ວັນພຸດ, 14/11/2018
ກອງປະຊຸມເວທີເສດຖະກິດໂລກ ກ່ຽວກັບອາຊຽນ ປີ 2018 ແລະສ່ວນຮ່ວມຂອງຫວຽດນາມ
28/10/2018 15:10' ສົ່ງ ພິມ
ກອງປະຊຸມເວທີເສດຖະກິດໂລກ ກ່ຽວກັບອາຊຽນ ປີ 2018 (ພາບ: TTXVN)

ກອງ​ປະຊຸມ​​ເວທີ​ເສດຖະກິດ​ໂລກ ​ແລະ​ການ​ເຂົ້າ​ຮ່ວມ, ຮ່ວມ​ມື​ຂອງ​ຫວຽດນາມ

​ເວທີ​ເສດຖະກິດ​ໂລກ (World Economic Forum - WEF) ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ເມື່ອ​ປີ 1971 ທີ່​ເມືອງ ​ເຊີ​ແນວ ປະ​ເທດ​ສະ​ວິດ, ​ເປັນ​ອົງການ​ຈັດ​ຕັ້ງ​ທີ່​ເປັນກາງ, ​ເຄື່ອນ​ໄຫວ​ໂດຍ​ບໍ່​ສະ​ແຫວ​ງຫາ​ຜົນ​ກຳ​ໄລ. ມາ​ຮອດ​ປະຈຸ​ບັນ, WEF ​ໄດ້​ກາຍເປັນ​ເວທີ​ປາ​ໄສ​ເສດຖະກິດທີ່​ມີ​ຊື່​ສຽງທີ່​ສຸດ​ໃນ​ໂລກ, ​ເປັນ​ຊ່ອງ​ທາງ​ທີ່ສຳຄັນສຳ​ລັບການ​ປຶກສາ​ຫາລື​ລະຫວ່າງ​ຜູ້ນຳ​ລັດຖະບານ, ບັນດາ​ບໍລິສັດ​ຊັ້ນ​ນຳ​ໃນ​ໂລກ, ນຳ​ເອົາ​ໂອກາດ​ການ​ລົງທຶນ​ແລະ​ພັດທະນາ​ມາ​ໃຫ້​ບັນດາ​ປະຊາ​ຊາດ, ພ້ອມ​ກັນ​ນັ້ນ​ກໍ່ສ້າງ​​ໂອ​ກາດ​ເພື່ອ​ໃຫ້​ບັນດາ​ຜູ້​ແທນ​ແລກປ່ຽນ​ກ່ຽວ​ກັບ​ບັນດາ​ບັນຫາ​ໂລກ ​ແລະ​ພາກ​ພື້ນທີ່​ມີ​ຄວາມ​ສົນ​ໃຈ​ຮ່ວມ​ກັນ, ກໍ່​ຄື​ເພີ່ມ​ທະວີ​ການ​ເຄື່ອນ​ໄຫວ​ເຊື່ອນ​ຕໍ່, ​ເປີດ​ກວ້າງ​ການ​ພົວພັນ​ຮ່ວມ​ມື.

​ໃນ​ແຕ່ລະ​ປີ, WEF ຈັດ​ຕັ້ງ​ການ​ປະຊຸມ​ຫຼາຍ​ຄັ້ງ​ໃນ​ລະດັບ​ໂລກ​ແລະ​ພາກ​ພື້ນ ດ້ວຍ​ການ​ເຂົ້າ​ຮ່ວມ​ຂອງ​ຜູ້ນຳລັດຖະບານ, ວິ​ສາ​ຫະກິດ​ໃຫຍ່, ອົງການ​ຈັດ​ຕັ້ງ​ສັງຄົມ​ຫຼາຍ​ທ່ານ ​ແລະ​ນັກຮຽນ​ຮູ້​ຈຳນວນ​ຫຼາຍ​ໃນ​ທົ່ວ​ໂລກ ​ເພື່ອ​ປຶກສາ​ຫາລື​ກ່ຽວ​ກັບ​ບັນດາ​ບັນຫາ​ເສດຖະກິດ-ການ​ພັດທະນາ ​ແລະ ບັນດາ​ບັນຫາທົ່ວ​ໂລກ. ​ໃນ​ບັນດາ​ເຫດການ​ທີ່ WEF ຈັດ​ຕັ້ງ​ນັ້ນ, ກອງ​ປະຊຸມ​ປະຈຳ​ປີ WEF ທີ່​ຈັດ​ຕັ້ງ​ໃນ​ທ້າຍ​ເດືອນ​ມັງກອນ​ທຸກ​ປີຢູ່​ທີ່​ນະ​ຄອນ ດາ​ໂວດ (ສະ​ວິດ) ​ເປັນ​ເຫ​ດການສຳຄັນ​ທີ່​ສຸດ. ຢູ່​ທີ່​ນີ້, ຜູ້ນຳ​ມາ​ຈາກ​ຫຼາຍ​ປະ​ເທດພ້ອມ​ກັນ​ປຶກສາ​ຫາລືກ່ຽວ​ກັບ​ບັນດາ​ບັນຫາ​ໃຫຍ່, ​ໃນລະດັບ​ທົ່ວໂລກ, ​ເຊັ່ນ ​ແນວ​ໂນ້ມການ​ເຄື່ອນ​ໄຫວ​ຂອງ​ເສດຖະກິດ​ໂລກ, ຮູບ​ແບບ​ການ​ເຕີບ​ໂຕ, ການ​ຄຸ້ມ​ຄອງ​ເສດຖະກິດ, ການ​ຄຸ້ມ​ຄອງ​ວິ​ສາ​ຫະກິດ... ​ແລະ​ພ້ອມ​ກັນ​ໃຫ້​ຄຳ​ໝັ້ນ​ສັນຍາ ຕົກລົງ​ເພີ່ມ​ທະວີ​ການ​ຮ່ວມ​ມື ​ເພື່ອ​ຄວາມ​ຈະ​ເລີ​ນພັດທະນາຮ່ວມ​ກັນ. ຄຽງ​ຄູ່​ກັບ​ກອງ​ປະຊຸມ​ປະຈຳ​ປີ​ຢູ່ ດາ​ໂວ​ດ, ທຸກ​ປີ WEF ຍັງ​ຈັດ​ຕັ້ງ​ບັນດາ​ເວທີ​ປາ​ໄສ​ຢູ່​ພາກ​ພື້ນຕ່າງໆ, ​ເຊັ່ນ ອາຊີ​ຕາ​ເວັນ​ອອກ,  ຕາ​ເວັນ​ອອກ​ກາງ, ອາ​ເມ​ລິ​ກາ​ລາ​ຕິນ, ອາ​ຟຣິກກາ. ກໍ່​ຄື​ກັນ​ກັບ​ບັນດາ​ກອງ​ປະຊຸມ WEF ຢູ່​ພາກ​ພື້ນ​ອື່ນ, ກອງ​ປະຊຸມ WEF ອາຊີ​ຕາ​ເວັນ​ອອກ ​ແມ່ນ​ບ່ອນ​ແລກປ່ຽນ, ວິ​ເຄາະ​ໄຈ້​ແຍກ ​ແລະ​ປະ​ເມີນ​ ​ກ່ຽວ​ກັບ​ບັນດາ​ບັນຫາ​ການພັດທະນາ​ຂອງ​ພາກ​ພື້ນ, ​ເພີ່ມ​ທະວີ ​ແລະ​ເປີດ​ກວ້າງ​ການ​ພົວພັນ​ຮ່ວມ​ມື ​ລະຫວ່າງ​ບັນດາ​ປະ​ເທດ​ໃນ​ພາກ​ພື້ນ ​ແລະ ບັນດາ​ປະຊາ​ຊາດ​ອາຊີ​ຕາ​ເວັນ​ອອກ ກັບ​ພາກ​ພື້ນ​ອື່ນ​ໃນ​ໂລກ.

ການ​ທີ່ WEF ຕົກລົງ​ປ່ຽນ​ຊື່ WEF ອາຊີ​ຕາ​ເວັນ​ອອກ ​ເປັນ WEF ອາ​ຊຽນ (ປີ 2016) ພາຍຫຼັງ​ປະຊາ​ຄົມ​ອາ​ຊຽນ (AC) ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ນັ້ນ ​ໃຫ້​ເຫັນ​ເຖິງຄວາມ​ເອົາ​ໃຈ​ໃສ່​ຂອງ WEF ຕໍ່​ຄວາມ​ສຳຄັນ​ຂອງ​ບັນດາ​ປະ​ເທດ​ອາ​ຊຽນ. ກອງ​ປະຊຸມ WEF ອາ​ຊຽນ ​ເປັນ​ເວທີ​ປາ​ໄສ​ທີ່​ມີ​ຊື່​ສຽງ​ໃນ​ພາກ​ພື້ນ, ​ເປັນ​ຊ່ອງ​ທາງຕິດ​ຕໍ່​ທີ່​ສຳຄັນ ​ເພື່ອ​ໃຫ້​ບັນດາ​ຜູ້ນຳ ​ແລະ​ຊຸມ​ຊົນ​ທຸລະ​ກິດພາຍ​ໃນ​ແລະ​ພາຍນອກ​ອາ​ຊຽນ ພ້ອມ​ກັນ​ປຶກສາ​ປະ​ເມີນ​ຄ່າ​ກ່ຽວ​ກັບບັນດາບັນຫາ​ເສດ​ຖະກິດ-ການ​ພັດທະນາ, ບັນດາ​ບັນຫາ​ພາກ​ພື້ນ​ແລະ​ທົ່ວ​ໂລກ, ພ້ອມ​ກັບ​ແບ່ງປັນ​ຄວາມ​ຄິດ​ເຫັນ, ວິ​ໄສ​ທັດ, ທິດ​ທາງກ້າວ​ເດີນ ​ແລະ ​ນະ​ໂຍບາຍທີ່​ເໝາະ​ສົມ ​ເພື່ອ​ແນ​ໃສ່​ຍົກ​ສູງ​ຄວາມ​ສາມາດສ້າງ​ຕົວ​ເອງ​ໃຫ້​ເຂັ້ມ​ແຂງ ​ແລະ ການ​ພັດທະນາ​ຢ່າງ​ຂະຫຍັນ​ຂັນ​ເຄື່ອນດ້ານ​ເສດຖະກິດ ​ຂອງ​ບັນດາ​ປະ​ເທດ​ອາ​ຊຽນ, ມຸ່ງ​ໄປ​ສູ່​ການ​ພັດທະນາຢ່າງ​ສະ​ໝ່ຳສະ​ເໝີ ​ແລະ​ປົກ​ຄຸມ​ໃນ​ອາ​ຊຽນ. 

ການ​ເຄື່ອນ​ໄຫ​ວຮ່ວມ​ມື​ຂອງ​ຫວຽດນາມ​ກັບ WEF ​ໄດ້​ເລີ່​ມຕົ້ນ​ແຕ່​ປີ 1989, ​ແລະ​ມາ​ເຖິງ​ປະຈຸ​ບັນ, WEF ຍັງ​ຄົງ​ເປັນ​ເວ​ທີ​ປາ​ໄສ​ທີ່​ສຳຄັນ, ປະກອບສ່ວນ​ແທດ​ຈິງ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ ​ແລະ​ການ​ເຊື່ອມ​ໂຍງສາກົນ​ຂອງ​ຫວຽດນາມ. ຫວຽດນາ​ໃຫ້​ຄວາມ​ສຳຄັນ​ແກ່​ການ​ຮ່ວມ​ມື​ກັບ WEF, ຖື​ວ່າ​ນີ້​ເປັນ​ກົນ​ໄກ​ສົນທະນາທີ່​ສຳຄັນ​ເພື່ອສົ່ງ​ເສີມ​ຮູບ​ພາບ​ຂອງ​ຊາດ, ຊຸກຍູ້​ຄວາມ​ນຶກ​ຄິດ​ກ່ຽວ​ກັບ​ການ​ປະຕິ​ຮູບ​ແລະ​ພັດທະນາ​ເສດຖະກິດ, ​ເປີດ​ໂອກາດ​ໃຫຍ່​ໃຫ້​ແກ່​ການ​ດຶງ​ດູດການ​ລົງທຶນ​ຈາກ​ຕ່າງປະ​ເທດ ​ເພື່ອ​ພັດທະນາ​ປະ​ເທດ. ຫວຽດນາມ​ຍາມ​ໃດ​ກໍ່​ເປັນ​ເຈົ້າ​ການ, ຕັ້ງໜ້າ​ເຂົ້າ​ຮ່ວມ​ກອງ​ປະຊຸມ​ຕ່າງໆ​ຂອງ WEF, ພ້ອມ​ກັນ​ນັ້ນ​ ກໍ່​ມີ​ສ່ວນ​ຮ່ວມທີ່​ແທດ​ຈິງ, ຂໍ້​ຄິດ​ປະດິດ​ທີ່​ໂດດ​ເດັ່ນ​ເຂົ້າ​ໃນ WEF ​ໃນ​ຕະຫຼອດ​ເວລາ​ເກືອບ 30 ປີ​ທີ່​ຜ່ານ​ມາ. ຜ່ານ​ໄລຍະ​ເວລາ, ບັນດາ​ຜູ້ນຳ​ຂັ້ນ​ສູງ​ຂອງ​ຫວຽດນາມ​ໄດ້​ເຂົ້າ​ຮ່ວມ​ບັນດາ​ກອງ​ປະຊຸມ​ປະຈຳ​ປີ​ຂອງ WEF ທີ່​ນະຄອນ ດາ​ໂວ​ດ, ຕັ້ງໜ້າ​ເຂົ້າ​ຮ່ວມ ​ແລະສົມທົບ​ຢ່າງ​ມີ​ປະສິດທິ​ຜົນກັບ​ບັນດາ​ປະ​ເທດ​ອາ​ຊຽນ ​ໃນ​ການຈັດ​ຕັ້ງ​ກອງ​ປະຊຸມ​ຂອງ​ເວທີ​ປາ​ໄສ​ຢູ່​ໃນ​ພາກ​ພື້ນ. ການ​ພົວພັນ​ຮ່ວມ​ມື​ລະຫວ່າງ​ຫວຽດນາມ​ແລະ WEF ນັບ​ມື້​ໄດ້​ຮັບ​ການ​ເພີ່ມ​ທະວີ​ຢ່າງ​ມີ​ເນື້ອ​ແທ້​ແລະ​ມີ​ປະສິດທິ​ຜົນ, ​ເນື້ອ​ໃນ​ການ​ຮ່ວມ​ມື​ນັບ​ມື້​ໄດ້​ຮັບ​ການ​ເປີດ​ກວ້າງ​ເຂົ້າ​ສູ່​ຫຼາຍ​ຂົງ​ເຂດ, ​ເຊັ່ນ​ກະສິກຳ, ອຸດສາຫະກຳ, ການ​ຄ້າ, ​ໂຄງສ້າງ​ພື້ນຖານ, ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ... ການ​ທີ່​ຫວຽດນາມ​ເຂົ້າ​ຮ່ວມ​ຢ່າງ​ຕັ້ງໜ້າ ​ແລະ​ເພີ່ມ​ທະວີ​ການ​ຮ່ວມ​ມື​ກັບ WEF ນັ້ນ ​ໄດ້​ປະກອບສ່ວນ​ປະຕິບັດ​ແຜນ​ນະ​ໂຍບາຍ​ຍົກ​ສູງ​ຄຸນ​ນະພາ​ບ​ແລະ​ປະສິດທິ​ຜົນ​ຂອງ​ວຽກ​ງານ​ການ​ຕ່າງປະ​ເທດ​ພະຫຸ​ພາຄີ​ ຂອງ​ພັກ​​ແລະ​ລັດໃຫ້​ປະກົດ​ເປັນ​ຈິ​ງ, ​ເປັນ​ຮູບ​ປະ​ທຳ.

WEF ອາ​ຊຽນ ມີ​ບົດບາດ​ສຳຄັນ​ສຳລັບ​ຫວຽດນາມ​ ໃນ​ຂະ​ບວນວິວັດ​ການຜັນ​ຂະຫຍາຍ​ນະ​ໂຍບາຍ​ການ​ຕ່າງປະ​ເທດ, ​ເປັນ​ໜຶ່ງ​ໃນ​ບັນດາ​ຊ່ອງ​ທາງ​ຕິດ​ຕໍ່​ທີ່​ສຳຄັນ ​ແລະ​ມີ​ປະສິດທິ​ຜົນ ຊ່ວຍ​ໃຫ້ຜູ້​ນຳ​ແລະ​ວິ​ສາ​ຫະກິດ​ຫວຽດນາມ ມີ​ໂອກາດ​ພົບ​ປະ​ກັບ​ການ​ນຳ, ຊຸມ​ຊົນ​ທຸລະ​ກິດ​ພາຍ​ໃນ​ແລະ​ພາຍ​ນອກ​ພາກ​ພື້ນ ປຶກສາ​ຫາລື ​ແລກປ່ຽນ​ກ່ຽວ​ກັບ​ບັນດາ​ບັນຫາ​ເສດຖະກິດ-ການ​ພັດທະນາ ຂອງ​ຫວຽດນາມແລະ​ພາກ​ພື້ນ, ນຳ​ສະ​ເໜີວິທີ​ແກ້​ໄຂ​ທີ່​ມີ​ປະສິດທິ​ພາບ​ເພື່ອ​ຜ່ານ​ຜ່າຄວາມ​ຫຍຸ້ງຍາກ, ສິ່ງ​ທ້າ​ທາຍ ​ແລະ ​ແນະນຳ​ທິດ​ທາງ​ໃຫຍ່​ສຳລັບ​ຂະ​ບວນວິວັດ​ການ​ເຕີບ​ໂຕ​ຕໍ່​ໄປ​ຂອງ​ຫວຽດນາມ ​ແລະ ປະຊາ​ຄົມ​ອາ​ຊຽນ. ພ້ອມ​ກັນ​ນັ້ນ, WEF ອາ​ຊຽນຍັງ​ປະກອບສ່ວນ​ສຳຄັນ​ຊ່ວຍ​ໃຫ້​ຫວຽດນາມ​ເປີດ​ກວ້າງ ​ແລະ​ເພີ່ມ​ທະວີ​ການ​ຮ່ວມ​ມື​ກັບ​ບັນດາ​ປະ​ເທດ​ອາ​ຊຽນ, ນຳ​ເອົາການ​ພົວພັນ​ຮ່ວມ​ມື​ກັບ​ບັນດາ​ປະ​ເທດ​ໃນ​ພາກ​ພື້ນ​ເຂົ້າ​ສູ່​ລວງ​ເລິກ, ​ເປັນ​ປົກກະຕິ, ​ແທດ​ເໝາະ​ແລະ​ມີ​ປະສິ​ດທິ​ພາບຫຼາຍ​ກວ່າ​ອີກ.

ປີ 2010, ​ໃນ​ຖານະ​ປະທານ​ອາ​ຊຽນ, ຫວຽດນາມ​ໄດ້​ເປັນ​ເຈົ້າ​ການ​ສົມທົບ​ກັບ WEF ຈັດ​ຕັ້ງ​ສຳ​ເລັດ​ຜົນ ກອງ​ປະຊຸມ WEF ອາຊີ​ຕາ​ເວັນ​ອອກ ພາຍ​ໃຕ້​ຫົວ​ຂໍ້ “ບົດບາດ​ທີ່​ພວມ​ເພີ່ມ​ຂຶ້ນ​ຂອງ​ອາຊີ​ ໃນ​ການ​ພັດທະນາ​ທົ່ວ​ໂລກ”. ພາຍ​ໃຕ້​ການ​ເປັນ​ປະທານ​ຂອງ​ປະ​ເທດ​ເຈົ້າພາບ​ຫວຽດນາມ, ກອງ​ປະຊຸມ WEF ອາຊີ​ຕາ​ເວັນ​ອອກ 2010 ​ໄດ້​ດຳ​ເນີນ​ລາຍການ​ປະຊຸມ​ເປັນ​ທາງ​ການ 20 ຄັ້ງ ດ້ວຍ 4 ​ເນື້ອ​ໃນ​ພື້ນຖານ​ຄື: ບົດບາດ​ທີ່​ພວມ​ເພີ່ມ​ຂຶ້ນ​ຂອງ​ອາຊີ; ບັນດາ​ຄວາມ​ສ່ຽງ​ທົ່ວ​ໂລກ; ​ເສັ້ນທາງ​ການຈະ​ເລີ​ນ​ເຕີບ​ໂຕຂອງ​ອາຊີ; ຄວາມ​ສາມາດ​ແຂ່ງຂັນ. ​ໃນ​ສະພາບ​ເສດຖະກິດ​ໂລກ​ເວົ້າ​ລວມ ​ແລະ​ເສດຖະກິດ​ບັນດາ​ປະ​ເທດ​ອາຊີ ຖືກ​ຜົນ​ກະທົບຢ່າງ​ໜັກໜ່ວງ​ຈາກ​ວິ​ກິດ​ການດ້ານການ​ເງິນ-​ເສດຖະກິດທົ່ວ​ໂລກ (2008-2009), ຫວຽດນາມ​ໄດ້​ເປັນ​ເຈົ້າ​ການນຳ​ສະ​ເໜີ​ຂໍ້​ສະ​ເໜີ​ແນະ​ຫຼາຍ​ປະການ​ໃນ​ທີ່​ປະຊຸມ ​ເພື່ອ​ແນ​ໃສ່​ແກ້​ໄຂ​ວິ​ກິດ​ການ​ດ້ານ​ການ​ເງິນ, ການ​ຖົດຖອຍ​ເສດຖະກິດ​ທົ່ວ​ໂລກ, ຟື້ນ​ຟູການ​ເຕີບ​ໂຕ​ໃນ​ອາຊີ. ບັນດາ​ຂໍ້​ສະ​ເໜີ​ແນະ ​ແລະສ່ວນ​ຮ່ວມ​ຂອງ​ຫວຽດນາມ​ຢູ່​​ໃນກອງ​ປະຊຸມ ​ໄດ້​ຮັບ​ການ​ສະໜັບສະໜູນຢ່າງກວ້າງຂວາງ ຈາກ​ບັນດາ​ປະ​ເທດ​ທີ່ເຂົ້າ​ຮ່ວມ​ກອງ​ປະຊຸມ ​ແລະ ການ​ຕີ​ລາຄາ​ສູງ​ຂອງ​ຄະນະ​ກຳມະການ WEF.

ຕໍ່​ຈາກ​ນັ້ນ, ຕາມ​ຂໍ້​ນຶກ​ຄິດ​ປະດິດ​ສ້າງ​ຂອງ​ຫວຽດນາມ, ກອງ​ປະຊຸມ WEF ກ່ຽວ​ກັບ​ພາກ​ພື້ນ​ແມ່​ນ້ຳຂອງ​ຄັ້ງ​ທີ​ໜຶ່ງ​ ໄດ້​ຮັບການຈັດ​ຂຶ້ນ​ທີ່​ນະຄອນ​ຮ່າ​ໂນ້ຍ (ປີ 2016) ​ແລະ​ບັນ​ລຸ​ຜົນສຳ​ເລັດ​ທີ່ຈົບງາມ. ກອງ​ປະຊຸມ​ນີ້​ແມ່ນ​ຊ່ອງທາ​ງຕິດ​ຕໍ່​ທີ່​ສຳຄັນ ປະກອບສ່ວນ​ເພີ່ມ​ທະວີ​ການ​ເຊື່ອມ​ຕໍ່, ​ສົ່ງ​ເສີມພາກ​ພື້ນ​ແມ່​ນ້ຳຂອງ​ໃຫ້​ແກ່​ບໍລິສັດ​ຊັ້ນນຳ​ຂອງ​ໂລກ, ຜ່ານ​ນັ້ນ ​​ໄຂ​ໂອກາດ​ການ​ຮ່ວມ​ມື​ໃໝ່ ​ແລະ​ຍາດ​ແຍ່ງ​ເອົາ​ແຫຼ່ງທຶນຈາກ​ພາຍ​ນອກ​ພາກ​ພື້ນ ​ເພື່ອ​ຊຸກຍູ້​ການ​ເຕີບ​ໂຕ​ແລະການ​ພັດທະນາ​ຂອງ​ພາກ​ພື້ນ​ແມ່​ນ້ຳຂອງ. ພາຍ​ໃຕ້​ຫົວ​ຂໍ້ “ພັດທະນາ​ພາກ​ພື້ນ​ແມ່​ນ້ຳຂອງ: ລົງທຶນ​ເຂົ້າ​ໃນໂຄງ​ສ້າງ​ພື້ນຖານ, ​ຊັບພະຍາກອນ​ມະນຸດ ​ແລະ​ເຊື່ອມ​ຕໍ່”, ກອງ​ປະຊຸມ​ໄດ້​ສຸມ​ໃສ່ປຶກສາ​ຫາລື​ຫຼາຍ​ບັນຫາ​ທີ່​ສຳຄັນ ກ່ຽວ​ກັບການ​ພັດທະນາ ​ແລະ​ການ​ເຊື່ອມ​ໂຍງ​ຂອງ​ພາກ​ພື້ນ​ແມ່​ນ້ຳຂອງ, ​ເຊັ່ນ ວິ​ໄສ​ທັດ​ແລະ​ທິດ​ທາງ​ການ​ພັດທະນາ​ຂອງ​ພາກ​ພື້ນ, ລະດົມ​ແຫຼ່ງພະລັງ​ເພື່ອ​ພັດທະນາ​ໂຄງ​ສ້າງ​ພື້ນຖານ​ໃນ​ພາກ​ພື້ນ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກທາງ​ການ​ຄ້າ, ການ​ລົງທຶນ ​ແລະ​ການທ່ອງທ່ຽວ, ຊຸກຍູ້​ການ​ຫັນ​ເປັນ​ອຸດສາຫະກຳ ​ແລະ​ການ​ພັດທະນາ​ແບບ​ຍືນ​ຍົງ​ຢູ່​ພາກ​ພື້ນ​ໃນ​ໄລຍະ​ໃໝ່.

ມາ​ເຖິງ​ປະຈຸ​ບັນ, ຫວຽດນາມ​ເປັນ​ປະ​ເທດ​ໜຶ່ງ​ປະ​ເທດ​ດຽວ​​ໃນ​ພາກ​ພື້ນ​ອາຊີ​ຕາ​ເວັນ​ອອກສຽງ​ເໜືອ ທີ່​ໄດ້​ເຊັນ​ຂໍ້​ຕົກລົງ​ການ​ຮ່ວມ​ມືຕາມ​ຮູບ​ແບບ ລັດ-​ເອກະ​ຊົນ ກັບ WEF, ສອງ​ຝ່າຍ​ສືບ​ຕໍ່​ຍູ້​ແຮງ​ການ​ຜັນ​ຂະຫຍາຍ​ຂໍ້​ຕົກລົງການ​ຮ່ວມ​ມື​ໃນ 6 ຂົງ​ເຂດ​ຕົ້ນຕໍ, ປະກອບ​ດ້ວຍ​ເສດຖະກິດ​ແລະ​ການ​ຫັນ​ເປັນ​ສັງຄົມ, ການ​ຄ້າ​ແລະ​ການ​ລົງທຶນ​ຂ້າມ​ຊາດ, ​ໂຄງ​ສ້າງ​ພື້ນຖານ, ຜະລິດ​ກະສິກຳ​ແລະ​ຄວາມ​ໝັ້ນຄົງ​ທາງ​ດ້ານ​ສະບຽງ​ອາຫານ, ການ​ສຶກສາ​ແລະ​ຄວາມ​ສະ​ເໝີ​ພາບ​ທາງ​ເພດ. ຕາມ​ເນື້ອ​ໃນ​ຂອງ​ຂໍ້​ຕົກລົງ​ການ​ຮ່ວມ​ມື, WEF ຈະ​ຊ່ວຍ​ເຫຼືອ​ແລະ​ໃຫ້​ຄຳ​ປືກສາ​ແກ່​ຫວຽດນາມ ​ໃນ​ການ​ຍົກ​ສູງ​ຄວາມ​ສາມາດ​ເຂົ້າ​ຮ່ວມ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່ (ການ​ປະຕິວັດ​ອຸດສາຫະກຳ 4.0), ສວຍ​ໃຊ້​ໂອກາດ​ແລະ​ຮັບ​ມື​ຢ່າງ​ມີ​ປະສິດທິ​ຜົນ​ກັບ​ສິ່ງ​ທ້າ​ທາຍ​ຕ່າງໆ ຊຶ່ງ​ກາ​ນະ​ຕິ​ວັດ​ນີ້​ວາງ​ອອກ​ມາ. ຄຽງ​ຂ້າງ​ນັ້ນ, ຫວຽດນາມ​ກໍ່​ພວມ​ເຂົ້າ​ຮ່ວມ​ຢ່າງ​ຕັ້ງໜ້າ ​ແລະ​ມີ​ສ່ວນ​ຮ່ວມ​ແທດ​ຈິງ​ເຂົ້າ​ໃນຂໍ້​ຄິດ​ປະດິດ “ວິ​ໄສ​ທັດ​ໃໝ່​ໃນ​ກະສິກຳ” ຂອງ WEF. ຫວຽດນາມ​ກໍ່​ໄດ້​ເຂົ້າ​ຮ່ວມ​ໜ່ວຍ​ປະສານ​ງານ​ໂຄງການ “ອະນາຄົດ​ຂອງ​ລະບົບ​ການ​ຜະລິດ” ຂອງ WEF ປີ 2016 ​ແລະ ທິມງານ​ຍຸດ​ທະ​ສາດ​ພາກ​ພື້ນ​ອາ​ຊຽນປີ 2017.

ອາດ​ຈະ​ເວົ້າ​ໄດ້​ວ່າ, ພາຍຫຼັງ​​ເກືອບ​ສາມ​ທົດ​ສະ​ວັດ​ແຫ່ງ​ການ​ເຂົ້າ​ຮ່ວມ WEF, ຫວຽດນາມຍາມ​ໃດ​ກໍ່​ສະ​ແດງ​ອອກ​ວ່າ​ຕົນ​ເປັນ​ສະມາ​ຊິດ​ທີ່​ຂະຫຍັນ​ຂັນ​ເຄື່ອນ, ຕັ້ງໜ້າ ​ແລະ​ມີ​ຄວາມ​ຮັບຜິດຊອບ, ພ້ອມ​ກັນ​ນັ້ນ​ກໍ່​ເປັນ​ຄູ່​ຮ່ວມ​ມື​ທີ່​ເຊື່ອ​ຖື​ໄດ້​ຂອງ WEF ຢູ່​ໃນ​ພາກ​ພື້ນ ທີ່​ມີ​ສ່ວນ​ຮ່ວມ​ທີ່​ຕັ້ງໜ້າ, ປະກອບສ່ວນ​ສຳຄັນ​ເຂົ້າ​ໃນ​ຜົນສຳ​ເລັດ ​ແລະ​ການ​ພັດທະນາ​ລວມຂອງ WEF.

ກອງ​ປະຊຸມ​ເວທີ​ເສດຖະກິດ​ໂລກ​ກ່ຽວ​ກັບ​ອາ​ຊຽນ ປີ 2018: “ກອງ​ປະຊຸມ​ພາກ​ພື້ນ​ທີ່​ບັນລຸ​ຜົນສຳ​ເລັດ​ດີ​ສຸດ”

ກອງ​ປະຊຸມ WEF ກ່ຽວ​ກັບອາ​ຊຽນປີ 2018 ມີ​ການ​ເຂົ້າ​ຮ່ວມ​ຂອງ​ປະມຸກ​ແຫ່ງ​ລັດ​ແລະ​ຜູ້ນຳ​ຂັ້ນ​ສູງ​ຫຼາຍ​ທ່ານ​ ຂອງ​ບັນດາ​ປະ​ເທດ​ອາຊຽນ, ບັນດາ​ປະ​ເທດ​ຄູ່​ຮ່ວມ​ມື ​ແລະ ປະມານ 1.000 ຕົວ​ແທນ​ຈາກ​ບໍລິສັດ​ຂ້າມ​ຊາດ​ຕ່າງໆ (​ໃນ​ນັ້ນມີ​ຫຼາຍ​ບໍລິສັດ​​ໃນ​ກຸ່ມ 500 ບໍລິສັດ​ຊັ້ນ​ນຳ​ຂອງ​ໂລກ ທີ່​ມີ​ຄວາມ​ເຂັ້ມ​ແຂງ​ທາງ​ດ້ານ​ການ​ເງິນ, ​ເຕັກ​ໂນ​ໂລ​ຊີ ​ແລະ ທັກ​ສະການ​ຄຸ້ມ​ຄອງ), ຕົວ​ແທນ​ຂອງ​ວິ​ສາ​ຫະກິດ​ໃນ​ອາ​ຊຽນ​ແລະ​ສາກົນ, ພ້ອມ​ກັບ​ຕົວ​ແທນ​ຂອງ​ປະມານ 800 ວິ​ສາ​ຫະກິດ​ໃນ​ປະ​ເທດ.

​ໃນ​ລະຫວ່າງ​ກອງ​ປະຊຸມ​ສາມວັນ, ມີ​ການ​ປະຊຸມ​ປຶກສາ​ສົນທະນາ​ຫົວ​ຂໍ້​ສະ​ເພາະ​ປະມານ 60 ຄັ້ັ້ັ້ງ ຊຶ່ງ​ໄດ້​ລວມສູນ​ໃສ່ 5 ກຸ່ມ​ເນື້ອ​ໃນ​ຕົ້ນຕໍ​ຄື: ກຳນົດ​ວິ​ໄສ​ທັດ​ໃໝ່​ໃຫ້​ອາ​ຊຽນ ກ່ຽວ​ກັບ​ການ​ເຊື່ອມ​ໂຍງ​ພາກ​ພື້ນ; ຊອກ​ຫາ​ຮູບ​ແບບ​​ເສດຖະກິດໃໝ່ ​ແລະ​ການຄຸ້ມ​ຄອງ​ໃນ​ຍຸກ​ດິຈິ​ຕອນ; ຊອກ​ຫາ​ກຳລັງ​ໜູນ ​ແລະ​ຮູບ​ແບບ​ທຸລະ​ກິດ​ໃໝ່​ໃຫ້​ບັນດາ​ປະ​ເທດ​ອາ​ຊຽນ ​ໃນ​ສະພາບການ​ປະຕິວັດ​ອຸດສາຫະກຳ 4.0; ວິທີ​ເຂົ້າ​ເຖິງ​ໃໝ່​ຂອງ​ວິ​ສາ​ຫະກິດສຳລັບ​ການ​ຄຸ້ມ​ຄອງ​ທົ່ວ​ໂລກ​ແລະ​ພາກພື້ນ; ບັນດາ​ເນື້ອ​ໃນ​ລະອຽດ​ຂອງ​ການ​ພັດທະນາ​ໂຄງ​ສ້າງ​ພື້ນຖານສະຫຼາດ, ຝຶກ​ອົບຮົມ​ທັກ​ສະ, ວຽກ​ເຮັກ​ງານ​ທຳ, ການ​ລິ​ເລິ່ມທຸລະ​ກິດ, ການປ່ຽນ​ແປງ​ໃໝ່​ປະດິດ​ສ້າງ. ຫົວ​ຂໍ້​ຂອງ​ການ​ປຶກສາປາ​ລື​ເຫຼົ່າ​ນັ້ນ ​ມີ​ຄວາມ​ອຸດົມສົມບູນ, ​ແທດ​ຈິງ, ຕອບ​ສະໜອງ​ຄວາມ​ຕ້ອງການ​ຂອງ​ຜູ້​ແທນ​ທຸກ​ພາກສ່ວນ, ​ເຊັ່ນ​ແງ່​ຫວັງ​ຂອງ​ເສດຖະກິດ​ອາຊີ, ຄວາມ​ປອດ​ໄພຂອງ​ເຄືອ​ຂ່າຍ, ທິດ​ທາງ​ຄວາມ​ສາມາດ​ສ້າງ​ຕົນ​ໃຫ້​ເຂັ້ມ​ແຂງ​ຂອງ​ພາກ​ພື້ນ, ສຳນັກງານ 4.0,...

​ໃນ​ວາລະ​ເປີດ​ກອງ​ປະຊຸມຄົບ​ຄະນະ, ທ່ານ​ນາຍົກລັດຖະມົນຕີຫວຽດນາມ ຫງວຽນ​ຊວັນ​ຝຸກ ​ໄດ້​ຍົກ​ໃຫ້​ເຫັນ​ແຈ້ງ​ບັນດາ​ໂອກາດ​ແລະຄວາມ​ທ້າ​ທາຍ​ຂອງ​ອາ​ຊຽນ ຕໍ່ໜ້າການ​ປະຕິວັດ​ອຸດສາຫະກຳ 4.0, ຈາກ​ນັ້ນ ສະ​ເໜີ​ຂໍ້​ບຸລິມະສິດ​ຕ່າງໆ ​ເພື່ອ​ໃຫ້​ອາ​ຊຽນສືບ​ຕໍ່​ຢືນຢັນບົດບາດ​ເປັນ​ໃຈກາງ​ຢູ່​ໃນ​ພາກ​ພື້ນ, ​ເດັ່ນ​ທີ່​ສຸດ​ຄື ສ້າງ​ກົດ​ລະບຽບ​ຂອງ​ອາ​ຊຽນກ່ຽວ​ກັບ​ການ​ຮ່ວມ​ມື​ແບ່ງປັນຂໍ້​ມູນ, ສ້າງ​ຂອບ​ເຂດ​ການ​ເຊື່ອມ​ຕໍ່ລະຫວ່າງ​ສວນ​ກ້າ​ຄວາມ​ຄິດ​ສ້າງສັນ​ແຫ່ງ​ຊາດ ກັບ​ເຄືອ​ຂ່າຍ​ສວນ​ກ້າ​ຂອງ​ພາກ​ພື້ນທັງ​ໝົດ... ຂໍ້​ສະ​ເໜີ​ຂອງ​ທ່ານ​ນາຍົກລັດຖະມົນຕີ ຫງວຽນ​ຊວັນ​ຝຸກ ​ໄດ້​ຮັບ​ການ​ສະໜັບສະໜູນ​ຈາກ​ຜູ້​ແທນ​ທີ່​ເຂົ້າ​ຮ່ວມ​ກອງ​ປະຊຸມ.

ສາດສະດາຈານ ​ເຄຼົາສ໌ ຊະ​ວັບ - ຜູ້​ກໍ່​ຕັ້ງ, ປະທານ​ກຳມະການບໍລິຫານ WEF ປະ​ເມີນ​ວ່າ, ກອງ​ປະຊຸມ​ເວທີ​ເສດຖະກິດ​ໂລກ​ກ່ຽວ​ກັບ​ອາ​ຊຽນປີ 2018 ​​ແມ່ນ​ກອງ​ປະຊຸມ​ພາກ​ພື້ນທີ່​ປະສົບ​ຜົນສຳ​ເລັດ​ຫຼາຍ​ທີ່​ສຸດ​ຂອງ WEF. ​ໃນ​ຖານະ​ປະ​ເທດ​ເຈົ້າພາບ, ຫວຽດນາມ​ໄດ້​ປະກອບ​ສ່ວນອັນ​ໃຫຍ່​ຫຼວງ​ໃນ​ຄວາມ​ສຳ​ເລັດ​ນັ້ນຂອງ WEF. ອາດ​ຈະ​ຍົກ​ບາງ​ຈຸດ​ເດັ່ນ​ດັ່ງ​ນີ້:

ທີ​ໜຶ່ງ, ການ​ກະກຽມຢ່າງຮອບ​ຄອບ​ໃຫ້​ແກ່​ກອງ​ປະຊຸມ WEF ກ່ຽວ​ກັບອາ​ຊຽນປີ 2018. ສາດສະດາຈານ ​ຄ.ຊະວັບ ​ໄດ້​ຕີ​ລາຄາ​ສູງ​ຕໍ່​ການ​ປະສານ​ງານ​ຢ່າງ​ແໜ້ນ​ແຟ້ນ, ມີ​ປະສິດທິ​ຜົນ ​ລະຫວ່າງ WEF ​ແລະ ຫວຽດນາມ ​ໃນ​ການຈັດ​ຕັ້ງ​ກອງ​ປະຊຸມ​ນີ້. ຫວຽດນາມ​ໄດ້​ເປັນ​ເຈົ້າ​ການ​ໃນ​ການສະ​ເໜີ​ແນວ​ຄິດ, ລວມສູນ​ການ​ສົນທະນາ, ການວາງ​​ແນວນະ​ໂຍບາຍ​ເພື່ອ​ກະ​ຕູ້ນຄວາ​ມສາມາດ​ບົ່ມ​ຊ້ອນ, ຄວາມ​ຄິດ​ສ້າງສັນ ​ແລະ​ຄວາມ​ຂະຫຍັນ​ຂັນ​​ເຄື່ອນ​ຂອງ​ວິ​ສາ​ຫະກິດ​ແລະ​ປະຊາຊົນ, ມຸ່ງ​​ໄປສູ່ການ​ກໍ່ສ້າງ​ປະຊາ​ຄົມ​ອາ​ຊຽນ​ເພື່ອ​ປະຊາຊົນ, ຂະຫຍັນ​ຂັນ​ເຄື່ອນ, ໝັ້ນ​ຄົງ​ເຂັ້ມ​ແຂງ, ວັດທະນາ​ຖາວອນ.

ກ່ຽວ​ກັບ​ເນື້ອ​ໃນ, ບົນ​ພື້ນຖານ​ຈິດ​ໃຈ​ສ້າງ​ສັນແລະ​ການ​ຮ່ວມ​ມື​ເພື່ອ​ຜົນ​ປະ​ໂຫຍ​ດຮ່ວມ​ກັນ, ​ໂດຍ​ການ​ເປັນ​ເຈົ້າພາບ​ກອງ​ປະຊຸມ WEF ກ່ຽວ​ກັບອາ​ຊຽນ 2018, ນັບ​ແຕ່​ການ​ກໍ່ສ້າງ​ເນື້ອ​ໃນ, ຫວຽດນາມ​ໄດ້​ປຶກສາ​ຫາລື​ກັບ​ບັນດາ​ສະມາຊິກ​ອາ​ຊຽນ ກ່ຽວ​ກັບ​ບັນດາເນື້ອ​ໃນທີ່​ຕ່າງ​ກັນ​ແລະປຶກສາ​ຫາລື​ກັບ WEF ​ເພື່ອລວມ​ເຂົ້າ​ໃນການ​ສົນທະນາບັນດາ​ຫົວ​ຂໍ້ຫຼື​ຫົວ​ຂໍ້​ຍ່ອຍ ທີ່​ແທດ​ເໝາະ​ກັບ​ອາ​ຊຽນ, ​ເຊັ່ນ​ການ​ກໍ່ສ້າງ​ໂຄງ​ສ້າງ​ພື້ນຖານ, ຕົວ​ເມືອງ​ສະຫຼາດ, ພັດທະນາ​ກະສິກຳ​ເຕັກ​ໂນ​ໂລ​ຊີ​ສູ​ງ​ໃນ​ສະ​ໄໝການ​ປະຕິວັດ​ອຸດສາຫະກຳ 4.0, ສ້າງ​ວຽກ​ເຮັດ​ງານ​ທຳ​ໃນ​ສະພາບ​ການ​ທີ່​ບັນດາ​ປະ​ເທດ​ອາຊຽນ​ມີແຮງ​ງານຫຼາຍ​ເກີນ​ໄປ... ການ​ກຳນົດ​ເນື້ອ​ໃນ​ທີ່​ຖືກຕ້ອງ​ໄດ້​ສ້າງ​ໂອກາດ​ໃຫ້​ບັນດາ​ປະ​ເທດ​ອາ​ຊຽນ ​ແບ່ງປັນ​ກັບປະຊາ​ຄົມ​ສາກົນ ​ແລະກົງ​ຂ້າມ ​ກໍ່​ຍາດ​ແຍ່ງ​ເອົາ​ຄວາມ​ຄິດ​ເຫັນ​ຂອງ​ປະຊາ​ຄົມ​ສາກົນກ່ຽວ​ກັບ​ອາ​ຊຽນ ​ເພື່ອວາງ​ນະ​ໂຍບາຍ​ທີ່​ເໝາະ​ສົມ. ພ້ອມ​ກັນ​ນັ້ນ, ປັບປຸງ​ເສີມ​ຂະຫຍາຍ​ກວ່າ​ອີກ​ ບົດບາດ​ເປັນ​ໃຈ​ການ​ຂອງ​ອາ​ຊຽນ​ໃນ​ພາກ​ພື້ນ, ຍົກ​ສູງ​ຄວາມ​ສາມາດ​ສ້າງ​ຕົ້ນ​ໃຫ້​ເຂັ້ມ​ແຂງ, ປັບ​ຕົວ​ໃຫ້​ເຂົ້າ​ກັບ​ການ​ປ່ຽນ​ແປງ​ຢ່າງ​ໄວວາ​ຂອງ​ໂລກ​ແລະ​ພາກ​ພື້ນ, ຊຸກຍູ້​ການ​ປ່ຽນ​ແປງ​ໃໝ່​ປະດິດ​ສ້າງ ​ແລະ​ຍົກ​ສູງ​ປະສິດທິ​ຜົນ​ຂອງ​ການ​ຮ່ວມ​ມື, ​ເຊື່ອມ​ໂຍງ, ນຳ​​ເອົາ​ຜົນ​ປະ​ໂຫຍ​ດຕົວ​ຈິງມາ​ໃຫ້​ປະຊາຊົນ ​ແລະ​ວິ​ສາ​ຫະກິດ. 

ທາງ​ດ້ານ​ການຈັດ​ຕັ້ງ, ດ້ວຍ​ຈິດ​ໃຈ​ເສີມ​ຂະຫຍາຍ​ພາບ​ພົດ​ຂອງ​ຫວຽດນາມ​ເວົ້າ​ສະ​ເພາະ ​ແລະ​ຂອງ​ອາ​ຊຽນ​ເວົ້າ​ລວມ, ຫວຽດນາມ​ໄດ້​ຂໍ​ຄວາມ​ເຫັນ​ລວມຂອງ​ບັນດາ​ປະ​ເທດ​ອາ​ຊຽນ​ເພື່ອ​ຈັດ​ຕັ້ງ​ກອງ​ປະຊຸມ. ດັ່ງ​ນັ້ນ, WEF ກ່ຽວ​ກັບອາ​ຊຽນປີ 2018 ຍັງ​ເປັນ​ວັນ​ບຸນ​ຂອງ​ບັນດາ​ປະ​ເທດ​ອາ​ຊຽນ. ດ້ວຍ​ຄວາມ​ພະຍາຍາມ​ປະສານ​ງານ​ຂອງ​ຫວຽດນາມ, ກອງ​ປະຊຸມ​ໄດ້​ໃຊ້ເທສະ​ສະ​ເພາະ​ເພື່ອ​ໂຄສະນາ​ເຜີຍ​ແຜ່​ກ່ຽວ​ກັບ​ບັນດາ​ປະ​ເທດ​ອາ​ຊຽນ ດ້ວຍ​ເນື້ອ​ໃນ​ທີ່​ອຸດົມສົມບູນ, ຮູບ​​ແບບ​ທີ່​ມີ​ຊີວິດ​ຊິ​ວາ, ສະ​ແດງ​ເຖິງ​ຂໍ້ຄວາມ​ກ່ຽວ​ກັບ “ຊາຍ​ຄາ​ປະຊາ​ຄົມ​ອາ​ຊຽນ” ທີ່​ມີ​ຄວາມ​ຫຼາກ​ຫຼາຍ​ທາງ​ວັດທະນະທຳ, ຫຼາກ​ຫຼາຍ​ທາງ​ເຊື້ອ​ຊາດ, ​ເຕັມ​ໄປ​ດ້ວຍ​ຈິດ​ໃຈ​ສາມັກຄີ, ມີ​ວິ​ໄສ​ທັດ​ດຽວ​ກັນ ​ເອກະລັກ​ດຽວ​ກັນ. ນີ້​ແມ່ນ​ຈຸດ​ທີ່​ເປັນ​ເອກະລັກ ​ແລະ​ບໍ່​ເຄຍມີ​ຢູ່​ໃນ​ກອງປະຊຸມ​ພາກ​ພື້ນ​ຂອງ WEF ກ່ອນ​ໜ້າ​ນີ້.

ທີ​ສອງ, ມີ​ການ​ເຊື່ອ​ມຕິດ​ແໜ້ນ​ແຟ້ນລະຫວ່າງ​ຫົວ​ຂໍ້​ລວມຂອງ​ອາ​ຊຽນ “ສ້າງ​ຕົນ​ໃຫ້​ເຂັ້ມ​ແຂງ, ປະດິດ​ສ້າງ” ກັບ​ຈິດ​ໃຈ​ຂອງປະຊາ​ຄົມ​ວິ​ສາ​ຫະກິດທີ່ຈະ​ຮັບ​ມື, ສວຍ​ໃຊ້ການ​ປະຕິວັດ​ອຸດສາຫະກຳ 4.0. ຫວຽດນາມສະ​ເໜີ​ໃຫ້ WEF ກຳນົດ​ຫົວ​ຂໍ້ “ອາ​ຊຽນ 4.0: ຈິດ​ໃຈ​ວິ​ສາ​ຫະກິດ ​ແລະ​ການ​ປະຕິວັອຸດສາຫະກຳຄັ້ງ​ທີ​ສີ່”. ຄວາມ​ສຳ​ເລັດ​ຜົນ​ຂອງ​ກອງ​ປະຊຸມ WEF ກ່ຽວ​ກັບອາ​ຊຽນປີ 2018 ​ໄດ້ຍົກ​ສູງບົດບາດ​ ຖານະຕຳ​ແໜ່​ງຂອງອາຊຽນ, ການ​​ເຊື່ອມ​ຕໍ່​​ບັນດາ​ປະ​ເທດ​ອາ​ຊຽນ ​ແລະ​ບັນດາ​ພື້ນຖານ​ເສດຖະກິດ​ຂອງ​ອາ​ຊຽນ​ເຂົ້າ​ນຳ​ກັນ, ສ້າງ​ຮູບ​ພາບ​ຂອງ​ອາ​ຊຽນທີ່​ສາມັກຄີ, ຂະຫຍັນ​ຂັນ​ເຄື່ອນ, ສ້າງ​ຄວາມ​ເຂັ້ມ​ແຂງ​ດ້ວຍ​ຕົນ​ເອງ, ຍົກ​ສູງ​ຖານະ​ຕຳ​ແໜງ​ຂອງ​ອາ​ຊຽນ​ໃນ​ການ​ເຊື່ອມ​ໂຍງ​ສາກົນ ກໍ່​ຄື​ຍາດ​ແຍ່ງ​ເອົາ​ໂອກາດ​ຂອງການ​ປະຕິວັດ​ອຸດສາຫະກຳ 4.0 ​​ໃຫ້​ແກ່ການ​ພັດທະນາ​ຂອງ​ພາກ​ພື້ນ.

ສຳລັບຫວຽດນາມ, ກອງ​ປະຊຸມ WEF ກ່ຽວ​ກັບອາ​ຊຽນປີ 2018 ​ແມ່ນ​ໂອກາດ​ທີ່​ສະດວກ​ດີ​ເພື່ອ​​ໃຫ້​ວິ​ສາ​ຫະກິດ, ນັກ​ລົງທຶນ, ປະຊາ​ຄົມ​ສາກົນ​ຮູ້​ ກ່ຽວ​ກັບ​ແຜນ​ນະ​ໂຍບາຍ, ນະ​ໂຍບາຍ, ຄວາມ​ຕັດສິນ​ໃຈ​ປ່ຽນ​ແປງ​ໃໝ່, ຄວາມ​ເປັນ​ເຈົ້າ​ການ ຕັ້ງໜ້າ​ເຊື່ອມ​ໂຍງ​ສາກົນ​ຂອງ​ພັກ-ລັດຫວຽດນາມ ​ແລະ​ຮູບ​ພາບ​ປະ​ເທດ​ຫວຽດນາມ​ທີ່​ຮັກຫອມສັນຕິພາບ, ມີ​ຄວາມ​ໝັ້ນຄົງ​ທາງ​ສັງຄົມ-ການ​ເມືອງ, ​ເສດຖະກິດມີ​ຄວາມ​ຂະຫຍັນ​ຂັນ​ເຄື່ອນ ​ເປີດ​ກວ້າງ ພັດທະນາ​ຢ່າງ​ໄວ, ຫວຽດນາມ​ເປັນ​ຄູ່​ຮ່ວມ​ງານ​ທີ່​ເຊື່ອ​ຖື​ໄດ້ ​ແລະ​ເປັນ​ສະມາຊິກ​ທີ່​ມີ​ຄວາມ​ຮັບຜິດຊອບ​ຂອງ​ປະຊາ​ຄົມ​ໂລກ. ຜ່ານກອງ​ປະຊຸມ WEF ກ່ຽວ​ກັບອາ​ຊຽນປີ 2018, ບັນດາ​ຜູ້​ແທນ​ຈາກຕ່າງປະ​ເທດທີ່​ເຂົ້າ​ຮ່ວມ​ກອງ​ປະຊຸມ​ ໄດ້​ເຫັນ​ໂດຍ​ກົງ​ເຖິງ​ການ​ພັດທະນາ​ຢ່າງ​ໄວວາ​ຂອງປະ​ເທດ, ຄວາມ​ຕັດ​ສິນ​ໃຈ​ກໍ່ສ້າງ​ລັດຖະບານ​ແບບສ້າງສັນ​ພັດທະນາ, ຄວາມ​ພະຍາຍາມ​ປົວ​ແປງ​ສິ່ງ​​ແວດ​ລ້ອມ​ແຫ່ງ​ການ​ລົງທຶນ​ທຸລະ​ກິດ, ບັນ​ຍາ​ກາດ​ການ​ທຸລະ​ກິດ​ທີ່ຟົດ​ຟື້ນ ​ແລະ ຮູບ​ພາບ​ຂອງ​ຄົນ​ຫວຽດນາມ​ທີ່​ອ່ອນ​ໂຍນ, ມີ​ນ້ຳ​ໃຈຮັກ​ແພງ​ແຂກ​ບ້ານ​ແຂກ​ເມືອງ, ​ເປີດ​ອົກ​ເປີດ​ໃຈ, ຂະຫຍັນ​ຂັນ​ເຄື່ອນ, ມີ​ຫົວຄິດປະດິດ​ສ້າງ ພ້ອມ​ດ້ວຍ​ຄວາມ​ປາຖະໜາ​ແລະ​ເຈດ​ຈຳນົງ​ບືນ​ຕົວ​ຂຶ້ນ​ຢ່າງ​ແຂງ​ແຮງ, ຈະ​ຊຸກຍູ້​ການ​ຮ່ວມ​ມື​ເຊື່ອມ​ຕໍ່ ທຸລະ​ກິດ ລົງທຶນ​ເຂົ້າ​ວຽດນາມ ດ້ວຍ​ບັນດາ​ແຜນ​ງານ ​ໂຄງການທີ່​ອຸດົມສົມບູນ, ຫຼາຍ​ຮູບ​ຫຼາຍ​ແບບ ​ໃນ​ການ​ຜັນ​ຂະຫຍາຍ​ໂອກາດ​ຂອງການ​ປະຕິວັດ​ອຸດສາຫະກຳ 4.0. ການ​ຮ່ວມ​ມື​ກັບ​ບັນດາ​ບໍລິສັດ​ຂ້າມ​ຊາດ​ຈະ​ເປັນ​ໂອກາດ​ແລະກຳລັງ​ໜູນ ​ເພື່ອ​ໃຫ້​ວິ​ສາ​ຫະກິດຫວຽດນາມກ້າ​ຄິດ, ກ້າ​ເຮັດ, ຍົກ​ສູງ​ປະສິດທິພາບ, ຄຸນ​ນະພາ​ບ, ປະສິດທິ​ຜົນ ​ແລະ​ກຳລັງ​ແຮງ​ແຂ່ງຂັນ​ໃນ​ໂລກ.

ກອງ​ປະຊຸມ WEF ກ່ຽວ​ກັບອາ​ຊຽນປີ 2018 ​ໄດ້​ປະກອບສ່ວນ​ເປີດ​ກວ້າງ, ນຳ​ເອົາ​ການ​ພົວພັນ​ລະຫວ່າງຫວຽດນາມ ​ແລະ​ບັນດາ​ປະ​ເທດ​ໃນ​ພາກ​ພື້ນ​ເຂົ້າ​ສູ່​ລວງ​ເລິກ, ​ເປັນ​ປົກກະຕິ ​ແລະ​ມີ​ປະສິດທິ​ຜົນ. ​ໃນ​ລະຫວ່າງ​ກອງ​ປະຊຸມ ​ໄດ້​ມີ​ບັນດາ​ການ​ພົບ​ປະ, ການ​ຢ້ຽມຢາມ​ເປັ​ນທາງ​ການ ຂອງ​ຜູ້ນຳຂັ້ນສູງ​ຂອງ​ປະ​ເທດ​ໃນ​ພາກ​ພື້ນ​ມາຢ້ຽມຢາມຫວຽດນາມ ​ແນ​ໃສ່​ເຮັດ​ໃຫ້ການ​ພົວພັນ​ສອງ​ຝ່າຍ​ໃນ​ອາ​ຊຽນ​ເລິກ​ເຊິ່ງກວ່າ​ອີກ ກໍ່​ຄື​ເພີ່ມ​ທະວີ​ການ​ປະສານ​ງານ​ໃນ​ການ​ແກ້​ໄຂ​ບັນດາ​ບັນຫາ​ພາກ​ພື້ນ ​ແລະ​ສາກົນ.

ການຈັດ​ຕັ້ງ​ການ​ເຄື່ອນ​ໄຫວ​ຕ່າງໆ​ຫຼຼາຍຢ່າງ​ເຊັ່ນ ​ເວ​ທີ​ເປີດ​ກ່ຽວ​ກັບ​ການ​ລິ​ເລິ່ມທຸລະ​ກິດ​ປະດິດ​ສ້າງ, ກອງ​ປະຊຸມ​ສຸດ​ຍອດ​ການ​ທຸລະ​ກິດຫວຽດນາມ, ງານ​ລາຕີ​ວັດທະນະທຳຫວຽດນາມ, ​ໂຄສະນາ​ສົ່ງ​ເສີມ​ກ່ຽວ​ກັບປະ​ເທດ ​ແລະ​ໂຄສະນາ​ສົ່ງ​ເສີມ​ກ່ຽວ​ກັບ​​ແຂວງ​-ກຳ​ແພງ​ນະຄອນຄື ຮ່າ​ໂນ້ຍ, ນະຄອນ​ໂຮ່ຈີ​ມິນ, ດາ​ນັ້ງ, ກວ໋າງນິງ... ​ໄດ້​ນຳ​ມາ​ຊຶ່ງ​ໂອກາດ​ດີ ​ເພື່ອ​ໃຫ້​ບັນດາ​ຂະ​ແໜງ​ການ ທ້ອງ​ຖິ່ນ ​ແລະ​ວິ​ສາ​ຫະກິດຫວຽດນາມ ​ເພີ່ມ​ທະວີ​ການ​ແລກປ່ຽນ, ຮ່ວມ​ມື, ​ເຊື່ອມ​ໂຍງ​ກັບ​ບັນດາ​ບໍລິສັດ ວິ​ສາ​ຫະກິດ​ທີ່​ສຳຄັນ​ໃນ​ພາກ​ພື້ນ ​ແລະ​ໃນ​ໂລກ ​ເພື່ອ​ເປີດ​ກວ້າງ​ຕະຫຼາດ, ຍົກ​ສູງ​ຄຸນ​ນະພາ​ບການ​ດຶງ​ດູດ​ການ​ລົງທຶນ, ​ເຕັກ​ໂນ​ໂລ​ຊີ, ການທ່ອງທ່ຽວ... ​ແລະ​ບັນດາ​ແຫຼ່ງພະລັງ​ຈາກ​ພາຍ​ນອກ ​ໃຫ້​ແກ່​ການ​ພັດທະນາ​ປະ​ເທດ.

ກອງ​ປະຊຸມ WEF ກ່ຽວ​ກັບອາ​ຊຽນປີ 2018 ກໍ່​ເປັນ​ໂອກາດ​ເພື່ອ​ໃຫ້​ຫວຽດນາມ​ເພີ່ມ​ຄວາມ​ເລິກ​ເຊິ່ງ​ຂອງ​ການ​ພົວພັນກັບ​ບັນດາ​ປະ​ເທດ, ບັນດາ​ຄູ່​ຮ່ວມ​ມື, ​ໃນ​ນັ້ນ​ມີ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ, ບັນດາ​ຄູ່​ຮ່ວມ​ມືຍຸດ​ທະ​ສາດ, ທີ່​ສຳຄັນ; ຜ່ານ​ນັ້ນ ປັບປຸງ​ການ​ພົວພັນ​ຕ່າງປະ​ເທດ​ທີ່​ເປີດ​ກວ້າງ, ຫຼາຍ​ກ້ຳ​ຫຼາຍ​ຝ່າຍ, ຫຼາຍ​ຮູບ​ຫຼາຍ​ແບບ, ປະກອບສ່ວນ​ສ້າງ​ສະພາບ​ແວດ​ລ້ອມ​ທີ່​ມີ​ສັນຕິພາບ ສະຖຽນ​ລະ​ພາບ​ໃຫ້​ແກ່​ການ​ພັດທະນາ​ເສດຖະກິດ-ສັງຄົມ, ຍົກ​ສູງ​ຖານະ​ບົກ​ບາດ ​ແລະ​ກຽດ​ສັກ​ສີ​ຂອງ​ປະ​ເທດ​ໃນ​ເວທີ​ໂລກ.

ອາດ​ຈະ​ເວົ້າ​ໄດ້​ວ່າ, ຄວາມ​ສຳ​ເລັດ​ຜົນ​ຂອງກອງ​ປະຊຸມ WEF ກ່ຽວ​ກັບອາ​ຊຽນປີ 2018 ​ໄດ້​ຢືນຢັນ​ຖານະບົດບາ​ດ ​ແລະ​ອິດ​ທິພົນ​ຂອງຫວຽດນາມຢູ່​ໃນ​ພາກ​ພື້ນ ​ແລະ​ໃນ​ໂລກ ທີ່​​ໄດ້​ຮັບ​ການ​ຍົກ​ສູງ​ຢ່າງ​ຕໍ່​ເນື່ອງຈາກ​ຄວາມ​ສຳ​ເລັດ​ຜົນ​ຂອງ​ປີ ​ເອ​ເປ​ກ 2017; ສະ​ແດງ​ໃຫ້​ເຫັນ​ເຖິງ​ຄວາມ​ຮັບ​ຮູ້ ​ແລະ​ຄວາມ​ເຊື່ອ​ຖື​ຂອງວົງ​ການ​ວິ​ສາ​ຫະກິດ, ນັກ​ລົງທຶນ​ສາກົນ ຕໍ່​ແງ່​ຫວັງ​ການ​ພັດທະນາ​ຂອງຫວຽດນາມ, ພ້ອມ​ກັນ​ນັ້ນ​ກໍ່​ຢືນຢັນ​ທ່າ ​ແລະ ກຳລັງແຮງ​ຂອງຫວຽດນາມພາຍຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່; ສະ​ແດງ​ໃຫ້​ເຫັນ​ເຖິງ​ຄວາມ​ເປັນ​ເຈົ້າ​ການ ​ແລະ “ຂະໜາດ​ໃຫຍ່​ໂຕ” ຂອງ​ຫວຽດນາມ​ໃນ​ການ​ເຊື່ອມ​ໂຍງ​ສາກົນ, ​ເຂົ້າຮ່ວມ​ໃນ​ການສ້າງ​ແລະ​ກຳນົດ​ຮູບ​ຮ່າງ​ເສດຖະກິດ​ພາກ​ພື້ນ​ແລະ​ທົ່ວ​ໂລກ. ກອງ​ປະຊຸມ WEF ກ່ຽວ​ກັບອາ​ຊຽນປີ 2018 ສ້າງ​ເຄື່ອງໝາຍ​ທີ່​ສຳຄັນ​ຂອງ​ຫວຽດນາມ, ປະກອບສ່ວນ​ຍູ້​ແຮງ​ວີ​ວັດ​ທະ​ນາ​ການ​ເຊື່ອມ​ໂຍງ​ຂອງ​ບັນດາ​ປະ​ເທດ​ອາ​ຊຽນ ​ໃນ​ສະພາບການ​ປະຕິວັດ​ອຸດສາຫະກຳ 4.0, ​ເພື່ອ​ສັນຕິພາບ, ການ​ຮ່ວມ​ມື ​ແລະ​ການ​ພັດທະນາ​ຢ່າງ​ຍືນ​ຍົງ​ຢູ່​ໃນ​ພາກ​ພື້ນ ​ແລະ​ໃນ​ໂລກ./.

​ໂດຍ ຟານ​ທິທູ​ຢູງ

ກະຊວງ​ຕຳຫຼວດ

-----------------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດສະບັບ​ທີ 912 (​ເດືອນ​ຕຸລາ 2018)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ