ວັນເສົາ, 20/7/2019
ສະພາບການປ່ຽນແປງໃນອາຊີ-ປາຊີຟິກໃນປີ 2018 ແລະ ແງ່ຫວັງໃນປີ 2019
26/4/2019 21:27' ສົ່ງ ພິມ
ພາບປະກອບ (ຈາກ Internet)

ຈີນ​ຍູ້​ແຮງ​ການ​ຜັນ​ຂະຫຍາຍ​​ແຜນ​ຍຸດ​ທະ​ສາດ “​ແລວ​ທາງ​ແລະ​ເສັ້ນທາງ”

​ໃນ​ປີ 2018, ຈີນ​ສືບ​ຕໍ່​ຢືນຢັນ “​ແລວ​ທາງ​ແລະ​ເສັ້ນທາງ” ​ແມ່ນ​ແຜນ​ຍຸດ​ທະ​ສາດ​ຍາວ​ນາມ ​ແລະ ສະ​ເໜີ​ການ​ປັບ​ປ່ຽນ​ທີ່​ສຳຄັນ 6 ປະການ ​ເພື່ອຊຸກຍູ້​ແຜນ​ຍຸດ​ທະ​ສາດ​ນີ້​ໃນ​ຂອບ​ເຂດ​ທົ່ວ​ໂລກ.

ທີ​ໜຶ່ງ, “​ແລວ​ທາງ​ແລະ​ເສັ້ນທາງ” ນັບ​ມື້​ນັບ​ໄດ້​ເປີດ​ກວ້າງ​ຂອບ​ເຂດ​ໄປ​ສູ່​ຫຼາຍ​ຂົງ​ເຂດ​ໃໝ່. ຮອດ​ທ້າຍ​ປີ 2018, “​ແລວ​ທາງ​ແລະ​ເສັ້ນທາງ” ​ໄດ້​ດຶງ​ດູດ​ການ​ເຂົ້າ​ຮ່ວມ​ຂອງ​ຫຼາຍ​ກວ່າ 100 ປະ​ເທດ, ອານາ​ເຂດ ​ແລະ ​ບັນດາ​ອົງການ​ຈັດ​ຕັ້ງ​ສາກົນ​ ໃນ​ທົ່ວ​ທັງຫ້າ​ທະວີບ. ຈີນ​ໄດ້​ລົງ​ນາມ​ໃນ​ຂໍ້​ຕົກລົງ​ການ​ຮ່ວມ​ມື 101 ສະບັບ​ກ່ຽວ​ກັບ​ຫຼາຍ​ຂົງ​ເຂດ​ໃນ​ຂອບ​ “​ແລວ​ທາງ​ແລະ​ເສັ້ນທາງ”.

ທີ​ສອງ, “​ແລວ​ທາງ​ແລະ​ເສັ້ນທາງ” ຫັນປ່ຽນ​ຈາກ​ການ​ຜັນ​ຂະຫຍາຍ​ໃນ​ບັນດາ “ຈຸດ” ​ໄປ​ສູ່​ການ​ເຊື່ອມ​ຕໍ່​ເປັນ “ສາຍ” ນັບ​ມື້​ນັບ​ຈະ​ແຈ້ງ. ​ເມື່ອ “​ແລວ​ທາງ​ແລະ​ເສັ້ນທາງ” ຫາ​ກໍ່​ເປັນ​ຮູ​ບ​ເປັນ​ຮ່າງ​ຂຶ້ນ, ຈີນ​ເອົາ​ໃຈ​ໃສ່​ເລືອກ​ທ່າ​ເຮືອ​ທະ​ເລ​ຈຳນວນ​ໜຶ່ງ, ​ໂຄງການ​ໂຄງ​ສ້າງ​ພື້ນຖານ​ບາງ​ຢ່າງ (ບັນດາ “ຈຸດ”) ທີ່ຢູ່​ກະ​ແຈກ​ກະຈາຍ​ໃນ​ຫຼາຍ​​ແຫ່ງ​ເພື່ອ​ຜັນ​ຂະຫຍາຍ. ​ແຕ່​ປະຈຸ​ບັນ, “​ແລວ​ທາງ​ແລະ​ເສັ້ນທາງ” ​ໄດ້​ຄ່ອຍໆ​ກໍ່​ຕັ້ງ​ເປັນ​ບັນດາ “ສາຍ” ທີ່​ເຊື່ອມ​ຕໍ່​ຢ່າງ​ຈະ​ແຈ້ງ​ທາງ​ດ້ານ​ໂຄງ​ສ້າງ​ພື້ນຖານ, ​ເຄືອ​ຂ່າຍ​ການ​ຄ້າ, ​ການເຊື່ອມ​ຕໍ່​ພະລັງງານ ​ແລະ ​ແລວ​ເສດຖະກິດ. ຈີນ​ຖື​ບົດບາດ​ສູນ​ກາງຂອງ​ບັນດາ​ເຄືອ​ຂ່າຍທີ່ເຊື່ອມ​ຕໍ່​ນີ້, ສ້າງ​ໂຄງ​ສ້າງ​ປະ​ເພດ “ສູນ​ກາງ - ບໍລິ​ເວນ​ອ້ອມ” ຢ່າງ​ຈະ​ແຈ້ງ, ຊຶ່ງ​ໄດ້​ຮັບ​ການຈັດ​ຕັ້ງ​ຢ່າງ​ແໜ້ນ​ແຟ້ນກວ່າອີກ. ກ່ຽວ​ກັບ​ການ​ເຊື່ອມ​ຕໍ່​ໂຄງ​ສ້າງ​ພື້ນຖານ, ​ໄດ້​ຈັດ​ຕັ້ງ​ເສັ້ນ​ທາງການ​ຂົນ​ສົ່ງເຊື່ອມ​ຕໍ່​ອາຊີ-​ເອີຣົບ. ຄິດ​ໄລ່​ຮອດ​ທ້າຍ​ເດືອນ​ສິງຫາ 2018, ​ໄດ້​ມີ​ຫຼາຍ​ກວ່າ 1.000 ຂະ​ບວນລົດ​ໄຟຈາກ​ຈີນ​ໄປ​ເຖິງ​ເອີຣົບ, ​ເຊື່ອມ​ຕໍ່ 48 ຕົວ​ເມືອງ​ຂອງ​ຈີນ ກັບ 42 ຕົວ​ເມືອງ​ຂອງ 14 ປະ​ເທດ​ເອີຣົບ. ບັນດາ​ສາຍ​ທາງ​ລົດ​ໄຟ, ທາງບົກ, ທາງ​ອາກາດ ລະຫວ່າງ​ຈີນກັບ​ຫຼາຍ​ປະ​ເທດ​ໃນ​ເອີຣົບ​ແລະ​ອາຊີ​ໃຕ້ ກໍ່​ຄ່ອຍໆ​ຖືກ​ກໍ່​ຕົວ​ຂຶ້ນ.

ກ່ຽວ​ກັບ​ການ​ເຊື່ອມ​ຕໍ່​ພະລັງງານ, ປີ 2018 ​​ບັນດາ​ເສັ້ນທາງ​ທໍ່​ພະລັງງານໄດ້​ຖືກ​ກໍ່ສ້າງ​ເທື່ອ​ລະ​ກ້າວ, ​ໂດຍ​ສະ​ເພາະ​ແມ່ນ​ໃນ​ອາຊີ​ກາງ​ແລະ​ອາຊີ​ໃຕ້ ​ເພື່ອ​ໃຫ້​ມີ​ການ​ສະໜອງ​ຫຼາກ​ຫຼາຍ ​ແລະ ຮັບປະກັນ​ຄວາມ​ປອດ​ໄພ​ດ້ານ​ພະລັງງານ ສຳລັບ​ອະນາຄົດ​ຂອງ​ປະ​ເທດຈີນ. ຈີນ​ກໍ່​ກຳ​ລັງຍູ້​ແຮງ​ການ​ກໍ່ສ້າງບັນດາ​ແລວ​ເສດຖະກິດ​ທີ່​ມີ​ຄວາມ​ສຳຄັນ​ຍຸດ​ທະ​ສາດ​ສຳ​ລັບ​ປະ​ເທດ​ຈີນ, ພິ​ເສດ​ແມ່ນ​ໃນ​ການ​ພົວພັນ​ກັບ​ອາຊີ​ຕາ​ເວັນ​ອອກສຽງ​ໃຕ້ ​ແລະ​ອາຊີ​ໃຕ້...

ທີ​ສາມ, ສ້າງ “​ເສັ້ນທາງ​ຜ້າ​ໄໝ” ​ໃນ​ໂລກ​ໄຊ​ເບີ ​ແລະ ຈັກກະວານ. ນີ້​ແມ່ນ​ຈຸດ​ທີ່​ຄວນ​ເອົາ​ໃຈ​ໃສ່​ໃນ​ການ​ຜັນ​ຂະຫຍາຍ “​ແລວ​ທາງ​ແລະ​ເສັ້ນທາງ” ຂອງ​ຈີນ​ໃນ​ປີ 2018. ຈີນ​ເປີດ​ກວ້າງພື້ນ​ທີ່​ການ​ເຄື່ອນ​ໄຫວຂອງ “​ແລວ​ທາງ​ແລະ​ເສັ້ນທາ” ​ເທື່ອ​ລະ​ກ້າວ ​ໄປ​ທົ່ວ​ທັງ​ຈັກກະວານ​ແລະ​ໃນ​ໂລກ​ໄຊ​ເບີ ​ໂດຍ​ຜ່ານ​ລະບົບ​ດາວ​ທຽມ ​ແລະ ​​ເຄື່ອງ​ກວດ​ຈັບ​ຕຳ​ແໜ່​ງ​ໄລຍະ​ໄກ ​ເພື່ອ​ແນ​ໃສ່​ກ້າວ​ໄປ​ເຖິງ​ຄວາມ​ສາມາດ​ຄວບ​ຄຸມ​ໂລກ​ໄຊ​ເບີ ​ແລະ ​ແຂ່ງຂັນ​ກັບປະ​ເທດ​ມະຫາ​ອຳນາ​ອື່ນ​ໃນ​ຈັກ​ກະ​ວານ. ​ໂດຍ​ພື້ນຖານ​ແລ້ວ, ລະບົບ​ນຳ​ທາງ​ດ້ວຍ​ດາວ​ທຽມ​ດາວ​ເໜືອ​ຂອງ​ຈີນ​ໄດ້​ຖືກ​ນຳ​ໄປ​ດຳ​ເນີນ​ງານທີ່​ໝັ້ນຄົງ, ພວມ​ເສີມ​ຂະຫຍາຍ​ຄຸນ​ປະ​ໂຫຍ​ດອັນ​ໃຫຍ່​ຫຼວງ​ໃນ​ຫຼາຍ​ດ້ານ ​ແລະ ຈະ​ສືບ​ຕໍ່​ຂະຫຍາຍຕົວ.

ທີ​ສີ່, ສືບ​ຕໍ່​ລົງທຶນ​ເຂົ້າ​ໃນ​ທ່າ​​ເຮືອ​ທະ​ເລທີ່​ສຳຄັນ, ມີ​ທີ່​ຕັ້ງ​ຍຸດ​ທະ​ສາດ​ສຳລັບ​ປະ​ເທດ​ຈີນ. ມາ​ເຖິງ​ດຽວ​ນີ້, ຈີນ​ໄດ້​ຄ່ອຍໆສ້າງ​ເຄືອ​ຂ່າຍ​ເສັ້ນທາງ​ເດີນ​ເຮືອ​ໂດຍ​ຈີນ​ຄວບ​ຄູ​ມ ທີ່​ແກ່ຍາວ​ຈາກ​ທະ​ເລ​ຕາ​ເວັນ​ອອກ ​ເຖິງມະຫາ​ສະໝຸດ​ອິນ​ເດຍ, ປາຊີ​ຟິກ​ໃຕ້, ທະ​ເລ​ເມ​ດິ​ເຕີຣີນຽນ, ທະ​ເລຕາ​ເວັນ​ອອກ​ອາ​ຟຣິກກາ, ອາ​ເມ​ລິ​ກາ​ກາງ ​ແລະ ອາ​ເມ​ລິ​ກາ​ໃຕ້. ບັນດາ​ທ່າ​​ເຮືອ​ເຫຼົ່າ​ນີ້​ໄດ້​ເຊື່ອມ​ຕໍ່​ທັງ​ໃນ​ທະວີບ​ແລະ​ທະ​ເລ, ​ໂດຍ​ສະ​ເພາະຢ່າງ​ຍິ່ງ​ເມື່ອ​ກອງທັບ​ເຮືອ​ຂອງ​ຈີນ​ຂະຫຍາຍ​ຂອບ​ເຂດ​ການ​ເຄື່ອນ​ໄຫວ​ຢ່າງ​ບໍ່​ຢຸດ​ຢັ້ງ.

ທີ​ຫ້າ, ຈີນ​ໄດ້​ຫັນ "​ແລວ​ທາງ​ແລະ​ເສັ້ນທາງ" ​ເປັນ​ນິ​ຕິ​ກຳ​ເທື່ອ​ລະ​ກ້າວ​ຕາມ​ແບບ​ຂອງ​ຈີນ. ​ໃນ​ປີ 2018, ສານ​ສູງ​ສຸດຂອງ​ຈີນ​ໄດ້​ສ້າງ​ຕັ້ງ 2 ສາຂາ​ຢູ່​ນະຄອນເຊິ​ນ​ເຈິ້ນແລະຊີ​ອານ ທີ່​ມີ​ຊື່ວ່າ ສານ​ການ​ຄ້າ​ສາກົນ​ທີ່​ໜຶ່ງ​ແລະ​ທີ່​ສອງ​ຂອງ​ຈີນ, ​ໂດຍ​ມີ​ເປົ້າ​ໝາຍ​​ເພື່ອແກ້​ໄຂຂໍ້​ພິພາດ​ທາງ​ເສດຖະກິດ, ການ​ຄ້າ ​ແລະ​ການ​ລົງທຶນ ອີງ​ຕາມ​ກົດໝາຍ​ຂອງ​ຈີນ. ສານ​ຢູ່​ຊີ​ອານ​ແກ້​ໄຂ​ກໍລະ​ນີ ຄະດີທີ່​ກ່ຽວຂ້ອງ​ເຖິງ "​ແລວ​ທາງ​ເສດຖະກິດ​ເສັ້ນທາງ​ຜ້າ​ໄໝ”, ສ່ວນ​ສານ​ການ​ຄ້າ​ສາກົນ​ຢູ່​ເຊິ​ນ​ເຈິ້ນ ຮັບຜິດຊອບ​ແກ້​ໄຂ​ກໍລະນີ​ຄະດີ​ທີ່​ກ່ຽວຂ້ອງ​ເຖິງ “​ເສັ້ນທາງ​ຜ້າ​ໄໝ​ໃນ​ທະ​ເລ​ສະຕະວັດ​ທີ XXI”. ຕາມ​ທີ່​ກຳນົດ, ຜູ້​ພິພາກສາ​ຈະ​ເປັນ​ຄົນ​ຈີນ, ຜູ້​ຊ່ຽວຊານ​ດ້ານ​ກົດໝາຍ​ສາກົນ​ໄດ້​ຖືກ​ເຊື້ອ​ເຊີນ​ໃຫ້​ເຂົ້າ​ຮ່ວມ​ເປັນ​ຜູ້​ໄກ່​ເກ່ຍຂໍ້​ພິພາດ​ເທົ່າ​ນັ້ນ... ​ແຕ່, ການ​ສ້າງ​ຕັ້ງສານ​ທັງ​ສອງ​ນີ້ມີ​ລັກສະນະ​ຮູບ​ການ ​ແລະ ​ເຖິງ​ຕອນ​ນີ້​ຍັງ​ບໍ່​ໄດ້​ຈັດການ​ໂດຍ​ກົງກັບກໍ​ລະນີ ຄະດີ​ໃດໆ​ເລີຍ.

ທີ​ຫົກ, ຈີນ​ໄດ້​ຂຸດ​ຄົ້ນ​ບັນດາ​ເຄື່ອງມື​ການ​ເງິນ​ຢ່າງ​ໄຫວ​ພິບ ​ແລະ ໝູນ​ໃຊ້​ຫຼາຍ​ກົນ​ໄກ​ການ​ຮ່ວມມື​ທີ່​ຕ່າງ​ກັນ ​ເພື່ອ​ຮັດ​ແໜ້ນ​ການ​ພົວພັນ​ກັບ​ຄູ່​ຮ່ວມ​ມື, ກໍ່​ຕັ້ງ​ຫຼາຍ​ກົນ​ໄກ​ສະໜັບສະໜູນ​ການຜັນ​ຂະຫຍາຍ “ແລວ​ທາງ​ແລະ​ເສັ້ນທາງ”, ​ເຊັ່ນ ສ້າງ​ບັນດາ​ເຄືອ​ຂ່າຍ​ຄູ່​ຮ່ວມ​ມື​ທີ່​ຕ່າງ​ກັນ ​ໃນ​ຂອບ​ເຂດ “​ແລວ​ທາງ​ແລະ​ເສັ້ນທາງ", ຍູ້​ແຮງ​ກົນ​ໄກ​ການ​ຮ່ວມ​ມື​ກັບ​ຝ່າຍ​ທີ​ສາມ​ໃນ “​ແລວ​ທາງ​ແລະ​ເສັ້ນທາງ”...

ນອກຈາກຜົນ​ສຳ​ເລັດຫຼາຍ​ຢ່າງ​ນັ້ນ, ສິ່ງ​ທ້າ​ທາຍ​ທີ່​ເກີດ​ຂຶ້ນ​ກັບ​ຈີນ​ໃນ​ການຈັດ​ຕັ້ງ​ປະຕິບັດ “​ແລວ​ທາງ​ແລະ​ເສັ້ນທາງ” ກໍ່​ນັບ​ມື້​ນັບ​ເຄັ່ງຮ້ອນ, ສັບສົນ​ກວ່າ​ປີ​ກ່ອນ. ລະ​ອຽດຄື:

ທີ​ໜຶ່ງ, ຄວາມ​ກັງວົນ​ທາງ​ຈິດຕະສາດ​ຂອງ​ປະ​ເທດ​ຕ່າງໆ​ກ່ຽວ​ກັບ “ຄວາມ​ສ່ຽງ​ຖືກ​ກັບ​ດັກ​ໜີ້” ຈາກ​ເງິນ​ກູ້​ຢືມ​ຂອງ “​ແລວ​ທາງ​ແລະ​ເສັ້ນທາງ” ທີ່​ນັບ​ມື້​ນັບ​ເພີ່ມ​ຂຶ້ນ. ປະຈຸ​ບັນ​ມີ 8 ປະ​ເທດຢູ່​ໃນ​ສະຖານະ “ການ​ແຈ້ງ​ເຕືອນ​ສີ​ແດງ” ກ່ຽວ​ກັບຄວາມ​ສ່ຽງຂອງ “​ກັບ​ດັກ​ໜີ້”; ປະ​ເທດ​ທີ່​ມີ​ຄວາມ​ສ່ຽງ​ສູງ​ກວມ​ເອົາ 23 ປະ​ເທດ​ໃນ​ຈຳນວນຄູ່​ຮ່ວມ​ມື​ທັງ​ໝົດ 68. ທ່າ​ອຽງຢຸດ​ຊົ່ວຄາວ, ງົດ​ໄວ້​ຊົ່ວຄາວ ຂອງບັນດາ​ໂຄງການ​ໃນ​ຂອບ​ເຂດ “​ແລວ​ທາງ​ແລະ​ເສັ້ນທາງ” ພວມ​ເກີດ​ຂຶ້ນ ​ເຊິ່ງ​ເຮັດ​ໃຫ້​ບາງ​ມາດຕາ​ຕ້ອງ​ໄດ້​ຮັບ​ການ​ເຈລະຈາ​ຄືນ​ໃໝ່...

ທີ​ສອງ, ບັນດາ​ປະ​ເທດ​ຈະ​ເລີ​ນພັດທະນາ, ​ໂດຍ​ສະ​ເພາະ​ສະຫະລັດ​ອາ​ເມ​ລິ​ກາ, ​ເອີຣົບຕາ​ເວັນຕົກ ພວມ​ຍູ້​ແຮງ​ການ​ເຄື່ອນ​ໄຫວ​ເພື່ອ​ປ້ອງ​ກັນ​ການບຸກລຸກ​ເຄືອ​ຂ່າຍ ​ແລະ ການ​ລົງທຶນ​ຖື​ວ່າ​ມີ​ຜົນ​ກະທົບ​ຕໍ່​ຄວາມ​ໝັ້ນຄົງ​ຂອງ​ຊາດ (ຕົວຢ່າງ​ຄື ກໍ​ລະ​ນີຂອງ​ກຸ່ມ​ຫົວ​ເວ່ຍ) ​ແລະ ພິ​ເສດ​ແມ່ນ ສົງຄາມ​ການ​ຄ້າ ອາ​ເມ​ລິ​ກາ-ຈີນ ທີ່​ກຳລັງ​ມີ​ທ່າ​ອຽງ​ແຜ່​ກະຈາຍ​ໄປ​ສູ່​ຂົງ​ເຂດ​ອື່ນ, ​ເຊັ່ນ​ເຕັກ​ໂນ​ໂລ​ຊີ, ການ​ປ້ອງ​ກັນ​ປະ​ເທດ-ຄວາມ​ປອດ​ໄພ...

ທີ​ສາມ, ບາງ​ໂຄງການ​ຖື​ກຢຸດ​ເຊົາ ຫຼື​ຖືກ​ດັດ​ປັບ ​ເນື່ອງ​ຈາກ​ຂາດຄວາມ​ເປັນ​ໄປ​ໄດ້ ຫຼືມີ​ບັນຫາ​ໃນ​ການ​ຜັນ​ຂະຫຍາຍປະຕິບັດ. ກະ​ໂຕ​ວິ​ສາ​ຫະກິດ​ບາງ​ແຫ່ງຂອງ​ຈີນກໍ່​ພົບ​ຄວາມ​ຫຍຸ້ງຍາກ, ສາ​ເຫດຕົ້ນຕໍ​ແມ່ນ​ຍ້ອນ​​ເສດຖະກິດ​ພາຍ​ໃນ​ປະ​ເທດຖືກຕົກ​ຕ່ຳ, ບັງຄັບ​ໃຫ້​ປະ​ເທດ​ນີ້​ຕ້ອງ​ປັບ​ໂຄງການ​ໃນ​ຂອບ​ເຂດ “​ແລວ​ທາງ​ແລະ​ເສັ້ນທາງ”.

ອາ​ເມ​ລິ​ກາ​ຜັນ​ຂະຫຍາຍ ​ແຜນ​ຍຸດ​ທະ​ສາດ​ມະຫາ​ສະໝຸດ​ອິນ​ເດຍ-ປາຊີ​ຟິກທີ່​ເສລີ​ແລະ​ເປີດ​ກວ້າງ

​ໃນ​ປີ 2017, ອາ​ເມ​ລິ​ກາ​ປະກາດ​ວິ​ໄສ​ທັດ​ມະຫາ​ສະໝຸດ​ອິນ​ເດຍ-ປາຊີ​ຟີ​ກ, ປີ 2018, ອາ​ເມ​ລິ​ກາ​ຍູ້​ແຮງການ​ປັບປຸງ​ເພີ່ມ​ເຕີມ​ເນື້ອ​ໃນ​ ແລະ ຮີບ​ເຮັ່ງ​ຜັນຂະຫຍາຍ​ປະຕິບັດ​ແຜນ​ຍຸດ​ທະ​ສາດ​ມະຫາ​ສະໝຸດ​ອິນ​ເດຍ-ປາຊີ​ຟິກທີ່​ເສລີ​ແລະ​ເປີດ​ກວ້າງ (ຍອປສປ) ​ເພື່ອ​ແຂ່ງຂັນ​ກັບ​ “​ແລວ​ທາງ​ແລະ​ເສັ້ນທາງ” ຂອງ​ຈີນ. ​ເດືອນ​ມີນາ 2018, ອາ​ເມ​ລິ​ກາ​ໄດ້​ປ່ຽນ​ຊື່​ຈາກ “ວິ​ໄສ​ທັດ​ມະຫາ​ສະໝຸດ​ອິນ​ເດຍ-ປາຊີ​ຟິກ” ມາ​ເປັນ ຍອປສປ. ນັບ​ແຕ່​ເດືອນ​ພຶດສະພາ 2018, ອາ​ເມ​ລິ​ກາ​ໄດ້​ສຳ​ເລັດ​ໂດຍ​ພື້ນຖານ​ການ​ກຳນົດ​ເປົ້າ​ໝາຍ, ໜ້າ​ທີ່, ຂອບ​ເຂດ ​ແລະ ບັນດາ​ວິທີ​ແກ້​ໄຂ​ຫຼັກ​ ຂອງ ຍອປສປ. ​ແຕ່​ຕົ້ນ​ເດືອນ​ກໍລະກົດ 2018 ​ເຖິງ​​ເວລາ​ນີ້, ອາ​ເມ​ລິ​ກາ​ເລີ່​ມຜັນ​ຂະຫຍາຍ ​ແລະ ​ເພີ່ມ​ເຕີມ​ຫຼາຍ​ເນື້ອ​ໃນ​ໃໝ່​ເຂົ້າ​ໃນ ຍອປສປ ກ່ຽວ​ກັບ​ການ​ຮ່ວມ​ມື​ດ້ານ​ເສດຖະກິດ, ​ໂຄງ​ສ້າງ​ພື້ນຖານ​ແລະ​ພະລັງງານ... 

ທາງ​ດ້ານ​ການ​ເມືອງ, ອາ​ເມລິ​ກາຢ້ຳຄວາມ​ໝັ້ນ​ໝາຍ​ຍາວ​ນານ​ຂອງ​ຕົນ​ຕໍ່​ພາກ​ພື້ນ, ສ້າງ​ຄວາມ​ໝັ້ນ​ໃຈ​ໃຫ້​ພັນທະ​ມິດ... ​ໃນ​ການ​ຢ້ຽມຢາມ​ອາຊີ​ເນື່ອງ​ໃນ​ໂອກາດ​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ອາຊີ​ຕາ​​ເວັນ​ອອກ​ຢູ່​ສິງກະ​ໂປ ແລະ ​ເວທີ​ປາ​ໄສ​ການ​ຮ່ວມມື​ເສດຖະກິດ​ອາຊີ-ປາຊີ​ຟິກຢູ່​ປາ​ປົວ​ນິວກີ​ເນ (​ເດືອນ​ພະຈິກ 2018), ຮອງ​ປະທານາທິບໍດີ​ອາ​ເມ​ລິ​ກາ ມ.​ແພນ​ເຊີ ​ໄດ້​ມີ​ຄຳ​ເວົ້າທີ່​ເຂັ້ມ​ແຂງ​ມຸ່ງ​ເປົ້າ​ໄປ​ທີ່​ປະ​ເທດ​ຈີນ. ອາ​ເມ​ລິ​ກາ​ປະກາດ​ວ່າ​ຈະ​ຮ່ວມ​ມື​ກັບ​ອົດ​ສະຕຣາລີ ​ແລະ​ປາ​ປົວ​ນິວກີ​ເນ ​ເພື່ອ​ພັດທະນາທ່າ​​ເຮືອ​ທະຫານທີ່​ເອີ້ນ​ວ່າ ລົມ​ບຣູມ ທີ່​ເກາ​ະມາ​ນູດ ຂອງ​ປາ​ປົວ​ນິວກີ​ເນ, ​ແນ​ໃສ່​ກີດ​ກັ້ນ​ຜົນ​ສະທ້ອນ​ຂອງ​ຈີນຢູ່​ປາຊີ​ຟິກ​ໃຕ້. ວັນ​ທີ 31 ທັນວາ 2018, ສະພາ​ແຫ່ງ​ຊາດ​ອາ​ເມ​ລິ​ກາ​ໄດ້ຜ່ານ​ກົດໝາຍ​ການ​ປະກັນ​ໄພ​ຕໍ່​ໃນ​ອາ​ຊີ ​ໂດຍມີ​ຄຳ​ໝັ້ນ​ສັນຍາ​ທີ່​ຈະ​ແຈ້ງ​ແລະ​ຍາວ​ນານ​ຢູ່​ໃນ​ພາກ​ພື້ນ.

ທາງ​ດ້ານ​ເສດຖະກິດ, ​ແຕ່​ວັນ​ທີ 6 ກໍລະກົດ 2018, ອາ​ເມ​ລິ​ການ​ໄດ້​ກຳນົດ​ການ​ຂຶ້ນ​ພາສີ​ຫຼາຍ​ຄັ້ງ ທີ່​ມີ​ມູນ​ຄ່າ​​ເປັນ​ຮ້ອຍ​ຕື້​ໂດ​ລາ​ສະຫະລັດ ຕໍ່​ສິນຄ້າ​ຂອງ​ຈີນ​ທີ່​ນຳ​ເຂົ້າ​ອາ​ເມ​ລິ​ກາ ​ແລະ ​ໄດ້​ເປີດ​ຕົວຢ່າງ​ເປັນ​ທາງ​ການ​ສົງຄາມ​ການ​ຄ້າລະຫວ່າງ​ອາ​ເມ​ລິ​ກາ​ກັບ​ຈີນ. ​ເດືອນ​ກັນຍາ 2018, ສະພາ​ແຫ່ງ​ຊາດ​ອາ​ເມ​ລິ​ກາ​ໄດ້​ຜ່ານກົດໝາຍວ່າ​ດ້ວຍ​ການ​ນຳ​ໃຊ້​ເງິນ​ລົງທຶນ​ພັດທະນາ​ໃຫ້​ມີ​ປະສິດທິ​ຜົນ​ຫຼາຍ​ກວ່າ​ອີກ (BUILD) ​ແລະ ບ້ວງ​ເງິນ 60 ຕື້​ໂດ​ລາ​ສະຫະລັດ​ເພື່ອ​ຊ່ວຍ​ເຫຼືອ​ບັນດາ​ປະ​ເທດ​ໃນພາກ​ພື້ນ​ທີ່​ຫາ​ກໍ່​ເຊື່ອມ​ໂຍງ​ເສດຖະກິດ, ​ໂດຍ​ສະ​ເພາະ​ແມ່ນ​ໂຄງ​ສ້າງ​ພື້ນຖານ, ​ໃນ​ນັ້ນ​ເອົາ​ໃຈ​ໃສ່​ຊຸກຍູ້​ການ​ຮ່ວມ​ມື​ກ່ຽວ​ກັບ​ການ​ເຊື່ອມ​ຕໍ່ໂຄງ​ສ້າງ​ພື້ນຖານ, ​ໂຄງ​ສ້າງ​ເຕັກນິກ, ພະລັງງານ (ພິ​ເສດ​ແມ່ນ​ນ້ຳມັນ​ອາຍ​ແກັດ) ​ແລະ​ການ​ເດີນ​​ເຮືອ ທີ່​ແຂ່ງຂັນ​ໂດຍ​ກົງ​ກັບ​ຈີນ. ອາ​ເມ​ລິ​ກາ​ກໍ່​ຜ່ານ​ບ້ວງ​ເງິນ 113 ລ້ານ​ໂດ​ລາສະຫະລັດ​ເພື່ອ​​ໃຫ້ບັນດາ​ປະ​ເທດ​ອາ​ຊຽນພັດທະນາ​ເສດຖະກິດ.

ກ່ຽວ​ກັບ​ການ​ປ້ອງກັນ​ປະ​ເທດ-ຄວາມ​ປອດ​ໄພ, ​ເດືອນ​ສິງຫາ 2018, ​ອາ​ເມ​ລິ​ກາ​ໄດ້​ຜ່ານ​ບ້ວງ​ເງິນ​ຊ່ວຍ​ເຫຼືອ​ອາ​ຊຽນທີ່​ມີ​ມູນ​ຄ່າ 300 ລ້ານ​ໂດ​ລາສະຫະລັດ​ ເພື່ອ​ຊ່ວຍ​ໃຫ້​ບັນດາ​ປະ​ເທດ​ອາຊີ​ຕາ​ເວັນ​ອອກສຽງ​​ໃຕ້ຍົກ​ສູງ​ຄວາມ​ສາມາດ​ຮັບປະກັນ​ຄວາມ​ປອດ​ໄພ. ຕໍ່​ຈາກ​ນັ້ນ, ສະພາ​ແຫ່ງ​ຊາດ​ອາ​ເມ​ລິ​ກາ​ໄດ້​ຜ່ານຮ່າງ​ກົດໝາຍອາ​ນັດ​ການ​ໃຊ້​ຈ່າຍ​ປ້ອງ​ກັນຊາ​ດ 2019 ​ຈອນ ມັກຄິນ (​ເດືອນ​ກັນຍາ 2018), ຕາມ​ນັ້ນ, ອາ​ເມ​ລິ​ການຈະສ້າງ​ຕັ້ງ​ກອງ​ເຮືອ​ລົບ​ທີ 2 ຄືນ​ໃໝ່, ຕໍ່​ກຳ​ປັ່ນ​ຕັດ​ນ້ຳ​ແຂງ​ໃໝ່ 6 ລຳ ​ເພື່ອຈັດ​ວາງ​ຢູ່​ພາກ​ພື້ນ​ຂົ້ວ​ໂລກ​ເໜືອ ​ແລະ​ເພີ່ມ​ທະວີ​ການ​ຈັດ​ກຳລັງ​​ໃນ​ລັດ​ອະ​ແ​ລສະກາ; ຕໍ່​ເຮືອ​ບັນທຸກ​ເຄື່ອງ​ບິນ​ໃໝ່ 1 ລຳ​ແລະ​ເຮືອ​ເດີນ​ທະ​ເລ​ໃໝ່ 7 ລຳ. ກອງ​ກຳລັງ​ປະຈຳການ​ຂອງ​ອາ​ເມ​ລິ​ກາ​ຢູ່​ພາກ​ພື້ນ​ປາຊີ​ຟິກຕາ​ເວັນ​ຕົກ​ ຈະ​ໄດ້ປັບປຸງ​ດ້ວຍ​ເຮືອ, ​ເຄື່ອງ​ບິນ ​ແລະ​ຍາ​ພາຫະນະ​ທີ່​ທັນສະ​ໄໝ​ເປັນ​ຈຳນວນ​ຫຼາຍ, ພິ​ເສດ ອາ​ເມ​ລິກາຈະ​ຈັດ​ໃຫ້​ເຮືອ​ບັນທຸກ​ເຄື່ອງ​ບິນ​ 2 ລຳ​ເຮັດ​ໜ້າ​ທີ່​ປະຈຳການ​ສູ້​ຮົບ​ທີ່​ທະ​ເລ​ຈີນ​ຕາ​ເວັນ​ອອກ​ ແລະ​ທະ​ເລ​ຕາ​ເວັນ​ມອອກ, ຄາດ​ວ່າ​ຈະ​ເລີ່​ມດຳ​ເນີນ​ການ​ຫຼັງ​ປີ 2023.

ບັນດາ​ບາດກ້າວ​ຜັນ​ຂະຫຍາຍ​ເທິງ​ນີ້​ໃຫ້​ເຫັນ​ວ່າ ອາ​ເມ​ລິ​ກາ​ນັບ​ມື້​ນັບ​​ເຂັ້ມ​ງວດ​ກວ່າ​ກັບ​ຈີນ ​ແລະ ພວມ​ຍູ້​ແຮງ​ການ​ເຕົ້າ​ໂຮມ​ກຳລັງ​ຢູ່​ໃນ​ພາກ​ພື້ນ​ ໂດຍ​ຜ່ານ ຍອປສປ. ​ແຕ່, ​ໃນ​ທ້າຍປີ 2018, ອຳນາດ​ການ​ປົກຄອງ​ຂອງ​ປະທານາທິບໍດີ ດ.ທຣັມ ຕ້ອງ​ປະ​ເຊີນ​ໜ້າ​ກັບ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ຫຼາຍ​ຢ່າງ, ພິ​ເສດ​ແມ່ນ​ບັນດາ​ບັນຫາ​ພາຍ​ໃນ, ​ເຊັ່ນ ການ​ກໍ່ສ້າງ​ກຳ​ແພງ​ຊາຍ​ແດນ​ລະຫວ່າງ​ອາ​ເມ​ລິ​ກາ​ແລະ​ເມັກ​ຊິກ, ລັດຖະບານ​ຖືກ​ປິດ​... ສິ່ງ​ດັ່ງກ່າວ​ໄດ້​ສົ່ງ​ຜົນ​ກະທົບ​ບໍ່​ນ້ອຍ​ເຖິງ​ການ​ຜັນ​ຂະຫຍາຍ​ຍຸດ​ທະ​ສາດ​ຂອງ​ອາ​ເມ​ລິ​ກາ​ຢູ່​ໃນ​ພາກ​ພື້ນ. ການ​ທີ່​ອາ​ເມ​ລິ​ກາ​ເລີ່​ມ​ເຈລະຈາ​ກ່ຽວ​ກັບ​ການ​ຄ້າ​ກັບ​ຈີນກໍ່​ເຮັດ​ໃຫ້​ຫຼາຍ​ປະ​ເທດ​ໃນ​ພາກ​ພື້ນນີ້​ມີ​ຄວາມ​ກັງວົນ​ວ່າ ​ອາດ​ຈະ​ມີ​ການ​ປະ​ນິປະນອມ​ທີ່​ເປັນ​ຜົນ​ກະທົບ​ບໍ່ດີ​ຕໍ່​ເຂົາ​ເຈົ້າ. ດັ່ງ​ນັ້ນ, ອາ​ເມ​ລີ​ກາ​ຍັງ​ມີ​ຫຼາຍ​ວຽກ​ທີ່​ຈະ​ຕ້ອງ​ແກ້​ໄຂ​ໃນ ຍອປສປ ​ໃນ​ຊຸມ​ປີ​ຕໍ່​ໄປ.

​ສະຖານະ​ການ​ໃນແຫຼມ​ເກົາຫຼີນັ້ນ​ບໍ່​ເຄັ່ງ​ຕຶງ ​ແຕ່​ບັນຫາ​ປອດ​ນິວ​ເຄຼຍຍັງ​ບໍ່​ມີ​ຄວາມ​ຄືບ​ໜ້າ​ຕົວ​ຈິງ

​ໃນ​ປີ 2018, ສະຖານະ​ການ​ໃນ​ແຫຼມ​ເກົາຫຼີ​ໄດ້​ຮັບ​ການ​ປົວ​ແປງ​ດີກ​ວ່າ​ປີ 2017, ຕົ້ນຕໍ​ແມ່ນ​ຍ້ອນ​ການ​ດັດປັບນະ​ໂຍບາຍ​ຢ່າງ​ຕັ້ງໜ້າ​ຂອງສາທາລະນະ​ລັດ​ປະຊາທິປະ​ໄຕ​ປະຊາຊົນ​ເກົາຫຼີ ​ແລະ ຄວາມ​ພະຍາຍາມ​ທາງ​ການ​ທູດ​ຂອງ​ບັນດາ​ປະ​ເທດ, ພິ​ເສດ​ແມ່ນ​ຂອງ​ສາທາລະນະ​ລັ​ດ​ເກົາຫຼີ. ສ.​ເກົາຫຼີ​ໄດ້​ເປັນ​ເຈົ້າ​ການ​ໃນ​ການ​ຮັບປະກັນ​ຄວາມ​ປອດ​ໄພ, ປະຕິບັດ​ນະ​ໂຍບາຍ​ການ​ຕ່າງປະ​ເທດ​ທີ່​ຂະຫຍັນ​ຂັນ​ເຄື່ອນຢ່າງ​ຕໍ່​ເນື່ອງ. ທາງ​ຝ່າຍ ສປປ.​ເກົາຫຼີ, ນັບ​ແຕ່​ຕົ້ນ​ປີ 2018, ​ເກົາຫຼີ​ໄດ້​ດຳ​ເນີນ​ກິດຈະກຳ​ທາງ​ການທູດ​ຢ່າງ​ລຽນຕິດ, ທັງ​ປົວ​ແປງ​ການ​ພົວພັນ​ກັບ ສ.​ເກົາຫຼີ, ທັງ​ຟື້ນ​ຟູ​ການ​ພົວພັນ​ກັບ​ຈີນ, ​ເປີດ​ການ​ເຈລະ​ຈາ​ກັບ​ອາ​ເມ​ລິ​ກາ, ​ເພີ່ມ​ທະວີ​ການ​ພົວພັນ​ກັບ​ລັດ​ເຊຍ ​ແລະ ຊຸກຍູ້​ການ​ພົວພັນ​ກັບ​ບັນດາ​ປະ​ເທດ​ອາ​ຊຽນ.

ບາດ​ລ້ຽວຂອງ​ສະຖານະ​ການ​ໃນ​ແຫຼມ​ເກົາຫຼີ​ໃນ​ປີ 2018 ​ແມ່ນ ອາ​ເມ​ລິກາ​ ແລະ ສປປ.​ເກົາຫຼີ ຈັດ​ຕັ້ງ​ການ​ພົບ​ປະ​ຂັ້ນ​ສຸດ​ຍອດ​ຄັ້ງ​ທຳ​ອິດ​ທີ່​ປະ​ເທດ​ສິງກະ​ໂປ ​ໃນ​ວັນ​ທີ 12 ມິຖຸນາ 2018 ​ແລະ ຜ່ານ​ຖະ​ແຫຼງການຮ່ວມ ຊຶ່ງ​ມີ​ເນື້ອ​ໃນ​ຕົ້ນຕໍ: 1- ສອງ​ຝ່າຍ​ໃຫ້​ຄຳ​ໝັ້ນ​ສັນຍາ​ຈະ​ສ້າງ​ຕັ້ງ​ການ​ພົວພັນ​ທາງ​ການ​ທູດ​ລະຫວ່າງ​ສະ​ຫະລັດ​ອາ​ເມ​ລິ​ກາ​ ແລະ ​ສປປ.​ເກົາຫຼີ; 2- ສ້າງສັນ​ຕິ​ພາບ, ຄວາມ​ໝັ້ນຄົງ​ຍາວ​ນານ​ຢູ່​ແຫຼມ​ເກົາຫຼີ; 3- ສປປ.​ເກົາຫຼີ​ໃຫ້​ຄຳ​ໝັ້ນ​ສັນຍາ​ມຸ່ງ​ໄປ​ສູ່​ການ​ປອດ​ນິວ​ເຄຼຍຢ່າງສົມບູນ; 4- ຊອກ​ຫາ​ເກັບ​ໂຮມ​ແລະ​ສົ່ງຄືນ​ປະ​ເທດ ​ອັດຖິ​ຂອງ​ທະຫານ​ອາ​ເມ​ລິ​ກາ​ທີ່​ຫາຍ​ສາບ​ສູນ (MIA) ​ໃນ​ສົງຄາມ​ເກົາຫຼີ. ​ເຖິງ​ວ່າ ພາຍຫຼັງ​ການ​ພົບ​ປະ​ຂັ້ນ​ສຸດ​ຍອດ​ທີ່​ສິງຫະ​ໂປ, ບັນຫາ​ການ​ປອດ​ນິວ​ເຄຼຍ​ໃນ​ແຫຼມ​ເກົາ​ຫຼີບໍ່​ມີ​ຄວາມ​ຄືບ​ໜ້າ​ຕົວ​ຈິງ​ກໍ​ຕາມ, ​ແຕ່​ການຈັດ​ຕັ້ງຢ່າງ​ສຳ​ເລັດ​ຜົນ ການ​ພົບ​ປະ​ຂັ້ນ​ສຸດ​ຍອດ​ອັນ​ເປັນ​ປະຫວັດສາດລະຫວ່າງ​ສະຫະລັດ​ອາ​ເມ​ລິ​ກາ ແລະ ສປປ.​ເກົາຫຼີ ກໍ່​ໄດ້​ເຮັດ​ໃຫ້​ສະພາບ​ການ​ຜ່ອນຄາຍ​ລົງ ​ແລະ ຊຸກຍູ້​ການ​ພົວພັນ​ອື່ນ​ໃຫ້​ມີ​ການ​ຫັນປ່ຽນ​ໃນ​ທາງ​ບວກ.

ການ​ພົວພັນ​ລະຫວ່າງ​ເກົາຫຼີ​ມີ​ຄວາມ​ຄືບ​ໜ້າ​ທີ່​ມີ​ລັກສະນະ​ບຸກທະລຸ​ໃນ​ປີ 2018. ສອງ​ຝ່າຍ​ໄດ້​ຜ່ານຖະ​ແຫຼ​ງການຮ່ວມ ພັນ​ມຸນ​ຈອມ (​ເດືອນ​ເມສາ 2018), ຖະ​ແຫຼ​ງການ​ຮ່ວມ ປຽງ​ຢາງ (​ເດືອນ​ກັນຍາ 2018), ​ເປີດ​ຫ້ອງການ​ຕິດ​ຕໍ່​ພົວພັນ​ລະຫວ່າງ​ເກົາຫຼີ​ໃນ​ເຂດ​ອຸດສາຫະກຳ ​ໄຂ່​ຖ່ານ (​ເດືອນ​ກັນຍາ 2018). ​ໃນ​ເວລາ​ນີ້, ສອງ​ຝ່າຍ​ພວມ​ຊຸກຍູ້​ເພື່ອ​ໃຫ້​ຜູ້ນຳ ສປປ.​ເກົາຫຼີ ​ຄິມ ຈອງ​ອຶນ ໄປ​ຢ້ຽມຢາມ ສ.​ເກົາຫຼີ. ບາງ​ໂຄງການ​ເສດຖະກິດ​ລະຫວ່າງ​ເກົາຫຼີ ກໍ່​ອາດ​ຈະ​ໄດ້​ຜັນ​ຂະຫຍາຍ​ໃນ​ເວລາ​ທີ່​ຈະ​ມາ​ເຖິງ​ນີ້.

​ໃນ​ຂະນະ​ນັ້ນ, ການ​ພົວພັນ​ລະຫວ່າງ​ຈີນ​ແລະ ສປປ.​ເກົາຫຼີ ກໍ່​ມີ​ການ​ພັດທະນາ​ທີ​ບໍ່​ຄາດ​ຄິດ​ແລະ​ໃນ​ທາງ​ບວກ ໃນ​ປີ 2018. ສອງ​ປະ​ເທດ​ໄດ້ສືບ​ຕໍ່​ແລກປ່ຽນ​ຄະນະ​ຜູ້​ແທນຂັ້ນ​ສູງພາຍຫຼັງ​ເຈັດ​ປີ​ຂອງ​ການ​ຢຸດ​ຊະ​ງັກ. ປະທານ ສປປ.​ເກົາຫຼີ ​ຄິມ ຈອງ​ອຶນ ​ໄດ້​ໄປ​ຢ້ຽມຢາມ ສປປ.ຈີນ 4 ຄັ້ງນັບ​ແຕ່​ເດືອນ​ເມສາ 2018 ​ເຖິງ​ດຽວ​ນີ້ ​ແລະ ສປປ.​ເກົາຫຼີ ກໍ່​ພວມ​ຊຸກຍູ້​ການ​ຢ້ຽມຢາມ​ຂອງ​ປະ​ທານ ສປປ.ຈີນ ສີ​ ຈິ້ນ​ຜິ​ງ ທີ່​ປະ​ເທດ​ນີ້. ການ​ແລກປ່ຽນຄະນະ​ຜູ້​ແທນ​ລະດັບ​ສູງ​ລະຫວ່າງ​ຈີນ​ ແລະ ສປປ.​ເກົາຫຼີ ​ໄດ້​ຮັບ​ການ​ສືບ​ຕໍ່​ນັ້ນ ​ໄດ້​ປະກອບສ່ວນ​ປັບປຸງ​ເສດຖະກິດ​ຂອງ ສປປ.​ເກົາຫຼີ, ​ເປີດ​ພື້ນ​ທີ່​ສຳລັບ ສປປ.​ເກົາຫຼີ ​ເພື່ອ​ຊຸກຍູ້ການ​ປອດ​ນິວ​ເຄຼຍ​ໃນ​ແຫຼມ​ເກົາຫຼີ ​ແລະ ປົວແປງ​ການ​ພົວພັນກັບ​ບັນດາ​ຄູ່​ຮ່ວມ​ມື​ທີ່​ສຳຄັນ​ອື່ນໆ, ​ໂດຍ​ສະ​ເພາະ​ຢ່າງ​ຍິ່ງ​ສະຫະລັດ​ອາ​ເມ​ລິ​ກາ​ ແລະ ສ.​ເກົາຫຼີ.

​ເຖິງ​ວ່າ​ໄດ້​ບັນລຸ​ຄວາມ​ກ້າວໜ້າ​ທາງ​ບວກ, ປະກອບສ່ວນ​ຜ່ອນຄາຍ​ຄວາມ​ເຄັ່ງຮ້ອນ​ໃນ​ແຫຼມ​ເກົາຫຼີກໍ່ຕາມ, ​ແຕ່​ພາກ​ພື້ນ​ນີ້​ຍັງ​ມີ​ຄວາມ​ສ່ຽງ​ແລະ​ສິ່ງ​ທ້າ​ທາຍ​ຫຼາຍ​ຢ່າງ. ​ກ່ຽວ​ກັບ​ບັນຫາ​ປອດ​ນິວ​ເຄຼຍຢູ່​ໃນ​ແຫຼມ​ເກົາຫຼີ, ​ເຖິງ​ວ່າ​ອາ​ເມ​ລິ​ການ​ ແລະ ສປປ.​ເກົາຫຼີ ​ໄດ້​ເປີດ​ບັນດາ​ຊ່ອງ​ສາຍ​ການ​ຕິດ​ຕໍ່​ແລກປ່ຽນ​ໂດຍ​ກົງ, ​ແຕ່​ຄວາມ​ຂັດ​ແຍ່ງ​ທາງ​ຫຼັກ​ໝັ້ນຍັງ​ໃຫຍ່​ຫຼາຍ. ອາ​ເມ​ລິ​ກາຍັງ​ສືບ​ຕໍ່​ເພີ່ມ​ຄວາມ​ກົດ​ດັນ ​ແລະ ບໍ່​ປ່ຽນ​ແປງ​ຫຼັກ​ໝັ້ນ​ກ່ຽວ​ກັບ​ບັນຫາ​ນີ້.

ທະ​ເລ​ຕາ​ເວັນ​ອອກ​ສະຫງົບ ​ແຕ່​ຄື້ນ​ໃຕ້​ດິນ​ຍັງ​ມີ​ຂະໜາດ​ໃຫຍ່

​ໃນ​ປີ 2018, ສະພາບ​ການ​ໃນ​ທະ​ເລ​ຕາ​ເວັນ​ອອກມີ​ຄວມສະຫງົບ​ພໍ​ຄວນ​ທາງ​ການ​ທູດ, ບໍ່​ມີ​ເຫດການ​ທີ່​ສຳຄັນ​ໃນ​ພາກ​ສະໜາມ, ​ແຕ່​ຄື້ນ​ໃຕ້​ດິນຍັງ​ມີ​ຄວາມ​ຮຸນ​ແຮງ​ຫຼາຍ. ຄຽງ​ຂ້າງ​ກັບ​ການ​ເພີ່ມ​ທະວີ​ການ​ເຄື່ອນ​ໄຫວ​ໃນ​ສະໜາມ, ອາ​ເມ​ລິ​ກາ​ກໍ່​ໄດ້​ສະ​ແດງ​ຄຳ​ໝັ້ນ​ສັນຍາຍຸດ​ທະ​ສາດ​ທີ່​ຍາວ​ນານ​ແລະ​ຮອບດ້ານ​ກັບ​ພາກ​ພື້ນ, ​ເສີມ​ສ້າງ​ຄວາມ​ໝັ້ນ​ໃຈ​ໃຫ້​ກັບ​ພັນທະ​ມິດ​ແລະ​ຄູ່​ຮ່ວມມື; ຫັນ ຍອປສປ ​ເປັນອັນ​ລະອຽດ​ດ້ວຍ​ຫຼາຍ​ໂຄງການ; ​ເພີ່ມ​ແຮງ​ກົດ​ດັນ​ຕໍ່ຈີນ, ​ເຊັ່ນ ຮຽກຮ້ອງ​ໃຫ້​ເອົາ​ລູກ​ສອນ​ໄຟອອກ​ຈາກ​ໂຄງ​ສ້າງ​ພູມິສາດ​ປະດິດ ທີ່​ຈີນ​ຢຶດຄອງ​ແລະກໍ່ສ້າງ​ຢ່າງ​ຜິດ​ກົດໝາຍ ​ໃນ​ໝູ່​ເກາະ​ເຈື່ອງ​ຊາ​ຂອງ​ຫວຽດນາມ...

ຈີນ​ກໍ່​ມີ​ການ​ປັບ​ປ່ຽນ​ບາງ​ຢ່າງ​ໃນ​ບັນຫາ​ທະ​ເລ​ຕາ​ເວັນ​ອອກ. ​ເດືອນ​ສິງຫາ 2018, ຈີນ​ແລະ​ອາ​ຊຽນ​ໄດ້​ຜ່ານຮ່າງ​ເອກະສານ​ການ​ເຈລະຈາ​ໜຶ່ງ​ດຽວກ່ຽວ​ກັບ ປະມວນ​ຂໍ້​ກຳນົດ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (COC). ​ໃນ​ກອງ​ປະຊຸມ​ຂັ້ນ​ສູງອາ​ຊຽນ - ຈີນ (ວັນ​ທີ 14 ພະຈິກ 2018), ນາຍົກລັດຖະມົນຕີຈີນ ຫຼີ່ ​ເຄີ້ສຽງ ​ໄດ້​ຢືນຢັນ​ຄວາມປາຖະໜາ​ທີ່​ຈະ​ເຮັດ​ສຳ​ເລັດ COC ພາຍ​ໃນ​ສາມ​ປີ. ຫຼັກ​ໝັ້ນ​ຂອງ​ຈີນ​ແມ່ນ ກໍ່ສ້າງ COC ​ໃນ​ລະດັບ​ລວມໆ, ບໍ່​ລົງ​ເລິກ​​ເຂົ້າໃນ​ບັນດາ​ບັນຫາ​ຫຼັກຂອງ​ຂໍ້​ພິພາດ​ຂັດ​ແຍ່ງ ​ແລະ ຢາກ​ປັດ​ເຂ່ຍ​ບັນດາ​ປະ​ເທດ​ນອກ​ພາກ​ພື້ນອອກ​ຈາກ​ບັນຫາ​ຄວາມ​ພິພາດ​ຂັດ​ແຍ່ງ​ຢູ່​ທະ​ເລ​ຕາ​ເວັນ​ອອກ. ​ໃນ​ຂະນະ​ນັ້ນ, ອາ​ຊຽນຢາກ​ມີ COC ທີ່​ມີ​ເນື້ອ​ແທ້, ຄື​ກັບ​ກົນ​ໄກ​ການ​ແລກປ່ຽນ​ພາກ​ພື້ນ​ກ່ຽວ​ກັບ​ທະ​ເລ​ຕາ​ເວັນ​ອອກ ກັບ​ຈີນ, ຊຸກ​ຍູ້​ຈີນ​ເຂົ້າ​ຮ່ວມ​ຢ່າງ​ຕັ້ງໜ້າ​ແລະ​ມີ​ຄວາມ​ຮັບຜິດຊອບ​ຢູ່​ທະ​ເລ​ຕາ​ເວັນ​ອອກ, ຮັກສາສະຖຽນ​ລະ​ພາບ​ແລະ​ສ້າງ​ມາດຕະຖານ​ທົ່ວ​ໄປ​ໃນ​ພາກ​ພື້ນ ຕາມ​ກົດໝາຍ​ສາກົນ, ​ໃນ​ນັ້ນ​ມີ​ອະນຸ​ສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລ (UNCLOS) ປີ 1982.

ພ້ອມ​ກັນ​ກັບ​ການ​ເຄື່ອນ​ໄຫວ​ທາງ​ການ​ທູດ, ​ໃນ​ພາກ​ສະໜາມ, ຈີນ​ຍັງ​ສືບ​ຕໍ່​ຍູ້​ແຮງການ​ເຄື່ອນ​ໄຫວ​ເພື່ອ​ແນ​ໃສ່​ຢືນຢັນການ​ອ້າງ​ສິດທິ​ທີ່​ບໍ່​ສົມ​ເຫດ​ສົມ​ຜົນ ກ່ຽວ​ກັບ​ອະທິປະ​ໄຕ​ຕາມ “​ເສັ້ນ​ເກົ້າ​ຕອນ”, ​ເພີ່ມ​ທະວີ​ການ​ເຄື່ອນ​ໄຫວ​ທາງ​ການ​ທະຫານ​ໃນ​ບັນດາໂຄງ​ສ້າງ​ພູມິສາດປະດິດ​ແລະ​ໃນ​ທະ​ເລ​ຕາ​ເວັນ​ອອກ... ຍ້ອນ​ແນວ​ນັ້ນ​ສະຖານະ​ການທະ​ເລ​ຕາ​ເວັນ​ອອກ​ຍັງ​ມີ​​ປັດ​ໄຈ​​ສັບສົນ​ເປັນ​ຈຳນວນ​ຫຼາຍ.

ອາ​ຊຽນ​ໄດ້ຢືນຢັນ​ບົດບາດ​​ຂອງ​ຕົນໃນສະພາບ​ການ​ທີ່​ມີ​ຄວາມສັບສົນຫຼາຍ

​ໃນ​ປີ 2018, ອາ​ຊຽນສືບ​ຕໍ່​ຮັກສາ​ຄວາມ​ສາມັກຄີ, ຍູ້​ແຮງ​ການ​ກໍ່ສ້າງ​ປະຊາ​ຄົມ ​ແລະ ຜັນ​ຂະຫຍາຍ​ແຜນ​ນະ​ໂຍບາຍ​ບຸລິມະສິດ​ກ່ຽວ​ກັບ​ອາ​ຊຽນທີ່ “ສ້າງ​ຄວາມ​ເຂັ້ມ​ແຂງ​​ໃຫ້​ຕົນ​​ເອງ​ແລະ​ປະດິດສ້າງ”, ພະຍາຍາມ​ປະຕິບັດຢ່າງ​ມີ​ປະສິດທິ​ຜົນ ​ວິ​ໄສ​ທັດ​ປະຊາ​ຄົມ​ອາ​ຊຽນ​ໃນ​ປີ 2025 ​ແລະ ​ແຜນ​ແມ່​ບົດ​ກໍ່ສ້າງ​ອາ​ຊຽນ​ໃນ​ສາມ​ເສົາ​ຄ້ຳ​.   

ການ​ຮ່ວມ​ມື​ດ້ານ​ການ​ເມືອງ - ຄວາມ​ປອດ​ໄພ ສືບ​ຕໍ່​ໄດ້​ຮັບ​ການ​ຍູ້​ແຮງ ​ແລະ ​ໄດ້​ຮັບຜົນ​ທາງບວກຫຼາຍ​ຢ່າງ. ອາ​ຊຽນ ​ໄດ້ຜັນ​ຂະຫຍາຍ 239/290 ການ​ປະ​ທຳ​ໃນ​ຄວາມ​ຮ່ວມ​ມື​ດ້ານ​ການ​ເມືອງ​ຄວາມປອດ​ໄພ, ປະກອບສ່ວນ​ຮັບປະກັນ​ສັນຕິພາບ, ​ສະຖຽນ​ລະ​ພາບ​ໃນ​ພາກ​ພື້ນ, ຄວາມ​ສະຫງົບ ປອດ​ໄພ​ໃຫ້​ປະຊາຊົນ. ກ່ຽວ​ກັບ​ການ​ຕ່າງປະ​ເທດ, ອາຊຽນສຸມ​ໃສ່​ຍູ້​ແຮງ​ການ​ສົນທະນາ​ແລະການ​ຮ່ວມ​ມື​​ເພື່ອສ້າງຄວາມ​​ໄວ້​ວາງ​ໃຈ, ກໍ່ສ້າງ​ແລະ​ແບ່ງປັນ​ບັນດາ​ມາດຕະຖານ​ການ​ປະຕິ​ບັດ, ປັບປຸງ​ບັນດາ​ກົນ​ໄກ, ຂອບ​ເຂດ​ການ​ຮ່ວມ​ມື​ເພື່ອ​ຮັບ​​ໃຊ້​ໃຫ້​ແກ່​ໂຄງ​ສ້າງ​ພາກ​ພື້ນ​​ເປີດ, ​ອີງ​ໃສ່​ກົດໝາຍ​ແລະ​ມາດຕະຖານ​ສາກົນ, ​ໂປ່​ງ​ໃສຍອມຮັບ​​ໄດ້ ຊຶ່ງອາ​ຊຽນຢູ່​ໃນ​ຖານະ​ສູນ​ກາງ. ອາ​ຊຽນ​ກໍ່​ເຫັນ​ດີ​ໃຫ້ ອີຣານ ​ແລະ ອາກຊັງ​ຕີນ ​ເຂົ້າ​ຮ່ວມ​ໃນ​ສັນຍາ​ມິດຕະພາບ​ແລະ​ການ​ຮ່ວມ​ມື (TAC), ຍົກ​ຈຳນວນ​ສະມາຊິກ​ຂອງ TAC ຂຶ້ນ​ເປັນ 37 ປະ​ເທດ. ອາ​ຊຽນກໍ່​ໄດ້​ພ້ອມ​ກັນ​ກັບ​ຈີນ​ ຊຸກຍູ້​ການ​ຜັນ​ຂະຫຍາຍ ຖະ​ແຫຼ​ງການ​ກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ​ແລະ​ຜັນ​ຂະຫຍາຍ​ການ​ເຈລະຈາ​ຕົວ​ຈິງກ່ຽວ​ກັບ COC, ຕັ້ງໜ້າ​ໃນ​ການສະ​ແດງ​ທັດສະນະ​ແລະ​ບົດບາ​ອຂອງ​ອາ​ຊຽນ​ໃນ​ບັນດາ​ບັນຫາ​ສາກົນ​ແລະ​ພາກ​ພື້ນ, ​ແລະ​ຕັ້ງໜ້າ​ປະສານ​ສົມທົບຫຼັກ​ໝັ້ນ​ໃນ​ເວທີ​ປາ​ໄສ​ພະຫຸ​ພາຄີ​ຕ່າງໆ.

ການ​ຮ່ວມ​ມື​ດ້ານ​ການ​ປ້ອງ​ກັນ​ປະ​ເທດ ຂອງ​ອາ​ຊຽນກໍ່​ມີ​ເນື້ອ​ແທ້​ຕົວ​ຈິງ​ຫຼາຍ​ຂຶ້ນ ​ແລະ ​ເຂົ້າ​ສູ່​ລວງ​ເລິກ, ຊ່ວຍ​ສ້າງ​ຄວາມ​ໄວ້​ວາງ​ໃຈ, ຍົກ​ສູງ​ກຳລັງ​ແລະຄວາມ​ສາມ​າດ​ໃນ​ການຮັບ​ມື​ກັບຄວາມ​ທ້າ​ທາຍ​ທີ່​ເກີດ​ຂຶ້ນ. ອາ​ຊຽນ​ໄດ້​ຜ່ານກົດ​ລະບຽບ​​ເພື່ອແນະນຳ​​ໃຫ້​ຫຼີ​ກເວັ້ນການ​ປະ​ທະ​ກັນ​ທາງ​ອາກາດ​ລະຫວ່າງ​ເຮືອບິນ​ທະຫານ, ຈັດ​ຝຶກ​ອົບຮົມ​ການບັນ​ເທົາ​ໄພພິບັດ, ​ເພີ່ມ​ທະວີ​ການ​ຮ່ວມ​ມື​​ໃນ​ການຕ້ານການ​ກໍ່​ການ​ຮ້າຍ, ການ​ຮ່ວມ​ມື​ທາງ​ດ້ານ​ເສນາ​ຮັກ...

ກ່ຽວ​ກັບ​ການ​ຮ່ວມ​ມື​ທາງ​ດ້ານ​ເສດຖະກິດ, ​ໃນ​ປີ 2018, ອາ​ຊຽນ​ໄດ້​ສຳ​ເລັດ​ການ​ເຈລະຈາ​ກ່ຽວ​ກັບ​ສັນຍາການ​ຄ້າ​ເອ​ເລັກ​ໂຕຣນິກອາ​ຊຽນ ​ແລະ ຂອບ​ການ​ເຊື່ອມ​ໂຍງ​ດິຈິ​ຕອນອາ​ຊຽນ; ລົງ​ນາມ​ໃນ​ອະນຸ​ສັນຍາ​ທີ່​ໜຶ່ງກ່ຽວ​ກັບ​ການ​ປັບປຸງ​ສັນຍາ​ການ​ຄ້າ​ສິນຄ້າ​ອາ​ຊຽນ (ATIGA), ອະນຸ​ສັນຍາ​ວ່າ​ດ້ວຍ​ການ​ປະຕິບັດຊຸດ​ຂໍ້​ຜູກ​ພັນ​ທີ 10 ​ໃນ​ຂອບ​ຂອງ​ຂອບ​ສັນຍາ​ອາ​ຊຽນກ່ຽວ​ກັບ​ການ​ບໍລິການ (AFAS), ອະນຸ​ສັນຍາ​ທີ​ 2 ​ແລະທີ​ 3 ​ເພື່ອ​ຍົກ​ລະດັບ​ສັນຍາ​ການ​ລົງທຶນ​ຮອບດ້ານ​ຂອງ​ອາ​ຊຽນ (ACIA), ບົດ​ບັນ​ທຶກການ​ຮ່ວມ​ມື​ລະຫວ່າງ​ອາ​ຊຽນ​ແລະ​ອົງການ​ພະລັງງານ​ທົດ​ແທນ​ສາກົນ (IRENA). ອາ​ຊຽນກໍ່​ໄດ້​ສຳ​​ເລັດ​ສັນຍາ​ການ​ຄ້າ​ບໍລິການ​ໃນ​ອາ​ຊຽນ (ATISA), ຜ່ານຖະ​ແຫຼ​ງການ​ອາ​ຊຽນກ່ຽວ​ກັບ​ການທ່ອງທ່ຽວທະ​ເລ, ສ້າງ​ຕັ້ງ​ເຄືອ​ຂ່າຍ​ຄວາມ​ຄິດ​ສ້າງສັນ​ອາ​ຊຽນ... ກ່ຽວ​ກັບ​ການ​ຄ້າ​ສິນຄ້າ, ອາ​ຊຽນ​ໄດ້​ຍົກ​ເລີກ 98,6% ຂອງ​ສາຍ​ພາສີ​ນຳ​ເຂົ້າຕາມ​ການ​ກຳນົດ​ໃນ​ສັນຍາ ATIGA ​ແລະ ຄາດ​ວ່າ​ຈະ​ສຳ​ເລັດ​ການ​ຍົກ​ເລີກ​ພາສີ​ນຳ​ເຂົ້າ​ໃນ​ຕັ້ນປີ 2019. ກ່ຽວ​ກັບ​ການ​ຄ້າ​ບໍລິການ, ອາ​ຊຽນ​ໄດ້​ຜັນ​ຂະຫຍາຍຂອບ​ການປະກາດ​ສະ​ນິຍະ​ບັດ​ອາ​ຊຽນ (AQRF) ​ແລະ​ດຳ​ເນີນ​ການ​ຄົ້ນຄວ້າຄວາມ​ເປັນ​ໄປ​ໄດ້​ ​​ແນ​ໃສ່ສ້າງ​ບັດ​ນັກທຸລະກິດ​ອາ​ຊຽນ (ABTC) ​ເພື່ອ​ອຳນວຍ​ຄວາມ​ສະດວກ​ໃນ​ການ​ເຄື່ອນ​ໄຫວ​ຜ່ານ​ແດນ​ຊົ່ວຄາວ​ຂອງບຸກຄົນ​ທຳ​ມະ​ດາ​ໃນ​ພາກ​ພື້ນ. ນອກຈາກ​ນັ້ນ, ​ໃນ​ບັນດາ​ຂົງ​ເຂດ​ອື່ນ​ເຊັ່ນ ການ​ອຳນວຍ​ຄວາມ​ສະດວກ​ທາງ​ການ​ຄ້າ, ສຸລະກາກອນ, ​ມາດ​ຕະຖານ​ແລະຄວາມ​ສອດຄ່ອງ​ກັບ​ມາດຕະຖານ, ນະ​ໂຍບາຍ​ການ​ແຂ່ງຂັນ, ການປົກ​ປ້ອງ​ຜູ້​ບໍລິ​ໂພ​ກ, ຊັບ​ສິນ​ທາງ​ປັນຍາ, ການ​ຄ້າ​ເອ​ເລັກ​ໂຕຣນິກ, ວິ​ສາ​ຫະກິດ​ຂະໜາດ​ນ້ອຍ​ສຸດ, ຂະໜາດນ້ອຍ ​ແລະ ຂະໜາດ​ກາງ (MSMEs)... ກໍ່​ບັນລຸ​ຜົນສຳ​ເລັດ​ຫຼາຍ​ຢ່າງ, ປະກອບສ່ວນ​ປົວ​ແປງ​ສະພາບ​ແວດ​ລ້ອມ​ການ​ລົງທຶນ​ທຸລະ​ກິດຢູ່​ໃນ​ພາກ​ພື້ນ ​ແລະ ຍົກ​ສູງ​ຄວາມ​ສາມ​າດ​ແຂ່ງຂັນ​ຂອງປະຊາ​ຄົມ​ເສດຖະກິດ​ອາ​ຊຽນ (AEC). ​ໃນ​ການ​ຮ່ວມ​ມື​ທາງ​ເສດຖະກິດ​ກັບ​ຄູ່​ຮ່ວມ​ມື, ອາ​ຊຽນພວມ​ເຈລະຈາ​ເພື່ອ​ຍົກ​ລະດັບບັນດາ​ສັນຍາ​ການ​ຄ້າ​ເສລີ (FTA) ທີ່​ໄດ້​ເຊັນ​ກັບ​ຈີນ, ສ.​ເກົາຫຼີ, ຍີ່ປຸ່ນ, ອົດ​ສະຕຣາລີ, ນູ​ແວນ​ເຊ​ລັງ​ ​ແລະ ອິນ​ເດຍ; ​ໃຫ້​ສັດຕະຍາບັນ​ແລະ​ຫັນ​ເປັນ​ກົດໝາຍ​ໃນ​ປະ​ເທດ ​ຕໍ່ບັນດາ​ຂໍ້​ຕົກລົງ​ໃນ​ສັນຍາ​ການ​ຄ້າ​ເສລີ​ລະຫວ່າງ​ອາ​ຊຽນ ​ແລະ ຮ່ອງ​ກົງ (ປະ​ເທດ​ຈີນ), ສຳ​ເລັດ​ການ​ຄົ້ນຄວ້າ​ຄວາມ​ເປັນ​ໄປ​ໄດ້​ຂອງ​ສັນຍາ​ການ​ຄ້າ​ເສລີ​ລະຫວ່າງ​ອາຊຽນ​ແລະ​ກາ​ນາ​ດາ, ​ແລະ​ພວມ​ກໍ່ສ້າງ​ຂອບ​ການ​ເຈລະຈາ​ສັນຍາ​ການ​ຄ້າ​ເສລີ​ລະຫວ່າງ​ອາ​ຊຽນ​ແລະ​ສະຫະພັນ​ເອີຣົບ.

ກ່ຽວ​ກັບ​ການ​ຮ່ວມ​ມື​ທາງ​ດ້ານ​ວັດທະນະທຳ - ສັງຄົມ, ມາ​ເຖິງ​ດຽວ​ນີ້ ອາ​ຊຽນ​ໄດ້​​ເຮັດສຳ​ເລັດ​ປະມານ 8% ຂອງ​ສາຍ​ການ​ກະທຳ​ໃນ​ແຜນການ​ປະຕິບັດ​ງານ​ການ​ກໍ່ສ້າງ​ປະຊາ​ຄົມ​ວັດທະນະທຳ-ສັງຄົມ​ອາ​ຊຽນ (ASCC) ຮອດ​ປີ 2025, 47% ຂອງ​ສາຍ​ການ​ກະທຳ​ທີ່​ພວມ​ເຮັດ ​ແລະ 45% ຂອງ​ສາຍ​ການ​ກະທຳ​ທີ່​ຈະ​​ໄດ້ປະຕິບັດ​ໃນຊຸມ​ປີ​ທີ່​ຈະ​ມາ​ເຖິງ. ມີ 14 ​ໃນ 15 ອົງການ​ຮ່ວມ​ມືພິ​ເສດ​ໃນ ASCC ​ໄດ້​ສຳ​ເລັດ​ແຜນການ​ເຮັດ​ວຽກ. ອາ​ຊຽນ​ໄດ້​ເພີ່ມ​ທະວີ​ລະບົບ​ການຕິດຕາມກວດກາ ​ແລະ ປະ​ເມີນ​ຄວາມ​ຄືບ​ໜ້າ​ໃນ​ການ​ຜັນ​ຂະຫຍາຍ​ແຜນ​ແມ່​ບົດ ASCC 2025. ການ​ພົວພັນ​ການ​ຕ່າງປະ​ເທດ​ຂອງ​ອາ​ຊຽນກັບ​ບັນດາ​ຄູ່​ຮ່ວມ​ມືນັ້ນ ສືບ​ຕໍ່​ໄດ້​ຮັບ​ການ​ເພີ່ມ​ທະວີ​ທາງ​ດ້ານລວງ​ກວ້າງ​ແລະ​ລວງ​ເລິກ. ປີ 2018 ກໍ່​ຂີດ​ໝາຍການ​ໂອນ​ບົດບາດ​ການ​ປະ​ສານ​ງານ​ລະຫວ່າງ​ບັນດາ​ປະ​ເທດ​ອາ​ຊຽນ​ແລະ​ຄູ່​ຮ່ວມ​ງານ. ບັນດາ​ປະ​ເທດ​ຄູ່​ສົນທະນາ​ ລ້ວນ​ແຕ່​ໄດ້​ຢືນຢັນຄວາມ​ສະໜັບສະໜູນ​ບົດບາດ​ເປັນ​ໃຈກາງ​ຂອງ​ອາ​ຊຽນ ​ໃນ​ການ​ກໍ່ສ້າງ​ໂຄງ​ສ້າງ​ພາກ​ພື້ນ​ທີ່ເປີດ​ກວ້າງ, ຮັບ​ເອົາ, ​ໂປ່​ງ​ໃສ ​ແລະ ​ເຄື່ອນ​ເໜັງຕາມກົດໝາຍ, ສະໜັບສະໜູນ​ອາ​ຊຽນ​ໃນ​ການ​ຜັນ​ຂະຫຍາຍ​ວິ​ໄສ​ທັດ​ປະຊາ​ຄົມ 2025, ຕັ້ງໜ້າ​ໃນ​ການ​ຊຸກຍູ້​ການ​ພົວພັນ​ຕົວ​ຈິງ​ກັບ​ອາ​ຊຽນ​ໂດຍ​ຜ່ານ​ບັນດາ​ໂຄງການ, ​ແຜນ​ງານ​ການ​ຮ່ວມ​ມື​ຕົວ​ຈິງ ​ເພື່ອ​ເພີ່ມ​ທະວີ​ການ​ເຊື່ອມ​ຕໍ່ ​ແລະ ຜັນ​ຂະຫຍາຍ​ການ​ເຊື່ອມ​ຕໍ່​ພາກ​ພື້ນ, ຫຼຸດຜ່ອນ​ຊ່ອງ​ຫວ່າງການ​ພັດທະນາ ​ແລະ ຮັບ​ມື​ກັບ​ຄວາມ​ທ້າ​ທາຍ​ລະດັບ​ໂລກ. ​ໃນ​ສະພາບ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່​ ແລະ ການ​ເຄື່ອນ​ໄຫວ​ປົກ​ປ້ອງ, ການ​ປະພຶດ​ຝ່າຍ​ດຽວ ມີ​ທ່າ​ອຽງ​ທີ່​ຈະ​ເພີ່ມ​ຂຶ້ນນັ້ນ, ອາ​ຊຽນ​ແລະ​ບັນດາ​ຄູ່​ຮ່ວມ​ມື ​ຈະປະສານ​ງານ​ຢ່າງ​ເປັນ​ເອກະສັນ​ ເພື່ອຊຸກຍູ້​ແລະ​ປັບປຸງ​ລະບົບ​ການ​ຄ້າພະຫຸ​ພາຄີ, ພ້ອມ​ກັນ​ນັ້ນ​ກໍ່​ເປີດ​ກວ້າງ​ບັນດາ​ຂົງ​ເຂດ​ການ​ຮ່ວມ​ມື...

ກ່ຽວ​ກັບ​ການ​ຮ່ວມ​ມື​​ໃນ​ການເຊື່ອມ​ຕໍ່, ອາ​ຊຽນສືບ​ຕໍ່​ຊຸກຍູ້​ການ​ປະສານ​ງານ​​ແບບສະຫະ​ຂະ​ແໜງ​ລະຫວ່າງຄະນະ​ກຳມະການ​ປະສານ​ງານ (ACCC), ການ​ປະສານ​ງານ​ແຫ່ງ​ຊາດ (NC), ຈຸດ​ປະສານ​ງານ​ແຫ່ງ​ຊາດ (NFPs) ​ແລະ​ບັນດາ​ອົງການປະຕິບັດ​ງານ​ຂະ​ແໜງ, ຂົງ​ເຂດພ້ອມ​ກັບ​ຄູ່​ຮ່ວມ​ງານ. ອາ​ຊຽນ​ໄດ້ສຳ​ເລັດ​ເອກະສານ​ແນວ​ຄິດ​ກ່ຽວ​ກັບ​ 15 ຄວາມ​ຄິດ​ລິ​ເລີ່​ມ​​ໃນ 5 ຂົງ​ເຂດ​ບຸລິມະສິດ​ການ​ຮ່ວມ​ມື, 8 ຄວາມ​ຄິດ​ລິ​ເລິ່​ມ​ໄດ້​ເຂົ້າ​ສູ່​ໄລຍະ​ຕົ້ນ​ແຫ່ງ​ການ​ຜັນ​ຂະຫຍາຍ, 7 ຄວາມ​ຄິດ​ລິ​ເລີ່​ມຢູ່​ໃນ​ໄລຍະ​ກໍ່ສ້າງ​ໂຄງການ. ກ່ຽວ​ກັບ​ການຫຼຸດຜ່ອນ​ຊ່ອງ​ຫວ່າງ​ການ​ພັດທະນາ, ​ແຜນການ​ປະຕິບັດ​ງານ​ໄລຍະ​ສາມຂອງ​ຄວາມ​ຄິດ​ລິ​ເລີ່​ມການ​ເຊື່ອມ​ໂຍງ​ອາ​ຊຽນ (IAI-WP3) ຊ່ວຍ​ເຫຼືອ​ບັນດາ​ປະ​ເທດ​ກຳປູ​ເຈຍ, ລາວ, ມຽນມາ​ ແລະ​ຫວຽດນາມ ​ໄດ້​ຮັບ​ການ​ຜັນ​ຂະຫຍາ​ຍຕໍ່​ໄປ​ໃນ​ຂົງ​ເຂດ​ອາຫານ, ກະສິກຳ, ການອຳນວຍ​ຄວາມ​ສະດວກທາງ​ການ​ຄ້າ, ພັດທະນາ​ວິ​ສາ​ຫະກິດ​ຂະໜາດນ້ອຍ​ແລະ​ຂະໜາດ​ກາງ, ການ​ສຶກສາ, ສາທາລະນະ​ສຸກ, ສະ​ວັດ​ດີກາ​ນສັງຄົມ, ການ​ຝຶກ​ອົບຮົມ​ແລະ​ແຮງ​ງານ. ຮອດ​ທ້າຍ​ເດືອນ​ຕຸລາ 2018, ມີ 18 ​ໃນ 26 ສາຍ​ການ​ກະທຳ​ໃນ IAI-WP3 ​ໄດ້​ຮັບ​ການ​ປະຕິບັດ, ທຽບ​ເທົ່າ 69,2% ດ້ວຍ 62 ​ໂຄງການ​ປະ​ເພດ​ຕ່າງໆ.

​ແງ່​ຫວັງ​ຂອງພາກ​ພື້ນ​ອາຊີ-ປາຊີ​ຟິກ ​ໃນ​ປີ 2019  

ຄາດ​ວ່າ ​ໃນ​ປີ 2019, ບັນດາ​ປະ​ເທດ​ໃຫຍ່​ຄື​ອາ​ເມ​ລິ​ກາ​ແລະ​ຈີນ ຈະ​ຕ້ອງ​ສຸມ​ໃສ່​ແກ້​ໄຂ​ຫຼາຍ​ບັນຫາ​ພາຍ​ໃນ​ປະ​ເທດ. ສຳລັບ​ອາ​ເມ​ລິ​ກາ ນັ້ນ​ແມ່ນ​ບັນຫາ​ລັດຖະບານ​ຖືກ​ປິດ​ເປັນ​ເວລາ​ນານ, ບັນຫາ​ກຳ​ແພງຊາຍ​ແດນ​ລະຫວ່າງອາ​ເມ​ລິ​ກາ​ແລະ​ເມັກ​ຊິກ, ຄວາມ​ຂັດ​ແຍ່ງ​ລະຫວ່າງ​ລັດຖະບານ​ ກັບ​ລັດຖະສະພາ​ອາ​ເມ​ລິ​ກາ, ພິ​ເສດ​ແມ່ນ​ກັບ​ສະພາ​ຕ່ຳ​ອາ​ເມ​ລິ​ກາ​ໂດຍ​ພັກ​ປະຊາທິປະ​ໄຕ​ຄວບ​ຄຸມ​, ຈະ​ເພີ່ມ​ຂຶ້ນ​ຢ່າງ​ຮຸນ​ແຮງ. ສຳ​ລັບ​ຈີນ ນັ້ນ​ແມ່ນ​ຄວາມ​ຫຍຸ້ງຍາກ​ທາງ​ດ້ານ​ເສດຖະກິດ ຍ້ອນ​ຄວາມ​ໄວ​ໃນ​ການ​ເຕີບ​ໂຕ​ຫຼຸດ​ລົງ, ຄວາມ​ຫຍຸ້ງຍາກ​ທາງ​ດ້ານ​ສັງຄົມ, ພິ​ເສດ​ແມ່ນ​ຄວາມ​ກົດ​ດັນ​ຈາກ​ການ​ສ້າງ​ວຽກ​ເຮັດ​ງານ​ທຳ​ໃໝ່... ຈີນ​ອາດ​ຈະ​ມີ​ການ​ດັດ​ປັບ​ໃນການ​ຕໍ່ສູ້​ທາງ​ດ້ານ​ການ​ຄ້າ​ກັບ​ອາ​ເມ​ລິ​ກາ, ​ແຕ່​ໂດຍ​ພື້ນຖານ​ຈະ​ບໍ່​ດັດ​ປັບ​ຍຸດ​ທະ​ສາ​ຂອງ​ຕົນ, ພິ​ເສດ​ແມ່ນ​ຍຸດ​ທະ​ສາດ “​ແລວ​ທາງ​ແລະ​ເສັ້ນທາງ” ​ແລະ “ປະຊາ​ຄົມ​ຮ່ວມ​ຊະ​ຕາ​ກຳ” ​ເພື່ອ​ມຸ່ງ​ໄປ​ສູ່​ເປົ້າ​ໝາຍ 100 ປີ​ຄັ້ງ​ທີ​ໜຶ່ງ​ໃນ​ປີ 2021.

​ເຖິງ​ວ່າ​ຈະ​ມີ​ຄວາມ​ຫຍຸ້ງຍາກ​ພາຍ​ໃນ, ​ແຕ່​ອາ​ເມ​ລິ​ກາ​ຈະ​ສືບ​ຕໍ່​ຮັກສາ​ຄຳ​ໝັ້ນ​ສັນຍາ​ທີ່​​ເຂັ້ມແຂງ​ແລະ​ຍາວ​ນານຢູ່ພາກ​ພື້ນ​ອາຊີ-ປາຊີ​ຟິກ ​ແລະ ຈະ​ສືບ​ຕໍ່​ທ່າ​ອຽງ​ນະ​ໂຍບາຍ​ຄື​ປະຈຸ​ບັນ. ບັນດາ​ປະ​ເທດ​ໃຫຍ່, ພິ​ເສດ​ແມ່ນ​ຍີ່ປຸ່ນ, ລັດ​ເຊຍ, ອັງກິດ, ຝຣັ່ງ​ ແລະ​ປະ​ເທດ​ອື່ນໆ ຈະ​ເຂົ້າ​ຮ່ວມ​ຢ່າງ​ຈິງຈັງ​ໃນ​ພາກ​ພື້ນ​ນີ້ ​ເພື່ອ​ຢືນຢັນ​ບົດບາດ​ທັງ​ຊອກ​ຫາ​ຜົນ​ປະ​ໂຫຍ​ດ ​ແລະ ຮັກສາລະບຽບ​​ພາກ​ພື້ນທີ່​ເປີດ, ຮັບ​ເອົາ​, ​ໂປ່​ງ​ໃສຕາມ​ກົດໝາຍ​ແລະ​ມາດຕະຖານ​ສາກົນ. ​ເຖິງ​ວ່າ​ບັນດາ​ສະ​ຖາ​ບັນ, ການຈັດ​ຕັ້ງ​ໃນ​ພາກພື້ນພົບ​ຄວາມ​ຫຍຸ້ງຍາກ​ໃນ​ປີ 2018, ​ແຕ່​ໂດຍ​ພື້ນຖານ​ແລ້​ວ ກົດ​ລະບຽບ​ແລະ​ສະ​ຖາ​ບັນ​ທີ່​ຄວບ​ຄຸມ​ໂດຍ​ສະ​ຫະລັດ​ອາ​ເມ​ລິ​ກາແລະຕາ​ເວັນ​ຕົກ ຍັງ​ມີ​ອິດ​ທິພົນ​ຊີ້​ຂາດ, ​ແຕ່​ບັນດາ​ກົນ​ໄກ​ການ​ຮ່ວມ​ມື​ໂດຍ​ຈີນຖື​ບົດບາດນຳ​ພາ ກໍ່​ນັບ​ນື້ນັບ​ມີ​ແຮງ​ດຶງ​ດູດ​ແລະ​ມີ​ທີ່​ຕັ້ງ​ສຳຄັນ.

ສຳລັບ​ອາຊີ​ຕາ​ເວັນ​ອອກສຽງ​ເໜືອ, ​ເຖິງ​ວ່າ​ຍັງ​ມີ​ສິ່ງ​ທ້າ​ທາຍ​ຫຼາຍ​ຢ່າງ​ໃນ​ປີ 2019, ຄາດ​ວ່າ​ທ່າ​ອຽງ​ສັນຕິພາບ, ​ເຈລະຈາ​ໄກ່​ເກ່ຍ​ໃນ​ແຫຼມ​ເກົາຫຼີ ຈະ​ໄດ້​ຮັບ​ການ​ຮັກສາ​ຕໍ່​ໄປ. ສະ​ເພາະ ຄວາມ​ພົວພັນ​ລະຫວ່າງ​ສອງ​ຝັ່ງ​ຂອງ​ຊ່ອງ​ແຄບ​​ໄທ​ເປປະ​ເທດ​ຈີນ ​ແມ່ນ​ອາດ​ຈະສັບສົນຫຼາຍ, ການ​ແຂ່ງຂັນ​ລະຫວ່າງ​ອາ​ເມ​ລິ​ກາ​ແລະ​ຈີນ​ຈະ​ເພີ່ມ​ແຮງ​ກົດ​ດັນຕໍ່​ພາກ​ພື້ນ. ສຳ​ລັບ​ອາຊີ​ຕາ​ເວັນ​ອອກ​ແລະ​ທະ​ເລ​ຕາ​ເວັນ​ອອກ, ປີ 2019 ຫວັງ​ວ່າ​ຈະ​ສືບ​ຕໍ່​ຮັກສາ​ບັນຍາກາດ​ສັນຕິພາບ, ສະຖຽນ​ລະ​ພາບ ​ເນື່ອງ​ຈາກບັນດາ​ປະ​ເທດ​ໃນ​ພາກ​ພື້ນ​ເຊັ່ນ ອິນ​ໂດ​ເນ​​ເຊຍ, ​ໄທ, ມາ​ເລ​ເຊຍ, ມຽນມາ ຕ້ອງ​ສຸມ​ໃສ່​ບັນດາບັນຫາ​ພາຍ​ໃນ​ປະ​ເທດ. ຂັ້ນ​ຕອນ​ການ​ເຈລະຈາ COC ​ເຖິງ​​ແມ່ນວ່າຍັງ​ບໍ່​ທັນ​ສາມາດ​ຫວັງ​ວ່າ​ຈະ​ມີ​ບາດ​ກ້າວບຸກທະລຸ​ໃນ​ປີ 2019 ກໍ່ຕາມ, ​ແຕ່ກໍ່​ອາດ​ຈະ​ບັນລຸ​ຄວາມ​ກ້າວໜ້າ​ບາງ​ຢ່າງ​ທີ່​ແນ່ນອນ, ປະກອບສ່ວນ​ເຮັດ​ໃຫ້​ສະຖານະ​ການ​ຂອງ​ທະ​ເລ​ຕາ​ເວັນ​ອອກ​ສະຫງົບ​ລົງ. ອາ​ຊຽນຈະ​ສືບ​ຕໍ່​ຮັກສາ​ໄດ້​ທ່າ​ອຽງ​ລວມຄື​ກັນ​ກັບ​ປີ 2018.

ສະຫຼຸບ​ລວມ, ພາບ​ລວມ​ຂອງ​ອາຊີ-ປາຊີ​ຟິກ​ໃນ​ປີ 2018 ນັ້ນ​ປະສົມ​ປະສານ​ກັນ​ທັງ​ຄວາມ​ສະຫວ່າງ​ແລະ​ຄວາມ​ມືດ, ​ແຕ່​ໂດຍ​ລວມ​ແລ້ວ ສັນຕິພາບ, ການ​ຮ່ວມ​ມື ​ແລະ​ການ​ພັດທະນາ ຍັງ​ຄົງ​ເປັນ​ກະ​ແສ​ຫຼັກ. ຢ່າງ​ໃດ​ກໍ່ຕາມ, ການ​ແຂ່ງຂັນ​ຍຸດ​ທະ​ສາດລະຫວ່າງ​ບັນດາ​ປະ​ເທດ​ທີ່​ສຳຄັນ​ເພີ່ມ​ຂຶ້ນ, ພວມ​ເຮັດ​ໃຫ້​ມີ​ການ​ປ່ຽນ​ແປງ​ເທື່ອ​ລະ​ກ້າວ​ ໃນ​ການ​ປຽບທຽບ​ກຳລັງ ​ແລະ ​ເຕົ້ນ​ໂຮມ​ກຳລັງ​ຢູ່​ໃນ​ພາກ​ພື້ນ, ດັ່ງ​ນັ້ນ ບັນດາ​ປະ​ເທດ​ໃນ​ພາກ​ພື້ນ​ລ້ວນ​ແຕ່​ໄດ້​ຕິດຕາມ​ຢ່າງ​ໃກ້ຊິດ ​ເພື່ອມີ​ມາດ​ຕະການ​ຕອບ​ສະໜອງ​ທີ່​ເໝາະ​ສົມ​ແລະ​ທັນ​ເວລາ./.

​ໂດຍ ປອ. ​ເຈີ່ນ​ຫວຽດຖາ​ຍ

ສະ​ຖາ​ບັນ​ການ​ທູດ (ຫວຽດນາມ)

-----------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 915 (​ເດືອນ​ມັງກອນ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ