ວັນອາທິດ, 24/9/2017
ກໍ່ສ້າງພັກໃຫ້ສະອາດປອດໃສ, ໝັ້ນຄົງເຂັ້ມແຂງ, ປັດໄຈຕັດສິນຄວາມໝັ້ນຄົງ ແລະ ການພັດທະນາຍືນຍົງ ຂອງລະບອບການເມືອງຢູ່ຫວຽດນາມ
21/3/2017 10:9' ສົ່ງ ພິມ
ພາບກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມ. (ພາບປະກອບ)

ຄວາມ​ໝັ້ນຄົງ ​ແລະ ການ​ພັດທະນາ​ຍືນ​ຍົງ​ຂອງ​ລະບອບ​ການ​ເມືອງ​ໜຶ່ງ ຂຶ້ນ​ຢູ່​ກັບ​ຫຼາຍ​ປັດ​ໄຈ: ​ເສດຖະກິດ, ການ​ເມືອງ, ວັ​ດທະນະ​ທຳ, ສັງຄົມ , ການ​ປ້ອງ​ກັນ​ປະ​ເທດ, ຄວາມ​ສະຫງົບ, ການພົວພັນຕ່າງປະ​ເທດ. ລະບອບ​ການ​ເມືອງຢູ່​ຫວຽດນາມ​ປະຈຸ​ບັນ​ ແມ່ນ​ລະບອບສັງຄົມ​ນິຍົມ ​ໂດຍ​ພັກ​ກອມ​ມູນິດ​ນຳພາ, ​ແມ່ນ​ລະບອບການ​ເມືອງ​ຝ່າຍ​ໜຶ່ງ​ຝ່າຍດຽວ ​ໂດຍ​ປະຊາຊົນ​ເປັນ​ເຈົ້າ. ພັກ​ທັງ​​ເປັນ​ແກ່​ນສານ​ຂອງ​ລະບົບ​ການ​ເມືອງ ທັງ​ເປັນຜູ້ນຳ​ພາລະ​ບົບການ​ເມືອງ, ​ເປັນ​ອົງການ​ຈັດ​ຕັ້ງ​ແກ່ນສານ​ ຂອງ​ລະບອບ​ການ​ເມື​ອງ ທັງ​ເປັນ​ກຳລັງ​ນຳພາ​ລະບອບ​ການ​ເມືອງ. ພັກ​ເປັນ “ກຳລັງ​ນຳພາ​ລັດສັງຄົມ​ນິຍົມ” (ລັດຖະທຳ​ມະນູນ​ປີ 2013). ​ເພາະສະ​ນັ້ນ, ການ​ຄົງ​ຕົວ ​ແລະ ຂະຫຍາຍຕົວ​ຂອງ​ພັກ, ການ​ກໍ່ສ້າງ​ພັ​ກໃຫ້​ສະອາດ​ປອດ​ໃສ ໝັ້ນຄົງ​ເຂັ້ມ​ແຂງ, ຍົກ​ສູງ​ຄວາມ​ສາມາດ​ນຳພາ ​ແລະ ກຳລັງ​ແຮງ​ສູ້​ຮົບ​ຂອງ​ພັກ ມີ​ຄວາມ​ໝາຍ​ຕັດສິນຕໍ່​ຄວາມ​ໝັ້ນຄົງ ​ແລະ ການ​ພັດທະນຍືນ​ຍົງ​ຂອງ​ລະບອບ​ການ​ເມືອງ​ຢູ່​ປະ​ເທດ​ເຮົາ​ໃນ​ປະຈຸ​ບັນ ​ແລະ​ ໃນ​ຍາວ​ນານ.

ພັກ​ກອມ​ມູນິດ​ຫວຽດນາມ - ພື້ນຖານ​ຂອງລະບອບ​ການ​ເມືອງຫວຽດນາມ

ປີ 1930 ພັກ​ກອມ​ມູນິດ​ຫວຽດນາມກຳ​ເນີ​ດ​ເກີດ​ຂຶ້ນ ​ແລະ ​ໄດ້​ນຳພາ​ປະຊາຊົນ​ຫວຽດນາມ​ດຳ​ເນີນ​ການ​ປະຕິວັດ​ອັນ​ຍາວ​ນານ ອົງອາດ​ກ້າຫານ ​ເພື່ອ​ເອກະລາດ​ແຫ່ງ​ຊາດ, ອິດສະຫຼະ​ເສລີ ​ແລະ ຄວາມ​ຜາ​ສຸກ​ຂອງ​ປະຊາຊົນ. ປີ 1945 ພາຍ​ໃຕ້​ການ​ນຳພາ​ຂອງ​ພັກ ​ແລະ ປະທານ​ໂຮ່ຈີ​ມິນ, ປະຊາຊົນ​ຫວຽດນາມ​ໄດ້​ລຸກ​ຮື​ຂຶ້ນ​ດຳ​ເນີນ​ການ​ປະຕິວັດ​ເດືອນ​ສິງຫາ​ຢ່າງ​ສຳ​ເລັດ​ຜົນ, ກໍ່​ຕັ້ງປະ​ເທດ​ສາທາລະນະ​ລັດ ​ປະຊາທິປະ​ໄຕ ​ຫວຽດນາມ​ ຂຶ້ນ, ປະຈຸ​ບັນ​ແມ່​ປະ​ເທດ​ສາທາລະນະ​ລັດ ​ສັງຄົມ​ນິຍົມ​ ຫວຽດນາມ. ການ​ປະ​ຕິ​ວັດ​ເດືອນ​ສິງຫາ​ສຳ​ເລັດ​ຜົນ ​ໄດ້​ສ້າງ​ຕັ້ງລະບອບ​ການ​ເມືອງ​ແບບ​ໃໝ່​ຂຶ້ນ - ຊຶ່ງ​ເປັນ​ລະບອບ​ການ​ເມືອງ​ຂອງ​ປະຊາຊົນ, ​ໂດຍ​ປະຊາຊົນ, ​ເພື່ອ​ປະຊາຊົນ ​ໂດຍ​ແມ່ນ​ພັກ​ກອມ​ມູນິດ​ນຳພາ. ຜ່ານ​ບັນດາ​ການ​ຕໍ່ສູ້ຕ້ານລ່າ​ເມືອງ​ຂຶ້ນ​ຝຣັ່ງ ​ແລະ ຈັກກະພັດ​ອາ​ເມ​ລິ​ກາ​ຜູ້​ຮຸກ​ຮານ, ລະບອບ​ການ​ເມືອງນີ້​ໄດ້​ຮັບ​ການ​ສະໜັບສະໜູນ, ປົກ​ປັກ​ຮັກສາ ​ແລະ ສ້າງສາ​ພັດທະນາ​ໂດຍອາ​ໃສ​ປະຊາຊົນ​ຫວຽດນາມ. ຈາກ​ລະບອບ​ປະຊາທິປະ​ໄຕ​ປະຊາຊົນ ​ເຖິງ​ລະບອບສັງຄົມ​ນິຍົມ ​ແມ່ນ​ບາດ​ກ້າວ​ຂະຫບາຍ​ຕົວ​ໃໝ່​ທາງ​ດ້ານ​​ເນື້ອ​ໃນ ​ແລະ ຮູບ​ການຈັດ​ຕັ້ງອຳນາດ​ການ​ເມືອງ, ສອດຄ່ອງ​ກັບ​ຄວາມ​ຕ້ອງການ ​ແລະ ໜ້າ​ທີ່​ການ​ປະຕິວັດ​ໃນ​ແຕ່ລະ​ໄລຍະ, ສອດ​ຄ່ອງ​ກັບ​ການ​ຜັນ​ປ່ຽນ​ຂອງ​ສະພາບ​ການ​ໂລກ ​ແລະ ​ໃນ​ປະ​ເທດ​ໃນ​ແຕ່ລະ​ໄລຍະ. ບັນດາ​ລັດຖະທຳ​ມະນູນ​ປີ 1946, ປີ 1959, ປີ 1980, ປີ 1992 ​ແລະ​ ປີ 2013 ​ໄດ້​ຢືນຢັນ​ຂະ​ບວນວິວັດ​ການ​ພັດທະນາ ກໍ່​ຄື​ບັນດາ​ຜົນງານ​ທາງ​ດ້ານ​ຄວາມ​ຮັບ​ຮູ້ ​ແລະ ການ​ປະຕິບັດລະບອບ​ການ​ເມືອງ​ໃໝ່​ຢູ່​ຫວຽດນາມ. ການ​ກຳ​ເນີ​ດ​ເກີດ​ຂຶ້ນ, ປັບປຸງ ​ແລະ ຂະຫຍາຍຕົວ​ຂອງລະບອບ​ການ​ເມືອງ​ແບບ​ໃໝ່​ຢູ່​ຫວຽດນາມ ​ໄດ້​ຕິດ​ແໜ້ນ​ກັບ​ການ​ນຳພາ​ຂອງພັກ​ກອມ​ມູນິດ​ຫວຽດນາມ, ກັບ​ແນວທາງ​ທີ່​ຖືກຕ້ອງ​ຂອງ​ພັກ, ກັບຄວາມ​ຕັ້ງໜ້າ​ພະຍາຍາມ​ໃນ​ການ​ເຄື່ອນ​ໄຫວ​ຂອງ​ພະນັກງານ, ສະມາຊິກ​ພັກ ຢຸ່ບັນດາ​ຂັ້ນ, ຂະ​ແໜງການຕ່າງໆ ພ້ອມ​ດ້ວຍ​ການ​ສະໜັບສະໜູນ​ຂອງ​ມະຫາ​ປະຊາຊົນ​ທີ່​ໜາ​ແໜ້ນ.

ລະບອບ​ການ​ເມືອງສັງຄົມ​ນິຍົມຢູ່​ຫວຽດນາມ​ປະຈຸ​ບັນ​ນີ້​ ໄດ້​ສະ​ແດງ​ອອກ ​ແລະ ​ໄດ້​ຮັບ​ການ​ປະຕິບັດ​ໂດຍ​ຜ່ານ:

- ບົດບາດນຳ​ພາ​ຂອງພັກ​ກອມ​ມູນິດ​ຫວຽດນາມ, ການ​ຍູ້​ແຮງ​ການ​ກໍ່ສ້າງ, ປັບປຸງ​ພັກ​ໃຫ້​ສະອາດ​ປອດ​ໃສ ໝັ້ນຄົງ​ເຂັ້ມ​ແຂງ.

- ກໍ່ສ້າງ ​ແລະ ປັບປຸງ​ບູລະນະ​ລັດ​ແຫ່ງ​ອຳນາດ​ກົດ​ໝາຍ​ສັງຄົມ​ນິຍົມ ຂອງ​ປະຊາຊົນ, ​ໂດຍ​ປະຊາຊົນ, ​ເພື່ອ​ປະຊາຊົນ.

- ກໍ່ສ້າງ ​ແລະ ພັດທະນາ​ພື້ນຖານ​ປະຊາທິປະ​ໄຕສັງຄົມ​ນິຍົມ, ສິດ​ເປັນ​ເຈົ້າ​ຂອງ​ປະຊາ​ຊົນ. ປະຊາຊົນ​ເປັນ​ເຈົ້າພາບ​ຂອງກຳລັງ​ອຳນາດ​ລັດ, ອຳນາດ​ລັດ​ທັງ​ໝົດ​ຂຶ້ນ​ກັບ​ປະຊາຊົນ ຊຶ່ງ​ຮາກ​ຖານ​ແມ່ນ​ພັນທະ​ພາບ​ລະຫວ່າງ​ຊົນ​ຊັ້ນ​ກຳມະກອນ, ຊົນ​ຊັ້ນ​ຊາວນາ ​ແລະ ຖັນ​ແຖວ​ປັນຍາ​ຊົນ. ລັດ​ຮັບປະກັນ ​ແລະ ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງ​ປະຊາຊົນ, ນັບຖື ​ແລະ ຮັບປະກັນ, ປົກ​ປັກ​ຮັກສາ​ສິດທິ​ມະ​ນຸດ, ສິດທິ​ພົນ​ລະ​ເມືອງ.

- ປ່ຽນ​ແປງ​ໃໝ່​ການຈັດ​ຕັ້ງ ​ແລະ ການ​​ເຄື່​ອນ​ໄຫວ​ຂອງ​ລະບົບ​ການ​ເມືອງ; ​ເສີມ​ຂະຫຍາຍ​ບົດບາດ​ຂອງ​ແນວ​ໂຮງ​ປະ​ເທດ​ຊາດ ​ແລະ ບັນດາ​ອົງຄະ​ນະ​ການ​ເມືອງ - ສັງຄົມ ​ແນ​ໃສ່​ເສີມ​ຂະຫຍາຍ​ກຳລັງ​ແຮງ​ແຫ່ງ​ຄວາມ​ສາມັກຄີ​ປວງ​ຊົນ​ທັງ​ຊາດ, ປະຕິບັດ​ປະຊາທິປະ​ໄຕ, ​ເພີ່ມ​ທະວີ​ຄວາມ​ເຫັນ​ດີ​ເຫັນ​ພ້ອມ​ສັງຄົມ; ຕິດຕາມ​ກວດກາ, ວິຈານ​ສັງຄົມ, ​ເຂົ້າ​ຮ່ວມ​ການ​ກໍ່ສ້າງ​ພັກ, ລັດ, ປົກ​ປັກ​ຮັກສາ​ສິດ ​ແລະ ຜົນ​ປະ​ໂຫຍ​ດທີ່​ຊອບ​ທຳ, ຖືກ​ກົດ​ໝາຍຂອງ​ປະຊາຊົນ, ​ເພີ່ມ​ທະວີ​ຄວາມ​ພົວພັນ​ສະໜິດ​ແໜ້ນ​ກັບ​ປະຊາຊົນ.

ລະບອບ​ການ​ເມືອງຂອງ​ຫວຽດນາມ​ອີງ​ໃສ່ 3 ​ເສົາ​ຄ້ຳ​ຄື: ພັກ - ລັດ - ປະຊາຊົນ ທີ່​ມີ​ບັນດາ​ພາລະ​ບົດບາດ​ທີ່​ຕ່າງ​ກັນຄື “ພັກ​ນຳພາ, ລັດ​ຄຸ້ມ​ຄອງ, ປະຊາຊົນ​ເປັນ​ເຈົ້າ”. ຢາກ​ໃຫ້​ລະບອບ​ການ​ເມືອງ​ມີ​ຄວາມ​ໝັ້ນຄົງ ​ແມ່ນ​ຕ້ອງ​ກໍ່ສ້າງ, ປັນ​ປຸງ 3 ​ເສົາ​ຄ້ຳ​ນີ້​​ໃຫ້ດີ: ພັກຕ້ອງ​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ, ຍົກ​ສູງ​ຄວາມ​ສາມາດ​ນຳພາ ​ແລະ ກຳລັງ​ແຮງ​ສູ້​ຮົບ​ຂອງ​ພັກ; ລັດ​ກໍ່​ຕ້ອງ​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ, ມີ​ຄຸນ​ນະພາ​ບ, ປະສິດທິ​ຜົນ, ຂະຫຍັນ​ຂັນ​ເຄື່ອນ​ໃນ​ການ​ຄຸ້ມ​ຄອງ​ບໍລິຫານ; ກໍ່ສ້າງ​ຖັນ​ແຖວ​ພະນັກງານ, ລັດຖະກອນ ​ໃຫ້​ມີ​ຄຸນສົມບັດ ແລະ ຄວາມ​ສາມາດ​ຢ່າງ​ພຽງພໍ​ເພື່ອ​ສຳ​ເລັດ​ໜ້າ​ທີ່; ປະຊາຊົນ​ເປັນ “ກົກ​ຮາກ” ທີ່​ແທ້​ຈິງ​ຂອງ​ປະ​ເທດ, ​ເປັນ​ເຈົ້າ​ຂອງ​ທີ່​ແທ້​ຈິງ, ມີ​ຄວາມ​ພົວພັນ​ສະໜິດ​ສະໜົມ​ກັບ​ພັກ ​ແລະ ລັດ; ນະ​ໂຍບາຍ​ຂອງ​ພັກ ​ແລະ​ ລັດ​ຕ້ອງ​ຖືກ​ໃຈ​ຂອງປະຊາຊົນ, “ປະຊາຊົນ​ນິຍົມ​ຊົມ​ຊອບ​ແມ່ນ​ໄດ້​ທຸກ​ສິ່ງ​ທຸກ​ຢ່າງ, ປະຊາຊົນ​ເສຍ​ໃຈ​ກໍ່​ຈະ​ເສຍ​ໝົດທຸກ​ຢ່າງ”, ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນຢ່າງ​ຈິງ​ຈັງ, ປະຊາຊົນ​ສະຫງົບ​ໃຈຢູ່​ເຢັນ ລະບອບ​ການ​ເມືອງ​ຈຶ່ງ​ມີ​ສະຖຽນ​ລະ​ພາບ, ຈຶ່ງ​ໝັ້ນຄົງ​ຍືນ​ຍົງ. ​ເຮັດ​ຄື​ແນວ​ໃດ​ໃຫ້​ປະຊາຊົນ​ຖື​ວ່າ ລະບອບ​ການ​ເມືອງນີ້​ແມ່ນ​ຂອງ​ເຂົາ​ເຈົ້າ ບໍ່​ແມ່ນ​ຂອງ​ຄົນ​ອື່ນ. ​ໃນ 3 ​ເສົາ​ຄ້ຳ​ນັ້ນ, ການກໍ່ສ້າງ​ພັກ​ແມ່ນ​ໜ້າ​ທີ່ທີ່​ສຳຄັນ, ການ​ເຊື່ອມ​ຕໍ່​ຢ່າງ​ສະໜິດ​ແໜ້ນ​ລະຫວ່າງ​ພັກ, ລັດ ກັບປະຊາຊົນ ​ແມ່ນໜ້າ​ທີ່ທີ່ສຳຄັນ​ຍິ່ງ​ເພື່ອຮັກສາ ​ແລະ ຢຶດໝັ້ນລະບອບ​ການ​ເມືອງຢູ່​ຫວຽດນາມ.

​ໃນ​ຊຸມ​ປີ​ແຫ່ງ​ການ​ປ່ຽນ​​ແປງ​ໃໝ່, ຄຽງ​ຂ້າງ​ກັບ​ບັນດາ​ຜົນງານ​ອັນ​ໃຫຍ່​ຫຼວງ​ທີ່​ບັນລຸ​ໄດ້, ຫວຽດນາມ​ກໍ່​​ໄດ້ປະສົບ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ບໍ່​ໜ້ອຍ. ​ໄພອັນຕະລາຍ 4 ປະການ​ ທີ່ພັກ​ກອມ​ມູນິດ​ຫວຽດນາມ​ໄດ້​ຊີ້​ອອກ​ມາ​ນັ້ນ ຍັງ​ຄົບ​ຕົວ​ຢູ່ ​ແລະ ຜັນ​ປ່ຽນ​ຢ່າງ​ສັບສົນ. ວຽກ​ງານ​ກໍ່ສ້າງ​ພັກ​ຍັງ​ມີ​ຂໍ້​ຈຳກັດ, ຂາດ​ຕົກ​ບົກພ່ອງ​ບໍ່​ໜ້ອຍ. “ຄວາມ​​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດຂອງ​ພະນັກງານ, ສະມາຊິກ​ພັກພາກສ່ວນ​​ໜຶ່ງທີ່​ບໍ່​ໜ້ອຍ ຍັງ​ບໍ່​ທັນ​ຖືກ​ຍູ້​ຖອຍ, ມີ​ດ້ານ, ມີ​ພາກສ່ວນ​ຍັງ​ຜັນ​ແປ​ຢ່າງ​ເລິກ​ແລບ, ສັບສົນ​ກວ່າ​ເກົ່າ; ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ, ຫຍໍ້​ທໍ້ ​ຍັງ​​ຮ້າຍ​ແຮງ​ຫຼາຍ ຊຶ່ງ​​ລວມສູນ​ຢູ່ບັນດາ​ສະມາຊິກ​ພັກທີ່​ມີ​ຕຳ​ແໜ່​ງ​ໃນ​ກົງຈັກ​ແຫ່ງ​ລັດ”(1). ບັນດາ​ຂໍ້​ຜິດພາດ​ນີ້ ​ມີ​ລັກສະນະ​ແຜ່​ຫຼາຍ​ທົ່ວ​ໄປ (“ພາກສ່ວນ​​ໜຶ່ງທີ່​ບໍ່​ໜ້ອຍ”) ຢູ່​ໃນ​ຫຼາຍ​ຂະ​ແໜງ​ການ, ຫຼາຍ​ຂັ້ນ, ​ໃນ​ນັ້ນ​ມີ​ທັງ​ພະນັກງານ​ຂັ້ນ​ສູງ​ຈຳນວນ​ໜຶ່ງ, ຂໍ້ຜິດພາດ​ເຫຼົ່າ​ນີ້​ໄດ້​ແກ່ຍາວ​ຜ່ານ​ຫຼາຍ​ສະ​ໄໝ​ກອງ​ປະຊຸມ​ໃຫຍ່ ​ແຕ່​ຍັງ​ບໍ່​ທັນ​ໄດ້​ແກ້​ໄຂ​ຜ່ານ​ຜ່າ. ​ເປັນອັນ​ຈະ​ແຈ້ງວ່າ ບັນດາ​ຂໍ້​ຜິດພາດ​​ເຫຼົ່າ​ນັ້ນ​ ແມ່ມ​ຮ້າຍ​ແຮງ​ທີ່​ສຸດ​ສຳລັບ​ພັກ​ໜຶ່ງ​ທີ່​ມີ​ມູນ​ເຊື້ອ​ປະຕິວັດ 86 ປີ ​ຄືພັກ​ກອມ​ມູນິດ​ຫວຽດນາມ, ມັນກໍ່​ຄວາມ​ເສຍ​ຫາຍ​ຫຼາຍ ​ແລະ ຍາວ​ນານ​ໃຫ້​ແກ່​ພັກ ​ແລະ ລະບອບການ​ປົກຄອງ, ຊຸກຍູ້​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ, ​ເຮັດ​ໃຫ້​ພັກ​ຄ່ອຍໆ​ຫ່າງ​ເຫີ​ນຈາກ​ທາດ​ແທ້​ປະຕິວັດ ​ແລະ ວິທະຍາສາດ ຂອງ​ພັກ​ກອມ​ມູນິດທີ່​ແທ້​ຈິງ​ໜຶ່ງ ຖ້າ​ຫາກ​ບໍ່​ມີ​ວິທີ​ກີດ​ກັ້ນ​ທີ່​ມີ​ຜົນ​ສັກສິດ. ບັນດາ​ຂໍ້​ຜິດພາດ​​ເທິງນີ້​, ຄື​ດັ່ງ​ທີ່ມະຕິ​ກອງ​ປະຊຸມ​ສູນ​ກາງ​ພັກຄັ້ງ​ທີ 4 ສະ​ໄໝ​ທີ XII ​ໄດ້​ຊີ້​ອອກ​ມາ, “​ໄດ້​ຫລຸດຜ່ອນ​ບົດບາດນຳ​ພາ​ຂອງ​ພັກ; ​ເປັນ​ຜົນ​ເສຍ​ຫາຍ ​ແລະ ຫລຸດຜ່ອນ​ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ກັບ​ພັກ, ​ເປັນ​ໄພ​ນາບ​ຂູ່​​ໂດ​ຍກົງຕໍ່​ການ​ດຳລົງ​ຄົງ​ຕົວ​ຂອງພັກ ​ແລະ ລະບອບ​ການ​ປົກຄອງ”. ດັ່ງ​ນັ້ນ, ຖ້າ​ຫາກ​ບໍ່​ກີດ​ກັ້ນ, ຍູ້​ຖອຍ​ຄວາມ​ຊຸດ​ໂຊມ​ຢູ່​ໃນ​ພັກ, ສະພາບ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ ​ເພື່ອ​ກໍ່ສ້າງ​ພັກ​ໃຫ້ສະອາດ​ປອດ​​ໃສ, ໝັ້ນຄົງ​ເຂັ້ມ​ແຂງ, ​ບໍ່​ດັ່ງ​ນັ້ນຈະ​ບໍ່​ຮັກສາ​ການ​ດຳລົງ​ຄົງ​ຕົວ​ຂອງ​ພັກ​ໄດ້ ​ແລະ​ລະບອບສັງຄົມ​ນິຍົມກໍ່​ຈະບໍ່​ຄົງ​ຕົວ​ຢູ່​ອີກ. ປະສົບ​ການ​ກ່ຽວ​ກັບ​ການ​ແຕກ​ທະລາຍຂອງພັກ​ກອມ​ມູນິດ​ສະຫະພາບ​ໂຊ​ວຽດ, ການ​ພັງ​ທະລາ​ຍຂອງ​ລະບອບສັງຄົມ​ນິຍົມ​ໂຊ​ວຽດ ກ່ອນ​ໜ້າ​ນີ້ 25 ປີ ​ຍັງ​ມີ​ຄວາມ​ໝາຍ​ສົດໆ​ຮ້ອນໆ​ຢູ່ຈົນ​ເຖິງ​ທຸກ​ວັນ​ນີ້ ​ສຳລັບ​ຫວຽດນາມ.

ເພີ່ມ​ທະວີການກໍ່ສ້າງ ປັບປຸງ​ພັກຕາມ​ຈິດ​ໃຈ​ຂອງມະຕິ​ກອງ​ປະຊຸມ​ສູນ​ກາງ​ພັກ ຄັ້ງ​ທີ 4 ສະ​ໄໝ​ທີ XII - ບາງບັນຫາ​ທີ່​ວາງອອກ​ມາ

ວັນ​ທີ 30-10-2016 ຄະນະ​ບໍລິຫານ​ງານ​ສູນ​ກາງ​ພັກ ​ສະ​ໄໝ​ທີ່ XII ​ໄດ້​ປະກາດ​ໃຊ້ມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 4 ກ່ຽວ​ກັບ​​ເພີ່ມ​ທະວີການກໍ່ສ້າງ ປັບປຸງ​ພັກ. ມະຕິ​ສະບັບ​ນີ້​ມີ​ຄວາມ​ໝາຍ​ຮີບ​ດ່ວນ ທັງມີ​ຄວາມ​ໝາຍ​ພື້ນຖານຍາວ​ນານ ສຳລັບ​ການ​ຮັກສາ​ສະຖຽນ​ລະ​ພາບ​ ຄວາມ​ໝັ້ນຄົງ ​ແລະ ການ​ພັດທະນາຢ່າງ​ຍືນ​ຍົງ ​ຂອງ​ລະບອບສັງຄົມ​ນິຍົມ ຢູ່​ຫວຽດນາມ.

ມະຕິ​ສະ​ແດງ​ໃຫ້​ເຫັນ​ເຖິງ​ຄວາມ​ຕັດສິນ​ໃຈ​ສູງ, ແຂງ​ແຮງ ຂອງພັກ​ກອມ​ມູນິດ​ຫວຽດນາມ ​ໃນ​ວຽກ​ງານ​ກໍ່ສ້າງ​ພັກ. ມະຕິ​ຮຽກຮ້ອງ​​ໃຫ້ພະນັກງານ, ສະມາຊິກ​ພັກ, ອົງການ​ຈັດ​ຕັ້ງ​ພັກ​ ຕ້ອງ​ຮັບ​ຮູ້​ຢ່າງ​ເລິກ​ເຊິ່ງກ່ຽວ​ກັບ​ໄພ​ອັນຕະລາຍ, ຮັບ​ຮູ້​ຖືກຕ້ອງ​ກ່ຽວ​ກັບ​ບັນດາ​ປະກົດ​ການ ​ແລະ ວາງ​ມາດ​ຕະການ​ທີ່​ສອດຄ່ອງ​ອອກ​ມາ; ຕ້ອງ​ຫັນ​ມະຕິ​ເປັນ​ການ​ກະທຳ​ທີ່​ລະອຽດ, ຕົວ​ຈິງ, ມີ​ປະສິດທິ​ຜົນ, ​ເປັນ​ປະຈຳ​ຕໍ່​ເນື່ອງ, ຊີ້​ນຳ​ຢ່າງ​ໃກ້ຊິດ; ​ເວົ້າ​ໄປ​ຄຽງ​ຄູ່​ກັບ​ເຮັດ, ກໍ່ສ້າງ​ໄປ​ຄຽງຄູ່​ກັບຕ້ານ; ປະຕິບັດ​ມະຕິຢ່າງ​ເດັດດ່ຽວ ໜຽວ​ແໜ້ນ, ​ເສີມ​ຂະຫຍາຍ​ຄວ​າມ​ເປັນເຈົ້າ​ການ, ປະດິດ​ສ້າງ ​ແລະ ກຳລັງ​ແຮງ​ສັງ​ລວມ ຂອງ​ທົ່ວທັງ​ລະບົບ​ການ​ເມືອງ, ພິ​ເສດ​ແມ່ນ​ພະນັກງານ​ນຳພາ, ຄຸ້ມ​ຄອງ, ກ່ອນ​ອື່ນ​ໝົດ​ແມ່ນ​ພະນັກງານ​ຂັ້ນ​ສູງ, ພະນັກງານຫຼັກ​ແຫຼ່ງ, ຫົວໜ້າຂັ້ນຕ່າງໆ ​ໃນ​ການ​ເປັນ​ແບບຢ່າງ​ປະຕິບັດ​ມະຕິ ກໍ່​ຄື​ໃນ​ການ​ປະຕິບັດ​ຄວາມ​ຮັບຜິດຊອບ​ຊີ້​ນຳ​ນຳພາ​ວຽກ​ງານ​ຕົວ​ຈິງ. ​ໂດຍ​ຜ່ານ​ການ​ປະຕິບັດ​ມະຕິ ຕ້ອງ​ເຮັດ​ໃຫ້ສະພາບ​ການ​ຂອງ​ພັກ ​ແລະ ວຽກງານ​ກໍ່ສ້າງພັກ ມີ​ການ​ຜັນ​ປ່ຽນຢ່າງ​ຈະ​ແຈ້ງ.

​ໃນ​ຂະ​ບວນວິວັດ​ນຳພາ​ການ​ປະຕິວັດ, ພັກ​ກອມ​ມູນິດ​ຫວຽດນາມ​ໄດ້​ໃຫ້​ຄວາມ​ສຳຄັນ ​ແລະ ​ເອົາ​ໃຈ​ໃສ່​ທີ່​ສຸດ​ເຖິງວຽກ​ງານ​ກໍ່ສ້າງ​ພັກ. ​ໃນ​ກອງ​ປະຊຸມ​ໃຫຍ່ສະ​ໄໝ​ຕ່າງໆ ພັກ​ໄດ້​ມີ​ລາຍ​ງານ​ສະ​ເພາະກ່ຽວກັບ​ການ​ກໍ່ສ້າງ​ພັກ ຫຼື​ລາຍ​ງານ​ກ່ຽວ​ກັບວຽກ​ງານ​ກໍ່ສ້າງ​ພັກ ຢູ່​ໃນ​ລາຍ​ງານ​ການ​ເມືອງ, ມີ​ບັນດາ​ມະຕິ​ສະ​ເພາະກ່ຽວ​ກັບວຽກ​ງານ​ກໍ່ສ້າງ​ພັກ (​ເຊັ່ນມະຕິ​ກອງ​ປະຊຸມ​ສູນ​ກາງພັກ ​ຄັ້ງ​ທີ 6 (ເທື່ອ​ທີ 2) ສະ​ໄໝ​ທີ VIII, ມະຕິ​ກອງ​ປະຊຸມ​ສູນ​ກາງ​ພັກ ຄັ້ງ​ທີ 4 ສະ​ໄໝ​ທີ XI...), ຈັດ​ຕັ້ງ​ການ​ເຄື່ອນ​ໄຫວ​ຈຳນວນ​ໜຶ່ງ​ກ່ຽວ​ກັບ​ການ​ກໍ່ສ້າງ, ປັບປຸງ​ພັກ. ​ແຕ່, ການ​ປະຕິບັດ​ບັນດາ​ມະຕິ​ກ່ຽວ​ກັບ​ການ​ກໍ່ສ້າງ​ພັກ ກໍ່​ຍັງ​ບໍ່​ທັນ​ບັນລຸ​ເປົ້າ​ໝາຍ​ທີ່​ວາ​ງ​ໄວ້. ພັກ​ກອມ​ມູນິດ​ຫວຽດນາມ ​ໄດ້​ຄົ້ນ​ເຜີຍ​ແລະກ່າວ​ເຕື່ອນ​​ຢ່າງທັນການ ກ່ຽວ​ກັບຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ ​ແລະ ຄຸນສົມບັດ, ​ແບບ​ແຜນ​ດຳລົງ​ຊີວິ​ຂອງ​ພະນັກງານ, ສະມາຊິກ​ພັກ, ​ເປັນ​ຕົ້ນ​ແມ່ນ​ໃນ​ເງື່ອນ​ໄຂ​ພັກ​ກຳ​ອຳນາດ. ​ແຕ່, ​ແຕ່​ບ່ອນ​ທີ່ປະກົດ​ການ​ເຫຼົ່າ​ນັ້ນມີ​ຢູ່​ໃນ​ບາງ​ຄົນ, ​ໃນ​ພະນັກງານ ສະມາຊິກພັກ​ພາກສ່ວນ​ນ້ອຍ​ໜຶ່ງ, ​ໄດ້​ຄ່ອຍໆ ​ແຜ່​ກວ້າງ​ອອກ​ເປັນ “ພາກສ່ວນ​ໜຶ່ງ​ທີ່​ບໍ່​ໜ້ອຍ”, ໝາຍ​ຄວາມ​ວ່າ​ມີ​ລັກສະນະ​ແຜ່​ຫຼາຍ​ພໍ​ຄວນ. ​ແຕ່​ກອງ​ປະຊຸມ​ໃຫຍ່​ຄັ້ງ​ທີ VIII ​ເຖິງ​ກອງ​ປະຊຸມ​ໃຫຍ່​ຄັ້ງ​ທີ XII ພັກ​ກອມ​ມູນິດ​ຫວຽດນາມ ລ້ວນ​ແຕ່​ສັງ​ເກດ​ວ່າ ຂໍ້​ຂາດ​ຕົກ​ບົກພ່ອງ​ນັ້ນ​ແມ່ນ​ຂອງ “ພະນັກງານ ສະມາຊິກ​ພັກພາກສ່ວນໜຶ່ງທີ່​ບໍ່​ໜ້ອຍ” ​ແລະ ​ເຖິງ​ວ່າ​ໄດ້​ພະຍາຍາມ​ປ້ອງ​ກັນ ຕໍ່ສູ້​ຕ້ານຢ່າງ​ເດັດດ່ຽວ​ກໍ່ຕາມ, ​ແຕ່ຄວາມ​ເສື່ອ​ມ​ໂຊ​ມທາງ​ດ້ານ​ແນວ​ຄິດ​ການ​ເມືອງ ​ແລະ ຄຸນສົມບັດ, ​ແບບ​ແຜນ​ດຳລົງ​ຊີວິດ​ຂອງ​ພະນັກງານ ສະມາຊິກ​ພັກ​ພາກສ່ວນ​ໜຶ່ງ​ທີ່​ບໍ່​ໜ້ອຍ ກໍ່​ຍັງ​ບໍ່​ທັນ​ຖືກ​ຍູ້​ຖອຍ​ເທື່ອ. ​ໃນ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ XI ​ແລະ ກອງ​ປະຊຸມ​ໃຫຍ່​ຄັ້ງ​ທີ XII, ພັກ​ກອມ​ມູນິດ​ຫວຽດນາມ ຍັງ​ຊີ້​ໃຫ້​ເຫັນ​ບັນດາ​ປະກົດ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ, ບັນດາ​ປະກົດ​ການ​ນີ້ ​ໄດ້​ກັດ​ເຊາະ​ທາດ​ແທ້​ຂອງພັກ​ກອມ​ມູນິດ​ຫວຽດນາມ, ​ເປັນ​ອັນຕະລາຍ​ທີ່​ສຸດ, ມັນ​ອາດ​ຈະ​ພາ​ໃຫ້​ເກີດ​ຄວາມ​ທໍລະ​ຍົດ​ຕໍ່ອຸດົມ​ຄະຕິ ​ແລະ ພາລະກິດ​ການ​ປະຕິວັດ​ຂອງ​ພັກ ​ແລະ ຂອງ​ຊາດ. ບັນດາ​ປະກົດ​ການ​ນີ້​ເກີດ​ຂຶ້ນ​ຊ້າໆ, ຍາກ​ທີ່​ຈະ​ຮູ້​ເຫັນ​ໄດ້, ຈາກ​ການ​ປ່ຽນ​ແປງ​ທາງ​ດ້ານ​ປະລິມານ​ ຈະ​ພາ​ໄປ​ເຖິງ​ການ​ປ່ຽນ​ແປງ​ທາງ​ດ້ານ​ຄຸນ​ນະພາ​ບ​ໃນ​ກະ​ໂຕ​ພັກ ​ແລະ ລະບອບ​ການ​ເມືອງ ​ຖ້າ​ຫາກ​ກີດ​ກັ້ນ​ມັນ​ບໍ່​ໄດ້.

ພັກ​ກອມ​ມູນິດ​ຫວຽດນາມ​ໃນ​ສະ​ໄໝ​ແຫ່ງ​ການ​ປ່ຽນ​ແປງ​ໃໝ່​ທີ່​ແຕກ​ຕ່າງ​ທີ່​ສຸດ​ກັບ​ ສະ​ໄໝ​ຕໍ່ສູ້ຕ້ານການ​ຮຸກ​ຮານ​ຈາກ​ພາຍ​ນອກ ຫຼື​ສະ​ໄໝ​ແຫ່ງ​ກົນ​ໄກ​​ເສດຖະກິດລວມສູນ ​ເກື້ອກູນ​ກ່ອນ​ໜ້າ​ນີ້.

ອາດ​ຈະ​ເວົ້າ​ວ່າ, ການ​ກໍ່ສ້າງ​ພັກ​ໃນ​ສະ​ໄໝ​ນີ້​ມີ​ຄວາມ​ຫຍຸ້ງຍາກ, ສັບສົນກວ່າ​ທຽບ​ກັບ​ສະ​ໄໝ​ສົງຄາມ ຫຼື​ສະ​ໄໝ​ແຫ່ງກົນ​ໄກ​ເສດຖະກິດລວມສູນ ​ເກື້ອ​ກູນ. ການ​ກະທົບ​ຈາກ​ດ້ານ​ລົບ​ຂອງ​ເສດຖະກິດ​ຕະຫຼາດ ​ແລະ ການ​ເຊື່ອມ​ໂຍງ​ສາກົນ, ການ​ກະທົບ​ຈາກ​ການ​ພັງ​ທະລາ​ຍຂອງລະບອບສັງຄົມ​ນິຍົມຢູ່​ສະຫະພາບ​ໂຊ​ວຽດ ​ແລະ ​ເອີຣົບຕາ​ເວັນ​ອອກ, ການ​ພົ້ນ​ເດັ່ນ​ຂຶ້ນ​ຂອງຜົນ​ປະ​ໂຫຍ​ດ​ເສດຖະກິດ​ໃນ​ຊີວິດ​ສັງຄົມ, ການ​ຟື້ນ​ຕົວ​ຂຶ້ນ​ຂອງ​ລັດທິ​ເອກະ​ຊົນ, “ຜົນ​ປະ​ໂຫຍ​ດໝູ່​ພວກ”, ລັດທິ​ອັດຖະປະ​ໂຫຍ​ດນິຍົມ, ​ເຫັນ​ແກ່​ຕົວ​ເອງ,... ​ໃນ​ຖັນ​ແຖວ​ພະນັກງານ, ສະມາຊິກ​ພັກ. ການກໍ່ສ້າງ​ພັກ​ໃນ​ເງື່ອນ​ໄຂ​ໃໝ່​ ​ແມ່ນ​ບໍ່​ເຄີຍ​ມີ​ກ່ອນ​ໃນ​ປະຫວັດສາດ​ຢູ່​ຫວຽດນາມ, ຍິ່ງ​ກວ່າ​ນັ້ນ​ແມ່ນ​ຍັງ​ບໍ່​ໄດ້​ກະກຽມ​ທາງ​ດ້ານ​ທິດ​ສະ​ດີ. ຄື​​ຄຳ​ສັງ​ເກດ​ໃນເອກະສານ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ ທີ່​ວ່າ: “ການກໍ່ສ້າງພັກທີ່​ກຳ​ອານາ​ດ​ ໃນ​ເງື່ອນ​ໄຂ​ພັດທະນາ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ກໍ່ສ້າງ​ພັກ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ ​ແລະ ​ເຊື່ອມ​ໂຍງ​ສາກົນ​ນັ້ນ ມັນ​​ແມ່ນບັນຫາ​ໃໝ່ ​ແລະ ຫຍຸ້ງ​ຍາກ, ຕ້ອງ​ທັງ​ເຮັດ, ທັງ​ຄົ້ນຄວ້າ​ຊອກ​ຫາ, ສະຫລຸບ​ຖອດ​ຖອນ​ບົດຮຽນ ​ເພື່ອ​ປ່ຽນ​ແປງ​ໃໝ່, ບູລະນະ. ມີ​ຄວາມ​ຊັກ​ຊ້າ​ໃນ​ການ​ປ່ຽນ​ແປງ​ໃໝ່​ຈິນຕະນາການ​ ກ່ຽວ​ກັບວຽກງານ​ກໍ່ສ້າງພັກ​ໃນ​ເງື່ອນ​ໄຂ​ໃໝ່”(2). ນີ້​ແມ່ນ​ບັນຫາ​ທີ່​ຕ້ອງ​ຄົ້ນຄວ້າ​ຢ່າງ​ເລິກ​ເຊິ່ງ, ຮອບດ້ານ, ​ເຖິງ​ຖອງ ​ທາງ​ດ້ານ​ທິດ​ສະ​ດີ ​ກ່ຽວ​ກັບ​ການ​ກໍ່ສ້າງ​ພັກໃນ​ເງື່ອນ​ໄຂ ​ພັດທະນາ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ​ເຊື່ອມ​ໂຍງ​ສາກົນ, ​ໃນ​ສະພາບ​ການ​ໃໝ່​ຂອງ​ໂລກ ​ແລະ ​ໃນ​ປະ​ເທດ.

ມະຕິ​ກອງ​ປະຊຸມ​ສູນ​ກາງ​ພັກ ຄັ້ງ​ທີ 4 ສະ​ໄໝ​ທີ XII ​ໄດ້​ຊີ້​ແຈງ​ສາ​ເຫດ​ພາວະ​ວິ​ໄສ ​ແລະ ອັດຕະວິ​ໄສ, ​ແຕ່​ກຳນົດ​ສາ​ເຫດ​ອັດຕະວິ​ໄສ​ແມ່ນ​ຕົ້ນ​ຕໍ່. “ສາ​ເຫດ​ທີ່​ເລິກ​ເຊິ່ງ, ຕົ້ນຕໍ່ ຂອງ​ສະພາບ​ການ​ເສື່ອ​ມ​ໂຊມ​ຢູ່​ໃນ​ພະນັກງານ, ສະມາຊິກ​ພັກ​ພາກສ່ວນ​ໜຶ່ງນັ້ນ ກ່ອນ​ອື່ນ​ໝົດ​ແມ່ນ​ຍ້ອນ​ກະ​ໂຕ​ບັນດາ​ພະນັກງານ, ສະມາຊິກ​ນັ້ນຂາດ​ການ​ຝຶກ​ຝົນ​ຫຼໍ່​ຫຼອມ, ​ຫຼັກ​ໝັ້ນແນວ​ຄິດບໍ່​ໜັກ​ແໜ້ນ, ສັ່ນ​ຄອນ ຫວາດ​ຫວັ່ນ​ຕໍ່​ການ​ກະທົບ​ຈາກ​ພາຍ​ນອກ; ຖືກ​ຕົກ​ໃສ່​ລັດທິ​ເອກະ​ຊົນ, ​ເຫັນ​ແກ່​ຕົວ​ເອງ, ​ໃຈ​ແຄບ, ຖືກ​ຈອບ​ອອຍ​ໂດຍ​ຜົນ​ປະ​ໂຫຍ​ດວັດຖຸ, ບໍ່​ເຮັດ​ຫຼ້ອນ​ໜ້າ​ທີ່ ຄວາມ​ຮັບຜິດຊອບ​ຂອງ​ຕົນຕໍ່​ພັກ, ຕໍ່​ປະຊາຊົນ”. ຢູ່​ນີ້ ຍັງ​ມີ​ຄວາມ​ຮັບຜິດຊອບ​ຂອງ​ວຽກ​ງານ​ສະຫລຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ​ກ່ຽວ​ກັບ​ການ​ກໍ່ສ້າງ​ພັກ ທີ່​ບໍ່​ເລິກ​ເຊິ່ງ, ບໍ່​ໄປ​ທັນ​ກັບ​ສະພາບ​ການ​ຕົວ​ຈິງ. ຫຼາຍ​ອົງຄະ​ນະ​ພັກ, ການຈັດ​ຕັ້ງພັກ, ຫົວໜ້າ​ຂັ້ນ​ຕ່າງໆ​ ຍັງ​ບໍ່​ມີ​ຄວາມ​ຕັດສິນ​ໃຈ​ການ​ເມືອງສູງ, ຊີ້​ນຳບໍ່​ເດັດ​ຂາດ, ຍັງ​ເຮັດ​ແບບ​ລວມໆ; ພະນັກງານ, ສະມາຊິກ​ພັກ​ຫຼາຍ​ຄົນ ບໍ່​ມີ​ຈິດ​ໃຈ​ນຳ​ໜ້າ, ບໍ່​ເປັນ​ແບບຢ່າງ. ອາດ​ຈະ​ເວົ້າ​ວ່າ, ວຽກງານ​ກໍ່ສ້າງພັກ (ວຽກ​ງານ​ອົບຮົມ​ສຶກສາ​ການ​ເມືອງ​ແນວ​ຄິດ, ວຽກ​ງານ​ທິດ​ສະ​ດີ, ວຽກ​ງານ​ຈັດ​ຕັ້ງ​ແລະ​ພະນັກງານ, ວຽກ​ງານ​ກວດກາ, ຕິດຕາມ​ກວດກາ, ວິ​ໄນ​ຂອງ​ພັກ, ວຽກ​ງານ​ຂົນຂວາຍ​ມະຫາຊົນ,...) ຍັງ​ບໍ່​ໄດ້​ຕາມ​ຄວາມ​ຕ້ອງການ.

ຫຼັກການ​ຕິ​ຊົມຕົນ​ເອງ ​ແລະ ຕິ​ຊົມ ​ແມ່ນ​ໜຶ່ງ​ໃນ​ບັນດາ​ຫຼັກການ​ພື້ນຖານ​ຂອງ​ການ​ກໍ່ສ້າງພັກ, ຂອງ​ການຈັດ​ຕັ້ງ​ ​ແລະ ​ເຄື່ອນ​ໄຫວຂອງພັກກອມ​ມູນິດ. ທ່ານ​ປະທານ​ໂຮ່ຈີ​ມິນ​ເຄີຍ​ຖື​ວ່າ “ຕິ​ຊົມ​ຕົນ​ເອງ ​ແລະ ຕິ​ຊົມ​ແມ່ນ​ອາວຸດ​ທີ່​ແຫຼມ​ຄົມ​ທີ່​ສຸດ, ມັນ​ຊ່ວຍ​ໃຫ້​ພັກ​ເຮົາ​ແຂງ​ແຮງ ​ແລະ ນັບ​ມື້​ນັບ​ແຂງ​ແຮງ​ກວ່າ​​​ອີກ. ອາ​ໃສ​ການ​ຕິ​ຊົມ​ພວກ​ເຮົາ​ແກ້​ໄຂ​ຂໍ້​ຜິດພາດ, ​ເສີມ​ຂະຫຍາຍ​ຈຸດ​ດີ, ກ້າວໜ້າ​ຢ່າງ​ບໍ່​ຢຸດ​ຢັ້ງ”(3). ​ແຕ່, ​ໃນ​ເວລາ​ທີ່​ຜ່ານ​ມາ ການ​ປະຕິບັດ​ຫຼັກການ​ນີ້​ບໍ່​ເຂັ້ມງວດ ຈຶ່ງ​ພາ​ໃຫ້​ມີ​ການ​ກະທົບ​ທີ່​ບໍ່​ສະດວກ, ຄວາມ​ສັກສິດ​ແລະ​ປະສິດທິ​ຜົນ​ຕ່ຳ. ຜ່ານ​ການ​ສະຫລຸບ​ສັງ​ລວມການ​ປະຕິບັດມະຕິ​ກອງ​ປະຊຸມ​ສູນ​ກາງພັກ ​ຄັ້ງ​ທີ 4 ສະ​ໄໝ​ທີ XI ກ່ຽວ​ກັບ​ການ​ກໍ່ສ້າງ​ພັກ, ​ເອກະ​ສາກ​ອງປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ສັງ​ເກດ: “​ໃນການ​ຕິ​ຊົມຕົນ​ເອງ ​ແລະ ຕິ​ຊົມ, ຍັງ​ມີ​ສະພາບ​ການ​ຈົ່ງ​ຈຽມ, ຫລີກ​ລ່ຽງ, ຢ້ານ​​ແຕະຕ້ອງ​ກັນ ຫຼາຍ​ພໍ​ຄວນ, ພະນັກງານ ສະມາຊິກ​ພັກ​ຈຳນວນ​ໜຶ່ງ ຍັງ​ບໍ່​ທັນ​ຕື່ນ​ຕົວ​ເພື່ອ​ຮັບ​ຮູ້​ໃຫ້​ຖືກຕ້ອງ​ກ່ຽວ​ກັບຂໍ້​ຂາດ​ຕົກ​ບົກພ່ອງ ​ແລະ ຄວາມ​ຮັບຜິດຊອບ​ຂອງ​ຕົນ ​ໃນ​ການ​ປະຕິບັດ​ວຽກ​ງານ​ທີ່​ໄດ້​ຮັບ​ມອບ​ໝາຍ. ​ໃນ​ບາງ​ບັນຫາ, ຜ່ານ​ການ​ສຳ​ຫຼວດກວດກາ​ຂອງ​ອົງ​ຄະນະ​ພັກ, ການຈັດ​ຕັ້ງ​ພັກ​ຂັ້ນ​ຕ່າງໆ ​ແຕ່​ສູນ​ກາງ​ຮອດ​ຮາກ​ຖານ ​ຍັງ​ບໍ່​ທັນ​ເຮັດ​ໃຫ້​ເຫັນ​ແຈ້ງ​ກ່ຽວ​ກັບ​ເນື້ອ​ແທ້, ຄວາມ​ຮຸນ​ແຮງ​ຂອງ​ສະພາບ​ການ, ​ເກີດ​ຂຶ້ນ​ຢູ່​ບ່ອນ​ໃດ, ​ໃຜ​ເປັນ​ຜູ້​ຮັບຜິດຊອບ, ​ເຊັ່ນ ສະພາບ​ຄວາມ​ເສື່ອ​ມ​ໂຊມ​ດ້ານ​ແນວຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ; ສະພາບ​ການ​ວິ້ງ​ເຕັ້ນຫາ​ຍົດສັກ, ວິ້ງ​ເຕັ້ນ​ເພື່ອ​ບໍ່​ຖືກ​ລົງ​ໂທດ, ສໍ້ລາດ​ບັງ​ຫຼວງ, ຜົນ​ປະ​ໂຫຍ​ດໝູ່​ພວກ”(4). ຈິດຕະສາດ “ຖື​ຄວາມ​ຖືກຕ້ອງ​ປອງ​ດອງ​ເປັນ​ຍອດ​ດີ”, “​​ໃຫ້ເພິ່ນ​ມີ​ຄວາມ​ສະດວກ​ ​ເຮົາ​ກໍ່​ຈະ​ໄດ້​ຮັບ​ຄວາມ​ສະດວກ”, “ໜັກ​ທາງ​ອາລົມ​ຈິດ, ​ເບົາ​ທາງ​ເຫດຜົນ” ຂອງ​ຫຼາຍຄົນ ​ກໍ່​ເປັນຜົນ​ກະທົບ​ເຖິງ​ປະສິດທິ​ຜົນ​ຂອງ​ການ​ຕິ​ຊົມ​ຕົນ​ເອງ ​ແລະ ຕິ​ຊົ​​ມ. ​ເພາະສະ​ນັ້ນ, ຕ້ອງ​ສືບຕໍ່​ຢຶດໝັ້ນ ປັບປຸງ​ຫຼັກການ​ນີ້, ​ແຕ່​ຕ້ອງ​ກໍ່ສ້າງບັນດາ​ກົດ​ລະບຽບ, ຂໍ້​ບັງຄັບ​ກ່ຽວ​ກັບ​ການ​ປະຕິບັດ​ຫຼັກການ​ນີ້ຢ່າງ​ແໜ້ນ​ແຟ້ນ ​ເຂັ້ມ​ງວດ, ສົມທົບ​ກັບ​ບັນດາ​ຫຼັກການ, ບັນດາ​ມາດ​ຕະການ​ອື່ນ, ​ເຊັ່ນ​ມີ​ກົນ​ໄກ​ກວດກາ, ຕິດຕາມ​ກວດກາ​ພາຍ​ໃນ​ພັກ ​ແລະ ການ​ຕິດຕາມ​ກວດກາ​ຂອງ​ມະຫາ​ປະຊາຊົນ. ພະນັກງານທີ່​ມີ​ອຳນາດ​ທຸກ​ຄົນ​ລ້ວນ​ແຕ່​ຕ້ອງ​ຖືກ​ຕິດຕາມ​ກວດກາ, ບໍ່​ໃຫ້​ອຳນາດ​ໃດໆຢູ່​ນອກ​ການ​ຕິດຕາມ​ກວດກາ, ບໍ່​ປະ​ໃຫ້​ອຳນາດ​ຖືກ​ລ່ວງ​ລະ​ເມີດ (ລະ​ເມີດ​ອຳນາດ, ລ່ວງ​ອຳນາດ, ​ໃຊ້​ອຳນາດ​ເພື່ອ​ຜົນ​ປະ​ໂຫຍ​ດສ່ວນ​ຕົວ, ຜົນ​ປະ​ໂຫຍ​ດໝູ່​ພວກ...). ສຳລັບ​ພະນັງານ ສະມາ​ຊິກ​ພັກ​ທີ່​ກະທຳ​ຜິດ ຕ້ອງ​ຖືກ​ແກ້​ໄຂ​ຢ່າງ​ເດັດດ່ຽວ, ​ແກ້​ໄຂ​ຢ່າງ​ທັນ​ການ ຊັດ​ເຈນ ​ເປີດ​ເຜີຍ ​ໂປ່​ງ​ໃສ ຍຸຕິ​ທຳ, ມີ​ຄວາມ​ຮັບຜິດຊອບ​ອະທິບາຍ. ກະ​ຊັບ​ຮັດ​ແໜ້ນ​ລະບຽບ ວິ​ໄນ ​ຢູ່​ໃນ​ພັກ; ພັກ​ມີ​ລະບຽບ​ວິ​ໄນ ສັງຄົມ​ຈຶ່ງ​ມີ​ລະບຽບ​ວິ​ໄນ. ຕ້ອງ​ປ່ຽນ​ແປງ​ໃໝ່​ວຽກງານ​ພະນັກງານ​ຢ່າງ​ແຂງ​ແຮງ ນັບ​ແຕ່​ການ​ຕີ​ລາຄາ, ວາງ​ແຜນ​ກຳນົດ, ອົບຮົມ​ກໍ່ສ້າງ, ​ຜັດປ່ຽນ, ນຳ​ໃຊ້, ຈັດ​ວາງສັບ​ຊ້ອນ, ​ເລື່ອນ​ຊັ້ນ​ຕຳ​ແໜ່​ງ ​ແລະ ນະ​ໂຍບາຍ​ພະນັກງານ. ສະມາຊິກ​ພັກ​ຕ້ອງ​ກ້າ​ທີ່​ຈະ​ເສຍສະຫຼະ​ຜົນ​ປະ​ໂຫຍ​ດສ່ວນ​ບຸກຄົນ ​ເພື່ອ​ຜົນ​ປະ​ໂຫຍ​ດຂອງສ່ວນ​ລວມ, ຂອງ​ພັກ, ຂອງ​ຊາດ; ຕ້ອງ​ຫລຸດຜ່ອນ “ຄວາມ​ໂລບ​ມາກ​ກ່ຽວ​ກັບ​ວັດຖຸ” ​ແລະ “ຄວາມ​ໂລ​ບມາກ​ກ່ຽວ​ກັບ​ອຳນາດ”. ຕ້ອງ​ຕໍ່ສູ້ຕ້ານລັດທິ​ເອກະ​ຊົນ​ພາຍ​ໃຕ້​ທຸກ​ຮູບ​ການ​ແລະ​ທຸກ​ເລ່ກົນຂອງ​ມັນ ຍ້ອນ​ຄື​ດັ່ງ​ທີ່​ທ່ານ​ປະທານ​ໂຮ່ຈີ​ມິນ ​ໄດ້​ຊີ້​ໃຫ້​ເຫັນ​ວ່າ, ລັດ​ທິເອກະ​ຊົນ​ເປັນ​ຕົ້ນ​ກຳເນີດຂອງ​ພະຍາດ​ຕ່າງໆ​ເຊັ່ນ ອາດຍາ​ສິດ, ສໍ້​ລາດ​ບັງ​ຫຼວງ, ຖື​ຕົວ​ເອງ​ເປັນ​ອາດຍາ​ສຳຄັນ, ອວດອົ່ງ​ຈອງຫອງ, ມັກ​ໃຊ້​ຄຳ​ສັ່ງ...

ປະຈຸ​ບັນ, ການ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ​ໄດ້​ສະ​ແດງ​ອອກ​ຈະ​ແຈ້ງ​ທີ່​ສຸດ​ໃນ ​ການຫ່າງ​ເຫີ​ນ, ປະຕິ​ເສດ​ຮາກ​ຖານ​ແນວ​ຄິດ​ຂອງ​ພັກ, ຫ່າງ​ເຫີ​ນ​ເປົ້າ​ໝາຍ ອຸດົມ​ຄະຕິ​ຂອງ​ພັກ. ສະພາບ​ການ “ຈືດຈາງ​ຫ່າງ​ເຫີ​ນພັກ”, “ຈືດຈາງ​ຫ່າງ​ເຫີ​ນການ​ເມືອງ”, “ຈືດຈາງ​ຫ່າງ​ເຫີ​ນລັດທິ” ​ໄດ້​ຜັນ​ແປ​ຢ່າງ​ສັບສົນ. ມີ​ສະມາຊິກ​ພັກ​ບໍ່​ກ້າ​ເວົ້າ​ອອກປາກ ​ແຕ່​ກໍ່​ມີ​ສະມາຊິກ​ພັກ​ຫຼາຍ​ຄົນ​ໄດ້​ແຜ່​ກະ​ຈາຍທັດສະ​ນະ​ທີ່​ຜິດ​ພາດຢ່າງ​ເປີດ​ເຜີຍ​ໃນ ອິນ​ເຕີ​ເນັດ, ​ໃນ​ປຶ້ມ​ ໜັງສືພິມ, ຊ້ຳ​ບໍ່​ໜຳ​ ​ມີ​ສະມາຊິກ​ພັກ​ໄດ້​ສະ​ເໜີ​ໃຫ້​ແກ້​ໄຂ​ໂຄງການ​ການ​ເມືອງ, ​ໃຫ້​ລຶບລ້າງ​ລັດ​ທິມາກ​ - ​ເລ​ນິນ​ອອກ​ຈາກ​ຮາກ​ຖານ​ແນວ​ຄິດ​ຂອງ​ພັກ, ​ໃຫ້​ລົບ​ລ້າງ​ລັດທິ​ສັງຄົມ​ນິຍົມອອກ​ຈາກ​ເປົ້າໝາຍ ອຸດົມ​ຄະຕິ​ຂອງ​ພັກ. ມັນຖືກຕ້ອງ​ຄື​ດັ່ງຄຳ​ສັງ​ເກດ​​ໃນ​ເອກະ​ສານ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ: “ພະນັກງານ ສະມາຊິກ​ພັກ​ຈຳນວນ​ໜຶ່ງ​ທີ່​ບໍ່​ໜ້ອຍ​ ໄດ້​ມີ​ປະກົດ​ການສັ່ນ​ຄອນ, ​ເສຍ​ທິດ​ທາງ, ລະ​ແວງ​ສົງ​ໄສ​ກ່ຽວ​ກັບ​ບົດບາດນຳ​ພາ​ຂອງ​ພັກ, ກ່ຽວ​ກັບ​ເປົ້າ​ໝາຍ ອຸດົມ​ຄະຕິ ​ແລະ ​ເສັ້ນທາງ​ຂຶ້ນ​ສູ່​ສັງຄົມ​ນິຍົມຢູ່​ຫວຽດນາມ”(5). ນີ້​ແມ່ນ​ບັນດາ​ທັດສະນະ​ຜິດ​ພາດ​ທີ່​ເປັນ​ອັນຕະລາຍ​ທີ່​ສຸດ, ຖ້າ​ຫາກ​ບໍ່​ຕຳ​ໜິວິພາກ, ກີດ​ກັ້ນ, ຍູ້​ຖອຍ ມັນ​ຈະ​ເປັ​ນຜົນ​ເສຍ​ຫາຍ​ໃຫ້​ແກ່​ພັກ ​ແລະ ລະບອບ​ສັງຄົມ​ນິຍົມ. ບົດຮຽນ​ປະສົບ​ການ​ກ່ຽວ​ກັບ​ການ​ພັງ​ທະລາ​ຍລົງ​ ຂອງ​ພັກ​ກອມ​ມູນິດ​ສະຫະພາບ​ໂຊ​ວຽດ ​ແລະ ລະບອບ​ໂຊ​ວຽດ ​ໄດ້​ໃຫ້​ເຫັນ​ວ່າ ​ເມື່ອ​ລະບົບ​ແນວ​ຄິດ​ຂອງ​ພັກ​ຖືກ​ເປື່ອ​ເລ້ ​ແມ່ນ​ພັກ​ກອມ​ມູນິດ ​ແລະ ລະບອບ​ສັງຄົມ​ນິຍົມ ກໍ່ຈະ​ຖືກ​ພັງ​ທະ​ລາຍ​ຢ່າງ​ແນນ​ອນ.

ດັ່ງ​ນັ້ນ ຕ້ອງ​ຕັ້ງໜ້າ​ຕໍ່ສູ້​ເພື່ອ​ປົດ​ປັກ​ຮັກສາ​ຮາກ​ຖານ​ແນວ​ຄິດ​ຂອງ​ພັກ, ປົກ​ປັກ​ຮັກສາ​ເປົ້າ​ໝາຍ ອຸດົມ​ຄະຕິ​ຂອງ​ພັກ. ຢາກ​ໄດ້​ຄື​ແນວ​ນັ້ນ, ດ້ານ​ໜຶ່ງ, ຕ້ອງ​ເຮັດ​ເປັນ​ຢ່າງ​ດີ ວຽກ​ງານ​ນຳພາ ຄຸ້ມ​ຄອງ​ບໍລິຫານ, ໜ້າ​ທີ່​ກໍ່ສ້າງ ​ແລະ ພັດທະນາ​ເສດຖະກິດ-ສັງຄົມ, ປົກ​ປັກ​ຮັກສາ​ປະ​ເທດ​ຊາດ; ດ້ານ​ອື່ນ, ຕ້ອງ​ສືບ​ຕໍ່​ປ່ຽນ​ແປງ​ໃໝ່​ຈິນຕະນາການ, ຍູ້​ແຮງ​ການ​ສະຫລຸບ​ສັງ​ລວມພຶດຕິ​ກຳ, ຄົ້ນ​ຄວ້າທິດ​ສະ​ດີ​ ກ່ຽວ​ກັບ​ລັດທິ​ສັງຄົມ​ນິຍົມ, ກ່ຽວ​ກັບ​ການ​ປ່ຽນ​ແປງ​ໃໝ່ ​ແລະ ກໍ່ສ້າງ​ສັງຄົມ​ນິຍົມ ຢູ່​ຫວຽດນາມ. ຕ້ອງ​ສືບ​ຕໍ່​ຄົ້ນຄວ້າ​ລັດທິ​ມາກ - ​ເລ​ນິນ​ຢ່າງ​ມີ​ລະ​ບົບ, ມີ​ຕຳ​ຫຼັບ​ຕຳລາ, ​ເລິກ​ເຊິ່ງ, ​ເພື່ອ​ຜ່ານ​ສິ່ງ​ດັ່ງກ່າວ ທຳ​ຄວາມ​ກະຈ່າງ​ແຈ້ງ​ກ່ຽວ​ກັບ​ບັນ​ດາຄຳ​ພິນິດ​ວິທະຍາ​ພື້ນຖານ​ຂອງ​ລັດທິ​ມາກ - ​ເລ​ນິນ ຊຶ່ງ​ກ່ອນ​ໜ້າ​ນີ້ຖືກຕ້ອງ, ດຽວ​ນີ້​ກໍ່​ຍັງ​ຖືກຕ້ອງ ​ແລະ ​ໃນ​ຍາວ​ນາ​ຕໍ່​ໄປ​ກໍ່​ຍັງ​ຄົງ​ຖືກຕ້ອງ​ຢູ່; ທຳ​ຄວາມ​ກະຈ່າງ​ແຈ້ງວ່າ ຄຳ​ພິນິດ​ວິທະຍາ​ໃດ​ຂອງ​​ມາກ, ອັງ​ແກນ, ​ເລ​ນິນ​ ​ແມ່ນ​ຖືກຕ້ອງ ​ແຕ່ມັນ​ຖືກ​ຮັບ​ຮູ້​ຜິດ​ແລະ​ເຮັດ​ຜິດ; ບັນດາຄຳ​ພິນິດ​ວິທະຍາ​ໃດ​ຂອງພວກ​ເພິ່ນ​ທີ່​ບໍ່​ສອດຄ່ອງ​ກັບສະພາບ​ການ​ຕົວ​ຈິງອີກ ຍ້ອນປະຫວັດສາດ​ໄດ້ຜ່ານ​ຂ້າມ​ແລ້ວ;... ​ແລະ​ສິ່ງ​ທີ່​ສຳຄັນ​ກວ່າ​ນັ້ນ​ແມ່ນ ຕ້ອງຂະຫຍາຍ ​ເພີ່ມ​ເຕີມ​ລັດທິ​ມາກ - ​ເລ​ນິນ ​ໃຫ້​ສອດ​ຄ່ອງ​ກັບ​ເງື່ອນ​ໄຂ​ປະຫວັດສາດ​ໃໝ່. ໝາຍ​ຄວາມ​ວ່າ ຕ້ອງ​ຢຶດໝັ້ນ ​ແລະ ປະດິດ​ສ້າງ​ໃນ​ການ​ຮັບ​ຮູ້, ໝູນ​ໃຊ້, ຂະຫຍາຍ​ລັດທິ​ມາກ - ​ເລ​ນິນ. ພ້ອມ​ກັນ​ນັ້ນ ຕ້ອງ​ປ່ຽນ​ແປງ​ໃໝ່ ​ແລະ ຍົກ​ສູງ​ຄຸນ​ນະພາ​ບ​ໃນ​ການ​ຮ່ຳຮຽນ​ລັດທິ​ມາກ - ​ເລ​ນິນ, ​ແນວ​ຄິດ​ໂຮ່ຈີ​ມິນ, ຮ່ຳຮຽນ​ທິດ​ສະ​ດີກາ​ນ​ເມືອງ, ​ຮັດ​ແໜ້ນລະບຽບ​ວິ​ໄນ​ໃນ​ການ​ສິດສອນ ​ແລະ ຮ່ຳຮຽນທິດ​ສະ​ດີ ຢູ່​ໃນບັນດາ​ໂຮງຮຽນ​ການ​ເມືອງ, ສະ​ຖາ​ບັນ, ມະຫາວິທະຍາ​ໄລ, ວິທະຍາ​ໄລ. ພຽງ​ແຕ່​ເຮັດ​ຄື​ແນວ​ນັ້ນ ຈຶ່ງ​ສ້າງ​ໃຫ້​ມີ​ຄວາມ​ເປັນ​ເອກະ​ພາບທາງ​ດ້ານ​ແນວ​ຄິດ​ການ​ເມືອງ​ພາຍ​ໃນ​ພັກ, ຈຶ່ງ​ມີ​ພື້ນຖານ​ວິທະຍາສາດ​ຢ່າງ​ພຽງພໍ ​ເພື່ອ​ຕໍ່ສູ້​ຕ້ານການ​ເສື່ອ​ມ​ໂຊ​ມທາງ​ດ້ານ​ແນວ​ຄິດ​ການ​ເມືອງ, ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ, ຕໍ່ສູ້​ຕ້ານ​ບັນດາ​ທັດສະນະ​ທີ່​ຜິດພາດ, ​ເປັນ​ປໍ​ລະ​ປັກ ​ເພື່ອ​ປົກ​ປັກ​ຮັກ​ສາ​ພັກ, ປົກ​ປັກ​ຮັກສາ​ລະບອບ​ສັງຄົມ​ນິຍົມ.

ດ້ວຍ​ຄວາມ​ຕັດສິນ​ໃຈ​ການ​ເມືອງ​ສູງ​ຂອງ​ພັກ ​ແລະ ລະບົບ​ການ​ເມືອງທັງ​ໝົດ, ການ​ເຂົ້າ​ຮ່ວມ​ຢ່າງຕັ້ງໜ້າ​ຂອງ​ມະຫາ​ປະຊາຊົນ​ທີ່​ໜາ​ແໜ້ນ, ຫວັງ​ວ່າການ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ ຄັ້ງ​ທີ 4 ສະ​ໄໝ​ທີ XII ຈະ​ບັນລຸ​ເປົ້າ​ໝາຍ​ທີ່​ໄດ້​ວາງ​ອອກ​ມາ. ຜ່ານ​ສິ່ງ​ດັ່ງກ່າວ​ນັ້ນ​ ຮັກສາ​ຄວາມ​ໝັ້ນຄົງ ​ແລະ ພັດທະນາ​ລະບອບ​ການ​ເມືອງ​ຢູ່​ຫວຽດນາມ​ຢ່າງ​ຍືນ​ຍົງ, ປະຕິບັດຢ່າງ​ສຳ​ເລັດ​ຜົນ ​ເປົ້າ​ໝາຍປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ​, ມີ​ປະຊາທິປະ​ໄຕ, ຍຸຕິ​ທຳ ​ແລະ ສີວິ​ໄລ./.

​ໂດຍ ສຈ. ປອ. ​ເລ​ຫື​ວ​ເງ໊ຍ

ສະ​ຖາ​ບັນ​ການ​ເມືອງ​ແຫ່ງ​ຊາດ​ໂຮ່ຈີ​ມິນ

 -------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ເລກທີ 892 (​ເດືອນ​ກຸມພາ 2017)

(1) ມະຕິ​ກອງ​ປະຊຸມ​​ຄັ້ງ​ທີ 4 ຄະນະ​ບໍລິຫານ​ງານສູນ​ກາງພັກ ສະ​ໄໝ​ທີ XII “ກ່ຽວ​ກັບ​ການ​ເພີ່ມ​ທະວີ​ການ​ກໍ່ສ້າງ, ປັບ​ປຸງ​ພັກ; ກີດ​ກັ້ນ ​ແລະ ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນ​ວຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ, ບັນດາ​ປະກົດ​ການ “ຜັນ​ປ່ຽນ​ດ້ວຍ​ຕົນ​ເອງ”, “ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ”

(2) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 198.

(3) ​ໂຮ່ຈີ​ມິນ: ນິພົນ​ຄົບ​ຊຸດ, ສຳນັກ​ພິມ​ຈຳໜ່າຍ​ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2002, ​ເຫຼັ້ມ 7, ໜ້າ 575.

(4) ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ປຶ້ມ​ທີ່​ໄດ້​ແນະນຳ, ໜ້າ 184.

(5) ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ປຶ້ມ​ທີ່​ໄດ້​ແນະນຳ, ໜ້າ 195.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ