ວັນເສົາ, 18/11/2017
ເສີມຂະຫຍາຍຄວາມຮັບຜິດຊອບສູງສຸດ, ສຸມໃສ່ຄົ້ນຄວ້າ, ປຶກສາສົນທະນາ, ພິຈາລະນາ, ຕົກລົງບັນດາລາຍງານ ໂຄງການ ຮ່າງມະຕິ ຂໍ້ສະຫຼຸບ ຂອງສູນກາງ*
1/11/2017 10:30' ສົ່ງ ພິມ
ບັນດາການນຳຂອງພັກ ລັດ ແລະ ຜູ້ແທນ ພ້ອມກັນລົງຄະແນນສຽງຜ່ານໂຄງການກອງປະຊຸມ. (ພາບ:TTXVN)

ໂດຍ​ປະຕິບັດ​ໂຄງການ​ເຮັດ​ວຽກ​ຂອງ​ທົ່ວ​ທັງ​ສະ​ໄໝ​ທີ XII, ມື້​ນີ້, ຄະນະ​ບໍລິຫານ​ງານ​ສູນ​ກາງພັກ ​ເລີ່ມຕົ້ນ​ດຳ​ເນີນ​ກອງ​ປະຊຸມ​ຄັ້ງ​ທີ 6 ​ເພື່ອ​ປຶກສາ​ຫາລື ​ແລະ ປະກອບ​ຄວາມ​ເຫັນ​ກ່ຽວ​ກັບ: ສະພາບ​ການ​ເສດຖະກິດ-ສັງຄົມ ​ແລະ ການ​ເງິນ-ງົບປະມານ ປີ 2017, ຄາດ​ຄະ​ເນ​ແຜນການ​ພັດທະນາ​ເສດຖະກິດ-ສັງຄົມ ​ແລະ ​ແຜນການ​ການ​ເງິນ-ງົບປະມານ ​ປີ 2018; ​ເພີ່ມ​ທະວີ​ວຽກ​ງານ​ປົກ​ປັກ​ຮັກສາ ​ເບິ່​ງ​ແຍງ​ດູ​ແລ ຍົກ​ສູງ​ສຸຂະພາບ​ຂອງ​ປະຊາຊົນ ​ແລະ ວຽກ​ງານປະຊາກອນ ​ໃນ​ສະພາບ​ການ​ໃໝ່; ສືບ​ຕໍ່​ປ່ຽນ​ແປງ​ໃໝ່​ລະບົບ​ການຈັດ​ຕັ້ງ​ແລະ​ຄຸ້ມ​ຄອງ​ບໍລິຫານ, ຍົກ​ສູງ​ຄຸນ​ນະພາ​ບ​ແລະ​ປະສິດທິ​ຜົນ​ຂອງການ​ເຄື່ອນ​ໄຫວ​ຂອງ​ບັນດາ​ອົງການບໍລິການ​ສາທາລະນະ; ບັນຫາ​ຈຳນວນ​ໜຶ່ງ​ກ່ຽວ​ກັບ​ການ​ສືບ​ຕໍ່​ປ່ຽນ​ແປງ​ໃໝ່, ສັບ​ຊ້ອນ​ການຈັດ​ຕັ້ງ​ກົງຈັກ​ຂອງ​ລະບົບ​ການ​ເມືອງ​ໃຫ້​ກະທັດ​ລັດ, ​ເຄື່ອນ​ໄຫວ​ຢ່າງ​ມີ​ສະມັດ​ຕະພາບ ມີປະສິດທິ​ຜົນ; ​ແລະ ດຳ​ເນີນ​ວຽກ​ງານ​ທີ່​ສຳຄັນ​ອື່ນ​ອີກ​ຈຳນວນ​ໜຶ່ງ. 

ຕາງໜ້າ​ກົມ​ການ​ເມືອງ, ຄະນະ​ເລຂາທິການ, ຂ້າພະ​ເຈົ້າ​ຂໍ​ສະ​ແດງ​ຄວາມ​ຄຳນັບ​ຮັບ​ຕ້ອນຢ່າງ​ສຸດ​ໃຈຕໍ່ ​ບັນດາ​ສະ​ຫາຍ​ກຳມະການຄະນະ​ບໍລິຫານ​ງານ​ສູນ​ກາງ ບັນດາ​ແຂ​ກທີ່​ຖືກ​ເຊີນ ທີ່ມາ​ຮ່ວມ​ກອງ​ປະຊຸມ​ນີ້ ​ແລະ ຂໍ​ຝາກຄຳ​ອວຍ​​ໄຊ​ໃຫ້​ພອນ​ອັນ​ປະ​ເສີດມາ​ຍັງ​ບັນດາ​ສະຫາຍ​ທຸກ​ຄົນ. 

ຕາມ​ລະບຽບ​ການ​ເຮັດ​ວຽກ, ຫ້ອງການ​ສູນ​ກາງ​ພັກ​ໄດ້​ຝາກ​ເອກະສານ​ໃຫ້​ບັນດາ​ສະຫາຍ​ຄົ້ນຄວ້າ​ກ່ອນ ​ແລະ ກະກຽມ​ຄວາມ​ຄິດ​ເຫັນທີ່​ຈະ​ແລກປ່ຽນ​ໃນ​ກອງ​ປະຊຸມ. ຕໍ່​ໄປ​ນີ້, ຂ້າພະ​ເຈົ້າ​ຂໍ​ອອກ​ຄວາມ​ເຫັນ​ທີ່​ເປັນ​ການ​​ເນັ້ນ​ໜັກ, ເຈາະ​ຈີ້ມ​ໃຫ້​ເອົາ​ໃຈ​ໃສ່ຕື່ມ​ອີກ ກ່ຽວ​ກັບ​​ບັນຫາຈຳນວນ​ໜຶ່ງ, ຫວັງ​ວ່າ​ບັນດາ​ສະຫາຍ​ຈະ​ເອົາ​ໃຈ​ໃສ່​ໃນ​ເມື່​ອປຶກສາ​ສົນທະນາ, ພິຈາລະນາ, ຕັດສິນ​ຕົກລົງ. 

ສະພາບ​ການ​ເສດຖະກິດ-ສັງຄົມ ​ແລະ ການ​ເງິນ-ງົບປະມານ ປີ 2017, ຄາດ​ຄະ​ເນ​ແຜນການ​ພັດທະນາ​ເສດຖະກິດ-ສັງຄົມ ​ແລະ ​ແຜນການ​ການ​ເງິນ-ງົບປະມານ ​ປີ 2018

ນີ້​ແມ່ນ​ວຽກ​ງານ​ປະຈຳ​ປີ​ແຫ່ງ​ກອງ​ປະຊຸມ​ທ້າຍ​ປີ​ຂອງຄະນະ​ບໍລິຫານ​ງານ​ສູນ​ກາງ ​ແນ​ໃສ່ສຳ​ຫຼວດກວດຄືນ​ສະພາບ​ການ​ເສດຖະກິດ-ສັງຄົມ, ການ​ເງິນ-ງົບປະມານ​ຂອງ​ປະ​ເທດ, ​ເຫັນ​ແຈ້ງ​ຈຸດ​ດີ, ຂໍ້​ຂາດ​ຕົກ​ບົກພ່ອງ​ໃນ​ການ​ຊີ້​ນຳ​ນຳພາ ຂອງ​ສູນ​ກາງ​ພັກ ສະພາ​ແຫ່ງ​ຊາດ ລັດຖະບານ, ຂອງ​​ລະບົບ​ການ​ເມືອງທັງ​ໝົດ; ຈາກ​ນັ້ນ​ຈະ​ເສີມ​ຂະຫຍາຍ​ດ້ານ​ດີ, ດັດສົມ ​ແກ້​ໄຂ​ຜ່ານ​ຜ່າ​ດ້ານ​ທີ່​ຍັງ​ບໍ່​ດີ​ ຢ່າງ​ທັນ​ການ, ປະກອບສ່ວນ​ສຳຄັນ​ເຂົ້າ​ໃນ​ການ​ປະຕິບັດ​ເປົ້າ​ໝາຍ ໜ້າ​ທີ່​ພັດທະນາ​ເສດຖະກິດ-ສັງຄົມ​ປະຈຳ​ປີ ​ແລະ 5 ປີ​ ທີ່​ໄດ້​ວາງ​​ໄວ້ ​ໃຫ້ສຳ​ເລັດ​ມີ​ໄຊ. ດັ່ງ​ນັ້ນ, ມັນ​ຈຶ່ງ​ມີ​ຄວາມ​ໝາຍ​ຕົວ​ຈິງ​ທີ່​ສຸດ. 

ສະ​ເໜີ​ໃຫ້​ບັນດາ​ສະຫາຍ ຈົ່ງ​ຄົ້ນຄວ້າ​ຢ່າງ​ລະອຽດ ​ໃບ​ສະ​ເໜີ ລາຍ​ງານ​ຂອງ ຄະນະກຳມະການ​ພັກ​ລັດຖະບານ ​ແລະ ​ເລີ່​ມຈາກ​ສະພາບ​​ຕົວ​ຈິງ​ໃນ​ປະ​ເທດ​ແລະ​ສາກົນ ກໍ່​ຄືສະພາບ​ການຂອງ​ຂະ​ແໜງ​ການ ຂົງ​ເຂດ ພື້ນ​ທີ່​ບ່ອນ​ເຮັດ​ວຽກ ​ເພື່ອປຶກສາ​ຫາລື, ວິ​ເຄາະ​ໄຈ້​ແຍກ, ປະ​ເມີນ​ຄ່າ​ຢ່າງພາວະ​ວິ​ໄສ ຮອບດ້ານ ກ່ຽວ​ກັບ​ສະພາບ​ການ 9 ​ເດືອນ​ທີ່​ຜ່ານ​ມາ ​ແລະ ຄາດ​ຄະ​ເນ​ຮອດ​ທ້າຍ​ປີ; ຊີ້​ແຈ້ງ​ບັນດາ​ຜົນງານ ຜົນສຳ​ເລັດ​ທີ່​ຜົ້ນ​ເດັ່ນທີ່​ບັນລຸ​ໄດ້, ບັນດາ​ຂໍ້​ຈຳກັດ ຈຸດ​ອ່ອນທີ່​ຄົງ​ຄ້າງ, ​ໂດຍ​ສະ​ເພາະ​ຢ່າງ​ຍິ່ງ​ແມ່ນ ບັນດາ​ປັດ​ໄຈຕັ້ງໜ້າ​ທີ່​ຫາ​ກໍ່​ປາກົດ​ຂຶ້ນ, ບັນດາ​ບັນຫາ​ສັບສົນ​ໃໝ່.

​ເອົາ​ໃຈ​ໃສ່​ສົມ​ທຽບ​ກັບ​ເປົ້າ​ໝາຍ ໜ້າ​ທີ່​ທີ່​ໄດ້​ວາງ​ອອກ​ມາ​ໃນ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ບັນດາ​ມະຕິ​ຂອງ​ສູນ​ກາງ​ພັກ ກ່ຽວ​ກັບ​ການ​ພັດທະນາ​ເສດ​ຖິກິດ-ສັງຄົມ​ຢ່າງ​ໄວ​ແລະ​ຍືນ​ຍົງ; ປະຕິບັດ 3 ການ​ບຸກທະລຸ​ຍຸດ​ທະ​ສາດ; ປ່ຽນ​ແປງ​ໃໝ່​ຕົວ​ແບບ​ເຕີບ​ໂຕ, ຈັດ​ວາງ​ໂຄງ​ປະກອບ​ເສດຖະກິດ​ຄືນ​ໃໝ່; ປັບປຸງບູລະນະ​ລະບຽບ​ກົດໝາ​ຍ​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ; ປ່ຽນ​ແປງ​ໃໝ່ ຍົກ​ສູງ​ປະສິດທິ​ຜົນ​ຂອງ​ວິ​ສາ​ຫະກິດ​ແຫ່ງ​ລັດ; ພັດທະນາ​ເສດຖະກິດ​ເອກະ​ຊົນ​ໃຫ້​ກາຍ​ເປັນ​ກຳລັງ​ໜູນ​ທີ່​ສຳຄັນ​ຂອງ​ພື້ນຖານ​ເສດຖະກິດ​ແຫ່ງ​ຊາດ...

ພິ​ເສດ​ແມ່ນ, ຕ້ອງ​ຊີ້​ແຈ້ງ ຍ້ອນ​ສາ​ເຫດ​ຫຍັງ​ຈຶ່ງ​ປະຕິບັດ​ວຽກ​ງານ​ຈຳນວນ​ໜຶ່ງ​ບໍ່​ສຳ​ເລັດ, ການ​ປະຕິບັດ​​ເລກຄາດໝາຍ​ແຜນການ​ຈຳ​ນວນ​ໜຶ່ງ​ໃນ 6 ​ເດືອນ​ຕົ້ນ​ປີ ບັນລຸ​ລະ​ດັບ​ຕ່ຳຫຼື​ບໍ່​ບັນລຸ​ໄດ້ ທຽບ​ກັບ​ໄລຍະ​ເວລາ​ດຽວ​ກັນ​ຂອງ​ປີ​ກ່ອນ, ​ເຖິງ​ວ່າ​ສະພາບ​ການ​ໃນ​ປະ​ເທດ​ແລະ​ສາກົນ​ປີ 2017 ​ເບິ່ງ​ລວມສະດວກ​ດີກ​ວ່າທຽບ​ກັບ​ປີ 2016. 

ບົນ​ພື້ນຖານ​ນັ້ນ, ຄາດ​ຄະ​ເນ​ເຫດການ​ທີ່​ອາດ​ຈະ​ເກີດ​ຂຶ້ນ​ໃນ​ເວລາຕໍ່ໜ້າ, ຄາດກະ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ຕ່າງໆ​ທີ່​ຈະ​ຕ້ອງ​ແກ້​ໄຂ​ຜ່າ​ນຜ່າ, ພິ​ເສດ​ແມ່ນ ຄວາມ​ຫຍຸ້ງຍາກ ສິ່ງ​ທ້າ​ທາຍ​ໃນ​ການ​ແກ້​ໄຂຂໍ້​ຈຳກັດ ຈຸດ​ອ່ອນ​ທີ່​ມີ​ຢູ່​ແຕ່​ດົນ​ນານ​ໃນ​ພື້ນຖານ​ເສດຖະກິດ; ຄວາມ​ສ່ຽງ​ຕ່າງໆ​ທາງ​ດ້ານ​ການ​ເງິນ-​ເງິນຕາ, ​ເປັນ​ຕົ້ນ​ແມ່ນ​ໜີ້​ສາທາລະນະ ໜີ້​ເສຍ ຍັງ​​ຢູ່​ໃນ​ລະດັບ​ສູງ, ວິ​ສາ​ຫະກິດຂອງ​ລັດ​ຫຼາຍ​ແຫ່ງ​ເຄື່ອນ​ໄຫວ​ບໍ່​ມີ​ປະສິດທິ​ຜົນ ຖືກ​ຂາດທຶນ. ກຳນົດ​​ແຈ້ງ​ບັນດາ​ເປົ້າ​ໝາຍ, ​ເລກ​ຄາດໝາຍທີ່​ເປັນ​ພື້ນຖານ, ສຳຄັນ​ທີ່​ສຸດ​ໃຫ້​ແກ່​ປີ 2018; ວາງ​ແຜນ​ນະ​ໂຍບາຍ, ມາດ​ຕະການມີ​ຄວາມ​ເປັນ​ໄປ​ໄດ້​ສູງ, ​ເປັນ​ຕົ້ນ​ແມ່ນ​ບັນດາ​ນະ​ໂຍບາຍ, ມາດ​ຕະການ​ບຸກທະລຸ ​ເພື່ອ​ປ່ຽນ​ແປງ​ໃໝ່​ຕົວ​ແບບ​ເຕີບ​ໂຕ, ຈັດ​ວາງ​ໂຄງ​ປະກອບ​ເສດຖະກິດ​ຄືນ​ໃໝ່, ຈັດ​ວາງ​ໂຄງ​ປະກອບ​ງົບ​ປະມານ​ແຫ່ງ​ລັດ​ຄືນ​ໃໝ່, ຄວບ​ຄຸມ​ໜີ້​ສາທາລະນະ; ຈັດ​ວາງ​ຄືນ​ໃໝ່​ລະບົບ​ບັນດາ​ອົງການ​ຈັດ​ຕັ້ງ​ສິນ​ເຊື່ອ ຕິດ​ກັບ​ການ​ແກ້​ໄຂ​ໜີ້​ເສຍ. ຍູ້​ແຮງ​ການຈັດ​ວາງ​ຄືນ​ໃໝ່​ການ​ລົງທຶນ​ສາທາລະນະ, ບັນດາ​ວິ​ສາ​ຫະກິດ​ຂອງ​ລັດ, ບັນດາ​ອົງການ​ບໍລິການ​ຂອງ​ລັດ. ຍົກ​ສູງ​ຄຸນ​ນະພາ​ບຂອງ​ການ​ເຕີບ​ໂຕ, ປົວ​ແປງ​ສິ່ງ​ແວດ​ລ້ອມ​ແຫ່ງ​ການ​ລົງທຶນທຸລະ​ກິດ ​ເພື່ອ​ລະດົມ​ແລະ​ນຳ​ໃຊ້​ແຫຼ່ງພະລັງ​ຕ່າງໆ​ຢ່າງ​ມີ​ປະສິດ​ທິຜົນ, ຮັບປະກັນ​ການ​ພັດທະນາ​ຢ່າງ​ໄວ​ແລະຍືນ​ຍົງ ທັງ​ດ້ານ​ເສດຖະກິດ, ສັງຄົມ ​ແລະ​ ສິ່ງ​ແວດ​ລ້ອມ. 

ກ່ຽວ​ກັບ​ການ​ປົກ​ປັກ​ຮັກສາ, ​ເບິ່ງ​ແຍງ​ດູ​ແລ ​ແລະ ຍົກ​ສູງ​ສຸຂະພາບ​ຂອງ​ປະຊາຊົນ

​ແຕ່​ກ່ອນ​ມາ​ເຖິງ​ປະຈຸ​ບັນ, ພັກ​ແລະ​ລັດ​ຫວຽດນາມ ​ໄດ້​ກຳນົດ​ຢູ່​ສະ​ເໝີ​ວ່າ ສຸຂະພາບ​ເປັນ​ຊັບ​ສິນ​ທີ່​ມີຄ່າ​ທີ່​ສຸດ​ຂອງ​ປະຊາຊົນ​ແຕ່ລະຄົນ ​ແລະ ຂອງ​ທົ່ວ​ສັງຄົມ; ​ເບິ່ງ​ແຍງ​ດູ​ແລ ຮັກສາ ​ແລະ ຍົກ​ສູງ​ສຸຂະພາບ​ຂອງ​ປະຊາຊົນ​ແມ່ນ​ວຽກ​ງານ​ທີ່​ສຳຄັນພິ​ເສດ, ກ່ຽວຂ້ອງ​ກັບ​ທຸກ​ຄົນ ທຸກ​ຄອບຄົວ ​ແລະ ​ໄດ້​ຮັບ​ຄວາມ​ເອົາ​ໃຈ​ໃສ່​ຂອງ​ທົ່ວ​ສັງຄົມ, ມີ​ຄວາມ​ໝາຍສຳຄັນ​ທາງດ້ານ​ການ​ເມືອງ ສັງຄົມ ​ແລະ ມະນຸດ, ສະ​ແດງ​ເຖິງທາດ​ແທ້​ທີ່ດີ​ເດັ່ນ ຈົບງາມ​ຂອງ​ລະບອບ​ຂອງ​ພວກເຮົາ. ວັນ​ທີ 14 ມັງກອນ 1993, ຄະນະ​ບໍລິຫານ​ງານ​ສູນ​ກາງພັກ ສະ​ໄໝ​ທີ VII ​ໄດ້​ປະກາດ​ໃຊ້​ມະຕິພິ​ເສດສະ​ເພາະ ກ່ຽວ​ກັບ​ບັນດາ​ບັນຫາ​ຮີບ​ດ່ວນຂອງ​ພາລະກິດ​ເບິ່ງ​ແຍງ​ດູ​ແລ​ສຸຂະພາບ​ຂອງ​ປະຊາຊົນ. ປີ 2005, ກົມ​ການ​ເມືອງ​ສູນ​ກາງ​ພັກ​ສະ​ໄໝ​ທີ IX ກໍ່​ໄດ້​ອອກ​ມະຕິ​ກ່ຽວ​ກັບ​ບັນຫາ​ນີ້. ​ນັບ​ແຕ່​ນັ້ນ​ເປັນ​ຕົ້ນ​ໄປ, ກົມ​ການ​ເມືອງ, ຄະນະ​ເລຂາທິການ ​ໄດ້​ປະກາດ​ໃຊ້​ ຄຳ​ສັ່ງ 8 ສະບັບ, ບົດ​ສະຫຼຸບ 3 ສະບັບ, ​ແຈ້ງ​ການ 4 ສະບັບ ​ແລະ ​ໄດ້​ເອົາ​ໃຈ​ໃສ່​ຢ່າງ​ເປັນ​ປະຈຳ​ເຖິງ​ການ​ນຳພາ ຊີ້​ນຳ ຊຸກຍູ້​ການ​ປະຕິບັດ.

ພາຍ​ໃຕ້​ການ​ນຳພາ​ຂອງ​ສູນ​ກາງ, ທົ່ວ​ພັກ ທົ່ວ​ປວງ​ຊົນ ທົ່ງ​ກອງທັບ, ​ເປັນ​ຕົ້ນ​ແມ່ນ ຖັນ​ແຖວ​ພະນັກງານ​​ແພດ ພະນັກງານ​ສາທາລະນະ​ສຸກ​ທົ່ວ​ປະ​ເທດ ​ໄດ້​ສູ້​ຊົນ ພະຍາຍາມ​ຜັນ​ຂະຫຍາຍປະຕິບັດ ຫຼາຍ​ແຜນ​ນະ​ໂຍບາຍ, ມາດ​ຕະການ​ເພີ່ມ​ທະວີ​ການ​ຮັກສາ ​ເບິ່ງ​ແຍງ​ດູ​ແລ ຍົກ​ສູງ​ສຸຂະພາບ​ຂອງ​ປະຊາຊົນ, ບັນລຸ​ຜົນສຳ​ເລັດ​ທີ່​ສຳຄັນ​ຫຼາຍ​ຢ່າງ. ຫວຽດນາມ​ຖືກອົງການ​ອະນາ​ໄມ​ໂລກ​ຕີ​ລາຄາ​ວ່າ ​ເປັນຈຸດ​ສະຫວ່າງ​ກ່ຽວ​ກັບ​ການ​ບັນລຸ​ເປົ້າ​ໝາຍການ​ພັດທະນາ​ສະຫັດ​ສະ​ວັດ ​ໃນ​ຂົງ​ເຂດ​ການ​ຮັກສາ ​ເບິ່ງ​ແຍງ​ດູ​ແລ​ສຸຂະພາບ​ຂອງ​ປະຊາຊົນ. 

​ແຕ່​ວ່າ, ຕໍ່ໜ້າ​ຄວາມ​ຮຽກຮ້ອງ​ຕ້ອງການ​ໃໝ່​ໃນ​ໄລຍະ​ແຫ່ງ​ການ​ພັດທະນາ​ໃໝ່​ ຂອງ​ປະ​ເທດ​ຊາດ, ວຽກ​ງານ​ຮັກສາ ​ເບິ່ງ​ແຍງ​ດູ​ແລ ​ແລະ ຍົກ​ສູງ​ສຸຂະພາບ​ຂອງ​ປະຊາຊົນ ກໍ່​ມີ​ຈຸດ​ອ່ອນ ຂໍ້​ຂາດ​ຕົກ​ບົກພ່ອງ​ບໍ່​ໜ້ອຍ, ມີ​ເຫດການ​ບາງ​ຢ່າງ​ເກີດ​ຂຶ້ນ, ກໍ່​ໃຫ້​ເກີດ​ບັນຫາ​ທາງ​ສັງຄົມ. ​ເພື່ອ​ເສີມ​ຂະຫຍາຍ​ບັນດາ​ຜົນງານຄວາມ​ສຳ​ເລັດ​ທີ່​ບັນລຸ​ໄດ້, ​ເຮັດ​ວຽກ​ງານຮັກສາ ​ເບິ່ງ​ແຍງ​ດູ​ແລ ​ແລະ ຍົກ​ສູງ​ສຸຂະພາບ​ຂອງ​ປະຊາຊົນ ​ໃນ​ສະພາບ​ການ​ໃໝ່​ ໃຫ້​ໄດ້​ດີກ​ວ່າ​ອີກ, ຄະນະ​ບໍລິຫານ​ງານ​ສູນ​ກາງຕ້ອງ​ປຶກສາ​ສົນທະນາ ​ແລະ ລົງມະຕິ​ກ່ຽວ​ກັບ​ບັນຫານນີ້.

ບົນ​ພື້ນຖານ​ຂອງບົດ​ລາຍ​ງານ ​ໂຄງການ ​ແລະ ​ໃບ​ສະ​ເໜີ​ຂອງ​ກົມ​ການ​ເມືອງ, ພ້ອມ​ກັນ​ນັ້ນ​ ກໍ່​ອີງ​ໃສ່​ສະຖານະ​ການ​ຕົວ​ຈິງ, ຂໍ​ສະ​ເໜີ​ໃຫ້​ສູນ​ກາງ​ຈົ່ງ​ປຶກສາ​ສົນທະນາ, ລົງ​ເລິກວິ​ເຄາະ​ໄຈ້​ແຍກ, ​ໄປ​ເຖິງ​ຄວາມ​ສັງ​ເກດ​ທີ່​ເປັນ​ເອກະ​ພາບ​ສູງ ກ່ຽວ​ກັບຜົນງານ ຈຸດ​ດີ ຄວາມ​ສຳ​ເລັດ ກໍ່​ຄື​ກ່ຽວ​ກັບ​ຈຸດ​ອ່ອນ ຂໍ້​ຈຳກັດ ​ແລະ ບົດຮຽນ​ປະສົບ​ການ ​ໃນ​ວຽກ​ງານຮັກສາ ​ເບິ່ງ​ແຍງ​ດູ​ແລ ​ແລະ ຍົກ​ສູງ​ສຸຂະພາບ​ຂອງ​ປະຊາຊົນ ໃນ​ເວລາ​ທີ່​ຜ່ານ​ມາ; ຊີ້​ໃຫ້​ເຫັນ​ໂອກາດ ຄວາມ​ສະດວກ​ດີ​ຕ່າງໆ ທີ່​ຕ້ອງ​ກຳ​ໃຫ້​ໄດ້​ຢ່າງ​ທັນ​ການ ​ແລະ ຄວາມ​ຫຍຸ້ງຍາກ ສິ່ງ​ທ້າ​ທາຍ​ທີ່​ຕ້ອງ​ພະຍາຍາມ​ແກ້​ໄຂ​ຜ່ານ​ຜ່າ​ ໃນ​​ໄລຍະເວລາ​ຕໍ່​ໄປ. ຈາກ​ນັ້ນ ກຳນົດ​ທັດສະນະ ​ເປົ້າ​ໝາຍ ​ແລະ ບັນດາ​ໜ້າ​ທີ່, ວິທີ​ແກ້​ໄຂຕົ້ນຕໍ່​ ທີ່ຕ້ອງ​ກຳ​ແໜ້ນ ​ແລະ ປະຕິບັດ​ໃນ​ໄລຍະ​ໃໝ່. 

ກ່ຽວ​ກັບ​ໂອກາດ, ຄວາມ​ສະດວກ​ດີ, ​ແມ່ນ​ບໍ່​ວ່າ ນັ້ນ​ແມ່ນ​ຜົນງານ ຄວາມ​ສຳ​ເລັດທີ່​ບັນລຸ​ໄດ້​ ໃນ​ຂົງ​ເຂດ​ນີ້ ກໍ່​ຄືບັນດາ​ຜົນສຳ​ເລັດ​ອັນ​ໃຫຍ່​ຫຼວງ, ທີ່​ມີ​ຄວາມ​ໝາຍ​ປະຫວັດສາດ​ຂອງ 30 ປີ​ແຫ່ງ​ການ​ປ່ຽນ​ແປງ​ໃໝ່; ການ​ຂະຫຍາຍຕົວ​ຢ່າງ​ກ້າວ​ກະ​ໂດດ​ຂອງ​ວິທະຍາສາດ-​ເຕັກ​ໂນ​ໂລ​ຊີສາຂາ​ສາທາລະນະ​ສຸກ ພາຍ​ໃຕ້​ການ​ກະທົບ​ຂອງ​ການປະຕິວັດ​ອຸດສາຫະກຳ​ຄັ້ງ​ທີ​ສີ່ ​ແລະ ການ​ໂລກາ​ພິວັດ, ​ເຊື່ອມ​ໂຍງ​ສາກົນ?... ກ່ຽວ​ກັບ​ຄວາມ​ຫຍຸ້ງຍາກ, ສິ່ງ​ທ້າ​ທາຍ, ​ແມ່ນ​ບໍ່​ວ່າ ຕ້ອງ​ເວົ້າ​ເຖິງ​ຈຸດ​ອ່ອນ ຂໍ້​ຈຳກັດ​ໃນ​ຂົງ​ເຂດ​ສາທາລະນະ​ສຸກ ​ແລະ ບັນດາ​ຂົງ​ເຂດ​ທີ່​ກ່ຽວຂ້ອງ; ການ​ປ່ຽນ​ແປງ​ຢ່າງ​ໄວວາຂອງ​ເງື່ອນ​ໄຂ​ດຳລົງ​ຊີວິດ, ​ແບບ​ແຜນ​ດຳລົງ​ຊີ​ວິກ, ສິ່ງ​ແວດ​ລ້ອມ​ແຫ່ງ​ການ​ດຳລົງ​ຊີວິດ​ແລະ​ເຮັດ​ວຽກ, ພະຍາດ​ປະ​ເພດ​ຕ່າງໆ; ​ແຫຼ່ງພະລັງ​ຂອງ​ລັດຖືກ​ຈຳກັດ ​ໃນ​ຂະນະ​ນັ້ນ ການລະດົມ​ບັນດາ​ແຫຼ່ງພະລັງ​ສັງຄົມ ​ພົບ​ຄວາມ​ຫຍຸ້ງຍາກ​ຫຼາຍ?... ກ່ຽວ​ກັບ​ບົດຮຽນ​ປະສົບ​ການ, ​ແມ່ນ​ບໍ່​ວ່າ ຕ້ອງ​ເນັ້ນ​ໜັກ ຢືນຢັນ​ບົດບາດນຳ​ພາ​ຂອງ​ພັກ, ການ​ຄຸ້ມ​ຄອງ​ບໍລິຫານ​ຂອງ​ລັດ, ການ​​ເຂົ້າ​ຮ່ວມຢ່າງ​ຫ້າວຫັນ​ຂອງ​ລະບົບ​ການ​ເມືອງ​ທັງ​ໝົດ ​ແລະ​ຂອງ​ທົ່ວປວງ​ຊົນ; ບົດບາດ​ນຳ​ໜ້າ​ພາ​ທາງ​ຂອງ​ໂຮງໝໍ, ພື້ນຖານ​ສາທາລະນະ​ສຸກ​ຂອງ​ລັດ; ຄວາມ​ໝາຍ, ຄວາມ​ສຳຄັນ​ຂອງ​ການ​ໝູນ​ໃຊ້​ກົນ​ໄກ​ຕະຫຼາດ ຢ່າງ​ຖືກຕ້ອງ ​ເພື່ອ​ລະດົມ​ເອົາ​ທຸກ​ແຫຼ່ງພະລັງ​ ​ແລະ ຈັດ​ແບ່ງ ນຳ​ໃຊ້​ແຫຼ່ງພະລັງ​ເຫຼົ່າ​ນັ້ນ​ຢ່າງ​ມີ​ປະສິດທິ​ຜົນ ​ໃນ​ການ​ຮັກສາ ​ເບິ່ງ​ແຍງ​ດູ​ແລ ຍົກ​ສູງ​ສຸຂະພາບ ຕິດ​ກັບ​ການ​ກຳນົດ​ທິດ​ສັງຄົມ​ນິຍົມ ​ແລະ ລັກສະນະ​ດີ​ເດັ່ນ​ຂອງ​ລະບອບ​ສັງຄົມ, ​ເຊັ່ນ ຫວຽດນາມ​ສ້າງ​ຕັ້ງ​ໄດ້​ລະບົບ​ສາທາລະນະ​ສຸກຢູ່​ຮາກຖານ, ຄວບ​ຄຸມ ​ເບິ່ງ​ແຍງ​ດູ​ແລ​ສຸຂະພາບ​ຂອງ​ປະຊາຊົນ​ຢູ່​ໃນ​ແຕ່​ລະ​ຕາ​ແສງ, ສຳນັກງານ​ອົງການ, ໜ່ວຍ​ງານ ​ໃນ​ຊຸມ​ປີ​ທີ່​ປະ​ເທດ​ຊາດ​ມີ​ຄວາມ​ຫຍຸ້ງຍາກຫຼາຍ​ກວ່າປະຈຸ​ບັນ? ກ່ຽວ​ກັບ​ທັດສະນະ, ທິດ​ທາງ​ການ​ປະຕິບັດ, ​ແມ່ນ​ບໍ່​ວ່າ ຈະ​ຕ້ອງ​ເນັ້ນ​ເຖິງ​ການ​ສົມທົບ​​ເປັນ​ຢ່າງ​ດີ ລະຫວ່າງ​ການ​ກັນ​ແລະ​ແກ້; ລະຫວ່າງ​ການ​ເບິ່ງ​ແຍງ​ດູ​ແລ​ ກັບ​ການ​ຮັກສາ; ລະຫວ່າງ​ແພດພື້ນ​ເມືອງ​ຕາ​ເວັນ​ອອກ ​ກັບ​ແພດ​ທະຍາ​ສາດຕາ​ເວັນ​ຕົກ; ລະຫວ່າງການ​ດູ​ແລ​ສຸຂະພາບ​ຂັ້ນ​ພື້ນຖານ​ ກັບຂັ້ນ​ເທິງ; ລະຫວ່າງ​ການລົງທຶນດ້ວຍ​ງົບປະມານ​ຂອງ​ລັດ​ ກັບການ​ເພີ່ມ​ທະວີ​ຄວາມ​ເປັນ​ເຈົ້າ​ຕົນ​ເອງ, ຫັນ​ເປັນ​ສັງຄົມ; ລະຫວ່າງ​ສາທາລະນະ​ສຸກ​ທົ່ວ​ປວງ​ຊົນ ​ກັບການ​ຝຶກ​ອົບຮົມນາຍ​ໝໍນາຍ​ແພດ, ຜູ້​ຊ່ຽວຊານ​ສາທາລະນະ​ສຸກ​ທີ່​ເກັ່ງ, ຜູ້ນຳ​ໜ້າ​ຂະ​ແໜງ​ການ,...? 

ກ່ຽວ​ກັບ​ວຽກ​ງານ​ປະຊາກອນ​ໃນ​ສະພາບ​ການ​ໃໝ່

ນີ້​ແມ່ນບັນຫາ​ໃຫຍ່​ແລະ​ຫຍຸ້ງຍາກ​ທີ່​ສຸດ ​ແຕ່​ມີ​ຄວາມ​ໝາຍ​ສຳຄັນ​ພິ​ເສດ, ກ່ຽວຂ້ອງ​ກັບ​ການ​ປົກ​ປ້ອງ ຮັກສາ ພັດທະນາ​ເຊື້ອ​ຊາດ ຊົນ​ຊາດ ປ​ະ​ເທດ​ຊາດ. ​ໃນ 25 ປີ​ທີ່​ຜ່ານ​ມາ, ທົ່ວ​ປະ​ເທດ​ເຮົາ​ໄດ້​ຕັ້ງ​ໝັ້ນ ​ເດັດດ່ຽວ​ປະຕິບັດ​ນະ​ໂຍບາຍ​ປະຊາກອນ ​ແລະ ການວາງ​ແຜນ​ຄອບຄົວ, ​ແຕ່ລະ​ຄູ່​ຜົວ​ເມຍ​ມີ​ລູກພຽງ 2 ຄົນ ຕາມ​ມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 4 ສະ​ໄໝ​ທີ VII. ຄຽງ​ຄູ່​ບັນດາ​ຜົນງານ ຄວາມ​ສຳ​ເລັດ​ທີ່​ບັນລຸ​ໄດ້​ນັ້ນ ກໍ່​ຍັງ​ມີ​ຈຸດ​ອ່ອນ ຂໍ້​ຈຳກັດ​ບໍ່​ໜ້ອຍ, ​ແລະ ​ມີ​ບັນຫາ​ໃໝ່ຕ່າງໆ ຊຶ່ງ​ຕ້ອງວາງ​ທິດ​ທາງ​ແກ້​ໄຂ​ຢ່າງ​ທັນ​ການ. ຕົວຢ່າງ: ອັດຕາ​ການ​ເກີດ​ລູກ​ຢູ່​ບັນດາ​ເຂດຕ່າງ​ກັນ ​ມີ​ຄວາມ​ແຕກ​ຕ່າງ​ກັນ​ຫຼາຍພໍ​ຄວນ.

ຄວາມ​ບໍ່​ສົມ​ດຸນ​ທາງ​ເພດຂອງ​ເດັດ​ເກີດ​ໃໝ່ ​ເພີ່ມ​ຂຶ້ນ​ຢ່າງ​ໄວ, ​ເຖິງລະດັບ​ເຄັ່ງຮ້ອນ ​ແລະ ນັບ​ມື້​ນັບ​​ແຜ່ກວ້າງອອກ. ຫວຽດນາມ​ກຳລັງ​ເຂົ້າ​ສູ່​ໄລຍະ “ປະຊາກອນ​ສູງ​ອາຍຸ”, ປະ​ເຊີນ​ໜ້າ​ກັບ​ຄວາມ​ສ່ຽງ “ຍັງ​ບໍ່​ທັນ​ຮັ່ງມີ​ແຕ່​ກໍ່​ໄດ້​ເຖົ້າ​ແລ້ວ”, ​ເສຍ​ໂອກາດ​ແຫ່ງ “​ໄລຍະ​ເວລາ​ປະ​ຊາກ​ອນທອງຄຳ”. ການຄວບ​ຄຸມ​ປະຊາກອນ, ການຄຸ້ມຄອງ​ການ​ຍ້າຍ​ຖິ່ນ​ຂອງ​ປະຊາກອນ, ​ເປັນ​ຕົ້ນ​ແມ່ນ​ການ​ຍ້າຍ​ຖິ່ນ​ແບບ​ເສ​ລີ, ຍັງ​ສັບສົນ​ບໍ່​ໄດ້​ຕາມ​ຄວາມ​ຕ້ອງການ. ຄຸນ​ນະພາ​ບຂອງ​ປະຊາກອນ, ​ໂດຍ​ສະ​ເພາະ​ແມ່ນ​ຄວາມ​ສູງ​ແລະ​ສຸຂະພາບ ​ໄດ້​ຮັບ​ການ​ປົວ​ແປງ​ຊ້າ. ສະພາບ​ການ​ແຕ່ງງານ​ໃນ​ໄວ​ເດັກ, ​ແຕ່ງງານ​ໃນ​ເຊື້ອສາຍ​ໃກ້​ກັນ ຍັງ​ເກີດ​ຂຶ້ນ​ຢູ່​ບາງ​ເຂດ​ຊົນ​ເຜົ່າ​ສ່ວຍ​ນ້ອຍ; ອັດຕາ​ສ່ວນ​ຄົນ​ພິການ​ໃນ​ປະຊາກອນ​ຍັງ​ສູງ​ພໍ​ຄວນ... 

ບົນ​ພື້ນຖານ​ຄວາມ​ເປັນ​ເອກະ​ພາບ​ຄວາມຮັບ​ຮູ້ກ່ຽວ​ກັບ​ສະພາບ​ການ, ທ່າ​ອຽງ​ການ​ພັດທະນາ​ໃນ​ເວລາ​ຕໍ່​ໄປ, ສະ​ເໜີ​ໃຫ້​ສູນ​ກາງ​ລົງ​ເລິກ​ໄຈ້​ແຍກ​ສາ​ເຫດຂອງ​ຈຸດ​ອ່ອນ ຂໍ້​ຈຳກັດ​ເທິງ​ນີ້, ຖອດ​ຖອນ​ບົດຮຽນ​ແຫ່ງ​ຄວາມ​ສຳ​ເລັດ​ຜົນ ກໍ່​ຄື​ຄວາມ​ບໍ່​ສຳ​ເລັດ​ຜົນ ຂອງ​ວຽກ​ງານ​ປະຊາກອນ​ຢູ່​ຫວຽດນາມ ​ແລະ ຄົ້ນຄວ້າ​ທາ​ບທາມ​ບົດຮຽນ​​ກ່ຽວ​ກັບ​ຂົງ​ເຂດ​ນີ້ຂອງ​ໂລກ. ຈາກ​ນັ້ນ, ວາງ​ທັດສະນະ​ຊີ້​ນຳ, ​ເປົ້າ​ໝາຍ ​ແລະ ໜ້າ​ທີ່, ວິທີ​ແກ້​ໄຂທີ່​ສອດຄ່ອງ ​ເພື່ອ​ຈະ​ກຳ​ເອົາ​ໂອກາດອັນ​ສະດວກ​ດີ, ຜ່ານ​ຜ່າຄວາມ​ຫຍຸ້ງຍາກ​ ສິ່ງ​ທ້າ​ທາຍ, ​ເຮັດ​ວຽກ​ງານ​ປະຊາກອນ​ໃນ​ສະພາບ​ການ​ໃໝ່​ໃຫ້​ດີກ​ວ່າ​ອີກ. ​ແມ່ນ​ບໍ່​ວ່າ ​ໃນ​ເວລາ​ຕໍ່​ໄປ​ນີ້​ ຫວຽດນາມຄວນຫັນປ່ຽນ​ຈຸດ​ໜັກ​ ຈາກ​ນະ​ໂຍບາຍ​ປະຊາກອນ​ແລະການວາງ​ແຜນຄອບຄົວ ​ໄປ​ສູ່​ປະຊາກອນ​ແລະ​ການ​ພັດທະນາ? ​ເນື້ອ​ໃນ​ອັນ​ລະອຽດ​ຂອງ​ຄວາມ​ສຳນຶກດັ່ງ​ຫ່າວ​ແມ່ນ​ຫຍັງ? ຄວາມ​ໝາຍ​ພຶດຕິ​ກຳ​ຂອງ​ມັນ​ແມ່ນ​ຄື​ແນວ​ໃດ? ສຸມ​ໃສ່​ໄຈ້​ແຍກ​ບັນດາ​ຫຼັກ​ຖານ ​ແລະ ຄວາມ​ຈຳ​ເປັນ, ຄວາມ​ຖືກຕ້ອງ ​ຂອງ​ການ​ຫັນປ່ຽນ​ຈຸດ​ໜັກ ຈາກ​ລົດ​ການ​ເຕີບ​ໂຕ​ຂອງ​ປະຊາກອນ​ ໂດຍ​ຜ່ານ​ການ​ປະຕິບັດຢ່າງ​ເຂັ້ມ​ງວດ​ນະ​ໂຍບາຍ​ແຕ່ລະ​ຄູ່​ຜົວ​ເມຍ​ເກີດ​ລູກ​ພຽງ 2 ຄົນ ມາ​ເປັນ​ການ​ຄວບ​ຄຸມ​ຂະໜາດ​ປະຊາກອນ ​ແລະ ຍົກ​ສູງ​ຄຸນ​ນະພາ​ບຂອງປະຊາກອນ ດ້ວຍ​ນະ​ໂຍບາຍ​ຮັກສາ​ລະດັບ​ການເກີດ​ປ່ຽນ​ແທນ.

​ເອົາ​ໃຈ​ໃສ່​ເຖິງ​ລັກສະນະ​ເປັນ​ໄປ​ໄດ້, ສອດຄ່ອງ​ຂອງ​ເປົ້າ​ໝາຍ​ທີ່​ໄດ້​ເລືອກ​ເອົາ ​ແລະ ຂອງນະ​ໂຍບາຍ ມາດ​ຕະການ​ທີ່​ໄດ້​ວາງ​ໄວ້. ພິ​ເສດ​ແມ່ນ​ ແຜນການ​ກ່ຽວ​ກັບ​ຂະໜາດ​ປະຊາກອນ ​ແລະ ບັນດາ​ນະ​ໂຍບາຍ ຮັບປະກັນ​ການ​ແກ້​ໄຂ​ບັນດາ​ບັນຫາ​ປະຊາກອນ​ຢ່າງຮອບດ້ານ ຄົບ​ຊຸດ, ​ເຊັ່ນ ຮັກສາ​ລະດັບ​ການ​ເກີດ​ປ່ຽນ​ແທນ; ​ເຮັດ​ໃຫ້​ອັດຕາ​ສ່ວນ​ທາງ​ເພດ​ຂອງ​ເດັກ​ເກີດ​ໃໝ່ ກັບຄືນ​ສູ່​ຄວາມ​ສົມ​ດຸນ​ໂດຍ​ທຳ​ມະ​ຊາດ; ສວຍ​ໃຊ້​​ເປັນ​ຢ່າງ​ດີ ​ເງື່ອ​ນໄຂ “​ໂຄງ​ສ້າງ​ປະຊາກອນ​ທອງຄຳ”; ຄ່ອງ​ຕົວ​ກັບ​ເງື່ອນ​ໄຂ​ປະຊາກອນ​ສູງ​ອາຍຸ; ຄຸ້ມ​ຄອງການ​ຍ້າຍ​ຖິ່ນ​ໃຫ້​ໄດ້​ເປັນ​ຢ່າ​ດີ, ​ໂດຍ​ສະ​ເພາະ​ແມ່ນ​ການຍ້າຍ​ຖິ່ນ​​ແບບເສລີ; ຍົກ​ສູງ​ຄຸນ​ນະພາ​ບຂອງ​ປະຊາກອນ... 

ບາງ​ບັນຫາ​ກ່ຽວ​ກັບ​ການ​ສືບ​ຕໍ່​ປ່ຽນ​ແປງ​ໃໝ່, ຈັດ​ວາງ​ການຈັດ​ຕັ້ງ​ກົງຈັກ ຂອງ​ລະບົບ​ການ​ເມືອງ​ໃຫ້ກະທັດ​ລັດ, ​ເຄື່ອນ​ໄຫວ​ຢ່າງ​ມີ​ສະມັດ​ຕະພາບ ປະສິດທິ​ຜົນ

ໃບ​ສະ​ເໜີ​ແລະ​ບົດ​ລາຍ​ງານ​ຂອງ​ກົມ​ການ​ເມືອງ​ສູນ​ກາງ​ໄດ້​ຍົກ​ໃຫ້​ເຫັນ​ແຈ້ງ​ຄວາມ​ໝາຍ, ຄວາມ​ສຳຄັນ, ຄວາມ​ຈຳ​ເປັນ​ແລະ​ຂອບ​ເຂດ ຂອງ​ໂຄງການ ບາງ​ບັນຫາ​ກ່ຽວ​ກັບ​ການ​ສືບ​ຕໍ່​ປ່ຽນ​ແປງ​ໃໝ່, ຈັດ​ວາງ​ການຈັດ​ຕັ້ງ​ກົງຈັກ ຂອງ​ລະບົບ​ການ​ເມືອງ ​ໃຫ້ກະທັດ​ລັດ, ​ເຄື່ອນ​ໄຫວ​ຢ່າງ​ມີ​ສະມັດ​ຕະພາບ ປະສິດທິ​ຜົນ. ກົມ​ການ​ເມືອງ​ສູນ​ກາງ​ເຫັນ​ວ່າ, ນີ້​ແມ່ນ​ບັນຫາ​ໃຫຍ່​ທີ່​ສຸດ, ສຳຄັນ​ທີ່​ສຸດ ​ແຕ່​ກໍ່​ຫຍຸ້ງຍາກທີ່​ສຸດ, ສັບສົນ​ແລະ​ສຳ​ຜັດ​ໄວ​ທີ່​ສຸດ, ຍ້ອນ​ມັນ​ພົວພັນ​ເຖິງ​ບັນດາ​ບັນຫາ​ທິດ​ສະ​ດີ​ທີ່​ພື້ນຖານ ກ່ຽວ​ກັບ​ແບບ​ວິທີ​ການ​ນຳພາ​ຂອງ​ພັກ, ບົດບາດ​ຄຸ້ມ​ຄອງ​ຂອງ​ລັດ ​ແລະ ສິດ​ເປັນ​ເຈົ້າ​ຂອງ​ປະຊາຊົນ; ກ່ຽວ​ກັບ​ການ​ປ່ຽນ​ແປງ​ໃໝ່​ລະບົບ​ການ​ເມືອງ​ຢ່າງ​ຄົບ​ຊຸດ ​ແລະ ການ​ປ່ຽນ​ແປງ​ໃໝ່​ເສດຖະກິດ; ກ່ຽວ​ກັບ​ຄວາມ​ພົວພັນ​ລະຫວ່າງ​ລັດ​, ຕະຫຼາດ ​ແລະ ສັງຄົມ; ມັນ​ມີ​ຄວາມ​ກ່ຽວຂ້ອງ​ກັບ​ສິດຜົນປະ​ໂຫຍດ, ​ແນວ​ຄິດ​ຈິດ​ໃຈ​ຂອງ​ພະນັກງານ ຂ້າ​ລັດຖະການ ລັດຖະກອນ ​ແລະ ຜູ້​ອອກ​ແຮງ​ງານ... 

​ໃນ​ຊຸມ​ປີ​ທີ່​ຜ່ານ​ມາ, ພັກ​ກອມ​ມູນິດ​ຫວຽດນາມ​ໄດ້​ປະກາດ​ໃຊ້ ​ແລະ ​ເອົາ​ໃຈ​ໃສ່​ຢ່າງ​ເປັນ​ປະຈຳ​ເຖິງ​ການ​ຊີ້​ນຳ​ນຳພາ​ການ​ປະຕິບັດ ​ແຜນ​ນະ​ໂຍບາຍ, ມະຕິ, ບົດ​ສະຫຼຸບ​ຫຼາຍ​ສະບັບ ກ່ຽວກັບການກໍ່ສ້າງ​ການຈັດ​ຕັ້ງ​ກົງຈັກ​ຂອງ​ລະບົບ​ການ​ເມືອງ. ອົງການ​ຈັດ​ຕັ້ງ​ພັກ, ລັດ, ​ແນວ​ໂຮມ​ປະ​ເທດ​ຊາດ ​ແລະ ບັນດາ​ອົງຄະ​ນະ​ການ​ເມືອງ-ສັງຄົມ ​ໄດ້​ຮັບ​ການຈັດ​ວາງ​ສັບ​ຊ້ອນ ປັບປຸງ​ບູລະນະ​ເທື່ອ​ລະ​ກ້າວ; ພາລະ​ບົດບາດ ໜ້າ​ທີ່ ສາຍ​ພົວພັນ​ການ​ງານ ຂອງ​ບັນດາ​ອົງການ​ຈັດ​ຕັ້ງ​ໃນ​ລະບົບ​ການ​ເມືອງ ​ໄດ້​ຮັບ​ການ​ກຳນົດ, ດັດ​ແປງ​ໃຫ້​ສອດຄ່ອງ​ເໝາະ​ສົບ​ກວ່າ​ເກົ່າ; ຮັບປະກັນ​ບົດບາດນຳພາ​ຂອງ​ພັກ, ການ​ຄຸ້ມ​ຄອງ​ບໍລິການ​ຂອງ​ລັດ, ສິດ​ເປັນ​ເຈົ້າ​ຂອງ​ປະຊາຊົນ ​ແລະ​ ໄດ້​ບັນລຸຜົນສຳ​ເລັດ​ທີ່​ສຳຄັນ, ປະກອບສ່ວນ​ເຂົ້າ​ໃນ​ຜົນສຳ​ເລັດ​ອັນ​ໃຫຍ່​ຫຼວງ ມີ​ຄວາມ​ໝາຍ​ປະຫວັດສາດ ຂອງ​ພາລະກິດ​ການ​ປ່ຽນ​ແປງ​ໃໝ່ຂອງ​ຊາດ. 

​ແຕ່​ວ່າ, ຈົນ​ເຖິງ​ປະຈຸ​ບັນ ການຈັດ​ຕັ້ງ​ກົງຈັກ​ຂອງ​ລະບົບ​ການ​ເມືອງ ຍັງ​ໃຫຍ່​ໂຕ​ພະ​ລຸງ​ພະລັງ, ຫຼາຍ​ຊັ້ນ ຫຼາຍຂັ້ນຕອນ, ສະມັດ​ຕະພາບ ປະສິດທິ​ຜົນ​ຕ່ຳ; ພາລະ​ບົດບາດ ໜ້າ​ທີ່​ຂອງ​ອົງການ​ຈຳນວນ​ໜຶ່ງຍັງ​ຊ້ຳ​ຊ້ອນ​ກັນ; ​ໂຄງ​ສ້າງ​ພາຍ​ໃນ​ບໍ່​ສົມ​ເຫດ​ສົມ​ຜົນ; ການຈັດ​ຕັ້ງ​ກົງຈັກ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງຄະ​ນະມະ​ຫານ​ຊົນ, ​ອົງການ​ພາລະກິດ​ຂອງ​ລັດ ​ໄດ້​ຮັບ​ການ​ປ່ຽນ​ແປງ​ໃໝ່​ຢ່າງ​ຊັກ​ຊ້າ; ການຈັດ​ຕັ້ງ​ແລະ​ບັນຈຸພະນັກງານ​ນັບ​ມື້​ນັບເພີ່ມ​ຂຶ້ນ​ຫຼາຍ; ຈຳນວນ​ຄົນ​ທີ່​ເປັນ​ຮອງ​ຫົວໜ້າ, ຈຳນວນ​ຄົນ​ທີ່​ໄດ້​ຮັບ​ສິດ​ໃນ​ລະບອບ​ “ໜ້າ​ທີ່​” ບໍ່​ສົມ​ເຫດ​ສົມ​ຜົນ; ​ໂຄງ​ປະກອບ, ຄຸນ​ນະພາ​ບຂອງ​ຖັນ​ແຖວ​ພະນັກງານ ຂ້າ​ລັດຖະການ ລັດຖະກອນ ບໍ່​ໄດ້​ຕາມ​ຄວາມ​ຕ້ອງການ; ​ຈຳນວນແຮງ​ງານ​ຮັບ​ໃຊ້​ທາງ​ອ້ອມຫຼາຍ​ໂພດ ​ໃນ​ຂະນະ​ນັ້ນ ​ແຮງ​ງານ​ເຮັດ​ວິຊາ​ສະ​ເພາະ​ໂດຍ​ກົງພັດ​ຂາດ​ເຂີນ. ຈຳນວນຄົນ​ທີ່​ໄດ້​ຮັບ​ເງິນ​ເດືອນ, ​ເບ້ຍ​ລ້ຽງ​ຈາກ​ງົບປະມານ ຢູ່​ບັນດາໜ່ວຍ​​ບໍລິການ​ສາທາລະນະ ​ແລະ ຜູ້​ເຮັດ​ວຽກ​ທີ່​ບໍ່​ຊ່ຽວຊຳນານ​ຂັ້ນ​ຕາ​ແສງ ນັບ​ມື້​ນັບ​ເພີ່ມ​ຂຶ້ນ. 

ສະ​ເໜີ​ໃຫ້​ບັນດາ​ສະຫາຍສຸມ​ໃຈ່ຄົ້ນຄວ້າ, ຕີ​ລາຄາ​ສະພາບ​ການ​ແລະ​ສາ​ເຫດ​ຢ່າງ​ພາວະ​ວິ​ໄສ ຮອບດ້ານ, ​ໂດຍ​ສະ​ເພາະ​ແມ່ນ ສາ​ເຫດ​ຂອງ​ຈຸດ​ອ່ອນ ຂໍ້​ຈຳ​ກັດ. ພ້ອມ​ກັນ​ນັ້ນ, ຈາກ​ບົດຮຽນ​ນຳພາ ຄຸ້ມ​ຄອງຢູ່​ບ່ອນ​ເຮັດ​ວຽກ; ຄົ້ນຄວ້າ ໝູນ​ໃຊ້​ບັນດາ​ບົດຮຽນທີ່​ຖອດ​ຖອນ​ມາ​ໄດ້​ ຈາກ​ການ​ສະຫຼຸບ​ສັງ​ລວມທິດ​ສະ​ດີ, ພຶດຕິ​ກຳ​ໃນ 30 ປີ​ແຫ່ງ​ການ​ປ່ຽນ​ແປງ​ໃໝ່, ລວມສູນ​ການ​ໃຫ້​ຄວາມ​ຄິດ​ເຫັນຕ່າງໆ​ທີ່​ຖືກຕ້ອງ​ຊັດ​ເຈນ, ເພີ່ມ​ເຕີມ ປັບປຸງບູລະນະ​ທັດສະນະ, ​ເປົ້າ​ໝາຍ ​ແລະ ໜ້າ​ທີ່, ວິທີ​ແກ້​ໄຂ​ໃນ​ເວລາ​ຕໍ່​ໄປ.

​ແມ່ນ​ບໍ່​ວ່າ ຄວາມ​ເອົາ​ໃຈ​ໃສ່​ເປັນ​ພິ​ເສດ​ເຖິງ​ການ​ຮັບປະກັນ​ລັກສະນະ​ປ່ຽ​ນແປງ​ໃໝ່, ກວມ​ລວມ, ລະບົບ, ຄົບ​ຊຸດ, ​ເຊື່ອມຕໍ່​ກັນ; ສົມທົບ​ຢ່າງ​ກົມກຽວ​ລະຫວ່າງ ການສືບ​ທອດ ຄວາມໝັ້ນຄົງ ​ກັບການປ່ຽນ​ແປງ​ໃໝ່, ການພັດທະນາ; ບໍ່​ຮີບຮ້ອນ ກະ​ໂດດຈາກ​ຂົ້ວ​ນີ້​​ໄປ​ສູ່​ຂົ້ວ​ອື່ນ; ຕິດ​ແໜ້ນ​ການປ່ຽນ​ແປງ​ໃໝ່​ການຈັດ​ຕັ້ງ​ກົງຈັກ ກັບ​ການ​ປ່ຽນ​ແປງ​ໃໝ່​ແບບ​ວິທີ​ການ​ນຳພາ, ກັບ​ການ​ຫຼຸດຜ່ອນ​ຈຳນວນ​ພະນັກງານ ​ແລະ ປະຕິ​ຮູບ​ລະບອບ​ເງິນ​ເດືອນ; ​ແກ້​ໄຂ​ຢ່າງ​ກົມກຽວ​ສາຍ​ພົວພັນ​ລະຫວ່າງ​ລັດ ຕະຫຼາດ ​ແລະ ສັງຄົມ?

ບັນດາ​ໜ້າ​ທີ່​ແລະ​ວິທີ​ແກ້​ໄຂ​ທີ່​ວາງ​ອອກ​ມາ​ຕ້ອງ​ສອດຄ່ອງ, ​ເປັນ​ໄປ​ໄດ້, ມີ​ຂັ້ນ​ຕອນ ບາດກ້າວ​ເດີນ​ທີ່​ໜັກ​ແໜ້ນ, ຕອບ​ສະໜອງ​ໄດ້​ຄວາມ​ຕ້ອງການ​ສະ​ເພາະ​ໜ້າ ​ແລະ ຍາວ​ນານ, ປະກອບສ່ວນ​ແກ້​ໄຂ​ບັນດາ​ບັນຫາ​ທີ່​ສະພາບ​ຕົວ​ຈິງວາງ​ອອກ​ມາ ຕໍ່​ການຈັດ​ຕັ້ງ​ກົງຈັກ​ຂອງ​​ລະບົບ​ການ​ເມືອງ​ທັງ​ໝົດ ກໍ່​ຄື​ບັນດາ​ອົງການຈັດ​ຕັ້ງ​ລະອຽດ​ຂອງ​ພັກ, ລັດ, ​ແນວ​ໂຮມ​ປະ​ເທດ​ຊາດຫວຽດນາມ ​ແລະ ບັນດາ​ອົງຄະ​ນະ​ການ​ເມືອງ-ສັງຄົມ, ​ໂດຍ​ສະ​ເພາະ​ແມ່ນ​ການຈັດ​ຕັ້ງ​ພາຍ​ໃນ​ແຕ່​ລະ​ອົງການ, ໜ່ວຍ​ງານ. ​ແມ່ນ​ບໍ່​ວ່າ ວຽກ​ໃດ​ທີ່​ຈະ​ແຈ້ງ​ແລ້ວ, ສຸກ​ງອມ​ແລ້ວ​ກໍ່​ຕັດສິນ​ໃຈ​ເຮັດ​ໂລດ; ວຽກ​ໃດ​ທີ່​ຍັງ​ບໍ່​ຈະ​ແຈ້ງ, ສັບສົນ​ໂພດ, ມີ​ຄວາມ​ຄິດ​ເຫັນ​ຕ່າງ​ກັນ​ຫຼາຍ ​ແມ່ນ​ຕ້ອງ​ພະຍາຍາມ​ຄົ້ນຄວ້າ, ກ້າ​ເຮັດ​ທົດ​ລອງ​ ແລ້ວ​​ສະຫຼຸບຖອດ​ຖອນ​ບົດຮຽນ, ​ເປີດ​ກວ້າງ​ເທື່ອ​ລະ​ກ້າວ?... 

ກ່ຽວ​ກັບ​ການ​ສືບ​ຕໍ່​ປ່ຽນ​ແປງ​ໃໝ່​ລະບົບ​ການຈັດ​ຕັ້ງ ​ແລະ ​ຄຸ້ມ​ຄອງ, ຍົກ​ສູງ​ຄຸນ​ນະພາ​ບ​ແລະ​ປະສິດທິ​ຜົນ​ການ​ເຄື່ອນ​ໄຫວ ​ຂອງບັນດາ​ໜ່ວຍບໍລິການສາທາລະນະ

​ໃນ​ເວລາ​ທີ່​ຜ່ານ​ມາ, ພັກ​ແລະ​ລັດ​ຫວຽດນາມ​ໄດ້​ປະການ​ໃຊ້​ເອກະສານ​ທີ່​ສຳຄັນ​ຫຼາຍ​ສະບັບ ​ແລະ ຕັ້ງໜ້າ​ຊີ້​ນຳ​ນຳພາລະບົບ​ການ​ເມືອງ​ທັງ​ໝົດ ​ໃນ​ການຈັດ​ຕັ້ງ​ປະຕິບັດຫຼາຍ​ແຜນ​ນະ​ໂຍບາຍ, ນະ​ໂຍບາຍ, ມາດ​ຕະການ​ປ່ຽນ​ແປງ​ໃໝ່ ການຈັດ​ຕັ້ງ​ແລະ​ເຄື່ອນ​ໄຫວຂອງ​ບັນດາ​ໜ່ວຍ​ບໍລິການ​ສາທາລະນະ, ບັນລຸ​ຜົນສຳ​ເລັດ​ຂັ້ນ​ຕົ້ນ​ທີ່​ສຳຄັນ. ​ແຕ່​ວ່າ, ຍັງ​ມີ​ຂໍ້​ຈຳກັດ ຈຸດ​ອ່ອນ​ຫຼາຍ​ຢ່າງ ທີ່​ກໍ່​ຄວາມ​ຮ້ອນ​ເຄືອງ​ທາງສັງຄົມ ​ແລະ ມີຄວາມ​ຫຍຸ້ງຍາກ​ສິ່ງ​ທ້າ​ທາຍ​ບໍ່​ໜ້ອຍ ທີ່​ຕ້ອງ​ແກ້​ໄຂ​ຜ່ານ​ຜ່າ, ​ໂດຍ​ສະ​ເພາະ​ແມ່ນ​​ໃນການຈັດ​ຕັ້ງ​ຄືນ​ໃໝ່ ​ແລະ ປ່ຽນ​ແປງ​ໃໝ່ກົນ​ໄກ ນະ​ໂຍບາຍ ​ແນ​ໃສ່​ເສີມ​ຂະຫຍາຍ​ໃຫ້​ໄດ້​ເປັນ​ຢ່າງ​ດີ ສະຕິ​ປັນຍາ​ແລະການ​ອຸທິດ​ ຂອງຖັນ​ແຖວ​ປັນຍາ​ຊົນ, ຜູ້​ຊ່ຽວຊານ, ນັກວິທະຍາສາດ ​ແລະ ​ແຮງ​ງານ​ເຕັກນິກ​ຄຸນ​ນະພາ​ບສູງ​ໃນ​ຂົງ​ເຂດ​ນີ້, ຍົກ​ສູງ​ຄຸນ​ນະພາ​ບຂອງ​ການ​ບໍລິການ​ສາທາລະນະ, ຕອບ​ສະໜອງ​ຄວາມ​ຕ້ອງການ​ນັບ​ມື້​ນັບ​ສູງ​ຂອງ​ປະຊາຊົນ; ພ້ອມ​ກັນ​ນັ້ນ​ກໍ່​ປະກອບສ່ວນ​ແກ້​ໄຂ​ບັນຫາ​ການຈັດ​ຕັ້ງ, ການ​ບັນຈຸ​ບຸກ​ຄະລາ​ກອນ, ການ​ປະຕິ​ຮູບ​ລະບອບ​ເງິນ​ເດືອນ​ຂອງ​ລະບົບ​ການ​ເມືອງ​ທັງ​ໝົດ. 

ຈົນ​ເຖິງ​ປະ​ຈຸ​ບັນ, ບໍ່​ນັບ​ເຖິງ​ການຈັດ​ຕັ້ງ ບັນຈຸ​ບຸກຄະລາ​ກອນ​ໃນ​ກຳລັງ​ຕຳຫຼວດ, ກອງທັບ ​ແລະ ຂົງ​ເຂດວິ​ສາ​ຫະກິດ​ແຫ່ງ​ລັດ, ທົ່ວ​ປະ​ເທດ​ມີ​ປະມານ 58 ພັນ​ໜ່ວຍ​ບໍ​ລະກາ​ນສາທາລະນະ ທີ່​ມີ​ການ​ບັນຈຸ 2,5 ລ້ານຄົນ; ຖື​ບົດບາດ​ເປັນ​ເຈົ້າພາ​ທາງ, ສະໜອງການ​ບໍລິການ​ສາທາລະນະ​ເກືອບ​ທັງໝົດ, ພົວພັນ​ກັບ​ທຸກ​ຄົນ, ທຸກ​ຄອບຄົວ ​ແລະ ທົ່ວ​ສັງຄົມ, ​ເຊັ່ນ​ໃຫ້ການ​ບໍ​ລະກາ​ນສາທາລະນະ​ສຸກ, ສຶກສາ-ຝຶກ​ອົບຮົມ, ວິທະຍາສາດ-​ເຕັກ​ໂນ​ໂລ​ຊີ, ວັດທະນະທຳ, ກີລາ... ​ເພາະສະ​ນັ້ນ, ການ​ປ່ຽນ​ແປງ​ໃໝ່​ການຈັດ​ຕັ້ງ, ຍົກ​ສູງ​ຄຸນ​ນະພາ​ນຂອງ​ການ​ບໍລິການ ​ແລະ ປະສິດທິ​ຜົນ​ການ​ເຄື່ອນ​ໄຫວ​ຂອງ​ບັນດາ​ໜ່ວຍ​ບໍລິການ​ສາທາລະນະ ​ແມ່ນ​ຈຳ​ເປັນ​ທີ່​ສຸດ, ມີ​ຄວາມ​ໝາຍ​ການ​ເມືອງ ​ເສດຖະກິດ ວັດທະນະທຳ ສັງຄົມ ມະນຸດ​ອະລິຍະ​ທຳ​ທີ່​ເລິກ​ເຊິ່ງທີ່​ສຸດ, ປະກອບສ່ວນ​ເຂົ້າ​ໃນ​ພາລະກິດການພັດທະນາ​ປະ​ເທດ​ຢ່າງ​ໄວ​ແລະ​ຍືນ​ຍົງ ຕາມ​ກຳນົດ​ທິດ​ສັງຄົມ​ນິຍົມ, ສະ​ແດງ​ໃຫ້​ເຫັນ​ເຖິງ​ລັກສະນະ​ດີ​ເດັ່ນ​ຂອງ​ລະບອບ​ການ​ເມືອງ​ຂອງ​ພວກ​ເຮົາ. 

ສະ​ເໜີ​ໃຫ້​ສູນ​ກາງສຸມ​ໃສ່​ວິ​ເຄາະ​ໄຈ້​ແຍກ, ຕີ​ລາຄາ​ສະພາບ​ການ ສາ​ເຫດ​ແລະບົດຮຽນ ​ຢ່າງ​ພາວະ​ວິ​ໄສ ຮອບດ້ານ. ​ເອົາ​ໃຈ​ໃສ່​ໄຈ້​ແຍກ​ຢ່າງ​ເລິກ​ເຊິ່ງກ່ຽວ​ກັບ​ຄວາມ​ໝາຍ ຄວາມ​ສຳຄັນ​ຂອງການ​ສືບ​ຕໍ່​ຍູ້​ແຮງ​ການ​ປ່ຽນ​ແປງ​ໃໝ່​ ບັນດາ​ໜ່ວຍ​ບໍລິການ​ສາທາລະນະ ກໍ່​ຄືການ​ປ່ຽນ​ແປງ​​ໃໝ່​ວິ​ສາ​ຫະກິດ​ແຫ່ງ​ລັດ; ດຳ​ເນີນການ​ປ່ຽນ​ແປງ​ໃໝ່​ຢ່າງ​ຄົບ​ຊຸດ, ຂຸ້ນຂ້ຽວ ​ແຕ່​ຕ້ອງ​ຮອບ​ຄອບ ໜັກ​ແໜ້ນ ​ແລະ ຕັ້ງ​ຢູ່​ໃນ​ຂະ​ບວນການ​ສືບ​ຕໍ່​ປ່ຽນ​ແປງ​ໃໝ່ການຈັດ​ຕັ້ງ​ກົງ​ຈັດ​ຂອງ​ລະບົບ​ການ​ເມືອງ; ຄວາມ​ຈຳ​ເປັນ​ຕ້ອງ​ຍູ້​ແຮງ​ການ​ຫັນ​ເປັນ​ສັງຄົມ​ຕໍ່​ການ​ບໍລິການ​ສາທາລະນະ (ຫັນ​ເປັນ​ສັງຄົມ​ ແຕ່​ບໍ່​ຫັນ​ເປັນ​ການ​ຄ້າ), ​ເສີມ​ຂະຫຍາຍ​ດ້ານ​ຕັ້ງໜ້າ, ຈຳກັດ​ດ້ານຫຍໍ້​ທໍ້​ຂອງກົນ​ໄກ​ຕະຫຼາດ, ຂອງ​ການ​ເຊື່ອມ​ໂຍງ​ສາກົນ. ກຳນົດ​ແຈ້​ງບົດ​ບາດນຳພາ​ຂອງ​ພັກ, ການ​ຄຸ້ມ​ຄອງ​ບໍລິຫານຂອງ​ລັດ, ສິດ​ເປັນ​ເຈົ້າ​ຂອງ​ປະຊາຊົນ; ບົດບາດ, ທີ່​ຕັ້ງ​ຂອງ​ບັນດາ​ໜ່ວຍ​ບໍລິການ​ສາທາລະນະ ​ໃນ​ເງື່ອນ​ໄຂ​ພັດທະນາ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ​ເຊື່ອມ​ໂຍງ​ສາກົນ ​ແລະ ການ​ປະຕິວັດ​ອຸດສາຫະກຳ​ຄົ້ງທີ​ສີ່. 

ຈາກ​ນັ້ນ ວາງ​ທັດສະນະ ​ເປົ້າ​ໝາຍ ​ແລະ ທິດ​ທາງ​ສືບ​ຕໍ່​ຍູ້​ແຮງ​ການ​ປ່ຽນ​ແປງ​ໃໝ່​ການຈັດ​ຕັ້ງ, ຍົກ​ສູງ​ຄຸນ​ນະພາ​ບຂອງ​ການ​ບໍລິການ ​ແລະ ປະສິດທິ​ຜົນ​​ແຫ່ງ​ການເຄື່ອນ​ໄຫວ​ຂອງ​ໜ່ວຍ​ບໍລິການ​ສາທາລະນະ ຕິດ​ແໜ້ນ​ກັບ​ຮັບປະກັນ​ຄວາມ​ໝັ້ນຄົງດ້ານ​ການ​ເມືອງ ສັງຄົມ​ເວົ້າ​ລວມ ​ແລະ ຂອງ​ແຕ່ລະ​ຂະ​ແໜງ​ການ ຂົງ​ເຂດ​ເວົ້າ​ສະ​ເພາະ. ​ເອົາ​ໃຈ​ໃສ່​ສືບ​ທອດ ​ເສີມ​ຂະຫຍາຍ​ບັນດາ​ຜົນງານ ຄວາມ​ສຳ​ເລັດ​ທີ່​ບັນລຸ​ໄດ້​ແລ້ວ; ອີງ​ໃສ່​ສະພາບ​ຕົວ​ຈິງ ​ແລະ​ລະດັບ​ການ​ພັດທະນາ​ຂອງ​ປະ​ເທດ​ເຮົາ​ເພື່ອ​ກວດຄືນ, ​ເພີ່ມ​ເຕີມ, ປັບ​ປຸງບູລະນະ ລະບົບ​ບັນດາ​ກົນ​ໄກ ນະ​ໂຍບາຍ​ທີ່​ມີ​ຄວາມ​ເປັນ​ໄປ​ໄດ້​ສູງ​ໂດຍ​ສະ​ເພາະ​ແມ່ນ​ບັນດາ​ກົນ​ໄກ ນະ​ໂຍບາຍ​ໃໝ່ ທີ່​ມີ​ລັກສະນະ​ບຸກທະລຸ. 

​ເນື້ອ​ໃນ​ໂຄງການຂອງ​ກອງ​ປະຊຸມ​ສູນ​ກາງ​ພັກ​ຄັ້ງ​ນີ້ ກວມ​ຫຼາຍ​ບັນຫາທີ່​ກວ້າງຂວາງ, ທັງ​ພື້ນຖານ​ທັງ​ຮີບ​ດ່ວນ, ກ່ຽວຂ້ອງ​ກັບ​ການ​ພັດທະນາ​ເສດຖະກິດ-ສັງຄົມປະຈຳ​ປີ, ປ່ຽນ​ແປງ​ໃໝ່​ການພັດທະນາ​ສັງຄົມ, ປ່ຽນ​ແປງ​ໃໝ່​ການ​ເມືອງ​ຢ່າງ​ຄົບ​ຊຸດ ກັບ​ປ່ຽນ​ແປງ​ໃໝ່​ການ​ພັດທະນາ​ເສດຖະກິດ ຕາມຈິດ​ໃຈ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ. ທັງ​ໝົດ​ລ້ວນ​ແຕ່​ເປັນ​ບັນຫາ​ທີ່​ສຳຄັນ ສັບສົນ ​ແລະ​ສຳຜັດ​ໄວ, ມີ​ການ​ກະທົບ​ໂດຍ​ກົງ​ເຖິງ​ຊີວິດ​ຂອງ​ປະຊາຊົນ, ​ເຖິງ​ພະນັກງານ ຂ້າ​ລັດຖະການ ລັດຖະກອນ​ ​ແລະ ຜູ້​ອອກ​ແຮງ​ງານທັງ​ໝົດ​ ໃນ​ທົ່ວ​ປະ​ເທດ, ​ໄດ້​ຮັບ​ຄວາມ​ເອົາ​​ໃຈ​ໃສ່​ເປັນ​ພິ​ເສດ ​ແລະ​ຄວາມ​ຫວັງ​ດີ​ຂອງ​ສັງຄົມ. 

ສະ​ເໜີ​ໃຫ້​ບັນດາ​ສະຫາຍ​ຈົ່ງ​ເສີມ​ຂະຫຍາຍສຸດ​ຂີດ​ຄວາມ​ຮັບຜິດຊອບ, ສຸມ​ໃສ່​ຄົ້ນຄວ້າ, ປຶກສາ​ສົນທະນາ​ຢ່າງ​ຟົດ​ເດືອດ, ປະກອບ​ຄວາມ​ເຫັນ​ເພື່ອ​ບູລະນະ​ບົດ​ລາຍ​ງານ, ​ໂຄງການ, ຮ່າງ​ມະຕິ ບົດ​ສະຫຼຸບ ຂອງ​ສູນ​ກາງ ​ແລະ ພິຈາລະນາ, ຕົກລົງ ພ້ອມ​ກັບ​ບັນຫາ​ທີ່​ສຳຄັນ​ອື່ນ​ອີກ​ຈຳນວນ​ໜຶ່ງ​ໃນ​ວາລະ​ທ້າຍ​ກອງ​ປະຊຸມ. 

ດ້ວຍ​ຈິດ​ໃຈ​ດັ່ງກ່າວ, ຂ້າພະ​ເຈົ້າ​ຂໍ​ປະກາດ​ເປີດ​ກອງ​ປະຊຸມ​ຄົ້ງທີ 6 ຄະນະ​ບໍລິຫານ​ງານ​ສູນ​ກາງພັກ ສະ​ໄໝ​ທີ XII. ອວຍພອນ​ກອງ​ປະຊຸມ​ສຳ​ເລັດ​ຜົນ​ຢ່າງ​ຈົບ​ງານ./.

​ໂດຍ ຫງວຽນ​ຝູຈ້ອງ,

​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ ພັກ​ກອມ​ມູນິດ​ຫວຽດນາມ

    ----------------------------------------

* ຫົວ​ຂໍ້​ໂດຍ​ວາລະສານ​ກອມ​ມູນິດ​ເປັນ​ຜູ້​ແຕ່ງ.

ບົດ​ນີ້​ໄດ້​ລົງທຶນ​ໃນ​ວາລະສານກອມມູນິດ ສະບັບ​ທີ 900 (​ເດືອນ​ຕຸລາ 2017)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ