ວັນພຸດ, 29/3/2017
ເສີມຂະຫຍາຍຄວາມຮັບຜິດຊອບ, ການຄົ້ນຄວ້າ ແລະ ສົນທະນາ ເພື່ອບູລະນະເນື້ອໃນຂອງບັນດາລາຍງານ, ແຜນຮ່າງ, ຮ່າງມະຕິ, ຂໍ້ສະຫລຸບຂອງສູນກາງພັກ*
17/1/2017 21:15' ສົ່ງ ພິມ
ສະຫາຍ ຫງວຽນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ (ພາບ: TTXVN)

ເພື່ອ​ປະຕິບັດ​ໂຄງການ​ດຳ​ເນີນ​ງານ​ລວມທັງ​ສະ​ໄໝ, ຄະນະ​ບໍລິຫານ​ງານ​ສູນ​ກາງ​ພັກ​ດຳ​ເນີນ​ກອງ​ປະຊຸມ​ຄັ້ງ​ທີສີ່ ​ແນ​ໃສ່ປຶກສາພິຈາລະນາ​ແລະ​ໃຫ້​ຄວາມ​ຄິດ​ເຫັນ​ກ່ຽວ​ກັບ: ສະພາບ​ການ​ເສດຖະກີດ - ສັງຄົມປີ 2016, ຮ່າງ​ແຜນການ​ພັດທະນາເສດຖະກີດ - ສັງຄົມປີ 2017; ວາງ​ແຜນ​ນະ​ໂຍບາຍ, ນະ​ໂຍບາຍ​ທີ່ສຳຄັນ​ຈຳນວນ​ໜຶ່ງ​ ເພື່ອ​ປ່ຽນ​ແປງ​ໃໝ່​ຕົວ​ແບບ​ເຕີບ​ໂຕ, ຍົກ​ສູງ​ຄຸນ​ນະພາ​ບຂອງ​ການ​ເຕີບ​ໂຕ, ສະມັດ​ຕະພາບ​ຂອງ​ງານ ​ແລະ ຄວາມ​ສາມາດ​ແຂ່ງຂັນ​ ຂອງ​ພື້ນຖານ​ເສດຖະກິດ; ປະຕິບັດ​ການ​ເຊື່ອມ​ໂຍງ​ເສດຖະກິດ​ສາກົນ​ຢ່າງ​ມີ​ປະສິດທິ​ຜົນ, ຮັກສາ​ສະຖຽນ​ລະ​ພາບ​ທາງ​ການ​ເມືອງ - ສັງຄົມ ​ໃນ​ສະພາບ​ທີ່​ຫວຽດນາມ​ເຂົ້າ​ຮ່ວມ​ໃນ​ບັນດາ​ສັນຍາ​ການ​ຄ້າ​ເສລີຮຸ່ນ​ໃໝ່; ​ເພີ່ມ​ທະວີ​ການກໍ່ສ້າງ, ປັບປຸງ​ພັກ, ກີດ​ກັ້ນ​ແລະ​ຍູ້​ຖອຍ​ຄວາມ​ເຊື່ອມ​ໂຊມ​ທາງ​ດ້ານ​ແນວ​ຄິດການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ, ບັນດາ​ປະກົດ​ການ “ຫັນປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ ​ແລະ ບັນຫາສຳຄັນອື່ນ​ອີກ​ຈຳນວນ​ໜຶ່ງ. 

​ໂດຍ​ຕາງໜ້າ​ກົມ​ການ​ເມືອງ, ຄະນະ​ເລຂາທິການ, ຂ້າພະ​ເຈົ້າ​ຂໍ​ສະ​ແດງ​ຄວາມຊົມ​ເຊີຍ​ຢ່າງ​ສຸດ​ໃຈ​ຕໍ່​ບັນດາ​ສະຫາຍ​ກຳມະການ​ຄະນະ​ບໍລິຫານ​ງານສູນ​ກາງ, ບັນດາ​ຜູ້​ແທນ​ແຂກ​ທີ່​ຖືກ​ເຊີນ ທີ່​ໄດ້​ມາ​ຮ່ວມ​ກອງ​ປະຊຸມ ​ແລະ ຂໍ​ຝາກ​ຄຳ​ອວຍພອນ​ໄຊ​ອັນ​ປະ​ເສີດ ມາ​ຍັງ​ບັນດາ​ສະຫາຍ​ທຸກ​ຄົນ. ​ໃນ​ເວລາ​ທີ່​ຜ່ານ​ມາ, ກົມ​ການ​ເມືອງ​ໄດ້​ຊີ້​ນຳຄະນະ​ກຳມະການ​ພັກ​ລັດຖະບານ ​ແລະ ບັນດາ​ຄະນະ​ພັກ ​ໃຫ້​ຕັ້ງໜ້າ​ກະກຽມລາຍ​ງານ​ແລະ​ແຜນ​ຮ່າງ​ຕ່າງໆ. ຕາມ​ລະບຽບ​ການ​ເຮັດ​ວຽກ, ຫ້ອງການ​ສູນ​ກາງ​ພັກ​ໄດ້ສົ່ງ​ເອກະສານ​ໄປ​ຍັງ​ບັນດາ​ສະຫາຍ ​ເພື່ອ​ໃຫ້​ບັນດາ​ສະຫາຍ​ຄົ້ນ​ຄວ້າ​ກ່ອນ. ຕໍ່​ໄປ​ນີ້, ຂ້າພະ​ເຈົ້າຂໍ​ເນັ້ນ​ຢ້ຳຕື່ມ​ອີກ​ບາງ​ປະການ​ທີ່​ກ່ຽວ​ພັນ​ກັບ​ບັນດາ​ເນື້ອ​ໃນ ​ແລະ ໜ້າ​ທີ່​ຂອງ​ກອງ​ປະຊຸມ, ທີ່​ມີ​ລັກສະນະ​ແນະນຳ ຍົກ​ບັນຫາ, ຫວັງ​ວ່າ​ບັດາ​ສະຫາຍ​ຈະ​ເອົາ​ໃຈ​ໃສ່​ໃນ​ເວລາປຶກສາສົນທະນາ, ພິຈາລະນາ ​ແລະ​ຕັດສິນ​ລົງມະຕິ.

ກ່ຽວ​ກັບສະພາບ​ການ​ເສດຖະກີດ - ສັງຄົມປີ 2016, ຮ່າງ​ແຜນການ​ພັດທະນາເສດຖະກີດ - ສັງຄົມປີ 2017

ປີ 2016 ​ແມ່ນ​ປີ​ທຳ​ອິດ​ທີ່​ຜັນ​ຂະຫຍາຍ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ຄຽງ​ຂ້າງ​ກັບ​ໂອກາດ ​ແລະຄວາມ​ສະດວກ ກໍ່​ມີ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ບໍ່​ໜ້ອຍ. ຜົນສຳ​ເລັດ​ຂອງ​ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ສ້າງ​​ເປັນ​ແຮງ​ກະ​ຕູ້ນ ​ແລະ​ບັນຍາກາດ​ໃໝ່​ ໃຫ້​ແກ່​ພາລະກິດ​ການ​ປ່ຽນ​ແປງ​ໃໝ່, ກໍ່ສ້າງ ​ແລະ ປົກ​ປັກ​ຮັກສາ​ປະ​ເທດ​ຊາດ. ພາຍຫຼັງ​ກອງ​ປະຊຸມ​​ໃຫຍ່​ຄັ້ງ​ທີ XII ຂອງ​ພັກ, ສູນ​ກາງ​ໄດ້​ນຳພາ​ການ​ເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດ​ຊຸດ​ທີ XIV ​ແລະ​ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ​ ສະ​ໄໝ 2016 - 2021 ຢ່າງ​ສຳ​ເລັດ​ຜົນ; ປັບປຸງ​ບູລະນະ​ຢ່າງ​ໄວ​ບັນດາ​ອົງການ​ນຳພາ​ຂອງ​ພັກ​ແລະ​ລັດ; ຮີບ​ເຮັ່ງກໍ່ສ້າງ ​ແລະ ຕັ້ງໜ້າ​ຈັດ​ຕັ້ງປະຕິ​ບັດ​ແຜນການ​ພັດທະນາ​ເສດຖະກິດ - ສັງຄົມ​ປີ 2016 ​ແລະ 5 ປີ 2016 - 2020. ລະບົບ​ການ​ເມືອງ​ທັງ​ໝົດ​ໄດ້​ຕັ້ງໜ້າ​ສືບ​ທອດ ​ແລະ​ເສີມ​ຂະຫຍາຍ​ບັນດາ​ຜົນງານ ຄວາມສຳ​ເລັດທີ່​ຍາດ​ມາ​ໄດ້, ​ແກ້​ໄຂ​ຜ່ານ​ຜ່າ​ຈຸດ​ອ່ອນ, ຂໍ້​ຈຳກັດ​ຄົງ​ຄ້າງ ​ແລະ ມີ​ສະຕິ​ສ່ອງ​ໃສທຸ່ນ​ທ່ຽງ​ໃນ​ການ​ແກ້​ໄຂ​ຢ່າງ​ຖືກຕ້ອງ​ ທັນ​ການກ່ຽວ​ກັບບັນດາ​ບັນຫາ​ໃໝ່ ທີ່​ເກີດ​ຂຶ້ນຍ້ອນ​ການ​ກະທົບທາງ​ລົບ​ຂອງ​ສະພາບ​ການທີ່​ບໍ່​ສະດວກ​ເຊັ່ນ ​ເສດຖະກິດ​ໂລກຟື້ນ​ຕົວ​ຄືນ​ໃໝ່​ຢ່າງ​ຊັກ​ຊ້າ ​ແລະອາດ​ຈະ​ມີ​ເຫດ​ບັງ​ເອີນ​ທີ່​ຄາດ​ເດົາ​ຍາກ; ລາຄານ້ຳມັນ​ດິດຕົກ​ຕ່ຳ, ​ແລະ​ຢູ່​ໃນ​ລະດັບ​ຕ່ຳ​ກວ່າ​ຕັ້ງ​ຫຼາຍ​ທຽບ​ກັບ​ຄາດໝາຍ​ແຜນການ ​ເຊິ່ງ​ເປັນ​ຜົນ​ສະທ້ອນ​ເຖິງ​ແຫຼ່ງລາຍ​ຮັບ​ງົບປະມານ​ແຫ່ງ​ລັດ ​ແລະ ການ​ຂະຫຍາຍຕົວ​ຂອງ​ຂະ​ແໜງອຸດສາຫະກຳ​ນ້ຳມັນ​ອາຍ​​ແກັສ. ສະພາບ​ແຫ້ງ​ແລ້ງ​ທີ່​ແກ່ຍາວ​ຢູ່​ບັນດາ​ແຂ​ວງຕອນ​ໃຕ້​ພາກ​ກາງ ​ແລະ ​ໄຕ​ງວຽນ; ​ໄພ​ແຫ້ງ​ແລ້ງ, ນ້ຳ​ເຄັມ​ຄຸກ​ຄາມ​ຢູ່​​ເຂດທົ່ງພຽງ​ແມ່​ນ້ຳຂອງ; ຄວາມ​ໜາວ​ຮ້າຍ​ແຮງ, ພາຍຸ​ນ້ຳ​ຖ້ວມ​ຢູ່​ບາງ​ແຂວງ​ພາກ​ເໜືອ ​ແລະ ອຸບັດ​ເຫດ​ສິ່ງ​ແວດ​ລ້ອມ​ທີ່​ຮ້າຍ​ແຮງ​ຢູ່​ບັນດາ​ແຂວງ​ພາກ​ກາງ ​ໄດ້​ເປັນ​ຜົນ​ກະທົບ​ທີ່​ໜັກໜ່ວງ ​ເຖິງ​ການ​ພັດທະນາ​ກະສິກຳ ​ແລະ ຊີວິດ​ຂອງ​ຊາວ​ກະສິກອນ. 

ສະ​ເໜີ​ໃຫ້​ບັນດາ​ສະຫາຍຈົ່ງ​ຕິດຕາມ​ໃກ້ຊິດ​ກັບ​ລາຍ​ງານ, ​ໃບ​ສະ​ເໜີ​ຂອງ​ກົມ​ການ​ເມືອງ ​ແລະ ສະຖານະ​ການ​ຕົວ​ຈິງ​ຢູ່​ບັນດາ​ຂະ​ແໜງ​ການ, ຂົງ​ເຂດ ​ແລະ ທ້ອງ​ຖິ່ນ ​ເພື່ອ​ສົນ​ທະນາ, ປະ​ເມີນ​ຜົນ​ຢ່າງ​ພາວະ​ວິ​ໄສ, ຮອບດ້ານ ກ່ຽວ​ກັບ​ການ​ພັດທະນາ​ເສດຖະກິດ - ສັງຄົມ​ໃນ 9 ​ເດືອນ​ຕົ້ນ​ປີ, ຄາດ​ຄະ​ເນ​ຜົນ​ການ​ປະຕິບັດ​ຈົນ​ຮອດ​ທ້າຍ​ປີ 2016. ລະບຸ​ຜົນ, ຄວາມ​ສຳ​ເລັດ​ທີ່​ບັນລຸ​ໄດ້, ບັນດາ​ຈຸດ​ອ່ອນ ຂໍ້​ຈຳກັດ​ທີ່​ຍັງ​ຄົງ​ຄ້າງ ​ແລະ ວິ​ເຄາະ​ໄຈ້​ແຍກ​ເພື່ອ​ຊີ້​ແຈງ​ສາ​ເຫດ. ​ເອົາ​ໃຈ​ໃສ່ສົມ​ທຽບ​ກັບບັນດາ​ເປົ້າ​ໝາຍ, ໜ້າ​ທີ່​ທີ່​ໄດ້​ວາງ​ອອກ​ມາ, ​ໂດຍ​ສະ​ເພາະ​ແມ່ນ​ເປົ້າ​ໝາຍ, ໜ້າ​ທີ່​ຮັກສາ​ສະຖຽນ​ລະ​ພາບ​ຂອງ​ເສດຖະກິດ​ມະຫາ​ພາກ ​ແລະ ຄວາມ​ເຕີບ​ໂຕ​ໃນ​ລະດັບ​ປະມານ 6,7%; ພັດທະນາວັດທະນະທຳ - ສັງຄົມ, ​ເບິ່ງ​ແຍງ​ດູ​​ແລ​ຊີວິດ​ຄວາມ​ເປັນ​ຢູ່​ຂອງ​ປະຊາຊົນ, ຮັບປະກັນ​ສະ​ວັດ​ດີກາ​ນສັງຄົມ; ປົກ​ປັກ​ຮັກສາ​ເອກະລາດ, ອຳນາດ​ອະທິປະ​ໄຕ​ຂອງ​ຊາດ, ຄວາມ​ສະຫງົບ​ດ້ານ​ການ​ເມືອງ, ຄວາມ​ເປັນ​ລະບຽບ​ຮຽບຮ້ອຍ ​ແລະ ຄວາມ​ປອດ​ໄພທາງ​ສັງຄົມ, ຮັກສາ​ສິ່ງ​ແວດ​ລ້ອມ​ສັນຕິພາບ ​ແລະ ສະຖຽນ​ລະ​ພາບ​ ເພື່ອ​ພັດທະນາ​ປະ​ເທດ​ຊາດ. 

ບົນ​ພື້ນຖານ​ວິ​ເຄາະ​ໄຈ້​ແຍກ, ຄາດ​ຄະ​ເນ​ສະພາບ​ການ​ທີ່​ອາດ​ຈະ​ເກີດ​ຂຶ້ນ​ໃນ​ເວລາ​ຕໍ່ໜ້າ, ກຳ​ໂອກາດ, ຄວາມ​ສະດວກ​ແລະ​ຫຍຸ້ງຍາກ ສິ່ງ​ທ້າ​ທາຍ, ກຳນົດ​ແຈ້ງ​ເປົ້າ​ໝາຍ​ສັງ​ລວມ, ບັນດາ​ເລກ​ຄາດໝາຍ​ພື້ນຖານ ທີ່​ສຳຄັນ​ທີ່​ສຸດ​ຂອງ​ປີ 2017 ​ແລະ ວາງ​ບັນດາ​​ແຜນ​ນະ​ໂຍບາຍ, ນະ​ໂຍບາຍ, ມາດ​ຕະການ​ທີ່​ມີຄວາມ​ສາມ​າດ​ເປັນ​ໄປ​ໄດ້​ສູງ. ພິ​ເສດ ​ເອົາ​ໃຈ​ໃສ່​ເປັນ​ສຳຄັນ​ເຖິງ​ບັນດາ​ນະ​ໂຍບາຍ, ມາດ​ຕະການ​ບຸກທະລຸ ​ເພື່ອ​ຄຸ້ມ​ຄອງ​ໜີ້​ສິນ​ສາທາລະນະ, ​ແກ້​ໄຂ​ໜີ້​ສິນ​ທີ່​ບໍ່​ດີ, ຈັດ​ວາງ​ຄືນ​ໃໝ່​ໂຄງ​ປະກອບ​ງົບປະມານ​ແຫ່ງ​ລັດ, ຍູ້​ແຮງ​ການຈັດ​ວາງ​ຄືນ​ໃໝ່​ຕໍ່​ການ​ລົງທຶນ​ສາທາລະນະ, ບັນດາ​ວິ​ສາ​ຫະກິດ​ແຫ່ງ​ລັດ, ບັນດາຫົວໜ່ວຍ​ພາລະກິດ​ສາທາລະນະ ​ແລະ ລະບົບ​ບັນດາ​ທະນາຄານການ​ຄ້າ, ປົວ​ແປງ​ສິ່ງ​ແວດ​ລ້ອມ​ແຫ່ງ​ການ​ລົງທຶນທຸລະ​ກິດ ​ເພື່ອ​ລະດົມແລະນຳ​ໃຊ້ບັນດາ​ແຫຼ່ງພະລັງ​ໃຫ້​ມີ​ປະສິດທິ​ຜົນ​ກວ່າ​ເກົ່າ, ຮັບປະກັນບັນດາ​ການ​ດຸນ​ດ່ຽງ​ທີ່​ສຳຄັນ​ຂອງ​ພື້ນຖານ​ເສດຖະກິດ. 

ກ່ຽວ​ກັບ​ການ​ປ່ຽນ​ແປງ​ໃໝ່​ຕົວ​ແບບ​​ເຕີບ​ໂຕ, ຍົກ​ສູງ​ຄຸນ​ນະພາ​ບການ​ເຕີບ​ໂຕ, ສະມັດ​ຕະພາບ​ແຮງ​ງານ ​ແລະ ຄວາມ​ສາມາດ​ແຂ່ງຂັນ​ຂອງ​ພື້ນຖານ​ເສດຖະກິດ

ນີ້​ແມ່ນ​ບັນຫາ​ທີ່​ມີຄວາມ​ໝາຍ​ຍຸດ​ທະ​ສາດ ​ແລະ ຄວາມ​ສຳຄັນ​ພິ​ເສດ, ຕັດສິນ​ຄວາມ​ສຳ​ເລັດ​ຂອງ​ພາລະ​ກິດ​ການ​ປ່ຽນ​ແປງ​ໃໝ່. ​ເລີ່​ມຈາກ​ສະພາບ​ຄວາມ​ເປັນ​ຈິງ​ໃນ 5 ປີ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ່ XI ຂອງ​ພັກ​ໃນ​ສະພາບ​ການ​ທີ່ການເຊື່ອມ​ໂຍງ​ສາກົນ​ນັບ​ມື້​ນັບ​ກວ້າງ​ຂວາງເລິກ​ເຊິ່ງ, ການປະຕິວັດ​ອຸດສາຫະກຳ​ຄັ້ງ​ທີ​ສີ່​ເກີດ​ຂຶ້ນ​ຢ່າງ​ໄວວາ, ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ປັບປຸງ ເພີ່ມ​ເຕີມນະ​​ໂຍບາຍ​ທີ່ສຳຄັນນີ້ ​ແລະ ກຳນົດ​ຄວາມ​ຮຽກ​ຮ້ອງຕ້ອງການ​ທີ່​ຕ້ອງ​ສືບ​ຕໍ່​ຍູ້​ແຮງການ​ປະຕິບັດ​ໜ້າ​ທີ່​ປ່ຽນ​ແປງ​ໃໝ່​ຕົວ​ແບບ​ເຕີບ​ໂຕ, ຍົກ​ສູງ​ຄຸນ​ນະພາ​ບການ​ເຕີບ​ໂຕ, ສະມັດ​ຕະພາບ​ຂອງ​ງານ ​ແລະ ຄວາມ​ສາມາດ​ແຂ່ງຂັນ​ຂອງ​ພື້ນຖານ​ເສດຖະກິດ. 

​ໃບ​ສະ​ເໜີ ​ແລະ ​ແຜນ​ຮ່າງ​ທີ່​ນຳ​ສະ​ເໜີ​ຕໍ່​ກອງ​ປະຊຸມ​ສູນ​ການ​ຄັ້ງ​ນີ້ ​ໄດ້​ຕີ​ລາຄາ​ໂດຍ​ລວມກ່ຽວ​ກັບ​ສະພາບ​ການ​ປ່ຽນ​ແປງ​ໃໝ່ຕົວ​ແບບ​ເຕີບ​ໂຕ ຕິດ​ກັບ​ການຈັດ​ວາງ​ຄືນ​ໃໝ່ພື້ນຖານ​ເສດຖະກິດ​ຫວຽດນາມ​ໃນ​ຊຸມ​ປີ​ທີ່​ຜ່ານ​ມາ, ຊີ້​ໃຫ້​ເຫັນ 7 ຜົນສຳ​ເລັດ, 6 ຂໍ້​ຈຳກັດ ຈຸດ​ອ່ອນ, 3 ສາ​ເຫດ​ຕົ້ນຕໍ ​ແລະ 5 ບົດຮຽນ​ປະສົບ​ການ; ຈາກ​ນັ້ນ​ ໄດ້ນຳສະ​ເໜີ​ບັນດາ​ທັດສະນະ ​ແລະ ​ທິດ​ທາງ​ແຜນ​ນະ​ໂຍບາຍ ນະ​ໂຍບາຍ​ທີ່​ສຳຄັນ​ຈຳນວນ​ໜຶ່ງ ​ເພື່ອ​ສືບ​ຕໍ່​ປ່ຽນ​ແປງ​ໃໝ່​ຕົວ​ແບບ​ເຕີບ​ໂຕ​ໃນ​ເວລາ​ຕໍ່​ໄປ. ສະ​ເໜີ​ໃຫ້​ບັນດາ​ສະຫາຍ​ຄົ້ນ​ຄວ້າ, ປຶກສາ​ພິຈາລະນາ​ຢ່າງ​ລະອຽດ, ປະກອບ​ຄວາມ​ຄິດ​ເຫັນ​ທີ່​ເໝາະ​ສົມ​ກ່ຽວ​ກັບ​ແຕ່​ລະ​ບັນຫາ, ​ເອົາ​ໃຈ​ໃສ່​ເຖິງ​ບັນດາ​ບັນຫາສຳຄັນ, ບັນຫາ​ໃໝ່ ແລະຍາກ, ​ໂດຍ​ສະ​ເພາະ​ແມ່ນ ​ຂໍ້ສະ​ເໜີປ່ຽນ​ແປງ​ໃໝ່​ທີ່​ສຳຄັນ, ສຳພັດ​ໄວ​ ຄື​ທີ່​ໄດ້​ລະບຸ​ໄວ້​ໃນ​ໃບສະ​ເໜີ​ຂອງ​ກົມ​ການ​ເມືອງ. 

ກ່ຽວ​ກັບ​ການ​ຕີ​ລາຄາ​ສະພາບ​ການ, ຕ້ອງ​ລົງ​ເລິກ​ຄົ້ນຄວ້າ​ບັນດາ​ສາ​ເຫດ​ທີ່​ພາ​​ໃຫ້​ເກີດ​ຄວາມ​ຈຳກັດ ຈຸດ​ອ່ອນ, ​ໂດຍ​ສະ​ເພາະ​ແມ່ນ​ສາ​ເຫດ​ອັດຕະວິ​ໄສ. ມັນ​​ແມ່ນ​ຍ້ອນສາ​ເຫດ​ຕໍ່​​ໄປນີ້​ຫຼືບໍ່: ຮັບ​ຮູ້​ຍັງ​ບໍ່ທັນ​ຖືກຕ້ອງ​ແລະ​ເປັນ​ເອກະ​ພາບ ​ກ່ຽວ​ກັບ​ຕົວ​ແບບ​ການ​ເຕີບ​ໂຕ​ໃໝ່ ​ເຊິ່ງມີ​ຄົບ​ບັນດາ​ປັດ​ໄຈ​ທີ່​ປະກອບ​ເປັນ​ກຳລັງ​ໜູນ, ​ແຫຼ່ງພະລັງ ​ແລະ ​ແບບ​ວິທີ​ສ້າງ​ເປັນ​ການ​ເຕີບ​ໂຕ, ຊ້ຳ​ຍັງ​ມີ​ຄວາມ​ຮັບ​ຮູ້​ແບບ​ງ່າຍດາຍ, ຖື​ເປັນອັນ​ໜຶ່ງ​ອັນ​ດຽວ​ລະຫວ່າງຕົວ​ແບບ​ເຕີບ​ໂຕ ກັບ​ຕົວ​ແບບ​ພັດທະນາ. ການ​ປ່ຽນ​ແປງ​ໃໝ່, ປັບປຸງ​ບູລະນະ​ລະບຽບ​ກົດໝາຍ​ເສດຖະກິດ​ຕະຫຼາດ​ກຳ​ນົດທິດ​ສັງຄົມ​ນິຍົມ ຍັງ​ຊັກ​ຊ້າ, ຍັງ​ບໍ່​ທັນ​ມີ​ບາດກ້າວ​ບຸກທະລຸ​ໃນ​ການ​ລະດົມ, ຈັດ​ແບ່ງ ​ແລະ ນຳ​ໃຊ້ບັນດາ​ແຫຼ່ງພະລັງ​ການ​ພັດທະນາ​ຢ່າງ​ມີ​ປະສິດທິ​ຜົນ ຕາມ​ສັນຍານ​ແລະ​ກົນ​ໄກ​ຕະຫຼາດ. ຮັບ​ຮູ້​ຍັງ​ບໍ່​ທັນ​ຄົບ​ຖ້ວນ, ຈັດ​ຕັ້ງ​ປະຕິບັດ​ຍັງ​ບໍ່​ທັນ​ດີ​ ກ່ຽວ​ກັບ​ສາມ​ການ​ບຸກທະລຸ​ຍຸດ​ທະ​ສາດ, ກ່ຽວ​ກັບ​ການຈັດ​ວາງ​ຄືນ​ໃໝ່​ໂຄງ​ປະກອບ​ເສດຖະກິດ, ກ່ອນ​ອື່ນ​ໝົດ​ແມ່ນ​ສາມ​ຂົງ​ເຂດ​ຈຸດ​ໜັກ​ບຸລິມະສິດ ທີ່​ກອງ​ປະຊຸມ​ໃຫຍ່​ຄັ້ງ​ທີ XI ​ໄດ້​ວາງ​ອອກ​ມາ. ຍັງ​ບໍ່​ທັນ​ສ້າງ​ໃຫ້​ມີ​ການ​ຜັນ​ປ່ຽນ​ຢ່າງ​ຈະ​ແຈ້ງ ​ໃນ​ການ​ປະຕິ​ຮູບ​ການ​ສຶກສາ - ກໍ່ສ້າງ, ພັດທະນາ​ແຫຼ່ງບຸກຄະລາ​ກອນ​ຄຸນ​ນະພາ​ບສູງ, ພັດທະນາ​ວິທະຍາສາດ - ​ເຕັກ​ໂນ​ໂລ​ຊີ, ຊຸກຍູ້​ການ​ປ່ຽນ​ແປງ​ໃໝ່​ປະດິດ​ສ້າງ, ຄົ້ນຄວ້າ​ແລະ​ປະ​ຢຸກ​ໃຊ້​ວິທະຍາສາດ - ​ເຕັກ​​ໂນ​ໂລ​ຊີ, ​ໂດຍ​ສະ​ເພາະ​ແມ່ນ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສາມ, ​ເຕັກ​ໂນ​ໂລ​ຊີ​ເຊື່ອມ​ຕໍ່​ເຄືອ​ຂ່າຍ​ອິນ​ເຕີ​ເນັດ. ບໍ່ມີ​ການຈັດ​ຕັ້ງ​ປະຕິບັດ​ງານ​ທີ່​ດີ​ ໃນ​ການ​ເສີມ​ຂະຫຍາຍ​ກາລະ​ໂອກາດ ​ເງື່ອນ​ໄຂ​ອັນ​ສະດວກ, ​ໃນ​ການ​ຜ່ານ​ຜ່າ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ແຫ່ງ​ການ​ເຊື່ອມ​ໂຍງ​ສາກົນ​ ທີ່​ມີ​ຕໍ່​ເສດຖະກິດ​ເວົ້າ​ລວມ ​ແລະ ການ​ປ່ຽນ​ແປງ​ໃໝ່​ຕົວ​ແບບ​ເຕີບ​ໂຕ, ຍົກ​ສູງ​ຄຸນ​ນະພາ​ບການ​ເຕີບ​ໂຕ, ສະມັດ​ຕະພາບ​ແຮງ​ງານ ​ແລະ ຄວາມ​ສາມາດ​ແຂ່ງຂັນ​ຂອງ​ພື້ນຖານ​ເສດຖະກິດ​ເວົ້າ​ໂດຍ​ສະ​ເພາະ...

ກ່ຽວ​ກັບ​ທັດສະນະ, ກຳນົດ​ທິດ​ແຜນ​ນະ​ໂຍບາຍ, ນະ​ໂຍບາຍ​ທີ່​ສຳຄັນ, ສະ​ເໜີ​ໃຫ້​ບັນດາ​ສະຫາຍ​ຈົ່ງ​ກຳ​ແໜ້ນ​ມະຕິ ​ແລະ ບັນດາ​ເອກະສານ​ຂອງ​ກອງ​ປະຊຸມ​ໃຫຍ່​ຄັ້ງ​ທີ XII ​ເພື່ອປຶ​ກສາ​ສົນທະນາ, ຫັນ​ເປັນ​ລະອຽດ, ​ພັດທະນາເພີ່ມ​ເຕີມ ​ແນ​ໃສ່​ປະຕິບັດ​ມະຕິ​ກອງ​ປະ​ຊຸມ​ໃຫຍ່​ໃຫ້​ໄດ້​ເປັນ​ຢ່າງ​ດີ. ກຳນົດ​ແຈ້ງ​ຕົວ​ແບບ​ເຕີບ​ໂຕ​ທີ່​ຈະ​ຕ້ອງ​ສູ້​ຊົນ​ກໍ່ສ້າງ​ ​ເຊິ່ງມີ​ການ​ປ່ຽນ​ແປງ​ໃໝ່​ຕ່າງໆ​ທຽບ​ກັບ​ຕົວ​ແບບ​ເຕີບ​ໂຕ​ປະຈຸ​ບັນ; ​ແຜນການ, ຂັ້ນ​ຕອນ​ໃນ 5 - 10 ປີ​ຕໍ່ໜ້າ, ວິ​ໄສ​ທັດ​ຮອດ​ປີ 2030; ບັນດາ​ແຜນ​ນະ​ໂຍບາຍ, ນະ​ໂຍບາຍ, ມາດ​ຕະການ ​ເສີມ​ຂະຫຍາຍ​ບົດບາດ​ຂອງ​ວິທະຍາສາດ - ​ເຕັກ​ໂນ​ໂລ​ຊີ, ການ​ປັບ​ໂຄງ​ສ້າງ ​ແລະ ຍົກ​ສູງຄຸນ​ນະພາບແຮງ​ງານ, ລະດັບ​ຈັດ​ຕັ້ງ​ການ​ຜະລິດ ທຸລະ​ກິດ, ລະດົມ​ແລະ​ນຳ​ໃຊ້​ແຫຼ່ງພະລັງ​ສັງຄົມ​ຢ່າງ​ມີ​ປະສິດທິ​ຜົນ, ພິ​ເສດ​ແມ່ນ​ແຫຼ່ງພະລັງ​ຂອງ​ຂົງ​ເຂດ​ເສດຖະກິດ​ເອກະ​ຊົນ; ​ແຜນ​ນະ​ໂຍບາຍ​ກ່ຽວ​ກັບ​ການສະ​ສົມ, ​ເຕົ້າ​ໂຮມສິດ​ນຳ​ໃຊ້​ທີ່​ດິນ​ກະສິກຳ; ນະ​ໂຍບາຍ, ມາດ​ຕະການ​ແກ້​ໄຂ​ໂດຍ​ພື້ນຖານ ​ບັນຫາ​ໜີ້​ສິນ​ເສຍ ​ແລະ​ບັນດາ​ທະນາຄານ​ການ​ຄ້າທີ່​ອ່ອນ​ແອ… 

ກ່ຽວ​ກັບ​ການ​ປະຕິບັດ​ເປັນ​ຢ່າງ​ດີ ວິວັດ​ການ​ເຊື່ອມ​ໂຍງ​ເສດຖະກິດ​ສາກົນ, ຮັກສາ​ສະຖຽນ​ລະ​ພາບ​ທາງ​ການ​ເມືອງ - ສັງຄົມ​ໃນສະພາບ​ການ​ໃໝ່ 

ກ່ອນ​ໜ້າ​ນີ້​ເກືອບ 10 ປີ, ເພື່ອ​ຊີ້​ນຳນຳພາ​ຢ່າງ​ທັນ​ການຕໍ່​ການ​ເຊື່ອມ​ໂຍງ​ເສດຖະກິດ​ສາກົນ​ໃນ​ເວລາ​ປະ​ເທດ​ເຮົາ​ເຂົ້າຮ່ວມອົງການ​ການ​ຄ້າ​ໂລກ, ວັນ​ທີ 5 ກຸ​ມພາ 2007, ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ X ​ໄດ້​ປະກາດ​ໃຊ້​ມະຕິ​ສະບັບ​ເລກ​ທີ 08-NQ/TW “ກ່ຽວ​ກັບ​ແຜນ​ນະ​ໂຍບາຍ, ນະ​ໂຍບາຍ​ທີ່​ສຳຄັນ​ຈຳນວນ​ໜຶ່ງ ​ເພື່ອ​ໃຫ້​ພື້ນຖານ​ເສດຖະກິດ​ພັດທະນາ​ຢ່າງ​ໄວ ​ແລະ​ຍືນ​ຍົງ ​ໃນ​ເມື່ອຫວຽດນາມ​ເປັນ​ສະມາຊິກ​ຂອງ​ອົງການ​ການ​ຄ້າ​ໂລກ”

ນັບ​ແຕ່​ເວລາ​ນັ້ນ​ມາ​ຮອດ​ປະຈຸ​ບັນ, ​ໂດຍ​ສະ​ເພາະ​​ໃນ​ຊຸມ​ປີ​ມໍ່​ໆນີ້, ການ​ເຊື່ອມ​ໂຍງ​ເສດຖະກິດ​ສາກົນ​ຂອງ​ຫວຽດນາມ​ໄດ້​ມີ​ບາດກ້າວ​ຂະຫຍາຍຕົວ​ໃໝ່​ ທັງ​ລວງ​ກວ້າງ​ແລະ​ລວງ​ເລິກ ​ໂດຍ​ຜ່ານການ​ເຊັນ​ແລະ​ປະຕິບັດ​ສັນຍາ​ການ​ຄ້າ​ເສລີຮຸ່ນ​ໃໝ່, ກວມ​ດ້ວຍ​ບັນດາ​ຂໍ້​ຕົກລົງ​ກ່ຽວ​ກັບ​ການ​ເປີດ​ເສລີ​ພາບທາງ​ດ້ານ​ການ​ຄ້າ​ແລະ​ການ​ລົງທຶນ ​ແລະ​ກວມ​ທັງ​ບັນດາ​ຂໍ້​ຕົກລົງ​ກ່ຽວ​ກັບ​ແຮງ​ງານ, ກຳມະບານ, ຊັບ​ສິນ​ທາງ​ປັນຍາ, ວິ​ສາ​ຫະກິດ​ແຫ່ງ​ລັດ ​ແລະ ຫຼາຍ​ບັນຫາກ່ຽວ​ກັບ​ການ​ເມືອງ, ວັດທະນະທຳ, ສັງຄົມ ທີ່​ສັບສົນ​ແລະ​ສຳ​ພັດ​ໄວ​ທີ່​ສຸດ​ອື່ນໆ. ການ​ທີ່​ປະຊາ​ຄົມ​ເສດຖະກິດ​ອາ​ຊຽນ​ໄດ້​ຮັບ​ການ​ກໍ່ສ້າງ​ຂຶ້ນ​ເປັນ​ທາງ​ການ​ທ້າຍ​ປີ 2015, ການ​ຜັນ​ຂະຫຍາຍ​ປະຕິບັດສັນຍາ​ການ​ຄ້າ​ເສລີກັບ ສ.​ເກົາຫຼີ, ກັບສະຫະພາບ​ເສດຖະກິດ​ອາຊີ - ​ເອີຣົບ, ພິ​ເສດ​​ແມ່ນ​ການ​ເຊັນແລະ​ກຽມ​ໃຫ້​ສັດຕະຍາບັນ ​ສັນຍາ​ຄູ່​ຮ່ວມ​ມືຂ້າມ​ປາຊີ​ຟິກ ​ແລະ ສັນຍາ​ການ​ຄ້າ​ເສລີ​ກັບ ອີ​ຢູ ຊຶ່ງ​ໄດ້​ແລະ​ຈະອຳນວຍ​ໂອກາດ ຄວາມ​ສະດວກ​ດີ​ຫຼາຍ​​ປະການ, ​ແຕ່​ກໍ່​ມີ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ໃໝ່ບໍ່​ໜ້ອຍທາງ​ດ້ານ​ເສດຖະກິດ ພ້ອມ​ທັງ​ທາງ​ດ້ານ​ປ້ອງ​ກັນຊາ​ດ, ຄວາມ​ສະຫງົບ, ການ​ຕ່າງປະ​ເທດ, ວັດທະນະທຳ, ສັງຄົມ. 

ບັນດາ​ສະຫາຍຈົ່ງ​ຄົ້ນຄວ້າ​ເອກະສານ​ຕ່າງໆ​ຢ່າງ​ລະອຽດ, ປຶກສາ​ສົນ​ທະນາ, ປະກອບ​ຄວາມ​ຄິດ​ຄວາມ​ເຫັນກ່ຽວ​ກັບ​ຄວາມ​ຈຳ​ເປັນ​ຕ້ອງ​ປະກາດ​ໃຊ້​ມະຕິ​ສະ​ເພາະ​ກ່ຽວ​ກັບ​ບັນຫາ​ນີ້; ຕີ​ລາຄາ​ສະ​ພາບ​ການ, ສະຖານະ​ການ, ບັນດາ​ການ​ກະທົບ​ທີ່​ຕັ້ງໜ້າ​ແລະ​ຫຍໍ້​ທໍ້ ຢ່າງຮອບດ້ານ, ພາວະ​ວິ​ໄສ, ພິ​ເສດ​ແມ່ນ​ບັນດາ​ປັດ​ໄຈ​ທີ່​ສົ່ງ​ຜົນ​ກະທົບ​ເຖິງ​ສະຖຽນ​ລະ​ພາບ​ທາງ​ການ​ເມືອງ - ສັງຄົມ ​ແລະ ການ​ພັດທະນາ​ແບບ​ຍືນ​ຍົງ​ຂອງ​ປະ​ເທດ​ຊາດ. ກຳນົດ​ຢ່າງ​ຖືກຕ້ອງ​ບັນດາ​ໂອກາດ ​ແລະ ສິ່ງ​ທ້າ​ທາຍທີ່​ມີ​ຕໍ່​ວິວັດ​ການ​ເຊື່ອມ​ໂຍງ​ສາກົນ ​ແລະ ພາລະກິດ​ການ​ສ້າງສາ, ປົດ​ປັກ​ຮັກສາ​ປະ​ເທດ​ຊາດ​ໃນ​ໄລຍະ 5 - 10 ປີ​ສະ​ເພາ​ໜ້າ. ທຳ​ຄວາມ​ກະຈ່າງ​ແຈ້ງ​ກ່ຽວ​ກັບ​ທັດສະນະ, ​ແນວ​ຄິດ​ຊີ້​ນຳ ​ແລະ ​ແຜນ​ນະ​ໂຍບາຍ, ນະ​ໂຍບາຍ​ສຳຄັນ​ຈຳນວນ​ໜຶ່ງ ທີ່​ຮັບປະກັນ​ຜົນສຳ​ເລັດ​ຂອງ​ການ​ເຊື່ອມ​ໂຍງ, ທັງ​ຮັກສາ​ສະຖຽນ​ລະ​ພາບ​ທາງ​ດ້ານ​ການ​ເມືອງ - ສັງຄົມ​ໄວ້​ຢ່າງ​ໝັ້ນຄົງ. 

​ໃນ​ຂະ​ບວນວິວັດ​ນີ້, ຕ້ອງ​ກຳ​ແໜ້ນ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ກ່ຽວ​ກັບ​ການ​ເຊື່ອມ​ໂຍງ​ສາກົນ, ສະພາບ​ການ​ປະຕິບັດ​ມະຕິ​ສະບັບ​ເລກທີ 08/NQ-TW ຂອງ​ຄະນະ​ບໍລິຫານ​ງານ​ສູນ​ກາງ​ສະ​ໄໝ​ທີ X “ກ່ຽວ​ກັບ​ແຜນ​ນະ​ໂຍບາຍ, ນະ​ໂຍບາຍ​ທີ່​ສຳຄັນ​ຈຳນວນ​ໜຶ່ງ ​ເພື່ອ​ໃຫ້​ພື້ນຖານ​ເສດຖະກິດ​ພັດທະນາ​ຢ່າງ​ໄວ ​ແລະ​ຍືນ​ຍົງ ​ໃນ​ເມື່ອຫວຽດນາມ​ເປັນ​ສະມາຊິກ​ຂອງ​ອົງການ​ການ​ຄ້າ​ໂລກ”, ມະຕິ​ສະບັບ​ເລກທີ 22/NQ-TW, ວັນ​ທີ 10 ​ເມສາ 2013, ຂອງ​ກົມ​ການ​ເມືອງ​ສູນ​ກາງ​ພັກສະ​ໄໝ​ທີ XI, ກ່ຽວ​ກັບ​ການ​ເຊື່ອມ​ໂຍງ​ສາກົນ ​ແລະ ມະຕິ​ສະບັບ​​ເລກທີ 28/NQ-TW, ວັນ​ທີ 25 ຕຸລາ 2013, ຂອງຄະນະ​ບໍລິຫານ​ງານ​ສູນ​ກາງ​ສະ​ໄໝ​ທີ XI “ກ່ຽວ​ກັບ​​ແຜນຍຸດ​ທະ​ສາດປົກ​ປັກ​ຮັກສາ​ປະ​ເທດ​ຊາດ​ໃນ​ສະພາບ​ການ​ໃໝ່” ​ເພື່ອ​ພິຈາລະນາ, ປະກາດ​ໃຊ້​ມະຕິ​ສະ​ເພາະ​ສະບັບ​ໜຶ່ງ​ຂອງ​ສູນ​ກາງ ​ແນ​ໃສ່​ສືບ​ທອດ, ພັດທະນາ​ເພີ່ມ​ເຕີມ​ບັນດາ​ທັດສະນະ, ​ແຜນ​ນະ​ໂຍບາຍ, ນະ​ໂຍບາຍ​ຂອງ​ພັກ ​ກ່ຽວກັບ​ການ​ເຊື່ອມ​ໂຍງ​ສາກົນ ທີ່​ສອດຄ່ອງ​ກັບ​ສະພາບ​ການຂອງ​ປະ​ເທດ, ພາກ​ພື້ນ ​ແລະ ​ໂລກ. ສຸມ​ໃສ່​ທຳ​ຄວາມ​ກະຈ່າງ​ແຈ້ງ​ກ່ຽວ​ກັບ​ທັດສະນະ, ​ແນວ​ຄິດ​ຊີ້​ນຳ​ໃນ​ເວລາ​ຕໍ່​ໄປ ​ເພື່ອ​ຕອບ​ສະໜອງ​ຄວາມ​ຮຽກຮ້ອງ​ຕ້ອງການ​ຂອງ​ສະພາບ​ການ​ໃໝ່. ກຳນົດ​ຢ່າງ​ລະອຽດ, ຈະ​ແຈ້ງ​ກ່ຽວ​ກັບ​ບັນດາ​ນະ​ໂຍບາຍ, ມາດ​ຕະການ​ກີດ​ກັ້ນ, ​ແກ້​ໄຂ​ຜ່ານ​ຜ່າ​ສິ່ງ​ທ້າ​ທາຍ, ການ​ກະທົບ​ທາງ​ລົບ ​ຈາກ​ການ​ປະຕິບັດ​ບັນດາ​ຂໍ້​ຕົກລົງ​ສາກົນ​ໃໝ່ ທີ່​ອາດ​ຈະ​ເກີດ​ຂຶ້ນ, ພິ​ເສດ​ແມ່ນ​ບັນດາ​ສິ່ງ​ທ້າ​ທາຍ, ການ​ກະທົບ​ທາງ​ລົບ​ທີ່​ອາດ​ຈະ​ມີ​ຕໍ່​ກະ​ສິກຳ, ຊົນນະບົດ ​ແລະ​ຊາວ​ກະສິກອນ, ຕໍ່ວິ​ສາ​ຫະກິດ​ຂະໜາດ​ນ້ອຍແລະ​ຂະໜາດກາງ ​ໃນ​ເມື່ອ​ເປີດ​ປະຕູ​ຕະຫຼາດ, ຫລຸດ​ອັດຕາພາສີນຳ​ເຂົ້າ​ສິນຄ້າ​ເກືອບ​ທຸກ​ປະ​ເພດ​ລົງ​ເປັນສູນ; ຕໍ່​ການ​ຮັບປະກັນ​ການ​ປ້ອງ​ກັນ​ປະ​ເທດ, ຄວາມ​ສະຫງົບ, ສະຖຽນ​ລະ​ພາບ​ທາງ​ການ​ເມືອງ - ສັງຄົມ ​ໃນ​ເມື່ອ​ປະຕິບັດ​ຂໍ້​ຕົກລົງ​ສາກົນ​ກ່ຽວ​ກັບ​ແຮງ​ງານ - ກຳມະບານ, ​ເປີດ​ເສລີພາບ​ຕະຫຼາດ​ການ​ບໍລິການ, ​ໃນ​ນັ້ນ​ມີ ຕະຫຼາດ​ການ​ບໍລິການການ​ເງິນ - ​ເງິນຕາ, ການ​ບໍລິການ​ໂທລະ​ຄົມມະນາຄົມ, ອິນ​ເຕີ​ເນັດ ​ແລະ ບັນດາ​ເຄືອ​ຂ່າງ​ສັງຄົມ... 

ກ່ຽກັບ​ການ​ກໍ່ສ້າງ, ປັບປຸງພັກ

ການ​ນຳພາ​ຂອງ​ພັກ​ເປັນ​ປັດ​ໄຈ​ອັນ​ດັບ​ໜຶ່ງ​ທີ່​ຕັດສິນ​ໄຊຊະນະ​ທັງ​ໝົດ​ຂອງ​ການ​ປະຕິວັດ​ຫວຽດນາມ. ການ​ກໍ່ສ້າງ, ປັບປຸງ​ພັກ​ແມ່ນ​ໜ້າ​ທີ່ສຳຄັນ​ພິ​ເສດ, ມີ​ຄວາມ​ໝາຍຕັດສິນ​ການ​ດຳລົງ​ຄົງ​ຕົວ​ຂອງ​ພັກ​ກອມ​ມູນິດ​ຫວຽດນາມ. ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ວາງ​ໜ້າ​ທີ​ພື້ນຖານ 10 ປະການ ​ເພື່ອ​ກໍ່ສ້າງ​ພັກ​ເຮົາ​ໃຫ້​ມີ​ຄວາມສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ​ຢ່າງ​ແທ້​ຈິງ, ​ໃນ​ນັ້ນ ຢືນຢັນ​ສືບ​ຕໍ່ຕັ້ງ​ໝັ້ນ, ​ເດັດດ່ຽວ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ ຄັ້ງ​ທີ 4 ສະ​ໄໝ​ທີ XI ກ່ຽວ​ກັບ​ການ​ກໍ່ສ້າງ​ພັກ. 

ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII, ຄະນະ​ບໍລິຫານ​ງານ​ສູນ​ກາງ​ໄດ້​ຕົກລົງວ່າ ກອງ​ປະຊຸມ​ສູນ​ກາງ​ຄັ້ງ​ນີ້​ຕ້ອງ​ປຶກສາ​ສົນທະນາ, ອອກ​ມະຕິ​ກ່ຽວ​ກັບ “​ເພີ່ມ​ທະວີ​ການ​ກໍ່ສ້າງ, ປັບປຸງ​ພັກ; ກີດ​ກັ້ນ, ຍູ້​ຖອຍຄວາມເຊື່ອມ​ໂຊມທາງ​ດ້ານ​ແນວ​ຄິດ​ການ​ເມືອງ, ​ແບບ​ແຜນ​ດຳລົງ​ຊີ​ວິດ, ບັນດາ​ປະກົດ​ການ “ຜັນປ່ຽນ​ດ້ວຍ​ຕົວ​ເອງ”, “ປ່ຽນ​ແປງ​ດ້ວຍຕົວ​ເອງ” ຢູ່​ພາຍ​​ໃນ”. ນີ້​ແມ່ນ​ບັນຫາ​ສຳຄັນ, ທັງ​ພື້ນຖານ, ທັງ​ຮີບ​ດ່ວນ. ຢູ່​ທີ່​ບັນດາ​ກອງ​ປະຊຸມ​ໃຫຍ່​ຄັ້ງ​ທີ VIII, IX, X ​ແລະ XI, ພັກ​ເຮົາ​ໄດ້​ເນັ້ນ​ເຖິງ​ຄວາມ​ຈຳ​ເປັນ​ຕ້ອງ​ກີດ​ກັ້ນ, ຍູ້​ຖອຍ​ສະພາບ​ຄວາມ​ເຊື່ອມ​ໂຊມ​ທາງ​ດ້າງ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ. ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັດ​ສືບ​ຕໍ່​ກ່າວ​ເຕື່ອນ ​ແລະ ວາ​ງຄວາມ​ຮຽກຮ້ອງ​ຕ້ອງການ: “ຕໍ່ສູ້, ກີດ​ກັ້ນ, ຍູ້​ຖອຍ​ສະພາບ​ຄວາມ​ເຊື່ອມ​ໂຊມ​ທາງ​ດ້ານ​ແນວ​ຄິດ, ຄຸນສົມບັດ, ​ແບບ​ແຜນ​ດຳລົງ​ຊີວິດ; ກີດ​ກັ້ນ, ຍູ້​ຖອຍ​ບັນດາ​ປະກົດ​ການ “ຜັນປ່ຽນ​ດ້ວຍ​ຕົວ​ເອງ”, “ປ່ຽນ​ແປງ​ດ້ວຍຕົວ​ເອງ”” (1); ຖື​ວ່າ​ນີ້​ເປັນ​ໜຶ່ງ​ໃນ​ຫົກ​ໜ້າ​ທີ່​ຈຸດ​ໜັກ​ໃຈກາງ​ຂອງສະ​ໄໝ​ທີ XII ນີ້. ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XI ກ່ຽວ​ກັບ​ການ​ກໍ່ສ້າງ​ພັກ, ດ້ວຍ​ຄວາມ​ຕັດສິນ​ໃຈ​ສູງ​ທີ່​ສຸດ​ຂອງ​ທົ່ວ​ພັກ, ທົ່ວ​ປວງ​ຊົນ ​ແລະ ທົ່ວ​ກອງທັບ, ພວກ​ເຮົາ​ໄດ້​ຮັບ​ບັນດາ​ຜົນສຳ​ເລັດ​ເບື້ອງ​ຕົ້ນ​ທີ່​ສຳຄັນ, ​ແຕ່​ສະພາບຄວາມ​ເຊື່ອມ​ໂຊມ, ການ “ຜັນປ່ຽນ​ດ້ວຍ​ຕົວ​ເອງ”, “ປ່ຽນ​ແປງ​ດ້ວຍຕົວ​ເອງ” ຍັງ​ບໍ່​ຖືກ​ກີດ​ກັ້ນ, ຍູ້​ຖອຍ​ເທື່ອ, ຍັງ​ມີ​ປະກົດ​ການ​ເກີດ​ຂຶ້ນ​ຢ່າງ​ເລິກ​​ແລບ ສັບສົນ​ກວ່າ​ເກົ່າ, ອາດ​ຈະ​ພາ​ໃຫ້​ເກີດ​ຜົນ​ກະທົບ​ທີ່​ຄວາດ​ຄະ​ເນ​ບໍ່​ໄດ້. 

​ໃບ​ສະ​ເໜີ​ຂອງ​ກົມ​ການ​ເມືອງ​ແລະ​ບັນດາ​ເອກະສານ​ທີ່​ກ່ຽວ​ຂ້ອງ ທີ່​ໄດ້​ສົ່ງ​ເຖິງ​ບັນດາ​ສະຫາຍກຳມະການສູນ​ກາງ​ພັກ ​ໄດ້​ລະບຸ​ເນື້ອ​ໃນ​ຂອງ​ແຜນ​ຮ່າງ​ຢ່າງ​ຄົບ​ຖ້ວນ​ພໍ​ຄວນ. ບັນດາ​ສະຫາຍ​ຈົ່ງ​ປະກອບ​ຄວາມ​ເຫັນ​ກ່ຽວ​ກັບຊື່, ຫົວ​ຂໍ້ ​ແລະ ຂອບ​ເຂດ​ຂອງ​ແຜນ​ຮ່າງ, ສະ​ເໜີ​ເພີ່ມ​ເຕີມ ປັບປຸງ. ຈາກ​ນັ້ນ, ຕີ​ລາຄາຢ່າງຖືກຕ້ອງກ່ຽວ​ກັບ​ສະພາບ​ການ ​ແລະ ສາ​ເຫດ; ກຳນົດ​ແຈ້ງ​ເປົ້າ​ໝາຍ, ທັດສະນະ, ​ແນວ​ຄິດ​ຊີ້​ນຳ ​ແລະ ບັນດາ​ແຜນ​ນະ​ໂຍບາຍ, ມາດ​ຕະການ​ທີ່​ສອດຄ່ອງ​ກັບ​ແຕ່ລະ​ເນື້ອ​ໃນ, ບັນຫາ. ບົນ​ພື້ນຖານ​ສືບ​ທອດ​ບັນດາ​ມະຕິກ່ອນ​ໜ້າ​ນີ້​ຂອງ​ສູນ​ກາງ, ພິ​ເສດ​ແມ່ນ​ມະຕິ​ກອງ​ປະ​ຊຸມ​ສູນ​ກາງ​ຄັ້ງ​ທີ 4 ສະ​ໄໝ​ທີ XI, ສະ​ເໜີ​ໃຫ້​ຄົ້ນຄວ້າ​ເພີ່ມ​ເຕີມ, ຊີ້ແຈ້ງ​ເບິ່ງວ່າ ​ຄວາມ​ເຊື່ອມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດນັ້ນ ​ມັນ​ເປັນ​ແນວ​ໃດ? ບັນດາ​ປະກົດ​ການ, ຄື​ທີ່​ໄດ້​ລະບຸ​ໄວ້​ໃນ​ໃບສະ​ເໜີ, ​ແຜນ​ຮ່າງ, ຮ່າງ​ມະຕິນັ້ນ ຊັດ​ເຈນ​ພຽງພໍ​ຫຼື​ຍັງ, ຈະຕ້ອງ​ລະບຸ​ເພີ່ມ​ເຕີມ​ບັນຫາ​ຫຍັງ​ອີກ? ການ “ຜັນປ່ຽນ​ດ້ວຍ​ຕົວ​ເອງ”, “ປ່ຽນ​ແປງ​ດ້ວຍຕົວ​ເອງ” ຢູ່​ພາຍ​ໃນນັ້ນ ​ມັນ​ເປັນ​ແນວ​ໃດ? ​ເຖິງ​ລະດັບ​ໃດ? ສາ​ເຫດຂອງ​ມັນ​ແມ່ນ​ຫຍັງ? ອັນຕະລາຍ​ຄື​ແນວ​ໃດ? 

ດ້ວຍ​ຈິດ​ໃຈມອງ​ເບິ່ງ​ໂດຍ​ກົງທີ່​ຄວາມ​ຈິງ, ຕີ​ລາຄາ​ຖືກຕ້ອງ​ຕາມ​ຄວາມ​ຈິ​ງ, ສະ​ເໜີ​ໃຫ້​ບັນດາ​ສະຫາຍຈົ່ງ​ລົງ​ເລິກ​ໄຈ້​ແຍກ, ທຳ​ຄວາມ​ກະຈ່າງ​ແຈ້ງ, ຊີ້​ໃຫ້​ເຫັນ​ສາ​ເຫດ​ຕົ້ນຕໍ, ວາງ​ມາດ​ຕະການ​ແກ້​ໄຂ​ທີ່​ມີ​ຜົນ​ສັກສິດ. ​ແຜນ​ຮ່າງ​ໄດ້​ວາງກຳນົດ 4 ກຸ່ມ​ໜ້າ​ທີ່, ວິ​ທິ​ແກ້ ກ່ຽວ​ກັບ​ການ​ສຶກສາ​ອົບຮົມ​ການ​ເມືອງ​ແນວ​ຄິດ, ຕິ​ຊົມ​ຕົນ​ເອງ​ແລະ​ຕິ​ຊົມ; ກ່ຽວ​ກັບ​ກົນ​ໄກ, ນະ​ໂຍບາຍ; ກ່ຽວ​ກັບ​ກວດກາ, ຕິດຕາມ​ກວດກາ, ລະບຽບ​ວິ​ໄນ​ພັກ; ກ່ຽວ​ກັບ​ການ​ເສີມ​ຂະຫຍາຍ​ບົດບາດ​ຂອງ​ປະຊາຊົນ, ຂອງ​ແນວ​ໂຮມ​ປະ​ເທດ​ຊາດ ​ແລະ ບັນດາ​ອົງການ​ຈັດ​ຕັ້ງ​ການ​ເມືອງ - ສັງຄົມ. ບັນດາ​ກຸ່ມ​ວິ​ມີ​ແກ້​ໄຂ​ເທິງ​ນີ້ ຈະ​ຖືກຕ້ອງ, ​ເຊື່ອ​ຖື​ໄດ້ ​ແລະ ​ເປັນ​ໄປ​ໄດ້​ຫຼື​ບໍ່​ ເພື່ອ​ເຮັດ​ໃຫ້​ສະພາບ​ການ​ປ່ຽນ​ແປງ​ໄປ? ຈະ​ຕ້ອງ​ເພີ່ມ​ເຕີມ​ວິທີ​ແກ້​​ໄຂຫຍັງ​ແດ່, ​ເນື້ອ​ໃນ​ຂອງ​ວິທີ​ແກ້​ໄຂ​ແຕ່​ລະ​ກຸ່ມ​ນັ້ນ ​ຈະ​ຕ້ອງ​ເອົາ​ໃຈ​ໃສ່​ບັນຫາ​ຫຍັງ​ແດ່? ວິທີ​ແກ້​ໄຂ​ໃດ​ທີ່​ພວກ​ເຮົາ​ອາດ​ຈະ​ຈັດ​ຕັ້ງ​ປະຕິບັດ​ໃນ​ທັນທີ​ທັນ​ໃດ; ບັນດາ​ວິທີ​ແກ້​ໄຂ​ທີ່​ຕ້ອງ​ມີ​ຂໍ້​ກຳນົດ, ​ແນະນຳນັ້ນ ຈະ​ຕ້ອງ​ຈັດ​ຕັ້ງ​ປະຕິບັດ​ຄືແນວ​ໃດ?... 

ບັນດາ​ເນື້ອ​ໃນ​ທີ່​ສະ​ເໜີ​ຕໍ່​ກອງ​ປະຊຸມ​ສູນ​ກາງ​ຄັ້ງ​ນີ້ ​ແມ່ນ​ບັນດາ​ບັນຫາ​​ສຳຄັນທີ່​ສຸດ ​ສຳລັບ​ການ​ປະຕິບັດຢ່າງ​ສຳ​ເລັດ​ຜົນ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ຊຶ່ງ​ກວມ​ທັງ​ການ​ປະຕິບັດ​ໜ້າ​ທີ່​ຈຸດ​ໜັກ​ໃຈກາງ​ຄື ພັດທະນາ​ເສດຖະກິດ - ສັງຄົມ ​ແລະ ການ​ປະຕິບັດ​ໜ້າ​ທີ່ຫຼັກ​ແຫຼ່ງຄື ກໍ່ສ້າງ ປັບປຸງ​ພັກ. ບັນດາ​ສະຫາຍ​ຈົ່ງ​ເສີມ​ຂະຫຍາຍ​ສຸດ​ຂີດ​ຈິດ​ໃຈຮັບຜິດຊອບ, ຄົ້ນຄວ້າ ປຶກສາ​ສົນທະນາ​ຢ່າ​ງຟົດ​ເດືອດ, ປະກອບ​ຄວາມ​ເຫັນ​ເພື່ອ​ບູລະນະ​ບັນດາ​ບົດ​ລາຍ​ງານ, ​ແຜນ​ຮ່າງ, ຮ່າງ​ມະຕິ, ຂໍ້​ສະຫລຸບຂອງ​ສູນ​ກາງ ​ແລະ ພິຈາລະນາ, ຮັບຮອງ​ເອົາ​ໃນວາລະ​ທ້າຍ​ກອງ​ປະຊຸມ.

ດ້ວຍ​ຈິດ​ໃຈ​ດັ່ງກ່າວ​ນັ້ນ, ຂ້າພະ​ເຈົ້າ​ຂໍ​ປະກາດ​​​ໄຂກອງ​ປະຊຸມຄົບ​ຄະນະຄັ້ງ​ທີ 4 ​ຄະນະ​ບໍລິຫານ​ງານ​ສູນ​ກາງພັກ​ສະ​ໄໝ​ທີ XII. ອວຍພອນ​ໄຊ​ໃຫ້​ກອງ​ປະຊຸມ​​ໄດ້​ຮັບ​ຜົນສຳເລັດອັນ​ຈົບງາມ./.

​ໂດຍ ຫງວຽນ​ຝູຈ້ອງ

​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ​ຫວຽດນາມ

 ------------------------------------------

* ຫົວ​ຂໍ້​ໂດຍ​ວາລະສານ​ກອມ​ມູນິດ​ເປັນ​ຜູ້​ແຕ່ງ. ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 889 (​ເດືອນ​ພະຈິກ 2016).

(1) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 201.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ