ວັນອາທິດ, 31/5/2020
ຫວຽດນາມໄດ້ມີການປະກອບສ່ວນ ທີ່ເໝາະສົມຫຼາຍຢ່າງ ເຂົ້າໃນສັບປະດາຂັ້ນສຸດຍອດ ເວທີປາໄສການຮ່ວມມືເສດຖະກິດ ອາຊີ-ປາຊີຟິກ
6/1/2016 11:23' ສົ່ງ ພິມ
ທ່ານປະທານປະເທດ ເຈືອງເຕິນຊາງ ພ້ອມກັບບັນດາທ່ານຜູ້ນຳ ອາເປັກ (ພາບ: TTXVN)

ຂີດ​ໝາຍ​ການ​ຮ່ວມ​ມື ອາ​ເປັກ ກ້າວ​ເຂົ້າ​ສູ່​ໄລ­ຍະ​ໃໝ່ “ເພື່ອ​ການ​ພັດ­ທະ­ນາ​ແບບ​ຍືນ​ຍົງ”

ສັບ­ປະ­ດາ​ຂັ້ນສຸດ​ຍອດ​ປີ​ນີ້​ໄດ້​ຈັດ​ຂຶ້ນ​ໃນ​ສະ­ພາບ​ການ​ທີ່​ພູມິພາກ ແລະ ໃນ​ໂລກ​ມີ​ການ​ຜັນ​ປ່ຽນສຳ­ຄັນ​ຫຼາຍ​ຢ່າງ. ​ເຖິງວ່າ ​ສັນ­ຕິ­ພາບ ສະ​ຖຽມ​ລະ​ພາບ​ຢູ່​ຫຼາຍ​ແຫ່ງໃນ​ໂລກຕ້ອງ​ປະ​ເຊີນ​ໜ້າ​ກັບສິ່ງ​ທ້າ​ທາຍ, ເສດຖະກິດ​ໂລກ​ໄດ້​ຮັບ​ການ​ຟື້ນ​ຟູ​ຢ່າງ​ຊັກ​ຊ້າ ແລະ ຍັງ​ມີ​ຄວາມ​ສ່ຽງ​ຫຼາຍ​ຢ່າງກໍ​ຕາມ, ແຕ່​ອາດຈະ​ເວົ້າ​ໄດ້​ວ່າ ດ້ານ​ສະ­ດວກຍັງ​ເປັນ​ພື້ນ­ຖານຢູ່. ການ​ຮ່ວມ​ມື ເຊື່ອມ​ຕໍ່​ສາ­ກົນ​ໄດ້​ຮັບ​ການ​ພັດ­ທະ­ນາ​ຢ່າງ​ແຂງ­ແຮງ ດ້ວຍ​ຫຼາຍຫຼັກ​ໝາຍ​ໃໝ່ ​ເຊິ່ງ​ພົ້ນ​ເດັ່ນ​ແມ່ນ ​ລະບຽບວາ­ລະ​ການ​ປະ­ຊຸມ 2030 ກ່ຽວ​ກັບ​ການ​ພັັດ​ທະ​ນາ​ແບບ​ຍືນ​ຍົງ​ ທີ່ກອງ​ປະຊຸມ​ສຸດ​ຍອດຂອງອົງກາ​ນສະຫະ​ປະຊາ​ຊາດ​ໄດ້​ຮັບ­ຮອງ​ເອົາ​ເມື່ອ​ເດືອນ​ກັນຍາ 2015, ການ​ສ້າງ​ຕັ້ງ​ປະ­ຊາ​ຄົມອາ​ຊຽນ ​ເດືອນ​ທັນວາ 2015 ແລະ ຄວາມສຳ­ເລັດ​ໃນ​ການ​ເຈລະ­ຈາ​ສັນ­ຍາ​ຄູ່​ຮ່ວມ​ເສດຖະກິດຂ້າມ​ປາ​ຊີ​ຟິກ (TPP).

ໃນ​ສະ­ພາບ​ການດັ່ງກ່າວ, ສັບ­ປະ­ດາ​ຂັ້ນສຸດ​ຍອດ​ໄດ້​ສຸມ​ໃສ່​ປຶກ­ສາ​ສົນ­ທະ­ນາ​ບັນ­ດາ​ມາດ​ຕະ­ການ​ເພື່ອ​ຮັບ​ມື​ກັບ​ສິ່ງ​ທ້າ​ທາຍ​ຕ່າງໆ​ ແລະ ​ໄດ້​ບັນ­ລຸ​ຜົນ​ເລັດ​ອັນ​ພົ້ນ​ເດັ່ນ​ຈຳ­ນວນ​ໜຶ່ງ​​ດັ່ງ​ລຸ່ມ​ນີ້:

ທີ​ໜຶ່ງ, ລະບົບ​ເສດ­ຖະ­ກິດ​ຂອງ​ບັນດາ​ປະ​ເທດສະ­ມາ­ຊິກ​ໄດ້​ຮັບ​​ຮອງ​ເອົາຖະ­ແຫຼງ​ການຂັ້ນ​ສູງ 2 ສະບັບ, ຖະ­ແຫຼງການ​ຂັ້ນ​ລັດ​ຖະ​ມົນຕີ 1 ສະ­ບັບ ແລະ ເອ­ກະ­ສານ​ປະກອບ 6 ສະ­ບັບ ດ້ວຍ​ເປົ້າ​ໝາຍທີ່​ສອດຫ້ອຍ​ຕະຫຼອດ​ແມ່ນ​ການ​ພັດ­ທະ­ນາ​ແບບ​ຍືນ​ຍົງ, ປົກ​ຫຸ້ມ. ນີ້​ແມ່ນ​ບາດ­ກ້າວ​ຫັນ­ປ່ຽນ​ໃໝ່, ຍົກ​ລະ­ດັບ​ປະ​ສິດ­ທິ​ຜົນ​ຂອງ​ການ​ຮ່ວມ​ມື ເວ­ທີ​ປາ​ໄສ ອາ​ເປັກ, ເປີດ​ກວ້າງ​ໄປ­ສູ່​ບັນ­ດາ​ຂົງ­ເຂດ​ໃໝ່, ຕິດ​ກັບ​ເປົ້າ​ໝາຍ​ແຫ່ງ​ການ​ພັດ­ທະ­ນາ.

ເປັນ​ເທື່ອ​ທຳ​ອິດ ນັບ​ແຕ່​ເມື່​ອ​ຜັນ​ຂະ­ຫຍາຍ​ຍຸດ​ທະ​ສາດ​ການ​ເຕີບ​ໂຕ​ປີ 2010, ອາ​ເປັກ ໄດ້​ວາງຍຸດ​ທະ​ສາດ​ໄລ­ຍະ​ຍາວທີ່ເນັ້ນ “ຄຸນ​ນະ​ພາບ” ການເຕີບ​ໂຕ ​ໂດຍຕິດ​ກັບ​ການ​ກໍ່­ສ້າງ​ລະ­ບຽບ​ກົດ­ໝາຍ, ຕິດ​ພັນ​ສັງ­ຄົມ ແລະ ຮັກ­ສາ​ສິ່ງ­ແວ­ດລ້ອມ. ນີ້​ກໍ່​ແມ່ນ​ເທື່ອ​ທຳ​ອິດທີ່ ອາ​ເປັກ ຮັບ­ຮອງ​ເອົາ ຂອບ​ຮ່ວມ​ມື​ດ້ານ​ບໍລິການ, ເຊິ່ງ​ຖື​ເອົາ​ນີ້​ເປັນ​ປັດ­ໃຈທີ່​ສຳ­ຄັນ, ປະ­ກອບ­ສ່ວນ​​ຍົກ​ສູງ​ຄວາມ​ສາ­ມາດ​ແຂ່ງ­ຂັນ ແລະ ເພີ່ມ​ທະ­ວີ​ການ​ຕິດ​ພັນ​ລະ­ຫວ່າງ​ບັນ­ດາ​ພື້ນ­ຖານ​ເສດ​ຖ​ຖະ​ກິດ ອາ­ຊາ - ປາ​ຊີ​ຟິກ.

ບັນ­ດາ​​ປະ​ເທດສະ­ມາ­ຊິກ​ກໍ່​ຮັບ­ຮອງ​ເອົາ​ລະບຽບວາ­ລະ​ການ​ປະ­ຊຸມ​ ກ່ຽວ​ກັບ​ການ​ຊ່ວຍ­ເຫຼືອ​ບັນ­ດາ​ວິ​ສາ​ຫະ​ກິດ​ຂະໜາດກາງ ຂະໜາ​ດນ້ອຍ ແລະ ນ້ອຍ​ສຸດ ​ໃຫ້​ເຂົ້າ​ຮ່ວມ​ຕະ­ຫຼາດ​ສາ­ກົນ ແລະ ພູມິພາກ, ຕອບສະໜອງ​ຄວາມເອົາ­ໃຈ­ໃສ່​ຂອງ​ວິ​ສາ​ຫະ​ກິດ ອາ­ຊີ - ປາ​ຊີ​ຟິກ ຢ່າງ​ທັນ​ການ. ໃນ​ປັດ­ຈຸ​ບັນ, 97% ຈຳນວນວິ​ສາ​ຫະ​ກິດ ອາ­ຊີ - ປາ​ຊີ​ຟິກ ເປັນ​ວິ​ສາ​ຫະ​ກິດ​ຂະ­ໜາດກາງ ແລະ ນ້ອຍ, ທີ່​ໄດ້​ປະ­ກອບ­ສ່ວນ​ເປັນ​ຈຳ­ນວນ 60% ຈີ​ດີ​ພີ ຂອງພູມິ​ພາກ.

ທີສອງ, ບັນ­ດາ​ປະ​ເທດສະ­ມາ­ຊິກ​ໄດ້​ເຫັນ​ດີ​ເປັນ​ເອ­ກະ​ພາບ​ວ່າ ຈະ​ປັບ­ປຸງ​ການ​ເຊື່ອມ​ໂຍງເສດ­ຖະ­ກິດພູມິ​ພາກ ແລະ ຊຸກ­ຍູ້​ທ່າ​ອຽງ​​ເປີດ​ກວ້າງ​ການ​ຄ້າ​​ເສລີທົ່ວ​ໂລກ. ບັນ­ດາ​ການ​ນຳ ອາ​ເປັກ ໄດ້​ຮັບ­ຮອງ​ເອົາ​ຖະ­ແຫຼງ­ການ​ວ່າ​ດ້ວຍການ​ສະໜັບ​ສະ​ໜູນ​ລະ­ບົບ​ການ​ຄ້າ​ຫຼາຍ​ຝ່າຍ ແລະ ກອງ​ປະ­ຊຸມ​ລັດ­ຖະ­ມົນ­ຕີຂອງອົງ­ການ​ການ​ຄ້າ​ໂລກ ຄັ້ງ​ທີ 10, ​ຢືນ­ຢັນ​ຄຸນ­ຄ່າແລະຄວາມ​ສຳ­ຄັນ​ຂອງອົງ­ການ​ການ​ຄ້າ​ໂລກ, ພິ­ເສດ​ແມ່ນ ​ໃນ​ໂອ­ກາດ​ສະ­ເຫຼີມ­ສະ­ຫຼອງວັນ​ສ້າງ­ຕັ້ງ​ອົງ­ການ​ການ​ຄ້າ​ໂລກຄົບຮອບ 20 ປີ​. ບັນ­ດາ​ການ​ນຳ​ກໍ່​ໄດ້​ຢືນ­ຢັນ​ຄວາມ​ຕັດ­ສິນ​ໃຈ​ຊຸກ­ຍູ້ການ​ສ້າງ​ຕັ້ງ​ເຂດ​ການ​ຄ້າ​ເສລີ​ທົ່ວ​ອາ­ຊີ-ປາ​ຊີ​ຟິກ (FTAAP) ຢ່າງຮອບ­ດ້ານ ມີຄຸນ​ນະ​ພາບ​ສູງ ​ແລະ ຕອບ​ສະໜອງ​ບັນ­ດາ​ບັນຫາ​ການ​ຄ້າ - ການ​ລົງ­ທຶນຮຸ່ນ​ໃໝ່ ​ບົນ​ພື້ນ­ຖານ​ບັນ­ດາການຈັດ​ຕັ້ງ​ເຊື່ອມຕໍ່​ທີ່​ມີ​ຢູ່​ໃນ​ພູມິພາກ​.

ທີ​ສາມ, ອາ​ເປັກ ຈະ​ສ້າງ­ຕັ້ງ​ກົນ​ໄກ ແລະ ເປົ້າ​ໝາຍ​ໃໝ່​ຈຳ­ນວນ​ໜຶ່ງ ທີ່​ສ່ອງ​ແສງ​ເຖິງ​ການ​ຮ່ວມ​ມື​ນັບ​ມື້​ນັບ​ໄດ້​ເປີດ​ກວ້າງ ແລະ ມີ​ຜົນ​ຕົວ​ຈິງ. ນັ້ນ​ແມ່ນ ຈະປັບປຸງ​ສິ່ງ­ແວ­ດລ້ອມ​​​ແຫ່ງການ​ທຸລະ​ກິດໃຫ້​ດີ​ຂຶ້ນ 10% ໃນ​ປີ 2018; ສ້າງ​ຕັ້ງ​ຕະ­ຫຼາດ​ໃຫ້​ແກ່​​ວິ​ສາ​ຫະ​ກິດ​ຂະ­ໜາດ​ກາງ ຂະ­ໜາດ​ນ້ອນ ແລະ ​ນ້ອຍ​​ສຸດ ​ຂອງອາ​ເປັກ, ເຄືອ​ຂ່າຍ​ການ​ເງິນ​ເພື່ອ​ພັດ­ທະ­ນາ​ໂຄງ​ສ້າງພື້ນຖານ, ໜ່ວຍ​ງານສະ­ເພາະກິດພະ­ລັງ­ງານ​ໃຫ້​ເຂັ້ມ­ແຂງ​ດ້ວຍ​ຕົນ​ເອງ, ​ແລະ ກອງ​ທຶນ​ຊ່ວຍ­ເຫຼືອ​ການ​ຜັນ​ຂະ­ຫຍາຍ​ບັນ­ດາ​ໂຄງ­ການ, ຄວາມ​ຄິດ​ລິ​ເລີ່ມ​ຂອງ ອາ​ເປັກ.

ທີ​ສີ່, ກອງ​ປະ­ຊຸມ​ຂັ້ນ​ສູງ​ຄັ້ງ​ທີ 6 ສັນ­ຍາ​ຄູ່​ຮ່ວມ​ເສດຖະກິດຂ້າມ​ປາ​ຊີ​ຟິກ ກໍ່​ໄດ້​ຈັດ​ຂຶ້ນ​ໃນ​ໂອ­ກາດ​ນີ້ ​ເຊິ່ງໄດ້​ຢືນ­ຢັນ​ຄວາມ​ຕັດ­ສິນ​ໃຈ​ຂອງ 12 ປະ​ເທດ​ສະ­ມາ­ຊິກ ​ໃນ​ການ​ລົງ​ນາມ ​ແລະ ​ໃຫ້​ສັດຕະຍາບັນສັນຍາສະບັບ​ນີ້​ໂດຍ​ໄວ ​ເພື່ອ​ແນ­ໃສ່​ນຳ​ເອົາ​ຜົນ​ປະ­ໂຫຍດມາ​ໃຫ້​ວິ​ສາ​ຫະ​ກິດ ແລະ ປະ­ຊາ­ຊົນ​ໃນ​ພູມິພາກ.

ດ້ວຍ​​ຜົນ­ສຳ­ເລັດ​​ເຫຼົ່ານັ້ນ, ສັບ­ປະ­ດາ​ຂັ້ນ​ສຸດ​ຍອດຄັ້ງ​ນີ້​ໄດ້​ເປັນ​ຂີດ​ໝາຍການ​ຮ່ວມ​ມື ອາ​ເປັກ ກ້າວ​ເຂົ້າ​ສູ່​ໄລ­ຍະ​ໃໝ່ “ເພື່ອ​ການ​ພັດ­ທະ­ນາ​ແບບ​ຍືນ​ຍົງ”, ສ່ອງ​ແສງ​​ເຖິງ​ບົດ­ບາດ​ນຳ​ໜ້າຂອງ ອາ​ເປັກ ໃນ​ການ​ຜັນຂະຫຍາຍ ລະບຽບວາ­ລະ​ການ​ປະ­ຊຸມ 2030 ກ່ຽວ​ກັບ​ການ​ພັັດ​ທະ­ນະ​ແບບ​ຍືນ​ຍົງ.

ຫວຽດ­ນາມໄດ້​ເຂົ້າ​ຮ່ວມສັບປະດາ​ຂັ້ນ​ສຸດ​ຍອດ ອາ​ເປັກ ​ຢ່າງ​ຕັ້ງ­ໜ້າ ແລະ ມີ​ການ​ປະ­ກອບ­ສ່ວນທີ່​ເໝາະ​ສົມ​ຫຼາຍ​ຢ່າງ

ຄະ­ນະ​ຜູ້​ແທນ​ຂັ້ນ​ສູງ ສສ. ຫວຽດ­ນາມ ນຳ​ໂດຍ​ທ່ານ​ປະ­ທານ​ປະ­ເທດ ເຈືອງ​ເຕິນ​ຊາງ ໄດ້​ເຂົ້າ​ຮ່ວມ​ສັບ­ປະ­ດາ​ຂັ້ນ​ສຸດ​ຍອດ ອາ​ເປັກ ຄັ້ງ​ນີ້​ດ້ວຍ​ມະ­ໂນ­ຈິດ​ໃໝ່. ຫວຽດ­ນາມ​ເປັນ​ພື້ນ­ຖານ​ເສດ­ຖະ­ກິດ​ໜຶ່ງ​ທີ່​ໄດ້​ຮັກສາ​ຄວາມ​ເຕີບ​ໂຕ​ສູງ​ຢູ່​ໃນ​ພູມິ​ພາກ. ເປັນ​ຈຸດ​ໃຈ​ກາງ­ຂອງ​ການ​​ເຊື່ອມ​ຕໍ່ເສດ­ຖະ­ກິດ​ພູມິພາກ ແລະ ສາ­ກົນ ​ເຊິ່ງ​ຫາ​ກໍ່ໄດ້​ສຳ​ເລັດ​ສິ້ນ​ສຸດ​ການ​ເຈລະ­ຈາ​ກ່ຽວ​ກັບ​ສັນ­ຍາ​ການຄ້າ​ເສລີ​ຮຸ່ນໃໝ່ 4 ສະ­ບັບ ກັບ​ບັນ­ດາ​ຄູ່​ຮ່ວມ​​ຍຸດ​ທະ​ສາດ​ທີ່​ສຳ­ຄັນ​ໃນ​ປີ 2015; ​ແລະ​ພວມ​ພ້ອມ​ກັນ​ກັບ​ບັນ­ດາປະ​ເທດ​ສະ­ມາ­ຊິກ ອາ​ຊຽນ ​ສຳ­ເລັດ​ການສ້າງຕັ້ງ​ປະ­ຊາ​ຄົມ ອາ​ຊຽນ ທີ່​ມີ​ພົນ­ລະ­ເມືອງ​ເປັນ​ຈຳ­ນວນ 650 ລ້ານ​ຄົນ ​ແລະ ຈີ​ດີ​ພີ ເປັນ​ຈຳ­ນວນ 2.500 ຕື້ໂດ​ລາ​ສະ­ຫະ­ລັດ. ຄະ­ນະ​ຜູ້​ແທນ​ຂັ້ນ​ສູງ​ຂອງຫວຽດ­ນາມ​ໄດ້​ມີ​ການ​ເຂົ້າ​ຮ່ວມ​ຢ່າງ​ຕັ້ງໜ້າ ແລະ ມີ​ການ​ປະ­ກອບ­ສ່ວນທີ່​ເໝາະ​ສົມ​ຫຼາຍ​ຢ່າງ ເຂົ້າ​ໃນ​ຜົນ­ສຳ­ເລັດ​ຂອງ​ສັບ​ປະ​ດາ​ຂັ້ນສຸດ​ຍອດ​ປີ​ນີ້. ​ໃນ​ນັ້ນມີການ​ເຄື່ອນ​ໄຫ​ວທີ່​ພົ້ນ​ເດັ່ນຄື:

ທ່ານ​ປະ­ທານ​ປະ­ເທດ ເຈືອງ​ເຕິນ​ຊາງ ເປັນ​ແຂກ​ຖືກ​ເຊີນ​ພິ­ເສດ​ ທັງ​ເປັນ​ນັກ​ປາ­ທະ​ກະ­ຖາ​ຕົ້ນ­ຕໍ​ໃນ​ກອງ​ປະ­ຊຸມ​​ທີ່​ສຳ­ຄັນຕ່າງໆ, ພິ­ເສດ​ແມ່ນ​ກອງ​ປະ­ຊຸມ​ສຸດ​ຍອດ​ວິ​ສາ​ຫະ​ກິດ​ອາ​ເປັກ ແລະ ວາລະການ​ສົນ­ທະ­ນາ​ຄັ້ງ​ທຳ​ອິດ​ກ່ຽວ​ກັບ “ຊຸກ­ຍູ້​ການ​ຈະ­ເລີນ​ເຕີບ​ໂຕ​ກວມ​ລວມ​ໂດຍ​ຜ່ານ​ການ​ເຊື່ອມ​ຕໍ່​ເສດ­ຖະ­ກິດ”.

ທ່ານ​ປະ­ທານ​ປະ­ເທດ​ວຽດ­ນາມ​ຢືນ­ຢັນ​ຄວາມ​ຕັດ­ສິນ​ໃຈ​ສືບ­ຕໍ່​ປ່ຽນ­ແປງ​ໃໝ່, ປະ­ຕິ​ຮູບ​ຢ່າງ​ກວ້າງຂວາງ​ເລິກ­ເຊິ່ງ, ຜັນ​ຂະ­ຫຍາຍບັນ­ດາ​ເປົ້າ­ໝາຍ​ການພັດ­ທະ­ນາ​ແບບ​ຍືນ​ຍົງ​ ຂອງອົງການ​ສະ­ຫະ​ປະ­ຊາ​ຊາດ; ພ້ອມ​ກັນ​ນັ້ນ ກໍ່​ໄດ້ມີ​ຂໍ້ສະ­ເໜີ​ແນະ​ຕ່າງໆ​ ທີ່​ແທດ­ເໝາະກັບ​ຄວາມ​ເປັນ​ຈິງ​ ແນ­ໃສ່​ປະ­ກອບ­ສ່ວນ​ຮັກ­ສາ​ສະ­ພາບ​ແວດລ້ອມ​ແຫ່ງ​ສັນ­ຕິ­ພາບ ສະ­ຖຽນ​ລະ​ພາບ​ເພື່ອ​ການພັດ­ທະ­ນາຢູ່ພູມິ​ພາກ​ ເຊິ່ງ​ໄດ້​ຮັບ​ການ​ຕີ​ລາຄາ​ສູງ​ຈາກ​ບັນດາ​ສະ­ມາ­ຊິກ; ທ່ານ​ໄດ້​ເນັ້ນ​ວ່າ ອາ​ເປັກ​ຕ້ອງ​​ໃຫ້​ບຸ­ລິ­ມະ­ສິດການ​ພັດ­ທະ­ນາ​ແບບ​ຍືນ​ຍົງ, ລົບ​ລ້າງຄວາມ​ອຶດ​ຫີວທຸກ​ຍາກ, ຫລຸດ­ຜ່ອນຄວາມ​ແຕກ​ໂຕນ​ກັນລະ­ຫວ່າງ​ບັນ­ດາ​ປະ­ເທດ, ຮັບປະກັນຄວາມ​ໝັ້ນຄົງ​ດ້ານ​ສະ­ບຽງ​ອາ­ຫານ, ຄຸ້ມ​ຄອງ​ແຫຼ່ງ​ນ້ຳ, ພັດ­ທະ­ນາ​ກະ­ສິ­ກຳ, ກຽມ­ຄວາມພ້ອມ​ຮັບ​ມື​ກັບ​ໄພ​ທຳ​ມະ​ຊາດ,... ນີ້​ແມ່ນ​ບັນ­ດາ​ໜ້າ­ທີ່​ໃຈ­ກາງ​ໃນ​ການ​ຜັນ​ຂະ­ຫຍາຍ​ແຜນຍຸດ​ທະ​ສາດ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງຫວຽດ­ນາມ ໃນ​ໄລຍະ 2010-2020.

​ໃນ​ໂອ­ກາດ​ນີ້ ການ​ນຳ​ຂັ້ນ​ສູງຫວຽດ­ນາມ​ຍັງມີ​ການ​ພົບ​ປະ​ຢ່າງ​ກວ້າງ­ຂວາງ ​ກັບ​ບັນດາທ່ານ​ຜູ້­ນຳ​ຂອງ​ປະ​ເທດ​ສະ​ມາ​ຊິດ​ຕ່າງໆ ເພື່ອ​ແລກ­ປ່ຽນ​ຢ່າງ​ກວ້າງ­ຂວາງ​ເລິກ­ເຊິ່ງກ່ຽວ​ກັບມາດ​ຕະ­ການຕ່າງໆ ແນ­ໃສ່​ຊຸກ­ຍູ້​ການ​ພົວ­ພັນ​ສອງ​ຝ່າຍ ແລະ ການປະ­ສານ​ສົມ­ທົບ​ໃນ​ເວ­ທີ​ປາ​ໄສ​ຫຼາຍ​ຝ່າຍ​ ໃນ​ນັ້ນ​ມີ​ປະ­ເທດ​ເຈົ້າ­ພາບຟີ​ລິບ​ປິນ, ລັດ­ເຊຍ, ກາ​ນາ​ດາ, ມາ​ເລ​ເຊຍ, ເປ​ຣູ, ປາ​ປົວນິວ​ກີເນ​,...

ພິ­ເສດ, ທ່ານ​ປະ­ທານ​ປະ­ເທດ ເຈືອງ​ເຕິນ​ຊາງ ແລະ ທ່ານ​ປະ­ທາ­ນາ­ທິ­ບໍ­ດີຟີ​ລິບ​ປິນ​ ໄດ້​ມີ​ການ​ພົບ​ປະ​ຫາ­ລື ແລະ ເປັນ​ສັກ­ຂີ​ພິ­ຍານ​​ພິ­ທີ​ລົງ​ນາມ​​ໃນ​ຖະ­ແຫຼງການ​ວ່າ​ດ້ວຍການ​ສ້າງ­ຕັ້ງສາຍ​ພົວ­ພັນ​ຄູ່​ຮ່ວມ​ຍຸດ​ທະ​ສາດ ລະ­ຫວ່າງຫວຽດ­ນາມ ແລະ ຟີ​ລິບ​ປິນ, ຍົກລະ­ດັບການ​ພົວ­ພັນ​ຮ່ວມ​ມື ແລະ ຄວາມ​ໄວ້​ວາງ­ໃຈ​ດ້ານ​ການ­ເມືອງ ລະ­ຫວ່າງ​ສອງ​ປະ­ເທດ. ຄະ­ນະ​ຜູ້​ແທນ​ຂັ້ນ​ສູງ​ຂອງຫວຽດ­ນາມ ໄດ້​ຕັ້ງ­ໜ້າ​ແລກ​ປ່ຽນ​ກັບ​ບັນ­ດາຄະນະ​ຜູ້​ແທນ​ປະ​ເທດ​ທີ່​ເປັນເຈົ້າພາບ ອາ​ເປັກ ໄລ­ຍະ 2015 – 2022, ພິ­ເສດ​ແມ່ນ ປະ­ເທດ ເປ​ຣູ ແລະ ປາ​ປົວນິວກີເນ​ ທີ່ຈະເປັນ​ປະ­ເທດ​ເຈົ້າ­ພາບ ອາ​ເປັກ ໃນ​ປີ 2016  ແລະ 2018, ເພື່ອ​ເພີ່ມ​ທະ­ວີ​ການ​ຮ່ວມ​ມື ຮັບ­ປະ­ກັນ​ໃຫ້​ແກ່​ບັນ­ດາ​ກອງ​ປະຊຸມ​ທີ່​ຈະຈັດ​ຂຶ້ນ​ໃນ​ຕໍ່ໜ້າ, ພິ­ເສດ​ແມ່ນ ປີ ອາ​ເປັກ ຫວຽດ­ນາມ 2017 ​ໃຫ້ໄດ້​ຮັບ​ຜົນເປັນ​ຢ່າງ​ດີ.

ທ່ານປະ­ທານ​ປະ­ເທດ ເຈືອງ​ເຕິນ​ຊາງ ​ກໍ່​ໄດ້ຍາດ​ເວ­ລາ​ເພື່ອ​ພົບ​ປະ​ກັບບັນ­ດາ​ກຸ່ມ​ບໍ­ລິ­ສັດເສດ­ຖະ­ກິດ​ທີ່​ນຳໜ້າ​ໃນ​ພູມິ​ພາກແລະໃນໂລກ ​ເຊິ່ງ​ເປັນ​ການ​ສົ່ງຂ່າວ​ສະ​ແດງ​ໃຫ້​ເຫັນ​ຢ່າງ​ຈະ​ແຈ້ງ​ວ່າ ຫວຽດ­ນາມ​ເປັນ​ປະເທດທີ່​ສືບ­ຕໍ່​ປ່ຽນ­ແປງ​ໃໝ່, ເຊື່ອມ​ໂຍງສາ­ກົນຢ່າງ​ກວ້າງ­ຂວາງ​ເລິກ­ເຊິ່ງ ດ້ວຍ​ການສຳ​ເລັດສິ້ນສຸດການ​ເຈລະ­ຈາສັນຍາ​ການ​ຄ້າ​ເສລີ​ຫຼາຍ​ສະບັບ, ພິ­ເສດ​ແມ່ນ ສັນ­ຍາ​ຄູ່​ຮ່ວມ​ເສດຖະກິດຂ້າມ​ປາ​ຊີ​ຟິກ ທີ່​ມີ​ການ​ເຂົ້າ​ຮ່ວມ​ຂອງ 12 ປະ​ເທດໃນ​ຈຳນວນ 21 ປະ​ເທດ​ສະ­ມາ­ຊິກ ​ອາ​ເປັກ.

ບັນ­ດາ​ວິ​ສາ​ຫະ​ກິດລ້ວນ​ແຕ່​ມີ​ຄວາມ​ຫວັງດີ​ແລະໄວ້​ວາງ​ໃຈ​ຕໍ່​ການ​ຕັດ­ສິນ​ໃຈ​ຂອງຫວຽດນາມ ທີ່ຈະ​ສືບ​ຕໍ່​ປະ­ຕິ​ຮູບ, ປັບປຸງ​ບູ­ລະ­ນະ​ລະ­ບຽບ​ກົດ­ໝາຍ, ນິ­ຕິ​ກຳ, ຊຸກ­ຍູ້​ສິ່ງ­ແວ­ດລ້ອມ​ແຫ່ງ​ການ​ທຸ​ລະ​ກິດ ໃຫ້​ມີ​ຄວາມ​ຍຸ­ຕິ​ທຳ ໂປ່ງ​ໃສ ແລະ ທະລຸ​ລົ່ງ​ກວ່າ​ອີກ; ໄດ້​ສະ­ແດງ​ຄວາມ​ເອົາ­ໃຈ­ໃສ່, ຢາກ​ໄດ້​ເປີດ​ກວ້າງ​ການ​ຮ່ວມ​ມື, ລົງ­ທຶນ​ກັບ ຫວຽດ­ນາມ.

ອາດຈະ​ເວົ້າ​ໄດ້​ວ່າ ຜົນ­ສຳ­ເລັດ​ຂອງ​ສັບ­ປະ­ດາ​ຂັ້ນສຸດ​ຍອດ ​ອາ​ເປັກ ປີ​ນີ້​ມີ​ຄວາມ​ໝາຍ​ສຳ­ຄັນຫຼາຍ, ສ້າງ​ກາ­ລະ​ໂອ­ກາດ​ໃໝ່ທີ່​ສະດວກ​ດີ​ໃຫ້​ແກ່​ການເຕີບ​ໂຕ ແລະ ຄວາມ​ຈະ​ເລີ​ນພັດ­ທະ­ນາ​ຢູ່​ອາ­ຊີ-ປາ​ຊີ​ຟິກ, ພ້ອມ​ກັນ​ນັ້ນ​ກໍ່­ສ້າງ​ພື້ນ­ຖານ​ທີ່​ດີ​ ໃຫ້​ຫວຽດ­ນາມປະ­ກອບ­ສ່ວນເຂົ້າ​ໃນ​ຂະ​ບວນ​ວິ­ວັດ​ແຫ່ງ​ການ​ພັດ­ທະ­ນາຂອງ ​ອາ​ເປັກ ໃນ​ຖາ­ນະ​ເປັນ​ປະ­ເທດ​ເຈົ້າ­ພາບ​ຂອງ​ອາ​ເປັກ​ປີ 2017 ຢ່າງ​ມີ​ປະ​ສິດ­ທິ​ຜົນ. ເພື່ອ​ຮັບ­ປະ­ກັນ​ເປົ້າ​ໝາຍ​ອັນ​ສຳ­ຄັນ​ນີ້, ການ​ກະ­ກຽມ​ພາຍ​ໃນ​ປະ­ເທດ, ພິ­ເສດ​ແມ່ນ​ການ​ເຂົ້າ​ຮ່ວມ​ຢ່າງ​ເປັນ​ເຈົ້າ​ການ ແລະ ຕັ້ງ­ໜ້າ​ຂອງ​ວິ​ສາ​ຫະ​ກິດ ມີ​ຄວາມ​ໝາຍ​ຕັດສິນ.

​ສັງລວມ​ໂດຍ ບນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ