ວັນພຸດ, 26/7/2017
ສືບຕໍ່ຍູ້ແຮງການປະຕິຮູບ ການບໍລິຫານແຫ່ງລັດ ຕາມຈິດໃຈຂອງມະຕິ ກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມ
12/8/2016 17:14' ສົ່ງ ພິມ
ພາບປະກອບ

ໂດຍ​ຜ່ານ 30 ປີ ແຫ່ງ​ການ​ປະ­ຕິ­ບັດ​ພາ­ລະ­ກິດ​ປ່ຽນ­ແປງ​ໃໝ່​ປະ­ເທດ​ຢ່າງ​ຮ້ອບ​ດ້ານ, ພ້ອມ​ກັນ​ກັບ​ປ່ຽນແປງ​ໃໝ່​ລະ­ບົບ​ການ­ເມືອງ ແລະ ການ​ປະ­ຕິ​ຮູບ​ກົງ­ຈັກ​ແຫ່ງ​ລັດ​ເວົ້າ​ລວມ, ການ​ປະ­ຕິ​ຮູບ​ການ​ບໍ­ລິ­ຫານ​ແຫ່ງ​ລັດ​ຍາມ​ໃດ​ກໍ່​ເປັນ​ນະ­ໂຍ­ບາຍ​ທີ່​ສະ­ເໝີ​ຕົ້ນ​ສະ­ເໝີ​ປາຍ​ອັນ​ໜື່ງ ​ຂອງ​ພັກກອມ​ມູນິດ​ຫວຽດນາມ. ໂດຍ​ຜ່ານ​ກອງ​ປະ­ຊຸມ​ໃຫຍ່​ຫຼາຍ​ຄັ້ງ, ພັກ​ເຮົາ​ໄດ້​ມີ​ມະ­ຕິ​ກ່ຽວ​ກັບ​ປ່ຽນ­ແປງ​ໃໝ່​ການ­ຈັດ­ຕັ້ງ​ກົງ­ຈັກ​ຂອງ​ລະ­ບົບ​ການ­ເມືອງ, ກໍ່­ສ້າງ​ລັດ​ແຫ່ງ​ອຳ­ນາດ​ກົດໝາຍ​ສັງ­ຄົມ​ນິ­ຍົມ ເຊິ່ງ​ຈຸ​ດໜັກ​ໃຈ­ກາງ​ແມ່ນ​ການ​ປະ­ຕິ​ຮູບ​ລະ­ບົບ​ການ​ບໍ­ລິ­ຫານ​ແຫ່ງ​ລັດ. ດັ່ງນັ້ນ, ອາດ​ຈະ​ຢືນ­ຢັນ​ໄດ້​ວ່າ, ການ​ປະ­ຕິ​ຮູບ​ການ​ບໍ­ລິ­ຫານ​ແມ່ນ​ຄວາມ​ຕ້ອງ­ການ​ທີ່​ຈຳ­ເປັນ​ແນ່­ນອນ​ ພາ­ວະ​ວິ​ໃສ​ອັນ​ໜຶ່ງ​ ໃນ​ຂະ​ບວນ​ວິ­ວັດ​ແຫ່ງ​ການ​ພັດ­ທະ­ນາ ເຊິ່ງ​ມີ​ຄວາມ​ໝາຍ​ສຳ­ຄັນ​ທີ່​ສຸດ​ເພື່ອ​ຊຸກ­ຍູ້​ການ​ປະ­ຕິ​ຮູບ​ເສດຖະກິດ ແລະ ຮັບ­ປະ­ກັນ​ຄວາມ​ສຳ­ເລັດ​ຜົນ​ ຂອງ​ພາ­ລະ­ກິດ​ກໍ່­ສ້າງ ແລະ ພັດ­ທະ­ນາ​ປະ­ເທດ, ກໍ່­ສ້າງ​ລັດ​ແຫ່ງ​ອຳ­ນາດ​ກົດໝາຍ​ສັງ­ຄົມ​ນິ­ຍົມ​ ໃນ​ຂະ​ບວນ​ວິ­ວັດ​ແຫ່ງ​ການ​ເຊື່ອມ​ໂຍງ​ສາ­ກົນ.

ໃນ​ເວ­ລາ​ທີ່​ຜ່ານ​ມາ, ໂດຍ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XI ຂອງ​ພັກ ແລະ ​ແຜນຍຸດ​ທະ​ສາດ​ພັດ­ທະ­ນາ​ເສດ­ຖະ­ກິດ - ສັງ­ຄົມ ​ໄລ­ຍະ 2011 – 2020, ລັດ­ຖະ­ບານ​ໄດ້​ອອກມະ­ຕິສະບັບເລກ​ທີ 30c/NQ-CP ​ລົງ​ວັນ​ທີ 8 ພະ­ຈິກ 2011, ວ່າ​ດ້ວຍ​ການປະ­ກາດ​ໃຊ້ ​ແຜນ​ແມ່​ບົດ​ການ​ປະ­ຕິ​ຮູບ​ການ​ບໍ­ລິ­ຫານ​ແຫ່ງ​ລັດ​ໄລຍະ 2011 – 2020 (ເອີ້ນ​ຫຍໍ້​ວ່າ​​ແຜນ​ແມ່​ບົດ). ຕາມ​ນັ້ນ, ໄດ້​ກຳ­ນົດ​ເປົ້າ​ໝາຍ​ຂອງ​ການ​ປະ­ຕິ​ຮູບ​ການບໍລິຫານ​ແມ່ນ: 1 - ກໍ່­ສ້າງ, ປົວ­ແປງ​ບູ­ລະ­ນະ​ ລະ­ບົບ​ລະ­ບຽບ​ກົດ­ໝາຍ​ເສດ­ຖະ­ກິດ​ຕະ­ຫຼາດ​ຕາມ​ທິດ​ສັງຄົມນິຍົມ ແນ­ໃສ່ປົດປ່ອຍກຳ­ລັງ​ການ​ຜະ­ລິດ, ລະ­ດົມ ແລະ ນຳ​ໃຊ້​ຢ່າງ​ມີ​ປະ​ສິດ­ທິ​ຜົນ ​ທຸກ​ແຫຼ່ງ​ພະ­ລັງ​ໃຫ້​ແກ່​ການ​ພັດ­ທະ­ນາ​ປະ­ເທດ; 2- ສ້າງ​ສະ­ພາບ​ແວດ​ລ້ອມ​ແຫ່ງ​ການ​ທຸ­ລະ​ກິດ​ອັນ​ສະ­ເໝີ­ພາບ, ປອດ­ໂປ່ງ, ສະດວກ, ໂປ່ງ​ໃສ​ ແນ​ໃສ​ຫລຸດ­ຜ່ອນຄວາມ​ເສຍ​ຫາຍ​ທາງ​ດ້ານ​ເວ­ລາ ແລະ ຄ່າ​ໃຊ້​ຈ່າຍ ​ຂອງ​ບັນ­ດາ​ວິ​ສາ​ຫະ​ກິດ​ຂອງ​ທຸກ​ພາກ­ສ່ວນ​ເສດ­ຖະ­ກິດ ​ໃນ​ການ​ປະ­ຕິ­ບັດ​ລະ­ບຽບ​ການ​ບໍ­ລິ­ຫານ; 3- ກໍ່­ສ້າງ​ລະ­ບົບ​ບັນ­ດາ​ອົງ­ການ​ບໍລິຫານ​ແຫ່ງ​ລັດ​ ແຕ່​ສູນ​ກາງ​ຈົນ​ຮອດ​ຮາກ​ຖານ​ ໃຫ້​ມີ​ຄວາມ​ທະ­ລຸລ່ວງ, ສະ­ອາດ​ປອດ​ໃສ, ເຂັ້ມ­ແຂງ, ທັນ​ສະໄໝ, ມີຄວາມ​ສັກສິດ ແລະ ປະ​ສິດ­ທິ​ຜົນ; 4- ຮັບ­ປະ­ກັນ​ການ​ປະ­ຕິ­ບັດ​ໃນ​ພາກ​ຕົວ​ຈິງ​ ສິດ​ປະ­ຊາ­ທິ­ປະ­ໄຕ​ຂອງ​ປະ­ຊາ­ຊົນ, ຮັກ­ສາ​ສິດ​ທິມະ­ນຸດ, ຕິ​ດພັນ​ສິດທິ​ມະ­ນຸດ ​ກັບ​ສິດແລະຜົນ​ປະ­ໂຫຍດ​ຂອງ​ຊົນ​ຊາດ ຂອງ​ປະເທດ​ຊາດ; 5- ກໍ່­ສ້າງ​ຖັນ​ແຖວ​ພະ­ນັກ­ງານ ຂ້າ​ລັດ­ຖະ­ການ ​ທີ່​ມີ​ຄຸນ­ສົມ­ບັດ ມີຄວາມ​ສາ­ມາດ​ ແລະ ມີລະດັບ​ຄວາມ​ຮູ້ຢ່າງ​ພຽງ­ພໍ ​ເພື່ອຕອບ​ສະໜອງ​ຄວາມ​ຮຽກ­ຮ້ອງ​ຕ້ອງ­ການ​ຮັບ​ໃຊ້​ປະ­ຊາ­ຊົນ ແລະ ການ​ພັດ­ທະນາ​ປະເທດ.  ​ແຜນ​ແມ່​ບົດ​ໄດ້​ກຳ­ນົດ​ວ່າ ​ຕ້ອງສືບ​ຕໍ່​ຜັນ​ຂະ­ຫຍາຍ​ປະ­ຕິ​ຮູບການ​ບໍ­ລິ­ຫານ​ໃນ 6 ຂົງ­ເຂດ: ປະ­ຕິ​ຮູບ​ລະ­ບຽບ​ກົດ­ໝາຍ, ລະ­ບຽບ​ການ​ບໍ­ລິ­ຫານ, ການ­ຈັດ­ຕັ້ງ​ກົງ­ຈັກ​ບໍ­ລິ­ຫານ​ແຫ່ງ​ລັດ; ກໍ່­ສ້າງ​ຍົກ​ສູງ​ຄູນ​ນະ​ພາບ​ຖັນ​ແຖວ​ພະ­ນັກ­ງານ, ຂ້າ​ລັດ​ຖະ​ການ; ການ​ເງິນ​ຫຼວງ ແລະ ການ​ຫັນການ​ບໍ­ລິ­ຫານ​ເປັນ​ທັນ​ສະ­ໄໝ​. ໃນ​ນັ້ນ, ​ຈຸດໜັກ​ໃຈ​ກາງຂອງ​ການ​ປະ­ຕິ​ຮູບ​ການບໍ­ລິ­ຫານ​ໃນ​ໄລ­ຍະ 10 ປີ ຕໍ່​ໄປ​ນີ້​ແມ່ນ: ກໍ່­ສ້າງ, ຍົກ​ສູງ​ຄູນ​ນະ​ພາບ​ຂອງ​ຖັນ​ແຖວ​ພະ­ນັກ­ງານ, ຂ້າ​ລັດຖະການ, ສຸມ​ໃສ່​ປະ­ຕິ​ຮູບ​ນະ­ໂຍ­ບາຍ​ເງິນ­ເດືອນ ​ແນ­ໃສ່​ສ້າງ​ກຳ­ລັງ​ຊຸກ​ດັນ​ຢ່າງ​ແທ້​ຈິງ​ເພື່ອ​ໃຫ້​ພະ­ນັກ­ງານ, ຂ້າ​ລັດ​ຖະ​ການ​ເຮັດ​ວຽກ; ຍົກ​ສູງ​ຄຸນ​ນະ​ພາບ​ຂອງການ​ບໍ­ລິ­ການ​ບໍ­ລິ­ຫານ ແລະ ຄຸນ​ນະ​ພາບ​ຂອງການ​ບໍ­ລິ­ການ​ສາ­ທາ­ລະ­ນະ.

ບັນ­ດາ​ຜົນ­ສຳ­ເລັດຕົ້ນ­ຕໍ​ທີ່​ບັນ­ລຸ​ໄດ້​ ໃນ​ການ​ປະ­ຕິ​ຮູບ​ການ​ບໍ­ລິ­ຫານ​ ໃນ​ເວ­ລາ​ທີ່​ຜ່ານ​ມາ

ດ້ວຍ​ການ​ຊີ້​ນຳ​ຢ່າງ​ແທດ​ເຖິງ​ຂອງ​ລັດ­ຖະ­ບານ, ນາ­ຍົກ­ລັດ­ຖະ­ມົນ­ຕີ ແລະ ອຳ­ນາດ​ການ​ປົກ­ຄອງ​ທ້ອງ​ຖິ່ນ​ຂັ້ນ​ຕ່າງໆ, ໃນ​ເວ­ລາ​ທີ່​ຜ່ານ​ມາ ການ​ປະ­ຕິ​ຮູບ​ການ​ບໍ­ລິ­ຫານ​ໄດ້​ຮັບ​ການ​ຜັນ​ຂະ­ຫຍາຍ​ຢ່າງ­ຮອບ­ດ້ານ, ຄົບ​ຊຸດ ແລະ ບັນ­ລຸ​ໄດ້​ຜົນ­ສຳ­ເລັດ​ອັນ​ຕັ້ງ­ໜ້າ​ຫຼາຍ​ຢ່າງ, ໄດ້​ປະ­ກອບ­ສ່ວນ​ອັນ​ສຳ­ຄັນ​ເຂົ້າ​ໃນ​ຜົນ­ງານ​ແຫ່ງ​ການ​ພັດທະ­ນາ​ລວມ​ຂອງ​ປະ­ເທດ. ສັງ​ລວມ​ບັນ­ດາ​ຜົນ­ງານ​ຕົ້ນ​ຕໍ່​ທີ່​ບັນ­ລຸ​ໄດ້​ ໃນ​ຂົງ­ເຂດ​ຕ່າງໆ ​ຄືດັ່ງ​ລຸ່ມ​ນີ້:

ທີ​ໜຶ່ງ, ລະ­ບົບ​ລະ­ບຽບ​ກົດ­ໝາຍ, ເປັນ­ຕົ້ນ​ແມ່ນ​ລະ­ບຽບ​ກົດ­ໝາຍ​ເສດ­ຖະ­ກິດ​ຕະ­ຫຼາດ​ ສືບ​ຕໍ່​ໄດ້​ຮັບ​ການ​ປັບ­ປຸງບູ­ລະ­ນະ. ໃນ​ເວ­ລາ​ທີ່​ຜ່ານ​ມາ, ການ​ປະ­ຕິ​ຮູບ​ລະ­ບຽບ​ກົດ­ໝາຍ​ຖືກກຳ­ນົດ​ເປັນ​ຈຸດໜັກໃຈ​ກາງ­ຂອງ​ການ​ປະ­ຕິ​ຮູບ​ການ​ບໍ­ລິ­ຫານ, ສ່ອງ​ແສງ​ເຖິງ​ການ​ນຳ­ພາ​ຂອງ​ພັກ, ວຽກ​ງານ​ຊີ້​ນຳ ບັນ­ຊາ​ຄວບ​ຄຸມ ​ຂອງ​ລັດຖະບານ, ນາ­ຍົກ­ລັດ­ຖະ­ມົນ­ຕີ​ ໃນ​ການ​ປະ­ຕິ­ບັດ​ເປົ້າ​ໝາຍ​ກໍ່­ສ້າງ​ລັດ­ຖະ­ບານ​ສ້າງ­ສັນ​ພັດ­ທະ­ນາ. ຕາມ​ນັ້ນ, ລະ­ບົບ​ລະ­ບຽບ​ກົດ­ໝາຍ, ຂໍ້​ກຳນົດກົດ­ໝາຍ​ຂອງ​ລັດ­ຖະ­ບານ, ກະ­ຊວງ, ຂະ­ແໜງ­ການ ແລະ ​ອຳ­ນາດ​ການ​ປົກ­ຄອງທ້ອງ​ຖິ່ນ ກ່ຽວ​ກັບ​ການ​ພັດ­ທະ­ນາ​ເສດ­ຖະ­ກິດ, ວັດ­ທະ­ນະ­ທຳ, ຮັບ­ປະ­ກັນ​ການ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ, ເພີ່ມ​ທະ­ວີ​ວຽກ​ງານ​ພົວ­ພັນ​ຕ່າງ­ປະ­ເທດ... ​ໄດ້​ຮັບ​ການປະ­ກາດ​ໃຊ້​ຢ່າງ​ຄົບ​ຊຸດ ​ແລະ ຄົບ​ຖ້ວນພໍ​ສົມ­ຄວນ. ລະບຽບ​ກົດ­ໝາຍ​ຂອງ​ລະ­ບົບ​ການ​ບໍ­ລິ­ຫານ ​ໄດ້​ຮັບ​ການ​ປະ­ຕິ​ຮູບ ແລະ ໄດ້​ປົວ­ແປງ​ບູ­ລະ­ນະ​ໂດຍ​ພື້ນຖານ​ເປັນ​ກ້າວໆ; ລະ­ບຽບ​ກົດ­ໝາຍ​ກ່ຽວ​ກັບ​ການ​ຫັນ​ເປັນ​ສັງ­ຄົມ, ຮ່ວມ​ມື​ພາກ​ລັດ-ເອ­ກະ​ຊົນ ໄດ້​ປະ­ກາດ​ໃຊ້ ແລະ ​ເຂົ້າສູ່ຊີ­ວິດສັງຄົມເທື່ອ​ລະ​ກ້າວ; ລະ­ບຽບ​ກົດ­ໝາຍ​ກ່ຽວ​ກັບ​ການ­ຈັດ­ຕັ້ງ​ກົງ­ຈັກ​ຂອງ​ລະ­ບົບ​ການ​ບໍ­ລິ­ຫານ, ກ່ຽວ​ກັບ​ສາຍ​ພົວ­ພັນ​ລະ­ຫວ່າງ​ລັດກັບ​ປະ­ຊາ­ຊົນ ​ສືບ​ຕໍ່​ໄດ້​ຮັບ​ການ​ປ່ຽນ­ແປງ​ໃໝ່ ແລະ ປົວ­ແປງ​ບູ­ລະ­ນະ. ວຽກ​ງານ​ໂຄສະ­ນາ​ເຜີຍ­ແຜ່, ສຶກ​ສາຮ່ຳຮຽນກົົດ​ໝາຍ​ ໄດ້​ຮັບ­ປະ­ກັນ​ສິດ​ເຂົ້າ​ເຖິງ​ກົດ­ໝາຍ​ຂອງ​ປະ­ຊາ­ຊົນ, ຍົກ​ສູງ​ຄວາມ​ຮູ້​ດ້ານ​ກົດ­ໝາຍ, ສະ­ຕິ​ປະ­ຕິ­ບັດ​ຕາມ​ກົດ­ໝາຍ​ຂອງ​ປະ­ຊາ­ຊົນ.

ທີສອງ, ກົງ­ຈັກ​ບໍ­ລິ­ຫານ​ແຫ່ງ​ລັດ​ແຕ່​ສູນ​ກາງ​ຈົນ​ຮອດ​ທ້ອງ​ຖິ່ນ​ ສືບ​ຕໍ່​ໄດ້​ຮັບ​ການ​ປົວ­ແປງ​ບູ­ລະ­ນະ ​ທາງ​ດ້ານ​ການ­ຈັດ­ຕັ້ງ ພາ­ລະ​ບົດ­ບາດ ໜ້າ­ທີ່, ຍົກ​ສູງ​ປະ​ສິດ­ທິ​ຜົນ ແລະ ຜົນ​ສັກ­ສິດ ​​ໃນການ­ເຄື່ອນ­ໄຫວ. ໄດ້​ດຳເນີນ​ການ​ທົບ​ທວນ­ຄືນ ແລະ ປະ­ກາດ​ໃຊ້​ບັນ­ດາ​ຂໍ້​ກຳ­ນົດ​ໃໝ່​ ກ່ຽວ​ກັບ​ທີ່​ຕັ້ງ, ພາ­ລະ​ບົດ­ບາດ, ໜ້າ­ທີ່, ສິດ​ອຳ­ນາດ, ໂຄງ​ສ້າງ​ການ­ຈັດ­ຕັ້ງ ແລະ ການ​ບັນ­ຈຸ​ທີ່​ມີຢູ່ ​ຂອງ​ບັນ­ດາ​ກະ­ຊວງ, ອົງ­ການ​ທຽບ​ເທົ່າກະຊວງ, ອົງການ​ຂຶ້ນ​ກັບ​ລັດ­ຖະ­ບານ, ຄະ­ນະ​ກຳ­ມະ­ການ​ປະ­ຊາ­ຊົນ​ຂັ້ນ​ຕ່າງໆ, ບັນ­ດາ​ອົງ­ການ​ວິ­ຊາ​ສະເພາະ​ຂຶ້ນ​ກັບ​ຄະນະ​ກຳ­ມະ­ການ​ປະ­ຊາ­ຊົນ​ຂັ້ນ​ແຂວງ, ຂັ້ນ​ເມືອງ, ບັນ­ດາ​ອົງ​ການ­ຈັດ­ຕັ້ງ​ຂຶ້ນ​ກັບ​ກົງ­ຈັກ​ການ​ບໍລິ­ຫານ​ແຫ່ງ​ລັດ​ຢູ່​ສູນ​ກາງ ແລະ ທ້ອງ​ຖີ່ນ. ການແບ່ງ​ຂັ້ນ​ໃນ​ການ​ຄຸ້ມ​ຄອງ​ລະ­ຫວ່າງ​ສູນ​ກາງ ແລະ ທ້ອງ​ຖິ່ນ​ ສືບ​ຕໍ່​ໄດ້​ຮັບ​ການ​ຍູ້​ແຮງ​ຜັນ​ຂະ­ຫຍາຍ. ລັດ­ຖະ­ບານ​ໄດ້​ເພີ່ມ​ທະ­ວີ​ການ​ແກ້​ໄຂ​ບັນ­ດາ​ບັນ­ຫາ​ທີ່​ມີ​ລັກ­ສະ­ນະ​ຍຸດ​ທະ​ສາດ, ຍູ້​ແຮງ​ການ​ກວດ­ກາ, ຕິດ­ຕາມ​ກວດ­ກາ​ສຳ­ລັບ​ບັນ­ດາ​ໜ້າ­ທີ່ໆ​ໄດ້​ແບ່ງ​ຂັ້ນ​ໃຫ້​ທ້ອງ​ຖິ່ນ. ສຳ­ເລັດ​ການ​ແບ່ງປະ​ເພດ​ຫົວໜ່ວຍ​ພາລະ​ກິດພາກ​ລັດ​​ ເພື່ອ​ຈະມີ​ຮູບ​ການ​ເຫັນ​ປ່ຽນ​ໃຫ້​ເໝາະ​ສົມ. ຜັນ​ຂະ­ຫຍາຍ​ຢ່າ​ງກວ້າງ­ຂວາງ​ກົນ​ໄກ​ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ, ​ຮັບ­ຜິດ­ຊອບ​ດ້ວຍ​ຕົນ​ເອງ ​ຂອງບັນດາ​ຫົວໜ່ວຍ​ພາລະ​ກິກພາກ​ລັດ. ຍູ້​ແຮງ​ການ​ຫັນ​ເປັນ​ສັງ­ຄົມ, ສົ່ງ­ເສີມ​ການ​ສ້າງ­ຕັ້ງ​ບັນ­ດາ​ອົງ​ການ­ຈັດ­ຕັ້ງ​ສະ­ໜອງ​ການ​ບໍ­ລິ­ການ​ສາ­ທາ­ລະ­ນະ​ ຂອງ​ບັນ­ດາ​ພາກສ່ວນ​ເສດ­ຖະ­ກິດ​ນອກ​ພາກ​ລັດ​ ໃນ​ຂົງ­ເຂດ​ຕ່າງໆ, ເປັນ­ຕົ້ນ​ແມ່ນ​ໃນ​ຂົງ­ເຂດ​ການ​ສຶກ​ສາ - ບຳ­ລຸງ​ກໍ່­ສ້າງ, ສາທາລະນະ​ສຸກ, ວິ­ທະ­ຍາ­ສາດ - ເຕັກ​ໂນ​ໂລ​ຊີ.

ທີ​ສາມ, ​ການປະ­ຕິ​ຮູບລະບຽບ​ການ​ບໍ­ລິ­ຫານ​ ຖືກ​ກຳນົດວ່າ​ເປັນ​ຂອດ​ຈຸດໜັກ​ໃຈ­ກາງ​ໜຶ່ງ ແລະ ໄດ້ຮັບ​ການ​ຜັນ​ຂະ­ຫຍາຍ​ຢູ່​ທຸກ​ຂັ້ນ​ການ​ບໍ­ລິ­ຫານ ​ຕາມ​ທິດ​ຫັນ​ເປັນ​ງ່າຍ­ດາຍ, ສ້າງສິ່ງແວດ​ລ້ອມ​ທີ່​ສະ­ດວກ​ສະ­ບາຍ ປອດໂປ່ງ​ໃຫ້​ແກ່​ການ​ພັດ­ທະ­ນາ​ເສດ​ທ​ຖະ​ກິດ - ສັງ­ຄົມ, ຮັບ­ປະ­ກັນ​ຜົນ​ປະ­ໂຫຍດ​ອັນຊອບ​ທຳ ແລະ ສິດ​ເປັນ​ເຈົ້າ​ຂອງ​ປະຊາ­ຊົນ. ລັດ­ຖະ­ບານ, ນາ­ຍົກ­ລັດ­ຖະ­ມົນ­ຕີ​ ໄດ້​ມີ​ການ​ປະ­ກາດ​ໃຊ້​ມະ­ຕິ, ຄຳ​ສັ່ງ​ເປັນ​ຫຼາຍ​ສະ­ບັບ​ ແນໃສ່​ຍູ້​ແຮງ​ການ​ປະ­ຕິ​ຮູບ​ລະ­ບຽບ​ການ​ບໍ­ລິ­ຫານ ​ໃນ​ຂົງ­ເຂດ​ຈຳ­ນວນ​ໜຶ່ງ​ຄື: ທີ່​ດິນ, ພາ­ສີ​ອາ­ກອນ, ສຸລະກາກອນ, ປະກັນ​ໄພ​ສັງ­ຄົມ, ຈົດ​ທະ­ບຽນ​ການ​ທຸ­ລະ​ກິດ ແລະ ກໍ່­ສ້າງ, ຈົດ​ທະ­ບຽນ​ສຳ­ມະ­ໂນ​ຄົວ, ບັດປະຈຳຕົວ... ແນ­ໃສ່​ປົວ­ແປງ​ສິ່ງ­ແວ­ດລ້ອມ​ແຫ່ງ​ການ​ທຸ­ລະ​ກິດ, ຍົກ​ສູງ​ຄວາມ​ສາ­ມາດ​ແຂ່ງ­ຂັນ, ດຶງ​ດູດ​ການ​ລົງ­ທຶນ. ການ​ຜັນ​ຂະຫຍາຍ​ປະຕິບັດ​ແຜນ­ການ​ຫັນ​ລະ­ບຽບ​ການ​ບໍ­ລິ­ຫານເປັນ​ງ່າຍ­ດາຍ ​​ຕາມ​ມະ­ຕິ​ສະ­ເພາະ 25 ສະ­ບັບ​ ຂອງ​ລັດຖະບານ​ ​ເຊິ່ງ​ບັນ­ດາ​ກະ­ຊວງ ຂະ­ແໜງ­ການ​ໄດ້​ປະ­ຕິ­ບັດຢ່າງ​ສຳ­ເລັດ​ຜົນ ​ໂດຍ​ໄດ້​ຫັນ​ເປັນ​ງ່າຍດາຍຕໍ່​ລະບຽບ​ການ​ບໍລິຫານ​ 4.481 ຂໍ້​ໃນ​ຈຳ­ນວນ​ທັງ​ໝົດ 4.723 ຂໍ້, ບັນ­ລຸ​ອັດ­ຕາ​ສ່ວນ 94,87% (ນັບ​ເຖິງ​ທ້າຍ​ປີ 2015). ໃນ​ແຕ່​ລະ​ປີ, ການ​ກວດ­ຄືນລະ­ບຽບ​​ການ​ບໍ­ລິ­ຫານ ​ແລະຫັນມັນ​ເປັນ​ງ່າຍ­ດາຍ​; ການ​ປະກາດ​ ແລະ ​ເອົາ​ຂໍ້​ກຳນົດ​ໃໝ່​ຕິດ​ກະດານ​ຢ່າງ​ເປີດ­ເຜີຍ​ທີ່​ບ່ອນ​ຮັບ ແກ້​ໄຂ​ລະ­ບຽບ​​ການ​ບໍ­ລິ­ຫານ ​ໄດ້​ຊ່ວຍ​ປົດ​ປ່ອຍ​ແຫຼ່ງ​ພະ­ລັງ​ສັງ­ຄົມ, ຍົກ​ສູງ​ຄວາມ​ສາ­ມາດ​ແຂ່ງຂັນ​ແຫ່ງ​ຊາດ. ມີ​ຫຼາຍ​ໂຄງ­ການ, ຄວາມ​ຄິດ​ລິ​ເລີ່ມ​ກ່ຽວ​ກັບ​ການ​ປະ­ຕິ​ຮູບ​ການ​ບໍ­ລິ­ຫານ​ທີ່​ມີ​ລັກ­ສະ­ນະບຸກ​ທະ­ລຸ ​ໄດ້​ຮັບ​ການ​ຄົ້ນ​ຄ້ວ​າ​ກໍ່­ສ້າງ ແລະ ຜັນ​ຂະ­ຫຍາຍ​ປະ­ຕິ­ບັດ, ຜ່ານ​ນັ້ນ, ໄດ້​ບັນ­ລຸ​ຜົນ­ສຳ­ເລັດ​ອັນ​ຕັ້ງ­ໜ້າ​ຫຼາຍ​ຢ່າງ, ພິ­ເສດ​ແມ່ນ​ບັນ­ດາ​ຜົນ­ສຳ­ເລັດ​ແຫ່ງ​ການ​ປະ­ຕິ​ຮູບ, ຫຍໍ້​ສັ້ນ​ເວ­ລາ ແລະ ລະ­ບຽບ​ການ​ບໍ­ລິ­ຫານ ​ກ່ຽວ​ກັບ​ພາສີ​ອາ­ກອນ ແລະ ປະ­ກັນ​ໄພ​ສັງ­ຄົມ. ກົນ​ໄກ “ປະ­ຕູ​ດຽວ”, “ປະຕູ​ດຽວ​ມີ​ການ​ຕໍ່​ເມື່ອງ​ພາຍ​ໃນ” ສືບ​ຕໍ່​ໄດ້​ຮັບ​ການ​ຍູ້​ແຮງ ​ຜັນ​ຂະ­ຫຍາຍຢູ່​ທ້ອງ​ຖິ່ນຕ່າງໆ, ປະ­ກອບ­ສ່ວນ​ເຂົ້າ​ໃນ​ການ​ປະ­ຕິ​ຮູບ​ລະ­ບຽບ​ການ​ບໍ­ລິ­ຫານ​ ຕາມ​ທິດ​ມີ​ຄວາມ​ເປີດ­ເຜີຍ, ໂປ່ງ​ໃສ, ຫລຸດ­ຜ່ອນ​ຄວາມ​ຫຍໍ້­ທໍ້ ຄວາມ​ລຳ​ຄານ​ໃຈ​ໃຫ້​ແກ່​ປະ­ຊາ­ຊົນ ແລະ ອົງ​ການຈັດ­ຕັ້ງ​ຕ່າງໆ.

ທີ​ສີ່, ຄຸນ​ນະ​ພາບ​ຂອງ​ຖັນ​ແຖວ​ພະ­ນັກ­ງານ ຂ້າ​ລັດ­ຖະ­ການ​ ໃນກົງ­ຈັກ​ການ​ບໍ­ລິ­ຫານ​ແຫ່ງ​ລັດ​ ໄດ້​ຮັບ​ການ​ຍົກ​ສູງ​ກວ່າ​ເກົ່າ, ​ຕອບ​ສະ­ໜອງ​ຄວາມ​ຕ້ອງ­ການ ແລະ ໜ້າ­ທີ່​ໄດ້​ດີ​ກວ່າ​ເກົ່າ. ລະ­ບົບ​ເອ­ກະ­ສານ​ນິ­ຕິ​ກຳ​ທີ່​ຫັນ​ເປັນ​ລະ­ອຽດຕໍ່ຂໍ້ກຳ­ນົດ​ຂອງ​ກົດ­ໝາຍວ່າ​ດ້ວຍ​ພະ­ນັກ​ງານ ຂ້າ​ລັດ­ຖະ­ການ, ກົດ­ໝາຍ​ວ່າ​ດ້ວຍ​ລັດ­ຖະ­ກອນ ​ສືບ​ຕໍ່​ໄດ້​ຮັບ​ການ​ກໍ່­ສ້າງ, ປັບປຸງ​ບູ­ລະ­ນະ. ນາ­ຍົກ­ລັດ­ຖະ­ມົນ­ຕີ ໄດ້​ປະ­ກາດ​ໃຊ້ຂໍ້​ຕົກ­ລົງ​ສະ­ບັບ​ເລກ​ທີ 1557/QĐ-TTg, ລົງ​ວັນ​ທີ 18 ຕຸ­ລາ 2012 ກ່ຽວ​ກັບ​ການ​ອາ​ນຸ​ມັດ​ຜ່ານໂຄງ­ການ “ຍູ້​ແຮງ​ການ​ປະ­ຕິ​ຮູບ​ລະບອບ​ການ​ງານ ຂ້າ​ລັດ​ຖະ​ການ” ແນ­ໃສ່​ກໍ່­ສ້າງ​ລະ­ບົບ​ການ​ງານ ຂ້າ​ລັດ​ຖະ​ການທີ່ “ຊຳ​ໜິ​ຊຳ­ນານ, ມີ​ຄວາມ​ຮັບ­ຜິດ­ຊອບ, ຂະ­ຫຍັນ​ຂັນ​ເຄື່ອນ, ໂປ່ງ​​ໃສ, ມີ​ປະ​ສິດ­ທິ​ຜົນ”. ຕາມ​ນັ້ນ, ການ​ປະ­ຕິ​ຮູບ​ລະ­ບອບ​ການ​ງານ ຂ້າລັດຖະການ ​ໃນ​ໄລ­ຍະ​ເວ­ລາ​ທີ່​ຜ່ານ​ມາ​ໄດ້​ສຸມ​ໃສ່​​ເປົ້າ​ໝາຍ​ກໍ່­ສ້າງ​ຖັນ​ແຖວ​ພະ­ນັກ­ງານ, ຂ້າ​ລັດ­ຖະ­ການ ທີ່​ມີ​ຄຸມ​ສົມ­ບັດ, ຄວາມ​ສາ­ມາດ, ວິ­ຊາ​ສະ­ເພາະ, ມີ​ໂຄງ​ສ້າງ​ທີ່ເໝາະ​ສົມ​ ໃນ​ບັນ­ດາ​ອົງ​ການຈັດຕັ້ງ, ກົມ​ກອງ ​ບົນ​ພື້ນ­ຖານ​ຂອງ​ການ​ກຳ­ນົດ​ທີ່​ຕັ້ງ­ເຮັດ​ວຽກ. ຮອດ​ເດືອນທັນ­ວາ 2015, ກະຊວງພາຍໃນ​ພ້ອມ​ກັບ​ບັນດາ​ກະຊວງ​ທີ່​ຄຸ້ມ​ຄອງ​ລັດຖະກອນ​ສະ​ເພາະ​ຂະ​ແໜງ ​ໄດ້​ປະກາດ​ໃຊ້​ມາດຕະຖານຍົດສັກຕຳແໜ່ງຊັ້ນຂັ້ນຂ້າລັດຖະການເປັນ 47 ສະບັບ. ຄຽງ​ຄູ່​ກັນ​ນັ້ນ, ກະ­ຊວງ​ພາຍ​ໃນ​ກໍ່​ໄດ້​ປະສານ​ສົມ­ທົບ​ຢ່າງ​ຕັ້ງ­ໜ້າ​ກັບ​ບັນ­ດາ​ກະຊວງ, ຂະ­ແໜງ­ການ​ທີ່​ກ່ຽວ­ຂ້ອງ ​ເພື່ອ​ບູ­ລະ­ນະ ແລະ ປະ­ກາດ​ໃຊ້ ໜັງສື​ວຽນປະ­ສົມ ​ກ່ຽວ​ກັບ​ການ​ກຳ­ນົດ​ລະ­ຫັດ, ມາດ­ຕະ­ຖານ​ຍົດ​ສັກຕຳແໜ່ງ​ວິ­ຊາ​ຊີບ​ຂ້າ​ລັດ​ຖະ​ການຂະແໜງ­ການ​ສະ­ເພາະ. ວຽກ​ງານ​ສອບ­ເສັງ​ຄັດ​ເລືອກ, ສອບ­ເສັງ​​ເລື່ອນ​ຊັ້ນ​ຂັ້ນ​ຂ້າ​ລັດ­ຖະ­ການ ​ໄດ້​ສຸມ​ໃສ່​ການ​ຮັບ­ປະ­ກັນ​ລັກ­ສະ­ນະ​ພາ­ວະ​ວິ­ໄສ, ຍຸ­ຕິ​ທຳ. ແບບ​ວິ­ທີ​ຄັດ​ເລືອກ​ການ​ນຳ​ຂັ້ນ​ກົມ, ຂັ້ນ​ພະ​ແນກ, ຂັ້ນ​ຫ້ອງ​ ໄດ້​ຮັບ​ການ​ປ່ຽນ­ແປງ​ໃໝ່​ ​ແລະໃນ​ເບື້ອງ​ຕົ້ນ​ໄດ້​ສ້າງ​ສະ­ພາບ​ແວດ​ລ້ອມ​ແຫ່ງ​ການ​ແຂ່ງຂັນ, ດຶງ​ດູດ​ຄົນ​ທີ່​ມີ​ຄຸມ​ສົມບັດ ຄວາມ​ສາ­ມາດ ​ເຂົ້າ​ຮ່ວມ​ການ​ຄັດ​ເລືອກ ຊຶ່ງ​ໄດ້​ຮັບ​ຄວາມ​ສະ­ໜັບ­ສະ­ໜູນ​ຈາກ​ຫາງ​ສຽງ​ໃນ​ສັງ­ຄົມ. ວຽກ​ງານ​ບຳ­ລຸງ​ກໍ່­ສ້າງ​ພະ­ນັກ­ງານ, ຂ້າ​ລັດ­ຖະ­ການ​ໄດ້​ສຸມ​ໃສ່​ການ​ຍົກ​ສູງ​ລະ­ດັບ​ຄວາມ​ຮູ້​ຕາມ​ກົນ​ໄກ​ຄຸ້ມ​ຄອງ​ແບບ​ໃໝ່ ແລະ ທັກ​ສະ­ການ​ເຮັດ​ວຽກ.

ວຽກ​ງານ​ຄຸ້ມ​ຄອງ, ຕີ​ລາ­ຄາ, ແບ່ງ​ປະ​ເພດ​ພະ­ນັກ­ງານ ຂ້າ​ລັດ­ຖະ­ການ, ພິ­ເສດ​ແມ່ນ​ ການ​ປັບ­ປຸງ​ວຽກ​ງານ​ຄຸ້ມ​ຄອງ​ພະ­ນັກ­ງານ, ຂ້າ​ລັດ­ຖະ­ການ​ ໄດ້​ຮັບ​ການ​ຍູ້​ແຮງ​ຜັນ​ຂະ­ຫຍາຍ​ປະ­ຕິ­ບັດ. ໄດ້​ກໍ່­ສ້າງ​ແລະປະ­ຕິ­ບັດ​ນະ­ໂຍ­ບາຍ​ກ່ຽວ​ກັບ​ການ​ດຶງ​ດູດ, ຄົ້ນ​ເຜີ​ຍ, ​ນຳ​ໃຊ້ ​ແລະ ເກື້ອ​ກຸນ​ຜູ້​ທີ່​ມີ​​ຄວາມ​​ເກັ່ງ​ກ້າສາ­ມາດ​​ໃນການເຄື່ອນໄຫວ​ດ້ານ​ວຽກ​ງານການ​ບໍ­ລິ­ຫານ. ນະ­ໂຍ­ບາຍປັບປຸງ​ການ​ບັນ­ຈຸ​ລັດ­ຖະ­ກອນ​ໃຫ້​ກະ­ທັດ​ລັດເພື່ອ​ຍົກ​ສູງ​ຄຸນ​ນະ​ພາບ​ຂອງຖັນ​ແຖວ​ພະ­ນັກ­ງານ ຂ້າ​ລັດ­ຖະ­ການ ​ໄດ້​ຮັບ​ການຜັນ​ຂະ­ຫຍາຍ​ໃນ​ເບື້ອງ​ຕົ້ນ. ການ​ປະ­ຕິ​ຮູບ​ເງິນ­ເດືອນ ແລະ ບັນ­ດາ​ລະ­ບອບ, ນະ­ໂຍ­ບາຍ​ອື່ນ ​ສຳ­ລັບ​ຖັນ​ແຖວ​ພະ­ນັກ­ງານ ຂ້າ​ລັດ­ຖະ­ການ ໄດ້​ປະ­ຕິ­ບັດ​ຕາມ​ແຜນການ​ດຳ­ເນີນງານ. ບັນ­ດາ​ນະ­ໂຍ­ບາຍ​ກ່ຽວ​ກັບ​ການ​ດຶງ​ດູດ, ລະ­ດົມສົ່ງ­ເສີມ​ໃຫ້​ພະ­ນັກ­ງານ ຂ້າລັດຖະການ​ ເສີມ​ຂະຫຍາຍ​ຄວາມ​ເກັ່ງ​ກ້າ​ສາ­ມາດຂອງ​ຕົນ​ໃນ​ການ­ເຄື່ອນ­ໄຫວ​ດ້ານວຽກ​​ງານການ​ບໍລິຫານນັ້ນ ສືບ​ຕໍ່​ໄດ້​ຮັບ​ຄວາມ​ເອົາ­ໃຈ­ໃສ່, ຫັນ​ເປັນ​ລະ­ອຽດ.

ທີ​ຫ້າ, ສະ​ຖາ​ບັນ, ກົດ­ໝາຍ, ກົນ​ໄກ, ນະ­ໂຍ­ບາຍ​ກ່ຽວ​ກັບ​ການ​ຄຸ້ມ​ຄອງລາຍ​ຮັບ, ລາຍ​ຈ່າຍ​ງົບປະມານ ແລະ ຄຸ້ມ​ຄອງ​ການ​ນຳ​ໃຊ້​ຊັບ​ສິນ​ແຫ່ງ​ລັດ ​ໄດ້​ຮັບ​ການ​ປ່ຽນ­ແປງ​ໃໝ່ ປັບປຸງບູ­ລະ­ນະ​ເທື່ອ​ລະ​ກ້າວ ແລະ ນັບ​ມື້​ນັບ​ເໝາະ​ສົມ​ກວ່າ​ເກົ່າ, ຜ່ານ​ນັ້ນ​ ໄດ້​ເພີ່ນທະວີ​ລັກ­ສະ­ນະ​ປະ​ສິດ­ທິ​ຜົນ​ຂອງ​ການ​ໃຊ້​ຈ່າຍ​ພາກ​ລັດ, ຫລຸດຜ່ອນການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ​ໃນ​ການ​ນຳ​ໃຊ້​ງົບ­ປະ­ມານ​ແຫ່ງ​ລັດ, ປະກອບສ່ວນ​ເພີ່ມ​ທະ­ວີ​ລະ­ບຽບ​ວິ​​ໄນ​ດ້ານ​ການ​ເງິນ, ເພີ່ມ​ທະ­ວີ​ລັກ­ສະ­ນະ​ໂປ່ງ​ໃສ ແລະ ຄວາມ​ຮັບຜິດຊອບ​ກ່ຽວ​ກັບ​ການ​ລາຍ​ງານ​ອະທິບາຍ​ ໃນ​ການ​ປະ­ຕິ­ບັດ​ດ້ານ​ງົບ­ປະ­ມານ. ການ​ຫັນ​ເປັນ​ກົດ­ໝາຍ ແລະ ຫັນ​ເປັນ​ເປີດ­ເຜີຍ​ຕໍ່ບັນດາແຫຼ່ງ​ລາຍ​ຮັບ ແລະ ລາຍ​ຈ່າຍ​ງົບ­ປະ­ມານ​ ກໍ​ໄດ້​ຍົກ​ສູງ​ລັກ­ສະ­ນະ​ປະ­ຊາ­ທິ­ປະ­ໄຕ ແລະ ໂປ່ງ​ໃສ​ ໃນ​ການ​ຄຸ້ມ​ຄອງ​ງົບ­ປະ­ມານ​ແຫ່ງ​ລັດ. ລະ­ບຽບ​ການ​ບໍ­ລິ­ຫານ​​ໃນ​ການ​ເກັບ​ລາຍ​ຮັບ ​ແລະ​ໃຊ້​ຈ່າຍງົບ­ປະ­ມານ​ແຫ່ງ​ລັດ ​ກໍໄດ້​ຮັບ​ການ​ປະ­ຕິ​ຮູບ​ຢ່າງ​ແຂງ­ແຮງ​ຕາມ​ທິດ​ເປີດ­ເຜີຍ, ຍຸ­ຕິ​ທຳ, ສະ­ດວກ​ ແລະ ຖືກຕ້ອງ​ຕາມ​ກົດ­ໝາຍ. ການ​ຄຸ້ມ​ຄອງ, ນຳ​ໃຊ້ ແລະ ລົງ­ທຶນຈັດ​ຊື້​ເຄື່ອງຂອງ​ພາກ​ລັດ ​ກໍໄດ້​ກຳ­ນົດ​ຢ່າງ​ແໜ້ນ​ແຟ້ນ​ກວ່າ​​ອີກ. ກົນ​ໄກ​ເປັນ​ເຈົ້າ​ດ້ວຍ​ຕົນ​ເອງ, ຮັບຜິດ­ຊອບ​ດ້ວຍ​ຕົນ​ເອງ​ກ່ຽວ​ກັບ​ການ​ນຳ​ໃຊ້​ການ​ບັນ­ຈຸ​ພະ­ນັກ­ງານ ຂ້າ​ລັດຖະການ ແລະ ຄ່າ​ໃຊ້​ຈ່າຍ​ໃນການ​ບໍ­ລິ­ຫານ​ ສຳ­ລັບ​ອົງ​ການ­ຈັດ­ຕັ້ງ​ແຫ່ງ​ລັດ ແລະ ກົນ​ໄກ​ຮັບ­ປະ­ກັນ​ການ​ເງິນ​ດ້ວຍ​ຕົນ​ເອງ ​ສຳ­ລັບໜ່ວຍ​ພາລະກິດແຫ່ງ​ລັດ, ອົງ​ການ­ຈັດ­ຕັ້ງ​ວິ­ທະ­ຍາ­ສາດແລະເຕັກ​ໂນ​ໂລ​ຊີ​​ແຫ່ງ​ລັດ ສືບ​ຕໍ່​ໄດ້​ຮັບ​ການຜັນ​ຂະ­ຫຍາຍ​ປະຕິບັດ.

ບັນ­ດາ​ກົນ​ໄກ, ນະ­ໂຍ­ບາຍ​ກ່ຽວ​ກັບ​ພາ​ສີອາ­ກອນ, ເງິນ­ເດືອນ, ຄ່າ​ແຮງ​ງານ, ປະ­ກັນ​ໄພ​ສັງ­ຄົມ, ສະຫວັດ­ດີ​ການ​ສັງ­ຄົມ​ ກໍສືບ​ຕໍ່​ໄດ້​ລັດ­ຖະ­ບານ ແລະ ກະ­ຊວງ, ຂະ­ແໜງ­ການ​ຕ່າງໆ​ ຄົ້ນ­ຄວ້າ ແລະ ບູ­ລະ­ນະ​ໃນ​ຂະ​ບວນ​ວິ­ວັດ​ແຫ່ງ​ການ​ປະ­ຕິ​ຮູບ. ກົນ​ໄກ, ນະ­ໂຍ­ບາຍ​ການ​ເງິນ​ສຳ­ລັບ​ວິ​ສາ​ຫະ​ກິດ​ແຫ່ງ​ລັດ; ຄຸ້ມ​ຄອງ​ການ​ກູ້​ຢືມ ແລະ ຊຳລະ​ໜີ້​​ຕ່າງ­ປະ­ເທດ, ໜີ້​​ລັດ­ຖະ­ບານ, ໜີ້​​ແຫ່ງ​ຊາດ, ໜີ້​ສາ­ທາ­ລະ­ນະ; ການຈັດ​ແບ່ງ​ງົບປະມານ​ແຫ່ງ​ລັດ​ໃຫ້​ອົງ­ການ​ບໍ​ລິ​ຫານ​ແຫ່ງ​ລັດ ​ສືບ​ຕໍ່​ໄດ້​ຮັບ​ການ​ປ່ຽນ­ແປງ​ໃໝ່.

ທີ​ຫົກ, ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ໃນ​ການ­ເຄື່ອນ­ໄຫວ​ຂອງ​ອົງ­ການ​ບໍ­ລິ­ຫານ ​ໄດ້ຮັບ​ການ​ຍູ້​ແຮງ, ຕາມ​ນັ້ນ ​ຍົກ​ສູງ​ຄຸນ​ນະ​ພາບ​ການ­ເຄື່ອນ­ໄຫວ ແລະ ສະ­ໜອງ​ການ​ບໍ­ລິ­ການ​ສາ­ທາ­ລະ­ນະ​ໃຫ້​ແກ່​ປະຊາຊົນ, ​ການ­ຈັດ­ຕັ້ງ​ຂອງ​ອົງ­ການ​ບໍ­ລິ­ຫານ​ແຫ່ງ​ລັດ ​ຕາມ​ທິດ​​ເປີດ­ເຜີຍ ແລະ ໂປ່ງ​ໃສ. ລັດ­ຖະ­ບານ, ນາຍົກລັດຖະມົນ­ຕີ​ ໄດ້​ມີ​ການ​ຊີ້​ນຳ, ບັນ­ຊາ​ຄວບ​ຄຸມ​ຢ່າງ​ແທດ​ເຖິງ ​ແນ­ໃສ່​ຊຸກ​ຍູ້​ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ໃນບັນດາ​ອົງ­ການ​​ລັດ, ບູ​ລະ​ນາ ແລະ ຍູ້​ແຮງ​ການ­ເຄື່ອນ­ໄຫວ​ຂອງ​​ເຄືອ​ຂ່າຍ​ສື່­ສານ​ເອ​ເລັກ​ໂຕຣນິກ​ການ​ບໍ­ລິ­ຫານ​ຂອງ​ລັດ­ຖະ­ບານ​ໃນ​ອິນ​ເຕີ​​ເນັດ. ບັນ­ດາ​ກະ­ຊວງ, ຂະ­ແໜງ­ການ ແລະ ທ້ອງ​ຖິ່ນ​ ໄດ້​ເພີ່ມ​ທະ­ວີ​ການ​ໝູນ​ໃຊ້​ລະ­ບົບ​ຄຸ້ມ​ຄອງ​ຄຸນ​ນະ​ພາບ​ຕາມ​ມາດ­ຕະ­ຖານ TCVN ISO 9001:2000 ແລະ​ ຫັນ­ປ່ຽນ​ມາ­ສູ່​ລະບົບ​ຄຸ້ມ​ຄອງ​ຄຸນ​ນະ​ພາບ​ຕາມ​ມາດ­ຕະ­ຖານ TCVN ISO 9001:2008 ເປັນ​ກ້າວໆ​ ເຂົ້າ​ໃນ​ການ​ເຄື່ອນ​ໄຫວຄຸ້ມ​ຄອງ​ລັດ ​ແນ­ໃສ່​ຍົກ​ສູງ​ຄຸນ​ນະ​ພາບ, ປະ​ສິດ­ທິ​ຜົນ, ລັກ­ສະ­ນະ​ເປີດ­ເຜີຍ, ໂປ່ງ​ໃສ​ໃນ​ການ​ປະ­ຕິ­ບັດ​ໜ້າທີ່​ຂອງ​ພະນັກງານ, ຂ້າ​ລັດ­ຖະ­ການ ​ໃນ​ລະ­ບົບ​ກົງ­ຈັກ​ບໍ­ລິ­ຫານ​ແຫ່ງ​ລັດ. ສຳ­ນັກ­ງານ​ອົງ­ການ​ບໍ­ລິ­ຫານ​ແຫ່ງ​ລັດ​ໄດ້​ຮັບ​ການ​ເອົາ­ໃຈ­ໃສ່​ລົງ­ທຶນ​ກໍ່­ສ້າງ​ໃຫ້​ໃຫຍ່​ໂຕ​​ໂອ້​ຖົງ ແລະ ທັນ​ສະ­ໄໝ​ກວ່າ​ເກົ່າ. ທ້ອງ​ຖິ່ນ​ຈຳ­ນວນ​ໜຶ່ງ​ທີ່​ມີ​ເງື່ອນໄຂ​ກໍ​ໄດ້​ກໍ່­ສ້າງ​ສູນ​ການ​ບໍ­ລິ­ຫານ​ລວມ​ສູນ​ຂອງ​ແຂວງ, ນະ­ຄອນ, ເມືອງ ຄື: ນະ­ຄອນ​ດ່າ​ໜັງ, ບັນ­ດາ​ແຂວງ ບິ່ງ​ເຢືອງ, ບ່າ​ເຣ້ຍ - ຫວູງ​ເຕົ່າ, ກວ໋າງ​ນິນ..., ສ້າງ​ເງື່ອນ­ໄຂ​ໃຫ້​ແກ່​ການ​ປ່ຽນ­ແປງ​ໃໝ່​ວຽກ​ງານ​ບໍລິຫານຄຸ້ມ​ຄອງ, ພ້ອມ​ທັງ​ສ້າງ​ຄວາມ​ສະ­ດວກ​ໃຫ້­ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ, ນຳ​ໃຊ້​ອຸ­ປະ­ກອນ​ວັດ­ຖຸ​ທີ່​ທັນ​ສະໄໝ​​ເຂົ້າໃນ​ການເຄື່ອນໄຫວ​ຂອງ​ອົງ­ການ​ບໍ­ລິ­ຫານ.

ບັນ­ດາ​ຂໍ້​ຈຳ­ກັດ, ສິ່ງ​ຄົງ​ຄ້າງ

ຄງງ​ຄູ່​ກັບ​ບັນ­ດາ​ຜົນ­ສຳ­ເລັດ​ອັນ​ຕັ້ງ­ໜ້າ​ທີ່​ບັນ­ລຸ​ໄດ້ນັ້ນ, ທຽບກັບເປົ້າ​ໝາຍ​ຂອງ​ການ​ປະ­ຕິ​ຮູບ ​ແລະ ຄວາມ​ຕ້ອງ­ການ​​ຕົວ​ຈິງ, ການ​ປະ­ຕິ​ຮູບ​ການ​ບໍ­ລິ­ຫານ​ໃນ​ເວ­ລາ​ທີ່​ຜ່ານ​ມາ​ກໍ່​ຍັງ​ມີ​ຂໍ້​ຈຳ­ກັດ ສິ່ງ​ຄົງ​ຄ້າງ​ຫຼາຍປະການ, ນັ້ນ​ແມ່ນ:

- ລະ­ບົບ​ລະ­ບຽບ​ກົດ­ໝາຍ, ກົດ­ໝາຍ​ຍັງ​ບໍ່​ທັນ​​ຄົບ​ຊຸດ ແລະ ຍັບ​ບໍ່​ທັນ​ເປັນ​ເອ­ກະ​ພາບ, ຍັງ​ບໍ່​​ສອດຄ່ອງ​ກັບ​ຄວາມ​ຕ້ອງ­ການ ​ແຫ່ງ​ການ​ພັດ­ທະ­ນາ​ລະ­ບົບ​ເສດ­ຖະ­ກິດ​ຕະ­ຫຼາດ​ຕາມ​ທິດ​ສັງ­ຄົມ​ນິ­ຍົມ ແລະ ​ເປີດ​ກວ້າງ​ປະຊາທິປະ​ໄຕ​ໃນ​ຊີວິດ​ສັງ­ຄົມ ​ໃນ​ສະ­ພາບ​ການ​ໃໝ່. ສິ່ງ​ເຫຼົ່າ­ນັ້ນ​ໄດ້​ສະ­ແດງ​ອອກຢູ່​ທີ່ ມີ​ກົດ­ໝາຍ, ຄຳສັ່ງ​ຕາມ​ກົດໝາຍບາງ​ສະ­ບັບ​ໄດ້ຖືກ​ຮັບຮອງ​ແລ້ວ ​ແຕ່​ການ​ອອກ​ດຳ­ລັດ ແລະ ໜັງສື​ວຽນແນະນຳ​ການ​ຜັນ​ຂະ­ຫຍາຍພັດ​ປະກາດ​ໃຊ້​ຢ່າງ​ຊັກ​ຊ້າ. ຍັງ​ມີ​ສະ­ພາບ​ການ​ຕິດ​ໜີ້​ເອ­ກະ­ສານ​ ໃນ​ລາຍ­ການ​ສ້າງ​ຂໍ້ກຳ­ນົດ​ກົດໝາຍ​ແຕ່​ລະ​ປີ. ລະດັບ​ສອດ­ຄ່ອງ​ລະຫວ່າງ​ເນື້ອ​ໃນ​ຂອງ​ເອ­ກະ­ສານ​ກົດ­ໝາຍ​ນິ­ຕິ​ກຳ­ ກັບ​ບັນ­ດາ​ສົມ​ທິ​ສັນ­ຍາ​ສາ­ກົນ​ທີ່​ກ່ຽວ­ຂ້ອງ ​ຍັງ​ມີ​ຄວາມ​ຈຳ­ກັດ; ວຽກ​ງານ​ກວດ­ຄືນ, ຫັນ​ເປັນ​ລະ­ບົບ​ເອ­ກະ­ສານ​ກົດ­ໝາຍ​ນິ­ຕິ​ກຳ ​ກໍຍັງ​ມີ​ຄວາມ​ຊັກ​ຊ້າ.

- ລະ­ບຽບ​ການ​ບໍ­ລິ­ຫານ​ຢູ່​ບາງ​ຂົງ­ເຂດ​ຍັງ​ມີ​ຄວາມ​ສັບ­ສົນ ຫຍຸ້ງ​ເຫຍີງ; ຈຳ­ນວນ​​ລະ­ບຽບການບໍລິຫານ​ປະ­ຕິ­ບັດ​ຕາມ​ກົນ​ໄກ “ປະ­ຕູ​ດຽວ​ມີ​ການ​ຕໍ່​ເມື່ອງ​ພາຍ​ໃນ” ກໍຍັງ​ໜ້ອຍ. ພື້ນ­ຖານ​ວັດ­ຖຸ​ຢູ່ພາກ­ສ່ວນ​ຮັບແລະສົ່ງ​ເອກະ­ສານ​ ເຖິງ​ວ່າ​ໄດ້​ຮັບ​ການ​ລົງ­ທຶນ​ຍົກ​ລະ­ດັບ ແຕ່ກໍ​ຍັງ​ບໍ່​ຕອບ​ສະ­ໜອງ​ໄດ້​ກັບຄວາມ​ຮຽກ­ຮ້ອງ​ຂອງ​ການ​ຫັນລະບົບ​ການ​ບໍ­ລິ­ຫານ​ເປັນ​ທັນ​ສະ­ໄໝ​. ຈຳ­ນວນ​ການ​ບໍ­ລິ­ການ​ສາ­ທາ­ລະ­ນະ​ສະ­ໜອງ​ຕາມ​ສາຍ​ອອນ​ໄລລະ­ດັບ 3 - 4 ກໍຍັງ​ມີ​ຄວາມ​ຈຳ­ກັດ.

- ການ​ກວດ­ຄືນ​ພາ­ລະ​ບົດ­ບາດ, ໜ້າ­ທີ່​ຂອງ​ກົງ­ຈັກ​ການ​ບໍ­ລິ­ຫານ​ແຫ່ງ​ລັດ​ທັງ​ໝົດ ​ຍັງ​ຊັກ​ຊ້າ, ຍັງ​ບໍ່​ທັນ​ສອດຄ່ອງກັບ​ຄວາມ​ຮຽກ­ຮ້ອງຕ້ອງການ​ພັດ­ທະ­ນາ​ລະ­ບົບ​ເສດ­ຖະ­ກິດ​ຕະ­ຫຼາດ​ຕາມ​ທິດ​ສັງ­ຄົມ​ນິ­ຍົມ. ກົງ­ຈັກ​ການ​ບໍ­ລິ­ຫານ​ຍັງ​ພະ​ລຸງ​ພະ­ລັງ, ບໍ່​ກະ­ທັດ​ລັດ, ຍັງສັບ­ສົນ, ບໍ່​ມີ​ຄວາມ​ໝັ້ນ­ຄົງ. ການ​ປັບ­ປຸງ​ການ​ບັນ­ຈຸ​ລັດ­ຖະ­ກອນ​ໃຫ້​ກະ­ທັດ​ລັດ​ ກໍ​ໄດ້​ຮັບ​ຜົນບໍ່ພໍ​ທໍ່​ໃດ. ບາງຂົງ­ເຂດ​ຄຸ້ມ​ຄອງ​​ລັດ​ຍັງ​ມີ​ຂໍ້​ຄົງ​ຄ້າງ, ຊ້ຳ​ຊ້ອນ​ກັນ. ການ​ແບ່ງ​ຂັ້ນ​ຄຸ້ມ​ຄອງລັດ​ ກໍຍັງ​ບໍ່​ໄດ້​ປະ­ຕິ­ບັດ​ຢ່າງ​ເດັດ­ຂາດ, ເຂັ້ມ​ງວດ. ການ­ເຄື່ອນ­ໄຫວ​ຂອງ​ກົງ­ຈັກ​ການ​ບໍ­ລິ­ຫານ​ແຕ່​ສູນ​ກາງ​ຈົນ​ຮອດ​ທ້ອງ​ຖິ່ນ​ ຍັງ​ບໍ່​​ເປັນ​ເອ­ກະ​ພາບ, ທະ­ລຸລົ່ງ​ແທ້​ເທື່ອ. ການ​ປ່ຽນ­ແປງ​ແບບ​ວິ­ທີ​ການ​ຄຸ້ມ​ຄອງ, ບັນ­ຊາ​ຄວບ​ຄຸມ​ຂອງ​ກົງ­ຈັກ​​ບໍ­ລິ­ຫານ ກໍ​ຍັງ​ຊັກ​ຊ້າ; ຫຼັກ​ດຳ­ເນີນ​ການ​ເຮັດ​ວຽກ​ຂອງ​ບັນ­ດາ​ອົງ­ການ​ບໍ­ລິ­ຫານ​ ເບິ່ງ​ລວມ​ຍັງ​ບໍ່​ມີ​ລັກສະ­ນະ​ວິ­ຊາ​ອາ­ຊີບ. ການ​ປະ­ສານ​ສົມ­ທົບ​ລະ­ຫວ່າງ​ບັນ­ດາ​ອົງ­ການ​ບໍ­ລິ­ຫານ​ແຫ່ງ​ລັດ ​ໃນ​ຂະ​ບວນ​ວິ­ວັດ​ຂອງ​ການ​ແກ້​ໄຂ​ວຽກ​ງານ​ ຍັງ​ບໍ່​ໄດ້​ແໜ້ນ​ແຟ້ນ.

- ຄຸນ​ນະ​ພາບ​ຂອງຖັນ​ແຖວ​ພະ­ນັກ­ງານ, ຂ້າ​ລັດ­ຖະ­ການ​ບາງ​ບ່ອນ​ຍັງ​ບໍ່​ໄດ້​ເທົ່າ​ທຽມ​ກັນ, ຊ້ຳ­ບໍ່­ໜຳ​ ​ຍັງ​ອ່ອນ­ແອ, ເປັນ­ຕົ້ນ​ແມ່ນ​ຄວາມ​ສາ­ມາດ​ຄົ້ນ​ເຫັນ​ບັນ­ຫາ, ການ​ເສ­ນາ​ທິ​ການ ແລະ ສະ­ເໜີ​ບັນ­ດາ​ມາດ​ຕະ­ການ​ແກ້​ໄຂ; ພະ­ນັກ­ງານ, ຂ້າ​ລັດ­ຖະ­ການ​ຈຳນວນ​ໜຶ່ງ ທີ່​​ເຮັດ​ວຽກ​ງານ​ພົວ­ພັນ​ເຖິງ​ອົງ​ການ­ຈັດ­ຕັ້ງແລະປະ­ຊາ­ຊົນ ກໍ​ຍັງ​ບໍ່​​ເຮັດ​ດ້ວຍຄວາມ​ຮັບ­ຜິດ­ຊອບສູງ, ບາງ​ຄັ້ງ ບາງ​ບ່ອນ​ພັດຍັງ​ກໍ່​ຄວາມ​ຫຍຸ້ງ­ຍາກ, ກໍ່​ຄວາມ​ລຳ​ຄານ​ໃຈ​ໃຫ້​ຜູ້​ອື່ນ. ການ​ສອບ­ເສັງ​ຄັດ​ເລືອກ​ພະ­ນັກ­ງານ​​ນຳພາ ຄຸ້ມ​ຄອງ ກໍ​ໄດ້​ຜັນ​ຂະ­ຫຍາຍ​ປະ­ຕິ­ບັດ​ຢ່າງ​ຊັກ​ຊ້າ. ວຽກ​ງານກວດກາ, ກວດ​ການ​ການ​ງານ​ບໍ­ລິ­ຫານ ແລະ ປະ­ຕິ­ບັດ​ວິ​​ໄນ ຕໍ່​ພະ​ນັັກ​ງານ ລັດ­ຖະ­ກອນ​ທີ່​ລະ­ເມີດ​ກົດໝາຍ​ ຍັງ​ບໍ່​ທັນ​ເປັນ​ປົກ­ກະ­ຕິ, ປະ​ສິດ­ທິ​ຜົນ​ຍັງ​ຕ່ຳ.

- ການ​ປະ­ຕິ​ຮູບ​ການ​ເງິນ​ຫຼວງ​ໄດ້​ປະ­ຕິ­ບັດ​ໃນ​ເບື້ອງ​ຕົ້ນ​ເທົ່າ​ນັ້ນ, ຜົນ­ສຳ­ເລັດ​ທີ່​ບັນ­ລຸ​ໄດ້​ກໍ​ຍັງ​ຕ່ຳ. ບັນດາ​ອົງການ​ທີ່​ມີ​ອຳ­ນາດ​ຕັດ­ສິນ​ໃນ​ການ​ຄຸ້ມ​ຄອງ ​ຍັງ​ບໍ່​ກ້າ​ຜັນ​ຂະ­ຫຍາຍ​ການ​ມອບ​ສິດ​ເປັນ​ເຈົ້າ​​ຕົນ​ເອງ ​ໃຫ້​ແກ່​ອົງການ​ພາລະກິດ​ການ​ບໍລິການ​ແຫ່ງ​ລັດ, ຍັງບໍ່​ມີ​ມາດ​ຕະ­ການ​ເພື່ອ​ສົ່ງ­ເສີມ​ໃຫ້​ບັນ­ດາ​ອົງ­ການພາລະກິດ​ການ​ບໍລິການ​ແຫ່ງ​ລັດ ​ໃນ​ການ​ຈົດ​ທະບຽນ​ປະ­ຕິ­ບັດ​ການ​ເປັນ​ເຈົ້າ​ດ້ວຍ​ຕົນ​ເອງ; ການ​ຫັນ​ເປັນ​ສັງ­ຄົມຕໍ່​ການ­ເຄື່ອນໄຫວ​ບໍລິການ​ສາ­ທາ­ລະ­ນະ ​ກໍຍັງ​​ຊັກ​ຊ້າຢູ່.

- ຜົນ­ສຳ­ເລັດ​ກ່ຽວ​ກັບ​ການ​ຜັນ​ຂະ­ຫຍາຍ​ການ​ໝູນ​ໃຊ້​ເຕັກ​ໂນ​ໂລ​ຊີສື່­ສານ, ໝູນ​ໃຊ້​ລະ­ບົບ​ຄຸ້ມຄອງ​ຄຸນ​ນະ​ພາບ​ຕາມ​ມາດ­ຕະ­ຖານ ISO 9001:2008 ເຂົ້າ​ໃນ​ການ­ເຄື່ອນ­ໄຫວ​ຂອງບັນ­ດາ​ອົງ­ການບໍລິຫານ​ແຫ່ງ​ລັດ​ ກໍຍັງ​ຈຳ­ກັດ. ການ​ກໍ່­ສ້າງ​ສຳ­ນັກ­ງານ​ໃຫ້​ທັນ​ສະ­ໄໝ​ ກໍ​ຍັງ​ບໍ່​ທັນຄົບ​ຊຸດ, ຍັງມີ​ລັກ­ສະ­ນະປີກ​ຍ່ອຍ ກະ​ແຈກ​ກະຈາຍ. ​ການ​ລົງ­ທຶນ​ກໍ່­ສ້າງ​ສຳ­ນັກ­ງານ​ຕາ​ແສງ, ໝູນ​ໃຊ້​ເຕັກ​ໂນ​ໂລ​ຊີສື່ສານ ກໍ​ບໍ່​ບັນລຸ​ຜົນ­ສຳ­ເລັດຕາມ​ທີ່​ຄາດ​ຫວັງ.

- ວຽກ​ງານ​ໂຄ­ສະ­ນາ​ຖະ​ແຫຼງຂ່າວ ​ສະ­ໜອງ​ຂໍ້​ມູນ​ຂ່າວ­ສານ, ສ້າງ​ຄວາມ​​ເຫັນ​ດີ​ເຫັນ​ພ້ອມ​ກັນ​ພາຍ​ໃນ​ປະ­ຊາ­ຊົນແລະສັງ­ຄົມ ​​​ໄດ້​ຮັບ​ປະ​ສິດ­ທິ​ຜົນໜ້ອຍ, ​ບໍ່​ຕອບ​ສະ­ໜອງ​ໄດ້ກັບ​ຄວາມ​ຕ້ອງ­ການ, ດັ່ງ­ນັ້ນ, ຈຶ່ງ​ມີ​ຫາງ​ສຽງ​ໃຫ້​ທັດ­ສະ­ນະ​ວ່າ ­ການ​ປະ­ຕິ​ຮູບ​ການ​ບໍ­ລິ­ຫານ​ຍັງ​ຊັກ​ຊ້າ. ການ​ລະ­ດົມ​ການ​ເຂົ້າ​ຮ່ວມ, ປະ­ກອບ​ຄວາມ​ຄິດ​ເຫັນ​ຂອງ​ປະ­ຊາ­ຊົນ, ອົງ​ການ­ຈັດ­ຕັ້ງ, ວິ​ສາ​ຫະ​ກິດ​ - ຊຶ່ງ​ເປັນ​ຜູ້​ທີ່​ຊົມ­ໃຊ້​ຜົນ­ງານ​ແຫ່ງ​ການ​ປະ­ຕິ​ຮູບ​ການ​ບໍ­ລິຫານ - ​ເຂົ້າ​ໃນ​ຂະ​ບວນ​ວິ­ວັດ​ແຫ່ງ​ການ​ປະ­ຕິ​ຮູບ​ການ​ບໍ­ລິ­ຫານ ​ກໍຍັງຖືກ​ຈຳ­ກັດ.

ສືບ​ຕໍ່​ຍູ້​ແຮງ​ການ​ປະ­ຕິ​ຮູບ​ການ​ບໍ­ລິ­ຫານ ​ຕາມ​ຈິດ­ໃຈ​ຂອງ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ

ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ ​ໄດ້​ກຳ­ນົດ​ 6 ໜ້າ­ທີ່​ຈຸດ​ສຸມ​ໃຈ­ກາງ​ ​ເພື່ອ​ແນ​ໃສ່​ຍູ້​ແຮງພາລະກິດ​ປ່ຽນ­ແປງ​ໃໝ່​ ຢ່າງ­ຮອບ­ດ້ານ, ຄົບ​ຊຸດ; ພັດ­ທະ­ນາ​ເສດ­ຖະ­ກິດ​ຢ່າງ​​ໄວ ແລະ ຍືນ​ຍົງ, ສູ້​ຊົນ​ສ້າງ​ປະ­ເທດ​ຫວຽດ­ນາມ​ໃຫ້​ກາຍ­ເປັນ​ປະ­ເທດ​ອຸດ­ສາ­ຫະ­ກຳ​ໂດຍ​ພື້ນ­ຖານ ​ຕາມ​ທິດ​ທັນ​ສະ­ໄໝ​​ໂດຍ​ໄວ; ຍົກ​ສູງ​ລະ­ດັບ​ຊີ­ວິດ​ດ້ານ​ວັດ­ຖຸ ແລະ ຈິດ­ໃຈ​ຂອງປະ­ຊາ­ຊົນ. ໃນ​ນັ້ນ, ໜ້າ­ທີ່​ຈຸດ​ສຸມ​ໃຈ­ກາງ​ຈຳ­ນວນ​ໜຶ່ງ​ທີ່​ມີ​ຜົນ​ກະ­ທົບ​ອັນ​ສຳ­ຄັນ, ມີ​ຄວາມ​ສະ­ທ້ອນ​ອັນ​ໃຫຍ່​ຫຼວງ ​ເຖິງ​ຂະ​ບວນ​ວິ­ວັດ​ແຫ່ງ​ການ​ຜັນ​ຂະ­ຫຍາຍ​ການ​ປະ­ຕິ​ຮູບ​ການບໍລິຫານ​ ໃນ​ໄລ­ຍະ​ຕໍ່​ໄປ​ນີ້ ຄື ກໍ່­ສ້າງ​ການ­ຈັດ­ຕັ້ງ​ກົງ­ຈັກ​ຂອງ​ລະ­ບົບ​ການ­ເມືອງ​ທັງ​ໝົດ​ໃຫ້​ກະ­ທັດ​ລັດຮັດກຸມ​ດີ, ​ແລະ­ເຄື່ອນ­ໄຫວຢ່າງ​ມີຄວາມ​ສັກ­ສິດ ​ມີປະ​ສິດ­ທິ​ຜົນ; ຍູ້​ແຮງ​ການ​ຕໍ່­ສູ້​ຕ້ານ, ສະ­ກັດ​ກັ້ນ​ການ​ສໍ້​ລາດ​ບັງ​ຫຼວງ​ແລະ​ຄວາມຟຸ່ມ​ເຟືອຍ, ອາດ­ຍາ​ສິດ; ສຸມ​ໃສ່​ປະ­ຕິ­ບັດ​ບັນ­ດາ​ມາດ​ຕະ­ການ​ກ່ຽວ​ກັບ​ການ​ຍົກ​ສູງ​ຄຸນ​ນະ​ພາບ​ການ​ເຕີບ​ໂຕ, ຍົກ​ສູງ​ປະ­ສິດ​ຕິ​ພາບ​ຂອງ​ແຮງ​ງານ ແລະ ຄວາມ​ສາ­ມາດ​ແຂ່ງ­ຂັນ​ ຂອງ​ລະ­ບົບ​ເສດ­ຖະ­ກິດ; ສືບ​ຕໍ່​ປະ­ຕິ­ບັດ​ໃຫ້​ມີ​ປະ​ສິດ­ທິ​ຜົນ ​ການ​ບຸກ​ທະ­ລຸ​ຍຸດ​ທະ​ສາດ​ໃນ​ສາມ​ດ້ານ (ປັບປຸງ​ບູ­ລະ­ນະ​ລະ­ບຽບ​ກົດ­ໝາຍ​​ເສດຖະກິດກຳ­ນົດ​ທິດ​ສັງ­ຄົມ​ນິ­ຍົມ; ປ່ຽນ­ແປງ​ໃໝ່​​ການ​ສຶກ​ສາ, ບຳ­ລຸງ​ກໍ່­ສ້າງ, ພັດ­ທະ­ນາ​ແຫຼ່ງ​ບຸກ​ຄະ­ລາ​ກອນ ຢ່າງ​ເປັນ​ພື້ນ­ຖານ ຮອບ­ດ້ານ, ເປັນຕົ້ນ​ແມ່ນ​ແຫຼ່ງ​ບຸກ​ຄະ­ລາ​ກອນ​ຄຸນ​ນະ​ພາບ​ສູງ; ກໍ່­ສ້າງ​ລະ­ບົບ​ໂຄງ​ສ້າງ​ພື້ນຖານ​​ໃຫ້​ຄົບ​ຊຸດ).

ເພື່ອ​ຍູ້​ແຮງ​ການ​ປະ­ຕິ​ຮູບ​ການ​ບໍ­ລິ­ຫານ​ຕາມ​ຈິດ­ໃຈ​ຂອງ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ XII ຂອງ​ພັກ, ໃນ​ເວ­ລາ​ຕໍ່​ໄປ​ນີ້ ລັດ­ຖະ­ບານ, ບັນ­ດາ​ກະ­ຊວງ, ຂະ­ແໜງ­ການ, ທ້ອງ​ຖິ່ນ​ ຕ້ອງ​ຜັນ​ຂະ­ຫຍາຍ​ການ​ປະ­ຕິ­ບັດ​ບັນ­ດາ​ໜ້າ­ທີ່​ປະ­ຕິ​ຮູບ​ການ​ບໍ­ລິ­ຫານ​ ໃນ​ຂໍ້​ຕົກ­ລົງ​ສະບັບເລກ​ທີ 225/QĐ-TTg, ລົງ​ວັນ​ທີ 4 ກຸມ­ພາ 2016, ຂອງ​ລັດຖະ­ບານກ່ຽວກັບການ​ອະ­ນຸ­ມັດ​ຜ່ານ​ແຜນ­ການ​ປະ­ຕິ​ຮູບ​ການ​ບໍ­ລິ­ຫານ​ແຫ່ງ​ລັດ ​ໄລ­ຍະ 2016 - 2020 ໃຫ້​ຄົບ​ຊຸດ, ໃນ​ນັ້ນ​ ຕ້ອງ​ສຸມ​ໃສ່​ການ​ປະ­ຕິ­ບັດ​ບັນ­ດາ​ເນື້ອ​ໃນ​ອັນ​ຕົ້ນ​ຕໍ່​ດັ່ງ​ລຸ່ມ​ນີ້:

ທີ​ໜຶ່ງ, ເພີ່ມ​ທະ­ວີ​ການ​ນຳ­ພາ​ຂອງ​ພັກຕໍ່​ກັບ​ວຽກ​ງານ​ປະ­ຕິ​ຮູບ​ການ​ບໍ­ລິ­ຫານ. ການ​ນຳ­ພາ​ຂອງ​ພັກ​ຕໍ່​ກັບວຽກ​ງານ​ປະ­ຕິ​ຮູບ​ການ​ບໍ­ລິ­ຫານ ​ໄດ້​ສະ­ແດງອອກ​ຜ່ານ​ການ​ຕັດ­ສິນຕົກລົງ​ບັນ­ດາ​ເປົ້າ​ໝາຍ, ທັດ­ສະ­ນະ, ນະໂຍ­ບາຍ ແລະ ມາດ​ຕະ­ການ​ໃຫຍ່ ​ກ່ຽວ​ກັບ​ການ​ປະ­ຕິ​ຮູບ​ການ​ບໍ­ລິ­ຫານ; ນຳ­ພາ​ວຽກ​ງານ​ໂຄ­ສະ­ນາ, ສຶກ​ສາ​ອົບ­ຮົມ​ ແນໃສ່​ຮັບ­ປະ­ກັນ​ການ​ຮັບ​ຮູ້​ໃຫ້​ເລິກ­ເຊິ່ງ ແລະ ການ​ກະ­ທຳເປັນ​ເອ­ກະ​ພາບ​​ ໃນ​ບັນ­ດາ​ອົງ​ການ­ຈັດ­ຕັ້ງ​ຂອງ​ພັກ, ໃນ​ພະນັກ­ງານ, ສະ­ມາ­ຊິກ​ພັກ ​ກ່ຽວ​ກັບ​ໜ້າ­ທີ່​ປະ­ຕິ​ຮູບ​ການ​ບໍ­ລິ­ຫານ; ນຳ­ພາ​ການ​ກໍ່­ສ້າງ​ບັນ­ດາ​ລະບຽບ​ກົດໝາຍ, ກົດ­ໝາຍ, ນະ­ໂຍ­ບາຍ​ ໃຫ້​ສອດ­ຄ່ອງ​ກັບ​ສະ­ພາບ​ການ​ຕົວ​ຈິງ ແລະ ນະ­ໂຍ­ບາຍ, ມະ­ຕິ​ຂອງ​ພັກ. ເພີ່ມ​ທະ­ວີ​ການ​ນຳ­ພາ, ກວດ­ກາ, ຄວບ​ຄຸມ, ສະ​ຫລຸບບ​ເບື້ອງ​ຕົ້ນ, ດັດ­ແກ້​ໃຫ້​ທັນ​ເວ­ລາ ​ການ​ປະ­ຕິບັດ​ບັນດາ​ນະ­ໂຍ­ບາຍ, ມະຕິ​ຂອງ​ພັກ ​ກ່ຽວ​ກັບ​ວຽກ​ງານ​ປະ­ຕິ​ຮູບ​ການ​ບໍ­ລິ­ຫານ. ບັນ­ດາ​ຄະ­ນະ​ພັກ​ທີ່​ນຳ­ພາ​ອົງ​ການຈັດຕັ້ງ, ອຳ­ນາດ​ການ​ປົກ­ຄອງ​ ຕ້ອງ​ກໍ່­ສ້າງ​ໂຄງ­ການ, ແຜນ­ການ​ກ່ຽວ​ກັບ​ການ​ປະ­ຕິ​ຮູບ​ການ​ບໍ­ລິ­ຫານ, ພິເສດ​ແມ່ນ​ການ​ປະ­ຕິ​ຮູບ​ລະບຽບ​ການ​ບໍ­ລິ­ຫານ ​ເພື່ອ​ຮັບ​ໃຊ້​ປະ­ຊາ­ຊົນ, ວິ​ສາ​ຫະ​ກິດ ແລະ ໂດຍ​ຜ່ານ​ຜົນສຳເລັດ​ແຫ່ງ​ການ​ປະ­ຕິ​ຮູບ​ການ​ບໍ­ລິ­ຫານ ​ເພື່ອ​ສັງ­ເກດ, ຕີ​ລາ­ຄາ, ນຳ​ໃຊ້​ພະ­ນັກ­ງານ, ສະ­ມາ­ຊິກ​ພັກ.

ທີ​ສອງ, ສືບ​ຕໍ່​ກໍ່­ສ້າງ ແລະ ບູ­ລະ­ນະ​ລະ­ບົບ​ລະ­ບຽບ​ກົດ­ໝາຍ, ນ​ນັ້ນ​ ­ຕົ້ນຕໍ​ແມ່ນ​ລະ­ບຽບ​ກົດ­ໝາຍ​ເສດ­ຖະ­ກິດ​ຕະ­ຫຼາດ​ຕາມ​ທິດ​ສັງ­ຄົມ​ນິ­ຍົມ ແລະ ລະ­ບຽບ​ກົດ­ໝາຍ​ກ່ຽວ​ກັບ​ການ­ຈັດ­ຕັ້ງ, ການ­ເຄື່ອນ­ໄຫວ​ຂອງ​ລະບົບ​ການ​ບໍ­ລິ­ຫານ​ແຫ່ງ​ລັດ. ເອົາ­ໃຈ­ໃສ່​ເຖິງ​ຄຸນ​ນະ​ພາບ​ການ​ກໍ່­ສ້າງ​ລະ­ບົບ​ເອ­ກະ­ສານ​ດ້ານ​ກົດ­ໝາຍ​ ຕາມ​ທິດ​ສ້າງ​ສະ­ພາບ​ແວດ​ລ້ອມທີ່​ສະ­ເໝີ­ພາບ, ໂປ່ງ​ໃສ, ສະ­ດວກອຳນວຍ​ໃຫ້​ບັນ­ດາ​ພາກ­ສ່ວນ​ເສດ­ຖະ­ກິດ​ແຂ່ງ­ຂັນ​ກັນ​ໂດຍ​ເສລີ ​ບົນ​ພື້ນຖານ​ກົດ­ໝາຍ. ຍຸບ​ເລີກ, ປັບ­ປຸງ ຫຼື​​ແກ້​ໄຂເພີ່ມ​ເຕີ່ມ​ບັນ­ດາ​ລະ­ບຽບ​ກົດ­ໝາຍ​ທີ່​ຫຼ້າ­ຫຼັງ ບໍ່​ເໝາະສົມ, ພ້ອມ​ທັງ​ສ້າງ­ຕັ້ງ​ບັນ­ດາ​ລະ­ບຽບ​ກົດ­ໝາຍ​ທີ່​ຕ້ອງການ ​ເພື່ອ​ບັນ­ຊາ​ຄວບ​ຄຸມ​ການ​ພົວ­ພັນ​ເສດຖະກິດ - ສັງ­ຄົມ​ທີ່​ເກີດ​ໃໝ່​ຕ່າງໆ ຕາມ​ລຳ­ດັບດຳ­ເນີນ​​ການ​ພັດ­ທະ­ນາ​ຂອງ​ລະ­ບົບ​ເສດ­ຖະ­ກິດ​ຕະ­ຫຼາດ ແລະ ຂະ​ບວນ​ວິວັດ​ແຫ່ງ​ການ​ເຊື່ອມ​ໂຍງ​ເສດ­ຖະ­ກິດ​ສາ­ກົນ. ໃນ​ເງື່ອນ­ໄຂ​ເສດ­ຖະ­ກິດ​​ເປີດ​ປະຕູ ​ແລະມີ​ລັກ­ສະ­ນະໂລກ, ມັນ​ຮຽກຮ້ອງໃຫ້​ພວກ​ເຮົາ​ຕ້ອງ​ສ້າງ​ຕັ້ງລະ­ບົບ​ລະ­ບຽບ​ກົດ­ໝາຍ​ເສດ­ຖະ­ກິດ, ລະ­ບຽບ​ກົດ­ໝາຍ​ການ​ບໍ­ລິ­ຫານ ທີ່​ຄົບ​ຊຸດ ແລະ ​ສອດ­ຄ່ອງ​ກັບ​ກົດ​ທົ່ວ​ໄປ​ຂອງ​ໂລກ, ຕ້ອງ­ປ່ຽນ­ແປງ​ໃໝ່​ການຈັດຕັ້ງ​ກົງ­ຈັກ ແລະ ຍົກ​ສູງ​ລະ­ດັບ​ຄວາມ​ຮູ້, ຄວາມ​ສາ­ມາດ, ຄວາມ​ຮັບ­ຜິດ­ຊອບ ​ຂອງ​ພະ­ນັກ­ງານ, ຂ້າ​ລັດ­ຖະ­ການ ​ເພື່ອ​ອາດ​ສາ­ມາດ​ເຊື່ອມ​ໂຍງ​ເຂົ້າ​ກັບ​ປະ­ຊາ​ຄົມ​ສາ­ກົນ.

ທີ່​ສາມ, ຜັນ​ຂະ​ຫຍາຍ​ປະ­ຕິ­ບັດກົດ­ໝາຍ​ວ່າ​ດ້ວຍການ­ຈັດ­ຕັ້ງ​ລັດ­ຖະ­ບານ ປີ 2015 ແລະ ກົດໝາຍ​ວ່າ​ດ້ວຍ​ການ­ຈັດ­ຕັ້ງ​ອຳ­ນາດ​ການ​ປົກ­ຄອງ​ທ້ອງ​ຖິ່ນ​ ປີ 2015 ໃຫ້​ມີ​ປະ​ສິດ­ທິ​ຜົນ, ຕາມ​ນັ້ນ, ດັດ­ແປງ​ພາ­ລະ​ບົດບາດ​ຂອງ​ລັດ­ຖະ­ບານ ​ໃຫ້​ເໝາະ​ສົມ​ກັບ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ກົນ​ໄກ​ເສດ­ຖະ­ກິດ​ຕະ­ຫຼາດ​ຕາມ​ທິດ​ສັງ­ຄົມ​ນິຍົມ, ບົນ​ພື້ນ­ຖານ​ນັ້ນ, ກຳ­ນົດ​ອຳ­ນາດ​ຕັດ­ສິນ​ຂອງ​ລັດ­ຖະ­ບານ, ນາ­ຍົກ­ລັດ­ຖະ­ມົນ­ຕີ ຢ່າງ​ຈະ­ແຈ້ງ. ລັດຖະບານ, ບັນ­ດາ​ກະ­ຊວງ, ຄະ­ນະ​ກຳ­ມະ­ການ​ປະ­ຊາ­ຊົນ​ຂັ້ນ​ຕ່າງໆ​ ປະ­ຕິ­ບັດ​ພາ­ລະ​ບົດ­ບາດ​ ໜ້າ​ທີ່​ຄຸ້ມ​ຄອງບໍລິຫານ​ລັດ ຊຶ່ງ​ມີ​ເນື້ອ​ໃນຕ່າງໆ​ຄື ​ວາງ​ແຜນ­​ຍຸດ​ທະ​ສາດ ແຜນ­ການ​ພັດ­ທະ­ນາ​ເສດ­ຖະ­ກິດ - ສັງ­ຄົມ; ກໍ່ສ້າງ​ແລະ​ປະ­ກາດ​ໃຊ້​ລະ­ບຽບ​ກົດ­ໝາຍ ນະ­ໂຍ­ບາຍ; ຍົກ​ສູງ​ຄວາມ​ສາ­ມາດ​ຂອງ​ພະ­ນັກ­ງານ ຂ້າ​ລັດຖະການ, ຄຸນ​ນະ­ພາ​ບວຽກ​ງານ​ວາງ​ແຜນ​ກຳ­ນົດ, ຄຸ້ມ​ຄອງ​ແຜນ​ກຳ­ນົດ, ເພີ່ມ​ທະ­ວີ​ການ​ກວດ­ກາ ​ຕິດ­ຕາມກວດ­ກາ, ຮັບປະ­ກັນ​ການ​ນຳ­ພາ​ລວມ​ສູນ ເປັນ​ເອ­ກະ​ພາບ​ຂອງ​ສູນ​ກາງ ແລະ ເສິມ​ຂະ­ຫຍາຍ​ລັກ­ສະ­ນະ​ເປັນ​ເຈົ້າ​ການ, ຫົວ­ຄິດ​ປະ­ດິດ​ສ້າງ​ຂອງ​ບັນ­ດາ​ຂັ້ນ, ຂະ­ແໜງ­ການ​ຕ່າງໆ ​ໃນ​ການ­ຈັດ­ຕັ້ງ​ຜັນ​ຂະ­ຫຍາຍປະຕິບັດ. ຍູ້​ແຮງ​ການ​ແບ່ງ​ຂັ້ນ​ລະ­ຫວ່າງ​ສູນ​ກາງ - ທ້ອງ​ຖິ່ນ. ປະ­ຕິ­ບັດ​ຢ່າງ​ເດັດ­ຂາດການ​ມອບ​ໂອນ​ບັນ­ດາ​ພາ­ລະ​ບົດບາດ, ເນື້ອ​ໃນ​ວຽກ​ງານ​ ທີ່​ບໍ່​ຂຶ້ນ​ກັບ​ພາ­ລະ​ບົດ­ບາດ​ຂອງ​ລະ­ບົບ​ການ​ບໍ­ລິ­ຫານ ​ມາໃຫ້​ບັນ­ດາ​ອົງ​ການ­ຈັດ­ຕັ້ງ​ສັງ­ຄົມ, ອົງການ​ນອກ​ພາກ​ລັດ, ອົງ­ການ​ພາລະກິດ​​ບໍ­ລິ­ການສາທາລະນະ, ­​ວິ​ສາ​ຫະ​ກິດ ​ແລະ ເອ­ກະ​ຊົນ ​ເປັນ​ຜູ້​ຮັບ­ຜິດ­ຊອບ​ໃຫ້​ໄດ້​ນັບ​ມື້​ນັບ​ຫຼາຍ​ກວ່າ​ເກົ່າ ​ຕາມ​ທິດ​ຍູ້​ແຮງ​ການ​ຫັນ​ເປັນ​ສັງ­ຄົມ. ສືບ​ຕໍ່​ປະ­ຕິ​ຮູບ ແລະ ຜັນ​ຂະ­ຫຍາຍ​ຢ່າງກວ້າງຂວາງ ກົນ​ໄກ​ເປັນ​ເຈົ້າ​ຕົນ​ເອງແລະຮັບ­ຜິດ­ຊອບ​ດ້ວຍ​ຕົນ​ເອງ ​ຂອງ​ບັນ­ດາ​ອົງ­ການພາລະກິດ​ບໍ­ລິ­ການ​ສາ­ທາ­ລະ­ນະ​; ຮັບ­ປະ­ກັນ​ຄວາມ​ເພິ່ງ​ພໍ­ໃຈ​ຂອງ​ບຸກ­ຄົນ​ຕໍ່​ການ​ບໍ­ລິ­ການ​ ໂດຍ​ອົງ­ການພາລະກິດ​ບໍ­ລິ­ການ​ສາທາລະ­ນະ​ສະ­ໜອງ​ໃຫ້​ ໃນ​ຂົງ­ເຂດ​ຕ່າງໆ​ຄື ການ​ສຶກ​ສາ, ສະ​ທາ​ລະ­ນະ​ສຸກ ​ໃຫ້​ບັນ­ລຸ​​ຫຼາຍ​ກວ່າ 80% ໃນ​ປີ 2020.

ທີ​ສີ່, ຍູ​ເແຮງ​ການ​ປະ­ຕິ​ຮູບ​ການ​ບໍ­ລິ­ຫານ ​ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ຍົກ​ສູງ​ຄຸນ​ນະ​ພາບ, ປະ​ສິດ­ທິ​ຜົນ​ການ​ສະ­ໜອງ​ການ​ບໍ­ລິ­ການ​ສາ­ທາ­ລະ­ນະ ​ຂອງ​ກົງ­ຈັກ​ບໍ­ລິ­ຫານ​ແຫ່ງ​ລັດ​ ໃນ​ສະ­ພາບ​ການ​ເຊື່ອມໂຍງຢ່າງກວ້າງຂວາງ​ເລິກ​ເຊິ່ງ​ເຂົ້າ​ກັບເສດ­ຖະ­ກິດ​ໂລກ. ​ປະ­ຕິ​ຮູບ​ບັນ­ດາ​ລະ­ບຽບ​ການ​ບໍ­ລິ­ຫານ​ທັງ​ໝົດ ​ແລະຫັນມັນເປັນ​ງ່າຍ­ດາຍ, ເປັນ­ຕົ້ນ​ແມ່ນ​ລະ­ບຽບການ​ບໍ­ລິ­ຫານ​ທີ່​ພົວ­ພັນ​ເຖິງ​ປະ­ຊາ­ຊົນ, ວິ​ສາ​ຫະ​ກິດ; ສືບ​ຕໍ່​ກວດ­ຄືນ​ບັນ­ດາ​ເອ­ກະ­ສານ​ກົດ­ໝາຍ​ນິ­ຕິ​ກຳ​ ທີ່​ກຳ­ນົດ​ກ່ຽວ​ກັບ​ລະ­ບຽບ​ການ​ບໍ­ລິ­ຫານ​ ຂອງ​ບັນ­ດາ​ອົງ­ການ​​ລັດ​ແຕ່​ສູນ​ກາງ​ຈົນ​ຮອດ​ທ້ອງ​ຖິ່ນ, ລົບ​ລ້າງ​ບັນ­ດາ​ລະ­ບຽບ​ການ​ບໍ­ລິ­ຫານ​ທີ່​ກຳ­ລັງ​ກໍ່​ຄວາມ​ກີດ­ຂວາງ​ຕໍ່​ການ​ພັດ­ທະ­ນາ​ການ​ຜະ­ລິດ ແລະ ທຸລະ​ກິດ. ບັນ­ດາ​ລະ­ບຽບ​ການ​ບໍ­ລິ­ຫານ​ທີ່​ພົວ­ພັນ​ເຖິງ​ການ­ເຄື່ອນ­ໄຫວ​ສະ­ໜອງ​ການ​ບໍ­ລິ­ການ​ດ້ານ​ບໍ­ລິ­ຫານ​ສາ­ທາ­ລະ­ນະ ​ທີ່​​ວາງ​ອອກມາ​ຕ້ອງ​ເໝາະ​ສົມ​ກັບ​ເງື່ອນ­ໄຂ​ຕົວ​ຈິງ ແລະ ມີ​ຄວາມສາ­ມາດ​ປະ­ຕິ­ບັດ​ໄດ້; ຍົກ​ສູງ​ຄຸນ​ນະ​ພາບ, ປະ​ສິດ­ທິ​ຜົນຂອງ​ການແກ້​ໄຂ​ລະ­ບຽບ​ການ​ບໍ­ລິ­ຫານ​ຕາມ​ກົນ​ໄກ “ປະ­ຕູ​ດຽວ” “ປະ­ຕູ​ດຽວ​ມີ​ການ​ຕໍ່​ເມື່ອງ​ພາຍ​ໃນ”, ລະ­ດັບ​ຄວາມ​ເພິ່ງ​ພໍ­ໃຈ​ຂອງ​ປະ­ຊາ­ຊົນ​ແລະວິ​ສາ​ຫະ​ກິດ​ ກ່ຽວ​ກັບ​ລະ­ບຽບ​ການ​ບໍລິຫານ​ ​ໃຫ້​ບັນ­ລຸຫຼາຍ​ກວ່າ 80% ໃນ​ປີ 2020.

ທີ່​ຫ້າ, ສືບ​ຕໍ່​ຈັດ​ຕັ້ງ​ປະ­ຕິ­ບັດ​ກົດ­ໝາຍວ່າ​ດ້ວຍ​ພະ­ນັກ­ງານ, ຂ້າ​ລັດ­ຖະ­ການ ແລະ ​ບັນ­ດາ​ເອ­ກະ­ສານ​ແນະ​ນຳ​ປະ­ຕິ­ບັດ​ກົດ­ໝາຍ​ ບົນ​ພື້ນ­ຖານ​ການ​ປ່ຽນ­ແປງ​ໃໝ່​ບັນ­ດາ​ຂອດ​ວຽກ​ງານ​ພະ­ນັກ­ງານໃຫ້​ຄົບ​ຊຸດ​. ກໍ່­ສ້າງ ແລະ ປະ­ຕິ­ບັດ​ລະ­ບອບ​ການ​ບໍ​ລິ​ຫານ​ໃຫ້​ເປັນ​ເອ­ກະ​ພາບ, ປະ­ຊາ­ທິ­ປະ­ໄຕ, ເປີດ­ເຜີຍ, ປອດ​ໃສ, ຖືກ​ຕາມ​ອຳນາດ​ຕັດ­ສິນ ແລະ ມີ​ການ​ກວດ­ກາ ​ຕິດ­ຕາມກວດກາ, ຄຽງ​ຄູ່​ກັບ​ການ​ສ້າງ­ຕັ້ງ​ກົນ​ໄກ ນະ­ໂຍ­ບາຍ​ແນ­ໃສ່​ເສີມ​ຂະ­ຫຍາຍ​ຄວາມ​ສາ­ມາດ​ຂອງ​ຖັນ​ແຖວ​ພະ­ນັກ­ງານ ຂ້າ​ລັດ­ຖະ­ການ. ສຸມ​ໃສ່​ປະ­ຕິ­ບັດ​ວຽກ​ງານ​ຕີ​ລາ­ຄາ, ແບ່ງປະ​ເພດ​ພະ­ນັກ­ງານ ຂ້າ​ລັດ­ຖະ­ການ​ ຢ່າງ​ເຂັ້ມ​ງວດ, ຮັບປະ­ກັນ​ຄວາມ​ສອດ­ຄ່ອງ​ຖືກ­ຕ້ອງ ພາ­ວະ​ວິ​​ໄສ ປອດ​ໃສ, ເຊີດ​ຊູ ເສີມ​ຂະ­ຫຍາຍ​ພາ­ລະ​ບົດ­ບາດ ແລະ ຄວາມ​ຮັບ­ຜິດ­ຊອບ​ຂອງ​ຜູ້­ນຳ​ພາ, ສ້າງ​ຄວາ​ມ​ຫັນ­ປ່ຽນ​ຢ່າງ​ຕັ້ງໜ້າ ເທື່ອ​ລະ​ກ້າວ, ເປີດ­ເຜີຍ​ຜົນ­ສຳ­ເລັດ​ການ​ຕີ​ລາ­ຄາ, ສ້າງ​ຄວາມ​​ເຫັນ​ດີ​ເຫັນ​ພ້ອມໃນ​ຫາງ​ສຽງ​ສັງ­ຄົມ​. ກໍ່­ສ້າງ​ໂຄງປະກອບ​ພະນັກງານ ຂ້າ​ລັດ­ຖະ­ການ​ຕາມ​ທີ່​ຕັ້ງ​ການ​ງານ ແລະ ປະ­ຕິ­ບັດ​ນະ­ໂຍ­ບາຍ​ກ່ຽວ​ກັບ​ການ​ບັນ­ຈຸ​ລັດຖະ­ກອນ​ໃຫ້​ກະ­ທັດ​ຮັດ. ເພີ່ມ​ທະ­ວີ​ລະ­ບຽບ​ວິ­ໄນ​ໃນ​ຂະ​ບວນ​ວິ­ວັດ​ແຫ່ງ​ການ​ປະ­ຕິ­ບັດ​ໜ້າ­ທີ່ ການງານ​ຂອງ​ຖັນ​ແຖວ​ພະ­ນັກ­ງານ ຂ້າ​ລັດຖະການ.

ທີ​ຫົກ, ຜັນ​ຂະ­ຫຍາຍ​ການ​ກໍ່­ສ້າງ​ລັດ­ຖະ­ບານ​ເອ​ເລັກ​ໂຕຣ​ນິກ, ອຳ­ນາດ​ການ​ປົກ­ຄອງ​ເອ​ເລັກ​ໂຕຣ​ນິກ​ຕາມ​ມະ​ຕິ​ສະບັບເລກ​ທີ  36a/NQ-CP ​ລົງ​ເມື່ອ​ວັນ​ທີ 14 ຕຸ­ລາ 2015 ຂອງ​ລັດ­ຖະ­ບານ. ຕາມ​ນັ້ນ, ຍູ້​ແຮງ​ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ ເຂົ້າ​ໃນ​ການ​ຄຸ້ມ​ຄອງ​ການ​ບໍ­ລິ­ຫານ ແລະ ນຳ​ໃຊ້​ຢ່າງ​ມີ​ປະ​ສິດ­ທິ​ຜົນ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ໃນ​ວຽກ​ງານ​ຊີ້​ນຳ ບັນ­ຊາ​ຄວບ​ຄຸມ​​ລວມ​ສູນ, ​ເປັນເອ­ກະ​ພາບ​ຂອງ​ລັດ­ຖະ­ບານ ແລະ ລະ­ບົບ​ການ​ບໍ­ລິ­ຫານ​ໃນ​ຂັ້ນ​ຕ່າງໆ. ພ້ອມ​ທັງ, ຍູ້​ແຮງ​ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ໃນ​ການເຄື່ອນໄຫວ​ຂອງ​ອົງ­ການ​ບໍ­ລິ­ຫານ​ແຫ່ງ​ລັດ ແລະ ໃນ​ການ​ແກ້​ໄຂ​ວຽກ​ງານ​ຂອງ​ປະ­ຊາ­ຊົນ ​ແລະ ວິ​ສາ​ຫະ​ກິດ, ​ຮັບ­ປະ­ກັນ​ລັກ­ສະ­ນະ​ປະ​ສິດ­ທິ​ຜົນ ທັນ​ເວ­ລາ ​ເປີດ​ເຜີຍ ແລະ​ ​ໂປ່​ງ​ໃສ ​ໃນ​ການ​ປະ­ຕິ­ບັດ​ການງານ, ຍົກ​ສູງ​ຄຸນ​ນະ​ພາບ​ການ​ສະ­ໜອງ​ການ​ບໍ­ລິ­ການ​ສາ­ທາ­ລະ­ນະ./.

ເລ​ຫວິງ​ເຕິນ

ກຳ­ມະ­ການ​ສູນ​ກາງ​ພັກ, ລັດ­ຖະ­ມົນ­ຕີ​ກະ­ຊວງ​ພາຍ​ໃນ

--------------------

      ບົດ​ນີ້​ໄດ້​ລົງ​ພິມ​ໃນ​ວາ­ລະ­ສານ​ກອມ​ມູ​ນິດ​ ສະ­ບັບ​ທີ 884 (ເດືອນ​ມິຖຸ​ນາ 2016)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ