ວັນພຸດ, 13/12/2017
ຫວຽດນາມເປັນເຈົ້າການແລະຕັ້ງໜ້າ ເຊື່ອມໂຍງສາກົນທາງດ້ານວັດທະນະທຳ ໃນສະພາບການໂລກາພິວັດ
4/12/2017 14:53' ສົ່ງ ພິມ
“ບົດກະວີຢູ່ໃນສະຖາປັດຕະຍະກຳ ຂອງລາຊະວັງ ເຫວ້” ຊຶ່ງຄະນະກຳມະການ ໂຄງການຄວາມຈຳຂອງໂລກ ໃນພາກພື້ນອາຊີ-ປາຊີຟິກ ໄດ້ຮັບຮອງວ່າ ເປັນມໍລະດົກຂໍ້ມູນຂອງໂລກ

ການ​ໂລກາ​ພິວັດ ​ແລະ ທັດສະນະ​ເຊື່ອມ​ໂຍງ​ສາກົນ ຂອງ​ຫວຽດນາມ 

​ການ​ໂລກາ​ພິວັດ (ຕາມ​ຄວາມ​ເຂົ້າ​ໃຈ​ທົ່ວ​ໄປ) ​ແມ່ນ​ສະຖານະ​ພາບ​​ສັງຄົມໜຶ່ງທີ່​ມີ​ບັນດາ​ສາຍ​ເຊື່ອມ​ໂຍງ​ໃນ​ຂອບ​ເຂດ​ທົ່ວ​ໂລກທາງ​ດ້ານ​ເສດຖະກິດ ວັດທະນະທຳ ການ​ເມືອງ ສັງຄົມ ສິ່ງ​ແວດ​ລ້ອມ ​ແລະ ບັນດາສາຍ​ກາ​ນຕິດ​ຕໍ່​ທີ່ຮັດ​ແຄບ​ຊ່ອງ​ວ່າງ ​ແລະ ​ເຮັດ​ໃຫ້​ບັນດາ​ເສັ້ນ​ຊາຍ​ແດນ​ແຫ່ງ​ຊາດຈືດ​ຈາງ​ໄປ. ​ໃນ​ດ້ານ​ອື່ນ, ການ​ໂລກາ​ພິວັດ​ແມ່ນ​ການ​ປ່ຽນ​ແປງ​ສັງຄົມ, ການ​ເຊື່ອມ​ຕໍ່​ກັນ​ລະຫວ່າງ​ບັນດາ​ສັງຄົມ ​ແລະ ບັນດາ​ປັດ​ໃຈ​ຂອງ​ມັນ​ນັບ​ມື້​ນັບ​ເພີ່ມ​ຂຶ້ນ ຍ້ອນ​ຂະ​ບວນການ​ແຊກ​ຊ້ອນ​ກັນ​ທາງ​ດ້ານ​ວັດທະນະທຳ ສົມທົບ​ກັບ​ການ​ເພີ່ມ​ທະວີ​ການ​ຄົມ​ມະນະ​ຄົມ ​ແລະ ​ເຕັກ​ໂນ​ໂລ​ຊີ​ສື່ສານ ປະກອບສ່ວນ​ຊຸກຍູ້​ເສດຖະກິດ​ລະຫວ່າງ​ປະ​ເທດແລະ​ການ​ແລກປ່ຽນ​ວັດທະນະທຳ. ປະຈຸ​ບັນ​ນີ້, ການ​ໂລກາ​ພິວັດ​ໄດ້​ກາຍ​ເປັນ​ທ່າ​ອຽງ​ພາວະ​ວິ​ໄສ, ​ເປັນຄວາມ​ຈິງ​ທີ່​ມີ​ຊີວິດ​ຊີວາ​ຂອງ​ໂລກ, ​ພາ​ໃຫ້​ແຕ່ລະ​ປະ​ເທດ ​​ຢືນ​ຢູ່​ຕໍ່ໜ້າ​ໂອກາດ​ທີ່​ດີ​ ພ້ອມ​ທັງ​ສິ່ງ​ທ້າ​ທາຍ​ທີ່​ໃຫຍ່​ຫຼວງ, ​ເປັນ​ຕົ້ນ​ແມ່ນ​ບັນດາ​ປະ​ເທດ​ກຳລັງ​ພັດທະນາ, ​ໃນ​ນັ້ນ​ມີ​ຫວຽດນາມ.

ກໍ່​ຄື​ກັນ​ກັບ​ຄວາມ​ສຳນຶກ “ການ​ໂລກາ​ພິວັດ”, ​ໃນ​ພາກ​ຕົວ​ຈິງ​ປະ​ຈຸ​ບັນ ກໍ່​ຍັງ​ມີ​ຄວາມ​ເຂົ້າ​ໃຈ​ທີ່​​ແຕກຕ່າງ​ກັນ​ກ່ຽວກັບ “ການ​ເຊື່ອມ​ໂຍງ​ສາກົນ”. ອາດ​ຈະ​ແມ່ນ,​ ການ​ເຂົ້າ​ເຖິງ​ທີ່​ສອດຄ່ອງ​ທີ່​ສຸດ​ແມ່ນ ພິຈາລະນາ​ການ​ເຊື່ອມ​ໂຍງ​ເປັນ​ຂະ​ບວນການ​ເປີດ​ປະຕູປະ​ເທດ​ ແລະ​ ເຂົ້າ​ຮ່ວມ​ໃນ​ທຸກ​ດ້ານ​ຂອງ​ຊີວິດ​ສາກົນ ຊຶ່ງ​ກົງກັນຂ້າມ​ກັບສະຖານະ​ປິດ​ປະຕູ​ປະ​ເທດ, ຢູ່​ໂດດດ່ຽວ ຫຼື​ມີ​ການ​ພົວພັນ​ແລກປ່ຽນ​ສາກົນ​ໜ້ອຍລົງ. ຕາມ​ນັ້ນ, ​ການເຊື່ອມ​ໂຍງ​ສາກົນ ​ໄດ້​ເຂົ້າ​ໃຈ​ວ່າ​ເປັນ​ຂະ​ບວນວິວັດ​ການ​ເຄື່ອນ​ໄຫວ​ພົວພັນ​ຕິດ​ຕໍ່​ລະຫວ່າງ​ບັນດາ​ປະ​ເທດ​ນຳ​ກັນ ອີງ​ໃສ່​ການ​ແບ່ງປັນ​ຜົນ​ປະ​ໂຫຍ​ດ, ​ເປົ້າ​ໝາຍ, ຄຸ​ນຄ່າ, ​ແຫຼ່ງພະລັງ, ອຳນາດ (ອຳນາດ​ຕັດ​ສີນ​ນະ​ໂຍບາຍ) ​ແລະ ​ປະຕິບັດ​ຕາມ​ບັນດາ “ກົດ​ລະບຽບ” ທົ່ວ​ໄປ​ໃນ​ຂອບ​ເຂດບັນດາ​ການ​ຈັດ​ຕັ້ງ​ຫຼື​ອົງການ​ສາກົນ.

ຫວຽດນາມ​ມີ​ແນວ​ຄິດເຊື່ອມ​ໂຍງ​ມາ​ແຕ່​ດົນ​ນາມ​ແລ້ວ, ນັບ​ແຕ່​ເມື່ອ​ເຂົ້າ​ຮ່ວມ ອາ​ຊຽນ (ປີ 1995), ຫວຽດນາມ​ໄດ້​ດຳ​ເນີນ​ເປັນ​ແຕ່​ລະ​ກ້າວ​ຢ່າງ​ໜັກ​ແໜ້ນ ນັບ​ທັງ​ໃນ​ການວາ​ງ​ແຜນ​ນະ​ໂຍບາຍ​ແລະ​ໃນ​ການ​ເຄື່ອນ​ໄຫວ​ຕົວ​ຈິງ, ​ໄປ​ແຕ່​ການ​ຮ່ວມ​ມືເຖິງ​ການ​​ເຊື່ອມ​ຕໍ່ ​ເຊື່ອມ​ໂຍງ; ​ແຕ່​ການ​ເຊື່ອມ​ໂຍງ​ພາກ​ພື້ນ, ຫຼາຍ​ພາກ​ພື້ນ ​ເຖິງການ​ເຊື່ອມ​ໂຍງ​ເສດຖະກິດ​ທົ່ວ​ໂລກ. ພິ​ເສດ​, ກ້າວ​ເຂົ້າ​ສູ່​ສະຕະວັດ​ທີ XXI, ດ້ວຍ​ແຜນ​ນະ​ໂຍບາຍ “​ເສີມ​ຂະຫຍາຍ​ແຫຼ່ງພະລັງ​ພາຍ​ໃນປະ​ເທດ, ພ້ອມ​ກັນ​ນັ້ນ​ກໍ່ຍາດ​ແຍ່ງ​ເອົາ​ແຫຼ່ງພະລັງ​ພາຍ​ນອກ”, ວັນ​ທີ 27 ພະຈິກ 2001, ກົມ​ການ​ເມືອງ​ສູນ​ກາງ​ພັກ​ໄດ້​ອອກ​ມະຕິ​ສະບັບ​ທີ 07-NQ/TW “ກ່ຽວ​ກັບ​ການ​ເຊື່ອມ​ໂຍງ​ເສດຖະກິດ​ສາກົນ” ດ້ວຍ​ເປົ້າ​ໝາຍ​ເປັນ​ເຈົ້າ​ການ​ໃນ​ການ​ເຊື່ອມ​ໂຍງ​ເສດຖະກິດ​ສາກົນ ​ແນ​ໃສ່​ເປີດ​ກວ້າງ​ຕະຫຼາດ, ຍາດ​ແຍ່ງ​ເອົາທຶນ ​ເຕັກ​ໂນ​ໂລ​ຊີ ຄວາມ​ຮູ້​ກ່ຽວ​ກັບ​ການ​ຄຸ້ມ​ຄອງ​ບໍລິຫານ ​ເພື່ອ​ຍູ້​ແຮງ​ການ​ຫັນ​ເປັນ​ອຸດສາຫະກຳ ທັນ​ສະ​ໄໝຕາມ​ທິດສັງຄົມ​ນິຍົມ, ປະຕິບັດ​​ເປົ້າ​ໝາຍ​ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ, ສັງຄົມ​ມີ​ຄວາມ​ຍຸຕິ​ທຳ ປະຊາທິປະ​ໄຕ ສີວິ​ໄລ.

ກອງປະຊຸມ​ໃຫຍ່​ຄັ້ງ​ທີ XI ຂອງ​ພັກ (ປີ 2011) ​ໄດ້​ຂີດ​ໝາຍ​ບາດກ້າວ​ພັດທະນາ​ໃໝ່​ ໃນ​ຂະ​ບວນວິວັດ​ການເຊື່ອມ​ໂຍງ​ສາກົນຂອງ​ຫວຽດນາມ ດ້ວຍ​ການວາງ​ແນວທາງ​ການ​ຕ່າງປະ​ເທດ​ດ້ານ​ວັດທະນະທຳ​ໃນ​ໄລຍະ​ການ​ພັດ​ທະນາໃໝ່ ຄື “​ເປັນ​ເຈົ້າ​ການ​ແລະ​ຕັ້ງໜ້າ​ເຊື່ອມ​ໂຍງ​ສາກົນ”. ຈາກ​ “ການ​ເຊື່ອມ​ໂຍງ​ເສດຖະກິດ​ສາກົນ” ຫັນ​ໄປ​ສູ່ “​ເຊື່ອມ​ໂຍງ​ສາກົນຢ່າງຮອບດ້ານ” ​ແມ່ນ​ບາດກ້າວ​ພັດທະນາ​ທີ່​ສຳຄັນກ່ຽວ​ກັບ​ຈິນຕະນາການ​ການ​ຕ່າງປ​ະ​ເທດ​ຂອງ​ພັກ​ເຮົາ. ນີ້​ບໍ່​ພຽງ​ແຕ່​​ແມ່ນຄວາມ​ເປັນ​ເຈົ້າ​ການ, ຕັ້ງໜ້າ​ເຊື່ອມ​ໂຍງສະ​ເພາະ​ຂົງ​ເຂດ​ເສດຖະກິດ ຫຼື​ຂົງ​ເຂດ​ລະອຽດ​ໜຶ່ງ​ເທົ່າ​ນັ້ນ ຫາກ​ແມ່ນ​ຄວາມ​ຕັ້ງໜ້າ​ເປີດ​ກວ້າງ​ການເຊື່ອມ​ໂຍງ​ສາກົນ ດ້ວຍ​ຂະໜາດ​ໃຫຍ່​ຮອບດ້ານ ​ໃນ​ບັນດາ​ຂົງ​ເຂດ​ເສດຖະກິດ ການ​ເມືອງ ວັດທະນະທຳ ສັງຄົມ ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ,...

ຮອດ​ປີ 2013, ​ໂດຍ​ພື້ນຖານ ຫວຽດນາມ​ໄດ້​ເຊື່ອມ​ໂຍງ​ເສດຖະກິດ​ໃນ​ລະດັບ​ທົ່ວ​ໂລກ ​ແລະ ບັນລຸ​ຜົນສຳ​ເລັດ​ທີ່​ແນ່ນ​ອນ. ຈາກ​ພຶດຕິ​ກຳ​ນັ້ນ, ກົມ​ການ​ເມືອງ​ໄດ້​ອອກ​ມະຕິ​ສະບັບ​ທີ 22-NQ/TW, ວັນ​ທີ 10​ເມສາ 2013, ກ່ຽວ​ກັບ​ການເຊື່ອມ​ໂຍງ​ສາກົນ, ​ເພື່ອ​ເພີ່ມ​ທະວີ​ຄວາມ​​ເປັນ​ເຈົ້າ​ການ ຕັ້ງໜ້າ​ເຊື່ອມ​ໂຍງ​ສາກົນ, ພາ​ການ​ເຊື່ອມ​ໂຍງ​ຂອງ​ຫວຽດນາມ​ໄປ​ສູ່​​ໄລຍະການ​ພັດທະນາ​ໃໝ່ - ​ເຊື່ອມ​ໂຍງ​ຮອບດ້ານ, ​ເຊື່ອມ​ໂຍງ​ໃນ​ທຸກ​ຂົງ​ເຂດ, ​ໃນ​ນັ້ນ​ເຊື່ອມ​ໂຍງ​ເສດຖະກິດ​ເປັນ​ຈຸດ​ໜັກ​ໃຈ​ກາງ, ​ເຊື່ອມ​ໂຍງ​ໃນ​ບັນດາ​ຂົງ​ເຂດ​ອື່ນ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້ການ​ເຊື່ອມ​ໂຍງ​ເສດຖະກິດ​ເລິກ​ເຊິ່ງກວ່າ ມີ​ປະສິດທິ​ຜົນ​ກວ່າ, ປະກອບສ່ວນ​ທີ່​ຕັ້ງໜ້າ​ແລະ​ມີ​ປະສິດທິ​ຜົນ​ ເຂົ້າ​ໃນ​ການ​ພັດທະນາ​ເສດຖະກິດ, ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດຊາດ​ຫວຽດນາມສັງຄົມ​ນິຍົມ. ​ເລື່ອງ​ນີ້​ສືບ​ຕໍ່​ໄດ້​ຊາບ​ຊຶມ​ຢູ່​ໃນ​ມະຕິ​ສະບັບ​ທີ 33-NQ/TW, ວັນ​ທີ 9 ​ມິຖຸນາ 2014, ກ່ຽວກັບ​ການ​ກໍ່ສ້າງ​ແລະ​ພັດທະນາ​ວັດທະນະທຳ, ຜູ້​ຄົນ​ຫວຽດນາມ ຕອບ​ສະໜອງ​ຄວາມ​ຕ້ອງການພັດທະນາ​ປະ​ເທດ​ແບບ​ຍືນ​ຍົງ ​ແລະ ​ໃນ​ລາຍ​ງານ​ການ​ເມືອງ​ທີ່​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ: “​ເປັນ​ເຈົ້າ​ການເຊື່ອມ​ໂຍງ​ສາກົນທາງ​ດ້ານ​ວັດທະນະທຳ, ຮັບ​ເອົາ​ສິ່ງ​ຍອດ​ຢ້ຽມ​ໃນ​ວັດທະນະທຳ​ຂອງ​ມະນຸດຊາດ. ​ເປັນ​ເຈົ້າ​ການ​ເປີດ​ກວ້າງການ​ຮ່ວມ​ມື​ດ້ານ​ວັດທະນະທຳ​ກັບ​ຕ່າງປະ​ເທດ, ປະຕິບັດ​ຮູບ​ການພົວພັນວັດທະນາ​ທຳຕ່າງປະ​ເທດ​ທີ່​ຫຼາກ​ຫຼາຍ, ພັດທະນາ​ການ​ພົວພັນ​ສາກົນ​ທາງ​ດ້ານ​ວັດທະນະທຳ​ໃຫ້​ເຂົ້າ​ສູ່​ລວງ​ເລິກ, ບັນລຸ​ປະສິດທິ​ຜົນ​​ແທ້​ຈິງ; ຮັບ​ເອົາ​ສິ່ງ​ຍອດ​ຢ້ຽມ​ຂອງ​ວັດທະນະທ​ໂລກຢ່າງ​ມີ​ການ​ເລືອກ​ເຟັ້ນ, ​ເຮັດ​ໃຫ້​ວັດທະນະທຳ​ຂອງ​ຊາດ​ອຸດົມສົມບູນຍິ່ງ​ຂຶ້ນ”(1).

ດ້ວຍ​ທັດສະນະ​ກຳນົດ​ທິດ​ນີ້, “ຍຸດ​ທະ​ສາດ​ວັດທະນະທຳ​ການ​ຕ່າງປະ​ເທດ​ຂອງ​ຫວຽດນາມ​ຮອດ​ປີ 2020 ​ແລະ​ວິ​ໄສ​ທັດ​ຮອດ​ປີ 2030” ​ໄດ້​ວາງ​ເປົ້າ​ໝາຍ ​ເປັນ​ເຈົ້າ​ການເຊື່ອມ​ໂຍງ​ສາກົນທາງ​ດ້ານ​ວັດທະນະ​ທຳ ​ເພື່ອ​​ໂຄສະ​ນາເຜີຍ​ແຜ່ຄຸນຄ່າ​ວັ​ດທະນະ​ທຳ​ຂອງ​ຫວຽດນາມ​ອອກ​ສູ່​ທົ່ວ​ໂລກ, ຮັບ​ເອົາ​ສິ່ງ​ຍອດ​ຢ້ຽມ​ໃນ​ວັດທະນະທຳ​ຂອງ​ມະນຸດຊາດ ​ແນ​ໃສ່​ກໍ່ສ້າງພື້ນຖານ​ວັດທະນະທຳ​ແລະ​ຜູ້​ຄົນ​ຫວຽດນາມ​ທີ່​ພັດທະນາ​ຢ່າງຮອບດ້ານ, ຍົກ​ສູງ​ຖານະ​ທີ່​ຕັ້ງ ອິດ​ທິພົນ​ສາກົນ​ຂອງ​ປະ​ເທດ​ຊາດ, ປະກອບສ່ວນ​ຮັບປະກັນ​ການ​ພັດທະນາ​ແບບ​ຍືນ​ຍົງ ​ແລະ ປົກ​ປັກ​ຮັກສາປະ​ເທດ​ຊາດ​ຢ່າງ​ໝັ້ນຄົງ.

ນີ້​ແມ່ນ​ແຜນ​ນະ​ໂຍບາຍ, ​ແນວ​ຄິດ​ທີ່ຖືກຕ້ອງ, ສະ​ແດງ​ໃຫ້​ເຫັນ​ເຖິງ​ວິ​ໄສ​ທັດ​ຍຸດ​ທະ​ສາດ​ຮອບດ້ານ​ຂອງ​ພັກ​ເຮົາ​ກ່ຽວ​ກັບ​ບັນຫາ​ນີ້, ຍ້ອນ​ວ່າ ຮັກສາ​ເອກະລັກ​ວັດທະນະທຳ​ຂອງ​ຊາດ​ໄວ້​ໄດ້ ​ແມ່ນ​ຮັກສາ​ຫຼັກ​ໝັ້ນ​ເອກະລັກ​ຂອງ​ຊາດ ​ເພື່ອ “​ເຊື່ອມ​ໂຍງ​ແຕ່​ບໍ່​ຖືກ​ເສື່ອ​ນ​ລະລາຍ”. ຄື​ແນວ​ນັ້ນ, ອາດ​ຈະ​ເຫັນ​ຂະ​ບວນວິວັດ​ການເຊື່ອມ​ໂຍງ​ສາກົນ ​ແລະ ​ເຂົ້າ​ຮ່ວມ​ການ​ໂລກາ​ພິວັດຂອງ​ຫວຽດນາມ ສະ​ແດງ​ໃຫ້​ເຫັນ​ເຖິງ​ຈິດ​ໃຈ​ທັງ​ປະດິດສ້າງ ເປັນ​ເຈົ້າ​ການ, ທັງ​ຊັ່ງຊາ ຮອບ​ຄອບ, ປະຕິບັດ​ເປັນ​ແຕ່​ລະ​ກ້າວ ການສະ​ເໜີ​ແຜນ​ນະ​ໂຍບາຍ ກໍ່​ຄື​ການ​ກະທຳ​ຕົວ​ຈິງ​ທີ່​ໜັກ​ແໜ້ນ​ຂອງ​ພັກ ​ແລະ ລັດ​ເຮົາ.

ຄວາມ​ເປັນ​ເຈົ້າ​ການ​ແລະ​ຕັ້ງໜ້າ​ຂອງ​ຫວຽດນາມ​ ໃນການ​ເຊື່ອມ​ໂຍງ​ສາກົນ ທາງ​ດ້ານ​ວັດທະນະທຳ​ ໃນ​ເວລາ​ທີ່​ຜ່ານ​ມາ

ການ​ເຊື່ອມ​ໂຍງ​ສາກົນທາງ​ດ້ານ​ວັດທະນະທຳ​ໄດ້​ສະ​ແດງ​ອອກ​ແຕ່​ດົນ​ແລ້ວ ​ແລະ ນັບ​ມື້​ນັບ​ມີ​ລັກສະນະ​ເປັນ​ເຈົ້າ​ການ, ຕັ້ງໜ້າ​ ເມື່ອ​ຜັນ​ຂະຫຍາຍ​ບັນດາ​ແຜນ​ນະ​ໂຍບາຍ, ​ແນວທາງ​ຂອງ​ພັກ​ແລະ​ລັດ. ​ໃນ​ເວລາ​ທີ່​ຜ່ານ​ມາ, ​ໂດຍຮັບ​ຮູ້​ໄດ້​ຄວາມ​ສຳຄັນ​ຂອງ​ຂະບວນວິວັດ​​ໂລກາ​ພິວັດ ​ແລະ ການ​ເຂົ້າ​ຮ່ວມສະໜາມ​ເກ​ມທົ່ວ​ໂລກ, ຫວຽດນາມ​ໄດ້​ມີ​ນະ​ໂຍບາຍ​​ເຂົ້າ​ຮ່ວມ​ຂະ​ບວນວິວັດ​ນີ້ຢ່າງເປັນ​ເຈົ້າ​ການ. ອາດ​ຈະ​ເຫັນ​ວ່າ, ສິ່ງ​ທີ່​ສອດ​ຮ້ອຍ​ຕະຫຼອດ​ໃນ​ແນວທາງ, ນະ​ໂຍບາຍ ​ກໍ່​ຄື​ພຶດຕິ​ກຳ​​ແຫ່ງການ​ເຄື່ອນ​ໄຫວເຊື່ອມ​ໂຍງ​ສາກົນທາງ​ດ້ານ​ວັດທະນະທຳ​ຂອງ​ຫວຽດນາມ ປະກອບ​ດ້ວຍ​ສອງ​ຂະ​ບວນວີ​ວັດທີ່​ຂະໜານ​ກັນ: ທີ​ໜຶ່ງ, ​ແນະນຳ​ວັດທະນະທຳ​ຫວຽດນາມ​ໃນ​ຕ່າງປະ​ເທດ, ກວມ​ດ້ວຍ​ແນະນຳຄວາມ​ມ່ວນ ຄວາມ​ງານ ຄວາມ​ພິ​ເສດ​ຂອງ​ພື້ນຖານ​ວັດທະນະທຳ​ຫວຽດນາມ, ຢືນຢັນ​ກັບ​ເພື່ອນ​ມິດ​ໃນ​ຫ້າ​ທະວີບ​ກ່ຽວ​ກັບ “ຊາດ​ຫວຽດນາມ​ທີ່​ຮັກຫອມ​ສັນຕິພາບ ວັດທະນະທຳ, ປະ​ເທດ​ຫວຽດນາມ​ທີ່​ປ່ຽນ​ແປງ​ໃໝ່, ຂະຫຍັນ​ຂັນ​ເຄື່ອນ ​ແລະ ພັດທະນາ​ຢ່າງ​ບໍ່​ຢຸດ​ຢັ້ງ”. ທີ​ສອງ, ຮັບ​ເອົາ​ຢ່າງ​ມີ​ການ​ເລືອກ​ເຟັ້ນ ສິ່ງ​ຍອດ​ຢ້ຽມຕ່າງໆ​ໃນ​ວັດທະນະທຳ​ຂອງ​ມະນຸດ, ກວມ​ທັງ​ບັນດາ​ຄວາມ​ຮູ້​ກ່ຽວ​ກັບ​ວິທະຍາສາດ, ຄວາມ​ຄິດ​ກ່ຽວ​ກັບ​ວັດທະນະທຳແລະສຶກສາ, ບັນດາ​ບົດຮຽນ​ໃນ​ການ​ແກ້​ໄຂບັນດາ​ບັນຫາສັງຄົມ​ທີ່​ເກີດ​ຂຶ້ນ​ໃນ​ຂະ​ບວນວິວັດ​ການ​ພັດ​ທະນາ, ຈາກ​ນັ້ນ ປະກອບສ່ວນ​ພັດທະນາ​ປະ​ເທດ ຕາມ​ທິດ​ຍືນ​ຍົງ, ກໍ່ສ້າງ​ສັງຄົມ​ສີວິ​ໄລ ທັນ​ສະ​ໄໝ ​ແລະ ມະນຸດ​ອະລິຍະ​ທຳ.

​ໃນ​ຊຸມ​ປີ​ທີ່​ຜ່ານ​ມາ, ກະຊວງ​ວັດທະນະທຳ ກິລາ ​ແລະ ການທ່ອງ​ທ່ຽວ ​ໄດ້​ມີ​ຄວາມ​ຕັ້ງໜ້າ ​ເປັນ​ເຈົ້າ​ການຢູ່​ສະ​ເໝີ ​ໃນ​ການ​ຊຸກຍູ້​ຂະ​ບວນການ​ເຊື່ອມ​ໂຍງ​ສາກົນທາງ​ດ້ານ​ວັດທະນະທຳ ຕາມ​ບັນດາ​ທິດ​ທາງ​ຂອງ​ພັກ ລັດ ​ແລະ ບັນລຸ​ຜົນສຳ​ເລັດ​ທີ່​ສຳຄັນ​ຫຼາຍ​ຢ່າງ.

ທາງ​ດ້ານ​ລະບຽບ​ກົດໝາຍ, ກະຊວງ​ໄດ້​ພະຍາຍາມ​ຊີ້​ນຳ​ການກວ​ດຄືນ, ​ແກ້​ໄຂດັດ​ແປງ, ​ເພີ່ມ​ເຕີມ​ບັນດາ​ເອກະສານ​ພາຍ​ໃນ​ປະ​ເທດ ​ແລະ ບັນດາ​ຂໍ້​ຕົກລົງ​ຮ່ວມມື​ສາກົນທາງ​ດ້ານ​ວັດທະນະທຳ; ວາງກຳນົດ​ທິດ​ທາງການ​ຮ່ວມ​ມື​ໃນ​ການ​ເຄື່ອນ​ໄຫວ​ແລກປ່ຽນ​ວັດທະນະທຳ​ສາກົນ ​ໃນ​ແຕ່ລະ​ໄລຍະ ສະ​ໄໝ ​ແລະ ​ແຕ່ລະ​ປີ, ກໍ່​ຄື​ກຳນົດ ​ແລະ ອອກມະຕິຕົກລົງ​ກ່ຽວ​ກັບບັນດາ​ຂົງ​ເຂດ, ພື້ນ​ທີ​ບຸລິມະສິດ​ໃນ​ການ​ຮ່ວມ​ມື​ສາກົນ, ຈາກ​ນັ້ນ ຊີ້​ນຳ​ບັນດາ​ອົງການ​ເສນາ​ທິການທີ່​ກ່ຽວຂ້ອງ ​ໃຫ້​ຜັນ​ຂະຫຍາຍ​ປະຕິບັດ.

ບົນ​ພື້ນຖານ​ນັ້ນ, ປະ​ເທດ​ເຮົາ​ນັບ​ມື້​ນັບ​ຍູ້​ແຮງ​ການ​ຮ່ວມ​ມືພະຫຸ​ພາຄີ​ແລະ​ທະວິ​ພາຄີ, ກາຍ​ເປັນສະມາຊິກ​ເປັນ​ທາງ​ການ​ຂອງ​ຫຼາຍອົງການ​ຈັດ​ຕັ້ງ​ສາກົນ ສະມາຄົມ ​ແລະ ​ເວທີ​ປາ​ໄສ​ສາກົນ​ທີ່​ສຳຄັນ​ເຊັ່ນ ອາ​ຊຽນ, ​ເອ​ເປ​ກ, ​ອາ​ເຊມ, ອົງການ​ການ​ຄ້າ​ໂລກ, ອົງການ​ການ​ສຶກສາ ວິທະຍາສາດ ​ແລະ​ວັດທະນະທຳ​ແຫ່ງ​ສະຫະ​ປະຊາ​ຊາດ...; ​ເຂົ້າ​ຮ່ວມ​ການ​ເຄື່ອນ​ໄຫວ​ວັດທະນະທຳ​ຂອງ​ບັນດາ​ອົງການ​ຈັດ​ຕັ້ງ​ສາກົນ ​ເຊັ່ນ ອົງການ​ສາກົນ​ ຟຣານ​ໂກ​ໂຟນ (OIF), ສະມາຄົມ​ສາກົນ​ບັນດາ​ສະພາ​ສິລະ​ປະ​ແລະ​ອົງການ​ວັດທະນະທຳ (IFACCA); ​ເຂົ້າຮ່ວມ​ບັນດາ​ອະນຸ​ສັນຍາ​ຂອງອົງການ​ການ​ສຶກສາ ວິທະຍາສາດ ​ແລະ​ວັດທະນະທຳ​ແຫ່ງ​ສະຫະ​ປະຊາ​ຊາດ ​ເຊັ່ນ ອະນຸ​ສັນຍາ​ປີ 1972, ອະນຸ​ສັນຍາ​ປີ 2003, ອະນຸ​ສັນຍາ​ປີ 2005... ​ແຕ່​ປີ 2016 ຮອດ​ເດືອນ ມິຖຸນາ 2017, ກະຊວງ​ໄດ້​ຈັດ​ຕັ້ງ​ການ​ຮຽບຮຽງ, ​ເຈລະຈາ, ກວດ​ຮັບ​ແລະ ລົງ​ນາມ​ໃນ 21 ​ເອກະສານ​ໝັ້ນ​ໝາຍ​ຮ່ວມ​ມືສະ​ເພາະ​ຂະ​ແໜງ​ກັບ​ຕ່າງ​ປະ​ເທດ. ຫວຽດນາມ​ໄດ້​ປັບປຸງ​ເຄືອ​ຂ່າຍ​ສາກົນ​ ກ່ຽວ​ກັບ​ການ​ຮ່ວມ​ມື​ດ້ານ​ວັດທະນະທຳທີ່​ກວ້າງຂວາງ​ແລະ​ເລິກ​ເຊິ່ງ ​ໃນ​ຫຼາຍຮູບ​ແບບ ​​ແລະ ແບບວີ​ທີ​ການ​ຮ່ວມ​ມື​ທີ່​ຫຼາກ​ຫຼາຍ ດ້ວຍ​ການ​ສ້າງ​ຕັ້ງ​ການ​ພົວພັນທາງ​ດ້ານ​ວັດທະນະທຳ​ກັບ​ປະມານ 60 ປະ​ເທດ​ໃນ​ໂລກ.

ວຽກ​ງານ​ສົ່ງ​ເສີມ ​ແນະນຳ​ວັດທະນາ​ທຳ​ຫວຽດນາມ​ໃນ​ຕ່າງປະ​ເທດ ນັບ​ມື້​ນັບ​ໄດ້​ຮັບ​ຄວາມ​ເອົາ​ໃຈ​ໃສ່ ​ໃຫ້​ຄວາມ​ສຳຄັນ. ​ໃນ​ແຕ່ລະ​ປີ, ຫວຽດນາມ​ໄດ້​ສົ່ງ​ຄະນະ​ຜູ້​ແທນ​ປະມານ 350 ຄະນະ ​ດ້ວຍ​ພະນັກງານ ຫຼາຍ​ພັນ​ຄົນ ​ໄປ​ຕ່າງປະ​ເທດ ​ເພື່ອ​ປະຕິບັດ​ການ​ແລກປ່ຽນ​ວັດທະນະທຳ​ກັບ​ຕ່າງປະ​ເທດ ​ແນ​ໃສ່​ແນະນຳ​ເຜີຍ​ແຜ່ ຮູບ​ພາບປະ​ເທດ​ຫວຽດນາມທີ່​ສວຍ​ງາມ, ຮັກຫອມ​ສັນຕິພາບ, ພວມ​ພັດທະນາ​ຢ່າງ​ຂະຫຍັນ​ຂັນ​ເຄື່ອນ ​ແລະ ວັດທະນະທຳ​ຫວຽດນາມ​ທີ່​ເປັນ​ເອກະລັກ, ມີ​ຄວາມ​ຫຼາກ​ຫຼາຍ, ​ເຕັມ​ໄປ​ດ້ວຍ​ສີສັນ ​ໄປ​ໃຫ້​ປະຊາ​ຄົມ​ໂລກ​ຢ່າງ​ກວ້າງຂວາງ. ຂະ​ແໜງການ​ວັດທະນະທຳ ກິລາແລະທ່ອງທ່ຽວ ​ໄດ້​ຕັ້ງໜ້າ​ຂຸດ​ຄົ້ນ​ບັນດາ​ຄຸນຄ່າ, ຄວາມ​ຮູ້, ບັນດາ​ມໍລະດົກ​ວັດທະນະທຳ​ທີ່​ມີ​ຕົວ​ຕົນ​ແລະ​ບໍ່​ມີຕົວ​ຕົນ ຂອງ​ຫວຽດນາມ ​ເພື່ອ​ປະກອບສ່ວນ​ເຂົ້າ​ໃນ​ການ​ພັດທະນາ​ຂອງ​ພາກ​ພື້ນ​ແລະ​ໃນ​ໂລກ, ​ເຮັດ​ໃຫ້​ສາງ​ວັດທະ​ນຳ​ຂອງ​ມະນຸດ​ຮັ່ງມີ ອຸດົມສົມບູນ​ຂຶ້ນ​ຕື່ມ. ​ໃນເວລາ​ທີ່​ຜ່ານ​ມາ​ມໍ່​ນີ້, ພວກ​ເຮົາ​​ໄດ້​ຈັດ​ຕັ້ງ​ພິທີມອບ​ໃບຮັບ​ຮອງຂອງ ອົງການຢູ​ເນ​ສະ​ໂກ ທີ່ຮັບຮອງ​ພິມີ​ບູຊາ​ພະ​ແມ່​ໄຕ​ຫໍຂອງ​ຊາວ​ຫວຽດນາມ ​ເປັນ​ມໍລະດົກ​ວັດທະນະທຳ​ທີ່ບໍ່​ມີຕົວ​ຕົນ​ທີ່​ເປັນ​ຕົວ​ແທນ​ຂອງ​ມະນຸດ, ​ເພີ່ມຈຳນວນ​ມໍລະດົກ​ວັດທະນະທຳຂອງ​ຫວຽດນາມ​ທີ່​ລົງທະບຽນ​ໂດຍອົງການ ຢູ​ເນ​ສະ​ໂກ ຂຶ້ນ​ເປັນ 25. ກອງ​ປະຊຸມ​ຄົບ​ຄະນະຂອງ ຄະນະ​ກຳມະການ​ໂຄງການ​ຄວາມ​ຈຳ​ຂອງ​ໂລກ​ໃນ​ພາກ​ພື້ນ​ອາຊີ-ປາຊີ​ຟິກ ໄດ້ຮັບຮອງ “ບົດ​ກະວີ​ຢູ່​ໃນ​ສະຖາປັດຕະຍະກຳ​ຂອງ​ລາຊະ​ວັງ ​ເຫວ້” ​ແລະ “​ແຜ່ນ​ໄມ້​ພິມ​ໜັງສື​ຂອງ​ໂຮງຮຽນ ຝຸກຢາງ” (ແຂວງ​ຮ່າ​ຕິ໊ງ) ​ເປັນ​ມໍລະ​ດົກຂໍ້​ມູນ ຂຶ້ນ​ກັບໂຄງການ​ຄວາມ​ຈຳ​ຂອງ​ໂລກ​ໃນ​ພາກ​ພື້ນ​ອາຊີ-ປາຊີ​ຟິກ.

​ໃນ​ການ​ແລກປ່ຽນ, ຮ່ວມ​ມື​ສາກົນທາງ​ດ້ານ​ວັດທະນະທຳ, ຫວຽດນາມ​ໄດ້​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ແນະນຳບັນດາຜະລິດ​ຕະພັນ​ທາງ​ວັດທະນະທຳ​ທີ່ເປັນ​ຕົວ​ແທນ, ບັນດາ​ຮູບ​ພາບ​ທີ່​ມີ​ລັກສະນະ​ຊາດ, ກໍ່ສ້າງ​ບັນດາ​ຕົວ​ແບບ ​ແບບ​ວິທີ​ການ​ເຄື່ອນ​ໄຫວ​ວັດທະນະທຳ​ການ​ຕ່າງປະ​ເທດ​ທີ່​ຫຼາກ​ຫຼາຍ ​ເພື່ອ​ແນະນຳ​ບັນດາ​ຄຸນຄ່າ​ວັດທະນະທຳ​ຫວຽດນາມ ຕໍ່​ໂລກ ​ໂດຍ​ຜ່ານ “ວັນ​ວັດທະນະທຳ”, “ສັບປະດາ​ວັດທະນະທຳ” ຫວຽດນາມ, ງານ​ເທດສະການ​ວັດທະນະທຳ-ການທ່ອງ​ທ່ຽວ, ບັນດາ​ການ​ເຄື່ອນ​ໄຫວ​​ໂຄສະນາ ​ສົ່ງ​ເສີມວັດທະນະທຳ-ການທ່ອງທ່ຽວ​ຢູ່​ຕ່າງປະ​ເທດ, ​ເພີ່ມ​ທະວີ​ການສະ​ແດງ​ຕົນ​ຂອງ​ຫວຽດນາມຢູ່​ບັນດາ​ເຫດການ​ສິລະ​ປະວັດ​ທະນະ​ທຳ​ທີ່​ສຳຄັນ​ຂອງ​ໂລກ ​ເຊັ່ນ EXPO, Biennale, ​ແຟດສະຕິວານ ຟີມຮູບ​ເງົາ​ທີ່​ມີ​ຊື່​ສຽງ...

ຄຽງ​ຂ້າງ​ນັ້ນ, ຫວຽດນາມ​ກໍ່​ໄດ້​ສ້າງ​ຍຸດ​ທະ​ສາດ​ການ​ໂຄສະ​ນາ​ສື່ສານທີ່​ຕັ້ງໜ້າ ຄວບ​ຄູ່​ກັບ​ການ​ເຄື່ອນ​ໄຫມ​ວັດທະນະທຳ, ຍາດ​ແຍ່ງ​ການ​ຮ່ວມ​ມື​ຂອງ​ຊຸມ​ຊົນ​ຊາວ​ຫວຽດນາມ​ຢູ່​ຕ່າງປະ​ເທດ ​ເພື່ອ​ສ້າງຜົນ​ກະທົບ​ສູງ​ຕໍ່​ກິດ​ຈຳ​ກຳ​ສົ່ງ​ເສີມ​ວັດທະນະທຳ​ຫວຽດນາມຢູ່​ຕ່າງປະ​ເທດ.

ຫວຽດນາມ​ໄດ້​ສ້າງ​ຕັ້ງ​ສູນວັດທະນະທຳ ​ແລະ ພື້ນຖານ​ວັດທະນະທຳ​ຈຳນວນ​ໜຶ່ງ ຢູ່​ບາງ​ເຂດ​ທີ່​ສຳຄັນ​ໃນ​ໂລກເພື່ອ​ເປີດ​ກວ້າງການ​ແລກປ່ຽນ ຮ່ວມ​ມື​ດ້ານສິລະ​ປະ ​ວັດທະນະທຳ, ​ເຊັ່ນ ສູນວັດທະນະທຳ​ຫວຽດນາມ​ຢູ່​ລາວ, ສູນວັດທະນະທຳ​ຫວຽດນາມ​ຢູ່​ຝຣັ່ງ. ປະຈຸ​ບັ​ນ, ຫວຽດນາມ​ພວມ​ກໍ່ສ້າງສູນວັດທະນະທຳ​ຫວຽດນາມ​ຢູ່​ກຳປູ​ເຈຍ, ຍີ່ປຸ່ນ, ລັດ​ເຊຍ ​ແລະ ສະຫະລັດ​ອາ​ເມຣິກາ, ສ້າງ​ຕັ້ງ​ລະບົບຜູ້​ຊ່ວຍທູດ​ດ້ານ​ວັດທະນະທຳທີ່​ສະຖານທູດ​ຫວຽດນາມຢູ່​ຕ່າງປະ​ເທດ...

ທາງ​ດ້ານ​ການ​ຮັບ​ເອົາ​ສິ່ງ​ຍອດ​ຢ້ຽມ​ໃນ​ວັດທະນະທຳ​ຂອງ​ມະນຸດ, ຫວຽດນາມ​ມີ​ບັນດາ​ນະ​ໂຍບາຍ, ​ແຜນການ​ຮັບ​ເອົາ​ວັດທະນະທຳ​ຕ່າງປະ​ເທດ​ແລະ​ແນະນຳ​ວັດທະນະທຳ​ຕ່າງປະ​ເທດ​ຢູ່​​ໃນປະ​ເທດ​ຫວຽດນາມ ຢ່າງ​ກວມ​ລວມ ​ເປັນ​ລະບົບ ຍາວ​ນາມ ​ເພື່ອ​ແນ​ໃສ່​ແນະນຳ​ບັນດາ​ຜົນສຳ​ເລັດ​ດ້ານ​ວັດທະນະທຂອງ​ມະນຸດ ​ໂດຍ​ຜ່ານ​ວັນ​ວັດທະນະທຳ ສັບປະດາ​ວັດທະນະທຳ ​ເຫດການ​ວັດທະນະທຳ,... ປະຈຸ​ບັນ, ມີ 9 ປະ​ເທດ​ທີ່​ໄດ້​ກໍ່ສ້າງ​ແລະນຳ​ໃຊ້​ສູນວັດທະນະທຳ​ຂອງ​ເຂົາ​ຢູ່​ຫວຽດນາມ​ຄື ລັດ​ເຊຍ, ​ເຢຍລະ​ມັນ, ອັງກິດ, ຝຣັ່ງ, ອີ​ຕາ​ລີ, ຍີ່ປຸ່ນ, ສ.​ເກົາຫຼີ, ອິນ​ເດຍ ​ແລະ ຈີນ.

ຫວຽດນາມ​ກໍ່​ຍາດ​ແຍ່ງ​ໄດ້​ການ​ຊ່ວຍ​ເຫຼືອ​ດ້ານ​ການ​ເງິນ​ຂອງ​ບັນດາປະ​ເທດ, ບັນດາ​ການຈັດ​ຕັ້ງລັດຖະບານ ລະຫວ່າງ​ລັດຖະບານ ​ແລະ​ນອກ​ພາກ​ລັດ ຄື ຍີ່ປຸ່ນ, ສ.​ເກົາຫຼີ, ຊູ​ແອດ, ດານ​ມາກ, ນອກແວ, ​ແຟງ​ລັງ, ຝຣັ່ງ, ກອງ​ທຶນ​ຟອດ, ອົງການ​ຟຣານ​ໂກ​ໂຟນ, ອີ​ຢູ, ອາ​ຊຽນ..., ກໍ່​ຄື​ການ​ຊ່ວຍ​ເຫຼືອຂອງ​ຂົງ​ເຂດ​ເອກະ​ຊົນ ​ແນ​ໃສ່​ພັດທະນາ​ໂຄງ​ສ້າງ​ພື້ນຖານ​ວັດທະນະທຳ​ຂອງ​ຫວຽດນາມ; ພ້ອມ​ກັນ​ນັ້ນ​ກໍ່​ດຶງ​ດູດ​ໄດ້ ຫຼາຍ​ໂຄງການ​ແລະ​ການຊ່ວຍ​ເຫຼືອ​ຂອງ​ຕ່າງປະ​ເທດ ​ໃຫ້​ແກ່​ການ​ຍົກ​ສູງ​ຄວາມ​ສາມາດ​ແລະ​ທັກ​ສະ​ວິ​ຊາ​ສະ​ເພາະ​ ຂອງ​ຖັນ​ແຖວ​ພະນັກງານຄຸ້ມ​ຄອງ​ແລະ​ດຳ​ເນີນປະຕິບັດ​ວັດທະນະທຳ...

ຄຽງຄູ່​ກັບ​ຂະ​ບວນວິວັດ​ດັ່ງກ່າວ​ນັ້ນ, ຫວຽດນາມ​ກໍ່​ເດັດດ່ຽວ​ກີດ​ກັ້ນການ​ລຸກ​ລ້ຳ​ຂອງ​ຜະລິດ​ຕະພັນ​ວັດທະນະທຳ​ທີ່​ເປັນ​ພິດ​ໄພ, ​ເລວ​ຊາມ​ລາມົກ, ປະຕິ​ການ, ທີ່​ບໍ່​ສອດຄ່ອງ​ກັບ​ຮີດຄອງ​ປະ​ເພນີ​ອັນ​ດີງາມ​ຂອງ​ຫວຽດນາມ, ຍົກ​ສູງ​ຄວາມ​ຕ້ານທານ, ຕ້ານ “ການ​ຮຸກ​ຮານ” ທາງ​ດ້ານ​ວັດທະນະທຳ.

ການ​ເຄື່ອນ​ໄຫວ​ດ້ານການ​ສຶກສາ ຝຶກ​ອົບຮົມ​ແຫຼ່ງບຸກຄະລາ​ກ​ອນ​ໃຫ້​ແກ່​ວຽກ​ງານ​ວັດທະນະທຳ​ການ​ຕ່າງປະ​ເທດ ກໍ່​ໄດ້​ຮັບ​ຄວາມ​ເອົາ​ໃຈ​ໃສ່ ​ໂດ​ຍຜ່ານ​ການ​ເພີ່ມ​ທະວີການ​ຮ່ວມ​ມືກັບ​ບັນດາ​ປະ​ເທດ ​ເພື່ອ​ອົບຮົມ​ສຶກສາ ຝຶກ​ອົບຮົມ​ດ້ານ​ທັກສະ ສິນລະປະ ວັດທະນະທຳ​ ໃຫ້​ພະນັກງານ​ວິຊາ​ສະ​ເພາະ​ຄຸນ​ນະພາ​ບສູງ.

ບັນດາ​ຜົນສຳ​ເລັດ​ດັ່ງກ່າວ​ເທິງ​ນີ້ ສະ​ແດງ​ໃຫ້​ເຫັນ​ວ່າການ​ເຊື່ອມ​ໂຍງ​ຢ່າງ​ແທ້​ຈິງທາງ​ດ້ານ​ວັດທະນະທຳ​ຂອງ​ຫວຽດນາມ ​ເຂົ້າ​ກັບ​ປະຊາ​ຄົນ​ໂລກ ​ແລະ ພວມ​ເຂົ້າ​ສູ່​ວົງ​ໂຄຈອນ​ລວມຂອງ​ຂະ​ບວນການ​ໂລກາ​ພິວັດ. ​ແຕ່​ວ່າ, ​ເຖິງ​ວ່າ​ໄດ້​ບັນລຸ​​ບັນດາ​ຜົນສຳ​ເລັດທີ່​ໜ້າ​ພຶງ​ພໍ​ໃຈກໍ່ຕາມ, ​ແຕ່​ທຽບ​ກັບ​ຄວາມ​ຕ້ອງການ​ຂອງການ​ເຊື່ອມ​ໂຍງ​ສາກົນ ​ແລະ ການ​ພັດທະນາ​ແບບ​ຍືນ​ຍົງ​ຂອງ​ປະ​ເທດ​ຊາດ​ແລ້ວ, ບັນດາ​ການ​ເຄື່ອນ​ໄຫວ​ແລກປ່ຽນ​ແລະ​ຮ່ວມ​ມື​ສາກົນທາງ​ດ້ານ​ວັດທະນະທຳ​ຂອງ​ຫວຽດນາມ​ ກໍ່ຍັງມີ​ຂໍ້​ຂາດ​ຕົກ​ບົກພ່ອງ​ບໍ່​ໜ້ອຍທີ່​ຕ້ອງ​ກຳຈັດ​ດັດ​ແກ້.

ສືບຕໍ່​ເປັນ​ເຈົ້າ​ການ​ແລະ​ຕັ້ງໜ້າ​ເຊື່ອມ​ໂຍງ​ສາກົນ ທາງ​ດ້ານ​ວັດທະນະທຳ ​ໃນ​ໄລຍະ​ຕໍ່​ໄປ

​ໃນ​ສະພາບ​ການ​ໂລກາ​ພິວັດ ທີ່​ມີ​ການ​ຜັນ​ປ່ຽນຢ່າງ​ສັບສົນ, ຄາດ​ເດົາ​ຍາກ ຊຶ່ງ​ພວມຮຽກຮ້ອງ​ໃຫ້​ຂະ​ແໜງ​ການ​ວັດທະນະທຳ ກໍ່​ຄືທົ່ວ​ທັງ​ລະບົບ​ການ​ເມືອງ ຕ້ອງ​ມີ​ຄວາມ​ມານະ​ພະຍາຍາມ​ຫຼາຍ​ກວ່າອີກ, ສືບ​ກໍ່​ເປັນ​ເຈົ້າ​ການ​ແລະ​ຕັ້ງໜ້າເຊື່ອມ​ໂຍງ​ສາກົນ​ໃນ​ໄລຍະ​ເວລາ​ຕໍ່​ໄປ, ສຸມ​ໃສ່​ປະຕິບັດ​ບັນດາວິທີ​ແກ້​ໄຂລຸ່ມ​ນີ້​ຢ່າງ​ຄົບ​ຊຸດ:

ທີ​ໜຶ່ງ, ຜັນ​ຂະຫຍາຍ​ປະຕິບັດ “ຍຸດ​ທະ​ສາດ​ວັດທະນະທຳ​ການ​ຕ່າງປະ​ເທດຂອງ​ຫວຽດນາມຮອດ​ປີ 2020 ​ແລະ​ວິ​ໄສ​ທັດ​ຮອດ​ປີ 2030” ​ເພື່ອ​ໃຫ້​ວັດທະນະທຳ​ການ​ຕ່າງປະ​ເທດກາຍ​ເປັນ​ພາກສ່ວນ​ໜຶ່ງ​ທີ່​ສຳຄັນ​ພິ​ເສດ ຂອງ​ພື້ນຖານ​ວັດທະນະທຳ​ແຫ່ງຊາດ, ສະ​ແດງ​ໃຫ້​ເຫັນ​ເຖິງ​ກຳລັງ​ແຮງ​ພາຍ​ໃນ​ຂອງ​ຊາດ, ມີ​ບົດບາດ​ຕັ້ງໜ້າ​ໃນ​ການ​ຍົກ​ສູງ​ຖານະ​ທີ່​ຕັ້ງ​ຂອງ​ປະ​ເທດ​ ປະຊາຊົນ ​ແລະ ວັດທະນະທຳ​ຫວຽດນາມ​ໃນ​ເວທີ​ສາກົນ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ແກ່​ການເຊື່ອມ​ໂຍງ​ສາກົນ ຂອງ​ປະ​ເທດ, ດ້ວຍ​ບັນດາ​ໂຄງການ​ໄລຍະ​ສັ້ນແລະ​ໄລຍະ​ຍາວ, ບັນດາ​ແຜນການ​ລະອຽດ ມີ​ປະສິດທິ​ຜົນ ​ແລະ ​ເປັນ​ໄປ​ໄດ້, ​ເຊັ່ນ ກໍ່ສ້າງ​ກົດ​ລະບຽບລະຫວ່າງ​ຂະ​ແໜງ​ການ ​ເພື່ອ​ຜັນ​ຂະຫຍາຍ​ວຽກ​ງານ​ວັດທະນະທຳ​ການ​ຕ່າງປະ​ເທດ; ຈັດ​ຕັ້ງ​ຊຸກ​ຝຶກ​ອົບຮົມ, ​ໂຄສະ​ນາ​ແລະ​ເຜີຍ​ແຜ່ ກ່ຽວ​ກັບບົດ​ບາດ​ແລະ​ຖານະ​ທີ່​ຕັ້ງ​ຂອງ​ວັດທະນະທຳການ​ຕ່າງປະ​ເທດ ​ໃຫ້​ບັນດາ​ຂັ້ນ, ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ, ບັນດາ​ອົງການ​ສູນ​ກາງ, ບັນດາ​ທ້ອງ​ຖິ່ນ ວິ​ສາ​ຫະກິດ; ກໍ່ສ້າງ​ແລະ​ຜັນ​ຂະຫຍາຍ​ໂຄງການ​ແນະນຳບຸກຄົນ​ທີ່​ມີ​ຊື່​ສຽງ, ວີລະ​ບຸລຸດ​ຂອງ​ຊາດ​ຫວຽດນາມ ຕໍ່​ປະຊາ​ຄົມ​ໂລກ,...

ທີ​ສອງ, ບູລະນະ​ກົນ​ໄກ ນະ​ໂຍບາຍ​ກ່ຽວ​ກັບ​ການ​ເງິນ, ການ​ຊ່ວຍ​ເຫຼືອ​ໃຫ້​ວຽກ​ງານ​ການ​ແລກປ່ຽນ ຮ່ວມ​ມື​ທາງ​ດ້ານ​ສິລະ​ປະ ວັດທະນະທຳ, ​ໃນ​ນັ້ນ​ ເນັ້ນ​ເຖິງ​ບັນດາ​ການ​ບຸລິມະສິດ​ກ່ຽວ​ກັບ​ພາສີ, ກໍ່ສ້າງ​ນະ​ໂຍບາຍ ກົດໝາຍ​ກ່ຽວ​ກັບ​ການບໍລິຈາກແລະອຸປະຖຳ ສ້າງ​ເປັນ​ຂອບ​ກົດໝາຍ​ໃຫ້​ແກ່ບັນດາ​ການ​ເຄື່ອນ​ໄຫວ​ນີ້ ​ໃນ​ຂົງ​ເຂດ​ວັດທະນະທຳ​ການ​ຕ່າງປະ​ເທດ. ກໍ່ສ້າງ​ນະ​ໂຍບາຍ​ຫັນ​ເປັນ​ສັງຄົມ ​ແລະ ນະ​ໂຍບາຍ​ບຸລິມະສິດ ​ໃຫ້​ແກ່​ບັນດາ​ການ​ເຄື່ອນ​ໄຫວ​ວັດທະນະທຳ​ການ​ຕ່າງປະ​ເທດ, ສ້າງ​ເງື່ອນ​ໄຂ​ແລະ​ສົ່ງ​ເສີມ​ບັນດາ​ການຈັດ​ຕັ້ງຢູ່​ໃນ​ແລະ​ຕ່າງປະ​ເທດ, ລັດຖະບານ​ແລະ​ນອກພາກ​ລັດ, ກໍ່​ຄື​ພາກສ່ວນ​ເສດຖະກິດ​ເອກະ​ຊົນ ​ໄດ້​ເຂົ້າ​ຮ່ວມ​ບັນດາການ​ເຄື່ອນ​ໄຫວ​ວັດທະນະທຳ​ການ​ຕ່າງປະ​ເທດ ​ແນ​ໃສ່​ເປີດ​ກວ້າງ​ການ​ລະດົມ​ບັນດາ​ແຫຼ່ງພະລັງ​ໃຫ້​ແກ່​​ການ​ເຄື່ອນ​ໄຫວຮ່ວມ​ມື​ສາກົນ.

ທີ​ສາມ, ກໍ່ສ້າງ​ບັນດາ​ຜະລິດ​ຕະພັນ​ການ​ຕ່າງປະ​ເທດທີ່​ມີ​ຄຸນ​ນະພາ​ບສູງ, ​ແນະນຳ​ບັນດາ​ຜະລິດ​ຕະພັນ​ພາບພະຍົນທີ່​ດີ​ເດັ່ນ ​ເພື່ອ​ເຂົ້າ​ຮ່ວມງານ​ເທດສະການ​ຟີມຮູບ​ເງົາ​ສາກົນ​ທີ່​ສຳຄັນ, ນຳ​ເອົາ​ຟີມຮູບ​ເງົາ​ຫວຽດນາມ​ເຂົ້າ​ໃນ​ເຄືອ​ຂ່າຍການ​ຈຳໜ່າຍແຈກ​ຢາຍລະຫວ່າງ​ປະ​ເທດ​ຢ່າງ​ເປັນ​ປະຈຳ. ຈັດ​ຕັ້ງງານ​ວາງສະ​ແດງ​ສິລະ​ປະ, ຮູບ​ພາບ​ຕາມ​ກຳນົດ​ເວລາ 2 ປີ, 3 ປີ, 5 ປີ ລະຫວ່າງ​ບັນດາ​ປະ​ເທດ​ໃນ​ກຸ່ມ ອາ​ຊຽນ, ຈັດ​ຕັ້ງ​ໝູນວຽນ​ໃນ 10 ປະ​ເທດ​ອາ​ຊຽນ ​ແລະ ກໍ່ສ້າງ​​ແຜນການ​ຈັດ​ຕັ້ງ​ງານ​ວາງສະ​ແດງ, ​ແລກປ່ຽນ​ ແນະນຳປະມວນ​ຈິດຕະກຳ, ວິຈິດ​ສິນ​ທີ່​ພິ​ເສດ​ ຂອງ​ຫວຽດນາມ, ບັນດາ​ລາຍການ​ສະ​ແດງສິລະ​ປະ​ທີ່​ຈັບ​ໃຈ, ​ເຂັ້ມ​ຂົ້ນໄປ​ດ້ວຍ​ເອກະ​ລັກ​ວັດທະນະທຳ​ຫວຽດນາມ ​ໄປ​ຍັງ​ຕ່າງປະ​ເທດ.

ທີ​ສີ່, ປະດິດ​ສ້າງ, ປ່ຽນ​ແປງ​ໃໝ່​ໃນ​ການຈັດ​ຕັ້ງ “ວັນວັດທະນະທຳ”, “ສັບປະດາວັດທະນະທຳ”, ບັນດາງານ​ເທດສະການວັດທະນະທຳ - ທ່ອງ​ທ່ຽວ​ຫວຽດນາມ, ບັນດາ​ເຫດການ ​ໂຄງການ​ເຄື່ອນ​ໄຫວວັດທະນະທຳ ສິລະ​ປະ​ຢູ່​ຕ່າງປະ​ເທດ, ​ເຮັດ​ໃຫ້​ການ​ເຄື່ອນ​ໄຫວ​ເຫຼົ່າ​ນີ້​ນັບ​ມື້​ນັບ​ມີ​ຄວາມ​ເປັນ​ເຈົ້າ​ການ ​ແລະ​ຈັບ​ໃຈ​ກວ່າ​ອີກ, ສ້າງ​ຄວາມ​ປະ​ທັບ​ໃຈ​ກ່ຽວ​ກັບປະ​ເທດ​ຫວຽດນາມ​ທີ່​ປ່ຽນ​ແປງ​ໃໝ່ ຂະຫຍັນ​ຂັນ​ເຄື່ອນ ປະດິດ​ສ້າງ ​ໃກ້ຊິດ​ເປັນ​ມິດ ​ແລະ ​ເຕັມ​ໄປ​ດ້ວຍ​ເອກະລັກ​ສວຍ​ງາມ. ​ເພີ່ມ​ທະວີ​ການ​ປະກົດ​ຕົວ​ຂອງ​ຫວຽດນາມ​ຢູ່​ໃນ​ບັນດາ​ເຫດການວັດທະນະທຳ ສິລະ​ປະ​ທີ່ສຳ​ຄັນ​ຂອງ​ໂລກ.

ທີ​ຫ້າ, ຍົກ​ສູງ​ປະສິດທິ​ຜົນ​ຂອງ​ວຽກ​ງານ​ສື່​ຂ່າວວັດທະນະທຳ, ກໍ່ສ້າງ​ນາມມະຍົດ “ທູດວັດທະນະທຳ”, “ທູດ​ການທ່ອງທ່ຽວ” ຂອງ​ຫວຽດນາມ ຢູ່​ບັນດາ​ພື້ນ​ທີ່​ທີ່​ສຳຄັນ​ໃນ​ໂລກ ​ເພື່ອ​ໂຄສະນາ​ເຜີຍ​ແຜ່​ຮູບ​ພາບປະ​ເທດ​ແລະ​ປະຊາຊົນ​ຫວຽດນາມ. ສ້າງ​ຄວາມ​ຫຼາກ​ຫຼາຍທາງ​ດ້ານ​ຜະລິດ​ຕະພັນ, ຮູບ​ການ​ສື່ສານ​ໄປ​ຍັງ​ສາກົນດ້ວຍ​ພາສາ​ຕ່າງປະ​ເທດ ​ເພື່ອ​ໃຫ້​ສອດຄ່ອງ​ກັບ​ຫຼາຍ​ຕະຫຼາກ​ແຂກ​ສາກົນ​ທີ່​ຕ່າງ​ກັນ. ຜະລິດ​ສິ່ງ​ພິມ ປຶ້ມ ໜັງສືພິມ​ອອນ​ໄລ ໜັງສືພິມ​ສະ​ເພາະ​ເປັນ​ພາສາ​ຕ່າງປະ​ເທດ, ລາຍການ​ໂທລະພາບ​ການ​ຕ່າງປະ​ເທດ, ນຳ​ໃຊ້​ບັນດາ​ຮູບ​ແບບ​ສື່ສານ​ໃໝ່​ເຊັ່ນ ​ເຄືອ​ຂ່າງ​ສັງຄົມ,... ​ເພື່ອ​ຮັບ​ໃຊ້​ຊຸມ​ຊົນ​ຊາວ​ຫວຽດນາມ​ຢູ່​ຕ່າງປະ​​ເທດ ​ແລະ​ເພື່ອນມິດ​ໃນ​ໂລກ.

ທີ​ຫົກ, ພັດທະນາ​ລະບົບ​ບັນດາ​ສູນວັດທະນະທຳຫວຽດນາ​ຢູ່​ຕ່າງປະ​ເທດ ທີ່​ບັນດາພື້ນ​ທີ່​ທີ່​ສຳຄັນ​ໃນ​ໂລກ. ຄຽງ​ຂ້າງ​ກັບ 2 ສູນວັດທະນະທຳ​ທີ່​ມີ​ຢູ່​ປະ​ເທດ​ລາວ ​ແລະ ຝຣັ່ງ, ​ໃນ​ໄລຍະ​ແຕ່​ນີ້​ຮອດ​ປີ 2025, ພວກ​ເຮົາ​ຈະ​ສຸມ​ໃສ່​ການ​ກໍ່ສ້າງ​ບັນດາ​ສູນວັດທະນະທຳ​ຢູ່ ກຳປູ​ເຈຍ, ອາ​ເມຣິກາ, ລັດ​ເຊຍ ​ແລະ ຍີ່​ປຸ່ນ. ​ແຕ່​ປີ 2020 - 2030, ພວກ​ເຮົາ​ຈະ​ສືບ​ຕໍ່​ພັດ​ທະນາສູນວັດທະນະທຳ​ຢູ່ບັນດາ​ພື້ນ​ທີ່​ທີ່​ສຳຄັນ​ອື່ນ​ໃນ​ໂລກ ຕາມ​ຄວາມ​ຕ້ອງການ​ຂອງ​ວຽກ​ງານ​ການ​ຕ່າງປະ​ເທດ​ຂອງ​ພັກ ​ແລະ​ລັດ ​ໃນ​ສະພາບ​ການ​ໃໝ່. ບັນດາ​ສູນວັດທະນະທຳ​ຕ້ອງ​ເປັນ “ຫຼັງຄາ​ເຮືອນ​ຮ່ວມ​ກັນ” ​ເພື່ອ​ໂຄສະນາ​ເຜີຍ​ແຜ່ວັດທະນະທຳ​, ຮູບ​ພາບ​​ປະ​ເທດ​ແລະ​ປະຊາຊົນ​ຫວຽດນາມ, ​ເຊື່ອ​ຕໍ່​ປະຊາ​ຄົມ​ສາກົນ​ແລະ​ຊຸມ​ຊົນ​ຊາວຫວຽດນາມ​ຢູ່​ຕ່າງປະ​ເທດ.

ທີ​ເຈັດ, ຍູ້​ແຮງ​ການ​ສຶກສາ ຝຶກ​ອົບຮົມ​ແຫຼ່ງບຸກຄະລາ​ກອນ ​ເພື່ອ​ຕອບ​ສະໜອງຄວາມ​ຕ້ອງການ​ເຊື່ອມ​ໂຍງ​ສາກົນ​ທາງ​ດ້ານ​ວັດທະນະທຳ. ​ແຫຼ່ງບຸກຄະລາ​ກອນ​ເຄີຍ​ເປັນ “ຈຸດ​ປຶກ​ຕັນ” ​ໃນການ​ເຄື່ອນ​ໄຫວຕ່າງໆ​ຫຼຼາຍຢ່າງ, ພິ​ເສດ​ແມ່ນ​ໃນ​​ການ​ເຄື່ອນ​ໄຫວການ​ຕ່າງປະ​ເທດ, ​ເພາະສະ​ນັ້ນ ລວມສູນ​ການ​ອົບ​ຮົມສຶກສາ ​​ແຫຼ່ງບຸກຄະລາ​ກອນ​ເປັນ​ວິທີ​ແກ້​ທີ່​ສຳຄັນ​ໜຶ່ງ ​ເພື່ອກໍ່​ຮ່າງ​ສ້າງ​ຮູບ​ເປັນ​ຖັນ​ແຖວພະນັກງານ​ທີ່​ສາມາດ​ຮັບຜິດຊອບ​ບັນດາ​ໜ້າ​ທີ່​ໃນ​ການ​ແລກປ່ຽນ ​ແລະ ​ເຊື່ອມ​ໂຍງ​ສາກົນ.

ທີ​ແປດ, ສ້າງ​ເງື່ອນ​ໄ​ຂອຳນວຍ​ຄວາມ​ສະດວກ ​ແລະ ສົ່ງ​ເສີມ​ບັນດາ​ອົງ​ນານ​ນອກ​ພາກລັດ, ບັນດາ​ສະມາ​ຄົມ ວິ​ສາ​ຫະກິດ ​ແລະ ສິລະ​ປິນ​ເສລີ ​ໃຫ້​ເຂົ້າ​ຮ່ວມ​ໃນ​ການ​ເຄື່ອນ​ໄຫວ​ຮ່ວມ​ມື​ສາກົນທາງ​ດ້ານ​ວັດທະນະທຳ ​ແນ​ໃສ່ສ້າງ​ຄວາມ​ຫຼາກ​ຫຼາຍ​ທາງ​ດ້ານ​ແຫຼ່ງພະລັງ​ວັດຖຸ ​ໃຫ້​ແກ່​ການ​ເຄື່ອນ​ໄຫວ. ດ້ວຍ​ການ​ເຄື່ອນ​ໄຫວ​ເຫຼົ່າ​ນີ້, ຫວຽດນາມ​ຈະ​ແກ້​ໄຂ​ໄດ້​ຈຸດ​ອ່ອນຍ້ອນ​ຖືກ​ຢູ່​ໃນ​ທ່າ​ຮັບ ​ແລະ ຂາດ​ເຂີນ​ແຫຼ່ງພະລັງ​ໃນ​ການ​ຜັນ​ຂະຫຍາຍ​ການ​ເຄື່ອນ​ໄຫວ​ພົວພັນ​ແລກປ່ຽນ ​ແລະ​ຮ່ວມ​ມື​ສາກົນ. ບໍ່​ພຽງ​ແຕ່​ເທົ່າ​ນັ້ນ, ບັນດາ​ການ​ເຄື່ອນ​ໄຫວການ​ຕ່າງປະ​ເທດ​ຍັງ​ກາຍ​ເປັນ​ການ​ເຄື່ອນ​ໄຫວ​ທີ່​ມີ​ຊີວິດ​ຊີວາ ​ແລະ​ມີ​ປະສິດທິ​ຜົນ ດ້ວຍ​ວິທີ​ການ​ເຂົ້າ​ເຖິງ​ແບບ​ຫຼາຍ​ທິດ​ຫຼາຍ​ລວງ.

ທີ​ເກົ້າ, ​ເຊື່ອມ​ຕິດ​ການ​ເຄື່ອນ​ໄຫວ​ການ​ຕ່າງປະ​ເທດ ກັບ​ຊຸມ​ຊົນ​ຊາວ​ຫວຽດນາມ ​ແລະ​ນັກຮຽນ​ນັກ​ສຶກສາ​ຫວຽດນາມ​ຢູ່​ຕ່າງປະ​ເທດ. ​ເປັນ​ເຈົ້າການ​ແລະ​ຕັ້ງໜ້າ​ເຊື່ອມ​ໂຍງ​ສາກົນ ​ໂດ​ຍຜ່ານ​ການ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້ຊຸມ​ຊົນ​ຊາວ​ຫວຽດນາມ ​ແລະ​ນັກຮຽນ​ນັກ​ສຶກສາ​ຫວຽດນາມ​ຢູ່​ຕ່າງປະ​ເທດ ​ໄດ້​ຮັບຂໍ້​ມູນ​ຂ່າວສານ​ແລະ​ຜະລິດ​ຕະພັນ​ວັດທະນະທຳ​ທີ່​ສົດ​ໃສ ​ຈາກ​ຫວຽດນາມ, ຜ່ານ​ສິ່ງ​ດັ່ງກ່າວ​ນັ້ນ ຊ່ວຍ​ໃຫ້​ເຂົາ​ປະກອບສ່ວນ​ເຂົ້າ​ໃນ​ພະລາ​ກິດ​ການ​ກໍ່ສ້າງ​ປະ​ເທດ​ຊາດ, ຮັກສາ ​ແລະ ​ເສີມ​ຂະຫຍາຍ​ມູນ​ເຊື້ອ​ວັດທະນະທຳ​ຫວຽດນາມ ​ຢູ່​ໃນ​ຄອບຄົວ, ​ໃນ​ການ​ດຳ​ເນີນ​ຊີວິດ​ຊຸມ​ຊົນ​ຊາວຫວຽດນາມ​ທີ່ຢູ່​ຫ່າງ​ໄກ​ປະ​ເທດຊາດ. ຜັນຂະຫຍາຍ​ໂຄງການ​ສອນ​ພະ​ສາ​ຫວຽດນາມ​ໃຫ້​ຊຸມ​ຊົນ​ຊາວ​ຫວຽດນາມ​ຢູ່​ຕ່າງປະ​ເທດ, ຮັກສາ​ຄວາມ​ຜ່ອງ​ໃສ​ຂອງ​ພາສາ​ຫວຽດນາມ. ​ເສີມ​ຂະຫຍາຍສະຕິ​ປັນຍາ ຄວາມ​ເກ່ງ​ກ້າ​ສາມາດ ​ຄວາມ​ສຸດ​ອົກ​ສຸດ​ໃຈ ຂອງກຳລັງ​ປັນຍາ​ຊົນ ສິລະ​ປິນ ຄົນ​ຫວຽດນາມ​ຢູ່​ຕ່າງປະ​ເທດ, ສ້າງ​ກຳລັງ​ແຮງ​ສັງ​ລວມ, ປະກອບສ່ວນ​ກໍ່ສ້າງ ພັດທະນາ​ວັດທະນະທຳ​​ແລະ​ຄົນ​ຫວຽດນາມ ​ເພື່ອ​ຕອບ​ສະໜອງ​ຄວາມ​ຕ້ອງການ​ພັດທະນາ​ແບບ​ຍືນ​ຍົງ ​ໃນ​ສະພາບ​ການ​ໂລກາ​ພິ​ວັດປະຈຸ​ບັຍ./. 

​ໂດຍ ປອ. ຫງວຽນ​ງອກ​ທ້ຽນ
ກຳມະການ​ສູນ​ກາງ​ພັກ,
ລັດຖະມົນຕີ​ກະຊວງ​ວັດທະນະທຳ ກິລາ ​ແລະການ​ທ່ອງ​ທ່ຽວ

-------------------------------------

(1)  ພັກ​ກອມ​ມູນິດ​ຫວຽດນາມ, ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 130.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ