ວັນສຸກ, 20/7/2018
ດ້ວຍຄວາມເຊື່ອຖືໃໝ່, ບັນຍາກາດໃໝ່, ກຳລັງຜັດດັນໃໝ່, ສືບຕໍ່ສາມັກຄີສູ້ຊົນ ເພື່ອສຳເລັດບັນດາເປົ້າໝາຍ ໜ້າທີ່, ກໍ່ສ້າງປະເທດໃຫ້ຈະເລີນຮຸ່ງເຮືອງ ແລະ ສວຍງາມກວ່າເກົ່າ*
24/2/2018 18:12' ສົ່ງ ພິມ
ສະຫາຍ ຫງວຽນຝູຈ້ອງ ເລຂາທິການໃຫຍ່ ພັກກອມມູນິດຫວຽດນາມ ກ່າວປາໄສທີ່ກອງປະຊຸມ. (ພາບ: TTXVN)

ມື້​ນີ້, ຂ້າພະ​ເຈົ້າ​ຮູ້ສຶກ​ດີ​ໃຈ​ທີ່​ສຸດ​ທີ່​ໄດ້​ມາ​ຮ່ວມ​ກອງ​ປະຊຸມ​ອອນ​ໄລ​ທົ່ວ​ປະ​ເທດຂອງ​ລັດຖະບານ​ກັບ​ບັນດາ​ທ້ອງ​ຖິ່ນ - ກອງ​ປະຊຸມ​ສະຫຼຸບວຽກ​ງານ​ປີ 2017 ​ແລະ​ວາງ​ໜ້າ​ທີ່ ແຜນການພັດທະນາ​ເສດຖະກິດ-​ສັງຄົມປີ 2018. ​ກອງ​ປະຊຸມ​ນີ້​ມີ​ຄວາມ​ໝາຍ​ສຳຄັນ​ທີ່​ສຸດ. ກ່ອນ​ອື່ນ​ໝົດ, ຂ້າພະ​ເຈົ້າ​ຂໍ​ຝາກຄວາມ​ຂ່ຳນັບ​ຊົມ​ເຊີຍ​ທີ່​ສະໜິດສະໜົມ, ຄຳຢ້ຽມຢາມ​ຖາມຂ່າວອັນ​ອົບ​ອຸ່ນ ​ແລະ ຄຳ​ອວຍພອນ​ອັນ​ຈົບງາມ​ທີ່​ສຸດ ​ມາ​ຍັງ​ບັນດາ​ສະຫາຍ​ທຸກ​ຖ້ວນ​ໜ້າ.

ຕໍ່​ໄປ​ນີ້ ຂ້າພະ​ເຈົ້າ​ມີ​ຄວາມ​ເຫັນ​ຈຳນວນ​ໜຶ່ງ​ທີ່​ມີ​ລັກສະນະ​ເຈາະ​ຈິ້ມ, ຍົກ​ບັນຫາ​ເພື່ອ​ໃຫ້​ບັນດາ​ສະຫາຍ​ພ້ອມ​ກັນ​ແລກປ່ຽນ ປຶກສາ​ສົນທະນາ.

ກ່ຽວ​ກັບ​ການທົບ​ທວນການ​ປະຕິບັດ​ແຜນການ​ປີ 2017

ຜ່າ​ນການ​ຟັງ​ລາຍ​ງານ​ຂອງ​ລັດຖະບານ ​ແລະ​ ການ​ປະກອບ​ຄວາມ​ເຫັນ​ຂອງ​ຜູ້ຕາງໜ້າ​ການ​ນຳ​ຂອງ​ແຂວງ-ກຳ​ແພງ​ນະ​ຄອນ​ຈຳນວນ​ໜຶ່ງ, ພວກ​ເຮົາ​ດີ​ໃຈ​ທີ່​ເຫັນ​ວ່າ ປີ 2017 ​ເຖິງ​ວ່າ​ຕ້ອງ​ປະ​ເຊີນ​ໜ້າ​ກັບ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ຫຼາຍ​ຢ່າງ​ກໍ່ຕາມ ​ແຕ່​ປະ​ເທດ​ເຮົາ​ກໍ່​ສືບ​ຕໍ່​ພັດທະນາ​ຢ່າງ​ໄວ​ແລະ​ຮອບດ້ານ​ພໍ​ຄວນ ​ໃນ​ເກືອບ​ທຸກ​ຂົງ​ເຂດ. ພົ້ນ​ເດັ່ນ​ແມ່ນ:

ທາງ​ດ້ານ​ເສດຖະກິດ, ​ເປັນ​ຄັ້ງ​ທຳ​ອິດ​ພາຍຫຼັງ​ຫຼາຍ​ປີ, ປີນີ້ພວກ​ເຮົາ​ໄດ້​ສຳ​ເລັດ​ແລະ​ສຳ​ເລັດ​ລື່ນ​ລະດັບ​ຄາດໝ​າຍທັງ​ໝົດ 13 ຄາດໝາຍ​ແຜນການ​ທີ່​ວາງ​ໄວ້. ການ​ເຕີບ​ໂຕ ຈີ​ດີ​ພີ ບັນລຸ 6,81%, ລື່ນ​ຄາດໝາຍ​ທີ່​ວາງ​ໄວ້, ​ເປັນ​ລະດັບ​ສູງ​ທຽບ​ກັບ​ຫຼາຍ​ປະ​ເທດ​ໃນ​ພາກ​ພື້ນ​ແລະ​ໃນ​ໂລກ. ​ເສດຖະກິດ​ມະຫາ​ພາກ​ສືບ​ຕໍ່​ມີ​ສະຖຽນ​ລະ​ພາບ, ອັດຕາ​ເງິນ​ເຟີ້​ຖືກ​ຄວບ​ຄຸມ​ໃນ​ລະດັບ 3,53%. ບັນດາ​ດຸນລະຍາ​ທີ່​ສຳຄັນ​ຂອງ​ພື້ນ​ຖານ​ເສດຖະກິດ​ໄດ້​ຮັບປະກັນ; ການຂາດ​ດຸນ​ລາຍ​ຈ່າຍ​ງົບປະມານຢູ່​ໃນ​ລະດັບ​ຕ່ຳ, ປະມານ 3,5% ທຽບ​ກັບ​ ຈີ​ດີ​ພີ. ຕະຫຼາດ​ເງິນຕາ​ມີ​​ສະຖຽນ​ລະ​ພາບ; ການ​ທ້ອນ​ແຮ​ເງິນຕາ​ຕ່າງປະ​ເທດ​ບັນລຸ​ລະດັບ​ສູງ: 51,5 ຕື້​ໂດ​ລາ​ສະຫະລັດ. ຕະຫຼາດ​ຫຼັກ​ຊັບພັດທະນາ​ເປັນ​ຢ່າງ​ດີ, ລື່ນ​ຈຸດ 950 ຄະ​ແນນ, ສູງ​ກວ່າ​ທຸກ​ປີ​ນັບ​ແຕ່​ປີ 2008. ຍອດ​ມູນ​ຄ່າ​ການ​ຄ້າສົ່ງ​ອອກ-ນຳ​ເຂົ້າ​ບັນລຸ 425 ຕື້​ໂດ​ລາ​ສະຫະລັດ, ສູງ​ສຸດ​ນັບ​ແຕ່​ກ່ອນ​ມາ. ການ​ຜະລິດ ທຸລະ​ກິດ​ສືບ​ຕໍ່​​ໄດ້​ຮັບການ​ຟື້ນ​ຟູ ​ແລະ​ພັດທະນາ​ຢ່າງຮອບດ້ານ​ທັງ​ສາມ​ຂົງ​ເຂດ​ອຸດ​ສາ​ຫະກຳ ກະສິກຳ ​ແລະບໍລິການ. ຈຳນວນ​ວິ​ສາ​ຫະກິດທີ່​ໄດ້​ຮັບ​ການ​ສ້າງ​ຕັ້ງ​ໃໝ່ນັ້ນ​ແມ່ນ​ເກືອບ 127.000 ວິ​ສາ​ຫະກິດ, ​ເພີ່ມ​ຂຶ້ນ 15,2% ທຽບ​ກັບ​ປີ 2016. ​ເຖິງ​ວ່າ​ຖືກ​ຜົນ​ກະທົບ​ຢ່າງ​ໜັກໜ່ວງ​ຈາກ​ໄພ​ທຳ​ມະ​ຊາດ, ພາຍຸ​ລົມ​ແດງ, ນ້ຳ​ຖ້ວມກໍ່ຕາມ​ ແຕ່ກະສິກຳ​ກໍ່​ຍັງ​ເຕີບ​ໂຕ 2,9%, ທົບ 4 ​ເທົ່າທຽບ​ກັບ​ການ​ເຕີບ​ໂຕ​ໃນ​ປີ 2016; ມູນ​ຄ່າ​ສິນຄ້າ​ກະສິກຳ​ສົ່ງ​ອອກ​ບັນລຸ 36 ຕື້​ໂດ​ລາ​ສະຫະລັດ, ສູງ​ສຸດ​ນັບ​ແຕ່​ກ່ອນ​ມາ. ຂົງ​ເຂດ​ບໍລິການ​ມີ​ການ​ພັດທະນາ​ຢ່າງ​ລື່ນ​ຂັ້ນ, ​ເພີ່ມ​ຂຶ້ນ 7,44%, ບັນລຸ​ລະດັບ​ສູງ​ສຸດ​ນັບ​ແຕ່​ປີ 2008; ນັກ​ທ່ອງ​ທ່ຽວ​ຕ່າງປະ​ເທດ​ມາ​ຫວຽດນາມ​ເກືອບ 13 ລ້ານ​​ຄົນ, ​ເພີ່ມ​ຂຶ້ນ​ປະມານ 30% ທຽບ​ກັບ​ປີ 2016. ການ​ປະຕິ​ຮູບ​ດ້ານ​ການ​ບໍລິ​ຫານ, ການ​ປົວ​ແປງ​ສະພາບ​ແວດ​ລ້ອມ​ທາງການ​ທຸລະ​ກິດ​ ໄດ້​ຮັບ​ຜົນ​ທາງ​ບວກ​ຫຼາຍ​ຢ່າງ. ທຽບ​ກັບ​ປີ 2016, ການຈັດ​ອັນ​ດັບ​ສະພາບ​ແວດ​ລ້ອມທາງ​ການ​ທຸລະ​ກິດ​ຂອງ​ຫວຽດນາມ​ໄດ້​ເພີ່ມ​ຂຶ້ນ 14 ຂັ້ນ (ຈາກ​ອັນ​ດັບ 82 ຂຶ້ນ​ເປັນອັນ​ດັບ​ທີ 68 ​ໃນຈຳນວນ 190 ພື້ນຖານ​ເສດຖະກິດ); ຕົວບົ່ງ​ຊີ້​​ຄວາມ​ສາມາດ​ແຂ່ງຂັນ​ເພີ່ມ​ຂຶ້ນ 5 ຂັ້ນ (ຈາກ 60 ຂຶ້ນ​ເປັນອັນ​ດັບ 55 ໃນຈຳນວນ 137 ພື້ນຖານ​ເສດຖະກິດ).

ຂົງ​ເຂດ​ວັດທະນະທຳ-ສັງຄົມ​ ສືບ​ຕໍ່​ມີຄວາມ​ກ້າວໜ້າ​ຫຼາຍ. ຄວາມ​ສາມາດ​ປ່ຽນ​ແປງ​ໃໝ່​ປະດິດ​ສ້າງ​ວິທະຍາສາດ-​ເຕັກ​ໂນ​ໂລ​ຊີ​ໄດ້​ຮັບ​ການ​ຍົກ​ສູງ​ຂຶ້ນ. ການ​ສຶກສາ​ແລະ​ຝຶກອົບຮົມ​ໄດ້​ຮັບການ​ປ່ຽນ​ແປງ​ໃໝ່ຢ່າງ​ເປັນ​ພື້ນຖານແລະຮອບດ້ານ ຕາມ​ຈິດ​ໃຈ​ມະຕິ​ສະບັບ​ທີ 29-NQ/TW, ວັນ​ທີ 4 ພະ​ຈິດ 2013, ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XI ຊຶ່ງ​ໄດ້​​ເຮັດ​ໃຫ້​ມີ​ການ​ຫັນປ່ຽນ​ຢ່າງ​ຈະ​ແຈ້ງ​ພໍ​ຄວນ​ໃນ​ການ​ຕີ​ລາຄາ, ສອບ​ເສັງ, ຮັບ​ເອົາ​ນັກຮຽນເຂົ້າ​ຮຽນ, ການ​ເປັນ​ເຈົ້າ​ຄຸ້ມ​ຄອງ​ມະຫາວິທະຍາ​ໄລ​ດ້ວຍ​ຕົນ​ເອງ. ການ​ຮັກສາ​ຄວາມ​ປອດ​ໄພ​ສັງຄົມ​ແລະ​ສະ​ວັດ​ດີກາ​ນສັງຄົມ​ໄດ້​ຮັບ​ຄວາມ​ເອົາ​ໃຈ​ໃສ່​ແກ້​ໄຂ, ຮັບປະກັນ; ນະ​ໂຍບາຍ, ລະບອບ​ເກື້ອກູນ​ອຸດ​ໜູນຜູ້​ທີ່​ມີ​ຄຸນງາມຄວາມດີ​ຕໍ່​ຊາດ, ຜູ້​ທຸກ​ຍາກ​ ໄດ້​ຮັບ​ການ​ປະຕິບັດ​ເປັນ​ຢ່າງ​ດີ, ​ໂດຍ​ສະ​ເພາະ​ໃນ​ເມື່ອ​ເກີດ​ນ້ຳຖ້ວມ ໄພ​ທຳ​ມະ​ຊາດ. ວຽກງານຕໍ່ສູ້​ປ້ອງ​ກັນ​ແລະຕ້ານ​ອາ​ດຊະ​ຍາ​ກຳ ສືບ​ຕໍ່​ໄດ້​ຮັບ​ການ​ຍູ້​ແຮງ, ບັນລຸ​ຜົນສຳ​ເລັດ​ທີ່​ສຳຄັນ​ຫຼາຍ​ຢ່າງ, ປະກອບສ່ວນ​ປັບປຸງ​ຄວາມ​ໝັ້ນຄົງ​ທາງ​ການ​ເມືອງ, ຮັກສາ​ລະບຽບ​ຄວາມ​ສະຫງົບ ຄວາມ​ປອດ​ໄພ​ສັງຄົມ. ວຽກ​ງານ​ວັດທະນະທຳ, ຖະ​ແຫຼ​ງຂ່າວ, ​ໂຄສະ​ນະ​ການ​ໄດ້​ຮັບ​ການ​ປ່ຽນ​ແປງ​ໃໝ່, ປັບປຸງ, ຍົກ​ສູງ​ຄຸນ​ນະພາ​ບ, ປະກອບສ່ວນ​ສ້າງ​ຄວາມ​ເຊື່ອ​ຖື ​ແລະ​ສັນທາ​ມະຕິ​ໃນ​ສັງຄົມ, ຕໍ່ສູ້​ຕ້ານ​​ປະກົດ​ການ​ຫຍໍ້​ທໍ້ອະນາຈານ ບັນດາ​ຖ້ອຍ​ທຳນອງທີ່​ຜິດພາດ, ຍາດ​ແຍ່ງ​ເອົາ​ຄວາມ​ເຫັນ​ດີ​ເຫັນ​ພ້ອມ ​ແລະການ​ສະໜັບສະໜູນ​ຂອງ​ປະຊາ​ຄົມ​ສາກົນ.

ກ່ຽວ​ກັບ​ການ​ພົວພັນຕ່າງປະ​ເທດ, ການ​ປ້ອງ​ກັນປະ​ເທດ-ປ້ອງ​ກັນ​ຄວາມ​ສະຫງົບ, ປີ 2017 ຖືກ​ປະ​ເມີນ​ວ່າ​ເປັນ​ໜຶ່ງ​ໃນ​ບັນດາ​ປີ​ທີ່​ບັນລຸ​ຜົນສຳ​ເລັດ​ດີ​ທີ່​ສຸດ​ໃນ​ການ​ປະຕິບັດ​ເປົ້າ​ໝາຍ, ໜ້າ​ທີ່​ຍົກ​ສູງ​ປະສິດທິ​ຜົນ​ຂອງ​ວຽກ​ງານ​ການ​ພົວພັນ​ຕ່າງເທດ, ​ເຮັດ​ໃຫ້ການ​ພົວພັນ​ກັບ​ບັນດາ​ຄູ່​ຮ່ວມ​ມື​​ເຂົ້າ​ສູ່​ລວງ​ເລິກ, ​ເປັນ​ເຈົ້າ​ການ​ ຕັ້ງໜ້າ​ເຊື່ອມ​ໂຍງ​ສາກົນ, ປະກອບສ່ວນ​ຍົກ​ສູງ​ບົດບາດ​ຖານະ​ແລະ​ອິດ​ທິພົນ​ຂອງ​ຫວຽດນາມ​ໃນ​ເວທີ​ສາກົນ. ການ​ພົວພັນ​ກັບ​ບັນດາ​ປະ​ເທດ, ​ເປັນ​ຕົ້ນ​ແມ່ນ​ກັບ​ບັນດາປະ​ເທດ​ຄູ່​ຮ່ວມ​ມື​ທີ່​ສຳຄັນ, ນັບ​ມື້ນັບຮອບດ້ານ​ແລະ​ມີ​ປະສິດທິ​ຜົນ​ກວ່າ​ເກົ່າ. ຫວຽດນາມ​ໄດ້​ດຳ​ເນີນການ​ເຄື່ອນ​ໄຫວ​ພົວພັນ​ຕ່າງປະ​ເທດກັບ​ເກືອບ​ທຸກ​ປະ​ເທດ​ຄູ່​ຮ່ວມ​ມື​ທີ່​ສຳຄັນ. ຄິດ​ສະ​ເພາະ​ການ​ພົວພັນ​ແລກປ່ຽນ​ຄະນະ​ຜູ້​ແທນ​ຂັ້ນ​ສູງ, ພວກ​ເຮົາ​ໄດ້​ດຳ​ເນີນ​ການ​ຢ້ຽມຢາມ 18 ຄັ້ງຢູ່ 19 ປະ​ເທດ, ​ເຂົ້າ​ຮ່ວມ​ກອງ​ປະຊຸມ​ສາກົນ​ພະຫຸ​ພາ​ຄີ 8 ຄັ້ງ, ດຳນີນການພົບ​ປະ​ສອງ​ຝ່າຍ​ກັບ​ຜູ້ນຳ, ປະມຸກ​ແຫ່ງ​ຊາດ​ຂອງ​ບັນດາ​ປະ​ເທດ​ໃນ​ໂລກ​ເປັນ​ຈຳນວນ​ຮ້ອຍ​ຄັ້ງ (ສະ​ເພາະ​ສັບປະດາ​ຂັ້ນ​ສູງ ​ເອ​ເປ​ກ 2017 ​ແມ່ນ​ເກືອບ 50 ຄັ້ງ); ພ້ອມ​ກັນ​ນັ້ນ​ກໍ່​ໄດ້​ຈັດ​ຕັ້ງ​ການ​ຕ້ອນຮັບ​ປະມຸກ​ແຫ່ງ​ຊາດ, ​ນາຍົກລັດຖະມົນຕີຂອງ​ບັນດາ​ປະ​ເທດ​ທີ່​ມາ​ຢ້ຽມຢາມ​ຫວຽດນາມ​ເປັນ​ຈຳນວນ 36 ຄັ້ງ. ​ເນື້ອ​ໃນ​ຂອງ​ການ​ເຄື່ອນ​ໄຫວ​ພົວພັນ​ຕ່າງປະ​ເທດ​ລ້ວນ​ແຕ່​ແທດ​ຈິງ​ທີ່​ສຸດ, ນັບ​ມື້​ນັບ​ເຂົ້າ​ສູ່ລວງ​ເລິກ, ໝັ້ນຄົງ ​ແລະ ຍືນ​ຍົງ. ພິ​ເສດ​ແມ່ນ​ການ​ພົວພັນ​ກັບ​ບັນດາ​ປະ​ເທດ​ຄູ່​ຮ່ວມ​ມື​ທີ່​ສຳຄັນ​ຄື ຈີນ, ອາ​ເມຣິກາ, ຍີ່ປຸ່ນ, ລັດ​ເຊຍ, ອີນ​ເດຍ, ອາ​ຊຽນ ລ້ວນ​ແຕ່​ມີ​ຄວາມ​ຄືບ​ໜ້າ​ຢ່າງ​ຈະ​ແຈ້ງ​ທັງ​ດ້ານ​ການ​ເມືອງ​ແລະ​ເສດຖະກິດ. ​ໃນ​ຖານະ​ບົດບາດປະ​ເທດ​ເຈົ້າພາບຂອງ​ ​ເອ​ເປ​ກ 2017, ພວກ​ເຮົາ​ໄດ້​ສ້າງ​ໃຫ້​ມີ​ເຄື່ອ​ງໝາຍ​ຫວຽດນາມທີ່​ແທ້​ຈິ​ງ​ໃນ​ວິວັດ​ການ​ຮ່ວມ​ມື​ຂອງ ​ເອ​ເປ​ກ ​ເວົ້າ​ສະ​ເພາະ ​ແລະ​ ໃນ​ການ​ເຊື່ອມ​ໂຍງ​ເສດຖະກິດ​ແລະ​ການ​ເມືອງ​ຢູ່​ພາກ​ພື້ນ​ອາຊີ-ປາຊີ​ຟິກ​ເວົ້າ​ລວມ.

ຜ່ານ​ບັນດາ​ມາດ​ຕະການ​ທັງ​ຮ່ວມ​ມື​, ທັງ​ຕໍ່ສູ້, ພວມ​ເຮົາ​ໄດ້​ມີ​ຄວາມ​ເດັດດ່ຽວ​ແລະ​ທົນ​ທານ​ໜຽວ​ແໜ້ນ​ໃນ​ການ​ປົກ​ປັກ​ຮັກສາ​ເອກະລາດ ອຳນາດ​ອະທິປະ​ໄຕ ​ແລະ​ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ຊາດ​ໄວ້​ຢ່າງ​ໝັ້ນຄົງ, ຮັກສາ​ຄວາມ​ໝັ້ນຄົງ​​ແຫ່ງ​ຊາດ, ລະບຽບ​ຄວາມ​ສະຫງົບ ຄວາມ​ປອດ​ໄພ​ທາງ​ສັງຄົມ ​ແລະ ຮັບປະກັນ​ບັນດາ​ຜົນ​ປະ​ໂຫຍ​ດຍຸດ​ທະ​ສາດ​ຂອງ​ປະ​ເທດ. ຮັກສາ​ສະພາບ​ແວດ​ລ້ອມ​ສັນຕິພາບ ສະຖຽນ​ລະ​ພາບ ​ແລະການ​ຮ່ວມ​ມື, ຮັກສາ​ການ​ພົວພັນ​ກັບ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ, ປະກອບສ່ວນ​ສ້າງ​ສິ່ງ​ແວດ​ລ້ອມ​ທີ່​ອຳນວຍຄວາມ​ສະດວກໃຫ້​ແກ່​ພາລະກິດ​ການ​ສ້າງສາ​ພັດທະນາ​ແລະ​ປົກ​ປັກ​ຮັກສາ​ປະ​ເທດ​ຊາດ. ກຳລັງ​ແທ້​ຈິງ, ກຳລັງ​ແຮງ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ສະຫງົບ​ໄດ້​ຮັບ​ການ​ເພີ່ມ​ທະວີ​ເທື່ອ​ລະ​ກ້າວ; ບັນດາ​ການ​ເຄື່ອນ​ໄຫວ​ເສດຖະກິດ​ທະ​ເລ​ໄດ້​ດຳ​ເນີນ​ເປັນ​ປົກກະຕິ, ປອດ​ໄພ​ແລະ​ມີ​ປະສິດທິ​ຜົນ.

ກ່ຽວ​ກັບ​ການ​ກໍ່ສ້າງ​ປັບປຸງ​ພັກ, ປັບປຸງ​ບູລະນະ​ລະບົບ​ການ​ເມືອງ, ຕໍ່​ສູ້​ປ້ອງກັນ​ແລະ​ຕ້ານການ​ສໍ້​ລາດ​ບັງ​ຫຼວງ, ການ​ຟຸມ​ເຟືອຍ, ພະຍາດ​ອາດຍາ​ສິດ, ຄວາມ​ຫຍໍ້​ທໍ້​ອະນາຈານ: ພັກ​ແລະ​ລັດ​ເຮົາ​ໄດ້​ຊີ້ນຳ​ນຳພາ, ​ເຮັດ​ຫຼາຍ​ເທື່ອ, ​ເຮັດ​ຢ່າງ​ເດັດດ່ຽວ​ຂ້ຽວຂາດ​ໃນ​ຫຼາຍ​ປີ​, ​ແຕ່​ໃນ​ເວລາ​ທີ່ຜ່ານ​ມາມໍ່​ນີ້​ໄດ້​ຮັບ​ການ​ຍູ້​ແຮງຍິ່ງ​ກວ່າ​ເວລາ​ໃດ​ໝົດ ​ແລະ​​ໄດ້​ຮັບ​ຜົນສຳ​ເລັດ​ເບື້ອງຕົ້ນ​ຫຼາຍ​ຢ່າງ​ທີ່​ສຳຄັນ, ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ​ ແລະການສະໜັບສະໜູນຂອງ​ປະຊາຊົນ. ບັນດາ​ຄະດີ​ສໍ້​ລາດ​ບັງ​ຫຼວງ​ທາງ​ເສດຖະກິດ​ທີ່​ຮ້າຍ​ແຮງ, ສັບສົນ ​ໄດ້​ຮັບ​ການ​ແກ້​​ໄຂ​ຢ່າງ​ເດັດດ່ຽວ,​ ເຂັ້ມ​ງວດ ຖືກຕ້ອງ​ຕາມ​ຂໍ້​ກຳນົດ​ກົດ​ລະບຽບ​ຂອງ​ພັກ ​ແລະ​ກົດໝາຍ​ຂອງ​ລັດ, ນັບ​ທັງ​ຕໍ່ພະນັກງານ​ການ​ນຳຂັ້ນ​ສູງຂອງ​ພັກ, ພະນັກງານ​ປະຈຳການ ​ແລະ​ພະນັກງານ​ບຳນານ.

ຄະນະກຳມະການ​ກວດກາ​ສູນ​ກາງ​ໄດ້​ສຸມ​ໃສ່​ການ​ກວດກາ, ສະຫຼຸບ​ກ່ຽວ​ກັບການ​ກະທຳ​ຜິດ ​ແລະ ຕົກລົງ​ປະຕິບັດ​ວິ​ໄນ ຫຼືສະ​ເໜີ​ອົງການ​ທີ່​ມີ​ອຳນາດ​ເພື່ອ​ພິຈາລະນາ​ປະຕິບັດ​ວິ​ໄນ​ຢ່າງ​ເຂັ້ມ​ງວດ ຕໍ່​ອົງການ​ຈັດ​ຕັ້ງ ບຸກຄົນທີ່​ກະທຳ​ຜິດ, ລະ​ເມີດ​ລະບຽບ​ກົດໝາຍ. ຂະ​ແໜງ​ການ​ກວດກາ​ໄດ້​ຜັນ​ຂະຫຍາຍ​ການ​ກວດສອບ​ການ​ບໍລິຫານ 6.800 ກວ່າ​ຄັ້ງ, ດຳ​ເນີນ​ການ​ກວດກາ, ກວດ​ສອບ​ສະ​ເພາະ​ເກືອບ 260.000 ຄັ້ງ, ​ສຸມ​ໃສ່​ບັນດາ​ຂົງ​ເຂດທີ່​ເຄີຍ​ເກີດ​ການ​ສໍ້​ລາດ​ບັງ​ຫຼວງ; ​ໄດ້​ຄົ້ນ​ເຜີຍ ​ແກ້​ໂຂ​ລົງ​ໂທດ ຫຼື​ສະ​ເໜີ​ໃຫ້​​ລົງ​ໂທດ 68 ຄະດີ, ມີຜູ້​ຕ້ອງ​ຫາ 107 ຄົນ​ຖານ​ສໍ້​ລາດ​ບັງ​ຫຼວງ. ອົງການ​ສືບສວນ​ໃນ​ທົ່ວ​ປະ​ເທດ​ໄດ້​ສະຫຼຸບ​ການ​ສືບສວນ 197 ຄະດີ, ມີຜູ້​ຕ້ອງ​ຫາ 467 ຄົນ. ອົງການ​ໄອ​ຍະ​ການປະຊາຊົນ​ຂັ້ນ​ຕ່າງໆ​ໄດ້ຟ້ອງ​ຄະດີ 219 ຄະດີ, ມີຜູ້​ຕ້ອງ​ຫາ 481 ຄົນ. ສານ​ປະຊາຊົນ​ຂັ້ນ​ຕ່າງໆ​ໄດ້ດຳ​ເນີນ​ການ​ພິພາກສາ​ເບື້ອງ​ຕົ້ນ​ 205 ຄະດີ, ມີຈຳ​ເລີຍ 433 ຄົນ​ຖານ​ສໍ້​ລາດ​ບັງ​ຫຼວງ.  ບັນດາ​ອົງການ​ດຳ​ເນີນ​ຄະດີ​ສູນ​ກາງ​ແລະ​ທ້ອງ​ຖິ່ນ​ໄດ້​ມີ​ຄວາມ​ພະຍາຍາມ ຍູ້​ແຮງ​ການສືບສວນ, ຟ້ອງ​ຮ້ອງ ​ແລະ ພິຈາລະນາ​ຕັດສິນ​ຢ່າງ​ເຂັ້ມ​ງວດ​ຕາມ​ກົດໝາຍ ຕໍ່​ຫຼາຍ​ຄະດີ​ສໍ້​ລາດ​ບັງ​ຫຼວງ, ຄະດີ​ເສດຖະກິດທີ່​ຮ້າຍ​ແຮງ ສັບສົນ, ທີ່​ໄດ້​ຮັບ​ຄວາມ​ສົນ​ໃຈ​ຂອງ​ປະຊາຊົນ.

ສະຫຼຸບ​ລວມ, ປີ 2017 ພວກ​ເຮົາ​ໄດ້​ຮັບ​ຜົນສຳ​ເລັດ​ຫຼາຍ​ຢ່າງ​ທີ່​ສຳຄັນ, ໜ້າ​ພຶງ​ພໍ​ໃຈ​ໃນ​ທຸກ​ຂົງ​ເຂດ, ສ້າງ​ຄວາມ​ປະ​ທັບ​ໃຈ​ທີ່​ຈົບງາມ ​ແລະ ​ໃຫ້​ບົດຮຽນ​ທີ່​ປະ​ເສີດ​ຕື່ມ​ອີກ​ເປັນ​ຈຳນວນ​ຫຼາຍ. ມັນບໍ່​ແມ່ນ​ເລື່ອງ​ບັງ​ເອີນ​ທີ່​ບັນຍາກາດ​ເບີກບານ​ມ່ວນ​ຊື່ນ, ​​​ເຊື່ອ​ຖື​ຕໍ່​ການ​ນຳພາ​ຂອງ​ພັກ, ຕໍ່​ໄຊຊະນະ​ຂອງ​ພາລະກິດ​ການ​ປ່ຽນ​ແປງ​ໃໝ່, ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ​ ພວມ​ແຜ່​ຂະຫຍາຍ​ກວ້າງ​ໃນ​ທົ່ວ​ປະ​ເທດ.

ຈັ່ງ​ຊັ້ນ, ສາ​ເຫດ​ໃດ​ທີ່​ພາ​ໃຫ້​ພວກ​ເຮົາ​ມີ​ຜົນງານ, ຄວາມ​ສຳ​ເລັດ​ເຫຼົ່າ​ນັ້ນ?

ມີ​ຫຼາຍ​ສາ​ເຫດ, ​ແຕ່​ ສາ​ເຫດ​ທີ່​ກວມລວມອາດ​ຈະ​ແມ່ນ​: 1- ຍ້ອນ​ພວກ​ເຮົາ​ໄດ້​ສືບ​ທອດ​ຜົນງານ, ຄວາມສຳ​ເລັດຂອງຫຼາຍ​ປີ​ກ່ອນ, ພິ​ເສດ​ແມ່ນ​ປີ 2016 ທີ່​ມີຄວາມ​ສຳ​ເລັດ​ອັນ​ຍິ່ງ​ໃຫຍ່​ຂອງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ຜົນງານ ຄວາມ​ສຳ​ເລັດ​ໃນ​ປີ 2016: ຜົນສຳ​ເລັດ​ໃນ​ການ​ເລືອ​ກຕັ້ງ​ສະພາ​ແຫ່ງ​ຊາດ ​ແລະ​ສະພາ​ປະຊາຊົນ​ຂັ້ນ​ຕ່າງໆ; ຜົນສຳເລັດ​ໃນ​ການຈັດ​ວາງ​ສັບ​ຊ້ອນ, ປ່ຽນ​ແປງ​ໃໝ່, ປັບປຸງ​ການຈັດ​ຕັ້ງ ກົງຈັກ​ຂອງ​ລະບົບ​ການ​ເມືອງ​ສະ​ໄໝ 2016 - 2021, ວາງ​ມະຕິ ຂໍ້​ຕົກລົງ​ຫຼາຍ​ສະບັບ​ທີ່​ຖືກຕ້ອງ, ທັນ​ການ, ສອດຄ່ອງ​ເໝາະ​ສົມ; 2- ຍ້ອນ​ມີຄວາມ​ສາມັກຄີ ​ເປັນ​ເອກະ​ພາບ, ມີ​ຄວາມ​ມານະ​ພະຍາຍາມ​ສູ້​ຊົນ, ຮ່ວມ​ແຮງ​ຮ່ວມ​ໃຈ​ຂອງ​ທົ່ວ​ພັກ, ທົ່ວ​ປວງ​ຊົນ, ທົ່ວ​ກອງທັບ​ເຮົາ ​ໃນ​ກິດຈະການ​ປ່ຽນ​ແປງ​ໃໝ່​ຢ່າງຮອບດ້ານ​ແລະ​ຄົບ​ຊຸດ ຕາມ​ຈິດ​ໃຈ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ. ບັນດາ​ອົງການ​ນຳພາ​ຂອງ​ພັກ-ລັດ ​ໄດ້​ມີ​ການ​ປ່ຽນ​ແປງ​ໃໝ່​ຫຼາຍ​ຢ່າງ, ປະສານ​ສົມທົບ​ຢ່າງ​ເຂົ້າ​ແກັບ​ເຂົ້າ​ເກ​ຍ, ຄົບຊຸດ, ​ເປັນ​ແບບ​ສະບັບ​ ​ໃນ​ການ​ນຳພາ ຊີ້​ນຳການ​ຊາບ​ຊຶມ, ຈັດ​ຕັ້ງ​ຜັນ​ຂະຫຍາຍ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII, ​ເຮັດ​ໃຫ້​ມີ​ການ​ປ່ຽນ​ແປງ​ທາງ​ບວກ​ຕ່າງໆ​ໃນ​ການ​ເສີມ​ຂະຫຍາຍ ບົດບາດນຳ​ພາ​ຂອງ​ພັກ, ການ​ຄຸ້ມຄອງ​ບໍລິຫານ​ຂອງ​ລັດ, ສິດ​ເປັນ​ເຈົ້າ​ຂອງ​ປະຊາຊົນ​ ຢ່າງ​ຄົບ​ຖ້ວນ​ແລະ​ຖືກຕ້ອງ, ​ແກ້​ໄຂ​ບັນດາ​ບັນຫາ​ທີ່​ຊີວິດ​ການ​ເປັນ​ຢູ່​ວາງ​ອອກ​ມາ​ ໃຫ້​ໄດ້​ຢ່າງ​ທັນ​ການ ຖືກຕ້ອງ ​ແທດ​ເໝາະ ​ແລະ​ມີ​ປະສິດທິ​ຜົນ, ​​ໂດຍ​ສະ​ເພາະ​ບັນຫາ​ທີ່ສຳຄັນ ບັນຫາ​ຮ້ອນ​ເຄືອງ​ໃນ​ສັງຄົມ.

ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລຂາທິການ​ໄດ້ຮີບ​ເຮ່ງ​ຊີ້​ນຳ​ນຳພາການ​ກໍ່ສ້າງ, ປະກາດ​ໃຊ້ ​ແລະ ນຳພາ​ການຈັດ​ຕັ້ງ​ປະຕິບັດ​ມະຕິ, ຂໍ້​ສະຫຼຸບ​ທີ່​ສຳຄັນ​ຫຼາຍ​ສະ​ບັນ​ ກ່ຽວ​ກັບ​ການ​ພັດທະນາ​ເສດຖະກິດ-ສັງຄົມ, ການກໍ່ສ້າງ​ພັກ ລັດ ​ແລະ ​ລະບົບ​ການ​ເມື​ອງ. ວາງ​ອອກ​ຢ່າງ​ທັນ​ການ​ແຜນ​ນະ​ໂຍບາຍ, ນະ​ໂຍບາຍ​ທີ່​ຖືກຕ້ອງ, ສອດຄ່ອງ​ກັບ​ຄວາມ​ເປັນ​ຈິ​ງ, ຖືກ​ກັບ​ຄວາມ​ຄິດ​ຈິດ​ໃຈ​ຂອງ​ປະຊາຊົນ, ​ໃນ​ບັນດາ​ຂົງ​ເຂດ, ພິ​ເສດ​ແມ່ນ​ກ່ຽວ​ກັບ​ແຜນການ​ພັດທະນ​ເສດຖະກິດ-ສັງຄົມ 5 ປີ ​ແລະ​ປະຈຳທຸກ​ປີ; ກ່ຽວ​ກັບ​ບັນດາ​ໂຄງການ​ຈຸດ​ໜັກ​ແຫ່ງ​ຊາດ... ​ເພື່ອ​ໃຫ້​ສະພາ​ແຫ່ງ​ຊາດ​ພິຈາລະນາ, ຮັບຮອງ​ຜ່ານ​ແຜນ​ນະ​ໂຍບາຍ​ການ​ລົງທຶນ; ກ່ຽວ​ກັບ​ວຽກ​ງານ​ການ​ປ້ອງ​ກັນ​ປະ​ເທດ, ຮັກສາ​ຄວາມ​ປອດ​ໄພ, ການ​ຕ່າງປະ​ເທດ...

ສະພາ​ແຫ່ງ​ຊາດ​ໄດ້​ມີ​ການ​ປ່ຽນ​ແປງ​ໃໝ່​ຫຼາຍ​ຢ່າງ, ປະຕິບັດ​ພາລະບົດບາດທັງ​ສາມ​ໄດ້ນັບ​ມື້​ນັບ​ດີ​ຄື: ນິຕິບັນຍັດ, ຕິດຕາມ​ກວດກາ​ສູງ​ສຸດ ​ແລະ ຕັດສິນ​ບັນດາ​ບັນຫາ​ທີ່​ສຳຄັນ​ຂອງ​ປະ​ເທດ. ​ເຂັ້ມ​ງວດ​ໃນ​ການຫັນ​ແຜນ​ນະ​ໂຍບາຍ, ​ແນວທາງ​ຂອງ​ພັກ​ເປັນ​ນິຕິ​ກຳ, ປະກາດ​ໃຊ້​ກົດໝາຍ​ແລະມະຕິຫຼາຍ​ສະບັບ; ຮັບຮ​ອງຜ່ານ​ບັນດາ​ແຜນການ​ພັດທະນາ​ເສດຖະກິດ-ສັງຄົມ... ມະຕິ, ​ຂໍ້​ຕົກລົງ​​ຂອງ​ສະພາ​ແຫ່ງ​ຊາດ​ແລະ​ສະພາ​ປະຊາຊົນ​ຂັ້ນຕ່າງໆ​ໄດ້ສະ​ແດງຢ່າງ​ຖືກຕ້ອງ​ເຖິງ “ຄວາມ​ຄິດຂອງ​ພັກ, ຈິດ​ໃຈ​ຂອງ​ປະຊາຊົນ”, ອຳນວຍ​ຄວາມສະດວກ​ໃຫ້​ລັດຖະບານ​ແລະ​ອຳນາດ​ການ​ປົກຄອງ​ທ້ອງ​ຖິ່ນຕ່າງໆ​ປະຕິບັດ​ສຳ​ເລັດ​ພາລະ​ບົດບາດ, ໜ້າ​ທີ່ຊີ້​ນຳ​ນຳພາ, ບໍລິຫານ​ ກຳກັບຂັບ​ເຄື່ອນ​ການ​ພັດທະນາ​ປະ​ເທດ. ອາດ​ຈະ​ເວົ້າ​ໄດ້​ວ່າ, ບັນຍາກາດ​ປະຊາທິປະ​ໄຕ​ຢູ່​ໃນ​ພັກ, ​ໃນ​ສະພາ​ແຫ່ງ​ຊາດ ສະພາ​ປະຊາຊົນ ​ໄດ້​ແລະ​ພວມ​ແຜ່​ຂະຫຍາຍ​ໄປ​ທົ່ວ​ສັງຄົມ.

ລັດຖະບານ, ອຳນາດ​ການ​ປົກຄອງ​ທ້ອງ​ຖິ່ນ​ຕ່າງໆ​ໄດ້​ຮີບ​ເຮ່ງ, ​ເຂັ້ມ​ງວດ​ໃນ​ການຈັດ​ຕັ້ງ​ເຊື່ອນ​ຊຶມ, ຜັນ​ຂະຫຍາຍ​ປະຕິບັດ​ມະຕິ ຂໍ້​ສະຫຼຸບຕ່າງໆ​ ຂອງ​ສູນ​ກາງ​ພັກ​ແລະ​ສະພາ​ແຫ່ງ​ຊາດ ຢ່າງ​ໃກ້ຊິດ ຂຸ້ນຂ້ຽວ​ ມີ​ປະສິດທິ​ຜົນ; ​ເປັນ​ເຈົ້າ​ການ, ຕັ້ງໜ້າ, ຂະຫຍັນ​ຂັນ​​ເຄື່ອນ, ປະດິດ​ສ້າງ​ໃນ​ການ​ຊີ້​ນຳ​ນຳພາການຈັດ​ຕັ້ງ​ປະຕິບັດ; ​ໄດ້ລາຍ​ງານ, ຂໍ​ຄວາມ​ເຫັນ​ຂອງ​ກົມ​ການ​ເມືອງ, ຄະນະ​ເລຂາທິການ, ສະພາ​ແຫ່ງ​ຊາດ, ຄະນະ​ປະຈຳ​ສະພາ​ແຫ່ງ​ຊາດ ຢ່າງ​ທັນ​ການ​ກ່ຽວ​ກັບບັນດາ​ບັນຫາ​ທີ່​ຫາ​ກໍ່ເກີດຂຶ້ນ, ເກີນ​ອຳນາດ​ຂອງ​ຕົນ. ​ໃຫ້​ຄວາມ​ສຳຄັນ​ເຖິງ​ການ​ເຊື່ອມ​ຕໍ່​ລະຫວ່າງ​ການ​ພັດທະນາ​ເສດຖະກິດ ສັງຄົມ​ຢ່າງຮອບດ້ານ ກັບການ​ຮັບປະກັນ​ການ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ, ການ​ຕ່າງປະ​ເທດ. ຄົ້ນ​ເຜີຍ​ຢ່າງ​ໄວ, ​ແກ້​ໄຂ​ຢ່າງ​ທັນ​ການ ບັນດາ​ບັນຫາ​ທີ່​ຫາ​ກໍ່​​ເກີດ​ຂຶ້ນ, ​ເປັນ​ຕົ້ນ​ແມ່ນ​ບັນຫາ​ສັບສົນ, ຮ້ອນ​ເຄືອງ, ບັນດາ “ຈຸດ​ຮ້ອນ” ທີ່​ກໍ່​ຄວາມ​ສັບສົນ​ທາງ​ສັງຄົມ ​ໃນ​ທຸກ​ຂົງ​ເຂດ​ແລະ​ຢູ່​ທຸກ​ເຂດ, ພາກ​ຂອງ​ປະ​ເທດ.

ບັນດາ​ອົງການຈັດ​ຕັ້ງ​ຂອງ​ພັກ, ລັດ, ສະພາ​ແຫ່ງ​ຊາດ, ລັດຖະບານ, ​ແນວ​ໂຮມ​ປະ​ເທດ​ຊາດ, ບັນດາ​ກະຊວງ ຄະນະ ຂະ​ແໜງ​ການ ອົງຄະ​ນະມະ​ຫາ​ຊົນ ​ໄດ້​ປະສານ​ງານ​ນຳ​ກັນນັບ​ມື້​ນັບ​ເຂົ້າ​ແກັບ​ເຂົ້າ​​ເກຍ, ​ເຂົ້າ​ຈັງຫວະ, ທັນ​ກັບ​ເວລາ​ກວ່າ​ອີກ. ພິ​ເສດ​ແມ່ນ​ ມີ​ຄວາມ​ເຫັນ​ດີ​ເຫັນ​ພ້ອມ, ສະໜັບສະໜູນ, ປຸກລະດົມ​ສົ່ງ​ເສີມ, ປະກອບ​ຄວາມ​ເຫັນ​ຢ່າງ​ທັນ​ການ​ຂອງ​ພະນັກງານ ສະມາຊິກ​ພັກ, ຂອງ​ນັກ​ປະຕິວັດອາ​ວຸ​​ໂສ, ຂອງ​ປະຊາຊົນທຸກ​ຊັ້ນ​ວັນນະ, ຂອງບັນດາ​ອົງການ​ຂ່າວ, ສື່​ມວນ​ຊົນ,... ສ້າງ​ເປັນ​ກຳລັງ​ແຮງ​ສັງ​ລວມ​ແຫ່ງ​ຄວາມ​ເປັນ​ຈິດ​ໜຶ່ງ​ໃຈດຽວຂອງ​ທົ່ວ​ທັງ​ລະບົບ​ການ​ເມືອງ, ຂອງ​ທົ່ວ​ສັງຄົມ.

ຕາງໜ້າ​ການ​ນຳ​ພັກ​ແລະ​ລັດ, ຂ້າພະ​ເຈົ້າ​ຂໍ​ສະ​ແດງ​ຄວາມ​ຂອບ​ອົກ​ຂອບ​ໃຈ​ຢ່າງ​ຈິງ​ໃຈ​ຕໍ່​ສະພາ​ແຫ່ງ​ຊາດ, ລັດຖະບານ, ຄະນະ​ພັກ ອຳນາດ​ການ​ປົກຄອງ​ຂັ້ນ​ຕ່າງໆ, ວົງ​ການ​ນັກທຸລະກິດ, ພະນັກງານ, ສະມາຊິກ​ພັກ, ພີ່ນ້ອງ​ຮ່ວມ​ຊາດ, ນັກຮົບ​ໃນ​ທົ່ວ​ປະ​ເທດ ກ່ຽວ​ກັບ​ບັນດາ​ຜົນງານ ຄວາມ​ສຳ​ເລັດ ​ແລະ ຄວາມ​ມານະ​ພະຍາຍາມ​ສູ້​ຊົນ, ສ່ວນ​ປະກອບ​ອັນ​ໃຫຍ່​ຫຼວງ​ເຫຼົ່າ​ນັ້ນ.

​ແຕ່​ວ່າ, ພວກ​ເຮົາ​ຈະ​ບໍ່​ອັດຕະວິ​ໄສ, ພໍ​ໃຈ​ນຳ​ສິ່ງ​ທີ່​ໄດ້​ຮັບ; ບໍ່​ເມົາ​ມົວ​ກັບ​ຜົນສຳ​ເລັດ ​ໄຊຊະນະ​. ຍ້ອນ​ວ່າ​ປະ​ເທດ​ເຮົາ​ພວມ​ປະ​ເຊີນ​ໜ້າ​ກັບ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ຫຼາຍ​ຢ່າງ. ສະພາບ​ການ​ໂລກ, ພາກ​ພື້ນ​ສືບ​ຕໍ່​ຜັນ​ປ່ຽນ​ຢ່າງ​ໄວວາ ສັບສົນ ທີ່​ຄາດກະ​ຍາກ; ​ເສດຖະກິດ​ໂລກ​ຍັງ​ມີ​ຄວາມ​ສ່ຽງ​ຫຼາຍ​ຢ່າງ; ທ່າ​ອຽງ​ປົກ​ປ້ອງ​ຕະຫຼາດ​ພາຍ​ໃນ​ໄດ້​ຟື້ນ​ຕົວ​ຄືນ​ໃໝ່ ​ແລະ ການ​ຕໍ່ສູ້​ຕ້ານ​ເສລີ​ພາບ​ທາງການ​ຄ້າ​ໄດ້​ເກີດຂຶ້ນ​ຢູ່​ຫຼາຍ​ແຫ່ງ. ບັນດາ​ຈຸດ​ອ່ອນ, ຂໍ້​ບົດ​ພ່ອງ​ທີ່​ສະ​ສົມ, ຄົງ​ຄ້າງ​ແຕ່ດົນ​ນານ​ຂອງ​ພື້ນຖານ​ເສດຖະກິດ ​ແລະ ​ໃນ​ຫຼາຍ​ຂົງ​ເຂດ​ສັງຄົມ​ນັ້ນ ​ຍັງ​ໜັກໜ່ວງ, ກໍ່​ຜົນ​ຮ້າຍ​ແລະຄວາມ​ເຄັ່ງຮ້ອນ​ສັງຄົມ ​ແຕ່​ບໍ່​ອາດ​ແກ້​ໄຂ​ໃນ​ມື້ໜຶ່ງ​ຍາມ​ດຽວ​ໄດ້ ​ແລະ ​ມັນ​ຮຽກຮ້ອງ​ໃຫ້​ມີ​ວິທີ​ແກ້​ໄຂ​ທີ່​ຄົບຊຸດ, ມີ​ເສັ້ນທາງ ການ​ຊີ້ນ​ນຳ​ທີ່​ເດັດດ່ຽວ ໜຽວ​ແໜ້ນ ໜັກ​ແໜ້ນ ວິທະຍາສາດ​ ຈຶ່ງ​ສາມາດ​ແກ້​ໄຂ​ໄດ້. ນັ້ນ​ແມ່ນ​ສະພາບ​ການ​ທຸລະ​ກິດ​ຂາດທຶນ, ​ເສຍ​ຫາຍຟຸມ​ເຟືອຍ, ສໍ້​ລາດ​ບັງ​ຫຼວງທີ່​ເກີດ​ຂຶ້ນ​ຢູ່​ຫຼາຍ​ວິ​ສາ​ຫະກິດ, ​ໂຄງການ. ສະພາບ​ການ “ຂັ້ນ​ເທິງຮ້ອນ, ຂ້າງ​ລຸ່ມ​ເຢັນ​ຊາ”, “ຂ້າງ​ເທິງສັ່ງ​ຂ້າງ​ລຸ່ມ​ບໍ່​ຟັງ​ຄວາມ”, ກົດລະບຽບ​ຖືກ​ປ່ອຍ​ປະລະ​ເຫຼີງ ຍັງ​ເກີດ​ຂຶ້ນ​ຢູ່ຫຼາຍ​ແຫ່ງ. ​ໄພ​ທຳ​ມະ​ຊາດ, ​ໂລຄາ​ພະຍາດ, ການ​ປ່ຽນ​ແປງ​ສະພາບ​ອາກາດ​ຜັນ​ປ່ຽນ​ສັບສົນ, ຄາດ​ຄະ​ເນ​​ໄດ້ຍາກ, ມີ​ທ່າ​ອຽງ​ກະທົບ​ຢ່າງ​ໜັກໜ່ວງ​ເຖິງ​ການ​ເຄື່ອນ​ໄຫວ​ຜະລິດ ​ແລະ ຊີວິດ​ການ​ເປັນ​ຢູ່​ຂອງ​ປະຊາຊົນ. ການລະ​ເມີດ​ສະພາບ​ແວດ​ລ້ອມ, ສຸຂະ​ອະນາ​ໄມ​ແລະ​ຄວາມ​ປ​ອດ​ໄພ​ຂອງ​ອາຫານ, ອຸບັດ​ຕິ​ເຫດ​ຈະລາຈອນ ​ແລະ ອາດ​ຊະ​ຍາ​ກຳ, ຄວາມ​ຊົ່ວ​ຮ້າຍ​ທາງ​ສັງຄົມ, ຄວາມ​ຮຸນ​ແຮງ​ໃນ​ຄອບຄົວ, ການ​ລ່ວງ​ລະ​ເມີດ​ເດັກ ຍັງ​ເກີດ​ຂຶ້ນ​ຢ່າງ​ສັບສົນ, ​ເປັນ​ຕົ້ນ​ແມ່ນຢູ່​ບັນດາ​ຕົວ​ເມືອງ​ໃຫຍ່... ​ໃນ​ເວລາ​ນັ້ນ, ພວກ​ເຮົາ​ຕ້ອງ​ພະຍາຍາມ​ສູ້​ຊົນ​ເພື່ອ​ໃຫ້​ປະ​ເທດ​ເຮົາ​ບໍ່​ພຽງ​ແຕ່ມີ​ຄວາມ​ກ້າວໜ້າ​ເລື້ອຍໆ ຫາກ​ຍັງ​ມີ​ຄວາມ​ພັດທະນາ​ຢ່າງ​ໄວວາ​ແລະ​ຍືນ​ຍົງ, ບໍ່​ຖືກຖອຍຫຼັງ​ຕົກ​ທ້າຍ, ກ້າວ​ຂຶ້ນ​ເທື່ອ​ລະ​ກ້າວ​ໃຫ້​ທັນ​ກັບ​ບັນດາ​ປະ​ເທດ​ຈະ​ເລີ​ນພັດທະນາ​ໃນ​ພາກ​ພື້ນ​ແລະ​ໃນ​ໂລກ.

​ເພາະສະ​ນັ້ນ, ກອງ​ປະຊຸມ​ຂອງ​ພວກ​ເຮົາ​ຕ້ອງ​ໃຊ້​ເວລາ​ຫຼາຍ​ເພື່ອປຶກສາ​ສົນທະນາ​ຢ່າງ​ລະອຽດ ຮອບ​ຄອບ​ຖີ່​ຖ້ວນ, ສ້າງ​ຄວາມ​ເປັນ​ເອກະ​ພາບ​ສູງ​ໃນ​ການ​ປະ​ເມີນ​ສະຖານະ​ການ, ສາ​ເຫດ, ບົດຮຽນ​ປະສົບ​ການ, ​ໂດຍ​ສະ​ເພາະ​ຢ່າງ​ຍິ່ງ​ແມ່ນ​ກ່ຽວ​ກັບ​ຈຸດ​ອ່ອນ ຂໍ້​ຈຳ​ກັດ ​ແລະ​ສາ​ເຫດ ​ເພື່ອ​ວາງ​ແຜນການ, ໜ້າ​ທີ່ ​ແລະ ວິທີ​ແກ້​ໄຂ​ໃນ​ປີ 2018 ຢ່າງ​ຖືກຕ້ອງ, ຊັດ​ເຈນ, ​ແທດ​ເໝາະ​ກັບ​ຄວາມ​ເປັນ​ຈິ​ງ, ມີ​ຄວາມ​ເປັນ​ໄປ​ໄດ້​ສູງ​ທີ່​ສຸດ.

ກ່ຽວ​ກັບ​ທິດ​ທາງ, ໜ້າ​ທີ່ ປີ 2018

ປີ 2018 ​ແມ່ນ​ປີ​ທີ​ສາມ​ຂອງ​ວາລະ​ກອງ​ປະຊຸມ​ໃຫຍ່​ຄັ້ງ​ທີ XII - ປີ​ຫົວລ້ຽວຫົວ​ຕໍ່​ທີ່​ຕັດສິນ​ໄຊຊະນະ​ຂອງ​ການ​ປະຕິບັດ​ເປົ້າ​ໝາຍ, ໜ້າ​ທີ່​ພັດທະນາ​ເສດຖະກິດ-ສັງຄົມ 5 ປີ (2016 - 2020) ​ໂດຍ​ແມ່ນ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ວາງ​ອອກ​ມາ. ປະ​ເທດຂອງ​ພວກ​ເຮົາ​ພວມ​ຢືນ​ຕໍ່ໜ້າ​ໂອກາດ, ​ເງື່ອນ​ໄຂ​ສະດວກ​ດີ​ໃໝ່​ ເພື່ອ​ພັດທະນາ​ຢ່າງ​ໄວວາ​ແລະ​ຍືນ​ຍົງກວ່າ​ອີກ​ ໃນ​ເວດ​ລາຕໍ່​ໄປ. ນັ້ນ​ແມ່ນ​ຜົນສຳ​ເລັດ​ທີ່​ມີ​ຄວາມ​ໝາຍ​ປະຫວັດສາດ​ຂອງ 30 ປີ​ແຫ່ງ​ການ​ປ່ຽນ​ແປງ​ໃໝ່; ​ແມ່ນ​ບັນດາ​ຜົນງານ​ເບື້ອງ​ຕົ້ນ​ທີ່​ສຳຄັນ​ຂອງ​ 2 ປີ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ພິ​ເສດ​ແມ່ນ ​ບັນດາ​ຜົນງານ​ແລະບົດຮຽນ​ປະສົບ​ການ​ທີ່​ໄດ້​ຮັບ​​ໃນ 2 ປີ​ທີ່​ຜ່ານ​ມາ, ​ເປັນ​ຕົ້ນ​ແມ່ນ​ປີ 2017. ສັນຕິພາບ ການ​ຮ່ວມ​ມື ​​ແລະ ​ການ​ພັດທະນາ​ຍັງ​ຄົງ​ເປັນ​ທ່າ​ອຽງຫຼັກ​ໃນ​ໂລກ. ຄາດ​ຄະ​ເນ​ເສດຖະກິດ​ໂລກຈະ​ຍັງ​ຄົງ​ຟື້ນ​ຕົວ​ແລະ​ເຕີບ​ໂຕຕໍ່​ໄປ. ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່ຈະ​ສ້າງ​ໂອກາດ, ຄວາມ​ສະດວກ​ດີ​ຫຼາຍ​ຢ່າງ​ ພ້ອມ​ທັງ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ໃໝ່ ​ເຊິ່ງປະ​ເທດ​ເຮົາ​ຕ້ອງ​ກຳ​ໃຫ້​ໄດ້​ ເພື່ອ​ສວຍ​ໃຊ້​​ໂອກາດ, ຜ່ານ​ຜ່ານ​ສິ່ງ​ທ້າ​ທາຍ, ອອກ​ແຮງ​ສູ້​ຊົນ, ຫຍໍ້​ສັ້ນ​ເທື່ອ​ລະ​ກ້າວ​ຄວາ​ມ​ແຕກ​ໂຕນທາງ​ດ້ານ​ການ​ພັດທະນາ​ກັບ​ບັນດາ​ປະ​ເທດ​ທີ່ໄປ​ກ່ອນ​.

​ແມ່ນ​​ ພວກ​ເຮົາຄວນ​ເອົາ​ໃຈ​ໃສ່​ເຖິງ​ບັນຫາ​ຈຳນວນ​ໜຶ່ງ​ດັ່ງ​ລຸ່ມ​ນີ້ ຫຼື​ແນວ​ໃດ:

ທີ​ໜຶ່ງ, ຕ້ອງສຸມ​ໃສ່​ໃຫ້​ບຸລິມະສິດ​ແກ່​ການ​ປັບປຸງ​ບູລະນະ​ ລະບຽບ​ກົດໝາຍ​​ເສດຖະກິດ​ຕະຫຼາດກຳນົດ​ທິດສັງຄົມ​ນິຍົມ ຖືກຕ້ອງ​ຕາມ​ຈິດ​ໃຈ​ມະຕິ​ກອງ​ປະຊຸມ​ສູນ​ກາງພັກ​ຄັ້ງ​ທີ 5 ສະ​ໄໝ​ທີ XII. ​ໃນ​ຂະ​ບວນວິວັດ​ການ​ກໍ່ສ້າງ, ປະກາດ​ໃຊ້, ຈັດ​ຕັ້ງ​ປະຕິບັດ​ ບັນດາ​ກົນ​ໄກ ນະ​ໂຍບາຍ ມາດ​ຕະການນັ້ນ, ຕ້ອງ​ຮັບ​ຮູ້​ຢ່າງ​ຄົບ​ຖ້ວນ, ​ເຄົາລົບ ​ແລະ ​ໝູນ​ໃຊ້​ຢ່າງ​ຖືກຕ້ອງ ​ບັນດາ​ກົດ​ເກນ​ພາວະ​ສິ​ໄສ​ຂອງ​​ເສດຖະກິດ​ຕະຫຼາດ, ​ຫຼັກທົ່ວ​ໄປ​ຂອງ​ສາກົນ, ພ້ອມ​ກັນ​ນັ້ນ​ກໍ່​ຮັບປະກັນ​ທິດ​ທາງ​ສັງຄົມ​ນິຍົມ, ສອດຄ່ອງ​ກັບ​ເງື່ອນ​ໄຂ​ການ​ພັດທະນາ​ຂອງ​ປະ​ເທດ​ໃນ​ແຕ່ລະ​ໄລຍະ. ຮັບປະກັນ​ລັກສະນະ​ວິທະຍາສາດ, ຄົບ​ຊຸດ ​ແລະ ມີ​ຄວາມ​ສາມາດ​ເປັນ​ໄປ​ໄດ້​ສູງ. ​ເຊື່ອມ​ຕິດ​ຢ່າງ​ກົມກຽວ​ລະຫວ່າງ​ການ​ເຕີບ​ໂຕ​ເສດຖະກິດ​ ກັບການ​ສ້າງ​ຄວາມ​ກ້າວໜ້າ​ແລະ​ຄວາມຍຸດ​ຕະທຳ​ທາງສັງຄົ​ມ, ພັດທະນາ​ວັດທະນະທຳ, ປົກ​ປັກ​ຮັກສາ​ສິ່ງ​ແວດ​ລ້ອມ, ຮັບປະກັນ​ການ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ. ກຳນົດ​ຢ່າງ​ຈະ​ແຈ້ງ ​ແລະ​ ປະຕິບັດ​ຢ່າງ​ຖືກຕ້ອງ ຖານະທີ່​ຕັ້ງ ບົດບາດ ພາລະ​ບົດບາດ ​ແລະ ສາຍ​ພົວພັນ ຂອງ​ລັດ - ຕະຫຼາດ ​ແລະ ສັງຄົມ ທີ່​ສອດຄ່ອງ​ກັບ​ເສດຖະກິດ​ຕະຫຼາດ; ຮັບປະກັນ​ກຳນົດ​ທິດ​ສັງຄົມ​ນິຍົມ; ​ເພີ່ມ​ທະວີ ​ແລະ ຮັກສາ​ບົດບາດນຳ​ພາ​ຂອງ​ພັກ. ​ເສດຖະກິດ​ຂອງ​ລັດ​ຮັກສາ​ບົດບາດ​ເປັນ​ເຈົ້າພາ​ທາງ; ​ເສດຖະກິດ​ເອກະ​ຊົນ​ເປັນ​ແຮງ​ຜັດ​ດັນ​ທີ່​ສຳຄັນ​ໜຶ່ງ​ຂອງ​ພື້ນຖານ​ເສດຖະກິດ. ​ເສດຖະກິດ​ທີ່​ມີ​ການ​ລົງທຶນ​ຈາກ​ຕ່າງປະ​ເທດ​ເປັນ​ພາກສ່ວນ​ໜຶ່ງ​ຂອງ​ພື້ນຖານ​ເສດຖະກິດ, ​ໄດ້​ຮັບ​ການ​ສົ່ງ​ເສີມ, ສ້າງ​ເງື່ອນ​ໄຂ​ໃຫ້​ພັດທະນາ. ວິ​ສາ​ຫະກິດ​ຂອງ​ລັດ​ຮັກສາ​ທີ່​ຕັ້ງ​ຫຼັກ​ແຫຼ່ງ​ແລະ​ເປັນ​ກຳລັງວັດຖຸ​ທີ່​ສຳຄັນ​ຂອງ​​ເສດຖະກິດ​ແຫ່ງ​ລັດ. ​ເສດຖະກິດ​ແຫ່ງ​ລັດ, ​ເສດຖະກິດ​ລວມໝູ່​ ພ້ອມກັນ​ກັບ​ເສດຖະກິດ​ເອກະ​ຊົນ​ເປັນ​ຫຼັກ​ແຫຼ່ງ​ເພື່ອ​ພັດທະນາພື້ນຖານ​ເສດຖະກິດ​ທີ່​ເປັນ​ເອກະລາດ ​ເປັນ​ເຈົ້າ​ຕົນ​ເອງ. ບັນດາ​ເຈົ້າພາບ​ຂຶ້ນກັບ​ບັນດາ​ພາກສ່ວນ​ເສດຖະກິດ ມີ​ຄວາມ​ສະ​ເໝີ​ພາບ, ຮ່ວມ​ມື, ​ແຂ່ງຂັນ, ພ້ອມ​ກັນ​ພັດທະນາຕາມ​ກົດໝາຍ. ລັດ​ມີ​ບົດບາດ​ກຳນົດ​ທິດ, ກໍ່ສ້າງ ​ແລະ ​ປັບປຸງ​ບູລະນະ ​ລະບຽບ​ກົດໝາຍ​ເສດຖະກິດ; ສ້າງສະພາບ​​ແວດ​ລ້ອມ​ການ​ແຂ່ງຂັນ​ທີ່​ສະ​ເໝີ​ພາບ, ​ໂປ່​ງ​ໃສ​ແລະ​ສົດ​ໃສ; ນຳ​ໃຊ້​ບັນດາ​ເຄື່ອງມື ນະ​ໂຍບາຍ ​ແລະ ​ບັນດາ​ແຫຼ່ງພະລັງ​ຂອງ​ລັດ ​ເພື່ອ​ກຳນົດ​ທິດ ​ແລະ ​ດັດສົມ​ພື້ນຖານ​ເສດຖະກິດ, ຊຸກຍູ້​ພັດທະນາ​ການ​ຜະລິດ​ ທຸລະ​ກິດ ​ແລະ​ ປົກ​ປັກ​ຮັກສາ​ຊັບພະຍາກອນ ສິ່ງ​ແວດ​ລ້ອມ; ພັດທະນາ​ບັນດາ​ຂົງ​ເຂດ​ວັດທະນະທຳ ສັງຄົມ. ຕະຫຼາດ​ມີ​ບົດບາດ​ຕົ້ນ​ຕໍ່​ໃນ​ການ​ລະດົມ ​ແລະ​ ຈັດ​ແບ່ງ​ບັນດາ​ແຫຼ່ງພະລັງ​ຢ່າງ​ມີ​ປະສິດທິ​ຜົນ, ​ເປັນ​ແຮງ​ຜັດ​ດັນ​ທີ່​ສຳຄັນ​ໜຶ່ງ​ເພື່ອ​ປົດ​ປ່ອຍ​ກຳລັງ​ການ​ຜະລິດ; ບັນດາ​ແຫຼ່ງພະລັງ​ຂອງ​ລັດ​ໄດ້ຈັດ​ແບ່ງ​ຕາມຍຸດ​ທະ​ສາດ, ​ແຜນ​ກຳນົດ, ​ແຜນການ ສອດຄ່ອງ​ກັບ​ກົນ​ໄກ​ຕະຫຼາດ.

ທີ​ສອງ, ຕ້ອງ​ຮັບ​ຮູ້ ​ເຊື່ອມ​ຊຶມ​ທັດສະນະ ​ແນວ​ຄິດຊີ້​ນຳ​ຂອງ​ພັກ​ໃຫ້​ເລິກ​ເຊິ່ງ​ເຖິງ​ຖອງ​ກວ່າ​ອີກ ​ແລະ ​ຜັນ​ຂະຫຍາຍຢ່າງຂຸ້ນຂ້ຽວ, ສ້າງ​ການ​ຜັນ​ປ່ຽນຢ່າງ​ແຂງ​ແຮງ​ກວ່າ​ອີກ ​ໃນ​ການຈັດ​ວາງ​ຄືນ​ໃໝ່​ເສດຖະກິດ ຕິດ​ກັບການ​ປ່ຽນ​ແປງ​ໃໝ່​ຮູບ​ແບບ​ການເຕີບ​ໂຕ, ຍົກ​ສູງ​ປະສິດທິພາບ​ຂອງ​ງານ, ຄວາ​ມສາມາດແຂ່ງຂັນ​ຂອງ​ພື້ນຖານ​ເສດຖະກິດ, ຖື​ວ່າ​ນີ້​ແມ່ນ​ໜ້າ​ທີ່​ພື້ນຖານ ສຳຄັນ​ຂອງ​ພວກ​ເຮົາ​ໃນ​ເວລາ​ຕໍ່​ໄປ. ຕ້ອງ​ຮັບ​ຮູ້​ແລະ​ເຊື່ອມ​ຊຶມ​ຢ່າງ​ເລິກເຊິ່ງວ່າ ຮູບແບບການ​ເຕີບ​ໂຕທີ່​ປະ​ເທດ​ເຮົາ​ກໍ່ສ້າງ​ນັ້ນ ​ແມ່ນຮູບ​ແບບ​ການ​ເຕີບ​ໂຕ​ທີ່​ນັບ​ມື້​ນັບ​ອີງ​ຫຼາຍ​ກວ່າ​ໃສ່​ການ​ເພີ່ມປະສິດທິພາບ​ແຮງ​ງານ, ຄຸນ​ນະພາ​ບ ​ແລະ ຄວາມ​ສາມາດ​ແຂ່ງຂັນ​ຂອງ​ພື້ນຖານ​ເສດຖະກິດ; ລະດົມ ຈັດ​ແບ່ງ ​ແລະ ນຳ​ໃຊ້​ຢ່າງ​ມີ​ປະສິດທິ​ຜົນບັນດາ​ແຫຼ່ງພະລັງ ຕາມ​ສັນຍານ​ແລະ​ກົນ​ໄກ​ຕະຫຼາດ; ​ເສີມ​ຂະຫຍາຍ​ນ້ຳ​ໃຈ​ຮັກ​ຊາດ, ຄວາມ​ທະ​ນົງ​ໃຈ​ ແລະ ​ຄວາມ​​ເຄົາລົບກຽດ​ສັກ​ສີ​ແຫ່ງ​ຊາດ, ຄວາມ​ເກັ່ງ​ກ້າ​ສາມາດ​ແລະ​ຄວາມ​ຄິດ​ສ້າງສັນ​ຂອງ​ຜູ້​ຄົນ ​ແລະ ທ່າ​ແຮງ, ຄວາມ​ສາມາດ​ບົ່ມ​ຊ້ອນ​ທຸກ​ຢ່າງ​ຂອງ​ບັນດາ​ຂະ​ແໜງ​ການ ຂົງ​ເຂດ, ບັນດາ​ທ້ອງ​ຖິ່ນ​ແລະ​ທົ່ວ​ປະ​ເທດ; ອຳນວຍ​ເງື່ອນ​ໄຂ​ໃຫ້​ປະຊາຊົນ​ທຸກ​ຄົນ​ເຂົ້າ​ຮ່ວມ ​ແລະ ພ້ອມ​ກັນ​ຊົມ​ໃຊ້​ໝາກຜົນ​ຂອງ​ການ​ເຕີບ​ໂຕ; ​ໃຫ້​ຄວາມ​ສຳຄັນ​​ແກ່​ການ​ຍົກ​ສູງ​ຄຸນ​ນະພາ​ບການ​ເຕີບ​ໂຕ, ຮັກສາ​ສະຖຽນ​ລະ​ພາບ​ຂອງ​ເສດຖະກິດ​ມະຫາ​ພາກ, ສ້າງ​ຄວາມ​ກ້າວ​ໜ້າ​ແລະ​ຄວາມ​ຍຸດຕິ​ທຳ​ທາງ​ສັງຄົມ, ຮັບປະກັນ​ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ, ຮັກສາ​ສິ່ງ​ແວດ​ລ້ອມລະບົບນິ​ເວດ. ອີງ​ໃສ່​ສະພາບ​ຕົວ​ຈິງ​ຂອງ​ແຕ່ລະ​ຂະ​ແໜງ​ການ ຂົງ​ເຂດ ​ແລະ​ທ້ອງ​ຖິ່ນ​ ເພື່ອ​ສົມທົບ​ຢ່າງ​ສົມ​ເຫດ​ສົມ​ຜົນ​ລະຫວ່າງການ​ເຕີບ​ໂຕ​ຕາມ​ລວງ​ກວ້າງ ​ແລະ ​ການເຕີບ​ໂຕ​ຕາມ​ລວງ​ເລິກ, ​ໃນ​ນັ້ນ, ຖືການເຕີບ​ໂຕ​ຕາມ​ລວງ​ເລິກ​ເປັນ​ທິດ​ທາງ​ຫຼັກ. ຫັນປ່ຽນ​ເທື່ອ​ລະ​ກ້າວ​ ຈາກ​ການ​ເຕີບ​ໂຕທີ່ອີງ​ໃສ່​ການ​ລົງທຶນ​ແລະ​ການ​ສົ່ງ​ອອກ​ເປັນ​ຕົ້ນຕໍ່ ​ໄປ​ສູ່​ການ​ເຕີບ​ໂຕ​ທີ່​ອີງ​ໃສ່​ທັງ​ການ​ລົງທຶນ ການ​ສົ່ງ​ອອກ​ແລະ​ຕະຫຼາດ​ພາຍ​ໃນ​ປະ​ເທດ​ພ້ອມໆ​ກັນ. ຫັນປ່ຽນ​ເທື່ອ​ລະ​ກ້າວ ​ຈາກ​ການ​ອີງ​ໃສ່ການ​ເພີ່ມ​ປະລິມານ​ບັນດາ​ປັດ​ໄຈ​ສົ້ນ​ເຂົ້າຂອງ​ການ​ຜະລິດ ​ໄປ​ສູ່ການ​ອີງ​ໃສ່​ການ​ເພີ່ມສະມັດ​ຕະພາບ ຄຸນ​ນະພາ​ບ​ຂອງ​ງານ, ການ​ປະ​ຢຸກ​ໃຊ້​ວິທະຍາສາດ-​ເຕັກ​ໂນ​ໂລ​ຊີ ​ແລະ​ການ​ປ່ຽນ​ແປງ​ໃໝ່​ປະດິດ​ສ້າງ. ຂຸດ​ຄົ້ນ​ແລະ​ເສີມ​ຂະຫຍາຍ​ກຳລັງ​ພາຍ​ໃນຢ່າງສຸດ​ຂີດ ສົມທົບ​ກັບ​ການ​ດຶງ​ດູດ​ແລະ​ນຳ​ໃຊ້​ກຳລັງ​ພາຍ​ນອກ​ຢ່າງ​ມີ​ປະສິດທິ​ຜົນ. ບໍ່​ແມ່ນ​ຍ້ອນ​ຄວາມ​ກົດ​ດັນ​ຈາກການ​ເຕີບ​ໂຕ, ຄວາມ​ກົດ​ດັນ​ຈາກ​ການ​ແກ້​ໄຂ​ບັນຫາ​ທີ່​ຮີບ​ດ່ວນ ​ແລ້ວມາ​ເບິ່ງ​ເບົາ, ບໍ່​ເອົາ​ໃຈ​ໃສ່​ເຖິງ​ການ​ຊີ້​ນຳ​ນຳພາ, ການ​ໃຊ້​ແຫຼ່ງພະລັງ​ເພື່ອ​ແກ້​ໄຂ​ບັນດາ​ບັນຫາ​ທີ່​ມີ​ລັກສະ​ນະ​ພື້ນຖານ ຍາວ​ນານຂອງ​ການ​ພັດທະນາຢ່າງ​ໄວວາ​ແລະ​ຍືນ​ຍົງ.

ທີ​ສາມ, ຍູ້​ແຮງ​ກວ່າ​ອີກ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ບັນດາ​ມະຕິ​ກອງ​ປະຊຸມ​ສູນ​ກາງ​ພັກສະ​ໄໝ​ທີ XI ກ່ຽວ​ກັບ​ການ​ປ່ຽນ​ແປງ​ໃໝ່​ການ​ສຶກສາ - ຝຶກ​ອົບຮົມ​ຢ່າງ​ພື້ນຖານ​ແລະ​ຮອບດ້ານ; ການ​ພັດທະນາ​ຊັບພະຍາກອນ​ມະນຸດ; ​ເພີ່ມ​ທະວີ​ຄວາມ​ສາມາດ​ບົ່ມ​ຊ້ອນ​ແລະ​ຍູ້​ແຮງ​ການ​ປະ​ຢຸກ​ໃຊ້ວິທະຍາສາດ-​ເຕັກ​ໂນ​ໂລ​ຊີ​ ເພື່ອ​ຜ່ານ​ຜ່າ​ສິ່ງ​ທ້າ​ທາຍ, ກຳ​ເອົາ​ໂອກາດ​ຕ່າງໆ​ທີ່​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່​ອາດ​ຈະ​ນຳ​ມາ​ໃຫ້. ນີ້​ແມ່ນ​ການ​ປະຕິ​ວັດ​ອຸດສາຫະກຳ​ໃໝ່ທີ່​ຫາ​ກໍ່​ເກີດ​ຂຶ້ນ​ ແຕ່​ກໍ່​ໄດ້​ຂະຫຍາຍຕົວ​ຢ່າງ​ໄວວາ ​ແລະ ສົ່ງ​ຜົນ​ກະທົບ​ແຮງ​ເຖິງ​ທຸກ​ປະ​ເທດ, ປະຊາ​ຊາດ ​ໃນ​ທຸກໆ​ດ້ານ, ​ແຕ່​ລະບຽບ​ກົດໝາຍ​ແລະ​ການ​ຄຸ້ມ​ຄອງ​ບໍລິຫານ​ລັດ, ການຄຸ້ມຄອງບໍລິສັດ ​ເຖິງ​ເສດຖະກິດ ສັງຄົມ ສິ່ງ​ແວດ​ລ້ອມ; ​ເຮັດ​ໃຫ້ການ​ຜະລິດ​ຂອງ​ໂລກ​ມີ​ການ​ປ່ຽນ​ແປງ​ໂດຍ​ພື້ນຖານ, ​ແຕ້ມ​ແຜນ​ທີ່ເສດຖະກິດ​ໂລກ​ຄືນ​ໃໝ່​​ເທື່ອ​ລະ​ກ້າວ ຕາມ​ທິດ​ຫຼຸດຜ່ອນ​ອຳນາດ​ຂອງ​ບັນດາ​ປະ​ເທດທີ່​ອີງຕົ້ນຕໍ​ໃສ່​ການ​ຂຸດ​ຄົ້ນ​ຊັບພະຍາກອນ, ​ແຮງ​ງານ​ລາຄາ​ຖືກ, ​ດຳ​ເນີນ​ການຜະລິດ​ທຸລະ​ກິດ​ຕາມ​ແບບ​ດັ້ງ​ເດີມ ​ແລະ ​ເພີ່ມ​ກຳລັງອຳນາດ​ໃຫ້​ບັນດາ​ປະ​ເທດ​ທີ່ອີງ​ຕົ້ນຕໍໃສ່​ການ​ປ່ຽນ​ແປງ​ໃໝ່ ປະດິດ​ສ້າງ​.

ດ້ວຍ​ທ່າ​ໄດ້​ປຽບ​ຂອງ​ປະ​ເທດ​ທີ່ຢູ່​ໃນ​ໄລຍະ​ປະຊາກອນ​ທອງ; ຄົນ​ຫວຽດນາມ​ມີ​ຄວາມ​ຂະຫຍັນ​ໝັ່ນ​ພຽນ​ໃນ​ການ​ອອກ​ແຮງ​ງານ, ​ສະຫຼາດ​ ແລະມີ​ຫົວຄິດ​ປະດິດ​ສ້າງ; ​ໃນ​ຊຸມ​ປີ​ທີ່​ຜ່ານ​ມາ ຫວຽດນາມ​ໄດ້​ສຸມ​ໃສ່​ກໍ່ສ້າງ​ພື້ນຖານ​ວັດຖຸ​ເຕັກ​ນີກ​ເບື້ອງ​ຕົ້ນ ​ຂອງ​ເຕັກ​ໂນ​ໂລ​ຊີຂໍ້​ມູນ​ສື່ສານ ​ແລະ ​ໄດ້ບັນລຸ​ຜົນສຳ​ເລັດ​ທີ່​ສຳຄັນ​ໃນ​ຂົງ​ເຂດ​ນີ້; ປະ​ເທດ​ຂອງ​ພວກ​ເຮົາ​ສາມາດ​ເອົາ​ຊະນະ​ຄວາມ​ຫຍຸ້ງຍາກສິ່ງ​ທ້າ​ທາຍ, ຍາດ​ແຍ່ງ​ເວລາ​ກຳ​ເອົາ​ໂອກາດ ຄວາມ​ສະດວກ​ທີ່​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່ອາດ​ຈະ​ນຳ​ມາ​ໃຫ້ ​ເພື່ອ​ສ້າງ​ບາດກ້າວ​ບຸກທະລຸ​ໃນ​ການ​ພັດທະນາ​ເສດຖະກິດ-ສັງຄົມ​ໃນ​ໄລຍະ​ເວລາ​ຕໍ່​ໄປ. ຢາກ​ໄດ້​ຄື​ແນວ​ນັ້ນ, ຕ້ອງ​ມີ​ຄວາມ​​ພະຍາ​ຍາມ​ຍິ່ງ​ກວ່າ​ອີກ, ສະ​ເໜີ ນຳ​ໃຊ້​ກົນ​ໄກ ນະ​ໂຍບາຍ​ທີ່​ສອດຄ່ອງ, ສືບ​ຕໍ່​ຍູ້​ແຮງ​ການ​ກໍ່ສ້າງ ພັດທະນາຊັບພະຍາກອນ​ມະນຸດ, ​ໂດຍ​ສະ​ເພາະ​ຊັບພະຍາກອນ​ມະນຸດ​ທີ່​ມີ​ຄຸນະພາບ​ສູງ ​ແລະ ລະບົບ​ໂຄງ​ສ້າງ​ພື້ນຖານ​ເສດຖະກິດ-ສັງຄົມທີ່​ຄົບ​ຊຸດ​ຕາມທິດທັນ​ສະ​ໄໝ; ບຸລິມະສິດ​ການ​ລົງທຶນ​ພັດທະນາ​ອຸດສາຫະກຳ ​ແລະ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ​ເພື່ອ​ກຳນົດ​ຮູບ​ແບບ, ກໍ່ສ້າງ​ທົດ​ລອງ​ຕົວ​ເມືອງ​ອັດ​ສະ​ລິ​ຍະ, ຂະ​ແໜງ​ການ ຂົງ​ເຂດ​ການ​ພັດທະນາ​ແບບ​ອັດ​ສະ​ລິ​ຍະ ທີ່​ນຳ​​ໃຊ້​ເຕັກ​ໂນ​ໂລ​ຊີ​ສູງ.

ທີ​ສີ່, ​ເອົາ​ໃຈ​ໃສ່​ຫຼາຍ​ກວ່າ​ອີກ​ເຖິງ​ການ​ພັດທະນາ​ວັດທະນະທຳ ສັງຄົມ​ຢ່າງ​ມີ​ປະສິດທິ​ຜົນ, ​ເອົາ​ໃຈ​ໃສ່​ປັບປຸງ​ຊີວິດ​ການ​ເປັນ​ຢູ່​ຂອງ​ປະຊາຊົນ. ຮີບ​ເຮັ່ງ​ສະຫຼຸບສັງ​ລວມທິດ​ສະ​ດີ​ແລະ​ພຶດຕິ​ກຳ, ຄົ້ນຄວ້າກໍ່ສ້າງ​ໂຄງການ​ເພື່ອ​ສະ​ເໜີ​ໃຫ້​ກອງ​ປະຊຸມ​ສູນ​ກາງ​ພັກຄັ້ງ​ທີ 7 ສະ​ໄໝ​ທີ XII ພິຈາລະນາ, ຕົກລົງ​ຮັບຮອງ: ​ໂຄງການ​ປັບປຸງນະ​ໂຍບາຍ​ເງິນ​ເດືອນ​ສຳລັບ​ພະນັກງານ, ​ເຈົ້າ​ໜ້າ​ທີ່, ລັດຖະກອນ, ກຳລັງ​ປະກອບ​ອາວຸດ ​ແລະ ຜູ້​ອອກ​ແຮງ​ງານ​ໃນ​ວິ​ສາ​ຫະກິດ ​ແລະ ​ໂຄງການ​ປັບປຸງ​ນະ​ໂຍບາຍການ​ປະກັນ​ສັງຄົມ. ສືບ​ຕໍ່​ການ​ກວດຄືນ, ປັບປຸງບູລະນະ​ນະ​ໂຍບາຍ​ສຳລັບຜູ້​ທີ່​ມີ​ຄຸນງາມຄວາມດີ​ຕໍ່​ຊາດ. ສຸມ​ໃສ່​ປະຕິບັດ​ບັນດາ​ມາດ​ຕະການ​ຫຼຸດຜ່ອນ​ຄວາມທຸກ​ຍາກ​ແບບ​ຍືນ​ຍົງ, ຮັບປະກັນ​ຄວາມ​ປອດ​ໄພ​ສັງຄົມ ສະ​ວັດ​ດີກາ​ນສັງຄົມ; ບຸລິມະສິດ​ແຫຼ່ງພະລັງ​ເພື່ອ​ພັດທະນາ​ເຂດ​ທີ່​ປະສົບ​ຄວາມ​ຫຍຸ້ງຍາກ​ທາງ​ດ້ານ​ເສດຖະກິດ-ສັງຄົມ, ​ເຂດ​ຊົນ​ເຜົ່າ​ສ່ວນນ້ອຍ ​ແລະ​ ເຂດ​ຖືກ​ໄພ​ທຳ​ມະ​ຊາດ, ຖືກ​ຜົນ​ກະທົບ​ຂອງ​ການ​ປ່ຽນ​ແປງ​ສະພາບ​ອາກາດ, ຖືກ​ນ້ຳ​ທະ​ເລ​ຍຶ່ງຂຶ້ນ. ສົ່ງ​ເສີມ​ການ​ພັດທະນາທີ່ຢູ່​ອາ​ໄສ​ເພື່ອສັງຄົມ. ປະຕິບັດ​ຢ່າງ​ເຂັ້ມ​ງວດ​ຂໍ້​ກຳນົດ​ກ່ຽວ​ກັບຄວາມ​ປອດ​ໄພ​ແລະ​ສຸກຂະ​ອະນາ​ໄມ​ໃນ​ການ​ອອກ​ແຮງ​ງານ; ຄວາມ​ປອດ​ໄພ​ແລະ​ສຸກຂະ​ອະນາ​ໄມ​ອາຫານ. ​ເອົາ​ໃຈ​ໃສ່​ຢ່າງ​ເປັນ​ປະຈຳ​ເຖິງ​ການ​ຊີ້​ນຳນຳພາການ​ກໍ່ສ້າງ​ຊົນນະບົດ​ໃໝ່, ຍູ້​ແຮງ​ຂະ​ບວນການ​ປວງ​ຊົນສາມັກຄີ, ກໍ່ສ້າງ​ຄອບຄົວ​ວັດທະນະທຳ​ໃໝ່.

ຍູ້​ແຮງການ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 9 ສະ​ໄໝ​ທີ XI ກ່ຽວ​ກັບ​ການ​ກໍ່ສ້າງ​ແລະ​ພັດທະນາ​ວັດທະ​ນະ​ທຳ, ຜູ້​ຄົນ​ຫວຽດນາມ​ ເພື່ອ​ຕອບ​ສະໜອງ​ຄວາມ​ຕ້ອງການ​ພັດທະນາ​ປະ​ເທດ​ຢ່າງ​ຍືນ​ຍົງ. ພັດທະນາ​ວັດທະ​ນະ​ທຳ​ເພື່ອ​​ບູລະນະບຸກຄະ​ລິກກະພາບ​ຂອງ​ຄົນ ​ແລະ ​ກໍ່ສ້າງ​ຄົນ​ເພື່ອ​ພັດທະນາ​ວັດທະນະທຳ. ​ໃນ​ການ​ກໍ່ສ້າງ​ວັດທະນະທຳ, ​ເບິ່ງ​ແຍງ​ດູ​ແລ​ການ​ກໍ່ສ້າງ​ຄົນ​ໃຫ້​ມີ​ບຸກຄະ​ລິກກະພາບ, ມີ​ແບບ​ດຳລົງ​ຊີວິດ​ທີ່​ດີ​ງານ ດ້ວຍ​ຄຸນສົມບັດ​ພື້ນຖານ​ຄື: ຮັກ​ຊາດ, ມີ​ຄວາມ​ເມດ​ຕາ, ມີ​ມິດ​ຈິດ​ມິດ​ໃຈ, ຊື່ສັດ, ມີ​ນ້ຳ​ໃຈ​ສາມັກຄີ, ຂະຫຍັນ​ໝັ່ນ​ພຽນ, ມີ​ຫົວຄິດ​ປປະດິດ​ສ້າງ. ກໍ່ສ້າງ​ສິ່ງ​ແວດ​ລ້ອມ​ວັດທະນະທຳ​ຢ່າງ​ຄົບ​ຊຸດ, ​ໃນ​ນັ້ນ​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ພັດທະນາ​ບົດບາດ​ຂອງ​ຄອບຄົວ, ຊຸມ​ຊົນ; ພັດທະນາ​ເສດຖະກິດ​ແລະ​ວັດທະນະທຳ​ຢ່າງ​ກົມກຽວ, ​ເອົາ​ໃຈ​ໃສ່ຢ່າງ​ເຕັມທີ​ເຖິງ​ປັດ​​ໄຈ​ວັດທະນະທຳ​ແລະ​ມະນຸດ​ໃນ​ການ​ພັດທະນາ​ເສດຖະກິດ.

ຮີບ​ດ່ວນ, ​ເຂັ້ມ​ງວດ​ໃນ​ການ​ຜັນ​ຂະຫຍາຍ​ປະຕິບັດ​ຢ່າງ​ມີ​ປະສິດທິ​ຜົນ ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6 ສະ​ໄໝ​ທີ XII ກ່ຽວ​ກັບ​ວຽກ​ງານ​ປົກປັກ​ຮັກສາ, ​ເບິ່ງ​ແຍງ​ດູ​ແລ, ຍົກ​ສູງ​ສຸຂະພາບ​ຂອງ​ປະຊາຊົນ ​ແລະ ວຽກ​ງານປະຊາກອນ​ໃນ​ສະພາບ​ການ​ໃໝ່. ຖື​ວ່າການ​ລົງທຶນ​ໃຫ້​ແກ່​ການປົກປັກ​ຮັກສາ, ​ເບິ່ງ​ແຍງ​ດູ​ແລ ​ແລະ ຍົກ​ສູງ​ສຸຂະພາບ​ຂອງ​ປະຊາຊົນ ​ແມ່ນ​ການ​ລົງທຶນ​ໃຫ້​ແກ່​ການ​ພັດທະນາ. ລັດຈະ​ບຸລິມະສິດ​ໃຊ້​ງົບປະມານ​ລົງທຶນ ​ແລະ ມີ​ກົນ​ໄກ ນະ​ໂຍບາຍ​ລະດົມ, ນຳ​ໃຊ້​ບັນດາ​ແຫຼ່ງພະລັງ​ ​ເພື່ອປົກປັກ​ຮັກສາ, ​ເບິ່ງ​ແຍງ​ດູ​ແລ ​ແລະ ຍົກສູງ​ສຸຂະພາບຂອງ​ປະຊາຊົນ; ຈັດ​ຕັ້ງ​ໃຫ້​ບໍລິການ​ສາທາລະນະ, ຮັບປະກັນ​ບັນດາ​ການ​ບໍລິການ​ພື້ນຖານ, ພ້ອມ​ກັນ​ນັ້ນ​ກໍ່​ສົ່ງ​ເສີມ​ການ​ຮ່ວມ​ມື​ລະຫວ່າງ​ພາກ​ລັດ-​ເອກະ​ຊົນ, ການ​ລົງທຶນ​ຂອງເອກະ​ຊົນ, ​ໃຫ້​ບໍລິການ​ຕາມ​ຄຳ​ຮ້ອງ​ຂໍ. ກຳນົດ​ປະຊາກອນ​ແມ່ນ​ປັດ​ໄຈ​ສຳຄັນ​ອັນ​ດັບ​ໜຶ່ງ​ຂອງ​ພາລະກິດ​ການ​ກໍ່ສ້າງ ​ແລະ​ປົກ​ປັກ​ຮັກສາ​ປະ​ເທດ​ຊາດ; ວຽກ​ງານ​ປະຊາກອນ​ແມ່ນ​ໜ້າ​ທີ່​ຍຸດ​ທະ​ສາດ, ທັງ​ຮີບ​ດ່ວນ​ທັງ​ຍາວ​ນານ; ​ແມ່ນ​ໜ້າ​ທີ່​ຂອງ​ທົ່ວ​ພັກ, ທົ່ວ​ປວງ​ຊົນ. ວຽກ​ງານ​ປະຊາກອນ​ຕ້ອງ​ເອົາ​ໃຈ​ໃສ່​ທຸກ​ດ້ານ ທັງ​ດ້ານ​ຂະໜາດ ​ໂຄງ​ສ້າງ ການ​ແຈກ​ຢາຍ ​ແລະ ຄຸນ​ນະພາ​ບຂອງ​ປະຊາກອນ ​ເຊິ່ງຕັ້ງ​ຢູ່​ໃນ​ສາຍ​ພົວພັນ​​ແບບອິນ​ຊີກັບ​ບັນດາ​ປັດ​ໄຈ​ເສດຖະກິດ, ສັງຄົມ, ການ​ປ້ອງ​ກັນຊາ​ດ, ປ້ອງ​ກັນ​ຄວາ​ງສະຫງົບ ​ແລະ ການ​ຮັບປະກັນການ​ກັນ​ພັດທະນາ​ຢ່າງ​ໄວວາ, ຍືນ​ຍົງ.

ທີ​ຫ້າ, ​ເດັດດ່ຽວ ໜຽວ​ແໜ້ນ​ໃນ​ການ​ຮັກສາ​ຄວາມ​ເປັນ​ເອກະລາດ, ອະທິປະ​ໄຕ, ​ເອກະ​ພາບ, ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ປະ​ເທດ​ຊາດ; ຮັບປະກັນ​ສະຖຽນ​ລະ​ພາບ​ທາງ​ການ​ເມືອງ, ຄວາມ​ເປັນ​ລະບຽບ ຄວາມ​ປອດ​ໄພ​ທາງ​ສັງຄົມ; ປະຕິບັດ​​ວຽກ​ງານ​ການ​ຕ່າງປະ​ເທດ ​ແລະ ການ​ເຊື່ອມ​ໂຍງ​ສາກົນ ຢ່າງ​ມີ​ປະສິດທິ​ຜົນ. ປັບປຸງ​ທ່າ​ສະໜາ​ມປ້ອງ​ກັນຊາ​ດທົ່ວ​ປວງ​ຊົນ, ການ​ປ້ອງ​ກັນ​ຄວາມ​ສະຫງົບ​ປະຊາຊົນ. ຍູ້​ແຮງ​ການ​ເຄື່ອນ​ໄຫວ​ພົວພັນ​ຕ່າງປະ​ເທດ​ຮອບດ້ານ ກ່ຽວ​ກັບ​ການ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ ​ຕາມ​ຈິດ​ໃຈ “ຮັກສາ​ປະ​ເທດ​ແຕ່​ໄກ”, “ຮັກສາ​ປະ​ເທດ​ແຕ່​ເມື່ອປະ​ເທດ​ບໍ່​ຕົກຢູ່ໃນ​ອັນຕະລາຍ”. ຮັກສາຄວາມ​ໝັ້ນຄົງ​ແຫ່ງ​ຊາດ, ຮັບປະກັນ​ຄວາມ​ເປັນ​ລະບຽບ ​ແລະ​ຄວາມ​ປອດ​ໄພ​ທາງ​ສັງຄົ​ມ. ​ເປັນ​ເຈົ້າ​ການ​ໃນ​ການ​ປ້ອງ​ກັນ, ຕໍ່ສູ້​, ກີດ​ກັ້ນ​ກົນອຸບາຍ, ການ​ເຄື່ອນ​ໄຫວ​ມ້າງ​ເພ​ທຳລາຍ​ຂອງ​ອິດ​ທິກຳລັງ​ສັດຕູ​ ຢ່າງ​ທັນ​ການ​ແລະມີ​ປະສິດທິ​ຜົນ​. ປະຕິບັດ​ຢ່າງ​ຂຸ້ນຂ້ຽວ ຄົບ​ຊຸດ ​ບັນດາ​ວິທີ​ປ້ອງກັນ​ແລະ​ຕ້ານ​ອາ​ຊະ​ຍາ​ກຳ, ຮັບປະກັນຄວາມ​ເປັນ​ລະບຽບ​ແລະ​ຄວາມ​ປອດ​ໄພ​ໃນ​ການ​ຄົມມະນາຄົມ, ປ້ອງ​ກັນ​​​ແລະຕ້ານອັກຄີ​ໄພ​ການລະ​ເບີດ ​ແລະ​ ຄວາມ​ຊົ່ວ​ຮ້າຍ​ທາງ​ສັງຄົມ. ​ເພີ່ມ​ທະວີ​ການ​ຄຸ້ມ​ຄອງ​ຊັບພະຍາກອນ, ຮັກສາ​ສິ່ງ​ແວດ​ລ້ອມ, ປ້ອງ​ກັນ​ແລະ​ຕ້ານ​ໄພ​ທຳ​ມະ​ຊາດ, ປັບ​ຕົວ​ໃຫ້​ຄ່ອງ​ກັບ​ການ​ປ່ຽນ​ແປງ​ສະພາບ​ອາກາດ; ກຽມ​ຄວາມ​ພ້ອມ​ເພື່ອ​ຮັບ​ມື​ຢ່າງ​ທັນ​ການ, ​ແກ້​ໄຂ​ຢ່າງ​ມີ​ປະສິດທິ​ຜົນ ບັນດາ​ເຫດການ​ໄພພິບັດ ​ແລະ ກູ້​ໄພ ​ກູ້​ຊີບ.

​ເອົາ​ໃຈ​ໃສ່​ເຖິງ​ການ​ຍົກ​ສູງ​ຄຸນ​ນະພາ​ບຂອງ​ວຽກ​ງານພະຍາກອນ, ວິ​ເຄາະ​ໄຈ້​ແຍກ​ສະພາບ​ການ​ສາກົນ; ​ເປັນ​ເຈົ້າ​ການ​ໃນ​ການ​ເຮັດ​ໃຫ້​ບັນດາ​ສາຍ​ພົວພັນ​ຄູ່​ຮ່ວມມື​ຍຸດ​ທະ​ສາດ, ຄູ່​ຮ່ວມ​ມື​ຮອບດ້ານ​ ມີ​ເນື້ອ​ແທ້​ແລະ​ເລິກ​ເຊິ່ງກວ່າ​ອີກ, ​ເພີ່ມ​ທະວີ​ການ​ພົວພັນ​ກັບ​ທຸກ​ປະ​ເທດ​ບົນ​ພື້ນຖານຫຼັກການ​ມິດ​ຕະພາບ, ການ​ຮ່ວມ​ມື, ສະ​ເໝີ​ພາບ ​ແລະ ​ມີ​ຜົນ​ປະ​ໂຫຍ​ດຮ່ວມ​ກັນ. ຈັດ​ຕັ້ງ​ເປັນ​ຢ່າງ​ດີ​ບັນດາ​ການ​​ເຄື່ອນ​ໄຫວ​ສອງຝ່າຍ, ຫຼາຍ​ຝ່າຍ. ຍູ້​ແຮງ​ວຽກ​ງານ​ຖະ​ແຫຼ​ງຂ່າວ​ໂຄສະນາ​ການ​ ກ່ຽວ​ກັບການ​ເຊື່ອມ​ໂຍງ​ສາກົນ, ຍົກ​ສູງ​ຄວາມ​ສາມາດ​ໃນ​ການ​ເຈລະຈາ, ​ເຊັນ, ປະຕິບັດ​ສົນທິ​ສັນຍາ​ສາກົນ​ຢ່າງ​ມີ​ປະສິດທິ​ຜົນ, ​​ໂດຍ​ສະ​​ເພາະ​ ​ບັນດາ​ສັນຍາ​ການ​ຄ້າ​ເສລີ​ຮຸ່ນ​ໃໝ່ ​ແລະ ຍົກ​ສູງ​ຄວາມ​ສາມາດ​ແກ້​ໄຂຂໍ້​ຂັດ​ແຍ່ງ​ທາງ​ການ​ຄ້າ​ແລະ​ການ​ລົງທຶນ​ສາກົນ. ​ເຮັດ​ເປັນ​ຢ່າງ​ດີ​ວຽກ​ງານ​ປົກ​ປ້ອງ​ພົນລະ​ເມືອງ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ຊາວ​ຫວຽດນາມ​ຢູ່​ຕ່າງປະ​ເທດ​ໄດ້​ປະກອບສ່ວນ​ກໍ່ສ້າງ​ປະ​ເທດ​ຊາດ.

ທີ​ຫົກ, ສືບ​ຕໍ່​ຍູ້​ແຮງ​ແລະ​ເຮັດ​ເປັນ​ຢ່າງ​ດີ​ວຽກ​ງານ​ກໍ່ສ້າງ​ພັກ ​ແລະ​ລະບົບ​ການ​ເມືອງ, ພິ​ເສດ​ແມ່ນ​ກໍ່ສ້າງ​ລັດຖະບານ, ອຳນາດ​ການ​ປົກຄອງທ້ອງ​ຖິ່ນ​ຕ່າງໆ​ໃຫ້ສະອາດ​ປອດ​ໃສ, ຊື່ສັດ​ທ່ຽງ​ທຳ, ໝັ້ນຄົງ​ເຂັ້ມ​ແຂງ, ​ເຄື່ອນ​ໄຫວມີ​ປະສິດທິພາບ ປະສິດທິ​ຜົນ. ​ໃນ​ການ​ກຳນົດ​ນະ​ໂຍບາຍ, ຊີ້​ນຳ ກຳກັບຂັບ​ເຄື່ອນ​ ຕ້ອງ​ເອົາ​ໃຈ​ໃສ່​ທັງ​ສອງ​ດ້ານ: ​ແກ້​ໄຂ​ບັນຫາ​ປະຈຸ​ບັນ, ພ້ອມ​ກັນ​ນັ້ນ​ກໍ່ສ້າງ​ສິ່ງ​ແວດ​ລ້ອມ​ແລະ​ເງື່ອນ​ໄຂ​ ເພື່ອ​ໃຫ້​ຊຸມ​ປີ​ຕໍ່​ໄປ​ຈະ​ມີ​ການ​ພັດທະນາ​ໄວ​ກວ່າ​ແລະຍືນ​ຍົງ​ກວ່າ​ອີກ. ​ເຂັ້ມ​ງວດ​ໃນ​ການ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII “ກ່ຽວ​ກັບ​ການ​ເພີ່ມ​ທະວີ​ການ​ກໍ່ສ້າງ​ປັບປຸງພັກ; ກີດ​ກັ້ນ, ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ດຳລົງ​ຊີວິດ, ບັນດາ​ປະກົດ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ”. ຜັນ​ຂະຫຍາຍ​ປະຕິບັດມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6 ສະ​ໄໝ​ທີ XII ກ່ຽວ​ກັບ​ການ​ສືບ​ຕໍ່​ປ່ຽນ​ແປງ​ໃໝ່, ຈັດ​ວາງ​ສັບ​ຊ້ອນ​ການ​ຈັດ​ຕັ້ງ​ກົງຈັກ​ຂອງ​ລະບົບ​ການ​ເມືອງ​ໃຫ້​ກະທັດ​ລັດ​ເບົາບາງ, ​ໃຫ້​ເຄື່ອນ​ໄຫວ​ມີ​ຄວາມ​ສັກສິດ ມີ​ປະສິດທິ​ຜົນ; ປ່ຽນ​ແປງ​ໃໝ່​ລະບົບ​ການຈັດ​ຕັ້ງ​ແລະ​ຄຸ້ມ​ຄອງບໍລິຫານ, ຍົກ​ສູງ​ຄຸນ​ນະພາ​ບ​ແລະ​ປະສິດທິ​ຜົນ​ການ​ເຄື່ອນ​ໄຫວຂອງ​ບັນດາໜ່ວຍ​ງານ​ບໍລິການ​ພາກ​ລັດ. ​ເຮັດ​ວຽກ​ງານ​ພະນັກງານ​ໃຫ້​ດີກວ່າ​ອີກ ​ເພື່ອ​ຄັດ​ເລືອກ, ຈັດ​ວາງ​​ພະນັກງານ​ທີ່​ມີ​ຄຸນສົມບັດ, ມີ​ຄວາມ​ສາມາດ, ​ຊື່ສັດ​ທ່ຽງ​ທຳ, ສຸດ​ອົກ​ສູດ​ໃຈຕໍ່​ພັກ ​ຕໍ່​ປະຊາຊົນ ​​ເຂົ້າ​ໃນ​ຕຳ​ແໜ່​ງຜູ້​ນຳ​ໃນ​ກົງຈັກ​ລັດ. ຕໍ່ສູ້​ຢ່າງ​ເດັດດ່ຽວ​ເພື່ອລົງ​ໂທດ​ພວກກະທຳ​ຜິດ ​ສໍ້​ລາດ​ບັງ​ຫຼວງ; ຕໍ່ສູ້​ຕ້ານ​ປະກົດ​ການຕ່າງໆ​ເຊັ່ນ ການ​ວິ້ງເຕັ້ນຫາຕຳ​ແໜ່​ງ​ຍົດ​ສັກ, ການ​ເລືອກ​ເອົາ​ຍາດ​ພີ່ນ້ອງ​ທີ່ບໍ່​​ໄດ້​ຕາມມາດຕະຖານ​ ໃຫ້​ເຂົ້າ​ເຮັດ​ວຽກ​ໃນ​ອົງການ​ພັກ​ລັດ. ​ເສີມ​ຂະຫຍາຍ​ປະຊາທິປະ​ໄຕ​ຢູ່​ຮາກ​ຖານ, ຍົກ​ສູງ​ສະຕິ​ຮັບຜິດຊອບ, ຈິດ​ໃຈ​ຮັບ​ໃຊ້​ປະຊາຊົນ ​ຂອງ​ພະນັກງານ, ​ເຈົ້າ​ໜ້າ​ທີ່, ລັດຖະກອນ. ຍູ້​ແຮງ​ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ, ກໍ່ສ້າງ​ລັດຖະບານ​ເອ​ເລັກ​ໂຕຣນິກ. ຮັດ​ແໜ້ນ​ລະບຽບ​ວິ​ໄນ​ການ​ບໍລິຫານ, ກວດກາ ຊຸກຍູ້​ຢ່າງ​ເປັນ​ປະຈຳ, ສ້າງ​ການ​ຫັນປ່ຽນ​ຢ່າງ​ແຂງ​ແຮງ​ໃນ​ການປະຕິບັດ​ໜ້າ​ທີ່; ຍົກ​ສູງ​ຄຸນສົມບັດ ວັດທະນະທຳ ລະດັບ​ວິຊາ​ຊີບ​ຂອງ​ພະນັກງານ, ເຈົ້າ​ໜ້າ​ທີ່, ລັດຖະກອນ. ປະຕິບັດ​ຢ່າງ​ເຂັ້ມ​ງວດ​ຂໍ້​ກຳນົດ​ຕ່າງໆກ່ຽວ​ກັບ​ການ​ປະຢັດ, ຕ້ານ​ການ​ຟຸມ​ເຟືອຍ ​ແລະ ການ​ຕ້ອນຮັບ​ປະຊາຊົນ; ກວດຄືນ, ​ແກ້​ໄຂ​ການ​ຮ້ອງທຸກ, ຮ້ອງ​ຟ້ອງ​ຕ່າງໆ​​ ຢ່າງ​ທັນ​ການ, ​ເປັນ​ຕົ້ນ​ແມ່ນ​ບັນດາ​ກໍລະນີ, ຄະດີ​ທີ່​ສັບສົນ ​ແກ່ຍາວ. ​ເພີ່ມ​ທະວີ​ການ​ປ້ອງ​ກັນ, ຕ້ານ, ຄົ້ນ​ເຜີຍ, ​ແກ້​ໄຂ​ລົງ​ໂທດ​ຢ່າງ​ເຂັ້ມ​ງວດ​ຕໍ່​ກໍລະນີ ຄະດີ​ສໍ້​ລາດ​ບັງ​ຫຼວງ, ຫຍໍ້​ທໍ້​ອະນາຈານ, ລະ​ເມີດ​ກົດໝາຍ; ​ເລັ່ງ​ການ​ສືບສວນ, ຟ້ອງສານ, ພິພາກສາ ຕັດສິນ​ຄະດີ ກໍລະນີ​ທີ່​ຮ້າຍ​ແຮງ ​ເຊິ່ງສັງຄົມ​ສົນ​ໃຈ; ​ເກັບ​​ກູ້​ສິນ​ຊັບທີ່​ຖືກ​ເສຍ​ຫາຍຍ້ອນ​ພວກ​ສໍ້​ລາດ​ບັງ​ຫຼວງຄືນ​ມາ​ໃຫ້​ໄດ້​ຫຼາຍ​ທີ່​ສຸດ.

ປະຕິ​ບັດ​ບັນດາວຽກ​ງານ​ເທິງ​ນີ້​ໄດ້​ດີ ຈະ​ບໍ່​​ເຮັດ​ໃຫ້ການ​ຊີ້​ນຳຖືກ “ຫຼຸ້ນຫ້ຽນ” ຫຼື​ເຮັດ​ໃຫ້ການ​ພັດທະນາ “ຊັກ​ຊ້າ” ລົງ​ແຕ່​ຢ່າງ​ໃດ​ເລີຍ, ​ແຕ່​ກົງ​ຂ້າມ, ຈະ​ເຮັດ​ໃຫ້​ກົງຈັກ​ຂອງ​ພັກ-ລັດ​ສະອາດ​ປອດ​ໃສ, ສ້າງ​ກຳລັງ​ແຮງ​ທີ່​ແທ້​ຈິງ​ໃຫ້​ກົງ​ຈັກ​ແລະ​ຖັນ​ແຖວ​ພະນັກງານ, ປັບປຸງ​ແລະ​ເພີ່ມ​ທະວີ​ຄວາມ​ເຊື່ອ​ໝັ້ນ​ຂອງ​ປະຊາຊົນ, ສ້າງ​​ແຮງ​ຜັດ​ດັນ​ໃໝ່, ບັນຍາກາດ​ໃໝ່​ ເພື່ອ​ໃຫ້​ລັດຖະບານ​ແລະ​ອຳນາດ​ການ​ປົກຄອງ​ທ້ອງ​ຖິ່ນ​ຕ່າງໆ ຊີ້​ນຳ​ນຳພາ​ການ​ປະຕິບັດ​ໜ້າ​ທີ່​ທັງ​ໝົດ​ຢ່າງ​ສຳ​ເລັດ​ຜົນ.

ຂ້າພະ​ເຈົ້າ​ເຊື່ອ​ໝັ້ນ​ແລະ​ຫວັງ​ທີ່​ສຸດ​ວ່າ, ພາຍຫຼັງ​ກອງ​ປະຊຸມ​ນີ້, ດ້ວຍ​ຄວາມ​ເຊື່ອ​ຖື​ໃໝ່, ບັນຍາກາດ​ໃໝ່, ​ແຮງ​ຜັດ​ດັນ​ໃໝ່, ລັດຖະບານ​ແລະ​ອຳນາດ​ການ​ປົກຄອງ​ທ້ອງ​ຖິ່ນ​ຕ່າງໆ ຈະ​ພ້ອມ​ກັບ​ທົ່ວ​ພັກ, ທົ່ວ​ປວງ​ຊົນ, ທົ່ວ​ກອງທັບ ສືບ​ຕໍ່​ສາມັກຄີ​ສູ້​ຊົນ​ດ້ວຍ​ຄວາມ​ຕັດສິນ​ໃຈ​ແລະ​ຄວາມ​ພະຍາຍາມ​ສູງກວ່າ​ອີກ, ຂະຫຍັນ​ຂັນ​ເຄື່ອນ​ແລະ​ມີ​ຫົວຄິດ​ປະດິດ​ສ້າງ​ກວ່າ​ອີກ ​ເພື່ອປະຕິບັດ​ເປົ້າ​ໝາຍ ໜ້າ​ທີ່​ທີ່​ບັນດາ​ສະຫາຍ​ວາງ​ອອກ​ມາຢ່າງ​ສຳ​ເລັດ​ມີ​ໄຊ, ປະກອບສ່ວນ​ກໍ່ສ້າງປະ​ເທດ​ຊາດ​ທີ່​ຮັກ​ແພງ​ຂອງ​ພວກ​ເຮົາ​ໃຫ້​ນັບ​ມື້​ນັບ​ໃຫຍ່​ໂຕ​ໂອ້​ຖົງ​ແລະ​ສວຍ​ງາມ​ ຄື​ທີ່​ລຸງ​ໂຮ່​​ຄາດ​ຫວັງ.

​ເນື່ອງ​ໃນ​ໂອກາດ​ປີ​ໃໝ່ 2018 ​ແລະ ​ບຸ​ມປີ​ໃໝ່​ປະຈຳ​ຊາດ​ປີ​ຈໍ ທີ່ກຳລັງ​ຈະ​ມາ​ເຖິງ, ຕາງໜ້າ​ການ​ນຳ​ພັກ-ລັດ ​ແລະ ດ້ວຍ​ຄວາມ​ຮູ້ສຶກ​ສ່ວນ​ຕົວ, ຂ້າພະ​ເຈົ້າ​​ອວຍພອນ​ລັດຖະບານ​ແລະ​ອຳນາດ​ການ​ປົກຄອງ​ທ້ອງ​ຖິ່ນ​ຕ່າງ​ໆ ສືບ​ຕໍ່​ເສີມ​ຂະຫຍາຍ​ບັນດາ​ຜົນສຳ​ເລັດ ຜົນງານ ​ແລະ ບົດຮຽນ​ປະສົບ​ການ​ທີ່​​ບັນລຸ​ໄດ້, ​ເອົາ​ຊະນະ​ຂໍ້​ຈຳກັດ ຈຸດ​ອ່ອນທີ່​ຍັງ​ຄົງ​ຄ້າງ, ຊີ້​ນຳ​ ນຳພາ ກຳກັບ​ຂັບ​ເຄື່ອນ​ການ​ເຄື່ອນ​ໄຫວ​ຢ່າງ​ຂຸ້ນຂ້ຽວ ມີ​ປະສິດທິພາບ ປະສິດທິ​ຜົນສູງ​ກວ່າ​ອີກ, ສຳ​ເລັດ​ໜ້າ​ທີ່​ຄວາມ​ຮັບຜິດຊອບ​ທີ່​ພັກ ລັດ ​ແລະ​ປະຊາຊົນ​ມອບ​ໝາຍ​./.

​ໂດຍ ຫງວຽນ​ຝູຈ້ອງ

​ເລຂາ​ທິການ​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ​ຫວຽດນາມ

---------------------------------

* ຫົວ​ຂໍ້​ໂດຍ​ວາລະສານ​ກອມ​ມູນິດ​ເປັນ​ຜູ້​ແຕ່ງ.

ວາລະສານ​ກອມ​ມູນິດ​ສະບັບ​ທີ 903 (​ເດືອນມັງກອນ 2018)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ