ວັນພຸດ, 26/7/2017
ຕໍ່ສູ້ເພື່ອກັນແລະຕ້ານການສໍ້ລາດບັງຫຼວງ ຕາມຈິດໃຈມະຕິກອງປະຊຸມໃຫຍ່ ຄັ້ງທີ XII ຂອງພັກ
25/3/2017 18:26' ສົ່ງ ພິມ
ພາບປະກອບ (ພາບ: TTXVN)

ໃນ​ເວລາ​ທີ່​ຜ່ານ​ມາ, ພ້ອມ​ກັບ​ບັນດາ​ຜົນງານ​ອັນສຳຄັນທາງ​ດ້ານ​ເສດຖະກິດ - ສັງຄົມ, ການ​ພົວພັນ​ຕ່າງປະ​ເທດ, ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ ​ແລະ ຄວາມ​ປອດ​ໄພ ລະບຽບ​ວິ​ໄນ​ສັງຄົມ ທີ່​ບັນລຸ​ໄດ້​ນັ້ນ, ວຽກ​ງານຕໍ່ສູ້​​ເພື່ອ​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ກໍ່​ມີ​ການ​ຜັນ​ປ່ຽນ​ທີ່​ຕັ້ງໜ້າ​ຫຼາຍ​ຢ່າງ, ນັບ​ທັງ​ການ​ກັນ ​ແລະ ຄົ້ນ​ເຜີຍ, ​ແກ້​ໄຂ​ການ​ກະທຳ​ສໍ້​ລາດ​ບັງ​ຫຼວງ. ວຽກ​ງານສື່​ຂ່າວ, ​ໂຄສະນາ​ການ, ອົບຮົມ​ສຶກສາ ​ກ່ຽວ​ກັບ​ການຕໍ່ສູ້​​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ໄດ້​ຮັບ​ຄວາມ​ເອົາ​ໃຈ​ໃສ່; ລະບຽບ​ກົດໝາຍ​ກ່ຽວ​ກັບ​ການ​ຄຸ້ມ​ຄອງ​ເສດຖະກິດ - ສັງຄົມ ​ແລະ ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ສື​ບຕໍ່​ໄດ້​ຮັບ​ການ​ປັບປຸງ​ບູລະນະ; ວຽກ​ງານ​ປະຕິ​ຮູບ​ການ​ບໍລິຫານ, ​ການເປີດ​ເຜີຍ ​ໂປ່​ງ​ໃສ​ໃນ​ການ​ເຄື່ອນ​ໄຫວ​ຂອງ​ສຳນັກງານ ອົງການ ການຈັດ​ຕັ້ງ ກົມ​ກອງ ​ໄດ້​ຮັບ​ການ​ລວມສູນ​ຊີ້​ນຳ​ນຳພາ ​ແລະ ​ໄດ້​ບັນລຸ​ບັນດາ​ຜົນສຳ​ເລັດ​ທີ່​ຕັ້ງໜ້າ; ວຽກ​ງານ​ກວດກາ, ຕິດຕາມ​ກວດກາ, ກວດກາ​ນ, ​ແກ້​ໄຂ​ກໍລະນີ​ຄະດີ​ຕ່າງໆ, ການ​ສືບສວນ, ຟ້ອງສານ, ພິພາດ​ສາ​ຄະດີ​ສໍ້​ລາດ​ບັງ​ຫຼວງ ​ໄດ້​ຮັບ​ການ​ເພີ່ມ​ທະວີ; ຫຼາຍ​ຄະດີ​ສໍ້​ລາດ​ບັງ​ຫຼວງທີ່​ຮ້າຍ​ແຮງ ສັບສົນ ​ໄດ້​ຖືກ​ຄົ້ນ​ເຜີຍ ​ແລະ ລວມສູນ​ການ​ຊີ້​ນຳ​ດຳ​ເນີນການ​ສືບສວນ, ຟ້ອງ​ສານ, ພິພາກສາ​ຢ່າງ​ເຂົ້ມງວດ(1); ບົດບາດ, ຄວາມ​ຮັບຜິດຊອບ ຂອງ​ບັນດາ​ອົງການ​ໂດ​ຍປະຊາຊົນ​ເລືອກ​ຕັ້ງ, ​ແນວ​ໂຮມ​ປະ​ເທດ​ຊາດ ​ແລະ ປະຊາຊົນ ​ໃນ​ການ​​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ໄດ້​ຮັບ​ການ​ເສີມ​ຂະຫຍາຍ​ເທື່ອ​ລະ​ກ້າວ; ການ​ຮ່ວມ​ມື​ສາກົນ​ກ່ຽວ​ກັບການ​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ສືບ​ຕໍ່​ໄດ້​ຮັບ​ການ​ເປີດ​ກວ້າງ, ປັບ​ປຸງ. ການ​ສໍ້​ລາດ​ບັງ​ຫຼວງ​ຖືກ​ຈຳກັດໃນ​ຂັ້ນ​ຕົ້ນ ​ໄດ້​ປະກອບສ່ວນ​ຕົວ​ຈິງ​ເຂົ້າ​ໃນ​ການ​ຮັກສາ​ຄວາມ​ໝັ້ນຄົງ​ດ້ານ​ການ​ເມືອງ, ພັດທະນາ​ເສດຖະກິດ - ສັງຄົມ, ປັບປຸງ​ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ພັກ​ແລະ​ລັດ.

ບັນລຸ​ໄດ້​ຜົນສຳ​ເລັດ​ດັ່ງກ່າວ​ເທິງ​ນີ້​ແມ່ນ​ຍ້ອນ​ມີ​ຄວາມ​ຕັດສິນ​ໃຈ​ການ​ເມືອງ​ສູງ ​ຂອງ​ພັກ​ແລະ​ລັດ ​ໃນ​ການຕໍ່ສູ້​​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ; ການ​ຊີ້​ນຳນຳພາຢ່າງ​​ໃກ້ຊິດຕິດ​ແທດ ຂຸ້ນຂ້ຽວ, ດ້ວຍ​ການ​ຕັດສິນ​ຕົກລົງ​ທີ່​ຖືກຕ້ອງ, ທັນ​ການ ​ຂອງ​ກົມ​ການ​ເມືອງ, ຄະນະ​ເລຂາທິການ, ຄະນະ​ຊີ້​ນຳ​ສູນ​ກາງ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ສະພາ​ແຫ່ງ​ຊາດ, ລັດຖະບານ; ຄວາ​ມມານະ​ພະຍາຍາມ​ຂອງ​ບັນດາ​ອົງການ​ເສນາ​ທິການ ​ແລະ ບັນດາ​ອົງຄະ​ນະ​ພັກ, ອົງການ​ຈັດ​ຕັ້ງ​ພັກ, ກະຊວງ, ຂະ​ແໜງ​ການ, ທ້ອງ​ຖິ່ນ, ​ເປັນ​ຕົ້ນ​ແມ່ນ ຄວາມ​ມານະ​ພະຍາຍາມ​ສູງ​ທີ່​ສຸດ ​ຂອງບັນດາ​ສຳນັກງານອົງການ, ກົມ​ກອງ​ທີ່​ມີ​ພາລະ​ໜ້າ​ທີ່ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ແລະ ບັນດາ​ອົງການຈັດ​ຕັ້ງ​ຕຸລາການ​ຢູ່​ສູນ​ກາງ ​ແລະ ທ້ອງ​ຖິ່ນ; ການ​ເຂົ້າ​ຮ່ວມ​ຢ່າງ​ຕັ້ງໜ້າ​ຂອງ​ແນວ​ໂຮງ​ປະ​ເທດ​ຊາດ, ບັນດາ​ການຈັດ​ຕັ້ງ​ການ​ເມືອງ - ສັງຄົມ, ປະຊາຊົນ ​ແລະ ສື່​ມວນ​ຊົນ.

​ແຕ່, ວຽກ​ງານ​​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຍັງ​ບໍ່​ທັນ​ຕອບ​ສະໜອງ​ໄດ້​ກັບຄວາມຕ້ອງການ, ຍັງ​ບໍ່​ທັນ​ບັນລຸ​ໄດ້​ເປົ້າ​ໝາຍ “ກີດ​ກັ້ນ, ຍູ້​ຖອຍ​ເທື່ອ​ລະ​ກ້າວການ​ສໍ້​ລາດ​ບັງ​ຫຼວງ” ທີ່​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 3 ສະ​ໄໝ​ທີ X ​ໄດ້​ວາງ​ອອກ​ມາ. “ການ​ສໍ້​ລາດ​ບັງ​ຫຼວງ, ຄວາມ​ຟຸ່ມ​ເຟື່ອຍຍັງ​ຮ້າຍ​ແຮງ​ຫຼາຍ, ດ້ວຍ​ບັນດາ​ປະກົດ​ການ​ທີ່​ນັບ​ມື້​ນັບ​ເລິກ​ແລບ ສັບສົນ, ​ເກີດ​ຂຶ້ນ​ໃນ​ຫຼາຍ​ຂົງ​ເຂດ, ຢູ່​ຫຼາຍ​ຂັ້ນ, ຫຼາຍ​ຂະ​ແໜງ​ການ, ຂັດຂວາງການ​ພັດທະນາ​ເສດຖະກິດ - ສັງຄົມ, ກໍ່​ຄວາມ​ຮ້ອນ​ເຄືອງ​ໃນ​ຫາງ​ສຽງ​ສັງຄົມ, ​ເປັນ​ສິ່ງທ້າ​ທາຍ​ທີ່​ຮ້າຍ​ແຮງ​ຕໍ່​ບົດບາດນຳ​ພາ​ຂອງ​ພັກ ​ແລະ ຄວາມ​ສັກສິດ​ໃນ​ການ​ຄຸ້ມ​ຄອງ​ຂອງ​ລັດ, ນາບ​ຂູ່​ການ​ດຳລົງ​ຄົງ​ຕົວ​ຂອງ​ລະບອບ​ການ​ເມືອງ”(2).

ບັນດາ​ຂໍ້​ຈຳກັດ​ເທິງ​ນີ້​ມີ​ທັງ​ສາ​ເຫດ​ພາວະ​ວິ​ໄສ ​ແລະ ອັດຕະວິ​ໄສ, ​ໃນ​ນັ້ນ ສາ​ເຫດ​ອັດຕະວິ​ໄສ​ເປັນ​ຕົ້ນຕໍ່. ລະຫວ່າງ​ຄວາມ​ຕັດສິນ​ໃຈ​ການ​ເມືອງ​ຂອງ​ພັກ ລັດ ​ແລະ ການ​ກະທຳ​ຕົວ​ຈິງ​ຂອງບາງ​ອົງຄະ​ນະ​ພັກ, ອຳນາດ​ການ​ປົກຄອງ, ສຳນັກງານ​ອົງການ, ກົມ​ກອງ, ພະນັກງານ, ສະມາຊິກ​ພັກ, ຂ້າ​ລັດຖະການ, ລັດຖະກອນ ຍັງ​ມີ​ຊ່ອງ​ຫວ່າງ, ​ເວົ້າ​ບໍ່​​ໄປຄຽງ​ຄູ່​ກັບ​ເຮັດ. ຫຼາຍ​ອົງຄະ​ນະ​ພັກ, ອົງການ​ຈັດ​ຕັ້ງ​ພັກ, ອຳນາດ​ການ​ປົກຄອງ, ຫົວໜ້າ​ຂອງ​ສຳນັກງານ, ອົງການ, ກົມ​ກອງ ຍັງ​ບໍ່​ທັນ​ເປັນ​ແບບຢ່າງ, ບໍ່​ເດັດດ່ຽວ​ໃນ​ການ​ຊີ້​ນຳນຳພາ, ກວດກາ, ຊຸກຍູ້ ​ແລະ ປະຕິບັດ​ວຽກ​ງານກັນ​ແລະ​ຕ້ານການ​ສໍ້​ລາດ​ບັງ​ຫຼວງ. ພະນັກງານ, ສະມາຊິກ​ພັກ, ຂ້າ​ລັດຖະການ, ລັດຖະກອນພາກສ່ວນ​ໜຶ່ງ​ທີ່​ບໍ່​ໜ້ອຍ ຂາດ​ການ​ຝຶກ​ຝົນ​ຫຼໍ່​ຫຼອນ, ຖືກ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ. ກົນ​ໄກ, ນະ​ໂຍບາຍ, ກົ​ດໝາຍ ກ່ຽວ​ກັບ​ເສດຖະກິດ - ສັງຄົມ ​ແລະ ການ​​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ໃນ​ຂົງ​ເຂດ​ຈຳນວນ​ໜຶ່ງ ຍັງ​ຫຼົມ​ແຫຼວ, ບໍ່​ສອດຄ່ອງ​ກັບ​ຄວາມ​ເປັນ​ຈິງ; ຂໍ້​ກຳນົດ​ຈຳນວນ​ໜຶ່ງ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຍັງ​ມີ​ລັກສະນະ​ຮູບ​ການ, ຄວາມ​ສາມາດ​ປະຕິບັດ​ບໍ່​ສູງ, ​ເຊັ່ນ ການ​ຄວບ​ຄຸມ​ຊັບ​ສິນ ລາຍ​ໄດ້, ຄວາມ​ເປີດ​ເຜີຍ ​ໂປ່​ງ​ໃສ, ການ​ແກ້​ໄຂ​ຄວາມ​ຮັບຜິດຊອບ​ຂອງ​ຜູ້​ເປັນ​ຫົວໜ້າ; ກົນ​ໄກ​ກວດກາ​ຄວບ​ຄຸມ​ອຳນາດ ​ໄດ້​ຮັບ​ການ​ປັບປຸງ​ບູລະນະ​ຢ່າງ​ຊັກ​ຊ້າ. ການ​ປະຕິບັດ​ກົດໝາຍ​ເວົ້າ​ລວມ ​ແລະ ປະຕິບັດ​ບັນດາ​ຂໍ້​ກຳນົດ ຂອງ​ພັກ​ແລະ​ລັດ​ເວົ້າ​ສະ​ເພາະ ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຍັງ​ບໍ່​ທັນ​ເຂັ້ມ​ງວດ; ບາງ​ແຜນ​ນະ​ໂຍບາຍ, ວິທີ​ແກ້​ໄຂ​ຢູ່​ໃນ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 3 ສະ​ໄໝ​ທີ່ X ຍັງ​ບໍ່​ທັນ​ໄດ້​ຫັນ​ເປັນ​ນິຕິ​ກຳ ຫຼື​ຫັນ​ເປັນ​ນິຕິ​ກຳ​ຢ່າງ​ຊັກ​ຊ້າ, ຍັງ​ບໍ່​ທັນ​ໄດ້​ຜັນ​ຂະຫຍາຍ​ປະຕິບັດ. ຍັງ​ບໍ່​ທັນ​ຕັດສິນ​ໃຈ​ ​ໃນ​ການຈັດ​ວາງ​ສັບ​ຊ້ອນ​ກົງຈັກ, ຫລຸດຜ່ອນ​ການ​ບັນຈຸ​ບຸກຄະລາ​ກອນ, ຈັດ​ວາງ​ຖັນ​ແຖວ​ພະນັກງານ, ຂ້າລັດຖະການ, ລັດຖະ​ກອນ ​ຄືນ​ໃໝ່. ຕົວ​ແບບ​ຈັດ​ຕັ້ງ​ບັນດາ​ສຳນັກງານ​ອົງການ, ກົມ​ກອງ​ສະ​ເພາະ​ກິດ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ບໍ່​ເປັນ​ປົກກະ​ຕິ, ສິດ​ຂອບ​ເຂດ​ຍັງ​ບໍ່​ທັນ​ສົມ​ຄູ່​ກັບ​ພາລະ​ບົດບາດ, ໜ້າ​ທີ່​ທີ່​ໄດ້​ຮັບ​ໝອບ​ໝາຍ; ພາຫະນະ, ​ເງື່ອນ​ໄຂ​ເຮັດ​ວຽກຍັງ​ຂາດ​ເຂີນ​; ຄຸນ​ນະພາ​ບຂອງ​ພະນັກງານ, ລັດຖະກອນ​ພາກສ່ວນ​ໜຶ່ງ ບໍ່​ຕອບ​ສະໜອງ​ໄດ້​ກັບ​ຄວາມ​ຕ້ອງການ; ຍັງ​ມີ​ການ​ກະທົບ​ຢ່າງ​ບໍ່​ຖືກຕ້ອງ, ຕາມ​ຈຸດປະສົງ​ສ່ວນ​ບຸກຄົນ ​ເຂົ້າ​ໃນ​ຂະ​ບວນວິວັດ​ການ​ຄົ້ນ​ເຜີຍ, ສືບສວນ, ​ແກ້​ໄຂການ​ສໍ້​ລາດ​ບັງ​ຫຼວງ ຂອງ​ສຳ​ນັກ​ງານ​ອົງການ, ກົມ​ກອງ. ຍັງ​ບໍ່​ທັນ​ເສີມ​ຂະຫຍາຍ​ໄດ້​ ກຳ​ລັງ​ແຮງ​ສັງ​ລວມຂອງ​ລະບົບ​ການ​ເມືອງ, ປະຊາຊົນ, ໜັງສື​ພິມ ​ແລະ​ ການ​ສື່ສານ​ ໃນ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ.

ຈາກ​ສະພາບ​ການ​ຕົວ​ຈິງ​ຂອງ​ວຽກ​ງານກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ໃນ​ເວລາ​ທີ່​ຜ່ານ​ມາ, ອາດ​ຈະ​ຖອດ​ຖອນ​ບົດຮຽນ​ຈຳນວນ​ໜຶ່ງ​ດັ່ງ​ລຸ່ມ​ນີ້:

ທີ​ໜຶ່ງ, ຕ້ອງ​ຫັນ​ຄວາມ​ຕັດສິນ​ໃຈ​ການ​ເມືອງ​ຂອງ​ພັກ, ລັດ ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ໃຫ້​ກາຍ​ເປັນ​ການ​ກະທຳ​ຕົວ​ຈິງ​ຂອງ​ພະນັກງານ, ຂ້າລັດຖະການ, ລັດຖະ​ກອນ ​ແລະ ປະຊາຊົນ, ກ່ອນ​ອື່ນ​ໝົດ​ແມ່ນ​ຄວາມ​ເປັນແບບຢ່າງ ​ແລະ ​ເດັດດ່ຽວ​ ຂອງ​ຫົວໜ້າ​ອົງຄະ​ນະ​ພັກ, ອົງການ​ຈັດ​ຕັ້ງ​ພັກ, ອຳນາດ​ການ​ປົກຄອງ, ສຳນັກງານ​ອົງການ, ການຈັດ​ຕັ້ງ, ກົມກ​ອງ ​ໃນ​ວຽກ​ງານກັນ​ແລະ​ຕ້ານການ​ສໍ້​ລາດ​ບັງ​ຫຼວງ. ຄວາມ​ຕັດສິນ​ໃຈ​ການ​ເມືອງ​ແມ່ນ​ປັດ​ໄຈອັນ​ດັບ​ໜຶ່ງ ​ທີ່​ຕັດສິນ​ຄວາມ​ສຳ​ເລັດ​ຜົນ​ ຂອງ​ວຽກ​ງານກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ​ແຕ່ ຖ້າ​ຫາກ​ບໍ່​ມີຄວາມ​ເປັນແບບຢ່າງ, ​ເດັດດ່ຽວ ຂອງຜູ້ນຳ​ໜ້າ, ການ​ມີ​ສ່ວນ​ຮ່ວມ​ຂອງພະນັກງານ, ຂ້າລັດຖະການ, ລັດຖະ​ກອນ, ຂອງ​ລະບົບ​ການ​ເມືອງ​ທັງ​ໝົດ ​ແລະ ທົ່ວ​ສັງຄົມ​ແລ້ວ ຄວາມ​ຕັດສິນ​ໃຈ​ການ​ເມືອງ​ກໍ່​ບໍ່​ອາດ​ກາຍ​ເປັນຄວາມ​ຈິງ​ໄດ້.

ທີ​ສອງ, ​ໃນ​ການ​ຕໍ່ສູ້​ເພື່ອກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ບໍ່​ປະສານ​ສົມທົບ​ຢ່າງ​ແໜ້ນ​ແຟ້ນລະຫວ່າງ​ຄວາ​ມຕັ້ງໜ້າ​ປ້ອງ​ກັນ, ​ເປັນ​ເຈົ້າ​ການ​ຄົ້ນ​ເຜີຍ ​ແລະ ​ເດັດດ່ຽວ​ແກ້​ໄຂ​ປະຕິບັດ​ວິ​ໄນ​ຢ່າງ​ເຂັ້ມ​ງວດ, ທັນ​ການ ຕໍ່​ຜູ້​​ສໍ້​ລາດ​ບັງ​ຫຼວງ, ປິດບັງ ປ່ອຍ​ມື​​ໃຫ້ການ​ສໍ້​ລາດ​ບັງ​ຫຼວງ, ການ​ແຊກ​ແຊງ ຂັດຂວາງ​ການ​ຕໍ່ສູ້​ຕ້ານ​ການ​ສໍ້​ລາດ​ບັງ​ຫຼວງ ຕາມ​ຂໍ້​ກຳນົດ​ຂອງ​ພັກ ​ແລະ ກົດໝາຍ​ຂອງ​ລັດ. ​ໃນ​ສະພາບ​​ປະຈຸ​ບັນ, ການ​ກັນ​ເປັນ​ຕົ້ນ​ຕໍ່, ພື້ນຖານ, ຍາວ​ນານ; ການ​ຄົ້ນ​ເຜີຍ, ​ແກ້​ໄຂ ​ແມ່ນສຳຄັນ, ຮີບ​ດ່ວນ. 

ທີ​ສາມ, ຕ້ອງ​ກໍ່ສ້າງ, ປັບປຸງ​ບູລະນະ​ລະບົບ​ລະບຽບ​ກົດໝາຍ​ກ່ຽວ​ກັບ​ເສດຖະກິດ - ສັງຄົມ ​ແລະ ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ທີ່​ຄົບ​ຊຸດ, ​ເປັນ​ເອກະ​ພາບ ​ແລະ ​ເປັນ​ໄປ​ໄດ້, ພ້ອມ​ກັນ​ນັ້ນ​ກໍ່​ຈັດ​ຕັ້ງ​ປະຕິບັດ​ຢ່າງ​ເຂັ້ມ​ງວດ, ມີ​ປະສິດທິ​ຜົນ. ​ເອົາ​ໃຈ​ໃສ່​ຢ່າງ​ໃກ້ຊິດ​ເຖິງ​ການ​ກວດກາ, ກວດສອບ, ຕິດຕາມ​ກວດກາ ການ​ປະຕິບັດໜ້າ​ທີ່​ຂອງ​ຜູ້ມີ​ຕຳ​ແໜ່​ງ ​ແລະອຳນາດ; ລົບ​ລ້າງ​ສະພາບ​ການສວຍ​ໃຊ້​ສິດ​ພິ​ເສດ ​ຜົນ​ປະ​ໂຫຍ​ດພິ​ເສດ, ກວດກາ​ຢ່າງ​ເຂັ້ມ​ງວດ​ ຕໍ່ຂະ​ບວນວິວັດ​ການ​ຫັນ​ແຜນ​ນະ​ໂຍບາຍ​ຂອງ​ພັກ​ເປັນ​ບັນດາ​ນະ​ໂຍບາຍ ​ແຜນ​ງານ​ທີ່​ລະອຽດ, ຕໍ່​ການ​ຫັນ​ວິ​ສາ​ຫະກິດ​​ແຫ່ງລັດ​ເປັນ​ຫຸ້ນ​ສ່ວນ, ການ​ຮ່ວມ​ມື​ລະຫວ່າງ​ພາກ​ລັດ​ແລະ​ເອກະ​ຊົນ, ການ​ຄຸ້ມ​ຄອງ​ທຶນ​ທຸລະ​ກິດ​ຂອງ​ລັດ. ຄວາມ​ເປັນ​ຈິງ​ໄດ້​ໃຫ້​ເຫັນ​ວ່າ, ​ເມື່ອ​ອຳນາດລັດ​ບໍ່ຖືຄວບ​ຄຸມ​ຢ່າງ​ແໜ້ນ​ແຟ້ນ ​ແລະ ສະພາບ​ການ​ສວຍ​ໃຊ້​ສິດ​ພິ​ເສດ ຜົນ​ປະ​ໂຫຍ​ດພິ​ເສດ​ຍັງ​ຄົງ​ຕົວ​ຢູ່, ການ​ຜູກຂາດ​ຂອງ​ລັດ​ ກາຍ​ເປັນ​ການ​ຜູກຂາດ​ຂອງ​ວິ​ສາ​ຫະກິດ​ແລ້ວ ກໍ່​ຈະ​ພາ​ໃຫ້​ເກີດການ​ສໍ້​ລາດ​ບັງ​ຫຼວງ ​ແລະ ​ເກີດ “ກຸ່ມ​ຜົນ​ປະ​ໂຫຍ​ດໝູ່​ພວກ”.

ທີ​ສີ່, ​ເສີມ​ຂະຫຍາຍ​ຢ່າງດີ ບົດບາດ ຄວາມ​ຮັບຜິດຊອບ​ຂອງ​ບັນດາ​ອົງການ​ໂດຍ​ປະຊາຊົນ​ເລືອກ​ຕັ້ງ, ​ແນວ​ໂຮມ​ປະ​ເທດ​ຊາດ, ບັນດາ​ອົງການ​ຈັດ​ຕັ້ງ​ການ​ເມືອງ - ສັງຄົມ, ປະຊາຊົນ, ອົງການສື່ສານ ​ແລະ ໜັງສືພິມ, ວິ​ສາ​ຫະກິດ, ນັກທຸລະກິດ ​ໃນ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ; ກໍ່ສ້າງ​ວັດທະນະທຳ​ປະຢັດ, ບໍ່​ມີ​ການສໍ້​ລາດ​ບັງ​ຫຼວງ​ໃນ​ສັງຄົມ, ກ່ອນ​ອື່ນ​ໝົດ​ແມ່ນ​ໃນພະນັກງານ, ສະມາຊິກ​ພັກ, ຂ້າລັດຖະການ, ລັດຖະກອນ. ​ໃນ​ແຕ່ລະ​ໄລຍະ​ທີ່​ຕ່າງ​ກັນ, ຕ້ອງ​ກຳນົດ​ບັນດາ​ໜ້າ​ທີ່​ຈຸດ​ໜັກ​ໃຈກາງ, ບັນດາ​ວິທີ​ແກ້​ໄຂ​ທີ່​ມີ​ລັກສະນະ​ບຸກທະລຸ ທີ່​ສອດຄ່ອງ​ກັບ​ສະພາບ​ການ​ຂອງ​ປະ​ເທດ, ຂອງ​ທ້ອງ​ຖິ່ນ ​ເພື່ອ​ເຕົ້າ​ໂຮ​ມລວມສູນ​ການ​ຊີ້​ນຳ​ນຳພາ​ປະຕິບັດ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ. ບັນດາ​ວິທີ​ແກ້​ໄຂ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຕ້ອງ​ສອດຄ່ອງ​ກັບ​ພື້ນຖານ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ ຢູ່​ຫວຽດນາມ, ສອດຄ່ອງ​ກັບ​ມູນ​ເຊື້ອ​ວັດທະນະທຳ​ຂອງ​ຊາດ.

ທີ​ຫ້າ, ​ເອົາ​ໃຈ​ໃສ່​ເສີມ​ຂະຫຍາຍ​ບົດບາດ​ແກ່ນສານ​ຂອງ​ບັນດາ​ສຳນັກງານ​ອົງການ, ກົມ​ກອງ​ທີ່​ມີພາລະ​ໜ້າ​ທີ່ກັນ​ແລະ​ຕ້ານການ​ສໍ້​ລາດ​ບັງ​ຫຼວງ (ຕຳຫຼວດ, ອົງການ​ໄອ​ຍະ​ການ, ສານ, ອົງການ​ກວດກາ, ກວດ​ສອບ, ກວດ​ບັນຊີ, ອົງການກິດຈະການ​ພາຍ​ໃນ), ກ່ອນ​ອື່ນ​ແມ່ນ​ໜ່ວຍງານ​ສະ​ເພາະ​ກິດ​ຕ້ານການ​ສໍ້​ລາດ​ບັງ​ຫຼວງ ຢູ່​ໃນ​ບັນດາ​ອົງການ​ດຳ​ເນີນ​ປະຕິບັດ​ກົດໝາຍ. ກໍ່ສ້າງ​ບັນດາ​ສຳນັກງານ​ອົງການ, ກົມ​ກອນ​ນີ້​ໃຫ້​ສະອາດປອດ​ໄສ, ໝັ້ນຄົງ​ເຂັ້ມ​ແຂງ, ມີ​ອຳ​ນາດ​ແທ້; ຮັບປະກັນ​ລັກສະນະ​ເປັນ​ເອກະລາດ​ທຽບ​ຖານ ​ໃນ​ການ​ປະຕິບັດ​ພາລະ​ບົດບາດ ໜ້າ​ທີ່, ມີ​ກົນ​ໄກ​ສົມທົບ​ຢ່າງ​ແໜ້ນ​ແຟ້ນ; ຮັບປະກັນ​ລະບອບ ນະ​ໂຍບາຍ ພາຫະນະ ​ເງື່ອນ​ໄຂ​ເຮັດ​ວຽກ, ຄວາມ​ຮັບຜິດຊອບ​ສູງ ​ແລະ ຄວາມ​ຊື່​ກົງ​ບໍລິສຸດ​ ຂອງ​ຖັນ​ແຖວພະນັກງານ, ລັດຖະກອນ. ​ເພີ່ມ​ທະວີ​ການ​ຮ່ວມ​ມື​ທາງ​ດ້ານການກັນ​ແລະ​ຕ້ານການ​ສໍ້​ລາດ​ບັງ​ຫຼວງ.

​ເປົ້າ​ໝາຍ, ທັດສະນະ, ​ແຜນ​ນະ​ໂຍບາຍ, ໜ້າ​ທີ່, ວິທີ​ແກ້​ໄຂ ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ໄດ້​ຮັບ​ການ​ກຳນົດ​ຢ່າງ​ມີ​ລະບົບ ​ໃນ​ມະຕິ​ກອງ​ປະຊຸມ​ສູນ​ກາງ​ພັກ​ ຄັ້ງ​ທີ 3 ສະ​ໄໝ​ທີ X, ຄຳ​ສະຫລຸບ​ເລກທີ 21-KL/TW ຂອງ​ກອງ​ປະຊຸມ​ສູນ​ກາງ​ພັກ ​ຄັ້ງ​ທີ 5 ສະ​ໄໝ​ທີ XI ​ແລະ ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ; ຊຶ່ງ​ໄດ້​ຮັບ​ການ​ຫັນ​ເປັນ​ລະອຽດ ​ແລະ ຫັນ​ເປັນ​ນິຕິ​ກຳ ​ດ້ວຍຂໍ້​ກຳນົດ​ຕ່າງໆ​ຂອງ​ພັກ ​ແລະ ລັດ, ​ເຊັ່ນ​ຂໍ້​ກຳນົດ​ເລກທີ 47-QĐ/TW, ວັນ​ທີ 1-11-2011, ຂອງ​ຄະນະ​ບໍລິຫານ​ງານ​ສູນ​ກາງ, “ກ່ຽວ​ກັບສິ່ງ​ຕ່າງໆ ທີ່​ສະມາຊິກ​ພັກ​ຈະ​ບໍ່​ເຮັດ”; ຂໍ້​ກຳນົດ​ເລກທີ 101-QĐ/TW, ວັນ​ທີ 7-6-2012, ຂອງ​ຄະນະ​ເລຂາທິການ, “ກ່ຽວ​ກັບ​ຄວາມ​ຮັບຜິດຊອບ​ເປັນ​ແບບຢ່າງ​ ຂອງ​ພະນັກງານ, ສະມາຊິກ​ພັກ, ​ເປັນ​ຕົ້ນ​ແມ່ນ​ພະນັກງານ​ການ​ນຳ​ຫຼັກ​ແຫຼ່ງຂອງ​ຂັ້ນ​ຕ່າງໆ”; ກອງ​ປະຊຸມ​ສູນ​ກາງ​ພັກ ​ຄັ້ງ​ທີ 4 ສະ​ໄໝ​ທີ XI ​ແລະ ກອງ​ປະຊຸມ​ສູນ​ກາງ​ພັກ​ ຄັ້ງ​ທີ 4 ສະ​ໄໝ​ທີ XII ກ່ຽວ​ກັບ​ການ​ກໍ່ສ້າງ ປັບປຸງ​ພັກ; ຄຳ​ສັ່ງ​ເລດ​ທີ 50-CT/TW, ວັນ​ທີ 7-12-2015, ຂອງ​ກົມ​ການ​ເມືອງ, “ກ່ຽວ​ກັບ​ການເພີ່ມ​ທະວີ​ການ​ນຳພາ​ຂອງ​ພັກ ​ຕໍ່​ວຽກ​ງານຄົ້ນ​ເຜີຍ, ​ແກ້​ໄຂ​ກໍລະນີ ຄະ​ດີ​ສໍ້​ລາດ​ບັງ​ຫຼວງ, ກົດໝາຍ​ວ່າ​ດ້ວຍ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ກົດໝາຍ​ວ່າ​ດ້ວນ​ການ​ເຂົ້າ​ເຖິງ​ຂໍ້​ມູນ​ຂ່າວສານ, ກົດໝາຍ​ວ່າ​ດ້ວຍ​ພະນັກງານ ລັດຖະກອນ ​ແລະ ​ເອກະສານ​ນິຕິ​ກຳ ກົດໝາຍ​ອື່ນ.

​ເພື່ອ​ສ້າງ​ໃຫ້​ມີ​ບາດກ້າວຫັນປ່ຽນ​ຢ່າງ​ແຂງ​ແຮງ, ກີດ​ກັ້ນ​ ​ແລະ​ຍູ້​ຖອຍການ​ສໍ້​ລາດ​ບັງ​ຫຼວງ​ເປັນ​ແຕ່​ລະ​ກ້າວ, ປະກອບສ່ວນ​ປະຕິບັດ​ສຳ​ເລັດ ໜ້າ​ທີ່​ພັດທະນາ​ເສດຖະກິດ - ສັງຄົມ, ປັບປຸງ​ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ ​ແລະ ກໍ່ສ້າງ​ພັກຕາມ​ຈິດ​ໃຈ​ມະຕິ​ກອງ​ປະຊຸມ​ໃຫຍ່​ ຄັ້ງ​ທີ XII ຂອງ​ພັກ, ຕ້ອງ​ສືບ​ຕໍ່​ຊີ້​ນຳນຳພາການ​ຊາບ​ຊືມ, ປະຕິບັດ​ບັນດາ​ເປົ້າ​ໝາຍ ທັດສະນະ ​ແຜນ​ນະ​ໂຍບາຍ ໜ້າ​ທີ່ ວິທີ​ແກ້​ໄຂ ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຢ່າງ​​ເຂັ້ມ​ງວດ​ແລະ​ຄົບ​ຊຸດ ຕາມ​ມະຕິ​ຂອງ​ພັກ ​ແລະ ກົດໝາຍ​ຂອງ​ລັດ; ສຸມ​ໃສ່​ແກ້​ໄຂ​ຜ່ານ​ຜ່າ​ຂໍ້​ຈຳກັດ ຈຸດ​ອ່ອນ​ໃນ​ເວລາ​ທີ່​ຜ່ານ​ມາ, ພ້ອມ​ກັນ​ນັ້ນ​ກໍ່​ຊາບ​ຊືມ, ປະຕິບັດບາງ​ທັດສະນະ​ຈຸດ​ໜັກ ​ແລະ ໜ້າ​ທີ່, ວິທີ​ແກ້​ໄຂ​ຕົ້ນ​ຕໍ່​ດັ່ງ​ລຸ່ມ​ນີ້:

ກ່ຽວ​ກັບ​ທັດສະນະ, ຕ້ອງ​ຜ່ານ​ຜ່າ​ສອງ​ທ່າ​ອຽງ: ອ່ຽງຊ້າຍ, ຮ້ອນຮົນ ​ແລະ ອ່ຽງຂວາ, ຊັກຊ້າ, ບໍ່​ເອົາ​ຈິງ​ເອົາ​ຈັງ, ບໍ່​ເດັດຂາດ. ຕາມ​ນັ້ນ​, ຕ້ອງ​ກຳນົດ​ແຈ້ງ:

ທີ​ໜຶ່ງ, ການກັນ​ເປັນ​ຕົ້ນ​ຕໍ່, ພື້ນຖານ, ຍາວ​ນານ; ການຄົ້ນ​ເຜີຍ, ​ແກ້​ໄຂ​ເປັນ​ສຳຄັນ, ຮີບ​ດ່ວນ. ສົມທົບ​ຢ່າງ​ແໜ້ນ​ແຟ້ນລະຫວ່າງ ຕັ້ງໜ້າ​ກັນ, ​ເປັນ​ເຈົ້າ​ການ​ຄົ້ນ​ເຜີຍ ​ແລະ ​ເດັດດ່ຽວ​ແກ້​ໄຂ ​ຢ່າງ​ເຂັ້ມ​ງວດ, ທັນ​ການ ຕໍ່​ຜູ້​ທີ່​ມີ​ການ​ກຳ​ທຳ​ສໍ້​ລາດ​ບັງ​ຫຼວງ, ປິດ​ບັງ ປ່ອຍ​ມື​​ໃຫ້ການ​ສໍ້​ລາດ​ບັງ​ຫຼວງ, ​ແຊກ​ແຊງ, ຂັດຂວາງ​ການ​ຕໍ່ສູ້​ຕ້ານ​ການ​ສໍ້​ລາດ​ບັງ​ຫຼວງ; ບໍ່​ມີ​ເຂດ​ຫ້າມ, ​ເຂດ​ເປົ່າຫວ່າງ​, ບໍ່​ມີການ​ຍົກ​ເວັ້ນ, ບໍ່​ມີ​ສິດ​ພິ​ເສດ, ​ເຖິງ​ວ່າ​​ຈະເປັນ​​ໃຜກໍ່ຕາມ.

ທີ​ສອງ, ຕ້ອງ​ດຳ​ເນີນ​ຢ່າງ​ເດັດດ່ຽວ, ໜຽວ​ແໜ້ນ, ຕໍ່​ເນື່ອງ ດ້ວຍ​ບາດກ້າວ​ທີ່​ໜັກ​ແໜ້ນ, ຕັ້ງໜ້າ, ​ເປັນ​ເຈົ້າ​ການ ​ແລະ ມີ​ຈຸດ​ໜັດ​ໃຈກາງ. ຕິດ​ແໜ້ນ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ກັບ​ການ​ປະຕິບັດ​ການ​ປະຢັດ, ຕ້ານ​ການ​ຟຸ່ມ​ເຟືອຍ; ຕິດ​ແໜ້ນການກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ການຟຸ່ມ​ເຟືອຍ ກັບ​ການ​ກໍ່ສ້າງ ​ແລະ ປັບປຸງ​ພັກ; ​ເສີມ​ຂະຫຍາຍ​ກຳລັງ​ແຮງ​ສັງ​ລວມຂອງ​ທັງ​ລະບົບ​ການ​ເມືອງ ​ແລະ ທົ່ວ​ປວງ​ຊົນ​ ໃນ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ.

ທີ​ສາມ, ​ເດັດດ່ຽວ, ໜຽວ​ແໜ້ນ, ຮີບ​ດ່ວນ​ ໃນ​ການ​ກໍ່ສ້າງ​ກົນ​ໄກປ້ອງ​ກັນ ​ເພື່ອບໍ່​ສາມາດສໍ້​ລາດ​ບັງ​ຫຼວງ; ກົນ​ໄກບອກ​ເຕືອນ, ລົງ​ໂທດ ​ເພື່ອບໍ່​ກ້າ​ສໍ້​ລາດ​ບັງ​ຫຼວງ; ກົນ​ໄກ​ຮັບປະກັນ​ ເພື່ອບໍ່​ຕ້ອງການ​ສໍ້​ລາດ​ບັງ​ຫຼວງ.

ກ່ຽວ​ກັບ​ໜ້າ​ທີ່, ວິທີ​​ແກ້​ໄຂ, ຕ້ອງ​ປະຕິບັດ​ບັນດາ​ເນື້ອ​ໃນ​ລຸ່ມ​ນີ້​ໃຫ້​ໄດ້​ເປັນ​ຢ່າງ​ດີ:

ທີ​ໜຶ່ງ, ສືບ​ຕໍ່​ຍູ້​ແຮງ​ການ​ກໍ່ສ້າງ, ​ເພີ່ມ​ເຕີມ, ດັດ​ແປງ, ບູລະນະ​ ບັນດາ​ຂໍ້​ກຳນົດ​ຂອງ​ພັກ, ນະ​ໂຍບາຍ, ກົດໝາຍ​ຂອງ​ລັດ ​ເພື່ອ​ຮັບປະກັນ​ໃຫ້ວຽກ​ງານ ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ມີ​ຄວາມ​ສັກສິດ, ມີ​ປະສິດທິ​ຜົນ; ​ເປັນ​ຕົ້ນ​ແມ່ນ​ການ​ກໍ່ສ້າງ​ຂໍ້​ກຳນົດ​ກົດ​ລະບຽບ​ພາຍ​ໃນ​ຂອງ​ພັກ, ບັນດາ​ຫຼັກການ ​ແລະ ມາດຕະຖານ​ຄຸນສົມບັດ​ທີ່​ນຳ​ໃຊ້​ຕໍ່​ພະນັກງານ, ສະມາ​ຊິດ​ພັກ, ຜູ້​ເປັນ​ຫົວໜ້າ; ກໍ່ສ້າງ ​ແລະ ປັບປຸງ​ບູລະນະ​ ລະບຽບ​ກົດໝາຍ​ຄຸ້ມ​ຄອງ​ເສດຖະກິດ - ສັງຄົມ, ການຈັດ​ຕັ້ງ - ກົງ​ຈັກຂອງ​ລັດ, ລະບົບ​ການ​ເມືອງ ​ແລະ ລະບຽບ​ກົດໝາຍ​ກ່ຽວ​ກັບ ການ​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຕາມ “​ໂຄງການ​ກໍ່ສ້າງ​ປະ​ເທດ​ຊາດ​ໃນ​ສະ​ໄໝ​ຂ້າມ​ຜ່ານ​ຂຶ້ນ​ສູ່​ສັງຄົມ​ນິຍົມ” (ສະບັບ​ປັບປຸງ​ເພີ່ມ​ເຕີມ​ປີ 2011), ລັດຖະທຳ​ມະນູນ​ປີ 2013 ​ແລະ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ.

ຜູ້ນຳ​ໜ້າ​ອົງຄະ​ນະ​ພັກ, ອົງການ​ຈັດ​ຕັ້ງ​ພັກ, ບັນດາ​ອົງການ​ເສນາ​ທິການ​ຂອງ​ພັກ, ບັນດາ​ກະຊວງ, ຂະ​ແໜງ​ການ, ສຳນັກງານ​ອົງການ​ລັດ​ ຕ້ອງ​ຊີ້​ນຳ​ນຳພາ​ໂດຍ​ກົງ​ ຕໍ່​ການກວດຄືນ, ​ເພີ່ມ​ເຕີມ, ກໍ່ສ້າງ, ປະກາດ​ໃຊ້ພາຍ​ໃຕ້​ສິດ​ອຳນາດ ຫຼື​ໃຫ້​ຄຳ​ປຶກສາ, ສະ​ເໜີນຳ​ຜູ້​ມີ​ອຳນາດ​ ເພື່ອ​ປະກາດ​ໃຊ້ ຂໍ້​ກຳນົດ​ກົດລະບຽບທີ່​ຂຶ້ນ​ກັບ​ຄວາ​ຮັບ​ຜິດ​ຊອບ, ການ​ຄຸ້ມ​ຄອງ​ຂອງສຳນັກງານອົງການ, ການຈັດ​ຕັ້ງ, ກະຊວງ, ຂະ​ແໜງ​ການ, ທ້ອງ​ຖິ່ນ​ຂອງ​ຕົນ. ກ່ອນ​ອື່ນ​ໝົດ​ແມ່ນ ດັດ​ແປງ​ຢ່າງຮອບດ້ານ ກົດໝາຍ​ວ່າ​ດ້ວຍ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ປະການ​ໃຊ້​ໂດຍ​ໄວ ກົດໝາຍວ່າ​ດ້ວຍ​ການ​ປົກ​ປ້ອງ​ຄວາມ​ລັບ​ຂອງ​ລັດ; ປັບປຸງ​ບູລະນະ​ບັນດາ​ຂໍ້​ກຳນົດ​ຂອງ​ພັກ ​ແລະ ກົດໝາຍ​ຂອງ​ລັດ​ ກ່ຽວ​ກັບພະນັກງານ, ຂ້າລັດຖະການ, ລັດຖະ​ກອນ; ປັບປຸງ​ບູລະນະ​ບັນ​ດາຂໍ້​ກຳນົດ​ກົດໝາຍ ກ່ຽວ​ກັບ​ອາຍາ, ການ​ດຳ​ເນີນ​ຄະດີ​ອາຍາ, ຊັນນະສູດ​ຍຸຕິ​ທຳ, ກວດກາ, ສືບສວນ, ​ແກ້​ໄຂ​ການ​ກ່າວ​ປະນາມ​ໂທດ; ບັນດາ​ຂໍ້​ກຳນົດ​ຂອງ​ກົດໝາຍ​ກ່ຽວ​ກັບ​ການ​ຄຸ້ມ​ຄອງ​ເສດຖະກິດ - ສັງຄົມ, ​​ໂດຍ​ສະ​ເພາະ​ແມ່ນສຳລັບ​ບັນດາ​ຂົງ​ເຂດ​ທີ່​ອາດ​ຈະ​ເກີດການ​ສໍ້​ລາດ​ບັງ​ຫຼວງ​ໂດຍ​ງ່າຍ, ​ເຊັ່ນ ການ​ລົງທຶນ​ກໍ່ສ້າງ (ປະກອບ​ດ້ວຍ​ການ​ລົງທຶນ​ສາທາລະນະ ​ແລະ ການ​ລົງທຶນ​ຕາມ​ຮູບ​ການ BT, BOT); ການ​ຮັບ ການ​ຈ່າຍ​ງົບປະມານ; ການ​ຄຸ້ມ​ຄອງ ນຳ​ໃຊ້ຊັບ​ສິນ​ສາທາລະນະ; ການ​ຫັນ​ວິ​ສາ​ຫະກິດ​ຂອງ​ລັດ​ເປັນ​ຫຸ້ນ​ສ່ວນ; ການ​ຄຸ້ມ​ຄອງ ນຳ​ໃຊ້​ທີ່​ດິນ, ຊັບພະຍາກອນ​ແຮ່​ທາດ; ການ​ເງິນ, ທະນາຄານ, ພາສີ, ສຸລະກາກອນ; ລະບອບ, ບັນທັດຖານ, ມາຕະຖານ... ​ແລະ ບັນດາ​ເອກະສານ​ກົດໝາຍ​ທີ່​ກ່ຽວ​ພັນ​ເຖິງການກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ຮັບປະກັນ​ແໜ້ນ​ແຟ້ນ, ຄົບ​ຊຸດ, ​ເປັນ​ເອກະ​ພາບ, ມີ​ຄວາມ​ສັກສິດ, ມີ​ປະສິດທິ​ຜົນ.

ລະບຽບ​ກົດໝາຍ​ເວົ້າ​ລວມ ​ແລະ ລະບຽບ​ກົດໝາຍ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ​ເວົ້າ​ສະ​ເພາະ ພ້ອມ​ກັບມາ​ຕະຖານ​ດ້ານ​ຈັນ​ຍາ​ບັນ​ໃນ​ບັນດາ​ຂົງ​ເຂດ ​ແມ່ນ​ປັດ​ໃຈ​ຕົ້ນຕໍ, ພື້ນຖານ, ມີ​ຜົນ​ກະທົບ​ກີດ​ກັ້ນການ​ກະທຳ​ສໍ້​ລາດ​ບັງ​ຫຼວງ. ຕ້ອງ​ມີ​ກົນ​ໄກ​ກວດກາ​ຢ່າງ​ແໜ້ນ​ແຟ້ນ ຕໍ່​ການ​ກໍ່ສ້າງ​ກົນ​ໄກ, ນະ​ໂຍບາຍ ​ແລະ ກົດໝາຍ​ກ່ຽວ​ກັບ​ການ​ຄຸ້ມ​ຄອງ​ເສດຖະກິດ - ສັງຄົມ ​ເພື່ອ​ຈຳກັດ​ການ​ກະທົບ​ຫຍໍ້​ທໍ້​ຂອງ “ກຸ່ມ​ຜົນ​ປະ​ໂຫຍ​ດ”, “ເດີນ​ຫຼັງ​ບ້ານ”, “ຈິນ​ຕະນາການ​ຕາມ​​ໄລຍະປະຈຳການ”, ກີດ​ກັ້ນ​ໄພ​ອັນຕະລາຍ​ທີ່​​ໃຫ້ເກີດການ​ສໍ້​ລາດ​ບັງ​ຫຼວງ ​ແຕ່​ເມື່ອ​ສ້າງ ​ແລະ ປະຕິບັດ​ນະ​ໂຍບາຍ. ສ້າງ​ຕັ້ງ​ກົນ​ໄກ​ກວດກາ ​ແລະ ຕິດຕາມ​ກວດກາ ​ການປະຕິບັດ​ອຳນາດຂອງ​ຜູ້​ມີ​ຖານະ​ຕຳ​ແໜ່​ງ, ມີ​ອຳນາດ ຢ່າງ​ມີ​ປະສິດທິ​ຜົນ; ​ເດັດດ່ຽວ, ໜຽວ​ແໜ້ນ, ຮີບ​ດ່ວນ​ ໃນ​ການ​ສ້າງ​ຕັ້ງ “ກົນ​ໄກ​ກີດ​ກັັ້ນ ​ເພື່ອ​ບໍ່​ສາມາດ​ສໍ້​ລາດ​ບັງ​ຫຼວງ; ກົນ​ໄກ​ບອກ​ເຕືອນ, ລົງ​ໂທດ ​ເພື່ອ​ບໍ່​ກ້າ​ສໍ້​ລາດ​ບັງ​ຫຼວງ(3) ​ແລະ “ກົນ​ໄກ​ຮັບປະກັນ​ ເພື່ອ​ບໍ່​ຕ້ອງ​ສໍ້​ລາດ​ບັງ​ຫຼວງ(4).

ທີ​ສອງ, ​ເສີມ​ຂະຫຍາຍ, ຍົກ​ສູງ​ບົດບາດ, ຄວາມ​ຮັບຜິດຊອບ ​ແລະ ລັກສະ​ນະ​ນຳ​ໜ້າ, ​ເປັນ​ແບບຢ່າງ​ຂອງ​ອົງຄະ​ນະ​ພັກ, ອົງການ​ຈັດ​ຕັ້ງ​ພັກ ​ແລະ ພະນັກງານ, ສະມາຊິກ​ພັກ, ກ່ອນ​ອື່ນ​ໝົດ​ແມ່ນ ​ຂອງ​ຫົວໜ້າ​ອົງຄະ​ນະ​ພັກ, ອົງການ​ຈັດ​ຕັ້ງ​ພັກ, ອຳນາດ​ການ​ປົກຄອງ, ສຳນັກງານ​ອົງການ, ກົມ​ກອງ ໃນ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ.

ການຕໍ່ສູ້​ເພື່ອກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ແມ່ນ​ການ​ຕໍ່ສູ້​ຢູ່​ໃນ​ແຕ່​ລະ​ສຳນັກງານ ອົງການ ກົມ​ກອງ, ຢູ່​ໃນ​ກະ​ໂຕ​ແຕ່​ລະບຸ​ກຄົນ. ດັ່ງ​ນັ້ນ, ຕ້ອງ​ເສີມ​ຂະຫຍາຍ, ຍົກ​ສູງ​ບົດບາດ, ຄວາມ​ຮັບຜິດຊອບ ​ແລະ ລັກສະນະ​ນຳ​ໜ້າ, ​ເປັນ​ແບບຢ່າງ ​ຂອງອົງຄະ​ນະ​ພັກ, ອົງການ​ຈັດ​ຕັ້ງ​ພັກ ​ແລະ ພະນັກງານ, ສະມາຊິກ​ພັກ, ກ່ອນ​ອື່ນ​ໝົດ​ແມ່ນ​ຂອງ​ຫົວໜ້າ​ອົງຄະ​ນະ​ພັກ, ອົງການ​ຈັດ​ຕັ້ງ​ພັກ ​ແລະ ຫົວໜ້າສຳນັກງານ​ອົງການ, ກົມ​ກອງ, ທ້ອງ​ຖິ່ນ. ຜູ້​ເປັນ​ຫົວໜ້າ​ຕ້ອງ​ຍົກ​ສູງ​ຄວາມ​ຮັບຜິດຊອບ, ​ເປັນ​ແບບຢ່າງ, ນຳ​ໜ້າ, ຕັດສິນ​ໃຈ, ​ເດັດດ່ຽວ, ຊີ້​ນຳ​ນຳພາ​ໂດຍ​ກົງ​ ຕໍ່​ວຽກ​ງານກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ກ່ອນ​ອື່ນ​ໝົດ​ແມ່ນ​ໃນສຳນັກງານ​ອົງການ, ກົມ​ກອງ, ທ້ອງ​ຖິ່ນທີ່​ຕົນ​ຮັບຜິດຊອບ. ກໍ່ສ້າງ​ຂໍ້​ກຳນົດ​ກ່ຽວ​ກັບບັນ​ທັດ​ຖານ​ການ​ປະ​ເມີນປະສິດທິ​ຜົນ​ ຂອງ​ວຽກ​ງານ​ກີດ​ກັ້ນ, ຄົ້ນ​ເຜີຍ, ​ແກ້​ໄຂການ​ສໍ້​ລາດ​ບັງ​ຫຼວງ ​ແລະ ປັບປຸງ​ບູລະນະຂໍ້​ກຳນົດ​ການ​ລົງ​ໂທດ​ຕໍ່​ຜູ້​ເປັນ​ຫົວໜ້າ​ ເມື່ອ​ໃຫ້​ເກີດ​ການ​ສໍ້​ລາດ​ບັງ​ຫຼວງ. ສືບ​ຕໍ່ປັບປຸງ​ບູລະນະ ​ແລະ ປະຕິບັດ​ຢ່າງ​ເຂັ້ມ​ງວດ ຂໍ້​ກຳນົດ​ກ່ຽວ​ກັບ​ຄວາມ​ຮັບຜິດຊອບ​ເປັນ​ແບບຢ່າງຂອງ​ພະນັກງານ, ສະມາຊິກ​ພັກ, ຂໍ້​ກຳນົດ​ກ່ຽວ​ກັບ​ສິ່ງ​ທີ່​ສະມາຊິກ​ພັກ​ຈະ​ບໍ່​ເຮັດ. ພະນັກງານ, ສະມາຊິກ​ພັກ, ຂ້າລັດຖະການ, ລັດຖະ​ກອນ ຕ້ອງ​ເປັນ​ແບບຢ່າງ​ໃນ​ການ​ປະຕິບັດ​ບັນດາ​ຂໍ້​ກຳນົດ​ຂອງ​ພັກ ​ແລະ​ລັດ ​ກ່ຽວ​ກັບການກັນ​ແລະ​ຕ້ານການ​ສໍ້​ລາດ​ບັງ​ຫຼວງ; ສະມາຊິກ​ພັກ​ຕ້ອງ​ເປັນ​ແບບຢ່າງ​ກວ່າ​ມະຫາຊົນ, ພະນັກງານ​ຕ້ອງ​ເປັນ​ແບບຢ່າງ​ກວ່າຄົນ​ງານ, ພະນັກງານ​ມີ​ຕຳ​ແໜ່​ງຍິ່ງ​ສູງ ຍິ່ງ​ຕ້ອງ​ເປັນ​ແບບຢ່າງ. ​ແກ້​ໄຂ​ລົງ​ໂທດ​ບັນດາ​ຜູ້​ທີ່​ມີ​ການ​ກະທຳ​ລະ​ເມີດ​ຂໍ້​ກຳນົດ​ກ່ຽວ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຢ່າງ​ທັນ​ການ, ​ເຂັ້ມ​ງວດ.

ທີ​ສາມ, ​ເພີ່ມ​ທະວີ​ການ​ຄຸ້ມ​ຄອງ, ຕິດຕາມ​ກວດກາ​ພະນັກງານ, ສະມາຊິກ​ພັກ​ ຢ່າງ​ແໜ້ນ​ແຟ້ນ; ປັບປຸງ​ບູລະນະ, ປະຕິບັດ​ບັນດາ​ຂໍ້​ກຳນົດ​ກ່ຽວ​ກັບ​ວຽກ​ງານ​ຈັດ​ຕັ້ງ, ພະນັກງານ​ ຮັບ​ໃຊ້​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ.

ຮີບ​ເຮ່ງ​ກວດຄືນ, ​ເພີ່ມ​ເຕີມ, ​ແກ້​ໄຂ​ຊ່ອງ​ຫວ່າງ, ຂໍ້​ຄົງຄ້າງ​ ໃນ​ການຮັບ​ຜູ້ສະໝັກ​ງານ, ອົບຮົມ​ກໍ່ສ້າງ, ວາງ​ແຜນ​ກຳນົດ, ຜັ​ດປ່ຽນ, ​ແຕ່ງ​ຕັ້ງ, ຄຸ້ມ​ຄອວພະນັກງານ, ສະມາຊິກ​ພັກ. ອົງຄະ​ນະ​ພັກ, ອົງການຈັດ​ຕັ້ງ​ພັກ, ຫົວໜ້າ​ສຳນັກງານ​ອົງການ, ກົມ​ກອງ ຕ້ອງ​ເພີ່ມ​ທະວີ​ການ​ຄຸ້ມ​ຄອງ, ຕິດຕາມ​ກວດກາ​ພະນັກງານ, ສະມາຊິກ​ພັກ; ​ເພີ່ມ​ອຳນາດ​ຕັດສິນ ​ແລະ ຄວາມ​ຮັບຜິດຊອບ​ຂອງ​ຜູ້​ເປັນ​ຫົວໜ້າ​ ໃນ​ການ​ໃຫ້ຢຸດວຽກງານ​ຊົ່ວຄາວ ຕໍ່ພະນັກງານ​ພາຍ​ໄຕ້​ອຳນາດ ​ເພື່ອສຳ​ຫຼວດ, ພິຈາລະນາ, ສະຫລຸບ ​ເມື່ອ​ມີ​ຮ່ອງຮອຍ​ຂອງ​ການລະ​ເມີດ.

ກຳນົດ ​ແລະ ປະຕິບັດ​ການ​ແກ້​ໄຂ, ຍົກຍ້າຍ, ປົດ​ຕຳ​ແໜ່​ງ, ປ່ຽນ​ແທນ ຕໍ່​ພະນັກງານ​ນຳພາ, ຄຸ້ມ​ຄອງ​ທີ່​ມີ​ປະກົດການ​ສໍ້​ລາດ​ບັງ​ຫຼວງ ຊຶ່ງ​ເປັນ​ຜູ້​ທີ່​ຖືກ​ຫາງ​ສຽງ​ຕຳ​ໜິວິຈານ, ​ເຮັດ​ວຽກ​ບໍ່​ມີ​ປະສິດທິ​ຜົນ, ບໍ່​ສຳ​ເລັດ​ໜ້າ​ທີ່​ການ​ງານ, ຂາດ​ຄວາມ​ສາມາດ, ຄຸນສົມບັດ​ສິນ​ທຳ​ເສື່ອ​ມ​ໂຊມ, ບໍ່​ໄດ້​ຮັບ​ຄວາມ​ເຊື່ອ​ຖື. ກຳນົດ​ຢ່າງ​ລະອຽດ ​ແລະ ປະຕິບັດ​ຢ່າງ​ມີ​ປະສິດທິ​ຜົນ ​ແຜນ​ນະ​ໂຍບາຍສັບ​ຊ້ອນ​ຕຳ​ແໜ່​ງພະນັກງານ​ການ​ນຳ​ຂັ້ນແຂວງ, ຂັ້ນ​​ເມືອງຈຳນວນ​ໜຶ່ງ ​ທີ່​ບໍ່​ແມ່ນ​ຄົນ​ທ້ອງ​ຖິ່ນ; ບໍ່​ສັບ​ຊ້ອນ​ບັນ​ດາ​ຜູ້​ທີ່​ມີຄວາມ​ພົວພັນ​ຄອບຄົວ​​ໃຫ້​ພ້ອມ​ກັນເຮັດ​ວຽກ​ງານ​ທີ່​ອາດ​ຈະ​ເກີດການ​ສໍ້​ລາດ​ບັງ​ຫຼວງ​ໂດຍ​ງ່າຍ.

ຮັດ​ແໜ້ນ​ລະບຽບ​ວິ​ໄນ​ໃນ​ພັກ ​ແລະ ​ໃນ​ກົງຈັກ​ແຫ່ງ​ລັດ; ຕ້ອງ​ມີ​ຮູບ​ການ​ແກ້​ໄຂ​ຢ່າງ​ທັນ​ການ, ​ເຂັ້ມ​ງວດ, ​ເປີດ​ເຜີຍ ຕໍ່ພະນັກງານ, ສະມາຊິກ​ພັກ, ຂ້າ​ລັດຖະການ, ລັດຖະກອນ​ ທີ່​ລະ​ເມີດ​ວິ​ໄນ. ກວດຄືນ, ປັບປຸງ​ຂໍ້​ກຳນົດ​ຂອງ​ພັກ ​ແລະ ລັດ​ ກ່ຽວ​ກັບການ​ແກ້​ໄຂ ປະຕິບັດ​ວິ​ໄນ, ຮັບປະກັນ​ຄວາມ​ເປັນ​ເອກະ​ພາບ, ຄົບ​ຊຸດ ລະຫວ່າງລະບຽບ​ວິ​ໄນ​ຂອງ​ພັກ ​ແລະ ລະບຽບ​ວິ​ໄນ​ການ​ບໍລິຫານ​ຂອງ​ພັກ.

ຍູ້​ແຮງການ​ປະຕິ​ຮູບ​ການ​ບໍລິຫານ, ​ເດັດດ່ຽວ​ປະຕິບັດ​ຢ່າງ​ມີ​ປະສິດທິ​ຜົນ ການຈັດ​ວາງ​ກົງຈັກ​ຄືນ​ໃໝ່, ຫລຸດຜ່ອນ​ການ​ບັນຈຸ​ບຸກຄະລາ​ກອນ ຕິດ​ກັບ​ການ​ປະຕິ​ຮູບ​ລະບອບ​ການ​ງານ, ຈັດ​ວາງ​ຄືນ​ໃໝ່​ ຖັນ​ແຖວພະນັກງານ, ຂ້າລັດຖະການ, ລັດຖະ​ກອນ ​ແລະ ປ່ຽນ​ແປງ​ໃໝ່​ນະ​ໂຍບາຍ​ເງິນ​ເດືອນ. ປ່ຽນ​ແປງ​ໃໝ່​ກົນ​ໄກ​ເຄື່ອນ​ໄຫວ​ຂອງ​ບັນດາ​ໜ່ວຍ​ທຸລະ​ກິດ​ສາທາລະນະ.

ທີ່​ສີ່, ປະຕິບັດ​ຢ່າງ​ເຂັ້ມ​ງວດ ບັນດາ​ຂໍ້​ກຳນົດ​ກ່ຽວ​ກັບ​ການ​ເປີດ​ເຜີຍ, ​ໂປ່​ງ​​ໃສ ​ແລະ ຄວາມ​ຮັບຜິດຊອບ​ອະທິ​ບາຍ ​ໃນ​ການ​ເຄື່ອນ​ໄຫ​ວຂອງ​ບັນດາ​ສຳນັກງານ ອົງການ ກົມ​ກອງ; ຄວບ​ຄຸມ​ຢ່າງ​ມີ​ປະສິດທິ​ຜົນ​ຕໍ່​ຊັບ​ສິນ, ລາຍ​ໄດ້​ຂອງ​ຜູ້​ມີ​ຕຳ​ແໜ່​ງ, ມີ​ສິດ​ອຳນາດ, ກ່ອມ​ອື່ນ​ແມ່ນ​ພະນັກງານ​ນຳພາ, ຄຸ້ມ​ຄອງ.

ການ​ເປີດ​ເຜີຍ, ​ໂປ່​ງ​​ໃສ, ຄວາມ​ຮັບຜິດຊອບ​ອະທິ​ບາຍ ​ເປັນ​ເງື່ອນ​ໄຂ​ທຳ​ອິດ​ເພື່ອ​ຄວບ​ຄຸມ​ອຳນາດ. ການ​ເປີດ​ເຜີຍ, ​ໂປ່​ງ​​ໃສ, ຄວາມ​ຮັບຜິດຊອບ​ອະທິ​ບາຍຍິ່ງ​ດີ​ ກໍ່​ຈະ​ຍິ່ງ​ສ້າງ​ເງື່ອນ​ໄຂ​ໃຫ້​ບັນດາ​ເຈົ້າພາບ ດຳ​ເນີນ​ການ​ຄວບ​ຄຸມ​ວຽກ​ງານກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຢ່າງ​ມີ​ປະສິດທິ​ຜົນ, ບໍ່​ມີ “​ເຂດ​ມືດ”, “​ເຂດ​ເປົ່າ​ຫວ່າງ”, “​ເຂດ​ຫ້າມ” ​ໃນ​ການ​ກັນ​ແລະຕ້ານ​ການ​ສໍ້​ລາດ​ບັງ​ຫຼວງ. ສືບ​ຕໍ່​ປັບປຸງ​ບູລະນະ​ບັນດາ​ຂໍ້​ກຳນົດ​ກ່ຽວ​ກັບ​ການ​ເປີດ​ເຜີຍ, ​ໂປ່​ງ​ໃສ ​ໃນ​ການ​ເຄື່ອນ​ໄຫວ​ຂອງ​ບັນດາ​ສຳນັກງານ​ອົງການ, ກົມ​ກອງ ​ແລະ ບັນດາ​ມາດ​ຕະການຮັບປະກັນ​ ເພື່ອ​ໃຫ້ພົນລະ​ເມືອງ​ປະຕິບັດ​ສິດ​ເຂົ້າ​ເຖິງຂໍ້​ມູນ​ຂ່າວສານ ຕາມ​ຂໍ້​ກຳນົດ​ຂອງ​ກົດໝາຍ.

ການຄວບ​ຄຸມ​ຊັບ​ສິນ, ລາຍ​ໄດ້​ຂອງ​ຜູ້​ມີ​ຕຳ​ແໜ່​ງ, ມີ​ສິດ​ອຳນາດ, ກ່ອນ​ອື່ນໝົດ​ແມ່ນ​ພະນັກງານ​ນຳພາ, ຄຸ້ມ​ຄອງ, ຍິ່ງ​ແໜ້ນ​ແຟ້ນ​ໃດ, ​ປະສິດທິ​ຜົນ​ຂອງ​ການ​ກີດ​ກັ້ນການ​ສໍ້​ລາດ​ບັງ​ຫຼວງ ກໍ່​ຍິ່ງ​ສູງ​ທໍ່​ນັ້ນ. ດັ່ງ​ນັ້ນ, ຕ້ອງ​ສືບ​ຕໍ່​ປັບປຸງ​ບູລະນະ​ຂໍ້​ກຳນົດ​ກ່ຽວ​ກັບ​ການ​ຄວບ​ຄຸມ​ຊັບ​ສິນ, ລາຍ​ໄດ້​ຂອງ​ຜູ້​ມີ​ຕຳ​ແໜ່​ງ, ມີ​ອຳນາດ, ​ເປັນ​ຕົ້ນ​ແມ່ນ​ບັນດາ​ເນື້ອ​ໃນ​ກ່ຽວ​ກັບ​ການ​ເປີດ​ເຜີຍ, ຄຸ້ມ​ຄອງ, ກວດກາ, ຕິດຕາມ​ກວດກາ, ຢືນຢັນ​ບັນຊີ​ລາຍການ; ຄວາມ​ຮັບຜິດຊອບ​ອະທິບາຍ, ຂໍ້​ກຳນົດ​ການ​ແກ້​ໄຂ​ຕໍ່​ການລະ​ເມີດ​ໃນ​ການ​ຂຶ້ນ​ບັນຊີ​ລາຍການ ​ແລະ ​ແກ້​ໄຂ​ຕໍ່​ຊັບ​ສິນ​ທີ່​ເພີ່ມ​ຂຶ້ນ​ແຕ່​ບໍ່​ອະທິບາຍ​ໄດ້​ຢ່າງ​ສົມ​ເຫດ​ສົມ​ຜົນ. ປັບປຸງບູລະນະ​ຂໍ້​ກຳນົດ​ ​ແລະ ລະບົບ​ໂຄງ​ສ້າງ​ພື້ນຖານ ​ເພື່ອ​ຫັນປ່ຽນ​ຢ່າງ​ແຂງ​ແຮງ ​ແລະ ກ້າວ​ໄປ​ເຖິງ​ການ​ຊຳລະ​ໂດຍ​ບໍ່​ໃຊ້​ເງິ​ນສົດ.

ທີ​ຫ້າ, ສຸມ​ໃສ່​ຊີ້​ນຳ​ນຳພາ​ການ​ຄົ້ນ​ເຜີຍ, ​ແກ້​ໄຂ​ບັນດາ​ກໍລະນີ ຄະດີການ​ສໍ້​ລາດ​ບັງ​ຫຼວງ, ຍົກ​ສູງ​ປະສິດທິ​ຜົນ​ໃນ​ການ​ເກັບ​ທ້ອນ​ຊັບ​ສິນ​ຈາກການ​ສໍ້​ລາດ​ບັງ​ຫຼວງ.

ບັນດາ​ອົງການ​ພາລະ​ບົດບາດ ຕ້ອງ​ມີ​ວິທີ​ແກ້​ທີ່​ສອດຄ່ອງ, ສະດວກ, ປອດ​ໄພ ​ເພື່ອ​ສົ່ງ​ເສີມ​ປະຊາຊົນຄົ້ນເຜີຍ, ສ່ອງ​ແສງ, ບອກ​ໂທດການ​ສໍ້​ລາດ​ບັງ​ຫຼວງ. ສືບ​ຕໍ່​ຍົກ​ສູງ​ຄວາມ​ສັກສິດ, ປະສິດທິ​ຜົນ​ ຂອງ​ວຽກ​ງານກວດກາ, ຕິດຕາມ​ກວດກາ, ກວດ​ສອບ, ກວດ​ບັນຊີ, ສືບສວນ, ຟ້ອງ​ສານ, ພິພາກສາ ​ແລະ ປະຕິບັດ​ຄຳ​ຕັດສິນ​ຂອງ​ສານ. ​ເມື່ອ​ເກີດການ​ສໍ້​ລາດ​ບັງ​ຫຼວງ ​ແມ່ນ​ຕ້ອງ​ແກ້​ໄຂ​ຢ່າງ​ເດັດດ່ຽວ, ​ເຂັ້ມ​ງວດ, ທັນ​ການ, ຖືກຕ້ອງ​ຕາມ​ຂໍ້​ກຳນົດ​ຂອງ​ພັກ ​ແລະ ກົດໝາຍ​ຂອງ​ລັດ, ບໍ່​ມີ​ເຂດ​ຫ້າມ, ບໍ່​ມີ​ອະພິສິດ, ບໍ່​ມີ​ຂໍ້​ຍົກ​ເວັ້ນ, ມີຄວາມ​ສະ​ເໝີ​ພາບຕໍ່ໜ້າ​ກົດໝາຍ, ບໍ່​ຖືກ​ການ​ກະທົບຢ່າງ​ບໍ່​ຖືກຕ້ອງ​ ຂອງ​ບໍ່​ວ່າ​ບຸກຄົນ​ໃດ, ອົງການ​ຈັດ​ຕັ້ງ​ໃດ. ຂະ​ບວນວິວັດ​ການ​ຄົ້ນ​ເຜີຍ, ສືບສວນ, ​ແກ້​ໄຂການ​ສໍ້​ລາດ​ບັງ​ຫຼວງ ຕ້ອງ “ຕັ້ງໜ້າ, ຮີບ​​ເຮ່ງ; ສືບສວນ​ທຳ​ຄວາມ​ກະຈ່າງ​ແຈ້ງ​ຮອດ​ບ່ອນໃດ ​ແມ່ນ​ແກ້​ໄຂ​ຮອດ​ບ່ອນນັ້ນ; ບໍ່​ຈຳ​ແນ​ກວ່າ​ຜູ້​ມີ​ການ​ກະທຳ​ສໍ້​ລາດ​ບັງ​ຫຼວງນັ້ນ​ແມ່ນ​ໃຜ, ​ເມື່ອ​ມີ​ຮ່ອງຮອຍ​ຫຼັກ​ຖານ​ທາງ​​ອາຍາ ແມ່ນ​ຕ້ອງ​ເລີ່​ມຟ້ອງ​ຮ້ອງ​ ສືບສວນ ​ແລະ ​ເມື່ອ​ພົບ​ຜູ້​ກະທຳ​ຜິດ​ແມ່ນ​ຕ້ອງຟ້ອງ​ສານ, ພິພາກສາ”(5); ກໍລະນີ​ທີ່ຍັງ​ບໍ່​ທັນ​ເຖິງ​ລະດັບຄະດີ​ອາຍາ ​ແມ່ນ​ຕ້ອງປະຕິບັດ​ວິ​ໄນ​ຢ່າງ​ເຂັ້ມ​ງວດ​ຕາມ​ການ​ກຳນົດ​ຂອງ​ພັກ ​ແລະ ກົດໝາຍ​ຂອງ​ລັດ. ​ແກ້​ໄຂ​ລົງ​ໂທດ​ຢ່າງ​ເຂັ້ມ​ງວດ, ຖືກ​ກົດໝາຍ ຕໍ່​ທັງ​ຜູ້​   ປິດບັງ, ປ່ອຍ​ມືໃຫ້ການ​ສໍ້​ລາດ​ບັງ​ຫຼວງ ​ແລະ ຜູ້​ແຊກ​ແຊງ, ຂັດຂວາງ​ການ​ຕໍ່ສູ້​ຕ້ານການ​ສໍ້​ລາດ​ບັງ​ຫຼວງ. ​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ຊອກ​ຫາ, ປະຕິບັດ​ບັນດາ​ມາ​ຕະການ​ໄລ່​ລຽງຊັບ​ສິນ, ຍຶດຊັບ​ສິນ​ຊົ່ວຄາວ, ປິດ​ລ້ອມ​ບັນຊີທະນາຄານ ​ແລະ ​ແກ້​ໄຂ​ຊັບ​ສິນ​ຈາກ​ການ​ສໍ້​ລາດ​ບັງ​ຫຼວງ ​ໃນ​ຂະ​ບວນວິວັດ​ການ​ກວດກາ, ກວດ​ບັນຊີ, ສືບສວນ, ຟ້ອງ​ສານ, ພິພາກສາ, ປະຕິບັດ​ຄຳ​ຕັດສິນ​ຄະດີ. ຍູ້​ແຮງ​ວິວັດ​ການ​ສືບສວນ, ຟ້ອງ​ສານ, ພິພາກສາ​ບັນດາ​ຄະດີ​ສໍ້​ລາດ​ບັງ​ຫຼວງທີ່​ສັບສົນ, ຮ້າຍ​ແຮງ​ພິ​ເສດ; ດຳ​ເນີນ​ການ​ກວດກາ, ສືບສວນ ​ແລະ ​ເດັດດ່ຽວ​ແກ້​ໄຂ​ຢ່າງ​ເຂັ້ມ​ງວດ ຕໍ່ບັນດາ​ອົງການ​ຈັດ​ຕັ້ງ, ບຸກຄົນ​ທີ່​ມີ​ຄວາມ​ຜິດ​ ກ່ຽວ​ພັນ​ເຖິງບັນດາ​ບໍລິສັດ ໂຄງການ​ຖືກ​ຂາດ​ທຶນ​ແກ່ຍາວ, ກໍ່​ຄວາມ​ຟຸມ​ເຟືອຍ​ຫຼາຍ ​ທີ່​ພວມ​ໄດ້​ຮັບ​ຄວາມ​ເອົາ​ໃຈ​ໃສ່​ຂອງ​ຫາງ​ສຽງ​ສັງຄົມ.

ສືບ​ຕໍ່​ປັບປຸງ​ບູລະນະ​ອົງການ​ສືບສວນ, ​ໄອ​ຍະ​ການ, ສານ ຕາມ​ການ​ກຳນົດ​ໃໝ່​ຂອງ​ກົດໝາຍ; ປັບ​ປຸງບູລະນະ​ການຈັດ​ຕັ້ງ, ກົງຈັກ, ຫັນ​ສິດ​ອຳນາດ ຄວາມ​ຮັບຜິດຊອບ​ເປັນ​ລະອຽດ​ກວ່າ​ອີກ, ຍົກ​ສູງ​ປະສິດທິ​ຜົນ​ການ​ເຄື່ອນ​ໄຫວ​ຂອງ​ຄະນະ​ຊີ້​ນຳ​ສູນ​ກາງ​ກ່ຽວ​ກັບການກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ຄະນະ​ກຳມະການ​ກວດກາ​ພັກ, ຄະນະກິດຈະການ​ພາຍ​​ໃນ, ອົງການ​ກວດກາ​ລັດຖະບານ, ອົງການ​ກວດ​ສອບ​ບັນຊີ​ແຫ່ງ​ລັດ ​ໃນ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ; ມີ​ຂໍ້​ກຳ​ນົດ​ເພື່ອ​ກີດ​ກັ້ນ​ຢ່າງ​ມີ​ປະສິດທິ​ຜົນ ຕໍ່ການ​ກະທົບ​ທີ່​ຜິດ​ກັບ​ຂໍ້​ກຳນົດ​ຂອງ​ພັກ ​ແລະ ກົດໝາຍ​ຂອງ​ລັດ ກ່ຽວ​ກັບ​ການ​ເຄື່ອນ​ໄຫວ​ຂອງ​ອົງການ​ເຫຼົ່າ​ນີ້. ປ່ຽນ​ແປງ​ໃໝ່​ແບບ​ວິທີ​ການ​ເຄື່ອນ​ໄຫວ, ປັບປຸງ, ​ເພີ່ມ​ເຕີມ, ຍົກ​ສູງ​ຄຸນ​ນະພາ​ບ ຂອງ​ຖັນ​ແຖວ​ພະນັກງານ, ​ເພີ່ມ​ທະວີພາຫະນະ ​ເຄື່ອງມື​ເຮັດ​ວຽກ ຂອງ​ບັນດາສຳນັກ​ງານ​ອົງການ, ກົມ​ກອງ​ທີ່ຮັບຜິດຊອບ​ສະ​ເພາະ​ການ​ຕໍ່ສູ້​ຕ້ານການ​ສໍ້​ລາດ​ບັງ​ຫຼວງ. ​ໃນ​ຍາວ​ນາມ, ຕ້ອງ​ຄົ້ນຄວ້າ​ການ​ກໍ່ສ້າງ​ຕົວແບບອົງການ​ສະ​ເພາະ​ກິດ​ການ​ຕໍ່ສູ້​ຕ້ານການ​ສໍ້​ລາດ​ບັງ​ຫຼວງ ຕາມ​ທິດ​ເພີ່ມ​ສິດ​ອຳນາດ, ຄວາມ​ຮັບຜິດຊອບ ​ແລະ ລັກສະນະ​ເປັນ​ເອກະລາດ​ທຽບ​ຖານ ​ໃນ​ການ​ປະຕິບັດ​ໜ້າ​ທີ່.

ທີ​ຫົກ, ​ເພີ່ມ​ທະວີ ​ແລະ ຍົກ​ສູງ​ປະສິດທິ​ຜົນ​ຂອງ​ວຽກ​ງານ​ກວດກກາ, ຕິດຕາມ​ກວດກາ, ຄວບ​ຄຸມ​ອຳນາດ ​ແລະ ກໍ່ສ້າງ​ວັດທະນະທຳ​ປະຢັດ, ບໍ່​ສໍ້​ລາດ​ບັງ​ຫຼວງ ​ເພື່ອ​ກີດ​ກັ້ນ​ຕັ້ງ​ແຕ່​ຕົ້ນ​ ສາ​ເຫດ​ທີ່​ພາ​ໃຫ້​ເກີດການ​ສໍ້​ລາດ​ບັງ​ຫຼວງ.

ກວດກາ, ຕິດຕາມ​ກວດກາ​ຢ່າງ​ເປັນ​ປະຈຳ​ຕໍ່​ວຽກ​ງານຄົ້ນ​ເຜີຍ, ​ແກ້​ໄຂ​ການ​ສໍ້​ລາດ​ບັງ​ຫຼວງ ຂອງ​ບັນດາ​ສຳນັກງານ​ອົງການ ໜ່ວຍງານສະ​ເພາະ​ກິດ ​ແລະ ຫົວໜ້າ​ຂອງ​ສຳນັກງານ, ​ອົງການຈັດ​ຕັ້ງ, ໜ່ວຍ​ງານ​ໃນການກັນ​ແລະ​ຕ້ານການ​ສໍ້​ລາດ​ບັງ​ຫຼວງ.

​ເສີມ​ຂະຫຍາຍ​ບົດບາດ, ຄວາມ​ຮັບຜິດຊອບ ​ຂອງ​ບັນດາ​ອົງການ​ໂດຍ​ປະຊາຊົນ​ເລືອກ​ຕັ້ງ, ​ແນວ​ໂຮມ​ປະ​ເທດ​ຊາດ, ບັນດາ​ອົງການ​ຈັດ​ຕັ້ງ​ການ​ເມືອງ - ສັງຄົມ, ປະຊາຊົນ ​ແລະ ອົງການ​ສື່ສານ, ໜັງສືພິມ ​ໃນ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ​ໂດຍ​ສະ​ເພາະ​ແມ່ນ ​ການ​ຕິດຕາມ​ກວດກາ​ຕໍ່​ການປະຕິບັດ​ໜ້າ​ທີ​ຮັບຜິດຊອບ, ສິດ​ຂອບ​ເຂດ ຂອງ​ບັນດາ​ອົງການ ​ແລະ ຜູ້​ມີ​ຄວາມ​ຮັບຜິດຊອບ, ມີ​ອຳນາດ ​ໃນ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ​ເວົ້າ​ລວມ ​ແລະ ​ໃນ​ການ​ແກ້​ໄຂ​ບັນດາ​ກໍລະນີ ຄະດີ​ສໍ້​ລາດ​ບັງ​ຫຼວງ​ເວົ້າ​ສະ​ເພາະ; ພ້ອນກັນ​ນັ້ນ, ລົງ​ໂທດຢ່າງ​ຮຸນ​ແຮງ​ຕໍ່​ການ​ກະທຳ​ສວຍ​ໃຊ້​ການ​ຕ້ານການ​ສໍ້​ລາດ​ບັງ​ຫຼວງ ​ເພື່ອ​ໃສ່​ຮ້າຍ, ກ່າວ​ຫາ​ຜິດ​ກັບ​ຄວາມ​ຈິງ, ປອງຮ້າຍຜູ້​ທີ່ຕໍ່ສູ້​ຕ້ານການ​ສໍ້​ລາດ​ບັງ​ຫຼວງ.

ກໍ່ສ້າງ​ແຜນ​ງານ​ເພີ່ມ​ທະວີ​ການ​ຕິດ​ຕາມ​ກວດກາ, ຄວບ​ຄຸມ​ອຳນາດ; ສ້າງ​ຕັ້ງ​ກົນ​ໄກ​ຕິດຕາມ​ກວດກາ, ຄວບ​ຄຸມການ​ປະຕິບັດ​ອຳນາດຂອງ​ຜູ້​ມີ​ຕຳ​ແໜ່​ງ, ມີ​ອຳນາດ ທີ່​ມີ​ຄວາມ​ສັກສິດ, ມີ​ປະສິດທິ​ຜົນ​ຢ່າງ​ແທ້​ຈິງ ​ເພື່ອ​ກີດ​ກັ້ນການ​ສໍ້​ລາດ​ບັງ​ຫຼວງ.

​ເພີ່ມ​ທະວີ​ການ​ໂຄສະນາ, ອົບ​ຮົບ​ສຶກສາ, ຍົກ​ສູງ​ຄວາມ​ຮັບ​ຮູ້​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ; ກໍ່ສ້າງ​ວັດທະນະທຳ​ປະຢັດ, ບໍ່​ສໍ້​ລາດ​ບັງ​ຫຼວງ, ກ່ອນ​ອື່ໝົດ​ແມ່ນ​ໃນພະນັກງານ, ສະມາຊິກ​ພັກ, ຂ້າລັດຖະການ, ລັດຖະ​ກອນ. ກໍ່ສ້າງ​ວັດທະນະທຳ​ແມ່ນ​ກໍ່ສ້າງ​ຄົນ; ວັດທະນະທຳ​ປະຢັດ, ບໍ່​ສໍ້​ລາດ​ບັງ​ຫຼວງ ​ແມ່ນ​ການ​ປະພຶດ​ແບບ​ມີ​ວັດທະນະທຳ​ຂອງ​ຄົນ​ຕໍ່​ກັບ​ບັນຫາ​ປະຢັດ, ຕ້ານ​ການ​ຟຸມ​ເຟືອຍ, ການ​ສໍ້​ລາດ​ບັງ​ຫຼວງ. ດັ່ງ​ນັ້ນ, ກໍ່ສ້າງ​ວັດທະນະທຳ​ປະຢັດ, ບໍ່​ສໍ້​ລາດ​ບັງ​ຫຼວງ ​ຕ້ອງ​ໄດ້​ປະຕິບັດ​ຢ່າງ​ຂຸ້ນຂ້ຽວ, ໝັ້ນ​ໜຽວ, ​ເປັນ​ປະຈຳ, ຍາວ​ນານ. ກ່ອນ​ອື່ນ​ໝົດ, ຕ້ອງ​ກໍ່ສ້າງ​ສະຕິ​ຕື່ນ​ຕົວ​ສະໝັກ​ໃຈປະຕິບັດ​ຢ່າງ​ເຂັ້ມ​ງວດ ບັນດາ​ຂໍ້​ກຳນົດ​ຂອງ​ພັກ ​ແລະ ກົດໝາຍ​ຂອງ​ລັດ ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ. ພ້ອມ​ກັນນັ້ນ, ​ເປັນ​ເຈົ້າ​ການ​ແກ້​ໄຂ​ໃນ​ເມື່​ອມີ​ຄວາມ​ຂັດ​ແຍ່ງ​ທາງ​ດ້ານ​ຜົນ​ປະ​ໂຫຍ​ດ; ກໍ່ສ້າງ, ປະຕິບັດ​ເປັນ​ຢ່າງ​ດີ ຫຼັກການ​ປະພຶດ, ຫຼັກ​ຈັນ​ຍາ​ບັນ​ວິຊາ​ຊີບ; ຕຳ​ໜິວິພາກ, ກ່າວ​ປະນາມ, ຕໍ່ສູ້​ກັບການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ; ​ໂຄສະນາ, ອົບຮົມ​ສຶກສາ ກ່ຽວ​ກັບຄວາມ​ສຳຄັນ​ຂອງ​ຄວາມ​ສັດ​ທ່ຽງ ກຽດ​ສັກ​ສີ, ຮູ້​ອາຍ​ໃຈ​ເມື່ອຕົວ​ເອງ ​ແລະ​ຄົນ​ໃນ​ຄອບຄົວ​ມີ​ການ​ກະທຳ​ສໍ້​ລາດ​ບັງ​ຫຼວງ, ຟຸມ​ເຟືອຍ.

ທີ​ເຈັດ, ​ເປີດ​ກວ້າງ​ການ​ເຄື່ອນ​ໄຫວກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ໃຫ້​ກວ້າງ​ອອກ​ເທື່ອ​ລະ​ກ້າວ​ສູ່​ຂົງ​ເຂດ​ນອກ​ພາກ​ລັດ; ​ເປີດ​ກວ້າງ ​ແລະ ຍົກ​ສູງ​ປະສິດທິ​ຜົນ​ການ​ຮ່ວມ​ມື​ສາກົນ ກ່ຽວ​ກັບ​ການ​ກັນ​ແລະ​ຕ້ານການ​ສໍ້​ລາດ​ບັງ​ຫຼວງ.

ການ​ສໍ້​ລາດ​ບັງ​ຫຼວງບໍ່​ພຽງ​ແຕ່​ເກີດ​ຂຶ້ນ​ໃນ​ການ​ເຄື່ອນ​ໄຫວ​ໃນ​ຂົງ​ເຂດ​ພາກ​ລັດ​ເທົ່າ​ນັ້ນ, ຫາກ​ຍັງ​ມີ​ການ​ຊ່ວຍ​ຊູ ຍູ້​ໜູນ​ຢ່າງ​ຕັ້ງໜ້າ​ຂອງ​ບັນດາ​ເປົ້າ​ໝາຍ​ທີ່​ເຄື່ອນ​ໄຫວ​ນອກ​ພາກລັດ​ອີກ​ນຳ. ການ​ສົມຮູ້​ຮ່ວມ​ຄິດ​ລະຫວ່າງບັນດາພະນັກງານ, ຂ້າລັດຖະການ, ລັດຖະລະ​ກອນ ທີ່​ເສື່ອ​ມ​ໂຊມ ປ່ຽນ​ທາດ​ໃນ​ຂົງ​ເຂດ​ພາກ​ລັດ ກັບ​ບັນດາ​ເປົ້າ​ໝາຍ​ທີ່​ເຄື່ອນ​ໄຫວ​ນອກ​ພາກ​ລັດ ​ເປັນ​​ເຫດການ​ໜຶ່ງທີ່​ມີ​ລັກສະນະ​ແຜ່​ຫຼາຍ​ໃນ​ປະຈຸ​ບັນ ​ຂອງອາຊະຍາກຳສໍ້ລາດບັງຫຼວງ. ດັ່ນນັ້ນ, ຕ້ອງ​ເປີດ​ກວ້າງ​ການ​ເຄື່ອນ​ໄຫວ ກັນ​ແລະ​ຕ້ານການ​ສໍ້​ລາດ​ບັງ​ຫຼວງ ​ໃຫ້​ກວ້າງ​ອອກ​ເທື່ອ​ລະ​ກ້າວອອກ​ສູ່​ນອກຂົງ​ເຂດພາກ​ລັດ ຈຶ່ງ​ເຮັດ​ໃຫ້​ວຽກ​ງານກັນ​ແລະ​ຕ້ານການ​ສໍ້​ລາດ​ບັງ​ຫຼວງ ມີ​ຄວາມ​ຄົບ​ຊຸດ ​ແລະ​ມີ​ປະສິດທິ​ຜົນ. ດ້ານ​ອື່ນ, ອາ​ຊະ​ຍາ​ກຳ​ສໍ້​ລາດ​ບັງ​ຫຼວງມີ​ລັກສະນະ​ສາກົນ, ​ແມ່ນ​ບັນຫາ​ທີ່​ເປັນ​ອັນຕະລາຍ​ສຳລັບ​ບັນດາ​ປະຊາ​ຊາດ. ດັ່ງ​ນັ້ນ, ຕ້ອງ​ຍູ້​ແຮງ​ການ​ເຈລະຈາ, ​ເຊັນ​ບັນດາ​ສັນຍາການ​ຊ່ວຍ​ເຫຼືອ​ທາງ​ດ້ານ​ກົດໝາຍ​ຊຶ່ງ​ກັນ​ແລະ​ກັນ, ບັນດາ​ຂໍ້​ຕົກລົງ​ກ່ຽວ​ກັບ​ການ​ຮ່ວມ​ມື​ກັບ​ບັນດາ​ປະ​ເທດໃນ​ການ​ຕໍ່ສູ້​ກັນ​ແລະ​ຕ້ານອາ​ຊະ​ຍາ​ກຳ, ​ເປັນ​ຕົ້ນ​ແມ່ນ​ກັບ​ບັນດາ​ປະ​ເທດທີ່​ມີ​ຄວາມ​ພົວພັນ​ເປັນ​ມູນ​ເຊື້ອ, ບັນດາ​ປະ​ເທດທີ່​ມີ​ຊາວ​ຫວຽດນາມ​ດຳລົງ​ຊີວິດ​ເປັນ​ຈຳນວນ​ຫຼາຍ. ສົມທົບ​ຢ່າງ​ແໜ້ນ​ແຟ້ນກັບອົງການ​ຕຸລາການ​ຂອງ​ບັນດາ​ປະ​ເທດ, ບັນດາ​ອົງ​ກາຈັດ​ຕັ້ງສາ​ກົນ ​ເພື່ອ​ຊອກ​ຫາ​ຈັບ​ກຸມ ​ແລະ ສົ່ງຜູ້​ຖືກ​ຈັບ​ກຸມ​ຖານ​ຄະດີ​ສໍ້ລາດ​ບັງ​ຫຼວງ ຂ້າມ​ແດນ, ມອບ​ສົ່ງ​ເອກະສາ​ນຫຼັກ​ຖານ ​ແລະ ທ້ອນ​ໂຮມ​ຊັບ​ສິນ​ຈາກການ​ສໍ້​ລາດ​ບັງ​ຫຼວງທີ່​ເຊື່ອງ​ຊ້ອນ​ຢູ່​ຕ່າງປະ​ເທດ​ ຄືນ​ມາ​ປະ​ເທດ. ຕັ້ງໜ້າ​ເຂົ້າ​ຮ່ວມ​ການ​ລິ​ເລີ່​ມ, ​ເວທີ​ປາ​ໄສ​ສາກົນ, ການ​ຄົ້ນຄວ້າ ​ແລກປ່ຽນບົດຮຽນ​ປະສົບ​ການກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ​ ກັບ​ບັນດາ​ປະ​ເທດ ​ແລະ ອົງການ​ຈັດ​ຕັ້ງ​ສາກົນ. ຫັນ​ເປັນ​ກົດໝາຍ​ພາຍ​ໃນ​ປະ​ເທດ ​ແລະ ປະຕິບັດ ອະນຸ​ສັນຍາ​ຂອງ​ສະຫະ​ປະຊາ​ຊາດ​ວ່າ​ດ້ວຍ​ການ​ຕໍ່ສູ້​ຕ້ານການ​ສໍ້​ລາດ​ບັງ​ຫຼວງ ຕາມ​ລຳດັບ​ດຳ​ເນີນ​ງານ​ແລະ​ກົດໝາຍ​ຂອງ​ຫວຽດນາມ./.

​ໂດຍ ຟ້າ​ມດິ່ງ​ຈາກ,
ກຳມະການ​ສູນ​ກາງ​ພັກ, ຫົວໜ້າ​ຄະນະ​ກິດຈະການ​ພາຍ​ໃນ​ສູນ​ກາງ,
ຮອງ​ຫົວໜ້າຜູ້​ປະຈຳການ ຄະນະ​ຊີ້​ນຳ​ສູນ​ກາງ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ

--------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ເລດ​ທີ 892 (​ເດືອນ​ກຸມພາ 2017).

(1) ນັບ​ແຕ່​ເມື່ອ​ສ້າງ​ຕັ້ງ​ຂຶ້ນມາ, ສະ​ເພາະ​ບັນດາ​ຄະດີ​ທີ່ຄະນະ​ຊີ້​ນຳ​ສູນ​ກາງ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ​ ເປັນ​ຜູ້​ຕິດຕາມ, ຊີ້​ນຳ​ນັ້ນ, ​ໄດ້​ດຳ​ເນີນ​ການ​ພິພາກສາ​ທີ່​ສານ​ຊັ້ນ​ຕົ້ນ 21 ກໍລະນີ ດ້ວຍຈຳ​ເລີຍ 247 ຄົນ, ຕັດສິນ​ລົງ​ໂທ​ດປະຫານ​ຊີ​ວັດ 7 ຄົນ, 14 ຈຳ​ເລີຍ​ຖືກ​ຕັດສິນ​ຈຳ​ຄຸດ​ຕະຫຼ​ອດ​ຊີ​ວິດ, 6 ຈຳ​ເລີຍ​ຖືກ​ຕັດສິນ​ຈຳ​ຄຸກ 30 ປີ, 203 ຈຳ​ເລີຍ​ຖືກ​ຕັດສິນ​ຈຳ​ຄຸກ​ໃນ​ເວລາ​ແຕ່ 15 ​ເດືອນ ​ເຖິງຕ່ຳ​ກວ່າ 30 ປີ; ບັນດາ​ຄະດີທີ່ຄະນະ​ຊີ້​ນຳ​ສູນ​ກາງ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ​ ເປັນ​ຜູ້​ຕິດຕາມ, ຊຸກ​ຍູ້​ນັ້ນ, ​ໄດ້​ດຳເນີນ​ການ​ພິພາກສາ​ທີ່​ສານ​ຊັ້ນ​ຕົ້ນ 18 ກໍ​ລະນີ ດ້ວຍ​ຈຳ​ເລີຍ 68 ຄົນ, ຕັດສິນ​ລົງ​ໂທດ 42 ຈຳ​ເລີຍ​ໃຫ້​ຕິດ​ຄຸກ​ຈາກ​ໄລຍະ 2 ປີ ​ເຖິງຕ່ຳ​ກວ່າ 30 ປີ.

(2), (3) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ ຄັ້ງ​ທີ XII, ຫ້ອງການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 196, 213.

(4) ຄຳ​ປາ​ໄສ​ຂອງ​ສະຫາຍ​ເລຂາທິການ​ໃຫຍ່​ ຫງວຽນ​ຝູຈ້ອງ, ຫົວໜ້າຄະນະ​ຊີ້​ນຳ​ສູນ​ກາງ​ກ່ຽວ​ກັບ​ການກັນ​ແລະ​ຕ້ານການ​ສໍ້​ລາດ​ບັງ​ຫຼວງ ຢູ່​ທີ່​ກອງ​ປະຊຸມ​ທົ່ວ​ປະ​ເທດ​ກ່ຽວ​ກັບວຽກ​ງານກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ວັນ​ທີ 5 ພຶດສະພາ 2014.

(5) ຄຳ​ສັ່ງ​ສະບັບ​ເລກທີ 50-CT/TW, ວັນ​ທີ 7-12-2015, ຂອງ​ກົມ​ການ​ເມືອງ, “ກ່ຽວ​ກັບ​ການ​ເພີ່ມ​ທະວີ​ການ​ນຳພາ​ຂອງ​ພັກ​ຕໍ່​ວຽກ​ງານ​ຄົ້ນ​ເຜີຍ, ​ແກ້​ໄຂ​ກໍລະນີ, ຄະດີ​ສໍ້​ລາດ​ບັງ​ຫຼວງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ