ວັນພຸດ, 26/7/2017
ແມ່ຍິງຫວຽດນາມ ສືບຕໍ່ເສີມຂະຫຍາຍມູນເຊື້ອອັນສະຫງ່າລາສີ, ປະກອບສ່ວນອັນໃຫຍ່ຫຼວງ ເຂົ້າໃນການກໍ່ສ້າງ ແລະ ປົກປັກຮັກສາປະເທດຊາດ*
26/5/2017 10:1' ສົ່ງ ພິມ
ພິທີໄຂກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງສະຫະພັນແມ່ຍິງຫວຽດນາມ. (ພາບ: TTXVN)

ມື້­ນີ້, ຂ້າ­ພະ­ເຈົ້າ​ຮູ້­ສຶກ​ດີ­ໃຈ​ທີ່​ສຸດ​ທີ່​ໄດ້​ມາ​ຮ່ວມກອງ​ປະ­ຊຸມ​ໃຫຍ່​ຜູ້​ແທນ​ແມ່ຍິງ​ທົ່ວ​ປະ­ເທດ ຄັ້ງ​ທີ XII ​ເຊິ່ງເປັນ​ເຫດ­ການ​ອັນ​ສຳ­ຄັນ​ ໃນ​ຊີ­ວິດ​ການ­ເມືອງ-ສັງ­ຄົມຂອງ​ປະ­ເທດ. ຕາງ­ໜ້າ​​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ, ຂ້າ­ພະ­ເຈົ້າຂໍ​ຝາກ​ຄຳ​ອວຍ­ພອນ​ໄຊ​ອັນ​ປະ­ເສີດ​ມາ​ຍັງ​ບັນ­ດາ​ແຂກ​ທີ່​ມີ​ກຽດ, ບັນ­ດາ​ແມ່​ຫວຽດ­ນາມ​ວິ­ລະ​ຊົນ, ຂໍ​ອວຍ­ພອນ​ໄຊ​ໃຫ້ຜູ້​ແທນ​ທາງ​ການ 1.153 ສະຫາຍ​ທີ່ເປັນ​ບັນ­ດາ​ແມ່­ຍິງ​ຜູ້​ດີ­ເດັ່ນແລະແບບ­ຢ່າງ ຈາກ​ທຸກ​ແຫ່ງຫົນ​ໃນ​ທົ່ວ​ປະ­ເທດ ມາ​ເຕົ້າ­ໂຮມຢູ່ນະ­ຄອນ­ຫຼວງຮ່າ​ໂນ້ຍ​ທີ່​ມີມູນ​ເຊື້ອ​ອະ­ລິ­ຍະ​ທຳຫຼາຍ​ພັນ​ປີ ເພື່ອ​ເຂົ້າ​ຮ່ວມ​ກອງ​ປະ­ຊຸມ​ໃຫຍ່​ຄັ້ງ​ນີ້. ໂດຍ​ຜ່ານ​ບັນ­ດາ​ທ່ານ​ຜູ້​ແທນ, ບັນ­ດາ​ສະ­ຫາຍ ແລະ ເພື່ອນ​ມິດ, ຂ້າພະ​ເຈົ້າ​ຂໍ​ຝາກ​ຄຳ​ຢ້ຽມ­ຢາມ​ຖາມ​ຂ່າວ​ທີ່​ສະ­ໜິດ­ສະ­ໜົມ ແລະ ຄຳ​ອວຍ­ພອນ​ໄຊ​ທີ່​ດີ­ງາມ​ທີ່​ສຸດ ມາ​ຍັງ​ຖັນ​ແຖວ​ພະນັກງານ​ສະ­ຫະ­ພັນ​​ແມ່ຍິງຂັ້ນ​ຕ່າງໆ ພ້ອມ​ດ້ວຍ​ເອື້ອຍ​ນ້ອງ​ແມ່­ຍິງ​ໝົດ​ທຸກ​ຄົນ​ໃນ​ທົ່ວ​ປະ­ເທດ. 

ໃນ​ຕະ­ຫຼອດ​ໄລ­ຍະ​ປະ­ຫວັດ­ສາດ​ແຫ່ງ​ການ​ສ້າງ­ສາ ແລະ ປົກ​ປັກ​ຮັກ­ສາ​ປະ­ເທດ​ຊາດ​ຂອງ​ຊາດ​ເຮົາ, ແມ່­ຍິງຫວຽດ­ນາມ​ໄດ້​ມີ​ການ​ອຸ­ທິດ, ປະ­ກອບ­ສ່ວນ​ອັນ​ໃຫຍ່​ຫຼວງ, ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ກໍ່­ສ້າງ ແລະ ປົກ​ປັກ​ຮັກ­ສາ​ບ້ານ​​ເມືອງສຸວັນນະຂອງ​ປະ­ເທດ​ຊາດ, ສ້າງ​ເປັນ​ມູນ­ເຊື້ອ​ອັນ​ສະຫງ່າ​ລາ­ສີ: ອົງ­ອາດ​ກ້າ​ຫານ, ບໍ່​ຍອມຈຳ­ນົນ, ຊື່ສັດ​ບໍ­ລິ­ສຸດ, ​ເກັ່ງກ້າ​ໃນ​ການ​ງານ.

ເມື່ອ​ຍັງ​ຊີ­ວິດ​ຢູ່, ປະ­ທານ ໂຮ່​ຈີ​ມິນ ຍາມ​ໃດ​ກໍ່​ໄດ້​ເອົາ­ໃຈ­ໃສ່ ແລະ ຕີ​ລາ­ຄາ​ສູງ​ຕໍ່​ຖາ­ນະ, ບົດບາດ​ຂອງ​ແມ່­ຍິງຫວຽດ­ນາມ. ເພິ່ນ​ເຄີຍ​ເນັ້ນ​​ວ່າ: “ບ້ານເມືອງສຸວັນນະຫວຽດ­ນາມ ໄດ້ມີ​ຄວາມ​ສວຍ​ງາມ ແລະ ຮຸ່ງ­ເຮືອງ​ເຫຼືອງ​ເຫຼື້ອມ ຍ້ອນ​ການ​ອອກ­ແຮງ​ຕ່ຳ​ຫຸກປັກ​ແສ່ວ ​ເພີ່ມ​ພູນ​ຄູນ​ສ້າງ​ຂອງ​ແມ່­ຍິງ​ທັງ​ຄົນ​ໜຸ່ມ​ກໍ່​ຄື​ຄົນ​ເຖົ້າ”(1). ຊາດຫວຽດ­ນາມ ແລະ ພັກ​ກອມ​ມູ​ນິດຫວຽດ­ນາມ ຮູ້​ບຸນ­ຄຸນ​ຕະຫຼອດ​ກາ­ລະ​ນານ ​ຕໍ່​ບັນ­ດາ​ແມ່​ວິ­ລະ​ຊົນ​ທີ່​ໄດ້​ໃຫ້​ກຳ​ເນີ​ດແລະອຸ­ທິດ​​ລູກ​ຫຼານ​ຜູ້​ດີ­ເດັ່ນຂອງ​ຕົນ​ໃຫ້​ແກ່​ການ​ປະຕິວັດ  ໄດ້ ແລະ ກຳ­ລັງ​ສູ້​ຮົບ​ຢ່າງ​ອົງ­ອາດ​ກະ​ຫານ​ເພື່ອ​ປົກ​ປັກ​ຮັກ­ສາ​ບ້ານ​ເກີດ​ເມືອງ​ນອນ​ອັນ​ເປັນ​ແພ­ໄໝ​ມີ­ຄ່າ​ໂດຍ​ບັນ​ພະ​ບູ​ລຸດ​ເປັນ​ຄົນ​ທີ່​ສ້າງ­ສາ, ປົກ​ປັກ​ຮັກ­ສາ​ເອົາ​ມາ​ໃຫ້.

ເສີມ​ຂະ­ຫຍາຍ​ມູນ­ເຊື້ອ​ຮັກ​ຊາດ ແລະ ປະ­ຕິ­ວັດ​ຂອງ​ບັນ­ດາ​ລຸ້ນ​ຄົນ​ສະ­ໄໝ​ກ່ອນ, ແມ່­ຍິງ ຫວຽດ­ນາມ ໃນ​ປັດ­ຈຸ­ບັນ​ກຳ­ລັງ​ສຶບ​ຕໍ່​ມີ​ບົດ­ບາດ ແລະ ມີ​ການ​ປະ­ກອບ­ສ່ວນ​ອັນ​ສຳ­ຄັນ​ໃນ​ພາ­ລະ­ກິດ​ແຫ່ງ​ການ​ປ່ຽນ­ແປງ​ໃໝ່, ຫັນ​ເປັນ​ອຸດ­ສາ­ຫະ­ກຳ​ທັນ​ສະ­ໄໝ, ເຊື່ອມ​ໂຍງ​ສາ­ກົນ, ກໍ່­ສ້າງ ແລະ ປົກ​ປັກ​ຮັກ­ສາ​ປະ­ເທດ​ຊາດ​ອັນ​ແສນ​ຮັກ.

ກວມ​ເອົາ​ກວ່າ 50% ຈຳ­ນວນ​ພົນ­ລະ­ເມືອງ ແລະ ຫຼາຍກວ່າ 48% ກຳ­ລັງ​ອອກ­ແຮງ​ງານ​ໃນ​ສັງ­ຄົມ, ແມ່­ຍິງ ຫວຽດ­ນາມ ມີ­ໜ້າ​ໃນ​ທຸກ​ຂົງ­ເຂດ, ໃນ​ທຸກ​ບໍ​ລິ​ເວັນ, ເປັນ​ເຈົ້າ​ການ​ເຂົ້າ​ຮ່ວມ​ບັນ­ດາ​ການເຄື່ອນ­ໄຫວ​ຂອງ​ຊີ­ວິດ​ສັງ­ຄົມ, ປະ­ຕິ­ບັດ​ເປັນ​ຢ່າງ​ດີ​ບັນ­ດາ​ແນວ​ນະ­ໂຍ­ບາຍ, ແນວ­ທາງ​ຂອງ​ພັກ, ນະໂຍບາຍ, ກົດ­ໝາຍ​ຂອງ​ລັດ; ຕັ້ງ­ໜ້າ​ຕອບ​ສະ­ໜອງ​ບັນ­ດາ​ຂະ​ບວນ​ການ​ແຂ່ງ­ຂັນ​ຮັກ​ຊາດ, ບັນ­ລຸ​ໄດ້­ຜົນ​ງານ​ອັນ​ດີ­ເດັ່ນ​ເປັນ​ຈຳ­ນວນ​ຫຼາຍ​ໃນ ຂົງ­ເຂດ​ຕ່າງໆ​ຂອງ​ຊີ­ວິດ​ສັງ­ຄົມ. ພ້ອມ​ທັງ, ແມ່­ຍິງ​ກໍ່​ຍັງ​ປະ­ຕິ­ບັດ​ເປັນ​ຢ່າງ​ດີ​ພາ­ລະ​ບົດ­ບາດ​ເປັນ​ເມຍ, ເປັນ​ແມ່, ເປັນ​ຄູ​ຜູ້​ທຳ​ອິດ, ເປັນ​ບ່ອນ​ອີງ​ດ້ານ​ຈິດ­ໃຈ​ທີ່​ແຂງ​ແກ່ນ, ຜູ້​ທີ່​ຕິດ​ພັນ​ບັນ­ດາ​ສະ​ມາ​ຊິດ​ໃນ​ຄອບ­ຄົວ, ພ້ອມ​ກັນ​ເບີ່ງ​ແຍງ​ດູ​ແລ​ຄອບ­ຄົວ​ໃຫ້​ມີ​ຄວາມ​ຜາ​ສຸກ.

ຂ້າ­ພະ­ເຈົ້າ​ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່ ບົດ​ລາຍ​ງານ​ຂອງ​ສະ­ຫະ­ພັນ​ແມ່­ຍິງ ຫວຽດ­ນາມ ທີ່​ໄດ້​ກ່າວ​ມາ ໃນ​ກອງ​ປະ­ຊຸມ​ໃຫຍ່​ຄັ້ງ​ນີ້. ໃນ​ຫ້າ​ປີ​ທີ່​ຜ່ານ​ມາ, ໄດ້​ເຫັນ​ຢ່າງ​ຈະ​ແຈ້ງ­ວ່າ ຂະ​ບວນ​ການ​ຂອງ​ແມ່­ຍິງ ຫວຽດ­ນາມ ສຶບ​ຕໍ່​ໄດ້​ມີ​ບາດ­ກ້າວ​ຂະ­ຫຍາຍ­ຕົວ, ເຊິ່ງ​ໄດ້​ປະ­ກອບ­ສ່ວນ​ຢ່າງ​ຕັ້ງ­ໜ້າ​ເຂົ້າ​ໃນ​ພາ­ລະ­ກິດ​ແຫ່ງ​ການ​ປ່ຽນ­ແປງ​ໃໝ່, ກໍ່­ສ້າງ ແລະ ປົກ​ປັກ​ຮັກ­ສາ​ປະ­ເທດ​ຊາດ. ສະ­ຫະ­ພັນ​ແມ່­ຍິງ ຫວຽດ­ນາມ ໄດ້​ສຶບ​ຕໍ່​ເສີມ​ຂະຫຍາຍ​ບົດ­ບາດ​ເປັນ​ຫຼັກ​ແຫຼ່ງ​ໃນ​ວຽກ​ງານ​ແມ່­ຍິງ ແລະ ພາ­ລະ­ກິດ​ສະ­ເໝີ­ພາບ​ຍິງ-ຊາຍ; ປະ­ຕິ­ບັດ​ພາ­ລະ​ໜ້າ­ທີ່​ເປັນ​ຜູ້­ຕາງ­ໜ້າ, ເບິ່ງ­ແຍງ​ດູ​ແລ, ຮັກ­ສາ​ສິດ ແລະ ຜົນ​ປະ­ໂຫຍດ​ທີ່​ຖືກ​ຕາມ​ກົດ­ໝາຍ ແລະ ເປັນ​ທຳ​ຂອງ​ແມ່­ຍິງ; ເປັນ​ຂົວ​ຕໍ່​ລະ­ຫວ່າງ ພັກ ກັບ​ສະ­ມາ­ຊິກ, ແມ່­ຍິງ, ເຊິ່ງ​ປະ­ກອບ­ສ່ວນ​ເຂົ້າ​ໃນ​ການ​ກໍ່­ສ້າງ​ກຸ່ມ​ກ້ອນ​ມະ­ຫາ​ສາ­ມັກ­ຄີ ປວງ​ຊົນ​ທັງ​ຊາດ, ກໍ່­ສ້າງ​ພັກ, ກໍ່­ສ້າງ​ລະ­ບົບ​ການ­ເມືອງ​ທີ່​ປອດ​ໃສ​ຂາວ​ສະ­ອາດ, ໝັ້ນ­ຄົງ​ເຂັ້ມແຂງ. ບັນ­ດາ​ຂະ​ບວນ​ການ​ແຂ່ງ­ຂັນ “ແມ່­ຍິງ​ຕັ້ງ­ໜ້າ​ຮ່ຳ­ຮຽນ, ອອກ­ແຮງ​ງານ​ຢ່າງ​ຫົວ­ຄິດ​ປະ­ດິດ​ສ້າງ, ກໍ່ສ້າງ​ຄອບ­ຄົວ​ໃຫ້​ມີ​ຄວາມ​ຜາ​ສຸກ” ແລະ ສອງ​ຂະ​ບວນ​ການ “ຫຼໍ່​ຫຼອມ​ຂາດ​ຄຸນ­ສົມ­ບັດ​ສິນ​ທຳ; ມີ​ຄວາມ​ໝັ້ນ​ໃຈ, ນັບ­ຖື​ຕົນ​ເອງ, ຊື່­ສັດ​ບໍ­ລິ­ສຸດ, ກ້າ​ກັ່ນ”, “ກໍ່­ສ້າງ​ຄອບ­ຄົວ​ແບບ​ຫ້າ​ບໍ່​ມີ, ສາມ​ສະ­ອາດ” ຕິດ​ພັນ​ກັບ​ການ​ຮ່ຳຮຽນ ແລະ ປະ­ຕິ­ບັດ​ຕາມ​ແນວ​ຄິດ ແລະ ຄຸນ­ສົມ­ບັດ, ແບບ­ແຜນ​ໂຮ່​ຈີ​ມິນ ໄດ້​ຮັບ​ການ​ປະ­ຕິ­ບັດ​ຢ່າງ​ຄົບ​ຊຸດ, ຮ້ອບ​ດ້ານ, ນຳ​ເອົາ​ຜົນ​ປະ­ໂຫຍດ​ຢ່າງ​ແທ້​ຈິງ​ໃຫ້​ແກ່​ແມ່­ຍິງ, ຄອບ­ຄົວ ແລະ ຊຸມ​ຊົນ, ປະ­ກອບ­ສ່ວນ​ເຂົ້າ​ໃນ​ການ​ກໍ່­ສ້າງ​ຊົນ­ນະ­ບົດ​ໃໝ່, ຕົວ​ເມືອງ​ສີ­ວິ­ໄລ. ເນື້ອ​ໃນ, ​ແບບວິ­ທີ​ການ­ເຄື່ອນ­ໄຫວ​ຂອງ​ສະ­ຫະ­ພັນ​ແມ່ຍິງ ​ໄດ້​ມີ​ການ​ປ່ຽນ­ແປງ​ໃໝ່, ມີມາດ​ຕະ­ການ​ແກ້​ໄຂ​ຈຳ­ນວນ​ຫຼາຍ​ ເພື່ອ​ເປີດ​ກວ້າງ​ລັກ­ສະ­ນະ​ສະ­ຫະ­ພາບ, ດຶງ​ດູດ, ຂົນຂວາຍ​ບັນດາ​ຊັ້ນຄົນ​ແມ່­ຍິງ, ປະ­ສານ​ສົມ­ທົບ​ກັບ​ຂັ້ນ ຂະ­ແໜງ­ການ​ຕ່າງໆ ແລະ ທົ່ວ​ສັງ­ຄົມ ​ເພື່ອປະກອບ­ສ່ວນ​ແກ້​ໄຂ​ຫຼາຍ​ບັນ­ຫາ​ຂອງ​ແມ່­ຍິງ, ຄອບ­ຄົວ, ເພື່ອ​ຄວາມ​ກ້າວ­ໜ້າ​ຂອງ​ແມ່­ຍິງ. ອົງ​ການຈັດຕັ້ງ​ສະຫະພັນ​​ແມ່ຍິງໄດ້​ຮັບ​ການ​ປັບ­ປຸງ ແລະ ຂະ­ຫຍາຍ­ຕົວ, ຫັນ​ເປັນ​ຫຼາຍ​ຮູບ​ຫຼາຍ​ແບບ​ການ​ເຕົ້າໂຮມ, ​ດຶງ​ດູດ​ແມ່­ຍິງ ​ໃຫ້​ເຂົ້າ​ຮ່ວມ​ອົງ​ການ­ຈັດ­ຕັ້ງ​ສະ­ຫະ­ພັນ. ພະ­ນັກ­ງານ​ສະ­ຫະ­ພັນ​ແມ່ຍິງ​ໄດ້​ຮັບ​ການ​ກໍ່ສ້າງ​ໂດຍ​ພື້ນ­ຖານ ​ແລະ ນັບ​ມື້​ນັບ​ໄດ້​ຫັນ​ເປັນ​ໜຸ່ມ​ນ້ອຍ. ສະ­ຫະ­ພັນ​ແມ່ຍິງ​ກໍ່​ໄດ້​​ເປັນ​ເຈົ້າ​ການ​ສະ­ເໜີ, ບຳລຸງ​ກໍ່­ສ້າງ​ພະ­ນັກ­ງານ​ເພດ​ຍິງຫຼາຍ​ຄົນ ​​ໃຫ້ຮັບຕຳ​ແໜ່​ງ​ການ​ນຳ, ການ​ຄຸ້ມ​ຄອງ​ໃນ​ຂັ້ນ, ຂະ­ແໜງ­ການ​ຕ່າງໆ​. ວຽກ​ງານ​ພົວ­ພັນ​ການ​ຕ່າງ­ປະ­ເທດ ແລະ ຮ່ວມ​ມື​ສາ­ກົນ​ຂອງ​ສະ­ຫະ­ພັນ​​ແມ່ຍິງໄດ້​ຮັບ​ການ​ເປີດ​ກວ້າງ.

ອັດ­ຕາ​ສ່ວນ​ແມ່­ຍິງ​ທີ່​ເຂົ້າ​ຮ່ວມ​ວຽກ​ງານ​ການ​ນຳ, ການ​ຄຸ້ມ​ຄອງ​ໃນ​ລະ­ບົບ​ການ­ເມືອງ ​ນັບ​ມື້​ນັບ​​ເພີ່ມ​ຂຶ້ນ. ໃນ​ບັນ­ດາ​ສະ­ໄໝ​ກອງ​ປະ­ຊຸມ​ໃຫຍ່​ຂອງ​ພັກທີ່​ຜ່ານ​ມາ​ນີ້ ​ຍາມ​ໃດ​ກໍ່​ມີ​ແມ່­ຍິງ​ເປັນ​ກຳ­ມະ­ການ​ກົມ​ການເມືອງ, ເລ­ຂາ​ທິການສູນ​ກາງ​ພັກ, ກຳ­ມະ­ການ​ສູນ​ກາງ​ພັກ, ລັດ­ຖະ­ມົນ­ຕີ, ຮອງ​ລັດ­ຖະ­ມົນ­ຕີ ເປັນ​ຈຳນວນຫຼາຍ; ອັດ­ຕາ​ສ່ວນ​ແມ່­ຍິງ​ເປັນ​ສະ­ມາ­ຊິກ​ສະ­ພາ​ແຫ່ງ​ຊາດ ​ກໍ່​ກວມ​ປະມານ 27%. ໃນ​ຂົງ­ເຂດ​ເສດຖະກິດ ​ຜູ້​ອອກ­ແຮງ​ງານ​​ເພດ​ຍິງ ໄດ້​ມີ​ການ​ເຂົ້າ​ຮ່ວມ​ໃນ​ຫຼາຍ​ຂະ­ແໜງ­ການ, ອາ­ຊີບ​ໃໝ່​ ເຊິ່ງ​ກ່ອນໜ້າ​ນີ້​ພຽງ​ແຕ່​ມີ​ການ​ເຂົ້າ​ຮ່ວມ​ຂອງ​ຜູ້​ອອກ­ແຮງ​ງານ​​ເພດ​ຊາຍ; ທາງ​ດ້ານ​ວິ­ທະ­ຍາ­ສາດ ເຕັກ​ໂນ​ໂລ​ຊີ, ການ​ເຂົ້າ​ຮ່ວມ​ຂອງ​ແມ່​ຍິງ​ໄດ້​ກວ​ມ​ເອົາ​ເກືອບ 40% ແລະ ອັດ­ຕາ​ສ່ວນ​ນັກ­ວິ­ທະ­ຍາ­ສາດ​ເພດ​ຍິງ​ບັນ­ລຸ 6%. ພິ­ເສດ, ໃນ​ການ​ສຶກ​ສາ, ບຳ­ລຸງ​ກໍ່­ສ້າງ ແລະ ​ສາ­ທາ­ລະ­ນະ​ສຸກ, ມີ​ພະ­ນັກ­ງານ​ເພດ​ຍິງ​ກວມ​ເອົາ​ອັດ­ຕາ​ສ່ວນ​ໃຫຍ່, ​ໃນ​ສນັ້ນ​ຫຼາຍຄົນ​ມີ​ລະ­ດັບ​ຄວາມ​ຮູ້​ສູງ. ການ​ເຕີບ​ໃຫຍ່​ຂອງ​ຂະ​ບວນ​ການ​ແມ່­ຍິງ, ບັນ­ດາ​ການ​ປະ­ກອບ­ສ່ວນ​ຢ່າງ​ສົມ​ກຽດ​ຂອງ​ສະ­ຫະ­ພັນ​ແມ່­ຍິງ​ຂັ້ນ​ຕ່າງໆ​ໃນ​ສະ­ໄໝ​ທີ່​ຜ່ານ​ມາ ​ໄດ້​ຮັບ​ການ​ຊົມ​ເຊິ​ຍຮັບ­ຮອງ, ປະດັບ​ນາມມະຍົດ, ຍ້ອງຍໍ​ໃຫ້ລາ­ງວັນທີ່​ສູງ​ສົ່ງແລະປະ­ເສີດ ​ຈາກ​ພັກແລະລັດ. ມີ​ໝູ່ຄະນະ, ບຸກ­ຄົນ​ເປັນ​ຜູ້­ຍິງ​ໄດ້​ຮັບ​ຫຼຽນ​ໄຊ​ເອ­ກະ­ລາດ ແລະ ຫຼຽນ​ໄຊ​ອກກ​ແຮງ​ງານ​ຂັ້ນ​ຕ່າໆ​ ເປັນ​ຈຳ­ນວນ​ຫຼາຍ; ມີ​ເອື້ຍ​ນ້ອງ​ໄດ້​ຮັບ​ນາມມະຍົດ​ເປັນ​ນັກ­ຮົບ​ແຂ່ງ​ຂັນ​ທົ່ວ​ປະ­ເທດ, ເປັນ​ຄູ​ອາ­ຈານ, ນາຍ​ແພດ​ຜູ້​ດີ­ເດັ່ນ; ຄູ​ອາ­ຈານ, ນາຍ​ແພດ​ປະຊາ­ຊົນ; ສິ​ລະ​ປິນ​ຜູ້​ດີ­ເດັ່ນ, ສິ​ລະ​ປິນ​ປະ­ຊາ­ຊົນ... ມີ​ຄົນ​ເປັນ​ແບບ­ຢ່າງ​ທີ່​ເຮັດ​ວຽກ​ດີ, ວຽກ​ບຸນ​ເປັນ​ຫຼາຍ​ວຽກ​ເຊິ່ງ​ໄດ້​ຕົບ­ແຕ່ງ​ເສີມ​ສວຍ​ໃຫ້​ຮູບ​ພາບ​ອັນ​ປະ­ເສີດ​ຂອງ​ແມ່­ຍິງຫວຽດ­ນາມ.

ຕາງ­ໜ້າ​ໃຫ້​ພັກແລະລັດ, ຂ້າ­ພະ­ເຈົ້າ​ຂໍ​ຊົມ­ເຊີຍ ແລະ ເຊີດ​ຊູ​ບັນ­ດາ​ຜົນ­ງານ​ອັນ​ໃຫຍ່​ຫຼວງ​ ຂອງ​ຂະ​ບວນ​ການ​ແມ່­ຍິງ ແລະ ສະ­ຫະ­ພັນ​ແມ່­ຍິງຫວຽດ­ນາມ ໃນ​ໄລ­ຍະ​ອາ­ຍຸ​ການ​ທີ່​ຜ່ານ​ມາ. ຊົມ­ເຊີຍ ແລະ ຈົດ​ຈຳ​ການ​ນຳ­ພາ, ຊີ້​ນຳ​ຢ່າງ​ແທດ­ເໝາະ​ຂອງ​ບັນ­ດາ​ຄະ­ນະ​ພັກ, ການ​ປະ­ສານ​ສົມ­ທົບ​ຢ່າງ​ແໜ້ນ​ແຟ້ນ​ ຂອງ​ອຳ­ນາດ​ການ​ປົກ­ຄອງ, ແນວ​ໂ​ຮມ​ປະ­ເທດ​ຊາດ, ບັນ­ດາ​ພະ​ແນກ, ກະ­ຊວງ, ຂະ­ແໜງ­ການ, ອົງ​ການ­ຈັດ­ຕັ້ງ​ ໃນ​ວຽກ​ງານແມ່­ຍິງ ແລະ ຄວາມ​ສະ­ເໝີ­ພາບ​ຍິງ-ຊາຍ. ເນື່ອງ​ໃນ​ໂອ­ກາດ​ນີ້, ຂ້າ­ພະ­ເຈົ້າ​ຂໍ​ສະ­ແດງ​ຄວາມ​ຂອບ​ອົກ​ຂອບ­ໃຈ​ຕໍ່​ຄວາມ​ສະ­ໜັບ­ສະ­ໜູນ, ຄວາມ​ຊ່ວຍ­ເຫຼືອດ້ວຍ​ຄວາມ​ຫວັງ​ດີ, ມີ​ປະ​ສິດ­ທິ​ຜົນ ​ຂອງ​ເພື່ອນ​ມິດ­ສາ​ກົນ ​ໃຫ້​ແກ່ສະ­ຫະ­ພັນ​ແມ່­ຍິງຫວຽດ­ນາມ, ​ໃຫ້​ແມ່­ຍິງແລະເດັກ­ນ້ອຍຫວຽດ­ນາມ.

ແຕ່​ວ່າ, ກໍ່​ຕ້ອງ​ຮັບ­ຮູ້​ຢ່າງ​ກົງ​ໄປ​ກົງ​ມາ​ວ່າ, ໃນ 5 ປີ​ທີ່​ຜ່ານ​ມາ​ ຂະ​ບວນ​ການ​ແມ່­ຍິງ ແລະ ການເຄື່ອນ­ໄຫວ​ຂອງສະ­ຫະ­ພັນ​ແມ່­ຍິງຫວຽດນາມ​ຂັ້ນ​ຕ່າງໆ​ ​ຍັງ​ປະ­ກົດ​ມີຂໍ້​ຈຳ­ກັດຫຼາຍ​ຢ່າງ. ນັ້ນ​ແມ່ນ, ຂະ​ບວນ​ການ​ແມ່ຍິງ​ພັດ­ທະ­ນາຢ່າງ​ບໍ່ສະ​ໝ່ຳ​ສະ­ເໝີ​, ​ຄວາມ​ສາ­ມາດ​ບົ່ມ​ຊ້ອນ ​ແລະ ກຳລັງ​​ປະ­ດິດ​ສ້າງ​ຂອງ​ແມ່ຍິງຊັ້ນວັນນະ​ຕ່າງຕ່າງ ຍັງ​ບໍ່​ທັນ​ໄດ້​ປຸກ​ຕື່ນຢ່າງ​ແຂ​ງແຮງ. ການ​ປ່ຽນ­ແປງ​ເນື້ອ​ໃນ, ມາດ​ຕະ​ການເຄື່ອນໄຫວ​ຂອງ​ສະຫະ­ພັນ​ແມ່ຍິງ ​ຍັງ​ບໍ່​ທັນ​ແຮງ​ແຮງ, ຍັງ​ມີ​ພະ­ນັກ­ງານ​ພາກ­ສ່ວນ​ໜຶ່ງ​ເຮັດ​ວຽກ​ຕາມ​ແບບ​ບໍ­ລິ­ຫານ, ​ບໍ່​​​ໃກ້ຊິດຕິດ​ແທດ​ກັບ​ຮາກ​ຖານ ​ເພື່ອ​ເກັບ​ກຳ​ຄວາມ​ຄິດ​ຈິດ­ໃຈ, ຄວາມ​ມຸ່ງ​ມາດ​ປາດ​ຖະ​ໜາ​ຂອງ​ສະມາ­ຊິກ; ບັນ­ດາ​ຮູບ​ການ​ເຕົ້າໂຮມ​ແມ່­ຍິງ ​ຍັງຂາດ​ຄວາມ​ຫຼາກ​ຫຼາຍ, ​ບໍ່​ຕອບ​ສະ­ໜອງ​ໄດ້​ກັບຄວາມ​ຮຽກຮ້ອງຕ້ອງການ​ຂອງ​ສະ­ພາບ​ການ. ບັນ­ດາ​ມາດ​ຕະ­ການ​ກ່ຽວ​ກັບ​ການ​ຊ່ວຍ­ເຫຼືອ​ໃຫ້​ແມ່­ຍິງ​ຫຼຸດ­ຜ່ອນ​ຄວາມທຸກ​ຍາກ, ​ພັດ­ທະ­ນາ​ເສດ­ຖະ­ກິດ​ແບບ​ຍືນ​ຍົງ ກໍ່​ຍັງ​ບໍ່​ທັນ​ຄົບ​ຊຸດ. ວຽກ​ງານ​ຕິດ­ຕາມກວດ­ກາ​, ວິ­ຈານ​ສັງ­ຄົມ, ​ເປັນ​ທີ່​ປຶກສາ​ໃນ​ການ​ສະ­ເໜີ​ກ່ຽວ​ກັບ​ນະ­ໂຍ­ບາຍ​ນັ້ນ ບາງ​ຄັ້ງ​ບາງ​ບ່ອນບໍ່​ໄດ້ຮັບ​ຄວາມ​ເອົາ​ໃຈ​ໃສ່ ດັ່ງນັ້ນ​ຈຶ່ງ​ບໍ່​ເສີມ​ຂະ­ຫຍາຍຄຸນ​ປະ­ໂຫຍດແລະປະ​ສິດ­ທິ​ຜົນ​​ ໄດ້ຢ່າງ​ແທ້​ຈິງ. ວຽກ​ງານ​ຄົ້ນ​ເຜີ​ຍ, ກໍ່ສ້າງ, ຍ້ອງຍໍ​ຊົມ​ເຊິ​ຍ ​ແລະ ການ​ຂະ­ຫຍາຍ​ບັນ­ດາ​ແບບ­ຢ່າງ​ທີ່​ດີ​ເດັ່ນກ້າວ­ໜ້າ ຍັງ​ບໍ່​ໄດ້​ປະ­ຕິ­ບັດ​ຢ່າງ​ເປັນ​ປະຈຳ, ບໍ່​ທັນ​ເວ­ລາ, ​ຍັງບໍ່​ແຜ່​ລານ​ໃນ​ບັນ­ດາຊັ້ນຄົນ​ແມ່­ຍິງ. ຄວາມ​ຮັບ​ຮູ້, ລະ­ດັບ, ຄວາມ​ສາ­ມາດ​ຂອງ​ແມ່​​ຍິງ​ພາກ­ສ່ວນ​ໜຶ່ງ ​ຍັງຖືກ​ຈຳ­ກັດ. ​ເ​ອື້ຍ​ນ້ອງ​ຫຼາຍ​ຄົນ​ຍັງ​ບໍ່​ມີ​ຄວາມ​ຮັບ​ຮູ້​ຢ່າງ​ພຽງ­ພໍ​ ກ່ຽວ​ກັບ​ບັນ­ດາຄຸນ​ຄ່າ​ມູນ­ເຊື້ອ ຄຸນສົມບັດ​ສິນ​ທຳ ​ອັນ​ດີ­ງາມຂອງ​ແມ່­ຍິງຫວຽດ­ນາມ, ໃນ​ຂະນະ​ທີ່​ວຽກ​ງານອົບຮົມ​ສຶກ​ສາ​ການ­ເມືອງ​ແນວ​ຄິດ, ກົດ­ໝາຍ, ຄຸນ­ສົມ­ບັດ, ແບບ­ແຜນ​ດຳ­ລົງ​ຊີ­ວິດ​ ຂອງ​ສະຫະ­ພັນ​​ແມ່ຍິງ​ໄດ້​ປ່ຽນ­ແປງ​​ໃໝ່ຢ່າງ​ຊັກ​ຊ້າ, ​ໂດຍ​ສະ​ເພາະ​ຢ່າງ​ຍິ່ງ​ແມ່ນ ​ໃນ​​ສະ­ພາບ​ການ​ຂອງ​ປະ­ເທດ​ທີ່​ມີ​ການ​ປ່ຽນ­ແປງ​ຫຼາຍ​ຢ່າງ ແລະ ຄວາມ​ຕ້ອງການ​ຂອງ​ແມ່­ຍິງ​ ນັບ​ມື້​ນັບ​ຫຼາກ​ຫຼາຍ. ຂ້າ­ພະ­ເຈົ້າ​ຂໍ​ສະ­ເໜີ, ດ້ວຍ​ຄວາມ​ບັບ​ຖື​ຖະໜຸ​ຖະ­ໜອມ ແລະ ຈິດ­ໃຈ​ຮັບ­ຜິດ­ຊອບ​ສູງ​ຕໍ່​ແມ່­ຍິງ​ທັງ​ຊາດ, ບັນ­ດາ​ຜູ້​ແທນ​ທີ່​ມາ​ຮ່ວມ​ກອງ​ປະ­ຊຸມ​ໃຫຍ່​ຄັ້ງ​ນີ້​ ຕ້ອງ​ແລກ­ປ່ຽນ, ສົນ­ທະ­ນາ, ວິ​​ໄຈ​ໄຈ້​ແຍກ­​ຢ່າງ​ຈະ­ແຈ້ງ ກ່ຽວ​ກັບ​ສາ​ເຫດ, ເປັນ­ຕົ້ນ​ແມ່ນສາ​ເຫດ­ອັດ​ຕະ​ວິ­ໄສ, ເພື່ອ​ຄົ້ນ​ຫາ​ມາດ​ຕະ­ການ​ແກ້​ໄຂ​ບັນດາ​ຂໍ້​ຈຳ­ກັດ, ແນ­ໃສ່​ຍົກ​ສູງ​ຄຸນ​ນະ​ພາບ ປະ​ສິດ­ທິ​ຜົນ​ແຫ່ງ​ການເຄື່ອນ­ໄຫວ ​ຂອງ​ຂະ​ບວນ​ການ​ແມ່­ຍິງ ແລະ ຂອງສະ­ຫະ­ພັນ​ແມ່­ຍິງ ​ໃນ​ເວ­ລາ​ຕໍ່​ໄປ​.

ກອງ​ປະ­ຊຸມ​ໃຫຍ່​ຜູ້​ແທນ​ແມ່­ຍິງ​ທົ່ວ​ປະ­ເທດ ຄັ້ງ​ທີ XII ໄດ້​ໄຂ​ຂຶ້ນ​ໃນ​ເວ­ລາ​ທີ່​ມີ​ຄວາມ​ໝາຍ​ສຳ­ຄັນ: ແມ່­ຍິງ​ທົ່ວ​ປະ­ເທດ​ພ້ອມ​ກັບ​ທົ່ວ​ພັກ, ທົ່ວ​ປວງ​ຊົນ, ທົ່ວ​ກອງ­ທັບ​ ກຳ­ລັງ​ອອກ­ແຮງ​ເສີມ​ຂະ­ຫຍາຍ​ບັນ­ດາ​ຜົນງານ​ທີ່​ໃຫຍ່​ຫຼວງ​ ມີ​ຄວາມ​ໝາຍ​ປະ­ຫວັດ­ສາດ​ ຂອງ​ປະ­ເທດ​ໂດຍ​ຜ່ານ 30 ປີ​ແຫ່ງ​ການ​ປ່ຽນ­ແປງ​ໃໝ່, ຕັດ­ສິນ​ໃຈ​ຜັນ​ຂະ­ຫຍາຍ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່​ຜູ້​ແທນ​ທົ່ວ​ປະ­ເທດ​ຄັ້ງ​ທີ XII ຂອງ​ພັກ​ ໃຫ້​ສຳ­ເລັດມີ​ໄຊ ແນ­ໃສ່​ພາ­ໃຫ້​ປະ­ເທດ​ຜ່ານ​ຜ່າ​ຄວາມ​ຫຍຸ້ງ­ຍາກ, ພັດ­ທະ­ນາ​ຢ່າງ​​ໄວແລະໝັ້ນ­ຄົງ, ຈະ​ເບີ​ນຮຸ່ງ­ເຮືອງແລະຜາ​ສຸກ.

ເພື່ອ​ປະ­ຕິ­ບັດເປົ້າ​ໝາຍ​ດັ່ງ­ກ່າວ, ພວກ​ເຮົາ​ຕ້ອງ​ເສີມ​ຂະ­ຫຍາຍ​ກຳ­ລັງ​ແຮງຂອງ​ຄວາມ​ມະ­ຫາ​ສາ­ມັກ­ຄີ​ທົ່ວປວງ​ຊົນ, ໃນ​ນັ້ນ​ມີ​ບົດ­ບາດ​ອັນ​ສຳ­ຄັນ​ຂອງ​ແມ່­ຍິງ. ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ ​ກໍ່​ໄດ້​ຢືນຢັນ​ວ່າ: ຍົົກ​ສູງ​ລະ­ດັບ​​ທຸກ​ດ້ານ, ຍົກ​ສູງ​ຊີ­ວິດ​ວັດ­ຖຸແລະຈິດ­ໃຈ​ຂອງ​ແມ່­ຍິງ; ປະ­ຕິ­ບັດ​​ເປັນ​ຢ່າງ​​ດີ​ຄວາ​ມ​ສະ­ເໝີ­ພາບ​ຍິງ-ຊາຍ, ສ້າງ​ເງື່ອນ­ໄຂ​ໃຫ້​​ແມ່­ຍິງ​ພັດ­ທະ­ນາ​ຄວາມ​ເກັ່ງ​ກ້າສາ­ມາດ​. ຄົ້ນ­ຄວ້າ, ປັບ­ປຸງ ແລະ ບູ­ລະ­ນະ​ກົດ­ໝາຍ ແລະ ນະ­ໂຍ­ບາຍ​ສຳ­ລັບ​ຜູ້​ອອກ­ແຮງ​ງານ​​ເພດ​ຍິງ, ສ້າງ​ເງື່ອນ­ໄຂແລະ​ໂອ­ກາດ ​ໃຫ້​ແມ່­ຍິງ​ປະ­ຕິ­ບັດ​ເປັນ​ຢ່າງ​ດີ​ບົດ­ບາດແລະຄວາມ​ຮັບ­ຜິດ­ຊອບ​ຂອງ​ຕົນ​ເອງ​ພາຍ​ໃນ​ຄອບ­ຄົວ ແລະ ໃນ​ສັງ­ຄົມ. ເດັດ­ດ່ຽວ​ຕໍ່­ສູ້​ຕ້ານ​ຄວາມ​ຫຍໍ້­ທໍ້​ຕ່າງໆ​ໃນ​ສັງ­ຄົມ ແລະ ແກ້​ໄຂ​ຢ່າງ​ເຂັ້ມ​ງວດ​ຕາມ​ກົດ­ໝາຍ ຕໍ່ບັນ­ດາ​ການ​ຄ້າມະນຸດ, ການ​ກະ­ທຳຮຸນ​ແຮງ ​ລະເມີດມະ­ນຸດ​ສະ​ນຸ​ພາບ​ຂອງ​ແມ່­ຍິງ.

ກ້າວ​ເຂົ້າ​ສູ່​ສະ­ໄໝ​ໃໝ່, ມີ​ກາ­ລະ​ໂອ­ກາດແລະຄວາມ​ສະ­ດວກ​ອັນ​ໃຫຍ່​ຫຼວງ ແຕ່​ກໍ່​ມີ​ສິ່ງ​ທ້າ​ທາຍ​ທີ່​ວາງ​ອອກ ​ຕໍ່​ຂະ​ບວນ​ການ​ແມ່­ຍິງ ແລະ ວຽກ​ງານ​ສະ­ຫະ­ພັນ. ສະ­ພາບ​ການ​ປ່ຽນ­ແປງ​ດິນ​ຟ້າ​ອາກາດ, ໄພ­ພິ­ບັດ, ໂລ­ຄາ​ພະ­ຍາດ, ຄຸນ​ນະ​ພາບ​ແຫຼ່ງ​ບຸກ​ຄະ­ລາ​ກອນ​ຍັງ​ຕ່ຳ, ຄວາມ​ອະຄະຕິ​ທາງດ້ານ​ເພດ​ຍັງ​ຄົງ​ຈະ​ຢູ່, ຊີ­ວິດ​ຂອງ​ແມ່­ຍິງ​ພາກ­ສ່ວນ​ໜຶ່ງ, ເປັນ­ຕົ້ນ​ແມ່ນ​ແມ່­ຍິງ​ຢູ່​ຊົນ­ນະ­ບົດ, ແມ່­ຍິງ​ຊົນ­ເຜົ່າ​ສ່ວນ​ໜ້ອຍ, ແມ່­ຍິງ​ເປັນ​ຄົນ​ພິການ ​ຍັງ​ພົບ​ຄວາມ​ຫຍຸ້ງ­ຍາກ​ຫຼາຍ​ຢ່າງ, ສະ­ພາບ​ການເກີດ​ອາ​ຊະ​ຍາ​ກຳ​ເພີ່ມ​ຂຶ້ນ, ຄວາມ​ຮຸນ​ແຮງ​ໃນ​ຄອບຄົວ​ເກີດ​ຂຶ້ນ​ຢ່າງ​ສັບສົນ, ສະ­ພາບ​ການ​​ຊຸດ­ໂຊມ​ທາງ​ດ້ານ​ແນວ​ຄິດ​ການ­ເມືອງ, ຄຸນສົມບັດ, ແບບ­ແຜນ​ດຳ­ລົງ​ຊີ­ວິດ​ໃນ​ແມ່­ຍິງ​ພາກ­ສ່ວນ​ໜຶ່ງ​ ຍັງ​ບໍ່​ຖືກ​ຍູ້​ຖອຍ. ­ເພາະສະ​ນັ້ນ, ໜ້າ­ທີ່​ທີ່​ວາງ​ອອກ​ໃຫ້​ຂະ​ບວນ​ການ​ແມ່ຍິງ​​ແລະ​ສະຫະພັນ​ແມ່ຍິງ​ຫວຽດນາມ ​ແມ່ນ​ໜັກ­ໜ່ວງ​ທີ່​ສຸດ. ຂ້າ­ພະ­ເຈົ້າ​ເຫັນ​ດີ​ເຫັນ​ພ້ອມ​ນຳ​ທິດ​ທາງ, ໜ້າທີ່​ຂອງ​ສະ​ໄໝ 2017 – 2022 ທີ່​ຄະ­ນະ​ບໍ­ລິ­ຫານງານ​ສະ­ຫະ­ພັນ​ແມ່­ຍິງ​ຊຸດທີ XI ​ໄດ້​ນຳ​ສະ​ເໜີ​ຕໍ່ກອງ​ປະ­ຊຸມ​ໃຫຍ່, ພິ­ເສດ​ແມ່ນ​ທິດ​ທາງ, ຈຸດ­ໝາຍ ແລະ ບັນ­ດາ​ຂອດ​ບຸກ​ທະ­ລຸ, ບັນ­ດາ​ໜ້າ­ທີ່​ຈຸດ​ສຸມ​ໃຈ­ກາງ. ຂ້າພະ­ເຈົ້າ​ຂໍ​ເນັ້ນ​ໜັກ, ​ເຈາະ​ຈິ້ມຕື່ມ​ອີກບາງ​ບັນຫາ ເພື່ອ​​ໃຫ້ກອງ​ປະ­ຊຸມ​ໃຫຍ່​ປຶກສາ​ຫາລື, ພິຈາລະ­ນາ, ຕົກລົງ​, ລະອຽດ​ຄື:

ທີ່​ໜຶ່ງ, ສະ­ຫະ­ພັນ​ແມ່­ຍິງຫວຽດ­ນາມຕ້ອງ​ກຳ​ແໜ້ນ ແລະ ເຊື່ອມ​ຊືມ​ຢ່າງ​ເລິກ­ເຊິ່ງ​ ບັນ­ດາ​ທັດສະ­ນະ, ແນວ​ຄິດ​ຊີ້​ນຳ​ ຂອງ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ XII ຂອງ​ພັກ; ສະ­ຫຼຸບ​ສັງ​ລວມການ​ປະ­ຕິ­ບັດ​ບັນ­ດາ​ຄຳ​ສັ່ງ, ມະ­ຕິ​ຕົກ­ລົງ​ທີ່​ກ່ຽວ­ຂ້ອງ​​ເຖິງ​ການ­ເຄື່ອນ­ໄຫວ​ໃນ​ພາກ​ຕົວ​ຈິງ​ ຂອງ​ຂະ​ບວນ​ການ​ແມ່­ຍິງ ແລະ ສະ­ຫະ­ພັນ​ແມ່­ຍິງ​ເພື່ອ​ມີ​ບັນ­ດາ​ມາດ​ຕະ­ການ​ອັນ​ລະ­ອຽດ​ພາ­ໃຫ້​ບັນ­ດາ​ແນວ​ຄິດ, ທັດ­ສະ­ນະ, ​ແຜນ​ນະ­ໂຍ­ບາຍ​ຂອງ​ພັກ​ໄປ​ສູ່​ຊີວິດ. ເພີ່ມ​ທະ­ວີ​ວຽກ​ງານ​ໂຄ­ສະ­ນາ, ສຶກ​ສາ​ອົບ­ຮົມ, ຂົນ­ຂວາຍ, ຊວນ​ເຊື່ອ​ບັນ­ດາ​​ຊັ້ນຄົນ​ແມ່­ຍິງ ​ເພື່ອ​ປະຕິບັດ​ໃຫ້​ໄດ້​ດີ ​ແນວ­ທາງ ແຜນ​ນະ­ໂຍ­ບາຍ​ຂອງ​ພັກ, ນະ­ໂຍ­ບາຍ ກົດ­ໝາຍ​ຂອງ​ລັດ, ເສີມ​ຂະ­ຫຍາຍ​ກຳລັງ​ແຮງ, ທ່າ­ແຮງ​ຂອງ​ແມ່­ຍິງ​ໃນ​ທຸກ​ຂົງ­ເຂດ; ພ້ອມ​ທັງ​ເບິ່ງ­ແຍງ​ດູ​ແລ​ກຽດ​ຕິ​ຄຸນ, ສິດທີແລະຜົນ​ປະໂຫຍດ​ທີ່​ຊອບ​ທຳ​ຂອງ​ແມ່­ຍິງ.

ທີ​ສອງ​, ສະ­ຫະ­ພັນ​ແມ່ຍິງ​ຕ້ອງ​ສືບ­ຕໍ່​ຈັດ​ຕັ້ງ ແລະ ຍົກ​ສູງ​ຄຸນ​ນະ​ພາບ​ ບັນ­ດາ​ຂະ​ບວນ​ການ​ແຂ່ງ­ຂັນ, ບັນ­ດາ​ການ​ຂົນ­ຂວາຍ​ ເພື່ອ​ດຶງ​ດູດ​​ເ​ອື້ອຍ​ນ້ອງ​​ຈຳ­ນວນ​ຫຼາຍ​ເຂົ້າ​ຮ່ວມ, ປະ­ກອບ­ສ່ວນ​​ກໍ່­ສ້າງ, ປົກ​ປັກ​ຮັກ­ສາ​ປະ­ເທດ​ຊາດ ກໍ່​ຄື​ເປັນ​ເຈົ້າ​ການ​ແກ້​ໄຂ​ບັນ­ດາ​ບັນ­ຫາ​ຂອງ​ແມ່­ຍິງ​ຢູ່​ຮາກ​ຖານ. ຕ້ອງ​ຄົ້ນ­ຄວ້າ ປຸກລະດົມ​ຂະ​ບວນ​ການ​ທີ່­ແທ້​ຈິງ​ຫຼາຍ​ກວ່າ​ອີກ ​ແນ­ໃສ່​ຊຸກ­ຍູ້​ການ​ປະ­ຕິ­ບັດ​ໜ້າ­ທີ່​ການ­ເມືອງ, ພັດທະ­ນາ​ເສດ­ຖະ­ກິດ-ສັງ­ຄົມ, ປຸກ­ລະ­ດົມ​ແມ່­ຍິງ​ປະ­ຕິ­ບັດ​ຂະ​ບວນ​ການ​ແຂ່ງ­ຂັນ​ໂດຍ​ສະ­ຫະ­ພັນ​ເປັນ​ຜູ້​ຈັດ​ຕັ້ງ. ສະ­ໜັບ­ສະ­ໜູນ​ຂະ​ບວນ​ການ “ທົ່ວ​ປວງ​ຊົນ​ສາ­ມັກ­ຄີ​ກໍ່­ສ້າງ​ຊີ­ວິດ​ວັດ­ທະ­ນະ­ທຳ” ແລະ ຂະ​ບວນ​ການ​ຂົນ­ຂວາຍ “ທົ່ວ​ປວງ​ຊົນ​ສາ­ມັກ­ຄີ​ກໍ່­ສ້າງ​ຊົນ­ນະ­ບົດ​ໃໝ່, ຕົວ​ເມືອງ​ສີ­ວິ­ໄລ” ຂອງ​ແນວ​​ໂຮມ​ປະ­ເທດ​ຊາດຫວຽດ­ນາມ, ບັນ­ດາ​ຂະ​ບວນ​ການ​ຄື ເພື່ອ​ຄົນ​ທຸກ​ຍາກ, ເຮືອນ​ຮັກ­ແພງ, ການຮ່ຳ­ຮຽນແລະປະ­ຕິ­ບັດ​ຕາມ​ແນວ​ຄິດ ແລະ ຄຸນ­ສົມ­ບັດ, ແບບ­ແຜນໂຮ່​ຈິ​ມິນ.... ເພີ່ມ​ທະ­ວີ​ການ​ເປັນ​ແບບ­ຢ່າງ​ກ່ຽວ​ກັບວຽກ​ດີ ຄົນ​ເດັ່ນ, ເຜີຍ­ແຜ່​ຂະ­ຫຍາຍ​ແບບ­ຢ່າງ​ທີ່​ກ້າວ­ໜ້າ.

ທີ​ສາມ​, ຍົກ​ສູງ​ບົດ­ບາດ​ຂອງ​ແມ່­ຍິງ ແລະ ອົງ​ການ­ຈັດ­ຕັ້ງ​ສະ­ຫະ­ພັນ​​ແມ່ຍິງໃນ​ການ​ກໍ່­ສ້າງ​ຄອບ­ຄົວ, ພິເສດ​ແມ່ນ​ເອົາ­ໃຈ­ໃສ່​ໃນ​ການ​ກໍ່­ສ້າງ​ຄອບ­ຄົວ​ວັດ­ທະ­ນະ­ທຳ, ອີ່ມ​ໜຳ​ສຳ­ລານ, ມີ​ຄວາມ​ຜາ​ສຸກ, ກ້າວ­ໜ້າ; ເບິ່ງ­ແຍງ​ດູ​ແລ, ສຶກ​ສາ​ອົບຮົມເດັກ­ນ້ອຍ. ຄຽງ​ຄູ່​ກັບ​ຄວາມ​ຮັບ­ຜິດ­ຊອບ​​ພົນ­ລະ­ເມືອງ, ແມ່­ຍິງ​ຍັງ​ມີ​ຄວາມ​ຮັບຜິດ­ຊອບ​ອັນ​ສູງ​ສົ່ງ​ໃນ​ຄອບ­ຄົວ​ ດ້ວຍ​ຖາ­ນະ​ເປັນ​ແມ່​ຜູ້​ເກີດ​ລູກ​​ເຕົ້າ, ລ້ຽງ​ດູ​ສັ່ງ­ສອນ​ເຊັ່ນ​ຄົນ​ໜຸ່ມ​ນ້ອຍ​ໃຫ້ກາຍ­ເປັນ​ເຈົ້າ​ຂອງ​ປະ­ເທດ. ແມ່­ຍິງ​ຕ້ອງ​ເປັນ “ຜູ້​ໄຕ້​ໄຟ​ໃຫ້​ແກ່​ຄອບ­ຄົວ”, ບໍ່​ພຽງ​ແຕ່​ເປັນ​ຄົນ​ເບິ່ງ­ແຍງ​ດູ​ແລ​ຄອບ­ຄົວ​ເທົ່າ​ນັ້ນ ຫາກ​ຍັງ​ຕ້ອງ​ຮູ້​ການ​ເຮັດ​ໃຫ້​ສະ­ມາ­ຊິກ​ໃນ​ຄອບ­ຄົວ​ມີ​ສັດ​ທາ, ຄວາມ​ຝັກ​ໄຝ່ ແລະ ມີ​ຄວາມ​ມຸ່ງ​ຫວັງ. ສະ­ຫະ­ພັນອມ່ຍິງ​ຂັ້ນ​ຕ່າງໆ​ຕ້ອງ​ສືບ​ຕໍ່​ຈັດ​ຕັ້ງ, ແນະ­ນຳ, ຊ່ວຍ­ເຫຼືອ​ແມ່­ຍິງ​ປະ­ຕິ­ບັດ​ບັນ­ດາ​ນະໂຍບາຍ​ກ່ຽວ​ກັບ​ການ​ສົມ­ລົດ ແລະ ຄອບ­ຄົວ, ເບິ່ງ­ແຍງ​ດູ​ແລ​ສຸ­ຂະ­ພາບ, ປົກ​ປັກ​ຮັກ­ສາ​ແມ່​ແລະເດັກ, ຮັກ­ສາ​ສະ­ພາບ​ແວດ​ລ້ອມ... ປະ­ສານ​ສົມ­ທົບ​ກັບ​ບັນ­ດາ​ຂັ້ນ, ຂະ­ແໜງ­ການ, ອົງ​ການ­ຈັດ­ຕັ້ງ​ຕ່າງໆ, ສຶກ​ສາ​ບຳ​ລຸງ​ໃຫ້​ແມ່­ຍິງ​ກ່ຽວ​ກັບ​ຄວາມ​ຮູ້​ດ້ານ​ການ​ລ້ຽງ​ດູ​ສັ່ງ­ສອນ​ລູກ​ຫຼານ, ຈັດ​ຕັ້ງ​ຊີ­ວິດ​ຄອບ­ຄົວ, ຮັກ­ສາ ແລະ ເສີມ​ຂະ­ຫຍາຍ​ເອ­ກະ­ລັກ​ວັດທະ­ນະ­ທຳ​ແຫ່ງ​ຊາດ, ຮັກ­ສາ​ຮີກ​ຄອງປະ­ເພ­ນີ, ມູນ­ເຊື້ອ​ອັນ​ດີ­ງາມ​ຂອງ​ແມ່ຍິງຫວຽດນາມ. ຍົກ​ສູງ​ຄວາມ​ເມດ​ຕາກະລຸນາ, ຄວາມອ່ອນ​ໂຍນອະ­ນຸ​ໂລມ, ຄຸນ­ສົມ­ບັດ​ອ່ອນນ້ອມ, ຈິດ​ໃຈ​ສາ­ມັກ­ຄີ, ນັບ­ຖື​ຖະໜຸ​ຖະ­ໜອມ, ຊ່ວຍ­ເຫຼືອ​ເຊິ່ງ​ກັນແລະກັນ, ເປັນ­ຕົ້ນ​ແມ່​ນໃນ​ເວ­ລາ​ທີ່​ພົບ​ຄວາມ​ຫຍຸ້ງ­ຍາກ, ຕົກ­ທຸກ​ໄດ້​ຍາກ; ກ່າວ​ປະ­ນາມ​ຕໍ່​ບັນ­ດາ​ການ​ກະ­ທຳ​ທີ່​ບໍ່​ມີ​ຄຸນສົມ­ບັດ, ບໍ່​ມີ​ຄວາມ​ຮັບ­ຜິດ­ຊອບ​ໃນ​ຄອບ­ຄົວ.

ທີ​ສີ່​, ສຸມ​ໃສ່​ປະ­ຕິ­ບັດບັນ­ດາ​ມາດ​ຕະ­ການ​ເພື່ອ​ກໍ່­ສ້າງ​ແມ່­ຍິງ​ຫວຽດ­ນາມທີ່ພັດທະນາ​ຮອບ­ດ້ານ​ກ່ຽວ​ກັບ​ຈິນ­ຕະ­ນາ­ການ, ຄຸນ­ສົມ­ບັດ, ກຳລັງ​ຮ່າງ​ກາຍ, ຈິດ­ໃຈ, ຄວາມ​ສາ­ມາດປະ­ດິດ​ສ້າງ, ຈິດ​ສຳນຶກ​ພົບ​ລະ​ເມືອງ; ເພື່ອ​ຕອບ​ສະ­ໜອງ​ຄວາມ​ຮຽກ­ຮ້ອງ​ຂອງ​ໄລ­ຍະ​​ແຫ່ງ​ການຍູ້​ແຮງ​ການ​ຫັນ​ເປັນ​ອຸດສາ­ຫະ­ກຳ ທັນ​ສະ­ໄໝ ແລະ ເຊື່ອມ​ໂຍງ​ສາ­ກົນ. ຍົກ​ສູງ​ຄຸນ​ນະ​ພາບຂອງ​ຖັນ​ແຖວ​ພະ­ນັກ­ງານ​ສະ­ຫະ­ພັນ​​ແມ່ຍິງຂັ້ນ​ຕ່າງໆ, ຕອບ​ສະ­ໜອງ​ຄວາມ​ຕ້ອງການ​ຂອງ​ວຽກ​ງານ​ສະ­ຫະ­ພັນ​ໃນ​ໄລ­ຍະ​ໃໝ່. ກໍ່­ສ້າງ​ຖັນ​ແຖວະ​ພະ­ນັກ­ງານ​ສະ­ຫະ­ພັນ​ແມ່ຍິງ​ທີ່​ມີ​ຫຼັກ​ໝັ້ນ​ການ­ເມືອງ​ເຂັ້ມ­ແຂງ, ຄຸນ­ສົມ­ບັດ​ສິນ​ທຳ​ດີ, ມີ​ຈິນ­ຕະ­ນາ­ການ​ປະ­ດິດ​ສ້າງ, ຕັ້ງໜ້າພະຍາຍາມ, ມີ​ຄວາມ​ຮັບ­ຜິດ­ຊອບ​ສູງ ​ຕໍ່​ວຽກ​ງານ​ສະ­ຫະ­ພັນ; ມີ​ລະ­ດັບ​ຄວາມ​ຮູ້​ດ້ານ​ວິ­ຊາ​ການ, ວິ­ຊາ​ສະ­ເພາະ; ມີ​ມາດ​ຕະ­ການ​ຂົນຂວາຍ​ແມ່­ຍິງ. ເອົາ­ໃຈ­ໃສ່​ການ​ບຳ​ລຸງ​ກໍ່­ສ້າງ​ພະ­ນັກ­ງານ​ສະ­ຫະ­ພັນ​ແມ່ຍິງ​ໂດຍ​ຜ່ານ​ການ­ເຄື່ອນ­ໄຫວ​ໃນ​ພາກ​ຕົວ​ຈິງ. ຄົ້ນ​ເຜີ​ຍ, ບຳ​ລຸງອົບຮົມ, ຄັດ​ເລືອກ​ເ​ອື້ອຍ​ນ້ອງ​​ແມ່ຍິງທີ່​ມີ​ເງື່ອນ­ໄຂ​ພຽງ­ພໍ​​ ເພື່ອ​ສະ­ເໜີ​​ໃຫ້ເຂົ້າ​ຮ່ວມ​ຄະ­ນະ​ພັກ, ອຳ­ນາດ​ການ​ປົກ­ຄອງ ​ແລະ ບັນ­ດາ​ພະ​ແນກ, ກະ­ຊວງ, ຂະ­ແໜງ­ການ​ ແຕ່​ສູນ​ກາງ​ຈົນ​ຮອດ​ຮາກ​ຖານ, ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ກໍ່­ສ້າງ​ຖັນ​ແຖວ​ພະ­ນັກ­ງານ​ການ​ນຳ, ການ​ຄຸ້ມ​ຄອງ, ຕອບ​ສະ­ໜອງ​ຄວາມ​ຮຽກ­ຮ້ອງຕ້ອງການ​ຍູ້​ແຮງ​ພາ­ລະ­ກິດການ​ຫັນ​ປະ­ເທດ​ເປັນ​ອຸດ­ສາ­ຫະ­ກຳ ທັນ​ສະ­ໄໝ.

ທີ​ຫ້າ​, ສືບ­ຕໍ່​ປ່ຽນ­ແປງ​ໃໝ່​ເນື້ອ​ໃນ, ມາດ​ຕະ­ການ​ການ­ເຄື່ອນ­ໄຫວ​ຂອງ​ສະ­ຫະ­ພັນ​​ແມ່ຍິງ ຕາມ​ຈິດ­ໃຈ​ຂອງ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ, ບັນ­ດາ​ມະ­ຕິ, ຄຳ​ສັ່ງ​ຂອງ​ສູນ​ກາງ, ກົມ​ການ­ເມືອງ, ຄະ­ນະ​ເລຂາ­ທິ­ການ ເພື່ອ​ປັບ­ປຸງ​ຈັດ​ຕັ້ງ​ສະ­ຫະ­ພັນ​ແມ່ຍິງ​ໃຫ້​ເຂັ້ມ­ແຂງ, ເສີມ​ຂະ­ຫຍາຍ​ຢ່າງ​ຮອບ​ດ້ານ ​ບົດ­ບາດ​ເປັນ​ຫຼັກ​ແຫຼ່ງ​ໃນ​ວຽກ​ງານ​ຂົນ­ຂວາຍ​ແມ່­ຍິງ. ຫັນ​ເນື້ອ​ໃນ​ການ­ເຄື່ອນ­ໄຫວ​ເປັນ​ຫຼາຍ​ຮູບ​ຫຼາຍ​ແບບ ​ແນ­ໃສ່​ຕອບ​ສະໜອງຄວາມ​ຕ້ອງການ​ຂອງ​ແມ່­ຍິງ​ທຸກ​ຊັ້ນຄົນ ຢ່າງ​ແທ້​ຈິງ​ແລະມີ​ປະ​ສິດ­ທິ​ຜົນ​. ຫັນ​ການ­ເຄື່ອນ­ໄຫວ​ລົງ​ສູ່​ຮາກ​ຖານ, ເຂດ​ຊຸມ​ຊົນ​ຢ່າງ​ແຂງແຮງ; ດັດ­ແປງ​​ວຽກ​ງານ​ຊີ້​ນຳ, ບັນ­ຊາ​ການ; ກຳ­ນົດ​ຢ່າງ​ຈະ­ແຈ້ງ​ໜ້າ­ທີ່​ຈຸດ​ສຸມ​ໃຈ­ກາງ​ໃນ​ແຕ່​ລະ​ໄລ­ຍະ, ສຸມ​ໃສ່​ຊີ້​ນຳ​ຢ່າງ​ເດັດ­ຂາດ, ສ້າງ​ປະ​ສິດ­ທິ​ຜົນ​ຢ່າງ​ຈະ­ແຈ້ງ, ຫຼິກ​ເວັ້ນການ​ເຮັດ​ແບບ​ຮູບ​ການ, ໂອ້​ອວດ, ​ແບບ​ການ​ບໍ­ລິ­ຫານ ​ໃນ​ການ​​ເ​ຄື່​ອນ​ໄຫວ​ຂອງ​ສະ­ຫະ­ພັນ. ຖື​ເອົາ​ຄວາມ​ຜາ​ສຸກ, ປະ​ສິດ­ທິ​ຜົນ​ຂອງ​ແມ່­ຍິງ​ເປັນ​ຈຸດໝາຍ; ຖື​ເອົາ​ຄວາມ​ເພິ່ງ​ພໍ­ໃຈ​ຂອງ​ແມ່­ຍິງ​ເປັນສິ່ງ​ວັດ­ແທກ​​ຄຸນ​ນະ​ພາບ, ປະ​ສິດ­ທິ​ຜົນ​ແຫ່ງ​ການເຄື່ອນ­ໄຫວ​ຂອງ​ສະ­ຫະ­ພັນ.

ທີ​ຫົກ​, ກອງປະຊຸມຄັ້ງ​ທີ​ສີ່​ຂອງຄະນະບໍລິຫານງານສູນກາງພັກຊຸດ XII ຫາກໍ່ປະກາດໃຊ້ມະຕິຕົກລົງ ວ່າດ້ວຍ ເພີ່ມ​ທະ­ວີ​ການ​ກໍ່­ສ້າງ, ດັດ­ແປງ​ພັກ; ສະ­ກັດ​ກັ້ນ, ຍູ້​ໃຫ້​ຖອຍ​ຄວາມ​ຊຸດ­ໂຊມ​ທາງ​ດ້ານ​ແນວ​ຄິດ​ການເມືອງ, ຄຸນ­ສົມ­ບັດ, ແບບ­ແຜນ​ດຳ­ລົງ​ຊີ­ວິດ, ບັນ­ດາ​ປະ­ກົດ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ­ແປງ​ດ້ວຍ​ຕົນ​ເອງ” ຢູ່​ພາຍ​ໃນ.  ນີ້​ແມ່ນ​ມະ­ຕິ​ສະ­ບັບ​ໜຶ່ງທີ່​ສຳ­ຄັນ​ທີ່​ສຸດ, ເວົ້າ​ເຖິງ​ບັນ­ຫາ​ທີ່​ທັງ​ເປັນ​ພື້ນ­ຖານ ທັງ​ຮີບ​ດ່ວນ, ທີ່​ໄດ້​ພະ­ນັກ­ງານ, ສະ­ມາ­ຊິກ​ພັກ ແລະ ປະ­ຊາ­ຊົນ​ເປັນ​ຈຳ­ນວນ​ຫຼວງ­ຫຼາຍ​​ ເອົາ­ໃຈ­ໃສ່ແລະຊົມເຊີຍ​ເປັນ​ພິ​ເສດ. ສະ­ຫະ­ພັນ​ແມ່­ຍິງຫວຽດ­ນາມຕ້ອງ​ຈັດ​ຕັ້ງ​ຢ່າງ​ເຂັ້ມ​ງວດ ​ການ​ຜັນ​ຂະ­ຫຍາຍ​ມະ­ຕິ​ຂອງ​ສູນ​ກາງ, ແຜນການ​ປະ­ຕິ­ບັດ​ມະ­ຕິ​ຂອງ​ກົມ​ການ­ເມືອງ ​ເຖິງ​ພະ­ນັກ­ງານ, ສະ­ມາ­ຊິກ​ຂອງ​ສະ­ຫະ­ພັນ​ທຸກ​ຄົນ. ສະຫະພັນ​ແມ່ຍິງ​ຕ້ອງ​ປ່ຽນແປງ​ໃໝ່​ເນື້ອ​ໃນ ແລະ ວິ­ທີ​ການ­ເຄື່ອນ­ໄຫວ, ໄປ​ສູ່​ລວງ​ເລິກ​ໃນ​ການ​ອົບຮົມສຶກ​ສາ, ບຳ​ລຸງກໍ່ສ້າງ, ປຸກ­ລະ­ດົມ​ສະ­ມາ­ຊິກ​ໃຫ້​ເສີມ​ຂະ­ຫຍາຍ​ສິດ​ເປັນ​ເຈົ້າ, ປະ­ຕິ­ບັດ​ຢ່າງ​ຕັ້ງ­ໜ້າ ມີ​ປະ​ສິດ­ທິ​ຜົນ ​ວຽກ​ງານ​ຕິດ­ຕາມກວດ­ກາ​, ວິ­ຈານ​ສັງ­ຄົມ, ເຂົ້າ​ຮ່ວມ​ການ​ກໍ່­ສ້າງ​ພັກ, ກໍ່­ສ້າງ​ອຳ­ນາດ​ການ​ປົກ­ຄອງ, ເຂົ້າ​ຮ່ວມ​ບັນດາ​ການ­ເຄື່ອນ­ໄຫວ​ດ້ານ​ການ­ເມືອງ-ສັງຄົມ ດ້ວຍ​ຄວາມ​ຮັບ­ຜິດ­ຊອບ​ຢ່າງ​ພຽງ­ພໍ​ຂອງ​ຜູ້​ເປັນ​ເຈົ້າ​ຂອງ. ຍືດ​ໝັ້ນ, ຕັ້ງ­ໜ້າ​ເຮັດ​ໃຫ້​ຖັນ​ແຖວ​ມີ​ຄວາມ​ປອດ​ໃສ​ຂາວ​ສະ­ອາດ, ແກ້​ໄຂ​ບັນ­ດາ​ປະ­ກົດ​ການ​ຊຸດ­ໂຊມ, ເສື່ອມ​ເສຍ​ຄຸນ­ສົມ­ບັດ, ແບບ­ແຜນ​ດຳ­ລົງ​ຊີ­ວິດ; ເປັນ​ເຈົ້າ​ການ​ຄົ້ນ​ເຜີຍ ແລະ ເຂົ້າ​ຮ່ວມ​ໃນ​ການ​ຕໍ່­ຕ້ານ​ສະ​ກັດ​ກັັ້ນ​ສະ­ພາບ​ການ​ສໍ້​ລາດ​ບັງ​ຫຼວງ, ຄວາມ​ຫຍໍ້­ທໍ້, ການ​ຟຸມ​ເຟືອຍ​ໃນ​ສັງ­ຄົມ; ສະ­ກັດ​ກັ້ນ​ບັນ­ດາ​ຄວາມ​ຫຍໍ້­ທໍ້​ໃນ​ຄອບ­ຄົວ​ຕົນ​ເອງ, ໃນ​ຍາດ­ຕິ​ພີ່­ນ້ອງ​ຂອງ​ຕົນ. ເພີ່ມ​ທະ­ວີ​ການ​ພົວ­ພັນ​ແໜ້ນ​ແຟ້ນ​ກັບ​ພັກ, ລັດ ແລະ ປະ­ຊາ­ຊົນ; ປັບ­ປຸງ​ຄວາມ​ໄວ້​ເນື້ອ​ເຊື່ອ​ໃຈ​ຂອງ​ປະ­ຊາ­ຊົນ​ຕໍ່​ພັກ, ລັດ ແລະ ລະ­ບອບ​ການ­ເມືອງ.

ທີ່​ກອງ​ປະ­ຊຸມ​ໃຫຍ່​ຄັ້ງ​ນີ້, ພ້ອມ​ກັບ​ການ​ປະ­ກອບ­​ຄວາມ​ຄິດ​ເຫັນ​ເຂົ້າ​ໃນ​ບົດ​ລາຍ​ງານ​ການ­ເມືອງ, ກົດ​ລະ­ບຽບ​ຂອງ​ສະ­ຫະ­ພັນ​ແມ່ຍິງ (ສະບັບປ່ຽນ­ແປງ, ປັບ­ປຸງ), ຂ້າ­ພະ­ເຈົ້າ​ຂໍ​ສະ­ເໜີ​ວ່າ ດ້ວຍ​ຈິດ​ໃຈ­ຄວາມ​ຮັບຜິດ­ຊອບ​ສູງ, ກອງ​ປະ­ຊຸມ​ໃຫຍ່​ຈະ​ປຶກ­ສາ​ສົນ­ທະ­ນາ​ຢ່າງ​ມີປະ­ຊາ­ທິ­ປະ­ໄຕ, ​​ມີສະ­ຕິ​ບັນ​ຍາ, ຄັດ​ເລືອກ​ຢ່າງ​ສະຫຼາດ​ ເພື່ອ​ເລືອກ​ຕັ້ງ​ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່ຍິງຊຸດ​ທີ XII ລວມ​ມີ​ບັນ­ດາ​ສະ­ຫາຍ​ທີ່​ມີ​ຄຸນ­ສົມ­ບັດ​ສິນ​ທຳ, ຄວາມ​ສາ­ມາດ, ມີ​ອິດ​ທິ​ພົນ, ຕັ້ງ­ໜ້າ ແລະ ມີ​ຄວາມ​ຮັບ­ຜິດ­ຊອບ​ສູງ, ມີ​ສຸ­ຂະ­ພາບ ​ເພື່ອ​ນຳ­ພາ​ຂະ​ບວນ​ການ ແລະ ວຽກ​ງານ​ຂອງ​ສະ­ຫະ­ພັນ​ໃນ​ສະ­ໄໝ​ທີ່​ຈະ​ມາ​ເຖິງ; ຕ້ອງ​ເອົາ­ໃຈ­ໃສ່​ເຖິງ​ໂຄງ​ປະກອບ, ອັດ­ຕາ​ສ່ວນ​ພະ­ນັກ­ງານ​ແມ່­ຍິງ​ເປັນ​ຄົນ​ຊົນ­ເຜົ່າ​ສ່ວນ​ນ້ອຍ, ກຳ­ມະ­ກອນ, ຜູ້​ອອກ­ແຮງ​ງານ ແລະ ພະ­ນັກ­ງານ​​ໜຸ່ມ​ທີ່​ມີ​ແງ່​ຫວັງ.

ເນື່ອງ​ໃນ​ໂອ­ກາດ​ນີ້ ຂ້າ­ພະ­ເຈົ້າ​ຂໍ​ສະ­ເໜີ​ໃຫ້​ຄະ­ນະ​ພັກ, ອຳ­ນາດ​ການ​ປົກ­ຄອງ​ຂັ້ນ​ຕ່າງໆ, ບັນ­ດາ​ຂະແໜງ­ການ ​ຕ້ອງ​ເຊື່ອມ​ຊືມ​ໃຫ້​ເລິກ­ເຊິ່ງ ​ກ່ຽວ​ກັບ​ທັດ­ສະ­ນະ, ຈຸດ­ໝາຍ​ຂອງ​ວຽກ​ງານ​ແມ່­ຍິງ​ໃນ​ສະ­ພາບ​ການ​ໃໝ່, ຈັດ​ຕັ້ງ​ນຳ­ພາ​ກໍ່​ຄື​ກໍ່­ສ້າງ​ບັນ­ດາ​ໂຄງ­ການ, ແຜນ­ການ­ເຄື່ອນ­ໄຫວ​ຢ່າງ​ລະ­ອຽດ ​ເພື່ອ​ສ້າງ​ບາດ­ກ້າວ​ຫັນ­ປ່ຽນ​ຢ່າງ​ຈະ­ແຈ້ງ​ ກ່ຽວ​ກັບ​ຄຸນ​ນະ​ພາບ, ປະ​ສິດ­ທິ​ຜົນ​ວຽກ​ງານ​ແມ່­ຍິງ​ ຢູ່​ແຕ່​ລະ​ຂະ­ແໜງ­ການ, ທ້ອງ​ຖີ່ນ, ກົມ​ກອງ; ເອົາ­ໃຈ­ໃສ່​ໃນ​ການ​ກໍ່­ສ້າງ, ປັບ­ປຸງ​ອົງ​ການ­ຈັດ­ຕັ້ງ, ຍົກ​ສູງ​ຄຸນ​ນະ​ພາບ, ປະ​ສິດ­ທິ​ຜົນ​ແຫ່ງ​ການເຄື່ອນ­ໄຫວ​ຂອງ​ສະ­ຫະ­ພັນ​​ແມ່​ຍິງຂັ້ນ​ຕ່າງໆ. ບັນ­ດາ​ອົງ​ການ­ຈັດ­ຕັ້ງ​ຂອງ​ພັກ, ລັດ, ແນວ​ໂ​ຮມ​ປະ­ເທດ​ຊາດ, ບັນ­ດາ​ອົງ​ການ­ຈັດ­ຕັ້ງ, ອົງ­ການ​ສັງ­ຄົມ, ອົງ­ການ​ສື່​ມວນ​ຊົນ​ ຕ້ອງ​ເພີ່ມ​ທະ­ວີ​ການ​ສຶກ​ສາ​ ເພື່ອ​ຍົກ​ສູງ​ຄວາມ​ຮັບ​ຮູ້​ກ່ຽວ​ກັບ​ບັນຫາ​ເພດ ແລະ ສະ­ຕິ​ຄວາມ​ຮັບ­ຜິດ­ຊອບ​ກ່ຽວ​ກັບ​ການ​ປະ­ຕິ­ບັດ​ຄວາມ​ສະ­ເໝີ­ພາບ​ຍິງ-ຊາຍ​ ໃຫ້​ແກ່​ພະ­ນັກ­ງານ, ສະ­ມາ­ຊິກ​ພັກ, ປະ­ຊາ­ຊົນ​ທຸກ​​ຊັ້ນວັນນະ. ກໍ່­ສ້າງ​ກ່ຽວ​ກັບ​ທ່າ​ທີ​ນັບ­ຖື, ຍ້ອງ­ຍໍ​ຊົມເຊີຍ, ປົກ​ປັກ​ຮັກ­ສາ​ແມ່­ ຍິງ​ໃນ​ທົ່ວ​ສັງ­ຄົມ; ແບບແຜນ​ປະ­ພຶດ​ທີ່​ມີ​ຄວາມ​ອະ­ລິ­ຍະ​ທຳ, ວັດ­ທະ­ນະ­ທຳ ​ຕໍ່ແມ່ຍິງ. ຕ້ອງ​ເອົາ­ໃຈ­ໃສ່​ໂຄສະ​ນາສົ່ງ​ເສີມ ແມ່­ຍິງທີ່​ເປັນ​ແບບ­ຢ່າງ​ກ້າວ­ໜ້າ; ມີ​ການ​ຕຳ​ໜິວິພາກ, ຕໍ່­ສູ້​ຕ້ານ​ແນວ​ຄິດດູ​ຖູ​ກດູ​ໝິ່ນ​ແມ່­ຍິງ, ບັນ­ດາ​ການກະ­ທຳ​ຈຳ­ແນກ​ການ​ປະ­ພຶດ, ສວຍ​ໃຊ້, ແຕະ­ຕ້ອງ​ກຽດ​ເປັນ​ມະ­ນຸດ​ຂອງ​ແມ່­ຍິງ.

ພວກ​ເຮົາ​ເຊື່ອ​ໝັ້ນ​ວ່າ, ພາຍ​ຫຼັງ​ກອງ​ປະ­ຊຸມ​ໃຫຍ່​ຄັ້ງ​ນີ້, ຂະ​ບວນ​ການ​ແມ່­ຍິງຫວຽດ­ນາມຈະ​ມີບາດກ້າວ​ຂະຫຍາຍຕົວ​ໃໝ່​ທີ່​ແຂງ­ແຮງ​ກວ່າ​ອີກ; ການ­ເຄື່ອນ­ໄຫວ​ຂອງ​ສະ­ຫະ­ພັນ​ແມ່­ຍິງຫວຽດ­ນາມຈະ​ມີຄວາມ​ເບັ່ງ​ບານ​ດ້ວຍ​ຫຼາຍ​ສີສັນ​ທີ່​ສວຍ​ງາມ, ປະ­ກອບ­ສ່ວນ​ຢ່າງ​ສົມ​ກຽດ​ເຂົ້າ​ໃນ​ການ​ປະ­ຕິ­ບັດ​ມະ­ຕິ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ­ເທດ​ຄັ້ງ​ທີ XII ຂອງ​ພັກ​ໃຫ້​ສຳ​ເລັດ​ມີ​ໄຊ, ເຮັດ​ໃຫ້ຫວຽດ­ນາມນັບ​ມື້​ນັບ​ຮັ່ງ­ມີ​ເຂັ້ມແຂງ, ມີ​ປະຊາທິ­ປະ­ໄຕ, ຍຸ­ຕິ​ທຳ, ສີ­ວິ­ໄລ, ກ້າວ​ຢ່າງ​ໜັກ​ແໜ້ນ​ຂຶ້ນ​ສູ່​ສັງ­ຄົມ​ນິ­ຍົມ./.

ໂດຍ ຫງວ​ຽນ​ຝູ​ຈ້ອງ

ເລ­ຂາ­ທິ­ການ​ໃຫຍ່​ຄະ­ນະ​ບໍ­ລິ­ຫານ​ງານ​ສູນ​ກາງພັກ​ກອມ​ມູ​ນິດ​ຫວຽດ­ນາມ

----------------------------------------------

* ຫົວ­ຂໍ້​ໂດຍ​ວາ​ລາ​ສານ​ກອມ​ມູ​ນິດ​ເປັນ​ຜູ້​ແຕ່ງ.

(1) ໂຮ່​ຈີ​ມິນ: ນິ­ພົນ​ຄົບ​ຊຸດ, ສຳ­ນັກ​ພິມ​ຈຳ​ໝ່າຍການ­ເມືອງ​ແຫ່ງ​ຊາດ - ຊື້​ເທິດ, ຮ່າ​ໂນ້ຍ, 2011, ເຫຼັ້ມ 7, ໜ້າ 340.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ