ວັນພຸດ, 20/9/2017
ຍູ້ແຮງການປະຕິຮູບການບໍລິຫານ, ກໍ່ສ້າງກົງຈັກແຫ່ງລັດ ທີ່ສະອາດປອດໃສ, ເຂັ້ມແຂງ, ຊື່ສັດທ່ຽງທຳ, ຜົນສັກສິດ, ປະສິດທິຜົນ, ຕາມປະຕູດຽວ ທີ່ມີການຕໍ່ເນື່ອງພາຍໃນ, ເພື່ອຕອບສະໜອງ ຄວາມຮຽກຮ້ອງຕ້ອງການ ຮັບໃຊ້ປະຊາຊົນ ແລະ ພັດທະນາປະເທດ
21/9/2016 15:47' ສົ່ງ ພິມ
ພາບປະກອບ. (ພາບ: ຂ່າວພາບຫວຽກນາມ)

ໃນ​ໄລ­ຍະ​ເວ­ລາ​ທີ່​ຜ່ານ​ມາ, ການ​ປະ­ຕິ​ຮູບ​ການ​ບໍ­ລິ­ຫານ​ໄດ້​ຮັບ​ການ​ດຳເນີນ​ຢ່າງ​ຄົບ​ຊຸດ ແລະ ມີ​ການ​ຫັນ­ປ່ຽນ​ຢ່າງ​ຕັ້ງ­ໜ້າ​ໃນ​ທຸກ​ຂົງ­ເຂດ, ວຽກ​ງານ​ຊີ້​ນຳ ບັນ­ຊາ​ຄວບ​ຄຸມ​ການ​ປະ­ຕິ​ຮູບ​ ກໍ່​ໄດ້​ຮັບ​ການ​ເອົາ­ໃຈ­ໃສ່ ແລະ ປ່ຽນ­ແປງ​ໃໝ່. ການ​ຜັນ​ຂະ­ຫຍາຍ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ການ­ຈັດ­ຕັ້ງ​ລັດ­ຖະ­ບານ, ກົດ­ໝາຍ​ວ່າ​ດ້ວຍ​ການຈັດຕັ້ງ​ອຳ­ນາດ​ການ​ປົກ­ຄອງ​ທ້ອງ​ຖິ່ນ ແລະ ເອ­ກະ­ສານ​ແນະນຳ​ສະ­ບັບ​ຕ່າງໆ​ ໄດ້​ປະ­ກອບ­ສ່ວນ​ເຂົ້າ​ໃນ​ການ​ຍົກ​ສູງຄວາມ​ສັກ­ສິດ, ປະ​ສິດ­ທິ​ຜົນ​ແຫ່ງ​ການ­ເຄື່ອນ­ໄຫວ​ ຂອງ​ບັນ­ດາ​ອົງ­ການ​ບໍ­ລິ­ຫານ​​ລັດ ແຕ່​ສູນ​ກາງ​ຈົນ​ຮອດ​ທ້ອງ​ຖິ່ນ. ບັນ­ດາ​ກະ­ຊວງ, ຂະ­ແໜງ­ການ, ທ້ອງ​ຖິ່ນ ​ກໍ່​ໄດ້​ສຸມ​ໃສ່​ປະ­ຕິ­ບັດ​ໃຫ້​ສຳ­ເລັດ ​ບັນ­ດາ​ໜ້າ­ທີ່​ຈຸດໜັກໃຈ​ກາງ­ ຂອງ​ການ​ປະ­ຕິ​ຮູບ​ລະ­ບອບ​ການ​ງານ, ຂ້າ​ລັດ​ຖະ​ການ; ວຽກ​ງານ​ແຂ່ງ­ຂັນ - ຍ້ອງ­ຍໍ; ວຽກ​ງານ​ຊາວ​ໜຸ່ມ; ວຽກ​ງານການສຳເນົາເອ­ກະ­ສານ ໄດ້​ຮັບ​ການ​ຫັນ­ປ່ຽນ​ຫຼາຍ​ຢ່າງ​ ແລະ ​ຕັ້ງໜ້າ; ຂົງ­ເຂດ​ສາ­ສະ­ໜາ, ຊົນ­ເຜົ່າ ​ກໍ່​ບັນ­ລຸ​ໄດ້​ບັນ­ດາ​ຜົນ­ງານ​ທີ່​ດີ, ສິດ​ເສ​ລີ​ໃນ​ການ​ເຊື່ອ​ຖື ສາສະ­ໜາ ​ຂອງ​ປະ­ຊາ­ຊົນກໍ​ນັບ​ມື້​ນັບ​ໄດ້​ຮັບປະ­ກັນ​ດີ​ກ່ວ​າ​ແຕ່​ກ່ອນ, ​ສາ​ສະ​ນິກະ​ຊົນ​ທຸກ​ຄົນ​ລ້ວນ​ແຕ່​​ມີ​ຄວາມ​ອຸ່ນ​ອ່ຽນ​ໃຈ, ພົວພັນ​ສະ­ໜິດ​ແໜ້ນ​ກັບ​ອຳ­ນາດ​ການ​ປົກ­ຄອງ, ມີ​ຄວາມ​ເຊື່ອ​ໝັ້ນ​ຕໍ່​ພາ­ລະ­ກິດ​ກໍ່­ສ້າງ ແລະ ພັດ­ທະ­ນາ​ປະ­ເທດ.

ແຕ່​, ຄຽງ​ຄູ່​ກັນ​ກັບ​ຜົນ­ງານ ຄວາມ​ກ້າວ­ໜ້າ​ທີ່​ກ່າວມາເທິງນີ້, ການ​ປະ­ຕິ​ຮູບ​ການ​ບໍ­ລິ­ຫານ​ກໍ່​ຍັງ​ມີ​ຂໍ້​ຈຳກັດຈຳ­ນວນ​ໜຶ່ງທີ່ຕ້ອງແກ້ໄຂ. ການ​ປະ­ຕິ​ຮູບ​ການ​ບໍ­ລິ­ຫານ (ແມ່ນ​ໜຶ່ງ​ໃນ​ສາມ​ຂອດ​ບຸກ​ທະ­ລຸ​ຍຸດ​ທະ​ສາດ) ກໍ່​ຍັງ​ມີ​ຄວາມ​ຊັກ​ຊ້າ, ຍັງ​ບໍ່​ຕອບ​ສະ­ໜອງ​ໄດ້​ກັບຄວາມ​ຮຽກ­ຮ້ອງ​ຕ້ອງ­ການ​ລວມ. ການ​ກໍ່­ສ້າງ, ປະ­ກາດ​ໃຊ້​ເອກະສານ, ໂຄງ­ການ​ຈຳ­ນວນ​ໜຶ່ງ​ ຍັງ​ຊັກ​ຊ້າ, ຄຸນ​ນະ​ພາບ​ຍັງ​ບໍ່​ສູງ; ​ການ​ປະ​ເມີນ​ຜົນ­ສຳ­ເລັດ​ແຫ່ງ​ການ​ຍູ້​ແຮງ​ການ​ປະ​ຮູບ​ລະ­ບອບ​ການ​ງານ, ຂ້າ​ລັດ​ຖະ​ການ ​ກໍ່​ຍັງ​ບໍ່​ໄດ້ດຳ​ເນີນ​ຢ່າງ​ທັນ​ເວ­ລາ. ການ​ປະ­ຕິ­ບັດ​ໂຄງ­ການ​ປັບ­ປຸງ​ບູລະນະ​​ສຳ​ເນົາ​ເອ­ກະ­ສານ​ແຜນ­ທີ່, ​ເຂ​ດແດນການປົກຄອງ​ ກໍ່​ຍັງ​ຊັກ​ຊ້າ​​ເມື່ອທຽບ​ກັບ​ແຜນ­ການ. ວຽກ​ງານກວດ​ລັດຖະການ​ເພື່ອ​ຄົ້ນ​ເຜີຍ​ບັນ­ດາ​ຂໍ້​ຈຳ­ກັດ​ຂອງ​ນະ­ໂຍ­ບາຍ​ເພື່ອ​ປັບ­ປຸງ​ແກ້​ໄຂ​ ກໍ່ຍັງ​ບໍ່​ທັນ​ໄດ້​ເຮັດ​ຢ່າງ​ທັນການ; ຕົ້ນຕໍ​ແມ່ນ​ພຽງແຕ່​ສຸມ​ໃສ່​ບັນ­ດາ​ຂົງ­ເຂດ​ພະນັກງານ ​ລັດ­ຖະ­ກອນ ແລະ ການຈັດ​ຕັ້ງ​​ບັນ­ຈຸ​ພະນັກງານ; ຍັງ​ບໍ່ທັນ​ດຳ­ເນີນ​ການ​ກວດ­ລັດຖະການ​ ຕໍ່​ບັນ­ດາ​ຂົງ­ເຂດ​ອື່ນ ​ທີ່​ຂຶ້ນ​ກັບ​ອຳ­ນາດ​ຕັດ­ສິນ​ຂອງ​ກະ­ຊວງ​ພາຍ​ໃນຄື​ ການອົບຮົມສຶກສາ ບຳລຸງ​ກໍ່­ສ້າງພະນັກງານ, ການຄຸ້ມ​ຄອງ​ສະ­ມາ​ຄົມ ອົງ​ການ­ຈັດ­ຕັ້ງ​ນອກ​ພາກ​ລັດ, ການ​ປະ­ຕິ​ຮູບ​ການ​ບໍ­ລິ­ຫານ.

ເພື່ອ​ແກ້​ໄຂ​ຂໍ້​ຈຳ­ກັດ ແລະ ປະ­ຕິ­ບັດ​​ບັນ­ດາ​ໜ້າ­ທີ່​ທີ່​ໄດ້ຮັບ​ມອບ​ໝາຍ​ໃຫ້​ໄດ້​ເປັນ​ຢ່າ​ງດີ, ສ້າງ​ການ​ຫັນປ່ຽນ​ຢ່າງ​ແຂງ­ແຮງ​ໃນ​ການ​ພັດ­ທະ­ນາ​ເສດ­ຖະ­ກິດ - ສັງ­ຄົມ, ຮັບ­ປະ­ກັນ​ການ​ພັດ­ທະ­ນາ​ແບບ​ຍືນ​ຍົງ, ໃນ​ເວລາຕໍ່​ໜ້າ ​ຕ້ອງ​ສຸມ​ໃສ່​ປະ­ຕິ­ບັດ​ບັນ­ດາ​ໜ້າ­ທີ່​ຈຸດ​ໜັກ​ໃຈ­ກາງ​ ດັ່ງ​ລຸ່ມ​ນີ້:

ທີ​ໜຶ່ງ, ກ່ຽວ​ກັບ​ວຽກ​ງານ​ປະ­ຕິ​ຮູບ​ການ​ບໍ­ລິ­ຫານ

ແຜນ​ແມ່​ບົດ​ການ​ປະ­ຕິ​ຮູບ​ການ​ບໍ­ລິ­ຫານ​ແຫ່ງ​ລັດ 10 ປີ ໄລ­ຍະ 2011 - 2020 ຕາມ​ມະ­ຕິ​ສະ­ບັບ​ເລກ​ທີ 30c/NQ-CP, ລົງ​ວັນ​ທີ 8 ພະ­ຈິກ 2011 ຂອງ​ລັດ­ຖະ­ບານ ​ໄດ້​ແບ່ງອອກ​ເປັນ​ສອງ​ໄລ­ຍະ: ໄລ­ຍະ​ທີ 1 ແຕ່ປີ 2011 ຫາ 2015, ໄລ­ຍະ​ທີ 2 ແຕ່​ປີ 2016 ຫາ 2020 ຊຶ່ງ​ມີ 5 ເປົ້າ​ໝາຍ ແລະ 6 ໜ້າ­ທີ່​ອັນ​ພື້ນຖານ. ໄລ­ຍະ​ທີ 1 ໄດ້​ບັນ­ລຸ​​ບັນ­ດາ​ຜົນ­ສຳເລັດ​ໃນ​ຂົງ­ເຂດ​ຕ່າງໆ​ ຄື ການ​ກໍ່­ສ້າງ​ລະ­ບຽບ​ກົດ­ໝາຍ, ການ​ປະ­ຕິ​ຮູບ​ລະບຽບ​ການ​ບໍ­ລິ­ຫານ, ການ­ຈັດ­ຕັ້ງ​ກົງ­ຈັກ​ບໍ­ລິ­ຫານ​ແຫ່ງ​ລັດ, ການ​ງານສາທາລະນະ ​ແລະ ການ​ລັດຖະກອນ. ​ໂດຍ​ເປັນ​ອົງ­ການ​ປະ­ຈຳ​ຂອງ​ຄະ­ນະ​ຊີ້​ນຳ​ການ​ປະ­ຕິ​ຮູບ​ການ​ບໍ­ລິ­ຫານ​ຂອງ​ລັດ­ຖະ­ບານ, ກະ­ຊວງ​ພາຍ​ໃນ​ໄດ້ປະກອບ­ສ່ວນ​ອັນ​ສຳ­ຄັນ ​ເຂົ້າ​ໃນ​ບັນດາ​ຜົນ­ສຳ­ເລັດ​ທີ່ໄດ້​ກ່າວມາ​ເທິງ​ນີ້.

ແຜນ­ການ​ປະ­ຕິ​ຮູບ​ການ​ບໍ­ລິ­ຫານ​ແຫ່ງ​ລັດ​ໄລ­ຍະ​ທີ 2 ທີ່ໄດ້​ຮັບ​ການ​ຜ່ານ​ອະນຸມັດ​ໂດຍນາຍົກລັດຖະມົນຕີ​ ໃນ​ຂໍ້​ຕົກ­ລົງ​ສະ­ບັບ​ເລກ​ທີ 225/QĐ-TTg, ລົງ​ວັນ​ທີ 4 ກຸມ­ພາ 2016 ຊຶ່ງ​ມີ​ບັນ­ດາ​ໜ້າ­ທີ່​ຈຸດໜັກ​ໃຈ­ກາງ​ດັ່ງ​ນີ້: ການ​ປະຕິ​ຮູບ​ລະ­ບຽບ​ກົດ­ໝາຍ; ການ​ອົບຮົມກໍ່­ສ້າງ ​ຍົກ​ສູງ​ຄຸນ​ນະ​ພາບ​ຖັນ​ແຖວ​ພະ­ນັກ­ງານ, ຂ້າ​ລັດ​ຖະ​ການ; ເອົາໃຈ­ໃສ່​​ເຖິງ​ການ​ປະ­ຕິ​ຮູບ​ນະ­ໂຍ­ບາຍ​ເງິນ­ເດືອນ; ການ​ຍົກ​ສູງ​ຄຸນ​ນະ​ພາບ​ການ​ບໍ­ລິ­ການ​ດ້ານ​ບໍ­ລິ­ຫານ ແລະ ຄຸນ​ນະ​ພາບ​ການ​ບໍ­ລິ­ການສາທາລະນະ.

​ປະ­ຈຸ​ປັນ, ຍັງ​ມີ​ຄວາມ​ແຕກ​ຕ່າງ​ບໍ່​ເປັນ​ເອກະ​ພາບ​ກັນກ່ຽວ​ກັບ ຫົວ​ຂອດ​​ຂອງ​ການຮັບແລະ​ສົ່ງ​ເອກະສານ​ກ່ຽວ​ກັບ​ການ​ຈົດ​ທະ­ບຽນ​ທຸ­ລະ​ກິດ. ​ລະ­ອຽດ, ໃນ​ຂໍ້​ຕົກ­ລົງ​ສະ­ບັບເລກ​ທີ 09/2015/QĐ-TTg, ​ລົງ​ວັນ​ທີ 23 ພຶດສະ­ພາ 2015 ວ່າ​ດ້ວຍກົດ​ລະບຽບ​ປະ­ຕູ​ດຽວ, ປະ­ຕູ​ດຽວ​ມີ​ການ​ຕໍ່​ເມື່ອງ​ພາຍ​ໃນ, ພາກ­ສ່ວນ​ຮັບແລະ​ສົ່ງ​ເອກະ­ສານ ​ໄດ້​ຕັ້ງ​ຢູ່​​ໃນຫ້ອງ­ການ​ຂອງ​ພະ​ແນກ​ແຜນ­ການແລະການ​ລົງ­ທຶນ​ແຂວງ. ຕາມ​ດຳລັດ​ສະ­ບັບ​ເລກ​ທີ 78/2015/NĐ-CP ວ່າ​ດ້ວຍ​ການ​ຈົດ​ທະ­ບຽນ​ການ​ທຸ­ລະ​ກິດ, ຫ້ອງ​ຈົດ​ທະ­ບຽນການ​ທຸ­ລະ​ກິດສັງກັດ​ພະ​ແນກ​ແຜນການແລະການລົງ­ທຶນ​ແຂວງ​ ​ເປັນ​ຜູ້​ຮັບແລະສົ່ງ​ເອ­ກະ­ສານ​ໂດຍ​ກົງ. ກະ­ຊວງ​ພາຍ​ໃນ​ຕ້ອງ​ມີ​ການ​ສະ­ເໜີ​ແຜນ­ການ​ແກ້​ໄຂ​ບັນ­ຫາດັ່ງ​ກ່າວ​ເທິງ​ນີ້​​ໂດຍ​ໄວ, ເຮັດ​ແນວ­ໃດ​ໃຫ້ມີ​ຄວາມ​ເປັນ​ເອ­ກະ​ພາບ​ກັນ​ຕາມ​ການ​ຊີ້​ນຳ​ຂອງ​ນາ­ຍົກ­ລັດ­ຖະ­ມົນ­ຕີ (ຕາມ​ໜັງສື​ທາງ​ການ​ສະ­ບັບ​ເລກ​ທີ 1350/VPCP-TCCV ລົງ​ວັນ​ທີ 3 ມີ­ນາ 2016). ຢູ່​ທ້ອງ​ຖິ່ນ​ຈຳ­ນວນ​ໜຶ່ງ​ຄື ນະ​ຄອບ ໂຮ່​ຈີ​ມິນ ໄດ້​ກໍ່­ສ້າງ​ແບບ­ຢ່າງ​ກ່ຽວ​ກັບ​ການ​ປະ­ຕິ​ຮູບ​ລະບຽບການ​ບໍ­ລິ­ຫານ, ກະຊວງ​ພາຍ​ໃນ​ຕ້ອງ​ປະ­ສານ​ສົມ­ທົບ​ກັບ​ກະ­ຊວງແຜນ­ການແລະການລົງ­ທຶນ​ ເພື່ອ​ຕີ​ລາຄາກ່ຽວ​ກັບ​ບັນ­ດາ​ຕົວ​ແບບ ​ແລະ ວິ­ທີ​ການ​ປະ­ຕິ­ບັດ​ທີ່​ມີ​ປະ​ສິດ­ທິ​ຜົນ ​ເພື່ອ​ແນ​ໃສ່​ທອດ​ຖອນ​ບົດ­ຮຽນ ແລະ ​ເປີດ​ກວ້າງ​ການ​ນຳ​ໃຊ້.

ກະ­ຊວງ​ພາຍ​ໃນ​ກໍ່​ຕ້ອງ​ຊຸກ­ຍູ້​ການ​ປະ­ຕິ­ບັດ​ການ​ປະ­ກາດ ດັດຊະນີ​ການ​ປະຕິ​ຮູບ​ການ​ບໍລິ­ຫານ​ປະຈຳ​ປີ ​ຂອງ​ບັນ­ດາ​ກະ­ຊວງ, ອົງ­ການ​ທຽບ​ເທົ່າ​ກະ­ຊວງ, ຄະ­ນະ​ກຳ­ມະ­ການ​ປະ­ຊາ­ຊົນ​ແຂວງ, ນະ­ຄອນ​ທີ່​ຂຶ້ນ​ກັບ​ສູນ​ກາງ ​ໃຫ້ຖືກຕ້ອງ​ຕາມ​ກຳນົດ. ຊຸກ­ຍູ້​ໃຫ້​ບັນ­ດາ​ອົງ­ການ​ທີ່​ກ່ຽວ­ຂ້ອງ​ ຜັນ​ຂະ­ຫຍາຍ​ການ​ກຳ­ນົດດັດຊະນີ​ຄວາມ​ພໍໃຈຕໍ່​ຄຸນ​ນະ​ພາບ​ການ​ບໍ­ລິ­ການ​ສາທາລະນະ (ຕາມ​ແຜນ​ແມ່​ບົດ​ການ​ປະ­ຕິ​ຮູບ​ການ​ບໍ­ລິ­ຫານ​ຮອດ​ປີ 2020 ຂອງ​ລັດ­ຖະ­ບານ, ຮັບ­ປະ­ກັນ​ຄວາມ​ພໍ­ໃຈ​ຂອງ​ບຸກ­ຄົນ​ຕໍ່​ການ​ບໍ­ລິ­ການ​ ໂດຍ​ຫົວ­ໜ່ວຍ​ບໍລິການ​ສາທາລະນະ​ສະໜອງ​ໃຫ້ ​ໃນ​ບັນ­ດາ​ຂົງ­ເຂດ​ຕ່າງໆ​ຄື ການ​ສຶກ​ສາ, ສາ­ທາ­ລະ­ນະ​ສຸກ ​​ໃຫ້ບັນ­ລຸ​ໄດ້​ລະ­ດັບສູງ​ກວ່າ 80%).

ໃນ​ວັນ​ທີ 30 ພຶດ­ສະ­ພາ 2016, ກະ­ຊວງ​ພາຍ​ໃນ​ໄດ້​ຍື່ນ​ຮ່າງ​ຂໍ້​ຕົກ­ລົງ​ຂອງ​ນາ­ຍົກ­ລັດ­ຖະ­ມົນ­ຕີ ກ່ຽວ​ກັບ​ການ​ປັບປຸງບູ­ລະ­ນະ​ຄະ­ນະ​ຊີ້​ນຳ​. ພ້ອມກັນ​ນັ້ນ, ​ໂດຍເສີມ​ຂະ­ຫຍາຍ​​ບົດ­ບາດ​ເປັນ​ອົງ​ການ​ປະ­ຈຳ​ກ່ຽວ​ກັບ​ການ​ປະ­ຕິ​ຮູບ​ການ​ບໍ­ລິ­ຫານ, ກະ­ຊວງ​ພາຍ​ໃນ​ຈະ​ສືບ​ຕໍ່​ຮັບ­ປະ­ກັນ​ເງື່ອນ­ໄຂ, ເປັນ​ຫົວ​ຂອດ​ທີ່​ຮັກ­ສາ​ຄວາມ​ພົວພັນ​ລະຫວ່າງ​ບັນ­ດາ​​ກຳ­ມະ­ການ​ຂອງ​ຄະ­ນະ​ຊີ້​ນຳ; ເຕົ້າ​​ໂຮມ​ແຜນ­ການ​ກວດ­ກາ​ການ​ປະ­ຕິ​ຮູບ​ການ​ບໍ­ລິ­ຫານ ​ຂອງ​ບັນດາ​ກຳ­ມະ­ການ​ຄະ­ນະ​ຊີ້​ນຳ; ກະ­ກຽມ​ຢ່າງ​ລະ­ອຽດ​ ແລະ ຄົບ​ຖ້ວນ​​ໃຫ້​ແກບັນ­ດາ​ການ​ປະ­ຊຸມ ເຮັດ​ວຽກ​ຂອງ​ຄະ­ນະ​ຊີ້​ນຳ​ ຕາມ​ຂໍ້​ກຳ­ນົດ​ທີ່​ໄດ້​ວາງ​ໄວ້. ກໍ່­ສ້າງ​ແຜນ​ການ­ຈັດ­ຕັ້ງ​ກອງ​ປະ­ຊຸມ​ຕາມ​ສາຍ ກ່ຽວ​ກັບ​ການ​ສະ­ຫຼຸບ​ເບື້ອງ​ຕົ້ນ​ການ​ປະ­ຕິ​ຮູບ​ການ​ບໍ­ລິ­ຫານ​ໄລ­ຍະ​ທີ 1, ຜັນ​ຂະ­ຫຍາຍ​ປະ­ຕິ­ບັດ​ໄລ­ຍະ​ທີ 2, ແນ­ໃສ່​ທອດ​ຖອນ​ບົດ­ຮຽນ ແລະ ວາງ​​ມາດ​ຕະ­ການຕ່າງໆ​ອອກ​ມາ, ໃນ​ນັ້ນ​ຕ້ອງ​ເອົາ­ໃຈ­ໃສ່​ເຖິງ​ເນື້ອ​ໃນປັບປຸງ​ບູ­ລະ­ນະ​ຄະ­ນະ​ຊີ້​ນຳ​ການ​ປະຕິຮູບ​ການ​ບໍ­ລິ­ຫານ​ຂັ້ນ​ຕ່າງໆ, ແນ­ໃສ່​ປະ­ຕິ­ບັດ​ໃຫ້​ມີ​ປະ​ສິດ­ທິ​ຜົນ​ໃນ​ເວ­ລາ​ຕໍ່​ໄປ​ນີ້.

ກ່ຽວ​ກັບ​ການ​ປະ­ຕິ​ຮູບ​ການ​ບໍ­ລິ­ຫານ​ແຫ່ງ​ລັດ: ກະ­ຊວງ​ພາຍ​ໃນ​ເປັນ​ອົງ­ການ​ປະ­ຈຳ, ​ເປັນຫົວ​ຂອດ, ແຕ່​ນີ້​ແມ່ນ​ໜ້າ­ທີ່​ລວມ​ຂອງ​ທົ່ວ​ລະ­ບົບ​ແຫ່ງ​ລັດ. ພິ­ເສດ, ໃນ​ຂົງ­ເຂດການ​ບໍ­ລິ­ຫານ, ຫວຽດ­ນາມ​ຕ້ອງຕັດ­ສິນ​ໃຈ​ກໍ່​​ສ້າງ​ລັດ​ແຫ່ງ​ອຳ­ນາດ​ກົດ­ໝາຍ​ ທີ່​ເປັນ​ຂອງ​ປະ­ຊາ­ຊົນ, ເພື່ອ​ປະ­ຊາ­ຊົນ, ຮັບ​ໃຊ້​ປະ­ຊາ­ຊົນ​ຢ່າງ​ສຸດ​ໃຈ. ຕໍ່​ຂົງ​ເຂດ​ການເຄື່ອນ​ໄຫວ​ທຳການ​ຜະ­ລິດ​ທຸ­ລະ​ກິດ, ກົງ­ຈັກ​ບໍ­ລິ­ຫານ​ແຫ່ງ​ລັດ​ຕ້ອງ​ສ້າງ​ເງື່ອນ​ໄຂ​ເອື້ອອຳ­ນວຍ ​ໃຫ້​ປະຊາຊົນ, ​ວິ​ສາ​ຫະ​ກິດ ດຳ​ເນີນ​ການ​ຜະລິດ​ທຸລະ​ກິດ​ຢ່າງ​ສະດວກ​ດີ​ທີ່​ສຸດ ນັບແຕ່​ຂອດ​ກໍ່ຮ່າງ​ສ້າງ​ຕົວ, ຈົດ​ທະບຽນ, ໄລ່​ລຽງ, ຜະ­ລິດ, ທຸ­ລະ​ກິດ; ລົບ​ລ້າງ​ບັນ­ດາ​ສິ່ງ​ກີດ­ຂວາງ, ລະ­ບຽບ​ການ​ທີ່​ສັບ­ສົນ​ຫຍຸ້ງ​ເຫຍີງ, ​ໃບ​ອາ​ນຸ​ຍາດ​ນ້ອຍ ... ຕາມ​ຈິດ­ໃຈທີ່​ນາ­ຍົກ­ລັດ­ຖະ­ມົນ­ຕີ​ໄດ້ຊີ້​ນຳ, ນັ້ນ​ແມ່ນ​ການ​ຫຼຸດ­ຜ່ອນ​ລະ­ບຽບ​ການ​ໜັງສ້ຽນ​ໜັງ­ສື, ປະ­ຕິ­ບັດ​ການ​ຈົດ​ທະ­ບຽນ​ຕາມ​ສາຍ​ອອນ​ໄລ, ແນະນຳ​​ຂໍ້​ມູນ​ຂ່າວ­ສານ​ຢ່າງ​ຄົບ​ຖ້ວນ, ປະ­ຕິ­ບັດ​ການ​ບໍ­ລິ­ການ​ສາທາ­ລະ­ນະຢ່າງ​ດີ ແລະ ມີ​ປະ​ສິດທິ​ຜົນ. ຖ້າ​ຫາກ​ວ່າ ບັນ­ດາ​ໂຄງ­ການ​ໄດ້​ຈົດ​ທະ­ບຽນຢ່າງ​ສະ­ດວກ​ສະ­ບາຍ, ໄດ້​ຮັບ​ການ​ແນະ​ນຳ​ຢ່າງ​ຄົບ​ຖ້ວນ ດ້ວຍ​ລະ­ບຽບ​ການ​ບໍ­ລິ­ຫານ​ທີ່​ເບົາ­ບາງ, ​ເວ­ລາຖືກ​ຫຍໍ້​ສັ້ນ, ​ການ​ກວດ­ສອບ​​ໄດ້​ດຳ​ເນີນຕາມ​ຫຼັງ..., ກໍ່​ຈະ​ເປັນ​ການສ້າງ​ເງື່ອນ­ໄຂ​ເພື່ອ​ດຶງ​ດູດ​ບັນ­ດາ​ກຸ່ມ​ບໍ­ລິ­ສັດ, ວິ​ສາ​ຫະ​ະ​ກິດຕ່າງ­ປະ­ເທດ​​ໃຫ້​ເຂົ້າ​ມາ​ທຳ​ງານ ແລະ ທຸ­ລະ​ກິດ​ຢູ່​ຫ​ວຽດ​ນາມ. ​ເພາະສະ​ນັ້ນ, ລັດ­ຖະ­ບານ​ຈຶ່ງໄດ້​ມີ​ນະ­ໂຍ­ບາຍ​ກ່ຽວ​ກັບ​ການ​ປະ­ຕິ​ຮູບ​ການ​ບໍ­ລິ­ຫານ ​ດ້ວຍ 5 ເປົ້າ​ໝາຍ, 6 ໜ້າ­ທີ່, ໃນ​ນັ້ນ​ການ​ປະ­ຕິ​ຮູບ​ລະ­ບຽບ​ການ​ບໍ­ລິ­ຫານ ​ມີ​​ບົດ­ບາດ​ສຳ­ຄັນ​ພິ­ເສດ​ ໃນ​ການ​ພັດ­ທະ­ນາ​ເສດ­ຖະ­ກິດ - ສັງ­ຄົມ.

ພ້ອມ​ກັບ​ການ​ກໍ່­ສ້າງ​ລະ­ບຽບ​ກົດ­ໝາຍ, ກົງ­ຈັກ, ຂ້າ​ລັດ​ຖະ​ການ, ລະບອບການ​ງານ..., ຕ້ອງ​ດັດ­ແປງ​ຢ່າງ​​ແຮງ​ລະ­ບຽບ​ການ​ບໍ­ລິ­ຫານ ແລະ ໝູນ​ໃຊ້​ເຕັກ​ໂນ​ໂລ​ຊີສື່ສານເຂົ້າ​ໃນ​ການ​ຜັນ​ຂະ­ຫຍາຍ​ບັນ­ດາ​ລະ­ບຽບ​ການ​ບໍ­ລິ­ຫານ (ກໍ່­ສ້າງ​ລະ­ຫັດ​ທີ່​ກະ­ທັດ​ລັດງ່າຍ­ດາຍ ​ເພື່ອ​ໃຫ້​ປະ­ຊາ­ຊົນ​ເຂົ້າ​ເຖິງ​ຢ່າງໄວ). ໃນ­ສະ​ເພາະໜ້າ, ຕ້ອງ​ຜັນ​ຂະ­ຫຍາຍ​ການ​ສະ​ຫຼຸບ​ຕີ​ລາ­ຄາ​ຢ່າງລະອຽດ­ຮອບ­ດ້ານ ​ກ່ຽວ​ກັບ​ສະ­ພາບ​ການ​ຕົວ​ຈິງ, ບັນ­ດາ​ດ້ານ​ດີ, ດ້ານ​ອ່ອນ, ຂໍ້​ຂາດ​ຕົກ​ບົກພ່ອງ​ຂອງ​ບັນ­ດາ​ລະ­ບຽບ​ການ​ບໍ­ລິ­ຫານ, ບົນ​ພື້ນ­ຖານ​ນັ້ນ ເພື່ອ​ວາງ​​ມາດ​ຕະ­ການ​ແກ້​ໄຂຢ່າງ​ເໝາະ​ສົມ.

ໃນ​ປະ­ຈຸ​ບັນ, ການ​ໝູນ​ໃຊ້​ເຕັກ​ໂນ​ໂລ​ຊີ​ສື່ສານ ເຂົ້າ​ໃນ​ການເຄື່ອນ​ໄຫວ​ຄຸ້ມ​ຄອງ​ຂອງ​ກົງ­ຈັກ​ລັດ, ການ​ບໍ­ລິ­ຫານ​ແຫ່ງ​ລັດ ​ນັບ​ມື້​ນັບ​ກວ້າງຂວາງ ແລະ​ ກາຍ​ເປັນ­ຄວາມ​ຮຽກ­ຮ້ອງ​ທີ່​ຈຳ­ເປັນ​ຮີບ​ດ່ວນ. ດັ່ງ­ນັ້ນ, ຕ້ອງ​ກຳນົດ​ຢ່າງ​ຈະ­ແຈ້ງ​ກ່ຽວ​ກັບ​ບັນ­ດາ​ກະ­ຊວງ, ຂະ­ແໜງ­ການ, ທ້ອງ​ຖິ່ນທີ່​ມີ​ການ​ເຊື່ອມ​ຕໍ່​ ເພື່ອ​ສ້າງ​​ກົນ​ໄກ​ປະ­ຕູ​ດຽວ, ປະ­ຕູ​ດຽວ​ມີ​ການ​ຕໍ່​ເນື່ອງ​ພາຍ​ໃນ ​ໃນທຸກ​ຂົງ­ເຂດ, ອຳ­ນວຍ​ຄວາມ​ສະ­ດວກ​ໃຫ້​ແກ່​ປະ­ຊາ­ຊົນ. ເດັດດ່ຽວ​ລົບ​ລ້າງ​ສະ­ພາບ​ການ “ສິດ​ຂອງ​ເຈົ້າ, ສິດຂອງ​ຂ້ອຍ” ຫຼື “ຍາດ​ເອົາ​ຄວາມ​ສະ­ດວກ​ມາ​ໃຫ້​ຕົນ​ເອງ”; ຕ້ອງ​​ກຳ­ນົດ​­ແຈ້ງ​ໜ້າທີ່​ຂອງ​ຫ້ອງ​ວ່າ­ການ​ລັດ­ຖະ­ບານ ​ກໍ່​ຄື​ຂອງ​ບັນ­ດາ​ກະ­ຊວງ, ຂະແໜງການ, ທ້ອງ​ຖິ່ນ ​ໃນ​ການ​ປະ­ຕິ​ຮູບ​ການ​ບໍລິ­ຫານ, ພິ­ເສດ​ແມ່ນ​ລະ­ບຽບ​ການ​ບໍ­ລິ­ຫານ, ການ​ໝູນ​ໃຊ້​ເຕັກ​ໂນ​ໂລ​ຊີ​ສື່ສານ​ເພື່ອເຊື່ອມ​ຕໍ່ ສະ​ສົມ​ໃນ​ຂົງ­ເຂດ​ນີ້. ພວກ​ເຮົາ​ພວມ​ມຸ່ງ​ໄປສູ່​ການ​ກໍ່­ສ້າງ “ລັດຖະ­ບານ​​ເອ​ເລັກ​ທຣໍນິກ”; ດ້ວຍ​ເຫດ​ນັ້ນ, ຕ້ອງທຳ​ຄວາມ​ກະຈ່າງ­ແຈ້ງກ່ຽວ​ກັບ​ຄວາມ​ສຳ­ນຶກ ເນື້ອ​ໃນ​ຂອງ “ລັດ­ຖະ­ບານ​​ເອ​ເລັກ​ທຣໍນິກ”; ບັນ­ດາ​ລະ­ບຽບ​ການ​ບໍລິຫານ ​ໂດຍ​ຜ່ານ “ລັດຖະບານ​ເອ​ເລັກ​ທຣໍນິກ” ຕ້ອງ​ໄດ້​ກຳ­ນົດ​ຢ່າງ​ລະ­ອຽດ, ຈະ­ແຈ້ງ, ເປີດ­ເຜີຍ, ໂປ່ງ​ໃສ ແລະ ສະ­ດວກ​ສະບາຍ​ໃຫ້​ແກ່​ປະ­ຊາ­ຊົນ.

ທີສອງ, ກ່ຽວ​ກັບຂ້າ​ລັດ​ຖະ​ການ, ການ​ງານ

ກະ­ຊວງ​ພາຍ​ໃນ​ໄດ້​ເອົາ­ໃຈ­ໃສ່​ຜັນ​ຂະ­ຫຍາຍ​ປະ­ຕິ­ບັດວຽກ​ງານ​ກໍ່­ສ້າງ, ບູ­ລະ­ນະ​ລະ­ບຽບ​ກົດ­ໝາຍ ແລະ ປະ­ຕິ​ຮູບ​ລະ­ບອບ​ການ​ງານ, ຂ້າ​ລັດ​ຖະ​ການ​ ​ເຊິ່ງໄດ້​ຍື່ນ​ໃຫ້​ລັດ­ຖະ­ບານ​ປະ­ກາດ​ໃຊ້ ແລະ ກະຊວງ​ກໍ່​ໄດ້ປະກາດ​ໃຊ້​ບັນ­ດາ​ເອ­ກະ­ສານ​ທີ່​ກຳ­ນົດ​ຢ່າງ​ລະ­ອຽດກ່ຽວ​ກັບ​ ກົດ­ໝາຍ​ວ່າ​ດ້ວຍ​ພະນັກງານຂ້າ​ລັດ​ຖະ​ການ ​ແລະ ກົດໝາຍ​ວ່າ​ດ້ວຍ​ພາລະ​ກອນ; ສ້າງ​ພື້ນ­ຖານ​ນິ­ຕິ​ກຳ​ໃຫ້​ແກ່​ການ​ຄຸ້ມ​ຄອງ, ນຳ​ໃຊ້​ຖັນ​ແຖວ​ພະນັກງານ ຂ້າ​ລັດ​ຖະ​ການ, ​ປະ­ກອບ­ສ່ວນ​ເຂົ້າ​ໃນ​ການ​ຍົກ​ສູງ​ຄຸນ​ນະ​ພາບ​ຖັນ​ແຖວ​ນີ້ ແລະ ເພີ່ມ​ທະ­ວີ​ປະ​ສິດ­ທິ​ຜົນ​​ແຫ່ງການ​ເຄື່ອນ​ໄຫວ​ຂອງ​ລະບົບ​ການ​ບໍ­ລິ­ຫານ. ໃນ​ເວ­ລາ​ຕໍ່​ໄປ​ນີ້, ກະ­ຊວງ​ພາຍ​ໃນ​ຕ້ອງ​ເອົາ­ໃຈ­ໃສ່​​ເຖິງ​ການ​ສືບ​ຕໍ່​ຜັນຂະຫຍາຍ​ຢ່າງຮີບ​ດ່ວນ​ບັນ­ດາ​ວຽກ​ງານ​ດັ່ງ​ລຸ່ມ​ນີ້:

1- ຕາມ​ລັດ​ຖະ​ທຳ​ມະ­ນູນ ແລະ ກົດ­ໝາຍ​ວ່າ​ດ້ວຍ​ການ­ຈັດ­ຕັ້ງ​ລັດ­ຖະ­ບານ​ປີ 2015, ລັດ­ຖະ­ບານ​ເປັນອົງການ​ຄຸ້ມ​ຄອງ​ບໍລິຫານ​ລັດທາງ​ດ້ານ​ພະ­ນັກ­ງານ ຂ້າ​ລັດ­ຖະ­ການ ແລະ ວຽກ​ງານ​ບໍລິຫານ​ ຢູ່ໃນ​ບັນ­ດາ​ອົງ­ການ​​ລັດ ​ແລະ ຫົວ­ໜ່ວຍ​ພາ­ລະ­ກິດ​ແຫ່ງ​ລັດ. ກະ­ຊວງ​ພາຍ​ໃນ​ຕ້ອງຮີບ​ກໍ່­ສ້າງ ແລະ ປັບ­ປຸງ​ບູ­ລະ­ນະ​ດຳ­ລັດ​ກ່ຽວ​ກັບ​ການ​ໝູນ​ໃຊ້​ກົດ­ໝາຍ​ວ່າ​ດ້ວຍ​ພະ­ນັກ­ງານຂ້າ​ລັດ​ຖະ​ການ ​ສຳ­ລັບ​ເປົ້າ​ໝາຍ​ພະນັກ­ງານ​ ​ເພື່ອ​ຍື່ນ​ໃຫ້​ລັດຖະ­ບານ​ ພິ­ຈາ­ລະ­ນາ, ປະ­ກາດ​ໃຊ້.

2- ກະ­ຊວງ​ພາຍ​ໃນ​ຕ້ອງ​ກວດ­ກາ​ທົບ​ທວນ, ສັງ​ລວມ​ບັນ­ດາ​ຂໍ້​ຄ້າງຄາ​ ໃນ​ວຽກ​ງານ​ຄັດ​ເລືອກຂ້າລັດຖະການ, ນຳ​ໃຊ້ ແລະ ຄຸ້ມ​ຄອງ​ຂ້າ​ລັດ​ຖະ​ການລັດຖະການ ​ແລະ ​ໃນການສອບ­ເສັງ​ເລື່ອນ​ຊັ້ນ​​ຂ້າ​ລັດ​ຖະ​ການ; ປັບ­ປຸງ​ບູລະ­ນະ​ລະບຽບ​ກົດ­ໝາຍ​ ແນ­ໃສ່​ແກ້​ໄຂ​ບັນ­ດາ​ບັນ­ຫາ​ທີ່​ເກີດ​ຂຶ້ນ​ໃນ​ເວ­ລາ​ທີ່​ຜ່ານ​ມາ.

- ໃນ​ຂົງ­ເຂດ​ຄັດ​ເລືອກ​ຂ້າ​ລັດ­ຖະ­ກອນ, ຕ້ອງ​ເປີດ­ເຜີຍ​ກ່ຽວ​ກັບ​ບັນ­ທັດ­ຖານ, ມາດ­ຕະ­ຖານ​: ຄວາມໂປ່ງ​ໃສ​ເພື່ອ​​ໃຫ້ຜູ້​ສະ­ໝັກຮັບ​ເລືອກ​ຈະ​ໄດ້​ແຂ່ງ­ຂັນ​ດ້ວຍ​ຄວາມ​ສາ­ມາດ​ແທ້​ຈິງ, ຕອບ​ສະ­ໜອງ​ຄວາມ​ຕ້ອງ­ການຂອງ​ການ​ຄັດ​ເລືອກ; ລົບ​ລ້າງ​ສະ­ພາບ​ການ​ວິ້ງ​ເຕັ້ນ​ ​ເລັດ​ລອດວິງ​ວອນຫາຄວາມ​ຊ່ວຍ­ເຫຼືອ ກໍ​ຄືການສວຍ​ໃຊ້​ຄວາມລື້ງ​ເຄີຍ​ຖານ​ຍາດຕິ​ພີ່ນ້ອງ​ ໃຫ້ໝົດ​ໄປ​ໂດຍ​ໄວ. ຕ້ອງ​ກໍ່­ສ້າງ​ກົງ­ຈັກ​ອຳ­ນາດ​ການ​ປົກ­ຄອງ​ແຫ່ງ​ລັດ ​ທີ່​ປະກອບ​ດ້ວຍ​ຖັນ​ແຖວ​ຂ້າ​ລັດ­ຖະ­ການທີ່​ມີ​ຄຸນ­ສົມ­ບັດ​ສິນ​ທຳ, ມີ​ຈິດ­ໃຈ​ຮັບ​ໃຊ້​ປະ­ຊາ­ຊົນ, ມີ​​ລະດັບຄວາມ​ຮູ້​​ທາງ​ດ້ານ​ກົດ­ໝາຍ, ມີ​ລະ­ດັບ​ວິ­ຊາ​ການ ວິ­ຊາ​ສະ­ເພາະ​ຢ່າງ​ເລິກ­ເຊິ່ງ.

- ກວດ­ກາ​ທົບ​ທວນ, ​ແກ້​ໄຂດັດ​ແປງ​ໃນ​ທັນທີ​ທັນ​​ໃດ​ບັນ­ດາ​ລະ­ບຽບ​ການ, ລຳ­ດັບ​​ດຳ­ເນີນ​ງານທີ່​ບໍ່​ເໝາະ​ສົມ ເພື່ອ​ສ້າງ​ເງື່ອນ­ໄຂ​ທຸກ​ຢ່າງ​ ໃຫ້ປະຊາຊົນ​ພົນລະ​ເມືອງທຸກ​ຄົນ​ມີ​ໂອ­ກາດສະ­ເໝີ­ພາບ​ໃນ​ການ​ທຸ­ລະ​ກິດ, ທຳ​ມາ​ຫາ​ກິນ, ຊື້​ຂາຍ ຫຼື​ເຂົ້າ​ຮ່ວມ​ເຂົ້າ​ໃນ​ກົງ­ຈັກ​ບໍ­ລິ­ຫານ​ແຫ່ງ​ລັດ. ຖ້າ​ຫາກ ບັນ­ດາດັດຊະນີ​ກ່ຽວ​ກັບ​ຄວາມເພີງພໍໃຈ, ດັດຊະນີ​ກ່ຽວ​ກັບ​ການ​ປະ­ຕິ​ຮູບ​ການ​ບໍ­ລິ­ຫານ​ ​​ໄດ້​ຮັບ​ການປະ­ຕິ­ບັດ​ເປັນ​ຢ່າງ​ດີ ​ມັນ​ຈະ​ສາມາດ​ສ້າງ​ກຳ­ລັງ​ໜູນ​ໃຫ້​ແກ່​ການ​ພັດ­ທະ­ນາ. ບັດ​ດາ​ດັບ​ຊະນີ​ເຫຼົ່າ​ນີ້ ​ກໍ່ຄື​ເປັນ​ຂໍ້​ມູນກ່າວ​ເຕື່ອນ​ສຳ­ລັບ​ບັນ­ດາ​ອົງການລັດ​ກ່ຽວ​ກັບ​ຄຸນ​ນະ​ພາບ​ການ­ເຄື່ອນ­ໄຫວ​ຂອງ​ຕົນ​ເອງ.

- ຕາມ​ກົດ­ໝາຍ​ວ່າ​ດ້ວຍ​ພະ­ນັກ­ງານຂ້າ​ລັດ​ຖະ​ການ, ຄະນະກຳ­ມະ­ການ​ປະ­ຊາ​ຊົນ​​ເມືອງ​ເປັນ​ຜູ້​ຈັດ​ຕັ້ງ​ການ​ຄັດ​ເລືອກ​ຂ້າ​ລັດ­ຖະ­ການ​ຂັ້ນ​ຕາ​ແສງ. ແຕ່​, ຕາມ​ການ​ສ່ອງ​ແສງ, ສຳລັບບັນດາເມືອງທີ່ມີຜູ້ສະໝັກໜ້ອຍ​ ​ການ­ຈັດ­ຕັ້ງ​ການ​ຄັດ​ເລືອກ​ຢູ່​ເມືອງ​ຈະ​ສິ້ນ​ເປື້ອງ​ຫຼາຍ. ໃນ​ເວ­ລາ​ທີ່​ຜ່ານ​ມາ, ນາຍົກລັດ­ຖະ­ມົນ­ຕີ​ໄດ້​ອະ​ນຸ​ຍາດ​ໃຫ້​ທ້ອງ​ຖິ່ນ​ຈຳ­ນວນ​ໜຶ່ງ​ໄດ້​ຈັດ​ຕັ້ງ​ການ​ຄັດ​ເລືອກ​ຢູ່​ຂັ້ນ​ແຂວງຄື ແທງ​ຮວ​າ, ກວ໋າງ​ນິນ. ບັນ­ຫາ​ນີ້​ຈະ​ຕ້ອງ​ມີ​ການ​ຄົ້ນ​ຄ້ວ​າ, ສະ­ເໜີ​ທິດ​ທາງ​ແກ້​ໄຂ​ໃຫ້​ສອດ­ຄ່ອງ​ກັບພາກ​ຕົວ​ຈິງ.

- ການ­ຈັດ­ຕັ້ງ​ການ​ສອບ­ເສັງ​ເພື່ອ​ເລື່ອນ​ຊັ້ນ​ໃຫ້​ພະ­ນັກ­ງານ​ຂ້າ​ລັດ­ຖະ­ກອນ​ ກໍ່ໄດ້​ມີ​ບັນ­ຫາ​ຈຳ­ນວນ​ໜຶ່ງ​ທີ່​ເກີດ​ຂຶ້ນຄື ການ​ໝູນ​ໃຊ້​ເປັນລວາດ​ພ້ອມ​ກັນ​ ບັນ­ດາ​ວິ­ຊາ​ສອບ­ເສັງ​ໃຫ້​ແກ່​ໝົດ​ທຸກ​ເປົ້າ​ໝາຍ​ຢູ່ບັນດາ​ຂະ​ແໜງ​ການ, ຂົງ­ເຂດ, ທີ່​ຕັ້ງ­ເຮັດ​ວຽກ​ທີ່​ຕ່າງ​ກັນ​ ແມ່ນ​ບໍ່​ເໝາະ​ສົມ; ຍັງ​ບໍ່​ທັນ​ກຳ­ນົດ​ກ່ຽວ​ກັບ​ເວ­ລາ​ປະ­ກາດ​ຜົນ­ການ​ສອບ​ເສັງ; ມີ​ການ​ສະ­ເໜີ​ກ່ຽວ​ກັບ​ການ​ແບ່ງ​ຂັ້ນ​ຈັດ​ຕັ້ງ​ການ​ສອບ­ເສັງ​ເລື່ອນ​ຊັ້ນຂ້າລັດຖະການ​ ແຕ່ຊັ້ນ​ນັກວິ­ຊາ​ການ​ຂຶ້ນເປັນນັກ​ວິ­ຊາ​ການ​ຕົ້ນ​ຕໍ່ ­ໃຫ້​​ກະ­ຊວງ, ຂະ­ແໜງ­ການ, ທ້ອງ​ຖິ່ນ​ເປັນ​ຜູ້​ຈັດຕັ້ງ. ຫາງ​ສຽງ​ສັງ­ຄົມ​ໄດ້​ສ່ອງ​ແສງ​​ບັນ­ຫາ​ຈຳ­ນວນ​ໜຶ່ງ, ໃນ​ນັ້ນ​ມີ​ຄວາມ​ຫຍໍ້­ທໍ້. ເພື່ອ​ແກ້​ໄຂບັນ­ດາ​ບັນ­ຫາ​ນີ້, ບັນ­ດາ​ອົງ­ການ​ພາລະ​ບົດ­ບາດ ​ຕ້ອງ​ກໍ່ສ້າງ​ບັນ­ດາ​ວິ­ຊາ​ສອບເສັງ​ທີ່​ເໝາະ​ສົມ​ກັບ​ບັນ­ດາ​ເປົ້າ​ໝາຍ​ທີ່​ຕ່າງ​ກັນ; ຈັດ​ຕັ້ງ​ການ​ສອບ­ເສັງ​ຕ້ອງ​ມີ​ຄວາມ​ຈະແຈ້ງ, ເປີດ­ເຜີຍ ແລະ​ ໂປ່ງ​ໃສ.

- ໃນ​ການ​ຄັດ​ເລືອກຮັບ​ເອົານັກ​ສຶກ​ສາ​ຜູ້​ຮຽນ​ຈົບ​ທີ່​ດີ­ເດັ່ນ, ຄົນ​ທີ່​ມີບົດຮຽນ​ປະ­ສົບ​ການ​ ຕາມ​ມາດ­ຕາ​ທີ 19 ຂອງ​​ດຳ­ລັດ​ສະ­ບັບ​ເລກ​ທີ 24/2010/NĐ-CP ​ກຳ­ນົດ​ກ່ຽວ​ກັບ​ການ​ຄັດ​ເລືອກ, ນຳ​ໃຊ້ ແລະ ຄຸ້ມ​ຄອງ​ຂ້າ​ລັດຖະການ, ຕ້ອງ​ຄົ້ນ­ຄວ້າ​​ເບິ່ງວ່າ ຄວນ​ຮັກ­ສາ​ລະ­ບຽບ​ການ​ຂໍຄວາມ​​ເຫັນ​​ເປັນ​ເອ­ກະ​ພາບ​ຂອງ​ກະ­ຊວງ​ພາຍ​ໃນຫຼື​ບໍ່ ຫຼືວ່າ ກະ­ຊວງ​ພາຍ​ໃນ​ແນະນຳ​ບັນ­ທັດ­ຖານ​ທີ່​ຈະ­ແຈ້ງ ລະ­ອຽດ ແລະ ມອບ​ສິດ​ຕັດ­ສິນ​ໃຫ້​ແກ່​ອົງ­ການ​ຄັດ​ເລືອກ (ສຳ­ລັບ​ບັນ­ດາ​ກໍ­ລະ­ນີ​ທີ່​ຄັດ​ເລືອກ​ຕາມ​ແບບ​ທຳ​ມະ​ດາ).

3- ຄົ້ນ­ຄວ້າ​​ແກ້​ໄຂດັດ​ແປງ​ດຳ­ລັດ​ສະ­ບັບ​ເລກ​ທີ 41/2012/NĐ-CP ກຳ­ນົດ​ກ່ຽວ​ກັບ​ທີ່​ຕັ້ງ­ເຮັດ​ວຽກ​ໃນ​ຫົວ­ໜ່ວຍ​ພາ­ລະ­ກິດ​ແຫ່ງ​ລັດ ​ຕາມ​ທິດ: ຫົວ­ໜ່ວຍ​ພາ­ລະ­ກິດ​ແຫ່ງ​ລັດ​ໄດ້​ຮັບ​ການ​ມອບ​ສິດ​ເປັນ​ເຈົ້າ​ຕົນ​ເອງ​ໃນ​ການ​ໃຊ້​ຈ່າຍ​ງົບປະມາດນ​ປະຈຳ, ໄດ້​ຕົກ­ລົງ​ກ່ຽວ​ກັບທີ່​ຕັ້ງ­ເຮັດ​ວຽກ ໂຄງ​ສ້າງ ແລະ ຈຳ­ນວນ​ຂ້າ​ລັດ­ຖະ­ການ ​ຕາມ​ມະ­ຕິ​ກອງ​ປະ­ຊຸມ​ລັດ­ຖະ­ບານ​ໃນ​ຄັ້ງ​ເດືອນ​ເມ­ສາ 2016.

- ກ່ຽວ​ກັບ​ການ​ກໍ່­ສ້າງ​ທີ່​ຕັ້ງ­ເຮັດ​ວຽກ, ເຖິງ​ວ່າ­ ​ໂຄງ­ການ​ທີ່​ຕັ້ງ­ເຮັດ​ວຽກ​ສຳລັບ​ບັນ­ດາ​ກະ­ຊວງ, ຂະແໜງການ, ທ້ອງ​ຖິ່ນ ​ໄດ້​ສຳ­ເລັດ​ໂດຍ​ພື້ນ​ຖານ​ແລ້ວ, ແຕ່ຫາ​ກໍ່​ໄດ້​ອະ­ນຸ­ມັດ​ຜ່ານ​ພຽງ​ແຕ່​ບັນຊີ​ທີ່​ຕັ້ງ­ເຮັດ​ວຽກ, ຍັງ​ບໍ່​ໄດ້​ອະ­ນຸ­ມັດ​ຜ່ານ​ໂຄງ​ສ້າງ​ຊັ້ນ​ຂັ້ນ ແລະ ຈຳ­ນວນ​ບັນ­ຈຸ. ດັ່ງ­ນັ້ນ, ຍັງ​ບໍ່​ມີ​ພື້ນ­ຖານ​ເພື່ອ​ປະ­ຕິ­ບັດ​ການ​ປັບ­ປຸງ​ການ​ບັນ­ຈຸ​ລັດ­ຖະ­ກອນ​ໃຫ້​ກະ­ທັດ​ລັດ​ໄດ້.

- ການ​ບັນ­ຈຸ​ລັດ­ຖະ­ກອນ​ໃຫ້​ກະ­ທັດ​ລັດ (ແບບ​​ຫລຸດສອງ, ເພີ່ມໜຶ່ງ) ຕາມ​ມະ­ຕິ​ສະ­ບັບ​ເລກ​ທີ 39-NQ/TW, ລົງ​ວັນ​ທີ 17 ເມ­ສາ 2015, ຂອງ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ​ວ່າ​ດ້ວຍ​ການຫລຸດຜ່ອນ​ການບັນຈຸ​ໃຫ້​ກະທັດ​ລັດ ​ແລະ ​ຈັດ​ວາງ​ຄືນ​ໃໝ່​ຖັນ​ແກວ​ພະນັກງານ​ຂ້າລັດຖະການ ຊຶ່ງ​ມີຈຸ​ປະ­ສົງ​​ດຶງ​ດູດ​ໃຫ້​ໄດ້​ແຫຼ່ງ​ບຸກ​ຄະ­ລາ​ກອນທີ່​ມີ​ຄຸນ​ນະ​ພາບ​ສູງ, ຄົນ​ທີ່​ມີ​ຄວາມ​ເກັ່ງ​ກ້າ​ສາ­ມາດ ເຂົ້າ​ໃນ​ກົງ­ຈັກ​ແຫ່ງ​ລັດ. ຢາກ​ໄດ້​ຄື​ແນວ​ນັ້ນ, ​ແມ່ນຕ້ອງ​ຕອບ​ສະ­ໜອງ​ໃຫ້​ໄດ້ຕາມ​ຄວາມ​ຮຽກ­ຮ້ອງ, ໜ້າ­ທີ່​ຂອງ​ອົງ­ການ, ຕ້ອງ​ກຳ­ນົດ​ໃຫ້​ໄດ້​ທີ່​ຕັ້ງ­ເຮັດ​ວຽກ, ຕິດ​ພັນ​ກັບ​ທີ່​ຕັ້ງ­ເຮັດ​ວຽກ, ນັ້ນ​ແມ່ນ​ໜ້າ­​ເປັນປະຈຳ​ທີ່​ພະ­ນັກ­ງານ ຂ້າ​ລັດ­ຖະ­ການ​ຕ້ອງ​ຕອບ​ສະໜອງ​ໃຫ້​ໄດ້ (ກ່ຽວ​ກັບ​ລະ­ດັບຄວາມ​ຮູ້, ຄວາມ​ສາ­ມາດ, ທັກ​ສະ, ວິ­ຊາ​ສະ­ເພາະ​ຊຳນິ​ຊຳນານ...). ລັດ­ຖະ­ບານ​ໄດ້​ມີ​ດຳ­ລັດ​ກ່ຽວ​ກັບ​ການ​ກຳ­ນົດ​ທີ່​ຕັ້ງ­ເຮັດ​ວຽກ, ແຕ່​ການ​ຜັນ​ຂະ­ຫຍາຍ​ປະ­ຕິ­ບັດ​ການ​ກໍ່­ສ້າງ​ທີ່​ຕັ້ງ­ເຮັດ​ວຽກ​ໃນ​ຕົວ​ຈິງ​ຍັງ​ປະສົບ​ຄວາມ​ຫຍຸ້ງຍາກ​ຄ້າງຄາ, ພາ­ໃຫ້​ຄວາມ​ຄືບ​ໜ້າບໍ່​ໄດ້​ຕາມ​ກຳນົດ. ດັ່ງ­ນັ້ນ, ຕ້ອງ​ກວດ­ກາ, ຕີ​ລາ­ຄາ​ໃຫ້​ຖືກ­ຕ້ອງ​ຊັດ​ເຈນ​ຕໍ່​ບັນ­ດາ​ວຽກ​ງານ​ທີ່​ໄດ້​ປະ­ຕິ­ບັດ ກຳ­ລັງ​ປະ­ຕິ­ບັດ ເພື່ອ​ຖອດ​ຖອນ​ບົດ­ຮຽນ​ປະ­ຕິ­ບັດ​ໃຫ້​ຖືກຕ້ອງ, ຊັດ​ເຈນ​ກ່ວ​າ​ອີກ​ໃນ​ເວ­ລາ​ຕໍ່​ໄປ.

4- ສຸມ​ໃສ່​ປະ­ຕິ­ບັດ​ໂຄງ­ການ​ເຮັດ​ວຽກ​ຂອງ​ລັດ­ຖະ­ບານ, ຮັບ­ປະ­ກັນ​ຄວາມ​ຄືບ​ໜ້າ ແລະ ຄຸນ​ນະ​ພາບ​ຂອງ​ເອ­ກະ­ສານ ໂຄງ­ການ​ຕ່າງໆ, ພິ­ເສດ​ແມ່ນ ​ບັນ­ດາ​ເອ­ກະ­ສານ ໂຄງ­ການ​ທີ່​ມີຢູ່​ໃນ​ໂຄງ­ການ​ເຮັດ​ວຽກ​ຄື ດຳລັດ​ກ່ຽວ​ກັບ​ມາດ­ຕະ­ຖານ​ຕຳແໜ່ງ​ການ​ນຳຄຸ້ມ​ຄອງ; ​ດຳ­ລັດ​ກ່ຽວ​ກັບ​ແຜນ​ກຳ­ນົດ, ແຕ່ງ­ຕັ້ງ, ແຕ່ງ­ຕັ້ງ​ຄືນໃໝ່, ຢຸດ​ເຊົາ​ຕຳແໜ່ງ, ລາອອກ​ຕຳແໜ່ງ, ປົດ​ຕຳ​ແໜ່ງ, ຜັດ­ປ່ຽນທີ່ເຮັດວຽກ ​ສຳ­ລັບ​ພະນັກງານ​ລັດ­ຖະ­ກອນ​ທີ່​ນຳພາ ຄຸ້ມ​ຄອງ; ໂຄງ­ການ​​ເຮັດ​ທົດ​ລອງ​ການ​ຄັດເລືອກພະນັກງານ​ນຳພາຄຸ້ມ​ຄອງ ​ຂັ້ນ​ກົມ, ພະ​ແນກ, ຫ້ອງ; ​ດຳ­ລັດ​ກ່ຽວ​ກັບ​ນະ­ໂຍ­ບາຍ​ດຶງ​ດູດ, ສ້າງ​ແຫຼ່ງ​ບຸກ​ຄະ­ລາ​ກອນທີ່​ມາ​ຈາກ​ນັກ​ສຶກ​ສາ​ຜູ້​ຮຽນ​ຈົບ​ທີ່​ດີ­ເດັ່ນ, ນັກວິທະຍາສາດໜຸ່ມ.

ກະ­ຊວງ​ພາຍ​ໃນ​ປະ­ສານ​ສົມ­ທົບ​ກັບບັນດາ​ກະ­ຊວງ, ຂະ­ແໜງ­ການ​ຕ່າງໆ ​ເພື່ອ​ສະ­ເໜີ​ນະ­ໂຍ­ບາຍ​ທີ່​ສາມາດ​ປະ­ຕິ­ບັດ​ໄດ້ ​ເພື່ອ​ດຶງ​ດູດ​ຄົນ​ທີ່​ມີ​ຄວາມ​ເກັ່ງ​ກ້າ​ສາ­ມາດ​ໃນ​ການ­ເຄື່ອນ­ໄຫວ​ການ​ບໍ­ລິ­ຫານ, ເລືອກ​ເອົາ​ບັນດາ​ຂົງເຂດຂະ­ແໜງ­ການ​ສະ­ເພາະ ພິ­ເສດ ​ເພື່ອ​ກຳ­ນົດ​ຢ່າງ​ຊັດ​ເຈນຄົນ​ທີ່​ມີ​ຄວາມ​ເກັ່ງ​ກ້າ​ສາ­ມາດ (ກ່ອນ​ອື່ນ​ໝົດ​ແມ່ນ​ຂົງ­ເຂດ​ວິ­ທະ­ຍາ­ສາດ - ເຕັກ​ໂນ​ໂລ​ຊີ ແລະ ບັນ­ດາ​ຂົງ­ເຂດ​ທີ່​ມີ​ລັກ­ສະ­ນະປະຍຸກ​ໃຊ້); ເອົາ­ໃຈ­ໃສ່​ເຖິງ​ລະບຽບ​ການ​ຮັບ­ຮອງ​ຄົນ​ທີ່​ມີ​ຄວາມ​ສາ­ມາດ​ເກັ່ງ​ກ້າ ​ພາຍ­ຫຼັງ​ໄລ­ຍະ​ເວ­ລາ​ເຮັດ​ວຽກ (ເປັນ­ຕົ້ນ​ແມ່ນ​ໃນ​ຂົງ­ເຂດ​ປ້ອງ​ກັນ​ຊາດ - ປ້ອງ​ກັນ​ຄວາມ​ສະ­ຫງົບ); ກຳ­ນົດ​ຄົນ​ທີ່​ມີ​ຄວາມ​ເກັ່ງ​ກ້າ​ສາ­ມາດ ​ໂດຍ​ຜ່ານ​ການ​ປ່ອນ​ບັດ. ເພື່ອ​ແກ້​ໄຂ​ບັນດາ​ບັນ­ຫາ​ນີ້, ຕ້ອງ​ສະ​ຫລຸບ, ຕີ​ລາ­ຄາ, ຄົ້ນ­ຄວ້າ​ພິ­ຈາ­ລະ­ນາ​ບັນ­ດາ​ສິ່ງ​ທີ່​ບໍ່​ເໝາະ​ສົມ​ກັບ​ຕົວ​ຈິງ, ບັນດາ​ຂໍ້​ກຳນົດ​ທີ່​ກໍ່​ຄວາມ​ກີດ­ຂວາງ ​ແມ່ນ​ຕ້ອງ​ປົວ­ແປງ​ຢ່າງ​ເດັດ­ຂາດ, ບໍ່​ໄດ້​ເປັນ​ແບບ​ເຄື່ອງ​ຈັກ, ​ແຂງ​ກະດ້າງ.

ມະ­ຕິ​ສະ­ບັບ​ເລ​ທີ 19-2016/NQ-CP, ລົງ​ວັນ​ທີ 28 ເມ­ສາ 2016 ຂອງ​ລັດ­ຖະ­ບານ ວ່າ​ດ້ວຍ​ບັນ­ດາ​ໜ້າ­ທີ່, ມາດ​ຕະ­ການ​ອັນ​ຕົ້ນ​ຕໍເພື່ອ​ປົວ­ແປງ​ສິ່ງ­ແວ­ດລ້ອມ​ແຫ່ງ​ການ​ທຸ­ລະ​ກິດ, ຍົກ​ສູງ​ຄວາມ​ສາ­ມາດ​ແຂ່ງຂັນ​ແຫ່ງ​ຊາດ​ໃນ​ໄລ­ຍະ ສອງ​ປີ 2016 – 2017, ກຳ­ນົດ​ທິດ​ເຖິງ​ປີ 2020, ເຊິ່ງ​ໄດ້​ມອບ​ໃຫ້​ກະ­ຊວງ​ພາຍ​ໃນ​ຍື່ນ​ໃຫ້​ລັດຖະ­ບານ​ ເພື່ອ​ປະ­ກາດ​ໃຊ້​ດຳ­ລັດ​ກ່ຽວ​ກັບ​ກົນ​ໄກ​ຕີ​ລາ­ຄາ ແລະ ກົດ​ວິ​ໄນ​ຕໍ່​ພະນັກ­ງານ, ຂ້າລັດຖະການ​ຜູ້​ທີ່​ແກ້​ໄຂ​ລະ­ບຽບ​ການ​ບໍ­ລິ­ຫານຢູ່​ອົງ­ການ​ແຫ່ງ​ລັດ​ທັງ​ໝົດ ​ແຕ່​ຂັ້ນ​ຕາ​ແສງ​ຂຶ້ນ​ໄປ​ ໃນ​ປີ 2016. ກະ­ຊວງ​ພາຍ​ໃນ​ຕ້ອງ​ຄົ້ນ­ຄວ້າ, ລາຍ​ງານ​ກ່ຽວ​ກັບ​ການ​ປະ­ຕິ­ບັດ​ໜ້າ­ທີ່​ນີ້​ ຢ່າງ​ຮີບ​ດ່ວນ.

5- ກະ­ຊວງ​ພາຍ​ໃນ​ຕ້ອງ​ຄົ້ນ­ຄວ້າ, ປັບ­ປຸງ​ບູ­ລະ­ນະ​ຂໍ້​ກຳ­ນົດ​ກ່ຽວ​ກັບ​ການ​ຕີ​ລາ­ຄາຂ້າ​ລັດ­ຖະ­ການ​ ​ເຊິ່ງ​ໄດ້​ລະບຸໃນດຳລັດ​ສະ­ບັບ​ເລກ​ທີ 56/2015/NĐ-CP, ລົງ​ວັນ​ທີ 9 ມິຖຸ​ນາ 2015, ຂອງ​ລັດ­ຖະ­ບານ ວ່າ​ດ້ວຍ​ການ​ຕີ​ລາ­ຄາ ແລະ ແບ່ງ​ປະ­ເພດ​ພະ­ນັກ­ງານ​ຂ້າ​ລັດ​ຖະ​ການ, ເພື່ອ​ຮັບ­ປະ­ກັນ​ຄວາມ​ເໝາະ​ສົມ​ກັບພາກ​ຕົວ​ຈິງ. ເອົາ­ໃຈ­ໃສ່​​ເຖິງການ​ສ່ອງ​ແສງຈາກ​ບັນ­ດາ​ອົງ­ການ ທ້ອງ​ຖິ່ນ ​ກ່ຽວ​ກັບ​ຂໍ້­ຄົງ­ຄ້າງ​ຄື ​ລັດຖະກອນຕ້ອງ​ມີ​ຄວາມ​ຄິດປະດິດ ມີກິດ­ຈະ­ກຳ ຈຶ່ງ​ຖືກ​ຖື​ວ່າ​ສຳ­ເລັດ​ໜ້າ­ທີ່. ​ເອົາ​ໃຈ​ໃສ່​​ເຖິງການອັບ​ເດດ ຕົວ​ເລກ​ອັດ­ຕາ​ສ່ວນ % ພະນັກງານຂ້າ​ລັດ­ຖະ­ການ​ທີ່​ບໍ່​ສຳ­ເລັດ​ໜ້າ­ທີ່, ແລະ​ຊອກ​ຫາ​ສາ­ເຫດ ແລະ ມາດ​ຕະ­ການ​ເພື່ອ​ແກ້​ໄຂ.

6- ການ​ແຕ່ງ­ຕັ້ງ “ຕຳ​ແໜ່​ງທາງ​ວິຊາ​ການ” ມີ​ຜົນ​ປະ­ໂຫຍດ​ດຶງ​ດູດ ປຸກ­ລະ­ດົມສົ່ງ­ເສີມ​ຄົນ​ທີ່​ມີ​ຄຸນສົມບັດ​ຄວາມ​ສາ­ມາດແລະ​ບົດຮຽນປະ­ສົບ​ການ​ ໃນ​ຂະ­ນະທີ່​ຍັງບໍ່ສາມາດ​ແຕ່ງ­ຕັ້ງ​ໃຫ້​​ເຂົາດຳລົງຕຳ​ແໜ່​ງ​ການ​ນຳພາຄຸ້ມ​ຄອງ​ໄດ້. ກະ­ຊວງ​ພາຍ​ໃນ​ຕ້ອງ​ຮີບ​ຄົ້ນ­ຄວ້າ​ແລະສະ­ເໜີ​​ແຜນ­ການ​​ປັບ­ປຸງ​ບູ­ລະ­ນະ​ພື້ນ­ຖານນິຕິ​ກຳ​ຂອງ​​ບັນ­ຫາ​ນີ້​.

7- ກະ­ຊວງ​ພາຍ​ໃນ​ປະ­ຕິ­ບັດ​ການ​ສະ​ຫລຸບ​ເບື້ອງ​ຕົ້ນ, ຕີ​ລາ­ຄາ​ການ​ປະ­ຕິ­ບັດ ໂຄງ­ການ “ຍູ້​ແຮງ​ການ​ປະ­ຕິ​ຮູບ​ລະ­ບອບ​ການ​ງານ, ຂ້າ​ລັດ​ຖະ​ການ ຕາມ​ຂໍ້​ຕົກ­ລົງ​ສະ­ບັບ​ເລກ​ທີ 1557/QĐ-TTg, ລົງ​ວັນ​ທີ 18 ຕຸ­ລາ 2012 ຂອງ​ນາຍົກລັດຖະມົນຕີ ກ່ຽວ​ກັບ​ການ​ອາ​ນຸ​ມັດ​ຜ່ານ​ໂຄງ­ການ “ຍູ້​ແຮງ​ການ​ປະ­ຕິ​ຮູບ​ລະ­ບອບ​ການ​ງານ​ຂ້າ​ລັດ​ຖະ​ການ”. ​ຜ່ານສິ່ງ​ດັ່ງກ່າວ​ນັ້ນ ​ເພື່ອ​ສະ­ເໜີ​ມາດ​ຕະ­ການ​ທີ່ເປັນ​ພື້ນ­ຖານ​​ໃຫ້​​ແກ່​ການ​ຍູ້​ແຮງ​ການ​ປະ­ຕິ​ຮູບ​ລະບອບ​ການ​ງານ, ຂ້າ​ລັດ​ຖະ​ການ ໃນ​ເວ­ລາ​ຕໍ່​ໄປ.

8- ການ​ປະ­ຕິ­ບັດ​ດຳ­ລັດ​ສະ­ບັບ​ເລກ​ທີ 108/2014/NĐ-CP ກ່ຽວ​ກັບ​ນະ­ໂຍ­ບາຍ​ຫລຸດຜ່ອນການບັນ­ຈຸ​ຂ້າ​ລັດ​ຖະ​ການ​ໃຫ້​ກະ­ທັດ​ລັດ ແລະ ແຜນ­ການ​ຜັນ​ຂະ­ຫຍາຍ​ມະ­ຕິ​ສະ­ບັບ​ເລກ​ທີ 39-NQ/TW, ຕ້ອງ​ເອົາ­ໃຈ­ໃສ່​ເຖິງ​ການ­ຈັດ­ຕັ້ງ​ປະ­ຕິ­ບັດ, ຫຼີກ​ລ່ຽງ​ການຫລຸດຜ່ອນ​ທີ່​ບໍ່​ຖືກກັບ​ເປົ້າ​ໝາຍ ບໍ່​ຖືກ​ຕາມ​ຈຸດ­ປະ­ສົງ. ການຫລຸດຜ່ອນ​ການ​ບັນ­ຈຸ​ຂ້າ​ລັດ​ຖະ​ການ​ໃຫ້​ກະ­ທັດ​ລັດ​ ​ແມ່ນ​ນະ­ໂຍ­ບາຍທີ່​ສຳ­ຄັນ ​ແຕ່​ວ່າ​ຕ້ອງ​ປະ­ຕິ­ບັດ​ໃຫ້​ຄົບ​ຊຸດ​ກັບ​ບັນ­ດາ​ນະໂຍບາຍອື່ນ. ຕ້ອງ​ດັດ­ແປງ​ໃນ​ທັນທີ​ທັນ​ໃດ ​ນັບ​ແຕ່​ຂອດ​ຄັດ​ເລືອກຮັບ​ເອົາ​ລັດຖະກອນ ​ຈົນ​ເຖິງ​ການ​ຕີ​ລາ­ຄາ, ແບ່ງ​ປະ­ເພດ​ລັດຖະກອນ; ຈັດ​ຕັ້ງ​ຄືນ­ໃໝ່​ລະ­ບົບ​ບັນ­ດາ​ຫົວ­ໜ່ວຍ​ພາ­ລະ­ກິດ​ແຫ່ງ​ລັດ​ທັງ​ໝົດ​ ຕາມ​ທິດ​ລັດຖະບານ​ພຽງ​ແຕ່ກຳ​ບັນ­ດາ​ຫົວ­ໜ່ວຍ​ທີ່​ຈຳ­ເປັນ​ເທົ່ານັ້ນ, ສ່ວນບັນ­ດາ​ຫົວ­ໜ່ວຍ​ອື່ນ​ຈະ​ໃຫ້​ຫັນມາ­ເຄື່ອນ­ໄຫວ​ຕາມ​ຕົວ​ແບບ​ວິ​ສາ​ຫະ​ກິດ ຫຼື ຍຸບເລີກ, ຫລຸດ­​ຈຳ­ນວນ​ຂ້າ​ລັດ­ຖະ­ການ​ທີ່​ມີ​ຢູ່ໃນ​ປະ­ຈຸ​ປັນ​ນີ້ລົງຢ່າງ​ໄວ​.

9- ກະ­ຊວງ​ພາຍ​ໃນ​ຕ້ອງ​ຮີບປັບ­ປຸງ​ບູ​ລະ​ນາ​ບັນ­ດາ​ໂຄງ­ການ​ປະ­ຕິ​ຮູບ​ນະ­ໂຍ­ບາຍ​ເງິນ­ເດືອນ, ປະ­ກັນ​ໄພ​ສັງ­ຄົມ, ອຸດ​ໜູນ, ເອື້ອ​ອຳ­ນວຍ​ຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ຊາດ.

ທີ​ສາມ, ກ່ຽວ​ກັບ​ການ­ຈັດ­ຕັ້ງ​ກົງ­ຈັກ​ບໍ­ລິ­ຫານ​ແຫ່ງ​ລັດ

ສືບ​ຕໍ່​ກວດ­ຄືນ​ພາ­ລະ​ບົດ­ບາດ, ໜ້າ­ທີ່, ສິດ​ອຳ­ນາດ​ແລະໂຄງ​ປະ­ກອບ​ການ­ຈັດ­ຕັ້ງ, ຈຳ­ນວນ​ຄົນ​ເປັນ​ຮອງ​ຂອງຫົວໜ້າ​ກົມ​ກອງ​ທີ່​ຂຶ້ນ​ກັບ, ມາດ​ຕະ­ການ​ແກ້​ໄຂ​ຕາມ​ຈິດ­ໃຈ​ຂອງ​ກົດ­ໝາຍ​ວ່າ​ດ້ວຍ​ການ­ຈັດ­ຕັ້ງ​ລັດຖະບານ​ປີ 2015.

ສຸມ​ໃສ່​ກວກ​ຄືນ​ບັນ­ດາ​ເອ­ກະ­ສານ​ທີ່​​ແກ້​ໄຂປັບ­ປຸງ​ບັນ­ດາ​ຂໍ້​ກຳ­ນົດ​ກ່ຽວ​ກັບ​ການ­ຈັດ­ຕັ້ງ​ກົງ­ຈັກ ​ແລະ ການ​ບັນ­ຈຸ ​ທີ່​ໄດ້​ລະບຸ​ໄວ້ໃນ​ບັນດາ​​ກົດ­ໝາຍ​ໃນ​ປະ­ຈຸ​ປັນ​ທີ່​ບໍ່​ຂຶ້ນ​ກັບ​ຂົງ­ເຂດ​ການ­ຈັດ­ຕັ້ງ​ແຫ່ງ​ລັດ ​ໃຫ້​ຖືກ­ຕ້ອງ​ຕາມ​ແຜນການ​ປະ­ຕິ­ບັດ​ມະ­ຕິ​ສະ­ບັບ​ເລກ​ທີ 39-NQ/TW.

ຕາມ​ນັ້ນ, ກະ­ຊວງ​ພາຍ​ໃນ​ຕ້ອງຮີບ​ປັບ­ປຸງ​ບູ­ລະ­ນະ​ເອ­ກະ­ສານ​ແນະນຳການ​ປະ­ຕິ­ບັດ ​ກົດ­ໝາຍ​ວ່າ​ດ້ວຍ​ການຈັດ​ຕັ້ງອຳ­ນາດ​ການ​ປົກ­ຄອງ​ທ້ອງ​ຖິ່ນ (ກົດ­ໝາຍ​ສະ­ບັບ​ເລກ​ທີ 77/2015/QH13, ລົງ​ວັນ​ທີ 19 ມິຖຸ​ນາ 2015) ​ເຊິ່ງ​ສະ­ພາ​ແຫ່ງ​ຊາ​ໄດ້​ຮັບ­ຮອງ​ເອົາ​ແລ້ວ; ຮຽບ​ຮຽງ​​ດຳ­ລັດປັບ­ປຸງ​ດຳ­ລັດ​ສະ­ບັບ​ເລກ​ທີ 37/2014/NĐ-CP ວ່າ​ດ້ວຍ​ຂໍ້​ກຳ­ນົດ​ການ­ຈັດ­ຕັ້ງ​ອົງ­ການ​ວິ­ຊາ​ສະ­ເພາະ​ສັງກັດ​ຄະ­ນະ​ກຳ­ມະ­ການ​ປະ­ຊາ­ຊົນ​ຂັ້ນ​ເມືອງ, ຕົວ​ເມືອງ ​ແລະ ນະຄອນ​ຂຶ້ນ​ກັບ​ແຂວງ, ເພື່ອ​ປັບ­ປຸງ​ຂໍ້​ກຳ­ນົດ​ກ່ຽວ​ກັບ​ການ­ຈັດ­ຕັ້ງ​ວຽກ​ງານ​ເສ­ນາ​ທິ​ການ, ຊ່ວຍ​ວຽກ, ຮັບ​ໃຊ້​ໃຫ້​ແກ່​ການ­ເຄື່ອນ­ໄຫວ​ຂອງ​ສະ­ພາ​ປະ­ຊາ­ຊົນ, ຄະ­ນະ​ກຳ­ມະ­ການ​ປະ­ຊາ­ຊົນ​ຂັ້ນ​ຕາ​ແສງ, ຍື່ນ​ໃຫ້​ລັດຖະບານ​ພິຈາລະນາແລະ​ປະ­ກາດ​ໃຊ້.

ປະ­ຕິ­ບັດ​ໃຫ້​ດີ​ວຽກ​ງານ​ຄຸ້ມ​ຄອງ​ເຂດ​ແດນ​ບໍ­ລິ­ຫານ. ພ້ອມ​ກັນ​ນັ້ນ, ຕ້ອງ​ກວດ­ກາ​ສະ­ພາບຕົວ​ຈິງ, ສະເໜີ​ແຜນ­ການ​ແກ້​ໄຂ​ບັນ­ດາ​ບັນ­ຫາ​ກ່ຽວ​ກັບ​ເ​ຂດ​ແດນ​ບໍ­ລິ­ຫານ​ຢູ່​ທ້ອງ​ຖິ່ນ​ຈຳ­ນວນ​ໜຶ່ງ​ ທີ່​ປະ­ຫວັດ­ສາດ​ທີ່​ປະ​ໄວ້, ຕາມ​ທິດ​ເຄົາ­ລົບ​ນັບ­ຖື​ຄວາມ​ເຫັນ​ດີ​ເປັນ​ເອ­ກະ​ພາບກັນ​ລະຫວ່າງ​ຝ່າຍ​ຕ່າງໆ; ກໍ່​ສ້້າງ​ໂຄງ­ການ​ໂຮມບາງ​ຕາ​ແສງ​ທີ່​ມີ​ຈຳ­ນວນ​ພົນ­ລະ­ເມືອງ​ຕ່ຳ​ກວ່າ 3000 ຄົນ​ເຂົ້າ­ກັນ; ກວດ­ຄືນ, ສະ­ເໜີ​ການ­ຈັດ­ຕັ້ງຄຸ້ມຊຸມ​ຊົນ​ຕົວເມືອງ​​ໃຫ້​ເໝາະ​ສົມ... ລາຍ​ງານ​ໃຫ້​ລັດ­ຖະ­ບານ ແລະ ນາ­ຍົກ­ລັດ­ຖະ­ມົນ­ຕີ ​ພິ­ຈາ­ລະ­ນາແລະ​ຕົກ­ລົງ. ພ້ອມກັນນັ້ນ, ກໍ່­ສ້າງ​ໂຄງການ​ຫັນ​ເປັນ​ດິຈິຕອນ​ຕໍ່​ສຳ​ເນົາ​​ເຂດແດນ​ບໍ­ລິ­ຫານ, ຍົກ​ສູງ​ລັກ­ສະ­ນະ​ມາດ­ຕະ­ຖານ, ວິ­ທະ­ຍາ­ສາດ​ໃນ​ຂົງ­ເຂດ​ນີ້.

ຕິດ­ຕາມ​ສະ­ພາບ​ການ​ພາຍ­ຫຼັງ​ການ​ເລືອກ​ຕັ້ງ​ ເພື່ອ​​​ໃຫ້​ຄຳ​ປຶກສາ ສະ­ເໜີ​​ມາດ​ຕະ­ການ​ແກ້​ໄຂທີ່​ເໝາະ​ສົມ. ສືບ​ຕໍ່​ປັບ­ປຸງ​ບູ­ລະ­ນະ​ກົນ​ໄກ​ແບ່ງ​ຂັ້ນ​ລະ­ຫວ່າງ​ສູນ​ກາງ ແລະ ທ້ອງ​ຖີ່ນ ແລະ ລະ­ຫວ່າງ​ອຳ­ນາດ​ການ​ປົກຄອງທ້ອງ​ຖິ່ນ​ຂັ້ນ​ຕ່າງໆ. ຄົ້ນ­ຄວ້າ, ດັດ­ແປງ​ກົນ​ໄກ​ຄຸ້ມ​ຄອງ​ການ­ຈັດ­ຕັ້ງ ແລະ ການ­ເຄື່ອນ­ໄຫວ​ຂອງ​ບັນ­ດາ​ຫົວໜ່ວຍ​ພາ­ລະ­ກິດ​ແຫ່ງ​ລັດ​ ຕາມ​ທິດ​ເພີ່ມ​ທະ­ວີ​ການ​ເປັນ​ເຈົ້າ​ດ້ວຍ​ຕົນ​ເອງ, ຮັບ­ຜິດ­ຊອບ​ດ້ວຍ​ຕົນ​ເອງ, ມີ​ການ​ກວດ­ກາ, ຕິດ­ຕາມກວດກາ​ຂອງ​ອົງ­ການ​ຄຸ້ມ​ຄອງ. ຕີ​ລາ­ຄາ​ສະ­ພາບ​ການ​ຍົກຍ້າຍ​ບັນ­ດາ​ຫົວ­ໜ່ວຍ​ພາ­ລະ­ກິດ​ແຫ່ງ​ລັດ ຈາກ​ວິ​ສາ​ຫະ​ກິດ​ມາ­ເປັນຫົວໜ່ວຍ​ຂຶ້ນ​ກັບ​ອົງ­ການ​ບໍ­ລິ­ຫານ, ຜົນ​ກະ­ທົບ​ຂອງ​ຂະ​ບວນ​ວິ­ວັດ​ການຍົກຍ້າຍ, ​ຄື ເພີ່ມ​ຫົວ​ຂອດ​ການ­ຈັດ­ຕັ້ງ, ຈຳ­ນວນ​ຂ້າ​ລັດ­ຖະ­ການ, ການ​ໃຊ້​ຈ່າຍ​ງົບ­ປະ­ມານ... ສະ­ເໜີ​ຫຼັກການ​ຫັນ­ປ່ຽນຍົກຍ້າຍ, ລາຍ​ງານ​ຄະ­ນະ​ປະ­ຈຳ​ລັດ­ຖະ­ບານ​ຕາມ​ການ​ຊີ້​ນຳ​ຂອງ​ນາ­ຍົກ­ລັດ­ຖະ­ມົນ­ຕີ.

ທີ​ສີ່, ການ​ຄຸ້ມ​ຄອງ​ລັດຕໍ່ກັບ​ບັນດາສະ­ມາ​ຄົມ​ຂອງ​ມະ­ຫາ­ຊົນ; ຂົງ­ເຂດ​ສາ­ສະ­ໜາ; ວຽກ​ງານ​ແຂ່ງ­ຂັນ - ຍ້ອງຍໍ​ໃຫ້​ລາງ​ວັນ ແລະ ວຽກ​ງານ​ຊາວ​ໜຸ່ມ

- ກ່ຽວ​ກັບ​ການ​ຄຸ້ມ​ຄອງ​​ລັດຕໍ່​ສະມາ​ຄົມ: ສືບ​ຕໍ່​ປັບ­ປຸງ​ບູ­ລະ­ນະ​ຮ່າງ­​ກົດ­ໝາຍ​ກ່ຽວ​ກັບ​ສະມາ​ຄົມ ​ເພື່ອ​ຍື່ນ​ໃຫ້​ສະ­ພາ​ແຫ່ງ​ຊາດ​​ ພິຈາລະນາ ຮັບ­ຮອງ​ເອົາ​​ໃນ​ກອງ​ປະ­ຊຸມ​ຄັ້ງ​ທີ 2 ສະ­ພາ​ແຫ່ງ​ຊາດ​ຊຸດ​ທີ XIV. ພ້ອມ​ກັນ​ນັ້ນ, ຮີບ​ຍື່ນ​ໃຫ້​ລັດ­ຖະ­ບານ ​ຮ່າງ​​ດຳ­ລັດ​ສະ­ບັບ​ປັບ­ປຸງດຳລັດ​ເລກ​ທີ 45/2010/NĐ-CP ກຳ­ນົດ​ກ່ຽວ​ກັບ​ການຈັດ­ຕັ້ງ ການ­ເຄື່ອນ­ໄຫວ ແລະ ຄຸ້ມ​ຄອງ​ສະມາ​ຄົມ; ຮັບ­ປະ­ກັນ​ບໍ່​ໃຫ້​ເພີ່ມ​ການ​ບັນ­ຈຸຂອງ​ບັນ­ດາ​ສະ​ມາ​ຄົມ. ເອົດ​ໃຈ​ໃສ່​ເຖິງ​ການ​ຄົ້ນຄວ້າ​ກໍ່­ສ້າງ​ໂຄງ­ການ​ວຽກ​ງານ ​ທີ່​ກ່ຽວ­ພັນ​ເຖິງ​ການ​ຄຸ້ມ​ຄອງ​ບັນ­ດາ​ອົງ​ການຈັດ­ຕັ້ງ​ນອກ​ພາກ​ລັດ (NGO), ທີ່​ເໝາະ​ສົມ​ກັບ​ລະ­ບຽບ​ກົດ­ໝາຍ​ການ­ເມືອງ, ເງື່ອນ­ໄຂ​ເສດ­ຖະ­ກິດ, ຮີດ​ຄອງ​ປະ­ເພ­ນີ​ມູນເຊື້ອ, ຈຸດ​ພິ­ເສດ​ສະ­ເພາະ​ດ້ານ​ວັດ­ທະ­ນະ­ທຳ​ຂອງ​ຫວຽດ­ນາມ.

- ກ່ຽວ​ກັບ​ຄວາມ​ເຊື່ອ​ຖື, ສາ­ສະ­ໜາ ແລະ ວຽກ​ງານ​ຊາວ​ໜຸ່ມ: ຕ້ອງຮີບ​ປັບ­ປຸງ​ບູ­ລະ­ນະ​ຮ່າງ​ກົດ­ໝາຍ​ວ່າ​ດ້ວຍ​ຄວາມ​ເຊື່ອ​ຖື, ສາ­ສະ­ໜາ; ກົດ­ໝາຍປັບປຸງ ​ເພີ່ມ​ເຕີມກົດໝາຍ​ຊາວ​ໜຸ່ມ ​ເພື່ອ​ຍື່ນ​ໃຫ້​ລັດ­ຖະ­ບານ, ນາຍົກລັດ­ຖະ­ມົນ­ຕີ​ພິ­ຈາ­ລະ­ນາ.

- ກ່ຽວ​ກັບ​ວຽກ​ງານ​ການ​ແຂ່ງ­ຂັນ - ຍ້ອງ­ຍໍ​ໃຫ້​ລາງ​ວັນ: ສືບ​ຕໍ່​ກວດ­ຄືນ, ຕີ​ລາ­ຄາ, ​ແກ້​ໄຂ​ດັດ​ແປງບັນດາ​ຂໍ້​ກຳ​ນົ​ດ​ກົດ­ໝາຍ​ກ່ຽວ​ກັບ​ການ​ແຂ່ງ­ຂັນ - ຍ້ອງ­ຍໍ​ໃຫ້​ລາງ​ວັນ; ຮັບ­ປະ­ກັນ​ລັກ­ສະ­ນະ​ເປັນ​ເໝືອນ​ດຽວ, ຄົບ​ຊຸດ, ຕອບ​ສະ­ໜອງ​ຄວາມ​ຮຽກ­ຮ້ອງ​​ຕົວ​ຈິງ ແລະ ​ງ່າຍ­ດາຍ​ ຂອງລະ­ບຽບ​ການ​​ຍ້ອງ­ຍໍ​ໃຫ້​ລາງ​ວັນ. ກໍ່­ສ້າງ​ເອກະ­ສານ​ນິຕິ​ກຳແລະແນະນຳ​ ກ່ຽວ​ກັບ​ວຽກ​ງານຍ້ອງ­ຍໍ​ໃຫ້​ລາງ​ວັນ​ ທີ່​ມີ​ປັດ­ໃຈ​ຕ່າງ­ປະ­ເທດ​ ຕາມ​ການ​ຊີ້​ນຳ​ຂອງ​ນາ­ຍົກ­ລັດ­ຖະ­ມົນ­ຕີ.

ສືບ​ຕໍ່​ຜັນ​ຂະ­ຫຍາຍ​ໄລ­ຍະ​ທີ 2 ຂອງ​ຂະ​ບວນ​ການ​ແຂ່ງ­ຂັນ “ທັງ​ຊາດ​ຮ່ວມ​ແຮງ​ກໍ່­ສ້າງ​ຊົນ­ນະ­ບົດ​ໃໝ່” ​ໃຫ້ນັບ​ມື້​ນັບ​​ແທດ​ຈິງ ​ແລະ​ມີ​ປະ​ສິດ­ທິ​ຜົນ. ປະ­ຕິ­ບັດ​ເປັນ​ຢ່າງ​ດີ​ການ​ມອບ​ນາມ­ມະ­ຍົດ “ແມ່ຫວຽດນາມວິ­ລະ​ຊົນ”; ສຸມ​ໃສ່​ແກ້​ໄຂ​ການ​ຍ້ອງ­ຍໍ​ຊົມ​ເຊີຍຜູ້​ທີ່​ມີ​ຄຸນ­ງາມ­ຄວາມ­ດີ​ຕໍ່​ຊາດ​ໃນສະໄໝຕໍ່ຕ້ານ ​ໃຫ້​ສຳ​ເລັດ​ຢ່າງ​ຂາດ​ຂັ້ນ.... ປ່ຽນ­ແປງ​ໃໝ່ ແລະ ຍົກ​ສູງ​ຄຸນ​ນະ­ພາ​ບວຽກ​ງານ​ຍ້ອງ­ຍໍ​ໃຫ້​ລາງວັນ, ດັດ​ແປງ​ລະ­ບຽບ​ການ​ການ​ຍ້ອງ­ຍໍ​ໃຫ້​ມີ​ຄວາມ​ງ່າຍດາຍ, ຮັບ­ປະ­ກັນ​ຄວາມ​ຊັດ​ເຈນ ແລະ ທັນ​ເວ­ລາ, ​ເພີ່ມອັດ­ຕາ​ສ່ວນ​ການ​ຍ້ອງ­ຍໍ​ໃຫ້​ແກ່​ລວມ​ໝູ່, ບຸກຄົນ​ທີ່​ມີ​ຜົນ­ງານດີ­ເດັ່ນ​​ທີ່​ສຸດ, ຄົນ​ທີ່​ອອກ­ແຮງ​ງານ​ໂດຍ​ກົງ.

ທີ​ຫ້າ, ວຽກ​ງານອົບຮົມ​ສຶກສາ ກໍ່­ສ້າງ ແລະ ຄົ້ນ­ຄວ້າ​ວິ­ທະ­ຍາ­ສາດ

ສະ​ຖາ​ບັນ​ການ­ເມືອງ​ແຫ່ງ​ຊາດໂຮ່​ຈີ​ມິນ, ສະ​ຖາ​ບັນ​ການປົກຄອງ​ແຫ່ງ​ຊາດ ​ຕ້ອງ​ປັບ­ປຸງ​​ພາ­ລະ​ບົດ­ບາດ ໜ້າ​ທີ່ ​ໃຫ້​ບໍລິບູນ​ໂດຍ​ໄວ, ໃນ​ນັ້ນ​ຕ້ອງ​ກຳ­ນົດ​ຈຸ​ໝາຍ​ກໍ່­ສ້າງ​ພະ­ນັກ­ງານ​ນຳພາ ຄຸ້ມ​ຄອງທີ່​ມີ​ລະ​ດັບ​ວິ­ຊາ​ສະເພາະ​ສູງ ​ເທົ່າ​ທຽມ​ກັບ​ພາກ​ພື້ນ. ບັນ­ດາສະ​ຖາ​ບັນ​ຕ້ອງ​ເປັນ​ທີ່​ປຶກສາ​ແລະສະ­ເໜີ​ໃຫ້​ລັດຖະບານ​ ກ່ຽວກັບແຜນການ, ໂຄງການ 10 ປີ ແຫ່ງການບຳລຸງ​ກໍ່­ສ້າງ​ພະ­ນັກ­ງານ, ຂ້າ​ລັດ​ຖະ​ການ.

ວຽກ​ງານ​ຄົ້ນ­ຄວ້າ​ວິ­ທະ­ຍາ­ສາດ​ກ່ຽວ​ກັບ​ການ​ບໍລິຫານ ​ຕ້ອງ​ສືບ​ຕໍ່​ສຸມ​ໃສ່​ຄົ້ນ­ຄວ້າ​ໃຫ້​ເລິກ­ເຊິ່ງ​ບັນ­ດາ​ບັນຫາ​ຄື ກົງ­ຈັກ​ລັດ­ຖະ­ບານ; ໂຄງ​ສ້າງ, ພາ​ກສ່ວນ, ພາ­ລະ​ບົດ­ບາດ, ໜ້າ­ທີ່ຂອງ​ອຳ­ນາດ​ການ​ປົກ­ຄອງ​ທ້ອງ​ຖິ່ນ; ກຳ­ນົດ​ທີ່​ຕັ້ງ­ເຮັດ​ວຽກ; ເນື້ອ​ໃນ​ຂອງ​ລັດ­ຖະ­ບານ​​ເອ​ເລັກ​ທຣໍນິກ; ຕົວ​ແບບ, ແບບ​ວິ­ທີ​ການສອບ​ເສັງ​ຄັດ​ເລືອກ​ຂ້າ​ລັດ­ຖະ­ການ, ເລື່ອນ​ຊັ້ນ​​ລັດ­ຖະ­ກອນ ​ຕາມ​ທິດ​ປ່ຽນ­ແປງ​ໃໝ່, ຕອບ​ສະ­ໜອງ​ຄວາມ​ຮຽກ­ຮ້ອງຕ້ອງ​ການ​ຍູ້​ແຮງ​ການ​ຫັນ​ເປັນ​ອຸດ­ສາ­ຫະ­ກຳ  ທັນ​ສະ­ໄໝ ແລະ ການ​ເຊື່ອມ​ໂຍງ​ສາ­ກົນ​ຢ່າງ​ເລິກ­ເຊິ່ງ​ກວ້າງ­ຂວາງ ​ໃນ​ປະ­ຈຸ​ປັນ ແລະ ວິ­ໄສ​ທັດ​​ອະນາ­ຄົດ. ດ້ານ​ອື່ນ, ຕ້ອງ​ຄົ້ນ­ຄວ້າ​ກໍ່­ສ້າງ​ໂຄງ­ການ​​ກິດ­ຈະ­ການ​ປະ­ຫວັດ­ສາດ​ຂອງ​ລັດຖະບານ, ປະ­ຕິ­ບັດວຽກ​ງານ​ສຶກ​ສາ​ມູນ­ເຊື້ອ​ໃຫ້​ຄົນ​ລຸ້ນ​ຕໍ່​ໄປ​ໃຫ້​​ໄດ້ເປັນ​ຢ່າງ​ດີ.

ພ້ອມ​ກັບ 5 ບັນ­ຫາ​ອັນ​ພື້ນ­ຖານ​ທີ່​ກ່າວ​ເທິງ​ນີ້, ກະ­ຊວງ​ພາຍ​ໃນ​ຕ້ອງ​ເອົາ­ໃຈ­ໃສ່​​ ໃຫ້​ຄວາມ​ສຳຄັນ​ແກ່ວຽກ​ງານການ​ສຳ​ເນົາ​ເອກະສານ, ​ຄື​ຄົ້ນ­ຄວ້າ​ກໍ່­ສ້າງ​ໂຄງ­ການ​ກ່ຽວ​ກັບ​ວຽກ​ງານ​ການ​ສຳ​ເນົາ​ເອກະສານ, ໃນ​ນັ້ນ​ເພີ່ມ​ທະ­ວີ​ການ​ໝູນ​ໃຊ້​ເຕັກ​ໂນ​ໂ​ລຊີ​ສື່­ສານ; ຄຸ້ມ​ຄອງ​ຮັກ­ສາ​ສາງ​ສຳ​ເນົາ​ເອ­ກະ​ສານ ຢ່າງ​ມີ​ວິ­ທະ­ຍາ­ສາດ ທັນ​ສະ­ໄໝ; ຈັດ​ຕັ້ງ​ການ​ຂຸດ​ຄົ້ນ ເກັບ​ກຳ​ຂໍ້​ມູນ​ປະ­ຫວັດ­ສາດ​ໃຫ້​ໄດ້​ດີ, ເພື່ອ​ຮັບ​ໃຊ້​ຢ່າງ​ມີ​ປະ​ສິດ­ທິ​ຜົນ​ໃຫ້​ແກ່​ການ​ຕໍ່­ສູ້​ປັກ​ປັກ​ຮັກ­ສາ​​ອະ­ທິ­ປະ​ໄຕ​​ຂອງ​ຊາດ, ຮັກ​ສາ​ຜືນ​ແຜ່ນ­ດິນ​ອັນ​ຄົບ​ຖ້ວນ, ຮັກສາ​ເຂດທະ­ເລ ​ໝູ່​ເກາະ ແລະ ໄຫຼ່​ທະ​ວີບ​ຂອງ​ປະ­ເທດ​ຊາດ./.

​ໂດຍ ​ເຈືອງ​ຮວ່າ​ບິ່ງ

ກຳມະການ​ກົມ​ການ​ເມືອງ, ຮອງ​ນາຍົກລັດຖະມົນຕີ

---------------------------------

ບົດ​ນີ້​ໄດ້​ລົງ​ພິມ​ໃນ​ວາ­ລະ­ສານ​ກອມ​ມູ​ນິດ ສະ­ບັບ​ທີ 886 (ເດືອນ​ສິງ­ຫາ 2016)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ