ວັນອາທິດ, 28/5/2017
ເສີມຂະຫຍາຍກຳລັງແຮງຂອງ ຄວາມມະຫາສາມັກຄີ ປວງຊົນທັງຊາດ ໃນພາລະກິດກໍ່ສ້າງ ແລະ ປົກປັກຮັກສາປະເທດຊາດ
25/10/2016 9:21' ສົ່ງ ພິມ
ປະທານປະເທດແຫ່ງ ສສ ຫວຽດນາມ ເຈິ່ນດ້າຍກວາງ (ພາບ: TTXVN)

ຜ່ານ​ຫຼາຍ​ພັນ​ປີ​ແຫ່ງ​ການ​ສ້າງ​ຕັ້ງ​ປະ​ເທດ ​ແລະ ປົກ​ປັກ​ຮັກສາ​ປະ​ເທດ, ຄວາມ​ມະຫາ​ສາມັກຄີ​ປວງ​ຊົນ​ທັງ​ຊາດ​ໄດ້​ກາຍ​ເປັນ​ມໍລະດົກ​ອັນ​ລ້ຳ​ຄ່າ, ມູນເຊື້ອອັນປະເສີດເລີດລ້ຳທີ່ສຸດ ຂອງຊາດເຮົາ. ນ້ຳ​ໃຈ​ຮັກ​ຊາດ, ນ້ຳ​ໃຈ​ສາມັກຄີ, ນັບຖື​ມະນຸດ​ສະທຳ, ຄວາມຮັກ​ແພງອຸປະຖຳ​ຄ້ຳ​ຊູ​ເຊິ່ງກັນ​ແລະ​ກັນ ​ໄດ້​ຊືມ​ເລິກ​ເຂົ້າ​ໃນ​ແນວ​ຄິດ ຈິດ​ໃຈ ຈິດ​ວິນ​ຍານ​ຂອງຊາວ​ຫວຽດນາມ, ກາຍ​ເປັນ​ຄະຕິ​ທຳ​ແຫ່ງ​ຊີ​ຊິດ, ​ເປັນ​ທາດ​ເຊື່ອມ​ຕິດຜູກ​ພັນ​ບັນດາ​ສະມາຊິກ​ໃນ​ວົງ​ຄະນາ​ຍາດ​ແຫ່ງ​ຊາດ​ຫວຽດນາມ. ປະຫວັດສາດ​ໄດ້​ພິສູດມູນ​ເຊື້ອມະຫາ​ສາມັກຄີ​ປວງ​ຊົນ​ທັງ​ຊາດຢູ່​ປະ​ເທດ​ຫວຽດນາມ ​ໃນ​ບໍ່​ວ່າ​ສະພາບ​ການ​ໃດ ກໍລ້ວນ​ແຕ່​ໂຮມ​ເປັນ​ກຳລັງ​ແຮງ​ທີ່ຊະນະ​ເລີດ, ພາ​ໃຫ້​ຊາດ​ຫວຽດນາມ​ຜ່ານ​ຜ່າ​ຄວາມ​ຫຍຸ້ງຍາກ ສິ່ງທ້າ​ທາຍ​ທຸກ​ຢ່າງ, ກ້າວ​ແຕ່​ໄຊຊະນະ​ນີ້​ໄປ​ສູ່​ໄຊຊະນະ​ອື່ນ, ສ້າງ​ຜົນສຳ​ເລັດ​ອັນ​ສະຫງ່າ​ລາສີ.

ນັບ​ແຕ່​ເມື່ອ​ທີ່ຫາ​ກໍ່​ໄດ້​ສ້າງ​ຕັ້ງ​ຂຶ້ນ ​ແລະ ​ໃນ​ຂະ​ບວນວິວັດ​ແຫ່ງ​ການ​​ນຳພາ​ການ​ປະຕິວັດ, ພັກ​ກອມ​ມູນິດ​ຫວຽດນາມ ຍາມ​ໃດ​ກໍ່​ກຳນົດ​ແຈ້ງວ່າ ມະຫາ​ສາມັກຄີ​ປວງ​ຊົນ​ທັງ​ຊາດ ​ແມ່ນ​ແນວທາງ​ຍຸດ​ທະ​ສາດ, ແມ່ນແຫຼ່ງກຳລັງແຮງ ກຳລັງໜູນຕົ້ນຕໍ ແລະ ເປັນປັດໄຈທີ່ມີຄວາມໝາຍຕັດສິນ ຕໍ່ໄຊຊະນະຂອງການປະຕິວັດຫວຽດນາມ. ​ເສີມ​ຂະຫຍາຍ​ກຳລັງ​ແຮງ​ຂອງ​ຄວາມມະຫາ​ສາມັກຄີ​ປວງ​ຊົນ​ທັງ​ຊາດ ​ໄດ້​ກາຍ​ເປັນໜຶ່ງ​ໃນ​ບັນດາ​ບົດຮຽນ​​ໃຫຍ່, ​ເປັນ​ແບບ​ວິທີ ​ແລະ ກໍ່​ເປັນ​ເງື່ອນ​ໄຂທີ່ຮັບປະກັນ​ຄວາມ​ສຳ​ເລັດ ຂອງ​ພາລະກິດ​ການ​ຕໍ່ສູ້​ປົດ​ປ່ອຍ​ຊາດ, ກໍ່​ສ້າງ ປົກ​ປັກ​ຮັກສາ ​ແລະ ພັດ​ທະ​ນາ​ປະ​ເທດ​ ໃນ​ແຕ່ລະ​ໄລຍະ​ການ​ປະຕິວັດ. ຈາດ​ພຶດຕິ​ກຳ​ແຫ່ງ​ການ​ຕໍ່ສູ້​ປະຕິວັດ​ທີ່​ອຸດົມສົມບູນ, ປະທານ​ໂຮ່ຈີ​ມິນ​ໄດ້​ສັງ​ລວມ​ເປັນ​ແນວ​ຄິດມະຫາ​ສາມັກຄີ​ປວງ​ຊົນ​ທັງ​ຊາດ ​ແລະ​ເນັ້ນ: “ສາມັກຄີ, ສາມັກຄີ, ມະຫາ​ສາມັກ​ຄີ. ຜົນສຳເລັດ, ຜົນສຳເລັດ, ຜົນສຳເລັດທີ່ຍິ່ງໃຫຍ່". ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກກໍ່​ຊີ້​ແຈ້ງ: “​ເສີມ​ຂະຫຍາຍ​ທຸກ​ແຫຼ່ງພະລັງ, ທຸກ​ຄວາມ​ສາມາດ​ປະດິດ​ສ້າງ ​ຂອງ​ປະຊາຊົນ​ຢ່າງ​ແຂງ​ແຮງ ​ເພື່ອ​ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ; ຖື​ເອົາ​ເປົ້າ​ໝາຍກໍ່ສ້າງ​ປະ​ເທດ​ຫວຽດນາມ​ທີ່​ມີ​ສັນຕິພາບ ​ເອກະລາດ ​ເອກະ​ພາບ ຜືນ​ແຜ່ນດິນ​ອັນ​ຄົນ​ຖ້ວນ, “ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ຍຸຕິ​ທຳ ສີວິ​ໄລ” ​ເປັນ​ຈຸດທີ່​ຄ້າຍຄື​ກັນ; ນັບຖື​ບັນດາ​ຈຸດ​ແຕກ​ຕ່ງກັນ​ທີ່​ບໍ່​ຝືນ​ກັບ​ຜົນ​ປະ​ໂຫຍ​ດຂອງ​ຊົນ​ຊາດ - ປະ​ເທດ​ຊາດ; ​ເຊີດ​ຊູ​ຈິດ​ໃຈ​ຊາດ, ມູນ​ເຊື້ອ​ຮັກ​ຊາດ, ນ້ຳ​ໃຈ​ມະນຸດສະທຳ, ຄວາມ​ອະນຸ​​ໂລ​ມຜ່ອນຜັນ ​ເພື່ອ​ເຕົ້າ​ໂຮມ ສາມັກຄີ​ຊາວ​ຫວຽດນາມ​ທຸກ​ຄົນທີ່ຢູ່​ໃນ ​ແລະ ຕ່າງປະ​ເທດ, ​ເພີ່ມ​ທະວີ​ຄວາມ​ພົວພັນ​ສະໜິດ​ແໜ້ນ​ລະຫວ່າງ​ປະຊາຊົນ​ກັດ​ພັກ ລັດ, ສ້າງ​ກຳລັງ​ຊີວິດ​ໃໝ່​ຂອງ​ກ້ອ​ນກຳລັງ​ມະຫາ​ສາມັກຄີ​ປວງ​ຊົນ​ທັງ​ຊາດ” (1).

​ຫຼັງຈາກ​ການ​ປະຕິວັດ​​ເດືອນ​ສິງຫາປີ 1945 ມາ​ຮອດ​ປະຈຸ​ບັນ, ພັກ-ລັດ​ຫວຽດນາມ​ໄດ້​ປະກາດ​​ໃຊ້​ແຜນ​ນະ​ໂຍບາຍ, ນະ​ໂຍບາຍ, ກົດໝາຍ​ຫຼາຍ​ສະບັບ​ ກ່ຽວ​ກັບຊົນ​ຊາດ, ສາສະໜາ, ຊາວ​ໜຸ່ມ, ​ແມ່ຍິງ, ກຳມະກອນ, ຊາວ​ນາ, ປັນຍາ​ຊົນ, ສິນລະປິນ, ຊາວ​ຫວຽດນາມ​ຢູ່​ຕ່າງປະ​ເທດ... ​ແນ​ໃສ່​ປຸກລຸກ ​​ແລະ ເສີມ​ຂະຫຍາຍ​ກຳລັງ​ແຮງ​ແຫ່ງມະຫາ​ສາມັກຄີ​ປວງ​ຊົນ​ທັງ​ຊາດ ​ໃນ​ພາລະກິດ​ສ້າງສາ, ປົກ​ປັກ​ຮັກສາ ​ແລະ ພັດທະນາ​ປະ​ເທດ. ຄວາມ​ຮັບ​ຮູ້ ​ແລະ ຄວາມ​ຮັບຜິດຊອບ​ຂອງ​ຄະນະ​ພັກ, ອຳນາດ​ການ​ປົກຄອງ​ຂັ້ນ​ຕ່າງໆ ​ກ່ຽວ​ກັບ​ການ​ເສີມ​ຂະຫຍາຍ​ກຳລັງ​ແຮງ​ແຫ່ງມະຫາ​ສາມັກຄີ​ປວງ​ຊົນ​ທັງ​ຊາດ ​ໃນ​ການ​ປະຕິບັດ​ໜ້າ​ທີ່​ພັດທະນາ​ເສດຖະກິດ - ສັງຄົມ, ຮັບປະກັນ​ການ​ປ້ອງ​ກັນ​ປະ​ເທດ, ຮັກສາ​ຄວາມ​ສະຫງົບ​ ຂອງ​ສຳນັກງານ​ອົງການ, ກົມ​ກອງ, ທ້ອງ​ຖິ່ນ ນັບ​ມື້​ນັບ​ໄດ້​ຮັບ​ຄວາມ​ເອົາ​ໃຈ​ໃສ່ ​ແລະ ມີ​ການ​ຫັນປ່ຽນ​ທີ່​ກ້າວໜ້າ​ຫຼາຍຢ່າງ. ບັນດາ​ຂັ້ນ, ຂະ​ແໜງ​ການ​ໄດ້ ຫັນ​ລົງ​ສູ່​ຮາກ​ຖານ​ຢ່າງ​ແຂງ​ແຮງ, ຕິດ​ແໜ້ນ​ກັບ​ພື້ນ​ທີ່ ກັບ​ປະຊາຊົນ, ເພີ່ມທະວີການສົນທະນາປຶກສາກັບປະຊາຊົນ, ຊອກຮູ້ຄວາມຄິດຈິດໃຈ, ເກັບກຳຄວາມປາຖະໜາ ແລະ ຂໍ້ສະເໜີ, ສະເໜີແນະ ຂອງປະຊາຊົນຢ່າງທັນການ ເພື່ອເປັນ​ທີ່​ປຶກສາ​ໃຫ້​ພັກ-ລັດ ​ໃນ​ການວາງກຳນົດ​ແຜນ​ນະ​ໂຍບາຍ ນະ​ໂຍບາຍທີ່​ເໝາະ​ສົມ​ ​ແນ​ໃສ່​ແກ້​ໄຂ​ບັນດາ​ບັນຫາ​ທີ່​ພົວພັນ​ໂດຍ​ກົງ​ກັບ​ຊີວິດ​ຄວາມ​ເປັນ​ຢູ່​ຂອງ​ປະຊາຊົນ. ການ​ຜັນ​ຂະຫຍາຍ​ນະ​ໂຍບາຍ ​ໂຄງການ ​ເປົ້າ​ໝາຍ​ຫຼາຍ​ຢ່າງ​ ໄດ້​ເຮັດ​ໃຫ້​ໂຄງ​ສ້າງ​ພື້ນຖານ​ເສດຖະກິດ - ສັງຄົມ ​ແລະ ຊີວິດ​ຄວາມ​ເປັນ​ຢູ່ ​ຂອງ​ປະ​ຊາ​ຊົນຢູ່​ເຂດ​ຊົນ​ເຜົ່າ​ສ່ວນ​ນ້ອຍມີ​ການ​ປົວ​ແປງ​ໃຫ້​ດີ​ຂຶ້ນ​ຢ່າງ​ຈະ​ແຈ້ງ; ວັນ​ທະ​ນະ​ທຳອັນ​ເປັນ​ມູນ​ເຊື້ອ​ຂອງ​ຊົນ​ຊາດ​ຊົນ​ເຜົ່າ​ໄດ້​ຮັບ​ຄວາມ​ນັບຖື, ຮັກສາ ​ແລະ ​ເສີມ​ຂະຫຍາຍ. ວຽກ​ງານ​ຂົນຂວາຍ​ຊຸມ​ຊົນ​ທີ່​ຖື​ສາສະໜາ, ສາ​ສະ​ນິກະ​ຊົນ, ຜູ້ນຳ​ທາງ​ສາສະໜາ ​ໃຫ້​ສະໜັບສະໜູນ ​ເຂົ້າ​ຮ່ວມ​ການ​ຂົນຂວາຍ, ຮ່ວມ​ຂະ​ບວນການ​​ແຂ່ງຂັນ​ຮັກ​ຊາດ, ກໍ່ສ້າງກ້ອນ​ກຳລັງ​ມະຫາ​ສາມັກຄີ​ປວງ​ຊົນ​ທັງ​ຊາດ ​ໃຫ້ບັນລຸ​ໝາກຜົນ​ຕົວ​ຈິງ.

ດ້ວຍ​ທິດ​ນຳ “ປະຊາຊົນ​ຮູ້, ປະຊາຊົນ​ປຶກສາ​ຫາລື, ປະຊາຊົນ​ເຮັດ, ປະຊາຊົນ​ກວດກາ”, ສິດ​ເປັນ​ເຈົ້າ​ຂອງ​ປະຊາຊົນ​ ໃນ​ການ​ຄຸ້ມຄອງ​ລັດ, ຄຸ້ມ​ຄອງ​ເສດຖະກິດ - ສັງຄົມ ​ໄດ້​ຮັບ​ການ​ປັບປຸງ​ແຕ່​ລະ​ກ້າວ; ປະຊາທິປະ​ໄຕ​ແບບ​ຕົວ​ແທນ, ປະຊາທິປະ​ໄຕ​ໂດຍ​ກົງ​ຢູ່​ຮາກ​ຖານ​ ໄດ້​ຮັບ​ການ​ເປີດ​ກວ້າງ, ປະກອບສ່ວນ​ປຸກລະດົມ​ກຳລັງ​ໃຈ​ຂອງ​ປະຊາຊົນ ​ໃຫ້​ຍູ້​ແຮງ​ການ​ອອກ​ແຮງ​ງານ​ເພີ່ມ​ພູນ​ຜະ​ລິດ​ຜົນ, ຕັ້ງໜ້າ​ເຂົ້າ​ຮ່ວມ​ໃນ​ການ​ປະຕິບັດ​ບັນດາ​ໜ້າ​ທີ່​ພັດທະນາ​ເສດຖະກິດ ວັດທະນະທຳ ສັງຄົມ, ຫລຸດຜ່ອນ​ຄວາມທຸກ​ຍາກ, ປະຕິບັດ​ນະ​ໂຍບາຍ​ແນວ​ຫຼັງ​ ເບິ່ງແຍງ​ດູ​ແລ​ນັກຮົບ​ເສຍ​ອົງຄະ, ນັກຮົບ​ເຈັບ​ປ່ວຍ, ຄອບຄົວ​ນັກຮົບ​ທີ່​ໄດ້​ເສຍ​ສະລະ​ຊີວິດ​ເພື່ອ​ຊາດ, ຜູ້​ທີ່ມີ​ຄຸນງາມຄວາມດີ​ຕໍ່​ການ​ປະຕິວັດ; ກໍ່ສ້າງ​ພື້ນຖານ​ການ​ປ້ອງ​ກັນຊາ​ດທົ່ວ​ປວງ​ຊົນ, ທ່າສະໜາມ​ປ້ອງ​ກັນຊາ​ດທົ່ວ​ປວງ​ຊົນ, ຕິດ​ກັບ​ພື້ນຖານ​ການ​ປ້ອງ​ກັນ​ຄວາ​ມສະຫງົບ​ປະຊາຊົນ, ທ່າສະໜາມ​ການປ້ອງ​ກັນ​ຄວາ​ມສະຫງົບ​ປະຊາຊົນທີ່​ໝັ້ນຄົງ, ປັບປຸງ​ແລະ​ເພີ່ມ​ທະວີ “ທ່າສະໜາມ​ຮົບ​ໃນ​ໃຈ​ປະຊາຊົນ”, ປະກອບສ່ວນ​ກໍ່ສ້າງ​ກ້ອນ​ກຳ​ລັງມະຫາ​ສາມັກຄີ​ປວງ​ຊົນ​ທັງ​ຊາດ.

ການ​ເຕົ້າ​ໂຮມປະຊາຊົນ​ທຸກ​ຊັ້ນ​ວັນນະ​ໃນ​ປະ​ເທດ ​ແລະ ຊາວ​ຫວຽດນາມ​ຢູ່​ຕ່າງປະ​ເທດພາຍ​ໃຕ້​ບັນດາ​ຮູບ​ການ​ທີ່​ຫຼາກ​ຫຼາຍ ກໍ່​ມີ​ບາດກ້າວ​ຂະຫຍາຍຕົວ​ໃໝ່. ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງ​ຄະນະ​ມະຫາຊົນ​ ໄດ້​ຮັບ​ການ​ເປີດ​ກວ້າງ ​ແລະ​ຍົກ​ສູງ​ບົດບາດ​ທີ່​ຕັ້ງ​ໃນ​ສັງຄົມ; ​ເນື້ອ​ໃນ ​ແບບ​ວິທີ​ການ​ເຄື່ອນ​ໄຫວ​ຂອງ​ອົງການ​ເຫຼົ່ານີ້​ ໄດ້​ຮັບ​ການ​ປ່ຽນ​ແປງ​ໃໝ່, ຕອບ​ສະໜອງ​ໄດ້​ກັບ​ຄວາມ​ປາຖະໜາ ​ແລະ ສິດຜົນປະ​ໂຫຍດຂອງ​ສະມາຊິກ, ປຸກ​ລະດົມ ດຶງ​ດູດ​ປະຊາຊົນ​ທີ່​ກວ້າງຂວາງ​ ໃຫ້​ເຂົ້າ​ຮ່ວມ​ໃນ​ຂະ​ບວນການ​ແຂ່ງຂັນກັນ​ຮັກ​ຊາດ, ກໍ່ສ້າງ​ລະບົບ​ການ​ເມືອງ​ຢູ່​ຮາກ​ຖານ ​ໃຫ້​ສະອາດປອດ​ໄສ ໝັ້ນຄົງ​ເຂັ້ມ​ແຂງ; ຂົນຂວາຍ​ຊາວ​ຫວຽດນາມ​ຢູ່​ຕ່າງປະ​ເທດ​ປະກອບ​ກຳລັງ​ຄົນ ກຳລັງ​ຊັບ​ເຂົ້າ​ໃນ​ການ​ກໍ່ສ້າງ​ບ້ານ​ເກີດ​ເມືອງ​ງນອນ ​ໃຫ້​ນັບ​ມື້​ນັບ​ໝັ້ນຄົງ​ເຂັ້ມ​ແຂງ. ການ​ເຄື່ອນ​ໄຫວ​ເຫຼົ່າ​ນັ້ນ ​ໄດ້​ເພີ່ມ​ທະວີ​ບັນຍາກາດ​ປະຊາທິປະ​ໄດ ​ແລະ ຄວາມ​ເຫັນ​ດີ​ເຫັນ​ພ້ອມ​ໃນ​ສັງຄົມ, ສ້າງ​ເງື່ອນ​ໄຂ​ໃຫ້​ປະຊາຊົນຊັ້ນ​ຄົນ​ຕ່າງໆ ​ປະຕິບັດ​ແຜນ​ນະ​ໂຍບາຍ ​ແນວທາງ​ຂອງ​ພັກ, ນະ​ໂຍບາຍ ກົດໝາຍ​ຂອງລັດ​ຢ່າງ​ຕັ້ງໜ້າ.

​ໃນ​ເງື່ອນ​ໄຂ​ກໍ່ສ້າງ​ລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ ຂອງ​ປະຊາຊົນ ​ໂດຍ​ປະຊາຊົນ ​ແລະ​ເພື່ອປະຊາຊົນ, ຍູ້​ແຮງ​ການ​ຫັນ​ເປັນ​ອຸດສາຫະກຳ ທັນ​ສະ​ໄໝ, ​ເຊື່ອ​ມ​ໂຍ​ງສາກົນ, ປະ​ເທດ​ເຮົາ​ພວມ​ຢືນ​ຕໍ່ໜ້າຫຼາຍ​ບັນຫາ​ໃໝ່​ ທີ່​ສົ່ງ​ຜົນ​ກະທົບ​ເຖິງ​ແນວ​ຄິດ​ຈິດ​ໃຈ, ຊີວິດ​ຂອງ​ປະຊາຊົນ. ການ​ຜັນ​ແຍກ​ຮັ່ງມີ​ທຸກ​ຍາກ, ການ​ຜັນ​ແຍກ​ຊັ້ນ​ຄົນ​ສັງຄົມ ນັບ​ມື້​ນັບ​ເຄັ່ງຮ້ອນ; ພະ​ຍາດ​ອາດຍາ​ສິດ, ສໍ້​ລາດ​ບັງ​ຫຼວງ, ຟຸມ​ເຟືອຍ, ລະ​ເມີດ​ສິດ​ແລະ​ຜົນ​ປະ​ໂຫຍ​ດອັນ​ຊອບ​ທຳ​ຂອງ​ປະຊາຊົນ... ຍັງ​ເກີດ​ຂຶ້ນ​ຢ່າງ​ສັບສົນ, ກໍ່​ຄວາມ​ຮ້ອນ​ເຄືອງ​ໃນ​ສັງ​ຄົມ, ພ້ອມ​ກັບ​ປະກົດ​ການ​ຕ່າງໆ​ຄື “ການ​ຜັນ​ປ່ຽນດ້ວຍຕົນ​ເອງ”, “ການ​ປ່ຽນ​ແປງ​ດ້ວຍຕົນ​ເອງ” ຢູ່​ພາຍ​ໃນ​ ​ເປັນ​ສິ່ງ​ທີ່​ພວມ​ເຮັດ​ໃຫ້ຄວາມ​ເຊື່ອ​ຖື​ຂອງ​ປະຊາຊົນ​ຫລຸດ​ໜ້ອຍຖອຍ​ລົງ, ກາຍ​ເປັນ​ສິ່ງ​ທ້າ​ທາຍ​ຕໍ່​ສາຍ​ພົວພັນ​ສະໜິດ​​ແໜ້ນລະຫວ່າງ​ພັກ-ລັດ ​ແລະ ປະຊາຊົນ. ສະພາບ​ຄວາມ​ເປັນ​ຈິງ​ຮຽກຮ້ອງ​ໃຫ້​ ສືບ​ຕໍ່​ປັບປຸງ​ກ້​ອນກຳລັງມະຫາ​ສາມັກຄີ​ປວງ​ຊົນ​ທັງ​ຊາດ​ໃຫ້​ໝັ້ນຄົງ, ​ເສີມ​ຂະຫຍາຍ​ກຳລັງ​ແຮງ​ອັນ​ໃຫຍ່​ຫຼວງ​ຂອງປວງຊົນ​ ໃນ​ພາລະກິດ​ກໍ່ສ້າງ​ ແລະປົກ​ປັກ​ຮັກສາ​ປະ​ເທດ​ຊາດ​ຫວຽດນາມສັງຄົມ​ນິຍົມ.

​ເພື່ອ​ປະຕິບັດການ​ຫັນ​ປະ​ເທດ​ເປັນ​ອຸດສາຫະກຳ ທັນ​ສະ​ໄໝ​ ​ແລະ​ເຊື່ອມ​ໂຍງ​ສາກົນ ບັນລຸ​ຜົນສຳ​ເລັດ, ຮັກສາຄວາມ​ເປັນ​ເອກະລາດ ອະທິປະ​ໄຕ ​ເອກະ​ພາບ ຜືນ​ແຜ່ນດິ​ນອັນ​ຄົບ​ຖ້ວນ ​ຂອງ​ປະ​ເທດ​ຊາດ​ໄດ້​ຢ່າງ​ໝັ້ນຄົງ, ຕ້ອງຍົກ​ສູງ​ຄວາມ​ຮັບ​ຮູ້, ຄວາມ​ຮັບຜິດຊອບ​ ຂອງ​ລະບົບ​ການ​ເມືອ​ງ, ຂອງ​ບັນດາ​ຂັ້ນ ຂະ​ແນງການ ​ແລະ ທົ່ວ​ສັງຄົມ ກ່ຽວ​ກັບ​ການ​ກໍ່ສ້າງ ປັບປຸງ​ກ້ອນ​ກຳ​ລັງມະຫາ​ສາມັກຄີ​ປວງ​ຊົນ​ທັງ​ຊາດ ໃນສະພາບການໃໝ່. ພະນັກງານ ສະມາຊິກ​ພັກ​ແຕ່ລະຄົນ​ ຕ້ອງ​ຊາບ​ຊືມຢ່າງ​ເລິກ​ເຊິ່ງ ​ແລະ ປະຕິບັດ​ຢ່າງ​ເຂັ້ມງວດ ທັດສະນະ​ອັນ​​ເປັນ​ແກ່ນສານຄື: ການ​ປະຕິວັດ​ແມ່ນ​ພາລະກິດ​ຂອງ​ປະຊາຊົນ, ​ໂດຍປະຊາຊົນ ​ແລະ​ເພື່ອປະຊາຊົນ, ປະຊາຊົນ​ແມ່ນ​ເຈົ້າ​ຂອງ, ປະຊາຊົນ​ເປັນ​ເຈົ້າ; ມະຫາ​ສາມັກຄີ​ປວງ​ຊົນ​ທັງ​ຊາດ ​ຕ້ອງ​ອີງ​ບົນ​ພື້ນຖານການ​ແກ້​ໄຂ​ຄວາມ​ພົວພັນ​ທາງ​ຜົນ​ປະ​ໂຫຍ​ດ ລະຫວ່າງສະມາຊິກ​ຂອງ​ສັງຄົມຢ່າງ​ກົມ​ກຽວ, ຍົກ​ສູງ​ຊີ​ວິ​ຄວາມ​ເປັນ​ຢູ່​ດ້ານ​ວັດ​ຖຸ ​ແລະ ຈິດ​ໃຈ​ ຂອງ​ປະຊາຊົນຢ່າງ​ບໍ່​ຢຸດ​ຢັ້ງ, ຮັບປະກັນ​ໃຫ້​ປະຊາຊົນ​ແຕ່ລະຄົນ ​ລ້ວນ​ແຕ່​ໄດ້​ມີ​ຊີວິດ​ຢູ່​ໃນ​ສິ່ງ​ແວດ​ລ້ອມ​ທີ່​ປອດ​ໄພ ມີ​ຄວາມ​ສະຫງົບ ​ແລະ ​ໄດ້​ຊົມ​ໃຊ້​ໝາກຜົນ​ຂອງ​ການ​ປ່ຽນ​ແປງ​ໃໝ່. ໜ້າ​ທີ່​ທີ່ປົກ​ຫຸ້ມ, ສອດ​ຮ້ອຍ​ຕະຫຼອດ​ຂອງ​ທຸກ​ຂັ້ນ ທຸກຂະ​ແໜງ​ການ​ແມ່ນ ປຸກລະດົມ ​ເຕົ້າ​ໂຮມປະຊາຊົນທຸກ​ຊັ້ນ​ວັນນະ​ຢູ່​ໃນ​ປະ​ເທດ ​ແລະ ພີ່ນ້ອງ​ຮ່ວມ​ຊາດ​ຢູ່​ຕ່າງປະ​ເທດ ຮ່ວມ​ສາມັກຄີ​ກັນ ຕັ້ງໜ້າ​ພະຍາຍາມ​ຢ່າງ​ບໍ່​ຢຸດ​ຢັ້ງ ​ເພື່ອ​ເຂົ້າ​ຮ່ວມ​ການ​ກໍ່ສ້າງ ປົກ​ປັກ​ຮັກສາ ​ແລະ ພັດທະນາ​ປະ​ເທດ.

ສືບ​ຕໍ່​ຫັນ​ທິດ​ນຳຂອງ​ພັກເປັນ​ນິຕິ​ກຳຄື ​“ປະຊາຊົນ​ຮູ້, ປະຊາຊົນປຶກສາ​ຫາລື, ປະຊາຊົນ​ເຮັດ, ປະຊາຊົນກວດກາ” ​ໃຫ້​ກາຍ​ເປັນ​ນະ​ໂຍບາຍ, ກົດ​ລະບຽບ, ຂໍ້​ກຳນົດ​ລະອຽດ ​ເພື່ອ​ໃຫ້ປະຊາຊົນ​ເສີມ​ຂະຫຍາຍ​ສິດ​ເປັນ​ເຈົ້າ​ໃນ​ພາກ​ຕົວ​ຈິງ ​ແລະ ປະຕິບັດ​ຄວາມ​ຮັບຜິດຊອບ ພັນທະ​ຕໍ່​ລັດ ​ແລະ ສັງຄົມ ​ໃຫ້​ໄດ້​ເປັນ​ຢ່າງ​ດີ. ກໍ່ສ້າງ​ກົນ​ໄກ, ນະ​ໂຍບາຍ ​ແລະ ບັນດາ​ຮູບ​ການຈັດ​ຕັ້ງ ​ເພື່ອ​ໃຫ້ປະຊາຊົນ​ໄດ້​ເສີມ​ຂະຫຍາຍ​ສິດ​ເປັນ​ເຈົ້າ ​ໃນ​ບັນດາ​ຂົງ​ເຂດ​ຂອງ​ຊີວິດ​ສັງຄົມ, ຂະຫຍາຍ​ຄວາມ​ເກັ່ງ​ກ້າ​ສາມາດ ຄວາມ​ປະດິດ​ສ້າງ, ຂະຫຍາຍ​ການ​ຜະລິດ ທຸລະ​ກິດ​ຫາ​ຄວາມ​ລ້ຳ​ລວຍທີ່​ຖືກຕ້ອງ​ຕາມ​ກົດໝາຍ, ນຳ​ເອົາ​ຜົນ​ປະ​ໂຫຍ​ດມາ​ໃຫ້​ຕົນ​ເອງ ​ແລະ ​ໃຫ້​ປະ​ເທດຊາດ. ສຸມ​ໃສ່​ກໍ່ສ້າງ​ຖັນ​ແຖວ​ພະນັກງານ ຂ້າ​ລັດຖະການທີ່ “​ໃກ້ຊິດ​ກັບປະຊາຊົນ, ເຂົ້າໃຈປະຊາຊົນ, ຮ່ຳຮຽນນຳປະຊາຊົນ, ນັບຖືປະຊາຊົນ ແລະມີຄວາມຮັບຜິດຊອບກັບປະຊາຊົນ", ເປັນແບບຢ່າງ, ສຸດອົກສຸດໃຈກັບວຽກງານ, ເວົ້າໄປຄຽງຄູ່ກັບເຮັດ, ເປັນຜູ້ຮັບໃຊ້ທີ່ແທ້ຈິງຂອງປະຊາຊົນ. ​ເພີ່ມ​ທະວີ​ລະບຽບ​ວິ​ໄນ​ຢູ່ໃນ​ພັກ ​ແລະ ​ໃນ​ກົງຈັກ​ອຳນາດ​ການ​ປົກຄອງ ບົນ​ພື້ນຖານ​ກຳນົດ​ແຈ້ງ​ຄວາມ​ຮັບຜິດຊອບ​ສ່ວນບຸກຄົນ ຕໍ່​ການ​ກະທຳ​ທີ່​​ໝິ່ນປະໝາດ ​ແລະ​ກໍ່​ຄວາມ​ເສຍ​ຫາຍ​ໃຫ້​ແກ່​ສິດ ຜົນ​ປະ​ໂຫຍດທີ່​ຖືກຕ້ອງ​ຕາມ​ກົດໝາຍ​ຂອງປະຊາຊົນ, ຈັດການ​ຢ່າງ​ເຂັ້​ມງວດຕາມ​ຂໍ້​ກຳນົດ​ກົດໝາຍ, ປັບປຸງ​ຄວາມ​ໄວ້​ວາງ​ໃຈ​ຂອງປະຊາຊົນຕໍ່​ພັກ ລັດ. ​ເດັດດ່ຽວ​ໜຽວ​ແໜ້ນ​ໃນ​ການ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XI ວ່າ​ດ້ວຍ “ບາງບັນຫາ​ອັນ​ຮີບ​ດ່ວນ​ກ່ຽວ​ກັບ​ການ​ກໍ່ສ້າງ​ພັກ​ໃນ​ປັດຈຸບັນ ​ໂດຍ​ຕິດ​ກັບ​ການ​ຍູ້​ແຮງ​ການ​ຮ່ຳຮຽນ ​ແລະ ປະຕິບັດ​ຕາມ​ແນວ​ຄິດ, ຄຸນສົມບັດ, ​ແບບ​ແຜນ​ຂອງ​ປະທານໂຮ່ຈີ​ມິນ ​ຕາມ​ຄຳ​ສັ່ງ​ສະບັບ​ເລກ​ທີ່ 05-CT/TW, ວັນ​ທີ 15 ພຶດສະພາ 2016, ຂອງ​ກົມ​ການ​ເມືອງ, ກໍ່ສ້າງ​ອົງການ​ຈັດ​ຕັ້ງ​ພັກ, ອົງການ​ລັດ​ໃຫ້​ສະອາດ​ປອ​​ດໃສ ມັ້ນຄົນ​ເຂັ້ມ​ແຂງ.

ຄະນະ​ພັກ, ອຳນາດ​ການ​ປົກ​ຄອງຂັ້ນ​ຕ່າງໆ ຕ້ອງ​ປະຕິບັດ​ບັນດາ​ຮູບ​ການ​​ໂຄສະນາທີ່​ຫຼາກ​ຫຼາຍ, ເປີດກວ້າງແລະຍົກສູງຄຸນນະພາບການອົບຮົມສຶກສາມູນເຊື້ອຮັກຊາດ, ຄວາມຮັບຜິດຊອບຂອງພົນລະເມືອງ, ຄຸນສົມບັດສັງຄົມ, ຈັນຍາບັນອາຊີບ, ກໍ່ສ້າງຄວາມເຫັນດີເຫັນພ້ອມສັງຄົມ ແລະ ເຊີດຊູສະຕິຮັບຜິດຊອບຊຸມຊົນ, ເຈດຈຳນົງອີງໃສ່ຕົນເອງ ສ້າງຄວາມເຂັ້ມແຂງດ້ວຍຕົນເອງ ເພື່ອ​ກໍ່ສ້າງ ​ແລະ ປົກ​ປັກ​ຮັກສາ​ປະ​ເທດ​ຊາດ, ຖື​ວ່າ​ອັນ​ນັ້ນ​ແມ່ນ​ປັດ​ໃຈ​ທີ່​ສຳຄັນ​ ເພື່ອ​ປັບປຸງ ​ແລະ ພັດທະນາ​ກ້ອນ​ກຳລັງມະຫາ​ສາມັກຄີ​ປວງ​ຊົນ​ທັງ​ຊາດ. ​ເບິ່ງ​ແຍງ​ດູ​ແລ​ຜົນ​ປະ​ໂຫຍ​ດ​ແທດ​ຈິງ​ທີ່​ຊອບ​ທຳ ຊອບ​ດ້ວຍ​ກົດໝາຍ​ ຂອງປະຊາຊົນ; ສົມທົບ​ຢ່າງ​ກົມກຽວ​ ລະຫວ່າງ​ຜົນ​ປະ​ໂຫຍ​ດສ່ວນ​ບຸກຄົນ, ຜົນ​ປະ​ໂຫຍ​ດລວມໝູ່ ​ແລະ ຜົນ​ປະ​ໂຫຍ​ດຂອງ​ທົ່ວ​ສັງຄົມ; ລະດົມ​ກຳລັງ​ແຮງ​ຂອງ​ປະຊາຊົນ ​ໄປ​ຄຽງ​ຄູ່​ກັບ​ບຳລຸງ​ກຳລັງ​ໃຫ້​ປະຊາຊົນ; ​ເສີມ​ຂະຫຍາຍ​ປະຊາທິປະ​ໄຕ ຕິດ​ແໜ້ນ​ກັບ​ການ​ຮັກສາ​ລະບຽບ​ວິ​ໄນ ກົດໝາຍ​ບ້ານ​ເມືອງ​ຢ່າງ​ເຂັ້ມ​ງວດ, ຕ້ານ​ພະຍາດ​ອາດຍາ​ສິດ, ການ​ສໍ້​ລາດ​ບັງ​ຫຼວງ, ຄວາມ​ຟຸ່ມ​ເຟືອຍ. ຍູ້​ແຮງ​ການ​ປະຕິ​ຮູບຕຸລາການ, ປະຕິ​ຮູບ​ການ​ບໍລິຫານ, ປ່ຽນ​ແປງ​ໃໝ່​ແບບ​ແຜນ ​ແບບ​ວິທີ​ເຮັດ​ວຽກ, ປົວ​ແປງ​ວິທີ​ທ່າ​ທີ່​ຮັບ​ໃຊ້​ປະຊາຊົນ; ຫັນ​ການ​ເຄື່ອນ​ໄຫວ​ລົງ​ສູ່​ຮາກ​ຖານ, ​ເຂົ້າສູ່​ແຕ່​ລະ​ຄອບຄົວປະຊາຊົນ​ຫຼາຍ​ກວ່າ​ອີກ, ​ເປັນ​ຕົ້ນ​ແມ່ນ​​ໄປສູ່​ເຂດ​ຫ່າງ​ໄກສ​ອກຫຼີກ, ​ເຂດ​ຫຍຸ້ງຍາກ​ພິ​ເສດ, ຂົນຂວາຍ ​ແລະ ຊ່ວຍ​ເຫຼືອປະຊາຊົນລົບ​ລ້າງ​ຄວາມ​ອຶດ​ຫີວ ຫລຸດຜ່ອນ​ຄວາມທຸກ​ຍາກ, ກໍ່ສ້າງ​ຊີວິດ​ຄວາມ​ເປັນ​ຢູ່​ອິ່ມໜຳສຳລານ ສົມບູນ​ພູມ​ສຸກ ຢູ່​ໃນ​ແຕ່​ລະ​ຊຸມ​ຊົນ. ປະຕິບັດ​ກົດລະ​ບຽບປະຊາທິປະ​ໄຕ​ຢູ່​ຮາກ​ຖານ​ໃຫ້​ໄດ້​ເປັນ​ຢ່າງ​ດີ, ສ້າງ​ເງື່ອນ​ໄຂ​ໃຫ້​ປະຊາຊົນ​ເປັນ​ເຈົ້າ​ການ ຕັ້ງໜ້າ​ເຂົ້າ​ຮ່ວມ​​ໃນ​ການ​ກໍ່ສ້າງ ​ແລະ ຕິດຕາມ​ກວດກາການ​ປະຕິບັດ​ນະ​ໂຍບາຍ ​ໂຄງການ ​ແຜນການ​ພັດທະນາ​ເສດຖະກິດ - ສັງຄົມ, ຮັບປະກັນ​ການ​ປ້ອງ​ກັນຊາດ ປ້ອງ​ກັນ​ຄວາມ​ສະຫງົບ​ຢູ່​ທ້ອງ​ຖິ່ນ. ​ເອົາ​ໃຈ​ໃສ່​ເຖິງ​ການສົນທະນາ, ຮັບ​ຟັງ, ​ເກັບ​ກຳ​ແລະ​ສຸມ​ໃສ່​ແກ້​ໄຂ​ຄວາມ​ຫຍຸ້ງຍາກ, ຄວາມ​ຂັດຂ້ອງ ອຸກ​ອັ່ງຂອງ​ປະຊາຊົນ, ຄວາມ​ປາຖະໜາ​ອັນ​ຊອບ​ທຳ​ຂອງປະຊາຊົນ, ​ເປັນ​ຕົ້ນ​ແມ່ນ​ບັນຫາ​ທີ່​ພົວພັນ​ໂດຍ​ກົງ​ເຖິງ​ຊີວິດ​ຄວາມ​ເປັນ​ຢູ່, ວຽກ​ເຮັດ​ງານ​ທຳ, ທີ່​ດິນ, ສິ່ງ​ແວດ​ລ້ອມ...; ຈັດການ​ບັນດາ​ກໍລະນີ​ຫຍໍ້​ທໍ້, ການສໍ້​ລາດ​ບັງ​ຫຼວງ​ຢ່າງ​ເຂັ້ມ​ງວດ; ​ແກ້​ໄຂ​​ກໍລະນີ​ຮ້ອງ​ຟ້ອງ​ເປັນ​ໝູ່​ໃຫ້​ໄດ້​ເປັນ​ຢ່າງ​ດີ, ບໍ່​ໃຫ້​ມັນ​ແກ່ຍາວ, ສັບສົນ​ຂຶ້ນ​ຕື່ມ. ​ເປັນ​ເຈົ້າ​ການ​ຕໍ່ສູ້​ເພື່ອ​ປັດ​ປະຕິ​ເສດ​ບັນດາ​ຖ້ອຍ​ທຳນອງ​ໃສ່​ຮ້າຍ​ປ້າຍ​ສີ, ຍຸຍົງ​ຂອງ​ບັນດາ​ອິດ​ທິກຳລັງ​ປະຕິ​ການ ທີ່​ຫວັງ​ທຳລາຍ​ກອ້ນກຳລັງມະຫາ​ສາມັກຄີ​ປວງ​ຊົນ​ທັງ​ຊາດ, ​ແບ່ງ​ແຍກປະຊາຊົນ ກັບ​ພັກ, ລັດ.

ສືບ​ຕໍ່ ປະຕິບັດບັນດາ​ນະ​ໂຍບາຍ​ພັດທະນາ​ເສດຖະກິດ - ສັງຄົມ​ ຢູ່​ເຂດ​ຊົນ​ເຜົ່າ​ສ່ວນ​ນ້ອຍ ​ແລະ​ເຂດ​ພູຜາ​ໃຫ້​ໄດ້​ເປັນ​ຢ່າງ​ດີ; ກວດຄືນ, ດັດສົມ, ​ເພີ່ມ​ເຕີມ​ ເພື່ອ​ບູລະນະ​ນະ​ໂຍບາຍ​ທີ່​ມີ​ຢູ່ ​ແລະ ຄົ້ນຄວ້າ​ປະກາດ​ໃຊ້​ນະ​ໂຍບາຍ​ໃໝ່ ​ເພື່ອ​ຕອບ​ສະໜອງ​ຄວາມ​ຕ້ອງການ​ພັດທະນາ​ ຢູ່​ບັນດາ​ເຂດ​ຊົນ​ເຜົ່າ​ສ່ວນ​ນ້ອຍ ​ແລະ ໜ້າ​ທີ່​ວຽກ​ງານ​ຊົນ​ຊາດ​ຊົນ​ເຜົ່າ​ໃນ​ໄລຍະ​ໃໝ່. ຮັກສາ ​ແລະ ​ເສີມ​ຂະຫຍາຍ​ມູນ​ເຊື້ອ​ບູຊາ​ບັນພະ​ບຸລຸດ, ​ເຄົາລົບ​ຊົມ​ເຊີຍ ​ແລະ ຕອບ​ແທນ​ບຸນຄຸນ ຂອງ​ຜູ້​ທີ່​ມີ​ຄຸນ​ງາມ​ຄວາມ​ດີ​ຕໍ່​ຊາດ; ​ເຄົາລົບ​ຄວາມ​ເຊື່ອ​ຖື​ທີ່​ເປັນ​ມູນ​ເຊື້ອ​ຂອງປະຊາຊົນຊົນ​ເຜົ່າ​ສ່ວນ​ນ້ອຍ ​ແລະ ຂອງ​ປະຊາຊົນ​ທີ່​ຖື​ສາສະໜາ, ຜ່ານ​ນັ້ນ ​ເພີ່ມ​ທະວີ​ຄວາມ​ເຫັນ​ດີ​ເຫັນ​ພ້ອມ​ລະຫວ່າງ​ຜູ້​ທີ່​ມີ​ຄວາມ​ເຊື່ອ​ຖືສາສະໜາ ​ແລະ ຜູ້​ທີ່​ບໍ່​ເຊື່ອ​ຖື​ສາສະໜາ, ລະຫວ່າງ​ຜູ້​ທີ່​ເຊື່ອ​ຖື​ສາສະໜາ​ທີ່​ຕ່າງ​ກັນ; ພ້ອມນັ້ນ, ຕໍ່ສູ້​ຢ່າງ​ຕັ້ງໜ້າ​ຕ້ານ​ປະກົດ​ການ, ການ​ກະທຳ​ເຊື່ອ​ຖື​ງົມງວາຍ, ສວຍ​ໃຊ້​ສາສະໜາ​ເພື່ອ​ທຳ​ຄວາມ​ເສຍ​ຫາຍ​ໃຫ້​ແກ່​ຜົນ​ປະ​ໂຫຍ​ດຂອງ​ປະ​ເທດ​ຊາດ ​ແລະ ຂອງ​ປະຊາຊົນ.

ຍົກ​ສູງ​ບົດບາດ ທີ່​ຕັ້ງ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາອົງການ​ຈັກ​ຕັ້ງປະຊາຊົນ ​ໃນ​ການ​ປະຕິບັດ​ນະ​ໂຍບາຍ​ມະຫາ​ສາມັກຄີ​ປວງ​ຊົນ​ທັງ​ຊາດ, ວຽກ​ງານ​ຊົນ​ຊາດ​ຊົນ​ເຜົ່າ, ວຽກ​ງານສາສະໜາ. ມີ​ຫຼາຍ​ຮູບ​ການ​ປຸກລະດົມ ​ເຕົ້າ​ໂຮ​ມປະຊາຊົນ​ ໃຫ້​ພ້ອມ​ແຮງ​ພ້ອມ​ໃຈ​ກັນ​ ປະຕິບັດ​ແຜນ​ນະ​ໂຍບາຍ ​ແນວທາງ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ ບັນລຸ​ຜົນສຳ​ເລັດ; ຕັ້ງໜ້າ​ເກັບ​ກຳ, ສ່ອງ​ແສງ​ຢ່າງທັນ​ການກ່ຽວ​ກັບ ​ແນວ​ຄິດ​ຈິດ​ໃຈ, ຄວາມ​ມຸ່ງ​ມາ​ປາຖະໜາ​ ຂອງບັນດາ​ຊັ້ນ​ຄົນ​ປະຊາຊົນ, ປົກ​ປັກ​ຮັກສາ​ສິດ​ແລະຜົນ​ປະ​ໂຫຍ​ດທີ່​ຊອບ​ທຳ ​ຂອງ​ສະມາຊິກ​ແນວ​ໂຮມ; ພ້ອມ​ນັ້ນ​ກໍ​ເຮັດ​ໃຫ້​ໄດ້​ເປັນ​ຢ່າງ​ດີ ບົດບາດ​ຕິດຕາມ​ກວດກາ ຕໍ່​ອົງການ​ລັດ, ຕໍ່​ພະນັກງານ ລັດຖະກອນ, ປະກອບ​ສ່ວນ​ກໍ່ສ້າງ​ອຳ​ນາ​ການ​ປົກຄອງ​ຂັ້ນ​ຕ່າງໆ ​ໃຫ້ສະອາດ​ປອດ​ໃສ ໝັ້ນຄົງ​ເຂັ້ມ​ແຂງ. ຍູ້​ແຮງ​ການ​ປະຕິບັດ​ບັນດາ​ການ​ຂົນຂວາຍ, ຂະ​ບວນການ​ແຂ່ງຂັນຮັກ​ຊາດ, ​ເປັນ​ຕົ້ນ​ແມ່ນ​ການ​ຂົນຂວາຍ “ປວງຊົນສາມັກຄີ​ກັນ​ກໍ່ສ້າງ​ຊົນນະບົດ​ໃໝ່, ຕົວ​ເມືອງ​ສີວິ​ໄລ” ​ໄລຍະ​ປີ 2016 - 2020 ​ໂດຍ​ແມ່ນ​ແນວ​ໂຮມ​ປະ​ເທດ​ຊາດ​ຫວຽດນາມ​ ເປັນ​ຜູ້​ປຸ​ກລະດົມ​ຂົນຂວາຍ. ນັບຖື​ຊົມ​ເຊີຍ​ການ​ປະກອບສ່ວນ​ຂອງ​ປະຊາຊົນ, ຊົມ​ເຊີຍ​ຍ້ອງຍໍ​ຢ່າງ​ທັນ​ການ​ຕໍ່​ແບບຢ່າງ “ວຽກ​ດີ, ຄົນ​ເດັ່ນ” ​ແລະ ທະວີຄູນ​ບັນດາ​ແບບຢ່າງ​ທີ່​ດີ​ເດັ່ນນັ້ນ. ມີ​ນະ​ໂຍບາຍ​ປຸກລະດົມ​ກຳລັງ​ໃຈ, ຝຶກ​ອົບຮົມ, ​ແນະ​ນຳ ​ແລະ ​ເສີມ​ຂະຫຍາຍ​ບົດບາດ ຂອງ​ຜູ້​ທີ່​ມີອິດ​ທິພົນ​ໃນ​ຊົນ​ເຜົ່າ​ສ່ວນ​ນ້ອຍ, ຜູ້ນຳ​ທາງ​ສາສະໜາ ​ໃນ​ການ​ປະຕິບັດ​ນະ​ໂຍບາຍ​ກ່ຽວ​ກັບຊົນ​ເຜົ່າ ສາສະໜາ, ພັດທະນາ​ເສດຖະກິດ ວັດທະນະທຳ ສັງຄົມ, ປົກ​ປັກ​ຮັກສາ​ລະບຽບຄວາມ​ສະຫງົບ​ຢູ່​ໃນ​ພື້ນ​ທີ່. ​ເອົາ​ໃຈ​ໃສ່​ເຖິງ​ວຽກ​ງານ​ການ​ຕ່າງປະ​ເທດປະຊາຊົນ, ຕັ້ງໜ້າ​ຂົນຂວາຍ ​ແລະ ມີ​ນະ​ໂຍບາຍ​ດຶງ​ດູດ​​ຊາວ​ຫວຽດນາມ​ຢູ່​ຕ່າງປະ​ເທດ​ ໃຫ້​ຫັນ​ເມືອ​ສູ່​ປະ​ເທດ​ຊາດ, ປະກອບສ່ວນ​ກໍ່ສ້າງ​ບ້ານ​ເກີດ​ເມືອງ​ນອນ ​ໃຫ້​ຮັ່ງມີ​ເຂັ້ມ​ແຂງ, ຮັກສາ​ເອກະລັກ​ຊາດ, ພາບ​ພົດ​ຂອງ​ຄົນ​ແລະ​ປະ​ເທດ​ຫວຽດນາມ; ຍ້ອງຍໍ​ຊົມ​ເຊີຍ​ຢ່າງ​ທັນ​ການ ຕໍ່​ຜູ້​ທີ່​ມີ​ຜົນງານ​ດີ​ເດັ່ນ, ພ້ອມ​ນັ້ນ​ກໍ​ເປັນ​ເຈົ້າ​ການ​ສົມທົບ​ກັບ​ບັນດາ​ອົງການ​ພາລະ​ບົດບາດທີ່​ກ່ຽວ​ຂອງ​ປະ​ເທດ​ເຈົ້າຂອງ ​ເພື່ອ​ມີ​ມາດ​ຕະການ​ທີ່​ດີ​ເພື່ອ​ປົກ​ປັກ​ຮັກສາ​ສິດ​ແລະ​ຜົນ​ປະ​ໂຫຍ​ດທີ່​ຖືກຕ້ອງ​ຕາມ​ກົດໝາຍ​ ຂອງ​ຊາວ​ຫວຽດນາມ​ຢູ່​ປະ​ເທດ​ນັ້ນ./.

​ໂດຍ ​ເຈິ່ນດ້າຍ​ກວາງ

ກຳມະການ​ກົມ​ການ​ເມືອງ, ປະທານ​ປະ​ເທດ

ປະ​ເທດ​ສາທາລະນະ​ລັດ ສັງຄົມ​ນິຍົມ ຫວຽດນາມ

--------------------------

(1) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູງ​ກາງ​ພັກ, ຮ່າ​ໂນ້ຍ, 2016, ໜ້າ 158 - 159.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ