ວັນພຸດ, 22/11/2017
ການເລືອກຕັ້ງສະມາຊິກສະພາແຫ່ງຊາດຊຸດທີ່ XIV ແລະ ສະມາຊິກສະພາປະຊາຊົນຂັ້ນຕ່າງໆ ສະໄໝ 2016-2021
27/7/2016 11:10' ສົ່ງ ພິມ
ກອງປະຊຸມສະພາແຫ່ງຊາດ (ພາບ: VTV)

ເຂົ້າ​ຮ່ວມ​ກອງ​ປະຊຸມ​ມີ ​ເລຂາທິການ​​ໃຫຍ່ພັກ​ກອມ​ມູນິດ​ຫວຽດນາມ ທ່ານ ຫງວຽນ​ຝູຈ້ອງ; ປະທານ​ປະ​ເທດ ​ທ່ານ ເຈິ່ນດ້າຍ​ກວາງ; ປະທານ​ສະພາ​ແຫ່ງ​ຊາດ, ປະທານ​ສະພາ​ເລືອກ​ຕັ້ງ​ແຫ່ງ​ຊາດ ທ່ານ​ນາງ ຫງວຽນ​ທີ້ກິມ​ເງິນ; ອະດີດ​ປະທານ​ສະພາ​ແຫ່ງ​ຊາດ, ອະດີດ​ປະທານ​ສະພາ​ເລືອກ​ຕັ້ງ​ແຫ່ງ​ຊາດ ທ່ານ ຫງວຽນ​ຊິງ​ຮຸ່ງ; ປະທານ​ຄະນະ​ກຳມະການ​ສູນ​ກາງ​ແນວ​ໂຮມ​ປະ​ເທດ​ຊາດ​ຫວຽດນາມ, ຮອງ​ປະທານ​ສະພາ​ເລືອກ​ຕັ້ງ​ແຫ່ງ​ຊາດ ທ່ານ ຫງວຽນ​ທ້ຽນ​ເຍິນ. ​ເຂົ້າ​ຮ່ວມ​ກອງປະຊຸມ​ຍັງ​ມີ​ບັນດາ​ສະຫາຍ​ກຳມະການ​ກົມ​ການ​ເມືອງ, ​ເລຂາທິການ​ສູນ​ກາງ​ພັກ, ບັນດາ​ຮອງ​ນາຍົກລັດຖະມົນຕີ, ບັນດາ​ຮອງ​ປະທານ​ສະພາ​ແຫ່ງ​ຊາດ, ບັນດາ​ຮອງ​ປະທານສະພາ​ເລືອກ​ຕັ້ງ​ແຫ່ງ​ຊາດ; ບັນດາ​ຜູ້ຕາງໜ້າ​ກະຊວງ, ຄະນະ, ຂະ​ແໜງ​ການ​ສູນ​ກາງ; ກາ​ນນຳ​ຄະນະ​ເລືອກ​ຕັ້ງ, ຄະນະ​ກຳມະການ​ເລືອກ​ຕັ້ງ, ຄະນະ​ກຳມະການ​ແນວ​ໂຮມ​ປະ​ເທດ​ຊາດ​ຫວຽດນາມ, ພະ​ແນ​ກພາຍ​ໃນຂອງ 63 ​ແຂວງ-ນະຄອນ​ ໃນ​ທົ່ວ​ປະ​ເທດ.

ກ່າວ​ປາ​ໄສ​ໄຂ​ກອງ​ປະຊຸມ, ​ໂດຍ​ຕາງໜ້າສະພາ​ເລືອກ​ຕັ້ງ​ແຫ່ງ​ຊາດ, ທ່ານ​ນາງ ຫງວຽນ​ທີ້ກິມ​ເງິນ ປະທານ​ສະພາ​ແຫ່ງ​ຊາດ, ປະທານ​ສະພາ​ເລືອກ​ຕັ້ງ​ແຫ່ງ​ຊາດ ​ໄດ້​ເນັ້ນ​ວ່າ, ຜົນສຳ​ເລັດ​ຂອງ​ການ​ເລືອກ​ຕັ້ງມີ​ຄວາມ​ໝາຍ​ສຳຄັນ​ທີ່​ສຸດ ​ໃນ​ການ​ຜັນ​ຂະຫຍາຍ​ປະຕິບັດ ມະຕິ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII ຂອງ​ພັກ, ​ແຜນການ​ພັດທະນາ​ເສດຖະກິດ - ສັງຄົມ​ສະ​ໄໝ 2016-2021 ​ແລະ ປີ 2016. ນີ້​ແມ່ນ​ປະຖົມ​ປັດ​​ໄຈ​ເພື່ອ​ສືບ​ຕໍ່​ກໍ່ສ້າງ, ປັບປຸງ ​ແລະ ບູລະນະ​ລັດ​ແຫ່ງ​ອຳນາດ​ກົດໝາຍສັງຄົມ​ນິຍົມ ຂອງ​ປະຊາຊົນ ​​ໂດຍປະຊາຊົນ ​ແລະ ​ເພື່ອ​ປະຊາຊົນ.

ປະທານ​ສະພາ​ແຫ່ງ​ຊາດ​ໃຫ້​ຮູ້​ວ່າ, ການ​ເລືອກ​ຕັ້ງ​ຄັ້ງ​ນີ້​ໄດ້​ດຳ​ເນີນ​ໄປ​ໃນ​ສະພາບ​ການ​ພາຍ​ໃນ​ປະ​ເທດ ​ແລະ ສາກົນ ມີ​ທັງ​ໂອກາດ ຄວາມ​ສະດວກ​ດີ ພ້ອມ​ທັງ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ທີ່​ແຊກ​ຊ້ອນ​ກັນ. ພັກ​-ລັດ​ໄດ້​ກຳນົດ​ວ່າ ນີ້​ແມ່ນ​ເຫດການ​ການ​ເມືອງ​ທີ່​ສຳຄັນ​ຍິ່ງ, ​ແມ່ນ​ໜ້າ​ທີ່​ຈຸດ​ໜັກ​ໃນ​ກາງ​ໃນ​ປີ 2016 ຂອງ​ປະ​ເທດ.

ປະຊາຊົນ ​ແລະ ຜູ້​ມີ​ສິດ​ເລືອກ​ຕັ້ງ​ໃນ​ທົ່ວ​ປະ​ເທດ ​ໄດ້​ເຂົ້າ​ຮ່ວມ​ການ​ເລືອກ​ຕັ້ງ​ຢ່າງ​ຫ້າວຫັນ ຕັ້ງໜ້າ ​ເພື່ອຄັດ​ເລືອກ​ເອົາ​ຜູ້​ທີ່​ດີ​ເດັ່ນ​ທາງ​ດ້ານ​ຄຸນສົມບັດ​​ແລະ​ຄວາມ​ເກັ່ງ​ກ້າ​ສາມາດ, ສົມ​ກັບ​ເປັນ​ຕົວ​ແທນ​ໃຫ້​ແກ່​ເຈດ​ຈຳນົງ ຄວາມ​ປາຖະໜາ ​ແລະ ສິດ​ເປັນ​ເຈົ້າ​ຂອງ​ປະຊາຊົນ, ຕາງໜ້າ​ປະຊາຊົນ​ປະຕິບັດ​ອຳນາດ​ລັດ​ໃນ​ສະພາ​ແຫ່ງ​ຊາດ ​ແລະ ​ສະພາ​ປະຊາຊົນ​ຂັ້ນ​ຕ່າງໆ ສະ​ໄໝ 2016-2021.

ທ່ານ​ນາງ ຕ່ອງ​ທີ້ຝ໊ອງ ຮອງ​ປະ​ທາ​ສະພາ​ແຫ່ງ​ຊາດ, ຮອງ​ປະທານ​ຜູ້​ປະຈຳການ​ສະພາ​ເລືອກ​ຕັ້ງ​ແຫ່ງ​ຊາດ ​ໄດ້​ລາຍ​ງານ​ຫຍໍ້​ກ່ຽວ​ກັບ​ຜົນສຳ​ເລັດ​ ຂອງ​ການເລືອກ​ຕັ້ງສະມາຊິກ​ສະພາ​ແຫ່ງ​ຊາດ​ຊຸດ​ທີ່ XIV ​ແລະ ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ ສະ​ໄໝ 2016 - 2021, ຢືນຢັນ​ການ​ເລືອກ​ຕັ້ງ​ໄດ້​ດຳ​ເນີນ​ດ້ວຍ​ຜົນສຳ​ເລັດ​ອັນ​ຈົບງາມ, ຮັບປະກັນ​ປະຊາທິປະ​ໄຕ ສະ​ເໝີ​ພາບ ຖືກ​ກົດໝາຍ ປອດ​ໄພ ປະຢັດ ​ແລະ ​ເປັນ​ວັນ​ບຸນ​ທີ່​ແທ້​ຈິງ​ຂອງ​ປະຊາຊົນ​ທັງ​ຊາດ. ການ​ເລືອກ​ຕັ້ງ​ແມ່ນ​ການ​ດຳລົງ​ຊີວິດ​ການ​ເມືອງ​ທີ່​ເລິກ​ເຊິ່ງ​ໃນ​ທົ່ວ​ພັກ, ທົ່ວ​ປວງ​ຊົນ ​ແລະ ທົ່ວ​ກອງທັບ; ມັນ​ດຶງ​ດູດ​ການ​ເຂົ້າ​ຮ່ວມ​ຂອງ​ປະຊາຊົນ​ຈຳນວນ​ຫຼວງ​ຫຼາຍ ນັບ​ແຕ່​ໄລຍະ​ກະກຽມ ຈົນ​ເຖິງວັນ​ໄປ​ປ່ອນ​ບັດ​ເລືອກ​ຕັ້ງ; ມັນ​ເສີມ​ຂະຫຍາຍ​ໄດ້​ຈິດ​ໃຈ​ປະຊາທິປະ​ໄຕ ​ເປີດ​ເຜີຍ ​ໂປ່​ງ​​ໃສ​ໃນ​ແຕ່​ລະບາດ​ກ້າວ​ແຫ່ງ​ການ​ຜັນ​ຂະຫຍາຍ​ປະຕິບັດ.

ຜົນ​ຂອງ​ການ​ເລືອກ​ຕັ້ງ​ໂດຍ​ພື້ນຖານ​ໄດ້ບັນລຸ​ເປົ້າໝາຍ​ແຜນ​ການ​ທີ່​ວາງ​ໄວ້, ຮັບປະກັນ​ພາກສ່ວນ ​ໂຄງປະກອບສະມາຊິກສະພາ ສອດຄ່ອງ​ກັບ​ການ​ຄາດ​ຄະ​ເນ, ອັດຕາ​ສ່ວນ​ສະມາຊິກ​ສະພາທີ່​ເປັນ​ຜູ້ຍິງ, ຄົນ​ຊົນ​ເຜົ່າ​ສ່ວນ​ນ້ອຍ, ​ໄວ​ໜຸ່ມ, ລະດັບການ​ສຶກສາ​ເໜືອ​ມະຫາວິທະຍາ​ໄລ ລ້ວນ​ແຕ່​ສູງ​ກວ່າ​ທຽບ​ກັບ​ສະ​ໄໝ​ກ່ອນ, ​ໂດຍ​ພື້ນຖານ​ແມ່ນ​ສ່ອງ​ແສ​ງໄດ້​ເຖິງ​ລັກສະນະ​ເປັນ​ຕົວ​ແທນ​ຢ່າງ​ກວ້າງຂວາງ ​ໃຫ້​ແກ່​ບັນດາ​ຊັ້ນ​ຄົນ​ປະຊາຊົນ; ຄຸນ​ນະພາ​ບຂອງ​ສະ​ມາ​ຊິກ​ສະພາໄດ້​ຮັບ​ການ​ຍົກ​ສູງ​ຂຶ້ນ… ນີ້​ຈະ​ເປັນ​ຮາກ​ຖານ​ເພື່ອ​ກໍ່ສ້າງ​ບັນດາ​ອົງການ​ຜູ້ຕາງໜ້າທີ່​ມີ​ຄວາມ​ສາມາດ​ເຄື່ອນ​ໄຫວ​ຢ່າງ​ພຽງພໍ ດ້ວຍ​ຄຸນະພາບ​ແລະປະສິດທິ​ຜົນ​ດີຍິ່ງ​ຂຶ້ນ.

​ໃນ​ທົ່ວ​ປະ​ເທດ​ມີ​ຜູ້​ທີ່​ມີ​ສິດ​ເລືອກ​ຕັ້ງທັງ​ໝົດ 67.485.482 ຄົນ, ​ໃນ​ນັ້ນ ຜູ້​ທີ່​ໄດ້​ໄປ​ປ່ອນ​ບັດ 67.049.091 ຄົນ ກວມ​ເອົາ 99,35%. ຈຳນວນ​ສະມາຊິກ​ສະພາ​ແຫ່ງ​ຊາດທັງ​ໝົດທີ່​ຖືກ​ເລືອກ​ຕັ້ງ​ໃນ​ວັນ​ທີ 22-5-2016 ​ແລະ ​ເລືອກ​ຕັ້ງ​ເພີ່ມ​ເຕີມ​ໃນ​ວັນ​ທີ 29-5-2016 ຢູ່​ເກິ່ນ​ເທີ ​ແມ່ນ 496 ຄົນ (​ເລືອກ​ຕັ້ງ​ຂາດ 4 ຄົນ​ທຽບ​ກັບຈຳນວນ ສສ ​ທັງ​ໝົດທີ່​ໄດ້​ເລືອກ​ຕັ້ງ); ​ໃນ​ນັ້ນ, ຄຳນວນ ສສ ​ໂດຍ​ແມ່ນສຳນັກງານ​ອົງການ​ສູນ​ກາງ​ແນະນຳ ​ແລະ ຖືກ​ເລືອກ​ຕັ້ງ ມີ 182 ຄົນ (36,70%); ຈຳນວນ ສສ ​ໂດຍ​ແມ່ນ​ສຳນັກງານ​ອົງການ​ທ້ອງ​ຖິ່ນ​ແນະນຳ ​ແລະ ຖືກ​ເລືອກ​ຕັ້ງ​ມີ 312 ຄົນ (62,90%). ​ໂຄງ​ປະກອບ​ຂອງ ສສ ຄືດັ່ງ​ນີ້: ສສ ​ເປັນ​ຄົນ​ຊົນ​ເຜົ່າ​ສ່ວນນ້ອຍ 86 ຄົນ (17,30%); ສສ ​ເປັນຜູ້ຍິງ 133 ຄົນ (26,80%); ສສ ​ເປັນ​ຄົນ​ຢູ່​ນອກ​ພັກ 21 ຄົນ (4,20%); ສສ ທີ່​ຍັງ​ໜຸ່ມ (ອາຍຸ​ບໍ່​ເຖິງ 40 ປີ) 71 ຄົນ (14,30%); ສສ ຊຸດ​ທີ XIII ​ໄດ້​ຖືກ​ເລືອກ​ຕັ້ງ​ຄືນ​ໃໝ່​ເຂົ້າ​ໃນ​ຊຸດ​ທີ XIV ມີ 160 ຄົນ (32,30%); ສສ ທີ່​ເຂົ້າ​ຮ່ວມ​ສະພາ​ແຫ່ງ​ຊາດ​ຄັ້ງ​ທຳ​ອິດ​ແມ່ນ 317 ຄົນ (63,90%); ສສ ທີ່​ສະໝັກ​ຮັບເລືອກ​ຕັ້ງອິດ​ສະລະ 2 ຄົນ (0,4%). ກ່ຽວ​ກັບ​ລະດັບ​ການ​ສຶກສາ: ​ເໜືອ​ມະຫາວິທະຍາ​ໄລ​ມີ 310 ຄົນ (62,50%); ມະຫາວິທະຍາ​ໄລ 180 ຄົນ (36,30%); ບໍ່​ບັນລຸ​ມະຫາວິທະຍາ​ໄລ 6 ຄົນ (1,20%).

ກ່ຽວ​ກັບການເລືອກ​ຕັ້ງສະມາຊິກ​ສະພາ​ປະຊາຊົນ​ຂັ້ນ​ຕ່າງໆ, ຈຳນວນສະມາຊິກ​ສະພາ​ປະຊາຊົນທີ່​ຖືກ​ເລືອກ​ຕັ້ງ​ໃນ​ແຕ່ລະ​ຂັ້ນ​ຄື​ດັ່ງ​ນີ້: ຂັ້ນ​ແຂວງ: 3.908 ຄົນ (ຍັງຂາດ 8 ຄົນ​ ທຽບ​ກັບ​ຈຳນວນສະມາຊິກ​ສະພາ​ປະຊາຊົນຂັ້ນ​ແຂວງທັງ​ໝົດ​ທີ່​ຈະ​ໄດ້​ເລືອກ​ຕັ້ງຄື 3.916 ຄົນ); ຂັ້ນ​ເມືອງ: 25.181 ຄົນ (ຍັງຂາດ 77 ຄົນ​ ທຽບ​ກັບ​ຈຳນວນສະມາຊິກ​ສະພາ​ປະຊາຊົນ​ຂັ້ນເມືອງທັງ​ໝົດ​ທີ່ຈະ​ໄດ້​ເລືອກ​ຕັ້ງ​ຄື 25.258 ຄົນ); ຂັ້ນ​ຕາ​ແສງ: 292.306 ຄົນ (ຍັງ​ຂາດ 5.671 ຄົນ​ ທຽບ​ກັບ​ຈຳນວນສະມາຊິກ​ສະພາ​ປະຊາຊົນຂັ້ນ​ຕາ​ແສງທັງ​ໝົດ​ທີ່ຈະ​ໄດ້​ເລືອກ​ຕັ້ງ​ຄື 297.977 ຄົນ).

ກ່ຽວ​ກັບ​ການ​ເລືອກ​ຕັ້ງ​ເພີ່ມ​ເຕີມ: ມີ 2 ໜ່ວຍ​ເລືອກ​ຕັ້ງ​ຢູ່​ນະຄອນ​ເກິ່ນ​ເທີ ​ໄດ້​ເລືອກ​ຕັ້ງສະມາຊິກ​ສະພາ​ແຫ່ງ​ຊາດ​ເພີ່ມ​ເຕີມ​ອີກ 2 ຄົນ. ຂັ້ນ​​ແຂວງ ບໍ່​ມີ​ການ​ເລືອກ​ຕັ້ງ​ເພີ່ມ​ເຕີມ. ມີ 3 ໜ່ວຍ​ເລືອກ​ຕັ້ງສະມາຊິກ​ສະພາ​ປະຊາຊົນຂັ້ນ​ເມືອງຢູ່ 3 ​ແຂວງ ​ແລະ 642 ໜ່ວຍ​ເລືອກ​ຕັ້ງ​ຢູ່ 538 ຕາ​ແສງ​ສັງກັດ 33 ​ແຂວງ-ນະຄອນ ​ໄດ້​ຈັດ​ຕັ້ງ​ການ​ເລືອກ​ຕັ້ງ​ເພີ່ມ​ເຕີມສະມາຊິກ​ສະພາ​ປະຊາຊົນຂັ້ນ​ຕາ​ແສງຕື່ມ​ອີກ 1.285 ຄົນ.

ກ່ຽວ​ກັບ​ການ​ເລືອກ​ຕັ້ງ​ຄືນ​ໃໝ່: ມີ​ເຂດ​ເລືອກ​ຕັ້ງ 1 ​ແຫ່ງຕ້ອງຍົກ​ເລີກ​ຜົນ​ຂອງການເລືອກ​ຕັ້ງສະມາຊິກ​ສະພາ​ແຫ່ງ​ຊາດ​ຊຸດ​ທີ່ XIV ​ແລະ ສະມາຊິກ​ສະພາ​ປະຊາຊົນທັງ 3 ຂັ້ນ ສະ​ໄໝ 2016 - 2021, ມີ 1 ໜ່ວຍ​ເລືອກ​ຕັ້ງສະມາຊິກ​ສະພາ​ປະຊາຊົນ​ຂັ້ນ​ຕາ​ແສງ​ຕ້ອງ​ຍົກ​ເລີກ​ຜົນ​ຂອງ​ການ​ເລືອກ​ຕັ້ງ​ສະມາຊິກ​ສະພາ​ປະຊາຊົນ​ຕາ​ແສງ ​ແລະ ດຳ​​ເນີນການ​ເລືອກ​ຕັ້ງ​ຄືນ​ໃໝ່​ໃນ​ວັນ​ອາທິດ ທີ 5-6-2015.

ລາຍ​ງານ​ໃຫ້​ຮູ້​ວ່າ, ສະພາ​ເລືອກ​ຕັ້ງ​ແຫ່ງ​ຊາດ, ຄະນະ​ກຳມະການ​ເລືອກ​ຕັ້ງ​ຂັ້ນ​ຕ່າງໆ​ ໄດ້ດຳ​ເນີນ​ການຮັບຮອງ​ຄຸນ​ລັກສະນະ​ຜູ້​ແທນ​ຂອງສະມາຊິກ​ສະພາ​ແຫ່ງ​ຊາດ​ຊຸດ​ທີ່ XIV, ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ ສະ​ໄໝ 2016 - 2021. ຕາມ​ນັ້ນ, ສະພາ​ເລືອກ​ຕັ້ງ​ແຫ່ງ​ຊາດ​ໄດ້​ມີ​ຄວາມ​ຮອບ​ຄອບ​ທີ່​ສຸດ​ໃນ​ການພິຈາລະນາ ຮັບຮອງ​ຄຸນ​ລັກສະນະຜູ້​ແທນ​ຂອງ ສສ, ມີ​ການ​ລົງ​ຕະ​ແນນ​ສຽງ​ດ້ວຍການ​ປ່ອນ​ບັດ, ຜົນ​ສຸດທ້າຍ​ຄື ບໍ່​ຮັບ​ຮອງຄຸນ​ລັກສະນະ​ຜູ້​ແທນ​ຂອງ 2 ຄົນ. ​ເປັນ​ອັນວ່າ, ມີ​ 494 ຄົນ​ຖືກ​ເລືອກ​ຕັ້ງ, ​ຖືກ​ຮັບຮອງ​ວ່າ​ມີ​ຄຸນ​ລັກ​ສະນະ​ເປັນສະມາຊິກ​ສະພາ​ແຫ່ງ​ຊາດ​ຊຸດ​ທີ່ XIV.

ກ່ຽວ​ກັບສະມາຊິກ​ສະພາ​ປະຊາຊົນ​ຂັ້ນຕ່າງໆ, ທົ່ວ​ປະ​ເທດ​ມີ ສະມາຊິກ​ສະພາ​ປະຊາຊົນ​ຂັ້ນ​ແຂວງ 3.907 ຄົນ, ສະມາຊິກ​ສະພາ​ປະຊາຊົນ​ຂັ້ນ​ເມືອງ 25.180 ຄົນ, ສະມາຊິກ​ສະພາ​ປະຊາຊົນ​ຂັ້ນຕາ​ແສງ 292.305 ຄົນ ທີ່​ຖືກ​ຮັບຮອງ​ວ່າ​ມີ​ຄຸນ​ລັກສະນະ​ຜູ້​ແທນ​ເປັນສະມາຊິກ​ສະພາ​ປະຊາຊົນ ສະ​ໄໝ 2016 - 2021.

ຄຽງ​ຄູ່​ກັບ​ບັນດາ​ຜົນສຳ​ເລັດ​​ດັ່ງກ່າວເທິງ​ນີ້, ການ​ເລືອກ​ຕັ້ງ​ຄັ້ງນີ້​ກໍ​ມີ​ຂໍ້​ຈຳກັດ​ຄື ຈຳນວນ ສສ ບໍ່​ຄົບ 500 ຄົນ​ຄື​ທີ່​ຄະນະ​ກຳມະການປະຈຳສະພາ​ແຫ່ງ​ຊາດ​ໄດ້​ຄາດ​ຫວັງ, ຍັງ​ມີ​ກໍລະນີ​ຜູ້​ຖືກ​ເລືອກ​ຕັ້ງ​ແລ້ວ​ແຕ່​ບໍ່​ມີ​ຄຸນ​ລັກສະນະ​ພຽງພໍ​ເພື່​ອເປັນ ສສ, ດັ່ງ​ນັ້ນ ສະພາ​ເລືອກ​ຕັ້ງ​ແຫ່ງ​ຊາດ​ຈຶ່ງ​ບໍ່​ຮັບຮອງ​ຄຸນ​ລັກສະນະ​ຜູ້​ແທນ; ຍັງ​ມີ​ຂໍ້​ຜິດພາດ​ໃນ​ການ​ພິມບັດລາຍ​ຊື່​ຜູ້​ສະໝັກ​ຮັບ​ເລືອກ​ຕັ້ງ ຊຶ່ງ​ພາ​ໃຫ້​ຕ້ອງ​ຍົກ​ເລີກ​ຜົນ​ຂອງ​ການ​ເລືອກ​ຕັ້ງ ​ແລະ ຕ້ອງ​ດຳ​ເນີນ​ການ​ເລືອກ​ຕັ້ງ​ຄືນ​ໃໝ່; ຍັງ​ມີ​ຂໍ້​ຜິດພາດ​ໃນ​ການ​ກວດກາ​ຈຳນວນ​ບັດ​ຄະ​ແນນ​ສຽງ​ທີ່​ຈ່າຍອອກ, ຈຳນວນ​ບັດ​ຄະ​ແນນ​ສຽງ​ທີ່​ຮັບ​ມາ, ການ​ປະ​ທັບ​ຕາ​ໃສ່​ບັດ​ຜູ້​ມີ​ສິດ​ເລືອກ​ຕັ້ງທີ່​ໄດ້​ປ່ອນ​ບັດ​ແລ້ວ, ຍັງ​ມີ​ກໍລະນີ​ປ່ອນ​ບັດ​ຊ່ວຍ ປ່ອນ​ບັດ​ແທນ.

ກ່າວ​ປາ​ໄສ​ທີ່​ກອງ​ປະຊຸມ, ສະຫາຍ​ເລຂາທິການ​ໃຫຍ່ ຫງວຽນ​ຝູຈ້ອງ ​​ໄດ້​ເນັ້ນວ່າ ຜົນສຳ​ເລັດ​ຂອງ​ການ​ເລືອກ​ຕັ້ງ​ໄດ້ຢັ້ງຢືນອີກ​ຄັ້ງ​ເຖິງ​ສະຕິ​ການ​ເມືອງ, ຄວາມ​ຮັບຜິດຊອບ ​ແລະ ນ້ຳ​ໃຈ​ຮັກ​ຊາດ​ຂອງ​ປະຊາຊົນ​ເຮົາ, ສະ​ແດງ​ໃຫ້​ເຫັນ​ເຖິງ​ຄວາມ​ໄວ້​ວາງ​ໄຈ​ຂອງ​ປະຊາຊົນ​ຕໍ່​ກັບ​ການ​ນຳພາ​ຂອງ​ພັກ, ການ​ຄຸ້ມ​ຄອງ ຈັດການ​ບໍລິຫານ​ຂອງ​ລັດ, ຢັ້ງຢືນ​ສິດ​ເປັນ​ເຈົ້າ​ຂອງ​ປະຊາຊົນ ​ແລະ ຈິດ​ໃຈ​ສາມັກຄີ​ແຫ່ງ​ຊາດ.

ພິ​​ເສດ, ວຽກ​ງານ​ບຸກຄະລາ​ກອນ​ໄດ້​ດຳ​ເນີນ​ໄປ​ເປັນ​ຢ່າງ​ດີ, ຮັບປະກັນ​ເສີມ​ຂະຫຍາຍ​ປະຊາທິປະ​ໄຕ ​ແລະ ການ​ນຳພາ​ລວມສູນ, ເປັນ​ເອກະ​ພາບ​ຂອງ​ພັກ​ໃນ​ວຽກ​ງານ​ພະນັກງານ, ​​ໂດ​ຍພື້ນຖານ​ແມ່ນ​ໄດ້​​ແນະນຳ​ບັນດາ​ຜູ້​ທີ່​ເປັນ​ແບບຢ່າງທາງ​ດ້ານ​ຄຸນ​ສົມບັດ ​ແລະ ຄວາມ​ສາມາດ, ສົມ​ກັບ​ເປັນ​ຕົວ​ແທນ​ໃຫ້​ແກ່​ເຈດ​ຈຳນົງ ຄວາມ​ປາຖະໜາ ​ແລະ ສິດ​ເປັນ​ເຈົ້າ​ຂອງ​ປະຊາຊົນ.

​ໂດຍ​ຕາງໜ້າ​ຄະນະ​ບໍລິຫານ​ງານ​ສູນ​ກາງ​ພັກ, ກົມ​ການ​ເມືອງ, ຄະນະ​ເລຂາທິການ​ສູນ​ກາງ, ສະຫາຍ​ເລຂາທິການ​ໃຫຍ່ ຫງວຽນ​ຝູຈ້ອງ ​ໄດ້​ຊົມ​ເຊີຍ ​ແລະ ຂອບ​ອົກ​ຂອບ​ໃຈ​ຢ່າງ​ສຸດ​ໃຈ ຕໍ່​ຜູ້​ມີ​ສິດ​ເລືອກ​ຕັ້ງ​ໃນ​ທົ່ວ​ປະ​ເທດ, ຕໍ່​ບັນດາ​ຄະນະ​ພັກ, ອຳນາດ​ການ​ປົກຄອງ, ​ແນວ​ໂຮມ ​ແລະ ບັນດາ​ສຳນັກງານ​ອົງການ​ທີ່​ກ່ຽວ ທີ່​ໄດ້​ປະຕິບັດ​ເປັນ​ຢ່າງ​ດີ​ວຽກ​ງານ​ກະກຽມ ​ແລະ ຈັດ​ຕັ້ງການເລືອກ​ຕັ້ງສະມາຊິກ​ສະພາ​ແຫ່ງ​ຊາດ​ຊຸດ​ທີ່ XIV ​ແລະ ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ ສະ​ໄໝ 2016 - 2021 ຢ່າງ​ສຳ​ເລັດ​ຜົນ.

ສະຫາຍ​ເລຂາທິການ​ໃຫຍ່ ຫງວຽນ​ຝູຈ້ອງ ຊີ້​ແຈ້ງວ່າ, ຄຽງ​ຂ້າງ​ກັບ​ຜົນສຳ​ເລັດ​ທີ່​ບັນລຸ​ໄດ້ນັ້ນ, ໜ້າ​ທີ່​ທີ່​ວາງ​ອອກ​ມາ​ໃນ​ເວລາ​ສະ​ເພາະ​ໜ້າ​ແມ່ນ​ໜັກໜ່ວງ​ທີ່​ສຸດ, ມັນ​ຮຽກຮ້ອງ​ໃຫ້​ສະພາ​ແຫ່ງ​ຊາດ ​ແລະ ສະພາ​ປະຊາຊົນ​ຂັ້ນ​ຕ່າງໆ ຕ້ອງ​ສືບ​ຕໍ່​ປ່ຽນ​ແປງ​ໃໝ່, ຍົກ​ສູງ​ຄຸນ​ນະພາ​ບ ປະສິດທິ​ຜົນ​ຂອງ​ການ​ເຄື່ອນ​ໄຫວຍິ່ງ​ກວ່າ​ອີກ. ສະມາຊິກ​ສະພາ​ແຫ່ງ​ຊາດ​ ​ແລະ ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ ​ແຕ່ລະຄົນ ຕ້ອງ​ຕັ້ງໜ້າ​ພະຍາຍາມ​ເສີມ​ຂະຫຍາຍ​ບົດບາດ ຄວາມ​ຮັບຜິດຊອບ​ຂອງ​ຕົນ, ປະຕິບັດ​ໜ້າ​ທີ່​ຕາມ​ກຳນົດ​ຂອງ​ກົດໝາຍ​ໃຫ້​ສຳ​ເລັດ​ເປັນ​ຢ່າງດີ./.

ສັງ​ລວມ​ໂດຍ ນດ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ