ວັນອັງຄານ, 22/10/2019
ບັນດາໜ້າທີ່ຈຸດໜັກໃຈກາງ ຂອງວຽກງານຂົນຂວາຍປະຊາຊົນ ໃນໄລຍະເວລາປະຈຳການ ຂອງຄະນະບໍລິຫານງານສູນກາງ ພັກກອມມູນິດຫວຽດນາມ ຊຸດທີ XII*
31/5/2016 18:8' ສົ່ງ ພິມ
ສະຫາຍ ນາງ ເຈືອງທິມາຍ ກຳມະການກົມການເມືອງ, ເລຂາທິການສູມກາງພັກ, ຫົວໜ້າຄະນະຂົນຂວາຍປະຊາຊົນສູນກາງ

1. ໃນ​ຊຸມ​ປີ​ທີ່​ຜ່ານ​ມາ, ພາຍ​ໃຕ້​ການ​ນຳ­ພາ​ຂອງ​ພັກ, ຄວາມ​ພະ­ຍາ­ຍາມ​ສູ້​ຊົນ​ຂອງ​ລະ­ບົບ​ການເມືອງ​ທັງ​ໝົດ, ຂອງທົ່ວ​ປວງ​ຊົນ ທົ່ວ​ກອງ­ທັບ, ຫວຽດ­ນາມ​ໄດ້​ບັນ­ລຸ​ຜົນ­ສຳ­ເລັດ​ອັນ​ສຳ­ຄັນ​ຫຼາຍ​ຢ່າງ. ປະ­ເທດ​ກຳ­ລັງ​ຢືນ​ຕໍ່­ໜ້າ​ກາ­ລະ​ໂອ­ກາດ​ອັນ​ສະດວກ​ທີ່​ສຸດ ແຕ່​ກໍ່​ຕ້ອງ​ປະ​ເຊີນ​ໜ້າ​ກັບ​ຄວາມ​ຫຍຸ້ງ­ຍາກ ແລະ ສິ່ງ​ທ້າ​ທາຍ​ຫຼາຍ​ປະ­ການ. ສະ­ພາບ​ການ​ໂລກ ແລະ ພາກ​ພື້ນ​ປ່ຽນ­ແປງ​ຢ່າງ​ເລິກ­ເຊິ່ງ ໄວ­ວາ, ຫັນ­ປ່ຽນ​ຢ່າງ​ສັບ­ສົນ ຄາດ​ຄະ­ເນ​ໄດ້​ຍາກ; ສົງ­ຄາມ, ການ​ປະ​ທະ​ກັນ​ທາງ​ດ້ານ​ຊົນ­ເຜົ່າ ສາ­ສະ­ໜາ, ການ​ກໍ່​ການ​ຮ້າຍ, ການ​ພິ­ພາດ​ຊ່ວງ​ຊິງ​ກັນ​ດ້ານ​ອະ­ທິ­ປະ​ໄຕ ເຂດ​ແດນ ແລະ ຊັບ­ພະ­ຍາ­ກອນ, ພິ­ເສດ​ແມ່ນ​ການພິພາດ​ດ້ານອະທິປະ​ໄຕ​ໃນ​ເຂດ​ທະ­ເລ ໝູ່ເກາະ​ທະ­ເລ ​ນັບ​ມື້​ນັບ​ເພີ່ມ​ຂຶ້ນ​ໃນ​ທະ­ເລ​ຕາ­ເວັນ​ອອກ ແລະ ກົນອຸບາຍ​ ການ­ເຄື່ອນ­ໄຫວ​ຂອງ​ບັນ­ດາ​ອິດ​ທິ​ກຳ­ລັງ​ປໍ​ລະ​ປັກ ທີ່​ຕ້ານຢັນ​ທຳ­ລາຍ​ພັກ, ລັດ, ລະ­ບົບການ​ເມືອງ, ນາບ​ຂູ່​​ໂດຍ​ກົງ​ຕໍ່​ສັນ­ຕິ­ພາບ, ສະ​ຖຽມ​ລະ​ພາບ ແລະ ຜືນ​ແຜ່ນ­ດິນ​ອັນ​ຄົບ​ຖ້ວນ​ຂອງ​ຫວຽດ­ນາມ​.

ປີ 2016 ເປັນ​ປີ​ທີ່​ມີ​ການ­ຈັດ­ຕັ້ງ​ບັນ­ດາ​ເຫດ­ການ​ອັນ​ສຳ­ຄັນ​ຍິ່ງ​ຂອງ​ປະ­ເທດ, ເປັນ​ປີ​ທຳ​ອິດ​​ແຫ່ງການ​ຜັນ​ຂະ­ຫຍາຍ​ປະ­ຕິ­ບັດ​ ມະ­ຕິ​ກອງ​ປະ­ຊຸມ​ໃຫຍ່​ຜູ້​ແທນ​ທົ່ວ​ປະ­ເທດ​ຄັ້ງ​ທີ XII ຂອງ​ພັກ​ ດ້ວຍ​ບັນດາ​ນະ­ໂຍ­ບາຍຄວາມ​ຕັດສິນ​ຕົກລົງ​ທີ່​ສຳ­ຄັນ ເຊິ່ງ​ໄດ້​ຂີດ​ໝາຍ​ບາດ­ກ້າວ​ພັດ­ທະ­ນາ​ດ້ານ​ທິດ​ສະ​ດີ ແລະ ສືບ​ຕໍ່ຢັ້ງ​ຢືນ​ຄວາມ​ສາ­ມາດນຳ­ພາ ແລະ ກຳ​ອຳ­ນາດ​ຂອງ​ພັກ. ບັນ­ດາ​ຜົນ­ສຳ­ເລັດ​ອັນ​ໃຫຍ່ຫຼວງ​ ມີ​ຄວາມ​ໝາຍ​​ປະ­ຫວັດ­ສາດ​ຂອງ 30 ປີ ແຫ່ງ​ການ​ປ່ຽນ­ແປງ​ໃໝ່​ທີ່​ຜ່ານ​ມານັ້ນ ໄດ້​ສ້າງປະຖົມ​ປັດ​ໃຈ ​ພື້ນ­ຖານ​ອັນ​ສຳ­ຄັນ, ສ້າງ​ທ່າ ແລະ ກຳ­ລັງ​ແຮງ​ໃໝ່​ ໃຫ້​ແກ່​ປະ­ເທດ​​ສືບ​ຕໍ່​ປ່ຽນ­ແປງ​ໃໝ່ ແລະ ຈະ​ເລີ​ນພັດ­ທະ­ນາ.

ເພື່ອ​ປະ­ຕິ­ບັດ​ເປົ້າ​ໝາຍ, ໜ້້າ​ທີ່​ທີ່​ໄດ້ລະ​ບຸ​ໃນ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XII ຢ່າງ​ສຳ­ເລັດ​​ມີ​ໄຊ, ວຽກ​ງານ​ຂົນ­ຂວາຍ​ປະຊາ­ຊົນ​ຕ້ອງ​ເປັນ­ຄວາມ​ຮັບ­ຜິດ­ຊອບ​ຂອງ​ລະ­ບົບ​ການ­ເມືອງ​ທັງ​ໝົດ, ໃນ​ນັ້ນ, ພັກ​ທັງ​ເປັນ​ຜູ້​ປະ­ຕິ­ບັດ​ວຽກ​ງານ​ຂົນ­ຂວາຍ​ປະຊາ­ຊົນ​ໂດຍ​ກົງ, ທັງ​ນຳ​ພາ​ອຳ­ນາດ​ການ​ປົກ­ຄອງ, ແນວ​ໂຮມປະ​ເທດ​ຊາດ ແລະ ອົງ​ຄະນະ​ປະ­ຊາ­ຊົນ ​ປະ­ຕິ­ບັດ. ການ​ປັບ­ປຸງ ແລະ​ເພີ່ມ​ທະ­ວີ​ສາຍ​ພົວ­ພັນ​​ລະ­ຫວ່າງ​ພັກ ກັບ​ປະ­ຊາ­ຊົນ ກໍ່​ຄື​ວຽກ​ງານ​ຂົນ­ຂວາຍ​ປະຊາ­ຊົນ​ຂອງ​ພັກ, ລັດ ແລະ ຂອງ​ລະ­ບົບ​ການ­ເມືອງ ​ນັບ​ມື້​ນັບ​ມີ​ຄວາມ​ສຳ­ຄັນ ແລະ ຈຳ­ເປັນ​ຮີບ​ດ່ວນ. ປະ­ທານ ໂຮ່​ຈີ​ມິນ ໄດ້​ຊີ້​ແຈ້ງ­ວ່າ: “ປະເທດ​ເອົາ​ປະ­ຊາ­ຊົນ​ເປັນ​ກົກ​ຮາກ. ໃນ​ການ​ຕໍ່­ຕ້ານ, ສະ­ຖາ­ປະ­ນາ​ປະ­ເທດ​ຊາດ ປະ­ຊາ­ຊົນ​ເປັນ​ກຳ­ລັງ​​ຕົ້ນ­ຕໍ”(1), “ໄຊ­ຊະ­ນະ​ຂອງ​ການ​ປະ­ຕິ­ວັດ​ແມ່ນຍ້ອນ​ການສູ້​ຊົນ​ເສຍ­ສະ­ຫຼະ ແລະ ປັນຍາ​ສະ­ຫຼາດ ປະ­ດິດ​ສ້າງ​ຂອງ​ປະ­ຊາ­ຊົນ​... ນັບ​ເປັນ​ລ້ານໆ ​ຄົນ”(2) “ເຮັດ​ຫຍັງ​ກໍ່​ຕ້ອງ​ມີ​ມະ­ຫາ­ຊົນ. ​ບໍ່​ມີ​ມະຫາຊົນ​ແມ່ນ​ບໍ່​ເຮັດ​ໄດ້”(3) “ສິດ​ອຳ­ນາດ ແລະ ກຳລັງ​ລ້ວນ​ແຕ່​ຢູ່​ນຳ​ປະ­ຊາ­ຊົນ”(4), “ການ​ຂົນຂວາຍປະຊາ­ຊົນ​ສຳ­ຄັນ​ທີ່​ສຸດ. ການ​ຂົນ­ຂວາຍປະຊາ­ຊົນ​ບໍ່​ດີ​ຈະ​ເຮັດ​ວຽກ​ໃດ​ກໍ່​ບໍ່​ດີ​ຄື​ກັນ. ການ​ຂົນຂວາຍປະຊາ­ຊົນ​ດີ ຈະ​ເຮັດ​ວຽກ​ໃດ​ກໍ່​ໄດ້​ຮັບ​ຜົນ­ສຳ­ເລັດ”(5). ​ຄຳສັ່ງສອນ​​ເທິງ​ນີ້ຂອງ​ປະ­ທານ​ໂຮ່​ຈີ​ມິນ ​ໄດ້​ຜ່ານ​ເວ​ລາ​ເຄິ່ງ​ສະ­ຕະ­ວັດ​ກວ່າ​ແລ້ວ ແຕ່​ຍັງ​ມີ​ຄຸນ­ຄ່າ​ຢູ່.

ໃນ​ແຕ່​ລະ​ໄລ­ຍະ​ປະ­ຫວັດ­ສາດ​ຂອງ​ການ​ປະ­ຕິ­ວັດ, ວຽກ​ງານ​ຂົນ­ຂວາຍ​ປະຊາ­ຊົນ​ຂອງ​ພັກ​​ມີ​ເນື້ອ​ໃນ, ວິ­ທີ​ການ​ທີ່​ແຕກ​ຕ່າງ​ກັນ, ແຕ່​ລ້ວນ​ແຕ່​ແນ­ໃສ່​ເປົ້າ​ໝາຍ​​ສຸດ​ທ້າຍຄື ​ເພື່ອ​ຄວາມ​ສົມ​ບູນ​ພູນ​ສຸກ​ຂອງ​ປະ­ຊາ­ຊົນ, ຂົນ­ຂວາຍປະ­ຊາ­ຊົນ​ທຸກ​ຊັ້ນຄົນ​ເຂົ້າ​ຮ່ວມ​ບັນ­ດາ​ຂະ​ບວນ​ການ​ປະ­ຕິ­ວັດຢ່າງ​ຕັ້ງໜ້າ, ແຂ່ງຂັນ​ຮັກ​ຊາ, ເພີ່ມ​ທະ­ວີ​ກຸ່ມ​ກ້ອນ​ມະ­ຫາ​ສາ­ມັດ​ຄີ​ປວງຊົນທັງຊາດ, ປັບ­ປຸງ ແລະ ເພີ່ມ​ທະ­ວີ​ສາຍ​ພົວ­ພັນ​ອັນ​ສະໜິດແໜ້ນ​ລະ­ຫວ່າງ​ພັກ​ກັບ​ປະ­ຊາ­ຊົນ.

​ເພື່ອກຳ­ນົດ­ແຈ້ງ​ພາ­ລະ​ບົດ­ບາດ, ຄວາມ​ສຳ­ຄັນ​ຂອງ​ວຽກ​ງານ​ຂົນ­ຂວາຍ​ປະຊາ­ຊົນ​ ໃນ​ສະ­ພາບ​ການ​ໃໝ່​, ​ຄະ­ນະ​ບໍ­ລິ­ຫານ​ງານ​ສູນ​ກາງ​, ກົມ​ການ­ເມືອງ, ຄະ­ນະ​ເລ­ຂາ­ທິ­ການສູນ​ກາງ​ພັກ ​ໄດ້​ປະ­ກາດ​ໃຊ້​ມະ­ຕິ, ກົດ​ລະ­ບຽບ, ຄຳ​ສັ່ງຕ່າງໆ ​ກ່ຽວ​ກັບ​ວຽກ​ງານ​ຂົນ­ຂວາຍປະຊາ­ຊົນ, ຄື​ກົມ​ການ­ເມືອງ​ສູນ​ກາງ​ພັກຊຸດ​ທີ X ໄດ້​ປະກາດ​ໃຊ້ “ກົດ​ລະ­ບຽບ​ກ່ຽວ​ກັບ​ວຽກ​ງານ​ຂົນ­ຂວາຍ​ປະຊາ­ຊົນ ​ຂອງ​ລະ­ບົບ​ການ­ເມືອງ”; ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຊຸດ​ທີ XI ໄດ້​ປະ­ກາດ​ໃຊ້ ມະ­ຕິ​ສະ­ບັບ​ເລກ​ທີ 25-NQ/TW, ວັນ​ທີ 3 ມິຖຸ​ນາ 2013, ກ່ຽວ​ກັບ “​ເພີ່ມ​ທະ­ວີ ແລະ ປ່ຽນ­ແປງ​ໃໝ່​ ການ​ນຳ­ພາ​ຂອງ​ພັກ​ ຕໍ່​ກັບ​ວຽກ​ງານ​ຂົນ­ຂວາຍປະຊາ​ຊົນ​ໃນ​ສະ­ພາບ​ການ​ໃໝ່”; ກົມ​ການ­ເມືອງສູນ​ກາງ​ພັກ​ໄດ້​ປະ­ກາດ​ໃຊ້ ມະ­ຕິ​ສະ­ບັບ​ເລກ​ທີ 217-QĐ/TW, ວັນ​ທີ 12 ທັນ­ວາ 2013, ວ່າ​ດ້ວຍ “ກົດລະບຽບກ່ຽວ​ກັບ​ການ​​ຕິດ­ຕາມກວດ­ກາ ແລະ ວິຈານ​ສັງ­ຄົມ​ຂອງ​ແນວ​ໂຮມ​ປະ­ເທດ​ຊາດ​ຫວຽດ­ນາມ ແລະ ບັນ­ດາອົງ​ການ­ຈັດ­ຕັ້ງ​ການ­ເມືອງ - ສັງ­ຄົມ” ແລະ ມະຕິ​ຕົກລົງ​ສະ­ບັບ​ເລກ​ທີ 218-QĐ/TW, ວັນ​ທີ 12 ທັນ­ວາ 2013 “ກຳ­ນົດ​ກ່ຽວ​ກັບ​ການ​ທີ່​ແນວ​ໂ​ຮມ​ປະ­ເທດ​ຊາດ​ຫວຽດ­ນາມ, ອົງ​ການ­ຈັດ­ຕັ້ງ​ການ­ເມືອງ - ສັງ­ຄົມ ແລະ ປະ­ຊາ­ຊົນ ​ເຂົ້າ​ຮ່ວມການ​ປະ­ກອບ​ຄຳ​ເຫັນ​ເພື່ອ​ກໍ່ສ້າງ​ພັກ, ກໍ່­ສ້າງ​ອຳ­ນາດ​ການ​ປົກ­ຄອງ”... ໄດ້​ສະ­ແດງ​ໃຫ້​ເຫັນ​ເຖິງ​ຄວາມ​ຕັດ­ສິນ​ໃຈ​ປ່ຽນ­ແປງ​ໃໝ່​ວຽກ​ງານ​ຂົນ­ຂວາຍປະ­ຊາ­ຊົນ​ຂອງ​ພັກ, ຍົກ​ສູງ​ຄວາມ​ສາ­ມາດນຳ­ພາ, ກຳ­ລັງ​ແຮງ​ສູ້​ຮົບຂອງ​ພັກ, ປະ​ສິດທິ​ຜົນ​ແຫ່ງ​ການ​ຄຸ້ມ​ຄອງ​ຂອງ​ລັດ​ ຢ່າງ​ບໍ່​ຢຸດ​ຢັ້ງ, ປະ­ກອບ­ສ່ວນ​ເຂົ້າ​ໃນ​ການ​ກໍ່­ສ້າງ​ພັກ, ກໍ່­ສ້າງ​ອຳ­ນາດ​ການ​ປົກຄ​ອງ​ໃຫ້​ປອດ​ໃສ​ຂາວ​ສະ­ອາດ ໝັ້ນ­ຄົງ​ເຂັ້ມ­ແຂງ.

​ໂດຍໝູນ​ໃຊ້​ຢ່າງ​ມີ​ຫົວ­ຄິດ​ປະ­ດິດ​ສ້າງ ແນວ​ຄິດ​ໂຮ່​ຈີມິນ ແລະ ທັດ­ສະ­ນະ​ຂອງ​ພັກ ​ກ່ຽວ​ກັບ​ວຽກ​ງານ​ຂົນ­ຂວາຍປະ­ຊາ­ຊົນ, ໃນ​ເວ­ລາ​ທີ​ຜ່ານ​ມາ, ເປັນ­ຕົ້ນ​ແມ່ນ​ໃນ​ໄລ­ຍະ 2010 - 2015, ຂະ​ບວນ​ການ​ແຂ່ງຂັນ “ຂົນ­ຂວາຍປະ­ຊາ­ຊົນ​ເກັ່ງ” ທີ່​ໄດ້​ຄະ­ນະ​ພັກ, ອຳ­ນາດ​ການ​ປົກ­ຄອງ, ອົງຄະ​ນະ​ມະຫາຊົນ​ຊີ້​ນຳ​ແລະ ຈັດ​ຕັ້ງ​ປະ­ຕິ​ປັດ​ຢ່າງ​ມີ​ປະ​ສິດ­ທິ​ຜົນ. ມີ​ຫຼາຍຕົວ​ແບບ​ດີ, ​ວິ­ທີ​ເຮັດ​​ດີ ປະ­ດິດ​ສ້າງ​ ໄດ້ຮັບ​ການ​ຜັນຂະຫບາຍ​ເຂົ້າ​ສູ່​ຄວາມ​ເປັນ​ຈິງ​ແຫ່ງ​ຊີ­ວິດ​ສັງ​ຄົມ. ປີ 2010 ມີ 200.000 ຕົວ​ແບບ, ​ແບບຢ່າງ​ດີ­ເດັ່ນ ມາ​ເຖິງ​ປັດ­ຈຸ​ປັນ​ໄດ້​​ເພີ່ມ​ຂຶ້ນ­ເປັນ 400.000 ຕົວ​ແບບ, ​ແບບຢ່າງ “ຂົນ­ຂວາຍ​ປະຊາ­ຊົນ​ເກັ່ງ” ໃນ​ທົ່ວປະ​ເທດ ​ເຊິ່ງໄດ້​ແຜ່​ລາມ​ເຂົ້າ​ໃນ​ທຸກ​ຂົງ​ເຂດ​ຂອງ​ຊີ­ວິດ​ສັງ­ຄົມ. ວຽກ​ງານ​ຂົນ­ຂວາຍປະຊາ­ຊົນ​ໄດ້​ປະ­ກອບ­ສ່ວນ​ປຸກ­ລະ­ດົມ​ໃຫ້​ປະ­ຊາ­ຊົນ​ທຸກ​​ຊັ້ນຄົນ​ສາ­ມັກ­ຄີ​ກັນ, ປະ​ຕິດ​ບັດ​ບັນ­ດາ​ເປົ້າ​ໝາຍ, ​ແຜນຍຸດ​ທະ​ສາດ​​ພັດ­ທະ­ນາ​ເສດ­ຖະ­ກິດ - ສັງ­ຄົມ​ ຂອງ​ທົ່ວ​ປະ­ເທດ​ຢ່າງ​ສຳ­ເລັດ​ມີ​ໄຊ.

2 - ປີ 2016 ເປັນ​ປີ​ທີ່​ມີ​ຄວາມ​ໝາຍ​ສຳ­ຄັນ​ທີ່​ສຸດ, ເປັນ​ປີ​ທີ່​ທຳ​ອິດທີ່​ທົ່ວ​ພັກ, ທົ່ວ​ປວງ​ຊົນ​ປະຕິ​ບັດມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ XII ຂອງ​ພັກ​ ດ້ວຍ 6 ໜ້າ­ທີ່​ຈຸດ​ໜັກ​ໃຈ­ກາງ, ສືບ​ຕໍ່​ປະ­ຕິ­ບັດ​ມະ­ຕິ​ກອງ​ປະຊຸມ​ສູນ​ກາງ​ພັກ​ເທື່ອ​ທີ 4 ສະ​ໄໝທີ XI ວ່າດ້ວຍ “ບາງ​ບັນ­ຫາ​ອັນ​ຮີບ​ດ່ວນ​ກ່ຽວ​ກັບ​ການ​ກໍ່­ສ້າງ​ພັກ​ ໃນ​ປັດ­ຈຸ­ບັນ” ​ຕິດ​ກັບ​ການ​ປະ­ຕິ­ບັດ​ບັນ­ດາ​ໜ້າ­ທີ່​ການ­ເມືອງ ​ຂອງ​ວຽກ​ງານ​ຂົນ­ຂວາຍ​ປະ­ຊາ­ຊົນຂອງ​ພັກ ​ໃນ​ສະ­ພາບ​ການ​ໃໝ່. ກ່າວ​ປາ​ໄສ​ທີ່​ພິ­ທີ​ອັດກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ, ສະຫາຍ​ເລຂາທິການ​ໃຫຍ່ ຫງວ​ຽນ​ຝູຈ້ອງ ໄດ້​ເນັ້ນ​ວ່າ: “ຕ້ອງ​ໃກ້​ຊິດ​ປະ­ຊາ­ຊົນ, ເຄົາ­ລົບ​ນັບ­ຖື​ປະ­ຊາ­ຊົນ, ​ເພື່ອປະຊາຊົນ, ຕິດຕາມ​ໃກ້ຊິດ​ກັບ​ພາກ​ພຶດ­ຕິ​ກຳ, ​​ເວົ້າ​ໄປ​ຄຽງ​ຄູ່​ກັບ​​ເຮັດ, ສຳ­ເລັດໜ້າ​ທີ່​ທີ່​ໄດ້​ຮັບ​ມອບ​ໝາຍ​ເປັນ​ຢ່າງ​ດີ, ປະກອບສ່ວນ​ເຂົ້າ​ໃນ​ການ​ປະ­ຕິ­ບັດ ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ XII ຂອງ​ພັກ​ ຢ່າງ​ສຳ­ເລັດ​ມີ​ໄຊ”; ຕ້ອງ​ຖື​ເອົາ​ວຽກ​ງານ​ຂົນ­ຂວາຍ​ປະຊາ­ຊົນ​ເປັນ “ໜ້າ​ທີ່​ທີ່ສຳ­ຄັນ​ຍິ່ງ” ຂອງ​ພັກ, ເພາະ­ວ່າ​ມັນ​ເປັນປັດ​ໃຈ​​ສຳ­ຄັນ​ທີ່ປະ­ກອບ­ສ່ວນ​ເຂົ້າ​ໃນ​ການ​ປັບ­ປຸງ​ສາຍ​ພົວ­ພັນ​ແບບ​ເລືອດ​ເນື້ອ ​ລະ­ຫວ່າງ​ພັກ​ກັບ​ປະ­ຊາ­ຊົນ; ເພີ່ມ​ພູນຄູນ​ສ້າງ​ຄວາມຜູກ​ພັນ​​ສະ­ໜິດ​ແໜ້ນ ​ລະ­ຫວ່າງ​ພັກ​ກັບ​ປະ­ຊາ­ຊົນ ຢ່າງ​ເປັນ​ປະຈຳ, ​ແມ່ນ​ຄຸນ­ສົມ­ບັດ​ອັນປະ​ເສີດ​ເລີດ​ລ້ຳ, ດີ­ງາມ, ຫຼັກ​ແຫຼ່ງ​ ທີ່​ສະ­ແດງ​ໃຫ້​ເຫັນ​ເຖິງ​ທາດ​ແທ້ ແລະ ກຳ​ລັງ​ຊີ­ວິດ​ຂອງ​ພັກ.

ສະພາບ​ການ​ໃໝ່​ໄດ້​ວາງໜ້າ­ທີ່ອັນໜັກໜ່ວງ​ທີ່​ສຸດອອກມາໃຫ້​ແກ່​ວຽກ​ງານ​ຂົນ­ຂວາຍປະ­ຊາ­ຊົນ​​, ມັນຮຽກ­ຮ້ອງ​ໃຫ້​ວຽກ​ງານ​ຂົນ­ຂວາຍປະຊາ­ຊົນ ແລະ ຖັນ​ແຖວ​ພະ­ນັກ­ງານ​ເຮັດ​ວຽກ​ງານຂົນຂວາຍ​ປະຊາຊົນ ​ຕ້ອງ​ສຸມ​ໃສ່​ປະ­ຕິ­ບັດ​ບັນ­ດາ​ໜ້າ­ທີ່​ຈຸດ​ໜັກ​ໃຈ­ກາງ ​ໃນ​ປີ 2016 ແລະ ​ໃນສະ­ໄໝ 2016 - 2020 ​ຄື​ດັ່ງ​ລຸ່ມ​ນີ້:

ທີ​ໜຶ່ງ, ປະ­ກອບ­ສ່ວນ​ພ້ອມ​ກັບ​ບັນ­ດາ​ອົງ­ການ​ຮັບ­ຜິດ­ຊອບ​ເພື່ອ​ເປັນ​ເສ­ນາ​ທິ​ການ​ໃຫ້​ແກ່​ການຈັດຕັ້ງ​ເຊື່ອມ​ຊືມ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ​ ຢ່າງ​ເລິກ­ເຊິ່ງ​ກວ້າງ­ຂວາງ, ໃນ​ນັ້ນມີ​ເນື້ອ​ໃນ​ກ່ຽວ​ກັບ​ວຽກ​ງານ​ຂົນ­ຂວາຍປະຊາ­ຊົນ​ຂອງ​ພັກ; ກໍ່­ສ້າງ ແລະ​ປະ­ກາດ​ໃຊ້​ໂຄງ­ການ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ ​ກ່ຽວ​ກັບ​ວຽກ​ງານ​ຂົນ­ຂວາຍ​ປະຊາ­ຊົນ.

ທີ​ສອງ, ເປັນ​ເສ­ນາ​ທິ​ການ​ໃຫ້​ແກ່​ພັກ ​ກ່ຽວ​ກັບ​ວຽກ​ງານ​ນຳ­ພາ​ລະ­ບົບ​ການ­ເມືອງ ແລະ ປະ­ຊາ­ຊົນ​ທຸກ​ຊັ້ນຄົນ​ປະ­ຕິ­ບັດ​​ສາມ​ເປົ້າ​ໝາຍ, ໜ້າ­ທີ່​ທີ່​ສຳ­ຄັນ​ ຂອງ​ວຽກ​ງານ​ຂົນ­ຂວາຍ​ປະຊາ­ຊົນ ​ໃນ​ສະ­ພາບ​ການ​ໃໝ່ ໃຫ້​​ໄດ້​ຮັບ​ປະ​ສິດ­ທິ​ຜົນ, ນັ້ນ​ແມ່ນ: ປັບ­ປຸງ​ຄວາມ​ເຊື່ອ​ຖື​ຂອງ​ປະ­ຊາ­ຊົນຕໍ່​ກັບ​ພັກ, ເພີ່ມ​ທະ­ວີ​ກຸ່ມ​ກ້ອນ​ມະ­ຫາ​ສາ­ມັກ­ຄີປວງ​ຊົນ​ທັງ​ຊາດ ແລະ ສາຍ​ພົວ­ພັນ​​ສະ­ໜິດ​​ແໜ້ນ​ ລະ­ຫວ່າງ​ພັກ​ກັບ​ປະ­ຊາ­ຊົນ; ເຕົ້າ​ໂ​ຮມ, ຂົນຂວາຍ​ປະ­ຊາ­ຊົນ​ປະ­ຕິ­ບັດ​ແຜນ​ນະ­ໂຍ­ບາຍ, ແນວ­ທາງ​ຂອງ​ພັກ ແລະ ນະໂຍ­ບາຍ​, ກົດ­ໝາຍ​ຂອງ​ລັດ ໃຫ້​ໄດ້​ຮັບ​ຜົນ​ດີ; ເສີມ​ຂະ­ຫຍາຍ​ກຳ­ລັງ​ແຮງ​ອັນໃຫຍ່ຫຼວງ​ຂອງ​ປະ­ຊາ­ຊົນ, ສ້າງ​ເປັນ​ຂະ​ບວນ​ການ​ປະ­ຕິ­ວັດ​ອັນ​ກ້ວ​າງ​ຂວາງ​ ເພື່ອ​ກໍ່­ສ້າງ ແລະ ປົກ​ປັກ​ຮັກ­ສາ​ປະ­ເທດ​ຊາດ.

ທີ​ສາມ, ປະ­ກອບ­ສ່ວນ​ເຂົ້າ​ໃນ​ການ​ໃຫ້​ຄຳ​ປຶກສາ​ແກ່​ການ​ປ່ຽນ­ແປງ​​ໃໝ່​ແບບວິ­ທີນຳ­ພາ​ຂອງ​ພັກ ​ຕໍ່​ວຽກ​ງານ​ຂົນ­ຂວາຍປະຊາ­ຊົນ​ ໃນ​ເງື່ອນ­ໄຂ​ພັດ­ທະ­ນາ​ເສດ­ຖະ­ກິດ​ຕະ­ຫຼາດ​ຕາມ​ທິດ​ສັງ­ຄົມ​ນິ­ຍົມ ແລະ ເຊື່ອມ​​ໂຍງ​ສາ­ກົນ. ກໍ່­ສ້າງ​ຖັນ​ແຖວ​ພະ­ນັກ­ງານ, ສະ­ມາ­ຊິກ​ພັກ​ຕ້ອງ​ມີ​ຄວາມ​ເຊື່ອ​ໝັ້ນ​ປະຊາຊົນ, ເຄົາ­ລົບ​ນັບ­ຖື​ປະ­ຊາ­ຊົນ, ໃກ້​ຊິກ​ຕິດ​ພັນ​ກັບ​ປະ­ຊາ­ຊົນ, ເຂົ້າ­ໃຈ​ປະ­ຊາ­ຊົນ, ຮຽນ​ຮູ້​ນຳປະຊາຊົນ, ອິງ​ໃສ່​ປະ­ຊາ­ຊົນ ແລະ ມີຄວາມ​ຮັບ­ຜິດ­ຊອບ​ຕໍ່​ປະ­ຊາ­ຊົນ. ພ້ອມ​ທັງ ປະ­ກອບ­ສ່ວນ​ເຂົ້າ​ໃນ​ການ​ແກ້​ໄຂ​ຄວາມ​ຂັດ­​ເຄືອງໃຈ, ຄຳ​ສະ­ເໜີ​ທີ່​ສົມ​ເຫດ​ສົມ​ຜົນຂອງ​ປະຊາ­ຊົນ ​ໃຫ້​ໄດ້ຢ່າງ​ທັນການ ​ແລະ​ມີ​ປະ​ສິດ­ທິ​ຜົນ.​

ທີ​ສີ່, ປະ­ກອບ­ສ່ວນ​ເຂົ້າ​ໃນ​ການໃຫ້ຄຳ​ປຶກສາ​ແກ່­ການ​ນຳ­ພາ​ການ​ຫັນ​ແນວ­ທາງ, ​ແຜນ​ນະ­ໂຍ­ບາຍ​ຂອງ​ພັກ ​ເປັນ​ນະ­ໂຍ­ບາຍ, ກົດ­ໝາຍ​ທີ່​ສອດຄ່ອງ​ກັບສະພາບ​ຕົວ​ຈິງ ແລະ ​ຕອບ​ສະ­ໜອງ​​ຜົນ​ປະ­ໂຫຍດ, ຄວາມ​ມຸ່ງ​ມາດ​ປາດ​ຖະ​ໜາ​ອັນ​ຊອບ​ທຳ​ ຂອງ​ປະ­ຊາ­ຊົນ. ສືບ​ຕໍ່​ຫັນ​​ສາຍ​ພົວ­ພັນ “ພັກ​ນຳ­ພາ, ລັດ​ຄຸ້ມ​ຄອງ, ປະ­ຊາ­ຊົນ​ເປັນ​ເຈົ້າ” ແລະ ທິດ​ນຳ “ປະ­ຊາ­ຊົນ​ຮູ້, ປະ­ຊາ­ຊົນ​ປຶກ­ສາ​ຫາ­ລື, ປະ­ຊາ­ຊົນປະ­ຕິ­ບັດ, ປະຊາ​ຊົນ​ຕິດຕາມ​ກວດ­ກາ” ​ໃຫ້ເປັນ​ນິ­ຕິ​ກຳ.

ທີ່​ຫ້າ, ໃຫ້ຄຳ​ປຶກສາ​ແກ່​ການ​ນຳ­ພາ, ເພີ່ມ​ທະ­ວີ ແລະ ປ່ຽນ­ແປງ​ໃໝ່, ຍົກ​ສູງ​ຄຸມ​ນະ​ພາບ,  ປະ​ສິດ​ທິ​ຜົນ ​ໃນ​ວຽກ​ງານ​ຂົນ­ຂວາຍປະຊາ­ຊົນ ​ຂອງ​ບັນ­ດາ​ອົງ​ການ­ຈັດ­ຕັ້ງ​ແຫ່ງ​ລັດ; ປະ­ຕິ­ບັດ​ເປັນ​ຢ່າງ​ດີ ກົດ​ລະບຽບ​ກ່ຽວ​ກັບ​ການ​ຂົນ­ຂວາຍ​​ປະຊາ­ຊົນ​ຂອງ​ລະ­ບົບ​ການ­ເມືອງ; ເອົາ­ໃຈ­ໃສ່​​ການ​ກໍ່­ສ້າງ, ບຳ​ລຸງ​ກໍ່­ສ້າງ​ຖັນ​ແຖວ​ພະ­ນັກ­ງານ​ທີ່​ຮັບ­ຜິດ­ຊອບສະ­ເພາະ​ວຽກ​ງານ​ຂົນ­ຂວາຍ​ປະຊາ­ຊົນ.

ທີ​ຫົກ, ໃຫ້ຄຳ​ປຶກສາ​ແກ່​ການ​ສະ​ຫລຸບສັງ​ລວມຜົນ​ການ​ປະຕິບັດ​ມະ­ຕິ​ຂອງ​ສູນ​ກາງ​ພັກ, ຄຳ​ສະຫລຸດ, ມະຕິ​ຕົກ­ລົງ​ຂອງ​ກົມ​ການ­ເມືອງ, ຄະ­ນະ​ເລ­ຂາ­ທິ­ການສູນ​ກາງ​ພັກ ແລະ ການສະ​ຫລຸບ​ເບື້ອງ​ຕົ້ນຜົນ​ການ​ປະຕິບັດ​ມະ­ຕິ​ສະ­ເພາະ​ກ່ຽວ​ກັບ​ວຽກ​ງານ​ຂົນຂວາຍ​ປະຊາ­ຊົນ.

ທີ​ເຈັດ, ໃກ້­ຊິດຕິດ​ແທດ​ກັບຮາກ​ຖານ, ກຳ​ແໜ້ນ​ສະ­ພາບ​ການ​ປະ​ຊາ​າຊົນ, ເປັນ­ຕົ້ນ​ແມ່ນ​ຄວາມ​ຄິດ​ຈິດ​ໃຈ, ຄວາມ​ມຸ່ງ​ມາດ​ປາດ​ຖະ​ໜາ, ຂໍ້​ສະ­ເໜີທີ່ສົມ​ເຫດ​ສົມ​ຜົນ​ຂອງ​ປະ­ຊາ­ຊົນ​ ​ເພື່ອ​ສ່ອງ​ແສງ ແລະ ​ໃຫ້​ຄຳ​ປຶກສາ​​ ຊ່ວຍໃຫ້​ສູນ​ກາງ​ພັກ​ ​ນຳ­ພາ, ຊີ້​ນຳ, ແກ້​ໄຂ​ຢ່າງ​ທັນ​ການ, ໃນ​ນັ້ນ​ມີ​ສະ­ພາບ​ການ​ກ່ຽວ​ກັບ​ວຽກ​ງານ​ຊາວ­ນາ, ແມ່­ຍິງ, ຊົນ­ເຜົ່າ, ສາ­ສະ­ໜາ, ກຳ­ມະ­ກອນ, ສະພາບ​ການ​ຂອງ​ນັກ​ສຶກ​ສາ, ຊາວ​ໜຸ່ມ, ຖັນ​ແຖວ​ປັນ​ຍາ​ຊົນ, ນັກທຸ​ລະ​ກິດ...

ໃນ​ຂະ​ບວນ​ວິ­ວັດ​ແຫ່ງ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໜ້າ­ທີ່​ຈຸດ​ສຸມ​ທີ່​ໄດ້​ກ່າວ​ເທິງ​ນີ້​ ​ຕ້ອງ​ເຊື່ອມ​ຊືມ​ຢ່າງ​ເລິກ­ເຊິ່ງ​ບັນ­ດາ​ທັດ­ສະ­ນະ​ຊີ້​ນຳ​ຂອງ​ພັກ ຕໍ່​ກັບ​ວຽກ​ງານ​ຂົນ­ຂວາຍ​ປະ­ຊາ­ຊົນ​ ໃນ​ສະພາບ​ການ​ໃໝ່​ ທີ່​ລະບຸ​ໃນມະ­ຕິ​ສະ­ບັບ​ເລກ​ທີ 25-NQ/TW, ນັ້ນ​ແມ່ນ:

- ການ​ປະ­ຕິ­ວັດ​ແມ່ນ​ເປັນ​ພາ­ລະ­ກິດ​ຂອງ​ປະ­ຊາ­ຊົນ, ​ໂດຍປະ­ຊາ­ຊົນ, ເພື່ອ​ປະ­ຊາ­ຊົນ; ປະ­ຊາ­ຊົນ​ເປັນ​ເຈົ້າ​ຂອງ, ປະ­ຊາ­ຊົນ​ເປັນ​ເຈົ້າ. ກຳ­ລັງ​ໜຸນຊຸກ­ຍູ້​ຂະ​ບວນ​ການ​ປະ­ຊາ­ຊົນ​ ແມ່ນ​ເສີມ​ຂະ­ຫຍາຍ​ສິດ​ເປັນ​ເຈົ້າ, ຕອບ​ສະ­ໜອງ​ຜົນ​ປະ­ໂຫຍດ​ອັນ​ແທດ​ຈິງຂອງ​ປະ­ຊາ­ຊົນ; ສົມທົບ​ຢ່າງ​ກົມ­ກຽວລະຫວ່າງ​ບັນດາຜົນປະ​ໂຫຍ​ດ; ຜົນ​ປະ­ໂຫຍດ​ຕ້ອງ​ໄປ​ຄຽງ​ຄູ່​ກັບ​ພັນ­ທະພົນລະ​ເມືອງ; ເອົາ­ໃຈ­ໃສ່​ເຖິງ​ຜົນ​ປະ­ໂຫຍດ​ໂດຍ​ກົງ​ຂອງປະຊາຊົນ; ລະ­ດົມ​ກຳ­ລັງ​ແຮງ​ຂອງ​ປະ­ຊາ­ຊົນ​ຕ້ອງ​ໄປ​ຄຽງ​ຄູ່​ກັບ​ບຳ​ລຸງ​ກຳ­ລັງ​ຂອງ​ປະ­ຊາ­ຊົນ; ​ອັນ​ໃດ​ທີ່​ມີ​ຜົນ​ປະ­ໂຫຍດ​ໃຫ້​ແກ່​ປະ­ຊາ­ຊົນ​ແມ່ນ​ຕ້ອງ​ປະ­ຕິ­ບັດ​ຢ່າງ​ສຸດ​ຄວາມ​ສາ­ມາດ, ​ອັນ​ໃດ​ທີ່​ເປັນ​ຜົນ​ຮ້າຍ​ໃຫ້​ແກ່​ປະ­ຊາ­ຊົນ​ແມ່ນ​ຕ້ອງຫຼີກລ່ຽງບໍ່​ເຮັດ​ຢ່າງ​ເດັດຂາດ.

- ​ແບບວິ­ທີນຳ­ພາ​ວຽກ​ງານ​ຂົນ­ຂວາຍປະຊາ­ຊົນ​ຂອງ​ພັກ​ຕ້ອງ​ຕິດ​ກັບ​ວຽກ​ງານ​ກໍ່­ສ້າງ​ພັກ, ລັດ​ ໃຫ້​ມີ​ຄວາມ​ປອດ​ໃສ​ຂາວ​ສະ­ອາດ ໝັ້ນຄົງ​ເຂັ້ມ­ແຂງ. ທຸກ​ທັດ­ສະ­ນະ, ແຜນ​ນະ­ໂຍ­ບາຍ​ຂອງ​ພັກ, ກົດໝາຍ​ຂອງ​ລັດ ​ຕ້ອງ​ສອດຄ່ອງ​ກັບ​ຜົນ​ປະ­ໂຫຍດ​ຂອງ​ປະ­ຊາ­ຊົນ, ​ໂດຍ​ປະ­ຊາ­ຊົນ, ເພື່ອ​ປະ­ຊາ­ຊົນ. ພະນັກ­ງານ, ສະ­ມາ­ຊິກ​ພັກ, ລັດ­ຖະ­ກອນ​ແຕ່­ລະ­ຄົນ​ ຕ້ອງ​ເປັນ​ແບບ­ຢ່າງ​ເພື່ອ​​ໃຫ້ປະ­ຊາ­ຊົນ​ເຊື່ອ​ໝັ້ນ ແລະ ປະ­ຕິ­ບັດ​ຕາມ.

- ວຽກ​ງານ​ຂົນ­ຂວາຍ​ປະຊາ­ຊົນ​ແມ່ນ​ຄວາມ​ຮັບ­ຜິດ­ຊອບ ​ຂອງລະ­ບົບ​ການ­ເມືອງ​ທັງ​ໝົດ, ຂອງ​ພະ­ນັກ­ງານ, ສະ­ມາ­ຊິກ​ພັກ, ລັດ­ຖະ­ກອນ, ສະ­ມາ­ຊິກ​ຊາວ​ໜຸ່ມ, ສະ​ມາ​ຊິດ​ຂອງ​ບັນ­ດາ​ອົງ​ການ­ຈັດ­ຕັ້ງ​ປະຊາ­ຊົນ, ພະ­ນັກ­ງານ ນັກ­ຮົບ​ຂອງ​ກຳ­ລັງ​ປະ­ກອບ​ອາ­ວຸດ. ໃນ​ນັ້ນ, ພັກ​ເປັນ​ຜູ້­ນຳ​ພາ, ອຳ­ນາດ​ການ​ປົກຄອງເປັນ​ຜູ້​ຈັດ​ຕັ້ງ​ປະ­ຕິ­ບັດ, ແນວ​​ໂຮມ​ປະ­ເທດ​ຊາດ ​ແລະ ອົງຄະ­ນະປະຊາຊົນ ​ເປັນເສ­ນາ​ທິ​ການ ແລະ ເປັນ​ກຳລັງ​ຫຼັກ​ແຫຼ່ງ.

- ລັດ​ຈະ​ສືບ​ຕໍ່​ຫັນ​​ກົນ​ໄກ “ພັກ​ນຳ­ພາ, ລັດ​ຄຸ້ມ​ຄອງ, ປະ­ຊາ­ຊົນ​ເປັນ​ເຈົ້າ” ເປັນ​ນິ­ຕິ​ກຳ ​ເປັນ​ລະບຽບກົດໝາຍ ຂໍ້​ກຳ­ນົດ​ ເພື່ອ​ໃຫ້​ບັນ­ດາ​ອົງ​ການ­ຈັດ­ຕັ້ງ​ໃນ​ລະ­ບົບ​ການ­ເມືອງ, ພະ­ນັກ­ງານ, ສະ­ມາ­ຊິກ​ພັກ, ລັດຖະ­ກອນ ແລະ ພະ­ນັກ­ງານ ນັກ­ຮົບ​ໃນ​ກຳ­ລັງ​ປະ­ກອບ​ອາ­ວຸດ ດຳ​ເນີນ​ປະ­ຕິ­ບັດ​ວຽກ​ງານ​ຂົນຂວາ​ຍປະຊາ­ຊົນ; ບັນ­ດາ​ຮູບ​ການ​ເຕົ້າ​ໂ​ຮມ​ປະ­ຊາ­ຊົນ​ຕ້ອງ​ອຸດົມ​ສົມ​ບຸນ, ​ຫຼາຍ​ຮູບ​ຫຼາຍ​ແບບ, ມີ​ວິ­ທະ­ຍາ­ສາດ ແລະ ມີ​ປະ​ສິດ­ທິ​ຜົນ.

ວຽກ​ງານ​ຂົນ​ຂວາ​ຍປະຊາ­ຊົນ​ເປັນ​ເນື້ອ​ໃນ​ທີ່​ສຳ­ຄັນ​ແນ­ໃສ່​ປະ­ກອບ­ສ່ວນ​ເຂົ້າ​ໃນ​ການ​ກໍ່­ສ້າງ​ພັກ​ໃຫ້​ມີ​ຄວາມ​ປອດ​ໃສ​ຂາວ​ສະ­ອາດ, ເຂັ້ມ­ແຂງ, ຍົກ​ສູງ​ຄວາມ​ສາ­ມາດ​ໃນ​ການ​ນຳ­ພາ ແລະ ກຳ­ລັງ​ແຮງ​ສູ້ຮົບຂອງ​ພັກ. ວຽກ​ງານ​ຂົນ­ຂວາຍ​ປະຊາ­ຊົນ​ຕ້ອງ​ສືບ​ຕໍ່​ປ່ຽນ­ແປງ​ໃໝ່​ ໃນ​ເງື່ອນ­ໄຂ​ເສດ­ຖະ­ກິດ​ຕະ­ຫຼາດ​ຕາມ​ທິດ​ສັງ­ຄົມ​ນິ­ຍົມ ແລະ ເຊື່ອມ​​ໂຍງ​ສາ­ກົນ. ຍິ່ງ​ກວ່າ​ເວ­ລາ​ໃດ​ໝົດ, ຖັນ​ແຖວ​ບັນ­ດາຜູ້​ປະ­ຕິ­ບັດ​ວຽກ​ງານ​ຂົນ­ຂວາຍປະ­ຊາ­ຊົນ ຕ້ອງ​ສືບ​ຕໍ່​ເຊື່ອມ​ຊືມ​ຢ່າງ​ເລິກ­ເຊິ່ງ, ຍົກ​ສູງ​ຈິດ­ໃຈ, ຈິດສຳນຶກ, ຄວາມ​ຮັບຜິດຊອບ, ສູ້​ຊົນ​ສຳ­ເລັດ​ບັນ­ດາ​ໜ້າ­ທີ່​ຈຸດ​ໜັກ​ໃຈ​ກາງ ­ຂອງ​ວຽກ​ງານ​ຂົນ­ຂວາຍປະ­ຊາ­ຊົນ​ໃນ​ປີ 2016  ແລະ ​ໃນໄລ­ຍະ 2016 - 2020 ຢ່າງ​ຈົບງາມ ຕາມ​ຈິດ­ໃຈ​ຂອງ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ. ຕັ້ງໜ້າໃຫ້ຄຳ​ປຶກສາ​ທີ່​ດີ​ແກ່​ຄະ­ນະ​ພັກ, ອຳ­ນາດ​ການ​ປົກ­ຄອງ​ ໃນ​ການ​ນຳ­ພາ ແລະ​ ຈັດ​ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ ​ກ່ຽວ​ກັບ​ວຽກ​ງານ​ຂົນ­ຂວາຍ​ປະ­ຊາ­ຊົນ​ ຢ່າງ​ມີ​ປະ​ສິດ­ທິ​ຜົນ, ປະກອບສ່ວນເຂົ້າ​ໃນ​ການ​ປະ­ຕິ­ບັດ​ບັນ­ດາ​ເປົ້າ​ໝາຍທີ່​ກອງ​ປະ­ຊຸມ​ໄດ້​ວາງ​ອອກ ​ຢ່າງ​ສຳ­ເລັດ​ມີ​ໄຊ./.

​ໂດຍ ເຈືືອງທິມາຍ,

ກຳ­ມະ­ການ​ກົມ​ການ­ເມືອງ, ເລ­ຂາ​ທີ​ການສູມ​ກາງ​ພັກ,

ຫົວ­ໜ້າ​ຄະ­ນະ​ຂົນ­ຂວາຍ​ປະຊາ­ຊົນ​ສູນ​ກາງ​ພັກ

-------------------------------

* ບົດ​ນີ້​ໄດ້​ລົງ​ພິມ​ໃນ​ວາ­ລະ­ສານ​ກອມ​ມູ​ນິດ ສະ­ບັບທີ 882 (ເດືອນ​ເມ­ສາ 2016)

(1) ໂຮ່​ຈີ​ມິນ: ນິ­ພົນ​ຄົບ​ຊຸດ, ສຳ­ນັກ​ພິມ​ຈຳ­ໜ່າຍ ການ­ເມືອງ​ແຫ່ງ​ຊາດ-ຊື້​ເທິດ, ຮ່າ​ໂນ້ຍ, 1996, ເຫຼັ້ມ​ທີ 5, ໜ້າ 409.

(2) ໂຮ່​ຈີ​ມິນ: ໜັງ­ສື​ທີ່​ໄດ້​ແນະ­ນຳ, ເຫຼັ້ມ​ທີ 11, ໜ້າ 372.

(3) ໂຮ່​ຈີ​ມິນ: ໜັງ­ສື​ທີ່​ໄດ້​ແນະ­ນຳ, ເຫຼັ້ມ​ທີ 12, ໜ້າ 212.

(4), (5) ໂຮ່​ຈີ​ມິນ: ໜັງ­ສື​ທີ່​ໄດ້​ແນະ­ນຳ, ເຫຼັ້ມ​ທີ 5, ໜ້າ 698, 700.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ