ວັນພະຫັດ, 25/4/2019
ການພົວພັນຕ່າງປະເທດທາງພັກ ປີ 2018 ໄດ້ປະກອບສ່ວນອັນສຳຄັນເຂົ້າໃນ ຜົນສຳເລັດອັນດີເດັ່ນ ຂອງການພົວພັນຕ່າງປະເທດ ແລະ ຜົນສຳເລັດລວມ ຂອງປະເທດ
10/4/2019 8:32' ສົ່ງ ພິມ
ທ່ານຮ່ວາງບິ່ງກວັນ ຫົວໜ້າຄະນະພົວພັນຕ່າງປະເທດສູນກາງ ພັກກອມມູນິດຫວຽດນາມ ແລະ ທ່ານ ກ.ບ. ຊູມມາເຊ ເລຂາທິການສູນກາງພັກ ນູໂອຕານ ປະເທດສາທາລະນະລັດ ກາຊັກສະຖານ ລົງນາມໃນເອກະສານການຮ່ວມມື ລະຫວ່າງສອງພັກ. (ພາບ: nhandan.com.vn)

ໃນ​ປີ​ທີ່​ຜ່ານ​ມາ, ສະ​ພາບ​ຄວາມ​ປອດ​ໄພ-ການ​ເມືອງ​ໂລກ​ ມີການ​ປ່ຽນ​ແປງ​ຢ່າງ​ໄວ​ວາ, ສັບ​ສົນ, ຄາດ​ເດົາ​ຍາກ, ​​ໄດ້ສົ່ງ​ຜົນ​ກະ​ທົບ​ຕາມຫຼາຍ​ທິດ, ຫຼາຍ​ລະ​ດັບ​ ເຖິງ​ຄວາມ​ຄວາມ​ປອດ​ໄພແລະການ​ພັດທະ​ນາ​ຂອງ​ທຸກໆ​ປະ​ເທດ, ໃນ​ນັ້ນ​ມີ​ປະ​ເທດຫວຽດ​ນາມ. ບັນ​ດາ​ປະ​ເທດ​ໃຫຍ່​​ໄດ້ມີ​ການ​ດັດ​ແປງ​ນະ​ໂຍ​ບາຍ​ຢ່າງ​ໄຫວພິບ​, ຍູ້​ແຮງ​ການ​ປະ​ຕິ​ບັດ​ບັນ​ດາ​ເປົ້າ​ໝາຍ​ຍຸດ​ທະ​ສາດ​ລະດັບ​ພາກ​ພື້ນແລະ​ໂລກ, ສ້າງ​ການ​ແຂ່ງ​ຂັນ, ຊ່ວງຊີງ​ກັນ​ຢ່າງ​ເຄັ່ງ​ຮ້ອນ​ທາງ​ດ້ານ​ການ​ເມືອງ, ການ​ທະ​ຫານ, ເສດ​ຖະ​ກິດ ກໍ່​ຄື​​ຄວາມ​ສັບ​ສົນ​ໃນ​ກ​ານ​ເຕົ້າ​ໂຮມ​ກຳ​ລັງ. ລັດ​ທິ​ຊາດ​ນິ​ຍົມ, ປະ​ຊາ​ນິ​ຍົມ, ​ປະ​ໂຫຍດນິຍົມ ​ໄດ້​ພື້ນ​ຕົ​ວ​ຂຶ້ນ​ຢ່າງ​ແຂງ​ແຮງ; ກົດ​ໝາຍ​ສາ​ກົນ, ບັນ​ດາ​ກົນ​ໄກຫຼາຍ​ຝ່າ​ຍ ຕ້ອງ​ປະ​ເຊີນ​ກັບສິ່ງ​ທ້າ​ທຍຫຼາຍກວ່າ​​ເກົ່າ; ທ່າ​ອຽງ​​ອຳ​ນາດບາດ​ໃຫຍ່, ການບັງຄັບ, ການປະ​ພຶດ​ຕາມ​ລຳພັງ​ຝ່າຍ​ດຽວ​ ​ມີ​​ແນວ​ໂນ້ມທີ່​ຈະ​ເພີ່ມ​ຂຶ້ນ; ບັນ​ດາ​ກົນ​ໄກ​ການ​ຄຸ້ມ​ຄອງ​ລະດັບ​ພາກ​ພື້ນແລະທົ່ວ​ໂລກ ​​ປະ​ເຊີນ​ກັບ​ສິ່ງທ້າ​ທາຍຫຼາຍ​ຢ່າງ ແລະ ຫຼຸດຜ່ອນ​ພະລະ​ບົດ​ບາດ ​ໃນ​ການ​ແກ້​ໄຂ​ບັນ​ຫາ​ສາ​ກົນ​ທີ່​ເກີດ​ຂຶ້ນ​ໃນ​ປະ​ຈຸ​ບັນ​. ບັນ​ດາ ຈຸດ​ຮ້ອນ” ຢູ່ຕາ​ເວັນ​ອອກ​ກາງ, ​ອາ​​ຟ​ຣິກກາ, ອາ​ຊີ-ປາ​ຊີ​ຟິກ ລ້ວນ​ແຕ່​ຫັນ​ປ່ຽ​ນ​ຢ່າງ​ສັບ​ສົນ​ກວ່າ​ເກົ່າ. ພາກ​ພື້ນອາ​ຊີ-ປາ​ຊີ​ຟິກນັບ​ມື້​ນັບຖືກຖື​ເປັນ​ສຳ​ຄັນສຳລັບ​ບັນ​ດາ​ປະ​ເທດ​ພາຍ​ໃນ​ ແລະນອກ​ພາກ​ພື້ນ​, ແຕ່​ວ່າ ນີ້ກໍ່​ແມ່ນ​ພາກ​ພື້ນ​ທີ່​ເຕົ້າ​ໂຮມບັນດາ​ຄວາມ​ຂັດ​ແຍ່ງ​ໃຫຍ່​ຂອງ​ໂລກ, ເປັນ​ບ່ອນ​ທີ່ມີ​ການຕັດ​​ໄຂວ່​ກັນ​ ລະຫວ່າງ​ບັນດາ​ຜົ​ນປະ​ໂຫຍດ​ພື້ນ​ຖານ ກໍ່​ຄືມີ​ຄວາມ​ແຂ່ງ​ຂັນ​ຍຸດ​ທະ​ສາດ​ຮອບ​ດ້ານ​ລະ​ຫວ່າງ​ບັນ​ດາ​ປະ​ເທດ​ໃຫຍ່. ຂໍ້​ຂັດ​ແຍ່ງ​ທາງດ້ານ​ອ​ະ​ທິ​ປະ​ໄຕ​​​ໃນອານາ​ເຂດ, ທະ​ເລ, ເກາະ​ທະ​ເລ ​ມີຄວາມ​ສັບ​ສົນ​ທີ່​ສຸດ, ​ເປັນອັນຕະລາຍ​ຕໍ່ສັນ​ຕິ​ພາບ, ສະ​ຖຽມ​ລະ​ພາບ​​ໃນພາກ​ພື້ນ, ​ເປັນ​ສິ່ງ​ທ້າ​ທາຍ​ຕໍ່ອຳນາດອະ​ທິ​ປະ​ໄຕ ​ແລະ ​ອະ​ທິ​ປ​ະ​ໄຕ​ຂອງ​ບັນ​ດາປະ​ເທດ. ເສດ​ຖະ​ກິດ​ໂລກ​ຍັງສືບ​ຕໍ່​​ຟື້ນ​ຟູ, ແຕ່​​ຊ້າລົງ ແລະ ມີຄວາມ​ສ່ຽງ, ​ໂດຍສະ​ເພາະ​ແມ່ນ​ຍ້ອນ​ການ​ແຂ່ງ​ຂັນ​ດ້ານການ​ຄ້າ, ຄວາມ​ບໍ່​ໝັ້ນຄົງ​ທາງດ້ານ​ພູ​ສາດ-ການ​ເມືອງ​ຢູ່​ໃນ​ບັນດາ​ພາກ​ພື້ນ ແລະ ໜີ້​ສາ​ທາ​ລະ​ນະ​ສູງ. ການ​ເຊື່ອມ​​ຕໍ່ເສດ​ຖະ​ກິດ​ສາ​ກົນ ​ແລະ ການ​ເປີດ​ເສລີ​ການ​ຄ້າ​ ສືບ​ຕໍ່​ໄດ້​ຮັບ​ການ​​ຊຸກ​ຍູ້​​ໂດຍ​ປະ​ເທດຕ່າງໆ, ແຕ່ກໍ່​ພົບ​ຄວາມ​ຫຍຸ້ງ​ຍາກກວ່າອີກ ຍ້ອນ​ການ​ເພີ່ມ​ຂຶ້ນ​ຂອງ​ບັນ​ດາ​ມາດ​ຕະ​ການ​ປົກ​ປ້ອງ. ​ປັດ​ໃຈ​​ເຫຼົ່ານັ້ນ​ກຳ​ລັງ​ເຮັດ​ໃຫ້​ລັກ​ສະ​ນະ​ບໍ່​ໝັ້ນຄົງ, ບໍ່​​ແນ່ນອນ ແລະ ຜິດ​ປົກ​ກະ​ຕິ​ຂອງ​ສະ​ພາບ​ການ​ໂລກ​ເພີ່ມ​ຂຶ້ນ.

ໃນ​ສະ​ພາ​ບ​ການ​ດັ່ງ​ກ່າວນັ້ນ, ປີ 2018 ການ​ພົວ​ພັນ​ຕ່າງ​ປະ​ເທດ​ທາງ​ພັກ​ ​ໄດ້​ຕັ້ງໝັ້ນ​ໃນແນວ​ທາງ​ການ​ພົວ​ພັນ​ຕ່າງ​ປະ​ເທດ​ຂອງກອງ​ປະ​ຊຸມ​ໃຫຍ່​ຄັ້ງ​ທີ XII ຂອງ​ພັກ, ຍົກ​ສູງ​ລັກ​ສະ​ນະ​ເປັນ​ເຈົ້າ​ການ, ຕັ້ງ​ໜ້າ, ປະ​ດິດ​ສ້າງ, ຜັນ​ຂະ​ຫຍາຍ​ການ​ເຄື່ອນ​ໄຫວ​ຢ່າງມີ​ຈຸດ​ໜັກ​ໃຈ​ກາງ ​ແລະ ບັນ​ລຸ​ໄດ້​ຜົນ​ງານທີ່​ສຳ​ຄັນຫຼາຍ​ຢ່າງ.

ບາງ​ຜົນ​ງານ​ໃຫຍ່​ຂອງການ​ເຄື່ອນ​ໄຫວ​ພົວ​ພັນ​ຕ່າງ​ປະ​ເທດ​ທາງ​ພັກ ໃນ​ປີ 2018

ທີ​ໜຶ່ງ, ພັກ​ກອມ​ມູ​ນິດຫວຽດ​ນາມ ໄດ້​ເປັນ​ເຈົ້າ​ການ​ຊຸກ​ຍູ້​ການ​ພົວ​ພັນ​ກັບ​ບັນ​ດາ​ພັກ​ທີ່​ກຳ​ອຳ​ນາດ​ຢູ່​ບັນ​ດາ​ປະ​ເທດ​ສັງ​ຄົມ​ນິ​ຍົມ ແລະ ປະ​ເທດ​​ເພື່ອນ​ບ້ານໃກ້​ຄຽງທີ່​ມີ​ຊາຍ​ແດນ​ຮ່ວມ​ກັນ, ​ຜ່ານນັ້ນ​ ການ​ພົວ​ພັນ​ໄດ້​ຮັບ​ການ​ປັບ​ປຸງ ແລະ ມີ​ບາດ​ກ້າວ​ພັດ​ທະ​ນາ​ທີ່ສຳ​ຄັນ; ການ​ພົວ​ພັນ​ຕາມຊ່ອງທາງ​ພັກ ໄດ້​ປະ​ກອບ​ສ່ວນ​ເຂົ້າ​ໃນ​ການ​ເພີ່ມ​ທະ​ວີ​ຄວາມ​ໄວ້​ວາງ​ໃຈ​ທາງ​ການ​ເມືອງ, ສ້າງ​ພື້ນ​ຖານ​ການ​ເມືອງ ແລະ ຮັກ​ສາ​ບົດ​ບາດ​ກຳ​ນົດ​ທິດ​​ຍຸດ​ທະ​ສາດ​ໃນ​ການ​ພົວ​ພັນ​ລະ​ຫວ່າງຫວຽດ​ນາມ ແລະ ປະ​ເທດ​ເພື່ອນ​ມິດ​ຕ່າງໆ.

ພັ​ກກອມ​ມູ​ນິດຫວຽດ​ນາມພ້ອມ​ກັບພັກ​ປະຊາຊົນ​ປະຕິວັດ​ລາວ ໄດ້ພັດທະນາການ​ພົວພັນ​ລະຫວ່າງ​ສອງ​ພັກ​ໃຫ້ເຂົ້າ​ສູ່​ລວງ​ເລິກ, ປັບ​ປຸງ​ຄວາມ​​ໄວ້​ວາງ​ໃຈ​ທາງ​ການ​ເມືອງ ແລະ ເສີມ​ຂະ​ຫຍາຍ​ປະ​ສິດ​​ທິຜົນ​ການ​ພົວ​ພັນ​ສາ​ມັກ​ຄີ​ແບບ​ພິ​ເສດ, ຮອບ​ດ້ານ​ລະ​ຫວ່າງ​ສອງ​ພັກ, ສອງ​ລັດ. ບັນ​ດາແຜນ​ນະ​ໂຍ​ບາຍ, ມາດ​ຕະ​ການ​ຮ່ວມ​ມືຈຸດໜັກ​ໃຈ​ກາງ​ ມີ​ລັກ​ສະ​ນະ​ຍຸດ​ທະ​ສາດ ​ໄດ້​ຮັບ​ການຊີ້​ນຳ​​ຂອງການ​ນຳ​ຂັ້ນ​ສູງ​ຂອງ​ສອງ​ພັກ ແຕ່​​ຕົ້ນ​ປີ 2018 ເຊິ່ງ​ໄດ້ປະ​ຕິ​ບັດດ້ວຍ​ຄວາມ​ມາ​ນະ​ພະ​ຍາ​ຍາມສູງ​; ຄວາມຮັບ​ຮູ້​ກ່ຽວ​ກັບ​ຄວາມ​ສຳ​ຄັນ​ຍຸດ​ທະ​ສາດ​ຂອງ​ການ​ພົວ​ພັນ​ລະຫວ່າງ​ສອງ​ພັກ ຕໍ່​ກັບການ​ພົວ​ພັນ​ລະຫວ່າງສອງ​ປະ​ເທດ​ ໄດ້​ຮັບ​ການ​ຍົກ​ສູງ​ຢ່າງບໍ່​ຢຸດຢັ້ງ. ໃນ​ປີ 2018, ສອງ​ພັກ​ໄດ້​​ປະ​ສານ​ສົມ​ທົບ​ຜັນ​ຂະ​ຫຍາຍ​ຢ່າງ​ມີ​ປະ​ສິດ​ທິ​ຜົນ ຫຼາຍ​ກົນ​ໄກ​ຮ່ວມ​ມື​ທີ່ສຳ​ຄັນ​ຢູ່​​ໃນ​ລະດັບ​ສູງ​ສຸດ ກໍ່​ຄື​ຢູ່​​ໃນ​ລະດັບ​ອົງການ​ທີ່​ປຶກສາ​ຂອງ​ພັກ; ບັນ​ດາ​ຮູບ​ການ​ແລກ​ປ່ຽນ​ຂໍ້​ມູນ​ຂ່າວ​ສານ, ທິດ​ສະ​ດີ, ບົດ​ຮຽນ​ພຶດ​ຕິ​ກຳ... ໄດ້​ຜັນ​ຂະ​ຫຍາຍ​ຢ່າງໄຫວພິບ, ຫຼາຍ​ຮູບຫຼາຍ​ແບບ, ເປັ​ນ​ຕົ້ນ​ແມ່ນ ສອງ​ພັກໄດ້​ຈັດ​ຕັ້ງການ​ສຳ​ມະ​ນາ​ທິດ​ສະ​ດີ ຄັ້ງ​ທີ​ 6 (ເດືອນກໍ​ລະ​ກົດ 2018) ຢ່າງ​ມີ​ປະ​ສິດ​ທິ​ຜົນ ດ້ວຍ​ຫົວ​ຂໍ້ ວຽກ​ງານ​ແນວ​ຄິດ​ໃນ​ເງື່ອນ​ໄຂ​ປະ​ຈຸ​ບັນ - ສະ​ພາບ​ຕົວ​ຈິງ, ບັນ​ຫາ​ທີ່​ວາງ​ອອກມາ ແລະ ວິທີ​ແກ້”, ໄດ້​ປະ​ກອບ​ສ່ວນ​ຢ່າງ​ແທ້​ຈິງ​ເຂົ້າ​ໃນ​ວຽກ​ງານ​ຄົ້ນ​ຄວ້າ​ທິດ​ສະ​ດີ ແລະ ສະຫຼຸບ​ພຶດ​ຕິ​ກຳ, ຮັບ​ໃຊ້​​ໃຫ້​ແກ່​ການ​ກຳ​ອຳ​ນາດ​ຂອງ​ສອງ​ພັກ. ຫວຽດ​ນາມໄດ້​ຜັນ​ຂະ​ຫຍາຍ​ຢ່າງ​ມີ​ປະ​ສິດ​ທິ​ຜົນ​ ການ​ຈັດ​ຕັ້ງ​ບັນ​ດາຊຸດ​ຝຶກ​ອົບຮົມ​ບຳ​ລຸງ​​ສ້າງພະ​ນັກ​ງານ​ເພື່ອ​ຊ່ວຍ​ໃຫ້​ຝ່າຍລາ​ວ. ກົນ​ໄກການ​ຢ້ຽມ​ຢາມ​ຢ່າງ​ເປັນ​ທາງ​ການ, ຢ້ຽມ​ຢາມ​ແບບ​ພາຍ​ໃນ​ຂອງ​ພະ​ນັກ​ງານ​ການ​ນຳ​ຂັ້ນ​ສູງ​ຂອງ​ສອງ​ພັກ ໄດ້​ຮັບ​ການ​ຍູ້​ແຮງ, ໃນ​ນັ້ນ​ມີ​ການ​ຢ້ຽມ​ຢາມຫວຽດ​ນາມ ຂອງທ່ານ ບຸນ​ຍັງ ວໍ​ລະ​ຈິດ ​ເລ​ຂາ​ທິ​ການ​ໃຫຍ່, ປະ​ທານ​ປະ​ເທດ​ລ​າວ ແລະ ການ​ຢ້ຽມ​ຢາມ​ຂອງ​ບັນ​ດາ​ທ່ານກຳ​ມະ​ການ​ກົມ​ການ​ເມືອງ, ຄະ​ນະ​ເລ​ຂາ​ທິ​ການຂອງ​ສອງ​ພັກ ​ເປັນຫຼາຍ​ຄັ້ງ.

ການ​ພົວພັນ​ກັບພັກ​ກອມ​ມູ​ນິດຈີນ, ກາ​ນ​ພົວ​ພັນ​ຕ່າງ​ປະ​ເທດທາງ​ພັກ ໃນ​ປີ 2018 ໄດ້​ເປັນ​ໄປຢ່າງ​ຟົດ​ຟື້ນ, ມີ​ປະ​ສິດ​ທິ​ຜົນ; ການ​ພົວ​ພັນ​ລະ​ຫວ່າງ​ສອງ​ພັກ​ສືບ​ຕໍ່​ຖືບົດ​ບາດ​ສຳ​ຄັນ, ກຳ​ນົດ​ທິດ ແລະ ນຳ​ພາ​ການ​ພັດ​ທະ​ນາ​ຢ່າງ​ໝັ້ນຄົງຂອງການ​ພົວ​ພັນລະຫວ່າງສອງ​ປະ​ເທດ. ບັນ​ດາ​ກົນ​ໄກ​ຮ່ວມ​ມື​ລະ​ຫວ່າງ​ສອງ​ພັກໄດ້​ເສີມ​ຂະ​ຫຍາຍ, ​ເຂົ້າ​ສູ່​ລວງ​ເລິກ, ແທ້​ຈິງ, ມີ​ປະ​ສິດ​ທິ​ຜົນ​ກວ່າ​ເກົ່າ. ອີກ​ດ້ານ​ໜຶ່ງ, ການ​ພົວ​ພັນ​ລະ​ຫວ່າງ​ສອງ​ພັກ​ໄດ້​ຮັບ​ການ​ເປີດກວ້າງ​ຢູ່​ໃນ​ທຸກ​ລະ​ດັບ, ແຕ່​ຂັ້ນ​ການ​ນຳ​ສູງ​ສຸດ​ຂອງ​ສອງ​ພັກ, ​ບັນ​ດາ​ຄະ​ນະ​ຂອງ​ສູນ​ກາງ, ບັນ​ດາອົງຄະ​ນະ​ພັກ​ແຂວງ, ອົງ​ຄະ​ນະ​ພັກ​ນະ​ຄອນ ຈົນ​ເຖິງບັນ​ດາ​ອົງ​ການ​ຈັດ​ຕັ້ງ​ພັກ​ຢູ່​ທ້ອງ​ຖີ່ນ. ການ​ແລກ​ປ່ຽນ​ຄ​ະ​ນະ​ຜູ້​ແທນ​ຂັ້ນ​ສູງ​ຂອງທັງ​ສອງ​ພັກ​, ​ໂດຍ​ສະ​ເພາະ​ແມ່ນ​​ກຳ​ມະ​ການ​ກົມ​ການ​ເມືອງ, ເລ​ຂາ​ທິ​ການ​ສູນ​ກາງ​ພັກ, ​ໄດ້​ບັນ​ລຸ​ແລະປັບ​ປຸງ​​ຄວາມ​ຮັບ​ຮູ້​ທົ່ວ​ໄປ​ທີ່​ສຳຄັນ​ໃນ​ລະດັບ​ສູງ, ​ຜ່ານນັ້ນ​​ເພີ່ມຄວາມ​ໄວ້​ວາງ​ໃຈ​ທາງ​ການ​ເມືອງ​ລະ​ຫວ່າງ​ສອງ​ປະ​ເທດ, ຄວບ​ຄຸມແລະແກ້​ໄຂຄວາມ​ຂັດ​ແຍ່ງ, ໃນ​ນັ້ນ​ມີ​ບັນ​ຫາ​ທະ​ເລ​ຕາ​ເວັນ​ອອກ. ໃນ​ປີ​ທີ່​ຜ່ານ​ມາ, ສອງ​ພັກ​ກໍ່​ໄດ້​ຈັດ​ຕັ້ງ​ການ​ສຳ​ມະ​ນາ​ທິດ​ສະ​ດີ​ຄັ້ງ​ທີ 14 (ເດືອນ ກໍ​ລະ​ກົດ 2018) ພາຍ​​​ໃຕ້​ຫົວ​ຂໍ້ ພຶດ​ຕິ​ກຳ ແລະ ບົດ​ຮຽນ​ການ​ປ່ຽນ​ແປງ​ໃໝ່​ຂອງຫວຽດ​ນາມ ແລະ ການ​ປະ​ຕິ​ຮູບ, ເປີດ​ປະ​ຕູ​ຂອງ​ຈີນ; ຈັດ​ຕັ້ງ​​ຊຸດ​ຝຶກ​ອົບຮົມ​ສຳລັບພະ​ນັກ​ງານຫວຽດ​ນາມ. ພ້ອມກັນ​ນັ້ນ, ໃນ​ປີ​ທີ່​ຜ່ານ​ມາ, ຫວຽດ​ນາມກໍ່​​ໄດ້​ເປັນ​ເຈົ້າ​ການ​ທີ່​ສຸດ​ໃນ​ການ​ເຄື່ອນ​ໄຫວພົວ​ພັນ​ຕ່າງ​ປະ​ເທດ​ຕາມຊ່ອງທາງ​ພັກ ເພື່ອ​ແລກ​ປ່ຽນ, ຄົ້ນຄວ້າທາບ​ທາມບົດຮຽນ​ກ່ຽວ​ກັບການກໍ່​ສ້າງ​ພັກ, ບັນ​ດາ​ຂົງ​ເຂດ​ວຽກ​ງານ​ຂອງ​ພັກ, ວຽກ​ງານ​ປ້ອງ​ກັນ​ແລະຕ້ານ​ການ​ສໍ້​​ລາດ​ບັງຫຼວງ...

ການພົວພັນ​ກັບ​ພັກ​ປະ​ຊາ​ຊົນກຳ​ປູ​ເຈຍ, ການເຄື່ອນ​ໄຫວ​​ພົວ​ພັນ​ຕ່າງ​ປະ​ເທດ​ທາງ​ພັກ ທັງ​​ເຂົ້າ​ສູ່​ລວງ​ເລິກ, ທັງ​ພັດ​ທະ​ນາ​ເປີດກວ້າງ​​ເນື້ອ​ໃນ​ການ​ຮ່ວມ​ມືຢ່າງ​ໄຫວ​ພິບ. ການ​ພົ​ວ​ພັນ​ລະ​ຫວ່າງ​ສອງ​ພັກ​ສືບ​ຕໍ່​ຖື​ບົດ​ບາດສຳຄັນ​ໃນ​ການ​ເສີມ​ສ້າງ​ພື້ນ​ຖານທາງ​ການ​ເມືອງ ສຳລັບ​ການ​ພົວ​ພັນ​ລະຫວ່າງ​ສອງ​ປະ​ເທດ. ​ຜ່ານກົນ​ໄກ​ປະ​ຈຳ​ປີ, ​ໂດຍ​ສະ​ເພາະແມ່ນ​ກອງ​ປະ​ຊຸມ​ເຈ​ລະ​ຈາລະດັບ​ສູງ ແລະ ​ການ​ຢ້ຽມ​ຢາມ​ຂອງ​ການ​ນຳ​ຂັ້ນ​ສູງ​ສຸດ​ຂອງ​ສອງ​ພັກ, ໃນ​ນັ້​ນມີ​ການ​ຢ້ຽມ​ຢາມຫວຽດ​ນາມ ຂອງ​ທ່ານຮູນ​ແຊນ​ ປະ​ທານ​ພັກ​ປະ​ຊາ​ຊົນກຳ​ປູ​ເຈຍ, ນາ​ຍົກ​ລັກ​ຖະ​ມົນ​ຕີກຳ​ປຸ​ເຈ​ຍ, ສອງ​ຝ່າຍ​ໄດ້​ແລກ​ປ່ຽນ​ກ່ຽວ​ກັບຫຼາຍ​ບັນ​ຫາ​ທີ່​ມີ​ລັກ​ສະ​ນະ​ຍຸດ​ທະ​ສາດ, ສ້າງ​ຄວາມ​ຮັບ​ຮູ້​ຮ່ວມ​ກັນ​ທີ່​ສຳ​ຄັນ​ ໃນ​ການ​ປັບ​ປຸງ​ການ​ພົວ​ພັນ​ທີ່ດີ​ງາມ​ລະ​ຫວ່າງ​ສອງ​ພັກ, ສອງ​ລັດ ​ເພື່ອ​ຄວາມ​ປອດ​ໄພແລະການ​ພັດ​ທະ​ນາ​ຂອງ​ແຕ່​ລະ​ປະ​ເທດ​ໃນ​ໄລ​ຍະ​ການພັດ​ທະ​ນາ​ໃໝ່.

ການ​ພົວພັນກັບ​ພັກ​ກອມ​ມູ​ນິດກູ​ບາ, ​ມິດ​ຕະ​ພາບ, ຄວາມສາ​ມັກ​ຄີສະ​ເໝີ​ຕົ້ນ​ສະ​ເໝີ​ປາຍ, ໄສ​ແຈ້ງ, ຄວາມ​ໄວ້​ວາງ​ໃຈ​ກັນ​ລະ​ຫວ່າງ​ສອງ​ພັກ ໄດ້​ຮັບ​ການ​ພັດ​ທະ​ນາ​ຢ່າງບໍ່​ຢຸດຢັ້ງ ແລະ ນັບ​ມື້​ນັບ​ໄດ້​ຮັດ​ແໜ້ນກວ່າ​ເກົ່າ. ພັກ​ກອມ​ມູ​ນິດຫ​ວຽດ​ນາມສືບ​ຕໍ່​ສະ​ແດງ​ຈິດ​ໃຈ​ສາ​ມັກ​ຄີ, ສະ​ໜັບ​ສະ​ໜູນ​ກູບ​າ​ ທັງ​ດ້ານ​ຈິດ​ໃຈແລະວັດ​ຖຸ ໂດຍ​ຜ່ານຫຼາຍ​ຮູບ​ການທີ່​ເໝາະ​ສົມ, ຄື​ຊ່ວຍ​ເຫຼືອ​ເຂົ້າສານ, ລົບ​ໜີ້ທັງ​ໝົດ​ໃຫ້ກູບາ... ຫວຽດ​ນາມ​ໄດ້​ຜັນ​ຂະ​ຫຍາຍ​ຢ່າງ​ຕັ້ງ​ໜ້າ​ ບັນ​ດາ​ການ​ເຄື່ອນ​ໄຫວ​​ພົວ​ພັນ​ຕ່າງ​ປະ​ເທດ​ທາງ​ພັກ. ພິ​ເສດ, ການ​ຢ້ຽມ​ຢາມລັດຖະກິດ​ທີ່​ປະ​ເທດກູ​ບາ ​ໂດຍ​ເລ​ຂາ​ທິ​ການ​ໃຫຍ່ ຫງວຽນ​ຝູຈ້ອງ (ເດືອນມີ​ນາ 2018) ​ໄດ້​ຮັດ​ແໜ້ນແລະປັບ​ປຸງ​ຄວາມ​ຮັກ​ແພງ​ອັນ​ເລິກ​ເຊິ່ງ​ລະ​ຫວ່າງ​ສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ປະ​ເທດ. ສອງ​ພັກ​ໄດ້​ເຊັນ​ຂໍ້​ຕົກ​ລົງ​​ສະ​ບັບ​ໃໝ່​ກ່​ຽວ​ກັນ​ການແລກ​ປ່ຽນແລະຮ່ວມ​ນື ໄລ​ຍະ 2018 - 2023, ເນັ້ນ​ໜັກເຖິງ​ບົດ​ບາດເປັນຫຼັກ​ແຫຼ່ງ​ຂອງ​ການ​ພົວ​ພັນ​ທາງ​ພັກ ​ໃນ​ການ​ກຳ​ນົດ​ທິດ​ການ​ພົວ​ພັນ​ຮ່ວມ​ມື​ຮອບ​ດ້ານ​ລະ​ຫວ່າງ​ສອງ​ປະ​ເທດ. ​ການຮ່ວມ​ມືລະ​ຫວ່າງ​ສອງ​ພັກ​ສືບ​ຕໍ່​ໄດ້​ຊຸກ​ຍູ້​ ໂດຍ​ຜ່ານ​ບັນ​ດາ​ການ​ເຄື່ອນ​ໄຫວ​ແລກ​ປ່ຽນ​ບົດ​ຮຽນ​ພາກ​ຕົວ​ຈິງ ແລະທິດ​ສະ​ດີ. ສອງ​ພັກ​ໄດ້​ຈັດ​ຕັ້ງການ​ສຳ​ມະ​ນາ​ທິດ​ສະ​ດີ​ຄັ້ງ​ທີ 4 (ເດືອນພະ​ຈິກ 2018) ກ່ຽວ​ກັບ​ຫົວ​ຂໍ້ ພັດ​ທະ​ນາ​ເສດ​ຖະ​ກິດ, ສັງ​ຄົມ ແລະ ວຽກ​ງານ​ການ​ເມືອງ, ແນວ​ຄິດ, ໜ້າ​ທີ່​ບຸລິ​ມະ​ສິດ​ອັນ​ດັບ​ໜຶ່ງ ​ຂອງ​ພັກ​ກອມ​ມູ​ນິດກູ​ບາ ແລະ ພັກ​ກອມ​ມູ​ນິດຫວຽດ​ນາມຢ່າງ​ສຳ​ເລັດ​ຜົນ. ຜົນ​ສຳ​ເລັດ​ຂອງ​ການ​ພົວ​ພັນ​ຮ່ວມ​ມື​ລະ​ຫວ່າງ​ສອງ​ພັກ​ໃນ​ປີ​ທີ່​ຜ່ານ​ມາ​ ສືບ​ຕໍ່​ປະ​ກອບ​ສ່ວນ​ອັນ​ສຳ​ຄັນ​ເຂົ້າ​ໃນ​ການ​ຊຸກ​ຍູ້​ການ​ພົວ​ພັນລະຫວ່າງ​ສອງ​ປະ​ເທດ, ພ້ອມ​ທັງ​ສ້າງ​ຜົນ​ສະ​ທ້ອນ​ອັນ​ຕັ້ງ​ໜ້າ​ ເຖິງ​ການ​ພົວ​ພັນ​ຂອງ​ພັກ​ກອມ​ມູ​ນິດຫວຽດ​ນາມ ກັບ​ບັນ​ດາ​ພັກ​ການ​ເມືອງ​ຢູ່​ພາກ​ພື້ນອາ​ເມລິ​ກາລາ​ຕິນ.

ທີ​ສອງ, ການ​ພົວ​ພັນ​ກັບ​ບັນ​ດາ​ພັກກຳ​ອຳ​ນາດ, ພັກທີ່​ເຂົ້າຮ່ວມ​ການ​ເມືອງ ກໍ່​ມີ​ການ​ພັດ​ທະ​ນາ​ຢ່າງ​ແຂງ​ແຮງ, ເຊິ່ງ​ປະ​ກອບ​ສ່ວນ​ສ້າງ​ພື້ນ​ຖານ​ການ​ເມືອງທີ່​ສຳ​ຄັນ​ສຳລັບການ​ປັບ​ປຸງ ແລະ ເປີດກວ້າງ​ການ​ພົວ​ພັນ​ສອງ​ຝ່າຍ, ພ້ອມ​ກັນ​ນັ້ນ ​ກໍໍ​ສ້າງ​ຄວາມ​ໝັ້ນ​ຄົງສຳລັບ​ການ​ພົວ​ພັນ​ລະຫວ່າງ​ລັດ​ ໃນ​ເວ​ລາ​ທີ່​ມີ​ການ​ປ່ຽນ​ແປງ​ຕຳ​ແໜ່​ງ​ກຳ​ອຳ​ນາດ​ຂອງ​​ພັກ​ໃນ​ເວ​ທີ​ການ​ເມືອງ​ຂອງປະ​ເທດ. ​ສິ່ງນີ້​ຍັງ​ຄົງສືບ​ຕໍ່​ເປັນ​ການ​ບຸກ​ທະ​ລຸ​ໜຶ່ງ​ໃນ​ການ​ພົວ​ພັນຕ່າງປະ​ເທດ​ຂອງ​ພັກ​ກອມ​ມູ​ນິດຫວຽດ​ນາມໃນ​ປີ 2018. ດ້ວຍ​ຖາ​ນະ​ເປັນ​ພັກກຳ​ອຳ​ນາດ​, ພັກ​ກອມ​ມູ​ນິດຫວຽດ​ນາມໄດ້​ເປັນ​ເຈົ້າ​ການ​ຊຸກ​ຍູ້​ການ​ພົວ​ພັນ​ກັບ​ບັນດາພັກ​​ກຳ​ອຳ​ນາດ, ພັກ​ທີ່​ເຂົ້າ​ຮ່ວມ​ການ​ເມືອງ, ພັກ​ທີ່​ມີ​ຖາ​ນະບົດ​ບາດ​ສຳ​ຄັນ​ໃນ​ການ​ສ້າງ​ແລະຜັນ​ຂະ​ຫຍາຍ​ນະ​ໂຍ​ບາຍ​ຂອງ​ປະ​ເທດ​ຕໍ່ກັບຫວຽດ​ນາມ​, ​ເຊັ່ນ​ບັນ​ດາ​ພັກ​ ​ໃນ​ສະຫະລັດອາ​ເມ​ລິ​ກາ, ອັງ​ກິດ, ຝ​ຣັ່ງ, ລັດ​ເຊຍ, ​ແຟງລັງ, ຮົງກາລີ, ​ເກຣັກ, ການາດາ, ຍີ່ປຸ່ນ, ສິງຄະໂປ, ມຽນມາ, ຟິລິບປິນ, ໄທ, ມົງໂກລີ, ອິນເດຍ, ອົດສະຕຣາລີ, ນູແວນ​ເຊລັງ, ອີຍິບ, ເນປານ, ສີລັງກາ, ໂມຊໍາບິກ, ອັງໂກລາ,... ​ພິ​ເສດ​ແມ່ນ, ບັນ​ດາ​ການ​ຢ້ຽມ​ຢາມທີ່ມີ​ຄວາມ​ສຳຄັນ​ແລະປະສົບ​ຜົນສຳ​ເລັດ​ທີ່​ສຸດ ທີ່​ປະ​ເທດຝ​ຣັ່ງ, ລັດ​ເຊຍ, ຮົງກາລີ ຂອງ​ທ່ານ​ເລ​ຂາ​ທິ​ການ​ໃຫຍ່ ພັກ​ກອ​ມ​ມູ​ນິດຫວຽດ​ນາມ ເຊິ່ງ​ໄດ້​ສ້າງ​ບັນ​ດາ​ຂີດ​ໝາຍ​ໃໝ່, ກຳ​ລັງ​ໜູນ​ໃໝ່, ກຳ​ນົດ​ບັນ​ດາ​ຂອບ​ການ​ຮ່ວມມື, ຂະຫຍາຍ “ສ່ວນ​ເກີນ​ທາງ​ພູມ​ສາດ” ສຳລັບ​ການ​ພົວ​ພັນ​ສອງ​ຝ່າຍ, ປັບ​ປຸງ​ຄວາມ​ໄວ້​ວາງ​ໃຈ​ທາງ​ການເມືອງ, ຜ່ານສິ່ງ​ດັ່ງກ່າວນັ້ນ ​ສ້າງ​ພື້ນ​ຖານອັນ​ໜັກ​ແໜ້ນ​ເພື່ອ​ຊຸກ​ຍູ້​ແລະຍົກ​ສູງ​ປະ​ສິດ​ທິ​ຜົນ​ການ​ຮ່ວມ​ມື​ໃນ​ທຸກໆ​ຂົງ​ເຂດ; ພ້ອມ​ທັງ​ສະ​ແດງ​ຄວາມ​ເຄົາ​ລົບ​ນັບ​ຖື, ຄວາມ​ຫວັງ​ເພີ່ມ​ພູນ​​ຄູນ​ສ້າງ​ໃຫ້​ແກ່​ການ​ພົວ​ພັນ​ມິດ​ຕະ​ພາບ​ລະ​ຫວ່າງ​ພັກ​ກອມ​ມູ​ນິດຫວຽດ​ນາມ ແລະ ບັນ​ດາ​ພັກ​ການ​ເມືອງ ​ຕໍ່​ບັນ​ດາ​ປະ​ເທດ​ຄູ່​ຮ່ວມ​ທີ່​ສຳຄັນ​ຢ່າງບໍ່​ຢຸດຢັ້ງ. ນອກຈາກ​ນັ້ນ, ພັກ​ກອມ​ມູ​ນິດຫວຽດ​ນາມ​ໄດ້​ຜັນ​ຂະຫຍາຍ​ການ​ຢ້ຽມ​ຢາມ ຂອງ​ຜູ້​ປະ​ຈຳການ​ຄະນະເລ​ຂາ​ທິ​ກາ​ນ, ​ກຳ​ມະ​ການ​ກົມ​ການ​ເມືອງ, ກຳມະການຄະ​ນະ​ເລ​ຂາ​ທິ​ການ, ກຳ​ມະ​ການ​ສູນ​ກາງພັກ ​ໄປຢ້ຽມ​ຢາມ​ຫຼາຍ​ປະ​ເທດ, ​​ເພີ່ມ​ທະວີ​ການ​ພົວ​ພັນ​ກັບ​ພັກ​ກຳ​ອຳ​ນາດຈຳ​ນວນໜຶ່ງ, ເປີດກວ້າງ​ການ​ພົວ​ພັນ​ກັບ​ບັນ​ດາ​ພັກ​ທີ່​ເຂົ້າ​ຮ່​ວມ​ການ​ເມືອງ, ເຊັນ​ຂໍ້​ຕົກ​ລົງ​ການຮ່ວມ​ມືຫຼາຍ​ສະ​ບັບ,... ສ້າງ​ພື້ນ​ຖານ​ການ​ພົວພັນ​ທີ່​ນັບ​ມື້​ນັບກວ້າງ​ຂວາງ​ເລິກ​ເຊິ່ງ ​ຂອງ​ການ​ພົວ​ພັນ​ຕ່າງ​ປະ​ເທດ​ທາງ​ພັກ. ການ​ພົວ​ພັນ​ກັບ​ບັນ​ດາ​ພັກ​ກຳ​ອຳ​ນາດ, ພັກ​ທີ່​ເຂົ້າ​ຮ່ວມ​ການ​​ເມືອງ, ​ພັກ​ຝ່າຍ​ຄ້ານ​ໃນ​ປະ​ເທດ​ຕ່າງໆ ​ໄດ້​ປະ​ກອບ​ສ່ວນເຮັດ​ໃຫ້​ວົງ​ການການ​ເມືອງ​​ໃນປະ​ເທດຕ່າງໆ ​ມີ​ທັດ​ສະ​ນະ​ທີ່​ສົມບູນ​ກວ່າ​ອີກ​ກ່ຽວ​ກັບ​ບົດ​ບາດ​ນຳ​ພາ​ຂອງ​ພັກ​ກອມ​ມູ​ນິດຫວຽດ​ນາມ, ນັບຖື​ສະ​ຖາ​ບັນ​ການ​ເມືອງ​ຂອງຫວຽດ​ນາມ, ສ້າງ​ການ​ຮັບ​ຮູ້​ທົ່ວ​ໄປ​ກ່ຽວ​ກັບ​ຄວາມຈຳ​ເປັນ​ຕ້ອງຊຸກ​ຍູ້​ຂອບ​ການ​​ພົວ​ພັນ​​ທີ່​ໝັ້ນ​ຄົງ​ແລະຍາວ​ນານ​ກັບ​ປະ​ເທດຫວຽດ​ນາມ, ຈາກນັ້ນ​ ຊຸກຍູ້ການ​ເຂົ້າ​ຮ່ວມແລະການ​ສົ່ງ​ຜົນ​ກະທົບ​ຕໍ່​ຂະ​ບວນ​ການ​ວາງ​ແຜນ ກໍ່​ຄືການ​ຜັນ​ຂະ​ຫຍາຍ​ນະ​ໂຍ​ບາຍ​ຂອງ​ປະ​ເທດ​ຕໍ່ກັບຫ​ວຽດ​ນາມ. ຄວນ​ເນັ້ນວ່າ ​ພັກ​ການ​ເມືອງສ່ວນ​ຫຼາຍ​ໃນ​ປະ​ເທດຕ່າງໆ, ເຖິງວ່າຈະ​ມີ​ທ່າ​ອຽງ​ທາງການ​ເມືອງ​ທີ່​​ແຕກ​ຕ່າງ​ກັນ, ແຕ່​​ໂດຍ​ທົ່ວ​ໄປ​ແລ້ວ, ​ລ້ວນ​ແຕ່​ມີ​ຄວາມ​ຫວັງ​ຢາກ​ໄດ້​ເພີ່ມ​ທະ​ວີ​ການ​ຮ່ວມ​ມື​ກັບ​ພັກ​ກອມ​ມູ​ນິດຫວຽດ​ນາມ, ຊົມ​ເຊີຍ​​ການ​ປະ​ກອບ​ສ່ວນ​ທີ່​ສຳ​ຄັນ​ຂອງຫວຽດ​ນາມ ຕໍ່​ການ​ຊຸກ​ຍູ້​ທ່າ​ອຽງ​ສັນ​ຕິ​ພາບ, ສະ​ຖຽມ​ລະ​ພາບ, ການຮ່ວມ​ມື ແລະ ການພັດ​ທະ​ນາ​ຢູ່​ພ​າກ​ພື້ນແລະໃນ​ໂລກ. ​ຜ່ານການ​ພົວ​ພັນກັບພັກ​ການ​ເມືອງ​ເຫຼົ່ານີ້, ຫວຽດ​ນາມກໍຄົ້ນຄວ້າ​ທາບ​ທາມໄດ້​ບົດ​ຮຽນປະສົບ​ການ​ຫຼາຍ​ຢ່າງ ​ກ່ຽວ​ກັບ​ການ​ກຳ​ອຳ​ນາດ, ​ການນຳ​ພາ ​ແລະ ບໍລິຫານປະ​ເທດ.

ທີ​ສາມ, ການ​ພົວ​ພັນ​ລະຫວ່າງພັກກອມ​ມູ​ນິດຫວຽດ​ນາມ ​ແລະ​ບັນ​ດາພັກ​ກອມ​ມູ​ນິດ, ພັກ​ກຳ​ມະ​ກອນ, ພັກ​ຝ່າຍ​ຊ້າຍ​ທີ່​ມີ​ຖາ​ນະ​ບົດ​ບາດ​ໃນ​ເວ​ທີ​ການ​ເມືອງ​​ໃນ​ປະ​ເທດຕ່າງໆ ​ກໍ​ໄດ້​ຮັບ​ການປັບ​ປຸງ​ຢ່າງ​ແທ້​ຈິງ, ມີ​ຈຸດສຸມ ຈຸດໜັກ​ໃຈ​ກາງ. ປີ 2018, ການ​​ພົວ​ພັນ​ກັບ​ບັນ​ດາ​ພັກ​ກອມ​ມູ​ນິດ, ພັກ​ກຳ​ມະ​ກອນ, ​ພັກ​ຝ່າຍ​ຊ້າຍ ສືບ​ຕໍ່​ເປັນ​ທິດທາງ​ການ​ພົວ​ພັນ​ທີ່​​ສຳ​ຄັນ​ຂອງ​ພັກ​ກອມ​ມູ​ນິດຫວຽດ​ນາມ ແລະ ໄດ້​ຮັບ​ການຜັນ​ຂະ​ຫຍາຍດ້ວຍຫຼ​າຍ​ຮູບການ​ທີ່​ອຸດົມສົມບູນ. ຫວຽດ​ນາມໄດ້​ຊຸກ​ຍູ້​ການ​ພົວ​ພັນ​ກັບ​ພັກ​ກອມ​ມູ​ນິດ, ພັກ​ກຳ​ມະ​ກອນຢູ່ຫຼາຍ​ປະ​ເທດ, ຄືພັກ​ກອມ​ມູ​ນິດສະ​ຫະ​ພາບ​ລັດ​ເຊຍ, ພັກ​ກອມ​ມູ​ນິດແຊັກ-​ໂມ​ຣາ​ວາ, ພັກ​ກອມ​ມູ​ນິດ ຝ​ຣັ່ງ, ພັກ​ກອມ​ມູ​ນິດອາ​ເມ​ຣີ​ກາ, ພັກ​ກອມ​ມູ​ນິດອີ​ຕາ​ລີ, ພັກ​ກອມ​ມູ​ນິດ​ເກຣັກ, ພັກ​ກອມ​ມູ​ນິດບ​ຣາ​ຊິນ, ພັກ​ກອມ​ມູ​ນິດປະ​ຊາ​ຊົນກາຊັກສະຖານ, ພັກ​ກອມ​ມູ​ນິດຍີ່​ປຸ່ນ, ພັກ​ສັງ​ຄົມ​ນິ​ຍົມເວ​ເນ​ຊູ​ເອ​ລາ, ພັກ​ກອມ​ມູ​ນິດຊີ​ເລ, ພັກຝ່າຍ​ຊ້າຍເຢຍ​ລະ​ມັນ, ພັກ​ປະ​ຕິ​ວັດຕັງ​ຊານີ​, ພັກ​ຂະ​ບວນ​ການ​ຝ່າຍ​ຊ້າຍ​ເອ​ກະ​ພາບ​ຂອງໂດ​ມີ​ນິກ ແລະ ພັກ​ຢູ່​ພາກ​ພື້ນ​ອື່ນ​ເປັນ​ຈຳ​ນວນຫຼາຍ. ຄວາມ​​ໄວ້​ວາງ​ໃຈ​ທາງການ​ເມືອງ ແລະ ລວງ​ເລິກ​ຂອງການ​ຮ່ວມ​ມື​ໄດ້​ຮັບ​ການຍົກ​ສູງຂຶ້ນ. ໃນ​ສະ​ພາບ​ການ​ທີ່ບັນ​ດາ​ພັກ​ກອມ​ມູ​ນິດ, ພັກ​ກຳ​ມະ​ກອນ​ຢູ່​ໃນ​ໂລກ ກຳລັງ​ມີຄວາມ​ຫຍຸ້ງ​ຍາກຫຼາ​ຍ​ດ້ານ, ພັກ​ກອມ​ມູ​ນິດຫວຽດ​ນາມໄດ້​​ເອົາ​ໃຈ​ໃສ່​ເຖິງ​ການ​ແລກ​ປ່ຽນ​ຄະ​ນະຜູ້​ແທນ​ເພື່ອເພີ່ມ​ທະ​ວີ​ການ​ພົວ​ພັນ​ສາ​ມັກ​ຄີ, ມິດ​ຕະ​ພາບ, ແລກ​ປ່ຽນ​ບັນ​ດາ​ບັນ​​ຫາທາງ​​ທິດ​ສະ​ດີແລະພຶດຕິ​ກຳ​ຂອງການກໍ່​ສ້າງ​ສັງ​ຄົມ​ນິ​ຍົມ ​ແລະ ບັນດາ​ບັນ​ຫາ​ໃຫຍ່​ຂອງ​ຍຸກ​ສະ​ໄໝ. ​ບັນ​ດາ​ພັກ​ກອມ​ມູ​ນິດ, ພັກ​ກຳ​ມະ​ກອນສ່ວນ​ຫຼາຍລ້ວນ​ແຕ່​ຖື​ວ່າ ​ຜົນ​ງານ​ແຫ່ງ​ການ​ປ່ຽນ​ແປງ​ໃໝ່​ຂອງຫວຽດ​ນາມ ເປັນ​ສ່ວນປະ​ກອບ​ສຳ​ຄັນ​ກ່ຽວ​ກັບ​ທິດ​ສະ​ດີແລະພຶດຕິ​ກຳ​ ໃນ​ການ​ປົກ​ປັກ​ຮັກ​ສາແລ​ະພັດ​ທະ​ນາ​ລັດ​ທິ​ມາກ-ເລ​ນິນ, ພ້ອມ​ທັງ​​ເປັນ​ການ​ໃຫ້​ກຳລັງ​ໃຈ​ແກ່ບັນ​ດາ​ພັກ​ເພື່ອນ​ມິດ​ໃນ​ການ​ຕໍ່​ສູ້​ເພື່ອ​ສັງ​ຄົມ​ນິ​ຍົມ. ນີ້​ກໍ່ແມ່ນ​ບັນ​ດາສ່ວນ​ປະ​ກອບ​ທີ່​ລະ​ອຽດຕົວ​ຈິງ​ຂອງ​ພັກ​ກອມ​ມູ​ນິດຫ​ວຽດ​ນາມ ຕໍ່​ຂະ​ບວນ​ການກອມ​ມູ​ນິດ​ແລະກຳ​ມະ​ກອນ​ສາ​ກົນ. ​ໃນ​ທິດ​ກົງ​ກັນ​ຂ້າມ, ບັນ​ດາ​ພັກ​ກອມ​ມູ​ນິດ​ແລະ​ກຳ​ມະ​ກອນ​ສາ​ກົນ ​ສື​ບ​ຕໍ່​ເປັນ​ກຳ​ລັງ​ໜູນ​ການ​ເມືອງ​ທີ່​ສຳ​ຄັນ​ທີ່​ສຸດ ສຳລັບພາ​ລະ​ກິດ​ການປະ​ຕິ​ວັດ​ຂອງພັກແລະປະ​ຊາ​ຊົນຫວຽດ​ນາມ; ມີ​ຫຼາຍ​ການ​ເຄື່ອນ​ໄຫວ​ຕົວ​ຈິງ​ເພື່ອ​ສະ​ໜັບ​ສະ​ໜູນ​ບັນ​ດາ​ທັດ​ສະ​ນະ, ແຜນ​ນະ​ໂຍ​ບາຍ​ຂອງຫວຽດ​ນາມ ໃນ​ການ​ແກ້​ໄຂ​ບັນ​ດາ​ບັນ​ຫາ​ທີ່​ພົວ​ພັນ​ເຖິງ​ຜົນ​ປະ​ໂຫຍດ​ຂອງ​ຊາດ-ປະ​ເທດ.

ທີ​ສີ່, ພັກ​ກອ​ມູ​ນິດຫວຽດ​ນາມ ສືບ​ຕໍ່​​ເຂົ້າ​ຮ່ວມ​ຢ່າງ​ຕັ້ງໜ້າເປັນ​ເຈົ້າ​ການ ແລະ ເຂົ້າ​ຮ່ວມ​ຢ່າງມີ​ປະ​ສິດ​ທິ​ຜົນ ​ໃນ​ບັນ​ດາ​ເວ​ທີ​ປາ​ໄສພະຫຸ​ພາຄີ​ພັກ​ການ​ເມືອງ. ​ໃນ​ລະ​ດັບພະຫຸ​ພາ​ຄີນີ້, ຫວຽດ​ນາມ​ໄດ້ເຂົ້າ​ຮ່ວມ ແລະ ມີ​ການ​ພົວ​ພັນ​ກັບ​ເວ​ທີ​ປາ​ໄສ​ຂອງ​ບັນ​ດາ​ກຳ​ລັງ​ກອມ​ມູ​ນິດ, ກຳ​ມະ​ກອນ ​ແລະ​​ ເວ​ທີ​ປາ​ໄສ​ຂອງ​ບັນ​ດາ​ພັກ​ການ​ເມືອງທີ່ບໍ່ມີ​ການ​ຈຳ​ແນກ​​ທ່າ​ອຽງແລະແນວ​ຄິດ​ທາງການ​ເມືອງ. ໃນ​ປີ 2018, ຫວຽດ​ນາມ​ໄດ້​ຖື​ບົດ​ບາດ​ເປັນສະມາຊິກ​ຄະ​ນະ​ກຳ​ມະ​ການປະ​ຈຳ​ ຂອງກອງ​ປະ​ຊຸມ​ສາ​ກົນ​ບັນ​ດາ​ພັກ​ການ​ເມືອງ ອາ​ຊີ (ICAPP) ແລະ ເປັນ​ສະ​ມາ​ຊິກປະຕິບັດ​ງນ ​ຂອງການ​ພົບ​ປະ​ສາ​ກົນ​ບັນ​ດາ​ພັກ​ກອມ​ມູ​ນິດ​ແລະກຳ​ມະ​ກອນ (IMCWP) ຊຶ່ງໄດ້​ປະ​ກອບ​ສ່ວນ​ທີ່​ສຳ​ຄັນ​ ເຂົ້າ​ໃນ​ການ​ຊຸກ​ຍູ້​ຄວາມ​ສາ​ມັກ​ຄີ, ​ຄວາມ​ເປັນເອ​ກະ​ພາບ, ກຳ​ນົດ​ທິດທາງ​ປະ​ສານ​ສົມ​ທົບ ​ໃນ​ການ​ເຄື່ອນ​ໄຫວ​ຂອງ​ເວ​ທີ​ປາ​ໄສ​ຕາມ​ທິດ​ໄຫວ​ພິບ, ແທ້​ຈິງກວ່າ​ອີກ. ຄຽງ​ຄູ່​ກັນ​ນັ້ນ, ພັກ​ກອມ​ມູ​ນິດຫວຽດ​ນາມ ສືບຕໍ່​ສະ​ໜັບ​ສະ​ໜູນ​ບັນ​ດາ​ກຳ​ລັງ​ຝ່າຍ​ຊ້າຍ ກ້າວ​ໜ້າ ຢູ່​ພາກ​ພື້ນອາ​ເມລິ​ກາລາ​ຕິນ ໂດຍ​ຜ່ານ​ການ​ເຂົ້າ​ຮ່ວມ​ຢ່າງ​ຕັ້ງ​ໜ້າ​ໃນ​ເວ​ທີ​ປະ​ໄສ ຊາວ​ໂປ​ໂລ ຄັ້ງ​ທີ 24 ທີ່​​ຈັດຂຶ້ນ​ຢູ່ປະ​ເທດກູບາ, ເວ​ທີ​ປາ​ໄສ ບັນ​ດາ​ພັກ​ການ​ເມືອງ ແລະ ສັງ​ຄົມ​ໃໝ່​ຄັ້ງ​ທີ 22 ທີ່​​ຈັດຂຶ້ນ​ຢູ່​ປ​ະ​ເທດເມັກຊິກ, ​ແລະ ການປະຊຸມ​ສຳ​ມະ​ນາ​ສາ​ກົນ​ຫຼາຍ​ຄັ້ງ​ຂອງບັນ​ດາ​ພັກ​ກອມ​ມູ​ນິດແລະກຳ​ມະ​ກອນ​ ທີ່​ໄດ້​ຈັດ​ຂຶ້ນ​ເປັນ​ໄລຍະ​ໃນຫຼາຍ​ປະ​ເທດ. ກຽດ​ສັກ​ສີ, ຖາ​ນະ​ບົດ​ບາດ ແລະ ຄວາມ​ໜ້າເຊື່ອຖືຂອງພັກ​ກອມ​ມູ​ນິດຫວຽດ​ນາມທີ່​ມີ​ຕໍ່ບັນ​ດາ​ພັກ​ການ​ເມືອງນັ້ນ ​ນັບ​ມື້​ນັບ​ໄດ້​ຍົກ​ສູງຂຶ້ນ, ຈາກ​ນັ້ນ​ໄດ້​ດຶງ​ດູດ​ເອົາ​ການ​ສະ​ໜັບ​ສະ​ໜູນ​ທີ່ນັບ​ມື້​ນັບ​ກວ້າງ​ຂວາງ ຈາກ​​ພັກ​ການ​ເມືອງຕ່າງໆ​ ຕໍ່​ແຜນ​ນະ​ໂຍ​ບາຍ​ແລະທັດ​ສະ​ນະ​ຂອງຫວຽດ​ນາມກ່ຽວ​ກັບຫຼາຍ​ບັນ​ຫາ. ການ​ເຄື່ອນ​ໄຫວ​ຂອງ​ພັກ​ກອມ​ມູ​ນິດຫ​ວຽດ​ນາມ​ໃນບັນ​ດາ​ເວ​ທີ​ປາ​ໄສພະຫຸ​ພາຄີ​ພັກ​ການ​ເມືອງ ກໍ່​ໄດ້​ປະ​ກອບ​ສ່ວນ​ເຮັດ​ໃຫ້​ເພື່ອນ​ມິດ​ສາ​ກົນ​ເຂົ້າ​ໃຈ​ຢ່າງຖືກ​ຕ້ອງແລະເລິກ​ເຊິ່ງກວ່າ​ອີກ​ ກ່ຽວ​ກັບ​ພາ​ລະ​ກິດ​ການ​ປ່ຽນ​ແປງ​ໃໝ່, ກ່ຽວ​ກັບ​ພັກ​ກອມ​ມູ​ນິດຫວຽກ​ນາມ​ແລະປະ​ເທດຫວຽດ​ນາ​ມ, ​ຜ່ານນັ້ນ​ ຍາດ​ແຍ່ງ​ເອົາ​ການ​ສະ​ໜັບ​ສະ​ໜູນ​ນັບ​ມື້​ນັບ​ກວ້າງ​ຂວາງ​ຂອງ​ພັກ​ຕ່າງໆ​ ຕໍ່​ບັນ​ດາ​ບັນ​ຫາ​ກ່ຽວ​ກັບ​ຜົນ​ປະ​ໂຫຍດ​ຂອງ​ຊາດ-ປະ​ເທດຫວຽດນາມ.

ທິດ​ທາງ, ໜ້າ​ທີ່​ວຽກ​ງານ​ການ​ພົວ​ພັນ​ຕ່າງ​ປະ​ເທດ​ທາງ​ພັກ​ໃນ​ເວ​ລາ​ຕໍ່​ໜ້າ

ໃນ​ຊຸມ​ປີ​ທີ່​ຈະ​ມາ​ເຖິງນີ້, ສະ​ພາບ​ການ​ໂລກຈະ​ສືບ​ຕໍ່​ມີ​ການ​ຜັນ​ແປ​ຢ່າງ​ໄວ​ວາ, ຄາດ​ເດົາ​ຍາກ; ສະ​ຖາ​ນະ​ການ​ການ​ເມືອງ​-ຄວາມ​ໝັ້ນຄົງ​ຂອງໂລ​ກ, ພາກ​ພື້ນ ອາດ​ຈະ​ມີ​ບັນ​ດາ​ປັດ​ໃຈ​ທີ່​ສັບ​ສົນ. ການ​ແຂ່ງ​ຂັນ​ຍຸດ​ທະ​ສາດ​ລະ​ຫວ່າງ​ບັນ​ດາ​ປະ​ເທດ​ໃຫຍ່​ ຈະ​ນັບ​ມື້​ນັບ​ຮຸນ​ແຮງ​ຂຶ້ນ; ທ່າ​ອຽງຫຼາຍຂົ້ວ, ຫຼາຍ​ສູນ​​ຈະ​ສືບ​ຕໍ່​ໄດ້​ຮັບ​ການ​ສົ່ງ​ເສີມ. ​ສັນ​ຕິ​ພາບ, ການ​ຮ່ວມ​ມື ແລະ ການພັດ​ທະ​ນາຍັງ​ຄົງເປັນ​ຄວາມ​ຕ້ອງ​ການທີ່​ຍິ່ງໃຫຍ່​ຂອງ​ບັນ​ດາ​ປະ​ເທດ​, ແຕ່​ທ່າ​ອຽງ​​ໃຊ້​ອຳ​ນາດ​ບາດ​ໃຫຍ່, ການ​ບັງຄັບ, ການ​ປົກ​ປ້ອງ​ການ​ຄ້າ, ການຂົ່ມ​ຂູ່ແລະພ້ອມ​ທີ່​ຈະ​ໃຊ້​ກຳ​ລັງ​ແຮງ​ໃນ​ການ​ພົວ​ພັນ​ສາ​ກົນ​ ຈະ​ມີ​ທ່າ​ອຽງ​ທີ່​ຈະເພີ່ມ​ຂຶ້ນ, ທ້າ​ທາຍກົດ​ໝາຍແລະລະ​ບຽບ​​ສາ​ກົນ. ຜົນ​ປະ​ໂຫຍດຂອງ​ຊາດ-ປະ​ເທດ​ຊາດ ​ສືບ​ຕໍ່​ໄດ້​ຮັບ​ການຍົກ​ສູງຂຶ້ນ​ໃນ​ການ​ພົວ​ພັນ​ສາ​ກົນ. ການ​​​ເຄື່ອນ​ໄຫວ​ຂອງ​ບັນ​ດາ​ພັກ​ການ​ເມືອງກໍ່​ຜັນປ່ຽນ​ຢ່າງ​ສັບ​ສົນ​ ​ດ້ວຍຫຼາຍປະ​ກົດ​ການ​ໃໝ່; ການ​ແຂ່ງ​ຂັນ​ລະ​ຫວ່າງ​ພັກ​ການ​ເມືອງ​ຕ່າງໆ​ຢູ່​ແຕ່​ລະ​ປະ​ເທດກໍ່​ຜັນ​ແປ​ຢ່າງເຄັ່ງຮ້ອນ, ສ້າງ​​ໃຫ້​ມີ​ການ​ປ່ຽນ​ແປງ​ຖາ​ນະ​ຢ່າງ​ໄວວາ​ໃນ​ເວ​ທີ​ການ​ເມືອງຂອງ​ປະ​ເທດ​ຕ່າງໆ.

ສະ​ຖານະ​ການຂ້າງ​ເທິງ​ນີ້​ໄດ້​ພາ​ໃຫ້​ເກີດ​ບັນ​ຫາ​ໃໝ່ ຄວາມ​​ຕ້ອງ​ການ​ໃໝ່ຫຼາຍ​ຢ່າງ, ​ເຊິ່ງຮຽກ​ຮ້ອງ​ໃຫ້​ວຽກ​ງານ​ພົວ​ພັນ​ຕ່າງ​ປະ​ເທດ​ທາງ​ພັກ ​ຕ້ອງ​ປັບ​ປ່ຽນ​ຢ່າງ​ໄວ, ເປັນ​ເຈົ້າ​ການ​ເດີນ​ລັດ​ໜ້າ ແລະ ຍາດ​ແຍ່ງຢ່າງສຸດຂີດ ​ບັນ​ດາ​ກາ​ລະ​ໂອ​ກາດ​ທີ່​ອຳນວຍ​ໃຫ້, ຮັບ​ປະ​ກັນ​ຜົນ​ປະ​ໂຫຍດ​ສູງ​ສຸດ​ຂອງ​ຊາດ-ປະ​ເທດ, ປະ​ກອບ​ສ່ວນ​ຮັກ​ສາ​ສະ​ພາບ​ແວດ​ລ້ອມ​ສັນ​ຕິ​ພາບ, ສະ​ຖຽມ​ລະ​ພາບ ສຳລັບການ​ພັດ​ທະ​ນາ​ຂອງ​ປະ​ເທດ; ປົກ​ປ້ອງ​ຢ່າງ​ໜັກ​ແໜ້ນ​ຄວາມ​ເປັນ​ເອ​ກະ​ລາດ, ​ອະ​ທິ​ປະ​ໄຕ ແລະ ຜືນ​ແຜ່ນ​ດິນ​ອັນ​ຄົບ​ຖ້ວນ; ຍາດ​ແຍ່ງ​ເອົາ​ບັນ​ພະຍາ​ການ​ສາກົນ​ຫຼາຍ​ທີ່​ສຸດ​ເພື່ອ​ຮັບ​ໃຊ້​ໃຫ້​ແກ່​ພາ​ລະ​ກິດ​ການ​ພັດ​ທະ​ນາ​ປະ​ເທດ; ຍົກ​ສູງ​ຖາ​ນະ​ບົດ​ບາດ​ຂອງ​ພັກ​ ແລະ ຂອງ​ປະ​ເທດຫວຽດ​ນາມ​ໃນ​ເວ​ທີ​ສາ​ກົນ.

ບົນ​ຈິດ​ໃຈ​ດັ່ງ​ກ່າວ, ວຽກ​ງານ​ພົວ​ພັນ​ຕ່າງ​ປະ​ເທດ​ທາງ​ພັກ ໃນ​ເວ​ລາ​ຕໍ່​ໄປ​ນີ້ ​ຕ້​ອງ​ສຸມ​ໃສ່ບັນດາ​​ທິດ​ທາງ, ໜ້າ​ທີ່​ໃຫຍ່ ​ລຸ່ມນີ້:

ທີ​ໜຶ່ງ, ຈັດ​ຕັ້ງ​​ເປັນ​ຢ່າງ​ດີ​ ບັນ​ດາ​ການ​ຢ້ຽມ​ຢາມ​ຂອ​ງ​ພັກ, ເປັນ​ຕົ້ນ​ແມ່ນ​​ການ​ຢ້ຽມ​ຢາມ​ຂັ້ນ​ສູງ; ເສີມ​ຂະ​ຫຍາຍ​ຢ່າງ​ແຂງ​ແຮງແລະມີ​ປະ​ສິດ​ທິ​ຜົນ​ ບັນ​ດາ​ກົນ​ໄກ ​ໂຄງ​ການ​ຮ່ວມ​ມື​ຕາມ​ຊ່ອງທາງ​ພັກ, ຄື​ການ​ສຳ​ມະ​ນາ​ທິດ​ສະ​ດີ, ການສົນ​ທະ​ນາ​ນະ​ໂຍ​ບາຍ, ການອົບຮົມກໍ່​ສ້າງ​ພະ​ນັກ​ງານ,… ເຮັດ​ໃຫ້​ການ​ພົວ​ພັນ​ຕ່າງ​ປະ​ເທດ​ຂອງ​ພັກ​ໄປ​ສູ່​ລວງ​ເລິກ, ມີປະ​ສິດ​ທິ​ຜົນ, ແທ້​ຈິງ, ເປັນ​ຕົ້ນ​ແມ່ນ​ການ​ພົວ​ພັນ​ກັບ​ບັນ​ດາ​ພັກ​ທີ່​ກຳ​ອຳ​ນາດ​ຢູ່​ບັນ​ດາ​ປະ​ເທດ​ສັງ​ຄົມ​ນິ​ຍົມ ແລະ ປະ​ເທດ​ເພື່ອນ​ບ້ານ​ທີ່​ມີ​ຊາຍ​ແດນ​ຮ່ວມ​ກັນ, ປັບ​ປຸງ​ຄວາມ​ເຊື່ອ​ໝັ້ນທາງ​ການ​ເມືອງ, ສ້າງ​ພື້​ນ​ຖານ​ການ​ເມືອງ​ອັນ​ໝັ້ນ​ຄົງ, ຮັກ​ສາ​ບົດ​ບາດ​ກຳ​ນົດ​ທິດ​ຍຸດ​ທະ​ສາດ​ໃຫ້​ແກ່​ການ​ພົວ​ພັນ​ສອງ​ຝ່າຍ; ເສີມ​ຂະ​ຫຍາຍ​ທ່າ​ໄດ້​ປຽບຂອງ​ການ​ພົ​ວ​ພັນ​ຕ່າງ​ປະ​ເທດ​ທາງ​ພັກ ​ເພື່ອ​ເຂົ້າ​ຮ່ວມ​ໃນ​ການ​ແກ້​ໄຂ​ບັນ​ດາ​ບັນ​ຫາ​ໃຫ​ຍ່ໃນ​ການ​ພົວ​ພັນ​ສອງ​ຝ່າຍ.

ທີ​ສອງ, ​ໃຫ້​ຄວາມ​ສຳຄັນ​​ແກ່​ການ​ພົວ​ພັນ​ກັບ​ບັນ​ດາ​ພັກ​ທີ່​ກຳ​ອຳ​ນາດ, ບັນ​ດາ​ພັກ​ທີ່​ເຂົ້າ​ຮ່ວມ​ການ​ເມືອງ, ພັກ​ທີ່​ມີ​ບົດ​ບາດ​ສຳ​ຄັນ​ ໃນ​ບັນ​ດາປະ​ເທດ​ຄູ່​ຮ່ວມ​ມື​ທີ່ສຳ​ຄັນ​ຂອງຫວຽດ​ນາມ, ​ໂດຍ​ສະ​ເພາະ​ບັນ​ດາ​ປະ​ເທດ​ຄູ່​ຮວມ​ມື​ຍຸດ​ທະ​ສາດ, ຄູ່​ຮ່ວມ​ມື​ຮອບ​ດ້ານ​ຂອງຫວຽດ​ນາມ, ປັບ​ປຸງ​ຄວາມ​ເຊື່ອ​ໝັ້ນ, ສ້າງ​ພື້ນ​ຖານ​ການ​ເມືອງ​ໃຫ້​ແກ່​ການ​ພົວ​ພັນ​ສອງ​ຝ່າຍ ​​ເພື່ອ​ສົ່ງ​ເສີມຂອບ​ການ​ພົວ​ພັນ​ທີ່ໝັ້ນ​ຄົງ​​ໃນ​ໄລຍະຍາວ.

ທີ​ສາມ, ເພີ່ມ​ທະ​ວີ​ການ​ພົວ​ພັນ​ຢ່າງ​ແທ້​ຈິງ​ກັບ​ບັນ​ດາ​ພັກ​ກອມ​ມູ​ນິດ, ພັກ​ກຳ​ມະ​ກອນ, ບັນ​ດາ​ພັກ​ຝ່າຍ​ຊ້າຍ​ທີ່​ມີ​ບົດ​ບາດສຳຄັນ​ພໍ​ສົມ​ຄວນ​ຢູ່​​ປະ​ເທດຕ່າງໆ ແລະ ໃນ​ຂະ​ບວນ​ການກອມ​ມູ​ນິດ​ແລະກຳ​ມະ​ກອນ​ສາ​ກົນ; ເປັນ​ຈົ້າ​ການແລະຕັ້ງ​ໜ້າ​ເສີມ​ຂະ​ຫຍາຍ​ບົດ​ບາດຢູ່​ໃນ​ເວ​ທີ​ປາ​ໄສພະຫຸ​ພາຄີ​ພັກ​ການ​ເມືອງ; ສະ​ເໜີ​ແນະແລະສົ່ງ​ເສີມ​ຄວາມ​ຄິດ​ລິ​ເລີ່ມ​ທີ່ສອດຄ່ອງ​ກັບ​ຜົນ​ປະ​ໂຫຍດ​ຂອງຫວຽດ​ນາມ; ຂົນ​ຂວາຍ, ສ້າງ​ຄວາມ​ສະ​ໜັບ​ສ​ະ​ໜູນ​ຫຼັກ​ໝັ້ນຂອງ​ຫວຽດ​ນາມ​ກ່ຽວ​ກັບ​ບັນ​ດາ​ບັນ​ຫາ​ທີ່​ສຳ​ຄັນ, ສ້າງ​ຄວາມສະໜັບສະໜູນ​ສາ​ກົນ​ໄລຍະຍາວທີ່​ມີປະ​ສິດ​ທິ​ຜົນ ສຳລັບ​ພັກ, ລັດ ແລະ ປະ​ເທດຫວຽດນາມ.

ທີ​ສີ່, ເພີ່ມ​ທະ​ວີ​ການປະສານ​ງານ​ຢ່າງ​ແໜ້ນ​ແຟ້ນ, ​ເຂົ້າ​ແກັບ​ເຂົ້າ​ເກ​ຍ, ລຸ​ລົ່ງ ລະ​ຫວ່າງ​ບັນ​ດາການ​ເຄື່ອນ​ໄຫວພົວ​ພັນ​ຕ່າງ​ປະ​ເທ​ດ​ທາງ​ພັກ, ການ​ທູດຂອງ​ລັດ ແລະ ການພົວ​ພັນ​ຕ່າງປະ​ເທດຂອງ​ປະ​ຊາ​ຊົນ; ເພີ່ມ​ທະ​ວີແລະຍົກ​ສູງ​ປະ​ສິດ​ທິ​ຜົນ​ການເຄື່ອນ​ໄຫວ​ພົວ​ພັນ​ຕ່າງ​ປະ​ເທດ ​ຂອງ​ບັນ​ດາ​ຄະ​ນະ​ພັກ, ຂອງ​ອົງ​ຄະ​ນະ​ພັກ​ແຂວງ, ອົງ​ຄະ​ນະ​ພັກ​ເມືອງ.

ທີ​ຫ້າ, ຍູ້​ແຮງ​ການ​ປະ​ສານ​ສົມ​ທົບ​ໃນ​ວຽກ​ງານ​ຄົ້ນ​ຄວ້າ, ພະ​ຍາ​ກອນ, ເປັນ​ຕົ້ນ​ແມ່ນ​ຄົ້ນ​ຄວ້າ, ພະ​ນາ​ກອນ​ຍຸດ​ທະ​ສາດ, ການ​ເປັນ​ທີ່​ປຶກສາ, ການສະ​ເໜີ​ແລະປະ​ເມີນ​ຜົນ, ສ້າງ​ຄວາມ​ເປັນ​ເອ​ກະ​ພາບ​ສູງ​ກ່ຽວ​ກັບ​ທັດ​ສະ​ນະແລະວິ​ທີ​ແກ້​ໄຂ, ສ້າງ​ພື້ນ​ຖານ​ອັນ​ໝັ້ນ​ຄົງ​ເພື່ອ​​ໃຫ້ຜູ້​ນຳ​ລະດັບ​ສູງຮັບຮອງ​ຜ່ານ​ແຜນ​ນະ​ໂຍ​ບາຍ, ໂຄງ​ການ, ມາດ​ຕະ​ການ, ນະ​ໂຍ​ບາຍ​ການ​ພົວ​ພັນ​ຕ່າງ​ປະ​ເທ​ດ.

ທີ​ຫົກ, ເພີ່ມ​ທະ​ວີ​ການ​ປະ​ສານ​ສົມ​ທົບ​ໃນ​ການ​ຄຸ້ມ​ຄອງກິດຈະກຳ​ພົວ​ພັນ​ຕ່າງ​ປະ​ເທດ ​ເພື່ອຮັບ​ປະ​ກັນ​ປະ​ຕິ​ບັດ​ຢ່າງ​ເຂັ້ມ​ງວດ​ແລະມີ​ປະ​ສິດ​ທິ​ຜົນ ​ກົດ​ລະ​ບຽບ​ການ​ຄຸ້ມ​ຄອງການຕ່າງ​ປະ​ເທດ​ ຂອງ​ກົມ​ການ​ເມືອງ, ປະ​ກອນ​ສ່ວນ​ເຂົ້າ​ໃນ​ການ​ຍົກ​ສູງຄວາມ​ແທດຈິງ ມີປະ​ສິດ​ທິ​ຜົນ ​ຂອງ​ການ​ເຄື່ອນ​ໄຫວ​ພົວ​ພັນ​ຕ່າງ​ປະ​ເທດ.

ບັນດາຜົນງານຂອງການພົວພັນຕ່າງປະເທທາງພັກ ​ໃນປີ 2018 ມີຄວາມໝາຍສຳຄັນທີ່ສຸດ, ຍ້ອນ​ວ່າ​ປີ 2018 ແມ່ນປີຂ້າມຜ່ານ ເມື່ອກອງປະຊຸມໃຫຍ່ຄັ້ງທີ XII ຂ​ອງ​ພັກໄດ້​ຜ່ານ​ເຄິ່ງ​ໜຶ່ງ​ຂອງໄລ​ຍະທີ່​ວາງ​ໄວ້, ແມ່ນ​ເວ​ລາ​ທີ່​ທົ່ວ​ພັກ ທົ່ວ​ປວງ​ຊົນແລະທົ່ວ​ກອງ​ທັບ​ ກ້າວ​ເຂົ້າ​ສູ່​ໄລ​ຍະ​ຂໍ​ກະ​ແຈ​​ແຫ່ງ​ການປະ​ຕິ​ບັດ​ບັນ​ດາ​ເປົ້າ​ໝາຍ​ຂອງກອງ​ປະ​ຊຸມ​ໃຫຍ່​ຄັ້ງ​ທີ່ XII ຂອງ​ພັກ. ບັນ​ດາ​ຜົນ​ງານ​ທີ່​ສຳ​ຄັນ​ນັ້ນ​ ໄດ້​ສ້າງ​ພື້ນ​ຖານ​ໃຫ້​ການ​ພົວ​ພັນ​ຕ່າງ​ປະ​ເທດ​ທາງ​ພັກ ​ພ້ອມ​ກັບ​ການ​ພົວ​ພັນ​ຕ່າງ​ປະ​ເທດຂອງ​ລັດ ແລະ ການ​ພົວ​ພັນ​ຕ່າງ​ປະ​ເທດ​ຂອງ​ປະ​ຊາ​ຊົນ​ ປະ​ຕິ​ບັດ​​ແນວ​ທາງ, ນ​ະ​ໂຍ​ບາຍ​ການ​ພົວ​ພັນ​ຕ່າງ​ປະ​ເທດ​ຂອງກ​ອງ​ປະ​ຊຸມ​ໃຫຍ່​ຄັ້ງ​ທີ່ XII ຂອງ​ພັກ​ກອມ​ມູ​ນິດຫວຽດ​ນາມຢ່າງ​ສຳ​ເລັດ​ມີ​ໄຊ./.

​​ໂດຍ ຮ່ວາງ​ບິ່ງ​ກວັນ

ກຳມະການສູນ​ກາງ​ພັກ, ຫົວໜ້າ​ຄະນະ​ພົວພັນ​ຕ່າງປະ​ເທດສູນ​ກາງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ