ວັນພຸດ, 20/9/2017
ການຕ່າງປະເທດ - ກຳລັງໜູນທີ່ແຂງແຮງ ປະກອບສ່ວນປະຕິບັດ ສອງໜ້າທີ່ຍຸດທະຍາດຄື ກໍ່ສ້າງ ແລະ ປົກປັກຮັກສາປະເທດຊາດ*
7/11/2016 14:13' ສົ່ງ ພິມ
ສະຫາຍເລຂາທິການໃຫຍ່ ພັກກອມມູນິດຫວຽດນາມ ຫງວຽນຝູຈ້ອງ ກ່າວປາໄສຊີ້ນຳກອງປະຊຸມ. (ພາບ: TTXVN)

ເນື່ອ​ງ​ໃນ​ໂອກາດ​ມາ​ຮ່ວມ​ກອງ​ປະຊຸມ​ການ​ທູດ​ຄັ້ງ​ທີ 29 - ​ເຫດການ​ທີ່​ມີ​ຄວາມ​ໝາຍ​ສຳຄັນບໍ່​ພຽງ​ແຕ່​ສຳລັບ​ຂະ​ແໜງ​ການ​ທູດ​ເທົ່າ​ນັ້ນ ຫາກ​ຍັງ​ມີ​ຄວາມ​ສຳຄັນ​ສຳລັບບັນດາ​ເຫຼົ່າ​ທັບ​ທີ່​ປະກອບ​ເປັນ​ແນວ​ຮົບ​ການ​ຕ່າງປະ​ເທດ​ຂອງ​ປະ​ເທດ​ຊາດ, ຂ້າພະ​ເຈົ້າ​ຂໍ​ຝາກຄວາ​ມ​ອວຍພອນ​ແລະ​ຊົມ​ເຊີຍ​ຢ່າງສຸດອົກ​ສຸດ​ໃຈ ມາ​ຍັງ​ບັນດານັກ​ການ​ທູດ​ອະ​ວຸ​​ໂສ ​ແລະ ບັນດາ​ສະຫາຍ​ຜູ້​ແທນ​ ທີ່​ມາ​ຮ່ວມ​ກອງ​ປະຊຸມ​ນີ້. ຂ້າພະ​ເຈົ້າ​ກໍ່​ສະ​ແດ​ງຄວາມ​ຊົມ​ເຊີຍ​ຢ່າງ​ສຸດ​ອົດ​ສຸດ​ໃຈ​ຕໍ່ບັນດາ​ສະ​ຫາຍຫົວໜ້າ​ສຳນັກງານ​ການ​ທູດ​ຫວຽດນາມຢູ່​ເກືອບ 100 ​ແຫ່ງ​ໃນ​ທົ່ວ​ໂລກ ທີ່​ໄດ້​ມາ​ຮ່ວມ​ກອງ​ປະຊຸມພ້ອມ​ດ້ວຍຂໍ້​ມູນ​ຂ່າວສານ​ທີ່​ສົດໆ​ຮ້ອນໆ ກ່ຽວ​ກັບ​ສະພາບ​ການ​ຢູ່​ພາກ​ພື້ນ​ຕ່າງໆ ສະ​ແດງ​ໃຫ້​ເຫັນ​ຮູບ​ພາບທີ່​ຫຼາກ​ຫຼາຍ, ອຸດົມສົມບູນ​ຂອງ​ຊີວິດ​ສາກົນ. 

ກອງ​ປະຊຸມ​ການ​ທູດ​ຄັ້ງ​ນີ້ ​ເປັນ​ໂອ​ການ​ເພື່ອ​ໃຫ້​ພວກ​ເຮົາ​ທົບ​ທວນຄືນ​ວິວັດ​ການ​ຜັນ​ຂະຫຍາຍ​ປະຕິບັດມະຕິ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກ ກ່ຽວ​ກັບການ​ຕ່າງປະ​ເທດ, ຊາບ​ຊຶມ​ຈິດ​ໃຈ ​ແລະ ​ເນື້ອ​ໃນມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ນຳ​ສະ​ເໜີ​ບັນດາ​ມາດ​ຕະການ​ ເພື່ອ​ປະຕິບັດໜ້າ​ທີ່​ການ​ຕ່າງປະ​ເທດຈຸດໜັກ​ໃຈກາງ​ໃນ​ຊຸມ​ປີ​ຕໍ່ໜ້າ​ ໃຫ້​ມີ​ປະສິດທິ​ຜົນ. ນີ້​ກໍ່​​ເປັນ​ໂອກາດ​ດີ ​ເພື່ອ​ໃຫ້​ພະນັກງານທີ່​ເຮັດ​ວຽກ​ງານການ​ຕ່າງປະ​ເທດ ຈະ​ໄດ້​ຮັບ​ຮູ້​ແຈ້ງ​ກວ່າ​ອີກ ​ກ່ຽວ​ກັບ​ສະພາບ​ການ, ຖານະ​ບົດບາດ​ ຂອງ​ປະ​ເທດ​ເຮົາ​ໃນ​ພາກ​ພື້ນ ​ແລະ ​ໃນ​ໂລກ, ຄວາມ​ສຳຄັນ​ຂອງ​ວຽກ​ງານ​ການ​ຕ່າງປະ​ເທດ​ ໃນ​ແຜນ​ຍຸດ​ທະ​ສາດການ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ, ສ້າງ​ກຳລັງ​ຊຸກ​ດັນ​ໃໝ່​ໃຫ້​ທົ່ວ​ຂະ​ແໜງ​ການ, ​ແຕ່​ລະ​ກົມ​ກອງ ​ແລະ ​ແຕ່ລະຄົນ ​ໃນ​ການ​ປະຕິບັດວຽກງານ​ຂອງ​ຕົນ.

ຄື​ທີ່​ບັນດາ​ສະຫາຍ​ໄດ້​ຮູ້, ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ໄດ້​ຕີລາຄາກ່ຽວ​ກັບວຽກ​ງານ​ການ​ຕ່າງປະ​ເທດ​ໃນ​ເວລາ​ທີ່​ຜ່ານ​ມາ ​ໂດຍ​ສັງ​ເຂ​ບດັ່ງ​ນີ້: “ສະພາບ​ແວດ​ລ້ອມ​ສັນຕິພາບ ​ທີ່​ອຳນວຍ​ຄວາມສະດວກ​ໃຫ້​ແກ່​ການ​ພັດທະນາ​ໃນຄວາມ​ເປັນ​ເອກະລາດ ອະທິປະ​ໄຕ ​ເອກະ​ພາບ ​ແລະ ຜືນ​ແຜ່ນດິນ​ອັນ​ຄົບ​ຖ້ວນນັ້ນ ສືບ​ຕໍ່​ໄດ້​ຮັກສາ​ຢ່າງ​ໝັ້ນຄົງ. ການ​ພົວພັນ​ຕ່າງປະ​ເທດ​ໄດ້​ຮັບ​ການ​ເປີດ​ກວ້າງ ​ແລະ ນັບ​ມື້​ນັບ​ເຂົ້າ​ສູ່​ລວງ​ເລິກ. ຄວາມ​ພົວພັນ​ກັບ​ບັນດາ​ປະ​ເທດ​ເພື່ອນ​ບ້ານ​ໃກ້​ຄຽງ ​ແລະ ບັນດາ​ປະ​ເທດ ອາ​ຊຽນ ​ໄດ້​ຮັບ​ການ​ປັບປຸງ. ປະ​ເທດ​ເຮົາ​ໄດ້​ສ້າງ​ຕັ້ງ​ສາຍ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ, ຄູ່​ຮ່ວມ​ມື​ຮອບດ້ານ​ ກັບຄູ່​ຮ່ວມ​ງານ​ທີ່​ສຳຄັນ​ຈຳນວນ​ຫຼາຍ. ການ​ເຊື່ອມ​ໂຍງ​ສາກົນ​ໄດ້ຍູ້​ແຮງ, ປະກອບສ່ວນ​ທີ່​ສຳຄັນ​ ເຂົ້າ​ໃນ​ການ​ເພີ່ມ​ທະວີ​ແຫຼ່ງພະລັງ​ ໃຫ້​ແກ່​ການ​ພັດທະນາ ກໍ​ຄືປະຕິບັດການ​ຫັນ​ປະ​ເທດເປັນ​ອຸດສາຫະກຳ ທັນ​ສະ​ໄໝ. ປະ​ເທດ​ເຮົາ​ໄດ້​ເປັນ​ເຈົ້າ​ການ ​ເຂົ້າ​ຮ່ວມ​ຢ່າງ​ຕັ້ງໜ້າ ​ໃນ​ວຽກ​ງານ​ລວມຂອງ​ປະຊາ​ຄົມ​ໂລກ, ​ໃນ​ບັນດາ​ເວທີ​ປາ​ໄສ ບັນດາ​ອົງການ​ຈັດ​ຕັ້ງ​ພາກ​ພື້ນ ​ແລະ ສາກົນ, ຍົກ​ສູງ​ຖານະ​ບົດບາດ​ຂອງ​ປະ​ເທດ​ຊາດ. ວຽກ​ງານ​ການ​ຕ່າງປະ​ເທດຂອງ​ພັກ, ການ​ທູດ​ຂອງ​ລັດ ​ແລະ ​ການ​ຕ່າງປະ​ເທດຂອງ​ປະຊາຊົນ ​ໄດ້​ຮັບ​ການ​ຜັນ​ຂະຫຍາຍ​ຢ່າງ​ຄົບ​ຊຸດ ມີ​ປະສິດທິ​ຜົນ ມີ​ບາດ​ກ້າວ​ຂະຫຍາຍຕົວ​ໃໝ່”(1), ລະອຽດ​ຄື: 

- ການ​ເຄື່ອນ​ໄຫວການ​ຕ່າງປະ​ເທດ ​ໄດ້​ປະກອບສ່ວນສຳຄັນ​ເຂົ້າ​ໃນ​ການ​ຮັກສາ ​ແລະ ປັບປຸງສະພາບ​ແວດ​ລ້ອມ​ສາກົນ​ທີ່​ສະດວກ​ດີ ​ໃຫ້​ແກ່ການສ້າງສາ​ແລະ​ປົກ​ປັກ​ຮັກສາ​ປະ​ເທດ​ຊາດ. ດ້ວຍ​ການ​ເຄື່ອນ​ໄຫວການ​ຕ່າງປະ​ເທດທີ່​ຟົດ​ຟື້ນ ຕັ້ງໜ້າ, ພວກ​ເຮົາ​ໄດ້​ເປີດ​ກວ້າງ​ແລະ​ຍົກ​ສູງ​ຄຸນ​ນະພາ​ບຂອງ​ການ​ຮ່ວມ​ມື ຮ່ວມ​ງານ​ກັບຫຼາຍ​ປະ​ເທດ, ລວມທັງ​ບັນດາ​ປະ​ເທດ​ທີ່​ສຳຄັນ​ທັງ​ໝົດ, ຍາດ​ແຍ່ງ​ເອົາ​ຄວາມ​ເຫັນ​ດີ​ເຫັນ​ພ້ອມ ສະໜັບສະໜູນ​ກວ້າງຂວາງ​ຂອງ​ປະຊາຊົນ​ໂລກ ຕໍ່​ກັບ​ພາລະກິດທີ່​ເປັນ​ທຳ​ຂອງ​ປະຊາຊົນ​ເຮົາ. ​ແມ່ນ​ຍ້ອນ​ທາດ​ແທ້​ມະນຸດສະທຳ,  ຄວາມ​ຮັກຫອມ​ສັນຕິ, ຄວາມ​ອະ​ນຸ​ໂລມ​ອ່ອນ​ໂຍນ​ຂອງ​ຊາດນັ້ນ​ເອງ ທີ່​ໄດ້​ຊ່ວຍ​ໃຫ້ການ​ທູດ​ຫວຽດນາ​ມ ລົບ​ລ້າງ​ຄວາມ​ອາ​ຄາດ​ບາດໝາງ ​ແລະ ຖົມ​ຊ່ອງຫວ່າງ​ລະຫວ່າງ​ປະ​ເທດ​ເຮົາ​ກັບບັນດາປະ​ເທດອື່ນ, ນັບ​ທັງ​ປະ​ເທດ​ທີ່​ເຄີຍ​ເປັນ​ສັດຕູ​ຂອງ​ປະ​ເທດ​ຫວຽດນາມ. 

- ການ​ເຄື່ອນ​ໄຫວການ​ຕ່າງປະ​ເທດ ​ໄດ້​ປະກອບສ່ວນຢ່າງສົມກຽດ​ເຂົ້າ​ໃນ​ການ​ປະຕິບັດ​ໜ້າ​ທີ່​ຮັກສາອຳນາດ​ອະທິປະ​ໄຕ, ຄວາມ​ເປັນ​ເອກະ​ພາບ ​ແລະ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ປະ​ເທດ​ຊາດ. ພວກ​ເຮົາ​ໄດ້​ປະຕິບັດການ​ແບ່ງ​ເຂດ​ປັກ​ຫຼັກ​ໝາຍ​ຊາຍ​ແດນ​ກັບ​ລາວ ​ແລະ ຈີນ ຢ່າງສຳ​ເລັດ​ຜົນ; ພວມ​ຊຸກຍູ້​ການ​ແບ່ງ​​ເຂດປັກ​ຫຼັກ​ໝາຍ​ຊາຍ​ແດນ​ ກັບ​ກຳປູ​ເຈຍ; ພວມ​ເຈລະຈາ​ແບ່ງ​ເຂດ​ທະ​ເລ ​ແລະ ຮ່ວມ​ມື​ພ້ອມ​ກັນ​ພັດທະນາ​ກັບ​ຈີນ ຢູ່​ເຂດ​ອ່າວ ບັກ​ໂບ້ (Gulf of Tonkin), ​ເຈລະຈາ​ແບ່ງ​ເຂດທະ​ເລ​​ໃນ​ເຂດ​ເສດຖະກິດ​ພິ​ເສດ​ກັບ ອິນ​ໂດ​ເນ​ເຊຍ, ​ແກ້​ໄຂ​ບັນດາ​ບັນຫາ​ທີ່​ພົວພັນ​ກັບ​ເຂດ​ໄຫຼ່​ທະວີບ​ເປີດ​ກວ້າງ​ກັບ ​ມາ​ເລ​ເຊຍ. ກ່ຽວ​ກັບ​ບັນດາ​ບັນຫາ​ທີ່​ສັບສົນ​ຢູ່​ທະ​ເລ​ຕາ​ເວັນ​ອອກ, ພວກ​ເຮົາ​ໄດ້​ເຊີດ​ຊູ​ຄັນ​ທຸງ​ແຫ່ງ​ສັນຕິພາບ ການ​ຮ່ວມ​ມື ການ​ແກ້​ໄຂຂໍ້​ພິພາດ​ຕ່າງໆ​ທຸກ​ຢ່າງ​ດ້ວຍ​ສັນຕິ​ວິທີ ບົນ​ພື້ນຖານ​ກົດໝາຍ​ສາກົນ, ​ໃນ​ນັ້ນ​ມີ​ ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລປີ 1982, ຖະ​ແຫຼ​ງການ​ກ່ຽວ​ກັບ​ການ​ປະພຶດ​ຢູ່​ທະ​ເລ​ຕາ​ເວັນ​ອອກ​ລະຫວ່າງ ອາ​ຊຽນ ​ແລະ ຈີນ, ​ໃນ​ທຸກ​ເວທີ​ປາ​ໄສ​ສອງ​ຝ່າຍ ​ແລະ ຫຼາຍ​ຝ່າຍ, ພາກ​ພື້ນ ​ແລະ ສາກົນ, ສົມທົບ​ຢ່າງ​ແໜ້ນ​ແຟ້ນກັບ ການ​ຕ່າງປະ​ເທດປ້ອງ​ກັນຊາ​ດ - ປ້ອງ​ກັນ​ຄວາມສະຫງົບ, ກັບການ​ຕ່າງປະ​ເທດປະຊາຊົນ, ​ເພື່ອ​ແນ​ໃສ່​ຄວບ​ຄຸມຄວາມ​ຂັດ​ແຍ່ງ, ພ້ອມ​ກັນ​ນັ້ນ​ກໍ່​ຊອກ​ຫາ​ວິທີ​ແກ້​ອັນ​ພື້ນຖານ, ຍາວ​ນານ​ ​ໃຫ້​ແກ່​ການ​ແກ້​ໄຂ​ຂໍ້​ພິພາດ​ຂັດ​ແຍ່ງ​ທຸກ​ຢ່າງ. ຂະ​ແໜງ​ການ​ທູ​ກ​ໄດ້​ຖື​ບົດບາດນຳ​ໜ້າ​ໃນ​ສະ​ໄໝ​ສັນຕິ, ປະກອບສ່ວນ​ເຂົ້າ​ໃນ​ການ​ຮັກສາ​ຄວາມ​ສະຫງົບ ​ເອກະລາດ ​ແລະ ອະທິປະ​ໄຕ​ຂອງ​ປະ​ເທດ. 

- ການ​ເຄື່ອນ​ໄຫວການ​ຕ່າງປະ​ເທດ ​ໄດ້​ເປັນ​ເຈົ້າ​ການ​ຜັນ​ຂະຫຍາຍ​ຢ່າງ​​ແຂງ​ແຮງຕັ້ງໜ້າ ​ແລະ​ມີ​ປະສິດທິ​ຜົນ ​ໃນ​ການ​ປະຕິບັດ​ແຜນ​ນະ​ໂຍບາຍ​ໃຫຍ່​ກ່ຽວ​ກັບ​ການ​ເຊື່ອມ​ໂຍງ​ສາກົນ ​ໂດຍ​ແມ່ນ​ກອງ​ປະຊຸມ​ໃຫຍ່​ຄັ້ງ​ຄີ XI ຂອງ​ພັກ​ວາງ​ອອກ​ມາ ​ແລະ ​ໄດ້​ຫັນ​ເປັນ​ລະອຽດ​ໃນ​ມະຕິ​ສະບັບ​​ເລກ​ທີ 22-NQ/TW ຂອງ​ກົມ​ການ​ເມືອງ​ສູນ​ກາງ​ພັກ​ສະ​ໄໝ​ທີ XI. ການເຊື່ອມ​ໂຍງ​ສາກົນ ​ໄດ້​ຮັບ​ການ​ຜັນ​ຂະຫຍາຍ​ໃນ​ທຸກຊ່ອງ​ທາງ, ລວມມີການ​ຕ່າງປະ​ເທດຂອງ​ພັກ, ການ​ທູດ​ຂອງ​ລັດ, ການ​ຕ່າງປະ​ເທດຂອງ​ສະພາ​ແຫ່ງ​ຊາດ, ການ​ຕ່າງປະ​ເທດປະຊາຊົນ ຊຶ່ງໄດ້​ສະ​ແດງອອກ​ຢູ່​ໃນ​​ເກືອບທຸກ​ຂົງ​ເຂດ​ຂອງ​ຊີວິດ​ສັງຄົມ. ຄວາມ​ມານະ​ພະຍາຍາມ​ໃນ​ການ​ເຄື່ອນ​ໄຫວການ​ຕ່າງປະ​ເທດ ​ໄດ້​ເສີມ​ຂະຫຍາຍ​ບົດບາດ​ຂອງ​ປະ​ເທດ​ເຮົາ​ໃນ​ຫຼາຍ​ເວທີ​ປາ​ໄສ ​ແລະ ອົງການ​ຈັດ​ຕັ້ງ​ສາກົນ, ຍາດແຍ່ງຂົນຂວາຍເພື່ອ​ມີ​ທີ່​ຕັ້ງ​ສົມ​ກຽດ ​ໃນ​ຄະນະ​ມົນຕີ​ຄວາມ​ໝັ້ນຄົງ, ຄະນະ​ກຳມະການ​ສິດທິ​ມະນຸດ, ສະພາ​ເສດຖະກິດ-ສັງຄົມ​ ຂອງສະຫະ​ປະຊາ​ຊາດ... ພິ​ເສດ, ​ໄດ້​ເສີມ​ຂະຫຍາຍ​ບົດບາດ​ເປັນ​ສະມາຊິກ​ທີ່​ຕັ້ງໜ້າ​ໃນ​ວິວັດການກໍ່ສ້າງ​ປະຊາ​ຄົມ​ອາ​ຊຽນ. ຫວຽດນາມ​ຖືກ​ຕີ​ລາຄາ​ສູງ​ ໃນ​ການ​ປະຕິບັດ​ໂຄງການ​ເປົ້າ​ໝາຍ​ພັດທະນາ​ສະຫັດ​ສະ​ວັດ ຂອງ​ສະຫະ​ປະຊາ​ຊາດ, ​ເປັນຄັ້ງທຳ​ອິດ​ທີ່​ໄດ້​ຮັບ​ຄວາມ​ເຊື່ອ​ຖື ​ໃຫ້ເຂົ້າຮ່ວມການ​ເຄື່ອນ​ໄຫວ​ຂອງ​ຄະນະ​ຮັກສາ​ສັນຕິພາບ ​ຂອງ​ສະຫະ​ປະຊາ​ຊາດ. 

- ການ​ເຄື່ອນ​ໄຫວການ​ຕ່າງປະ​ເທດ ​ມີ​ສ່ວນປະກອບຕົວຈິງ​ຫຼາຍ​ຢ່າງ ​ເຂົ້າ​ໃນ​ການດຶງ​ດູດ​ເອົາ​ແຫຼ່ງພະລັງ​ພາຍ​ນອກ​ ມາ​ຮັບ​ໃຊ້​ໃຫ້​ແກ່​ການ​ພັດທະນາ​ເສດຖະກິດ-ສັງຄົມ. ​ເຖິງ​ວ່າ ສະພາບ​ການ​​ເມືອງ-ເສດຖະກິດ​ໂລກ​ຜັນ​ປ່ຽນບໍ່​ສະດວກ​ກໍ່ຕາມ, ​ແຕ່​ຫວຽດນາມກໍ່​ສືບ​ຕໍ່​ເປັນ​ຈຸດ​ໝາຍ​ປາຍທາງ​ທີ່​ຈັບ​ໃຈ ສຳລັບ​ນັກ​ລົງທຶນຂອງ​ຫຼາຍ​ປະ​ເທດ. ຄິດ​ຮອດ​ເວລນີ້, ຈຳນວນ​ໂຄງການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ​ທີ່​ກຳລັງ​ເຄື່ອນ​ໄຫວ​ຢູ່​ຫວຽດນາມ​ແມ່ນ 21.666 ​ໂຄງການ, ດ້ວຍ​ຈຳນວນ​ທຶນ​ຈົດ​ທະບຽນ​ທັງ​ໝົດ​ຫຼາຍ​ກວ່າ 293 ຕື້​ໂດ​ລາ​ສະຫະລັດ. ປະມານ 100 ປະ​ເທດ​ແລະ​ອານາ​ເຂດ ​ມີ​ໂຄງການ​ລົງທຶນ ​ແລະ 100 ກວ່າກຸ່ມ​ບໍລິສັດ​ຂ້າມ​ຊາດ​ຂະໜາດ​ໃຫຍ່​ໃນ​ໂລກ ​ມີໜ້າ​ຢູ່​ຫວຽດນາມ. ພວກ​ເຮົາ​ໄດ້​ເຈລະຈາ​ສັນຍາ​ການ​ຄ້າ​ເສລີ​ຫຼາຍ​ສະບັບກັບ 55 ປະ​ເທດຢ່າງ​ສຳ​ເລັດ​ຜົນ, ​ໄຂ​ແງ່​ຫວັງ​ດີ​ໃນ​ການ​ດຶງ​ດູດ​ເອົາ​ແຫຼ່ງພະລັງ​ຈາກ​ພາຍ​ນອກ​​ໃຫ້ໄດ້​ຫຼາຍ​ກວ່າ​ອີກ ​ເພື່ອ​ພັດທະນາ​ປະ​ເທດ.

- ວຽກ​ງານ​ຂົນຂວາຍ​ຊາວ​ຫວຽດນາມ​ຢູ່​ຕ່າງປະ​ເທດ ຕາມ​ມະຕິ​ສະບັບ​ເລກທີ 36-NQ/TW ຂອງ​ກົມ​ການ​ເມືອງ​ສູນ​ກາງ​ພັກ ​ໄດ້​ມີ​ບາດກ້າວ​ຫັນປ່ຽນ​ຢ່າງ​ຈະ​ແຈ້ງ. ຊາວ​ຫວຽດນາມ​ຢູ່​ຕ່າງປະ​ເທດ​ນັບ​ມື້​ນັບ​ຫັນ​ມາສູ່​ບ້ານ​ເກີດ​ເມືອ​ງນອນ, ພົວ​ພັນ​ແໜ້ນ​ແຟ້ນ ​ແລະ ມີ​ສ່ວນ​ປະກອບ​ຕົວ​ຈິງ​ເຂົ້າ​ໃນ​ພາລະກິດ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດ. ບັນດາ​ສຳນັກງານ​ຕົວ​ແທນທາງ​ການ​ທູດ​ຂອງຫວຽດນາມ​ຢູ່​ຕ່າງປະ​ເທດ ​ໄດ້​ແລະພວມ​ເຮັດ​ເປັນ​ຢ່າ​ງດີ ​ໜ້າທີ່​ປົກ​ປ້ອງ​ພົນລະ​ເມືອ​ງຂອງ​ຕົນ, ​ເປັນ​ບ່ອນ​ອີງ​ທີ່​ໜ້າ​ໄວ້​ວາງ​ໃຈ ​ຂອງ​ຊຸມ​ຊົນ​ຊາວ​ຫວຽດນາມ​ທີ່​ດຳລົງ​ຊີວິດ ​ແລະ ​ເຮັດ​ວຽກ​ຢູ່​ຕ່າງປະ​ເທດ. 

ບັນລຸ​ໄດ້​ບັນດາ​ຜົນສຳ​ເລັດ​ເຫຼົ່າ​ນັ້ນ​ແມ່ນ​ຍ້ອນ​ມີ​ການ​ນຳພາ​ທີ່​ສະຫຼາດ​ສ່ອງໃສ ປະດິດ​ສ້າງ ທຸ່ນທ່ຽງຂອງ​ສູນ​ກາງ​ພັກ, ​ໂດຍ​ກົງ​ແມ່ນ​ກົມ​ການ​ເມືອ​ງ, ຄະນະ​ເລຂາທິການ; ການ​ຄຸ້ມ​ຄອງ​ບໍລິຫານ​ຢ່າ​ງ​ເປັນ​ເຈົ້າ​ການ ​ໄຫວ​ພິບ​ຂອງລັດ, ການ​ມີ​ສ່ວນ​ຮ່ວມ ​ແລະ ​ເຄື່ອນ​ໄຫວ​ຢ່າງ​ຕັ້ງໜ້າ​ ຂອງ​ຂະ​ແນງການ ຂັ້ນ​ຕ່າງໆ, ​ໃນ​ນັ້ນ ຂະ​ແໜງ​ການ​ທູດ​ຖື​ບົດບາດນຳໜ້າ. ​ເນື່ອງ​ໃນ​ໂອກາດ​ນີ້, ຕາງໜ້າ​ການ​ນຳ​ພັກ​​ແລະລັດ ຂ້າພະ​ເຈົ້າ​ຂໍ​ຍ້ອງຍໍ​ຊົມ​ເຊີຍ​ຢ່າງ​ສຸດ​ໃຈ ຕໍ່ການ​ປະກອບສ່ວນ​ອັນ​ໃຫຍ່​ຫຼວງ, ມີ​ຄວາມ​ໝາຍ​ທີ່​ສຸດ​ ຂອງ​ຖັນ​ແຖວ​ພະນັກງານ​ເຮັດວຽກ​ງານການ​ຕ່າງປະ​ເທດ​ເວົ້າ​ລວມ, ຂອງ​ຂະ​ແໜງ​ການ​ທູດ​ເວົ້າ​ໂດຍ​ສະ​ເພາະ. 

​ແຕ່​ວ່າ, ວຽກ​ງານການ​ຕ່າງປະ​ເທດ​ໃນ​ເວລາ​ທີ່​ຜ່ານ​ມາ​ກໍ່​ມີ​ຂໍ້ຈຳກັດ​ຈຳນວນ​ໜຶ່ງ; ມີ​ວຽກ​ງານ​ທີ່​ຍັງ​ບໍ່​ທັນເຮັດ ຫຼື​ເຮັດ​ຍັງ​ບໍ່​ດີ ຊຶ່ງກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ຊີ້​ອອກ​ມາ. ລະອຽດ​ຄື, ​ໃນວຽກ​ງານການ​ຕ່າງປະ​ເທດ ​ແລະ ​ເຊື່ອມ​ໂຍງ​ສາກົນ ມີ​ດ້ານໜຶ່ງ​ທີ່​ຍັງ​ບໍ່​ທັນ​ເປັນ​ເຈົ້າ​ການ​ແທ້​ເທື່ອ ​ແລະ ປະສິດທິ​ຜົນ​ກໍ່​ບໍ່​ສູງ. ພວກ​ເຮົາ​ຍັງ​ບໍ່​ທັນ​ມີ​ວິທີ​ແກ້​ທີ່​ຄົບ​ຊຸດ, ມີ​ປະສິດທິ​ຜົນ ​ເພື່ອ​ຈຳກັດ​ຜົນ​ກະທົບ​ທີ່​ຫຍໍ້​ທໍ້ຕໍ່​ການ​ຍູ້​ແຮງ​ການ​ເຊື່ອມ​ໂຍງ​ສາກົນ; ​ໃນ​ຄວາມ​ຮັບ​ຮູ້ ​ແລະ ການ​ຊີ້​ນຳ​ຕົວ​ຈິງ ບາງ​​ເທື່ອບໍ່​ທັນ​ກັບ​ການ​ຫັນປ່ຽນ​ຢ່າງ​ສັບສົນໄວວາຂອງ​ສະພາບ​ການ; ການ​ປະສານ​ສົມທົບ​ລະຫວ່າງ​ບັນດາ​ຂະ​ແໜງ​ການ, ບັນດາ​ທ້ອງ​ຖິ່ນ​ ຍັງ​ບໍ່​ທັນ​ແໜ້ນ​ແຟ້ນ; ວຽກ​ງານ​ຄົ້ນຄວ້າ​ຍຸດ​ທະ​ສາດ, ຄາດ​ຄະ​ເນ​ສະພາບ​ການ​ ຍັງ​ບໍ່​ໄດ້​ຕາມ​ຄວາ​ມຸ່ງ​ຫວັງ.

ຈາກ​ບັນດາ​ຜົນສຳ​ເລັດ​ແລະ​ຂໍ້​ຈຳກັດ​ດັ່ງກ່າວ​ເທິງ​ນີ້ ແລະ ​ເວົ້າ​ລວມ​ແມ່ນ ຈາກ​ການ​ເຄື່ອງ​ໄຫວ​ທັງ​ໝົດ​ທີ່​ອຸ​ດົມສົມບູນ, ຟົດ​ຟື້ນ​ໃນ​ແນວ​ຮົບການ​ຕ່າງປະ​ເທດ ​ໃນ​ເວລາ​ທີ່​ຜ່ານ​ມາ, ພວກ​ເຮົາ​ສາມາດ​ຖອດ​ຖອນ​ບົດຮຽນ​ທີ່​ແທກ​ຈິງ​ຈຳນວວນໜຶ່ງ​ດັ່ງ​ນີ້: 

- ບົດຮຽນ​ກ່ຽວ​ກັບການ​ສົມທົບ​ ລະຫວ່າງ​ກຳລັງ​ແຮງ​ຂອງ​ຊາດ ​ກັບ​ກຳລັງ​ແຮງ​ແຫ່ງ​ຍຸກ​ສະ​ໄໝ, ກົມ​ກຽວລະຫວ່າງ​ຜົນ​ປະ​ໂຫຍ​ດ​ແຫ່ງ​ຊາດ ກັບ​ຄວາມ​ຮັບຜິດຊອບ​ຕໍ່​ສາກົນ. ສະພາບ​ການ​ໂລກ​ຜັນ​ປ່ຽນ​ຢ່າງ​ສັບສົນ, ​ແຕ່​ທ່າ​ອຽງ​ໃຫຍ່ ​ແລະ ຄວາມ​ມຸ່ງ​ມາດ​ປາຖະໜາ​ອັນ​ແຮງ​ກ້າຂອງ​ບັນດາປະຊາ​ຊາດ ຍັງ​ຄົງ​ແມ່ນ​ຮັກສາ​ສັນຕິພາບ ​ເປີດ​ກວ້າງ​ການ​ຮ່ວມ​ມື​ ເພື່ອ​ຄວາມ​ພັດທະນາ. ຫວຽດນາມ​ໄດ້​ກຳນົດ​ແຈ້ງ​ທີ່​ຕັ້ງ​ຂອງ​ຕົນ​ ໃນ​ການ​ແບ່ງ​ງານ​ສາກົນ, ປົວ​ແປງ​ທີ່​ຕັ້ງ​ຂອງ​ຕົນ​ ໃນ​ພວງ​ພະນັງ​ຄຸນຄ່າ, ພວງ​ພະນັງ​ການ​ຜະລິດ ​ແລະ ລຳລຽງ​ສະໜອງ​ ຢູ່​ໃນ​ພາກ​ພື້ນ ​ແລະ ​ໃນ​ທົ່ວ​ໂລກ. ​ແນວທາງ, ນະ​ໂຍບາຍ ​ແລະ ​ເປົ້າ​ໝາຍ​ຂອງ​ພວກ​ເຮົາ ຍາມ​ໃດ​ກໍ່​ສອດຄ່ອງ​ກັບ​ທ່າ​ອຽງ​ໃຫຍ່​ດັ່ງກ່າວ​ນັ້ນ​ຂອງ​ສະພາບ​ການ​ໂລກ. ຜົນ​ປະ​ໂຫຍ​ດ​ແຫ່ງ​ຊາດ​ຂອງ​ພວກ​ເຮົາ​ໃນ​ເວລາ​ນີ້​ແມ່ນ​ ຮັບປະກັນ​ສະພາບ​ແວດ​ລ້ອມ​ສາກົນທີ່​ສະດວກ​ດີ​ ເພື່ອ​ພັດທະນາ​ປະ​ເທດ. ສິ່ງ​ດັ່ງກ່າວ​ສອດຄ່ອງ​ໂດຍ​ສົມບູນ​ກັບ​ຜົນ​ປະ​ໂຫຍ​ດຂອງ​ປະຊາຊົນ​ໂລກ ​ເພື່ອ​ສັນຕິພາບ ​ເອກະລາດ​ແຫ່ງ​ຊາດ ປະຊາທິປະ​ໄຕ ​ແລະ ຄວາມ​ກ້າວໜ້າ​ທາງ​ສັງຄົມ. 

- ບົດຮຽນ​ກ່ຽວ​ກັບຄວາມ​ຢຶດໝັ້ນ​ທາງ​ດ້ານ​ຫຼັກການ, ​ໄຫວ​ພິບ​ທາງ​ດ້ານ​ຍຸດ​ໂທບາຍ. ຫຼັກການ​ຂອງ​ພວກ​ເຮົາ​ແມ່ນ ​ເອກະລາດ​ແຫ່ງຊາດ ​ແລະ ສັງຄົມ​ນິຍົມ. ຍຸດ​ໂທບາຍຂອງ​ພວກ​ເຮົາ​ແມ່ນ​ເຄື່ອນ​ເໜັງ, ​ໄຫວ​ພິບ​ໃນ​ການ​ດັດສົມ​ຕາມ​ແຕ່​ລະ​ບັນຫາ, ຕາມ​​ແຕ່ລະ​ຈຸດ​ເວລາ ​ແລະ ​ແລ້ວ​ແຕ່​ເປົ້າ​ໝາຍ ຫຼື​ຄູ່ຮ່ວມ​ງານ, ປະຕິບັດ​ຕາມ​ແນວ​ຄິດ​ໃຫຍ່​ຂອງ ລຸງ​ໂຮ່: “​ເອົາ​ຫຼັກການ​ເປັນ​ພື້ນ​ເພື່ອ​ໝູນ​ໃຊ້​ຢ່າງ​ໄຫວ​ພິບ”, “ຫາເພື່ອນ​ຕື່ມອີກ, ຫລຸດ​ຜ່ອນ​ສັດຕູ”, “​ເປັນ​ເພື່ອນມິດ​ກັບ​ທຸກ​ປະ​ເທດ​ປະຊາທິປະ​ໄຕ ​ແລະ ບໍ່​ກໍ່​​ໃຫ້​ເກີດຄວາມ​ອາ​ຄາດ​ກັບ​ຜູ້​ອື່ນ”. 

- ບົດຮຽນ​ກ່ຽວ​ກັບການ​ສ້າງ​ຄວາມ​ເຫັນ​ດີ​ເຫັນ​ພ້ອມ​ໃນ​ທົ່ວ​ພັກ, ທົ່ວ​ກອງທັບ ​ແລະ ທົ່ວ​ປວງຊົນ ຄື​ຄຳ​ຕັກ​ເຕືອນ​ຂອງ ລຸງ​ໂຮ່: “ພາລະກິດ​ບັນລຸ​ຜົນສຳ​ເລັດ​ໄດ້​ກໍ່ຍ້ອນ​ຄຳ​ວ່າ​ພ້ອມພຽງ”. ​ແນວທາງ​ການ​ຕ່າງປະ​ເທດ​ທີ່​ຖືກຕ້ອງ ​ແລະ ການ​ຜັນ​ຂະຫຍາຍບັນດາ​ນະ​ໂຍບາຍ​ອັນ​ລະອຽດ​ຢ່າງ​ມີ​ປະສິດທິ​ຜົນ ​ໄດ້​ປະກອບສ່ວນ​ສ້າງ​ຄວາມ​ເຫັນ​ດີ​ເຫັນ​ພ້ອມ​ອັນ​ໃຫຍ່​ຫຼວງ ​ໃນ​ທົ່ວ​ລະບົບ​ການ​ເມືອງ. ກົນ​ໄກ​ຄຸ້ມ​ຄອງ​ເປັນ​ເອກະ​ພາບ​ຕໍ່​ການ​ຕ່າງປະ​ເທດ ນັບມື້ນັບ​ສົມບູນ; ກົນ​ໄກ​ສົມທົບ​ລະຫວ່າງ​ການ​ທູດ​ດ້ານ​ກາ​ເມືອງ, ການ​ທູດ​ດ້ານ​ເສດຖະກິດ ກັບ​ກາ​ທູດ​ດ້ານປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ, ການ​ທູດ​ວັດທະນະທຳ-ສັງຄົມ, ການ​ທູດ​ປະຊາຊົນ, ນັບ​ທັງ​ການ​ທູດ​ດ້ານ​ສິ່ງ​ແວດ​ລ້ອມ; ລະຫວ່າງສູນ​ກາງ ​ແລະ ທ້ອງ​ຖິ່ນ... ​ໄດ້​ມີ​ການ​ດັດ​ແປງ​ຫຼາຍ, ປະກອບສ່ວນ​ສ້າງ​ຄວາມ​ຂະຫຍັນ​ຂັນ​ເຄື່ອນ ​ແລະ ປະສິດທິຜົນ​ສູງ ​ໃນ​ການ​ເຄື່ອນ​ໄຫວພົວພັນ​ຕ່າງປະ​ເທດ.

- ບົດຮຽນ​ກ່ຽວ​ກັບວຽກ​ງານ​ກໍ່​ສ້າງ​ຂະ​ແໜງ​ການ​ຕ່າງປະ​ເທດ ​ແລະ ວຽກ​ງານ​ພະນັກງານ ທີ່​ລຸງ​ໂຮ່ ຖື​ວ່າ​ເປັນ "ກົກຮາກຂອງທຸກວຽກງານ”. ໃນ​ບັນດາ​ໄລຍະ​ປະຫວັດ​ສາ​ດທີ່​ຕ່າງ​ກັນ​ຂອງ​ປະ​ເທດ​ຊາດ, ພະນັກງານການ​ຕ່າງປະ​ເທດຮຸ່ນ​ຕ່າງໆ ​ໄດ້​ສຳ​ເລັດ​ໜ້າ​ທີ່​ຂອງ​ຕົນ​ຢ່າງ​ສະຫງ່າ​ງາມ​, ​ໃນ​ນັ້ນ​ມີຖັນ​ແຖວພະນັກງານຂອງ​ກະຊວງ​ການ​ຕ່າງປະ​ເທດ ຊຶ່ງ​ມີ​ພາລະ​ບົດບາດ​ເປັນ​ເສນາ​ທິການ ​ແລະ ຜັນ​ຂະຫຍາຍວຽກ​ງານການ​ຕ່າງປະ​ເທດ​ໂດຍ​ກົງ. “​ເອົາລະຄັງ​ໄປສະ​ແດງ​ຢູ່​ປະ​ເທດ​ອື່ນ” ​ເປັນ​ວຽກ​ງານ​ທີ່​ຫຍຸ້ງຍາກລຳບາກ​ທີ່​ສຸດ, ມັນ​ຮຽກຮ້ອງ​ໃຫ້​ຜູ້​ທີ່​ເຮັດວຽກ​ງານການ​ຕ່າງປະ​ເທດຕ້ອງມີ​ຄຸນສົມບັດ​ພິ​ເສດ. ຄວາມ​ມານະ​ພະຍາຍາມ​ໃນ​ແນວ​ຮົບການ​ຕ່າງປະ​ເທດ ​ໃນ​ເວລາ​ທີ່​ຜ່ານ​ມາ ​ຂອງ​ບັນດາ​ຮຸ່ນ​ພະນັກງານການ​ຕ່າງປະ​ເທດ ນັບ​ມື້​ນັບ​ປະກອບ​ເປັນ​ຄຸນສົມບັດ​ປະຕິວັດ​ທີ່​ທັງ​ແດງ​ທັງ​ຊຳນານ, ຊຶ່ງເບື້ອງ​ຕົ້ນ​ໄດ້ສະ​ແດງ​ອອກ​​​​ເຖິງຄວາມ​ສະຫຼາດກ້າຫານ, ຈະລິ​ຍະ​ທຳ, ​ແບບ​ແຜນ ຂອງ​ລູກ​ຫຼານ​ຂອງ​ປະທານໂຮ່ຈີ​ມິນ. 

- ສຸດ​ທ້າ​ຍ, ກວມ​ລວມທັງ​ໝົດ​ແມ່ນ ບົດຮຽນ​ກ່ຽວ​ກັບການ​ນຳພາ​ເປັນ​ເອກະ​ພາບ, ​ເດັດຂາດ​ຂອງ​ພັກ, ການ​ຄຸ້ມ​ຄອງ​ບໍລິຫານ​ລວມສູນ​ຂອງ​ລັດ. ບັນດາ​ອົງການນຳພາ​ຂອງ​ພັກ, ກ່ອນ​ອື່ນ​ແມ່ນ​ກົມ​ການ​ເມືອງ, ຄະນະ​ເລຂາທິການ, ພ້ອມ​ກັບ​ບັນດາ​ອົງການ​ເສນາ​ທິການ​ ໄດ້ສະ​ແດງ​ໃຫ້​ເຫັນ​ເຖິງ ​ຄວາມ​ຫຼັກ​ແຫຼມ​ໄວພະລັນ ​ໃນ​ການສັງ​ເກດ​ສະພາບ​ການ ​ແລະ ກຳ​ສະພາບ​ການ, ຄວາມ​ເດັດຂາດ​ໃນ​ການວາງ​ມາດ​ຕະການ ນະ​ໂຍບາຍ​ອັນ​ລະອຽດອອກ​ມາ. ຫຼາຍ​ແຜນ​ນະ​ໂຍບາຍ, ວິທີ​ການ​ແກ້​ໄຂ​​ບັນຫາ​ສັບສົນ, ​ໃນ​ນັ້ນ ມີ​ບັນຫາ​ທະ​ເລ​ຕາ​ເວັນ​ອອກ, ການ​ຄິດ​ໄລ່ ຄັດ​ເລືອກທີ່​ຖືກ​ເໝາະ​ກັບ​ເວລາດຳ​ເນີນ​ການ​ເຄື່ອນ​ໄຫວການ​ຕ່າງປະ​ເທດທີ່​ສຳຄັນ, ​ໃນ​ນັ້ນ ມີ​ເຫດການ​ຕ້ອນຮັບ​ແລະ​ປະຕິບັດ​ການ​ຢ້ຽມຢາມ​ຂັ້ນສູງ, ​ໄດ້​ສ້າງ​ຜົນ​ກະທົບ​ທີ່​ແຂງ​ແຮງ ​ແລະ​ຈັບ​ໃຈ​ທີ່​ສຸດ, ສ້າງ​ຄວາມ​ເຫັນ​ດີ​ເປັນ​ເອກະ​ພາບ​ສູງ​ໃນ​ທົ່ວ​ພັກ, ທົ່ວ​ປວງ​ຊົນ ​ແລະ ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ ສະໜັບສະໜູນ​ຂອງ​ຫາງ​ສຽງສາກົນ.

ຂ້າພະ​ເຈົ້າ​ຫວັງ​ວ່າ​ກອງ​ປະຊຸມ​ຈະ​ສຸມ​ໃສ່​ສົນທະນາ, ​ເພີ່ມ​ເຕີມ, ຊີ້​ແຈງ​ບັນດາບົດຮຽນທີ່​ອາດ​ຈະ​ຖອດ​ຖອນ​ອອກມາ​ຈາກພາກ​ພຶດຕິກຳໃນ​ຊຸມ​ປີ​ທີ່​ຜ່ານ​ມາ, ​ເພື່ອ​ເປັນ​ພື້ນຖານ​ໃຫ້​ແກ່​ການ​ປະຕິບັດບັນດາ​ໜ້າ​ທີ່​​ໃໝ່ ທີ່​ໃຫຍ່ຫຼວງ ​ແລະ ສັບສົນ​ໃນ​ເວລາ​ຕໍ່​ໄປ​ນີ້.

ປະຈຸ​ບັນ, ປະ​ເທດ​ເຮົາ​ກຳລັງ​ກ້າວ​ເຂົ້າ​ສູ່​​ໄລຍະ​ແຫ່ງ​ການ​ພັດທະນາ​ໃໝ່ ດ້ວຍບັນດາ​ໜ້າ​ທີ່ສຳຄັນ​ທີ່​ສຸດ. ການ​ຕ່າງປະ​ເທດບໍ່​ພຽງ​ແຕ່​ເປັນ​ການ​ສືບ​ຕໍ່​ຂອງ​ນະ​ໂຍບາຍ​ພາຍ​ໃນປະ​ເທດ​ເທົ່າ​ນັ້ນ ຫາກ​ຍັງ​ເປັນ​ກຳລັງ​ໜູນອັນແຂງແຮງ ທີ່ປະກອບສ່ວນອັນ​ສົມ​ກຽດ​ ເຂົ້າ​ໃນ​ການ​ປະຕິບັດສອງ​ໜ້າ​ທີ່ຍຸດ​ທະ​ສາດ​ຄື ກໍ່ສ້າງ ​ແລະ ປົກ​ປັກ​ຮັກສາ​ປະ​ເທດ​ຫວຽດນາມສັງຄົມ​ນິຍົມ. ຂະ​ແໜງ​ການ​ທູດ​ເວົ້າ​ໂດຍ​ສະ​ເພາະ, ການ​​ເຄື່ອນ​ໄຫວການ​ຕ່າງປະ​ເທດທັງ​ໝົດ​ເວົ້າ​ລວມ ພວມ​ຢືນ​ຢູ່​ຕໍ່ໜ້າ​ຄວາມ​ຮຽກຮ້ອງ​ຕ້ອງການ ​ແລະ ໜ້າ​ທີ່​ທີ່​ໃຫຍ່​ຫຼວງ ສຳຄັນ: 

ກ່ອນ​ອື່ນ​ໝົດ​ແມ່ນ ​ໜ້າ​ທີ່ຍາດ​ແຍ່ງ​ເອົາ​ແຫຼ່ງພະລັງ​​ພາຍ​ນອກ​​ໃຫ້​ໄດ້​ຫຼາຍ​ທີ່​ສຸດ ​ເພື່ອ​ພັດທະນາ​ປະ​ເທດ. ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ວາງ​ເປົ້າ​ໝາຍ​ສັງ​ລວມ​ໃນ 5 ປີ​ສະ​ເພາະ​ໜ້າ​ຄື ຍູ້​ແຮງ​ການ​ປ່ຽນ​ແປງ​ໃໝ່​ຢ່າງ​ຮອບດ້ານຄົບ​ຊຸດ, ພັດທະນາ​ເສດຖະກິດ​ຢ່າງ​ໄວ​ແລະ​ຍືນ​ຍົງ, ສູ້​ຊົນ​ເພື່ອ​​ເຮັດ​ໃຫ້​ປະ​ເທດ​ເຮົາກາຍ​ເປັນ​ປະ​ເທດ​ອຸດສາຫະກຳ​ຕາມ​ທິດ​ທັນ​ສະ​ໄໝ​ໂດຍ​ພື້ນຖານ ​ໂດຍ​ໄວ. ບັນດາ​ຜົນສຳ​ເລັດ​ທີ່​ບັນລຸ​ໄດ້​ພາຍຫຼັງ 30 ປີ​ແຫ່ງ​ການ​ປ່ຽນ​ແປງ​ໃໝ່ ​ເປັນບັນ​ດາ​ປະຖົມ​ປັດ​ໄຈ​ທີ່ສະດວກ​ດີ ​ເພື່ອ​ປະຕິບັດ​ໜ້າ​ທີ່​​ດັ່ງກ່າວ, ​ແຕ່ ປະ​ເທດ​ເຮົາ​ກໍ່​ພວມ​ຢືນ​ຢູ່​ຕໍ່ໜ້າ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ບໍ່​ໜ້ອຍ. ​ໃນ​ໄລຍະ​ສັ້ນ, ພວກ​ເຮົາ​ຕ້ອງ​ແກ້​ໄຂ​ຜ່ານ​ຜ່າ​ຜົນ​ກະທົບ​ຂອງ​ການ​ວິ​ກິດ​ດ້ານ​ການ​ເງິນ, ​ເງິນຕາ​ຂອງ​ໂລກ, ກໍ​ຄື​ບັນດາ​ຈຸດ​ອ່ອນຂອງ​ພື້ນຖານ​ເສດຖະກິດ ​ແລະ ຂໍ້​ຂາດ​ຕົກ​ບົກ​ພ່ອງ​ໃນ​ການ​ຊີ້​ນຳ ຄຸ້ມ​ຄອງບໍລິຫານ; ພ້ອມ​ນັ້ນ​ຍັງ​ຖືກ​ຜົນ​ກະທົບ​ອັນ​ຮ້າຍ​​ແຮງ ​ຂອງ​ສະພາບ​ການ​ປ່ຽນ​ແປງ​ພູມິ​ອາກາດ, ​ໄພພິບັດ​ສິ່ງ​ແວດ​ລ້ອມ ​ແລະ ສິ່ງ​ທ້າ​ທາຍ​ໃໝ່​ຫຼາຍ​ຢ່າງ​ທີ່​ມາ​ຈາກ​ການ​ຜັນປ່ຽນ​ຂອງ​ເສດຖະກິດ​ໂລກ. ​ໃນ​ໄລຍະ​ຍາວ, ​ເສດຖະກິດ​ໂລກ​ກຳລັງ​ຜ່ານ​ວິວັດ​ການຈັດ​ວາງ​ໂຄງ​ປະກອບ​ຄືນ​ໃໝ່​ຢ່າງຮອບດ້ານ, ນັບ​ແຕ່​ໂຄງ​ສ້າງ​ການ​ຜະລິດ, ການ​ບໍລິ​ໂພ​ກ ຈົນ​ເຖິງ​ໂຄງ​ສ້າງ​ຕະຫຼາດ, ​ເງິນຕາ... ດ້ານ​ອື່ນ, ຄວາມ​ກ້າວໜ້າ​ແບບ​ກະ​ໂດດ​ຂັ້ນ​ຂອງ​ວິທະຍາສາດ​ເຕັກ​ໂນ​ໂລ​ຊີ ພວມ​ເປີດ​ສາກ​ໃຫ້​ແກ່​ການ​ປະຕິວັດດ້ານ​ອຸດ​ສະຫະ​ກຳ​ຄັ້ງ​ທີ​ສີ່, ພວມ​ພາ​ມະນຸດຊາດຂຶ້ນ​ສູ່​ລະດັບ​ໃໝ່​ແຫ່ງ​ການ​ພັດທະນາ.

​ເປັນ​ອັນວ່າ, ພື້ນຖານ​ເສດຖະກິດ​ຂອງ​ປະ​ເທດ​ເຮົາ​ທັງ​ຕ້ອງ​ແກ້​ໄຂ​ບັນດາ​ບັນຫາ​ສະ​ເພາະ​ໜ້າ, ທັງ​ຕ້ອງ​ປະ​ເຊີນ​ໜ້າ​ກັບການ​ຫັນປ່ຽນ​ທີ່​ກວ້າງຂວາງ​ເລິກ​ເຊິ່ງ​ໃນ​ພື້ນຖານ​ເສດຖະກິດ​ໂລກ. ຖ້າ​ຫາກ​ວ່າ ​ປະ​ເທດ​ເຮົາ​ບໍ່​ສາມາດຜ່ານ​ຜ່າ​ສິ່ງ​ທ້າ​ທາຍ​ທີ່​​ໃໝ່​ແລະ​ສັບສົນ​​ເຫຼົ່ານີ້​ໄດ້ ພວກ​ເຮົາ​ຈະ​ຖືກ​ໄພ​ອັນຕະລາຍ​ແຫ່ງ​ຄວາມ​ຖອຍຫຼັງ​ທີ່​ໜັກໜ່ວງ​ກວ່າ​ອີກ. ຂະ​ແໜງ​ການ​ທູດ​ບໍ່​ອາດ​ຢືນ​ຢູ່​ນອບ​ໜ້າ​ທີ່ປະກອບສ່ວນ​ແກ້​ໄຂ​ບັນດາ​ບັນຫາ​ທີ່​ມີ​ຄວາມ​ສຳຄັນ​ຍຸດ​ທະ​ສາດ​ນີ້. ກອງ​ປະຊຸມ​ຄວນ​ລົງ​ເລິກ​ສົນທະນາ​ເບິ່ງ​ວ່າ​ຂະ​ແໜງ​ການ​ຂອງ​ຕົນ​ອາດ​ຈະ​ເຮັດ​ໄດ້​ຫຍັງ​ແດ່. ຂ້າພະ​ເຈົ້າ​ຂໍ​ເຈາະ​ຈິ້ມບາງ​ວຽກ​ດັ່ງ​ນີ້: 

​ເປັນ​ຂະ​ແໜງ​ການ​ທີ່​ມີ​ເງື່ອນ​ໄຂ​ເຂົ້າ​ເຖິງ​ແຫຼ່ງຂໍ້​ມູນ​ຂ່າວສານກ່ຽວ​ກັບ​ການ​ເມືອ​ງ ​ເສດຖະກິດ​ໂລກ, ວິທະຍາສາດ​ເຕັກ​ໂນ​ໂລ​ຊີ, ຕະຫຼາດ​ໂລກ​ຢ່າງ​ໄວວາ, ມີ​ສຳນັກງານ​ຕົວ​ແທນທາງ​ການ​ທູດຢູ່​ທົ່ວ​ທຸກ​ຫ້າ​ທະວີ​ບ, ຂະ​ແໜງ​ການ​ທູດ ຕ້ອງ​ໃຫ້​ບຸລິມະສິດ​ສູງ ​ແລະ ມອບ​ໜ້າ​ທີ່​ອັນ​ລະອຽດ​ ໃຫ້​ບັນດາສຳນັກງານ​ຕົວ​ແທນ​ທາງ​ການ​ທູດຢູຕ່າງປະ​ເທດ, ບັນດາ​ອົງການ​ພາລະ​ບົດບາດ​ສັງກັດ​ກະຊວງ ​ໃນ​ການ​ເພີ່ມ​ທະວີ​ວຽກ​ງານ​ຄົ້ນຄວ້າການ​ຄາດ​ຄະ​ເນ, ສະໜອງ​ຂໍ້​ມູນ​ຊ່າວ​ສານກ່ຽວ​ກັບ​ສະພາບ​ການ​ຜັນ​ປ່ຽນ​ສະ​ເພາະ​ໜ້າ ​ແລະ ຍາວ​ນານ ​ຂອງ​ເສດຖະກິດ​ໃນ​ພາກ​ພື້ນ ​ແລະ ​ໃນ​ໂລກ, ຊ່ວຍ​ໃຫ້​ການ​ນຳ​ມີ​ການ​ຕີ​ລະຄາ​ຢ່າງ​ຊັດ​ເຈນ, ທັນ​ການ ​ເພື່ອຊີ້​ນຳ, ຄຸ້ມ​ຄອງ​ເສດຖະກິດ​ໃນ​ປະ​ເທດ​ໃຫ້​ສອງ​ຄ່ອງ​ກັບ​ກົດ​ເກນ​ພາວະ​ວິ​ໄສ ​ແລະ ທ່າ​ອຽງ​ແຫ່ງ​ການ​ພັດທະນາ​ລວມ. 

ປະຈຸ​ບັນ​ນີ້, ປະ​ເທດ​ເຮົາ​ໄດ້​ເຊື່ອມ​ໂຍງ​ຢ່າງ​ກວ້າງຂວາງ​ເລິກ​ເຊິ່ງກວ່າ​ຕັ້ງ​ຫຼາຍ ທຽບ​ກັບ​ໄລຍະ​ກ່ອນ, ສະ​ແດງ​ອອກ​ໃນ​ການ​ເຊັນ​ສັນຍາ​ການ​ຄ້າ​ເສລີ​ຮຸ່ນ​ໃໝ່​​ໄດ້ຫຼາຍ​ສະບັບ. ສະພາບ​ການ​ໃໝ່​ນັ້ນ​ ໄດ້​ວາງ​ຄວາມ​ຮັບຜິດຊອບ​ອັນ​ໜັກໜ່ວງໃຫ້ຂະ​ແໜງ​ການ​ທູດ ຕ້ອງ​ປະກອບສ່ວນ​ປະຕິບັດ​ສັນຍາ​ທີ່​ໄດ້​ລົງ​ນາມ​ ໃຫ້​ປະກົດ​ເປັນ​ຈິງ ຕາມ​ຈິດ​ໃຈ​ນຳ​ເອົາ​ຜົນປະ​ໂຫຍ​ດສູງ​ສຸດມາ​ໃຫ້ປະ​ເທດ​ຊາດ, ຈຳກັດ​ການ​ກະ​ທົບ​ທາງ​ລົບທີ່​ບໍ່​ດີ​ຍ້ອນສິ່ງ​ທ້າ​ທາຍ​ທີ່​ອາດ​ຈະ​ເກີດ​ຂຶ້ນ. ​ເພື່ອ​ປະຕິບັດຈຸດ​ປະ​ສົງ​ດັ່ງກ່າວ, ຂະ​ແໜງ​ການ​ທູດຕ້ອງ​ສົມທົບ​ຢ່າງ​ແໜ້ນ​ແຟ້ນກັບ​ບັນດາ​ຂະ​ແໜງ​ການ​ທີ່​ກ່ຽວຂ້ອງ, ​ເປັນ​ເຈົ້າ​ການ, ຕັ້ງໜ້າ​ພະຍາຍາມ​ເປີດ​ກວ້າງ​ຕະຫຼາດ, ຊອກ​ຫາ​ຄູ່​ຮ່ວມ​ງານ​ການ​ຄ້າ ການ​ລົງທຶນ ການທ່ອງທ່ຽວທີ່​ມີ​ຄວາມ​ສາມາດ, ປະກອບສ່ວນ​ປະຕິບັດ​ແຜນ​ນະ​ໂຍບາຍ​ຈັດ​ວາງ​ໂຄງ​ສ້າງ​ເສດຖະກິດ​ຄືນ​ໃໝ່, ຕິດ​ກັບ​ປ່ຽນ​ແປງ​ໃໝ່​ຕົວ​ແບບ​ເຕີບ​ໂຕ, ຍົກ​ສູງ​ຄຸນ​ນະພາ​ບ ປະສິດທິ​ຜົນ ​ແລະ ຄວາມ​ສາມາດ​ແຂ່ງຂັນ​ຂອງ​ພື້ນຖານ​ເສດຖະກິດ. ​ການ​ທູດຕ້ອງ​ມີ​ມາດ​ຕະການ​ທີ່​ແທດ​ຈິງ ​ເພື່ອ​ຊ່ວຍ​ເຫຼືອບັນດາ​ຂະ​ແໜງ​ການ, ທ້ອງ​ຖິ່ນ, ​ເປັນ​ຕົ້ນ​ແມ່ນ​ວິ​ສາ​ຫະກິດ, ​ໃນ​ການ​ເປີດ​ກວ້າງ​ການ​ຮ່ວມ​ມື​ກັບ​ພາຍ​ນອກ ​ແນ​ໃສ່​ຈຳໜ່າຍ​ຂາຍ​ສິນຄ້າ, ຍາດ​ແຍ່ງ​ເອົາ​ທຶນ ​ເຕັກ​ໂນ​ໂລ​ຊີ ​ແລະ ທັກ​ສະການ​ຄຸ້ມ​ຄອງ ​ຂອງ​ຕ່າງປະ​ເທດ. 

ພ້ອມ​ກັບ​ໜ້າ​ທີ່​ພັດທະນາ​ປະ​ເທດ, ຂະ​ແໜງ​ການ​ທູດຍັງ​ຕ້ອງ​​ແບກ​ຫາບ​ໜ້າ​ທີ່​ທີ່​ໃຫຍ່​ຫຼວງ​ສັບສົນ​ທີ່​ສຸດ​ຄື ປະກອບ​ສ່ວນ​ທີ່​ສຳຄັນ​ເຂົ້າ​ໃນ​ການ​ປົກ​ປັກ​ຮັກສາ​ເອກະລາດ ອະທິປະ​ໄຕ ​ເອກະ​ພາບ ຜືນ​ແຜ່ນດີ​ນອັນ​ຄົບ​ຖ້ວນ​ຂອງ​ປະ​ເທດ​ຊາດ, ຮັກສາ​ສະພາບ​ແວດ​ລ້ອມ​ສັນຕິພາບ ສະຖຽນ​ລະ​ພາບ​ເພື່ອ​ການ​ພັດທະນາ. ໜ້າ​ທີ່​ນີ້​ນັບ​ມື້​ນັບ​ສັບສົນ​ແລະ​ໜັກໜ່ວງ ຍ້ອນ​ການ​ຜັນ​ປ່ຽນ​ໃໝ່​ຂອງ​ສະພາບ​ການ​ພາກ​ພື້ນ ​ແລະ ​ໃນ​ໂລກ. ​ເຖິງ​ວ່າ ສັນຕິພາບ ​ເອກະລາດ​ແຫ່ງ​ຊາດ ປະຊາທິປະ​ໄຕ ການ​ຮ່ວມ​ມື ​ແລະ ການ​ພັດທະນາ ຍັງ​ເປັນ​ທ່າ​ອຽງ​ໃຫຍ່​ກໍ່ຕາມ, ​ແຕ່ ສະພາບ​ການ​ການ​ເມືອງ-ຄວາມ​ສະຫງົບ​ໃນ​ໂລກ ພວມ​ປ່ຽນ​ແປງ​ຢ່າງ​ໄວວາ, ຜັນ​ປ່ຽນຢ່າງ​ສັບສົນທີ່​ຄາດ​ຄະ​ເນ​ຍາກ. ​ໃນ​ທຸກ​ວັນ​ນີ້, ພວກ​ເຮົາ​ໄດ້​ຮູ້​ເຫັນ​ກັບ​ຕາ ​ບັນດາ​ການ​ປະ​ທະ​ກັນ​ດ້ວຍ​ອາວຸດ, ການ​ເຄື່ອນ​ໄຫວ​ແຊກ​ແຊງ, ການ​ໂຄ່ນ​ລົ້ມ, ການ​ກໍ່​ການ​ຮ້າຍ, ສົງ​ຄາມ​ພາກສ່ວນ, ສົງຄາມ​ເຄືອ​ຂ່າຍ​ອິນ​ເຕີ​ເນັດ, ການ​ກະທຳ​ລ່ວງ​ລ້ຳ​ອຳນາດ​ອະທິປະ​ໄຕ​ຂອງ​ປະ​ເທດ​ອື່ນ, ການ​ແກ່ງ​ແຍ້​ງພິພາດກັນ​ດ້ານ​ດິນ​ແດນ ຊັບພະຍາກອນ ທີ່​ພວມ​ເກີດ​ຂຶ້ນ​ຢູ່​ຫຼາຍ​ແຫ່ງ​ຫົນ​ໃນ​ໂລກ. ຢູ່​ອາຊີ - ປາຊີ​ຟິກ ​ແລະ ອາຊີ​ຕາ​ເວັນ​ອອກສຽງ​ໃຕ້ ກໍ​ມີ​ການ​ປ່ຽນ​ແປງທີ່​ສັບສົນ​ທີ່​ສຸດ, ທີ່​ພົວພັນ​ເຖິງ​ຄວາມ​ຂັດ​ແຍ່ງ ພິພາດ​ທາງ​ດິນ​ແດນ, ​ອະທິປະ​ໄຕ​ໃນ​ເຂດ​ທະ​ເລ ​ເກາະ​ທະ​ເລ ​ແລະ ການ​ແກ່ງ​ແຍ້ງທາງດ້ານ​ຍຸດ​ທະ​ສາດ ລະຫວ່າງ​ປະ​ເທດ​ໃຫຍ່​ຈຳນວນ​ໜຶ່ງ, ​ເຮັດ​ໃຫ້ສະພາກ​ການ​ບໍ່​ມີ​ຄວາມ​ສະຫງົບ. ສະພາບ​ການ​ດັ່ງກ່າວ​ນັ້ນ​ຮຽກຮ້ອງ​ໃຫ້​ພວກ​ເຮົາ​ຕ້ອງ​ມີ​ຄວາມ​ສຳ​ພັດ​ໄວ​ທີ່ສຸດ ​ໃນ​ການ​ຄາດ​ຄະ​ເນ​ສະພາບ​ການ ​ເພື່ອ​ບໍ່​ຖືກ​ຕົກສະ​ເງີ້, ຕົກ​ໃນ​ທ່າ​ຮັບ. ຢາກ​ໄດ້​ຄື​ແນວ​ນັ້ນ, ຕ້ອງ​ເອົາ​ໃຈ​ໃສ່​ເຖິງ​ວຽກ​ງານ​ຄົ້ນຄວ້າ​ຄາດ​ຄະ​ເນ​ຍຸດ​ທະ​ສາດ, ທຳ​ຄວາມ​ກະຈ່າງ​ແຈ້ງ​ກ່ຽວ​ກັບບໍ່​ເກີດ​ທີ່​ເລິກ​ເຊິ່ງ ຂອງ​ສະພາບ​ການ​ຜັນ​ປ່ຽນ​ຢູ່ໃນ​ໂລກ​ປະຈຸ​ບັນ, ​ເປັນ​ຕົ້ນ​ແມ່ນ ສາຍ​ພົວພັນ​ທັງ​ຮ່ວມ​ມື ທັງ​ແຂ່ງຂັນ​ແກ່ງ​ແຍ້​ງກັນ ​ລະຫວ່າງ​ບັນດາ​ທະ​ເທດ​ໃຫຍ່ ຢູ່ບັນດາ​ເຂດ​ທີ່​ສຳຄັນ​ຂອງ​ໂລກ, ນັບ​ທັງຢູ່​ອາຊີ - ປາຊີ​ຟິກ ​ແລະ ອາຊີ​ຕາ​ເວັນ​ອອກສຽງ​ໃຕ້, ທີ່ອາດ​ຈະ​ສົ່ງ​ຜົນ​ກະທົບ​ເຖິງ​ຜົນ​ປະ​ໂຫຍ​ດຂອງ​ປະ​ເທດ​ເຮົາ, ນຳ​ສະ​ເໜີ​ແຜນການ​ດຳ​ເນີນ​ການ​ແກ້​ໄຂຢ່າງ​ທັນ​ການ ​ຕໍ່​ສະພາບ​ການສະ​ເພາ​ໜ້າ ​ແລະ ຍາວ​ນາມ. 

​ໃນ​ພາລະກິດ​ປົກ​ປັກ​ຮັກສາ​ປະ​ເທດ​ຊາດ, ຕ້ອງ​ກຳ​ແໜ້ນ​ບັນດາ​ທັດສະນະ​ນຳພາ ກ່ຽວ​ກັບ​ການ​ຮ່ວມ​ມື ​ແລະ ຕໍ່ສູ້. ທັງ​ເດັດດ່ຽວ ໜຽວ​ແໜ້ນ​ໃນ​ການ​ປົກ​ປັກ​ຮັກສາ​ເອກະລາດ ອະທິປະ​ໄຕ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ປະ​ເທດ​ຊາດ, ປົກ​ປັກ​ຮັກສາຜົນ​ປະ​ໂຫຍ​ດຂອງ​ຊາດ, ທັງ​ຕ້ອງ​ຮັກສາ​ສິ່ງ​ແວດ​ລ້ອມ​ແຫ່ງ​ສັນຕິພາບ ​ແລະ​ການ​ຮ່ວມ​ມື​ ​ເພື່ອການ​ພັດທະນາ. ​ແນ​ໃສ່​ຈຸດໝາຍ​ດັ່ງກ່າວ, ຕ້ອງ​ກຳ​ແໜ້ນ​ຫຼັກການ​ແກ້​ໄຂ​ຂໍ້​ພິພາດ ຂັດ​ແຍ່ງ​ດ້ວນ​ສັນຕິ​ວິທີ, ​ໃນ​ນັ້ນ ມີ​ການ​ເຈລະຈາ​ສອງ​ຝ່າຍ​ກ່ຽວ​ກັບ​ບັນດາ​ບັນຫາທີ່​ກ່ຽວ​ພັນ​ກັບ​ສອງ​ປະ​ເທດ ​ແລະ ການ​ເຈລະຈາ​ພະຫຸ​ພາຄີ​ກ່ຽວ​ກັບ​ບັນດາ​ບັນຫາ​ທີ່​ພົວພັນ​ກັບ​ຫຼາຍ​ປະ​ເທດ, ຫຼາຍ​ຝ່າຍ; ສູ້​ຊົນ​ຢ່າງ​ໝັ້ນ​ໜຽວ​ແນ​ໃສ່​ບັນລຸ​ເຖິງ​ວິທີ​ແກ້​ທີ່​ພື້ນຖານ, ຍາວ​ນານ ບົນ​ພື້ນຖານ​ກົດໝາຍ​ສາກົນ.

​ໃນ​ໂລກ​ທີ່​ມີ​ການ​ເຊື່ອມ​ໂຍງ, ​ໂລກາ​ພິວັດ​ໃນ​ປະຈຸ​ບັນ, ການ​ຕ່າງປະ​ເທດປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ກໍ່​ມີ​ທີ່​ຕັ້ງ​ສຳຄັນ​ທີ່​ສຸດ. ຂະ​ແໜງ​ການ​ທູດ​ຕ້ອງ​ສົມທົບ​ຢ່າງ​ແໜ້ນ​ແຟ້ນກັບອົງການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ, ​ເປັນ​ເຈົ້າ​ການ​ຜັນ​ຂະຫຍາຍ​ການ​ເຄື່ອນ​ໄຫວ​ໃນ​ຂົງ​ເຂດທີ່​ສຳຄັນ​ນີ້. ການຮັກສາ​ສິ່ງ​ແວດ​ລ້ອມ​ທີ່​ສະດວກ​ດີ​ ເພື່ອ​ການພັດທະນາ​ ແລະ ການປົກ​ປັກ​ຮັກສາ​ເອກະລາດ ອະທິປະ​ໄຕ ຜືນ​ແຜ່ນດິນ​ອັນ​ຄົບ​ຖ້ວນ ​ແມ່ນມີຄວາມພົວພັນ​ທີ່​ສະໜິດ​ແໜ້ນນຳ​ກັນ, ກະທົບ​​ຊຶ່ງ​ກັນ​ແລະ​ກັນ ດັ່ງ​ນັ້ນມັນ​ຕ້ອງ​ໄດ້​ຮັບ​ການ​ກຳນົດ​ວ່າ​ເປັນ​ບຸລິມະສິດ​ສູງ​ຢ່າງ​ເປັນ​ປະຈຳ, ​ເປັນ​ເງື່ອນ​ໄຂ​ທີ່​ສຳຄັນ​ອັນ​ດັບ​ໜຶ່ງ​ ໃນ​ພາລະກິດ​ການ​ກໍ່ສ້າງ ​ແລະ ປົກ​ປັກ​ຮັກສາ​ປະ​ເທດ​ຊາດ. ນີ້​ກໍ່​ແມ່ນ​ແນວ​ຄິດ​ຂອງບັນ​ພະບຸຸລຸດຂອງ​ພວກ​ເຮົາ: “ຮັກສາ​ປະ​ເທດ​ແຕ່​ໄກກ່ອນ”, “ຮັກສາ​ປະ​ເທດ​ແຕ່​ເມື່ອ​ປະ​ເທດ​ຍັງ​ບໍ່​ຖືກ​ອັນຕະລາຍ”.

ຜົນສຳ​ເລັດ​ຫຼື​ຄວາມ​ລົ້ມ​ເຫຼວຂອງ​ການ​ທູດ​ແມ່ນຂຶ້ນ​ກັບ​ກຳລັງ​ອຳນາດ​ແລະ​ທີ່​ຕັ້ງ. ກຳລັງ​ອຳນາດ​ແລະ​ທີ່​ຕັ້ງຢູ່​ນີ້​ບໍ່​ພຽງ​ແຕ່​ສະ​ແດງ​ອອກ​ໃນ​ກຳລັງ​ແຮງວັດຖຸ ຫາກ​ຍັງ​ຢູ່​ໃນ “ກຳລັງ​ແຮງ​ນິ້ມ​ນວນ”. ນັ້ນ​ແມ່ນ ລັກສະນະ​ເປັນ​ທຳ​ຂອງ​ພາລະກິດ​ຂອງ​ພວກ​ເຮົາ; ​ແມ່ນ​ກຳລັງ​ແຮງ​ແຫ່ງ​ຄວາມມະຫາ​ສາມັກຄີ​ປວງຊົນ​ທັງ​ຊາດ; ຄວາມ​ເຫັນ​ດີ​ເຫັນ​ພ້ອມ ສະໜັບສະໜູນ​ຂອງ​ປະຊາຊົນ​ຜູ້​ຮັກຫອມ​ສັນຕິພາບ, ຄວາມ​ຍຸຕິ​ທຳ​ໃນ​ໂລກ. ນັ້ນ​ກໍ່​ແມ່ນ​ການ​ປະຕິບັດ​ແນວທາງ ນະ​ໂຍບາຍ​ການ​ຕ່າງປະ​ເທດ ຢ່າງ​ສະຫຼາດ​ຄ່ອງ​ແຄ່​ວ ຕາມ​ແນວ​ຄິດ​ໃຫຍ່​ຂອງ​ທ່ານ​ປະທານ​ໂຮ່ຈີ​ມິນ. ຖ້າ​ຫາກ ກ່ອນ​ໜ້າ​ນີ້ ​ໃນ​ການ​ຕໍ່ສູ້ຕ້ານການ​ຮຸກ​ຮານ​ຈາກ​ພາຍ​ນອກ ​ເພື່ອ​ປົກ​ປັກ​ຮັກສາ​ປະ​ເທດ​ຊາດ, ດ້ວຍ​ພາລະກິດ​ທີ່​ເປັນ​ທຳ​ແລະ​ການ​ເສຍ​ສະລະ​ເລືອດ​ເນື້ອ​ຂອງ​ຕົນ, ປະຊາຊົນ​ເຮົາ​ຍາດ​​ແຍ່ງ​ໄດ້​ຄວາມ​ເຫັນ​ດີ​ເຫັນ​ພ້ອມ ​ແລະ ທີ່​ຕັ້ງ​ສູງ​ທີ່​ສຸດ​ໃນ​ມະ​ໂນ​ທຳ​ຂອງ​ມະນຸດຊາດ, ​ຊຶ່ງ​ໃນ​ປະຈຸ​ບັນ​ນີ້ ​ໂດຍ​ອາ​ໃສ​ການ​ປ່ຽນ​ແປງ​ໃໝ່ ​ແລະ ນະ​ໂຍບາຍ​ການ​ຕ່າງປະ​ເທດ​ທີ່​ຖືກຕ້ອງ​ປອງ​ດອງ​ແລະເປີດ​ກວ້າງ, ຫວຽດນາມ​ໄດ້​ມີ​ທີ່​ຕັ້ງ​​ໃໝ່​ໃນ​ການ​ພົວພັນສາກົນ. ​ເວົ້າ​​ແບບ​ອື່ນ, ພວກ​ເຮົາ​ຕ້ອງ​ນຳ​ຊາດຂອງ​ຕົນ​ເຂົ້າ​ໃນ​ກະ​ແສລວມຂອງ​ຍຸກ​ສະ​ໄໝ, ​ເຊີດ​ຊູທຳ​ມະ​ຈັນຍາ​ຂອງ​ຊາດ, ຍາດ​ແຍ່ງ​ເອົາ​ຄວາມ​​ເຫັນ​ໃຈ ຄວາມສັດທາຮັກ​ແພງຂອງມະນຸດຊາດ​ທີ່​ກ້າວໜ້າ, ​ເຊີດ​ຊູ​ທັງ​ກຳລັງ​ອຳນາດ​ແລະທີ່​ຕັ້ງ​ຂອງ​ປະ​ເທດ​ຊາດ​​ໃຫ້​ສູງຂຶ້ນຢ່າງ​ໜັກ​ແໜ້ນ​ທີ່​ສຸດ.

​ໃນ​ຂອບ​ຂອງ​ການ​ຜັນ​ຂະຫຍາຍ​ແນວທາງ​ການ​ຕ່າງປະ​ເທດຂອງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ພວກ​ເຮົາ​ຕ້ອງ​​ໃຫ້​ຄວາມ​ສຳຄັນ​ທີ່​ສຸດ​ເຖິງການ​ພົວພັນ​ກັບ​ບັນດາ​ປະ​ເທດ​ເພື່ອນ​ບ້ານ​​ໃກ້​ຄຽງ, ບັນດາ​ປະ​ເທດ​ໃຫຍ່, ບັນດາ​ປະ​ເທດ​ເພື່ອ​ນມິດ​ທີ່​ເປັນ​ມູນ​ເຊື້ອ, ​ເຊີດ​ຊູ​ບົດບາດ​ໃຈກາງ​ຂອງ​ປະຊາ​ຄົມ ອາ​ຊຽນ. ຕັ້ງ​ໝັ້ນ​ໃນ​ແຜນ​ນະ​ໂຍບາຍ​ເພີ່ມ​ທະວີ​ການ​ຮ່ວມ​ມື​ບົນ​ພື້ນຖານ​ເຄົາລົບ​ເອກະລາດ ອະທິປະ​​ໄຕ ຜືນ​ແຜ່ນດິນ​ອັນ​ຄົບ​ຖ້ວນ, ບໍ່​ແຊກ​ແຊງ​ເຂົ້າ​​ວຽກ​ງານ​ພາຍ​ໃນ​ຂອງ​ກັນ, ສະ​ເໝີ​ພາບ, ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ.

ຂະ​ແໜງ​ການ​ທູດກໍ່​ຕ້ອງນຳ​ໜ້າ​ໃນ​ການ​ສົມທົບ​ກັບ​ການ​ຕ່າງປະ​ເທ​ດປະຊາຊົນ ​ແລະ ຂະ​ແໜງ​ການ​ສິລະ​ປະວັດທະນະທຳ ​ໃນ​ການ​ຖະ​ແຫຼ​ງຂ່າວ ​ໂຄສະນາ​ການ, ​ເສີມຂະຫຍາຍປະສິດທິ​ຜົນ​ຂອງ​ທ່າ​​ແຮງ “ກຳລັງ​ແຮງ​ນິ້ມ​ນວນ​” ຂອງປະ​ເທດ, ​ເລີ່​ມຕົ້ນ​ຈາກ​ວັດທະນະທຳ. ວັດທະນະທຳ, ບໍ​ມີ​ລະດັບ​ສູງ​ລະດັບ​ຕ່ຳ, ມີ​ພຽງ​ຄວາມ​ຫຼາກ​ຫຼາຍດ້ວຍ​ຫຼາຍ​ຮູບ​ຫຼາຍ​ແບບ. “ກຳລັງ​ແຮງ​ນິ້ມ​ນວນ​” ຂອງ​ຫວຽດນາມ ​ໄດ້​ສະ​ແດງ​ອອກ​ກ່ອນ​ອື່ນ​ແມ່ນ​ຢູ່​ທີ່​ຄວາມຈັບ​ໃຈ, ຄວາມ​ງາມ​ທີ່​​ແຜ່ອອກ​ມາຈາກ​ຄຸນຄ່າ​ວັດທະນະທຳ ຊຶ່ງ​ກວມ​ດ້ວຍ​ຄຸນຄ່າມີ​ຕົວ​ຕົນ​ແລະ​ຄຸນຄ່າ​ທີ່​ບໍ່​ມີ​ຕົວ​ຕົນ, ຄຸນຄ່າ​ຈິດ​ໃຈ​ແລະ​ຄຸນຄ່າ​ຂອງ​ຄົນ​ຫວຽດນາມ. ພວກ​ເຮົາ​ຕ້ອງ​ເສີມ​ຂະຫຍາຍ​ຄຸນຄ່າ​ເຫຼົ່າ​ນັ້ນ ​ເພື່ອ​ສ້າງ​ໃຫ້​ມີ “ເຄື່ອງໝາຍ​ການ​ຄ້າ” ​ຂອງ​ຊາດ, ທີ່​ມີ​ແຮງ​ດຶງ​ດູດ​ໂລກ​ພາຍ​ນອກ, ປະກອບສ່ວນ​ຍົກ​ສູງຄວາມ​ພາກພູມ​ໃຈ​ຂອງ​ຊາດ, ຄວາມ​ເຊື່ອ​ໝັ້ນ​ໃນ​ການ​ຄົບ​ຄ້າ​ສະມາຄົມ ​ແລະ ​ເຜີນ​ແຜ່​ຄຸນຄ່າ​ວັດທະນະທຳ​ຂອງ​ຫວຽດນາມ​ໄປ​ທົ່ວ​ໂລກ.

​ເພື່ອສຳ​ເລັດບັນດາ​ໜ້າ​ທີ່​ຫຍຸ້ງຍາກ​ສັບ​ສົນ​ເທິ​ງນີ້ ວຽກ​ງາມ​ທີ່​ມີ​ຄວາມ​ໝາຍ​ຫຼັກ​ແຫຼ່ງ​ແມ່ນ​ເພີ່ມ​ທະວີວຽກ​ງານ​ກໍ່ສ້າງ ປັບປຸງ​ພັກ, ກໍ່​ຄື​ກໍ່ສ້າງ​ຂະ​ແໜງ​ການ​ທູດ, ປັບປຸງ​ການຈັດ​ຕັ້ງ ​ແລະ​ຖັນ​ແຖວ​ພະນັກງານ​ໃນ​ທຸກ​ດ້ານ ຊຶ່ງ​ຈຸດ​ໜັກ​ແມ່ນ​ປະຕິບັດ​ຢ່າງ​​ເຂັ້ມງວດ ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XI ກ່ຽວ​ກັບ​ການ​ກໍ່ສ້າງ​ພັກ ​ແລະ ​ເນື້ອ​ໃນ​ວຽກ​ງານ​ກໍ່ສ້າງ​ພັກ​ ໃນມະຕິ​ກອງ​ປະຊຸມ​ໃຫຍ່​ຄັ້ງ​ທີ XII, ​ເພື່ອ​ແນ​ໃສ່​ຍົກ​ສູງ​ບົດບາດ​ຂອງ​ການຈັດ​ຕັ້ງ​ພັກ, ຫຼັກ​ໝັ້ນ​ການ​ເມືອງ ​ແລະ ຈັນ​ຍາ​ບັນ ຄຸນສົມບັດຂອງ​ຖັນ​ແຖວ​ພະນັກງານ ສະມາຊິກ​ພັກ. 

ພະນັກງານ ສະມາຊິກ​ພັກ ຂ້າ​ລັດຖະການ ​ແລະ ລັດຖະກອນ​ທຸກ​ຄົນ​ໃນ​ຂະ​ແໜງ​ການ​ທູດ ຕ້ອງຝືກຝົນ​ຫຼໍ່​ຫຼອມ​ຢ່າງ​ບໍ່​ຢຸດ​ຢັ້ງ ​ໃຫ້​ມີ​ຄວາມ​ໜັກແໜ້ນທາງ​ດ້ານ​ການ​ເມືອງ, ຈົງ​ຮັກ​ພັກດີ​ຕໍ່​ອຸດົມ​ຄະຕິ​ຂອງ​ພັກ, ຕໍ່​ຜົນ​ປະ​ໂຫຍ​ດຂອງ​ຊາດ, ມີ​ສະຕິ​ສ່ອງ​ໃສ​ທຸ່ນ​ທ່ຽງ​ແລະ​ເປັນ​ເຈົ້າການ​ ໃນ​ການ​ຕໍ່ສູ້ປ້ອງ​ກັນ​ແລະ​ຕ້ານ “ການ​ຜັນ​ປ່ຽນ​ໂດຍ​ສັນຕິ” ຂອງ​ບັນດາ​ອິດ​ທິກຳລັງ​ສັດຕູ. ບັນດາ​ສະຫາຍ​ຄວນ​ແລກປ່ຽນ​ດ້ວຍ​ຈິດ​ໃຈກໍ່ສ້າງ​ແລະ​ເຂັ້ມ​ງວດ​ ເພື່ອ​ເບິ່ງ​ວ່າ​ພາຍ​​ໃນມີ​ຄວາມ​​ເສື່ອ​ມ​ໂຊມທາງ​ດ້ານ​ແນວ​ຄິດ​ການ​ເມືອງ​ຫຼື​ບໍ່? ມີ​ປະກົດ​ທານ “ຫັນປ່ຽນດ້ວຍ​ຕົນ​ເອງ”, “ປ່ຽນ​ແປງ​ດ້ວຽຕົນ​ເອງ” ຫຼື​ບໍ່? ມີ​ປະກົດ​ການ​ເວົ້າ​ບໍ່​ໄປ​ຄຽງ​ຄູ່​ກັບ​ເຮັດ, ຊ້ຳພັດ​ໃນ​ການ​ຕິດ​ຕໍ່​ແລກປ່ຽນ​ກັບ​ຕ່າງປະ​ເທດ ບໍ່​ກ້າ​ປົກ​ປັກ​ຮັກສາ​ທັດສະນະ​ຂອງ​ພັກ, ຂອງ​ປະ​ເທດ​ຊາດ​ ຫຼື​ບໍ່? ຍ້ອນ​ຈຸດ​ພິ​ເສດ​ຂອງ​ຂະ​ແໜງ​ການ, ພະນັກງານ ຂ້າ​ລັດຖະການການ​ທູດ ​ເຄີຍ​ພົວພັນ​ແລະ​ດຳລົງ​ຊີວິດຢູ່ຕ່າງປະ​ເທດ ​ໃນ​ສະພາບ​ແວບລ້ອມ​ທີ່ມັກ​ຖືກ​ເຍົ້າ​ຍວນ​ຊວນ​ໃຈ​ໂດຍ​ງ່າຍ. ດັ່ງ​ນັ້ນ, ຕ້ອງກ້າມອງ​ເບິ່ງ​ກົງ​ໄປ​ທີ່​ຄວາມ​ຈິງ ​ເບີ່​ງວ່າ​ໃນ​ຂະ​ແໜງ​ການ​ມີ​ປະກົດ​ການຜິດ​ເຂ​ວທາງ​ດ້ານ​ແນວ​ຄິດ ຄຸນສົມບັດ ​ແບບ​ແຜນ​ດຳລົງ​ຊີວິດ; ມີ​ປະກົດ​ການ​ວິ້ງ​ເຕັ້ນ​ຫາວຽກ​ງານດີ ຫາ​ຖານະ​ຕຳ​ແໜ່​ງ ມັກ​ໃຫຍ່​ໃຜ່ສູງ... ຫຼື​ບໍ່? ບົນ​ພື້ນຖານ​ນັ້ນ ວາງ​ມາດ​ຕະການ​ທີ່​ລະອຽດ ​ແທດ​ຈິງ​ອອກ​ມາ ​ເພື່ອກໍ່ສ້າງ ປັບປຸງ​ພັກ​ ແລະ ກົງຈັກ​ຂອງ​ຂະ​ແໜງ​ການ.

ພະນັກງານການ​ທູດຕ້ອງ​ຮ່ຳຮຽນ ​ແລະ ​ເຮັດ​ວຽກ​ຕາມ​ແບບຢ່າ​ງຂອງ​ລຸງ​ໂຮ່ - ນັກ​ການ​ທູດ​ທີ່​ດີ​ເດັ່ນ​ທາງ​ດ້ານ​ປັນຍາ​ແລະ​ບຸກຄະ​ລິກກະພາບ. ຮ່ຳຮຽນ​ນຳ​ລຸງ​ໂຮ່​ເພື່ອຝຶກ​ຝົນ​ຫຼໍ່​ຫຼອມຄຸນ​ທາດ ຄຸນສົມບັດ​ປະຕິວັດ, ຕ້ານ​ລັດທິ​ເອກະ​ຊົນ. ​ເອົາ​ໃຈ​ໃສ່​ກໍ່ສ້າງ​ກົງ​ຈັກ​ໃຫ້​ກະທັດ​ລັດ ​ແລະ ມີ​ປະສິດທິ​ຜົນ; ຍູ້​ແຮງ​ການ​ຕໍ່ສູ້​ປ້ອງ​ກັນ​ແລະຕ້ານການ​ສໍ້​ລາດ​ບັງ​ຫຼວງ, ພະຍາດ​ອາດຍາ​ສິດ ຈອງຫອງ ອວດອຳນາດກໍ່​ຄວາມ​ຫຍຸ້ງຍາກລຳ​ຄານ​ໃຈ ​ໃຫ້​ແກ່​ບັນດາ​ເປົ້າ​ໝາຍ​ທີ່​ຂະ​ແໜງ​ການ​ມີ​ພັນທະ​ປົກ​ປັກ​ຮັກສາ​ສິດຜົນປະ​ໂຫຍ​ດ ​ແລະ ມີໜ້າ​ທີ່​ຮັບ​ໃຊ້, ກວມ​ທັງພົນລະ​ເມືອງຫວຽນ​ນາມ ​ແລະ ​ຕ່າງປະ​ເທດ. ​ເນື່ອງ​ໃນ​ໂອກາດ​ນີ້, ບັນດາ​ສະຫາຍ​ກໍ່​ຄວນ​ຄົ້ນຄວ້າ​ພິຈາລະນາ​​ໂຄງ​ປະກອບ, ຈັດ​ວາງ​ຄືນ​ໃໝ່​ກົງຈັກ​ຢູ່​ໃນ​ປະ​ເທດ ​ແລະ ​ເຄືອ​ຂ່າຍ​ສຳນັກງານ​ຕົວ​ແທນ​ທາງ​ການ​ທູດ​ຢູ່​ຕ່າງປະ​ເທດ ​ບົນ​ພື້ນຖານ​ຖື​ເອົາປະສິດທິ​ຜົນ​ເປັນ​ມາດຕະຖານ​ສູງ​ສຸດ, ​ເພື່ອ​ແນ​ໃສ່​ຍົກ​ສູງ​ຄຸນ​ນະພາ​ບການ​ເຄື່ອນ​ໄຫວ​ຂອງ​ຂະ​​ແໜງ​ການ, ທັງ​ປະກອບສ່ວນ​ປະຢັດ​ຄ່າ​ໃຊ້​ຈ່າຍ, ຫລຸດຜ່ອນ​ແບກ​ຫາບ​ອັນ​ໜັກໜ່ວງ​ ຂອງ​ງົບປະມານ​ທີ່​ພວມພົບ​ຄວາມ​ຫຍຸ້ງຍາກ.

ຂ້າພະ​ເຈົ້າ​ຫວັງ​ວ່າ​ ບັນດາສະ​ຫາຍ​ຈະ​ລົງ​ເລິກສົນທະນາ ​ແລກປ່ຽນ ຮັບ​ຮູ້​ຢ່າງ​ຈະ​ແຈ້ງ​ຕື່ມ​ອີກ ​ກ່ຽວ​ກັບ​ບັນດາ​ວຽກ​ງານທີ່​ສຳຄັນ​ເທິງ​ນີ້ ​ແລະ ວາງ​ກຳນົດ​ໄດ້​ບັນດາ​ມາດ​ຕະການ​ທີ່​ລະອຽດ ​ແທດ​ຈິງ ​ເພື່ອ​ປະຕິບັດໜ້າ​ທີ່​ທີ່​ພັກ ​ແລະ ລັດ​ມອບ​ໝາຍ​ໃຫ້​ ຢ່າງ​ສຳ​ເລັດ​ມີ​ໄຊ. 

​ໃນ​ໂລກ​ທີ່​ເຕັມ​ໄປ​ດ້ວຍ​ຄວາມຜັນ​ຜວນ, ປະ​ເທດ​ເຮົາ​ພວມ​ຢືນຢູ່​ຕໍ່ໜ້າ​ໂອກາດ​ດີ​ຫຼາຍ​ຢ່າງ​ເພື່ອ​ພັດທະນາ, ພ້ອມ​ນັ້ນ​ກໍ່​ຕ້ອງ​ປະ​ເຊີນ​ໜ້າ​ກັບ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ບໍ່​ໜ້ອຍ, ການ​ເຄື່ອນ​ໄຫວ​ການ​ຕ່າງປະ​ເທດ​ຕ້ອງ​ເປັນ​ຕຳລາ​ຢາ​ສັນຕິພາບທີ່​ມີ​ຄວາມ​ສັກສິດ ​ໃນ​ການ​ແກ້​ໄຂ​ຄວາມ​ແຕກ​ຕ່າງ, ກີດ​ກັ້ນ​ການ​ປະ​ທະ​ກັນ, ​ເພີ່ມ​ທະວີ​ການ​ຮ່ວມ​ມື, ​ໄຂ​ເສັ້ນທາງ​ໃຫ້​ແກ່​ບັນດາ​ວິທີ​ແກ້​ໄຂ​ທີ່​​ເໝາະ​ສົມ. ກອງ​ປະຊຸມ​ການ​ທູດ​ຄັ້ງ​ທີ 29 ​ໄດ້​ດຳ​ເນີນ​ຖືກ​ກັບ​ເວລາ​ສະ​ເຫຼີ​ມສະຫຼອງ 71 ປີ ​ການ​ປະຕິວັດ​ເດືອນ​ສິງ​ກາ​ ແລະ ວັນຊາດ​ທີ 2 ກັນຍາ - ຊຶ່ງ​ເປັນ​ສອງ​ເຫດການທີ່​ໄດ້​ເລີ່ມຕົ້ນສະ​ໄໝ​ແຫ່ງ​ການ​ພັດທະນາ​ໃໝ່​ ຂອງ​ປະ​ເທດ​ເຮົາ​ໃນ​ປະຫວັດສາດສະ​ໄໝ​ໃໝ່, ພ້ອມ​ນັ້ນ ກໍ່​ໄດ້​ປະ​ໄວ້​ຊຶ່ງ​ບັນດາ​ບົດຮຽນລ້ຳ​ຄ່າ ກ່ຽວ​ກັບບົດບາດ ທີ່​ຕັ້ງ​ຂອງ​ການ​ເຄື່ອນ​ໄຫວ​ການ​ທູດ ​ໃນ​ວິວັດ​ການ​ຕໍ່ສູ້​ສ້າງ​ຕັ້ງ​ປະ​ເທດ ​ແລະ ປົກ​ປັກ​ຮັກສາ​ປະ​ເທດ​ຂອງ​ຊາດ​ຫວຽດນາມ. ​ໃນ​ເວລາ 70 ກວ່າ​ປີ​ທີ່​ຜ່ານ​ມາ, ພາຍ​ໃຕ້​ການ​ນຳພາ​ຂອງ​ພັກ ​ແລະ ປະທານ​ໂຮ່ຈີ​ມິນ, ການ​ເຄື່ອນ​ໄຫວ​ພົວພັນ​ຕ່າງປະ​ເທດ ​ໄດ້ສ້າງຜົນງານ​ອັນ​ສະຫງ່າ​ງານ​ຫຼາຍ​ຢ່າງ, ກໍ່​ຕັ້ງ​ວົງ​ການ​ການ​ທູດ​ພິ​​ເສດໜຶ່ງ ທີ່​ເຂັ້ມ​ຂົ້ມ​ໄປ​ດ້ວຍ​ສີສັນ “ຕົ້ນ​ໄຜ່​ຫວຽດນາມ” - ອອ່ນນຸ່ມ ​ແຕ່​ກໍ່​ແຂງ​ແກ່ນ, ມີຄວາມ​ເມດ​ຕາ ​ແຕ່​ກໍ່​ມີ​ຄວາມ​ກ້າຫານ​ບືນ​ຕົວ​ຂຶ້ນ, ຮູ້​ອ່ອນ​ໄຫວ ຮູ້​ແຂ​ງກ້າ, ຮູ້​ກາລະ​ໂອກາດ ຮູ້ທ່າ​ແຮງ, ຮູ້ຈັກ​ຕົວເອງ ຮູ້ຈັກ​ຜູ້​ອື່ນ,... ສະ​ແດງ​ໃຫ້​ເຫັນ​ເຖິງຈິດ​ວິນ​ຍານ ​ແລະ ຄວາມ​ກ້າຫານ​ຂອງ​ຊາດ​ຫວຽດນາມ. ຂ້າພະ​ເຈົ້າ​ຫວັງ​ວ່າ, ຖັນ​ແຖວ​ພະນັກງານ​ເຮັດວຽກ​ງານການ​ຕ່າງປະ​ເທດ ຈະ​ຊາບ​ຊຶມ​ແນວ​ຄິດ​ໂຮ່ຈີ​ມິນ ​ແລະ ບັນດາ​ບົດຮຽນ​ຂອງ​ການ​ປະຕິວັດ​ເດືອນ​ສິງຫາ ​ແລະ ວັນຊາດ​ທີ 2 ກັນຍາ, ຕັ້ງໜ້າ​ພະຍາຍາມ​ສູ້​ຊົນ​ ເພື່ອພາລະກິດ​ການ​ພັດທະນາ​ຂອງ​ປະ​ເທດ​ຊາດ, ​ເພື່ອ​ຄວາມ​ວັດທະນາ​ຖາວອນ​ຂອງ​ຊາດ.

​ເນື່ອງ​ໃນ​ໂອ​ການ​ນີ້, ອີກ​ເທື່ອ​ໜຶ່ງ, ຂ້າພະ​ເຈົ້າຂໍ​ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ ​ແລະ ອວຍພອນ​ໃຫ້ບັນດາ​ນັກ​ການ​ທູດຜູ້​ອາວຸ​ໂສ, ບັນດາ​ຜູ້​ແທນ ພ້ອມ​ດ້ວຍ​ຖັນ​ແຖວ​ພະນັກງານ ຂ້າ​ລັດຖະການ​ຂອງຂະ​ແໜງ​ການ​ທູດທັງ​ໝົດ, ບັນດາ​ພະນັກງານ​ເຮັດ​ວຽກ​ງານ​ການ​ຕ່າງປະ​ເທດ​ຢູ່​ສູນ​ກາງ ​ແລະ ທ້ອງ​ຖິ່ນ, ຈົ່ງ​ມີ​ສຸຂະພາບ​ເຂັ້ມ​ແຂງ ​ແລະ ບັນລຸ​ຄວາມ​ສຳ​ເລັດ​ຜົນ​ໃໝ່ ​ໃນ​ພາລະກິດ​ອັນ​ສະຫງ່າ​ງາມ​ຂອງ​ຕົນ. ຂ້າພະ​ເຂົ້າ​ກໍ່​ອາ​ໃສ​ບັນດາ​ສະຫາຍ​ຫົວໜ້າ​ສຳນັກງານ​ຕົວ​ແທນ​ການ​ທູດ ຝາກຄວາມ​ຢ້ຽມຢາມ​ຖາມ​ຂ່າວ​ ​ແລະ ຄຳ​ອວຍພອນ​ທີ່​ອົບ​ອຸ່ນທີ່​ສຸດ​ໄປ​ຍັງ​ບັນດາ​ພະນັກງານ ​ລັດຖະກອນ ​ແລະ ຊຸມ​ຊົນ​ຊາວ​ຫວຽດນາມ​ຢູ່​ຕ່າງປະ​ເທດ. ພັກ​ແລະ​ລັດ​ໄດ້​ຮັບ​ຮູ້​ຢູ່​ສະ​ເໝີ​ວ່າ ຊຸມ​ຊົນ​ຊາວ​ຫວຽດນາມ​ຢູ່​ຕ່າງປະ​ເທດ ​ເປັນ​ພວກ​ສ່ວນໜຶ່ງ​ທີ່​ແຍກ​ອອກບໍ່​ໄດ້ ຂອງ​ຊາດ​ຫວຽດນາມ ​ແລະ ຫວັງ​ວ່າ​ ພີ່ນ້ອງ​ຮ່ວມ​ຊາດ​ຫັນ​ມາ​ຫາ​ບ້ານ​ເກີດ​ເມືອງ​ນອນ, ປະກອບສ່ວນ​ເຮັດ​ໃຫ້​ປະ​ເທດ​ຊາດ​ທີ່​ຮັກ​ແພງ​ຂອງ​ພວກ​ເຮົາ ນັບ​ມື້​ນັບ​ຈະ​ເລີ​ນພັດທະນາ ​ແລະ ຄວາມ​ພົວພັນ​ມິດຕະພາບ ການ​ຮ່ວມ​ມື​ລະຫວ່າງ​ປະຊາຊົນ​ເຮົາ ກັບ​ປະຊາຊົນ​ໂລກນັບ​ມື້​ນັບ​ສະໜິດສະໜົມ ​ແໜ້ນ​ແຟ້ນຍິ່ງ​ຂຶ້ນ./.

​ໂດຍ ຫງວຽນ​ຝູຈ້ອງ

​ເລຂາທິການ​ໃຫຍ່​ ຄະນະ​ບໍລິຫານ​ງານ​ສູນ​ກາງ ພັກ​ກອມ​ມູນິດ​ຫວຽດນາມ

--------------------------------

* ຫົວ​ຂໍ້​ໂດຍ​ວາລະສານ​ກອມ​ມູນິດ​ເປັນ​ຜູ້​ແຕ່ງ

(1) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 151 - 152.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ