ວັນສຸກ, 21/9/2018
ວຽກງານສື່ຂ່າວດ້ານການພົວພັນຕ່າງປະເທດ ໄດ້ປະກອບສ່ວນເຂົ້າໃນ ຜົນງານແຫ່ງການພົວພັນຕ່າງປະເທດ ຂອງຫວຽດນາມ ໃນປີ 2017 ແລະ ສ້າງປະຖົມປັດໄຈທີ່ໜັກແໜ້ນໃຫ້ແກ່ປີ 2018
9/5/2018 17:51' ສົ່ງ ພິມ
ພາບປະກອບ (ພາບ:tuyengiao.vn)

ການຜັນຂະຫຍາຍວຽກງານຂ່າວສານ​ດ້ານການພົວພັນຕ່າງປະເທດຢ່າງຕັ້ງໜ້າ​ແລະມີ​ປະສິດ​ຜົນນັ້ນ ໄດ້​ຊ່ວຍໃຫ້ຜົນງານຕ່າງໆ​ ຂອງການພົວພັນຕ່າງປະເທດ​ແຜ່ລາມ​ໄປ​ທົ່ວ ດ້ວຍຜົນກະທົບຢ່າງແຂງແຮງ. ອາດ​ຈະ​ເວົ້າ​ໄດ້​ວ່າ, ການເຄື່ອນໄຫວສື່ຂ່າວດ້ານການພົວພັນຕ່າງປະເທດ ​ໃນປີ​ທີ່​ຜ່ານ​ມາ ມີ​ຄວາມ​ຟົດຟື້ນ ກວ້າງຂວາງ​ເລິກ​ເຊິ່ງທີ່​ສຸດ ​ແລະ ບັນລຸ​ຜົນ​ງານ​ທີ່​ມີ​ຄວາມ​ໝາຍ​ຫຼາຍ​ຢ່າງ.

ວຽກ​ງານ​ຂ່າວສານ​ດ້ານ​ການພົວພັນ​ຕ່າງປະເທດ​ປີ 2017: ​ໂອ​ກາດ​ແລະ​ສິ່ງ​ທ້າ​ທາຍ​ແຊກ​ຊ້ອນ​ກັນ

ປີ 2017, ພາຍຫຼັງ​ຫຼາຍ​ປີ​​ແຫ່ງ​ການ​ຢຸດ​ສະ​ຫງັກ​ຊັກ​ຊ້າ, ເສດຖະກິດ​ໂລກ​ໄດ້​ມີ​ການ​ພັດທະນາ​ຢ່າງ​ຕັ້ງໜ້າ ​ດ້ວຍການ​ເຕີບ​ໂຕ​ເພີ່ມ​ຂຶ້ນ​ຂອງ​ບັນດາ​ພື້ນຖານ​ເສດຖະກິດທີ່ສຳຄັນ ແລະ ການ​ເບັ່ງ​ບານຂອງການ​ຄ້າພານິດ​ໃນ​ທົ່ວ​ໂລກ. ໃນຂະນະນັ້ນ, ສະພາບການການເມືອງສາກົນແລະພາກພື້ນ ມີການ​ຫັນປ່ຽນຢ່າງໄວ​ວາ ສັບສົນ, ການກະທົບ​ຊຶ່ງ​ກັນ​ແລະ​ກັນລະຫວ່າງບັນດາປະເທດໃຫຍ່, ບັນດາສູນການເມືອງ - ເສດຖະກິດ ກໍ​ສືບ​ຕໍ່​ເພີ່ມ​ຂຶ້ນ. ບັນດາ​ປະ​ເທດ​ໃຫຍ່ມີການດັດແປງນະໂຍບາຍ ແລະ ປ່ຽນແປງພາຍໃນ. ປະທານາທິບໍດີອາເມລິກາ ​ໂດ​ນັນ ທຣັມ ໃນປີທຳອິດ​ແຫ່ງ​ການກຳອຳນາດ ໄດ້ປະຕິບັດການປ່ຽນແປງຫຼາຍຢ່າງ ກ່ຽວກັບນະໂຍບາຍ​ພົວພັນພາຍໃນ ແລະ ພົວພັນຕ່າງປະເທດຕາມທິດ “ປະເທດອາເມລິກາເປັນອັນດັບໜຶ່ງ”, ບຸລິມະສິດການຊຸກຍູ້​ເສດຖະກິດ​ພາຍ​ໃນ​ປະ​ເທດ. ປະເທດຈີນດ້ວຍການຈັດຕັ້ງກອງປະຊຸມໃຫຍ່ພັກກອມມູນິດຈີນ ຄັ້ງທີ XIX ​ໄດ້​ຢືນຢັນ​ບົດບາດ​ຖານະ “ແກ່ນສານນຳພາ” ຂອງເລຂາທິການໃຫຍ່, ປະທານປະເທດ ສີຈີ້ນຜິງ ແລະ “ແນວຄິດສີ​ຈີ້ນຜິງ ກ່ຽວກັບສັງຄົມນິຍົມພິເສດຂອງຈີນ ໃນສະໄໝໃໝ່”, ກຳນົດເປົ້າໝາຍກ່ຽວກັບການເຮັດໃຫ້ປະເທດຈີນ​ກາຍເປັນປະເທດມະຫາອຳນາດອັນດັບໜຶ່ງຂອງໂລກ ໃນກາງສະຕະວັດທີ XXI, ເພີ່ມທະວີກຳລັງຄວາມ​ສາມາດບົ່ມຊ້ອນໃນທຸກດ້ານ ເສດຖະກິດ, ການທະຫານ, ວິທະຍາສາດ - ເຕັກນິກ... ໃນທະວີບເອີຣົບ, ​ໄດ້​ມີ​ການເລືອກຕັ້ງທີ່ສຳຄັນຢູ່ຫຼາຍປະ​ເທດ (ເຢຍລະມັນ, ຝຣັ່ງ, ​ໂອຕຣິດ...); ສະ­ຫະພັນເອີຣົບ (ອີ​ຢູ) ​ເຖິງ​ວ່າ​ມີ​ການ​ເຕີບ​ໂຕເສດຖະກິດຕາມ​ທາງ​ບວກ​ກໍຕາມ ແຕ່ກໍສືບຕໍ່ຖືກແຕກແຍກທາງດ້ານກຳນົດທິດ​ພັດທະນາ, ຂະ​ບວນການ​ເຈລະຈາກ່ຽວກັບການຖອນຕົວອອກຈາກສະຫະພາບເອີຣົບຂອງອັງກິດ ເບຣຊິດ (Brexit) ກໍ​ພົບ​ຄວາມ​ຫຍຸ້ງຍາກ​ຫຼາຍຢ່າງ. ສະຖານະການໂລກເທື່ອທຳອິດມີເຄື່ອງໝາຍປ່ຽນແປງ​ຢ່າງແຂງແຮງ ພາຍຫຼັງສົງຄາມເຢັນ, ​ໃນ​ເວລາ​ທີ່​ບັນດາກົນໄກເກົ່າຢືນຕໍ່ໜ້າຄວາມທົດສອບຖືກສູນ​ເສຍ​ບົດບາດ​ຂອງ​ຕົນ, ພັດ​ມີບັນດາກົນໄກ​ໃໝ່ ກົນ​ໄກ​ອະນຸ​ພາກ​ພື້ນ, ພາກພື້ນ, ລະຫວ່າງພາກ​ພື້ນຄື ເວທີປາໄສຂັ້ນສູງການຮ່ວມມືສາກົນ “​ແລວ​ທາງ, ເສັ້ນທາງ” ຕາມ​ຄວາມ​ຄິດ​ລິ​ເລີ່​ມຂອງຈີນ; ສະຫະພັນເສດຖະກິດ ອາຊີ - ເອຣົບ (EAEU) ​ໄດ້​ຮັບ​ການ​ເປີດ​ກວ້າງ​ໂດຍ​ການ​ຊຸກຍູ້​ຂອງລັ​ດ​ເຊຍ... ດ້ານ​ອື່ນ, ສະພາບບໍ່​ມີຄ​ວາ​ມສະຫງົບທາງດ້ານການເມືອງແບບພາກສ່ວນ, ການ​ປະ​ທະ​ກັນ​ທາງ​ດ້ານ​ຊົນ​ເຜົ່າ ກໍໄດ້ເກີດຂຶ້ນຢູ່​ຫຼາຍ​ແຫ່ງໃນໂລກ, ສິ່ງ​ທ້າ​ທາຍ​ຕໍ່ຄວາມ​ປອດ​ໄພແບບດັ້ງ​ເດີມ ແລະ ຄວາມປອດ​ໄພ​ທີ່ບໍ່ເປັນແບບດັ້ງເດີມ, ຄືການປ່ຽນແປງດິນຟ້າອາກາດ, ການກໍ່ການຮ້າຍ, ການອົບພະຍົບ​ເຂົ້າ​ເມືອງ,... ສືບຕໍ່ເກີດຂຶ້ນ​ຢ່າງເຄັ່ງຮ້ອນ. ຢູ່ອາຊີຕາເວັນອອກສຽງເໜືອ, ຄວາມເຄັ່ງຕຶງເພີ່ມຂຶ້ນຢູ່ແຫຼັມເກົາຫຼີ. ຢູ່​ຕາ​ເວັນ​ອອກ​ກາງ, ບັນດາຈຸດຮ້ອນກໍບໍ່ຫຼຸດຜ່ອນຄວາມຮ້ອນ ຊ້ຳ​ບໍ່​ໜຳ​ຍັງ​ມີ​ຄວາມ​ສັບສົນ​ກວ່າ​ອີກ ຍ້ອນ​ການ​ວິ​ກິດ​ດ້ານ​ການ​ພົວພັນ​ທາງ​ການທູດ ລະຫວ່າງບັນດາປະເທດຢູ່​ເຂດອ່າວເປີເຊຍ. ​ເອີຣົບ​ໄດ້​ກາຍ​ເປັນ​ເປົ້າ​ໝາຍ​ຂອງ​ການ​ກໍ່​ການ​ຮ້າຍຢ່າງ​ຕໍ່ເນື່ອງ. ອາດຈະເວົ້າໄດ້ວ່າ, ລັກສະນະບໍ່ຄົງທີ່ ແລະບໍ່ມີຄວາມໝັ້ນຄົງ ​ໃນ​ສະພາບ​ແວດ​ລ້ອມ​ແຫ່ງ​ກາ​ນພົວພັນ​ສາກົນ ພວມເພີ່ມຂຶ້ນ.

​ສະ­ຖາ­ນະ​ການດັ່ງກ່າວໄດ້ສົ່ງຜົນສະທ້ອນເຖິງບັນດາປະເທດຂະໜາດກາງ ແລະຂະໜາດນ້ອຍຄື ຫວຽດນາມ, ເຊິ່ງຮຽກຮ້ອງ​ໃຫ້ວຽກງານຂ່າວສານດ້ານພົວພັນຕ່າງປະເທດ ຕ້ອງມີຄວາມໄຫວພິບຢ່າງເໝາະ​ສົມ ເພື່ອຮັບໃຊ້​ເປັນ​ຢ່າງ​ດີ ໃຫ້ແກ່ບັນດາການບຸລິມະສິດ ໜ້າທີ່ພົວພັນຕ່າງປະເທດ​ ໃນ​ສະພາບ​ການ​ທົດສອບ​ໃໝ່. ໃນສະພາບການສັບສົນ ແລະຄາດເດົາຍາກດັ່ງກ່າວນັ້ນ, ວຽກງານພົວພັນຕ່າງປະເທດຂອງພັກ ແລະລັດຫວຽດນາມ ໄດ້ດຳ​ເນີນ​ໄປ​ຢ່າງຕັ້ງໜ້າທີ່​ສຸດ, ​ເປັນ​ສິ່ງ​ພິສູດ​ຢ່າງ​ມີ​ຊີວິດ​ຊີວາ ​ໃຫ້​ແກ່ການ​ຜັນ​ຂະຫຍາຍ​ຢ່າ​ວມີປະສິດທິຜົນ ແນວ­ທາງການພົວພັນຕ່າງປະເທດ ຂອງກອງປະຊຸມໃຫຍ່ ຄັ້ງທີ XII ຂອງພັກກອມມູນິດ ຫວຽດນາມ ກ່ຽວກັບການເຊື່ອມໂຍງສາກົນຢ່າງເລິກເຊິ່ງກວ້າງຂວາງ. ນີ້ແມ່ນປີທີ່​ມີ​ເຫດການ​ການ​ພົວພັນ​ຕ່າງປະ​ເທດທີ່​ສຳ­ຄັນເປັນຈຳ­ນວນ​ຫຼາຍ ແລະມີຜົນສຳເລັດ ທາງດ້ານ​ການ​ພົວພັນຫຼາຍຝ່າຍ ແລະສອງຝ່າຍ.

ປີ ເອເປັກ ຫວຽດນາມ 2017 - ເຫດການພົວພັນຕ່າງປະເທດໃຫຍ່ທີ່ສຸດຂອງປະເທດ ​ໄດ້​ຮັບ​ຜົນສຳ​ເລັດ​ໃນ​ຫຼາຍ​ດ້ານດ້ວຍລະດັບສູງສຸດ: ມີການເຄື່ອນໄຫວ​ແຕ່ຂະໜາດໃຫຍ່ຈົນຮອດຂະໜາດນ້ອຍ ເປັນຈຳນວນ 243 ເຫດການ ທີ່ໄດ້ຈັດຕັ້ງຢູ່ 10 ທ້ອງຖິ່ນໃນທົ່ວປະເທດ;  ສັບປະດາຂັ້ນສຸດຍອດ ເອເປັດ ທີ່ໄດ້ຈັດຕັ້ງຢູ່ນະຄອນ ດ່າ​ໜັງ ດ້ວຍການເຂົ້າຮ່ວມຢ່າງຄົບໜ້າ​ຄົບ​ຕາ ​ຈາກການນຳ​ຂອງ 21 ພື້ນຖານເສດຖະກິດ ​ແລະ ການ​ເຂົ້າ​ຮ່ວມ​ຂອງຜູ້ແທນຫຼາຍ​ກວ່າ 11.000 ຄົນ, ໃນນັ້ນ ນັກ​ຂ່າວສາກົນ 2.000 ຄົນ, ນັກວິ​ສາຫະກິດ 4.000 ຄົນ, ມີຂໍ້ຕົກລົງ​ແລະສັນຍາ ກ່ຽວ​ກັບ​ການ​ຮ່ວມ​ມື ທີ່​ໄດ້ລົງນາມເປັນຈຳນວນ 121 ສະບັບ ດ້ວຍມູນ​ຄ່າທັງໝົດເກືອບ 20 ຕື້ໂດລາສະຫະລັດ. ພິເສດ, ຫວຽດນາມໄດ້ສະແດງຄວາມ​ສາມາດຈັດຕັ້ງຢ່າງຊຳ​ນີ​ຊຳນານ ແລະ ​ໄດ້​ປະສານ​ງານ, ນຳພາການເຄື່ອນໄຫວຕ່າງໆຂອງ ເອເປັກ ຢ່າງດີເດັ່ນ, ໄກ່ເກ່ຍຄວາມແຕກຕ່າງກັນ, ກໍ່ສ້າງຄວາມ​ເປັນເອກະພາບຮ່ວມກັນ, ຮັກສາໄດ້​ຄຸນຄ່າຫຼັກ​ທີ່ສຳຄັນທີ່ສຸດຂອງ ເອເປັກ ຄື ການເຊື່ອມຕໍ່​ເສດ­ຖະກິດສາກົນ, ​ເປີດເສລີ​​ການ​ຄ້າແລະການລົງທຶນໃນທົ່ວໂລກ; ພ້ອມທັງ, ສະເໜີ​ບັນດາຄວາມຄິດ​ລິ​ເລີ່ມ, ພາການ​ຮ່ວມມື ເອເປັກ ໄປ​ເຖິງບາດກ້າວພັດທະນາໃໝ່ ​ແລະວິໄສທັດພາຍຫຼັງປີ 2020.

ທາງ​ດ້ານ​ການ​ພົວພັນ​ສອງຝ່າຍ, ອາດຈະເວົ້າໄດ້ວ່າ ປີນີ້​ມີ​ຄວາມຟົດເຟື້ອນພິ­ເສດ ໃນການພົວພັນລະຫວ່າງຫວຽດນາມ ແລະ ປະເທດຕ່າງໆ ດ້ວຍຫຼາຍຮູບ​ການ​ທີ່ບໍ່ເຄີຍມີມາກ່ອນ. ຫວຽດນາມ ໄດ້ດຳ​ເນີນແລກປ່ຽນ​ຄະນະຜູ້​ແທນຂັ້ນສູງ ທັງໝົດ 53 ຄະນະ, ໃນນັ້ນ ການນຳຫວຽດນາມ​ໄດ້​ດຳ​ເນີນ​ການ​ຢ້ຽມຢາມຕ່າງປະເທດ​ 18 ຄັ້ງ, ເຂົ້າຮ່ວມກອງປະຊຸມຫຼາຍຝ່າຍ 8 ຄັ້ງ, ຕ້ອນຮັບ​ການ​ຢ້ຽມຢາມ​ຂອງ​ຄະນະ​ຜູ້​ແທນການນຳຂັ້ນສູງຂອງປະເທດ​ຕ່າງໆ 35 ຄະນະ. ຫວຽດນາມກໍໄດ້​ຜັນ​ຂະຫຍາຍ​ການ​ເຄື່ອນ​ໄຫວ​ສະ​ເຫຼີມສະຫຼອງ ປີ​ສາມັກຄີມິດຕະພາບ ຫວຽດນາມ-ລາວ, ປີມິດ­ຕະພາບ ຫວຽດນາມ-ກຳປູເຈຍ, ສ້າງ​ຕັ້ງ​ການພົວພັນຄູ່ຮ່ວມມືຮອບດ້ານກັບ ການາດາ, ມຽນມາ ແລະ ມຸ່ງສູ່ຄູ່ຮ່ວມມືຍຸດທະສາດກັບ ອົດສ​ະຕຣາລີ.

ບັນດາ​ການເຄື່ອນໄຫວດັ່ງກ່າວເປັນອຸປະກອນອັນອຸດົມສົມບຸນໃຫ້ແກ່ຂ່າວສານການພົວພັນ​ຕ່າງປະເທດ  ແຕ່ກໍ່ວາງຄວາມຮຽກຮ້ອງຕ້ອງ​ການເຜີຍແຜ່ ບັນດາເນື້ອໃນເຫຼົ່ານີ້ ຢ່າງເລິກເຊິ່ງກວ້າງຂວາງ ​ໃນໝູ່​ປະຊາຊົນເປັນຈຳ­ນວນຫຼວງຫຼາຍຢູ່​ພາຍໃນ ແລະຕ່າງປະເທດ. ແຕ່ວ່າ, ຄຽງຄູ່ກັບບັນດາຜົນສຳເລັດອັນພົ້ນເດັ່ນ​ທາງດ້ານເສດຖະກິດ, ການເມືອງ - ສັງຄົມ, ການປ້ອງກັນຊາດ - ປ້ອງກັນຄວາມສະຫງົບ, ຊີວິດການເປັນຢູ່ຂອງ​ປະຊາຊົນໄດ້ຮັບການປົວແປງ... ກໍ່ມີບັນຫາທີ່ສັບສົນສືບຕໍ່ຄົງຕົວ, ເກີດຂຶ້ນໃໝ່ ເປັນຈຳນວນ​ຫຼາຍ, ເຊິ່ງໄດ້​ສົ່ງຜົນ​ກະທົບບໍ່ໜ້ອຍເຖິງ ສະພາບແວດລ້ອມການ​ສື່ຂ່າວດ້ານພົວ­ພັນຕ່າງປະເທດ, ​ເປັນ​ຜົນສະທ້ອນ​ສ່ວນ​ໃດສ່ວນ​ໜຶ່ງ​ເຖິງ ຮູບພາບຂອງປະເທດ ແລະ ວຽກງານພົວພັນຕ່າງປະເທດ ຂອງຫວຽດນາມ. ການ​ພັດທະນາ​ຢ່າງ​ໄວວາ ​ຂອງພາຫະນະ​ສື່ມວນຊົນ, ເຄືອຂ່າຍສັງຄົມ ໄດ້ສ້າງໂອກາດໃຫ້ວຽກ​ງານສື່​ຂ່າວ, ​ໂຄສະນາການ, ແຕ່ກໍ່ວາງອອກບັນ­ດາຄວາມທົດສອບໃໝ່. ຄືນັກຄົ້ນຄວ້າ ທອມ ​ແຟຼດ​ເຈີ (Tom Fletcher) ໄດ້ສັງ​ເກດ​ວ່າ: “ອາວຸດທີ່ອັນຕະລາຍທີ່ສຸດຂອງສະຕະວັດ XXI ບໍ່ແມ່ນອາຍພິດຊາຣິນ ຫຼື ລູກລະເບີດປະ​ລຳ​ມະນູ, ​ແຕ່ແມ່ນໂທລະສັບສະຫຼາດ” (1), ສະພາບການຂາດກົດຂໍ້ບັງຄັບ​ທີ່ຈຳເປັນ, ບັນຫາຮັກສາຄວາມລັບ​ດ້ານຂໍ້ມູນຂ່າວສານ, ລິຂະສິດດ້ານຂໍ້ມູນຂ່າວສານ, ລັກສະນະແທ້ຈິງຂອງແຫຼ່ງຂໍ້ມູນ, ຂໍ້ມູນຂ່າວສານທີ່ຍັງບໍ່ໄດ້​ກວດກາ,... ໄດ້ສ້າງເປັນຊ່ອງຫວ່າງ ເພື່ອ​ໃຫ້​ພວກຜູ້​ຮ້າຍ​ສວຍໃຊ້ເຄືອຂ່າຍສັງຄົມ ເພື່ອເສກສັນປັ້ນ​ແຕ່ງ, ບິດເບືອນ​ຂໍ້ມູນຂ່າວສານ, ກໍ່ຜົນສະທ້ອນ​ຫຍໍ້​ທໍ້ເຖິງຄວາມເປັນລະບຽບຮຽບຮ້ອຍທາງສັງຄົມ ກໍ່ຄື​ຮູບ​ພາບ ​ແລະ​ກຽດ​ສັກ​ສີຂອງປະເທດ. ການ​ສື່ຂ່າວດ້ານການພົວ­ພັນຕ່າງປະເທດ ຢືນຢູ່ຕໍ່­ໜ້າໜ້າທີ່ຕ້ອງ​​ໄປ​ທັນ​ກັບ ແລະໝູນໃຊ້​​ໄດ້​ເປັນ​ຢ່າງ​ດີ ​ເຕັກໂນໂລຊີໃໝ່​, ນັບທັງເຄືອຂ່າຍສັງຄົມ ໃນການໂຄສະນາ ແລະຕໍ່ສູ້ທາງຫາງສຽງສັງຄົມ; ພ້ອມທັງແກ້ໄຂ, ຫຼຸດຜ່ອນຜົນກະທົບ​ທາງ​ລົບ ຕໍ່ການພົວພັນຕ່າງປະເທດ, ພາບພົດ ແລະຜົນປະໂຫຍດຂອງ​ປະເທດ.

ຜົນສຳລັດຂອງວຽກ​ງານຂ່າວສານດ້ານການພົວພັນຕ່າປະເທດປີ 2017 - ສວຍໃຊ້ໂອກາດ, ຜ່ານຜ່າສິ່ງ​ທ້າ​ທາຍ

ເຖິງວ່າ ສະພາບການພາວະວິໄສແລະອັດຕະວິໄສ ມີບັນຫາທີ່ສັບສົນບໍ່ໜ້ອຍກໍ່ຕາ​ມ, ແຕ່ບັນດາ​ເຫຼົ່າທັບ​ສື່​ຂ່າວດ້ານການພົວພັນຕ່າງປະເທດ ຂອງຫວຽດນາມ, ບັນດາກະຊວງ, ຄະນະ, ຂະແໜງການ ແລະ ພິເສດແມ່ນ ບັນດາອົງການສື່​ມວນຊົນ, ໄດ້ພ້ອມກັນມານະພະຍາຍາມ ຍາດແຍ່ງ​ເອົາໂອກາດ​ໃໝ່, ໝູນ​ໃຊ້​ສຸດ​ຂີດ ບັນດາເງື່ອນໄຂທີ່ສະດວກດີ, ແກ້ໄຂວຽກ​ງານຢ່າງ​ເໝາະສົມ ແລະ ຜ່ານຜ່າຄວາມຫຍຸ້ງຍາກ​ສິ່ງ​ທ້າ​ທາຍ, ຊ່ວຍເຫຼືອການເຄື່ອນໄຫວພົວພັນຕ່າງປະເທດ, ປະກອບສ່ວນເຂົ້າໃນການຮັກສາສະພາບແວດລ້ອມ​ແຫ່ງ​ສັນຕິພາບ, ສະຖຽມລະພາບ ເພື່ອການພັດທະນາ, ຮັກສາກຽດ​ສັກ​ສີ​ຂອງ​ຊາດ ແລະຍົກສູງຖານະບົດບາດຂອງ​ປະເທດ.

ກ່ອນອື່ນໝົດ, ຫວຽດນາມໄດ້ໝູນໃຊ້ບົດບາດເປັນປະເທດເຈົ້າພາບຂອງປີ ເອເປັກ 2017 ເພື່ອສ້າງ “ຜົນກະທົບທາງ​ບວກ​ຂອງຮູບພາບ” ກ່ຽວກັບຫວຽດນາມໃນວົງຄະນາຍາດສາກົນ. ໃນສັບປະດາຂັ້ນ​ສຸດ​ຍອດທີ່​ນະຄອນ ດ່າໜັງ, ຄຳສັບ “ຫວຽດນາມ” ໄດ້ປະ­ກົດໃນບົດຂ່າວ ບົດໜັງສືພິມ​ສາກົນ​ທີ່​ຕິດ​ກັບ​ເຫດການທີ່​ສຳຄັນຂອງ ເອເປັກ ເປັນຈຳນວນຫຼາຍພັນບົດ; ໃນເຄືອຂ່າຍສັງຄົມ Twitter, #APEC2017 ເປັນຄຳ​ຫຼັກ​ທີ່ພົ້ນເດັ່ນ ທີ່​ມີບົດຂຽນປະມານ 10.000 ບົດ, #APECVN2017, ມີການ​ໃຊ້ tweet ​ປະມານ 1.500 ຄັ້ງ ​ແລະ​ການ​ຄົ້ນ​ຫາຄຳຫຼັກນີ້ເກືອບ 30.000 ຄັ້ງ. ວຽກງານຂໍ້ມູນ​ຂ່າວສານ, ການໂຄສະນາ ​ໄດ້ຮັບ​ການ​ຜັນຂະຫຍາຍ​ຢ່າງໄວວາ, ມີຈຸດໜັກໃຈກາງ, ສ້າງເປັນບັນດາ “ກະແສຟອງ” ໂຄສະນາ ສຸມ​ໃສ່​ບັນດາ​ກອງ​ປະຊຸມ​ທີ່​ສຳຄັນ ເຊິ່ງສູງສຸດແມ່ນ ສັບປະດາຂັ້ນສຸດ​ຍອດທີ່ນະຄອນ ດ່າໜັງ. ວຽກງານຈັດຕັ້ງການ​ສື່ຂ່າວ​ສຳລັບ​ບັນດາ​ເຫດການ ເອເປັກ ໄດ້ຜັນຂະຫຍາຍຢ່າງມີແບບແຜນ, ຊຳນີຊຳນານ, ສ້າງ​ຄວາມ​ປະ​ທັບ​ໃຈ​ໃນຫວຽດນາມ ສຳລັບສື່ມວນຊົນສາກົນ, ນັກຂ່າວໄດ້ຮັບ​ການອຳນວຍຄວາມສະດວກ​ໃຫ້ເຮັດວຽກ​ໄດ້ດີທີ່ສຸດ ດ້ວຍ​ອຸປະກອນທີ່​ທັນ​ສະ​ໄໝ ​ແລະບໍລິການດ້ານ​ເຕັກນິກດີ​ທີ່​ສຸດ. ສື່ມວນຊົນຫວຽດນາມ ດ້ວຍ​ນັກ​ຂ່າວ 2.119 ຄົນ ​ໄດ້​ເຂົ້າ​ຮ່ວມ​ຢ່າງ​ຕັ້ງໜ້າ ​ໃນ​ການ​ສົ່ງຂ່າວກ່ຽວກັບການເຄື່ອນໄຫວໃນປີ ເອເປັກ ດ້ວຍຫຼາຍ​ຮູບການ ພາຫະນະ​ທີ່​ອຸດົມສົມບູນ. ໂທລະພາບຫວຽດນາມ​ ໄດ້​ດຳ​ເນີນ​ຜະລິດຕະພັນ​ຫຼາຍ​ກວ່າ 300 ລາຍການ​ໃນ​ຫົວ​ຂໍ້ ​ເອ​ເປັກ 2017. ສຳນັກ​ຂ່າວສານຫວຽດນາມ ໄດ້ຈັດ​ຕັ້ງປະຕິບັດຫຼາຍ​ກວ່າ 6.600 ຜະລິດຕະພັນຂໍ້ມູນ ດ້ວຍຫຼາຍຮູບການ (ຂໍ້ຄວາມ, ຮູບ​ພາບ, ຂ່າວໂທລະພາບ ແລະ ຂ່າວກຣາຟິກ). ວິທະຍຸກະຈາຍສຽງຫວຽດນາມ ໄດ້ດຳ​ເນີນ​ຜະລິດ​ຕະພັນຫຼາຍ​ກວ່າ 1.600 ລາຍການ (ບົດຄວາມ, ຮູບພາບ, ຂ່າວວີດີໂອ, ລາຍ​ງານ​ຂ່າວ, ສາລະຄະດີ, ສຳມະນາ, ໜ້າ​ພິ​ເສດ, ຄໍລຳພິ​ເສດ...). ໃນ​ຈຳ­ນວນນັກຂ່າວຕ່າງປະເທດຫຼາຍພັນຄົນ ທີ່ສົ່ງຂ່າວກ່ຽວກັບປີ ​ເອເປັກ 2017 ນັ້ນ ບໍ່​ມີ​ຜູ້​ໃດ​ທີ່​ສົ່ງ​ຂ່າວ​ບໍ່​ດີກ່ຽວກັບຫວຽດນາມ. ຫາງສຽງທົ່ວ​ໄປ​ໄດ້​ປະ​ເມີນ​ຜົນຢ່າງຕັ້ງໜ້າ ທາງ​ດ້ານ​ວຽກ​ງານ​ການຈັດ​ຕັ້ງ ​ແລະຜົນສຳເລັດທີ່ບັນລຸໄດ້​ໃນ​ປີ ​ເອ​ເປັກ 2017, ວ່າຫວຽດນາມອາດຈະ “ເອກອ້າງທະນົງໃຈ” ກ່ຽວ​ກັບ​ຜົນສຳ​ເລັດດັ່ງກ່າວ, ປະເທດຕ່າງໆອາດຈະມາ “ຮຽນຮູ້” ນຳບົດຮຽນຂອງຫວຽນດາມ.

ການ​ສື່ສານດ້ານການພົວພັນຕ່າງປະເທດ ຍາມໃດກໍ່ໄປຄຽງຄູ່ກັນ ແລະປະກອບສ່ວນ ​ເຂົ້າ​ໃນ​ການ​ເຮັດ​ໃຫ້ການ​ພົວພັນ ​ແລະຮ່ວມມືກັບຕ່າງປະ​ເທດ ມີ​ຄວາມເລິກເຊິ່ງຍິ່ງ​ກວ່າ​ອີກ, ພິເສດແມ່ນ ກັບ​ບັນດາ​ປະ​ເທດ​ໃຫຍ່ ທີ່​ສຳຄັນ. ໃນ​ປີ 2017, ການແລກປ່ຽນຄະນະຜູ້ແທນຂອງຫວຽດນາມກັບປະເທດຕ່າງໆ ມີຄວາມຟົດຟື້ນທີ່​ສຸດ ດ້ວຍ​ການຢ້ຽມຢາມຂັ້ນສູງຫຼາຍຄັ້ງ: ການຢ້ຽມຢາມຂັ້ນສູງ ລະຫວ່າງຫວຽດນາມແລະຈີນ 3 ຄັ້ງ; ການຢ້ຽມຢາມຂັ້ນສູງ ລະຫວ່າງຫວຽດນາມແລະອາເມຣີກາ 2 ຄັ້ງ; ການຢ້ຽມຢາມຂັ້ນສູງ ​ລະຫວ່າງຫວຽດນາມ​ແລະຍີ່ປຸ່ນ 3 ຄັ້ງ; ການຢ້ຽມຢາມຂອງປະທານປະເທດຫວຽດນາມ ທີ່​ປະ​ເທດລັດເຊຍ 1 ຄັ້ງ... ພິເສດ, ຫວຽດນາມເປັນປະເທດທຳອິດ ທີ່ໄດ້ຕ້ອນຮັບທ່ານ ສີຈີ້ນຜິງ ເລຂາທິການ​ໃຫຍ່, ປະທານປະເທດ ສປ. ຈີນ ມາ​ຢ້ຽມຢາມ ພາຍຫຼັງກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນສຳເລັດຜົນ; ທ່ານນາຍົກລັດຖະມົນຕີ ຫງວຽນຊວັນຝຸກ ເປັນການນຳຜູ້ທຳອິດຂອງພາກພື້ນອາຊີຕາເວັນອອກສຽງ​ໃຕ້ ທີ່​ໄດ້​ຮັບ​ການ​ຕ້ອນຮັບ​ຂອງ ປະທານາທິບໍດີ ໂດນັນ ທຣັມ ຢູ່ທີ່ທຳນຽບຂາວ ໃນປີ 2017; ທ່ານປະທານາທິບໍດີ ໂດນັນ ທຣັມ ກໍໄດ້ມາຢ້ຽມຢາມຫວຽດນາມ ໃນປີ​ທຳອິດຂອງສະ​ໄໝກຳອຳນາດ; ເຈົ້າຊີວິດ ແລະພະລາຊີນີຍີ່ປຸ່ນ ມາຢ້ຽມຢາມຫວຽດນາມ​ເທື່ອ​ທຳ​ອິດ... ການ​ຢ້ຽມຢາມ​ເຫຼົ່ານັ້ນ ໄດ້ສ້າງຂີດໝາຍອັນສຳຄັນ​ແລະຈົບງາມ ​ໃນ​ຈິດ​ສຳນຶກ​ຂອງ​ປະຊາຊົນ​ທຸກ​ຄົນ ​ເມື່ອ​ບັນດາ​ພາ​ຫະ​ນະ​ສື່​ມວນ​ຊົນສ່ອງແສງ​ຢ່າງມີຊີວິດຊີວາ​ ເຖິງ​ບັນດາ​ຮູບ​ພາບ​ທີ່​ໜ້າ​ສົນ​ໃຈ​ຕ່າງໆ. ຮູບພາບທ່ານເລຂາທິການໃຫຍ່ພັກ​ກອມມູນິດຫວຽດ­ນາມ ຫງວ​ຽນຝູຈ້ອງ ແລະ ທ່ານເລຂາທິການໃຫຍ່ ປະທານ​ປະ​ເທດຈີນ ສີຈີ້ນຜິງ ພ້ອມກັນ​ຍ່າງທ່ຽວ​ແລະດື່ມນ້ຳຊາ; ທ່ານປະທານປະເທດຫວຽດນາມ ເຈິ່ນດ້າຍກວາງ ພາທ່ານປະນານາທິບໍດີອາເມລິກາ ໂດ​ນັນ ທຣັມ ໄປຢ້ຽມ​ຊົມຮູບປັ້ນລຸງໂຮ່ ຢູ່​ໃນສວນທຳນຽບປະທານປະເທດ; ເຈົ້າຊີວິດ ແລະພະລາຊິນີຍີ່ປຸ່ນ ​ໄດ້​ຮັບ​ການ​ຊົມ​ເຊີຍຕ້ອນຮັບຢ່າງອົບອູ່ນ ຈາກປະຊາຊົນນະຄອນຫຼວງເກົ່າ ເຫວ້ ຫຼື ຮູບພາບນາຍົກລັດຖະມົນຕີປະເທດກາ​ນາດາ ແລ່ນອອກກຳລັງກາຍ, ນາຍົກລັດຖະມົນຕີອົດສະຕຣາລີ ຮັບປະທານອາຫານຢູ່​ຮ້ານ​ອາຫານຕາມ​ຖະໜົນ​ຂອງຫວຽດນາມ,... ຊຶ່ງໄດ້​ສື່ມວນຊົນພາຍໃນ ແລະຕ່າງປະເທດສົ່ງຂ່າວຢ່າງ​ແຈ້ງ​ຊັດ, ຜ່ານ​ນັ້ນ ສົ່ງ​ຂ່າວ​ໃຫ້​ປະຊາຊົນປະ​ເທດ​ຕ່າງໆ​ໃນ​ໂລກ ​ແລະວົງຄະນະຍາດສາກົນ ກ່ຽວກັບປະ​ເທດຫວຽດນາມ​ແຫ່ງ​ສັນຕິພາບ, ມິດຕະພາບ, ປອດໄພ, ຮັກແຂກບ້ານ​ແຂກ​ເມືອງ...

ການ​ສື່ຂ່າວດ້ານການພົວພັນຕ່າງປະເທດ ​ໄດ້ມີສ່ວນຮ່ວມບໍ່ໜ້ອຍໃນການຮັກສາສິ່ງແວດລ້ອມ​ແຫ່ງ​ສັນຕິພາບ, ສະຖຽມລະພາບ ເພື່ອພັດທະນາປະເທດຊາດ. ບັນດາການເຄື່ອນໄຫວສື່​ຂ່າວ, ໂຄສະນາການ ກ່ຽວກັບຜົນສຳ­ເລັດຂອງການແບ່ງເຂດ ປັກ​ຫຼັກ​ໝາຍ​ຊາຍແດນ, ການປັກຫຼັກໝາຍຖີ່ ແລະປັບປຸງ​ລະບົບ​ຫຼັກ​ໝາຍ​ຊາຍ​ແດນ​ແຫ່ງ​ຊາດ, ການຄຸ້ມຄອງຊາຍແດນ​ແຫ່ງ​ຊາດ ລະຫວ່າງຫວຽດນາມ ​ແລະປະເທດ​ເພື່ອນ​ບ້ານ ກໍ​ໄດ້​ຜັນ​ຂະຫຍາຍເປັນຢ່າງດີ. ຫວຽດນາມເດັດດ່ຽວຮັກສາຫຼັກໝັ້ນ ປົກປັກຮັກສາອຳນາດອະທິປະໄຕ ແລະ ຜືນ​ແຜ່ນດິນ​ອັນ​ຄົບ​ຖ້ວນຂອງປະເທດຊາດ, ຜົນປະໂຫຍດແລະຄວາມສະຫງົບປອດ​ໄພແຫ່ງຊາດ ກໍຄື​ສິດ​ແລະ​ຜົນ​ປະ​ໂຫຍດ ອັນ​ຊອບ​ທຳ​ຂອງ​ຊາດຫວຽດນາມ; ພ້ອມທັງຕໍ່ສູ້ຕ້ານ ປະຕິເສດ ບັນດາຖ້ອຍທຳນອງ ໂຄສະນາເສກສັນປັ້ນແຕ່ງ ກ່ຽວກັບ​ປະຊາທິປະໄຕ, ສິດທິມະນຸດ ແລະສາສະໜາ ແນໃສ່ແຊກແຊງເຂົ້າວຽກງານພາຍໃນ ຂອງຫວຽດນາມ, ບໍ່ປະໃຫ້ບັນດາອິດທິກຳລັງສວຍ​ໂອກາດການ​ເມືອງ​ພາຍ​ໃນ ​ເຮັກ​​ໃຫ້​ສະພາບ​ການ​ເຄັ່ງຮ້ອນ​ຂຶ້ນ​ຕື່ມ, ບໍ່​ໃຫ້​ເກີດ​ການເຕົ້າ​ໂຮມ​ກຳລັງຕໍ່ສູ້​ຕ້ານພັກ​ແລະ​ລັດ​. ບັນດາອົງການຈັດຕັ້ງຜູ້ຕາງໜ້າ ຂອງຫວຽດນາມຢູ່ຕ່າງປະເທດ ຍາມໃດກໍຍົກສູງ​ຈິດໃຈຮັບຜິດຊອບ ຕໍ່ຊີວິດ, ຊັບສິນ ​ແລະສິດປະໂຫຍດອັນຊອບທຳ ຂອງຊາວຫວຽດນາມ ຢູ່ຕ່າງປະເທດ, ປະຕິບັດມາດຕະການປົກປ້ອງພົນລະເມືອງ ຢ່າງທັນ​ການ ແລະເປັນເຈົ້າການແຈ້ງຂ່າວ​ໃຫ້ສື່ມວນຊົນ. ​ໃນ​ສະພາບ​ການ​ທີ່​ປະເທດຕ່າງໆຮັດ​ແໜ້ນນະໂຍບາຍການເຂົ້າເມືອງ, ຄຸ້ມຄອງ​ແຮງງານຕ່າງດ້າວ, ເປັນຕົ້ນແມ່ນ ບັນດາ​ປະ​ເທດ​ໃນ​ພາກ​ພື້ນເພີ່ມ​ທະວີ​ມາດ​ຕະການ​ເຂັ້ມ​ງວດ ​ຕໍ່ເຮືອຫາ​ປາ ​ແລະຊາວປະມົງຕ່າງປະ​ເທດ ​ທີ່​ລະ​ເມີດ​​ເຂດທະ​ເລນັ້ນ, ການ​ສື່​ຂ່າວພົວພັນຕ່າງປະເທດໄດ້ມີສ່ວນຮ່ວມ​ ໃນ​ການສະໜອງຂໍ້ມູນຂ່າວສານ, ຊ່ວຍໜູນ​ໃຫ້​ແກ່​ການ​ຕໍ່ສູ້​ເພື່ອ​ປົກ​ປ້ອງ ​ສິດແລະຜົນປະໂຫຍດທີ່ຖືກກົດໝາຍ​ ຂອງພົນລະເມືອງຫວຽດນາມ ຢູ່ຕ່າງປະເທດ ຢ່າງທັນການ, ພ້ອມທັງບໍ່ໃຫ້ມີການກະທົບຕອບ​ແບບຫຍໍ້ທໍ້ຢູ່ພາຍໃນ​ປະເທດ.

ຈຸດສະຫວ່າງໃນວຽກງານສື່ຂ່າວດ້ານການພົວພັນຕ່າງປະເທດໃນປີ 2017 ແມ່ນຄວາມ​ເປັນ​ເຈົ້າ​ການ​ສູງ​ກວ່າ​ເກົ່າ, ສະແດງອອກ ໃນການເປັນເຈົ້າການສະໜອງແຫຼ່ງຂໍ້​ມູນ, ເປັນເຈົ້າການໃນການກຳນົດ​ທິດ​ທາງ​ການ​ໂຄສະນາ; ເປັນເຈົ້າການຕໍ່ສູ້ດ້ານຫາງສຽງ ທີ່ມີລັກສະນະຊວນເຊື່ອຫຼາຍກວ່າ, ບໍ່​​ໃຫ້​ຖືກ​ເສຍ​ສະໜາມຮົບ, ກີດກັ້ນຂໍ້ມູນຂ່າວສານຫຍໍ້ທໍ້​ໄດ້. ຈາກການຄົ້ນຄວ້າ, ຄົ້ນ​ພົບບັນຫາ, ຫວຽດນາມໄດ້​ເປັນ​ເຈົ້າ​ການ​ໃນ​ຮູບ​ແບບຖະແຫຼງຂ່າວ, ສະ​ແດງທັດສະນະ ຫຼັກໝັ້ນຢ່າງທັນການ; ພ້ອມທັງປະສານສົມທົບ​ແກ້​ໄຂ ການ​ສື່​ຂ່າວ​ພາຍ​ໃນ ​ແລະສື່​ຂ່າວ​ການ​ຕ່າງປະ​ເທດ ຢ່າງ​ຄ່ອງ​ແຄ່​ວ ​ເຂົ້າ​ແກັບ​ເຂົ້າ​ເກ​ຍ, ແນໃສ່ສ້າງຄວາມ​ເປັນ​ເອກະ​ພາບ​ທາງ​ດ້ານຫາງສຽງພາຍໃນ ແລະ ຕ່າງປະເທດ, ຫຼຸດຜ່ອນຊ່ອງຫວ່າງໃນຂໍ້ມູນຂ່າວສານ ທີ່​ອາດ​ຈະຖືກ​ບັນດາ​ອິດ​ທິກຳລັງ​ສັດຕູ​ສວຍ​ໃຊ້ ເພື່ອທຳລາຍປະເທດ. ໃນປີ 2017, ກະຊວງການ​ຕ່າງປະ​ເທດ​ໄດ້​ຈັດ​ຕັ້ງກອງ​ປະຊຸມ​ຖະ​ແຫຼ​ງຂ່າວ 16 ຄັ້ງ, ຕອບຄຳຖາມຂອງ​ນັກ​ຂ່າວ 230 ຄຳ, ສະໜອງ​ຂໍ້​ມູນຂ່າວສານ​ກ່ຽວ​ກັບ​ການ​ເຄື່ອນ​ໄຫວພົວພັນ​ຕ່າງປະ​ເທດ​ທີ່​ສຳຄັນ ​ແລະ​ບົດ​ຂ່າວ​ເປັນ​ພັນໆ​ບົດ ​ໃຫ້​ນັກ​ຂ່າວ, ສື່​ມວນ​ຊົນ​ພາຍ​ໃນ ​ແລະ​ຕ່າງປະ​ເທດ (2).

ບາດກ້າວຫັນປ່ຽນທີ່ສຳຄັນຂອງວຽກ​ງານສື່ຂ່າວດ້ານການພົວພັນຕ່າງປະເທດ​ໃນ ປີ 2017 ສະແດງອອກ​ທັງດ້ານ “ປະລິມານ” ແລະ “ຄຸນ​ນະພາ​ບ”, ມີການປ່ຽນແປງ​​ໃໝ່​ທັງ​ເນື້ອ​ໃນ​ແລະ​ຮູບ​ການ​ຜັນ​ຂະຫຍາຍ, ມີກົນໄກ​ປະສານສົມທົບຢ່າງ​ເຂົ້າ​ແກັບ​ເຂົ້າ​ເກ​ຍ ລະຫວ່າງບັນດາອົງການທີ່ກ່ຽວຂ້ອງ, ບັນດາກະຊວງ, ຂະແໜງການ, ບັນດາ​ອົງການສື່ມວນຊົນ, ພິເສດແມ່ນ ມີຄວາມເອົາໃຈໃສ່ ແລະການຊີ້ນຳຢ່າງ​ແທດ​ເໝາະ​ຂອງ​ການ​ນຳຂັ້ນ​ສູງ. ຜົນສຳ​ເລັດຂອງປີ 2017 ເປັນປະຖົມປັດ​ໄຈທີ່ໝັ້ນຄົງ ໃຫ້ແກ່ວຽກງານສື່ຂ່າວດ້ານ​ການພົວພັນ​ຕ່າງປະ​ເທດ​ໃນ​ປີ 2018 ແລະ ຊຸມປີຕໍ່​ໄປ.

ວຽກ​ງານສື່ຂ່າວ​ດ້ານ​ການພົວພັນຕ່າງປະເທດ ປີ 2018 - ປ່ຽນແປງໃໝ່ຢ່າງ​ບໍ່​ຢຸດ​ຢັ້ງ ​ເພື່ອສຶບຕໍ່ປະສົບຜົນສຳ­ເລັດ.

ສະພາບການປີ 2018 ແລະຊຸມປີຕໍ່​ໄປ ຈະມີບັນຫາໃໝ່ທີ່​ສືບ​ຕໍ່ເກີດຂຶ້ນ, ​ມັ​ນຮຽກຮ້ອງ​ໃຫ້ວຽກ​ງານສື່ຂ່າວດ້ານ​ການ​ພົວພັນ​ຕ່າງປະ​ເທດ ຕ້ອງມີການປ່ຽນແປງໃໝ່ຢ່າງບໍ່ຢຸດຢັ້ງ. ຂະບວນການເຊື່ອມໂຍງສາກົນຢ່າງຮອບດ້ານ ກໍຮຽກຮ້ອງ​ໃຫ້​ວຽກງານສື່ຂ່າວຕ້ອງ​ມີ​ການ​ເຊື່ອມ​ໂຍງ, ເຂົ້າເຖິງບັນດາມາດຕະຖານ, ຄວາມຮຽກຮ້ອງຂອງເປົ້າໝາຍຫາງສຽງສາກົນ. ທາງ​ດ້ານ​ອັດຕະວິໄສ, ບໍ່ພຽງແຕ່ຢູ່ຫວຽດນາມ,  ຫາກຢູ່ຫຼາຍປະເທດ ກໍມີເຫດການການພັດທະນາຂອງສັງຄົມຂໍ້ມູນຂ່າວສານ​ ໄວ​ກວ່າຕັ້ງ​ຫຼາຍ ທຽບກັບຄວາມຮັບຮູ້ ​ແລະ ກົນໄກທີ່ມີ​ຢູ່.

ໃນເວລາຕໍ່ໄປນີ້, ຫວຽດນາມຈະປະເຊີນໜ້າກັບສິ່ງ​ທ້າ​ທາຍທີ່ນັບມື້ນັບໃຫຍ່ຫຼວງ ຈາກການລະເບີດຂຶ້ນ​ຂອງ “ການ​ສື່ສານ​ໃໝ່”. ດ້ວຍການປະຕິວັດອຸດສາຫະກຳ 4.0, ການພັດທະນາຂອງການສື່ສານ​ຈະຂ້າມຜ່ານ ຂອບລະບຽບກົດໝາຍທີ່ມີໃນປະຈຸບັນ, ຂ້າມຜ່ານຊາຍແດນແຫ່ງຊາດ ກໍຄືບັນດາລະບົບຄຸ້ມຄອງ​​ແບບດັ້ງ​ເດີມ, ວາງສິ່ງ​ທ້າ​ທາຍ​ລວມ​ໃຫ້ທຸກໆປະເທດ. ລັກສະນະແຜ່ລາມຂອງຂໍ້ມູນຂ່າວສານ ທັງ​ຂໍ້​ມູນ​ທີ່​ຕັ້ງໜ້າ​ແລະຂໍ້​ມູນທີ່ຫຍໍ້ທໍ້ ໃນອີນເຕິ​​ເນດແລະເຄືອຂ່າຍສັງຄົມ ຈະມີການຜັນແປຢ່າງໄວວາກວ່າເວລາໃດໝົດ (3).

ໃນຂະນະນັ້ນ, ຄວາມກົດດັນຈາກ “ຄວາມ​ຕ້ອງການທາງດ້ານຂໍ້ມູນຂ່າວສານ” ຂອງໝູ່ປະຊາຊົນ ​ໄດ້ຮຽກຮ້ອງ​ໃຫ້ມີການສະໜອງຂໍ້ມູນຂ່າວສານທີ່ແທ້ຈິງ ​ແລະທັນການກວ່າ, ເປັນຕົ້ນແມ່ນ ບັນ­ດາ “ບັນຫາທີ່ມີຄວາມເຄັ່ງຮ້ອນ”, ບັນດາບັນຫາທີ່ໄດ້ຮັບຄວາມເອົາໃຈໃສ່, ບັນດາບັນຫາກ່ຽວກັບຊາຍແດນ, ເຂດແດນ, ການພົວພັນຕ່າງປະເທດ. ຍິ່ງ​ກວ່າ​ນັ້ນ, ລັກສະນະ “ປະຕິສຳພັນ” ຂອງ​ຂໍ້​ມູນ​ຂ່າວສານ​ດ້ານ​ການ​ພົວພັນ​ຕ່າງປະ​ເທດນັບມື້ນັບເພີ່ມຂຶ້ນ. ການ​ສື່ສານ​ບໍ່​ແມ່ນ​ຂະ​ບວນວິວັດ​ດ້ານ​ດຽວ ຈາກອົງການສື່ຂ່າວ, ສື່​ມວນ​ຊົນ ​ເຖິງໝູ່ປະຊາຊົນຄື​ເວລາກ່ອນອີກ, ປະຈຸ​ບັນ, ລັກສະນະປະຕິສຳພັນ ກັບບັນດາເປົ້າໝາຍສື່​ຂ່າວ ມີບົດບາດນັບ​ມື​ນັບສຳຄັນ, ພິເສດແມ່ນ ການສັງເກດຕີລາຄາຜົນສຳເລັດ ຂອງ​ຂະ​ບວນການ​ສະໜອງ​ຂໍ້​ມູນ​ຂ່າວສານ ກໍຄືການປະຕິສຳພັນກັບໝູ່ປະຊາຊົນ ເພື່ອທອດຖອນບົດຮຽນ ແລະຫາວິທີ​ແກ້​ໄຂ.

ບັນຫາທີ່ວາງອອກມາແມ່ນ, ໃນສະພາບການໂລກມີການປ່ຽນແປງຢ່າງໄວວາ, ຂະບວນການ​ເຊື່ອມ​ໂຍງ​ສາກົນ​ໄດ້ພັດທະນາຢ່າງແຂງແຮງ, ສະພາບແວດລ້ອມການ​ສື່​ຂ່າວມີການຫັນປ່ຽນຢ່າງບໍ່ຢຸດຢັ້ງ, ຈະ​ເຮັດ​ແນວ​ໃດ​ໃຫ້ການ​ສື່​ຂ່າວດ້ານການພົວພັນຕ່າງປະເທດໄປທັນ, ບໍ່ຖືກຕົດ​ຢູ່​ຂ້າງຫຼັງ ທຽບກັບການຫັນປ່ຽນໃໝ່? ໃນປີ 2018, ວຽກງານ​ສື່​ຂ່າວດ້ານການພົວພັນຕ່າງປະເທດ ຈະສືບຕໍ່ມີສ່ວນປະກອບ​ຫຼາຍ​ກວ່າ​ອີກ ​ເຂົ້າ​ໃນ​ການ​ປະຕິບັດ​ໜ້າ​ທີ່​ຈຸດ​ສຸມ​ໃຈກາງ ຂອງການພົວພັນຕ່າງປະເທດ. ນັ້ນແມ່ນ, ໂຄສະນາເພື່ອ​ເພີ່ມທະວີການ​ພົວພັນ​ກັບ​ຄູ່​ຮ່ວມ​ມື​ຕ່າງໆ ໃນທ່ວງທ່າ​ການພັດທະນາຂອງປີ 2017; ການເຄື່ອນໄຫວພົວພັນຕ່າງປະເທດທີ່ສຳຄັນ  ຂອງການນຳຂັ້ນສູງ ຂອງຫວຽດນາມ, ພິເສດແມ່ນ ຢູ່ທີ່ບັນດາອົງການຈັດຕັ້ງແລະເວທີປາໄສສາກົນ ແລະ ພາກພື້ນທີ່ສຳຄັນ, ຄື ອາຊຽນ, ອາ​ເຊມ (ASEM), ສະຫະປະຊາຊາດ...; ບັນດາເຫດການພົວພັນຕ່າງປະເທດ ທີ່ສຳຄັນ ໂດຍຫວຽດນາມເປັນປະເທດເຈົ້າພາບ, ຄື ເວທີປາໃສລັດຖະສະພາອາຊີ - ປາຊີຟິກ (APPF), ກອງປະຊຸມສຸດ​ຍອດອະນຸພາກພື້ນ ແມ່ນ້ຳຂອງ (GMS), ເວທີປາໄສເສດຖະກິດໂລກກ່ຽວກັບ ອາຊຽນ (WEF ASEAN)...; ສະໜອງຂໍ້ມູນຂ່າວສານຢ່າງທັນການ ໃຫ້ບັນດາທ້ອງຖິ່ນ, ວິສາຫະກິດ ກ່ຽວ​ກັບ​ຄວາມ​ສະດວກ ​ແລະສິ່ງ​ທ້າ​ທາຍ ໃນຂະບວນການເຊື່ອມໂຍງສາກົນ (ແຕ່ປັດຈຸບັນເຖິງປີ 2020, ຫວຽດນາມຈະ​ສຳ​ເລັດ ບັນດາ​ຄຳ​ໝັ້ນ​ສັນຍາ​ສາກົນ​ທີ່​ສຳຄັນ, ໃນນັ້ນມີການ​ສຳ​ເລັດຄຳໝັ້ນສັນຍາເຂົ້າຮ່ວມອົງການການຄ້າໂລກ (WTO) ໃນປີ 2018; ລົງລາຍເຊັນ, ອະນຸມັດຜ່ານ ແລະ ຜັນຂະຫຍາຍສັນຍາການຄ້າເສລີ (FTA) ຮຸ່ນໃໝ່ຈຳນວນໜຶ່ງ; ບັນດາແຜນ​ນະໂຍບາຍແກ້ໄຂຢ່າງຄ່ອງແຄ້ວຂອງຫວຽດນາມ ໃນບັນດາບັນຫາທີ່ສຳຜັດ​ໄວ​ແລະສັບສົນ, ຕັ້ງໜ້າ​ໂຄສະນາ​ເຜີຍ​ແຜ່ ກ່ຽວກັບສະພາບການການເມືອງທີ່ມີຄວາມສະຖຽມລະພາບ, ສັງຄົມ​ມີ​ຄວາມ​ສະຫງົບ​ສຸກ, ເສດຖະກິດມີການປ່ຽນແປງໃໝ່ ແລະຈະ​ເລີ​ນພັດທະນາ, ປະເທດແລະຄົນຫວຽດນາມ ທີ່ມີສັນຕິພາບ, ຮັກແຂກບ້ານ​ແຂກ​ເມືອງ...

ລັກສະນະຂອງການ​ສື່ຂ່າວດ້ານການພົວພັນຕ່າງປະເທດ​ແມ່ນ​ມີຄວາມຫຼາກຫຼາຍ ​ເຊິ່ງຮຽກຮ້ອງ​ຕ້ອງ​ມີ​ການ​ປະ​ສາ​ສົມທົບ “ລະຫວ່າງຂະແໜງການ, ຫຼາຍຂະແໜງການ”. ການ “ຊີ້ນຳຢ່າງທັນເວ­ລາ, ການ​ປະສານ​ສົມທົບ​ຢ່າງ​ເຂົ້າ​ແກັບ​ເຂົ້າ​ເກ​ຍ, ທະລຸລ່ວງ” ລະຫວ່າງບັນດາກຳລັງເຮັດວຽກງານການ​ສື່ສານດ້ານ​ການ​ພົວພັນ​ຕ່າງປະ​ເທດ ຕ້ອງ​ໄດ້ສືບຕໍ່ເສີມຂະຫຍາຍ, ພິ­ເສດ​ແມ່ນ ການປະສານສົມທົບ “ສາມກຸ່ມອົງການ” ລວມມີ ບັນດາອົງການນຳ​ສົ່ງຂໍ້​ມູນ, ບັນດາອົງການສື່ມວນ​ຊົນ, ລວມທັງສື່ມວນຊົນຢູ່ພາຍໃນແລະຕ່າງປະເທດ; ກຸ່ມບັນດາອົງການປະສານງານຂໍ້ມູນຂ່າວສານ ລວມມີຄະນະ​ໂຄສະນາອົບຮົມສູນກາງ, ກະຊວງການຕ່າງປະເທດ, ກະຊວງຖະ​ແຫຼ​ງຂ່າວ​ແລະສື່ສານ...; ກຸ່ມບັນດາອົງການທີ່ສະໜອງຂໍ້ມູນຂ່າວສານ (ບັນດາກະຊວງ, ຂະແໜງການ, ທ້ອງຖິ່ນທີ່ເປັນຫົວຂອດ ຂອງການສະໜອງຂໍ້ມູນຂ່າວສານ...). ນີ້ແມ່ນ ບັນຫາທີ່ສຳຄັນຕົ້ນຕໍ ເພື່ອຜັນຂະຫຍາຍໜ້າທີ່ສື່ສານການພົວພັນຕ່າງປະເທດ ຢ່າງສະເໝີຕົ້ນສະເໝີປາຍ, ທັນເວລາ. ບັນດາອົງການກະຊວງ, ຂະແໜງການ, ທ້ອງຖີ່ນ ຕ້ອງເປັນເອກະພາບ ກ່ຽວກັບຄວາມຮັບຮູ້ ຕໍ່ພາລະບົດບາດ ຂອງການ​ສື່ສານ​ດ້ານການພົວພັນຕ່າງປະເທດ, ຈາກນັ້ນ, ມີການລົງທຶນຢ່າງເໝາະສົມ ກ່ຽວກັບແຫຼ່ງພະລັງ ໃຫ້ແກ່ວຽກງານນີ້. ຍ້ອນລັກສະນະຫຍຸ້ງຍາກ​ໃນ​ການ “ກຳນົດປະລິມານ” ​ແຫ່ງ​ຜົນສຳ​ເລັດ ຂອງວຽກງານຂໍ້ມູນຂ່າວສານດ້ານພົວພັນຕ່າງປະເທດ, ດັ່ງ​ນັ້ນ, ບາງຄັ້ງບາງຄາວ ບົດບາດ​ຂອງ​ຂໍ້​ມູນ​ຂ່າວສານ​ດ້ານ​ການ​ພົວພັນ​ຕ່າງປະ​ເທດ ບໍ່ໄດ້ຖືເປັນສຳຄັນ, ຊ້ຳບໍ່ໜຳ ຍັງຖືກຖືເປັນແບບ​ຮູບການ. ພາກ​ຕົວ​ຈິງ​ໄດ້​ໃຫ້​ເຫັນ​ວ່າ, ຂະແໜງການໃດ, ທ້ອງຖິ່ນໃດ ມີຄວາມຮັບຮູ້ຢ່າງເລິກເຊິ່ງ ແລະ ມີການເອົາໃຈໃສ່ເຖິງ ວຽກ​ງານ​ພົວພັນ​ຕ່າງປະ​ເທດ ​ແມ່ນ​ຢູ່​ນັ້ນ ການເຄື່ອນໄຫວສື່​ຂ່າວ​ການພົວພັນຕ່າງປະເທດ ມີການພັດທະນາຢ່າງແຂງແຮງ ແລະ ບັນລຸປະສິດທິຜົນສູງ. ກົງກັນຂ້າມ, ບັນດາຂະແໜງການ ທ້ອງຖິ່ທີ່ຂາດຄວາມເອົາໃຈໃສ່ ​ເຖິງ​ວຽກ​ງານ​ສື່​ຂ່າວດ້ານການພົວພັນຕ່າງປະເທດ ​ແມ່ນການເຄື່ອນໄຫວຈະພົບຄວາມຫຍຸ້ງຍາກ, ກະວົນກະວາຍ, ມີປະ​ສິດ​ຜົນຕ່ຳ. ຫຼາຍທ້ອງຖິ່ນ ໄດ້ເປັນເຈົ້າການ​ໃຫນການຜັນຂະຫຍາຍການ​ສື່ສານດ້ານການພົວພັນຕ່າງປະເທດ ຢ່າງທັນການແລະປະດິດສ້າງ, ນຳເອົາຜົນງານ​ຕົວ​ຈິ​ງມາ​ປະກອບສ່ວນ​ ເຂົ້າ​ໃນ​ການ​ພັດທະນາ​ເສດຖະກິດ​ສັງຄົມ​ຢູ່​ທ້ອງ​ຖິ່ນ(4).

ປ່ຽນແປງໃໝ່ເພື່ອບໍ່ຖືກຕົກ​ຢູ່​ຂ້າງຫຼັງ, ຖືເອົາເຕັກໂນໂລຊີໃໝ່ເປັນໂອກາດດີກ​ວ່າ​ສິ່ງ​ທ້າ​ທາຍ ຈຶ່ງ​ຈະ​ສາມາດຫຼຸດຜ່ອນຜົນກະທົບທີ່​ຫຍໍ້ທໍ້ ຂອງສື່ມວນຊົນໃໝ່ ຂອງເຄືອຂ່າຍສັງຄົມ. ຄຽງ​ຄູ່​ກັບ​ການ​ຮັກສາ​ບົດບາດ​ຂອງສື່​ກະ​ແສ​ຫຼັກ, ຫວຽດນາມກໍຕ້ອງ​ຍາດ​ແຍ່ງ​ເອົາ​ຫຼາຍ​ສຸດ ຄວາມ​ກ້າວໜ້າ​ຂອງ​ເຕັກ​ໂນ​ໂລ​ຊີ​ຂໍ້​ມູນ​ຂ່າ​ວສານ ກໍ່​ຄື​ທ່າ​ແຮງຂອງພາຫະນະສື່ມວນຊົນທັນສະໄໝ ​ແລະ​ທ່າ​ແຮງ​ຂອງ​ການ​ສື່ສານ​ດິຈິ​ຕອນ ​ເພື່ອ​ເຂົ້າ​ເຖິງ​ບັນດາ​ເປົ້າ​ໝາຍຢ່າງໄວກວ່າອີກ, ກວ້າງຂວາງກວ່າອີກ. ເຄືອຂ່າຍສັງຄົມບໍ່​ແມ່ນ “ໂລກສະ​ເໝືອນ​ຈິງ” ອີກ ຫາກ​ມັນ​ຄ່ອຍໆ​ມີບົດບາດແທ້ຈິງ, ມີຄຸນຄ່າຈິງ​ໃນຊີວິດ, ພິເສດ​ແມ່ນ​ໃນແນວຮົບຂໍ້ມູນຂ່າວສານ. ດ້ວຍເຫດນັ້ນ, ວຽກ​ງານ​ສື່ສານ​ການພົວພັນຕ່າງປະເທດ ໃນເວລາຕໍ່ໄປນີ້ ຕ້ອງນຳໃຊ້ເຄືອຂ່າຍສັງຄົມ​ໃຫ້​ໄດ້​ດີ​ທີ່​ສຸດ, ສ້າງ​ທາງເດີນ​ເພື່ອຊ່ວຍ​ໜູນ​ໃຫ້​ແກ່ສື່ສານ​ກະ​ແສ​ຫຼັກ.

ຫວຽດນາມກ້າວເຂົ້າສູ່ປີ 2018 ດ້ວຍມະໂນພາບ ແລະຖານະບົດບາດໃໝ່. ບັນດາຜົນງານທີ່​ຍິ່ງ​ໃຫຍ່ ​ແລະມີຄວາມໝາຍສຳຄັນໃນປີ 2017 ໄດ້ສ້າງປະຖົມປັດ​ໄຈທີ່​ໝັ້ນຄົງ ແລະຄວາມເຊື່ອໝັ້ນຢ່າງຕາຍ​ໃຈວ່າ, ວຽກງານຂໍ້ມູນຂ່າວສານດ້ານການພົວພັນຕ່າງປະເທດໄດ້ ແລະພວມ​ມີ​ສ່ວນປະກອບ​ທີ່​ສຳຄັນ ​ເຂົ້າ​ໃນ​ການ​ຜັນ​ຂະຫຍາຍປະຕິບັດໜ້າທີ່ການພົວພັນຕ່າງປະເທດຢ່າງ​ສຳ​ເລັດ​ມີ​ໄຊ, ປະກອບສ່ວນອັນ​ສຳຄັນ​ເຂົ້າ​ໃນການກໍ່ສ້າງ, ປົກປັກຮັກສາ ແລະພັດທະນາປະເທດ./.

​ໂດຍ ຮ່າກີມງອກ

                                    ຮອງລັດຖະມົນຕີກະຊວງການຕ່າງປະເທດ

--------------------------

(1) Tom Fletcher: The Naked Diplomat,  London, 2017, Harper Collins Publishers

(2) ແຫຼ່ງ: ກົມຂ່າວສານ ​ແລະ ສື່ມວນຊົນ, ກະຊວງການຕ່າງປະເທດ.

(3) ໃນບັນດາທ່າອຽງທີ່​ໂດດ​ເດັ່ນປະຈຸບັນ, ເຄືອຂ່າຍສັງຄົມນັບມື້ນັບກາຍເປັນແຫຼ່ງຂໍ້ມູນຂ່າວສານທີ່ສຳຄັນ, ມີຄວາມສາມາດດຶງດູດຜູ້​ອ່ານ​ຜູ້​ຊົມທີ່ແຕກຕ່າງກັນເປັນຈຳນວນຫຼາຍ ຍ້ອນ​ມັນ​ມີລັກສະນະປະຕິສຳພັນ, ເຊື່ອມຕໍ່ຊຸມ​ຊົນ, ສະໜອງຂໍ້ມູນ​ແບບຫຼາຍດ້ານ ແລະ ຖືກກວດແກ້ໜ້ອຍ. ຕາມ Social Media Statistics (11-2016), ຄິດສະເລ່ຍ ຜູ້ໃຊ້ອິນເຕີ​ເນດໃນໂລກ​ແຕ່​ລະ​ຄົນ ມີບັນຊີເຄືອຂ່າຍສັງຄົມ 5,54 ບັນຊີ.

(4) ຄະນະກຳມະການປະຊາຊົນນະຄອນ ຮ່າໂນ້ຍ ໄດ້ເຊັນສັນຍາໂຄສະນາການທ່ອງທ່ຽວໃນໂທລະພາບ CNN ໄລຍະ 2016 – 2018, ໄດ້ປະກອບສ່ວນເຂົ້າໃນການເຕີບໂຕ​ຢ່າງແຂງແຮງຂອງການທ່ອງທ່ຽວນະຄອນຫຼວງ: ປີ 2017 ຕ້ອນຮັບນັກທ່ອງທ່ຽວ 23,83 ລ້ານຄົນ (ເພີ່ມຂຶ້ນ 9%); ໃນນັ້ນ, ນັກ​ທ່ອງ​ທ່ຽວ​ຕ່າງປະ​ເທດ 4,95 ລ້ານຄົນ (ເພີ່ມຂຶ້ນ 23%). ເກັບລາຍໄດ້ຈາກການທ່ອງທ່ຽວປະມານ 70,96 ພັນຕື້ດົ່ງ, ເພີ່ມຂຶ້ນ 15% ທຽບກັບປີ 2016. ການທ່ອງທ່ຽວຮ່າໂນ້ຍໄດ້ຮັບ​ການ​ຕີ​ລາ​ຄາ​ສູງ ​ຈາ​ກວາລະສານການທ່ອງທ່ຽວທີ່ມີ​ສື່ສຽງໃນໂລກ, ຄື Business Insider, Discovery, CNN, TripAdvisor,...: ຮ່າ​ໂນ້ຍຢູ່​ໃນ​ອັນດັບທີ 3 ໃນ 20 ນະຄອນທີ່ຫຼາຍຄົນຢາກມາ​ຢ້ຽມຢາມ, ຢູ່​ໃນຈຸ 10 ຕົວ​ເມືອງທີ່ມີການເຕີບໂຕທາງດ້ານການທ່ອງທ່ຽວຢ່າງໄວ ແລະ ເປັນໜຶ່ງ​ໃນ​ບັນດາ​ຈຸດໝາຍ​ປາຍ​ທາງທີ່ເປັນໜ້າສົນໃຈກວ່າໝູ່ໃນໂລກ.

* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 905 (ເດືອນມີນາ 2018)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ