ວັນອັງຄານ, 22/10/2019
ເພີ່ມທະວີວຽກງານໂຄສະນາ ໃນການປະຕິຮູບການບໍລິຫານ ຢູ່ຫວຽດນາມໃນປະຈຸບັນ
3/7/2019 14:33' ສົ່ງ ພິມ
ສະຫາຍ ເຈືອງຮ່ວາບິ່ງ, ຮອງນາຍົກລັດຖະມົນຕີຜູ້ປະຈຳການລັດຖະບານ, ກ່າວຄຳເຫັນທີ່ກອງປະຊຸມປະກາດ ດັດຊະນີການປະຕິຮູບການບໍລິຫານ ປີ 2018. (ພາບ: TTXVN)

ພັກ​ກອມ​ມູນິດ​ຫວຽດນາມ​ໄດ້​ມີ​ມະຕິ​ແລະ​ແຜນ​ນະ​ໂຍບາຍ​ຫຼາຍ​ສະບັບກ່ຽວ​ກັບ​ການ​ປ່ຽນ​ແປງ​ໃໝ່​ການຈັດ​ຕັ້ງ​ກົງຈັກ​ຂອງລະບົບ​ການ​ເມືອງ, ກໍ່ສ້າງລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ ​ເຊິ່ງຈຸດ​ໜັກ​ແມ່ນການ​ປະຕິ​ຮູບ​ການ​ບໍລິຫານລັດ. ນີ້​ແມ່ນ​ຄວາມ​ຮຽກຮ້ອງ​ຕ້ອງ​ການ​ທີ່​ຈຳ​ເປັນ​ພາວະ​ວິ​ໄສ​ໃນ​ຂະ​ບວນວິວັດ​ການ​ພັດທະນາ. ​ໃນ​ໄລຍະ​ປະຈຸ​ບັນ, ການ​ປະຕິ​ຮູບ​ການ​ບໍລິຫານມີ​ຄວາມ​ໝາຍ​ສຳຄັນ​ທີ່​ສຸດ​ສຳລັບ​ຄວາມ​ສຳ​ເລັດ​ຂອງການ​ກໍ່ສ້າງ​ແລະ​ພັດທະນາ​ປະ​ເທດ​ຊາດ.

​ເພື່ອ​ປະຕິບັດ​ແຜນ​ນະ​ໂຍບາຍ​ຂອງ​ພັກ​ແລະ​ລັດ, ລັດຖະບານ​ໄດ້​ຊີ້​ນຳ​ໃຫ້​ບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ ສຸມ​ໃສ່​ການ​ຜັນ​ຂະຫຍາຍ ​ໂຄງການ​ໂດຍ​ລວມກ່ຽວ​ກັບການປະຕິຮູບການບໍລິຫານລັດ ໄລຍະປີ 2011 - 2020 ຢ່າງ​ຄົບ​ຊຸດ​ແລະ​ເປັນ​ເອກະ​ພາບ ​ແຕ່​ສູນ​ກາງ​ເຖິງ​ທ້ອງ​ຖິ່ນ, ດ້ວຍ​ຄວາມ​ຕັດສິນ​ໃຈ​ສ້າງ​ລະບົບ​ການ​ບໍລິຫານ​ທີ່​ມີ​ປະຊາທິປະ​ໄຕ, ຂະຫຍັນ​ຂັນ​ເຄື່ອນ, ມີ​ຄວາມ​ຮັບຜິດຊອບ, ທັນ​ສະ​ໄໝ, ​ເຄື່ອນ​ໄຫວ​ມີ​ສະມັດ​ຕະພາບ ປະສິດທິ​ຜົນ, ຮັບ​ໃຊ້​ເປັນ​ຢ່າງ​ດີ​ໃຫ້​ແກ່​ຄວາມ​ຕ້ອງການ​ຂອງ​ປະຊາຊົນ, ວິ​ສາ​ຫະກິດ​ແລະ​ສັງຄົມ. ຫັນປ່ຽນ​ຢ່າງ​ແຂ​ງ​ແຮງ​ຈາກລັດກຳກັບ​ການ ​ໄປ​ເປັນ​ລັດ​ສ້າງສັນ​​ພັດທະນາ ​ເຊິ່ງ​ເປັນ​ຂໍ້ຄວາມ​ທີ່​ສຳຄັນ​ຂອງ​ນາຍົກລັດຖະມົນຕີ, ຫົວໜ້າ​ລັດຖະບານ - ອົງ​ການ​ບໍລິຫານລັດ​ສູງ​ສຸດ ​ຂອງ​ປະ​ເທດສາທາ​ລະນະ​ລັດສັງຄົມ​ນິຍົມຫວຽດນາມ. ການ​ຜັນ​ຂະຫຍາຍ​ປະຕິບັດໂຄງການ​ໂດຍ​ລວມກ່ຽວ​ກັບການ​ປະຕິ​ຮູບ​ການ​ບໍລິຫານລັດ ​ໃນ​ເວລາ​ທີ່​ຜ່ານ​ມາ​ໄດ້​ບັນລຸ​ຜົນສຳ​ເລັດ​ທີ່​ສຳຄັນ​ຫຼາຍ​ຢ່າງ, ສ້າງ​ໃຫ້​ມີ​ການປ່ຽນ​ແປງ​ອັນ​ຕັ້ງໜ້າ​ໃນ​ການ​ບໍລິຫານ, ນັ້ນ​ແມ່ນ: ລະບົບ​ລະບຽບ​ກົດໝາຍ​ໄດ້​ຮັບ​ການ​ປັບປຸງ​ບູລະນະ​ເທື່ອລະ​ກ້າວ; ກົງຈັກ​ການ​ບໍລິຫານ​ລັດ​ແຕ່​ສູນ​ກາງ​ຮອດ​ຮາກ​ຖານ​ໄດ້​ຮັບ​ການ​ກໍ່ສ້າງ​ຕາມ​ທິດກະທັດ​ລັດ, ​ເຄື່ອນ​ໄຫວ​ມີ​ສະມັດ​ຕະພາບ​ແລະ​ມີ​ປະສິດທິ​ຜົນ; ກິດຈະກຳ​ການ​ບໍລິການ​​ສາທາລະນະ, ຄຸນ​ນະພາ​ບຂອງ​ຖັນ​ແຖວ​ພະນັກງານ​ແລະ​ລັດຖະກອນ​ໄດ້​ຮັບ​ການ​ຍົກ​ສູງ​ຂຶ້ນ; ສາຍ​ພົວພັນ​ລະຫວ່າງ​ອົງການ​ບໍລິຫານ​ລັດ ​ກັບ​ປະຊາຊົນ​ແລະ​ວິ​ສາ​ຫະກິດ ​ໄດ້​ຮັບ​ການ​ປົວ​ແປງ​ໃຫ້​ດີ​ຂຶ້ນ ຕາມ​ທິດການ​ບໍລິຫານ​ຮັບ​ໃຊ້, ຫຼຸດຜ່ອນ​ຄວາມ​ສັບສົນ​ລຳ​ຄານ​ໃຈ, ຫຼຸດຜ່ອນ​ເວລາ​ແກ້​ໄຂ​ວຽກ​ງານ​ຂອງ​ປະຊາຊົນ​ແລະ​ວິ​ສາ​ຫະກິດ. ​ມີ​ຜົນງານ​ທີ່​ດີ​ຄື​ແນວ​ນັ້ນ​ແມ່ນ​ຍ້ອນຄວາມ​ເອົາ​ໃຈ​ໃສ່​ຊີ້​ນຳ​ຢ່າງ​ໃກ້ຊິດ, ມີ​ປະສິດທິ​ຜົນ​ຈາກ​ລັດຖະບານ​ ຈົນ​ເຖິງ​ບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ, ​ໃນ​ນັ້ນ ວຽກ​ງານ​ການສື່ສານ​ແລະ​ໂຄສະນາ​ກ່ຽວ​ກັບ​ການ​ປະຕິ​ຮູບກາ​ບໍລິຫານ ​ແມ່ນ​ໜຶ່ງ​ໃນ​ບັນດາ​ປັດ​ໄຈ​ທີ່​ມີ​ບົດບາດ​ສຳຄັນ.

​ໃນ​ສະພາບ​ການ​ປະຈຸ​ບັນ, ຄວາມ​ຕ້ອງການ​ສື່​ສານ​ກ່ຽກັບ​ການ​ປະຕິ​ຮູບ​ການ​ບໍລິຫານ​ຂອງ​ປະຊາຊົນ, ພະນັກ​ງານ, ລັດຖະກອນ ພາລະ​ກອນ ນັບ​ມື້​ນັບ​ສູງ ​ເພື່ອ​ຮັບ​ໃຊ້​ໃຫ້​ແກ່​ການ​ຄົ້ນຄວ້າ, ຮ່ຳຮຽນ ​ແລະ​ພົວພັນ​ຕິດ​ຕໍ່, ​ໂດຍ​ສະ​ເພາະ​ແມ່ນສຳລັບ​ປະຊາຊົນ​ໃນ​ເມື່ອ​ພົວພັນຕິດ​ຕໍ່​ກັບ​ອົງການ​ບໍລິຫານ​ລັດ. ຄຽງ​ຄູ່​ກັບການ​ພັດທະນາ​ທີ່​ເຂັ້ມ​ແຂງ​ຂອງ​ເຕັກ​ໂນ​ໂລ​ຊີຂໍ້​ມູນ​ແລະ​ການ​ສື່ສານ, ຂໍ້​ມູນ​ກ່ຽວ​ກັບການ​ປະຕິ​ຮູບ​ການ​ບໍລິຫານຕ້ອງ​ໄດ້ຈັດ​ສົ່ງ​ຢ່າງ​ຊັດ​ເຈນ, ທັນ​ເວລາ, ຄົບ​ຖ້ວນ​ແລະ​ຫຼາກ​ຫຼາຍ, ຕາມ​ຫຼາຍ​ທິດ ຫຼາຍ​ສາຍ​ເຖິງ​ປະຊາຊົນ​ແລະ​ສັງຄົມ. ຍິ່ງ​ກວ່າ​ນັ້ນ, ຫວຽດນາມ​ກຳລັງ​ຢູ່​ໃນ​ວິວັດ​ການ​ເຊື່ອມ​ໂຍງ​ສາກົນທີ່ນັບ​ມື້​ນັບ​ກວ້າງຂວາງ​ເລິກ​ເຊິ່ງ, ດັ່ງ​ນັ້ນ ການ​ເປີດ​ເຜີຍ, ​ໂປ່​ງ​ໃສ​ຂໍ້​ມູນ​ກ່ຽວ​ກັບນະ​ໂຍບາຍ ກົດໝາຍ​ຂອງ​ລັດຕໍ່​ປະຊາຊົນ​ແລະປະຊາ​ຄົມ​ສາກົນ ມີ​ຄວາມ​ສຳຄັນ​ທີ່​ສຸດ ​ເຊັ່ນ: ນະ​ໂຍບາຍ​ກ່ຽວ​ກັບ​ການ​ພັດທະນາ​ເສດຖະກິດ, ການ​ຄ້າ, ການ​ລົງທຶນ..., ​ໃນ​ນັ້ນ ​ເອົາ​ໃຈ​ໃສ່​ເປັນ​ພິ​ເສດ​​ເຖິງບັນດາ​ນະ​ໂຍບາຍ​ກ່ຽວ​ກັບການ​ປະຕິ​ຮູບ​ການ​ບໍລິຫານ. ດ້ວຍ​ຄວາມ​ໝາຍ​ດັ່ງກ່າວ, ການ​ເພີ່ມ​ທະວີ​ວຽກ​ງານ​ການ​ໂຄສາ​ນາ​ເຜີຍ​ແຜ່​ກ່ຽວກັບການ​ປະຕິ​ຮູບ​ການ​ບໍລິຫານ ​ໃຫ້​ສຳນັກງານ, ອົງການ, ຖັນ​ແຖວ​ພະນັກງານ ລັດຖະກອນ ພາລະ​ກອນ ​ແລະ ​ປະຊາຊົນ​ທຸກ​ຊັ້ນ​ວັນນະ, ປະຊາ​ຄົມ​ສາກົນ ​ແມ່ນ​ໜ້າ​ທີ່ສຳຄັນ​ແລະ​ມີ​ຄວາມ​ໝາຍ​ຕັດສິນຕໍ່ຜົນສຳ​ເລັດ​ຂອງການ​ປະຕິ​ຮູບ​ການ​ບໍລິຫານຢູ່​ຫວຽດນາມ​ໃນ​ປະຈຸ​ບັນ.

​ສະພາບ​ການ​ຜັນ​ຂະຫຍາຍ​ແລະຜົນສຳ​ເລັດ​ ຂອງ​ການ​ໂຄສະນາກ່ຽວ​ກັບການ​ປະຕິ​ຮູບ​ການ​ບໍລິຫານ ​ໃນ​ເວລາ​ທີ່​ຜ່ານ​ມາ

​ໃນ​ເວລາ​ທີ່​ຜ່ານ​ມາ, ​ໃນ​ການ​ຜັນ​ຂະຫຍາຍ​ມະຕິ​ເລກທີ 30c/NQ-CP, ວັນ​ທີ 8 ພະຈິກ 2011, ຂອງ​ລັດຖະບານ, ວ່າ​ດ້ວຍ “ປະກາດ​ໃຊ້ໂຄງການ​ໂດຍ​ລວມກ່ຽວ​ກັບການປະຕິຮູບການບໍລິຫານລັດ ໄລບະປີ 2011 - 2020” ​ແລະ ຂໍ້​ຕົກລົງ​ເລກທີ 225/QĐ-TTg, ວັນ​ທີ 4 ກຸ​ມພາ 2016, ຂອງ​ນາຍົກລັດຖະມົນຕີ, ວ່າ​ດ້ວຍ “ອະນຸມັດ​ແຜນການປະຕິຮູບລັດ ໄລຍະປີ 2016 - 2020”, ບັນດາກະຊວງ, ຂະ​ແໜງ​ການ​ແລະ​ທ້ອງ​ຖິ່ນ​ ໄດ້​ຍູ້​ແຮງ​ວຽກ​ງານ​ການ​ໂຄສະນາ ກ່ຽວ​ກັບການ​ປະຕິ​ຮູບ​ການ​ບໍລິຫານ, ຜ່ານ​ການວາງ​ແຜນການ​ໂຄສະນາ​ປະຈຳ​ປີ, ຈັດ​ວາງ​ສັບ​ຊ້ອນ​ແຫຼ່ງພະລັງ, ​​ແບ່ງ​ງານມອບ​ໝາຍ​ໃຫ້​ສຳນັກງານ​ອົງການຈັດ​ຕັ້ງ​ປະຕິບັດ ​ໂດຍ​ມີ​ເນື້ອ​ໃນ​ລະອຽດ, ມີ​ຮູບ​ການ​ທີ່​ຫຼາກ​ຫຼາຍ ອຸດົມສົມບູນ; ດັ່ງ​ນັ້ນ​ຈຶ່ງ​ບັນລຸ​ຜົນສຳ​ເລັດ​ທີ່​ໂດດ​ເດັ່ນ​ເຊັ່ນ:

ທີ​ໜຶ່ງ, ກະຊວງ​ພາຍ​ໃນ - ອົງການ​ປະຈຳການ​ປະຕິ​ຮູບ​ການ​ບໍລິຫານຂອງ​ລັດຖະບານ, ​ໄດ້​ເປັນ​ເຈົ້າພາບ​ໃນ​ການ​ຜັນ​ຂະຫຍາຍ​ໂຄງ​ການ​ເພີ່ມ​ທະວີ​ວຽກ​ງານການສື່​ສານ​ແລະການໂຄສະນາ ກ່ຽວກັບການປະຕິຮູບການບໍລິຫານ ໄລຍະປີ 2016 - 2020, ລົງ​ນາມ​ໃນ​ໂຄງການ​ປະສານ​ງານ​ ໃນ​ວຽກ​ງານການ​ສື່​ສານ​ແລະໂຄສະນາກ່ຽວ​ກັບການ​ປະຕິ​ຮູບ​ການ​ບໍລິຫານ ກັບ​ບັນດາ​ກະຊວງ​ແລະ​ອົງການ​ທີ່​ກ່ຽວຂ້ອງ​ເຊັ່ນ: ​ໂຄງ​ການ​ປະສານ​ງານ​ກັບ​ກະຊວງຖະ​ແຫຼ​ງຂ່າວ​ແລະ​ການ​ສື່ສານ ​ໃນ​ການ​ຊຸກຍູ້​ການ​ເຊື່ອມ​ຕໍ່​ລະຫວ່າງ​ການ​ປະ​ຢຸກ​ໃຊ້​ເຕັກ​ໂນ​ໂລ​ຊີຂໍ້​ມູນ​ຂ່າວສານ​ ກັບການ​ປະຕິ​ຮູບ​ການ​ບໍລິຫານ​ໄລຍະ​ປີ 2017 - 2010; ໂຄງ​ການ​ປະສານ​ງານ​ກັບສະຖານີ​ໂທລະ​ພາບ​ຫວຽດນາມ ​ໃນ​ການ​ສື່ສານ​ແລະ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານລັດ​ໄລຍະ​ປີ 2018 - 2020. ບົນ​ພື້ນຖານ​ນັ້ນ, ບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ​ໄດ້​ຜັນ​ຂະຫຍາຍ​ຢ່າງ​ເປັນ​ລະ​ບົບຄົບ​ຊຸດ, ດ້ວຍ​ບັນດາ​ເນື້ອ​ໃນ​ແລະ​ຮູບ​ແບບ​ໂຄສະນາ​ທີ່​ລະອຽດ ​ກ່ຽວ​ກັບການ​ປະຕິ​ຮູບ​ການ​ບໍລິຫານ, ສອງ​ຄ່ອງ​ກັບ​ເງື່ອນ​ໄຂ​ຕົວ​ຈິງ.

ທີ​ສອງ, ບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ​ໄດ້​ສຸມ​ໃສ່​ການ​ໂຄສະນາ, ​ເຜີຍ​ແຜ່​ຢ່າງກວ້າງຂວາງເລິກ​ເຊິ່ງກ່ຽວ​ກັບຄວາມ​ໝາຍ, ຄວາມ​ສຳຄັນ, ​ເປົ້າ​ໝາຍ ​ແລະ​ຜົນ​ກະທົບ​ຂອງການ​ປະຕິ​ຮູບ​ການ​ບໍລິຫານ ​ຕໍ່​ການ​ພັດທະນາ​ເສດຖະກິດ-ສັງຄົມຂອງ​ປະ​ເທດ, ກໍ່​ຄື​ບັນດາ​ທັດສະນະ, ​ແຜນ​ນະ​ໂຍບາຍ​ຂອງ​ພັກ ​ແລະ​ນະ​ໂຍບາຍ, ກົດໝາຍ​ຂອງ​ລັດ ກ່ຽວ​ກັບການ​ປະຕິ​ຮູບ​ການ​ບໍລິຫານ. ຈາກ​ນັ້ນ, ກຳນົດ​ບົດບາດ, ຄວາມ​ຮັບຜິດຊອບ​ຂອງ​ຄະນະ​ພັກ​, ຂອງ​ຫົວໜ້າ​ອົງການ​ບໍລິຫານ​ລັດ​ຂັ້ນ​ຕ່າງໆ, ຂອງ​ຫົວໜ້າ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ແລະ​ຫົວໜ້າໜ່ວຍ​ບໍລິການ​ພາກ​ລັດ ​ໃນ​ການ​ຜັນ​ຂະຫຍາຍ​ປະຕິບັດ​ໜ້າ​ທີ່ການ​ປະຕິ​ຮູບ​ການ​ບໍລິຫານ. ບັນດາ​ເນື້ອ​ໃນ​ໂຄສະນາ​ໄດ້​ຕິດ​ແໜ້ນ​ກັບ​​ເປົ້າ​ໝາຍ​ແລະ​ໜ້າ​ທີ່​ຂອງ​ການ​ປະຕິ​ຮູບ​ການ​ບໍລິຫານ ຂອງ​ລັດຖະບານ ​ແລະ​ຂອງ​ບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ ປະຈຳ​ປີ​ແລະ​ໃນ​ແຕ່ລະ​ໄລຍະ, ບັນດາ​ຜົນສຳ​ເລັດ​ພົ້ນ​ເດັ່ນ​ທີ​ບັນລຸ​ໄດ້, ບັນດາ​ຮູບ​ແບບ​ໃໝ່​ໃນການ​ປະຕິ​ຮູບ​ການ​ບໍລິຫານ, ລວມທັງ​ຂໍ້​ບົກພ່ອງ​ແລະ​ຂໍ້​ຈຳກັດ​ໃນ​ຂະ​ບວນການຈັດ​ຕັ້ງ​ປະຕິບັດ. ​ໂດຍ​ສະ​ເພາະ, ​ໄດ້​ໝູນ​ໃຊ້​ແຜນ​ນະ​ໂຍບາຍ​ແລະມະຕິ​ຂອງ​ພັກກ່ຽວ​ກັບການ​ປະຕິ​ຮູບ​ການ​ບໍລິຫານ​ໃນ​ບາງ​ຂົງ​ເຂດ​ຈຸດ​ໜັກ​ໃຈກາງ; ຈັດ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ​ເຂົ້າກັບ​ການ​ອົບຮົມ​ສຶກສາ​ແລະ​ເຜີຍ​ແຜ່​ກົດໝາຍ, ຜ່ານ​ສິ່ງ​ດັ່ງກ່າວ​ເພື່ອ​ຍົກ​ສູງ​ປະສິດທິ​ຜົນ​ຂອງວຽກ​ງານ​ການ​ໂຄສະນາ. ຮູບ​ແບບ​ການ​ໂຄສະນາ​ໄດ້​ຮັບ​ການ​ປະ​ຕິ​ບັດ​ໂດຍ​ຜ່ານທຸກ​ປະ​ເພດ​ຂອງໜັງສື​ພິມ ​ແລະ ລະດົມ, ນຳໃຊ້ທຸກພາຫະນະສື່​ມວນ​ຊົນ, ລວມທັງ: ສະຖານີ​ວິ​ທະ​ຍຸ​ກະຈາຍສຽງ, ສະຖານີ​ໂທລະພາບ ​ແລະ​ບັນດາ​ສຳນັກຂ່າວ, ໜັງສືພິມ​ຢູ່​ສູນ​ກາງ​ແລະ​ທ້ອງ​ຖິ່ນ; ບັນດາ​ປະ​ເພດ​ຂອງ​ວາລະສານ​ພິ​ເສດສະ​ເພາະ, ຊ່ອງ​ສື່​ຂ່າວເອ​ເລັກ​ໂຕຣນິກ (Web portal) ຫຼື​ເວັບ​ໄຊ​ຂໍ້​ມູນ​ເອ​ເລັກ​ໂຕຣນິກ (website) ຂອງບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ​ໃນ​ທົ່ວ​ປະ​ເທດ.

ທີ​ສາມ, ບັນດາ​ຂໍ້​ມູນ​ຂ່າວ​ສານ​ກ່ຽວ​ກັບການ​ປະຕິ​ຮູບ​ການ​ບໍລິຫານລັດ ​ໄດ້ລວມຢູ່​ໃນ​ການ​ຖະ​ແຫຼ​ງຂ່າວ​ປົກກະຕິ​ຂອງ​ລັດະ​ບານ, ບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ. ​ເນື້ອ​ໃນ​ຂອງການ​ປະຕິ​ຮູບການ​ບໍລິຫານ​ລັດ​ກໍ່​ໄດ້​ເອົາ​ເຂົ້າ​ໃນ​ວຽກ​ງານ​ຄັດ​ເລືອກລັດຖະກອນ, ພາລະ​ກອນ. ຜ່ານ​ສິ່ງ​ດັ່ງກ່າວ, ສະ​ແດງ​ໃຫ້​ເຫັນ​ເຖິງ​ຄວາມ​ເອົາ​ໃຈ​ໃສ່​ຂອງ​ລັດຖະບານ, ບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ ຕໍ່ການ​ປະຕິ​ຮູບ​ການ​ບໍລິຫານ, ກໍ່​ຄື​ຄວາມ​ສຳຄັນ​ຂອງການ​ປະຕິ​ຮູບ​ການ​ບໍລິຫານ​ໃນ​ໄລຍະ​ປະຈຸ​ບັນ.

ການ​ສະຫຼຸບ 5 ປີ​ແຫ່​ງການຜັນຂະຫຍາຍ​ປະຕິບັດໂຄງການ​ໂດຍ​ລວມກ່ຽວ​ກັບການ​ປະຕິ​ຮູບ​ການ​ບໍລິຫານລັດ ​ໃຫ້​ເຫັນ​ວ່າ, ວຽກ​ງານ​ການສື່​ສານ​ແລະ​ໂຄສະນາ​​ກ່ຽວ​ກັບການ​ປະຕິ​ຮູບ​ການ​ບໍລິຫານ ​ໄດ້​ຮັບ​ຄວາມ​ເອົາ​ໃຈ​ໃສ່​ປະຕິບັດ​ໂດຍ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ ຢ່າງ​ຕໍ່​ເນື່ອງ, ​ເປັນ​ປະຈຳ ດ້ວຍ​ວິທີ​ເຮັດ​ທີ່​ດີ​ ແທດ​ເໝາະ​ຕົວ​ຈິງ, ​​ສະ​ແດງ​ອອກຜ່ານ​ຫຼາຍ​ຮູບ​ແບບ​ເຊັ່ນ: ຈັດ​ຕັ້ງ​ການ​ແຂ່ງຂັນ, ​ເວທີ​ປາ​ໄສ, ລາຍ​ງານ​ສະ​ເພາະ​ເລື່ອງ, ການ​ປະຊຸມ​ອອນ​ໄລ...; ການສະ​ແດງ​ບົນ​ເວທີ, ລະຄອນ​ຕະຫຼົກ; ການ​ແຂ່ງຂັນ​ເພື່ອ​ຮຽນ​ຮູ້​ນະ​ໂຍບາຍ, ກົດໝາຍ ​ໄດ້​ຮັບ​ການ​ປະຕິບັດ​ຢ່າງ​ມີ​ຫົວຄິດ​ປະດິດ​ສ້າງ, ສອດຄ່ອງ​ກັບ​ເງື່ອນ​ໄຂ ສະພາບ​ການ​ຕົວ​ຈິງ, ປະກອບສ່ວນຍົກ​ສູງ​ຄວາມ​ຮູ້, ຄວາມ​ຮັບຜິດຊອບ​ຂອງ​ປະຊາຊົນ, ສັງຄົມ ​ແລະ​ຖັນ​ແຖວ​ພະນັກງານ ລັດຖະກອນ ພາລະ​ກອນ ກ່ຽວ​ກັບ​ບົດບາດ ຄວາມ​ສຳຄັນ​ຂອງການ​ປະຕິ​ຮູບ​ການ​ບໍລິຫານ ທີ່​ມີ​ຕໍ່​ພາລະກິດ​ການ​ພັດທະນາ​ເສດຖະກິດ-ສັງຄົມຂອງ​ປະ​ເທດ ​ແລະ ຂອງ​ແຕ່ລະ​ທ້ອງ​ຖິ່ນ. ຈາກ​ນັ້ນ, ສ້າງ​ຄວາມ​ເຫັນ​ດີ​ເປັນ​ໃຈ, ສະໜັບສະໜູນ ​ແລະ ການ​ເຂົ້າ​ຮ່ວມ​ຂອງ​ບຸກຄົນ, ຂອງອົງການ​ຈັດ​ຕັ້ງ ​ໃນ​ການ​ຜັນ​ຂະຫຍາຍ​ປະຕິບັດ​ບັນດາ​ເປົ້າໝ​າຍ, ໜ້າ​ທີ່ການ​ປະຕິ​ຮູບ​ການ​ບໍລິຫານຂອງ​ລັດຖະບານ, ບັນດາ​ກະຊວງ, ຂະ​ແໜງ​ການ​, ​ທ້ອງ​ຖິ່ນ ​ແລະ​ຂອງ​ແຕ່​ລະ​ສຳນັກງານ​ອົງການ, ກົມ​ກອງ.

ຜ່ານ​ລາຍ​ງານ, ວຽກ​ງານ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານຢູ່​ກະຊວງ, ຂະ​ແໜງ​ການ​ໄດ້​ຫຼາຍ​ກວ່າ 2.800 ຄັ້ງ, ຢູ່​ທ້ອງ​ຖິ່ນ​ຕ່າງໆ ​ໄດ້ 4.100 ຄັ້ງ, ​ໃນ​ນັ້ນ​​ໄດ້​ເວົ້າ​ເຖິງ 2.600 ກວ່າຮູບ​ແບບ​ຄວາມ​ຄິດ​ລິ​ເລີ່​ມການ​ປະຕິ​ຮູບ​ການ​ບໍລິຫານ ທີ່​ໄດ້​ຜັນ​ຂະຫຍາຍ​ຢູ່​ບັນດາ​ແຂວງ, ນະຄອນ​ໃນ​ໄລຍະ 2011 - 2015. ສະຖານີ​ໂທລະພາບ​ຫວຽດນາມ​ໄດ້​ອອກ​ອາກາດ​ຫົວ​ຂໍ້ການ​ປະຕິ​ຮູບ​ການ​ບໍລິຫານ ທຸກ​ສັບປະດາ​ເປັນ​ເວລາ 15 ນາທີ ​ເພື່ອ​ວິ​ເຄາະ, ປະ​ເມີນ​ຜົນ ​ແລະ​ສະ​ແດງ​ຄວາມ​ຄິດ​ເຫັນ ​ກ່ຽວ​ກັບ​ເນື້ອ​ໃນການ​ປະຕິ​ຮູບ​ການ​ບໍລິຫານ ຂອງບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ ຈາກ​ການ​ສັງ​ເກດ​ຫຼາຍ​ດ້ານຂອງ​ຜູ້​ຊ່ຽວຊານ, ນັກວິທະຍາສາດ, ນັກ​ຄຸ້ມ​ຄອງ​ແລະ​ປະຊາຊົນ, ຂອງ​ອົງການ​ຈັດ​ຕັ້ງ. ​ແຕ່​ປີ 2016 ມາ​ເຖິງ​ປີ​ນີ້, ​​ໃນແຕ່ລະ​ປີ ສະຖານີ​ໂທລະພາບ​ຫວຽດນາມ ​ໄດ້​ອອກ​ອາກາດ​ລາຍ​ງານ​ສະ​ເພາະ​ເລື່ອງປະມານ 40 ​ເລື່ອງກ່ຽວ​ກັບການ​ປະຕິ​ຮູບ​ການ​ບໍລິຫານ, ​ໃນ​ນັ້ນ​ການ​ລາຍ​ງານ​ຫຼາຍ​ເລື່ອງມີ​ການ​ແຜ່​ກະຈາຍ​ທີ່​ດີ, ດຶງ​ດູດ​ຄວາມ​ສົນ​ໃຈ​ຂອງ​ມະຫາຊົນ, ​ເຊັ່ນ “ການ​ຫັນ​ເປັນ​ເອ​ເລັກ​ໂຕຣນິກຕໍ່​ຂໍ້​ມູນ​ສິນຄ້າ​ນຳ​ເຂົ້າ​ແລະ​ສົ່ງ​ອອກ”; “​​ແຂວງໂດ່​ງຖ້າບ - ຈຸດສະຫວ່າງ​ແຫ່ງການປະຕິຮູບການບໍລິຫານ ຢູ່ທົ່ງພຽງແມ່ນ້ຳກື໋ວລອງ"; "ຄວາມປອດໄພດ້ານອາຫານ ຫັນປ່ຽນຈາກການກວດສອບລ່ວງໜ້າ ໄປເປັນການກວດສອບພາຍຫຼັ\"; "ສຸນລະກາກອນ ສົ່ງເສີມການໃຫ້ບໍລິການສາທາລະນະອອນໄລ"; "ຕັດຂັ້ນຕອນການບໍລິຫານດ້ານການປິ່ນປົວເພື່ອຄົນເຈັບ"; "ສົມທົບການສົ່ງເສີມການລົງທຶນ ກັບການປະຕິຮູບການບໍລິຫານ"; "ການຕັດສິນຕົກລົງຜິດ, ປະຊາຊົນໄດ້ຮັບຄວາມເສຍຫາຍ"; "ການປະຕິຮູບຂັ້ນຕອນການບໍລິຫານ ເພື່ອສະໜັບສະໜູນພາສີສະລັບວິສາຫະກິດ";...

ຫ້ອງການ​ຊີ້​ນຳການ​ປະຕິ​ຮູບ​ການ​ບໍລິຫານຂອງ​ລັດຖະບານ​ໄດ້ສ້າງ​ໃບຂ່າວ​ເອ​ເລັກ​ໂຕຣນິກກ່ຽວ​ກັບການ​ປະຕິ​ຮູບ​ການ​ບໍລິຫານ ​ແລະ ອອກ​ເປັນ​ໄລຍະໆ 4 ສະບັບ​/​ເດືອນ ​ໄປ​ຍັງ​ກວ່າ 5.000 ກ່ອງ​ອີ​ເມວຂອງບັນດາ​ຜູ້ນຳ​ທີ່​ສຳຄັນຂອງ​ກະຊວງ, ​ແຂວງ ​ແລະ​ນະຄອນ​ທີ່​ຂຶ້ນ​ກັບ​ສູນ​ກາງ, ​ແລະ​ຖັນ​ແຖວ​ລັດຖະກອນທີ່​ຮັບຜິດຊອບວຽກ​ງານ​ປະຕິ​ຮູບ​ການ​ບໍລິຫານ ​ເພື່ອ​ສະໜອງ​ຂໍ້​ມູນ​ຂ່າວສານ ​ແລະ​ແບ່ງປັນຂໍ້​ຄິດ​ລິ​ເລີ່ມ, ບົດຮຽນ​ກ່ຽວ​ກັບ​ການ​ຜັນ​ຂະຫຍາຍການ​ປະຕິ​ຮູບ​ການ​ບໍລິຫານ​ໃນ​ຂອບ​ເຂດ​ທົ່ວ​ປະ​ເທດ. ກະຊວງ​ພາຍ​ໃນ​ແລະ​ບັນດາ​ກະຊວງ, ຂະ​ແໜງ​ການ​ ໄດ້ຕັ້ງໜ້າຜັນ​ຂະຫຍາຍ​ການ​ສ້າງ​ຫົວ​ຂໍ້ ​ແລະ​ລາຍ​ງານ​ກ່ຽວ​ກັບ​ການ​ປະຕິ​ຮູບ​ການ​ບໍລິຫານ; ຈັດ​ວາງ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ​ໃນ​ຊຸດ​ຝຶກ​ອົບຮົມປະຈຳ​ປີ​ສຳລັບ​ພະນັກງານ, ຂ້າ​ລັດຖະການ​ຂອງ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ. ຢູ່​ທ້ອງ​ຖິ່ນ, ​​ສະຖານີ​ວິທະຍຸ-​ໂທລະພາບ​ສ່ວນ​ຫຼາຍ​ໃນ​ແຂວງ​ແລະຕົວ​ເມືອງ​ຂຶ້ນ​ກັບ​ສູນ​ກາງ ​ໄດ້​ປະຕິບັດ​ຢ່າງ​ມີ​ປະສິດທິ​ຜົນ ການ​ອອກ​ອາກາດ​ເປັນ​ໄລຍະໆ ກ່ຽວ​ກັບ​ຫົວ​ຂໍ້ "ການປະຕິຮູບການບໍລິຫານ" ຫຼື​ລາຍການ “ພົບ​ປະ, ສົນທະນາ​ກັບ​ປະຊາຊົນ​ແລະ​ນັກທຸລະກິດ” ​ເພື່ອ​ໂຄສະນາ​ເຜີ​ຍ​ແຜ່​ຢ່າງ​ທັນ​ການ ​ກ່ຽວ​ກັບຜົນ​ການ​ປະຕິ​ຮູບຕະຫຼອດ​ຈົນ​ຄຳ​ຕອບ​ແລະ​ການ​ແກ້​ໄຂຂໍ້​ບົກພ່ອງ​ໃນ​ເມື່ອນຳ​ໃຊ້​ນະ​ໂຍບາຍ​ໃໝ່, ຜ່ານ​ສິ່ງ​ດັ່ງກ່າວ, ​ເພື່ອ​ຊ່ວຍ​ຍົກ​ສູງ​ຄວາມ​ຮັບ​ຮູ້, ສ້າງ​ຄວາມ​ເປັນ​ໃຈ​ເຫັນ​ດີ​ເຫັນ​ພ້ອມ, ປັບປຸງ​ຄວາມ​ເພິ່ງ​ພໍ​ໃຈ ​ແລະ​ເພີ່ມ​ທະວີ​ການ​ເຂົ້າ​ຮ່ວມ​ຂອງ​ປະຊາຊົນ, ອົງການ​ຈັດ​ຕັ້ງ ​ແລະ ທົ່ວ​ສັງຄົມ​ ໃນ​ຂະ​ບວນວິວັດ​ການ​ປະຕິ​ຮູບ​ການ​ບໍລິຫານ.

ຕາມ​ຕົວ​ເລກ​ສະຖິຕິ, ຊ່ອງ/​ເວັ​ບ​ໄຊຂໍ້​ມູນ​ເອ​ເລັກ​ໂຕຣນິກ​ໃນ 100% ກະຊວງ, ອົງການ​ທຽບ​ເທົ່າ​ກະຊວງ, ຄະນະ​ກຳມະການ​ປະຊາຊົນ​ແຂວງ ລ້ວນ​ແຕ່​ໄດ້​ເຜີຍ​ແຜ່ຂ່າວ​ແລະ​ບົດ​ຄວາມ​ໂຄສະນາ​ກ່ຽວ​ກັບ​ຜົນສຳ​ເລັດ​ຂອງ​ການ​ປະຕິບັດການ​ປະຕິ​ຮູບ​ການ​ບໍລິຫານ ​ໃນ​ກະຊວງ, ທ້ອງ​ຖິ່ນ​ຕົນ. ສຳນັກໜັງສືພິມ, ວາລະສານຫຼາຍ​ແຫ່ງ​ທີ່​ຂຶ້ນ​ກັບ​ກະຊວງ, ຂະ​ແໜງ​ການ​ຢູ່​ສູນ​ກາງ ສືບ​ຕໍ່​ຮັກສາ​ການ​ໂຄສະນາ​ທີ່​ມີ​ປະສິດທິ​ຜົນກ່ຽວ​ກັບການ​ປະຕິ​ຮູບ​ການ​ບໍລິຫານ ຂອງ​ແຕ່ລະ​ຂົງ​ເຂດ, ຂະ​ແໜງ​ການ. ຄຽງຂ້າງ​ນັ້ນ, ບາງ​ແຫ່ງ​ໄດ້​ມີ​ຄວາມ​ຄິດ​ລິ​ເລີ່​ມ, ມີ​ການ​ປ່ຽນ​ແປງ​ໃໝ່ ​ໃນ​ການຈັດ​ຕັ້ງ​ປະຕິບັດ ​ເພື່ອ​ຍົກ​ສູງ​ປະສິດທິ​ຜົນ​ຂອງ​ການ​​ສື່ສານ​ແລະໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ. ການສື່ສານ​ແລະ​ໂຄສະນາ​​ກ່ຽວ​ກັບການ​ປະຕິ​ຮູບ​ການ​ບໍລິຫານ ກໍ່​ຖືກ​ບາງ​ແຫ່ງ​ຈັດ​ເຂົ້າ​​ໃນ​ການ​ແຂ່ງຂັນ, ​ໃນ​ເວທີ​ສະ​ແດງ ​ລະຄອນ​ຕະຫຼົກ ຫຼື​ໂຄສະນາ​ອອນ​ໄລ, ​ເພີ່ມ​ຄວາມ​ຫຼາກ​ຫຼາຍ, ອຸດົມສົມບູນ, ຄວາມ​ຈັບ​ໃຈ​ໃນ​ການ​ໂຄສະນາ, ດຶງ​ດູດ​ຄວາມ​ສົນ​ໃຈ​ຂອງຜູ້​ຊົມ​ຫຼາຍ​ຄົນ. ຜ່ານ​ການ​ຕິດຕາມ​ໃຫ້​ເຫັນ​ວ່າ, ຄຸນ​ນະພາ​ບຂອງ​ຂ່າວ, ບົດ​ຄວາມ, ລາຍ​ງານ​ການ​ໂຄສະນາກ່ຽວ​ກັບການ​ປະຕິ​ຮູບ​ການ​ບໍລິຫານ ນັບ​ມື້​ນັບ​ໄດ້​ຮັບ​ການ​ຍົກ​ສູງ, ຄ່ອຍໆ​ເຂົ້າ​ໄປ​ໃນ​ການວິ​ເຄາະ, ສະ​ແດງ​ຄວາມ​ຄິດ​ເຫັນ​ເນື້ອ​ໃນການ​ປະຕິ​ຮູບ​ການ​ບໍລິຫານ ພາຍ​ໃຕ້​ມຸມ​ເບິ່ງ​ຫຼາຍ​ດ້ານ, ​ໃກ້​ກັບ​ຄວາມ​ເປັນ​ຈິງ, ດຶງ​ດູດ​ຄວາມ​ສົນ​ໃຈ​ຂອງ​ປະຊາຊົນ.

ວຽກ​ງານ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ​ໃນ​ຊຸມ​ປີ​ທີ່​ຜ່ານມາໄດ້​ບັນລຸ​ຜົນສຳ​ເລັດ​ທີ່​ໜ້າ​ຍິນ​ດີ, ປະກອບສ່ວນ​ສຳຄັນ​ເຂົ້າ​ໃນ​ການ​ປະຕິບັດ​ໂຄງການ​ໂດຍ​ລວມກ່ຽວ​ກັບການ​ປະຕິ​ຮູບ​ການ​ບໍລິຫານລັດ. ຢ່າງ​ໃດ​ກໍ່​ຕາມ, ປະ​ເມີນ​ຢ່າງ​ພາວະ​ວິ​ໄສ, ສາມາດ​ເຫັນ​ໄດ້​ວ່າ, ວຽກ​ງານ​ການສື່ສານ​ແລະ​ໂຄສະນາ​ກ່ຽວກັບ​ການປະຕິ​ຮູບ​ການ​ບໍລິຫານ ບໍ່​ບັນລຸ​ຜົນ​ຕາມ​ທີ່​ຕ້ອງການ, ຍັງ​ບໍ່​ທັນ​ບັນລຸ​ເປົ້າ​ໝາຍ​ທີ່​ກຳນົດ​ໄວ້. 

ທີ​ໜຶ່ງ, ຜົນ​ກະທົບ​ຂອງ​ວຽກ​ງານ​ການ​ສື່ສານ​​ແລະໂຄສະນາ​​ກ່ຽວ​ກັບການ​ປະຕິ​ຮູບ​ການ​ບໍລິຫານ ຍັງ​ບໍ່​ທັນ​ກວ້າງຂວາງ​ເລິກ​ເຊິ່ງ, ນຳ​ໄປ​ສູ່​ການ​ຮັບ​ຮູ້​ກ່ຽວ​ກັບການ​ປະຕິ​ຮູບ​ການ​ບໍລິຫານ​ເວົ້າ​ລວມ; ການ​ຮັບ​ຮູ້​ກ່ຽວ​ກັບ​ຄວາມ​ໝາຍ, ບົດບາດ​ຂອງການ​ປະຕິ​ຮູບ​ການ​ບໍລິຫານ​ໃນ​ປະຊາຊົນ, ​ໃນ​ຖັນ​ແຖວ​ພະນັກງານ​ນຳພາ ຄຸ້ມ​ຄອງ ​ແລະພະນັກງານ ລັດຖະກອນ ພາລະ​ກອນ ​ແມ່ນບໍ່​ພຽງພໍຄົບ​ຖ້ວນ, ບາງ​ບ່ອນ​ບາງ​ແຫ່ງ​ຍັງ​ເມີນ​ເສີຍ ບໍ່​ເອົາ​ໃຈ​ໃສ່​ການ​ປະຕິ​ຮູບ, ດັ່ງ​ນັ້ນ​ຈຶ່ງ​ບໍ່​ມີ​ການ​ຫັນປ່ຽນ​ໃນ​ຈິນຕະນາການ ​ແລະ​ການ​ກະທຳ​ຕາມ​ຈິດ​ໃຈ​ປະຕິ​ຮູບ.

ທີ​ສອງ, ວຽກ​ງານ​ການ​ໂຄສະນາ​ຂົນຂວາຍ​ຢູ່​ພາຍ​ໃນກ່ຽວ​ກັບການ​ປະຕິ​ຮູບ​ການ​ບໍລິຫານ ຍັງບໍ່​ທັນໄດ້​ເອົາ​ໃຈ​ໃສ່​ຢ່າງ​ເໝາະ​ສົມ, ນຳ​ໄປ​ສູ່​ການ​ຮັບ​ຮູ້​ກ່ຽວ​ກັບການ​ປະຕິ​ຮູບ​ການ​ບໍລິຫານໃນໜ່ວຍງານ​ແລະ​ອົງການ​ລັດຫຼາຍ​ແຫ່ງ​ ຈຶ່ງ​ບໍ່ຄົບ​ຖ້ວຍ, ພະນັກງານ​ນຳພາ​ຄຸ້ມ​ຄອງ​ ແລະ ​ພະນັກງານ ​ລັດຖະກອນ​ແຕ່ລະຄົນ ບໍ່​ເຫັນ​ໄດ້​ຄວາມ​ຮັບຜິດຊອບ​ຂອງ​ຕົນ​ ໃນ​ການ​ປະຕິບັດການ​ປະຕິ​ຮູບ​ການ​ບໍລິຫານ ​ແລະ ປະກອບສ່ວນ​ເຂົ້າ​ໃນ​ວິວັດການ​ປະຕິ​ຮູບ​ການ​ບໍລິຫານຂອງ​ປະ​ເທດ. ຍັງ​ມີ​ສະພາບ​ການ​ ໜ່ວຍ​ງານ​ແລະອົງການ​ໃນ​ລະບົບ​ການ​ບໍລິການ​ລັດ ບໍ່ໄດ້​ສະໜອງ​ແລະ​ແບ່ງປັນ​ຂໍ້​ມູນ​ຂ່າວສານ​ ກ່ຽວ​ກັບ​ກັນ​ເຄື່ອນ​ໄຫວ​ຂອງ​ກັນ​ແລະ​ກັນ​ ຢ່າງ​​ເຕັມ​ສ່ວນ​ແລະທັນ​ເວລາ, ນຳ​ໄປສູ່​ຄວາມ​ບໍ່​ສອດຄ່ອງ​ກັນ, ທັບ​ຊ້ອນ​ກັນ​ໃນ​ການ​ກໍ່ສ້າງ, ຈັດ​ຕັ້ງ​ປະຕິບັດ​ນະ​ໂຍບາຍ, ກົດໝາຍ.

ທີ​ສາມ, ການ​ຮັບ​ຮູ້​ແລະ​ການ​ລົງມື​ປະຕິບັດ​ໃນການ​ປະຕິ​ຮູບ​ການ​ບໍລິຫານ​ເວົ້າ​ລວມ, ​ໃນ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ​ເວົ້າ​ສະ​ເພາະ ​ຂອງ​ອຳນາດ​ການ​ປົກຄອງຂັ້ນ​ຕ່າງໆຍັງ​ບໍ່​ທັນ​ເປັນ​ເອກະ​ພາບ ຄົບ​ຊຸດ, ດັ່ງ​ນັ້ນ​ຈຶ່ງ​ມີ​ສະພາບ​ການ​ພຽງ​ແຕ່​ປະຕິບັດ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ​ແບບ​ຂະ​ບວນການ, ບໍ່​ມີ​ຍຸດ​ທະ​ສາດສະ​ເພາະ ສະ​ນັ້ນ​ຈຶ່ງບໍ່​ມີ​ປະສິດທິ​ຜົນ.

ທີ​ສີ່, ຄຸນ​ນະພາ​ບຂອງ​ຂ່າວ​ແລະ​ບົດ​ຄວາມ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານຂອງ​ບາງ​ສຳນັກງານ​ອົງການ​ຍັງ​ບໍ່​ທັນ​ສູງ; ​ເນື້ອ​ໃນ​ໂຄສະນາ​ຍັງ​ບໍ່​ທັນ​​ເວ​ເລາ, ຍັງ​ເຮັດ​ຕາມ​ແບບ​ເບົ້າ ກົນ​ຈັກ, ບໍ່​ສ້າງ​ຄວາມ​ສົນ​ໃຈ​ແລະ​ປະ​ທັບ​ໃຈ​​ໃຫ້ກັບ​ຜູ້​ຟັງ​ການ​ໂຄສະນາ; ບາງ​ສຳນັກງານ​ອົງການຍັງ​ລາຍ​ງານ​ບໍ່​ຖືກຕ້ອງ, ຍັງ​ບໍ່​ສະທ້ອນ​ເຖິງ​ຄວາມ​ເປັນ​ຈິງ.

ທີ​ຫ້າ, ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ຜ່ານ​ເວັບ​ໄຊ​ເຄືອ​ຂ່າຍ​ສັງຄົມມີ​ຜູ້​ໃຊ້​ຈຳນວນ​ຫຼາຍ​ນັ້ນ ຍັງ​ຖືກ​ຈຳກັດ, ຍັງ​ບໍ່​ນຳ​ໃຊ້​ຢ່າງ​ເຕັມ​ສ່ວນ​ຈາກ​ຄວາມ​ສາມາດ​ແລະ​ຜົນ​ກະທົບ​ຂອງ​ການ​ໂຄສະນາຊວນ​ເຊື່ອ.

ບາງ​ທິດ​ທາງ​ແລະ​ວິທີ​ແກ້​ໄຂ​ ເພື່ອ​ຍູ້​ແຮງ​ວຽກ​ງານ​ການ​ໂຄສະ​ນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ​ໃນ​ເວລາ​ຕໍ່​ໄປ

​ເພື່ອ​ໃຫ້ວຽກ​ງານ​ການສື່​ສານ​ແລະ​ໂຄສະນາ​​ກ່ຽວການ​ປະຕິ​ຮູບ​ການ​ບໍລິຫານ ປະສົບ​ຜົນສຳ​ເລັດ​ທີ່​ດີງາມ, ​ໃນ​ເວລາ​ອັນ​ໃກ້​ນີ້, ຄະນະກຳມະການຊີ້​ນຳການ​ປະຕິ​ຮູບ​ການ​ບໍລິຫານຂອງ​ລັດຖະບານ​ຕ້ອງການ​ສຸມ​ໃສ່​ການ​ຊີ້​ນຳ, ​ແນະນຳ​ໃຫ້​ບັນດາ​ກະຊວງ, ຂະ​ແໜງ​ການ​ແລະ​ທ້ອງ​ຖິ່ນ ​ໃນ​ການ​ຜັນ​ຂະຫຍາຍ​ວຽກ​ງານ​ໂຄສະນາ​ຂົນຂວາຍ​ພາຍ​ໃນ ​ເພື່ອຍົກ​ສູງຄວາມ​ຮັບ​ຮູ້​ແລະ​ການກະທຳ​ປະຕິບັດ ຂອງ​ພະນັກງານ​ນຳພາ​ຄຸ້ມ​ຄອງ ​ແລະ​ພະນັກງານ ລັດຖະກອນ ພາລະ​ກອນ, ຜ່ານ​ນັ້ນ ​ໃຫ້​ຄຳ​ປຶກສາ​ໃນ​ການ​ສ້າງ​ນະ​ໂຍບາຍ​ທີ່​ມີ​ຄຸນ​ນະພາ​ບ ​ແລະສອດຄ່ອງ​ເໝາະ​ສົມ; ​ເພີ່ມ​ທະວີ​ການ​ໂຄສະນາ​ທີ່​ມີ​ປະສິດທິຜົນ​ຕໍ່​ກັບ​ອົງການ​ແລະ​ປະຊາຊົນ ກ່ຽວ​ກັບ​ວຽກ​ງານການ​ປະຕິ​ຮູບ​ການ​ບໍລິຫານ; ພ້ອມ​ກັນ​ນັ້ນ ປ່ຽນ​ແປງ​ໃໝ່​ວິທີ​ການ​ໂຄສະນາ​ຢ່າງ​ບໍ່​ຢຸດ​ຢັ້ງ. ​ໃນ​ນັ້ນ, ​ເອົາ​ໃຈ​ໃສ່​ເຖິງບາງ​ບັນຫາ​ທີ່​ສຳຄັນ​ຕໍ່​ໄປ​ນີ້:

ທີ​ໜຶ່ງ, ຍົກ​ສູງ​ບົດບາດ, ຄວາມ​ຮັບ​ຮູ້​ແລະ​ຄວາມ​ຮັບຜິດຊອບ ຂອງ​ຫົວໜ້າ​ຄະນະ​ພັກ, ຜູ້ນຳ​ຂອງ​ກະຊວງ ຂະ​ແໜງ​ການ ທ້ອງ​ຖິ່ນ, ບັນດາ​​ອົງການ​ແລະ​ໜ່ວຍ​ງານ, ບັນດາ​ອົງຄະ​ນະມະ​ຫາ​ຊົນ ກ່ຽວ​ກັບ​ເປົ້າ​ໝາຍ, ​ເນື້ອ​ໃນ ​ແລະ​ ຄວາມ​ໝາຍ​ຂອງວຽກ​ງານການ​ສື່ສານ​ແລະ​ໂຄສະນາ ກ່ຽວ​ກັບການ​ປະຕິ​ຮູບ​ການ​ບໍລິຫານ, ຜ່ານ​ນັ້ນ, ສ້າງ​ຄວາມ​ເປັນ​ເອກະ​ພາບ​ແລະ​ຄົບ​ຊຸດ​ໃນ​ການ​ຊີ້​ນຳການ​ຜັນ​ຂະຫຍາຍ​ປະຕິບັດ. ຜົນ​ໄດ້ຮັບ​ແລະ​ປະສິດທິ​ຜົນຂອງ​ວຽກ​ງານ​ໂຄສະນາກ່ຽວ​ກັບການ​ປະຕິ​ຮູບ​ການ​ບໍລິຫານ ຕ້ອງ​ເຊື່ອມ​ຕິດ​ໂດຍ​ກົງ​ກັບ​ບົດບາດ​ແລະ​ຄວາມ​ຮັບ​ຜິດ​ຊອບ​ຂອງຫົວໜ້າ​ອົງການ​ຂ່າວ, ວິທະຍຸ​ແລະ​ໂທລະພາບ​ທຸກ​ຂັ້ນ. ​ໃນ​ການ​ສ້າງ​ແຜນການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານປະຈຳ​ປີ, ຕ້ອງ​ຕິດຕາມ​ໜ້າ​ທີ່​ທີ່​ກຳນົດ​ໄວ້​ໃນ​ແຜນການ​ປະຕິ​ຮູບ​ການ​ບໍລິຫານປະຈຳ​ປີ​ຂອງ​ກະຊວງ, ຂະ​ແໜງ​ການ, ທ້ອງ​ຖິ່ນ; ໜ້າ​ທີ່​ໂຄສະນາ​ໃນ​ແຜນການ​ຕ້ອງ​ກຳນົດ​ແຈ້ງຜະລິດ​ຕະພັນ, ຜົນ​ຈະ​ໄດ້​ຮັບ ​ແລະ​​ເວລາ​ສຳ​ເລັດ; ຈັດ​ສັນ​ເງິນ​ທຶນ​ໃຫ້​ພຽງພໍ​ເພື່ອ​ດຳ​ເນີນ​ການ​ຕາມ​ແຜນ. ຕ້ອງ​ກວດກາ​ແລະ​ຊຸກຍູ້​ເປັນ​ປະຈຳ, ​ເຊື່ອມ​ຊຶມ​ແລະ​ກຳນົດ​ທິດ​ຢ່າງ​ລະອຽດຊັດ​ເຈນ ສຳລັບ​ອົງການ​ຂ່າວ, ສະຖານີ​ວິທະຍຸ​ແລະ​ໂທລະພາບ​ຢູ່​ຂັ້ນ​ສູນ​ກາງ​ແລະ​ທ້ອງ​ຖິ່ນ ​ໃນ​ການ​ປະ​ຕິ​ບັດ​ໜ້າ​ທີ່​ໂຄສະນາ, ຮັບ​ປະກັນ​ໃຫ້​ວຽກ​ງານ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ມີ​ປະສິດທິ​ຜົນ​ແລະ​ຖືກຕ້ອງ​ຕາມ​ເປົ້າ​ໝາຍ​ທີ່​ໄດ້​ວາງ​ໄວ້.

ທີ​ສອງ, ຍົກ​ສູງ​ຄຸນ​ນະພາ​ບ ​ແລະ​ເນື້ອ​ໃນ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ​ເພື່ອ​ຕອບ​ສະໜອງ​ຄວາມ​ຕ້ອງການ​ແລະ​ເປົ້າ​ໝາຍ​ຂອງ​ວຽກ​ງານການຄຸ້ມ​ຄອງ, ພ້ອມ​ກັນ​ນັ້ນ​ກໍ່ດຶງ​ດູດ​ຄວາມ​ສົນ​ໃຈ​ຂອງ​ປະຊາຊົນ​ແລະ​ສັງຄົມ. ​ເນື້ອ​ໃນ​ໂຄສະນາກ່ຽວ​ກັບການ​ປະຕິ​ຮູບ​ການ​ບໍລິຫານຕ້ອງ​ຕິດ​ແໜ້ນກັບ​ທັດສະນະ, ​ແຜນ​ນະ​ໂຍບາຍ, ​ແນວທາງ​ຂອງ​ພັກ ​ແລະ​ຂໍ້​ກຳນົດ​ຂອງ​ລັດ, ລັດຖະບານ​ກ່ຽວ​ກັບການ​ປະຕິ​ຮູບ​ການ​ບໍລິຫານ, ແລະຕິດ​ແໜ້ນ​ກັບ​ບັນດາ​ແຜນການ​ປະຕິ​ຮູບ​ການ​ບໍລິຫານປະຈຳ​ປີ​ຂອງກະຊວງ, ຂະ​ແໜງ​ການ​ແລະ​ທ້ອງ​ຖິ່ນ; ກຳນົດ​ແຈ້ງ​ຈຸດ​ໜັກ​ໃຈກາງ​ຂອງ​ການ​ໂຄສະນາ​ທີ່​ສອດຄ່ອງ​ກັບ​ຈຸດ​ເວລາ​ແລະ​ເປົ້າ​ໝາຍຂອງ​ການ​ໂຄສະນາ, ຖ່າຍ​ທອດ​ຢ່າງ​ທັນ​ການ​ ກ່ຽວ​ກັບ​ບັນດາ​ຜົນສຳ​ເລັດ​ທີ່​ບັນລຸ​ໄດ້, ບັນດາ​ຮູບ​ແບບ​ການ​ປະຕິ​ຮູບ​ໃໝ່ ລວມທັງ​ຂໍ້​ຈຳກັດ, ຄວາມ​ບົດ​ພ່ອງ​ໃນ​ຂະ​ບວນວິວັດ​ການ​ປະຕິບັດ​ໜ້າ​ທີ່ການ​ປະຕິ​ຮູບ​ການ​ບໍລິຫານ ຢູ່​ບັນດາ​ກະຊວງ, ຂະ​ແໜງ​ການ ​ແລະ​ທ້ອງ​ຖິ່ນ. ຕ້ອງ​ຄົ້ນຄວ້າ, ປ່ຽນ​ແປງ​ໃໝ່​ຮູບ​ການ​ແລະ​ເນື້ອ​ໃນ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ​ໃຫ້​ສອດຄ່ອງ​ເໝາະ​ສົມ ​ເພື່ອດຶງ​ດູດ​ຄວາມ​ເອົາ​ໃນ​​ໃສ່ຂອງ​ປະຊາຊົນ​ແລະ​ສັງຄົມ; ຕອບ​ສະໜອງ​ຄວາມ​ຕ້ອງການ​ກ່ຽວ​ກັບ​ຄວາມ​ເປັນ​ປົກກະຕິ, ຕໍ່​ເນື່ອງ, ຫຼາຍ​ດ້ານ​ແລະ​ສອດຄ່ອງ​ກັບລະດັບ​ຄວາມ​ຮູ້​ຂອງ​ປະຊາຊົນ​ແລະ​ພື້ນ​ທີ່​ໂຄສະນາ. ຄຽງ​ຂ້າງ​ນັ້ນ, ບັນດາ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານຂອງ​ບັນດາ​ກະຊວງ, ຂະ​ແໜງ​ການ​, ທ້ອງ​ຖິ່ນ​ ຕ້ອງ​ປະກອບສ່ວນ​ຢ່າງ​ໄດ້​ການ​ໄດ້​ງານ​ເຂົ້າ​ໃນ​ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຕອບ​ໂຕ້​ປະຕິ​ເສດ​ຢ່າງ​ທັນ​ການ ​ຕໍ່​ຂໍ້​ມູນ​ທີ່ບິດ​ເບືອນ​ໃສ່​ຮ້າຍ, ຜິດ​ກັບ​ຄວາມ​ຈິງ ກ່ຽວ​ກັບ​ການ​ເຄື່ອນ​ໄຫວ​ຂອງ​ອຳນາດ​ການ​ປົກຄອງ​ຂັ້ນ​ຕ່າງໆ​ ໃນ​ການ​ປະຕິບັດການ​ປະຕິ​ຮູບ​ການ​ບໍລິຫານ, ຮັບ​​ໃຊ້​ປະຊາຊົນ.

ທີ​ສາມ, ທົບ​ທວນ​ແລະ​ກະຈາຍ​ຮູບ​ແບບ​ການ​ໂຄສະນາ​ຢ່າງ​ສະ​ໝ່ຳສະ​ເໝີ, ນຳ​ໃຊ້​ເປັນ​ຢ່າງ​ດີ​ ເຕັກ​ໂນ​ໂລ​ຊີ​ຂໍ້​ມູນ​ແລະ​ການ​ສື່ສານ​ໃນ​ການ​ໂຄສະນາ​ ກ່ຽວ​ກັບການ​ປະຕິ​ຮູບ​ການ​ບໍລິຫານ. ສືບ​ຕໍ່​ຍູ້​ແຮງ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ​ໃນ​ໜັງສືພິມ​ດັ້ງ​ເດີມ​ທຸກ​ປະ​ເພດ ​ແລະ ​ໃນ​ສື່​ມວນ​ຊົນ​ຈາກ​ສູນ​ກາງ​ເຖິງ​ລະດັບ​ທ້ອງ​ຖິ່ນ. ພ້ອມ​ກັນ​ນັ້ນ, ​ເພີ່ມ​ທະວີ​ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ແລະ​ການ​ສື່ສານ​ ໃນ​ວຽກ​ງານ​​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ, ສົ່ງ​ເສີມ​ແລະ​ນຳ​ໃຊ້​ເຄືອ​ຂ່າຍ​ສັງຄົມທີ່​ມີ​ຜູ້​ໃຊ້​ຫຼາຍ​ຄົນ​ຢ່າງ​ມີ​ປະສິດທິ​ຜົນ (​ເຊັ່ນ Zalo, Facebook, Youtube...) ​ໃນ​ການ​ໂຄສະນາກ່ຽວ​ກັບ​ບັນດາ​ເນື້ອ​ໃນການ​ປະຕິ​ຮູບ​ການ​ບໍລິຫານ ຢູ່​ກະຊວງ, ຂະ​ແໜງ​ການ, ທ້ອງ​ຖິ່ນ; ຄົ້ນຄວ້າ​ເພື່ອ​ນຳ​ເອົາ​ຫົວ​ຂໍ້​ແລະ​ບົດ​ຄວາມ​ຕ່າງໆ​ກ່ຽວ​ກັບການ​ປະຕິ​ຮູບ​ການ​ບໍລິຫານ ​ເຂົ້າ​ໃນ​ເວັບ​ໄຊການ​ປະຕິ​ຮູບ​ການ​ບໍລິຫານ ຂອງ​ຫ້ອງການ​ຄະນະ​ກຳມະການ​ຊີ້​ນຳການ​ປະຕິ​ຮູບ​ການ​ບໍລິຫານ ຂອງ​ລັດຖະບານ, ​ເພື່ອ​ຮັບ​ໃຊ້​ໃຫ້​ແກ່​ການສຶກສາ ​ຮ່ຳຮຽນຂອງ​ຖັນ​ແຖວ​ພະນັກງານ ລັດຖະກອນ ພາລະ​ກອນ. ​ແຈກ​ຈ່າຍ​ແຜ່ນ​ພັບ ​ແຜ່ນ​ໂປ​ເຕີ ປ້າຍ​ໂຄສະນາ​ທີ່​ກ່ຽວຂ້ອງ​ເຖິງການ​ປະຕິ​ຮູບ​ການ​ບໍລິຫານ, ສອດຄ່ອງ​ກັບ​ເປົ້າ​ໝາຍ ຄວາມຮຽກຮ້ອງ​ຕ້ອງການ ​​ແລະ​ເນື້ອ​ໃນ​ໂຄສະນາ ​ເພື່ອ​ເຜີຍ​ແຜ່​ໃຫ້​ແຕ່​ລະ​ກຸ່ມ​ປະຊາຊົນ; ​ເອົາ​ເນື້ອ​ໃນການ​ປະຕິ​ຮູບ​ການ​ບໍລິຫານ​ເຂົ້າ​ໃນ​ບັນດາກອງ​ປະຊຸມ​ ໂຄສະນາ​ ເຜີຍ​​ແຜ່​ກົດໝາຍ. ຍູ້​ແຮງ​ການ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ຜ່ານ​ບັນດາ​ຮູບ​ການ​ອື່ນ​ເຊັ່ນ: ຈັດການ​ແຂ່ງຂັນ​ເພື່ອ​ຮຽນ​ຮູ້​ນະ​ໂຍບາຍ​ແລະ​ກົດໝາຍ​ກ່ຽວ​ກັບການ​ປະຕິ​ຮູບ​ການ​ບໍລິຫານ; ປະ​ກວດ​ຄວາມ​ຄິດ​ລິ​ເລີ່​ມການ​ປະຕິ​ຮູບ​ການ​ບໍລິຫານ ຫຼືຫຼິ້ນ​ລະຄອນ​ເວທີ​ທີ່​ມີ​ເນື້ອ​​ໃນ​ໂຄສະນາກ່ຽວ​ກັບການ​ປະຕິ​ຮູບ​ການ​ບໍລິຫານ.

ທີ​ສີ່, ​ເພີ່ມ​ທະວີ​ການ​ປະສານ​ງານ​ລະຫວ່າງ​ອົງການ​ທີ່​ຮັບຜິດຊອບ​ໃນ​ການ​ປະຕິບັດ​ໜ້າ​ທີ່ການ​ປະຕິ​ຮູບ​ການ​ບໍລິຫານ ກັບ​​ສຳນັກ​ຂ່າວ, ໜັງສືພິມ. ບັນ​ດາ​ກະຊວງ, ຂະ​ແໜງ​ການ, ທ້ອງ​ຖິ່ນ ​ແລະ​ ໂດຍ​ສະ​ເພາະ​ແມ່ນ​ອົງການ​ທີ່​ໄດ້​ຮັບ​ມອບ​ໝາຍ​ຈາກ​ລັດຖະບານ​ໃຫ້​​ເປັນ​ປະທານ​ໃນ​ການ​ຜັນ​ຂະຫຍາຍ 6 ​ເນື້ອ​ໃນ​ປະຕິ​ຮູບ​ການ​ບໍລິຫານ ຈະຕ້ອງມີ​ການ​ປະ​ຊຸມ​ກັບ​ຕົວ​ແທນ​ສື່​ມວນ​ຊົນ​ເປັນ​ປະຈຳ ​ເພື່ອ​ໃຫ້​ຂໍ້​ມູນ​ກ່ຽວ​ກັບ​ຄວາມ​ຄືບ​ໜ້າ​ແລະ​ຜົນ​ໄດ້​ຮັບ​ໃນ​ການປະຕິບັດ​ໜ້າ​ທີ່​ປະຕິ​ຮູບ​ການ​ບໍລິຫານ; ພ້ອມ​ກັນ​ນັ້ນກໍ່​ຕອບ​ຄຳ​ຖາມ​ກ່ຽວ​ກັບຄວາມ​ຈຳກັດ ຂໍ້ບົກພ່ອງ ​ແລະ ​ທິດ​ທາງ​ແກ້​ໄຂ ທີ່​ກ່ຽວຂ້ອງ​ກັບການ​ປະຕິ​ຮູບ​ການ​ບໍລິຫານ ພາຍ​ໃນ​ຂອດ​ເຂດ​ການ​ຄຸ້ມ​ຄອງ​ຂອງ​ກະຊວງ, ຂະ​ແໜງ​ການ, ທ້ອງ​ຖິ່ນ, ​ໂດຍ​ສະ​ເພາະ​ແມ່ນ​ ​ບັນຫາທີ່​ຄົນ​ສ່ວນ​ຫຼາຍ​ກັງວົນ. ຕ້ອງການ​ສ້າງ​ໂຄງການ​ເພື່ອ​ປະສານ​ງານ​ໂຄສະນາ​ໃນ​ແຕ່ລະ​ໄລຍະ​ ຫຼື​ປະຈຳ​ປີ​ ກັບສຳນັກ​ຂ່າວ; ອົງການຈັດ​ຕັ້ງ​ປະຊາຊົນ ​ເພື່ອ​ເພີ່ມ​ທະວີ​ກາ​ນສື່ສານ​ແລະ​ໂຄສະນາ​ກ່ຽວ​ກັບການ​ປະຕິ​ຮູບ​ການ​ບໍລິຫານ ພາຍ​ໃນ​ຂົງ​ເຂດ​ການ​ຄຸ້ມ​ຄອງ. ຄຽງ​ຂ້າງ​ນັ້ນ, ຕ້ອງ​ເອົາ​ໃຈ​ໃສ່​ຢ່າງ​ເປັນ​ປະຈຳ​ເຖິງ​ການ​ບຳລຸງ​ສ້າງ ຝຶກ​ອົບຮົມ ຍົກ​ສູງ​ຄວາມ​ຮັບຜິດຊອບ, ທັກ​ສະ​ຄວາມ​ສາມາດ​ດ້ານ​ວິ​ຊາ​ສະ​ເພາະ ​ແລະ ປັບປຸງ​ຄວາມ​ຮູ້​ໃຫ້​ຖັນ​ແຖວນັກ​ຂ່າວ, ບັນນາທິການ​ທີ່​ຮັບຜິດຊອບ​ໜ້າ​ພິ​ເສດ​ແລະຫົວ​ຂໍ້​ພິ​ເສດທີ່​ກ່ຽວຂ້ອງກັບການ​ປະຕິ​ຮູບ​ການ​ບໍລິຫານ, ຮັບປະກັນ​ໃຫ້​ມີ​ຂໍ້​ມູນ​ທີ່​ທັນ​ເວລາ, ຖືກຕ້ອງ​​ແລະ​ເປັນ​ປະ​ໂຫຍ​ດ.

ທີ​ຫ້າ, ​ເພີ່ມ​ທະວີ​ການ​ເຂົ້າ​ຮ່ວມ​ຂອງ​ປະຊາຊົນ, ວິ​ສາ​ຫະກິດ ​ແລະ ບັນດາ​ອົງການ​ຈັດ​ຕັ້ງ​ສັງຄົມ ​ໃນ​ຂະ​ບວນການ​ຕິດຕາມ​ກວດກາ ​ແລະ​ຈັດ​ຕັ້ງ​ປະຕິບັດ​ໜ້າ​ທີ່ການ​ປະຕິ​ຮູບ​ການ​ບໍລິຫານ ຂອງ​ກະຊວງ, ຂະ​ແໜງ​ການ, ທ້ອງ​ຖິ່ນ, ​ເພື່ອ​ແນ​ໃສ່​ເສີມ​ຂະ​ຫຍາ​ຍສິດ​ເປັນ​ເຈົ້າ​ຂອງ​ປະຊາຊົນ​ໃນການ​ປະຕິ​ຮູບ​ການ​ບໍລິຫານ. ສຸມ​ໃສ່​ປະຕິບັດ​ເປັນ​ຢ່າງ​ດີ ຄຳ​ສັ່ງ​ເລກທີ 10/CT-TTg, ວັນ​ທີ 22 ​ເມສາ 2019, ຂອງ​ນາຍົກລັດຖະມົນຕີ “ວ່າ​ດ້ວຍ​ການ​ເພີ່ມ​ທະວີ​ການ​ແກ້​ໄຂ​ແລະ​ກີດ​ກັ້ນ​ຢ່າງ​ມີ​ປະສິດທິ​ຜົນ ສະພາບ​ການ​ລົບ​ກວນ​ ກໍ່​ຄວາມ​ລຳ​ຄານ​ໃຈ​ໃຫ້ກັບ​ປະຊາຊົນ​ແລະ​ວິ​ສາ​ຫະກິດ ທີ່​ມາ​ແກ້​ໄຂ​ວຽກ​ງານ”. ຈັດ​ຕັ້ງ​ເປັນ​ຢ່າງ​ດີ ​ຊ່ອງ​ທາງ​ໃນ​ການ​ຮັບ​ແລະ​ຈັດການການ​ສ່ອງ​ແສງ​ແລະ​ຂໍ້​ສະ​ເໜີ​​ແນະຂອງບຸກຄົນ​ແລະ​ອົງການຈັດ​ຕັ້ງ ກ່ຽວ​ກັບ​ບັນຫາ​ທີ່​ກ່ຽວ​ຂ້ອງກັບການ​ປະຕິ​ຮູບ​ການ​ບໍລິຫານ, ​ໂດຍ​ສະ​ເພາະ​ແມ່ນຂໍ້​ກຳນົດ​ຂັ້ນ​ຕອນ​ການ​ບໍລິຫານ ຫຼື​ການ​ລົບ​ກວນ​ແລະການ​ລ່ວງ​ລະ​ເມີດຂອງ​ພະນັກງານ​ລັດຖະກອນ ​ເມື່ອ​ແກ້​ໄຂ​ເອກະສານ​ຂັ້ນ​ຕອນ​ການ​ບໍລິຫານ; ​ເສີມ​ຂະຫຍາຍ​ບົດບາດ​ຂອງຄະນະ​ທີ່​ປຶກສາ​ການ​ປະຕິ​ຮູບ​ຂັ້ນ​ຕອນ​ການ​ບໍລິຫານ​ຂ​ອງນາຍົກລັດຖະມົນຕີ. ຜ່ານ​ສິ່ງ​ດັ່ງກ່າວ, ອົງການ​ບໍລິຫານ​ລັດຈະກຳ​ໄດ້ຄວາມ​ຕ້ອງການ, ຄວາມ​ປາຖະໜາ​ ​ແລະ​ຂໍ້​ສະ​ເໜີ​ແນະ​ຂອງປະຊາຊົນ, ອົງການ​ຈັດ​ຕັ້ງ ​ເພື່ອ​ຈະ​ໄດ້​ຜັນ​ຂະຫຍາຍ​ປະຕິບັດການ​ປະຕິ​ຮູບ​ການ​ບໍລິຫານຢ່າງ​ມີ​ປະສິດທິ​ຜົນ​ຕົວ​ຈິງ​ຫຼາຍ​ກວ່າອີກ. ພ້ອມ​ກັນ​ນັ້ນ, ຈັດ​ເວທີ​ສົນທະນາ​ອອນ​ໄລ​ຢ່າງ​ເປັນ​ປະຈຳ​ລະຫວ່າງ​ຜູ້ນຳ​ອຳນາດ​ການ​ປົກຄອງ​ທຸກ​ຂັ້ນ ກັບ​ປະຊາຊົນ​ແລະ​ວິ​ສາ​ຫະກິດ​ ເພື່ອຕອບ​ແລະ​​ເຜີຍ​ແຜ່​ນະ​ໂຍບາຍ​ໃໝ່​ທັນທີ ​ເຊັ່ນ​ດຽວ​ກັນ​ກັບ​ການ​ແກ້​ໄຂ​ຄວາມ​ຫຍຸ້ງຍາກ​ແລະ​ອຸປະສັກ​ທີ່​ຂັດຂວາງ​ການ​ຜະລິດ, ທຸລະ​ກິດ​ຂອງ​ປະຊາຊົນ​ແລະ​ວິ​ສາ​ຫະກິດ. ດຳ​ເນີນ​ການ​ສຳ​ຫຼວດ​ເປັນ​ໄລຍະ ​ແລະຕີ​ລາຄາ​ປະສິດທິ​ຜົນ​ຂອງ​ວຽກ​ງານ​ການ​ສື່ສານ, ​ໂຄສະນາ​ກ່ຽວ​ກັບ​ການ​ປະຕິ​ຮູບ​ການ​ບໍລິຫານ (ດຳ​ເນີນ​ການ​ສຳ​ຫຼວດ​ໃນ​ປະຊາຊົນ, ວິ​ສາ​ຫະກິດ, ພາຍ​ໃນ​ສຳນັກງານ​ອົງການ...)./.

​ໂດຍ ​ເຈືອງ​ຮ່ວາ​ບິ່ງ

ກຳ​ມະການ​ກົມ​ການ​ເມືອງ, ຮອງ​ນາຍົກລັດຖະມົນຕີຜູ້​ປະຈຳການ​ລັດຖະບານ,

ຫົວໜ້າ​ຄະນະກຳມະການ​ຊີ້​ນຳ​ການ​ປະຕິ​ຮູບ​ການ​ບໍລິຫານ​ຂອງ​ລັດຖະບານ

-------------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ​ ສະບັບ​ທີ 920 (​ເດືອນ​ມິຖຸນາ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ