ວັນຈັນ, 18/2/2019
ບັນດາຂີດໝາຍ ເອເປກ 2017 - ເບິ່ງຄືນຫຼັງໜຶ່ງປີ
26/1/2019 18:28' ສົ່ງ ພິມ
ພາບປະກອບ (ພາບ: TTXVN)

ຂີດ​ໝາຍ ເອ​ເປກ 2017

​ປີ 2017 ແມ່ນ​ປີ​ທີ່​ມີ​ຄວາມ​ຜັນ​ປ່​ຽນແລະສັບສົນ​ແທ້​, ​ປີ​ທີ່​ຄວາມ​​ກັງວົນ, ຄວາມ​ປັ່ນ​ປວນ​ແລະ​ຄວາມບໍ່​ສະ​ຫງົບ​ແຜ່​ກະ​ຈາຍ​​ໄປ​ທົ່ວ​ໂລກ. ໃນ​​ແຜ່ນພາບ​ທີ່​ເຕັມ​ໄປ​ດ້ວຍ​ລາຍ​ສີ​ມືດ​ມົ​ວ ຂອງ​ສະ​ພາບ​ການ​ໂລກ ແລະພາກ​ພື້ນອາ​ຊີ-ປ​າ​ຊີ​ຟິກນັ້ນ, ການ​ຮັບ​ປະ​ກັນ​ຄວາມ​ສຳ​ເລັດ​ໃຫ້​ແກ່ກອງ​ປະ​ຊຸມ​ຂອງ​ຫຼາຍ​ປະ​ເທດ​ເສດ​ຖະ​ກິດພັດທະນາ​ ແມ່ນ​ຕ້ອງ​ຜ່ານ​ຜ່າສິ່ງ​ທ້າ​ທາຍ​ຕ່າງໆຫຼາຍ​ຢ່າງ, ​ໂດຍ​ສະ​ເພາະ​​ສຳ​ລັບ​ຄວາມຕ້ອງການ​ໃຫ້ບັນ​ດາປະ​ເທດ​ສະ​ມາ​ຊິກມາ​ຮ່ວມ​ຢ່າງ​ຄົບ​ຖ້​ວນ ແລະ ເຕົ້າ​ໂຮມ​ໄດ້​ຄວາມ​​​ເຫັນ​ດີ​ເຫັນ​ພ້ອມ ຄວາມ​ເປັນ​ຈິດ​ໜຶ່ງ​ໃຈດຽວກັນ. ໃນ​ເດືອນເມ​ສາ 2014, ກອງ​ປະ​ຊຸມ​ສຸດຍອດ ຈີ 20 ​ໃນ​ປະ​ເທດ​ເຢຍ​ລະ​ມັນ​ບໍ່​​ບັນລຸ​ຜົນສຳ​ເລັດ, ຕໍ່ຈາກ​ນັ້​ນ​ແມ່ນ​ສັນ​ຍານທາງ​ລົບຕິດ​ຕໍ່​ກັນໃນ​ທຸກເວ​ທີ​ປາ​ໄສຫຼາຍ​ຝ່າຍ ​ແລະ ມີ​ອຸປະ​ສັ​ກຫຼາຍ​ຢ່າງໃນ​ການ​ເຊື່ອມ​ຕໍ່​ພາກ​ພື້ນ. ແຕ່​ວ່າ, ​ໃນ​ເວ​ລາ​ທີ່​ມີ​ຄວາມ​ຫຍຸ້ງ​ຍາກແລະສິ່ງ​ທ້າ​ທາຍບໍ່​ພຽງ​ແຕ່ສຳ​ລັບ ເອ​​ເປກ ​ເທົ່າ​ນັ້ນ ​ແຕ່​ຍັງ​ຕໍ່​ທ່າ​ອຽງ​ຂອງ​ການເຊື່ອມ​​ໂຍງພາກ​ພື້ນ, ທ່າ​ອຽງ​ຂອງ​ການເປີດ​ເສລີການ​ຄ້າ​​ໃນ​ທົ່ວ​ໂລກ, ຫວຽດ​ນາມໄດ້​ສະ​ແດງ ​ຄວາມ​ກ້າຫານ, ຄວາມອົດທົນແລະ​ປະ​ດິດ​ສ້າງ​, ຄວາມຕັດ​ສິນ​ໃຈ, ຄວາມ​ຮັບ​ຜິດ​ຊອບ ເພື່ອ​ຮັບຮອງ​ຄວາມ​ສຳ​ເລັດ​ຂອງ ເອ​ເປກ 2017. ບັນ​ດາ​ຂີດ​ໝາຍ​ທີ່​ຈະ​ແຈ້ງ​ຂອງ ເອ​ເປກ 2017 ໄດ້​ສົ່ງ​ຜົນກະ​ທົບອັນ​ຕັ້ງ​ໜ້າ​​ເຖິງ​ສະ​ພາບ​ການ, ທ່າ​ອຽງ​ໃນ​ໂລກ, ​ໃນພາກ​ພື້ນ ແລະ​ໃນເອ​ເປກ​ເອງ. ພິ​ເສດ, ສຳລັບປະ​ເທດຫວຽດ​ນາມ, ຄວາມ​​ພະຍາ​ຍາມ​ຕະຫຼອດ​ທັງ​ປີ ເອ​ເປກ ເຊິ່ງສູງ​ສຸດແມ່ນສັບ​ປະ​ດາ​ຂັ້ນ​ສູງ ໄດ້​ຍົກສູງ​ພາ​ລະ​ບົດ​ບາດແລະຖາ​ນະ​ສາ​ກົນ ຂອງ​ປະ​ເທດ​ເຮົາ, ເພີ່ມ​ທະ​ວີແລະເຮັດ​ໃຫ້​​ ການ​ພົວ​ພັນ​ລະ​ຫວ່າງ​ປະ​ເທດ​ເຮົາ​ກັບບັ​ນ​ດາ​ພື້ນ​ຖານ​ເສດ​ຖະ​ກິດເອ​ເປກ ​ເລິກ​ເຊິ່ງກວ່າ​ອີກ, ​ເຊື່ອມ​ຕໍ່​ວິ​ສາ​ຫະ​ກິດຂອງຫວຽດ​ນາມ ກັບ​ວິ​ສາ​ຫະ​ກິດຂອງເອ​ເປກ, ພ້ອ​ມກັນ​ນັ້ນ​ກໍ່ໂຄ​ສະ​ນາ​ສົ່ງ​ເສີມຮູບ​ພາບ​ຂອງປະ​ເທດ ​ແລະ ຄວາມ​ສາ​ມາດ​ບົ່ມ​ຊ້​ອນ​ໃນ​ການ​ພັດທະນາຂອງຫວຽດ​ນາມ.

​ເຂົ້າ​ສູ່​ປີ 2018, ສະ​ພາບ​ການ​ໂລກແລະພາກ​ພື້ນໄດ້​​ຜັນປ່ຽນ​ຕາມ​ທິດ​ທີ່​ສັບ​ສົນ​ກວ່າ​ອີກ, ຄວາມ​ຫຍຸ້ງ​ຍາກຫຼາຍກວ່າ​ຄວາມ​ສະ​ດວກ. ທ່າ​ອຽງ​ບາງ​ຢ່າງ​ຈາກປີ​ກ່ອນ, ​ເຊັ່ນ​​ລັດ​ທິ​ປົກ​ປ້ອງ​ການ​ຄ້າ, ລັດ​ທິ​ປະ​ຊາລາດ​ນິ​ຍົມ ແລະການ​ຄັດຄ້ານ​ໂລ​ກາ​ພິ​ວັດ ​ຍັງ​ສືບ​ຕໍ່​ພັດ​ທະ​ນາ, ຊ້ຳ​ບໍ່​ໜຳຍັງ​ແຂງ​ແຮງກວ່າ​ແຕ່​ກ່ອນ. ​ສິ່ງ​ທີ່​ໜ້າ​ສົນ​ໃຈ​ຄື​ ການດັດ​ແປງ​ນະ​ໂຍ​ບາຍ​ຂອງ​ບັນ​ດາ​ປະ​ເທດ​ໃຫຍ່, ພິ​ເສດ​ແມ່ນ​ຄວາມ​ເຄັ່ງ​ຕຶງ​ລະ​ຫວ່າງອາ​ເມ​ລິ​ກາ ແລະ ຈີນ​ໄດ້​ເພີ່ມ​ຂຶ້ນ​​ແລະແຜ່​ກະ​ຈາຍ​ຈາກ​ຂົງ​ເຂດ​ການ​ຄ້າ​​ໄປ​ສູ່​ຂົງ​ເຂດ​ຮັກສາຄວາມ​ສະ​ຫງົບ. ອຳ​ນາດ​ການ​ປົກ​ຄອງ​ຂອງ​ປະ​ທາ​ນາ​ທິ​ບໍ​ດີ ໂດ​ນັນ ທ​ຣັມ ສືບ​ຕໍ່​ປະ​ຕິ​ບັດ​ນະ​ໂຍ​ບາຍ ​ອາ​ເມ​ລິ​ກາກ່ອນອື່ນ​ໝົດ”, ສ້າງ​ແຮງ​ກົດ​ດັນ​ໃຫ້​​ເຈ​ລະ​ຈາ​ບັນດາສັນ​ຍາ​ການ​ຄ້າ​ເສ​ລີຄືນ​ໃໝ່ ​ແລະ ຊຸກ​ຍູ້​ການ​ປະ​ຕິ​ຮູບ​ອົງ​ການ​ຈັດ​ຕັ້ງ​ການ​ຄ້າ​ໂລກ (WTO). ໃນ​ຂະ​ນະ​ນັ້ນ, ຈີນ ​ຫັນ​ເຂົ້າ​ສູ່​ນະ​ໂຍ​ບາຍ​​ຊຸກ​ຍູ້​ຄວາມ​ຮຽກ​ຮ້ອງ​ຕ້ອງ​ການພາຍ​ໃນ, ​ເອົາ​ໃຈ​ໃສ່​​ຄຸນ​ນະ​ພາບ​​ການເຕີບ​ໂຕ ​ແລະ ເຕັກ​ໂນ​ໂລ​ຊີ​ສູງ (Made in China 2025). ຕໍ່​ໜ້າການ​ຫັນ​ປ່​ຽນ​ເຫຼົ່ານນັ້ນ, ​ການ​ເຕີບ​ໂຕ​ເສດ​ຖະ​ກິດ​ໂລກ​​ກໍ່ມີ​ທ່າ​ອຽງຫຼຸດ​ລົງ​ໃນ​ປີ 2018. ກອງ​ທຶນ​​ການ​ເງິນສາ​ກົນ (IMF) ໃນ​ບົດ​ລາຍ​ງານເດືອນ​ຕຸ​ລາ 2018 ໄດ້ຄາດ​ກະກາ​ນ​ເຕີບ​ໂຕ​ເສດ​ຖະ​ກິດ​ໂລກ​ຢູ່​ລະ​ດັບ 3,7% ຕໍ່​ປີໃນ​ປີ 2018 - 2019, ຕ່ຳ​ກວ່າ 0,2% ທຽບ​ກັບ​ລະ​ດັບ​ການ​​ຄາດ​ຄະ​ເນ​ໃນ​ເດືອນເມ​ສາ 2018. ໃນ​ຂະ​ນະ​ນັ້ນ, ການ​ປະ​ຕິ​ວັດ​ເຕັກ​ໂນ​ໂລ​ຊີ (ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່ - 4.0) ທີ່​ກຳລັງ​ພັດ​ທະ​ນາ​ຢ່າງ​ແຂງ​ແຮງ, ຊຸກ​ຍູ້​ການ​ປ່ຽນ​ແປງ​ໃໝ່​​ປະ​ດິດ​ສ້າງ, ຍົກ​ສູງ​ປະ​ສິດ​ທິ​ພາບ​ການ​ອອກ​ແຮງ​ງານ (ກະ​ວ່າ​ຈະ​ເພີ່ມ​ຂຶ້ນ 30% ໃນ​ປີ 2025).

ພາຍຫຼັງ​ໜຶ່ງ​ປີ​, ເຖິ​ງວ່າ​ສະ​ພາບ​ການ​ສືບ​ຕໍ່​ມີ​ການ​ຜັນ​ປ່ຽນ​ຢ່າງ​ສັບ​ສົນ, ມີ​ສິ່ງ​ທ້າ​ທາຍຫຼາຍ​ຢ່າງ, ແຕ່​ບັນ​ດາ​ຂີດ​ໝາຍ​ຂອງ​ປີ ເອ​ເປກ 2017 ກໍ່​ຍັງສືບ​ຕໍ່​ແຜ່​ກະ​ຈາຍ​ຜົນທາງ​ບວກ​ໃນຫຼ​າຍ​ແງ່​ມູມ, ທົ່ວ​ປະ​ເທດ ແລະ ໃນ​ເວ​ທີ​ສາ​ກົນ. ເອ​ເປກ 2017 ກໍ່​​ເປັນ​ພື້ນ​ຖານ​ເພື່ອ​ໃຫ້ຫວຽດ​ນາມສືບ​ຕໍ່​ເສີມ​ຂະ​ຫຍາຍຖາ​ນະ​ຕຳ​ແໜ່​ງ, ບົດ​ບາດທີ່​ຕັ້ງ​ຂອງ​ຕົນ​​ພາຍຫຼັງປີ 2017 - ເສີມ​ຂະ​ຫຍາຍ ກຳ​ລັງ​ແຮ​ງ​ນຸ້ມນວນຂອງ​ປະ​ເທດ​ໃນ​ປີ 2018.

ສຳ​ລັບ​ເອ​ເປກ, ຜົນ​ງານ​ທີ່​ມີ​ຄວາມ​ໝາຍ​ທີ່​ສຸດ​ພາຍຫຼັງ​ປີ 2017 ແມ່ນ ເອ​ເປກ ສືບ​ຕໍ່​ຮັກ​ສາ​ທ່າ​ຮ່ວມ​ມື, ການ​ເຊື່ອມ​ຕໍ່​ເສດ​ຖະ​ກິດຢ່າງ​ໝັ້ນ​ຄົງ, ເສີ​ມ​ຂະ​ຫຍາຍ​ພາ​ລະ​ບົດ​ບາດ​ເປັນ​ກົນ​ໄກ​ເຊື່ອມ​ຕໍ່​ເສດ​ຖະ​ກິດ​ອັນ​ດັບ​ໜຶ່ງ​ໃນ​ພາກ​ພື້ນ, ຮັກ​ສາ​ຄຸນ​ຄ່າ​ຫຼັກ​ຂອງ ເອ​ເປກ ຄື​ການ​ເປີດ​ເສລີ​ການ​ຄ້າ​ແລະການ​ລົງ​ທຶນ, ສະ​ໜັບ​ສະ​ໜຸນ​ລະ​ບົບ​ການ​ຄ້າຫຼາຍ​ຝ່າຍ. ບັນ​ດາ​ຜົນ​ສຳ​ເລັດ​ໄດ້​ສະຫຼຸບ​ໄວ້​ໃນ​ສັບ​ປະ​ດາ​ຂັ້ນ​ສູງທີ່ນະຄອນດ່າ​ໜັງ ໄດ້​ສ້າງ​ພື້ນ​ຖານ​ທີ່​ສຳ​ຄັນ​ໃຫ້​ແກ່​ການ​ຮ່ວມ​ມື​ຂອງເອ​ເປກ ໃນ​ໄລ​ຍະ​ໃໝ່. ສັບ​ປະ​ດາ​ຂັ້​ນ​ສູງໄດ້​ຮັບ​ຮອງ​ເອົາ​ເອ​ກະ​ສານ​ທີ່ສຳ​ຄັນ​ 8 ສະ​ບັບ, ເປັ​ນ​ຕົ້​ນ​ແມ່ນ ຖະ​ແຫຼງ​ການ​ຮ່ວມ​ຂອງກອງ​ປະຊຸມສຸດ​ຍອດ​ ແລະ ຖະ​ແຫຼງ​ການຮ່ວມ​ຂອງ​ກອງ​ປະ​ຊຸມ​ລະ​ຫວ່າງ​ລັດ​ຖະ​ມົນ​ຕີການ​ຕ່າງ​ປະ​ເທດ - ເສດ​ຖະ​ກິດ. ໃນ​ນັ້​ນ, ຖະ​ແຫຼງ​ການຮ່ວມ​ຂອງ​ກອງ​ປະຊຸມ​ສຸດຍອດ​ໂດຍ​ຫວຽດ​ນາມເປັນ​ປະທານ​ໃນ​ການ​ຮ່າງ ໄດ້​ຮັບ​ການ​ປະ​ເມີນ​ຈາກ​ສະ​ມາ​ຊິກ​ວ່າ ສັ້ນ, ຮັດກຸມ, ມີ​ລະ​ດັບ​ຍຸດ​ທະ​ສາດ, ແລະ​ມີ​​ຄຳ​ສັບ​ທີ່​​ເຂັ້ມແ​ຂງກ່ຽວ​ກັບ​ການ​ສະ​ໜັບ​ສະ​ໜູນ​ລະ​ບົບ​ການ​ຄ້າຫຼາຍ​ຝ່າຍ, ຄຳ​ໝັ້​ນ​ສັນ​ຍາ​​ກ່ຽວ​ກັບ​ການ​ຕ້ານ​ລັດ​ທິ​ປົກ​ປ້ອງ, ເຊິ່ງ​ກ່ອນ​ນັ້​ນ ກອງ​ປະ​ຊຸມ ຈີ 20 ກໍ່​ບໍ່​ສາ​ມາດ​ບັນ​ລຸ​ໄດ້. ຕາມ​ຄວາມ​ຄິດ​ລິ​ເລີ່ມ ແລະຂໍ້​ສະ​ເໜີ​ຂອງຫວຽດ​ນາມ, ​ເປັນ​ເທື່ອ​ທຳ​ອິດ​ທີ່ ​ເອ​ເປ​ກ ​ເຫັນ​ດີ​ຈະ​ຊຸກຍູ້​ການ​ພັດທະນາ​ແບບ​ກປົກ​ຄຸມທາງ​ດ້ານ​ເສດຖະກິດ, ການ​ເງິນ, ສັງຄົມ ​ແລະ ​ເລີ່​ມຕົ້ນທຸລະ​ກິດ​ສ້າງສັນ. ​ເນື້ອ​ໃນ​ເຫຼົ່າ​ນີ້​ລ້ວນ​ແຕ່​ແມ່ນ​ບັນ​ຫາ​ທີ່ຖືກ​ຕ້ອງ ແລະ ຖືກ​ກັບ​ຄວາມ​ຄິດ​ຂອງ​ສະ​ມາ​ຊິກ​ເອ​ເປກທຸກ​ປະ​ເທດໃນ​ສະ​ພາບ​ການ​ປັດ​ຈຸ​ບັນ.

ຫັນ​ໄປ​ຂ້າງ​ໜ້າ​ເພື່ອອະ​ນາ​ຄົດ

ໃນ​ປີ 2018, ບັນ​ດາ​ກອງ​​ປະ​ຊຸມແລະບັນ​ດາ​ຂົງ​ເຂດ​ໃນຂອບເອ​ເປກ ຍັງ​ຮັກ​ສາ​ຈິດ​ໃຈ​ທີ່​ບັນລຸ​ໄດ້ຢູ່ຫວຽດ​ນາມ, ​ໄດ້​ສືບ​ຕໍ່​ຍູ້​ແຮງ​ຄວາມ​​ພະ​ຍາ​ຍາມ​ເພື່ອ​ສຳ​ເລັດ​ບັນ​ດາ​ເປົ້າ​ໝາຍ ໂບກໍ ກ່ຽວ​ກັບ​ການ​ສົ່ງເສີມການ​ຄ້າ ການ​ລົງ​ທຶນ​ເສ​ລີ, ສະ​ໜັບ​ສະ​ໜູນ​ລະ​ບົບ​ການ​ຄ້າຫຼາຍ​ຝ່າຍ, ຄຳ​ໝັ້ນ​ສັນ​ຍາ​​ຕ້ານ​ລັດ​ທິ​ປົກ​ປ້ອງ, ສົ່ງ​ເສີມທ່າ​ອຽງ​ສັນ​ຕິ​ພາບ, ສະ​ຖຽມ​ລະ​ພາບ, ການ​ເຊື່ອມ​ຕໍ່​ເສດ​ຖະ​ກິດ​ພາກ​ພື້ນ​ໃຫ້​ເລິກ​ເຊິ່ງກວ່າ​ອີກ, ການພັດ​ທະ​ນາ​ແບບ​ຍືນ​ຍົງ, ຍູ້​ແຮງ​ບັນ​ດາ​ສັນ​ຍາ​ການ​ຄ້າ​ເສດ​ລີ (FTAs) ຮຸ່ນ​ໃໝ່. ຫວຽດ​ນາມໄດ້​ເປັນ​ເຈົ້າ​ການປະ​ສານ​ສົມ​ທົບ​ກັບ​ປະ​ເທດ​ເຈົ້າ​ພາບ ເອ​ເປກ 2018 ປາປົວນິວກິນີ ແລະ ບັນ​ດາ​ປະ​ເທດ​ສະ​ມາ​ຊິກ ປະ​ກອບ​ສ່ວນ​ຢ່າງ​ຕັ້ງ​ໜ້າ ໃນຫຼາຍ​ບັນ​ຫາ​ໃຫ​ຍ່, ຄື ສຳ​ເລັດ​​ເປົ້າ​ໝາຍ ໂບກໍ, ຊຸກ​ຍູ້​ການ​ຜັນ​ຂະ​ຫຍາຍ​ແຜນ​ງານ​ການ​ແຂ່ງ​ຂັນທາງ​ດ້ານການ​ບໍ​ລິ​ການ ເອ​ເປກ (ASCR), ສຳ​ເລັດການກວດ​ຄືນ​ໄລ​ຍະ​ກາງວາລະ​​ເອເປ​ກກ່ຽວ​ກັບ​ການປະ​ຕິ​ຮູບ​ໂຄງສ້າງ (RAASR) ແລະພວມ​ຢູ່ໃນ​​ວິ​ວັດ​ການ​ສຳ​ເລັດແຜນ​ການ​ປະ​ຕິ​ບັ​ດງານ​ແຫ່ງ​ຊາດ (IAP) ກ່ຽວ​ກັບ ການປະ​ຕິ​ຮູບ​ໂຄງສ້າງ (RAASR) ປີ 2018... ພິ​ເສດ, ຫວຽດ​ນາມໄດ້​ພ້ອມ​ກັນກັບ​ບັນ​ດາປະ​ເທດ​ສະ​ມາ​ຊິກ​ຊຸກ​ຍູ້​ການ​ຜັນ​ຂະ​ຫຍາຍ​ບັນ​ດາ​ຜົນ​ສຳ​ເລັດ​ທີ່​ສຳ​ຄັນ​ຂ​ອງ​ປີ ເອ​ເປກ 2017, ຄື ການ​ພັດດ​ທະ​ນາ​ແບບ​ປົກ​ຄຸມ, ຍົກ​ສູງ​ຄວາມ​ສາ​ມາດ​ຂອງ​ບັນ​ດາ​ວິ​ສາ​ຫະ​ກິດ​ຂະ​ໜາດ​ນ້ອຍ​ທີ່​ສຸດ (MSMEs) ແລະວິ​ສາ​ຫະ​ກິດ​ເລີ່ມ​ທຸລະ​ກິດ, ການ​ຄ້າ​ອອນ​ໄລ​ຂ້າມ​ຊາດ, ຄວາມ​ສະ​ຫງົບ​ປອດ​ໄພ​ດ້ານ​ສະ​ບຽງ​ອາ​ຫານ ແລະ ການ​ປ່ຽນ​ແປງສະພາບ​ດິນ​ຟ້າ​ອາ​ກາດ, ການພັດ​ທະ​ນາ​ຊົນ​ນະ​ບົດ - ຕົວ​ເມືອງ, ການ​ເຊື່ອມ​ຕໍ່​ເຂດ​ຫ່າງ​ໄກ​ສອກຫຼີກ, ການ​ເຊື່ອມ​ຕໍ່​ອາ​ນຸ​ພາກ​ພື້ນ ແລະ ມອບ​ສິດ​ໃນ​ຂົງ​ເຂດ​ເສດ​ຖະ​ກິດ​ໃຫ້​ແມ່​ຍິງ.

ສິ່ງ​ທີ່​ໜ້າ​ສົນ​ໃຈ​ແລະ​ກໍ​ເປັນຂີດ​ໝາຍ​ທີ່​ຈະ​ແຈ້ງ​ຢູ່​ນະຄອນດ່າ​ໜັງຄື ​ບັນ​ດາປະ​ເທດ​ສະ​ມາ​ຊິກເອ​ເປກ ເຫັນ​ດີ​ເປັນ​ເອ​ກະ​ພາບ​ຈະ​ກໍ່​ສ້າງວິ​ໄສ​ທັດ​ຍຸດ​ທະ​ສາດທີ່​ມີ​ລັກສະນະ​ການ​ປະຕິບັດ ໃຫ້​ແກ່​ເວ​ທີ​ປ​າ​ໄສ, ມຸ່ງ​ໄປ​ສູ່ເອ​ເປກໜຶ່ງທີ່ເພື່ອ​ປະ​ຊາ​ຊົນ, ເພື່ອ​ວິ​ສາ​ຫະ​ກິດ, ຄ່ອງ​ຕົວ​ກັບສິ່ງ​ທ້າ​ທາຍ​ຕ່າງໆ; ປະ​ກອບ​ສ່ວນກໍ່​ສ້າງ​ປະ​ຊາ​ຄົມ ອາ​ຊີ - ປາ​ຊີ​ຟິກ ທີ່​ມີ​​ສັນ​ຕິ​ພາບ, ສະ​ຖຽມ​ລະ​ພາບ, ຂະ​ຫຍັນ​ຂັນ​ເຂື່ອນ, ຕິດ​ພັນ ແລະ ຈະ​ເລີ​ນຮຸ່ງ​ເຮືອງ; ຊຸກ​ຍູ້​ການ​ພົວ​ພັນ​ຄູ່​ຮ່ວມ​ມື ອາ​ຊີ - ປາ​ຊີ​ຟິກ ບົນ​ພື້ນ​ຖານ​ຄວາມ​ເຊື່ອ​ໝັ້ນ ແລະ ເຄົາ​ລົບ​​ເຊິ່ງ​ກັນແລະກັນ, ປົກ​ຄຸມ ແລະ ຮ່ວມ​ມື​ແບບ​ຕ່າງ​ຝ່າຍຕ່າງ​ມີ​ຜົນ​ປະ​ໂຫຍດ. ດ້ວຍ​ວິ​ໄສ​ທັດ​ຍຸດ​ທະ​ສາດ, ບັນ​ດາຜູ້ນຳເອ​ເປກ ກໍ່​ໄດ້​ວາງ​ບັນ​ດາ​​ທິດທາງ​ໃຫຍ່​ເພື່ອ​ຊຸກ​ຍູ້​ການ​ຮ່ວມ​ມື ເອ​ເປກ ບໍ່​ພຽງ​ແຕ່​​ເຖິງ​ປີ 2020 ເທົ່າ​ນັ້ນ ​ແຕ່​ຍັງລວມ​ເຖິງໄລ​ຍະຕໍ່​ໄປ. ພິ​ເສດ, ບັນ​ດາ​ປະ​ເທດສະ​ມາ​ຊິກ​ໄດ້​​ເຫັນ​ດີ​ກັບ​ຄວາມ​ຄິດ​ລິ​ເລີ່ມ​ຂອງຫວຽດ​ນາມ ກ່ຽວ​ກັບ ເອ​ເປກ ມຸ່ງ​ໄປ​ສູ່​​ປີ 2020 ແລະອະ​ນາ​ຄົດ, ໃນ​ນັ້ນ​ມີ​ຂໍ້​ສະ​ເໜີ​ກ່ຽວ​ກັບ​ການ​ສ້າງ​ຕັ້ງກຸ່ມ​ວິ​ໄສ​ທັດ ເອ​ເປກ (AVG) ເພື່ອ​ຊ່ວຍ​ເຫຼືອ​ໃຫ້​ບັນ​ດາ​ການ​ນຳ​ຂັ້ນ​ສູງ​ໃນ​ການກໍ່​ສ້າງວິ​ໄສ​ທັດ. ຫຼັງ​ຈາກນັ້​ນ, ຫວຽດ​ນາມກໍ່​ໄດ້​ຮັບການສະ​ເໜີ​ຊື່​ຈາກ​ສະມາຊິກ​ເອ​ເປ​ກ​ໃຫ້​ດຳລົງ​ຕຳ​ແໜ່​ງຮອງ​ປະ​ທານ AVG.

ໃນ​ປີ 2018, ​ໃນ​ຖານະ​ຮອງ​ປະ​ທານກຸ່ມ​ວິ​ໄສ​ທັດ ເອ​ເປກ (AVG), ຫວຽດ​ນາມໄດ້​ເຂົ້າ​ຮ່ວມ ແລະມີ​​ສ່ວນ​ຮ່ວມ​ທີ່​ສຳຄັນ​ໃນ​ວິ​ວັດ​​ການກໍ່​ສ້າງ​ລາຍ​ການ, ເນື້ອ​ໃນແລະເອ​ກະ​ສານ ກໍ່​ຄື​​ເປັນ​ປະ​ທານຮ່ວມກອງ​ປະ​ຊຸມ AVG2. ໃນ​ການກໍ່​ສ້າງ ວິ​ໄສ​ທັດເອ​ເປກພາຍຫຼັງ​ປີ 2020, ຫວຽດ​ນາມໄດ້​ມີ​ຂໍ້​ສະ​ເໜີ ແລະ ນຳ​ສະ​ເໜີຫຼາຍ​ເນື້ອ​ໃນທີ່​ເໝາະ​ສົມ​ກັບ​ຄວາມ​ເອົາ​ໃຈ​ໃສ່​ຮ່ວມ​ຂອງ ເອ​ເປກ, ອາ​ຊຽນ ແລະ ບັນ​ດາສະ​ມາ​ຊິກ​ໃນ​ກຸ່ມ​ບັນ​ດາ​ປະ​ເທດ​ກຳ​ລັງ​ພັດ​ທະ​ນາ, ຄື ການ​ຮ່ວມ​ມື​ພັດ​ທະ​ນາ ​ຍົກ​ສູງ​ຄວາມ​ສາ​ມາດ​ແລະການ​ເຊື່ອມ​ຕໍ່; ຮ່ວມ​ມືຮັກສາຄວາມ​​ປອດ​ໄພ​ດ້ານ​ແຫຼ່ງ​ນ້ຳ, ການ​ຝຶກ​ອົບຮົມ​ຄືນ​ໃໝ່ແລະຍົກ​ສູງທັກ​ສະ​ທີ່​ເໝາະ​ສົມ​ກັບ​ເຕັກ​ໂນ​ໂລ​ຊີ ຈິດິຕອນ, ຍົກ​ສູງ​ຄວາມ​ສາ​ມາດແຂ່ງ​ຂັນ​ຂອງ​ວິ​ສາ​ຫະ​ກິດ​ຂະ​ໜາດ​ກາງແລະຂະ​ໜາດ​ນ້ອຍ ແລະ ​ວິ​ສາ​ຫະ​ກິດເລີ່ມ​ທຸລະ​ກິດ, ບັນ​ດາ​ບັນ​ຫາ​ກ່ຽວ​ກັບ​ພົນ​ລະ​ເມືອງ​ສູງ​ອາຍຸ ແລະ ການພັດ​ທະ​ນາ​ຊົນ​ນະ​ບົດ - ຕົວ​ເມືອງ, ບົດ​ບາດນຳ​ໜ້າຂອງ ເອ​ເປກ ຢູ່​ພາກ​ພື້ນແລະ​ໃນທົ່​ວ​ໂລກ. ​ໃນ​ຖາ​ນະຮອງ​ປະ​ທານ AVG, ຫວຽດ​ນາມສືບ​ຕໍ່​ເສີມ​ຂະຫຍາ​ຍ​ບົດ​ບາດ​​ຂະ​ຫຍັນ​ຂັນ​ເຂື່ອນ, ນຳ​ພາ ແລະ ມີ​ຄວາມ​ຮັບ​ຜິດ​ຊອບ​ ຄື​ເຄີຍ​ໄດ້​ສະ​ແດງອອກ​ໃນ​ປີ ເອ​ເປກ 2017.

ສຳ​ລັບ​ໂລກແລະພາກ​ພື້ນ, ຜົນ​ສຳ​ເລັດ​ຂອງເອ​ເປກ 2017 ໄດ້​ສ້າງ​ຜົນ​ກະ​ທົບ​ອັ​ນ​ຕັ້ງ​ໜ້າ​ໃຫ້​ແກ່​ເສດ​ຖະ​ກິດໂລກ, ສ້າງ​ພື້ນ​ຖານ​ເພື່ອ​​ໃຫ້ທ່າ​ອຽງ​ເຊື່ອມ​ໂຍງ​ເສດ​ຖະ​ກິດ​ສາ​ກົນ​ສືບ​ຕໍ່ພັດ​ທະ​ນາ. ບັນ​ດາ​ຜົນ​ສຳ​ເລັດ​ຂອງເອ​ເປກ 2017 ໄດ້​​ເຮັດ​ໃຫ້​ບັນ​ຍາ​ກາດທີ່​ດີແຜ່​ກະຈາຍ​ໄປ​ສູ່ການ​ຄ້າ​​ໂລກ ​ແລະ​ການ​ເຕີບ​ໂຕ​ຂອງເສດ​ຖະ​ກິດ​ໂລກ. ຜູ້​ອຳ​ນວຍ​ການ​ໃຫຍ່ກອງ​ທຶນ​ການ​ເງິນ​ສາ​ກົນ (IMF) ​ທ່ານນາງ ຄຣິດສຕີນ ລາ​ກາດ ໃຫ້​ທັດ​ສະ​ນະ​ວ່າ, ດ້ວຍ​ຜົນ​ສຳ​ເລັດຂອງເອ​ເປກ 2017 ເສດ​ຖະ​ກິດ​ໂລກ​​​ຟື້ນຕົວ​ດີກວ່າ​ຄາດໝາຍ (1). ຕາມ​ທ່ວງທ່ານີ້, ເຖິງວ່າ​ໃນ​ປີ 2018 ເສດ​ຖະ​ກິດ​ໂລກ​ຖືກ​ຜົນ​ກະ​ທົບ​ທາງ​ລົບຈາກ​ສົງຄາມ​ການ​ຄ້າລະ​ຫວ່າງອາ​ເມລິ​ກາ - ຈີນ, ແຕ່​ດັດຊະນີ​ຕ່າງໆ​ຍັງ​ຄົງ​ເປັນ​ບວກ. ສິ່ງສຳ​ຄັນ​ທີ່​ສຸດ​ແມ່ນ ​ຜົນ​ສຳ​ເລັດ​ທີ່​ໄດ້​ຮັບຈາກ ເອ​ເປກ 2017 ກ່ຽວ​ກັບ​ການ​ຊຸກ​ຍູ້​ການ​ຄ້າຫຼ​າຍ​ຝ່າຍ ​ໄດ້​ປະ​ກອບ​ສ່ວນ​ອັນ​ສຳ​ຄັນ​ເຂົ້າ​ໃນ​ຄວາມ​​ພະ​ຍາ​ຍາມ​ຮັກ​ສາ​ທ່າ​ອຽງ​ເຊື່ອມ​ໂຍງ​ເສດຖະກິດ​ໃນ​ປີ 2018 ຕໍ່​ໜ້າ​ແຮງ​ກົດ​ດັນ​ຢ່າງ​​ໃຫຍ່​ຫຼວງ​ຈາກ​ມາດ​ຕະ​ການກີດ​ກັນ​ທາງ​ການ​ຄ້າ​ຂອງບັນ​ດາປະ​ເທດເສດ​ຖະ​ກິດ​ໃຫ​ຍ່​. ໃນ​ສະ​ພາບ​ການ​ການ​ຄ້າພະຫຸ​ພາຄີ​ປະສົບຄວາມ​ຫຍຸ້ງ​ຍາກຫຼາຍ​ຢ່າງ, ການ​ທີ່ເອ​ເປກ 2017 ຕັດ​ສິນ​ໃຈ​ຊຸກ​ຍູ້​ການ​ປະ​ຕິ​ບັດ ໂຄງ​ການ​ປະ​ຕິ​ບັດງານ​ເຂດ​ການ​ຄ້າ​ເສ​ລີອາ​ຊີ - ປາ​ຊີ​ຟິກ (FTAAP) ໄດ້​ຊ່ວຍ​ໃຫ້​ບັນ​ດາ​ສະ​ມາ​ຊິກ​ສືບ​ຕໍ່​ພະ​ຍາ​ຍາມ​ສຳ​ເລັດການ​ຮ່າງຄັ້ງທຳ​ອິດ ​ບົດ​ລາຍ​ງານຄວາມ​ຄືບ​ໜ້າກ່ຽວ​ກັບ​ການ​ສ້າງ FTAAP ແລະ ເປັນ​ເອ​ກະ​ພາບ​ກັນ​ໂດຍ​ພື້ນ​ຖານຈະ​ສົ່ງບົດ​ລາຍ​ງານນີ້​​ໃຫ້​ຜູ້​ນຳ. ນອກ​ນັ້ນ​ຈາກ​ຄວາມ​ພະ​ຍາ​ຍາມຢ່າງ​ຕໍ່​ເນື່ອງ​ຂອງຫ​ວຽດ​ນາມ​ໃນເອ​ເປກ 2017, ສັນ​ຍາ​ວ່າ​ດ້ວຍ​ຄູ່​ຮ່ວມ​ມື​ຮອບ​ດ້ານແລະ​ກ້າວ​ໜ້າ​ຂ້າ​ມ​ປາ​ຊີ​ຟິກ (CPTPP) ກໍ່ໄດ້​ມີ​ບາດ​ກ້າວ​ຄືບ​ໜ້າ​ທີ່​ດີ​ໃນ​ປີ 2018 ​ດ້ວຍການ​ອະ​ນຸ​ມັດ​ຈາກ 7 ປະ​ເທດ​ສະ​ມາ​ຊິກ ແລະ ມີ​ຜົນ​ບັງຄັບໃຊ້​ໃນ​ທ້າຍ​ປີ 2018. ການ​ທີ່ CPTPP ​ເຂົ້າ​ສູ່​ການ​ຜັນ​ຂະ​ຫຍາຍ​​ໂດຍ​ໄວ​ ຈະ​ຊ່ວຍ​ໃຫ້​ການປັບ​ປຸງ​ການຮ່ວມ​ມືແລະການ​ເຊື່ອມ​ໂຍງ, ຮັກ​ສາ​ຄຸນ​ຄ່າ​ຫຼັກ​ຂອງ​ການ​ຮ່ວມ​ມື ເອ​ເປກ ແມ່ນ​​ຊຸກ​ຍູ້ການ​ຄ້າແລະການ​ລົງ​ທຶນ​ແບບ​ເສ​ລີແລະ​ເປີດ​ກວ້າງ, ສະ​ໜັບ​ສະ​ໜູນ​ລະ​ບົບ​ການ​ຄ້າຫຼາຍ​ຝ່າຍ. ໃນ​ບັນ​ຍາ​ກາດ​ທີ່​ດີ​ນັ້ນ, ສັນ​ຍາ​ວ່າ​ດ້ວຍ​ຄູ່​ຮ່ວມ​ມື​ຮອບ​ດ້ານ​ພາກ​ພື້ນ (RCEP) ກໍ່​​ມີ​ຄວາມ​ຄືບ​ໜ້າ​ທີ່​ສຳ​ຄັນ ແລະ ຄາດ​ວ່າ​ຈະສຳ​ເລັດ​ໃນ​ທ້າຍ​ປີ 2018.

ສຳລັບ​ພາກ​ພື້ນອາ​ຊີ​ຕາ​ເວັນ​ອອກ​ສຽງ​ໃຕ້ທີ່​ກຳ​ລັງ​ປະ​ເຊີນ​ໜ້າ​ກັບ​ໂອ​ກາດດີແລະສິ່ງ​ທ້າ​ທາຍຫຼາຍ​ຢ່າງ, ໂດຍ​ຜ່ານເອ​ເປກ 2017, ຫວຽດ​ນາມໄດ້​ປະ​ກອບ​ສ່ວນ​​ຊ່ວຍ​ໃຫ້​ບົດ​ບາດ​ເປັນ​ໃຈ​ກາງ​ຂອງ ອາ​ຊຽນ ໄດ້​ຮັບ​ການຍົກ​ສູງ​​ຂຶ້ນ​ເປັນພິ​ເສດ​ໃນ​ຕະຫຼອດປີ 2017 ແລະປີ 2018. ຕາມ​ຄວາມ​ຄິດ​ລິ​ເລີ່ມ​ຂອງຫວຽດ​ນາມທີ່ ເອ​ເປກ 2017, ​​ເປັນຄັ້ງ​ທຳ​ອິດທີ່​ບັນ​ດາ​ຜູ້​ນຳ ເອ​ເປກ ດຳ​ເນີນ​ການ​ປຶກ​ສາ​ຫາ​ລືກັບຜູ້​ນຳ​ຂອງ 10 ປະ​ເທດສະ​ມາ​ຊິກອາ​ຊຽນ ແນ​ໃສ່​ເພີ່ມ​ທະ​ວີ​ການ​ປະ​ສານ​ສົມ​ທົບ​ໃນ​ການ​ຊຸກ​ຍູ້​ຄວາມ​ເຕີບ​ໂຕ ແລະ ການ​ເຊື່ອມ​ຕໍ່​ເສດ​ຖະ​ກິດ​ພາກ​ພື້ນ. ບັນ​ດາປະ​ເທດອາ​ຊຽນໃຫ້​ທັດ​ສະ​ນະ​ວ່າ, ຜົນ​ສຳ​ເລັດທີ່ນະຄອນດ່າ​ໜັງໄດ້​ປະ​ກອບ​ສ່ວນ​ສ້າງ​ບັນ​ຍາ​ກາດ​ອັນ​ສະ​ດວກ​ໃຫ້​ແກ່ກອງ​ປະ​ຊຸມສຸດ​ຍອດອາ​ຊຽນ ທີ່ໄດ້​ຈັດ​ຂຶ້ນຫຼັງຈາກນັ້ນ​ໃນ​ນະຄອນຫຼວງມະນີລາ (ຟີ​ລິບ​ປີນ) -  ກອງ​ປະ​ຊຸມສຸດ​ຍອດທີ່ສຳ​ຄັນ​ສຳລັບ​ອາ​ຊຽນ ​ໃນ​ເວລາ​ທີ່​ສະມາຄົມສະ​ເຫຼີມ​ສະຫຼອງວັນ​ຄົບຮອບ 50 ປີແຫ່ງການ​ກໍ່​ຕັ້ງ, ກໍ່​ຄື​ສ້າງ​ຄວາມ​ກ້າວໜ້າ​ໃຫ້​ປີ ອາ​ຊຽນ 2018. ໃນຄວາມທ້າ​ທາຍ​ແລະຄວາມຫຍຸ້ງ​ຍາກ​ຫຼາຍຄັ້ງ​ໃນ​ປີ 2018, ພວກ​ເຮົາຍັງຄົງ​ສືບ​ຕໍ່​ຈິດ​ໃຈ​ທີ່​ໄດ້​ເສີມ​ຂະ​ຫຍາຍ​ຢູ່ນະຄອນດ່າ​ໜັງ, ເຕົ້າ​ໂຮມ​ສະ​ມາ​ຊິກອາ​ຊຽນຢ່າງ​ຄ່ອງ​ແຄ່ວ ເພື່ອ​ເສີມ​ຂະ​ຫຍາຍ​ຄວາມ​ສາ​ມັກ​ຄີ​ແລະສະ​ແດງ​​ໃຫ້​ເຫັນບົດ​ບາດ​ຫຼັກ ​ໃນ​ການ​ສົ່ງ​ເສີມ​ຄຸນ​ຄ່າແລະຄວາມ​ເຫັນດີ​ເປັນ​ເອ​ກະ​ພາບຂອງ​ເອ​ເປກ. ຫຼັກ​ຖານ​ທີ່​ຈະ​ແຈ້ງທີ່​ສຸດ​ແມ່ນ​ການ​ຈັດ​ຕັ້ງ​ຢ່າງສຳ​ເລັດ​ຜົນ​ກ​ອງ​ປະ​ຊຸມ​ເວ​ທີ​ປາ​ໄສ​ເສດ​ຖະ​ກິດ​ໂລກອາ​ຊຽນ (WEF - ASEAN) (ເດືອນກັນ​ຍາ 2018) ທີ່​ມີ​ຈິດ​ໃຈ​ປະຊາ​ຄົມອາ​ຊຽນ​ຢ່າງ​ຈະ​ແຈ້ງ.

ຍົກ​ສູງ​ຖາ​ນະ​ບົດ​ບາດ​ຂອງຫວຽດ​ນາມ

ທີ່ເອ​ເປກ 2017, ຫວຽດ​ນາມໄດ້​ມີ​ການ​ປະ​ສານ​ສົມ​ທົບ​ຢ່າງ​ນຸ້ມນວນລະຫວ່າງການ​ພົວ​ພັນ​ຕ່າງ​ປະ​ເທດຫຼາຍ​ຝ່າຍແລະການ​ພົວພັນ​ຕ່າງປະ​ເທດສອງ​ຝ່າຍ, ໃນ​ນັ້ນ​ການເຄື່ອນ​ໄຫວຫຼາຍ​ຝ່າຍ​ໄດ້​ສ້າງ​ພື້ນ​ຖານ​ໃຫ້​ການ​ເຄື່ອນ​ໄຫວ​ສອງ​ຝ່າຍທີ່​​ສຳ​ຄັນຫຼາຍ​ຄັ້ງ. ໃນ​ໂອ​ກາດ​ຈັດ​ຕັ້ງສັບ​ປະ​ດາ​ຂັ້ນ​ສູງ ເອ​ເປກ 2017, ​​ມີ​ການ​ຢ້ຽມ​ຢາມ​ຂັ້ນ​ລັດ​ຂອງ ເລ​ຂາ​ທິ​ການ​ໃຫຍ່​ພັກ​ກອມ​ມູ​ນິດ​ ປະ​ທານ​ປະ​ເທດ​ຈີນ, ປະ​ນາ​ທິ​ບໍ​ດີເອ​ເມລິ​ກາ, ປະ​ທາ​ນາ​ທິ​ບໍ​ດີຊີ​ເລ ແລະ ການ​ຢ້ຽມ​ຢາມ​ຂອງນາ​ຍົກ​ລັດ​ຖະ​ມົນ​ຕີກາ​ນາ​ດາ. ການ​ຢ້ຽມຢາມ​ເຫຼົ່າ​ນັ້ນ​ລ້ວນ​ແຕ່​ແມ່ນການ​ຢ້ຽ​ມ​ຢາມ​ທີ່​ມີ​ລັກ​ສະ​ນະ​ປະ​ຫວັດ​ສາດຢູ່ຫວຽດ​ນາມ ແລະ ບັນ​ລຸ​ໄດ້​ຂໍ້ຕົກ​ລົງ​ທີ່​ມີ​ລະ​ດັບ​ຍຸດ​ທະ​ສາດ, ໄຂ​ກາ​ລະ​ໂອ​ກາດ​ໃໝ່​ໃຫ້​ແກ່​ການ​ຊຸກ​ຍູ້​ການ​ພົວ​ພັນ​ຮ່ວມ​ມື​ຂອງຫ​ວຽດ​ນາມ ກັບ​ບັນ​ດາ​ຄູ່​ຮ່ວມ​ມື. ພິ​ເສດ, ນີ້​ແມ່ນ​ເທື່ອທຳ​ອິດທີ່​ເລ​ຂາ​ທິ​ການ​ໃຫຍ່ພັກ​ກອມ​ມູ​ນິດຈີນມາ​ຢ້ຽມ​ຢາມຫວຽດ​ນາມ ຫຼັງຈາກກອງ​ປະ​ຊຸມ​ໃຫຍ່ພັກ​ກອມ​ມູ​ນິດ​ຈີນຄັ້ງ​ທີ່ 19 ສຳ​ເລັດ​ສິ້ນ​ສຸດ​ລົງ ແລະ ກໍ່​ແມ່ນ​ເທື່ອ​ທຳ​ອິດທີ່ປະ​ທາ​ນາ​ທິ​ບໍ​ດີອາ​ເມ​ລິ​ກາມາ​ຢ້ຽມ​ຢາມຫວຽດ​ນາມ ​ໃນ​ປີ​ທຳ​ອິດ​ທີ່​ທ່ານ​ຂຶ້ນກຳ​ອຳ​ນາດ. ຄຽງ​ຄູ່​ກັນ​ນັ້ນ, ກໍ່​ມີ​ການ​ພົບ​ປະຂອງ​ການ​ນຳ​ຂັ້ນ​ສູງຫວຽດ​ນາມ ກັບ​ບັນ​ດາ​ຄູ່​ຮ່ວມ​ມື​ເປັນ 50 ຄັ້ງ. ຂະ​ໜາດ​ຂອງເອ​ເປກ 2017 ແລະ ບັນ​ດາ​ການ​ເຄື່ອນ​ໄຫວ​ສອງ​ຝ່າຍ​ທີ່​ສຳ​ຄັນ​ດັ່ງ​ກ່າວນັ້ນ ໄດ້ສ້າງທ່າ​​ແຮງ​ໃຫ້​ແກ່​ການ​ສືບ​ຕໍ່​ເຮັດ​ໃຫ້​ການ​ພົວ​ພັນ​ກັບ​ບັນ​ດາ​ປະ​ເທດ​​ເຂົ້າ​ສູ່​ລວງ​ເລິກ ​ແລະ ຍົກ​ລະ​ດັບ​ການ​ພົວ​ພັນ​ສອງ​ຝ່າຍ​ຂຶ້ນໃນ​ປີ 2018. ສິ່ງ​ທີ່​ສຳຄັນ​ແມ່ນ ​ບັນ​ດາ​ບາດ​ກ້າວ​ໃໝ່​ໃນ​ການ​ພົວ​ພັນ​ກັບຈີນ ແລະ ອາ​ເມ​ລິ​ກາ, ການ​ຍົກ​ລະ​ດັບ​ກາ​ນ​ພົວ​ພັນ​ກັບອົດ​ສ​ຕາ​ລີ ຂຶ້ນ​ເປັນ​ຄູ່​ຮ່ວມ​ມື​ຍຸດ​ທະ​ສາດ (ເດືອນມີ​ນາ 2018), ຜົນ​ສຳ​ເລັດ​ຂອງ​ການ​​ຢ້ຽມ​ຢາມ​ຂັ້​ນ​ສູງ​ກັບຫຼາຍ​ປະ​ເທດ (ລາວ, ອີນ​ໂດ​ເນ​ເຊຍ, ສິງ​ກະ​ໂປ, ມຽນ​ມາ, ລັດ​ເຊຍ, ອີນ​ເດຍ, ຍີ່​ປຸ່ນ, ຝະລັ່ງ, ແບນ​ຊິກ, ນິວ​ຊີ​ແລນ,...). ຜົນ​ສຳ​ເລັດຂອງເອ​ເປກ ແລະ ບັນ​ດາການ​ເຄື່ອນ​ໄຫວ​ສອງ​ຝ່າຍກໍ່​​​ໄດ້​ສ້າງ​​ແຮງ​ກະ​ຕູ້ນ​​ຕື່ມ​ອີກ ​ເພື່ອໃຫ້ຫວຽດ​ນາມຂົນ​ຂວາຍ​ສະໝັກ​ຮັບ​ເລືອກ​ເປັນ​ສະມາ​ຊິດ​ບໍ່​ຖາວອນຂອງສະ​ພາ​ຄວາມໝັ້ນຄົງ​ແຫ່ງ​ສະ​ຫະ​ປະ​ຊາ​ຊາດ ໄລ​ຍະ 2020 - 2021.

ດ້ວຍ​ການ​ພິຈາລະນາເລືອກ​ເອົາສະຖານ​ທີ່ແລະຈັດ​ຕັ້ງການ​ເຄື່ອນ​ໄຫວ​ຢ່າງຮອບ​​ຄອບກິດຈະກຳ​ຕ່າງໆ​ເປັນ​ຈຳນວນ​ຮ້ອຍ​ໃນ​ປີ 2017 ໄດ້​ໂຄ​ສະ​ນາ​ຄວາມ​ສາ​ມາດ​ບົ່ມ​ຊ້ອນ​ແລະກາ​ລະ​ໂອ​ກາດ​ໃໝ່​ກ່ຽວ​ກັບ​ການ​ພັດ​ທະ​ນາ, ເສດ​ຖະ​ກິດ, ການ​ຄ້າ, ການ​ລົງ​ທຶນ, ການ​ບໍ​ລິ​ການ, ການ​ເຊື່ອມ​ຕໍ່, ການ​ທ່ອງ​ທ່ຽວ​ຂອງ​ປະ​ເທດຫວຽດ​ນາມ. ກອງ​ປະ​ຊຸມສຸດຍອດການ​ທຸລະ​ກິດເອ​ເປກ ​ໄດ້​ດຶງ​ດູດ​ນັກທຸລະກິດ​ຈຳນວນ​ຫຼາຍກວ່າ 2.000 ​ຄົນ, ໃນນັ້ນ ນັກທຸລະກິດ​ຕ່າງປະ​ເທດປະ​ມານ 1.300 ຄົນ. ຄວາມ​ຄິດ​ລິ​ເລີ່ມ​ຂອງ​ປະ​ເທດ​ເຈົ້າ​ພາບ​ກ່ຽວ​ກັບ​ການ​ຈັດ​ຕັ້ງກອງ​ປະ​ຊຸມສຸດຍອດການທຸລະກິດຫວຽດ​ນາມ ກໍ່​ໄດ້​​ດຶງ​ດູດ​ນັກທຸລະກິດເຂົ້າ​ຮ່ວມ​ເປັນ​ຈຳ​ນວນ 2.200 ຄົນ, ໃນ​ນັ້ນນັກທຸລະກິດຫວຽດ​ນາມ 850 ຄົນ. ປະ​ຊາ​ຊົນ, ນັກທຸລະ​ກິດຈາກ​ບັນ​ດາປະ​ເທດເສດ​ຖະ​ກິດ​​ໃນ​ພາກ​ພື້ນ ໄດ້​ເຫັນກັບຕາ​ຄວາມ​ຂະ​ຫຍັນ​ຂັນ​ເຂື່ອນ ແລະການປ່ຽນ​ແປງ​ໃໝ່​ ຂອງ​ເສດ​ຖະ​ກິດຫວຽດ​ນາມ, ​ເປີດ​ຄວາມຫວັງ​ກ່ຽວ​ກັບ​ຄື້ນ​ການ​ລົງ​ທຶນ, ການ​ຄ້າ, ການ​ທ່ອງ​ທ່ຽວ​ໃໝ່​​ໃນ​ຫວຽດ​ນາມ. ບັນ​ດາ​​ໂຄງ​ການ​ວັດທະນະ​ທຳເພື່ອ​ໂຄ​ສະ​ນາຫວຽດ​ນາມຕໍ່ເອ​ເປກແລະໂລກ ໄດ້​ສະ​ແດງ​ໃຫ້​ເຫັນ​ເຖິງຫວຽດ​ນາມທີ່​ອຸດົມ​ໄປ​ດ້ວຍ​ປະ​ເພນີ​ແລະການປ່ຽນ​ແປງ​​ໃໝ່​ປະດິດ​ສ້າງ. ຢູ່ທີ່​ສັບ​ປະ​ດາ​ຂັ້ນ​ສູງ, ຫວຽດ​ນາມໄດ້​ລົງ​ນາມ​ໃນຂໍ້​ຕົກ​ລົງ​ການຮ່ວມ​ມື, ສັນ​ຍາຮ່ວມ​ມື​​ກັບ​ຄູ່​ຮ່ວມ​ມື​​ເປັນ​ຈຳ​ນວນ 121 ສະ​ບັບ ດ້ວຍ​ມູນ​ຄ່າ​ທັງ​ໝົດ​ 20 ຕື້​ໂດ​ລາ​ສະ​ຫະ​ລັດ. ບັນ​ດາ​ຕົວ​ເລກ​ທີ່​ລະ​ອຽດ​ພ້ອມ​ກັບ​ຜົນ​ກະ​ທົບ​ການ​ແຜ່​ລາມ​ ໄດ້​ປະ​ກອບ​ສ່ວນ​ສ້າງ​ແຮງ​ກະ​ຕູ້ນຊຸກຍູ້​ບັນ​ດາ​ບາດ​ກ້າວ​ພັດ​ທະ​ນາ​ໃໝ່​ທີ່​ເຕັມ​ໄປ​ດ້ວຍ​ຄວາມ​ລະ​ດົມ​ສົ່ງ​ເສີມ​ຂອງ​ປີ 2018.

ຕໍ່​ໜ້າການ​ຜັນ​ປ່ຽນ​​ສັບ​ສົນ​ຂອງ​ສະ​ພາບ​ການ​ພາຍ​ໃນ​ປະ​ເທດ​ແລະ​ໃນໂລກ, ​ເສີມ​ຂະ​ຫຍາຍ​ບັນ​ດາ​ຜົນ​ກະ​ທົບ​ທີ່​ບັນ​ລຸ​ໄດ້​​ໃນເອ​ເປກ 2017, ລັດ​ຖະ​ບານ​ຫວຽດນາມໄດ້​​ເປັນ​ເຈົ້າ​ການ​​ວາງ​ວິ​ທີ​ການມາດ​ຕະການ​ຮັບ​ມື​ທີ່​ເໝາະ​ສົມ, ​ນຳພາ​ເສດ​ຖະ​ກິດ​​ບັນ​ລຸ​ໄດ້​ຜົນ​ງານ​ອັນ​ຕັ້ງ​ໜ້າ. ສິ່ງ​ທີ່​ໂດດເດັ່ນ​ແມ່ນ​ຄວາມ​ເຕີບ​ໂຕ ຈີ​ດີ​ຟີ ​ໃນ 9 ເດືອນບັນ​ລຸ​ໄດ້ 6,98%, ຄາດ​ຄະ​ເນ​ວ່າທັງ​​ປີ​ຈະ​ບັນລຸລື່ນຄາດ​ໝາຍທີ່​ສະ​ພາ​ແຫ່ງ​ຊາດ​​ໄດ້ວາງ​ໄວ້ (6,7%); ທຶນ​ສຳຮອງ​ເງິນຕາ​ຕ່າງ​ປະ​ເທດຂອງ​ລັດໄດ້ຫຼາຍ​ກວ່າ 60 ​ຕື້​ໂດ​ລາ​ສະ​ຫະ​ລັດ. ລວມຍອດມູນ​ຄ່າ​ສິນຄ້າ​ນຳ​ເຂົ້າ-ສົ່ງ​ອອກ​ໃນ 9 ເດືອນບັນລຸ​ຫຼາຍ​ກວ່າ 325 ​ຕື້​ໂດ​ລາ​ສະ​ຫະ​ລັດ, ​​ຄາດວ່າ​ທັງ​ປີຈະບັນ​ລຸ​ໄດ້ 475 ຕື້​ໂດ​ລາ​ສະ​ຫະ​ລັດ, ເພີ່ມຂຶ້ນ​ 11,7%; ໃນ​ນັ້​ນ​ການ​ສົ່ງ​ອອກ​ບັນ​ລຸ​ໄດ້ 238 ຕື້​ໂດ​ລາ​ສະ​ຫະ​ລັດ, ເພີ່ມຂຶ້ນ​ 11,2% (ເປົ້າ​ໝາຍ 7% - 8%); ​ສືບ​ຕໍ່​ການຄ້າ​ເກີນ​ດຸນ, ໃນ 9 ເດືອນ​ເກີນ​ດຸນ​ເກືອບ 5,4 ຕື້​ໂດ​ລາ​ສະ​ຫະ​ລັດ. ເງິນລົງທຶນໂດຍ​ກົງຈາກຕ່າງປະເທດ (FDI) ທີ່​ປະ​ຕິ​ບັດ​ໃນ​ປີ ຄາດວ່າ​ຈະ​ບັນ​ລຸ​ໄດ້ 18 ຕື້​ໂດ​ລາ​ສະ​ຫະ​ລັດ, ສູງ​ສຸດ​ນັບແຕ່​​ກ່ອນ​ມາ​ຮອດ​ປະ​ຈະ​ບັນ (2). ຈຳ​ນວນ​ນັກ​ທ່ອງ​ທ່ຽວ​ຕ່າງປະ​ເທດ​ມາຫວຽດ​ນາມໃນ​ເດືອນຕຸ​ລາ 2018 ຄາດ​ວ່າຈະ​ບັນ​ລຸ​ໄດ້ 1.205.157 ຄົນ. ເພີ່ມ​ຂຶ້ນ​ 17,6% ​ທຽບ​ກັບ​ໄລ​ຍະ​ດຽວ​ກັບ​ຂອງ​ປີ 2017. ນັບ​ລວມ​​ໃນ 10 ເດືອນຂອງ​ປີ 2018 ຄາດວ່າ​ຈະ​ບັນ​ລຸ​ໄດ້ 12.821.647 ຄົນ, ເພີ່ມ​ຂຶ້ນ​ 22,4% ​ທຽບ​ກັບ​ໄລ​ຍະ​ດຽວ​ກັນ​ຂອງ​ປີ 2017(3).

ໂດຍ​ຜ່ານ​ການ​ຈັດ​ຕັ້ງເອ​ເປກ 2017, ຖັນ​ແຖວ​ພະ​ນັກ​ງານ​ໃນ​ທຸກ​ລະດັບ​ແລະ​ສາຂາ ​ຕັ້ງແຕ່​ສູນ​ກາງ​ຈົນ​ເຖິງ​​ທ້ອງ​ຖິ່ນ​ຂອງຫວຽດ​ນາມ​ ມີການ​ເຕີບ​​​​ໃຫຍ່​ທີ່​ໂດດ​ເດັ່ນ​ທາງ​ດ້ານ​ຄວາມ​ສາ​ມາດຄຸ້ມ​ຄອງ​ບໍ​ລິ​ຫານ, ການ​ຈັດ​ຕັ້ງ​ແລະພາ​ສາ​ຕ່າງ​ປະ​ເທດ. ໃນ​​ປີເອ​ເປກ, ເພື່ອນ​ມິດ, ​ເພື່ອນຮ່ວມງານ, ຄູ່​ຮ່ວມ​ມື​ທີ່​ມາ​ຈາກປະ​ເທດ​ສະ​ມາ​ຊິກ​ໄດ້​ສະ​ແດງ​ຄວາມນິ​ຍົມ​ນັບ​ຖືແລະຕີ​ລາ​ຄາ​ສູງ​ຕໍ່ຖັນ​ແຖວ​ພະນັກງານຫວຽດ​ນາມ, ເຊິ່ງ​​ເດັ່ນທີ່​ສຸດ​​ແມ່ນ​ບັນດາຂີດ​ໝາຍ​ຂອງສັບ​ປະ​ດາ​ຂັ້ນ​ສູງ. ອາດ​ຈະ​ເວົ້າ​ໄດ້​ວ່າ, ເອ​ເປກ 2017 ໄດ້​ສ້າງ​ພື້ນ​ຖານ​ເພື່ອ​ກໍ່​ຕັ້ງ, ພັດ​ທະ​ນາວັດ​ທະ​ນະ​ທຳ​ເຊື່ອມ​ໂຍງ ຮັບ​ປະ​ກັນ​ການ​ປ່ຽນ​ແປງ​ໃໝ່​ຢ່າງ​ຄົບ​ຊຸດ, ຮອບ​ດ້ານ ແລະ ເຊື່ອມ​ໂຍງ​ສາ​ກົນ​ຢ່າງ​ເລິກ​ເຊິ່ງ​ຂອງ​ປະ​ເທດ ແລະ ສ້າງ​​ເພື່ອນ​ມິດ​ສາ​ກົນຮຸ່ນໃໝ່​ທີ່​ມີ​ຄວາມ​ຮັກ​ແພງ​ຫວຽດ​ນາມ. ຜົນ​ສຳ​ເລັດ​ນີ້​ສືບ​ຕໍ່​ໄດ້​ຮັບ​ການ​ເສີມ​ຂະ​ຫຍາຍ​ໃນ​ປີ 2018, ບໍ່​ພຽງ​ແຕ່​ດ້ວຍ​ຜົນ​ສຳ​ເລັດ​ຂອງ​ບັນ​ດາ​ເຫດ​ການຫຼາຍ​ຝ່າຍຄື ກ​ອງ​ປະ​ຊຸມ​ເວ​ທີ​ປາ​ໄສ​ເສດ​ຖະ​ກິດ​ໂລກ ອາ​ຊຽນ (WEF - ASEAN), ​ແຕ່​ຍັງ​ແມ່ນການ​ເຄື່ອນ​ໄຫວ​ພົວ​ພັນ​ຕ່າງ​ປະ​ເທດ​ສອງ​ຝ່າຍ​ທີ່​ເຕັມ​ໄປ​ດ້ວຍ​ປະ​ສິດ​ທິ​ຜົນຢູ່​ທ້ອ​ງ​ຖິ່ນຕ່າງໆ, ເປັນ​ຕົ້ນ​ແມ່ນ​ບັນ​ດາ​ການ​ຢ້ຽມ​ຢາມ​ທ້ອງ​ຖິ່ນ​ຂອງ​ການ​ນຳ​ຂັ້ນ​ສູງ​ປະ​ເທດຕ່າງໆ ​ເນື່ອງ​ໃນ​ໂອ​ກາດ​ຢ້ຽມ​ຢາມ​ປະ​ເທດຫວຽດ​ນາມຢ່າງ​ເປັນ​ທາງ​ການ. ອາດ​ຈະ​ຢືນ​ຢັນ​ໄດ້​ວ່າ, ຖັນ​ແຖວ​ພະ​ນັກ​ງານ​ໄດ້​ຍົກ​ສູງ​ລະ​ດັບ​ຄວາມ​ຮູ້, ມີ​ຄວາມ​ເຊື່ອ​ໝັ້ນ​ຕົນ​ເອງ ແລະ ມີ​ຄວາມ​ຊຳນານ​ງານ​ໃນ​ວິ​ວັດ​ການ​ເຊື່ອມ​ໂຍງ​ສາ​ກົນ​.

ສະຫຼຸບ​ຄືນ​ໃໝ່​ບັນ​ດາ​ຂີດ​ໝາຍ​ໃນ​ພາກ​ພື້ນ, ໃນ​ໂລກ, ຢູ່​​ໃນ​ປະ​ເທດ, ເພື່ອ​ເຫັນ​ໄດ້​ວ່າ​ຂີດ​ໝາຍ​ອັນ​ໃຫຍ່​ທີ່​ສຸດ​ແມ່ນ​ຂະ​ໜາດ​ຂອງຫວຽດ​ນາມທີ່​ມີ​ການປ່ຽນ​ແປງ​ໃໝ່, ​ປະ​ດິດ​ສ້າງ ແລະ ມີ​ຄວາມ​ຮັບ​ຜິດ​ຊອບ. ໃນ​ປີ 2018 ທີ່​ເຕັມ​ໄປ​ດ້ວຍ​​ສິ່ງ​ທ້າ​ທາຍນັ້ນ, ຄ​ວາມ​ໝັ້ນ​ໃຈແລະຄວາມ​ກ້າວໜ້າ​ທີ່ໄດ້​ຮັບຈາກປີ ເອ​ເປກ 2017 ໄດ້​ຊ່ວຍ​ໃຫ້ຫວຽດ​ນາມສືບ​ຕໍ່​ຢືນ​ຢັນ​ຖາ​ນະ​ບົດ​ບາດ​ໃນ​ເວ​ທີ​ປາ​ໄສ​ສາ​ກົນ, ຮັກ​ສາ​ກຳ​ນົດ​ທິດ​ຢ່າງ​ໝັ້​ນ​ຄົງ ໃນ​ສະ​ພາບ​ການ​ໂລກແລະພາກ​ພື້ນ​ທີ່ມີ​ການ​ຜັນ​ປ່ຽນ​​ສັບ​ສົນຢ່າງ​ບໍ່​ເຄີຍ​ມີ​ມາ​ກ່ອນ. ໃນ​ການ​ພົວ​ພັນ​ສອງ​ຝ່າຍ, ຫວຽດ​ນາມ​ສືບ​ຕໍ່​ຮັກ​ສາ​ທ່າ​ພົວ​ພັນ​ກັບ​ບັນ​ດາ​ປະ​ເທດ​ມະ​ຫາ​ອຳ​ນາດ, ບັນ​ດາ​ສູນ​ກາງ​ທີ່​ສຳຄັນຂອງ​ໂລກ, ເຮັດ​ໃຫ້​ການ​ພົວ​ພັນ​​​ເຂົ້າ​ສູ່​ລວງ​ເລິກ ​ແລະມີຄວາມ​ໝັ້ນຄົງ​ກວ່າ​ແຕ່​ກ່ອນ. ​ໃນ​ລະດັບ​ພະຫຸ​ພາຄີ, ຫວຽດ​ນາມຍັງສືບ​ຕໍ່​ສະ​ແດງ​ບົດ​ບາດ​ເປັນ​ສະ​ມາ​ຊິກ​ທີ່​ມີ​ຄວາມ​ຮັບ​ຜິດ​ຊອບ, ມີ​ຄວາມ​ສາ​ມາດ​ນຳ​ພາ​ໃນ​ບາງ​ບັນ​ຫາ​ທີ່​ສຳ​ຄັນ​ຂອງການ​ເຊື່ອມ​ຕໍ່​ໃນ​ລະ​ດັບ​ຕ່າງໆ ນັບ​ແຕ່ການ​ເຊື່ອມ​ຕໍ່​ອະ​ນຸ​ພາກ​ພື້ນ (ກອງ​ປະ​ຊຸມ​ຂັ້ນ​ສູງ​ກ່ຽວ​ກັບ​ອະ​ນຸ​ພາກ​ພື້ນ​ແມ່​ນ້ຳ​ຂອງຫຼາຍ​ຄັ້ງ) ເຖິງ​ພາກ​ພື້ນອາ​ຊີ​ຕາ​ເວັນ​ອອກ​ສຽງ​ໃຕ້ (ASEAN - ອາ​ຊຽນ), ອາ​ຊີ - ປາ​ຊີ​ຟິກ (APEC -​ ເອ​ເປ​ກ), ແລະ ລະ​ຫວ່າງ​ພາກ​ພື້ນ (ASEM - ເອ​ເຊມ). ດ້ວຍ​ຄວາມ​ສຳຄັນຂະ​ໜາດນັ້​ນ, ຫວຽດ​ນາມສືບ​ຕໍ່​ໄດ້​ຮັບ​ການ​ເຊື້ອ​ເຊີນ​ໃຫ້​ເຂົ້າ​ຮ່ວມກອງ​ປະ​ຊຸດ​ສຸດຍອດ ຈີ 7 ເປີດກວ້າງ​ໃນ​ການາ​ດາ.

ຜົນ​ສຳ​ເລັດ​ຂອງເອ​ເປກ 2017 ແລະ ບັນ​ດາຂີດ​ໝາຍ​ຂອງກອງ​ປະ​ຊຸມ ສະ​ແດງໃຫ້​ເຫັນ​​ເຖິງ​ບົດ​ຮຽນຈຳນວນ​ຫຼາຍ​ທີ່ສົມຄວນ​ພິຈາລະນາ. ໃນ​ປີເອ​ເປກ 2017, ຜົນ​ສຳ​ເລັດ​ໃນ​ການ​ແກ້​ໄຂ​ຄວາມ​ແຕກ​ຕ່າງ​ຢ່າງ​ຫຼວງ​ຫຼາຍ​ລະ​ຫວ່າງ​ບັນ​ດາ​ສະ​ມາ​ຊິກ, ​ຄວາມ​ໝັ້ນ​ຄົງ​ໃນ​ເວລາວິ​ກິດ​ ​ເຖິງ​ວ່າ​ເກືອບ​ຈະ​ແຕກ, ໄດ້​ຢັ້ງ​​ຢືນກ່ຽວ​ກັບ​ຂະ​ໜາດ​ຂອງຫວຽດ​ນາມ. ຖາ​ນະ​ບົດ​ບາດ ​ແລະ “ກຳລັງ​ແຮງນຸ້ມນວນ” ຂອງຫວຽດ​ນາມໄດ້​ຊ່ວຍ​ໃຫ້​ພວກ​ເຮົາ​ບໍ​ລິ​ຫານຈັດການ​ແລະນຳ​​ໄປສູ່​ການ​ຮ່ວມ​ມືໃນ​ເອ​ເປກ ຢ່າງ​ແທ້​ຈິງ; ພ້ອ​ມກັນ​ນັ້ນ, ຜົນສຳ​ເລັດ​ຂອງເອເປກ 2017 ກໍ່​ໄດ້​ປະ​ກອບ​ສ່ວນ​ເພີ່ມ​ທະວີ​ຖາ​ນະ​ບົດ​ບາດ, “ກຳ​ລັງ​ແຮງ​ນຸ້ມນວນ” ຂອງ​ປະ​ເທດ. ອາດ​ຈະ​ເວົ້າ​ໄດ້​ວ່າ, ຜົນ​ສຳ​ເລັດ​ຂອງເອ​ເປກ 2017 ໄດ້​ຢື​ນ​ຢັນ​ຄວາມ​ຖືກ​ຕ້ອງ​ຂອງ​ແນວ​ທາງ​ການ​ພົວ​ພັນ​ຕ່າງ​ປະ​ເທດ ຂອງກອງ​ປະ​ຊຸມ​ໃຫຍ່​ຄັ້ງ​ທີ XII ຂອງ​ພັກ​ກອມ​ມູ​ນິດຫວຽດ​ນາມ ກ່ຽວ​ກັບ​​ການຫັນ​ການ​ພົວ​ພັນ​ສາ​ກົນ​ເປັນຫຼາຍ​ຮູບ​ຫຼາຍ​ແບບຫຼາຍ​ກ້ຳ​ຫຼາຍ​ຝ່າຍ, ຄວາມເປັນ​ເຈົ້າ​ການ​ແລະຕັ້ງ​ໜ້າ​ເຊື່ອມ​ໂຍງ​ສາ​ກົນ, ຍົກ​ສູງ​ປະ​ສິດ​ທິ​ຜົນ​ການ​ພົວ​ພັນ​ຕ່າງ​ປະ​ເທດຫຼາຍ​ຝ່າຍ, ດ້ວຍ​ເປົ້າ​ໝາຍ​ສູງ​ສຸດ​ແມ່ນ​ຮັກ​ສາ​ສະ​ພາບ​ແວດ​ລ້ອມ​ແຫ່ງ​​ສັນ​ຕິ​ພາບ, ສະ​ຖຽມ​ລະ​ພາບ, ສ້າງ​ຄວາມ​ສະ​ດວກ​ເພື່ອ​ຮັບ​ໃຊ້​ພາ​ລະ​ກິດ​ການກໍ່​ສ້າງ ແລະ ພັດ​ທະ​ນາ​ປະ​ເທດ. ບົນ​ພື້ນ​ຖານ​ຄວາມ​ເຕີບ​ໃຫຍ່​ເຂັ້ມ​ແຂງ​ຂອງ​ການ​ທູດ​ພະຫຸ​ພາຄີ​ໃນຫວຽດ​ນາມ ເຊິ່ງຈຸ​ດສູງ​ສຸດຄື ເອ​ເປກ 2017, ພ້ອມກັບ​ຄວາມ​ຮັບ​ຮູ້​ຢ່າງ​ເລິກ​ເຊິ່ງ​ກ່ຽວ​ກັບຄວາມ​ສຳ​ຄັນ​ຂອງ​ການທູດ​ພະຫຸ​ພາຄີ​ໃນ​ສະ​ພາບ​ການ​ໃໝ່, ຄະ​ນະ​ເລ​ຂາ​ທິ​ການ​ພັກ​ກອມ​ມູນິດ​ຫວຽດນາມໄດ້ປະ​ກາດ​ໃຊ້ຄຳ​ສັ່ງເລ​ກ​ທີ 25-CT/TW, ສະ​ບັບ​ລົງ​ວັນ​ທີ 08 ສິງ​ຫາ 2018, ກ່ຽວ​ກັບ​ການ​ຍູ້​ແຮງ ແລະ ຍົກ​ລະ​ດັບ​ການ​ພົວ​ພັນ​ຕ່າງ​ປະ​ເທດຫຼາຍ​ຝ່າຍ​ເຖິງ​ປີ 2030.

ຜົນ​ສຳ​ເລັດຂອງ​ປີເອ​ເປກ 2017 ແລະ ຜົນກະ​ທົບຢ່າງ​ເລິກ​ເຊິ່ງ​ຂອງ​ເຫດ​ການຈົນ​ເຖິງ​ມື້​ນີ້ ແມ່ນແນ່ນອນ​ວ່າ ໄດ້​ເລີ່ມ​ຕົ້ນ​ຈາກ​ການ​ຕັດສິນ​ໃຈ​ຍຸດ​ທະ​ສາດ​ແຕ່​ປີ 2012 ຂອງ​ພັກ, ລັດ, ລັດ​ຖະ​ບານ ກ່ຽວ​ກັບ​ການຮັບ​ສະ​ໝັກ​ເປັນ​ເຈົ້າ​ພາບ​ປີເອ​ເປກ 2017. ຄວາມ​ສຳ​ເລັດ​ດັ່ງກ່າວມີ​ບ່ອນອີງທີ່​ໝັ້ນ​ຄົງ​ ນັ້ນ​ຄື​ຖາ​ນະ​ບົດ​ບາດ, ອິດ​ທິ​ພົນ​ຂອງ​ປະ​ເທດ​ພາຍຫຼັງ 30 ປີ​ແຫ່ງ​ການ​ປ່ຽນ​ແປງ​ໃໝ່ແລະເຊື່ອມ​ໂຍງ​ສາ​ກົນ​ຢ່າງ​ເລິກ​ເຊິ່ງ, ແມ່ນ​ຄວາມ​ເຊື່ອ​ໝັ້​ນແລະຄວາມ​ຮັກ​ແພງ​ຂອງ​ບັນ​ດາ​ສະ​ມາ​ຊິກເອ​ເປກ ຕໍ່ຫວຽດ​ນາມ. ຄວາມສຳ​ເລັດ​ນັ້ນ​ກໍ່​​ເກີດ​ຈາກ​ຄວາມ​ກ້າຫານແລະສະ​ຕິ​ປັນ​ຍາ​ຂອງ​ການ​ພົວ​ພັນຕ່າງ​ປະ​ເທດຫ​ວຽດ​ນາມ, ພາຍ​ໃຕ້​ການ​ຊີ້​ນຳ​ຢ່າງ​ແທດ​ເໝາະ​ຂອງ​ກົມ​ການ​ເມືອງແລະການ​ນຳ​ຂັ້ນ​ສູງ, ​ເຊິ່ງໄດ້​ຊ່ວຍ​ໃຫ້​ພວກ​ເຮົາ​ມີ​ບາດ​ກ້າວ​ທີ່​​ເປັນແບບ​ແຜນແລະກວມ​ລວມ, ກຳ​ນົດ​​ບັນ​ຫາແລະຈຸດ​ເວ​ລາ​ໄດ້ຢ່າງ​ຖືກຕ້ອງ, ຈັດການແກ້​ໄຂສະຖານະ​ການ​​ໄດ້​ຢ່າງ​ຄ່ອງ​​ແຄ່​ວ. ໃນ​ເວ​ລາ​ທີ່​ທ້າ​ທາຍຫຼາຍ​ທີ່​ສຸດ, ພວກ​ເຮົາຍັງຄົງ​ທົນ​ທານ, ກ້າຫານ, ປະສານ​ງານ​ກັບຄູ່​ຮ່ວມ​ມື​ເພື່ອ​ຊອກ​ຫາ​ທິດທາງ​ທີ່ຖືກຕ້ອງ. ພວກ​ເຮົາ​ຍັງ​ປະສົບ​ຜົນ​ສຳ​ເລັດ​ຍ້ອນ​ການ​ເປັນ​ມື​ອາ​ຊີບ​ ຕັ້ງ​ແຕ່​ຂັ້ນ​ຕອນ​ການ​ກະ​ກຽມ ​ດ້ວຍ​ການ​ສ້າງ​ຕັ້ງຢ່າງໄວ​ກົງຈັກທີ່​ລວມ​ມີ​​ກະ​ຊວງ, ຂະ​ແໜງ​ການ, ທ້ອງ​ຖິ່ນ​ ​ໃນ​​ເດືອນທັນ​ວາ 2014. ແລະສູງ​ກວ່າ​ທັງ​ໝົດ, ຄວາມສຳ​ເລັດ​ຈະ​​ເກີດ​ຂຶ້ນຢ່າງ​ແນ່ນອນ​ຍ້ອນ​ແຜນ​ນະ​ໂຍ​ບາຍທີ່​ຖືກ​ຕ້ອງ​ຂອງ​ພັກໄດ້​ຮັບ​ຄວາມ​ສະ​ໜັບ​ສະ​ໜູນ​ຢ່າງສຸດ​ອົກ​ສຸດ​ໃຈ​​ຈາກ​ປະ​ຊາ​ຊົນ​ທຸກຄົນ. ຈາກ​ການ​ບໍລິຈາກ​ຂອງ​ວິ​ສາ​ຫະ​ກິດ​ພາຍ​ໃນ​ປະ​ເທດ​ທີ່​ສະ​ໜັບ​ສະ​ໜູນ​ລັດ​ຖະ​ບານ​ໃນ​ການ​ຈັດ​ຕັ້ງປີເອ​ເປກ 2017, ດ້ວຍ​ຈຳນວນ​ເງິນ​ບໍລິຈາກຫຼາຍ​ກວ່າປີເອ​ເປກ 2006 ​ເກືອບ 5 ເທື່ອ, ຈົນ​​ເຖິງ​ລາຍ​ມື​ຂັດ​ຖູ​ຂອງສິລະ​ປິນ​ແຕ່ຄົນ​ທີ່ເຮັດ​ຂອງ​ຂວັນ​​ໃຫ້​ແຂກ​ສາ​ກົນ, ແລະ​ໂດຍ​ສະ​ເພາະ​ແມ່ນ​ຄວາມ​ມາ​ນະ​ພະ​ຍາ​ຍາມທາງ​ດ້ານ​ຈິດ​ໃຈ​ຂອງ​ປະ​ຊາ​ຊົນນະຄອນດ່າ​ໜັງ, ໂຮ້ຍ​ອານ ທີ່ລົງ​ຖະ​ໜົນ​ເພື່ອ​ມ້ຽນມັດປັດກວາດ ເຮັດຄວາມ​ສະອາດ​ໃນ​ເມືອງ​ຫຼັງຈາກພາ​ຍຸໝາຍ​ເລກ 12... ສິ່ງທັງ​ໝົດ​ເຫຼົ່າ​ນັ້ນ​ສະ​ແດງອອກ​ໃນ​ເມືອງດ່າ​ໜັງ​ທີ່ສວຍ​ງາມ, ​ເມືອງໂຮ້ຍ​ອາ​ນທີ່​ຮັກ​ແຂກບ້ານ​ແຂກ​ເມືອງ, ​ຮອຍ​​ຍິ້ມອັນ​ສົດ​ໃສ​ຂອງພົນລະ​ເມືອງທຸກ​ຄົນ​ຍິນ​ດີຕ້ອນ​ຮັບ​ແຂກ​ສາ​ກົນ, ໃນ​ຂະ​ນະ​ທີ່ຫາກໍ່​ປະສົບ​ຄວາມ​ເສຍ​ຫາຍຢ່າງໜັກ​ໜ່ວງ. ນັ້ນ​ແມ່ນ​ຄວາມ​ສະ​ໜັບ​ສະ​ໜູນ​ອັນ​ລ້ຳ​ຄ່າ​ຂອງ​ປະ​ຊາ​ຊົນ, ເປັນ​ສັນ​ຍາ​ລັກທີ່​ສວຍ​ງາມ​ຂອງ​ຄວາມ​ຖືກ​ເໝາະ​ລະ​ຫວ່າງ ຄວາມ​ຄິດ​ຂອງ​ພັກ - ຄວາມ​ປາ​ຖະ​ໜາ​ຂອງ​ປະ​ຊາ​ຊົ​ນ”. ນີ້​ແມ່ນ​ບົດ​ຮຽນ​ອັນ​ລ້ຳ​ຄ່າ​ຈາກ ເອ​ເປກ 2017 ເພື່ອ​​ໃຫ້ປະ​ເທດ​ຫວຽດນາມສືບ​ຕໍ່​ກ້າວ​ເດີນຢ່າງ​ໜັກ​ແໜ້ນ​ໃນ​ຊຸມ​ປີ​ຕໍ່​ໜ້າ, ​​ເອົາ​ຊະນະ​ຄວາມ​ທ້າ​ທາຍ​ຕ່າງໆ​ທຸກ​ຢ່າງ, ມີ​ຄວາມ​ໝັ້ນ​ໃຈ​ໃນ​ເຫດການ​ການ​ຕ່າງປະເທດ​ອັນ​ຍິ່ງ​ໃຫ​ຍ່​ຄື ​ເປັນປະ​ທານອາ​ຊຽນປີ 2020 ແລະ ເປັນສະມາຊິກ​ບໍ່​ຖາ​ວອນ​ຂອງສະ​ພາ​ຄວາມ​ໝັ້ນຄົງ​ແຫ່ງ​ສະ​ຫະ​ປະ​ຊາ​ຊາດໄລ​ຍະ 2020 - 2021./.

 ​ໂດຍ ປອ. ເລ​ຫາຍ​ບິ່ງ

ຮອງ​ອຳ​ນ​ວຍ​ການ​ສະ​ຖາ​ບັນການ​ທູດ

---------------------------------------------------

- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 913 (​ເດືອນທັນວາ 2018).

(1) https://www.freemalaysiatoday.com/category/nation/2017/11/12/najib-apec-leaders-summit-ends-in-optimistic-note/

(2) ​ບົດ​ລາ​ງານ​ຂອງລັດ​ຖະ​ບານ ທີ່ກອງ​ປະ​ຊຸມ​ຄັ້ງ​ທີຫົກ, ສະ​ພາ​ແຫ່ງ​ຊາດຊຸດ​ທີ XIV.

(3) http://vietnamtourism.gov.vn/index.php/cat/12

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ