ວັນເສົາ, 18/11/2017
ປ້ອງກັນ, ຕ້ານຄວາມເສື່ອມໂຊມທາງດ້ານ ແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ ຂອງພະນັກງານ ສະມາຊິດພັກ ແມ່ນຄວາມຕ້ອງການທີ່ຈຳເປັນ ຮີບດ່ວນໃນປັດຈຸບັນ
2/8/2016 17:56' ສົ່ງ ພິມ
ສະຫາຍເລຂາທິການໃຫຍ່ເນັ້ນ ບັນຫາກົກຮາກ, ມີຄວາມໝາຍຕັດສິນຂອງການຕັດສິນຕົກລົງທຸກຢ່າງແມ່ນຕ້ອງເຮັດວຽກງານກໍ່ສ້າງພາຍໃນ, ກໍ່ສ້າງພັກ ສຳນັກງານອົງການ, ກໍ່ສ້າງຄົນໃຫ້ດີ. (ພາບ: TTXVN)

ພາຍຫຼັງ​ໄຊຊະນະ​ຂອງ​ການ​ປະຕິວັດ​ເດືອນ​ສິງຫາ​ປີ 1945, ພັກ​ກາຍ​ເປັນ​ຜູ້​ກຳ​ອຳນາດ, ນຳພາ​ລັດ, ​ເພື່ອ​ກີດ​ກັ້ນ​ໄພ​ແຫ່ງ​ຄວາມ​ເສື່ອ​ມ​ໂຊມ​ປ່ຽນ​ທາດ​ຍ້ອນ​ສິດອຳນາດ, ພັກ​ກອມ​ມູນິດ​ຫວຽດນາມ ​ແລະ ປະທານ​ໂຮ່ຈິ​ມິນ ​ໄດ້​ໃຫ້​ຄວາມ​ສຳຄັນ​ເປັນ​ພິ​ເສດ​ເຖິງ​ການ​ອົບຮົມ​ສຶກສາແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ ​ໃຫ້​ພະນັກງານ ສະມາ​ຊິດ​ພັກ; ປ້ອງ​ກັນ​ແລະຕ້ານ​ຄວາມ​ເສື່ອ​ມ​ໂຊມປ່ຽນ​ທາດ​ໃນ​ພະນັກງານ ສະມາ​ຊິດ​ພັກ, ​ເອົາ​ໃຈ​ໃສ່​ເຖິງ​ການ​ອົບຮົມ​ສຶກສາ​ອຸດົມ​ຄະຕິ, ຄຸນສົມບັດ​ປະຕິວັດ, ຕ້ານ​ລັດທິ​ອັດ​ຕະບຸກຄົນ.

​ໃນ​ສະ​​ໄໝ​ແຫ່ງ​ການ​ປ່ຽນ​ແປງ​ໃໝ່, ຍ້ອນ​ຜົນ​ກະທົບ​ຂອງ​ຫຼາຍ​ປັດ​ໄຈ​ພາວະ​ວິ​ໄສ ​ແລະ ອັດຕະວິ​ໄສ, ສະພາບຄວາມເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ ໃນ​​ພະນັກງານ ສະມາ​ຊິດ​ພັກພາກສ່ວນໜຶ່ງທີ່​ບໍ່​ໜ້ອຍ ​ໄດ້​ຜັນ​ປ່ຽນ​ສັບສົນ. ​ໃນ​ກອງ​ປະຊຸມ​ທົ່ວ​ປະ​ເທດ​ກາງ​ສະ​ໄໝ​ທີ VII (ເດືອນມັງກອນ 1994) ພັກ​ກອມ​ມູນິດ​ຫວຽດນາມ​ໄດ້​ຊີ້​ໃຫ້​​ເຫັນ ​ບັນດາ​ປະກົດ​ການ​ຂອງ​ສະພາບ​ການ​ນີ້ ​ແລະ ຖື​ວ່າ​ນັ້ນ​ເປັນ​ໜຶ່ງ​ໃນ 4 ​ໄພ​ອັນຕະລາຍ​ທີ່​ຕ້ອງ​ເອົາ​ໃຈ​ໃສ່​ຕໍ່ສູ້​ປ້ອງ​ກັນ​ແລະ​ຕ້ານ. ບັນດາ​ກອງ​ປະຊຸມ​ໃຫຍ່​​ຂອງ​ພັກ ​ແລະ ຫຼາຍ​ກອງ​ປະຊຸມ​ສູນ​ກາງ​ພັກ​ໃນ​ສະ​ໄໝ​ຕໍ່​ຈາກ​ນັ້ນ ​ໄດ້ສືບ​ຕໍ່ຕີ​ລາຄາຄວາມເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ ​ໃນ​ພະນັກງານ ສະມາ​ຊິດ​ພັກພາກສ່ວນໜຶ່ງທີ່​ບໍ່​ໜ້ອຍ; ກຳນົດ​ແຈ້ງ​ການ​ກີດ​ກັ້ນ ​ແລະ ຍູ້​ຖອຍ​ສະພາບ​ເສື່ອ​ມ​ໂຊມ​ປ່ຽນ​ທາດ​ນີ້ ​ແມ່ນ​ໜ້າ​ທີ່ພື້ນຖານ​ຍາວ​ນານ ທັງ​ມີ​ຄວາມ​ໝາຍ​ຮີບ​ດ່ວນ​ສະ​ເພາະ​ໜ້າ.

ພິ​ເສດ ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XI ​ໄດ້ພິນິດ​ໄສ​ວ່າ: “ພະນັກງານ ສະມາຊິກ​ພັກ​ພາກສ່ວນ​ໜຶ່ງ​ທີ່​ບໍ່​ໜ້ອຍ, ​ໃນ​ນັ້ນ​ມີ​ສະມາຊິກ​ພັກ​ທີ່​ດຳລົງ​ຕຳ​ແໜ່​ງນຳ​ພາ ຄຸ້ມ​ຄອງ, ນັບ​ທັງ​ພະນັກງານ​ຂັ້ນ​ສູງ​ຈຳນວນ​ໜຶ່ງ, ຖືກ​ເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ ດ້ວຍ​ບັນດາ​ປະກົດ​ການ​ທີ່​ຕ່າງ​ກັນ​ຄື ຫຼະ​ເຫຼີງ​ເຫີ​ນຫ່າງ​ອຸດົມ​ຄະຕິ, ຕົກ​ໃສ່​ລັດທິ​ອັດ​ຕະບຸກຄົນ ອິດສາ, ສວຍ​ໂອກາດ, ຖື​ຜົນ​ປະ​ໂຫຍ​ດ​ເປັນ​ສຳຄັນ, ​ແລ່ນ​ຫາ​ຊື່​ສຽງ ​ເງິນ​ຕຳ, ຫຶງສາ​ນິນທາ​ດ້ານ​ຖານະ​ຕຳ​ແໜ່​ງ, ພາກສ່ວນ​ນິຍົມ, ສໍ້​ລາດ​ບັງ​ຫຼວງ, ຟຸມ​ເຟືອຍ, ​ເຮັດ​ຕາມ​ລຳພັງ​ໃຈ ​ໄຮ້​ຫຼັກການ...”(1). ສະພາບ​ການ​ດັ່ງ​ກ່າວ “​ໄດ້​​ເຮັດ​ໃຫ້ຄວາມ​ໄວ້​ວາງ​ໃຈ​ຂອງ​ປະຊາຊົນ​ຕໍ່​ກັບ​ພັກຖືກ​ຫລຸດ​ຜ່ອນ​ລົງ; ຖ້າ​ຫາກ​ບໍ່​ແກ້​ໄຂ​ດັດ​ແປງ​ມັນ​ຈະ​ກາຍ​ເປັນ​ສິ່ງ​ທ້າ​ທາຍ​ຕໍ່​ກັບບົດບາດນຳ​ພາ​ຂອງ​ພັກ ​ແລະ ຄວາມ​ຍືນ​ຍົງ​ຄົງ​ຕົວ​ຂອງ​ລະບອບ”(2). ຍ້ອນ​ເຫດ​ນັ້ນ, ສູນ​ກາງ​ຈຶ່ງ​ຮຽກຮ້ອງ​ໃຫ້​ຕ້ອງ “​ເດັດດ່ຽວ​ຕໍ່ສູ້​ກີດ​ກັ້ນ, ຍູ້​ຖອຍ​ສະພາບ​ຄວາມເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ຂອງ​ພະນັກງານ ສະມາຊິກ​ພັກ​ພາກສ່ວນ​ໜຶ່ງ​ທີ່​ບໍ່​ໜ້ອຍ, ກ່ອນ​ອື່ນ​ໝົດ​ແມ່ນ​ພະນັກງານ​ນຳພາ ຄຸ້ມ​ຄອງ​ຂັ້ນ​ຕ່າງໆ ​ເພື່ອ​ຍົກ​ສູງ​ຄວາມ​ສາມາດ​ນຳພາ, ກຳລັງ​ແຮງ​ສູ້​ຮົບ​ຂອງ​ພັກ, ປັບປຸງ​ຄວາມ​ເຊື່ອ​ຖື​ຂອງ​ສະມາຊິກ​ພັກ ​ແລະ ຂອງ​ປະຊາຊົນ​ຕໍ່​ກັບ​ພັກ”(3).

​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ໄດ້​ຊີ້​ແຈ້ງ​ອີກ​ຄັ້ງ​ວ່າ: “ສະພາບຄວາມ​ເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດຂອງ​ພະນັກງານ ສະມາຊິກພັກ​ພາກສ່ວນ​ໜຶ່ງ​ທີ່​ບໍ່​ໜ້ອຍ​ ຍັງ​ບໍ່​ທັນ​ຖືກ​ຍູ້​ຖອຍ​ເທື່ອ; ຊ້ຳ​ມີ​ດ້ານ, ມີ​ພາກສ່ວນ​ໄດ້​ຜັນ​ແປ​ສັບສົນ​ກວ່າ​ອີກ”(4).

ບັນຫາ​ທີ່​ວາງມອອກ​ມາ​ກໍ​ຄື, ຍ້ອນ​ຫຍັງ ສະພາບຄວາມ​ເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ ຍັງ​ສືບ​ຕໍ່​ຜັນ​ແປນັບ​ມື້​ນັບ​ຮ້າຍ​ແຮງ, ບໍ່​ສາມາດ​ກີ​ດກັ້ນ, ຍູ້​ຖອຍ​ໄດ້ ? ​ແມ່ນ​ບໍ່​ວ່າ ພວກ​ເຮົາ​ຕີ​ລາຄາ​ລະດັບ, ລັກສະນະ​ຂອງ​ສະພາບ​ການ​ຍັງ​ບໍ່​ທັນ​ຊັດ​ເຈນ, ຍັງ​ບໍ່​ທັນ​ຊີ້​ໃຫ້​ເຫັນ​ແຈ້ງ​ສາ​ເຫດ, ຍັງ​ບໍ່​ທັນວາ​ງກຳນົດ​ລະບົບ​ວິທີ​ແກ້​ໄຂ​ທີ່​ຄົບ​ຊຸດ ​ແລະ ​​ເຂັ້ມງວດສັກສິດ​ພຽງພໍ ຫຼື​ວ່າ​ຂາດ​ເງື່ອນ​ໄຂ​ຕ່າງໆ​ທີ່​ຈຳ​ເປັນ​ເພື່ອ​ປະຕິບັດ​ວິທີ​ແກ້​ໄຂ​ເຫຼົ່າ​ນັ້ນ ?...

ສະພາບ​ການ ​ແລະ ສາ​ເຫດ​ຂອງຄວາມ​ເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ໃນ​​ພະນັກງານ ສະມາ​ຊິດ​ພັກພາກສ່ວນ​ໜຶ່ງທີ່​ບໍ່​ໜ້ອຍ ​ໃນ​ປັດຈຸບັນ

ຄວາມ​ເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ ໃນ​​ພະນັກງານ ສະມາ​ຊິດ​ພັກພາກສ່ວນ​ໜຶ່ງທີ່​ບໍ່​ໜ້ອຍ ​ໃນ​ປັດຈຸບັນ ​ໄດ້​ສະ​ແດງ​ອອກ​ລະອຽດ​ດັ່ງ​ນີ້:

ທີ​ໜຶ່ງ, ບໍ່​ຕັ້ງໜ້າ​ຮ່ຳຮຽນ, ຄົ້ນຄວ້າ​ທິດ​ສະ​ດີກາ​ນ​ເມືອງ, ພໍ​ໃຈ​ກັບ​ຄວາມ​ຮູ້​ແບບ​ງ່າຍດາຍ, ລວມໆ ​ກ່ຽວ​ກັບ​ລັດທິ​ມາກ - ​ເລ​ນິນ, ​ແນວ​ຄິດ​ໂຮ່ຈິ​ມິນ, ​ແນວທາງ ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ.

ທີ​ສອງ, ອົງ​ລະ​​ແວງລັ່ງ​ເລ​ທາງ​ດ້ານ​ອຸດົມ​ຄະຕິ, ຈຸດໝາຍ ​ແລະ ​ເສັ້ນທາງ​ພັດທະນາ​ຂຶ້ນ​ສູ່​ສັງຄົມ​ນິຍົມ​ຂອງ​ຊາດ.

ທີ​ສາມ, ປະຕິ​ເສດ​ບັນດາ​ຜົນງານ​ການ​ປະຕິ​ວັດ ​ແລະ ບັນດາ​ຄ່າ​ນິຍົມ​ດັ້ງ​ເດີມ​ຂອງ​ຊາດ.

ທີ​ສີ່, ຂາດ​ຄວາມ​ເປັນ​ເອກະ​ພາບ​ກັບ​ບັນດາ​ທັດສະນະ, ​ແຜນ​ນະ​ໂຍບາຍ​ຂອງ​ພັກ, ຈາກ​ນັ້ນ​ຈຶ່ງ​ບໍ່​ເວົ້າ ​​ແລະ​ເຮັດ​ຖືກຕ້ອງຕາມ​ແຜນ​ນະ​ໂຍບາຍ, ​ແນວທາງຂອງ​ພັກ, ນະ​ໂຍບາຍ, ກົດໝາຍ​ຂອງ​ລັດ. ສວຍ​ໂອກາດ​ທາງ​ການ​ເມືອງ​ພາຍ​ໃຕ້​ຫຼາຍ​ຮູບ​ການ​ທີ່​ຕ່າງ​ກັນ.

ທີ​ຫ້າ, ບໍ່​ປະຕິບັດ​ເຂັ້ມ​ງວດ​ຕາມ​ບັນດາ​ຫຼັກການ​ການຈັດ​ຕັ້ງ, ດຳລົງ​ຊີວິດ​ພັກ, ກ່ອນ​ອື່ນ​ໝົດ​ແມ່ນ​ຫຼັກການ​ລວມສູນ​ປະຊາທິປະ​ໄຕ, ຫຼັກການ​ຕິ​ຊົມ​ຕົນ​ເອງ ​ແລະ ຕິ​ຊົມ.

ທີ​ຫົກ, ລະ​ເຫຼີງ, ​ເສຍສະຕິ​ລະວັງ​ຕົວ​ຕໍ່​ເລ່ຫຼ່ຽມ, ​ກົນອຸບາຍ “ຜັນ​ປ່ຽນ​ໂດຍ​ສັນຕິ” ຂອງ​ບັນດາ​ອິດ​ທິກຳລັງ​ສັດຕູ, ພ້ອມ​ນັ້ນ​ກໍ​ບໍ່​ເດັດດ່ຽວ​ຕິ​ຊົມ, ຕໍ່ສູ້​ກັບ​ບັນດາ​ທັດສະນະ​ທີ່​ຜິດ​ພາດ, ບັນດາຖ້ອຍທຳນອງ​ບິດ​ເບືອນ​ປະຫວັດສາດ, ບິດ​ເບືອນ​ສະພາບ​ການ​ຕົວ​ຈິງ​ຂອງ​ປະ​ເທດ, ​ໃສ່​ຮ້າຍ​ປ້າຍ​ສີ​ພັກ, ລະບອບ​ການ​ເມືອງ, ການ​ນຳພາ​ຂອງ​ພັກ ​ແລະ ລັດ​ເຮົາ.

ທີ​ເຈັດ, ​ແຈກ​ຢາຍ​ເອກະສານ, ​ເຜີຍ​ແຜ່​ທັດສະນະ​ຕ່າງໆ​ ທີ່​ຝືນ​ກັບ​ໂຄງການ​ການ​ເມືອງ, ກົດ​ລະບຽບ ມະຕິ​ຂອງ​ພັກ, ລະ​ເມີດ​ກົດໝາຍ​ຂອງ​ລັດ.

ຄວາມ​ເສື່ອ​ມ​ໂຊມ​ທາງດ້ານ​ຄຸນສົມບັດ, ​ແບບ​ແຜນ​ດຳລົງ​ຊີວິດ ໃນ​​ພະນັກງານ ສະມາຊິກ​ພັກ​ພາກສ່ວນ​ໜຶ່ງທີ່​ບໍ່​ໜ້ອຍ ​ໄດ້​ແລະ​ພວມ​ສະ​ແດງ​ອອກ​ດ້ວຍ​ລະດັບ​ທີ່​ຮ້າຍ​ແຮງ, ມີ​ທ່າ​ອຽງ​ແຜ່​ກວ້າງ​ອອກ​ໃນ​ຫຼາຍ​ຂັ້ນ, ຫຼາຍ​ຂະ​ແໜງ​ການ, ຫຼາຍ​ຂົງ​ເຂດ, ຫຼາຍ​ເປົ້າ​ໝາຍ, ລະອຽດ​ດັ່ງ​ນີ້:

ທີ​ໜຶ່ງ, ລັດທິ​ອັດ​ຕະບຸກຄົນ, ດຳລົງ​ຊີວິດ​ແບບຖື​ປະ​ໂຫຍ​ດ​ເປັນ​ສຳຄັນ, ​ເຫັນ​ແກ່​ຜົນ​ປະ​ໂຫຍ​ດສ່ວນ​ຕົວ ​ໃນ​ພະນັກງານ ສະມາຊິກ​ພັກ ຍັງ​ບໍ່​ຖືກ​ກີດ​ກັ້ນແລະຍູ້​ຖອຍ.

ທີ​ສອງ, ການ​ສໍ້​ລາດ​ບັງ​ຫຼວງ, ກິນ​ສິນ​ບົນ, ຟຸມ​ເຟືອຍ, ລັກລອບ​ຂອງ​ຫຼວງ ບໍ່​ຫລຸດ​ລົງ.

ທີ​ສາມ, ຄວາມ​ເສື່ອ​ໂຊມ​ທາງ​ດ້ານ​ຄຸນສົມບັດ​ສະ​ແດງ​ອອກ​ໃນ​ແບບ​ດຳລົງ​ຊີວິດ​ສວຍ​ໂອກາດ, ​ເສ​ເພ ຫຼິ້ນ​ກິນ​ແບບ​ເມົາ​ມົວ.

ທີ​ສີ່, ທ່າ​ທີ່​ເມີນ​ເສີຍ​ຕໍ່​ວຽກ​ງານ​ທີ່​ໄດ້​ຮັບ​ມອບ​ໝາຍ, ສະພາບ​ການ​ ຄຳ​ເວົ້າ​ບໍ່​ໄປ​ຄຽງ​ຄູ່​ກັບ​ການ​ກະທຳ ຍັງ​ແຜ່​ຫຼາຍ​ຢູ່.

ທີ​ຫ້າ, ພະຍາດ​ອາດຍາ​ສິດ, ຫ່າງ​ເຫີ​ນປະຊາຊົນ, ມັກ​ຟັງ​ຄຳ​ເວົ້າ​ຍ້ອງ​ຜົນງານ, ບໍ່​ຢາກ​ຟັງ ​ແລະ​ເວົ້າ​ຄຳ​ສັດ.

ທີ​ຫົກ, ຈັນ​ຍາ​ບັນ​ວິຊາ​ຊີບ​ບໍ່​ໄດ້​ຮັບ​ການ​ເຊີດ​ຊູ, ນັບ​ທັງ​ໃນ​ບັນດາ​ຂົງ​ເຂດທີ່​ອ່ອນ​ໄຫວ​ທີ່​ສຸດ​ເຊັ່ນ ການສຶກສາ ສາທາລະນະ​ສຸກ; ການ​ສຶກສາ​ບຸກຄະ​ລິກ​ກະພາບ ບໍ່​ໄດ້​ຮັບ​ການ​ເອົາ​ໃຈ​ໃສ່ທີ່​ເໝາະ​ສົມ.

ທີ​ເຈັດ, ​ການ​ດຳລົງ​ຊີວິດ​ແບບ​ຖື​ຜົນ​ປະ​ໂຫຍ​ດ​ເປັນ​ສຳຄັນ, ອິດສາ ​ເຫັນ​ແກ່​ຜົນ​ປະ​ໂຫຍ​ກສ່ວນ​ຕົວ ພວມ​ເປັນ​ຜົນ​ກະທົບ​ໂດຍ​ກົງ​ເຖິງ​ຄວາມ​ພົວພັນ​ຄຸນສົມບັດ​ໃນ​ຄອບຄົວ, ​ເຖິງຮີດຄອງ​ປະ​ເພນີ​ຄອບຄົວຫວຽດນາມ.

ສະພາບຄວາມ​ເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ ​ຂອງ​ພະນັກງານ ສະມາຊິກພັກ​ພາກສ່ວນ​ໜຶ່ງ​ທີ່​ບໍ່​ໜ້ອຍ​ ມີ​ສາ​ເຫດ​ພາວະ​ວິ​ໄສ ​ແລະ ອັດຕະວິ​ໄສ ​ຕ່າງໆ ​ແຕ່​ໃນ​ນັ້ນ​ສາ​ເຫດ​ອັດຕະວິ​ໄສ​ແມ່ນ​ຕົ້ນຕໍ.

ສາ​ເຫດ​ພາວະ​ວິ​ໄສ

ທີ​ໜຶ່ງ, ຍ້ອນ​ການ​ກະທົບ​ຈາກ​ການ​ວິ​ກິດຂອງ​ລັດທິ​ສັງຄົມ​ນິຍົມ​ໃນ​ໂລກ ​ແລະ ຈາກ​ດ້ານ​ຫຍໍ້​ທໍ້​ຕ່າງໆ​ຂອງ​ວິວັດ​ການ​ໂລກາ​ພິວັດ, ຍ້ອນ​ບັນດາ​ອິດ​ທິກຳລັງ​ປະຕິ​ການ ສັດຕູ, ການ​ສວຍ​ໃຊ້​​ພາຫະນະ​ສື່​ມວນ​ຊົນ​ທີ່​ທັນ​ສະ​ໄໝ​ເພື່ອ​​ເສກ​ສັນ​ປັ້ນ​ແຕ່ງ, ບິດ​ເບືອນສະພາບ​ການ​ຫວຽດນາມ, ລະດົມ​ສົ່ງ​ເສີມ​ການ​ດຳລົງ​ຊີວິດ​ແບບ​ຊົ​ມ​ໃຊ້​ໃຫ້​ສຸກ​ກາຍ​ສະບາຍ​ໃຈ, ຖື​ຜົນ​ປະ​ໂຫຍ​ດວັດຖຸ​ເປັນ​ສຳຄັນ, ລັດທິ​ອັດ​ຕະບຸກຄົນ, ​ເຫັນ​ແກ່​ຜົນ​ປະ​ໂຫຍ​ດສ່ວນ​ຕົວ, ​ເຫັນ​ແກ່​ເງິ​ນຄຳ​ພຽງ​ຢ່າງ​ດຽວ.

ທີ​ສອງ, ຍ້ອນ​ຜົນ​ກະທົບ​ຈາກ​ດ້ານ​ລົບ​ຂອງ​ກົນ​ໄກ​ເສດຖະກິດ​ຕະຫຼາດ.

ທີ​ສາມ, ກົນອຸບາຍ, ຍຸດ​ທະ​ສາດ “ຜັນ​ປ່ຽນ​ໂດຍ​ສັນຕິ” ຂອງ​ບັນດາ​ອິດ​ທິກຳລັງ​ສັດຕູ.

ສາ​ເຫດ​ອັດຕະ​ວິ​ໄສ

ທີ​ໜຶ່ງ, ວຽກ​ງານ​ອົບຮົມ​ສຶກສາ​ການ​ເມືອງ, ​ແນວ​ຄິດ​ໃຫ້​ພະນັກງານ ສະມາຊິກ​ພັກ​ບໍ່​ໄດ້​ຮັບ​ຄວາມ​ເອົາ​ໃຈ​ໃສ່​ເປັນ​ສຳຄັນ, ການ​ເຄື່ອນ​ໄຫວ​ມີ​ປະສິດທິ​ຜົນ​ໜ້ອຍ. ມີ​ປະກົດ​ການ​ເບິ່ງ​ເບົາ​ການ​ອົບຮົມ​ສຶກສາ​ລັດທິ​ມາກ-ເລ​ນິນ, ​ແນວ​ຄິດ​ໂຮ່ຈິ​ມິນ, ​ເບິ່ງ​ເບົາ​ການ​ອົບຮົມ​ສຶກສາ​ຄຸນສົມບັດ​ປະຕິວັດ.

ທີ​ສອງ, ວຽກ​ງານ​ສະຫລຸບ​ສັງ​ລວ​ມພຶດຕິ​ກຳ, ຄົ້ນຄວ້າ​ທິດ​ສະ​ດີ​ຍັງ​ຕິດ​ຂັດ ບໍ່​ໄດ້​ຕາມ​ຕາມ​ຄວາມຕ້ອງການ, ປະສິດທິຜົນ​ຕ່ຳ.

ທີ​ສາມ, ວຽກ​ງານ​ຄຸ້ມ​ຄອງ​ພະນັກງານ ສະມາຊິກ​ພັກ​ຖືກ​ປ່ອຍປະ​ລະ​ເຫຼີງ. ຫຼັກການ​ຈັດ​ຕັ້ງ ​ແລະ​ດຳ​ເນີນ​ຊີວິດ​ພັກ​ບໍ່​ໄດ້​ຮັບ​ການ​ປະຕິບັດ​ຢ່າງ​ເຂັ້ມ​ງວດ.

ທີ​ສີ່, ກະ​ໂຕ​ພະນັກງານ ສະມາຊິກ​ພັກ​ພາກສ່ວນ​ໜຶ່ງ ບໍ່​ຍອມ​ຝຶກ​ຝົນ​ຫຼໍ່​ຫຼອມ ​ແລະ ຮ່ຳຮຽນ, ປະ​ໃຫ້​ລັດ​ທະ​ອັດ​ຕະບຸກຄົນ​ຂະຫຍາຍຕົວ, ​ແຊກ​ຄຸມ, ທຳລາຍ​ຄຸນ​ທາດທີ່​ດີງາມ​ຂອງ​ສະມາຊິກ​ພັກ​ກອມ​ມຸນິ​ດ.

ທີ​ຫ້າ, ຄວາມ​ອ່ອນ​ແອ​ຕ່ຳ​ຕ້ອຍ​ໃນ​ການ​ຄຸ້ມ​ຄອງ​ບໍລິຫານ​ລັດ, ຄຸ້ມ​ຄອງ​ສັງຄົມ​ແມ່ນ​ເປັນສາ​ເຫດ ທັງ​ເປັນຜົນ​ທີ່​ຕາມ​ມາ​ ຂອງ​ສະພາບ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອ​ງ, ຄຸນສົມບັດ, ​ແບບ​​ແຜນດຳລົງ​ຊີວິດ. ດ້ວຍ​ສາຍຕາ​ສັດຈະ​ວິພາກ ​ແລະ ​ເຂັ້ມ​ງວດ, ຕ້ອງ​ຖື​ວ່າ​ນີ້​ເປັນສາ​ເຫດ​ຕົ້ນຕໍ.

ວິທີ​ແກ້​ໄຂ​ເພື່ອ​ປ້ອງ​ກັນ​ແລະ​ຕ້ານ ຄວາມ​ເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​

ເພື່ອ​ປ້ອງ​ກັນ​ແລະ​ຕ້ານສະພາບຄວາມ​ເສື່ອ​ມ​ໂຊມ​ທາງດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​​ໃນ​ພະນັກງານ ສະມາ​ຊິກ​ພັກພາກສ່ວນ​ໜຶ່ງ​ທີ່​ບໍ່​ໜ້ອຍ​ໃນ​ປັດຈຸບັນ, ຕ້ອງ​ຜັນ​ຂະຫຍາຍ​ປະຕິບັດ​ລະບົບ​ບັນດາວິທີ​ແກ້​ໄຂ​ໜຶ່ງ​ຢ່າງ​ຂ້ຽວຂາດ, ຄົບ​ຊຸດ.

ບັນດາ​ວິທີ​ແກ້​ໄຂ​ໃນ​ວຽກ​ງານ​ກໍ່ສ້າງ​ພັກ

ພ້ອມໆ​ກັບ​ການ​ສືບ​ຕໍ່​ປະຕິບັດ​ບັນດາ​ແຜນ​ນະ​ໂຍບາຍ, ມະຕິ, ຄຳ​ສັ່ງ, ຂໍ້​ກຳນົດ​ກ່ຽວ​ກັບ​ການ​ກໍ່ສ້າງ​ພັກ, ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ກຳນົດ: ​ເດັດດ່ຽວ, ຕັ້ງ​ໝັ້ນດ້ວຍ​ຄວາມ​ຕັດ​ສີນ​ໃຈ​ການ​ເມືອງ​ສູງ ສືບ​ຕໍ່​ຍູ້​ແຮງ​ການ​ປະຕິບັດ​ມະຕິ​ຂອງກອງ​ປະຊຸມ​ສູນ​ກາງ​ພັກຄັ້ງ​ທີ 4 (ສະ​ໄໝ​ທີ XI) ວ່າ​ດ້ວຍ​ການ​ກໍ່ສ້າງ​ພັກ, ຊຶ່ງ​ຮຽກຮ້ອງ​ໃຫ້​ຕ້ອງ​ສຸມ​ໃສ່​ປະຕິບັດ​ບັນດາ​ໜ້າ​ທີ່, ວິທີ​ແກ້​ຕົ້ນຕໍ​ຈຳນວນ​ໜຶ່ງ​ດັ່ງ​ນີ້:

ທີ​ໜຶ່ງ, ຍູ້​ແຮງ​ການ​ສະຫລຸບ​ສັງ​ລວມພຶດຕິ​ກຳ, ຄົ້ນ​ຄວ້າ​ວິທະຍາສາດ, ຄົ້ນຄວ້າ​ທິດ​ສະ​ດີກາ​ນ​ເມືອງ.

ຍູ້​ແຮງ​ການ​ສະຫລຸບ​ສັງ​ລວມພຶດຕິ​ກຳ, ຄົ້ນ​ຄວ້າ​ວິທະຍາສາດ, ຄົ້ນຄວ້າ​ທິດ​ສະ​ດີ​ໃນ​ທົ່ວ​ລະບົບ​ການ​ເມືອງ, ພິ​ເສດ​​ແມ່ນ​ຢູ່​ບັນດາ​ສະ​ຖາ​ບັນ​ວິທະຍາສາດ, ມະຫາວິທະຍາ​ໄລ. ດຳ​ເນີນ​ການບຳລຸງອົບຮົມທິດ​ສະ​ດີ, ບຳລຸງ​ຄວາມ​ຮູ້​ໃໝ່​ຢ່າງ​ເປັນ​ປະຈຳ​ໃຫ້​ແກ່​ພະນັກງານ ສະມາຊິກ​ພັກ, ​ເປັນ​ຕົ້ນ​ແມ່ນ​ພະນັກງານ​ການ​ນຳ, ພະນັກງານ​ຄຸ້ມ​ຄອງ​ບໍລິຫານ​ຂັ້ນ​ຕ່າງໆ, ພິ​ເສດ​ແມ່ນ​ຂັ້ນ​ສູນ​ກາງ.

ທີ​ສອງ, ​ເພີ່ມ​ທະວີ​ວຽກ​ງານ​ແນວ​ຄິດ​ຕໍ່​ກັບ​ພະນັກງານ ສະມາຊິກ​ພັກ ​ແລະ ປະຊາ​ຊົນ.

ປ່ຽນ​ແປງ​ໃໝ່ວຽກ​ງານ​ໂຄສະ​ນາ ອົບຮົມ​ສຶກສາ​ການ​ເມືອງ​ແນວ​ຄິດ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ໃຫ້​ພະນັກງານ ສະມາຊິກ​ພັກ ​ໂດຍ​ຕິດ​ກັບ​ການສຳ​ຫຼວດກວດ​ກາ ຕີ​ລາຄາ ​ແລະ ມາດ​ຕະການ​ແກ້​ໄຂ​ບັນຫາ​ຮີບ​ດ່ວນ ​ໃນ​ວຽກ​ງານ​ກໍ່ສ້າງ​ພັກ​ຂອງ​ຂັ້ນ​ຕ່າງໆ, ສ້າງ​ຄວາມ​ເຊື່ອ​ຖື​ໃນ​ປະຊາຊົນ. ​ເພີ່ມ​ທະວີ​ການ​ຊີ້​ນຳ ນຳພາ​ຂອງບັນດາຄະນະ​ພັກ ຕໍ່​ກັບ​ວຽກ​ງານ​ແນວ​ຄິດ. ​ເສີມ​ຂະຫຍາຍ​ກຳລັງ​ແຮງ​ສັງ​ລວມ​ເພື່ອ​ຍູ້​ແຮງ​ວຽກ​ງານ​ແນວ​ຄິດຂອງ​ພັກ. ຍົກ​ສູງ​ຄຸນ​ນະພາ​ບຂອງ​ກົງຈັກ, ພະນັກງານ​ເຮັດ​ວຽກ​ງານ​​ແນວ​ຄິດ​ຂັ້ນ​ຕ່າງໆ. ​ເອົາ​ໃຈ​ໃສ່​ເຖິງ​ການ​ຕໍ່ສູ້​ທາງດ້ານ​ແນວ​ຄິດ, ທິດ​ສະ​ດີກາ​ນ​ເມືອງ​ປັດຈຸບັນ. ​ເພີ່ມ​ທະວີ​ການ​ຊີ້​ນຳ, ກຳນົດ​ທິດ​ທາງ​ການ​ເຄື່ອນ​ໄຫວ​ໃນ​ຂົງ​ເຂດ​ສິລະ​ປະ ວັນນະຄະດີ, ປະກອບສ່ວນ​ຢັ້ງຢືນ​ຄຸນຄ່າ​ຄຸນສົມບັດ ​ແລະ ບຸກຄະ​ລິກລັກສະນະ​ຂອງ​ຄົນ​ຫວຽດນາມ​ໃໝ່​ສັງຄົມ​ນິຍົມ.

​ເພີ່ມ​ທະວີ​ການ​ຊີ້​ນຳ ນຳພາ ​ແລະ​ຄຸ້ມ​ຄອງ​ສື່​ສິ່ງ​ພິມ ຕໍ່ໜ້າ​ຄວາມ​ຮຽກຮ້ອງ​ຕ້ອງການ​ໃໝ່. ປັບປຸງ​ການ​ເຄື່ອນ​ໄຫວ​ຖະ​ແຫຼ​ງຂ່າວ ໂຄສະ​ນາການ; ຄຸ້ມ​ຄອງ​ການ​​ເຄື່ອນ​ໄຫວສື່​ຂ່າວຢ່າງ​ມີ​ປະສິດທິ​ຜົນ ຖືກຕ້ອງ​ຕາງການ​ກຳນົດ​ທິດ​ຂອງ​ພັກ ​ແລະ​ລັດ. ປະຕິບັດ​ເປັນ​ຢ່າງ​ດີກາ​ນ​ໂຄສະນາ ຍ້ອງຍໍ​ຊົມ​ເຊີຍ​ວຽກ​ດີ ຄົນ​ເດັ່ນ; ​ເອົາ​ປັດ​ໄຈ​ຕັ້ງໜ້າ ​ເພື່ອ​ຍູ້​ຖອຍ​ຄວາມ​ຫຍໍ້​ທໍ້; ພ້ອນນັ້ນ​ກໍ​ຕຳ​ໜິວິຈານ, ຕໍ່ສູ້​ກັບ​​ບັນດາ​ປະກົດ​ການ​ເຊື່ອມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຂາດ​ຄວາມ​ຮັບຜິດຊອບ, ​ເປັນ​ແກ່​ຜົນ​ປະ​ໂຫຍ​ດສ່ວນ​ຕົວ, ລະ​ເມີດ​ມາດຕະຖານ​ທາງ​ຈະລິ​ຍະ​ທຳ, ​ແບບ​ແຜນ​ດຳ​ເນີນ​ຊີວິດ,.. ສຸມ​ໃສ່​ປັບປຸງ​ການ​ຄຸ້ມ​ຄອງ​ສື່​ຂ່າວ​ໃນ​ເຄືອ​ຂ່າຍ​ອິນ​ເທີ​ເນັດ, ບັນດາ​ເຄືອ​ຂ່າຍ​ສັງຄົມ ​ແລະ ບຼ໊ອກສ່ວນ​ຕົວ.

ພະນັກງານ​ນຳພາ, ຄຸ້ມ​ຄອງ​ຕ້ອງພົວພັນຕິດ​ຕໍ່ ສົນທະນາ​ໂດຍ​ກົງ​ກັບ​ປະຊາຊົນ​ຢ່າງ​ເປັນ​ປະຈຳ, ​ເປັນ​ເຈົ້າ​ການ​ກຳ​ຄວາມ​ຄິດ​ຈິດ​ໃຈ​ຂອງ​ພະນັກງານ ສະມາຊິກ​ພັກ, ຕີ​ລາຄາ ຄາດ​ຄະ​ເນ​ການ​ຜັນ​​ແປ​ດ້ານ​​ແນວ​ຄິດ​ຂອງ​ພະນັກງານ ສະມາຊິກ​ພັກ ​​ແລະ ມີ​ມາດ​ຕະການ​ເພື່ອ​ແກ້​ໄຂ​ຢ່າງ​ທັນ​ການ. ຕໍ່ສູ້​ຢ່າງ​ເດັດດ່ຽວ​ເພື່ອ​ທັບ​ມ້າງ​ກົນອຸບາຍ ​ແລະ ການ​ເຄື່ອນ​ໄຫວ “ຜັນ​ປ່ຽນ​ໂດຍ​ສັນຕິ” ຂອງ​ບັນດາ​ອິດ​ທິກຳລັງ​ສັດຕູ. ​ເປັນ​ເຈົ້າ​ການ​ໃນ​ການ​ປ້ອງ​ກັນ, ຕໍ່ສູ້, ຕຳ​ໜິວິຈານຕ້ານ​ປະກົດ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ​ພັກ. ຮັກສາ​ຄວາມ​ສາມັກຄີ​ເປັນ​ເອກະ​ພາບ​ໃນ​ພັກ, ຄວາມ​ເຫັນ​ດີ​ເຫັນ​ພ້ອມ​ສັງຄົມ.

ທີ​ສາມ, ຍູ້​ແຮງ​ການ​ຮ່ຳຮຽນ ​ແລະ ​ເຮັດຕາມ​ແນວ​ຄິດ, ຄຸນສົມບັດ ​ແລະ ​ແບບ​ແຜນ​ໂຮ່ຈິ​ມິນ ຕາມ​ຈິດ​ໃຈ​ຄຳ​ສັ່ງ​ສະບັບ​ເລກ​ທີ່ 05-CT/TW, ລົງ​ວັນ​ທີ 15 ພຶດສະພາ 2016, ຂອງ​ກົມ​ການ​ເມືອງ​ສູນ​ກາງ​ພັກ ຢ່າງ​ແທດ​ຈິງ​ ໂດຍ​ຕິດ​ກັບ​ວຽກ​ງານ, ການ​ຝຶກ​ຝົນ​ຫຼໍ່​ຫຼອມ, ການບຳລຸ​ງສ້າງ​ຕົວ​ເອງ​ປະຈຳ​ວັນ​ຂອງພະນັກງານ ສະມາຊິກ​ພັກ​ແຕ່ລະຄົນ, ​ເພື່ອ​ເຮັດ​ໃຫ້ການ​ປະຕິບັດ​ຕາມ​ແວ່ນ​ແຍງ​ຂອງ​ລຸງ​ໂຮ່ມີ​ປະສິດທິ​ຜົນ​ຕົວ​ຈິງ. ​ເສີມ​ຂະຫຍາຍ​ບົດບາດ​ເປັນ​ເຈົ້າ​ການ, ຕື່ນ​ຕົວ​ສະ​ໝັກ​ໃຈ​ຂອງ​ພະນັກງານ ສະມາຊິກ​ພັກ ​ໃນ​ການ​ຝຶກ​ຝົນ​ຫຼໍ່​ຫຼອມ, ຍົກ​ສູງ​ຫຼັກ​ໝັ້ນ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ທີ່​ດີ.

ທີ​ສີ່, ​ແຕ່​ລະ​ສຳນັກງານ​ອົງການ, ກົມ​ກອງ, ທ້ອງ​ຖິ່ນ​ຕ້ອງສຳຫຼວດ​ກວດຄືນ ​ແລະ ມີ​ແຜນການ​ແກ້​ໄຂ, ຜ່ານ​ຜ່າ​ສິ່ງ​ຄົງ​ຄ້າງ, ຂໍ້​ຈຳກັດ, ຂໍ້​ຂາດ​ຕົກ​ບົກພ່ອງ​ທີ່​ກອງ​ປະຊຸມ​ໃຫຍ່​ຄະນະ​ພັກ​ຂອງ​ຕົນ​ໄດ້​ຊີ້​ອອກ​ມາ; ​ເພື່ອ​​ແກ້​ໄຂ ດັດ​ແປງ ​ເພີ່ມ​ເຕີມ​ບັນດາ​ເນື້ອ​ໃນ​ທີ່​ຈຳ​ເປັນ​ຢ່າງ​ທັນ​ການ ​ແນ​ໃສ່​ຊີ້​ນຳ​ນຳພາ​ການ​ປະຕິບັດ, ຕິດ​ກັບ​ການ​ປະຕິບັດ​ມະຕິ​ກອງ​ປະຊຸ​ມໃຫຍຄັ້ງ​ທີ XII ຂອງ​ພັກ​ໃຫ້​ມັນ​ສອດຄ່ອງ​ກັນ, ຮັບປະກັນ​ປະສິດທິ​ຜົນ​ແທດ​ຈິງ, ​ເປັນ​ຕົ້ນ​ແມ່ນ​ ບັນດາ​ເນື້ອ​ໃນ​ທີ່​ຍັງ​ບໍ່​ທັນ​ປະຕິບັດ ຫຼື​ປະຕິບັດ​ບໍ່​ໄດ້​ຕາມ​ຈຸດປະສົງ ​ລະດັບ​ຄາດໝາຍ​ທີ່​ວາງ​ໄວ້ ​ແລະ ບັນດາ​ບັນຫາ​ສັບສົນ​ທີ່​ຫາ​ກໍ​ເກີດ​ຂຶ້ນ.

ທີ​ຫ້າ, ກ່ຽວ​ກັບ​ການຈັດ​ຕັ້ງ ພະນັກງານ ​ແລະ ການ​ດຳ​ເນີນຊີວິດ​ພັກ, ບັນດາ​ຄະນະ​ພັກ ການຈັດ​ຕັ້ງ​ພັກ, ບັນດາ​ອົງການ ກົມ​ກອງ​ຕ້ອງປັບປຸງ​ເພີ່ມ​ເຕີມ ດັດ​ແປງ​ກົດ​ລະບຽບ​ການ​ເຮັດ​ວຽກ​ໃຫ້​ສອດຄ່ອງ​ກັບ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ມະຕິ​ກອງ​ປະຊຸມ​ໃຫຍ່​ຄະນະ​ພັກ​ຂອງ​ຂັ້ນ​ຕົນ​ເອງ ​ແລະ ສະພາບການ​ຕົວ​ຈິງ​ຢູ່​ສຳນັກງານອົງການ, ກົມ​ກອງ, ທ້ອງ​ຖິ່ນ; ​ໃນ​ນັ້ນ, ​ເອົາ​ໃຈ​ໃສ່​ທຳ​ຄວາມ​ກະຈ່າງ​ແຈ້ງ​ກ່ຽວ​ກັບບົດບາດ, ຄວາມ​ຮັບຜິດຊອບ, ສິດ​ອຳນາດຂອງ​ໝູ່​ຄະນະ​ການ​ນຳ ​ແລະ ບຸກຄົນ​ຜູ້ນຳ​ໜ້າ ​ໃນ​ວຽກ​ງງານ​ຈັກ​ຕັ້ງ​ພະນັກງານ. ປ່ຽນ​ແປງ​ໃໝ່​ບັນດາ​ຂອດ​ໃນ​ວຽກ​ງານ​ພະນັກງານ ​ຢ່າງ​ແຂງ​ແຮງ, ຄົບ​ຊຸດ. ​ເອົາ​ການ​ຕີ​ລາຄາ​ພະນັກງານ​ເປັນ​ປະຖົມ​ປັດ​ໃຈ. ​ເປີດ​ກວ້າງ​ປະຊາທິປະ​ໄຕ​ໃນ​ແຕ່ລະ​ຂອດ​ຂອງ​ວຽກ​ງານ​ພະນັກງານ: ນັບ​ແຕ່​ຕີ​ລາຄາ​ພະນັກງານ, ກໍ່ສ້າງ​ແຜນ​ກຳນົດ, ບຳລຸງ​ສ້າງ ຈົນ​ເຖິງ​ຜັດປ່ຽນ, ​ແຕ່ງ​ຕັ້ງ, ​ແຕ່ງ​ຕັ້ງ​ຄືນ​ໃໝ່​ ຕາມ​ທິດ​ໃຫ້​ຫຼາຍ​ເປົ້າ​ໝາຍ​ໄດ້​ເຂົ້າ​ຮ່ວມ. ຍິ່ງ​ເປີດ​ກວ້າງ​ປະຊາທິປະ​ໄຕ​ຢ່າງ​ແທ້​ຈິງ, ຍິ່ງ​ມີ​ເງື່ອ​ນໄຂ​ເພື່ອຄັດ​ເລືອກ​ເອົາ​ຜູ້​ທີ່​ມີ​ຄຸນສົມບັດ ມີ​ຄວາມ​ເກັ່ງ​ກ້າ​ສາມາດ ​ໃຫ້​ມາ​ດຳລົງດຳ​ແໜ່​ງ ຮັບຜິດຊອບ​ໜ້າ​ທີ່​ທີ່​ສຳຄັນ ​ໃນ​ກົງຈັກ​ຂອງ​ອົງການ​ພັກ ​ແລະ ລັດ. ​ແກ້​ໄຂ​ຜ່ານ​ຜ່າ​ຈຸດ​ອ່ອນ​ໃນ​ແຕ່ລະ​ຂອດ​ຂອງ​ວຽກ​ງານ​ພັກ.

ທົດ​ລອງ​ມອບ​ສິດ​ໃຫ້​ເລຂາ​ຄະນະ​ພັກ​ເປັນ​ຜູ້​ຄັດ​ເລືອກ ​ແນະນຳ​ຜູ້​ອອກຮັບ​ເລືອກ​ຕັ້ງ​ເປັນກຳມະການ​ປະຈຳ​ຄະນະ​ພັກ; ຂັ້ນ​ຫົວໜ້າ​ມີ​ຄວາມ​ຮັບ​ຜິດ​ຊອບ​ໃນ​ການ​ຄັດ​ເລືອກ​ແລະ​ແນະນຳຜູ້​ທີ່​ຈະ​ໄດ້​ເລືອກ​ຕັ້ງ, ​ແຕ່ງ​ຕັ້ງ​ເປັນ​ຮອງ​ຫົວໜ້າ; ທົດ​ລອງລະບອບ​ແນະນຳ​ຜູ້​ອອກ​ຮັບ​ເລືອກ​ຕັ້ງ, ລະບອບ​ຝຶກ​ງານ​ການ​ນຳ, ການ​ຄຸ້ມ​ຄອງ​ບໍລິຫານ; ປະຕິບັດ​ລຳດັບ​ດຳ​ເນີນ​ການ​ແນະນຳ​ບຸກຄະລາ​ກອນ ຕາມ​ທິດ​ໃຫ້​ຜູ້​ທີ່​ຈະ​ໄດ້​ຮັບ​ການ​ແຕ່ງ​ຕັ້ງຕ້ອງ​ສະ​ເໜີ​ໂຄງການ ຫຼື​ແຜນການ​ປະຕິບັດ​ງານ​ຂອງ​ຕົນ ກ່ອນ​ເມື່ອ​ທີ່​ຂັ້ນ​ມີ​ສິດ​ອຳນາດ​ພິຈາລະນາ ຕັດ​ສີນ​ຕົກລົງ​ການ​ແຕ່ງ​ຕັ້ງ.

ປັບປຸງ​ການຈັດ​ຕັ້ງ, ຍົກ​ສູງ​ຄວາມ​ສາມາດ​ນຳພາ, ກຳລັງ​ແຮງ​ສູ້​ຮົບ​ ຂອງ​ອົງການ​ຈັດ​ຕັ້ງຮາກ​ຖານພັກ, ຍົກ​ສູງ​ຄຸນ​ນະພາ​ບ​ການ​ດຳ​ເນີນ​ຊີວິດຂອງໜ່ວຍ​ພັກ, ອົງຄະນະ​ພັກ; ປະຕິບັດ​ຫຼັກການ​ຕິ​ຊົມ​ຕົນ​ເອງ ​ແລະ ຕິ​ຊົມ​ຢ່າງ​ເຂັ້ມ​ງວດ.

ທີ​ຫົກ, ​ເພີ່ມ​ທະວີ​ວຽກ​ງານ​ກວດກາ, ຕິດຕາມ​ກວດກາ, ກວດລັດຖະກາ​ນ, ກວດ​ສອບ, ສືບສວນ, ຟ້ອງ​ຄະດີ, ພິພາກສາ ​ເພື່ອ​ຍົກ​ສູງປະສິດທິ​ຜົນ​ຂອງ​ວຽກ​ງານ​ປ້ອງ​ກັນ​​ແລະ​ຕ້ານການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ. ສະຫລຸບ​ສັງ​ລວມຢ່າງຮອບດ້ານ​ວຽກ​ງານ​ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ, ປະຕິບັດ​ການ​ປະຢັດ; ດັດ​ແປງ ​ເພີ່ມ​ເຕີມ​ກົດໝາຍ​ວ່າ​ດ້ວຍ​ການ​ປ້ອງ​ກັນ, ຕ້ານ​ການ​ສໍ້​ລາດ​ບັງ​ຫຼວງ. ປັບປຸງ​ບູລະນະ ​ແລະ ​ເພີ່ມ​ທະວີ​ຄວາມ​ຮັບຜິດຊອບ, ຍົກ​ສູງ​ປະສິດທິ​ຜົນ​ການ​ເຄື່ອນ​ໄຫວຂອງ​ອົງການປ້ອງກັນ, ຕ້ານ​ການ​ສໍ້​ລາດ​ບັງ​ຫຼວງ. ພິພາກສາ​ບັນດາ​ຄະດີ​ສໍ້​ລາດ​ບັງ​ຫຼວງຢ່າງ​ເຂັ້ມ​ງວດ, ກ່ອນ​ອື່ນ​ໝົດ​ແມ່ນ​ບັນດາ​ຄະດີ​ທີ່​ຮ້າຍ​ແຮງ, ສັບສົນ, ກໍ່​ຄວາມ​ຮ້ອນ​ເຄື່ອງ​ໃນ​ປະຊາຊົນ. ຈັດ​ຕັ້ງ​ໃຫ້​ປະຊາຊົນ​ປະກອບສ່ວນ​ກໍ່ສ້າງ​ພັກຕາມ​ກຳນົດ​ເວລາ ​ໂດຍ​ຜ່ານ​ແນວ​ໂຮມ​ປະ​ເທດ​ຊາດ ​ແລະ ບັນດາ​ອົງຄະ​ນະ​ການ​ເມືອງ - ສັງຄົມ.

ທີ​ເຈັດ, ຮີບ​ດ່ວນ​ໃນ​ການ​ກວດຄືນ, ​ເລີກ​ລ້າງ​ບັນດາ​ກົນ​ໄກ, ນະ​ໂຍບາຍ​ທີ່​ບໍ່​ສອດຄ່ອງ​ອີກ; ກໍ່ສ້າງ, ປະກາດ​ໄຊ້ບັນດາ​ນະ​ໂຍບາຍ​ໃໝ່​ທີ່​ຄົບ​ຊຸດ ​ເພື່ອ​ປ່ຽນ​ແປງ​ໃໝ່​ວຽກ​ງານ​ພະນັກງານຢ່າງ​ແຂ​ງ​ແຮງ.

ກວດຄືນ​ບັນດາ​ກົນ​ໄກ, ນະ​ໂຍບາຍ ​ແລະ ​ເອກະສານ​ກົດໝາຍ​ ເພື່ອກວດກາ, ​ຄຸ້ມ​ຄອງ​ເງິນ​ທຶນ​ແລະ​ຊັບ​ສີນ​ຂອງ​ລັດ​ຢ່າງ​ແໜ້ນ​ແຟ້ນ, ລົບ​ລ້າງ​ຊ່ອງວ່າງຕ່າງໆ​ໃນ​ກົດໝາຍ, ນະ​ໂຍບາຍທີ່​ຖືກ​ພວກຄົນ​ຮ້າຍ​ສວຍ​ໃຊ້​ໂດຍ​ງ່າຍ​ເພື່ອ​ສໍ້​ລາດ​ບັງຫຼວງ.

ປະຕິບັດ​ການ​ປະຕິ​ຮູບ​ການ​ບໍລິຫານ​ລັດ ​ແລະ ການ​ປະຕິ​ຮູບ​ການ​ບໍລິຫານ​ຈັດການ​ໃນ​ພັກ​ຢ່າງ​ຕັ້ງໜ້າ. ກວດຄືນ, ​ເລີກ​ລ້າງ​ບັນດາ​ກົນ​ໄກ, ນະ​ໂຍບາຍ​ທີ່​ບໍ່​ສອດຄ່ອງ​ອີກ, ທີ່​ຂັດຂວາງ​ການ​ປະຕິບັດໜ້າ​ທີ່​ຂອງ​ພະນັກງານ ຂ້າ​ລັດຖະການ; ດັດ​ແປງ ປັບປຸ​ງ​ເພີ່ມ​ເຕີມ ຫຼື​ປະກາດ​​ໃຊ້ໃໝ່ ຂໍ້​ກຳນົດ​ຕ່າງໆ​ຂອງ​ພັກ​ ແລະ ລັດ ຕາມ​ທິດ​ເຊີດ​ຊູຍິ່ງ​ກວ່າ​ອີກ ​ຄວາມ​ຮັບຜິດຊອບ ​ແລະ ສິດ​ອຳນາດຂອງ​ຜູ້ນຳ​ໜ້າ​ ໃນ​ການ​ພົວພັນ​ລະຫວ່າງ​ໝູ່​ຄະນະ ​ແລະ ບຸກຄົນ ຊຶ່ງ​ທັງ​ຕ້ອງ​ເຄົາລົບ​ນັບຖື​ຫຼັກການ​ລວມໝູ່ ທັງ​ຕ້ອງ​ເສີມ​ຂະຫຍາຍ​ບົດບາດ​ຂອງ​ແຕ່ລະບຸກຄົນ​ຜູ້ນຳ​ໜ້າ; ສົ່ງ​ເສີມ​, ປົກ​ປັກ​ຮັກສາ​ຜູ້ກ້າ​ຄິດ, ກ້າ​ເຮັດ, ກ້າ​ຮັບຜິດຊອບ, ຕັ້ງ​ຜົນ​ປະ​ໂຫຍ​ດສ່ວນ​ລວມຂຶ້ນ​ເທິງ​ຜົນ​ປະ​ໂຫຍ​ດສ່ວນ​ຕົວ.

ຍູ້​ແຮງການ​ປະຕິ​ຮູບ​ລະບ​ອບ​ເງິນ​ເດືອນ, ​ເຮືອນ​ຢູ່ ​ແລະ ປະຕິບັດ​ມັນ​ໂດຍ​ໄວ, ຕ້ານ​ການ​ປະຕິບັດ​ແບບ​ສະ​ເຫຼ່ຍ, ສະ​ເໝີ​ເທົ່າ​ທຽມ​ກັນ; ພ້ອມ​ກັນ​ນັ້ນ​ກໍ​ຕ້ານສິດ​ພິ​ເສດ ຜົນ​ປະ​ໂຫຍ​ດພິ​ເສດ; ຕິດ​ກັບ​ການ​ຫລຸດ​ບັນຈຸ​ບຸກຄະ​ບາກ​ອນ​ໃຫ້​ກະທັດ​ລັດ ​ແລະ ການຈັດ​ວາງ​ຖັນ​ແຖວ​ພະນັກງານ ລັດຖະກອນ​ຄືນ​ໃໝ່.

ປະກາດ​ໃຊ້​ໂດຍ​ໄວ​ກົດ​ລະບຽບ​ຕິດຕາມ​ກວດກາ (​ໂດຍ​ກົງ ​ແລະ ​ໂດຍ​ທາງ​ອ້ອມ) ຂອງ​ປະຊາຊົນ​ຕໍ່​ກັບ​ພະນັກງານ ສະມາຊິກ​ພັກ ການ​ຈັກ​ຕັ້ງ​ພັກ ​ແລະ ອຳນາດ​ການ​ປົກຄອງ​ຂັ້ນ​ຕ່າງໆ; ​ໃນ​ນັ້ນ​ມີກົນ​ໄກ​ຕິດຕາມ​ກວດກາ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງຄະ​ນະ​ການ​ເມືອງ-ສັງຄົມ, ​ເກັບ​ກຳ​ຄວາມ​ເຫັນ​ປະກອບສ່ວນຂອງ​ຜູ້​ຊ່ຽວຊານ, ນັກວິທະຍາສາດ; ກົນ​ໄກ​ໃຫ້ແນວ​ໂຮມ​ປະ​ເທດ​ຊາດ, ບັນດາ​ອົງຄະ​ນະ​ການ​ເມືອງ-ສັງຄົມ ​ແລະ ປະຊາຊົນ ​ເຂົ້າ​ຮ່ວມ​ການ​ປະກອບ​ຄວາມ​ເຫັນ​ກໍ່ສ້າງ​ພັກ, ກໍ່ສ້າງ​ອຳນາດ​ການ​ປົກຄອງ.

ບັນດາ​ວິທີ​ແກ້​ໄຂ​ໃນ​ການ​ເພີ່ມ​ທະວີ​ການ​ຄຸ້ມ​ຄອງ​ບໍລິຫານ​ລັດ

ທີ​ໜຶ່ງ, ກໍ່ສ້າງ ​ແລະ ປັບປຸງ​ບູລະນະ​ລະບົບ​ກົດໝາຍ.

​ເຕົ້າ​ໂຮມ​ທຸກ​ແຫຼ່ງພະລັງ, ​ເຊີດ​ຊູ​ຄວາມ​ຮັບຜິດຊອບ​ຂອງ​ບັນດາ​ຂະ​ແໜງ​ການ, ຂັ້ນ​ຕ່າງໆ, ສູ້​ຊົນ​ກໍ່ສ້າງ ແລະ ປັບປຸງ​ບູລະນະ​ລະບົບ​ກົດໝາຍ ທາງ​ດ້ານຈຳນວນ ​ແລະ ຄຸນ​ນະພາ​ບ. ກໍ່ສ້າງ ​ແລະ ປັບປຸງ​ບູລະນະ​ລະບົບບັນດາ​ເອກະສານ​ກຳນົດກົດໝາຍ ຮັບປະກັນ​ລັກສະນະ​ເອກະ​ພາບ​ໃນຕົວ, ຈະ​ແຈ້ງ ກ່ຽວ​ກັບ​ລຳດັບ​ຊັ້ນ, ຄວາມ​ຊັດ​ເຈນ, ​ໂປ່​ງ​ໃສ ​ແລະ ​ເຂົ້າ​ໃຈງ່າຍ, ປະຕິບັດ​ງ່າຍ, ມີ​ລັກສະນະ​ປະຕິບັດ​​ເປັນ​ຈິວໄດ້​ສູງ. ປະຕິ​ຮູບ​ໂດຍ​ພື້ນຖານ​ລຳດັບ​ການ​ກໍ່ສ້າງ ​ແລະ ປະກາດ​ໃຊ້​ເອກະສານ​ກຳນົດ​ກົດໝາຍ; ຮັບປະກັນ​ເພີ່ມ​ຂຶ້ນ​ທາງ​ດ້ານ​ຈຳນວນ, ທັງ​ຍົກ​ສູງຄຸນ​ນະພາ​ບຂອງ​ເອກະສານ; ​ເສີມ​ຂະຫຍາຍ​ປະຊາທິປະ​ໄຕ, ລະດົມສະຕິ​ປັນຍາ​ຢ່າງ​ກວ້າງຂວາງ.

ທີ​ສອງ, ກໍ່ສ້າງ ​ແລະ ປັບປຸງ​ບູລະນະ​ລະກົນ​ໄກ, ນະ​ໂຍບາຍ​ຄຸ້ມ​ຄອງ​ເສດຖະກິດ - ສັງຄົມ.

​ໃນ​ຂົງ​ເຂດ​ເສດຖະກິດ, ສຸມ​ໃສ່ປັບປຸງ​ບູລະນະ​ລະລະບອບ​ກົດໝາຍ​ກ່ຽວ​ກັບ​ກຳມະສິດ ​​ແນໃສ່ຫັນ​ແນວທາງ​ພັດທະນາ​ເສດຖະກິດ​ຕະຫຼາດ​ກຳນົດ​ທິດ​ສັງຄົມ​ນິຍົມ​ໃຫ້​ເປັນ​ນິຕິ​ກຳ. ​ໃນ​ຂົງ​ເຂດ​ສັງຄົມ ​ແລະ ປະຕິບັດ​ນະ​ໂຍບາຍ​ສັງຄົມ, ​ເອົາ​ໃຈ​ໃສ່​ເຖິງ​ວຽກ​ງານ​ການ​ກໍ່ສ້າງ ​ແລະ​ປະກາດ​ໃຊ້​ບັນ​ດາ​ເອກະສານ​ກົດໝາຍ ຮັບປະກັນ​ປະຕິບັດ​ບັນດາ​ນະ​ໂຍບາຍ​ກ່ຽວ​ກັບ​ຄວາມ​ສະ​ເໝີ​ພາບ​ທາງ​ສັງຄົມ​ ໃນ​ການ​ເຂົ້າ​ເຖິງ ​ແລະ ຊົມ​ໃຊ້ການ​ບໍລິການ​ສາທາລະນະ, ສັງຄົມ​ສົງ​ເຄາະ, ການ​ຫລຸດຜ່ອນ​ຄວາມທຸກ​ຍາກ... ​ໃນ​ຂົງ​ເຂດ​ປ້ອງ​ກັນຊາ​ດ, ປ້ອງ​ກັນ​ຄວາ​ມສະຫງົບ, ລະບຽບ​ຄວາມ​ປອດ​ໄພ​ສັງຄົມ, ​ໃຫ້​ຄວາມ​ສຳຄັນ​ແກ່​ການ​ກໍ່ສ້າງ ​ແລະ ປັບປຸງ​ບູລະນະ​ລະກົດໝາຍ​ກ່ຽວ​ກັດ​ຊາຍ​ແດນ, ​ອານາເຂດ​, ​ເຂດ​ທະ​ເລ, ຄວາມ​ໝັ້ນຄົງ​ແຫ່ງ​ຊາດ. ​ໃນ​ຂົງ​ເຂດ​ການຈັດ​ຕັ້ງ ​ແລະ ​ເຄື່ອນ​ໄຫວ​ຂອງ​ກົງຈັກ​ແຫ່ງ​ລັດ, ສືບ​ຕໍ່​ຫັນ​ເປັນ​ນິຕິ​ກຳ​ຢ່າງ​ລະອຽດ​ເປັນ​ເອກະ​ພາບ ຕໍ່​ຫຼັກການ​ທີ່​ວ່າ ອຳນາດ​ລັດ​ແມ່ນ​ເປັນ​ເອກະ​ພາບ, ມີ​ການ​ແບ່ງ​ງານ​ຢ່າງ​ຈະ​ແຈ້ງ, ການ​ສົມທົບ ​ແລະ​ກວດກາ​ອຳນາດ​ຢ່າງ​ແໜ້ນ​ແຟ້ນ ລະຫວ່າງ​ບັນດາ​ອົງການ​ລັດ​ ໃນ​ການປະຕິບັດ​ບັນດາ​ສິດ​ນິຕິບັນຍັດ, ​ບໍລິຫານ, ຕຸລາການ.

ທີ​ສາມ, ​ເພີ່ມ​ທະວີ​ວຽກ​ງານ​ກວດກາ​ລັດ.

ກໍ່ສ້າງລະບຽບ​ກົດໝາຍ​ທີ່​ເປັນ​ມາດຕະຖານ​ໃຫ້​ແກ່​ການ​ແກ້​ໄຂການ​ຮ້ອງທຸກ, ຟ້ອງ​ຮ້ອງ​ໃນ​ປັດຈຸບັນ. ຍູ້​ແຮງ​ວຽກ​ງານ​ໂຄສະນາ, ອົບຮົມ​ສຶກສາ​ກ່ຽວ​ກັບການ​ຮ້ອງທຸກ, ຟ້ອງ​ຮ້ອງ. ສຸມ​ໃສ່​ຊີ້​ນຳ​ວຽກ​ງານ​ກວດກາ​ການ​ປະຕິບັດສາມ​ຈຸດ​ໃຫຍ່​ໃນ​ການ​ແກ້​ໄຂການ​ຮ້ອງທຸກ, ຟ້ອງ​ຮ້ອງ: ວຽກ​ງານຕ້ອນຮັບ​ປະຊາຊົນ; ​ແກ້​ໄຂການ​ຮ້ອງທຸກຂອງ​ຫຼາຍ​ຄົນ; ​ແກ້​ໄຂ​ຢ່າງ​ຂາດ​ຕົວບັນດາ​ຄະດີ ກໍລະນີ​ທີ່​ຍັງ​ຄົງ​ຄ້າງ, ຮ້ອນ​ເຄືອງທີ່​ແກ່ຍາວ.

ບັນດາ​ວິທີ​ແກ້​ໄຂໃນນ​ການ​ເສີມ​ຂະຫຍາຍບົດບາດ​ຂອງ​ປະຊາຊົນ, ຂອງ​ບັນດາ​ອົງຄະ​ນະ​ການ​ເມືອງ​-ສັງຄົມ, ສື່​ ​ແລະ ຫາງ​ສຽງ​ສັງຄົມ

ທີ​ໜຶ່ງ, ເສີມ​ຂະຫຍາຍບົດບາດ​ຕິດຕາມ​ກວດກາ, ວິຈານ​ສັງຄົມຂອງ​ປະຊາຊົນ. ຄຽງ​ຄູ່​ກັບ​ການ​ວິຈານ​ຂອງ​ແນວ​ໂຮມ​ປະ​ເທດ​ຊາດ​ຂັ້ນ​ຕ່າງໆ ​ແລະ ຂອງ​ບັນດາ​ອົງຄະ​ນະ​ປະຊາຊົນ, ຄວນ​ສ້າງ​ເວທີ​ປາ​ໄສ​ໃນ​ໜັງສືພິມ, ສື່ມວນຊົນ ​ແນ​ໃ​ສ່ດຶງ​ດູດ​ເອົາ​ການ​ເຂົ້າ​ຮ່ວມສົນທະນາ ປະກອບ​ຄວາມ​ເຫັນ​ວິຈານ ຕິ​ຊົມຂອງ​ປະຊາຊົນ ກ່ຽວ​ກັບ​ແຜນ​ນະ​ໂຍບາຍ, ນະ​ໂຍບາຍ​ ຂອງພັກ​ແລະ​ລັດ, ພິ​ເສດ​ແມ່ນ​ບັນດາ​ແຜນ​ນະ​ໂຍບາຍ, ນະ​ໂຍບານ​ທີ່​ມີ​ຄວາມ​ກ່ຽວຂ້ອງ, ກະທົບ​ຢ່າງ​ກວ້າງຂວາງເຖິງ​ປະຊາຊົນ. ​ເພື່ອ​ໃຫ້ການ​ວິຈານ​ສັງຄົມ​ມີ​ຜົນ​ກະທົບ​ຢ່າງ​ຕັ້ງໜ້າ​ນັ້ນ, ​ແມ່ນ​ຕ້ອງ​ກຳນົດ​ທິດ, ​ເສີມ​ຂະຫຍາຍ​ສິດ​ເປັນ​ເຈົ້າຂອງ​ປະຊາຊົນ, ຕິດ​ແໜ້ນ​ກັບ​ຈຸດໝາຍ​ຂອງ​ການ​ວິຈານ​ສັງຄົມ. ​ເພີ່ມ​ທະວີ​ກົນ​ໄກ​ຕິດຕາມ​ກວດກາ, ວິຈານ​ສັງຄົມ​ຂອງ​ແນວ​ໂຮມ​ປະ​ເທດ​ຊາດ ​ແລະ ບັນດາ​ອົງຄະ​ນະ​ການ​ເມືອງ​-ສັງຄົມ ຕໍ່​ກັບ​ການ​ເຄື່ອນ​ໄຫວ​ຂອງ​ບັນດາ​ອົງການ ການຈັດ​ຕັ້ງ​ໃນ​ລະບົບ​ການ​ເມືອງ. ​ເສີມ​ຂະຫຍາຍ​ບົດບາດ​ຂອງປະຊາຊົນ​ ໃນ​ການ​ຕິດຕາມ​ກວດກາ​ຖັນ​ແຖວ​ພະນັກງານ ສະມາຊິກ​ພັກ, ຂ້າ​ລັດຖະການ, ຢູ່​ບ່ອນ​ເຮັດ​ວຽກ ກໍ​ຄື​ຢູ່​ທີ່ຢູ່​ອາ​ໄສ.

ທີ​ສອງ, ເສີມ​ຂະຫຍາຍ​ບົດບາດຂອງ​ຫາງ​ສຽງ​ສັງຄົມ. ໝູນ​ໃຊ້ຫາງ​ສຽງ​ສັງຄົມ​ແມ່ນ​ເພື່ອເສີມຂະຫຍາຍບັນດາມາດ​ຕະການ ​ຕີ​ລາຄາ, ດັດສົມ​ການ​ພົວພັນ​ສັງຄົມ, ສຶກສາ, ຕິດຕາມ​ກວດກາ, ​ໃຫ້​ຄຳ​ປຶກສາ - ວິຈານ ​ແລະ ບັນ​ເທົາ​ຈິດຕະສັງຄົມ ​ໃນ​ການ​ຕໍ່ສູ້​ປ້ອງ​ກັນ​ແລະຕ້ານ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ຂອງ​ພະນັກງານ ສະມາຊິກ​ພັກພາກສ່ວນ​ໜຶ່ງ. ​ເພີ່ມ​ທະວີ​ກົນ​ໄກ​ຕິດຕາມ​ກວດກາ​ກ່ຽວ​ກັບຄຸນສົມບັດ ຈະລິ​ຍະ​ທຳ ​ແບບ​ແຜນ​ດຳລົງ​ຊີວິດ​ຂອງ​ພະນັກງານ ສະມາຊິກ​ພັກ ຂ້າ​ລັດຖະການ ​ໂດຍ​ບັນດາ​ອົງການ​ລັດ, ອົງການ​ຈັດ​ຕັ້ງການ​ເມືອງ​-ສັງຄົມ, ​ເປັນ​ຕົ້ນ​ແມ່ນ​ໂດຍ​ອົງການ​ຈັດ​ຕັ້ງ​ພັກ. ປັບປຸງ​ບູລະນະ​ລະບົບ​ບັນດາ​​ເອກະສານຂໍ້​ກຳນົດກົດ​ລະບຽບ ​ແລະ ສະ​ຖາ​ບັນ​ຕ່າງໆທີ່​ຮັບປະກັນ​ຄວາມ​ສັກສິດ​ໃນ​ການ​ປ້ອງ​ກັນ ​ແລະ ​ແກ້​ໄຂ​ຄວາມ​ເສື່ອ​ມ​ໂຊມ​ໃນ​ພັກ. ສູນ​ກາງ​ພັກ, ສະພາ​ແຫ່ງ​ຊາດ, ລັດຖະບານ ​ແລະ ສູນ​ກາງ​ແນວ​ໂຮມ​ປະ​ເທດ​ຊາດ​ຫວຽດນາມ, ບັນດາອົງຄະ​ນະ​ການ​ເມືອງ​-ສັງຄົມ ຕ້ອງ​ປະກາດ​ໃຊ້ ​ແລະ ປະຕິບັດ​ຢ່າງ​ເຂັ້ມ​ງວດ​ຂໍ້​ກຳນົດ​ກ່ຽວ​ກັບ​ຄວາມ​ຮັບຜິດຊອບ ແລະ ການ​ເປັນ​ແບບຢ່າງ​ຂອງ​ພະນັກງານ​ການ​ນຳຂັ້ນ​ຕ່າງໆ ​ໃນ​ການ​ຕິ​ຊົມ​ຕົນ​ເອງ ​ແລະ ຕິ​ຊົມໝູ່ຄູ່; ​ໃນ​ການ​ຮ່ຳຮຽນ ​ແລະ ປະຕິ​ບັດ​ຕາມ​ແນວ​ຄິດ, ຕຸ​ນສົມບັດ, ​ແບບ​​ແຜນ​ໂຮ່ຈິ​ມິນ.

ທີ​ສາມ, ເສີມ​ຂະຫຍາຍ​ບົດບາດຂອງ​ສື່​ສິ່ງ​ພິມ. ​ເພີ່ມ​ທະວີ​ການ​ນຳພາ​ຂອງ​ພັກ ​ແລະ ການ​ຄຸ້ມ​ຄອງ​ຂອງ​ລັດຕໍ່​ກັບ​ການ​ເຄື່ອນ​ໄຫວ​ຂອງ​ສື່​ສິ່ງ​ພິມ ຕາມ​ທິດ​ນຳ​ທີ່​ວ່າ ພັດທະນາ​ໄປ​ຄຽງ​ຄູ່​ກັບ​ຄຸ້ມ​ຄອງ​ໃຫ້​ດີ. ວາງ​ແຜນ​ກຳນົດ​ລະບົບ​ສື່​ສິ່ງ​ພິມ​ໃຫ້ສົມ​ດຸນ, ຄົບ​ຊຸດ, ສົມ​ເຫດ​ສົມ​ຜົນ. ​ເພີ່ມ​ເຕີມ, ປັບປຸງ​ບູລະນະ​ລະບົບ​ກົດໝາຍ, ລະບອບ​ນະ​ໂຍບາຍ​ກ່ຽວ​ກັບ​ສື່​ສິ່ງ​ພິມ. ປ່ຽນ​ແປງ​ໃໝ່ ​ແລະ ຍົກ​ສູງ​ຄຸນ​ນະພາ​ບຂອງການ​ຄຸ້ມ​ຄອງ, ບຳລຸ​ງສ້າງ​ພະນັກງານ​ສື່​ສິ່ງ​ພິມ. ​ເພີ່ມ​ທະວີ​ວຽກ​ງານ​ຄົ້ນຄວ້າ​ທິດ​ສະ​ດີ ​ແລະ​ວິທະຍາສາດ​ກ່ຽວ​ກັບການ​ຖະ​ແຫຼ​ງຂ່າວ - ສື່ສານ.

ທີ​ສີ່, ເສີມ​ຂະຫຍາຍ​ບົດບາດ, ການ​ກະທົບ, ຜົນ​ສະທ້ອນ​ຂອງ​ການ​ຂົນຂວາຍ “ທົ່ວ​ປວງຊົນສາມັກຄີ​ກໍ່ສ້າງ​ຊີວິດ​ວັດທະນະທຳ​ໃໝ່”.

ບັນດາ​ວິທີ​ແກ້​ໄຂໃນ​ການ​ຈຳກັດ​ການ​ກະທົບ​ຫຍໍ້​ທໍ້​ຈາກ​ພາຍ​ນອກ

ທີໜຶ່ງ, ຈັດ​ຕັ້ງ​ການ​ຕໍ່ສູ້​ຢ່າງ​ມີ​ປະສິດທິ​ຜົນ​ກັບ​ບັນດາ​ທັດສະນະ​ທີ່​ຜິດພາດ, ບັນດາ​ຖ້ອຍ​ທຳນອງ​ປັ້ນ​ແຕ່ງ ໃສ່​ຮ້າຍ​ປ້າຍ​ສີ​ຂອງບັນດາ​ອິດ​ທິກຳລັງ​ສັດຕູ​ກ່ຽວ​ກັບ​ບັນຫາ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີ​ວິດ.

ຍູ້​ແຮງ​ການ​ໂຄສະນາ, ອົບຮົມ​ສຶກສາ​ເພື່ອ​ຍົກ​ສູງ​ຄວາມ​ຮັບ​ຮູ້​ຂອງ​ພະນັກງານ ສະມາຊິກ​ພັກ​ກ່ຽວ​ກັບ​ສະພາບ​ການ, ໜ້າ​ທີ່ການ​ປະຕິວັດ ​ແລະ ​ເຫັນ​ແຈ້ງ​ເລ່ຫຼ່ຽມ ກົນອຸບາຍ​ຂອງ​ບັນດາ​ອິດ​ທິກຳລັງ​ສັດຕູທີ່​ຫວັງ​ຕ້ານຄືນ, ທຳລາຍ​ການ​ສ້າງສາ​ພັດທະນາ​ປະ​ເທດ ​ແລະ​ເຊື່ອມ​ໂຍງ​ສາກົນ​ຂອງ​ປະຊາຊົນ​ເຮົາ.

​ເພີ່ມ​ທະວີ​ປັບປຸງ​ແນວ​ຮົບ​ແນວ​ຄິດ​ຂອງ​ພັກ.

ກີດ​ກັ້ນ​ບັນດາຊ່ອງ​ການ​ສື່ສານ​ທີ່​ຜິດ​ກົດໝາຍ.

ປະ​ຕິ​ບັດ​​ໃຫ້​ໄດ້​ເປັນ​ຢ່າງ​ດີ ​ທິດ​ນຳສົມທົບ “ຕ້ານ” ​ແລະ “ສ້າງ", ​ໃນ​ນັ້ນ ຕ້ານ​ຢ່າງ​ດຸ​ເດືອດ ສ້າງ​ຢ່າງ​ຕັ້ງໜ້າ.

ກວດຄືນ, ດັດ​ແປງ, ​ເພີ່ມ​ເຕີມ​ເອກະສານ, ປະກາດ​ໃຊ້​ເອກະສານ​ໃໝ່ ​ເພື່ອ​ຫັນ​ຂໍ້​ກຳນົດ​ຂອງ​ພັກ ​ແລະ​ລັດ​ເປັນ​ນິຕິ​ກຳ.

ກໍ່ສ້າງ​ຂໍ້​ກຳນົດ ກົດ​ລະບຽບ​ຮັບ​ປະ​ກັນສິດຂອງ​ອົງການ​ລັດ.

ທີ​ສອງ, ຈຳກັດ​ຜົນ​ກະທົບ​ຂອງ​ແບບ​ດຳລົງ​ຊີວິດທີ່​ເຫັນ​ແຕ່​ຜົນ​ປະ​ໂຫຍ​ດວັດຖຸ​ເປັນ​ສຳຄັນ ​ແບບ​ຕາ​ເວັນ​ຕົກ ​ໃນ​ເງື່ອນ​ໄຂ​ໂລກາ​ພິວັດ ​ແລະ ​ເຊື່ອມ​ໂຍງ​ສາກົນ.

ວິທີ​ແກ້​ໄຂ​ຈຳນວນ​ໜຶ່ງ​ທີ່​ຕ້ອງ​ສຸມ​ໃສ່​ປະຕິບັດ​ເປັນ​ພິ​ເສດ

​ເພື່ອ​ຕໍ່ສູ້​ປ້ອງ​ກັນ, ຕ້ານ​ຄວາມ​ເສື່ອ​ມ​ໂຊມ​ທາງ​ດ້ານ​​ແນວ​ຄິດການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ຂອງ​ພະນັກງານ ສະມາຊິກ​ພັກ​ພາກສ່ວນ​ໜຶ່ງ​ທີ່​ບໍ່​ໜ້ອຍ ໃຫ້ບັນລຸ​ປະສິດທິ​ຜົນ, ປະກອບ​ສ່ວນປັບປຸງ, ຍົກສູງ​ຄວາມ​ເຊື່ອ​ຖື​ຂອງ​ປະຊາຊົນ ຕໍ່​ກັບ​ພັກ​ແລະລັດ ນັ້ນ, ຕ້ອງ​ເອົາ​ໃຈໃສ່​ເປັນ​ພິ​ເສດ ​ແລະ ສຸມ​ໃສ່​ປະຕິບັດບາງ​ບັນຫາ​ດັ່ງ​ນີ້:

1- ຕ້ອງ​ເບິ່ງ​ໂດຍ​ກົງ​ໃສ່​ຄວາມ​ຈິງ ​ເພື່ອ​ອາດ​ຈະ​ເຫັນ​ໄດ້​ສາ​ເຫດ​ທີ່ເລິກ​ເຊິ່ງທີ່​ສຸດຂອງ​ສະພາບ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ຂອງພະນັກງານ ສະມາຊິກ​ພັກ ທີ່​ນອນ​ຢູ່​​ໃນ​ຄວາມ​ຫຼ້າ​ຫຼັງ, ຄວາມ​ຈຳກັດ​ຂອງ​ວຽກ​ງານ​ທິດ​ສະ​ດີ; ​ໃນ​ວຽກ​ງານ​ກໍ່ສ້າງ​ພັກ; ​ໃນ​ພຶດຕິ​ກຳ​ແຫ່ງ​ການ​ເຄື່ອນ​ໄຫວ​ຂອງ​​ລະບົບ​ການ​ເມືອງ; ​ໃນ​ການ​ຄຸ້ມ​ຄອງ​ບໍລິຫານ​ລັດ​ທາງ​ດ້ານ​ເສດຖະກິດ - ການ​ເມືອງ...

ຖ້າ​ຫາກ​ບໍ່​ຮັບ​ຮູ້​ຢ່າງ​ເລິກ​ເຊິ່ງ ​ແລະ ຕັດສິນ​ໃຈ​ລົບ​ລ້າງສາ​ເຫດ​ເຫຼົ່າ​ນີ້, ບັນດາ​ວິທີ​ແກ້​ໄຂ​ອື່ນ​ກໍ​ຈະ​ບໍ່ສາມາດ​ເສີມ​ຂະຫຍາຍ​ປະສິດທິ​ຜົນ​ໄດ້, ຫຼື​ມີ​ແຕ່​ລັກສະນະ​ຊົ່ວຄາວ, ບໍ່​ສາມາດ​ແກ້​ໄຂ​ບັນຫາ​ພື້ນຖານ​ໄດ້. ອາດ​ຈະ​ຖື​ວ່າ ​ແກ້​ໄຂ​ບັນດາ​ສາ​ເຫດ​ທີ່​ເລິກ​ເຊິ່ງນີ້ ທັງ​ເປັນ​ເງື່ອນ​ໄຂ​ອັນ​ພື້ນຖານ​ທີ່​ສຸດ ທັງ​ເປັນ​ວິທີ​ແກ້​ຕົ້ນຕໍທີ​ສຸ​ດ​ເພື່ອກີດ​ກັ້ນ ​ແລະ​ຍູ້​ຖອຍ​ສະພາບ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​ໃນພະນັກງານ ສະມາຊິກ​ພັກ​ພາກສ່ວນໜຶ່ງ​ທີ່​ບໍ່​ໜ້ອຍ.

2- ​ເພື່ອ​ຜ່ານ​ຜ່າ​ຄວາມ​ອ່ອນ​ນ້ອຍ​ຕ່ຳ​ຕ້ອຍ​ທາງ​ດ້ານ​ທິດ​ສະ​ດີ ​ແນ​ໃສ່​ຕ້ານ​ຄວາມເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ​​ໃຫ້​ໄດ້​ຮັບ​ຜົນສຳ​ເລັດ​ນັ້ນ ຕ້ອງ​ປະຕິບັດ​ບັນດາ​ເນື້ອ​ໃນ​ອັນ​ພື້ນຖານ​ລຸ່ມ​ນີ້:

- ​ເພີ່ມ​ທະວີ​ວຽກ​ງານ​ສະຫລຸບ​ສັງ​ລວມພຶດຕິ​ກຳ, ຄົ້ນຄວ້າ ຂະຫຍາຍ​ທິດ​ສະ​ດີ, ​ເສີມ​ຂະຫຍາຍ​ບົດບາດນຳ​ໜ້າ​ພາ​ທາງ​ການ​ພັດທະນາ​ຂອງ​ວິທະຍາສາດ. ສືບ​ຕໍ່​ຄົ້ນຄວ້າ, ອະທິບາຍ​ຢ່າງ​ຈະ​ແຈ້ງ​ກ່ຽວ​ກັບ​ສາ​ເຫດ​ແຫ່ງ​ການ​ພັງ​ທະລາ​ຍລົງ​ຂອງ​ຕົວ​ແບບ​ສັງຄົມ​ນິຍົມ​ຢູ່ ​ໂຊ​ວຽດ ​ແລະ ​ເອີຣົບຕາ​ເວັນ​ອອກ ກ່ອນ​ໜ້າ​ນີ້, ​ເພີ່ມ​ທະວີ​​ວຽກ​ງານ​ສະຫລຸບ​ສັງ​ລວມພຶດຕິ​ກຳ, ບົນ​ພື້ນຖານ​ນັ້ນ ​ເພີ່ມ​ເຕີມ, ຂະຫຍາຍ ​ແລະ ໝູນ​ໃຊ້​ລັດທິ​ມາກ-​ເລ​ນິ, ​​ແນວຄິດ​ໂຮ່ຈິ​ມິນ​ ຢ່າງ​ປະດິດ​ສ້າງ​ໃນ​ໄລຍະການ​ປະຕິວັດ​ໃໝ່, ປະກອບສ່ວນ​ສ້າງ​ແນວທາງ​ກ້າວຂຶ້ນ​ສູ່​ສັງຄົມ​ນິຍົມ​ທີ່​ສອດຄ່ອງ​ກັບ​ຄວາມ​ຮຽກຮ້ອງ​ຕ້ອງການ​ແລະ​ສະພາບ​ຕົວ​ຈິ​ງຂອງຫ​ວຽດນາມ ​ແລະ ອະທິບາຍແນວທາງ​ດັ່ງກ່າວຢ່າ​ງມີພື້ນຖານ​ວິທະຍາສາດ. ​ໃຫ້​ຄວາມ​ສຳຄັນ​ແກ່​ການ​ອົບຮົມ​ສຶກສາ​ລັດທິ​ມາກ - ​ເລ​ນິນ, ​ແນວ​ຄິດ​ໂຮ່ຈິ​ມິນ, ​ແນວທາງ ທັດສະນະ​ປ່ຽນ​ແປງ​ໃໝ່​ຂອງ​ພັກ ​ໃຫ້​ພະນັກງານ ສະມາຊິກ​ພັກ, ​ເຮັດ​ໃຫ້​ພະນັກງານ ສະມາຊິກ​ພັກ​ມີ​ຄວາມ​ເຊື່ອ​ຖື​ຢ່າງ​ຕາຍ​ໃຈ​ຕໍ່​ໄຊຊະນະ​ຂອງ​ພາລະກິດ​ກໍ່ສ້າງ​ລະບອບສັງຄົມ​ນິຍົມ​ຢູ່​ຫວຽດນາມ.

- ປ່ຽນ​ແປງ​ໃໝ່​ຈິນຕະນາການ, ຂະຫຍາຍ​ທິດ​ສະ​ດີ​ກ່ຽວ​ກັບ​ຄຸນສົມບັດ​ສິນ​ທຳ, ກໍ່ສ້າງ​ລະບົບ​ບັນດາ​ຄຸນຄ່າ, ມາດຕະຖານ​ຄຸນສົມບັດ ຈະລິ​ຍະ​ທຳ ​ທີ່​ສອດຄ່ອງ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ປະ​ເທດ​ໃນ​ໄລຍະ​ປັດຈຸບັນ. ​ໃຫ້​ຄວາມ​ສຳຄັນ​ແກ່​ການ​ຄົ້ນຄວ້າ ​ແລະ ​ເຜີຍ​ແຜ່​ແນວ​ຄິ​ດ​ໂຮ່ຈິ​ມິນກ່ຽວ​ກັບ​ຄຸນສົມບັດ, ປະກອບ​ດ້ວຍ​ປັດ​ຊະ​ຍາ ຄຸນຄ່າ ມາດຕະຖານ​ຄຸນສົມບັດ​ຈະລິ​ຍະ​ທຳດັ້ງ​ເດີມ​ຂອງ​ຊາດ ​ແລະ ຄຸນສົມບັດ​ຂອງ​ຊາວ​ກອມ​ມູນິດ. ຫັນ​ເປັນ​ລະອຽດ, ກໍ່ສ້າງ​ມາດຕະຖານ​ຄຸນສົມບັດ​ໂຮ່ຈິ​ມິນ ສຳລັບ​ແຕ່​ລະ​ຊົນ​ຊັ້ນ, ຊັ້ນ​ຄົນ, ກຸ່ມສັງຄົມ ​ໂດຍ​ຕິດ​ກັບ​ຜົນ​ປະ​ໂຫຍ​ດ ​ແລະ ສະພາບ​ຊີວິດ​ຂອງ​ເຂົາ. ​ເພື່ອ​ໃຫ້ການ​ຝຶກ​ຝົນ​ຫຼໍ່​ຫຼອມ ​ແລະ ການ​ປະຕິບັດ​ຄຸນສົມບັດ​ ກາຍ​ເປັນຊີວິດ​ປະຈຳ​ວັນ​ຂອງ​ພະນັກງານ ສະມາຊິກ​ພັກ​ແຕ່ລະຄົນ.

- ຕໍ່ສູ້​ຢ່າງ​ມີ​ປະສິດທິ​ຜົນ​ກັບ​ຍຸດ​ທະ​ສາດ “ຜັນ​ປ່ຽນ​ໂດຍ​ສັນຕິ” ຂອງ​ບັນດາ​ອິດ​ທິກຳລັງ​ສັດ​ຕູ; ​ເຮັດ​ໃຫ້​ກົນອຸບາຍ​​ຂອງ​ພວກມັນຕ້ອງ​ປະລາ​ໄຊ​ລົງ; ສ້າງ​ໃຫ້​ພະນັກງານ ສະມາຊິກ​ພັກມີ​ຄວາມ​ຕ້ານ​ທານ​ສູງ, ມີ​ກຳລັງ​ແຮງ​ພຽງພໍ​ເພື່ອ​ຕ້ານ “ການ​ຜັນ​ປ່ຽນ​ດ້ວຍ​ຕົນ​ເອງ”, “ການ​ປ່ຽນ​ແປງ​ດ້ວຍ​ຕົນ​ເອງ” ທາງ​ດ້ານ​ແນວ​ຄິດການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ; ​ເພື່ອ​ໃຫ້​ພະນັກງານ ສະມາ​ຊິກ​ພັກ​ແຕ່ລະຄົນມີ​ຄວາມ​ສາມາດ​ປ້ອງ​ກັນ​ແລະ​ຕ້ານ​ຢ່າງ​ມີ​ປະສິດທິ​ຜົນ​ກັບທຸກ​ເລ່ຫຼ່ຽມ ​ກົນອຸບາຍຂອງ​ອິດ​ທິກຳລັງ​ສັດ​ຕູ ​ເຖິ​ງວ່າ​ມັນ​ຈະ​ເລິກ​ແລບ​ແນບ​ນຽນ​ປານ​ໃດ​ກໍ່ຕາມ.

3- ​ເພື່ອ​ແກ້​ໄຂ​ຜ່ານ​ຜ່າ​ຂໍ້​ຂາດ​ຕົກ​ບົກພ່ອງ, ສິ່ງ​ຜິດ​ປົກກະຕິ​ໃນ​​ໂຄງ​ປະກອບ​ການຈັດ​ຕັ້ງ​ ແລະ ກົນ​ໄກ​ການ​ເຄື່ອນ​ໄຫວ​ຂອງ​ລະບົບ​ການ​ເມືອງ​ເວົ້າ​ລວມ, ​ໃນ​ລະບົບ​ກົດໝາຍ ​ແລະ ກົນ​ໄກ​ຂັບ​ນຳ​ດຳ​ເນີນ​ຄຸ້ມ​ຄອງ​ບໍລິຫານ​ປະ​ເທດ​ເວົ້າ​ໂດຍ​ສະ​ເພາະ, ທີ່​ມັກ​ກະທົບ​ຢ່າງ​ຫຍໍ້​ທໍ້ເຖິງ​ແນວ​ຄິດ​ການ​ເມືອງຂອງ​ພະນັກງານ ສະມາຊິກ​ພັກ​ນັ້ນ ຕ້ອງ​ໃຫ້ຄວາມ​ສຳຄັນ​ເຖິງ​ບັນດາ​ວິ​ທິ​ແກ້​ໄຂ​ລຸ່ມ​ນີ້:

- ປ່ຽນ​ແປງ​ໃໝ່​ການ​ເມືອງ​ຕ້ອງ​ໄດ້​ປະຕິບັດພ້ອມ​ກັນ​ກັບ​ປ່ຽນ​ແປງ​ໃໝ່​ເສດຖະກິດ; ປະຕິ​ຮູບ​ກົງຈັກ​ບໍລິຫານ​ຄຸ້ມ​ຄອງ​ລັດ​ຕາມ​ທິດ​ກະທັດ​ລັດ​ເບົາບາງ, ມີ​ການ​​ແບ່ງກຳນົດພາລະ​ບົດບາດ, ສິດ​ອຳນາດ ​ແລະ ຄວາມ​ຮັບຜິດຊອບ​ຢ່າງ​ຈະ​ແຈ້ງ ລະຫວ່າງບັນດາ​ອົງການ​ ນິຕິບັນຍັດ ບໍລິຫານ ​ແລະ ຕຸລາການ; ປ່ຽນ​ແປງ​ໃໝ່​ວິທີ​ນຳພາ​ຂອງພັກ ຕໍ່​ກັບ​ລັດ ​ແລະ ສັງຄົມ. ​ເພີ່ມ​ທະວີ​ລັກສະນະ​ປະຊາທິປະ​ໄຕ, ລັກສະນະ​ເປີດ​ເຜີຍ, ​ໂປ່​ງ​ໃສ ​ໃນ​ການ​ເຄື່ອນ​ໄຫວ​ຂອງ​ລະບົບ​ການ​ເມືອງ​ເວົ້າ​ລວມ, ຂອງ​ກົງຈັກ​ແຫ່ງ​ລັດ​ເວົ້າ​ໂດຍ​ສະ​ເພາະ. ​ເພີ່ມ​ທະວີ​ກົນ​ໄກ​ຕິດຕາມ​ກວດກາ, ກຳນົດ​ແຈ້ງ​ໜ້າ​ທີ່​ຮັບຜິດຊອບ​ຂອງ​ຜູ້ນຳ​ໜ້າ​ສຳນັກງານ ອົງການ​ໃນ​ລະບົບ​ການ​ເມືອງ, ຜູ້ນຳ​ໜ້າ​ໃນ​ອົງການ​ລັດ. ​ເພີ່​ທະວີ​ກົນ​ໄກ​ຕິດຕາມ​ກວດກາ​ຊຶ່ງ​ກັນ​ແລະ​ກັນ ລະຫວ່າງ​ບັນດາ​ອົງການ​ອຳນາດ​ລັດ.

- ປ່ຽນ​ແປງ​ໃໝ່ ​ແລະ ​ເພີ່​ມທະວີ​ວຽກ​ງານ​ພະນັກງານ ​ແລະ ຄຸ້ມ​ຄອງ​ພະນັກງານ ​ໃນ​ລະບົບ​ການ​ເມືອງ. ປະຕິ​ຮູບ​ກົນ​ໄກ​ສອບ​ເສງ​ເລືອກ​ເຝັ້ນ, ການ​ຮັບ​ສະໝັກ​ງານ, ຕີ​ລາຄາ ​ແຕ່ງ​ຕັ້ງ​ພະນັກງານ ​ເພື່ອ​ໃຫ້​ວຽກ​ງານ​ເຫຼ່າ​ນີ້​ໄດ້​ດຳ​ເນີນ​ຢ່າງ​ພາວະ​ວິ​ໄສ, ສະ​ເໝີ​ພາບ, ​ເປີດ​ເຜີຍ ບົນ​ຈິດ​ໃຈ​ນັບຖື​ການ​ນຳ​ໃຊ້​ຜູ້​ມີ​ຄຸນສົມບັດ​ມີຄວາມ​ເກັ່ງ​ກ້າ​ສາມາດ. ລົບ​ລ້າງ​ຄວາມ​ບໍ່​ສະ​ເໝີພາບ, ​ລະບອບ​ເກື້ອກູນ​ແບບ​ສິດ​ພິ​ເສດ ຜົນ​ປະ​ໂຫຍ​ດພິ​ເສດ ຢ່າງ​ເດັດຂາດ, ຮັບປະກັນ​ຄວາມ​ເປີດ​ເຜີນ, ​ໂປ່​ງໃສ​ໃນ​ການ​ປະຕິບັດ​ບັນດາ​ລະບອບ​ນະ​ໂຍບາຍ ​ແລະ ການ​ໃຊ້​ຈ້າງ​ຕ່າງໆ ​ໃຫ້ພະນັກງານ, ນັບ​ທັງ​ລົດ​ໂອ​ໂຕ ນ້ຳມັນ​ແອັດ​ຊັງ, ​ເຮືອນ​ຢູ່​ອາ​ໄສ​ ໃຫ້​ພະນັກງານ​ຂັ້ນ​ກາງ, ຂັ້ນ​ສູງ..., ຕາມ​ທິດ​ຄິດ​ການ​ໃຊ້​ຈ່າງເປັນ​ເງິນ ​ແລະ ບວກ​ກັບ​ເງິນ​ເດືອນ, ​ເບ້ຍ​ເພີ່ມ​ເຕີມ. ​ເງິນ​ເດືອນ​ຕ້ອງ​ຮັບປະກັນຄວາມ​ຕ້ອງການ​ດຳລົງ​ຊີວິດ​ອັນ​ພື້ນຖານ​ຂອງ​ພະນັກງານ. ຮັບປະກັນ​ໃຫ້​ພະນັກງານ ຂ້າ​ລັດຖະການ​ມີ​ລາຍ​ໄດ້​ເປັນ​ເງິນ​ເດືອນສູງ​ກວ່າ​ລະດັບ​ປານ​ກາງຂອງ​ສັງຄົມ ​ແລະ ​​ແຕ່ລະ​ປີ​​ເງິນ​ເດືອນໄດ້​ດັບ​ສົມຕາມ​ລະດັບ​ເພີ່ມ​ຂອງ​ລາຍ​ໄດ້​ແຫ່ງ​ຊາດ.

- ​ເພີ່ມ​ທະວີ​ກົນ​ໄກ​ຕິດຕາມ​ກວດກາ, ວິຈານ​ສັງ​ຄົມ​ຂອງ​ແນວ​ໂຮມ​ປະ​ເທດ​ຊາດ ​ແລະ ບັນດາ​ອົງຄະ​ນະ​ການ​ເມືອງ-ສັງຄົມ ຕໍ່​ກັບການ​ເຄື່ອນ​ໄຫວ​ຂອງ​ບັນດາ​ອົງການ ການ​ຈັດ​ຕັ້ງ​ໃນ​ລະບົບ​ການ​ເມືອງ. ​ເສີມ​ຂະຫຍາຍ​ບົດບາດ​ຂອງ​ປະຊາຊົນ​ ໃນ​ການ​ຕິດຕາມ​ກວດກາຖັນ​ແຖວ​ພະນັກງານ, ສະມາຊິກ​ພັກ, ຂ້າ​ລັດຖະການ​, ນັບ​ທັງ​ຢູ່​ບ່ອນ​ເຮັດ​ວຽກ ​ແລະ ຢູ່​ທີ່ຢູ່​ອາ​ໄສ.

4- ​ເພື່ອ​ຜ່ານ​ຜ່າ​ຄວາມ​ເສື່ອ​ມ​ໂຊມທາງ​ດ້ານຄຸນສົມບັດ, ​ແບບ​ແຜນ​ດຳລົງ​ຊີວິດ, ນອກຈາກ​ບັນດາ​ມາດ​ຕະການ​ອັນ​ພື້ນຖານ​ທີ່​ກ່າວ​ມາ​ເທິງນີ້, ຕ້ອງ​ສຸມ​ໃສ່​ບັນດາ​ບັນຫາ​ຕົ້ນ​ຕໍ​ດັ່ງ​ນີ້:

- ​ໃຫ້​ຄວາມ​ສຳຄັນ​ຢ່າງ​ແທ້​ຈິງ​ເຖິງ​ການ​ອົບຮົມ​ສຶກສາ​ຄຸນສົມບັດ, ​ແບບ​ແຜນ​ດຳລົງ​ຊີວິດ ​ໃຫ້​ພະນັກງານ ສະມາຊິກ​ພັກ. ​ເພີ່ມ​ທະວີ​ການ​ຕໍ່ສູ້​ຕ້ານ​ເລ່ຫຼ່ຽມ ກົນອຸບາຍຍຸດ​ທະ​ສາດ “ຜັນ​ປ່ຽນ​ໂດຍ​ສັນຕິ” ຂອງ​ບັນດາ​ອິດ​ທິກຳລັງ​ສັດຕູ; ຕ້ານ​ຜົນ​ກະທົບ​ຂອງ​ແນ​ວຄິດ ຄຸນສົມບັດ, ​ການ​ດຳລົງ​ຊີວິດ​ແບບ​ນາຍ​ທຶນ.

- ຍົກ​ສູງ​ຄຸນນະພາບ, ຜັນ​ຂະຫຍາຍ​ຕາມ​ລວງ​ເລິກ ​ການ​ຂົນຂວາຍ​ຮ່ຳຮຽນ​ແລະ​ປະຕິບັດ​ຕາມ​ແນວ​ຄິດ, ຄຸນສົມບັດ, ​ແບບ​ແຜນ​ໂຮ່ຈິ​ມິນ ແລະ ​ແຊກ​ຊ້ອນ​ບັນດາ​ເນື້ອ​ໃນ​ເຫຼົ່າ​ນັ້ນ​ກັບ​ບັນດາ​ໜ້າ​ທີ່​ການ​ເມືອງ, ​ໂຄງການ​ພັດທະນາ​ເສດຖະກິດ-ສັງຄົມ, ​ໃນ​ບັນດາ​ຂົງ​ເຂດ​ສັງຄົມ​ທີ່​ຕ່າງ​ກັນ, ຮັກສາ​ມັນ​ຢ່າງ​ເປັນ​ປະຈຳ​ໃນ​ການ​ດຳ​ເນີນ​ຊີ​ວິດ​ພັກ. ​​ເອົາບັນດາ​ມາດຕະຖານ: ກ້າ​ຄິດ, ກ້າ​ເຮັດ, ກ້າ​ຮັບຜິດຊອບ; ມີ​ຄວາມ​ກ້າຫານ​ໃນ​ການ​ຕໍ່ສູ້​ຕ້ານ​ພະຍາດ​ອາດຍາ​ສິດ, ສໍ້​ລາດ​ບັງ​ຫຼວງ… ​ມາ​ເພີ່ມ​ເຕີມ​ເຂົ້າ​ໃນ​ບັນທັດຖານ​ຄຸນຄ່າ ຈະລິ​ຍະ​ທຳ ຄຸນສົມບັດອັນ​ພື້ນຖານ​ ຂອງ​ພະນັກງານ ສະມາຊິກ​ພັກ.

- ​ເພີ່ມ​ທະວີ​ກົນ​ໄກ​ຕິດຕາມ​ກວດກາ​ກ່ຽວ​ກັບ​ຄຸນສົມບັດ, ​ແບບ​ແຜນ​ດຳລົງ​ຊີວິດຂອງ​ພະນັກງານ ສະມາຊິກ​ພັກ, ຂ້າ​ລັດຖະການ ​ໂດຍ​ບັນດາ​ອົງການ​ລັດ, ການຈັດ​ຕັ້ງ​ການ​ເມືອງ-ສັງຄົມ, ​ເປັນ​ຕົ້ນ​ແມ່ນ​ໂດຍ​ອົງການ​ຈັດ​ຕັ້ງ​ພັກ. ​ເພື່ອປັບປຸງ​ບູລະນະ​ລະບົບ​ບັນດາ​ເອກະສານລະບຽບກົດໝາຍ, ບັນດາ​ສະ​ຖາ​ບັນ​ທີ່​ຮັບປະກັນ​ການ​ປ້ອງ​ກັນ ​ແລະ ​ແກ້​ໄຂ​ຜ່ານ​ຜ່າ​ຄວາມ​ເສື່ອ​ມ​ໂຊມພາຍ​ໃນ​ພັກນັ້ນ, ສູນ​ກາງ​ພັກ ສະພາ​ແຫ່ງ​ຊາດ ລັດຖະບານ ​ແລະ ສູນ​ກາງ​ແນວ​ໂຮມ​ປະ​ເທດ​ຊາດ​ຫວຽດນາມ, ບັນດາ​ອົງຄະ​ນະ​ການ​ເມືອງ-ສັງຄົມ ​ໄດ້​ມີ​ຂໍ້​ກຳນົດກ່ຽວ​ກັບ​ຄວາມ​ຮັບຜິດຊອບ ​ແລະ ການ​ເປັນ​ແບບຢ່າງ​ຂອງ​ພະນັກງານ​ການ​ນຳ​ຂັ້ນ​ຕ່າງໆ ​ໃນ​ການ​ຮ່ຳຮຽນ ​ແລະ ​ປະຕິບັດ​ຕາມ​ແນວ​ຄິດ, ຄຸນສົມບັດ, ​ແບບ​ແຜນ​ໂຮ່ຈິ​ມິນ.

5- ສືບ​ຕໍ່​ປ່ຽນ​ແປງ​ໃໝ່​ແບບ​ວິທີ​ການ​ນຳພາ​ຂອງ​ພັກ, ຕັ້ງ​ໝັ້ນ​ໃນ​ຈຸດປະສົງ ອຸດົມ​ຄະຕິ​​ປະຕິວັດ, ​ເພີ່ມທະວີຄວາມ​ເປັນ​ເອກະ​ພາບ​ ທາງ​ດ້ານ​ເຈດ​ຈຳນົງ ​ແລະການ​ກະທຳ​ໃນ​ພັກ, ຮັກສາ​ສາຍ​ພົວພັນ​ສະໜິດ​ແໜ້ນ​ກັບ​ປະຊາຊົນ. ຍົກ​ສູງ​ຄວາມ​ສາມາດ​ນຳພາ, ກຳລັງ​ແຮງ​ສູ້​ຮົບ ຂອງ​ບັນດາ​ການຈັດ​ຕັ້ງ​ຮາກ​ຖານ​ພັກ, ​ເປັນ​ຕົ້ນ​ແມ່ນ​ໜ່ວຍ​ພັກ, ອົງຄະ​ນະ​ພັກ​ຮາກ​ຖານ, ພິ​ເສດ​ແມ່ນ​ໃນ​ການ​ມອບ​ໜ້າ​ທີ່, ກວດກາ, ຕິດຕາມ​ກວດກາ, ຄຸ້ມ​ຄອງ​ບໍລິຫານ. ປະຕິບັດ​ເປັນ​ຢ່າງ​ດີ​ຂໍ້​ກຳນົດ​ສະບັບ​ເລກທີ 76-QĐ/TW ວ່າ​ດ້ວຍ​ການຮັກສາ​ສາຍ​ພົວພັນ​ສະໜິດ​ແໜ້ນ​ ລະຫວ່າງ​ຄະນະ​ພັກຢູ່​ສຳນັກງານ ​ແລະ ຄະນະ​ພັກ​​ຢູ່​ທີ່​ຢູ່ອາ​ໄສ, ຮັບປະກັນ​ການ​ຕິດຕາມ​ກວດກາ​ຢ່າງ​ເປັນ​ປະຈຳ​ຂອງ​ການຈັດ​ຕັ້ງ​ພັກ ​ແລະ ຂອງ​ປະຊາຊົນ​ຕໍ່​ກັບ​ພະນັກງານ ສະມາຊິກ​ພັກ, ຂ້າ​ລັດຖະການ. ສ້າງ​ຫາງ​ສຽງ​ສັງ​ຄົນ​ທີ່​ແຮງ ​ແລະ ຕັ້ງໜ້າ ​ເພື່ອ​ຍ້ອງຍໍ​ຊົມ​ເຊີຍ​ວຽກ​ດີ ຄົນ​ເດັ່ນ, ກ່າວ​ປະນາມ​ການ​ກະທຳ​ທີ່​ຜິດພາດ, ລະ​ເມີດ​ຄຸນສົມບັດ ສິນ​ທຳ, ລະ​ເມີດລະບຽບ​ວິ​ໄນ.

6- ປະຕິບັດ​ຢ່າງ​ເຂັ້ມ​ງວດ ຫຼັກການ​ພັກ​ນຳພາ​ວຽກ​ງານ​ພະນັກງານ​ໃນ​ລະບົບ​ການ​ເມືອງ. ​ເສີມ​ຂະຫຍາຍ​ປະຊາທິປະ​ໄຕ, ​ເປີດ​ເຜີຍ, ​ໂປ່​ງ​​ໃສ ​ໃນ​ການ​ວາງ​ແຜນ​ກຳນົດ​ພະນັກງານ, ຕີ​ລາຄາ ​ແຕ່ງ​ຕັ້ງ​ພະນັກງານ, ​ເອົາ​ໃຈ​ໃສ່​ຄວາມ​ເຫັນ​ຂອງ​ແນວ​ໂຮມ​ປະ​ເທດ​ຊາດ, ຂອງ​ຄະນະ​ພັກ ​ແລະ ປະຊາຊົນ ​ເພື່ອຫຼີກ​ລ່ຽງການ​ເຮັດ​ແບບ​ອັດຕະວິ​ໄສ, ກີດ​ກັ້ນ​ພາກສ່ວນ​ສວຍ​ໂອກາດ​ການ​ເມືອງ ​ເອກະ​ຊົນນິຍົມ, ກີດ​ກັ້ນ​ສະພາບ​ການ “ຊື້​ຍົດ, ຂາຍ​ຕຳ​ແໜ່​ງ”. ກໍ່ສ້າງ ​ແລະ​ປະຕິບັດ​ກົນ​ໄກນັບຖື ນຳ​ໃຊ້​ຜູ້​ມີ​ຄຸນສົມບັດ​ສິນ​ທຳ​, ມີ​ຄວາມ​ສາມາດ, ​ໃນ​ນັ້ນ ຄຸນສົມບັດ​ເປັນ​ກົກ​ຮາກ. ກໍ່ສ້າງ​ກົນ​ໄກ, ນະ​ໂຍບາຍ​ຄົ້ນ​ເຜີຍ, ດຶງ​ດູດ, ນັບຖື​ນຳ​ໃຊ້​ຜູ້​ມີ​ຄວາມ​ເກັ່ງ​ກ້າ​ສາມາດ​ຮັບ​ໃຊ້​ໃຫ້​ປະ​ເທດ​ຊາດ.

7- ​ເອົາ​ໃຈ​ໃສ່​ຢ່າງ​ແທ້​ຈິງ​ເຖິງ​ການ​ຍົກ​ສູງ​ຄຸນ​ນະພາ​ບຂອງ​ຖັນ​ແຖວ​ສະມາຊິກ​ພັກ ດ້ວຍ​ວິທີ​ປະກາດ​ໃຊ້ ​ແລະ ປະຕິບັດ​ຂໍ້​ກຳນົດ​ທີ່​ແໜ້ນ​ແຟ້ນກ່ຽວ​ກັບ​ການ​ຮັບ​ເອົາ​ສະມາຊິກ​ໃໝ່​ເຂົ້າ​ພັກຮັບ​ປະ​ກັນ​ຄຸນ​ນະພາ​ບ, ​ບໍ່​ແລ່ນ​ຕາມ​ປະລິມານ​ຢ່າງເດັດຂາດ ​ເພື່ອ​ກີດ​ກັ້ນ​ບໍ່​ໃຫ້​ພວກ​ສວຍ​ໂອກາດ, ​ເອກະ​ຊົນ​ນິຍົມ​ ເລັດ​ລອດ​ເຂົ້າ​ໃນ​ຖັນ​ແຖວ​ຂອງ​ພັກ. ຄົ້ນຄວ້າ​ເພື່ອ​ມີວິທີຕີ​ລາຄາ, ຈັດ​ປະ​ເພດ​ສະມາຊິ​ກພັກ​ຢ່າງ​ຊັດ​ເຈນ ​ເຂັ້ມ​ງວດ, ພໍ​ທີ່​ຈະ​ຈຳກັດ​ປັດ​ເຂ່ຍ​ພວກ​ເສື່ອມ​ໂຊມ​ປ່ຽນ​ທາດ​ອອກ​ຈາກ​ພັກ.

8- ​ເດັດດ່ຽວ​ປະຕິບັດ​ການ​ປະກາດ​ເປີດ​ເຜີຍ​ຊັບ​ສິນ, ລາຍ​ໄດ້​ຂອງ​ພະນັກງານ, ສະມາຊິກ​ພັກ, ຂ້າ​ລັດຖະການ. ອົງການ​ຕ້ານ​ການ​ສໍ້​ລາດ​ບັງ​ຫຼວງ​ມີ​ສິດ​ອຳ​ນາ​ພຽງພໍ​ເພື່ອ​ປະຕິບັດ​ໜ້າ​ທີ່​; ອົງການ​ນີ້​ມີໜ້າ​ທີ່​ຄຸ້ມ​ຄອງ​ລາຍ​ໄດ້, ຊັບ​ສິນ​ຂອງ​ພະນັກງານ, ຂ້າ​ລັກ​ຖະການ​ໃນ​ລະບົບ​ການ​ເມືອງ. ຍູ້​ແຮງ​ການ​ປ້ອງ​ກັນ, ກີດ​ກັ້ນ ​ແລະ ຕໍ່ສູ້​ຕ້ານ​ພະຍາດ​ອາດຍາ​ສິດ, ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ ດ້ວຍ​ການຈັດ​ຕັ້ງ​ລະບົບ​ກົດໝາຍ, ກົນ​ໄກ, ນະ​ໂຍບາຍ ​ແລະ ມາດ​ຕະການ​ອື່ນໆ ​ເພື່ອ​ໃຫ້​ພະນັກງານ “ບໍ່​ສໍ້​ລາດ​ບັງ​ຫຼວງ”, “ບໍ່​ກ້າ​ສໍ້​ລາດ​ບັງ​ຫຼວງ”.

9- ​ເພີ່ມ​ທະວີ​ລະບຽບ​ວິ​ໄນ ກົດ​ຂໍ້​ບັງຄັບ​ພາຍ​ໃນ​ພັກ, ຄຸ້ມ​ຄອງ​ສັງຄົມ​ດ້ວຍກົດໝ​າຍ. ​ໃນ​ການ​ແກ້​ໄຂ​ການລະ​ເມີດ​ລະບຽບ​ກົດໝາຍ​ຕ້ອງ​ສົມທົບ​ລະຫວ່າງ​ການ​ຂົນຂວາຍ, ອົບຮົມ​ສຶກສາ ​ແລະ ການ​ປະຕິບັດ​ວິ​ໄນ​ລົງ​ໂທດ​ຢ່າງ​ເຂັ້ມງວດ, ກ່ອນ​ອື່ນ​ແມ່ນ​ປັບ​ໃໝ. ສົມທົບ​ບັນດາ​ມາດ​ຕະການ​ອົບຮົມ​ສຶກສາ, ຄຸ້ມ​ຄອງ​ບໍລິຫານ, ກົດໝາຍ ກັບ​ຫາງ​ສຽງ​ສັງຄົມ ​ເພື່ອ​ດັດສົມ​ພຶດຕິ​ກຳ​ຂອງ​ແຕ່ລະບຸກຄົນ. ລະດົມ​ສົ່ງ​ເສີມຄວາມ​ທະ​ນົງ​ໃຈ ​ແລະ​ກຽດ​ສັກ​ສີ​ແຫ່ງ​ຊາດ​ໂດຍ​ຜ່ານ​ຄຳ​ຂວັນ​ປຸກລະດົມ​ຢ່າງ​ຝົດ​ຟື້ນ​ແທດ​ຈິງ./.

ໂດຍ: ຮສ, ປອ, ຫງວຽນວັນຝຸກ,
ບັນນາທິການ​ໃຫຍ່ ວາລະສານ​ກອມ​ມູນິດ

------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານກອມ​ມູນິດ ສະບັບ​ທີ 884 (​ເດືອນ​ມິຖຸນາ 2016)

(1), (2), (3) ​ເອກະສານ​ກອງ​ປະຊຸມ​ສູນ​ກາງ​ພັກຄັ້ງທີ 4 ສະ​ໄໝ​ທີ XI, ສຳນັກ​ພິມ​ຈຳໜ່າຍ​ການ​ເມືອງ​ແຫ່ງ​ຊາດ - ຊື້​ເທິ​ດ, ຮ່າ​ໂນ້ຍ, 2012, ໜ້າ 21. 

(4) ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 185.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ