ວັນອັງຄານ, 21/5/2019
ການປ່ຽນແປງໃໝ່ແບບວິທີການນຳພາຂອງພັກ - ປັດໄຈທີ່ກຳນົດຜົນສຳເລັດໃນວຽກງານຂົນຂວາຍແມ່ຍິງ ຂອງສະຫະພັນແມ່ຍິງຫວຽດນາມ
19/4/2019 12:1' ສົ່ງ ພິມ
ທ່ານນາງ ຫງວຽນທິທູຮ່າ ກຳມະການສູນກາງພັກ, ປະທານສະຫະພັນແມ່ຍິງຫວຽດນາມ ມອບຂອງຂວັນອວຍພອນປີໃໝ່. (ພາບ: TTXVN)

ການສືບ​ຕໍ່​ຄົ້ນຄວ້າຊີ້​ແຈງ​ກ່ຽວ​ກັບ​ເນື້ອ​ໃນການປ່ຽນ​ແປງ​ໃໝ່​​​ແບບວິທີການນຳພາຂອງ​ພັກ​ຕໍ່​ວຽກ​ງານ​ຂົນຂວາຍ​ແມ່ນ​ຍິງ​ແລະສະຫະພັນ​ແມ່ຍິງ​ຫວຽດນາມ ຕິດ​ກັບ​ຄວາມ​ຕ້ອງການ​ພັດທະນາ​ປະ​ເທດ​ໃນ​ໄລຍະ​ປະຈຸ​ບັນນີ້ ​ແມ່ນ​ໜ້າ​ທີ່​ການ​ເມືອງ​ທີ່​ສຳຄັນ, ຕິດ​ກັບ​ການ​ລະດົມ​ກຳລັງ​ແຮງ​ຂອງ​ກຸ່ມ​ກ້ອມ​ມະຫາ​ສາມັກຄີ​ປວງ​ຊົນ​ທັງ​ຊາດ ​ເພື່ອ​ການ​ພັດທະນາ​ແບບ​ຍືນ​ຍົງ​ຂອງ​ປະ​ເທດ.

​ແບບວິທີການນຳພາຂອງ​ພັກ​ແມ່ນ​ການ​ສັງ​ລວມບັນດາ​ວິທີ, ວິທີ​ການ​ ແລະ​ມາດ​ຕະການ​ ທີ່​ພັກ​ໃຊ້​ເພື່ອ​ປະຕິບັດ​ບົດບາດການ​ນຳ​ຂອງ​ຕົນ ​ໃນ​ຖານະ​ພັກ​ການ​ເມືອ​ງທີ່ກຳ​ອຳນາດ, ນຳພາ​ລັດ​ແລະ​ທົ່ວ​ສັງຄົມ. ແບບວິທີການນຳພາຂອງ​ພັກຂຶ້ນ​ກັບ​ຫຼາຍ​ປັດ​ໄຈ, ​ໃນ​ນັ້ນ​ມີ​ເປົ້າ​ໝາຍ​ນຳພາ ​ແລະ ການ​ປ່ຽນ​ແປງ​ຕາມ​ໜ້າ​ທີ່, ຄວາມ​ຕ້ອງການ​ຂອງ​ແຕ່ລະ​ໄລຍະ​ການ​ປະຕິວັດ, ພ້ອມ​ກັນ​ນັ້ນ ບໍ່​ແຍກ​ອອກ​ຈາກ​ເນື້ອ​ໃນ​ຂອງ​ການ​ນຳພາ, ຊຶ່ງ​ໄດ້​ຕັ້ງ​ຢູ່​ໃນ​ສາຍ​ພົວພັນ​ສັດຈະ​ວິພາກ​ ກັບການຈັດ​ຕັ້ງ​ກົງຈັກ, ກົນ​ໄກ​ປະຕິ​ບັດ​ງານ ​ແລະ​ແບບ​ແຜນການ​ເຮັດ​ວຽກ​ຂອງລະບົບ​ການຈັດ​ຕັ້ງ, ຂອງ​ພະນັກງານ ສະມາຊິກ​ພັກ ຂ້າ​ລັດຖະການ​ແຕ່ລະຄົນ.

​ເປົ້າ​ໝາຍ​ນຳພາ​ຂອງ​ພັກ​ແມ່ນ​ກວ້າງ​ທີ່​ສຸດ, ​ໃນ​ນັ້ນ​ມີ​ວຽກ​ງານ​ຂົນຂວາຍ​ແມ່ຍິງ ​ແລະ ສະຫະພັນ​ແມ່ຍິງ​ຫວຽດນາມ ​ໃນ​ຖານະ​ອົງການ​ຈັດ​ຕັ້ງ​ການ​ເມືອງ-ສັງຄົມ, ຕາງ​ໜ້າ​ໃຫ້​ສິດທິ​ແລະ​ຜົນ​ປະ​ໂຫຍ​ດທີ່​ຖືກ​ກົດໝາຍ ຊອບ​ທຳ​ຂອງ​ແມ່ຍິງ​ທຸກ​ຊັ້ນ​ຄົນ. ​ໃນ​ທຸກ​ໄລຍະ​ການ​ປະຕິວັດ, ພັກ​ກອມ​ມູນິດ​ຫວຽດນາມ​ໄດ້​ໃຫ້​ຄວາມ​ສຳຄັນ​ເປັນ​ປະຈຳ​ ເຖິງ​ບົດບາດ​ແລະ​ການ​ປະກອບສ່ວນ​ອັນ​ໃຫຍ່​ຫຼວງ​ຂອງ​​ແມ່ຍິງທຸກ​ຊັ້ນ​ຄົນ, ພ້ອມ​ກັນ​ນັ້ນ​ກໍ​ໄດ້​ກຳນົດ: “ວຽກ​ງານ​ແມ່ຍິງ​ແມ່ນ​ຄວາມ​ຮັບຜິດຊອບ​ຂອງ​ລະບົບ​ການ​ເມືອງ​ທັງ​ໝົດ, ຂອງ​ທົ່ວ​ສັງຄົມ ​ແລະ​ແຕ່​ລະ​ຄອບຄົວ. ​ໃນ​ນັ້ນ, ​ແກ່ນສານ​ນຳພາ​ແມ່ນ​ຄະນະ​ພັກ​ຂັ້ນ​ຕ່າງໆ, ຜູ້​ຮັບຜິດຊອບ​ໂດຍ​ກົງແລະ​ຕົ້ນຕໍ​ ແມ່ນອົງການ​ຄຸ້ມ​ຄອງ​ລັດ​ຂັ້ນຕ່າງໆ, ບົດບາດ​ຂອງ​ເຈົ້າພາບ​ແມ່ນ​ຂອງ​ແມ່ຍິງ ຊຶ່ງ​ຫຼັກ​ແຫຼ່ງ​ແມ່ນສະຫະພັນ​ແມ່ຍິງ​ຫວຽດນາມຂັ້ນ​ຕ່າງໆ”(1). ການ​ປ່ຽນ​ແປງ​ໃໝ່ແບບວິທີການນຳພາຕໍ່​ສະຫະພັນ​ແມ່ຍິງ ​ແລະ​ຕໍ່​ວຽກ​ງານ​ຂົນຂວາຍ​ແມ່ຍິງ ​ໄດ້​ຮັບ​ຄວາມ​ເອົາ​ໃຈ​ໃສ່​ຕາມ​ທິດ ​ເຄົາລົບ​ຄວາມ​ເປັນ​ເຈົ້າ​ຕົນ​ເອງ, ສະໜັບສະໜຸນການ​ເຄື່ອນ​ໄຫວ​ສະໝັກ​ໃຈ ຕັ້ງໜ້າ ປະດິດ​ສ້າງ​ທຸກ​ຢ່າງ ​ແລະ ຈິງ​ໃຈ​ຮັບ​ຟັງ​ຄວາມ​ຄິດ​ເຫັນ​ປະກອບສ່ວນຂອງ​ແມ່ຍິງ ບົນ​ພື້ນຖານ​ປະຕິບັດ​ຕາມ​ກົດໝາຍ ລັດຖະທຳ​ມະນູນ ​ແລະ ຮັບປະກັນ​ການ​ນຳພາ​ຂອງ​ພັກ. ນີ້​ແມ່ນ​ປັດ​ໄຈທີ່​ມີ​ລັກສະນະ​ຕັດສິນ​ຜົນສຳ​ເລັດ​ທີ່​ບັນລຸ​ໄດ້​ໃນ​ວຽກ​ງານ​ຂົນຂວາຍ​ແມ່ຍິງ​ເວົ້າ​ລວມ ​ແລະ ການ​ເຄື່ອນ​ໄຫວ​ຂອງສະຫະພັນ​ແມ່ຍິງ​ຫວຽດນາມ​ເວົ້າ​ສະ​ເພາະ, ພິ​ເສດ​ແມ່ນ​ໃນ​ຊຸມ​ປີ​ແຫ່ງ​ການ​ປ່ຽນ​ແປງ​ໃໝ່​ປະ​ເທດ. ໜຶ່ງ​ໃນ​ບັນດາແບບວິທີການນຳພາຂອງ​ພັກຕໍ່​ວຽກ​ງານ​ຂົນຂວາຍ​ແມ່​ຍິງ ​ແລະ ສະຫະພັນ​ແມ່ຍິງ​ຫວຽດນາມ ​ໄດ້​ສະ​ແດງ​ອອກ​ໂດຍ​ຜ່ານການອອກ​ແຜນ​ນະ​ໂຍບາຍ ມະຕິ ​ແລະ ການ​ນຳພາ​​ປະຕິບັດ​ແຜນ​ນະ​ໂຍບາຍ ມະຕິ​ເຫຼົ່າ​ນັ້ນ ຊຶ່ງ​ມີ​ບາງ​ເນື້ອ​ໃນ​ພື້ນຖານ​ລຸ່ມ​ນີ້:

ທີ່​ໜຶ່ງ, ການ​ປ່ຽນ​ແປງ​ໃໝ່ຂະ​ບວນການ​ແລະ​ວິທີ​ການ​ອອກ​ມະຕິ​ຂອງ​ພັກ ກ່ຽວກັບ​ວຽກ​ງານ​ຂົນຂວາຍ​ແມ່ຍິງ ​ແລະ ສະຫະພັນ​ແມ່ຍິງ​ຫວຽດນາມ ຕາມ​ທິດ​ເພີ່ມ​ທະວີ​ການ​ເຂົ້າ​ຮ່ວມ​ຂອງ​ແມ່ຍິງ ​ແລະ​ເສີມ​ຂະຫຍາຍ​ບົດບາດ​ວິຈານສັງຄົມ​ຂອງອົງການ​ສະຫະພັນ ​ໃນ​ຂະ​ບວນວິວັດ​ການ​ສ້າງ​ເອກະສານ​ທີ່​ກ່ຽວຂ້ອງ.

ຊາບ​ຊຶມ​ຈິດ​ໃຈ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6 (​ເທື່ອ​ທີ່ 2) ສະ​ໄໝ​ທີ VIII ວ່າ​ດ້ວຍ​ບາງ​ບັນຫາ​ອັນ​ພື້ນຖານ​ແລະ​ຮີບ​ດ່ວນ ​ໃນ​ວຽກ​ງານ​ການ​ກໍ່ສ້າງ​ພັກ​ໃນ​ປະຈຸ​ບັນ: ປ່ຽນ​ແປງ​ໃໝ່​ວິທີ​ອອກ​ມະຕິ​ແລະ​ຄຳ​ສັ່ງ​ຂອງ​ພັກ... ມະຕິ​ຕ້ອງ​ສັ້ນ​ແລະຈະ​ແຈ້ງ ຊຶ່ງ​ຄະນະ​ພັກ ອົງການ​ຈັດ​ຕັ້ງ​ພັກ ຂະ​ແໜງ​ການ​ຂັ້ນ​ຕ່າງໆ​ສາມາ​ປະຕິບັດ​ໄດ້​ໃນ​ທັນທີ, ລົດເວລາ​ລໍຖ້າ​ຄຳ​ແນະນຳ, ຫັນ​ເປັນ​ລະອຽດ​ຢູ່​ຂັ້ນ​ຕ່າງ​ໆ... ​ໃນ​ຊຸມ​ປີ​ທີ່​ຜ່ານ​ມາ​ມໍ່​ນີ້, ພັກ​ກອມ​ມູນິດ​ຫວຽດນາມ​ໄດ້​ມີ​ການ​ປ່ຽນ​ແປງ​ໃໝ່​ໂດຍ​ພື້ນຖານ​ ໃນ​ວິທີ​ເຂົ້າ​ເຖິງບັນດາ​ບັນຫາ​ຂອງ​ແມ່ຍິງ, ​ເສີມ​ຂະຫຍາຍ​ຢ່າງ​ແຂງ​ແຮງ​ບົດບາດ​ວິຈານ​ສັງຄົ​ມຂອງ​ສະຫະພັນ​ໃນ​ຂະ​ບວນວິວັດ​ການ​ກໍ່ສ້າງ, ປະກາດ​ໃຊ້​ແຜນ​ນະ​ໂຍບາຍ, ມະຕິ, ນະ​ໂຍບາຍ​ທີ່​ກ່ຽວ​ພັນ​ເຖິງວຽກ​ງານ​ຂົນຂວາຍ​ແມ່ຍິງ. ຂໍ້​ກຳນົດ​ກ່ຽວ​ກັບ​ການ​ເກັບ​ກຳ​ຄວາມ​ເຫັນ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ​ຂອງ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ, ​ໃນ​ນັ້ນ​ມີ​ອົງການ​ສະຫະພັນ​ແມ່ຍິງ ​ໄດ້​ເອົາ​ເຂົ້າ​ໃນ​ເອກະສານ​ຫຼາຍ​ສະບັບ​ຂອງ​ພັກ ​ແລະ ລັດ, ​ເຊັ່ນ: ກົດ​ລະບຽບ​ກ່ຽວ​ກັບ​ການ​ຕິດຕາມ​ກວດກາ​ແລະວິຈານ​ສັງຄົມ ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງຄະ​ນະ​ການ​ເມືອງ-ສັງຄົມ, ອີງຕາມຂໍ້​ຕົກລົງ​ເລກທີ 217-QĐ/TW, ລົງວັນ​ທີ 12-12-2013, ຂອງ​ກົມ​ການ​ເມືອງ; ກົດໝາຍ​ວ່າ​ດ້ວຍ​ການ​ປະກາດ​ໃຊ້​ເອກະສານ​ທາງ​ກົດໝາຍປີ 2015; ກົດໝາຍ​ວ່າ​ດ້ວຍ​ການຈັດ​ຕັ້ງ​ລັດຖະບານ​ປີ 2015; ກົດໝາຍ​ວ່າ​ດ້ວຍ​ການຈັດ​ຕັ້ງ​ອຳນາດ​ການ​ປົກຄອງ​ທ້ອງ​ຖິ່ນ​ປີ 2015; ກົດໝາຍ​ວ່າ​ດ້ວຍ​ຄວາມ​ຄວາມ​ສະ​ເໝີ​ພາບ​ທາງ​ເພດ...

​ເສີມ​ຂະຫຍາຍ​ປະຊາທິປະ​ໄຕ ​ແລະ​ຮັບ​ຟັງ​ຄວາມ​ເຫັນ​ຂອງ​ແມ່ຍິງ, ​ເພີ່ມ​ທະວີ​ບັນດາ​ເວທີ​ປາ​ໄສ​ການ​ສົນທະນາ​ໂດ​ຍກົງ​ ລະຫວ່າງຜູ້ນຳ​ໜ້າ​ຄະນະ​ພັກ, ອຳນາດ​ການ​ປົກຄອງ ກັບອົງການ​ສະຫະພັນ ​ແລະກັບ​ແມ່ຍິງ, ​ເກັບ​ກຳ​ຄວາມ​ເຫັນ​ຢ່າງ​ກວ້າງຂວາງ​ຂອງ​ບັນດາ​ສຳນັກງານ​ອົງການ, ການຈັດ​ຕັ້ງ​ແລະ​ບຸກຄົນ​ທີ່​ກ່ຽວຂ້ອງ, ​ໂດຍ​ສະ​ເພາະ​ແມ່ຍິງ​ຜູ້​ທີ່​ໄດ້​ຮັບ​ຜົນ​ປະ​ໂຫຍ​ດ ຫຼື​ຖືກ​ການ​ກະທົບ​ຈາກ​ແຜນ​ນະ​ໂຍບາຍ ມະຕິ ນະ​ໂຍບາຍ, ​ແມ່ນ​ໄດ້​ຮັບ​ຄວາມ​ເອົາ​ໃຈ​ໃສ່​ຫຼາຍ​ກວ່າ; ​ເພາະສະ​ນັ້ນ, ​ແຜນ​ນະ​ໂຍບາຍ ມະຕິ ​ທັງ​ຮັບປະກັນ​ລັກສະນະ​ວິທະຍາສາດ, ​ເຄົາລົບ​ກົດ​ເກນ​ພາວະ​ວິ​ໄສ, ທັງ​ຫັນ​ສູ່​ການ​ແກ້​ໄຂ​ຢ່າງ​ຖືກຕ້ອງບັນຫາ​ທີ່​ພວມ​ວາງ​ອອກ​ມາ​ສຳລັບ​ແມ່ຍິງ​ແລະ​ວຽກ​ງານຂອງ​ສະຫະພັນ​ແມ່ຍິງ ​ເພື່ອ​ສຸມ​ໃສ່​ນຳພາ​ບັນດາ​ຂັ້ນ ຂະ​ແໜງ​ການ, ສະຫະພັນ​ແມ່ຍິງ​ຫວຽດນາມ, ​ແມ່ຍິງ ​ແລະ​ທົ່ວ​ສັງຄົມ​ ໃນ​ການ​ປະຕິບັດ.

ພຽງ​ແຕ່​ສຳລັບ​ຮ່າງ​ລັດຖະທຳ​ມະນູນ​ປີ 2013, ສະຫະພັນ​ແມ່ຍິງ​ຫວຽດນາມ​ຂັ້ນ​ຕ່າງໆ​ໄດ້ຈັດ​ຕັ້ງ​ການ​​ເກັບ​ກຳ​ຄວາມ​ເຫັນ​ຂອງ​ແມ່ຍິງກວ່າ 10 ລ້ານ​ຄົນ, ​ໃນ​ນັ້ນ​ກວ່າ 1,2 ລ້ານຄົນ​ໄດ້​ປະກອບຄວາມ​ຄິດ​ເຫັນ. ​ໃນ 5 ປີ (​ແຕ່​ປີ 2013 ຮອດ​ປີ 2018), ສະຫະພັນ​ແມ່ຍິງ​ຫວຽດນາມ​ໄດ້​ເຂົ້າ​ຮ່ວມ​ການ​ວິຈານ​ສັງຄົມ​ຕໍ່​ຮ່າງ​ກົດໝາຍ​ຫຼາຍ​ສະບັບ​ທີ່​ສຳຄັນ, ມີ​ຜົນ​ກະທົບ​ໂດຍ​ກົງ​ເຖິງ​ແມ່ຍິງ, ​ເດັດ​ນ້ອຍ, ຄວາມ​ສະ​ເໝີ​ພາບ​ທາງ​ເພດ, ​ເຊັ່ນ ປະມວນ​ກົດໝາຍ​ແພ່ງ (ສະບັບປັບປຸງ); ປະມວນ​ກົດໝາຍ​ອາຍາ (ສະບັບ​ປັບປຸງ), ກົດໝາຍ​ວ່າ​ດ້ວຍ​ການ​ສົມລົດ​ແລະ​ຄອບຄົວ, ກົດໝາຍ​ປະກັນ​ໄພ​ສັງຄົມ, ກົດໝາຍ​ເດັກນ້ອຍ...; ຈັດ​ຕັ້ງ​ການ​ສົນທະນາ​ໂດຍ​ກົງກັບ​ບັນດາ​ອົງການ​ທີ່​ກ່ຽວຂ້ອງ 21.742 ຄັ້ງ(2) ເພື່ອ​ສະ​ເໜີ​ແນະ​ເນື້ອ​ໃນ​ທີ່​ລະອຽດ​ເຂົ້າ​ໃນ​ເອກະສານ​ຮ່າງ ບົນ​ພື້ນຖານ​ຄວາມ​ເຫັນ, ຄວາມ​ປາຖະໜາ​ຂອງ​ແມ່ຍິງ, ພາລະ​ບົດບາດ ໜ້າ​ທີ່​ຂອງ​ສະຫະພັນ​ແມ່ຍິງ ​ແລະ ຂໍ້​ກຳນົດ​ຂອງ​ກົດໝາຍ, ຫຼາຍ​ຄຳ​ເຫັນ​ຂອງສະຫະພັນ​ແມ່ຍິງ​ຫວຽດນາມ​ໄດ້ຮັບ​ຄວາມ​ຮັບ​ຮູ້​ແລະ​ປະກອບສ່ວນ​ເຮັດ​ໃຫ້​ລະບົບ​ນະ​ໂຍບາຍ​ກ່ຽວ​ກັບຄວາມ​ສະ​ເໝີພາບ​ທາງ​ເພດ, ນະ​ໂຍບາຍ​ສຳລັບ​ແມ່ຍິງ ນັບ​ມື້​ນັບ​ໄດ້​ຮັບ​ການ​ເພີ່ມ​ເຕີມ, ປັບປຸງ​ບູລະນະ ​ແລະ ​ໄດ້​ຮັບ​ການ​ປະ​ເມີນ​ວ່າ​ກ້າວໜ້າ​ເມື່ອ​ທຽບ​ກັບ​ບັນດາ​ປະ​ເທດ​ໃນ​ພາກ​ພື້ນ.

ທີ​ສອງ, ການ​ປະກາດ​ໃຊ້​ນະ​ໂຍບາຍ, ມະຕິ​ໄດ້​ຮັບ​ການ​ປ່ຽນ​ແປງ​ໃໝ່ຕາມ​ທິດ​ຫັນປ່ຽນ​ຈາກ​ການ​ເອົາ​ໃຈ​ໃສ່​ເຖິງ​ການ​​ເບິ່ງ​ແຍງ​ດູ​ແລ ມາ​ເປັນ​ການ​ເສີມ​ຂະຫຍາຍ​ບົດບາດ​ເຈົ້າ​ຂອງ​ຂອງ​ແມ່ຍິງ ​ໃນ​ການ​ພັດທະນາ​ປະ​ເທດ; ສະຫະພັນ​ແມ່ຍິງ​ຫວຽດນາມຈາກ​ບົດບາດ​ສູນກາງຂອງ​ຄວາມ​ສາມັກຄີ, ​ເຕົ້າ​ໂຮມ, ​ແນະນຳ ​ໄດ້​ຖືກຍົກ​ຂຶ້ນ​ໃນ​ລະດັບ​ທີ່​ສູງ​ຂຶ້ນ​ເປັນ​ບົດບາດຫຼັກ​ແຫຼ່ງ​ໃນ​ວຽກ​ງານ​ແມ່ຍິງ, ຕາງໜ້າ​ໃຫ້​ບັນດາ​ຊັ້ນ​ຄົນ​ແມ່ຍິງ, ​ໃນ​ນັ້ນ​ເນັ້ນ​ເຖິງ​ໜ້າ​ທີ່​ເຂົ້າ​ຮ່ວມ​ການ​ສ້າງ​ກົດໝາຍ, ນະ​ໂຍບາຍ, ບົດບາດ​ຕິດຕາມ​ກວດກາ, ວິຈານ​ສັງຄົມ, ​ເຂົ້າ​ຮ່ວມ​ການ​ກໍ່ສ້າງ​ພັກ, ກໍ່ສ້າງ​ອຳນາດ​ການ​ປົກຄອງ. 

ກ່ອນ​ອື່ນ​ໝົດ, ສຳ​ລັບ​ແມ່ຍິງ, ທິດ​ທາງ​ຫັນປ່ຽນ​ພື້ນຖານ​ແມ່ນ ຈາກ​ເປົ້າ​ໝາຍ​ທີ່​ຕ້ອງການ​ເອົາ​ໃຈ​ໃສ່, ​ເບິ່ງ​ແຍງ​ດູ​ແລ ມາ​ສູ່​ບົດບາດ​ເຈົ້າ​ຂອງ​ໃນ​ວຽກ​ງານ​ແມ່ຍິງ, ​ເສີມ​ຂະຫຍາຍ​ທ່າ​ແຮງ, ການ​ປະກອບສ່ວນ​ໃນ​ຖານະ​ຊັບພະຍາກອນ​ມະນຸດ​ທີ່​ສຳຄັນ​​ໃນ​ພະລະ​ກິດ​ການ​ພັດທະນາ​ປະ​ເທດ. ​ໃນ​ໄລຍະ​ຕົ້ນ​ຂອງ​ການ​ປ່ຽນ​ແປງ​ໃໝ່, ພັກ​ກອມ​ມູນິດ​ຫວຽດນາມກຳນົດ​ວ່າ “ຕ້ອງ​ຖື​ການ​ປົດ​ປ່ອຍ​ແມ່ຍິງ​​ເປັນ​ເປົ້າ​ໝາຍ​ແລະ​ເນື້ອ​ໃນທີ່​ສຳຄັນ​ຂອງການ​ປ່ຽນ​ແປງ​ໃໝ່”(3), ຮອດ​ປີ 2007, ມະຕິ​ເລກທີ 11-NQ/TW, ລົງວັນ​ທີ 27-4-2007, ​ລະບຸ “ການຍົກ​ສູງ​ສະຖານະ​ຂອງ​ແມ່ຍິງ, ປະຕິບັດ​ຄວາມ​ສະ​ເໝີ​ພາບ​ທາງ​ເພດ​ໃນ​ທຸກ​ຂົງ​ເຂດ...​ເປັນ​ໜຶ່ງ​ໃນ​ບັນດາ​ໜ້າ​ທີ່​ແລະ​ຈຸດໝາຍ​ທີ່​ສຳຄັນ​ຂອງການ​ປະຕິວັດ​ຫວຽດນາມ​ໃນຍຸກ​ສະ​ໄໝ​ໃໝ່”(4), ພ້ອມ​ກັນ​ນັ້ນ​ກໍ​ຢືນຢັນບົດບາດ​ເຈົ້າພາບ​ຂອງ​ແມ່ຍິງ​ໃນ​ກິດຈະການ​ປ່ຽນ​ແປງ​ໃໝ່​ປະ​ເທດຊາດ. ພາຍຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ຄຳ​ສັ່ງ​ເລກທີ 21- CT/TW, ລົງວັນ​ທີ 20-1-2018, ຂອງ​ຄະນະ​ເລຂາທິການ “ກ່ຽວກັບ​ການສືບ​ຕໍ່​ຍູ້​ແຮງ​ວຽກ​ງານ​ແມ່ຍິງ​ໃນ​ສະພາບ​ການ​ໃໝ່ (5), ຄຽງ​ຂ້າງ​ກັບ​ການ​ສືບ​ຕໍ່​ເອົາ​ໃຈ​ໃສ່ ​ເບິ່ງ​ແຍງ​ດູ​ແລ​ແມ່​ຍິງ, ​ໂດຍ​ສະ​ເພາະ​ແມ່ຍິງ​ຢູ່​ເຂດ​ພູດ​ອຍ ​ເຂດ​ຫ່າງ​ໄກ​ສອກຫຼີກ ​ເຂດ​ຊາຍ​ແດນ ​ເກາະ​ທະ​ເລ, ​ແມ່ຍິງ​ຊົນ​ເຜົ່າ​ສ່ວນ​ນ້ອຍ, ​ແມ່ຍິງ​ພິການ ປ່ຽວດ່ຽວ ສູງ​ອາຍຸ, ​ແມ່ຍິງ​ຖືພາ​ແລະ​ລ້ຽງ​ລູກນ້ອຍ, ​ແມ່ຍິງ​ແຮງ​ງານ​ອົບ​ພະຍົບ ປ່ຽນ​ອາຊີບ​ແລ້ວ, ຍັງ​ໄດ້​ເອົາ​ໃຈ​​ໃສ່​ເປັນ​ພິ​ເສດ​ເຖິງ​ການ​ເສີມ​ຂະຫຍາຍ, ຂຸດ​ຄົ້ນ​ທ່າແຮງ, ກຳລັງ​ຊ້ອນ​ແຝງ​ຂອງ​ແມ່ຍິງ ​ໃນ​ຖານ​ນະ​ຊັບພະຍາກອນ​ມະນຸດ​ທີ່​ສຳຄັນ​ຂອງ​ປະ​ເທດ, ​ເຊັ່ນ ​ເອົາ​ໃຈ​ໃສ່​ພັດທະນາ​ແຫຼ່ງບຸກຄະລາ​ກອນ​ແມ່ຍິງ​ຄຸນ​ນະພາ​ບສູງ, ​ເອົາ​ໃຈ​ໃສ່​ສຶກສາ​ກໍ່ສ້າງ, ຝຶກ​ອົບຮົມ, ນຳ​ໃຊ້, ຊົມ​ເຊີຍ​ໃຫ້​ກຽດ ​ເພື່ອ​ແນ​ໃສ່​ປຸກ​ຕື່ນ​ຄວາມ​ສາມາດ​ຊ້ອນ​ແຝງ, ສະຕິ​ປັນຍາ, ຄວາມ​ຄິດ​ປະດິດ​ສ້າງ, ຈິດ​ໃຈ​ເລີ່ມທຸລະ​ກິດ, ຄວາມ​ປາຖະໜາ​ຂອງຖັນ​ແຖວ​ຜູ້​ຄຸ້ມ​ຄອງ​ບໍລິຫານ​ຍິງ, ປັນຍາ​ຊົນ​ຍິງ, ພະນັກງານ​ວິທະຍາສາດ​ຍິງ, ນັກທຸລະກິດ​ຍິງ...

​ໂດຍ​ກຳ​ແໜ້ນ​ທັດສະນະຊີ້​ນຳ​ຂອງ​ພັກ, ​ໃນ​ໄລຍະ​ຕົ້ນ​ຂອງ​ການ​ປ່ຽນ​ແປງ​ໃໝ່, ສະມາຄົມ​ແມ່ຍິງ​ຂັ້ນ​ຕ່າງໆ​ໄດ້​ສຸມ​ໃສ່​ການ​ເຄື່ອນ​ໄຫວ​ເບິ່ງ​ແຍງ​ດູ​ແລ​ແມ່ຍິງ ​ໂດຍ​ຜ່ານ​ການ​ຂົນຂວາຍ​ຕ່າງໆ​ເຊັ່ນ “​ແມ່ຍິງ​ຊ່ວນ​ເຫຼືອ​ກັນ​ເຮັດ​ເສດຖະກິດ​ຄອບຄົວ” ​ແລະ “​ແມ່ຍິງ​ລ້ຽງ​ດູ​ສັ່ງສອນ​ລູກ​ດີ"; ປຸກ​ຕື່ນ​ຈິດ​ໃຈ​ຕັດສິນ​ໃຈ​ປະຕິບັດບັນດາ​ແຜນ​ນະ​ໂຍບາຍ​ປ່ຽນ​ແປງ​ໃໝ່ຢ່າງຮອບດ້ານ ​ເພື່ອນຳ​ເອົາ​ປະ​ເທດ​ຜ່ານ​ໄລຍະ​ເວລາ​ທີ່​ຫຍຸ້ງຍາກ; ສຸມ​ໃສ່​ການ​ຊ່ວຍ​ເຫຼືອ​ແມ່ຍິງ​ທາງ​ດ້ານ​​ເງິນທຶນ, ຄວາມ​ຮູ້, ບົດຮຽນ, ​ໃນ​ນັ້ນ​ການ​ເຄື່ອນ​ໄຫວ​ຊ່ວຍ​ເຫຼືອ​ທາງ​ດ້ານ​ເງິນ​ທຶນ​ເປັນ​ຫຼັກ ດ້ວຍຮູບ​ແບບ “ກຸ່ມ​ແມ່ຍິງ​ປະຢັດ", "ກອງ​ທຶນ​ແຫ່ງ​ຄວາມ​ຮັກ​ແພງ", ຂະ​ບວນການ “ວັນ​ປະຢັດ​ເພື່ອ​ແມ່ຍິງ​ທຸກ​ຍາກ", ...

ການ​ຫັນປ່ຽນ​ຈາກ​ການ​ເຄື່ອນ​ໄຫວ​​ເບິ່ງ​ແຍງດູ​ແລດ້ານ​ດຽວ ​ໄປ​ສູ່​ການຂຸດ​ຄົ້ນ, ​ເສີມ​ຂະຫຍາຍ​ທ່າ​ແຮງ, ຄວາມ​ສາມາດ​ຊ້ອນ​ແຝງ ​ແລະ ບົດບາດ​ເຈົ້າຂອງຂອງ​ແມ່ຍິງ ອີງ​ຕາມ​ທັດສະນະ​ຂອງ​ພັກ, ຊຶ່ງ​ສະມາຄົມ​ແມ່ຍິງ​ຂັ້ນ​ຕ່າງໆ ພ້ອມດ້ວຍ​ອຳນາດ​ການ​ປົກຄອງ​ທຸກ​ຂັ້ນ ແລະ​ສັງຄົມ ​ໄດ້​ປະຕິບັດດ້ວຍ​ຜົນສຳ​ເລັດ​ທີ່​ຊັດ​ເຈນ​ພໍ​ຄວນ, ​ໂດຍ​ສະ​ເພາະ​ໃນ​ຊຸມ​ປີ​ທີ່​ຜ່ານ​ມາ​ມໍ່​ນີ້, ອາ​ໄສ​ສິ່ງ​ດັ່ງກ່າວ ​ແມ່ຍິງ​ໄດ້​ເຂົ້າ​ຮ່ວ​ມຢ່າງ​ເປັນ​ເຈົ້າ​ການຕັ້ງໜ້າ ​ແລະ ປະກອບສ່ວນ​ທີ່​ສຳຄັນຫຼາຍ​ຢ່າງ​ໃນ​ບັນດາ​ຂົງ​ເຂດຂອງ​ຊີວິດ​ສັງຄົມ; ຊັບພະຍາກອນ​ມະນຸດ​ເພດ​ຍິງ​ໄດ້​ເປັນ​ຮູບ​ເປັນ​ຮ່າງ​ຂຶ້ນ​ເທື່ອ​ລະ​ກ້າວ. ​ໃນ​ຂົງ​ເຂດ​ການ​ເມືອງ, ອັດຕາ​ສ່ວນ​ແມ່ຍິງ​ເຂົ້າ​ຮ່ວມ​ການ​ນຳພາຄຸ້ມ​ຄອງ​ນັບ​ມື້​ນັບ​ສູງ, ​ໃນ​ນັ້ນ ຫຼາຍ​ສະຫາຍ​ດຳລົງ​ຕຳ​ແໜ່​ງທີ່ສຳຄັນຫຼັກ​ແຫຼ່ງ ຢູ່​ທັງ​ສູນ​ກາງ​ແລະ​ທ້ອງ​ຖິ່ນ; ​ໃນ​ການ​ເຄື່ອນ​ໄຫວ​ວິທະຍາສາດ​ເຕັກ​ໂນ​ໂລ​ຊີ, ຫຼາຍ​ໂຄງ​ການ​ຄົ້ນຄວ້າ​ລະດັບ​ລັດ​ໂດຍ​ແມ່ຍິງ​ເປັນຜູ້ອຳນວຍການ ​ໄດ້​ປະກອບ​ສ່ວນ​ສ້າງ​ພື້ນຖານ​ວິທະຍາສາດ​ໃຫ້​ແກ່​ການກຳນົດ​ນະ​ໂຍບາຍ, ໝູນ​ໃຊ້​ເຂົ້າ​ໃນ​ການ​ຜະລິດ​ແລະ​ການ​ເຄື່ອນ​ໄຫວ​ຕົວ​ຈິງ, ນຳ​ມາ​ຊຶ່ງ​ຜົນ​ປະ​ໂຫຍ​ດ​ໃນ​ຫຼາຍ​ດ້ານ.

ກ່ຽວ​ກັບ​ພາລະບົດບາດ​ຂອງ​ອົງການຈັດ​ຕັ້ງ​ສະຫະພັນ, ມະຕິ​ເລກທີ 04-NQ/TW(6), ລົງ​ວັນ​ທີ 12-7-1993, ຢືນຢັນ: “ສະຫະພັນ​ແມ່ຍິງ​ຫວຽດນາມ​ແມ່ນ​ອົງການທີ່​ເປັນ​ຕົວ​ແທນຜົນ​ປະ​ໂຫຍ​ດຂອງ​ແມ່ຍິງ, ​ແມ່ນ​ສູນ​ກາງຂອງ​ການ​ເຕົ້າ​ໂຮມ​ສາມັກຄີ​ແມ່ຍິງ​ຫວຽດນາມ, ​ແນະນຳ​ແລະ​ຂົນຂວາຍ​ເອື້ອຍ​ນ້ອງ​ໃຫ້​ສູ້​ຊົນ​ເພື່ອ​ພາລະກິດ​ປົດ​ປ່ອຍ​ແມ່ຍິງ, ​ເພື່ອ​ຄວາມ​ສະ​ເໝີ​ພາບ​ລະຫວ່າງ​ຍິງ​ຊາຍ”, ຫຼັງ​ຈາກ​ນັ້ນ 10 ກວ່າ​ປີ, ​ໃນ​ມະຕິ​ເລກທີ 11-NQ/TW, ລົງ​ວັນ​ທີ 27-4-2007, ບົດບາດ​ຂອງ​ສະຫະພັນ​ໄດ້​ຖືກຍົກລະດັບ​ຂຶ້ນສູ່​ຄວາມ​ຮັບຜິດຊອບ​ຫຼັກ​ໃນ​ວຽກ​ງານ​ແມ່ຍິງ. ຈາກ​ນັ້ນ, ບົດບາດ​ເປັນ​ຕົວ​ແທນ​ຂອງ​ສະຫະພັນ​ໄດ້​ຮັບ​ຄວາມ​ນັບຖື​ແລະ​ເສີມ​ຂະຫຍາຍ​ຕາມ​ທິດ “ປະຕິບັດ​ຢ່າງ​ເຂັ້ມ​ງວດ​ ຄວາມ​ຮັບຜິດຊອບ​ຮັບປະກັນ​ໃຫ້​ສະຫະພັນ​ຂັ້ນ​ຕ່າງ​ໆ ​ໄດ້​ເຂົ້າ​ຮ່ວມ​ການ​ກໍ່ສ້າງ​ພັກ, ກໍ່ສ້າງ​ອຳນາດ​ການ​ປົກຄອງ; ການຕິດຕາມ​ກວດກາ, ການວິຈານ​ສັງຄົມ; ຮັບຜິດ​ຊອບ​ໜ້າ​ທີ່​ຈຳນວນ​ໜຶ່ງ ​ໃນ​ໂຄງການ​ພັດທະນາ​ເສດຖະກິດ-ສັງຄົມ”(7). ດ້ວຍ​ການ​ປະກາດ​ໃຊ້​ຂໍ້​ກຳນົດ, ກົດ​ລະບຽບ​ຕ່າງໆ​ຂອງ​ພັກ​ກ່ຽວ​ກັບ​ການຕິດຕາມ​ກວດກາ, ການ​ວິຈານ​ສັງຄົມ ​ແລະ ການ​ເຂົ້າ​ຮ່ວມ​ການ​ກໍ່ສ້າງ​ພັກ ກໍ່ສ້າງ​ອຳນາດ​ການ​ປົກຄອງ ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ອົງການ​ຈັດ​ຕັ້ງມະຫາຊົນ(8), ການ​ປະຕິບັດ​ພາລະ​ໜ້າ​ທີ່​ທີ່​ເປັນ​ຕົວ​ແທນ​ຂອງ​ແມ່ຍິງຂອງສະຫະພັນ​ແມ່ຍິງ​ຫວຽດນາມ ​ແລະ ການຍົກ​ສູງ​ສິດ​ເປັນ​ເຈົ້າ​ຂອງ​ຂອງ​ແມ່ຍິງນັ້ນ ນັບ​ມື້​ນັບ​ໄດ້ຮັບ​ການ​ປະຕິບັດ​ຢ່າງ​ເປັນ​ເຈົ້າ​ການ​ແລະ​ມີ​ປະສິດທິ​ຜົນຫຼາຍ​ກວ່າ​ອີກ, ​ໂດຍ​ສະ​ເພາະ​ແມ່ນ​ການ​ເຂົ້າ​ຮ່ວມ​ການ​ສ້າງ​ກົດໝາຍ​ແລະນະ​ໂຍບາຍ, ພິ​ເສດ​ແມ່ນ​ກົດໝາຍນະ​ໂຍບາຍ​ທີ່​ກ່ຽວ​ພັນ​ເຖິງ​ຄວາມ​ສະ​ເໝີ​ພາບ​ທາງ​ເພດ ​ແລະ ສິດຜົນປະ​ໂຫຍ​ດຂອງ​ແມ່ຍິງ; ວຽກ​ງານ​ຕິດຕາມ​ກວດກາ​ການ​ປະຕິບັດ​ກົດໝາຍ, ນະ​ໂຍບາຍ​ສຳລັບ​ແມ່ຍິງ​ ແມ່ນ​ນັບ​ມື້​ນັບ​ໄດ້​ຮັບ​ຄວາມ​ເອົາ​ໃຈ​ໃສ່. ຜ່ານ​ການ​ຕິດຕາມ​ກວດກາ​ແລະ​ການ​ວິຈານ​ສັງຄົມ ຈະ​ສາມາດ​ຄົ້ນ​ເຜີຍ​ຂໍ້​ຜິດພາດ​ຢ່າງ​ທັນ​ການ​ໃນ​ການ​ປະຕິບັດ​ນະ​ໂຍບາຍ, ຊ່ວຍ​ໃຫ້​ພະນັກງານ​ຂອງ​ພັກ​ ​ລັດ, ​ລວມທັງ​ຫົວໜ້າ ດັດ​ແກ້​ທັນ​ເວລາ(9), ສະ​ເໜີ​ນະ​ໂຍບາຍ​ທີ່​ເໝາະ​ສົມ ສ້າງ​ຄວາມ​ເຫັນ​ດີ​ເຫັນ​ພ້ອມ​ທາງ​ສັງຄົມ, ປະກອບສ່ວນ​ປັບປຸງ​ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ພັກ(10).

ທີ​ສາມ, ຍູ້​ແຮງ​ການ​ຫັນ​​ເປັນ​ນິຕິ​ກຳ​ ໃຫ້ແຜນ​ນະ​ໂຍບ​າຍ, ມະຕິຂອງ​ພັກ​ ກາຍເປັນ​ນະ​ໂຍບາຍ​ທີ່​ລະອຽດ ​ເພື່ອ​ຂຸກ​ຄົ້ນ, ​ເສີມ​ຂະຫຍາຍ​ຄວາມ​ສາມາດ​ຊ້ອງ​ແຝງ, ທ່າ​ແຮງ, ບົດບາດ​ເຈົ້າ​ຂອງ​ຂອງ​ແມ່ຍິງ ​ແລະ ​ເບິ່ງ​ແຍງ​ດູ​ແລ​ແມ່ຍິງ, ​ໂດຍ​ສະ​ເພາະ​ກຸ່ມ​ແມ່ຍິງພິ​ເສດ​ແລະ​ອ່ອນ​ແອ.

ການ​ຂັບ​ເຄື່ອນ​ພື້ນຖານ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ ກຳນົດ​ຄວາມ​ຕ້ອງການ​ຫັນ​ເປັນ​ນິຕິ​ກຳ​ຢ່າງ​ແຂງ​ແຮງຕໍ່​ບັນດາ​ແຜນ​ນະ​ໂຍບາຍ ມະຕິ​ຂອງ​ພັກ​ກ່ຽວ​ກັບ​ວຽກ​ງານ​ແມ່ຍິງ, ຍ້ອນ​ແມ່ຍິງ​ແມ່ນ​ແຮງ​ງານເຄິ່ງໜຶ່ງ​ຂອງ​​ສັງຄົມ, ທັງ​ຖືກ​ຜົນ​ກະທົບ​ຢ່າງ​ແຮງ​ຈາກ​ກົດ​ເກນ​ເສດຖະກິດ​ຕະຫຼາດ, ຍອມຮັບ​ການ​ແຂ່ງຂັນ, ທັງ​ມີ​ໂອ​ກາດຢືນຢັນ​ຄວາມ​ສາມາດ​ແລະຂໍ້​ໄດ້​ປຽບ​ຂອງ​ຕົນ, ຫາກ​ມີລະບຽບ​ກົດໝາຍ​ທີ່​ຍຸຕິ​ທຳ, ບໍ່​ລຳອຽງ, ​ໃນ​ນັ້ນ​ສະ​ແດງ​ໃຫ້​ເຫັນ​ສິດທິ​ຂອງ​ແມ່ຍິງ​ຢ່າງ​ເຕັມ​ສ່ວນ​ໃນ​ທັງ 3 ລະດັບ: 1- ​ໄດ້​ຮັບ​ການ​ບັນທຶກ​ຮັບຮອງ​ທາງ​ດ້ານ​ນິຕິບັນຍັດ, 2- ​ໄດ້​ດຳ​ເນີນ​ການ​ທາງ​ດ້ານ​ການ​ບໍລິຫານ, 3- ​ໄດ້​ຮັບ​ການ​ປົກ​ປ້ອງ​ທາງ​ດ້ານ​ຕຸລາການ. ດ້ວຍ​ທັດສະນະ​ດັ່ງກ່າວ, ການ​ຍູ້​ແຮງ​ການ​ກໍ່ສ້າງ, ປະຕິບັດ​ບັນດາ​ນະ​ໂຍບາຍ​ທີ່​ລະ​ອຽດ​ເພື່ອ​ຮັບປະກັນ​​ສິດທິ​ແລະ​ຜົນ​ປະ​ໂຫຍ​ດອັນ​ຊອບ​ທຳ, ​ເສີມ​ຂະຫຍາຍ​ຄວາມ​ສາມາດ​ຊ້ອນ​​ແຝງ​ແລະ​ທ່າ​ໄດ້​ປຽບ​ຂອງ​ແມ່ຍິງ ​ແມ່ນ​ໄດ້​ຮັບ​ຄວາມ​ເອົາ​ໃຈ​ໃສ່​ເປັນ​ພິ​ເສດ. 

​ເປັນ​ຄັ້ງ​ທຳ​ອິດ​ທີ່ຄວາ​ມຄິດຄວາມ​ສະ​ເໝີ​ພາບ​ທາງ​ເພດ ຖືກ​ກຳນົດ​ໂດຍ​ກົດໝາຍ​ໃນ​ລັດຖະທຳ​ມະນູນ​ປີ 2013. ບັນດາ​ເອກ​ະສານ​ກົດໝາຍ​ໄດ້​ຫັນ​ເປັນ​ນິຕິ​ກຳ​ຢ່າງ​ຄົບ​ຖ້ວມ​ພໍ​ຄວນ ຕໍ່​ບັນດາ​ທັດສະນະ, ​ແຜນ​ນະ​ໂຍບາຍຂອງ​ພັກ​ກ່ຽວ​ກັບ​ວຽກ​ງານ​ແມ່ຍິງ, ສ້າງ​ເງື່ອນ​ໄຂ​ເພື່ອ​ເຮັດ​ໃຫ້​ຫວຽດນາມ​ກາຍ​ເປັນ​ປະ​ເທດ​ທີ່​ມີ​ຄວາມ​ກ້າວໜ້າ​ຫຼາຍ​ຢ່າງ​ໃນ​ການກໍ່ສ້າງ​ຂອບ​ກົດໝາຍ​ກ່ຽວ​ກັບ​ຄວາມ​ສະ​ເໝີ​ພາບ​ທາງ​ເພດ ​ແລະ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ, ສ້າງ​ໂອກາດ​ໃຫ້​ແມ່ຍິງ​ມີ​ຄວາມ​ສະ​ເໝີ​ພາບ. ​ໃນ​​ເອກະສານ​ກົດໝາຍ ນະ​ໂຍບາຍ​ຕ່າງໆ, ບັນດາຂໍ້​ກຳນົດ​ກ່ຽວ​ກັບ​ຕຳ​ແໜ່ງ, ບົດບາດຂອງ​ສະຫະພັນແມ່ຍິງ​ນັບ​ມື້​ນັບ​ຈະ​ແຈ້ງ. ກົດໝາຍ​ສະ​ເພາະ​ບາງ​ຢ່າງ​ທີ່​ກ່ຽວຂ້ອງ​ກັບ​ແມ່ຍິງ, ​ເຊັ່ນ​ກົດໝາຍ​ວ່າ​ດ້ວຍ​ຄວາມ​ສະ​ເໝີ​ພາບ​ທາງ​ເພດ, ກົດໝາຍ​ວ່າ​ດ້ວຍ​ການ​ປ້ອງ​ກັນ​ແລະ​ຄວບ​ຄຸມ​ຄວາມ​ຮຸນ​ແຮງ​ໃນ​ຄອບຄົວ... ​ໄດ້​ຖືກ​ປະກາດ​ໃຊ້. ບົດບາດ​ຂອງ​ສະຫະພັນ​ແມ່ຍິງ​ຂັ້ນ​ຕ່າງໆ​ໃນ​ການ​ເຂົ້າ​ຮ່ວມ​ການ​ຄຸ້ມ​ຄອງ​ລັດ ສືບ​ຕໍ່​ໄດ້​ຮັບ​ການ​ຢືນຢັນ​ໃນຄຳ​ສັ່ງ​ເລກທີ 56/2012/NĐ-CP, ລົງ​ວັນ​ທີ 16-7-2012, ຂອງ​ລັດຖະບານ “ກຳນົດ​ຄວາມ​ຮັບຜິດຊອບ​ຂອງ​ກະຊວງ, ຂະ​ແໜງ​ການ, ຄະນະ​ກຳມະການ​ປະຊາຊົນ​ຂັ້ນ​ຕ່າງໆ ​ໃນ​ການ​ຮັບປະກັນ​ໃຫ້ສະຫະພັນ​ແມ່ຍິງ​ຫວຽດນາມຂັ້ນ​ຕ່າງໆ ​ເຂົ້າ​ຮ່ວມ​ການ​ຄຸ້ມ​ຄອງ​ລັດ(11) ຕາມ​ທິດ​ສ້າງ​ໂອກາດ​ແລະ​ເງື່ອນ​ໄຂ​ເພື່ອ​ໃຫ້ສະຫະພັນ​ແມ່ຍິງ​ຫວຽດນາມ​ເຂົ້າ​ຮ່ວມ​ການ​ເຄື່ອນ​ໄຫວ, ​ໃນ​ໂຄງການ​ຕ່າງໆ​ທີ່​ກ່ຽວ​ຂ້ອງ​ເຖິງ​ສິດທິ​ແລະ​ຜົນ​ປະ​ໂຫຍ​ດຂອງ​ແມ່ຍິງ, ລະດົມ​ການ​ເຂົ້າ​ຮ່ວມ​ຂອງ​ແມ່ຍິງ​ໃນ​ການ​ປະຕິບັດ​ບັນດາ​ເປົ້າ​ໝາຍ​ກ່ຽວ​ກັບ​ຄວາມ​ສະ​ເໝີ​ພາ​ບທາງ​ເພດ, ປະກອບສ່ວນ​ປະຕິບັດ​ບັນດາ​ໂຄງການ​ເສດຖະກິດ-ສັງຄົມ​ຂອງ​ປະ​ເທດ ​ໂດຍ​ຜ່ານບັນດາ​ໂຄງການ, ​ແຜນ​ງານ​ທີ່​ລະອຽດ(12). ສະພາ​ແຫ່ງ​ຊາດ, ລັດຖະບານ​ໄດ້​ປະກາດ​ໃຊ້​ບັນດາ​ນະ​ໂຍບາຍ, ​ໂຄງການ​ປົກ​ປັກ​ຮັກສາ​ແລະ​ຊ່ວຍ​ເຫຼືອ​ແມ່ຍິງ(13) ດ້ວຍ​ຂໍ້​ກຳນົດ​ໃໝ່​ທີ່​ກ້າວໜ້າ​ຫຼາຍ​ຢ່າງ(14).

​ດ້ວຍ​ເປົ້າໝາຍ​ສູງ​ສຸກຄືການ​ພັດທະນາ​ທີ່​ຍືນ​ຍົງ ຊຶ່ງ​ຢູ່​ນັ້ນ​ ບໍ່​ປະ​ໃຫ້​ຜູ້​ໃດ​ຕົກ​ຢູ່​ຂ້າງ​ຫຼັງ​ໃນ​ຂະ​ບວນວິວັດ​ການ​ເຊື່ອມ​ໂຍງ​ສາກົນ, ສຳລັບ​ວຽກ​ງານ​ແມ່ຍິງ, ຄຽງ​ຂ້າງ​ກັບ​ການ​ສືບ​ຕໍ່​ເປົ້າ​ໝາຍ “ກໍ່ສ້າງ​ແມ່ຍິງ​ຫວຽດນາມ​ໃຫ້​ຂະຫຍາຍຕົວ​ຢ່າງຮອບດ້ານ”, ວິທີ​ແກ້​ທີ່​ສຳຄັນ​ໃນ​ວຽກ​ງານ​ຂົນຂວາຍ​ແມ່ຍິງ​ຂອງ​ພັກ​ແມ່ນ: “ກໍ່ສ້າງ​ແລະ​ປະຕິບັດ​ນະ​ໂຍບາຍ​ພິ​ເສດ​ເພື່ອ​ຊ່ວຍ​ເຫຼືອ​ແມ່ຍິງ​ຢູ່​ເຂດ​ພູດ​ອຍ, ​ເຂດ​ຫ່າງ​ໄກ​ສອກຫຼີກ, ​ເຂດ​ຊາຍ​ແດນ​ແລະ​ເກາະທະ​ເລ, ​ແມ່ຍິງ​ຊົນ​ເຜົ່າ​ສ່ວນ​ນ້ອຍ, ​ແມ່ຍິງ​ພິການ ປ່ຽວ​ດ່ຽວ ສູງ​ອາຍຸ, ​ແມ່ຍິງ​ຖືພາແລະລ້້ຽງລູກນ້ອຍ, ແມ່ຍິງ​ແຮງ​ງານ​ທີ່ອົບ​ພະຍົບ ປ່ຽນ​ອາຊີບ”(15). ບັນດາ​ໂຄງການ “​ໂຄສະນາ, ຂົນຂວາຍ​ແມ່ຍິງ​ເຂົ້າ​ຮ່ວມ​ການ​ແກ້​ໄຂ​ບັນດາ​ບັນຫາ​ສັງຄົມ​ໄລຍະ​ປີ 2017-2027", "ຊ່ວຍເຫຼືອແມ່ຍິງເລີ່ມທຸລະກິດປີ 2017-2025"  ​ໂດຍນາຍົກລັດຖະມົນຕີອະນຸມັດ ​ໄດ້​ສະ​ແດງ​ໃຫ້​ເຫັນ​ແຈ້ງ​ທີ່​ສຸດ​ເຖິງ​ການ​ຫັນ​ທັດສະນະ​ນີ້​ຂອງ​ພັກ​ເປັນ​ນິຕິ​ກຳ.

ດ້ວຍການ​ເຂົ້າ​ເຖິງ​ວຽກ​ງານ​ແມ່ຍິງ​ຈາກ​ແງ່​ມູມບົດບາດ​ທີ່​ສຳຄັນ​ພິ​ເສດ​ຂອງ​ແມ່ຍິງ​ໃນ​ຄອບຄົວ, ​ແຜນ​ນະ​ໂຍບາຍ​ຂອງ​ພັກ​ແມ່ນ​ຕ້ອງ​ຫັນ​ເຂົ້າ​ສູ່​ການ​ແກ້​ໄຂ​ບັນດາ​ບັນຫາຂອງ​ຄອບຄົວ​ໂດຍ​ຜ່ານ​ລະບົບ​ນະ​ໂຍບາຍ​ທີ່​ຄົບ​ຊຸດ​ພໍ​ຄວນ(16). ຈາກ​ນັ້ນ, ລັດຖະບານ​ໄດ້​ປະກາດ​ໃຊ້​ແຜນ​ຍຸດ​ທະ​ສາດ​ການ​ພັດທະນາ​ຄອບຄົວ​ຫວຽດນາມ​ຮອດ​ປີ 2020, ວິ​ໄສ​ທັດ​ຮອດ​ປີ 2030, ອະນຸມັດ​ແລະ​ຜັນ​ຂະຫຍາຍ​ປະຕິບັດ​ຫຼາຍ​​ແຜນ​ການຊ່ວຍ​ເຫຼືອ​ການ​ພັດທະນາ​ຄອບຄົວ. ບັນດາ​ນະ​ໂຍບາຍ​ຄວາມ​ປອດ​ໄພ​ສັງຄົມ, ​ໂຄງການ, ​ແຜນ​ງານ​ຊ່ວຍ​ເຫຼືອ​ຄອບຄົວ ​ໄດ້ປະກອບສ່ວນ​ປ່ຽນ​ແປງ​ບົດບາດ​ດັ້ງ​ເດີມ, ຫຼຸດຜ່ອນ​ວຽກ​ງານ​ຄອບຄົວ, ສ້າງ​ເງື່ອນ​ໄຂ​ໃຫ້​ແມ່ຍິງ​ມີ​​ເວລາ​ເພື່ອ​ຮ່ຳຮຽນຍົກ​ສູງ​ລະດັບ​ແລະ​ເຂົ້າ​ຮ່ວມ​ການ​ເຄື່ອນ​ໄຫວ​ສັງຄົມ.

ປະຕິບັດ​ຕາມ​ແຜນ​ນະ​ໂຍບາຍ​ການ​ນຳພາ​ຂອງ​ພັກ, ​ໃນ​ຊຸມ​ປີ​ທີ່​ຜ່ານ​ມາ, ການ​ເຄື່ອນ​ໄຫວ​ຂອງສະຫະພັນ​ແມ່ຍິງ​ຫວຽດນາມ​ໄດ້​ຫັນ​​ເຂົ້າ​ສູ່​ຫຼາຍ​ເປົ້າ​ໝາຍ​ທີ່​ຕ່າງ​ກັນ, ​ເປີດ​ກວ້າງ​ລັກສະນະ​ປະສົມ ​ເພື່ອ​ເພີ່ມ​ທະວີບົດບາດ​ເປັນ​ຕົວ​ແທນ ​ແລະ ກໍ່​ເພື່ອ​ແນ​ໃສ່​ກໍ່ສ້າງ, ​ເສີມ​ຂະຫຍາຍ​ການ​ເຂົ້າ​ຮ່ວມ, ບົດບາດ​ຂອງ​ຊັບພະຍາກອນ​ມະນຸດ​ແມ່ຍິງ​ຄຸນ​ນະພາ​ບສູງ, ​ເຊັ່ນ ຖັນ​ແຖວ​ຜູ້​ຄຸ້ມ​ຄອງ​ບໍລິຫານ​ຍິງ, ນັກ​ທຸລະ​ກິດ​ຍິງ, ປັນຍາ​ຊົນ​ຍິງ... ພ້ອມ​ນັ້ນ​ກໍ່​ມີ​ຫຼາຍວິທີ​ແກ້ທີ່​ລະອຽດ​ສຳລັບ​ກຸ່ມ​ແມ່ຍິງ​ພິ​ເສດ ທຸກຍາກ. ບັນດາ​ໂຄງການ “ຊາຍ​ຄາ​ອົບອຸ່ນ​ດ້ວຍ​ຄວາມ​ຮັກ​ແພງ” (17), “ຄຽງ​ຄູ່​ກັບ​ແມ່ຍິງ​ໃນ​ເຂດ​ຊາຍ​ແດນ” (18)...​ແມ່ນ​ບາງ​ຕົວຢ່າງ​ທີ່​ເດັ່ນ. ກຳນົດ​ການ​ຊ່ວຍ​ເຫຼືອ​ແມ່ຍິງສ້າງ​ຄອບຄົວ​ທີ່​ມີ​ຄວາມສຸກ ​ແລະ ການ​ກໍ່ສ້າງ​ແມ່ຍິງ​ຫວຽດນາມ ​ໄດ້​ເປັນ​ໜ້າ​ທີ່​ຈຸດ​ໜັກ​ທີ່​ສຳຄັນ​ໃນ​ຫຼາຍ​ສະ​ໄໝ; ສົມທົບ​ຢ່າງ​ແໜ້ນ​ແຟ້ນກັບ​ບັນດາ​ກະຊວງ, ຂະ​ແໜງ​ການທີ່​ກ່ຽວຂ້ອງ​ ໃນ​ການຈັດ​ຕັ້ງການ​ຜັນ​ຂະຫຍາຍບັນດາ​ໂຄງການ​ກ່ຽວ​ກັບ​ການ​ສ້າງ​ຄອບຄົວ, ການ​ຂົນຂວາຍ “ກໍ່ສ້າງ​ຄອບຄົວທີ່ 5 ບໍ່, 3 ສະອາດ" ຕິດ​ກັບ​ການ​ກໍ່ສ້າງ​ຊົນນະບົດ​ໃໝ່ ຕົວ​ເມືອງ​ສີວິ​ໄລ, ບັນດາ​ໂຄງການສະໜັບສະໜູນ​ການ​ຍົກ​ສູງ​ຄວາມ​ສາມາດ ​ແລະ ລະດັບຂອງ​ແມ່ຍິງ, ຊ່ວຍ​ເຫຼືອ​ແມ່ຍິງ​ພັດທະນາ​ເສດຖະກິດ, ການ​ສຶກສາ​ແມ່ຍິງ, ການ​ດູ​ແລ​ສຸຂະພາບ​ແລະ​ຄວາມ​ປອດ​ໄພ​ຂອງ​ແມ່ຍິງ​ແລະ​ເດັກນ້ອຍ...

ອາດ​ຈະ​ເວົ້າ​ໄດ້​ວ່າ, ດ້ວຍ​ການ​ປ່ຽນ​ແປງ​ໃໝ່​ວິທີ​ເຂົ້າ​ເຖິງ​ວຽກ​ງານ​ຂົນຂວາຍ​ແມ່ຍິງ​ຄື​ແນວ​ນັ້ນ, ຄວາມ​ຮັບ​ຮູ້​ຂອງ​ສັງຄົມ​ກ່ຽວ​ກັບ​ບົດບາດ ​ແລະຄວາມ​ສາມາດ​ຂອງ​ແມ່ຍິງ ​ໄດ້​ມີ​ການ​ປ່ຽນ​ແປງ​ໃນ​ທາງ​ບວກ. ຊີວິດ, ວຽກ​ເຮັດ​ງານ​ທຳ, ​ເງື່ອນ​ໄຂ​ອອກ​ແຮງ​ງານ, ການ​ຮຽນ​ຮູ້, ການ​ຫຼິ້ນ​ມ່ວນ, ການ​ບັງ​ເທິງຂອງ​ແມ່ຍິງ ​ໄດ້​ຮັບ​ການ​ປົວ​ແປງຢ່າງ​ຕໍ່​ເນື່ອງ; ລະດັບ, ຄວາມ​ສາມາດ​ຂອງ​ແມ່ຍິງ​ໄດ້​ຮັບ​ການ​ຍົກ​ສູງ. ​ແມ່ຍິງ​ມີ​ຄວາມ​ໝັ້ນ​ໃຈ, ​ເປັນ​ເຈົ້າ​ການ​ຫຼາຍ​ຂຶ້ນ, ​ໄດ້​ຊົມ​ໃຊ້​ໝາກຜົນ​ໃນ​ຂະ​ບວນການ​ພັດທະນາ, ພ້ອມ​ກັນ​ນັ້ນ​ກໍ່​ຢືນຢັນ​ບົດບາດທີ່​ຕັ້ງ, ຕຳ​ແໜ່​ງທີ່​ສຳຄັນ​ຂອງ​ຕົນ​ໃນ​ຄອບຄົວ​ແລະ​ສັງຄົມ, ປະກອບສ່ວນ​ອັນ​ສົມ​ກຽດ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ, ຮັບປະກັນ​ການ​ປ້ອງ​ກັນຊາ​ດ, ຄວາມ​ປອດ​ໄພ​ຂອງ​ປະ​ເທດ.

ຄື​ແນວ​ນັ້ນ​ແມ່ນ, ຈາກ​ບາງ​ມຸມ​ເບິ່ງ​ພື້ນຖານ​ເທິງ​ນີ້, ​ໄດ້ຢືນຢັນ​ອີກ​ເທື່ອ​ໜຶ່ງວ່າ, ພ້ອມກັນ​ກັບ​ການ​ເຄື່ອນ​ໄຫວ​ຂອງ​ພຶດຕິ​ກຳ, ​ແບບ​ວິທີ​ການ​ນຳພາ​ຂອງ​ພັກ​ຕໍ່​ວຽກ​ງານ​ແມ່ຍິງ​ແລະສະຫະພັນ​ແມ່ຍິງ​ຫວຽດນາມ​ໄດ້​ຮັບ​ການ​ປ່ຽນ​ແປງ​ໃໝ່ຢ່າງ​ເປັນ​ປະຈຳ ຄົບ​ຊຸດ​ໃນ​ທຸກດ້ານ, ​ໃນ​ນັ້ນ ຈະ​ແຈ້ງ​ທີ່​ສຸດ​ແມ່ນ​ການ​ປ່ຽນ​ແປງ​ໃໝ່​ໃນ​ການ​ປະກາດ​ໃຊ້​ແຜນ​ນະ​ໂຍບາຍ, ມະຕິ ​ແລະ ​ໃນ​ການ​ນຳພາການ​ຫັນ​ເປັນ​ນິຕິ​ກຳ​ຕໍ່​ແຜນ​ນະ​ໂຍບາຍ, ມະຕິ​ດັ່ງກ່າວ​ນັ້ນ. ນີ້​ແມ່ນ​ປັດ​ໄຈ​ທີ່​ສຳຄັນ ມີ​ລັກສະນະ​ຕັດສິນ​ຄວາມ​ສຳ​ເລັດ​ໃນ​ການ​ເຄື່ອນ​ໄຫວ​ຂອງສະຫະພັນ​ແມ່ຍິງ​ຫວຽດນາມ ກໍ່​ຄື​ການ​ປ່ຽນ​ແປງ​ທີ່​ດີ​ໃນ​ວຽກ​ງານ​ຂົນຂວາຍ​ແມ່ຍິງຂອງ​ທົ່ວ​ສັງຄົມ. ສະຫະພັນ​ໄດ້​ປະຕິບັດພາລະ​ໜ້າ​ທີ່ ​ແລະ ​ບົດບາດຫຼັກ​ແຫຼ່ງ​ໃນ​ວຽກ​ງານ​ຂົນຂວາຍ​ແມ່ຍິງ​ນັບ​ມື້​ນັບດີ. ຄວາມ​ຕ້ອງການທາງ​ດ້ານ​ຊີວິດ​ວັດຖຸ​ແລະ​ຈິດ​ໃຈຂອງ​ແມ່ຍິງ​ ໄດ້​ຮັບ​ການ​ຕອບ​ສະໜອງດີກ​ວ່າ​ເກົ່າ. ດ້ວຍການປະກອບ​ໃນ​ທຸກ​ຂົງ​ເຂດ​ຂອງ​ຊີວິດ​ສັງຄົມ, ​ແມ່ຍິງ​ໄດ້​ແລະ​ພວມ​ຢືນຢັນ​ບົດບາດ​ທີ່​ບໍ່​ອາດ​ຈະ​ຂາດ​ໄດ້​ຂອງ​ຕົນ ​ໃນ​ຖານະ​ເປັນ​ຊັບພະຍາ​ກອມະນຸດ​ທີ່​ສຳຄັນ​ຂອງ​ພາລະກິດ​ການ​ກໍ່ສ້າງ ​ແລະ​ປ່ຽນ​ແປງ​ໃໝ່​ປະ​ເທດ.

​ແຕ່​ວ່າ, ສະພາບ​ການ​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ ​ແລະ​ເຊື່ອມ​ໂຍງ​ສາກົນ​ປະຈຸ​ບັນ ພວມ​ວາງ​ຫຼາຍ​ບັນຫາ​ອອກ​ມາ​​ໃຫ້​ແກ່ວຽກ​ງານ​ຂົນຂວາຍ​ແມ່ຍິງ, ນັ້ນ​ແມ່ນ​ການຈັດ​ແບ່ງຊັ້ນ, ຄວາມ​ກັງວົນ, ຜົນ​ປະ​ໂຫຍ​ດ, ຄວາມ​ຕ້ອງການຂອງ​ບັນດາ​ກຸ່ມ​ແມ່​ຍິງ​ທີ່​ແຕກ​ຕ່າງ​ກັນ​ທີ່​ສຸດ ​ແລະ ​ແຕກ​ຕ່າງ​ຈາກ​ເມື່ອ​ກ່ອນ​ຫຼາຍ; ຊີວິດ​ຂອງ​ແມ່ຍິງ​ພາກສ່ວນ​ໜຶ່ງ, ​ໂດຍ​ສະ​ເພາະ​ແມ່ຍິງ​ຊົນນະບົດ, ​ແມ່ຍິງ​ຊົນ​ເຜົ່າ​ສ່ວນ​ນ້ອຍ, ​ແມ່ຍິງ​ພິການ,​ ແມ່ນ​ຍັງ​ມີ​ຄວາມ​ຫຍຸ້ງຍາກ​ຫຼາຍ; ສະພາບ​ອາ​ຊະ​ຍາ​ກຳ​ທີ່​ກ່ຽວ​ພັນ​ເຖິງ​ແມ່ຍິງ ​ເດັກນ້ອຍ, ຄວາມ​ຮຸນ​ແຮງ​ໃນ​ຄອບຄົວ ນັບ​ມື້​ນັບ​ສັບສົນ; ບັນຫາ​ແຮງ​ງານ, ວຽກ​ເຮັດ​ງານ​ທຳ ​ແລະ ການ​ຜັນ​ປ່ຽນ​ຂອງ​ວັດທະນະທຳ​ຄອບຄົວ ພວມ​ສ້າງ​ໃຫ້​ມີ​ໂອກາດ ​ແຕ່​ກໍ່​ມີ​ຄວາມ​ທ້າ​ທາຍ​ບໍ່​ໜ້ອຍ​ທີ່​ຈະ​ຕ້ອງ​​ແກ້​ໄຂຜ່ານ​ຜ່າ./.

​ໂດຍ ຮສ.ປອ. ຫງວຽນ​ທິທູ​ຮ່າ,
ກຳມະການ​ສູນ​ກາງ​ພັກ, ປະທານສະຫະພັນ​ແມ່ຍິງ​ຫວຽດນາມ

-------------------

(1) ມະຕິ​ເລກທີ 11-NQ/TW, ລົງ​ວັນ​ທີ 27-04-2007, ຂອງ​ກົມ​ການ​ເມືອງ​ສູນ​ກາງ​ພັກ “ກ່ຽວ​ກັບ​ວຽກ​ງານ​ແມ່ຍິງ​ໃນ​ໄລຍະ​ແຫ່ງ​ການ​ຍູ້​ແຮງ​ການ​ຫັນ​ປະ​ເທດ​ເປັນ​ອຸດສາຫະກຳ ທັນ​ສະ​ໄໝ”.

(2) ຕາມ​ບົດສະຫຼຸບ​ລາຍ​ງານ 5 ປີ​ແຫ່ງ​ການ​ປະຕິບັດ​ຂໍ້​ຕົກລົງ​ເລກທີ 217-QĐ/TW ​ແລະ ຂໍ້​ຕົກລົງ​ເລກທີ 218-QĐ/TW ຂອງ​ກົມ​ການ​ເມືອງສູນ​ກາງ​ພັກ ​ຢູ່ 63 ​ແຂວງ-ກຳ​ແພງ​ນະຄອນ.

(3) ມະຕິ​ເລກທີ 04-NQ/TW, ລົງ​ວັນ​ທີ 12-07-1993, ຂອງ​ກົມ​ການ​ເມືອງ​ສູນ​ກາງ​ພັກ ກ່ຽວ​ກັບ​ການ​ປ່ຽນ​ແປງ​ໃໝ່​ແລະ​ເພີ່ມ​ທະວີ​ວຽກ​ງານ​ຂົນຂວາຍ​ແມ່ຍິງ​ໃນ​ສະພາບ​ການ​ໃໝ່.

(4) ມະຕິ​ເລກທີ 11-NQ/TW, ລົງ​ວັນ​ທີ 27-04-2007, ຂອງ​ກົມ​ການ​ເມືອງ​ສູນ​ກາງ​ພັກ.

(5) ຄຳ​ສັ່ງ​ເລກທີ 21-CT/TW, ລົງ​ວັນ​ທີ 20-01-2018, ຂອງ​ຄະນະ​ເລຂາທິການກ່ຽວ​ກັບ​ການ​ສືບ​ຕໍ່​ຍູ້​ແຮງ​ວຽກ​ງານ​ແມ່ຍິງ​ໃນ​ສະພາບ​ການ​ໃໝ່.

(6) ມະຕິ​ເລກທີ 04-NQ/TW, ລົງ​ວັນ​ທີ 12-07-1993, ຂອງ​ກົມ​ການ​ເມືອງ​ສູນ​ກາງ​ພັກ.

(7) ຄຳ​ສັ່ງ​ເລກທີ 21-CT/TW, ລົງ​ວັນ​ທີ 20-01-2018, ຂອງ​ຄະນະ​ເລຂາທິການ.

(8) ຂໍ້​ກຳນົດ​ເລກທີ 217-QĐ/TW ​ແລະ ຂໍ້​ກຳນົດ​ເລກທີ 218-QĐ/TW ປີ 2013 ຂອງ​ກົມ​ການ​ເມືອງ​ສູນ​ກາງ​ພັກ; ຂໍ້​ກຳນົດ​ເລກທີ 124-QĐ/TW ປີ 2018 ຂອງ​ຄະນະ​ເລຂາທິການ ກ່ຽວ​ກັບ​ການ​ຕິດຕາມ​ກວດກາ​ສະມາຊິກ​ພັກ.

(9) ປີ 2017, ຜ່ານ​ການ​ເຂົ້າ​ຮ່ວມ​ການ​ຕິດຕາມ​ກວດກາ​ນະ​ໂຍບາຍ​ສຳລັບ​ຜູ້​ທີ່​ມີ​ຄຸນງາມຄວາມດີ​ຕໍ່​ຊາດ, ສະຫະພັນ​ແມ່ຍິງ​ໄດ້​ຄົ້ນ​ເຜີຍ 541 ກໍລະນີຮັບ​ຜົນ​ປະ​ໂຫຍ​ດທີ່​ຜິດ​ນະ​ໂຍບາຍ; ພາຍຫຼັງ​ການ​ຕິດຕາມ​ກວດກາ, ​ໄດ້​ສະ​ເໜີ​ໃຫ້​ຄະນະ​ພັກ​ແລະ​ອຳນາດ​ການ​ປົກຄອງ​ທ້ອງ​ຖິ່ນດັດ​ແກ້​ຢ່າງ​ທັນ​ການ ປະກອບສ່ວນ​ສ້າງ​ຄວາມ​ສະ​ເໝີ​ພາບ​ທາງ​ສັງຄົມ.

(10) ​ເມື່​ອວິຈານ​ສັງຄົມ​ຕໍ່​ກົດໝາຍ​ປະກັນ​ໄພ​ສັງຄົມ (ສະບັບ​ປັບປຸງ), ຄະນະ​ປະທານ​ສູນ​ກາງ​ສະຫະພັນ​ແມ່ຍິງ​ຫວຽດນາມ​ ​ໄດ້ສະ​ເໜີ ​ແລະ ສະພາ​ແຫ່ງ​ຊາດກໍ່​ໄດ້​ແກ້​ກຳນົດ​ເວລາຈ່າຍ​ຄ່າ​ປະກັນ​ໄພ​ສັງຄົມ​ເພື່ອ​ຮັບ​ເງິນ​ບຳນາມ ຈາກ 20 ປີ​ລົງ​ເປັນ 15 ປີ ສຳລັບພະນັກ​ງານຍິງ​ທີ່​ເຮັດ​ສະ​ເພາະ​ວຽກ​ງານ​ແມ່ຍິງ​ຢູ່​ຮາກ​ຖານ. ຄ້າຍຄື​ແນວ​ນັ້ນ, ສະຫະພັນ​ແມ່ຍິງ​ກໍ່​ໄດ້​ສະ​ເໜີ​ໃຫ້​ຊ່ວຍ​ໜູນ​ແມ່ຍິງ​ຜູ້​ທຸກ​ຍາກທີ່​ເປັນ​ຄົນ​ຊົນ​ເຜົ່າ​ສ່ວນ​ນ້ອຍ ​ເມື່ອ​ເກີດ​ລູກຖືກ​ຕາມ​ນະ​ໂຍບາຍ​ປະຊາກອນ ​ແລະ ​ໄດ້​ຮັບ​ການ​ຍອມຮັບ​ຈາກ​ລັດຖະບານຕາມ​​ໂດຍ​ລະບຸ​​ໄວ້ໃນ​ຄຳ​ສັ່ງ​ເລດ​ທີ 39/2015/NĐ-CP ດ້ວຍ​ການ​ສະໜັບສະໜູນ 2 ລ້ານ​ດົ່ງ / 1 ​ເທື່ອ. ການ​ດັດ​ແປງ​ດັ່ງກ່າວ​ເທິງ​ນີ້​ໄດ້​ຮັບ​ຄວາມ​ຊົມ​ເຊີຍ​ຈາກຜູ້ຮັບ​ຜົນ​ປະ​ໂຫຍ​ດ​ໂດຍ​ກົງ ​ແລະ ຄວາມ​ເຫັນ​ດີ​ເຫັນ​ພ້ອມ​ຈາກ​ຫາງ​ສຽງ​ສັງຄົມ.

(11) ຄຳ​ສັ່ງ​ເລກທີ 56/2012/NĐ-CP, ລົງ​ວັນ​ທີ 16-7-2012, ຂອງ​ລັດຖະບານ “ກຳນົດ​ຄວາມ​ຮັບຜິດຊອບ​ຂອງ​ກະຊວງ, ຂະ​ແໜງ​ການ, ຄະນະ​ກຳມະການ​ປະຊາຊົນ​ຂັ້ນ​ຕ່າງໆ ​ໃນ​ການ​ຮັບປະກັນ​ໃຫ້ສະຫະພັນ​ແມ່ຍິງ​ຫວຽດນາມຂັ້ນ​ຕ່າງໆ ​ເຂົ້າ​ຮ່ວມ​ການ​ຄຸ້ມ​ຄອງ​ລັດ

(12) ​ໂຄງການໂຄສະນາ, ອົບຮົມ​ສຶກສາຄຸນ​ນະພາ​ບຄຸນ​ທຳ; ​ໂຄງການ​ໂຄສະນາ​ຂົນຂວາຍ​ແມ່ຍິງ​ເຂົ້າ​ຮ່ວມ​ການ​ແກ້​ໄຂບັນດາ​ບັນຫາ​ສັງຄົມ; ​ໂຄງການຊ່ວຍ​ເຫຼືອ​ແມ່ຍິງ​ເລີ່​ມທຸລະ​ກິດ....

(13) ກົດໝາຍ​ແຮງ​ງານ; ກົດໝາຍ​ປະກັນ​ໄພ​ສັງຄົມ; ກົດໝາຍການປັບປຸງ​ເພີ່ມ​ເຕີມ​ບາງ​ມາດຕາຂອງ​ກົດໝາຍ​ປະກັນ​ສຸຂະພາບ; ກົດໝາຍວ່າ​ດ້ວຍ​ການ​ປ້ອງ​ກັນ​ແລະ​ຄວບ​ຄຸມ​ຄວາມ​ຮຸນ​ແຮງ​ໃນ​ຄອບຄົວ, ກົດໝາຍວ່າ​ດ້ວຍ​ການ​ປ້ອງ​ກັນ​ແລະຕ້ານ​ການ​ຄ້າ​ມະນຸດ, ກົດໝາຍ​ວ່າ​ດ້ວຍ​ການສົມລົດ​ແລະ​ຄອບຄົວ.

(14) ລົດ​ກຳນົດ​ເວລາ​ຈ່າຍ​ຄ່າ​ປະກັນ​ໄພ​ສັງຄົມຈາກ 20 ປີ​ລົງ​ເປັນ 15 ປີ ສຳລັບ​ແຮງ​ງານ​ຍິງທີ່​​ເຄື່ອນ​ໄຫວ​ສະເພາະ​​ຊີບ​ຫຼື​ບໍ່​ສະ​ເພາະ​ຊີບ​ ຢູ່​ຕາ​​ແສງ, ຕາ​​ແສງ​​ໃນ​ຕົວເມືອງ, ​ເທດສະບານ​ເມືອງ ​ເພື່ອ​ມີ​ສິດທິ​ໄດ້​ຮັບ​ເງິນ​ບຳນານ; ຊ່ວຍ​ໜູນ​ແມ່ຍິງທຸກ​ຍາກ​ຄົນ​ຊົນ​ເຜົ່າ​ສ່ວນ​ນ້ອຍທີ່​ເກີດ​ລູກ​ຖືກ​ຕາມ​ນະ​ໂຍບາຍ​ປະຊາກອນ; ​ເພີ່​ມເວລາ​ພັກຜ່ອນ​ໃນ​ການ​ເກີດ​ລູກ​ຂອງ​ແຮງ​ງານ​ຍິງ ​ຈາກ 4 ​ເດືອ​ນ​ເປັນ 6 ​ເດືອນ; ​ເປັນ​ຄັ້ງ​ທຳ​ອິດ​ທີ່​ມີ​ຂໍ້​ກຳນົດ​ໃຫ້​ຜູ້​ຊາຍ​ໄດ້​ພັກຜ່ອນ​​ໃນ​ເມື່ອ​ເມຍ​ເກີດ​ລູກ..

(15) ຄຳ​ສັ່ງ​ເລກທີ 21-CT/TW, ລົງ​ວັນ​ທີ 20-01-2018, ຂອງ​ຄະນະ​ເລຂາທິການ.

(16) ກົດ​ໝາຍວ່າ​ດ້ວຍ​ການ​ສົມລົດ​ແລະ​ຄອບຄົວ​ປີ 2014; ກົດໝາຍ​ວ່າ​ດ້ວຍ​ການ​ປ້ອງ​ກັນ​ແລະ​ຄວາມ​ຄຸມ​ຄວາມ​ຮຸນ​ແຮງ​ໃນ​ຄອບຄົວປີ 2007; ກົດໝາຍ​ເດັກນ້ອຍ​ປີ 2016; ກົດໝາຍ​ທີ່​ດິນ​ປີ 2013.

(17) ​ໂຄງການ​ສະໜັບສະໜູນ​ການ​ສ້າງ​ເຮືອນ​ຢູ່​ໃຫ້​ແມ່ຍິງ​ທີ່​ມີ​ຄວາມ​ຫຍຸ້ງຍາກ​ພິ​ເສດ ​ໄດ້​ຮັບ​ການ​ປະຕິບັດ​ແຕ່​ປີ 2007 ຮອດ​ປີ 2017 ຊຶ່ງ​ໄດ້​ຂົນ​ຂວາ​ຍສັງຄົມ​ບໍລິຈາກ​ເງິນ 1.000 ຕື້​ດົ່ງ, ຊ່ວຍ​ກໍ່ສ້າງ​ເຮືອນ​ໃໝ່​ໄດ້ 35.695 ຫຼັງ ​ແລະສ້ອມ​ແປງ​ເຮືອນ​ໄດ້ 23.000 ຫຼັງ.

(18) ​ໂຄງການ​ຊ່ວຍ​ເຫຼືອ​ແມ່​ຍິງຢູ່​ບັນດາ​ຕາ​ແສງ​ເຂດ​ຊາຍ​ແດນ​ທີ່​ພົບ​ຄວາມ​ຫຍຸ້ງຍາກ ​ໄດ້​ປຸກລະດົມ​ການ​ປະຕິບັດ​ແຕ່​ປີ 2018, ພາຍຫຼັງ 1 ປີ​ລະດົມ​ເງິນ​ໄດ້ 38 ກວ່າ​ຕື້​ດົ່ງ ດ້ວຍ​ການ​ເຄື່ອນ​ໄຫວ​ຊ່ວຍ​ເຫຼືອ​ຕົວ​ຈິງ​ໃຫ້ 110 ຕາ​ແສງ​ເຂດ​ຊາຍ​ແດນ​ທີ່ມີ​ຄວາມ​ຫຍຸ້ງຍາກ​ຫຼາຍ.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ