ວັນເສົາ, 15/12/2018
ການທູດຫວຽດນາມ: ເປັນເຈົ້າການ, ປະດິດສ້າງ, ປະສິດທິຜົນ, ປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ຢ່າງສຳເລັດມີໄຊ
22/11/2018 18:19' ສົ່ງ ພິມ
ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຟ້າມບິ່ງມິງ ກ່າວປາໃສປິດກອງປະຊຸມທາງການທູດຄັ້ງທີ 30. (ພາບ: TTXVN)

ໃນ​ກະ­ແສ​ປະ­ຫວັດ­ສາດ​ນັ້ນ, ກອງ​ປະ­ຊຸມ​ທາງການທູດ​ 30 ຄັ້ງ (ແຕ່​ປີ 1975 ມາ​ຮອດ​ປະ­ຈຸ​ບັນ) ໄດ້​ກາຍ­ເປັນ​ມູນ­ເຊື້ອ​ດີ­ງາມ​ອັນ​ໜຶ່ງ. ບັນ­ດາ​ວັນ​ບຸນ​ແຫ່ງ​ການ​ເສີມ​ຂະ­ຫຍາຍ​ສຸດ​ຂີດ​ຈີນ​ຕະ​ນາ​ການ​ຂອງ​ທົ່ວ​ຂະ­ແໜງ­ການ​ນັ້ນ ລ້ວນ​ແຕ່​ແນ​ໃສ່​ເປົ້າ​ໝາຍ​ອັນ​ໜຶ່ງ​ອັນ​ດຽວ​ຄື: ຊຸກ­ຍູ້ ແລະ ຮັບປະ­ກັນ​ຜົນ​ປະໂຫຍດ​ຂອງ​ຊາດ ຂອງປະ­ເທດ. ກອງ​ປະ­ຊຸມທາງ​ການ​ທູດ​ແມ່ນ​ການ​​ເຄື່ອນ​ໄຫວ​ດຳ​ເນີນ​ຊີ​ວິດ​ການ​ເມືອງ ​ທີ່​ສຳຄັນ​ທີ່​ສຸດ​ຂອງ​ຂະ​ແໜງ​ການ​ທູດ, ເຊື່ອມ​ຊືມ ແລະ ຕັດ­ສິນ​ໃຈ​ປະ­ຕິ­ບັດ​ ແນ​ໃສ່​ຜັນ​ຂະ­ຫຍາຍ​ແຜນ​ນະ­ໂຍ­ບາຍ, ແນວທາງ​ການ​ຕ່າງ­ປະ­ເທດ​ຂອງ​ພັກ​ ຢ່າງ​ສຳ­ເລັດ​​ມີ​ໄຊ.

ກອງ​ປະ­ຊຸມ​ທາງການທູດຄັ້ງ​ທີ 30 ໄດ້​ໄຂ​ອອກ​ແຕ່​ວັນ​ທີ 13 ຫາ 17 ສິງ­ຫາ 2018 ໃນ​ເວ­ລາ​ທີ່​ມີ​ລັກ­ສະ­ນະ​ຫົວລ້ຽວຫົວ​ຕໍ່, ​ແມ່ນ​ໂອ­ກາດ​ທີ່​ທົ່ວ​ພັກ, ທົ່ວ​ປວງ​ຊົນ ແລະ ທົ່ວ​ກອງ­ທັບ​ດຳ​ເນີນ​ການສຳ​ຫຼວດກາງ​ສະ​ໄໝ​ກ່ຽວ​ກັບ​ການ​ປະ­ຕິ­ບັດ​ໜ້າ­ທີ່​ຂອງກອງ​ປະ­ຊຸມ​ໃຫຍ່​ຜູ້​ແທນ​ທົ່ວ​ປະ­ເທດ​ຄັ້ງ​ທີ XII ຂອງ​ພັກ​ກອມ​ມູ​ນິດຫວຽດ­ນາມ. ປະ­ເທດ​ເຮົາ​ກຳລັງ​ກ້າວ​ເຂົ້າ​ສູ່​ໄລ­ຍະທີ່​ສຳ­ຄັນ, ຍູ້​ແຮງ​​ພາ­ລະ­ກິດ​ການ​ປ່ຽນ­ແປງ​ໃໝ່ຢ່າງຮອບ­ດ້ານ​ແລະຄົບ​ຊຸດ, ເສີມ​ຂະ­ຫຍາຍ​ທຸກ​ແຫຼ່ງ​ພະ­ລັງ​ເພື່ອ​​ພັດ­ທະ­ນາ​ປະ­ເທດ​ຢ່າງ​ວ່ອງ­ໄວແລະໝັ້ນ­ຄົງ. ດັ່ງ­ນັ້ນ, ຂະ­ແໜງ­ການທູດ​ຕ້ອງ​​ສຸມ​ໃສ່ ແລະ ເສີມ​ຂະຫຍາຍ​ສຸດ​ຂີດ​ຄວາມ​ສາ­ມາດທຸກ​ຢ່າງ​ເພື່ອ​ຮັບ​ໃຊ້​ດີ​ທີ່​ສຸດ​​ໃຫ້ແກ່​ຜົນ​ປະ­ໂຫຍດ​ຂອງ​ຊາດ ຂອງປະ­ເທດ. ​ຈຸດໜັກ​ໃຈ­ກາງ​ແມ່ນ​​ ປະ­ຕິ­ບັດມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ, ຍຸດ​ທະສາດພັດ­ທະ­ນາ​ເສດ­ຖະ­ກິດ ສັງ­ຄົມ 2011-2020 ຢ່າງ​ມີ​ປະ​ສິດ­ທິ​ຜົນ​ແລະສຳ­ເລັດ​​ມີ​ໄຊ​; ປັບ­ປຸງ, ­ສ້າງສັນ​ສະ­ພາບ​ແວດ​ລ້ອມທີ່​ສະ­ດວກດີ​ໃຫ້​ແກ່​ການ​ພັດ­ທະ­ນາ​ປະ­ເທດ.

ໂລກ​​​ແຫ່ງ​ການ​ປ່ຽນ​ແປງ

​ໃນ​ເວລາສອງ​ກວ່າ​ປີ​ທີ່​ຜ່ານ​ມາ​, ຄຽງ​ຄູ່​ກັບ​​ຄວາມ​ສະ­ດວກ, ສະ­ພາບ​ການ​ສາ­ກົນແລະພາກ​ພື້ນ​ກຳລັງ​ຫັນ­ປ່ຽນ​ຢ່າງ​ໄວ­ວາ ສັບ­ສົນ ແລະ ​ຄາດ​ເດົາ​ຍາກ, ໄດ້​ສ້າງສິ່ງ​ທ້າ​ທາຍ​ຫຼາຍ​ຢ່າງ​ຕໍ່​ສະພາບ​ແວດ​ລ້ອມ​ຍຸດ​ທະ​ສາດ​ຂອງ​ປະ­ເທດ​ຊາດ, ​ສົ່ງ​ຜົນ​ກະ­ທົບ​​ໂດຍ​ກົງ​ເຖິງ​ບັນ­ດາ​ຜົນ​ປະໂຫຍດ​ດ້ານ​ຄວາມ​ສະ­ຫງົບ​ແລະການ​ພັດທະ­ນາ.

ສິບ​ປີ​ພາຍ­ຫຼັງ​ການ​ວິ​ກິດ​ທາງ​ເສດ​ພະ​ກິດ-ການ​ເງິນ​ທົ່ວ​ໂລກ ປີ 2008-2009, ເສດ­ຖະ­ກິດ​ໂລກ​ກຳລັງ​ໄດ້​ຮັບ​ການ​ຟື້ນ​ຟູ ແລະ ກ້າວ​ເຂົ້າ​ສູ່​ວົງ​ຈອນ​ການ​ພັດ­ທະ­ນາ​ໃໝ່. ຄວາມ​ເຕີບ​ໂຕ​ເສດ­ຖະ­ກິດ​ທົ່ວ​ໂລກ​ປີ 2017 ​ບັນ­ລຸ​ໄດ້ 3,6% ແລະ ອາດ​ສາ­ມາດ​ສືບ­ຕໍ່​ມີ​ການ​ເພີ່ມ​ຂຶ້ນ​ໃນ​ປີ 2018; ການ​ຄ້າ​ທົ່ວ​ໂລກ​ໄດ້​ເພີ່ມ​ຂຶ້ນ 4,6%, ເປັນ​ລະ­ດັບ​ສູງ​ສຸດ​ແຕ່​ປີ 2011 ມາ​ຮອດ​ປະ­ຈຸ​ບັນ​ນີ້. ແຕ່​ວ່າ, ບັນ­ດາ​ຄວາມ​ສ່ຽງ​ດ້ານ​ການ​ເງິນ, ທ່າ​ອຽງ​ປົກ​ປ້ອງ ແລະ “ເງົາ​ຜີ​” ແຫ່ງ​​ສົງ­ຄາມ​ດ້ານ​ການ​ຄ້າ​ ຈະ​ສົ່ງ​ຜົນ​ກະ­ທົບ​ທີ່​ບໍ່​ສະ­ດວກ​ເຖິງ​ທ່ວງ​ທ່າ​ການພັດທະ­ນາ​ຂອງ​ເສດ­ຖະ­ກິດ​ໂລກ ແລະ ຫວຽດ­ນາມ.

ການ​ປະ­ຕິ­ວັດ​ອຸດ­ສາ­ຫະ­ກຳ 4.0 ແລະ ວິ­ທະ­ຍາ­ສາດ-ເຕັກ​ໂນ​ໂລ​ຊີ ໄດ້​ກາຍ​ເປັນ​ກຳລັງ​ການ​ຜະລິດ​ໂດຍ​ກົງ ​ເຊິ່ງ​ຮັກ­ສາ​ພາ­ລະ​ບົດ­ບາດ​ເປັນ​ກຳລັງ​ໜູນ​ອັນ​ສຳ­ຄັນ​ ໃນ​ພື້ນ­ຖານ​ເສດ­ຖະ­ກິດ​ພູມປັນ​ຍາ​ ດ້ວຍ​ຫຼາຍ​ຮູບ​ການ​ໃໝ່, ຄື ເສດ­ຖະ­ກິດ​ແບບ​ແບ່ງ­ປັນ, ເສດ­ຖະ­ກິດ​ຈິດິຕອນ, ເສດ­ຖະ­ກິດ​ແບບ​ໜູນ​ວຽນ... ນີ້​ແມ່ນ​ໂອກາດ​ເພື່ອ​ໃຫ້ຫວຽດ­ນາມບຸກ​ທະ­ລຸ, ຫຍໍ້​ສັ້ນ​ໄລ­ຍະ​ຫ່າງ​ແຫ່ງ​ການ​ພັດ­ທະ­ນາ. ອີກ​ດ້ານ​ຫນຶ່ງ​ ບັນ­ດາ​ທ່າ​ອຽງ​ພັດ­ທະ­ນາ​ເຕັກ​ໂນ​ໂລ​ຊີ, ຮູບ​ການ​ເສດ­ຖະ­ກິດ​ໃໝ່​ ໄດ້​ວາງສິ່ງ​ທ້າ​ທາຍ​ຕ່າງໆ​ຫຼາຍ​ຢ່າງ​ທີ່​ບໍ່​ເຄີຍ​ມີກ່ອນ ແລະ ຖ້າຈັບ​ທ່າ​ອຽງ​ເຫຼົ່າ​ນັ້ນບໍ່​ໄດ້ ​ຈະ​ຖືກ​ປະ​ໄວ້​ຂ້າງ​ຫຼັງ​ຢ່າງ​ແນ່ນອນ.

ສະ­ພາບ​ການ​ການ­ເມືອງ-ຄວາມ​ສະ­ຫງົບ​ຂອງໂລກ​ກຳ­ລັງ​ມີ​ຄວາມ​ຜັນ​ປ່ຽນ​ຫຼາຍ​ຢ່າງ. ການ​ດັດ­ແປງ​ນະ­ໂຍ­ບາຍ​ຂອງ​ປະ­ເທດ​ຕ່າງໆ, ລັດ­ທິ​ປະ­ຊາ­ລາດ​ນິ­ຍົມ, ລັດ­ທິຜົນ​ປະ​ໂຫຍ​ດນິຍົມ ​ໄດ້​ເພີ່ມ​ສູງ​ຂຶ້ນ​ ເຮັດ​ໃຫ້​​ຄວາມ​​ໝັ້ນ­ຄົງ​​ໃນ​ພາກ​ພື້ນນັບ​ມື້​ນັບຖື​ກສັ່ນ​ຄອນ. ຄວາມ​ແຕກ​ຕ່າງ​ດ້ານ​ຜົນ​ປະໂຫຍດ​ລະ­ຫວ່າງ​ບັນ­ດາ​ສະມາຊິກ​​ໃນກຸ່ມ ຈີ 7, ຈີ 20, ສະ­ຫະ­ພາບ​ເອີ​ຣົບ (ອີ​ຢູ) ແລະ ພາ­ລະ​ບົດ­ບາດ​ຂອງ​ບັນ­ດາ​ກົນ​ໄກ​ຫຼາຍ​ຝ່າຍ​ກຳລັງ​ຖືກ​ຮັບ​ຜົນ​ສະ­ທ້ອນ. ທະ­ວີບ­ອາ­ຊີ-ປາ​ຊີ​ຟິກ, ແຫຼມ​ເກົາ­ຫຼີ ພາຍ​ຫຼັັັັັັັັັງ​ຄວາມ​ເຄັ່ງ​ຕຶງ​ຫຼາຍ​ຢ່າງ, ​ປະ­ຈຸ​ບັນ​ສະພາບ​ການ​​ໂຍະ​ຍາມ​​ຊົ່ວ­ຄາວ ແຕ່​ຍັງ​ອາດ​ຈະ​ມີ​ເຫດ​ບັງ​ເອີນ​ຊ້ອນ​ແຝງຢູ້​ຫຼາຍ. ​ການ​ຜັນ​ປ່ຽນ​ທີ່​ສັບສົນ​ຕ່າງ​ໆ​ໃນ​ທະ­ເລ​ຕາ­ເວັນ​ອອກ, ພິ­ເສດ​ແມ່ນ​ການ​ກໍ່ສ້າງ​ຂະໜາດ​ໃຫຍ່ແລະການຫັນ​ເປັນ​ການ​ທະ­ຫານ​ໃນບັນດາ​ເກາະດອນ​ຢູ່​ທະ​ເລ​ຕາ​ເວັນ​ອອກ ພວມ​ຂົ່ມ­ຂູ່​​ສັນ­ຕິ­ພາບ, ຄວາມ​ສະຫງົບ​ປອດ​ໄພແລະຄວາມໝັ້ນຄົງ ​ຢູ່​ພາກ​ພື້ນ​ ກໍ່​ຄື​ສິດແລະຜົນ​ປະ­ໂຫຍດ​ອັນຊອບ​ທຳ​ຂອງ​ຫຼາຍ​ປະ­ເທດ, ໃນ​ນັ້ນ​ມີ ຫວຽດ­ນາມ.

ປັບ­ປຸງແລະສ້າງ­ສະ­ພາບ​ແວດ​ລ້ອມ​​ສັນ­ຕິ­ພາບ, ຮັບ​ໃຊ້​ໃຫ້​ແກ່​ການພັດ­ທະ­ນາ

ຕິດ​ແທດ​ກັບ​ແນວ­ທາງການ​ພົວ­ພັນ​ຕ່າງ­ປະ­ເທດ​ຂອງ​ກອງ​ປະ­ຊຸມ​ໃຫຍ່​ຄັ້ງ​ທີ  XII ຂອງ​ພັກ, ຂະແໜງ­ການ​ທູດ​ໄດ້​ຢຶດໝັ້ນ​​ໃນ​ຫຼັກ­ການ; ຕັ້ງ​ໝັ້ນ​ໃນ​ເປົ້າ​ໝາຍ; ເປັນ​ເຈົ້າ​ການ, ມີ​ຄວາມ​ພິບ­ໄຫວ​ໃນ​ການ​ຜັນ​ຂະ­ຫຍາຍ​ໜ້າ­ທີ່ ແລະ ບັນ­ລຸ​ໄດ້­ຜົນ​ງານ​ອັນ​ສຳ­ຄັນ​ຫຼາຍ​ຢ່າງ, ປະກອບສ່ວນ​ເຂົ້າ​ໃນ​ການ​ປົກ​ປັກ​ຮັກ­ສາ​ສິດ​ອະ­ທິ­ປະ​ໄຕ​ແຫ່ງ​ຊາດ, ຮັກ­ສາ​ສະ­ພາບ​ແວດ​ລ້ອມ​​ສັນ­ຕິ­ພາບ, ສະ​ຖຽມ​ລະ​ພາບ​ ເພື່ອ​ຮັບ​ໃຊ້​ການ​ພັດທະນາ, ເຊື່ອມ​ໂຍງ​ສາ­ກົນ ແລະ ຍົກ​ສູງ​ຖາ­ນະ​ບົດ­ບາດ​ຂອງ​ປະ­ເທດ.

ໃນ​ສະ­ພາບ​ການ​ສາ­ກົນ​ທີ່​ມີ​ຄວາມ​ຜັນ​ປ່ຽນ​ຫຼາຍ​ຢ່າງ, ການ​​​ໃຫ້​ຄຳປຶກສາ​ນະ­ໂຍ­ບາຍ, ຫັນ​​ແນວ­ທາງ​ຂອງ​ກອງ​ປະ­ຊຸມ​ໃຫຍ່​ຄັ້ງ​ທີ XII ຂອງ​ພັກ​ເປັນອັນ​ລະອຽດ ​ແລະ​ການກໍ່­ສ້າງ​ລະ­ບຽບ​ກົດ­ໝາຍ ​ໄດ້​ຮັບ​ຄວາມ​ເອົາ­ໃຈ­ໃສ່​​ເປັນ​ພິ­ເສດ. ສອງ​ກວ່າ​ປີ​ທີ່​ຜ່ານ​ມາ, ຂະ­ແໜງ­ການ​ທູດ​ໄດ້​ນຳສະ­ເໜີໂຄງ­ການ​ໃຫຍ່​ກ່ຽວ​ກັບ​ການ​ພົວ­ພັນ​ຕ່າງ­ປະ­ເທດ​ຫຼາຍ​ໂຄງການ ໃຫ້ສູນ​ກາງ​ພັກ, ກົມ​ການ­ເມືອງ, ຄະ­ນະ​ເລ­ຂາ­ທິ­ການ ແລະລັດ­ຖະ­ບານ​, ໃນ​ນັ້ນມີ​​ແຜນນະ­ໂຍ­ບາຍ​ກ່ຽວ​ກັບ​ການ​ປະ­ຕິ­ບັດຢ່າງ​ມີ​ປະສິດທິ​ຜົນ ​ການ​ເຊື່ອມ​ໂຍງ​ເສດ­ຖະ­ກິດ​ສາ­ກົນ ແລະ ຍົກ​ລະ­ດັບ​ການ​ພົວ­ພັນ​ຕ່າງ­ປະ­ເທດ​ຫຼາຍ​ຝ່າຍ. ນີ້​ແມ່ນ​ບັນ­ດາ​ແຜນ​ນະ­ໂຍ­ບາຍ​ທີ່​ສຳ­ຄັນ​ ເພື່ອ​ຮັບ­ປະ­ກັນ​​ການ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃໝ່​ຄັ້ງ​ທີ XII ຂອງ​ພັກ ຢ່າງ​ຄົບ​ຊຸດ​.

ຫວຽດ­ນາມໄດ້​ເປັນ​ເຈົ້າ​ການ​ຍູ້​ແຮງແລະ​ເພີ່ມ​ທະວີການ​ພົວ­ພັນ​ກັບ​ບັນ­ດາ​ປະ­ເທດ​​ເພື່ອນ​ບ້ານໃກ້​ຄຽງ, ສະ​ມາ​ຄົ​ມ​ບັນ­ດາ​ປະ­ເທດອາ­ຊີ​ຕາ­ເວັນ​ອອກ​ສຽງ​ໃຕ້ (ອາ​ຊຽນ), ບັນ­ດາ​ປະ­ເທດ​ໃຫຍ່, ປະ​ເທດຄູ່​ຮ່ວມ​ມື​ຍຸດ​ທະ​ສາດ, ຮອບ­ດ້ານ ແລະ ເພື່ອນ​ມິດທີ່ເປັນ​ມູນ­ເຊື້ອ. ໃນ​ນັ້ນ, ການເຄື່ອນ​ໄຫວ​​ພົວ­ພັນ​ຕ່າງ­ປະ­ເທດ​ຂັ້ນ​ສູງ​​ມີ​ບົດ­ບາດ​ຫຼັກ​ແຫຼ່ງ ​ດ້ວຍ​​ຈຸດໜັກ​ໃຈ­ກາງ​ແມ່​ການ​ກໍ່­ສ້າງແລະປັບ­ປຸງ​ຄວາມ​ໄວ້​ວາງ​ໃຈ, ​ເພີ່ມ​ທະວີ ແລະ ສ້າງ​ການ​ບຸກ​ທະ­ລຸ​ໃນ​ການ​ພົວ­ພັນ​ກັບ​ປະ­ເທດ​ຕ່າງໆ. ມາ​ຮອດ​ປະ­ຈຸ​ບັນ​, ຫວຽດ­ນາມໄດ້​ສ້າງ­ຕັ້ງ​ການ​ພົວ­ພັນ​ທາງການ​ທູດ​ກັບ 188 ປະ­ເທດ, ດ້ວຍ​ເຄືອ​ຂ່າຍ 27 ປະ­ເທດ​ຄູ່​ຮ່ວມ​ມື​ຍຸດ​ທະ​ສາດ ແລະຄູ່​ຮ່ວມ​ມື​ຮອບດ້ານ, ໃນ​ນັ້ນ​ມີ​ທັງ​ໝົດ 5 ປະ­ເທດ​ສະ­ມາ­ຊິກ​ຖາ­ວອນ​ຂອງສະ­ພາ​ຄວາມ​ໝັ້ນຄົງ​ແຫ່ງ​ສະ­ຫະ​ປະ­ຊາ​ຊາດ. ສະ­ພາ­ວະ​ການ​ພົວ­ພັນ​​ເປີດກວ້າງ​ນີ້​ ບໍ່​ພຽງ​ແຕ່​ປະ­ກອບ­ສ່ວນ​​ຍົກ​ສູງ​ຖານະ​ບົດບາດ​ຂອງ​ຫວຽດນາມ​ເທົ່າ​ນັ້ນ ຫາກ​ຍັງ​ເປັນ​ພື້ນຖານ​ສຳຄັນ, ​ປະກອບສ່ວນໂດຍ​ກົງ​ເຂົ້າ​ໃນ​ການ​ປົກ​ປັກ​ຮັກ­ສາ​ ແລະພັດ­ທະ­ນາ​ປະ­ເທດ.

ບົນ​ພື້ນ­ຖານ​ສ້າງ­ຕັ້ງ​ຄວາມ​​ໄວ້​ວາງ​ໃຈດ້ານ​ການ­ເມືອງ, ຂະ­ແໜງ­ການ​ທູດ​ໄດ້​ເຮັດ​ເປັນ​ຢ່າງ​ດີ​ ບົດບາດ​​ເຊື່ອມ​ຕໍ່, ຊຸກ­ຍູ້​ການ​ເຊື່ອມ​ໂຍງ​ເສດ­ຖະ­ກິດ​ສາ­ກົນ, ເປີດ​ກວ້າງ​ຕະ­ຫຼາດ, ເພີ່ມ​ຄວາມ​ແຊກ​ຊ້ອນ​ຜົນ​ປະ­ໂຫຍດ, ຮັບ​ໃຊ້​ການ​ພັດ­ທະ­ນາ. ​ປະ­ຈຸ​ບັນ ຫວຽດ­ນາມກຳລັງ​ກໍ່­ສ້າງ​ຂອບ​ການ​ຄ້າ​ເສລີ​ກັບ​ເກືອບ 60 ປະເທດ (ກວມ​ເອົາ 59% ຂອງ​ຈຳນວນພົນ­ລະ­ເມືອງ, 61% ຈິດິພີ ແລະ 68% ການ​ຄ້າ​ໂລກ) ໂດຍ​ຜ່ານສັນ­ຍາ​​ການ​ຄ້າ​ເສລີ 16 ສະ­ບັບ, ລວມ​ມີ​ບັນ­ດາສັນ­ຍາ​ການ​ຄ້າ​ເສລີຮຸ່ນ​ໃໝ່, ຄື ​ສັນ­ຍາ​ຄູ່​ຮ່ວມ​ມື​ຮອບດ້ານແລະກ້າວ­ໜ້າ ຂ້າມປາ​ຊິີຟິກ, ​ສັນ­ຍາ​ການ​ຄ້າ​ເສລີຫວຽດ­ນາມ - ອີ​ຢູ. ​ໃນຂັ້ນ​ທ້ອງ​ຖິ່ນ, ແຕ່​ປີ 2016 ມາ​ຮອດ​ປະ­ຈຸ​ບັນ, ດ້ວຍ​ການ​ແນະນຳ​ຂອງ​ກະ­ຊວງ​ການ​ຕ່າງ­ປະ­ເທດ, ບັນ­ດາ​ທ້ອງ​ຖິ່ນ​ໄດ້​ມີ​ການ​ເປັນ​ເຈົ້າ​ການ​ຜັນ​ຂະ­ຫຍາຍ​ການ​ເຊື່ອມ​ໂຍງ​ສາ­ກົນ, ລົງ​ນາມ​ໃນ​ຂໍ້​ຕົກ­ລົງ​ສາ­ກົນ​ກ່ຽວ​ກັບ​ຂົງ­ເຂດ​ຕ່າງໆ ​ທັງ​ໝົດ​420 ສະ­ບັບ, ເສີມ​ຂະຫຍາຍ​ທ່າ­ແຮງ​ຂອງ​ແຕ່​ລະ​​ເຂດພາກ, ແຕ່​ລະ​ຂະ­ແໜງ­ການ​ຜະ­ລິດ​ຕະ​ພັນ. ນີ້​ແມ່ນ​ບັນ­ດາ​ປະ­ຖົມ​ປັດ­ໃຈທີ່​ສຳ­ຄັນ​ ​ສ້າງ​ແຮງ​ກະ​ຕຸ້ນ​ໃໝ່​ເພື່ອ​ໃຫ້​ປະ­ເທດ​ກ້າວ​ເຂົ້າ​ສູ່​ໄລ­ຍະ​ເຕີບ​ໂຕ​ໃໝ່​ທີ່​ມີ​ຄວາມ​ໝັ້ນ­ຄົງ​​ແລະ​ແທດຈິງ​ກວ່າ​ອີກ.

ຫວຽດ­ນາມໄດ້​ເສີມ​ຂະ­ຫຍາຍ​ເປັນ​ຢ່າງ​ດີ​ ບັນ­ດາ​ກົນ​ໄກ​ຫຼາຍ​ຝ່າຍ​ເພື່ອ​ຮັກ­ສາ​​ສິດແລະຜົນ​ປະ­ໂຫຍດ ຂອງຫວຽດ­ນາມ ກໍ່ຄືເຂົ້າ​ຮ່ວມ​​ໃນ​ການແກ້​ໄຂ​ບັນ­ດາ​ສິ່ງ​ທ້າ​ທາຍ​ລວມ ​ຂອງປະຊາ​ຄົມ​ສາ­ກົນ. ການເຄື່ອນ​ໄຫວ​​ພົວ­ພັນ​ຕ່າງ­ປະ­ເທດ​ຫຼາຍ​ຝ່າຍ​ ໄດ້​ຫັນ​ປ່ຽນ​ຢ່າງ​ແຮງຈາກ “ການ​ເຂົ້າ​ຮ່ວມຢ່າງ​ຕັ້ງ­ໜ້າ” ຂຶ້ນ​ເປັນ “ເປັນ​ເຈົ້າ​ການ​ປະກອບ­ສ່ວນ, ສ້າງຕັ້ງ​ສະ​ຖາ​ບັນ​ພະຫຸ​ພາຄີ”. ດ້ວຍ​ບົດ­ບາດ​ເປັນ​ປະ­ເທດ​ເຈົ້າ­ພາບ​ຂອງ​ເວ­ທີ​ປາ​ໄສ​ການຮ່ວມ​ມື​ເສດ­ຖະ­ກິດ ອາ­ຊີ - ປາ​ຊີ​ຟິກ (ເອ​ເປັກ) ປີ 2017, ​ໂດຍເລີ່ມຈາກ​ຜົນ​ປະໂຫຍດ​ຂອງກະ​ໂຕ​ປະຊາຊົນ​ແລະວິ​ສາ​ຫະ​ກິດ, ຫວຽດນາມ​ໄດ້​ຄັດ​ເລືອກ​​ເອົາຫົວ­ຂໍ້ ແລະບັນ­ດາຂໍ້​ບູ​ລິ​ມະ​ສິດ ທີ່​ສອດຄ່ອງ​ກັບຄວາມສົນ­ໃຈ­​ຮ່ວມ​ກັນ, ໄກ່​ເກ່ຍ​ຄວາມ​ແຕກ​ຕ່າງ, ສ້າງ​ຄວາມ​ເຫັນ​ດີ​ເຫັນ​ພ້ອມ, ​ຈາກ​ນັ້ນ​ປະ­ກອບ­ສ່ວນອັນ​ຕັ້ງ­ໜ້າ​ ເຂົ້າ​ໃນ​ການ​ກຳ­ນົດ​ທິດ​ໃຫ້​ແກ່​ໄລ­ຍະ​ການພັດ­ທະ­ນາ​ໃໝ່​ຢູ່​ພາກ​ພື້ນ​ດ້ວຍ “ວິ­ໄສ​ທິດ ເອ​ເປັກ ພາຍ­ຫຼັງ​ປີ 2020”. ໃນ​ສະ­ພາບ​ການທີ່​ທ່າ​ອຽງປະ­ຊາ­ລາດ​ນິ­ຍົມແລະການ​ປົກ​ປ້​ອງ ​ເກີດ​ຂຶ້ນ​ຢ່າງ​ແຂງແຮງ, ເອ​ເປັກ 2017 ບໍ່​ພຽງ​ແຕ່​ຮັກ­ສາ​ທ່ວງ​ທ່າ​ໄດ້ ​ຫາກ​ຍັງ​ຊຸກ­ຍູ້​ການ​ເຊື່ອມ​ຕໍ່ແລະການ​ຄ້າ​ເສລີ​ໃນ​ພາກ​ພື້ນ. ​ໃນ​ສັບ­ປະ­ດາ​ຂັ້ນ​ສຸດ​ຍອດ​ນັ້ນ, ບັນດາກະ­ຊວງ ທ້ອງ​ຖີ່ນ ແລະວິ​ສາ​ຫະ​ກິດ​​ຂອງ​ພວກ​ເຮົາ ​ໄດ້​ລົງ​ນາມ​​ໃນຂໍ້​ຕົກລົງ​ການຮ່ວມ​ມື​ກັບ​ບັນ­ດາ​ຄູ່​ຮ່ວ​ມມື​ ເປັນ 121 ສະ­ບັບ ທີ່​ມີ​ມູນ​ຄ່າ​ທັງ​ໝົດ 20 ກວ່າ​ຕື້​ໂດ​ລາ​ສະ­ຫະ­ລັດ. ຜົນສຳ­ເລັດ​ຂອງ​ປີ ເອ​ເປັກ 2017 ໄດ້​ໃຫ້​ຮູ້​ວ່າ, ເຖິງ​ວ່າ​ບໍ່​ແມ່ນ​ປະ­ເທດ​ໃຫຍ່​, ແຕ່ຫວຽດ­ນາມ​ມີ​ຖາ­ນະ​ບົດບາດແລະອິດ​ທິ​ພົນ ​ເພື່ອ​​ຄິດ​ໃຫຍ່ແລະກະທຳ​ໃຫຍ່, ​ໂດຍ​ສະ​ເພາະ​ແມ່ນ​ເມື່​ອຕ້ອງ​ການຮັກສາ​ຜົນ​ປະໂຫຍດ​ຂອງ​ຊາດ, ຂອງປະ­ເທດ.

ຄຽງ​ຄູ່​ກັນ​ນັ້ນ, ເຮົາ​ໄດ້​ສະ­ແດງ​ພາ­ລະ​ບົດ­ບາດ​ເປັນ “ສະ​ມາ​ຊິກ​ທີ່​ມີ​ຄວາມ​ຮັບ­ຜິດ­ຊອບ” ​ຂອງ​ອາ​ຊຽນ, ສະ­ຫະ​ປະ­ຊາ​ຊາດ, ເວ­ທີ​ປາ​ໄສ ອາ­ຊີ - ເອ​ຣົບ (ASEM), ສະ­ພາ​ສິດ​ທິມະ­ນຸດ, ສະ­ພາເສດ­ຖະ­ກິດ ​ແລະສັງ­ຄົມ (ECOSOC), ອົງ­ການ​ສຶກ​ສາ, ວິ­ທະ­ຍາ­ສາດແລະວັດ­ທະ­ນະ­ທຳ​ ສະ­ຫະ​ປະ­ຊາ​ຊາດ (UNESCO), ບັນ­ດາ​ກົນ​ໄກ​ອະ​ນຸ​ພາກ​ພື້ນ​ແມ່­ນ້ຳ​ຂອງ...

ການຕໍ່­ສູ້​ປົກ​ປັກ​ຮັກ­ສາ​ສິດ​ອະ­ທິ­ປະ​ໄຕແລະຜືນ​ແຜ່ນ­ດິນ​ອັນ​ຄົບ​ຖ້ວນ ຍາມ​ໃດ​ກໍ່​ເປັນ​ໜ້າ­ທີ່​ອັບ​ດັບ​ໜຶ່ງ ແລະສອດ​ຮ້ອຍ​ຕະຫຼອດ​ຂອງ​ຂະ­ແໜງ­ການທູດ. ໃນ​ຊຸມ​ປີ​ທີ່​ຜ່ານ​ມາ, ຂະ­ແໜງ­ການ​ທູດ​ໄດ້​ມີ​ການ​ປະ­ສານ​ສົມ­ທົບ​ຢ່າງ​ແໜ້ນ​ແຟ້ນ​ເປັນ​ປົກ­ກະ­ຕິ​ ກັບ​ບັນ­ດາ​ກະ­ຊວງ, ຂະ­ແໜງ­ການ ແລະທ້ອງ​ຖິ່ນ​ຂອງຫວຽດນາມ ແລະ ພ້ອມ​ກັບ​ບັນ­ດາ​ປະ­ເທດ​ທີ່​ກ່ຽວ­ຂ້ອງ​ ພະ­ຍາ­ຍາມ​ກໍ່­ສ້າງ​ເສັ້ນ​ຊາຍ​ແດນ​ແຫ່ງ​​ສັນຕິພາບ, ມິດ­ຕະ­ພາບ ແລະ ການຮ່ວມ​ມື​ເປັນ​ປົກກະຕິ ​ເພື່ອການ​ພັດ­ທະ­ນາ.

ໃນ​ບັນ­ຫາ​ທະ­ເລ​ຕາ­ເວັນ​ອອກ, ເຖິງ​ວ່າ​​ຍັງ​ສືບ­ຕໍ່​ມີ​​ການ​ຜັນ​ແປປ່ຽນ​​ໃໝ່​ທີ່​ສັບ­ສົນ​ໃໝ່ ​ແລະຊ້ອນ​ແຝງ​ໄພ​ອັນ­ຕະ­ລາຍ​ຫຼາຍ​ຢ່າງທີ່​ຄາດ​ເດົາ​ຍາກ, ​ແຕ່​ຍ້ອນ​ໄດ້​ຮັບ​ຄວາມ​ເອົາ­ໃຈ­ໃສ່​ທີ່​ສຸດ​ຈາກ​ຫາງ​ສຽງ​ສາ­ກົນ, ຫວຽດ­ນາມໄດ້​ເດັດ­ດ່ຽວ, ຢຶດ​ໝັ້ນ ແລະຜັນ​ຂະ­ຫຍາຍ​ຫຼາຍ​ມາດ​ຕະ­ການ​ຕໍ່­ສູ້​ຢ່າງ​ມີ​ປະ​ສິດ­ທິ​ຜົນ​ ກັບ​ບັນ­ດາ​ການ​ລະ­ເມີດ, ​ແລະ ​ໄດ້ຮັກ­ສາ​ສິດ​ອະ­ທິ­ປະ​ໄຕແລະສິດ​ຕັດ­ສິນຂອງ​ຕົນ ​ຕໍ່​ບັນ­ດາ​ເຂດ​ທະ­ເລ ໄຫຼ່​ທະ­ວີບ ແລະບັນດາ​ເກາະ​ທະເລ ຕາມ​ກົດ­ໝາຍ​ສາ­ກົນ, ໃນ​ນັ້ນ​ມີ​ອະ­ນຸ​ສັນ­ຍາ​ສະ­ຫະ​ປະ­ຊາ​ຊາດ​ວ່າ​ດ້ວຍ​ກົດ­ໝາຍ​ທະເລ​ປີ 1982 (UNCLOS 1982). ຫວຽດ­ນາມພ້ອມ​ກັບ​ອາ​ຊຽນ ແລະ ຈີນ ກຳລັງ​ຊຸກ­ຍູ້​ການ​ເຈລະ­ຈາ​ກ່ຽວ​ກັບ​ປະ­ມວນ​ຂໍ້​ກຳ­ນົດ​ກ່ຽວ​ກັບ​ວິ­ທີ​ປະ­ພຶດ​ຢູ່​ທະ­ເລ​ຕາ­ເວັນ​ອອກ (COC) ​ທີ່​ມີ​ປະ​ສິດ­ທິ​ຜົນ, ມີ​ຜົນ​ຜູກພັນຕາມ​ກົດໝາຍ ແລະມີ​ເນື້ອ​​ແທ້ສຳຄັນ. ພ້ອມກັນ​ນັ້ນ, ຫວຽດ­ນາມກໍ່​​ໄດ້ຕັ້ງ­ໜ້າ​ເປີດ​ກວ້າງ​ການ​ຮ່ວມ​ມືທາງ​ດ້ານ​ທະ­ເລ​ກັບ​ບັນ­ດາ​ປະ­ເທດ​ພາຍ​ໃນ​ ແລະພາຍ​ນອກ​ພາກ​ພື້ນ; ແລກ­ປ່ຽນ, ເຈລະ­ຈາ​ແນ­ໃສ່​ຫຍໍ້​ສັ້ນ​ຄວາມ​ແຕກ​ຕ່າງກັນ, ເພີ່ມ​ທະ­ວີ​ການສ້າງ​ຄວາມ​​ໄວ້​ວາງ​ໃຈ​ກັນ.

ປົກ​ປັກ​ຮັກ­ສາ​ຜົນ​ປະ­ໂຫຍດ​ຂອງ​ພົນ­ລະ­ເມືອງ, ຊາວຫວຽດ­ນາມຢູ່​ຕ່າງ­ປະ­ເທດ ​ຍາມ​ໃດ​ກໍ່​ເປັນ​ໜ້າທີ່ສຳ­ຄັນ​ເປັນ​ພິ​ເສດ ​ໃນ​ວຽກ​ງານ​ການ​ພົວ­ພັນ​ຕ່າງ­ປະ­ເທດ​ທັງໝົດ. ແຕ່​ປີ 2016 ມາ​ຮອດ​ປະ­ຈຸ​ບັນ, ຂະ­ແໜງ­ການທູດ ​ໄດ້​ດຳ­ເນີນ​ການ​ຄ້ຳ­ປະ­ກັນ​ໃຫ້​​ຊາວຫວຽດ­ນາມຢູ່​ຕ່າງ­ປະ­ເທດ​ ເປັນ​ຈຳນວນ 16.000 ​ຄົນ ແລະຊາວ​ປະ­ມົງ​ 5.000 ຄົນ. ບັນ­ດາ​ແຜນ​ນະ­ໂຍ­ບາຍ, ນະ­ໂຍ­ບາຍ​ກ່ຽວ​ກັບ​ການ​ຊ່ວຍ­ເຫຼືອ​ຊາວຫວຽດ­ນາມ ຢູ່​ຕ່າງ­ປະ­ເທດ ໄດ້​ຮັບ​ການ​ຜັນ​ຂະ­ຫຍາຍ​ຢ່າງ​ຄົບ​ຊຸດ, ປະ­ກອບ­ສ່ວນ​ເຂົ້າ​ໃນ​ການ​ປັບ­ປຸງ​ກຸ່ມ​ສາ­ມັກ­ຄີ​ປວງ​ຊົນ​ທັງ​ຊາດ, ປຸກ​ຕື່ນ​ແຫຼ່ງ​ພະ­ລັງ­ງານ​ໃຫ້​ແກ່​ປະ­ເທດ​ ຈາກຊາວຫວຽດ­ນາມຢູ່​ຕ່າງ­ປະ­ເທດ 4,5 ລ້ານ​ຄົນ.

ການຮັກ­ສາແລະເສີມ​ຂະ­ຫຍາຍ​ເອ­ກະ­ລັກ​ວັດ­ທະ­ນະ­ທຳ​ແຫ່ງ​ຊາດ ຍາມ​ໃດ​ກໍ່​ມີ​ຄວາມ​ສຳ­ຄັນ​ໃນ​ຂະ​ບວນ​ວິ­ວັດ​ແຫ່ງ​ການ​ເຊື່ອມ​ໂຍງ​ສາ­ກົນ​ຮອບ­ດ້ານ, ຍົກ​ສູງ​ຖາ­ນະ​ບົດ­ບາດ ແລະເພີ່ມ​ທະວີ “ກຳລັງ​ແຮງ​ນຸ່ມ​ນວນ” ຂອງ​ປະ­ເທດ. ການ​ພົວ­ພັນ​ຕ່າງ­ປະ­ເທດ​ດ້ານ​ວັດ­ທະ­ນະ­ທຳ​ໄດ້​ຮັບ​ການ​ຜັນ​ຂະ­ຫຍາຍ​ຢ່າງ​ມີ​ປະ​ສິດ­ທິ​ຜົນ ​ດ້ວຍ​ຈຸດ​ສຸມ​ໃຈ­ກາງ​ແມ່ນ “ໂຄງ­ການ​​ເຊີ​ດຊູ​ສັນລະ​ເສີນ​ປະທານ​ໂຮ່ຈີ​ມິນ, ວິລະ​ຊົນ​ປົດ​ປ່ອຍ​ຊາດ, ນັກ​ວັດທະນະທຳ​ທີ່​ເລີດ​ລ້ຳ​ຢູ່​ຕ່າງ­ປະ­ເທດ”. ແຕ່​ປີ 2016 ມາ​ຮອດ​ປະ­ຈຸ​ບັນ, ມີ​​ 8 ມໍ­ລະ­ດົກ​ວັດ​ທະ­ນະ​ທຳ​ໄດ້​ຮັບ​ການ​ຮັບ­ຮອງ​ຈາກ​ອົງການ UNESCO, ຍົກ​ຈຳ­ນວນ​ມໍລະດົກ​ວັດທະນະທຳ​ໂລກ​ຂອງຫວຽດນາມ​ຂຶ້ນ​ເປັນ 38 ​ແຫ່ງ. ບັນ­ດາ​ມໍລະດົກ​ໂລກ​ນີ້ໄດ້​ປະກອບສ່ວນ​ຢ່າງ​ຕັ້ງ­ໜ້າ​ ໃຫ້​ແກ່​ການ​ໂຄ­ສະ­ນາ​ຮູບ​ພາບຂອງ​ປະ​ເທດ, ດຶງ​ດູດນັກ­ທ່ອງ­ທ່ຽວ, ປັບ­ປຸງ​ພື້​ນ​ຖານ​ໃຫ້​ແກ່​ການ​ພັດ­ທະ­ນາ​ແບບ​ຍືນ​ຍົງ​ຂອງ​ທ້ອງ​ຖິ່ນ​. ຂໍ້​ມູນ​ຂ່າວ­ສານ​ກ່ຽວ​ກັບ​ການ​ພົວ­ພັນ​ຕ່າງ­ປະ­ເທດ​ໄດ້​ສ້າງ​ຜົນ​ກະ­ທົບ​​ທາງ​ບວກ​ໃນການ​ໂຄ­ສະ­ນາ​ເຜີຍ​ແຜ່ແຜນ​ນະ­ໂຍ­ບາຍ, ນະໂຍບາຍ​ຂອງ​ພັກ, ລັດ ແລະ ຜົນງານ​ໃນ​ການ​ພັດ­ທະ­ນາ​ຂອງ​ຫວຽດນາມ.

ມຸ່ງ​​ໄປສູ່​​ການ​ທູດ​ທີ່​ທັນ​ສະ­ໄໝ, ເປັນ​ເຈົ້າ​ການ, ປະ­ດິດ​ສ້າງ​ ​ແລະມີປະ​ສິດ­ທິ​ຜົນ​

ບັນ­ດາ​ຜົນ­ງານ​ເທິງ​ນີ້​ໄດ້​​ປະ­ກອບ­ສ່ວນ​ຢ່າງ​ຕັ້ງ­ໜ້າ​ ເຂົ້າ​ໃນ​ການ​ກໍ່­ສ້າງແລະ ປົກ​ປັກ​ຮັກສາ​ປະ­ເທດ​ຊາດ ແລະ ກໍ່​ແມ່ນ​ສຳ­ພາ­ລະ​ເດີນ­ທາງ​ທີ່​ສຳ­ຄັນ ​ເພື່ອ​ກ້າວ​ເຂົ້າ​ສູ່​ໄລ­ຍະ​ການພັດ­ທະ­ນາ​ໃໝ່, ມີ​ລັກສະ­ນະ​ກຸນແຈ. ແຕ່​ວ່າ, ກໍ່​ຕ້ອງ​ເຫັນ​ໄດ້​ວ່າ, ຍັງ​ມີ​​ກາ­ລະ​ໂອ­ກາດ​ຕ່າງໆ ທີ່​ພວກ​ເຮົາ​​ບໍ່​ສວຍ​ໃຊ້​​ໄດ້ ​ເພື່ອ​ປະກອບສ່ວນ​ຢ່າງ​ມີ​ປະ​ສິດ­ທິ​ຜົນ​ ​ໃຫ້​ແກ່​ພາ­ລະ­ກິດ​ການ​ສ້າງສາແລະປົກ​ປັກ​ຮັກ­ສາ​ປະ­ເທດ​ຊາດ. ການເຊື່ອມ​ໂຍງ​ສາ­ກົນ ແລະການ​ພັດ­ທະ­ນາ​ຂອງ​ວິ­ທະ­ຍາ­ສາດ-ເຕັກ​ໂນ​ໂລ​ຊີ​ ໄດ້​ນຳ​ເອົາ​ໂອ­ກາດ​ມາ​ໃຫ້​ພວກ​ເຮົາ ​ເພື່ອ​ບຸກ​ທະ­ລຸ, ແຕ່​ພ້ອມ​ກັບ​ນັ້ນ​ ມັນ​ກໍ່​ມີ​ສິ່ງທ້າ​ທາຍ​ຫຼາຍ​ຢ່າງ​ ທີ່ຕ້ອງ​ໄດ້​ແກ້​ໄຂ.

ສະ­ພາບ​ການ​ດັ່ງ­ກ່າວ​ຮຽກ­ຮ້ອງ​ໃຫ້​ຂະ­ແໜງ­ການ​ທູດ​ເວົ້າ​ສະ­ເພາະ​ ຕ້ອງ​ສືບ­ຕໍ່​ພະຍາ­ຍາມ, ເປັນ​ເຈົ້າ​ການ, ປະ­ດິດ​ສ້າງ​ໃນ​ຈິນ­ຕະ­ນາ­ການ, ທັນ​ສະ­ໄໝ​ໃນ​ວິ­ທີ​ການ​ປະ­ຕິ­ບັດ, ເອົາ­ໃຈ­ໃສ່​​ເຖິງລັກ­ສະ­ນະ​ປະ​ສິດ­ທິ​ຜົນ​ ເພື່ອ​ຜັນ​ຂະ­ຫຍາຍ​ປະຕິບັດ​ແຜນ​ນະ­ໂຍ­ບາຍ ມະ­ຕິ​ຂອງ​ພັກ ໃຫ້​ສຳ­ເລັດ​ຜົນ​ມີ​ໄຊ​. ດັ່ງນັ້ນ, ກອງ​ປະ­ຊຸມ​ຄັ້ງ​ທີ 30 ດ້ວຍ​ຫົວ­ຂໍ້ “ການ​ທູດຫວຽດ­ນາມ: ເປັນ​ເຈົ້າ​ການ, ປະ­ດິດ​ສ້າງ, ປະ​ສິດ­ທິ​ຜົນ, ປະ­ຕິ­ບັດ​​ມະ­ຕິ​ກອງ​ປະ­ຊຸມ​ໃຫຍ່​​ຄັ້ງ​ທີ XII ຂອງ​ພັກ ຢ່າງ​ສຳ​ເລັດມີ​ໄຊ” ຈະ​ສຸມ​ໃສ່​​ບັນ­ດາ​ຈຸດ​​ໃຈ­ກາງ​ຕົ້ນ​ຕໍ່​​ດັ່ງ­ນີ້:

ທີ​ໜຶ່ງ, ສືບ­ຕໍ່​ເຊື່ອມ​ຊືມ ແລະ ຕີ​ລາ­ຄາ​ການ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່​​ຄັ້ງ​ທີ XII ຂອງ​ພັກ ກ່ຽວ​ກັບ​ວຽກ​ງານ​ພົວ­ພັນ​ຕ່າງ­ປະ­ເທດ​ໃນ​ເວ­ລາ​ທີ່​ຜ່ານ​ມາ ແລະວາງ​​ບັນ­ດາ​ມາດ​ຕະ­ການ, ປະສານ​ສົມ­ທົບ​ໃຫ້​ແໜ້ນ​ແຟ້ນ​ລະ­ຫວ່າງ​ຂັ້ນ, ຂະ­ແໜງ­ການ ແລະກຳ­ລັງ​ປະ­ຕິ­ບັດ​ວຽກ​ງານ​ການ​ພົວ­ພັນ​ຕ່າງ­ປະ­ເທດ​ ​ເພື່ອ​ເສີມ​ຂະ­ຫຍາຍ​ກຳລັງ​ແຮງ​ສັງ​ລວມ​ ໃນ​ການ​ປະ­ຕິ­ບັດ​​ມະ­ຕິ​ກອງ​ປະຊຸມ​ໃຫຍ່​​ຄັ້ງ​ທີ XII ຂອງ​ພັກໃຫ້​ສຳ­ເລັດ​ມີ​ໄຊ.

ທີ​ສອງ, ຄາດ​ຄະ­ເນ ແລະຕີ​ລາ­ຄາ​ໃຫ້​ແທດ­ເໝາະ​ກັບ​ສະ­ພາບ​ການ​ໂລກ ແລະພາກ​ພື້ນ​ໃນ 3 - 5  ປີ​ຕໍ່­ໜ້າ​ ດ້ວຍ​ວິ­ໄສ​ທັດ 10–15 ປີ ເພື່ອ​ຮັບ​ຮູ້​ໃຫ້​ຖືກ­ຕ້ອງ ແລະທັນ​ເວ­ລາ​ບັນ­ດາ​ໂອ­ກາດ, ສິ່ງ​ທ້າ​ທາຍ​ຕໍ່​ປະເທດ; ຄົ້ນ­ຄວ້າເທື່ອ​ລະ​ກ້າວ​ເນື້ອ​ໃນ​ຈຳ­ນວນ​ໜຶ່ງ​ທີ່​ມີ​ລັກ­ສະ­ນະ​ຍຸດ​ທະ​ສາດ​ໃໝ່​ກ່ຽວ​ກັບ​ການ​ພົວ­ພັນ​ຕ່າງປະ­ເທດ​ ​​ມຸ່ງ​​ໄປສູ່​ກອງ​ປະ­ຊຸມ​ໃຫຍ່​ຄັ້ງ​ທີ XIII ຂອງ​ພັກ ໃຫ້​ເໝາະ​ສົມ​ກັບ​ລະ­ດັບ, ທ່າ ແລະ ກຳ­ລັງ​ແຮງ​ຂອງ​ປະ­ເທດ.

ທີ​ສາມ, ສືບ­ຕໍ່​ແລກ­ປ່ຽນ​​ບັນ​ດາມ​ດ​ຕະ­ການ​ແລະວິ­ທີ​ການ​ສັງ​ລວມ​ກ່ຽວ​ກັບ​ການ​ຜັນ​ຂະ­ຫຍາຍ ​ແນໃສ່​ຍົກ​ສູງ​ປະ​ສິດ­ທິ​ຜົນຂອງ​ການ​ເຊື່ອມ​ໂຍງ​ສາກົນ​ຂອງ​ປະ­ເທດ, ພິ­ເສດ​ແມ່ນ​ຍົກ​ລະ­ດັບ​ການ​ເຄື່ອນ​ໄຫວ​ການທູດ​ຫຼາຍ​ຝ່າຍ​ໃນ​ເວ­ລາ​ຕໍ່​ໄປ; ພ້ອມກັນ​ກັບ​ການ​ສືບ­ຕໍ່​ເຮັດ​ໃຫ້­ການ​ພົວ­ພັນກັບ​ຕ່າງ​ປະ­ເທດ​​ເຂົ້າ​ສູ່​ລວງ​ເລິກ, ຕ້ອງປັບ­ປຸງ​ສະ­ພາບ​ແວດ​ລ້ອມ​ສັນ­ຕິ­ພາບ, ສະ​ຖຽມ​ລະ​ພາບ ​ຮັບ​ໃຊ້​ຢ່າງ​ແທດຈິງ​ໃຫ້­ການ​ພັດ­ທະ­ນາ​ປະ­ເທດ.

ທີ​ສີ່, ປັບ­ປຸງ​ບູ­ລະ­ນະ​ກົງ­ຈັກ​ການຈັດ​ຕັ້ງ ແລະ ກໍ່­ສ້າງ​ຖັນ​ແຖວ​ພະ­ນັກ­ງານ​ຂະ­ແໜງ­ການທູດ​ຕາມ​ທິດ​ທັນ​ສະ­ໄໝ​ເທື່ອ​ລະ​ກ້າວ, ເຄື່ອນ​ໄຫວ​ມີ​ປະ​ສິດ­ທິ​ຜົນ, ປະສິດທິ​ພາບ, ເທົ່າ​ທຽມ​ກັນ​ລະ­ດັບ​ໜ້າ­ທີ່​ ຕາມ​ຈິດ­ໃຈກອງ​ປະ­ຊຸມ​ສູນ​ກາງ​ພັກ​ຄັ້ງ​ທີ 6 ແລະ ກອງ​ປະ­ຊຸມ​ສູນ​ກາງ​ພັກ​ຄັ້ງ​ທີ 7 ສະ­ໄໝ​ທີ XII.

ດ້ວຍ​ຈິດ­ໃຈ​ສຸມ​ອົກ​ສຸດ​ໃຈ​ຕໍ່­ໜ້າ​ທີ່​ ທີ່​ພັກ, ລັດ ແລະປະ­ຊາ­ຊົນ​ມອບ​ໝາຍ​ໃຫ້, ກອງ​ປະ­ຊຸມ​ທາງການທູດ​ຄັ້ງ​ທີ 30 ຈະ​ສະ­ແດງ​ໃຫ້​​ເຫັນ­ແຈ້ງ​ເຖິງ​ລັກ­ສະ­ນະ​ເປັນ​ເຈົ້າ​ການ, ປະ­ດິດ​ສ້າງແລະມີປະ​ສິດ­ທິ​ຜົນ​ ເພື່ອ​ມີ​ສ່ວນ​ຮ່ວມທີ່ດີ​​ໃນ​ພາ­ລະ­ກິດ​​ການ​ກໍ່­ສ້າງ ແລະປົກ​ປັກ​ຮັກ­ສາປະ­ເທດ​ຊາດ./.

​ໂດຍ ຟ້າມ​ບິ່ງ​ມິນ
ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ, 
ຮອງ​ນາ­ຍົກ­ລັດ­ຖະ­ມົນ­ຕີ, ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ

--------------------------------

ບົດ​ນີ້​ໄດ້​ລົງ​ພິມ​ໃນ​ວາ­ລະ­ສານ​ກອມ​ມູ​ນິດ ສະ­ບັບ​ທີ 911 (ເດືອນ​ກັນ­ຍາ 2018)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ