ວັນສຸກ, 24/1/2020
ການດຶງດູດການລົງທຶນໂດຍກົງ ຈາກສະຫະພາບເອີຣົບ ເຂົ້າໃນຫວຽດນາມ: ສະຖານະພາບແລະຄວາມຄາດຫວັງ
27/12/2019 15:5' ສົ່ງ ພິມ
ນາຍົກລັດຖະມົນຕີຫວຽດນາມ ຫງວຽນຊວັນຝຸກ ເປັນສັກຂີພະຍານໃນພິທີເຊັນ ສັນຍາການຄ້າເສລີລະຫວ່າງຫວຽດນາມແລະສະຫະພາບເອີຣົບ (ພາບ: TTXVN)
     ພາຍຫຼັງ​ເກືອບ 25 ປີ ​ແຫ່ງ​ການ​ສ້າງສາ​ຍພົວພັນ​ທາງ​ການ​ທູດ​ຢ່າງ​ເປັນ​ທາງ​ການ ນັບ​ແຕ່​ສັນຍາ​ຂອບ​ກ່ຽວ​ກັບ​ການ​ຮ່ວມ​ມື​ ທີ່​ລົງ​ນາມ​ໃນ​ປີ 1995, ສະຫະພາບ​ເອີຣົບກາຍ​ເປັນ​ຄູ່​ຮ່ວມ​ມື​ທີ່​ສຳຄັນ​ແຖວ​ໜ້າ​ຂອງ​ຫວຽດນາມ ​ໃນ​ຫຼ!ຍຂົງ​ເຂດ. ຕາມ​ຂໍ້​ມູນຂອງ​ສະຫະ​ກົມ​ສະຖິຕິ, ຄິດ​ຮອດ​ທ້າຍ​ປີ 2018, ສະຫະພາບ​ເອີຣົບ​ເປັນ​ຄູ່​ຮ່ວມ​ການ​ຄ້າ​ທີ່​ໃຫຍ່​ທີ 4 (ຫຼັງ​ຈາກ ຈີນ, ອາ​ເມ​ລິ​ກາ, ສະຫະພາບ​ເກົາຫຼີ) ​ແລະ ​ເປັນ​ຕະຫຼາດ​ສົ່ງ​ອອກ​ທີ່​ໃຫຍ່​ທີ 2 (ຖັດຈາກ​ອາ​ເມ​ລິ​ກາ) ຂອງ​ຫວຽດນາມ(1). ພ້ອມ​ກັນ​ນັ້ນ, ສະຫະພາບ​ເອີຣົບ​ເປັນ​ຄູ່​ຮ່ວມ​ການ​ລົງທຶນ​ຈາກ​ຕ່າງປະ​ເທດ​ທີ່​ທີ 4 ຂອງ​ຫວຽດນາມ (ຫຼັງ​ຈາກ ອາ​ຊຽນ, ສາທາລະນະ​ລັດ​ເກົາຫຼີ, ຍີ່ປຸ່ນ)(2). ກົງ​ຂ້າມ, ຫວຽດນາມ​ກໍ່​ເປັນ​ຄູ່​ຮ່ວມມື​ເສດຖະກິດ​ທີ່​ສຳຄັນ​ອັນ​ດັບ​ສອງຂອງສະຫະພາບ​ເອີຣົບ ຢູ່​ໃນ​ພາບ​ພື້ນ​ອາຊີ​ຕາ​ເວັນ​ອອກສຽງ​ໃຕ້, ຖັດ​ຈາກ​ສິງກະ​ໂປ. ສັນຍາ​ການ​ຄ້າ​ເສລີ​ລະຫວ່າງ​ຫວຽດນາມ ​ແລະ ສະຫະພາບ​ເອີຣົບ (ສັນຍາ EVFTA) ທີ່​ສອງ​ຝ່າຍຫາກໍ່​​ລົງ​ນາມ ​​ເປັນ​ເຫດການ​ທີ່​ສຳຄັນ, ນຳ​ເອົາ​ການ​ພົວພັນ​ສອງ​ຝ່າຍ​ຂຶ້ນ​ສູ່​ໄລຍະ​ການ​ພັດທະນາ​ໃໝ່, ຮອບດ້ານ​ແລະ​ເລິກ​ເຊິ່ງກວ່າ​ອີກ, ​ໃນ​ນັ້ນ ການ​ດຶງ​ດູດ​ການ​ລົງທຶນ​ຄຸນ​ນະພາ​ບສູງ​ຈາກສະຫະພາບ​ເອີຣົບ ​ແມ່ນ​ໜຶ່ງ​ໃນ​ບັນດາ​ຜົນ​ປະ​ໂຫຍ​ດທີ່​ຫວຽດນາມ​ຄາດ​ຫວັງ​ຫຼາຍ.

ສະຖານະ​ພາບ​ຂອງ​ການ​ລົງທຶນ​ໂດຍ​ກົງ​ຈາກສະຫະພາບ​ເອີຣົບ​ເຂົ້າ​ໃນ​ຫວຽດນາມ

ຄິດ​ໄລ່​ສະ​ສົມ​ເຖິງ​ເດືອນ 4-2019, ສະຫະພາບ​ເອີຣົບ​ເປັນ​ຄູ່​ຮ່ວມ​ລົງທຶນ​ທີ່​ໃຫຍ່​ທີ່​ສຸດຢູ່​ຫວຽດນາມ ດ້ວຍ 2.244 ​ໂຄງການ​ຍັງ​ຄົງ​ເຄື່ອນ​ໄຫວ​ຢູ່, ທຶນ​ຈົດ​ທະບຽນ​ທັງ​ໝົດ​ແມ່ນ 24,67 ຕື້​ໂດ​ລາ​ສະຫະລັດ, ທຽບ​ເທົ່າ 7,6% ຂອງລວມຍອການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ເຂົ້າ​ໃນ​ຫວຽດນາມ(3). ການ​ລົງທຶນ​ໂດຍ​ກົງ​ຈາກສະຫະພາບ​ເອີຣົບ​ເຂົ້າ​ຫວຽດນາມ​ເພີ່ມ​ຂຶ້ນ​ໄວ​ເປັນ​ພິ​ເສດ ພາຍຫຼັງ​ທີ່​ຫວຽດນາມ​ເຂົ້າ​ເປັນ​ສະມາຊິກ​ອົງການ​ການ​ຄ້າ​ໂລກ​ປີ 2007 ​ແລະ​ ບັນລຸ​ລະດັບ​ສູງ​ສຸດ 2,6 ຕື້​ໂດ​ລາ​ສະຫະລັດຂອງ​ທຶນ​ຈົດ​ທະບຽນ​ໃນ​ປີ 2010 ​ແລະ​ທຶນ​ປະຕິບັດ​ປະມານ 1,69 ຕື້​ໂດ​ລາ​ສະຫະລັດ. ​ແຕ່, ​ຍ້ອນ​ການ​ກະທົບ​ຂອງ​ວິ​ກິດ​ການ​ການ​ເງິນ-​ເສດຖະກິດທົ່ວໂລກ, ກະ​ແສ​ທຶນ​ຊ້າ​ລົງ. ​ໃນ​ຊຸມ​ປີ​ທີ່​ຜ່ານ​ມາ​ມໍ່​ນີ້, ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ​ໄດ້​ຮັບ​ການ​ຟື້ນ​ຟູ ​ແຕ່​ຍັງ​ບໍ່​ບັນລຸ​ລະດັບ​ສູງ​ສຸດ​ຂອງ​ປີ 2010.

​ເຖິງ​ວ່າ​ເງິນ​ລົງທຶນ​ໄດ້​ມີ​ການ​ເພີ່ມ​ຂຶ້ນ​ກໍ່ຕາມ, ​ແຕ່​ອັດຕາ​ສ່ວນການ​ລົງທຶນ​ໂດຍ​ກົງ​ຂອງ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ ພຽງ​ແຕ່​ກວມ​ສ່ວນ​ໜ້ອຍ ​ໃນ​ການ​ລົງທຶນ​ໂດຍ​ກົງ​ທັງ​ໝົດ ຂອງ​ສະຫະພາບ​ເອີຣົບ ​ໄປ​ຍັງ​ຕ່າງປະ​ເທດ, ກໍ່ຄືການ​ລົງທຶນ​ໂດຍ​ກົງ​ຂອງ​ສະຫະພາບ​ເອີຣົບ ​ເຂົ້າ​ໃນ​ອາ​ຊຽນ​ໂດຍ​ລວມ. ຕາມ​ຕົວ​ເລກ​ສະຖິຕິ​ຂອງ Eurostat ​ແລະ ASEANStats, ປີ 2017, ການ​ລົງທຶນ​​ໂດຍ​ກົງ​ຂອງ​ສະຫະພາບ​ເອີຣົບ ຕົ້ນຕໍ​ແມ່ນ​ການ​ລົງທຶນ​ໂດຍ​ກົງ​ຢູ່​ພາຍ​ໃນ​ກຸ່ມ (ກວມ​ເອົາຫຼາຍ​ກວ່າ 61%), ການ​ລົງທຶນ​ໂດຍ​ກົງ​ເຂົ້າ​ອາ​ເມ​ລິ​ການ​ກວມ​ເອົາ 29,35%, ການ​ລົງທຶນ​ໂດຍ​ກົງ​ເຂົ້າ​ອາ​ຊຽນກວມ​ເອົາ 5,7%, ທຽບ​ທົ່າ 175,2 ຕື້​ໂດ​ລາ​ສະຫະລັດ ​ໃນ​ໄລຍະ 2010-2017. ທຽບ​ກັບ​ບັນດາ​ປະ​ເທດອາ​ຊຽນອື່ນ, ຫວຽດນາມ​ບໍ່​ແມ່ນຄູ່​ຮ່ວມ​ການ​ລົງທຶນ​ໃຫຍ່​ຂອງ​ສະ​ກະພາບ​ເອີຣົບ ຊຶ່ງ​ກວມ​ພຽງ 3% ​ໃນການ​ລົງທຶນ​ໂດຍ​ກົງ​ທັງ​ໝົດ​ຈາກ​ສະຫະພາບ​ເອີຣົບ​ເຂົ້າ​ໃນ​ອາ​ຊຽນ, ​ແລະ​ຢູ່​ໃນ​ອັນ​ດັບ​ທີ​ສາມ ຫຼັງ​ສາກ​ສິງກະ​ໂປ(85%) ​ແລະ​ມາ​ເງ​ເຊຍ (10%).

ຕາມ​ຂໍ້​ມູນຈາກກົມ​ການ​ລົງທຶນຕ່າງປະ​ເທດ, ກະຊວງ​ແຜນການ​ແລະ​ການ​ລົງທຶນ, ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ ​ເຖິງ​ທ້າຍ​ເດືອນ 4-2019 ມີ​ຈຸດ​ພິ​ເສດ​ຈຳນວນ​ໜຶ່ງ​ດັ່ງ​ຕໍ່​ໄປ​ນີ້: ມີ 27 ​ໃນ 28 ປະ​ເທດສະຫະພາບ​ເອີຣົບ (ຍົກ​ເວັ້ນ ກຣົວຊີ) ​ເຄີຍ​ມີ​ການ​ລົງທຶນ​ໂດຍ​ກົງ​ເຂົ້າ​ຫວຽດນາມ, ປະ​ເທດ​ທີ່​ລົງທຶນ​ຫຼາຍ​ທີ່​ສຸດ​ ແມ່ນປະ​ເທດ​ໂຮງ​ລັງ (329 ​ໂຄງການ, ດ້ວຍ​ທຶນ​ລົງທະບຽນ 9,5 ຕື້​ໂດລາ​ສະຫະ​ລົດ), ອັງກິດ (363 ​ໂຄງການ, 5,9 ຕື້​ໂດ​ລາ​ສະຫະລັດ), ຝຣັ່ງ (543 ​ໂຄງການ, 3,6 ຕື້​ໂດ​ລາ​ສະຫະລັດ), ລຸກ​ຊຳ​ລວກ (47 ​ໂຄງການ, 2,4 ຕື້​ໂດ​ລາ​ສະຫະລັດ), ​ເຢຍລະ​ມັນ (326 ​ໂຄງການ, 2 ຕື້​ໂດ​ລາ​ສະຫະລັດ) ​ແລະ ​ແບນ​ຊິກ (70 ​ໂຄງການ, 1 ຕື້​ໂດ​ລາ​ສະຫະລັດ). ສະ​ສົມ​ເຖິງ​ທ້າຍ​ເດືອນ 4-2019, ການ​ລົງທຶນ​ຂອງ​ປະ​ເທດ​ເຫຼົ່າ​ນີ້ກວມ​ເອົາ 89,96% ຂອງຍອດ​ຈຳນວນທຶນ​ຈົດ​ທະບຽນຂອງ​ສະຫະພາບ​ເອີຣົບ ທີ່​ລົງທຶນ​ເຂົ້າ​ໃນ​ຫວຽດນາມ. ການ​ລົງທຶນ​ໂດຍ​ກົງ​ຂອງ​ປະ​ເທດ​ສະຫະພາບ​ເອີຣົບອື່ນ​ແມ່ນ​ບໍ່​ຫຼ!ຍພໍ​ເທົ່າ​ໃດ. ສິ່ງ​ດັ່ງກ່າວ​ໃຫ້​ເຫັນ​ວ່າ, ພື້ນ​ທີ່​ເພື່ອ​ດຶງ​ດູດການ​ລົງທຶນ​ໂດຍ​ກົງ​ຈາກ​ບັນດາຄູ່​ຮ່ວມ​ມື​ທີ່​ເປັນ​ມູນ​ເຊື້ອ ກໍ່​ຄື​ຈາກ​ບັນດາ​ຄູ່​ຮ່ວມ​ມື​​ໃນສະຫະພາບ​ເອີຣົວ ຍັງ​ຫຼາຍ​ພໍ​ຄວນ. 

ມູນຄ່າ​ສະ​ເລ່ຍຂອງ​ໂຄງການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ ​ແມ່ນ​ຂ້ອນ​ຂ້າງ​ໜ້ອຍ (11,02 ລ້ານໂດ​ລາ​ສະຫະລັດ), ຕ່ຳ​ກວ່າ​ລະດັບ​ທົ່ວ​ໄປ (12,4 ລ້ານໂດ​ລາ​ສະຫະລັດ). ພິ​ເສດ, ຂະໜາດ​ຂອງ​ໂຄງການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ ​ຂອງ​ບັນດາ​ຄູ່​ຮ່ວມ​ມື​ສະຫະພາບ​​ເອີຣົບ ມີ​ຄວາມ​ແຕກ​ຕ່າງ​ຫຼາຍ. ບາງ​ປະ​ເທດ​ມີ​ໂຄງການ​ລົງທຶນ​ຂະໜາດ​ໃຫຍ່, ​ເຊັ່ນ​ລຸກ​ຊຳ​ບວກ (ສະ​ເລ່ຍ 51,48 ລ້ານໂດ​ລາ​ສະຫະລັດ ຕໍ່​ໂຄງການ), ​ໂຮ​ນລັງ (29,02 ລ້ານໂດ​ລາ​ສະຫະລັດ), ​ໄຊ​ປຣັດ (26,75 ລ້ານໂດ​ລາ​ສະຫະລັດ), ​ແບນ​ຊິກ (14,8 ລ້ານໂດ​ລາ​ສະຫະລັດ), ສະ​ໂລ​ວາ​ກີ (14,15 ລ້ານໂດ​ລາ​ສະຫະລັດ). ສ່ວນ​ທີ່​ເຫຼືອ​ແມ່ນ​ມີ​ຂະໜາດ​ນ້ອຍ ​ແຕ່ 1 - 5 ລ້ານໂດ​ລາ​ສະຫະລັດ ຫຼືຕ່ຳ​ກວ່າ 1  ລ້ານໂດ​ລາ​ສະຫະລັດ.

ກ່ຽວ​ກັບ​ຂົງ​ເຂດ​ການ​ລົງທຶນ, ສະຫະພາບ​ເອີຣົບ​ໄດ້​ລົງທຶນ​ໃນ 18 ຂະ​ແໜງ​ຂອງ 21 ຂະ​ແໜງ​ຕາມ​ລະບົບ​ການ​ຈັດແບ່ງ​ປະ​ເພດ​ຂະ​ແໜງ​ເສດຖະກິດ​ແຫ່ງ​ຊາດ, ​ໃນ​ນັ້ນ ​ໄດ້​ສຸມ​ໃສ່ອຸດສາຫະກຳ​ການ​ຜະລິດ​ແລະ​ປຸງ​ແຕ່ງ (ກວມ​ເອົາ 36,3% ຂອງຈຳນວນ​ເງິນ​ລົງທຶນ​ທັງ​ໝົດ, ຕົ້ນຕໍ​ແມ່ນ​ບັນດາ​ຂະ​ແໜງ​ເຊັ່ນ ການ​ກັ່ນ​ຕອງ​ປິ​ໂຕ​ເຄມີ 11%, ສິ່ງ​ທໍ 6,94%, ​ເອ​ເລັກ​ໂຕຣນິກ 6,4%, ປຸງ​ແຕ່ງອາຫານ 5,6%, ຜະລິດ​ລົດ​ໂອ​ໂຕ​ແລະ​ພາຫະນະ​ຂົນ​ສົ່ງ 5,2%), ການ​ຜະລິດ, ​ແຈກ​ຢາຍ​ໄຟຟ້າ ອາຍ​ແກ໊ດ (20,7%), ອະສັງ​ຫາ​ລິມະ​ຊັບ (11%), ຂໍ້​ມູນ​ຂ່າວສານ​ແລະ​ການ​ສື່ສານ (6,6%). ດັ່ງ​ນັ້ນ, ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ ​ໄດ້​ປະກອບສ່ວນ​ເຂົ້າ​ໃນຂະ​ບວນການຈັດ​ວາງ​ໂຄງ​ສ້າງ​ເສດຖະກິດ​ຄືນ​ໃໝ່ ຕາມ​ທິດ​ທາງ​ກ້າວໜ້າ​ຢູຫວຽດນາມ. ບັນດາ​ຂົງ​ເຂດ​ການ​ລົງທຶນ​ຈາກສະຫະພາບ​ເອີຣົບກໍ່​ໄດ້​ແຜ່​ກະຈາຍ​ຢ່າງ​ສະ​ໝ່ຳສະ​ເໝີ​ກວ່າ ທຽບ​ກັບ​ການ​ລົງທຶນ​ໂດຍ​ກົງ​ຈາກ​ຍີ່ປຸ່ນ ​ແລະ ສາທາລະນະ​ລັ​ດ​ເກົາຫຼີ.

ກ່ຽວ​ກັບ​ພື້ນ​ທີ່​ການ​ລົງທຶນ, ບັນດາ​ນັກ​ລົງທຶນ​ຈາກສະຫະພາບ​ເອີຣົບ ​ໄດ້​ມີໜ້າ​ຢູ່ 54 ​ແຂວງ ກຳ​ແພງ​ນະຄອນ​ຂອງ​ຫວຽດນາມ, ​ແຕ່​ສ່ວນ​ຫຼາຍໄດ້​ລວມ​ສູນ​ຢູ່​ໃນຕົວ​ເມືອງ​ໃຫຍ່ ທີ່​ມີ​ໂຄງ​ສ້າງ​ພື້ນຖານ​ພັດທະນາ, ມີທ່າ​ເຮືອ​ທາງ​ທະ​ເລ, ​ເດີນ​ບິນ, ​ເຊັ່ນ ນະຄອນ​ໂຮ່ຈີ​ມິນ (15,1%), ​ແຂວງ​ບ່າ​ເຣ້ຍ-ຫວຸງ​ເຕົ່າ (15%), ຮ່າ​ໂນ້ຍ (14,8%), ກວ໋າງນິງ (9%), ດົ່ງ​ນາຍ (8,3%), ບິ່ງ​ເຢືອງ (6,9%). ດັ່ງ​ນັ້ນ, ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ ບໍ່​ໄດ້​ຊ່ວຍ​ໃຫ້ຫວຽດນາມ​ຫຍໍ້​ສັ້ນ​ຊ່ອງ​ຫວ່າງ​ການ​ພັດທະນາ​ລະຫວ່າງ​ເຂດ​ແລະ​ພາກ​ໃນ​ທົ່ວ​ປະ​ເທດ.

ກ່ຽວ​ກັບ​ຮູບ​​ແບບ​ຂອງການ​ລົງທຶນ, ​ໂຄງການ​ລົງທຶນ​ໂດຍ​ກົງ​ຈາກສະຫະພາບ​ເອີຣົບຢູ່​ຫວຽດນາມ​ສ່ວນ​ຫຼ!ຍ​ແມ່ນ​ທຶນ​ຕ່າງປະ​ເທດ 100%. ຮູບ​ແບບ​ການ​ຮ່ວມ​ທຶນ, BOT, BT, BTO ກວມ​ອັດຕາ​ສ່ວນ​ນ້ອຍ. ສິ່ງ​ດັ່ງກ່າວ​ພາ​ໃຫ້ການ​ເຊື່ອມ​ຕໍ່​ລະຫວ່າງຂົງ​ເຂດການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ ​ແລະຂົງ​ເຂດ​ໃນ​ປະ​ເທດ, ກໍ່ຄື​ຜົນ​ກະທົບ​ແຜ່​ກະຈາຍ​ຈາກ​ວິ​ສາ​ຫະກິດທີ່​ມີ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ ​ຖືກ​ຈຳກັດ.

​ເວົ້າ​ລວມ, ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ ​ເຂົ້າ​ຫວຽດນາມ​ໃນ​ຊຸມ​ປີ​ທີ່​ຜ່ານ​ມາ​ມີ​ການ​ເຕີບ​ໂຕ, ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະກິດ​ຂອງ​ຫວຽດນາມ ​ໂດຍ​ຜ່ານ​ການ​ສະໜອງ​ທຶນ​ໃຫ້​ແກ່​ການ​ລົງທຶນ​ພັດທະນາ; ຊຸກຍູ້​ການ​ສົ່ງ​ອອກ, ປັບປຸງ​ດຸນ​ການ​ຄ້າ; ຊ່ວຍ​ເຫຼືອ​ໃນ​ການ​ປັບ​ໂຄງ​ສ້າງ​ເສດຖະກິດ​ຕາມ​ທິດ​ກ້າວໜ້າ; ຊຸກຍູ້​ວິ​ສາ​ຫະກິດ​ພາຍໃນຍົກ​ສູງ​ຄວາມ​ສາມາດ​ໃນ​ການ​ຄຸ້ມ​ຄອງ ​ແລະ​ຄວາມ​ສາມາດ​​ແຂ່ງຂັນ​ໃນ​ຕະຫຼາດ. ພິ​ເສດ, ບັນດາ​ນັກ​ລົງທຶນ​ເອີຣົບມີ​ຂໍ້​ໄດ້​ປຽບ​ທາງ​ເຕັກ​ໂນ​ໂລ​ຊີ, ປະກອບສ່ວນ​ຕັ້ງໜ້າ​ໃນ​ການ​ສ້າງ​ຂະ​ແໜງ​ການ​ແລະ​ອາຊີບ​ໃໝ່ ​ແລະ ​ຜະລິດ​ຕະພັນ​ໃໝ່ທີ່​ມີ​ເນື້ອ​ໃນ​ເຕັກ​ໂນ​ໂລ​ຊີ​ສູງ. ທ່າ​ອຽງການ​ລົງທຶນ​ໂດຍ​ກົງ​ຂອງ​ສະຫະພາບ​ເອີຣົບ ​ແມ່ນ​ມຸ່ງ​ສູ່​ບັນດາ​ຂະ​ແໜງ​ອຸດສາຫະກຳ​ທີ່​ໃຊ້​ເຕັກ​ໂນ​ໂລ​ຊີ​ສູງ ​ແລະ​ບັນດາ​ຂະ​ແໜງ​ບໍລິການ (​ໄປ​ຊະນີ​​ແລະໂທລະ​ຄົມມະນາຄົມ, ການ​ເງິນ, ຫ້ອງການ​ໃຫ້​ເຊົ່າ, ການ​ຂາຍຍ່ອຍ,...). ການປະກົດ​ຕົວ​ຂອງ​ບັນດາວິ​ສາ​ຫະກິດທີ່ມີ​ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ ໄດ້​ນຳ​ມາ​ເຊິ່ງ​ເຕັກ​ໂນ​ໂລ​ຊີ​ທັນ​ສະ​ໄໝ​ຈຳນວນ​ໜຶ່ງ ໃນບັນດາ​ຂົງ​ເຂດ​ເຊັ່ນ ນ້ຳມັນ​ອາຍ​ແກ໊ດ, ອຸດສາຫະກຳ​ໜັກ, ບໍລິການ​ໄປ​ຊະນີ​ແລະ​ໂທລະ​ຄົມມະນາຄົມ,... ຢູ່​ຫວຽດນາມ.

​ແຕ່, ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ ຍັງ​ບໍ່​ທັນ​ເປັນ​ປົກກະຕິ ​ແລະ​ບໍ່​ສົມ​ຄູ່​ກັບ​ຄວາມ​ສາມາດ​ບົ່ມ​ຊ້ອນ​ທາງ​ທຶນຮອນ, ​ເຕັກ​ໂນ​ໂລ​ຊີ​ແລະ​ວິ​ສາວະ​ກຳ​ ຂອງ​ນັກລົງທຶນສະຫະພາບ​ເອີຣົບ. ຈຳນວນ​ໂຄງການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບທີ່​ມີ​ຂະໜາດ​ໃຫຍ່​ໃນ​ຂົງ​ເຂດ​ຕ່າງໆ ​ແມ່ນ​ຂໍ້​ໄດ້​ປຽບ​ຂອງ​ບັນດາ​ປະ​ເທດ​ສະຫະພາບ​ເອີຣົບ, ພ້ອມ​ກັນ​ນັ້ນ​ກໍ່​ເປັນ​ຂົງ​ເຂດ​ທີ່​ຫວຽດນາມ​ເອົາ​ໃນ​ໃສ່​ໃນ​ການ​ກຶງ​ກູດ, ​ເຊັ່ນ ບັນດາ​ໂຄງການ​​ເຕັກ​ໂນ​ໂລ​ຊີ​ສູງ, ​ເຕັກ​ໂນ​ໂລ​ຊີ​ແຫຼ່ງ, ​ເຕັກ​ໂນ​ໂລ​ຊີ​ສີຂຽວ, ພະລັງງານ​ທົດ​ແທນ, ກະສິກຳ​ເຕັກ​ໂນ​ໂລ​ຊີ​ສູງ, ການ​ເງິນ​ທະນາຄານ,...ຍັງມີ​ໜ້ອຍ. ຫຼາຍ​ໂຄງການ​ລົງທຶນ​ໂດຍ​ກົງຂອງ​ສະຫະພາບ​ເອີຣົບຍັງ​ສຸມ​ໃສ່ການ​ນຳ​ໃຊ້​ແຮງ​ງານ​ລາຄາ​ຖືກ ​ເພື່ອປະຕິບັດຂັ້ນ​ຕອນ​ການ​ປະກອບ​ແລະ​ປຸງ​ແຕ່ງ​ຜະລິດ​ຕະພັນທີ່​ຈຳໜ່າຍ​ໃນ​ປະ​ເທດ​ແລະ​ເພື່ອ​ການ​ສົ່ງ​ອອກ. ພ້ອມ​ກັນ​ນັ້ນ, ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດລວມສູນ​ຢູ່​ບັນດາ​ຕົວ​ເມືອງ​ໃຫຍ່ ​ແລະ ມີ​ຮູບ​ແບບ​ທນຕ່າງປະ​ເທດ 100%, ດັ່ງ​ນັ້ນ ລັກສະນະ​ເຊື່ອມ​ຕໍ່​ແລະ​ຜົນ​ກະທົບ​ແຜ່​ກະຈາຍ ຂອງ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ ຍັງ​ຖືກ​ຈຳກັດ.

​ແງ່​ຫວັງ​ການ​ດຶງ​ດູດການ​ລົງທຶນ​ໂດຍ​ກົງ ຈາກ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ

ການ​ລົງທຶນ​ໂດຍ​ກົງຈາກ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ ຄາດ​ວ່າ​ຈະ​ເພີ່ມ​ຂຶ້ນ​ຢ່າງ​ໄວວາ​ໃນ​ອະນາຄົດ​ອັນ​ໃກ້​ນີ້, ສ່ວນ​ໃຫຍ່​ແມ່ນ​ຍ້ອນ​ຜົນ​ກະທົບ​ຈາກສັນຍາ EVFTA. ສັນຍາ EVFTA ແມ່ນສັນຍາທີ່​ມີ​ຂອບ​ເຂດຂອງ​ຄຳ​ໝັ້ນ​ສັນຍາ​ກວ້າງ​ທີ່​ສຸດ ​ແລະ ລະດັບ​ການ​ຜູກ​ພັນ​ສູງ​ທີ່​ສຸດ​ຂອງ​ຫວຽດນາມ ມາ​ຮອດ​ປະຈຸ​ບັນ, ພ້ອມ​ກັນ​ນັ້ນ ມັນ​ກໍ່​ແມ່ນໜຶ່ງ​​ໃນ​ສັນຍາ​ທີ່​ຮອບດ້ານ​ແລະທະ​ເຍີ​ທະຍານ​ທີ່​ສຸດ ທີ່​ສະຫະພາບ​ເອີຣົບ​ເຄີຍ​ລົງ​ນາມ​ກັບປະ​ເທດ​ກຳລັງ​ພັດທະນາ. ສັນຍາ​ດັ່ງກ່າວ​ບໍ່​ພຽງ​ແຕ່​ມີຄຳ​ໝັ້ນ​ສັນຍາ​ທີ່​ກ່ຽວຂ້ອງ​ກັບ​ການ​ເປີດ​ເສ​ລິ​ທາງ​ການ​ຄ້າ ​ແລະ​ອຳນວຍ​ຄວາມ​ສະດວກ​ທາງ​ການ​ຄ້າ​ເທົ່າ​ນັ້ນ, ​ແຕ່​ຍັງ​ມີ​ຄຳ​ໝັ້ນ​ສັນຍາ​ກ່ຽວ​ກັບ​ການ​ເປີດ​ເສລີການ​ຄ້າ​ດ້ານບໍລິການ​ແລະການ​ຄ້າ​ເອ​ເລັກ​ໂຕຣນິກ, ການຈັດ​ຊື້​ຂອງ​ລັດຖະບານ, ນະ​ໂຍບາຍ​ການ​ແຂ່ງຂັນ​ເສດຖະກິດ, ວິ​ສາ​ຫະກິດ​ຂອງ​ລັດ, ຊັບສິນ​ທາງ​ປັນຍາ, ຄວາມ​ໂປ່​ງ​ໃສ, ການ​ແກ້​ໄຂ​ຂໍ້​ຂັດ​ແຍ່ງ, ດ້ານ​ກົດໝາຍ-ສະ​ຖາ​ບັນ... ຄຳ​ໝັ້ນ​ສັນຍາ​ເຫຼົ່າ​ນີ້​ຈະ​ກະ​ຕູ້ນ​ໃຫ້​ຫວຽດນາມ​ປະຕິ​ຮູບ​ສະ​ຖາ​ບັນ​ແລະ​ກອບ​ກົດໝາຍ, ປັບປຸງ​ສະພາບ​ແວດ​ລ້ອມ​ແຫ່ງ​ການ​ທຸລະ​ກິດ, ສ້າງ​ເງື່ອນ​ໄຂ​ໃຫ້​ນັກ​ລົງທຶນ​ດຳ​ເນີນ​ການ​ລົງທຶນ​ຢ່າງ​ສະດວກ​ແລະ​ປອດ​ໄພ. ຈາກ​ນັ້ນ​ສາມາດ​ເຫັນ​ວ່າ ສັນຍາ EVFTA  ມີ​ຜົນ​ກະທົບ​ທີ່​ແນ່ນອນ.

ທີ​ໜຶ່ງ, ຄຳ​ໝັ້ນ​ສັນຍາ​ກ່ຽວ​ກັບ​ການ​ຫຼຸດຜ່ອນ​ພາສີ​ແລະການ​ອຳນວຍ​ຄວາມ​ສະດວກ​ດ້ານ​ການ​ຄ້າ ​ໃນສັນຍາ EVFTA ມີ​ລະດັບ​ສູງ​ທີ່​ສຸດ ​ແມ່ນໜຶ່ງ​ໃນ​ບັນດາ​ປັດ​ໄຈ​ທີ່​ສຳຄັນ ​ໃນ​ການ​ຊຸກຍູ້​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ເຂົ້າ​ໃນ​ຫວຽດນາມ. ຕາມ​ນັ້ນ, ສອງ​ຝ່າຍ​ໃຫ້​ຄຳ​ໝັ້ນ​ສັນຍາ​ວ່າ​ ຈະ​ລົບ​ລ້າງ​ພາສີ​ນຳ​ເຂົ້າສຳ​ລັບ​ເກືອ​ນ 100% ຂອງ​ສາຍ​ພາສີ​ ​ແລະ ມູນ​ຄ່າ​ການ​ສົ່ງ​ອອກ​​ສິນຄ້າ​ຂອງ​ກັນ​ແລະ​ກັນ ດ້ວຍ​​ແຜນງານສູງ​ສຸດ 7 ປີ​ຈາກ​ຝ່າຍສະຫະພາບ​ເອີຣົບ ແລະ 10 ປີ​ຈາກ​ຝ່າຍ​ຫວຽດນາມ(4). ທາງ​ດ້ານ​ທິດ​ສະ​ດີ, ຄຳ​ໝັ້ນ​ສັນຍາ​ລົບ​ລ້າງ​ພາສີ​ສຸ​ລະກາ​ກອນ ຈະ​ຊ່ວຍ​ເພີ່ມການ​ລົງທຶນ​ໂດຍ​ກົງ​ໂດຍ​ລວມ ຈາກ​ບັນດາ​ປະ​ເທດ​ທີ່​ບໍ່​ເຂົ້າ​ຮ່ວມ​ສັນຍາ​ການ​ຄ້າ​ເສລີ ​ເພື່ອ​ໃຊ້​ປະ​ໂຫຍ​ດຈາກ​ສິດທິ​ພິ​ເສດ ທີ່​ປະ​ເທດ​ສະມາຊິກ​ສັນຍາ​ການ​ຄ້າ​ເສລີ​ມີ​ໃຫ້​ກັນ​ແລະ​ກັນ. ​ໃນ​ຂະນະ​ນັ້ນ, ສຳລັບ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ພາຍ​ໃນ​ກຸ່ມ​ໜຶ່ງ, ສັນຍາ​ການ​ຄ້າ​ເສ​ລີອາດ​ຈະ​ເພີ່ມ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ຕາມ​ແບບ​ຕົ້ງ(5) ​ແລະ​ຫຼຸດການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ຕາມ​ແນວ​ນອນ(6). ດັ່ງ​ນັ້ນ ຜົນ​ກະທົບ​ໂດຍ​ລວມຂອງ​ການລົບ​ລ້າງສິ່ງ​ກີດຂວາ​ງທາງ​ການ​ຄ້າ ຂຶ້ນ​ກັບ​ທາດ​ແທ້​ຂອງການ​ລົງທຶນ​ໂດຍ​ກົງ​ລະຫວ່າງ​ສອງ​ຝ່າຍ. ນຳ​ໃຊ້​ເຂົ້າ​ໃນ​ກໍລະນີ​ຂອງສັນຍາ EVFTA, ສັນຍາ​ນີ້​ຈະ​ຊ່ວນ​ເພີ່ມ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ເຂົ້າປະ​ເທດ​ຢູ່​ໃນ​ກຸ່ມ​ສະຫະພາບ​ເອີຣົບ, ​ເພີ່ມ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ຕາມ​ແນວ​ຕັ້ງ ​ແລະ​ ຫຼຸດການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ຕາມ​ແນວ​ນອນ ຈາກ​ບັນດາ​ປະ​ເທດ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ. ໃນຄວາມເປັນຈິງ, ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ ​ໃນ​ປະຈຸ​ບັນ​ນີ້ ຕົ້ນຕໍ​ແມ່ນ​ການ​ລົງທຶນ​ໂດຍ​ກົງ​ຕາມ​ແນວ​ນອນ ​ເມື່ອ​ບັນດາ​ນັກ​ລົງທຶນ​ສະຫະພາບ​ເອີຣົບມຸ່ງ​ໄປ​ສູ່​ເປົ້າ​ໝາຍ​ຂຸດ​ຄົ້ນຊັບພະຍາກອນ, ວັດຖຸ​ດິບ, ວັດຖຸ​ເຊື້ອ​ໄຟ ​ແລະ​ແຮງ​ງານ​ລາຄາ​ຖືກ. ດັ່ງ​ນັ້ນ, ສັນຍາ EVFTA ຄາດ​ວ່າຈະ​ເພີ່ມການ​ລົງທຶນ​ໂດຍ​ກົງ​ຈາກ​ບັນດາ​ປະ​ເທດ​ສະຫະພາບ​ເອີຣົບ ​ແລະ ຈາກ​ບັນດາ​ປະ​ເທດທີ່​ບໍ່​ຂຶ້ນ​ກັບ​ສະຫະພາບ​ເອີຣົບ ​ເຂົ້າ​ໃນ​ປະ​ເທດ​ຫວຽດນາມ.

​ໃນ​​ໄລຍະ​ເວລາ​ທີ່​ຈະ​ເຖິງ​ນີ້, ກຸ່ມ​ສິນຄ້າ​ສົ່ງ​ອອກ​ຈາກຫວຽດນາມ​ໄປ​ຍັງສະຫະພາບ​ເອີຣົບ ຈະ​ໄດ້​ຮັບ​ການ​ຫຼຸດ​ພາສີ​ຫຼາຍ​ທີ່​ສຸດ​ຕາມ​ລຳດັບ​ແມ່ນ: ອາຫານ​ປຸງ​ແຕ່ງ, ​ເຄື່ອງ​ດື່ມ, ຢາສູບ; ສິນຄ້າ​ສິ່ງ​ທໍ; ​ໄຂ່​ມຸກ, ​ໂລຫະ​ມີຄ່າ; ​ເກີບ, ໝວກ​ແລະ​ຜະລິດ​ຕະພັນ​ເປັນ​ໝວກ; ຜະລິດ​ຕະພັນ​ໂລຫະ​ພື້ນຖານ; ຜະລິດ​ຕະພັນ​ຫີນ; ຜະລິດ​ຕະພັນ​ໄມ້; ຜະລິດ​ຕະພັນ​ໜັງ​, ວັດ​ສະດຸ​ຕ່ຳແຜ່ນ​ແລະ​ຕັດຫຍິບ. ຂະ​ແໜງ​​ເຫຼົ່ານີ້​ສາມາດ​ດຶງດູດ​ການ​ລົງທຶນ​ໂດຍ​ກົງ​ຈາກ​ບັນດາ​ປະ​ເທດ​ຢູ່​ນອກ​ກຸ່ມ​ສະຫະພາບ​ເອີຣົບ, ​ໂດຍ​ສະ​ເພາະ​ບັນດາ​ປະ​ເທດ​ທີ່​ມີ​ທ່າ​ແຮງ​ປຽບທຽບທີ່​ຄ້າຍ​ກັບ​ຫວຽດນາມ ​ເພື່ອ​ໃຊ້​ປະ​ໂຫຍ​ດຈາກ​ພາສີ​ບຸລິມະສິດທີ່​ສະຫະພາບ​ເອີຣົບມອບ​ໃຫ້​ຫວຽດນາມ.

ກຸ່ມ​ສິນຄ້າ​ສົ່ງ​ອອກ​ຈາກສະຫະພາບ​ເອີຣົບ​ໄປປະ​ເທດ​ຫວຽດນາມ​ຈະ​ໄດ້​ຮັບ​ການ​ຫຼຸດຜ່ອນພາສີ​ຫຼາຍ​ທີ່​ສຸດ​ຕາມ​ລຳດັບ: ​ເກີບ, ໝວກ​ແລະ​ຜະລິດ​ຕະພັນ​ເປັນ​ໝວກ; ຜະລິດ​ຕະພັນ​ຫີນ, ຫີນ​ກາວ, ຊີມັງ, ມີ​ກາ, ​ແກ້ວ; ສິ່ງ​ທໍ; ອາຫານ​ປຸງ​ແຕ່ງ, ​ເຄື່ອງ​ດື່​ມ, ຢາສູບ; ຜະລິດ​ຕະພັນ​ເຄື່ອງ​ໜັງ; ວັດ​ສະ​ດຸ​ຕ່ຳ​ແຜ່ນ​ແລະ​ຕັດຫຍິບ; ​ເຈ້ຍ​ແລະ​ເຍື່ອ​ເຈ້ຍ. ຂະ​ແໜງ​ເຫຼົ່າ​ນີ້​ສາມາດ​ດຶງ​ດູດການ​ລົງທຶນ​ໂດຍ​ກົງ​ຕາມ​ແນວ​ຕັ້ງ ຈາກ​ບັນດາ​ປະ​ເທດ​ສະຫະພາບ​ເອີຣົບ, ກໍ່​ຄື​ບັນດາ​ປະ​ເທດ​ທີ່ຢູ່​ນອກ​ກຸ່ມສະຫະພາບ​ເອີຣົບ ​ເພື່ອ​ໃຊ້​ປະ​ໂຫຍ​ດຈາກຂໍ້​ໄດ້​ປຽບ​ປຽບທຽບ ​ຂອງທັງ​ຫວຽດນາມ​ແລະສະຫະພາບ​ເອີຣົບ. ສິ່ງ​ທີ່​ໜ້າ​ເອົາ​ໃຈ​ໃສ່​ຄື, ມີ​​ກຸ່ມສິນຄ້າ​ຈຳນວນ​ໜຶ່ງ​ໄດ້ຮັບ​ການ​ຫຼຸດຜ່ອນ​ພາສີ​ຫຼາຍ​ຈາກ​ທັງ​ສອງ​ຝ່າຍ, ​ເຊັ່ນ ​ເກີບ, ໝວກ​ແລະ​ຜະລິດ​ຕະພັນ​ເປັນ​ໝວກ; ສິ່ງ​ທໍ; ຜະລິດ​ຕະພັນ​ເຄື່ອງ​ໜັງ; ວັດ​ສະດຸ​ຕ່ຳ​​ແຜ່ນ​ແລະ​ຕັດຫຍິບ. ຂະ​ແໜງ​ເຫຼົ່າ​ນີ້ ຫວຽດນາມ​ມີ​ຂໍ້​ໄດ້​ປຽບ​ປຽບທຽບ​ຢ່າງ​ໃຫຍ່​ຫຼວງ. ຄຳ​ໝັ້ນ​ສັນຍາ​ເຫຼົ່າ​ນີ້​ຈະ​ສ້າງ​ເງື່ອນ​ໄຂ​ດຶງ​ດູດການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ໂດຍ​ລວມ ​ເຂົ້າ​ໃນ​ຫວຽດນາມ ໃນ​ບັນດາ​ຂົງ​ເຂດ​ການ​ຜະລິດ​ສິ່ງ​ທໍ, ​ເຄື່ອງ​ໜັງ​ແລະ​ເກີບ, ​ໂດຍ​ສະ​ເພາະ​ແມ່ນ ການ​ເຄື່ອນ​ໄຫວ​ຜະລິດ​ປຸງ​ແຕ່ງສາກົນ ​ເມື່ອ​ບໍລິສັດ​ຕ່າງປະ​ເທດ​ໃນ​ຫວຽດນາມ​ສາມາດ​ນຳ​ເຂົ້າ​ວັດ​ຖຸດິບ​ຈາກສະຫະພາບ​ເອີຣົບ ຫຼັງ​ຈາກ​ນັ້ນສົ່ງ​ອອກ​ຜະລິດ​ຕະພັນ​ສຳ​ເລັດ​ຮູບ ​ໄປ​ຍັງສະຫະພາບ​ເອີຣົບດ້ວຍ​ຕົ້ນ​ທຶນ​ທີ່​ຕ່ຳ.

ທີ​ສອງ, ຄຳ​ໝັ້ນ​ສັນຍາ​ທີ່​ຈະເປີດກວ້າງ​ກວ່າ​ແລະ​ເລິກ​ກວ່າ​ຂອງສັນຍາ EVFTA ທຽບ​ກັບ WTO ​ໃນ​ດ້ານ​ການ​ຄ້າ​ບໍລິການ​ແລະ​ການ​ລົງທຶນ, ​ເປີດ​​ໂອກາດການ​ລົງທຶນ​ໂດຍ​ກົງຈາກ​ບັນດາ​ບໍລິສັດ​ຂອງ​ສະຫະພາບ​ເອີຣົບ ​ເຂົ້າ​ໃນ​ຫວຽດນາມ.

ການລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ ອາດ​ຈະ​ເພີ່ມ​ຂຶ້ນ​ໃນ​ບັນດາສາຂາ​ຍ່ອຍບໍລິການ ​ເຊິ່ງຫວຽດນາມ​ບໍ່​ໄດ້​ມີ​ຂໍ້​ຜູກ​ພັນ​ໃນ WTO ​ແຕ່​ມີ​ຂໍ້​ຜູກ​ພັນ​ໃນສັນຍາ EVFTA, ​ເຊັ່ນ ບໍລິການ​ໃຫ້​ເຊົ່າ​ກຳ​ປັ່ນ​ໂດຍ​ບໍ່​ມີ​ຄົນ​ຂັບ, ບໍລິການ​ຕະຫຼາດນັດ, ງານ​ວາງສະ​ແດງ, ບໍລິການ​ໄປ​ຊະນີ, ບໍລິການ​ຈັດ​ສົ່ງ, ບໍລິການ​ຮັບປະກັນ​ແລະ​ຊ້ອມ​ແປງກຳ​ປັ່ນ, ​ເຮືອ​ໃນ​ແມ່​ນ້ຳ​ລຳ​ເຊ, ​ເຮືອບິນ, ບໍລິການ​ຂົນ​ຖ່າຍ​ຕູ້​ສິນ​ຄ້າ​ທາງ​ທະ​ເລ, ບໍລິການ​ຕົວ​ແທນ​ຂົນ​ສົ່ງ​ສິນ​ຄ້າ.

ການລົງທຶນ​ໂດຍ​ກົງ​ຈາກ​ຕ່າງປະ​ເທດ​ກໍ່​ສາມາດ​ເພີ່ມ​ຂຶ້ນ​ໃນ​ບັນດາ​ຂະ​ແໜງ​ບໍລິການທີ່​ໄດ້​ມີ​ຂໍ້ຕົກລົງ​ເປີດ​ປະຕູ​ເລິກ​ເຊິ່ງກວ່າ ທຽບ​ກັບ​ຂໍ້​ຕົກລົງ​ໃນ WTO, ພ້ອມ​ນັ້ນ​ກໍ່​ເປັນທ່າ​ແຮງ​ຂອງ​ບັນດາປະ​ເທດ​ສະຫະພາບ​ເອີຣົບ, ​ເຊັ່ນ ບໍລິການ​ການ​ເງິນ, ​ໂລ​ຈິດ​ສະຕິ​ກ, ບໍລິການ​ຄອມ​ພິວ​ເຕີ, ບໍລິການ​ສິ່ງ​ແວດ​ລ້ອມ, ການ​ສຶກສາ​ຊັ້ນ​ສູງ, ການ​ແຈກ​ຢາຍ, ​ໂທລະ​ຄົມມະນາຄົມ​ແລະ​ສາທາລະນະ​ສຸກ. ສຳລັບ​ບັນດາ​ຂະ​ແໜງ​ເຫຼົ່າ​ນີ້ ຫຼືບາງ​ສາຂາ​ຍ່ອຍ​ໃນ​ຂະ​ແໜງ​ເຫຼົ່າ​ນີ້, ຫວຽດນາມ​ໃຫ້​ຄຳ​ໝັ້ນ​ສັນຍາ​ກ່ຽວ​ກັບ​ການ​ເຂົ້າ​ເຖິງ​ຕະຫຼາດ ​ແລະການ​ປະພຶດ​ລະດັບ​ຊາດ​ທີ່​ສະດວກ​ກວ່າ, ​ເພີ່ມ​ຂີດ​ຈຳກັດ​ທຶນ​ຫຸ້ນ​ສ່ວນ​ຕ່າງປະ​ເທດ ​ໃຫ້​ບັນດາ​ປະ​ເທດ​ຄູ່​ຮ່ວມ​ມືໃນສະຫະພາບ​ເອີຣົບ ທຽບ​ກັບ​ຄູ່​ຮ່ວມ​ມື​ອື່ນໆ.

ຄຽງຂ້າງ​ນັ້ນ, ຄຳ​ໝັ້ນ​ສັນຍາ​ເປີດ​ເສລີ​ການ​ລົງທຶນ​ໃນສັນຍາ EVFTA ກໍ່ສາມາດ​ເພີ່ມການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ​ເຂົ້າ​ໃນ​ຫວຽດນາມ ​ໃນ​ຂະ​ແໜງ​ການ​ຜະ​ງິດຈຳນວນ​ໜຶ່ງ ທີ່​ຫວຽດນາມ​ເປີດ​ປະຕູ​ຕະຫຼາດ ​ໃຫ້​ນັກ​ລົງທຶນ​ສະຫະພາບ​ເອີຣົບ ປະກອບມີ: ຜະລິດ​ອາຫານ​ແລະ​ເຄື່ອງ​ດື່ມ, ຜະ​ລິດ​ນ້ຳຕານ​ອ້ອຍ, ຜະລິດ​ຝຸ່ນ​ແລະ​ທາດ​ປະສົມ​ໄນ​ໂຕຣ​ເຈນ; ຜະລິດ​ຢາງ​ລົດ, ຖົງມື​ແລະ​ຜະລິດ​ຕະພັນ​ພາດ​ສະຕິ​ກ, ຜະລິດ​ເຄື່ອງ​ປັ້ນດິນ​ເຜົາ, ການ​ປະກອບ​ເຄື່ອງ​ຈັກ​ທາງ​ທະ​ເລ, ​ເຄື່ອງ​ຈັກກະ​ສິກຳ, ​ເຄື່ອງ​ໃຊ້​ໃນ​ເຮືອນ ​ແລະຜະລິດ​ລົດ​ຖີບ, ຜະລິດ​ແກ້ວ​ກະຈົກ, ດິນ​ຈີ່​ແລະ​ຊີມັງ​ເພື່ອ​ການ​ກໍ່ສ້າງ,...

ນອກຈາກ​ຄຳ​ໝັ້ນ​ສັນຍາ​ກ່ຽວ​ກັບ​ການ​ເປີດ​ເສລີ​ການ​ຄ້າ​ສິນ​ຄ້າ, ບໍລິ​ການ ​ແລະ​ການ​ລົງທຶນ​ແລ້ວ, ຄຳ​ໝັ້ນ​ສັນຍາ​ອື່ນ​ໃນສັນຍາ EVFTA ກໍ່​​ເປັນ​ກຳລັງ​ໜູນ​ທີ່​ສຳຄັນ​ ເພື່ອ​ໃຫ້ຫວຽດ​ນາມ​ສື​ບຕໍ່​ບູລະນະ​ສະ​ຖາ​ບັນ​ແລະສະພາບ​ແວດ​ລ້ອມ​ການ​ທຸລະ​ກິດ, ຊຸກ​ຍູ້​ການ​ແຂ່ງຂັນທີ່​ເປັນ​ທຳ, ສ້າງເງື່ອນ​ໄຂທີ່ສະດວກ​ແລະ​ຄວາມ​ເຊື່ອ​ຖື​ໃຫ້​ນັກ​ລົງທຶນ​ຕ່າງປະ​ເທດ​ເວົ້າ​ລວມ​ ແລະ​ນັກ​ລົງທຶນສະຫະພາບ​ເອີຣົບ​ເວົ້າ​ສະ​ເພາະ.

ບາງ​ບັນຫາ​ທີ່​ວາງ​ອອກ​ມາ​ໃນ​ການ​ດຶງ​ດູດການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ

ແງ່​ຫວັງການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ ໃນສະພາບການສອງຝ່າຍລົງນາມໃນສັນຍາ EVFTA ​​ແມ່ນດີທີ່​ສຸດ​ແລະ​ໝັ້ນ​ໝາຍ​ຈະ​ປັບປຸງ​ຄຸນ​ນະພາ​ບຂອງກະ​ແສການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ເຂົ້າ​ໃນ​ຫວຽດນາມ ​ເມື່ອ​ສະຫະພາບ​ເອີຣົບ​ແມ່ນ​ຄູ່​ຮ່ວມ​ມື​ທີ່​ມີ​ຂໍ້​ໄດ້​ປຽບ​ດ້ານ​ເຕັກ​​ໂນ​ໂລ​ຊີ​ແຫຼ່ງ, ເຕັກ​ໂນ​ໂລ​ຊີ​ສູງ ​ແລະ ​ເຕັກ​ໂນ​ໂລ​ຊີ​ສະອາດ. ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບ ບໍ່​ພຽງ​ແຕ່​ເປັນ​ການ​ເພີ່ມ​ເງິນ​ລົງທຶນ​ເຂົ້າຫວຽດນາມຫຼາຍ​ກວ່າ​ອີກ​ເທົ່າ​ນັ້ນ ແຕ່ຍັງສາມາດຊ່ວຍໃຫ້ຫວຽດນາມເຂົ້າເຖິງແລະທັນກັບ ບັນດາທ່າອຽງການພັດທະນາໃໝ່ຂອງໂລກ, ຈາກ​ນັ້ນ ຊຸກຍູ້​ການ​ພັດທະນາ​ເສດຖະກິດ​ໄວ​ກວ່າ​ອີກ ​ໂດຍ​ບໍ່​ເປັນ​ຜົນ​ເສຍ​ຫາຍ​ໃຫ້​ແກ່​ບັນດາ​ເປົ້າ​ໝາຍ​ແລະ​ສິ່ງ​ອວດ​ລ້ອມ. ​ແຕ່, ຫວຽດນາມ​ກໍ່​ຕ້ອງ​ເອົາ​ໃຈ​ໃສ່​ເຖິງ​ບາງ​ບັນຫາ​ໃນ​ການ​ດຶງ​ດູດ​ການ​ລົງທຶນ​ໂດຍ​ກົງ​ຈາກ​ສະຫະພາບ​ເອີຣົບກ

ທີ​ໜຶ່ງ, ຂໍ້​ໄດ້​ປຽບ​ໃນ​ການ​ດຶງ​ດູດການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ຂອງ​ຫວຽດນາມ ມາ​ຈາກ​ການ​ລົງ​ນາມ​ກ່ອນ​ໃນ​ສັນຍາ EVFTA ໃນຂະນະ​ທີ່ບັນດາ​ຄູ່​ແຂ່ງ​ດ້ານ​ການ​ຄ້າ​ແລະການ​ລົງທຶນ​ໃນ​ພາກ​ພື້ນ ບໍ່​ມີ​ສັນຍາ​ການ​ຄ້າ​ເສລີ​ກັບ​ສະຫະພາບ​ເອີຣົບ (ຍົກ​ເວັ້ນສິງກະ​ໂປ). ​ແຕ່, ຂໍ້​ປຽບທຽບ​ນີ້ອາດ​ຈະ​ມີ​ຢູ່​ໃນ​ໄລຍະ​ສັ້ນ​ເທົ່າ​ນັ້ນ ຍ້ອນ​ແນວທາງ​ຂອງ​ທັງ​ອາ​ຊຽນແລະສະຫະພາບ​ເອີຣົບ​ແມ່ນ ຈະ​ລົງ​ນາມ​ໃນ​ສັນຍາ​ການ​ຄ້າ​ເສລີ​ສະບັບ​ໜຶ່ງ​ລະຫວ່າງ​ສອງ​ພາກ​ພື້ນ. ​ເພື່ອ​ປະຕິບັດ​ເປົ້າ​ໝາຍ​ນີ້, ສະຫະພາບ​ເອີຣົບຈະ​ສືບ​ຕໍ່​ເຈລະຈາສັນຍາ​ການ​ຄ້າ​ເສລີ​ສອງ​ຝ່າຍ​ກັບ​ແຕ່ລະ​ປະ​ເທດ​ອາ​ຊຽນ ໃນເວລາຕໍ່ໜ້າ. ​ເວລາ​ນັ້ນ, ຂໍ້​ໄດ້​ປຽບ​ກ່ຽວ​ກັບ​ພາ​ສີ​ນຳ​ເຂົ້າ​ຕ່ຳ​ກວ່າ, ບັນດາ​ກົນ​ໄກ​ອຳນວຍ​ຄວາມ​ສະດວກ​ດ້ານ​ການ​ຄ້າ​ແລະ​ການ​ລົງທຶນ ​ໃຫ້​ແກ່​ຫວຽດນາມ​ຈະ​ບໍ່​ມີ​ອີກ. ດັ່ງ​ນັ້ນ, ໃນ​ເມື່ອ​ບັນດາ​ປະ​ເທດ​ອາ​ຊຽນບໍ່ມີ​ສັນຍາ​ການ​ຄ້າ​ເສລີ​ກັບ​ສະຫະພາບ​ເອີຣົບນັ້ນ ຫວຽດນາມຈຳ​ເປັນ​ຕ້ອງ​ໃຊ້​ປະ​ໂຫຍ​ດຈາກ “​ເວລາ​ຄຳ” ຢ່າງ​ສຸດ​ຂີດ ເພື່ອເຂົ້າເຖິງ, ​ແຊກ​ຊືມ​ເຂົ້າ​ຕະຫຼາດ ກໍ່​ຄື​ດຶງ​ດູດການ​ລົງທຶນ​ໂດຍ​ກົງ​ຈາກ​ບັນດາ​ປະ​ເທດ​ສະຫະພາບ​ເອີຣົບ.

ທີ​ສອງ, ສຳລັບການ​ລົງທຶນ​​ໂດຍ​ກົງຈາກຕ່າງປະ​ເທດ​ທີ່​ມີ​ຄຸນ​ນະພາ​ບສູງ, ສັນຍາ EVFTA ​ພຽງ​ແຕ່​ເປັນ​ປັດໄຈສະໜັບສະໜູນການ​ລົງທຶນ, ບໍ່​ແມ່ນ​ປັດ​ໄຈ​ຕັດສິນການ​ລົງທຶນ. ຢາກ​ປັບປຸງ​ຄຸນ​ນະພາ​ບຂອງ​ກະ​ແສການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ, ຫວຽດນາມ​ຕ້ອງ​ສືບ​ຕໍ່​ປັບປຸງ​ສະພາບ​ແວ​ດລ້ອມ​ການ​ທຸລະ​ກິດ, ຍົກ​ສູງ​ຄຸນ​ນະພາ​ບຂອງ​ຊັບພະຍາກອນ​ມະນຸດ ​ແລະ​ລະດັບ​ເຕັກ​ໂນ​ໂລ​ຊີ. ​ເຖິງ​ວ່າ​ໃນມໍ່ໆ​ນີ້ ມີ​ການ​ປັບປຸງ​ຕຳ​ແໜ່​ງ​ໃນ​ການຈັດ​ອັນ​ດັບສະພາບ​ແວ​ດລ້ອມ​ທາງ​ທຸລະ​ກິດ ​ໂດຍ​ທະນາຄານ​ໂລກ​ເປັນ​ຜູ້​ຈັດ, ​ແຕ່​ອັນ​ດັບ​ຂອງ​ຫວຽດນາມ​ໃນ​ປີ 2018 ຍັງ​ຂ້ອນ​ຂ້າງ​ຕ່ຳ (68/190) ​ເມື່ອ​ທຽບ​ກັບ​ບັນດາຄູ່​ແຂ່ງ​ໃນ​ການ​ດຶງ​ດູດການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ, ​ເຊັ່ນ​ສິງກະ​ໂປ, ມາ​ເລ​ເຊຍ(7). ບາງ​ຕົວ​ຊີ້​ວັດ​ທີ່​ຈຳ​ເປັນຕ້ອງ​ປັບປຸງຢ່າງ​ຕໍ່​ເນື່ອງ, ​ເຊັ່ນ​ຂັ້ນ​ຕອນ​ທີ່​ພົວພັນ​ເຖິງ​ການ​ລິ​ເລີ່​ມທຸລະ​ກິດ (ອັນ​ດັບ 123), ​ແກ້​ໄຂ​ການ​ລົ້ມ​ລະລາຍ​ຂອງ​ບໍລິສັດ (ອັນ​ດັບ​ທີ 129), ການ​ຄ້າ​ຜ່ານ​ຊາຍ​ແດນ (ອັນ​ດັບ​ທີ 94) ​ແລະ​ການ​ເສຍ​ພາສີ (ອັນ​ດັບ​ທີ 86). ຕາມ​ລາຍ​ງານ​ຂອງ​ເວທີ​ປາ​ໄສ​ເສດຖະກິດ​ໂລກ(8), ບັນດາ​ອຸປະສັກ​ສຳຄັນ​ ທີ່​ເຮັດ​​ໃຫ້​ຫວຽດນາມ​ຍາກ​ທີ່​ຈະ​ຍ້າຍ​ຂຶ້ນ​ສູ່​ຕຳ​ແໜ່ງທີ່​ສູງກວ່າ ​ໃນ​ສາຍ​ໂຊ້​ຄຸນຄ່າ​ທົ່ວ​ໂລກນັ້ນ ​ແມ່ນຄວາມ​ຈຳກັດ​ໃນ​ລະດັບ​ຊັບຊ້ອນ​ໃນ​ການ​ຜະລິດ​ແລະ​ທຸລະ​ກິດ (ອັນ​ດັບ​ທີ 100), ຄຸນ​ນະພາ​ບຂອງຜູ້​ສະໜອງ​ພາຍ​ໃນ​ປະ​ເທດ (ອັນ​ດັບ​ທີ 115) ​ແລະ ຄວາມ​ພ້ອມ​ຂອງ​ເຕັກ​ໂນ​ໂລ​ຊີ​ລ້າ​ສຸດ (ອັນ​ດັບ​ທີ 112)... ກ່ຽວ​ກັບ​ລະດັບ​ເຕັກ​ໂນ​ໂລ​ຊີ​ແລະ​ຄຸນ​ນະພາ​ບຂອງ​ແຫຼ່ງຊັບພະຍາກອນ​ມະນຸດ, ຕາມ​ການ​ຕີ​ລາຄາ​ຂອງ​ເວທີ​ປາ​ໄສ​ເສດຖະກິດ​ໂລກ ​ແລະ Kearney ປີ 2018, ຫວຽດນາມ​ຖືກ​ປະ​ເມີນ​ວ່າ​ຢູ່​ໃນ​ກຸ່ມ “ບໍ່​ກຽມພ້ອມ​ສຳລັບ​ການ​ປະຕິວັດ​ອຸດສາຫະກຳ 4.0”. ບັນດາ​ປັດ​ໄຈ​ກ່ຽວ​ກັບ​ການ​ປ່ຽນ​ແປງ​ໃໝ່​ປະດິດ​ສ້າງ​ເຕັກ​ໂນ​ໂລ​ຊີ ​ແລະ ການ​ສຶກສາ​ຂອງ​ຫວຽດນາມພວມ​ຢູ່​ໃນ​ລະດັບ​ຕ່ຳ, ອັນ​ດັບ​ທີ 90 ​ໃນ 100 ປະ​ເທດ​ກ່ຽວ​ກັບ​ເຕັກ​ໂນ​ໂລ​ຊີ​ແລະ​ການ​ປ່ຽນ​ແປງ​ໃໝ່​ປະດິດ​ສ້າງ, ອັນ​ດັບທີ 92/100 ກ່ຽວ​ກັບ​ເຕັກ​ໂນ​ໂລ​ຊີ​ພື້ນຖານ, ອັນ​ດັບ​ທີ 77/100 ກ່ຽວ​ກັບ​ຄວາມ​ສາມາດ​ປະດິດ​ສ້າງ ​ແລະ ອັນ​ດັບ​ທີ 70/100 ກ່ຽວ​ກັບ​ແຫຼ່ງຊັບພະຍາກອນ​ມະນຸດ. ຖ້າ​ຫາກ​ທຽບ​ກັບ​ບັນດາ​ປະ​ເທດ​ໃນ​ພາກ​ພື້ນ​ອາຊີ​ຕາ​ເວັນ​ອອກສຽງ​ໃຕ້, ຫວຽດນາມຢູ່​ໃນ​ອັນ​ດັບ​ຫຼັງ​ມາ​ເລ​ເຊຍ (ອັນ​ດັບ​ທີ 23/100 ກ່ຽວ​ກັບ​ເຕັກ​ໂນ​ໂລ​ຊີ​ແລະ​ການ​ປ່ຽນ​ແປງ​ໃໝ່​ປະດິດ​ສ້າງ, ອັນ​ດັບ​ທີ 21/100 ກ່ຽວ​ກັບ​ແຫຼ່ງຊັບພະຍາກອນ​ມະນຸດ), ປະ​ເທດ​ໄທ (ອັນ​ດັບ 41/100 ກ່ຽວ​ກັບ​ເຕັກ​ໂນ​ໂລ​ຊີ​ແລະ​ການ​ປ່ຽນ​ແປງ​ໃໝ່​ປະດິດ​ສ້າງ, ອັນ​ດັບ​ທີ 53/100 ກ່ຽວ​ກັບ​ແຫຼ່ງຊັບພະຍາກອນ​ມະນຸດ), ຟີ​ລິບ​ປີນ (ອັນ​ດັບ​ທີ 59/100 ກ່ຽວ​ກັບ​ເຕັກ​ໂນ​ໂລ​ຊີ​ແລະ​ການ​ປ່ຽນ​ແປງ​ໃໝ່​ປະດິດ​ສ້າງ ​ແລະ ອັນ​ດັບ​ທີ 66/100 ກ່ຽວ​ກັບ​ແຫຼ່ງຊັບພະຍາກອນ​ມະນຸດ). ນີ້​ແມ່ນ​ບັນດາ​ປັດ​ໄຈ​ທີ່​ຫວຽດນາມ​ຕ້ອງ​ສືບ​ຕໍ່ປັບປຸງ​ໃຫ້​ດີ​ກວ່າ​ອີກ ​ເພື່ອ​ແນ​ໃສ່ດຶງ​ດູດການ​ລົງທຶນທີ່ມີ​ຄຸນ​ນະພາ​ບສູງ​ກວ່າ​ໃນ​ອະນາ​ຄົດ.

ທີ​ສາມ, ໜຶ່ງ​ໃນ​ບັນດາ​ບັນຫາ​ທີ່​​ນັກ​ລົງທຶນຂອງສະຫະພາບ​ເອີຣົບສົນ​ໃຈ ແມ່ນບັນຫາປົກປ້ອງສິດທິຊັບສິນທາງປັນຍາ. ດັ່ງ​ນັ້ນ, ຫວຽດນາມ​ຄວນ​ກວດຄືນ​ກົດໝາຍ​ວ່າ​ດ້ວຍ​ຊັບ​ສິນ​ທາງ​ປັນຍາ ​ເພື່ອ​ດັດ​ປ່ຽນ​ໃຫ້​ສອດຄ່ອງ​ເໝາະ​ສົມ​ກັບ​ຄຳ​ໝັ້ນ​ສັນຍາ​ທີ່​ເລິກ​​ເຊິ່ງ​ໃນສັນຍາEVFTA ​ແລະ ​ບັນດາສັນຍາ​ການ​ຄ້າ​ເສລີ​ອື່ນໆ, ກໍ່​ຄື​ຮັບປະກັນການ​ປະຕິບັດ​ຄຳ​ໝັ້ນ​ສັນຍາ​ຢ່າງ​ເຂັ້ມ​ງວດ​ແລະ​ເຕັມ​ສ່ວນ ​ເພື່ອ​ສ້າງ​ຄວາມ​ເຊື່ອ​ໝັ້ນ​ໃຫ້​ແກ່​ນັກ​ລົງທຶນ. 

ທີ​ສີ່, ​ເຖິງ​ວ່າສັນຍາ EVFTA ມີ​ຜົນ​ກະທົບ​ຢ່າງ​ກວ້າງຂວາງ​ເລິກ​ເຊິ່ງ ​ແລະ ​ໄດ້​ຮັບ​ຄວາມ​ສົນ​ໃຈ​ຂອງ​ຊຸມ​ຊົນ​ທຸລະ​ກິດ, ​ແຕ່​ຈຳນວນ​ວິ​ສາ​ຫະກິດ​ທີ່​ມີ​ຄວາມ​ເຂົ້າ​ໃຈ​ກ່ຽວ​ກັບສັນຍາEVFTA ຍັງ​ຈຳກັດ​ຢູ່.  ນັບ​ທັງ​ບັນດາ​ວິ​ສາ​ຫະກິດຂອງ​ເອີຣົບ​ທີ່​ກຳລັງ​ເຄື່ອນ​ໄຫວ​ຢູ່​ຫວຽດນາມກໍ່​ມີ​ເຖິງ 28% ຂອງ​ຈຳນວນ​ວິ​ສາ​ຫະກິດ ຍັງ​ເຄືອບ​ຄຸມບໍ່​​ແຈ້ງ​ກ່ຽວ​ກັບ​ເນື້ອ​ໃນ​ຂອງສັນຍາ EVFTA(9). ອັດຕາ​ສ່ວນ​ນີ້​ຢູ່​ໃນ​ວິ​ສາ​ຫະກິດ​ຂອງ​ຫວຽດນາມອາດ​ຈະ​ສູງ​ກວ່າ. ​ເລື່ອງ​ນີ້​ອາດ​ຈະ​ຈຳກັດ​ຄວາມ​ສາມາດ​ຂອງ​ວິ​ສາ​ຫະກິດ​ ໃນ​ການສວຍ​ໃຊ້​ໂອກາດ ກໍ່​ຄື​​ໃນ​ການກຽມພ້ອມ​ຕໍ່ໜ້າ​ສິ່ງ​ທ້າ​ທາຍທີ່​ສັນຍາ EVFTA ສ້າງ​ຂຶ້ນ​ມາ. ດັ່ງ​ນັ້ນ, ການ​ເພີ່ມ​ທະວີ​ຄວາມ​ຮັບ​ຮູ້​ແລະ​ການ​ຄົ້ນຄວ້າ​ກ່ຽວ​ກັບ​ການ​ກະທົບ​ຂອງສັນຍາ EVFTA ​ແມ່ນ​ມີ​ຄວາມ​ຈຳ​ເປັນ​ທີ່​ສຸດ./.

​ໂດຍ ຫງວຽນ​ທິມິ​ງ​ເຟືອງ

ມະຫາວິທະຍາ​ໄລ​ເສດຖະສາດ, ມະຫາວິທະຍາ​ໄລ​ແຫ່ງ​ຊາດ​ຫວຽດນາມຮ່າ​ໂນ້ຍ

------------------------------

(1) ຕາມ​ຂໍ້​ມູນ​ຂອງ​ສະຫະ​ກົມ​ສະຖິຕິ.

(2), (3) ຕາມ​ຂໍ້​ມູນ​ຂອງ​ກົມ​ການ​ລົງທຶນ​ຈາກຕ່າງປະ​ເທດ, ກະຊວງ​ແຜນການ​ແລະ​ການ​ລົງທຶນ.

(4) ຄຳ​ໝັ້ນ​ສັນຍາສະ​ເພາະ​ທີ່​ເບິ່ງ​ຢູ່​ທີ່ http://www.trungtamwto.vn/download/18717/TTWTO- %20Tom%20luoc%20EVFTA%20-%20final.pdf

(5) ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ຕາມ​ແນວ​ຕັ້ງ ​ເກີດ​ຂຶ້ນ​ເມື່ອ​ຜະລິດ​ຕະພັນ​ທີ່​ນັກ​ລົງທຶນ​ດຳ​ເນີນ​ການ​ຜະລິດ​ຢູ່​ໃນປະ​ເທດ​ລົງທຶນ​ແລະປະ​ເທດ​ຮັບ​ການ​ລົງທຶນ ນອນ​ຢູ່​ໃນ​ສາຍ​ການ​ຜະລິດ​ດຽວ​ກັນ​ແລະຈັດ​ຈຳໜ່າຍ​ຜະລິດ​ຕະພັນ​ສຸດ​ທ້າຍ. ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ຕາມ​ແນວ​ຕັ້ງ​ ເພື່ອ​ເປົ້າ​ໝາຍ​ຂຸດ​ຄົ້ນຊັບພະຍາກອນ, ວັດຖຸ​ດິດວັດຖຸ​ເຊື້ອ​ໄຟ, ​ແຮງ​ງານ​ລາຄາ​ຖື​ກ ຢູ່​ປະ​ເທດ​ທີ່​ຮັບ​ການ​ລົງທຶນ.

6) ການລົງທຶນ​ໂດຍ​ກົງ​ຈາກ​ຕ່າງປະ​ເທດ​ຕາມ​ແນວ​ນອນ ເກີດ​ຂຶ້ນ​ເມື່ອ​ນັກ​ລົງທຶນ​ດຳ​ເນີນ​ການ​ຜະລິດ​ສິນຄ້າຕ່າງໆ​ຢູ່​ປະ​ເທດ​ທີ່​ຮັບ​ການ​ລົງທຶນ ຄ້າຍ​ຄື​ກັນ​ກັບ​ສິນຄ້າທີ່​ນັກ​ລົງທຶນ​ໄດ້​ຜະລິດ​ຢູ່​ໃນ​ປະ​ເທດຂອງ​ພວກ​ເຂົາ​ເອງ. ການລົງທຶນ​ໂດຍ​ກົງ​ຈາກ​ຕ່າງປະ​ເທດ​ຕາມ​ແນວ​ນອນ ເພື່ອ​ແນ​ໃສ່​ເປົ້າ​ໝາຍ​ຊອກ​ຫາ​ແລະ​ເປີດ​ກວ້າງ​ຕະຫຼາດ, ​ໂດຍ​ສະ​ເພາະ​ເມື່ອ​ປະສົບ​ກັບ​ຄວາມ​ຫຍຸ້ງຍາກຍ້ອນ​ອຸປະ​ສັກ​ໃນ​ການ​ຄ້າ.

(7) World Bank: Doing Business 2018: Reforming to Create Jobs, Washington, DC. IBRD

(8) World Economic Forum: Kearney,  A. T: Readiness for the Future of Production Report 2018, Geneva, WEF

(9) Euro Cham (2018b): EVFTA Report 2018-The EU-Vietnam Free Trade Agreement: Perspectives from Vietnam 

- ບົດ​ນີ້​ໄດ້​ລົງ​ພິມ​ໃນວາລະສານ​ກອມ​ມູນິດ ສະບັບ​ທີ 924 (​ເດືອ​ສິງຫາ 2019).

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ