ວັນຈັນ, 18/11/2019
ຫວຽດນາມພ້ອມແລ້ວທີ່ຈະຮັບຕຳແໜ່ງເປັນສະມາຊິກບໍ່ຖາວອນ ຂອງສະພາຄວາມໝັ້ນຄົງແຫ່ງສະຫະປະຊາຊາດ ໃນໄລຍະ 2020 - 2021
24/5/2019 15:57' ສົ່ງ ພິມ
ກອງປະຊຸມສະພາຄວາມໝັ້ນຄົງແຫ່ງສະຫະປະຊາຊາດ ທີ່ ນິວຢອກ ໃນວັນທີ 26 ກັນຍາ 2018. (ພາບ: Reuters)

ເດືອນມັງ​ກອນ 2010, ພາຍຫຼັງ​ທີ່​​ໄດ້​ສຳ​ເລັດສິ້ນ​ສຸດ​ພາ​ລະ​ບົດ​ບາດ​ເປັນສະ​ມາ​ຊິກບໍ່​ຖາ​ວອນ​ຂອງສະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ (E10) ໄລ​ຍະ 2008-2009, ຫວຽດ​ນາມໄດ້​ມອບ​ໜັງ​ສື​​ສະ​ໝັກ​ຮັບຕຳ​ແໜ່​ງ E10 ສຳລັບໄລ​ຍະ 2020-2021. ການ​ຕັດສິນ​ໃຈ​ຄັ້ງ​ນີ້​ສະ​ແດງ​​ໃຫ້​ເຫັນ​ເຖິງ​ຄວາມ​ຕໍ່​ເນື່ອງ​ໃນ​ຈິນ​ຕະ​ນາ​ການ, ທີ່​ມີທັງການ​ສືບ​ທອດ​ແລະ​ການ​ປ່ຽນ​ແປງ​ໃໝ່​ຢ່າງ​ລຽນ​ຕິດ​ ກ່ຽວ​ກັບ​ວິ​ໄສ​ທັດ​ການ​ພົວ​ພັນ​ຕ່າງ​ປະ​ເທດ​ຂອງ​ພັກ, ໃນ​ນັ້ນ​ມີ​ຈິນ​ຕະ​ນາ​ການ, ວິ​ໄສ​ທັດ​ຍຸດ​ທະ​ສາດ ​ກ່ຽວ​ກັບ​ການ​ພົວ​ພັນ​ຕ່າງ​ປະ​ເທດພະຫຸ​ພາຄີ, ການ​ສ້າງ​​ເອກະລັກການ​ພົວ​ພັນ​ຕ່າງ​ປະ​ເທດພະຫຸ​ພາຄີ​ຂອງຫວຽດ​ນາມ. ການ​ສະ​ໝັກຮັບ​ຕຳ​ແໜ່​ງ E10 ຄັ້ງ​ທີ​ສອງ​ຂອງ​ຫວຽດ​ນາມ ​ຍັງ​ອາດ​ຈະຖື​ເປັນຫຼັກຖານ​ພະ​ຍານ​ໃຫ້​​ແກ່​ຄວາມຖືກ​ຕ້ອງ​ຂອງວິ​ທີ​ເຂົ້າ​ເຖິງບັນຫາ ຊຶ່ງ​ຖືການ​ພົວ​ພັນ​ຕ່າງ​ປະ​ເທດພະຫຸ​ພາຄີ​ເປັນ​ເຄື່ອງ​ມື​ທີ່​ມີ​ປະ​ສິດ​ທິ​ຜົນ​ ເພື່ອ​ໃຫ້ປະ​ເທດ​ຂະ​ໜາດ​ກາງແລະຂະ​ໜາດ​ນ້ອຍ​ ມຸ່ງ​ໝັ້ນ​ປະ​ຕິ​ບັດ ແລະ ປົກ​ປັກ​ຮັກ​ສາ​ຜົນ​ປະ​ໂຫຍດ​ແຫ່ງ​ຊາດ​ຂອງ​ຕົນ​ເອງ.

ເພື່ອ​ໃຫ້​ຫວຽດ​ນາມ​ໄດ້​ຮັບ​ເລືອກ​ຕັ້ງ ແລະ ດຳລົງ​ຕຳ​ແໜ່​ງນີ້​ໄດ້​ດີ, ມີຫຼາຍ​ບັນ​ຫາ​ທີ່​​ຕ້ອງ​ຄົ້ນ​ຄວ້າ​ແລະແກ້​ໄຂ, ​ເຊັ່ນ ການ​ວິ​​ເຄາະ, ການ​ປະ​ເມີນ​ຜົນ, ການ​ພະຍາກອນ​ສະ​ພາບ​ການ​ສາ​ກົນ​ແລະພາກ​ພື້ນ ແລະ ຜົນ​ກະ​ທົບ​ຕໍ່​ຫວຽດ​ນາມ; ຄຸນ​ລັກສະນະໃໝ່​​ໃນ​ການ​ເຄື່ອນ​ໄຫວ​ຂອງ​ສະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ ​ເມື່ອທຽບ​ກັບ 10 ປີ​ທີ່​ແລ້ວ; ​ບົດ​ຮຽນ​ທີ່​​ໄດ້​ຮຽນ​ຮູ້​ເມື່ອ​ຫວຽດ​ນາມເຂົ້າ​ຮ່ວມ​ໃນ​ຕຳ​ແໜ່​ງ  E10 ໃນໄລ​ຍະ 2008-2009.

ລັກສະນະ​ໃໝ່​ບາງ​ຢ່າງກ່​ຽວ​ກັບ​ສະຖານະ​ການ​ສາ​ກົນ ແລະ ການເຄື່ອນ​ໄຫວ​ຂອງ​ສະ​ພາ​ຄວາມ​ໝັ້ນ​ຄົງ​​ແຫ່ງສ​ະ​ຫະ​ປະ​ຊາ​ຊາດ

ໃນ​ຊຸມ​ປີມໍ່​ໆ​ມານີ້, ການ​ແຂ່ງ​ຂັນແລະຂັດ​ແຍ້ງ​ຜົນ​ປະ​ໂຫຍດ​ລະ​ຫວ່າງ​ບັນດາປະ​ເທດ​ໃຫຍ່​ ​ແມ່ນ​ມີ​ຄວາມ​ຮຸນ​ແຮງກວ່າ​ເກົ່າ (ພິ​ເສດ​ແມ່ນ​ການ​ແຂ່ງ​ຂັນ​ລະ​ຫວ່າງ​ອາ​ເມ​ລິກາແລະຈີນ ຢູ່​ໃນ​ພາກ​ພື້ນ​ອາ​ຊີ-ປາ​ຊີ​ຟິກ ແລະ ມະ​ຫາ​ສະ​ມຸດ​ອີນ​ເດຍ-ປາ​ຊີ​ຟິ​ກ). ການທີ່​ບັນດາ​ປະ​ເທດ​ໃຫຍ່​ເພີ່ມ​ທະວີ​ການ​ນຳ​ໃຊ້​​ມາດ​ຕະ​ການ​ສອງ​ຝ່າຍແລະຝ່າຍ​ດຽວ​ໃນ​ການ​ພົວ​ພັນ​ສາ​ກົນນັ້ນ ​ໄດ້​ສົ່ງ​ຜົນ​ກະ​ທົບຢ່າງ​ແຂງ​ແຮງຕໍ່​ບົດ​ບາດ​ແລະ​ຕຳ​ແໜ່ງຂອງສະ​ຖາ​ບັນ​ພະຫຸ​ພາຄີ​ບາງ​ຢ່າງ. ບັນ​ດາ​ປະ​ເທດ​ຂະ​ໜາດ​ກາງແລະຂະ​ໜາດ​ນ້ອຍ ​ນັບ​ມື້​ນັບ​ຖືກ​ຕົກ​ໃສ່​ທ່າ​ຮັບ​ກວ່າ​ເກົ່າ ​ຕໍ່​ໜ້າການ​ປັບ​ນະ​ໂຍ​ບາຍ​ຂອງ​ບັນ​ດາ​ປະ​ເທດ​ໃຫຍ່.

ຄຽງ​ຄູ່​ກັນ​ນັ້​ນ, ການ​ແຂ່ງ​ຂັນແລະຂັດ​ແຍ້ງ​ລະ​ຫວ່າງ​ບັນ​ດາ​ຮູບ​ແບບ​ການ​ພັດ​ທະ​ນາ, ບັນ​ດາ​ກະ​ແສ​ຟອງ, ທ່າ​ອຽງ ແລະສະຖາ​ບັນຍັດ​ ນັບ​ມື້​ນັບ​ຈະ​ແຈ້ງ, ດຸ​ເດືອດ. ບາງ ຈຸດ​ຮ້ອນ​ມີ​ຄວາມ​ຜັນ​ປ່ຽນ​ໃໝ່, ສັບ​ສົນ​ກວ່າ​ເກົ່າ; ບັນ​ດາ​ບັນ​ຫາ​​ຄວາມ​ສະ​ຫງົບ​ທີ່ບໍ່​​ເປັນ​ແບບດັ້ງ​ເດີມ​ເຊັ່ນ ການເຄື່ອນ​ໄຫ​ວກໍ່​ການ​ຮ້າຍ, ຄວາມ​ປອດ​ໄພ​ເຄືອ​ຂ່າຍ, ການ​ປ່ຽນ​ແປງ​ສະພາບອາ​ກາດມີ​ທ່າ​ອຽງ​ແຜ່​ຂະ​ຫຍາຍ​ດ້ວຍການ​ປ່ຽນ​ແປງຫຼາຍ​ຢ່າງ​ທີ່​ຄາດ​ເດົາ​ຍາກ.

ຂະ​ບວນ​​ການ​ໂລ​ກາ​ພິ​​ວັດເກີດ​ຂຶ້ນ​ ໄດ້​ເຜີ​ຍ​ໃຫ້​​ເຫັນ​ແຈ້ງ ​ດ້ານ​ຊ້າຍ​ແລະ​ຜົນ​ກະ​ທົບ​ທາງ​ລົບ​ສຳລັບ​ທຸກ​ປະ​ເທດ. ໂລກ​ກຳລັງ​​ໄດ້​ເຫັນ​ການ​ເຄື່ອນ​ໄຫວ​ຫຼາຍ​ຂຶ້ນ​ ຂອງຂະ​ບວນ​ການ​ຕ້ານໂລ​ກາ​ພິ​ວັດ, ຕ້ານ​ການ​ເຊື່ອມ​ໂຍງ​ສາ​ກົນ; ການ​ເກີດ​ຂຶ້ນ​ຂອງ​ລັດ​ທິຊາດນິຍົມ​ສຸດ​ຂົ້ວ​ແລະລັດ​ທິ​ປະ​ຊາ​ລາດ​ນິ​ຍົມ​ ນຳ​ໄປ​ສູ່ຄວາມ​ຂັດ​ແຍ້ງ​ກັບ​ທ່າ​ອຽງພະຫຸ​ພາຄີ; ຄວາມ​ຂັດ​ແຍ້ງ​ລະ​ຫວ່າງ​ກົດ​ໝາຍ​ສາ​ກົນ​ກັບ​ການ​ເມືອງ​​ອຳ​ນາດບາດ​ໃຫຍ່ນັ້ນ ກໍ່​ເຄັ່ງຮ້ອນ​ກວ່າ​ເກົ່າ.

ຈາກຄວາມ​ເປັນ​ຈິງນັ້ນ​ສາ​ມາດ​ຄາດ​ຄະ​ເນ​ວ່າ, ທ່າ​ອຽງການ​ແຂ່ງ​ຂັນ​ແລະຕໍ່​ສູ້ກັນນີ້​ອາດ​ຈະ​ສືບ​ຕໍ່​ແກ່​ຍາວ​ອີກ 3-5 ປີ​ຂ້າງໜ້າ ດ້ວຍວົງ​ຈອນ​ການ​ນຳ​ຂອງ​ບາງພັກ​​ແລະນັກ​ການ​ເມືອງຢູ່​ບາງ​ປະ​ເທດ ​ທີ່​ມີ​ທ່າ​ອຽງ​ປະ​ຊາ​ລາດ​ນິ​ຍົມ, ຕ້ານ​ການ​ເຊື່ອມ​ໂຍງ​ສາ​ກົນ. ເຖິງ​ແມ່ນວ່າ​ ມະນຸດຊາດຍັງຄົງສະແຫວງຫາ​ຄວາມ​ສະຫງົບ​ສຸກ ແລະມີ​​ຄວາມ​ພະ​ຍາ​ຍາມ​ໃນ​ການ​ຮັກ​ສາສັນ​ຕິ​ພາບ; ໂລ​ກາ​ພິ​ວັດ, ສັນ​ຕິ​ພາບ​ ແລະການ​ຮ່ວມ​ມືຍັງຄົງ​ເປັນ​ກະ​ແສຫຼັກ, ລັດ​ທິພະຫຸ​ພາຄີແລະກົດ​ໝາຍ​ສາ​ກົນ ​ຍັງ​ສືບ​ຕໍ່​ໄດ້​ຮັບ​ກາ​ນສົ່ງ​ເສີມ ແລະຮັກ​ສາ​ໄດ້​ທີ່​ຕັ້ງ​ສຳ​ຄັນ​ທີ່ບໍ່​ສາ​ມາດ​ປ່ຽນ​ແທນ​ໄດ້​ ໃນ​ການ​ພົວ​ພັນ​ສາ​ກົນ, ແຕ່​​ສັນ​ຕິ​ພາບແລະຄວາມ​ປອດ​ໄພ​ສາ​ກົນ​ໃນ​ຊຸມ​ປີ​ທີ່​ຜ່ານ​ມາແລະໃນ​ເວ​ລາ​ຕໍ່​ໜ້ານີ້ ບໍ່​ສາ​ມາດ​ຫຼີກ​ລ່ຽງ​ການ​ຜັນ​ແປ​ທີ່​ສັບ​ສົນ, ຖືກ​ຜົນ​ກະ​ທົບຈາກ​ການດັດ​ແປງ​ນະ​ໂຍ​ບາຍ​ຂອງ​ບັນ​ດາ​ປະ​ເທດ​ໃຫຍ່, ຕາມດ້ວຍການ​ດັດ​ແປງ​ຂອງປະ​ເທດ​ອື່ນໆ.

​ການ​ເຄື່ອນ​ໄຫວດັງ​ກ່າວ​ເທິງນີ້​​ໃນ​ພາກ​ພື້ນ​ຕ່າງໆ​ຂອງ​ໂລກແລະໃນ​ການ​ພົວ​ພັນ​ສາ​ກົນ ຍັງເຮັດ​ໃຫ້​ສະ​ພາ​ຄວາມ​ໝັ້ນ​ຄົງ​ແຫ່ງ​ສະ​ຫະ​ປະ​ຊາ​ຊາດ ຕ້ອງ​ປະ​ເຊີນ​ກັບບັນ​ຫາ​ໃໝ່ແລະສັບ​ສົນ​ກວ່າ​ກ່ອນ​ໜ້າ​ນີ້ 10 ປີ. ​ວຽກ​ງານ​ຂອງ​ສະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ​ໄດ້ເພີ່ມ​ຂຶ້ນ​ຢ່າງ​ຫຼວງ​ຫຼາຍ. ​ທ່ານ​ນາງ ຊ.ທອມ​ເຊີນ (Shamala Thomson), ຮອງຜູ້ອຳ​ນວຍ​ການບໍລິ​ຫານ​ຂອງ​ອົງ​ການ Security Council Report, ​ໃຫ້​ຮູ້​ວ່າ ​ປີ 2009 ຈຳ​ນວນ​ກອງ​ປະ​ຊຸມ​ເປັນ​ທາງ​ການ​ຂອງ​ສະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ ​ແມ່ນ​ໜ້ອຍ​ກວ່າ 200 ຄັ້ງ, ເຖິງ​ປີ 2017 ໄດ້​ເພີ່ມ​ຂຶ້ນ​ເປັນ​ 350 ຄັ້ງ; ຈຳ​ນວນ​ເອ​ກະ​ສານ​ຂອງ​ສະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ (ລວມ​ມີ​ມະ​ຕິ, ຖະ​ແຫຼງ​ການປະ​ທານ, ຖະ​ແຫຼງ​ຂ່າວ) ກໍ່​​ເພີ່ມ​ຂຶ້ນ​ ຈາກ 150 ສະ​ບັບ (ປີ 2011) ຂຶ້ນ​ເປັນ 200 ກວ່າ​ສະ​ບັບ (ປີ 2017). ວາ​ລະ​ກອງ​ປະ​ຊຸມ​ຂອງ​ສະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ ນັ​ບມື້​ນັບ​ໜາ​ແໜ້ນ​ຂຶ້ນ, ສຸມ​ໃສ່​​ບັນ​ດາ​ບັນ​ຫາ, ບັນ​ດາ ຈຸດ​ຮ້ອນ”, ຄວາມ​ເຄັ່ງ​ຕຶງ, ການປະ​ທະ​ກັນຕ່າງໆ​ເຊັ່ນ ​ບັນ​ຫາການ​ລົບ​ລ້າງອາວຸດນິວ​ເຄຼຍໃນ​ແຫຼມ​ເກົາຫຼີ, ສະຖານະ​ການ​ໃນຕາ​ເວນ​ອອກ​ກາງ-ອາ​ຟ​ຣິກກາ, ອົງ​ການ​ຈັດ​ຕັ້ງລັດອິ​ດສະລາມ (IS) ອ້າງ​ຕົວເອງ, ຂໍ້​ພິພາດ​ກ່ຽວ​ກັບ​ດິນ​ແດນ ທະ​ເລ​ແລະເກາະ​ ໃນ​ພາກ​ພື້ນອາ​ຊີປາ​ຊີ​ຟິກ, ຄວາມ​ຂັດ​ແຍ່ງ​ທາງ​ຊົນ​ເຜົ່າ ສາ​ສະ​ໜາ, ແລະ ສິ່ງ​ທ້າ​ທາຍ​ດ້ານ​ຄວາມ​ປອດ​ໄພ​ທີ່ບໍ່​​ແມ່ນແບບ​ດັ້ງ​ເດີມອື່ນໆ. ນອກ​ຈາກນັ້ນ, ວາ​ລະ​ກອງ​ປະ​ຊຸມກໍ່​ມີ​ຄວາມ​ພົວ​ພັນ​ເຖິງ​ບັນ​ດາ​ຂົງ​ເຂດ​ອື່ນ​ເຊັ່ນ ​ຄວາມ​ຜິດຂ້ອງຕ້ອງຖຽງ​ກັນ​ແລະ​ການແຂ່ງ​ຂັນ​ກັນ​ທາງຍຸດ​ທະ​ສາດ​ລະ​ຫວ່າງ​ບັນ​ດາ​ປະ​ເທດ​ໃຫຍ່, ພິ​ເສດ​ແມ່ນ​ລະ​ຫວ່າງ​ບັນ​ດາ​ປະ​ເທດ​ສະ​ມາ​ຊິກ​ຖາ​ວອນ​ຂອງ​ສະ​ພາ​ຄວາມ​ໝັ້ນ​ຄົງ​ແຫ່ງ​ສະ​ຫະ​ປະ​ຊາ​ຊາດ (P5) ແລະ ລະ​ຫວ່າງກຸ່ມ​ປະ​ເທດ P5 ກັບ​ບັນ​ດາ​ປະ​ເທດ​ສະ​ມາ​ຊິກ​ສະ​ຫະ​ປະ​ຊາ​ຊາດ. ບັນ​ດາ​ປະ​ເທດ P5 ຍັງສືບ​ຕໍ່​ຮ່ວມ​ມື​ແລະ​ຕໍ່​ສູ້​​ກັນ, ແຕ່​​ ເບິ່ງຄື​ວ່າ​ການ​ຕໍ່​ສູ້​ຈະ​ໂດດເດັ່ນ​ແລະຮຸນແຮງ​ຂຶ້ນ​ເລື້ອຍໆ, ການ​ໂຕ້​ຖຽງ​ກັນ​ກ່ຽວ​ກັບ​ບາງ​ບັນຫາ​ສາກົນ​ທີ່​ສະ​ພາ​ຄວາມ​ໝັ້ນ​ຄົງກໍ່​​ເພີ່ມ​ຂຶ້ນ​ເລື້ອຍໆ. ຄວາມ​ແຕກ​ແຍກ​ລະ​ຫວ່າງ​ບັນ​ດາ​ສະ​ມາ​ຊິກ P5, ​ໂດຍ​ສະ​ເພາະ​ແມ່ນ​ລະ​ຫວ່າງລັດ​ເຊຍ ກັບອາ​ເມ​ລິກາ​ແລະ​ອັງກິດ, ນັບ​ມື້​ນັບ​​ເພີ່ມ​ຂຶ້ນ, ສົ່ງ​ຜົນ​ກະ​ທົບ​ຢ່າງ​ແຮງ​ເຖິງ​ການ​ດຳ​ເນີນ​ງານ​ຂອງ​ສະ​ພາ​ຄວາມ​ໝັ້ນ​ຄົງ. ການ​ເຕົ້າ​ໂຮມ​ກຳ​ລັງ​ຂອ​ງ​ສະ​ພາ​ຄວາມ​ໝັ້ນ​ຄົງ​ໃນ​ສອງ​ປີ​ຂ້າງ​ໜ້າ​ຄາ​ດ​ວ່າ​ຈະ​ສືບ​ຕໍ່​​ເພີ່ມ​ຂຶ້ນ ​ໂ​ດຍ​ການ​ພົວ​ພັນທີ່​ສັບ​ສົນ​ລະ​ຫວ່າງ​ບັນ​ດາ​ປະ​ເທດ P5. ​ແຜນ​ພາບ​ຂ້າງ​ເທິ​ງສະ​ແດງໃຫ້​ເຫັນ​ວ່າ, ແຕ່​ປີ 2008 ​ເຖິງ​ປີ 2018, ບັນດາ​ປະ​ເທດ P5 ​ໄດ້​ໃຊ້​ສິດ​ຢັບ​ຢັ້ງ​​ຫຼາຍ​ກວ່າ​ແຕ່​ກ່ອນ, ​ໂດຍ​ສະ​ເພາະ​ໃນ​ປີ 2017 ແລະ ປີ 2018.

ບັນດາໂອ​ກາດແລະສິ່ງ​ທ້າ​ທາຍ​ສຳລັບຫວຽດ​ນາມ ໃນ​​ເມື່ອ​​ສະ​ໝັກ​ຮັບເລືອກ​ຕັ້ງ​​ຄັ້ງທີ​ສອງເປັນ​ສະ​ມາ​ຊິກບໍ່​ຖາ​ວອນ​ຂອງສ​ະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ.

ສະ​ພາບ​ການ​ສາ​ກົນ, ພາກ​ພື້ນ, ການເຄື່ອນ​ໄຫວ​ຂອງ​ສະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ ແລະ ສະພາບ​ການພາຍ​ໃນ​ປະ​ເທດ​ໃນ​ເວ​ລາ​ທີ່​ຜ່ານ​ມາ ​ໄດ້ແລະກຳ​ລັງ​ສ້າງ​ໂອ​ກາດ, ຄວາມ​ສະ​ດວກ ກໍ່​ຄືສິ່ງ​ທ້າ​ທາຍ​ສຳລັບຫວຽດ​ນາມ ໃນ​ເມື່ອ​ສະ​ໝັກ​ຮັບເລືອກ​ຕັ້ງ​ຄັ້ງ​ທີ່​ສອງ​ເປັນ​ສະ​ມາ​ຊິກບໍ່​ຖາ​ວອນ​ຂອງສະ​ພາ​ຄວາມ​ໝັ້ນ​​ແຫ່ງສະ​ຫະ​ປະ​ຊາ​ຊາດ ໄລ​ຍະ 2020 - 2021 ແລະ ​ດຳລົງ​ຕຳ​ແໜ່​ງນີ້ໃນ​ກໍລະ​ນີ​ທີ່​ຖືກເລືອກ​ຕັ້ງ.

ທີ​ໜຶ່ງ, ສະຖານະແລະກຳລັງ​ແຮງ​ຂອງ​ປະ​ເທດ​ໄດ້​ຮັບ​ການຍົກ​ສູງຂຶ້ນ. ພາຍຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ຫວຽດ​ນາມບັນ​ລຸ​ໄດ້​ຜົນ​ງານ​ອັນ​ໃຫຍ່ຫຼວງຫຼາຍ​ຢ່າງ, ມີ​ຄວາມ​ໝາຍ​ປະ​ຫວັດ​ສາດ​ທາງດ້ານ​ການ​ເພີ່ມ​ທະ​ວີ​ກຳລັງ​ແຮງ​ສັງ​ລວມຂອງ​ຊາດ, ຮັກ​ສາ​​ຄວາມ​ສ​ະ​ຫງົບປອດ​ໄພແລະຍົກ​ສູງ​ສະຖານະ​ສາ​ກົນຂອງ​ປະ​ເທດ. ສະຖຽນ​ລະ​ພາບ​ທາງເສດ​ຖະ​ກິດ-ສັງ​ຄົມ​ໄດ້​ຮັກ​ສາ​ຢ່າງ​ໝັ້ນ​ແກ່ນ, ການ​ເຕີບ​ໂຕ​ທາງ​ເສດ​ຖະ​ກິດ​ດີ​ຂຶ້ນ (ຈີ​ດີ​ຟີ​ເພີ່ມ​ຂຶ້ນ​​ສະ​ເລ່ຍ​ 7% ຕໍ່​ປີ ໃນ​ 5 ປີ​ທີ່​ຜ່ານ​ມາ). ສະ​ພາບ​ແວດ​ລ້ອມ​ແຫ່ງ​ການ​ທຸ​ລະ​ກິດ ແລະຄວາມ​ສາ​ມາດ​ແຂ່ງ​ຂັນ​ຂອງ​ພື້ນ​ຖານ​ເສດ​ຖະ​ກິດ​ ໄດ້​ຮັບ​ການປົວ​ແປງ. ຫວຽດ​ນາມ​ກາຍ​ເປັນ​ປະ​ເທດ​ກຳ​ລັງ​ພັດ​ທະ​ນາທີ່​ມີ​ລາຍ​ໄດ້​ປານ​ກາງ (ແຕ່​ປີ 2010) ດ້ວຍ​ກຽດ​ສັກ​ສີ​ແລະ​ສະຖານະສາ​ກົນ​ນັບ​ມື້​ນັບ​​ສູງ.

ທີ​ສອງ, ການ​ພົວ​ພັນ​ຕ່າງ​ປະ​ເທດ​ຖື​ວ່າ​ເປັນ​ໜຶ່ງ​ໃນ​ບັນດາ ຈຸດ​ສະ​ຫວ່າງໃນ​ຂະ​ບວນ​ວິ​ວັດການ​ພັດ​ທະ​ນາ​ຂອງ​ປະ​ເທດ​ທີ່​ມີ​ຜົນສຳ​ເລັດຫຼາຍຢ່າງຄື​ ສືບ​ຕໍ່​ປັບ​ປຸງແລະເພີ່ມ​ທະ​ວີ​ບັນ​ດາ​ສາຍ​ພົວ​ພັນ​ຄູ່​ຮ່ວມ​ມື​ຍຸດ​ທະ​ສາດແລະຄູ່​ຮ່ວມ​ມື​ຮອບ​ດ້ານ, ເພີ່ມ​ທະ​ວີ​​ຜົນ​ປະ​ໂຫຍດ​ຮ່ວມ​ກັນ, ​ເສີມ​ສ້າງ​ຄວາມ​ເຊື່ອ​ໝັ້ນແລະປັບ​ປຸງກົນ​ໄກ​ການຮ່ວມ​ມື​ກັບ​ປະ​ເທດ​ຕ່າງໆ; ຮັກ​ສາ​ສ​ະ​ພາບ​ແວດ​ລ້ອມ​ແຫ່ງ​​ສັນ​ຕິ​ພາບ, ສະ​ຖຽມ​ລະ​ພາບ, ອຳນວຍຄວາມ​ສະ​ດວກ​ໃຫ້​ແກ່​ການ​ພັດ​ທະ​ນາ, ຜັນ​ຂະ​ຫຍາຍ​ຢ່າງ​ກົມ​ກຽວ​ບັນ​ດາ​ໜ້າ​ທີ່​ຮັກ​ສາ​ຄວາມ​ເປັນ​ເອ​ກະ​ລາດ, ອຳ​ນາດ​ອະ​ທິ​ປະ​ໄຕ, ຜືນ​ແຜ່ນ​ດິນ​ອັນ​ຄົບ​ຖ້ວນ (​ໂດຍ​ສະ​ເພາະ​ແມ່ນ​ຄວາມ​ປອດ​ໄພ​ແລະ​ອະທິປະ​ໄຕ​ໃນ​ເຂດ​ທະ​ເລ ໝູ່ເກາະ) ແລະ ປົກ​ປັກ​ຮັກ​ສາ​ລະ​ບອບ​ສັງ​ຄົມ​ນິ​ຍົມ; ​ໃນ​ການເຊື່ອມ​ໂຍງ​ສາກົນ​ແລະ​ການ​ພົວພັນ​ທາງ​ການ​ທູດ​ຮັບ​ໃຊ້​​ໃຫ້​ແກ່ການ​ພັດ​ທະ​ນາ​ ກໍ່​ມີ​ຄວາມ​ຄືບ​ໜ້າ​ໃໝ່​ທາງ​ດ້ານ​ແຜນນ​ະ​ໂຍ​ບາຍ, ນະ​ໂຍ​ບາຍກໍ່​ຄື​ການ​ຜັນ​ຂະ​ຫຍາຍ​ໃນ​ພາກ​ຕົວ​ຈິງ.

ພິ​ເສດ, ໃນ​ພາ​ລະ​ກິດ​ການ​ປ່ຽນ​ແປງ​ໃໝ່, ຍູ້​ແຮງ​ການ​ຫັນປະ​ເທດ​ເປັນ​ອຸດ​ສາ​ຫະ​ກຳ ທັນ​ສະ​ໄໝ​ແລະເຊື່ອມ​ໂຍງ​ສາ​ກົນ, ການທູດພະຫຸ​ພາ​ຄີຂອງ​ຫວຽດ​ນາມ​ໄດ້​ຮັບ​ການເປີດກ​ວ້າງແລະ​ເຂົ້າ​ສູ່​ລວງ​ເລິກ​ຢ່າງບໍ່​ຢຸດຢັ້ງ. ການ​​ຕ່າງ​ປະ​ເທດພະຫຸ​ພາຄີ​ໄດ້ຢືນ​ຢັນ​​ບົດ​ບາດ​ຂອງຫວຽດ​ນາມ​ໃນ​ຖານະ​ສ​ະ​ມາ​ຊິກ​ທີ່​ຕັ້ງ​ໜ້າ, ເປັນ​ຄູ່​ຮ່ວມ​ມື​ທີ່​​ເຊື່ອຖື​ໄດ້ແລະມີ​ຄວາມ​ຮັບ​ຜິດ​ຊອບ ​ຂອງ​ປະ​ຊາ​ຄົມ​ສາ​ກົນ, ມີ​ຄວາມພະ​ຍາ​ຍາມ​ບືນ​ຕົວ​ຂຶ້ນ​ເພື່ອ​ຖື​ບົດ​ບາດ​ຫຼັກ​ແຫຼ່ງ, ນຳ​ພາ, ໄກ່​ເກ່ຍ​ໃນບັນດາ​ເວ​ທີ​ປາ​ໄສ ​ແລະ ອົງ​ການ​ຈັດ​ຕັ້ງພະຫຸ​ພາຄີ​ທີ່​ມີ​ຄວາມ​ສຳ​ຄັນ​ຍຸດ​ທະ​ສາດ​ຕໍ່​ປະ​ເທດ, ສອດຄ່ອງ​ກັບ​ຄວາມ​ສາ​ມາດແລະເງື່ອນ​ໄຂ​ສະ​ເພາະຂອງ​ຕົນ. ກອງ​ປະ​ຊຸມ​ໃຫຍ່​ຄັ້ງ​ທີ XII ຂອງ​ພັກກອມ​ມູນິດ​ຫວຽດນາມ​ໄດ້​ກຳນົດຄັ້ງ​ທຳ​ອິດ​ວ່າ ​ການພົວພັນ​ຕ່າງ​ປະ​ເທດພະຫຸ​ພາຄີ​ແມ່ນ​ທິດທາງ​ຍຸດ​ທະ​ສາດ​ໜຶ່ງ​ຂອງ​ປະ​ເທດ ​ດ້ວຍການ ຍົກ​ສູງ​ຄຸນ​ນະ​ພາບ​ແລະປະ​ສິດ​ທິ​ຜົນ​ຂອງວຽກ​ງານ​ການພົວ​ພັນ​ຕ່າງ​ປະ​ເທດພະຫຸ​ພາຄີ, ຄວາມເປັນ​ເຈົ້າ​ການແລະ​ຕັ້ງ​ໜ້າ​ປະ​ກອບ​ສ່ວນ​ເຂົ້າ​ໃນ​ການກໍ່​ສ້າງ​ບັນ​ດາ​ສະ​ຖາ​ບັນ​ພະຫຸ​ພາຄີ”, ໃນ​ນັ້ນ ເປັນ​ເຈົ້າ​ການ​ເຂົ້າ​ຮ່ວມ ແລະເສີມ​ຂະ​ຫຍາຍ​ບົດ​ບາດຂອງ​ຕົນ​ໃນ​ບັນ​ດາ​ກົນ​ໄກພະ​ຫຸພາຄີ, ພິ​ເສດ​ແມ່ນ ອາ​ຊຽນ ແລະ ສະ​ຫະ​ປະ​ຊາ​ຊາດ(2) ແມ່ນ​ຈຸດໜັກ​ໃຈ​ກາງ​ໜຶ່ງ. ເດືອນສິງ​ຫາ 2018, ຄະ​ນະ​ເລ​ຂາ​ທິ​ການ​ສູນ​ກາງ​ພັກ​ໄດ້​ອອກ​ຄຳ​ສັ່ງ​ເລກ​ທີ 25/CT-TW ກ່ຽວ​ກັບ “ການຍູ້​ແຮງ​ແລະ​ຍົກ​ລະດັບ​ການ​ພົວພັນ​ຕ່າງປະ​ເທດ​ພະຫຸ​ພາຄິ​ເຖິງ​ປີ 2030”. ນີ້​ແມ່ນ​ເທື່ອ​ທຳ​ອິດ​ທີ່ຄະ​ນະ​ເລ​ຂາ​ທິ​ການສູນ​ກາງ​ພັກ​ອອກ​ຄຳ​ສັ່ງ​ສະ​ເພາະ​​ກ່ຽວ​ກັບ​ການ​ຍູ້​ແຮງ ແລະຍົກ​ລະ​ດັບ​ການ​ພົວ​ພັນ​ຕ່າງ​ປະ​ເທດພະຫຸ​ພາຄີເຖິງ​ປີ 2030, ໃນ​ນັ້ນ ​ໄດ້​ວາງ​​ເປົ້າ​ໝາຍ, ທັດ​ສະ​ນະ​ຊີ້​ນຳ ແລະ ໜ້າ​ທີ່, ມາດ​ຕະ​ການ​ຕົ້ນ​ຕໍ່​ສຳລັບ 10 ກວ່າ​ປີ​ຕໍ່​ໜ້າ​ໃນ​ຂົງ​ເຂດ​ຕ່າງໆ(3).

ທີ​ສາມ, ​ບັນດາບົດ​ຮຽນ​ທີ່​ຮຽນ​ຮູ້​ໄດ້ຈາກຂະ​ບວນ​ການ​ເຂົ້າ​ຮ່ວມ​​ໃນ​ຕຳ​ແໜ່​ງ E10 (ໄລ​ຍະ 2008-2009). ການ​ປະຕິບັດ​ວຽກ​ງານ E10 ໄລ​ຍະ 2008-2009 ປະສົບ​ຄວາມ​ສຳ​ເລັດ​ນັ້ນ ໄດ້​ປະ​ກອບ​ສ່ວນເຂົ້າ​ໃນ​ການ​ຊຸກ​ຍູ້​ຈິນ​ຕະ​ນາ​ການ ຍົກ​ສູງ​ປະ​ສິດ​ທິ​ຜົນ​ແລະຄຸນ​ນະ​ພາບ​ຂອງວຽກ​ງານການ​ຕ່າງ​ປະ​ເທດພະຫຸ​ພາຄີຂອງ​ຫວຽດ​ນາມ; ສະ​ໜອງ​ພື້ນ​ຖານ​ພຶດຕິ​ກຳ​ທີ່​ສຳ​ຄັນ ​ເພື່ອ​ໃຫ້ກອງ​ປະ​ຊຸມ​ໃຫຍ່​ຄັ້ງ​ທີ XII ຂອງ​ພັກ​ກຳ​ນົດ​ການ​ພົວ​ພັນ​ຕ່າງ​ປະ​ເທດພະຫຸ​ພາຄີ​ເປັນ​​ທິດທາງ​ຍຸດ​ທະ​ສາດ​​ໜຶ່ງ​ຂອງ​ຫວຽດ​ນາມ; ເປັນ​ເຈົ້າ​ການ​ເຂົ້າ​ຮ່ວມ ແລະເສີມ​ຂະ​ຫຍາຍ​ບົດ​ບາດຂອງ​ຕົນ​ໃນ​ບັນ​ດາ​ກົນ​ໄກພະຫຸ​ພາຄີ, ພິ​ເສດ​ແມ່ນ​ ອາ​ຊຽນ ແລະ ສະ​ຫະ​ປະ​ຊາ​ຊາດ. ​ບົດ​ຮຽນ​ຈຳນວນ​ຫຼາຍ​ທີ່​ຮຽນ​ຮູ້​ຈາກ​ທຸກ​ແງ່​ມຸມຜ່ານ​ການ​ຮັບ​ຕຳ​ແໜ່​ງ E10 (ໄລ​ຍະ 2008-2009) ​ແມ່ນ​ມີ​ຄຸນ​ຄ່າ​​ແທ້ໆ ຊຶ່ງ​ໄດ້​ຊ່ວຍ​ໃຫ້​ຫວຽດນາມ​ຍົກ​ສູງ​ປະ​ມິດ​ທິ​ຜົນ​ຂອງການ​ເຂົ້າ​ຮ່ວມ​ໃນບັນ​ດາ​ກົນ​ໄກພະຫຸ​ພາຄີເວົ້າ​ລວມ ແລະ ​ໂດຍ​ສະ​ເພາະ​ແມ່ນ​​ຮັ​ບ​ໃຊ້​​ໂດຍ​ກົງ​​ໃຫ້​ແກ່​ການ​ສະ​ໝັກ​ຮັບເລືອກ​ຕັ້ງຄັ້ງທີ​ສອງ​ເຂົ້າ​ໃນ​ຕຳ​ແໜ່​ງ E10 ໄລ​ຍະ 2020-2021. ນັ້ນ​ແມ່ນ:

1- ມີ​ຈິນ​ຕະ​ນາ​ການແລະວິ​ໄສ​ທັດ​ການ​ຕ່າງ​ປ​ະ​ເທດຕະຫຼອດ​ໄປ​ຂ້າ​ງໜ້າ. ການ​​ສະ​ໝັກ​ຮັບເລືອກ​ຕັ້ງ ແລະການຮັບ​ຜິດ​ຊອບ​ຢ່າງ​ສຳ​ເລັດ​ຜົນ​ໃນຕຳ​ແໜ່ງ E10 ໄລ​ຍະ 2008-2009 ຂອງ​ຫວຽດ​ນາມນັ້ນ ກ່ອນ​ອື່ນ​ໝົດ​ແມ່ນ ເລີ່ມ​ຈາກ​ການ​ປ່ຽນ​ແປງ​ໃໝ່​ດ້ານ​ຈິນ​ຕະ​ນາ​ການ​ການ​ພົວ​ພັນ​ຕ່າງ​ປະ​ເທດ ແລະ ແນວ​ທາງ​ການ​ພົວ​ພັນ​ຕ່າງ​ປະ​ເທດທີ່​ຖືກ​ຕ້ອງ​ຂອງ​ພັກ ​ດ້ວຍສາຍຕາ​ກວ້າງ​ໄກ​ແລະ​ຄວາ​ສາມາດ​ເຂົ້າ​ໃຈກຳ​​ໄດ້​ທ່າ​ອຽງ​ການເຄື່ອນ​ໄຫວ​ຂອງ​ສະ​ຖານະ​ການ​ສາ​ກົນ. ​ແຜນ​ນະ​ໂຍ​ບາຍ​ກ່ຽວ​ກັບ​ການ​ເຂົ້າ​ຮ່ວ​ມຢ່າງເລິກ​ເຊິ່ງ​ແລະ​ຕັ້ງໜ້າ​ໃນ​ວຽກ​ງານ​ຕ່າງໆຂອງ​ສະ​ຫະ​ປະ​ຊາ​ຊາດນັ້ນ ​ແມ່ນ​ຜົນ​ມາ​ຈາກ​ການ​ພັດ​ທະ​ນາແລະການປ່ຽນ​ແປງ​ໃໝ່​​ ຈິນ​ຕະ​ນາ​ການ​ການ​ຕ່າງ​ປະ​ເທດ ​ຂອງ​ພັກ​ກອມ​ມູ​ນິດຫວຽດນາມ, ໃນ​ນັ້ນ​ມີ​ ຈິນ​ຕະ​ນາ​ການກ່ຽວ​ກັບ​ການ​ຕ່າງ​ປະ​ເທດພະຫຸ​ພາຄີ. ແຕ່​ປີ 1997, ຫວຽດ​ນາມ​ກຳ​ນົດ​ເວ​ລາ​​ສະ​ໝັກຮັບເລືອກ​ຕັ້ງ​ແລະຮັບ​ຕຳ​ແໜ່​ງ E10​ໃນໄລ​ຍະ ບວກແລະລົບ 1 - 2 ປີ” ນັ້ນ ​ໄດ້​ສະ​ແດງ​ໃຫ້​ເຫັນ​ເຖິງວິ​ໄສ​ທັດ​ທີ່​ຄົມ​ຄາຍ ແລະ ຄວາມ​ສາ​ມາດ​ຄາດ​ຄະ​ເນທີ່​ຖືກ​ຕ້ອງ​ ກ່ຽວ​ກັບທ່າ​ອຽງການ​ເຄື່ອນ​ໄຫວ​ຂອງ​ສະ​ຖານະ​ການຢູ່​ພາຍ​ໃນ​ປະ​ເທດ, ​ສາ​ກົນ, ພາກ​ພື້ນ ແລະຢູ່​ໃນສະ​ຫະ​ປະ​ຊາ​ຊາດ.

ການຕັດສິນ​ໃຈ​ສະ​ໝັກຮັບ​ເລືອກ​ຕັ້ງ​ເຂົ້າ​ໃນ​ຕຳ​ແໜ່​ງ E10 ໄລ​ຍະ 2008-2009 ນັ້ນ ແມ່ນ​ການ​ຜັນ​ຂະຫຍາຍ​ທັດ​ສະ​ນະກ່ຽວ​ກັບ​ການ​ພົວ​ພັນ​ຕ່າງ​ປະ​ເທດພະຫຸ​ພາຄີ ທີ່​ວ່າ ຮ່ວມ​ມື​ສອງ​ຝ່າຍແລະຫຼາຍ​ຝ່າຍ​ກັບ​ບັນດາປະ​ເທດ​ແລະ​ອົງ​ການ​ຈັດ​ຕັ້ງ​ສາ​ກົນ”, ພິ​ເສດ​ແມ່ນ ປະ​ກອບ​ສ່ວນ​ເຮັດ​ໃຫ້​ສະ​ຫະ​ປະ​ຊາ​ຊາດມີ​ປະສິດທິພາບຫຼາຍ​ກວ່າ​ອີກ ​ໃນ​ການ​ຮັບ​ໃຊ້ເປົ້າ​ໝາຍ​ຂອງ​ມະ​ນຸດຊາດ​ຄື ​ສັນ​ຕິ​ພາບ, ມິດ​ຕະ​ພາບ, ການຮ່ວມ​ມື ແລະ ການພັດ​ທະ​ນາ”. ການ​​ສະ​ໝັກ​ຮັບເລືອກ​ຕັ້ງຂອງ​ຫວຽດ​ນາມສຳລັບ​ຕຳ​ແໜ່​ງ E10 ໄລ​ຍະ 2020-2021 ທັນທີ​ຫຼັງຈາກ​ສິ້ນ​ສຸດ​ການ​ຮັບຮັບ​ຕຳ​ແໜ່​ງ E10 ໄລ​ຍະ 2008-2009 ນັ້ນ ອີກ​ເທື່ອ​ໜຶ່ງສະ​ແດງ​ໃຫ້​ເຫັນ​ເຖິງ​ຄວາມ​ຕໍ່​ເນື່ອງ​, ທັງ​ສືບ​ຖອດ, ທັງ​ມີ​ການ​ປ່ຽນ​ແປງ​ໃໝ່​​ແລະພັດ​ທະ​ນາ​ຢ່າງ​ຕໍ່​ເນື່ອງ ໃຫ້​ສອດຄ່ອງ​ກັບ​ການ​ປ່ຽນ​ແປງ​ໃນ​ຈິນ​ຕະ​ນາ​ການແລະວິ​ໄສ​ທັດ​ການ​ພົວ​ພັນ​ຕ່າງ​ປະ​ເທດ, ໃນ​ນັ້ນ​ມີ​ຈິນ​ຕະ​ນາ​ການ​ແລະວິ​ໄສ​ທັດ​ຍຸດ​ທະ​ສາດ ​ກ່ຽວ​ກັບ​ການ​ພົວ​ພັນ​ຕ່າງ​ປະ​ເທດພະຫຸ​ພາຄີ ​ຂອງ​ພັກ​ກອມ​ມູ​ນິດ​ຫວຽດ​ນາມ.

2- ກະ​ກຽມ​ເນື້ອ​ໃນ​ໃຫ້​ດີ, ກຳ​ນົດ​ເປົ້າ​ໝາຍແລະວາງ​ແຜນ​ການ​ລ່ວງ​ໜ້າ; ​ສ້າງ​ຖັນ​ແຖວ​ພະ​ນັກ​ງານການ​ທູດ​ພະຫຸ​ພາຄີ​ທີ່ເໝາະ​ສົມ; ກະ​ກຽມ​ກຳ​ລັງແລະຈັດການ​ດຳ​ເນີນການ​ຕໍ່ສູ້​ຢ່າງ​ເປັນ​ແບບ​ແຜນ​ໃຫ້​ສອດຄ່ອງ​ກັບຄວາມ​ເປັນ​ຈິງ ​ແມ່ນ​ກຸນ​ແຈ​ທີ່​ພາ​ໄປ​ສູ່​ຄວາມ​ສຳ​ເລັດ. ໃນ​ຄວາມ​ເປັນ​ຈິງ, ຄະ​ນະ​ຜູ້​ແທນ​ຫວຽດ​ນາມ​ທີ່​ສະ​ຫະ​ປະ​ຊາ​ຊາດ ​ໄດ້​ມີ​ການ​ແບ່ງ​ງານ, ແຕ່ງ​ຕັ້ງຜູ້​ທີ່​ຮັບ​ຜິ​ດ​ຊອບ​ບັນຫາ​ຕ່າງ​ໆ ແລະ ມີ​ກົນ​ໄກ​​ໃນ​ການ​ສະໜັບສະໜູນ​ແລະປະ​ສານງານກັນ​ຢ່າງ​ມີ​ປະ​ສິດ​ທິ​ຜົນ​. ນອກຈາກ​ນັ້ນ, ການ​ຮັກ​ສາການ​ສື່ສານແລກ​ປ່ຽນ​ກັບ​ຄະນະ​ເຮັດ​ວຽກ​ລະ​ຫວ່າງໜ່ວຍ​ງານ​ໃນ​ນະຄອນຮ່າ​ໂນ້ຍ, ຫວຽດ​ນາມ ກໍ່​​ໄດ້​ຊ່ວຍ​ເຫຼືອ​​ຢ່າງ​ຕັ້ງໜ້າ​ໃຫ້​ແກ່​ການຕໍ່​ສູ້​ຂອ​ງ​ພະ​ນັກ​ງານ​ການ​ທູດ​ໃນ​ຄະ​ນະ​ຜູ້​ແທນຫວຽດນາມ. ຄວາມ​ສາ​ມາດ​ແລະລະ​ດັບ​ຄວາມ​ຮູ້​ຂອງ​​ພະ​ນັກ​ງານ​ການທູດພະຫຸ​ພາຄີໃນ​ໄລ​ຍະ​ນີ້​ ​ໄດ້​ຮັບ​ການຕີ​ລາຄາ​ສູງ ໂດຍທ່ານ​ນາງ ນ.ຊານ (Norman Chan), ຫົວ​ໜ້າ​ຄະ​ນະ​ເລ​ຂາ​ທິ​ການ​ສະ​ພາ​ຄວາມ​ໝັ້ນ​ຄົງ​, ​ໃນ​ການ​ຢ້ຽມ​ຢາມຫວຽດ​ນາມ​ຄັ້ງ​ວັນ​ທີ 12 ທັນ​ວາ 2008: “ຂະ​ຫຍັນ​ຂັນ​ເຄື່ອນ, ຕັ້ງ​ໜ້າ ແລະ ໄດ້​ຈັດ​ຕັ້ງ​ເປັນ​ຢ່າງ​ດີ”. ບົດ​ຮຽນ​ທີ່​ຖອດ​ຖອນ​ມາ​ຈາກ​ການກໍ່ສ້າງ, ຝຶກ​ອົບຮົມ ​ແລະ ຈັດ​ຕັ້ງ​ບຸ​ຄະລາ​ກອນ​ໃຫ້​ເຫັນ​ວ່າ, ມີ​ຄວາມ​ຈຳ​ເປັນຕ້ອງ​ວາງ​ແຜນ​ການ​ໄລ​ຍະ​ຍາວ​​ເພື່ອກໍ່​ສ້າງ, ຝຶກ​ອົບຮົມ​ແລະ​ເກື້ອກູນ​ຕອບ​ແທນ​ສຳລັບ​ພະນັກງານ; ​ສ້າງ​ຖັນ​ແຖວ​ພະ​ນັກ​ງານ​ການທູດ​ພະຫຸ​ພາຄີ​ມື​ອາຊີບ. ​ເຮັດ​ໄດ້​ຄື​ແນວ​ນັ້ນ​ຈະ​ຊ່ວຍ​ໃຫ້​ຫວຽດ​ນາມ​ມີ​ຖັນ​ແຖວ​ພະ​ນັ​ກ​ງານ​ການ​ທູດ​ພະຫຸ​ພາຄີ​ ທີ່​ມີ​ຄວາມ​ເຕີບ​ໃຫຍ່ກ່ຽວ​ກັບ​ຫຼັກ​ໝັ້ນ​ການ​ເມືອງ, ຄວາມ​ສາ​ມາດທາງດ້ານ​ວິ​ຊາສະ​ເພາ, ມີປະ​ສົບ​ການ, ຄວາມ​ສາມາດ​ທາງ​ພາ​ສາຕ່າງປະ​ເທດ, ດຳ​ເນີນ​ງານ​ຢ່າງ​ມີ​ປະ​ສິດ​ທິ​ຜົນ, ມື​ອາຊີບໃນ​ເວ​ທີ​ປາ​ໄສ, ມີ​ທັກ​ສະ​​ໃນ​ການ​ຮ່າງແລະເປັນ​ປະ​ທານ​ໃນ​ການ​ເຈ​ລະ​ຈາ​ແກ້​ບັນຫາ, ​ໃນ​ການ​ປຶກ​ສາຫາລື​ແລະ​ກອງ​ປະ​ຊຸມ​ສາ​ກົນ,

3- ກຳ​ແໜ້ນ, ເສີມ​ຂະ​ຫຍາຍ, ໝູນ​ໃຊ້ຢ່າງ​ໄຫວ​ພິບ​ແລະສຳ​ເລັດ​ຜົນ ​ບັນ​ດາ​ບົດ​ຮຽນປະສົບ​ການ, ຫຼັກ​ການ​ເຈ​ລະ​ຈາ ​​ແລະ​ສິລະ​ປະ​ການ​ທູດ​ຫວຽດ​ນາມ. ບັນ​ດາ​ບົດ​ຮຽນປະສົບ​ການ​ທີ່​ລ້ຳ​ຄ່າ​ດ້ານການທູດ​ພະຫຸ​ພາຄີ​​ຂອງຫວຽດ​ນາມ ​ຜ່ານ​ການ​ເຈ​ລະ​ຈາ​ປະ​ຫວັດ​ສາດ​ຄັ້ງ​ຕ່າງໆ​ກ່ອນໜ້ານີ້​ເຊັ່ນ ​ການ​ເຈ​ລະ​ຈາ​ສັນ​ຍາ ​ເຊີ​ແນວ (ປີ 1954) ກ່ຽວ​ກັບ​ສັນ​ຕິ​ພາບ​ຢູ່​ອິນ​ດູ​ຈີນ, ສັຍ​ຍາ​ປາ​ຣີ ກ່ຽວ​ກັບ​ການສິ້ນ​ສຸດ​ສົງ​ຄາມແລະການ​ຟື້ນ​ຟູ​ສັນ​ຕິ​ພາບ​ຢູ່​ຫວຽດ​ນາມ (ປີ 1973), ການ​ເຈ​ລະ​ຈາ​ກ່ຽວ​ກັບ​ການ​ເຂົ້າ​ຮ່ວມ​ອົງ​ການ​ການ​ຄ້າ​ໂລກ (WTO) ໄດ້​​ເຜີຍ​​ແຜ່​ໃຫ້​ພະ​ນັກ​ງານ​ການທູດ​ພະຫຸ​ພາຄີ​ທຸກ​ຄົນ​ຊາບ​ຊຶມ ​ເພື່ອ​ໝູນ​ໃຊ້​ໃນ​ເມື່ອ​ເຂົ້າ​ຮ່ວມ​ການ​ເຈ​ລະ​ຈາ ​ແລະ​ເຮັດ​ສຳ​ເລັດ​ບົດ​ບາດ​ໃນ​ຕຳ​ແໜ່​ງ E10. ພາກ​ຕົວ​ຈິງ​ໃດ້ພິສູດ​ໃຫ້​ເຫັນ​ວ່າ, ພະ​ນັກ​ງານ​ເຮັດ​ວຽກ​ງານການທູດ​ພະຫຸ​ພາຄີ​​ຂອງ​ຫວຽດ​ນາມ ​ສືບ​ຕໍ່​​ເຕີບ​ໃຫຍ່​​ເຂັ້ມ​ແຂງໂດຍ​ຜ່ານ​ບັນ​ດາ​ການ​ເຈ​ລະ​ຈາ​ສາ​ກົນ​​ດ້ານ​ການ​ເມືອງ, ການ​ທູດ ​ແລະ ເສດ​ຖະ​ກິດ.

ບົດ​ຮຽນຈາກ​ການ​ເຂົ້າ​ຮັບ​ຕຳ​ແໜ່​ງ E10 ໄລ​ຍະ 2008-2009 ໄດ້​ຊ່ວຍ​ໃຫ້​ຫວຽດ​ນາມ​ມີ​ການ​ກະ​ກຽມ​​ເປັນ​ຢ່າງ​ດີ​ກ່ຽວ​ກັບ​ການ​ກຳ​ນົດ​ແຜນ​ນະ​ໂຍ​ບາຍ ​ແລະ ນະ​ໂຍ​ບາຍ; ​ສ້າງແລະກະ​ກຽມ​ເນື້ອ​ໃນ​ໂຄ​ສະ​ນາ​ເພື່ອ​ແຈ້ງ​ໃຫ້​ຊຸມ​ຊົນ​ສາ​ກົນຊາບ​ກ່ຽວ​ກັບ​ແນວ​ທາງແລະນະ​ໂຍ​ບາຍ​ການ​ພົວ​ພັນ​ຕ່າງ​ປະ​ເທດ​ຂອງ​ຫວຽດ​ນາມ​ໃນ​ໄລ​ຍະ​ທີ່​ຫວຽດ​ນາມ​ເຊື່ອມ​ໂຍງ​ສາ​ກົນ​ຢ່າງ​ເລິກ​ເຊິ່ງກວ້າງ​ຂວາງ; ​ສ້າງ​​ມາດ​ຕະ​ການ​ຈັດ​ຕັ້ງ​ປະຕິບັດ​ທີ່ເໝາະ​ສົມ, ແນໃສ່​ປະ​ກອບ​ສ່ວນ​ເຂົ້າ​ໃນ​ການ​ປະ​ຕິ​ບັດ​ທິດ​ນຳ​ ເປັນ​ເຈົ້າ​ການ​ແລະຕັ້ງ​ໜ້າ​ເຊື່ອມ​ໂຍງ​ສາ​ກົນຢ່າງ​ຮອບ​ດ້ານ. ​ຜ່ານສິ່ງ​ດັງກ່າວ​ເພື່ອ​ຍົກ​ສູງ​ຖາ​ນະ​ບົດ​ບາດ​ຂອງ​ປະ​ເທດ, ເສີມ​ຂະ​ຫຍາຍ​ຜົນ​ປະ​ໂຫຍດຂອງ​ຊາດ, ຮັກ​ສາ​ສະ​ພາບ​ແວດ​ລ້ອມ​ສາ​ກົນທີ່​ສະຫງົບ​ສຸກ ​ເພື່ອ​ການພັດ​ທະ​ນາ​ທີ່​ໄວແລະຍືນ​ຍົງ​ຂອງ​ປະ​ເທດ.

4. ຫາກ​ໄດ້​ຮັບ​ການ​ເລືອກ​ຕັ້ງ, ຫວຽດ​ນາມຈະ​ມີ​ໂອ​ກາດຫຼາຍທີ່​ຈະ​ສືບ​ຕໍ່ສຶກສາຄົ້ນ​ຄວ້າ​ແລະ​ສະ​ເໜີຂໍ້​ສະ​ເໜີ​ແນະ ແລະ ຊຸກ​ຍູ້​​ຄວາ​ຄິດ​ລິ​ເລີ່ມ​ອັນ​ລະ​ອຽດບາງ​ຢ່າງ, ປະ​ກອບ​ສ່ວນ​ເຂົ້າ​ໃນ​ເຄື່ອນ​ໄຫວ​ຂອງ​ສະ​ຫະ​ປະ​ຊາ​ຊາດ​ເວົ້າ​ລວມ ແລະ ຮັບ​ປະ​ກັນ​ຜົນ​ປະ​ໂຫຍດ​ແຫ່ງ​ຊາດ​ຂອງ​ຫວຽດ​ນາມ​ເວົ້າ​ສະ​ເພາະ. ພ້ອມກັນ​ນັ້ນ, ອາດ​ຈະ​ມີ​​ສ່ວນຮ່ວມ​ຕົວ​ຈິງ​​ໃນ​ການ​ຊຸກ​ຍູ້​​ໃຫ້​ບັນດາ​ປະ​ເທດສະ​ມາ​ຊິກ​​ຮ່ວມ​ມືກັນ, ເສີມ​ຂະ​ຫຍາຍ​ບົດ​ບາດ​ອັນ​ສຳ​ຄັນ​ຂອງ​ການ​ພົວ​ພັນ​ຕ່າງ​ປະ​ເທດພະຫຸ​ພາຄີ​ ໃນ​ການ​ຮັກ​ສາ​​ສັນ​ຕິພາບ​ແລະ​ຄວາມ​ໝັ້ນຄົງສາ​ກົນ.

ຄຽງ​ຂ້າງ​ຄວາມ​ສະ​ດວກ​ແລະ​ໂອ​ກາດ​ດັງ​ກ່າວ​ເທິງນີ້, ຫາກ​ໄດ້​ຮັບ​ການ​ເລືອກ​ຕັ້ງ​ເປັນ​ຄັ້ງ​ທີ່​ສອງ​ໃຫ້​ດຳລົງ​ຕຳ​ແໜ່​ງ E10 ໄລ​ຍະ 2020-2021, ຊຶ່ງ​ຄວາມ​ສຳ​ເລັດ​ໃນ​ການ​ເຂົ້າ​ດຳລົງ​ຕຳ​ແໜ່​ງ E10 ໄລ​ຍະ 2008-2009 ນັ້ນ ກໍ່​ເປັນ​​ແຮງ​ກົດ​ດັນແລະຄວາມ​ທ້າ​ທາຍສຳລັບ​ກະ​ຊວງ​ການ​ຕ່າງ​ປະ​ເທດ​ຫວຽດ​ນາມ​ເວົ້າ​ລວມ ​ແລະຄະ​ນະ​ຜູ້​ແທນ​ຫວຽດ​ນາມ​ທີ່ສະ​ຫະ​ປະ​ຊາ​ຊາດ​ເວົ້າ​ສະ​ເພາະ. ໃນ​ຂະ​ນະ​ນັ້ນ, ສະ​ພາບ​ການ​ສາ​ກົນ​ມີ​ການ​ພັດທະນາ​ທີ່​ສັບ​ສົນ​ແລະຄາດ​ເດົາ​ຍາກ; ວຽກ​ງານ​ຂອງສະ​ຫະ​ປະ​ຊາ​ຊາດ​ໄດ້​ເພີ່ມ​ຂຶ້ນ​ຫຼາຍພໍ​ຄວນ; ການປະຊຸມ​ໃຫ້​ຄຳ​ປຶກ​ສາ​ແລະການ​ປະຊຸມເປີດ​ເຜີຍກໍ່​​ໄດ້​ແກ່​ຍາວ​ກວ່າກ່ອນໜ້ານີ້, ຈະເປັນ​ຄວາມທ້າ​ທາຍຕໍ່​ຫວຽດ​ນາມ​​ໃນ​ການ​ກະ​ກຽມ​ເນື້ອ​ໃນສຳລັບ​ບັນ​ຫາ​ທີ່​ຄາດ​ວ່າ​ຈະ​ຈັດ​ຂຶ້ນໃນ​ໄລ​ຍະ 2020-2021 ແລະ ການຈັດ​ເວລາ, ບຸກຄະລາ​ກອນ​ທີ່​ເໝາະ​ສົມ​ ​ເພື່ອ​ເຂົ້າ​ຮ່ວມກອງ​ປະ​ຊຸມ ກໍ່​ຄື​ຕິດ​ຕາມ​ບັນ​ດາ​ບັນ​ຫາ​ເຫຼົ່ານີ້.

ຄວາມ​ແບ່ງ​ແຍກ​ລະ​ຫວ່າງ​ບັນ​ດາ​ປະ​ເທດ​ສະ​ມາ​ຊິກສະ​ພາ​ຄວາມ​ໝັ້ນ​ຄົງ​ແຫ່ງ​ສະ​ຫະ​ປະ​ຊາ​ຊາດ ກໍ່​ເປັນຄວາມ​ທ້າ​ທາຍ​ສຳລັບບັນ​ດາ​ປະ​ເທດ E10 ເວົ້າ​ລວມແລະຫວຽດ​ນາມ​ເວົ້າ​ສະ​ເພາະ​ ໃນ​ເວ​ລາ​ເຂົ້າ​ຮ່ວມ​ສະ​ພາ​ຄວາມ​ໝັ້ນ​ຄົງແລະຮັບ​ຕຳ​ແໜ່​ງ​ປະ​ທານ​ເມື່ອ​ຕ້ອງ​ເປັນ​ປະທານ​ກອງ​ປະຊຸມ ຫຼື​ສະ​ແດງຫຼັກ​ໝັ້ນ​ກ່ຽວ​ກັບ​ບັນ​ຫາ​ທີ່​ຖືກ​ແບ່ງ​ແຍກ​ລະ​ຫວ່າງ​​ປະ​ເທດ P5, ໃນ​ນັ້​ນ​ມີ​ບັນ​ດາ​ປະ​ເທດ​ທີ່ເປັນ​ຄູ່​ຮວມ​ມື​ຍຸດ​ທະ​ສາດ, ຄູ່​ຮ່ວມ​ມື​ຮອບ​ດ້ານ​ຂອງ​ຫວຽດ​ນາມ.

ຄວາມ​ທ້າ​ທາຍ​ຕໍ່​ໄປ​ແມ່ນຕ້ອງທຳ​ຄວາມ​ລື້ງ​ເຄີຍ​ກັບ ກົນ​ໄກ ຖື​ປາກກາ (penholder) / ​ຮ່າງເອ​ກະ​ສານ​ໂດຍ​ກົງ​ຂອງ​ສະ​ພ​າ​ຄວາມ​ໝັ້ນ​ຄົງ​ແຫ່ງສະ​ຫະປະ​ຊາ​ຊາດ​ ກ່ຽວ​ກັບ​ບັນ​ຫາ​ສະ​ເພາະ​ຈຳນວນ​ໜຶ່ງ. ໃນ​ໄລ​ຍະ 2008-2009 ຍັງ​ບໍ່​ມີ​ກົນ​ໄກ​ນີ້. ທີ່​ຜ່ານ​ມາ​ມໍ່​ນີ້, ບັນ​ດາ​ປະ​ເທດ E10 ​ໄດ້​ສະ​ເໜີ​ຄວາມ​ຄິດ​ລິ​ເລີ່ມ ​ໃຫ້​ຖື​ບົດບາດ​ເປັນ​ຜູ້ຂຽນ​​ເອ​ກະ​ສານ​ຂອງ​ສະ​ພາ​ຄວາມ​ໝັ້​ນ​ຄົງ, ຕົວ​ຢ່າງ​ຄື ຊູ​ແອດແລະກູ​ເວດເປັນ​ຜູ້​ຂຽນ​​ຮ່າງ​ມະ​ຕິ​ກ່ຽວ​ກັບ​ບັນ​ຫາມະ​ນຸດ​ສະ​ທຳ​ຢູ່ຊີ​ຣີ, ຊູ​ແອດຂຽນ​ຮ່າງ​ມະ​ຕິ​ກ່ຽວ​ກັບ​ເດັດ​ນ້ອຍ​ໃນ​ການ​ປະ​ທະ​ກັນ​ດ້ວຍອາ​ວຸດ, ​ໂຮ​ນລັງ​ຂຽນ​ຮ່າງ​ມະ​ຕິ​ກ່ຽວ​ກັບ​ ອາ​ຟະ​ກາ​ນິດສະ​ຖານ, ໂບລີວີຂຽນ​ຮ່າງ​ມະ​ຕິ​ກ່ຽວກັບ​ການ​ສ້າງສັນ​ຕິ​ພາບ​

ເວົ້າ​ລວມ​ແລ້ວ, ການ​ສະ​ໝັກຮັບ​ເລືອ​ກ​ຕັ້ງ​​ເຂົ້າ​ໃນ​ຕຳ​ແໜ່​ງ E10 ໄລ​ຍະ 2020-2021 ໄດ້​ວາງຄວາມ​ຄວາມ​ຕ້ອງການ​ທີ່​ໃຫ​ຍ່ຫຼວງຕໍ່​ຫວຽດ​ນາມ​ຄື: 1- ຕ້ອງຕອບ​ສະ​ໜອງ​ຄວາມຄາດ​ຫວັງ​ທີ່ສູງກວ່າໄລ​ຍະ 2008-2009; 2- ກຳ​ນົດ​ທີ່​ຕັ້ງແລ​ະລະ​ດັບ​ການ​ມີ​ສ່ວນ​ຮ່ວມ​ຂອງຫວຽດ​ນາມ​ໃນສະ​ພາ​ຄວາມ​ໝັ້ນ​ຄົງ​​ແຫ່ງສະ​ຫະ​ປະ​ຊາ​ຊາດ ​ແມ່ນແນ່​ໄສ່​ປະ​ກອບ​ສ່ວນ​ຢ່າງ​ເປັ​ນ​ເຈົ້າ​ການ, ຕັ້ງ​ໜ້າ ແລະ ມີ​ປະ​ສິດ​ທິ​ຜົນ​ໃຫ້​ແກ່​ວຽກ​ງານ​ຮ່ວມ​ກັນຂອ​ງ​ສະ​ພາ​ຄວາມ​ໝັ້​ນ​ຄົງ; 3- ປົກ​ປັກ​ຮັກ​ສ​າ​ແລະຊຸກ​ຍູ້​ທັດ​ສະ​ນະ, ຫຼັກ​ໝັ້ນ​ກ່ຽວ​ກັບ​ບັນ​ຫາ​ດ້ານ​ຄວາມ​ປອດ​ໄພ​ຂອງຫວຽດ​ນາມມີ​ຜົນ​ປະ​ໂຫຍດຕາມ​ກົດໝາຍທີ່ສະ​ພາ​ຄວາມ​ໝັ້ນ​ຄົງ; 4- ເພີ່ມ​ທະ​ວີ​ຖານະບົດບາດ, ຮູບ​ພາບ ແລະ​ຄວາມ​ສ​ະ​ໜັບ​ສະ​ໜູນ​ ໂດຍ​ຜ່ານ​ການ​ຊຸກ​ຍູ້​ຄວາມ​ຄິດ​ລິ​ເລີ່ມ​ຈຳ​ນວນ​ໜຶ່ງ, ຂໍ້​ສະ​ເໜີ​ປະ​ສານ​ງານ​ໃນ​ເວ​ທີ​ປາ​ໄສ​ຈຳ​ນວນ​ໜຶ່ງ​ ກ່ອນແລະ​ລະຫວ່າງ​ການ​ດຳລົງ​ຕຳ​ແໜ່​ງ E10 ໃນ​ສະ​ພາ​ຄວາມ​ໝັ້ນ​ຄົງ.

“​ເອົາ​ຫຼັກການ​ເປັນ​ພື້ນ​ເພື່ອໝູນ​ໃຊ້​ຢ່າງ​ໄຫວ​ພິບ" ແມ່ນ​ສິລະ​ປະການທູ​ດຫວຽດ​ນາມຕາມ​ແບບ​ແຜນຂອງ​ປະທານ​ໂຮ່​ຈິ​ມິນ ​ແມ່ນຄຸນ​ຄ່າຄວາມ​ພົວ​ພັນ​ຕ່າງ​ປະ​ເທດຂອງຫວ​ຽດ​ນາມທີ່​ມີ​ຄວາມ​ຍືນ​ຍົງ​ຕະຫຼອດ​ໄລຍະ​ປະ​ຫວັດ​ສາດ​ຂອງ​ຊາດ. ​ເອົາຫຼັກການ​​ເປັນ​ພື້ນ​ແມ່ນຢຶດ​ໝັ້ນຫຼັກ​ການເອ​ກະ​ລາດ​​ແຫ່ງຊາດແລະຜົນ​ປະ​ໂຫຍດຂອງປະ​ເທດຊາດ, ເຊື່ອມ​ຊຶມ​ແນວ​ທາງ​ການ​ພົວ​ພັນ​ຕ່າງ​ປະ​ເທດ​ຂອງ​ພັກແລະລັດ, ຖື​ເອົາ​ນັ້ນ​ເປັນ​ພື້ນ​ຖານ​ເພື່ອ​ຜັນ​ຂະ​ຫຍາຍ​ການ​ເຄື່ອນ​ໄຫວ​ການ​ພົວ​ພັນ​ຕ່າງ​ປະ​ເທດ. ຮັກ​ສາຫຼັກ​ການ​ໄວ້​ຢ່າງ​ໝັ້ນຄົງ ແລະ ມີຄວາມ​ໄຫວ​ພິບທາງ​ດ້ານ​ຍຸດ​ໂທ​ບາຍ​ ແມ່ນ​ທິດ​ນຳ​ທີ່​ສອດ​ຮ້ອຍ​ຕະຫຼອດ​ຂອງ​ການທູດຫວຽດ​ນາມ ແລະ ເປັນ​ປັດ​​ໄຈທີ່​ຮັບປະກັນ​ໃຫ້ການ​ປັບ​ຕົວທີ່​ສຳ​ເລັດ​ຜົນ ກັບ​ບັນດາການ​ປ່ຽນ​ແປງ​ຢ່າງ​ໄວວາ​ແລະສັບ​ສົນ, ພ້ອມກັນ​ນັ້ນ​ກໍ່​ສາມາດແກ້​ໄຂ​​ບັນ​ຫາ​ໃນ​ທຸກຂົງ​ເຂດ​ໄດ້​ດີ, ໃນ​ນັ້ນ​ມີ​ແນວຮົບ​ການ​ຕ່າງ​ປະ​ເທດ​ເວົ້າ​ລວມ ແລະ ການ​ທູດພະຫຸ​ພາຄີ​ເວົ້າ​ສະ​ເພາະ./.

 

ສະພາບການ​ການລົງຄະແນນສຽງ ກ່ຽວກັບຮ່າງມະຕິຕົກລົງ ຂອງສະພາຄວາມຫມັ້ນຄົງ​ແຫ່ງສະຫະປະຊາຊາດ (ໄລຍະ 2008-2018) (1)

 ​ໂດຍ ປອ. ຫງວຽນ​ຫວຽດ​ເລິມ

ກະ​ຊວງ​ການ​ຕ່າງ​ປະ​ເທດ

------------------------------

- ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 918 (​ເດືອນເມ​ສາ 2019).

(1) ເຂົ້າ​ຫາ: Voting on draft resolutions: 2008-2018,https://unite.un.org/sites/unite.un.org/ files/app-schighlights 2018/index.html#decisions, ​ເຂົ້າ​ຫາ​ວັນ​ທີ 20-1-2019.

(2) ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XIIຫ້ອງ​ວ່າການ​ສູນ​ກາງ​ພັກຮ່າ​ໂນ້ຍ, 2016, ໜ້າ 153-155.

(3) ​ເ​ຂົ້າ​ຫາ: http://baoquocte.vn/doi-ngoai-da-phuong-gop-phan-day-manh-hoi-nhap-tang-cuong-suc-manh-dat-nuoc-85683.html, ວັນ​ທີ 18-1-2019.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ