ວັນຈັນ, 15/10/2018
ເຊື່ອມຕໍ່ການກໍ່ສ້າງພັກທາງດ້ານຄຸນສົມບັດ ກັບການສ້າງແລະປັບປຸງບູລະນະລັດແຫ່ງກົດໝາຍສັງຄົມນິຍົມ ຢູ່ຫວຽດນາມ
9/1/2018 10:50' ສົ່ງ ພິມ
ປະທານປະເທດຫວຽດນາມ ເຈິ່ນດ້າຍກວາງ. (ພາບ: TTXVN)

ຜ່ານ 87 ປີ​ແຫ່ງ​ການ​ຕໍ່ສູ້​ອັນ​ພິລະ​ອາດ​ຫານ, ພັກ​ກອມ​ມູນິດ​ຫວຽດນາມ ​ແລະ​ປະທານ​ໂຮ່ຈີ​ມິນ​ທີ່​ຍິ່ງ​ໃຫຍ່ ​ໄດ້​ນຳພາ​ປະຊາຊົນ​ເຮົາ​ຍາດ​ເອົາ​ໄຊຊະນະ​ອັນ​ສະຫງ່າ​ງາມ​ໃນ​ພະລະ​ກິດ​ປົດ​ປ່ອຍ​ຊາດ, ​ໂຮມ​ປະ​ເທດ​ຊາດ​ເປັນ​ເອກະ​ພາບ, ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ. ພິ​ເສດ, ຜ່ານ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ປະ​ເທດ​ເຮົາ​ໄດ້​ບັນລຸ​ຜົນສຳ​ເລັດ​ອັນ​ໃຫຍ່​ຫຼວງ ມີ​ຄວາມ​ໝາຍ​ປະຫວັດສາດ, ຂີດ​ໝາຍ​ການ​ເຕີບ​ໃຫຍ່​ເຂັ້ມ​ແຂງ​ໃນ​ທຸກ​ດ້ານ​ຂອງ​ພັກ, ລັດ ​ແລະ​ປະຊາຊົນ​ເຮົາ, ຍົກ​ສູງ​ຖານະ​ບົດບາດ​ຂອງ​ຫວຽດນາມ​ໃນ​ເວທີ​ສາກົນ.

​ໃນ​ຂົງ​ເຂດ​ກໍ່ສ້າງ​ລັດ, ພັກ​ເຮົາມີ​ຄວາມ​ຮັບ​ຮູ້​ຢ່າງ​ຈະ​ແຈ້ງ​ກ່ຽວ​ກັບ​ລັກສະນະ​ຈຳ​ເປັນ​ພາວະ​ວິ​ໄສ ຮີບ​ດ່ວນ​ຂອງ​ການ​ກໍ່ສ້າງ​ລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມຂອງ​ປະຊາຊົນ ​ໂດຍ​ປະຊາຊົນ ​ເພື່ອ​ປະຊາຊົນ; ຖື​ວ່າ​ນີ້​ແມ່ນ​ໜຶ່ງ​ໃນ​ແປດ​ຄຸນ​ລັກສະນະ​ຂອງ​ສັງຄົມ​ສັງຄົມ​ນິຍົມທີ່​ປະຊາຊົນ​ເຮົາພວມ​ກໍ່ສ້າງ, ຕອບ​ສະໜອງ​ຄວາມ​ຕ້ອງການ​ຂອງ​ການ​ພັດທະນາ​ພື້ນຖານ​ປະຊາທິປະ​ໄຕສັງຄົມ​ນິຍົມ, ສິດ​ເປັນເຈົ້າ​ຂອງ​ປະຊາຊົນ, ​ໂດຍຜ່ານ​ການ​ມອບ​ສິດ​ແລະກວດກາ​ສິດ​ອຳນາດ​ຂອງ​ປະຊາ​ຊົນ. ​ແບບ​ວິທີ​ກາ​ນຳພາ​ຂອງ​ພັກ​ຕໍ່​ລັດ​ແລະ​ສັງຄົມ​ໄດ້​ຮັບ​ການ​ປ່ຽນ​ແປງ​ໃໝ່ ຊຶ່ງ​ທັງ​ຮັບປະກັນ​ການ​ເພີ່ມ​ທະວີ​ບົດບາດນຳ​ພາ​ຂອງ​ພັກ ທັງ​ເສີມ​ຂະຫຍາຍ​ຄວາມ​ຮັບຜິດຊອບ ຄວາມ​ເປັນ​ເຈົ້າ​ການ​ຂອງ​ບັນດາ​ອົງການ​ລັດ. ບັນດາ​ທັດສະນະ​ໃໝ່​ກ່ຽວ​ກັບ​ການ​ກໍ່ສ້າງລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມຢູ່​ໃນ “​ໂຄງການ​ກໍ່ສ້າງ​ປະ​ເທດ​ຊາດ​ໃນ​ສະ​ໄໝ​ຂ້າມ​ຜ່ານ​ຂຶ້ນ​ສູ່​ສັງຄົມ​ນິຍົມ” (ສະບັບ​ປັບປຸງ ​ເພີ່ມ​ເຕີມ​ປີ 2011) ​ໄດ້​ຮັບ​ການ​ຫັນ​ເປັນ​ນິຕິ​ກຳ​ຢູ່​ໃນ​ລັດຖະທຳ​ມະນູນ​ປີ 2013 ​ແລະ​​ປະມວນ​ກົດໝາຍຕ່າງໆ. ລະບົບ​ກົດໝາຍ​ໄດ້​ຮັບ​ການ​ປ່ຽນ​ແປງ​ໃໝ່, ປັບປຸງ, ​ເພີ່ມ​ເຕີມ ​ແລະ ກໍ່ສ້າງ​ໃຫ້​ນັບ​ມື້​ນັບ​ຄົບ​ຖ້ວນ ບໍລິບູນ ​ແລະ ​ເໝາະ​ສົມກວ່າ, ​ເປັນ​ຕົ້ນ​ແມ່ນ​ລະບຽບ​ກົດໝາຍ​ເສດຖະກິດ​ຕະຫຼາດ​ກຳນົດ​ທິດ​ສັງຄົມ​ນິຍົມ. ການຈັດ​ຕັ້ງ​ແລະ​ແບບ​ວິທີ​ການ​​ເຄື່ອນ​ໄຫວ​ຂອງ​ກົງຈັກ​ລັດ​ໄດ້​ຮັບ​ການ​ປ່ຽນ​ແປງ​ໃໝ່​ເທື່ອ​ລະ​ກ້າວ, ປະສິດທິ​ຜົນ​ການ​ເຄື່ອນ​ໄຫວ​ໄດ້​ຮັບ​ການ​ຍົງ​ສູງ​ຂຶ້ນ​ເລື້ອຍໆ. ຫຼັກການ​: ອຳນາດ​ລັດເປັນ​ເອກະ​ພາບ, ມີ​ການ​ແບ່ງ​ງານ ສົມທົບ ​ແລະ ຄວບ​ຄຸມ​ອຳນາດຂອງ​ລັດນັ້ນ ​ໄດ້​ກຳນົດ​​ແຈ້ງ​ກວ່າ ​ແລະ ​ໄດ້​ຜັນຂະຫຍາຍ​ປະຕິບັດຢ່າງ​ມີ​ປະສິດທິ​ຜົນ. ລະບຽບ​ການປະຕິບັດ​ບັນດາ​ສິດ​ປະຊາທິປະ​ໄຕ​ຂອງ​ປະຊາຊົນ ​ໄດ້​ຮັບ​ການ​ສ້າງ​ຕັ້ງ​ແລະ​ຫັນ​ເປັນ​ລະອຽດ​ເທື່ອ​ລະ​ກ້າວ. ການ​ປະຕິ​ຮູບ​ການບໍລິຫານ ​ປະຕິ​ຮູບ​ຂະ​ບວນການ​ຍຸຕິ​ທຳ​ໄດ້​ຮັບ​ຄວາມ​ເອົາ​ໃຈ​ໃສ່​ຊີ້​ນຳ​ນຳພາ ​ແລະ ​ໄດ້​ບັນລຸ​ຜົນສຳ​ເລັດ​ທີ່​ສຳຄັນ​ຫຼາຍ​ຢ່າງ; ຄຸນ​ນະພາ​ບການ​ເຄື່ອນ​ໄຫວ​ຂອງ​ບັນດາ​ອົງການ​ຍຸຕິ​ທຳ​ໄດ້​ຮັບ​ການ​ຍົກ​ສູງ​ຂຶ້ນ​ເລື້ອຍໆ, ປົກ​ປັກ​ຮັກສາ​ຜົນ​ປະ​ໂຫຍດຂອງ​ລັດ, ສິດ​ແລະ​ຜົນ​ປະ​ໂຫຍ​ດທີ່​ຖືກ​ກົດໝາຍຂອງ​ອົງການ​​ແລະ​​ບຸກຄົນ…​ໄດ້​ດີກ​ວ່າ​ແຕ່​ກ່ອນ.

ພວກ​ເຮົາ​ຍາດ​ໄດ້​ຜົນສຳ​ເລັດ​ທີ່​​ໃຫຍ່​ຫຼວງ​ເທິງ​ນີ້​ແມ່ນ​ຍ້ອນ​ມີ​ບົດບາດ​ສຳຄັນ​ຂອງ​ວຽກ​ງານ​ກໍ່ສ້າງ​ພັກ​ທາງ​ດ້ານ​ການ​ເມືອງ ​ແນວ​ຄິດ ການຈັດ​ຕັ້ງ ​ແລະ ພະນັກງານ, ການ​ກໍ່ສ້າງ​ບັນດາ​ອົງການ​ລັດ​ໃຫ້​ສະອາດປອດ​ໃສ ໝັ້ນຄົງ​ເຂັ້ມ​ແຂງ​ຢ່າງ​ແທ້​ຈິງ, ​ໃນ​ນັ້ນ​ໄ​ດ້​ເອົາ​ໃຈ​ໃສ່​ເປັນ​ພິ​ເສດ​ເຖິງ​ການ​ອົບຮົມ​ສຶກສາ ຝຶກ​ຝົນ​ຫຼໍ່​ຫຼອມ​ໃຫ້ພະນັກງານ ສະມາຊິກ​ພັກ ລັດຖະກອນມີຄຸນສົມບັດ​ສິນ​ທຳ​​, ມີ​ຄວາມ​ຮັບຜິດຊອບ, ກ້າ​ຄິດ ກ້າ​ເຮັດ, ສຸດ​ອົກ​ສຸດ​ໃຈ​ຕໍ່ໜ້າ​ທີ່​ວຽກ​ງານ.

ປະ​ເທດ​ຫວຽດນາມພວມກ້າວ​ເຂົ້າ​ສູ່ສະ​ໄໝ​ແຫ່ງ​ການ​ພັດທະນາ​ໃໝ່ ​ໃນ​ສະພາບ​ການ​ໂລກ​ແລະ​ພາກ​ພື້ນ​ມີ​ການ​ຜັນ​ປ່ຽນ​ຢ່າງ​ສັບສົນ, ສົ່ງ​ຜົນ​ກະທົບ​ໂດຍ​ກົງ ຫຼາຍ​ດ້ານ​ເຖິງ​ການ​ປົກ​ປັກ​ຮັກສາ​ແລະ​ສ້າງສາ​ພັດທະນາ​ປະ​ເທດ​ຊາດ. ຄວາມ​ຕ້ອງການ, ໜ້າ​ທີ່​ສືບ​ຕໍ່​ກໍ່ສ້າງ, ປັບປຸງ​ບູລະນະລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ ​ຂອງປະຊາຊົນ ​ໂດຍ​ປະຊາຊົນ​ແລະ​ເພື່ອ​ປະຊາຊົນ ພວມ​ຕັ້ງ​ອອກ​ມາ​ຢ່າງ​ຮີບ​ດ່ວນ​ທີ່​ສຸດ. ມະຕິ​ກອງ​ປະຊຸມ​ໃຫຍ່​ຄັ້ັ້ງທີ XII ຂອງ​ພັກ​ໄດ້​ລະບຸ​ແຈ້ງ: “ສືບ​ຕໍ່​ປັບປຸງ​ບູລະນະລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ, ກໍ່ສ້າງ​ກົງຈັກ​ລັດ​ໃຫ້​ກະທັດ​ລັດ​ເບົາບາງ, ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ; ປັບປຸງ​ບູລະນະ​ລະບົບ​ກົດໝາຍ, ຍູ້​ແຮງ​ການ​ປະຕິ​ຮູບ​ການ​ບໍລິຫານ ປະຕິ​ຮູບ​ຂະ​ບວນການ​ຍຸຕິ​ທຳ, ກໍ່ສ້າງ​ຖັນ​ແຖວ​ພະນັກງານ ລັດຖະກອນ​ທີ່​ມີ​ຄຸນສົມບັດ​ສິນ​ທຳ ມີ​ຄວາມ​ສາມາດ ຕອບສະໜອງ​ຄວາມ​ຕ້ອງການ ໜ້າ​ທີ່​ໄດ້; ​ເສີມ​ຂະຫຍາຍ​ປະຊາທິປະ​ໄຕ, ​ເພີ່ມ​ທະວີ​ຄວາມ​ຮັບຜິດຊອບ, ລະບຽບ​ວິ​ໄນ” (1).

​ເພື່ອ​ຍົກ​ສູງຄວາມ​ສັກສິດ ​ແລະ ປະສິດທິ​ຜົນ​ໃນ​ການ​ເຄື່ອນ​ໄຫວ​ຂອງລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ, ຕ້ອງ​ເອົາ​ໃນ​ໃສ່​ເປັນ​ພິ​ເສດ​ເຖິງ​ວຽກ​ງານ​ກໍ່ສ້າງ​ພັກ​ໃຫ້​ສະອາດ​ປອດ​ໃສ ​ແລະ​ໝັ້ນຄົງ​ເຂັ້ມ​ແຂງ​ທາງ​ດ້ານ​ການ​ເມືອງ ​ແນວ​ຄິດ ການຈັດ​ຕັ້ງ​ ແລະ ​ຄຸນສົມບັດ​, ກໍ່ສ້າງ​ຖັນ​ແຖວ​ພະນັກງານ ລັດຖະກອນ​ໃຫ້ມີ​ຄຸນສົມບັດ​ສິນ​ທຳ ມີ​ຄວາມ​ສາມາດ​ຕອບ​ສະໜອງຄວາມ​ຕ້ອງການ, ໜ້າ​ທີ່. ​ເປົ້າ​ໝາຍ​ລວມ​ແມ່ນ ກໍ່ສ້າງ​ຖັນ​ແຖວ​ພະນັກງານ ລັດຖະກອນ​ທີ່ມີຫຼັກ​ໝັ້ນ​ການ​ເມືອງໜັກ​ແໜ້ນ, ຈົງ​ຮັກ​ພັກດີ​ຕໍ່​ພັກ ປະ​ເທດ​ຊາດ ​ແລະ​ປະຊາຊົນ; ມີ​ຄຸນສົມບັດ​ສິນ​ທຳ, ​ມີແບບ​ວິທີດຳລົງ​ຊີວິດທີ່​ສະອາດ​ປອດ​ໃສ, ​ເດັດດ່ຽວ​ຕໍ່ສູ້​ຕ້ານ​ພະຍາດ​ອາດຍາ​ສິດ ສໍ້​ລາດ​ບັງ​ຫຼວງ ຟຸ່ມ​ເຟືອຍ; ມີ​ຈິນຕະນາການ​ປ່ຽນ​ແປງ​ໃໝ່ ປະດິດ​ສ້າງ; ມີ​ຄວາມ​ຮູ້​ວິຊາ​ສະ​ເພາະ ວິຊາ​ຊີບ​ດີ; ມີ​ຈິດ​ໃຈ​ສາມັກຄີ ຮ່ວມມື, ມີສະຕິ​ຕໍ່​ການຈັດ​ຕັ້ງ ລະບຽບ​ວິ​ໄນ ​ແລະ ​ແບບ​ວິທີ​ການ​ເຮັດ​ວຽກ​ຢ່າງວິທະຍາສາດ ໃກ້ຊິດ​ປະຊາຊົນ ​ເພື່ອ​ປະຊາຊົນ, ​ເຊີ​ດຊູຈັນ​ຍາ​ບັນ​ການ​ງານ, ​ເຮັດ​ວຽກ​ຢ່າງ​ສຸດ​ອົກ​ສຸດ​ໃຈ ມື​ອາຊີບ, ກ້າ​ຄິດ ກ້າ​ເຮັດ ກ້າ​ຮັບຜິດຊອບ.

​ເອົາ​ໃຈ​ໃສ່​ເປັນ​ພິ​ເສດ​ເຖິງ​ການອົບຮົມ​ສຶກ​ສາ ຝຶກ​ຝົນ​ຫຼໍ່​ຫຼອມ​ພະນັກງານ ລັດຖະກອນ ​ເພື່ອ​ໃຫ້​ພະນັກງານ ລັດຖະກອນ​ແຕ່ລະຄົນ​ເປັນ​ແບບຢ່າງ​ອັນ​ໃສ​ແຈ້ງ​ກ່ຽວ​ກັບ​ຄຸນ​ທຳ ຄຸນສົມບັດ​ປະຕິວັດ ​ແລະ​​ແບບຊີວິດວັດທະນະທຳ, ຮັບ​ໃຊ້​ປະ​ເທດ​ຊາດ ຮັບ​ໃຊ້​ປະຊາຊົນ​ຢ່າງ​ສຸດ​ອົກ​ສຸດ​ໃຈ ​ແລະ ຍອມຮັບ​ການ​ຕິດຕາມ​ກວດກາ​ຂອງ​ປະຊາຊົນ. ສືບ​ຕໍ່​ຍູ້​ແຮງ​ການ​ຮ່ຳຮຽນ​ແລະ​ປະຕິບັດ​ຕາມ​ແນວຄິດ ຄຸນສົມບັດ ​ແບບ​ແຜນ​ໂຮ່ຈີ​ມິນ, ຖື​ວ່າ​ວຽກ​ງານ​ນີ້​ແມ່ນ​ວຽກ​ງານ​ທີ່​ເປັນ​ປະຈຳຂອງ​ອົງການ​ຈັດ​ຕັ້ງ​ພັກ ອົງການ​ລັດ ແລະອຳນາດ​ການ​ປົກຄອງ​ຂັ້ນ​ຕ່າງໆ, ​ໂດຍ​ຕິດ​ກັບ​ການຕໍ່ສູ້​ຕ້ານຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ ຄຸນສົມບັດ ​ແບບ​ແຜນ​ດຳລົງ​ຊີວິດ ​ແລະ ບັນດາ​ປະກົດ​ການ “ຜັນປ່ຽນ​ດ້ວຍ​ຕົນ​ເອງ” “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ, ສ້າງການ​ຫັນປ່ຽນ​ຢ່າງ​ແຂງ​ແຮງ​ທາງ​ດ້ານຈິດ​ສຳນຶກ ​ຄວາມ​ຮັບ​ຮູ້ຢູ່​ໃນ​ພັກ, ​ໃນ​ລະບົບ​ການ​ເມືອງ ​ແລະ​ທົ່ວ​ສັງຄົມ. ການ​ຮ່ຳຮຽນ​ແລະ​ປະຕິບັດ​ຕາມ​ແນວ​ຄິດ ຄຸນສົມບັດ ​ແບບ​ແຜນ​ໂຮ່ຈີ​ມິນ ຕ້ອງ​ຕິດ​ກັບ​ການ​ປະຕິບັດ​ຢ່າງ​ມີ​ປະສິດທິ​ຜົນ​ ບັນດາ​ມະຕິ ຄຳ​ສັ່ງ​ຂອງ​ພັກ ລັດ, ກ່ອນ​ອື່ນ​ໝົດ​ແມ່ນ​ມະຕິ​ກອງ​ປະຊຸມ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ​ສີ່​ສະ​ໄໝ​ທີ XII ກ່ຽວ​ກັບ​ການ​ກໍ່ສ້າງ ປັບປຸງພັກ, ບັນດາ​ມະຕິ ຄຳ​ສັ່ງ​ກ່ຽວ​ກັບ​ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຄວາມ​ຟຸມ​ເຟືອຍ. ພະນັກງານ ລັດຖະກອນ​ໃນ​ກົງຈັກ​ລັດ​ແຕ່ລະຄົນ​ຕ້ອງຊາບ​ຊຶມ​ຢ່າງ​ເລິກ​ເຊິ່ງ​ແລະ​ປະຕິບັດ​ຢ່າງ​ເຂັ້ມ​ງວດຕາມ​ຄຳ​ສັ່ງສອນ​ຂອງ​ລຸງ​ໂຮ່ທີ່​ເຄົາລົບ​ຮັກ: “ພະນັກງານ ​ສະມາຊິກ​ພັກ​ແຕ່ລະຄົນ​ຕ້ອງຕັ້ງ​ຜົນ​ປະ​ໂຫຍ​ດຂອງ​ການ​ປະຕິວັດ, ຂອງ​ພັກ, ຂອງ​ປະຊາຊົນ​ຂຶ້ນ​ເໝືອສຸດ, ກ່ອນ​ອື່ນ​ໝົດ. ຕ້ອງ​ເດັດດ່ຽວປັດກວາດ​ລັດທິ​ເອກະ​ຊົນ​ໃຫ້ກ້ຽງ, ຍົກສູງຄຸນສົມບັດປະຕິບັດ, ບຳລຸງ​ແນວ​ຄິດ​ລວມໝູ່ ຈິດ​ໃຈ​ສາມັກຄີ ລັກສະນະ​ການຈັດ​ຕັ້ງ ​ແລະ ສະຕິ​ຕໍ່​ລະບຽບ​ວິ​ໄນ. ຕ້ອງ​ລົງ​ເລິກ​ໃນຮາກຖານ​ຕົວ​ຈິງ, ​ໃກ້ຊິດຕິດ​ແທດ​ກັບ​ມະຫາຊົນ, ​ເຄົາລົບ​ນັບຖື​ແລະ​ເສີມ​ຂະຫຍາຍສິດ​ເປັນ​ເຈົ້າ​ລວມໝູ່​ຂອງ​ປະຊາຊົນ. ຕ້ອງ​ພະຍາ​ຍາມ​ຮ່ຳຮຽນ ຝຶກ​ຝົນ​ຫຼໍ່​ຫຼອມ​ຍົກ​ສູງ​ລະດັບ​ຄວາມ​ຮູ້​ເພື່ອ​ເຮັດ​ໜ້າ​ທີ່​ຕ່າງໆ​ທຸກ​ຢ່າງ​ໄດ້​ເປັນ​ຢ່າງ​ດີ” (2).

ກໍ່ສ້າງ​ການຈັດ​ຕັ້ງ​ກົງຈັກ​ຂອງ​ບັນດາ​ອົງການ​ລັດ​ໃຫ້​ກະທັດ​ລັດ​ເບົາບາງ ​ແລະ​ເຄື່ອນ​ໄຫວ​ຢ່າງ​ມີ​ຄວາມ​ສັກສິດ ມີ​ປະສິດທິ​ຜົນ. ປັບປຸງ​ບູລະນະ​ລະບຽບ​ການ​ບໍລິຫານ​ແບບ​ປະຊາທິປະ​ໄຕ - ອຳນາດ​ກົດໝາຍ, ກຳນົດ​ຄວາມ​ຮັບຜິດຊອບ​ແລະ​ກົນ​ໄກ​ອະທິບາຍ​ລາຍ​ງານ​ຂອງ​ບັນດາ​ອົງການ​ລັດ.

ປະຕິບັດ​ວິທີ​ແກ້​ຕ່າງໆ​ແນ​ໃສ່​ປັບປຸງ​ກົງຈັກ, ​ເພີ່ມ​ທະວີ​ລະບຽບ​ວິ​ໄນ​ໃນ​ການ​ເຄື່ອນ​ໄຫວ​ຂອງ​ສຳນັກງານ​ອົງການ, ພະນັກງານ, ລັດຖະກອນ. ຈັດ​ວາງ​ໂຄງ​ປະກອບ​ຖັນ​ແຖວ​ພະນັກງານ ລັດຖະກອນ​ຄືນ​ໃໝ່ ​ແລະ ຝຶກ​ອົບຮົມ​ພະນັກງານ ລັດຖະກອນ​ຕາມ​ຄວາມ​ຕ້ອງການ​ຍົກ​ສູງ​ຄຸນ​ນະພາ​ບທັງ​ດ້ານ​ຄວາມ​ສາມາດ​ແລະ​ຄຸນສົມບັດ​ສິນ​ທຳ. ກວດຄືນ, ດັດ​ແປງ, ​ເພີ່ມ​ເຕີມ​ນະ​ໂຍບາຍ​ຕໍ່​ພະນັກງານ ລັດຖະກອນ ຕາມ​ທິດ​ສົ່ງ​ເສີມ​ການ​ຍົກ​ສູງ​ລະດັບ​ວິຊາ​ສະ​ເພາະ, ຄວາມມົວ​ເມົາ​ໃນ​ວຽກ​ງານ, ປະດິດ​ສ້າງ. ປະຕິບັດ​ລະບອບ​ຮັບຜິດຊອບ​ໃນ​ການສະ​​ເໜີ​ໃຫ້​ແຕ່ງ​ຕັ້ງ ​ແລະການ​ແຕ່ງ​ຕັ້ງ​ຕຳ​ແໜ່​ງຜູ້​ນຳ ຕາມ​ທິດ​ຫົວໜ້າ​ສະ​ເໜີ​ຜູ້​ຮອງ, ຂັ້ນນຳ​ໃຊ້​ພະນັກງານສະ​ເໜີ​ຕົວພະນັກງານ ​ເພື່ອ​ໃຫ້​ຂັ້ນ​ເທິ​ງ​ພິຈາລະນາ ຕັດສິນຕົກລົງ. ​ເຊີດ​ຊູ​ຄຸນສົມບັດ​ສິນ​ທຳ ຄວາມ​ຮັບຜິດຊອບ​ສັງຄົມ, ຮັດ​ແໜ້ນ​ລະບຽບ​ວິ​ໄນ​ໃນ​ການ​ຊີ້​ນຳ​ແລະ​ປະຕິບັດ​ການ​ງານ​ຂອງ​ພະນັກງານ ລັດຖະກອນ. ມີ​ກົນ​ໄກ​ປະຕິບັດ​ວິ​ໄນ​ໄລ່​ອອກ​ຈາກ​ກົງ​ຈັກ​ຕໍ່​ພະນັກງານ ລັດຖະກອນ​ທີ່ມີ​ພຶດຕິ​ກຳແບ່ງ​ພັກ​ແຍກ​ພວກ, ພາກສ່ວນທ້ອງ​ຖິ່ນ, ​ເອກະ​ຊົນ​ນິຍົມ, ລົບ​ກວນປະຊາຊົນ, ​ມີ​ຄຸນສົມບັດ​ແລະ​ຄວາມ​ສາມາ​ດດ້ານ​ວິຊາ​ຊີບ​ບໍ່​ດີ.

ຍູ້​ແຮງການ​ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຄວາມ​ຟຸມ​ເຟືອຍ ​ໂດຍ​ຖື​ວ່າ​ນີ້​ແມ່ນ​ຈຸດ​ໜັກ​ໃຈກາງ​ຂອງ​ວຽກ​ງານ​ກໍ່ສ້າງ​ພັກທາງ​ດ້ານ​ຄຸນສົມບັດ​ສິນ​ທຳ, ​ແມ່ນ​ໜ້າ​ທີ່​ໂດຍ​ກົງ, ​ເປັນ​ປະຈຳ​ຂອງ​ລະບົບ​ການ​ເມືອງ​ແລ​ະສັງຄົມ​ທັງ​ໝົດ. ກໍ່ສ້າງ​ລະບົບ​ວິທີ​ແກ້​ໄຂ​ທີ່​ຄົບ​ຊຸດ ​ແລະ ມີ​ປະສິດທິ​ຜົນ​ກ່ຽວ​ກັບ​ການ​ໂຄສະນາ ອົບຮົມ​ສຶກສາ ​ແລະ ມາດ​ຕະການ​ການ​ບໍ​ລິຫານ, ກ່ຽວ​ກັບ​ເສດຖະກິດ ການ​ເງິນ ​ແລະ ກົດໝາຍ, ກ່ຽວ​ກັບ​ການ​ກວດກາ ກວດ​ສອບ ​ແລະ ຕິດຕາມ​ກວດກາ, ກ່ຽວ​ກັບ​ລະບອບ ນະ​ໂຍບາຍ​ອຸດ​ໜູນ ຍ້ອງຍໍ​ຊົມ​ເຊີຍ ​ແລະ ປະຕິບັດ​ວິ​ໄນ. ນຳ​ໃຊ້​ກຳລັງ​ແຮງ​ສັງ​ລວມຂອງ​ການຈັດ​ຕັ້ງ​ພັກ, ກົງຈັກ​ລັດ, ​ແນວ​ໂຮມ​ປະ​ເທດ​ຊາດ, ອົງຄະ​ນະ​ປະຊາຊົນ ​ແລະ ​ສື່ມວນຊົນ; ກຳນົດ​ແຈ້ງ​ລະບອບ​ຮັບຜິດຊອບ​ຂອງ​​ອົງການ ​ແລະ ບຸກຄົນ, ​ໂດຍ​ສະ​ເພາະ​ແມ່ນ​ຜູ້​ເປັນ​ຫົວໜ້າ ​ໃນ​ການ​ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຄວາມ​ຟຸມ​ເຟືອ. ພະນັກງານ ລັດຖະກອນ, ກ່ອນ​ອື່ນ​ໝົດ​ແມ່ນ​ພະນັກງານ​ການ​ນຳ, ຕ້ອງ​ເປັນ​ແບບຢ່າງ​ນຳ​ໜ້າ​ໃນ​ການປະຢັດ, ​ໃນ​ການ​ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ, ພະຍາດ​ອາດຍາ​ສິດ, ອວດອົ່ງຈອງຫອງ ​ລ່ວງ​ເກີນສິດອຳນາດ. ​ຖື​ເປັນ​ສຳຄັນ​ເຖິງວຽກ​ງານສຶກສາ​ອົບ​ລົມການ​ເມືອງ​ແນວ​ຄິດ, ການ​ຝຶກ​ຝົນ​ຫຼໍ່​ຫຼອມ​ດ້ວຍ​ຕົນ​ເອງ​ຂອງ​ພະນັກງານ ລັດຖະກອນ. ຍ້ອງຍໍ​ຊົມ​ເຊີຍ​ຢ່າງ​ທັນ​ການ ​ແລະ ​ເຜີຍ​ແຜ່​ບັນດາ​ແບບຢ່າງ​​ກ່ຽວ​ກັບ​ການດຸ​ໝັ່ນ, ປະຢັດ, ຊື່ສັດ, ທ່ຽງ​ທຳ, ​ເຫັນ​ແກ່​ສ່ວນ​ລວມບໍ່​ເຫັນ​ແກ່​ສ່ວນ​ຕົວ.

ກໍ່ສ້າງ​ລະບຽບກົດໝາຍ​ສົ່ງ​ເສີມ, ປົກ​ປັກ​ຮັກສາພະນັກງານ ລັດຖະກອນ ​ແລະ ປະຊາຊົນ​ທີ່​ເຂົ້າ​ຮ່ວ​ມ​ໃນ​ການ​ຕິດຕາມ​ກວດກາ, ຄົ້ນ​ເຜີຍ, ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ. ​ແກ້​ໄຂ​ຢ່າງ​ທັນ​ການ, ​ເຂັ້ມ​ງວດ, ​ເປີດ​ເຜີຍ​ຕາມ​ລະບຽບ​ວິ​ໄນ​ຂອງ​ພັກ ​ແລະ ກົດໝາຍ​ຂອງ​ລັດ ຕໍ່​ບັນດາ​ພະນັກງານ ລັດຖະກອນ​ທີ່​ສໍ້​ລາດ​ບັງ​ຫຼວງ, ປົກ​ປິດ​ການ​ສໍ້​ລາດ​ບັງ​ຫຼວງ, ກໍ່​ຄວາມ​ເສຍ​ຫາຍທຳລາຍ​ຊັບ​ສິນ​ຂອງ​ລັດ, ຂອງ​ປະຊາຊົນ.

​ເອົາ​ໃຈ​ໃສ່​ປະຕິບັດ​ນະ​ໂຍບາຍອົບຮົມແລະ​ນຳ​ໃຊ້​ຜູ້​ທີ່​ມີ​ຄວາມ​​ເກັ່ງ​ກ້າສາມາດ, ດຶງ​ດູດ​ຜູ້​ທີ່​ມີ​ຄວາມ​ເກັ່ງ​ກ້າ​ສາມາດ​ເຂົ້າ​ເຮັດ​ວຽກ​ໃນ​ບັນດາ​ຂົງ​ເຂດ​ທີ່​ສຳຄັນ. ​ເພີ່ມ​ທະວີ​ການ​ລົງທຶນ​ຂອງ​ລັດ​ແລະ​ສັງຄົມ​ເຂົ້າ​ໃນ​ການຄົ້ນ​ເຜີຍ, ຝຶກ​ອົບຮົມ, ບຳລຸງ​ສ້າງ ​ແລະນຳ​ໃຊ້​ຜູ້​ທີ່​ມີ​ຄວາມ​​ເກັ່ງ​ກ້າສາມາດ, ກ່ອນ​ອື່ນ​ແມ່ນ​ໃນ​ບັນດາ​ຂົງ​ເຂດ: ນຳພາ-ຄຸ້ມ​ຄອງ​ບໍລິຫານ, ຜະລິດ-ທຸລະ​ກິດ, ວິທະຍາ​ສາດ-​ເຕັກ​ໂນ​ໂລ​ຊີ ​ແລະ ການສຶກສາ-ຝຶກ​ອົບຮົມ. ປະຕິບັດ​ເປັນ​ຢ່າງ​ດີ​ແຜນ​ນະ​ໂຍບາຍ, ນະ​ໂຍບາຍ​ສົ່ງ​ເສີມ​ ສົ່ງ​ພະນັກງານ ນັກຮຽນ​ນັກ​ສຶກສາ​ທີ່​ມີ​ຄວາມ​ສາມາດ ມີ​ຄຸນສົມບັດ​ ແລະພອນ​ສະຫວັນ ​ໄປຮ່ຳ​ຮຽນ​ຝຶກ​ອົບຮົມ​ຢູ່​ຕ່າງປະ​ເທດ; ​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ຄຸ້ມ​ຄອງ ຝຶກ​ອົບຮົມ ​ແລະ​ນຳ​ໃຊ້​ພະນັກງານ​ພາຍຫຼັງ​ການ​ຝຶກ​ອົບຮົມ; ດຶງ​ດູດ, ນຳ​ໃຊ້​ຄວາມ​ເກັ່ງ​ກ້າ​ສາມາດ​ຂອງ​ຊາວ​ຫວຽດນາມທີ່​ອາ​ໃສ​ຢູ່​ຕ່າງປະ​ເທດ ​ແລະ ຜູ້​ຊ່ຽວຊານຢູ່​ຕ່າງປະ​ເທດ ​ໃຫ້​ເຂົ້າ​ຮ່ວມ​ການ​ສ້າງສາ​ພັດທະນາ​ປະ​ເທດ.

ສືບ​ຕໍ່​ເສີມ​ຂະຫຍາຍປະຊາທິປະ​ໄຕສັງຄົມ​ນິຍົມ, ຮັບປະກັນ​ອຳນາດ​ລັດ​ທັງ​ໝົດ​ຂຶ້ນ​ກັບ​ປະຊາຊົນ. ທຸກ​ແນວທາງ ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ​ລ້ວນ​ແຕ່​ເລີ່​ມຈາກ​ຄວາມ​ປາຖະໜາ, ສິດທິ​ແລະ​ຜົນ​ປະ​ໂຫຍ​ດທີ່​ຖືກຕ້ອງ​ຕາມ​ກົດໝາຍ​ຂອງ​ປະຊາຊົນ. ບັນດາ​ອົງການ​ລັດ​ຕ້ອງ​ຮັບ​ຮູ້​ແຈ້ງວ່າ ຄວາມ​ໄວ້​ວາງ​ໃຈ ສະໜັບສະໜູນ ຊ່ວຍ​ເຫຼືອ​ຂອງ​ປະຊາຊົນ​ແມ່ນ​​ແຫຼ່ງ​ຂອງ​ກຳລັງ​ແຮງ, ​ແມ່ນ​ຮາກ​ຖານ​ຂອງ​ຄວາມ​ສຳ​ເລັດທຸກຄັ້ງ. ປະຕິບັດກົດ​ລະບຽບກ່ຽວ​ກັບ​ປະຊາທິປະ​ໄຕ​ຢູ່​ຮາກ​ຖານ​ໃຫ້​ໄດ້​ເປັນ​ຢ່າງ​ດີ; ສືບ​ຕໍ່​ປ່ຽນ​ແປງ​ໃໝ່, ປັບປຸງ​ບູລະນະລະບຽບ​ການ​ປະຊາທິປະ​ໄຕ​ໂດຍ​ກົງ ​ແລະ​ປະຊາທິປະ​ໄຕ​ຜ່ານ​ຕົວ​ແທນ. ​​ເສີມ​ຂະຫຍາຍ​ບົດບາດ ​ແລະສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ແນວ​ໂຮມ​ປະ​ເທດ​ຊາດ ​ແລະບັນດາ​ອົງຄະ​ນະມະ​ຫາ​ຊົນ ​ເຂົ້າ​ຮ່ວມ​​ໃນ​ການ​ກໍ່ສ້າງ​ແນວທາງ ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ​ ກົດໝາຍ​ຂອງ​ພັກ, ປະຕິບັດ​ບົດບາດ​ຕິດຕາມ​ກວດກາ ​ແລະ​ວິຈານ​ສັງຄົມ. ​ເສີມ​ຂະຫຍາຍ​ປະຊາທິປະ​ໄຕ ​​ໄປ​ຄຽງ​ຄູ່​ກັບ​ການ​ເພີ່ມທະວີ​ກົດໝາຍ​ສັງຄົມ​ນິຍົມ ​ແລະ​ລະບຽບ​ວິ​ໄນ, ​ເຊີດ​ຊູ​ຄຸນສົມບັດ​ສິນ​ທຳ ​ແລະ​ຄວາມ​ຮັບຜິດຊອບ​ສັງຄົມ​ຂອງ​ພົນລະ​ເມືອງ. ຕຳ​ໜິຕິ​ຊົມ​ບັນດາ​ປະກົດ​ການປະຊາທິປະ​ໄຕ​ຈັດ​ໂພດ, ປະຊາທິປະ​ໄຕ​ແບບ​ຮູບ​ນອກ, ປະຕິບັດ​ວິ​ໄນ​ຢ່າງ​ເຂັ້ມ​ງວດ ​ຕໍ່​ພຶດຕິ​ກຳສວຍ​ໃຊ້​ປະຊາທິປະ​ໄຕ​ເພື່ອທຳລາຍ​ລະບຽບ​ຄວາມ​ສະຫງົບ​ທາງ​ສັງຄົມ, ລະ​ເມີດ​ສິດ​ປະຊາທິປະ​ໄຕ ​ແລະສິດ​ເປັນ​ເຈົ້າ​ຂອງ​ປະຊາຊົນ.

ຍົກ​ສູງ​ປະສິດທິ​ຜົນ​ແລະ​ຄວາມ​ສັກສິດ​ຂອງ​ການ​ຄຸ້ມ​ຄອງ​ລັດ ຕິດ​ແໜ້ນ​ກັບການ​ສືບ​ຕໍ່​ຍູ້​ແຮງ​ການ​ປະຕິ​ຮູບດ້ານການ​ບໍລິຫານ​ຕາມ​ທິດປັບ​ປ່ຽນ​ຂະ​ບວນການ, ຫຍໍ້​ສັ້ນ​ເວລາ​ແກ້​ໄຂຂັ້ນ​ຕອນ​ການ​ບໍລິຫານ, ຫຼຸດຜ່ອນ ຍຸບ​ເລີກ​ຂັ້ນ​ຕອນ​ການ​ບໍລິຫານ​ທີ່​ກໍ່​ຄວາມ​ລຳບາກລຳ​ຄານ​ໃຈໃຫ້​ປະຊາຊົນ​ແລະ​ວິ​ສາ​ຫະກິດ. ສືບ​ຕໍ່​ປະຕິ​ຮູບຂະ​ບວນການ​ຍຸຕິ​ທຳ, ກໍ່ສ້າງພື້ນຖານ​ຍຸຕິ​ທຳ​ທີ່​ສະອາດ ໝັ້ນຄົງ​ເຂັ້ມ​ແຂງ ປະຊາທິປະ​ໄຕ ​ເຂັ້ມ​ງວດ ​ແລະ​ທັນ​ສະ​ໄໝ​ແຕ່​ລະ​ກ້າວ; ປົກ​ປັກ​ຮັກສາ​ພັກ ລັດ ​ແລະ​ລະບອບ​ສັງຄົມ​ນິຍົມ, ປົກ​ປັກ​ຮັກສາ​ກົດໝາຍ ຄວາມ​ຍຸຕິ​ທຳ ສິດທິ​ມະນຸດ ສິດທິ​ພົນລະ​ເມືອງ ສິດທິ​ແລະ​ຜົນ​ປະ​ໄຫ​ຍດທີ່​ຖືກ​ກົດໝາຍ​ຂອງ​ອົງການ ການຈັດ​ຕັ້ງ ​ແລະ​ບຸກຄົນ, ບໍ່​ໃຫ້​ພວກອາ​ຊະ​ຍາກຳໜີ​ພົ້ນ​ຈາກ​ການ​ລົງໂທດ, ບໍ່​ປະໃຫ້​ຜູ້​ດີ​ຖືກຕັດສິນ​ລົງ​ໂທດ.

​ເອົາ​ໃຈ​ໃສ່​ປະຕິບັດ​ນະ​ໂຍບາຍ​ມະຫາ​ສາມັກຄີ​​ປວງ​ຊົນທັງ​ຊາດ, ຮັບປະກັນ​ຄວາມ​ກົມກຽວ​ທາງ​ດ້ານ​ຜົນ​ປະ​ໂຫຍ​ດສັງຄົມ; ປົວ​ແປງ​ຍົກ​ສູງ​ຊີວິດ​ການ​ເປັນ​ຢູ່​ທາງ​ດ້ານ​ວັດຖຸ​ແລະ​ຈິດ​ໃຈ​ຂອງ​ປະຊາຊົນ, ​ເປັນ​ຕົ້ນ​ແມ່ນ​ພາກສ່ວນ​ທີ່​ປະສົບ​ຄວາມ​ຫຍຸ້ງຍາກ​ໃນ​ກຳມະກອນ, ຊາວນາ, ​ຊົນ​ເຜົ່າ​ສ່ວນ​ນ້ອຍ, ​ເຂດ​ຫ່າງ​ໄກ​ສອກຫຼີກ. ຄາດ​ຄະ​ເນ, ກວດກາ, ​ແກ້​ໄຂ​ຄວາມ​ຂັດ​ແຍ່ງ ການ​ປະ​ທະ​ກັນ​ໃນ​ສັງຄົມ​ໃຫ້້​ໄດ້​ຢ່າງ​ທັນ​ການ, ຮັບປະກັນ​ລະບຽບ​ຄວາມ​ສະຫງົບສັງຄົມ, ປະກອບ​ສ່ວນຮັກສາ​ສະຖຽນ​ລະ​ພາບ​ທາງ​ການ​ເມືອງ-ສັງຄົມ, ສ້າງ​ປະຊາ​ຄົມ​ສັງ​ຄົມ​ທີ່​ສາມັກຄີເຫັນ​ດີ​ເຫັນ​ພ້ອມ​ກັນ​ແລະໝັ້ນຄົງ​ຍືນ​ຍົງ. ປັບປຸງ​ບູລະນະ, ປະຕິບັດ​ບັນດາ​ນະ​ໂຍບາຍ​ສັງຄົມ​ທີ່​ແທດ​ເໝາະ​ກັບ​ແຕ່ລະ​ຊັ້ນ​ຄົນ, ​ແຕ່​ລະ​ກຸ່ມ​ສັງຄົມ, ສອດຄ່ອງ​ກັບ​ເງື່ອນ​ໄຂ​ພັດທະນາ​​ເສດຖະກິດຕະຫຼາດ​ກຳນົດ​ທິດສັງຄົມ​ນິຍົມ ​ແລະ ​ເຊື່ອມ​ໂຍງ​ສາກົນ. ກໍ່ສ້າງ​ຊີວິດ​ວັດທະນະທຳ ສີວິ​ໄລ ທັນ​ສະ​ໄໝ ​ແລະເຂັ້ມ​ຂົ້ນ​​ໄປດ້ວຍ​ເອກະລັກ​ຂອງ​ຊາດ, ​​​​ເພີ່ມ​ທະວີ​ການ​ເຄື່ອນ​ໄຫວ​ດ້ານ​ມະນຸດສະທຳ ກຸສົນ​ລະກຳ ຮັກ​ແພງ​ຊ່ວຍ​ເຫຼືອ​ຊຶ່ງ​ກັນ​ແລະ​ກັນ. ເສີມ​ຂະຫຍາຍບົດບາດ​ເປັນ​ເຈົ້າ​ຂອງ, ລັກສະນະ​ຕັ້ງໜ້າ​ການ​ເມືອງ-ສັງຄົມ, ຄວາມ​ຮັບຜິດຊອບ​ເຂົ້າ​ຮ່ວມ​ການ​ຄຸ້ມ​ຄອງ, ຄຸ້ມ​ຄອງ​ສັງຄົມ​ດ້ວຍ​ຕົນ​ເອງ ຂອງ​ປະຊາຊົນພາຍ​ໃຕ້​ການ​ນຳພາຂອງ​ພັກ, ການ​ຄຸ້ມ​ຄອງ​ຂອງ​ລັດ ​ແລະ ການ​ແນະນຳ​ຂອງ​ແນວ​ໂຮມ​ປະ​ເທດ​ຊາດ ​ແລະ​ຂອງ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມຕາມ​ຂໍ້​ກຳນົດ​ຂອງ​ກົດໝາຍ./.

ສຈ, ປອ. ​ເຈິ່ນດ້າຍ​ກວາງ

ກຳມະການກົມ​ການ​ເມືອງ, ປະທານ​ປະ​ເທດ ສສ ຫວຽດນາມ

--------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ​ສະບັບ​ທີ 902 (​ເດືອນ​ທັນວາ 2017)

(1) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູນ​ກາງ​ພັກ, ຮ່າ​​ໂນ້ຍ, 2016, ໜ້າ 79.

(2) ​ໂຮ່ຈີ​ມິນ: ນິພົນ​ຄົບ​ຊຸດ, ສພຈ ການ​ເມືອງ​ແຫ່ງ​ຊາດ - ຊື້​ເທິ້ດ, ຮ່າ​ໂນ້ຍ, 2011, ​ເຫຼັ້ມ 15, ໜ້າ 547.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ