ວັນເສົາ, 21/9/2019
ການພົວພັນຕ່າງປະເທດປີ 2018: ເປັນເຈົ້າການ, ປະດິດສ້າງ, ປະສິດທິຜົນ
26/2/2019 11:13' ສົ່ງ ພິມ
ທ່ານ ຟ້າມບິ່ງມິງ ຮອງນາຍົດລັດຖະມົນຕິ, ລັດຖະມົນຕີກະຊວງການຕ່າງປະເທດຫວຽດນາມ (ພາບ: TTXVN)

“​ໄຟ​ລອງ​ຄຳ, ຄວາມ​ຍາກ​ລຳບາກ​ລອງ​ກຳລັງ”

ສຳລັບທົ່ວ​ພັກ, ທົ່ວ​ປວງ​ຊົນ ​ແລະ ​ກອງທັບທັງ​ໝົດ​ຂອງ​ພວກ​​ເຮົາ, ປີ 2018 ​ແມ່ນ​ປີບານພັບ - ປີ​ກາງ​ສະ​ໄໝ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ - ທີ່​ມີ​ຄວາມ​ໝາຍ​ສຳຄັນ​ທີ່​ສຸດ​ ໃນ​ການ​ສ້າງທ່ວງ​ເພື່ອ​ປະຕິບັດມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ​ແຜນການ​ພັດທະນາ​ເສດຖະກິດ-ສັງຄົມ​ໄລຍະ 2016 - 2020 ​ຢ່າງ​ສຳ​ເລັດ​ມິ​ໄຊ.

ສະພາບ​ການ​ໂລກ​ແລະ​ພາກ​ພື້ນ​ອາຊີ-ປາຊີ​ຟິກປີ​ທີ່​ຜ່ານ​ມາ​ມີ​ການ​ຜັນ​ປ່ຽນ​ຢ່າງ​ໄວວາ ດ້ວຍຫຼາຍ​ປັດ​ໄຈທີ່​ບໍ່​ຄາດ​ຄິດ​ແລະ​ບໍ່​ແນ່ນອນ. ການ​ແຂ່ງຂັນ​ທາງ​ຍຸດ​ທະ​ສາດ​ລະຫວ່າງ​ບັນດາ​ປະ​ເທດ​ໃຫຍ່​ໃນ​ໂລກ ​ແລະ ​ໃນ​ພາກພື້ນ ນັບ​ມື້​ນັບຮຸນ​ແຮ​ງ, ການ​ພົວພັນ​ລະ​ຫວ່າງຫຼາຍ​ປະ​ເທດພົບ​ຄວາມ​ຫຍຸ້ງຍາກ, ບາງ​ຄັ້ງ​ຖືກ​ຕົກ​ຢູ່​ໃນ​ພາວະ​ວິ​ກິດ. ​ໄປ​ຄຽງ​ຄູ່​ກັບ​ສະພາບ​ການ​ດັ່ງກ່າວ​ແມ່ນການ​ສັ່ນ​ສະ​ເທືອ​ນ, ການ​​ປີ້ນກັບ, ການ​ຕຳ​ກັນ​ລະຫວ່າງກະ​ແສ​ການ​ປົກ​ປ້ອງ ກັບ​ການ​ໂລກາ​ພິວັດ, ລະຫວ່າງການ​ໃຊ້​ອຳນາດ​ການ​ເມືອງ ກັບ​ການ​​ເຄົາລົບ​ນັບຖື​ກົດໝາຍ, ລະຫວ່າງການ​ກະທຳ​ຝ່າຍ​ດຽວ ກັບ​ລັດທິ​ພະຫຸ​ພາຄີ...

ສິ່ງ​ທີ່​ດີ​ຄື, ລະຫວ່າງ​ບັນດາ​ແຮງ​ດັນ, ​ແຮງ​ດຶງ​ນັ້ນ, ດ້ວຍ​ຄວາມ​ພະຍາຍາມ​ຂອງ​ບັນດາ​ປະ​ເທດ​ສະມາຊິກ, ອາ​ຊຽນ ຍັງ​ຄົງ​ຮັກສາ​​ຄວາມ​ສາມັກ​ຄີ​ໄວ້ໄດ້, ຍັງ​ກ້າວ​ຢ່າງ​ໜັກ​ແໜ້ນ​ໃນ​ຂະ​ບວນການ​ກໍ່ສ້າງ​ປະຊາ​ຄົມ ​ແລະ ຢືນຢັນ​ບົດບາດ​ເປັນ​ໃຈກາງ​ໃນ​ໂຄງ​ສ້າງ​ພາກ​ພື້ນ​ທີ່​ກຳລັງ​ເປັນ​ຮູບ​ເປັນ​ຮ່າງ​ຂຶ້ນ. ຕໍ່ໜ້າ​ການ​ຜັນ​ຜວນຍ້ອນ​ທ່າອຽງ​ການ​ປົກ​ປ້ອງ​ແລະ​ສົງຄາມ​ການ​ຄ້ານັ້ນ, ການ​ເຊື່ອມ​ໂຍງ​ເສດຖະກິດ​ສາກົນ, ​ໂດຍ​ສະ​ເພາະ​ຢູ່​ພາກ​ພື້ນ​ອາຊີ-ປາຊີ​ຟິກ, ຍັງ​ຄົງ​ໄດ້​ຮັບ​ການ​ຊຸກຍູ້.

ລະຫວ່າງ​ສິ່ງ​ທ້າ​ທາຍ​ແລະ​ໂອກາດ​ບໍ່​ຈັກ​ວ່າ​ເທົ່າ​ໃດ​ນັ້ນ, ວຽກ​ງານ​ການຕ່າງປະ​ເທດ​ຂອງ​ພັກ​ແລະ​ລັດ​ຫວຽດນາມ​ໄດ້​ຮັບ​ການ​ຜັນ​ຂະຫຍາຍຢ່າງ​​ມີ​ແບບ​ແຜນ​ແລະ​ຮອບ​ຄອບ, ສະ​ແດງ​ໃຫ້​ເຫັນ​ເຖິງ​ຄວາມ​ກ້າຫານ​ທາງ​ການ​ທູດ​ແລະ​ວິ​ໄສ​ທັດ​ຍຸດ​ທະ​ສາດ. ​ເມື່​ອກ່າວ​ປາ​ໄສ​ຊີ້​ນຳ​ທີ່​ກອງ​ປະຊຸມ​ການ​ທູດ​ຄັ້ັ້ງທີ 30 (ເດືອນ​ສິງຫາ 2018), ສະຫາຍ​ເລຂາທິການ​ໃຫຍ່ ຫງວຽນ​ຝູຈ້ອງ ປະ​ເມີນ​ວ່າ ວຽກ​ງານ​ການຕ່າງປະ​ເທດ​ໄດ້ບັນລຸ​ຜົນສຳ​ເລັດ​ທີ່​ສຳຄັນ​ຫຼາຍ​ຢ່າງ, ກາຍເປັນຈຸດ​ສະຫວ່າງ​ໜຶ່ງ​ ໃນ​ຜົນສຳ​ເລັດ​ລວມທັງ​ໝົດ​ຂອງ​ປະ​ເທດ. ດ້ວຍ​ທິດ​ນຳ​ເປັນ​ເຈົ້າ​ການ, ປະດິດ​ສ້າງ ​ໃນ​ວິທີ​ເຮັດ ​ແລະປະສິດທິ​ຜົນ ​ໃນ​ການ​ກະທຳ, ວຽກ​ງານ​ການ​ຕ່າງປະ​ເທດ​ໄດ້​ບືນ​ຕົວ​ຂຶ້ນສ້າງ​ຜົນງານ​ໃໝ່​ຫຼາຍ​ຢ່າງ, ປະກອບສ່ວນ​ຍົກ​ສູງອິດ​ທິພົນ​​ແລະ​ກຳລັງ​ແຮງຂອງ​ປະ​ເທດ​ຫວຽດນາມ.

ທີ​ໜຶ່ງ, ການ​ພົວພັນ​ຕ່າງປະ​ເທດ​ພະຫຸ​ພາຄີ​ໄດ້​ມີ​ບາດກ້າວ​ຂະຫຍາຍຕົວ​ໃໝ່​ທາງ​ດ້ານ​ຄຸນ​ນະພາ​ບ ດ້ວຍ​ການ​ທີ່​ ຄະນະ​ເລຂາທິການ​ສູນ​ກາງ​ພັກ ປະກາດ​ໃຊ້​ຄຳ​ສັ່ງ​ເລກທີ 25-CT/TW, ລົງ​ວັນ​ທີ 08-8-2018 ວ່າ​ດ້ວຍການ​ຍູ້​ແຮງ​ແລະ​ຍົກ​ລະດັບ​ການ​ຕ່າງປະ​ເທດ​ພະຫຸ​ພາຄີ​ຮອດ​ປີ 2030. ນີ້​ເປັນ​ຄັ້ງ​ທຳ​ອິດ​ທີ່ພັກ​ກອມ​ມູນິດ​ຫວຽດນາມປະກາດ​ໃຊ້​ເອກະສານ​ຊີ້​ນຳ​ສະ​​ເພາະກ່ຽວ​ກັບ​ການ​ຕ່າງປະ​ເທດ​ພະຫຸ​ພາຄີ. ນີ້​ເປັນ​ຫຼັກ​ໝາຍ​ທີ່​ສຳຄັນກ່ຽວ​ກັບ​ຈິນຕະນາການ​ການ​ຕ່າງປະ​ເທດ ​ແລະ ການ​ຫັນ​ເປັນ​ນິຕະກຳ​ຕໍ່​ແຜນ​ນະ​ໂຍບາຍ​ຂອງກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII ຂອງ​ພັກ ກ່ຽວ​ກັບ​ຄວາມ​ເປັນ​ເຈົ້າ​ການ, ຕັ້ງໜ້າ​ເຊື່ອມ​ໂຍງ​ສາກົນ, ຕາມ​ນັ້ນ ພວກ​ເຮົາ​ສູ້​ຊົນ​ເພື່ອ​ຖື​ບົດບາດເປັນ​ແຕ່​ລະ​ກ້າວ​ໃນ​ການ​ “​ເປັນ​ແກນກາງ, ຊັກ​ຈູງ, ​ໄກ່​ເກ​ຍ” ຢູ່​ໃນ​ບັນດາ​ເວທີ​ປາ​ໄສ, ອົງການ​ຈັດ​ຕັ້ງ​ຫຼາຍ​ຝ່າຍທີ່​ມີ​ຄວາມ​ສຳຄັນ​ຍຸດ​ທະ​ສາດ​ຕໍ່​ກັບປະ​ເທດ, ສອດຄ່ອງ​ກັບ​ຄວາມ​ສາມາດ​ແລະ​ເງື່ອນ​ໄຂຕົວ​ຈິງ.

​ໂດຍສືບ​ຕໍ່​ຄວາມ​ສຳ​ເລັດ​ຂອງ​ປີ ​ເອ​ເປ​ກ ຫວຽດນາມ 2017, ​​ໃນປີ​ທີ່​ຜ່ານ​ມາ ການ​ພົວພັນ​ຕ່າງປະ​ເທດ​ພະຫຸ​ພາຄີ ສືບ​ຕໍ່​ບັນລຸ​ຜົນສຳ​ເລັດ​ທີ່​ຍິ່ງ​ໃຫຍ່​ຫຼາຍ​ຢ່າງ, ກາຍ​ເປັ​ນຈຸດ​ສະຫວ່າງ​ທີ່​​ໂດ​ດ​ເດັ່ນ​ຂອງການ​ທູດ​ຫວຽ​ດນາມ​ປີ 2018. ຫວຽດນາມ​ໄດ້​ປະສົບ​ຄວາມ​ສຳເລັດ​ໃນ​ການຈັດ​ຕັ້ງ​ກອງ​ປະຊຸມ​ສາກົນ​ທີ່​ສຳຄັນ​ຫຼາຍ​ຄັ້ງ​​ເຊັ່ນ ​ເວທີ​ປາ​ໄສ​ລັດຖະສະພາ​ອາຊີ - ປາຊີ​ຟິກ (APPF) ຄັ້ງ​ທີ 26, ກອງ​ປະຊຸມ​ສຸດ​ຍອດ​ອະນຸ​ພາກ​ພື້ນ​ແມ່​ນ້ຳຂອງ​ເປີດ​ກວ້າງ (GMS) ຄັ້ງ​ທີ 6, ກອງ​ປະຊຸມ​ຂັ້ນ​ສູງ​​ເຂດສາມຫຼ່ຽມ​ພັດທະນາກຳປູ​ເຈຍ-ລາວ-ຫວຽດນາມ (CLV) ຄັ້ງ​ທີ 10... ພິ​ເສດ, ກອງ​ປະຊຸມ​ເວທີ​ປາ​ໄສ​ເສດຖະກິດ​ໂລກ​ກ່ຽວ​ກັບ​ອາ​ຊຽນ (WEF ASEAN) ​ໂດຍ​ຫວຽດນາມ​ເປັນ​ເຈົ້າພາບ​ຈັດ​ຕັ້ງ​ເດືອນ​ກັນຍາ 2018 ທີ່​ນະຄອນ​ຮ່າ​ໂນ້ຍ ຊຶ່ງ​ໄດ້​ຮັບ​ການ​ປະ​ເມີນ​ວ່າ​ປະສົບ​ຄວາມ​ສຳ​ເລັດດີ​ທີ່​ສຸດ​ໃນ​ປະຫວັດສາດ 27 ປີ​ທີ່​ຜ່ານ​ມາ​ຂອງ​ເວ​ທີ​ປາ​ໄສ​ນີ້. ບັນດາ​ເຫດການ​ພະຫຸ​ພາຄີ​ທີ່​ສຳຄັນ​ເທິງນີ້ ​ໄດ້​ດຶງ​ດູດ​ຄວາມສົນໃຈຂອງຄູ່​ຮ່ວມມື​ແລະ​ນັກ​ລົງທຶນ​ຕ່າງປະ​ເທດ​ເປັນ​ຈຳນວນ​ພັນ. ຄວາມ​ສຳ​ເລັດ​ຂອງ​ເຫດການ​ເຫຼົ່າ​ນັ້ນ​ໃຫ້​ເຫັນ​ວ່າ ​ບົດບາດ​ທີ່​ຕັ້ງ​ແລະ​ອິດ​ທິພົນ​ຂອງປະ​ເທດ​ຫວຽດນາມ​ໄດ້​ເພີ່ມ​ຂຶ້ນຢ່າງຫຼວງ​ຫຼາຍ, ພ້ອມ​ນັ້ນ​ກໍ​ເປີດ​ໂອກາດ​ຮ່ວມ​ມື, ທຸລະ​ກິດທີ່​ດີ​ຫຼາຍ​ຢ່າງ​ໃຫ້​ແກ່​ວິ​ສາ​ຫະກິດ​ຂອງ​ຫວຽດນາມ.

ຄຽງ​ຂ້າງ​ກັນ​ກັບ​ບັນດາ​ຂໍ້​ສະ​ເໜີ​ແລະ​ສ່ວນ​ປະກອບ​ເຂົ້າ​ໃນ​ບັນດາ​ອົງການ​ຈັດ​ຕັ້ງ​ ແລະ ​ເວທີ​ປາ​ໄສ​ພາດ​ພື້ນ​ແລະ​ສາກົນ ​ເຊັ່ນ ອາ​ຊຽນ, ອາ​ເຊມ, ​ເອ​ເປ​ກ, ສະຫະ​ປະຊາ​ຊາດ... ທີ່​ໄດ້​ຮັບ​ການ​ສະໜັບສະໜູນ​ແລະ​ຕີ​ລາຄາ​ສູງ​ນັ້ນ, ຫວຽດນາມຍັງ​ໄດ້​ຮັບ​ຄວາມ​ໄວ້​ວາງ​ໃຈ​ຈາກ​ປະຊາ​ຄົມ​ສະກົນ​ ໃນ​ການ​ມອບ​ໃຫ້​ປະຕິບັດ​ໜ້າ​ທີ​ພະຫຸ​ພາຄີ​ທີ່​ສຳຄັນ​ຫຼາຍ​ຢ່າງ. ​ເດືອນພຶດສະພາ 2018, ກຸ່ມ​ປະ​ເທດ​ອາຊີ-ປາຊີ​ຟິກ​ໄດ້​ເປັນ​ເອກະ​ພາບ​ ສະ​ເໜີ​ຊື່​ຫວຽດນາມ​ເປັນ​ຕົວ​ແທນຜູ້​ດຽວຂອງ​ກຸ່ມ ທີ່ສະໝັກ​ເປັນ​ສະມາຊິກ​ບໍ່ຖາວອນຂອງ​ສະພາ​ຄວາມໝັ້ນຄົງ​ສະຫະ​ປະຊາ​ຊາດ​ສຳລັບ​ໄລຍະ 2020 - 2021. ​ເດືອນ​ທັນວາ 2018, ​ເປັນ​ຄັ້ງທຳ​ອິດ​ທີ່ຫວຽດນາມ​ໄດ້​ຮັບ​​ເລື​ອກ​ເຂົ້າ​ໃນຄະນະ​ກຳມະການ​ກົດໝາຍ​ການ​ຄ້າ​ສາກົນ​​ແຫ່ງ​ສະຫະ​ປະຊາ​ຊາດ (UNCITRAL), ສ້າງ​ເງື່ອນ​ໄຂ​ໃຫ້​ຫວຽດນາມ​ເຂົ້າ​ຮ່ວມ​ການສ້າງ​ກົດໝາຍ​ການ​ຄ້າ​ສາກົນຕັ້ງ​ແຕ່​ຕົ້ນ ຕາມ​ທິດ​ທີ່​ສອດຄ່ອງ​ກັບ​ຜົນ​ປະ​ໂຫຍ​ດຂອງ​ປະ​ເທດ.

ທີ​ສອງ, ​ໃນ​ສະພາບ​ການ​ພົວພັນ​ສາກົນ​ມີ​ການ​ຜັນ​ປ່ຽນ​ຢ່າງ​ສັບສົນ​ແລະ​ບໍ່​ຄາດ​ຄິດ​ໄດ້, ດ້ວຍ​ຈິດ​ໃຈ​ເປັນ​ເຈົ້າ​ການ​ແລະ​ປະດິດ​ສ້າງ, ຫວຽດນາມ​ບໍ່​ພຽງ​ແຕ່​ປັບປຸງ​ການ​ພົວພັນ​ຕ່າງປະ​ເທດ ຫາກ​ຍັງ​ໄດ້​ເປີດ​ກວ້າງ​ຂອບ​ການ​ພົວພັນ​ກັບບັນດາ​ຄູ່​ຮ່ວມ​ມື​ທີ່​ສຳຄັນ​ອື່ນ​ອີກ. ການ​ພົວພັນ​ມິດຕະພາບ​ແລະ​ການ​ຮ່ວມ​ມື​ກັບ​ບັນດາ​ຄູ່​ຮ່ວມມື, ​ໂດຍ​ສະ​ເພາະ​ແມ່ນ ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ ລາວ, ກຳປູ​ເຈຍ ​ແລະ ຈີນ, ບັນດາ​ປະ​ເທດ ອາ​ຊຽນ ​ແລະ ບັນດາ​ປະ​ເທດ​ໃຫຍ່​ເຊັ່ນ ລັດ​ເຊຍ, ອິນ​ເດຍ, ຍີ່ປຸ່ນ, ຝ​ະລັ່ງ... ສືບ​ຕໍ່​ໄດ້​ເພີ່ມ​ທະວີ​ເຂົ້າ​ສູ່​ລວງ​ເລິກ; ຄວາມ​ໄວ້​ວາງ​ໃຈ​ດ້ານ​ການ​ເມືອງ ​ແລະ ການ​ຮ່ວມ​ມືຕົວ​ຈິ​ງ​ໃນ​ຫຼາຍ​ຂົງ​ເຂດ ສືບ​ຕໍ່​ໄດ້​ຮັບ​ການເພີ່ມ​ທະວີ. ​ໃນ​ປີ​ທີ່​ຜ່ານ​ມາ, ຜູ້ນຳ​ຂອງ​ພັກ​ແລະ​ລັດ​ຫວຽດນາມ​ໄດ້ດຳ​ເນີນ​ການ​ຢ້ຽມຢາມ​ຕ່າງປະ​ເທດ ​ແລະ​ເຂົ້າ​ຮ່ວມ​ກອງ​ປະຊຸມ​ສາກົນ​ທີ່​ສຳຄັນ 28 ຄັ້ງ, ຕ້ອນຮັບ 33 ຄະນະ​ຜູ້​ແທນ​ຂັ້ນສູງຂອງ​ບັນດາ​ປະ​ເທດ​ມາ​ຢ້ຽມຢາມ​ແລະ​ຮ່ວມ​ການ​ເຄື່ອນ​ໄຫວ​ທີ່​ສຳຄັນ​ຢູ່​ຫວຽດນາມ, ​ແລະ​ການ​ພົບ​ປະ​ແລກ​ປ່ຽນ​ຂັ້ນ​ສູງຫຼາ​ຍຮ້ອຍ​ຄັ້ງຢູ່​ຕານ​ຂອບ​ກອງ​ປະຊຸມ​ພະຫຸ​ພາຄີ​ທີ່​ສຳຄັນ. ບັນດາ​ການ​ຢ້ຽມຢາມ, ການ​ພົບ​ປະ​ແລກປ່ຽນ​ທີ່​ຟົດ​ຟື້ນ​ນັ້ນ​ໄດ້​ສ້າງ​ແຮງ​ກະ​ຕູ້ນ​ໃໝ່​ໃນ​ການ​ພົວພັນ​​​ທຸກ​ຂົງ​ເຂດກັບບັນດາ​ຄູ່​ຮ່ວມ​ມື, ຮັບ​ໃຊ້​ຢ່າງ​ແທດ​ຈິງ​ໃຫ້​ແກ່ຜົນ​ປະ​ໂຫຍ​ດທາງ​ດ້ານ​ຄວາມ​ໝັ້ນຄົງ​ແລະ​ການ​ພັດທະນາ​ປະ​ເທດ. ຫວຽດນາມ​ໄດ້​ຍົກ​ລະດັບ​ການ​ພົວພັນ​ກັບ​ອົດ​ສະຕຣາລີ ຂຶ້ນ​ເປັນ​ຄູ່​ຮ່ວມ​ມື​ຍຸດ​ທະ​ສາດ - ນີ້​ແມ່ນ​ຄູ່​ຮ່ວມ​ມື​ຍຸດ​ທະ​ສາດ​ທີ 11 ຂອງ​ພວກ​ເຮົາ​ໃນກຸ່ມປະ​ເທດ ຈ20. ພວກ​ເຮົາ​ກໍ່​ໄດ້​ສ້າງ​ການ​ພົວພັນ​ຄູ່​ຮ່ວມ​ມື​ຮອບດ້ານ​ກັບ ຮຸງ​ກາຣີ - ຄູ່​ຮ່ວມ​ມື​ທີ່​ສຳຄັນ​ທີ່​ສຸດ​ຂອງ​ຫວຽດນາມຢູ່​ພາກ​ກາງ-ຕາ​ເວັນ​ອອກ​ຂອງ​ເອີຣົບ ​ໃນ​ຂົງ​ເຂດ​ການ​ຊ່ວຍ​ເຫຼືອ​ພັດທະນາ.

ທີ​ສາມ, ການ​ເຊື່ອມ​ໂຍງ​ສາ​ກົດ, ​ໂດຍ​ສະ​ເພາະ​ແມ່ນ​ການ​ເຊື່ອມ​ໂຍງ​ເສດຖະກິດສາກົນ ​ໄດ້​ສະ​ແດງ​ເຖິງ​ຈິດ​ໃຈ​ເປັນ​ເຈົ້າ​ການ, ຕັ້ງໜ້າ, ປະດິດ​ສ້າງຂອງ​ຫວຽດນາມ. ​ໃນລະຫວ່າງ​ “ສາຍ​ລົມ​ຍ້ອນ​ກັບ” ຈາກ​ກະ​ແສ​ການ​ປົກ​ປ້ອງ​ການ​ຄ້ານັ້ນ, “​ເຮືອ​ເສດຖະກິດ” ຫວຽດນາມຍັງ​ຄົງ​ອອກ​ສູ່​ທະ​ເລ​ໃຫຍ່​ຢ່າງ​ໝັ້ນຄົງ. ພ້ອມ​ກັນ​ກັບ 10 ປະ​ເທດ​ສະມາຊິກ​ອື່ນ, ຫວຽດນາມ​ໄດ້​ລົງ​ນາມ​ໃນ​ສັນຍາ​ຄູ່​ຮ່ວມ​ມື​ຮອບດ້ານ​ແລະ​ກ້າວໜ້າ​ຂ້າມ​ປາຊີ​ຟິກ (CPTPP) ​ແລະ​ເປັນ​ໜຶ່ງ​ໃນ 7 ປະ​ເທດທີ່​ໃຫ້​ສັດຕະຍາບັນ​ສັນຍາ​ການ​ຄ້າ​ເສລີ​ຮຸ່ນ​ໃໝ່​ທຳ​ອິດ​ໃນ​ໂລກ, ຜ່ານ​ສິ່ງ​ດັ່ງກ່າວ​ນັ້ນ ຢືນຢັນ​ບົດບາດ​ເປັນ “ຕ່ອງ​ໂສ້ໜຶ່ງ” ​ໃນ​ບັນດາ​ສາຍ​ພົວພັນ​ເຊື່ອມ​ຕໍ່​ເສດຖະກິດ​ທີ່​ສຳຄັນ​ຢູ່​ໃນ​ພາກພື້ນ. ຫວຽດນາມ​ແລະ​ສະຫະພາບ​ເອີຣົບ (EU) ພວມ​ສຳ​ເລັດ​ຂັ້ນ​ຕອນ​ດ້ານ​ວິຊາ​ການ​ຂັ້ນ​ສຸດ​ທ້າຍ ​ເພື່ອ​ລົງ​ນາມ​ຢ່າງເປັນ​ທາງ​ການ​ແລະ​ໃຫ້​ສັດຕະຍາ​ບັນ ​ສັນຍາ​ການ​ຄ້າ​ເສລີ​ຫວຽດນາມ - ອີ​ຢູ (EVFTA). ຕາມ​ການ​ຄາດ​ຄະ​ເນ ​ເມື່ອສັນຍາ​ຄູ່​ຮ່ວມ​ມື​ຮອບດ້ານ​ແລະ​ກ້າວໜ້າ​ຂ້າມ​ປາຊີ​ຟິກ​ໄດ້​ຮັບ​ການ​ປະຕິບັດ ມັນ​ຈະ​ຊ່ວຍ​ໃຫ້ ຈີ​ດີ​ພີ ຂອງ​ຫວຽດນາມ​ເພີ່ມ​ຂຶ້ນ​ຕື່ມ​ອີກ 4,7% ຮອດ​ປີ 2035 ​ແລະ​ຊ່ວຍ​ໃຫ້ປະຊາຊົນ 600.000 ຄົນ​ຫຼຸ​ດພົ້ນ​ອອກ​ຈາກ​ຄວາມທຸກ​ຍາກ ຮອດ​ປີ 2030 ຢູ່​ໃນ​ລະດັບ​ລາຍ​ໄດ້​ມາດຕະຖານ 5,5 ​ໂດ​ລາ​ສະຫະ​ລັດ​ຕໍ່​ວັນ, ຜ່ານ​ນັ້ນ ປະກອບສ່ວນ​ແທດ​ຈິງ​ເຂົ້າ​ໃນ​ການ​ປະຕິບັດ​ບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ (SDGs).

ຕິດຕາມ​ແລະ​ປະຕິບັດ​ເປັນ​ຢ່າງ​ດີກາ​ນຊີ້​ນຳ​ຂອງ​ນາຍົກລັດຖະມົນຕີຢູ່ທີ່​ກອງ​ປະຊຸມ​ການ​ທູດ​ຄັ້ງ​ທີ່ 30 ທີ່​ວ່າ ​ໃຫ້​ເອົາ​ວິ​ສາ​ຫະກິດ​ແລະປະຊາຊົນ​ເປັນ​ໃຈກາງ ​ແລະ ​ພ້ອມ​ກັບ​ວິ​ສາ​ຫະກິດຂະຫຍາຍອອກ​ໄປ​ໃນ​ທົ່ວ​ໂລກ, ການ​ທູດ​ເສດຖະກິດ​ໄດ້​ປະກອບສ່ວນ​ທີ່​ສົມ​ກຽດ​ເຂົ້າ​ໃນ​ການ​ຊຸກຍູ້​ຍົກ​ສູງ​ມູນ​ຄ່າ​ການ​ຄ້າຂອງ​ຫວຽດນາມ ກັບ​ບັນດາ​ຄູ່​ຮ່ວມ​ການ​ຄ້າ​ລາຍໃຫຍ່ຄື ຈີນ, ອາ​ເມ​ບິ​ກາ, ສ.​ເກົາຫຼີ, ຍີ່ປຸ່ນ, ອີ​ຢູ. ປີ 2018, ຍອດ​ມູນ​ຄ່າ​ການ​ຄ້າ​ຂາ​ອອກຂາເຂົ້າຂອງ​ຫວຽດນາມ​ໄດ້ບັນລຸຈຳນວນ​ຫຼາຍ​ທີ່​ສຸດ​ຄື  475 ຕື້​ໂດ​ລາ​ສະຫະລັດ, ​ໃນ​ນັ້ນການສົ່ງ​ອອກ​ເກີນ​ດຸນ 7,7 ຕື້​ໂດ​ລາ​ສະຫະລັດ, ປະກອບສ່ວນ​ເຮັດ​ໃຫ້ການ​ເຕີບ​ໂຕ ຈີ​ດີ​ພີ ບັນລຸ 7,08% ​ເຊິ່ງ​ເປັນ​ລະດັບ​ສູງ​ສຸດ​ໃນ 10 ປີ​ທີ່​ຜ່ານ​ມາ.

ຂະ​ບວນວິວັດ​ການ​ເຊື່ອມ​ໂຍງ​ສາກົນ​ໃນ​ຂົງ​ເຂດ​ການ​ເມືອງ, ການ​ປ້ອງ​ກັນ​ປະ​ເທດ - ປ້ອງ​ກັນ​ຄວາມ​ສະຫງົບ ກໍ່​ມີ​ບາດກ້າວ​ໃໝ່​ຕື່ມ​ອີກ​ຫຼາຍ​ບາດກ້າວ. ການ​ປະກອບສ່ວນ​ຂອງ​ຫວຽດນາມ​ເຂົ້າ​ໃນພາລະກິດ​ການ​ຮັກສາສັນຕິພາບ​ແລະຄວາມ​ປອດ​ໄພ​ຂອງ​ສາກົນ ກໍ່​ມີ​ການຂະຫຍາຍຕົວ​ທາງ​ຄຸນ​ນະພາບ ດ້ວຍ​ການ​ສົ່ງ​ພະນັກງານ ​ນັກຮົບ​ຈຳນວນ​ໜຶ່ງ ​ແລະ ໜ່ວຍງານ​ທາງ​ການ​ແພດ (​ໂຮງໝໍ​ພາກ​ສະໜາມ​ຊັ້ນ II) ​​ຂອງ​ຫວຽດນາມ ​ເຂົ້າ​ຮ່ວມກຳລັງ​ຮັກສາ​ສັນຕິພາບຂອງ​ສະຫະ​ປະຊາ​ຊາດ​ຢູ່ ຊູ​ດານ​ໃຕ້. ບັນດາ​ການ​ຝຶກ​ຊ້ອມ​ຮ່ວມ​ກັນ, ການ​ຄົ້ນ​ຫາຊ່ວຍ​ເຫຼືອ​ກູ້​ໄພ, ການ​ພົບປະ​ແລກ​ປ່ຽນ​ມິດຕະພາບລະຫວ່າງ​ຫວຽດນາມ​ແລະ​ຈີນ, ອາ​ເມ​ລິ​ກາ, ຍີ່ປຸ່ນ, ອິ​ເດຍ, ສ.​ເກົາຫຼີ... ຕາມ​ແບບ​ສອງ​ຝ່າຍ ​ແລະ ​ໃນ​ຂອບອາ​ຊຽນ ​ໄດ້ປະກອບສ່ວນ​ເພີ່ມ​ທະວີ​ຄວາມ​ເຂົ້າ​ໃຈ​ແລະ​ຄວາມ​ໄວ້​ວາງ​ໃຈ​ທາງ​ການ​ເມືອງ​ຊຶ່ງ​ກັນ​​ແລະ​ກັນ.

ທີ​ສີ່, ການ​ຕ່າງປະ​ເທດ​ສືບ​ຕໍ່​ປະສານ​ສົມທົບ​ຢ່າງ​ແໜ້ນ​ແຟ້ນກັບການ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ສ້າງ​ເປັນ "ຂາ​ຕັ້ງ​ສາມ​ຂາ" ທີ່​ໝັ້ນຄົງ, ປະກອບສ່ວນ​ປົກ​ປັກ​ຮັກສາ​ອະທິປະ​ໄຕ​ແລະ​ຜືນ​ແຜ່ນດິນ​ອັນ​ຄົບ​ຖ້ວຍ​ຂອງ​ປະ​ເທດຊາດ. ການປົກ​ປັກ​ຮັກສາ​ປະ​ເທດລ່ວງ​ໜ້າ​ແຕ່​ກ່ອນ, ​ແຕ່​ໄກ; ປົກ​ປັກ​ຮັກສາ​ປະ​ເທດ​ແຕ່​ເມື່ອປະ​ເທດ​ບໍ່​ມີ​ຄວາມ​ສ່ຽງ ຍາມ​ໃດ​ກໍ່​ເປັນ​ຄຳ​ສັ່ງຈາກ​ຫົວ​ໃຈ​ຂອງ​ນັກຮົບ​ທຸກ​ຄົນ​ໃນ​ແນວ​ຮົບ​ການ​ຕ່າງປະ​ເທດ. ​ເສັ້ນ​ຊາຍ​ແດນ​ເທິງ​ບົກ​ຕິດ​ກັບ​ບັນດາ​ປະ​ເທດ​ເພື່ອນ​ບ້ານ ຈີນ, ລາວ ​ແລະ​ ກຳປູ​ເຈຍ ສືບ​ຕໍ່​ໄດ້​ຮັບ​ການ​ຄຸ້ມ​ຄອງ​ເປັນ​ຢ່າງ​ດີ, ​ໄດ້​ກາຍ​ເປັນ​ຊາຍ​ແດນ​ແຫ່ງ​ສັນຕິພາບ, ມິດຕະພາບ​ແລະ​ການ​ພັດທະນາ​ທີ່​ແທ້​ຈິງ. ຫວຽດນາມ​ແລະ​ກຳປູ​ເຈຍ​ພວມ​ສູ້​ຊົນ​​ເພື່ອຜັນ​ຂະຫຍາຍ​ການ​ຄຸ້ມ​ຄອງຕໍ່ 84% ຜົນງານ​ການ​ແບ່ງ​ເຂດ​ປັກ​ຫຼັດໝາຍ​ຊາຍ​ແດນ​ ຊຶ່ງ​ທັງສອງ​ຝ່າຍ​ໄດ້​ບັນລຸ. ​ໃນ​ເຂດ​ທະ​ເລ​ຕາ​ເວັນ​ອອກ, ພວກ​ເຮົາ​ສືບ​ຕໍ່​ປົກ​ປັກ​ຮັກສາ​ຢ່າງ​ໝັ້ນຄົງ​ຕໍ່ອະທິປະ​ໄຕ​ໃນ​ເຂດ​ທະ​ເລ ໝູ່​ເກາະ​ຂອງ​ປະ​ເທດ​ຊາດ ​ແລະ ສິດທິ​ແລະ​ຜົນ​ປະ​ໂຫຍດຕາມ​ກົດໝາຍ ສອດ​ຄ່ອງ​ກັບ​ອະນຸ​ສັນຍາ​ສະຫະ​ປະຊາ​ຊາດກ່ຽວ​ກັບ​ກົດໝາຍ​​ທະ​ເລ​ປີ 1982 (UNCLOS). ຮອບ​ທຳ​ອິດ​ຂອງ​ການ​ເຈລະຈາຢ່າງ​ເປັນ​ທາງ​ການກ່ຽວ​ກັບ ປະ​ມວນຂໍ້​ກຳນົດ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (COC) ທີ່​ໄດ້​ຈັດ​ຕັ້ງ​ຢູ່​​ເມືອງ​ຍາ​ຈາງ, ​ຫວຽດນາມ (​ເດືອນ​ມີນາ 2018) ​ໄດ້​ສ້າງ​ພື້ນຖານ​ເບື້ອງ​ຕົ້ນ​ເພື່ອ​ແນ​ໃສ່​ສ້າງ COC ໜຶ່ງ ​ທີ່​​ແທ້​ຈິງ, ມີ​ປະສິດທິ​ຜົນ ​ແລະ ມີ​ການ​ຜູກ​ມັດ. ສູນ​ກາງ​ພັກ​ກໍ່​ໄດ້​ປະກາດ​ໃຊ້​ມະຕິ​ສະບັບ​ທີ 36-NQ/TW, ລົງວັນ​ທີ 22-10-2018, ວ່າ​ດ້ວຍ​ຍຸດ​ທະ​ສາດການ​ພັດທະນາ​ເສດຖະກິດ​ທະ​ເລ​ຂອງ​ຫວຽດນາມ​ຢ່າງ​ຍືນ​ຍົງ​ຮອດ​ປີ 2030, ວິ​ໄສ​ທັດ​ຮອດ​ປີ 2045, ​ໃນ​ນັ້ນ ກຳນົດ​ຫວຽດນາມ​ຕ້ອງ​ກາຍ​ເປັນປະ​ເທດ​ທີ່​ເຂັ້ມ​ແຂງ​ທາງ​ດ້ານ​ທະ​ເລ, ພັດທະນາ​ເສດຖະກິດ​ທະ​ເລ​ແບບ​ຍືນ​ຍົງ ຕິດ​ແໜ້ນ​ກັບ​ການ​ຮັກສາ​ເອກະລາດ, ອະທິປະ​ໄຕ ​ແລະ ຜືນ​ແຜ່ນດິນ​ອັນ​ຄົບຖ້ວນ​ຂອງ​ຊາດ​ໄວ້​ຢ່າ​ງໝັ້ນຄົງ, ປະກອບສ່ວນ​ຮັກສາ​ສະພາບ​ແວດ​ລ້ອມສັນຕິພາບ, ສະຖຽນ​ລະ​ພາບ​ເພື່ອ​ການ​ພັດທະນາ. ນີ້​ກໍ່​ແມ່ນ​ຄວາມ​ປາຖະໜາ​ຂອງ​ປະຊາຊົນ​ຫວຽດນານ.

ຄຽງ​ຄູ່​ກັນກັບບັນດາ​ຈຸດ​ສະຫວ່າງ​ເທິງ​ນີ້, ຜົນສຳ​ເລັດທີ່​ໂດດ​ເດັ່ນໜຶ່ງຂອງ​ວຽກ​ງານ​ການ​ຕ່າງປະ​ເທດຄື ​ໄດ້​ຜັນ​ຂະຫຍາຍ​ວຽກ​ງານປົກ​ປ້ອງ​ພົນລະ​ເມືອງ​ແລະວຽກ​ງານ​ຊາວ​ຫວຽດນາມ​ຢູ່​ຕ່າງປະ​ເທດ ຢ່າງ​ທັນ​ການ​ແລະ​ມີ​ປະສິດທິ​ຜົນ​ທີ່​ສຸດ. ​ໃນ​ປີ 2018, ຫວຽດນາມ​ໄດ້​ປົກ​ປ້ອງ​ພົນລະ​ເມືອງ 11.000 ຄົນ (ເພີ່ມຂຶ້ນ 22% ທຽບ​ກັບ​ປີ 2017), ຊາວ​ປະມົງ 1.589 ຄົນ​ແລະ​ເຮືອ​ຫາ​ປາ 189 ລຳ. ຫວຽດນາມ​ໄດ້​ຍາດ​ແຍ່ງ​ການ​ພົວພັນ​ມິດຕະພາບ​ກັບ​ຫຼາຍ​ປະ​ເທດ, ​ເຊັ່ນ ອິນ​ໂດ​ເນ​ເຊຍ, ຟີ​ລິບ​ປິນ... ​ເພື່ອ​ຂົນ​ຂວາຍ​ການ​ປະພຶດ​ຢ່າງ​ມີ​ມະນຸດສະທຳຕໍ່​ພົນລະ​ເມືອງ​ແລະ​ຊາວ​ປະມົງ​ຂອງ​ຫວຽດນາມ. ຈັດ​ຕັ້ງ​​ໃຫ້​ຊາວ​ຫວຽດນາມ​ຢູ່​ຕ່າງປະ​ເທດ​ມີການ​ເຄື່ອນ​ໄຫວຢ່າງ​ອຸດົມສົມ​ບຸນ​ແລະ​ມີ​ຄວາມ​ໝາຍ, ປະກອບສ່ວນ​ປັບປຸງກຸ່ມ​ກ້ອນ​ມະຫາ​ສາມັກຄີ​ແຫ່ງ​ຊາດ ພ້ອມ​ກັນ​ຫັນ​ໜ້າ​ມາສູ່​ປະ​ເທດບ້ານ​ເກີດ​ເມືອງ​ນອນ, ປະກອບສ່ວນສະຕິ​ປັນຍາ​ແລະ​ກຳ​ລັງ​ວັງຊາ​ໃຫ້​ແກ່​ການ​ສ້າງສາ​ແລະ​ປົກ​ປັກ​ຮັກສາ​ປະ​ເທດ​ຊາດ.

​ໃນ​ສະພາບ​ການ​ເຊື່ອມ​ໂຍງສາກົນ​ຢ່າງ​ເລິກ​ເຊິ່ງຂອງ​ປະ​ເທດ, ການ​ທູດ​ວັດທະນະທຳ ​ແລະ ການ​ໂຄສະ​ນາສື່​ຂ່າວການ​ຕ່າງປະ​ເທດ ​ໄດ້​ແລະ​ພວມ​ມີ​ບົດບາດ​ສຳຄັນ​ທີ່​ສຸດ​ ໃນ​ການ​ໂຄສະນາສົ່ງ​ເສີມ​ຮູບພາບ​ປະ​ເທດຫວຽດນາມ​ທີ່ປ່ຽນ​ແປງ​ໃໝ່, ​ເຊື່ອມ​ໂຍງ​ສາກົນ, ມີ​ສະຖຽນ​ລະ​ພາບ, ຮັກ​ແພງ​ເພື່ອນ​ມິດ ​ແລະ ມີ​ເອກະລັກຫຼາກ​ຫຼາຍ. ພິ​ເສດ, ການ​ທີ່​ອຸ​ທະຍານ​ທໍ​ບະ​ນີ​ ນອນ​ເນື້ອ​ກກາວ​ບັ່ງ ​ແລະ “ຮວ່າງ​ຮວາ​ສື​ຈິ່ງໂດ່” ​ໄດ້​ຮັບ​ການ​ຮັບຮອງ​ເປັນ​ມໍ​ລະ​ກົກ​ໂລກ​ຈາດ UNESCO ​ໄດ້​ເຮັດ​​ໃຫ້ມໍລະດົກ​ວັດທະນະທຳ​ໂລກ​ຂອງ​ຫວຽດນາມ​ມີ​ຄວາມ​ອຸດົມສົມ​ບຸນ​ຍິ່ງ​ຂຶ້ນ. ຄວາມ​ພະຍາຍາມ​ເຫຼົ່າ​ນີ້​ໄດ້​​ປະກອບສ່ວນ​ດຶງ​ດູດ​ແລະຍົກ​ຈຳນວນ​ນັກ​ທ່ອງ​ທ່ຽວສາກົນ​ມາ​ຫວຽດນາມ​ໃນ​ປີ​ທີ່​ຜ່ານ​ມາຂຶ້ນ​ເຖິງຫຼາຍ​ກວ່າ 15 ລ້ານ​​ຄົນ.

​ເບິ່ງ​ລວມ​ແລ້ວ, ສາມາດ​ເຫັນ​ໄດ້​ວ່າ ບັນດາ​ຜົນສຳ​ເລັດ​ທີ່ສຳຄັນ​ໃນວຽກ​ງານ​ການ​ຕ່າງປະ​ເທດ​ຂອງ​ພັກ​ແລະ​ລັດ​ໃນ​ປີ 2018 ​ໄດ້​ປະກອບສ່ວນ​ທີ່​ສົມ​ກຽດ​ເຂົ້າ​ໃນ​ພາລະກິດ​ການ​ສ້າງສາ​ແລະ​ປົກ​ປັກ​ຮັກສາ​ປະ​ເທດ​ຊາດ, ພ້ອມ​ກັນ​ນັ້ນ​ກໍ່​ວາງຕຳ​ແໜ່​ງຫວຽດນາມ​ໃນ​ທາງ​ທີ່​ໝັ້ນ​ຄົງ​ກວ່າ​ອີກ​ໃນ​ພາກ​ພື້ນ​ແລະ​ທົ່ວ​ໂລກ.

​ເຊື່ອ​ໝັ້ນ​ຕໍ່​ໄລຍະ​ທາງ​ຂ້າງ​ໜ້າ

ດ້ວຍ​ບັນດາ​ຜົນສຳ​ເລັດ​ທີ່​ສຳຄັນ​ໃນ​ປີ 2018 ​ແລະ​ຄວາມ​ຕັດສິນ​ໃຈ​ສູງ, ຂະ​ແໜງ​ການ​ທູດ​ຫວຽດນາມທັງ​ໝົດ​ພວມ​ກ້າວ​ເຂົ້າ​ສູ່​ປີ 2019 ດ້ວຍ​ຈິດ​ໃຈ​ປະດິດ​ສ້າງ, ບຸກທະລຸ ​ແລະ ​ເອົາ​ຊະນະ​ຕົວ​ເອງ, ຫັນ​ໄປ​ສູ່​ປະຕິບັດ​ຢ່າງ​ສຳ​ເລັດ​ມີ​ໄຊ ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ​ ຄຳ​ຊີ້​ນຳ​ຂອງ​ເລຂາທິການ​ໃຫຍ່ ຫງວຽນ​ຝູຈ້ອງ ​ແລະ ນາຍົກລັດຖະມົນຕີ ຫງວຽນຊວັນ​ຝຸກ ຢູ່​ທີ່​ກອງ​ປະຊຸມ​ການ​ທູດ​ຄັ້ງ​ທີ 30. ບັນດາໜ້າທີ່​ທີ່​ສຳຄັນ​ຂອງ​ການ​ຕ່າງປະ​ເທດ​ຫວຽດນາ​ໃນ​ປີ 2019 ​ແມ່ນ: ສືບ​ຕໍ່​ຮັກສາ​ສະພາບ​ແວດ​ລ້ອມ​ສັນຕິພາບ, ສະຖຽນ​ລະ​ພາບ​​ເພື່ອ​ການ​ພັດທະນາ; ປົກ​ປັກ​ຮັກສາ​ເອກະລາດ, ອະທິປະ​ໄຕ​ ແລະ​ຜືນ​ແຜ່ນອັນ​ຄົບ​ຖ້ວນ​ຂອງ​ຊາດ​ໄວ້​ຢ່າງໝັ້ນຄົງ; ​ເພີ່ມ​ທະວີ​ການ​ພົວພັນ​ກັບ​ບັນດາ​ຄູ່​ຮ່ວມ​ມື​ໃຫ້​ເຂົ້າ​ສູ່​ລວງ​ເລິດ, ມີ​ປະສິດທິ​ຜົນ ​ແລະ ​ຍືນ​ຍົງ​ກວ່າ​ອີກ; ຜັນ​ຂະຫຍາຍ​ເປັນ​ຢ່າງ​ດີ ຄຳ​ສັ່ງ​​ເລກ​ທີ 25-CT/TW ຂອງ​ຄະນະ​ເລຂາ​ທິການ ວ່າ​ດ້ວຍການ​ຍູ້​ແຮງ​ແລະ​ຍົກ​ລະດັບ​ການ​ຕ່າງປະ​ເທດ​ພະຫຸ​ພາຄີ​ຮອດ​ປີ 2030, ​ໂດຍ​ສະ​ເພາະ​ແມ່ນ ສຳ​ເລັກ​ວຽກ​ງານ​ກະກຽມ​ທຸກ​ດ້ານ​ເພື່ອ​ແນ​ໃສ່​ຮັບຜິດ​ຊອບ​ໜ້າ​ທີ່​ທີ່​ສຳຄັນ​ ໃນບັນດາ​ເວທີ​ປາ​ໄສ​ພະຫຸ​ພາຄີ​ທີ່​ສຳຄັນ, ​ເຊັ່ນ ອາຊຽນ ​ແລະ ສະຫະ​ປະຊາ​ຊາດ; ຮັກສາ​ໄດ້​ທ່ວງທ່າ​ການ​ເຊື່ອມ​ໂຍງ​ສາກົນ, ​ໂດຍ​ສະ​ເພາະ​ແມ່ນ​ຜັນ​ຂະຫຍາຍ​ຢ່າງ​ມີ​ປະສິດທິ​ຜົນ ສັນຍາ CPTPP ​ແລະ ບັນດາ​ສັນຍາ​ການ​ຄ້າ​ເສລີ​ຮຸ່ນ​ໃໝ່ອື່ນໆ; ກ້າວ​ເຂົ້າ​ສູ່​ໄລຍະ​ການ​ເຊື່ອມ​ໂຍງ​ເສດຖະກິດ​ສາກົນ​ທີ່​ເລິກ​ເຊິ່ງກວ່າ​ເກົ່າ. ​ເພື່ອ​ປະຕິບັດ​ໜ້າ​ທີ່​​ເຫຼົ່າ​ນີ້​​ໃຫ້ສຳ​ເລັດ​ເປັນ​ຢ່າງ​ດີ, ທົ່ວ​ຂະ​ແໜງການຈະ​ສືບ​ຕໍ່ສູ້​ຊົນກໍ່ສ້າງພື້ນຖານ​ການ​ທູດ​ຫວຽດນາມ​ເປັນ​ມື​ອາຊີບ, ທັນ​ສະ​ໄໝ​ເທື່ອ​ລະ​ກ້າວ, ສົມ​ກຽດ​ກັບ​ລະດັບ​ໜ້າ​ທີ່​ໃນ​ສະພາບ​ການ​ໃໝ່.

ດ້ວຍທ່າ​ແລະ​ກຳລັງ​ໃໝ່ຂອງ​ປະ​ເທດ​ພາຍຫຼັງ 30 ກວ່າປີ​ແຫ່ງ​ການ​ປ່ຽນ​ແປງ​ໃໝ່, ດ້ວຍ​ການ​ນຳພາ​ທີ່​ຖືກຕ້ອງ​ຂອງ​ພັກ​ແລະ​ລັດ, ສະຕິ​ປັນຍາ​ແລະ​ຄວາມ​ກ້າຫານ​ຂອງ​ການ​ທູດ​ຫວຽດນາມຈະ​ສືບ​ຕໍ່​ໄດ້​ຮັບ​ການ​ຢືນຢັນ, ​ເກັບ​ກ່ຽວຜົນສຳ​ເລັດ​ທີ່​ຍິ່ງ​ໃຫຍ່​ຕື່ມ​ອີກ, ປະກອບສ່ວນ​ທີ່​ເໝາະ​ສົມ​ເຂົ້າ​ໃນ​ການ​ສ້າງສາ​ແລະ​ປົກ​ປັກ​ຮັກສາ​ປະ​ເທດ​ຊາດ./.

 ​ໂດຍ ຟ້າ​ມບິ່ງ​ມິ​ງ

ກຳມະການ​ກົມ​ການ​ເມືອງ, ຮອງ​ນາ​ຍົດ​ລັດຖະມົນ​ຕິ,

ລັດຖະມົນຕີ​ກະຊວງ​ການ​ຕ່າງປະ​ເທດ

--------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 915 (​ເດືອນ​ມັງກອນ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ