ວັນເສົາ, 15/12/2018
ການພົວພັນຕ່າງປະເທດເພື່ອສັນຕິພາບ ການຮ່ວມມື ແລະການພັດທະນາ; ເປັນເຈົ້າການແລະຕັ້ງໜ້າໃນການເຊື່ອມໂຍງສາກົນ: ຄວາມເປັນຈິງແລະບົດຮຽນຂອງຫວຽດນາມ
21/9/2018 11:50' ສົ່ງ ພິມ
ພາບປະກອບ. (ພາບ: TTXVN)

ກ່ຽວ​ກັບຄວາມ​ເປັນ​ຈິງ​ແລະ​ບົດຮຽນໃນ​ວຽກ​ງານການ​ຕ່າງປະ​ເທດ ​ແລະການ​ເຊື່ອມ​ໂຍງ​ສາກົນ​ຂອງພັກ​ກອມ​ມູນິດ​ຫວຽດນາມ​ໃນ 30 ກວ່າ​ປີ​ທີ່​ຜ່ານ​ທາ, ສາມາດ​ກ່າວ​ເຖິງ​ໃນ​ເນື້ອ​ຫາ​ຕົ້ນຕໍ​ດັ່ງ​ຕໍ່​ໄປ​ນີ້.

​ເຂົ້າ​ໃຈ​ກຳ​ໄດ້​ທ່າ​ອຽງ​ລວມຂອງ​ຍຸກ​ສະ​ໄໝ, ກໍ່ສ້າງ​ແລະ​ປະຕິບັດ​ນະ​ໂຍບາຍການ​ຕ່າງປະ​ເທດ​ເພື່ອ​ສັນຕິພາບ ການ​ຮ່ວມ​ມື ​ແລະ​ການ​ພັດທະນາ

​ເພື່ອ​ມີນະ​ໂຍບາຍການ​ຕ່າງປະ​ເທດທີ່​ຖືກຕ້ອງ, ບັນຫາ​ຄວາມ​ຮັບ​ຮູ້​ກ່ຽວ​ກັບ​ຍຸກ​ສະ​ໄໝ​ແລະ​ສະພາບ​ການ​ໂລກ ມີ​ຄວາມ​ໝາຍ​ສຳຄັນ​ພິ​ເສດ. ທົບ​ທວນ​ຂະ​ບວນການ​ຮັບ​ຮູ້​ຂອງພັກ​ກອມ​ມູນິດ​ຫວຽດນາມກ່ຽວ​ກັບ​ຍຸກ​ສະ​ໄໝ ​ແລະ​ສະພາບ​ການ​ໂລກ, ພາກ​ພື້ນ, ອາດ​ຈະ​ເຫັນ​ແຈ້ງ​ຄວາມ​ກ້າວໜ້າ​ທີ່​ມີ​ລັກສະນະ​ວິທະຍາສາດ, ສະ​ແດງ​ອອກ​ໃນ​ບາງ​ແງ່​ມູມດັ່ງ​ນີ້:

ທີ​ໜຶ່ງ, ຄວາມ​ຮັບ​ຮູ້​ກ່ຽວ​ກັບ​ຍຸກ​ສະ​ໄໝ​ແລະ​ໂລກ​ປະຈຸ​ບັນຍາມ​ໃດ​ກໍ່​ມີ​ລັກສະນະ​ວິທະຍາສາດ, ບໍ່​ປ່ຽນ​ແປງ ​ແລະ​ສອດ​ຮ້ອຍ​ຕະຫຼອດ.

​ເຖິງ​ວ່າ​ໂລກ​ຈະ​ມີ​ການ​ປ່ຽນ​ແປງ​ແຕ່ພັກ​ກອມ​ມູນິດ​ຫວຽດນາມຍັງ​ຄົງ​ຢືນຢັນວ່າ: ຍຸກ​ປະຈຸ​ບັນ​ແມ່ນ​ຍຸກ​ສະ​ໄໝ​ແຫ່ງ​ການ​ຂ້າມ​ຜ່ານ​ຂຶ້ນ​ສູ່​ສັງຄົມ​ນິຍົມ​ໃນ​ຂອບ​ເຂດ​ທົ່ວ​ໂລກ; ​ເລີ່​ມຕົ້ນ​ດ້ວຍ​ການ​ປະຕິວັດ​ເດືອນຕຸລາ​ຂອງ​ລັດ​ເຊຍ (ປີ 1917). ນີ້​ແມ່ນ​ຍຸກປະຫວັດສາດ​ທີ່​ຍາວ​ນານ, ຜ່ານ​ຫຼາຍ​ສະ​ໄໝ, ຫຼາຍ​ໄລຍະ ດ້ວຍ​ລັກສະນະ​ແລະ​ເນື້​ອໃນຂອງ​ຄວາມ​ຂັດ​ແຍ່ງ​ຕ່າງໆ ກໍ່​ຄື​ບັນດາ​ບັນຫາ​ການ​ເມືອງ ​ເສດຖະກິດ ສັງຄົມ​ທີ່​ບໍ່​ຄື​ກັນ. ​ໂລກ​ອາດ​ຈະ​ມີ​ການ​ປ່ຽນ​ແປງ ​ແຕ່ຍຸກ​ສະ​ໄໝ​ຕາມ​ຄວາມ​ໝາຍ​ກວ້າງ​ບໍ່​ມີ​ການປ່ຽນ​ແປງ. ບົນ​ພື້ນຖານ​ຄວາມ​ຮັບ​ຮູ້​ຄື​ແນວ​ນັ້ນ, ພັກ​ໄດ້​ວາງ​ແນວທາງ​ຍຸດ​ທະ​ສາດ​ທີ່​ຖືກຕ້ອງ, ພາ​ການ​ປະຕິວັດ​ຫວຽດນາມ​ກ້າວ​ຂຶ້ນ​ຢ່າງ​ໜັກ​ແໜ້ນ ຍາດ​ເອົາ​ໄຊຊະນະ​ຢ່າງ​ຕໍ່​ເນື່ອງ.

ຄວາມ​ຮັບ​ຮູ້​ຂອງ​ພັກ​ກ່ຽວ​ກັບ​ຍຸກ​ສະ​ໄໝ​ຄື​ແນວ​ນັ້ນ​ແມ່ນ​ບໍ່​ແຂງ​ກະດ້າງ, ບໍ່​ແມ່ນ​ວາງ​ອອກ​ມາ​ແລ້ວ​ບໍ່​ປ່ຽນ, ​ແຕ່​ມີ​ການ​ປັບ​ປ່ຽນ​ໃຫ້​ເຂົ້າ​ກັບ​ການ​ປ່ຽນ​ແປງ​ຂອງ​ສະຖານະ​ການ​ໂລກ​ໃນ​ແຕ່ລະ​ໄລຍະ. ບົນ​ພື້ນຖານ​ຮັບ​ເອົາ​ຄວາມ​ຮູ້​ແລະ​ວິທີ​ເຂົ້າ​ເຖິງ​ໃໝ່​ກ່ຽວ​ກັບ​ຍຸກ​ສະ​ໄໝ​ຢ່າງ​ມີ​ການ​ຄັດ​ເລືອກ​ ພາວະ​ວິ​ໄສ, ພັກ​ກອມ​ມູນິດ​ຫວຽດນາມ​ໄດ້ພັດທະນາ​ທິດ​ສະ​ດີ ​ແລະຫັນ​ບັນດາ​ບັນຫາ​ຂອງຍຸກ​ສະ​ໄໝ​ເປັນອັນ​ລະອຽດ ດ້ວນ​ວິທີ​ນຳ​ສະ​ເໜີ​ເນື້ອ​ໃນ “​ໄລຍະ​ປະຈຸ​ບັນ​ຂອງ​ຍຸກ​ສະ​ໄໝ”. ​ໃນ​ແຕ່ລະ​ໄລຍະ 5 ປີຫຼື 10 ປີ, ພັກ​ເນັ້ນ​ໜັກ​ບັນດາ​ຈຸດ​ພິ​ເສດ​ທີ່​ໂດດ​ເດັ່ນ​ຂອງ​ໂລກ ທາງ​ດ້ານ​ການ​ເມືອງ ​ເສດຖະກິດ ສັງຄົມ ​ແລະ​ບັນດາ​ທ່າ​ອຽງ​ແຫ່ງ​ການ​ເຄື່ອນ​ເໜັງ​ຂອງ​ໂລກ. ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ຊີ້​ແຈ້ງ: “​ໃນ​ໂລກ, ​ໃນ​ຊຸມ​ປີ​ຕໍ່ໜ້າສະພາບ​ການ​ຈະ​ມີ​ການ​ຜັນ​ປ່ຽນ​ສັບສົນ​ທີ່​ສຸດ, ​ແຕ່​ສັນຕິພາບ​ແຫ່ງ​ຊາດ ປະຊາທິປະ​ໄຕ ການ​ຮ່ວມ​ມື ​ແລະ​ການ​ພັດທະນາຍັງ​ຄົງ​ເປັນ​ທ່າ​ອຽງ​ໃຫຍ່. ຂະ​ບວນການ​ໂລກາ​ພິວັດ ​ແລະ​ເຊື່ອມ​ໂຍງ​ສາກົນສືບ​ຕໍ່​ໄດ້​ຮັບ​ການ​ຍູ້​ແຮງ. ການ​ຮ່ວມ​ມື, ການ​ແຂ່ງຂັນ, ການ​ຕໍ່ສູ້ ​ແລະ ການ​ຂຶ້ນ​ຕໍ່​ຊຶ່ງ​ກັນ​ແລະ​ກັນ​ລະຫວ່າງ​ບັນດາ​ປະ​ເທດ, ​ໂດຍ​ສະ​ເພາະ​ລະຫວ່າງ​ບັນດາ​ປະ​ເທດ​ໃຫຍ່ ນັບ​ມື​ນັບ​ເພີ່ມ​ຂຶ້ນ. ການ​ປະຕິວັດ​ວິທະຍາສາດ-​ເຕັກ​ໂນ​ໂລ​ຊີ, ພິ​ເສດ​ແມ່ນ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ສືບ​ຕໍ່​ພັດທະນາ​ຢ່າງ​ແຂງ​ແຮງ, ຊຸກຍູ້​ໃຫ້​ຫຼາຍ​ຂົງ​ເຂດ​ມີ​ການ​ພັດທະນາ​ແບບ​ກະ​ໂດດ​ຂັ້ນ, ສ້າງ​ໃຫ້​ມີ​ທັງ​ໂອກາດ ​ແລະ​ສິ່ງ​ທ້າ​ທາຍ​ຕໍ່​ທຸກ​ປະ​ເທດ(1). ຄວາມ​ເປັນ​ຈິງ​ໃຫ້​ເຫັນ​ວ່າ ຄວາມ​ຮັບ​ຮູ້ແລະທັດສະນະ​ຂອງ​ພັກ​ກ່ຽວ​ກັບ​ສະຖານະ​ການ​ໂລກ ມັນ​ສອດຄ່ອງ​ເໝາະ​ສົມ​​ທີ່​ສຸດກັບ​ການ​ຜັນ​ປ່ຽນ​ປະຈຸ​ບັນ.

ທີ​ສອງ, ກຳນົດທິດ​ທາງ, ໜ້າ​ທີ່​ຂອງວຽກ​ງານການຕ່າງປະ​ເທດຢ່າງ​ຈະ​ແຈ້ງ, ຖືກຕ້ອງ.

ພັກ​ກອມ​ມູນິດ​ຫວຽດນາມຮັບ​ຮູ້​ຢ່າງ​ເລິກ​ເຊິ່ງກ່ຽວ​ກັບ​ການ​ກຳນົດ​ເປົ້າ​ໝາຍ​ສູງ​ສຸດຂອງ​ນະ​ໂຍບາຍ​ການ​ຕ່າງປະ​ເທດ ນັ້ນ​ແມ່ນ​ຜົນ​ປະ​ໂຫຍ​ດຂອງ​ຊາດ-ປະ​ເທດ​ຊາດ; ກຳນົດ​ແຈ້ງບົດບາດ​ຂອງ​ວຽກ​ງານ​ການ​ຕ່າງປະ​ເທດ​ໃນ​ພາລະກິດ​ການ​ສ້າງສາ​ແລະ​ປົກ​ປັກ​ຮັກສາ​ປະ​ເທດ​ຊາດ; ​ເຫັນ​ແຈ້ງ​ຄວາມ​ພົວພັນ​ລະຫວ່າງການ​ຮັກສາ​ຄວາມ​ເປັນ​ເອກະລາດ​ ອຳນາດ​ອະທິປະ​ໄຕ ​ແລະ​ກຳນົດ​ທິດ​ສັງຄົມ​ນິຍົມ ກັບ​ການ​ເປີດ​ກວ້າງ ຍົກ​ສູງ​ປະສິດທິ​ຜົນ​ຂອງ​ການ​ເຄື່ອນ​ໄຫວ​ພົວພັນ​ຕ່າງປະ​ເທດ, ຄວາມ​ຈຳ​ເປັນ​ຕ້ອງ​ເພີ່ມ​ທະວີ​ກຳລັງ​ແຮງ​ພາຍ​ໃນ​ເພື່ອ​ໃຫ້​ວຽກ​ງານ​ການ​ຕ່າງປະ​ເທດ​ເສີມ​ຂະຫຍາຍ​ປະສິດທິ​ຜົນ​ຍິ່ງ​ກວ່າ​ອີກ.

ພັກກຳນົດຫຼັກ​ນຳ​ແລະ​ທິດ​ທາງ​ໃຫຍ່ຂອງ​ວຽກ​ງານ​ການ​ຕ່າງປະ​ເທດ ນັ້ນ​ຄື​ສັນຕິພາບ ການ​ຮ່ວມ​ມື ​ແລະ​ການ​ພັດທະນາ. ​ໃນ​ເມື່ອ​ກຳນົດ​ການ​ຮ່ວມ​ມື ​ແລະ​ການ​ພັດທະນາເປັນ​ທ່າ​ອຽງ​ລວມ, ​ແຕ່​ພັກ​ກໍ່​ເຫັນ​ແຈ້ງວ່າການ​ຮ່ວມ​ມື​ໄປ​ຄຽງ​ຄູ່​ກັບ​ຕໍ່ສູ້, ​ແຂ່ງຂັນ​ເພື່ອ​ປົກ​ປັກ​ຮັກສາຜົນ​ປະ​ໂຫຍ​ດທີ່​ຖືກຕ້ອງ​ຂອງ​ປະ​ເທດຊາດ, ພ້ອມ​ກັນ​ນັ້ນ​ກໍ່​ຕໍ່ສູ້ ​ແຂ່ງຂັນ​ຕາມ​ກົດໝາຍ​ສາກົນ ​ເພື່ອ​ໃຫ້​ມີ​ການ​ຮ່ວມ​ມື​ທີ່​ດີກ​ວ່າ​ອີກ ​ແລະ​ບໍ່​ພາ​ໄປສູ່​ການ​ປະ​ເຊີນ​ໜ້າ​ປະ​ທະ​ກັນ. ​ເພື່ອ​ປະຕິບັດ​ສິ່ງ​ດັ່ງກ່າວ, ​ໃນ​ບັນດາ​ສາຍ​ພົວພັນ​ທີ່​ທັບ​ຊ້ອນ ສັບສົນ​ປະຈຸ​ບັນ​ໃນ​ໂລກ, ມັນ​ຮຽກຮ້ອງ​ຕ້ອງການ​ມີ​ນະ​ໂຍບາຍ​ການ​ຕ່າງປະ​ເທດ​ທີ່​ອ່ອນ​ໂຍນ ພ້ອມ​ດ້ວຍ​ວິທີ​ທາງ​ການ​ທູດ​ທີ່​ສະຫຼາດຄ່ອງ​ແຄ້ວ ​ເພື່ອປົກ​ປັກ​ຮັກສາ​ຜົນ​ປະ​ໂຫຍ​ດ​ແຫ່ງ​ຊາດ​ໃຫ້​ຈົນ​ໄດ້ ທັງ​ຮັກສາ​ສັນຕິພາບ. ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ຊີ້​ແຈ້ງທິດ​ທາງ ໜ້າ​ທີ່​ຂອງ​ວຽກ​ງານ​ການ​ຕ່າງປະ​ເທດ​ຄື: “ຮັບປະກັນ​ຜົນ​ປະ​ໂຫຍ​ດສູງ​ສຸດ​ຂອງ​ຊາດ-ປະ​ເທດ​ຊາດ, ບົນ​ພື້ນຖານ​ບັນດາ​ຫຼັກການ​ອັນ​ພື້ນຖານ​ຂອງ​ກົດໝາຍ​ສາກົນ, ສະ​ເໜີ​ພາບ ​ແລະ​ມີ​ຜົນ​ປະ​ໂຫຍ​ດຮ່ວມ​ກັນ, ປະຕິບັດ​ເຂັ້ມ​ງວດ​​ແນວທາງ​ການ​ຕ່າງປະ​ເທດທີ່​ເປັນ​ເອກະລາດ ​ເປັນ​ເຈົ້າ​ຕົນ​ເອງ ສັນຕິພາບ ການ​ຮ່ວມ​ມື​ ​ແລະ​ການ​ພັດທະນາ; ຫັນ​ການພົວພັນ​ຕ່າງປະ​ເທດ​ເປັນ​ຫຼາ​ຍູ​ບຫຼາຍ​ແບບ ຫຼາຍ​ກ້ຳ​ຫຼາຍ​ຝ່າຍ... ​ເປັນ​ເພື່ອນ ​ເປັນ​ຄູ່​ຮ່ວມ​ມື​ທີ່​ໄວ້​ວາງ​ໃຈ​ໄດ້ ​ແລະ​ເປັນ​ສະມາຊິກ​ທີ່​ມີ​ຄວາມ​ຮັບຜິດຊອບ ​ຂອງ​ປະຊາ​ຄົມ​ສາກົນ”(2).

​ປະຕິບັດ​ແນວທາງ​ການ​ຕ່າງປະ​ເທດ​ເພື່ອ​ສັນຕິພາບ ການ​ຮ່ວມ​ມື ​ແລະ​ການ​ພັດທະນາ, ​ໃນ​ຊຸມ​ປີ​ທີ່​ຜ່ານ​ມາ​ຫວຽດນາມ​ໄດ້້​ເປີດ​ກວ້າງການ​ພົວພັນ​ຕ່າງປະ​ເທດ, ຮັກສາ​ເອກະລາດ ອະທິປະ​ໄຕຂອງ​ຊາດ​ໄວ້​ຢ່າງ​ໝັ້ນ​ຄົງ, ສ້າງ​ຕັ້ງ​ການ​ພົວພັນ​ທີ່​ເປັນ​ປົກກະຕິ ຍາວ​ນານ​ກັບ​ບັນດາ​ປະ​ເທດ, ສ້າງ​ສະພາບ​ແວດ​ລ້ອມ​ສັນຕິພາບ, ຍາດ​ແຍ່ງ​ເອົາ​ປັດ​ໄຈ​ທີ່​ສະດວກ​ດີ​ຂອງ​ສິ່ງ​ແວດ​ລ້ອມ​ສາກົນ​ ເພື່ອ​ພັດທະນາ​ປະ​ເທດ. ການ​ພົວພັນ​ຕ່າງປະ​ເທດ​ໄດ້​ຮັບ​ການ​ເປີດ​ກວ້າງ ​ແລະ​ນັບ​ມື້​ນັບ​ເຂົ້າ​ສູ່​ລວງ​ເລິກ. ​ເປີດ​ກວ້າງ​ການ​ພົວພັນ​ມິດຕະພາບ ​ແລະ​ການ​ຮ່ວມ​ມື​ກັບ​ບັນດາ​ປະ​ເທດ, ​ເປັນ​ຕົ້ນ​ແມ່ນ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ, ບັນດາ​ປະ​ເທດ​ທີ່​ມີ​ການ​ພົວພັນ​ທີ່​ເປັນ​ມູນ​ເຊື້ອ ​ແລະບັນດາ​ເຂດ​ແດນ​ໃນ​ໂລກ​ ບົນ​ພື້ນຖານ​ເຄົາລົບ​ເອກະລາດ ອະທິປະ​ໄຕ ​ເອກະ​ພາບ ຜືນ​ແຜ່ນດິນ​ອັນ​ຄົບ​ຖ້ວນ ​ແລະ​ລະບອບ​ການ​ເມືອງ​ຂອງ​ກັນ​ແລະ​ກັນ, ສືບ​ຕໍ່​ນຳ​ເອົາ​ການ​ພົວພັນ​ກັບ​ບັນດາ​ຄູ່​ຮ່ວມ​ມື​ທີ່​ສຳຄັນ​ເຂົ້າ​ສູ່​ລວງ​ເລິກ ​ແລະ​ເປັນ​ປົກກະຕິ​ກວ່າ​ອີກ. ຫວຽດນາມ​ໄດ້​ສ້າງ​ຕັ້ງ​ການ​ພົວພັນ​ຄູ່​ຮ່ວມມື​ຍຸດ​ທະ​ສາດ​ກັບ 16 ປະ​ເທດ, ການ​ພົວພັນ​ຄູ່​ຮ່ວມ​ມື​ຮອບດ້ານ​ກັບ 10 ປະ​ເທດ; ​ເຊີດ​ຊູ​ພາບ​ພົດ ​ແລະບົດບາດ​ທີ່​ຕັ້ງຂອງ​ຫວຽດນາມ​ໃນ​ເວທີ​ສາກົນ, ປະກອບສ່ວນ​ທີ່​ຕັ້ງໜ້າ ​ແລະ​ມີ​ຄວາມ​ຮັບຜິດຊອບ​ເຂົ້າ​ໃນ​ຊີວິດ​ການ​ເມືອງຂອງ​ພາກ​ພື້ນ​ແລະ​ຂອງ​ໂລກ, ​ເສີມ​ຂະຫຍາຍ​ບົດບາດ​ທີ່​ຕັ້ງ​ໜ້າ​ຂອງ​ປະຊາ​ຄົມ​ອາ​ຊຽນ. ພ້ອມ​ກັບ​ການ​ເພີ່ມ​ທະວີ​ການ​ທູດ​ຂອງ​ລັດ, ການ​ພົວພັນ​ຕ່າງປະ​ເທດ​ຂອງ​ພັກ​ແລະ​ການ​ພົວພັນ​ຕ່າງປະ​ເທດ​ປະຊາຊົນກໍ່​ໄດ້​ຮັບ​ການ​ເປີດ​ກວ້າງ ຊຶ່ງ​ໄດ້​ຍົກ​ສູງ​ບົດບາດ​ທີ່​ຕັ້ງ ​ແລະ​ອິດ​ທິພົນ​ຂອງ​ຫວຽດນາມ​ໃນ​ບັນດາ​ເວທີ​ປາ​ໄສ​ພະຫຸ​ພາຄີ.

ກອງປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ຕີ​ລາຄາ​ສັງ​ລວມບັນດາ​ຜົນສຳ​ເລັດ​ທີ່​ສຳຄັນ​ຂອງ​ວຽກ​ງານ​ການ​ຕ່າງປະ​ເທດ: “ສະພາບ​ແວດ​ລ້ອມ​ສັນຕິພາບ​ອຳນວຍ​ຄວາມ​ສະດວກ​ໃຫ້​ແກ່​ການ​ພັດທະນາ, ຄວາມ​ເປັນ​ເອກະລາດ ອະທິປະ​ໄຕ ​ເອກະ​ພາບ ​ແລະ​ຜືນ​ແຜ່ນດິນ​ອັນ​ຄົບ​ຖ້ວນ ສືບ​ຕໍ່​ໄດ້​ຮັບ​ການ​ຮັກສາ​ໄວ້​ຢ່າງ​ໝັ້ນຄົງ. ການ​ພົວພັນ​ຕ່າງປະ​ເທດ​ໄດ້​ຮັບ​ການ​ເປີດ​ກວ້າງ ​ແລະ​ນັບ​ມື້​ນັບ​ເຂົ້າ​ສູ່​ລວງ​ເລິກ. ການ​ພົວພັນ​ກັບ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ ​ແລະ​ບັນດາ​ປະ​ເທດ​ອາ​ຊຽນ​ໄດ້​ຮັບ​ການ​ປັບປຸງ. ​ໄດ້​ສ້າງ​ຕັ້ງ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ, ການ​ພົວພັນ​ຄູ່​ຮ່ວມ​ມື​ຮອບດ້ານ​ກັບ​ຫຼາຍ​ປະ​ເທດ​ທີ່​ສຳຄັນ... ​ໄດ້​ເປັນ​ເຈົ້າ​ການ​ແລະ​ຕັ້ງໜ້າ​ໃນ​ການ​ເຂົ້າຮ່ວມ​ວຽກ​ງານລວມຂ​ອງປະຊາ​ຄົມ​ໂລກ, ​ໃນ​ບັນດາ​ເວທີ​ປາ​ໄສ, ບັນດາ​ອົງການ​ຈັດ​ຕັ້ງ​ພາກ​ພື້ນ ​ແລະ​ສາກົນ, ຍົກ​ສູງ​ຖານະ​ບົດບາດ​ຂອງ​ປະ​ເທດ...”(3).

ອາດ​ຈະ​ຢືນຢັນ​ວ່າ, ຜົນສຳ​ເລັດ​ໃນ​ການ​ປະຕິບັດ​ແນວທາງ​ການ​ຕ່າງປະ​ເທດ​ຂອງ​ພັກ​ໃນ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່ ​ແມ່ນ​ສ່ວນ​ປະກອບ​ທີ່​ສຳຄັນ​ເຂົ້າ​ໃນ​ການ​ປົກ​ປັກ​ຮັກສາ​ເອກະລາດ ອະທິປະ​ໄຕ​ຂອງ​ຊາດ, ຮັກສາສະຖຽນ​ລະ​ພາບ​ທາງ​ການ​ເມືອງ, ຍົກ​ສູງ​ຖານະ​ບົດບາດ​ຂອງ​ຫວຽດນາມ​ໃນ​ເວທີ​ສາກົນ; ປະກອບສ່ວນ​ສ້າງ​ສະພາບ​ແວດ​ລ້ອມ​ສາກົນ​ທີ່​ມີ​ສັນຕິພາບ ​ເອກະລາດ ການ​ຮ່ວມ​ມື ການ​ພັດທະນາ ​ແລະ ຄວາມ​ໄວ້​ວາງ​ໃຈ​ຊຶ່ງ​ກັນ​ແລະ​ກັນ; ສ້າງ​ແຫຼ່ງພະລັງ​ທີ່​ສຳຄັນ​ຈາກ​ພາຍ​ນອກ​ເພື່ອ​ຍູ້​ແຮງການ​ຫັນ​ປະ​ເທດ​ຊາດ​ເປັນ​ອຸດສາຫະກຳ ທັນ​ສະ​ໄໝ; ​ໄດ້​​ເຂົ້າ​ຮ່ວມປະກອບສ່ວນ​ຄວາມ​ຮັບຜິດຊອບ​ໃນ​ການ​ແກ້​ໄຂ​ບັນດາ​ບັນຫາ​ສາກົນ​ເພື່ອ​ສັນຕິພາບ ການ​ຮ່ວມ​ມື ​ແລະ​ການ​ພັດທະນາ.

​​ຍູ້​ແຮງ​ການຜັນ​ຂະຫຍາຍ​ທິດ​ທາງ​ຍຸດ​ທະ​ສາດ​ເປັນ​ເຈົ້າ​ການ ​ແລະ​ຕັ້ງໜ້າ​ເຊື່ອມ​ໂຍງ​ສາກົນ

ປະຈຸ​ບັນ​ນີ້, ​​ໂລກາ​ພິວັດ​ບໍ່​ແມ່ນ​ທ່າ​ອຽງ​ໜຶ່ງ​ອີກຫາກ​​ເປັນ​ຂະ​ບວນວິວັດການ​ເຄື່ອນ​ໄຫວ​ທີ່​​ແຂງ​ແຮງ​ຂອງ​ໂລກ, ດັ່ງ​ນັ້ນ ການ​ເຊື່ອມ​ໂຍງ​ສາກົນຈຶ່ງ​ເປັນ​ແຮງ​ດຶງ​ດູດສຳລັບ​ທຸກ​ປະ​ເທດ​ໃນ​ໂລກ. ພາຍ​​ໃຕ້​ການ​ກະທົບ​ຂອງ​ໂລກາ​ພິວັດ, ຄວາມ​ຕ້ອງການ​ເຊື່ອມ​ໂຍງ​ສາກົນ​ກໍ່​ປະກົດ​ຕົວ​ຂຶ້ນ. ​ໂລກາ​ພິວັດ​ເປັນ​ສິ່ງ​ທີ່​ຈຳ​ເປັນ ດັ່ງ​ນັ້ນ​ການ​ເຊື່ອມ​ໂຍງ​ສາກົນ​ກໍ່​ເປັນຄວາມ​ຮຽກຮ້ອງ​ຕ້ອງການ​ພາວະ​ວິ​ໄສ. ​ໂດຍ​ເຫັນ​ແຈ້ງ​ການ​ຫັນປ່ຽນ​ພາວະ​ວິ​ໄສ ​ແລະ​ແຂງ​ແຮງ​ທີ່​ສຸດ​ນັ້ນ, ​ໃນ​ຕະຫຼອດ 30 ກວ່າ​ປີ​ແຫ່ງ​ການປ່ຽນ​ແປງ​ໃໝ່​ປະ​ເທດ​ຊາດ, ຜ່ານ​ບັນດາ​ກອງ​ປະຊຸມ​ໃຫຍ່ ​ແລະ​ກອງ​ປະຊຸມ​ຄະນະ​ບໍລິຫານ​ງານ​ສູນ​ກາງ, ພັກ​ກອມ​ມູນິດ​ຫວຽດນາມ​ໄດ້​ວາງ​ແນວທາງ ແລະນຳພາ​ການຈັດ​ຕັ້ງ​ປະຕິບັດທິດ​ທາງ​ຍຸດ​ທະ​ສາດ​ເປັນ​ເຈົ້າ​ການ ​ແລະ​ຕັ້ງໜ້າ​ເຊື່ອມ​ໂຍງ​ສາກົນ, ປະກອບສ່ວນ​ເຂົ້າ​ໃນ​ການ​ປະຕິບັດ​ໜ້າ​ທີ່​​ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ​ຫວຽດນາມ​ສັງຄົມ​ນິຍົມ.

ພັກ​ກອມ​ມູນິດ​ຫວຽດນາມກຳນົດ​ແຈ້ງ, ການ​ເຊື່ອມ​ໂຍງ​ສາກົນ​ແມ່ນ​ພາລະກິດ​ຂອງ​ປວງ​ຊົນ ​ແລະ​ຂອງ​ທົ່ວ​ທັງ​ລະບົບ​ການ​ເມືອງພາຍ​ໃຕ້​ການ​ນຳພາ​ຂອງ​ພັກ. ທຸກ​ກົນ​ໄກ, ນະ​ໂຍບາຍ​ຕ້ອງ​ເສີມ​ຂະຫຍາຍ​ຄວາມ​ເປັນ​ເຈົ້າ​ການ, ຄວາມ​ຕັ້ງໜ້າ ​ແລະ​ປະດິດ​ສ້າງ​ຂອງ​ທຸກ​ອົງການ​​ແລະ​ບຸກຄົນ, ຂຸດ​ຄົ້ນ​​ຄວາມ​ສາມາດ​ບົ່ມ​ຊ້ອນ​ຕ່າງໆ​ໃນ​ສັງຄົມ​ແລະ​ໃນ​ປະຊາຊົນ ຢ່າງ​ມີ​ປະສິດທິ​ຜົນ. ​ເຊື່ອມ​ໂຍງ​ສາກົນ​ບົນ​ພື້ນຖານ​ເສີມ​ຂະຫຍາຍຊັບພະຍາກອນ​ພາຍ​ໃນ; ​ເຊື່ອມ​ຕໍ່​ຢ່າງ​ແໜ້ນ​ແຟ້ນ​ແລະ​ຊຸກຍູ້​ຂະ​ບວນວິວັດ​ການ​ປັບປຸງ​ລະບຽບ​ກົດໝາຍ, ຍົກ​ສູງ​ຄຸນນະພາ​ບຂອງ​ຊັບພະຍາກອນ​ມະນຸດ, ສ້າງ​ໂຄງ​ສ້າງ​ພຶ້ນຖານ​ໃຫ້​ທັນ​ສະ​ໄໝ, ຍົກ​ສູງ​ກຳລັງ​ແຮງ​ສັງ​ລວມ​ແລະ​ຄວາມ​ສາມາດ​ແຂ່ງຂັນ​ຂອງ​ຊາດ; ​ເຊື່ອມ​ຕໍ່​ຢ່າງ​ແໜ້ນ​ແຟ້ນກັບ​ການ​ເພີ່ມ​ທະວີ​ການ​ເຊື່ອມ​ໂຍງ​ລະຫວ່າງ​ພາກ, ​ເຂດ​ໃນ​ປະ​ເທດ. ການ​ເຊື່ອມ​ໂຍງ​ເສດຖະກິດ​ສາກົນ​ແມ່ນ​ຈຸດ​ໜັກ​ໃຈກາງ, ການ​ເຊື່ອມ​ໂຍງ​ສາກົນ​ໃນ​ບັນດາ​ຂົງ​ເຂດ​ອື່ນ​ຕ້ອງ​ອຳນວຍ​ຄວາມ​ສະດວກ​ໃຫ້​ແກ່​ການ​ເຊື່ອມ​ໂຍງ​ເສດຖະກິດ ​ແລະປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ພັດທະນາ​ເສດຖະກິດ, ປັບປຸງ​ການ​ປ້ອງ​ກັນປະ​ເທ​ດ, ຮັບປະກັນ​ຄວາມ​ໝັ້ນຄົງ​ແຫ່ງ​ຊາດ, ຮັກສາ​ແລະ​ເສີມ​ຂະຫຍາຍ​ເອກະ​ລັກ​ວັດທະນະທຳ​ຂອງ​ຊາດ, ຊຸກຍູ້​ການ​ພັດທະນາ​ວັດທະນະທຳ​ສັງ​ຄົມ; ການ​ເຊື່ອມ​ໂຍງ​ສາກົນ​ໃນ​ບັນດາ​ຂົງ​ເຂດ​ຕ້ອງ​ໄດ້​ຮັບ​ການ​ປະຕິບັດ​ຢ່າງ​ຄົບ​ຊຸດຢູ່​ໃນ​ແຜນ​ຍຸດ​ທະ​ສາດ​ການ​ເຊື່ອມ​ໂຍງ​ສາກົນ​ລວມ ດ້ວຍ​ແຜນການດຳເນີນ​ງານ​​ຂັ້ນ​ຕອນທີ່​ສອດຄ່ອງເໝາະ​ສົມກັບ​ເງື່ອນ​ໄ​ຂ ​ແລະ​ກຳລັງ​ຄວາມ​ສາມາດ​ຂອງ​ປະ​ເທດ.

​ຍ້ອນ​ໄດ້​ຜັນ​ຂະຫຍາຍ​ທິດ​ທາງ​ຍຸດ​ທະ​ສາດ​ທີ່​ສຳຄັນ​ນີ້​ຢ່າງ​ແຂງ​ແຮງ, ດັ່ງ​ນັ້ນ​ໃນ​ຊຸມ​ປີ​ທີ່​ຜ່ານ​ມາ, ຫວຽດນາມ​ໄດ້​ຍູ້​ແຮງ​ການ​ພົວພັນ​ກັບ​ບັນດາ​ຄູ່​ຮ່ວມ​ມື ແລະ​ເຮັດ​ໃຫ້ການ​ພົວພັນ​ນັ້ນ​ເລິດ​ເຊິ່ງຕື່ມ​ອີກ, ​ໂດຍ​ສະ​ເພາະ​ບັນດາ​ຄູ່​ຮ່ວມ​ມື​ທີ່​ສຳຄັນ​ທີ່​ສຸດ​ສຳລັບ​ການ​ພັດທະນາ ​ແລະການ​ຮັກສາ​ຄວາມ​ປອດ​ໄພ​ຂອງ​ປະ​ເທດ, ນຳ​ເອົາຂອບ​ການ​ພົວພັນ​ທີ່​ໄດ້​ສ້າງ​ຂຶ້ນ​ນັ້ນ​ເຂົ້າ​ສູ່​ພາກ​ປະຕິບັດ​ຕົວ​ຈິງ. ອາດ​ຈະປະ​ເມີນ​ສະຖານະຂອງ​ການ​ເຊື່ອມ​ໂຍງ​ສາກົນ​ຂອງ​ຫວຽດນາມ​ໃນ​ບາງ​ຂົງ​ເຂດ​ຕົ້ນຕໍ​ລຸ່ມ​ນີ້.

ທີ​ໜຶ່ງ, ການ​ເຊື່ອມ​ໂຍງ​ເສດຖະກິດ​ສາກົນ

ມາ​ເຖິງ​ປະຈຸ​ບັນ, ຫວຽດນາມ​ໄດ້​ເຊັນ​ບັນດາ​ສັນຍາ​ການ​ຄ້າ​ເສລີ (FTA) ກັບ​ສະມາຄົມ​ບັນດາ​ປະ​ເທດ​ອາຊີ​ຕາ​ເວັນ​ອອກສຽງ​ໃຕ້ (ອາ​ຊຽນ), ຍີ່ປຸ່ນ, ຊີ​ເລ, ສະຫະພາບ​ເອີຣົບ (EU), ສ.​ເກົາຫຼີ; ຫວຽດນາມ​ພ້ອມ​ກັບ​ອາ​ຊຽນ ​ເຊັນ​ສັນຍາ​ການ​ຄ້າ​ເສລີ​ກັບ ອິນ​ເດຍ, ອົ​ດສະຕຣາລີ, ນິວ ຊີ​​ແລນ, ສ.​ເກົາຫຼີ, ຍີ່ປຸ່ນ, ຈີນ. ພາຍຫຼັງ​ທີ່​ຫວຽດນາມ​ເຂົ້າ​ເປັນ​ສະມາຊິກ​ຂອງ​ອົງການ​ການ​ຄ້າ​ໂລກ (WTO) ​ໃນ​ປີ 2007, ບັນດາ​ນັກ​ລົງທຶນ​ທີ່​ສຳຄັນ​ຂອງ​ໂລກ​ໄດ້​ຫັນ​ມາ​ລົງທຶນ​ໃນ​ຫວຽດນາມ, ຊຶ່ງ​ເປັນ​ປະ​ເທດ​ທີ່​ມີຄວາມ​ໝັ້ນຄົງ​ທາງ​ການ​ເມືອງ​ແລະ​ເສດຖະກິດ​ມະຫາ​ພາກ, ມີ​​ກຳລັງ​ແຮງ​ງານ​ຫຼວງ​ຫຼາຍ​ແລະ​ຄ່າ​ໄຊ້ຈ່າຍ​ຕ່ຳ. ​ໃນ​ຊຸມ​ປີ​ທີ່​ຜ່ານ​ມາ, ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ (FDI) ມີ​ມູນ​ຄ່າ​ສະ​ເລ່ຍ​ເກືອບ 11 ຕື້​ໂດ​ລາ​ສະຫະລັດ​ຕໍ່​ປີ, ມູນ​ຄ່າ​ການ​ຄ້າ​ສົ່ງ​ອອກ​ປີ 2017 ບັນລຸ 214 ຕື້​ໂດ​ລາ​ສະຫະລັດ, ຫຼາຍ​ກວ່າ 40 ​ເທົ່າ​ທຽບ​ກັບ​ມູນ​ຄ່າ​ການ​ຄ້າ​ສົ່ງ​ອອກ​ປີ 1995 (ປີ​ທຳ​ອິດ​ທີ່​ຫວຽດນາມ​ເຊື່ອມ​ໂຍງ​ເສດຖະກິດ​ສາກົນ, ມູນ​ຄ່າ​ການ​ຄ້າ​ສົ່ງ​ອອກ​ບັນລຸ​ພຽງ 5 ຕື້​ໂດ​ລາ​ສະຫະລັດ). ການລົງນາມ ແລະກະກຽມຜັນຂະຫຍາຍສັນຍາການຄ້າເສດລີຮຸ່ນໃໝ່ ສ້າງ​ໂອກາດ​ເພື່ອ​ເປີດ​ກວ້າງຕະຫຼາດທີ່​ມີ​ຫຼາຍ​ຮູບ​ການບູລິ​ມະ​ສິດ​ສູງ, ​ເຂົ້າ​ຮ່ວມ​ເລິກ​ໃນ​ພວງ​ພະນັງ​ການ​ສະໜອງ, ​ໃນ​ເຄືອ​ຂ່າຍ​ການ​ຜະລິດ​ລະດັບ​ໂລກ ​ແລະ​ຂະ​ບວນການ​ເຄື່ອນ​ໄຫວ​ຂອງ​ບັນດາ​ສະ​ຖາ​ບັນ, ກົນ​ໄກ, ​ໂຄງ​ສ້າງ​ເສດຖະກິດ​ຂອງ​ພາກ​ພື້ນ ​ແລະ​ສາກົນ. ຜູ້​ບໍລິ​ໂພ​ກມີ​ໂອກາດ​ເລືອກ​ເອົາ​ສິນຄ້າ, ບໍລິການ​ທີ່​ມີ​ຄຸນ​ນະພາ​ບສູງ, ລາຄາ​ຕ່ຳ, ຮັບປະກັນ​ມາດຕະຖານ​ອະນາ​ໄມ, ສິ່ງ​ແວດ​ລ້ອມ.

ທີ​ສອງ, ​ການ​ເຊື່ອມ​ໂຍງ​ສາກົນ​ທາງ​ດ້ານ​ວັດທະນະທຳ-ສັງຄົມ, ສິ່ງ​ແວດ​ລ້ອມ

​ໃນ​ລະດັບ​ພາກ​ພື້ນ, ພິ​ເສດ​ໃນ​ຂອບ​ອາ​ຊຽນ, ຫວຽດນາມ​ຖື​ບົດບາດ​ສຳຄັນ​ໃນ​ການ​ກໍ່ສ້າງ​ປະຊາ​ຄົມ​ວັດທະນະທຳ-ສັງຄົມ​ອາ​ຊຽນ, ມຸ່ງ​ໄປ​ສູ່ “​ເປັນ​ເອກະ​ພາບ​ໃນ​ຄວາມ​ຫຼາກ​ຫຼາຍ”. ​ໃນ​ລະດັບ​ໂລກ, ຫວຽດນາມ​ເຂົ້າ​ຮ່ວມ​ນັບ​ມື້​ນັບ​ເລິກ​ເຊິ່ງ​ໃນ​ບັນດາ​ອົງການ, ​ເວທີ​ປາ​ໄສພະຫຸ​ພາຄີ​ກ່ຽວ​ກັບ​ວັດທະນະທຳ, ​ເຊັ່ນອົງການ​ວັດທະນະທຳ, ວິທະຍາສາດ ​ແລະ​ການ​ສຶກສາ​ຂອງ​ສະຫະ​ປະຊາ​ຊາດ (UNESCO), ຟຣານ​ໂກ​ຟົນ, ຄະນະ​ກຳມະການ​ມໍລະດົກ​ໂລກ. ຫວຽດນາມ​ບໍ່​ພຽງ​ແຕ່​ເຂົ້າ​ຮ່ວມ​ແລະ​ປະຕິບັດ​ຂໍໍ້ສັນຍາ​ຕ່າງໆ​ໃນ​ຖານະສະມາຊິກ​ຂອງ​ອົງການ​ຈັດ​ຕັ້ງ​ສາກົນ​ເທົ່າ​ນັ້ນ ​ແຕ່​ຍັງ​ໄດ້​ປະກອບສ່ວນ​ເຂົ້າ​ໃນ​ການປັບປຸງ​ບູລະນະ, ກໍ່ສ້າງ​ມາດຕະຖານ​ແລະ​ຂໍ້​ຄິດ​ປະດິດ​ໃໝ່​ຂອງອົງການ​ຈັດ​ຕັ້ງ​ເຫຼົ່າ​ນັ້ນ.

ຂະ​ບວນວິວັດ​ແຫ່ງ​ການ​ເຊື່ອມ​ໂຍງ​ສາກົນ​ທາງ​ດ້ານ​ວັດທະນະທຳ-ສັງຄົມ​ໄດ້​ຊ່ວຍ​ໃຫ້​ຫວຽດນາມ​ເພີ່ມ​ຄວາມ​ສາມາດ​ເຂົ້າ​ເຖິງບັນດາ​ວັດທະນະທຳ​ທີ່​ຕ່າງ​ກັນ; ຮັບ​ເອົາ​ຄຸນຄ່າ​ທີ່​ກ້າວໜ້າ​ຂອງ​ມະນຸດຊາດ; ຮ່ຳຮຽນບັນດາ​ບົດຮຽນ​ທີ່​ດີ ​ເພື່ອ​ຮັກສາ​ແລະ​ພັດທະນາ​ວັດທະນະທຳ​ທີ່​ເປັນ​ມູນ​ເຊື້ອ​ຂອງ​ຊາດ, ສົມທົບ​ວັດທະນະທຳ​ທີ່​ເປັນ​ມູນ​ເຊື້ອ​ກັບ​ວັດທະນະທຳ​ສະ​ໄໝ​ໃໝ່​ເປັນ​ຢ່າງ​ດີ; ສວຍ​ໃຊ້​ໂອກາດ​ຕ່າງໆ​ເພື່ອ​ໂຄສະນາ​ເຜີຍ​ແຜ່​ວັດທະນະທຳ ​ແລະ​ບັນດາ​ຄຸນຄ່າ​ວັດທະນະທຳ​ຫວຽດນາມ​ໃນ​ທົ່ວ​ໂລກ.

ການ​ເຊື່ອມ​ໂຍງ​ສາກົນ​ທາງ​ດ້ານ​ສິ່ງ​ແວດ​ລ້ອມ, ຮັບ​ມື​ກັບ​ການ​ປ່ຽນ​ແປງ​ສະພາບ​ອາກາດ ຊ່ວຍ​ໃຫ້​ປະ​ເທດ​ແລະ​ພັກ​ມີ​ບົດຮຽນ​ທີ່​ລ້ຳ​ຄ່າ, ​ເພີ່ມ​ແຫຼ່ງພະລັງ​ເພື່ອ​ມີ​ນະ​ໂຍບາຍ​ແລະ​ມາດ​ຕະການທີ່​ມີ​ປະສິດທິ​ຜົນ ​ໃນ​ການ​ປ້ອງ​ກັນຕ້ານ​ແລະຫຼຸດຜ່ອນ​ຜົນ​ກະທົບ​ຂອງ​ໄພ​ທຳ​ມະ​ຊາດ, ຮັບປະກັນ​ຄວາມ​ໝັ້ນຄົງ​ຂອງ​ຊາດ ​ແລະ​ຄວາມ​ປອດ​ໄພ​ຂອງ​ປະຊາຊົນ.

ທີ​ສາມ, ການ​​ເຊື່ອມ​ໂຍງ​ສາກົນ​ທາງ​ດ້ານ​ການ​ເມືອງ, ການ​ປ້ອງ​ກັນ​ປະ​ເທດ-ປ້ອງ​ກັນ​ຄວາມ​ສະຫງົບ

​ໃນ​ລະດັບ​ການ​ພົວພັນ​ສອງ​ຝ່າຍ, ການ​​ເຊື່ອມ​ໂຍງ​ສາກົນ​ທາງ​ດ້ານ​ການ​ເມືອງຂອງ​ຫວຽດນາມ​ໃນ​ຊຸມ​ປີ​ທີ່​ຜ່ານ​ມາ ​ໄດ້​ມີ​ບາດກ້າວ​ຫັນປ່ຽນ​ໂດຍ​ພື້ນຖານ ຈາກ​ການ​ເອົາ​ໃຈ​ໃສ່​ເປີດ​ກວ້າງການ​ພົວພັນ​ກັບ​ບັນດາ​ປະ​ເທດ ​ໄປ​ສູ່​ການ​ພັດທະນາ​ການ​ພົວພັນ​ລະຫວ່າງ​ຫວຽດນາມ​ກັບ​ບັນດາ​ປະ​ເທດ​​ໃຫ້ເຂົ້າ​ສູ່​ລວງ​ເລິກ​ແລະ​ເປັນ​ປົກກະຕິ. ຫວຽດນາມ​ສືບ​ຕໍ່​ຍູ້​ແຮງ​ແລະ​ເຮັດ​ໃຫ້ການ​ພົວພັນ​ສອງ​ຝ່າຍ​ກັບ​ບັນດາ​ປະ​ເທດ​ໃຫ້​ເລິກ​ເຊິ່ງກວ່າ​ອີກ, ​ເປັນ​ຕົ້ນ​ແມ່ນ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ, ບັນດາ​ປະ​ເທດ​ໃນ​ພາກ​ພື້ນ, ບັນດາ​ປະ​ເທດ​ໃຫຍ່, ປະ​ເທດ​ເພື່ອນ​ມິດ​ທີ່​ເປັນ​ມູນ​ເຊື້ອ ​ແລະ​ຄູ່​ຮ່ວມ​ມືທີ່​ມີ​ທ່າ​ແຮງ.

ທາງ​ດ້ານ​ການ​ປ້ອງ​ກັນ​ປະ​ເທດ-ປ້ອງ​ກັນ​ຄວາມ​ສະຫງົບ, ຫວຽດນາມ​ເຊື່ອມ​ໂຍງ​ແຕ່​ລະ​ກ້າວ​ໃນ​ສະຖານະ​ການ​ແລະ​ເວລາ​ທີ່​ລະອຽດ. ນັ້ນ​ແມ່ນ​ເຂົ້າ​ຮ່ວມ​ໃນ​ເກືອບ​ທຸກ​ເວທີ​ປາ​ໄສ​ການ​ປ້ອງ​ກັນ​ຄວາມ​ສະຫງົບພາກ​ພື້ນ, ​ເຊັ່ນ​ບັນດາ​ກອງ​ປະຊຸມ​ໃນ​ຂອບ​ເຂດ​ອາ​ຊຽນ. ​ໃນ​ລະດັບ​ໂລກ, ຫວຽດນາມ​ເຂົ້າ​ຮ່ວມອົງການ​ຕຳຫຼວດ​ອາຊະຍາ​ກຳ​ສາກົນ (Interpol) ​ແຕ່​ປີ 1990 ​ແລະ​ເຂົ້າ​ຮ່ວມ​ເວທີ​ປາ​ໄສຜູ້​ບັນຊາ​ການ​ຕຳຫຼວດ​ບັນດາ​ປະ​ເທດ​ອາ​ຊຽນ. ​ເດືອນ​ພຶດສະພາ 2014, ຫວຽດນາມ​ໄດ້​ແຕ່ງ​ຕັ້ງ​ນາຍ​ທະຫານ​ເຂົ້າ​ຮ່ວມກຳລັງ​ຮັກສາ​ສັນຕິພາບ​ຂອງ​ສະຫະ​ປະຊາ​ຊາດ.

ການ​ປ້ອງ​ກັນ​ປະ​ເທດ-ປ້ອງ​ກັນ​ຄວາມ​ສະຫງົບສອງ​ຝ່າຍ​ເປີດ​ກວ້າງ. ມາ​ເຖິງ​ປະຈຸ​ບັນ, ຫວຽດນາມ​ໄດ້​ມີ​ການ​ພົວພັນ​ທາງ​ດ້ານ​ການ​ປ້ອງ​ກັນ​ປະ​ເທດ​ກັບ 80 ກວ່າ​ປະ​ເທດ, ປະກອບ​ດ້ວຍ​ບັນດາ​ປະ​ເທດ​ສະມາຊິກ​ຖາວອນ​ຂອງ​ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະຊາ​ຊາດ; ​ໄດ້​ເຊັນ​ສັນຍາ, ບົດ​ບັນທຶກ​ຄວາມ​ຈຳ 50 ສະບັບ​ກ່ຽວ​ກັບ​ການ​ຮ່ວມມື​ຊ່ວຍ​ເຫຼືອ​ຊຶ່ງ​ກັນ​ແລະ​ກັນ​ທາງ​ອາຍາ ຕ້າ​ນອາ​ຊະ​ຍາ​ກຳ, ປ້ອງ​ກັນ​ແລະ​ຕ້ານ​ຢາ​ເສບ​ຕິດ​ກັບ​ຕ່າງປະ​ເທດ. ການ​ພົວພັນ​ທາງ​ດ້ານ​ການ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບພະຫຸ​ພາຄີ​ໄດ້​ມີ​ການ​ພັດ​ທະ​ນາ​ທາງ​ດ້ານ​ປະລິມານ ຄຸນ​ນະພາ​ບ ​ແລະ​ປະສິດທິ​ຜົນ.

ຜ່ານ​ໄລຍະ​ເວລາ 30 ກວ່າ​ປີ​ແຫ່ງ​ການ​ປະຕິບັດ​ແນວທາງ​ການ​ຕ່າງປະ​ເທດ​ເພື່ອ​ສັນຕິພາບ ການ​ຮ່ວມ​ມື ການ​ພັດທະນາ, ​ເປັນ​ເຈົ້າ​ການ ຕັ້ງໜ້າ​ເຊື່ອມ​ໂຍງ​ສາກົນ​ຂອງ​ພັກ, ອາດ​ຈະ​ຖອດ​ຖອນ​ບົດຮຽນ​ເບື້ອງ​ຕົ້ນ​ຈຳນວນ​ໜຶ່ງ​ດັ່ງ​ນີ້:

ທີ​ໜຶ່ງ, ຮັບປະກັນ​ແລະ​ເພີ່ມ​ທະວີ​ການ​ນຳພາ​ຂອງ​ພັກ, ການ​ຄຸ້ມ​ຄອງ​ຂອງ​ລັດ, ​ເສີມ​ຂະຫຍາຍ​ກຳລັງ​ແຮງ​ຂອງ​ລະບົບ​ການ​ເມືອງ​ແລະ​ທົ່ວ​ປວງ​ຊົນ​ໃນ​ວຽກ​ງານ​ການ​ຕ່າງປະ​ເທດ ​ແລະ​ເຊື່ອມ​ໂຍງ​ສາກົນ. ການ​ພົວພັນ​ຕ່າງປະ​ເທດ​ເພື່ອ​ສັນຕິພາບ ການ​ຮ່ວມ​ມື ການ​ພັດ​ທະນະ; ​ເປັນ​ເຈົ້າ​ການ​ແລະ​ຕັ້ງໜ້າ​ເຊື່ອມ​ໂຍງ​ສາກົນ​ປະກອບສ່ວນ​ຮັກສາ​ສະພາບ​ແວ​ດລ້ອມ​ສັນຕິພາບ ສະຖຽນ​ລະ​ພາບ, ປົກ​ປັກ​ຮັກສາ​ເອກະລາດ ອະທິປະ​ໄຕ​ແຫ່ງ​ຊາດ, ຜົນ​ປະ​ໂຫຍ​ດສູງ​ສຸດ​ຂອງ​ຊາ​ດ, ຮັກສາ​ກຳນົດ​ທິດ​ສັງຄົມ​ນິຍົມ, ຍົກ​ສູງ​ຖານະ​ບົດບາດ​ຂອງ​ຫວຽດນາມ​ໃນ​ເວທີ​ສາກົນ. ຫວຽດນາມ​ເປັນ​ເຈົ້າ​ການ, ຕັ້ງ​ໃຈ​ເຂົ້າ​ຮ່ວມ​ການ​ປົກ​ປັກ​ຮັກສາ​ສັນຕິພາບ ການ​ຮ່ວມ​ມື ​ແລະ​ການ​ພັດ​ທະນາ, ຍູ້​ແຮງ​ການ​ປະຕິບັດ​ແນວທາງ​ການ​ຕ່າງປະ​ເທດ​ທີ່​ເປັນ​ເອກະລາດ ​ເປັນ​ເຈົ້າ​ຕົນ​ເອງ, ສ້າງ​ຂອບ​ເຂດ​ການ​ພົວພັນ​ຮ່ວມ​ມື​ແບບ​ສະ​ເໝີ​ພາບ ​ເປັນ​ປົກກະຕິ ຍາວ​ນານ, ​ເຂົ້າ​ສູ່​ລວງ​ເລິກ, ມີ​ຜົນ​ປະ​ໂຫຍ​ດຮ່ວມ​ກັນ, ສ້າງ​ຄວາມ​ແຊກ​ຊ້ອນ​ທາງ​ຜົນ​ປະ​ໂຫຍ​ດພູມ​ສາດ​ການ​ເມືອງ​ຍຸດ​ທະ​ສາດ; ຍູ້​ຖອຍ​ແລະ​ຜາບ​ແພ້ທຸກ​ການ​ເຄື່ອນ​ໄຫວ​ທຳລາຍ​ຂອງ​ບັນດາ​ອິດ​ທິກຳລັງ​ສັດຕູ, ປະຕິບັດ​ໜ້າ​ທີ່​ກໍ່ສ້າງ​ແລະ​ປົກ​ປັກ​ຮັກສາປະ​ເທດ​ຊາດຢ່າງ​ສຳ​ເລັດ​ມີ​ໄຊ.

ທີ​ສອງ, ຮັບ​ຮູ້​ສະຖານະ​ການ​ໂລກ​ແລະ​ສະພາບ​ການ​ຂອງ​ປະ​ເທດ​ຢ່າງ​ຖືກຕ້ອງ, ​ເປັນ​ເຈົ້າ​ການ​ເກັບ​ກຳ​ສະພາບ​ການ, ຍົກ​ສູງ​ຄວາມ​ສາມາດ​ຄາດ​ຄະ​ເນ, ​ໄຈ້​ແຍກ​ສະພາບ​ການ​ຜັນ​ປ່ຽນ​ສະ​ເພາະ​ໜ້າ​​ແລະ​ຍາວ​ນານ ​ເພື່ອ​ຍົກ​ສູງ​ຄວາມ​ສາມາດ​ວາງ​ແນວທາງ ​ແຜນ​ນະ​ໂຍບາຍຂອງ​ພັກ, ຊີ້​ນຳ​ແລະບໍລິຫານ​ຈັດການ​ການ​ເຄື່ອນ​ໄຫວ​ພົວພັນ​ຕ່າງປະ​ເທດ​ແລະ​ເຊື່ອມ​ໂຍງ​ສາກົນ​ຢ່າງ​ທັນ​ການ. ການ​ປະຕິບັດ​ຂໍ້​ສັນຍາ​ສາກົນ​ໃນ​ການຕ່າງປະ​ເທດ​ແລະ​ເຊື່ອມ​ໂຍງ​ສາກົນ​ທັງ​ຮຽກຮ້ອງ ທັງ​ອຳນວຍ​ເງື່ອນ​ໄຂ​​ເພື່ອໃຫ້​ພັກປ່ຽນ​ແປງ​ໃໝ່​ຈິນຕະນາການ​ທິດ​ສະ​ດີ​ກ່ຽວ​ກັບ​ຍຸກສະ​ໄໝ ​ແລະ​ໂລກ​ປະຈຸ​ບັນ; ​ເປີດ​ກວ້າງ​ການ​ພົວພັນ​ກັບ​ບັນດາ​ພັກ​ການ​ເມືອງ, ​ເພີ່ມ​ທະວີ​ການ​ພົວພັນ​ທາງ​ດ້ານ​ພັກ, ຍົກ​ສູງ​ຖານະ​ບົດບາດ​ສາກົນ​ຂອງ​ພັກ​ແລະຂອງ​ປະ​ເທດ; ປະກອບສ່ວນ​ປ່ຽນ​ແປງ​ໃໝ່​ແບບ​ວິທີ​ນຳພາ, ຍົກ​ສູງ​ຄວາມ​ສາມາດ​ນຳພາ​ແລະ​ກຳລັງ​ແຮງ​ສູ້​ຮົບ​ຂອງ​ພັກ. ຈາກ​ນັ້ນ, ພັກ​ນຳ​ພາ​ການ​ປັບປຸງ​ບູລະນະ​ລະບອບລະບຽບ, ນະ​ໂຍບາຍ, ກົດໝາຍ​ຕາມ​ມາດຕະຖານ​ສາກົນ, ຮັບປະກັນ​ໃຫ້​ປະ​ເທດ​ມີ​ເງື່ອນ​ໄຂ​ປັບ​ຕົວ​ເຂົ້າ​ກັບການ​ປ່ຽນ​ແປງ​ຢ່າງ​ໄວວາ​ຂອງ​ສະຖານະ​ການ​ສາກົນ ​ແລະ​ພາກ​ພື້ນ.

ທີ​ສາມ, ຮັບປະກັນລັກສະນະ​ຈຸດປະສົງ​ແລະ​ແທດ​ຈິງ​ຂອງ​ວຽກ​ງານ​ການ​ຕ່າງປະ​ເທດ​ແລະ​ເຊື່ອມ​ໂຍງ​ສາກົນ, ມຸ່ງ​ໄປ​ສູ່​ເປົ້າໝາຍ​ສູງ​ສຸດ​ຄື​ຜົນ​ປະ​ໂຫຍ​ດຂອງ​ຊາດ, ພັດທະນາ​ປະ​ເທດ, ປົກ​ປັກ​ຮັກສາ​ລະບອບ​ການ​ເມືອງ, ປະກອບສ່ວນ​ຍົກ​ສູງ​ຊີວິດ​ດ້ານ​ວັດຖຸ​ແລະ​ຈິດ​ໃຈ​ຂອງ​ປະຊາຊົນ, ​ໂຄສະນາ​ເຜີຍ​ແຜ່​ພາບ​ພົດ​ຂອງ​ປະ​ເທດ​ແລະ​ຜູ້​ຄົນ​ຫວຽດນາມກັບ​ເພື່ອນ​ມິດ​ໃນ​ໂລກ. ຜ່ານ​ການ​ຊຸກຍູ້​ການ​ປັບ​ໂຄງ​ສ້າງ​ທາງ​ເສດຖະກິດ, ​ເປີດ​ກວ້າງ​ການ​ຄ້າ, ຮ່ວມ​ມື​ທາງ​ດ້ານ​ແຮງ​ງານ ​ການ​ລົງທຶນ ການທ່ອງທ່ຽວ, ​ເປີດ​ກວ້າງ​ການ​ພົວພັນ​ຕ່າງປະ​ເທດ ​ແລະ​ເຊື່ອມ​ໂຍງ​ສາກົນ​ ໄດ້​ສ້າງ​ວຽກ​ເຮັດ​ງານ​ທຳ, ​ເພີ່ມ​ລາຍ​ໄດ້​ແລະ​ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ. ການ​ຮ່ວມ​ມື​ທາງ​ດ້ານ​ວັດທະນະທຳ, ການ​ສຶກສາ ​ຝຶກ​ອົບຮົມ, ວິທະຍາສາດ-​ເຕັກ​ໂນ​ໂລ​ຊີ... ສ້າງ​​ເງື່ອນ​ໄຂ​ໃຫ້​ປະຊາຊົນ​ທຸກ​ຊັ້ນ​ວັນນະມີ​ໂອກາດ​ເຂົ້າ​ເຖິງ​ຄວາມ​ຮູ້ ​ແລະ​ຄຸນຄ່າ​ອັນ​ດີ​ງານ​ຂອງ​ມະນຸດຊາດ, ຈາກ​ນັ້ນ​ຍົກ​ສູງ​ລະດັບການ​ສຶກສາ, ລະດັບ​ຄວາມ​ຮູ້ ​ແລະ​ຊີວິດທາງ​ຈິດ​ໃຈ​ຂອງ​ປະຊາຊົນ.

ທີ​ສີ່, ​ເຫັນ​ແຈ້ງຜົນ​ກະທົບ​ຕ່າງໆ​ທີ່​ບໍ່​ດີ​ແລະ​ສິ່ງ​ທ້າ​ທາຍ​ໃນ​ການ​ປະຕິບັດ​ນະ​ໂຍບາຍ​ການ​ຕ່າງປະ​ເທດ ​ແລະ​ເຊື່ອມ​ໂຍງ​ສາກົນ.

​ໃນ​ສະພາບ​ແວດ​ລ້ອມ​ແຫ່ງ​ການ​ເຊື່ອມ​ໂຍງ​ສາກົນ, ບັນດາ​ການ​ຜັນ​ປ່ຽນ​ທີ່​ບໍ່​ດີ​ຂອງ​ຊີວິດ​ການ​ເມືອງ, ​ເສດຖະກິດ​ໂລກ​ແລະ​ພາກ​ພື້ນ​ຈະ​ກະທົບ​ຢ່າງ​ໄວ​ແລະ​ແຂງ​ແຮງ​ເຖິງ​ເສດຖະກິດ​ຫວຽດນາມ ​ໂດຍ​ຜ່ານ​ຊ່ອງ​ທາງ​ການ​ຄ້າ ການ​ລົງທຶນ ການ​ເງິນ​ເງິນຕາ... ຂະ​ບວນວິວັດ​ດັ່ງກ່າວ​ອາດ​ຈະ​ເພີ່ມ​ຄວາມ​ສ່ຽງຕໍ່​ຄວາມ​ໝັ້ນຄົງ​ທາງ​ການ​ເມືອງ, ລະບຽບ​ຄວາມ​ສະຫງົບ ​ແລະ​ຄວາມ​ປອດ​ໄພ​ທາງ​ສັງຄົມ. ​ເປີດ​ປະຕູ​ປະ​ເທດ, ​ເປີດ​ເສລີ ​ແລະ​ເຊື່ອມ​ໂຍງ​ສາກົນເຮັດ​ໃຫ້ການ​ກະທົບ​ທີ່​ບໍ່​ດີ ​ແລະ​ຄວາມ​ຫຍໍ້​ທໍ້​ທາງສະພາບ​ແວ​ດລ້ອມ​ຄວາມ​ປອດ​ໄພຢູ່​ພາກ​ພື້ນ​ແລະ​ໃນ​ໂລກ, ​ເຊັ່ນ​ການ​ກໍ່​ການ​ຮ້າຍ, ອາ​ຊະ​ຍາກຳ​ລະຫວ່າງ​ປະ​ເທດ, ການລະ​ເມີດ​ຄວາມ​ປອດ​ໄພ​ເຄືອ​ຂ່າຍ… ມີ​ໂອ​ການ​ທີ່​ຈະ​ແຊກ​ຊືມ​ເຂົ້າຫວຽດນາມ. ສະພາບ​ການ​ດັ່ງກ່າວ​ກະທົບ​ໃສ່​ຂົງ​ເຂດ​ການ​ເມືອງ, ​ແນວ​ຄິດ, ສິນ​ທຳ, ​ແບບ​ແຜນ​ດຳ​ເນີນ​ຊີວິດ​ໃນ​ສັງຄົມ. ບໍ່​ພຽງ​ແຕ່​ເທົ່າ​ນັ້ນ, ບັນດາ​ອິດ​ທິກຳລັງ​ສັດຕູ, ປະຕິ​ການ​ອາດ​ຈະ​ສວຍ​ໃຊ້ສະພາບ​ການ​ເຊື່ອມ​ໂຍງ​ສາກົນ​ເພື່ອຍູ້​ແຮງ​ການ​ເຄື່ອນ​ໄຫວ​ທຳລາຍ​ເສດຖະກິດ, ຜ່ານ​ການ​ຮ່ວມ​ມື ​ແລະ​ການລົງທຶນ​ເພື່ອ​ກະທົບ​ໃສ່​ພາຍ​ໃນ, ຊຸກຍູ້​ການ “ຫັນປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ ​ແລະ​ປະຕິບັດ​ກົນອຸບາຍ “ຫັນປ່ຽນ​ໂດຍ​ສັນຕິ”.

​ເພື່ອ​ສວຍ​ໃຊ້​ໂອກາດ, ​ເອົາ​ຊະນະ​ອັນຕະລາຍ​ໃນ​ຂະ​ບວນວິວັດ​ການ​ເປີດ​ກວ້າງ​ການ​ພົວພັນ​ຕ່າງປະ​ເທດ ​ແລະ​ເຊື່ອມ​ໂຍງ​ສາກົນ, ພັກ​ກອມ​ມູນິດ​ຫວຽດນາມຕົກລົງ​ແກ້​ໄຂ​ສາຍ​ພົວພັນ​ຕ່າງໆ​ຢ່າງ​ສົມ​ເຫດ​ສົມ​ຜົນ: ການ​ພົວພັນ​ລະຫວ່າງ​ການ​ຮັບປະກັນ​ຄວາມ​ເປັນ​ເອກະລາດ, ​ເປັນ​ເຈົ້າ​ຕົນ​ເອງ​ຂອງ​ປະ​ເທດ​ ກັບຄວາມ​ເປັນ​ເຈົ້າ​ການ, ຕັ້ງໜ້າ​ເຊື່ອມ​ໂຍງ​ສາກົນ; ລະຫວ່າງ​ສິດຜົນປະ​ໂຫຍ​ດ​ແລະ​ພັນທະ​ຂອງປະ​ເທດ ກັບບັນດາ​ບັນຫາ​ທີ່​ບໍ່​ປະສົງ​ໃນ​ບັນດາ​ອົງການ​ສາກົນ; ລະຫວ່າງຈຸດປະສົງ​ດ້ານ​ເສດຖະກດ-ສັງຄົມ​ໃນ​ປະ​ເທດ ກັບຄວາມ​ຮຽກຮ້ອງ​ແລະ​ຄວາມ​ຕ້ອງ​ການ​ຂອງ​ພາຍ​ນອກ; ລະຫວ່າງ​ບັນດາ​ບັນຫາ​ເສດຖະກິດ-ການ​ຄ້າ ກັບ​ບັນດາ​ຂົງ​ເຂດ​ອື່ນ. ​ໃນ​ການ​ຊີ້​ນຳ, ບໍລິຫານ​ຈັດການ​ນັ້ນ ບັນຫາ​ສຳຄັນ​ແມ່ນການ​ປັບ​ຕົວ​ທັນ​ເວລາ, ການ​ກະທົບ​ຕອບ​ໄຫວ​ພິບ, ນຳ​ໃຊ້​ເປັນ​ຢ່າງ​ດີ​ທ່າ​​ແຮງ​ປຽບທຽບ, ຮ່ຳຮຽນ​ແລະຮັບ​ເອົາສິ່ງ​ທີ່​ດີງາມ​ຂອງ​ເພື່ອນ​ມິດສາກົນ, ດັດ​ແປງ​ແກ້​ໄຂ​ຈຸດ​ອ່ອນ ຂໍ້​ຈຳກັດ​ຂອງ​ຕົນ​ຢ່າງ​ທັນ​ການ./.

​ໂດຍ ສຈ. ປອ. ຫວູວັນ​ຮ່ຽນ

ຮອງ​ປະ​ທານ​ສະພາ​ທິດ​ສະ​ດີ​ສູນ​ກາງ

-----------------------------------------------

(1), (2) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງ​ວ່າການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 70 -71, 153.

(3) ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ປຶ້ມ​ທີ່​ໄດ້​ແນະນຳ, ໜ້າ 151-152.

- ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 910 (​ເດືອນ​ສິງຫາ 2018).

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ