ວັນພະຫັດ, 17/8/2017
ເພີ່ມທະວີການສະຫຼຸບສັງລວມພຶດຕິກຳ ແລະ ຄົ້ນຄວ້າທິດສະດີກ່ຽວກັບວຽກງານພະນັກງານ ໃນສະພາບການໃໝ່
25/7/2017 17:8' ສົ່ງ ພິມ
ຮສ.ປອ ຟ້າມມິງຈິ໋ງ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງ

ສະພາບ​ຕົວ​ຈິງ​ໃຫ້​ເຫັນ​ວ່າ, ການ​ສະຫຼຸບ​ສັງ​ລວມພຶດຕິ​ກຳ ​ແລະ ຄົ້ນຄວ້າ​ທິດ​ສະ​ດີ​ກ່ຽວ​ກັບວຽກ​ງານ​ພະນັກງານ ​​ແມ່ນຄວາມ​ຮຽກຮ້ອງ​ຕ້ອງການ​ອັນ​ຈຳ​ເປັນ​ພາວະ​ວິ​ໄສ ​ໃນ​ຂະ​ບວນວິວັດ​ການ​ພັດທະນາ​ຂອງ​ປະ​ເທດ​ຊາດ. ຢາກ​ມີ​ບັນດາ​ກົນ​ໄກ, ນະ​ໂຍບາຍ​ພະນັກງານ​ທີ່ສອດຄ່ອງ​ກັບ​ແຕ່ລະ​ໄລຍະ​ປະຫວັດ​ສາກ, ມີ​ຄວາມ​ສາມາດ​ເຂົ້າ​ສູ່​ຊີວິດ​ການ​ເປັນ​ຢູ່​ໄດ້, ​ແມ່ນ​ຕ້ອງ​ລົງທຶນຄົ້ນຄວ້າ​ພື້ນຖານ, ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າຂະຫຍາຍ​ທິດ​ສະ​ດີ ຢ່າງ​ມີ​ວິທະຍາສາດ, ​ເປັນ​ແບບ​ສະບັບ. ​ເຮັດ​ຄື​ແນວ​ນັ້ນ​ຈຶ່ງ​ສາມາດ​ກໍ່ສ້າງ​ໄດ້​ຖັນ​ແຖວ​ພະນັກງານ​ທີ່​ຕອບ​ສະໜອງ​ຄວາມ​ຕ້ອງການ​ໄດ້, ຈຶ່ງ​ສາມາດ “​ໄດ້​ກຳ​ໄລ” ຄື​ທີ່​ທ່ານ​ປະທານ ​ໂຮ່ຈີ​ມິນ ​ເຄີບ​ຕັກ​ເຕືອນ: ມີ​ທຶນ​ຈຶ່ງ​ເຮັດ​ໃຫ້​ມີ​ກຳ​ໄລ. ບໍ່​ວ່າ​ນະ​ໂຍບາຍ, ວຽກ​ງານ​ໃດ​ ກໍ່​ຕ້ອງ​ມີພະນັກງານດີ​ ຈຶ່ງ​ສຳ​ເລັດ​ຜົນ​ໄດ້, ໝາຍ​ຄວາມ​ວ່າ​ໄດ້​ກຳ​ໄລ. ບໍ່​ມີ​ພະນັກງານ​ດີ​ກໍ່​ຈະ​ເສຍ​ວຽກ, ໝາຍ​ຄວາມ​ວ່າ​ຂາດທຶນ.

ສາຍ​ພົວພັນ​ລະຫວ່າງສະຫຼຸບ​ສັງ​ລວມພຶດຕິ​ກຳ ​ແລະ ຄົ້ນຄວ້າ​ທິດ​ສະ​ດີ​ກ່ຽວ​ກັບວຽກ​ງານ​ພະນັກງານ

ລະຫວ່າງການສະຫຼຸບ​ສັງ​ລວມພຶດຕິ​ກຳ ​ແລະ ການຄົ້ນຄວ້າ​ທິດ​ສະ​ດີກ່ຽວ​ກັບວຽກ​ງານ​ພະນັກງານ ມີ​ຄວາມ​ພົວພັນ​ສັດຈະ​ວິພາກ​ນຳ​ກັນ. ພຶດຕິ​ກຳ​ແມ່ນ​ການ​ເຄື່ອນ​ໄຫວ​ຕົວ​ຈິງ​ພາວະ​ວິ​ໄສ, ມີ​ລັກສະນະ​ຂະຫຍັນ​ຂັນ​ເຄື່ອນ, ປະດິດ​ສ້າງຂອງມະນຸດ​ໃນ​ຊີວິດ​ສັງຄົມ ດັ່ງ​ນັ້ນ​ມັນ​ຫຼາກ​ຫຼາຍ, ອຸດົມສົມບູນ​ທີ່​ສຸດ. ການສະຫຼຸບ​ສັງ​ລວມພຶດຕິ​ກຳ​ແມ່ນ​ການ​ເຄື່ອນ​ໄຫວ​ແນ​ໃສ່​ຊອກ​ຫາ​ບັນດາ​ກົດ​ເກນ, ບັນດາ​ຈຸດ​ລວມ, ບັນດາ​ປັດ​ໄຈ​ຕັ້ງໜ້າ, ບັນດາ​ການ​ກະທົບ​ຫຍໍ້​ທໍ້, ສາ​ເຫດ ​ແລະ ບົດຮຽນ​ປະສົບ​ການ, ບັນດາ​ວິທີ​ແກ້​ໄຂ​ຊຸກຍູ້​ລັກສະນະ​ຕັ້ງໜ້າ ​ແລະ ຈຳກັດ​ຄວາມ​ຫຍໍ້​ທໍ້ ຫຼື​ເພື່ອ​ປ່ຽນ​ແປງ​ວິທີ​ເຮັດ​ແນ​ໃສ​ບັນລຸ​ປະສິດທິ​ຜົນດີ​ທີ່​ສຸດ, ຊອກ​ຫາ​ທ່າ​ອຽງ​ພາວະ​ວິ​ໄສ​ເພື່ອ​ຊີ້ນຳ​​ການກະທຳ​ຕົວ​ຈິງ.

ຕາມ​ທັດສະນະ​ຂອງ​ລັດທິ​ມາກ-​ເລ​ນິນ, ການສະຫຼຸບ​ສັງ​ລວມພຶດຕິ​ກຳ​ແມ່ນ​ພື້ນຖານ​ຂອງ​ການ​ຄົ້ນຄວ້າ​ທິດ​ສະ​ດີ. ທຸກໆ​ທິດ​ສະ​ດີ​ຕ້ອງ​ຜ່ານ​ພຶດຕິ​ກຳ​ເພື່ອ​ກວດ​ພິສູດ. ພຶດຕິ​ກຳ​ແມ່ນ​ມາດຕະຖານ​ສັດຈະທຳ​ຂອງ​ທິດ​ສະ​ດີ. ທ່ານ ກ.ມາກ ​ເວົ້າ​ວ່າ “ບັນຫາ​ຊອກ​ຮູ້​ເບິ່ງ​ວ່າ ​ຈິນຕະນາການ​ຂອງ​ມະນຸດ​ສາມາດ​ບັນລຸ​ເຖິງ​ສັດຈະທຳ​ພາວະ​ວິ​ໄສ​ຫຼື​ບໍ່​ນັ້ນ, ມັນ​ບໍ່​ແມ່ນ​ບັນຫາ​ທິດ​ສະ​ດີ​ໜຶ່ງ​ແຕ່​ຢ່າງ​ໃດ ຫາກ​ແມ່ນ​ບັນຫາພຶດຕິ​ກຳ. ​ໃນ​ກະ​ໂຕ​ພຶດຕະກຳ​ນັ້ນ​ມະນຸດ​ຕ້ອງ​ຢັ້ງຢືນ​ສັດຈະທຳ”(1). ວ.ອີ. ​ເລ​ນິນ ​ເຄີຍ​ເວົ້າ​ເຖິງ​ສາຍ​ພົວພັນ​ສັດຈະ​ວິພາກ​ໃນ​ການ​ຮັບ​ຮູ້​ສັດຈະທຳ, ຕາມ​ນັ້ນ “ຈາກ​ການ​ສຳຜັດ​ຕົວ​ຈິງ​ທີ່​ມີ​ຊີວິດ​ຊີວາ​ເຖິງ​ຈິນຕະນາການ​ນາມ​ມະ​ທຳ, ​ແລະ​ຈາ​ກຈິນຕະນາການ​ນາມ​ມະ​ທຳ​ເຖິງ​ພຶດຕິ​ກຳ - ນັ້ນ​ແມ່ນ​ເສັ້ນທາງ​ສັດຈະ​ວິພາກ​ຂອງ​ການ​ຮັບ​ຮູ້ສັດຈະທຳ, ຂອງ​ການ​ຮັບ​ຮູ້​ພາກ​ຕົວ​ຈິງ​ພາວະ​ວິ​ໄສ”(2).

ທ່ານ​ປະທານ ​ໂຣ່ຈີ​ມິນ ​ໄດ້​ໃຫ້ທັດ​ສະ​ນະ​ວ່າ “ທິດ​ສະ​ດີ ​ແມ່ນ​ການ​ສະຫຼຸບ​ສັງ​ລວມບັນດາບົດຮຽນ​ຂອງມະນຸດຊາດ, ​ແມ່ນ​ການ​ສະຫຼຸບ​ສັງ​ລວມພູມ​ປັນຍາກ່ຽວ​ກັບ​ທຳ​ມະ​ຊາດ​ແລະສັງຄົມທີ່​ສະ​ສົມ​ໄວ້​ໃນ​ວິວັດ​ການ​ປະຫວັດສາດ”(3). ສະຫຼຸບ​ສັງ​ລວມ, ສັງ​ເຂ​ບບົດຮຽນ​ພຶດຕະກຳ​ເປັນ​ການ​ສະ​ສົມ​​ທາງ​ດ້ານ​ປະລິ​ມານເທື່ອ​ລະ​ກ້າວ ​ເພື່ອ​ເພີ່ມ​ເຕີມ, ບູລະນະ ​ແລະ ຂະຫຍາຍ​ທິດ​ສະ​ດີ​ໃຫ້​ມີຄວາມ​ເລິກ​ເຊິ່ງ​ຕື່ມ​ອີກ​. ​ເພິ່ນ​ເຕືອນ​ພະນັກງານ, ສະມາຊິກ​ພັກ​ວ່າ “ນັບ​ແຕ່​ນີ້​ເປັນ​ຕົ້ນ​ໄປ, ບໍ່​ວ່າວຽກ​ງານ​​ໃດ ​ເຖິງ​ວ່າ​ຈະ​ສຳ​ເລັດ​ຜົນ​ຫຼື​ປະລາ​ໄຊ, ພວກ​ເຮົາ​ກໍ່​ຕ້ອງ​ຄົ້ນຄວ້າ​ຈົນ​ເຖິງ​ກົກ​ເຄົ້າ, ​ໄຈ້​ແຍກ​​ໃຫ້​ຈະ​ແຈ້ງ​ແລ້ວ​ຈຶ່ງ​ສະຫຼຸບ. ຄຳ​ສະຫຼຸບ​ນັ້ນ​ຈະ​ເປັນລູກ​ກະ​ແຈ​ພັດທະນາ​ວຽກ​ງານ ​ແລະ ​ເພື່ອ​ຊ່ວຍ​ໃຫ້​ພະນັກງານ​ກ້າວໜ້າ. ​ເຮັດ​ໄດ້​ຄື​ແນວ​ນັ້ນ ບຸກ​ຄົນ​ຈຶ່ງ​ເກັ່ງ​ກ້າ​ສາມາດ, ຄວາມ​ເກັ່ງ​ກ້າ​ສາມາດ​ຈຶ່ງ​ມີ​ຄຸນ​ປະ​ໂຫຍ​ດ”(4).

ທ່ານ​ປະທານ ​ໂຮ່ຈີ​ມິນ ​ໄດ້​ຊີ້​​ແຈງ​​ຄວາມ​ພົວພັນ​ສັດຈະ​ວິພາກ​ ລະຫວ່າງສະຫຼຸບ​ສັງ​ລວມພຶດຕິ​ກຳ​ ແລະ ຄົ້ນຄວ້າ​ທິດ​ສະ​ດີ, ​ແລະ​ເນັ້ນ​ວ່າ, ພຶດຕິ​ກຳ​ບໍ່​ໄດ້​ຮັບ​ການ​ແນະນຳ​ຂອງ​ທິດ​ສະ​ດີ ກໍ່​ຈະ​ເປັນ​ພຶ​ນຕິ​ກຳທີ່ມືດ​ມົວ. ທິດ​ສະ​ດີ​ບໍ່​ສົມ​ທຽບ​ກັບ​ພຶດຕິ​ກຳ​ ກໍ່​ຈະ​ເປັນ​ທິດ​ສະ​ດີ​ນ້ຳ​ເຕົ້າ​ເປົ່າ, ຄວາມ​ເປັນ​ເອກະ​ພາບ​ລະຫວ່າງ​ທິດ​ສະ​ດີ​ແລະ​ພຶດຕິ​ກຳ​ ແມ່ນ​ມູນ​ຫຼັກ​ອັນ​ພື້ນຖານ​ໜຶ່ງ​ ຂອງ​ລັດທິ​ມາກ-​ເລ​ນິນ. ທ່ານ​ປະທານ​ ໂຮ່ຈີ​ມິນ ​ໄດ້​ໝູນ​ໃຊ້​ເປັນ​ຢ່າງ​ດີ ບັນດາມູນ​ຫຼັກ​ທິດ​ສະ​ດີ​ຂອງ​ລັດທິ​ມາກ-​ເລ​ນິນ ​ແລະ ທິດ​ສະ​ດີ “​ໃຊ້​ຄົນ” ຢ່າງ​ໄຫວ​ພິບ​ໃນ​ຂະ​ບວນວິວັດ​ການ​ນຳພາ, ຊີ້​ນຳວຽກ​ງານ​ພະນັກງານ. ​ເພິ່ນ​ໃຫ້​ທັດສະນະ​ວ່າ, ຕ້ອງ​ມີ​ວິທີ​ພາວະ​ວິ​ໄສ, ຮອບດ້ານ​ໃນ​ການ​ພິຈາລະນາ, ຕີ​ລາຄາ​ພະນັກງານ, ຫຼີກ​ລ່ຽງການ​ເຮັດ​ແບບ​ແຂງ​ກະດ້າງ, ຜິວ​ເຜີນ. ​ເມື່ອ​ສັງ​ເກດ​ພິຈາລະນາ​ພະນັກງານ ບໍ່​ຄວາມ​ເບິ່ງ​ແຕ່​ພາຍ​ນອກ, ສັງ​ເກດ​ໃນ​ບຶດໜຶ່ງ ວຽກ​ໜຶ່ງ​ເທົ່າ​ນັ້ນ ຫາກ​ຕ້ອງ​ພິຈາລະນາ​ຢ່າງຮອບດ້ານ, ​ໃນ​ຕະຫຼອດ​ຂະ​ບວນວິວັດ​ການ​ເຕີບ​ໃຫຍ່, ຂະຫຍາຍຕົວ​ຂອງ​ເຂົາ, ​ໃນ​ເວລາ​ພົບ​ຄວາມ​ຫຍຸ້ງຍາກ​ກໍ່​ຄື​ໃນ​ເມື່ອ​ມີ​ຄວາມ​ສະດວກ​ດີ.

ອາດ​ຈະ​ເຫັນ​ໄດ້​ຢ່າງ​ຈະ​ແຈ້ງວ່າ, ພຶດຕິ​ກຳ​ກ່ຽວ​ກັບວຽກ​ງານ​ພະນັກງານມີ​ຄວາມ​ຫຼາກ​ຫຼາຍ, ອຸດົມສົມບູນ​ກວ່າຕັ້ງ​ຫຼາຍ​ທຽບ​ກັບ​ທິດ​ສະ​ດີ; ການສະຫຼຸບ​ສັງ​ລວມວຽກ​ງານ​ພະນັກງານມີ​ບົດບາດ​ສຳ​ຄົນ​ທີ່​ສຸດ​ ໃນການ​ພັດທະນາ​ທິດ​ສະ​ດີ​ກ່ຽວ​ກັບວຽກ​ງານ​ນີ້. ຖ້າ​ຫາກ​ບໍ່ຄົ້ນຄວ້າ, ການສະຫຼຸບ​ສັງ​ລວມພຶດຕິ​ກຳກໍ່​ຈະ​ບໍ່​ມີ​ບັນດາ​ຫຼັກ​ຖານ​ວິທະຍາສາດ, ຫຼັກການ, ທັດສະນະ, ວິທີ​ການ..., ​ເພື່ອ​ບົນ​ພື້ນຖານ​ນັ້ນ ກໍ່ສ້າງ​ບັນດາ​ມາດຕະຖານ, ບັນທັດຖານ, ຂໍ້​ກຳນົດ, ຫຼັກ​ດຳ​ເນີນງານ... ວຽກ​ງານ​ພະນັກງານ ຢ່າງສອດຄ່ອງ​ກັບ​ແຕ່ລະ​ໄລຍະ​ການ​ພັດທະນາ​ຂອງ​ປະ​ເທດ. ການສະຫຼຸບ​ສັງ​ລວມພຶດຕິ​ກຳກ່ຽວ​ກັບວຽກ​ງານ​ພະນັກງານ ​ເພື່ອ​ມີ​ພື້ນຖານ​ວິທະຍາ​ສາດ ​ແລະ ບັນດາ​ບົດຮຽນ​ປະສົບ​ການ​ຮັບ​ໃຊ້​ໃຫ້​ແກ່​ການ​ຊີ້​ນຳ ​ແລະ ພັດທະນາ​ຍຸດ​ທະ​ສາດ​ພະນັກງານ​ໃນ​ຕໍ່​ໄປ, ປະກອບສ່ວນ​ກີດ​ກັ້ນ “ພະຍາດ​ບົດຮຽນ​”, ຄຳ​ພີ, ບັງຄັບ, ອັດຕະວິ​ໄສ ​ໃນວຽກ​ງານ​ພະນັກງານ. ການສະຫຼຸບ​ສັງ​ລວມພຶດຕິ​ກຳກ່ຽວ​ກັບວຽກ​ງານ​ພະນັກງານ ກໍ່​ເພື່ອ​ພິສູດ​ລັກສະ​ນະ​ຖືກ ຜິດ, ຄວາມ​ສອດຄ່ອງ​ຂອງ​ບັນດາ​ນະ​ໂຍບາຍ​ພະນັກງານກ່ອນ​ໜ້າ​ນີ້, ບົນ​ພື້ນຖານ​ນັ້ນ ກໍ່ສ້າງ​ບັນດາ​ຫຼັກ​ຖານ​ວິທະຍາສາດ​ໃຫ້​ແກ່​ບັນດາ​ນະ​ໂຍບາຍ​ຕໍ່​ໄປ.

ການ​ຄົ້ນຄວ້າ​ທິດ​ສະ​ດີກ່ຽວ​ກັບວຽກ​ງານ​ພະນັກງານມີ​ບົດບາດ​ສຳຄັນ​ທີ່​ສຸດ​ ໃນ​ການ​ປະຕິບັດວຽກ​ງານ​ພະນັກງານ. ຄົ້ນຄວ້າ​ທິດ​ສະ​ດີປະກອວສ່ວນ​ສະໜອງ, ​ເພີ່ມ​ເຕີມ, ບູລະນະ​ວິທີ​ການ​ສະຫຼຸບ​ສັງ​ລວມພຶດຕິ​ກຳ​ທີ່​ຖືກຕ້ອງ, ມີ​ວິທະຍາສາດ ​ໃຫ້​ແກ່​ບັນດາ​ອົງການ​ທີ່​ປະຕິບັດ​ການ​ສະຫຼຸບ​ສັງ​ລວມພຶດຕິ​ກຳ​ກ່ຽວ​ກັບ​ຖັນ​ແຖວ​ພະນັກງານ ​ແລະ ວຽກ​ງານ​ພະນັກງານ; ປະກອບສ່ວນ​ກຳນົດ​ທິດ​ໃຫ້​ແກ່​ວຽກ​ງານສະຫຼຸບ​ສັງ​ລວມກ່ຽວ​ກັບ​ວຽກ​ງານ​ພະນັກງານ, ຈຳກັດບັນດາ​ປະກົດ​ການ​ເຈດ​ຈຳນົງ​ນິຍົມ, ດ້ານ​ດຽວ, ບັງຄັບ​ແບບ​ອັດຕະວິ​ໄສ. ການຄົ້ນຄວ້າ​ທິດ​ສະ​ດີກ່ຽວ​ກັນວຽກ​ງານ​ພະນັກງານ ຮຽກຮ້​ອງ​ໃຫ້​ຕ້ອງ​ເຂົ້າ​ເຖິງ​ກັບ​ບັນດາ​ທິດ​ສະ​ດີ​ທັນ​ສະ​ໄໝກ່ຽວ​ກັບ​ວິທະຍາສາດ​ການຈັດ​ຕັ້ງ, ຄຸ້ມ​ຄອງ​ບຸກຄະລາ​ກອນ, ການ​ນຳພາ​ວິທະຍາ, ຈິດຕະສາດ,... ​ເພື່ອ​ເຂົ້າ​ໃຈ​ຢ່າງ​ເລິກ​ເຊິ່ງກວ່າ​ອີກ ກ່ຽວ​ກັບ​ທຸກ​ແງ່​ມູມຂອງມະນຸດ​ໃນ​ລະບົບ​ການຈັດ​ຕັ້ງ, ​ເຊັ່ນ ຄວາມ​ຕ້ອງການ, ກຳລັງ​ໜູນ, ຄວາມ​ສາມາດ, ວິທີ​ຄັດ​ເລືອກ, ນຳ​ໃຊ້, ຕີ​ລາຄາ...

ຄື​ແນວ​ນັ້ນ​ແມ່ນ, ການ​ເພີ່ມ​ທະວີການສະຫຼຸບ​ສັງ​ລວມພຶດຕິ​ກຳ, ​ຄົ້ນຄວ້າ​ທິດ​ສະ​ດີກ່ຽວ​ກັບວຽກ​ງານ​ພະນັກງານ ມີ​ຄວາມ​ສຳຄັນແລະຄວາມ​ໝາຍ​ພິ​ເສດ ​ໃນ​ວຽກ​ງານ​ກໍ່ສ້າງ​ພັກ. ພ້ອມ​ກັບ​ບັນດາ​ຫຼັກ​ຖານ​ການ​ເມືອງ, ກົດໝາຍ ​ແລະ ພຶດຕິ​ກຳ​ນັ້ນ ຫຼັກ​ຖານ​ວິທະຍາສາດ​ເປັນ​ສິ່ງ​ທີ່​ບໍ່​ອາດ​ຂາດ​ໄດ້​ ໃນ​ຂະ​ບວນວິວັດ​ການ​ກໍ່ສ້າງບັນດາ​ນະ​ໂຍບາຍ ຂໍ້​ຕົກລົງ​ກ່ຽວ​ກັບ​ພະນັກງານ, ປະກອບສ່ວນ​ເຮັດ​ໃຫ້​ວຽກ​ງານ​ກໍ່ສ້າງ​ພັກ​ມີ​ປະສິດ​ທີ​ຜົນ ​ແລະ ​ແທດ​ເໝາະ​ຕົວ​ຈິງ​ກວ່າ​ອີກ.

ສະພາບ​ຕົວ​ຈິງ​ຂອງການສະຫຼຸບ​ສັງ​ລວມພຶດຕິ​ກຳ ​ແລະ ການ​ຄົ້ນຄວ້າ​ທິດ​ສະ​ດີກ່ຽວ​ກັບວຽກ​ງານ​ພະນັກງານ ​ໃນ​ເວລາ​ທີ່​ຜ່ານ​ມາ

​ໃນ​ຂະ​ບວນວິວັດ​ການ​ນຳພາ​ປະ​ເທດ​ແຕ່​ເມື່ອ​ກໍ່​ຕັ້ງ​ຂຶ້ນ​ມາ​ເຖິງ​ປະຈຸ​ບັນ, ພັກ​ກອມ​ມູນິດ​ຫວຽດນາມ ຍາມ​ໃດ​ກໍ່​ກຳ​ແໜ້ນບັນດາ​ຫຼັກການ​ພື້ນຖານ ​ກ່ຽວ​ກັບ​ສາຍ​ພົວພັນ​ສັດຈະ​ວິພາກ​ລະຫວ່າງການສະຫຼຸບ​ສັງ​ລວມພຶດຕິ​ກຳ ​ແລະ ການ​ຄົ້ນຄວ້າ​ທິດ​ສະ​ດີ ​ເພື່ອ​ຊີ້​ນຳ​ແລະ​ຜັນ​ຂະຫຍາຍວຽກ​ງານ​ພະນັກງານ. ​ໃນ​ໄລ​ຍະປ່ຽນ​ແປງ​ໃໝ່​ແຕ່​ປີ 1986 ມາ​ເຖິງ​ປະຈຸ​ບັນ, ພັກ​ໄດ້​ປະການ​ໃຊ້​ມະຕິ​ຫຼາຍ​ສະບັບ ​ເພື່ອ​ຊີ້​ນຳວຽກງານສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ​ກ່ຽວ​ກັບ​ຂົງ​ເຂດ​ກໍ່ສ້າງ​ພັກ​ເວົ້າ​ລວມ ​ແລະ ກ່ຽວ​ກັບວຽກ​ງານ​ພະນັກງານ​ເວົ້າ​ສະ​ເພາະ

ມະຕິ​ສະບັບ​ທີ 01-NQ/TW, ວັນ​ທີ 28 ມີນາ 1992, ຂອງ​ກົມ​ການ​ເມືອງ, ວ່າ​ດ້ວຍ​ວຽກ​ງານ​ທິດ​ສະ​ດີ ​ໄດ້​ວາງ​ລະດັບ​ຄາດໝາຍ​ສືບ​ຕໍ່​ປ່ຽນ​ແປງ​ໃໝ່​ຈິນຕະນາການ, ລົງ​ເລິກ​ສະຫຼຸບ​ສັງ​ລວມພຶດຕິ​ກຳ ​ແລະ ພັດທະນາ​ທິດ​ສະ​ດີ​ຢ່າງ​ປະດິດ​ສ້າງ. ການ​ຄົ້ນຄວ້າ, ສະຫຼຸບ​ສັງ​ລວມພຶດຕິ​ກຳ ຕ້ອງ​ກຳ​ແໜ້ນ​ບັນດາ​ທິດ​ນຳ, ​ເຊື່ອມ​ຊຶມ​ທາດ​ແທ້​ປະຕິບ​ວັດແລະວິທະຍາສາດຂອງ ​ລັດ​ທິ ມາກ-​ເລ​ນິນ, ​ແນວ​ຄິດ​ໂຮ່ຈີ​ມິນ, ​ເສີມ​ຂະຫຍາຍ​ລັກສະນະ​ເປັນ​ເອກະລາດ ​ປະດິດ​ສ້າງ, ສືບ​ທອດ​ບັນດາ​ສິ່ງ​ຍອດ​ຍິ່ງ​ໃນສະຕິ​ປັນຍາ​ຂອງ​ຊາດ, ບັນດາ​ບົດຮຽນ​ແລະ​ຜົນສຳ​ເລັດ​ວິທະຍາສາດ​ຂອງ​ໂລກ; ຕິດ​ແໜ້ນ​ທິດ​ສະ​ດີ​ກັບ​ພຶດຕິ​ກຳ, ລະຫວ່າງ​ຄວາມ​ຮຽກຮ້ອງ​ຕ້ອງການ​ສະ​ເພາະ​ໜ້າ​ກັບ​ໜ້າ​ທີ່​ຍາວ​ນານ; ສົມທົບ​ເປັນ​ເອກະ​ພາບ​ລະຫວ່າງ​ລັກສະນະ​ວິທະຍາສາດ​ກັບ​ລັກສະນະ​ພັກ, ລະຫວ່າງ​ວິທະຍາສາດ​ກັບ​ການ​ເມືອງ.

ຕໍ່​ຈາກ​ນັ້ນ​ແມ່ນ, ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 5 ສະ​ໄໝ​ທີ IX, ວັນ​ທີ 18 ມີນາ 2002, ວ່າ​ດ້ວຍ​ໜ້າ​ທີ່​ຕົ້ນຕໍ​ຂອງ​ວຽກ​ງານ​ແນວ​ຄິດ, ທິດ​ສະ​ດີ​ ໃນ​ສະພາບ​ການ​ໃໝ່ ຮຽກຮ້ອງ​ໃຫ້​ບັນດາ​ຄະນະ​ພັກ, ອົງການ​ຈັດ​ຕັ້ງ​ພັກ​ຂັ້ນ​ຕ່າງໆ ​ແລະ ບັນດາ​ອົງການ​ພາລະ​ບົດບາດ​ ຕ້ອງ​ຍູ້​ແຮງການສະຫຼຸບ​ສັງ​ລວມພຶດຕິ​ກຳ,​ ຄົ້ນຄວ້າ​ທິດ​ສະ​ດີ​ ແນ​ໃສ່ “​ເຊີດ​ຊູ​ຄວາມ​ຮັບຜິດຊອບ​ຂອງ​ແຕ່​ລະ​ອົງການ​ຈັດ​ຕັ້ງ​ພັກ ​ແລະ ສະມາຊິກ​ພັກ​ແຕ່ລະຄົນ ຕ້ອງ​ສູ້​ຊົນ​ເພື່ອກຳຈັດ​ປັດ​ເຂ່ຍ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ, ພະຍາດ​ອາດຍາ​ສິດ​ ຢູ່ສຳນັກງານ​ອົງການ ກົມ​ກອງ ພື້ນຖານ​ຂອງ​ຕົນ. ຍູ້​ແຮງ​ການ​ຕິ​ຊົມ​ຕົນ​ເອງ​ແລະ​ຕິ​ຊົມ, ຮ່ຳຮຽນ ຝຶກ​ຝົນ​ຫຼໍ່​ຫຼອມ​ດ້ວຍ​ຕົນ​ເອງ, ຕໍ່ສູ້​ຕ້ານ​ລັດທິ​ອັດ​ຕະບຸກຄົນ, ​ແນວ​ຄິດ​ສວຍ​ໂອກາດ, ​ເຫັນ​ແຕ່​ອັດຖະ​ປະ​ໂຫຍ​ດ ​ແລະ ສະພາບ​ການ​ເສື່ອ​ມ​ໂຊມ​ປ່ຽນ​ທາດຢູ່​ໃນ​ພັກ. ​ເດັດດ່ຽວ​ແກ້​ໄຂ​ປະຕິບັດ​ວິ​ໄນ​ຕໍ່​ພະນັກງານ, ສະມາຊິກ​ພັກ​ທີ່​ລະ​ເມີດ​ກົດ​ລະບຽບ​ຂອງ​ພັກ ​ແລະ ກົດ​ໝາຍ​ຂອງ​ລັດ”.

ບົນ​ພື້ນຖານ​ຄົ້ນຄວ້າ ​ແລະ ສະຫຼຸບ​ສັງ​ລວມພຶດຕິ​ກຳ 20 ກວ່າ​ປີ​ ແຫ່ງ​ການ​ປະຕິບັດມະຕິ​ສະບັບ​ທີ 01-NQ/TW, ວັນ​ທີ 28 ມີນາ 1992, ຂອງ​ກົມ​ການ​ເມືອງ ວ່າ​ດ້ວຍ​ວຽກ​ງານ​ທິດ​ສະ​ດີ ນັ້ນ, ກົມ​ການ​ເມືອງ​ໄດ້​ປະກາດ​ໃຊ້ມະຕິ​ສະບັບ​ທີ 37-NQ/TW, ວັນ​ທີ 9 ຕຸລາ 2014, ວ່າ​ດ້ວຍ​ວຽກ​ງານ​ທິດ​ສະ​ດີ ​ແລະ ​ກຳນົດ​ທິດ​ຄົ້ນຄວ້າ​ຮອດ​ປີ 2030. ມະຕິ​ໄດ້​ວາ​ງບັນດາ​ທິດ​ນຳ, ໜ້າ​ທີ່, ມາດ​ຕະການ​ຕົ້ນຕໍ ​ເພື່ອ​ຍູ້​ແຮງ​ວຽກ​ງານ​ທິດ​ສະ​ດີ​ຮອດ​ປີ 2030, ​ໃນ​ນັ້ນ​ມີ​ບັນດາ​ການ​ຊີ້​ນຳ​ທີ່​ສຳຄັນ ​ກ່ຽວ​ກັບການສະຫຼຸບ​ສັງ​ລວມພຶດຕິ​ກຳ ​ແລະ ​ຄົ້ນຄວ້າ​ທິດ​ສະ​ດີ ​ໃນ​ວຽກ​ງານ​ກໍ່ສ້າງ​ພັກ​ເວົ້າ​ລວມ ​ແລະ ວຽກ​ງານ​ພະນັກງານ​ເວົ້າ​ສະ​ເພາະ.

ກອງປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງທີ XII ຂອງ​ພັກ​ໄດ້​ກຳນົດ 10 ໜ້າ​ທີ່, ວິທີ​ແກ້​ໄຂ​ ​ເພື່ອ​ຍູ້​ແຮງ​ວຽກ​ງານ​ກໍ່ສ້າງ​ພັກ, ​ໃນ​ນັ້ນ ມີ​ວິທີ​ແກ້​ໄຂ “ຍູ້​ແຮງ​ວຽກ​ງານສະຫຼຸບ​ສັງ​ລວມພຶດຕິ​ກຳ, ​ຄົ້ນຄວ້າ​ທິດ​ສະ​ດີ, ສະໜອງ​ບັນດາ​ຫຼັກ​ຖານ​ວິທະຍາສາດ, ທິດ​ສະ​ດີ ​ໃຫ້​ແກ່​ການວາງ​ກຳນົດ, ຂະຫຍາຍ​ແນວທາງ ​ແຜນ​ນະ​ໂຍບາຍຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ. ປ່ຽນ​ແປງ​ໃໝ່​ຕົວ​ແບບ​ການຈັດ​ຕັ້ງ, ​ແບບ​ວິທີ​ການ​ເຄື່ອນ​ໄຫວ, ຍົກ​ສູງ​ຄຸນ​ນະພາ​ບ​ແລະປະສິດທິ​ຜົນ ​ໃນ​ການ​ເຄື່ອນ​ໄຫວ​ຂອງ​ອົງການ​ຄົ້ນຄວ້າ​ທິດ​ສະ​ດີຂອງ​ພັກ; ລົງທຶນ​ຢ່າງ​ເໝາະ​ສົມ​ໃຫ້​ແກ່​ການ​ກໍ່ສ້າງ ພັດທະນາ​ຖັນ​ແຖວ​ພະນັກງານ​ທິດ​ສະ​ດີ, ​ເປັນ​ຕົ້ນ​ແມ່ນ​ບັນດາ​ຜູ້​ຊ່ຽວຊານ​ນຳ​ໜ້າ​ຂະ​ແໜງ​ການ; ຍົກ​ສູງ​ຄຸນ​ນະພາ​ບຂອງການສະຫຼຸບ​ສັງ​ລວມພຶດຕິ​ກຳ, ​ຄົ້ນຄວ້າ​ທິດ​ສະ​ດີ, ຕອບ​ສະໜອງ​ຄວາມ​ຕ້ອງການ​ໃໝ່”(5). ບົດຮຽນ​ສຳຄັນ​ທີ່​ສຸດທີ່​ໄດ້​ຖອດ​ຖອນ​ຈາກ​ຂະ​ບວນການ​ສະຫຼຸບ​ສັງ​ລວມ 30 ປີ​ແຫ່ງ​ການ​ປ່ຽນ​ແປງ​ໃໝ່ ​ແມ່ນຕ້ອງ​ເຄົາລົບ​ກົດ​ເກນ​ພາວະ​ວິ​ໄສ, ຕິດ​ແໜ້ນ​ກັບ​ພຶດຕິ​ກຳ, ​ໃຫ້​ຄວາມ​ສຳຄັນ​ແກ່ການສະຫຼຸບ​ສັງ​ລວມພຶດຕິ​ກຳ, ​ຄົ້ນຄວ້າ​ທິດ​ສະ​ດີ, ​ສຸມ​ໃສ່​ແກ້​ໄຂ​ບັນດາ​ບັນຫາ​ທີ່​ພຶດຕິ​ກຳ​ວາງ​ອອກ​ມາ​ ໃຫ້​ໄດ້​ຢ່າງ​ທັນ​ການ ມີ​ປະສິດທິ​ຜົນ.

​​ໂດຍເຊື່ອມ​ຊຶມ​ບັນດາ​ມະຕິ, ຄຳ​ສັ່ງແລະການ​ຊີ້​ນຳ​ຂອງ​ສູນ​ກາງ​ພັກ, ບັນດາ​ສຳນັກງານ​ອົງການ​ຢູ່​ສູນ​ກາງ​ແລະ​ທ້ອງ​ຖິ່ນ​ ໄດ້ຜັນ​ຂະຫຍາຍການສະຫຼຸບ​ສັງ​ລວມພຶດຕິ​ກຳ​ແລະ​ຄົ້ນຄວ້າ​ທິດ​ສະ​ດີກ່ຽວ​ກັບວຽກ​ງານ​ພະນັກງານ ຢ່າງ​ຕັ້ງໜ້າ ​ແລະ ​ໄດ້​ຮັບ​ຜົນງານ​ທີ່ດີງາມຫຼາຍ​ຢ່າງ, ປະກອບສ່ວນ​ເຂົ້າ​ໃນ​ຜົນສຳ​ເລັດ​ຂອງ​ພາລະກິດ​ການ​ປ່ຽນ​ແປງ​ໃໝ່. ຫຼາຍ​ໂຄງການ, ຫົວ​ຂໍ້​ຄົ້ນຄວ້າ​ລະດັບ​ລັດ, ລະດັບ​ກະຊວງ ຂະ​ແໜງ​ການ ທ້ອງ​ຖິ່ນ; ກິດຈະກຳສະຫຼຸບ​ສັງ​ລວມພຶດຕິ​ກຳຂະໜາ​ດ​ໃຫຍ່​ຫຼາຍ​ໂຄງການ ​ໄດ້​ດຳ​ເນີນ​ໃນ​ຂອບ​ເຂດ​ທົ່ວ​ປະ​ເທດ, ​ເຊັ່ນ ການ​ສະຫຼຸບ​ສັງ​ລວມ 20 ປີ​ແຫ່ງ​ການ​ປ່ຽນ​ແປງ​​ໃໝ່ (1986 - 2006) ​ແລະ 30 ປີ​ແຫ່ງ​ການ​ປ່ຽນ​ແປງ​ໃໝ່ (1986 - 2016), 20 ປີ​ແຫ່ງ​ການ​ປະຕິບັດ​ໂຄງການ​ການ​ເມືອງ​ກໍ່ສ້າງ​ປະ​ເທດ​ໃນ​ສະ​ໄໝ​ຂ້າມ​ຜ່ານ​ຂຶ້ນ​ສູ່​ສັງຄົມ​ນິຍົມ (1991 - 2011), 20 ປີ​ແຫ່ງ​ການ​ປະຕິບັດ​ລັດຖະທຳ​ມະນູນ (1992 - 2012)... ຜ່ານການສະຫຼຸບ​ສັງ​ລວມພຶດຕິ​ກຳ​ເຫຼົ່າ​ນັ້ນ, ຄວາມ​ຮັບ​ຮູ້​ກ່ຽວ​ກັບ​ສັງຄົມ​ນິຍົມ ​ແລະ ​ເສັ້ນທາງ​ຂຶ້ນາ​ສູ່ສັງຄົມ​ນິຍົມຢູ່​ຫວຽດນາມ​ນັບ​ມື້​ນັບ​ກະຈ່າງ​ແຈ້ງ​, ປະກອບສ່ວນ​ປ່ຽນ​ແປງ​ໃໝ່​ຈິນຕະນາການ​ທິດ​ສະ​ດີ​ຂອງ​ພັກ, ສ້າງ​ພື້ນຖານ​ວິທະຍາສາດ​ໃຫ້​ແກ່​ການ​ປ່ຽນ​ແປງ​ໃໝ່ຂົງ​ເຂດ​ການ​ກໍ່ສ້າງ​ພັກ, ​ໃນ​ນັ້ນ​ມີວຽກ​ງານ​ພະນັກງານ.

ບັນດາ​ຜົນສຳ​ເລັດ​ຂອງການສະຫຼຸບ​ສັງ​ລວມພຶດຕິ​ກຳກ່ຽວ​ກັບວຽກ​ງານ​ພະນັກງານ ​ເປັນ​ພື້ນຖານ​ສຳຄັນ​ໃຫ້​ແກ່​ການ​ປະກາດ​ໃຊ້​ບັນດາ​ມະຕິ, ຄຳ​ສະຫຼຸບທີ່​ກ່ຽວ​ພັນ​ເຖິງວຽກ​ງານ​ພະນັກງານ​ໃນ​ເວລາ​ທີ່​ຜ່ານ​ມາ. ນັ້ນ​ແມ່ນ ມະຕິກອງ​ປະຊຸມ​ສູນ​ກາງພັກ​ຄັ້ງ​ທີ 5 ສະ​ໄໝ​ທີ VI “ບາງ​ບັນຫາ​ອັນ​ຮີບ​ດ່ວນ​ກ່ຽວ​ກັບ​ການ​ກໍ່ສ້າງ​ພັກ, ຮັບປະກັນປະຕິບັດມະຕິກອງປະຊຸມໃຫຍ່ຄັ້ງທີ VI ຂອງພັກ; ມະຕິກອງ​ປະຊຸມ​ສູນ​ກາງພັກ​ຄັ້ງ​ທີ 3 ສະ​ໄໝ​ທີ VII “ບາງ​ໜ້າ​ທີ່​ປ່ຽນ​ແປງ​ໃໝ່​ແລະ​ປັບປຸງ​ພັກ”; ມະຕິກອງ​ປະຊຸມ​ສູນ​ກາງພັກ​ຄັ້ງ​ທີ 3 ສະ​ໄໝ​ທີ VIII “ຍຸດ​ທະ​ສາດ​ພະນັກງານ​ ໃນ​ສະ​ໄໝ​ແຫ່ງ​ການ​ຍູ້​ແຮງ​ການ​ຫັນ​ປະ​ເທດ​ເປັນ​ອຸດສາຫະກຳ ທັນ​ສະ​ໄໝ”; ມະຕິກອງ​ປະຊຸມ​ສູນ​ກາງພັກ​ຄັ້ງ​ທີ 6 ສະ​ໄໝ​ທີ VIII “ໜ້າ​ທີ່​ອັນ​ພື້ຖານ​ແລະ​ຮີບ​ດ່ວນ​ຈຳນວນ​ໜຶ່ງ​ ໃນ​ວຽກ​ງານ​ກໍ່ສ້າງ​ພັກ​ໃນ​ປະຈຸ​ບັນ”; ມະຕິກອງ​ປະຊຸມ​ສູນ​ກາງພັກ​ຄັ້ງ​ທີ 4 ສະ​ໄໝ​ທີ XI “ບັນຫາ​ອັນ​ຮີບ​ດ່ວນ​ຈຳນວນ​ໜຶ່ງ​ກ່ຽວ​ກັບ​ການ​ກໍ່ສ້າງ​ພັກ​ໃນ​ປະຈຸ​ບັນ”; ມະຕິກອງ​ປະຊຸມ​ສູນ​ກາງພັກ​ຄັ້ງ​ທີ 4 ສະ​ໄໝ​ທີ XII “​ເພີ່ມ​ທະວີ​ການ​ກໍ່ສ້າງ, ປັບປຸງ​ພັກ, ກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, ປະກົດການ "ຫັນປ່ຽນດ້ວຍຕົນເອງ", "ປ່ຽນແປງດ້ວຍຕົນເອງ" ຢູ່ພາຍໃນ; ມະຕິ​ສະບັບ​ທີ 11-NQ/TW, ວັນ​ທີ 25 ມັງ​ດອນ 2002, ຂອງ​ກົມ​ການ​ເມືອງ​ສູນ​ກາງ​ພັກ, ວ່າ​ດ້ວຍ “ການ​ຜັດປ່ຽນ​ພະນັກງານ​​ນຳພາ, ຄຸ້ມຄອງບໍລິຫານຂັ້ນຕ່າງໆ; ມະຕິ​ສະບັບ​ທີ 42-NQ/TW, ວັນ​ທີ 30 ພະຈິກ 2004, ຂອງ​ກົມ​ການ​ເມືອງ​ສູນ​ກາງ​ພັກ, ວ່າ​ດ້ວຍ “ວຽກ​ງານວາງ​ແຜນ​ກຳນົດພະນັກງານນຳພາ, ຄຸ້ມ​ຄອງ​ໃນ​ສະ​ໄໝ​ແຫ່ງ​ການ​ຍູ້​ແຮງ​ການ​ຫັນ​ປະ​ເທດ​ເປັນ​ອຸດສາຫະກຳ ທັນ​ສະ​ໄໝ”; ບົດ​ສະຫຼຸບສະບັບ​ທີ 37-KL/TW ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ X “ສືບ​ຕໍ່​ຍູ້​ແຮງ​ຍຸດ​ທະ​ສາດ​ພະນັກງານ​ ໃນ​ສະ​ໄໝ​ແຫ່ງ​ການຍູ້​ແຮງ​ການ​ຫັນ​ປະ​ເທດ​ເປັນ​ອຸດສາຫະກຳ ທັນ​ສະ​ໄໝ”; ມະຕິ​ຕົກລົງ​ສະບັບ​ທີ 67-QĐ/TW, ວັນ​ທີ 4 ກໍ​ບະ​ກົດ 2007, ຂອງ​ກົມ​ການ​ເມືອງ​ສູນ​ກາງ​ພັກປະກາດ​ໃຊ້ “ຂໍ້​ກຳນົດ​ກ່ຽວ​ກັບ​ການ​ແບ່ງ​ຂັ້ນ​ຄຸ້ມ​ຄອງ​ພະນັກງານ”; ມະຕິ​ຕົກລົງ​ສະບັບ​ທີ 68-QĐ/TW, ວັນ​ທີ 4 ກໍລະ​ກົດ 2007, ຂອງ​ກົມ​ການ​ເມືອງ​ສູນ​ກາງ​ພັກ​ປະກາດ​ໃຊ້ “ກົດ​ລະບຽບ​ກ່ຽວ​ກັບ​ການ​ແຕ່ງ​ຕັ້ງ​ພະນັກງານ ​ແລະ ​ແນະນຳ​ພະນັກງານ​ອອກ​ສະໝັກ​ຮັບ​ເລືອກ​ຕັ້ງ”; ບົດ​ສະຫຼຸບ​ສະບັບ​ທີ 24-KL/TW ຂອງ​ກົມ​ການ​ເມືອງ​ສູນ​ກາງ​ພັກສະ​ໄໝ​ທີ XI “ສືບ​ຕໍ່ຍູ້​ແຮງວຽກ​ງານ​ວາງ​ແຜນ​ກຳນົດ​ແລະ​ຜັດປ່ຽນ​ພະນັກງານນຳພາ, ຄຸ້ມຄອງຮອດປີ 2020 ແລະ ຊຸມປີຕໍ່ໄປ"; ບົດ​ສະຫຼຸບ​ສະບັບ​ທີ 12-KL/TW, ວັນ​ທີ 22 ມີນາ 2017, ຂອງ​ກົມ​ການ​ເມືອງ​ສູນ​ກາງ​ພັກ, ກ່ຽວ​ກັບ​ການ​ດັດ​ແປງ, ​ເພີ່ມ​ເຕີມ​ເນື້ອ​ໃນ​ກຳນົດ​ຈຳນວນ​ໜຶ່ງ​ກ່ຽວ​ກັບວຽກ​ງານ​ພະນັກງານ...

ປະຈຸ​ບັນ​, ຄະນະ​ຈັດ​ຕັ້ງ​ສູນ​ກາງພັກພວມ​ເປັນ​ເຈົ້າພາບ, ສົມທົບ​ກັບ​ບັນດາ​ອົງການ​ພາລະ​ບົດບາດ ​ໃນ​ການຜັນ​ຂະຫຍາຍຫຼາຍ​​ໂຄງການ​ທີ່​ກ່ຽວ​ພັນ​ເຖິງວຽກ​ງານ​ພະນັກງານ ບົນ​ພື້ນຖານ​ຄົ້ນຄວ້າ, ສະຫຼຸບ​ສັງ​ລວມພຶດຕິ​ກຳຢ່າງ​ເປັນ​ແບບ​ສະບັບ, ​ເປັນ​ລະບົບ, ​ເພື່ອ​ເປັນ​ພື້ນຖານ​ວິທະຍາສາດໃຫ້​ແກ່​ການດັດ​ແປງ, ປັບປຸງ ​ເພີ່ມ​ເຕີມ ​ແລະ ປະກາດ​ໃຊ້​ນະ​ໂຍບາຍ​ຂໍ້​ຕົກລົງ​ໃໝ່​ກ່ຽວ​ກັບວຽກ​ງານ​ພະນັກງານ. ລະອຽດ​ຄື ບັນດາ​ໂຄງການ​ກ່ຽວ​ກັບ​ການ​ແບ່ງ​ຂັ້ນ​ຄຸ້ມ​ຄອງ​ພະນັກງານ; ​ແນະນຳ, ​ແຕ່ງ​ຕັ້ງ​ພະນັກງານ; ກຳນົດ​ມາດຕະຖານ, ບັນທັດຖານ​ຕີ​ລາຄາ​ພະນັກງານ; ການ​ຜັດປ່ຽນ​ພະນັກງານ; ວຽກ​ງານ​ວາງ​ແຜນ​ກຳນົດ, ສຶກສາກໍ່ສ້າງ, ຝຶກ​ອົບຮົມ​ພະນັກງານ; ນະ​ໂຍບາຍ​ເຮືອນ​ຢູ່​ໃຫ້​ພະນັກງານ, ລັດຖະກອນ, ພາລະ​ກອນ​ໃນ​ລະບົບ​ການ​ເມືອງ; ຂໍ້​ກຳນົດ​ກ່ຽວ​ກັບ​ຄວາມ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານ ສະມາຊິກ​ພັກ, ກ່ອນ​ອື່ນ​ໝົດ​ແມ່ນ​ບັນດາ​ສະຫາຍ​ກຳມະການ​ກົມ​ການ​ເມືອງ​, ຄະນະ​ເລຂາທິການ, ຄະນະ​ບໍລິຫານ​ງານ​ສູນ​ກາງ​ພັກ ​ແລະ ​ເລຂາ​ຄະນະພັກຂັ້ນ​ຕ່າງໆ; ຂໍ້​ກຳນົດ​ກ່ຽວ​ກັບ​ສິດ​ຂອບ​ເຂດ ​ແລະ ຄວາມ​ຮັບຜິດຊອບ​ຂອງ​ຜູ້​ເປັນ​ຫົວໜ້າ​ໃນວຽກ​ງານ​ພະນັກງານ; ຂໍ້​ກຳນົດ​ກ່ຽວ​ກັບ​ບັນຫາ​ປົກ​ປັກ​ຮັກສາ​ການ​ເມືອງ​ພາຍ​ໃນ​ພັກ​ຈຳນວນ​ໜຶ່ງ...

ຄວາມ​ຈິງ​ໃຫ້​ເຫັນ​ວ່າ, ​ເນື້ອ​ໃນ​ຈຳນວນ​ໜຶ່ງ​ທີ່​ບໍ່​ໜ້ອຍ​ ໃນ​ບັນດາກົດ​ລະບຽບ, ຂໍ້​ກຳນົດ, ຂັ້ນ​ຕອນ... ກ່ຽວ​ກັບວຽກ​ງານ​ພະນັກງານ ທີ່​ປະກາດ​ໃຊ້​ກ່ອນ​ໜ້າ​ນີ້​ ບໍ່​ສອດຄ່ອງ​ອີກ. ຖ້າ​ຫາກ​ບໍ່​ດັດ​ແປງ, ​ເພີ່ມ​ເຕີມ, ບູລະນະ​ຢ່າງ​ທັນ​ການ ກໍ່​ຈະ​ເປັນ​ການ​ກີດຂວາງ​ຕໍ່ວຽກ​ງານ​ພະນັກງານ​ເວົ້າ​ສະ​ເພາະ ​ແລະ ຕໍ່​ການ​ພັດທະນາ​ຂອງ​ປະ​ເທດ​ຊາດ​ເວົ້າ​ລວມ. ການ​ຜັນ​ຂະຫຍາຍ​ບັນດາ​ຫົວ​ຂໍ້, ຫົວຂໍ້ສະ​ເພາະ, ​ກິດຈະ​ການ​ຄົ້ນຄວ້າ, ສະຫຼຸບ​ສັງ​ລວມການ​ປະຕິບັດ​ບັນດາ​ຂໍ້​ກຳນົດ, ກົດ​ລະບຽບ​ກ່ຽວ​ກັບວຽກ​ງານ​ພະນັກງານ ​ແມ່ນ​ຄວາມ​ຮຽກຮ້ອງຕ້ອງການຈຳ​ເປັນ​ໃນ​ຂະ​ບວນວິວັດການ​ກໍ່ສ້າງ​ບັນດາ​ໂຄງການ​ກ່ຽວ​ກັບວຽກ​ງານ​ຈັດ​ຕັ້ງພະນັກງານ. ຍ້ອນ​ມີ​ວິທີ​ວິທະຍາສາດ, ​ເຂົ້າ​ເຖິງ​ບັນດາ​ບັນຫາ​ທີ່​ເກີດ​ຂຶ້ນ​ໃນວຽກ​ງານ​ພະນັກງານ ຢ່າງ​ເປັນ​ລະບົບ, ຮອບດ້ານ, ຫຼາຍ​ທິດ​ຫຼາຍ​ທາງ ດັ່ງ​ນັ້ນໝາກຜົນ​ຂອງ​ການ​ຄົ້ນຄວ້າ, ສະຫຼຸບ​ສັງ​ລວມ ຈຶ່ງ​ຮັບປະກັນລັກສະນະ​ພາວະ​ວິ​ໄສ, ມີ​ຄວາມ​ຊັດ​ເຈນ​ສູງ, ​ເປັນ​ຫຼັກ​ຖານ​ເພື່ອ​ກໍ່ສ້າງ​ນະ​ໂຍບາຍ ​ຂໍ້​ຕັດສິນ​ຕົງ​ລົງທີ່​ສອດຄ່ອງ​ເໝາະ​ສົມ, ມີ​ລັກສະນະ​ປະຕິບັດ​ໄດ້ ​ເຂົ້າ​ສູ່​ຊີວິດ​ການ​ເປັນ​ຢູ່​ຢ່າງ​ໄວວາ. 

​ແຕ່​ວ່າ, ການສະຫຼຸບ​ສັງ​ລວມພຶດຕິ​ກຳ, ​ຄົ້ນຄວ້າ​ທິດ​ສະ​ດີກ່ຽວ​ກັບວຽກ​ງານ​ພະນັກງານ ຍັງ​ມີ​ຄວາມ​ຈຳກັດ ສິ່ງ​ຄົງ​ຄ້າງ​ຫຼາຍ. ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ກ່ຽວ​ກັບ​​ເພີ່ມ​ທະວີການ​ກໍ່ສ້າງ, ປັບປຸງ​ພັກ ​ໄດ້​ຊີ້​ແຈ້ງວ່າ, ວຽກ​ງານ​ສະຫຼຸບ​ສັງ​ລວມພຶດຕິ​ກຳ, ຄົ້ນ​ຄວ້າ​ວິທະຍາສາດ ຍັງ​ບໍ່​ທັນ​ຕອບ​ສະໜອງ​ໄດ້​ກັບ​ຄວາມ​ຕ້ອງການ ​ຂອງ​ພາລະກິດການ​ປ່ຽນ​ແປງ​ໃໝ່. ​ເບິ່ງ​ລວມ​ແລ້ວ, ທິດ​ສະ​ດີ​ຍັງ​ຫຼ້າ​ຫຼັງ, ລັກສະນະ​ຄາດ​ຄະ​ເນ​ຕ່ຳ, ຜົນສຳ​ເລັດ​ຂອງ​ການຄົ້ນ​ຄວ້າ​ວິທະຍາສາດຕອບ​ສະໜອງ​ຄວາມ​ຕ້ອງການ​ຂອງ​ພຶດຕິ​ກຳ​ ຍັງ​ບໍ່​ດີ, ຂາດ​ການ​ຕິດ​ພັນ​ສະໜິດ​ແໜ້ນ​ລະຫວ່າງຄົ້ນ​ຄວ້າ​ວິທະຍາສາດ ກັບ​ສະຫຼຸບ​ສັງ​ລວມພຶດຕິ​ກຳ, ລະຫວ່າງ​ພະນັກງານ​ທິດ​ສະ​ດີ ​ແລະ ພະນັກງານ​ຊີ້​ນຳ​ນຳພາ​ພຶດຕິ​ກຳ, ລະຫວ່າງ​ວຽກ​ງານຄົ້ນຄວ້າ​ທິດ​ສະ​ດີ ​ແລະ ວຽກ​ງານ​ສິດສອນ ອົບຮົມ​ສຶກສາທິດ​ສະ​ດີ. ວຽກ​ງານ​ສະຫຼຸບ​ສັງ​ລວມພຶດຕິ​ກຳ, ​ຄົ້ນຄວ້າ​ທິດ​ສະ​ດີ ຍັງ​ບໍ່​ທັນ​ມີ​ລວງ​ເລິກ, ບໍ່​ໄປ​ທັນ​ກັບ​ສະພາບ​ການຕົວ​ຈິງ; ການ​ປ່ຽນ​ແປງ​ໃໝ່, ຍົກ​ສູງ​ຄຸນ​ນະພາ​ບ, ປະສິດທິ​ຜົນ​ການ​ເຄື່ອນ​ໄຫວ​ຂອງ​ບັນດາ​ອົງການ​ຄົ້ນຄວ້າ​ທິດ​ສະ​ດີ ຍັງ​ຖືກ​ຈຳກັດ. ​ເພາະສະ​ນັ້ນ, ​ເນື້ອ​ໃນ​ຈຳນວນ​ໜຶ່ງ​ໃນ​ມະຕິ​ກ່ຽວ​ກັບ​ການ​ກໍ່ສ້າງ, ປັບປຸງພັກ ຈຶ່ງ​ບໍ່​ຕິດ​ແທດ​ກັບ​ພຶດຕິ​ກຳ, ຂາດ​ລັກສະນະ​ປະຕິບັດ​ເປັນ​ຈິງ.

​ໃນ​ພາກ​ຕົວ​ຈິງ, ຍັງ​ມີ​ຄວາມ​ຈຳກັດ​ຫຼາຍ​ທີ່​ສຸດ​ໃນ​ການ​ຄົ້ນຄວ້າ​ວິທະຍາສາດ, ສະຫຼຸບ​ສັງ​ລວມພຶດຕິ​ກຳ, ຂະຫຍາຍ​ທິດ​ສະ​ກີ​ກ່ຽວ​ກັບວຽກ​ງານ​ພະນັກງານ. ລັດທິ​ບົດຮຽນ​ນິຍົມ, ຮັກສາ​ເດີມ, ຈິ​ນຕະນາ​ການ​ແບບ​ກົນ​ຈັກຕາມ​ຮອຍ​ເກົ່າ ພວມ​ກີດ​ຂວາງ​ການ​ເຂົ້າ​ເຖິງ​ພູມ​ປັນຍາ​ໃໝ່, ວິທີ​ວິທະຍາສາດທັນ​ສະ​ໄໝ່ ໃນ​ການ​ຄົ້ນຄວ້າ​ແລະສະຫຼຸບ​ສັງ​ລວມພຶດຕິກກຳ. ຜົນ​ຕາມ​ມາ​ຄື ມີ​ຂໍ້​ກຳນົດ, ກົດ​ລະບຽບ, ມາດຕະຖານ, ບັນທັດຖານ​ລະອຽດ​ກ່ຽວ​ກັບພະນັກງານ​ທີ່ຫາ​ກໍ່​ໄດ້​ປະກາດ​​ໃຊ້ ​ແຕ່​ບໍ່​ສາມາດ​ປະຕິບັດ​ໄດ້, ຕ້ອງ​ດັດ​ແປງ​ຍ້ອນ​ຂາດ​ພື້ນຖານ​ວິທະຍາສາດ, ຫ່າງ​ເຫີ​ນຊີວິດ​ການ​ເປັນ​ຢູ່​ຕົວ​ຈິງ.

ບັນດາ​ອົງການ​ຄົ້ນຄວ້າ​ສະ​ເພາະ​ຂະ​ແໜງ​ກ່ຽວ​ກັບ​ການ​ກໍ່ສ້າງ​ພັກ​ໃນ​ລະບົບ​ການ​ເມືອງ ຍັງ​ບໍ່​ທັນ​ໄດ້​ຮັບ​ການລົງທຶນຢ່າງ​ເໝາະ​ສົມ ກ່ຽວ​ກັບ​ການ​ຊີ້​ນຳ​ນຳພາ ​ແລະ ບັນດາ​ແຫຼ່ງພະລັງ​ທີ່​ຈຳ​ເປັນ​ໃຫ້​ແກ່​ການ​ຄົ້ນຄວ້າ​ສະ​ເພາະ ​ເລິກ​ເຊິ່ງ ກ່ຽວ​ກັບ​ການຈັດ​ຕັ້ງພະນັກງານ. ຖັນ​ແຖວ​ນັກ​ຄົ້ນຄວ້າຕົ້ນຕໍ​ແມ່ນ​ອ່ຽງ​ໄປ​ທາງ​ທິດ​ສະ​ດີ, ຍັງ​ບໍ່​ທັນ​ຕິດ​ແໜ້ນ​ກັບ​ພຶດຕິ​ກຳ​ກ່ຽວ​ກັບວຽກ​ງານ​ຈັດ​ຕັ້ງພະນັກງານ; ພາກສ່ວນ​ໜຶ່ງ​ຍັງ​ຖືກ​ຈຳກັດ​ກ່ຽວ​ກັບ​ຄວາມ​ສາມາດ, ລັກສະນະ​ວິຊາ​ສະ​ເພາະ​ຍັງ​ບໍ່​ທັນ​ສູງ, ຍັງ​ບໍ່​ທັນ​ມີ​ຄວາມ​ສາມາດ​ຢ່າງ​ພຽງພໍ​ເພື່ອ​​ເຂົ້າ​ເຖິງ ​ແລະ ໝູນ​ໃຊ້​ບັນດາ​ຜົນສຳ​ເລັດ​ຂອງ​ການ​ຄົ້ນຄວ້າ, ບັນດາ​ທິດ​ສະ​ດີ​ທັນ​ສະ​ໄໝ​ຂອງ​ຕ່າງ​ປະ​ເທດ​ໃນ​ຂົງ​ເຂດ​ຈັດ​ຕັ້ງ​ພະນັກງານ,​ ເຊັ່ນ ວິທະຍາສາດ​ກ່ຽວ​ກັບ​ການຈັດ​ຕັ້ງ, ຄຸ້ມ​ຄອງ​ບຸກຄະລາ​ກອນ​ໃນ​ຂົງ​ເຂດ​ສາທາລະນະ, ຈິດຕະສາດ​ການ​ນຳ, ການ​ນຳພາ​ວິທະຍາ... ຫົວ​ຂໍ້​ຄົ້ນຄວ້າ​ຫຼາຍ​ຫົວ​ຂໍ້​ຍັງ​ມີ​ລັກສະນະ​ລວມໆ, ມີ​ປະສິດທິ​ຜົນ​ຕ່ຳ, ບໍ່​ມີ​ຄວາມ​ສາມາດ​ໝູນ​ໃຊ້​ໃນ​ພຶດຕິ​ກຳ.

​ໃນ​ຖັນ​ແຖວ​ພະນັກງານ​ເຮັດ​ວຽກ​ງານ​ປຶກສາ​ຊ່ວຍ​ວຽກກ່ຽວ​ກັບ​ວຽກ​ງານ​ຈັດ​ຕັ້ງ​ພະນັກງານນັ້ນ ມີ​ຫຼາຍ​ຄົນ​ຍັງ​ບໍ່​ທັນ​ໄດ້​ຮັບ​ການ​ຝຶກ​ອົບຮົມ​ທາງ​ດ້ານ​ວິຊາ​ສະ​ເພາະ​ຂະ​ແໜງ​ການ, ບໍ່​ໄດ້​ອົບຮົມ​ອັບ​ເດດ​ຄວາມ​ຮູ້​ໃໝ່ຢ່າງ​ເປັນ​ປະຈຳ ດັ່ງ​ນັ້ນ​ຄວາມ​ສາມາດ​ຄົ້ນຄວ້າ, ສະຫຼຸບ​ສັງ​ລວມພຶດຕິ​ກຳ, ສັງ​ເຂ​ບ​ເປັນ​ທິດ​ສະ​ດີ​ ຍັງ​ຖືກ​ຈຳກັດ. ຫຼາຍ​ຄົນ​ເຮັດ​ວຽກ​ຕາມ​ຄວາມ​ເຄີຍ​ຊິນ, ຕາມ​ທາງ​ນ້ອຍ​ທີ່​ຫຼ້າ​ຫຼັງ, ໜັກ​ໄປ​ທາງ​ລັດທິ​ບົດຮຽນ​ນິຍົມ​ໃນ​ການ​ແກ້​ໄຂ​ບັນຫາ; ຜູ້​ທີ່​ໄດ້​ຮັບ​ການ​ຝຶກ​ອົບຮົມ, ​ແນະນຳ​ວິທີ​ຄົ້ນຄວ້າ​ທີ່​ທັນ​ສະ​ໄໝ ​ແລະ ສະຫຼຸບ​ສັງ​ລວມບົດຮຽນ​ກ່ຽວ​ກັບ​ວຽກ​ງານ​ພະນັກງານ ກໍ່​ມີ​ຈຳນວນ​ໜ້ອຍ. ຍິ່ງ​ກວ່າ​ນັ້ນ, ວຽກ​ງານ​ພະນັກງານ​ເຄີຍ​ຖືກ​ຖື​ວ່າ​ເປັນ “​ເຂດ​ທີ່​ອັດ​ແຈບ”, ສຳຜັດໄວ ດັ່ງ​ນັ້ນ​ຈຶ່ງ​ບໍ່​ໄດ້​ແບ່ງປັນ, ​ເຜີຍ​ແຜ່​ຢ່າງ​ກວ້າງຂວາງ.

ບັນດາ​ຂໍ້​ຈຳ​ກັດ, ຂາດ​ຕົກ​ບົກພ່ອງ​ເທິງ​ນີ້​ມີ​ສາ​ເຫດ​ພາວະ​ວິ​ໄສ​ຄື ຂະ​ບວນວິວັດ​ການ​ປ່ຽນ​ແປງ​ໃໝ່, ພັດທະນາ​ປະ​ເທດ​ເກີດ​ມີ​ຫຼາຍ​ບັນຫາ​ໃໝ່, ສັບສົນ​ທີ່​ບໍ່​ເຄີຍ​ມີ​ມາ​ກ່ອນ. ຍ້ອນ​ແນວ​ນັ້ນ, ການສະຫຼຸບ​ສັງ​ລວມພຶດຕິ​ກຳ, ພັດທະນາ​ທິດ​ສະ​ດີ​ກ່ຽວ​ກັບ​ວຽກ​ງານ​ພະນັກງານ​ ກໍ່​​ປ່ຽນ​ແປງບໍ່​ທັນ​ການ​ເພື່ອ​ຄ່ອງ​ຕົວ​ກັບ​ຄວາມ​ຕ້ອງການ.

ສາ​ເຫດ​ອັດຕະວິ​ໄສ​ຂອງຂໍ້​ຈຳ​ກັດ, ຂາດ​ຕົກ​ບົກພ່ອງ​ເທິງ​ນີ້​ແມ່ນ​ມີ​ດັ່ງ​ນີ້:

ທີ​ໜຶ່ງ, ຄະນະ​ພັກ, ອຳນາດ​ການ​ປົກຄອງ​ຢູ່​ບາງ​ແຫ່ງ​ບໍ່​​ໄດ້ໃຫ້​ຄວາມ​ສຳຄັນ​ຢ່າງ​ແທ້​ຈິງ​​ແກ່ວຽກ​ງານ​ທິດ​ສະ​ດີ, ​ເປັນ​ຕົ້ນ​ແມ່ນການສະຫຼຸບ​ສັງ​ລວມພຶດຕິ​ກຳ; ບໍ່​ມີ​ການ​ກຳນົດວ່າ ​ຕ້ອງ​ຕິດ​ການຄົ້ນ​ຄວ້າວິທະຍາສາດ​ກັບ ການສະຫຼຸບ​ສັງ​ລວມພຶດຕິ​ກຳກ່ຽວ​ກັບວຽກ​ງານ​ພະນັກງານ, ດັ່ງ​ນັ້ນ ຈຶ່ງ​ເບິ່ງ​ເບົາ​ການ​ຊີ້​ນຳ​ຄົ້ນຄວ້າ, ສະຫຼຸບ​ສັງ​ລວມພຶດຕິ​ກຳ; ການ​ໝູນ​ໃຊ້​ພື້ນຖານ​ວິທະຍາສາດ​ເພື່ອ​ນຳພາ​ ບໍ່​ກາຍ​ເປັນ​ຫຼັກການ​ໃນວຽກ​ງານ​ພະນັກງານ. ຢູ່​ບາງ​ແຫ່ງ ການ​ປະຕິບັດ​ຂອດ​ຕ່າງໆ​ ໃນວຽກ​ງານ​ພະນັກງານ ບໍ່​ໄດ້​ອີງ​ໃສ່​ບັນດາ​ຫຼັກຖານ​ພາວະ​ວິ​ໄສ, ຖືກ​ແຊກ​ຄຸມ​ຍ້ອນ​ເຈດ​ຈຳນົງ​ອັດຕະວິ​ໄສຂອງ​ຜູ້ນຳ​ໜ້າ, ​ເຮັດ​ແບບ​ບັງຄັບ ບໍ່​ມີ​ປະຊາທິປະ​ໄຕ ຂາດ​ຄວາມ​ໂປ່​ງ​ໃສ.

ທີ​ສອງ, ບໍ່​ມີ​ກົນ​ໄກ​ສົມທົບລະຫວ່າງ​ບັນດາ​ອົງການ​ຄົ້ນຄວ້າ​ສະ​ເພາະ ກັບບັນດາ​ອົງການປຶກສາ​ຊ່ວຍ​ວຽກ​ ກ່ຽວ​ກັບວຽກ​ງານ​ພະນັກງານ. ດັ່ງ​ນັ້ນ, ​ເນື້ອ​ໃນ​ຄົ້ນຄວ້າ​ຂອງບັນ​ດາ​ອົງການວິຊາ​ສະ​ເພາະ​ຈຶ່ງ​ບໍ່​ເຂົ້າກັນ​ກັບ​ຄວາມ​ຕ້ອງການ​ຂອງ​ບັນດາ​ອົງການ​ປຶກສາ, ຜົນ​ການ​ຄົ້ນຄວ້າ​ບໍ່​ມີ​ທີ່ຢູ່​ຈະ​ແຈ້ງເພື່ອ​ໝູນ​ໃຊ້ ຫຼືຄວາມ​ສາມາດ​ນຳ​ໃຊ້​ຜົນ​ການ​ຄົ້ນຄວ້າ​ບໍ່​ສູງ, ​​ເຮັດ​ໃຫ້​ບັນດາ​ແຫຼ່ງພະລັງຖືກ​ນຳໃຊ້​ຢ່າງ​ຟຸມ​ເຟືອຍ, ​ແລະ​ສຳຄັນ​ທີ່​ສຸດ​ແມ່ນ​ ຄຸນ​ນະພາ​ບຂອງການ​ປະກາດ​ໃຊ້ບັນດາ​ນະ​ໂຍບາຍ ການ​ຕັດສິນ​ຕົກລົງ ​ກ່ຽວ​ກັບວຽກ​ງານ​ພະນັກງານບໍ່​ໄດ້​ຕາມ​ຄວາມ​ປະສົງ, ຫຼາຍ​ເນື້ອ​ໃນ​ບໍ່​ສາມາດ​ເຂົ້າ​ສູ່​ຊີວິດ​ການ​ເປັນ​ຢູ່.

ທີ​ສາມ, ຄວາມ​ຈຳກັດ​ທາງ​ດ້ານ​ຄວາມ​ສາມາດ​ວິຊາ​ສະ​ເພາະ, ຈິນຕະນາການ​ທິດ​ສະ​ດີ​ຂອງ​ຖັນ​ແຖວ​ພະນັກງານ​ທີ່​ປຶກສາ​ຊ່ວຍ​ວຽກກ່ຽວ​ກັບວຽກ​ງານ​ພະນັກງານ ​ແມ່ນ​ສາ​ເຫດ​ພື້ນຖານ​ທີ່​ພາ​ໃຫ້ຄຸນ​ນະພາ​ບຂອງ​ນະ​ໂຍບາຍ ການ​ຕັດສິນ​ຕົກລົງ ​ກ່ຽວ​ກັບວຽກ​ງານ​ພະນັກງານ ບໍ່​ສູງ. ຍ້ອນ​ຄວາມ​ຈຳກັດ​ທາງ​ດ້ານ​ລະດັບ, ຄວາມ​ຮັບ​ຮູ້ແລະວິ​ໄສ​ທັດ​ຂອງ​ພະນັກງານ​ທີ່​ປຶກສາ​ຊ່ວຍ​ວຽກກ່ຽວ​ກັບວຽກ​ງານ​ພະນັກງານ ຈຶ່ງ​ບໍ່​ຄົ້ນ​ເຜີຍ​ໄດ້​ບັນດາ​ບັນຫາ​ທີ່​ມີ​ລັກສະນະ​ລະບົບ, ມີ​ລັກສະນະ​ກົດ​ເກນ ​ແລະ ບໍ່​ນຳ​ໃຊ້​ໄດ້​ບັນດາ​ວິທີ​ຄົ້ນຄວ້າ​ທັນ​ສະ​ໄໝ, ວິທະຍາສາດ ​ເພື່ອ​ປະຕິບັດການສະຫຼຸບ​ສັງ​ລວມພຶດຕິ​ກຳ.

ທີ່​ສີ່, ພະນັກງານ​ການ​ນຳ​ແລະນັກ​ຈັດ​ຕັ້ງ​ມື​ອາຊີບ​ພາກສ່ວນ​ໜຶ່ງ ຍັງ​ມີ​ແນວ​ຄິດຮັກສາ​ເດີມ, ບໍ່​ຖືວຽກ​ງານ​ພະນັກງານ​ແລະ​ຄຸ້ມ​ຄອງ​ຖັນ​ແຖວ​ພະນັກງານ ​ເປັນ​ວິຊາ​ວິທະຍາສາດ​ການຈັດຕັ້ງໜຶ່ງ. ດັ່ງ​ນັ້ນ, ຈຶ່ງ​ບໍ່​ເປີດ​ກວ້າງ​ການ​ຄົ້ນຄວ້າ​ບັນດາ​ທິດ​ສະດີທີ່​ກ່ຽວ​ພັນ​ເຖິງ​ວຽກ​ງານ​ພະນັກງານ​ຂອງ​ໂລກ, ບໍ່​ຮູ້​ແລະ​ກໍ່​ບໍ່​ກ້າ​ໝູນ​ໃຊ້​ບັນດາ​ຜົນສຳ​ເລັດ​ຂອງ​ການ​ຄົ້ນຄວ້າຂອງ​ຕ່າງປະ​ເທດ​ກ່ຽວ​ກັບ​ວິທະຍາສາດ​ການຈັດ​ຕັ້ງ​ ເຂົ້າ​ໃນ​ພາກ​ຕົວ​ຈິງ.

ໜ້າ​ທີ່, ວິທີ​ແກ້​ໄຂ​ຈຳນວນ​ໜຶ່ງ​ ເພື່ອ​​ເພີ່ມ​ທະວີການສະຫຼຸບ​ສັງ​ລວມພຶດຕິ​ກຳ ​ແລະ ຄົ້ນ​ຄວ້າ​ວິທະຍາສາດ ກ່ຽວ​ກັບວຽກ​ງານ​ພະນັກງານ

​ໃນ​ເວລາ​ຕໍ່ໜ້າ, ​ເພື່ອ​ປະກອບສ່ວນ​ຍົກ​ສູງ​ຄຸນ​ນະພາ​ບຂອງ​ຖັນ​ແຖວ​ພະນັກງານ, ​ເປັນ​ຕົ້ນ​ແມ່ນ​ພະນັກງານ​​ນຳພາ, ຄຸ້ມ​ຄອງ​ຂັ້ນ​ຕ່າງໆ ຕອບ​ສະໜອງ​ຄວາມ​ຕ້ອງການ, ໜ້າ​ທີ່​ໃນ​ສະພາບ​ການ​ໃໝ່, ວຽກ​ງານ​ຄົ້າຄວ້າ, ສະຫຼຸບ​ສັງ​ລວມພຶດຕິ​ກຳ ​ແລະ ກໍ່ສ້າງ​ທິດ​ສະ​ດີ​ກ່ຽວ​ກັບ​ການຈັດ​ຕັ້ງ​ພະນັກງານ ຕ້ອງ​ສຸມ​ໃສ່​ໜ້າ​ທີ່, ວິທີ​ແກ້​ໄຂຈຳນວນ​ໜຶ່ງ​ ດັ່ງ​ລຸ່ມ​ນີ້: 

ທີ​ໜຶ່ງ, ກຳ​ແໜ້ນ​ມູນ​ຫຼັກ, ວິທີ​ວິທະຍາ ມາກ-​ເລ​ນິນ, ​ແນວ​ຄິດ​ໂຮ່ຈີ​ມິນ​ ໃນການສະຫຼຸບ​ສັງ​ລວມພຶດຕິ​ກຳ ​ແລະ ຄົ້ນ​ຄວ້າ​ວິທະຍາສາດ. ຕັ້ງໝັ້ນ​ໂລກ​ກະທັດ, ວິທີ​ວິທະຍາສາດ ​ແລະ ບັນດາ​ຄຸນຄ່າ​ແກ່ນສານ​ຂອງ​ລັດ​ທິມາກ-​ເລ​ນິນ, ​ແນວ​ຄິດ​ໂຮ່ຈີ​ມິນ, ມູນ​ເຊື້ອ​ອັນ​ດີງາມ​ຂອງ​ຊາດ​ຫວຽດນາມ; ພ້ອມ​ກັນ​ນັ້ນ ກໍ່ຮັບ​ເອົາ​ບັນດາ​ຜົນສຳ​ເລັດ​ໃໝ່, ສິ່ງ​ທີ່​ຍອດ​ຍິ່ງ​ຂອງ​ມະນຸດຊາດ, ​ເຊິ່ງ​ເປັນຮາກຖານຫຼັກ​ແຫຼ່ງທີ່​ຕ້ອງ​ໝູນ​​ໃຊ້ຢ່າງ​ສຸດ​ຂີດ​ໃນ​ການ​ຄົ້ນ​ຄວ້າ, ສະຫຼຸບ​ສັງ​ລວມພຶດຕິ​ກຳ, ພັດທະນາ​ທິດ​ສະ​ດີ​ກ່ຽວ​ກັບ​ວຽກ​ງານ​ກໍ່ສ້າງ​ພັກ​ເວົ້າ​ລວມ​ ແລະ ວຽກ​ງານ​ພະນັກງານ​ເວົ້າ​ສະ​ເພາະ.

ທີ​ສອງ, ຮັບປະກັນ​ຄວາມ​ເປັນ​ເອກະ​ພາບ​ລະຫວ່າງ​ທິດ​ສະ​ດີ ​ແລະ ພຶດຕິ​ກຳ​ໃນວຽກ​ງານ​ພະນັກງານ. ທິດ​ສະ​ດີ​ຕ້ອງ​ຕິດ​ກັບ​ພຶດຕິ​ກຳ, ​ເລີ່​ມຈາກ​ພຶດຕິ​ກຳ, ຕອບ​ສະໜອງ ​ແລະ ຮັບ​ໃຊ້​ຄວາມ​ຕ້ອງການ​ພັດທະນາ​ປະ​ເທດ​ຊາດ, ຮັບປະກັນ​ຄວາມ​ກົມກຽວ​ລະຫວ່າງ​ບັນດາ​ຄວາມ​ຕ້ອງການ​ສະ​ເພາະ​ໜ້າ ​ແລະ ຍາວ​ນານ, ລະຫວ່າງ​ການ​ຄົ້ນຄວ້າ​ພື້ນຖານ ​ກັບ​ການ​ຄົ້ນຄວ້າ​ປະ​ຢຸກ​ໃຊ້, ຜັນ​ຂະຫຍາຍ. ​ແກ້​ໄຂ​ພະຍາດ​ອັດຕະວິ​ໄສ, ​ເຈດ​ຈຳນົງ​ນິຍົມ, ບົດ​ຮຽນ​ນິຍົມ​ໃນ​ການສະຫຼຸບ​ສັງ​ລວມພຶດຕິ​ກຳ, ຄົ້ນ​ຄວ້າ​ວິທະຍາສາດ ກ່ຽວ​ກັບວຽກ​ງານ​ພະນັກງານ.

ທີ​ສາມ, ​ເສີມ​ຂະຫຍາຍ​ປະຊາທິປະ​ໄຕ, ສົ່ງ​ເສີມ​ຄວາມ​ປະດິດ​ສ້າງ​ໃນ​ການສະຫຼຸບ​ສັງ​ລວມພຶດຕິ​ກຳ, ຄົ້ນ​ຄວ້າ​ວິທະຍາສາດກ່ຽວ​ກັບວຽກ​ງານ​ພະນັກງານ. ຖື​ເປັນ​ສຳຄັນ​ການ​ກໍ່ສ້າງ​ສິ່ງ​ແວດ​ລ້ອມ​ປະຊາທິປະ​ໄຕ ​ໄປ​ຄຽງ​ຄູ່​ກັບ​ຍົກ​ສູງ​ຄວາມ​ຮັບຜິດຊອບ​ການ​ເມືອງ ​ຂອງ​ອົງການ​ຈັດ​ຕັ້ງ ​ແລະ ບຸກຄົນຜູ້​ເຄື່ອນ​ໄຫວ​ວິທະຍາສາດ. ກໍ່ສ້າງ​ບັນຍາກາດ​ປະຊາທິປະ​ໄຕ, ​ເປີດ​ອົກ​ເປີດ​ໃຈ ​ແລະ ມີ​ຫຼັກການ​ໃນ​ການ​ສົນທະ​ນາ, ປຶກສາ​ຫາລື.

ທີ​ສີ່, ກໍ່ສ້າງ​ບັນດາ​ໂຄງການ, ​ເປົ້າ​ໝາຍ​ໃນ​ການ​ຄົ້ນຄວ້າ ​ແລະ ການສະຫຼຸບ​ສັງ​ລວມພຶດຕິ​ກຳກ່ຽວ​ກັບວຽກ​ງານ​ພະນັກງານ, ຕອບ​ສະໜອງ​ສະພາບ​ການ​ໃໝ່. “ຍູ້​ແຮງ​ວຽກ​ງານ​ຄົ້ນຄວ້າ​ວິທະຍາສາດ, ກໍ່ສ້າງ​ອົງການ​ຈັດ​ຕັ້ງ ​ແລະ ບຸກຄົນ​ຜູ້​ເຮັດ​ວຽກ​ງານ​ຈັດ​ຕັ້ງ, ພະນັກງານ. ກໍ່ສ້າງ​ໂຄງການ, ​ແຜນການ ​ແລະ ຂັ້ນ​ຕອນ​ປະຕິບັດການ​ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ວິທະຍາສາດ ​ກ່ຽວ​ກັບການຈັດ​ຕັ້ງ​ແລະ​ພະນັກງານ ທີ່​ສອດຄ່ອງ​ກັບ​ຈຸດ​ພິ​ເສດ​ຂອງ​ປະ​ເທດ​ເຮົາ​ໃນ​ສະພາບ​ການ​ໃໝ່”(6). ຍູ້​ແຮ​ງວຽກ​ງານສະຫຼຸບ​ສັງ​ລວມພຶດຕິ​ກຳ, ຄົ້ນ​ຄວ້າ​ວິທະຍາສາດ, ​ເປັນ​ຕົ້ນ​ແມ່ນ​ບັນດາ​ຕົວ​ແບບ​ໃໝ່, ບົດຮຽນ​ທີ່​ດີ; ສົ່ງ​ເສີມ​ພັດທະນາ​ຈິນຕະນາການ​ທິດ​ສະ​ດີທີ່​ສອດຄ່ອງ​ກັບ​ແນວທາງ​ການ​ປ່ຽນ​ແປງ​ໃໝ່​ຂອງ​ພັກ.

ທີ​ຫ້າ, ກໍ່ສ້າງ​ໂຄງການ, ​ແຜນການ​ສຶກສາກໍ່ສ້າງ, ຝຶກ​ອົບຮົມ​ພະນັກງານ​ເຮັດ​ວຽກ​ງານສະຫຼຸບ​ສັງ​ລວມພຶດຕິ​ກຳ, ຄົ້ນ​ຄວ້າ​ວິທະຍາສາດກ່ຽວ​ກັບວຽກ​ງານ​ພະນັກງານ. ດຶງ​ດູດ​ຖັນ​ແຖວ​ພະນັກງານ​ທິດ​ສະ​ດີ ​ແລະ ບັນດາ​ອົງການຄົ້ນຄວ້າ ​ໃຫ້​ເຂົ້າ​ຮ່ວມ​ໃນ​ຂະ​ບວນວິວັດ​ການ​ກຳນົດ​ແນວທາງ, ຍຸດ​ທະ​ສາດ, ​ແຜນ​ນະ​ໂຍບ​າຍ, ນະ​ໂຍບາຍ ຂອງ​ພັກ​ແລະ​ລັດ, ​ໃນ​ນັ້ນ​ມີ​ບັນດາ​ນະ​ໂຍບາຍ ການ​ຕັດສິນ​ຕົກລົງ​ກ່ຽວ​ກັບວຽກ​ງານ​ພະນັກງານ. ມີ​ວິທີ​ການ​ທີ່​ສອດຄ່ອງ​ ແນ​ໃສ່​ເສີມ​ຂະຫຍາຍສະຕິ​ປັນຍາ, ຄວາມ​ສາມາດ​ປະດິດ​ສ້າງ ຂອງ​ຖັນ​ແຖວ​ພະນັກງານ​ທີ່ມີ​ຫຼັກ​ໝັ້ນ​ການ​ເມືອງ​ທີ່​ໜັກ​ແໜ້ນ ​ແລະ ມີ​ລະດັບ​ວິຊາ​ສະ​ເພາະ​ສູງ (ນັບ​ທັງ​ພະນັກງານ​ປະຈຳການ ​ແລະ ພະນັກງານ​​ກິນ​ເບ້ຍບຳນານ), ບັນດາ​ຜູ້​ຊ່ຽວຊານ ​ເຂົ້າ​ໃນ​ການ​ກໍ່ສ້າງ, ປະກອບ​ຄວາມ​ຄິດ​ເຫັນ ​ແລະ ວິຈານ​ຕໍ່​ນະ​ໂຍບາຍ​ກ່ຽວ​ກັບວຽກ​ງານ​ພະນັກງານ.

ທີ​ຫົກ, ຄົ້ນຄວ້າ​ສ້າງ​ຂໍ້​ກຳນົດ​ກ່ຽວ​ກັບ​ການ​ຕິດ​​ແໜ້ນ​ລະຫວ່າງການຄົ້ນ​ຄວ້າ​ວິທະຍາສາດ ກັບການສະຫຼຸບ​ສັງ​ລວມພຶດຕິ​ກຳ. ​ເສີມ​ຂະຫຍາຍ​ບົດບາດ​ຂອງ​ບັນດາ​ຄະນະ​ພັກ, ອຳນາດ​ການ​ປົກຄອງ​ຂັ້ນ​ຕ່າງໆ ​ໃນ​ວຽກ​ງານ​ທິດ​ສະ​ດີ, ຊີ້​ນຳ​ຢ່າງ​ເປັນ​ປະຈຳ​ຕໍ່​ການຄົ້ນ​ຄວ້າ​ວິທະຍາສາດຕິດ​ກັບການສະຫຼຸບ​ສັງ​ລວມພຶດຕິ​ກຳ; ຍົກ​ສູງ​ຄວາມ​ສາມາດ ​ແລະ ຄຸນ​ນະພາ​ບການ​ຄາດ​ຄະ​ເນ, ກຳນົດ​ທິດທາງ​ຄົ້ນຄວ້າ​ໃນ​ແຕ່ລະ​ໄລຍະ.

ທີ່​ເຈັດ, ຄົ້ນຄວ້າ​ກໍ່ສ້າງ​ອົງການ​ຄົ້ນຄວ້າ​ກ່ຽວ​ກັບວິທະຍາ​ສາດ​ການຈັດ​ຕັ້ງພະນັກງານ ທີ່​ມີ​ພາລະ​ບົດບາດ​ຄົ້ນຄວ້າ, ສະຫຼຸບ​ສັງ​ລວມພຶດຕິ​ກຳ ກ່ຽວ​ກັບ​ບັນດາ​ນະ​ໂຍບາຍ​ພະນັກງານ​ຂອງ​ພັກ, ​​ເປັນ​ທີ່​ປຶກສາ​ໃຫ້ພັກ​ກ່ຽວ​ກັບ​ບັນດາ​ນະ​ໂຍບາຍ​ໃໝ່, ມີ​ລັກສະນະ​ບຸກທະລຸ. ກໍ່ສ້າງ​ລະບົບ​ໂຄງການ​ຄົ້ນຄວ້າ​ທີ່​ມີ​ເປົ້າ​ໝາຍ, ຄວາມ​ຕ້ອງການ, ​ເນື້ອ​ໃນ​ລະອຽດ ​ແລະ ​ແທດ​ຈິງ. ມີ​ນະ​ໂຍບາຍ​ສົ່ງ​ເສີມ​ແລະ​ຄ່າ​ຕອບ​ແທນ​ທີ່​ເໝາະ​ສົມ, ຮັບປະກັນ​ຊີວິດ​ການ​ເປັນ​ຢູ່​ດ້ານ​ວັດຖຸ​ແລະ​ຈິດ​ໃຈ​ໃຫ້​ບັນດາ​ນັກວິທະຍາສາດ, ນັກ​ຄົ້ນຄວ້າ​ກ່ຽວ​ກັບວຽກ​ງານ​ພະນັກງານ, ການຈັດ​ຕັ້ງ./.

  ​ໂດຍ ຮສ.ປອ ຟ້າ​ມມິ​ງຈິ໋ງ,
ກຳມະການ​ກົມ​ການ​ເມືອງ, ​ເລຂາ​ທິ​ການ​ສູນ​ກາງ​ພັກ,
ຫົວໜ້າ​ຄະນະ​ຈັດ​ຕັ້ງ​ສູນ​ກາງ

------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ​ສະບັບ​ທີ 896 (​ເດືອນ​ມິຖຸນາ 2017).

(1) ກ.ມາກ ​ແລະ ຟ.ອັງ​ແກນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ - ຊື້​ເທີ້ດ, ຮ່າ​ໂນ້ຍ, 1995, ​ເຫຼັ້ມ​ທີ 3, ໜ້າ 9 - 10.

(2) ວ.ອີ. ​ເລ​ນິນ: ນິພົນ​ຄົບຊຸດ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2006, ​ເຫຼັ້ມ​ທີ 29, ໜ້າ 179.

(3) ​ໂຮ່ຈີ​ມິນ: ນິພົນ​ຄົບຊຸດ, ສພຈ. ການ​ເມືອງ​ແຫ່ງ​ຊາດ - ຊື້​ເທີ້ດ, ຮ່າ​ໂນ້ຍ, 2011, ​ເຫຼັ້ມ​ທີ 11, ໜ້າ 96.

(4) ໂຮ່ຈີ​ມິນ: ນິພົນ​ຄົບຊຸດ, ປຶ້ມ​ທີ່​ໄດ້​ແນະນຳ, ​ເຫຼັ້ມ​ທີ 5, ໜ້າ 283.

(5) ​ເອກະສານ​ກອງ​ປະ​ຊູ​ມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 201.

(6) ​ເອກະສານ​ກອງ​ປະຊຸມ​ຄັ້ງ​ທີ 9 ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ X, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2009, ໜ້າ 277.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ