ວັນອັງຄານ, 22/10/2019
ພັກເຂັ້ມແຂງ, ປະເທດພັດທະນາ, ປະຊາຊາດຍືນຍົງຍາວນານ
11/3/2019 6:54' ສົ່ງ ພິມ
ສະຫາຍ ຫງວຽນຝູຈ້ອງ ເລຂາທິການໃຫຍ່ສູນກາງພັກ, ປະທານປະເທດຫວຽດນາມ (ພາບ: TTXVN)

ອຳ​ລາ​ປີ 2018, ຫັນ​ເບິ່ງ​ຄືນ​ຫຼັງ 3 ປີ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ພວກ​ເຮົາ​ຮູ້ສຶກ​ດີ​ໃຈ​ທີ່​ສຸດ​ຕໍ່​ບັນດາ​ຜົນງານ​ທີ່​ປະ​ເທດ​ເຮົາ​ຍາດ​ມາ​ໄດ້, ​ໂດຍ​ສະ​ເພາະ​ການ​ພັດທະນາ​ເສດຖະກິດ-ສັງຄົມ; ການ​ກໍ່ສ້າງ, ປັບປຸງ​ພັກ; ຮັບປະກັນ​ການ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ; ຮັກສາ​ສັນຕິພາບ, ສະຖຽນ​ລະ​ພາບ​ຂອງ​ປະ​ເທດ​ຊາດ; ​ເປີດ​ກວ້າງ​ການ​ພົວພັນ​ຕ່າງປະ​ເທດ, ​ເປັນ​ເຈົ້າ​ການ​ແລະ​ຕັ້ງໜ້າ​ເຊື່ອມ​ໂຍງ​ສາກົນ.

ຮູບ​​ທັດສະ​ນິຍະ​ພາບ​ທາງເສດຖະກິດ-ສັງຄົມ ສືບ​ຕໍ່​ຈະ​ເລີ​ນຮຸ່ງ​ເຮືອງ. ທີ່​ໂດດ​ເດັ່ນ​ຄື ອັດຕາ​ການ​ເຕີບ​ໂຕ​ຂອງ GDP ​ໄດ້​ບັນລຸ 7,08% - ລະດັບ​ສູງ​ທີ່​ສຸດ​ໃນ​ທົດ​ສະ​ວັດ​ທີ່​ຜ່ານ​ມາ; ການ​ສົ່ງ​ອອກ​ບັນລຸ 238 ຕື້​ໂດລາ​ສະຫະລັດ, ​ໃນ​ນັ້ນການ​ສົ່ງ​ອອກ​ເກີນ​ດຸນ​ເຖິງ 7,2 ຕື້​ໂດລາ​ສະຫະລັດ; ອັດຕາ​ສ່ວນ​ໜີ້​ສາທາລະນະ​ທຽບ​ກັບ GDP ຫຼຸດ​ລົງ​ຢ່າງ​ໄວ; ດັດຊະນີ​ລາຄາ​ເຄື່ອງ​ບໍລິ​ໂພ​ກ (CPI) ສະ​ເລ່ຍຕ່ຳ​ກວ່າ 4% ຊຶ່ງ​ເປັນປີທີ​ສາມທີ່ຕ່ຳ​ກວ່າ 4%; ການ​ສຳ​ລອງ​ເງິນຕາ​ຕ່າງປະ​ເທດ​ຂອງ​ລັດ​ບັນລຸ​ຫຼາຍ​ກວ່າ 60 ຕື້​ໂດລາ​ສະຫະລັດ. ຂະໜາດ​ຂອງ​ພື້ນຖານ​ເສດຖະກິດ​ຂະຫຍາຍຕົວ​ຢ່າງ​ໄວ, ປີ 2018 ​ປະມານ​ກວ່າ 5,5 ລ້ານ​ຕື້​ດົ່ງ (ປະມານ​ກວ່າ 240 ຕື້​ໂດລາ​ສະຫະລັດ), ຫຼາຍ​ກວ່າ​ປີ 2015 ​ເຖິງ 1,3 ກວ່າ​ເທື່ອ. GDP ສະ​ເລ່ຍຕໍ່ຫົວ​ຄົນ​ບັນລຸ 2.580 ​ໂດລາ​ສະຫະລັດ, ຫຼາຍ​ກວ່າ​ປີ 2017 ​ເກືອບ 200 ​ໂດລາ​ສະຫະລັດ. ຂະ​ບວນການ​ເລີ່​ມທຸລະ​ກິດ, ປ່ຽນ​ແປງ​ໃໝ່​ປະດິດ​ສ້າງ​ ໄດ້​ຮັບ​ຄວາມ​ເອົາ​ໃຈ​ໃສ່​ຊ່ວຍ​ເຫຼືອ, ສົ່ງ​ເສີມ ດ້ວຍ​ການ​ສ້າງ​ວິ​ສາ​ຫະກິດ​ໃໝ່​ຕື່ມ​ອີກ 131.000 ວິ​ສາ​ຫະກິດ. ຂະ​ແໜງ​ການ​ທ່ອງ​ທ່ຽວ​ໄດ້​ຕ້ອນຮັບ​ນັກ​ທ່ອງ​ທ່ຽວຕ່າງປະ​ເທດ​ເກືອບ 15,6 ລ້ານ​ຄົນ ​ແລະ ຮັບ​ໃຊ້​ນັກ​ທ່ອງ​ທ່ຽວ​ພາຍ​ໃນ​ປະ​ເທດ 80 ລ້ານ​ຄົນ, ລາຍ​ໄດ້​ລວມຍອດ​ບັນລຸ 620.000 ຕື້​ດົ່ງ, ​​ແລະໄດ້ຂະຫຍາຍຕົວ​ເທື່ອ​ລະ​ກ້າວ​ເປັນຂະ​ແໜງ​​ເສດຖະກິດ​ປາຍ​ແຫຼມຊອງ​ປະ​ເທດ,...​ເວົ້າ​ໂດຍ​ສັງ​ເຂ​ບ, ປີ 2018 ພວກ​ເຮົາ​ໄດ້​ບັນລຸ​ແລະ​ບັນລຸ​ລື່ນ​ລະດັບ​ຄາດ​ໝາຍ​ທັງ​ໝົດ 12 ​ເລກ​ຄາດໝາຍ​ແຜນການ (​ໃນ​ນັ້ນ 9 ​ເລກ​ຄາດໝາຍ​ ​ໄດ້​ບັນລຸ​ລື່ນ​ລະດັບ). ລັກສະນະເປັນ​ເອກະລາດ, ​ເປັນ​ເຈົ້າ​ຕົນ​ເອງຂອງ​ພື້ນຖານ​ເສດຖະກິດ​ໄດ້​ຮັບ​ການ​ຍົກ​ສູງ​ຂຶ້ນ​ເທື່ອ​ລະ​ກ້າວ. ການ​ປະຕິບັດ​ເປົ້າ​ໝາຍ​ຄູ່​ກ່ຽວ​ກັບ​ການ​ເຕີບ​ໂຕ​ແລະ​ຄວບ​ຄຸມ​ໄພ​ເງິນ​ເຟີ້ ປະສົບ​ຄວາມ​ສຳ​ເລັດ​…​ໄດ້​ສ້າງ​ເງື່ອ​ນໄຂອຳນວຍ​ຄວາມ​ສະດວກ​ໃຫ້ການ​ປະຕິບັດ​ໜ້າ​ທີ່ອື່ນໆໄດ້​ເປັນ​ຢ່າງ​ດີ​ເຊັ່ນ ຮັບປະກັນ​ຄວາມ​ປອດ​ໄພ​ສັງຄົມ, ຮັກສາ​ລະບຽບ​ຄວາມ​ສະຫງົບ, ຄວາມ​ໝັ້ນຄົງ​ທາງ​ສັງຄົ​ມ. ຜົນສຳ​ເລັດ​ອັນ​ຕັ້ງໜ້າ​ນັ້ນ​ໄດ້ສ້າງ​ຜົນ​ກະທົບ​ແຜ່​ກວ້າງ, ປັບປຸງຄວາມ​ເຊື່ອ​ຖື​ຂອງ​ປະຊາຊົນ, ຂອງ​ນັກ​ລົງທຶນ​ຍຸດ​ທະ​ສາດ​ຢູ່​ໃນ​ແລະ​ຕ່າງປະ​ເທດ.

ວັນ​ທີ 12-11-2018, ສະພາ​ແຫ່ງ​ຊາດ​ຊຸດ​ທີ XIV ​ໄດ້​ຮັບຮອງ​ຜ່ານ​ມະຕິ​ກ່ຽວ​ກັບ​ການ​ໃຫ້​ສັດຕະຍາບັນ ສັນຍາ​ຄູ່​ຮ່ວມ​ມື​ຮອບດ້ານ​ແລະ​ກ້າວໜ້າ​ຂ້າມ​ປາຊີ​ຟິກ (CPTPP), ມີ​ຜົນ​ບັງຄັບ​ໃຊ້​ເປັນ​ທາງ​ການ​ແຕ່​ວັນ​ທີ 14-01-2019. ນີ້​ແມ່ນ​ສັນຍາ​ການ​ຄ້າ​ເສລີ​ຮຸ່ນ​ໃໝ່ ທີ່​ມີ​ຄຸນ​ນະພາ​ບສູງ​ແລະຮອບ​ດ້າຍ​ພໍ​ຄວນ ດ້ວຍ​ລະດັບ​ຄຳ​ໝັ້ນ​ສັນຍາ​​ເລິກ​​ເຊິ່ງກວ່າ​ແຕ່​ກ່ອນ. ພວກ​ເຮົາ​ໄດ້​ປະສົບ​ຄວາມ​ສຳ​ເລັດ​ໃນ​ການຈັດ​ຕັ້ງ​ກອງປະຊຸມ​ເວທີ​ປາ​ໄສ​ເສດຖະກິດ​ໂລກ​ກ່ຽວ​ກັບ ອາ​ຊຽນ (WEF-ASEAN) 2018, ດ້ວຍ​ການ​ເຂົ້າ​ຮ່ວມ​ຂອງປະມຸກ​ແຫ່ງ​ລັດ​ຕ່າງໆ​ໃນ​ ອາ​ຊຽນ, ຜູ້ນຳລະດັບ​ສູງຂອງ​ບັນດາ​ປະ​ເທດ​ຄູ່​ຮ່ວມ​ມື ພ້ອມ​ດ້ວຍ​ຜູ້​ແທນ 1.000 ທ່ານ​ຂອງ​ບັນດາບໍລິສັດ​ຂ້າມ​ຊາດ, ບັນດາ​ວິ​ສາ​ຫະກິດ​ຂອງ ອາ​ຊຽນ ​ແລະ ສາກົນ, ທີ່​ນະຄອນ​ຮ່າ​ໂນ້ຍ ​ໃນ​ເດືອນ​ກັນຍາປີ 2018, ພາຍ​ໃຕ້​ຫົວ​ຂໍ້ “ອາ​ຊຽນ 4.0: ຈິດ​ໃຈ​ວິ​ສາ​ຫະກິດ​ແລະ​ການ​ປະຕິວັດ​ອຸດສາຫະກຳ​ຄັ້ງ​ທີສີ່”. ທ່ານ ຄ.ຊະວາ​ບ ປະທານ​ຜູ້​ກໍ່​ຕັ້ງ​ເວທີ​ປາ​ໄສ​ເສດ​ຖະກິດ​ໂລກ ​ໄດ້​ປະ​ເມີນ​ວ່າ ກອງ​ປະຊຸມ​ຄັ້ງ​ນີ້ປະສົບ​ຄວາມ​ສຳ​ເລັດ​ສູງ​ທີ່​ສຸດ​ໃນຮອບ 27 ປີ​ແຫ່ງ​ການຈັດ​ຕັ້ງ​ເວທີ​ປາ​ໄສ​ເສດຖະກິດ​ໂລກ​ກ່ຽວ​ກັບອາ​ຊຽນ​ແລະ​ອາຊີ​ຕາ​ເວັນ​ອອກ.

​ໃນ​ເດືອນ​ມັງກອນ 2018, ທີ່​ນະຄອນ​ຮ່າ​ໂນ້ຍ, ກອງ​ປະຊຸມ​ປະຈຳ​ປີ​ຄັ້ງ​ທີ 26 ​ເວທີ​ປາ​ໄສ​ລັດຖະສະພາອາຊີ-ປາຊີ​ຟິກ (APPF-26) ​ໄດ້​ຮັບ​ການຈັດ​ຕັ້ງ​ຂຶ້ນ​ ດ້ວຍ​ການ​ເຂົ້າ​ຮ່ວມ​ຂອງ 22 ຄະນະ​ຜູ້​ແທນລັດຖະສະພາ ​ແລະ ​ແຂກ​ຖືກ​ເຊີນ 300 ກວ່າ​ທ່ານ, ຊຶ່ງ​ເປັນ​ຈຸດ​ເນັ້ນ​ໃນວຽກ​ງານ​ການ​ຕ່າງປະ​ເທດ​ຂອງ​ສະພາ​ແຫ່ງ​ຊາດ​ຊຸດ​ທີ XIV. APPF-26 ​ໄດ້​ສົ່ງ​ສັນຍານ​ຂໍ້ຄວາມ​ອັນ​ໜັກ​ແໜ້ນ ​ແລະ ຮູບ​ພາບ​ຂອງ​ປະ​ເທດ​ຫວຽດນາມທີ່​ມີ​ການ​ປ່ຽນ​ແປງ​ໃໝ່, ຂະຫຍັນ​ຂັນ​ເຄື່ອນ, ຕັ້ງໜ້າພະຍາຍາມ ​ແລະ ມີ​ຄວາມ​ຮັບຜິດຊອບ​ຕໍ່​ເພື່ອນ​ມິດສາ​ກົນ. ​ໃນ​ກອງ​ປະຊຸມ​ຄັ້ງ​ທີ 73 ຂອງ​ສະມັດຊາ​ໃຫຍ່​ແຫ່ງ​ສະຫະ​ປະຊາ​ຊາດ, ຫວຽດນາມ​ໄດ້​ຮັບ​ເລືອກຕັ້ງ​ເປັນຄັ້ງ​ທຳ​ອິດ, ​ເປັນ​ສະມາຊິກ​ຂອງ​ຄະນະ​ກຳມາ​ທິການ​ກົດໝາຍ​ການ​ຄ້າສາກົນ ຂອງ​ສະຫະ​ປະຊາ​ຊາດ (UNCITRAL) ​ໃນ​ໄລຍະ 2019 - 2025. ດ້ວຍ​ຄວາມ​ຮັບຜິດຊອບ​ໃໝ່, ຫວຽດນາມ​ຈະ​ມີ​ໂອ​ກາດ​ເພີ່ມ​ທະວີ​ການຄົ້ນຄວ້າ​ປຶກສາ, ຮັບ​ເອົາ​ບົດຮຽນ​ຂອງ​ຕ່າງປະ​ເທດ ​ເພື່ອ​ປັບປຸງ​ບູລະນະ​ຂອບ​ກົດໝາຍ, ສ້າງ​ສິ່ງ​ແວດ​ລ້ອມ​ການ​ລົງທຶນ, ທຸລະ​ກິດ​ທີ່​ສະດວກ​ດີ, ​ເພື່ອ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ.

ທ້າຍ​ເດືອນມີນາ 2018, ທີ່​ນະຄອນ​ຮ່າ​ໂນ້ຍ, ​ໄດ້​ມີ​ກອງ​ປະຊຸມ​ສຸດ​ບອດ​ການ​ຮ່ວມ​ມື​ອະນຸ​ພາກ​ພື້ນ​ແມ່​ນ້ຳຂອງ​ເປີດ​ກວ້າງຄັ້ງທີ 6 (GMS-6) ​ແລະ​ກອງ​ປະຊຸມ​ຂັ້ນ​ສູງ​ເຂດ​ສາມຫຼ່ຽມ​ພັດທະນາ​ກຳປູ​ເຈຍ - ລາວ - ຫວຽດນາມ ຄັ້ງ​ທີ 10 (CLV-10), ດ້ວຍ​ການ​ເຂົ້າຮ່ວມ​ຂອງ​ຜູ້​ແທນຫຼາຍກວ່າ 2.000 ທ່ານ​ພ້ອມ​ດ້ວຍ​ຜູ້ຕາງໜ້າ​ຂອງ 200 ກຸ່ມ​ເສດຖະກິດ, ບໍລິສັດ. ປີ 2018, ຫວຽດນາມ​ສືບ​ຕໍ່​ເປັນ​ຈຸດ​ໝາຍປາຍທາງ​ຂອງ​ການ​ລົງທຶນ​ຈາກ​ຕ່າງປະ​ເທດ, ດ້ວຍ​ເງິນ​ລົງທຶນ​ໂດຍ​ກົງ​ຈາກ​ຕ່າງປະ​ເທດ (FDI) ຫຼາຍ​ກວ່າ 30 ຕື້​ໂດລາ​ສະຫະລັດ, ​ໃນ​ນັ້ນ ທຶນ​ທີ່​ໄດ້​ຈ່າ​ຍ​ແລ້ວ 19,1 ຕື້​ໂດລາ​ສະຫະລັດ. ຫວຽດນາມ “ກາຍ​ເປັນ​ຈຸດ​ໝາຍ​ປາຍທາງ​ຂອງ​ການ​ລົງທຶນ​ທີ່​ຮ້ອນ​ທີ່​ສຸດ​ຢູ່​ອາຊີ”, “ຖື​ຕຳ​ແໜ່​ງສູງສຸດຕໍ່​ເນື່ອງ​ກັນ​ເປັນ​ປີ​ທີ່​ສອງ ​ໃນ​ບັນດາ​ຈຸດໝາຍ​ປາຍທາງ​ທີ່​ຄາດ​ວ່າຈະ​ດຶງ​ດູດ​ການ​ລົງທຶນ​ຈາກ​ຕ່າງປະ​ເທດ​ຫຼາຍ​ທີ່​ສຸດ​ໃນ​ພາກ​ພື້ນ ​ເອ​ເປ​ກ”. ເຖິງ​ເດືອນ​ພະຈິກ​ປີ 2018, ​ໃນ​ທົ່ວ​ປະ​ເທດ​ມີ​ປະມານ 27.000 ​ໂຄງການ​ລົງທຶນ​ຈາກ 128 ປະ​ເທດ​ແລະດິນ​ແດນ, ດ້ວຍ​ທຶນ​ຈົດ​ທະບຽນ​ທັງ​ໝົດ 340 ຕື້​ໂດລາ​ສະຫະລັດ ​ແລະ ທຶນ​ທີ່​ໄດ້​ປະຕິບັດປະມານ 188,8 ຕື້​ໂດລາ​ສະຫະລັດ. ພວກ​ເຮົາ​ໄດ້​ຕ້ອນຮັບ​ນັກ​ທ່ອງ​ທ່ຽວ​ຕ່າງປະ​ເທດ​ເພີ່ມ​ຂຶ້ນ 3 ​ເທື່ອ​ເມື່ອ​ທຽບ​ກັບ​ປີ 2010, ​ແມ່ນ​ລະດັບ​ສູງ​ທີ່​ສຸດ​ທີ່​ເຄີຍ​ມີ​ມາ.

ກ່ຽວ​ກັບ​ການ​ກໍ່ສ້າງ​ແລະ​ປັບປຸງ​ບູລະນະ​ລະບຽບ​ກົດໝາຍນະ​ໂຍບາຍ, ພັກ, ສະພາ​ແຫ່ງ​ຊາດ, ລັດຖະບານ​ໄດ້ປະກາດ​ໃຊ້​ຫຼາຍ​ແຜນ​ນະ​ໂຍບາຍ, ກົນໄກ, ນະ​ໂຍບາຍ​ໃໝ່ ທີ່​ກ່ຽວ​ພັນ​ເຖິງ​ບັນດາ​ບັນຫາ​ສຳຄັນ, ຮີ​ບດ່ວນທີ່​ພວມ​ວາງ​ອອກ​ມາ​ໃນ​ພຶດຕິ​ກຳ. ບັນດາ​ມະຕິ​ຂອງ​ບັນດາ​ກອງ​ປະ​ຊຸມ​ສູນ​ກາງ​ພັກ​ມະ​ໄໝ​ທີ XII ກ່ຽວ​ກັບ “ການບູລະນະ​ລະບຽບກົດໝຍ​ເສດຖະກິດ​ຕະຫຼາດ​ກຳ​ນັດ​ທິດ​ສັງຄົມ​ນິຍົມ; “ສືບ​ຕໍ່​ຈັດ​ວາງ​ຄືນ​ໃໝ່, ປ່ຽນ​ແປງ​ໃໝ່ ​ແລະ ຍົກ​ສູງ​ປະສິດທິ​ຜົນ​ຂອງ​ວິ​ສາ​ຫະກິດ​ແຫ່ງ​ລັດ; “ພັດທະນາ​ເສດຖະກິດ​ເອກະ​ຊົນ​ໃຫ້​ກາຍ​ເປັນກຳລັງ​ໜູນ​ທີ່​ສຳຄັນ​ໜຶ່ງ​ ຂອງ​ພື້ນຖານ​​ເສດຖະກິດ​ຕະຫຼາດ ກຳນົດ​ທິດ​ສັງຄົມ​ນິຍົມ”,... ​ແມ່ນ​ນອນ​ຢູ່​ໃນ​ໂຄງ​ການ​ໂດຍ​ລວມນັ້ນ.

ກ່ຽວ​ກັບ​ການຈັດ​ຕັ້ງ​ກົງຈັກ, ພັກ​ໄດ້​ອອກບັນດາ​ມະຕິ, ຂໍ້​ກຳນົດ​ກ່ຽວ​ກັບການ​ສືບ​ຕໍ່​ການ​ປ່ຽນ​ແປງ​ໃໝ່, ສັບ​ຊ້ອນ​ການຈັດ​ຕັ້ງ​ກົງຈັກ​ຂອງ​ລະບົບ​ການ​ເມືອງ ​ໃຫ້​ກະທັດ​ລັດ​ເບົາບາງ, ​ເຄື່ອນ​ໄຫວ​ມີ​ປະສິດທິພາບ​ແລະ​ປະສິດທິ​ຜົນ; ປະຕິ​ຮູບ​ນະ​ໂຍບາຍ​ເງິນ​ເດືອນສຳລັບ​ພະນັກງານ, ຂ້າ​ລັດຖະການ, ພາລະ​ກອນ, ກຳລັງປະກອບ​ອາວຸດ ​ແລະ ຜູ້​ອອກ​ແຮງ​ງານ​ໃນ​ວິ​ສາ​ຫະກິດ; ປະຕິ​ຮູບ​ນະ​ໂຍບາຍ​ປະກັນ​ໄພ​ສັງຄົມ; ສືບ​ຕໍ່​ປ່ຽນ​ແປງ​ໃໝ່​ລະບົບ​ການຈັດ​ຕັ້ງ​ແລະ​ຄຸ້ມ​ຄອງ, ຍົກ​ສູງ​ຄຸນ​ນະພາ​ບ​ແລະ​ປະສິດທິ​ຜົນ​ການ​ເຄື່ອນ​ໄຫວຂອງ​ບັນດາ​ໜ່ວຍ​ພາລະກິດ​ຂອງ​ລັດ,... ສືບ​ຕໍ່​ສ້າງ​ຮາກ​ຖານ​ຫຼັກ​ແຫຼ່ງ​ແລະ​ກຳລັງ​ໜູນ​ທີ່​ແຂງ​ແຮງ ​ເພື່ອ​ພັດທະນາ​ເສດຖະກິດ-ສັງຄົມ​ຢ່າງ​ຍືນ​ຍົງ.

ກ່ຽວ​ກັບ​ການ​ກໍ່ສ້າງ​ແລະປັບປຸງ​ພັກ, ບັນດາ​ມະຕິ​ຂອງ​ສູນ​ກາງ​ພັກ​ກ່ຽວ​ກັບ​ການ​ກີດ​ກັ້ນ​ແລະ​ຍູ້​ຖອຍຄວາມ​ເສື່ອ​ມ​ໂຊມ​ທາງ​ດ້ານ​​ແນວຄິດ​ການ​ເມືອງ, ຄຸນສົມບັດ​ສີນ​ທຳ, ​ແບບ​ແຜນ​ດຳລົງ​ຊີວິດ, ບັນດາ​ປະກົດ​ການ “ຫັນປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ; ສຸມ​ໃສ່​ກໍ່ສ້າງຖັນ​ແຖວ​ພະນັກງານ​ຂັ້ນຕ່າງໆ, ​ໂດຍ​ສະ​ເພາະ​ໃນ​ລະດັບ​ຍຸດ​ທະ​ສາດ, ​ໃຫ້​ມີ​ຄຸນ​ທາດ, ຄວາມ​ສາມາດ ​ແລະ ກຽດ​ສັກ​ສີ​ຢ່າງ​ພຽງພໍ, ທຽບ​ເທົ່າ​ກັບ​ໜ້າ​ທີ່; ກ່ຽວ​ກັບ​ມາດຕະຖານ​ຕຳ​ແໜ່ງ, ​ເກນ​ກຳນົດ​ການ​ປະ​ເມີນ​ພະນັກງານ ທີ່​ຂຶ້ນ​ກັບ​ສິດ​ຄຸ້ມ​ຄອງ​ຂອງ​ຄະນະ​ບໍລິຫານ​ງານ​ສູນ​ການ, ກົມ​ການ​ເມືອງ, ຄະນະ​ເລຂາທິການ; ຂໍ້​ກຳ​ນົກ​ກ່ຽວ​ກັບ​ຄວາມ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານ, ສະມາຊິກ​ພັກ, ກ່ອນ​ອື່ນ​ໝົດ​ແມ່ນ​ກຳມະການ​ກົມ​ການ​ເມືອງ, ກຳມະການ​ຄະນະ​ເລຂາທິການ, ກຳມະການ​ຄະນະ​ບໍລິຫານ​ງານ​ສູນ​ກາງ,... ​ໄດ້​ສ້າງ​ກຳລັງ​ຊີວິ​​ແລະ​ກຳລັງ​ແຮງໃໝ່​ໃນ​ການ​ນຳພາ ຊີ້​ນຳ​ການ​ປະຕິບັດ​ບັດາ​ໜ້າ​ທີ່​ການ​ເມືອງທີ່​ມີ​ຄວາມ​ໝາຍ​ຍຸດ​ທະ​ສາດ​ໂດຍລວມ.

ພິ​ເສດ, ​ໃນ​ການ​ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ການ​ຟຸມ​ເຟືອຍ, ອາດຍາ​ສິດ​ແລະ​ຄວາມ​ຫຍໍ້​ທໍ້ ຊຶ່ງ​ພັກ​ແລະ​ລັດ​ເຮົາ​ໄດ້​ນຳພາ, ຊີ້​ນຳ, ​ເຮັດ​ຫຼາຍ​ຄັ້ງ, ​ເຮັດ​ຢ່າງ​ຕັ້ງໜ້າ​ໃນ​ຫຼາຍ​ປີ​ທີ່​ຜ່ານ​ມາ, ​ແລະ​ໃນ​ເວລາ​ທີ່​ຜ່ານ​ມາ​ມໍ່​ນີ້ ຍິ່​ງໄດ້​ຍູ້​ແຮງ​ກວ່າ​ເວລາ​ໃດ​ໝົດ, ​ໄດ້​ຊີ້​ນຳ​ປະຕິບັດ​ຢ່າງ​​ເດັດດ່ຽວ, ຂຸ້ນຂ້ຽວ ​ແລະ ​ປະສົບ​ຄວາມ​ສຳ​ເລັດ​ຕົວ​ຈິງ, ຈະ​ແຈ້ງ​ຫຼາຍ​ຢ່າງ. ບັນດາ​ຄະດີ​ສໍ້​ລາດ​ບັງ​ຫຼວງ, ຄະດີ​ເສດຖະກິດທີ່​ຮ້າຍ​ແຮງ​ແລະ​ສັບສົນ ​ໄດ້​ຖືກ​ຈັດການ​ລົງ​ໂທດ​ຢ່າງ​ເດັດດ່ຽວ, ​ເຂັ້ມ​ງວດ, ຖືກຕ້ອງ​ຕາມ​ກົດ​ລະບຽບ​ຂອງ​ພັກ​ແລະ​ກົດໝາຍ​ຂອງ​ລັດ, ນັບ​ທັງ​ພະນັກງານ​ນຳພາ​ຂັ້ນ​ສູງ​ຂອງ​ພັກ​ແລະ​ລັດ; ນາຍ​ພົນ, ນາຍ​ທະ​ຫານ, ນາຍຕຳຫຼວດ; ພະນັກງານ​ປະຈຳການ​ ແລະ​ ພະນັກງານ​ບຳນານ. ນັບ​ແຕ່​ພາຍ​ຫຼັງກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ (​ເດືອນ​ມັງກອນ 2016) ມາ​ເຖິງ​ດຽວ​ນີ້, ​ໃນ​ເວລາ​ເກືອບ 3 ປີ, ມີ​ພະນັກງານຂັ້ນ​ສູງທີ່​ຂຶ້ນກັບ​ສິດ​ຄຸ້ມ​ຄອງ​ຂອງ​ສູນ​ກາງກວ່າ 60 ຄົນ​ ໄດ້​ຖື​ກປະຕິບັດ​ວິ​ໄນຖືກ​ລົງ​ໂທດ, ​ໃນ​ນັ້ນມີ​ກຳມະການ​ສູນ​ກາງ​ປະຈຸ​ບັນ 5 ຄົນ ​ຊຶ່ງ 3 ສະຫາຍ​ໃນ​ຈຳນວນ​ນັ້ນ ​ຖືກ​ໄລ່​ອອກ​ຈາກ​ຄະນະ​ບໍລິຫານ​ງານ​ສູນ​ກາງ, ຊ້ຳ​ບໍ່​ໜຳ ກຳ​ມະການ​ກົມ​ການ​ເມືອງ​ຜູ້​ໜຶ່ງ​ ຖືກ​ໄລ່​ອອກ​ຈາກ​ພັກ​ແລະ​ຖືກ​ຕັດສິນ​ຈຳ​ຄຸກ 30 ປີ; 11 ສະຫາຍ​ເປັນ​ອະດີດ​ກຳມະການ​ສູນ​ກາງ​ພັກ​ໄດ້​ອອກ​ກິນ​ເບ້ຍ​ບຳນາມ​ແລ້ວ ກໍ່​ຖືກ​ປະຕິບັດ​ວິ​ໄນ. ນີ້​ແມ່ນ​ບາດກ້າວ​ບຸກທະລຸ​ໃນ​ວຽກ​ງານ​ກໍ່ສ້າງ, ປັບປຸງ​ພັກ, ຮັດ​ແໜ້ນ​ລະບຽບ​ວິ​ໄນ​ໃນ​ກົງຈັກຂອງ​ລັດ ​ແລະ ​ໃນ​ລະບົບ​ການ​ເມືອງ​ທັງ​ໝົດ, ປະກອບສ່ວນ​ທີ່​ສຳຄັນ​ເຂົ້າ​ໃນ​ການ​ປັບປຸງ​ຄວາມ​ໄວ້​ວາງ​ໃຈ ຄວາມ​ເຊື່ອ​ຖື​ຂອງປະຊາຊົນ​ຕໍ່​ການ​ນຳພາ​ຂອງ​ພັກ.

​ເຖິງ​ວ່າ​ຍັງ​ມີ​ຄວາມ​ຫຍຸ້ງຍາກ, ສິ່ງ​ທ້າ​ທາຍ, ຂໍ້​ຈຳກັດ​ຫຼາຍ​ຢ່າງກໍ່ຕາມ, ​ແຕ່​ເບິ່ງ​ລວມ​ແລ້ວ, ອາດ​ຈະ​ເຫັນ​ວ່າ, ທ່າ​ແລະ​ກຳລັງ​​ແຮງຂອງປະ​ເທດ​ເຮົາ​ໄດ້​ເພີ່ມ​ທະວີ, ປະ​ເທດ​ກຳລັງ​ຮຸ່ງ​ເຮືອງ, ​ໂຊກຊາຕາ​ຂອງ​ປະ​ເທດກຳລັງ​​ເພີ່ມ​ຂຶ້ນ. ຫຼາຍ​ອົງການ​ຈັດ​ຕັ້ງ​ສາກົນ​ປະ​ເມີນວ່າ ​ຫວຽດນາມ​ເປັນ​ປະ​ເທດ​ທີ່​ເສດຖະກິດ-ວັດທະນະທຳຈະ​ເລີ​ນພັດທະນາ, ການ​ເມືອງ-ສັງຄົມມີ​ຄວາມ​ໝັ້ນຄົງ, ມີ​ຄວາມ​ສາມາດ​ພັດທະນາ​ເປັນ​ຢ່າງ​ດີ; ​ເສດຖະກິດ​ເຕີບ​ໂຕ​ໄວ​ທີ່​ສຸດ​ໃນ​ພາກ​ພື້ນ​ແລະ​ໃນ​ໂລກ; ບັນດາ​ຕະຫຼາດ​ທີ່​ສຳຄັນ​, ຄື​ ເງິນຕາ, ຫຼັກ​ຊັບ ​ແລະ ອະສັງຫາລິມະ​ຊັບ ລ້ວນ​ແຕ່​ເຄື່ອນ​ໄຫວ​ເປັນ​ປົກກະຕິ, ສອດຄ່ອງ​ກັບ​ການພັດທະນາ​ເສດຖະກິດ​ມະຫາ​ພາກ. ບໍ່​ມີ​ເວລາ​ໃດ​ທີ່ປະ​ເທດ​ຂອງ​ພວກເຮົາ​ມີພາລະກິດ, ກຳລັງ​ແຮງ, ຕຳ​ແໜ່​ງ ແລະ​ກຽດ​ສັກ​ສີ ຄືທຸກມື້​ນີ້. ​ແມ່ນ​ບໍ່​ວ່າ ນີ້​ເປັນ​ຜົນງານ​ມະຫັດສະຈັນ ​ໃນ​ສະພາບ​ການປະ​ເທດຂອງ​ພວກ​ເຮົາ​ຢືນ​ຕໍ່ໜ້າ​ຄວາມ​ຫຍຸ້ງຍາກ​ທີ່​ກ່າຍກອງ ​ແລະ ສະພາບ​ການ​ໂລກ​ມີ​ການ​ຜັນ​ປ່ຽນ​ຢ່າງ​ແຮງ​ແລະ​ສົບ​ສົນ? ສິ່ງ​ທີ່​ສຳຄັນ​ກວ່າ​ນັ້ນ ​ແມ່ນ​ ຜ່ານ​ສະພາບ​ການ​ດັ່ງກ່າວ​ພວກ​ເຮົາ​ຈະ​ມີ​ບົດຮຽນ​ທີ່​ລ້ຳ​ຄ່າ​ຕື່ມ​ອີກ.

ມີ​ຄຳ​ຖາມ​ໜຶ່ງ​ຄື ສາ​ເຫດ​ເລິກ​ເຊິ່ງ​ໃດ​ທີ່​ຊ່ວຍ​ໃຫ້ພວກ​ເຮົາ​ໄດ້​ຮັບ​ຄວາມ​ສຳ​ເລັດ​ແລະຜົນງານ​ເຫຼົ່າ​ນັ້ນ? ມີ​ຫຼາຍ​ສາ​ເຫດ. ແຕ່​ສາ​ເຫດ​ທີ່​ກວມ​ລວມທີ່​ສຸດ​ອາດ​ຈະ​ແມ່ນ ​ເນື່ອງ​ຈາກ​ພວກ​ເຮົາ​ໄດ້​ສືບ​ທອດຜົນສຳ​ເລັດ​ທີ່​ສຳຄັນ​ໃຫຍ່​ຫຼວງ, ມີ​ຄວາມ​ໝາຍ​ປະຫວັດສາດພາຍຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່; ບັນດາ​ຜົນສຳ​ເລັດທີ່​ຮອບດ້ານ​ໃນ​ສອງ​ປີ 2016 ​ແລະ 2017. ພວກ​ເຮົາ​ມີ​ຄວາມ​ສາມັກຄີ, ​ເປັນ​ເອກະ​ພາບ, ມີ​ຄວາມ​ພະຍາຍາມ​ສູ້​ຊົນ, ຮ່ວມ​ແຮງ​ຮ່ວມ​ໃຈ​ຂອງ​ທົ່ວ​ພັກ, ທົ່ວ​ປວງ​ຊົນ​ ແລະ​ທົ່ວ​ກອງທັບ. ລະບົບ​ການ​ເມືອງ​ທັງ​ໝົດ, ກວມ​ດ້ວຍ​ບັນດາ​ອົງການ​ນຳພາ​ຂອງ​ພັກ, ສະພາ​ແຫ່ງ​ຊາດ, ລັດຖະບານ, ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ຂະ​ແໜງ​ການ, ບັນດາ​ຂັ້ນ, ບັນດາ​ອົງຄະ​ນະມະ​ຫາ​ຊົນ ທີ່​ໄດ້​ມີ​ການ​ປ່ຽນ​ແປງ​ໃໝ່​ຫຼາຍ​ຢ່າງ, ປະສານ​ງານ​ຢ່າງ​ໃກ້ຊິດ, ​ເປັນຈັງ​ຫວະ, ຄົບ​ຊຸດ, ​ເປັນ​ແບບ​ແຜນ​ກວ່າ​ເກົ່າ​ໃນ​ການນຳພາ ຊີ້​ນຳ​ການ​ຊາບ​ຊຶມ, ຈັດ​ຕັ້ງການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ສ້າງ​ໃຫ້​ມີ​ການ​ຫັນປ່ຽນ​ຢ່າງ​ຕັ້ງໜ້າ​ ໃນ​ການ​ເສີມ​ຂະຫຍາຍຢ່າງ​ຄົບ​ຖ້ວນ​ແລະ​ຖືກຕ້ອງ ກ່ຽວ​ກັບບົດບາດນຳ​ພາ​ຂອງ​ພັກ, ການ​ຄຸ້ມ​ຄອງ​ຂອງ​ລັດ ​ແລະ ສິດ​ເປັນ​ເຈົ້າ​ຂອງ​ປະຊາຊົນ; ​ແກ້​ໄຂ​ບັນດາ​ບັນຫາ​ຊີວິດຢ່າງ​ທັນ​ການ, ຖືກຕ້ອງ, ​​ເໝາະ​ສົມ ​ແລະ​ມີ​ປະສິດທິ​ຜົນ, ​ເປັນ​ຕົ້ນ​ແມ່ນ​ບັນດາ​ບັນຫາ​ສຳຄັນ, ຮີບ​ດ່ວນ​ຂອງ​ສັງຄົມ. ​ແລະ​ຍັ​ງແມ່ນ​ຍ້ອນ​ອາ​ໄສ​ຄວາມ​ເປັນ​ໃຈ, ​ເຫັນ​ດີ​ເຫັນ​ພ້ອມ, ສະໜັບສະໜູນ, ລະດົມ​ກຳລັງ​ໃຈ, ປະກອບ​ຄວາມ​ເຫັນ​ຢ່າງ​ທັນ​ການ​ຂອງ​ພະນັກງານສະມາຊິກ​ພັກ, ຂອງ​ບັນດາ​ສະຫາຍອາວຸ​ໂສ, ຂອງ​ບັນດາ​ຊັ້ນ​ຄົນ​ປະຊາຊົນ ນັບ​ທັງ​ຊາວ​ຫວຽດນາມ​ຢູ່​ຕ່າງປະ​ເທດ, ຂອງ​ບັນດາ​ອົງການ​ສື່​ມວນ​ຊົນ,... ສ້າງ​ເປັນ​ກຳລັງ​ແຮງ​ສັງ​ລວມ, ຄວາມ​ເປັນ​ຈິດ​ໜຶ່ງ​ໃຈ​ດຽວ​ຂອງ​ລະບົບ​ການ​ເມືອງ​ທັງ​ໝົດ ​ແລະ ຂອງ​ທົ່ວ​ສັງຄົມ. ດັ່ງ​ທີ່​ພວກ​ເຮົາ​ໄດ້​ເຫັນ, ມັນ​ບໍ່​ແມ່ນ​ເລື່ອງ​ບັງ​ເອີນ​ທີ່​ວ່າ ນັບ​ແຕ່​ພາຍຫຼັງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ມາ​ເຖິງ​ດຽວ​ນີ້, ບັນຍາກາດ​ເບີກບານ​ມ່ວນ​ຊື່ນ, ຄວາມ​ເຊື່ອ​ໝັ້ນ​ໃນ​ການ​ນຳພາ​ຂອງ​ພັກ, ​ໃນ​ໄຊຊະນະ​ຂອງ​ພາລະກິດ​ການປ່ຽນ​ແປງ​ໃໝ່, ກໍ່ສ້າງ​​ແລະ​ປົກ​ປັກ​ຮັກສາ​ປະ​ເທດ​ຊາດ ນັບ​ມື້​ນັບ​ແຜ່​ຂະຫຍາຍ​ກວ້າງອອກ​ໄປ​ໃນ​ທົ່ວ​ປະ​ເທດ.

*

*       *

ພຶດຕິ​ກຳ​ທີ່​ອຸດົມສົມບູນ​ຂອງ​ການ​ປະຕິວັດ​ຫວຽດນາມ​ໃນ​ເວລາ 89 ປີ, ນັບ​ແຕ່​ວັນ​ກໍ່​ຕັ້ງ​ພັກ​ຈົນ​ເຖິງ​ປະຈຸ​ບັນ, ​ໄດ້​ພິສູດ​ວ່າ, ການ​ນຳພາ​ທີ່​ຖືກຕ້ອງ​ແລະ​ສະຫຼາດ​ສ່ອງ​ໃສ​ແມ່ນ​ປັດ​ໄຈນຳ​ໜ້າ​ທີ່​ຕັດສິນ​ໄຊຊະນະທັງ​ໝົດ​ ຂອງ​ການ​ປະຕິວັດ​ຂອງ​ປະ​ເທດ​ເຮົາ, ສ້າງ​ສິ່ງ​ມະຫັດສະຈັນ​ຫຼາຍ​ຢ່າງ​ ໃນ​ປະ​ເທດ​ຫວຽດນາມ; ພ້ອມ​ກັນ​ນັ້ນ, ​ໃນ​ຂະ​ບວນວິວັດ​ການ​ນຳພາ​ປະຕິວັດ, ພັກ​ຂອງ​ພວກ​ເຮົາ​ກໍ່​ໄດ້​ຝຶກ​ຝົນ​ຫຼໍ່​ຫຼອມ, ​ໄດ້ທົດ​ສອບ​ ແລະ ​ເຕີບ​ໃຫຍ່​ເຂັ້ມ​ແຂງຢ່າງ​ບໍ່​ຢຸດ​ຢັ້ງ, ມີ​ບົດຮຽນ​ປະສົບ​ການ​ຫຼາຍ ​ເພື່ອສົມກຽດ​ກັບ​ບົດບາດ​ແລະພາລະ​ໜ້າ​ທີ່​ນຳພາ​ການ​ປະຕິວັດ, ສົມ​ກຽດ​ກັບ​ຄວາມ​ໄວ້​ວາງ​ໃຈ​ຂອງ​ປະຊາຊົນ. ສະພາບ​ຄວາມ​ເປັນ​ຈິງ​ເກືອບ​ສະຕະວັດ​ທີ່​ຜ່ານມາ​ໃຫ້​ເຫັນ​ວ່າ, ຢູ່​ຫວຽດນາມ​ບໍ່​ມີ​ກຳລັງ​ການ​ເມືອງ​ອື່ນ​ໃດ, ນອກຈາກ​ພັກ​ກອມ​ມູນິດ​ຫວຽດນາມ, ທີ່​ມີຄົບ​ຄວາມ​ກ້າຫານ, ສະຕິ​ປັນຍາ, ບົດ​ຮຽນ, ກຽດ​ສັກ​ສີ​ ແລະ​ຄວາມ​ສາມາດ​ນຳພາ​ປະ​ເທດຜ່ານ​ຜ່າ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ເຄັ່ງຮ້ອນ​ທັງ​ໝົດ ​ເພື່ອນຳພາ​ປະຊາ​ຊາດ​ໄປ​ເຖິງ​ຊາຍ​ຝັ່ງ​ອັນ​ສະຫງ່າ​ລາສີ, ຍາດ​ເອົາ​ໄດ້ໄຊຊະນະ​ນີ້​ໄປ​ສູ່​ຄວາມ​ສຳ​ເລັດ​ອື່ນຢ່າງ​ຕໍ່​ເນື່ອງ. ​ແລະ​ໃນ​ຂະ​ບວນວິວັດ​ດັ່ງກ່າວ, ພັກ​ຂອງ​ພວກ​ເຮົາສະ​ສົມ​ແລະ​ຖອດ​ຖອນ​ບົດຮຽນອັນ​ລ້ຳ​ຄ່າ​ໄດ້​ຢ່າງ​ຫຼວງ​ຫຼາຍ, ​ເຕົ້າ​ໂຮມ​ເຂົ້າ​ເປັນບັນດາ​ມູນ​ເຊື້ອ​ອັນ​ສະຫງ່າ​ງາມ ຊຶ່ງມື້​ນີ້​ພວກ​ເຮົາ​ມີ​ຄວາມ​ຮັບຜິດຊອບ​ຕ້ອງ​ອອກ​ແຮງ​ຮັກສາ​ແລະ​ເສີມ​ຂະຫຍາຍ. ນັ້ນ​ແມ່ນ​ມູນ​ເຊື້ອຄວາມຈົງ​ຮັກ​ພັກດີ​ຢ່າງ​ບໍ່​ມີ​ຂອບ​ເຂດ​ຕໍ່​ຜົນ​ປະ​ໂຫຍ​ດຂອງ​ຊາດ​ແລະ​ຂອງຊົນ​ຊັ້ນ, ຢຶດໝັ້ນ​ໃນ​ເປົ້າ​ໝາຍ, ອຸດົມ​ຄະຕິ​ເອກະລາດ​ແຫ່ງ​ຊາດຕິດ​ແໜ້ນ​ກັບ​ລັດທິ​ສັງຄົມ​ນິຍົມ ບົນ​ພື້ນຖານ​ລັດ​ທິ​ມາກ-​ເລ​ນິນ ​ແລະ ​ແນວ​ຄິດ​ໂຮ່ຈີ​ມິນ. ນັ້ນ​ແມ່ນ​ມູນ​ເຊື້ອ​ຮັກສາ​ຄວາມ​ເປັນ​ເອກະລາ​ດ​ແລະ​ເປັນ​ເຈົ້າ​ຕົນ​ເອງ​ທາງ​ດ້ານ​ແນວທາງ; ກຳ​ແໜ້ນ, ໝູນ​ໃຊ້​ແລະ​ພັດທະນາຢ່າງ​ປະດິດ​ສ້າງ​ລັດທິ​ມາກ-​ເລ​ນິນ, ຄົ້ນຄວ້າ​ປຶກສາ​ບົດຮຽນ​ສາກົນ ​ເພື່ອວາງ​ແນວທາງ​ທີ່​ຖືກຕ້ອງ ​ແລະ ຈັດ​ຕັ້ງປະຕິບັດໜ້າ​ທີ່​ປະຕິວັດ​ຢ່າງ​ມີ​ປະສິດທິ​ຜົນ. ນັ້ນ​ແມ່ນ​ມູນ​ເຊື້ອການ​ພົວພັນ​​ໃກ້ຊິ​ດລະຫວ່າງ​ພັກ​ແລະ​ປະຊາຊົນ, ຖື​ການ​ຮັບ​ໃຊ້​ປະຊາຊົນ​ເປັນ​ວິຖີ​ຊີວິດ ​ແລະ ​​ເປັນເປົ້າ​ໝາຍ​ຂອງ​ການ​ສູ້​ຊົນ. ນັ້ນ​ແມ່ນ​ມູນ​ເຊື້ອ​ສາມັດ​ຄີ​ເປັນ​ເອກະ​ພາບ, ມີ​ການຈັດ​ຕັ້ງ​ແລະ​ມີ​ລະບຽບ​ວິ​ໄນຢ່າງ​ເຂັ້ມ​ງວດ ບົນ​ພື້ນຖານ​ຫຼັກການ​ລວມສູນ​ປະຊາທິປະ​ໄຕ, ຕິ​ຊົມ​ຕົນ​ເອງ, ຕິ​ຊົມແລະຄວາມ​ຮັກ​ແພງ​​ສະຫາຍ. ນັ້ນ​ແມ່ນ​ມູນ​ເຊື້ອ​ສາມັກຄີ​ສາກົນທີ່​ຊື່ສັດ, ບໍລິສຸດ ອີງ​​ໃສ່​ບັນດາ​ຫຼັກການ​ແລະ​ເປົ້າ​ໝາຍ​ທີ່​ສູງ​ສົ່ງ.

ປະຈຸ​ບັນ​ນີ້, ທົ່ວ​ພັກ ທົ່ວ​ປວງ​ຊົນ ​ແລະ​ທົ່ວ​ກອງທັບ​ເຮົາ ພວມ​ອອກ​ແຮງ​ສູ້​ຊົນ​ປະຕິບັດ​ໂຄງການ​ການ​ເມືອງ​ຂອງ​ພັກ, ລັດຖະທຳ​ມະນູນ​ຂອງ​ລັດ, ຍູ້​ແຮງ​ຢ່າງຮອບດ້ານ​ແລະ​ຄົບ​ຊຸດ ​ພາລະກິດການ​ປ່ຽນ​ແປງ​ໃໝ່, ຫັນ​ເປັນ​ອຸດສາຫພກຳ​ທັນ​ສະ​ໄໝ, ພັດທະນາ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ​ເຊື່ອມ​ໂຍງ​ສາ​ກົນ​ຢ່າງ​ຕັ້ງໜ້າ ​ເປັນ​ເຈົ້າ​ການ, ປະຕິບັດ​ສອງ​ໜ້າ​ທີ່​ຍຸດ​ທະ​ສາດຄື​ ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ​ສັງຄົມ​ນິຍົມ ຢ່າງ​ໝັ້ນຄົງ, ​ເພື່ອ​ເປົ້າໝ​າຍປະຊາຊົນ​ຮັ່ງມີ, ປະ​ເທດ​ຊາ​ດ​ເຂັ້ມ​ແຂງ ມີ​ປະຊາທິປະ​ໄຕ ຍຸຕິ​ທຳ​ແລະ​ສີວິ​ໄລ. ນີ້​ແມ່ນ​ພາລະກິດ​ປະຕິວັດ​ທີ່ຍິ່ງ​ໃຫຍ່​ແລະສະຫງ່າ​ງາມ​ທີ່​ສຸດ, ​ແມ່ນ “ການ​ສູ້​ຮົບທີ່​ໃຫຍ່​ໂຕ”, “ການຜ່າຕັດ​ດ້ວຍ​ຕົນ​ເອງ​ທີ່​ເຄັ່ງ​ຄັດ” ຄື​ທີ່​ລຸງ​ໂຮ່​ໄດ້​ສັ່ງສອນ, ​ແຕ່​ກໍ່​ຫຍຸ້ງຍາກ​ທີ່​ສຸດ, ສັບສົນ​ທີ່​ສຸດ. ​ໃນ​ສະພາບ​ການ​ສາກົນ​ແລະ​ສະຖານະ​ການ​ໃນ​ປະ​ເທດ, ຄຽງ​ຂ້າງ​ຄວາມ​ສະດວກ​ແລະ​ໂອກາດ ກໍ່​ມີ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ຫຼາຍ​ຢ່າງ​ທີ່​ແຊກ​ຊ້ອນ​ຢູ່. ພວກ​ເຮົາ​ຢືນ​ຕໍ່ໜ້າ​ຫຼາຍ​ບັນຫາ​ໃໝ່​ທີ່​ຕ້ອງ​ຈັດການ, ຫຼາຍສິ່ງ​ສັບສົນ​ທີ່​ສຸດ​ທີ່​ຕ້ອງ​ແກ້​ໄຂ. ສະພາບ​ການ​ດັ່ງກ່າວ​ຮຽກຮ້ອງ​ໃຫ້​ທົ່ວ​ພັກ ທົ່ວ​ປວງ​ຊົນ ​ແລະ​ທົ່ວກອງທັບ​ເຮົາ, ຍິ່ງກວ່າ​ເວລາ​ໃດ​ໝົດ, ຍິ່ງ​ຕ້ອງ​ເສີມ​ຂະຫຍາຍ​ສຸດ​ຂີດ ມູນ​ເຊື້ອ​ຮັກ​ຊາດ​ແລະ​ປະຕິວັດ, ຈິດ​ໃຈ​ສາມັກຄີ, ຄວາມ​ຮັບຜິດຊອບ, ຄວາມ​ພະຍາຍາມ​ສູ້​ຊົນ ​ຜ່ານ​ຜ່າຄວາມ​ຫຍຸ້ງຍາກ ສິ່ງ​ທ້າ​ທາຍ​ທຸກ​ຢ່າງ ​ເພື່ອກໍ່ສ້າງ​ປະ​ເທດ​ຊາດ​ຂອງ​ພວກ​ເຮົາ​ໃຫ້​ໃຫຍ່​ໂຕ​ໂອ້​ຖົງ​ກວ່າ​ເກົ່າ, ສວຍ​ງາມ​ກວ່າ​ເກົ່າ. ການ​ສູ້​ຊົນ​ທີ່​ອົງອາດ​ກ້າ​ແກ່ນ, ປະດິດ​ສ້າງ​ຂອງປວງ​ປະຊາຊົນ, ຂອງ​ບັນດາ​ຂະ​ແໜງ​ການ, ບັນດາ​ທ້ອງ​ຖິ່ນ, ບັນດາ​ພາກສ່ວນ​ເສດຖະກິດ ​ເປັນ​ປັດ​ໄຈ​ທີ່​ສຳຄັນ​ທີ່​ສຸດ ສຳລັບ​ການ​ພັດທະນາປະ​ເທດ​ຂອງ​ພວກເຮົາ. ​ເດັດຂາດ​ບໍ່​ອັດຕະວິ​ໄສ​ໃນ​ຕົວ, ບໍ່ພໍ​ໃຈ​ນຳ​ຜົນສຳ​ເລັດ​ຂອງ​ຕົນ, “ບໍ່​ເມົາ​ມົວ​ນຳ​ໄຊຊະນະ, ນອນ​ຫຼັບ​ເທິງ​ພວງລໍ​ເຣນ”.

ນັບ​ແຕ່​ພາຍຫຼັງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ຈົນ​ເຖິງ​ວັນ​ນີ້, ພັກ​ຂອງ​ພວກ​ເຮົາ​ໄດ້​ໃຊ້​ເວລາ​ແລະ​ເຫື່ອ​ແຮງ​ບໍ່​ໜ້ອຍ​ໃຫ້​ແກ່​ວຽກ​ງານ​ກໍ່ສ້າງ​ພັກ, ຖື​ການ​ກໍ່ສ້າງ​ພັກ​ເປັນ​ໜ້າ​ທີ່​ຫຼັກ. ທີ່​ຜ່ານ​ມາ​ມໍ່​ນີ້, ທົ່ວ​ພັກ​ໄດ້​ດຳເນີນການກໍ່ສ້າງ, ປັບປຸງ​ພັກ ຕາມ​ມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 4 ສະ​ໄໝ​ທີ XII, ​ໄດ້​ບັນລຸ​ຜົນສຳ​ເລັດ​ແລະ​ບົດຮຽນ​ເບື້ອງ​ຕົ້ນ​ທີ່​ສຳຄັນ, ປະກອບສ່ວນ​ກີດ​ກັ້ນ​ແລະ​ຍູ້​ຖອຍ​ຄວາມ​ຫຍໍ້​ທໍ້​​ໄດ້​ກ້າວໜຶ່ງ, ຍົກ​ສູງ​ຄວາມ​ສາມາດ​ນຳພາ​ແລະ​ກຳລັງ​ແຮງ​ສູ້​ຮົບ​ຂອງ​ພັກ. ​ແຕ່​ວ່າ, ວຽກ​ງານ​ກໍ່ສ້າງ​ພັກ​ຍັງ​ຫຼາຍ​ຢ່າງ​ທີ່​ຕ້ອງ​ເຮັດ, ​ໂດຍ​ສະ​ເພາະ​ແມ່ນ ການ​ຕໍ່ສູ້​ຕ້ານ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສີນ​ທຳ, ​ແບບ​ແຜນ​ດຳລົງ​ຊີວິດ; ບັນດາ​ປະກົດ​ການ “ຫັນປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ”; ການສໍ້​ລາດ​ບົງ​ຫຼວງ, ຟຸມ​ເຟືອຍ, ອາດຍາ​ສິດ, ຫ່າງ​ເຫີ​ນປະຊາຊົນ... ບັນດາ​ອິດ​ທິກຳລັງ​ສັດຕູ​ກຳລັງ​ຫາ​ທຸກ​ວິທີ​ເພື່ອ​ທຳລາຍ​ພາລະກິດການ​ປະຕິວັດ​ຂອງ​ປະຊາຊົນ​ເຮົາ; ພວກ​​ເຂົາ​ອອກ​ແຮງ​ໃສ່​ຮ້າຍ​ປ້າຍ​ສີພັກ​ແລະ​ລັດ​ຂອງ​ພວກເຮົາ, ​ໂຈມ​ຕີ​ໂດຍ​ກົງ​ໃສ່​ລະບົບ​ແນວ​ຄິດ, ​ໂຄງການ​ການ​ເມືອງ, ​ແນວທາງ​ການ​ເມືອງ​ຂອງ​ພັກ, ຍຸຍົງ​ແບ່ງ​ແຍກ​ພາຍ​ໃນ​ພັກ, ​ແບ່ງ​ແຍກ​ພັກ, ລັດ​ແລະ​ປະຊາຊົນ, ​ເພື່ອ​ເຮັດ​ໃຫ້​ພັກ​ເຮົາ​ແລະ​ລະບອບການ​ປົກຄອງ​ຂອງ​ພວກ​ເຮົາ​ແຕກ​ທະລາ​ຍຕັ້ງ​ແຕ່​ຮາກ,​ ຈາກ​ພາຍ​ໃນ, ນີ້​ແມ່ນ​ກົດ​ອຸບາຍ​ທີ່​ໂຫດຫ້ຽມ​ແລະ​ອັນຕະລາຍ​ທີ່​ສຸດ.

​ເພື່ອ​ເບິ່ງ​ແຍງ​ປະ​ເທດ, ​ເພີ່ມ​ພູນ​ຄູນ​ສ້າງ​ຈິດ​ໃຈ​ຂອງ​ປະຊາຊົນ, ກໍ່ສ້າງ​ພັກ​ໃຫ້​ສົມ​ກັບ​ເປັນ “ລູກຄິງ​ຜູ້​ປະ​ເສີດ” ຂອງ​ຊາດ, “​ເປັນ​ຜູ້ນຳ​ພາ​ແລະ​ຜູ້​ຮັບ​ໃຊ້​ທີ່​ສັດ​ຊື່​ແທ້​ຂອງ​ປະຊາຊົນ”, ນຳພາ​ຂະ​ບວນການ​ປ່ຽນ​ແປງ​ໃໝ່​ຢ່າງ​ຕໍ່​ເນື່ອງ, ພັກ​ຂອງ​ພວກ​ເຮົາ​ຕ້ອງ​ອອກ​ແຮງ​ຊຸກຍູ້​ການ​ກໍ່ສ້າງ ປັບປຸງ​ພັກ, ​ເຮັດ​ໃຫ້​ພັກ​ນັບ​ມື້​ນັບ​ສະອາດ​ປອດ​ໃສ​ແລະ​ໝັ້ນຄົງ​ເຂັ້ມ​ແຂງ, ​ເຮັດ​ຫຼ້ອນ​ໜ້າ​ທີ່​ຮັບຜິດຊອບຂອງ​ກອງ​ນຳ​ໜ້າ ນຳພາ​ພາລະກິດ​ການ​ປະຕິວັດ​ໃນ​ໄລຍະ​ໃໝ່. ທິດ​ທາງ​ລວມຂອງ​ການ​ກໍ່ສ້າງ, ປັບປຸງ​ພັກ​ໃນ​ປະຈຸ​ບັນ​ແມ່ນ​ຕ້ອງ​ສືບ​ຕໍ່​ເສີມ​ຂະ​ຫຍາ​ຍມູນ​ເຊື້ອ​ອັນ​ດີງາມ, ຮັກສາ​ແລະ​ເພີ່ມ​ທະວີ​ທາດ​ແທ້​ປະຕິວັດ ​ແລະ ລັກສະນະ​ນຳ​ໜ້າ​ຂອງ​ພັກ, ກໍ່ສ້າງ​ພັກ​ໃຫ້​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ​ແທ້ ທັງ​ດ້ານ​ການ​ເມືອງ, ​ແນວ​ຄິດ, ການຈັດ​ຕັ້ງ ​ແລະ​ຄຸນສົມບັດ​ສິນ​ທຳ, ປ່ຽນ​ແປງ​ໃໝ່​ແບບ​ວິທີ​ນຳພາ​ຂອງ​ພັກ, ​ເພີ່ມ​ທະວີ​ຄວາມ​ພົວພັນ​ໃກ້ຊິດ​ລະຫວ່າງ​ພັກ​ກັບ​ປະຊາຊົນ, ຮັບປະກັນ​ໃຫ້​ພັກ​ມີ​ກຳລັງ​ແຮງ​ຢ່າງ​ພຽງພໍ​ເພື່ອ​ນຳພາພາລະກິດ​ຊອງ​ປະ​ເທດ​ຊາດ​ໃຫ້​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ.

​ໃນ​ເງື່ອນ​ໄຂ​ພັກຂອງ​ພວກ​ເຮົາ​ເປັນ​ພັກ​ກຳ​ອຳນາດ, ​ເຄື່ອນ​ໄຫວ​ໃນ​ສະພາບ​ແວດ​ລ້ອມ​ການ​ພັດທະນາ​​ເສດຖະກິດ​ຕະຫຼາດ ​ແລະ​ເຊື່ອມ​ໂຍງ​ສາກົນ; ພະນັກງານ, ສະມາຊິກ​ພັກຮັບຜິດຊອບ​ຕຳ​ແໜ່ງສຳຄັນ​ຫຼາຍ​ຢ່າງ, ທຸກ​ມື້​ ທຸກຊົ່ວ​ໂມງຕິດ​ຕໍ່​ກັບ​ສິນຄ້າ​ແລະ​ເງິນ, ຕິດ​ກັບ​ຜົນ​ປະ​ໂຫຍ​ດສ່ວນບຸກຄົນ, ປະ​ເຊີ​ນໜ້າ​ກັບ​ສິ່ງ​ຈອບ​ອອຍຊວນ​ໃຈ, ກັບ​ດ້ານລົບ​ຂອງກົນ​ໄກ​ຕະຫຼາດ, ພວກ​ເຮົາ​ຍິ່ງ​ຕ້ອງ​ເບິ່ງ​ແຍງ​ຮັກສາ​ທາດ​ແທ້​ປະຕິວັດ ​ແລະ ລັກສະນະ​ນຳ​ໜ້າ​ຂອງ​ພັກ. ຖ້າ​ບໍ່​ຮັບ​ຮູ້​ເລື່ອງ​ນີ້​ຢ່າງ​ເລິກ​ເຊິ່ງ, ຖ້າ​ພະນັກງານ​ສະມາຊິກ​ພັກ​ບໍ່​ຕັ້ງໜ້າ ​ແລະ ອົດທົນ​ຝຶກ​ຝົນ​ຫຼໍ່​ຫຼອນ ກໍ່​ຈະ​ຖືກ​ເສື່ອ​ມ​ໂຊມ​ປ່ຽນ​ທາດ​ໂດຍ​ງ່າຍ. ບັນ​ຫາ​ຮັກສາ​ທາດ​ແທ້​ຂອງ​ພັກ - ​ແມ່ນ​ພັກ​ກອມ​ມູນິດ, ພັກ​ປະຕິວັດ​ທີ່​ແທ້​ຈິ​ງ, ທີ່​ເຄື່ອນ​ໄຫວ​ເພື່ອ​ພາລະກິດ​ຂອງ​ຊົນ​ຊັ້ນ​ກຳມະກອນ, ຂອງ​ຊາດ, ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ ​​ເປັນ​ບັນຫາ​​ພື້ນຖານ​ແລະ​ສຳຄັນ​ທີ່​ສຸດ.

ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ກ່ຽວ​ກັບ​ການ​ເພີ່ມ​ທະວີ​ການ​ກໍ່ສ້າງ, ປັບປຸງ​ພັກ ​ໄດ້​ຢືນຢັນ​ວ່າ ຕ້ອງດຳ​ເນີນ​ການ​ກໍ່ສ້າງ, ປັບປຸງ​ພັກ ດ້ວຍ​ຈິດ​ໃຈ​ຕັ້ງໜ້າ, ​ເດັດດ່ຽວແລະ​ແຂງ​ແຮງ, ​ແນ​ໃສ່​ສ້າງ​ໃຫ້​ມີ​ການຫັນປ່ຽນ​ຢ່າງ​ຈະ​ແຈ້ງ​ກວ່າ​ອີກ ​ໃນ​ດ້ານ​ຕ່າງໆ, ກີດ​ກັ້ນ​ແລະ​ຍູ້​ຖອຍ​ສະພາບ​ການ​ເສື່ອ​ມ​ໂຊມ, ປັບປຸງຄວາມ​ມຸ່ງ​ໝັ້ນ​ກ່ຽວ​ກັບ​ເປົ້າ​ໝາຍ, ອຸດົມ​ຄະຕິ​ການ​ປະຕິວັດ; ​ເພີ່ມ​ທະວີ​ຄວາມ​ເປັນ​ເອກະ​ພາບ​ທາງ​ດ້ານ​ເຈດ​ຈຳນົງ​ແລະ​ການ​ກະທຳ; ປັບປຸງ​ການຈັດ​ຕັ້ງ​ໃຫ້​ແໜ້ນ​ແຟ້ນ; ​ເພີ່ມ​ທະວີ​ຄວາມ​ພົວພັນ​ສະໜິດ​ແໜ້ນ​ກັບ​ປະຊາຊົນ; ຍົກ​ສູງ​ຄວາມ​ສາມາດ​ນຳພາ​ແລະ​ກຳລັງ​ແຮງ​ສູ້​ຮົບ​ຂອງ​ພັກ, ຖື​ວ່າ​ນີ້​ແມ່ນ​ບັນຫາ​ເປັນຕາຍຂອງ​ພັກ​ ​ແລະ ຂອງ​ລະບອບ​ການ​ປົກຄອງຂອງ​ພວກ​ເຮົາ. ພັກ​ປະຕິວັດ​ທີ່​ແທ້​ຈິງ​ມີ​ແນວທາງ​ທີ່​ຖືກຕ້ອງ, ມີການຈັດຕັ້ງແໜ້ນແຟ້ນ, ມີຖັນແຖວພະນັກງານ ສະມາຊິກພັກທີ່ສະອາດປອດໄສ, ເປັນແບບຢ່າງ, ສຸດອົກສຸດໃຈຕໍ່ໜ້າທີ່, ພົວພັນໃກ້ຊິດກັບປະຊາຊົນ, ໄດ້ຮັບການສະໜັບສະໜູນຂອງປະຊາຊົນ, ພັກນັ້ນຈະມີກຳລັງແຮງຊະນະເລີດ, ບໍ່ມີອິດທິກຳລັງໃດທີ່ຈະຂັດຂວາງເສັ້ນທາງແຫ່ງການນຳພາປະເທດຊາດກ້າວຂຶ້ນຂ້າງໜ້າ.

ປີ​ນີ້​ ພວກ​ເຮົາ​ສະ​ເຫຼີ​ມສະຫຼອງ​ວັນ​ສ້າງ​ຕັ້ງ​ພັກ​ໃນ​ເວລາ​ທີ່​ປະ​ເທດ​ຂອງ​ພວກ​ເຮົາ​ໄດ້​ຜ່ານ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, 50 ປີ​ແຫ່ງ​ການ​ປະຕິບັດພິ​ໄນ​ກຳ ຂອງ​ປະທານ​ໂຮ່ຈີ​ມິນ. ນັ້ນ​ແມ່ນ​ໄລຍະ​ທາງ​ປະຫວັດສາດທີ່​ສຳຄັນ​ໃນ​ພາລະກິດ​ການ​ພັດທະນາ​ຂອງ​ປະ​ເທດ​ເຮົາ, ຂີດ​ໝາຍ​ຄວາມ​ເຕີບ​ໃຫຍ່​ໃນ​ທຸກ​ດ້ານ​ຂອງ​ພັກ, ລັດ ​ແລະ​ປະຊາຊົນ​ເຮົາ. ການ​ປ່ຽນ​ແປງ​ໃໝ່​ມີ​ຂະໜາດ​ແລະ​ຄວາມ​ໝາຍ​ປະຫວັດສາດ, ​ແມ່ນ​ຂະ​ບວນວິວັດ​ການ​ດັດ​ປ່ຽນ​ທີ່​ເລິກ​ເຊິ່ງ, ຮອບດ້ານ, ​ເຖິງ​ຖອງ, ​ແມ່ນ​ພາລະກິດ​ອັນ​ຍິ່ງ​ໃຫຍ່​ຂອງ​ທົ່ວພັກ, ທົ່ວ​ປວງ​ຊົນ​ເຮົາ. ​ເບິ່ງ​ໂດຍ​ລວມ, ພາຍຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ປະ​ເທດ​ຂອງ​ພວກ​ເຮົາ​ໄດ້​ບັນລຸ​ບັນດາ​ຜົນສຳ​ເລັດ​ທີ່​ໃຫຍ່​ຫຼວງ, ມີ​ຄວາມ​ໝາຍ​ປະຫວັດສາດ. ຜົນສຳ​​ເລັດ​ຂອງ​ປີ 2018, ຂອງ 3 ປີ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ຍິ່ງ​ປັບປຸງ​ຍົກ​ສູງ​ຄວາມ​ເຊື່ອ​ໝັ້ນ​ຂອງ​ພວກ​ເຮົາ​ຕໍ່ອະນາຄົດ​ອັນ​ສະຫວ່າງ​ສົດ​ໃສ​ຂອງ​ຊາດ, ຂອງ​ປະ​ເທດທີ່ຢູ່​ທາງ​ໜ້າ.

ປີ 2019 ​ແມ່ນ​ປີ​ທີ​ສີ່ - ປີ​ກະກຽມ​ສິ້ນ​ສຸດສະ​ໄໝ 5 ປີ, ມີທີ່​ຕັ້ງ​ສຳຄັນ​ທີ່​ສຸດ​ໃນ​ການ​ປະຕິບັດ​ຢ່າງ​ສຳ​ເລັດ​ມີ​ໄຊ ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ ແລະ ​ແຜນການ​ພັດທະນາ​ເສດຖະກິດ-ສັງຄົມ 5 ປີ 2016 - 2020 ທັງ​ໝົດ; ປີ​ເລີ່​ມຕົ້ນ​ຂະ​ບວນການ​ກະກຽ​​ມ​ໃຫ້​ແກ່​ການ​ຈັດ​ຕັ້ງ​ກອງ​ປະຊຸມ​ໃຫຍ່​ຄະນະ​ພັກ​ຂັ້ນ​ຕ່າງໆ​, ກ້າວ​ໄປ​ເຖິງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XIII ຂອງ​ພັກ. ສະພາບ​ການ​ສາກົນ​ແລະ​ສະພາບ​ການ​ໃນ​ປະ​ເທດ​ອຳນວຍ​ໂອກາດ​ແລະ​ຄວາມ​ສະດວກ​ຫຼາຍ​ຢ່າງ ​ແຕ່​ກໍ່​ມີ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ບໍ່​ໜ້ອຍ, ຮຽກຮ້ອງ​ໃຫ້​ທົ່ວ​ພັກ, ທົ່ວ​ປວງ​ຊົນ​ແລະທົ່ວ​ກອງທັບ​ເຮົາ ຕ້ອງ​ມີ​ຄວາມ​ພະຍາຍາມ​ສູ້​ຊົນ​ສູງ, ຄວາມ​ຕັດສິນ​ໃຈ​ສູງ ​ເພື່ອປະຕິບັດ​ໜ້າ​ທີ່​​ໃນ​ປີ 2019 ຢ່າງ​ສຳ​ເລັດ​ມີ​ໄຊ ຊຶ່ງ​ຈຸດ​ໜັກ​ໃຈກາງ​ຄື: ສູ້​ຊົນ​ເພື່ອ​ສຳ​ເລັດ​ໃນ​ລະດັບ​ສູງ​ສຸດ ບັນດາ​ໜ້າ​ທີ່​ພັດທະນາ​ເສດຖະກິດ​-ສັງຄົມ; ​ເພີ່ມ​ທະວີ​ຄວາມ​ໝັ້ນຄົງ​ຂອງ​ເສດຖະກິດ​ມະຫາ​ພາກ, ຍູ້​ແຮງ​ການ​ປະຕິບັດ​ບັນດາ​ການ​ບຸກທະລຸ​ຍຸດ​ທະ​ສາດ, ປັບ​ໂຄງ​ສ້າງ​ເສດຖະກິດ​ຕິດ​ກັບ​ການ​ປ່ຽນ​ແປງ​ໃໝ່​ຮູບ​ແບບ​ການ​ເຕີບ​ໂຕ, ຮັບປະກັນ​ຄວາມ​ປອດ​ໄພ​ທາງ​ສັງຄົມ ​ແລະ​ສະຫວັດດີ​ການ​ສັງຄົມ, ປົວ​ແປງ​ຊີວິດ​ການ​ເປັນ​ຢູ່​ຂອງ​ປະຊາ​ຊົນ​ໃຫ້​ດີ​ຂຶ້ນ. ຮັກສາ​ເອກະ​ລາດ, ​ອະທິປະ​ໄຕ ​ແລະ ສະພາບ​ແວດ​ລ້ອມ​ສັນຕິພາບ, ສະຖຽນ​ລະ​ພາບ ​ເພື່ອ​ພັດທະນາ​ປະ​ເທດ; ຍູ້​ແຮງ​ການ​ພົວພັນ​ຕ່າງປະ​ເທດ. ສືບ​ຕໍ່​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ກ່ຽວ​ກັບ​ການ​ເພີ່ມ​ທະວີ​ການ​ກໍ່ສ້າງ, ປັບປຸງ​ພັກ, ​ແລະ​ປະຕິບັດຄຳ​ສັ່ງ​ສະບັບ​ທີ 05-CT/TW ຂອງ​ກົມ​ການ​ເມືອງ ກ່ຽວ​ກັບ​ການ​ຍູ້​ແຮງ​ການ​ຮ່ຳຮຽນ ​ແລະ ປະຕິບັດ​ຕາມ​ແນວ​ຄິດ, ຄຸນສົມບັດ​ສິນ​ທຳ, ​ແບບ​ແຜນ​ໂຮ່ຈີ​ມິນ, ສ້າ​ງໃຫ້​ມີ​ການ​ປ່ຽນ​ແປງ​ແຂງ​ແຮງ​ກວ່າ​ອີກ​ໃນ​ວຽກ​ງານ​ກໍ່ສ້າງ, ປັບປຸງ​ພັກ.

ດ້ວຍ​ຄວາມ​ເບີກບານ​ມ່ວນ​ຊື່ນ, ຄວາມ​ເອກອ້າງ​ທະ​ນົງ​ໃຈ, ພວກ​ເຮົາ​ເຊື່ອ​ໝັ້ນ​ວ່າ, ພັກ​ກອມ​ມູນິດ​ຫວຽດນາມ - ພັກ​ຂອງ​ປະທານ​ໂຮ່ຈີ​ມິນ - ​ແນ່ນອນ​ຈະ​ສຳ​ເລັດ​ພາລະ​ໜ້າ​ທີ່​ຂອງ​ຕົນ​ຢ່າງ​ດີ​ເດັ່ນ. ທົ່ວ​ພັກ, ທົ່ວ​ປວງ​ຊົນ, ທົ່ວ​ກອງທັບ​ເຮົາ ຮ່ວມ​ແຮງ​ຮ່ວມ​ໃຈ​ກັນ, ພະຍາຍາມ​ສູ້​ຊົນ​ກໍ່ສ້າງ​ປະ​ເທດ​ຫວຽດນາມ​ໃຫ້​ເປັນ​ປະ​ເທດ​ສັນຕິພາບ, ​ເອກະລາດ, ​ເອກະ​ພາບ, ປະຊາທິປະ​ໄຕ, ຮັ່ງມີ​ເຂັ້ມ​ແຂງ, ກ້າວ​ຢ່າງ​ໜັກ​ແໜ້ນ​ຂຶ້ນ​ສູ່​ສັງຄົມ​ນິຍົມ.

ພັກ​ເຂັ້ມ​ແຂງ, ປະ​ເທດ​ພັດທະນາ, ປະຊາ​ຊາດ​ຍືນ​ຍົງ​ຍາວ​ນາມ!

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ