ວັນຈັນ, 23/10/2017
ເຊີດຊູຊົມເຊີຍ ຈົດຈຳບຸນຄຸນ ຂອງນັກຮົບຜູ້ເສຍອົງຄະ ນັກຮົບຜູ້ເສຍຊີວິດເພື່ອຊາດ ໄວ້ຢ່າງຕະຫຼອດການ, ຕັ້ງໜ້າສືບທອດ ແລະ ປະຕິບັດພາລະກິດການປະຕິວັດ ໃຫ້ສຳເລັດມີໄຊ ເພື່ອສົມກັບຄວາມເສຍສະຫຼະ, ການອຸທິດທີ່ໃຫຍ່ຫຼວງ ຂອງບັນດານັກຮົບຜູ້ເສຍອົງຄະ ນັກຮົບວິລະຊົນທີ່ເສຍສະຫຼະຊີວິດເພື່ອຊາດ ແລະ ຜູ້ທີ່ມີຄຸນງາມຄວາມດີຕໍ່ການປະຕິວັດ*
16/9/2017 11:52' ສົ່ງ ພິມ
ທ່ານເລຂາທິການໃຫຍ່ ຫງວຽນຝູຈ້ອງ ມອບຊໍ່ດອກໄມ້ ໃຫ້ແມ່ຫວຽດນາມວິລະຊົນ, ນັກຮົບຜູ້ເສຍອົງຄະ ແລະ ຜູ້ທີ່ມີຄຸນງາມຄວາມດີຕໍ່ປະເທດຊາດ. (ພາບ: TTXVN)

ມື້­ນີ້, ດ້ວຍ​ຄວາມ​ຮູ້­ສຶກ ແລະ ຄວາມ​ເອກ­ອ້າງ​ທະ​ນົງ​ໃຈ​ ຂອງ​ທົ່ວ​ປວງ​ຊົນ​ທັງ​ຊາດ, ຄະ­ນະບໍ­ລິ­ຫານງານ​ສູນ​ກາງ ພັກ​ກອມ​ມູ​ນິດຫວຽດ­ນາມ, ສະ­ພາ​ແຫ່ງ​ຊາດ, ປະ­ທານ​ປະ­ເທດ, ລັດ­ຖະ­ບານ​ແຫ່ງ ສສ. ​ຫວຽດ­ນາມ, ຄະ­ນະ​ກຳ­ມະ­ການ​ສູນ​ກາງ ​ແນວ​ໂຮມ​ປະ­ເທດ​ຊາດ ​ຫວຽດ­ນາມ ແລະ ນະ­ຄອນ​ຮ່າ​ໂນ້ຍ ​ໄດ້ຈັດ​ຕັ້ງ​ພິ­ທີ​ສະເຫຼີມສະຫຼອງ​ ວັນ​ນັກ­ຮົບ​ຜູ້​ເສຍ​ອົງ­ຄະ - ນັກ­ຮົບ​ຜູ້​ເສຍ​ຊີ­ວິດ​ເພື່ອ​ຊາດ ຄົບ­ຮອບ 70 ປີ (27 ກໍລະກົດ 1947 – 27 ກໍ­ລະ­ກົດ 2017) ຂຶ້ນ​ຢ່າງ​ສົມ​ກຽດ.

ຕາງ­ໜ້າ​ໃຫ້​ພັກແລະລັດ, ຂ້າ­ພະ­ເຈົ້າຂໍ​ຝາກ​ຄຳ​ຢ້ຽມ­ຢາມ​ຖາມ​ຂ່າວ ​ດ້ວຍ​ຄວາມ​ຈິງ​ໃຈ, ຄວາມ​ຮັກແພງ, ຮູ້​ບຸນ­ຄຸນ​ຢ່າງ​ເລິກ­ເຊິ່ງ​ ມາຍັງ​ບັນ­ດາ​ນັກ​ປະ­ຕິ­ວັດ​ອາວຸ​ໂສ, ບັນ­ດາ​ແມ່​ຫວຽດ­ນາມ​ວິ­ລະ​ຊົນ, ບັນ­ດາ​ສະ­ຫາຍ​ນັກ­ຮົບ​ຜູ້​ເສຍ​ອົງ­ຄະ ນັກ­ຮົບ​ທີ່​ເຈັບ​ປ່ວຍ, ຍາດ​ພີ່­ນ້ອງ​ຂອງ​ນັກ­ຮົບ​ຜູ້​ເສຍ​ຊີ­ວິດ​ເພື່ອ​ຊາດ, ຜູ້​ທີ່​ມີ​ຄຸນງາມ​ຄວາມ​ດີ​ຕໍ່​ການ​ປະຕິວັດ ​​ໃນ​ທົ່ວ​ປະ​ເທດ.

ໃນ​ເວ­ລານາທີ​ທີ່​ສຳຄັນ​ນີ້, ດ້ວຍ​ຄວາມ​ນັບ­ຖື ແລະ ຮູ້​ບຸນ­ຄຸນ​ທີ່​ບໍ່​ມີ​ຂອບ​ເຂດ, ພວກ​ເຮົາ​ຂໍ​ກົ້ມ​ຫົວ​ດ້ວຍ​ຄວາມ​ເຄົາ­ລົບ​ນັບ­ຖື​ຢ່າງ​ສູງ ເພື່ອ​ລະ­ນຶກ​ເຖິງ​ທ່ານ​ປະ­ທານ​ໂຮ່​ຈີ​ມິນ ​ຜູ້​ຍິ່ງ​ໃຫຍ່, ບັນ­ດາ​​ນັກ​ປະ­ຕິ­ວັດຮຸ່ນ​ກ່ອນ, ບັນດາ​ນັກຮົບ​ວິ­ລະ​ຊົນ​ຜູ້​​ທີ່​ໄດ້​ເສຍ­ຊີວິດ​ເພື່ອ​ຊາດ, ເພື່ອ​ປະ­ຊາ­ຊົນ​ຢ່າງ​ອົງອາດ​ກ້າ­ຫານ.

ໃນ​ຕະ­ຫຼອດ​ເວ­ລາ​ຫຼາຍ​ພັນ​ປີ​ແຫ່ງ​ການ​ສ້າງ­ສາ ແລະ ປົກ​ປັກ​ຮັກ­ສາ​ປະ­ເທດຊາດ​ບ້ານ​ເມືອງ, ປະຊາຊົນຫວຽດນາມ​ ດ້ວຍ​ຈິດ­ໃຈ​ຮັກ​ຊາດ​ອັນ​ແຮງ​ກ້າ, ຄວາມ​ມຸ່ງ​ມາດ​ປາດ​ຖະ​ໜາ​ຕໍ່​ຄວາມເປັນ​ເອ­ກະ­ລາດ ເປັນ​ເຈົ້າ​​ຕົນ​ເອງ, ໄດ້​ມີ​ຄວາມ​ສາ­ມັກ­ຄີ​ເປັນ​ຈິດ​ໜຶ່ງ​ໃຈ​ດຽວ, ບໍ່​ຫວັ່ນ​ໃຈ​ຕໍ່​ຄວາມ​ຫຍຸ້ງ­ຍາກ​ລຳ­ບາກ ຄວາມ​ເສຍ­ສະ­ຫຼະ, ຕໍ່ສູ້​ຕ້ານ​ພວກ​ສັດ­ຕູ​ຜູ້​ຮູກ​ຮານ, ປົກ​ປັກ​ຮັກ­ສາ​ຄວາມ​ເປັນ​ເອ­ກະ­ລາດ, ອິດ­ສະ­ຫຼະ­ພາບ, ເອ­ກະ​ພາບ ແລະ ຜືນ​ແຜ່ນດິນ​ອັນ​ຄົບ​ຖ້ວນ​ອັນ​ສັກ­ສິດ ​ຂອງ​ປະ­ເທດ​ຊາດ ​ໄວ້​ຢ່າງ​ໝັ້ນ­ຄົງ.

ໃນ​ການ​ຕໍ່­ສູ້​ເພື່ອ​ຄວາມ​ເປັນ​ເອ­ກະ­ລາດ, ອິດ­ສະ­ຫຼະ­ພາບ ແລະ ອະນາ​ຄົດ​ອັນ​ສົດ­ໃສ​ຂອງ​ປະ­ເທດ, ເພື່ອ​ຊີວິດ​ການ​ເປັນ​ຢູ່​ທີ່ມີ​ຄວາມ​ສະ­ຫງົບ, ມີ​ຄວາມ​ຜາ​ສຸກ​ຂອງ​ປະ­ຊາ­ຊົນ, ລູກ​ຫຼານ​ທີ່​ດີ­ເດັ່ນ​ຂອງ​ຊາດ​ຫຼາຍ​ລ້ານ​ຄົນ​ ໄດ້​ອຸ­ທິດ​​ໄວ​ອາ­ຍຸ​ໜຸ່ນ​ນ້ອຍ, ກຽມ­ພ້ອມ​ສະ­ຫຼະຊີວິດ​ເພື່ອ​ຊາດ, ຕໍ່­ສູ້​ຢ່າງ​ອົງ­ອາດ​ກ້າ​ຫານ, ຍອມເສຍ­ສະ­ຫຼະຊີວິດ ຫຼືຍອມ​ຮັບຄວາມພິການ​ຕະ­ຫຼອດ​ຊີ­ວິດ. ເຫຼືອດ​ແດງ ແລະ ຄວາມ​ເສຍ­ສະ­ຫຼະ​ຂອງ​ບັນ­ດາ​ນັກ­ຮົບ​ວິ­ລະ​ຊົນ​ຜູ້​ທີ່​ເສຍ​ຊີ­ວິດ​ເພື່ອ​ຊາດ​ ໄດ້​ຕົບ​ແຕ່ງ​ຄັນ​ທຸງ​ປະ­ຕິ­ວັດ​ອັນ​ສະ­ຫງ່າ​ລາ­ສີ, ເພື່ອ​ໃຫ້​ປະ­ເທດຫວຽດ­ນາມ​ເກີດ​ດອກ​ເອ­ກະ­ລາດ, ອອກ​ຜົນ​ອິດສະ­ຫຼະ­ພາບ. ຍາດ­ຕິ​ພີ່­ນ້ອງ​ຂອງ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ - ຜູ້​ເປັນ​ປູ່ຍ່າ, ພໍ່​ແມ່, ເມຍ, ຜົວ, ລູກ, ຫຼານ, ອ້າຍເອື້ອຍ​ນ້ອງ ​ບໍ່​ມີ​ເວ­ລາ​ໃດ​ທີ່ຈະ​ໄດ້​ພົບ​ໜ້າຜູ້​ທີ່​ຮັກ­ແພງ​ທີ່​ສຸດ​ຂອງ​ຕົນ​ເອງ​ຄືນ­ໃໝ່​. ບັນ­ດາ​ນັກ­ຮົບ​ວິ­ລະ​ຊົນ​ຜູ້​ທີ່​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ບັນ­ດາ​ນັກ­ຮົບ​ຜູ້​ເສຍ​ອົງ­ຄະ ໄດ້ “ເຮັດ​ໃຫ້​ຊາດ​ຫວຽດ­ນາມ​ມີ​ຄວາມ​ສະຫງ່າ​ຜ່າ­ເຜີຍ ມີ​ຊື່​ສຽງ​ໂດ່ງ​ດັງ, ເຮັດ​ໃຫ້​ເຊື້ອ­ສາຍ​ມີ​ກຽດ​ອັນ​ສະ­ຫງ່າ”. ຊື່​ສຽງ​ດີ​ຂອງ​ບັນ­ດາ​ສະ­ຫາຍ​ນັ້ນ​ຈະ​ໄດ້​ສືບ​ສາຍ​ດ້ວຍ​ປະຫວັດສາດ​ອັນ​ຂຽວ​ສົດ​ຊົ່ວ​ນິ­ລັນ­ດອນ. ພວກເພີ່ນ​ໄດ້​ສູ້​ຮົບ, ເສຍສະຫຼະ​ເພື່ອ​​ໃຫ້ປະ­ເທດ​ຊາດ​ໄດ້​ເປັນ​ເອ­ກະ­ລາດ, ອິດ­ສະ­ຫຼະ­ພາບ, ເອ­ກະ​ພາບ ແລະ ຊາດ​ເຮົາ​ໄດ້​​ຍືນ​ຍົງ​ຄົງ​ຕົວ​ຕະ­ຫຼອດ​ກາ­ລະ​ນານ. ຈິດໃຈອະມະຕະ, ແບບ­ຢ່າງ​ອັນ​ໃສ​ແຈ້ງ​ຂອງພວກ​ເພີ່ນ​ ຈະຍືນ​ຍົງ​ຄົງ​ຕົວ​ກັບ​ປະ­ເທດ​ຊາດ​ບ້ານ​ເມືອງຫວຽດ­ນາມ ​ຕະ­ຫຼອດ​ກາ­ລະ​ນານ. ພັກ, ລັດ ແລະ ປະ­ຊາ­ຊົນ​​ເຮົາ ຈະ​ຈາລຶກ​ບຸນ­ຄຸນ​ຂອງ​ນັກຮົບ​ຜູ້​ເສຍ​ອົງຄະ ນັກຮົບ​ວິລະ​ຊົນ​ຜູ້​ເສຍ​ສະລະ​ຊີວິ​ດເພື່ອ​ຊາດ​ໄວ້​ຊົ່ວກາ­ລະ​ນານ, ຮູ້­ສຶກ​ມີ​ຄວາມ​ເອກ­ອ້າງ​ທະ​ນົງ​ໃຈ, ຈະ​ສະ­ໝັກ​ໃຈ​ສືບ​ທອດ ແລະ  ປະ­ຕິ­ບັດ​ພາ­ລະ­ກິດ​ການ​ປະຕິວັດ​ ໃຫ້​ສຳ­ເລັດມີ​ໄຊ ເພື່ອ​ສົມ​ກັບ​ຄວາມ​ເສຍ​ລະ​ຫຼະ, ການ​ອຸ­ທິດ​ອັນ​ຍິ່ງ​ໃຫຍ່​ ຂອງ​ບັນ­ດາ​ນັກ​ປະ­ຕິ­ວັດ​ຮຸ່ນ​ກ່ອນ, ນັກ­ຮົບ​ວິ­ລະ​ຊົນ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ນັກ­ຮົບ​ຜູ້​ເສຍ​ອົງ­ຄະ, ພໍ່​ແມ່​ປະຊາ­ຊົນ, ນັກ­ຮົບ​ທຸກ​ຄົນ​ໃນ​ທົ່ວ​ປະ­ເທດ.

“ດື່ມ­ນ້ຳ​ຈື່​ໄວ້​ວ່າ​ແຫຼ່ງ”, “ກິນ​ໝາກ​ໄມ້​ຈົ່ງ​ຮູ້​ບຸນ­ຄຸນ​ຜູ້ປູກ” ນີ້​ແມ່ນ​ຫຼັກ​ທຳທີ່​ເປັນ​ມູນ­ເຊື້ອ​ມີ​ມາ​ແຕ່​ດົນ​ນານ​ ຂອງ​ຊາດ​ຫວຽດ­ນາມ. ເຊື່ອມ​ຊຶມ​ຫຼັກ​ທຳ​ອັນ​ດີ­ງາມ​ດັ່ງ­ກ່າວ​ນັ້ນ ແລະ ເຂົ້າ­ໃຈ​ຢ່າງ​ເລິກ­ເຊິ່ງ ກ່ຽວ​ກັບ​ຄຸນ­ຄ່າ​ຂອງ​ຄວາມ​ເສຍ­ສະ­ຫຼະ, ຄວາມ​ອຸ­ທິດ​ອັນ​ໃຫຍ່​ຫຼວງ​ ຂອງ​ບັນ­ດາ​ນັກ­ຮົບ​ວິ­ລະ​ຊົນ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ນັກ­ຮົບ​ຜູ້​ເສຍ​ອົງ­ຄະ ຕໍ່​ປະ­ເທດຊາດ, ເວ­ລາ​ຍັງ​ມີຊີ­ວິດ​ຢູ່ ປະ­ທານ​ໂຮ່​ຈິ​ມິນ ກໍ່​ໄດ້​ມີ​ຄວາມ​ເອົາ­ໃຈ­ໃສ່​ແບບ​ພິ­ເສດ ​ເຖິງ​ວຽກ​ງານ​ເບິ່ງແຍງ​ດູ​ແລ​ນັກ­ຮົບ​ຜູ້​ເສຍ​ອົງ­ຄະ, ຄອບ­ຄົວ​ຂອງ​ຜູ້​ເສຍ​ຊີ­ວິດ​ເພື່ອ​ຊາດ. ໃນ​ປີ 1946, ເມື່ອ​ປະ­ເທດ​ຫາ­ກໍ່​ຍາດ​ໄດ້​ເອ­ກະ­ລາດ, ເພີ່ນ​ໄດ້​ອອກ “ປະ­ກາດ​ກ່ຽວ​ກັບ​ການ​ຮັບ​ລູກ​ຂອງ​ຜູ້​ເສຍ​ຊີ­ວິດ​ເພື່ອ​ຊາດ​ ເປັນ​ລູ­ກລ້ຽງ” ດ້ວຍ​ຄຳ​ເວົ້າທີ່ງ່າຍ­ດາຍ​ ແຕ່​ມີ​ຄວາມ​ຈິງ​ໃຈ​ ເຮັດ​ໃຫ້​ມີ​ຄວາມ​ສະ­ເທືອນ​ໃຈ​ຢ່າງ​ແຮງ: “ເພື່ອ​ຢາກ​ໄດ້​ຕາງໜ້າ​ໃຫ້​ປະ­ເທດ​ຊາດ, ປະ­ຊາ­ຊົນ​ທັງ​ຊາດ ແລະ ລັດ­ຖະ­ບານ ສະ​ແດງ​ຄວາມຂອບ​ອົກ​ຂອບ­ໃຈ ​ຕໍ່​ບັນ­ດາ​ນັກ­ຮົບ​ຜູ້​ທີ່​ໄດ້​ເສຍສະຫຼະ​ຊີ­ວິດ​ເພື່ອຄວາມ​ເປັນ​ອິດ­ສະ­ຫຼະ­ພາບ, ເອ­ກະ­ລາດ ແລະ ເອ­ກະ​ພາບ ​ຂອງ​ປະ­ເທດ​ຕົນ​ເອງ, ​ໃນ​ໄລຍະ​ການ​ປະ­ຕິ­ວັດ ຫຼື​ໃນໄລ­ຍະ​ການ​ຕໍ່­ຕ້ານ. ຂ້າ­ພະ­ເຈົ້າ​ຂໍ​ຝາກ​ຄວາມ​ຢ້ຽມ­ຢາມ​ຖາມ​ຂ່າວ​ອັນ​ສະ­ໜິດ­ສະ­ໜົມ ແລະ ຮັກ­ແພງ ​ມາ​ຍັງ​ຄອບຄົວ​ ບັນ­ດາ​ນັກ­ຮົບ​ຜູ້​ເສຍ​ຊີ­ວິດ​ເພື່ອ​ຊາດ, ແລະ ຂ້າ­ພະ­ເຈົ້າ​ຂໍ​ຮັບ​ເອົາ ​ລູກ​ຂອງ​ບັນດາ​ນັກ­ຮົບ​ຜູ້​ເສຍ​ຊີ­ວິດ​ເພື່ອ​ຊາດ​ນັ້ນ ເປັນ​ລູ­ກລ້ຽງ​ຂອງ​ຕົນ​ເອງ”(1).

ປີ 1947, ໃນ​ຂະ­ນະ​ການ​ຕໍ່­ສູ້​ຕ້ານ​ພວກ​ລ່າ​ເມືອງ​ຂຶ້ນ ຝຣັ່ງ ຜູ້​ຮູກ​ຮານ​ ກຳ­ລັງ​ຢູ່​ໃນ​ໄລ­ຍະ​ຫຍຸ້ງ­ຍາກ ດຸເດືອດ, ທ່ານປະ­ທານ ໂຮ່​ຈີ​ມິນ ໄດ້​ອອກ​ຄຳ​ສັ່ງ​ກ່ຽວ​ກັບການ​ເລືອກ​ເອົາ​ວັນໜຶ່ງໃນ​ປີ ​​ເປັນ “ວັນ​ນັກ­ຮົບ​ຜູ້​ເສຍ​ອົງຄະ” ເພື່ອ​ສະ­ແດງ​ຄວາມ​ຮັກ­ແພງທີ່​ສະ­ໜິດ­ສະ­ໜົມ, ຄວາມ​ຮູ້​ບຸນ­ຄຸນ​ອັນ​ເລິກ­ເຊິ່ງ​ ຕໍ່​ບັນ­ດາ​ຜູ້​ທີ່​ບໍ່​ເສຍ­ດາຍ​ເລືອດ​ເນື້ອ​ເຫື່ອ​ແຮງ, ​ໄດ້​ອຸ­ທິດ​ຄວາມ​ສາ­ມາດທັງໝົດ​ຂອງ​ຕົນ ໃຫ້​ແກ່​ປະ­ເທດ​ຊາດ. ໂດຍ​ໄດ້​ຮັບ​ຄວາມ​ເອົາໃຈໃສ່​ຊີ້​ນຳ​​ໂດຍ​ກົງ ​ຂອງທ່ານ​ປະທານ​ໂຮ​ຈີ​ມິນ, ໃນ​ວັນ​ທີ 27 ກໍ­ລະ­ກົດ 1947, ຢູ່ທີ່ເມືອງດ້າຍ​ຕື່ ແຂວງຖາ​ຍງວ​ຽນ, ໄດ້​ມີ​​ການຊຸມ​ນຸມ​ມິດ​ຕິງ​ໃຫຍ່​ ເພື່ອ​ຊົມ​ເຊີຍ​ການ​ກໍ່​ຕັ້ງ ​ວັນ​ນັກ­ຮົບ​ຜູ້​ເສຍ​ອົງ­ຄະ​ໃນ​ທົ່ວ​ປະ­ເທດ​. ຈາກ​ນັ້ນ, ວັນ​ທີ 27 ກໍລະ­ກົດ ໃນ​ແຕ່​ລະ​ປີ ​ໄດ້​ກາຍ­ເປັນ​ວັນ​ລະນຶກ​ທີ່​ສັກກະ​ລະ​ບູຊາ ​ແລະ ມີ​ລັກ­ສະ­ນະ​ມະ­ນຸດ​ອະ­ລິ­ຍະ​ທຳ ຂອງຫວຽດນາມ, ເປັນ​ໂອກາດ​ເພື່ອ​ໃຫ້​ທົ່ວ​ພັກ, ທົ່ວ​ປວງ​ຊົນ ແລະ ທົ່ວ​ກອງ­ທັບ​ເຮົາ ​ຄິດ​ຮອດ​ຄິດ​ເຖິງ​ດ້ວຍ​ຄວາມ​ເຄົາລົບ ແລະ ຮູ້​ບຸນຄຸນຢ່າງ​ເລິ​ກເຊິ່ງ ຕໍ່​ບັນ­ດາ​ນັກ­ຮົບ​ວິ­ລະ​ຊົນ ທີ່ໄດ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ນັກ­ຮົບ​ຜູ້​ເສຍ​ອົງຄະ, ນັກ­ຮົບ​ທີ່​ເຈັບປ່ວຍ, ຄອບ­ຄົວນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ ແລະ ຜູ້​ທີ່​ມີ​ຄຸນ​ງານ​ຄວາມ​ດີ​ຕໍ່​ການ​ປະຕິວັດ.

ໃນ 70 ​ປີ​ທີ່​ຜ່ານ​ມາ, ເປັນ­ຕົ້ນ​ແມ່ນ​ໃນ 30 ກ່າວ​ປີ​ແຫ່ງ​ການ​ປ່ຽນ­ແປງ​ໃໝ່, ພັກ ລັດຫວຽດ­ນາມ ຍາມ​ໄດ​ກໍ່​ມີ​ຄວາມ​ເອົາ­ໃຈ­ໃສ່​​ນຳ­ພາ ຊີ້​ນຳ​ ເຮັດ​ໃຫ້​ໄດ້​​ເປັນ​ຢ່າງດີ ​ວຽກ​ງານນັກ­ຮົບ​ເສຍ​ອົງຄະ, ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ຜູ້ທິີ່ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ ແລະ ຈັດ​ຕັ້ງ​ການ​ຂົນຂວາຍ​ ໃຫ້​ທົ່ວ​ປວງ​ຊົນ​ເຂົ້າ​ຮ່ວມຢ່າງຕັ້ງໜ້າ​​​ ໃນຂະ​ບວນ​ການ “ຕອບ​ບຸນ​ແທນ​ຄຸນ”, “ທົ່ວ​ປວງ​ຊົນ​ເບິ່ງ­ແຍງ​ດູ​ແລ ​ຄອບ­ຄົວ​ນັກ­ຮົບ​ເສຍ​ອົງຄະ, ນັກ­ຮົບ​ຜູ້​ເສຍສະຫຼະ​ຊີ­ວິດ​ເພື່ອ​ຊາດ, ຜູ້ທິີ່ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ”. ​ແຜນ​ນະ­ໂຍ­ບາຍ​ຂອງ​ພັກ, ນະໂຍບາຍ ກົດໝາຍ​ຂອງ​ລັດ​ ກ່ຽວ​ກັບ​ການ​ປະ­ພຶດ​ແບບ​ພິ­ເສດ​ສຳ­ລັບຜູ້​ທີ່​ມີ​ຄຸນງາມ­ຄວາມ­ດີ​ຕໍ່​ການ​ປະ­ຕິ­ວັດ​ ​ໄດ້​ຮັບ​ການປະ­ກາດ​ໃຊ້ ​ເປັນ​ຈຳ­ນວນ​ຫຼາຍ​ສະ­ບັບ; ເປົ້າ​ໝາຍ​ທີ່​ໄດ້ຮັບ​ນະ­ໂຍ­ບາຍ​ປະ­ພຶດ​ແບບ​ພິ­ເສດ ​ໄດ້​ເປີດ​ກວ້າງ, ບັນດາ​ລະ­ບອບ​ປະພຶດ​ແບບ​ພິ­ເສດ ​ກໍ່​ໄດ້​ຮັບການປັບ­ປຸງ ບູ​ລະ​ນະ​ເທື່ອ​ລະ​ກ້າວ, ​ສະ­ແດງ​ໃຫ້​ເຫັນ​ເຖິງ​ຄວາມ​ເຄົາ­ລົບ​ນັບ­ຖື, ຮູ້​ບຸນ­ຄຸນ, ການ​ເບິ່ງ​ແຍງດູ​ແລ ຂອງ​ພັກ ລັດ ແລະ ປະ­ຊາ­ຊົນຫວຽດ­ນາມ.

ມາ​ຮອດ​ປະ­ຈຸ​ປັນ​, ຈຳນວນ​ຜູ້​ທີ່​​ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ ​ມີ 9 ລ້ານ​ກວ່າ​ຄົນ ​ໃນ​ນັ້ນ​ມີພະນັກງານ​ປະ­ຕິ­ວັດ​ອາວຸ​ໂສ, ພະ­ນັກ­ງານ​ກ່ອນ​ການ​ລຸກ​ຮື​ຂຶ້ນ, ບັນ­ດາ​ແມ່​ຫວຽດ­ນາມວິ­ລະ​ຊົນ, ​ວິ­ລະ​ຊົນ​ກຳ­ລັງ​ປະ­ກອບ​ອາ­ວຸດ​ປະ­ຊາ­ຊົນ, ​ວິ­ລະ​ຊົນ​​ອອກ­ແຮງ​ງານ, ນັກ­ຮົບ​ຜູ້​ເສຍ​ອົງ­ຄະ, ນັກ­ຮົບ​ທີ່​ເຈັບປ່ວຍ, ຍາດ­ຕິ​ພີ່­ນ້ອງ​ຂອງນັກ­ຮົບ​ຜູ້​ເສຍສະ­ຫຼະ​ຊີ­ວິດ​ເພື່ອ​ຊາດ... ຊຶ່ງໄດ້​ຮັບ​ບັນ­ດາ​ລະ­ບອບ, ນະ­ໂຍ­ບາຍ​ປະ­ພຶດ​ແບບ​ພິ­ເສດ; ຜູ້​ທີ່​ມີ​ຄຸນ​ງານ​ຄວາມ​ດີ​ຕໍ່​ການ​ປະ­ຕິ­ວັດ​ 4 ລ້ານ​ກວ່າ​ຄົນ ​ໄດ້ຮັບ​ປະດັບຫຼຽນ​ໄຊ ຫຼຽນ​ກາ ແລະ ຂອງ­ຂວັນ​ລາ­ງວັນ, ​ນາມມະ­ຍົດ​ທີ່​ປະ​ເສີດສູງ​ສົ່ງຕ່າງໆ. ນອກ­ຈາກເງິນ​ເພີ່ມ ເບ້ຍ​ອຸດ​ໜູນ​ແລ້ວ ພັກແລະລັດ​ກໍ່​ຍັງ​ມີ​ຄວາມ​ເອົາ­ໃຈ­ໃສ່ ​ເບິ່ງ­ແຍງ​ດູ​ແລ​ ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ ​ດ້ວຍ​ບັນດາ​ນະ­ໂຍ­ບາຍ​ປະ­ພຶດ​ແບບ​ພິ­ເສດ​ຢ່າງ​ລະ­ອຽດ, ຄື​ເບິ່ງ­ແຍງ​ດູ​ແລ​ດ້ານ​ສຸຂະ­ພາບ, ​ໃຫ້​ບຸລິ​ມະ​ສິດ​ໃນການ​ມອບ​ດິນ​ຜະ­ລິດ, ຊ່ວຍ​ເຫຼື​ອ​ປົວ­ແປງ​ເຮືອນ​ຢູ່, ດິນ​ຢູ່, ຝຶກ​ອົບຮົມ​ວິຊາ​ອາ­ຊີບ, ສ້າງ​ວຽກ​ເຮັດ​ງານ​ທຳ; ປະ­ຕິ­ບັດ​ນະ­ໂຍ­ບາຍ​ກ່ຽວ​ກັບ​ການ​ສຶກ​ສາ, ກໍ່­ສ້າງ; ເປີດ​ກວ້າງ​ລະ­ບົບ​ພື້ນ­ຖານ​ການ​ບໍ­ລິ­ການ ແລະ ພາ­ລະ­ກິດ​ສາ­ທາ­ລະ­ນະ ​ຮັບ​ໃຊ້​ນັກ­ຮົບ​ຜູ້​ເສຍ​ອົງ­ຄະ; ຍູ້​ແຮງ​ການ​ຊອກ​ຄົ້ນ​ເຕົ້າ​ໂຮ​ມ​ ອັດ­ຖິຂອງນັກ­ຮົບ​ຜູ້​ເສຍສະຫຼະ​ຊີ­ວິດ​ເພື່ອ​ຊາດ; ກໍ່­ສ້າງ ແລະ ປົວ­ແປງ​ບູ­ລະ­ນະ ສຸ­ສານ​ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ ​ຫຼາຍ​ພັນ​ແຫ່ງ, ອຳ​ນວ​ຄວາມ​ສະ­ດວກ​ໃຫ້​​ຄອບ​ຄົວ ຂອງ​ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ ​ມາ​ໄຫວ້​ອາ­ໄລ​ນັກ­ຮົບ​ຜູ້​ເສຍສະຫຼະທີ່​​ສຸ­ສານ.

ພ້ອມ​ກັບ​ການ​ປະ­ຕິ­ບັດ​ບັນ­ດາ​ນະ­ໂຍ­ບາຍ​ການ​ປະ­ພຶດ​ແບບ​ພິ­ເສດ​ຂອງ​ພັກແລະລັດ ​ນັ້ນ, ຄະ­ນະ​ພັກ, ອຳນາດ​ການ​ປົກ­ຄອງ, ແນວ​ໂຮມ​ປະ­ເທດ​ຊາດ ແລະ ອົງ​ການ­ຈັດ­ຕັ້ງຂັ້ນ​ຕ່າງໆ, ບັນ­ດາ​ກົມ​ກອງ​ທະ­ຫານ, ຕຳຫຼວດ, ວິ​ສາ​ຫະ​ກິດ ແລະ ບັນ­ດາ​ບຸກ­ຄົນ​ຢູ່ພາຍ​ໃນແລະຕ່າງ­ປະ­ເທດ ກໍ່​ໄດ້​ມີ​ການ​ເຂົ້າ​ຮ່ວມ​ບັນ­ດາ​ຂະ​ບວນ​ການ “ຕອບ​ບຸນ​ແທນ​ຄຸນ”, “ທົ່ວ​ປວງ​ຊົນ​ເບິ່ງ­ແຍງ​ດູ​ແລ​ ບັນ­ດາ​ຄອບ­ຄົວ​ນັກ­ຮົບ​ຜູ້​ເສຍ​ອົງ­ຄະ, ນັກ­ຮົບ​ຜູ້​ເສຍສະຫຼະ​ຊີ­ວິດ​ເພື່ອ​ຊາດ ແລະ ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ” ຢ່າງ​ຕັ້ງ­ໜ້າ​ ດ້ວຍ​ບັນ­ດາ​ການເຄື່ອນໄຫວທີ່​ລະ­ອຽດ, ແທ້​ຈິງ, ​ເຊັ່ນ ​ກໍ່­ສ້າງ​ເຮືອນ​ກະຕັນຍູ, ສ້າງ​ກອງ​ທຶນ “ຕອບ​ບຸນ​ແທນ​ຄຸນ”, ມອບ​ປຶ້ມເງິນອອມ​ສິນ, ລ້ຽງ​ດູ​​ແມ່​ຫວຽດ­ນາມ ວິ­ລະ​ຊົນ, ຊ່ວຍ​ໃຫ້​ຊີວິດ​ຂອງ​ນັກ­ຮົບ​ຜູ້​ເສຍ​ອົງ­ຄະ ນັກ­ຮົບ​ທີ່​ເຈັບ​ປ່ວຍ​ໜັກ ມີ​ຄວາມ​ໝັ້ທ່ຽງ, ເບິ່ງ­ແຍງ​ດູ​ແລ​ພໍ່ແມ່​ຂອງ​ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ ທີ່​ເຖົ້າ​ແກ່ ອອ່ນ​ໂຊ, ​ແລະ ​ເບິ່ງ​ແຍງລູກ​ຂອງ​ນັກ­ຮົບ​ຜູ້​ເສຍ­ສະ­ຫຼະ... ໃນ​​ເວລາເກືອບ​ສິບ​ປີ​ ທີ່​ຜ່ານ​ມາ​ມໍ່​ນີ້, ແຕ່​ປີ 2007 ຫາ 2016, ໃນ​ທົ່ວ​ປະ­ເທດ​ໄດ້​ກໍ່­ສ້າງ ແລະ ສ້ອມ­ແປງ​ເຮືອນ​ກະຕັນຍູ ​ເປັນຈຳນວນ 182.000 ຫຼັງ, ມອບ​ປຶ້ມ​ເງິນອອມ​ສິນ 133.000 ​ເຫຼັ້ມ ໃຫ້​ແກ່​ບັນ­ດາ​ຄອບ­ຄົວ​ຄົນ​ທີ່​ມີ​ຄຸນງາມ­ຄວາມ­ດີ​ຕໍ່​ການ​ປະ­ຕິ­ວັດ.

ບັນ­ດາ​ງຽກງານ​ທີ່​ເຕັມ​ໄປ​ດ້ວຍ​ຄວາມ​ຮັບ­ຜິດ­ຊອບ ແລະ ຄວາມ​ຮັກ­ແພງ​ນັ້ນ ​ໄດ້​ຮັບ​ການ​ສະໜັບ­ສະ­ໜູນ ແລະ ເຂົ້າ​ຮ່ວມ​ຢ່າງ​ຕັ້ງ­ໜ້າ ​ຂອງ​ທົ່ວ​ສັງ­ຄົມ, ໄດ້​ກາຍ­ເປັນ​ຂະ​ບວນ​ການ​ມະ­ຫາ­ຊົນ​ຢ່າງ​ເລິກເຊິ່ງ​ກວ້າງ­ຂວາງ, ເປັນ­ຄວາມ​ງາມ​ດ້ານ​ວັດ­ທະ­ນະ­ທຳ, ເພື່ອ​ປະ­ກອບ­ສ່ວນ​ທີ່​ສຳ­ຄັນ ​ເຂົ້າ​ໃນ​ການ​ປັບ­ປຸງ, ເພີ່ມ​ທະ­ວີ​ກຸ່ມ​ກ້ອນ​ມະ­ຫາ​ສາມັກ­ຄີ​ທົ່ວ​ປວງ​ຊົນ, ຍົກ​ສູງ​ນ້ຳ­ໃຈ​ຮັກ​ຊາດ, ຄົ້ນ​ຄືນແລະເພີ່ມ​ພຸນ​ຄຸນ​ສ້າງ ​ບັນ­ດາ​ຄຸນ­ຄ່າ​ມະ­ນຸດ­ອະລິຍະ­ທຳທີ່​ດີງາມ.

ດ້ວຍ​ເຈດ​ຈຳ­ນົງ​ເພິ່ງ​ຕົນ​ເອງ, ກຸ້ມ​ຕົນ​ເອງ ແລະ ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ, ນັກ­ຮົບ​ຜູ້​ເສຍ​ອົງຄະ, ຍາດ­ຕິ​ພີ່­ນ້ອງ​ຂອງ​ຮັກ​ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ ແລະ ຜູ້ທິີ່ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ ​ເປັນຈຳນວນຫຼາຍ​ ​ໄດ້​ຜ່ານ​ຜ່າ​ຄວາມ​ເຈັບປ່ວຍ ຄວາມ​ຫຍຸ້ງ­ຍາກ​ລຳ­ບາກ ​ເພື່ອ​ເຂົ້າຮ່ວມ​ໃນ​ຊີ­ວິດ, ສືບ­ຕໍ່​ອຸ­ທິດ​ກຳລັງ​ກາຍ ​ແລະ​ສະຕິ​ປັນ​ຍາ, ເປັນ​​ແບບ­ຢ່າງ​ທີ່​ໃສ​ແຈ້ງ ​ໃນ​ການ​ອອກ­ແຮງ​ງານ, ຜະ­ລິດ, ເຮັດ​ວຽກ, ສູ້​ຮົບ, ຮ່ຳຮຽນ..., ເພື່ອ​ປະ­ກອບ­ສ່ວນ​ ເຂົ້າ​ໃນ​ການ​ປົກ​ປັກ​ຮັກ­ສາ ແລະ ກໍ່­ສ້າງປະ­ເທດ​ຊາດບ້ານ​ເມືອງ​ ໃຫ້​ນັບ​ມື້​ນັບ​​ຮັ່ງ­ມີ ຮູ່ງ​ເຮືອງ​ສີວິໄລ.

ຕາງ­ໜ້າ​­ການ​ນຳ​ພັກແລະລັດ, ຂ້າ­ພະ­ເຈົ້າ​ຂໍ​ຊົມ­ເຊີຍ, ຕີ​ລາ­ຄາ​ສູງ ແລະ ຍ້ອງ­ຍໍ​ສັນ­ລະ­ເສີນ ​ບັນດາ​ກະຊວງ, ຂະ­ແໜງ­ການ, ທ້ອງ​ຖີ່ນ, ອົງ­ການ, ກົມ​ກອງ, ບຸກ­ຄົນ​ພາຍ​ໃນແລະຢູ່​ຕ່າງປະເທດ​ ທີ່ໄດ້​ມີ​ການ​ຕອບ​ສະໜອງ ແລະ ປະ­ຕິ­ບັດ​ເປັນ​ຢ່າງ​ດີ ບັນ­ດາ​ແຜນ​ນະ­ໂຍ­ບາຍ, ນະ­ໂຍ­ບາຍ​ຂອງ​ພັກ ແລະ ລັດ​ຢ່າງ​ຕັ້ງ­ໜ້າ, ເຂົ້າ​ຮ່ວມ​ບັນ­ດາ​ຂະ​ບວນ​ການ “ຕອບ​ບຸນ​ແທນ​ຄຸນ”, “ທົ່ວ​ປວງ​ຊົນ​ເບິ່ງ­ແຍງ​ດູ​ແລ ​ຄອບ­ຄົວ​ນັກ­ຮົບ​ເສຍ​ອົງ­ຄະ, ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ຜູ້ທິີ່ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ” ຢ່າງ​ຟົດ­ຟື້ນ; ຂໍ​ຊົມ­ເຊີຍ​ບັນ­ດາ​ຜົນ­ງານ ທີ່ບັນດາ​ສະ­ຫາຍ​ນັກ­ຮົບ​ຜູ້​ຖືກ­ເສຍ​ອົງ­ຄະ, ຍາດ­ຕິ​ພີ່­ນ້ອງ​ຂອງ​ນັກ­ຮົບ​ຜູ້​ເສຍ­ສະ­ຫຼະ​ຊີວິດ​ເພື່ອ​ຊາດ ແລະ ຜູ້ທິີ່ມີ​ຄຸນງາມ­ຄວາມ­ດີ​ຕໍ່​ການ​ປະ­ຕິ­ວັດ​ ບັນ­ລຸ​ໄດ້​ໃນ​ພາ­ລະ­ກິດ​ແຫ່ງ​ການ​ກໍ່ສ້າງ ແລະ ປົກ​ປັກ​ຮັກ­ສາ​ປະ­ເທດ​ຊາດ.

ການເອົາ­ໃຈ­ໃສ່​​ເບິ່ງ­ແຍງ​ດູ​ແລ, ຍົກ​ສູງ​ຊີ­ວິດ​ການ​ເປັນ​ຢູ່ດ້ານ​ວັດຖຸແລະຈິດ­ໃຈ ​ຂອງ​ນັກ­ຮົບ​ຜູ້​ຖືກ­ເສຍ​ອົງຄະ, ນັກ­ຮົບ​ຜູ້​ເຈັບ​ປ່ວຍ, ຍາດ­ຕິ​ພີ່­ນ້ອງ​ຂອງ​ຮັກ​ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ ແລະ ຜູ້ທິີ່ມີ​ຄຸນງາມຄວາມ­ດີ​ຕໍ່​ການ​ປະຕິ­ວັດ ເປັນ​ແຜນ​ນະ­ໂຍ­ບາຍ, ທັດ­ສະ­ນະ​ອັນ​ສະ­ເໝີ​ຕົ້ນ​ສະ­ເໝີ​ປາຍ ​ຂອງ​ພັກແລະລັດຫວຽດ­ນາມ, ເປັນ​ຫຼັກ​ທຳ​ທີ່​ເປັນ​ມູນ­ເຊື້ອ​ຂອງ​ຊາດ​ເຮົາ. ໂຄງ­ການ​ການ­ເມືອງ ​ກ່ຽວ​ກັບ​ກໍ່­ສ້າງ​ປະ­ເທດ​ ໃນ​ສະໄໝ​ຂ້າມ​ຜ່ານ​ ຂຶ້ນ​ສູ່​ສັງ­ຄົມ​ນິຍົມ (ສະ­ບັບ​ປັບ­ປຸງ, ​ເພີ່ມ​ເຕີນ ປີ 2011) ໄດ້​ຊີ້​ແຈ້ງ­ວ່າ: “ປະ­ຕິ­ບັດ​ໃຫ້​ໄດ້​​ເປັນ​ຢ່າງດີ​ ນະ­ໂຍ­ບາຍ​ຕໍ່​ຄົນ ແລະ ຄອບ­ຄົວ​ທີ່​ມີ​ຄຸນ­ງາມ­ຄວາມ­ດີ​ຕໍ່​ປະ­ເທດ”(2). ມະ­ຕິ​ກອງ​ປະ­ຊຸມ​ໃຫຍ່​ ຜູ້​ແທນ​ທົ່ວ​ປະເທດ​ຄັ້ງ​ທີ XII ຂອງ​ພັກ​ກອມ​ມູ​ນິດຫວຽດ­ນາມ ກໍ່​ໄດ້​ເນັ້ນ​ໜັກ​ວ່າ: “ປະ­ຕິ­ບັດ​ໃຫ້​ໄດ້​​ເປັນ​ຢ່າງດີ ​ນະ­ໂຍ­ບາຍ​ກ່ຽວ​ກັບ​ການ​ເບິ່ງ­ແຍງ​ດູ​ແລ ຜູ້​ທີ່​ມີ​ຄຸນງາມ­ຄວາມ­ດີ​ຕໍ່​ຊາດ ​ບົນ​ພື້ນ­ຖານ​ປຸກ­ລະ­ດົມ​ທຸກ​ແຫຼ່ງ​ພະ­ລັງ ​ຂອງ​ສັງ­ຄົມ ​ປະ­ສົມ​ກັບ​ແຫຼ່ງ​ພະ­ລັງ​ຂອງ​ລັດ; ຮັບປະ­ກັນ​ໃຫ້​ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ຊາດ​ ມີ​ລະ­ດັບ​ຊີ­ວິດ​​ຕາມ​ລະດັບ​ປານ​ກາງ​ຂຶ້ນ​ໄປ”(3).

ເພື່ອ​ເສີມ​ຂະ­ຫຍາຍ​ບັນ­ດາ​ຜົນ­ງານ, ຜົນ­ສຳ­ເລັດ​ທີ່​ບັນ­ລຸ​ໄດ້​ ໃນ​ຕະ­ຫຼອດ​ໄລ­ຍະ 70 ປີ​ທີ່​ຜ່ານ​ມາ, ພ້ອມ​ທັງ​ສືບ­ຕໍ່​ຍູ້​ແຮງ ​ວຽກ​ງານ​ເບິ່ງ­ແຍງ​ດູ​ແລ ​ນັກ­ຮົບ​​­ເສຍ​ອົງ­ຄະ, ນັກ­ຮົບ​ເຈັຍປ່ວຍ, ຄອບ­ຄົວ​ຂອງ​ຮັກ​ຮົບທີ່​ເສຍ­ສະ­ຫຼະ​ຊີວິດ​ເພື່ອ​ຊາດ ແລະ ຜູ້ທິີ່​ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ, ໃນ​ເວ­ລາ​ຕໍ່​ໄປ​ນີ້, ບັນ­ດາ​ຄະ­ນະ​ພັກ, ອຳ­ນາດ​ການ​ປົກຄອງ, ແນວ​ໂຮມ​ປະ­ເທດ​ຊາດ ແລະ ບັນ­ດາ​ອົງ​ການ­ຈັດ­ຕັ້ງ, ອົງ­ການ​ສັງ­ຄົມ ​ຕ້ອງ​ສືບ­ຕໍ່​ໂຄ­ສະ­ນາ​ ແຜນ​ນະໂຍບາຍ, ນະ­ໂຍ­ບາຍ​ຂອງ​ພັກ, ລັດ ຕໍ່​ນັກ­ຮົບ​ຜູ້​­ເສຍ​ອົງ­ຄະ, ນັກ­ຮົບ​​ເຈັບປ່ວຍ, ຄອບ­ຄົວ​ຂອງ​ຮັກ​ຮົບ​​ເສຍສະຫຼະ​ຊີວິດ​ເພື່ອ​ຊາດ ແລະ ຜູ້ທິີ່​ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ ​ໃຫ້​ພະນັກງານ, ສະ­ມາ­ຊິກ​ພັກ ແລະ ປະ­ຊາ­ຊົນ​ຊາບ​ຊືມ​ເລິກ­ເຊິ່ງ​ກວ່າ​ອີກ. ອັນ​ທີ່​ໃໝ່​ທີ່​ສຸດ​ແມ່ນ ຄຳ​ສັ່ງ​ເລກ​ທີ 14-CT/TW, ສະ­ບັບ​ລົງ​ວັນ​ທີ 19 ກໍລະ­ກົດ 2017 ຂອງ​ຄະ­ນະ​ເລ­ຂາ­ທິ­ການສູນ​ກາງ​ພັກ ວ່າ​ດ້ວຍ “ສືບ­ຕໍ່​ເພີ່ມ​ທະ­ວີ​ການ​ນຳ­ພາ​ຂອງ​ພັກ ​ຕໍ່​ວຽກ​ງານ​ສຳລັບ​ຜູ້​ທີ່​ມີ​ຄຸນງາມຄວາມ­ດີ​ຕໍ່​ການ​ປະ­ຕິ­ວັດ”. ຕ້ອງ​ຮັບ​ຮູ້​ຢ່າງ​ເລິກ­ເຊິ່ງ​ວ່າ, ປະ­ຕິ­ບັດ​ໃຫ້​ໄດ້​​ເປັນ​ຢ່າງດີ ​ນະໂຍບາຍ​ກ່ຽວ​ກັບ​ການ​ປະ­ພຶດ​ແບບ​ພິ­ເສດ ​ສຳ­ລັບ​ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ປະ­ເທດ ​ທັງ​ເປັນ­ຄວາມ​ຮັກແພງ​, ຄວາມ​ຮັບ­ຜິດ­ຊອບ​ອັນ​ສູງ​ສົ່ງ​ຂອງ​ທົ່ວ​ລະ­ບົບ​ການ­ເມືອງ ແລະ ທົ່ງ​ປວງ​ຊົນ, ທັງ​ເປັນ​ປັດ­ໃຈ​ທີ່​ຮັບ­ປະ­ກັນ​ ການ​ປະ­ຕິ­ບັດ​ຄວາມ​ກ້າວ­ໜ້າ ແລະ ຄວາມ​ຍຸ­ຕິ​ທຳ​ທາງ​ສັງ­ຄົມ, ສະ­ແດງ​ຢ່າງ​ເລິກ­ເຊິ່ງ​​ເຖິງ ລັກສະ­ນະ​ດີ­ເດັ່ນ ແລະ ທາດ​ແທ້​ອັນ​ດີ­ງາມ​ ຂອງ​ລະ­ບອບ​ເຮົາ, ປະ­ກອບ­ສ່ວນ​ເຂົ້າ​ໃນ​ການ​ປັບ­ປຸງ​ ກຸ່ມ​ກ້ອນ​​ສາ­ມັກ­ຄີ​ປວງ​ຊົນທັງ​ຊາດ, ເພີ່ມ​ທະ­ວີ​ຄວາມ​ເຊື່ອ​ໝັ້ນ​ຂອງ​ປະຊາຊົນ​ຕໍ່​ພັກ, ລັດ. ​ຈາກ​ນັ້ນ, ຫັນ​ຄວາມ​ຮັບ​ຮູ້​​ເປັນ​ການ​ກະ­ທຳ​ຕົວ​ຈິງ ລະ­ອຽດ, ຕັ້ງ­ໜ້າ​ປະ­ກອບ­ສ່ວນ​ເຂົ້າ​ໃນ​ການ​ປະ­ຕິ­ບັດ ໃຫ້​ໄດ້​ເປັນ​ຢ່າງ​ດີ ​ນະ­ໂຍ­ບາຍ​ກ່ຽວ​ກັບ​ການ​ປະ­ພຶດ​ແບບ​ພິ­ເສດ ​ສຳລັບຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ປະເທດ​ຊາດ, ຍົກ​ສູງ​ປະ​ສິດທິ​ຜົນ ແລະ ເຮັດ​ໃຫ້​ບັນ­ດາ​ຂະ​ບວນ​ການ “ຕອບ​ບຸນ​ແທນ​ຄຸນ”, “ທົ່ວ​ປວງ​ຊົນ​ເບິ່ງ­ແຍງ​ດູ​ແລ​ ບັນ­ດາ​ຄອບ­ຄົວ​ນັກຮົບ​ເສຍ​ອົງ­ຄະ, ນັກ­ຮົບ​ເສຍ­ສະ­ຫຼະ​ຊີ­ວິດ​ເພື່ອ​ຊາດ ແລະ ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ” ກາຍ­ເປັນ​ການ­ເຄື່ອນ­ໄຫວ​ແບບຢ່າງ​ ເປັນ​ປົກ­ກະ­ຕິ ​ໃນ​ທຸກ​ດ້ານ​ຂອງ​ຊີ­ວິດ​ສັງ­ຄົມ.

ສຸມ​ໃສ່​ນຳ­ພາ, ຊີ້​ນຳ​ປະ­ຕິ­ບັດ​ຢ່າງ​ຄົບ​ຖ້ວນ ​ແຜນ​ນະ­ໂຍ­ບາຍ, ນະ­ໂຍ­ບາຍ​ຂອງ​ພັກ, ກົດ­ໝາຍ​ຂອງ​ລັດ ກ່ຽວ​ກັບ​ນັກ­ຮົບ​­ຜູ້ເສຍ​ອົງ­ຄະ, ນັກ­​ຮົບຜູ້ເຈັບປ່ວຍ, ຄອບ­ຄົວ​ຂອງ​ນັກ​ຮົບຜູ້​​ເສຍ­ສະ­ຫຼະ​ຊີ­ວິດ​ເພື່ອ​ຊາດ ແລະ ຜູ້ທິີ່​ມີ​ຄຸນງາມ­ຄວາມ­ດີ​ຕໍ່​ການ​ປະ­ຕິ­ວັດ. ໃນ​ນັ້ນ, ມີ​ການ​ເອົາ­ໃຈ­ໃສ່​ແບບ​ພິ­ເສດ​ຕໍ່ ​ຄອບ­ຄົວຂອງ​ຜູ້​ທີ່​ມີ​ຄຸນ​ງານ​ຄວາມ​ດີ​ຕໍ່​ປະ­ເທດ​ຊາດ ​ທີ່​ຕົກ​ໃນ​ສະ­ພາບ​ຫຍຸ້ງ­ຍາກ, ຜູ້​ທີ່​ມີ​ຄຸນ​ງານ​ຄວາມ​ດີ​ຕໍ່​ປະ­ເທດ​ຊາດ​ ທີ່ກຳ­ລັງ​ຢູ່​ປ່ຽວ ບໍ່​ມີ​ບ່ອນ​ອີງອາ​ໃສ, ບັນ­ດາ​ຄອບ­ຄົວຂອງ​ຜູ້​ທີ່​ມີ​ຄຸນ​ງານ​ຄວາມ​ດີ​ຕໍ່​ປະ­ເທດ​ຊາດ ທີ່​ຢູ່​ເຂດ​ຊົນ­ເຜົ່າ​ສ່ວນ​ໜ້ອຍ, ເຂດ​ຫ່າງ​ໄກ​ສອກຫຼີກ, ເຂດ​ທີ່​ໝັ້ນ​ການ​ປະ­ຕິ­ວັດ​ໃນ​ເມື່ອ​ກ່ອນ, ສູ້​ຊົນ​ບໍ່​ໃຫ້​ຄອບ­ຄົວ​ຜູ້​ທີ່​ມີ​ຄວາມ​ງາມ​ຄວາມ​ດີ​ຕໍ່​ປະ­ເທດ​ຊາດ ​ຕົກ​ເປັນ​ຄອບຄົວ​​ທຸກ​ຍາກ. ມີ​ການ​ບຸລິ​ມະ​ສິດ​ແຫຼ່ງ​ພະ­ລັງ​ ເພື່ອ​ແກ້​ໄຂ​ຄວາມ​ຮຽກ­ຮ້ອງ​ຕ້ອງ­ການ​ອັນ​ຈຳ­ເປັນ​ ຂອງ​ຜູ້​ທີ່​ມີ​ຄຸນງາມຄວາມ­ດີ​ຕໍ່​ປະ­ເທດ​ຊາດ​ຄື ລ້ຽງ​ດູ​​ແມ່​ຫວຽດ­ນາມວິ­ລະ​ຊົນ, ຝຶກ​ອົບຮົມ​ອາຊີບ, ສ້າງ​ວຽກ​ເຮັດ​ງານ​ທຳ, ຊ່ວຍເຫຼືອ​ບັນ­ດາ​ຄອບ­ຄົວ​ນະ­ໂຍ­ບາຍ ​ທີ່ປະສົບ​ຄວາມ​ຫຍຸ້ງ­ຍາກ ​ໃຫ້​ເຂົາ​ພັດ­ທະ­ນາ​ເສດ­ຖະ­ກິດ, ທຸ­ລະ​ກິດ... ຍູ້​ແຮງ​ຂະ​ບວນ​ການ​ຫັນ​ເປັນ​ສັງ­ຄົມ​ ວຽກ​ງານ​ຕໍ່​ຜູ້​ທີ່​ມີ​ຄຸນງາມ­ຄວາມ­ດີ​ຕໍ່​ການ​ປະ­ຕິ­ວັດ. ບົນ​ພື້ນ­ຖານ​ປຸກ­ລະ­ດົມ ແຫຼ່ງ​ພະ­ລັງ​ສັງ­ຄົມ​ ປະ­ສົມ​ກັບ​ແຫຼ່ງ​ພະ­ລັງ​ຂອງ​ລັດ, ສູ້​ຊົນ​ເຖິງ​ປີ 2020, ບັນ­ດາ​ຄອບ­ຄົວ​ຂອງ​ຜູ້ທີ່​ມີ​ຄຸນ­ງາມ­ຄວາມ­ດີ​ຕໍ່​ການ​ປະຕິ­ວັດ ​ມີ​ລະ­ດັບ​ຊີ­ວິດ​ເທົ່າ​ທຽມຫຼື​ສູງ​ກວ່າ ລະ­ດັບ​​ຊີ­ວິດປານ​ກາງ​ໃນ​ຊຸມ​ຊົນ​​ທ້ອງ​ຖິ່ນ.

ສືບ­ຕໍ່​ເຮັດ​ໃຫ້​ໄດ້​​ເປັນ​ຢ່າງດີ ​ວຽກ​ງານ​ປົວ­ແປງ​ບູ­ລະ­ນະ ​ສຸ­ສານ​ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ກິດຈະກຳຈາລຶກບຸນ­ຄຸນ ຂອງນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ; ຍູ້​ແຮງ​ການ​ຊອກ​ຫາ, ກຳ­ນົດ​ເຊື້ອ­ສາຍ​ຂອງນັກຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ຊອກ​ຄົ້ນ​ເຕົ້າ​ໂຮມ​ອັດ­ຖິ ​ຂອງນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ແຈ້ງ​ໃຫ້​ຄອບຄົວ​ຂອງ​ເຂົາ​ຮູ້​ຢ່າງທັນການ ແລະ ອຳ­ນວຍ​ຄວາມ​ສະ­ດວກ​​ໃຫ້​ຍາດ­ຕິ​ພີ່­ນ້ອງ​ຂອງ​ເຂົາ ​ມາ​ໄຫວ້​ອາ​ໄລ​ຢູ່​ທີ່ສຸສານ.

ຍົກ​ສູງ​ຄວາມ​ສາ­ມາດ, ຜົນ​ສັກ­ສິດ, ປະ​ສິດ­ທິ​ຜົນຂອງ​ການ​ຄຸ້ມ​ຄອງ​​ລັດ ​ສຳ­ລັບ​ວຽກ​ງານກ່ຽວ​ກັບ​ຜູ້​ທີ່​ມີ​ຄຸນງາມ­ຄວາມ­ດີ​ຕໍ່​ການ​ປະ­ຕິ­ວັດ. ກວດ­ຄືນ, ປັບ­ປຸງ, ປົວ­ແປງ​ບູ­ລະ­ນະ ​ນະ­ໂຍ­ບາຍ, ກົດ­ໝາຍ​ກ່ຽວ​ກັບ​ການ​ປະພຶດ​ແບບ​ພິ­ເສດ​ສຳ­ລັບ​ຜູ້​ທີ່​ມີ​ຄຸນ­ງາມ­ຄວາມ­ດີ, ພິ­ເສດ​ແມ່ນ ​ເອົາ­ໃຈ­ໃສ່​ແກ້​ໄຂ​ບັນ­ດາ​ຂໍ້­ຄົງ­ຄ້າງ, ຕິດ​ຂັດ​ທີ່​ກ່ຽວຂ້ອງ ​ເພື່ອ​ດັດ­ແປງ ປັບ­ປຸງ​ໃຫ້​ເໝາະ​ສົມ ແລະ ທັນ​ເວ­ລາ​ ກັບ​ການ​ພັດ­ທະ­ນາ​ຂອງ​ປະ­ເທດ. ເອົາ­ໃຈ­ໃສ່​ແກ້​ໄຂ​ການ​ອອກໜັງສືຮັບຮອງ​ ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ປະ­ເທດ​ຊາດ ​ທີ່​ຍັງ​ຄົງ​ຄ້າງ, ຮັບປະ­ກັນ​ຄວາມ​ໜັກ​ແໜ້ນ, ສົມ​ເຫດ​ສົມ​ຜົນ ເພື່ອ​​ໃຫ້ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ປະ­ເທດ​ຊາດ ແລະ ຄອບຄົວ​ຂອງ​ເຂົາ ​ໄດ້​ຮັບ​ການ​ຊົມ­ໃຊ້​ຢ່າງ​ຄົບ​ຖ້ວນ ​ບັນດາ​ນະ­ໂຍ­ບາຍ​ກ່ຽວ​ກັບ​ການ​ປະ­ພຶດ​ແບບ​ພິ­ເສດ​ຂອງ​ພັກແລະລັດ.

ເພີ່ມ​ທະ­ວີ​ການ​ໝູນ​ໃຊ້​ວິ­ທະ­ຍາ­ສາດເຕັກ​ໂນ​ໂລ​ຊີ​ທີ່​ກ້າວ­ໜ້າ, ປະ­ສານ​ສົມ­ທົບ​ຢ່າງ​ແໜ້ນ​ແຟ້ນ ລະຫວ່າງ​ບັນດາ​ກະ­ຊວງ, ຂະ­ແໜງ­ການ​ສູນ​ກາງ ແລະ ທ້ອງ​ຖິ່ນ ​ໃນ​ການ​ປະ­ຕິ­ບັດ​ວຽກ​ງານຕໍ່​ຜູ້ທີ່​ມີ​ຄຸນງາມຄວາມ­ດີຕໍ່​ການ​ປະຕິ­ວັດ; ສຸມ​ໃສ່​ບັນ­ດາ​ມາດ​ຕະ­ການ ຍົກ​ສູງ​ລະ­ດັບ​ຄວາມ​ຮູ້​ດ້ານ​ວິ­ຊາ​ສະເພາະ, ວິ­ຊາ​ການ ກໍ່​ຄື​ສະ­ຕິ ຄວາມ​ຮັບຜິດ­ຊອບ ​ຂອງ​ພະນັກງານ​ທີ່​ເຮັດ​ວຽກ​ງານ​ນີ້.

ດ້ວຍ​​ວຽກງານ​ການ​ດຳ​ເນີນ​ຢ່າງ​ລະ­ອຽດ, ບັນ­ດາ​ອົງ​ການ­ຈັດ­ຕັ້ງ, ສຳນັກງານອົງ­ການ, ພະ­ນັກ­ງານ, ສະມາ­ຊິກ​ພັກ, ລັດຖະກອນ, ສະ­ມາ­ຊິກ​ຊາວ​ໜຸ່ມ, ສະ­ມາ­ຊິກ​ສະ­ມາ​ຄົມ ແລະ ປະ­ຊາ­ຊົນ​ທຸກ​​ຊັ້ນຄົນ ​ຕ້ອງຕັ້ງໜ້າ​ເຂົ້າ​ຮ່ວມ ດ້ວຍ​ຄວາມ​ຮັບ­ຜິດ­ຊອບ ​ໃນ​ວຽກ​ງານຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ ແລະ ​ຂະ​ບວນ​ການ “ທົ່ວ​ປວງ​ຊົນ​ເບິ່ງ­ແຍງ​ດູ​ແລ​ ບັນ­ດາ​ຄອບ­ຄົວ​ນັກ­ຮົບ​ຜູ້​ເສຍ​ອົງ­ຄະ, ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ ແລະ ຜູ້​ທີ່​ມີ​ຄຸນງາມ­ຄວາມ­ດີ​ຕໍ່​ການ​ປະ­ຕິ­ວັດ” ແລະ ສະ­ໜັບ­ສະ­ໜູນກອງ​ທຶນ “ຕອບ​ບຸນ​ແທນ​ຄຸນ”. ຍ້ອງ­ຍໍ​ຊົມເຊີຍ, ເຊີດ​ຊູ​ບັນດາ​ແບບ­ຢ່າງ​ນັກ​ຮັບ​ຜູ້​ເສຍ​ອົງ­ຄະ, ນັກ­ຮົບທີ່ເຈັບປ່ວຍ, ຄອບ­ຄົວ​ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ຜູ້​ທີ່​ມີ​ຄຸນງາມ­ຄວາມ­ດີ​ຕໍ່​ປະ­ເທດ​ຊາດ ​ໄດ້​ເສີມ​ຂະ­ຫຍາຍ​ເຈດ​ຈຳ­ນົງ​ເພິ່ງ​ຕົນ​ເອງ, ກຸ້ມ​ຕົນ​ເອງ ແລະ ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ, ຜ່ານ​ຜ່າ​ຄວາມ­ທຸກ​ຍາກ, ຕັ້ງ­ໜ້າ​ອອກ­ແຮງ​ງານ, ຜະ­ລິດ, ເຂົ້າ​ຮ່ວມ​ບັນ­ດາ​ຂະ​ບວນ​ການ​ແຂ່ງ­ຂັນ​ຮັກ​ຊາດ... ຄົ້ນ​ເຜີຍ, ຂະ­ຫຍາຍ​ບັນ­ດາ​ແບບ­ຢ່າງ​ທີ່​ດີ­ເດັ່ນ​ກ້າວ­ໜ້າ, ເຊີດ​ຊູ​ຍ້ອງ­ຍໍ ມອບ​ລາງວັນ​ໃຫ້​ແກ່​ລວມ​ໝູ່, ບຸກຄົນຜູ້​ທີ່​ມີ​ຜົນ­ງານ​ດີ­ເດັ່ນ ກ່ຽວ​ກັບ​ການ​ປະ­ກອບ­ສ່ວນ ເຂົ້າ​ໃນ​ບັນ­ດາຂະ​ບວນ​ການ “ຕອບ​ບຸນ​ແທນ​ຄຸນ”, “ທົ່ວ​ປວງ​ຊົນ​ເບິ່ງ­ແຍງ​ດູ​ແລ​ຄອບ­ຄົວ​ນັກ­ຮົບ​ຜູ້ເສຍ​ອົງ­ຄະ, ນັກ­ຮົບ​ຜູ້​ເສຍ­ສະ­ຫຼະ​ຊີ­ວິດ​ເພື່ອ​ຊາດ, ຜູ້ທິີ່ມີຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ”, ຮວ່ມ​ແຮງ​ຊ່ວຍ­ເຫຼືອ ບັນ­ດາ​ຄອບ­ຄົວຂອງຜູ້​​ທີ່​ມີ​ຄຸນງາມຄວາມ­ດີຕໍ່​ການ​ປະ­ຕິ­ວັດ ​ແກ້​ໄຂ​ຄວາມ​ຫຍຸ້ງ­ຍາກ, ປົວ­ແປງ​ຊີ­ວິດ​ການ​ເປັນ​ຢູ່.

ໃນ​ປະ­ຈຸ​ປັນ, ທົ່ວ​ພັກ, ທົ່ວ​ປວງ​ຊົນ ແລະ ທົ່ວ​ກອງ­ທັບ​ເຮົາ ​ກຳ­ລັງ​ປະ­ຕິ­ບັດ ຄຳ​ສັ່ງ​ເລກ​ທີ 05-CT/TW, ສະ­ບັບ​ລົງ​ວັນ​ທີ 15 ພຶດ­ສະ­ພາ 2016, ຂອງ​ກົມ​ການ­ເມືອງສູນ​ກາງ​ພັກ ສະ­ໄໝ​ທີ XII, ກ່ຽວ​ກັບ “ຍູ້​ແຮງ​ການ​ຮ່ຳຮຽນ ແລະ ປະ­ຕິ­ບັດ​ຕາມ​ແນວ​ຄິດ ແລະ ຄຸນ­ສົມ­ບັດ, ແບບ­ແຜນ​ໂຮ່​ຈີ​ມິນ”. ຕາງ­ໜ້າ​ໃຫ້​ພັກ ແລະ ລັດ, ຂ້າ​ພະ​ເຈົ້າ​ຮຽກ­ຮ້ອງ​ບັນ­ດາ​ສະ​ຫານ, ປະ­ຊາ­ຊົນ, ນັກ­ຮົບ​ທັງ​ຊາດ​ທຸກ​ຄົນ​ ສືບ​ຕໍ່​ເຊື່ອມ​ຊືມ​ຢ່າງ​ເລິກເຊິ່ງ, ແລະ ປະ­ຕິ­ບັດ​ໃຫ້​ໄດ້​ເປັນ​ຢ່າງ​ດີ ​ແນວ​ຄິດ ໂຮ່​ຈີ​ມິນ ກ່ຽວ​ກັບ​ວຽກ​ງານ​ນັກ­ຮົບ​ຜູ້​ເສຍ​ອົງ­ຄະ, ນັກ­ຮົບ​ຜູ້​ເສຍ­ສະ­ຫຼະຊີວິດ​ເພື່ອ​ຊາດ; ​ເອົາ​ໃຈ​ໃສ່​ເບິ່ງ­ແຍງ​ດູ​ແລ ນັກ­ຮົບ​ຜູ້​­ເສຍ​ອົງ­ຄະ, ນັກ­ຮົບ​ຜູ້​ເຈັບປ່ວຍ, ຄອບ­ຄົວ​ຂອງ​ຮັກ​ຮົບ​ຜູ້​ເສຍ­ສະ­ຫຼະ​ຊີວິດ​ເພື່ອ​ຊາດ ແລະ ຜູ້ທິີ່ມີ​ຄຸນ­ງາມ­ຄວາມ­ດີ​ຕໍ່​ການ​ປະ­ຕິ­ວັດ ​ໃຫ້​ດີ​ກວ່າ​​ເກົ່າ​ອີກ, ຖື​ວ່າ​ອັນ​ນີ້​ທັງ​ເປັນ​ຫຼັກ​ທຳ, ທັງ​ເປັນ​ພັນ­ທະ, ຄວາມ​ຮັບ­ຜິດ­ຊອບ ແລະ ຄວາມ​ຮັກ­ແພງ​ສະ­ຫາຍ, ພໍ່​ແມ່​ປະ­ຊາ­ຊົນ​ ຂອງ​ຄົນຫວຽດ­ນາມ ແຕ່­ລະ­ຄົນ​ພວກ​ເຮົາ.

ຄວາມ​ເສຍ­ສະ­ຫຼະ, ການ​ອຸ­ທິດ​ທີ່​ຍິ່ງ​ໃຫຍ່​ ຂອງ​ບັນ­ດານັກ​ປະ­ຕິ­ວັດ​ຮຸ່ນ​ກ່ອນ, ບັນ­ດາ​ນັກ­ຮົບ​ວິ­ລະ​ຊົນ ຜູ້​ເສຍ​ສະ­ຫຼະ​ຊີ­ວິດ​ເພື່ອ​ຊາດ, ນັກ­ຮົບ​ຜູ້​ເສຍ​ອົງ­ຄະ, ຄອບ­ຄົວ​ນັກ­ຮົບ​ຜູ້​ເສດ​ສະ­ຫຼະ​ຊີ­ວິດ​ເພື່ອ​ຊາດ, ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ປະ­ເທດ​ຊາດ ທີ່​ໄດ້​ຝັງ​ເລິກ​ໄວ້ຢູ່​ໃນ​ໝາກຫົວ­ໃຈ​ ຂອງ​ຄົນຫວຽດ­ນາມ ແຕ່­ລະ­ຄົນ​ ຕະ­ຫຼອດ​ກາ​ລະນາມ, ເປັນ​ແຫຼ່ງ​ພະ­ລັງ​ດ້ານ​ຈິດ­ໃຈ​ອັນ​ລ້ຳ​ຄ່າ, ໃຫ້​ກຳ­ລັງ​ແຮງ​ຕື່ມ​ອີກ ​ເພື່ອ​​ໃຫ້ທົ່ວ​ພັກ, ທົ່ວ​ປວງ​ຊົນ ແລະ ທົ່ວ​ກອງ­ທັບ​ ປະຕິບັດພາລະ­ກິດ​​ການ​ປ່ຽນ­ແປງ​ໃໝ່, ຫັນ​ປະ­ເທດ​ເປັນ​ອຸດ­ສາ­ຫະ­ກຳ ທັນ​ສະ­ໄໝ ແລະ ເຊື່ອມ​ໂຍງ​ສາ­ກົນ, ກໍ່ສ້າງ ພັດ­ທະ­ນາ ​ແລະ ປົກ​ປັກ​ຮັກ­ສາ ​ປະ­ເທດ​ຊາດ​ຫວຽດ­ນາມ ​ທີ່​ແສນ​ຮັກ­ຂອງ​ພວກ​ເຮົາ ​ໃຫ້​ໝັ້ນ­ຄົງ​ເຂັ້ມ​ແຂງ.

ພັກ, ລັດ ແລະ ປະ­ຊາ­ຊົນ​ເຮົາ​ຈະ​ບໍ່​ມີ​ວັນ​​ລືມ​ ​ບຸນ­ຄຸນ​ອັນ​ຍິ່ງ​ໃຫຍ່​ ຂອງ​ບັນ­ດາ​ນັກ​ປະ­ຕິ­ວັດຮຸ່ນ​ກ່ອນ, ບັນດາ​ນັກ­ຮົບ​ວິ­ລະ​ຊົນ​ຜູ້​ເສຍສະ­ຫຼະ​ຊີ­ວິດ​ເພື່ອ​ຊາດ, ນັກ­ຮົບ​ຜູ້​ເສຍ​ອົງ­ຄະ, ຄອບ­ຄົວ​ນັກ­ຮົບ​ຜູ້​ເສຍ​ສະ­ຫຼະ​ຊີ­ວິດ​ເພື່ອ​ຊາດ, ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ປະ­ເທດ​ຊາດ!

ພວກ​ເຮົາ​ສັນ­ຍາ​ວ່າ ຈະ​ດຳ­ລົງ​ຊີ­ວິດ, ສູ້​ຮົບ, ອອກ­ແຮງ​ງານ, ຮ່ຳ­ຮຽນ ແລະ ເຮັດ​ວຽກຢ່າງ​ສຸດ​ຄວາມ​ສາມາດ​ ໃຫ້​ສົມ​ກັບບັນພະບຸລຸດ, ກັບບັນ­ດາ​ຜູ້​ທີ່​ໄດ້​ເສຍ­ສະ­ຫຼະ​ ສຸດ​ອົກ​ສຸ​ໃຈ ເພື່ອ​ປະ­ຊາ­ຊົນ, ເພື່ອ​ຊາດ! ./.

ໂດຍ ຫງວຽ​ນຝູຈ້ອງ
ເລ​ນາ​ທິ​ການ​ໃຫຍ່​ຄະ­ນະ​ບໍ­ລິ­ຫານ​ງານ​ສູນ​ກາງ
ພັກ​ກອມ​ມູ​ນິດ​ຫວຽດ­ນາມ

-------------------------

* ຫົວ­ຂໍ້​ໂດຍ​ວາ­ລະ­ສານ​ກວມ​ມູ​ນິດ​ເປັນ​ຜູ້​ແຕ່ງ.

ບົດ​ນີ້​ໄດ້​ລົງ​ພິມ​ໃນ​ວາ­ລະ­ສານ​ກອມ​ມູ​ນິດ ສະ­ບັບ​ເລກ​ທີ 899 (ເດືອນ​ສິງ­ຫາ 2017)

(1) ໂຮ່​ຈີ​ມິນ: ນິ­ພົນ​ຄົບ​ຊຸດ, ສຳ­ນັກ​ພິມ​ຈຳ­ໜ່າຍ​ການ­ເມືອງ​ແຫ່ງ​ຊາດ-ຊື້​ເທີ້ດ, ຮ່າ​ໂນ້ຍ, 2012, ເຫຼັ້ມທີ 4, ໜ້າ 486.

(2) ເອ­ກະ­ສານກອງ​ປະ­ຊຸມ​ໃຫຍ່ຜູ້​ແທນ​ທົ່ວ​ປະ­ເທດ ຄັ້ງ​ທີ XI, ສຳ­ນັກ​ພິມ​ຈຳ­ໜ່າຍ​ການ­ເມືອງ​ແຫ່ງ​ຊາດ-ຊື້​ເທີ້ດ, ຮ່າ​ໂນ້ຍ, 2011, ໜ້າ 79.

(3) ເອ­ກະ­ສານກອງ​ປະ­ຊຸມ​ໃຫຍ່ຜູ້​ແທນ​ທົ່ວ​ປະ­ເທດ ຄັ້ງ​ທີ XII, ຫ້ອງ​ວ່າ­ການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 136.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ