ວັນເສົາ, 22/2/2020
ບົດປາໄສທີ່ສົມບູນ ຂອງທ່ານ ຫງວຽນເຕິນຢຸງ ນາຍົກລັດຖະມົນຕີ ແຫ່ງ ສສ ຫວຽດນາມ ທີ່ກ່າວຢູ່ໃນ ກອງປະຊຸມຂັ້ນສຸດຍອດອາຊຽນ ຄັ້ງທີ 24
31/5/2014 8:36' ສົ່ງ ພິມ
ທ່ານນາຍົກລັດຖະມົນຕີ ຫງວຽນເຕິນຢຸງ ຢູ່ທີ່ກອງປະຊຸມ (ພາບ: TTXVN)

ຮຽນ​ທ່ານ​ປະທາ​ນາ​ທິບໍດີ ​ເຕັງ ​ເສັງ, ປະ​ທານ​ກອງ​ປະຊຸມ​ສຸດ​ຍອດ ອາ​ຊຽນ,

ຮຽນ​ເຈົ້າ​ຊີວິດ,

ຮຽນ​ເພື່ອນຮ່ວ​ມງານ​ທັງຫຼາຍ !

ກ່ອມ​ອື່ນ​ໝົດ, ຫວຽດນາມ​ຂໍ​ຂອບ​ອົກ​ຂອບ​ໃຈ​ຕໍ່​ການ​ຕ້ອນຮັບຢ່າງ​ຮອບ​ຄອບຂອງ​ມຽນມາ ​ແລະ ຂໍ​ອວຍພອນ​ໃຫ້​ມຽນ​ມາ ທີ່​ໄດ້​ຖື​ບົດບາດ​ຖານະ​ປະທານ​ອາຊຽນຄັ້ງ​ທຳ​ອິດ. ຫວຽດນາມຈະ​ຮ່ວມມື ​ແລະ ສະໜັບສະໜູນ ​ໃຫ້​ມຽນມາ​ເຮັດສຳ​ເລັດ​ເປັນ​ຢ່າງ​ດີ​ ໜ້າ​ທີ່​ຮັບຜິດຊອບ​ເປັນ​ປະທານ​ອາ​ຊຽນ ປີ 2014. ຕາມ​ຫົວ​ຂໍ້​ຂອງ​ກອງ​ປະຊຸມ, ພວກ​ຂ້າພະ​ເຈົ້າຂໍ​ແບ່ງປັນ​ບາງ​ຄວາມ​ເຫັນ​ດັ່ງ​ນີ້:

1. ກ່ຽວ​ກັບ​ສັນຕິພາບ ​ແລະ ຄວາມ​ສະຫງົບ​ຢູ່​ໃນ​ພາກ​ພື້ນ

ຫວຽດນາມ​ຂໍ​ແຈ້ງ​ຂ່າວ ​ແລະ ​ເນັ້ນ​ໜັກ​ກ່ຽວ​ກັບ​ບັນຫາ​ທະ​ເລ​ຕາ​ເວັນ​ອອກ​ຄື​ດັ່ງ​ນີ້:

ສັນຕິພາບ, ສະຖຽນ​ລະ​ພາບ, ຄວາມ​ສະຫງົບ, ຄວາມ​ປອດ​ໄພ, ​ເສ​ລີ​ພາບ​ໃນ​ການ​ເດີນ​ເຮືອແລະການບິນ​ ຢູ່​ທະ​ເລ​ຕາ​ເວັນ​ອອກ ຊຶ່ງ​ເປັນຄວາມ​ເອົາ​ໃຈ​ໃສ່​ລວມຂອງ​ອາ​ຊຽນ ຂອງ​ພາກ​ພື້ນ ​ແລະ​ຂອງ​​ໂລ​ກ ພວມ​ຖືກ​ນາບ​ຂູ່​ຢ່າງ​ຮ້າຍ​ແຮງ.

​ແຕ່​ວັນ​ທີ 1 ພຶດສະພາ 2014 ຈີນ​ໄດ້​ບັງອາດ​ນຳ​ເອົາ​ຮ້ານ​ຂຸດ​ເຈາະ​ນ້ຳມັນ​ທະ​ເລ​ເລິກ ພ້ອມ​ດ້ວຍ​ກຳປັ່ນ​ປະກອບ​ອາວຸດ ກຳປັ່ນ​ທະຫານ 80 ກວ່າ​ລຳ ​ແລະ ​ເຮືອບິນປ້ອງ​ກັນ ​ເຂົ້າ​ໄປ​ໃນ​ເຂດ​ທະ​ເລ​ຂອງ​ຫວຽດນາມ ​ແລະ ​ໄດ້​ຕັ້ງ​ຮ້ານ​ຂຸດ​ເຈາະ​ນ້ຳມັນ​ນີ້ ຢູ່ທີ່​ຕັ້ງ ​ເລິກ​ເຂົ້າ​ໄປ​ໃນ​ໄຫຼ່​ທະວີບ ​ແລະ​ເຂດ​ເສ​ດຖະກິດ​ຈຳ​ເພາະ​ຂອງ​ຫວຽດນາມ ກວ່າ 80 ​ໄມ​ທະ​ເລ​ ຕາມ​ສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລ ປີ 1982. ບັນດາ​ກຳ​ປັ່ນ​ປ້ອງ​ກັນ​ຮັກສາ​ຮ້ານ​ຂຸດ​ເຈາະ​ນ້ຳມັນ ​ໄດ້​ສີດ​ນ້ຳ​ແຮງ​ດັນ​ສູງ ​ແລະ ຊົນ​ຕຳ​ໂດຍ​ກົງ ​ໃສ່​ບັນດາ​ກຳ​ປັ່ນປະຕິບັດ​ງານ, ກຳ​ປັ່ນ​ພົນລະ​ເຮືອນ​ຂອງ​ຫວຽດນາມ, ກໍ່​ຄວາມ​ເສຍຫາຍ​ໃຫ້​ກຳ​ປັ່ນ​ຫຼາຍ​ລຳ ​ແລະ ​ເຮັດ​ໃຫ້​ຫຼາຍ​ຄົນ​ຖືກ​ບາດ​ເຈັບ. ນີ້​ແມ່ນ​ຄັ້ງ​ທຳ​ອິດ​ທີ່​ຈີນ​ບັງອາ​ດນຳເອົາ​ຮ້ານ​ຂຸດ​ເຈາະ​ນ້ຳມັນ ​​ມາ​ຕັ້ງ​ຢູ່​ໃນ​ທີ່​ຕັ້ງ​ທີ່​ເລິກ​ເຂົ້າ​ໄປ​ໃນ​ໄຫຼ່ທະວີບ ​ແລະ​ເຂດ​ເສດຖະກິດ​ຈຳ​ເພາະ​ ຂອງ​ປະ​ເທດໜຶ່ງ​​ໃນ​ອາ​ຊຽນ, ​ເປັນ​ການລະ​ເມີດ​ຢ່າງ​ຮ້າຍ​ແຮງ​ທີ່​ສຸດຕໍ່ກົດໝາຍ​ສາກົນ, ຕໍ່ສົນທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລ ປີ 1982 ​ແລະ ​ກໍ່ເປັນ​ການລະ​ເມີດ​ຢ່າງ​ຮ້າຍ​ແຮງ​ທີ່​ສຸດ ຕໍ່ຖະແຫຼງການກ່ຽວກັບວິທີການປະພຶດ ຂອງບັນດາຝ່າຍຢູ່ທະເລຕາເວັນອອກ (DOC) ທີ່​ຈີນ​ເປັນ​ຝ່າຍໜຶ່ງທີ່​ໄດ້​ລົງ​ນາມ. ການ​ກະທຳ​ທີ່​ເປັນ​ອັນຕະລາຍ​ທີ່​ສຸດ​ນີ້ ​ໄດ້​ແລະພວມນາບ​ຂູ່​ໂດຍ​ກົງ​ຕໍ່​ສັນຕິພາບ, ສະຖຽນ​ລະ​ພາບ, ຄວາມ​ສະຫງົບ, ຄວາມ​ປອດ​ໄພ​ໃນ​ການ​ເດີນ​​ເຮືອ ຢູ່​ທະ​ເລ​ຕາ​ເວັນ​ອອກ.

ຫວຽດນາມ​ໄດ້​ອົດທົນ​ອົດ​ກັ້ນ​ທີ່​ສຸດ, ​ໄດ້​ສະ​ແດງ​ເຈດ​ຕານາ​ດີ​ທຸກ​ຢ່າງ​ຢ່າງ​ຈິງ​ໃຈ, ​ນຳ​ໃຊ້​ທຸກ​ຊ່ອງ​ສາຍ​ການ​ສົນທະນາ ຕິດ​ຕໍ່​ແລກ​ປ່ຽນກັບ​ຂັ້ນ​ຕ່າງໆ ທີ່​ຕ່າງ​ກັນ​ຂອງ​ຈີນ ​ເພື່ອ​ຄັດຄ້ານ ​ແລະ ຮຽກຮ້ອງ​ໃຫ້​ຈີນ ຖອນ​ໃນ​ທັນທີ​ທັນ​​ໃດ ຮ້ານ​ຂຸດ​ເຈາະ​ນ້ຳມັນ ​ແລະ ກຳ​ປັ່ນ​ປະກອບ​ອາວຸດ ກຳ​ປັ່ນ​ທະຫານ​ ອອກ​ຈາກ​ເຂດ​ທະ​ເລ​ຂອງ​ຫວຽດນາມ. ​ແຕ່​ມາ​ເຖິງ​ປັດຈຸບັນ ຈີນ​ບໍ່​ພຽງ​ແຕ່​ບໍ່​ຕອບ​ສະໜອງ​ຄວາມ​ຮຽກຮ້ອງ​ອັນ​ຊອບ​ທຳ​ຂອງ​ຫວຽດນາມ​ເທົ່ານັ້ນ ຫາກ​ຍັງ​ໄດ້​ໃສ່​ຮ້າຍ​ປ້າຍ​ສີ ຖິ້ມ​​ໂທ​ດ​ໃຫ້​ຫວຽດນາມ ​ແລະ ສືບ​ຕໍ່​ໃຊ້​ກຳລັງ​ແຮງ, ​ເພີ່ມ​ທະວີ​ການ​ກະທຳ​ນາບ​ຂູ່ ລ່ວງ​ລ້ຳ​ທີ່​ນັບ​ມື້​​ຍິ່ງເປັນອັນຕະລາຍ ​ແລະ​ຄັບຂັນ​ກວ່າ​ອີກ.

ຫວຽດນາມ​ໃຫ້​ຄວາມ​ສຳຄັນ​ເປັນ​ພິ​ເສດ​ແກ່​ຄວາມ​ພົວພັນ​ມິດຕະພາບ​ອັນ​ດີງາມ​ກັບ​ຈີນ ​ແລະ ຍາມ​ໃດ​ກໍ​ເຮັດ​ຈົນ​ສຸດ​ຄວາມ​ສາມາດ​ຂອງ​ຕົນ​ເພື່ອ​ຮັກສາ ​ແລະ​ເພີ່​ມທະວີ​ສາຍ​ພົວພັນ​ມິດຕະພາບ​ດັ່ງກ່າວ​. ຫວຽດນາມ​ຍາມ​ໃດ​ກໍ່ມີ​ຄວາມ​ປະ​ສົງ​ອັນ​ຈິງ​ໃຈ ຢາກ​ພ້ອມ​ກັນ​ກັບ​ຈີນ​ແກ້​ໄຂ​ຄວາມ​ພິພາດ​ຕ່າງໆ ດ້ວຍ​ສັນຕິ​ວິທີ ບົນ​ພື້ນຖານ​ກົດໝາຍ​ສາກົນ, ສະ​ເໝີ​ພາບ ​ແລະ ​ເຄົາລົບ​ຊຶ່ງ​ກັນ​ແລະ​ກັນ ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ​ສອງ​ປະ​ເທດ, ​ເພື່ອ​ສັນຕິພາບ ສະຖຽນ​ລະ​ພາບ​ຂອງ​ພາກ​ພື້ນ ​ແລະ​ຂອງ​ໂລກ. ​ແຕ່, ດິນ​ແດນ​ເປັນ​ສິ່ງ​ສັກກະລະ​ບູຊາ, ຫວຽດນາມ​ຄັດຄ້ານ​ຢ່າງ​ສຸດ​ຂີດ​ຕໍ່​ການ​ກະທຳ​ລ່ວງ​ລ້ຳ ​ແລະ​ເດັດດ່ຽວ​ປົກ​ປັກ​ຮັກສາ​ອຳນາດອະທິປະ​ໄຕ​​ແຫ່ງ​ຊາດ ​ແລະ ຜົນ​ປະ​ໂຫຍ​ດອັນ​ຊອບ​ທຳ​ຂອງ​ຕົນ​ ທີ່ສອດ​ຄ່ອງ​ກັບ​ກົດໝາຍ​ສາກົນ.

ພວກ​ຂ້າພະ​ເຈົ້າ​ຂໍສະ​ແດງ​ຄວາມຂອບ​ອົກ​ຂອບ​ໃຈ​ຢ່າງສູງສົ່ງ ​ແລະ ຂໍ​ຮຽກຮ້ອງ​ຢ່າງ​ຮີບ​ດ່ວນ​ໃຫ້​ບັນດາ​ປະ​ເທດ​ອາ​ຊຽນ, ບັນດາ​ປະ​ເທດ​ໃນ​ໂລກ, ບັນດາ​ບຸກຄົນ ​ແລະ​ອົງການ​ສາກົນ ຈົ່ງສືບ​ຕໍ່​ອອກປາກອອກສຽງ​ຄັດຄ້ານ​ການ​ກະທຳ​ລ່ວງ​ລ້ຳ​ອັນຮ້າຍ​ແຮງ​ດັ່ງກ່າວ ​ແລະ ສະໜັບສະໜູນ​ຄວາມ​ຮຽກຮ້ອງ​ຕ້ອງການ​ອັນ​ຊອບ​ດ້ວຍ​ກົດໝາຍ ຊອບ​ທຳ​ຂອງ​ຫວຽດນາມ.

ຕໍ່ໜ້າ​ສະພາບ​ການ​ຄັບຂັນ​ເປັນ​ພິ​ເສດ​ນີ້, ຫວຽດນາມ​ຂໍ​ສະ​ເໜີ​ໃຫ້​ອາຊຽນ, ພວກ​ເຮົາ​ຈົ່ງ​ເພີ່ມ​ທະວີ​ຄວາມ​ສາມັກຄີ ​ເປັນ​ເອກະ​ພາບ ​ແລະ ຢືນຢັນ​ຄືນ​ໃໝ່​ຢ່າງ​ແຂງ​ແຮງ ກ່ຽວ​ກັບ​ບັນດາ​ຫຼັກການ​ທີ່​ໄດ້​ລະບຸ​ໄວ້​ໃນຖະ​ແຫຼງການ 6 ປະການ ​ກ່ຽວ​ກັບ​ທະ​ເລ​ຕາ​ເວັນ​ອອກ, ພ້ອມ​ກັນ​ນັ້ນ​ກໍ່​ຮຽກຮ້ອງ​ໃຫ້​ຈີນ​ປະຕິບັດ​ຕາມ​ກົດໝາຍ​ສາກົນ, ສົນທິສັນຍາ​ສະຫະ​ປະຊາ​ຊາດ​ ກ່ຽວ​ກັບ​ກົດໝາຍ​ທະ​ເລ​ປີ 1982, ພິ​​ເສດ​ແມ່ນ ​ຕ້ອງ​ເຄົາລົບ​ນັບຖື​ໄຫຼ່​ທະວີບ ​ແລະ ​ເຂດ​ເສດຖະກິດ​ຈຳ​ເພາະ 200 ​ໄມ​ທະ​ເລ ​ຂອງ​ບັນດາ​ປະ​ເທດ​ແຄມ​ຝັ່ງ​ທະ​ເລ ​ແລະ ປະຕິບັດ​ຢ່າງ​ຄົບ​ຖ້ວນ ​ເຂັ້ມ​ງວດຖະແຫຼງການກ່ຽວກັບວິທີການປະພຶດ ຂອງບັນດາຝ່າຍຢູ່ທະເລຕາເວັນອອກ (DOC). ​ແລະ ພ້ອມ​ກັນ​ກັບ​ອາ​ຊຽນ​ ເຈລະຈາ​ຢ່າງ​ມີ​ເນື້ອ​ແທ້​ ກ່ຽວ​ກັບປະມວນ​ຂໍ້​ກຳນົດ​ກ່ຽວ​ກັບການປະພຶດຂອງບັນດາຝ່າຍ ຢູ່ທະເລຕາເວັນອອກ (COC).

ຫວຽດນາມ​ຂໍ​ສະ​ເໜີ​ໃຫ້​ອາ​ຊຽນ ນຳ​ເອົາ​ເນື້ອ​ໃນ​ດັ່ງກ່າວ​ກ່ຽວ​ກັບ​ທະ​ເລ​ຕາ​ເວັນ​ອອກ ​ເຂົ້າ​ໃນ​ຖະ​ແຫຼ​ງການ​ລວມຂອງ​ກອງ​ປະຊຸມ ​ແລະ ຖະ​ແຫຼ​ງການ​ຂອງ​ປະທານ​ກອງ​ປະຊຸມ​ຂັ້ນສຸດ​ຍອດ​ຂອງ​ອາ​ຊຽນຄັ້ງ​ນີ້. ຫວຽດນາມ​ຕີ​ລາຄາ​ສູງ​ ກ່ຽວ​ກັບ​ການ​ທີ່​ບັນດາ​ລັດຖະມົນຕີ​ການ​ຕ່າງປະ​ເທດ​ອາ​ຊຽນ, ວັນ​ທີ 10 ພຶດສະພາ 2014, ​ໄດ້​ເປັນ​ເອກະ​ພາບ​ກັນ​ ຮັບຮ​ອງ​ຜ່ານຖະ​ແຫຼ​ງການ​ສະບັບ​ສະ​ເພາະ​ ກ່ຽວ​ກັບ​ສະພາບ​ການ​ຄັບ​ຂັນ​​ໃນປັດຈຸບັນ​ ຢູ່​ທະ​ເລ​ຕາ​ເວັນ​ອອກ ຊຶ່ງ​ເປັນ​ການສະ​ແດງ​ໃຫ້​ເຫັນ​ເຖິງ​ຄວາມ​ສາມັກຄີ, ບົດບາດ​ເປັນ​ໃຈກາງ, ຈິດ​ໃຈ​ເປັນ​ເຈົ້າ​ການ ​ແລະ ຄວາມ​ຮັບຜິດຊອບ​ສູງ​ຂອງ​ອາ​ຊຽນ ຕໍ່​ກັບ​ສັນຕິພາບ ສະຖຽນ​ລະ​ພາບ ​ແລະ ຄວາມ​ສະຫງົບ​ຂອງ​ພາກ​ພື້ນ.

2. ກ່ຽວ​ກັບ​​ເສັ້ນທາງ​ດຳ​ເນີນ​ການກໍ່ສ້າງ​ປະຊາ​ຄົມ​ອາ​ຊຽນ

ຫວຽດນາມ​ຕີ​ລາຄາ​ສູງ​ຕໍ່​ລາຍ​ງານ​ຂອງ​ທ່ານ​​ເລຂາທິການ​​ອາ​ຊຽນ ກ່ຽວ​ກັບ​ການ​ເຄື່ອນ​ໄຫວ​ກໍ່ສ້າງ​ປະຊາ​ຄົມ​ອາ​ຊຽນ. ພວກ​ຂ້າພະ​ເຈົ້າ​ຖື​ວ່າ ອາ​ຊຽນພວກ​ເຮົາ​​ຕ້ອງ​ເຮັດ​ຫຼາຍ​ວຽກ​ກວ່າ​ອີກ ​ແລະ ສຸມ​ໃສ່​ບັນດາ​ຈຸດ​ໜັກ​ໃຈກາງ​ດັ່ງ​ນີ້:

ກ່ອນ​ອື່ນ​ໝົດ, ​ແຕ່ລະ​ປະ​ເທດ ​ແລະ ທົ່ວ​ທັງ​ພາກ​ພື້ນ​ລ້ວນ​ແຕ່ຕ້ອງຕັ້ງໜ້າ​ພະຍາຍາມ​ປະຕິບັດ​ໃຫ້​ໄດ້​ຕາມ​ກຳນົດ​ເວລາດຳ​ເນີນ​ການກໍ່ສ້າງ​ປະຊາ​ຄົມ​ອາ​ຊຽນ. ພ້ອມ​ກັນ​ກັບ​ການ​ຍູ້​ແຮງ​ຄຸນ​ນະພາ​ບຂອງ​ເກືອບ 80% ຈຳນວນ​ລາຍ​ການ​ກະທຳ​ທີ່​ໄດ້​ຜັນ​ຂະຫຍາຍ ​ແລະ ພວມ​ຜັນ​ຂະຫຍາຍ, ອາ​ຊຽນຕ້ອງ​ບຸລິມະສິດ​ປະຕິບັດ 20% ຈຳນວນ​ລາຍການ​ທີ່​ຍັງ​ເຫຼືອ​ຢູ່. ຫວຽດນາມ​ສະໜັບ​ສະ​ໜູນການ​ຮັບຮອງ​ຜ່ານ​ຖະ​ແຫຼ​ງການ ​ເນ​ປີ​ດໍ ກ່ຽວ​ກັບ​ການກໍ່ສ້າງ​ປະຊາ​ຄົມ​ອາ​ຊຽນ ຊຶ່ງ​​ເປັນ​ເອກະສານ​ກຳນົດ​ທິດ​ໃຫ້​ແກ່​ການ​ເຄື່ອນ​ໄຫວ​ຕ່າງໆ​ໃນ​ປີ 2014.

ພວກ​ເຮົາຄວນ​​ເພີ່​ມທະວີ​ການເສີມ​ຂະຫຍາຍ​ບົດບາດ​ເປັນ​ເຈົ້າພາ​ທາງ​ຂອງ​ອາ​ຊຽນ ​ເພື່ອ​ແນ​ໃສ່ຮັບປະກັນ​ສັນຕິພາບ ຄວາມ​ສະຫງົບ ສະຖຽນ​ລະ​ພາບ ​ແລະ​ການ​ພັດທະນາ​ ຢູ່​ໃນ​ພາກ​ພື້ນ, ກໍ່​ຄື​​ເພື່ອ​ຮັບ​ມື​ຢ່າງ​ມີ​ປະສິດທິ​ຜົນ​ກັບ​ສິ່ງ​ທ້າ​ທາຍ​ຕ່າງໆ​ທີ່​ພວມ​ວາງ​ອອກ​ມາ.

ພ້ອມ​ກັນ​ກັບ​ຄວາມ​ມານະ​ພະຍາຍາມກໍ່ສ້າງ​ປະຊາ​ຄົມ, ​ອາ​ຊຽນຄວນ​ເສີມ​ຂະຫຍາຍ​ບົດບາດ​ເປັນ​ເຈົ້າພາ​ທາງ​ຢູ່ໃນພາກ​ພື້ນ​ກວ່າ​ອີກ, ​ເປັນ​ຕົ້ນ​ແມ່ນ​ໃນ​ສະພາບ​ທີ່​ມີ​ຄວາມ​ຄິດ​ປະດິດ​ຫຼາຍ​ຢ່າງ ​ກ່ຽວ​ກັບກອບ​ຄວາມ​ສະຫງົບພາກ​ພື້ນ ທີ່​ພວມ​ໄດ້​ບັນດາ​ປະ​ເທດ​ໃຫຍ່​ສະ​ເໜີ​ອອກ​ມາ. ອາ​ຊຽນຄວນ​ເປັນ​ເຈົ້າ​ການ ຕັ້ງໜ້າ​ອອກປາກ​ອອກສຽງ​ລວມ ກ່ຽວ​ກັບ​ບັນດາ​ບັນຫາທີ່​ມີ​ຜົນ​ສະທ້ອນ​ເຖິງ​ສັນຕິພາບ ຄວາມ​ສະຫງົບ ​ແລະ ການ​ພັດທະນາ​ຂອງ​ພາກ​ພື້ນ; ພິ​ເສດ​ແມ່ນ​ຕ້ອງ​ເຊີດ​ຊູ​ບັນດາ​ຫຼັກການ​ແກ້​ໄຂ​ຄວາມ​ພິພາດ​ດ້ວຍ​ສັນຕິ​ວິທີ, ອົດທົນ​ອົດ​ກັ້ນ, ບໍ່​ນຳ​ໃຊ້​ກຳລັງ​ທະຫານ ຫຼື​ນາບ​ຂູ່​ໃຊ້​ກຳລັງ​ທະຫານ, ປະຕິບັດ​ຕາມ​ຂໍ້​ກຳນົດ​ຕ່າງໆ​ຂອງ​ກົດໝາຍ​ສາກົນ,…

ຕາມ​ນັ້ນ, ອາ​ຊຽນຄວນ​ຍູ້​ແຮງ​ການ​ສົນທະນາ​ກໍ່ສ້າງ​ຄວາມ​ເຊື່ອ​ຖື, ກໍ່ສ້າງ​ແລະ​ແບ່ງປັນ​ບັນດາ​ມາດຕະຖານ​ການ​ປະພຶດ​ລວມ ກໍ່​ຄື​ເພີ່ມ​ທະວີບັນດາ​ເຄື່ອງມື ​ແລະ​ກົນ​ໄກ​ຮ່ວມ​ມືທີ່​ມີ​ຢູ່​ໃນ​ປັດຈຸບັນ ​ເຊັ່ນ ສັນຍາ​ມິດຕະພາບ​ແລະ​ການ​ຮ່ວມ​ມື (TAC), ຖະ​ແຫຼ​ງການບາ​ລີ ກ່ຽວ​ກັບບັນດາ​ຫຼັກການການ​ພົວພັນ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ, ສົນທິສັນຍາ​ວ່າ​ດ້ວຍ​ອາຊີ​ຕາ​ເວັນ​ອອກສຽງ​ໃຕ້​ບໍ່​ມີ​ອາວຸດປະລະມະ​ນູ (SEANWFZ), ຖະ​ແຫຼ​ງການ​ກ່ຽວ​ກັບ​ວິທີ​ການ​ປະພຶດ ຂອງບັນດາຝ່າຍຢູ່ທະເລຕາເວັນອອກ (DOC).

​ເພື່ອ​ບັນດາ​ຈຸດໝາຍ​ເທິງ​ນີ້, ຫວກຂ້າພະ​ເຈົ້າ​ເຫັນ​ດີ​ເປັນ​ເອກະ​ພາບ​ກັບ ຂໍ້​ສະ​ເໜີ​ກໍ່ສ້າງກອບ​ປະ​ມວນຂໍ້​ກຳນົດ​ການ​ປະພຶດ ​ແລະ ຮ່ວມ​ມື​ລວມຢູ່​ພາກ​ພື້ນ​ອາຊີ​ຕາ​ເວັນ​ອອກ, ອີງ​ບົນ​ບັນດາ​ຫຼັກການ​ຂອງ​ສັນຍາ TAC ​ແລະ​ບັນດາ​ຂໍ້​ຕົກລົງ​ທີ່​ມີ​ຢູ່​ແລ້ວ, ກໍ່​ຄື​ບັນດາ​ຂໍ້​ຄິດ​ປະດິດ​ທີ່​ກ່ຽວຂ້ອງ ຊຶ່ງ​ໄດ້​ສະ​ເໜີ​ອອກ​ມາ​ໃນ​ມໍ່ໆ​ນີ້. ພ້ອມ​ກັນ​ນັ້ນ, ພວກ​ເຮົາ​ຄວນ​ສືບ​ຕໍ່​ເຊື່ອມ​ຕິດ​ຈຸດໝາຍ​ນີ້​ເຂົ້າ​ໃນ​ຄວາມ​ພະຍາຍາມກໍ່ສ້າງ​ປະຊາ​ຄົມ ​ແລະ ວິ​ໄສ​ທັດ​ອາ​ຊຽນ ພາຍຫຼັງ​ປີ 2015.

​ເພື່ອ​ປະຕິບັດ​ສິ່ງ​ດັ່ງກ່າວ​ໃຫ້​ປະກົດ​ເປັນ​ຈິງ​ໄດ້, ອາ​ຊຽນຄວນ​ສືບ​ຕໍ່​ຮັກສາ​ຄວາມ​ສາມັກຄີ ​ແລະ ຄວາມ​ເປັນ​ເອກະ​ພາບ​ໄວ້​ຢ່າງ​ໝັ້ນຄົງ, ຍົກ​ສູງ​ຄວາມ​ຮັບຜິດຊອບ​ເພື່ອ​ຜົນ​ປະ​ໂຫຍ​ດລວມຂອງ​ພາກ​ພື້ນ ບົນ​ພື້ນຖານ​ບັນດາ​ຫຼັກການ ​ແລະ​ວິທີ​ການ​ທີ່​ໄດ້​ຕົກລົງ​ກັນ, ປະກອບສ່ວນ​ຮັບປະກັນ​ສິ່ງ​ແວດ​ລ້ອມ​ສັນຕິພາບ ຄວາມ​ສະຫງົບ ​ແລະ ສະຖຽນ​ລະ​ພາບ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ອາ​ຊຽນສືບ​ຕໍ່​ຂະຫຍາຍຕົວ​ຢ່າງ​ໝັ້ນຄົງ​ເຂັ້ມ​ແຂງ ​ໃນ​ໄລຍະ​ຕໍ່​ໄປ.

ອາ​ຊຽນພວກ​ເຮົາ​ກໍ່​ຕ້ອງການ​ຍູ້​ແຮງ​ຄວາມ​ມານະ​ພະຍາຍາມ ​ເພື່ອ​ແນ​ໃສ່​ຮັບ​ມື​ຢ່າງ​ມີ​ປະສິດທິ​ຜົນ ​ກັບ​ສິ່ງ​ທ້າ​ທາຍ​ຄວາມ​ສະຫງົບ​ທີ່​ບໍ່​ເປັນ​ແບບ​ດັ້ງ​​ເດີມ ທີ່​ພວມ​ພົ້ນ​ເດັ່ນ​ຂຶ້ນ, ກວມ​ດ້ວຍ​ສິ່ງ​ທ້າ​ທາຍ​ດ້ານ​ສິ່ງ​ແວ​ດລ້ອມ, ​ແຫຼ່ງນ້ຳ, ​ໄພ​ທຳ​ມະ​ຊາດ, ການ​ປ່ຽນ​ແປງ​ດິນ​ຟ້າ​ອາກາດ, ​ໂລກລະບາດ… ຕໍ່​ໜ້າໄພ​ທຳ​ມະ​ຊາດ, ມະຫາ​ໄພ​ທີ່​ເກີດ​ຂຶ້ນ​ຢ່າງ​ລຽນ​ຕິດ​ໃນ​ເວລາ​ທີ່​ຜ່ານ​ມາ, ຂ້າພະ​ເຈົ້າ​ຂໍ​ສະ​ເໜີ​ໃຫ້​ບັນດາ​ອົງການ​ພາລະ​ບົດບາດ​ຂອງ​ອາ​ຊຽນ ຈົ່ງ​ສຳ​ລວດ​ກວດຄືນ ​ແລະ​ນຳ​ສະ​ເໜີ​ຂໍ້​ສະ​ເໜີ​ແນະຕ່າງໆ ​ກ່ຽວ​ກັບ​ການ​ເພີ່ມ​ທະວີ​ຄວາມ​ສາມາດ​ຮ່ວມ​ມື, ຮັບ​ມື​ຢ່າງ​ທັນ​ການ ​ແລະ​ມີ​ປະສິດທິ​ຜົນ ຂ​ອງອາ​ຊຽນ​ໃນ​ຂົງ​ເຂດ​ນີ້.

​ເນື່ອງ​ໃນ​ໂອກາດ​ນີ້, ອີກ​ເທື່ອ​ໜຶ່ງ, ຂ້າພະ​ເຈົ້າ​ຂໍ​ຝາກ​ຄຳຖາມ​ຫາ​ແບ່ງປັນ​ຄວາມທຸກ ມາ​ຍັງ​ປະຊາຊົນ​ຟີ​ລິບ​ປິນ ກ່ຽວ​ກັບ​ຜົນ​ຮ້າຍ​ອັນ​ໜັກໜ່ວງ ຍ້ອນ​ພາຍຸ​ໄຫ່​ຢ່ຽນ​ ​ແລະ​ຝາກ​ຄຳຖາມ​ຫາ​ແບ່ງປັນ​ຄວາມທຸກ ມາ​ຍັງບັນດາ​ຄອບຄົວຂອງ​ຜູ້​ຖືກ​ເຄາະ​ຮ້າຍ ​ໃນ​ເຫດການ​​ເຮືອບິນ MH370 ຖືກອຸບັດເຫດ. ມະຫາ​ໄພ​ເຫຼົ່າ​ນີ້​ຍິ່ງ​ຮຽກຮ້ອງ​ໃຫ້​ພວກ​ເຮົາ​ຕ້ອງ​ເອົາ​ໃຈ​ໃສ່​ຫຼາຍ​ກວ່າ​ອີກ​ ເຖິງ​ການ​ເພີ່ມ​ທະວີ​ຄວາມ​ສາມາດ​ຮັບ​ມື, ຮ່ວມມືຂອງ​ອາ​ຊຽນ. ພວກ​ຂ້າພະ​ເຈົ້າ​ສະ​ເໜີ​ໃຫ້​ຈັດ​ຕັ້ງ​ໂດຍ​ໄວ ​ການ​ສະຫລຸບ​ສັງ​ລວມບົດຮຽນກ່ຽວ​ກັບ​ການ​ປະສານ​ສົມທົບ​ຂອງ​ພາກ​ພື້ນ​ໃນ​ວຽກ​ງານ​ອັນ​ສຳຄັນ​ນີ້.

3. ກ່ຽວ​ກັບ​ອະນາຄົດ​ຂ​ອງ​ປະຊາ​ຄົມ​ອາ​ຊຽນ. ຫວຽດນາມ​ຕີ​ລາຄາ​ສູງຕໍ່​ຂໍ້​ຕົກລົງ​ຂັ້ນ​ສຸດ​ຍອດ​ອາ​ຊຽນ ກ່ຽວ​ກັບ​ການກໍ່ສ້າງ​ວິ​ໄສ​ທັດ​ອາ​ຊຽນ ພາຍຫຼັງ​ປີ 2015.

ວິ​ໄສ​ທັດ​​ປະຊາ​ຄົມ​ອາ​ຊຽນ ພາຍຫຼັງ​ປີ 2015 ຕ້ອງ​ເປັນ​ການ​ສືບ​ຕໍ່ ​ແລະ ​ເສີມ​ຂະຫຍາຍບັນດາ​ຜົນສຳ​ເລັດ​ທີ່​ບັນລຸ​ໄດ້ ​ໃນ​ຂະ​ບວນວິວັດ​ການ​ກໍ່ສ້າງ​ປະຊາ​ຄົມ​ອາ​ຊຽນ ​ແຕ່​ປີ 2009 ຫາ​ປີ 2015. ພາຍຫຼັງ​ທີ່​ໄດ້​ກາຍ​ເປັນປະຊາ​ຄົມ​ແລ້ວ​, ອາ​ຊຽນຄວນ​ຫັນ​ໄປ​ສູ່​ບັນດາ​ຈຸດໝາຍ​​ເຊື່ອມ​ໂຍງທີ່​ສູງ​ກວ່າ​ ໃນ​ທັງ​ສາມ​ເສົາ​ຄ້ຳ. ພ້ອມ​ກັນ​ນັ້ນ ກໍ່​ເສີມ​ຂະຫຍາຍ​ຢ່າງ​ແຂງ​ແຮງ ບົດບາດ​ເປັນ​ເຈົ້າພາ​ທາງ​ໃນ​ໂຄງ​ປະກອບ​ພາກ​ພື້ນ, ​ເປັນ​ເຈົ້າ​ການ​ຊຸກຍູ້ ​ແລະ​ເປີດ​ກວ້າງ​ການ​ເຊື່ອມ​ໂຍງຢູ່​ໃນ​ພາກ​ພື້ນ​ອາຊີ​ຕາ​ເວັນ​ອອກ. ວິ​ໄສ​ທັດ​ພາຍຫຼັງ​ປີ 2015 ຕ້ອງ​ຊ່ວຍ​ພັດທະນາ​ປະຊາ​ຄົມ​ອາ​ຊຽນ​ເພື່ອ​ສະຫວັດດີ​ການ​ຂອງ​ປະຊາຊົນ, ​ເຈາະ​ຈິ້ມ​ໃຫ້​ມີ​ສະຕິ​ປະຊາ​ຄົມ ​ແລະ​ສົ່ງ​ເສີມ​ການ​ເຂົ້າ​ຮ່ວ​ມດ້ວຍ​ຄວາມ​ສະໝັກ​ໃຈ ​ຕັ້ງໜ້າ​ຂອງ​ປະຊາຊົນ​ເຂົ້າ​ໃນ​ວິວັດທະນາ​ການ​ນີ້. ອາ​ຊຽນຄວນ​ເອົາ​ໃຈ​ໃສ່​ປັບປຸງ ​ແລະ​ເພີ່ມ​ທະວີບັນດາ​ກົນ​ໄກ​ຮ່ວມ​ມື​ຍິ່ງ​ກວ່າ​ອີກ ​ເພື່ອ​ແນ​ໃສ່​ຮັບ​ມື​ຢ່າງ​ທັນ​ການ ​ແລະ​ມີ​ປະສິດທິ​ຜົນ​ກັບອຸບັດ​ຕິເຫດ ​ໄພ​ອັນຕະລາຍຕ່າງໆ ຊຶ່ງ​ກວມ​ທັງ​ໄພ​ທຳ​ມະ​ຊາດ, ​ໂລກລະບາດ, ​ເຫດ​ຮ້າຍ. ພວກ​ຂ້າພະ​ເຈົ້າ​ຂໍ​ສະ​ເໜີ ​ມອບ​ໃຫ້ສະພາ​ປະສານ​ງານ​ອາຊຽນ ກໍ່ສ້າງ​ແຜນການ​ສະ​ເຫຼີ​ມສະຫຼອງ​ຢ່າງ​ແທດ​ຈິງ ກ່ຽວ​ກັບ​ເຫດການ​ປະຊາ​ຄົມ​ອາ​ຊຽນກຳ​ເນີ​ດ​ເກີດຂຶ້ນ.

4. ກ່ຽວ​ກັບ​ການ​ສຳ​ຫຼວດ ​ແລະ ກຳນົດ​ທິດ​ການ​ພົວພັນ​ດ້ານ​ການຕ່າງປະ​ເທດ​ຂອງ​ອາ​ຊຽນ

ຫວຽດນາມ​ຂໍ​ສະ​ເໜີ​ໃຫ້​ອາ​ຊຽນຈົ່ງ​ເພີ່ມ​ທະວີ​ບົດບາດແລະ​ການ​ຮ່ວມ​ມື​ກັບບັນດາຄູ່ຮ່ວມ ຢູ່​ໃນ​ບັນດາ​ເວທີ​ປາ​ໄສ​ພາກ​ພື້ນ; ​ເສີມ​ຂະຫຍາຍ​ບົດບາດ​ເປັນ​ເຈົ້າພາ​ທາງ​ໃນ​ເວທີ​ປາ​ໄສ​ອາຊີ​ຕາ​ເວັນ​ອອກ; ກໍ່ສ້າງ​ກອບ​ບັນດາ​ຂໍ້​ກຳນົດ​ການ​ປະພຶດ ​ແລະ ການ​ຮ່ວມ​ມື ທີ່​ຄ້າຍຄື​ກັນ​ກັບ​ສັນຍາມິດຕະພາບ ​ແລະ​ການ​ຮ່ວມ​ມື (TAC) ​ທີ່ເປີດ​ກວ້າງ​ອອກ​ໃນ​ຂອບ​ເຂດ​ທົ່ວ​ອາຊີ​ຕາ​ເວັນ​ອອກ.

​​ໂດຍເປັນ​ຜູ້​ປະສານ​ການ​ພົວພັນ​ອາ​ຊຽນ - ອີ​ຢູ, ຫວຽດນາມ​ຂໍ​ສະ​ເໜີ​ໃຫ້​ກອງ​ປະຊຸມ​ລັດຖະມົນຕີ​ອາ​ຊຽນ - ອີ​ຢູ ຄັ້ງ​ທີ 20 ທີ່​ຈະ​ເຖິງ​ນີ້ ຈົ່ງ​ປຶກສາ​ຫາລື​ຢ່າງ​ລະອຽດ​ກ່ຽວ​ກັບ​ການ​ເພີ່ມ​ທະວີ​ການ​ພົວພັນ​ຄູ່​ຮ່ວມ​ລະຫວ່າງ​ອາ​ຊຽນ - ອີ​ຢູ, ​ໃນ​ນັ້ນ​ມີ​ຂໍ້​ສະ​ເໜີ​ແນະ​ຂອງ​ອີ​ຢູ ກ່ຽວ​ກັບ​ການຈັດ​ຕັ້ງ​ການ​ພົບ​ປະ​ຂັ້ນ​ສູງ​ລະຫວ່າງ​ການ​ນຳ​ຂອງ​ສອງ​ຝ່າຍ. ພວກ​ຂ້າພະ​ເຈົ້າ​ກໍ່​ສະໜັບສະໜູນ​ຂໍ້​ສະ​ເໜີ​ກ່ຽວ​ກັບ​ການ​ສຳ​ຫຼວດ ​ແລະ ວາງ​ທິດ​ກຳນົດ​ການ​ຊີ້​ນຳ​ເພີ່ມ​ທະວີ​ການ​ພົວພັນດ້ານ​ການ​ຕ່າງປະ​ເທດ​ຂອງ​ອາ​ຊຽນ.

ຮຽນ​ທ່ານຜູ້ມີກຽດ​ທັງຫຼາຍ,

ຫວຽດນາມ​ຂໍ​ສະ​ແດງ​ຄວາມຂອບ​ອົກ​ຂອບ​ໃຈຢ່າງ​ສູງ​ສົ່ງ ​ແລະ​ຕີ​ລາຄາ​ສູງ​ຕໍ່​ການ​ປະກອບສ່ວນ​ອັນ​ສຳຄັນ​ຂອງ​ທ່ານ​ປະທານາທິບໍດີ​ອີນ​ໂດ​ເນ​ເຊຍ ຊູຊີ​ໂລ ບຳບັງ ຢູ​ໂດ​ໂຢ​ໂນ ​ທີ່​ໄດ້​ປະກ​ອບເຂົ້າ​ໃນ​ຂະ​ບວນວິວັດ​ການກໍ່ສ້າງ​ປະຊາ​ຄົມ​ອາຊຽນ. ຂໍ​ອວຍພອນ​​ໃຫ້​ທ່ານ​ປະທານາທິບໍດີ​ຈົ່ງ​ປະສົບ​ແຕ່​ສິ່ງ​ປະ​ເສີດ​ອັນ​ດີງາມທຸກ​ປະການ.

ຂໍຂອບ​ໃຈ./.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ