ວັນອາທິດ, 24/9/2017
ກໍ່ສ້າງພັກໃຫ້ນັບມື້ນັບສະອາດປອດໃສ, ໝັ້ນຄົງເຂັ້ມແຂງ, “ມີຄຸນສົມບັດສິນທຳ, ອະລິຍະທຳ” ທີ່ແທ້ຈິງ*
17/2/2017 9:55' ສົ່ງ ພິມ
ສະຫາຍ ຫງວຽນຝູຈ້ອງ, ເລຂາທິການໃຫຍ່ ພັກກອມມູນິດຫວຽດນາມ. (ພາບ: TTXVN)

ກອງ​ປະຊຸມ​ຄັ້ງ​ທີ 4 ຄະນະ​ບໍລິຫານ​ງານ​ສູນ​ກາງພັກ​ ສະ​ໄໝ​ທີ XII ​ໄດ້​ປຶກສາ​ພິຈາລະນາ ​ແລະ ​ເປັນ​ເອກະ​ພາບ​ປະກາດ​ໃຊ້​ມະຕິ​ກ່ຽວ​ກັບ“​ເພີ່​ມທະວີ​ການ​ກໍ່ສ້າງ​ພັກ, ປັບປຸງ​ພັກ; ກີດ​ກັ້ນ, ຍູ້​ຖອຍຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ບັນດາ​ປະກົດ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ”. ມະຕິ​ສະບັບ​ນີ້​ມີ​ຄວາມ​ສຳຄັນ​ທີ່​ສຸດ, ມັນ​ເຕື້ອງ​ເຖິງ​ບັນຫາ​ໜຶ່ງທີ່ທັງ​​ເປັນພື້ນຖານ, ທັງ​ຮີບ​ດ່ວນ ຊຶ່ງ​ພະນັກງານ, ສະມາຊິ​ພັກ ​ແລະ ປະຊາຊົນ​ສ່ວນ​ຫຼາຍ ​ໄດ້​ເອົາ​ໃຈ​ໃສ່​ແລະ​ຊົມ​ເຊີຍ​ເປັນ​ພິ​ເສດ. ​ເພື່ອ​ຜັນ​ຂະຫຍາຍ​ປະຕິບັດ​ມະຕິ, ກົມ​ການ​ເມືອງ​ໄດ້​ວາງ​ແຜນການ​ຈັດ​ຕັ້ງ​ປະຕິບັດ ດ້ວຍ​ບັນດາ​ເນື້ອ​ໃນ​ລະອຽດ. ມື້​ນີ້, ກົມ​ການ​ເມືອງ​ຈັດ​ຕັ້ງ​ກອງ​ປະຊຸມ​ພະນັກງານ​ທົ່ວ​ປະ​ເທດ​ອອນ​ໄລ​ ເພື່ອ​ເຜີຍ​ແຜ່, ຊາບ​ຊຶມ​ຈຸດປະສົງ, ຄວາມ​ໝາຍ, ຄວາມ​ສຳຄັນ, ບັນດາ​ເນື້ອ​ໃນ​ຫຼັກ ​ຂອງ​ມະຕິ ​ແລະ ​ແຜນການ​ຈັດ​ຕັ້ງ​ປະຕິບັດ, ສ້າງ​ຄວາມ​ເປັນ​ເອກະ​ພາບ​ສູງ​ ກ່ຽວ​ກັບ​ຄວາມ​ຮັບ​ຮູ້ ​ເພື່ອ​ໃຫ້​ບັນດາ​ສະຫາຍ​ພະນັກງານ​ການ​ນຳ​ຫຼັກ​ແຫຼ່ງ ​ແຕ່​ສູນ​ກາງ​ຮອດ​ຮາກ​ຖານ ຊີ້​ນຳ​ການ​ຜັນ​ຂະຫຍາຍ​ມະຕິຢູ່​ທ້ອງ​ຖິ່ນ, ກົມ​ກອງ, ສຳ​ນັກ​ງານ​ອົງການ​ຂອງ​ຕົນ ​ຢ່າງ​ມີ​ປະສິດທິ​ຜົນ. ການ​ມາ​ຮ່ວມ​ຢ່າງ​ຄົບ​ໜ້າ​ຄົບ​ຕາ​ຂອງ​ບັນດາ​ສະຫາຍ​ໃນ​ກົມ​ການ​ເມືອງ, ຄະນະ​ເລຂາທິການ, ບັນດາ​ສະຫາຍ​ກຳມະການຄະນະ​ບໍລິຫານ​ງານ​ສູນ​ກາງ, ບັນດາ​ສະຫາຍ​ການ​ນຳ​ຫຼັກ​ແຫຼ່ງຂອງ​ກະຊວງ, ຄະນະ​, ຂະ​ແໜງ​ການ, ອົງຄະ​ນະມະ​ຫາ​ຊົນ​ ຢູ່​ສູນ​ກາງ ​ແລະ ບັນດາ​ແຂ​ວງ, ນະຄອນ​ ໃນ​ທົ່ວ​ປະ​ເທດ ​ໄດ້​​ໃຫ້​ເຫັນ​ເຖິງ​ຄວາມ​ສຳຄັນ​ຂອງ​ກອງ​ປະຊຸມ​ນີ້ ​ແລະ ສະ​ແດງ​ໃຫ້​ເຫັນ​ເຖິງ​ຈິດ​ໃຈ​ເຂັ້ມ​ງວດ, ຄວາມ​ຕັດສິນ​ໃຈ​ສູງ ​ຂອງ​ທົ່ວ​ພັກ.

ຕາງ​ໜ້າ​ກົມ​ການ​ເມືອງ, ຂ້າພະ​ເຈົ້າ​ຂໍ​ສະ​ແດງ​ຄວາມ​ຊົ​ມ​ເຊີຍ​ຢ່າງ​ສຸດ​ໃຈ ​ຕໍ່ບັນດາ​ສະຫາຍ​ທຸກ​ຄົນ​ທີ່​ມາ​ຮ່ວມ​ຢູ່ບັນດາ​ຫົວ​ຂອດການ​ປະຊຸມອອນ​ໄລ​ ໃນ​ທົ່ວ​ປະ​ເທດ, ຂໍ​ອວຍພອນ​ໃຫ້​ບັນດາ​ສະຫາຍ​ຈົ່ງ​ມີ​ສຸຂະພາບ​ເຂັ້ມ​ແຂງ, ຮັບ​ຮູ້​ມະຕິຢ່າງ​ເລິກ​ເຊິ່ງ ​ແລະ ປະຕິບັດ​ມະຕິ​ຢ່າງ​ມີ​ປະສິທິຜົນ. ກ່ອນ​ເມື່ອ​ທີ່​ບັນດາ​ສະຫາຍ​ຮັບ​​ຟັງ​ລາຍ​ງານ​ເຜີຍ​ແຜ່, ຊາບ​ຊຶມ​ບັນດາ​ເນື້ອ​ໃນ​ຂອງ​ມະຕິ ​ແລະ ​ແຜນການ​ຈັດ​ຕັ້ງ​ປະຕິບັດ, ຂ້າພະ​ເຈົ້າ​ຢາກ​ໃຫ້​ບັນດາ​ສະຫາຍ​ເອົາ​ໃຈ​ໃສ່​ເຖິງ​ບັນຫາ​ລວມຈຳນວນ​ໜຶ່ງ ​ດັ່ງ​ລຸ່ມ​ນີ້:

ທີ​ໜຶ່ງ, ​ໃນ​ຂະ​ບວນການ​ຮ່ຳຮຽນ, ຄົ້ນຄວ້າ​ມະຕິ, ບັນດາ​ສະຫາຍ​ຄວນ​ຮັບ​ຮູ້​ຢ່າງ​ຄົບ​ຖ້ວນ​ວ່າ, ການ​ກໍ່ສ້າງ​ພັກ​ຍາມ​ໃດ​ກໍ່​ຕ້ອງ​ໄປ​ຄຽງ​ຄູ່​ກັບການ​ປະ​ປຸງ​ພັກ, ຫຼື​ເວົ້າ​ຢ່າງ​ອື່ນ, ການ​ປ່ຽນ​ແປງ​ໃໝ່, ປັບປຸງ​ພັກ​ແມ່ນ​ພາກສ່ວນ​ທີ່​ບໍ່​ອາດ​ຈະ​ແຍກ​ອອກ​ຈາກ​ວຽກ​ງານ​ກໍ່ສ້າງ​ພັກໄດ້. ນີ້​ແມ່ນ​ຄວາມ​ຮຽກຮ້ອງ​ຕ້ອງການ​ພາວະ​ວິ​ໄສ, ທຳ​ມະ​ຊາດ, ​ແມ່ນ​ວຽກງານ​ເປັນ​ປະຈຳ ​ຂອງທຸກ​ພັກ​ປະຕິວັດ​ທີ່​ແທ້​ຈິງ, ​ໃນ​ທຸກ​ໄລຍະ. ​ໃນ​ຕະຫຼອດ​ວິວັດ​ການ​ພັດທະນາ ​ແລະ ​ເຕີບ​ໃຫຍ່​ເຂັ້ມ​ແຂງ, ພັກ​ຍາມ​ໃດ​ກໍ່​ຕໍ່ສູ້​ດ້ວຍ​ຕົນ​ເອງ, ປັບປຸງ​ດ້ວຍ​ຕົນ​ເອງ, ກຳຈັດ​ຄວາມ​ຫຍໍ້​ທໍ້, ຜ່ານ​ຜ່າ​ຄວາມ​ຜິດ​ພາດ ຂໍ້​ຂາດ​ຕົກ​ບົກພ່ອງ ​ເພື່ອ​ແນ​ໃສ່​ເຮັດ​ໃຫ້​ຖັນ​ແຖວ​ຂອງ​ຕົນສະອາດ​ປອດ​ໃສ​ ຢ່າງ​ບໍ່​ຢຸດ​ຢັ້ງ. ບາງ​ຄັ້ງ, ພວກ​ເຮົາ​ຕ້ອງ “ຕຳໜິ​ຕົນ​ເອງ”, “ປິດ​ປະຕູ” ​ເພື່ອ​ປັບປຸງ ດັດ​ແກ້​ພັກ. ພວກ​ເຮົາ​ຍັງ​ຈື່​ຈຳ​ໄດ້, ​ເດືອນ​ກໍລະກົດ 1939, ​ໃນ​ສະ​ໄໝ​ທີ່​ພັກ​ຍັງ​ເຄື່ອນ​ໄຫວ​ປິດ​ລັບ, ​ໃນ​ນິພົນ “ຕຳ​ໜິຕົນ​ເອງ”, ສະຫາຍ​ເລຂາທິການ​ໃຫຍ່ ຫງວຽນ​ວັນ​ກື່ ​ໄດ້​ໃຫ້​ທັດສະນະ​ວ່າ, ສຳລັບ​ພັກ​ການ​ເມືອງ​ໜຶ່ງ, ການ​ມີ​ຂໍ້​ຂາດ​ຕົກ​ບົກພ່ອງ, ມີ​ຄວາມ​ຜິດພາດນັ້ນ ມັນ​ເປັນ​ເລື່ອງ​ທີ່​ບໍ່​ອາດ​ຈະ​ຫຼົບຫຼີກ​ໄດ້. ສິ່ງ​ສຳຄັນ​ແມ່ນ​ຕ້ອງ​ຮູ້​ຕຳ​ໜິ​ຕົນ​ເອງ, ​ເປີດ​ເຜີຍ, ກ້າ​ກັ່ນ, ຊື່ສັດ​ ໃນ​ການ​ຊີ້​ແຈ້ງ​ຄວາມ​ຜິດພາດ​ຂອງ​ຕົນ ​ແລະ ຫາ​ທິດ​ນຳ ​ວິທີ​ການ​ແກ້​ໄຂ... ​ເພື່ອ​ເພີ່ມ​ທະວີ​ອິດ​ທິພົນ ​ແລະ ຜົນ​ສະທ້ອນ​ຂອງ​ພັກ, ​ເຮັດ​ໃຫ້​ພັກ​ເປັນ​ເອກະ​ພາບ ​ແລະ ​ໄດ້​ຮັບ​ການ​ປັບປຸງ, ​ເພື່ອ​ຂະຫຍາຍ​ຂະບວນການ​ຢ່າງບໍ່​ຢຸດ​ຢັ້ງ ​ແລະ ນຳ​ເອົາ​ການ​ປະຕິວັດ​ໄປ​ສູ່​ໄຊຊະນະ.

ບັນຫາ​ຕໍ່ສູ້​ຕ້ານ​ນິ​ໄສ ຄວາມ​ຊິນ​ເຄີຍບໍ່​ດີ, ກໍ່ສ້າງ​ຄຸນສົມບັດ​ປະຕິວັດ​ໃນ​ຖັນ​ແຖວ​ພະນັກງານ, ສະມາຊິກ​ພັກ ​ໄດ້​ຮັບ​ຄວາມ​ເອົາ​ໃຈ​ໃສ່​ເປັນ​ພິ​ເສດ​ ຂອງ​ທ່ານ​ປະທານ​ໂຮ່ຈີ​ມິນ. ປີ 1927, ​ເພິ່ນ​ຂຽນ​ປຶ້ມ “ເສັ້ນທາງ​ປະຕິວັດ”, ​ໃນ​ນັ້ນ​ໄດ້​ຊີ້​ແຈ້ງ​ຄວາມ​ຮຽກຮ້ອງ​ກ່ຽວ​ກັບ​ຄຸນ​ລັກສະ​ນະ​ຂອງ​ນັກ​ປະຕິວັດ. ປີ 1969, ​ເພິ່ນ​ຂຽນ​ປຶ້ມ “ຍົກ​ສູງ​ຄຸນສົມບັດ​ປະຕິວັດ, ກວາດ​ລ້າງ​ລັດທິ​ເອກະ​ຊົນ”. ​ເພິ່ນ​ໃຫ້​ທັດສະນະ​ວ່າ, ພັກ​ໜຶ່ງ​ທີ່​ບໍ່​ຮູ້​ເຫັນ​ຈຸດ​ອ່ອນ, ຂໍ້​ຂາດ​ຕົກ​ບົກພ່ອງ​ຂອງ​ຕົນ ​ແລະ ບໍ່ຕັດສິນ​ໃຈ​ແກ້​ໄຂ​ຂໍ້​ຂາດ​ຕົກ​ບົກພ່ອງ​ຢ່າງ​ເດັດດ່ຽວ ກໍ​ຈະ​ເປັນ "ພັກ​ທີ່​ເສຍ​ຕົວ”. ນັບ​ສະ​ເພາະ​ແຕ່​ເມື່​ອດຳ​ເນີນ​ການປ່ຽນ​ແປງ​ໃໝ່​ມາ​ເຖິງ​ດຽວ​ນີ້, ພັກ​ໄດ້​ມີ​ຫຼາຍ​ມະຕິ, ຄຳ​ສັ່ງ, ຫຼາຍ​ການ​ຂົນຂວາຍ​ກໍ່ສ້າງ, ປັບປຸງ​ພັກ. ດ້ວຍ​ຈິດ​ໃຈ​ເບິ່ງ​ໂດຍ​ກົງ​ໃສ່​ຄວາມ​ຈິງ, ​ເວົ້າ​ແຈ້ງ​ຄວາມ​ຈິງ, ບາງ​ເທື່ອ​ພັກ​ໄດ້ຍອມຮັບ​ຄວາມ​ຜິດພາດ ຂໍ້​ຂາດ​ຕົກ​ບົກພ່ອງ, ​ເວົ້າ​ແຈ້ງ​ຄວາມ​ຫຍໍ້​ທໍ້ ຈຸດ​ອ່ອນ​ຢູ່ໃນ​ພັກ. ສິ່ງ​ດັ່ງກ່າວ​ສະ​ແດງ​ໃຫ້​ເຫັນ​ເຖິງ​ຫຼັກ​ໝັ້ນ​ກ້າ​ແກ່ນ, ຄວາມ​ຖ່ອມ​ຈຽມ, ລັກສະນະ​ແຂງ​ແຮງ​ສົດ​ໃສ​ ຂອງ​ພັກ​ປະຕິວັດ​ທີ່​ແທ້​ຈິງ.

ປະຈຸ​ບັນ​ນີ້, ​ໃນ​ເງື່ອນ​ໄຂ​ໃໝ່, ຕໍ່ໜ້າ​ຄວາມ​ຮຽກຮ້ອງ​ຕ້ອງການ​ປະຕິວັດ​ທີ່​ໃຫຍ່​ໂຕ, ຍັງ​ມີ​ຄວາມ​ຫຍຸ້ງຍາກ ສັບສົນ​ໃໝ່​ຫຼາຍ​ຢ່າງ, ດັ່ງ​ນັ້ນ ຍິ່ງ​ກວ່າ​ເວລາ​ໃດ​ໝົດ, ພວກ​ເຮົາ​ຍິ່ງ​ຕ້ອງ​ເສີມ​ຂະຫຍາຍ​ມູນ​ເຊື້ອວິລະ​ຊົນ ​ແລະ ທາດ​ແທ້​ທີ່​ດີງາມ​ຂອງ​ພັກ, ​ເດັດດ່ຽວ​ຕໍ່ສູ້​ຕ້ານ​ບັນດາ​ປະກົດ​ການ​ເສື່ອ​ມ​ໂຊມ, ຫຍໍ້​ທໍ້, ​ເອົາ​ໃຈ​ໃສ່​ກໍ່ສ້າງ​​ພັກ ​ໃຫ້ນັບມື້​ນັບ​ສະອາດ​ປອດ​ໃສ ໝັ້ນຄົງ​ເຂັ້ມ​ແຂງ, ​ໃກ້ຊິດຕິດ​ແໜ້ນ​ກັບ​ປະຊາຊົນ, ມີ​ກຳລັງ​ພຽງພໍ​ເພື່ອ​ນຳພາ​ປະ​ເທດ​ໃຫ້​ຈະ​ເລີ​ນພັດທະນາ. ພວກ​ເຮົາ​ບໍ່​ຢ້ານ​ການ​ເວົ້າ​ຄວາມ​ຈິງກ່ຽວ​ກັບ​ຂໍ້​ຂາດ​ຕົກ​ບົກພ່ອງ ຄວາມ​ຫຍໍ້​ທໍ້​ຂອງ​ຕົນ; ພ້ອມ​ກັນ​ນັ້ນ​ກໍບໍ່​ອະນຸຍາດ​ໃຫ້ຜູ້​ອື່ນ​ສວຍ​ໃຊ້ການ​ຕໍ່​ສູ້​ແກ້​ໄຂ​ຜ່ານ​ຜ່າ​ຄວາມ​ຫຍໍ້​ທໍ້ ຂໍ້​ຂາດ​ຕົກ​ບົກພ່ອງ ​ເພື່ອ​ໃສ່​ຮ້າຍ​ປ້າຍ​ສີ, ກໍ່ກວນ​ຕໍ່ຕ້ານ​ພັກ, ຕ້ານ​ການ​ປະຕິວັດ​ຂອງ​ປະຊາຊົນ.

ທີ​ສອງ, ຕ້ອງກຳ​ແໜ້ນ​ບັນດາ​ເນື້ອ​ໃນ​ພື້ນຖານ, ​ແນວ​ຄິດ​ຫຼັກ ​ຂອງມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ​ເພື່ອ​ສຸມ​ໃສ່​ຊີ້​ນຳ, ຜັນ​ຂະຫຍາຍ​ປະຕິບັດ​ມະຕິ​ຢ່າງ​ມີ​ປະສິດທິ​ຜົນ. ຈຸດ​ໃໝ່​ໃນ​ມະຕິ​ສະບັບ​ນີ້​ແມ່ນ ​ໄດ້​ຊີ້​ບອກ​ຢ່າງ​ເປັນ​ລະບົບ ບັນດາ​ປະກົດ​ການ​ຂອງ​ຄວາມ​ເສື່ອ​ມ​ໄຊ​ມທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ, ​ເນັ້ນ​ເຖິງ​ລັກສະນະ​ເປັນ​ອັນຕະລາຍ ​ແລະ ຜົນ​ກະທົບ​ທີ່​ຄາດກະ​ບໍ່​ໄດ້ ​ຂອງ​ມັນ. ພ້ອມກັນ​ກັບ​ການ​ຫັນ​ເປັນ​ລະອຽດຕໍ່​ບັນດາ​ໜ້າ​ທີ່, ວິທີ​ແກ້​ກ່ຽວ​ກັບ​ການ​ກໍ່ສ້າງ​ພັກ ທີ່​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ວາງ​ອອກ​ມາ, ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ​ໄດ້​ນຳ​ສະ​ເໜີ 4 ກຸ່ມ​ວິທີ​ແກ້​ໄຂ ​ເພື່ອ​ສືບ​ຕໍ່​ປະຕິບັດມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XI, ​ໃນ​ນັ້ນ ສຸມ​ໃສ່​ການ​ຕໍ່ສູ້​ກີດ​ກັ້ນ, ຍູ້​ຖອຍຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ບັນດາ​ປະ​ກັດ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ. ມະຕິ​ຍັງ​ເນັ້ນ​ໜັກ​ເຖິງ​ເນື້ອ​ໃນ​ໃໝ່​ຄື ກໍ່ສ້າງ​ພັກ​ທາງ​ດ້ານ​ຄຸນສົມບັດ​ສິນ​ທຳຕິດ​ກັບ​ການ​ປະຕິບັດ​ຄຳ​ສັ່ງ​ສະບັບ​ເລກທີ 05-CT/TW, ວັນ​ທີ 15 ພຶດສະພາ 2016, ຂອງ​ກົມ​ການ​ເມືອງ, ກ່ຽວ​ກັບ​ການ​ຍູ້​ແຮງ​ການ​ຮ່ຳຮຽນ ​ແລະ ​ເຮັດ​ຕາມ​ແນວ​ຄິດ, ຄຸນສົມບັດ, ​ແບບ​ແຜນ​ໂຮ່ຈີ​ມິນ.

ຕ້ອງ​ຮູ້​ເຫັນ​ແຈ້ງວ່າ, ການຕໍ່ສູ້, ກີດ​ກັ້ນ, ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ບັນດາ​ປະກົດ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ ​ແມ່ນ​ການຕໍ່ສູ້​ທີ່​ເຕັມ​ໄປ​ດ້ວຍ​ອຸປະສັກ ຄວາມຫຍຸ້ງຍາກ, ​ແຕ່​ບໍ່​ອາດ​ຈະ​ບໍ່​ປະຕິບັດ​ໄດ້, ຍ້ອມ​ວ່າ​ ມັນ​ພົວພັນ​ເຖິງຊະ​ຕາ​ກຳ​ຂອງ​ພັກ ​ແລະ ລະບອບການ​ປົກຄອງ​ຂອງ​ປະ​ເທດ​ຫວຽດນາມ. ທັດສະນະ​ຊີ້​ນຳ​ຂອງ​ພັກ​ແມ່ນ ​ເດັດດ່ຽວ, ຕັ້ງ​ໝັ້ນປະຕິບັດ, ຍາກ​ຫຼາຍ​ກໍ່​ຕ້ອງ​ປະຕິບັດ, ປະຕິບັດ​ດ້ວຍ​ຄວາມ​ຕັດສິນ​ໃຈ​ການ​ເມືອງ​ສູງ, ຄວາມ​ມານະ​ພະຍາຍາມ​ສູງ, ດຳ​ເນີນ​ຢ່າງ​ເປັນ​ປະຈຳ ຕໍ່​ເມື່ອ​ງ ຢູ່​ທຸກ​ຂັ້ນ, ທຸກຂະ​ແໜງ​ການ, ຄົບ​ຊຸດ ຢູ່​ທັງ​ສູນ​ກາງ ​ແລະ ທ້ອງ​ຖິ່ນ. ພະນັກງານ, ສະມາຊິກ​ພັກ​ແຕ່ລະຄົນ ຕ້ອງ​ຮັບ​ຮູ້​ຢ່າງ​ເລິກ​ເຊິ່ງ​ເຖິງ​ຄວາມ​ຮັບຜິດຊອບ​ຂອງ​ຕົນຕໍ່​ກັບ​ພັກ ​ແລະ ປະ​ເທດ​ຊາດ ​ເພື່ອປະຕິບັດ​ມະຕິ​ຢ່າງ​ເຂັ້ມ​ງວດ ​ແລະ ມີປະ​ສິດທິ​ຜົນ, ຫຼີກ​ລ່ຽງສະພາບ​ການ​ເມີນ​ເສີຍ, ຢືນ​ຢູ່​ນອກ ​ໂດຍບໍ່​ເອົາ​ໃຈ​ໃສ່, ຫຼື​ມີ​ແ​ນວຄິດພຽງ​ແຕ່​ລໍຖ້າ ພິພາກສາ​ຄົນ​ອື່ນ.

ທີ​ສາມ, ການ​ປະຕິບັດມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ຕ້ອງ​ໄດ້​ຜັນ​ຂະຫຍາຍ​ຢ່າງ​ຄົບ​ຊຸດ ກັບ​ບັນດາ​ມະຕິ​ອື່ນ​ຂອງ​ສູນ​ກາງ​ພັກ, ຂອງ​ສະພາ​ແຫ່ງ​ຊາດ ​ແລະ ຂອງ​ລັດຖະບານ ​ເພື່ອ​ຍູ້​ແຮງ​ການ​ພັດທະນາ​ເສດຖະກິດ - ສັງຄົມ, ປົກ​ປັກ​ຮັກສາ​ປະ​ເທດ​ຊາດ - ຄວາ​ມສະຫງົບ​, ​ເປີດ​ກວ້າງ​ການ​ພົວພັນ​ຕ່າງປະ​ເທດ, ຮັກສາ​ສະຖຽນ​ລະ​ພາບ; ສ້າງ​ຄວາມ​ເຊື່ອ​ຖືພາ​ຍ​ໃນ​ພັກ ​ແລະ ​ໃນ​ປະຊາຊົນ. ບໍ່​ແມ່ນ “ປິດ​ປະຕູ” ​ເພື່ອ​ກໍ່ສ້າງ, ປັບປຸງ​ພັກ.

ອົງຄະ​ນະ​ພັກ, ການຈັດ​ຕັ້ງ​ພັກ ​ແລະ ຜູ້ນຳ​ໜ້າ​ຂັ້ນ​ຕ່າງໆ ຕ້ອງ​ສາມັກຄີ​ກັນ​ຢ່າງ​ແທ້​ຈິງ, ​ເບິ່ງ​ໂດຍ​ກົງ​ໃສ່​ຄວາມ​ຈິງ, ​ເວົ້າ​ແຈ້ງ​ຄວາມ​ຈິງ, ຕີ​ລາຄາ​ຖືກ​ກັບ​ຄວາມ​ຈິງ, ​ໂດຍ​ສະ​ເພາະ​ແມ່ນ​ຕ້ອງ​ມີ​ວິທີ​ແກ້​ໄຂ​ທີ່​ແຂງ​ແຮງ, ມີ​ການ​ກະທຳ​​ລະອຽດຕົວ​ຈິງ ​ເພື່ອ​ເຮັດ​ໃຫ້​ສະພາບ​ການ​ຫັນປ່ຽນ​ຢ່າງ​ຈະ​ແຈ້ງ; ສົມທົບ​ຢ່າງ​ກົມກຽວ​ລະຫວ່າງ “ກໍ່ສ້າງ” ​ແລະ “ຕ້ານ”; ສຸມ​ໃສ່​ແກ້​ໄຂບັນດາ​ກໍລະນີ ​ເຫດການ​ຮ້ອນ​ເຄືອງ​ທີ່​ໄດ້​ຊີ້​ອອກ​ມາ​ ໃຫ້​ແລ້ວຢ່າງ​ຂາດ​ຕົວ. ຕ້ອງ​ເຊີດ​ຊູ​ກົດ​ລະບຽບ ວິ​ໄນ​ຂອງ​ພັກ, ກົດໝາຍ​ຂອງ​ລັດ, ສົມທົບ​ກັບ​ການ​ຕິດຕາມ​ກວດກາ, ກວດກາ, ກວດກາ​ນ ​ແລະ ​ແກ້​ໄຂ​ຂໍ້​ຜິດພາດ ລະ​ເມີດ​ວິ​ໄນ; ​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ເສີມ​ຂະຫຍາຍ​ບົດບາດ​ຂອງ​ໜັງສືພິມ ສື່​ມວນ​ຊົນ ແລະ ຫາງ​ສຽງ​ສັງຄົມ ​ໃນ​ຂະ​ບວນວິວັດ​ການ​ປະຕິບັດ​ມະຕິ. ສົມທົບ​ວຽກ​ງານ​ອົບຮົມ​ສຶກສາ​ການ​ເມືອງ​ແນວ​ຄິດ, ຕິ​ຊົມ​ຕົນ​ເອງ​ແລະ​ຕິ​ຊົມ ກັບ​ການ​ກໍ່ສ້າງ​ແລະ​ປະຕິບັດ​ບັນດາ​ກົນ​ໄກ, ນະ​ໂຍບາຍ; ກວດກາ, ຕິດຕາມ​ກວດກາ, ລະບຽບ​ວິ​ໄນ​ຂອງ​ພັກ; ​ເສີມ​ຂະຫຍາຍ​ບົດບາດ​ຂອງ​ປະຊາຊົນ ​ແລະ ​ແນວ​ໂຮມ​ປະ​ເທດ​ຊາດ, ບັນດາ​ອົງຄະ​ນະ​ການ​ເມືອງ - ສັງຄົມ.

​ໃນ​ແຜນການ​ປະຕິບັດ​ມະຕິ, ກົມ​ການ​ເມືອງ​ໄດ້​ມອບ​ໜ້າ​ທີ່​ໃຫ້​ບັນດາ​ສະຫາຍ​ກຳມະການ​ກົມ​ການ​ເມືອງ, ຄະນະ​ເລຂາທິການ, ກຳມະການຄະນະ​ບໍລິຫານ​ງານ​ສູນ​ກາງ, ​ເລຂາ​ຄະນະ​ພັກຂັ້ນ​ຕ່າງໆ; ​ເລຂະ​ຄະນະ​ກຳມະການ​ພັກ, ຄະນະ​ກຳກັບ​ວຽກ​ງານ​ພັກ, ຫົວໜ້າ​ບັນດາ​ສຳນັກງານ​ອົງການ ກົມ​ກອງ ຕ້ອງ​ເຜີຍ​ແຜ່​ຊາບ​ຊືມມະຕິ​ໂດຍ​ກົງ ​ຢູ່ຂະ​ແໜງການ, ທ້ອງ​ຖິ່ນ, ສຳນັກງານ​ອົງການ, ກົມ​ກອງ. ຊີ້​ແຈ້ງ​ບັນດາ​ໜ້າ​ທີ່, ວິທີ​ແກ້​ໄຂ​ທີ່​ອາດ​ຈະ​ປະຕິບັດ​ໃນ​ທັນທີ​ທັນ​ໃດ​ພາຍຫຼັງ​ກອງ​ປະຊຸມ​ ​ເພື່ອດຳ​ເນີນ​ການ​ຊາບ​ຊຶມຢ່າງ​ຮີບ​ດ່ວນ ​ແລະ ຈັດ​ຕັ້ງ​ປະຕິບັດ​ຢ່າງ​ເຂັ້ມ​ງວດ ​ໂດຍ​ບໍ່​ຕ້ອງ​ລໍຖ້າ. ສຳລັບ​ບັນດາ​ໜ້າ​ທີ່​ທີ່​ຕ້ອງມີ​ການ​ແນະນຳ, ຕ້ອງ​ລໍຖ້າ​ການ​ກໍ່ສ້າງ​ກົນ​ໄກ​ຕາມລຳດັບ​ດຳ​ເນີນ​ງານ ​ແມ່ນ​ຕ້ອງ​ແບ່ງ​ງານ​ໃຫ້​ບັນດາ​ອົງການ, ກົມ​ກອງ​ທີ່​ລະອຽດ ​ເພື່ອ​ຜັນ​ຂະຫຍາຍ​ໂດຍ​ໄວ ​ແລະ ຄົບ​ຊຸດ, ບໍ່​ໃຫ້​ຊັກ​ຊ້າ.

ຈິດ​ໃຈ​ຂອງ​ມະຕິ​​ແມ່ນ​ຕ້ອງການ​ກະທຳ, ກະທຳ​ຢ່າງ​ແທດ​ຈິງ, ມີ​ປະສິດທິ​ຜົນ; ຫຼີກ​ລ່ຽງການ​ເວົ້າ​ຫຼາຍ​ແຕ່​ເຮັດ​ໜ້ອຍ ຫຼື ພຽງ​ແຕ່​ເວົ້າ​ແຕ່​ບໍ່​ເຮັດ.

ທີ​ສີ່, ຕ້ອງ​ເພີ່ມ​ທະວີ​ການ​ຊຸກຍູ້, ກວດກາ. ບັນດາ​ອົງຄະ​ນະ​ພັກ, ອົງການ​ຈັດ​ຕັ້ງ​ພັກ ​ແຕ່ສູນ​ກາງ​ຮອດ​ຮາກ​ຖານ ຕ້ອງ​ກຳ​ແໜ້ນ​ສະພາບ​ການ, ກວດກາ, ຕິດຕາມ​ກວດກາ, ຕີ​ລາຄາ​ການ​ປະຕິບັດ​ມະຕິຢູ່​ທ້ອງ​ຖິ່ນ, ສຳນັກງານ​ອົງການ, ກົມ​ກອງ​ຕົນ​ ຢ່າງ​ເປັນ​ປະຈຳ. ດຳ​ເນີນ​ຕາມ​ລາຍ​ຄາບ​ການ​ສະຫລຸບ​ບົດຮຽນ​ເບື້ອງ​ຕົ້ນ ​ແລະ ມີ​ຮູບ​ການ​ຍ້ອງຍໍ​ຊົມ​ເຊີຍ​ຢ່າງ​ທັນ​ການ ຕໍ່​ບັນດາ​ອົງການ​ຈັດ​ຕັ້ງ, ບຸກຄົນ​ທີ່​ເຮັດ​ດີ​ມີ​ຜົນງານ ​ແລະ ປະຕິບັດ​ວິ​​ໄນ​ຕໍ່​ຜູ້​ທີ່​ເຮັດ​ບໍ່​ດີ. ຫຼີກ​ລ່ຽງສະພາບ​ການ​ເຮັດ​ແບບ “ຫົວຊ້າງຫາງ​ໜູ”, ​ເມື່ອ​ຈັດ​ຕັ້ງ​ການ​​ເຜີຍ​ແຜ່​ຊາບ​ຊຶມ, ຜັນ​ຂະຫຍາຍ​ມະຕິ ​ໄດ້​ຕີ​ຄ້ອງ​ຮ້ອງ​ປ່າວກຶກ​ກ້ອງ ​ແຕ່​ເມື່ອ​ປະຕິບັດ​ພັດ​ເຮັດ​ແບບ​ໃຫ້​ມັນ​ແລ້ວ, ບໍ່​ມີ​ໝູ່​ຄະນະ, ບຸກຄົນ​ໃດ​ຮັບຜິດຊອບ.

ຫວຽດນາມ​ພວມ​ມີ​ຊີວິດ​ໃນ​ວັນ​ເວລາ​ຟົດ​ຟື້ນ​ແຫ່ງ​ການ​ຜັນ​ຂະຫຍາຍ ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ. ທົ່ວ​ທັງ​ລະບົບ​ການ​ເມືອງ​ພວມລົງມື​ປະຕິບັດ​ງານ, ພວມ​ເຄື່ອນ​ເໜັງ​ຕາມ​ທິດ​ຕັ້ງໜ້າ: ພັກ​ປະກາດ​ໃຊ້ ​ແລະ ຊີ້​ນຳ​ປະຕິບັດ​ຫຼາຍ​ມະຕິ​ທີ່​ສຳຄັນ​ ຢ່າງ​ມີ​ປະສິດທິ​ຜົນ; ລັດຖະບານ​ພວມ​ເດັດດ່ຽວ​ຂຸ້ນຂ້ຽວ​ປະຕິບັດບັນດາ​ມະຕິ, ​ແຜນ​ນະ​ໂຍບາຍ​ຂ​ອງພັກ; ສະພາ​ແຫ່ງ​ຊາດ​ພວມ​ມີ​ການ​ປ່ຽນ​ແປງ​ໃໝ່​ຢ່າງ​ແຂງ​ແຮງ, ​ໄດ້​ຮັບ​ຄວາມ​ຊົມ​ເຊີຍ​ຂອງ​ຜູ້​ປ່ອນ​ບັດ ​ແລະ ປະຊາຊົນ. ກອງ​ປະຊຸມ​ສູນ​ກາງ​ຄັ້ງ​ທີ 4 ຂອງ​ພັກ​ ​ໄດ້​ປຶກສາ​ພິຈາລະນາ ​ແລະ ຕັດສິນ​ຕົກລົງ ​ແຜນ​ນະ​ໂຍບາຍ​ໃຫຍ່ ສຳຄັນ​ຈຳນວນ​ໜຶ່ງ ທີ່​ມີ​ຄວາມ​ໝາຍ​ຍຸດ​ທະ​ສາດ ​ແລະ ຮີບ​ດ່ວນ ກ່ຽວ​ກັບ​ການ​ຫັນປ່ຽນ​ຕົວ​ແບບ​ເສດ​ຖະກິດ, ພັດທະນາ​ການ​ຜະລິດ​ຢ່າງ​ແຂງແຮງ; ​ເພີ່ມ​ທະວີ​ການ​ເຊື່ອມ​ໂຍງ​ເຂົ້າ​ກັບ​ສາກົນ; ກໍ່ສ້າງ​ພັກ​ໃຫ້​ນັບ​ມື້​ນັບ​ສະອາດ​ປອດ​ໃສ, ໝັ້ນ​ຄົນ​ເຂັ້ມ​ແຂງ. ການ​ຕັດສິນ​ໃຈ​ນະ​ໂຍບາຍ ​ແລະ ວຽກ​ງານ​ຈຳນວນ​ໜຶ່ງ​ຂອງ​ພວກ​ເຮົາ​ໃນ​ເວລາ​ທີ່​ຜ່ານ​ມາ​ມໍ່​ນີ້​ ໄດ້​ຮັບ​ຄວາມ​ຊົມ​ເຊີຍ​ຂອງ​ປະຊາຊົນ​ໃນ​ທົ່ວ​ປະ​ເທດ ​ແລະ ປະຊາຊົນມີ​ຄວາມ​ຕ້ອງການ, ມີ​ຄວາມ​ຄາດ​ຫວັງ​ວ່າ​ຈະ​ເຮັດ​ດີກ​ວ່າ​ນັ້ນອີກ.

​ເພື່ອ​ປະຕິບັດຢ່າງ​ມີ​ປະສິດທິ​ຜົນ ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ກ່ຽວ​ກັບ​​ເພີ່ມ​ທະວີການ​ກໍ່ສ້າງ, ປັບປຸງ​ພັກ ​ແມ່ນ​ຄວາ​ຮັບ​ຮູ້​ຕ້ອງ​ຮອບ​ຄອບ​ຖີ່​ຖ້ວນ, ​ແນວ​ຄິດ​ຕ້ອງ​ລຸ​ລ່ວງ, ຄວາມ​ຕັດສິນ​ໃຈ​ຕ້ອງ​ກ້າ​ແກ່ນ ​ແລະ ວິທີ​ການ​ຕ້ອງ​ຖືກຕ້ອງ. ກົມ​ການ​ເມືອງ​ເຊື່ອ​ວ່າ, ​ດ້ວຍ​ຄວາມ​ຕັດສິນ​ໃຈ​ສູງ​ທີ່​ສຸດ​ຂອງ​ທົ່ວ​ພັກ, ຄວາມ​ເຫັນ​ດີ​ເຫັນ​ພ້ອມ ສະໜັບສະໜູນ​ຢ່າງ​ແຂງ​ແຮງຂອງທົ່ວ​ປວງ​ຊົນ, ການ​ລົງມື​ປະຕິບັດ​ງານ​ຂອງ​ທົ່ວ​ທັງ​ລະບົບ​ການ​ເມືອງ, ຈະ​ເຮັດ​ໃຫ້​ສະພາບ​ການ​ປ່ຽນ​ແປງ​ໄດ້​ຢ່າງ​ແນ່ນອນ ​ເພື່ອຕອບ​ສະໜອງ​ຄວາມ​ຄາດ​ຫວັງ​ຂອງ​ປະຊາຊົນ​ຕໍ່​ກັບ​ພັກ; ​ເພື່ອ​ກໍ່ສ້າງພັກ​ກອມ​ມູນິດ​ຫວຽດນາມໃຫ້​ນັບ​ມື້​ນັບ​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ, “​ມີ​ຄຸນສົມບັດ​ສິນ​ທຳ, ​ອະລິຍະ​ທຳ” ທີ່​ແທ້​ຈິງ./.

​ໂດຍ ຫງວຽນ​ຝູຈ້ອງ
​ເລຂາ​ທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ
ພັກ​ກອມ​ມູນິດ​ຫວຽດນາມ

----------------------------------

* ຫົວ​ຂໍ້​​ໂດ​ຍວາລະສານ​ກອມ​ມູນິດ​ເປັນ​ຜູ້​ແຕ່ງ

- ບົດ​ນີ້​ໄດ້​ລົງພິມ​ໃນ​ວາລະສານ​ກອມ​ມູນິດ ສະບັບ​ເລກທີ 891 (​ເດືອນ​ມັງກອນ 2017)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ