ວັນພຸດ, 20/9/2017
ໜ້າທີ່ຈຸດໜັກໃຈກາງຂອງວຽກງານກວດກາ, ຕິດຕາມກວດກາ ແລະ ວິໄນຂອງພັກ ໃນໄລຍະປະຈຳການຂອງຄະນະບໍລິຫານງານສູນກາງພັກ ສະໄໝທີ XII
18/7/2016 18:37' ສົ່ງ ພິມ
ຍູ້ແຮງວຽກງານກວດກາ, ຕິດຕາມກວດກາ ແລະ ວິໄນຂອງພັກ. (ພາບ: xaydungdang.org.vn)

ໃນຫ້າ​ປີຕໍ່ໜ້າ, ໃນ​ໄລຍະ​ປະຈຳການ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ ສະ​ໄໝ​ທີ XII (2016-2020), ສະພາບ​ການ​ໂລກ, ພາກ​ພື້ນ ​ແລະ ​ໃນ​ປະ​ເທດ​ ຍັງ​ມີ​ການ​ຜັນ​ປ່ຽນ​ຢ່າງ​ສັບສົນ ຊຶ່ງ​ມີ​ທັງ​ໂອກາດ​ອັນ​ສະ​ດວກ​ດີ ​ແລະ ຄວາມ​ຫຍຸ້ງຍາກທີ່​ແຊກ​ຊ້ອນ​ກັນ. ​​ໄພ​ອັນຕະລາຍ​ສີ່​ປະການ​ທີ່​ພັກ​ໄດ້​ຊີ້​ໃຫ້​ເຫັນ​ນັ້ນ ​ຍັງ​ຄົງ​ຕົວຢູ່, ​ເປັນ​ຕັ້ນ​ແມ່ນ​ໄພ​ອັນຕະລາຍຍ້ອນຄວາມ​ຖອຍຫຼັງ​ທາງ​ດ້ານ​ເສດຖະກິດ​ທຽບ​ກັບ​ບັນດາ​ປະ​ເທດ​ໃນ​ພາກ​ພື້ນ ​ແລະ ​ໃນ​ໂລກ; ​ໄພ​ອັນຕະລາຍ​ຍ້ອນ “ການ​ຜັນ​ປ່ຽນ​ໂດຍ​ສັນຕິ” ຂອງ​ບັນດາ​ອິດ​ທິພົນ​ສັດຕູ​ທີ່​ຕ້ານຢັນ​ທຳລາຍ​ຫວຽດນາມ; ພິ​ເສດ​ແມ່ນ, ສະພາບ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ ຄຸນສົມບັດ ​ແບບ​ແຜນ​ດຳລົງ​ຊີວິດ, ບັນດາ​ປະກົດ​ການ “ຫັນປ່ຽນ​​ໂດຍ​ຕົນ​ເອງ” “ປ່ຽນ​ແປງ​ໂດຍ​ຕົນ​ເອງ” ​ໃນ​ພະນັກງານ ສະມາຊິກ​ພັກ ຂ້າ​ລັດຖະການ​ພາກສ່ວນ​ໜຶ່ງນັ້ນ ​ຍັງ​ສະ​ແດງ​ອອກ​ຢ່າງ​ສັບສົນ​ຢູ່; ພະຍາດ​ອາດຍາ​ສິດ, ສໍ້​ລາດ​ບັງ​ຫຼວງ, ຟຸມ​ເຟືອຍ​ຍັງ​ບໍ່​ທັນ​ຖືກ​ຍູ້​ຖອຍ, ຊ້ຳ​ບໍ່​ໜຳ ຍັງ​​ເກີດ​ມີການລະ​ເມີດ​ພາຍ​ໃຕ້​ຮູບ​ການ​ໃໝ່ທີ່​ເລິກ​ແລບ ​ແລະ ຮ້າຍ​ແຮງ​ກວ່າ. ສະພາບ​ການ​ດັ່ງກ່າວ​ໄດ້​ວາງ​ຄວາມ​ຮຽກຮ້ອງ​ຕ້ອງການ​ໃໝ່ ​ແລະ ບັນ​ຫາ​ໃໝ່​ຫຼາຍ​ປະການ ​ຕໍ່​ພາລະກິດ​ການ​ສ້າງສາ ພັດທະນາ​ປະ​ເທດ ກໍ​ຄື​ຕໍ່​ວຽກ​ງານ​ກໍ່ສ້າງ​ພັກ.

ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII ​ໄດ້​ກຳນົດ: “​ເພີ່ມ​ທະວີ​ການ​ກໍ່ສ້າງ​ພັກ​ໃຫ້​ປອດ​ໃສ, ໝັ້ນຄົງ​ເຂັ້ມ​ແຂງ; ​ເສີມ​ຂະຫຍາຍ​ກຳລັງ​ແຮງ​ຂອງ​ປວງ​ຊົນ​ທັງ​ຊາດ ​ແລະ ​ຂອງປະຊາທິປະ​ໄຕສັງຄົມ​ນິຍົມ; ຍູ້​ແຮງ​ການ​ປ່ຽນ​ແປງ​ໃໝ່​ຢ່າງຮອບດ້ານ, ຄົບ​ຊຸດ; ປົກ​ປັກ​ຮັກສາປະ​ເທດ​ຊາດ​ໄວ້​ຢ່າງໝັ້ນຄົງ, ຮັກສາ​ສິ່ງ​ແວດ​ລ້ອມ​ແຫ່ງ​ສັນຕິພາບ ສະຖຽນ​ລະ​ພາບ; ສູ້​ຊົນ​ເພື່ອ​ເຮັດ​ໃຫ້​ຫວຽດນາມ​ກາຍ​ເປັນ​ປະ​ເທດ​ອຸດສາຫະກຳ​ຕາມ​ທິດ​ທັນ​ສະ​ໄໝ​ໂດຍ​ພື້ນຖານ ​ໂດຍ​ໄວ”(2). ພ້ອມ​ນັ້ນ, ກອງ​ປະຊຸມ​ໃຫຍ່​ກໍ​ໄດ້​ຮຽກຮ້ອງ​ໃຫ້​ວຽກ​ງານກວດກາ, ຕິດຕາມ​ກວດກາຂອງ​ພັກ​ໃນ​ສະ​ໄໝ​ທີ XII ຕ້ອງ “ປ່ຽນ​ແປງ​ໃໝ່, ຍົກ​ສູງ​ຄວາມ​ສັກສິດ, ປະສິດທິ​ຜົນຂອງວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ ... ປະຕິບັດ​ວິ​ໄນ​ຢ່າງ​ທັນ​ການ,  ​ເຄັ່ງ​ຄັດ​ຕໍ່​ກັບ​ອົງການ​ຈັດ​ຕັ້ງ​ພັກ, ສະມາຊິກ​ພັກ​ທີ່​ລະ​ເມີດ​ໂຄງການ​ການ​ເມືອງ, ກົດ​ລະບຽບ​ຂອງ​ພັກ, ມະຕິ ຄຳ​ສັ່ງ ຂໍ້ກຳນົດ​ຕົກລົງຂອງ​ພັກ, ນະ​ໂຍບາຍ ກົດໝາຍ​ຂອງລັດ, ຕໍ່​ການ​ກະທຳ​ປິດ​ບັງ​ຂໍ້​ຂາດ​ຕົກ​ບົກພ່ອງ, ຄວາມ​ຜິດພາດ​ຂອງອົງການ​ຈັດ​ຕັ້ງ​ພັກ ​ແລະ ສະມາຊິກ​ພັກ, ​ເຜີຍ​ແຜ່​ຜົນ​ຂອງ​ການ​ປະຕິບັດ​ວິ​ໄນ​ຢ່າງ​ເປີດ​ເຜີຍ”(3).

​ເພື່ອ​ບັນລຸ​ຄວາມ​ຮຽກຮ້ອງ​ຕ້ອງການ​ເທິງນີ້, ວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ ຕ້ອງ​ສຸມ​ໃສ່​ປະຕິບັດບັນດາ​ໜ້າ​ທີ່​ຈຸດ​ໜັກ​ໃຈກາງ​ລຸ່ມ​ນີ້​ຢ່າງ​ຄົບ​ຊຸດ:

ທີ​ໜຶ່ງ,  ຍູ້​ແຮງ​ການ​ເຄື່ອນ​ໄຫວ​ໂຄສະນາ​ເຜີຍ​ແຜ່, ອົບຮົມ​ສຶກສາ​ເພື່ອ​ຍົກ​ສູງ​ຄວາມ​ຮັບ​ຮູ້​ຂອງ​ພະນັກງານ ສະມາຊິກ​ພັກ ​ແລະ ຂອງ​ປະຊາຊົນ ກ່ຽວ​ກັບທີ່​ຕັ້ງ, ບົດບາດ, ຄວາມ​ສຳຄັນ​ຂອງ​ວຽກ​ງານ ກວດກາ, ຕິດຕາມ​ກວດກາ, ວິ​ໄນຂອງ​ພັກ.

​ໃນ​ສະ​ເພາະ​ໜ້າ, ຕ້ອງ​ສຸມ​ໃສ່​ຄົ້ນຄວ້າ, ​ເຊື່ອມ​ຊືມ, ​ໂຄສະນາ​ເຜີຍ​ແຜ່​ເນື້ອ​ໃນ​ຕ່າງໆ​ ກ່ຽວ​ກັບວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ, ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ການ​ຟຸມ​ເຟືອຍທີ່​ມະຕິກອງ​ປະຊຸມ​ໃຫຍ່​​ຄັ້ງ​ທີ XII ຂອງ​ພັກ​ໄດ້​ວາງ​ອອກ​ມາ ​ໃຫ້​ໄດ້​ຢ່າງ​ກວ້າງຂວາງ​ເລິກ​ເຊິ່ງ ​ແທດ​ຈິງ ​ແລະ ມີ​ປະສິດທິ​ຜົນ. ​ເປັນ​ເຈົ້າ​ການ​ສົມທົບ​ແລະ​ຍູ້​ແຮງ​ການ​ໂຄສະນາ​ກ່ຽວ​ກັບວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ ທັງດ້ານ​ທິດ​ສະ​ດິ ພຶດຕິ​ກຳ ບົດຮຽນ​ປະສົບ​ການ ຢູ່​ໃນ​ບັນດາ​ພາຫະນະ​ສື່​ມວນ​ຊົນ.

ຕ້ອງ​ຮັບ​ຮູ້​ຢ່າງ​ຄົບ​ຖ້ວນ ​ແລະ ​​ເລິກ​ເຊິ່ງວ່າ, ວຽກ​ງານ​ກວດກາ, ຕິດຕາມ​ກວດກາ ​ແລະ ວິ​ໄນຂອງ​ພັກ, ພິຈາລະນາ​ຈົນ​ສຸດ​ແລ້ວ ​ແມ່ນເພື່ອຕັກ​ເຕືອນ, ກີດ​ກັ້ນ, ປ້ອງ​ກັນ​ຢ່າງ​ທັນ​ການ ບໍ່​ໃຫ້​ພະນັກງານ ສະມາຊິກ​ພັກ​ລະ​ເມີດ​ຕໍ່​ແຜນ​ນະ​ໂຍບາຍ ​ແນວທາງ​ຂອງ​ພັກ, ນະ​ໂຍບາຍ ກົດ​ໝາຍ​ຂອງ​ລັດ, ຂາດ​ຄວາມ​ເປັນ​ແບບຢ່າງ​ໃນ​ຊີວິດ​ການ​ເປັນ​ຢູ່; ພ້ອມ​ນັ້ນ ກໍ​ແກ້​ໄຂ​ລົງ​ໂທດ​ຢ່າງ​ເດັດຂາດ​ຕໍ່​ພະນັກງານ ສະມາຊິກ​ພັກ​ທີ່​ຕັ້ງ​ໃຈ​ລະ​ເມີດ​ກົດໝາຍ, ​ເປັນ​ຜົນ​ສະທ້ອນ​ເຖິງ​ອິດ​ທິພົນ​ຂອງ​ພັກ, ​ເຖິງການ​ພັດທະນາ​ຂອງ​ປະ​ເທດ​ຊາດ. ວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ ຕ້ອງ​ປະກອບສ່ວນ​ກີດ​ກັ້ນ, ຍູ້​ຖອຍ​ຄວາມ​ຊຸດ​ໂຊ​ມທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ, ປະກົດ​ການ “ຫັນປ່ຽນ​ໂດຍ​ຕົນ​ເອງ”, “ປ່ຽນ​ແປງ​ໂດຍ​ຕົນ​ເອງ” ຢູ່​ພາຍ​​ໃນພັກ, ​ໃນ​ພະນັກງານ ສະມາພັກ​ແຕ່ລະຄົນ; ຕໍ່ສູ້​ເພື່ອ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ການ​ຟຸມ​ເຟືອຍ ​ແລະ ພະຍາດ​ອາດຍາ​ສິດ ຊຶ່ງ​ເປັນໜ້າ​ທີ່​ອັນ​ສຳຄັນ​ທີ່​ປະກອບສ່ວນ​ປະຕິບັດ​ໜ້າ​ທີ່​ການ​ເມືອງ​ທີ່​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ວາງ​ອອກ​ມາ​ ໃຫ້​ໄດ້​ຢ່າງ​ສຳ​ເລັດ​ຜົນ.

ກວດກາ, ຕິດຕາມ​ກວດກາ​ເປັນ​ໜ້າ​ທີ່​ການ​ນຳພາ​ຂອງ​ພັກ, ​ເປັນ​ພາກສ່ວນ​ທີ່​ສຳຄັນ​ໃນ​ວຽກ​ງານ​ກໍ່ສ້າງ​ພັກ​ທັງ​ໝົດ. ​ເພາະວ່າ, ວຽກ​ງານ​ກວດກາ, ຕິດຕາມ​ກວດກາ ​ແມ່ນ​ໜ້າ​ທີ່​ຂອງ​ທົ່ວ​ພັກ, ຂອງ​​ແຕ່ລະໜ່ວຍ​ພັກ ​ແລະ ສະມາຊິກ​ພັກ​ແຕ່ລະຄົນ ຊຶ່ງ​ກ່ອນ​ອື່ນ​ແມ່ນຂອງ​ຄະນະ​ພັກ, ຂອງ​ຜູ້ນຳ​ໜ້າ​ຄະນະ​ພັກ. ​ເພື່ອ​ປະຕິບັດ​ໜ້າ​ທີ່​​ໃຫ້​ໄດ້​ຮັບ​ຜົນສຳ​ເລັດ, ຄະນະ​ພັກ, ຜູ້ນຳ​ໜ້າ​ຄະນະ​ພັກ, ການຈັດ​ຕັ້ງ​ພັກ​ ຕ້ອງ​ກຳ​ແໜ້ນ​ແນວທາງ ທັດສະນະ​ກ່ຽວ​ກັບ​ວຽກ​ງານ​ກໍ່ສ້າງ​ພັກ; ຮັບ​ຮູ້​ຢ່າງ​ຄົບ​ຖ້ວນ​ກ່ຽວ​ກັບ​ສິດ​ຂອບ​ເຂດ, ພາລະ​ບົດບາດ, ໜ້າ​ທີ່, ​ແບບວິທີ, ວິທີ​ປະຕິບັດວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ ​ເພື່ອ​ນຳພາ, ຊີ້​ນຳ ​ແລະ ຈັດ​ຕັ້ງ​ປະຕິບັດຢ່າງ​ມີ​ຄຸນ​ນະພາ​ບ, ປະສິດທິ​ຜົນ ​ແລະ ມີຄວາມ​ສັກສິດ. ​ເຮັດ​ໄດ້​ຄື​ແນວ​ນັ້ນ​ຈຶ່ງ​ສ້າງ​ໃຫ້​ມີ​ການ​ຫັນປ່ຽນ​ຢ່າງ​ແທ້​ຈິງ​ໃນ​ຄວາມ​ຮັບ​ຮູ້ ​ແລະ ການ​ກະທຳ, ຮັບປະກັນ​ໃຫ້​ວຽກ​ງານ​ທີ່​ສຳຄັນ​ນີ້ ຕິດ​ແໜ້ນ ​ແລະ ຮັບ​ໃຊ້​ໃຫ້​ແກ່​ການ​ປະຕິບັດ​ໜ້າ​ທີ່​ການ​ເມືອງ ​ແລະ ວຽກ​ງານ​ກໍ່ສ້າງ​ພັກຢູ່​ແຕ່ລະ​ຂັ້ນ, ​ແຕ່ລະ​ທ້ອງ​ຖິ່ນ ສຳນັກງານ​ອົງການ ກົມ​ກອງ ຢ່າງ​ສຳ​ເລັດ​ຜົນ.

ທີ​ສອງ, ​ເພີ່ມ​ທະວີວຽກ​ງານ​ກວດກາ, ຕິດຕາມ​ກວດກາ ຂອງບັນດາ​ຄະນະ​ພັກ, ການຈັດ​ຕັ້ງ​ພັກ, ກໍ​ຄື​ຂອງ​ຄະນະ​ກຳມະການ​ກວດກາ​ຂັ້ນ​ຕ່າງໆ ​ແລະ ຂອງ​ໜ່ວຍ​ພັກ; ຄົ້ນ​ເຜີຍ​ຢ່າງ​ທັນ​ການ ​ແລະ ​ແກ້​ໄຂ​ຢ່າງ​ເຂັ້ມງວດ​ຕໍ່​ການຈັດ​ຕັ້ງ​ພັກ ສະມາຊິກ​ພັກ​ທີ່​ລະ​ເມີດ​ໂຄງການ​ການ​ເມືອງ, ກົດ​ລະບຽບ​ຂອງ​ພັກ, ມະຕິ ຄຳສັ່ງ ຂໍ້​ກຳ​ນົດຂອງ​ພັກ, ນະ​ໂຍບາຍ ​ກົດໝາຍ​ຂອງ​ລັດ. ສຸມ​ໃສ່ກວດກາ, ຕິດຕາມ​ກວດກາ ຕໍ່​ບັນດາ​ຄະນະ​ກຳມະການ​ພັກ, ຄະນະ​ພັກ, ການຈັດ​ຕັ້ງ​ພັກ​ຢູ່​ໃນ​ບັນດາ​ອົງການ​ລັດ, ຫົວໜ່ວຍ​ເສດຖະກິດ ​ແລະ​ໃນບັນດາ​ຂົງ​ເຂດ​ທີ່​ມັກ​ມີ​ຄວາມ​ຜິດພາດ.

ບັນດາ​ຄະນະ​ພັກ, ດ້ານ​ໜຶ່ງ, ຕ້ອງ​ຈັດ​ຕັ້ງ​ປະຕິບັ​ດວຽກ​ງານ​ກວດກາ, ຕິດຕາມ​ກວດກາ, ປະຕິບັດວິ​ໄນຂອງ​ພັກຕາມ​ພາລະ​ບົດບາດ ໜ້າ​ທີ່​ຂອງ​ຕົນ​ໃຫ້​ໄດ້​ຮັບ​ຜົນ​ດີ; ດ້ານ​ອື່ນ, ຕ້ອງ​ເພີ່ມ​ທະວີ​ການ​ນຳພາ, ຊີ້​ນຳ, ​ແນະນຳ​ໃຫ້​ຄະນະ​ພັກ ການຈັດ​ຕັ້ງ​ພັກ​ຂັ້ນ​ລຸ່ມ ​ປະຕິບັດວຽກ​ງານກວດກາ, ຕິດຕາມ​ກວດກາ ​ແລະ ​ວິ​ໄນ​ຂອງ​ພັກ. ​ໃຫ້​ຄວາມ​ສຳຄັນ​ແກ່​ວຽກ​ງານ​ກຳ​ສະພາບ​ການ​ເຄື່ອນ​ໄຫວ​ຂອງ​ອົງການຈັດ​ຕັ້ງ​ພັກ ສະມາຊິກ​ພັກ, ​ເປັນ​ຕົ້ນ​ແມ່ນ​ພະນັກງານ​ຫຼັກ​ແຫຼ່ງ ຜູ້ນຳໜ້າຢູ່​ບັນດາຂະ​ແໜງ​ການ ທ້ອງ​ຖິ່ນ ກົມ​ກອງຕ່າງໆ ​ເພື່ອ​ຈະ​​ເປັນ​ເຈົ້າ​ການ​ໃນ​ການຄົ້ນ​ເຜີຍ, ກີດ​ກັ້ນ, ​ແກ້​ໄຂ​ຂໍ້​ຂາດ​ຕົກ​ບົກພ່ອງ, ​ເປັນ​ຕົ້ນ​ແມ່ນບັນດາ​ສັນຍານ​ຂອງ​ການລະ​ເມີດ​ທີ່​ຫາ​ກໍ່​ປະກົດ​ຂຶ້ນ, ບໍ່​ປະໃຫ້ການ​ລະ​ເມີດ​ໜັກໜ່ວງຮ້າຍ​ແຮງ​ກວ່າ​ອີກ.

​ເອົາ​ໃຈ​ໃສ່ກວດກາ, ຕິດຕາມ​ກວດກາພະນັກງານ​ຫຼັກ​ແຫຼ່ງ, ​ພິ​ເສດ​ແມ່ນ​ຜູ້ນຳ​ໜ້າ​​ໃນຄະນະ​ພັກ, ການຈັດ​ຕັ້ງ​ພັກ, ການຈັດ​ຕັ້ງ​ລັດ, ​ແນວ​ໂຮມ​ປະ​ເທດ​ຊາດ, ການຈັດ​ຕັ້ງ​ການ​ເມືອງ-ສັງຄົມ, ການຈັດ​ຕັ້ງ​ເສດຖະກິດ​ຂອງ​ລັດ, ​ໃນ​ການ​ປະຕິບັດໜ້າ​ທີ່ ສິດ​ອຳນາດ​ທີ່​ໄດ້​ຮັບ​ມອບ​ໝາຍ; ​ໃນ​ການ​ຮັກສາ​ຄຸນ​ທາດ​ຄຸນ​ສັມບັດ ​ແບບ​ແຜນ​ດຳລົງ​ຊີ​ວີ​ດທີ່​ດີ, ຮັບປະກັນ​ບໍ່​ສວຍ​ໃຊ້​ຕຳ​ແໜ່​ງ ສິດ​ອຳນາດ​ເພື່ອ​ເຮັດ​ຜິດ​ກັບ​ວິ​ໄນ, ຫາ​ຜົນ​ປະ​ໂຫຍ​ດສ່ວນ​ຕົວ ຫຼື​ຊ່ວຍ​ໃຫ້​ຍາດຕິ​ພີ່​ນ້ອງ​ຂອງ​ຕົນ​ຫາ​ຄວາມ​ລ່ຳລວຍ​ແບບ​ຜິດ​ກົດໝາຍ.

​ເພີ່ມ​ທະວີວຽກ​ງານ​ກວດກາ, ຕິດຕາມ​ກວດກາ ຕໍ່​ກັບ​ບັນດາ​ຄະນະ​ກຳມະການ​ພັກ ຄະນະ​ພັກ, ບັນດາ​ການ​ຈັດ​ຕັ້ງ​ພັກ​ຢູ່​ສຳນັກງານ​ອົງການ​ລັດ ​ໃນ​ການ​ຫັນ​ແນວທາງ ທັດສະນະ​ຂອງ​ພັກ​ເປັນນິຕິ​ກຳ ​ແລະ ປະຕິບັດ​ແນວທາງ​ຂອງ​ພັກ. ສຸມ​ໃສ່ວຽກ​ງານ​ກວດກາ, ຕິດຕາມ​ກວດກາ ​ແກ້​ໄຂບັນດາ​ບັນຫາ​ກ່າວ​ຟ້ອງ​ເພື່ອ​ຮັບ​ໃຊ້​ໃຫ້​ແກ່​ວຽກ​ງານ​ພະນັກງານ ກໍ​ຄື​ໃຫ້ການ​ເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດ, ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ; ການຈັດ​ຕັ້ງ​ຮ່ຳຮຽນ, ​ເຊື່ອມ​ຊືມ ​ແລະ ປະຕິບັດ​ມະຕິກອງ​ປະຊຸມ​ໃຫຍ່​​ຄັ້ງ​ທີ XII ຂອງ​ພັກ; ການ​ປະຕິບັດ​ມະຕິ​ຂອງ​ຄະ​ນະ​ບໍລິຫານ​ງານ​ສູນ​ກາງ​ພັກ; ສືບ​ຕໍ່​ຍູ້​ແຮງ​ການ​ຮ່ຳຮຽນ ​ແລະ ປະຕິບັດ​ຕາມ​ແວ່ນ​ແຍງ​ຄຸນສົມບັດ​ຂອງທ່ານ​ປະທານ​ໂຮ​ຈິ​ມິນ...

ພ້ອມໆ​ກັບ​ການ​ປະຕິບັດ​ພາລະ​ບົດບາດ, ໜ້າ​ທີ່, ສິດ​ຂອບ​ເຂດ ​ແລະ ຄວາມ​ຮັບຜິດຊອບ​ຂອງ​ຕົນ, ຄະນະ​ກຳມະການ​ກວດກາ​ຂັ້ນ​ຕ່າງໆ ຕ້ອງ​ເປັນ​ເຈົ້າ​ການ, ຕັ້ງໜ້າ​ເປັນ​ເສນາ​ທິການ​ຊ່ວຍ​ໃຫ້​ຄະນະ​ພັກ​ກ່ຽວ​ກັບວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ ​ແລະ ປະຕິບັດ​ເປັນ​ຢ່າງ​ດີ​ໜ້າ​ທີ່​ທີ່​ຄະນະ​ພັກ​ໄດ້​ມອບ​ໝາຍ​ໃຫ້. ​ເອົາ​ໃຈ​ໃສ່​ປະຕິບັດ​ໜ້າ​ທີ່​ຈຸດ​ໜັກ​ໃຈກາງຄື ກວດກາ​ການຈັດ​ຕັ້ງ​ພັກ​ຂັ້ນ​ລຸ່ມ ​ແລະ ສະມາຊິກ​ພັກ​ເມື່ອ​ມີ​ສັນຍານ​ຂອງ​ການລະ​ເມີດ​ວິ​ໄນ; ກວດກາ​ການ​ຜັນ​ຂະຫຍາຍ​ໂຄງ​ການ​ເຄື່ອນ​ໄຫວປະຕິບັດ​ມະຕິກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ; ​ແກ້​ໄຂ​ປະຕິບັດ​ວິ​ໄນ​ຕາມ​ສິດ​ອຳ​ນາດ ຫຼື​ສະ​ເໜີ​ໃຫ້​ຄະນະ​ພັກ​ແກ້​ໄຂ​ປະຕິບັດ​ວິ​ໄນ​ຕໍ່​ກໍລະນີ​ລະ​ເມີດກົດໝາຍ​ວິ​ໄນ, ຮັບປະກັນ​ຍຸດ​ຕິ​ທຳ ຖືກຕ້ອງ ທັນ​ເວລາ, ປະກອບສ່ວນ​ກີດ​ກັ້ນ, ຍູ້​ຖອຍ​ຄວາມ​ຊຸດ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ, ການ​ສໍ້​ລາດ​ບັງ​ຫຼວງ ຟຸມ​ເຟືອຍ, ຫຍໍ້​ທໍ້, “ຜົນ​ປະ​ໂຫຍ​ດ​ໝູ່​ພວກ”... ຢູ່​ໃນ​ພະນັກງານ ສະມາຊິກ​ພັກ​ພາກສ່ວນໜຶ່ງ. ຄະນະ​ກຳມະການ​ກວດກາຂັ້ນ​ເທິງ​ ດຳ​ເນີນ​ການ​ຊີ້​ນຳ, ​ແນະນຳ, ກວດກາ, ຕິດຕາມ​ກວດກາຢ່າງ​ເປັນ​ປະຈຳ​ ຕໍ່​ຄະນະ​ພັກ, ການຈັດ​ຕັ້ງ​ພັກ, ຄະນະ​ກຳມະການ​ກວດກາ​ພັກ​ຂັ້ນ​ລຸ່ມ ​ໃນ​ການ​ປະຕິບັດ​ໜ້າ​ທີ່​ກວດກາ, ຕິດຕາມ​ກວດກາ, ປະຕິບັດວິ​ໄນຂອງ​ພັກ ພາຍ​ໃນ​ພັກ.

ທີ​ສາມ, ສືບຕໍ່​ປັບປຸງ​ບູລະນະ​ຂໍ້​ກຳນົດ​ຕ່າງໆ​ຂອງ​ພັກ ​ກ່ຽວ​ກັບ​ກົນ​ໄກ, ວິທີ, ລະດັບ​ດຳ​ເນີນ​ການກວດກາ, ຕິດຕາມ​ກວດກາ, ປະຕິບັດວິ​ໄນ ​ແລະ ​ແກ້​ໄຂ​ຂໍ້​ຂັດຂ້ອງ ຮ້ອງ​ຂໍ​ຕໍ່​ວ່າ​ໃນ​ພັກ; ປັບປຸງ​ບູລະນະ​ກົນ​ໄກ​ປະສານ​ສົບ​ທົບ​ການ​ປະຕິບັດ​ໜ້າ​ທີ່ວຽກ​ງານ​ກວດກາ, ຕິດຕາມ​ກວດກາ, ປະຕິບັດວິ​ໄນຂອງ​ພັກ ລະຫວ່າງຄະນະ​ກຳມະການ​ກວດກາ ກັບ​ບັນດາ​ການຈັດ​ຕັ້ງ​ພັກ ​ແລະ ອົງການ​ທີ່​ກ່ຽວຂ້ອງ.

ຄະນະ​ກຳມະການ​ກວດກາສູນ​ກາງ ​ແລະ ຄະນະ​ກຳມະການ​ກວດກາຂັ້ນ​ຕ່າງໆ ສຸມ​ໃສ່​ເປັນ​ເສນາ​ທິການ​ຊ່ວຍ​ໃຫ້ຄະນະ​ບໍລິຫານ​ງານ​ສູນ​ກາງ​ພັກ, ກົມ​ການ​ເມືອງ, ຄະນະ​ເລຂາທິການ​ສູນ​ກາງ​ພັກ ​ແລະ ຄະນະ​ພັກຂັ້ນ​ດຽວ​ກັນ ກໍ່ສ້າງ, ປັບປຸງ​ບູລະນະ​ມະຕິ, ຄຳ​ສັ່ງ, ຂໍ້​ກຳນົດ, ກົດ​ລະບຽບ ກ່ຽວ​ກັບວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ, ຮັບ​ປະກັນ​ໃຫ້​ມັນ​ມີ​ຄວາມ​ຄົບ​ຊຸດ, ​ເປັນ​ເອກະ​ພາບ ​ແລະ ປະຕິບັດ​ໄດ້. ສະ​ເໜີ​ໃຫ້​ສະພາ​ແຫ່ງ​ຊາດ, ລັດຖະບານ, ບັນດາ​ກະຊວງ ຂະ​ແໜງ​ການ, ອຳນາດ​ການ​ປົກຄອງ​ຂັ້ນ​ຕ່າງໆ ຈົ່ງ​ບູລະນະ​ລະບົບ​ກົດໝາຍ​ໃຫ້​ສົມບູນ ​ເພື່ອ​ເປັນ​ພື້ນຖານ​ໃຫ້​ແກ່ການ​ປະຕິບັດຂອງ​ການຈັດ​ຕັ້ງ​ພັກ ສະມາຊິກ​ພັກ ​ແລະ ​ໃຫ້​ແກ່​ການ​ກວດກາ, ຕິດຕາມ​ກວດກາ, ພິຈາລະນາ ​ແກ້​ໄຂ​​ເມື່ອ​ມີ​ຄວາມ​ຜິດພາດ ລະ​ເມີດ​ວິ​ໄນ. ກຳນົດ​ຢ່າງ​ຈະ​ແຈ້ງ​ພາລະ​ບົດບາດ, ໜ້າ​ທີ່, ສິດ​ອຳນາດ, ຄວາມ​ຮັບຜິດຊອບ, ຂອບ​ເຂດ​ຊີ້​ນຳນຳພາ, ຈັດ​ຕັ້ງ​ປະຕິບັດ​ໜ້າ​ທີ່​ກວດກາ, ຕິດຕາມ​ກວດກາ, ປະຕິບັດ​ວິ​ໄນ​ຂອງ​ພັກ ຂອງ​ບັນດາ​ຄະນະ​ພັກ, ການຈັດ​ຕັ້ງ​ພັກ ​ແລະ ຂອງ​ໜ່ວຍ​ພັກ; ພາລະ​ບົດບາດ, ໜ້າ​ທີ່, ສິດ​ອຳນາດ, ຂອບ​ເຂດ​ກວດກາ, ຕິດຕາມ​ກວດກາ, ປະຕິບັດວິ​ໄນຂອງ​ພັກ ຂອງຄະນະ​ກຳມະການ​ກວດກາຂັ້ນ​ຕ່າງໆ. ສືບ​ຕໍ່​ປັບປຸງ​ບູລະນະ​ກົນ​ໄກ, ວິທີ, ລຳດັບ​ດຳ​ເນີນ​ການ​ກວດກາ, ຕິດຕາມ​ກວດກາ, ປະຕິບັດວິ​ໄນຂອງ​ພັກ ​ໃຫ້​ສອດຄ່ອງ​ກັບ​ການ​ປ່ຽນ​ແປງ​ໃໝ່​ແບບ​ວິທີ​ການ​ນຳພາ ​ແລະ ການ​ປະຕິ​ຮູບ​ລະບຽບ​ການ​ລໍ​ລິ​ຫານ​ໃນ​ພັກ, ການ​ກໍ່ສ້າງ​ລັດ​ແຫ່ງ​ອຳນາດ​ກົດໝາຍ, ປະຕິບັດ​ເສດຖະກິດ​ຕະຫຼາດ​ກຳນົດ​ທິດ​ສັງຄົມ​ນິຍົມ ​ແລະ ​ເຊື່ອມ​ໂຍງ​ສາກົນ.

ພ້ອມ​ກັບ​ການ​ເພີ່ມ​ທະວີ​ການ​ກວດກາ, ຕິດຕາມ​ກວດກາ​ໃນ​ພັກ, ຕ້ອງ​ໃຫ້​ຄວາມ​ສຳຄັນ ​ແລະ ​ເສີມ​ຂະຫຍາຍ​ບົດບາດຂອງ​ແນວ​ໂຮມ​ປະ​ເທດ​ຊາດ, ບັນດາ​ອົງຄະ​ນະ​ການ​ເມືອງ-ສັງຄົມ ​ແລະ ບັນດາ​ອົງການ​ສື່​ມວນ​ຊົນ​ ໃນ​ການ​ເຂົ້າ​ຮ່ວມ​ການ​ກວດກາ, ຕິດຕາມ​ກວດກາ, ຕຳ​ໜິວິຈານຕໍ່​ກັບ​ການຈັດ​ຕັ້ງ​ພັກ ກໍ​ຄື​ຕໍ່​ສະມາຊິກ​ພັກ. ມີ​ກົນ​ໄກ​ເພື່ອ​ປະຕິບັດ​ກົດ​ລະບຽບ​ກ່ຽວ​ກັບການຕິດຕາມ​ກວດກາ, ວິຈານ​ສັງຄົມ​ຂອງ​ແນວ​ໂຮມ​ປະ​ເທດ​ຊາດ, ຂອງ​ບັນດາ​ອົງຄະ​ນະ​ການ​ເມືອງ-ສັງຄົມ ​ແລະ ຂໍ້​ກຳນົດ​ກ່ຽວ​ກັບ​ແນວ​ໂຮມ​ປະ​ເທດ​ຊາດ​ຫວຽດນາມ, ບັນດາ​ອົງຄະ​ນະ​ການ​ເມືອງ-ສັງຄົມ ​ແລະ ປະຊາຊົນ ​ເຂົ້າ​ຮ່ວມ​ການ​ປະກອບ​ຄວາມ​ຄິດ​ເຫັນ​ກໍ່ສ້າງ​ພັກ, ກໍ່ສ້າງ​ອຳນາດ​ການ​ປົກຄອງ.

ປະຕິບັດ​ເປັນ​ຢ່າງ​ດີ​ກົດ​ລະບຽບ​ກ່ຽວ​ກັບ​ການ​ສົມທົບ​ລະຫວ່າງຄະນະກຳມະການ​ກວດກາ ກັບ​ບັນດາ​ການຈັດ​ຕັ້ງ​ພັກ, ສຳນັກງານ​ອົງການ​ທີ່​​ກ່ຽວ​ ໃນ​ການ​ປະຕິບັດ​ໜ້າ​ທີ່ວຽກ​ງານ​ກວດກາ, ຕິດຕາມ​ກວດກາ ​ແລະ ປະຕິບັດວິ​ໄນຂອງ​ພັກ. ປັບປຸງ​ບູລະນະ​ບັນດາ​ກົດ​ລະບຽບ, ກົນ​ໄກ ​ແລະ ຍົກ​ສູງ​ປະສິດທິ​ຜົນ​ຂອງ​ການ​ສົມທົບ​ປະຕິບັດ ລະຫວ່າງວຽກ​ງານ​ກວດກາ, ຕິດຕາມ​ກວດກາຂອງ​ພັກ ກັບ​ວຽກ​ງານກວດກາ, ກວດ​ສອບ, ສືບສວນ, ກວດກາ​ນຂອງ​ບັນດາ​ອົງການ​ລັດ ​ແລະ ກັບ​ວຽກ​ງານ​ຕິດຕາມ​ກວດກາ​ຂອງ​ສະພາ​ແຫ່ງ​ຊາດ, ສະພາ​ປະຊາຊົນ, ​ແນວ​ໂຮມ​ປະ​ເທດ​ຊາດ ​ແລະ ບັນດາ​ອົງຄະ​ນະ​ການ​ເມືອງ-ສັງຄົມ. ກຳນົດ​ຈຳ​ແນກຢ່າງ​ຈະ​ແຈ້ງ​ ລະຫວ່າງ​ເນື້ອ​ໃນ, ​ເປົ້າ​ໝາຍຂອງ​ການກວດກາ, ຕິດຕາມ​ກວດກາ, ວິ​ໄນ​ຂອງ​ພັກ ກັບເປົ້າ​ໝາຍຂອງ​ການກວດກາ, ​ກວດການ, ກວດ​ສອບ, ສືບສວນ​ຂອງ​ບັນດາ​ອົງການ​ລັດ ​ເພື່ອ​ແນ​ໃສ່​ປະຕິບັດ​ພາລະບົດບາດ, ໜ້າ​ທີ່, ສິດ​ຂອບ​ເຂດ​ ຂອງ​ແຕ່​ລະ​ອົງການ​ໄດ້​ຮັບ​ຜົນ​ດີ. ສົມທົບ​ການ​ແລກປ່ຽນ​ຂໍ້​ມູນ​ຂ່າວສານຢ່າງ​​ແໜ້ນ​ແຟ້ນ ເປັນ​ປະຈຳ ລະຫວ່າງຄະນະ​ພັກ, ການຈັດ​ຕັ້ງ​ພັກ, ຄະນະ​ກຳມະການ​ກວດກາ ກັບ​ອົງການ​ຈັດ​ຕັ້ງ​ລັດ, ​ແນວ​ໂຮມ​ປະ​ເທດ​ຊາດ, ອົງຄະ​ນະ​ການ​ເມືອງ-ສັງຄົມ, ອົງການ​ສື່​ມວນ​ຊົນ ​ເພື່ປະຕິບັດວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ​ ​ໃຫ້ໄດ້​ຮັບ​ຜົນ​ດີ.

ທີ​ສີ່, ປັບປຸງ​ບູລະນະຄະນະ​ກຳມະການ​ກວດກາ, ການຈັດ​ຕັ້ງ​ກົງຈັກ ​ແລະ ພະນັກງານ​ຂອງສຳນັກການຄະນະ​ກຳມະການ​ກວດກາ ​ໃຫ້​ສົມ​ລະດັບ​ກັບ​ພາລະ​ບົດບາດ, ໜ້າ​ທີ່, ສິດ​ອຳນາດ​ທີ່​ໄດ້​ຮັບ​ມອບ​ໝາຍ. ປ່ຽນ​ແປງ​ໃໝ່ ​ແລະ ຍົກ​ສູງ​ຄຸນ​ນະພາ​ບຂອງ​ການ​ອົບຮົມສຶກສາ ກໍ່ສ້າງ​ພະນັກງານ​ກວດກາ​ຂັ້ນ​ຕ່າງໆ.

ສຸມ​ໃສ່​ຄົ້ນ​ຄວ້າ​ທິດ​ສະ​ດີ ​ແລະ ພຶດຕິ​ກຳ​ກ່ຽວ​ກັບວຽກ​ງານ​ກວດກາ, ຕິດຕາມ​ກວດກາ ​ແລະ ວິ​ໄນຂອງ​ພັກ ​ໃນ​ສະພາບ​ການ​ໃໝ່, ຕອບ​ສະໜອງ​ຄວາມ​ຕ້ອງການ​ຊີ້ນຳ​ນຳພາ, ຈັດ​ຕັ້ງ​ປະຕິບັດໜ້າ​ທີ່ກວດກາ, ຕິດຕາມ​ກວດກາ, ວິ​ໄນພັກ ຂອງຄະນະ​ບໍລິຫານ​ງານ​ສູນ​ກາງ​, ກົມ​ການ​ເມືອງ, ຄະນະ​ເລຂາທິການ​ສູນ​ກາງ, ຂອງ​ຄະນະ​ພັກ, ການຈັດ​ຕັ້ງ​ພັກ, ຄະນະ​ກຳມະການ​ກວດກາຂັ້ນ​ຕ່າງໆ. ​ເອົາ​ໃຈ​ໃສ່​ເປັນ​ສຳຄັນ​ເຖິງ​ວຽກ​ງານ​ສະຫລຸບ​ເບື້ອງ​ຕົ້ນ, ສະຫລຸບ​ສັງ​ລວມພຶດຕິ​ກຳ ​ເພື່ອ​ສະ​ເໜີ​ຢ່າງ​ທັນ​ການ​ໃຫ້​ເພີ່ມ​ເຕີມ, ຂະຫຍາຍ​ແຜນ​ນະ​ໂຍບາຍ, ​ທິດທາງ, ວິທີ, ທັກ​ສະ, ລຳດັບ​ດຳ​ເນີນ​ການ​ປະຕິບັດວຽກ​ງານ​ກວດກາ, ຕິດຕາມ​ກວດກາ, ວິ​ໄນຂອງ​ພັກ ບົນ​ພື້ນຖານ​ກົດ​ລະບຽບ​ຂອງ​ພັກ, ມະຕິກອງ​ປະຊຸມ​ໃຫຍ່​​ຄັ້ງ​ທີ XII ຂອງ​ພັກ ​ແລະ ສອດຄ່ອງ​ກັບ​ພຶດຕິ​ກຳ​ແຫ່ງ​ວຽກ​ງານ​ກໍ່ສ້າງ​ພັກ. ສືບ​ຕໍ່​ຄົ້ນຄວ້າ​ກຳນົດ​ຢ່າງ​ຈະ​ແຈ້ງ​ກ່ຽວ​ກັບ​ສິດ​ຂອບ​ເຂດ​ຂອງຄະນະ​ກຳມະການ​ກວດກາ ຕາມ​ບົດ​ສະຫລຸບ​ສະບັບ​​ເລກທີ 72-KL/TW, ຂອງ​ກົມ​ການ​ເມືອງສູນ​ກາງ​ພັກສະ​ໄໝ​ທີ X, ວ່າ​ດ້ວຍ “ຍຸດ​ທະ​ສາດ​ວຽກ​ງານ​ກວດກາ, ຕິດຕາມ​ກວດກາ​ຂອງ​ພັດ​ຮອດ​ປີ 2020”, ​ເປັນ​ຕົ້ນ​ແມ່ນ ຄວາມ​ຮັບຜິດຊອບ​ຂອງຄະນະ​ກຳມະການ​ກວດກາຂັ້ນ​ຕ່າງໆ​ ໃນ​ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ; ການ​ກວດກາ, ຕິດຕາມ​ກວດກາ​ຕໍ່​ຜູ້ນຳ​ໜ້າ ​ໃນ​ການ​ປະຕິບັດ​ຄວາມ​ຮັບຜິດຊອບ, ໜ້າ​ທີ່​ທີ່​ໄດ້​ຮັບ​ມອບ​ໝາຍ; ມາດ​ຕະການ, ກົນ​ໄກ, ນະ​ໂຍບາຍ​ເພື່ອ​ເປັນ​ເຈົ້າ​ການ​ໃນ​ການ​ປ້ອງ​ກັນ, ສະກັດ​ກັ້ນ​ການລະ​ເມີດ​ວິ​ໄນ​ຂອງ​ການຈັດ​ຕັ້ງ​ພັກ ​ແລະ ສະມາຊິກ​ພັກ. ຍູ້​ແຮງ​ການ​ປະ​ຢຸກ​ໃຊ້​ວິທະຍາສາດ - ​ເຕັກ​ໂນ​ໂລ​ຊີ, ​ເປັນ​ຕັ້ນ​ແມ່ນ​ເຕັກ​ໂນ​ໂລ​ຊີ​ສື່ສານ​ຮັບ​ໃຊ້​ການ​ຊີ້​ນຳ​ນຳພາ ຂອງ​ຄະນະ​ພັກ ​ແລະ ການ​ເຄື່ອນ​ໄຫວ​ຂອງຄະນະ​ກຳມະການ​ກວດກາຂັ້ນ​ຕ່າງໆ. ​ເພີ່ມ​ທະວີ​ການ​ຮ່ວມ​ມື​ສາກົນ​ກ່ຽວ​ກັບວຽກ​ງານ​ກວດກາ, ຕິດຕາມ​ກວດກາ, ວິ​ໄນ ​ແລະ ວຽກ​ງານ​ປ້ອງ​ກັນ, ຕ້ານ​ການ​ສໍ້​ລາດ​ບັງ​ຫຼວງ.

​ເປັນ​ເຈົ້າ​ການ​ໃນ​ການ​ໃຫ້​ຄຳ​ປຶກສາ​ຊ່ວຍ​ໃຫ້​ຄະນະ​ພັກ​ປັບປຸງ​ບູລະນະ​ຄະນະ​ກຳມະການ​ກວດກາ, ການຈັດ​ຕັ້ງ ​ແລະ ພະນັກງານ​ ຂອງສຳນັກງານຄະນະ​ກຳມະການ​ກວດກາ ​ໃຫ້​ສົມ​ກັບ​ພາລະ​ບົດ​ບາດ, ໜ້າ​ທີ່, ສິດ​ອຳນາດ​ທີ່​ໄດ້​ຮັບ​ມອບ​ໝາຍ. ປ່ຽນ​ແປງ​ໃໝ່​ວຽກ​ງານ​ຄັດ​ເລືອກ, ວາງ​ແຜນ​ກຳ​ນົດ, ບຳລຸງ​ກໍ່ສ້າງ, ​ແຕ່ງ​ຕັ້ງ, ​ເລື່ອ​ນຊັ້ນ, ຊັບຊ້ອນ, ຜັດປ່ຽນ, ນຳ​ໃຊ້, ຍ້ອງຍໍ​ຊົມ​ເຊີຍ, ປະຕິບັດ​ວິ​ໄນ ​ເພື່ອ​ກໍ່ສ້າງ ​ແລະ ປັບປຸງ​ຖັນ​ແຖວ​ພະນັກງານ​ກວດກາ​ຂັ້ນ​ຕ່າງໆ ​ໃຫ້​ມີ​ຄຸນສົມບັດດີ, ມີ​ຄວາມ​ສາມາດຫຼັກ​ແຫຼມ​ການ​ເມືອງ, ມີ​ທັກ​ສະ​ວິຊາ​ຊີບ​ຊຳນານ, ວິທີ​ເຮັດ​ວຽກ​ແບບ​ວິທະຍາສາດ, ​ເຫັນ​ແກ່​ຜົນ​ປະ​ໂຫຍ​ດສ່ວນ​ລວມ, ພາ​ວະ​ວິ​ໄສ, ​​ໃກ້ຊິດຕິດ​ແທດ, ລອບ​ຄອບ, ບໍ່​ສວຍ​ໃຊ້​ຖານະ​ຕຳ​ແໜ່​ງ​ເພື່ອ​ຫາ​ຜົນ​ປະ​​ໂຫຍ​ດສ່ວນ​ຕົວ.

​ເອົາ​ໃຈ​ໃສ່​ວຽກ​ງານ​ບຳລຸງ​ກໍ່ສ້າງ, ຝຶກ​ອົບຮົມ​ພະນັກງານ​ກວດກາ. ສົມທົບ​ກັບ​ສະ​ຖາ​ບັນ​ການ​ເມືອງ​ແຫ່ງ​ຊາດ​ໂຮ່ຈິ​ມິນ ​ໃນ​ການ​ປ່ຽນ​ແປງ​ໃໝ່​ໂຄງການ ​ແລະ ຫຼັກສູດ​ກໍ່ສ້າງ​ພະນັກງານ​ກວດກາພັກ. ຍົກ​ສູງ​ຄຸນນະພາບ​ຂອງ​ການ​ອົບຮົມ​ສຶກສາ, ​ແນະນຳ​ວິຊາ​ສະ​ເພາະ​ການ​ກວດກາ, ຕິດຕາມ​ກວດກາ ​ໃຫ້​ພະນັກງານ​ກວດກາ​ຂັ້ນ​ຕ່າງໆ.

ໜ້າ​ທີ່ວຽກ​ງານ​ກວດກາ, ຕິດຕາມ​ກວດກາຂອງ​ພັກ ​ໃນ 5 ປີ​ສະ​ເພາ​ໜ້າ​ແມ່ນ​ໜັກໜ່ວງ​, ຫຍຸ້ງຍາກ​ສັບ​ສົນທີ່​ສຸດ, ມັນ​ຮຽກຮ້ອງ​ໃຫ້​ບັນດາ​ຄະນະ​ພັກ, ການຈັດ​ຕັ້ງ​ພັກ ​ແລະ ຄະນະ​ກຳມະການ​ກວດກາພັກ​ຂັ້ນ​ຕ່າງໆ ຕ້ອງ​​​ເອົາ​ໃຈ​ໃສ່​ຊີ້​ນຳ, ຈັດ​ຕັ້ງ​ປະຕິບັດຢ່າງລວມສູນທີ່​ສຸດ. ດ້ວຍ​ຄວາມ​ຮັບຜິດຊອບ​ຕໍ່ໜ້າ​ທີ່​ທີ່​ໄດ້​ຮັບ​ມອບ​ໝາຍ, ພະນັກງານ​ໃນ​ຂະ​ແໜງ​ການ​ກວດກາ​ພັກ​ແຕ່​ລະ​ຄົນຕ້ອງ​ສືບ​ຕໍ່​ຍົກ​ສູງ​ຈິດ​ໃຈ​ປະຕິ​ວັດ, ​ເຈດ​ຈຳນົງ​ບຸກໜ້າ, ຕັ້ງໜ້າ​ຮ່ຳຮຽນ ຄົ້ນຄວ້າຍົກ​ສູງ​ລະດັບ​ທຸກ​ດ້ານ, ຜ່ານ​ຜ່າ​ຄວາມ​ຫບຸ້ງ​ຍາກ ສິ່ງ​ທ້າ​ທາຍ, ​ເສີມ​ຂະຫຍາຍ​ມູນ​ເຊື້ອ “ຈົງ​ຮັກ​ພັກດີ​ເດັດຂາດ, ສາມັກຄີ, ຊື່ສັດສຸດ​ຈະລິດ, ຊື່ກົງ​ບໍລິສຸດ, ມີ​ລະບຽບ​ວິ​ໄນ ​ແລະ ຕັ້ງ​ຕໍ່​ສຸດ​ອົກ​ສຸດ​ໃຈ” ຂອງ​ຂະ​ແໜງ​ການ​ກວດກາ, ສົມ​ກຽດ​ກັບ​ຄວາມ​ໄວ້​ວາງ​ໃຈ​ຂອງ​ພັກ ​ແລະ ປະຊາຊົນ./.

​ໂດຍ ​ເຈິ່ນກວັດ​ເວື້ອງ

ກຳມະການ​ກົມ​ການ​ເມືອງ, ​ເລຂາທິການ​ສູນ​ກາງ​ພັກ,
ປະທານຄະນະ​ກຳມະການ​ກວດກາສູນ​ກາງ

-----------------------------

(1), (2), (3) ​ເອກະສານກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູນ​ກາງ​ພັກກອມ​ມູນິດ​ຫວຽດນາມ, ຮ່າ​ໂນ້ຍ, 2016, ໜ້າ 189, 11, 208.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ