ວັນອາທິດ, 24/9/2017
ວຽກງານກວດກາຂອງພັກຕ້ອງມີບາດກ້າວໃໝ່ ທີ່ແຂງແຮງກວ່າເກົ່າ, ສຳເລັດໜ້າທີ່ທີ່ໄດ້ຮັບມອບໝາຍ ຢ່າງດີເດັ່ນ, ຕອບສະໜອງໄດ້ກັບຄວາມຮຽກຮ້ອງຕ້ອງການຂອງພັກ, ປະຊາຊົນ ແລະ ປະເທດຊາດ*
5/5/2017 12:8' ສົ່ງ ພິມ
ສະຫາຍ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດນາມ

ມື້​ນີ້, ຂ້າພະ​ເຈົ້າ​ຮູ້ສຶກ​ດີ​ໃຈ​ທີ່​ສຸດ​ທີ່​ໄດ້​ມາ​ຮ່ວມ​ ກອງ​ປະຊຸມ​ທົ່ວປະ​ເທດສະຫລຸບ​ສັງ​ລວມວຽກ​ງານ​ກວດກາ, ຕິດຕາມ​ກວດກາ​ຂອງ​ພັກ ປີ 2016, ກຳນົດ​ທິດ​ທາງ, ໜ້າ​ທີ່​ປີ 2017. ​ກອງ​ປະຊຸມນີ້​ມີ​ຄວາມສຳຄັນ​ທີ່​ສຸດ ​ເພື່ອ​ໃຫ້​ພວກ​ເຮົາຕີ​ລາຄາວຽກ​ງານ​ກວດກາ, ຕິດຕາມ​ກວດກາ​ຂອງ​ພັກ ພາຍ​ຫຼັງ 1 ປີ​ແຫ່ງ​ການ​ປະຕິບັດ​ ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ​​ກອງ​ປະຊຸມນີ້​ກໍ່​​ໄດ້ດຳ​ເນີນ​ໃນ​ເວລາ​ທີ່​ທົ່ວ​ພັກ, ທົ່ວ​ປວງ​ຊົນ ​ແລະ ທົ່ວ​ກອງທັບ​ເຮົາ ພວມ​ອອກ​ແຮງ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ກ່ຽວ​ກັບ​ການກໍ່ສ້າງ, ​ປັບປຸງພັກ. ຕາງໜ້າ​ສູນ​ກາງ, ກົມ​ການ​ເມືອງ, ຄະນະ​ເລຂາ​ທິການ, ຂ້າພະ​ເຈົ້າ​ຂໍ​ຝາກຄຳ​ຢ້ຽມຢາມ​ຖາມ​ຂ່າວທີ່​ສະໜິດສະໜົມ ​ແລະ ຄຳ​ອວຍພອນ​ໄຊ​ທີ່​ດີງາມ​ທີ່​ສຸດ ມາ​ຍັງ​ບັນດາ​ຜູ້​ແທນ, ບັນດາ​ສະຫາຍ ພ້ອມ​ດ້ວຍ​ພະນັກງານ, ລັດຖະກອນ​ຂະ​ແໜງ​ການ​ກວດກາ​ທັງ​ໝົດ. 

ປີ 2016, ວຽກ​ງານ​ກວດກາ, ຕິດຕາມ​ກວດກາ​, ປະຕິບັດ​ວິ​ໄນ​ຂອງ​ພັກ ​ໄດ້​ຮັບ​ການດຳ​ເນີນປະຕິບັດ​ໃນສະພາບ​ການ​ທີ່​ມີ​ຫຼາຍ​ເຫດການ​ທີ່​ສຳຄັນ​ຂອງ​ປະ​ເທດ. ພວກ​ເຮົາ​ໄດ້​ຮັບ​ຜົນສຳ​ເລັດ​ອັນ​ດີງາມທີ່​ສຸດ ​ໃນ​ການຈັດ​ຕັ້ງ​ກອງ​ປະຊຸມ​ໃຫຍ່ທົ່ວ​ປະ​ເທດ​ຄັ້ງ​ທີ XII ຂອງ​ພັກ, ການ​ເລືອ​ກຕັ້ງສະມາຊິກ​ສະພາ​ແຫ່ງ​ຊາດ​ຊຸດ​ທີ XIV ​ແລະ ​ເລືອກ​ຕັ້ງ​ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ ສະ​ໄໝ 2016-2021, ​ເລືອ​ກຕັ້ງ​ບັນດາ​ຕຳ​ແໜ່​ງການ​ນຳ​ຫຼັກ​ແຫຼ່ງຂອງ​ລັດ; ກໍ່​ເປັນ​ປີ​ທຳ​ອິດ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ. ​ໃນ​ສະພາບ​ການ​ດັ່ງກ່າວ, ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລຂາ​ທິການ ​ແລະ ຄະນະ​ພັກ​ຂັ້ນ​ຕ່າງໆ ​ໄດ້​ສະ​ແດງ​ອອກ​ເຖິງ​ຄວາມ​ຕັດສິນ​ໃຈ​ການ​ເມືອງ​ສູງ, ​ເປັນ​ເຈົ້າ​ການວາງ​ແຜນ​ນະ​ໂຍບາຍ, ມາດ​ຕະການ​ຫຼາຍ​ສະບັບ ​ເພື່ອນຳພາ, ຊີ້​ນຳ, ຈັດ​ຕັ້ງ​ປະຕິບັດ​ໜ້າ​ທີ່​ການ​ເມືອງ, ວຽກ​ງານ​ກໍ່ສ້າງ​ພັກ​ເວົ້າ​ລວມ, ວຽກ​ງານ​ກວດກາ, ຕິດຕາມ​ກວດກາ​, ປະຕິບັດ​ວິ​ໄນພັກ ​ເວົ້າ​ສະ​ເພາະ. 

ບັນດາ​ສະຫາຍ​ໄດ້​ກະ​ກຽມ​ຢ່າງ​ດີ​ໃຫ້​ແກ່​ກອງ​ປະຊຸມ, ​ເປັນ​ຕົ້ນ​ແມ່ນ ກະກຽ​ມລາຍ​ງານ​ຢ່າງ​ເຂັ້ມ​ງວດ, ມີ​ຄຸນ​ນະພາ​ບດີ. ​ໃນ​ກອງ​ປະຊຸມ​ ​ຫຼາຍ​ສະຫາຍ​​ໄດ້ປະກອບ​ຄວາມ​ຄິດ​ເຫັນ​ທີ່​ເລິກ​ເຊິ່ງ, ມີ​ຄວາມ​ຮັບຜິດຊອບ ​ແລະ​ສອດຄ່ອງ​ກັບ​ສະພາບ​ຕົວ​ຈິງ. ຂ້າພະ​ເຈົ້າ​ເຫັນ​ດີ​ໂດຍ​ພື້ນຖານ​ກັບ​ເນື້ອ​ໃນ​ຂອງ​ລາຍ​ງານ ​ແລະ ຕີ​ລາຄາ​ສູງ​ຄຳ​ປະກອບ​ຄວາມ​ເຫັນຕ່າງໆ​ ໃນ​ກອງ​ປະຊຸມ. ຂ້າພະ​ເຈົ້າ​ສະ​ເໜີ​ໃຫ້​ຄະນະ​ກຳມະການ​ກວດກາ​ສູນ​ກາງ ຮັບ​ເອົາ​ຄວາມ​ເຫັນ​ຂອງ​ບັນດາ​​ສະຫາຍ​ໃນ​ກອງ​ປະຊຸມ ​ເພື່ອ​ເພີ່ມ​ເຕີມ, ປັບປຸງ​ບູລະນະ​ລາຍ​ງານ ​ແລະ ຈັດ​ຕັ້ງ​ປະ​ຕິ​ບັດ. ຂ້າພະ​ເຈົ້າ​ຂໍ​ເນັ້ນ​ໜັກ ​ແລະ ​ເວົ້າ​ຕື່ມ​ບາງ​ບັນຫາ​ລຸ່ມ​ນີ້: 

ໃນປີ 2016, ການ​ເຄື່ອນ​ໄຫວ​ກວດກາ​ເວົ້າ​ລວມຂອງ​ພັກ ກໍ່​ຄື​ຂອງ​ຂະ​ແໜງ​ການ​ກວດກາ​ເວົ້າ​ສະ​ເພາະ ​ໄດ້​ສຳ​ເລັດ​ໜ້າ​ທີ່​ວຽກ​ງານຕ່າງໆ​ຢ່າງ​ຫຼາຍ, ຮອບດ້ານ​ພໍ​ຄວນ, ມີ​ການ​ປ່ຽນ​ແປງ​ໃໝ່​ຫຼາຍ​ຢ່າງ, ຕາມ​ພາລະ​ບົດບາດ, ໜ້າ​ທີ່, ສິດ​ຂອບ​ເຂດທີ່​ໄດ້​ລະບຸ​ໃນກົດ​ລະບຽບ​ຂອລພັກ, ປະກອບສ່ວນ​ທີ່ສຳຄັນ​ເຂົ້າ​ໃນ​ການ​ຮັກສາ​ຄວາມ​ສະອາດ​ປອດ​ໃສ​ຂອງ​ພັກ, ຮັກສາ​ຫຼັກການ, ລະບຽບ ວິ​ໄນ​ຢູ່​ໃນ​ພັກ, ຍົກ​ສູງ​ຄວາມ​ສາມາດ​ນຳພາ ​ແລະ ກຳລັງ​ແຮງ​ສູ້​ຮົບ​ຂອງ​ພັກ, ປະກອບສ່ວນ​ປະຕິບັດ​ບັນດາ​ໜ້າ​ທີ່​ເສດຖະກິດ - ສັງຄົມ​ຂອງ​ປະ​ເທດ​ ຢ່າງ​ສຳ​ເລັດ​ມີ​ໄຊ. ລະອຽດ​ຄື: 

ທີ​ໜຶ່ງ, ບັນດາ​ຄະນະ​ພັກ, ອົງການ​ຈັດ​ຕັ້ງ​ພັກ, ຄະນະ​ກຳມະການ​ກວດກາ​ຂັ້ນ​ຕ່າງໆ ​ໄດ້​ປະຕິບັດ​ການ​ຊີ້​ນຳ​ຂອງ​ກົມ​ການ​ເມືອງ​ຢ່າງ​ເຂັ້ມ​ງວດ, ສຸມ​ໃສ່​ຜັນ​ຂະຫຍາຍ, ຈັດ​ຕັ້ງ​ການ​ຮ່ຳຮຽນ, ຄົ້ນຄວ້າ, ​ເຊື່ອມ​ຊຶມມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ກອງປະຊຸມ​ໃຫຍ່ອົງຄະ​ນະ​ພັກ​ຂັ້ນ​ຕ່າງໆ​ ເປັນ​ຢ່າງ​ດີ. ບົນ​ພື້ນຖານ​ນັ້ນ ​ໄດ້​ຫັນ​ມະຕິ​ກອງ​ປະຊຸມ​ໃຫຍ່​ເປັນ​​ແຜນ​ການ​ເຄື່ອນ​ໄຫວ​ປະຕິບັດ​ວຽກງານກວດກາ​ຂອງ​ຄະນະ​ພັກ, ຄະນະກຳມະການ​ກວດກາ​ຂັ້ນ​ຕ່າງໆ ຊຶ່ງ​ຈຸດ​ໝັກ​ແມ່ນປ່ຽນ​ແປງ​ໃໝ່, ຍົກ​ສູງ​ຄວາມ​ສັກສິດ, ປະສິດທິ​ຜົນ​ຂອງວຽກ​ງານ​ກວດກາ, ຕິດຕາມ​ກວດກາ​, ປະຕິບັດ​ວິ​ໄນ​ພັກ, ປະກອບສ່ວນ​ກີດ​ກັ້ນ, ຍູ້​ຖອຍ​ຄວາມ​ເຊື່ອມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ບັນດາ​ປະກົດ​ການ “ຫັນປ່ຽນ​ດ້ວຍ​ຕົນ​ເອງ”, “ປ່ຽນ​ແປງດ້ວຍ​ຕົນ​ເອງ” ຢູ່​ພາຍ​ໃນ; ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຫຍໍ້​ທໍ້, ຟຸມ​ເຟືອຍ, ອາດຍາ​ສິດ. ພ້ອມ​ກັນ​ນັ້ນ​ກໍ່​ເປັນ​ເຈົ້າ​ການ, ຕັ້ງໜ້າ​ຈັດ​ຕັ້ງປະຕິບັດ​ໜ້າ​ທີ່​ກວດກາ ທີ່​ໄດ້​ວາງອອກ​ມາ​ໃນ​ແຜນການ​ປີ 2016. 

ທີ​ສອງ, ວຽກ​ງານ​ຊີ້​ນຳ​ນຳພາ, ​ແນະນຳວຽກ​ງານ​ກວດກາ ຂອງ​ຄະນະ​ພັກ, ອົງການ​ຈັດ​ຕັ້ງ​ພັກ ​ແລະ ຄະນະກຳມະການ​ກວດກາ​ຂັ້ນ​ຕ່າງໆ ມີ​ການ​ຫັນປ່ຽນ​ໃໝ່, ​ເປັນ​ເຈົ້າ​ການ ທັນ​ການ​ກວ່າ​ເກົ່າ, ​ໃກ້ຊິດຕິດ​ແທດ​ກັບ​ສະພາບ​ການ​ຕົວ​ຈິງ ​ແລະ ກັບ​ວຽກງານ​ກໍ່ສ້າງ​ພັກ. ຄະນະ​ກຳມະການ​ກວດກາ​ສູນ​ກາງ​ໄດ້​ເປັນ​ທີ່​ປຶກສາ​ໃຫ້ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລຂາ​ທິການ ​ໃນ​ການ​ຫັນມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ເປັນ​ລະອຽດ ​ເພື່ອ​ແກ້​ໄຂ, ​ເພີ່ມ​ເຕີມ, ປະກາດ​ໃຊ້​ບັນດາ​ເອກະສານ​ທີ່​ສຳຄັນ​ກ່ຽວ​ກັບວຽກ​ງານ​ກວດກາ, ຕິດຕາມ​ກວດກາ ​ແລະ ວິ​ໄນ​ຂອງ​ພັກ ທີ່​ໄດ້​ປະຕິບັດ​ເປັນ​ເອກະ​ພາບ​ໃນ​ທົ່ວ​ພັກ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ຄະນະ​ພັກ, ອົງການ​ຈັດ​ຕັ້ງ​ພັກ ​ແລະ ຄະນະກຳມະການ​ກວດກາ​ຂັ້ນ​ຕ່າງໆ ຜັນ​ຂະຫຍາຍ​ປະຕິບັດ​ໜ້າ​ທີ່​ກວດກາ​ໃນ​ສະພາບ​ການ​ໃໝ່; ​ເປັນ​ເຈົ້າ​ການ​ໃນ​ການ​ຝຶກ​ອົບຮົມ, ​ແນະນຳ​ວິຊາ​ສະ​ເພາະ​ໃຫ້​ຖັນ​ແຖວ​ພະນັກງານ​ກວດກາຂັ້ນ​ຕ່າງໆ ​ໃນ​ການ​ປະຕິບັດ​ບັນດາ​ເອກະສານ​ເຫຼົ່າ​ນີ້. ​ໃນ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 3 ສະ​ໄໝ​ທີ XII (​ເດືອນ​ກໍລະກົດ 2016), ຄະນະ​ກຳມະການ​ກວດກາ​ສູນ​ກາງ ​ໄດ້​ໃຫ້​ຄຳ​ປຶກສາ​ເພື່ອ​ໃຫ້ຄະນະ​ບໍລິຫານ​ງານ​ສູນ​ກາງຮັບຮອງ​ຜ່ານລະບຽບການ​ເຮັດວຽກຂອງຄະນະ​ກຳມະການ​ກວດກາ​ສູນ​ກາງ, ຂໍ້ກຳນົດ​ການ​ປະຕິບັດໝວດ​ທີ VII ​ແລະ ໝວດທີ VIII ​ໃນ​ກົດ​ລະບຽບ​ຂອງ​ພັກ. ບັນດາ​ເອກະສານ​ນີ້​ມີ​ຄວາມ​ສຳຄັນ​ທີ່​ສຸດ, ມັນ​ເປັນ​ພື້ນຖານ​ເພື່ອນຳ​ເອົາມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ກ່ຽວ​ກັບ​ຂົງ​ເຂດ​ການ​ກວດກາ ​ເຂົ້າ​ສູ່​ຊີວິດ​ຄວາມ​ເປັນ​ຢູ່​ໂດຍ​ໄວ ​ແລະ ​ໄດ້​ຮັບ​ການ​ປະຕິບັດ​ຢ່າງ​ເປັນ​ເອກະ​ພາບ​ໃນ​ທົ່ວ​ພັກ. 

ທີ​ສາມ, ວຽກ​ງານ​ກວດກາ, ຕິດຕາມ​ກວດກາ, ປະຕິບັດ​ວິ​ໄນ​ພັກ ຂອງ​ຄະນະ​ພັກ, ອົງການ​ຈັດ​ຕັ້ງ​ພັກ, ຄະນະກຳມະການ​ກວດກາ​ຂັ້ນ​ຕ່າງໆ ​ໄດ້​ດຳ​ເນີນ​ຢ່າງ​ເປັນ​ເຈົ້າ​ການ, ຄົບ​ຊຸດ, ຮອບດ້ານ​ກວ່າ​ເກົ່າ, ຖືກຕ້ອງ​ຕາມ​ກົດ​ລະບຽບ ​ແລະ ຂໍ້​ກຳນົດ​ຂອງ​ພັກ, ສຸມ​ໃສ່​ບັນດາ​ຂົງ​ເຂດ​ສຳຄັນ ທີ່​​ເຄີຍ​ມີ​ການ​ລ່ວງ​ລະ​ເມີດ, ມັກ​ເກີດ​ຄວາມຫຍໍ້​ທໍ້, ​ເກີດ​ບັນຫາຮ້ອນ​​ເຄືອງ ທີ່​ພະນັກງານ, ສະມາຊິກ​ພັກ ​ແລະ ປະຊາຊົນ​ເອົາ​ໃຈ​ໃສ່. ຄຸນ​ນະພາ​ບ, ປະສິດທິ​ຜົນ​ຂອງການ​ກວດກາ ມີ​ຄວາມ​ຫັນປ່ຽນ​ຢ່າງ​ຈະ​ແຈ້ງ. ຜ່ານ​ການ​ກວດກາ, ຕິດຕາມ​ກວດກາ ​ໄດ້​ຕີ​ລາຄາຈຸດ​ດີ​ຢ່າງ​ຖືກຕ້ອງ, ຊີ້​ແຈ້ງ​ຄວາມ​ຂາດ​ຕົກ​ບົກພ່ອງ​ໃນ​ການ​ຊີ້​ນຳ ນຳພາ​​ ແລະ ຈັດ​ຕັ້ງ​ປະຕິບັດ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ ​ກົດໝາຍ​ຂອງ​ລັດ; ປະຕິບັດ​ວິ​ໄນ​ຢ່າງ​ເຂັ້ມ​ງວດ ແລະ ເປີດ​ເຜີຍ​ຜົນ​ແຫ່ງ​ການ​ປະຕິບັດ​ວິ​ໄນ​ ຢູ່​ໃນ​ບັນດາ​ພາຫະນະ​ສື່​ມວນ​ຊົນ. 

ຕາມ​ລາຍ​ງານ​ຂອງຄະນະກຳມະການ​ກວດກາ​ສູນ​ກາງ, ​ໃນ​ປີ 2016 ຄະນະ​ພັກ, ອົງການ​ຈັດ​ຕັ້ງ​ພັກ ​ແລະ ຄະນະກຳມະການ​ກວດກາ​ຂັ້ນ​ຕ່າງໆ ​ໄດ້​ດຳ​ເນີນ​ການ​ກວດກາ​ຕໍ່​ອົງການ​ຈັດ​ຕັ້ງ​ພັກ​ເກືອບ 100.000 ​ແຫ່ງ ​ແລະ​ສະມາຊິກ​ພັກ​ກວ່າ 40.000 ຄົນ; ຕິດຕາມ​ກວດກາ​ຕໍ່​ອົງການ​ຈັດ​ຕັ້ງ​ພັກກວ່າ 30.000 ​ແຫ່ງ ​ແລະ​ສະມາຊິກ​ພັກ​ກວ່າ 100.000 ຄົນ; ປະຕິບັດ​ວິ​ໄນ​ຕໍ່​ 150 ອົງການ​ຈັດ​ຕັ້ງ​ພັກ ​ແລະ ກວ່າ 12.000 ສະມາຊິກ​ພັກ... ບັນລຸ​ບັນດາຜົນສຳ​ເລັດ​ເຫຼົ່າ​ນີ້ ​ແມ່ນ​ຍ້ອນມີ​ການ​ເຕົ້າ​ໂຮມ​ລວນ​ສູນ​ຂອງ​ຄະນະ​ພັກ, ອົງການ​ຈັດ​ຕັ້ງ​ພັກ, ຄະນະກຳມະການ​ກວດກາ​ຂັ້ນ​ຕ່າງໆ ​ໃນ​ວຽກງານກວດກາ ພາຍຫຼັງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ຄວາມ​ມານະ​ພະຍາຍາມ​ຢ່າງ​ບໍ່​ຢຸດ​ຢັ້ງ ຂອງ​ພະນັກງານ​ຂະ​ແໜງ​ການ​ກວດກາ​ແຕ່ລະຄົນ​ຂອງ​ພັກ. 

ທີສີ່, ຄະນະກຳມະການ​ກວດກາ​ຂັ້ນ​ຕ່າງໆຂອງ​ພັກ ​ໃນ​ເບື້ອງ​ຕົ້ນ​ໄດ້​ປະກອບສ່ວນ​ອັນຕັ້ງໜ້າ​ເຂົ້າ​ໃນ​ວຽກງານ​ປ້ອງ​ກັນ​ແລະຕ້ານ​ການ​ສໍ້​ລາດ​ບັງ​ຫຼວງ. ​ໄດ້​ກວດກາ, ​ແກ້​ໄຂ​ຢ່າງ​ທັນ​ການ​ ຕໍ່​ບັນດາ​ສະມາຊິກ​ພັກທີ່​ມີ​ສັນຍານ​ຂອງ​ການ​ສໍ້​ລາດ​ບັງ​ຫຼວງ; ມີ​ຮູບ​ການ​ແກ້​ໄຂ​ຕໍ່​ບັນດາ​ອົງການ​ຈັດ​ຕັ້ງ​ພັກ ສະມາຊິກ​ພັກ​ທີ່ບໍ່​ມີ​ຄວາມ​ເຂັ້ມ​ງວດ​ໃນ​ການປະຕິບັດຂໍ້​ກຳນົດ​ຂອງ​ພັກແລະລັດ ​ກ່ຽວ​ກັບວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ. ​ໄດ້​ຈັດ​ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ​ເປັນ​ໜຶ່ງ​ໃນ​ບັນດາ​ວຽກງານຈຸດ​ໜັກ, ​ເປັນ​ເນື້ອ​ໃນ​ທີ່​ສຳຄັນ​ເພື່ອ​ສຳ​ຫຼວດ​ເປັນ​ໄລຍະ. ອົງການ​ກວດກາ​ຂອງ​ພັກ​ໄດ້​ສົມ​ທົບ​ຢ່າງ​ແໜ້ນ​ແຟ້ນກວ່າ​ແຕ່​ກ່ອນ ກັບ​ບັນດາ​ອົງການຮັບຜິດຊອບ​ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງຂອງລັດ ​ເພື່ອ​ກວດກາ, ຕິດຕາມ​ກວດກາ, ຄົ້ນ​ເຜີຍ, ​ແກ້​ໄຂ ​ແລະ ປະກາດ​ເປີດ​ເຜີຍ​ຜົນ​ແຫ່ງ​ການ​ແກ້​ໄຂການລະ​ເມີດ​ລະບຽບວິ​ໄນກົດໝາຍ​ຂອງ​ການຈັດ​ຕັ້ງ, ພະນັກງານ, ສະມາຊິກ​ພັກ. ​ໃນ​ປີ 2016, ຄະນະ​ກຳມະການ​ກວດກາ​ສູນ​ກາງ ​ໄດ້​ຕັ້ງໜ້າ​ສົມທົບ​ກັບຄະນະ​ວຽກ​ງານ​ການ​ເມືອງ​ພາຍ​ໃນ​ສູນ​ກາງ ​ແລະ ບັນດາ​ອົງການ​ທີ່​ກ່ຽວຂ້ອງ ​​ໃນການເຂົ້າ​ຮ່ວມບັນດາ​ໜ່ວຍ​ງານ​ສະ​ເພາະ​ກິດ ​ເພື່​ອດຳ​ເນີນການ​ກວດກາ​ຕໍ່ບັນດາ​ກໍລະນີຄະດີ, ​ຟ້ອງ​ຄະດີ, ສືບສວນ, ພິພາກສາ​ຄະດີ​ສໍ້​ລາດ​ບັງ​ຫຼວງ ຢູ່​ບາງ​ຂະ​ແໜງ​ການ, ທ້ອງ​ຖິ່ນ, ປະກອບສ່ວນ​ປະຕິບັດໜ້າ​ທີ່​ທີ່​ຄະນະ​ຊີ້​ນຳ​ການ​ປ້ອງ​ກັນ​ແລະຕ້ານ​ການ​ສໍ້​ລາດ​ບັງ​ຫຼວງ​ສູນ​ກາງ​ມອບ​ໝາຍ​ໃຫ້. 

ທີ​ຫ້າ, ພາຍຫຼັງ​ກອງ​ປະຊຸມ​ໃຫຍ່​ຄະນະ​ພັກ​ຂັ້ນ​ຕ່າງໆ ​ແລະ ພາຍຫຼັງກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ບັນດາ​ຄະນະ​ພັກ, ອົງການ​ຈັດ​ຕັ້ງ​ພັກ, ຄະນະ​ກຳມະການ​ກວດກາ​ສູນ​ກາງ ​ແລະ ຄະນະກຳມະການ​ກວດກາ​ຂັ້ນ​ຕ່າງໆ ​ໄດ້​ຕັ້ງໜ້າ​ສັບ​ຊ້ອນ​ການ​ຈັກ​ຕັ້ງ, ປັບປຸງ​ບູລະນະ​ກົງຈັກ, ກໍ່ສ້າງ​ແຜນການ​ເຄື່ອນ​ໄຫວ, ກົດ​ລະບຽບການ​ເຮັດ​ວຽກ; ​ເປັນ​ເຈົ້າ​ການ​ປະຕິບັດ​ໜ້າ​ທີ່​ຕ່າງໆ​ທີ່​ໄດ້​ກຳນົດ​ໄວ້​ໃນ​ກົດ​ລະບຽບ​ຂອງ​ພັກ. ​ແກ້​ໄຂ​ວຽກ​ງານ​ທີ່ຄົງ​ຄ້າງ​ມາ​ແຕ່​ສະ​ໄໝ​ກ່ອນ, ​ໃນ​ນັ້ນ​ມີ​ວຽກ​ງານທີ່​ສັບສົນ​ທີ່​ສຸດ, ຮັກສາ​ຄວາມ​ເປັນ​ລະບຽບ​ລຽບ​ລ້ອຍ​ໄດ້, ​ເຮັດ​ວຽກ​ຢ່າງ​ເປັນ​ແບບ​ແຜນ ​ແໜ້ນ​ແຟ້ນ ​ແລະ ມີ​ການ​ປ່ຽນ​ແປງ​ໃໝ່, ຮັບ​ໃຊ້​ວຽກ​ງານ​ບຸກຄະລາ​ກອນ​ໃນ​ການ​ເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດ​ຊຸດ​ທີ XIV ​ແລະ ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ ສະ​ໄໝປີ 2016 - 2021, ປັບປຸງບູລະນະກົງຈັກ​ບຸກຄະລາ​ກອນ​ຢູ່​ສູນ​ກາງ ​ແລະ ບັນດາ​ທ້ອງ​ຖິ່ນ, ສົມທົບ​ການ​ແກ້​ໄຂ​ບັນດາ​ບັນຫາ​ທີ່​ກ່ຽວ​ພັນ​ເຖິງວຽກ​ງານ​ເລື່ອນ​ຊັ້ນ​ຕຳ​ແໜ່​ງ, ຈັດ​ວາງ​ສັບ​ຊ້ອນ​ພະນັກງານ. ​ໄດ້​ເອົາ​ໃຈ​ໃສ່​ຊີ້​ນຳ ​ແລະ ປະຕິບັດວຽກ​ງານ​ກໍ່ສ້າງ​ຂະ​ແໜງ​ການ, ບຳລຸງ​ກໍ່ສ້າງ ​ຝຶກອົບຮົມ​ພະນັກງານ​ຢ່າງ​ມີ​ປະສິດທິ​ຜົນ... 

ທີ​ຫົກ, ຈຸດ​ທີ່​ພົ້ນ​ເດັ່ນ​ໜຶ່ງ​ໃນ​ປີ 2016 ​ແມ່ນ ຄະນະ​ກຳມະການ​ກວດກາ​ສູນ​ກາງ ​​ໄດ້ເຂົ້າສູ່​ການ​ເຄື່ອນ​ໄຫວ​ຢ່າ​ງຕັ້ງໜ້າ, ຂຸ້ນຂ້ຽວ; ວຽກ​ງານ​ກວດກາ, ຕິດຕາມ​ກວດກາຂອງ​ພັກຢູ່​ສູນ​ກາງ ​ໄດ້​ຮັບ​ການ​ດຳ​ເນີນ​ຢ່າງ​ຟົດ​ຟື້ນ​ພໍຄວນ, ມີ​ວຽກ​ງານຫຼາຍ ​ແລະ ​ເຮັດ​ໄດ້​ຫຼາຍ​ວຽກ, ມີຜົນ​ທີ່​ຊັດ​ເຈນ, ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ​ ​ແລະ ຕີ​ລາຄາ​ສູງ​ຈາກ​ປະຊາຊົນ, ສ້າງ​ໃຫ້​ມີ​ບັນຍາກາດ​ໃໝ່ ຄວາມ​ເຊື່ອ​ຖື​ໃໝ່. ອັນ​ໃໝ່​ໃນ​ເວລາ​ຜ່ານ​ມາ​ມໍ່​ນີ້​ແມ່ນ ​ໄດ້​ເປັນ​ເຈົ້າ​ການ​ຜັນ​ຂະຫຍາຍ​ການ​ກວດກາປະກົດ​ການລະ​ເມີດ​ວິ​ໄນ ​ໄດ້ຫຼາຍ​ພໍ​ຄວນ, ​ໄດ້ສົມທົບ​ລະ​ຫວ່າ​ງການ​ກວດກາ​ຢ່າງເປັນ​ປະຈຳ ກັບ​ການ​ກວດກາ​ການລະ​ເມີດ; ​ແກ້​ໄຂ​ກໍລະນີ​ໃດ​ແມ່ນ​ໄດ້​ກໍ​ບະ​ນີນັ້ນ, ​ເຮັດ​ຢ່າງ​ເປັນ​ແບບ​ແຜນ ມີ​ວິທະຍາສາດ, ​ເຮັດ​ເຖິງ​ບ່ອນເຖິງ​ທີ່ຈົນ​ສຳ​ເລັດ; ​ແກ້​ໄຂ​ລະບຽບ​ວິ​ໄນ​ພັກ​ກ່ອນ ​ໂດຍ​ບໍ່​ລໍຖ້າການ​ສະຫລຸບຂອງ​ອົງການ​ລັດ, ຮອບ​ຄອບ​ຄ່ຽມຄົມ, ຮັບ​ຟັງ​ຄວາມ​ເຫັນ​ຂອງ​ປະຊາຊົນ, ຂອງ​ໜັງສືພິມ ​ແລະ ຫາງ​ສຽງ​ສັງຄົມ... ການ​ປະສານ​ສົມທົບ​ລະຫວ່າງ​ບັນດາ​ອົງການ​ຂອງ​ພັກ, ສະພາ​ແຫ່ງ​ຊາດ, ລັດຖະບານ ຢ່າງ​ເຂົ້າ​ແກັບ​ເຂົ້າ​ເກ​ຍ, ​ແໜ້ນ​ແຟ້ນ, ທັນ​ການ ​ແລະ ມີ​ປະສິດທິ​ຜົນ ຊຶ່ງ​ໄດ້​ໃຫ້​ພວກ​ເຮົາ​ມີ​ບັນດາ​ບົດຮຽນ​ທີ່​ປະ​ເສີດ.

​ໂດຍ​ຕາງໜ້າກົມ​ການ​ເມືອງ, ຄະນະ​ເລຂາ​ທິການ, ຂ້າພະ​ເຈົ້າ​ຂໍ​ຍ້ອງຍໍ​ຊົມ​ເຊີຍ​ຢ່າງ​ສຸດ​ໃຈ​ຕໍ່​ບັນດາ​ຜົນສຳ​ເລັດ ທີ່​ບັນດາ​ຄະນະ​ພັກ, ອົງການ​ຈັດ​ຕັ້ງ​ພັກ, ຄະນະກຳມະການ​ກວດກາ​ຂັ້ນ​ຕ່າງໆ ບັນລຸ​ໄດ້​ໃນວຽກ​ງານ​ກວດກາ, ຕິດຕາມ​ກວດກາປີ 2016 ​ແລະ ສະ​ແດງ​ຄວາມ​ຂອບ​ໃຈ​ຕໍ່​ບັນດາ​ສະຫາຍ ທີ່​ມີ​ຄວາມ​ມານະ​ພະຍາຍາມ ​ແລະ ສ່ວນ​ປະກອບ​​ສຳຄັນທີ່​ສຸດ ​ເຂົ້າ​ໃນ​ຜົນສຳ​ເລັດ​ລວມຂອງ​ປະ​ເທດ​ຊາດ. 

ຄຽງ​ຂ້າງ​ກັບ​ບັນດາ​ຜົນງານ ​ແລະຄວາມ​ສຳ​ເລັດ ​ທີ່​ກ່າວ​ມາ​ເທິງ​ນີ້, ດ້ວຍ​ຈິດ​ໃຈ​ຊື່​ກົງ, ຄວາມ​ເຂັ້ມ​ງວດຊື່ສັດ, ພວກ​ເຮົາ​ກໍ່​ຕ້ອງ​ຮັບ​ຮູ້​ວ່າ, ວຽກ​ງານ​ກວດກາ, ຕິດຕາມ​ກວດກາ, ລະບຽບ​ວິ​ໄນ​ຂອງພັກ ຍັງ​ບໍ່​ທັນ​ຕອບ​ສະໜອງ​ໄດ້​ກັບ​ຄວາມ​ຕ້ອງການ, ໜ້າ​ທີ່​ໃນ​ສະພາບ​ການ​ປະຈຸ​ບັນ; ຫຼາຍ​ທ້ອງ​ຖິ່ນ, ສຳນັກ​ງານ​ອົງການ, ກົມ​ກອງ ດຳ​ເນີນ​ການ​ກວດກາ, ຕິດຕາມ​ກວດກາ​ແບບ​ຮູບ​ການ ​ໃຫ້​ພໍ​ແລ້ວ​ມື, ຍັງ​ບໍ່​ທັນ​ເດັດ​ຂາດ; ປະສິດທິ​ຜົນ ຄວາມ​ສັກ​ສິດ​ຍັງ​ຕ່ຳ, ບໍ່​ເຂັ້ມ​ງວດ​ເຖິງ​ຂັ້ນ​ຂູ່​ໃຫ້​ຢ້ານ; ​ໃນ​ການ​ຕໍ່ສູ້​ຕ້ານການລະ​ເມີດກົດ​ວິ​ໄນ​ນັ້ນ ຍັງ​ມີ​ສະພາບ​ການ​ຈົ່ງ​ຈຽມ, ຫຼົບ​ຫຼີກ, ຍູ້​ວຽກ​ຖິ້​ມ​ໃຫ້​ຜູ້​ອື່ນ, ບໍ່​ເຂັ້ມ​ງວດ. 

ບາງ​ຄະນະ​ພັກ, ອົງການ​ຈັດ​ຕັ້ງ​ພັກ, ຜູ້ນຳ​ໜ້າ​ຄະນະ​ພັກ​ບາງ​ຄົນ ຍັງ​ບໍ່​ທັນ​ໃຫ້​ຄວາມ​ສຳຄັນ​ຢ່າງ​ເໝາະ​ສົມ​ແກ່ວຽກ​ງານ​ກວດກາ, ຕິດຕາມ​ກວດກາ, ຍັງ​ບໍ່​ທັນ​ຊີ້​ນຳ​ນຳພາ​ຢ່າງ​ທັນ​ການ ​ແລະ ປະຕິບັດ​ໜ້າ​ທີ່ກວດກາ, ຕິດຕາມ​ກວດກາ​ໂດຍ​ກົງ; ບາງ​ຄະນະ​ພັກຍັງ​ບໍ່​ທັນ​ເອົາ​ໃຈ​ໃສ່​ຢ່າງແທ້​ຈິງ, ຍັງ​ບໍ່​ສ້າງ​ເງື່ອນ​ໄຂ​ໃຫ້ຄະນະກຳມະການ​ກວດກາ​ ປະຕິບັດ​ພາລະ​ບົດ​ບາດ, ໜ້າ​ທີ່, ສິດ​ຂອບ​ເຂດ ຕາມ​ຂໍ້​ກຳນົດ​ກົດ​ລະບຽບ​ຂອງ​ພັກ. ວຽກ​ງານກວດກາ, ຕິດຕາມ​ກວດກາ ຕໍ່​ກຳມະການ​ຄະນະ​ພັກ​ຂັ້ນ​ດຽວ​ກັນ, ຕໍ່​ຫົວໜ້າ, ພະນັກງານ​ຫຼັກ​ແຫຼ່ງ ຍັງ​ບໍ່​ທັນ​ແຂງ​ແຮງ. ຄະນະ​ກຳມະການ​ກວດກາຂັ້ນ​ດຽວ​ກັນ ກໍ​ຍັງ​ບໍ່​ທັນ​ກ້າ ບໍ່​ເປັນ​ເຈົ້າ​ການ​ໃຫ້​ຄຳ​ປຶກສາ, ຄຳ​ສະ​ເໜີຕໍ່​ຄະນະ​ພັກ ກ່ຽວ​ກັບ​ວຽກ​ງານ​ກວດກາ, ​ເປັນ​ຕົ້ນ​ແມ່ນ​ການ​ກວດກາ​ບັນດາ​ກໍລະນີການລະ​ເມີດ​ທີ່​ລະອຽດ. ການ​ຕິດຕາມ​ກວດກາ​ກໍ່​ບໍ່​ຈະ​ແຈ້ງພໍ​ປານ​ໃດ. 

ການ​ກຳນົດ​ເນື້ອ​ໃນ​ແຜນການກວດກາ, ຕິດຕາມ​ກວດກາ ຂອງ​ຄະນະ​ພັກ ອົງການ​ຈັດ​ຕັ້ງ​ພັກຈຳນວນ​ໜຶ່ງ ​ມີ​ລັກສະນະ​ກະ​ແຈກ​ກະ​ຈ່າຍ, ຍັງ​ບໍ່​ທັນ​ເຂົ້າ​ໃນບັນດາ​ຂົງ​ເຂດ​ທີ່​ສັບສົນ, ສຳ​ພັດ​ໄວ, ຂົງ​ເຂດ​ທີ່ມັກ​ເກີດ​ຄວາມ​ຫຍໍ້​ທໍ້ ຫຼື​ບັນດາ​ບັນຫາ​ທີ່​ພວມ​ສ້າງ​ຄວາມ​ຮ້ອນເຄືອງ​ຢູ່​ທ້ອງ​ຖິ່ນ, ສຳນັກງານ​ອົງການ, ກົມ​ກອງ; ຢູ່​ບັນດາ​ທ້ອງ​ຖິ່ນ, ​ເປັນ​ຕົ້ນ​ແມ່ນ​ຂັ້ນ​ເມືອງ​ແລະຂັ້ນ​ຮາກ​ຖານ ຍັງ​ບໍ່​ທັນ​ມີ​ການ​ຫັນປ່ຽນ​ຢ່າງ​ແຂງ​ແຮງ, ຍັງ​ບໍ່​ທັນ​ມີ​ກໍລະນີ ຄະ​​ດີ​ທີ່​ເປັນ​ຈຸດ​ໜັກ​ໃຈກາງ, ກໍລະນີ ຄະດີ​ທີ່​ເປັນ​ຕົວຢ່າງ. ຍັງ​ມີ​ອົງການ​ຈັດ​ຕັ້ງ​ພັກ​ທີ່​ຂາດ​ຄຸນ​ວຸດ​ທິ, ບໍ່​ກ້າ​ແກ່ນ, “ຖື​ຄວາມ​ສອດຄ່ອງກັນ​ເປັນ​ດີເລີດ”, ຊ້ຳບໍ່​ໜຳ ຍັງ​ປົກ​ປ້ອງ​​ຄວາມ​ຜິດ​ພາດ​ຂອງພະນັກງານ ສະມາຊິກ​ພັກທີ່​ມີຕຳ​ແນ່​ງ ​ອຳນາດ. ການ​ປະສານ​ສົມທົບ​ວຽກ​ງານ​ ລະຫວ່າງຄະນະ​ກຳມະການ​ກວດກາ ​ແລະ ບັນດາ​ອົງການ​ທີ່​ກ່ຽວຂ້ອງ, ​ເຊັ່ນ​ກວດກາ, ກວດ​ສອບ​ບັນຊີ, ຕຳຫຼວດ, ອົງການ​ໄອ​ຍະ​ການ, ສານ... ​ໃນບາ​ງ​ເວລາ, ບາ​ງວຽກ​ງານ ກໍ່ຍັງ​ບໍ່​ທັນ​ແໜ້ນ​ແຟ້ນ, ບໍ່​ເປັນ​ປະຈຳ, ປະສິດທິ​ຜົນ​ຕ່ຳ. 

ຍ້ອນ​ຍັງ​ມີ​ຂໍ້​ຈຳກັດ, ຄວາມ​ຂາດ​ຕົກ​ບົກພ່ອງ​ເທິງ​ນີ້ ດັ່ງ​ນັ້ນ ສະພາບການລະ​ເມີດ​ລະບຽບ​ວິ​ໄນ​ຂອງ​ອົງການ​ຈັດ​ຕັ້ງ​ພັກ, ຂອງ​ພະນັກງານ ສະມາຊິກ​ພັກ ຈຶ່ງຜັນ​ປ່ຽນຢ່າງ​ສັບສົນ, ​ເປັນ​ຕົ້ນ​ແມ່ນ​ການ​ສໍ້​ລາດ​ບັງ​ຫຼວງ, ຄວາມ​ຫຍໍ້​ທໍ້, ຟຸມ​ເຟືອຍ, ຜົນ​ປະ​ໂຫຍ​ດໝູ່​ພວກ, ຄວາມ​ເສື່ອມ​ໂຊມ​ທາງ​ດ້ານ​ຄຸນສົມບັດ, ​ແບບ​ແຜນ​ດຳລົງ​ຊີວິດ,...

ປີ 2017, ສະພາບ​ການ​ໂລກ ​ແລະ ພາກ​ພື້ນສືບຕໍ່ຜັນ​ປ່ຽນ​ຢ່າງ​ສັບສົນ, ມີສິ່ງ​ທ້າ​ທາຍ​ໃໝ່​ຫຼາຍ​ຢ່າງປາກົດ​ຂຶ້ນ ​ແລະ ​ເປັນ​ຜົນ​ສະທ້ອນ​ໂດຍ​ກົງ ​ເຖິງ​ການ​ນຳພາ​ຂອງ​ພັກ, ການ​ຄຸ້ມ​ຄອງ​ບໍລິຫານ​ຂອງ​ລັດ; ​ເປັນ​ປີ​ທີ່​ສອງ​ທີ່​ທົ່ວ​ພັກ, ທົ່ວ​ປວງ​ຊົນ ​ແລະ ທົ່ງ​ກອງທັບ​ເຮົາ ສືບ​ຕໍ່​ປະຕິບັດມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ; ​ເປັນ​ປີ​ແຫ່ງ​ການ​ສຸມ​ໃສ່​ຍູ້​ແຮງ​ການ​ປະຕິບັດມະຕິ​ກອງ​ປະຊຸມ​ສູນ​ກາງ ຄັ້ງ​ທີ 4 ສະ​ໄໝ XII ກ່ຽວ​ກັບ​ການ “​ເພີ່ມ​ທະວີ​ການ​ກໍ່ສ້າງ​ ປັບປຸງ​ພັກ; ກິດ​ກັ້ນ​ແລະ​ຍູ້​ຖອຍ​ຄວາມ​ເສື່ອມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ບັນດາ​ປະກົດ​ການ “ຜັນ​ປ່ຽນດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ້ພາຍ​ໃນ”. ພັກ​ເຮົາ​​ໄດ້ຕົກລົງ​​ສືບ​ຕໍ່​ດຳ​ເນີນ​ການ​ກໍ່ສ້າງ ປັບປຸງ​ພັກ ດ້ວຍ​ຈິດ​ໃຈ​ເດັດດ່ຽວ​ກວ່າ ​ແລະ​ແຂງ​ແຮງ​ກວ່າ​ເກົ່າ, ​ແນ​ໃສ່ສ້າງ​ໃຫ້​ມີ​ບາດກ້າວ​ຜັນ​ປ່ຽນ​ໃໝ່​ໃນ​ດ້ານ​ຕ່າງໆ. 

ຂ້າພະ​ເຈົ້າ​ຢາກ​ໃຫ້​ບັນດາ​ສະຫາຍ​ເອົາ​ໃຈ​ໃສ່ຕື່ມ​ອີກ​​ຄື ປະ​ຈຸ​ບັນ ພະນັກງານ ສະມາຊິກ​ພັກ ​ແລະ ປະຊາຊົນດີ​ໃຈ, ສະໜັບສະໜູນ ​ແລະ ມີ​ຄວາມ​ຫວັງ​ດີ ຍ້ອນ​ວ່າ​ມີມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 4 ສະ​ໄໝ​ທີ XI, ມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 4 ສະ​ໄໝ​ທີ XII ກ່ຽວ​ກັບ​ການ​ກໍ່ສ້າງ, ປັບປຸງ​ພັກ, ​ແຕ່ປະຊາຊົນ​ກໍ່​ຍັງ​ມີ​ຄວາມກັງວົນ ລັ່ງ​ເລ​ວ່າ ມະຕິ​ເຫຼົ່ານັ້ນຈະ​ໄດ້​ຮັບ​ການປະຕິບັດຢ່າງ​ສຸດ​ກົດ​ສຸດ​ປາຍ​ຫຼື​ບໍ່, ປະຊາຊົນ​ຍັງ​ມີ​ຄວາມ​ຮ້ອນເຄືອງກ່ຽວ​ກັບຄວາມ​ອ່ອນ​ແອຫຍໍ້​ທໍ້ ຄວາມຈຳກັດ​ຢູ່​ໃນ​ພັກ, ​ເປັນ​ຕົ້ນ​ແມ່ນ​ສະພາບ​ການ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄວາມ​ຕົກ​ຕ່ຳ​ທາງ​ດ້ານຄຸນສົມບັດແລະແບບ​ແຜນ​ດຳ​ລົງ​ຊີວິດ, ພະຍາດ​ອາດຍາ​ສິດ, ການ​ສໍ້​ລາດ​ບັງ​ຫຼວງ, “ຜົນ​ປະ​ໂຫຍ​ດໝູ່​ພວກ” ​ໃນ​ພະນັກງານ ສະມາຊິກ​ພັກ ຂ້າ​ລັດຖະການ​ພາກສ່ວນ​ໜຶ່ງ ທີ່​ຍັງ​ບໍ່​ຖືກ​ກີດ​ກັ້ນ, ຍູ້​ຖອຍ. ​ໃນ​ສະພາບ​ດັ່ງ​ກ່າວນັ້ນ, ບົດບາດ ຄວາມ​ຮັບຜິດຊອບ​ຂອງ​ຄະນະ​ພັກ, ຄະນະ​ກຳມະການ​ກວດກາ ​ແລະ ຂອງ​ພະນັກງານ​ເຮັດ​ວຽກ​ງານ​ກວດກາ​ຂອງ​ພັກ ຢູ່​ຂັ້ນ​ຕ່າງໆ ​ມີ​ຄວາມ​ສຳຄັນ​ທີ່​ສຸດ. 

ຄຽງ​ຄູ່ກັບ​ການ​ສືບ​ຕໍ່​ເຊື່ອ​ມຊຶມ, ປະຕິບັດມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ​ແລະ ບັນດາ​ເອກະສານ​ຂອງ​ພັກ​ກ່ຽວ​ກັບ​ວຽກ​ງານ​ກວດກາ, ຕິດຕາມ​ກວດກາ; ທິດ​ທາງ ໜ້າ​ທີ່​ຂອງວຽກ​ງານ​ກວດກາ, ຕິດຕາມ​ກວດກາ ປີ 2017 ທີ່​ລາຍ​ງານ​ໃນ​ກອງ​ປະຊຸມ​ໄດ້​ວາງ​ອອກ​ນັ້ນ, ຂ້າພະ​ເຈົ້າ​ສະ​ເໜີ​ໃຫ້​ຄະນະ​ພັກ, ອົງການ​ຈັດ​ຕັ້ງ​ພັກ ​ແລະ ຄະນະ​ກຳມະການ​ກວດກາ​ຂັ້ນ​ຕ່າງ​​ໆ ​ໃນ​ປີ 2017 ​ແລະ ​ໃນ​ຊຸມ​ປີ​ຕໍ່​ໄປ ຕ້ອງ​ປະຕິບັດ​ເນື້ອ​​ໃນ​ພື້ນຖານ​ຈຳນວນ​ໜຶ່ງລຸ່ມ​ນີ້​ໃຫ້​ໄດ້​ເປັນ​ຢ່າງ​ດີ: 

1- ຕ້ອງ​ຮັບ​ຮູ້​ຢ່າງ​ຄົບ​ຖ້ວນ ​ແລະ ​ເລິກ​ເຊິ່ງກວ່າ​ອີກ ​ກ່ຽວ​ກັບ​ບົດບາດ ທີ່​ຕັ້ງ ຄວາມ​ສຳຄັນ​ຂອງວຽກ​ງານ​ກວດກາ, ຕິດຕາມ​ກວດກາ, ປະຕິບັດ​ວິ​ໄນ​ຂອງ​ພັກ. ການ​ກວດກາ, ຕິດຕາມ​ກວດກາ ​ເປັນ​ໜຶ່ງ​ໃນ​ບັນດາ​​ແບບ​ວິທີ​ນຳພາ​ຂອງ​ພັກ, ​ເປັນພາກສ່ວນ​ທີ່​ສຳຄັນ​ໃນ​ວຽກ​ງານ​ກໍ່ສ້າງ​ພັກ. ພັກ​ກອມ​ມູນິດ​ຫວຽດນາມຢືນຢັນ​ການ​ກວດກາ​ເປັນ​ພາລະ​ບົດບາດການນຳຂອງ​ພັກ, ​ເປັນ​ໜ້າ​ທີ່​ຂອງ​ທົ່ວ​ພັກ; ນຳພາ​ຫາກ​ບໍ່​ກວດກາ​ກໍ່​ຖືກ​ຖື​ວ່າ​ບໍ່​ນຳພາ. 

2- ວຽກ​ງານ​ກວດກາ, ຕິດຕາມ​ກວດກາຕ້ອງ​ໄດ້​ດຳ​ເນີນ​ຢ່າງ​ເປັນ​ປະຈຳ, ຮອບດ້ານ, ​ເປີດ​ເຜີຍ, ປະຊາທິປະ​ໄຕ, ຮອບ​ຄອບ ​ແລະ ​ແໜ້ນ​ແຟ້ນ, ​ໃນ​ນັ້ນ ຖື​ການ​ກັນ ​ແລະ ສ້າງ​ເປັນ​ຕົ້ນຕໍ. ວຽກ​ງານ​ກວດກາ, ຕິດຕາມ​ກວດກາ, ​ວິ​ໄນ​ຂອງ​ພັກ ​ແມ່ນເພື່ອຕັກ​ເຕືອນ, ປັບປຸງ, ກີດ​ກັ້ນ​ຢ່າງ​ທັນ​ການ​ ຕໍ່ບັນດາ​ການ​ກະທຳ​ລະ​ເມີດ​ແຜນ​ນະ​ໂຍບາຍ ​ແນວທາງ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ, ຕໍ່​ຄວາມ​ບໍ່​ເປັນ​ແບບຢ່າງ​ໃນ​ຊີວິດ ດ້ວຍ​ຈຸດປະສົງ “ປົວ​ພະຍາດ​ກູ້​ຊີວິດ”; ພ້ອມ​ກັນ​ນັ້ນ, ​ເດັດດ່ຽວ​ແກ້​ໄຂ​ລົງ​ໂທດບັນດາ​ອົງການ​ຈັດ​ຕັ້ງ​ພັກ, ສະມາຊິກ​ພັກ​ທີ່​ຕັ້ງ​ໃຈ​ລະ​ເມີດ​ລະບຽບ​ວິ​ໄນ, ສົ່ງ​ຜົນ​ກະທົບ​ຕໍ່​ກຽດ​ສັກ​ສີ​ຂອງ​ພັກ ກໍ່ຄື​ຕໍ່​ການ​ພັດທະນາ​ຂອງ​ປະ​ເທດ​ຊາດ. ພວກ​ເຮົາ​ມີ​ມະນຸດສະທຳ, ມະນຸດ​ອະລິຍະ​ທຳ, ມີ​ຄວາມ​ເມດ​ຕາ, ຄວາມ​ຮັກ​ແພງ​ມະນຸດ​ທີ່​ສຸດ; ພວກ​ເຮົາບໍ່​ດີ​ໃຈ​ຈັກ​ໜ້ອຍ​ເລີຍ ​ເມື່ອ​ຕ້ອງ​ປະຕິບັດ​ວິ​ໄນ​ຕໍ່​ສະ​ຫາຍ ຕໍ່​ເພື່ອນ​ຮ່ວມ​ງານຂອງ​ຕົນ; ກົງ​ຂ້າມ, ພວກ​ເຮົາຮູ້ສຶກ​ທໍລະມານ​ໃຈ ​ໂສກ​ເສົ້າ​ທີ່​ສຸດ. ​ແຕ່ ​ເພື່ອ​ຄວາມ​ກ້າວໜ້າ​ລວມ, ​ເພື່ອ​ໃຫ້​ຫຼາຍ​ຄົນ​ບໍ່ກະທຳ​ຜິດ​ລະບຽບ​ວິ​ໄນ ພວກ​ເຮົາ​ຈຶ່ງຈຳ​ເປັນ​ຕ້ອງ​ປະຕິບັດ​ວິ​ໄນ; ປະຕິບັດ​ວິ​ໄນບາງ​ຄົນ​ເພື່ອ​ຊ່ວຍ​ກູ້​ໜື່ນຄົນ! 

3- ສືບ​ຕໍ່​ປະຕິບັດມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 4 ສະ​ໄໝ​ທີ XII ກ່ຽວ​ກັບ​ການ​ກໍ່ສ້າງ, ປັບປຸງ​ພັກ. ປີ 2016 ພວກ​ເຮົາ​ເຮັດ​ໄດ້​ຫຼາຍ​ວຽກ, ປີ 2017 ພວມ​ສືບ​ຕໍ່​ເຮັດ ​ແລະ ຍັງ​ມີ​ຫຼາຍ​ວຽກ​ທີ່​ຕ້ອງ​ເຮັດ. ​ໃນ​ບັນຍາກາດ​ທີ່​ລະບົບ​ການ​ເມືອງ​ທັງ​ໝົດ ພວມ​ລົງມື​ປະຕິບັດ​ງານ, ປະຊາຊົນ​ກຳລັງ​ເບີ​ກບານ​ໃຈ ​ໃຫ້ການສະໜັບສະໜູນ, ພວກ​ເຮົາ​ຕ້ອງ​ຍູ້​ແຮງ ​ແລະ ​ເຮັດ​ຢ່າງ​ເດັດຂາດ​ກວ່າ​ອີກ, ບໍ່ພໍ​ໃຈ​ນຳ​ສິ່ງ​ທີ່​ໄດ້​ເຮັດ​ມາ, ຕ້ອງ​ສືບ​ຕໍ່​ປ່ຽນ​ແປງ​​ໃໝ່, ຍົກ​ສູງ​ຈິດ​ໃຈບຸກບືນ ​ເພື່ອ​ພາລະກິດ​ປະຕິວັດ​ຂອງ​ພັກ, ຂອງ​ຊາດ, ​ເພື່ອ​ປະຊາຊົນ. 

4- ຕ້ອງ​ເປັນ​ເຈົ້າ​ການ​ໃນ​ການສະ​ເໜີ​ບັນດາ​ວິ​ແກ້​ໄຂ​ທີ່​ມີ​ຄວາມ​ສັກສິດ ​ເພື່ອ​ແກ້​ໄຂບັນດາ​ວຽກ​ງານ​ທີ່​ພວມ​ເຮັດ​ໃຫ້​ແລ້ວ​ຢ່າງ​ຂາດ​ຂັ້ນ, ພ້ອມ​ກັນ​ນັ້ນ ​ກໍ່​ກະກຽມ​ເພື່ອ​ສືບ​ຕໍ່​ແກ້​ໄຂ​ບັນດາ​ກໍລະນີ ຄະດີ​ທີ່​ຫາ​ກໍ່​ເກີດຂຶ້ນ​ໃໝ່. ​ໃນ​ຂະ​ບວນ​ວິວັດ​ການ​ກວດກາ, ຕິດຕາມ​ກວດກາ, ຕ້ອງ​ເອົາ​ໃຈ​ໃສ່​ເຖິງ​ຂອດ​ຄົ້ນ​ເຜີຍ, ​ເຜີຍ​ອອກ​ໃນ​ເບື້ອງ​ຕົ້ນ. ຜ່ານ​ການ​ກວດກາ, ຕິດຕາມ​ກວດກາ ​ເພື່ອ​ຄົ້ນ​ເຜີຍ​ການ​ລະ​ເມີດ​ວິ​ໄນ; ຜ່ານ​ໜັງສືພິມ, ຫາງ​ສຽງ​ສັງຄົມ, ຜ່ານ​ການ​ເຜີຍ​ໂທດ​ທີ່​ປະຊາຊົນ​ແຈ້ງ​ມາ ​ເພື່ອ​ຈະ​ເປັນ​ເຈົ້າ​ການຈັດ​ຕັ້ງ​ການ​ກວດກາ. ຕ້ອງ​ຮູ້ສຶກ​ໄວ, ມີ​ສະຕິ​ສອດສ່ອງ​ວ່ອງ​ໄວ, ຢ່າ​ເພີກເສີຍກັບ​ເຫດການ. ​ເອົາ​ໃຈ​ໃສ່​ກວດກາ​ຢ່າງ​ສະ​ໝ່ຳສະ​ເໝີ​ໃນ​ບັນດາ​ຂົງ​ເຂດ, ຂະ​ແໜງ​ການ, ທ້ອງ​ຖິ່ນ. ບັນດາ​ທ້ອງ​ຖິ່ນ​ຕ້ອງ​ເຮັດ​ຢ່າງ​ແຂງ​ແຮງ​ກວ່າ​ອີກ, ດຸ​ເດືອດ​ກວ່າ​ອີກ; ຫຼີກລ່ຽງການ “ລໍຖ້າ, ຄອຍ​ຟັງ”, “​ເທິງ​ໜັກ, ລຸ່ມ​ເບົາ”. ຖ້າ​ຫາກ​ ແຕ່ລະ​ແຂວງ, ກຳ​ແພງ​ນະຄອນ, ​ແຕ່ລະ​ທ້ອງ​ຖິ່ນ ​ເລືອກ​ເອົາບາງ​ກໍລະນີ​ທີ່​ມີ​ລັກສະນະ​ຕົວຢ່າງ ​ເພື່ອຊີ້​ນຳ​ແກ້​ໄຂຄື​ທີ່​ສູນ​ກາງ​ໄດ້​ເຮັດ​ໃນ​ເວລາ​ທີ່​ຜ່ານ​ມາມໍ່​ນີ້ ກໍ່​ຈະ​ມີ​ຄຸນ​ປະ​ໂຫຍ​ດດີ​ທີ່​ສຸດ. ​ເອົາ​ໃຈ​ໃສ່​ບັນດາ​ຂອດ, ບັນດາ​ຂົງ​ເຂດ​ທີ່​ມັກ​ເກີດການລະ​ເມີດວິ​ໄນ ​ເກີດ​ຄວາມຫຍໍ້​ທໍ້ (​ເຊັ່ນ​ການ​ຄຸ້ມ​ຄອງ​ທີ່​ດິນ, ການ​ເງິນ, ງົບ​ປະມານ, ວຽກ​ງານ​ພະນັກງານ,...). 

ຂ້າພະ​ເຈົ້າ​ສະ​ເໜີ​ໃຫ້ຄະນະ​ກຳມະການ​ກວດກາ​ສູນ​ກາງ ຕ້ອງ​ມີ​ຮູບ​ການ​ທີ່​ເໝາະ​ສົມ​ເພື່ອ​ເພີ່ມ​ທະວີ​ການ​ຊີ້​ນຳ​ການ​ກວດກາ, ຕິດຕາມ​ກວດກາ, ປະຕິບັດ​ວິ​ໄນຕໍ່​ບັນດາ​ອົງການ​ຈັດ​ຕັ້ງ, ສະມາຊິກ​ພັກ ຢູ່​ຂັ້ນ​ເມືອງ ​ແລະ ຮາກ​ຖານ ​ເມື່​ອ​ເຫັນ​ມີ​ສັນຍານ​ຂອງ​ການລະ​ເມີດ​ວິ​ໄນ, ຫຼີກ​ລ່ຽງການ​​ປິດບັງຄວາມ​ຜິດພາດ​ຂອງ​ບັນດາ​ທ້ອງ​ຖິ່ນ, ສຳນັກງານ​ອົງການ, ກົມ​ກອງ; ​ເປັນ​ເຈົ້າ​ການ​ສົມທົບ​ຢ່າງ​ແໜ້ນ​ແຟ້ນ, ມີ​ປະສິດທິ​ຜົນ ກັບບັນດາ​ອົງ​ການຕຸລາການ, ກວດກາ ​ແລະ ກວດ​ສອບ ​ໃນ​ການ​ປະຕິບັດ​ໜ້າ​ທີ່, ຍູ້​ແຮງ​ການ​ພິຈາລະນາ, ​ກວດກາ, ຕິດຕາມ​ກວດກາ ຕໍ່​ບັນດາ​ກໍລະນີ ຄະດີ ດ້ວຍ​ຄວາມ​ຕັດສິນ​ໃຈ​ສູງ, ​ເດັດດ່ຽວ​ປົກ​ປັກ​ຮັກສາສັດຈະທຳ, ບໍ່​ອະນຸ​ລົມ​ຜ່ອນຜັນ​ໃຫ້ການ​ກະທຳ​ລະ​ເມີດ​ລະບຽບ​ວິ​ໄນ​ຂອງ​ພັກ. 

5- ​ເພື່ອ​ສຳ​ເລັດ​ໜ້າ​ທີ່ວຽກ​ງານ​ກວດກາ​ໃນ​ສະພາບ​ການ​ປະຈຸ​ບັນ, ສິ່ງ​ຕັດສິນ​ທີ່​ສຳຄັນ​ຄື ຕ້ອງ​ສືບ​ຕໍ່​ຍົກ​ສູງ​ຄຸນ​ນະພາ​ບຂອງ​ຖັນ​ແຖວ​ພະນັກງານກວດກາ; ຕ້ອງ​ກໍ່ສ້າງຖັນ​ແຖວ​ພະນັກງານກວດກາຂັ້ນຕ່າງໆ​ ໃຫ້​ມີ​ຄຸນນະພາ​ບຢ່າງ​ແທ້​ຈິງ, ມີ​ຄວາມ​ສາມາດ​ສຳ​ເລັດ​ໜ້າ​ທີ່; ມີ​ຄຸນສົມບັດ​ປະຕິວັດ; ມີ​ຄຸນ​ວຸດ​ທິການ​ເມືອງ, ບົດຮຽນ, ມີ​ລັກສະນະ​ຕໍ່ສູ້​ສູງ; ມີ​ທັກ​ສະ​ວິຊາ​ສະ​ເພາະທີ່​ຊຳ​ນິຊຳນານ, ມີວິທີ​ເຮັດ​ວຽກຢ່າງວິທະຍາສາດ, ​ໃກ້ຊິດຕິດ​ແທດ, ຮອບ​ຄອບ ​ແລະ ປະພຶດ​ຢ່າງ​ມີ​ວັດທະນະທຳ. 

ໜ້າ​ທີວຽກ​ງານ​ກວດກາ, ຕິດຕາມ​ກວດກາ​ໃນ​ເວລາ​ທີ່​ຈະ​ມາ​ເຖິງ​ແມ່ນ​ໜັກໜ່ວງ​ທີ່​ສຸດ. ພະນັກງານ​ກວດກາ​ຍາມ​ໃດ​ກໍ່ຕ້ອງ​ປະ​ເຊີນ​ໜ້າ, ຕໍ່ສູ້​ກັບ​ຄວາມ​ຜິດພາດ, ຄວາມ​ຫຍໍ້​ທໍ້​ຂອງ​ສະຫາຍ, ​ເພື່ອນ​ຮ່ວມ​ງານ ​ແລະ ຂອງ​ທັງ​ຍາດຕິ​ພີ່ນ້ອງ​ຂອງ​ຕົນ; ຍາມ​ໃດ​ກໍ່​ຕ້ອງ​ຕໍ່ສູ້​ກັບ​ຕົນ​ເອງ ​ເພື່ອບໍ່ຖືກ​ຕົກ​ໃສ່​ສິ່ງຍົວະ​ຍວນ​ປະຈຳ​ວັນ. ນັ້ນ​ເປັນ​ສິ່ງ​ທ້າ​ທາຍ​ທີ່​ບໍ່​ແມ່ນ​ນ້ອຍ. ຂ້າພະ​ເຈົ້າ​ແບ່ງປັນ​ກັບ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ທີ່​ບັນດາ​ສະຫາຍ​ພວມ​ປະ​ເຊີນ​ໜ້າ, ​ແຕ່​ພັກ, ປະຊາຊົນ​ເຊື່ອໜັ້ນ​ໃນ​ຄວາມ​ກ້າຫານ, ​ເຈດ​ຈຳນົງ​ຂອງ​ພະນັກງານກວດກາ - ທະຫານ​ປະຈັນບານ​ໃນ​ແນວ​ຮົບຕໍ່ສູ້​ກັບ​ຄວາມ​ຜິດພາດ, ຄວາມ​ຫຍໍ້​ທໍ້​ຢູ່​ໃນ​ພັກ. ພະນັກງານ​ເຮັດ​ວຽກ​ງານ​ກວດກາ​ແຕ່ລະຄົນ ຕ້ອງ​ກຳ​ແໜ້ນ​ຫຼັກການ, ກົນ​ໄກ, ນະ​ໂຍບາຍ, ຂໍ້​ກຳນົດ​ຕ່າງໆ​ຂອງ​ພັກ, ລັດ ​ເພື່ອ​ປະຕິບັດ​ໜ້າ​ທີ່ດ້ວຍ​ສິ່ງ​ຊຸກຍູ້​ທີ່​ຜ່ອງ​ໃສ, ບໍ່​ແມ່ນ​ເພື່ອ​ຜົນ​ປະ​ໂຫຍ​ດສ່ວນ​ບຸກຄົນ, ບໍ່​ເຮັດ​ແບບ​ໂສ​ສຸດ, ບໍ່​ເຮັດ​ຕະພຶດຕະພື. ຄຳ​ສະຫລຸບ​ການ​ກວດກາ​ຕ້ອງ​ຈະ​ແຈ້ງ, ​ໂປ່​ງ​ໃສ; ​ແກ້​ໄຂ​ຢ່າ​ງຖືກຕ້ອງ, ພາວະ​ວິ​ໄສ; ວິ​ໄນ​ຕ້ອງ​ເຂັ້ມ​ງວດ. ຕ້ອງ​ກ້າ​ຕໍ່ສູ້, ຊື່​ກົງ ​ແລະ ຍິ່ງ​ກວ່າ​ນັ້ນ​ແມ່ນ​ຕ້ອງ​ຊື່ສັດ​ບໍລິສຸດ, ປອດ​ໃສ. ຖ້າ​ຫາກ​ບໍ່​ຊື່ສັດ​ສຸຈະລິດ, ບໍ່​ບໍລິສຸດ​ປອດ​ໃສ ​ແມ່ນ​ບໍ່​ເວົ້າ​ກັບ​ໃຜ​ໄດ້, ບໍ່ກວດກາ, ຕິດຕາມ​ກວດກາ, ບໍ່​ປະຕິບັດ​ວິ​ໄນ​ຜູ້​ອື່ນ​ໄດ້. ພະນັກງານ​ກວດກາ​ຕ້ອງ​ເປັນ​ແບບຢ່າງ, ນຳ​ໜ້າ​ໃນ​ການ​ປະຕິບັດມະຕິ​ກອງ​ປະຊຸມ​ສູນ​ກາງຄັ້ງ​ທີ 4 ສະ​ໄໝ​ທີ XII ກ່ຽວ​ກັບ​ການ​ກໍ່ສ້າງ ປັບປຸງ​ພັກ, ​ແລະຄຳ​ສັ່ງ​ເລກທີ 05-CT/TW, ວັນ​ທີ 15-5-2016, ຂອງ​ກົມ​ການ​ເມືອງ, ກ່ຽວ​ກັບ​ການ​ຍູ້​ແຮງ​ການ​ຮ່ຳຮຽນ ​ແລະ ​ເຮັດ​ຕາມ​ແນວ​ຄິດ, ຄຸນສົມບັດ, ​ແບບ​ແຜນ​ຂອງ​ປະທານໂຮ່ຈີ​ມິນ. ຕ້ອງ​ຕ້ານ​ຄວາມ​ຫຍໍ້​ທໍ້​ຢູ່​ໃນ​ບັນດາ​ສຳນັກງານ​ອົງການ ​ແລະ ບຸກຄົນ​ຜູ້​ເຮັດ​ວຽກ​ງານ​ຕ້ານ​ຄວາມ​ຫຍໍ້​ທໍ້. 

ປະຈຸ​ບັນ​ນີ້, ບົດບາດ​ທີ່​ຕັ້ງຂອງຄະນະກຳມະການ​ກວດກາ​ຂັ້ນ​ຕ່າງໆ, ​ເປັນ​ຕົ້ນ​ແມ່ນຂອງຄະນະ​ກຳມະການ​ກວດກາ​ສູນ​ກາງ, ພວມ​ໄດ້​ຮັບ​ການ​ເຊີດ​ຊູ; ສິດທິ, ຄວາມ​ຮັບຜິດຊອບ​ໄດ້​ຮັບ​ການ​ເປີດ​ກວ້າງ; ​ແຜນການ​ເຄື່ອນ​ໄຫວ ​ແລະ ກົດ​ລະບຽບ​ການ​ງານ​ ໄດ້​ຮັບ​ການ​ກໍ່ສ້າງ​ຂຶ້ນ​ແລ້ວ. ສູນ​ກາງ, ກົມ​ການ​ເມືອງ, ຄະນະ​ເລຂາ​ທິການ, ຄະນະ​ພັກ​ຂັ້ນ​ຕ່າງໆ ​ໄດ້​ເອົາ​ໃຈ​ໃສ່​ເປັນ​ພິ​ເສດ​ເຖິງ​ວຽກ​ງານ​ກວດກາ​ຂອງ​ພັກ. ນັ້ນ​ແມ່ນ​ປະ​ຖົມ​ປັດ​​ໄຈທີ່​ສຳຄັນ​ ເພື່ອ​ໃຫ້​ບັນດາ​ສະຫາຍ​ດຳ​ເນີນ​ງານ​ຢ່າງ​ແຂງ​ແຮງ ​ເດັດດ່ຽວ​ກວ່າ​ອີກ, ​ເຄື່ອນ​ໄຫວ​ມີ​ຄວາມ​ສັກສິດ ມີ​ປະສິດທິ​ຜົນ​ກວ່າ​ອີກ. ສະພາບ​​ຕົວຈິງຮຽກຮ້ອງ​ໃຫ້​ພວກ​ເຮົາ​ຕ້ອງ​ເຄື່ອນ​ໄຫວກະທຳ, ​ເວົ້າ​ໄປ​ຄຽງ​ຄູ່​ກັບ​ເຮັດ, ບໍ່​ເວົ້າ​ທິດ​ສະ​ດີ, ສິນ​ທຳ​​ລວມໆ​ແບບ​ນ້ຳ​ເຕົ້າ​ເປົ່າ.

ຂ້າພະ​ເຈົ້າ​ເຊື່ອ​ໝັ້ນ​ວ່າ, ດ້ວຍ​ຄວາມ​ເອົາ​ໃຈ​ໃສ່, ຊີ້​ນຳ​ນຳພາ ຂອງ​ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລຂາ​ທິການ, ການ​ສົມທົບ​ຢ່າງ​ແໜ້ນ​ແຟ້ນລະຫວ່າງ​ລັນ​ດາ​ອົງການ​ທີ່​ກ່ຽວຂ້ອງ, ຄວາມ​ເຫັນ​ດີ​ເຫັນ​ພ້ອມ, ສະໜັບສະໜູນ, ຊ່ວຍ​ເຫຼືອຂອງ​ພະນັກງານ, ສະມາຊິກ​ພັກ ​ແລະ ປະຊາຊົນ, ​ແນ່ນອນ​ວ່າ ຄະນະກຳມະການ​ກວດກາ​ສູນ​ກາງ ​ແລະ ຄະນະກຳມະການ​ກວດກາ​ຂັ້ນ​ຕ່າງໆ ຈະ​ຜ່ານຜ່າ​ຄວາມ​ຫຍຸ້ງຍາກ, ອຸປະສັກ​ທຸກ​ຢ່າງ, ສຳ​ເລັດ​ໜ້າ​ທີ່​ທີ່​ໄດ້​ຮັບ​ມອບ​ໝາຍ​ຢ່າງ​ດີ​ເດັ່ນ, ຕອບ​ສະໜອງ​ໄດ້​ກັບ​ຄວາມ​ຮຽກຮ້ອງ​ຂອງ​ພັກ, ປະຊາຊົນ ​ແລະ ປະ​ເທດ​ຊາດ. ຫວັງ​ວ່າ ພາຍ​ຫຼັງ​ກອງ​ປະຊຸມ​ນີ້, ວຽກ​ງານ​ກວດກາ​ຂອງ​ພັກ, ​ເປັນ​ຕົ້ນ​ແມ່ນ​ຢູ່​ບັນດາ​ທ້ອງ​ຖິ່ນ, ບັນດາ​ຂະ​ແໜງ​ການ ຈະ​ມີ​ບາດກ້າວ​ຂະຫຍາຍຕົວ​ໃໝ່, ​ແຂງ​ແຮງ​ກວ່າ​ອີກ./.

​ໂດຍ ຫງວຽນ​ຝູຈ້ອງ

​ເລຂາທິການ​ໃຫຍ່ຄະນະ​ບໍລິຫານ​ງານ​ສູນ​ກາງ

ພັກ​ກອມ​ມູນິດ​ຫວຽດນາມ

-----------------------

* ຫົວ​ຂໍ້​ໂດຍ​ວາ​ລາ​ສານ​ກອມ​ມູນິດ​ເປັນ​ຜູ້​ແຕ່ງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ