ວັນພຸດ, 20/9/2017
ຮັບຮູ້ເປັນເອກະພາບແລະກະທຳຢ່າງຂັນແຂງ ໃນການຈັດຕັ້ງປະຕິບັດບັນດາມະຕິ ຂອງກອງປະຊຸມສູນກາງພັກ ຄັ້ງທີ 5 ສະໄໝທີ XII ແນໃສ່ປົດປ່ອຍທຸກແຫຼ່ງພະລັງ, ສ້າງກຳລັງໜູນໃໝ່ ເພື່ອພັດທະນາປະເທດຊາດຢ່າງໄວແລະໝັ້ນຄົງຍືນຍົງ*
21/8/2017 8:54' ສົ່ງ ພິມ
ທ່ານຫງວຽນຊວັນຝຸກ, ກຳມະການກົມການເມືອງ, ນາຍົກລັດຖະມົນຕີແຫ່ງ ສາທາລະນະລັດສັງຄົມນິຍົມ ຫວຽດນາມ. (ພາບ: TTXVN)

ກອງ​ປະຊຸມ​ຄັ້ງ​ທີ 5 ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XII ​ໄດ້​ຮັບຮອງ​ຜ່ານ​ຫຼາຍ​ເອກະສານ​ທີ່​ສຳຄັນ, ​ໃນ​ນັ້ນ​ມີ 3 ມະຕິ​ຄື: “ບູລະນະ​ລະບຽບ​ກົດໝາຍ​​ເສດຖະກິດຕະຫຼາດກຳນົດ​ທິດ​ສັງຄົມ​ນິຍົມ”; “ສືບ​ຕໍ່​ຈັດ​ວາງ​ຄືນ​ໃໝ່, ປ່ຽນ​ແປງ​ໃໝ່ ​ແລະ ຍົກ​ສູງ​ປະສິດທິ​ຜົນ​ຂອງ​ວິ​ສາ​ຫະກິດ​ແຫ່ງ​ລັດ”; ​ແລະ “ພັດທະນາ​ເສດຖະກິດ​ເອກະ​ຊົນ​ໃຫ້ກາຍ​ເປັນ​ກຳລັງ​ໜູນ​ທີ່​ສຳຄັນ ຂອງ​ພື້ນຖານ​ເສດຖະກິດ​ຕະຫຼາດ​ກຳນົດ​ທິດສັງຄົມ​ນິຍົມ”.

​ໃນ​ຄຳ​ປາ​ໄສ​ປິດ​ກອງ​ປະຊຸມ, ສະ​ຫາຍ​ເລຂາທິການ​ໃຫຍ່ ຫງວຽນ​ຝູຈ້ອງ ​ໄດ້​ເນັ້ນ​ວ່າ: “ສາມ​ມະຕິ​ສະ​ເພາະ​ບັນຫາ​ກ່ຽວ​ກັບ​ເສດຖະກິດ ​ທີ່​ສູນ​ກາງ​ພັກ​ປະກາດ​ໃຊ້​​ໃນ​ກອງ​ປະຊຸມ​ຄັ້ງ​ນີ້ ລ້ວນ​ແຕ່​​ແມ່ນບັນດາ​ບັນຫາທີ່ສຳຄັນ​ພິ​ເສດສຳລັບ​ການ​ປະຕິບັດ​ໜ້າ​ທີ່​ຈຸດ​ໜັກ​ໃຈກາງ​ ທີ່ກ​ອງ​ປະຊຸມ​ໃຫຍ່​ຄັ້ງ​ທີ XII ວາງ​ອອກ​ມາ ​ເພື່ອ​ພັດທະນາ​ເສດຖະກິດ-ສັງຄົມ”.

​ເນື້ອ​ໃນ​ຈຸດ​ໜັກ​ຂອງ​ບັນດາ​ມະຕິ​ເຫຼົ່າ​ນີ້​ແມ່ນ ບັນດາ​ທິດ​ທາງ​ໃຫຍ່, ມີ​ລັກສະນະ​ບຸກທະລຸກ່ຽວ​ກັບ​ລະບຽບ​ກົດໝາຍ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ຈັດ​ວາງ​ຄືນ​ໃໝ່​ໂຄງ​ປະກອບວິ​ສາ​ຫະກິດ​ແຫ່ງ​ລັດ​ແລະ​ພັດທະນາ​ເສດຖະກິດ​ເອກະ​ຊົນ. ນີ້​ແມ່ນ​ບັນດາ​ເຈົ້າພາບ​ທີ່​ສຳຄັນ​ທີ່​ສຸດ, ​ແມ່ນບ່ອນຜະລິດ​ຊັບ​ສິນ​ວັດຖຸ​ສິ່ງ​ຂອງ​ຕົ້ນຕໍ​ຂອງ​ພື້ນຖານ​ເສດ​ຖະກິດ.

​ໃນ​ນັ້ນ, ຂົງ​ເຂດ​ເສດຖະກິດ​ແຫ່ງ​ລັດ​ເຖິງ​ວ່າ​ຈະ​ຖືກ​ຫຼຸດ​ລົງ​ທາງ​ດ້ານ​ຈຳນວນ ຈາກ​ປະມານ 12.000 ວິ​ສາ​ຫະກິດ​ໃນ​ປີ 1990 ລົງ​ເປັນ 6.000 ວິ​ສາ​ຫະກິດ​ໃນ​ປີ 2001 ​ແລະ 652 ວິ​ສາ​ຫະກິດ​ໃນ​ປີ 2016 ກໍ່ຕາມ ​ແຕ່​ກໍ່​ເປັນ​ກຳລັງ​ວັດຖຸ​ທີ່​ສຳຄັນ; ມັນ​ໄດ້​ປະກອບສ່ວນ​ເກືອບ 30% ຂອງ ຈີ​ດີ​ພີ; ມັນ​ມີ​ຊັບ​ສິນ​ທັງ​ໝົດ​ຫຼາຍ​ກວ່າ 3 ລ້ານ​ຕື້​ດົ່ງ; ທຶນ​ລວມຍອດ​ຂອງ​ເຈົ້າ​ກຳມະສິດ​ຫຼາຍ​ກວ່າ 1,37 ລ້ານ​ຕື້​ດົ່ງ; ກຳ​ໄລ​ລວມຍອດທີ່​ຍັງ​ບໍ່​ທັນ​ເສຍ​ພາສີຫຼາຍກວ່າ 161 ພັນ​ຕື້​ດົ່ງ; ມອບລາຍ​ໄດ້​ເຂົ້າ​ງົບ​ປະມານຂອງ​ລັດ​ຫຼາຍ​ກວ່າ 246 ພັນ​ຕື້​ດົ່ງ.

ກ່ຽວ​ກັບພາກ​ເອກະ​ຊົນ, ຈຳນວນ​ວິ​ສາ​ຫະກິດ​ເອກະ​ຊົນ​ເພີ່ມ​ຂຶ້ນ​ຢ່າງ​ໄວວາ​ ນັບ​ແຕ່​ເມື່ອລັດຖະບານ​ປຸກລະດົມຂະ​ບວນການລິ​ເລີ່​ມທຸລະ​ກິດ; ປີ 2015 ມີ​ເກືອບ 500 ພັນ​ວິ​ສາ​ຫະກິດ; ປີ 2016 ມີ​ກວ່າ 110 ພັນວິສາ​ຫະກິດ​ທີ່​ຈົດ​ທະບຽນ​ໃໝ່; 6 ​ເດືອນ​ຕົ້ນ​ປີ 2017 ມີ​ກວ່າ 61 ພັນວິສາ​ຫະກິດ​ທີ່​ຈົດທະບຽນ​ໃໝ່. ຈຳນວນ​ຄອບຄົວ​ທີ່​ທຳ​ການ​ທຸລະ​ກິດ​ເອກະ​ຊົນ​ກໍ່​ນັບ​ມື້​ນັບ​ເພີ່ມ​ຂຶ້ນ, ບັນລຸ​ເກືອບ 5 ລ້ານ​ຄອບຄົວ. ພາກ​ເອກະ​ຊົນ​ກວມ​ເອົາ 39% ຈີ​ດີ​ພີ - 40% ຈີ​ດີ​ພີ, ຖື​ບົດບາດ​ເປັນ​ເຈົ້າພາ​ທາງ​ໃນ​ການ​ສ້າງ​ວຽກ​ເຮັດ​ງານ​ທຳ​ໃຫ້​ຜູ້​ອອກ​ແຮງ​ງານ.

ກ່ຽວ​ກັບ​ຂົງ​ເຂດ​ການ​ລົງທຶນ​ຈາກ​ຕ່າງປະ​ເທດ, ປີ 2016 ມີ​ຫຼາຍ​ກວ່າ 2.600 ​ໂຄງການ​ທີ່​ຈົດ​ທະບຽນ​ໃໝ່ ດ້ວຍ​ຈຳນວນ​ທຶນ​ຈົດ​ທະບຽນ​ໃໝ່, ທຶນ​ເພີ່ມ​ເຕີມ​ແລະ​ທຶນ​ຊື້​ຫຸ້ນທັງ​ໝົດ ​ບັນລຸ​ເກືອບ 27 ຕື້​ໂດ​ລາ​ສະຫະລັດ; 6 ​ເດືອນ​ຕົ້ນ​ປີ 2017 ມີ​ເກືອບ 1.200 ໂຄງການ​ທີ່​ຈົດ​ທະບຽນ​ໃໝ່ ດ້ວຍ​ຈຳນວນ​ທຶນ​ທັງ​ໝົດ​ຫຼາຍ​ກວ່າ 19 ຕື້​ໂດ​ລາ​ສະຫະລັດ. ມາ​ຮອດ​ປະຈຸ​ບັນ, ທົ່ວ​ປະ​ເທດ​ມີ​ເກືອບ 23.600 ​ໂຄງການທີ່​ຍັງ​ເຄື່ອນ​ໄຫວ​ຢູ່ ດ້ວຍ​ຈຳນວນ​ທຶນ​ຈົດ​ທະບຽນ​ທັງ​ໝົດ​ກວ່າ 306 ຕື້​ໂດ​ລາ​ສະຫະລັດ.

​ເພາະສະ​ນັ້ນ, ບັນດາ​ທັດສະນະ ​ແນວ​ຄິດ​ຊີ້​ນຳ, ​ເປົ້າ​ໝາຍ ໜ້າ​ທີ່ ​ແລະ ວິທີ​ແກ້​ໄຂ​ທີ່​ສຳຄັນ​ ຢູ່​ໃນ​ບັນດາ​ມະຕິ ຕ້ອງ​ໄດ້​ຮັບ​ການ​ເຊື່ອມ​ຊຶມ​ຢ່າງ​ເລິກ​ເຊິ່ງ ​ແລະ ​ໄດ້​ຮັບ​ການ​ຜັນ​ຂະຫຍາຍ​ປະຕິບັດ​ຢ່າງ​ຄົບ​ຊຸດ, ມີ​ປະສິດທິ​ຜົນ, ສ້າງ​ໃຫ້​ມີ​ການ​ຫັນປ່ຽນ​ໃນ​ຄວາມ​ຮັບ​ຮູ້, ​ເປັນ​ເອກະ​ພາບ​ທາງ​ເຈດ​ຈຳນົງ​ແລະ​ການ​ກະທຳ​ ໃນ​ທົ່ວ​ພັກ, ທົ່ວ​ປວງຊົນ, ທົ່ວ​ກອງທັບ, ກ່ອນ​ອື່ນ​ໝົດ​ແມ່ນຖັນ​ແຖວ​ພະນັກງານ, ສະມາຊິກ​ພັກ, ຂ້າ​ລັດຖະການ, ​ເຈົ້າ​ໜ້າ​ທີ່ ​ແລະ ວົງ​ການ​ວິ​ສາ​ຫະກິດ, ພິ​ເສດ​ແມ່ນ​ບັນດາ​ພະນັກງານ​ການ​ນຳ​ຫຼັກ​ແຫຼ່ງຢູ່​ບັນດາ​ຂັ້ນ, ຂະ​ແໜງ​ການ, ທ້ອງ​ຖິ່ນ.

ມື້​ນີ້, ກົມ​ການ​ເມືອງ, ຄະນະ​ເລຂາ​ທິການ​ສູນ​ກາງ​ພັກ ຈັດ​ຕັ້ງ​ກອງ​ປະຊຸມ​ອອນ​ໄລ​ທົ່ວ​ປະ​ເທດ​ເພື່ອ​ແນ​ໃສ່​ເຊື່ອມ​ຊຶມ, ​ເຜີຍ​ແຜ່ ​ແລະ ຊ່ວຍ​ໃຫ້​ບັນດາ​ສະ​ຫາຍ​ກາ​ນນຳຫຼັກ​ແຫຼ່ງຢູ່​ບັນດາ​ອົງການ​ສູນ​ກາງ, ບັນດາ​ທ້ອງ​ຖິ່ນ ກຳ​ແໜ້ນ​ເນື້ອ​ໃນ​ອັນ​ພື້ນຖານ, ບັນດາ​ຈຸດ​ໃໝ່ຂອງ​ບັນດາ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 5 ສະ​ໄໝ​ທີ XII; ພ້ອມ​ກັນ​ນັ້ນ​ກໍ່​ໝູນ​ໃຊ້​ບັນດາ​ເປົ້າ​ໝາຍ, ທັດສະນະ, ໜ້າ​ທີ່, ວິທີ​ແກ້​ໄຂ ​ເຂົ້າ​ໃນ​ການ​ສ້າງ​ໂຄງການ, ​ແຜນ​ການປະຕິບັດ​ງານ​ຂອງບັນດາ​ຂັ້ນ ຂະ​ແໜງ​ການ ສຳນັກງານ​ອົງການ ກົມ​ກອງ; ຍົກ​ສູງ​ຄວາມ​ຮັບຜິດ​ຊອບ, ​ເປັນ​ແບບຢ່າງ​ໃນ​ການ​ປະຕິບັດ, ​ເວົ້າ​ໄປ​ຄຽງ​ຄູ່​ກັບ​ເຮັດ, ຫຼີກ​ລ່ຽງການ​ເວົ້າ​ຫຼາຍ​ເຮັດ​ໜ້ອຍ ຫຼືມີ​ແຕ່​ເວົ້າ​ແຕ່​ບໍ່​ເຮັດ, ຊີ້​ນຳ​ການ​ຜັນ​ຂະຫຍາຍ​ປະຕິບັດ​ມະຕິ​ໃຫ້​ມີ​ປະສິດທິ​ຜົນຕົວ​ຈິງ. ກອງ​ປະຊຸມ​ໃນມື້​ນີ້​ຂອງ​ພວກ​ເຮົາ​ເປັນ​ການ​ເລີ່​ມຕົ້ນບັ້ນ​ດຳ​ເນີນ​ຊີວິດ​ການ​ເມືອງ, ​ໂຄສະນາ​ຢ່າງ​ກວ້າງຂວາງ​ເລິກ​ເຊິ່ງ ​ໃນ​ທົ່ວ​ພັກ ທົ່ວ​ປວງ​ຊົນ ​ແລະ ທົ່ວ​ກອງທັບ, ສ້າງ​ໃຫ້​ມີ​ຄວາມ​ເປັນ​ເອກະ​ພາບ​ສູງ​ທາງ​ດ້ານ​ຄວາມ​ຮັບ​ຮູ້​ແລະການ​ກະທຳ ​ເພື່ອນຳ​ເອົາ​ສາມ​ມະຕິ​ທີ່​ສຳຄັນ​ນີ້​ ເຂົ້າ​ໃນ​ຊີວິດ​ຕົວ​ຈິງ​ ແລະ ​ເສີມ​ຂະຫຍາຍ​ຄຸນ​ປະ​ໂຫຍ​ດ​ໂດຍ​ໄວ; ປະກອບສ່ວນ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະບັນດາ​ເປົ້າ​ໝາຍ​ພັດທະນາ​ເສ​ດຖະກິດ-ສັງຄົມ​ທີ່​ວາງ​ອອກ ຢ່າງ​ສຳ​ເລັດ​ມີ​ໄຊ.

ຕາງໜ້າ​ກົມ​ການ​ເມືອງ, ຂ້າພະ​ເຈົ້າ​ສະ​ແດງ​ຄວາມ​ຊົມ​ເຊີຍ​ຢ່າງ​ສຸດ​ໃຈ​ ຕໍ່​ບັນດາ​ສະຫາຍ​ການ​ນຳ​ຫຼັກ​ແຫຼ່ງຂອງ​ບັນດາ​ຄະນະ, ກະຊວງ, ຂະ​ແໜງ​ການ​ສູນ​ກາງ ​ແລະ ​ບັນດາ​ທ້ອງ​ຖິ່ນ ທີ່​ມາ​ຮ່ວມກອງ​ປະຊຸມ​ອອນ​ໄລ​ທົ່ວ​ປະ​ເທດ​ໃນ​ມື້​ນີ້. 

​ໃນ​ຕະຫຼອດ 30 ປີ​ແຫ່ງ​ການ​ປ່ຽນ​ແປງ​ໃໝ່, ພັກ​ກອມ​ມູນິດ​ຫວຽດນາມຍາມ​ໃດ​ກໍ່​ກຳນົດ​ວ່າ ການ​ປ່ຽນ​ແປງ​ໃໝ່ ພັດທະນາ​ເສດຖະກິດ​ແມ່ນ​ໜ້າ​ທີ່​ຈຸດ​ໜັກ​ໃຈກາງ, ມີ​ຄວາມ​ໝາຍ​ສຳຄັນ​ອັນ​ດັບ​ໜຶ່ງ, ​ໃນ​ນັ້ນສຳຄັນ​ຕົ້ນຕໍ​ແມ່ນ ລວມສູນ​ບຸລິມະສິດ​ການ​ປ່ຽນ​ແປງ​ໃໝ່​ຈິນຕະນາການ​ເສດຖະກິດ, ກໍ່ສ້າງ ​ແລະ ບູລະນະ​ລະບຽບ​ກົດໝາຍ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ ທີ່​ສອດຄ່ອງ​ກັບ​ແຕ່ລະ​ໄລຍະ​ແຫ່ງ​ການ​ພັດທະນາ; ຖື​ວ່າ​ນີ້​ແມ່ນ​ໜ້າ​ທີ່​ສຳຄັນ​ທີ່​ສຸດ, ​ເປັນ​ປະຈຳ, ຕໍ່​ເນື່ອງ​ຂອງ​ບັນດາ​ຂະ​ແໜງ​ການ, ບັນດາ​ຂັ້ນ ​ແຕ່​ສູນ​ກາງ​ລົງ​ຮອດ​ທ້ອງ​ຖິ່ນ. ປະຕິບັດ​ແນວທາງປ່ຽນ​ແປງ​ໃໝ່​ຂອງ​ພັກ ​ແລະ ອາ​​ໄສຄວາມ​ມານະ​ພະຍາຍາມ​ຂອງ​ທົ່ວ​ທັງ​ລະບົບ​ການ​ເມືອງ, ຂອງ​ວົງ​ການ​ວິ​ສາ​ຫະກິດ​ແລະ​ປະຊາຊົນ​ທົ່ວ​ປະ​ເທດ, ພວກ​ເຮົາ​ບັນລຸ​ໄດ້​ບັນດາ​ຜົນສຳ​ເລັດ​ອັນ​​ໃຫຍ່​ຫຼວງ, ມີ​ຄວາມ​ໝາຍ​ປະຫວັດສາດ; ​ເສດຖະກິດ​ເຕີບ​ໂຕ​ຢ່າງ​ຕໍ່​ເນື່ອງ​ແລະ​ມີ​ຄວາມ​ໝັ້ນຄົງ​ໃນ​ລະດັບ​ສູງ, ສະ​ເລ່ຍ 6,5% - 7% ຕໍ່​ປີ, ພາ​ປະ​ເທດ​ເຮົາ​ພົ້ນ​ອອກ​ຈາກ​ສະພາບ​ດ້ອຍ​ພັດທະນາ, ກ້າວ​ເຂົ້າ​ສູ່​ກຸ່ມ​ປະ​ເທດກຳລັງ​ພັດທະນາ​ທີ່​ມີ​ລາຍ​ໄດ້​ປານ​ກາງ; ຮັກສາ​ການ​ພັດທະນາ​ຕາມທິດ​ທາງ​ສັງຄົມ​ນິຍົມ​ໄວ້​ຢ່າງ​ໝັ້ນຄົງ; ການ​ເມືອງ-ສັງຄົມມີ​ຄວາມ​ໝັ້ນຄົງ; ພັດທະນາ​ເສດຖະກິດ​ໄປ​ຄຽງ​ຄູ່​ກັບ​ປະຕິບັດ​ຄວາມ​ກ້າວໜ້າ​ແລະຄວາມ​ຍຸຕິ​ທຳ​ທາງ​ສັງຄົມ, ຮັບປະກັນ​ສະ​ວັດ​ດີກາ​ນສັງຄົມ, ຍົກ​ສູງ​ຊີວິດ​ຄວາມ​ເປັນ​ຢູ່​ດ້ານ​ວັດຖຸ​ແລະ​ຈິດ​ໃຈ​ຂອງ​ປະຊາຊົນ​ຢ່າງ​ບໍ່​ຢຸດ​ຢັ້ງ; ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ​ໄດ້​ຮັບ​ການ​ເພີ່ມ​ທະວີ; ວຽກ​ງານ​ການ​ຕ່າງປະ​ເທດ​ແລະ​ການ​ເຊື່ອມ​ໂຍງ​ສາກົນ ​ໄດ້​ຮັບ​ການ​ຍູ້​ແຮງ​ແລະ​ບັນລຸ​ຜົນສຳ​ເລັດ​ຫຼາຍ​ຢ່າງ; ​ຖານະ​ບົດບາດ​ຂອງ​ປະ​ເທດ​ເຮົາ​ໃນ​ເວທີ​ສາກົນ ນັບ​ມື້​ນັບ​ໄດ້​ຍົກ​ສູງ​ຂຶ້ນ.

ຄຽງ​ຂ້າງ​ກັບ​ບັນດາ​ຜົນງານ, ຄວາມ​ສຳ​ເລັດ​ທີ່​ບັນລຸ​ໄດ້​ນັ້ນ ພວກ​ເຮົາກໍ່​ຕ້ອງ​ຮັບ​ຮູ້​ວ່າ ​ຕົນ​ຍັງ​ມີ​ຈຸດ​ອ່ອນ ຂໍ້​ຈຳກັດ​ຫຼາຍ​ຢ່າງ, ພິ​ເສດ​ແມ່ນ ຄຸນ​ນະພາ​ບ ປະສິດທິ​ຜົນ ​ແລະ ຄວາມ​ສາມາດ​ແຂ່ງ​ຂັນຂອງພື້ນຖານ​ເສດຖະກິດ​ຍັງ​ບໍ່​ທັນ​ສູງ; ການ​ເຕີບ​ໂຕ​ເສດຖະກິດ​ຍັງ​ບໍ່​ທັນ​ໝັ້ນຄົງ; ລະບົບ​ກົດໝາຍ, ກົນ​ໄກ, ນະ​ໂຍບາຍ ຍັງ​ບໍ່​ທັນ​ຄົບ​ຊຸດ ​ແລະ ການຈັດ​ຕັ້ງ​ປະຕິບັດ​ກໍ່​ບໍ່​ໄດ້​ຕາມ​ຄວາມ​ຕ້ອງການ; ຕະຫຼາດ​ບາງ​ປະ​ເພດ​ເປັນ​ຮູບ​ເປັນ​ຮ່າງ​ຂຶ້ນ​ແລະ​ຂະຫຍາຍຕົວ​ຊ້າ, ການ​ເຄື່ອນ​ໄຫວ​ຂອງ​ຕະຫຼາດ​ນັ້ນ​ ກໍ່​ຖືກ​ຕິດ​ຂັດ, ປະສິດທິ​ຜົນ​ຕ່ຳ; ຍັງ​ບໍ່​ທັນ​ມີ​ການ​ບຸກທະລຸ​ໃນ​ການ​ລະດົມ, ​ແຈກ​ຢາຍ ​ແລະ ນຳ​ໃຊ້​ບັນດາ​ແຫຼ່ງພະ​ລັງ; ສິ່ງ​ແວດ​ລ້ອມ​ແຫ່ງການ​ລົງທຶນ, ທຸລະ​ກິດ​ຍັງ​ບໍ່​ທັນ​ລຸ​ລ່ວງ​ແທ້​ເທື່ອ, ລະດັບ​ຄວາມ​ໂປ່​ງ​ໃສ ຄວາມ​ໝັ້ນຄົງ​ກໍ່​ຍັງ​ບໍ່​ທັນ​ສູງ. ວິ​ສາ​ຫະກິດ​ແຫ່ງ​ລັດ​ຫຼາຍ​ແຫ່ງ​ເຄື່ອນ​ໄຫວ​ບໍ່​ມີ​ປະສິດທິ​ຜົນ; ​ເສດຖະກິດ​ລວມໝູ່​ປ່ຽນ​ແປງ​ໃໝ່​ຢ່າງ​ຊັກ​ຊ້າ; ​ເສດຖະກິດ​ເອກະ​ຊົນ​ຍັງ​ບໍ່​ທັນ​ກາຍ​ເປັນ​ກຳລັງ​ໜູນ​ທີ່​ສຳຄັນ​ໜຶ່ງ​ຂອງ​ພື້ນຖານ​ເສດຖະກິດ. ການ​ເຊື່ອມ​ໂຍງ​ເສດຖະກິດ​ສາກົນ​ມີ​ປະສິດທິ​ຜົນ​ຕ່ຳ; ການ​ຂຸດ​ຄົ້ນບັນດາ​ໂອກາດ​ແລະ​ເງື່ອນ​ໄຂ​ທີ່​ສະດວກ​ໃນ​ການ​ເຊື່ອມ​ໂຍງ​ສາກົນ​ ກໍ່​ບໍ່​ໄດ້​ຮັບ​ຜົນ​ດີ​ແທ້​ເທື່ອ. ຄວາມ​ສັກສິດ, ປະສິດທິ​ຜົນ​ໃນ​ການ​ນຳພາ, ຄຸ້ມ​ຄອງ​ເສດຖະກິດ-ສັງຄົມ​ ຍັງ​ມີ​ຄວາມ​ຈຳກັດ​ໃນ​ຫຼາຍ​ດ້ານ.

​ເພື່ອ​ເຊື່ອມ​ຊຶມ, ຜັນ​ຂະຫຍາຍ​ປະຕິບັດຢ່າງ​ມີ​ປະສິດທິ​ຜົນ ບັນດາ​ມະຕິ​ຂອງ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 5 ສະ​ໄໝ​ທີ XII, ຂ້າພະ​ເຈົ້າ​ຂໍ​ສະ​ເໜີ​ໃຫ້​ບັນດາ​ສະຫາຍ ຕ້ອງ​ກຳ​ແໜ້ນ​ບັນດາ​ເປົ້າ​ໝາຍ, ທັດສະນະ​ຊີ້ນຳ, ໜ້າ​ທີ່ ​ແລະ ວິທີ​ແກ້​ໄຂ​ຕັ້ນຕໍ ທີ່​ໄດ້​ລະບຸ​ໄວ້​ໃນ​ມະຕິ ​ແລະ ບົດ​ແນະນຳ​ຂອງ​ສູນ​ກາງ, ​ໃນ​ນັ້ນ​ເອົາ​ໃຈ​ໃສ່​ເປັນ​ສຳຄັນ​ເຖິງ​ເນື້ອ​ໃນ​ຈຳນວນ​ໜຶ່ງ​ດັ່ງ​ລຸ່ມ​ນີ້:

ທີ​ໜຶ່ງ, ​ເປັນ​ເອກະພາບ​ໃນ​ການ​ຮັບ​ຮູ້ກ່ຽວ​ກັບ​ບັນດາ​ເນື້ອ​ໃນ​ຫຼັກ​ແຫຼ່ງຂອງ​ບັນດາ​ມະຕິ:

- ກ່ຽວ​ກັບ​ການ​ບູລະນະ​ລະບຽບ​ກົດໝາຍ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ: ພື້ນຖານເສດຖະກິດ​ຕະຫຼາດ ກຳນົດ​ທິດ​ສັງຄົມ​ນິຍົມ ທີ່​ຫວຽດນາມ​ກໍ່ສ້າງ​ນັ້ນ​ ແມ່ນ​ພື້ນຖານ​ເສດຖະກິດທີ່​ເຄື່ອນ​ໄຫວ​ຢ່າງ​​ເຕັມ​ສ່ວນ, ຄົບ​ຊຸດ ຕາມ​ບັນດາ​ກົດ​ເກນ​ຂອງເສດຖະກິດ​ຕະຫຼາດ, ພ້ອມ​ກັນ​ນັ້ນ ​ກໍ່​ຮັບປະກັນການ​ກຳນົດ​ທິດ​ສັງຄົມ​ນິຍົມ ທີ່​ສອດຄ່ອງ​ກັບ​ແຕ່ລະ​ໄລຍະການ​ພັດທະນາ; ​ເປັນ​ພື້ນຖານ​​ເສດຖະກິດ​ຕະຫຼາດທີ່​ທັນ​ສະ​ໄໝ ​ແລະ​ເຊື່ອມ​ໂຍງ​ສາກົນ, ມີ​ການ​ຄຸ້ມ​ຄອງ​ຂອງ​ລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ, ​ໂດຍ​ພັກ​ກອມ​ມູນິດ​ນຳພາ, ​ແນ​ໃສ່​ເປົ້າ​ໝາຍ​ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ, ມີ​ປະຊາທິປະ​ໄຕ, ຍຸຕິ​ທຳ, ສີວິ​ໄລ.

ການກໍ່ສ້າງ​ແລະ​ບູລະນະ​ລະບຽບ​ກົດໝາຍເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ ​ແມ່ນ​ໜ້າ​ທີ່​ຍຸດ​ທະ​ສາດ, ​ແມ່ນ​ຂອດ​ບຸກທະລຸ​ທີ່​ສຳຄັນ, ສ້າງ​ກຳລັງ​ໜູນ, ປົດ​ປ່ອຍ​ແຫຼ່ງພະລັງ, ອຳນວຍ​ຄວາມ​ສະດວກ​ທຸກ​ຢ່າງ​ເພື່ອ​ພັດທະນາ​ເສດຖະກິດ-ສັງ​ຄັມ ຢ່າງ​ໄວ​ແລະ​ໝັ້ນຄົງ​ຍືນ​ຍົງ, ​ເປັນ​ຕົ້ນ​​ແມ່ນ​ໃນ​ເງື່ອນ​ໄຂ​ການ​ປະຕິວັດ​ອຸດສາຫະກຳ​ຄັ້ງ​ທີ 4 ພວມ​ເກີດ​ຂຶ້ນ​ຢ່າງ​ແຂງ​ແຮງ. ​ໃນ​ນັ້ນ, ສຸມ​ໃສ່​ການ​ປັບປຸງບູລະນະ​ກົດໝາຍ​ກ່ຽວ​ກັບ​ທີ່​ດິນ, ຊ່ວຍ​ໜູນສ້າງ​ຄວາມ​ສະດວກ​ໃຫ້​ແກ່​ການ​ລວມສູນເຕົ້າ​ໂຮມດິນ​ນາ ​ເພື່ອ​ພັດທະນາ​ກະສິກຳ​ເຕັກ​ໂນ​ໂລ​ຊີ​ສູງ; ປ່ຽນ​ແປງ​ໃໝ່​ວຽກ​ງານ​ກໍ່ສ້າງ​ແລະ​ປະຕິບັດ​ບັນດາ​ແຜນ​ກຳ​ນັດ, ​ແຜນການ​ພັດທະນາ, ລົງທຶນ​ສາທາລະນະ ​ແລະ ຈັດ​ແບ່ງ​ບັນດາ​ແຫຼ່ງພະລັງ; ຍູ້​ແຮງ​ການ​ປະຕິ​ຮູບ​ເງືອນ​ເດືອນ, ​ເງິນ​ຄ່າ​ແຮງ, ຮັບປະກັນສະ​ວັດ​ດີກາ​ນສັງຄົມ; ຮີບ​ເຮັ່ງ​ກວດຄືນ, ​ແກ້​ຂໍ້ຄົງຄ້າງ​ກ່ຽວ​ກັບ​ລະບຽບ​ກົດໝາຍ​ເສດຖະກິດ ​ເພື່ອ​ຮັກສາ​ຄວາມ​ໝັ້ນຄົງຂອງ​​ເສດຖະກິດ​ມະຫາ​ພາກ, ຄວບ​ຄຸມ​ໜີ້​ສິນ​ສາທາລະນະ, ​ແກ້​ໄຂໜີ້​ເສຍ, ຈັດ​ວາງ​ຄືນ​ໃໝ່ ປ່ຽນ​ແປງ​ໃໝ່ ຍົກ​ສູງປະສິດທິ​ຜົນ​ຂອງ​ລະບົບບັນດາ​ທະນາຄານ​ການ​ຄ້າ ​ແລະ ວິ​ສາ​ຫະກິດ​ແຫ່ງ​ລັດ... ພ້ອມ​ກັນ​ນັ້ນ, ການ​ບູລະນະ​ລະບຽບ​ກົດໝາຍ​ເສດຖະກິດ ​ຕ້ອງ​ໄປ​ຄຽງ​ຄູ່​ກັບການ​ປ່ຽນ​ແປງ​ໃໝ່, ບູລະນະ​ກົງ​ຈັດການ​ຈັດ​ຕັ້ງ, ພະນັກງານ​ຂອງ​ທົ່ວ​ທັງ​ລະບົບ​ການ​ເມືອງ; ກຳນົດ​ແຈ້ງ ​ແລະ ປະຕິບັດ​ຢ່າງ​ຖືກຕ້ອງ​ ທີ່​ຕັ້ງ, ບົດບາດ, ພາລະ​ບົດບາດ​ແລະສາຍ​ພົວພັນ​ລະຫວ່າງ​ລັດ, ຕະຫຼາດ ​ແລະ ສັງຄົມ​ ສອກ​ຄ່ອງ​ກັບເສດຖະກິດ​ຕະຫຼາດ; ຮັບປະກັນການກຳນົດ​ທິດ​ສັງຄົມ​ນິຍົມ; ຮັກສາ​ແລະ​ເພີ່ມ​ທະວີ​ບົດບາດນຳ​ພາ​ຂອງ​ພັກ.

- ກ່ຽວ​ກັບ​ການ​ສືບ​ຕໍ່​ຈັດ​ວາງ​ຄືນ​ໃໝ່, ປ່ຽນ​ແປງ​ໃໝ່, ຍົກ​ສູງ​ປະສິດທິ​ຜົນ​ຂອງ​ວິ​ສາ​ຫະກິດ​ແຫ່ງ​ລັດ: ​ເພື່ອ​ເຮັດ​ໃຫ້​ວິ​ສາ​ຫະກິດ​ແຫ່ງ​ລັດ​ເຄື່ອນ​ໄຫວ​ຢ່າງ​ມີ​ປະສິດທິ​ຜົນ​ໃນ​ພື້ນຖານ​ເສດຖະກິດ​ຕະຫຼາດ, ​ເສິມ​ຂະຫຍາຍ​ໄດ້​ບົດບາດ​ຫຼັກ​ແຫຼ່ງ​ໃນ​ຂົງ​ເຂດ​ເສດຖະກິດ​ແຫ່ງ​ລັດ​ນັ້ນ, ການ​ສືບ​ຕໍ່​ຍູ້​​ແຮງ​ການຈັດ​ວາງ​ຄືນ​ໃໝ່, ຫັນ​ເປັນ​ຫຸ້ນ​ສ່ວນ, ຖອນ​ທຶນ​ອອກ​ຈາກ​ວິ​ສາ​ຫະກິດ, ຍົກ​ສູງ​ປະສິດທິ​ຜົນ​ຂອງ​ວິ​ສາ​ຫະກິດ​ແຫ່ງ​ລັດ ​ເປັນ​ໜ້າ​ທີ່​ທີ່​ສຳຄັນ ຮີບ​ດ່ວນ​ທີ່​ສຸດ. ວິ​ສາ​ຫະກິດ​ແຫ່ງ​ລັດລວມສູນ​​ເຂົ້າໃນ​ບັນດາ​ຂົງ​ເຂດທີ່​ສຳຄັນ ທີ່ຈຳ​ເປັນ​ຕ້ອງການ; ​ໃນບັນດາ​ພື້ນ​ທີ່​ທີ່​ສຳຄັນ ​ແລະ ການ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ; ​ໃນ​ບັນດາ​ຂົງ​ເຂດ​ທີ່​ວິ​ສາ​ຫະກິດ​ສັງກັດ​ພາກສ່ວນ​​ເສກຖະກິດ​ອື່ນ ​ບໍ່​ລົງທຶນ.

ຍົດ​ສູງ​ປະສິດທິ​ຜົນ​ການ​ຄຸ້ມ​ຄອງ​ບໍລິຫານ​ວິ​ສາ​ຫະກິດ​ແຫ່ງ​ລັດ, ຕອບ​ສະໜອງ​​ຄວາມຮຽກຮ້ອງ​ຕ້ອງການ​ພຶດຕິ​ກຳ ​ແລະ ມາດຕະຖານ​ສາກົນ; ​ເຄື່ອນ​ໄຫວ​ຕາມ​ກົນ​ໄກ​ຕະຫຼາດ, ​ເປັນ​ເຈົ້າ​ຕົນ​ເອງ, ຮັບຜິດຊອບ​ດ້ວຍ​ຕົນ​ເອງ, ​ແຂ່ງຂັນ​ແບບ​ສະ​ເໝີ​ພາບ; ຮັບປະກັນ​ຄວາມ​ເປີດ​ເຜີຍ ​ໂປ່​ງ​ໃສ ​ແລະ ມີໜ້າ​ທີ່​ອະທິບາຍ​ລາຍ​ງານ. ສືບ​ຕໍ່​ປ່ຽນ​ແປງ​ໃໝ່; ຍົກ​ສູງ​ຄວາມ​ສັກສິດ ປະສິດທິ​ຜົນຂອງ​ການຄຸ້ມ​ຄອງ, ​ກວດກາ, ຕິດຕາມ​ກວດກາ; ບໍ່​ປະ​ໃຫ້​ທຶນ​ ຊັບ​ສິນ​ຂອງ​ລັດ​ຖືກ​ຕົກ​ເຮ່ຍ​ເສຍ​ຫາຍ, ຟຸມ​ເຟືອຍ. ​ແຍກ ​ແລະ ກຳນົດ​ແຈ້ງ​ພາລະ​ບົດບາດ​ຄຸ້ມ​ຄອງ​ລັດ ກັບ ພາລະ​ບົດບາດ​ກຳມະສິດ​ຂອງ​ລັດ; ສ້າງ​ຕັ້ງ​ອົງການ​ສະ​ເພາະ​ກິດ​ໜຶ່ງ​ເປັນ​ຜູ້ຕາງໜ້າ​ເຈົ້າ​ຂອງ​ກຳມະສິດ​ ຕໍ່​ກັບ​ວິ​ສາ​ຫະກິດ​ແຫ່ງ​ລັດ ​ແລະ ຕໍ່​ຈຳນວນ​ທຶນ​ປະກອບ​ຂອງ​ລັດ​ຢູ່​ວິ​ສາ​ຫະກິດ.

ພ້ອມ​ກັນ​ນັ້ນ, ສຸມ​ໃສ່​ແກ້​ໄຂດ້ວຍ​ມາດ​ຕະການ​ຕ່າງໆ​​ໃຫ້​ສຳ​ເລັດຢ່າງ​ຂາດ​ຂັ້ນ ຕໍ່​ບັນດາ​ກຸ່ມ​​ເສດຖະກິດ, ສະຫະບໍ​ລະ​ສັດ, ວິ​ສາ​ຫະກິດ, ບັນດາ​ໂຄງການ, ກິດຈະການ​ລົງທຶນ ​ທີ່​ບໍ່​ມີ​ປະສິດທິ​ຜົນ, ຖືກ​ຂາດທຶນ​ແກ່ຍາວ, ນັບ​ທັງ​ມາດ​ຕະການ​ຍຸບ​ເລີກ, ​ໃຫ້​ລົ້ມ​ລະລາຍ. ​ແກ້​ໄຂ​ຄວາມ​ຜິດພາດ​ຕ່າງໆ​ຢ່າງ​ເດັດດ່ຽວ​ເຊັ່ນ ການລະ​ເມີດ​ກົດໝາຍ, “ຜົນ​ປະ​ໂຫຍ​ດໝູ່​ພວກ”, “ບໍລິສັດ​​ເດີນຫຼັງ​ບ້ານ”, ຫາ​ຜົນ​ປະ​ໂຫຍ​ດສ່ວນ​ຕົວ, ສໍ້​ລາດ​ບັງ​ຫຼວງ, ຟຸມ​ເຟືອຍ. ຜັນ​ຂະຫຍາຍ​ຢ່າງ​ເຂັ້ມ​ງວດ ຄຳ​ສະຫຼຸບ​ຂອງສະຫາຍ​ເລຂາທິການ​ໃຫຍ່, ຫົວໜ້າ​ຄະນະ​ຊີ້​ນຳ​ສູນ​ກາງ​ກ່ຽວ​ກັບ​ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ວ່າ​ດ້ວຍ​ການ​ແກ້​ໄຂ​ບັນດາ​ຄະດີ​ຈຸດ​ໜັກ​ທີ່​ພົວພັນ​ເຖິງ​ກຸ່ມ​ເສດຖະກິດ, ສະຫະ​ບໍລິສັດ​ແຫ່ງ​ລັດ.

- ກ່ຽວ​ກັບ​ການ​ພັດທະນາ​ເສດຖະກິດ​ເອກະ​ຊົນ ​ໃຫ້​ກາຍ​ເປັນ​ກຳລັງ​ໜູນ​ທີ່​ສຳຄັນ​ໜຶ່ງ​ຂອງ​ພື້ນຖານ​ເສດຖະກິດ: ພັກ, ລັດ​ຫວຽດນາມ​ໄດ້​ປະກາດ​ໃຊ້ ​ແລະ ນຳພາ, ຊີ້​ນຳການຈັດ​ຕັ້ງ​ປະຕິບັດ​ຫຼາຍ​ແຜນ​ນະ​ໂຍບາຍ, ນະ​ໂຍບາຍ, ມາດ​ຕະການ​ທີ່​ສຳຄັນ​ກ່ຽວ​ກັບ​ການ​ສົ່ງ​ເສີມ ​ແລະ ສ້າງ​ເງື່ອນ​ໄຂ​ໃຫ້​ເສດຖະກິດ​ເອກະ​ຊົນ​ພັດທະນ. ພາຍຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ຄວາມ​ຮັບ​ຮູ້​ກ່ຽວ​ກັບ​ຖານະ​ທີ່​ຕັ້ງ, ບົດບາດ​ຂອງ​ເສດຖະກິດ​ເອກະ​ຊົນ​ໄດ້​ມີ​ຄວາມກ້າວໜ້າ​ທີ່​ສຳຄັນ. ​ໃນ​ກອງ​ປະຊຸມ​ຄັ້ງ​ນີ້, ສູນ​ກາງ​ກຳນົດ​ແຈ້ງ​ວ່າ ​ເສດຖະກິດ​ເອກະ​ຊົນ ​ແມ່ນ​ກຳລັງ​ໜູນ​ທີ່​ສຳຄັນ​ໜຶ່ງ ​ເພື່ອ​ພັດທະນາ​ເສດຖະກິດ; ສົ່ງ​ເສີມ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ເສດຖະກິດ​ເອກະ​ຊົນ​ຂະຫຍາຍຕົວ​ຢ່າງ​ໄວ​, ໝັ້ນຄົງ​ຢືນ​ຍົງ.

ເສດຖະກິດ​ເອກະ​ຊົນ​ໄດ້​ຂະຫຍາຍຕົວ​ຢູ່​ໃນ​ທຸກຂະ​ແໜງ​ການ, ທຸກ​ຂົງ​ເຂດ​ທີ່​ກົດໝາຍ​ບໍ່​ຫ້າມ. ຊຸກຍູ້​ພັດທະນາ​ທຸກ​ຮູບ​ການ​ຮ່ວມ​ທຸລະ​ກິດ, ທຸກ​ການ​ເຊື່ອມ​ຕໍ່ຕາມ​​ເຄືອ​ຂ່າຍການ​ຜະລິດ, ພວງ​ພະ​ນັງຄຸນຄ່າ​ຕະຫຼາດ ລະ​ຫວ່າງເສດຖະກິດ​ເອກະ​ຊົນ ​ກັບ​ເສດຖະກິດ​ແຫ່ງ​ລັດ, ​ເສດຖະກິດ​ລວມໝູ່ ​ແລະ ວິ​ສາ​ຫະກິດ​ທີ່​ມີ​ທຶນ​ຈາກ​ຕ່າງປະ​ເທດ. ​ເສີມ​ຂະຫຍາຍ​ແລະ​ຍົກ​ສູງ​ປະສິດທິ​ຜົນ​ການ​ເຄື່ອນ​ໄຫວ ຂອງ​ບັນ​ດາ​ວິ​ສາ​ຫະກິດ​ຂະໜາດນ້ອຍ​ແລະ​ຂະ​ໜາດ​ກາງ, ການ​ປ່ຽນ​ແປງ​ໃໝ່​ປະດິດ​ສ້າງ​ ແລະ ​ຂະ​ບວນການ​ລິ​ເລີ່​ມ​ທຸລະ​ກິດ. ອຳນວຍ​ຄວາມ​ສະດວກ​ໃຫ້​ບັນດາ​ຄອບຄົວ​ແລະ​ບຸກຄົນ​ຮ່ວມ​ມື​ນຳ​ກັນ​ຢ່າງ​ສະໝັກ​ໃຈ​ ເພື່ອກໍ່ສ້າງ​ວິ​ສາ​ຫະກິດ ຫຼື​ສ້າງຮູບການຈັດ​ຕັ້ງ​ຮ່ວມມື​ເສດຖະກິດ. ສົ່ງ​ເສີມ​ການ​ສ້າງ​ຕັ້ງ​ບັນດາ​ກຸ່ມເສດຖະກິດ​ເອກະ​ຊົນຮ່ວມ​ກຳມະສິດ ​ແລະ ສົ່ງ​ເສີມ​ເອກະ​ຊົນ​ປະກອບ​ທຶນ​ເຂົ້າ​ໃນ​ບັນດາ​ກຸ່ມ​ເສດຖະກິດ​ແຫ່ງ​ລັດ, ມີ​ຄວາມ​ສາມາດ​ພຽງພໍ​ໃນ​ການ​ເຂົ້າ​ຮ່ວມ​ເຄືອ​ຂ່າຍ​ການ​ຜະລິດ ​ແລະ ພວງ​ພະນັງ​ຄຸນຄ່າ​ລະດັບ​ພາກ​ພື້ນ​ແລະ​ລະດັບ​ໂລກ.

​ເອົາ​ໃຈ​ໃສ່​ອົບຮົມ​ສຶກສາ, ຍົກ​ສູງ​ຄວາມ​ຮັບ​ຮູ້​ການ​ເມືອງ, ຈິດ​ໃຈ​ເພິ່ງ​ຕົນ​ເອງ​ສ້າງ​ຕົນ​ໃຫ້​ເຂັ້ມ​ແຂງ, ນ້ຳ​ໃຈ​ຮັກ​ຊາດ, ຄວາມ​ທະ​ນົງ​ໃຈ ຄວາມ​ນັບຖື​ກຽດ​ສັກ​ສີ​ແຫ່ງ​ຊາດ, ສະໜິດ​ຕິດ​ພັນ​ກັບ​ຜົນ​ປະ​ໂຫຍ​ດຂອງ​ປະ​ເທດ​ແລະພາລະກິດ​ກໍ່ສ້າງ​ສັງຄົມ​ນິຍົມ ຂອງ​ບັນດາ​ເຈົ້າ​ຂອງ​ວິ​ສາ​ຫະກິດ; ພັດທະນາ​ຖັນ​ແຖວ​ນັກທຸລະກິດ​ຫວຽດນາມ​ໃຫ້​ເຕີບ​ໃຫຍ່​ເຂັ້ມ​ແຂງ, ມີ​ສະຕິ​ປະຕິບັດ​ຕາມ​ກົດໝາຍ, ມີ​ຄວາມ​ຮັບຜິດຊອບ​ຕໍ່​ສັງຄົມ ​ແລະມີ​ຄວາມ​ສາມາດບໍລິຫານ​ຈັດການ ຄຸ້ມ​ຄອງ​ດີ; ​ເອົາ​ໃຈ​ໃສ່​ກໍ່ສ້າງ, ຍົກ​ສູງ​ວັດທະນະທຳ​ວິ​ສາ​ຫະກິດ​ແລະ​ຈັນ​ຍາ​ບັນທຸ​ລະ​ກິດ. ພ້ອມ​ກັນ​ນັ້ນ, ​ເພີ່ມ​ທະວີ​ການ​ກວດກາ, ຕິດຕາມ​ກວດກາ, ກວດ​ສອບ, ປະຕິບັດ​ການ​ເປີດ​ເຜີຍ ​ໂປ່​ງ​ໃສ; ກີດ​ກັ້ນ, ຈຳກັດ​ຄວາມ​ຫຍໍ້​ທໍ້, ພິ​ເສດ​ແມ່ນ​ປ້ອງ​ກັນ​ແລະ​ຕ້ານ​ທຸກ​ປະກົດ​ການ​ຂອງ “ລັດທິ​ທຶນ​ນິຍົມ​ເພື່ອນ​ມິດ”, ຂອງ​ການ​ພົວພັນ “ຜົນ​ປະ​ໂຫຍ​ດໝູ່​ພວກ”, “ການ​ແຊກ​ຄຸມ​ນະ​ໂຍບາຍ”, ການ​ແຂ່ງຂັນບໍ່​ຍຸຕິ​ທຳ ​ເພື່ອສະ​ແຫວງຫາ​ຜົນ​ປະ​ໂຫຍ​ດທີ່​ຜິດ​ກົດໝາຍ.

ທີ​ສອງ, ສະ​ເໜີ​ໃຫ້​ບັນດາ​ສະຫາຍ​ຈົ່ງ​ເອົາ​ໃຈ​ໃສ່​ຮັບ​ຟັງບັນດາ​ເນື້ອ​ໃນ​ທີ່​ໄດ້​ເຜີຍ​ແຜ່, ​ເຊື່ອມ​ຊຶມ​ໃນ​ກອງ​ປະຊຸມ ​ແລະ ຄົ້ນຄວ້າ​ເອກະສານ, ສົນທະນາ​ແລກປ່ຽນ, ກຳ​ແໜ້ນ​ບັນດາ​ແນວ​ຄິດ​ຫຼັກ​, ພື້ນຖານຂອງ​ບັນດາ​ມະຕິ ​ເພື່ອ​ຈະ​ສຸມ​ໃສ່​ຊີ້​ນຳ ຜັນ​ຂະຫຍາຍ​ປະຕິບັດ ຢ່າງ​ມີ​ປະສິດທິ​ຜົນ.

​ໃນ​ນັ້ນ ​ເອົາ​ໃຈ​ໃສ່​ບັນດາ​ຈຸດ​ທີ່ໃໝ່, ຫັນ​ເປັນ​ລະອຽດ​ກ່ຽວ​ກັບວັດຖຸ​ປະສົງ, ທັດສະນະ, ​ແນວ​ຄິດ​ຊີ້​ນຳ, ບັນດາ​ເນື້ອ​ໃນ​ຫຼັກ​ແຫຼ່ງ ​ແລະ ໜ້າ​ທີ່ ວິທີ​ແກ້​ໄຂ​ທີ່​ມີ​ລັກສະນະ​ບຸກທະລຸ ​ໃນ​ການ​ຜັນ​ຂະຫຍາຍ​ປະຕິບັດ​ມະຕິ, ປະກອບສ່ວນ​ແກ້​ໄຂ​ຂໍ້​ຄົງ​ຄ້າງຕິດ​ຂັດ​ຕ່າງໆ​ຢ່າງ​ທັນ​ການ, ສືບ​ຕໍ່​ປັບປຸງບູລະນະ​ລະບຽບ​ກົດໝາຍ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ; ​ແກ້​ໄຂ​ຜ່ານ​ຜ່າ​ຈຸດ​ອ່ອນ ຂໍ້​ຈຳກັດ ​ເພື່ອ​ຈັດ​ວາງ​ຄືນ​ໃໝ່, ຍົກ​ສູງ​ປະສິດທິ​ຜົນ​ຂອງ​ວິ​ສາ​ຫະກິດ​ແຫ່ງ​ລັດ ​ແລະ ພັດທະນາ​ເສດຖະກິດ​ເອກະ​ຊົນ​ໃຫ້ກາຍເປັນກຳລັງ​ໜູນ​ທີ່​ສຳຄັນ​ຂອງ​ພື້ນຖານ​ເສດຖະກິດ. ພ້ອມ​ກັນ​ນັ້ນ, ສຸມ​ໃສ່​ຄົ້ນຄວ້າ, ​ເຊື່ອມ​ຊຶມ​ບັນດາ​ເນື້ອ​ໃນ​ທີ່​ພົວພັນ​ໂດຍ​ກົງ​ເຖິງຂົງ​ເຂດ, ຂະ​ແໜງ​ການ​ຂອງ​ຕົນ ​ເພື່ອ​ກວດຄືນ, ດັດ​ແປງ, ປັບປຸງ​ເພີ່ມ​ເຕີມ, ບູລະນະ​ກົດໝາຍ, ກົນ​ໄກ, ນະ​ໂຍບາຍ ​ແນ​ໃສ່​ເສີມ​ຂະຫຍາຍ​ບັນດາ​ຜົນສຳ​ເລັດ​ທີ່​ບັນລຸ​ໄດ້, ​ແກ້​ໄຂ​ຜ່ານ​ຜ່ານ​ຈຸດ​ອ່ອນ, ຂໍ້ຄົງຄ້າງ.

ທີ​ສາມ, ​ໃນ​ທັນທີຫຼັງ​ຈາກກອງ​ປະຊຸມ​ນີ້, ສະ​ເໜີ​ໃຫ້​ບັນດາ​ສະຫາຍອີງ​ໃສ່​ຄວາມ​ຮັບຜິດຊອບ​ແລະ​ພາລະ​ໜ້າ​ທີ່​ທີ່​ໄດ້​ຮັບ​ມອບ​ໝາຍ, ຊີ້​ນຳ​ການ​ກໍ່ສ້າງ​ແລະ​ຜັນ​ຂະຫຍາຍ​ປະຕິບັດ ​ໂຄງການ​ປະຕິບັດ​ງານ​ຜັນ​ຂະຫຍາຍ​ບັນດາ​ມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 5 ສະ​ໄໝ​ທີ XII ຂອງ​ພັກ ​ຢ່າງ​ມີ​ປະສິດທິ​ຜົນ. ຕິດ​ກັບ​ສະພາບ​ຕົວ​ຈິງ​ຂອງ​ຂະ​ແໜງ​ການ, ຂົງ​ເຂດ, ສຳນັກງານ​ອົງການ, ກົມ​ກອງ ທີ່​ເປັນ​ພື້ນຖານ ​ເພື່ອກໍ່ສ້າງ​ໂຄງການ​ປະຕິບັດ​ງານ, ​ແຜນ​ດຳ​ເນີນ​ງານ​ອັນ​ລະອຽດ​ ຂອງ​ແຕ່ລະ​ຄະນະ​ພັກ, ​ແຕ່​ລະ​ສຳນັກງານ​ອົງການ. ສະ​ເໜີ​ທິດ​ທາງ, ຈຸດປະສົງ​ລະດັບ​ຄາດໝາຍ, ວິທີ​ແກ້​ໄຂ​ໃນ​ບັນດາ​ຂົງ​ເຂດ, ໜ້າ​ທີ່​ວຽກ​ງານ​ທີ່​ໄດ້​ຮັບ​ມອບ​ໝາຍ. ພ້ອມ​ກັນ​ນັ້ນ, ສືບ​ຕໍ່​ຄົ້ນຄວ້າ, ສະ​ເໜີ​ແນະ ​ແລະ ສຸມ​ໃສ່​ແກ້​ໄຂ​ຄວາມ​ຫຍຸ້ງຍາກ, ຂໍ້ຄົງຄ້າງ​ຕິດ​ຂັດ​ໃນ​ແຕ່ລະ​ຂົງ​ເຂດ, ຂະ​ແໜງ​ການ, ສຳນັກງານ​ອົງການ, ກົມ​ກອງ ​ເພື່ອ​ໃຫ້​ບັນດາທັດສະນະ, ທິດທາງ​ຊີ້​ນຳ, ​ເນື້ອ​ໃນອັນ​ພື້ນຖານ​ຂອງ​ບັນດາ​ມະຕິນັ້ນ ​ໄດ້​ຮັບ​ການ​ໝູນ​ໃຊ້​ແລະ​ເສີມ​ຂະຫຍາຍ​ປະສິດທິ​ຜົນ​ໃນ​ຊີ​ວິດຕົວ​ຈິ​ງ.

ທີ​ສີ່, ການ​ປະຕິບັດ​ບັນດາ​ມະຕິ​ຕ້ອງ​ຮັບປະກັນ​ຄວາມ​ຄົບ​ຊຸດ, ​ເປັນ​ເອກະສັນ​ກັບ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ​ແລະ ບັນດາ​ມະຕິ​ອື່ນ​ຂອງສູນ​ກາງ, ຫັນ​ເປັນ​ລະອຽດ​ເປັນ​ບັນດາ​ມະຕິ​ຂອງ​ສະພາ​ແຫ່ງ​ຊາດ, ຂອງ​ລັດຖະບານ, ຂອງ​ບັນດາ​ຊັ້ນ​ຂັ້ນ, ຂະ​ແໜງການ, ຂອງ​ບັນດາທ້ອງ​ຖິ່ນ ​ເພື່ອ​ຍູ້​ແຮງ​ການພັດທະນາ​ເສດຖະກິດ-ສັງ​ຄົມ, ຮັກສາ​ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ, ​ເປີດ​ກວ້າງ​ການ​ພົວພັນ​ຕ່າງປະ​ເທດ; ​ເພີ່ມ​ທະວີ​ແລະ​ປັບປຸງ​ຄວາມ​ເຊື່ອ​ຖື​ໃນ​ພັກ, ​ໃນ​ປະຊາຊົນ. ອົງຄະ​ນະ​ພັກ, ການຈັດ​ຕັ້ງ​ພັກ ​ແລະ ຜູ້ນຳ​ໜ້າ​ຂັ້ນ​ຕ່າງໆ ຕ້ອງ​ຂະຫຍັນ​ຂັນ​ແຂງ, ສາມັກຄີ, ​ເຊີດ​ຊູ​ກົດລະບຽບ​ວິ​ໄນຂອງ​ພັກ, ກົດໝາຍ​ຂອງ​ລັດ, ສົມທົບ​ກັບ​ການ​ກວດກາ, ຕິດຕາມ​ກວດກາ, ກວດ​ສອບ​ ແລະ ປະຕິບັດ​ວິ​ໄນ​ແກ້​ໄຂ​ຄວາມ​ຜິດພາດ; ​ເປັນ​ເຈົ້າ​ການ​ໃນ​ການ​ໂຄສະນາ​ມະຕິ​ໃຫ້​ພະນັກງານ, ສະມາຊິກ​ພັກ, ຂ້າ​ລັດຖະການ, ​ເຈົ້າ​ໜ້າ​ທີ່, ຜູ້​ອອກ​ແຮງ​ງານ ​ແລະ ປະຊາຊົນ; ​ເອົາ​ໃຈ​ໃສ່​ເສີມ​ຂະຫຍາຍ​ບົດບາດ​ຂອງການ​ສື່​ຂ່າວ​ໃນ​ຂະ​ບວນວິວັດ​ການ​ປະຕິບັດ.

​ເພື່ອ​ປະຕິບັດບັນດາ​ມະຕິ​ຂອງ​ສູນ​ກາງຢ່າງ​ມີປະສິດທິ​ຜົນ ​ແມ່ນ​ຄວາມ​ຮັບ​ຮູ້​ຕ້ອງ​ຮ​ອບຄອບ​ເລິກ​ເຊິ່ງ, ​ແນວຄິດ​ຕ້ອງລຸ​ລ່ວງ, ຄວາມ​ຕັດສິນ​ໃຈ​ຕ້ອງ​​​ເດັດຂາດ, ວິທີ​ຕ້ອງ​ຖືກຕ້ອງ, ການ​ກະທຳ​ຕ້ອງ​ຂັນ​ແຂງ, ການ​ຍ້ອງຍໍ​ຊົມ​ເຊີຍທັນ​ການ, ວິ​ໄນ​ຕ້ອງ​ເຂັ້ມ​ງວດ. ພິ​​ເສດ​ແມ່ນ​ ຂອດ​ການຈັດ​ຕັ້ງປະຕິບັດ​ຂອງ​ຄະນະ​ພັກ, ອຳນາດ​ການ​ປົກຄອງຂັ້ນ​ຕ່າງໆຕ້ອງ​ເຂັ້ມ​ງວດ. ກົມ​ການ​ເມືອງ​ເຊື່ອ​ໝັ້ນ​ວ່າ, ດ້ວຍ​ຄວາມ​ຕັດສິນ​ໃຈ​ການ​ເມືອງ​ສູງ​ທີ່​ສຸດ​ຂອງ​ທົ່ວ​ພັກ, ຄວາມ​ເຫັນ​ດີ​ເຫັນ​ພ້ອມ ​ແລະ ສະໜັບ​ສະໜູ​ນຢ່າງ​ແຂງ​ແຮງ ​ຂອງ​ປວງ​ຊົນ, ການມີ​ສ່ວນ​ຮ່ວມ​ຂອງ​ທົ່ວ​ທັງ​ລະບົບ​ການ​ເມືອງ, ​ແນ່ນອນ​ວ່າ ຫວຽດນາມ​ຈະ​ສືບ​ຕໍ່​ປະຕິບັດ​ການ​ປ່ຽນ​ແປງ​ໃໝ່, ​ເຊື່ອມ​ໂຍງ​ສາກົນ ​ແລະ ພັດທະນາປະ​ເທດ​ຢ່າງ​ສຳ​ເລັດ​ຜົນ, ນຳ​ເອົາ​ບັນດາ​ແຜນ​ນະ​ໂຍບາຍ ທັດສະນະ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ ​ເຂົ້າ​ໃນ​ຊີວິດ​ຕົວ​ຈິງ, ​ເພື່ອ​ເປົ້າ​ໝາຍ​ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ, ມີ​ປະຊາທິປະ​ໄຕ, ຍຸຕິ​ທຳ, ສີວິ​ໄລ ​ແລະ ສ້າງສາ​ປະ​ເທດ​ເຮົາ​ໃຫ້​ໃຫຍ່​ໂຕ​ໂອ້​ຖົງ​ກວ່າ, ສວຍ​ງາມ​ກວ່າ​ເກົ່າ ຄື​ຄຳ​ຕັກ​ເຕືອນ​ສັ່ງສອນຂອງທ່ານ​ປະທານ ​ໂຮ່ຈີ​ມິນ ທີ່​ເຄົາລົບ​ຮັກ./.

​ໂດຍ ຫງວຽນ​ຊວັນ​ຝຸກ,
ກຳມະການ​ກົມ​ການ​ເມືອງ,
ນາຍົກ​ລັດຖະມົນຕີ​ແຫ່ງ​ ສາທາລະນະ​ລັດ​ສັງຄົມ​ນິຍົມ ຫວຽດນາມ

---------------------------------

* ຫົວ​ຂໍ້​ໂດຍ​ວາລະສານ​ກອມ​ມູນິດ​ເປັນ​ຜູ້​ແຕ່ງ.

ບົດ​ນີ້​ໄດ້​ລົວ​ພິມ​ໃນ​ວາລະສານ​ກອມ​ມູນິດ ສະບັດ​ທີ 897 (​ເດືອນ​ກໍລະກົດ 2017).

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ