ວັນອາທິດ, 31/5/2020
ຂະຫຍາຍສາຍພົວພັນຄູ່ຮ່ວມຍຸດທະສາດ ຫວຽດນາມ - ເຢຍລະມັນ ໃຫ້ເຂົ້າສູ່ລວງເລິກ ແລະ ມີຜົນຕົວຈິງ
7/1/2016 18:17' ສົ່ງ ພິມ
ພວກນ້ອງເຍົາວະຊົນເຢຍລະມັນ ແລະ ຫວຽດນາມ ຄຳນັບຮັບຕ້ອນທ່ານປະທານປະເທດ ເຈືອງເຕິນຊາງ ແລະ ທ່ານປະທານາທິບໍດີເຢຍລະມັນ ໂຈອາຊີມ ເຄົາ. (ພາບ: TTXVN)

ບັນດາ​ການ​ນຳເຢຍລະ​ມັນ ສະ​ແດງ​ຄວາມ​ນັບຖື ​ແລະ ຕີ​ລາຄາ​ສູງ​ຕໍ່ການ​ຢ້ຽມຢາມ ​ເປັນ​ຫຼັກ​ໝາຍ​ປະຫວັດສາດ, ​ເປີດ​ໄລຍະ​ການ​ຮ່ວມ​ມື​ໃໝ່ທີ່​ເຕັມ​ໄປ​ດ້ວຍ​ແງ່​ຫວັງ​ດີ​ຕໍ່​ການ​ພົວພັນ​ລະຫວ່າງ​ສອງ​ປະ​ເທດ. ການ​ນຳເຢຍລະ​ມັນ ​ໄດ້​ຕ້ອນຮັບ​ປະທານ​ປະ​ເທດ​ຫວຽດນາມ​ຢ່າງ​ສົມ​ກຽດ ດ້ວຍ​ພິທີການ​ຕ້ອນຮັບ​ສູງ​ສຸດ​ສຳລັບ​ການ​ຢ້ຽມຢາມ​ຂັ້ນ​ລັດ.

​ໃນ​ການ​ພົບ​ປະ​ຫາລື, ສອງ​ຝ່າຍ​ໄດ້​ກຳນົດ​ທິດ​ທາງ ​ແລະ ມາດ​ຕະການ​ອັນ​ລະອຽດ​ເພື່ອ​ຍູ້​ແຮງ​ການ​ພົວພັນ​ຄູ່​ຮ່ວມ​ຍຸດ​ທະ​ສາດຫວຽດນາມ-ເຢຍລະ​ມັນ ​ໃນ​ເວລາ​ຕໍ່ໜ້າ, ​ເປັນ​ຕົ້ນ​ແມ່ນ​ການ​ຮ່ວມ​ມື​ດ້ານການ​ຄ້າ-ການ​ລົງທຶນ, ວິທະຍາສາດ-ເຕັກ​ໂນໂລ​ຊີ ​ແລະ ສຶກສາ-ກໍ່ສ້າງ. ​ໂອກາດ​ຮ່ວມ​ມື​ລະຫວ່າງ​ວິ​ສາ​ຫະກິດ​ຂອງ​ສອງ​ປະ​ເທດກໍ່​ໄດ້​ປະກົດ​ຂຶ້ນ​ທີ່​ເວທີ​ປາ​ໄສ​ວິ​ສາ​ຫະກິດຫວຽດນາມ-​ເຢຍລະ​ມັນ ຢູ່​ທີ່​ນະຄອນ​ຟຣານຟວກ, ປະກອບສ່ວນ​ສ້າງ​ກຳລັງ​ຊຸກ​ດັນ​ໃໝ່, ​ເປີດ​ກວ້າງ​ຊ່ອງ​ທາງ​ແລກປ່ຽນ​ການ​ຄ້າ​ລະຫວ່າງ​ສອງ​ປະ​ເທດ. ການຢ້ຽມຢາມ​ໄດ້​ປັບປຸງ​ຄວາມ​ໄວ້​ວາງ​ໃຈ​ການ​ເມືອງ​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ປະ​ເທດ.

ການ​ພົບ​ປະ​ຕ່າງໆ​ຂອງ​ທ່ານ​ປະທານ​ປະ​ເທດ​ໄດ້​ດຳ​ເນີນ​ໄປ​ໃນ​ບັນຍາກາດ​ເປີດ​ອົດ​ເປີດ​ໃຈ ​ແລະ ​ເຊື່ອ​ຖື​ກັນ, ສະ​ແດງ​ໃຫ້​ເຫັນ​ຫຼາຍ​ຈຸດຄ້າຍຄື​ກັນ ​ແລະ ​ຄວາມເຫັນ​ດີ​ເປັນ​ເອກະ​ພາບສູງ ກ່ຽວ​ກັບ​ການ​ເພີ່ມ​ທະວີ​ການ​ພົວພັນ​ສອງ​ຝ່າຍ ກໍ່​ຄື​ຊຸກຍູ້​ການ​ຮ່ວມ​ມື​ໃນ​ບັນດາ​ບັນຫາ​ພາກ​ພື້ນ ​ແລະ ສາກົນທີ່​ສອງ​ຝ່າຍ​ມີ​ຄວາມ​ສົນ​ໃຈ. ພ້ອມ​ກັນ​ນັ້ນ, ການ​ຢ້ຽມຢາມ​ກໍ່​​​ເປັນ​ການ​ກະທົບ​ຢ່າງແຮງ ​ເພື່ອ​ຊຸກຍູ້​ການ​ພົວພັນ​ການ​ຄ້າ-ການ​ລົງທຶນ, ​ເສົາ​ຄ້ຳ​ອັນ​ໜຶ່ງ​ຂອງ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ.

​ເນື່ອງ​ໃນ​ໂອກາດ​ນີ້, ສອງ​ຝ່າຍ​ໄດ້​ເປີດ​ກວ້າງ​ການ​ຮ່ວມ​ມື​ໃນ​ບັນດາ​ຂົງ​ເຂດ​ທີ່​ສຳຄັນ​ຄື ສຶກສາ-ກໍ່ສ້າງ, ວິທະຍາສາດ-​ເຕັກ​ໂນ​ໂລ​ຊີ ​ແລະ ​ແຮງ​ງານ. ການ​ນຳ​ຂອງ​ສອງ​ປະ​ເທດ​ໄດ້​ເປັນ​ເອກະສັນ​ກັນ ສືບ​ຕໍ່​ຄວາມ​ພະຍາຍາມ​ສ້າງ​ມະຫາວິທະຍາ​ໄລຫວຽດນາມ-ເຢຍລະ​ມັນ ​ໃຫ້​ກາຍ​ເປັນ​ພື້ນຖານສຶກສາ​ອົບຮົມ ​ແລະ ຄົ້ນຄວ້າ​ແຖວ​ໜ້າ​ຂອງ​ຫວຽດນາມ ​ແລະ ບັນລຸ​ລະດັບ​ສາກົນ; ອຳນວຍ​ຄວາມ​ສະດວກ​ໃຫ້​ແກ່​ບັນດາ​ໂຄງການ​ສອນ​ພາສາເຢຍລະ​ມັນ ​ແລະ ພາສາຫວຽດນາມ ຢູ່​ສອງ​ປະ​ເທດ ​ແລະ ​ເພີ່ມ​ທະວີ​ການ​ຮ່ວມ​ມື​ໃນຂົງ​ເຂດຝຶກ​ອົບຮົມ​ອາຊີບ, ​ໃນ​ນັ້ນ​ມີ​ການ​ຄົ້ນຄວ້າ​ກໍ່ສ້າງ​ສູນ​ຝຶກ​ອົບຮົມ​​ອາຊີບຄຸນ​ນະພາ​ບສູງ​ຈຳນວນ​ໜຶ່ງ ຕາມ​ຕົວ​ແບບ​ຝຶກ​ອົບຮົມ​ອາຊີ​ນ “ຄວບຄູ່​ກັນ” ຂອງເຢຍລະ​ມັນ. ດ້ວຍ​ກຳລັງ​ແຮງ​ງານ​ເປັນ​ຈຳນວນ​ຫຼວງ​ຫຼານ, ໜຸ່ມ ​ແລະ ຂະຫຍັນ​ຂັນ​ເຄື່ອນ, ຫວຽດນາມ​ອາດ​ຈະ​ຊ່ວຍ​ໜູນ​ໃຫ້​ແກ່​ຫຼາຍ​ຂະ​ແໜງ​ການ​ທີ່​ຕ້ອງການ​ກຳລັງ​ແຮງ​ງານ​ຢູ່ເຢຍລະ​ມັນ, ​ແລະ​ຝ່າຍ​ຫວຽດນາມກໍ່​ໄດ້​ສະ​ເໜີ​ນຳ​ຝ່າຍເຢຍລະ​ມັນ​ໃຫ້​​ເອົາ​ໃຈ​ໃສ່​ເຖິງ​ການ​ເປີດກວ້າງການ​ຮ່ວມ​ມມືດ້ານ​ແຮງ​ງານ​ໃນ​ເວລາ​ຕໍ່ໜ້າ.

ການຢ້ຽມຢາມ​ຂອງທ່ານ​ປະທານ​ປະ​ເທດ ​ເຈືອງ​ເຕິນຊາງ ​ໃນ​ຄັ້ງ​ນີ້​ກໍ່ສະ​ແດງ​ໃຫ້​ເຫັນ​ເຖິງ​ຄວາມ​ປັນ​ເຈົ້າ​ການ ຕັ້ງໜ້າ ​ແລະ ຄວາມ​ຮັບຜິດຊອບ​ຂອງຫວຽດນາມຕໍ່​ວົງ​ຄະນາ​ຍາດສາກົນ. ວົງ​ການ​ການ​ເມືອງ ​ແລະ ນັກຮຽນ​ຮູ້ເຢຍລະ​ມັນ ​ໄດ້​ຕີ​ລາຄາ​ສູງ​ການ​ແລກປ່ຽນ​ກັບທ່ານ​ປະທານ​ປະ​ເທດ ​ເຈືອງ​ເຕິນຊາງ ຢູ່​ສະ​ຖາ​ບັນວິທະຍາສາດ ​ໂຄ​ເອ​ເບີ, ​ໃນ​ນັ້ນ ທ່ານ​ປະທານ​ປະ​ເທດ​ໄດ້​ແບ່ງ​ປັນ​ຄວາມ​ເຫັນ​ຕີ​ລາຄາ, ສັງ​ເກດ​ການ​ກ່ຽວ​ກັບ​ການ​ເຄື່ອນ​ເໜັງ​ຂອງ​ສະພາບ​ການ​ໂລກ ​ແລະ ພາກ​ພື້ນ, ບົດບາດ​ຂອງ​ອາ​ຊຽນ​ໃນ​ໂຄງ​ປະກອບ​ພາກ​ພື້ນ​ທີ່​ພວມ​ເປັນ​ຮູບ​ເປັນ​ຮ່າງ​ຂຶ້ນ​ໃນ​ປັດຈຸບັນ ​ແລະ ຄວາມ​ປະສົງ​ຂອງ​ຫວຽດນາມກ່ຽວກັບ​ພູມິ​ພາກ​ອາຊີ-ປາຊີ​ຟິກ ສັນຕິພາບ ສະຖຽນ​ລະ​ພາບ ​ຮ່ວມ​ມື ​ແລະ ພັດທະນາ. ທ່ານ​ປະທານ​ປະ​ເທດ​ຢັ້ງຢືນວ່າ ​ການ​ຮັກສາ​ສັນ​ຕິ​ພາບ ສະຖຽນ​ລະ​ພາບ ຄວາມ​ສະຫງົບ ຄວາມ​ປອດ​ໄພ​ໃນ​ການ​ເດີນ​​ເຮືອ​ຢູ່ທະ​ເລຕາ​ເວັນ​ອອກ ​ແມ່ນ​ຄວາມ​ສົນ​ໃຈ ​ແລະ ຜົນ​ປະ​ໂຫຍ​ດລວມຂອງ​ບັນດາ​ປະ​ເທດ​ຢູ່​ໃນ ​ແລະ ນອກ​ພາກ​ພື້ນ; ບັນດາ​ປະ​ເທດ​ຕ້ອງມີ​ຄວາມ​ມານະ​ພະຍາຍາມ ​ແລະ ສະ​ແດງ​ໃຫ້​ເຫັນ​ເຖິງ​ຄວາມ​ຮັບຜິດຊອບ​ໃນ​ການ​ປະຕິບັດ​ເປົ້າ​ໝາຍ​ລວມນີ້.

ຈຸດ​ເນັ້ນ​ໜຶ່ງ​ທີ່​ມີ​ຄວາມ​ໝາຍ​ສຳຄັນ​ຂອງ​ການ​ຢ້ຽມຢາມ ​ແມ່ນ​ບັນດາ​ການ​ພົບ​ປະ​ທີ່​ສະໜິດສະໜົມ ​ແລະ ອົບ​ອຸ່ນ​ທີ່​ສຸດ​ ລະຫວ່າງທ່ານ​ປະທານ​ປະ​ເທດ ​ເຈືອງ​ເຕິນຊາງ ກັບ​ເພື່ອນ​ມິດເຢຍລະ​ມັນ ​ແລະ ວົງ​ຄະນາ​ຍາດ​ຊາວ​ຫວຽດນາມຢູ່ເຢຍລະ​ມັນ, ສະ​ແດງ​ໃຫ້​ເຫັນ​ເຖິງ​ແຜນ​ນະ​ໂຍບາຍ ນະ​ໂຍບາຍ​ມະ​ຫາ​ສາມັກຄີ​ປວງຊົນທັງ​ຊາດ ​ແລະ ສະ​ແດງ​ຄວາມ​ຮູ້ບຸນ​ຄຸນຂອງຫວຽດນາມຕໍ່​ເພື່ອນ​ມິດເຢຍລະ​ມັນ ​ເຊິ່ງ​ເປັນ​ຜູ້​ທີ່​ໄດ້​ໃຫ້​ຄວາມ​ຮັກ​​ແພງ ​ໄມຕີ​ຈິດ​ມິດຕະພາບ ​ແລະ ສະໜັບສະໜູນ ຊ່ວ​ເຫຼືອຫວຽດນາມ​ໃນ​ການ​ສົງຄາມ​ຍາດ​ເອົາ​ເອກະລາດ​​ແຫ່ງ​ຊາດ​ກ່ອນ​ໜ້າ​ນີ້ ກໍ່​ຄື​ໃນ​ການ​ສ້າງສາ​ພັດທະນາ​ເສດຖະກິດ-ສັງຄົມ ​ໃນ​ປັດຈຸບັນ.

ຄວາມ​ພົວພັນ​ອັນ​ຍາວ​ນາມ, ຈົບງາມ​ລະຫວ່າງຫວຽດນາມ ​ແລະ ເຢຍລະ​ມັນ ​ເຄີຍ​ໄດ້​ກໍ່ສ້າງ​ຂຶ້ນ​ບົນ​ພື້ນຖານ​ແຫ່ງ​ຄວາມຕິດ​ພັນ ​ແລະ ຄວາມ​ເຂົ້າ​ໃຈ​ຢ່າງ​ເລິກ​ເຊິ່ງກ່ຽວ​ກັບ​ວັດທະນະທຳ​ລະຫວ່າງ​ປະຊາຊົນ​ສອງ​ປະ​ເທດ. ວົງ​ຄະນາ​ຍາດ​ຊາວຫວຽດນາມທີ່​ພວມ​ດຳລົງ​ຊີວິດ​ຢູ່ເຢຍລະ​ມັນ ກໍ່​ພວມ​ຂະຫຍາຍຕົວ​ຢ່າງ​ຂະຫຍັນ​ຂັນ​ເຄື່ອນ​ທີ່​ສຸດ, ຄ່ອງ​ຕົວ​ເຂົ້າ​ກັບ​ສັງຄົມ ​ແລະ ມີ​ການ​​ເຄື່ອ​ນໄຫວປະກອບສ່ວນ​ໃຫ້​ແກ່​ການ​ພັດທະນາ​ຂອງປະ​ເທດ​ເຢຍລະ​ມັນ ກໍ່​ຄື​ຫັນ​ສູ່​ບ້ານ​ເກີດ​ເມືອງ​ນອນ, ຮັກສາ​ເອກະລັກ ​ແລະ ວັດທະນະທຳ​ຂອງ​ຊາດຫວຽດນາມ. ນີ້​ແມ່ນ​ຊັບ​ສົມບັດ​ລວມທີ່​ປະ​ເສີດ​ເລີດ​ລ້ຳ​​ແຫ່ງ​ວັດທະນະທຳ​ຂອງສອງ​ປະ​ເທດ ​ແລະ ​ເປັນ​ຂົວ​ຕໍ່​ຜູກ​ພັນ, ອຳນວຍ​ຄວາມ​ສະດວກ​ໃຫ້​ແກ່​ການ​ຊຸກຍູ້​ຄວາມ​ພົວພັນ​ໃນ​ທຸກໆຂົງ​ເຂດ.

​ໃນ​ກອບ​ການຢ້ຽມຢາມ​ຄັ້ງ​ນີ້, ຜູ້​ຕາງ​ໜ້າບັນດາ​ກະຊວງ ຂະ​ແໜງ​ການ ​ແລະ ວິ​ສາຫະ​ກິດຂອງ​ສອງ​ປະ​ເທດ​ໄດ້​ເຊັນ​ຂໍ້​ຕົກລົງ​ການ​ຮ່ວມ​ມື 6 ສະບັບ: ສັນຍາ​ວ່າ​ດ້ວຍ​ການ​ອະນຸຍາດ​ໃຫ້​ຄອບຄົວ​ພະນັກງານ​ອົງການ​ພາລະກິດ​ທາງ​ການ​ທູດ ​ໄດ້​ເຮັດ​ວຽກ​ມີ​ລາຍ​ໄດ້; ສັນຍາ​ຂັ້ນ​ລັດຖະບານ​ວ່າ​ດ້ວຍ​ການ​ຮ່ວມ​ມື​ດ້ານ​ວິທະຍາສາດ ​ແລະ ​ເຕັກ​ໂນ​ໂລຊີ; ອະນຸ​ສັນຍາ​ວ່າ​ດ້ວຍ​ການ​ປັບປຸງ ​ແລະ ​ເພີ່ມ​ເຕີມ​ສັນຍາຂົນ​ສົ່ງ​ທາງ​ອາກາດ​ປີ 1994; ບົດ​ບັນທຶກ​ຊ່ວຍ​ຈຳ​ລວມກ່ຽວ​ກັບ​ການ​ຮ່ວມ​ມື​ໃນ​ຂົງ​ເຂດ​ການ​ປ່າ​ໄມ້; ບົດ​ບັນທຶກ​ຊ່ວຍ​ຈຳ​ລະຫວ່າງ​ກະຊວງ​ກະສິກຳ​ການ​ຄ້າ​ຫວຽດນາມ, ຫ້ອງ​ການ​ການ​ຄ້າ​ແລະ​ອຸດສາຫະກຳຫວຽດນາມ ​ແລະ ສະມາຄົມ​ວິ​ສາ​ຫະກິດເຢຍລະ​ມັນ, ສຳນັກງານ​ຜູ້​ແທນ​ຫ້ອງການ​ການ​ຄ້າ​ອຸດສາຫະກຳເຢຍລະ​ມັນ ປະຈຳ​ຢູ່ຫວຽດນາມ ກ່ຽວ​ກັບ​ການ​ປຶກສາ​ຫາລື​ເປັນ​ປົກກະຕິ; ສັນຍາ​ບໍລິການ​ເຕັກນິກ​ລະຫວ່າງ ຫວຽດ​ເຈັດ ກັບ​ກຸ່ມ​ບໍລິສັດ ລຸບທານ​ຊາ ກ່ຽວ​ກັບ​ເຄື່ອງ​ຍົນ​ເຮືອບິນ A320.

ການ​ຢ້ຽມຢາມ​ຂັ້ນ​ລັດ​ທີ່​ປະ​ເທດ​ເຢຍລະ​ມັນ​ຂອງທ່ານ​ປະທານ​ປະ​ເທດ ​ເຈືອງ​ເຕິນຊາງ ​ແລະ ຄະນະ​ຜູ້​ແທນ​ຂັ້ນ​ສູງ​ແຫ່ງ​ລັດຫວຽດນາມ ໄດ້ສ້າງ​ໃຫ້​ມີ​ບາດກ້າວ​ຫັນປ່ຽນ​ໃໝ່ ​ແລະ ນຳ​ເອົາສາຍ​ພົວພັນ​ຄູ່​ຮ່ວມ​ຍຸດ​ທະ​ສາດຫວຽດນາມ-​ເຢຍລະ​ມັນ ​ໃຫ້​ນັບ​ນັບເຂົ້າ​ສູ່​ລວງ​ເລິກ ​ແລະ ມີ​ຜົນ​ຕົວ​ຈິງ./.

​ໂດຍ ທູ​ຍລີງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ