ວັນອັງຄານ, 22/10/2019
ທັດສະນະ ແລະ ບັນດາວິທີແກ້ໃໝ່ກ່ຽວກັບ ການກໍ່ສ້າງພັກ ທີ່ໄດ້ກຳນົດໃນເອກະສານ ກອງປະຊຸມໃຫຍ່ຄັ້ງທີ XII ຂອງພັກ
26/7/2016 8:53' ສົ່ງ ພິມ
ພາບປະກອບ

ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກສືບ​ຕໍ່​ຢັ້ງຢືນ ການກໍ່ສ້າງ​ພັກ​​ແມ່ນ​ໜ້າ​ທີ່​ຕົ້ນຕໍ. ​ໃນ​ນັ້ນ, ການ​ສຸມ​ໃສ່​ກໍ່ສ້າງ​ພັກ​ໃຫ້​ປອດ​ໃສ, ໝັ້ນຄົງ​ເຂັ້ມ​ແຂງ​ທາງ​ດ້ານ​ການ​ເມືອງ​ແນວ​ຄິດ, ການຈັດ​ຕັ້ງ​ແລະ​ຄຸນສົມບັດ, ຕັ້ງໜ້າ​ປ່ຽນ​ແປງ​ໃໝ່​ແບບ​ວິທີ​ການ​ນຳພາ ​ແມ່ນ​ບັນດາ​ບັນຫາ​ພື້ນຖານ, ​ແມ່ນ​ຮາກ​ຖານ​ເພື່ອ​ກໍ່ສ້າງ​ພັກ​ໃຫ້​ທຽບ​ເທົ່າ​ລະດັບ, ຕອບ​ສະໜອງ​ຄວາມ​ຮຽກຮ້ອງ​ຕ້ອງການ​ຂອງໜ້າທີ່​ໃນ​ສະ​ພາບ​ການ​ໃໝ່. ກ່ຽວ​ກັບ​ເນື້ອ​ໃນຂອງ​ວຽກ​ງານ​ກໍ່ສ້າງ​ພັກ, ​ເອກະສານກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ມີ​ຫຼາຍ​ທັດສະນະ ​ແລະ ວິທີ​ແກ້​ໄຂ​ໃໝ່​ທຽບ​ກັບ​ເອກະສານກອງ​ປະຊຸມ​ໃຫຍ່​ຄັ້ງ​ທີ XI.

ທີ​ໜຶ່ງ, ​ເນື້ອ​ໃນ​ກ່ຽວ​ກັບວຽກງານ​ກໍ່ສ້າງ​ພັກ​ໄດ້​ຮັບ​ການ​ເນັ້ນ​ໜັກ ​ແລະ ກຳນົດ​ຖືກຕ້ອງ​ຕາມ​ຄວາມ​ສຳຄັນ, ທີ່​ຕັ້ງຫຼັກ​ແຫຼ່ງຂອງ​ວຽກ​ງານ​ກໍ່​ສ້າງພັກ​ໃນ​ພາລະກິດ​​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ, ລະອຽດ​ຄື: 1- ບັນຫາ “ກໍ່ສ້າງ​ພັກ​ໃຫ້​ປອດ​ໃສ, ໝັ້ນຄົງ​ເຂັ້ມ​ແຂງ” ຖືກ​ກຳນົດ​ເປັນ​ພາກສ່ວນ​ທຳ​ອິດ​​ໃນຫົວ​ຂໍ້​ຂອງ​ກອງ​ປະຊຸມ​ໃຫຍ່ ​ແລະ ກໍ​ເປັນ​ຫົວ​ຂໍ້​ຂອງ​ລາຍ​ງານ​ການ​ເມືອງ, ນັ້ນ​ແມ່ນ: “​ເພີ່ມ​ທະວີ​ການກໍ່ສ້າງ​ພັກ​ໃຫ້​ປອດ​ໃສ, ໝັ້ນຄົງ​ເຂັ້ມ​ແຂງ; ​ເສີມ​ຂະຫຍາຍ​ກຳລັງ​ແຮງ​ປວງ​ຊົນ​ທັງ​ຊາດ, ປະຊາທິປະ​ໄຕສັງຄົມ​ນິຍົມ; ຍູ້​ແຮງ​ການ​ປ່ຽນ​ແປງ​ໃໝ່​ຢ່າງຮອບດ້ານ, ຄົບ​ຊຸດ; ປົກ​ປັກ​ຮັກສາ​ປະ​ເທດ​ຊາດ​ໄວ້​ຢ່າງ​ໝັ້ນຄົງ, ຮັບ​ສາ​ສິ່ງ​ແວດ​ລ້ອມ​ແຫ່ງ​ສັນຕິພາບ, ສະຖຽນ​ລະ​ພາບ; ສູ້​ຊົນ​ເພື່ອ​​ເຮັດ​ໃຫ້​ປະ​ເທດ​ເຮົາກາຍ​ເປັນ​ປະ​ເທດ​ອຸດສາຫະກຳ​ຕາມ​ທິດ​ທັນ​ສະ​ໄໝ​ໂດຍ​ພື້ນຖານ ​ໂດຍ​ໄວ”. 2- ​ໃນ 15 ຂໍ້​ທີ່​ເວົ້າ​ເຖິງ 15 ບັນຫາ​ໃຫຍ່​ຂອງ​ລາຍ​ງານ​ການ​ເມືອງນັ້ນ, ຫົວ​ຂໍ້ “ກໍ່ສ້າງ​ພັກ​ໃຫ້​ປອດ​ໃສ, ໝັ້ນຄົງ​ເຂັ້ມ​ແຂງ, ຍົກ​ສູງ​ຄວາມ​ສາມາດ​ນຳພາ ​ແລະ ກຳລັງ​ແຮງ​ສູ້​ຮົບ​ຂອງ​ພັກ” ມີ​ເນື້ອ​ໃນ​ຍາວ​ກວ່າ​ໝູ່​ (ຫົວ​ຂໍ້​ກໍ່ສ້າງ​ພັກ​ຍາວ​ກວ່າ 35 ໜ້າ, 14 ຫົວ​ຂໍ້​ທີ່​ຍັງ​ເຫຼືອ​ຍາວ 123 ໜ້າ) ຊຶ່ງ​ສະ​ແດງ​ເຖິງ​ບົດບາດ ທີ່​ຕັ້ງ​ສຳ​ຄັນ​ຂອງ​ວຽກ​ງານ​ກໍ່ສ້າງ​ພັກ​ຢູ່​ໃນ​ລາຍ​ງານ​ການ​ເມືອງທີ່ກອງ​ປະຊຸມ​ໃຫຍ່​ຄັ້ງ​ທີ XII ​ແລະ ​ໃນ​ພາລະກິດ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ​ຫວຽດນາມສັງຄົມ​ນິຍົມ. 3- ກອງ​ປະຊຸມ​ໃຫຍ່​ຄັ້ງ​ທີ XII ກຳນົດ 6 ໜ້າ​ທີ່​ຈຸດ​ໜັກ​ໃຈກາງ​ໃນ​ທົ່ວ​ທັງ​ສະ​ໄໝ, ​ໃນນັ້ນ 2 ໜ້າ​ທີ່​ທຳ​ອິດ​ແມ່ນ​ກ່ຽວ​ກັບ​ວຽກ​ງານ​ກໍ່ສ້າງ​ພັກ, ກໍ່ສ້າງ​ລະບົບ​ການ​ເມືອງ, ນັ້ນ​ແມ່ນ: ກ- ​ເພີ່ມ​ທະວີ​ການ​ກໍ່ສ້າງ​ ປັບປຸງ​ພັກ; ກີດ​ກັ້ນ, ຍູ້​ຖອຍ​ຄວາມ​ເສື່ອ​ມ​ໂຊ​ມທາງ​ດ້ານ​ການ​ເມືອງ​ແນວ​ຄິດ, ຄຸນສົມບັດ, ​ແບ​ບແຜນດຳລົງ​ຊີວິດ, ປະກົດ​ການ “ຫັນປ່ຽນ​​ໂດຍ​ຕົນ​ເອງ”, “ປ່ຽນ​ແປງ​ໂດຍ​ຕົນ​ເອງ” ຢູ່​ພາຍ​ໃນ​ພັກ. ສຸມ​ໃສ່​ກໍ່ສ້າງ​ຖັນ​ແຖວພະນັກງານ, ​ເປັນ​ຕົ້ນ​ແມ່ນ​ຖັນ​ແຖວ​ພະນັກງານ​ຂັ້ນ​ຍຸດ​ທະ​ສາດ, ​ໃຫ້​ມີ​ຄວາມ​ສາມາດ ຄຸນ​ທາດ ​ແລະ ອິດ​ທິພົນ​ຢ່າງ​ພຽງພໍ, ທຽບ​ເທົ່າ​ກັບ​ລະດັບ​ໜ້າ​ທີ່. ຂ- ກໍ່ສ້າງ​ການຈັດ​ຕັ້ງ​ກົງຈັກ​ຂອງ​ລະບົບ​ການ​ເມືອງທັງ​ໝົດ​ໃຫ້​ມີຄວາ​ມ​ກະທັດຮັດ, ​ເຄື່ອນ​ໄຫວ​ມີ​ຄວາມ​ສັກສິດ ມີ​ປະສິດທິ​ຜົນ; ຍູ້​ແຮງ​ການ​ຕໍ່ສູ້​ປ້ອງ​ກັນ ​ແລະ ຕ້ານການ​ສໍ້​ລາດ​ບັງ​ຫຼວງ, ຄວາມຟຸມ​ເຟືອຍ, ພະຍາດອາດຍາ​ສິດ.

ທີ​ສອງ, ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກກຳນົດ​ທິດ​ທາງ​ລວມກ່ຽວ​ກັບ​ວຽກ​ງານ​ກໍ່ສ້າງ​ພັກ​ໃນ​ສະ​ໄໝ​ປະຈຳ​ການ​ທັງ​ສະ​ໄໝ​ຄື: “​ໃນ​ຊຸມ​ປີ​ສະ​ເພາະ​ໜ້າ, ລະດັບ​ຄາດໝາຍ​ແລະໜ້າ​ທີ່​ອັນ​ໜັກໜ່ວງຂອງ​ສະ​ໄໝ​ແຫ່ງ​ການ​ພັດທະນາ​ໃໝ່ ຮຽກຮ້ອງ​ໃຫ້​ຕ້ອງ​ຍູ້​ແຮງ​ວຽກ​ງານ​ກໍ່ສ້າງ​ພັກ​ຍິ່ງ​ກວ່າ​ອີກ ຊຶ່ງ​ຈຸດ​ໜັກ​ໃຈກາງ​ແມ່ນ​ເດັດດ່ຽວ, ຕັ້ງ​ໝັ້ນ​ສືບ​ຕໍ່​ປະຕິບັດ​ມະຕິ​ກອງ​ປະຊຸມ​ສູນ​ກາງພັກ​ຄັ້ງ​ທີ 4 ສະ​ໄໝ​ທີ XI ວ່າ​ດ້ວຍ​ບາງ​ບັນຫາ​ອັນ​ຮີບ​ດ່ວນ​ກ່ຽວ​ກັບ​ການ​ກໍ່ສ້າງ​ພັກ​ໃນ​ປັດ​ຈຸ​ບັນ”. ການ​ທີ່ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກກຳນົດ​ວ່າ​ຕ້ອງສືບ​ຕໍ່​ປະຕິບັດ​ມະຕິ​ກອງ​ປະຊຸມ​ສູນ​ກາງພັກ​ຄັ້ງ​ທີ 4 ສະ​ໄໝ​ທີ XI ກ່ຽວ​ກັບ​ການ​ກໍ່ສ້າງ​ພັກ​ນັ້ນ ມັນສະ​ແດງ​ໃຫ້​ເຫັນ​ເຖິງ​ຄວາມ​ຕັດສິນ​ໃຈ​ການ​ເມືອງ​ຂອງ​ທົ່ວພັກ, ຂອງ​ທົ່ວ​ທັງ​ລະບົບ​ການ​ເມືອງ ຕໍ່​ກັບ​ໜ້າ​ທີ່​ກໍ່ສ້າງ ປັບປຸງ​ພັກ, ​ແລະ ຖື​ວ່າ​ອັນ​ນັ້ນ​ທັງ​ເປັນ​ໜ້າ​ທີ່​ຈຸດ​ໜັກ​ໃຈກາງ ພື້ນຖານ, ທັງ​ເປັນ​ໜ້າ​ທີ່​ທີ່ເປັນ​ປະຈຳ ຍາວ​ນານ ​ຂອງ​ວຽກ​ງານ​ກໍ່ສ້າງ​ພັກ​ໃນ​ສະພາບ​ການປັດຈຸບັນ; ​ແກ້​ໄຂ​ຜ່ານຜ່າຄວາມ​ຈຳກັດ ຂໍ້​ຂາດ​ຕົກ​ບົກພ່ອງ​ຈຳນວນ​ໜຶ່ງ ​ແລະ ວຽກ​ງານ​ບາງ​ຢ່າງ​ທີ່​ບໍ່​ບັນລຸ​ໄດ້​ຕາມ​ເປົ້າ​ໝາຍທີ່​ມະຕິວາງອອກ​ມາ.

ທີ​ສາມ, ຄະນະ​ບໍລິຫານ​ງານ​ສູນ​ກາງ​ພັກ​ຊຸດ​ທີ XII ​ໄດ້​ຫັນສອງ​ໜ້າ​ທີ່​ຈຸດ​ໜັກ​ໃຈກາງ​ກ່ຽວ​ກັບ​ການ​ກໍ່ສ້າງ​ພັກ, ກໍ່ສ້າງ​ລະບົບ​ການ​ເມືອງ ​ເປັນ​ລະອຽດ​ເປັນ 3 ​ໂຄງການ​ໃນ​ແຜນການ​ເຮັດ​ວຽກ​ທັງ​ໝົດ​ຂອງ​ສູນ​ກາງ ​ເພື່ອ​ສະ​ເໜີ​ຕໍ່​ບັນດາ​ກອງ​ປະຊຸມ​ສູນ​ກາງ​ພັກ​ສະ​ໄໝ​ທີ XII, ນັ້ນ​ຄື: 1- ​ເພີ່ມ​ທະວີ​ການ​ກໍ່ສ້າງ ປັບປຸງ​ພັກ, ກີດ​ກັ້ນ ຍູ້​ຖອຍ​ຄວາມ​​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ກຳ​ລົງ​ຊີວິດ​ໃນ​ພັກ, ບັນດາ​ປະກົດ​ການ “ຫັນປ່ຽນ​​ໂດຍ​ຕົນ​ເອງ”, “ປ່ຽນ​ແປງ​ໂດຍ​ຕົນ​ເອງ” ຢູ່​ພາຍ​ໃນ​ພັກ (​ໂຄງການ​ທີ່​ຈະ​ສະ​ເໜີ​ຕໍ່​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4, ​ເດືອນຕຸລາ 2016). 2- ສືບ​ຕໍ່​ປ່ຽນ​ແປງ​​ໃໝ່​ແບບ​ວິທີ​ການ​ນຳພາ​ຂອງ​ພັກ, ຕິດ​ກັບ​​ກໍ່ສ້າງການຈັດ​ຕັ້ງ​ກົງຈັກ​ຂອງລະບົບ​ການ​ເມືອງທັງໝົດ​ ໃຫ້​ມີຄວາ​ມ​ກະທັດຮັດ, ​ເຄື່ອນ​ໄຫວ​ມີ​ຄວາມ​ສັກສິດ ມີ​ປະສິດທິ​ຜົນ; ຍູ້​ແຮງ​ການ​ຕໍ່ສູ້​ປ້ອງ​ກັນ​​ແລະຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ, ພະຍາດ​ອາດຍາ​ສິດ (ໂຄງການ​ທີ່​ຈະ​ສະ​ເໜີ​ຕໍ່​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6, ​ເດືອນ​ຕຸລາ 2017). 3- ສຸມ​ໃສ່​ກໍ່ສ້າງ​ຖັນ​ແຖວ​ພະນັກງານ, ​ເປັນ​ຕົ້ນ​ແມ່ນ​ຖັນ​ແຖວ​ພະນັກງານ​ຂັ້ນຍຸດ​ທະ​ສາດ, ​ໃຫ້ມີ​ຄວາມ​ສາມາດ ຄຸນ​ທາດ ​ແລະ ອິດ​ທິພົນ​ຢ່າງພຽງພໍ, ທຽບ​ເທົ່າ​ກັບ​ລະດັບ​ໜ້າ​ທີ່ (​ໂຄງການ​ທີ່​ຈະ​ສະ​ເໜີ​ຕໍ່​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 7, ​ເດືອນພຶດສະພາ 2018).

ທີ​ສີ່, ມະຕິກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກກຳນົດ 10 ໜ້າ​ທີ່​ກ່ຽວ​ກັບ​ການ​ກໍ່ສ້າງ​ພັກ, ​ຊຶ່ງໄດ້​ເພີ່ມ​ເຕີມ 2 ໜ້າ​ທີ່​ໃໝ່​ທຽບ​ກັບ​ກອງ​ປະຊຸມ​ໃຫຍ່​ຄັ້ງ​ທີ XI, ນັ້ນ​ຄື:

1- ສືບ​ຕໍ່​ປ່ຽນ​ແປງ​ໃໝ່, ຍົກສູງ​ປະສິດທິ​ຜົນ​ຂອງ​ວຽກ​ງານ​ຂົນຂວາຍ​ປະຊາຊົນ, ​ເພີ່ມ​ທະວີ​ຄວາມ​ພົວພັນ​ສະໜິດ​ແໜ້ນ​ລະຫວ່າງ​ພັກ ກັບ​ປະຊາຊົນ. ​ໃນກອງ​ປະຊຸມ​ໃຫຍ່​ຄັ້ງ​ທີ XI ຍັງ​ບໍ່​ທັນ​ມີ​ຫົວ​ຂໍ້​ສະ​ເພາະ​ກ່ຽວ​ກັບ​ວຽກ​ງານ​ຂົນຂວາຍ​ປະຊາຊົນ ຊຶ່ງ​ໃນ​ຂະນະ​ນັ້ນວຽກ​ງານ​ຂົນຂວາຍ​ປະຊາຊົນ​ມີ​ຄວາມ​ຈຳກັດ​ຫຼາຍ​ດ້ານ. ການ​ກໍ່ສ້າງ, ​ເປັນ​ຕົ້ນ​ແມ່ນການ​ຜັນ​ຂະຫຍາຍ​ປະຕິບັດບັນດາ​ມະຕິ, ຄຳ​ສັ່ງຂອງ​ພັກ​ກ່ຽວ​ກັບ​ວຽກ​ງານ​ຂົນຂວາ​ຍປະຊາຊົນ ກໍ​ຍັງ​ບໍ່​ທັນທັນ​ການ, ມີ​ປະສິດທິ​ຜົນ​ໜ້ອຍ; ການ​ຕີ​ລາຄາ, ຄາດ​ຄະ​ເນສະພາບ​ຄວາມປ່ຽ​ນແປງ​ໂຄງ​ປະກອບ​ສັງຄົມ, ພາກສ່ວນ​ພົນລະ​ເມືອງ, ​​ແນວ​ຄິດ​ຈິດ​ໃຈ ຄວາມ​ປາຖະໜາ​ຂອງ​ບັນດາ​ຊັ້ນ​ຄົນ​ປະຊາຊົນ... ກໍຍັງ​ບໍ່​ທັນຊັດ​ເຈນ ​​ດັ່ງນັ້ນ ​ແຜນ​ນະ​ໂຍບາຍ, ນະ​ໂຍບາຍ ​ແລະ ມາດ​ຕະການ​ຈຶ່ງ​ບໍ່ແທດ​ເໝາະກັບ​ສະພາບ​ຕົວ​ຈິງ. ​ເລີ່ມ​ຈາກ​ທີ່​ຕັ້ງອັນ​ສຳຄັນ ​ແລະ ​ຄວາມ​ເປັນ​ຈິງ​ຂອງ​ວຽກ​ງານ​ຂົນຂວາຍ​ປະຊາຊົນ​ໃນ​ສະພາບ​ການ​ປັດຈຸບັນ, ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ມີ​ຫົວ​ຂໍ້​ສະ​ເພາະ​ກ່ຽວ​ກັບ​ວຽກ​ງານ​ຂົນຂວາຍ​ປະຊາຊົນ, ​ເພື່ອ​ແນ​ໃສ່​ຫັນ​ເປັນ​ລະອຽດ​ແລະປະຕິ​ບັດ ​ລັດຖະທຳ​ມະນູນ​ປີ 2013 ກ່ຽວ​ກັບ​ການ​ເພີ່ມ​ທະວີ​ສາຍ​ພົວພັນ​ສະໜິດ​ແໜ້ນ​ລະຫວ່າງ​ພັກ​ກັບ​ປະຊາຊົນ ​ແລະ ສື​ບຕໍ່​ຍູ້​ແຮງ​ການ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 7 ສະ​ໄໝ​ທີ XI ວ່າດ້ວຍ “​ເພີ່ມ​ທະວີ ​ແລະ ປ່ຽນ​ແປງ​ໃໝ່ການ​ນຳພາ​ຂອງ​ພັກ​ຕໍ່​ກັບ​ວຽກ​ງານ​ຂົນຂວາຍ​ປະຊາຊົນ​ໃນ​ສະພາບ​ການ​ໃໝ່”.

ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ວາງ​ວິທີ​ແກ້​ໄຂ​ໃໝ່​ຈຳນວນ​ໜຶ່ງ​ເພື່ອ​ປະຕິບັດ​ເນື້ອ​ໃນ​ນີ້: ທີ​ໜຶ່ງ, ປັບປຸງ​ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ກັບ​ພັກ, ​ເພື່ມທະວີ​ກຸ່ມ​ກ້ອມ​ມະຫາ​ສາມັກຄີ​ປວງ​ຊົນ​ທັງ​ຊາດ ​ແລະ ຄວາມ​ພົວພັນ​ສະໜິດ​ແໜ້ນ​ລະຫວ່າງ​ພັກ​ແລະປະຊາຊົນ; ​ແກ້​ໄຂ​ຄວາມ​ຂ້ອງ​ໃຈ, ຂໍ້​ສະ​ເໜີ​ທີ່​ສົມ​ເຫດ​ສົມ​ຜົນ​ຂອງ​ປະຊາຊົນ ​ແລະ ຄວາມຮ້ອງທຸກ, ກ່າວຟ້ອງຂອງ​ພົນລະ​ເມືອງ ​ຢ່າງ​ທັນ​ການ, ມີ​ປະສິດທິ​ຜົນ. ທີ​ສອງ, ປ່ຽນ​ແປງ​ໃໝ່​ແບບ​ວິທີ​ການ​ນຳພາ​ຂອງ​ພັກ​ກ່ຽວ​ກັບ​ວຽກ​ງານ​ຂົນຂວາຍ​ປະຊາຊົນ​ ໃນ​ເງື່ອນ​ໄຂ​ພັດທະນາ​ເສດຖະກິດ​ຕະຫຼາດ​ກຳນົດ​ທິດສັງຄົມ​ນິຍົມ ​ແລະ ​ເຊື່ອມ​ໂຍງ​ສາກົນ. ຖັນ​ແຖວ​ພະນັກງານ, ສະມາຊິກ​ພັກ​ຕ້ອງ​ເຊື່ອ​ປະຊາຊົນ, ນັບຖື​ປະຊາຊົນ, ​ໃກ້ຊິດ​ກັບ​ປະຊາຊົນ, ​ເຂົ້າ​ໃຈ​ປະຊາຊົນ, ຮ່ຳຮຽນ​ນຳ​ປະຊາຊົນ, ອີງ​ໃສ່​ປະຊາຊົນ, ມີ​ຄວາມ​ຮັບຜິດຊອບ​ຕໍ່ປະຊາຊົນ. ທີ​ສາມ, ສືບ​ຕໍ່​ຫັນ​ສາຍ​ພົວພັນ “ພັກ​ນຳພາ, ລັດ​ຄຸ້ມ​ຄອງ, ປະຊາຊົນ​ເປັນ​ເຈົ້າ” ​ແລະ ທິດ​ນຳ “ປະຊາຊົນ​ຮູ້, ປະຊາຊົນ​ປຶກສາ​ພິຈາລະນາ, ປະຊາຊົນ​ເຮັດ, ປະຊາຊົນ​ກວດກາ”​​ ​ໃຫ້ເປັນ​ນິຕິ​ກຳ, ​ເປັນອັນ​ລະອຽດ, ​ເປັນ​ຕົ້ນ​ແມ່ນ​ເນື້ອ​ໃນ​ປະຊາຊົນ​ເປັນ​ເຈົ້າ.

2- ຍູ້​ແຮງ​ການ​ຕໍ່​ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ. ຢູ່​ກອງ​ປະຊຸມ​ໃຫຍ່​ຄັ້ງ​ທີ XI, ວຽກ​ງານການ​ຕໍ່​ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ ​ໄດ້​ລະບຸ​ໃນ​ພາກ​ກໍ່ສ້າງ​ລັດ​ແຫ່ງ​ອຳນາດ​ກົດໝາຍສັງຄົມ​ນິຍົມ. ຢູ່​ກອງ​ປະຊຸມ​ໃຫຍ່​ຄັ້ງ​ທີ XII, ບັນຫາການ​ຕໍ່​ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ ​ໄດ້​ລະບຸ​ໃນ​ສອງ​ພາກຄື ​ກໍ່ສ້າງ​ລັດ ​ແລະ ກໍ່ສ້າງ​ພັກ, ​ເພື່ອ​ແນ​ໃສ່​ເພີ່ມ​ທະວີ​ການ​ນຳພາ​ຂອງ​ພັກ​ຕໍ່ກັບ​ການ​ຕໍ່ສູ້ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ.

ລາຍ​ງານ​ການ​ເມືອງ​​ໃນກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ໄດ້​ຊີ້​ໃຫ້​ເຫັນຄວາມ​ຈິງ​ຄື: ຫຼາຍ​ຄະນະ​ພັກ, ອຳນາດ​ການ​ປົກຄອງຢູ່​ຫຼາຍ​ແຫ່ງ ​ປະຕິບັດ​ບົດບາດ​ຊີ້​ນຳ​ນຳພາ, ຄຸ້ມ​ຄອງ, ປະຕິບັດ​ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຕ້ານຄວາມ​ຟຸມ​ເຟືອ ​ຍັງ​ບໍ່​ທັນ​ດີ​ເທື່ອ; ຍັງ​ບໍ່​ທັນ​ເສີມ​ຂະຫຍາຍ​ກຳລັງ​ແຮງ​ສັງ​ລວມຂອງ​ລະບົບ​ການ​ເມືອງ, ຂອງ​ປະຊາຊົນ ​ໃນ​ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຄວາມ​ຟຸມ​ເຟືອຍ. ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຄວາມ​ຟຸມ​ເຟືອຍ ບໍ່​ບັນລຸ​ໄດ້​ຕາມ​ເປົ້າໝາຍ, ຄວາມ​ຮຽກຮ້ອງ​ຕ້ອງການ.

ຈາກ​ສະພາບ​ການ​ດັ່ງ​ກ່າວ, ລາຍງານ​ການ​ເມືອງ​ໃນກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ກຳນົດ​ແຈ້ງວ່າ: ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ແມ່ນ​ນ້າ​ທີ່ສຳຄັນ ​ເປັນ​ປະຈຳ ​ພ້ອມ​ນັ້ນ​ກໍ​ເປັນ​ໜ້າ​ທີ່​ທີ່​ຫຍຸ້ງຍາກ ສັບສົນ ຍາວ​ນານ. ບັນດາ​ຄະນະ​ພັກ, ກ່ອນ​ອື່ນ​ແມ່ນ​ຜູ້ນຳ​ໜ້າ​ຄະນະ​ພັກ, ອຳນາດ​ການ​ປົກຄອງ ​ແລະ ລະບົບ​ການ​ເມືອງ​ທັງ​ໝົດ ຕ້ອງ​​ເດັດດ່ຽວ​ຕໍ່ສູ້​ປ້ອງ​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ; ​ແກ້​ໄຂ​ລົງ​ໂທດ​ຢ່າງ​ທັນ​ການ ​ເຂັ້ມ​ງວດ​ຕໍ່​ການ​ກະທຳ​ສໍ້​ລາດ​ບັງ​ຫຼວງ ຟຸມ​ເຟືອຍ, ຕໍ່ການ​ປິດ​ບັງ ​ເຊື່ອງອຳ ປ່ອຍ​ມື​ໃຫ້ການ​ກະທຳ​ສໍ້​ລາດ​ບັງ​ຫຼວງ ຟຸມ​ເຟືອຍ, ຕໍ່ການ​ແຊກ​ແຊງ ກີດ​ກັ້ນ​ວຽກ​ງານ​ຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ.

ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາງວິທີ​ແກ້​ໄຂ​ໃໝ່​ຈຳນວນ​ໜຶ່ງ​ເພື່ອ​ປະຕິບັດ​ເນື້ອ​ໃນ​ດັ່ງກ່າວ​ຄື​ດັ່ງນີ້: 

- ບູລະນະ​ຂໍ້​ກຳນົດ​ຕ່າງໆ​ຂອງ​ພັກ, ບັນດາ​ນະ​ໂຍບາຍ, ກົ​ດໝາຍ​ຂອງ​ລັດ ​ເພື່ອ​ຮັບປະກັນ​ໃຫ້​ວຽກ​ງານ​ປ້ອງ​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ຕ້ານຄວາມ​ຟຸມ​ເຟືອຍ ມີ​ຄວາມ​ສັກສິດ ມີ​ປະສິດທິ​ຜົນ, ​ເປັນ​ຕົ້ນ​ແມ່ນ​ຢູ່​ໃນ​ບັນດາ​ຂົງ​ເຂດ​ທີ່​ອາດ​ຈະ​ເກີດ​ການ​ສໍ້​ລາດ​ບັງ​ຫຼວງ​ຫຼາຍ​ເຊັ່ນ ຄຸ້ມ​ຄອງ​ແລະ​ນຳ​ໃຊ້​ທີ່​ດິນ, ຂຸດ​ຄົ້ນ​ຊັບພະຍາກອນ​ທຳ​ມະ​ຊາດ, ຊັບພະຍາກອນ​​ແຮ່​ທາດ, ການ​ຮັບ ຈ່າຍ​ງົບປະມານ ​ແລະ ການຈັດ​ຊື້ພາກ​ລັດ, ການ​ປະຕິບັດ​ບັນດາ​ໂຄງການ​ລົງທຶນ​ກໍ່ສ້າງ​ພື້ນຖານ,...

- ​ເດັດດ່ຽວ, ຕັ້ງ​ໝັ້ນ​ກໍ່ສ້າງ​ກົນ​ໄກ​ປ້ອງ​ກັນ ​ເພື່ອ​ບໍ່​ອາດ​ກິນ​ສິນ​ບົນ ບໍ່​ອາດສໍ້​ລາດ​ບັງ​ຫຼວງ; ກົນ​ໄກ​ບອກ​ເຕືອນ ລົງ​ໂທດ ​ເພື່ອ​ບໍ່​ກ້າ​ກິນ​ສິນ​ບົນ ບໍ່​ກ້າສໍ້​ລາດ​ບັງ​ຫຼວງ.

- ປະຕິບັດ​ຢ່າງ​ເຂັ້ມ​ງວດ​ຂໍ້​ກຳນົດ​ກ່ຽວ​ກັບ​ການ​ລາຍ​ງານ​ໄລ່​ລຽງ​ຊັບ​ສິນ, ກວດກາ​ການ​ລາຍ​ງານ​ໄລ່​ລຽງ​ຊັບ​ສິນ ລາຍ​ໄດ້​ຂອງ​ພະນັກງານ​ ລັດຖະກອນ, ​ເປັນ​ຕົ້ນ​ແມ່ນ​ພະນັກງານ​ນຳພາ ຄຸ້ມ​ຄອງ; ຈຳກັດ​ການ​ແລກປ່ຽນ​ຊຳລະ​ດ້ວຍ​ເງິນສົດ.

ທີ​ຫ້າ, ນອກຈາກ 2 ໜ້າ​ທີ່​ໃໝ່​ທີ່​ຫາ​ກໍ່​ໄດ້​ເພີ່ມ​ເຕີມ ທຽບ​ກັບກອງ​ປະຊຸມ​ໃຫຍ່​ຄັ້ງ​ທີ XI ​ແລ້ວ, 8 ໜ້າ​ທີ່​ທີ່​ຍັງ​​ເຫຼືອກ່ຽວ​ກັບ​ວຽກ​ງານ​ກໍ່ສ້າງ​ພັກ​ນັ້ນ ລ້ວນ​ແຕ່​ໄດ້​ເພີ່ມ​ເຕີມ, ພັດທະນາ ​ແລະ ​ເນັ້ນ​ໜັກ​ກວ່າ​ອີກ. ລະອຽດ​ຄື:

1- ​ເອົາ​ໃຈ​ໃສ່​ກໍ່ສ້າງ​ພັກ​ທາງ​ດ້ານ​ການ​ເມືອງ.

​ເອກະສານກອງ​ປະຊຸມ​ໃຫຍ່​ຄັ້ງ​ທີ XI ຍົກ​ບັນຫາ “ກໍ່ສ້າງ​ພັກ​ທາງ​ດ້ານ​ການ​ເມືອງ”. ຕໍ່ໜ້າ​ຄວາມຈຳກັດ​ຕ່າງໆ ​ເຊັ່ນ, ການ​ຫັນ​ເປັນ​ນິຕິ​ກຳ, ກໍ່ສ້າງ​ແຜນການ​ປະຕິບັດ​ງານ ​ແລະ ຈັດ​ຕັ້ງ​ປະຕິບັດ​ມະຕິ ຄຳ​ສັ່ງ ຂໍ້​ກຳນົດ ຂໍ້​ສະຫລຸບ​ຂອງ​ພັກ ຍັງ​ບໍ່​ທັນ​ທັນ​ການ ຄົບ​ຊຸດ ​ລະອຽດຕົວ​ຈິງ ​ແລະ ປະສິດທິ​ຜົນ​ກໍ​ບໍ່​ສູງ; ຄວາມ​ສາມາດ​ນຳພາ ​ແລະ ກຳລັງ​ແຮງ​ສູ້​ຮົບຂອງ​ອົງການ​ຈັດ​ຕັ້ງ​ພັກ​ຢູ່​ຫຼາຍ​​ແຫ່ງ​ຍັງ​ຕ່ຳ...; ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ເພີ່ມ​ເຕີມ ​ແລະ ​ເນັ້ນ​ໜັກ: “ເອົາ​ໃຈ​ໃສ່​ກໍ່ສ້າງ​ພັກ​ທາງ​ດ້ານ​ການ​ເມືອງ”.

ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາງ​ວິທີ​ແກ້​ຈຳນວນ​ໜຶ່ງ​ເພື່ອ​ປະຕິບັດ: ທີ​ໜຶ່ງ, ຢຶດໝັ້ນ​ບັນດາ​ບັນຫາ​ທີ່​ມີ​ລັກສະນະ​ຫຼັກການ​ໃນ​ການ​ກໍ່ສ້າງ​ພັກ. ຍົກ​ສູງ​ຄວາມ​ສາມາດ​ກຳ​ອຳນາດ​ຂອງ​ພັກ ​ແລະ ຮັບປະກັນ​ການ​ນຳພາ​ໃຫ້​ມີ​ຄວາມ​ສັກສິດ, ມີ​ປະສິດທິ​ຜົນ; ຮັກສາ​ຄຸນ​ທາດ​ຫຼັກ​ຂອງ​ພັກ, ຂອງ​ບັນດາອົງ​ການຈັດ​ຕັ້ງ​ພັກ, ຂອງ​ພະນັກງານ ສະມາຊິກ​ພັກ. ທີ​ສອງ, ຍົກ​ສູງ​ຄວາມ​ສາມາດ​ວາງ​ກຳນົດ​ແນວທາງ, ນະ​ໂຍບາຍ​ທີ່​ສອດຄ່ອງ​ກັບ​ກົດ​ເກນ​ພາວະ​ວິ​ໄສ ​ແລະ ຈຸດ​ພິ​ເສດ​ຂອງ​ຫວຽດນາມ, ສ້າງ​ບາດກ້າວ​ບຸກທະ​ລຸ​ເພື່ອ​ການ​ພັດທະນາ. ທີ​ສາມ, ບູລະນະ​ກົນ​ໄກ, ກົດ​ລະບຽບ ​ແລະ ຈັດ​ຕັ້ງ​ປະຕິບັດການ​ຕິ​ຊົມ​ຕົນ​ເອງ ​ແລະ ຕິ​ຊົມ, ການຊັກ​ຖາມ​ໃນ​ກອງ​ປະຊຸມ​ຕ່າງໆ​ ຂອງ​ຄະນະ​ບໍລິຫານ​ງານ​ສູນ​ກາງ, ຄະນະ​ພັກ, ຄະນະ​ປະຈຳການ​ຂອງ​ຄະນະ​ພັກ​ຂັ້ນ​ຕ່າງໆ ຢ່າງ​ເຂັ້ມ​ງວດ, ມີ​ປະສິດທິ​ຜົນ. ທີ​ສີ່, ກໍ່ສ້າງ ​ແລະ ຈັດ​ຕັ້ງ​ປະຕິບັດ​ຢ່າງ​ມີ​ປະສິດທິ​ຜົນກົນ​ໄກ​ເສີມ​ຂະຫຍາຍ​ບົດບາດ​ຂອງ​ປະຊາຊົນ​ໃນ​ການ​ເຂົ້າ​ຮ່ວມ​ການ​ກໍ່ສ້າງ​ພັກ, ກໍ່ສ້າງ​ອຳນາດ​ການ​ປົກຄອງ.

2- ປ່ຽນ​ແປງ​ໃໝ່​ວຽກ​ງານ​ແນວ​ຄິດ, ທິດ​ສະ​ດີ.

ກອງ​ປະຊຸມ​ໃຫຍ່​ຄັ້ງ​ທີ XI ລະບຸ: “ຍົກ​ສູງ​ຄຸນ​ນະພາ​ບ ​ແລະ ປະສິດທິ​ຜົນ​ຂອງ​ວຽກ​ງານ​ແນວ​ຄິດ, ທິດ​ສະ​ດີ”. ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ເພີ່ມ​ເຕີມ ​ແລະ ​ເນັ້ນ: “ປ່ຽນ​ແປງ​ໃໝ່​ວຽກ​ງານ​ແນວ​ຄິດ, ທິດ​ສະ​ດີ”. ຕ້ອງ​ປ່ຽນ​ແປງ​ໃໝ່​ວຽກ​ງານ​ນີ້​ຍ້ອນ​ຄວາມ​ຮຽກຮ້ອງ​ຕ້ອງການ​ຈາກ​ສະພາບ​ການ​ຕົວ​ຈິງ ຊຶ່ງ​ຄຸນ​ນະພາ​ບ ​ແລະ ປະສິດທິ​ຜົນ​ຂອງ​ວຽກ​ງານ​ແນວ​ຄິດ ທິດ​ສະ​ດີ​ຍັງ​ບໍ່​ທັນ​ສູງ, ຍັງ​ບໍ່​ທັນ​ຫຼັກແຫຼມ​ ​ແລະ ​ແຮງ​ດຶງ​ດູດ​ໃຈ​ກໍ​ຍັງ​ຕ່ຳ; ວຽກ​ງານ​ສະຫລຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ​ ບໍ່​ຕອບ​ສະໜອງ​ໄດ້​ກັບ​ຄວາມ​ຕ້ອງການ​ຂອງ​ພາລະກິດ​ການ​ປ່ຽນ​ແປງ​ໃໝ່; ວິທີ​ການ​ສິດສອນ ຮ່ຳຮຽນ​ທິດ​ສະ​ດິການ​ເມືອງ ​ຍັງ​ຫຼ້າ​ຫຼັງ...

​ເພື່ອ​ປະຕິບັດ​ໜ້າ​ທີ່​ນີ້​ໄດ້​ຮັບ​ຜົນ​ດີ, ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາງ​ວິທີ​ແກ້​ໄຂ​ໃໝ່​ຈຳນວນ​ໜຶ່ງ​ເພື່ອ​ປະຕິບັດ: ທີ​ໜຶ່ງ, ສືບ​ຕໍ່​ປ່ຽນ​ແປງ​ໃໝ່​ເນື້ອ​ໃນ ​ແລະ ​ແບບ​ວິທີຂອງ​ວຽກ​ງານ​​ແນວ​ຄິດ, ຍົກ​ສູງ​ລັກສະນະ​ສູ້​ຮົບ, ລັກສະນະ​ດຶງ​ດູດຈັບ​ໃຈ, ປະສິດທິ​ຜົນ​ຂອງ​ວຽກ​ງານ​ແນວ​ຄິດ ທີ່​ຮັບ​ໃຊ້​​ໃຫ້​ແກ່​ຄວາມຮຽກຮ້ອງ​ຕ້ອງການ​ປະຕິບັດ​ໜ້າ​ທີ່​ການ​ເມືອງ, ສອດຄ່ອງ​ກັບ​ແຕ່ລະ​ໄລຍະ, ສ້າງ​ຄວາມ​ເປັນ​ເອກະ​ພາບ​ສູງ​ໃນ​ພັກ, ຄວາມ​ເຫັນ​ດີ​ເຫັນ​ພ້ອມ​ໃນ​ສັງຄົມ. ທີ​ສອງ, ຍູ້​ແຮງ​ການ​ໂຄສະນາ​ເຜີຍ​ແຜ່, ຮ່ຳຮຽນ​ລັດທິ​ມາກ - ​ເລ​ນິນ, ​ແນວ​ຄິດ​ໂຮ່ຈິ​ມິນ, ທັດສະນະ ​ແນວທາງ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ ທີ່​ສອດ​ຄ່ອງ​ກັບ​ແຕ່ລະ​ເປົ້າ​ໝາຍ ຕາມ​ທິດ​ລະອຽດ, ​ແທດ​ຈິ​ງ ​ແລະ ມີ​ປະສິດທິ​ຜົນ. ທີ​ສາມ, ສືບ​ຕໍ່​ປ່ຽນ​ແປງ​ໃໝ່​ຈິນຕະນາການ​ທິດ​ສະ​ດີ; ຍູ້​ແຮງ​ວຽກ​ງານ​ສະຫລຸບ​ສັງ​ລວມພຶດຕິ​ກຳ, ຄົ້ນຄວ້າ​ວິທະຍາສາດ, ສະໜອງ​ຫຼັກ​ຖານ​ວິທະຍສາດ, ທິດ​ສະ​ດີ​ໃຫ້​ແກ່​ການວາງ​ກຳ​ນົດ ຂະຫຍາຍ​ແນວທາງ ​ແຜນ​ນະ​ໂຍບາຍ ນະ​ໂຍບາຍ​ຂອງ​ພັກ, ກົດໝາຍ​ຂອງ​ລັດ (ຈຸດ​ໃໝ່​ຄື ​ເອົາ​ການ​ສະຫລຸບ​ສັງ​ລວມພຶດຕິ​ກຳ​ຂຶ້ນ​ເທິງ​ການ​ຄົ້ນຄວ້າ​ທິດ​ສະ​ດີ). ທີ​ສີ່, ປະຕິບັດ​ການ​ອົບຮົມ​ສຶກສາທິດ​ສະ​ດີ, ບຳລຸງ​ຄວາມ​ຮູ້ໃໝ່​ໃຫ້​ພະນັກງານ ສະມາຊິກ​ພັກ​ຢ່າງ​ເປັນ​ປະຈຳ, ​ເປັນ​ຕົ້ນ​ແມ່ນ​ພະນັກງານ​ການ​ນຳ ພະນັກງານຄຸ້ມ​ຄອງຂັ້ນ​ຕ່າງໆ, ພິ​ເສດ​ແມ່ນ​ຂັ້ນ​ສູນ​ກາງ.

3- ​ເພີ່ມ​ທະວີ​ການ​ຝຶກ​ຝົນ​ຫຼໍ່​ຫຼອມຄຸນສົມບັດ​ສິນ​ທຳ​ປະຕິວັດ, ຕ້ານ​ລັດທິ​ເອກະ​ຊົນ, ຕ້ານ​ການສວຍ​ໂອກາດ ​ແລະ ການຖື​ຜົນປະ​ໂຫຍດ​ເປັນ​ສຳຄັນ.

ກອງ​ປະຊຸມ​ໃຫຍ່​ຄັ້ງ​ທີ XI ລະບຸ: “ຝຶກ​ຝົນ​ຫຼໍ່​ຫຼອມຄຸນສົມບັດ​ສິນ​ທຳ​ປະຕິວັດ, ຕ້ານ​ລັດທິ​ເອກະ​ຊົນ”. ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ເພີ່ມ​ເຕີມ ​ແລະ ​ເນັ້ນ: “ຝຶກ​ຝົນ​ຫຼໍ່​ຫຼອມຄຸນສົມບັດ​ສິນ​ທຳ​ປະຕິວັດ, ຕ້ານ​ລັດທິ​ເອກະ​ຊົນ, ຕ້ານ​ການສວຍ​ໂອ​ກາດ ​ແລະ ການ​ຖື​ຜົນ​ປະ​ໂຫຍ​ດ​ເປັນ​ສຳຄັນ”. ນີ້​ແມ່ນ​ເນື້ອ​ໃນ​ໃໝ່​ທີ່​ສຳຄັນ​ທີ່​ສຸດ ​ເພື່ອປະຕິບັດ​ເປົ້າ​ໝາຍ “ກໍ່ສ້າງ​ພັກ​ໃຫ້​ປອດ​ໃສ, ໝັ້ນຄົງ​ເຂັ້ມ​ແຂງ​ທາງ​ດ້ານ​ການ​ເມືອງ​, ​ແນວ​ຄິດ, ການຈັດ​ຕັ້ງ ​ແລະ ຄຸນສົມບັດ”. ການ​ເພີ່ມ​ເຕີມ​ເນື້ອ​ໃນ​ກໍ່ສ້າງ​ພັກ​ທາງ​ດ້ານ​ຄຸນສົມບັດ​ສິນ​ທຳ ​ແມ່ນ​ບັນຫາ​ສຳຄັນ​ພິ​ເສດ​ໃນ​ສະພາບ​ການ​ປັດຈຸບັນ ຊຶ່ງ​ສະພາບ​ການ​ສໍ້​ລາດ​ບັງ​ຫຼວງ ຄວາມ​ຟຸມ​ເຟືອຍ​ຍັງ​​ເກີດ​ຂຶ້ນ​ຫຼາຍ ​ແລະສະ​ແດງ​ອອກ​ນັບ​ມື້​ນັບ​ສັບສົນ ​ເລິກ​ແລບ; ສະພາບ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ຂ​​ອງພະນັກງານ ສະມາຊິກ​ພັກ​ພາກສ່ວນ​ໜຶ່ງ​ ຍັງ​ບໍ່​ຖືກ​ຍູ້​ຖອຍ; ມີ​ດ້ານ, ມີ​ພາກສ່ວນ​ຍັງ​ສະ​ແດງ​ອອກ​ຢ່າງ​ສັບສົນ​ກວ່າ​ແຕ່​ກ່ອນ. ​ເພາະສະ​ນັ້ນ, ກອງ​ປະຊຸມ​ໃຫຍ່​ຄັ້ງ​ທີ XII ຈຶ່ງ​​ເນັ້ນວ່າ​ຕ້ອງ “ເພີ່ມ​ທະວີ​ການຝຶກ​ຝົນ​ຫຼໍ່​ຫຼອມຄຸນສົມບັດ​ສິນ​ທຳ​ປະຕິວັດ” ​ໃຫ້​ພະນັກງານ ສະມາຊິກ​ພັກ. ສິ່ງ​ດັ່ງກ່າວ​ສະ​ແດງ​ໃຫ້​​ເຫັນ​ເຖິງ​ຄວາມ​ຕັດສິນ​ໃຈ​ການ​ເມືອງ ​ຂອງ​ພັກກອມ​ມູນິດ​ຫວຽດນາມ ​ໃນ​ການ​ຕໍ່​ສູ້​ກີດ​ກັ້ນ ຍູ້​ຖອຍສະພາບ​ຄວາມ​ເສື່ອ​ມ​ໂຊມ​ທາງ​ດ້ານ​ການ​ເມືອງ​ແນວ​ຄິດ, ຄຸນສົມບັດ, ​ແບບ​ແຜນ​ດຳລົງ​ຊີວິດ ​ແລະ ບັນດາ​ປະກົດ​ການ “ຫັນປ່ຽນ​​ໂດຍ​ຕົນ​ເອງ”, “ປ່ຽນ​ແປງ​ໂດຍ​ຕົນ​ເອງ”, ພະຍາດ​ອາດຍາ​ສິດ, ສໍ້​ລາດ​ບັງ​ຫຼວງ ຟຸມ​ເຟືອຍ, ພັກ​ພວກ ພາກສ່ວນນິຍົມ, “ຜົນ​ປະ​ໂຫຍ​ດໝູ່​ພວກ”, ​ເວົ້າ​ບໍ່​ໄປ​ຄຽງ​ຄູ່​ກັບ​ເຮັດ; ພ້ອມ​ນັ້ນ​ກໍ​ສືບ​ຕໍ່​ຢັ້ງຢືນ​ທັດສະນະ​ຂອງ​ພັກ​ ກ່ຽວ​ກັບ​ການ​ກໍ່ສ້າງ​ຖັນ​ແຖວ​ພະນັກງານ​ຂອງ​ລະບົບ​ການ​ເມືອງ ​ໂດຍ “​ໃຫ້​ຄວາມ​ສຳຄັນ​ທັງ​ຄຸນສົມບັດ ​ແລະ ຄວາມ​ເກັ່ງ​ກ້າ​ສາມາດ, ​ໃນ​ນັ້ນ​ຄຸນສົມບັດ​ເປັນ​ກົກຮາກ” ​ເພື່ອ​ກໍ່ສ້າງ “ພັກເຮົາ​ແມ່ນ​ຄຸນສົມບັດ, ​ແມ່ນ​ສີວິ​ໄລ” ຄື​ທີ່​ລຸງ​ໂຮ່​ໄດ້​ເວົ້າ​ມາ.

ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາງ​ວິທີ​ແກ້​ຈຳນວນ​ໜຶ່ງ​ຄື: ທີ​ໜຶ່ງ, ສືບ​ຕໍ່​ຍູ້​ແຮງ​ການ​ຮ່ຳຮຽນ ​ແລະ ປະຕິບັດ​ຕາມ​ແນວ​ຄິດ, ຄຸນສົມບັດ, ​ແບບ​ແຜນ​ຂອງ​ໂຮ່ຈິ​ມິນ. ທີ​ສອງ, ປະຕິບັດ​ຢ່າງ​ເຂັ້ມ​ງວດ​ກົນ​ໄກ​ກວດກາ, ຕິດຕາມ​ກວດກາ, ກວດ​ສອບ​ຂອງ​ອົງການ​ຈັດ​ຕັ້ງ​ພັກ; ການ​ຕິດຕາມ​ກວດກາ ​ແລະ ວິຈານ​ສັງຄົມ​ຂອງ​ແນວ​ໂຮມ​ປະ​ເທດ​ຊາດ, ຂອງບັນດາ​ກາ​ນຈັດ​ຕັ້ງ​ການ​ເມືອງ - ສັງຄົມ ​ແລະ ຂອງ​ປະຊາຊົນ​ຕໍ່​ກັບຄຸນສົມບັດ, ​ແບບ​ແຜນ​ດຳລົງ​ຊີວິດ​ຂອງ​ພະນັກງານ ສະມາ​ຊິດ​ພັກ.

4- ສືບ​ຕໍ່​ປ່ຽນ​ແປງ​ໃໝ່, ປັບປຸງ​ບູລະນະ​ການຈັດ​ຕັ້ງ, ກົງຈັກ​ຂອງ​ພັກ ​ແລະ ລະບົບ​ການ​ເມືອງ.

ສະພາບ​ການ​ຕົວ​ຈິງ​ປັດຈຸບັນ​ໃຫ້​ເຫັນ​ວ່າ, ການຈັດ​ຕັ້ງ​ກົງຈັກ​ຂອງ​ພັກ ​ແລະ ລະບົບ​ການ​ເມືອງ​ຍັງ​ພະ​ລຸງ​ພະລັງ, ຫຼາຍ​ຂັ້ນ​ຫຼາຍ​ຊັ້ນ; ພາລະ​ບົດບາດ, ໜ້າ​ທີ່​ຂອງ​ການຈັດ​ຕັ້ງຈຳນວນ​ໜຶ່ງ​ຍັງ​ຊ້ຳ​ຊ້ອນ​ກັນ; ຄວາມ​ສັກສິດ, ປະສິດທິ​ຜົນ​ການ​ເຄື່ອນ​ໄຫວ​ຂອງ​ຫຼາຍ​ອົງການ​ຈັດ​ຕັ້ງ​ໃນ​ລະບົບ​ການ​ເມືອງ​ ຍັງ​ຕ່ຳ ບໍ່​ຕອບ​ສະໜອງ​ໄດ້​ຕາມ​ຄວາມ​ຮຽກຮ້ອງ​ຕ້ອງການ, ຕາມໜ້າ​ທີ່. ຈຳນວນ​ພະນັກງານ ຂ້າ​ລັດຖະກອນ ​ບໍ່ພຽງ​ແຕ່ບໍ່​ຫລຸດ​ລົງ ຫາກ​ຍັງ​ເພີ່ມ​ຂຶ້ນ, ​ເປັນ​ຕົ້ນ​ແມ່ນ​ຢູ່​ບັນດາ​ຫົວໜ່ວຍ​ພາລະກິດ​ພາກ​ລັດ ​ແລະ ລັດຖະກອນ, ພະນັກງານ​ສະ​ເພາະ​ກິດ, ບໍ່​ສະ​ເພາະ​ກິດ​ຢູ່​ຕາ​ແສງ, ​ເທດສະບາ​ນ​ເມື​ອງ...

ດັ່ງ​ນັ້ນ, ກອງ​ປະຊຸມ​ໃຫຍ່​ຄັ້ງ​ທີ XII ຈຶ່ງ​​ໄດ້ສືບ​ຕໍ່​ພັດທະນາ, ຫັນ​ເປັນ​ລະອຽດ​ແຜນ​ນະ​ໂຍບາຍຂອງກອງ​ປະຊຸມ​ໃຫຍ່​ຄັ້ງ​ທີ XI, ມະຕິ​ສະບັບ​ເລກທີ 39-NQ/TW ຂອງ​ກົມ​ການ​ເມືອງ​ສູນ​ກາງກ່ຽວ​ກັບ​ການ​ຫລຸ​ດຜ່ອນ​ການ​ບັນຈຸ​ພະນັກງານ, ຈັດ​ວາງ​ຄືນ​ໃໝ່​ໂຄງ​ປະກອບ​ຖັນ​ແຖວ​ພະນັກງານ ລັດຖະກອນ, ​ແລະຄວາມ​ສະຫລຸບ​ສະບັບ​ເລກທີ 64-KL/TW ຂອງ​ຄະນະ​ບໍລິຫານ​ງານ​ສູນ​ກາງ​ພັກຊຸດ​ທີ XI ວ່າ​ດ້ວຍ “ບາງ​ບັນຫາ​ກ່ຽວ​ກັບ​​ສືບ​ຕໍ່​ປ່ຽນ​ແປງ​ໃໝ່​ລະບົບການ​ເມື​ອງ​ແຕ່​ສູນ​ກາງ​ຮອດ​ຮາກ​ຖານ” ​ແລະ ​ເນັ້ນ​ວ່າ: ສືບ​ຕໍ່​ປ່ຽນ​ແປງ​ໃໝ່, ປັບປຸງ​ບູລະນະ​ການຈັດ​ຕັ້ງ​ກົງຈັກ​ຂອງ​ພັກ ​ແລະ ລະບົບການ​ເມື​ອງຕາມ​ທິດ​ກະທັດ​ລັດ​ເບົາບາງ, ​ເຄື່ອນ​ໄຫວ​ຢ່າງ​ມີ​ຄວາມ​ສັກສິດ, ມີ​ປະສິດທິ​ຜົນ; ຍົກ​ສູງ​ຄວາມ​ສາມາດ​ຊີ້​ນຳ ນຳພາ ຈັດການ​ບໍລິຫານ; ປັບປຸງ​ບູລະນະ​ພາລະ​ບົດບາດ ໜ້າ​ທີ່, ຍົກ​ສູງ​ຄຸນ​ນະພາ​ບຂອງ​ຖັນ​ແຖວ​ພະນັກງານ ລັດຖະກອນ; ກຳນົດ​ແຈ້ງ​ສາຍ​ພົວພັນ​ລະຫວ່າງ​ໝູ່​ຄະນະເປັນ​ຜູ້ນຳ​ພາ ​ແລະ ບຸກຄົນ​ຮັບຜິດຊອບ.

ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາງ​ວິທີ​ແກ້​ຈຳນວນ​ໜຶ່ງ​​ເພື່ອປະຕິບັດ: ທີ​ໜຶ່ງ, ປັບປຸງ​ບູລະນະ​ກົນ​ໄກ​ກວດກາ​ອຳນາດ ​ແລະ ປະຕິບັດ​ການ​ກວດກາ​ອຳນາດ​ຢ່າງ​ເຂັ້ມ​ງວດ​ ເພື່ອກີດ​ກັ້ນ​ການ​ລ່ວງ​ອຳນາດ, ລະ​ເມີດ​ກົດໝາຍ ວິ​ໄນ. ທີ​ສອງ, ຄົ້ນຄວ້າ​ເພື່ອ​​ເຮັດທົດ​ລອງການ​ໂຮມອົງການ​ພັກ ​ແລະ ອົງການ​ລັດ​ທີ່​ມີ​ພາລະ​ບົດບາດ ໜ້າ​ທີ່​ທີ່​ຄ້າຍຄື​ກັບ ​ເຂົ້າ​ເປັນອັນ​ໜຶ່ງ​ອັນ​ດຽວ. ທີ​ສາມ, ປະຕິບັດ​ແຜນ​ນະ​ໂຍບາຍ​ຄຸ້ມ​ຄອງ​ການ​ບັນຈຸ​ພະນັກງານ​ຢ່າງ​ເປັນ​ເອກະ​ພາບ​ໃນ​ທົ່ວລະບົບ​ການ​ເມືອງ. ທີ​ສີ່, ສັບ​ຊ້ອນ​ການຈັດ​ຕັ້ງ​ກົງ​ຈັກໃຫ້​ກະທັດ​ລັດ ​ໂດຍ​ຕິດ​ກັບການ​ສືບ​ຕໍ່​ກຳນົດ​ແຈ້ງ​ພາລະ​ບົດບາດ, ໜ້າ​ທີ່, ​ແບບ​ວິທີ​ການ​ເຄື່ອນ​ໄຫວ​ຂອງ​ບັນດາ​ອົງການ​ຈັດ​ຕັ້ງ. ທີ​ຫ້າ, ປະຕິບັດ​ການ​ຄວບ​ໜ້າ​ທີ່​ຕໍ່​ຕຳ​ແໜ່​ງຈຳນວນ​ໜຶ່ງ ​ແລະ ຫລຸດຜ່ອນ​ການບັນຈຸ​ພະນັກງານ​ໃນ​ທົ່ວລະບົບ​ການ​ເມືອງ. ທີ​ຫົກ, ປະຕິບັດ​ໂດຍ​ພື້ນຖານ ຕົວ​ແບບ​ເລຂາ​ຄະນະ​ພັກ​ຄວບ​ຕຳ​ແໜ່ງປະທານ​ສະພາ​ປະຊາຊົນ​ຢູ່​ຂັ້ນ​ຕ່າງ​ໆ; ສະຫລຸບ​ສັງ​ລວມ​ໂດຍ​ໄວ​ຕົວ​ແບບ ​ເລຂາ​ຄະນະ​ພັກ​ຄວບ​ຕຳ​ແໜ່​ງປະທານ​ຄະນະ​ກຳມະການ​ປະຊາຊົນ​ຂັ້ນ​ຕາ​ແສງ, ຂັ້ນ​ເມືອງ ຢູ່​ບ່ອນ​ທີ່​ມີ​ເງືອນ​ໄຂ​ສະດວກ​ດີ.

5- ກ່ຽວ​ກັບ​ການ​ກໍ່ສ້າງ​ອົງການຈັດ​ຕັ້ງຮາກ​ຖານ​ພັກ, ຍົກ​ສູງ​ຄຸນນະ​ພາບ​ຂອງ​ສະມາຊິກ​ພັກ.

ກອງ​ປະຊຸມ​ໃຫຍ່​ຄັ້ງ​ທີ XI ລະບຸ: “ປັບປຸງ​ບູລະນະ​ບັນດາ​ອົງການຈັດ​ຕັ້ງຮາກ​ຖານ​ພັກ ​ແລະ ຍົກ​ສູງ​ຄຸນ​ນະພາ​ບສະມາຊິກ​ພັກ”. ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ເພີ່ມ​ເຕີມ​ແລະ​ທຳ​ຄວາມ​ກະຈ່າງ​ແຈ້ງ​ຕື່ມອີກ: “ປັບປຸງ​ບູລະນະ​ການຈັດ​ຕັ້ງ, ຍົກ​ສູງ​ຄຸນະພາບ ປະສິດທິ​ຜົນ​ການ​ເຄື່ອນ​ໄຫວ​ຂອງ​ບັນດາ​ອົງການ​ຈັດ​ຕັ້ງຮາກ​ຖານ​ພັກ ​ແລະ ຍົກ​ສູງ​ຄຸນ​ນະພາ​ບສະມາຊິກ​ພັກ”. ກອງ​ປະຊຸມ​ໃຫຍ່​ຄັ້ງ​ທີ XII ໄດ້​ວາງ​ວິທີ​ແກ້​​ໃໝ່ຈຳນວນ​ໜຶ່ງ​​ເພື່ອປະຕິບັດ: ທີ​ໜຶ່ງ, ປັບປຸງ​ບູລະນະ​ການຈັດ​ຕັ້ງ, ຮັບປະກັນ​ການ​ນຳພາ​ຮອບດ້ານ​ຂອງ​ພັກ​ຢູ່​ຮາກ​ຖານ. ທີ​ສອງ, ສະຫລຸບ​ສັງ​ລວມການ​ປະຕິບັດ​ຂໍ້​ກຳນົດ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ ກ່ຽວ​ກັບ​ສະມາຊິກ​ພັກ​ເຮັດ​ເສດຖະກິດ​ເອກະ​ຊົນ ​ແລະ ການ​ທົດ​ລອງ​ຮັບ​ເອົາ​ເຈົ້າ​ຂອງ​ວິ​ສາ​ຫະກິດ​ເອກະ​ຊົນ​ທີ່​ມີ​ມາດຕະຖານ​ພຽງພໍ​ ເຂົ້າ​ເປັນ​ສະມາຊິກ​ພັກ. ທີ​ສາມ, ກໍ່ສ້າງ​ຖັນ​ແຖວ​ສະມາຊິກ​ພັກ​ທີ່​​ເປັນ​ແບບຢ່າງ, ນຳ​ໜ້າ, ນັບຖື​ປະຊາ​ຊັນ, ​ໃກ້ຊິດຕິດ​ແທດ​ກັບ​ປະຊາຊົນ, ​ເຂົ້າ​ໃຈ​ປະຊາຊົນ, ຮ່ຳຮຽນ​ນຳ​ປະຊາຊົນ... ບໍ່​ທໍ້ຖອຍ​ຕໍ່​ຄວາມ​ຫຍຸ້ງຍາກ ສິ່ງ​ທ້າ​ທາຍ, ຕັດສິນ​ໃຈສູ້​ຊົນ​ເພື່ອ​ປະຕິບັດ​ເປົ້າ​ໝາຍ, ອຸດົມ​ຄະຕິ​ຂອງ​ພັກ.

6- ກ່ຽວ​ກັບ​ວຽກ​ງານ​ພະນັກງານ ​ແລະ ປົກ​ປັກ​ຮັກສາ​ການ​ເມືອງ​ພາຍ​ໃນ.

ກອງ​ປະຊຸມ​ໃຫຍ່​ຄັ້ງ​ທີ XI ລະບຸ: “ປ່ຽນ​ແປງ​ໃໝ່​ວຽກ​ງານ​ພະນັກງານ, ​ໃຫ້​ຄວາມ​ສຳຄັນ​ແກ່​ວຽກ​ງານປົກ​ປັກ​ຮັກສາ​ການ​ເມືອງ​ພາຍ​ໃນ”. ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ເພີ່ມ​ເຕີມ ​ແລະ ​ເນັ້ນ​ວ່າ: “ປ່ຽນ​ແປງ​ໃໝ່​ວຽກ​ງານ​ພະນັກງານ​ຢ່າງ​ແຂງ​ແຮງ, ​ໃຫ້​ຄວາມ​ສຳຄັນ​ແກ່​ວຽກ​ງານປົກ​ປັກ​ຮັກສາ​ການ​ເມືອງ​ພາຍ​ໃນ”. ລາຍ​ງານ​ການ​ເມືອງ​ຢູ່ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ຮັບ​ຮູ້​ຢ່າງ​ກົງ​ໄປ​ກົງ​ມາ​ວ່າ: ວຽກ​ງານປົກ​ປັກ​ຮັກສາ​ການ​ເມືອງ​ພາຍ​ໃນ ມີ​​ຂໍ້​ຈຳກັດຈຳນວນ​ໜຶ່ງ, ຍັງ​ບໍ່​ທັນ​ເອົາ​ໃຈ​ໃສ່​ກຳ​ສະພາບ​ການ​ກາ​ເມືອງ ​ແລະ ການ​ແກ້​ໄຂ​ບັນຫາ​ການ​ເມືອ​ງປັດຈຸບັນ​ກໍ​ຍັງບໍ່ທັນ​ດີ ຊຶ່ງ​ໃນ​ເວລາ​ນັ້ນ ບັນດາ​ປະກົດ​ການ “ຫັນປ່ຽນ​​ໂດຍ​ຕົນ​ເອງ”, “ປ່ຽນ​ແປງ​ໂດຍ​ຕົນ​ເອງ” ມີ​ທ່າ​ອຽງ​ຫັນປ່ຽນ​ຢ່າງ​ສັບສົນ​ຢູ່​ພາຍ​ໃນ​ພັກ, ​ໃນ​ລະບົບ​ການ​ເມືອງ ​ແລະ ​ໃນ​ສັງຄົມ...

ກອງ​ປະຊຸມ​ໃຫຍ່​ຄັ້ງ​ທີ XII ຊີ້​ແຈ້ງວ່າ: ສືບ​ຕໍ່​ຍູ້​ແຮງ​ການ​ປະຕິບັດ “ຍຸດ​ທະ​ສາດ​ພະນັກງານ​ໃນ​ສະ​​ໄໝ​ແຫ່ງ​ການ​ຍູ້​ແຮງ​ການ​ຫັນ​ປະ​ເທດ​ເປັນ​ອຸດສາຫະກຳ ທັນ​ສະ​ໄໝ”; ຫັນ​ບັນດາ​ຫຼັກການ​ກ່ຽວ​ກັບ​ການ​ກໍ່ສ້າງ​ພັກ​ເປັນ​ນິຕິ​ກຳ, ​ເປັນອັນ​ລະອຽດ; ສືບ​ຕໍ່​ປະກາດ​ໃຊ້ ​ແລະ ປະຕິບັດ​ບັນດາ​ຂໍ້​ກຳນົດ ກົດ​ລະບຽບ​ໃນ​ວຽກ​ງານ​ພະນັກງານ, ຮັບປະກັນ​ລັກສະນະ​ເປັນ​ເອກະ​ພາບ, ຄົບ​ຊຸດ ​ແລະ ​ແໜ້ນ​ແຟ້ນ ລະຫວ່າງຂອດ​ຕ່າງໆ, ຕິ​ດຕໍ່ໜໍ່​ເນືອງ​ລະຫວ່າງ​ຂັ້ນ​ຕ່າງໆ; ມີ​ກົດ​ລະບຽບ​ກ່ຽວ​ກັບ​ການ​ຕີ​ລາຄາ​ພະນັກງານ​ຢ່າງ​ຖືກຕ້ອງ, ພາວະ​ວິ​ໄສ, ​ເພື່ອ​ເປັນ​ພື້ນຖານ​ໃຫ້​ແກ່​ການ​ນຳ​ໃຊ້ ຈັດ​ວາງ​ສັບ​ຊ້ອນ​ພະນັກງານ, ກີດ​ກັ້ນ​ແລະ​ຍູ້​ຖອຍ​ສະພາບ​ການ​ວິ້ງ​ເຕັ້ນ​ຫາ​ຕຳ​ແໜ່​ງ, ວິ້ງ​ເຕັ້ນ​ໃຫ້​ໄດ້​ອາຍຸ​ປະຈຳການ, ວິ້ງ​ເຕັ້ນ​ເອົາ​ສັນ​ນິຍະ​ບັດ...

ເພື່ອປະຕິບັດ​ໜ້າ​ທີ່​ນີ້​ໃຫ້​ໄດ້​ຮັບ​ປະສິດທິ​ຜົນ, ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາງ​ວິທີ​ແກ້​ຈຳນວນ​ໜຶ່ງ​ດັ່ງ​ນີ້: ທີ​ໜຶ່ງ, ຫັນ​ເປັນ​ນິຕິ​ກຳ ​ເປັນອັນ​ລະອຽດຕໍ່​ກັບ ຫຼັກການ​ຂອງ​ພັກ​ກ່ຽວ​ກັບ​ສາຍ​ພົວພັນ​ລະຫວ່າງ​ແນວທາງ​ການ​ເມືອ​ງ ​ແລະ ​ແນວທາງ​ພະນັກງານ​; ທັດສະນະ​ຊົນ​ຊັ້ນ ​ແລະ ນະ​ໂຍບາຍ​ມະຫາ​ສາມັກຄີຢ່າງ​ກວ້າງຂວາງ​ໃນ​ວຽກ​ງານ​ພະນັກງານ; ຄວາມ​ພົບ​ພັນ​ລະຫວ່າງ​ມາດຕະຖານ ​ແລະ ການ​ປະກອບ; ລະ​ຫວ່າ​ງຄຸນສົມບັດ ​ແລະ ຄວາມ​ເກັ່ງ​ກ້າ​ສາມາດ; ລະຫວ່າງ​ການສືບ​ທອດ ​ແລະ ການພັດທະນາ; ລະຫວ່າງ​ການ​ຄຸ້ມ​ຄອງ​ເປັນ​ເອກະ​ພາບ​ຂອງ​ພັກ ​ແລະ ​ເສີມ​ຂະຫຍາຍ​ຢ່າງ​ຄົບ​ຖ້ວນ​ຄວາມ​ຮັບຜິດຊອບ​ຂອງ​ບັນດາ​ອົງການ​ຢູ່​ໃນ​ລະບົບ​ການ​ເມືອງ; ລະຫວ່າງ​ອຳນາດ​ຕັດສີນ ​ແລະ ຄວາມ​ຮັບຜິດຊອບ​ຂອງ​ບຸກຄົນ ​ແລະ ໝູ່​ຄະນະ. ທີ​ສອງ, ປ່ຽນ​ແປງ​ໃໝ່​ວຽກ​ງານ​ເລືອກ​ຕັ້ງ​ຢູ່​ໃນ​ພັກ, ວິທີ​ຄັດ​ເລືອກ, ​ແຕ່ງ​ຕັ້ງ​ພະນັກງານ,... ​ເພື່ອ​ຄັດ​ເລືອກ​ໄດ້​ຜູ້​ທີ່​ມີ​ຫຼັກ​ໝັ້ນ​ການ​ເມືອ​ງໜັກ​ແໜ້ນ, ມີ​ຄຸນ​ສົມບັດ​ສິນ​ທຳດີ, ຂະ​ຫຍັນ​ຂັນ​ເຄື່ອນ, ປະດິດ​ສ້າງ, ກ້າ​ຄິດ ກ້າ​ທຳ ກ້າ​ຮັບຜິດ​ຊອບ ​ໃຫ້​ຮັກສາ​ຕຳ​ແໜ່​ງນຳພາ, ພິ​ເສດ​ແມ່ນ​ຜູ້ນຳ​ໜ້າ. ທີ​ສາມ, ສຸມ​ໃສ່​ກໍ່ສ້າງ​ຖັນ​ແຖວ​ພະນັກງານ, ​ເປັນ​ຕົ້ນ​ແມ່ນ​ພະນັກງານ​ຍຸດ​ທະ​ສາດທີ່​ມີ​ຄຸນສົມບັດ​ສິນ​ທຳ ມີ​ຄວາມ​ສາມ​ດ ​ແລະ ອິດ​ທິພົນ​ຢ່າງ​ຄົບ​ຖ້ວນ, ​ເທົ່າ​ທຽມ​ກັບ​ລະດັບ​ໜ້າ​ທີ່. ມີ​ກົນ​ໄກ, ນະ​ໂຍບາຍ​ຄົ້ນ​ເຜີຍ, ດຶງ​ດູດ, ນຳ​ໃຊ້ຄົນ​ເກັ່ງ. ທີ​ສີ່, ​ເພີ່ມ​ທະວີ​ຄວາມ​ຮັບຜິດຊອບ​ຂອງ​ຄະນະ​ພັກ, ​ເປັ​ນຕົ້ນ​ແມ່ນ​ຄະນະ​ພັກ​ຮາກ​ຖານ ​ໃນ​ວຽກ​ງານປົກ​ປັກ​ຮັກສາ​ການ​ເມືອງ​ພາຍ​ໃນ; ຕິດ​ແໜ້ນ​ວຽກ​ງານປົກ​ປັກ​ຮັກສາ​ການ​ເມືອງ​ພາຍ​ໃນກັບ​ວຽກ​ງານ​ກໍ່ສ້າງ, ປັບປຸງ​ພັກ. ກຳນົດ​ໜ້າ​ທີ່​ຈຸດ​ໜັກ​ໃຈກາງ​ຂອງ​ວຽກ​ງານປົກ​ປັກ​ຮັກສາ​ການ​ເມືອງ​ພາຍ​ໃນ​ໃນ​ໄລຍະ​ປັດຈຸບັນ​ນີ້ ​ແມ່ນ​ປົກ​ປັກ​ຮັກສາ​ໂຄງການ​ການ​ເມືອງ, ກົດ​ລະບຽບ​ຂອງ​ພັກ; ປົກ​ປັກ​ຮັກສາ​ລັດຖະທຳ​ມະນູນ ​ແລະ ກົດໝາຍ. ທີ​ຫ້າ, ​ເດັດດ່ຽວ​ຕໍ່ສູ້, ກີດ​ກັ້ນ​ບັນດາ​ປະກົດ​ການ​ພວກ​ສ່ວນ​ນິຍົມ, ພັກ​ພວກ, “ຜົນ​ປະ​ໂຫຍ​ດໝູ່​ພວກ” ທຳລາຍ​ຄວາມ​ສາມັກຄີ​ພາຍ​ໃນ​ພັກ. ປະຕິບັດ​ວິ​ໄນຢ່າງ​ເຂັ້ມ​ງວດ​ຕໍ່​ພະນັກງານ ສະມາຊິກ​ພັກ​ ທີ່​ລະ​ເມີດ​ຂໍ້​ກຳນົດ​ຂອງຄະນະ​ບໍລິຫານ​ງານ​ສູນ​ກາງ​ພັກກ່ຽວ​ກັບ​ສິ່ງ​ທີ່ສະມາ​ຊິດ​ພັກບໍ່​ໄດ້​ເຮັດ, ​ເປັນ​ຕົ້ນ​ແມ່ນ​ການ​ອອກປາກ​ອອກສຽງ, ​ໂຄສະ​ນະ, ​ແຈກ​ຢາຍ​ເອກະສານ​ທີ່​ຜິດ​ກັບ​ໂຄງການ​ການ​ເມືອງ, ກົດ​ລະບຽບ​ຂອງ​ພັກ, ຜິດ​ກັບມະຕິ ຄຳ​ສັ່ງ ຂໍ້​ກຳນົດ​ຂອງ​ພັກ, ລັດຖະທຳ​ມະນູນ​ ແລະ ກົດໝາຍຂອງ​ລັດ. ຕໍ່ສູ້​ຢ່າງ​ມີ​ປະສິດທິ​ຜົນ​ຕ້ານກັບກົນ​ອຸບາຍ ການ​ເຄື່ອນ​ໄຫວ “ຫັນປ່ຽນ​ໂດຍ​ສັນຕິ”​ ຂອງບັນດາ​ອິດ​ທິກຳລັງ​ສັດຕູ.

7- ກ່ຽວ​ກັບ​ການ​ປ່ຽນ​ແປງ​ໃໝ່, ຍົກ​ສູງ​ຄວາມ​ສັກສິດ ປະສິດທິ​ຜົນ​ຂອງ​ວຽກ​ງານ​ກວດກາ ຕິດຕາມ​ກວດກາ ​ແລະ ວິ​ໄນ​ຂອງ​ພັກ.

ກອງ​ປະຊຸມ​ໃຫຍ່​ຄັ້ງ​ທີ XI ລະບຸ “ປ່ຽນ​ແປງ​ໃໝ່, ຍົກ​ສູງ​ປະສິດທິ​ຜົນ​ຂອງ​ວຽກ​ງານ​ກວດກາ, ຕິດຕາມ​ກວດກາ”. ກອງ​ປະຊຸມ​ໃຫຍ່​ຄັ້ງ​ທີ XII ​ເພີ່ມ​ເຕີມ ​ແລະ ​ເນັ້ນ: “ປ່ຽນ​ແປງ​ໃໝ່, ຍົກ​ສູງ​ຄວາມ​ສັກສິດ, ປະສິດທິ​ຜົນ​ຂອງ​ວຽກ​ງານ​ກວດກາ ຕິດຕາມ​ກວດກາ ​ແລະ ວິ​ໄນ​ຂອງ​ພັກ”. ການວາງ​ໜ້າ​ທີ່​ນີ້​ອອກ​ມາ​ແມ່ນ​ເລີ່​ມຈາກ​ສະພາບ​ການ​ປັດຈຸບັນ​ຄື: ຄຸນ​ນະພາ​ບ, ປະສິດທິ​ຜົນ​ຂອງ​ວຽກ​ງານ​ກວດກາ, ຕິດຕາມ​ກວດກາ ​ແລະ ​ແກ້​ໄຂການລະ​ເມີດ​ວິ​ໄນ​ຂອງ​ອົງກາ​ນຈັດ​ຕັ້ງ​ພັກ ​ແລະ ສະມາຊິກ​ພັກ ຍັງ​ບໍ່​ທັນ​ສູງ, ບໍ່​ເຂັ້ມ​ງວດ​ພຽງພໍ​ເພື່ອ​ປະກອບສ່ວນ​ກີດ​ກັ້ນ, ຍູ້​ຖອຍ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ, ຄວາມ​ຫຍໍ້​ທໍ້​ຢູ່​ພາຍ​ໃນ​ພັກ; ຂໍ້​ຂາດຕົກ​ບົກພ່ອງ, ຄວາມ​ຜິດພາດ​ຫຼາຍ​ປະການ​ ຂອງ​ການຈັດ​ຕັ້ງ​ພັກ ຂອງ​ສະມາຊິກ​ພັກ ບໍ່ຖືກ​ຄົ້ນ​ເຜີຍ ກວດກາ ຫຼື​ຖືກ​ແກ້​ໄຂ​ຢ່າງ​ຊັກ​ຊ້າ ​ແກ່ຍາວ, ດັ່ງ​ນັ້ນ ລະບຽບ​ວິ​ໄນ​ຢູ່​ຫຼາຍ​​ແຫ່ງຈຶ່ງ​ບໍ່​ເຂັ້ມ​ງວດ; ບົດບາດ, ຄວາມ​ຮັບຜິດຊອບ​ຂອງ​ບັນດາ​ການຈັດ​ຕັ້ງ​ໃນ​ລະບົບ​ການ​ເມືອງ ​ແລະ ຂອງ​ປະຊາຊົນ​ໃນ​ວຽກ​ງານ​ກວດກາ, ຕິດຕາມ​ກວດກາ ບໍ່​ໄດ້​ເສີມ​ຂະຫຍາຍຢ່າງຄົບ​ຖ້ວນ.

ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາງ​ວິທີ​ແກ້​​ໄຂຈຳນວນ​ໜຶ່ງ​ອອກ​ມາ​ຄື: ທີ​ໜຶງ, ​ແກ້​ໄຂ​ປະຕິບັດ​ວິ​ໄນ​ຢ່າງ​ທັນ​ການ, ​ເຂັ້ມ​ງວດ​ຕໍ່​ອົງການ​ຈັດ​ຕັ້ງ​ພັກ, ສະມາຊິກ​ພັກ​ທີ່​ລະ​ເມີດ​ໂຄງການ​ການ​ເມືອງ ກົດ​ລະບຽບ​ຂອງ​ພັກ, ລະ​ເມີດ​ມະຕິ ຄຳ​ສັ່ງ ຂໍ້​ກຳນົດ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ, ຕໍ່​ບັນດາ​ການ​ກະທຳ​ປິດ​ບັງ, ປົກ​ປ້ອງ, ອະ​ນຸ​ໂລມ​ໃຫ້​ຄວາມ​ຂາດ​ຕົກ​ບົກພ່ອງ, ການລະ​ເມີດ​ວິ​ໄນ​ຂອງ​ອົງການ​ຈັດ​ຕັ້ງ​ພັກ ​ແລະ​ຂອງ​ສະມາຊິກ​ພັກ; ປະກາດຜົນ​ຂອງ​ການ​ແກ້​ໄຂ​ປະຕິບັດ​ວິ​ໄນ​ຢ່າງ​ເປີດ​ເຜີຍ. ທີ​ສອງ, ລວມສູນ​ການ​ຊີ້​ນຳ​ເພື່ອ​ກໍ່ສ້າງ, ປັບປຸງ​ບູລະນະ​ຂໍ້​ກຳນົດ​ຕ່າງໆ​ຂອງ​ພັກ ​ເພື່ອ​ຍົກ​ສູງ​ຄຸນະພາບ, ຄວາມ​ສັກສິດ ​ແລະ ປະສິດທິ​ຜົນ​ຂອງ​ວຽກ​ງານກວດກາ, ຕິດຕາມ​ກວດກາ, ວິ​ໄນ​ຂອງ​ພັກ. ທີ​ສາມ, ​ເອົາ​ໃຈ​ໃສ່ກວດກາ, ຕິດຕາມ​ກວດກາ ຕໍ່​ຜູ້ນຳ​ໜ້າ​ຄະນະ​ພັກ, ອົງການ​ຈັດ​ຕັ້ງ​ພັກ, ອົງການ​ຈັດ​ຕັ້ງ​ລັດ ​ໃນ​ການ​ຮັກສາ​ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ບໍ່​ປະ​ໃຫ້​ພີ່ນ້ອງ​ໃນ​ຄອບຄົວ​ສວຍ​ໃຊ້​ສິດ​ອຳນາດ ຖານະ​ຕຳ​ແໜ່​ງ​ເພື່ອ​ຫາ​ຜົນ​ປະ​ໂຫຍ​ດສ່ວນ​ຕົວ. ທີ​ສີ່, ຄົ້ນຄວ້າ​ການ​ເພີ່ມ​ສິດ​ອຳນາດ​ກວດກາ, ປະຕິບັດ​ວິ​ໄນ​ຂອງ​ພັກ ​ໃຫ້​ຄະນະ​ກຳມະການ​ກວດກາ​ຂັ້ນ​ຕ່າງໆ.

8- ກ່ຽວ​ກັບ​ການ​ປ່ຽນ​ແປງ​ໃໝ່​ແບບ​ວິ​ທີ​ການ​ນຳພາ​ຂອງ​ພັກ.

ກ່ຽວ​ກັບ​ເນື້ອ​ໃນ​ນີ້, ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ເນັ້ນ​ເຖິງ​ຂໍ້​ຈຳກັດ​ຈຳນວນ​ໜຶ່ງ​ຄື, ການ​ປ່ຽນ​ແປງ​ໃໝ່​ແບບ​ວິທີ​ການ​ນຳພາ​ຂອງ​ພັກຕໍ່​ກັບ​ລັດ, ​ແນວ​ໂຮມ​ປະ​ເທດ​ຊາດ ​ແລະ ບັນດາ​ການຈັດ​ຕັ້ງ​ການ​ເມືອງ​ສັງຄົມ ຍັງ​ຊັກ​ຊ້າ; ​ແບບ​ວິທີ​ການ​ນຳພາ​ຂອງ​ພັກ​ຕໍ່​ກັບ​ລັດ​ ມີ​ບາງ​ເນື້ອ​ໃນ​ຍັງ​ສັບສົນ; ຍັງ​ບໍ່​ທັນ​ກຳນົດ​ຢ່າງ​ຈະ​ແຈ້ງ​ເນື້ອ​ໃນ ​ແລະ ​ແບບ​ວິ​ທິກຳ​ອຳນາດ... 

ຕໍ່ໜ້າສະພາບ​ການ​ດັ່ງກ່າວ, ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ກຳນົດ: ສືບ​ຕໍ່​ປ່ຽນ​ແປງ​ໃໝ່​ຢ່າງ​ແຂງ​ແຮງ​​ແບບ​ວິ​ທິການ​ນຳພາ​ຂອງ​ພັກ​ຕໍ່​ກັບລະບົບ​ການ​ເມືອງ, ພິ​ເສດ​ແມ່ນ​ຕໍ່​ກັບ​ລັດ. ບັນດາ​ອົງການ​ຈັດ​ຕັ້ງ​ພັກ​ແລະ ສະມາຊິກ​ພັກ​ ຕ້ອງ​ເປັນ​ແບບຢ່າງ​ໃນ​ການ​ປະຕິບັດ​ຕາມ​ລັດຖະທຳ​ມະນູນ ​ແລະ ກົດໝາຍ. ປ່ຽນ​ແປງ​ໃໝ່​ແບບ​ວິ​ທິການ​ນຳພາ​ຂອງ​ພັກ ​ຕໍ່​ກັບ​ແນວ​ໂຮມ​ປະ​ເທດ​ຊາດ ​ແລະ ບັນດາ​ອົງການຈັດ​ຕັ້ງ​ການ​ເມືອງ - ​ສັງຄົມ, ​ເຄົາລົບ​ນັບຖື​ຫຼັກການ​ເຈລະຈາ​ປະຊາທິປະ​ໄຕ ​ໃນ​ການຈັດ​ຕັ້ງ ​ແລະ ​ເຄື່ອນ​ໄຫວ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ. ​ໃຫ້​ຄວາມ​ສຳຄັນ​ແກ່​ການ​ກໍ່ສ້າງ​ວັດທະນະທຳ​ໃນ​ບັນດາ​ອົງການຈັດ​ຕັ້ງ​ພັກ, ອົງການ​ລັດ, ​ໃນ​ລະ​ບົບການ​ເມືອງ.

ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາ​ງວິທີ​ແກ້​ໄຂ​ໃໝ່​ຈຳນວນ​ໜຶ່ງຄື: ທີ​ໜຶ່ງ, ສືບ​ຕໍ່​ສະຫລຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ​ກ່ຽວ​ກັບ​ພັກ​ກຳ​ອຳນາດ, ກຳນົດ​ແຈ້ງ​ຈຸດປະສົງ, ​ແບບ​ວິທີ, ​ເນື້ອ​ໃນ ​ແລະ ​ເງື່ອນ​ໄຂ​ກຳ​ອຳນາດ; ການ​ເສີມ​ຂະຫຍາຍ​ປະຊາທິປະ​ໄຕ​ໃນ​ເງື່ອນ​ໄຂພັກ​ການ​ເມືອງ​ໜຶ່ງ​ດຽວ​ກຳ​ອຳນາດ; ​ໄພ​ອັນຕະລາຍ​ຕ່າງໆ​ທີ່​ຕ້ອງ​ເອົາ​ໃຈ​ໃສ່​ປ້ອງ​ກັນ​ສຳລັບ​ພັກ​ກຳ​ອຳນາດ. ທີ​ສອງ, ສືບ​ຕໍ່​ຫັນ​ເປັນ​ລະອຽດ​ຕໍ່​ແບບ​ວິທີ​ການນຳພາ​​ຂອງ​ພັກ ທີ່​ໄດ້ລະບຸ​ໃນ​ໂຄງການກໍ່ສ້າງ​ປະ​ເທດ​ຊາດ​ໃນ​ສະ​ໄໝ​ແຫ່ງ​ການ​ຂ້າມ​ຜ່ານ​ຂຶ້ນ​ສູ່​ສັງຄົມ​ນິຍົມ (ສະບັບ​ປັບປຸງ, ຂະຫຍາຍ​ຕື່ມ​ປີ 2011) ຢູ່​ໃນ​ທຸກໆ​ຂັ້ນ ດ້ວຍ​ບັນດາ​ກົດ​ລະບຽບ, ຂໍ້​ກຳນົດ, ລຳດັບ​ດຳ​ເນີນ​ງານ​ອັນ​ລະ​ອຽດ. ທີ​ສາມ, ກຳນົດ​ແຈ້ງ​ກວ່າ​ອີກ ​ກ່ຽວ​ກັບ​ມາດຕະຖານ​ພັກ​ຮັບ​ໃຊ້​ປະຊາຊົນ, ຍອມຮັບ​ການ​ຕິດຕາມ​ກວດກາ​ຂອງ​ປະຊາຊົນ ​ແລະ ຮັບຜິດຊອບຕໍ່​ປະຊາຊົນ​ກ່ຽວ​ກັບ​ການ​ຕັດສິນ​ຕົກລົງ​ຕ່າງໆ​ຂອງ​ຕົນ. ກຳນົດ​ຢ່າງ​ຈະ​ແຈ້ງກວ່າ​ອີກ ກ່ຽວ​ກັບ​ສິດ​ອຳນາດ ​ແລະ ຄວາມ​ຮັບຜິດຊອບ​ຂອງຄະນະ​ບໍລິຫານ​ງານ​ສູນ​ກາງ​ພັກ, ກົມ​ການ​ເມືອ, ຄະນະ​ເລຂາ​ທິການ​ສູນ​ກາງ, ຄະນະພັກ ​ແລະ​ ຄະ​ຄະ​ປະຈຳຂອງ​ຄະນະ​ພັກ​ຂັ້ນ​ຕ່າງໆ. ທີ​ສີ່, ຍູ້​ແຮງ​ການ​ແບ່ງ​ຂັ້ນ, ​ແບ່ງ​ສິດອຳນາດ; ມີ​ກົນ​ໄກ​ເພື່ອ​ໃຫ້​ທ້ອງ​ຖິ່ນ​ຕ່າງໆ​ເສີມ​ຂະຫຍາຍ​ສິດ​ເປັນ​ເຈົ້າ​ການ ປະດິດ​ສ້າງ, ຕິດ​ກັບ​ການ​ເຊີດ​ຊູ​ຄວາມ​ຮັບຜິດຊອບ, ພ້ອມ​ກັນ​ນັ້ນ​ກໍ​ຮັບປະກັນ​ກາ​ນນຳພາ, ຄຸ້ມ​ຄອງ​ເປັນ​ເອກະ​ພາບ​ຂອງ​ສູນ​ກາງ. ທີ​ຫ້າ, ປ່ຽນ​ແປງ​ໃໝ່​ວິທີ, ​ແບບ​ແຜນ, ລະບຽບ​ການ​ເຮັດ​ວຽກ​ຂອງ​ບັນດາ​ອົງການ​ນຳພາ​ຂອງ​ພັກ ​ແຕ່​ສູນ​ກາງ​ລົງ​ຮອດ​ຮາກ​ຖານ, ກໍ່ສ້າງ​ແບບ​ແຜນ​ເຮັດ​ວຽກ​ຢ່າງ​ມີ​ວິທະຍາສາດ, ລວມໝູ່, ປະຊາທິປະ​ໄຕ, ​ໃກ້ຊິດ​ກັບ​ປະຊາຊົນ, ນັບຖື​ປະຊາຊົນ, ​ເພື່ອ​ປະຊາຊົນ, ​ໃກ້ຊິດຕິດ​​ແທດກັບ​ພຶດຕິ​ກຳ, ​ເວົ້າ​ໄປ​ຄຽງ​ຄູ່​ກັບ​ເຮັດ./.

ໂດຍ: ຮສ, ປອ, ຟ້າ​ມມິ​ງຈິ໊ງ

ກຳມະການ​ກົມ​ການ​ເມືອງ, ​ເລຂາທິການ​ສູນ​ກາງ​ພັກ,

ຫົວໜ້າ​ຄະນະ​ຈັດ​ຕັ້ງສູນ​ກາງ

--------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 884, ​ເດືອນ​ມິຖຸນາ 2016.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ