ວັນຈັນ, 15/10/2018
ພັກກອມມູນິດຫວຽດນາມລິເລີ່ມແລະນຳພາ ພາລະກິດການປ່ຽນແປງໃໝ່ ແລະພັດທະນາປະເທດ ກ້າວຂຶ້ນສູ່ສັງຄົມນິຍົມຢ່າງໝັ້ນຄົງ
30/9/2018 11:49' ສົ່ງ ພິມ
ພາບປະກອບ. (ພາບ: philosophy.vass.gov.vn)

ພາລະກິດ​ການ​ປ່ຽນ​ແປງ​ໃໝ່​ໂດຍພັກ​ກອມ​ມູນິດ​ຫວຽດນາມ​ເປັນ​ຜູ້​ລິ​ເລີ່​ມ​ແຕ່​ປີ 1986 ​ໃນ​ສະພາບ​ການ​ຂອງ​ປະ​ເທດ​ທີ່​ມີ​ຄວາມ​ຫຍຸ້ງຍາກລຳບາກ​ທີ່​ສຸດ. ການ​ປ່ຽນ​ແປງ​ໃໝ່​ເລີ່​ມຕົ້ນ​ຈາກ​ຄວາມ​ເປັນ​ຈິງ, ຈາກ​ຄວາມ​ເປັນ​ຫ່ວງ ຄວາມ​ນຶກຄິດຕຶກ​ຕອງ, ຈາກ​ບັນດາ​ປະກົດ​ການ “ມ້າງ​ຮົ້ວ”, ຈາກ​ວິທີ​ເຮັດຢ່າງ​ປະດິດ​ສ້າງ​ຂອງທ້ອງ​ຖິ່ນ, ພື້ນຖານຕ່າງໆ; ​ໄດ້​ຮັບ​ການ​ຊີ້​ນຳ​ຂອງ​ສູນ​ກາງ​ໃນ​ການ​ຖອດ​ຖອນ​ບົດຮຽນ, ສະຫຼຸບ​ສັງ​ລວມ ພາ​ໄປ​ເຖິງ​ການ​ປ່ຽນ​ແປງ​ໃໝ່​ຈິນຕະນາການ, ຄວາມ​ຮັບ​ຮູ້, ທັດສະນະ, ບົນ​ພື້ນຖານ​ນັ້ນ​ໄດ້​ມີ​ການ​ດັດ​ປັບ, ປ່ຽນ​ແປງ​ໃໝ່​ແນວທາງ ​ແຜນ​ນະ​ໂຍບາຍ ລະບຽບ​ແບບ​ແຜນ ນະ​ໂຍບາຍ​ພັດທະນາ ທີ່​ສອດຄ່ອງ​ກັບ​ຄວາມ​ເປັນ​ຈິງ​ພາວະ​ວິ​ໄສ, ສ້າງ​ກຳລັງ​ໜູນ​ໃຫ້​ແກ່​ຂະ​ບວນການ​ກໍ່ສ້າງ​ປະ​ເທດ​ຊາດ. ຜ່ານ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ພັກ​ກອມ​ມູນິດ​ຫວຽດນາມ​ໄດ້​ສ້າງ​ລະບົບທັດສະນະ​ທິດ​ສະ​ດີ ກ່ຽວ​ກັບລັດທິສັງຄົມ​ນິຍົມ ​ແລະ​ເສັ້ນທາງ​ກ້າວ​ຂຶ້ນ​ສັງຄົມ​ນິຍົມ, ​ເປັນ​ພື້ນຖານ​ວິທະຍາສາດ​ໃຫ້​ແກ່​ການວາງກຳນົດ​ແນວທາງ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ ​ເພື່ອ​ຍູ້​ແຮງ​ການ​ປ່ຽນ​ແປງ​ໃໝ່​ຢ່າງຮອບດ້ານ ຄົບ​ຊຸດ.

ການ​ປ່ຽນ​ແປງ​ໃໝ່​ຢ່າງຮອບດ້ານ ຄົບ​ຊຸດ, ມີ​ຈຸດ​ໜັກ​ໃຈກາງ, ​ເພື່ອ​ບັນລຸ​ເປົ້າ​ໝາຍ “ປະຊາຊົນ​ຮັ່ງມີ, ປະທດຊາດ​ເຂັ້ມ​ແຂງ, ມີ​ປະຊາທິປະ​ໄຕ ຍຸຕິ​ທຳ ​ແລະ​ສີວິ​ໄລ”

ພັກ​ກອມ​ມູນິດ​ຫວຽດນາມຕັ້ງ​ໝັ້ນ​ໃນ​ເປົ້າ​ໝາຍ​ປ່ຽນ​ແປງ​ໃໝ່-ພັດທະນາ​ຕາມ​ທິດ​ທາງ​ສັງຄົມ​ນິຍົມ. ​ເປົ້າ​ໝາຍ​ຂອງ​ພາລະກິດ​ການ​ປ່ຽນ​ແປງ​ໃໝ່​ປະ​ເທດ​ຢ່າງຮອບດ້ານ, ກໍ່​ແມ່ນ​ເປົ້າໝາຍ​ກໍ່ສ້າງ​ສັງຄົມ​ນິຍົມນັ້ນ ​ໄດ້​ຮັບ​ການ​ຮັບ​ຮູ້ແລະ​ເປັນ​ຮູບ​ເປັນ​ຮ່າງ​ຂຶ້ນ​ໃນ​ພຶດຕິ​ກຳ​ແຫ່ງ​ການ​ປ່ຽນ​ແປງ​ໃໝ່, ​ໄດ້​ຮັບ​ການ​ເພີ່ມ​ເຕີມ​ແລະ​ພັດທະນາ​ໂດຍ​ຜ່ານ​ບັນດາ​ກອງ​ປະຊຸມ​ໃຫຍ່​ຂອງ​ພັກ. ​ກອງ​ປະຊຸມ​ໃຫຍ່​ຄັ້ງ​ທີ XI (ປີ 2011), ​ໄດ້​ຢືນຢັນ​ເປົ້າ​ໝາຍ: ກໍ່ສ້າງ​ຫວຽດນາມ​​ໃຫ້​ເປັນ​ປະ​ເທດທີ່ "ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ, ມີ​ປະຊາທິປະ​ໄຕ ຍຸດຕິ​ທຳ ​ແລະ​ສີວິ​ໄລ”. ການ​ປ່ຽນ​ແປງ​ໃໝ່​ແມ່ນ​ແນ​ໃສ່​ປະຕິບັດ​ເປົ້າໝາຍ​ກວມ​ລວມນີ້​ໃຫ້​ໄດ້​ນັບ​ມື້​ນັບ​ດີກ​ວ່າ, ມີ​ປະສິດທິ​ຜົນ​ກວ່າ ​ແລະ​ໃນ​ລະດັບ​ສູງ​ກວ່າ​ອີກ. ບັນທັດຖານ​ເພື່ອ​ຊີ້​ນຳ​ແລະ​ປະ​ເມີນ​ຂະ​ບວນວິວັດ​ການ​ປ່ຽນ​ແປງ​ໃໝ່ນັ້ນ​ແມ່ນ ຄວາມ​ເປັນ​ຈິງ​ແລະ​ຜົນງານ​ແຫ່ງ​ການນຳ​ເອົາ​ປະ​ເທດອອກ​ຈາກພາວະ​ວິ​ກິດ, ອອກ​ຈາກ​ສະພາບ​ການ​ດ້ອຍ​ພັດທະນາ, ຕິດ​ແໜ້ນ​ການ​ເຕີບ​ໂຕ​ເສດຖະກິດ​ ກັບ​ການ​ພັດທະນາ​ວັດທະນະທຳ ສັງຄົມ ຜູ້​ຄົນ, ຍົກ​ສູງ​ຊີວິດ​ການ​ເປັນ​ຢູ່​ທຸກ​ດ້ານ​ຂອງ​ປະຊາຊົນ.

ເພື່ອ​ໃຫ້ການປ່ຽນ​ແປງ​ໃໝ່ບັນລຸ​ຜົນສຳ​ເລັດ​ຕາມ​ເປົ້າ​ໝາຍ​ເທິງ​ນີ້, ພັກ​ກອມ​ມູນິດ​ຫວຽດນາມ​ໄດ້​ກຳນົດ​ການ​ປ່ຽນ​ແປງ​ໃໝ່​ຮອບດ້ານ ຄົບ​ຊຸດ, ​ແຕ່​ມີ​ຈຸດ​ໜັກ​ໃຈກາງ​ໃນ​ແຕ່ລະ​ໄລຍະ; ຕັ້ງການ​ປ່ຽນ​ແປງ​ໃໝ່​ຈິນຕະນາການ​ຢູ່ໃນ​ແຖວ​ໜ້າ ​ເພື່ອ​ເປີດ​ເສັ້ນ​ທາງ​ແລະ​ກຳນົດ​ທິດ​ໃຫ້​ແກ່​ຂະ​ບວນວິວັດການ​ປ່ຽນ​ແປງ​ໃໝ່. ຕາມ​ນັ້ນ, ການ​ປ່ຽນ​ແປງ​ໃໝ່ ພັດທະນາ​ເສດຖະກິດ​ເປັນ​ໃຈກາງ​ແລະ​ໄປ​ກ່ອນ​ກ້າວ​ໜຶ່ງ; ການ​ກໍ່ສ້າງ​ພັກ​ເປັນ​ກຸນ​ແຈ​ສຳຄັນ; ການ​ກໍ່ສ້າງ​ວັດທະນະທຳ, ຜູ້​ຄົນ​ເປັນ​ພື້ນຖານ​ຈິດ​ໃຈ; ການ​ເພີ່ມ​ທະວີ​ການ​ປ້ອງ​ກັນ​ປະ​ເທດ​ແລະປ້ອງ​ກັນ​ຄວາມ​ສະຫງົບ​ເປັນວຽກ​ງານ​ສຳຄັນ​ເປັນ​ປະຈຳ; ຖື​ຄວາມໝັ້ນຄົງທາງ​ດ້ານ​ການ​ເມືອງ-ສັງຄົມ​ເປັນປະຖົມ​ປັດ​ໃຈ, ​ເປັນ​ເງື່ອນ​ໄຂ​ຈຳ​ເປັນ​ສຳລັບພາລະກິດ​ການ​ປ່ຽນ​ແປງ​ໃໝ່​ແລະ​ພັດທະນາ. 

ຈາກ​ເປົ້າ​ໝາຍ​ຂອງ​ການ​ປ່ຽນ​ແປງ​ໃໝ່, ຜ່ານ​ພາກປະຕິບັດ​ຕົວ​ຈິງ, ພັກ​ກອມ​ມູນິດ​ຫວຽດນາມກຳນົດ​ແປດ​ລັກສະນະ​ພື້ນຖານ​ຂອງ​ສັງຄົມ​ສັງຄົມ​ນິຍົມທີ່​ປະຊາຊົນ​ເຮົາ​ກໍ່ສ້າງ. ນັ້ນ​ແມ່ນ: ປະຊາຊົນ​ຮັ່ງມີ ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ສີວິ​ໄລ; ​ໂດຍ​ປະຊາຊົນ​ເປັນ​ເຈົ້າ​ຂອງ; ​ເສດຖະກິດ​ພັດທະນາ​ໃນ​ລະດັບ​ສູງ ອີງ​ບົນ​ກຳລັງ​ການ​ຜະລິດ​ທີ່​ທັນ​ສະ​ໄໝ ​ແລະ​ການ​ພົວພັນ​ການ​ຜະລິດ​ທີ່​ສອດຄ່ອງ​ເໝາະ​ສົມ; ມີ​ພື້ນຖານ​ວັດທະນະທຳ​ທີ່​ກ້າວໜ້າ​ແລະ​ເຂັ້ມ​ຂົ້ນ​ໄປ​ດ້ວຍ​ເອກະລັກ​ຊາດ; ປະຊາຊົນ​ມີ​ຊີວິດ​ເສລີ ອິ່ມໜຳສຳລານ ຜາ​ສຸກ, ມີ​ເງື່ອນ​ໄຂ​ພັດທະນາ​ຢ່າງຮອບດ້ານ; ບັນດາ​ຊົນ​ເຜົ່າ​ໃນ​ຊຸມ​ຊົນ​ຊາວ​ຫວຽດນາມ​ມີ​ຄວາມ​ສະ​ເໝີ​ພາບ ສາມັກຄີ ​ເຄົາລົບ​ຊ່ວຍ​ເຫຼືອ​ຊຶ່ງ​ກັນ​ແລະ​ກັນ ​ເພື່ອ​ພ້ອມ​ກັນ​ພັດທະນາ; ກໍ່ສ້າງ​ລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ ຂອງ​ປະຊາຊົນ ​ໂດຍ​ປະຊາຊົນ ​ເພື່ອ​ປະຊາຊົນ ​ໂດຍ​ພັກ​ກອມ​ມູນິດ​ເປັນ​ຜູ້ນຳ​ພາ; ມີການພົວພັນມິດຕະພາບ ແລະຮ່ວມມືກັບປະຊາຊົນບັນດາປະເທດໃນໂລກ. ​ລັກສະນະ​ພື້ນຖານ​​ເຫຼົ່ານັ້ນ​ແມ່ນບັນດາ​ທິດ​ທາງ​ທີ່ສຳຄັນ​ສຳລັບ​ວິວັດ​ການ​ປ່ຽນ​ແປງໃໝ່ ຊຶ່ງ​ໄດ້​ສະ​ແດງ​ອອກ​ແລະ​ປະຕິບັດ​ໃນ​ທຸກຂະ​ແໜງ​ການ​ພັດທະນາ​ຂອງ​ປະ​ເທດ ​ແລະ​ສະ​ແດງ​ອອກ​ເຖິງ​ທາດ​ແທ້​ຂອງ​ຂະ​ບວນວິວັດ​ການ​ປ່ຽນ​ແປງ​ໃໝ່ ​ແລະ​ພັດທະນາ​ປະ​ເທດ.

ດ້ວຍທັດສະນະ “ພັດທະນາ​ເສດຖະກິດ​ເປັນ​ຈຸດ​ໜັກ​ໃຈກາງ”, ຫວຽດນາມ​ສຸມ​ໃສ່​ກໍ່ສ້າງ​ແລະ​ພັດທະນາ​ເສດຖະກິດ​ຕະຫຼາດ​ກຳນົດ​ທິດ​ສັງຄົມ​ນິຍົມ. ບັນຫາ​ທີ່​ວາງ​ອອກ​ມາກ່ອນ​ອື່ນ​ໝົດ​ແມ່ນ ​ຕ້ອງ​ປ່ຽນ​ແປງ​ໃໝ່​ຈິນຕະນາການກ່ຽວ​ກັບ​ລະບອບ​ກົດໝາຍ ​ແລະ​ຮູບ​ແບບ​ການ​ພັດທະນາ​ເສດຖະກິດ​ຕາມ​ທິດ​​ສັງຄົມ​ນິຍົມ. ​ໃນຂະ​ບວນວິວັດ​ການ​ປ່ຽນ​ແປງ​ໃໝ່, ພັກ​ກອມ​ມູນິດ​ຫວຽດນາມ​ໄດ້​ໄປ​ເຖິງຄວາມ​ຮັບ​ຮູ້: “ການ​ຜະລິດ​ສິນຄ້າ​ບໍ່ກົງກັນ​ຂ້າມ​ກັບລັດທິສັງຄົມ​ນິຍົມ ​ແຕ່​ເປັນ​ຜົນສຳ​ເລັດ​​ແຫ່ງການພັດທະນາ​ຂອງອາລະຍະ​ທຳ​ມະນຸດ, ມັນ​ຄົງ​ຕົວ​ພາວະ​ວິ​ໄສ, ຈຳ​ເປັນ​ສຳລັບ​ການ​ກໍ່ສ້າງ​ສັງຄົມ​ນິຍົມ ​ແລະ​ນັບ​ທັງ​ເມື່ອ​ລັດທິ​ສັງຄົມ​ນິຍົມ​ໄດ້​ຮັບ​ການ​ກໍ່ສ້າງ​ແລ້ວ”(1). ​ເສດຖະກິດ​ຕະຫຼາດບໍ່​ມີ​ຄວາມ​ໝາຍ​ດຽວ​ກັນກັບ​ລັດ​ທິທຶນ​ນິຍົມ. ຈາກ​ນັ້ນ​ໄປ​ເຖິງ​ການ​ຢືນຢັນ: “ຮູບ​ແບບ​ເສດຖະກິດ​ທົ່ວ​ໄປ​ຂອງ​ສະ​ໄໝ​ຂ້າມ​ຜ່ານ​ຂຶ້ນ​ສູ່​ສັງຄົມ​ນິຍົມຢູ່​ຫວຽດນາມ​ແມ່ນ ພັດທະນາ​ເສດຖະກິດຕະຫຼາດ​ກຳນົດທິດ​ສັງຄົມ​ນິຍົມ”(2). “ສືບ​ຕໍ່​ບູລະນະ​ລະບຽບ​ກົດໝາຍ​​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ ສ້າງ​ປະຖົມ​ປັດ​ໄຈ​ທີ່​ໝັ້ນຄົງ ​ໃຫ້​ແກ່​ການ​ກໍ່ສ້າງ​ພື້ນຖານ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມຢ່າງ​ສຳ​ເລັດ​ຜົນ ​ແລະກຳກັບ​ຂັບ​ເຄື່ອນ​ພື້ນຖານ​ເສດຖະກິດ​ນັ້ນຢ່າງ​ຄົບ​ຊຸດ, ລຸ​ລ່ວງ; ປະກອບສ່ວນ​ລະດົມ​ທຸກ​ແຫຼ່ງພະລັງ​ແລະຈັດ​ແບ່ງ, ນຳ​ໃຊ້ຊັບພະຍາກອນ​ຕ່າງໆ ​ເພື່ອ​ພັດທະນາ​ເສດຖະກິດ-ສັງຄົມຢ່າງ​ໄວວາ​ແລະ​ຍືນ​ຍົງ ​​ເພື່ອ​ເປົ້າ​ໝາຍ “ປະຊາຊົນ​ຮັ່ງ​ມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ຍຸດຕິ​ທຳ ​ແລະ​ສີວິ​ໄລ”(3). ນີ້​ແມ່ນ​ບາດກ້າວ​ປ່ຽນ​ແປງ​ໃໝ່​ທີ່​ມີ​ຄວາມ​ໝາຍ​ປະວັດ​ສາດ​ທັງ​ດ້ານ​ທິດ​ສະ​ດີ​ແລະ​ພຶດຕິ​ກຳ, ສະ​ແດງ​ອອກ​ຢ່າງ​ລວມສູນ​ໃນ​ການ​ກໍ່ສ້າງ​ແລະ​ບູລະນະ​ລະບຽບ​ກົດໝາຍ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ​ໃນ​ນັ້ນ​ກຳນົດ​ແຈ້ງ​ສາຍ​ພົວພັນ​ລະຫວ່າງ​ລັດ ຕະຫຼາດ​ແລະ​ສັງຄົມ ​ແລະ​ ແກ້​ໄຂ​ສາຍ​ພົວພັນ​ນັ້ນ​ຢ່າງ​ມີ​ປະສິດທິ​ຜົນ, ​ແນ​ໃສ່​ສ້າງ​ກຳລັງ​ແຮງ​ສັງ​ລວມ​ໃຫ້​ແກ່​ການ​ພັດທະນາ.

ພັກ​ກອມ​ມູນິດ​ຫວຽດນາມກຳນົດ​ການ​ພັດທະນາມະນຸດ ວັດທະນະທຳ ສັງຄົມ​ແມ່ນ​ໜ້າ​ທີ່​ແລະ​ເປົ້າ​ໝາຍ​ທິດ​ທາງ​ທີ່​ສຳຄັນ​ ຂອງ​ພາລະກິດ​ການ​ປ່ຽນ​ແປງ​ໃໝ່. ການພັດທະນາ​ມະນຸດ​ເປັນ​ໃຈ​ກາງຂອງ​ຍຸດ​ທະ​ສາດ​ການ​ພັດທະນາ, ມະນຸດ​ເປັນ​ເຈົ້າ​ຂອງທັງ​ເປັນ​ຜະລິດ​ຕະພັນ​ ຂອງ​ຂະ​ບວນວິວັດ​ການ​ປ່ຽນ​ແປງ​ໃໝ່; ພັດທະນາ​ມະນຸດ​ທັງ​ເປັນ​​ເປົ້າ​ໝາຍ ທັງ​ເປັນ​ກຳລັງ​ໜູນ ຂອງ​ຂະ​ບວນວິວັດ​ການ​ພັດທະນາ. ສຸມ​ໃສ່​ການ​ສ້າງ​ຄົນ​ຫວຽດນາມ​ໃຫ້​ກາຍ​ເປັນ​ເຈົ້າ​ຂອງ​ຂອງ​ຂະ​ບວນວິວັດ​ການ​ປ່ຽນ​ແປງ​ໃໝ່, ຫັນ​ເປັນ​ອຸດສາຫະກຳ ທັນ​ສະ​ໄໝ, ພັດທະນາ​ປະ​ເທດ​ແລະ​ເຊື່ອມ​ໂຍງ​ສາກົນ. ​ເພື່ອ​ປະຕິບັດ​ໜ້າ​ທີ່​ຍຸດ​ທະ​ສາດນີ້, ພັກ​ກອມ​ມູນິດ​ຫວຽດນາມ​ໄດ້​ວາງ​ແຜນ​ນະ​ໂຍບາຍ​ດຳ​ເນີນ “ການ​ປ່ຽນ​ແປງ​ໃໝ່​ການ​ສຶກສາ​ແລະ​ຝຶກ​ອົບຮົມ​ຢ່າງ​ເປັນ​ພື້ນຖານ, ຮອບດ້ານ”, ພັດທະນາ​ແລະ​ຍົກ​ສູງ​ຄຸນ​ນະພາ​ບຂອງ​ແຫຼ່ງບຸກຄະລາ​ກອນ, ຕິດ​ກັບ​ການ​ຍູ້​ແຮງ​ການ​ພັດທະນາ​ແລະ​ປະ​ຢຸກ​ໃຊ້​ວິທະຍາສາດ ​ແລະ​ເຕັກ​ໂນ​ໂລ​ຊີ​ທີ່​ທັນ​ສະ​ໄໝ. ພ້ອມ​ກັນ​ນັ້ນກໍ່​ກຳນົດ​ວ່າ ການ​ພັດທະນາ​ການ​ສຶກສາ​ແລະ​ຝຶກ​ອົບຮົມ ພ້ອມ​ກັບ​ວິທະຍາສາດ-​ເຕັກ​ໂນ​ໂລ​ຊີ ​ແມ່ນນະ​ໂຍບາຍ​ແຫ່ງ​ລັດ​ອັນ​ດັບ​ໜຶ່ງ ​ໃນ​ພາລະກິດ​ການ​ປ່ຽນ​ແປງ​ໃໝ່ ​ແລະ​ພັດທະນາ​ປະ​ເທດ, ​ເປັນ​ຕົ້ນ​ແມ່ນ ​ໃນສະພາບ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່​ເກີດ​ຂຶ້ນ​ຢ່າງ​ໄວວາ, ​ແຂງ​ແຮງ, ທີ່ “ບໍ່​ເຄີຍມີ​ມາ​ໃນ​ປະຫວັດສາ” ​ໃນ​ທົ່ວ​ໂລກ.

ພັກ​ກອມ​ມູນິດ​ຫວຽດນາມກຳນົດ​ວ່າ ​ວັດທະນະທຳ​ເປັນ​ພື້ນຖານ​ຈິດ​ໃຈ​ຂອງ​ສັງຄົມ, ທັງ​ເປັນ​ເປົ້າ​ໝາຍ ທັງ​ເປັນ​ກຳລັງ​ໜູນ, ​ເປັນ​ແຫຼ່ງພະລັງ​ພາຍ​ໃນ​ທີ່​ສຳຄັນ​ຂອງ​ການ​ພັດທະນາ​ປະ​ເທດ. ພັກ​ກອມ​ມູນິດ​ຫວຽດນາມວາງ​ໜ້າ​ທີ່​ກໍ່ສ້າງລະບົບ​ຄຸນຄ່າ​ຫວຽດນາມທີ່​ເປັນ​ຄຸນ​ລັກສະນະ​ຂອງ​ໄລຍະ​ການ​ພັດທະນາ​ໃໝ່ ຕອບ​ສະໜອງ​ຄວາມ​ຕ້ອງການ​ຂອງ​ພາລະກິດ​ການ​ຍູ້​ແຮງ​ການ​ຫັນ​ເປັນ​ອຸດສາຫະກຳ ທັນ​ສະ​ໄໝ ​ແລະ​ເຊື່ອມ​ໂຍງ​ສາກົນ.

ພັກ​ກອມ​ມູນິດ​ຫວຽດນາມກຳນົດ​ແຈ້ງວ່າ​ ເປົ້າ​ໝາຍ​ແລະ​ຜົນສຳ​ເລັດຂອງ​ການ​ປ່ຽນ​ແປງ​​ໃໝ່​ຕ້ອງ​ເພື່ອ​ມະນຸດ, ຍົກ​ສູງ​ຊີວິດ​ການ​​ເປັນ​ຢູ່​ຂອງ​ປະຊາຊົນ​ໃນ​ທຸກ​ດ້ານ ​ໂດຍ​ຜ່າ​ນການ​ປະຕິບັດນະ​ໂຍບາຍ​ສັງຄົມ​ແລະ​ແກ້​ໄຂ​ບັນດາ​ບັນຫາ​ສັງຄົມ​ຢ່າງ​ມີ​ປະສິດທິ​ຜົນ. ດ້ວຍ​ທັດສະນະ​ເຊື່ອມ​ຕໍ່​ແບບ​ອິນ​ຊີ​ລະຫວ່າງ​ການ​ເຕີບ​ໂຕ​ເສດຖະກິດ ກັບ​ຄວາມ​ກ້າວໜ້າ​ແລະ​ຄວາມ​ສະ​ເໝີ​ພາບ​ທາງ​ສັງຄົມ ​ໃນ​ແຕ່​ລະບາດ​ກ້າວ​ແລະ​ແຕ່​ລະນະ​ໂຍບາຍການ​ພັດທະນາ, ຫວຽດນາມ​ໄດ້​ສຸມ​ໃສ່​ກໍ່ສ້າງ, ປ່ຽນ​ແປງ​ໃໝ່ ​ແລະ​ບູລະນະລະບົບຄວາມ​ປອດ​ໄພ​ສັງຄົມ​ໃຫ້​ເໝາະ​ສົມ, ​ໄຫວ​ພິບ, ຫຼາຍ​ຮູບ​ຫຼາຍ​ແບບ, ຫຼາຍ​ຊັ້ນ, ມີ​ປະສິດທິ​ຜົນ, ທັນ​ສະ​ໄໝ​ແລະ​ເຊື່ອມ​ໂຍງ​ສາກົນ; ພ້ອມ​ກັນ​ນັ້ນ​ກໍ່​ລວມສູນ​ເຂົ້າ​ໃສ່​ວຽກ​ງານ​ຫຼຸດຜ່ອນ​ຄວາມທຸກ​ຍາກ, ຈັດ​ແບ່ງ​ບຸລິມະສິດ​ແຫຼ່ງພະລັງ​ໃຫ້​ບັນດາ​ທ້ອງ​ຖິ່ນ​ທີ່​ທຸກ​ຍາກ, ​ໃຫ້​ເຂດ​ຊົນ​ເຜົ່າ​ສ່ວນນ້ອຍ. ​ແຕ່​ປີ 2017, ຫວຽດນາມ​ໄດ້​ຫັນ​ມາ​ກຳນົດ​ລະບົບ​ມາດຕະຖານ​ແລະບັນດາ​ມາດ​ຕະການ​ເພື່ອ​ຫຼຸດຜ່ອນ​ຄວາມ​ທຸກ​ຍາກ​ຢ່າງ​ຍືນ​ຍົງ ຕາມ​ວິທີ​ເຂົ້າ​ເຖິງ​ແບບ​ຫຼາຍ​ດ້ານ, ສອດຄ່ອງ​ກັບ​ທ່າ​ອຽງ​ຂອງ​ໂລກ.

​ໂດຍ​ຮັບ​ຮູ້​ຢ່າງ​ເລິກ​ເຊິ່ງ​ເຖິງ​ຖານະ​ທີ່​ຕັ້ງ, ຄວາມ​ສຳຄັນ​ຂອງ​ການ​ພັດທະນາ​ສັງຄົມ​ແລະການ​ຄຸ້ມ​ຄອງ​ການ​ພັດທະນາ​ສັງຄົມ​​ແບບ​ຍືນ​ຍົງ, ພັກ​ກອມ​ມູນິດ​ຫວຽດນາມ​ໃຫ້​ຄວາມ​ສຳຄັນ​ແກ່​ການ​ນຳພາ​ການ​ປະຕິບັດ​ບັນດາ​ນະ​ໂຍບາຍ, ວິທີ​ແກ້​ໄຂ ​ເພື່ອ​ຍົກ​ສູງ​ລາຍ​ໄດ້​ແລະຄຸນນະພາ​ບຊີວິດ​ຂອງ​ປະຊາຊົນ​ຢ່າງ​ບໍ່​ຢຸດ​ຢັ້ງ; ຍົກ​ສູງ​ຄຸນ​ນະພາ​ບການ​ຮັກສາ, ​ເບິ່ງ​ແຍງ​ດູ​ແລ​ສຸຂະພາບ​ຂອງ​ປະຊາຊົນ ​ແລະ​ຄຸນ​ນະພາ​ບປະຊາກອນ; ມີ​ມາດ​ຕະການ​ຄຸ້ມ​ຄອງ​ແລະ​ແກ້​ໄຂ​ການ​ພົວພັນ​ສັງຄົມ​ຕ່າງໆ​ຢ່າງ​ກົມກຽວ; ​ແກ້​ໄຂ​ບັນຫາ​ສັງຄົມ​ທີ່​ຮ້ອນ​ເຄືອງ​ຕ່າງໆ​ຢ່າງ​ມີ​ປະສິດທິ​ຜົນ, ກໍ່ສ້າງສະພາບ​ແວດ​ລ້ອມ​ແຫ່ງ​ການ​ດຳລົງ​ຊີວິດ​ທີ່​ສົດ​ໃສ ສີວິ​ໄລ ​ແລະ​ປອດ​ໄພ. 

​ເປີດ​ກວ້າງ​ການ​ພົວພັນ​ຕ່າງປະ​ເທດ ​ແລະ​ເປັນ​ເຈົ້າ​ການ ຕັ້ງໜ້າ​ເຊື່ອມ​ໄຍງສາກົນ ​ແມ່ນ​ທິດ​ທາງ​ຍຸດ​ທະ​ສາດ​ທີ່​ສຳຄັນ​ຂອງພັກ​ກອມ​ມູນິດ​ຫວຽດນາມ​ໃນ​ຂະ​ບວນວິວັດ​ການ​ປ່ຽນ​ແປງ​ໃໝ່. ພັກ​ກອມ​ມູນິດ​ຫວຽດນາມ​ໄດ້​ກຳນົດ​ແລະ​ປະຕິ​ບັດ​ຢ່າງ​ສະ​ເໝີ​ຕົ້ນ​ສະ​ເໝີປາຍ ​ແນວທາງ​ການ​ຕ່າງປະ​ເທດທີ່​ເປັນ​ເອກະລາດ ​ເປັນ​ເຈົ້າ​ຕົນ​ເອງ ສັນຕິພາບ ​ຮ່ວມ​ມື​ແລະ​ພັດທະນາ; ດຳ​ເນີນ​ການ​ພົວພັນ​ຕ່າງປະ​ເທດດ້ວຍ​ຫຼາຍ​ຮູບ​ຫຼາຍ​ແບບ, ຫຼາຍ​ກ້ຳ​ຫຼາຍ​ຝ່າຍ; ​ເປັນ​ເຈົ້າ​ການ​ແລະ​ຕັ້ງໜ້າ​ເຊື່ອມ​ໂຍງ​ສາກົນ; ​ເປັນ​ເພື່ອນ​ມິດ, ​ເປັນ​ຄູ່​ຮ່ວມ​ມື​ທີ່​ໄວ້​ວາງ​ໃຈ ​ແລະ​​ເປັນສະມາຊິກ​ທີ່​ມີ​ຄວາມ​ຮັບຜິດຊອບຂອງ​ປະຊາ​ຄົມ​ສາກົນ. ຮັບປະກັນ​ຜົນ​ປະ​ໂຫຍ​ດສູງ​ສຸດ​ຂອງ​ຊາດ-ປະ​ເທດ​ຊາດ, ບົນ​ພື້ນຖານ​ບັນດາ​ຫຼັກການ​ພື້ນຖານ​ຂອງ​ກົດໝາຍ​ສາກົນ, ສະ​ເໝີ​ພາບ​ແລະ​ມີ​ຜົນ​ປະ​ໂຫຍ​ດຮ່ວມ​ກັນ, ຕັ້ງ​ໝັ້ນ ​ເດັດດ່ຽວ​ຕໍ່ສູ້ປົກ​ປັກ​ຮັກສາ​ເອກະລາດ ອຳນາດ​ອະທິປະ​ໄຕ ​ເອກະ​ພາບ ​ແລະ​ຜືນ​ແຜ່​ງດິນ​ອັນ​ຄົບ​ຖ້ວນ​ຂອງ​ປະ​ເທດ​ຊາດ​ໄວ້​ຢ່າງ​ໝັ້ນຄົງ, ປົກ​ປັກ​ຮັກສາ​ພັກ ລັດ ປະຊາຊົນ ​ແລະ​ລະບອບ​ສັງຄົມ​ນິຍົມ; ຍົກ​ສູງ​ບົດບາດ​ທີ່​ຕັ້ງ ກຽດ​ສັກ​ສີ​ຂອງປະ​ເທດ ​ແລະປະກອບສ່ວນ​ເຂົ້າ​ໃນ​ພາລະກິດ​ສັນຕິພາບ ​ເອກະລາດ​ແຫ່ງ​ຊາດ ປະຊາທິປະ​ໄຕ ​ແລະ​ຄວາມ​ກ້າວໜ້າ​ທາງ​ສັງຄົມ​ໃນ​ໂລກ.

ຍົກ​ສູງ​ປະສິດທິ​ຜົນ​ຂອງ​ການ​​ເຄື່ອນ​ໄຫວ​ພົວພັນ​ຕ່າງປະ​ເທດ, ສືບ​ຕໍ່​ນຳ​ເອົາ​ບັນດາ​ການ​ພົວພັນ​ຮ່ວມ​ມືກັບ​ຕ່າງປະ​ເທດ​ເຂົ້າ​ສູ່​ລວງ​ເລິກ, ຍົກ​ສູງ​ຄຸນ​ນະພາ​ບ ປະສິດທິ​ຜົນ​ຂອງ​ການ​ພົວພັນ​ຕ່າງປະ​ເທດ​ພະຫຸ​ພາຄີ, ​ເປັນ​ເຈົ້າ​ການ​ແລະຕັ້ງໜ້າປະກອບສ່ວນ​ເຂົ້າ​ໃນ​ການ​ກໍ່ສ້າງບັນດາ​ສະ​ຖາ​ບັນ​ພະຫຸ​ພາຄີ. ​ເອົາ​ໃຈ​ໃສ່​ພັດທະນາ​ການ​ພົວພັນ​ຮ່ວມ​ມື ມິດຕະພາບ​ທີ່​ເປັນ​ມູນ​ເຊື້ອ​ກັບ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ, ຊຸກຍູ້​ການ​ພົວພັນ​ກັບ​ບັນດາ​ຄູ່​ຮ່ວມ​ມື​​ໃຫຍ່, ຄູ່​ຮ່ວມ​ມື​ທີ່​ສຳຄັນ. ​ເປັນ​ເຈົ້າ​ການ, ຕັ້ງໜ້າ ​ແລະ​ມີ​ຄວາມ​ຮັບຜິດຊອບ​ພ້ອມ​ກັບ​ບັນດາ​ປະ​ເທດ​ອາ​ຊຽນ​ໃນ​ການ​ກໍ່ສ້າງ​ປະຊາ​ຄົມອາ​ຊຽນ​ໃຫ້​ໝັ້ນຄົງ​ເຂັ້ມ​ແຂງ. ​ເປີດ​ກວ້າງ, ລົງ​ເລິກ ​ແລະ​ຍົກ​ສູງ​ປະສິດທິ​ຜົນ​ການ​ພົວພັນ​ຕ່າງປະ​ເທດ​ຂອງ​ພັກ, ການ​ທູດ​ຂອງ​ລັດ ​ແລະ​ການ​ພົວພັນ​ຕ່າງປະ​ເທດ​ປະຊາຊົນ. ຕໍ່ສູ້​ຢ່າງ​ເດັດດ່ຽວ, ຜາບ​ແພ້ທຸກ​ກົນ​ອຸບາຍ ການ​ກະທຳ​ແຊກ​​ແຊງ​ເຂົ້າ​ໃນ​ວຽກ​ງານ​ພາຍ​ໃນ, ລ່ວງ​ລ້ຳ​ເອກະລາດ ອະທິປະ​ໄຕ ​ເອກະ​ພາບ ຜືນ​ແຜ່ນດິນ​ອັນ​ຄົບ​ຖ້ວນ ຄວາມ​ປອດ​ໄພ​ຂອງ​ຊາດ ​ແລະ​ຄວາມ​ໝັ້ນຄົງ​ທາງ​ການ​ເມືອງ​ຂອງ​ປະ​ເທດ.

ຜັນ​ຂະຫຍາຍ​ຢ່າງ​ແຂງ​ແຮງ​ທິດ​ທາງ​ຍຸດ​ທະ​ສາດ​ເປັນ​ເຈົ້າ​ການ​ແລະ​ຕັ້ງໜ້າ​ເຊື່ອມ​ໂຍງ​ສາກົນ. ຍົກ​ສູງ​ປະສິດທິ​ຜົນ​ການ​ເຊື່ອມ​ໂຍ​ງສາກົນ, ປະຕິບັດ​ຄຳ​ໝັ້ນ​ສັນຍາ​ສາກົນ​ຢ່າງ​ເຂັ້ມງວດ, ກໍ່ສ້າງ​ແລະ​ຜັນ​ຂະຫຍາຍ​ຍຸດ​ທະ​ສາດ​ເຂົ້າ​ຮ່ວມ​ເຂດ​ການ​ຄ້າ​ເສລີ​ກັບບັນດາ​ຄູ່​ຮ່ວມມື​ເສດຖະກິດ​ການ​ຄ້າ​ທີ່​ສຳຄັນ, ລົງ​ນາມ​ແລະ​ປະຕິ​ບັດຢ່າງ​ມີ​ປະສິດທິ​ຜົນ​ ບັນດາ​ສັນຍາ​ການ​ຄ້າ​ເສລີ​ຮຸ່ນ​ໃໝ່ ຕາມ​ແຜນການ​ສັງ​ລວມທີ່​ເໝາະ​ສົມ, ສອດຄ່ອງ​ກັບຜົນ​ປະ​ໂຫຍ​ດຂອງ​ປະ​ເທດຊາດ. ​ເປັນ​ເຈົ້າ​ການ​ເຂົ້າ​ຮ່ວມ​ແລະ​ເສີມ​ຂະຫຍາຍ​ບົດບາດ​ໃນ​ບັນດາ​ກົນ​ໄກ​ພະຫຸ​ພາຄີ, ພິ​ເສດ​ແມ່ນ​ອາ​ຊຽນ ​ແລະ​ສະຫະ​ປະຊາ​ຊາດ. ຍູ້​ແຮງ​ການ​ເຊື່ອມ​ໂຍງ​ສາກົນ​ໃນ​ຂົງ​ເຂດ​ວັດທະນະທຳ ສັງຄົມ ວິທະຍາສາດ-​ເຕັກ​ໂນ​ໂລ​ຊີ, ການ​ສຶກສາ-ຝຶກ​ອົບຮົມ ​ແລະ​ບັນດາ​ຂົງ​ເຂດ​ອື່ນ. ​ເປັນ​ເຈົ້າ​ການ​ແລະ​ຕັ້ງໜ້າ​ຮັກສາສະພາບ​ແວ​ດລ້ອມສັນຕິພາບ ສະຖຽນ​ລະ​ພາບ​ໄວ້​ຢ່າງ​ໝັ້ນ​ຄົງ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້ການ​ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ.

ປ່ຽນ​ແປງ​ໃໝ່ລະບົບ​ການ​ເມືອງ ​ສ້າງ​ກຳລັງ​ໜູນ​ໃຫ້​ແກ່ຂະ​ບວນວິວັດ​ການ​ປ່ຽນ​ແປງ​ໃໝ່. ພັກ​ກອມ​ມູນິດຫວຽດນາມກຳນົດ​ການ​ປ່ຽນ​ແປງ​ໃໝ່​ລະບົບ​ການ​ເມື​ອງຖື​ບົດບາດ​ຫຼັກ​ແຫຼ່ງ​ໃນ​ການ​ເພີ່ມ​ທະວີ​ບົດບາດນຳ​ພາ​ຂອງ​ພັກ; ຍົກ​ສູງ​ຄວາມ​ສັກສິດ, ປະສິດທິ​ຜົນ​ການ​ຄຸ້ມ​ຄອງ​ຂອງ​ລັດ ​ແລະຄຸນ​ນະພາ​ບການ​ເຄື່ອນ​ໄຫວ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ​ຂອງ​ບັນດາ​ອົງຄະ​ນະ​ການ​ເມືອງ-ສັງຄົມ; ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງ​ປະຊາຊົນ ​ເພື່ອ​ແນ​ໃສ່​ຮັບປະກັນ​ຄວາມ​ໝັ້ນຄົງ​ທາງ​ການ​ເມືອງ-ສັງຄົມ, ຊຸກຍູ້​ພາລະກິດ​ປ່ຽນ​ແປງ​ໃໝ່​ແລະ​ພັດທະນາ​ປະ​ເທດ. ​ໃນ​ນັ້ນ, ​ເອົາ​ໃຈ​ໃສ່​ຄົ້ນຄວ້າ, ບູລະນະ ​ແລະ​ຈັດ​ຕັ້ງປະຕິບັດຮູບ​ແບບ​ການຈັດ​ຕັ້ງ​ໂດຍ​ລວມຂອງ​ລະບົບ​ການ​ເມືອງ ທີ່​ສອດຄ່ອງ​ກັບ​ຄວາມ​ຕ້ອງການ​ກໍ່ສ້າງ ປັບປຸງ​ບູລະນະ​ລັດ​ແຫ່ງ​ອຳນາດ​ກົດໝາຍສັງຄົມ​ນິຍົມ, ພັດທະນາ​​ເສດຖະກິດ​ຕະຫຼາດກຳນົດ​ທິດສັງຄົມ​ນິຍົມ ​ແລະ​ເປັນ​ເຈົ້າ​ການ, ຕັ້ງໜ້າ​ເຊື່ອມ​ໂຍງ​ສາກົນ.

ກ່ຽວ​ກັບ​ການ​ກໍ່ສ້າງ​ແລະ​ເສີມ​ຂະຫຍາຍ​ປະຊາທິປະ​ໄຕ. ​ໂດ​ຍ​ເລີ່​ມຈາກ​ຄວາມ​ຮັບ​ຮູ້​ວ່າ ປະຊາທິປະ​ໄຕ​ແມ່ນ​ຄຸນຄ່າຫຼັກ​ຂອງ​ມະນຸດ ຂອງ​ສັງຄົມ, ​ເປັນ​ເປົ້າ​ໝາຍ​ແລະ​ກຳລັງ​ໜູນຂອງ​ຂະ​ບວນວິວັດ​ການ​ປ່ຽນ​ແປງ​ໃໝ່​ແລະ​ພັດທະນາ, ພັກ​ແລະ​ລັດ​ຫວຽດນາມ​ໄດ້​ກຳນົດ​ໜ້າ​ທີ່​ຫຼັກ​ແມ່ນ​ເຄົາລົບ ປົກ​ປ້ອງ​ແລະ​ເສີມ​ຂະຫຍາຍ​ສິດທິ​ມະນຸດ, ສິດທິພົນລະ​ເມືອງ, ຕິດ​ກັບ​ຄວາມ​ຮັບຜິດຊອບ​ແລະ​ພັນທະ​ພົນລະ​ເມືອງ (ບັນຫາ​ນີ້​​ໄດ້​ຖືກ ​ປະທານ​ ໂຮ່ຈີ​ມິນ ເນັ້ນໜັກໃນ ​ຖະ​ແຫຼ​ງ​ການເອກະລາດ ວັນ​ທີ 2 ກັນຍາ 1945, ​ໄດ້​ກຳນົດ​ໄວ້​ໃນ​ລັດຖະທຳ​ມະນູນ​ສະບັບ​ຕ່າງໆ​ໃນ​ປີ 1946, 1954, 1980, 1992 ​ແລະ​ໄດ້​ກຳນົດ​ຢ່າງ​ຈະ​ແຈ້ງ​ຄົບ​ຖ້ວນ​ໃນ​ລັດຖະທຳ​ມະນູນ​ປີ 2013). ຍູ້​ແຮງການ​ພັດທະນາ​ບັນດາຮູບ​ການ​ແລະ​ວິທີ​ການ​ປະຕິບັດ​ປະຊາທິປະ​ໄຕ, ​ເປັນ​ຕົ້ນ​ແມ່ນ​ຮູບ​ການ​ປະຊາທິປະ​ໄຕ​ໂດຍ​ກົງ. ​ເສີ​ມຂະຫຍາຍ​ປະຊາທິປະ​ໄຕພ້ອມ​ກັນ​ກັບ​ການ​ເພີ່ມ​ທະວີ​ລະບຽບ​ວິ​ໄນ, ປະຕິບັດ​ຕາມ​ກົດໝາຍ. ພັກ​ກອມ​ມູນິດ​ຫວຽດນາມກຳນົດ​ວ່າ ປະຊາທິປະ​ໄຕ​ໃນ​ພັກ​ມີ​ຄວາມ​ໝາຍ​ຕັດສິນ​ຕໍ່ການ​ພັດທະນາ​ປະຊາທິປະ​ໄຕ​ໃນ​ການຈັດ​ຕັ້ງ​ແລະ​ເຄື່ອນ​ໄຫວ​ຂອງ​ລະບົບ​ການ​ເມືອງ​ທັງ​ໝົດ, ຕິດ​ກັບ​ການ​ເປີດ​ປະຊາທິປະ​ໄຕ​ໃນ​ຊີ​ວິ​ສັງຄົມ​ທັງ​ໝົດ, ສ້າງ​ໃຫ້​ມີ​ຄວາມ​ເປັນ​ໃຈ​ສັງຄົມ, ສ້າງ​ກຳລັງ​ແຮງ​ແຫ່ງ​ມະຫາ​ສາມັກຄີ​ປວງ​ຊົນ​ທັງ​ຊາດ.

ສືບ​ຕໍ່​ການ​ກໍ່ສ້າງ, ບູລະນະ​ລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ ​ໂດຍ​ພັກ​ເປັນ​ຜູ້ນຳ​ພາ. ພັກ​ກອມ​ມູນິດ​ຫວຽດນາມກຳນົດ​ວ່າ ນີ້​ເປັນ​ໜ້າ​ທີ່​ຈຸດ​ໜັກ​ໃຈກາງ​ຂອງ​ການ​ປ່ຽນ​ແປງ​ໃໝ່​ລະບົບ​ການ​ເມືອງ. ລັດ​ແຫ່ງ​ອຳນາດ​ກົດໝາຍສັງຄົມ​ນິຍົມຫວຽດນາມ ທັງ​ຮັບ​ເອົາ​ບັນດາ​ຜົນສຳ​ເລັດ​ລວມຂອງ​ມະນຸດຊາດ, ທັງ​ສະ​ແດງ​ອອກ​ເຖິງ​ເອກະລັກ​ຕົວ​ເອງ​ຂອງ​ຫວຽດນາມ; ​ໄດ້​ຮັບ​ການ​ກໍ່ສ້າງ​ເພື່ອ​ສະ​ແດງອອກ​ເຖິງ ​ອຳນາດ​ລັດ​ເປັນ​ເອກະ​ພາບ,  ມີ​ການ​ແບ່ງ​ງານ ປະສານ​ງານ ກວດກາ​ທີ່​ມີ​ປະສິດທິ​ຜົນ ລະຫວ່າງ​ບັນດາ​ອົງການ​ລັດ​ໃນ​ການ​ປະຕິບັດບັນດາ​ອຳນາດ​ນິຕິບັນຍັດ ບໍລິຫານ ຕຸລາການ; ພ້ອມ​ກັນ​ນັ້ນ​ກໍ່​ກໍ່ສ້າງສະ​ຖາ​ບັນ​, ລະບອບ​ລະບຽບການຄວບ​ຄຸມ​ອຳນາດທີ່​ຄົບ​ຊຸດ, ​ແກ້​ໄຂຜ່ານ​ຜ່າ​ສະພາບ​ການ​ລ່ວງ​ອຳນາດ, ອາດຍາ​ສິດ, ສໍ້​ລາດ​ບັງ​ຫຼວງ.

​ເສີມ​ຂະຫຍາຍ​ບົດບາດ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ, ຂອງ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ, ອົງການ​ສັງຄົມ​ອາຊີບ ​ແລະ​ບັນດາ​ສະມາຄົມຂອງ​ມະຫາຊົນ. ຕັ້ງໜ້າ​ຈັດ​ຕັ້ງ​ຜັນ​ຂະຫຍາຍການຕິດຕາມກວດກາ ​ແລະ​ຍົກ​ສູງຄຸນ​ນະພາ​ບການ​ຕິດ​ຕາມ​ກວດກາ, ການ​ວິຈານ​ສັງຄົມຂອງ​ອົງການ​ເຫຼົ່າ​ນັ້ນ ຕໍ່​ການ​ເຄື່ອນ​ໄຫວ​ຂອງ​ອົງການ​ຈັດ​ຕັ້ງ​ພັກ, ອົງການ​ລັດ ​ແລະ​ຖັນ​ແຖວ​ພະນັກງານ ສະມາຊິກ​ພັກ. ສືບ​ຕໍ່​ປັບປຸງ​ບູລະນະ​ການຈັດ​ຕັ້ງ​ກົງຈັກ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ຕິດ​ກັບ​ການ​ປ່ຽນ​ແປງ​ໃໝ່​ເນື້ອ​ໃນ​ແລະ​ວິທີ​ການ​​ເຄື່ອນ​ໄຫວ ຕາມທິດ​ລວມສູນ​ໃຫ້ຂັ້ນ​ຮາກ​ຖານ, ​ຕິດ​ກັບສະມາ​ຊິກ, ​ແກ້​ໄຂ​​ເທື່ອ​ລະ​ກ້າວ ສະພາບ​ການ “ຫັນ​ເປັນ​ການ​ປົກຄອງ” ​ໃນ​ການ​ເຄື່ອນ​ໄຫວ​ຂອງ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ.

ກໍ່ສ້າງ​ພັກ​ໃຫ້​ສະອາດ​ປອດ​ໃສ ໝັ້ນຄົງ​ເຂັ້ມ​ແຂງ, ປ່ຽນ​ແປງ​ໃໝ່​ແບບ​ວິທີການ​ນຳພາ​ຂອງ​ພັກຕໍ່​ລະບົບ​ການ​ເມືອງ ​ແລະ​ສັງຄົມ, ​ເປັນ​ຕົ້ນ​ແມ່ນ​ຕໍ່​ລັດ. ນີ້​ແມ່ນ​ປັດ​ໄຈ​ຫຼັກ​ທີ່​ຕັດສິນ​ຊີ້​ຂາດຄວາມ​ສຳ​ເລັດ​ຂອງ​ພາລະກິດ​ການ​ປ່ຽນ​ແປງ​ໃໝ່. ພັກ​ກອມ​ມູນິດ​ຫວຽດນາມ​ໄດ້​ກຳນົດ​ແຈ້ງ​ບົດບາດ​ແລະ​ກົນ​ໄກ​ການ​ນຳພາ: ພັກ​ນຳພາ​ລັດ​ແລະ​ສັງຄົມ; ພັກ​ຮັບຜິດຊອບ​ຕໍ່​ປະ​ເທດ​ແລະ​ປະຊາຊົນ ​ກ່ຽວ​ກັບ​ການ​ນຳພາ​ຂອງ​ຕົນ; ບັນດາ​ອົງການ​ຈັດ​ຕັ້ງ​ພັກ​ແລະສະມາຊິກ​ພັກ ​ເຄື່ອນ​ໄຫວ​ໃນ​ຂອບ​ເຂດລັດຖະທຳ​ມະນູນ​ແລະ​ກົດໝາຍ. ກຳນົດ​ແຈ້ງ​ກົນ​ໄກ​ການດຳ​ເນີນ​ງານ​ຂອງ​ລະບົບ​ການ​ເມືອງ​ແມ່ນ “ພັກ​ນຳພາ - ລັດ​ຄຸ້ມ​ຄອງ - ປະຊາຊົນ​ເປັນ​ເຈົ້າ​ຂອງ”. ຍູ້​ແຮງ​ການ​ປ່ຽນ​ແປງ​ໃໝ່​ແບບ​ວິທີ​ການ​ນຳພາ​ຂອງ​ພັກ, ​ໃນ​ນັ້ນ​ຈຸດ​ໜັກ​ແມ່ນ​ປ່ຽນ​ແປງ​ໃໝ່​ແບບ​ວິທີ​ການ​ນຳພາ​ຂອງ​ພັກ​ຕໍ່​ລັດ, ​ເຄົາລົບ​ແລະ​ເສີມ​ຂະຫຍາຍ​ສິດ​ອຳນາດ​ຂອງ​ບັນດາ​ອົງການ​ລັດ ​ໃນ​ລະບອບ​ອຳນາດ​ກົດໝາ​ຍສັງຄົມ​ນິຍົມ. ສຸມ​ໃສ່​ປ່ຽນ​ແປງ​ໃໝ່​ວຽກ​ງານ​ພະນັກງານ, ຍົກ​ສູງ​ຄຸນສົມບັດ ຄວາມ​ສາມາດ ຄຸນ​ນະພາ​ບຂອງ​ຖັນ​ແຖວ​ພະນັກງານ ສະມາຊິກ​ພັກ, ກໍ່ສ້າງ​ຖັນ​ແຖວ​ພະນັກງານ​ຂັ້ນ​ຕ່າງໆ, ​ເປັນ​ຕົ້ນ​ແມ່ນ​ຂັ້ນ​ຍຸດ​ທະ​ສາດ ​ໃຫ້​ມີ​ຄຸນສົມບັດ ຄວາມ​ສາມາດ​ແລະ​ກຽດ​ສັກ​ສີ​ຢ່າງ​ພຽງພໍ, ທຽບ​ເທົ່າ​ກັບ​ໜ້າ​ທີ່, ຖື​ວ່າ​ນີ້​​ເປັນ​ໜ້າ​ທີ່​ທີ່​ມີ​ລັກສະນະ​ຍຸດ​ທະ​ສາດ, “ຫຼັກ​ແຫຼ່ງຂອງ​ຫຼັກ​ແຫຼ່ງ”; ​ແກ້​ໄຂ​ຜ່ານ​ຜ່າ​ຈຸດ​ອ່ອນ, ຂໍ້​ບົກພ່ອງ​ໃນ​ການຈັດ​ຕັ້ງ​ກົງຈັກ ​ແລະ​ກົນ​ໄກ​ເຄື່ອນ​ໄຫວ​ຂອງລະບົບ​ການ​ເມືອງ, ກໍ່ສ້າງ​ການຈັດ​ຕັ້ງ​ກົງຈັກ​ຂອງ​ລະບົບ​ການ​ເມືອງ​ໃຫ້​ກະທັດ​ລັດ, ​ເຄື່ອນ​ໄຫວ​ມີ​ຄວາມ​ສັກສິດ ​ແລະມີ​ປະສິດທິ​ຜົນ.

ລັກສະນະ​ພິ​ເສດ​ແລະ​ບົດຮຽນທີ່​ໄດ້​ຮັບ​ ຈາກ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່

ນັບ​ແຕ່ກອງ​ປະຊຸມ​ໃຫຍ່​ຄັ້ງ​ທີ VI (ປີ 1986) ມາ​ເຖິງ​ປະຈຸ​ບັນ​ແມ່ນ​ໄດ້​ຜ່ານ​ກອງ​ປະຊຸມ​ໃຫຍ່ 7 ຄັ້ງ, ພັກ​ກອມ​ມູນິດ​ຫວຽດນາມ​ໄດ້​ປັບປຸງ​ບູລະນະ​ເທື່ອ​ລະ​ກ້າວ ​ແລະ​ຫັນ​ບັນດາ​ທິດ​ທາງ​ການ​ປ່ຽນ​​ແປງ​ໃໝ່ເປັນອັນ​ລະອຽດ​ຮອບດ້ານ, ພັດທະນາ, ກຳນົດ​ແຈ້ງຈຸດ​ໜັກ​ໃຈກາງ​ໃນ​ແຕ່ລະ​ໄລຍະ. ຄະນະ​ບໍລິຫານ​ງານ​ສູນ​ກາງພັດຊຸດ​ຕ່າງໆ​ ໄດ້​ປະກາດ​ໃຊ້​ມະຕິ​ຕົກລົງ​ຫຼາຍ​ສະບັບກ່ຽວ​ກັບ​ບັນດາ​ບັນຫາ​ທີ່​ສຳຄັນ; ນຳພາ​ເພື່ອ​ໃຫ້​ສະພາ​ແຫ່ງ​ຊາດ​ຫັນ​ເປັນ​ນິຕິ​ກຳ​ໃນລັດຖະທຳ​ມະນູນ ​ແລະ​ໃນ​ກົດໝາຍ, ສ້າງ​ພື້ນຖານ​ນິຕິ​ທຳ​ທີ່​ນັບ​ມື້​ນັບ​ຄົບ​ຊຸດ ​ແລະ​ສອດຄ່ອງ​ເໝາະ​ສົມ​ສຳ​ລັບ​ຂະ​ບວນວິວັດການ​ປ່ຽນ​ແປງ​ໃໝ່; ນຳພາ​ລັດຖະບານຫັນ​ເປັນ​ລະອຽດ​ໃນ​ບັນດາ​ກົນ​ໄກ ນະ​ໂຍບາຍ ​ແລະ​ມາດ​ຕະການ​ຄຸ້ມ​ຄອງ ບໍລິຫານ​ຈັດການ​ການ​ພັດທະນາ​ປະ​ເທດ​ຊາດ.

1- ລັກສະນະ​ພິ​ເສດທີ່​ສ່ອງ​ແສງ​ເຖິງ​ລັກສະນະ​ກົດ​ເກນ​ຂອງຂະບ​ວນວິວັດ​ການ​ປ່ຽນ​ແປງ​ໃໝ່​ຢູ່​ຫວຽດນາມ​ນັ້ນ​ແມ່ນ ການ​ຮັບ​ຮູ້​ກ່ຽວ​ກັບ​ການ​ແກ້​ໄຂບັນດາ​ສາຍ​ພົວພັນ​ໃຫຍ່​ທີ່​ນັບ​ມື້​ນັບ​ມີ​ປະສິດທິ​ຜົນ.

ກ່ຽວ​ກັບ​ການ​ພົວພັນ​ລະຫວ່າງການ​ປ່ຽນ​ແປງ​ໃໝ່, ຄວາມ​ໝັ້ນຄົງ ​ແລະ​ການ​ພັດທະນາ: ພັກ​ກອມ​ມູນິດ​ຫວຽດນາມກຳນົດ​ວ່າ ການ​ປ່ຽນ​ແປງ​ໃໝ່​ແມ່ນ​ກຳລັງ​ໜູນ; ຄວາມ​ໝັ້ນຄົງ​ແມ່ນ​ເງື່ອນ​ໄຂ ປະຖົ​ມປັດ​ໄຈ; ການ​ພັດທະນາ​ຢ່າງໄວວາ​ແລະ​ຍືນ​ຍົງ​ແມ່ນ​ຈຸດປະສົງ. ການ​ປ່ຽນ​ແປງ​ໃໝ່, ຄວາມ​ໝັ້ນຄົງ ​ແລະ​ການ​ພັດທະນາ ​ລ້ວນ​ແຕ່​ເພື່ອ​ມະນຸດ. ມະນຸດ​ເປັນ​​ເປົ້າ​ໝາຍ ກຳລັງ​ໜູນ, ​ເປັນ​ທັງ​ເຈົ້າພາບ​ຂອງ​ການ​ປ່ຽນ​ແປງ​ໃໝ່, ຄວາມ​ໝັ້ນຄົງ ​ແລະ​ການ​ພັດທະນາ.

ກ່ຽວ​ກັບ​ການ​ພົວພັນ​ລະຫວ່າງ​ການປ່ຽນ​ແປງ​ໃໝ່​ທາງເສດຖະກິດ ​ແລະການ​ປ່ຽນ​ແປງ​ໃໝ່​ທາງ​ການ​ເມືອງ: ພັກ​ກອມ​ມູນິດ​ຫວຽດນາມກຳນົດ​ຕ້ອງສຸມ​ໃສ່​ການ​ປ່ຽນ​ແປງ​ໃໝ່ທາງ​ເສດຖະກິດ, ພ້ອມ​ກັນ​ນັ້ນ​ກໍ່​ປ່ຽນ​ແປງ​ໃໝ່​ການຈັດ​ຕັ້ງ​ແລະ​ແບບ​ວິທີ​ການ​ເຄື່ອນ​ໄຫວ​ຂອງ​ລະບົບ​ການ​ເມືອງ​ເທື່ອ​ລະ​ກ້າວ. ສົມທົບ​ຢ່າງ​ແໜ້ນ​ແຟ້ນ​ແຕ່​ເລີ່​ມຕົ້ນ​ການ​ປ່ຽນ​ແປງ​ໃໝ່​ທາງ​ເສດຖະກິດ ກັບ​ການ​ປ່ຽນ​ແປງ​ໃໝ່​ທາງ​ການ​ເມືອງ, ຖື​ເອົາ​ການ​ປ່ຽນ​ແປງ​ໃໝ່​ທາງ​ເສດຖະກິດ​ເປັນ​ຈຸດ​ໜັກ​ໃຈກາງ, ປ່ຽນ​ແປງ​ໃໝ່​ທາງ​ການ​ເມືອງ​ເທື່ອ​ລະ​ກ້າວຢ່າງຮອບ​ຄອບ​ແລະ​ໜັກ​ແໜ້ນ, ຮັກສາ​ສະຖຽນ​ລະ​ພາບ​ທາງ​ການ​ເມືອງ. ການ​ປ່ຽນ​ແປງ​ໃໝ່​ທາງ​ການ​ເມືອງຕ້ອງ​ຄົບ​ຊຸດ​ກັບ​ການ​ປ່ຽນ​ແປງ​ໃໝ່​ທາງ​ເສດຖະກິດ ຕາມ​ເສັ້ນທາງ​ທີ່​ເໝາະ​ສົມ, ດ້ວຍ​ຈຸດ​ໜັກ​ທີ່​ມຸ່ງ​ໄປ​ສູ່​ການ​ບູລະນະ​ລະບຽບ​ກົດໝາຍ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ຊຸກຍູ້​ການ​ປ່ຽນ​ແປງ​ໃໝ່​ປະ​ເທດ​ຢ່າງຮອບດ້ານ​ຕາມ​ເປົ້າ​ໝາຍ “ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ຍຸດຕິ​ທຳ​ແລະ​ສີວິ​ໄລ”. ຖື​ເອົາ​ຜົນ​ຂອງ​ການ​ປະຕິບັດ​ເປົ້າ​ໝາຍ​ນີ້​ເປັນ​ມາດຕະຖານ​ສູງ​ສຸດ​ເພື່ອ​ປະ​ເມີນ​ຜົນ​ຂອງ​ຂະ​ບວນວິວັດ​ການ​ປ່ຽນ​ແປງ​ໃໝ່​ແລະ​ການ​ພັດທະນາ.

ກ່ຽວ​ກັບ​ເສດຖະກິດ​ຕະຫຼາດ ​ແລະ​ການ​ກຳນົດ​ທິສັງຄົມ​ນິຍົມ: ຈຸດ​ບຸກທະລຸ​ໃນຄວາມ​ຮັບ​ຮູ້​ຂອງພັກ​ກອມ​ມູນິດ​ຫວຽດນາມ​ແມ່ນ ​ໄດ້​ຢືນຢັນ​​ເສດຖະກິດ​ຕະຫຼາດບໍ່​ແມ່ນ​ຜະລິດ​ຕະພັນ​ສະ​ເພາະ​ຕ່າງຫາກ​ຂອງລັດທິ​ທຶນ​ນິຍົມ, ​ແຕ່ມັນ​ແມ່ນ​ຜົນສຳ​ເລັດ​ລວມຂອງ​ມະນຸດຊາດ. ​ເສດຖະກິດ​ຕະຫຼາດ​ໂດຍ​ມັນ​ເອງ​ບໍ່​ສາມາດ​ໄປ​ເຖິງ​ລັດທິ​ສັງຄົມ​ນິຍົມ​ໄດ້, ​ແຕ່​ພາລະກິດ​ການ​ກໍ່ສ້າງ​ສັງຄົມ​ນິຍົມຕ້ອງ​ຜ່ານ​ການ​ພັດທະນາ​​ເສດຖະກິດ​ຕະຫຼາດ. ​ເສດຖະກິດ​ຕະຫຼາດກຳ​ນົດທິ​ດສັງຄົມ​ນິຍົມປະຕິບັດ​ຕາມ​ບັນດາ​ກົດ​ເກນ​ຂອງ​​ເສດຖະກິດ​ຕະຫຼາດ, ພ້ອມ​ກັນ​ນັ້ນ​ກໍ່ຖືກ​ກຳນົດ​ທິດ ນຳພາ ດັດ​ປັບ​ໂດຍ​ບັນດາ​ຫຼັກການ​ແລະ​ທາດ​ແທ້​ຂອງ​ລັດທິ​ສັງຄົມ​ນິຍົມ ​ໃນ​ແຕ່ລະ​ໄລຍະ​ການ​ພັດທະນາ. ​ເນື້ອ​ແທ້​ແມ່ນ​ຮັບ​ຮູ້​ແລະ​ໝູນ​ໃຊ້ບັນດາ​ກົດ​ເກນ​ພາວະ​ວິ​ໄສ​ຂອງ​​ເສດຖະກິດ​ຕະຫຼາດ ​ແນ​ໃສ່​ກໍ່ສ້າງ​ລະບຽບ​ກົດໝາຍ​ເສດຖະກິດທີ່ຮັບປະກັນ​ໃຫ້​ພື້ນຖານ​ເສດຖະກິດ​ເຕີບ​ໂຕ, ພັດທະນາ​ຢ່າງ​ໄວວາ, ຍືນ​ຍົງ ​ເພື່ອ​ຜົນ​ປະ​ໂຫຍ​ດຂອງ​ປະ​ເທດ​ຊາດ, ຜົນ​ປະ​ໂຫຍ​ດຂອງ​ປະຊາຊົນ.

ກ່ຽວ​ກັບ​ການພົວພັນ​ລະຫວ່າງ​ການ​ພັດທະນາ​ກຳລັງ​ການ​ຜະລິດ ​ແລະ​ການ​ກໍ່ສ້າງ, ບູລະນະ​ການ​ພົວພັນ​ການ​ຜະລິດ​ສັງຄົມ​ນິຍົມເທື່ອ​ລະ​ກ້າວ: ​ໃນ​ຂະ​ບວນວິວັດ​ການ​ປ່ຽນ​ແປງ​ໃໝ່, ພັກ​ກອມ​ມູນິດ​ຫວຽດນາມ​ໄດ້​ປະຕິບັດ​ການ​ປ່ຽນ​ແປງ​ໃໝ່​ຈິນຕະນະ​ການ, ດັດ​ປັບໂຄງສ້າງຂ​ອງການ​ພົວພັນ​ການ​ຜະລິດ, ພິ​ເສດ​ແມ່ນ​ການ​ພົວພັນ​ກຳມະສິດ, ບັນດາ​ຮູບ​ການ​ກຳມະສິດ ​ແລະ​ພັດທະນາ​ພື້ນຖານ​ເສດຖະກິດ​ຫຼາຍ​ພາກສ່ວນ ​ເພື່ອ​ຮັບປະກັນ​ຄວາມ​ສອດຄ່ອງ​ລະຫວ່າງ​ການ​ພົວພັນ​ການ​ຜະລິດ ກັບ​ລະດັບ​ການ​ພັດທະນາຂອງ​ກຳລັງ​ການ​ຜະລິດ, ​ແນ​ໃສ່​ປົດ​ປ່ອຍ​ແລະ​ຊຸກ​ຍູ້​ໃຫ້​ກຳລັງ​ການ​ຜະລິດ​ພັດທະນາ​ຢ່າງ​ແຂງ​ແຮງ.

ກ່ຽວ​ກັບ​ການ​ພົວພັນ​ລະຫວ່າງ​ລັດ ຕະຫຼາດ ​ແລະ​ສັງຄົມ: ພັກ​ກອມ​ມູນິດ​ຫວຽດນາມກຳນົດ​ວ່າ ນີ້​ແມ່ນ​ການ​ພົວພັນ​ສັດຈະ​ວິພາກ​ລະຫວ່າງ “ສາມ​ເສົາ​ຄ້ຳ” ຂອງ​ລະບຽບ​ກົດໝາຍ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມຢູ່​ຫວຽດນາມ. ​ໃນ​ນັ້ນ, ​ແຕ່ລະ​ເຈົ້າພາບ​ຕ້ອງ​ເສີມ​ຂະຫຍາຍ​ດ້ານດີດ້ານ​ແຮງ ດ້ານ​ຕັ້ງໜ້າຂອງ​ຕົນ​ໃຫ້​ຈົນ​ໄດ້, ພ້ອມ​​ນັ້ນ​ກໍ່ປະສານ​ສົມທົບກັນ​ຢ່າງ​ກົມກຽວ ​ເພື່ອກຳຈັດ​ຈຸດ​ອ່ອນຂໍ້​ຈຳກັດຂອງ​ແຕ່ລະ​ເຈົ້າພາບ, ຕາມ​ຫຼັກການ “ລັດ​ເຂັ້​ມ​ແຂງ - ຕະຫຼາດ​ມີ​ປະສິດທິ​ຜົນ - ສັງຄົມ (ປະຊາຊົນ, ວິ​ສາ​ຫະກິດ, ບັນດາ​ອົງການ​ຈັດ​ຕັ້ງ​ສັງຄົມ...) ຂະຫຍັນ​ຂັນ​ເຄື່ອນ​ແລະ​ປະດິດ​ສ້າງ”.

ກ່ຽວ​ກັບ​ການພົວພັນລະຫວ່າງ​ການ​ເຕີບ​ໂຕ​ເສດຖະກິດ ​ແລະ​ການ​ພັດທະນາ​ວັດທະນະທຳ, ສ້າງ​ຄວາມ​ກ້າວໜ້າ​​ແລະຄວາມ​ຍຸດຕິ​ທຳ​ທາງ​ສັງຄົມ: ພັກ​ກອມ​ມູນິດ​ຫວຽດນາມຍາມ​ໃດ​ກໍ່​ຊາບ​ຊຶມ​ທັດສະນະ​ພັດທະນາ​ເສດຖະກິດ ວັດທະ​ນະ​ທຳ ສັງຄົມ​ເພື່ອ​ມະນຸດ; ການ​ເຕີບ​ໂຕ​ເສດຖະກິດ​ສ້າງ​ແຫຼ່ງພະລັງ​ເພື່ອ​ພັດທະນາ​ວັດທະນະທຳ, ສ້າງ​ຄວາມ​ກ້າວໜ້າ​ແລະ​ຄວາມ​ຍຸດຕິ​ທຳ​ທາງ​ສັງຄົມ; ພ້ອມ​ກັນ​ນັ້ນ ການ​ແກ້​ໄຂ​ບັນດາ​ບັນຫາ​ສັງຄົມ​ເປັນ​ຢ່າງ​ດີ ຈະ​ສ້າງ​ກຳລັງ​ໜູນ​ເພື່ອ​ພັດທະນາ​ເສດຖະກິດ ວັດທະນະທຳ; ການ​ພັດທະນາ​ວັດທະນະທຳ​ຈະ​ສ້າງ​ພື້ນຖານ​ຈິດ​ໃຈ​ສັງຄົມ ​ແລະ​ແຫຼ່ງພະລັງ​ພາຍ​ໃນ​ເພື່ອ​ພັດທະນາ​ຢ່າງ​ຍືນ​ຍົງ.

ກ່ຽວ​ກັບ​ການ​ພົວພັນ​ລະຫວ່າງ​ການ​ກໍ່ສ້າງ​ລັດທິ​ສັງຄົມ​ນິຍົມ ​ແລະ​ປົກ​ປັກ​ຮັກສາ​ປະ​ເທດ​ຊາດ​ສັງຄົມ​ນິຍົມ: ພັກ​ກອມ​ມູນິດ​ຫວຽດນາມຊີ້​ແຈ້ງ: ສ້າງ​ປະ​ເທດ​ໄປ​ຄຽງ​ຄູ່​ກັບ​ຮັກສາ​ປະ​ເທດ. ຮັກສາ​ແມ່ນ​ເງື່ອນ​ໄຂ​ເພື່ອ​ກໍ່ສ້າງ; ການກໍ່ສ້າງສ້າງ​ໃຫ້​ມີ​ກຳລັງ​ແຮງ​ເພື່ອ​ປົກ​ປັກ​ຮັກສາ, ​ແນ​ໃສ່​ຮັບປະກັນ​ໃຫ້​ປະ​ເທດ​ພັດທະນາ​ຢ່າງ​ໄວວາ ຍືນ​ຍົງ, ກຳຈັດ​ປັດ​ເປົ່າ​ໄພ​ແຫ່ງ​ການ​ຖອຍຫຼັງ​ນັບ​ມື້​ນັບ​ຫ່າງ​ໄກທາງ​ດ້ານ​ເສດຖະກິດ; ຕໍ່ສູ້​ຜາບ​ແພ້​ກົນອຸບາຍ ​​ເລ່​ລ່ຽມ “ຫັນປ່ຽນ​ໂດຍ​ສັນຕິ” ຂອງ​ບັນດາ​ອິດ​ທິກຳລັງ​ສັດຕູ; ກີດ​ກັ້ນ​ແລະ​ຍູ້​ຖອຍ​ປະກົດ​ການ​ຕ່າງໆ​ຄື “ຫັນປ່ຽນ​​ໂດຍ​ຕົນ​ເອງ”, “ປ່ຽນ​ແປງ​ໂດຍ​ຕົນ​ເອງ” ຢູ່​ພາຍ​ໃນ.

ກ່ຽວ​ກັບ​ການ​ພົວພັນ​ລະຫວ່າງຄວາມ​ເປັນ​ເອກະລາດ ​ເປັນ​ເຈົ້າ​ຕົນ​ເອງ ​ແລະ​ການເຊື່ອມ​ໂຍງ​ສາ​ກົນ: ພັກ​ກອມ​ມູນິດ​ຫວຽດນາມກຳນົດ​ວ່າ ​ຄວາມ​ເປັນເອກະລາດ ​ເປັນ​ເຈົ້າ​ຕົນ​ເອງ​ແມ່ນ​ບັນຫາ​ທີ່​ມີ​ລັກສະນະ​ຫຼັກການ; ສ້າງ​ຖານະ​ຕຳ​ແໜ່​ງທີ່​ເປັນ​ເອກະລາດ ​ເປັນ​ເຈົ້າ​ຕົນ​ເອງ, ກວມ​ດ້ວຍ​ຄວາມ​ເປັນ​ເອກະລາດ ​ເປັນ​ເຈົ້າ​ຕົນ​ເອງ​ທາງ​ດ້ານ​ການ​ເມືອງ ​ເສດຖະກິດ ວັດທະນະທຳ, ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ, ການ​ຕ່າງປະ​ເທດ... ຄວາມ​ເປັນ​ເອກະລາດ ​ເປັນ​ເຈົ້າ​ຕົນ​ເອງ​ຕິດ​ກັບ​ການ​ເປັນ​ເຈົ້າ​ການ​ແລະ​ຕັ້ງໜ້າ​ເຊື່ອມ​​ໂຍງ​ສາກົນ; ກໍ່ສ້າງ​ເສດຖະກິດ​ທີ່​ເປັນ​ເອກະລາດ ​ເປັນ​ເຈົ້າ​ຕົນ​ເອງ​ໄປ​ຄຽງ​ຄູ່​ກັບ​ການ​ເຊື່ອມ​ໂຍງ​ສາກົນ, ​ເພີ່ມ​ທະວີ​ກຳລັງ​ແຮງ​ຂອງ​ຊາດ, ຍົກ​ສູງ​ຄວາມ​ສາມ​າດ​ແຂ່ງຂັນ​ຂອງ​ພື້ນຖານ​ເສດຖະກິດ; ​ເສີມ​ຂະຫຍາຍ​ກຳລັງ​ແຮງ​ພາຍ​ໃນ, ພ້ອມ​ກັນ​ນັ້ນ​ກໍ່​ຍາດ​​ແຍ່ງ​ເອົາ​ການ​ຊ່ວຍ​ເຫຼືອ​ແລະ​ນຳ​ໃຊ້​ແຫຼ່ງພະລັງ​ພາຍ​ນອກ, ​ເຂົ້າ​ຮ່ວມ​ພວງ​ພະນັງ​ຄຸນຄ່າ​ໃນ​ໂລກ​ຢ່າງ​ມີ​ປະສິດທິ​ຜົນ.

ກ່ຽວ​ກັບ​ການ​ພົວພັນ​ລະຫວ່າງ​ພັກ​ນຳພາ, ລັດ​ຄຸ້ມ​ຄອງ​ບໍລິຫານ, ປະຊາຊົນ​ເປັນ​ເຈົ້າ​ຂອງ: ນີ້​ແມ່ນ​ການ​ພົວພັນ​ການ​ເມືອງ-ສັງຄົມ ​ແລະ​ນິຕິ​ທຳ​ລະຫວ່າງບັນດາ​ເຈົ້າພາບ​ທີ່​ມີ​ບົດ​ບາດ, ຖານະ​ທີ່​ຕັ້ງ​, ພາລະ​ແລະ​ໜ້າ​ທີ່​ທີ່​ຕ່າງ​ກັນ, ​ແຕ່​ລ້ວນ​ແຕ່​ມຸ່ງ​​ສູ່​ເປົ້າ​ໝາຍ ​ເອກະລາດ​ແຫ່ງ​ຊາດ ​ແລະລັດທິ​ສັງຄົມ​ນິຍົມ, ປະຕິບັດປະຊາທິປະ​ໄຕ, ຮັບປະກັນ​ແລະ​ເສີມ​ຂະ​ຫຍາ​ຍສິດ​ເປັນ​ເຈົ້າ​ຂອງ​ຂອງ​ປະຊາຊົນ. ພັກ​ກອມ​ມູນິດ​ຫວຽດນາມ​ເອົາ​ໃຈ​ໃສ່​ເຖິງ​ການ​ປ່ຽນ​ແປງ​ໃໝ່​ແບບ​ວິທີ​ນຳພາ ​ແລະ​ແບບ​ວິທີ​ກຳ​ອຳນາດ, ​ໃນ​ນັ້ນ ຈຸດ​ໜັກ​ແມ່ນ ນຳພາ​ຜ່ານ​ລັດ, ​ດ້ວຍ​ລັດ; ກໍ່ສ້າງ​ລັດ​ແຫ່ງ​ກົດໝາຍ​ສັງຄົມ​ນິຍົມ ​ແລະພື້ນຖານ​ປະຊາທິປະ​ໄຕສັງຄົມ​ນິຍົມ ​ເພື່ອບັງຄັບ​ໃຊ້​ອຳນາດ​ແລະ​ເສີມ​ຂະຫຍາຍສິດ​ເປັນ​ເຈົ້າ​ຂອງ​ຂອງ​ປະຊາຊົນ​ໃນ​ການ​ກໍ່ສ້າງ​ພັກ ລັດ, ​ເຂົ້າ​ຮ່ວມ​ການ​ຕິດຕາມ​ກວດກາ​ແລະ​ຄວບ​ຄຸມ​ອຳນາດ. ການ​ປ່ຽນ​ແປງ​ໃໝ່​ການ​ພົວພັນ​ລະຫວ່າງ​ພັກ​ນຳພາ, ລັດ​ຄຸ້ມ​ຄອງ​ບໍລິຫານ, ປະຊາຊົນ​ເປັນ​ເຈົ້າ​ຂອງ ​ໄດ້​ດຳ​ເນີນ​ຢ່າງ​ຄົບ​ຊຸດ, ​ເປັນ​ເອກະ​ພາບ​ໃນ​ທົ່ວ​ລະບົບ​ການ​ເມືອງ, ​ເຮັດ​ຢ່າງ​ຄົບ​ຊຸດ​ໃນ​ທຸກ​ຂັ້ນ ​ແຕ່​ສູນ​ກາງ​ຈົນ​ຮອດ​ຮາກ​ຖານ. 

ການ​ກຳນົດແລະ​ແກ້​ໄຂ​ບັນດາ​ສາຍ​ພົວພັນ​ໃຫຍ່​ເທິງ​ນີ້ ​ໄດ້​ຂີດ​ໝາຍ​ບາດກ້າວ​ຄືບ​ໜ້າ​ໃໝ່ທາງ​ດ້ານຈິນຕະນາການ​ທິດ​ສະ​ດີ ​ແລະ​ການ​ນຳພາ​ພຶດຕິ​ກຳ​ຂອງພັກ​ກອມ​ມູນິດ​ຫວຽດນາມ ກ່ຽວກັບການ​ປ່ຽນ​ແປງ​ໃໝ່​ແລະພັດທະນາ​ປະ​ເທດ, ກໍ່ສ້າງ​ລັດ​ທິສັງຄົມ​ນິຍົມ. ບັນດາ​ສາຍ​ພົວພັນ​ໃຫຍ່​ນັ້ນກ່ຽວຂ້ອງ​ຢ່າງ​ໃກ້ຊິດ​ກັບ​ເປົ້າ​ໝາຍ​ຂອງ​ການ​ປ່ຽນ​​ແປງ​ໃໝ່ຄື “ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ຍຸດຕິ​ທຳ​ແລະ​ສີວິ​ໄລ”. ການ​ກຳ​ແໜ້ນ​ແລະ​ຊີ້​ນຳ​ແກ້​ໄຂ​ສາຍ​ພົວພັນ​ເຫຼົ່າ​ນີ້​ຢ່າງ​ມີ​ປະສິດທິ​ຜົນ​ ໃນ​ແຕ່ລະ​ໄລຍະ​ແຫ່ງ​ການ​ພັດທະນາແລະ​ໃນ​ທຸ​ກຂົງ​ເຂດ ​ແມ່ນ​ເປັນ​ເງື່ອນ​ໄຂ​ແລະ​ແບບ​ວິທີ​ຮັບປະກັນການ​ປະຕິບັດ​ເປົ້າ​ໝາຍ​ການ​ປ່ຽນ​ແປງ​ໃໝ່ ດ້ວຍ​ລະດັບ​ນັບ​ມື້​ນັບ​ສູງກວ່າ, ມີ​ປະສິດທິ​ຜົນ​ຫຼາຍ​ກວ່າ ​ແລະ​ຍືນ​ຍົງ​ກວ່າ​ອີກ.

​ແຕ່​ວ່າ, ຜ່ານ​ສະພາບ​ຄວາມ​ເປັນ​ຈິງ​ໄດ້​ໃຫ້​ເຫັນ​ວ່າ ການ​ຮັບ​ຮູ້​ແລະ​ແກ້​ໄຂ​ສາຍ​ພົວພັນ​ຕ່າງໆ​ຕ້ອງ​ໄດ້ດຳ​ເນີນ​ປະຕິບັດ​ຢ່າງ​ຄົບ​ຊຸດ, ​ໂດຍ​ສະ​ເພາະ​ແມ່ນ ​ສາຍ​ພົວພັນ​ລະຫວ່າງ​​ເສດຖະກິດ​ຕະຫຼາດ ​ແລະ​ກຳ​ນົດ​ທິດ​ສັງຄົມ​ນິຍົມ; ລະຫວ່າງ​ບົດບາດ​ຂອງ​ລັດ, ຕະຫຼາດ ​ແລະ​ສັງຄົມ... 

2- ​ເບິ່ງ​ລວມ, ຜ່ານ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່ ຫວຽດນາມ​ໄດ້​ບັນລຸ​ຜົນສຳ​ເລັດ​ທີ່​ຍິ່ງ​ໃຫຍ່, ມີ​ຄວາມ​ໝາຍ​ປະຫວັດສາດ.

ການ​ປ່ຽນ​ແປງ​ໃໝ່​ມີ​ຄວາມ​ສຳຄັນ​ແລະ​ຄວາມ​ໝາຍ​ປະຕິວັດ​ທີ່​ເລິກ​ເຊິ່ງ ຮອບດ້ານ, ​ແມ່ນ​ພາລະກິດ​ອັນ​ຍິ່ງ​ໃຫຍ່​ເພື່ອ​ເປົ້າ​ໝາຍ “ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ຍຸດຕິ​ທຳ​ແລະ​ສີວິ​ໄລ”. ພາບ​ຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ຫວຽດນາມ​ໄດ້​ກາຍ​ເປັນ​ປະ​ເທດກຳລັງ​ພັດທະນາ ທີ່​ມີ​ລາຍ​ໄດ້​ປານ​ກາງ; ພວມ​ຍູ້​ແຮງ​ການ​ຫັນ​ເປັນ​ອຸດສາຫະກຳ ທັນ​ສະ​ໄໝ ​ແລະ​​ເຊື່ອມ​ໂຍງ​ສາກົນ. ການ​ເຕີບ​ໂຕ​ທາງ​ເສດຖະກິດ​ດີ​ພໍ​ຄວນ, ພື້ນຖານ​ເສດຖະກິດ​ຕະຫຼາດ​ກຳ​ນົດທິດ​ສັງຄົມ​ນິຍົມກຳລັງ​ເປັນ​ຮູບ​ເປັນຮ່າງ​ຂຶ້ນແລະ​ພັດທະນາ​ເທື່ອ​ລະ​ກ້າວ. ວັດທະນະທຳ-ສັງຄົມ​ໄດ້​ພັດທະນາ​ຂຶ້ນ, ວຽກ​ງານ​ແກ້​ໄຂ ​ຫຼຸດຜ່ອນ​ຄວາມທຸກ​ຍາກບັນລຸ​ຜົນສຳ​ເລັດ​ທີ່​ສຳຄັນ, ປະຕິບັດ​ສຳ​ເລັດຢ່າງ​ໄວ​​ຫຼາຍ​ເປົ້າ​ໝາຍ​ການ​ພັດທະນາ​ສະຫັດ​ສະ​ວັດຂອງ​ສະຫພປະຊາ​ຊາດ, ​ໄດ້​ຮັບ​ການ​ຊົ​ມ​ເຊີຍ​ຈາກ​ສາກົນ; ຮູບຊົງ​ຂອງ​ປະ​ເທດ​ແລະ​ຊີວິດ​ຂອງ​ປະຊາຊົນ​ໄດ້​ປ່ຽນ​ແປງ​ຢ່າງຫຼວງຫຼາຍ. ການ​ເມືອງ-ສັງຄົມມີ​ສະຖຽນ​ລະ​ພາບ; ການ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ສະຫງົບ​ໄດ້​ຮັບ​ການ​ເພີ່ມ​ທະວີ. ປະຊາທິປະ​ໄຕສັງຄົມ​ນິຍົມ​ໄດ້​ຮັບ​ການ​ເສີມຂະຫຍາຍ​ແລະ​ນັບ​ມື້​ນັບ​ເປີດ​ກວ້າງ. ຄວາມ​ສາມັກຄີ​ປວງ​ຊົນ​ທັງ​ຊາດ​ໄດ້​ຮັບ​ການ​ປັບປຸງ​ແລະ​ເພີ່ມ​ທະວີ. ວຽກ​ງານ​ກໍ່ສ້າງ​ພັກ, ກໍ່ສ້າງ​ລັດ​​ແຫ່ງ​ອຳນາດ​ກົດໝາຍສັງຄົມ​ນິຍົມ ​ແລະ​ລະບົບ​ການ​ເມືອງ​ທັງ​ໝົດ ​ໄດ້​ຮັບ​ການ​ຍູ້​ແຮງ. ຄວາມ​ເຂັ້ມ​ແຂງ​ໃນ​ທຸກ​ດ້ານ​ຂອງ​ປະ​ເທດ​ໄດ້​​ເພີ່ມ​ຂຶ້ນ. ການ​ພົວພັນ​ຕ່າງປະ​ເທດ​ໄດ້​ເປີດ​ກວ້າງ ​ແລະ​ນັບ​ມື້​ນັບ​ເຂົ້າ​ສູ່​ລວງ​ເລິກ. ການ​ພົວພັນ​ກັບ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ​ແລະ​ບັນດາ​ປະ​ເທດ​ໃນ​ອາ​ຊຽນ ​ໄດ້​ຮັບ​ການ​ປັບປຸງ. ຫວຽດນາມ​ໄດ້​ສ້າງ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ, ຄູ່​ຮ່ວມ​ມື​ຮອບດ້ານ​ກັບບັນດາ​ປະ​ເທດ​ໃຫຍ່, ປະ​ເທດ​ທີ່​ສຳຄັນ​ທັງ​ໝົດ​ໃນ​ໂລກ; ​ໄດ້​ເປັນ​ເຈົ້າ​ການ​ແລະ​ຕັ້ງໜ້າ​ເຂົ້າ​ຮ່ວມ​ໃນ​ວຽກ​ງານ​ທົ່ວ​ໄປຂອງ​ປະຊາ​ຄົມ​​ໂລກ, ​ໃນ​ບັນດາ​ເວທີ​ປາ​ໄສ ບັນດາ​ອົງການ​ຈັດ​ຕັ້ງ​ພາກ​ພື້ນ​ແລະ​ສາກົນ, ຍົກ​ສູງ​ຖານະບົດບາດຂອງ​ປະ​ເທດ.

​ໃນ​ຊຸມ​ປີ​ທີ່​ຜ່ານ​ມາ, ​ເສດຖະກິດ​ມະຫະພາກສືບ​ຕໍ່​ມີ​ຄວາມ​ໝັ້ນຄົງ, ຄວາມ​ສົມ​ດຸນ​ທີ່​ສຳຄັນຂອງພື້ນຖານ​ເສດຖະກິດ​ ໄດ້​ຮັບ​ການ​ຮັບປະກັນ​ໂດຍ​ພື້ນຖານ; ຍອດ​ມູນ​ຄ່າ​ການ​ສົ່ງ​ອອກ-ນຳ​ເຂົ້າ​​ໃນ​ປີ 2017 ບັນລຸ 425 ຕື້​ໂດ​ລາ​ສະຫະລັດ, ສູງ​ກວ່າ​ທຸກປີ​ທີ່​ຜ່ານ​ມາ. ການ​ຜະລິດ ທຸລະ​ກິດ​ໄດ້​ຟື້ນ​ຟູ​ແລະ​ພັດທະນາ​ຢ່າງຮອບດ້ານ​ທັງ 3 ຂົງ​ເຂດ: ອຸດ​ສາ​ຫະກຳ, ກະສິກຳ ​ແລະ​ບໍລິການ. ຂົງ​ເຂດ​ວັດທະນະທຳ-ສັງຄົມ​​ມີ​ຄວາມ​ກ້າວໜ້າຢ່າງ​ຕໍ່​ເນື່ອງ. ຄວາມ​ປອດ​ໄພ​ສັງຄົມ​ແລະ​ສະ​ວັດ​ດີກາ​ນສັງຄົມ ​ໄດ້​ຮັບ​ຄວາມ​ເອົາ​ໃຈ​ໃສ່​ປົວ​ແປງ, ຮັບປະກັນ​ໄດ້​ດີກ​ວ່າ​ແຕ່​ກ່ອນ. ວຽກ​ງານ​ກໍ່ສ້າງ ປັບປຸງ​ພັກ, ປັບປຸງລະບົບ​ການ​ເມືອງ, ​ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຕ້ານຄວາມຟຸມ​ເຟືອຍ ອາດຍາ​ສິດ ຄວາມ​ຫຍໍ້​ທໍ້ ​ໄດ້​ຮັບ​ການ​ຊີ້​ນຳ​ນຳພາ​ຂອງພັກ​ແລະ​ລັດ​ເພື່ອ​ປະຕິບັດຢ່າງ​ເດັດ​ດ່ຽວຂຸ້ນຂ້ຽວ​ໃນ​ຫຼາຍ​ປີ​ທີ່​ຜ່ານ​ມາ, ​ໄດ້​ຮັບ​ການ​ຍູ້​ແຮງ​ກວ່າ​ອີກ​ໃນ​ເວລາ​ຜ່ານ​ມາ​ມໍ່​ນີ້ ​ແລະ​ບັນລຸ​ຜົນສຳ​ເລັດ​ຕົວ​ຈິງ​ເບື້ອງຕົ້ນ​ຫຼາຍ​ຢ່າງ, ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ​ແລະ​ສະໜັບສະໜູນ​ຈາກ​ປະຊາຊົນ; ຄວາມ​ໄວ້​ວາງ​ໃຈ​ຂອງ​ປະຊາຊົນ​ຕໍ່​ພັກ​ແລະ​ລັດ​ເພີ່ມ​ຂຶ້ນ... ຜົນສຳ​ເລັດ​ເຫຼົ່າ​ນັ້ນຢືນຢັນ​ວ່າ​ແນວທາງ​ການ​ປ່ຽນ​ແປງ​ໃໝ່​ຂອງ​ພັກ​ແມ່ນ​ຖືກຕ້ອງ​ແລະປະດິດ​ສ້າງ; ສ້າງ​ປະຖົມ​ປັດ​ໄຈ, ຮາກ​ຖານ​ທີ່​ສຳຄັນ​ເພື່ອ​ໃຫ້​ປະ​ເທດ​ສືບ​ຕໍ່​ການ​ປ່ຽນ​ແປງ​ໃໝ່ ​ແລະ​ພັດທະນາ​ຢ່າງ​ແຂງ​ແຮງ​ໃນ​ຊຸມ​ປີ​ຕໍ່​ໄປ.

​​ເຖິງ​ຢ່າງນັ້ນ​ກໍ່ຕາມ, ການ​ປ່ຽນ​ແປງ​ໃໝ່​ກໍ່ຍັງ​ບໍ່​ທັນ​ຄົບ​ຊຸດ​ຮອບດ້ານ. ບາງ​ຄາດໝາຍ, ຕົວ​ຊີ້​ວັດ​ໃນ​ເປົ້າ​ໝາຍ​ສູ້​ຊົນພາ​ໃຫ້​ຫວຽດນາມ​​ ໂດຍ​ພື້ນຖານກາຍ​ເປັນ​ປະ​ເທດ​ອຸດສາຫະກຳ​ຕາມ​ທິດ​ທັນ​ສະ​ໄໝນັ້ນ​ ແມ່ນ​ບໍ່​ບັນລຸ​ຜົນ. ສະມັດຖະພາບ, ຄຸນ​ນະພາບ, ປະສິດທິ​ຜົນ, ​ຄວາມ​ສາມາດແຂ່ງຂັນ ຂອງ​ພື້ນຖານ​ເສດຖະກິດ​ຍັງຕ່ຳ. ຂໍ້​ຈຳ​ກັບ ຈຸດ​ອ່ອນ​ຫຼາຍ​ຢ່າງ ​ໃນ​ບັນດາ​ຂົງ​ເຂດ​ການ​ສຶກສາ​ແລະ​ຝຶກ​ອົບຮົມ, ວິທະຍາສາດ​ແລະ​ເຕັກ​ໂນ​ໂລ​ຊີ, ວັດທະນະທຳ, ສັງຄົມ, ສາທາລະນະ​ສຸກ ​ໄດ້​ຮັບ​ການ​ແກ້​ໄຂ​ຜ່ານ​ຜ່າ​ຢ່າງ​ຊັກ​ຊ້າ. ວຽກ​ງານການ​ຄາດ​ຄະ​ເນ, ວາງກຳນົດ​ນະ​ໂຍບາຍ ​ແລະ​ນຳພາ​ຈັດ​ຕັ້ງ​ປະຕິບັດ​ນະ​ໂຍບາຍ​ຂອງ​ພັກ - ລັດ, ປະສິດທິພາບ, ປະສິດທິ​ຜົນ​ຂອງ​ການ​ຄຸ້ມ​ຄອງ​ບໍລິຫານ​ລັດ, ຄຸ້ມ​ຄອງ​ການ​ພັດທະນາ​ສັງຄົມ ຍັງ​ມີ​ຈຸດ​ອ່ອນ​ຫຼາຍ. ການ​ເຊື່ອມ​ໂຍງ​ສາກົນ​ໃນ​ດ້ານ​ໃດ​ດ້ານ​ໜຶ່ງ​ຍັງ​ບໍ່​ເປັນ​ເຈົ້າ​ການ, ປະສິດທິ​ຜົນ​ບໍ່​ສູງ... ນັ້ນ​ແມ່ນ​ບັນດາ​ບັນຫາ​ທີ່​ພັກ​ກອມ​ມູນິດ​ຫວຽດນາມພວມ​ສຸມ​ໃສ່ນຳພາ​ເພື່ອ​ແກ້​ໄຂ​ຜ່ານ​ຜ່າ.

3- ຈາກ​ຄວາມ​ສຳ​ເລັດ ແລະບໍ່​ປະສົບ​ຄວາມ​ສຳ​ເລັດ​ ຜ່ານ 30 ກວ່າ​ປີ​ແຫ່ງການ​ປ່ຽນ​ແປງ​ໃໝ່ນັ້ນ, ພັກ​ກອມ​ມູນິດ​ຫວຽດນາມ​ໄດ້​ຖອດ​ຖອນ​ບົດຮຽນ​ທີ່​ສຳຄັນຈຳນວນ​ໜຶ່ງ:

ທີ​ໜຶ່ງ, ​ໃນ​ຂະ​ບວນວິວັດ​ການ​ປ່ຽນ​ແປງ​ໃໝ່ ຕ້ອງ​ເປັນ​ເຈົ້າ​ການ, ປະດິດ​ສ້າງ​ຢ່າງ​ບໍ່​ຢຸດ​ຢັ້ງ ບົມພື້ນຖານຢຶດໝັ້ນ​ເປົ້າ​ໝາຍ​ເອກະລາດ​ແຫ່ງ​ຊາດ ​ແລະລັດທິ​ສັງຄົມ​ນິຍົມ, ໝູນ​ໃຊ້​​ແລະ​ພັດທະນາ​ລັດທິ​ມາກ-​ເລ​ນິນ, ​ແນວ​ຄິດ ​ໂຮ່ຈີ​ມິນ ຢ່າງ​ປະດິດ​ສ້າງ, ສືບ​ທອດ​ແລະ​ເສີມ​ຂະຫຍາຍ​ມູນ​ເຊື້ອ​ຂອງ​ຊາດ, ຮັບ​ເອົາ​ແກ່ນສານ​ຂອງ​ວັດທະນະທຳ​ຂອງ​ມະນຸດ, ໝູນ​ໃຊ້​ບົດຮຽນ​ສາກົນ​ທີ່​ສອດຄ່ອງ​ກັບ​ຫວຽດນາມ. ການ​ປ່ຽນ​ແປງ​ໃໝ່​ຕ້ອງ​​ໝັ້ນຄົງ, ບໍ່​ປ່ຽນ​ແປງ​ເປົ້າ​ໝາຍ, ຮາກ​ຖານ​ແນວ​ຄິດ, ພ້ອມ​ນັ້ນ ຕ້ອງ​ມີ​ຄວາມ​ຄິດ​ສ້າງສັນ​ສະ​ເໝີ​ໃນ​ຂະ​ບວນການຈັດ​ຕັ້ງ​ປະຕິບັດ​ແນວທາງ​ການ​ປ່ຽນ​ແປງ​ໃໝ່​ຂອງ​ພັກ.

ທີ​ສອງ, ການ​ປ່ຽນ​ແປງ​ໃໝ່​ຕ້ອງ​ຊາບ​ຊຶມ​ທັດສະນະ “ປະຊາຊົນ​​ແມ່ນ​​ຮາກ”, ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ, ອີງ​ໃສ່​ປະຊາຊົນ, ​ເສີມ​ຂະຫຍາຍ​ບົດບາດ​ເປັນ​ເຈົ້າ ຈິດ​ໃຈ​ຮັບຜິດຊອບ ຄວາມ​ຄິດ​ສ້າງສັນ ​ແລະ​ແຫຼ່ງພະລັງ​ທຸກ​ຢ່າງ​ຂອງ​ປະຊາຊົນ; ​ເສີມ​ຂະຫຍາຍ​ກຳລັງ​ແຮງ​​ແຫ່ງ​ຄວາມ​ສາມັກຄີ​ປວງ​ຊົນທັງ​ຊາດ. ການ​ປ່ຽນ​ແປງ​ໃໝ່​ຫາກ​ຫ່າງ​ເຫີ​ນ, ຂັດ​ຂືນກັບ​ຜົນ​ປະ​ໂຫຍ​ດຂອງ​ປະຊາຊົນ ກໍ່​ຈະ​ຖືກ​ປະລາ​ໄຊ. ຄວາມ​ຄິດ​ເຫັນ, ຄວາມ​ປາຖະໜາ ​ແລະ​ການ​ເຄື່ອນ​ໄຫວ​ປະດິດ​ສ້າງ​ຂອງ​ປະຊາຊົນທີ່​ເກີດ​ຂຶ້ນຈາກຄວາມ​ເປັນ​ຈິງ ​ເປັນ​ໜຶ່ງ​ໃນ​ບັນດາ​ພື້ນຖານ​ເພື່ອວາງ​ແນວທາງ​ການ​ປ່ຽນ​ແປງ​ໃໝ່​ຂອງ​ພັກ. ການ​ປ່ຽນ​ແປງ​ໃໝ່​ຕ້ອງ​ອີງ​ໃສ່​ປະຊາຊົນສະ​ເໝີ, ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງ​ປະຊາຊົນ, ຮັບປະກັນ​ໃຫ້​ອຳນາດ​ທັງ​ໝົດ​ເປັນ​ຂອງ​ປະຊາຊົນ.

ທີ​ສາມ, ການ​ປ່ຽນ​ແປງ​ໃໝ່​ຕ້ອງ​ຮອບດ້ານ ຄົບ​ຊຸດ, ມີ​ບາດກ້າວຂັ້ນ​ຕອນ​ທີ່​ເໝາະ​ສົມ; ຕ້ອງ​​ເຄົາລົບ​ກົດ​ເກນ​ພາວະ​ວິ​ໄສ, ​ເລີ່​ມຈາກ​ຄວາມ​ເປັນ​ຈິງ, ຕິດ​ແທດ​ກັບ​ຄວາມ​ເປັນ​ຈິງ, ​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ສະຫຼຸບ​ສັງ​ລວມພຶດ​ຕິ​ກຳ, ຄົ້ນ​ຄວາມ​ທິດ​ສະ​ດີ, ສຸມ​ໃສ່​ແກ້​ໄຂ​ບັນດາ​ບັນຫາ​ທີ່​ຄວາມ​ເປັນ​ຈິງ​ວາງ​ອອກ​ມາ​​ໃຫ້​ໄດ້​ຢ່າງ​ທັນ​ການ​ແລະ​ມີ​ປະສິດທິ​ຜົນ. ຖື​ການ​ພັດທະນາ​ຂອງ​ຄວາມ​ເປັນ​ຈິງ​ແມ່ນ​ຄວາມ​ຮຽກຮ້ອງ​ຕ້ອງການ ​ແລະ​ພື້ນຖານ​ເພື່ອ​ປ່ຽນ​ແປງ​ໃໝ່​ຈິນຕະນາການ​ທິດ​ສະ​ດີ, ​ແນວທາງ, ​ແຜນ​ນະ​ໂຍບາຍ, ກົນ​ໄກ, ນະ​ໂຍບາຍ​ຂອງ​ພັກ​ແລະ​ລັດ. ຕ້ອງ​ຕິດ​ແທດ​ກັບ​ຄວາມ​ເປັນ​ຈິງ, ​ໃຫ້​ຄວາມ​ສຳຄັນ​ແກ່​ການ​ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ​ ເພື່ອດັດ​ປັບ ​ເພີ່ມ​ເຕີມ ພັດທະນາ​ແນວທາງ​ການ​ປ່ຽນ​ແປງ​ໃໝ່. ​ໃນ​ຂະ​ບວນການ​ປ່ຽນ​ແປງ​ໃໝ່​ຕ້ອງ​ເອົາ​ໃຈ​ໃສ່​ເປັນ​ສຳຄັນ​ເຖິງວຽກ​ງານ​ຈັດ​ຕັ້ງ​ປະຕິບັດ ດ້ວຍ​ບາດກ້າວ ຮູບ​ການ ​ແລະວິທີ​ທີ່​ເໝາະ​ສົມ ມີ​ປະສິດທິ​ຜົນ; ​ແກ້​ໄຂ​ຜ່ານ​ຜ່າສະພາບ​ການ​ຊັກ​ຊ້າ, ຮັກສາ​ເດີມ, ຮ້ອນຮົນ, ອັດຕະວິ​ໄສ, ​ເຈດ​ຈຳນົງ​ນິຍົມ, ພ້ອມ​ນັ້ນ ຕ້ອງ​ເປັນ​ເຈົ້າ​ການ, ຂະຫຍັນ​ຂັນ​ເຄື່ອນ, ປະດິດ​ສ້າງ​ຢ່າງ​ບໍ່​ຢຸດ​ຢັ້ງ.

ທີ​ສີ່, ຕ້ອງ​ຕັ້ງ​ຜົນ​ປະ​ໂຫຍ​ດຂອງ​ຊາດ-ປະ​ເທດ​ຊາດ​ຂຶ້ນ​ເໜືອ​ສຸດ; ຢຶດໝັ້ນ​ຄວາມ​ເປັນເອກະລາດ ​ເປັນ​ເຈົ້າ​ຕົນ​ເອງ, ພ້ອມນັ້ນກໍ່​ເປັນ​ເຈົ້າ​ການ ​ແລະ​ຕັ້ງໜ້າ​ເຊື່ອມ​ໂຍງ​ສາກົນ ບົນ​ພື້ນຖານ​ສະ​ເໝີ​ພາບ, ຜົນ​ປະ​ໂຫຍດຮ່ວມ​ກັນ; ສົມທົບ​ເສີມ​ຂະຫຍາຍ​ກຳລັງ​ແຮງ​ຂອງ​ຊາດ​ ກັບ​ກຳລັງ​ແຮງ​ຂ​ອງຍຸກ​ສະ​ໄໝ ​ເພື່ອ​ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາ​ຫວຽດນາມ​ສັງຄົມ​ນິຍົມ​ໄວ້​ຢ່າງ​ໝັ້ນຄົງ. ​ໃນ​ທຸກ​ສະຖານະ​ການ ຕ້ອງ​ຢຶດໝັ້ນ​ຄວາມ​ເປັນ​ເອກະລາດ ​ເປັນ​ເຈົ້າ​ຕົນ​ເອງ ພ້ອມ​ນັ້ນ​ກໍ່​ເປັນ​ເຈົ້າ​ການແລະຕັ້ງໜ້າ​ເຊື່ອມ​ໂຍງ​ສາກົນ. ສົມທົບ​ເສີມ​ຂະຫຍາຍ​ກຳລັງ​ແຮງ​ຂອງ​ຊາດ​ ກັບ​ກຳລັງ​ແຮງ​ຂອງ​ຍຸກ​ສະ​ໄໝ, ກຳລັງ​ແຮງ​ໃນ​ປະ​ເທດ ​ກັບ​ກຳລັງ​ແຮງ​ສາກົນ ​​ແນ​ໃສ່​ສ້າງ​ເປັນ​ກຳລັງ​ແຮງ​ສັງ​ລວມເພື່ອພັດທະນາ​ປະ​ເທດ​ຢ່າງ​ໄວວາ​ແລະ​ຍືນ​ຍົງ, ປົກ​ປັກ​ຮັກສາ​ປະ​ເທດ​ຊາດ​ຫວຽດນາມ​ໄວ້​ຢ່າງ​ໝັ້ນຄົງ. 

ທີ​ຫ້າ, ຕ້ອງ​ປ່ຽນ​ແປງ​ໃໝ່​ດ້ວຍ​ຕົນ​ເອງ ປັບປຸງ​ຕົວ​ເອງ​ຢ່າງ​ເປັນ​ປະຈຳ ​ເພື່ອ​ຍົກ​ສູງ​ຄວາມ​ສາມາດ​ນຳພາ​ແລະ​ກຳລັງ​ແຮງ​ສູ້​ຮົບ​ຂອງ​ພັກ; ກໍ່ສ້າງ​ຖັນ​ແຖວ​ພະນັກງານ, ​ເປັນ​ຕົ້ນ​ແມ່ນ​ຖັນ​ແຖວ​ພະນັກງານ​ຂັ້ນ​ຍຸດ​ທະ​ສາດ​ໃຫ້​ມີ​ຄຸນ​ທາດ ຄວາມ​ສາມາດ ​ແລະ​ກຽດ​ສັກ​ສີ​ຢ່າງ​ພຽງພໍ, ທຽບ​ເທົ່າ​ກັບ​ລະດັບ​ໜ້າ​ທີ່; ຍົກ​ສູງ​ປະສິດທິພາບ, ປະສິດທິ​ຜົນ​ການ​ເຄື່ອນ​ໄຫວ​ຂອງ​ລັດ, ​ແນວ​ໂຮມ​ປະ​ເທດ​ຊາດ​ຫວຽດນາມ, ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ແລະ​ຂອງ​ລະບົບ​ການ​ເມືອງ​ທັງ​ໝົດ; ​ເພີ່ມ​ທະວີ​ສາຍ​ພົວພັນ​ສະໜິດ​ແໜ້ນ​ກັບ​ປະຊາຊົນ. ການ​ປ່ຽນ​ແປງ​ໃໝ່​ແມ່ນ​ພາລະກິດ​ປະດິດ​ສ້າງ​ທີ່​ຍິ່ງ​ໃຫຍ່, ການ​ນຳພາ​ທີ່​ຖືກຕ້ອງ​ຂອງ​ພັກ​ແມ່ນ​ປັດ​ໄຈ​ຕັດສິນຊີ້​ຂາດ​ຄວາມ​ສຳ​ເລັດ​ຂອງ​ການ​ປ່ຽນ​ແປງ​ໃໝ່. ດັ່ງ​ນັ້ນ ຕ້ອງ​ປ່ຽນ​ແປງ​ໃໝ່​ແລະ​ຍົກ​ສູງ​ຄວາມ​ສາ​ມາກ​ນຳພາ ກຳ​ອຳນາດ​ຂອງ​ພັກຢ່າງ​ເປັນ​ປະຈຳ; ກໍ່ສ້າງ​ພັກ​ໃຫ້​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ. ປັບປຸງ​ການຈັດ​ຕັ້ງ, ຍົກ​ສູງ​ປະສິດທິພາບ​ແລະ​ປະສິດທິ​ຜົນ​ການ​ເຄື່ອນ​ໄຫວ​ຂອງ​ລັດ​ຢ່າງ​ເປັນ​ປະຈຳ. ​ເສີມ​ຂະຫຍາຍ​ບົດບາດ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ​ບັນດາ​ອົງຄະ​ນະມະຫາຊົນ​ ໃນ​ການ​ເຕົ້າ​ໂຮມປະຊາຊົນ, ​ເສີມ​ຂະຫຍາຍ​ກຳລັງ​ແຮງ​ຂອງ​ກຸ່ມ​ກ້ອນ​ມະຫາ​ສາ​ມັກປວງ​ຊົນ​ທັງ​ຊາດ ​ເພື່ອປະຕິບັດ​ພາລະກິດ​ປ່ຽນ​ແປງ​ໃໝ່ປະສົບ​ຜົນສຳ​ເລັດ.

​ໄລຍະ​ເວລາ​ການ​ພັດທະນາ​ໃໝ່​ຮຽກຮ້ອງ​ໃຫ້ພັກ​ກອມ​ມູນິດ​ຫວຽດນາມ, ລະບົບ​ການ​ເມືອງ​ທັງ​ໝົດ ພ້ອມ​ກັບ​ປະຊາຊົນ​ຫວຽດນາມ​ທັງ​ປວງ ຕ້ອງ​ຕັດສິນ​ໃຈ​ສູ້​ຊົນ, ຍົກ​ສູງຫຼັກ​ໝັ້ນ​ການ​ເມືອງ ຄວາມ​ສູງ​ຂອງ​ພູມ​ປັນຍາ ຄຸນສົມບັດ​ສິນ​ທຳ ​ເພື່ອສຳ​ເລັດ​ພາລະ​ກຳ​ປະຫວັດສາດ​ຕໍ່​ຊາດ-ປະ​ເທດ​ຊາດ; ພ້ອມ​ນັ້ນ​ຕ້ອງ​ປະດິດ​ສ້າງ ປ່ຽນ​ແປງ​ໃໝ່​ຢ່າງ​ບໍ່​ຢຸດ​ຢັ້ງ ບົນ​ພື້ມຖານ​ໝູນ​ໃຊ້​ແລະ​ພັດທະນລັດທິ​ມາກ-​ເລ​ນິນ, ​ແນວ​ຄິດ ​ໂຮ່ຈີ​ມິນ​ຢ່າງ​ປະດິດ​ສ້າງ; ຕິດຕາມ​​ຄວາມ​ເປັນ​ຈິງ​ຂອງ​ປະ​ເທດ​ແລະ​ທົ່ວ​ໂລກຢ່າງ​ໃກ້ຊິດ; ຄົ້ນຄວ້າ​ທາ​ບທາມ​ປະສົບ​ການ​ຂອງຕ່າງປະ​ເທດ​ ເພື່ອກຳນົດ​ແນວທາງ ນະ​ໂຍບາຍ​ທີ່ຖືກຕ້ອງ, ສອດຄ່ອງ​ເໝາະສົມ​ກັບ​ສະພາບ​ການ​ໃໝ່, ກໍ່ສ້າງ​ຫວຽດນາມ​ໃຫ້​ເປັນ​ປະ​ເທດ​ທີ່ “ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ຍຸດຕິ​ທຳ​ແລະ​ສີວິ​ໄລ”. ​ຂ້າພະ​ເຈົ້າ​ຫວັງ​ວ່າ ຜ່ານ​ກອງ​ປະຊຸມ​ສຳ​ມະ​ນາ​ຄັ້ງ​ນີ້, ພວກ​ຂ້າພະ​ເຈົ້າ​ຈະ​ຮຽນ​ຮູ້ສິ່ງ​ທີ່​ເປັນ​ປະ​ໂຫຍ​ດຫຼາຍ​ຢ່າງ​ຈາກ​ພຶດຕິ​ກຳ​ແຫ່ງ​ການ​ເປີດ​ປະຕູ​ປະຕິ​ຮູບ​ຂອງ​ພັກ​ກອມ​ມູນິດ​ຈີນ. ຜົນຂອງ​ກອງ​ປະຊຸມ​ສຳ​ມະ​ນາ​ຈະ​ປະກອບສ່ວນ​ປັບປຸງ, ​ເພີ່ມ​ທະວີ​ສາຍ​ພົວພັນທີ່​ເປັນ​ມູນ​ເຊື້ອ, ມິດ​ສະ​ຫາຍອ້າຍ​ນ້ອງ ລະຫວ່າງ​ສອງ​ພັກ, ສອງ​ລັດ ​ແລະ​ປະຊາຊົນ​ສອງ​ປະ​ເທດ./.

​ໂດຍ ຫວໍ​ວັນ​ເຖືອ​ງ

ກຳມະການ​ກົມ​ການ​ເມືອງ, ​ເລຂາທິການ​ສູນ​ກາງ​ພັກ,
ຫົວໜ້າ​ຄະນະ​ໂຄສະ​ນະ​ອົບຮົມ​ສູນ​ກາງ

------------------------

(1), (2) ​ເອກະສານກອງ​ປະຊຸມ​ໃຫຍ່​ໃນ​ສະ​ໄໝ​ແຫ່ງ​ການ​ປ່ຽນ​ແປງ​ໃໝ່, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2005, ໜ້າ 481, 459.

(3) ​ເອກະສານ​ກອງ​ປະຊຸມ​ຄະນະ​ບໍລິຫານ​ງານ​ສູນ​ກາງ​ຄັ້ງ​ທີ 5 ສະ​ໄໝ​ທີ XII, ຫ້ອງ​ວ່າການ​ສູນ​ກາງ​ພັກ, ຮ່າ​ໂນ້ຍ, 2017, ໜ້າ 29.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ