ວັນເສົາ, 20/7/2019
ເສີມຂະຫຍາຍຈິດໃຈໄຊຊະນະດ້ຽນບຽນຟູ, ກໍ່ສ້າງກອງທັບປະຊາຊົນຫວຽດນາມ ໃຫ້ໝັ້ນຄົງເຂັ້ມແຂງທາງດ້ານການເມືອງແລະແນວຄິດ, ຍົກສູງຄຸນນະພາບສັງລວມ ແລະກຳລັງແຮງສູ້ຮົບ
14/6/2019 15:57' ສົ່ງ ພິມ
ໃນຕອນບ່າຍຂອງວັນທີ 7 ພຶດສະພາ 1954, ຄັນທຸງ ຕັດສິນໃຈສູ້ຮົບ-ເດັດຂາດມີໄຊ ຂອງກອງທັບເຮົາ ປິວສະບັດຢູ່ເທິງອຸມົງຂອງນາຍພົນຝຣັ່ງ ເດິ ກາສະຕຣີ. (ພາບ: TTXVN)

ກ້າວ​ເຂົ້າ​ສູ່​ລະດູ​ຮ່ວງ​ໂຮຍ-ລະດູ​ໜາວ​ປີ 1953, ການ​ຕໍ່ສູ້​ຕ້ານພວກ​ລ່າ​ເມືອງ​ຂຶ້ນ​ຝຣັ່ງ​ໄດ້​ມີ​ບາດກ້າວ​ຫັນປ່ຽນ​ໃໝ່, ຕາມ​ທິດ​ທີ່​ເປັນ​ປະ​ໂຫຍ​ດ​ແກ່​ຫວຽດນາມ. ຈາກ​ທ່າ​ປ້ອງ​ກັນ, ກອງທັບ​ແລະ​ປະຊາຊົນ​ຫວຽດນາມ​ໄດ້​ຫັນ​ມາ​ເປັນ​ເຈົ້າ​ການ​ໃນ​ສະໜາມຮົບ, ບຸກ​ແລະ​ໂຈມ​ຕີ​ສັດຕູ​ຢ່າງ​ຕໍ່​ເນື່ອງ. ​ເພື່ອ​ກອບ​ກູ້​ສະຖານະ​ການ, ພວກ​ລ່​າເມືອງ​ຂຶ້ນ​ຝຣັ່ງ​ໄດ້​ວາງ​ແຜນການ ນາວາ - ຄວາມ​ພະຍາຍາມ​ສູງ​ສຸດ​ທີ່​ໄດ້​ຮັບ​ການ​ສະໜັບສະໜູນ​ແລະຊ່ວຍ​ເຫຼືອ​ຈາກ​ອາ​ເມ​ລິ​ກາ - ​ແນ​ໃສ່​ເພີ່ມ​ກຳລັງ​ທະຫານ​ແລະ​ຄ່າ​ໃຊ້​ຈ່າຍ​ສົງຄາມ, ດ້ວຍ​ເປົ້າ​ໝາຍ ​ໃນ​ເວລາ 18 ​ເດືອນ ​ຈະ​ທຳລາຍ​ລ້າງກອງ​ກຳລັງ​ຫຼວງ​ສ່ວນ​ຫຼາຍຂອງ​ສັດຕູ, ຄວບ​ຄຸມ​ດິນ​ແດນ​ຫວຽດນາມ ​ແລະ ປາບ​ອິນ​ໂດ​ຈີນ​ໃຕ້​ທັງ​ໝົດ​ໃຫ້​ສະຫງົບ. ທາງ​ຝ່າຍ​ຫວຽດນາມ, ​ເພື່ອ​ຮັກສາ​ທ່າ​ເປັນ​ເຈົ້າ​ການ​ທາງ​ຍຸດ​ທະ​ສາດ, ກົມ​ການ​ເມືອງ​ໄດ້​ຕົກລົງ​ເປີດ​ບັ້ນ​ບຸກ​ໂຈມ​ຕີ​ຍຸດ​ທະ​ສາດ​ລະດູ​ໜາວ-ລະດູບານ​ໃໝ່, ດ້ວຍ​ທິດ​ນຳ: ຕັ້ງໜ້າ, ​ເປັນ​ເຈົ້າ​ການ, ​ເຄື່ອນ​ເໜັງ, ​ໄຫວ​ພິບ, ທຳລາຍ​ລ້າງ​ພະລັງ​ຊີວິ​ຂອງ​ສັດຕູ, ປັບປຸງກຳລັງຂອງເຮົາ, ຍູ້ແຮງສົງຄາມກອງຫຼອນ, ບັງຄັບໃຫ້ກຳລັງຂອງສັດຕູຕ້ອງກະແຈກກະຈາຍ. ​ເມື່ອ​ສັດຕູ​ຄົ້ນ​ເຜີຍ​ທິດ​ທາງ​ບຸກ​ໂຈມ​ຕີ​ຂອງພວກ​ເຮົາ​ເຂົ້າ​ເຂດ​ຕາ​ເວັນ​ຕົກ​ສຽງ​ເໜືອ, ລາຍ​ເຈົາ ​ແລະ ​ເຂດ​ລາວ​ເໜືອ, ກອງ​ບັນຊາ​ການ​ທະຫານ​ສົ່ງ​ນອກ​ຝຣັ່ງ​ໄດ້​ໃຫ້​ທະຫານ​ໂດດ​ຈ້ອງ​ລົງ​ຢຶດ​ເອົາ​ດ້ຽນບຽນ​ຟູ ​ແລະ ​ເພີ່ມ​ທະວີ​ກຳລັງ, ກໍ່ສ້າງ​ບໍລິ​ເວນ​ນີ້​ເປັນຖານ​ທີ່​ໝັ້ນ​ທີ່​ເຂັ້ມ​ແຂງ​ທີ່​ສຸດ​ໃນ​ອິນ​ໂດ​ຈີນ, “ປ້ອມ​ປາການ​ທີ່​ບໍ່​ສາມາດ​ທຳລາຍ​ໄດ້”, ​ແນ​ໃສ່​ດຶງ​ດູດ​ແລະ​ດັບ​ສູນ​ກອງ​ທະຫານ​ຫຼວງ​ຂອງ​ຫວຽດນາມ.

ຕໍ່ໜ້າ​ສະພາບ​ການ​ດັ່ງ​ກ່າວ​, ວັນ​ທີ 6 ທັນວາ 1953, ກົມ​ການ​ເມືອງ​ໄດ້​ປະຊຸມ, ຕົກລົງ​ເປີດ​ບັ້ນ​ຮົບ​ດ້ຽນບຽນ​ຟູ, ຜ່ານ​ແຜນການ​ສູ້​ຮົບ, ຈັດ​ຕັ້ງ​ຄະນະ​ພັກ​ແນວ​ຮົບ​ແລະກອງ​ບັນຊາ​ການ​ບັ້ນ​ຮົບ ​ໂດຍ​ສະຫາຍພົນ​ເອກ ຫວໍ​ ງວຽນ​ຢາ​ບ ​ເປັນຜູ້​ບັງຄັບບັນຊາ​ການສູງ​ສຸດ​ຄວບ​ຕຳ​ແໜ່​ງ​ເລຂາ​ຄະນະ​ພັກ. ທົ່ວ​ປະ​ເທດ​ໄດ້​ເຕົ້າ​ໂຮມ​ກຳລັງ​ແຮງ​ໃຫ້​ແນວ​ຮົບ​ດ້ຽນບຽນ​ຟູ, ດ້ວຍ​ຈິດ​ໃຈ “ທຸກ​ສິ່ງ​ທຸກ​ຢ່າງ​ໃຫ້​ແນວ​ໜ້າ, ທັງ​ໝົດ​ເພື່ອເອົາ​ຊະນະ”. ບັນດາ​ກົມ​ກອງ​ທະຫານ​ຫຼວງ​ໄດ້​ເຕົ້າ​ໂຮມ​ຢ່າງ​ໄວວາ, ທັງ​ວັນ​ແລະ​ຄືນ​ຜ່າ​ປ່າ​ຜ່ານ​ພູ​ສ້າງ​ທາງ, ລາກ​​ແກ່ປືນ​ໃຫຍ່, ສ້າງ​ປ້ອມ​ປືນ​ສະໜາມຮົບ, ກຽມພ້ອມ​ບຸກ​ໂຈມ​ຕີ​ສັດຕູ. ປະຊາຊົນ​ຄົນ​ງານ​ແລະ​ຊາວ​ໜຸ່ມ​ອາສາ​ສະໝັກຫຼາຍ​ໝື່ນ​ຄົນ​ ໄດ້​ເຂົ້າ​ຮ່ວມ​ການ​ຂົນ​ສົ່ງ​ສະບຽງ​ອາຫານ​ແລະ​ອາວຸດ​ໄປ​ສູ່​ດ້ຽນບຽນ ​ເຖິງ​ວ່າ​ຈະ​ຖືກ​ລະ​ເບີ​ດ​ແລະ​ການ​ທຳລາຍຂອງ​ສັດຕູ, ຮັບປະກັນ​ພະລາທິການ​ຮັບ​ໃຊ້​ບັ້ນ​ຮົບ.

​ເພື່ອ​ປະ​ເຊີນ​ໜ້າ​ກັບ​ຄວາມ​ສາມາດ​ປ້ອງ​ກັນ​ທີ່​ເຂັ້ມ​ແຂງ​ຂອງ​ສັດຕູ, ຄະນະ​ພັກ​ແລະ​ກອງ​ບັນຊາ​ການ​ບັ້ນ​ຮົບ​ໄດ້​ຕົກລົງ​ປ່ຽນ​ທິດ​ນຳ​ການ​ສູ້​ຮົບ​ຈາກການ “ຕີ​ໄວ, ​ແກ້​ໄຂ​ໄວ” ມາ​ເປັນ​ການ “ຕີ​ຢ່າງ​ໜັກ​ແໜ້ນ, ບຸກຢ່າງ​ໝັ້ນຄົງ”. ການ​ຕົກລົງ​ນີ້​ແມ່ນ​ຖືກຕ້ອງ, ​ແຕ່​ໃນລະຫວ່າງ​ການ​ປະຕິບັດ ກອງທັບ​ແລະ​ປະຊາຊົນ​ຫວຽດນາມຕ້ອງປະ​ເຊີນ​ກັບ​ຄວາມ​ຍາກ​ລຳບາກ​ຫຼາຍ​ຢ່າງ. ດ້ວຍ​ຈິດ​ໃຈ​ກ້າຫານ, ບໍ່​ຢ້ານ​ຕໍ່​ຄວາມ​ຍາກ​ລຳບາກ​ແລະ​ເສຍ​ສະລະ, “​ລາກປືນ​ໃຫຍ່​ເຂົ້າ​ສະໜາມ​ຮົບ ແລ້ວ​ລາກປືນ​ໃຫຍ່​ອອກ”, ກອງທັບ​​ແລະ​ປະຊາຊົນ​ເຮົາຍາມ​ໃດ​ກໍ່​ເປັນ​ເຈົ້າ​ການ ປະດິດ​ສ້າງ, ຫາ​ທຸກ​ວິທີ​ທາງ​​ຜ່ານ​ຜ່າຄວາມ​ຫຍຸ້ງຍາກ ​ແລະສິ່ງ​ທ້າ​ທາຍທຸກ​ຢ່າງ ​ເພື່ອ​ສຳ​ເລັດ​ໜ້າ​ທີ່​ຢ່າງ​ດີ​ເດັ່ນ.

ຫຼັງຈາກ 56 ວັນ​ແລະ​ຄືນ​ແຫ່ງ​ການ “​ເຈາະ​ພູ​ເຂົາ, ນອນ​ໃນ​ອຸມົງ, ຕາກ​ແດດ​​ແຂ່ງ​ຝົນ, ກິນ​ເຂົ້າ​ປັ້ນ, ​ເລືອດ​ໄຫຼ​ຍ່ອຍ​ລົງ​ຂີ້ຕົມ”, ​ແຕ່ “​ໃຈ​ບໍ່​ຫວັ່ນ, ​ເຈດ​ຈຳນົງ​ບໍ່​ໄຫວ”, ກອງທັບ​ແລະ​ປະຊາຊົນ​ຫວຽດນາມ​ໄດ້​ສູ້​ຮົບ​ຢ່າງ​ອົງ​ອາດກ້າຫານ, ທັບ​ມ້າງ​ຖານ​ທັບ​ທະຫານ​ດ້ຽນບຽນ​ຟູ​ໃຫ້​ແຕກ​ທະລາ​ຍ. ​ເມື່ອ​ເວລາ 17 ​ໂມງ 30 ນາທີ​ໃນ​ວັນ​ທີ 7 ພຶດສະພາ 1954, ຄັນ​ທຸງ “ຕັດສິນ​ໃຈ​ສູ້​ຮົບ, ​ເດັດຂາດ​ມີ​ໄຊ" ຂອງກອງທັບ​ປະຊາຊົນ​ຫວຽດນາມ ​ໄດ້​ປິວ​ສະ​ບັດຢ່າງ​ສະຫງ່າ​ຜ່າ​ເຜີຍຢູ່​ເທິງ​ອຸມົງຂອງ​ນາຍ​ພົນ ​ເດິ ກາ​ສະຕຣີ, ຂີດ​ໝາຍ​ການ​ພັງ​ທະລາ​ຍຢ່າງ​ຮາບ​ຄາບ​ຂອງ​ແຜນການ ນາວາ, ສຳ​ເລັດ​ສິ້ນ​ສຸດ​ການ​ຕໍ່ສູ້​ຕ້ານ​ການ​ຮຸກ​ຮານ​ຂອງ​ພວກ​ລ່າ​ເມືອງ​ຂຶ້ນ​ຝຣັ່ງ, ​ເປີດ​ສັກກະ​ລາດ​ໃໝ່ - ສະ​ໄໝ​ແຫ່ງ​ການ​ກໍ່ສ້າງ​ສັງຄົມ​ນິຍົມ​ຢູ່​ພາກ​ເໜືອ, ສ້າງ​ປະ​ຖົມປັດ​​ໄຈທີ່​ສະດວກ​ດີ​ ເພື່ອ​ໃຫ້​ປະຊາຊົນ​ເຮົາ​ຕໍ່ສູ້​ປົດປ່ອຍ​ພາກ​ໃຕ້, ລວມປະ​ເທດ​ເປັນອັນ​ໜຶ່ງ​ອັນ​ດຽວ.

​ໄຊຊະນະ​ດ້ຽນບຽນ​ຟູ​ແມ່ນ "ຫຼັກ​ໝາຍ​ຄຳ​ທີ່​ຮຸ່ງ​ເຮືອງ​ເຫຼືອ​ງ​ເຫຼື້ອມ”, ​ແມ່ນ​ເຫດການ​ທີ່​ສຳຄັນ​ທີ່​ສຸດ, ​ແມ່ນ​ໜຶ່ງ​ໃນ​ບັນດາ​ວິລະ​ກຳ​ທີ່​ໂດ່​ງດັງ​ທີ່​ສຸດ​ ໃນ​ປະຫວັດສາດ​ແຫ່ງ​ການ​ຕໍ່ສູ້​ຕ້ານ​ການ​ຮຸກ​ຮານ​ຈາກ​ພາຍ​ນອກ​ຂອງ​ຊາດ​ຫວຽດນາມ. ນີ້​ແມ່ນ​ໄຊຊະນະ​​ແຫ່ງ​ສິລະ​ປະສົງ​ຄາມ​ປະຊາຊົນ, ທົ່ວ​ປວງ​ຊົນ, ຮອບດ້ານ, ພາຍ​ໃຕ້​ການ​ນຳພາ​ຂອງ​ພັກ​ແລະຂອງ​ປະທານ​ໂຮ່ຈີ​ມິນ; ສະ​ແດງ​ຢ່າງ​ມີ​ຊີວິດ​ຊີວາ​ເຖິງ​ເຈດ​ຈຳນົງທີ່​ແຂງ​ແກ່ນ, ຄວາມ​ກ້າຫານ, ສະຕິ​ປັນຍາ ​ແລະ​ກຳລັງ​ແຮງທີ່​ເລີດ​ລ້ຳ​ ຂອງ​ຊາດ​ຫວຽດນາມ​ໃນ​ຍຸກ​ສະ​ໄໝ​ໂຮ່ຈີ​ມິນ. ​ໄຊຊະນະ​ນີ້​​ໄດ້​ໂມ່ງ​ບາດ​ຄ້ອນ​ທີ່​ຕັດສິນ, ສ້າງ​ບາດ​ລ້ຽວປະຫວັດສາດ​ ເຮັດ​ໃຫ້​ສະຖານະ​ການ​ໃນ​ສະໜາມຮົບ​ປ່ຽນ​ແປງ​ໄປ, ທັບ​ມ້າງ​ເຈດຕະນາ​ຮຸກ​ຮານ, ບັງຄັບ​ໃຫ້​ຝຣັ່ງ​ຕ້ອງ​ຍອມ​ເຊັນ​ສັນຍາ​​ເຊີ​ແນວກ່ຽວ​ກັບ​ການ​ຢຸດຕິ​ສົງຄາມ, ສ້າງສັນ​ຕິ​ພາບ​ໃນ​ອິນ​ໂດ​ຈີນ. ​ໄຊຊະນະ​ຂອງ​ບັ້ນ​ຮົບ​ດ້ຽນບຽນ​ຟູ​ໄດ້​ເພີ່ມ​ທະວີ​ຄວາມ​ພາກພູມ​ໃຈ​ຂອງ​ຊາດ, ຄວາມ​ເຊື່ອ​ຖື​ຢ່າງ​​ເລິກ​ເຊິ່ງ​ໃນ​ການ​ນຳພາ​ຂອງ​ພັກ, ​ໃນ​ເຈດ​ຈຳນົງ​ແລະ​ກຳລັງ​ແຮງ​ສູ້​ຮົບ​ຂອງ​ກອງທັບ​ປະຊາຊົນ​ຫວຽດນາມ; ພ້ອມ​ກັນ​ນັ້ນ ​ມັນ​ກໍ່​ປຸກລະດົມ​ກຳລັງ​ໃຈ​ໃຫ້​ທົ່ວ​ພັກ, ທົ່ວ​ປວງ​ຊົນ​ແລະ​ທົ່ວ​ກອງທັບ​ເປັນ​ຈິດ​ໜຶ່ງ​ໃຈ​ດຽວ​ແລະຮ່ວມ​ແຮງ​ສູ້​ຮົບພາຍ​​ໃຕ້​ຄັນ​ທຸງ​ອັນ​ສະຫງ່າ​ງາມ​ຂອງ​ພັກ, ​ເພື່ອ​ເອກະລາດ ອິສະລະ​ພາບ​ຂອງປະ​ເທດຊາດ, ​ເພື່ອ​ຄວາມ​ສົມບູນ​ພູມ​ສຸກ​ຂອງ​ປະຊາຊົນ.

ມີ​ບົດຮຽນ​ຈຳນວນ​ຫຼາຍ​ໄດ້​ມາ​ຈາກ​ເຫດການ​ປະຫວັດສາດ​ນີ້, ​ແຕ່​ບົດຮຽນ​ອັນ​ດັບ​ໜຶ່ງ​ຄື ພັກ​ກອມ​ມູນິດ​ຫວຽດນາມ ນຳ​ໂດຍ​ປະທານ​ໂຮ່ຈີ​ມິນ ​ໄດ້​ວາງ​ແນວທາງການ​ຕໍ່ຕ້ານ​ແລະ​ແນວທາງ​ການ​ທະຫານທີ່​ເປັນ​ເອກະລາດ ​ຖືກຕ້ອງ ປະດິດ​ສ້າງ, ນຳພາ​ປະຊາຊົນດຳ​ເນີນ​ການ​ຕໍ່ຕ້ານ​ແບບ​ທົ່ວ​ປວງ​ຊົນ​ແລະ​ຮອບດ້ານ, ອີງ​ໃສ່​ກຳລັງ​ແຮງ​ຂອງ​ຕົນ​ເອງ​ເປັນ​ຕົ້ນຕໍ; ກໍ່ສ້າງ​ກຳລັງ​ປະກອບ​ອາວຸດ​ປະຊາຊົນ​ທີ່ໝັ້ນຄົງ​ເຂັ້ມ​ແຂງ ​ແລະ​ເປັນຫຼັກ​ແຫຼ່ງ​ແກ່ນສານ​ໃຫ້​ປວງ​ຊົນ​ຕີ​ສັດຕູ; ປະສານ​ສົມທົບ​ຢ່າງ​ແໜ້ນ​ແຟ້ນລະຫວ່າງ​ສົງຄາມ​ກອງ​ຫຼອນ​ກັບສົງຄາມປົກກະຕິ; ລະຫວ່າງການ​ໂຈມ​ຕີ​ດ້ວຍ​ກຳລັງ​ທະຫານ, ການ​ຂົນຂວາຍ​ທະຫານ​ສັດຕູ ກັບ​ການ​ລຸກ​ຮື​ຂຶ້ນ​ຂອງ​ມະຫາຊົນ... ພາຍ​ໃຕ້​ການ​ນຳພາ​ຂອງ​ພັກ​ແລະ​ປະທານ​ໂຮ່ຈີ​ມິນ, ຜ່ານ​ພຶດຕິ​ກຳ​ແຫ່ງ​ການ​ສູ້​ຮົບ, ກອງທັບປະຊາຊົນຫວຽດນາມ​ໄດ້​ເຕີບ​ໃຫຍ່​ເຂັ້ມ​ແຂງທີ່​ສຸດ ​ທາງ​ດ້ານ​ແນວ​ຄິດ​ການ​ເມືອງ, ກຳລັງ, ການຈັດ​ຕັ້ງບັງຄັບ​ບັນຊາ, ລະດັບ​ການ​ສູ້​ຮົບ, ການ​ປະກອບ​ອາວຸດ​ຍຸດທະ​ພັນ, ລະບຽບ​ວິ​ໄນ​ສະໜາມຮົບ; ບໍ່​ຢ້ານ​ກົວ​ອັນຕະລາຍ, ຜ່ານ​ຜ່າ​ຄວາມ​ຫຍຸ້ງຍາກ ສິ່ງ​ທ້າ​ທາຍ, ສະຫຼາດ​ໄຫວ​ພິບ ປະດິດ​ສ້າງ ກ້າ​ເສຍ​ສະລະ, ສ້າງ​ວິລະ​ກຳຫຼວງຫຼາຍ​ໃນ​ທົ່ວ​ສະໜາມຮົບອິນ​ໂດ​ຈີນ, ປະຕິບັດ​ໜ້າ​ທີ່​ໃນ​ສະໜາມຮົບ​ດ້ຽນບຽນ​ຟູບັນລຸ​ຜົນສຳ​ເລັດ​ທີ່​ດີ​ເດັ່ນ. ບົດ​ຮຽນກ່ຽວ​ກັບ​ການ​ກໍ່ສ້າງ​ກອງທັບ​ໃນ​ບັ້ນ​ຮົບ​ດ້ຽນບຽນ​ຟູສືບ​ຕໍ່​ໄດ້​ຮັບ​ການ​ຄົ້ນຄວ້າ, ໝູນ​ໃຊ້​ເຂົ້າ​ໃນ​ການ​ຕໍ່ສູ້​ຕ້ານອາ​ເມ​ລິ​ກາ​ເພື່ອ​ກູ້​ຊາດ. ມາ​ເຖິງ​ປະຈຸ​ບັນ​ນີ້, ບົດຮຽນ​ເຫຼົ່າ​ນີ້ຍັງ​ມີ​ຄຸນຄ່າ​ທາງ​ດ້ານ​ທິດ​ສະ​ດີ​ແລະ​ພຶດຕິ​ກຳ​ຄື​ເກົ່າ, ​ໂດຍ​ສະ​ເພາະ​​ແມ່ນ​ ໃນ​ການ​ກໍ່ສ້າງ​ກອງທັບ​ໃຫ້​ໝັ້ນ​ຄົງ​ເຂັ້ມ​ແຂງ​ທາງ​ດ້ານ​ການ​ເມືອງ, ຍົກ​ສູງ​ຄຸນະພາບ​ສັງ​ລວມ​ແລະ​ກຳລັງ​ແຮງ​ສູ້​ຮົບ​ຢ່າງ​ບໍ່​ຢຸດ​ຢັ້ງ, ຕອບ​ສະໜອງ​ຄວາມ​ຕ້ອງການ​ຂອງ​ພາລະກິດປັບປຸງການ​ປ້ອງ​ກັນ​ປະ​ເທດ, ປົກ​ປັກ​ຮັກສາ​ປະ​ເທດ​ຊາດ​ຫວຽດນາມ​ສັງຄົມ​ນິຍົມຢ່າງ​ໝັ້ນຄົງ.

ປະຈຸ​ບັນ, ພາລະກິດ​ການ​ປ່ຽນ​ແປງ​ໃໝ່, ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ​ ຂອງ​ປະຊາຊົນ​ຫວຽດນາມ​ພາຍ​ໃຕ້​ການ​ນຳພາ​ຂອງ​ພັກ ພວມ​ມີ​ໂອກາດທີ່​ສະດວກ​ດີ​ຫຼາຍ​ຢ່າ​ງ, ​ແຕ່​ກໍ່​ມີ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ບໍ່​ໜ້ອຍ. ສະພາບ​ການ​ໂລກ​ແລະ​ພາກ​ພື້ນ​ພວມ​ຜັນ​ປ່ຽນ​ຫຼາຍ: ທະ​ເລ​ຕາ​ເວັນ​ອອກຍັງ​ມີ​ຄວາມ​ສັບສົນ​ທີ່​ເຊື່ອງ​ຊ້ອນ​ຢູ່​ສະ​ເໝີ ​ແລະ ມີ​ຄວາມ​ສ່ຽງ​ຫຼາຍ​ຢ່າງ; ບັນດາ​ປະ​ເທດ​ໃຫຍ່​ສືບ​ຕໍ່​ເພີ່ມ​ທະວີ​ການເຂົ້າ​ຮ່ວມ​ແລະ​ສ້າງ​ອິດ​ທິພົນ​ໃນ​ພາກ​ພື້ນ ດ້ວຍ​ລະດັບ​ແລະ​ຂະໜາດ​ທີ່​ຕ່າງ​ກັນ; ສົງຄາມ​ພາກສ່ວນ, ການ​ປະ​ທະ​ກັນ​ດ້ວຍ​ອາວຸດ, ຄວາມ​ຂັດ​ແຍ່ງ​ທາງດ້ານ​ຊົນ​ເຜົ່າ​ແລະ​ທາງ​ດ້ານສາສະໜາ, ການ​ເຄື່ອນ​ໄຫວກໍ່​ການ​ຮ້າຍ ຍັງ​ເກີດ​ຂຶ້ນ ​ແລະ​ກໍ່​ໃຫ້​ເກີດ​ຄວາມ​ວຸ່ນວາຍ​ໃນ​ພາກ​ພື້ນ​ແລະ​ໃນ​ໂລກ. ບັນດາ​ອິດ​ທິກຳລັງ​ສັດຕູ​ສືບ​ຕໍ່ຍູ້​ແຮງ​ການ​ເຄື່ອນ​ໄຫວ “ຫັນປ່ຽນ​ໂດຍ​ສັນຕິ”, ກໍ່​ການ​ຈະລາຈົນ​ໂຄ່ນ​ລົ້ມ, ຊຸກຍູ້ “ການ​ຫັນປ່ຽນດ້ວຍຕົນ​ເອງ, “ການ​ປ່ຽນ​ແປງ​ດ້ວຍຕົນ​ເອງ" ຢູ່​ພາຍ​ໃນ, ປະຕິ​ບັດການ “​ຫັນ​ເປັນ​ໄຮ້​ການ​ເມືອງ”, “ຫັນ​ເປັນ​ພົນລະ​ເຮືອນ" ຕໍ່​ກອງທັບ, ​ແບ່ງ​ແຍກ​ກອງທັບ​ກັບ​ພັກ, ​ເຮັດ​ໃຫ້​ກອງທັບສູນ​ເສຍ​ທິດ​ທາງ​ການ​ເມືອງ, ຈາງ​ຫາຍ​ອຸດົມ​ຄະຕິ​ແລະ​ເປົ້າໝາຍ​ການ​ສູ້​ຮົບ, ກາຍ​ເປັນ​ກອງທັບມື​ອາຊີບ​ແບບ​ຕາ​ເວັນ​ຕົກ... ສະພາບ​ການ​ດັ່ງ​ກ່າວ​ເທິງ​ນີ້​ຮຽກຮ້ອງ​ໃຫ້​ພວກ​ເຮົາ​ຕ້ອງ​ເພີ່ມ​ທະວີ​ຄວາມ​ສາມັກຄີ, ​ເສີມ​ຂະຫຍາຍ​ກຳລັງ​ແຮງ​ສັງ​ລວມຂອງ​ທົ່ວ​ພັກ, ທົ່ວ​ປວງ​ຊົນ​ແລະ​ທົ່ວ​ກອງທັບ​ໃນ​ພາລະກິດ​ການ​ກໍ່ສ້າງ​ກອງ​ທັບ, ປັບປຸງ​ການ​ປ້ອງ​ກັນປະ​ເທດ​ແລະປົກ​ປັກ​ຮັກສາ​ປະ​ເທດ​ຊາດ; ​ໂດຍ​ສະ​ເພາະ​ແມ່ນ ​ໃນ​ການ​ໝູນ​ໃຊ້ຢ່າງ​ມີ​ປະສິດທິ​ຜົນ​ບົດຮຽນ​ແຫ່ງ​ໄຊຊະນະ​ດ້ຽນບຽນ​ຟູ ​​ເຂົ້າໃນ​ການ​ກໍ່ສ້າງ​ກອງທັບ​ໃຫ້​ເຂັ້ມ​ແຂງ​ທາງ​ດ້ານ​ການ​ເມືອງ, ຍົກ​ສູງ​ຄຸນ​ນະພາ​ບ​ສັງ​ລວມ​ແລະ​ກຳລັງ​ແຮງ​ສູ້​ຮົບ ຊຶ່ງ​ຍິ່ງ​ມີ​ຄວາມ​ໝາຍ​ພຶດຕິ​ກຳ​ທີ່​ເລິ​ກເຊິ່ງ. ​ເພື່ອ​ປະຕິບັດ​ສິ່ງ​ດັ່ງ​ກ່າວ, ທົ່ວ​ກອງທັບ​ຕ້ອງ​ຊາບ​ຊຶມ​ແລະ​ປະຕິບັດ​ບາງ​ເນື້ອ​ໃນ​ແລະວິທີ​ແກ້ລຸ່ມ​ນີ້​ ໃຫ້​ໄດ້​ເປັນ​ຢ່າງ​ດີ:

ທີ​ໜຶ່ງ, ​ເພີ່ມ​ທະວີ​ການນຳພາ​ຂອງ​ພັກ, ກໍ່ສ້າງກອງທັບປະຊາຊົນ​ໃຫ້​ໝັ້ນຄົງ​ເຂັ້ມ​ແຂງ​ທາງ​ດ້ານ​ການ​ເມືອງ.

​ໃນ​ບັ້ນ​ຮົບ​ດ້ຽນບຽນ​ຟູ, ໜຶ່ງ​ໃນ​ບັນດາ​ປັດ​ໄຈ​​ສຳຄັນທີ່​ປະກອບສ່ວນສ້າງ​ໄຊຊະນະ​ທີ່​ມີຄວາມ​ໝາຍຍຸກ​ສະ​ໄໝ ນັ້ນ​ຄື ພັກ​ກອມ​ມູນິດ​ຫວຽດນາມ​ໄດ້​ຊີ້​ນຳ​ນຳພາ​ການ​ກໍ່ສ້າງ​ກອງທັບ​ໃຫ້​ໝັ້ນຄົງ​ເຂັ້ມ​ແຂງ​ທາງ​ດ້ານ​ການ​ເມືອ​ງ ແນວ​ຄິດ ​ແລະ ການຈັດ​ຕັ້ງ, ​ມີ​ຄວາມ​ຈົງ​ຮັກ​ພັກດີ​ສຸດ​ຂີດ​ຕໍ່​ກັບ​ພັກ ປະ​ເທດ​ຊາດ​ແລະ​ປະຊາຊົນ; ກຽມ​ຄວາມ​ພ້ອມ​ທີ່​ຈະ​ສູ້​ຮົບ ​ເສຍ​ສະລະ ​ແລະ ​ຕີ​ເອົາ​ຊະ​ນະ​ສັດຕູຜູ້​ຮຸກ​ຮານ​ທຸກ​ໂຕ. ​ເພາະສະ​ນັ້ນ, ​ເມື່ອ​ກ້າວ​ເຂົ້າ​ສູ່​ບັ້ນ​ຮົບ, ພະນັກງານ​ແລະ​ນັກຮົບ​ກອງທັບ​ທຸກ​ຄົນ​ໄດ້​ສະ​ແດງ​ໃຫ້​ເຫັນ​ຢ່າງ​ຈະ​ແຈ້ງ​ເຖິງ​ທາດ​ແທ້​ຊົນ​ຊັ້ນ, ​ເປົ້າ​ໝາຍ ອຸດົມ​ຄະຕິ​ຂອງ​ການ​ຕໍ່ສູ້, ດ້ວຍ​ເຈດ​ຈຳນົງ​ຕັດສິນ​ໃຈ​ສູ້​ຮົບ ​ເດັດຂາດ​ມີ​ໄຊ​ໃນ​ລະດັບ​ສູງ, ຈິດ​ໃຈ​ອົດທົນ​ຕໍ່​ຄວາມ​ຍາກ​ລຳບາກ​​ແລະການ​ເສຍ​ສະລະ, ຕັດສິນ​ໃຈ​ສູ້​ຊົນ​ເພື່ອ​ສຳ​ເລັດ​ຢ່າງ​ດີ​ເດັ່ນໜ້າ​ທີ່​ທີ່​ສູນ​ກາງ​ພັກ, ລຸງ​ໂຮ່​ແລະ​ປະຊາຊົນ​ມອບ​ໝາຍ​ໃຫ້​.

​ເພື່ອ​ເສີມ​ຂະຫຍາຍ​ບົດຮຽນ​ດັ່ງ​ກ່າວ​ໃນ​ໄລ​ຍະ​ປະຈຸ​ບັນ, ຕ້ອງ​ເພີ່ມ​ທະວີ​ການ​ນຳພາ​ເດັດຂາດ ​ໂດຍ​ກົງ​ໃນ​ທຸກ​ດ້ານ​ຂອງ​ພັກ, ກໍ່ສ້າງ​ກອງທັບ​ໃຫ້​ໝັ້ນຄົງ​ເຂັ້ມ​ແຂງ​ທາງ​ດ້ານ​ການ​ເມືອງ, ຍົກ​ສູງ​ຄຸນ​ນະພາ​ບສັງ​ລວມ ​ແລະ ກຳລັງ​ແຮງ​ສູ້​ຮົບ, ມີ​ຄວາມ​ຈົງ​ຮັກ​ພັກດີ​ສຸດ​ຂີດ​ຕໍ່​ພັກ ປະ​ເທດ​ຊາດ​ແລະ​ປະຊາຊົນ, ກຽມ​ຄວາມ​ພ້ອມ​ທີ່​ຈະ​ຕໍ່ສູ້​​ແລະ​ເສຍ​ສະລະ, ຕີ​ເອົາ​ຊະນະ​ສັດຕູ​ຜູ້​ຮຸກ​ຮານ​ທຸກ​ໂຕ. ຕາມ​ນັ້ນ, ຄະນະ​ພັກ​ແລະ​ພະນັກງານ​ນຳພາ​ຂັ້ນ​ຕ່າງໆ​ຕ້ອງຕັ້ງໜ້າ​ຄົ້ນຄວ້າ, ກຳ​ແໜ້ນ​ແຜນ​ນະ​ໂຍບາຍ, ​ແນວທາງ, ກົນ​ໄກ, ທິດນຳ​ຂອງ​ພັກໃນ​ການ​ກໍ່ສ້າງກອງທັບ; ກໍ່ສ້າງ​ອົງການ​ຈັດ​ຕັ້ງ​ພັກ​ຂັ້ນ​ຕ່າງໆ​ ໃຫ້​ໝັ້ນຄົງເຂັ້ມ​ແຂງ​ທາງ​ດ້ານ​ການ​ເມືອງ ​ແນວ​ຄິດ ການ​ຈັດ​ຕັ້ງ ​ແລະ ຄຸນສົມບັດ, ຕິດ​ກັບ​ການ​ກໍ່ສ້າງ​ກົມ​ກອງ​ໃຫ້​ເຂັ້ມ​ແຂງຮອບດ້ານ, ບັນດາ​ອົງຄະ​ນະມະ​ຫາ​ຊົນ​ເຂັ້ມ​ແຂງດີ​ເດັ່ນ; ​ເອົາ​ໃຈ​ໃສ່​ກໍ່ສ້າງ​ຖັນ​ແຖວ​ພະນັກງານ ສະມາຊິກ​ພັກ, ​ໂດຍ​ສະ​ເພາະ​ແມ່ນ​ພະນັກງານ​ຂັ້ນ​ຍຸດ​ທະ​ສາດ ​ໃຫ້​ໝັ້ນຄົງ​ເຂັ້ມ​ແຂງ​ທາງ​ດ້ານ​ຄຸນ​ທາດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ຄວາມ​ສາມາດປະຕິບັດ, ​ແບບ​ແຜນ​ນຳພາ, ​ທຽບ​ເທົ່າ​ກັບ​ຄວາມ​ຕ້ອງການ, ໜ້າ​ທີ່.

ທົ່ວ​ກອງທັບ​ຕ້ອງ​ເອົາ​ໃຈ​ໃສ່​ປະຕິບັດ​ວຽກ​ງານ​ພັກ ວຽກ​ງານ​ການ​ເມືອງ​ ໃຫ້​ໄດ້​ເປັນ​ຢ່າງ​ດີ, ຮັກສາສະໜາມຮົບ​ແນວ​ຄິດ​ຂອງ​ພັກ​ໃນ​ກອງທັບ​ໄວ້​ຢ່າງ​ໝັ້ນຄົງ; ​ເສີ​ມຂະຫຍາຍ​ປັດ​​ໄຈ​ການ​ເມືອງ ຈິດ​ໃຈ, ປັບປຸງ​ຄວາມ​ເຊື່ອ​ຖື, ​ເຈດ​ຈຳນົງ​ອີງ​ໃສ່​ຕົນ​ເອງ​ສ້າງ​ຕົນ​ໃຫ້​ເຂັ້ມ​ແຂງ, ຄວາມ​ຕັດສິນ​ໃຈ​ສູ້​ຊົນ, ຜ່ານ​ຜ່າ​ຄວາມ​ຫຍຸ້ງຍາກ, ສຳ​ເລັດ​ເປັນ​ຢ່າງ​ດີ​ໜ້າ​ທີ່​ຂອງ​ພະນັກງານ ນັກຮົບ; ຍົກ​ສູງ​ປະສິດທິ​ຜົນ​ຂອງ​ວຽກ​ງານ​ຂົນຂວາຍ​ປະຊາຊົນ​ໃນ​ສະພາບ​ການ​ໃໝ່, ປັບປຸງ​ສາຍ​ພົວພັນ​ລະຫວ່າງ​ທະຫານ​ແລະ​ປະຊາຊົນ, ພະຍາຍາມ​ຊ່ວຍ​ເຫຼືອ​ປະຊາຊົນ​ໃນ​ການ​ຫຼຸດຜ່ອນ​ຄວາມທຸກ​ຍາກ, ປ້ອງ​ກັນ, ຕ້ານ ​ແລະ ​ແກ້​ໄຂ​ຜົນກະທົບ​ຈາກ​ໄພພິບັດ, ກູ້​ໄພ-ກູ້​ຊີບ; ​ເສີມ​ຂະຫຍາຍ​ກຳລັງ​ແຮງ​ຂອງ​ປະຊາຊົນ​ໃນ​ການ​ກໍ່ສ້າງ​ທ່າ​ສະໜາມຮົບ, ສ້າງ​ທ່າ​ແຮງ​ທາງ​ທະຫານ, ການ​ປ້ອງ​ກັນປະ​ເທ​ດ ​ແລະ ​ແນ​ວຫຼັງຂອງກອງທັບ ​ໃຫ້​ໝັ້ນຄົງ​ເຂັ້ມ​ແຂງ. ຜັນ​ຂະຫຍາຍ​ປະຕິບັດ​ຢ່າງ​ມີ​ປະສິດທິ​ຜົນ ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII “ກ່ຽວ​ກັບ​ການ​ເພີ່ມ​ທະວີ​ການ​ກໍ່ສ້າງ, ປັບປຸງ​ພັກ; ກີດ​ກັ້ນ​ແລະ​ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ດຳລົງ​ຊີວິດ, ບັນດາ​ປະກົດ​ການ “ຫັນປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ”, ຕິດ​ກັບ​ການຍູ້​ແຮງ​ການ​ຮ່ຳຮຽນ ​ແລະ ​ເຮັດ​ຕາມ​ແນວ​ຄິດ, ຄຸນສົມບັດ, ​ແບບ​ແຜນ​ໂຮ່ຈີ​ມິນ; ​ເສີມ​ຂະຫຍາຍ​ບົດ​ບາດ​ເປັນ​ແບບຢ່າງ​ທາງ​ດ້ານ​ແນວ​ຄິດ​ການ​ເມືອງ ຄຸນສົມບັດ ​ແບບ​ດຳລົງ​ຊີວິດຂອງ​ພະນັກງານ ສະມາຊິກ​ພັກ, ​ໂດຍ​ສະ​ເພາະ​ແມ່ນ​ພະນັກງານນຳພາ​​ຂັ້ນ​ຕ່າງໆ.

ພະຍາຍາມ​ປ່ຽນ​ແປງ​ໃໝ່​ເນື້ອ​ໃນອົບຮົມ​ສຶກສາ​ການ​ເມືອງ ​ແນວ​ຄິດ ​ແລະ​ ເຮັດ​ໃຫ້​ມັນມີ​ຮູບ​ການ ວິທີ​ການ​ທີ່​ຫຼາກ​ຫຼາຍ; ສົມທົບ​ຢ່າງ​ແໜ້ນ​ແຟ້ນລະຫວ່າງ​ການ​ອົບຮົມ​ສຶກສາ ຍົກ​ສູງຄວາມ​ຮັບ​ຮູ້ ກັບ​ການ​ແນະນຳ​ປະຕິບັດ; ສຸ​ມ​ໃສ່​ການ​ກໍ່ສ້າງຮູບ​ພາບ “ທະຫານ​ຂອງ​ລຸງ​ໂຮ່” ​ໃນ​ສະ​ໄໝ​ໃໝ່, ດ້ວຍ​ບັນດາ​ເອກະລັກທາງ​ດ້ານ ຄຸນ​ທາດການ​ເມືອງ, ຄຸນສົມບັດ​ສິນ​ທຳ, ວັດທະນະທຳ, ມີ​ການຈັດ​ຕັ້ງ, ມີ​ລະບຽບ​ວິ​ໄນ, ມີ​ຄວາມ​ຮູ້, ມີ​ສຸ​ຂະ​ພາບ​​ແຂງ​ແຮງ ​ແລະ ມີ​ລະດັບ​ການ​ທະຫານ. ພ້ອມ​ກັນ​ກັບ​ການ​ຍູ້​ແຮງ​ການ​ໂຄສະນາ​ຂົນຂວາຍ​ແລະການອົບຮົມ​ສຶກສານັ້ນ, ຕ້ອງ​​ເຜີຍ​ແບ​ທາດ​ແທ້, ກົນອຸບາຍ ລ່ຽມ​ລາຍ​ໃໝ່ຂອງ​ບັນດາ​ອິດ​ທິກຳລັງ​ສັດຕູ, ຍົກ​ສູງ​ຄວາມ​ຮັບ​ຮູ້​ກ່ຽວ​ກັບຄູ່ຮ່ວມ​ມື ກໍ່​ຄື​ເປົ້າ​ໝາຍ​ຂອງ​ການ​ປະຕິວັດ​ຫວຽດນາມ, ​ແນວທາງ, ສິລະ​ປະການ​ທະຫານ​ຂອງ​ພັກ; ​ຍົກ​ສູງ​ສະຕິ​ລະວັງ​ຕົວ, ​ຕໍ່ສູ້​ຢ່າງເດັດດ່ຽວ​​ເພື່ອ​ເອົາ​ຊະນະທຸກກົນ​ອຸບາຍ​ແລະ​ການ​ທຳລາຍ​ຂອງ​​ສັດຕູ ທີ່​ພວກ​ມັນ​ຫວັງປະຕິບັດ “ການ​ຫັນປ່ຽ​ນໂດຍ​ສັນຕິ, ຊຸກຍູ້ “ການ​ຫັນປ່ຽນ​ດ້ວຍ​ຕົນ​ເອງ", “ການ​ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ, ທວງ​ໃຫ້ “ຫັນ​ເປັນ​ໄຮ້​ການ​ເມືອງ”, “ຫັນ​ເປັນ​ພົນລະ​ເຮືອນ” ຕໍ່​ກອງທັບ​ເຮົາ,...

ທີ​ສອງ, ປະຕິບັດ​ເປັນ​ຢ່າງ​ດີ​ວຽກ​ງານ​ຄົ້ນຄວ້າ, ຕີ​ລາຄາ​ສະພາບ​ການ, ຄາດ​ຄະ​ເນ​ຍຸດ​ທະ​ສາດ, ກຽມ​ຄວາມ​ພ້ອມ​ສູ້​ຮົບ​ເພື່ອ​ປົກ​ປັກ​ຮັກສາ​ປະ​ເທດ​ຊາດ​ໃຫ້​ໝັ້ນ​ຄົງ​ໃນ​ທຸກ​ກໍລະນີ.

ໜຶ່ງ​​ໃນ​ບັນດາ​ສາ​ເຫດ​ຂອງ​ໄຊຊະນະ​ໃນບັ້ນ​ຮົບ​ດ້ຽນບຽນ​ຟູ​ແມ່ນ ກອງທັບ​ຫວຽດນາມ​​ກຳ​ແໜ້ນ​ແລະຄວບ​ຄຸມ​ສະຖານະ​ການ​​ໄດ້ຢູ່​ສະ​ເໝີ, ​​ໄດ້ເປັນ​ເຈົ້າ​ການ​ທາງ​ດ້ານ​ຍຸດ​ທະ​ສາດ, ດັບ​ປັບ​ທິດ​ນຳ​ການສູ້​ຮົບ​ຢ່າງ​ທັນ​ການ, ຈັດ​ວາງ​ສັບ​ຊ້ອນກອງ​ກຳລັງທີ່​ເໝາະ​ສົມ. ຮັບ​ເອົາ​ບົດຮຽນ​ດັ່ງກ່າວ, ບັນດາ​ອົງການ​ເສນາ​ທິການ​ຍຸດ​ທະ​ສາດ​ໄດ້​ເປັນ​ເຈົ້າ​ການ​​ສົມທົບ​ຢ່າງ​ແໜ້ນ​ແຟ້ນກັບກຳລັງ​ອື່ນໆ ​ເພື່ອ​ຜັນ​ຂະຫຍາຍ​ມາດ​ຕະການ​ຕ່າງໆ​ຢ່າງ​ຄົບ​ຊຸດ ​ແນ​ໃສ່​ກຳ​ແໜ້ນກົນອຸບາຍ​ແລະ​ການ​ເຄື່ອນ​ໄຫວ​ຂອງບັນດາ​ອິດ​ທິກຳລັງ​ສັດຕູ, ຄາດ​ຄະ​ເນ​ຢ່າງ​ຊັດ​ເຈນ​ສະພາບ​ການ​ສາກົນ ພາກ​ພື້ນ​ແລະ​ໃນ​ປະ​ເທດ, ພ້ອມ​ດ້ວຍ​ການ​ເຄື່ອນ​ໄຫວ​ໃໝ່​ແລະ​ທ່າ​ອຽງ​ການ​ພັດທະນາ, ການຜັນ​ປ່ຽນຂອງ​ສະພາບ​ການ​ປ້ອງ​ກັນຊາ​ດ, ການ​ປ້ອງ​ກັນ​ຄວາມ​ສະຫງົບ​ໃນ​ໂລກ. ​ໃຫ້​ຄຳ​ແນະນຳ​ແລະ​ສະ​ເໜີ​ມາດ​ຕະການ​ຕ່າງໆ ຕໍ່​ພັກ​ແລະ​ລັດ​ຢ່າງ​ທັນ​ການ​​ ເພື່ອ​ແກ້​ໄຂ​ສະຖານະ​ການ​ຍຸດ​ທະ​ສາດ​ຢ່າງ​ຖືກຕ້ອງ; ​ເປັນ​ເຈົ້າ​ການ​ໃນ​ການ​ກີດ​ກັ້ນ, ຄົ້ນ​ເຜີຍ​ແລະ​ລົບ​ລ້າງປັດ​​ໄຈທີ່​ອັບປະ​ໂຫຍ​ດ, ບໍ່​ໃຫ້ຖືກ​ຕົກ​ໃນ​ທ່າ​ຮັບ ທີ່ບໍ່​ຄາດ​ຄິດ, ​ໂດຍ​ສະ​ເພາະ​ແມ່ນ​ໃນ​ພື້ນ​ທີ່​ຍຸດ​ທະ​ສາດ, ຈຸດ​ໜັກ​ໃຈ​ກາງ, ​ໃນ​ອາກາດ​ແລະ​ທະ​ເລ, ປະກອບສ່ວນ​ປົກ​ປັກ​ຮັກສາ​ປະ​ເທດ​ຊາດ​ໃຫ້​ໝັ້ນຄົງ​ຕັ້ງ​ແຕ່​ຕົ້ນ, ​ແຕ່​ໄກ.

​ໄຊຊະນະ​ຂອງບັ້ນ​ຮົບ​ດ້ຽນບຽນ​ຟູຂີດ​ໝາຍ​ບາດກ້າວ​ການ​ພັດທະນາລະດັບ​ສູງ​ ທາງ​ດ້ານ​ສິລະ​ປະການ​ທະຫານຂອງກອງທັບປະຊາຊົນຫວຽດນາມ. ນັ້ນ​ແມ່ນ​ສິລະ​ປະການ​ທະຫານ​ຂອງ​ປວງ​ຊົນຕໍ່ສູ້​ກັບ​ສັດຕູ, ການ​ສົມທົບ​ຢ່າງ​ແໜ້ນ​ແຟ້ນລະຫວ່າງ​ການ​ທະຫານ​ກັບ​ການ​ເມືອງ, ການ​ສູ້​ຮົບ​ກັບ​ການ​ຂົນຂວາຍ​ທະຫານ​ສັດຕູ, ການ​ດັບ​ສູນ​ສັດຕູ​ກັບ​ການປຸກລະດົມ​ມະຫາຊົນ​ຍາດ​ເອົາ​ສິດ​ເປັນ​ເຈົ້າຂອງ; ການ​ສົມທົບ​ຢ່າງ​ແໜ້ນ​ແຟ້ນການ​ສູ້​ຮົບ​ຂອງ​ທະຫານ​ສາມ​ປະ​ເພດ, ຂອງ​ບັນດາ​ເຫຼົ່າ​ທັບ ​ເຫຼົ່າ​ທະຫານ, ຕີ​ແບບ​ກອງ​ຫຼອນ​ແລະ​ຕີ​ແບບ​ລວມສູນ, ຕີ​ຂະໜາ​ດນ້ອຍ ຕີ​ຂະໜາ​ກກາງ ​ແລະ​ຕີ​ຂະໜາດ​ໃຫຍ່. ໝູນ​ໃຊ້​ບົດຮຽນ​ດັ່ງກ່າວ​​ເຂົ້າ​ໃນ​ສະພາບ​ການ​ປະຈຸ​ບັນ, ທົ່ວ​ກອງທັບ​ຕ້ອງ​ຕັ້ງໜ້າ​ຄົ້ນຄວ້າ, ໝູນ​ໃຊ້​ສິລະ​ປະການ​ທະຫານ​​ໃຫ້ສອດຄ່ອງ​ກັບ​ຄວາມ​ຕ້ອງການສູ້​ຮົບ​ໃໝ່, ຮັບປະກັນ​ຄວາມ​ເປັນ​ເຈົ້າ​ການ​ໃນ​ທຸກ​ສະຖານະ​ການ​ຍຸດ​ທະ​ສາດ; ດັດສົມ​ຢ່າງ​ທັນ​ການ, ​ເພີ່ມ​ຄວາມ​ຕັດສິນ​ໃຈ, ​ແຜນການ​ສູ້​ຮົບ, ຕັ້ງໜ້າ​ຝຶກ​ອົບຮົມ​ຕາມ​ແຜນການ​ຕ່າງໆ; ຮັກສາ​ລະບຽບ​ວິ​ໄນ​ຢ່າງ​ເຂັ້ມ​ງວດ, ຮັກສາ​ລະບອບ​ກຽມພ້ອມ​​ສູ້​ຮົບ, ຄຸ້ມ​ຄອງ​ຢ່າງ​ແໜ້ນ​ແຟ້ນ​ເຂດ​ທ້ອງ​ຝ້າ, ​ເຂດ​ທະ​ເລ, ຊາຍ​ແດນ​ແລະ​ບັນດາ​ພື້ນ​ທີ່​ທີ່​ສຳຄັນ​ທາງ​ດ້ານ​ການ​ປ້ອງ​ກັນປະ​ເທ​ດ, ປ້ອງ​ກັນ​ຄວາມ​ສະຫລົບ. ສົມທົບ​ຢ່າງ​ແໜ້ນ​ແຟ້ນລະຫວ່າງການ​ຝຶກ​ອົບຮົມ, ຝຶກ​ຊ້ອມ ກັບ​ການ​ຍົກ​ສູງ​ຄວາມ​ສາມາດ​ເຄື່ອນ​ໄຫວ​ກຽມພ້ອມ​ສູ້​ຮົບ; ກໍ່ສ້າງ​ເຂດ​ປ້ອງ​ກັນທີ່​ໝັ້ນຄົງ, “ທ່າ​ສະໜາມຮົບ​ໃນ​ໃຈ​ປະຊາຊົນ” ທີ່​ໝັ້ນຄົງ​ເຂັ້ມ​ແຂງ; ປັບ​ຮູບ​ແບບ​ການ​ປ້ອງ​ກັນປະ​ເທ​ດທີ່​ເໝາະ​ສົມ; ບຸລິມະສິດ​ການ​ກໍ່ສ້າງ​ທ່າ​ສະໜາມຮົບ ​ແລະລະບົບກິດຈະກຳ​​ປ້ອງ​ກັນ​ປະ​ເທດ ຢູ່​ພື້ນ​ທີ່​ຍຸດ​ທະ​ສາດ; ຕັ້ງໜ້າ​ເຂົ້າ​ຮ່ວມ​ໃນ​ການ​ກໍ່ສ້າງ​ແຜນ​ແມ່​ບົດ, ​ແຜນການ, ​ໂຄງການ, ​ແຜນ​ງານ​ພັດທະນາ​ເສດຖະກິດ-ສັງຄົມ ຕິດ​ກັບ​ການ​ຮັບປະກັນ​ການ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ສະຫງົບ. ສົມທົບ​ຢ່າງ​ແໜ້ນ​ແຟ້ນລະຫວ່າງ​ກອງທັບ​ແລະ​ຕຳຫຼວດ ​ໃນ​ການ​ແກ້​ໄຂ​ເຫດການ​ຕ່າງໆ​ກ່ຽວ​ກັບ​ການ​ປ້ອງ​ກັນ​ປະ​ເທດ​ແລະ​ປ້ອງ​ກັນ​ຄວາມ​ສະຫງົບ, ປະກອບສ່ວນ​ເຂົ້າ​ໃນ​ການ​ປ້ອງກັນ​ຄວາມ​ໝັ້ນຄົງ​ແຫ່ງ​ຊາດ, ຮັກສາ​ລະບຽບ​ຄວາມ​ສະຫງົບ, ຄວາມ​ປອດ​ໄພ​ທາງ​ສັງຄົມ ​ແລະ ໜ້າ​ທີ່​ປ້ອງກັນປະ​ເທດ.

ທາງ​ທິດ​ທະ​ເລ, ຕ້ອງ​ສົມທົບ​ຢ່າງ​ແໜ້ນ​ແຟ້ນລະຫວ່າງ​ບັນດາ​ກຳລັງກອງທັບ​ອາກາດ-ປ້ອງ​ກັນ​ອາກາດ, ກອງທັບ​ເຮືອ, ທະຫານ​ຊາຍ​ແດນ, ຕຳຫຼວດ​ທະ​ເລ, ກອງ​ກວດກາ​ການ​ປະມົງ ກັບ​ບັນດາ​ເຂດ​ທະຫານ​ ​ແລະ​ ທ້ອງ​ຖິ່ນ​ທີ່​ມິ​ທະ​ເລ​ແລະ​ເກາະ​ທະ​ເລ ​ເພື່ອ​ປະຕິບັ​ດ​ເປັນ​ຢ່າງ​ດີ​ໜ້າ​ທີ່​ກວດກາ, ຄຸ້ມ​ຄອງ, ຕິດຕາມ​ກວດກາ, ຄົ້ນ​ເຜີ​ຍ, ກີດ​ກັ້ນ ​ແລະ ​ຕໍ່ສູ້​ຢ່າງ​ມີ​ປະສິດທິ​ຜົນ​ ຕ້ານ​ການ​ກະທຳລ່ວງ​ລ້ຳ​ອຳນາດ​ອະທິປະ​​ໄຕ​ໃນ​ເຂດ​ທະ​ເລ, ​ເກາະ​ທະ​ເລ​ແລະ​ໄຫຼ່​ທະວີບ​ຂອງ​ປະ​ເທດ​ຊາດ​ເຮົາ. ຢູ່​ເຂດ​ຊາຍ​ແດນ​ໃນ​ແຜ່ນດິນ, ທະຫານ​ທ້​ອງຖິ່ນ, ທະຫານ​ຊາຍ​ແດນ​ແລະ​ກຳລັງ​ຕຳຫຼວດ​ ຕ້ອງ​ປະສານ​ສົມທົບ​ກັນ​ຢ່າງ​ແໜ້ນ​ແຟ້ນ​ໃນ​ການລາດຕະ​ເວນ, ຄຸ້ມ​ຄອງ​ແລະ​ປົກ​ປັກ​ຮັກສາ​ຊາຍ​ແດນ; ​ເຊື່ອມຕິດລະຫວ່າງ​ການ​ກໍ່ສ້າງ​ທ່າ​ສະໜາມຮົບ​ປ້ອງກັນປະ​ເທ​ດທົ່ວ​ປວງ​ຊົນ ກັບ​ທ່າສະໜາມຮົບ​ປ້ອງ​ກັນ​ຄວາມ​ປອດ​ໄພ​ປະຊາຊົນ ​ແລະທ່າ​ສະໜາມຮົບ​ການ​ປ້ອງ​ກັນຊາ​ຍ​ແດນ​ທົ່ວ​ປວງ​ຊົນ, ກຽມ​ຄວາມ​ພ້ອມ​ເພື່ອ​ຮັບ​ມື​ຢ່າງ​ມີ​ໄຊກັບ​ທຸກ​ການ​ລ່ວງ​ລ້ຳອະທິປະ​ໄຕ​ແລະຄວາມ​ປອດ​ໄພ​ໃນ​ຊາຍ​​ແດ​ນ​ແຫ່ງ​ຊາດ, ກໍ່ສ້າງ​ເຂດ​ຊາຍ​ແດນ​ແຫ່ງ​ສັນ​ຕະພາບ ມິດຕະພາບ.

ທີ​ສາມ, ສ້າງ​ການ​ຫັນປ່ຽນ​ຢ່າງ​ແຂງ​ແຮງ​​ໃນ​ການຈັດ​ຕັ້ງ, ການ​ບັນຈຸກຳລັງ, ການ​ຝຶກ​​ແອບ, ການອົບ​ຮົມ​ສຶກສາ; ລະດັບ​ລະບຽບ​ຫຼວງ, ການ​ປະຕິບັດ​ລະບຽບ​ວິ​ໄນ​ ແລະ​ກົດໝາຍ​ຂອງ​ທະຫານ.

ກຳລັງ​ແຮງ​ຂອງ​ກອງທັບ​ຫວຽດນາມ​ໃນບັ້ນ​ຮົບ​ດ້ຽນບຽນ​ຟູ​ແມ່ນ​ກຳລັງ​ແຮງ​ສັງ​ລວມຂອງ​ຫຼາຍ​ປັດ​ໄຈ, ​ໃນ​ນັ້ນ​ມີ​ການ​ບັນຈຸ​ກຳລັງແລະ​ການຈັດ​ຕັ້ງທີ່​ເໝາະ​ສົມ ​ໄຫວ​ພິບ, ການ​ຝຶກ​​ແອບທີ່​ມີ​ຄຸນ​ນະພາ​ບສູງ ​ແລະ ​ລະບຽບ​ວິ​ໄນ​ສະໜາມຮົບ​ທີ່​ເຂັ້ມ​ງວດ. ມາ​ເຖິງ​ປະຈຸ​ບັນ ບົດຮຽນ​ດັ່ງກ່າວ​​ຍັງ​ມີ​ຄຸນຄ່າ​ພຶດຕິ​ກຳ​ຢູ່ ຊຶ່ງ​ຕ້ອງ​ໄດ້​ໝູນ​ໃຊ້​ເຂົ້າ​ໃນ​ການ​ກໍ່ສ້າງ​ກອງທັບ​ໃນ​ສະພາບ​ການ​ໃໝ່. ທົ່ວ​ກອງທັບ​ຕ້ອງ​ຊາບ​ຊຶມ​ແລະ​ປະຕິບັດ​ຢ່າງ​ເຂັ້ມ​ງວດ ​ຕາມແຜນ​ນະ​ໂຍບາຍ, ​ແນວທາງ, ກົນ​ໄກ, ທິດ​ທາງການ​ກໍ່ສ້າງ​ກອງທັບ​ຂອງ​ພັກ, ລັດ, ຄະນະ​ພັກທະຫານ​ສູນ​ກາງ, ກະຊວງ​ປ້ອງ​ກັນປະ​ເທ​ດ, ​ໂດຍ​ສະ​ເພາະ​ແມ່ນບົດສະຫຼຸບ​ເລກ​ທີ່ 16-KL/TW, ວັນ​ທີ 7-7-2017, ຂອງ​ກົມ​ການ​ເມືອງ, “ກ່ຽວ​ກັບ​ການຈັດ​ຕັ້ງ​ກອງທັບ​ປະຊາຊົນ​ຫວຽດນາມ​ຮອດ​ປີ 2021” ​ແລະ ມະຕິ​ເລກທີ 606-NQ/QUTW, ວັນ​ທີ 16-6-2018, ຂອງ​ຄະນະ​ພັກ​ທະຫານ​ສູນ​ກາງ, “ກ່ຽວ​ກັບ​ການ​ນຳພາ​ປະຕິບັດ​ການຈັດ​ຕັ້ງ​ກອງທັບ​ປະຊາຊົນ​ຫວຽດນາມ​ຮອດ​ປີ 2021”; ຂໍ້​ຕົກລົງ​ເລກທີ 2574/QĐ-BQP, ວັນ​ທີ 30-6-2018, ຂອງ​ລັດຖະມົນຕີ​ກະຊວງ​ປ້ອງ​ກັນ​ປະ​ເທດ, ກ່ຽວກັບ “ອະນຸມັດ​ແຜນການ​ຜັນ​ຂະຫຍາຍ​ການ​ປະຕິບັດມະຕິ​ເລກທີ 606-NQ/QUTW ກ່ຽວ​ກັບ​ການຈັດຕັ້ງ​ກອງທັບ​ປະຊາຊົນ​ຫວຽດນາມ​ຮອດປີ 2021”, ​ເພື່ອ​ແນ​ໃສ່​ກໍ່ສ້າງ​ກອງທັບ​ໃຫ້​ດີ ກະທັດ​ລັດ ​ເຂັ້ມ​ແຂງ, ​ມີ​ໂຄງ​ສ້າງການຈັດ​ຕັ້ງທີ່ສົມ​ເຫດ​ສົມ​ຜົນ, ມີ​ຄຸນະພາບ​ສັງ​ລວມ​ແລະ​ກຳລັງ​ແຮງ​ສູ້​ຮົບ ທີ່​ນັບ​ມື້​ນັບ​ສູງ, ຕອບ​ສະໜອງ​ໄດ້​ຕາມ​ຄວາມ​ຕ້ອງການ ​ແລະໜ້າ​ທີ່​ປົກ​ປັກ​ຮັກສາ​ປະ​ເທດ​ຊາດ​ໃນ​ສະພາບ​ການ​ໃໝ່. ສືບຕໍ່​ຄົ້ນຄວ້າ​ດັດສົມ​ທ່າ​ຈັດ​ວາງ​ສັບ​ຊ້ອນ​ຢູ່​ໃນ​ບັນດາ​ພາກ, ​ເຂດ, ພື້ນ​ທີ່​ຈຸດ​ສຸມ, ສອດຄ່ອງ​ກັບ “ຍຸດ​ທະ​ສາດ​ການ​ປົກ​ປັກ​ຮັກສາ​ປະ​ເທດ​ຊາດ​ໃນ​ສະພາບ​ການ​ໃໝ່”; ຍົກສູງ​ຄວາມ​ສາມາດ​ສູ້​ຮົບ​ຂອງ​ບັນດາ​ກຳລັງ​ໃນ​ສະຖານະ​ການ​ສົງຄາມ.

​ໃນ​ການ​ຝຶກ​​ແອບ, ທົ່ວ​ກອງທັບ​ຕ້ອງ​ຊາບ​ຊຶມ​ຢ່າງ​ເລິກ​ເຊິ່ງມະຕິ​ເລກທີ 765-NQ/QUTW, ວັນ​ທີ 20-12-2012, ຂອງ​ຄະນະ​ພັກ​ທະຫານ​ສູນ​ກາງ, "ກ່ຽວກັບການຍົກສູງຄຸນະພາບການຝຶກແອບໃນໄລຍະ 2013 -2020 ​ແລະ​ໃນ​ຊຸມ​ປີ​ຕໍ່​ໄປ”; ປະຕິບັດ​ທິດ​ນຳ​​ການ​ຝຶກ​ແອບ​ໃຫ້​ໄດ້​ເປັນ​ຢ່າງ​ດີ​ຄື “ພື້ນຖານ, ​ແທດ​ຈິງ, ໜັກ​ແໜ້ນ”; ​ໃຫ້​ຄວາມ​ສຳຄັນ​ແກ່​ການ​ຝຶກ​ແອບ​ທີ່​ຄົບ​ຊຸດ, ສະ​ເພາ​ະເລິກ​ເຊິ່ງ, ​ເອົາ​ພາກ​ປະຕິບັດ​ເປັນ​ຕົ້ນຕໍ; ຝຶກ​ແອບ​ການ​ເປັນ​ເຈົ້າ​ຂອງ​ອາວຸດ ​ເຄື່ອງ​ປະກອບ​ໃໝ່; ​ເພີ່ມ​ທະວີ​ການອົບຮົມ​ຝຶກ​ແອບ​ກາງຄືນ, ອົບຮົມຝຶກ​ແອບ​ການ​ເຄື່ອນ​ທີ່, ອົບຮົມຝຶກ​ແອບ​ຕາມ​ສະຖານະ​ການ, ຝຶກ​ຝົນ​ຫຼໍ່​ຫຼອມ​ກຳລັງ​ກາຍ. ສົມທົບ​ຢ່າງ​ແໜ້ນ​ແຟ້ນລະຫວ່າງ​ການ​ອົບຮົມຝຶກ​ແອບ ກັບການຊ້ອມ​ຮົບ​ແບບ​ປະສານການ​ສູ້​ຮົບ​ຂອງ​ບັນດາ​ເຫຼົ່າ​ທັບ, ​ຊ້ອມ​ຮົບ​ການ​ປະ​ທະ​ກັນ, ຊ້ອມ​ຮົບ​ຕາມ​ເຂດ​ປ້ອງ​ກັນ; ຍົກ​ສູງ​ຄວາມ​ສາມາດ​ສົມທົບ​ລະຫວ່າງ​ທະຫານ​ຫຼວງ ​ແລະ ກຳລັງ​ປະກອບ​ອາວຸດ​ທ້ອງ​ຖິ່ນ ​ໃນ​ເຂ​ດປ້ອງ​ກັນ, ຄວາມ​ສາມາດ​ສູ້​ຮົບ​ປົກປັກ​ຮັກສາ​ອະທິປະ​ໄຕ​ໃນ​ເຂດ​ທະ​ເລ​ແລະໝູ່​ເກາະ. ບັນດາ​ສະ​ຖາ​ບັນ, ​ໂຮງຮຽນ​ທະຫານ ຕ້ອງ​ຕັ້ງໜ້າ​ປ່ຽນ​ແປງ​ໃໝ່​ເນື້ອ​ໃນ​ແລະຫຼັກສູດ​ ຕາມ​ທິດ​ເປັນ​ມາດຕະຖານ, ທັນ​ສະ​ໄໝ ​ແລະ​​ເຊື່ອມ​ຕໍ່​ກັນ; ຜັນ​ຂະຫຍາຍ​ໂຄງການ​ລົງທຶນ​ຕາມ​ຮູບ​ແບບ “ໂຮງຮຽນ​ສະຫຼາດ, ການ​ເຂົ້າ​ເຖິງ​ການ​ປະຕິວັດອຸດສາຫະກຳ 4.0”. ຮັກ​ສາ, ປະຕິບັດ​ເປັນ​ຢ່າງດີ ການກໍ່ສ້າງ​ເປັນ​ລະບຽບ​ຫຼວງ, ປະຕິບັດ​ຕາມ​ລະບຽບ​ວິ​ໄນ, ກົດໝາຍ ​ແລະ ​ການ​ປະຕິ​ຮູບ​ການ​ບໍລິຫານ; ​ເພີ່ມ​ທະວີ​ວຽກ​ງານ​ໂຄສະນາ, ​ເຜີຍ​ແຜ່, ສຶກສາຮ່ຳຮຽນ​ກົດໝາຍ, ​ເຮັດ​ໃຫ້​ມີ​ການ​ຫັນປ່ຽນ​ໃນ​ຈິດ​ສຳນຶກ, ວັດທະນະທຳ​ກົດໝາຍ ຂອງ​ພະນັກງານ ​ແລະນັກຮົບ, ປະກອບສ່ວນ​ຫຼຸດຜ່ອນ​ການລະ​ເມີດ​ລະບຽບ​ວິ​ໄນ, ​ໂດຍ​ສະ​ເພາະ​ແມ່ນ​ຈຳກັດ​ການລະ​ເມີດ​ທີ່​ຮ້າຍ​ແຮງ, ຍົກ​ສູງ​ກຳລັງ​ແຮງ​ສູ້​ຮົບ​ຂອງ​ກອງທັບ.

ທີ​ສີ່, ຍົກ​ສູງ​ປະສິດທິ​ຜົນ​ຂອງ​ວຽກ​ງານ​ເຊື່ອມ​ໂຍງ​ສາກົນ ​ແລະ ການ​ພົວ​ພັນ​ຕ່າງປະ​ເທດ​ດ້ານ​ການ​ປ້ອງ​ກັນຊາ​ດ, ປະກອບສ່ວນ​ປົກ​ປັກ​ຮັກສາ​ປະ​ເທດ​ຊາດ​ໄວ້​ຢ່າງ​ໝັ້ນຄົງ​ຕັ້ງ​ແຕ່​ກ່ອນ, ​ແຕ່​ໄກ.

​ໄຊຊະນະ​ຂອງ​ບັ້ນ​ຮົບ​ດ້ຽນບຽນ​ຟູ ​ແມ່ນ​ກຳລັງ​ແຮງ​ສັງ​ລວມຂອງ​ຫຼາຍ​ປັດ​ໄຈ, ​ໃນ​ນັ້ນ​ມີ​ການ​ສະໜັບສະໜູນ​ແລະຊ່ວຍ​ເຫຼືອຢ່າງ​ໃຫຍ່​ຫຼວງ​ຂອງ​ບັນດາ​ປະ​ເທດສັງຄົມ​ນິຍົມອ້າຍ​ນ້ອງ, ຂອງ​ເພື່ອນ​ມິດສາ​ກົນ, ຂອງ​ຂະ​ບວນການ​ຕໍ່ສູ້​ເພື່ອ​ສັນຕິພາບ​ຂອງປະຊາຊົນ​ຜູ້​ກ້າວໜ້າ​ໃນ​ທົ່ວ​ໂລກ ​ແລະ​ຂອງ​ປະຊາຊົນ​ຝຣັ່ງອີກ​ນຳ; ພິ​ເສດ​ແມ່ນ​ນ້ຳ​ໃຈ​ສາມັກຄີ, ການຄຽງ​ບ່າ​ຄຽງ​ໄຫຼ່​ກັນ ຮ່ວມ​ຂຸມ​ຄອງ​ດຽວ​ກັນ ຂອງ​ກອງທັບ​ແລະ​ປະຊາຊົນ​ສາມ​ປະ​ເທດ​​ໃນອິນ​ໂດ​ຈີນ ​ໃນ​ການຮ່ວມສຳພັນ​ສູ້​ຮົບຕ້ານ​ລ່າ​ເມືອງ​ຂຶ້ນ​ຝຣັ່ງຜູ້​ຮຸກ​ຮານ. ​ການເສີມ​ຂະຫຍາຍ​ບົດບາດ​ດັ່ງກ່າວ​​ໃນ​ຍຸກ​ສະ​ໄໝ​ໃໝ່ ​ແມ່ນ​ຈຳ​ເປັນ​ຕ້ອງ​ແກ້​ໄຂ​ເປັນ​ຢ່າງ​ດີບັນດາ​ສາຍ​ພົວພັນ​ສາກົນຕາມ​ຈິດ​ໃຈ “​ເພີ່ມ​ເພື່ອນ, ລົດ​ສັດຕູ”, ຮັບປະກັນ​ໃຫ້ການພົວພັນ​ດ້ານ​ການ​ປ້ອງ​ກັນ​ປະ​ເທດ​ເປັນ​ເສົາ​ຄ້ຳ​ທີ່​ແທ້​ຈິງ​ໜຶ່ງ​​ຂອງ​ການ​ພົວພັນ​ສາກົນ.

​ເພື່ອ​ປະຕິບັດ​ສິ່ງ​ດັ່ງກ່າວ​, ວຽກ​ງານ​ພົວພັນ​ຕ່າງປະ​ເທດ​ດ້ານ​ການ​ປ້ອງ​ກັນຊາດຕ້ອງ​ຊາບ​ຊຶມ​ຢ່າງ​ເລິກ​ເຊິ່ງມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ມະຕິ​ເລກທີ 806-NQ/QUTW, ວັນ​ທີ 31-12-2013, ຂອງ​ຄະນະ​ພັກ​ທະຫານສູນ​ກາງ, “ກ່ຽວ​ກັບ​ການ​ເຊື່ອມ​ໂຍງ​ສາກົນ​ແລະ​ການ​ພົວພັນ​ຕ່າງປະ​ເທດ​ດ້ານ​ການ​ປ້ອງ​ກັນຊາ​ດຮອດ​ປີ 2020 ​ແລະ​ຊຸມ​ປີ​ຕໍ່​ໄປ”; ປະຕິບັດ​ຢ່າງ​ເຂັ້ມ​ງວດ​ແນວທາງ​ການ​ຕ່າງປະ​ເທດ​ທີ່​ເປັນ​ເອກະລາດ, ​ເປັນ​ເຈົ້າ​ຕົນ​ເອງ, ສັນຕິພາບ, ການ​ຮ່ວມ​ມື, ການ​ພັດທະນາ, ການ​ພົວພັນ​ຕ່າງປະ​ເທດ​ຫຼາຍ​ຮູບ​ຫຼາຍ​ແບບ ຫຼາຍກ້ຳ​ຫຼາຍ​ຝ່າຍ ​ແລະ​ແຜນ​ນະ​ໂຍບາຍທັງ​ເພີ່ມ​ທະວີ​ການ​ຮ່ວມ​ມື ທັງ​ຕໍ່ສູ້, ຕັ້ງ​ໝັ້ນ​ໃນ​ເປົ້າ​ໝາຍ​ແລະຫຼັກການ​ຍຸດ​ທະ​ສາດ; ໝູນ​ໃຊ້​ຍຸດ​ໂທ​ບາຍ​ຢ່າງ​ໄຫວ​ພິບ ອ່ອນ​ໂຍນ ຕາມ​ທິດ​ນຳ “ເອົາຫຼັກການ​ເປັນ​ພື້ນເພື່ອ​ໝູນ​​ໃຊ້​ຢ່າງ​ໄຫວ​ພິບ”, ຍູ້​ແຮງ​ການ​ເຊື່ອມ​ໂຍງ​ສາກົນ​ແລະ​ການ​ພົວພັນ​ຕ່າງປະ​ເທດ​ດ້ານ​ການ​ປ້ອງ​ກັນຊາ​ດຕາມ​ຈິນຕະນາການ​ໃໝ່, ປະດິດ​ສ້າງ ​ແລະ​ສອດຄ່ອງ​ເໝາະ​ສົມ. ສືບ​ຕໍ່​ຫັນ​ເປັນ​ລະອຽດຕໍ່​ທັດສະນະ, ​ແນວທາງ​ການ​ຕ່າງປະ​ເທດ​ຂອງ​ພັກ​ໃນ​​ແຜນ​ຍຸດ​ທະ​ສາດ​ການ​ປ້ອງ​ກັນຊາດຫວຽດນາມ, ​ແຜນ​ຍຸດ​ທະ​ສາດ​ການ​ປ້ອງ​ກັນຊາ​ຍ​ແດງ​ແຫ່ງ​ຊາດ ​ແລະ ແຜນ​ຍຸດ​ທະ​ສາດ​ອື່ນໆ. ສຸມ​ໃສ່​ຊີ້​ນຳ​ນຳພາ​ການ​ປະຕິບັດ​ໂຄງການ​ເຊື່ອມ​ໂຍງ​ສາກົນທາງ​ດ້ານ​ການ​ປ້ອງ​ກັນຊາ​ດຮອດ​ປີ 2020, ວິ​ໄສ​ທັດ​ຮອດ​ປີ 2030 ​ໃຫ້​ມີ​ປະສິດທິ​ຜົນ; ຍູ້​ແຮງ​ການ​ພົວພັນ​ຮ່ວມ​ມື​ດ້ານ​ການ​ປ້ອງ​ກັນຊາ​ດທະວິ​ພາຄີ ​ແລະ ພະຫຸພາ​ຄີ​ ໃຫ້​ເຂົ້າ​ສູ່​ລວງ​ເລິກ, ຕົວ​ຈິງ ​ແລະ ​ມີ​ປະສິດທິ​ຜົນ; ​ເຂົ້າ​ຮ່ວມ​ຢ່າງ​ເປັນ​ເຈົ້າ​ການ​ໃນ​ການ​ເຄື່ອນ​ໄຫວ​ຮັກສາສັນຕິພາບ ​ແລະ ​ໃນ​ບັນດາ​ກົນ​ໄກການ​ຮ່ວມ​ມືດ້ານ​ການ​ປ້ອງ​ກັນຊາ​ດ​ຂອງ​ອາ​ຊຽນ; ​ເພີ່ມ​ທະວີ​ວຽກ​ງານ​ການ​ສື່​ຂ່າວ​ການ​ພົວພັນ​ຕ່າງປະ​ເທດ ​ແລະ ການ​ສົນທະນາ​ດ້ານ​ການ​ປ້ອງ​ກັນຊາ​ດ, ​ແກ້​ໄຂ​ບັນຫາ​ທີ່​ເກີດ​ຂຶ້ນທັນທີ, ປະກອບສ່ວນ​ສ້າງ​ຄວາມ​ໄວ້​ວາງ​ໃຈ​, ​ເພີ່ມ​ຄູ່​ຮ່ວມ​ມື, ລົດ​ເປົ້າ​ໝາຍ​ທີ່​ຕ້ອງ​ຕໍ່ສູ້, ສົມ​ດຸນ​ຄວາມ​ສຳພັນ​ກັບ​ບັນດາ​ປະ​ເທດ​ທີ່​ສຳຄັນ, ​ເຊີດ​ຊູ​ຖານະ​ບົດບາດ​ຂອງ​ປະ​ເທດ​ແລະ​ຂອງ​ກອງທັບ​ໃນ​ເວທີ​ສາກົນ.

ທີ​ຫ້າ, ​ເພີ່ມ​ທະວີ​ກຳລັງບົ່ມຊ້ອນທາງ​ດ້ານ​ວິທະຍາສາດ-​ເຕັກ​ໂນ​ໂລ​ຊີ, ອາວຸດ, ອຸປະກອນ​ເຕັກນິກ, ຮັບປະກັນ​ພະລາທິການ, ​ເຕັກນິກ, ຕອບ​ສະໜອງ​ຄວາມ​ຕ້ອງການ​ແລະ​ໜ້າ​ທີ່​ປົກ​ປັກ​ຮັກສາ​ປະ​ເທດ​ຊາດ​ໃນ​ສະພາບ​ການ​ໃໝ່.

​ໃນບັ້ນ​ຮົບ​ດ້ຽນບຽນ​ຟູ, ຖ້າ​ປຽບທຽບ​ທາງ​ດ້ານ​ກຳລັງ ກໍ​ເຫັນ​ວ່າ​ພວກລ່າ​ເມືອງ​ຂຶ້ນ​ຝຣັ່ງມີ​ກອງ​ທະຫານ​ມື​ອາຊີບ​ທີ່​ເຂັ້ມ​ແຂງ, ອາວຸດ​ແລະ​ອຸ​ປ​ະກອນ​ທັນ​ສະ​ໄໝກວ່າ​​ເຮົາຫຼາຍ​ເທົ່າ, ​ແຕ່​ຜົນ​ສຸດ​ທ້າຍ ພວກ​ເຂົາ​ຖືກ​ປະລາ​ໄຊ, ຍ້ອນ​ພວກ​ເຮົາ​ຮູ້​ເສີມ​ຂະຫຍາຍ​ກຳລັງ​ແຮງ​ຂອງກຸ່ມ​ກ້ອນ​ມະຫາ​ສາມັກຄີ​ປວງ​ຊົນທັງ​ຊາດ, ກຳລັງ​ແຮງ​ຂອງ​ເຈດ​ຈຳນົງການ​ເມືອງ, ຈິດ​ໃຈ​ແລະ​ຄວາມສາມັກຄີ​ເປັນ​ຈິດ​ໜຶ່ງ​ໃຈ​ດຽວ, ສຸມ​ກຳລັງ​ຄົນ​ແລະ​ກຳລັງ​ຊັບ​ທັງ​ໝົດ​ ເພື່ອ​ຮັບປະກັນ​ພື້ນຖານ​ວັດຖຸ, ອາ​ວຸດ​ຍຸດ​ໂທ​ປະກອນ, ​ເຄື່ອງ​ປະກອບ​ເຕັກນິກ, ພະລາທິການຮັບ​ໃຊ້​ໃຫ້​ແກ່​ບັ້ນ​ຮົບ. ປະຈຸ​ບັນ​ນີ້, ​ໃນ​ພາລະກິດ​ການ​ກໍ່ສ້າງ​ກອງທັບ, ປັບປຸງ​ການ​ປ້ອງ​ກັນຊາ​ດ ​ແລະປົກ​ປັກ​ຮັກສາ​ປະ​ເທດ​ຊາດ, ຈິດ​ໃຈ​ດັ່ງກ່າວ​ຕ້ອງ​ໄດ້​ຮັບ​ການ​ເສີມ​ຂະຫຍາຍ ​ແລະ​ຢືນຢັນ​ໃນ​ພາກ​ຕົວ​ຈິງ. ພ້ອມໆ​ກັບ​ການ​ໃຫ້​ຄວາມ​ສຳຄັນ​ແກ່​ປັດ​ໄຈ​ມະນຸດ, ການ​ພັດທະນາ​ວິທະຍາສາດ-​ເຕັກ​ໂນ​ໂລ​ຊີການ​ທະຫານ, ຮັບປະກັນ​ອາວຸດ​ແລະ​ອຸປະກອນ​ເຕັກນິກ​ ແມ່ນ​ບັນຫາ​ທີ່​ມີ​ຄວາມ​ໝາຍ​ສຳຄັນ​ທີ່​ສຸດ. ​ເພາະສະ​ນັ້ນ, ກອງທັບ​ຕ້ອງ​ປະຕິບັດ​ເປັນ​ຢ່າງ​ດີ ກາ​ນຮັບປະກັນອາວຸດ​ຍຸດ​ໂທ​ປະກອນ​ ເພື່ອ​ໃຫ້​ບັນດາ​ກົມ​ກອງ​ເຮັດ​ໜ້າ​ທີ່​ອົບ​ຮົມຝຶກ​ແອບ, ກຽມພ້ອມ​ສູ້​ຮົບ, ຕາມ​ທິດ​ທັນ​ສະ​ໄໝ​ໃນ​ສາມ​​ແບບວິທີ: ດັດ​ແປງ, ຟື້ນ​ຟູ; ​ຜະລິດ​ປະກອບ​ເຂົ້າ​ເຄື່ອງຢູ່​​ໃນ​ປະ​ເທດ; ຈັດ​ຊື້​ອາວຸດ​ຍຸດ​ໂທ​ປະກອນຈາກ​ຕ່າງປະ​ເທດ. ​ໃນ​ນັ້ນ, ​ເອົາ​ໃຈ​ໃສ່​ເປັນສຳຄັນ​​ເຖິງການປະກອບ​ອາວຸດ​ຍຸດ​ໂທ​ປະກອນ​ທີ່​ທັນ​ສະ​ໄໝ​ ໃຫ້​ແກ່​ບັນດາ​ກຳລັງທີ່​ໄດ້​ກຳນົດ​ຈະ​ກ້າວ​ຂຶ້ນ​ທັນ​ສະ​ໄໝ​ໂດຍ​ກົງ; ພ້ອມ​ກັນ​ນັ້ນ​ ກໍ່​ເສີມ​ຂະຫຍາຍ​ບົດບາດ​ຂອງ​ອຸດສາຫະກຳ​ການ​ປ້ອງ​ກັນຊາ​ດ, ຍົກ​ສູງ​ຄວາມ​ສາມາດ​ຜະລິດ, ຄວາມ​ສາມາດ​ຮັບປະກັນ​ອາວຸດ​ແລະ​ອຸປະກອນ​ເຕັກນິກ​ໃຫ້​ກຳລັງ​ປະກອບ​ອາວຸດ​ປະຊາຊົນ, ​ໂດຍ​ສະ​ເພາະ​ແມ່ນ​ກອງທັບ​ປະຊາຊົນ.

ສຳລັບ​ຂະ​ແໜງ​ການ​ພະລາທິການ​ແລະ​ເຕັກນິກ, ສືບ​ຕໍ່​ປະຕິບັດ​ເປັນ​ຢ່າງ​ດີຂະ​ບວນການ “ຂະ​ແໜງ​ການ​ພະລາທິການ​ຂອງ​ກອງທັບ​ປະຕິບັດ​ຕາມ​ຄຳ​ສອນ​ຂອງ​ລຸງ​ໂຮ່” ​ແລະ​ການຂົນຂວາຍ “ຄຸ້ມ​ຄອງ, ຂຸດ​ຄົ້ນ​ອາວຸດ​ແລະ​ອຸປະກອນ​ເຕັກນິກ​ໃຫ້​ໄດ້​ເປັນ​ຢ່າງ​ດີ, ທົນ​ທານ, ປອດ​ໄພ, ປະຢັດ ​ແລະ​​ປອດ​ໄພ​ໃນ​ການ​ຈະລາຈອນ”. ທົ່ວ​ກອງທັບ​ຕ້ອງ​ເປັນ​ເຈົ້າ​ການ​ໃນ​ການ​ຜັນ​ຂະຫຍາຍ​ວິທີ​ແກ້​ໄຂ​ຕ່າງໆ​ຢ່າງ​ຄົບ​ຊຸດ, ​ແບ່ງ​ຂັ້ນ​ແລະ​ປ່ຽນ​ແປງ​ໃໝ່​ແບບ​ວິທີການສ້າງ​ແຫຼ່ງວັດຖຸພະລາທິການ, ປ່ຽນ​ແປງ​ໃໝ່​ກົນ​​ໄກ​ຄຸ້ມ​ຄອງການ​ເງິນ; ຈັດ​ຕັ້ງ​ການ​ລ້ຽງ​​ເກືອ​ທະຫານ, ​ເພີ່ມ​ພູນ​ຜະລິດຜົນ​ຕາມ​ທິດ​ຍືນ​ຍົງ, ຮັບປະກັນ​ອະນາ​ໄມ​ສິ່ງ​ແວດ​ລ້ອມ ​ແລະ​ຄວາມ​ປອດ​ໄພ​ຂອງ​ສະບຽງ​ອາຫານ, ປ້ອງ​ກັນ​​ແລະປົວ​ພະຍາດ, ​ເບິ່ງ​ແຍງ​ສຸຂະພາບ​ຂອງ​ທະຫານ. ຂະ​ແໜງ​ການ​ເຕັກນິກ​ຊີ້​ນຳ​ປະຕິບັດ​ເປັນ​ຢ່າງ​ດີ ມະຕິ​ເລກທີ 382/NQ-ĐUQSTW, ວັນ​ທີ 29-11-2007, ຂອງ​ຄະນະ​ພັກ​ທະຫານ​ສູນ​ກາງ, “ກ່ຽວ​ກັບ​ວຽກ​ງານ​ເຕັກນິກ​ໃນ​ສະພາບ​ການ​ໃໝ່”; ປະຕິບັດ​ຢ່າງ​ມີ​ປະສິດທິ​ຜົນ ບັນດາ​ໂຄງການ​ຈັດ​ຊື້, ຜະລິດ, ສ້ອມ​ແປງ, ດັດ​ແປງ, ຍົກ​ລະດັບ​ທັນ​ສະ​ໄໝ, ຫັນ​ເປັນ​ຄົບ​ຊຸດ​ ຕໍ່​ອາວຸດ​ຍຸດ​ໂທ​ປະກອນ​ເຕັກນິກ, ຕອບ​ສະໜອງ​ຄວາມ​ຕ້ອງການ​ຮັບປະກັນດ້ານ​ເຕັກນິກ ​ເພື່ອ​ປະຕິບັດ​ໜ້າ​ທີ່​ຂອງ​ກອງທັບ.

ຫົກ​ສິບ​ຫ້າ​ປີຜ່ານ​ໄປ​ແລ້ວ, ​ແຕ່​ບັນດາ​ບົດຮຽນ​ປະສົບ​ການ​ຈາກ​ໄຊຊະນະ​ດ້ຽນບຽນ​ຟູຍັງ​ມີ​ຄຸນຄ່າ​ຄື​ເກົ່າ, ​ເປັນ​ພື້ນຖານ​ພຶດຕິ​ກຳ​ທີ່​ສຳຄັນ​ເພື່ອ​ໃຫ້​ພວກ​ເຮົາ​ໝູນ​ໃຊ້​ເຂົ້າ​ໃນ​ການ​ກໍ່ສ້າງ​ກອງທັບ, ປັບປຸງ​ການ​ປ້ອງ​ກັນຊາ​ດ, ປົກ​ປັກ​ຮັກສາ​ປະ​ເທດ​ຊາດ​ຫວຽດນາມ​ສັງຄົມ​ນິຍົມ​ໃນ​ສະ​ໄໝ​ໃໝ່​ໄວ້​ຢ່າງ​ໝັ້ນຄົງ. ​ເຊື່ອ​ໝັ້ນ​ວ່າ, ດ້ວຍ​ຄຸນ​ທາດ “ທະຫານ​ຂອງ​ລຸງ​ໂຮ່” ທີ່ດີງາມ ​ແລະ ​ມູນ​ເຊື້ອ ທາດ​ແທ້ກອງທັບ​ວິລະ​ຊົນ, ການ​ເສີມ​ຂະ​ຫຍາ​ຍບົດຮຽນ​ຈາກ​ໄຊຊະນະ​ດ້ຽນບຽນ​ຟູຈະ​ມີ​ປະສິດທິ​ຜົນ​ທີ່​ແທດ​ຈິງ​ ໃນ​ການ​ກໍ່​ສ້າງກອງທັບປະຊາຊົນ​ໃຫ້ໝັ້ນຄົງ​ເຂັ້ມ​ແຂງ​ທາງ​ການ​ເມືອງ, ຍົກ​ສູງ​ຄຸນ​ນະພາ​ບສັງ​ລວມ​ແລະ​ກຳລັງ​ແຮງ​ສູ້​ຮົບ​ຢ່າງ​ບໍ່​ຢຸດ​ຢັ້ງ, ສຳ​ເລັດ​ຢ່າງ​ດີ​ເດັ່ນ​ທຸກ​ໜ້າ​ທີ່​ທີ່​ພັກ, ລັດ​ແລະ​ປະຊາຊົນ​ມອບ​ໝາຍ​ໃຫ້./.

​ໂດຍ ພົນ​ເອກ ​ໂງ​ຊວັນ​ລິກ

ກຳມະການ​ກົມ​ການ​ເມືອງ, ຮອງ​ເລຂາ​ຄະນະ​ພັກ​ທະຫານ​ສູນ​ກາງ,

ລັດຖະມົນ​ຕີ​ກະຊວງ​ປ້ອງ​ກັນ​ປະ​ເທດ

----------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ (ສະບັບ​ອອກເດືອນ​ພຶດສະພາ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ