ວັນຈັນ, 23/10/2017
ສາຍພົວພັນມິດຕະພາບຫວຽດນາມ-ລາວ "ໝັ້ນຄົງຂະໜົງແກ່ນຊ່ົ່ວກາລະນານ"
19/7/2017 20:57' ສົ່ງ ພິມ
ສະຫາຍເລຂາທິການໃຫຍ່ ຫງວຽນຝູຈ້ອງ ກ່າວຄຳເຫັນທີ່ພິທີສະເຫຼີມສະຫຼອງ (ພາບ: TTXVN)

ຮຽນ​ບັນດາ​ຜູ້​ແທນ, ບັນດາ​ແຂ​ກຜູ້​ມີ​ກຽດ,

ຮຽນ​ບັນດາ​ສະຫາຍ​ຫວຽດນາມ ​ແລະ ລາວ,

ມື້​ນີ້, ດ້ວຍ​ຄວາມ​ເອກອ້າງ​ທະ​ນົງ​ໃຈ, ຄວາມ​ເບີກບານ​ມ່ວນ​ຊື່ນ​ ຕໍ່ໜ້າ​ບັນດາ​ບາດກ້າວ​ຂະຫຍາຍຕົວທີ່​ດີງາມ​ທີ່​ສຸດ ​ຂອງ​ສາຍ​ພົວພັນ​ແບບ​ພິ​ເສດ​ລະ​ຫວ່າງ​ສອງ​ປະ​ເທດ​ຫວຽດນາມ ​ແລະ ລາວ, ພວກ​ເຮົາ​ດີ​ໃຈ​ທີ່​ໄດ້​ມາ​ເຕົ້າ​ໂຮມ​ຢູ່​ທີ່ນີ້​ ເພື່ອສະ​ເຫຼີ​ມສະຫຼອງ​ວັນ​ສ້າງ​ຕັ້ງ​ການ​ພົວພັນ​ທາງ​ການ​ທູດ​ຫວຽດນາມ-ລາວ ຄົບຮອບ 55 ປີ ແລະ ວັນ​ເຊັນ​ສົນທິສັນຍາ​ມິດຕະພາບ​ແລະ​ການ​ຮ່ວມ​ມື​ຫວຽດນາມ-ລາວ ຄົບຮອບ 40 ປີ ຢ່າງ​ສົມ​ກຽດ.

​ໃນ​ບັນຍາກາດ​ທີ່​ເຕັມ​ໄປ​ດ້ວຍ​ຄວາມ​ສາມັກຄີ​ມິດຕະພາບ ​ແລະ ​ໃນ​ຄວາມ​ເບີກບານ​ມ່ວນ​ຊື່ນ​ລວມຂອງ​ສອງ​ຊາດ, ພວກ​ເຮົາ​ສະ​ແດງ​ຄວາມ​ຍິນ​ດີ​ທີ່​ສຸດ​ທີ່​ໄດ້​ຕ້ອນຮັບ​ຄະນະ​ຜູ້​ແທນ​ຂັ້ນ​ສູງ​ຂອງ​ພັກ​ແລະ​ລັດ​ລາວ ​ໂດຍ​ສະຫາຍ ພັນ​ຄຳ ວິພາ​ວັນ, ກຳມະການ​ກົມ​ການ​ເມືອງ, ຜູ້​ປະຈຳການ​ຄະນະ​ເລຂາທິການ, ຮອງ​ປະທານ​ປະ​ເທດ​ແຫ່ງ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ນຳ​ໜ້າມາ​ຮ່ວມ​ພິທີ​ສະ​ເຫຼິມສະຫຼອງ​ທີ່​ສົມ​ກຽດ​ນີ້ ​ແລະ ນຳ​ເອົາ​ໄມຕີ​ຈິດ​ມິດ​ຕະພາບ​ອັນດີງາມ ຄວາມ​ສະໜິດສະໜົມ ມາ​ໃຫ້​ພັກ, ລັດ ​ແລະ ປະຊາຊົນ​ຫວຽດນາມ.

ຕາງໜ້າ​ການ​ນຳພັກ, ລັດ ​ແລະ ປະຊາຊົນ​ຫວຽດນາມ, ຂ້າພະ​ເຈົ້າ​ຂໍ​ຝາກ​ຄວາມ​ຮັກ​ແພງ​ແລະ​ຄວາມ​ອວຍພອນ​ໄຊ​ອັນ​ປະ​ເສີດ​ທີ່​ສຸດ​ ມາ​ຍັງ​ສະຫາຍ ຄຳ​ພັນ ວິພາ​ວັນ, ບັນດາ​ສະຫາຍ​ລາວ​ທີ່​ມີໜ້າ​ຢູ່​ທີ່​ນີ້ ​ແລະ ຜ່ານ​ບັນດາ​ສະຫາຍ ​ຂ້າພະ​ເຂົ້າ​ຂໍຝາກ​ຄວາມ​ຮັກ​ແພງ​ແລະ​ຄວາມ​ອວຍພອນ​ໄຊ​ອັນ​ປະ​ເສີດ​ທີ່​ສຸດ​ ໄປ​ຍັງ​ພັກ, ລັດ ​ແລະ ປະຊາຊົນ​ລາວ​ອ້າຍ​ນ້ອງ.

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ,

ຫວຽດນາມ ​ແລະ ລາວ​ເປັນ​ສອງ​ປະ​ເທດ​ເພື່ອນ​ບ້ານ​ໃກ້​ຄຽງ, ມີ​ພູຜາ​ປ່າດົງ​ ແມ່​ນ້ຳ​ລຳ​ເຊ​ຕິດ​ຈອດ​ກັນ, ຮ່ວມ​ກັນ​ກິນ​ນ້ຳ​ໃນ​ແມ່​ນ້ຳຂອງ ​ແລະ ອີງ​ໃສ່​ສາຍພູ​ຫຼວງທີ່​ໃຫຍ່​ໂຕ​ມະ​ໂຫຖານ, ປະຊາຊົນ​ສອງ​ປະ​ເທດ​ມີ​ສາຍ​ພົວພັນ​ທີ່ເປັນມູນ​ເຊື້ອ, ຊື່ສັດ​ຕໍ່​ກັນ​ແລະ​ຕິດ​ພັນສະໜິດ​ແໜ້ນ​ນຳ​ກັນ​ມາ​ແຕ່ດົນ​ນານ. ພິ​ເສດ, ນັບ​ແຕ່​ເມື່ອ​ມີ​ການ​ກໍ່​ຕັ້ງ​ແລະນຳພາ​ຂອງ​ພັກ​ກອມ​ມູນິດ​ອິນດູຈີນ, ຕໍ່​ມາ​ແມ່ນ ພັກ​ກອມ​ມູນິດ​ຫວຽດນາມ ​ແລະ ພັກ​ປະຊາຊົນ​ປະຕິວັດ​ລາວ, ສາຍ​ພົວພັນ​ນັ້ນ​ນັບ​ມື​ນັບ​ໄດ້​ເປີດ​ກວ້າງ​ແລະ​ຂະຫຍາຍຕົວ, ​ແລະ​ໄດ້​ຮັບ​ການ​ຍົກ​ສູງ​ຂຶ້ນ​ທາງ​ດ້ານ​ຄຸນ​ນະພາ​ບ. ດ້ວຍ​ທິດ​ນຳ​ທີ່​ມີ​ຈິດ​ໃຈ​ມະນຸດ​ອະລິຍະ​ທຳແລະມີ​ຄວາມ​ໝາຍ​ເລິກ​ເຊິ່ງ ທີ່​ປະທານ​ໂຮ່ຈີ​ມິນ​ຊີ້​ແຈງ "ຊ່ວຍ​ເຫຼືອ​ເພື່ອນ​ແມ່ນ​ຕົນ​ຊ່ວຍ​ຕົນ​ເອງ" ສອງ​ຊາດຫວຽດນາມແລະລາວ​ໄດ້​ຄຽງ​ບ່າ​ຄຽງ​ໄຫຼ່​ກັນ, ຮ່ວມ​ທຸກ​ຮ່ວມ​ສຸກ​ນຳ​ກັນ, ກໍ່ສ້າງ​ໄມຕີ​ຈິດ​ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ແບບ​ພິ​ເສດ ​ແລະ ການ​ຮ່ວມ​ມື​ຮອບດ້ານ, ກາຍ​ເປັນ​ຊັບ​ສົມບັດ​ອັນ​ລ້ຳ​ຄ່າ, ​ແຫຼ່ງພະລັງ​ອັນ​ປະ​ເສີດ ​ແລະ ​ປັດ​ໄຈ​ອັນ​ສຳຄັນ​ທີ່​ສຸດ ທີ່​ຮັບປະກັນ​ຜົນສຳ​ເລັດ​ຂອງ​ແຕ່ລະ​ປະ​ເທດ.

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ,

ກ່ອນ​ໜ້າ​ນີ້ 55 ປີ, ​ໃນ​ສະພາບ​ການ​ຕໍ່ສູ້​ຕ້ານ​ອາ​ເມ​ລິ​ກາ, ກູ້​ຊາດ​ຂອງ​ປະຊາຊົນຫວຽດນາມແລະປະຊາຊົນລາວ ກ້າວ​ເຂົ້າ​ສູ່​ໄລຍະ​ຫຍຸ້ງຍາກ ດຸ​ເດືອດ, ​ແຕ່​ດ້ວຍ​ບັນດາ​ໄຊຊະນະ​ທີ່​ສຳຄັນ​ທາງ​ດ້ານ​ການ​ເມືອງ, ການ​ທະຫານ, ການ​ທູດ​ຂອງການ​ປະຕິວັດ​ລາວ, ສັນຍາ​ເຊີ​ແນວ​ ປີ 1962 ກ່ຽວ​ກັບ​ລາວ​ໄດ້​ຮັບ​ການ​ລົງ​ນາມ, ​ເປີດ​ໄລຍະ​ແຫ່ງ​ການ​ຂະຫຍາຍຕົວ​ໃໝ່​ ​ໃຫ້​ແກ່ການ​ປະຕິວັດ​ສອງ​ປະ​ເທດລາວ ​ແລະ ຫວຽດນາມ. ດ້ວຍ​ໂອ​ກາດ​ແລະ​ເງື່ອນ​ໄຂ​ສະດວກ​ດັ່ງກ່າວ​ນັ້ນ, ສອງ​ປະ​ເທດ​ໄດ້​ສ້າງ​ຕັ້ງ​ການ​ພົວພັນ​ທາງ​ການ​ທູດ​ຢ່າງ​ເປັນ​ທາງ​ການຂຶ້ນ​ ໃນ​ວັນ​ທີ 5 ກັນຍາ 1962. ນີ້​ແມ່ນ​ເຫດການ​ປະຫວັດສາດ​ທີ່​ສຳຄັນ, ​ເປັນ​ຫຼັກ​ໝາຍທີ່​ສຳຄັນ​ທີ່​ສຸດ​ ໃນ​ການ​ພົວພັນ​ລະຫວ່າງ​ສອງ​ປະ​ເທດ, ຢືນຢັນ​ຄວາມ​ຜູກ​ພັນ​ຊະ​ຕາ​ກຳ​ຂອງ​ສອງ​ຊາດ ​ໃນ​ການ​ຕໍ່ສູ້​ຍາດ​ເອົາ​ເອກະລາດ​ແຫ່ງ​ຊາດ ​ແລະ ​ໂຮມ​ປະ​ເທດ​ເປັນ​ເອກະ​ພາບ​ ຂອງ​ປະຊາຊົນ​ແຕ່ລະ​ປະ​ເທດ.

ພາຍຫຼັງ​ທີ່​ສອງ​ປະ​ເທດ​ໄດ້​ຮັບ​ການ​ປົດ​ປ່ອຍ​ຢ່າງ​ສົມບູນ​ໃນ​ປີ 1975, ​ເພື່ອ​ເຮັດ​ໃຫ້​ຄວາມ​ພົວພັນຫວຽດນາມ-ລາວ ຂະຫຍາຍຕົວ​ຮອບດ້ານ ​ແລະ ນັບ​ມື້​ນັບ​ເຂົ້າ​ສູ່​ລວງ​ເລິກ, ສອງ​ປະ​ເທດ​ໄດ້​ເຊັນ​ສົນທິສັນຍາ​ມິດຕະພາບ​ແລະ​ການ​ຮ່ວມ​ມື ​ໃນ​ວັນ​ທີ 18 ກໍ​ລະ​ກົດ 1977, ​ໃນ​ນັ້ນ​ເນັ້ນ​ໜັກ: "ຄວາມ​ພົວພັນ​ພິ​ເສດຫວຽດນາມ-ລາວ, ຄວາມ​ສາມັກຄີ​ແບບ​ສູ້​ຮົບ​ແລະນ້ຳ​ໃຈ​ມິດຕະພາບທີ່​ບໍ່​ມີ​ສິ່ງ​ໃດ​ອາດ​ຈະ​ສັ່ນ​ສະ​ເທືອ​ນ​ໄດ້​ລະຫວ່າງ​ປະຊາຊົນຫວຽດນາມ​ແລະປະຊາຊົນລາວ, ນ້ຳ​ໃຈ​ມິດ​ສະຫາຍ​ທີ່​ຍິ່ງ​ໃຫຍ່​ ລະຫວ່າງພັກ​ກອມ​ມູນິດ​ຫວຽດນາມ ​ແລະ ພັກ​ປະຊາຊົນ​ປະຕິວັດ​ລາວ ທີ່​ໄດ້​ຫຼໍ່​ຫຼອມ​ໃນ​ຫຼາຍ​ສິບ​ປີ​ແຫ່ງ​ການ​ຮ່ວມ​ທຸກ​ຮ່ວມ​ສຸກ, ຮ່ວມ​ກັນ​ສູ້​ຮົບ, ຮ່ວມກັນ​ເອົາ​ຊະນະ​ພວກ​ສັດຕູ​ຜູ້​ຮຸກ​ຮານ, ພ້ອມ​ກັນ​ຮ່ວມ​ມື​ແລະ​ຊ່ວຍ​ເຫຼືອ​ກັນ​ກໍ່ສ້າງ​ປະ​ເທດ ​ແມ່ນ​ມູນ​ເຊື້ອ​ທີ່​ລ້ຳ​ຄ່າ, ກຳລັງ​ແຮງ​ທີ່​ຊະນະ​ເລີດ​ຂອງ​ສອງ​ຊາດ, ສອງ​ພັກ...". ສີ່​ສິບ​ປີຜ່າ​ມມາ, ສົນທິສັນຍາ​ນັ້ນ​ໄດ້​ກາຍ​ເປັນ​ພື້ນຖານ​ການ​ເມືອງ, ກົດໝາຍທີ່​ສຳຄັນ ​ເພື່ອ​ປັບປຸງແລ​ະພັດທະນາການ​ພົວພັນ​ລະຫວ່າງ​ສອງ​ປະ​ເທດ​ຢ່າງ​ບໍ່​ຢຸດ​ຢັ້ງ, ຮັບ​ໃຊ້​ຢ່າງ​ໄດ້​ການ​ໄດ້​ງານ​ໃຫ້​ແກ່​ພາລະກິດ​ສ້າງສາ​ແລະ​ພັດທະນາປະ​ເທດ​ຊາດ ​ຂອງ​ແຕ່ລະ​ປະ​ເທດ.

ຫວນຄືນໄລຍະທາງປະຫວັດສາດ 55 ປີທີ່ຜ່ານມາ, ພວກເຮົາສາມາດມີຄວາມເອກອ້າງທະນົງໃຈ ກ່ຽວກັບວິວັດການສ້າງຕັ້ງແລະພັດທະນາ ຂອງການພົວພັນແບບພິເສດ, ຫາຍາກ ລະຫວ່າງ 2 ຊາດ. ຍ້ອນວ່າ, ນັ້ນ​ແມ່ນສາຍພົວພັນທີ່ໄດ້ພັດທະນາແບບຍືນຍົງ ຈາກການພົວພັນທີ່ເປັນມູນເຊື້ອສະໜິດແໜ້ນ ກາຍເປັນການພົວພັນ​ແບບພິເສດ ​ໂດຍ​ປະທານ​ໂຮ່ຈີ​ມິນ​ເປັນ​ຜູ້​ຕັ້ງ​ຮາກ​ຖານ ​ແລະ ພ້ອມ​ກັບ​ບັນດາ​ສະຫາຍ ປະທານ​ໄກສອນ ພົມວິຫານ, ປະທານ ສຸພາ​ນຸວົງ ​ແລະ ບັນດາ​ການ​ນຳ​ຂອງ​ສອງ​ພັກ, ສອງ​ປະ​ເທດ ອອກ​ແຮງ​ເພີ່ມ​ພູນ​ຄູນ​ສ້າງ; ນັ້ນແມ່ນການພົວພັນທີ່ສະແດງໃຫ້ເຫັນຄວາມມຸ່ງມາດປາດຖະນາຂອງປະຊາຊົນ 2 ປະເທດ ແມ່ນຄວາມສາມັກຄີ ຊ່ວຍເຫຼືອກັນຕ້ານສັດຕູໂຕດຽວ, ສ້າງຕັ້ງການພົວພັນສະ​ເໝີ​ພາບ, ​ເປັນ​ເຈົ້າ​ຕົນ​ເອງ, ມິດຕະພາບ, ຮ່ວມ​ມືຕ່າງຝ່າຍຕ່າງມີຜົນປະໂຫຍດ ລະຫວ່າງ 2 ປະ​ເທດ; ນັ້ນ​ແມ່ນ​ການ​ພົວພັນ​ຮ່ວມ​ມື​ຮອບດ້ານ, ຍືນຍົງ ມີລັກສະນະລຸລ່ວງໃນຕະຫຼອດບັນດາ ໄລຍະປະຫວັດສາດ, ບັນດາ​ໄລຍະ​ທາງ, ບາດກ້າວ​ກ່ອນກະກຽມ​ໃຫ້​ບາດກ້າວ​ຕໍ່​ໄປ​ສືບ​ຕໍ່​ຂະຫຍາຍຕົວ ນຳມາເຊິ່ງບັນດາໄຊຊະນະປະຫວັດສາດ ໃຫ້ແກ່ 2 ປະເທດຫວຽດນາມ, ລາວ ໃນພາລະກິດຕໍ່ສູ້ຍາດເອົາເອກະລາດແຫ່ງຊາດໃນເມື່ອກ່ອນ ແລະ ພາລະກິດ​ແຫ່ງ​ການປ່ຽນແປງໃໝ່, ສ້າງສາປະເທດຊາດ ພ້ອມ​ກັນ​ກ້າວ​ຂຶ້ນ​ສັງຄົມ​ນິຍົມໃນປະຈຸບັນ.

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ,

ພັກ, ລັດ ​ແລະ ປະຊາຊົນ​ຫວຽດນາມ​ຍາມ​ໃດ​ກໍ່​ຮັບ​ຮູ້​ຢ່າງ​ເລິກ​ເຊິ່ງວ່າ ​ແຕ່ລະ​ໄຊຊະ​ນະ​ໃນ​ພາລະກິດການຕໍ່ສູ້​ປົດປ່ອຍ​ຊາດ, ​ໂຮມ​ປະ​ເທດ​ຊາ​ດ​ເປັນ​ເອກະ​ພາບ​ກ່ອນ​ໜ້າ​ນີ້ ກໍ່​ຄື​ແຕ່ລະ​ຜົນສຳ​ເລັດ​ໃນ​ການ​ປ່ຽນ​ແປງ​ໃໝ່, ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ໃນ​ປະຈຸ​ບັນ ​ຂອງ​ປະຊາຊົນ​ຫວຽດນາມ ລ້ວນ​ແຕ່​ຕິດ​ແໜ້ນ​ກັບ​ຄວາມ​ສາມັກຄີ, ການ​ສະໜັບສະໜູນ ຊ່ວຍ​ເຫຼືອອັນ​ລ້ຳ​ຄ່າ, ສຸດ​ອົກ​ສຸດ​ໃຈ ຂອງ​ພັກ, ລັດ ​ແລະ ປະຊາຊົນ​ລາວ​ບັນດາ​ເຜົ່າ. ​ໃນ​ໂອກາດ​ນີ້, ພວກ​ຂ້າພະ​ເຈົ້າ​ຂໍ​ສະ​ແດງ​ຄວາມ​ຮູ້​ບຸນຄຸນ​ຢ່າງ​ເລິກ​ເຊິ່ງຕໍ່ພັກ​ປະຊາຊົນ​ປະຕິວັດ​ລາວ, ປະ​ເທດ​ ສປປ ​ລາວ, ປະຊາຊົນ​ລາວ ທີ່​ໄດ້​ສາ​ມັກ​ຄີ ໃຫ້ການ​ສະໜັບສະໜູນ ຊ່ວຍ​ເຫຼືອ ​ແກ່​ພັກ, ລັດ ​ແລະ ປະຊາຊົນ​ຫວຽດນາມ. ​ໃນ​ໝາກ​ຫົວ​ໃຈ​ຂອງ​ປະຊາຊົນ​ຫວຽດນາມ​ແຕ່ລະ​ຄົມ​ໃນ​ມື້​ນີ້ແລະໃນ​ພາຍ​ໜ້າ ຈະ​ຈົດຈຳ​ຄຳ​ຕັກ​ເຕືອນ​ຂອງ​ປະທານ ​ໂຮ່ຈີ​ມິນ "ສອງຊາດຫວຽດ-ລາວ​ໄດ້​ ຝັງ​ຄວາມ​ຮັກ​ຢູ່​ໃນ​ໃຈ, ​ຮົ່ງຮ່າ ​ທັງ​ແມ່​ຂອງ ບໍ່​ເລິກ​ປຸນ​ປານ​ໄດ້" ​ໄວ້​ຕະຫຼອດ​ການ.


ລາຍການ​ສະ​ແດງ​ສິລະ​ປະ​ພິ​ເສດ​ ຊົມ​ເຊີຍ​ພິທີ​ສະ​ເຫຼີ​ມສະຫຼອງ. (ພາບ: TTXVN)

ເປັນ​ສະ​ຫາຍ ອ້າຍ​ນ້ອງ​ທີ່​ສະໜິດສະໜົມ, ພວກ​ຂ້າພະ​ເຈົ້າ​ຮູ້ສຶກ​ດີ​ອົກ​ດີ​ໃຈ​ທີ່​ສຸດ​ ກ່ຽວ​ກັບ​ຜົນສຳ​ເລັດ​ອັນ​ໃຫຍ່​ຫຼວ​ງ ທີ່ພັກ, ລັດ ​ແລະ ປະຊາຊົນ​ລາວ​ ບັນລຸ​ໄດ້​ໃນ​ຕະຫຼອດ​ໄລ​ຍະ​ປະຕິວັດ​ອັນ​ສະຫງ່າ​ງາມ​ຂອງ​ຕົນ. ​ໃນ​ເງື່ອນ​ໄຂ​ທີ່​ມີ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ຫຼາຍ​ຢ່າງ, ປະຊາຊົນ​ລາວ​ພາຍ​ໃຕ້​ການ​ນຳພາ​ອັນ​ສະຫຼາດ​ສ່ອງ​ໃສ​ຂອງ​ພັກ​ປະຊາຊົນ​ປະຕິວັດ​ລາວ, ​ໄດ້​ເສີມ​ຂະຫຍາຍ​ມູນ​ເຊື້ອ​ປະຕິວັດ​ອົງອາດ​ກ້າຫານ, ຕັ້ງໜ້າ​ພະຍາຍາມບັນລຸ​ເຖິງ​ຜົນ​ສຳ​ເລັດ​ອັນ​ໃຫຍ່​ຫຼວງຫຼາຍ​ຢ່າງທີ່ໜ້າ​ນິຍົມ​ນັບຖື​ທີ່​ສຸດ ​ໃນ​ພາລະກິດ​ການ​ກໍ່ສ້າງ ພັດທະນາ​ເສດຖະກິດ-ສັງຄົມ, ຮັກສາ​ຄວາມ​ສະຫງົບ ການ​ປ້ອງ​ກັນ​ປະ​ເທດ​ຢ່າງ​ໜັກ​ແໜ້ນ, ປົວ​ແປງ​ຊີວິດ​ການ​ເປັນ​ຢູ່​ຂອງ​ປະຊາຊົນ, ​ເປີດ​ກວ້າງ​ການ​ພົວພັນ​ກັບ​ຕ່າງປະ​ເທດ. ພວກ​ຂ້າພະ​ເຈົ້າ​ຂໍ​ອວຍພອນ​ຊົມ​ເຊີຍ​ຢ່າງ​ສຸດ​ໃຈ​ ຕໍ່ບັນດາ​ຜົນສຳ​ເລັດ​ທີ່​ມີ​ລັກສະນະ​ປະຫວັດສາດ​ ທີ່ພັກ, ລັດ ​ແລະ ປະຊາຊົນ​ລາວອ້າຍ​ນ້ອງ​ຍາດ​ມາ​ໄດ້​ໃນ 30 ປີ​ແຫ່ງ​ການ​ປ່ຽນ​ແປງໃໝ່ ​ແລະ ບັນດາ​ຜົນງານ​ທີ່​ສຳຄັນ ​ໃນກວ່າ​ໜຶ່ງ​ປີ​ແຫ່ງ​ການ​ຜັນ​ຂະຫຍາຍ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງພັກ​ປະຊາຊົນ​ປະຕິວັດ​ລາວ ​ແລະ ​ເຊື່ອ​ໝັ້ນ​ວ່າ, ພາຍ​ໃຕ້​ການ​ນຳພາ​ຂອງພັກ​ປະຊາຊົນ​ປະຕິວັດ​ລາວ, ການ​ຄຸ້ມ​ຄອງ​ບໍລິຫານຂອງ​ລັດຖະບານ​ແຫ່ງ ສປປ ລາວ, ການ​ຕິດຕາມ​ກວດກາ​ຂອງ​ສະພາ​ແຫ່ງ​ຊາດລາວ, ປະ​ເທດ​ລາວ​ຈະ​ປະຕິບັດມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ​ແລະ ​ແຜນການ​ພັດທະນາ​ເສດຖະກິດ-ສັງຄົມ 5 ປີ​ຄັ້ງ​ທີ VIII ຢ່າງ​ສຳ​ເລັດ​ມີ​ໄຊ; ປະສົບ​ຜົນສຳ​ເລັດ​ໃນ​ການ​ກໍ່ສ້າງ​ປະ​ເທດ​ລາວ​ສັນຕິພາບ, ​ເອກະລາດ, ປະຊາທິປະ​ໄຕ, ​ເອກະ​ພາບ ​ແລະ ວັດທະນາ​ຖາວອນ ຕາມ​ເປົ້າ​ໝາຍ​ສັງຄົມ​ນິຍົມ, ອິດ​ທິພົນ​ແລະຖານະບົດບາດຂອງ​ປະ​ເທດ ສປປ ລາວ ​ໄດ້​ຮັບ​ການ​ຍົກ​ສູງ​ຂຶ້ນ​ຢ່າງ​ບໍ່​ຢຸດ​ຢັ້ງ​ຢູ່​ໃນ​ພາກ​ພື້ນ ​ແລະ ​ໃນ​ເວທີ​ສາກົນ.

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ,

​ໃນ​ສະພາບ​ກາ​ນໂລກ​ແລະ​ພາກ​ພື້ນມີ​ການ​ຜັນ​ປ່ຽນ​ຢ່າງ​ສັບສົນຄື​ປະຈຸ​ບັນ, ສອງ​ປະ​ເທດ​ພວກ​ເຮົາ​ພວມ​ຢືນ​ຕໍ່ໜ້າ​ໂອກາດ​ດີ​ຫຼາຍ​ຢ່າງ ​ແຕ່​ກໍ່​ຕ້ອງ​ປະ​ເຊີນ​ໜ້າ​ກັບຄວາມ​ຫຍຸ້ງຍາກ ສິ່ງ​ທ້າ​ທາຍ​ໃໝ່​ບໍ່​ໜ້ອຍ; ບັນດາ​ບົດຮຽນ​ປະສົບ​ການ​ປະຫວັດສາດ​ຂອງ​ສາຍ​ພົວພັນ​ທີ່​ເປັນ​ແບບຢ່າງຫວຽດນາມ-ລາວ, ລາວ-ຫວຽດນາມ; ບັນດາ​ແນວ​ຄິດ​ຊີ້​ນຳ​ແລະ​ເນື້ອ​ໃນ​ຮ່ວມ​ມື ​ທີ່​ລະບຸ​ໄວ້​ໃນ​ສັນ​ທິສັນຍາມິດຕະພາບ​ແລະ​ການ​ຮ່ວມ​ມື ຍັງ​ມີ​ຄຸນຄ່າ​ເໝືອນ​ເດີມ, ​ແລະ ​​ເປັນ​ເສັ້ນ​​ໄໝ​ແດງສອດ​ຮ້ອຍ​ຕະຫຼອດວິວັດທະນາ​ການ​ພັດທະນາ​ຂອງ​ສາຍ​ພົວພັນ​ລະຫວ່າງ​ສອງ​ພັກ, ສອງ​ລັດ ​ແລະ ປະຊາຊົນ​ສອງ​ປະ​ເທດ. ອາດ​ຈະ​ເຫັນ​ໄດ້​ວ່າ, ການ​ພົວພັນ​ລະຫວ່າງ​ສອງ​ປະ​ເທດ​ພວມ​ນັບ​ມື້​ນັບ​ເຂົ້າ​ສູ່​ລວງ​ເລິກ, ​ແທດ​​ເໝາະ​ຕົວຈິງ ​ແລະ ມີ​ປະສິດທິ​ຜົນ​ໃນ​ທຸກໆ​ຂົງ​ເຂດ ດ້ວຍ​ຫຼາຍ​ຮູບ​ການ​ຮ່ວມ​ມື​ທີ່​ອຸດົມສົມບູນ, ຫຼາກ​ຫຼາຍ ​ໃນ​ບັນດາ​ສາຍ​ພັກ, ລັດ ​ແລະ ປະຊາຊົນ; ລະຫວ່າງ​ບັນດາ​ຂະ​ແໜງ​ການ​ແລະ​ບັນດາທ້ອງ​ຖິ່ນ; ​ໃນ​ການ​ຮ່ວມ​ມື​ສອງ​ຝ່າຍ​ແລະ​ຫຼາຍ​ຝ່າຍ. ການ​ພົວພັນ​ທາງ​ດ້ານ​ການ​ເມືອງ​ໄດ້​ຮັບ​ຄວາມ​ເອົາ​ໃຈ​ໃສ່​ເປັນ​ສຳຄັນ, ນັບ​ມື້​ນັບຖື​ບົດ​ບາດ​ເປັນ​ແກ່ນສານ, ກຳ​ນົດທິດ​​ໃນ​ການ​ພົວພັນ​ຮ່ວມ​ມື​ທັງ​ໝົດ; ບັນດາ​ກົນ​ໄກ​ຮ່ວມ​ມື​ທີ່​ມີ​ຢູ່​ໃນ​ປະຈຸ​ບັນ​ລະຫວ່າງ​ສອງ​ພັກ, ສອງ​ລັດ​ ສືບ​ຕໍ່​ເສີມ​ຂະຫຍາຍ​ປະສິດທິ​ຜົນ​ເປັນ​ຢ່າງ​ດີ.

ການ​ຮ່ວມ​ມື​ດ້ານ​ເສດຖະກິດ, ການ​ຄ້າ ​ແລະ ​ການ​ລົງທຶນ ​ສືບ​ຕໍ່​ໄດ້​ຮັບ​ການ​ຊຸກຍູ້, ກາຍ​ເປັນຮາກ​ຖານຍາວ​ນາ​ນໃນການ​ພົວພັນ​ລະຫວ່າງ​ສອງ​ປະ​ເທດ. ການ​ຮ່ວມ​ມື​ດ້ານ​ການ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ສະຫງົບ ​ແລະ ການ​ຕ່າງປະ​ເທດ​ ນັບ​ມື້​ນັບ​ແໜ້ນ​ແຟ້ນ ​ແລະ ​ເຂົ້າ​ສູ່​ລວງ​ເລິກ, ບັນລຸ​ປະສິດທິ​ຜົນ​ທີ່​ຕັ້ງໜ້າ ​ແລະ ຖື​ບົດບາດ​ເປັນ​ເສົາ​ຄ້ຳ​ໃນ​ການ​ພົວພັນ​ລະຫວ່າງ​ສອງ​ປະ​ເທດ. ການ​ຮ່ວມ​ມື​ດ້ານ​ວັດທະນະທຳ, ສຶກສາ-ກໍ່ສ້າງ, ສາທາລະນະ​ສຸກ, ວິທະຍາສາດ-​ເຕັກນິກ ​ໄດ້​ຮັບ​ຜົນງານ​ຫຼາຍ​ຢ່າງ​ທີ່​ຕັ້ງໜ້າ, ​ເພີ່ມ​ເຕີມ​ທ່າ​ດີ​ໃຫ້​ແກ່​ກັນ​ໃນຂະ​ບວນ​ວິວັດ​ການ​ປ່ຽນ​ແປງ​ໃໝ່ ​ແລະ ການພັດທະນາ. ສອງ​ປະ​ເທດລາວ​ແລະຫວຽດນາມພວມ​ຍູ້​ແຮງ​ການ​ປ່ຽນ​ແປງ​ໃໝ່, ​ເປັນ​ເຈົ້າການ​ແລະ​ຕັ້ງໜ້າ​ເຊື່ອມ​ໂຍງ​ເຂົ້າ​ກັບ​ສາກົນ, ປະຊາຊົນ​ສອງ​ປະ​ເທດ​ພວມ​ຕັ້ງໜ້າ​ຜັນ​ຂະຫຍາຍ​ປະຕິບັດ​ມະຕິ​​ກອງ​ປະຊຸມ​ໃຫຍ່ຂອງ​ແຕ່ລະ​ພັກ ​ແລະ ພ້ອມ​ກັນ​ສູ້​ຊົນ​ກໍ່ສ້າງ​ປະ​ເທດ​ຊາດ​ຮັ່ງມີ, ປະຊາຊົນ​ສອງ​ປະ​ເທດ​ມີ​ຊີວິດ​ການ​ເປັນ​ຢູ່​ອິ່ມໜຳສຳລານ ຜາ​ສຸກ ມີ​ເສລີພາບ, ປະກອບສ່ວນ​ອັນຕັ້ງໜ້າ​ເຂົ້າ​ໃນ​ພາລະກິດ​ສັນຕິພາບ, ​ເອກະລາດ​ແຫ່ງ​ຊາດ, ປະຊາທິປະ​ໄຕ ​ແລະ ຄວາມ​ກ້າວໜ້າ​ທາງ​ສັງຄົມ​ໃນ​ໂລກ.

​ເພື່ອ​ເພີ່ມ​ທະວີ​ການ​ຮ່ວມ​ມື​ຮອບດ້ານ, ນຳ​ເອົາ​ການ​ພົວພັນ​ແບບ​ພິ​ເສດຫວຽດນາມ-ລາວ, ລາວ-ຫວຽດນາມ ຂຶ້ນ​ສູ່​ລະດັບ​ສູງ​ໃໝ່, ສອງ​ຝ່າຍ​ຄວນ​ສືບ​ຕໍ່​ເພີ່ມ​ເຕີມ, ບູລະນະ​ບັນດາກົນ​ໄກ ນະ​ໂຍບາຍ ​ແລະ ການຈັດ​ຕັ້ງ​ຊີ້​ນຳ​ປະຕິບັດຢ່າງ​ມີ​ປະສິດທິ​ຜົນ ຕໍ່​ບັນດາ​ຂໍ້​ຕົກ​ລົງ​ແລະ​ບັນດາ​ເປົ້າ​ໝາຍ​ຍຸດ​ທະ​ສາດທີ່​ໄດ້​ວາ​ງອອກ​ມາ ດ້ວຍ​ວິ​ໄສ​ທັດ​ກວ້າງ​ກວ່າ, ຮອບດ້ານ​ແລະ​ຍາວ​ນານ​ກວ່າ ​ແນ​ໃສ່​ປັບປຸງ ​ເພີ່ມ​ທະວີ ​ແລະ ພັດທະນາ​ສາຍ​ພົວພັນ​ສາມັກຄີ​ພິ​ເສດ, ການ​ຮ່ວມ​ມື​ຮອບດ້ານ​ລະຫວ່າ​ສອງ​ປະ​ເທດຫວຽດນາມ​ແລະລາວ ຢ່າງ​ບໍ່​ຢຸດ​ຢັ້ງ. ​ເຖິງ​ວ່າ​ຈະ​ຫຍຸ້ງຍາກ​ລຳບາກ​ປານ​ໃດ​ກໍ່ຕາມ ພວກ​ເຮົາ​ກໍ່​ຕັດສິນ​ໃຈ​ຮັກສາ​ແລະ​ປົກ​ປ້ອງ​ສາຍ​ພົວພັນຫວຽດນາມ-ລາວ​ເໝືອນ​ດັ່ງ​ຮັກສາ​ແກ່ນ​ຕາ​ຂອງ​ຕົນ ​ເພື່ອ​ໃຫ້ສາຍ​ພົວພັນ​ມິດຕະພາບ​ລາວ-ຫວຽດນາມ "​ໝັ້ນ​ຄົງ​ຂະໜົງ​ແກ່ນ​ຊົ່ວ​ກາລະ​ນານ" ຄື​ທີ່​ປະທານ​ໄກສອນ ພົມວິຫານ ​ໄດ້​ຢືນຢັນ.

ອວຍພອນ​ໄມຕີ​ຈິດ​ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານຫວຽດນາມ-ລາວ ຈົ່ງ​ສວຍ​ສົດ​ງົດ​ງານ ​ແລະ ໝັ້ນຄົງ​ຂະໜົງ​ແກ່ນ​ຕະຫຼອດ​ກາລະ​ນານ.

ອວຍພອນ​ບັນດາ​ສະ​ຫາຍ​ການ​ນຳ, ອະ​ດີດການ​ນຳ​ພັກ, ລັດ ​ແລະ ບັນດາ​ສະຫາຍລາວ​ແລະຫວຽດນາມທຸກ​ຄົນ​ ຈົ່ງ​ມີ​ສຸຂະພາບ​ເຂັ້ມ​ແຂງ, ມີ​ຄວາມ​ຜາ​ສຸກ ​ແລະ ປະສົບ​ຜົນສຳ​ເລັດອັນ​ດີງາມ.

ຂອບ​ໃຈ​ບັນດາ​ສະຫາຍ​ແລະ​ເພື່ອນ​ທັງຫຼາຍ./.

                                      ຕາມ: ສຳນັກຂ່າວສານຫວຽດນາມ (TTXVN)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ