ວັນເສົາ, 21/4/2018
ຕ້ອງມີວິໄສທັດລ່ວງໜ້າ; ຄາດເດົາທ່າອຽງການພັດທະນາຢ່າງຊັດເຈນ; ກໍ່ສ້າງລະບົບຫຼັກຖານວິທະຍາສາດທີ່ໝັ້ນແກ່ນໃຫ້ແກ່ຍຸດທະສາດການພັດທະນາປະເທດ*
30/3/2018 11:11' ສົ່ງ ພິມ
ສະຫາຍເລຂາທິການໃຫຍ່ ຫງວຽນຝູຈ້ອງ ໃຫ້ກຽດເຂົ້າຮ່ວມ ແລະປະກອບຄວາມເຫັນຊີ້ນຳ ກອງປະຊຸມຂອງສະພາທິດສະດີສູນກາງ. (ພາບ: TTXVN)

ຂ້າພະ​ເຈົ້າ​ຮູ້ສຶກ​ດີ​ໃຈຫຼາຍ​ທີ່​ໄດ້​ມາ​ຮ່ວມ​ກອງ​ປະຊຸມ​ຄັ້ງ​ທີ່ 4 ຂອງສະພາ​ທິດ​ສະ​ດີ​ສູນ​ກາງ​ສະ​ໄໝ 2016 - 2021 ​ເຊິ່ງ​ເປັນ​ກອງ​ປະຊຸມ​ທີ່​ປຶກສາ​ຫາລື​ຢ່າງ​ເລິກ​ເຊິ່ງກ່ຽວ​ກັບ​ຫົວ​ຂໍ້ “ວຽກ​ງານ​ທິດ​ສະ​ດີ: ສະພາບ​ຕົວ​ຈິງ, ບັນຫາ ​ແລະ​ວິທີ​ແກ້​ໄຂ” ​ແລະ​ ສະຫຼຸບ​ສັງ​ລວມວຽກ​ງານ​ປີ 2017, ກຳນົດ​ທິດ​ທາງ ໜ້າ​ທີ່​ປີ 2018 ຂອງ​ສະພາ… ພາຍຫຼັງ​ການ​ຟັງ​ລາຍ​ງານ​ຂອງ​ສະພາ ​ແລະ​ການ​ປະກອບ​ຄວາມ​ເຫັນ​ຈຳນວນ​ໜຶ່ງ​ທີ່​ມີ​ເນື້ອ​ໃນ​ອຸດົມສົມບູນ, ​ເລິກ​ເຊິ່ງ, ຂ້າພະ​ເຈົ້າ​ຂໍ​ເນັ້ນ​ໜັກ ​ແລະ​ເຈາະ​ຈິ້ມຕື່ມ​ອີກ​ບາງ​ບັນຫາ​ ເພື່ອ​ໃຫ້​ບັນດາ​ສະພາຍ​ພ້ອມກັນ​ສົນທະນາ ​ປຶກສາ​ຫາລື.

ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້ຢືນຢັນວ່າ 30 ປີ​ແຫ່ງ​ການ​ປ່ຽນ​ແປງ​ໃໝ່​ແມ່ນ​ໄລຍະ​ປະຫວັດສາດ​ທີ່​ສຳຄັນ​ໃນ​ພາລະກິດ​ການ​ສ້າງ​ສາ ​ແລະ​ປົກ​ປັກ​ຮັກສາ​ປະ​ເທດ​ຊາດ, ຂີດ​ໝາຍ​ການ​ເຕີບ​ໃຫຍ່​​ໃນ​ທຸກ​ດ້ານ​ຂອງ​ພັກ, ລັດ ​ແລະ​ປະຊາຊົນ​ຫວຽດນາມ. ການ​ປ່ຽນ​ແປງ​ໃໝ່​ມີ​ຄວາມ​ໝາຍ​ສຳຄັນ​ທາງ​ປະຫວັດສາດ ​ແລະ​ປະຕິວັດ, ​ແມ່ນ​ຂະ​ບວນການປ່ຽນ​ແປງ​ທີ່​ເລິ​ກເຊິ່ງ ຮອບດ້ານ ​ເຖິງ​ຖອງ, ​ແມ່ນ​ພາລະ​ກິດ​ປະຕິວັດ​ອັນ​ໃຫຍ່​ຫຼວງ​ຂອງ​ທົ່ວ​ພັກ ທົ່ວ​ປວງ​ຊົນ ທົ່ວ​ກອງທັບ ​ເພື່ອ​ເປົ້າ​ໝາຍ “ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ຍຸດຕິ​ທຳ ສີວິ​ໄລ”. ປະຊາຊົນ​ຫວຽດນາມ​ໄດ້​ບັນລຸ​ຜົນສຳ​ເລັດ​ອັນ​ໃຫຍ່​ຫຼວງ ມີ​ຄວາມ​ໝາຍ​ປະຫວັດສາດ​ຫຼາຍ​ຢ່າງ, ຢືນຢັນ​ແນວທາງ​ການ​ປ່ຽນ​ແປງ​ໃໝ່​ຂອງ​ພັກ​ກອມ​ມູນິດ​ຫວຽດນາມ ​ແມ່ນ​ແວ​ທາງ​ທີ່​ຖືກຕ້ອງ ປະດິດ​ສ້າງ; ​ເສັ້ນທາງ​ກ້າວ​ຂຶ້ນ​ສັງຄົມ​ນິຍົມ​ແມ່ນ​ສອດຄ່ອງ​ກັບ​ພຶດຕິ​ກຳ​ຂອງ​ຫວຽດນາມ ​ແລະ​ທ່າ​ອຽງ​ແຫ່ງ​ການ​ພັດທະນາ​ຂອງ​ໂລກ. ຜົນສຳ​ເລັດຂອງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່​ທີ່​ຜ່ານ​ມາມີການ​ປະກອບສ່ວນ​ທີ່​ສຳຄັນ​ຂອງ​ຖັນ​ແຖວ​ພະນັກງານ​ທິດ​ສະ​ດີ.

​ແຕ່​ວ່າ, ​ໃນ​ການ​ປ່ຽນ​ແປງ​ໃໝ່​ເວົ້າ​ລວມ ​ແລະ​ໃນ​ວຽກ​ງານ​ທິດສະ​ດີສະ​ໄໝ​ປ່ຽນ​ແປງ​ໃໝ່​ເວົ້າ​ສະ​ເພາະ ກໍ​ຍັງ​ມີ​ຈຸດ​ອ່ອນ ຂໍ້​ຈຳກັດທີ່​ຕ້ອງ​ສຸມ​ໃສ່​ແກ້​ໄຂ ຜ່ານ​ຜ່າ​ ເພື່ອ​ສືບ​ຕໍ່​ເຮັດ​ໃຫ້​ປະ​ເທດຊາດ​ພັດທະນາ​ຢ່າງ​ໄວວາ ​ແລະໝັ້ນຄົງ​ກວ່າ​ອີກ. ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ຊີ້​ແຈ້ງວ່າ ຄຸນ​ນະພາ​ບ​ແລະ​ປະສິດທິ​ຜົນ​ຂອງ​ວຽກ​ງານທິດ​ສະ​ດີ​ຍັງ​ບໍ່​ທັນ​ສູງ. ວຽກ​ງານ​ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ​​ບໍ່​ຕອບ​ສະໜອງໄດ້​ຕາມ​ຄວາມ​ຕ້ອງການ, ຍັງ​ບໍ່​ທຳ​ຄວາມ​ກະຈ່າງ​ແຈ້ງ​ກ່ຽວ​ກັບ​ບັນຫາ​ຈຳນວນ​ໜຶ່ງ​ທີ່​ວາງ​ອອກ​ມາ​ໃນ​ຂະ​ບວນການ​ປ່ຽນ​ແປງ​ໃໝ່ ​ເພື່ອ​ກຳນົດ​ທິດ​ໃນ​ພາກ​ຕົວ​ຈິງ, ສະໜອງ​ພື້ນຖານ​ວິທະຍາ​ສາດ​ໃຫ້​ແກ່​ການ​ສ້າງ​ແລະ​ບູລະນະ​ແນວທາງ​ຂອງ​ພັກ, ນະ​ໂຍບາຍ​ ​ແລະ​ກົດໝາຍຂອງ​ລັດ. ທິດ​ສະ​ດີ​ກ່ຽວ​ກັບສັງຄົມ​ນິຍົມ ​ແລະ​ເສັ້ນທາງ​ກ້າວ​ຂຶ້ນ​ສັງຄົມ​ນິຍົມຍັງ​ມີ​ບັນຫາ​ຈຳນວນ​ໜຶ່ງ​ທີ່​ຕ້ອງ​ຜ່ານ​ການ​ສະຫຼຸບ​ສັງ​ລວມພຶດຕິ​ກຳ ​ແລະ​ຄົ້ນຄວ້າ​ທິດ​ສະ​ດີ​ ເພື່ອ​ສືບ​ຕໍ່​ທຳ​ຄວາມ​ກະຈ່າງ​ແຈ້ງ.

ພຶດຕິ​ກຳ​ແຫ່ງ​ການ​ປ່ຽນ​ແປງ​ໃໝ່​ພວມວາງ​ບັນຫາ​ໃໝ່​ອອກ​ມາ ​ແລະ​ຮຽກຮ້ອງ​ໃຫ້​ພວກ​ເຮົາ​ຕ້ອງສືບ​ຕໍ່​ປ່ຽນ​ແປງ​ໃໝ່ຈິນຕະນາການ​ທິດ​ສະ​ດີ ​ແລະ​ວຽກ​ງານ​ທີ​ດສະ​ດີ​ຢ່າງ​ແຂງ​ແຮງ​ກວ່າ​ອີກ. ພວກ​ເຮົາລ້ວນ​ແຕ່​ຮູ້​ວ່າ ທິດ​ສະ​ດີ​ມີ​ບົດບາດ​ສຳຄັນ​ທີ່​ສຸດ​ໃນ​ຊີວິດ​ສັງຄົມ. ວ.ອີ.​ເລ​ນິນ ​ໄດ້​ຊີ້​ແຈ້ງວ່າ: ບໍ່​ມີ​ທິດ​ສະ​ດີ​ປະຕິວັດ​ກໍ​ບໍ່​ອາດ​ມີ​ຂະ​ບວນການ​ປະຕິວັດ; ມີ​ແຕ່​ພັກ​ໃດ​ທີ່​ມີ​ທິດ​ສະ​ດີນຳ​ໜ້າ​ພາ​ທາງ​ຈຶ່ງ​ເຮັດ​ຫຼ້ອນ​ບົດບາດ​ຂອງ​ນັກຮົບຜູ້ນຳ​ໜ້າ. ປະທານ ​ໂຮ່ຈີ​ມິນ ກໍ​ໄດ້​ຢືນຢັນ​ຫຼາຍ​ເທື່ອ​ວ່າ: ບໍ່​ມີ​ທິດ​ສະ​ດີ​ກໍ​ເໝືອນ​ຄົນ​ຫຼັບ​ຕາຍ່າງ. ​ແຕ່​ວ່າ, ທິດ​ສະ​ດີ​ບໍ່​ແມ່ນສິ່ງ​ທີ່ຫ່ຽວ​ແຫ້ງ, ​ແຂງ​ກະດ້າງ; ກົງ​ຂ້າມ, ມັນ​ເຕັມ​ໄປ​ດ້ວຍ​ລັກສະນະ​ປະດິດ​ສ້າງ ​ໄຫວ​ພິບ, ມັນ​ໄດ້​ຮັບ​ການ​ເພີ່ມ​ເຕີມ​ດ້ວຍ​ພຶດ​ຕິ​ກຳ​ທີ່​ອຸດົມສົມບູນ ຫຼາຍ​ຮູບ​ຫຼາຍ​ສີ ​ເພື່ອ​ພັດ​ທະນາ​ຢ່າງ​ບໍ່​ຢຸດ​ຢັ້ງແລະ​ສົມບູນ​ແບບ. ​ໂດຍ​ຊາບ​ຊືມຢ່າງ​ເລິກ​ເຊິ່ງ​ໃນ​ຄຳ​ສອນ​ຂອງ​ລັດ​ທິ ມາກ-​ເລ​ນິນ ​ແລະ​ແນວ​ຄິດ​ໂຮ່ຈີ​ມິນ, ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້ຢືນຢັນ​ອີກ​ເທື່ອ: ສືບ​ຕໍ່​ປ່ຽນ​ແປງ​ໃໝ່ຈິນຕະນາການ​ຢ່າງ​ແຂງ​ແຮງ, ໝູນ​ໃຊ້​ລັດທິ​ມາກ-​ເລ​ນິນ​ແລະ​ແນວ​ຄິດ ​ໂຮ່ຈີ​ມິນ ຢ່າງ​ປະດິດ​ສ້າງ ​ແລະ​ພັດທະນາລັດທິ​ມາກ-​ເລ​ນິນ, ຕັ້ງ​ໝັ້ນ​ໃນ​ເປົ້າ​ໝາຍ​ເອກະລາດ​ແຫ່ງ​ຊາດ ​ແລະ​ສັງຄົມ​ນິຍົມ; ​ເພີ່ມ​ທະວີ​ການ​ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ, ຄາດ​ຄະ​ເນ​ຢ່າງ​ຊັດ​ເຈນ ​ແລະ​ທັນ​ການ; ມີ​ແຜນ​ນະ​ໂຍບາຍ ​ແລະ​ນະ​ໂຍບາຍ​ເພື່ອ​ຈັດການ​ບັນຫາ​ໃໝ່​ທີ່​ຫາ​ກໍ​ເກີດ​ຂຶ້ນ​ໃນ​ພາກ​ຕົວ​ຈິງຢ່າງ​ມີ​ປະສິດທິ​ຜົນ, ​ແກ້​ໄຂ​ເປັນ​ຢ່າງ​ດີ​ບັນດາ​ສາຍ​ພົວພັນ​ໃຫຍ່ທີ່​ສ່ອງ​ແສງ​ເຖິງ​ກົດ​ເກນ​ແຫ່ງ​ການ​ປ່ຽນ​ແປງ​ໃໝ່​ແລະການ​ພັດທະນາ​ຢູ່​ຫວຽດນາມ.

ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ຊີ້​ແຈ້ງ, ​ໄລຍະ​ໃໝ່​ຮຽກຮ້ອງ​ໃຫ້ພັດທະນາ​ປະ​ເທດຢ່າງ​ຮອບດ້ານ ຄົບ​ຊຸດ​ກວ່າ​ອີກ​ທາງ​ດ້ານ​ການ​ເມືອງ ​ເສດຖະກິດ ວັດທະນະທຳ ການ​ປ້ອງ​ກັນ​ປະ​ເທດ ການ​ຮັກສາ​ຄວາມ​ປອດ​ໄພ ການ​ຕ່າງປະ​ເທດ, ​ໃນ​ນັ້ນ​ການ​ພັດທະນາ​ເສດຖະກິດ-ສັງຄົມ​ເປັ​ນຈຸດ​ໜັກ​ໃຈກາງ, ການ​ກໍ່ສ້າງ​ພັກ​ເປັນ​ຫຼັກ​ແຫຼ່ງ; ການ​ກໍ່ສ້າງ​ວັດທະ​ນະທຳ ​ແລະສ້າງ​ຄົນ​ເປັນ​ພື້ນຖານ​ຈິດ​ໃຈ; ​ການເພີ່ມ​ທະວີ​ການ​ປ້ອງ​ກັນ​ປະ​ເທດ ປ້ອງ​ກັນ​ຄວາມ​ສະຫງົບ​​​ເປັນ​ເລື່ອງ​ສຳຄັນ ​ເປັນປົກກະຕິ. ພາຍຫຼັງ​ກອງ​ປະຊຸມ​ໃຫຍ່, ​ໄດ​ຍກຳ​ແໜ້ນ​ແນວ​ຄິດ​ຊີ້​ນຳ, ບັນດາ​ທິດ​ທາງ​ໃຫຍ່, ບັນດາ​ໜ້າ​ທີ່​ຈຸດ​ໜັກທີ່​ໄດ້​ລະບຸ​ໃນ​ເອກະສານ​ກອງ​ປະຊຸມ​ໃຫຍ່, ຄະນະ​ບໍລິຫານ​ງານ​ສູນ​ກາງ​ພັກ​, ກົມ​ການ​ເມືອງ, ຄະນະ​ເລຂາທິການ ​ໄດ້​ລວມສູນ​ການ​ນຳພາ ຊີ້​ນຳ​ຢ່າງ​ຂຸ້ນຂ້ຽວ. ສູນ​ກາງ​ໄດ້​ປະກາດ​ໃຊ້​ມະຕິ​ທີ່​ສຳຄັນ​ຈຳນວນ​ໜຶ່ງ ກ່ຽວ​ກັບການ​ກໍ່ສ້າງ ປັບປຸງ​ພັກ​ໃຫ້ສະອາດ​ປອດ​​ໃສ, ໝັ້ນ​ຄົນ​ເຂັ້ມ​ແຂງ​ທາງ​ດ້ານການ​ເມືອງ ​ແນວ​ຄິດ ການ​ຈັດ​ຕັ້ງ ​ແລະ​ຄຸມ​ສົມບັດ; ກ່ຽວ​ກັບ​ການ​ສືບ​ຕໍ່​ປ່ຽນ​ແປງ​ໃໝ່, ຈັດ​ວາງ​ສັບ​ຊ້ອນ​ລະບົບ​ການ​ເມືອງ​ໃຫ້​ກະທັດ​ລັດ, ​ເຄື່ອນ​ໄຫວ​ມີ​ຄວາມ​ສັກສິດ ມີ​ປະສິດທິ​ຜົນ; ກ່ຽວ​ກັບການ​ພັດທະນາເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ຍົກ​ສູງ​ປະສິດທິພາບ​ແຮງ​ງານ ຄຸນ​ນະພາ​ບ ປະສິດທິ​ຜົນ ​ແລະຄວາມ​ສາມາດ​ແຂ່ງຂັນ​ຂອງ​ພື້ນຖານ​ເສດຖະກິດ​ ໃນ​ສະພາບການ​ທີ່​ປະ​ເທດພວມ​ເຊື່ອມ​ໂຍງສາກົນ​ນັບ​ມື້​ນັບ​ກວ້າງຂວາງ​ເລິກ​ເຊິ່ງ; ກ່ຽວ​ກັບ​ການ​ເອົາ​ໃຈ​ໃສ່​ເບິ່ງ​ແຍງ​ສະ​ວັດ​ດີກາ​ນສັງຄົມ, ກໍ່ສ້າງ​ຄົນ, ​ເອົາ​ໃຈ​ໃສ່ປັບປຸງ​ຮ່າງກາຍ​ສຸຂະພາບ​ຂອງ​ຄົນ ​ແລະ​ຄຸນ​ນະພາ​ບຂອງ​ປະຊາກອນ. ນີ້ແມ່ນ​ບັນດາ​ບັນຫາ​ພື້ນຖານ​ແລະ​ຮີບ​ດ່ວນ, ຕອບ​ສະໜອງ​ຖືກຕ້ອງ​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ພຶດຕະກຳ​ແຫ່ງ​ການ​ສ້າງສາ​ແລະ​ປົກ​ປັກ​ຮັກສາ​ປະ​ເທດ​ຊາດ​ໃນ​ສະພາບ​ການ​ໃໝ່. ບັນດາ​ມະຕິ​ຂອງ​ກອງ​ປະ​ຊຸມ​ສູນ​ກາງ​ໄດ້​ຫັນ​ເປັນ​ລະອຽດ, ​ເພີ່ມ​ເຕີມ, ທຳ​ຄວາມ​ຈະ​ແຈ້ງ​ຕື່ມ​ອີກ ກ່ຽວ​ກັບ​ບັນດາ​ແນວ​ຄິດຊີ້​ນຳ​ຂອງ​ກອງ​ປະຊຸມ​ໃຫຍ່​ຄັ້ງ​ທີ XII, ມັນ​ມີ​ຄຸນຄ່າ​ກຳນົດ​ທິດ​ທາງ​ການ​ຮັບ​ຮູ້ ​ແລະ​ການ​​ເຄື່ອນ​ໄຫວ​ຂອງທົ່ວ​ພັກ ທົ່ວ​ປວງ​ຊົນ ທົ່ວ​ກອງທັບ.

​ໃນ​ເວລາ​ທີ່​ຜ່ານ​ມາ, ຖັນ​ແຖວ​ພະນັກງານ​ທິດ​ສະ​ດີ, ​ໃນ​ນັ້ນ​ມີ​ສະພາ​ທິດ​ສະ​ດີສູນ​ກາງ ​ເປັນ​ຂອດ​ໜຶ່ງ​ທີ່​ສຳຄັນ, ​ໄດ້​ມີ​ຄວາມ​ຮີບ​ດ່ວນ, ຕັ້ງໜ້າ​ໃນ​ການ​ຜັນ​ຂະຫຍາຍ​ການ​ເຄື່ອນ​ໄຫວ​ຕ່າງໆ​ເພື່ອ​ຮັບ​ໃຊ້ວຽກ​ງານ​ນຳພາ ຊີ້​ນຳ​ຂອງຄະນະ​ບໍລິຫານ​ງານ​ສູນ​ກາງ​ພັກ​, ກົມ​ການ​ເມືອງ, ຄະນະ​ເລຂາທິການ. ຜ່ານ​ການ​ຄົ້ນຄວ້າ​ຫົວ​ຂໍ້ສະ​ເພາະ​ຕ່າງໆ​ຮັບ​ໃຊ້​ໃຫ້​ໂຄງການ​ຄົ້ນຄວ້າ​ຂອງກົມ​ການ​ເມືອງ; ບັນດາ​ຫົວ​ຂໍ້​ຂອງ​ໂຄງການຄົ້ນຄວ້າ​ທິດ​ສະ​ດີ​ໄລຍະ 2016-2020; ບັນດາ​ລາຍ​ງານ​ໃຫ້​ຄຳ​ປຶກສາ, ລາຍ​ງານ​ການ​ສຳ​ຫຼວດ, ການ​ສະຫຼຸ​ບສັງ​ລວມພຶດຕິ​ກຳ, ການ​ແລກປ່ຽນ​ທິດ​ສະ​ດີ​ກັບ​ບາງ​ພັກ​ກອມ​ມູນິດ, ພັກ​ກຳ​ອຳນາດຢູ່​ຕ່າງປະ​ເທດ; ບັນດາ​ການ​ເຄື່ອນ​ໄຫວ​ຕໍ່ສູ້ຕ້ານກັບ​ທັດສະນະ​ທີ່​ຜິດພາດ, ​ເປັນ​ປໍ​ລະ​ປັກ..., ຖັນ​ແຖວ​ພະນັກງານ​ທິດ​ສະ​ດີ​ໄດ້​ສະໜອງຫຼັກ​ຖານ​ວິທະຍາສາດ​ຫຼາຍປະການ ​ເພື່ອ​ຊ່ວຍ​ໃຫ້ຄະນະ​ບໍລິຫານ​ງານ​ສູນ​ກາງ​ພັກ​, ກົມ​ການ​ເມືອງ, ຄະນະ​ເລຂາທິການ ວາງ​ກຳນົດ​ແຜນ​ນະ​ໂຍບາຍ, ນະ​ໂຍບາຍ​ທີ່​ສຳຄັນ ​ແລະ​ສືບ​ຕໍ່​ປັບປຸງ​ບູລະນະ​ແຜນ​ນະ​ໂຍບາຍ, ນະ​ໂຍບາຍ​ຂອງ​ພັກ. ຂໍ້​ສະ​ເໜີ​ແນະ​ຫຼາຍໆ​ຂໍ້​ຂອງ​ອົງການ​ຊ່ວຍ​ວຽກ ອົງການທີ່​ປຶກສາ​ທາງ​ດ້ານ​ທິດ​ສະ​ດີກາ​ນ​ເມືອງ​ ໄດ້​ຖືກ​ຮັບ​ຮູ້​ແລະ​ເອົາ​ເຂົ້າ​ໃນ​ມະຕິ​ຂອງ​ພັກ.

​ແຕ່​ກໍ​ຕ້ອງ​ເຂັ້ມ​ງວດ ຮັບ​ຮູ້​ຢ່າງ​ເລິກ​ເຊິ່ງ ​ແລະ​ຕັດສິນ​ໃຈ​ກຳຈັດ​ແກ້​ໄຂ​ຈຸດ​ອ່ອນ ຂໍ້​ຈຳກັດທີ່​ໄດ້​ຍົກ​ອອກ​ມາ​ໃນ​ບົດລາຍ​ງານສະຫຼຸບ​ຂອງ​ສະພາ​ທິດ​ສະ​ດີ, ​ເປັນ​ຕົ້ນ​ແມ່ນ​ຄວາມ​ຊັກ​ຊ້າ​ໃນ​ການ​ດຳ​ເນີນ​ງານ, ຂໍ້​ຈຳກັດ​ທາງ​ດ້ານ​ຄຸນ​ນະພາ​ບຂອງ​ບົດ​ລາຍ​ງານ​ສະຫຼຸບ​ພຶດຕິ​ກຳ, ບົດ​ຄົ້ນຄວ້າ​ຫົວ​ຂໍ້​ສະ​ເພາະ​ຈຳນວນ​ໜຶ່ງ, ​​ໂດ​ຍສະ​ເພາະ​ແມ່ນ ບໍ່​ໄດ້​ໃຫ້​ຄຳ​ຕອບ​ຢ່າງ​ທັນ​ການ​ກ່ຽວ​ກັບ​ບັນດາ​ບັນຫາ​ທີ່​ຫາ​ກໍ​ເກີດ​ຂຶ້ນ​ໃນ​ຊີວິດ​ຕົວ​ຈິງ. ບໍ່​ສາມາດ​ປະ​ໃຫ້ ສະພາບ​ຄວາມ​ຫຼ້າ​ຫຼັງ​ຂອງ​ທິດ​ສະ​ດີທຽບ​ກັບການ​ເຄື່ອນ​ໄຫວ​ແລະ​ຄວາມ​ຮຽກຮ້ອງ​ຕ້ອງການ​ຂອງ​ພຶດຕິ​ກຳ ​ແກ່ຍາວ​ຕໍ່​ໄປ. ທິດ​ສະ​ດີ​ຕ້ອງ​ບືນ​ຕົວ​ຂຶ້ນ​ເພື່ອ​ພາ​ທາງ​ແລະຮ່ວມທາງ​ກັບ​ພາກ​ພຶດຕິ​ກຳ.

ສະພາບ​ການ​ໂລກ, ພາກ​ພື້ນ​ກຳລັງ​ແລະ​ຈະ​ຜັນ​ປ່ຽນ​ຢ່າງ​ໄວວາສັບສົນບໍ່​ອາດ​ຄາດ​ເດົາ​ໄດ້. ຄວາມ​ບໍ່​ໝັ້ນຄົງ​ໃນ​ໂລກ​ມີ​ທ່າ​ອຽງ​ເພີ່ມ​ຂຶ້ນ. ການ​ເຄື່ອນ​ທີ່​ຂອງ​ອຳນາດ​ຈາກ​ຕາ​ເວັນ​ຕົກ​ໄປ​ຕາ​ເວັນ​ອອກ, ການ​ປັບ​ປ່ຽນ​ຍຸດ​ທະ​ສາດ​ຂອງ​ບັນດາ​ປະ​ເທດ​ໃຫຍ່, ພ້ອມ​ກັບ​ລັດທິ​ຊາດ​ນິຍົມ, ລັດທິປົກ​ປ້ອງ​ຕະຫຼາດ​ພາຍ​ໃນ ​ພວມ​ເປັນ​ການ​ຜັນ​ປ່ຽນ​ຂະໜາດ​ໃຫຍ່​ໃນ​ໂລກ​ປະຈຸ​ບັນ. ການ​ພັດທະນາ​ຢ່າງ​ໄວ​ວາຂອງ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່ (ການ​ປະຕິວັດ​ອຸດສາຫະກຳ 4.0) ກຳລັງ​ປ່ຽນ​ແປງການ​ຜະລິດ​ຂອງ​ໂລກ​ໂດຍ​ພື້ນຖານ, ​ແຕ້ມ​ແຜນ​ທີ່​ເສດຖະກິດຂອງໂລກ​ຄືນ​ໃໝ່​ເທື່ອ​ລະ​ກ້າວ, ດ້ວຍ​ການ​ຫຼຸດຜ່ອນ​ອຳນາດ​ຂອງ​ບັນດາ​ປະ​ເທດທີ່​ອີງ​ໃສ່​ການ​ຂຸດ​ຄົ້ນ​ຊັບພະຍາກອນ​ເປັນ​ຕົ້ນຕໍ ​ແລະ ການ​ເພີ່ມ​ກຳລັງ​ແຮງ​ຂອງ​​ບັນດາ​ປະ​ເທດທີ່​ອີງ​ໃສ່​ເຕັກ​ໂນ​ໂລຊີແລະ​ການ​ປະດິດ​ສ້າງ. ການ​ປະຕິວັດ​ດັ່ງກ່າວ​ກຳລັງ ​ແລະ​ຈະ​ປ່ຽນ​ແປງ​ວິທີຄິດ, ວິທີ​ເຮັດ ​ແລະ​​ແບບ​ວິທີດຳລົງ​ຊີວິດ​ຂອງ​ມະນຸດ.

ພວກ​ເຮົາ​ຕ້ອງ​ເປັນ​ເຈົ້າ​ການ​ໃນ​ການ​ຄາດ​ຄະ​ເນ, ​ເປັນ​ເຈົ້າ​ການ​ກະກຽມ​ທຸກ​ຢ່າງ​ເພື່ອ​ພາ​ປະ​ເທດກ້າວ​ຂຶ້ນ​ຢ່າງ​ໄວວາ, ​ແຂງ​ແຮງ ຕໍ່ໜ້າ​ການ​ເຄື່ອນ​ໄຫວ​ຢ່າງ​ໄວວາ​ຂອງ​ສະພາບ​ການ. ມີ​ຫຼາຍ​ບັນຫາ​ໃໝ່​ກ່ຽວ​ກັບ​ທິດ​ສະ​ດີ​ແລະ​ພຶດຕິ​ກຳ​ທີ່ຮຽກຮ້ອງ​ໃຫ້​ພວກ​ເຮົາ​ຕ້ອງ​ຮັບ​ຮູ້ຢ່າງ​ຖືກຕ້ອງ ​ແລະ ​ແກ້​ໄຂ​ເປັນ​ຢ່າງ​ດີ. ສະພາບ​ນີ້​ວາງ​ບົດບາດ​ໃຫ້​ວົງ​ການ​ທິດ​ສະ​ດີ​ແຫ່ງ​ຊາດ​ມີ​ຄວາມ​ຮັບຜິດຊອບ​ໃຫຍ່​ທີ່ສຸດ. ຕ້ອງ​ມີ​ວິ​ໄສ​ທັດ​ລ່ວງ​ໜ້າ; ຄາດ​ເດົາ​ທ່າ​ອຽງການ​ພັດທະນາ​ຢ່າງ​ຊັດ​ເຈນ; ກໍ່ສ້າງ​ລະບົບ​ຫຼັກ​ຖານ​ວິທະຍາສາດ​ທີ່​ໝັ້ນ​ແກ່ນ​ໃຫ້​ແກ່​ຍຸດ​ທະ​ສາດ​ການ​ພັດທະນາ​ປະ​ເທດ ດ້ວຍ​ຂັ້ນ​ຕອນທີ່​ມີ​ວິທະຍາສາດ​ແລະ​ບາດກ້າວ​ເດີນ​ທີ່​ເໝາະ​ສົມ.

ກ່ຽວ​ກັບທິດທາງ​ບັນດາ​ບັນຫາ​ທິດ​ສະ​ດີ​ທີ່ຈະຕ້ອງ​ສືບ​ຕໍ່​ຄົ້ນຄວ້າ ທຳ​ຄວາມ​ກະຈ່າງ​ແຈ້ງ​ໃນ​ເວລາ​ຕໍ່ໜ້ານັ້ນ, ບົດ​ລາຍ​ງານ​ສະຫຼຸບ​ບາງ​ບັນຫາ​ທິດ​ສະ​ດີ-ພຶດຕິ​ກຳ ​ຜ່ານ 30 ປີ​ແຫ່ງ​ການ​ປ່ຽນ​ແປງ​ໃໝ່ຂອງຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XI, ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ມະຕິ​ເລກທີ 37-NQ/TW, ວັນ​ທີ 9 ຕຸລາ 2014, ຂອງ​ກົມ​ການ​ເມືອງ​ສູນ​ກາງພັກ​ສະ​ໄໝ​ທີ XI, ວ່າ​ດ້ວຍ​ວຽກ​ງານ​ທິດ​ສະ​ດີ​ ​ແລະ​ກຳນົດ​ທິດ​ຮອດ​ປີ 2030, ​ໄດ້​ລະບຸ​ໄວ້​ແລ້ວ. ຂ້າພະ​ເຈົ້າ​ຂໍ​ເນັ້ນໜັກ​ຕື່ມ​ອີກ​ບາງ​ບັນຫາ​ເພື່ອ​ໃຫ້​ບັນດາ​ສະ​ຫາຍ​ຄົ້ນຄວ້າ, ໜູນ​ໃຊ້​ເຂົ້າ​ໃນ​ການ​ສ້າງ​ໂຄງການ​ເຮັດ​ວຽກ, ​ແຜນການ​ປະຕິບັດ​ງານ​ປີ 2018 ​ແລະ​ຊຸມ​ປີ​ຕໍ່​ໄປ. ພ້ອມ​ກັນ​ກັບ​ການ​ສືບ​ຕໍ່ຍູ້​ແຮງວຽກ​ງານ​ຄົ້ນຄວ້າ​ພື້ນຖານ, ປັບປຸງ​ເພີ່ມ​ເຕີມ ບູລະນະ​ລະບົບ​ທິດ​ສະ​ດີກ່ຽວ​ກັບສັງຄົມ​ນິຍົມ ​ແລະ​ເສັ້ນທາງ​ຂຶ້ນ​ສູ່​ສັງຄົມ​ນິຍົມຢູ່​ປະ​ເທດ​ເຮົາ​ໃນ​ໄລຍະ​ໃໝ່ນັ້ນ, ຄວນ​​ເອົາ​ໃຈ​ໃສ່ ສຸມ​ໃສ່ປະຕິບັດ​ວຽກ​ງານ​ສະ​ເພາະ​ໜ້າຈຳນວນ​ໜຶ່ງ​ລຸ່ນນີ້:

ກ່ອນ​ອື່ນ​ໝົດ, ຄວນ​ສຸມ​ໃສ່​ຍົກ​ສູງ​ຄຸນ​ນະພາ​ບຂອງ​ການ​ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ, ຮັບ​ໃຊ້​ເປັນ​ຢ່າງ​ດີ​ໃຫ້​ແກ່​ວຽກ​ງານ​ຊີ້​ນຳ​ນຳພາ​ຂອງຄະນະ​ບໍລິຫານ​ງານ​ສູນ​ກາງ​ພັກ​, ກົມ​ການ​ເມືອງ, ຄະນະ​ເລຂາທິການ ​ແຕ່​ນີ້​ຮອດ​ທ້າຍ​ສະ​ໄໝ​ປະຈຳການ.

​ໃນ​ບັນດາ​ມະຕິ​ຂອງ​ກອງ​ປະຊຸມ​ສູນ​ກາງຄັ້ງ​ທີ​ສີ່, ຄັ້ງ​ທີ​ຫ້າ, ຄັ້ງ​ທີ​ຫົກ, ສູນ​ກາງ​ໄດ້​ຊີ້​ແຈ້ງ​ບັນດາ​ທັດສະນະ ທິດ​ທາງ ວິທີ​ແກ້​ໄຂ​ໃຫຍ່ ທີ່​ຕ້ອງ​ໄດ້​ຮັບ​ການປະຕິບັດຢ່າງ​ມີ​ປະສິດທິ​ພາບ, ພ້ອມ​ກັນ​ນັ້ນ ກໍ​ຍົກບັນຫາຈຳນວນ​ໜຶ່ງທີ່​ຍັງ​ມີ​ຄວາມ​ຄິດ​ເຫັນ​ແຕກ​ຕ່າງ​ກັນອອກ​ມາ ​ເຊິ່ງຕ້ອງ​ໄດ້​ຮັບ​ການ​ຄົ້ນຄວ້າ ທົດ​ລອງ ສະຫຼຸບ​ເພື່ອ​ໃຫ້​ຊັດ​ເຈນ. ຕົວຢ່າງ: ບັນຫາ​ການ​ຮັບ​ຮູ້ ​ແລະ​ການ​ແກ້​ໄຂຢ່າງ​ຖືກຕ້ອງ​ຄວາມ​ພົວພັນ​ລະຫວ່າງ​ລັດ-ຕະຫຼາດ-ສັງຄົມ; ບັນຫາ​ກຳມະສິດ​ຊັບ​ສິນ; ບັນຫາ​ການ​ສະ​ສົມ, ລວມສູນ​ທີ່​ດິນ ​ເພື່ອຮັບ​ໃຊ້​ໃຫ້​ແກ່​ການ​ຍູ້​ແຮງ​ການ​ຫັນ​ເປັນ​ອຸດ​ສະຫະ​ກຳ ທັນ​ສະ​ໄໝຕໍ່ກະສິກຳ​ ​ແລະກໍ່ສ້າງ​ຊົນນະບົດ​ໃໝ່; ບັນຫາ​ລະດົມ, ​ແຈກ​ຢາຍ, ນຳ​ໃຊ້ຊັບພະຍາກອນ​ຢ່າງ​ມີ​ປະສິດທິ​ຜົນ ​ເພື່ອ​ແນ​ໃສ່ພັດທະນາ​ປະ​ເທດ​ຢ່າງ​ໄວວາ​ແລະຍືນ​ຍົງ; ບັນຫາ​ຕົວ​ແບບ​ທົ່ວ​ໄປ​ຂອງ​ລະບົບ​ການ​ເມືອງປະ​ເທດ​ເຮົາ​ສອດຄ່ອງ​ກັບການ​ພັດທະນາເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ກໍ່ສ້າງ​ລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ, ​ເຊື່ອມ​ໂຍງ​ສາກົນ; ບັນຫາ​ຄວບ​ຄຸມ​ອຳນາດ... ສະພາ​ທິດ​ສະ​ດີ​ສູນ​ກາງຄວນ​ເຮັດ​ໜ້າ​ທີ່​ເປັນ​ຈຸດ​ສຳຄັນ​ໃນ​ການ​ເຕົ້າ​ໂຮມ​ສະຕິ​ປັນຍາ​ຂອງ​ຖັນ​ແຖວ​ພະນັກງານ​ທິດ​ສະ​ດີ, ຕັ້ງໜ້າພະຍາຍາມ​ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ, ປະກອບສ່ວນ​ໃນ​ການ​ຊີ້​ແຈງ​ບັນຫາ​ເຫຼົ່າ​ນີ້.

​ໃນ​ປີ 2018, ຄະນະ​ບໍລິຫານ​ງານ​ສູນ​ກາງ​ຈະ​ສະຫຼຸບ​ສັງ​ລວມການ​ປະຕິບັດ​ຍຸດ​ທະ​ສາດ​ວຽກ​ງານ​ພະນັກງານ​ໃນ​ສະ​ໄໝຫັນ​ເປັນ​ອຸດສາຫະກຳ ທັນ​ສະ​ໄໝ ​ແລະ ຍຸດ​ທະ​ສາດ​ທະ​ເລ ​ເພື່ອ​ສືບ​ຕໍ່​ປັບປຸງ​ບູລະນະ​ບັນດາ​ແຜນ​ນະ​ໂຍບາຍ, ນະ​ໂຍບາຍ​ໃຫຍ່. ນີ້​ແມ່ນ​ບັນຫາ​ສຳຄັນ​ທີ່​ສຸດ, ຮຽກຮ້ອງ​ໃຫ້​ມີ​ການ​ກະກຽມ​ຢ່າງ​ລະອຽດ, ວິທະຍາສາດ​ແທ້​ຈິງ. ການ​ເຄື່ອນ​ໄຫວ​ທິດ​ສະ​ດີ​ຕ້ອງ​ເຂົ້າ​ຮ່ວມ​ຢ່າງ​ຕັ້ງໜ້າ​ໃນ​ຂະ​ບວນການ​ກະກຽມນີ້, ​ໃຫ້​ຄຳ​ປຶກສາ​ຊ່ວ​ຍໃຫ້​ສູນ​ກາງມີ​ຫຼັກ​ຖານ​ທິດ​ສະ​ດີ ​ແລະ​ພຶດຕິ​ກຳ​ທີ່​ໝັ້ນ​ແກ່ນ ​ເພື່ອ​ມີ​ການ​ຕົກລົງ​ນະ​ໂຍບາຍ​ທີ່​ຖືກຕ້ອງ, ຕອບ​ສະໜອງ​ຄວາມ​ຕ້ອງການ​ໃໝ່ທີ່​ສູງ​ທີ່​ສຸດ​ຂອງ​ການ​ສ້າງສາ ​ແລະ​ປົກ​ປັກ​ຮັກສາ​ປະ​ເທດ​ຊາດ.

ຄວນ​ເລີ່​ມຕົ້ນກະກຽ​ມ​ໃຫ້​ແກ່​ການສ້າງ​ຮ່າງ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ.

ຕາມ​ໂຄງການ​ເຮັດ​ວຽກ​ທັງສະ​ໄໝ, ກອງ​ປະຊຸມ​ສູນ​ກາງ​ຄັ້ງ​ທີ 8 (​ເດືອນ​ຕຸລາ 2018) ຈະ​ສ້າງ​ຕັ້ງ​ບັນດາ​ອະນຸ​ກຳມະການ​ກະກຽ​ມກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ. ກອງ​ປະຊຸມ​ສູນ​ກາງ​ຄັ້ງ​ທີ 9 (ເດືອນພຶດສະພາ 2019) ຈະ​ປຶກສາ​ຫາລື​ໂຄງ​ຮ່າງ​ບັນ​ເອກະສານ​ທີ່​ຈະ​ສະ​ເໜີ​ຕໍ່ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ. ກອງ​ປະຊຸມ​ໃຫຍ່​ຄັ້ງ​ທີ XIII ມີ​ຄວາມ​ສຳຄັນ​ພິ​ເສດ. ກອງ​ປະຊຸມ​ໃຫຍ່ບໍ່​ພຽງ​ແຕ່ທົບ​ທວນ, ປະ​ເມີນ​ຜົນ 5 ປີ​ແຫ່ງ​ການ​ປະຕິບັດມະຕິກອງ​ປະຊຸມ​ໃຫຍ່​ຄັ້ງ​ທີ XII ​ເທົ່າ​ນັ້ນ ຫາກ​ຍັງ​ສະຫຼຸບ​ສັງ​ລວມ 10 ປີ​ແຫ່ງ​ການ​ປະຕິບັດ​ໂຄງການ​ການ​ເມືອງ​ກໍ່ສ້າງ​ປະ​ເທດ​ໃນ​ສະ​ໄໝ​ຂ້າມ​ຜ່ານ​ຂຶ້ນ​ສູ່​ສັງຄົມ​ນິຍົມ (ສະບັບ​ປັບປຸງ​ເພີ່ມ​ເຕີມ​ປີ 2011) ​ແລະ ຍຸດ​ທະ​ສາດ​ພັດທະນາ​ເສດຖະກິດ-ສັງຄົມ 2011-2020. ກອງ​ປະຊຸມ​ໃຫຍ່​ບໍ່​ພຽງ​ແຕ່​ກຳນົດ​ທິດ​ທາງ, ໜ້າ​ທີ່​ພັດທະນາ​ປະ​ເທດ​ໃນ​ໄລຍະ 5 ປີ 2021-2025 ​ເທົ່າ​ນັ້ນ ຫາກ​ຍັງ​ກຳນົດ​ທິດ​ທາງ​ພັດທະນາ​ປະ​ເທດ​ຢ່າງຮອບດ້ານ, ຍືນ​ຍົງ​ຮອດ​ປີ 2030 - ​ເປັນ​ປີ​​ສະ​ເຫຼີມສະຫຼອງການ​ສ້າ​ງຕັ້ງພັກ​ກອມ​ມູນິດຫວຽດນາມ​ຄົບຮອບ 100 ປີ, ​ແລະ​ໄກ​ກວ່າ​ນັ້ນ​ອີກ, ຕ້ອງກຳນົດ​ວິ​ໄສ​ທັດ​ຮອດ​ປີ 2045 - ​ເປັນປີທີ່​ພວກ​ເຮົາ​ສະ​ເຫຼີມສະຫຼອງ 100 ປີ​ແຫ່ງ​ການ​ປະຕິວັດ​ເດືອນ​ສິງຫາ ​ແລະ ການ​ສ້າງ​ຕັ້ງ​ປະ​ເທດ​ສາທາລະນະ​ລັດ​ປະຊາທິປະ​ໄຕ​ຫວຽດນາມ ປະຈຸ​ບັນ​ແມ່ນປະ​ເທດ​ສາທາລະນະ​ລັດ​ສັງຄົມ​ນິຍົມ​ຫວຽດນາມ.

ການ​ກະກຽມ​ບັນດາ​ຮ່າງ​ເອກະສານກອງ​ປະຊຸມ​ໃຫຍ່​ຄັ້ງ​ທີ XIII ຮຽກຮ້ອງ​ຕ້ອງການ​ຄວາມ​ພະຍາຍາມ​ໃຫຍ່​ທີ່​ສຸດ​ຂອງ​ທົ່ວ​ພັກ, ​ໃນ​ນັ້ນ​ມີ​ບົດບາດ​ສຳຄັນ​ທີ່​ສຸດ​ຂອງ​ວົງ​ການ​ທິດ​ສະ​ດີ. ບັນດາ​ເອກະສານ​ກອງ​ປະຊຸມ​ໃຫຍ່ຕ້ອງ​ມີ​ລັກສະນະ​ສະຫຼຸບ ລັກສະນະ​ຄາດ​ຄະ​ເນ ລັກສະນະ​ກຳນົດ​ທິດ​ສູງ​ທີ່​ສຸດ ​ແລະດ້ວຍ​ຄວາມ​ກວມ​ລວມກວ້າງຂວາງ. ຕ້ອງ​ຄົ້ນຄວ້າ, ສະຫຼຸບ​ຮອບດ້ານ​ບັນດາ​ບັນຫາ​ການ​ເມື​ອງ, ​ເສດຖະກິດ, ວັດທະນະທຳ, ສັງຄົມ, ການ​ປ້ອງ​ກັນ​ປະ​ເທດ, ການ​ຮັກສາ​ຄວາມປອດ​ໄພ, ການ​ຕ່າງປະ​ເທດ, ການ​ກໍ່ສ້າງ​ລະບົບ​ການ​ເມືອງ, ພິເສດ​ແມ່ນ​ກໍ່ສ້າງ​ພັກ. ສິ່ງ​ທີ່ປົກ​ຄຸມ ສອດ​ຫ້ອຍ​ຕະຫຼອດ​ບັນດາ​ເນື້ອ​ໃນ ຂົງ​ເຂດທີ່​ຕ້ອງ​ຄົ້ນຄວ້າ ສະຫຼຸບນັ້ນ​ແມ່ນ ກຳນົດ​ໃຫ້​ຈົນ​ໄດ້​ເສັ້ນທາງ, ຂັ້ນ​ຕອນປະຕິບັດ​ຢ່າງສຳ​ເລັດ​ຜົນ​ເປົ້າ​ໝາຍພັດທະນາ​ປະ​ເທດ​ໃຫ້​ຮັ່ງມີ​ເຂັ້ມ​ແຂງ​ໃນ​ທຸກ​ດ້ານ ​ແລະ​ກາຍ​ເປັນ​ປະ​ເທດ​ອຸດສາຫະກຳ​ທັນ​ສະ​ໄໝ​ຕາມທິດສັງຄົມ​ນິຍົມ​ໃນ​ກາງສະຕະວັດ​ທີ XXI.

ນັບ​ແຕ່ກອງ​ປະຊຸມ​ໃຫຍ່​ຄັ້ງ​ທີ XI ມາ​ເຖິງ​ປະຈຸ​ບັນ, ພັກ​ໄດ້​ມີ​ການ​ຕົກລົງ​ນະ​ໂຍບາຍ​ຫຼາຍ​ປະການ​ທີ່​ຖືກຕ້ອງ​ເພື່ອ​ພັດທະນາ​ປະ​ເທດ​ຢ່າງ​ໄວວາ ຍືນ​ຍົງ, ​ດ້ວຍ​ບັນດາແຜນ​ນະ​ໂຍບາຍ​ທີ່​ພົ້ນເດັ່ນ​ຄື ​ແຜນ​ນະ​ໂຍບາຍ​ປ່ຽນ​ແປງ​ໃໝ່ຕົວ​ແບບ​ການ​ເຕີບ​ໂຕ, ຈັດ​ວາງ​ໂຄງ​ປະກອບ​ເສດຖະກິດ​ຄືນ​ໃໝ່, ຍູ້​ແຮງ​ການ​ຫັນ​ປັນ​ອຸດສາຫະກຳ ທັນ​ສະ​ໄໝ, ພັດທະນາ​ເສດຖະກິດ​ພູມ​ປັນຍາ, ພັດທະນາ​ເສດຖະກິດ​ສີຂຽວ...; ກຳນົດ​ການ​ບຸກທະລຸ​ຍຸດ​ທະ​ສາດ​ກ່ຽວ​ກັບ​ເສດຖະກິດ​ຕະຫຼາດຕາມ​ທິດ​ສັງຄົມ​ນິຍົມ; ພັດທະນາ​ຊັບພະຍາກອນ​ມະນຸດ, ​ເປັນ​ຕົ້ນ​ແມ່ນ​ບຸກຄະລາ​ກອນ​ຄຸນ​ນະພາ​ບສູງ; ກໍ່ສ້າງ​ລະບົບ​ໂຄງ​ສ້າງ​ພື້ນຖານ​ທີ່​ຄົບ​ຊຸດຕາມ​ທິດ​ທັນ​ສະ​ໄໝ... ຄວາມ​ເປັນ​ຈິງ​ໄດ້​ພິສູດຄວາມ​ຖືກຕ້ອງ ​ແລະ​ປະສິດທິ​ຜົນ​ທາງ​ບວກ​ຂອງ​ແຜນ​ນະ​ໂຍບາຍ​ເຫຼົ່ານັ້ນ. ​ໃນ​ຊຸມ​ປີ​ຕໍ່ໜ້າ, ພວກ​ເຮົາ​ສືບ​ຕໍ່​ປະຕິບັດບັນດາ​ທິດ​ທາງ​ຍຸດ​ທະ​ສາດ​ດັ່ງກ່າວຢ່າງ​ແຂງ​ແຮງກວ່າ​ອີກ ​ໃນສະພາບ​ທີ່​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່ກຳລັງ​ເກີດ​ຂຶ້ນ​ດ້ວຍລະດັບ​ຄວາມ​ໄວ​ສູງ​ທີ່​ສຸດ, ດ້ວຍ​ບັນດາ​ເນື້ອ​ໃນ ​ແບບ​ວິທີ ຮູບ​ການ​ທີ່​ໃໝ່​ທີ່​ສຸດ. ​ໂລກ​ກຳລັງ​ເວົ້າ​ຫຼາຍ​ຢ່າງ ​ແລະ​ຮີບ​ດ່ວນ​ໃນ​ການກໍ່​ສ້າງ​ໂຄງ​ສ້າງ​ພື້ນຖານ​ເຕັກນິກ​ອັດ​ສະ​ລິຍະ, ​ໂດຍ​ສະ​ເພາະ​ແມ່ນ​ເຕັກນິກ​ດິຈິ​ຕອນ, ​ປັນຍາປະດິດ, ອິນ​ເຕີ​ເນັດ​ເຊື່ອມ​ຕໍ່​ທຸກ​ສິ່ງ​ທຸກ​ຢ່າງ, ​ເມືອງ​ອັດ​ສະ​ລິ​ຍະ, ພື້ນຖານ​ການ​ຄຸ້ມ​ຄອງ​ແລະ​ຜູ້​ບໍລິຫານ​ພ້ອມ​ດ້ວຍ​ຜູ້​ຢູ່​ອາ​ໄສ​ທີ່​ສະຫຼາດ... ພວກ​ເຮົາ​ຕ້ອງ​ເປັນ​ເຈົ້າ​ການ​ກຳ​ເອົາ​ໂອກາດ​ເພື່ອພາ​ໃຫ້​ປະ​ເທດ​ຊາດ​ພັດທະນາ​ຢ່າງ​ໄວ, ​ຜ່ານ​ພົ້ນ​ຄວາມ​ສ່ຽງ​ທີ່​ຈະ​ຖືກ​ຕົກ​ຢູ່​ຂ້າງ​ຫຼັງ. ​ຜູ້​ທີ່​ເຮັດ​ວຽກ​ງານ​ຄົ້ນຄວ້າ​ທິດ​ສະ​ດີຄວນ​ມີ​ຄວາມ​ສຳຜັດ​ໄວ, ຂະຫຍັນ​ຂັນ​ເຄື່ອນ​ໃນ​ການ​ເຂົ້າ​ເຖິງ ຮັບ​ເອົາ ປະດິດ​ສ້າງ​ບັນດາ​ບັນຫາ​ທິດ​ສະ​ດີ​ໃໝ່, ​ໄຈ້​ແຍກ ກັ່ນ​ຕອງ ​ເລືອກ​ເອົາ​ບັນດາ​ຄຸນຄ່າ​ຍອດ​ຍິ່ງທີ່​ອາດ​ຈະ​ໝູນ​ໃຊ້​ໃຫ້​ສອດຄ່ອງ​ກັບ​ເງື່ອນ​ໄຂ​ຂອງ​ປະ​ເທດ​ເຮົາ; ສະ​ເໜີ​ແນະບັນດາ​ຫຼັກ​ຖານ​ວິທະຍາສາດ​ເພື່ອ​ປັບປຸງ​ບູລະນະ​ແຜນ​ນະ​ໂຍບາຍ, ນະ​ໂຍບາຍ​ຂອງ​ພັກຕໍ່ໜ້າ​ຄວາມ​ຮຽກຮ້ອງ​ຕ້ອງການ​ໃໝ່. ລັ່ງ​ເລ, ຊັກ​ຊ້າ​ຈະ​ພາດ​ໂອກາດ, ຈະ​ຖືກ​ຕົກ​ຢູ່ຂ້າງ​ຫຼັງ; ​ແຕ່​ຄວາມ​ຮ້ອນຮົນຟ້າ​ວຟັ່ງ, ຈົດ​ກ່າຍ​ບົດຮຽນ​ຂອງ​ຕ່າງປະ​ເທດ​ແບບ​ງ່າຍດາຍ, ຜັນ​ຂະຫຍາຍ​ເປັນ​ລວາດ​ຕາມ​ແບບ​ຂະ​ບວນການ​ໂດຍ​ບໍ່​ອີງ​ຕາມ​ເງື່ອນ​ໄຂ, ສະພາບ​ການ​ຕົວ​ຈິງ​ຂອງ​ປະ​ເທດ ກໍ​ຈະ​ນຳ​ໄປ​ສູ່​ຄວາມລົ້ມ​ເຫຼວ.

ສືບ​ຕໍ່​ກໍ່ສ້າງ​ພື້ນຖານເສດຖະກິດ​ຕະຫຼາດຕາມ​ທິດ​ສັງຄົມ​ນິຍົມທີ່​ທັນ​ສະ​ໄໝ, ການ​ເຊື່ອມ​ໂຍງ​ກັບ​ໂລກ​ນັບ​ມື້​ນັບ​ສົມບູນ, ​ຊັບພະຍາກອນ​ມະນຸດ​ມີ​ຄຸນ​ນະ​ພາບ​ສູງ, ລະບົບ​ໂຄງ​ສ້າງ​ພື້ນຖານ​ຄົບ​ຊຸດ ​ເຊື່ອມ​ຕໍ່​ແລະ​ທັນ​ສະ​ໄໝ; ກໍ່ສ້າງ​ລະບົບ​ການ​ເມືອງທີ່​ຄ່ອງ​ຕົວ, ​ເຄື່ອນ​ໄຫວ​ມີ​ຄວາ​ມສັກສິດ​ມີປະສິດທິ​ຜົນ ​ເຊິ່ງຈຸດ​ໜັກ​ແມ່ນ​ກໍ່ສ້າງ​ລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມທີ່ສັດ​ທ່ຽງ, ພັດທະນາ; ກໍ່ສ້າງ​ພັກ​ໃຫ້​ສະອາດ​ປອດ​ໃສ ໝັ້ນຄົງ​ເຂັ້ມ​ແຂງ ມີ​ສະຕິ​ປັນຍາ; ກໍ່ສ້າງ​ສັງຄົມທີ່ມີ​ປະຊາທິປະ​ໄຕ ຍຸດຕິ​ທຳ ສີວິ​ໄລ; ກໍ່ສ້າງຊາດ​ທີ່​ມີ​ຄວາມສະຫຼາດ ​ແລະ​ຄົນ​ຫວຽດນາມ​ທີ່​ຂະຫຍາຍຕົວ​ຮອບດ້ານ; ກໍ່ສ້າງ​ແລະ​ພັດທະນາ​ຄຸນຄ່າ​ວັດທະນະທຳ​ທີ່​ທັນ​ສະ​ໄໝ ​ແລະ​ເຕັມ​ໄປ​ດ້ວຍ​ເອກະລັກ​ປະຈຳຊາດ; ກໍ່ສ້າງ​ພື້ນຖານ​ການ​ປ້ອງ​ກັນຊາ​ດ, ການ​ຮັກສາ​ຄວາມ​ປອດ​ໄພ, ການ​ທູດ​ທີ່​ທັນ​ສະ​ໄໝ, ມະນຸດ​ອະລິຍະ​ທຳ; ລະດົມ, ບຳລຸງ​ລ້ຽງ, ປົກ​ປັກ​ຮັກສາ, ​ແຈກ​ຢາຍ​ແຫຼ່ງພະລັງ​ຕ່າງໆ​ຢ່າງ​ສົມ​ເຫດ​ສົມ​ຜົນ ​ແລະ​ນຳ​ໃຊ້​ມັນ​ຢ່າ​ດີ​ທີ່​ສຸດ; ສ້າງ​ກຳລັງ​ໜູນ​ເພື່ອ​ພັດທະນາ​ປະ​ເທດ​ຢ່າງ​ໄວ​ແລະ​ຍືນ​ຍົງ, ປົກ​ປັກ​ຮັກສາ​ປະ​ເທດ​ຊາດ​ສັງຄົມ​ນິຍົມຢ່າງ​ໝັ້ນຄົງ... ນັ້ນ​ແມ່ນ​ບັນດາ​ທິດ​ທາງ​ຕົ້ນຕໍ​ໃນ​ລະດັບ​ຍຸດ​ທະ​ສາດສຳລັບ​ວຽກ​ງານ​ຄົ້ນຄວ້າ​ທິດ​ສະ​ດີ​ຂອງ​ພວກ​ເຮົາ, ສອດຄ່ອງ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ປະ​ເທດ ​ແລະສອດຄ່ອງ​ກັບ​ທ່າອຽງ​ແຫ່ງ​ການ​ພັດທະນາ​ຂອງ​ໂລກ. ບໍ່​ມີ​ເວລາ​ໃດ​ທີ່ພຶດຕະກຳ​ໃໝ່, ​ອຸດົມສົມບູນຂອງ​​ໂລ​ກ​ແລະ​ປະ​ເທດ ​ໄດ້​ເປີດ​ຂອບ​ຟ້າ​ແຫ່ງ​ຄວາມ​ຄິດ​ສ້າງສັນອັນ​ກວ້າງ​ໃຫຍ່ ​ແລະການ​ດຶງ​ດູດ​ໃຈສຳລັບ​ຖັນ​ແຖວ​ຜູ້​ເຮັດ​ວຽກ​ງານ​ທິດ​ສະ​ດີ ຄື​ປະຈຸ​ບັນ​ນີ້. ພັກ, ລັດ ​ແລະ​ປະຊາຊົນມີ​ຄວາມຕ້ອງການ​ແລະຄວາມ​ຄາດ​ຫວັງ ​ຕໍ່​ຜົນສຳ​ເລັດແລະການ​ປະກອບສ່ວນ​ໃໝ່​ຂອງວົງ​ການ​ທິດ​ສະ​ດີ​ຂອງ​ປະ​ເທດ.

​​ໃນເກືອບ​ສອງ​ປີ​ທີ່​ຜ່ານ​ມາ, ​ເປັນ​ຕົ້ນ​ແມ່ນ​ປີ 2017, ສະພາ​ທິດ​ສະ​ດີ​ສູນ​ກາງ​ໄດ້​ມີ​ການ​ປ່ຽນ​ແປງ​ໃໝ່​ຈຳນວນ​ໜຶ່ງ​ກ່ຽວ​ກັບ​ເນື້ອ​ໃນ ​ແລະ​ແບບ​ວິທີ​ການ​ເຄື່ອນ​ໄຫວ: ຖື​ເອົາ​ການ​ເຄື່ອນ​ໄຫວ​ຂອງ​ອະນຸ​ກຳມະການ​ເປັນ​ຈຸດ​ໜັກ​ໃນ​ການ​ຜັນ​ຂະຫຍາຍວຽກ​ງານ​ຂອງ​ສະພາ; ​ໃຫ້​ຄວາມ​ສຳຄັນ​ແກ່​ການ​ສະຫຼຸ​ບສັງ​ລວມພຶດຕິ​ກຳ; ສົມທົບ​ຢ່າງ​ແໜ້ນ​ແຟ້ນກັບບາງອົງການ, ທ້ອງ​ຖິ່ນ, ​ເສີມ​ຂະຫຍາຍ​ບົດບາດ​ເປັນ​ຈຸດ​ເຕົ້າ​ໂຮມ ​ແລະ​ເສີມ​ຂະຫຍາຍ​ສະຕິ​ປັນຍາ​ຂອງ​ຖັນ​ແຖວ​ປັນຍາ​ຊົນ​ໃນ​ການ​ຄົ້ນຄວ້າ​ທິດ​ສະ​ດີ, ສະຫຼຸບ​ສັງ​ລວມພຶດຕິ​ກຳ; ປ່ຽນ​ແປງ​ໃໝ່ ​ແລະ​ຍົກ​ສູງ​ຄຸນ​ນະພາ​ບຂອງ​ການ​ສ້າງ​ບົດລາຍ​ງານ, ຫົວ​ຂໍ້​ວິທະຍາສາດ. ຜູ້ນຳ​ສະພາ ​ແລະ​ພະນັກງານ​ໃນ​ອົງການ​ສະພາ​ມີ​ຄວາມສາມັກຄີ, ​ເປັນ​ເອກະ​ພາບ, ກວດຄືນ, ສັບ​ຊ້ອນ​ວຽກ​ງານ​ຢ່າງ​​ເໝາະ​ສົມ, ຖືກ​ກັບ​ຄົນ, ຖືກ​ກັບ​ວຽກ​ງານອີງ​ຕາມ​ໂຄງການ​ຈັດ​ຕຳ​ແໜ່​ງວຽກ... ການ​ປ່ຽນ​ແປງ​ໃໝ່​ເຫຼົ່າ​ນີ້​ໄດ້​ປະກອບສ່ວນ​ຍົກ​ສູງ​ຄຸນ​ນະພາ​ບ ​ແລະປະສິດທິພາບ​ການ​ເຄື່ອນ​ໄຫວ​ຂອງ​ສະພາ…

​ເພື່ອ​ສຳ​ເລັດ​ເປັນ​ຢ່າງ​ດີບັນດາ​ໜ້າທີ່​ທີ່​ໜັກໜ່ວງ​ໃນປີ 2018 ​ແລະ​ຊຸມ​ປີ​ທີ່​​ເຫຼືອ​ໃນສະ​ໄໝ 2016-2021​ ຂອງສະພາ​ທິດ​ສະ​ດີ​ສູນ​ກາງ​, ບັນດາ​ສະຫາຍ​ຄວນ​ສືບ​ຕໍ່​ປ່ຽນ​ແປງ​ໃໝ່​ເນື້ອ​ໃນ​ແລະ​ແບບ​ວິທີ​ການ​ເຄື່ອນ​ໄຫວ​ຢ່າງ​ແຂງ​ແຮງ​ກວ່າ​ອີກ, ຖືກຕ້ອງ​ຕາມ​ພາລະ​ບົດບາດ ​ແລະໜ້າ​ທີ່​ຂອງ​ສະພາ​ ທີ່ກົມ​ການ​ເມືອງ​ໄດ້​ມອບ​ໝາຍ​ໃຫ້.

ສະພາ​ທິດ​ສະດີ​ຄວນ​ສືບ​ຕໍ່​ປະສານ​ງານ​ຢ່າງ​ແໜ້ນ​ແຟ້ນ, ​ເປັນ​ປົກກະຕິ​ກັບບັນດາ​ຄະນະ, ກະຊວງ, ຂະ​ແໜງ​ການ​ທີ່​ກ່ຽວຂ້ອງ ​ແລະບາງ​ທ້ອງ​ຖິ່ນ ​ເພື່ອ​ຍູ້​ແຮງ​ການ​ສະຫຼຸບ​ສັງ​ລວມພຶດຕິ​ກຳ. ການ​ເອົາ​ໃຈ​ໃສ່​​ການ​ສຳ​ຫຼວດ​ແລະສະຫຼຸບ​ສັງ​ລວມພຶດຕິ​ກຳ​ ແມ່ນ​​ໄດ້ໄປ​ໃນ​ທິດ​ທາງ​ທີ່ຖືກຕ້ອງ​. ບັນຫາ​ສຳຄັນ​ແມ່ນ​ຕ້ອງ​ຮັບປະກັນ​ລັກສະນະ​ແທດ​ຈິງ ຄຸນ​ນະພາ​ບ ປະສິດທິ​ຜົນ. ສຳ​ຫຼວດພຶດຕິ​ກຳບໍ່​ພຽງ​ແຕ່​ຢຸດ​ຢູ່​ທີ່​ການ​ຈົດ​ກ່າຍ​ຖ່າຍ​ຮູບ, ພັນ​ລະ​ນາ​ຮູບ​ນອກ​ຂອງ​ຄວາມ​ເປັນ​ຈິງ, ​ແຕ່​ຕ້ອງ​ຄົ້ນ​ຫາ​ຄວາມ​ເລິກ​ຂອງ​ພຶດຕິ​ກຳ, ຄົ້ນ​ເຜີຍ​ຂໍ້​ຂັດ​ແຍ່ງ ທ່າ​ອຽງ ​ແລະ​ປັດ​ໄຈການ​ພັດທະນາ​ໃໝ່. ນັ້ນ​ແມ່ນ​ການ​ສະຫຼຸບ​ສັງ​ລວມພຶດຕິ​ກຳ​ໃນ​ລະດັບ​ທິດ​ສະ​ດີ ​ເຊິ່ງຕ້ອງ​ຂະຫຍັນ​ໝັ້ນ​ພຽນ ແລະ​ໃຊ້ເຫື່ອ​ແຮງ ​ສະຕິ​ປັນຍາ​ຫຼາຍ​ທີ່​ສຸດ. ຍູ້​ແຮງ​ການ​ຄົ້ນຄວ້າ​ບັນດາ​ຫົວ​ຂໍ້​ໃນ​ໂຄງການຄົ້ນຄວ້າ​ວິທະຍາສາດທິດ​ສະ​ດີການ​ເມືອງລະດັບ​ລັດ​ໃນ​ໄລຍະ 2016-2020; ບັນດາ​ຫົວ​ຂໍ້​ຄົ້ນຄວ້າ​ທິດ​ສະ​ດີກາ​ນ​ເມືອງ​ຂອງ​ກົມ​ການ​ເມືອງ, ຄະນະ​ເລຂາທິການສູນ​ກາງ​ພັກ​ສະ​ໄໝ​ທີ XII. ພະຍາຍາມ​ສະ​ເໜີ​​ແນະ​ບັນດາ​ຈຸດ​ໃໝ່, ​ເປັນ​ຕົ້ນ​ແມ່ນ​ວິທີ​ແກ້​ໄຂ​ທີ່​ມີ​ລັກສະນະ​ບຸກທະລຸ​ໃນ​ແຕ່​ລະ​ຫົວ​ຂໍ້, ​ແຕ່​ລະ​ບັນຫາ​ສ​ະເພາະ​ເພື່ອ​ໃຫ້ກົມ​ການ​ເມືອງ, ຄະນະ​ເລຂາທິການ ຄົ້ນຄວ້າ, ປຶກສາ​ຫາລື, ຮັບ​ເອົາ.

​ເຂົ້າ​ຮ່ວມ​ຢ່າງ​ຕັ້ງໜ້າ, ​ເປັນ​ເຈົ້າ​ການ ​ແລະ​ມີ​ປະສິດທິ​ຜົນ​ກວ່າ​ອີກ ​ໃນ​ການ​ຕໍ່ສູ້​ຕ້ານບັນດາ​ທັດສະນະ​ທີ່​ບໍ່​ຖືກຕ້ອງ, ຕໍ່ສູ້ປະຕິ​ເສດ​ບັນດາ​ຖ້ອຍ​ທຳນອງ​ປະຕິ​ການ ​ເປັນ​ປໍ​ລະ​ປັກ, ປົກ​ປັກ​ຮັກສາ​ໂຄງການ​ການ​ເມືອງ ​ແລະ​ແນວທາງ​ຂອງ​ພັກ.

​ເປີດ​ກວ້າງ​ແລະ​ຍົກ​ສູງ​ຄຸນ​ນະພາ​ບ, ປະສິດທິພາບ​ຂອງ​ການ​ຮ່ວມ​ມື​ທາງ​ທິດ​ສະ​ດີ​ກັບ​ບັນດາ​ພັກ​ກອມ​ມູນິດ​ທີ່​ກຳ​ອຳນາດ ​ແລະບາງພັກ​ການ​ເມືອງ​ອື່ນ​ໃນ​ໂລກ, ຕັ້ງໜ້າ​ແລກປ່ຽນ ສົນທະນາ​ກັບນັກຮຽນ​ຮູ້​ຕ່າງປະ​ເທດ​ແນ​ໃສ່​ອັບ​ເດດ​ຄວາມ​ຮູ້ ​ແລະຮັບ​ເອົາ​ໂດຍ​ມີ​ການ​ເລືອກ​ເຟັ້ນ ຜົນງານ​ທິດ​ສະ​ດີ​ຂອງ​ໂລກທີ່​ມີ​ຄຸນຄ່າ​ຄົ້ນຄວ້າ​ທາ​ບທາມ​ສຳລັບ​ຫວຽດນາມ; ພ້ອມ​ກັນ​ນັ້ນ​ກໍ​ແນະນຳ ​ເຜີຍ​ແຜ່​ແນວທາງ, ​ແຜນ​ນະ​ໂຍບາຍ​ຂອງ​ພັກ, ລັດ ​ແລະຜົນສຳ​ເລັດ​ທາງ​ທິດ​ສະ​ດີ​ຂອງ​ຫວຽດນາມ.

ສະພາ​ທິດ​ສະ​ດີ​ແລະ​ສຳນັກງານ​ສະພາ​ທິດ​ສະ​ດີສືບ​ຕໍ່​ປັບປຸງ​ໂຄງ​ສ້າງ​ອົງ​ກອນ, ກຳນົດ​ແຈ້ງ​ຕຳ​ແໜ່ງຂອງ​ການ​ງານ; ​ໃຫ້​ຄວາມ​ສຳຄັນ​ແກ່​ວຽກ​ງານການ​ເຊື່ອມ​ໂຍງ, ອັບ​ເດດຂໍ້​ມູນ​ທິດ​ສະ​ດີ​ໃນ​ປະ​ເທດ, ສາກົນ; ສາມັກ​ຄີ, ປະດິດ​ສ້າງ, ມີ​ລະບຽບ​ວິ​ໄນ, ສູ້​ຊົນ​ປະຕິບັດ​ພາລະ​ບົດບາດ ໜ້າ​ທີ່​ໃຫ້​ສຳ​ເລັດ​ເປັນ​ຢ່າງ​ດີ. ​ເສີມ​ຂະຫຍາຍ​ບົດບາດ​ຂອງ​​ບັນດາ​ອະນຸ​ກຳມະການ ​ແລະສະມາຊິກ​ສະພາ​ທິດ​ສະ​ດີ ​ໃຫ້​ດີກ​ວ່າ​ອີກ. ບັນດາ​ອະນຸ​ກຳມະການ​ຂອງ​ສະພາ​ທິດ​ສະ​ດີ​ຕ້ອງ​ຍົກ​ສູງລັກສະນະ​ເປັນ​ເຈົ້າ​ການ, ລັກສະນະ​ແຜນການ ​ແລະລັກສະນະປະຊາທິປະ​ໄຕ. ​ເພີ່ມ​ທະວີ​ການ​ດຳລົງ​ຊີວິດ​ດ້ານ​ວິຊາ​ສະ​ເພາະ, ​ແລກປ່ຽນ ສົນທະນາ​ຢ່າງ​ເລິກ​ເຊິ່ງ, ​ໂຕ້​ວາທີ​ຢ່າງ​ກົງ​ໄປ​ກົງ​ມາ​ກ່ຽວ​ກັບບັນດາ​ບັນຫາ​ທີ່​ຍັງ​ບໍ່​ທັນ​ຈະ​ແຈ້ງ ​ເພື່ອ​ໄປ​ເຖິງ​ຄວາມ​ຮັບ​ຮູ້​ເປັນ​ເອກະ​ພາບ. ບັນດາ​ສະມາຊິກ​ສະພາ​ທິດ​ສະ​ດີ​ຄວນ​ເຊີດ​ຊູ​ຈິດ​ໃຈ​ຮັບຜິດຊອບ, ​ໃຊ້​ເວລາ ​ເຫື່ອແຮງ ຈິດ​ໃຈ ສະຕິ​ປັນຍາຫຼາຍ​ໃຫ້​ແກ່​ວຽກ​ງານ. ​ເຂົ້າ​ຮ່ວມ​ສະພາ​ທິດ​ສະ​ດີ​ແມ່ນ​ເພື່ອ​ປະຕິບັດບັນດາ​ວຽກ​ງານ​ທີ່​ສຳຄັນ​ທີ່​ສຸດ ມີ​ຄວາມ​ພົວພັນ​ເຖິງ​ຂະ​ບວນການກຳນົດ​ແນວທາງ, ​ແຜນ​ນະ​ໂຍບາຍ​ຂອງ​ພັກ. ບໍ່​ເຫັນ​ແຈ້ງ​ກຽດ​ສັກ​ສີ​ແລະ​ຄວາມ​ຮັບຜິດຊອບ, ບໍ່​ລົງທຶນ​ຈິດ​ໃຈ ສະຕິ​ປັນຍາ, ບໍ່​ເປັນ​ຫ່ວງ​ເປັນ​ໄຍຕັດສິນ​ໃຈ​ຄົ້ນ​ຄວ້າຊອກຫາ ປະດິດ​ສ້າງ ຈະ​ບໍ່​ສາມາດ​ສຳ​ເລັດ​ໜ້າ​ທີ່​ໄດ້./.

ຫງວຽນ​ຝູຈ້ອງ

​ເລຂາທິການ​ໃຫຍ່ຄະນະ​ບໍລິຫານ​ງານ​ສູນ​ກາງ​ພັກກອມ​ມູນິດ​ຫວຽດນາມ

-------------------------

* ຫົວ​ຂໍ້​​ໂດ​ຍວາລະສານ​ກອມ​ມູນິດ​ເປັນ​ຜູ້​ແຕ່ງ.

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 904 (​ເດືອນ​ກຸມພາ 2018)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ