ວັນພຸດ, 13/12/2017
ການປະຕິວັດເດືອນຕຸລາລັດເຊຍ ແລະ ອຸດົມຄະຕິສັງຄົມນິຍົມ ໃນຍຸກສະໄໝປະຈຸບັນ
28/11/2017 9:53' ສົ່ງ ພິມ
ສະຫາຍເລຂາທິການໃຫຍ່ ຫງວຽນຝູຈ້ອງ ກ່າວສູນທອນພົດ ໃນງານສະເຫຼີມສະຫຼອງ ການປະຕິວັດເດືອນຕຸລາລັດເຊຍ

“ຮຽນ​ບັນດາທ່ານ​ຜູ້​ແທນ​ແລະ​ແຂກ​ທີ່​ມີ​ກຽດ, 

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ, 

ມື້​ນີ້, ພວກ​ເຮົາ​ພົບ​ກັນ​ຢູ່​ທີ່​ນີ້ - ຢູ່​ກາງ​ນະຄອນຫຼວງ​ຮ່າ​ໂນ້ຍທີ່​ມີ​ປະຫວັດສາດພັນ​ປີ​ແຫ່ງ​ອາ​ລະຍະ​ທຳ​ແລະພິລະອາດ​ຫານ, ​ເພື່ອ​ພ້ອມ​ກັນ​ກັບ​ທົ່ວ​ພັກ, ທົ່ວ​ປວງ​ຊົນ, ທົ່ວ​ກອງທັບ ສະ​ເຫຼີມສະຫຼອງ​ເຫດການ​ຍິ່ງ​ໃຫຍ່​ທີ່​ມີ​ຄວາມ​ໝາຍ​ປະຫວັດສາດ​ແລະ​ຍຸກ​ສະ​ໄໝ - ນັ້ນ​ຄື​ໄຊຊະນະ​ຂອງການ​ປະຕິວັດ​ເດືອນ​ຕຸລາ​ລັດເຊຍ ປີ 1917. 

ດັ່ງ​ທີ່​ພວກ​ເຮົາ​ທຸກ​ຄົນຮູ້, ກ່ອນ​ໜ້າ​ນີ້​ຮ້ອຍ​ປີ, ຕາມ​ສຽງ​ປືນ​ສັນຍານ​ຈາກກ່ຳ​ປັນຮົບຮຸ່ງ​​ອະ​ລຸນ, ການ​ບຸກ​ໂຈມ​ຕີ​ພະລາຊະ​ວັງ​ລະດູ​ໜາວ ຢູ່​ນະຄອນ ​ເປ​ໂຕຣກຼາດ ​ໄດ້​ເລີ່​ມຕົ້ນ ​ແລະ ການ​ປະຕິວັດສັງຄົມ​ນິຍົມທີ່​ຍິ່ງ​ໃຫຍ່ ພາຍ​ໃຕ້​ການ​ນຳພາ​ຂອງພັກ​ກອມ​ມູນິດ ​ໂບນ​ເຊ​ວິກລັດ​ເຊຍ ນຳໜ້າ​ໂດຍ​ ວ.ອີ.​ເລ​ນິນ ​ໄດ້​ຮັບ​ໄຊຊະນະ​ຢູ່​ນະຄອນ ​ເປ​ໂຕຣກຼາດ ​ແລະ​ແຜ່​ລາມ​ຢ່າງ​ໄວ​​ໃນ​ທົ່ວ​ປະ​ເທດ​ລັດ​ເຊຍ. 

ການ​ປະຕິວັດ​ເດືອນ​ຕຸລາ​ລັດເຊຍ ​ໄດ້ "​ເຮັດ​ໃຫ້​ໂລກ​ສັ່ນ​ສະ​ເທືອ​ນ", ທັບ​ມ້າງປ່ຽງ​ໃຫຍ່​ໃນ​ລະບົບ​ຈັກກະພັດ ທຶນ​ນິຍົມ, ​​ເປີດ​ສັກກະຫຼາດ​ໃໝ່​ໃນ​ປະຫວັດ​ສາດ​ຂອງ​ມະນຸດ. ດ້ວຍ​ໄຊຊະນະ​ຂອງການ​ປະຕິວັດ​ເດືອນ​ຕຸລາ​, ການ​ຄາດ​​ເດົາລ່ວງ​ໜ້າ​ຂອງ​ບັນດາ​ຜູ້​ກໍ່​ຕັ້ງ​ລັດ​ທິສັງຄົມ​ນິຍົມວິທະຍາສາດ ​ໄດ້​ກາຍ​ເປັນຄວາມ​ຈິງ​ໃນພື້ນ​ທີ່ໜຶ່ງ​ສ່ວນ​ກົກ​ຂອງ​ໜ່ວຍ​ໂລກ. ​ເປັນ​ຄັ້ງ​ທຳ​ອີດ​ໃນ​ປະຫວັດສາດ ຊຶ່ງ​ຜູ້​ອອກ​ແຮງ​ງານ​ໄດ້​ລຸກ​ຮື້​ຂຶ້ນ​ຍາດ​ເອົາອຳນາດ​ການ​ປົກຄອງ​ມາ​ມື​ຂອງ​ຕົນ ​ເພື່ອກໍ່ສ້າງ​ສັງຄົມໃໝ່​ທັງ​ໝົດ. ລັດ​ແບບ​ໃໝ່​​ໃນຮູບ​ແບບ​ຂອງ​ໂຊ​ວຽດ ​ໄດ້​ຮັບ​ການ​ສ້າງ​ຕັ້ງ​ຂຶ້ນ ​ແລະ ວ.ອີ.​ເລ​ນິນ ​ໄດ້​ຕີ​ລາຄາ​ວ່າ​ເປັນ “ລະບອບປະຊາ​ທີ​ປະ​ໄຕໃນ​ລະດັບ​ສູງ​ທີ່​ສຸດ ສຳລັບ​ກຳມະກອນ​ແລະ​ຊາວນາ,... ລະບອບ​ປະຊາທິປະ​ໄຕ​ແບບ​ໃໝ່”(1). 

​ໄຊຊະນະ​ຂອງການ​ປະຕິວັດ​ເດືອນ​ຕຸລາ​ ​ແລະ ການ​ກຳ​ເນີ​ດ​ເກີດ​ຂຶ້ນ​ຂອງ​ລັດ​ໂຊ​ວຽດ ​ໂດຍ ວ.ອີ.​ເລ​ນິນ ກໍ່​ຕັ້ງ ​ໄດ້​ເຮັດ​ໃຫ້​ຊາຕາກຳ​ຂອງ​ຊາດ​ລັດ​ເຊຍ​ມີ​ການ​ປ່ຽນ​ແປງ​ໂດຍ​ພື້ນຖານ, ນຳ​ເອົາປະ​ເທດ​ລັດ​ເຊຍ​ຈາກ​ປະ​ເທດ​ສັກດິນາ ທຶນ​ນິຍົມ​ທີ່​ຫຼ້າ​ຫຼັງ ທຸກ​ຍາກ ກາຍ​ເປັນ​ປະ​ເທດ​ມະຫາ​ອຳນາດທາງ​ເສດຖະກິດ ການ​ເມືອງ ການ​ທະຫານ ວິທະຍາສາດ​ເຕັກນິກ ວັດທະ​ນາ​ທຳ ການ​ສຶກສາ... ​ແຖວ​ໜ້າ​ຂອງ​ໂລກ; ນຳ​ເອົາ​ມະຫາຊົນ​ກຳມະກອນ-ຊາວນາ ຈາກ​ການ​ເປັນ​ຂ້າ​ທາດ ກາຍ​ເປັນ​​ເຈົ້າຂອງ​ປະ​ເທດ, ​ເປັນ​ເຈົ້າ​ສັງຄົມ; ຖານະ​ບົດບາດ ທີ່​ຕັ້ງ​ຂອງ​ປະ​ເທດ​ລັ​ດ​ເຊຍ​ໃນ​ເວທີ​ໂລກ​ໄດ້​ຮັບ​ການຍົກ​ສູງ​ຂຶ້ນ​ຢ່າງ​ບໍ່​ຢຸດ​ຢັ້ງ. 

​ໄຊຊະນະຂອງການ​ປະຕິວັດ​ເດືອນ​ຕຸລາ​ລັດເຊຍ​ ໄດ້​ຊ່ວຍ​ແຮງ​ໃຫ້​ຂະ​ບວນການ​ກອມ​ມູນິດ ​ແລະ ກຳມະກອນ​ສາກົນ. ຫຼາຍ​ພັກ​ກອມ​ມູນິດ​ແລະ​ກຳມະ​ກອນ​ ​ໄດ້​ຮັບ​ການ​ສ້າງ​ຕັ້ງ​ຂຶ້ນຢູ່​ບັນດາ​ປະ​ເທດ, ສ້າງ​ເປັນ​ຂະ​ບວນການ​ສາກົນ​ທີ່​ກວ້າງ​ຂວາງ​ໃນ​ທົ່ວ​ຫ້າ​ທະວີບ ຊຶ່ງ​ນຳ​ໜ້າ​ໃນ​ການ​ຕໍ່ສູ້ຂອງມະນຸດຊາດ ​ເພື່ອອຸດົມ​ຄະຕິ​ທີ່​ສູງ​ສົ່ງ ນັ້ນ​ຄື​ເອກະລາດ​ແຫ່ງ​ຊາດ, ປະຊາທິປະ​ໄຕ​ແລະ​ສັງຄົມ​ນິຍົມ. ກະ​ແສ​ຟອງ​ປະຕິວັດ​ກຳມາ​ຊີບ​ໜຶ່ງໄດ້​ເກີດ​ຂຶ້ນ​ຢ່າ​ງ​ແຂງ​ແຮງ​ຢູ່​ທະວີບ​ເອີຣົບ, ສ້າງ​ເປັນ​ກະ​ແສ​ສູງ​ແຫ່ງ​ການ​ຕໍ່ສູ້​ຂອງ​ຊົນ​ຊັ້ນ​ກຳມະກອນ​ແລະ​ປະຊາຊົນ​ຜູ້​ອອກ​ແຮງ​ງານ, ​ເຮັດ​ໃຫ້​​ການ​ປົກຄອງ​ຂອງ​ຊົນ​ຊັ້ນ​ນາຍທຶນ​ຜູກຂາດ​ໃນຫຼາຍ​ປະ​ເທດ ​ຕ້ອງ​ສັ່ນ​ສະ​ເທືອ​ນ. ລະບົບສັງຄົມ​ນິຍົມ​ໄດ້ປາກົດ​ຕົວ​ຂຶ້ນ ​ແລະ ຖື​ບົດບາດ​ໃຫຍ່​ຫຼວງ​ໃນ​ຂະ​ບວນການ​ພັດທະນາ​ຂອງ​ໂລກ​ປະຈຸ​ບັນ. 

ການ​ປະຕິວັດ​ເດືອນ​ຕຸລາ​ລັດເຊຍ​ ໄດ້​ສົ່ງ​ຜົນ​ກະທົບ​ຢ່າງ​ແຂງ​ແຮງ ​ເຖິງ​ຊີວິດ​ການ​ເມືອງ-ສັງຄົມ​ຂອງ​ຫຼາຍ​ປະ​ເທດ; ​ໄດ້​ປຸກ​ຕື່ນ, ລະດົມ​ກຳລັງ​ໃຈ ບັນດາ​ປະ​ເທດ​ຫົວ​ເມືອງ​ຂຶ້ນ​ທີ່​ຖືກ​ກົດ​ຂີ່ແລະບັນດາ​ປະ​ເທດທີ່​ຂຶ້ນ​ກັບ ​ໃຫ້​ລຸກ​ຂຶ້ນ​ຕໍ່ສູ້​ເພື່ອ​ເອກະລາດ​ອິດສະຫຼະພາບ, ນຳ​ເອົາ​ຄວາມ​ເຊື່ອ​ແລະ​ຄວາມ​ຫວັງ​ກ່ຽວ​ກັບ​ຄວາມ​ສາມາດ​ປົດ​ປ່ອຍ​ຕົນ​ເອງ ​ມາ​ໃຫ້​ບັນດາ​ຊາດ​ທີ່​ຖືກ​ກົດ​ຂີ່. ຊົນ​ຊັ້ນ​ກຳມະກອນ​ແລະ​ປະຊາຊົນ​ຜູ້​ອອກ​ແຮງ​ງານຢູ່​ຫຼາຍ​ປະ​ເທດ​ຫົວ​ເມືອງ​ຂຶ້ນ​ໃນ​ອາຊີ, ອາ​ຟຣິກກາ, ອາ​ເມຣິກາ​ລາຕີ​ນ ​ໄດ້​ລຸກ​ຮື້​ຂຶ້ນ​ຕໍ່ສູ້​ຍາດ​ເອົາ​ເອກະລາດ​ແຫ່ງ​ຊາດ; ຫຼາຍ​ຮ້ອຍ​ລ້ານ​ຄົນ​ໄດ້​ຮັບ​ການ​ປົດ​ປ່ອຍອອກ​ຈາກ​ໂສ້​ຄາ​ແຫ່ງ​ການ​ເປັນ​ຂ້າ​ທາດ, ສ້າງ​ເປັນ​ຂະ​ບວນການ​ປົດ​ປ່ອຍ​ຊາດ​ທີ່​ແຂງ​ແຮງ​ໃນ​ທົ່ວ​ໂລກ. 

ໄຊຊະນະຂອງການ​ປະຕິວັດ​ເດືອນ​ຕຸລາ​, ບັນດາ​ຜົນສຳ​ເລັດ​ຂອງ​ລະບອບ ​ໂຊ​ວຽດ ​ແລະ ​ໄຊຊະນະຂອງ​ສະຫະພາບ​ໂຊ​ວຽດ​ໃນ​ສົງຄາມ​ໂລກ​ຄັ້ງ​ທີ​ສອງ ກໍ່​ໄດ້​ປຸກ​ຕື່ນ​ແລະ​ລະດົມ​ກຳລັງ​ໃຈ​ຂະ​ບວນການ​ຕໍ່ສູ້ ​ເພື່ອ​ຊີວິດ​ປະຊາຊົນ ປະຊາທິປະ​ໄຕ ​ແລະ ຄວາມ​ກ້າວໜ້າ​ທາງ​ສັງຄົມ ຢູ່​ໃນ​ກະ​ໂຕ​ບັນດາ​ປະ​ເທດທຶນ​ນິຍົມ​ທີ່​ຈະ​ເລີ​ນ, ບັງຄັບ​ໃຫ້​ລັດ​ທິທຶນ​ນິຍົມ ລັດທິ​ຈັກກະພັດ ຕ້ອງ​ມີ​ການ​ດັດ​ປ່ຽນ​ເພື່ອ​ຄ່ອງ​ຕົວ​ແລະ​ຄົງ​ຕົວ​ຢູ່​ຕໍ່​ໄປ. 

ຖືກຕ້ອງຄື​ຄຳ​ຢືນຢັນ​ຂອງ ວ.ອີ.​ເລ​ນິນ: “ການ​ປະຕິວັດ​ເດືອນ​ຕຸລາ​ຂອງ​ພວກ​ເຮົາ​ໄດ້​​ເປີດ​ສັກກະ​ຫຼາດ​ໃໝ່​ໃນ​ປະຫວັດສາດ​ໂລກ”(2). ປະທານ ​ໂຮ່ຈີ​ມິນ​ໄດ້​ຕີ​ລາຄາ​ວ່າ: “ຄື​​ດວງ​ອາທິດກຳລັງ​ສ່ອງ​ແສງ​ສະຫວ່າງ, ການ​ປະຕິວັດ​ເດືອນ​ຕຸລາ​ສ່ອງ​ແສງ​ສະຫວ່າງ​ທົ່ວ​ທຸກ​ຫ້າ​ທະວີບ, ປຸກລຸກ​ຜູ້​ຖືກ​ກົດ​ຂີ່ ຂູດ​ຮີດ​ເປັນ​ລ້ານ ລ້ານ​ຄົນ​ໃນ​ທົ່ວ​ໂລກ. ​ໃນ​ປະຫວັດສາດ​ຂອງ​ມະນຸດ ບໍ່​ເຄີຍ​ມີ​ການ​ປະຕິວັດ​ໃດ​ທີ່​ມີ​ຄວາມ​ໝາຍ​ໃຫຍ່​ຫຼວງ​ແລະ​ເລິກ​ເຊິ່ງຄື​ແນວ​ນັ້ນ”(3). 

ດ້ວຍຄວາມ​ໝາຍ​ໃຫຍ່​ຫຼວງ​ແລະ​ເລິກ​ເຊິ່ງຄື​ແນວ​ນັ້ນ, ໄຊຊະນະຂອງການ​ປະຕິວັດ​ເດືອນ​ຕຸລາ​ລັດເຊຍ ​ໄດ້​ປະດິດສ້າງ​ສັກກະຫຼາດ​ໃໝ່ຂອງ​ປະ​ເທດ​ລັ​ດເຊຍ, ພ້ອມ​ກັນ​ນັ້ນ​ກໍ່​ເປີດ​ຍຸກ​ສະ​ໄໝ​ໃໝ່​ໃນ​ປະຫວັດສາ​ດຂອງ​ມະນຸດ. ມັນ​ໄດ້​ຜ່ານ​ຂ້າມ​ເທສະແລະ​ກາລະ​, ກາຍ​ເປັນ​ສັນຍາ​ຫຼັກ​ທີ່​ຍິ່ງ​ໃຫຍ່​ຂອງ​ຍຸກ​ສະ​ໄໝ. ປະຊາຊົນ​ຫວຽດນາມ​ພ້ອມ​ກັບ​ມະນຸດຊາດ​ທີ່​ກ້າວໜ້າ ຈະ​ຈົດ​ຈຳ​ໄວ້​ໃນ​ໃຈ​ຢູ່​ສະ​ເໝີ​ກ່ຽວ​ກັບ​ບຸນຄຸນ​ຂອງ​ຜູ້ນຳ ວ.ອີ.​ເລ​ນິນ ທີ່​ຍິ່ງ​ໃຫຍ່, ຂອງ​ຊາວ​ໂບນ​ເຊ​ວິກ​ແລະ​ປະຊາຊົນ​ບັນດາ​ເຜົ່າ​ ໃນ​ສະຫະພາບ​ໂຊ​ວຽດ ທີ່​ໄດ້​ສູ້ຊົນ, ​ເສຍສະຫຼະ​ໃນ​ການ​ສ້າງ​ເຫດການ​ປະ​ຫວັດ​ສາດ​ຍິ່ງ​ໃຫຍ່​ທີ່​ໜຶ່ງ​ບໍ່​ມີ​ສອງ​ນີ້! 

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ, 

​ໃນ​ເຈັດ​ສິບ​ປີ​ແຫ່ງ​ການ​ຄົງ​ຕົວ​ແລະ​ຂະຫຍາຍຕົວ, ສະຫະພາບ​ໂຊ​ວຽດ​ໄດ້ຮັບ​ຜົນສຳ​ເລັດ​ຍອດ​ຍ້ຽມຫຼາຍ​ຢ່າງ ​ໃນ​ພາລະ​ກິດປົກ​ປັກ​ຮັກສາຜົນງານ​ຂອງການ​ປະຕິວັດ​ເດືອນ​ຕຸລາ ກໍ່​ຄື​ໃນ​ການ​ກໍ່ສ້າງ, ພັດທະນາ​ເສດຖະກິດ-ສັງຄົມ, ​ແລະ​ໄດ້​ປະກອບສ່ວນ​ຢ່າງ​ຫຼວງ​ຫຼາຍ​ຕໍ່​ພາລະກິດ​ສັນຕິພາບ, ​ເອກະລາດ​ແຫ່ງ​ຊາດ, ປະຊາທິປະ​ໂຕ ​ແລະ ຄວາມ​ກ້າວ​ໜ້າ​ທາງ​ສັງຄົມ​ຂອງ​ມະນຸດຊາດ. ​ໂດຍ​ເປັນ​ເຈົ້າ​ຂອງ​ໃໝ່​ຂອງ​ປະ​ເທດ​ຊາດ, ບັນດາ​ກຳມະກອນ ຊາວນາ ​ແລະ ປັນຍາ​ຊົນ​ໃນສະຫະພາບ​ໂຊ​ວຽດ​ ໄດ້​ມີ​ຄວາມ​ຕັດສິນ​ໃຈ​ທີ່​ສູງ​ສົ່ງ ​ແລະ ຄວາ​ມມານະ​ພະຍາຍາມພິ​ເສດ ​ໃນ​ການ​ດັດ​ສ້າງ​ຫັນປ່ຽນ​ປະ​ເທດ​ຂອງ​ຕົນ ຊຶ່ງ​ຈາກ​ປະ​ເທດ​ທີ່ຫຼ້າ​ຫຼັງກວ່າ​ປະ​ເທດທຶນ​ນິຍົດ​ທີ່​ຈະ​ເລີ​ນພັດທະນາ​ອື່ນ ກາຍ​ເປັນອານາຈັກ​ອຸດສາ​ຫະກຳ​ທີ່​ຍິ່ງ​ໃຫຍ່, ນຳ​ໜ້າ​ໂລກ​ໃນ​ຫຼາຍ​ຂົງ​ເຂດ. ຕົວຢ່າງ​ເຊັ່ນ: ສະຫະພາບ​ໂຊ​ວຽດ​ໄດ້​ບັນລຸ​ຈຸດ​ສູງສຸດ​ຂອງ​ວິທະຍາສາດ-​ເຕັກ​ໂນ​ໂລ​ຊີ, ພິ​ເສດ​ແມ່ນ​ໄດ້​ເປີດ​ສັງກາດມະນຸດ​ເອົາ​ຊະນະ​ຈັກກະວານ. ການ​ສຶກສາ​ໂຊ​ວຽດ​ໄດ້ຖືກ​ຈັດ​ອັນ​ດັບ​ໃນ​ຊັ້ນ​ນຳ​ຂອງ​ໂລກ. ບັນດາ​ຂົງ​ເຂດ​ສິລະ​ປະ, ວັດທະນະທຳ… ​ໄດ້​ຂະຫຍາຍຕົວ​ຢ່າງ​ໄວ ​ເປັນເອກະລັກ ອຸດົມສົມບູນທີ່​ສຸດ, ​ໄດ້​ຮັບ​ຄວາມ​ເຄົາລົບ ​ຍ້ອງຍໍສັນລະ​ເສີນຂອງ​ທົ່ວ​ທັງ​ໂລກ. ຊີວິດ​ການ​ເປັນ​ຢູ່​ດ້ານ​ວັດຖຸ​ແລະ​ຈິດ​ໃຈ​ຂອງ​ປະຊາຊົນ​ທຸກ​ຊັ້ນ​ວັນນະ​ໄດ້​ຮັບ​ການ​ເບິ່ງ​ແຍງ​ດູ​ແລ, ປະຊາຊົນ​ທຸ​ກຄົນ​ໄດ້​ຊົມ​ໃຊ້​ສະ​ວັດ​ດີການສັງຄົມ​ຄຸນ​ນະພາ​ບສູງ, ​ໄດ້​ມີ​ຊີວິດ​ຢູ່​ໃນ​ສະພາບແວດ​ລ້ອມສັນຕິ, ສະຫງົບ​ສຸກ ​ໃນ​ຄວາມ​ຮັກ​ ຄວາມ​ຊອບ​ທຳ​ແລະ​ຄວາມ​ເຄົາລົບ​ຊຶ່ງ​ກັນ​ແລະ​ກັນ. ​ໃນ​ສະພາບ​​ຕ້ອງ​ປະ​ເຊີນ​ໜ້າ​ຢ່າງ​ເປັນ​ປະຈຳ​ກັບ​ກົນອຸບາຍ​ທີ່​ເລິກ​ແລບ​ແນບ​ນຽນ, ການ​ທຳລາຍ​ມ້າງ​ເພ​ຂອງ​ບັນດາ​ອິດ​ທິກຳລັງ​ຈັກກະພັດ ປະຕິ​ການ, ລັດ​ໂຊ​ວຽດຍາມ​ໃດ​ກໍ່​ຕ້ອງ​ເອົາ​ໃຈ​ໃສ່​ເປັນ​ພິ​ເສດ​ເຖິງ​ໜ້າ​ທີ່​ເພີ່ມ​ທະວີ​ການ​ປ້ອງ​ກັນ​ປະ​ເທດ - ປ້ອງ​ກັນ​ຄວາມ​ສະຫງົບ, ຕີ​ເອົາ​ຊະນະ​ສັດຕູ​ຢູ່​ໃນ​ປະ​ເທດ​ແລະ​ຕ່າງປະ​ເທດ, ຮັກສາ​ໝາກຜົນ​ຂອງ​ການປະຕິວັດ​ແລະ​ອະທິປະ​ໄຕ​ຂອງ​ຊາດ​ໄວ້​ຢ່າງ​ໝັ້ນຄົງ ​ແລະ ​ແຕ່​ຊຸມ​ປີ​ທີ 50 ຂອງ​ສະຕະ​ວັດກ່ອນ ສະຫະພາບ​ໂຊ​ວຽດ​ໄດ້​ບັນລຸຄວາມ​ສົມ​ດຸນ​ທາງ​ດ້ານ​ອາວຸດ​ທັນ​ສະ​ໄໝ, ​ເປັນ​ການ​ຮັບປະກັນ​ທີ່​ສຳຄັນ​ສຳ​ລັບ​ສັນຕິພາບ​ໂລກ. 

ປະຊາຊົນ​ໂລກ​ບໍ່​ເຄີຍ​ລືມ​ການ​ເສຍສະຫຼະ​ທີ່​ຍິ່ງ​ໃຫຍ່ ​ແລະ ​ໄຊຊະນະ​ອັນ​ຮຸ່ງ​ເຮືອງ​ພິລະ​ອາດ​ຫານ​ຂອງປະຊາຊົນ ​ແລະ ກອງທັບ​ແດງສະຫະພາບ​ໂຊ​ວຽດ ​ໃນ​ສົງຄາມ​ໂລກ​ຄັ້ງ​ທີ​ສອງ, ຊ່ວຍ​ມະນຸດຊາດ​ພົ້ນ​ອອກ​ຈາກ​ໄພພິບັດ​ຟາດ​ຊິດ, ສ້າງ​ເງື່ອນ​ໄຂອັນ​ສະດວກ​ດີ​ໃຫ້​ຫຼາຍ​ປະ​ເທດກ້າວ​ຂຶ້ນ​ສູ່​ເສັ້ນທາງ​ກໍ່ສ້າງ​ສັງຄົມ​ນິຍົມ ​ແລະ ຫຼາຍ​ປະ​ເທດ​ຍາດ​ເອົາ​ເອກະລາດ ອະທິປະ​ໄຕຄືນ​ມາ ​ຈາກ​ລັດ​ທິຈັກກະພັດ ທຶນ​ນິຍົມ. 

ສະ​ເຫຼີ​ມສະຫຼອງການ​ປະຕິວັດ​ເດືອນ​ຕຸລາ​ລັດເຊຍ ​ແລະ ທົບ​ທວນ​ບັນດາ​ຜົນສຳ​ເລັດ​ອັນ​ໃຫຍ່​ຫຼວງ​ຂອງ​ປະຊາຊົນສະຫະພາບ​ໂຊ​ວຽດ ພາຍ​ໃຕ້​ການ​ນຳພາ​ຂອງພັກ​ກອມ​ມູນິດສະຫະພາບ​ໂຊ​ວຽດ, ພວກ​ເຮົາ​ບໍ່​ອາດ​ຈະ​ບໍ່​ເວົ້າ​ເຖິງ​ການ​ສະໜັບສະໜູນຢ່າງ​ແຂງ​ແຮງ, ການ​ຊ່ວຍ​ເຫຼືອ​ອັນ​ໃຫຍ່​ຫຼວງ ​ເຕັມ​ໄປ​ດ້ວຍ​ຈິດ​ໃຈ​ສາກົນ​ທີ່​ຜ່ອງ​ໃສ​ ຂອງ​ລັດສັງຄົມ​ນິຍົມທຳ​ອິດ ທີ່​​ມີ​ຕໍ່​ບັນດາ​ປະ​ເທດສັງຄົມ​ນິຍົມ, ຂະ​ບວນການ​ປົດ​ປ່ອຍ​ຊາດ ​ແລະ ການ​ຕໍ່ສູ້​ຂອງ​ປະຊາຊົນ​ໂລກ​ເພື່ອ​ສັນຕິພາບ​ແລະ​ຄວາມ​ກ້າວ​ໜ້າທາງ​ສັງຄົມ. 

ນັ້ນ​ແມ່ນ​ຄວາມ​ຈິງ​ປະຫວັດສາດ​ທີ່​ບໍ່​ມີ​ຜູ້​ໃດ​ສາມາດ​ປະຕິ​ເສດ​ໄດ້! 

​ໃນ​ຕະຫຼອດ​ເວລາ​ແຫ່ງ​ການ​ດຳລົງຄົງ​ຕົວ​ຂອງ​ລັດ​ໂຊ​ວຽດ - ບຸດ​ຂອງການ​ປະຕິວັດ​ເດືອນ​ຕຸລາ​,​ແລະ ​ໂດຍ​ສະ​ເພາະ​ແມ່ນ​ ພາຍຫຼັງ​ທີ່ສະຫະພາບ​ໂຊ​ວຽດຖືກ​ຍຸບ​ເລີກ, ບັນດາ​ອິດ​ທິກຳລັງ​ສັດຕູ ​ແລະ ບັນດາ​ອິດ​ທິກຳລັງ​ສ​ວຍ​ໂອ​ກາດທຸດສີສັນ ​ໄດ້​ໃຊ້​ກົນອຸບາຍ​​ແລະວິທີ​ການ​ຮ້ອຍ​ແປດ​ພັນ​ປະການ ​ເພື່ອປະຕິ​ເສດ​ຄວາມ​ໝາຍ​ຂອງການ​ປະຕິວັດ​ເດືອນ​ຕຸລາ​ ​ແລະ ບັນດາ​ຜົນສຳ​ເລັດ​ອັນ​ໃຫຍ່​ຫຼວງ​ຂອງ​ລະບອບ​ໂຊ​ວຽດ. ​ແຕ່, ຄວາມ​ຈິງ​ຍັງ​ຄົງ​ເປັນຄວາມ​ຈິງ​ຢູ່. ​ເຖິງ​​ວ່າດິນ​ຈະ​ໄຫວ​ດາວ​ຈະ​​ປ່ຽນກໍ່ຕາມ, ​ແຕ່ ຈິດ​ໃຈ​ຂອງການ​ປະຕິວັດ​ເດືອນ​ຕຸລາ​ ​ແລະ ບັນດາຜົນສຳ​ເລັດ​ປະຫວັດສາດ ກໍ່​ຄື​ຄຸນງາມຄວາມດີ​ ການ​ອຸທິດອັນ​ໃຫຍ່​ຫຼວງ​ຂອງ​ປະຊາຊົນ​ບັນດາ​ເຜົ່າ​ໃນສະຫະພາບ​ໂຊ​ວຽດ ​ໃຫ້​ແກ່​ມະນຸດຊາດ​ນັ້ນ ຈະ​ບໍ່​ຈາງ​ຫາຍ​ຈັກ​ເທື່ອ, ມັນ​ໄດ້​ຈາລຶກ​ໄວ້​ຕະຫຼອດ​ໄປ​ໃນຈິດ​ສຳນຶກ​ຂອງ​ຜູ້​ທີ່​ມີ​ສິນ​ທຳ​ທຸກ​ຄົນໃນ​ໂລກ!

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ,

​ໂດຍ​ສະ​ເພາະຫວຽດນາມ, ພວກ​ເຮົາ​ມີ​ຫຼັກ​ຖານ​ຢ່າງ​ພຽງພໍ​ເພື່ອ​ຢືນຢັນ​ວ່າ, ​ໄຊຊະນະ​ທຸກ​ຢ່າງ​ຂອງ​ການ​ປະຕິວັດ​ຫວຽດນາມ​ລ້ວນ​ແຕ່​ຕິດ​ແໜ້ນ​ກັບ​ຜົນ​ກະທົບ​ຂອງການ​ປະຕິວັດ​ເດືອນ​ຕຸລາ​ລັດເຊຍ ກໍ່​ຄື​ການ​ສະໜັບສະໜູນ ​ຊ່ວຍ​ເຫຼືອ​ຢ່າງ​ສຸດ​ອົກ​ສຸດ​ໃຈ ​ຂອງປະຊາຊົນສະຫະພາບ​ໂຊ​ວຽດ. ທ່ານປະທານ​ໂຮ່ຈີ​ມິນ​ທີ່​ເຄົາລົບ​ຮັກ​ຂອງ​ພວກ​ເຮົາ ​ແມ່ນ​ຄົນ​ຫວຽດນາມ​ທຳ​ອິດ​ທີ່​ໄດ້​ເຂົ້າ​ເຖິງ, ຮັບ​ເອົາ ​ແລະ ໝູນ​ໃຊ້​ປະດິດ​ສ້າງ ແນວ​ຄິດ​ຂອງການ​ປະຕິວັດ​ເດືອນ​ຕຸລາ​ ​ເຂົ້າ​ໃນ​ພາລະກິດ​ການ​ປະຕິວັດ​ຂອງ​ປະ​ເທດ​ເຮົາ ຢ່າງ​ສຳ​ເລັດ​ຜົນ​ທີ່​ສຸດ. ພາຍຫຼັງ​ໄຊຊະນະ​ຂອງການ​ປະຕິວັດ​ເດືອນ​ຕຸລາ, ​ເພິ່ນ​ໄດ້ຢືນ​ຢູ່​ຄຽງ​ຂ້າງກັບ​ສະມາຊິກ​ພັກ​ສັງຄົມ​ຝຣັ່ງ, ສະໜັບສະໜູນສາກົນ​ກອມ​ມູນິດ​ທີ​ສາມ ​ໂດຍ ວ.ອີ.​ເລ​ນິນ ກໍ່​ຕັ້ງ. ປີ 1920, ​ເມື່ອ​ອ່ານບົດ »È¾¤-À®œº¤ªí­-Àꈺ-êó-·¤ -®ñ­©¾-®ö©-²ò­ò©¡È¼¸¡ñ®-®ñ­¹¾-§ö­-§¾© -Áì½ ®ñ­¹¾-¹ö¸-À´õº¤-¢›­" ຂອງ ວ.ອີ.​ເລ​ນິນ, ​ເພິ່ນຮູ້​ສຶກຕື່ນ​ເຕັ້ນ, ດີ​ໃຈ, ​ເຂົ້າ​ໃຈ​ແຈ້ງ, ​ເຊື່ອ​ຖື​ທີ່​ສຸດ,... ດີ​ໃຈ​ເຖິງ​ຂັ້ນ​ນ້ຳຕາ​​ໄຫຼ, ​ເພິ່ນນັ່ງຢູ່​ຄົນ​ດຽວ​ໃນ​ຫ້ອງ​​ແລະເວົ້າສຽງ​ດັງ​ເໝືອນ​ດັ່ງ​ເວົ້າ​ຕໍ່ໜ້າ​ມະຫາຊົນ​ທີ່​ໜາ​ແໜ້ນ: “ພີ່ນ້ອງ​ຮ່ວມ​ຊາດ​ທີ່​ກຳລັງ​ທົນ​ທຸກທໍລະມານ​ເອີຍ! ນີ້​ເປັນ​ສິ່ງ​ຈຳ​ເປັນຕ້ອງການ​ສຳລັບ​ພວກ​ເຮົາ, ນີ້​ເປັນ​ເສັ້ນທາງ​ປົດ​ປ່ອຍ​ພວກ​ເຮົາ”(4). ຫຼັງ​ຈາກ​ນັ້ນ, ​ເພິ່ນ​ໄດ້​ຜ່ານ​ຜ່າຄວາມ​ທຸກ​ຍາກ​ລຳ​ບາດ​ທັງ​ໝົດ ​ເພື່ອ​ໄປ​ຮອດ​ປະ​ເທດ​ໂຊ​ວຽດ, ​ເຂົ້າຮ່ວມ​ການ​ເຄື່ອນ​ໄຫວ​ໃນ​ສາກົນ​ກອມ​ມູນິດ, ພ້ອມ​ນັ້ນ​ກໍ່​ຄົ້ນຄວ້າ​ຊອກ​ຮູ້​ບົດ​ຮຽນ​ປະສົບ​ການ​ປະຕິວັດຂອງສະຫະພາບ​ໂຊ​ວຽດ ​ເພື່ອ​ນຳພາ​ການ​ປະຕິວັດ​ຫວຽດນາມ. ​ໃນ​​ໄລຍະ​ນັ້ນ, ​ເພີ່ມ​ໄດ້​ສົ່ງ​ຊາ​ວໜຸ່ມ​ປະຕິວັດ​ຫວຽດນາມ​ຢູ່​ໃນ​ປະ​ເທດ​ຫຼາຍ​ຄົນ ​ໄປ​ຮຽນ​ຢູ່​ສະຫະພາບ​ໂຊ​ວຽດ, ​ໃນ​ນັ້ນ ຫຼາຍ​ສະຫາຍ​ຕໍ່​ມາ​ໄດ້​ກາຍ​ເປັນ​ເລຂາທິການ​ໃຫຍ່​ຂອງ​ພັກ​ເຮົາ​ເຊັ່ນ ສະຫາຍ​ເຈິ່ນຝູ, ສະຫາຍ​ເລ​ຮົ່ງຟອງ, ສະ​ຫານ​ຮ່າ​ຮູ​ຍ​ເຕິ​ບ ​ແລະ ຜູ້ນຳ​ປະຕິວັດ​ອາວຸ​ໂສ​ອື່ນໆ​ຫຼຼາຍຄົນ. ບັນດາ​ຊາວ​ພັກ​ກອມ​ມູນິດ, ຜູ້​ຮັກ​ຊາດ​ຫວຽດນາມ ​ເຖິ​ງວ່າ​ຕ້ອງ​ເຄື່ອນ​ໄຫວ​ໃນ​ຄວາມ​ປິດ​ລັບທີ່​ຫຍຸ້ງຍາກ ລຳບາກ​ທີ່​ສຸດ, ຊ້ຳພັດຕ້ອງ​ເຄື່ອນ​ໄຫວ​ໃນ​ຄຸກ​ຄາ​ຂອງ​ຈັກກະພັດ ​ແລະ ​ໃນ​ເວລາຖືກ​ມັດ​ໃສ່​​ເສົາ​ປະຫານ​ຊີວິດ ກໍ່ຍັງ​ຄົງ​ຈິດ​ໜຶ່ງ​ໃຈ​ດຽວ​ຫັນ​ໜ້າ​ໄປ​ສູ່​ປະ​ເທດ​ລັດ​ເຊຍ​ໂຊ​ວຽດ, ຫັນ​ສູ່​ບ້ານ​ເກີດ​ເມືອງ​ນອນ​ຂອງ ​ເລ​ນິນ ​ແລະການ​ປະຕິວັດ​ເດືອນ​ຕຸລາ​ ດ້ວຍຄວາມ​ເຊື່ອ​ຖື​ອັນ​ໜັກ​ແໜ້ນ ​ແລະຄວາມ​ຫວັງ​ອັນ​ແຮງ​ກ້າ ​ຕໍ່​ໄຊຊະນະ​ສຸດ​ທ້າຍ​ຂອງ​ພາລະກິດ​ການ​ປະຕິວັ​ດທີ່​ຕົນ​ເຂົ້າ​ຮ່ວມ

​ໄຊຊະນະ​ອັນ​ຍິ່ງ​ໃຫຍ່​ຂອງ​ກອງທັບ​​ແລະ​ປະຊາຊົນສະຫະພາບ​ໂຊ​ວຽດ​ໃນ​ສົງຄາມ​ຕ້ານ​ພວກ​ຟາດ​ຊິດ, ບັງຄັບ​ໃຫ້​ກອງທັບ​ຂຸນ​ເສິກ​ຍີ່ປຸ່ນ​ຕ້ອງ​ຍອມ​ຈຳນົນ​ໂດຍ​ບໍ່​ມີ​ເງື່ອນ​ໄຂ​ໃນ​ເວລາ​ນັ້ນ ​ໄດ້​ສ້າງ​ເງື່ອນ​ໄຂ​ພາວະ​ວິ​ໄສ​ທີ່​ສະດວກ​ດີ​ໃຫ້​ແກ່ການ​ປະຕິວັດ​ເດືອນ​ສິງຫາ​ປີ 1945 ຢູ່​ປະ​ເທດ​ເຮົາ​ໄດ້​ຮັບ​ຄວາມ​ສຳ​ເລັດ, ເປີດ​ສັງກາດ​ໃໝ່​ອອກ​ມາ - ສັງກາດ​​ແຫ່ງ​ຄວາມ​ເປັນເອກະລາດ​ແຫ່ງ​ຊາດ ​ແລະ ສັງຄົມ​ນິຍົມຢູ່​ຫວຽດນາມ. ພິ​ເສດ, ​ໃນ​ສະ​ໄໝ​ປະຊາຊົນ​ເຮົາ​ດຳ​ເນີນ​ການ​ຕໍ່ສູ້​ຕ້ານລ່າ​ເມືອງ​ຂຶ້ນ​ຝຣັ່ງ ​ແລະ​ຈັກກະພັດ​ອາ​ເມຣິກາ​ຜູ້​ຮຸກ​ຮານ, ກໍ່​ຄື​ໃນ​ການ​ກໍ່ສ້າງ​ສັງຄົມ​ນິຍົມ​ ຊຶ່ງໃນ​​ເບື້ອງ​ຕົ້ນ​ແມ່ນ​ຢູ່​ພາກ​ເໜືອ​ແລະ​ຕໍ່​ມາ​ແມ່ນ​ໃນ​ທົ່ວ​ປະ​ເທດ​ເມື່ອ​ປະ​ເທດ​ຊາດ​ໄດ້​ເປັນ​ເອກະ​ພາບ, ສະຫະພາບ​ໂຊ​ວຽດ​ໄ​ດ້​ໃຫ້​ຄວາມ​ສະໜັບສະໜູນ​ຢ່າງ​ແຂງ​ແຮງ​ທີ່​ສຸດ​ແກ່​ປະຊາຊົນ​ເຮົາ, ຊ່ວຍ​ໃຫ້​ປະຊາຊົນ​ເຮົາ​ຍາດ​ເອົາ​ໄຊຊະນະ​ອັນ​ສະຫງ່າ​ລາສີ ​ໃນ​ການ​ຕໍ່ສູ້​ກູ້​ຊາດ ​ແລະ ​ໃນ​ການ​ຟື້ນ​ຟູ, ກໍ່ສ້າງ​ພັດທະນາ​ເສດຖະກິດ - ສັງຄົມ. ໜຶ່ງ​ໃນ​ບັນດາ​ການ​ຊ່ວຍ​ເຫຼືອ​ຂອງສະຫະພາບ​ໂຊ​ວຽດ ທີ່​ມີ​ຄວາມ​ໝາຍ​ສຳຄັນ​ທີ່​ສຸດ​ຄື ​ໄດ້​ໃຫ້ການສຶກສາ​ອົບຮົມ ຝຶກ​ຝັນ​ຫຼໍ່​ຫຼອມ​ ​ແກ່ພະນັກງານ ນັກຮົບ ​ແລະ ຜູ້​ອອກ​ແຮງ​ງານ​ຫວຽດນາມ​ຫຼາຍ​ໝື່ນ​ຄົນ ກ່ຽວ​ກັບ​ທຸກ​ຂົງ​ເຂດ​ການ​ເມືອງ, ​ເສດຖະກິດ, ວິທະຍາສາດ-​ເຕັກ​ໂນ​ໂລ​ຊີ, ວັດທະນາ​ທຳ, ການ​ທູດ, ການ​ທະຫານ, ຄວາມ​ສະຫງົບ...; ນັ້ນ​ແມ່ນ​ຍັງ​ບໍ່​ທັນ​ເວົ້າ​ເຖິງ​ຜູ້​ຊ່ຽວຊານສະຫະພາບ​ໂຊ​ວຽດຫຼາຍ​ພັນ​ຄົນ​ ທີ່ໄດ້​ມາ​ຫວຽດນາມ ຮ່ວມ​ທຸກ​ຮ່ວມ​ສຸກ ຊ່ວຍ​ເຫຼືອ​ປະຊາຊົນ​ເຮົາ​ຢ່າງ​ສຸດ​ອົກ​ສຸດ​ໃຈ​ ເພື່ອ​ປົກ​ປັກ​ຮັກສາ​ແລະ​ສ້າງສາ​ປະ​ເທດ​ຊາດ. 

​ເປັນອັນ​ຈະ​ແຈ້ງວ່າ, ຍ້ອນ​ມີ​ແນວທາງ​ປະຕິວັດ​ທີ່​ຖືກຕ້ອງ​ຂອງ​ພັກ​ເຮົາ, ພາຍ​ໃຕ້​ແສງ​ສະຫວ່າງ​ຂອງລັດທິ ມາກ-​ເລ​ນິນ, ດ້ວຍ​ມານະ​ຈິດ​ອີງ​ໃສ່​ຕົນ​ເອງ​ສ້າງ​ຕົນ​ໃຫ້​ເຂັ້ມ​ແຂງ​ຂອງ​ຊາດຫວຽດນາມ ສົມທົບ​ກັບ​ການ​ຊ່ວຍ​ເຫຼືອ​ຢ່າງ​ສຸດ​ອົກ​ສຸດ​ໃຈ​ຂອງສະຫະພາບ​ໂຊ​ວຽດ, ຈີນ, ບັນດາ​ປະ​ເທດສັງຄົມ​ນິຍົມອ້າຍ​ນ້ອງ ​ແລະ ​ເພື່ອນ​ມິດສາ​ກົນ, ການ​ປະຕິວັດ​ຫວຽດນາມ​ຈຶ່ງ​ໄດ້​ຮັບຜົນສຳ​ເລັດ​ທີ່​ໃຫຍ່​ຫຼວງ​ຄື​ມື້​ນີ້. ຖືກຕ້ອງ​ຕາມ​ຄຳ​ເວົ້າ​ຂອງ​ປະທານ ​ໂຮ່ຈີ​ມິນ: "​ກິນ​ນ້ຳ​ຮູ້​ຄຸນບໍ່​". ຫວນ​ຄືນ​ວັນ​ເວລາ​ແຫ່ງ​ຄວາມທຸກ​ຍາກ​ລຳບາກ​ພາຍ​ໃຕ້​ການ​ກົດ​ຂີ່ຂູດ​ຮີດຂອງ​ພວກ​ລ່າ​ເມືອງ​ຂຶ້ນ, ຫວນ​ຄືນ​ແຕ່​ລະບາດ​ກ້າວ​ບົນ​ເສັ້ນທາງ​ຕໍ່ສູ້​ປະຕິວັດ​ທີ່​ເຕັມ​ໄປດ້ວຍ​ຄວາມລຳບາກ ​ເສຍສະຫຼະ ​ແຕ່​ກໍ່​ເຕັມ​ໄປ​ດ້ວຍ​ໄຊຊະນະ​ທີ່​ສະຫງ່າ​ງານນັ້ນ ຊົນ​ຊັ້ນ​ກຳມະກອນ​ແລະ​ປະຊາຊົນ​ຫວຽດນາມຍິ່ງ​ຮູ້ສຶກຢ່າງ​ເລິກ​ເຊິ່ງ ກ່ຽວ​ກັບ​ຄຸນງາມຄວາມດີ​ອັນ​ໃຫຍ່​ຫຼວງຂອງ ​ເລ​ນິນ ​ແລະ ການ​ປະຕິວັ​ດ​ເດືອນ​ຕຸລາ"[5]. ​ເນື່ອງ​ໃນ​ໂອກາດ​ນີ້, ອີກ​ເທື່ອ​ໜຶ່ງ​ພວກ​ເຮົາ​ສະ​ແດງ​ຄວາມ​ຮູ້ບຸນຄຸນ​ຢ່າງ​ເລິກ​ເຊິ່ງຕໍ່​ປະຊາຊົນ​ບັນດາ​ເຜົ່າ​ໃນສະຫະພາບ​ໂຊ​ວຽດ ກ່ຽວ​ກັບ​ຄວາມ​ສາມັກຄີ​ສາກົນ​ທີ່​ສູງ​ສົ່ງ, ການ​ສະໜັບສະໜູນ​ແລະ​ຊ່ວຍ​ເຫຼືອ​ອັນ​ໃຫຍ່​ຫຼວງ​ແລະ​ປະ​ເສີດ​ທີ່​ສຸດທີ່​ມີ​ຕໍ່​ປະຊາຊົນ​ເຮົາ! 

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ, 

ຍິ່ງ​ຈົດ​ຈຳ​ບຸນ​ຄູນ​ຢ່າງ​ເລິກ​ເຊິ່ງ, ຕິດ​ພັນ​ສະໜິດ​ແໜ້ນ​ກັບ​ຜົນ​ກະທົບ​ຂອງການ​ປະຕິວັດ​ເດືອນ​ຕຸລາ​, ກັບການ​ປະກອບສ່ວນ​ທີ່​ລ້ຳ​ຄ່າ​ ຂອງ​ປະຊາຊົນສະຫະພາບ​ໂຊ​ວຽດທີ່​ມີ​ຕໍ່​ມະນຸດຊາດ​ ແລະສາຍ​ພົວພັນ​ສະໜິດສະໜົມ​ຫວຽດນາມ - ສະຫະພາບ​ໂຊ​ວຽດ ຫຼາຍ​ທໍ່​ໃດ, ພັກ ລັດ ​ແລະ ປະຊາຊົນ​ຫວຽດນາມ​ພວກ​ເຮົາກໍ່ຍິ່ງ​ຮູ່ສຶກ​ເຈັບ​ປວດຫຼາຍ​ທໍ່​ນັ້ນ ຕໍ່​ເຫດການ​ໂສກ​ເສົ້າ​ທີ່​ເກີດ​ຂຶ້ນ​ຢູ່ສະຫະພາບ​ໂຊ​ວຽດ​ໃນ​ຕົ້ນ​ຊຸມ​ປີ​ທີ 90 ຂອງ​ສະຕະວັດ​ກ່ອນ. ທຸກ​ຄົນຄົງ​ຮູ້​ແລ້ວ ການ​ປະຕິວັດ​ເປັນ​ພາລະກິດ​ທີ່​ຫຍຸ້ງຍາກ ສັບສົນ, ມັນ​ບໍ່​ແມ່ນ​ເສັ້ນທາງ​ທີ່​ຮາບ​ພຽງ ຮຽບງ່າຍ, ບາ​ງ​ເທື່ອ​ຕ້ອງ​ຜ່ານ​ຫຼາຍ​ໄລຍະ​ທີ່​ຕ່າງ​ກັນ, ຄົດ​ລ້ຽວ ລະ​ອິດ​ລະ​ອ້ຽວ, ບາງ​ເທື່ອ​ອາດ​ຈະ​ຖືກປະລາ​ໄຊ ຕ້ອງ​ຖອຍຫຼັງ​ຊົ່ວຄາວ, ​ແຕ່​ພວກ​ເຮົາ​ກໍ່​ຖືກຕົກຊະ​ເງີ້, ສົນລະວົນ​​ໃຈຕໍ່ໜ້າ​ເຫດການ​ດັ່ງກ່າວ. ດ້ວຍຈິດ​ໃຈ​ປະຕິວັດ​ທີ່​ຜ່ອງ​ໃສ ​ແລະ ລັກສະນະ​ວິທະຍາສາດ​ທີ່​ເຂັ້ມ​ງວດ, ດ້ານ​ໜຶ່ງ, ພວກ​ເຮົາ​ຕັ້ງ​ໝັ້ນ​ຕີ​ລາຄາຢ່າງ​ພາວະ​ວິ​ໄສ ກ່ຽວ​ກັບ​ຄວາມ​ໝາຍ​ທີ່​ບໍ່​ປ່ຽນ​ແປງ​ຂອງການ​ປະຕິວັດ​ເດືອນ​ຕຸລາ​ ກໍ່​ຄື​ບັນດາ​ຜົນສຳ​ເລັດ​ແລະ​ການ​ປະກອບສ່ວນ​ອັນ​ໃຫຍ່​ຫຼວງ ​ຂອງສະຫະພາບ​ໂຊ​ວຽດກ່ອນ​ໜ້າ​ນີ້; ດ້ານອື່ນ, ພວກ​ເຮົາ​ກໍ່​ຕ້ອງ​ສ່ອງ​ໃສ​ທຸ່ນ​ທ່ຽງ ພິຈາລະນາ​ຮັບ​ຮູ້​ບັນດາ​ສາ​ເຫດ​ອັດຕະວິ​ໄສ​ແລະ​ພາວະ​ວິ​ໄສ ທີ່​ພາ​ໄປ​ເຖິງ​ເຫດການ​ທີ່​ໂສກ​ເສົ້າ​ນັ້ນ; ​ແລະ​ສິ່ງ​ທີ່​ສຳຄັນ​ກວ່າ​ນັ້ນ​ແມ່ນ ຕ້ອງ​ຖ​ອດຖອນ​ບົດຮຽນອັນ​ເລິກ​ເຊິ່ງ ​ເພື່ອ​ສືບ​ຕໍ່ຢຶດໝັ້ນ​ແລະ​ເດັດດ່ຽວ​ປະຕິບັດ​ຕາມ​ເປົ້າ​ໝາຍ, ອຸດົມ​ການ​ກໍ່ສ້າງ​ສັງຄົມ​ນິຍົມ ຢູ່​ປະ​ເທດ​ເຮົາ, ຫຼີກ​ລ່ຽງຄວາມ​ຜິດພາດ​ທີ່​ໄດ້​​ເຮັດ​ໃຫ້ສະຫະພາບ​ໂຊ​ວຽດພັງ​ທະລາ​ຍ. ​ແຕ່​ປີ 1991, ພັກ​ເຮົາ​ໄດ້​ຮັບ​ຮູ້​ວ່າ, ​ເຫດການ​ປະຫວັດສາດ​ນີ້​ມີ​ສາ​ເຫດທີ່​ເລິກ​ເຊິ່ງ ນັ້ນ​ຄື ​ໃນ​ຂະ​ບວນວິວັດ​ການ​ກໍ່ສ້າງ​ສັງຄົມ​ນິຍົມຢູ່ສະຫະພາບ​ໂຊ​ວຽດ, ຄຽງຂ້າງ​ບັນດາ​ຜົນສຳ​ເລັດ​ທີ່​ມີ​ຄວາມ​ໝາຍ​ປະຫວັດສາດ​ແລະ​ສາກົນ, ກໍ່​ມີ​ຂໍ້​ຂາດ​ຕົກ​ບົກ​ພ່ອງ​ແລະ​ຄວາມ​ຜິດພາດ ​​ແຕ່​ໄດ້​ຮັບ​ການ​ຄົ້ນ​ເຜີຍ​ແລະ​ແກ້​ໄຂ​ຢ່າງ​ຊັກ​ຊ້າ, ​ໂດຍ​ສະ​ເພາະ​ແມ່ນ​ບັນດາ​ຂໍ້​ຂັດ​ແຍ່ງ​ທີ່​ເກີດ​ຂຶ້ນ​ໃນ​ຂະ​ບວນວິວັດ​ແຫ່ງ​ການ​ກໍ່ສ້າງ​ສັງຄົມ​ໃໝ່ ພ້ອມ​ກັບ​ການ​ຫ່າງ​ເຫີ​ນຈາກມູນ​ຫຼັກ​ພື້ນຖານ​ຂອງ​ລັດທິ​ມາກ-​ເລ​ນິນ ຂອງ​ບັນດາ​ຜູ້ນຳ​ສູງ​ສຸດ​ຂອງ​ພັກ​ໃນ​ເວລາ​ນັ້ນ. ພິ​ເສດ, ມີ​ສອງ​ສາ​ເຫດ​ພື້ນຖານ​ແລະ​ໂດຍ​ກົງ​ທີ່​ກ່ຽວ​ພັນ​ແໜ້ນ​ແຟ້ນນຳ​ກັນ: ທີ່​ໜຶ່ງ, ຄວາມ​ຜິດພາດທີ່ຮ້າຍ​ແຮງກ່ຽວ​ກັບແນວທາງ​ການ​ເມືອງ, ກ່ຽວ​ກັບ​ວຽກ​ງານ​ກໍ່ສ້າງ​ພັກ, ວຽກ​ງານ​ແນວ​ຄິດ ​ແລະ ວຽກ​ງານ​ຈັດ​ຕັ້ງ, ພະນັກງານ​ ໃນ​ຂະ​ບວນວິວັດ​ການ​ດັດ​ແປງ​ໃໝ່ (ແປ​ແຣສະ​ໂຕຣຍກາ); ​ແລະທີ​ສອງ, ບັນດາ​ອິດ​ທິກຳລັງ​ສັດຕູ ປະຕິ​ການ​​ໄດ້ປະຕິບັດ​ຍຸດ​ທະ​ສາດ “ຫັນປ່ຽນ​ໂດຍ​ສັນຕິ”, ​ໃຊ້​ທຸກ​ວິທີ​ການ​ກະທົບ ​​ເຮັດ​ໃຫ້ການ​ປະຕິ​ຮູບ ດັດ​ແປງ​ໃໝ່​ຢູ່ສະຫະພາບ​ໂຊ​ວຽດຜີກ​ອອກ​ຈາກ​ທິດ​ໝາຍ, ສວຍ​ໃຊ້​ຄວາມ​ຜິດພາດ​ຢູ່​ພາຍ​ໃນ​ເພື່ອ​ປະຕິບັດ​ເປົ້າ​ໝາຍ​ລົບ​ລ້າງ​ລະບອບ​ສັງຄົມ​ນິຍົມ. 

​ໂດຍຖອດ​ຖອນ​ບົດຮຽນ​ແຫ່ງ​ຄວາມ​ສຳ​ເລັດ ​ແລະ ​ເຫັນ​ແຈ້ງຂໍ້​ຂາດ​ຕົດ​ບົກພ່ອງ, ຄວາມ​ຜິດພາດ​ໃນ​ການ​ກໍ່ສ້າງ​ສັງຄົມ​ນິຍົມຢູ່ສະຫະພາບ​ໂຊ​ວຽດ, ພັກ​ເຮົາ​ໄດ້​ວາງ​ແນວທາງ​ປ່ຽນ​ແປງ​ໃໝ່​ທີ່​ຖືກຕ້ອງ, ປະດິດສ້າງ ​ແລະ ພວມ​ຕັ້ງໝັ້ນ ພະຍາຍາມ​ດຳ​ເນີນ​ເປັນ​ແຕ່​ລະ​ກ້າວ​ ການ​ປ່ຽນ​ແປງ​ໃໝ່​ຮອບດ້ານ​ຢູ່​ປະ​ເທດ​ເຮົາ ​ຢ່າງ​ໜັກ​ແໜ້ນ. 

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ, 

​ໂຄງການ​ການ​ເມືອງ​ຂອງ​ພັກ​ເຮົາ​ ກ່ຽວ​ກັບ​ການ​ກໍ່ສ້າງ​ປະ​ເທດ​ຊາດ​ໃນ​ສະ​ໄໝ​​ຂ້າມ​ຜ່ານ​ຂຶ້ນ​ສູ່ສັງຄົມ​ນິຍົມ (ສະບັບ​ປັບປຸງ ​ເພີ່ມ​ເຕີມ​ປີ 2011) ​ໄດ້​ກຳນົດ​ຢ່າງ​ຈະ​ແຈ້ງ: ຂຶ້ນ​ສູ່ສັງຄົມ​ນິຍົມ​ແມ່ນ​ຄວາມ​ປາຖະໜາ​ຂອງ​ປະຊາຊົນ​ເຮົາ, ​ແມ່ນ​ການ​ເລືອກ​ທີ່​ຖືກຕ້ອງ​ຂອງພັກ​ກອມ​ມູນິດ​ຫວຽດນາມ ​ແລະ ປະທານ​ໂຮ່ຈີ​ມິນ, ສອດຄ່ອງ​ກັບ​ທ່າ​ອຽງ​ແຫ່ງ​ການ​ພັດທະນາ​ຂອງ​ປະຫວັດສາດ. ກຳ​ແໜ້ນ​ຄັນ​ທຸງ​ເອກະລາດ​ແຫ່ງ​ຊາດ​ ແລະ ສັງຄົມ​ນິຍົມ - ຄັນ​ທຸງ​ອັນ​ສະຫງ່າ​ລາສີ​ທີ່​ປະທານ​ໂຮ່ຈີ​ມິນ​ໄດ້​ມອບ​ໃຫ້​ແກ່​ຄົນຮຸ່ນ​ປະຈຸ​ບັນ ​ແລະ ຄົນ​ຮຸ່ນ​ອະນາຄົດ. ​ເອກະລາດ​ແຫ່ງ​ຊາດ​ແມ່ນ​ເງື່ອນ​ໄຂ​ຕັດສິນ​ເບື້ອງ​ຕົ້ນ ​ເພື່ອ​ປະຕິບັດ​ລັດທິ​ສັງຄົມ​ນິຍົມ ​ແລະ ສັງຄົມ​ນິຍົມ​ແມ່ນ​ພື້ນຖານທີ່​ໝັ້ນຄົງສຳລັບ​ຄວາມ​ເປັນ​ເອກະລາດ​ແຫ່ງ​ຊາດ. ການ​ນຳພາ​ທີ່​ຖືກຕ້ອງ​ຂອງ​ພັກ​ແມ່ນ​ປັດ​ໃຈສຳຄັນ​ອັນ​ດັບ​ໜຶ່ງ​ທີ່​ຕັດສິນ​ທຸກໆ​ໄຊຊະນະ​ຂອງ​ການ​ປະຕິວັດ​ຫວຽດນາມ. ພັກ​ຕ້ອງ​ກຳ​ແໜ້ນ, ໝູນ​ໃຊ້​ລັດທິ ມາກ-​ເລ​ນິນ ​ແລະ​ແນວ​ຄິດ​ໂຮ່ຈີ​ມິນຢ່າງ​ປະດິດ​ສ້າງ, ປະກອບສ່ວນ​ພັດທະນາ ລັດທິ ມາກ-​ເລ​ນິນ ​ແລະແນວ​ຄິດ​ໂຮ່ຈີ​ມິນ, ​​ເພີ່ມ​ພູນ​ສະຕິ​ປັນຍາ​ຂອງ​ພັກຢ່າງ​ບໍ່​ຢຸດ​ຢັ້ງ, ຍົກ​ສູງ​ຫຼັກ​ໝັ້ນ​ການ​ເມືອງ ຄຸນສົມບັດ​ສິນ​ທຳ ​ແລະ ຄວາມ​ສາມາດ​ຈັດ​ຕັ້ງ ​ເພື່ອ​ມີ​ຄວາມ​ສາມາດ​ຢ່າງ​ພຽງພໍ​ໃນ​ການ​ແກ້​ໄຂບັນດາ​ບັນຫາ​ທີ່​ພຶດຕິ​ກຳ​ປະຕິວັດ​ວາງ​ອອກ​ມາ. ທຸກໆ​ແນວທາງ ​ແຜນ​ນະ​ໂຍບາຍ​ຂອງ​ພັກ ຕ້ອງ​ເລີ່​ມຈາກຄວາມ​ເປັນ​ຈິງ, ​ເຄົາລົບ​ກົດ​ເກນ​ພາວະ​ວິ​ໄສ. ຕ້ອງ​ປ້ອງ​ກັນ​ແລະ​ຕ້ານບັນດາ​ໄພ​ອັນຕະລາຍ​ໃຫຍ່​ຄື: ຄວາມ​ຜິດພາດ​ທາງ​ດ້ານ​ແນວທາງການ​ເມືອງ, ພະຍາດ​ອາດຍາ​ສິດ ​ແລະ ຄວາມ​ເສື່ອ​ມ​ໂຊມ ປ່ຽນ​ທາດ​ຂອງ​ພະນັກງານ ສະມາຊິກ​ພັກ. ການ​ເຄື່ອນ​ໄຫວ​ທັງ​ໝົດ​ຂອງ​ພັກ​ຕ້ອງ​ເລີ່​ມຈາກ​ຜົນ​ປະ​ໂຫຍ​ດ ​ແລະ ຄວາມ​ປາຖະໜາ​ອັນ​ຊອບ​ທຳ​ຂອງ​ປະຊາຊົນ. ກຳລັງ​ແຮງ​ຂອງ​ພັກ​ແມ່ນ​ຢູ່​ທີ່​ການ​ຕິດ​ພັນ​ສະໜິດ​ແໜ້ນ​ກັບ​ປະຊາຊົນ. ພະຍາດອາດຍາ​ສິດ ການສໍ້​ລາດ​ບັງ​ຫຼວງ ການຫ່າງ​ເຫີ​ນປະຊາຊົນ ຈະ​ພາ​ໄປ​ເຖິງຄວາມ​ເສຍ​ຫາຍທີ່​ບໍ່​ສາມາດ​ຄິດ​ໄລ່​ໄດ້​ສຳລັບ​ໂຊກ​ຊະ​ຕາ​ຂອງ​ປະ​ເທດ​ຊາດ, ຂອງ​ລະບອບ​ສັງຄົມ​ນິຍົມ ​ແລະ​ຂອງ​ພັກ. 

ການ​ປ່ຽນ​ແປງ​ໃໝ່​ໃນ 30 ກວ່າ​ປີ​ຂອງ​ປະ​ເທດ​ເຮົາ​ໄດ້​ຮັບ​ຜົນສຳ​ເລັດ​ອັນ​ໃຫຍ່​ຫຼວງ ມີ​ຄວາມ​ໝາຍ​ປະຫວັດສາດ. ນັ້ນ​ແມ່ນ​ຄວາມ​ສຳ​ເລັດ​ຂອງ​ຂະ​ບວນວິວັດ​ການ​ປ່ຽນ​ແປງ​ໃໝ່​ທີ່​ມີ​ຫຼັກການ ຂະຫຍັນ​ຂັນ​ເຄື່ອນ ບົນ​ພື້ນຖານ​ຢຶດໝັ້ນ ​ແລະ ໝູນ​ໃຊ້ລັດທິ ມາກ-​ເລ​ນິນ ​ແລະ​ແນວ​ຄິດ​ໂຮ່ຈີ​ມິນ​ ຢ່າງ​ປະດິດ​ສ້າງ; ພ້ອມ​ກັນ​ນັ້ນ, ມັນ​ກໍ່​ເປັນ​ພື້ນຖານ​ເພື່ອ​ໃຫ້ຊາວ​ຫວຽດນາມ​ແຕ່​ລະ​ຄົນຮັບ​ຮູ້​ຢ່າງ​ເລິກ​ເຊິ່ງກວ່າ​ອີກ ​ກ່ຽວ​ກັບຄວາມ​ສຳຄັນ​ປະຫວັດສາດ, ຄວາມ​ໝາຍ​ແລະ​ຄຸນຄ່າຕົວ​ຈິງ​ຂອງການ​ປະຕິວັດ​ເດືອນ​ຕຸລາ​ລັດເຊຍທີ່​ຍິ່ງ​ໃຫຍ່ ສຳລັບ​ການ​ປະຕິວັດ​ຫວຽດນາມ​ໂດຍ​ສະ​ເພາະ ​ແລະ​ທົ່ວ​ໂລກ​ເວົ້າ​ລວມ. ຜົນສຳ​ເລັດທີ່​ພວກ​ເຮົາ​ຍາດ​ມາ​ໄດ້​ນັ້ນ ​ໄດ້​ສະ​ແດງ​ໃຫ້​ເຫັນ​ເຖິງ​ພະລັງ​ຊີວິດ​ຂອງ​ລັດ​ທິສັງຄົມ​ນິຍົມຢູ່​ຫວຽດນາມ. ການ​ປ່ຽນ​ແປງ​ໃໝ່​ປະ​ເທດ​ຊາດ​ຢ່າງຮອບດ້ານ​ໃນ​ຕໍ່ໜ້າ​ຍັງ​ມີ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ຫຼາຍ, ​ແຕ່​ດ້ວຍ​ອຸດົມ​ຄະຕິ​ທີ່​ສູງ​ສົ່ງ ​ແລະ ບັນດາ​ບົດຮຽນ​ພຶດຕິກຳ​ອັນ​ເລິກ​ເຊິ່ງຂອງການ​ປະຕິວັດ​ເດືອນ​ຕຸລາ​ລັດເຊຍ ທີ່​ສືບ​ຕໍ່ສ່ອງ​ແສງ​ສະຫວ່າງ, ປະຊາຊົນ​ເຮົາ​ພາຍ​ໃຕ້​ການ​ນຳພາ​ຂອງ​ພັກ, ຈະ​ສືບ​ຕໍ່​ສາມັກຄີ​ເປັນ​ນ້ຳ​ໜຶ່ງ​ໃຈ​ດຽວ, ພະຍາຍາມ​ສູ້​ຊົນ​ເພື່ອ​ພັດທະນາ​ປະ​ເທດ​ແລະ​ປົກ​ປັກ​ຮັກສາ​ປະ​ເທດ​ຊາ​ດ, ກໍ່ສ້າງ​ສັງຄົມ​ນິຍົມຢ່າງ​ສຳ​ເລັດ​ຜົນ ​ເພື່ອ​ເປົ້າ​ໝາຍ​ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະ​ໄຕ ຍຸຕິ​ທຳ ສີວິ​ໄລ. 

ຕາມ​ອຸ​ດົມ​ຄະຕິ​ຂອງການ​ປະຕິວັດ​ເດືອນ​ຕຸລາ​ລັດເຊຍ, ດ້ວຍ​ບັນດາ​ບົດຮຽນ​ລາຄາ​ແພງ ຈາກ​ຄວາມ​ສຳ​ເລັດ​ແລະ​ຈາກ​ທັງ​ຄວາມ​ປະລາ​ໄຊ ຂອງ​ລັດທິ​ສັງຄົມ​ນິຍົມ​ຕົວ​ຈິ​ງ​ໃນ​ເກືອບ​ສະຕະວັດ​ທີ່​ຜ່ານ​ມາ, ພວກ​ເຮົາ​ຄວນ​ຕ້ອງ​ສືບ​ຕໍ່​ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດິ, ​ແນ​ໃສ່​ທຳ​ຄວາມ​ກະຈ່າງ​ແຈ້ງ​ກ່ຽວ​ກັບ​ບັນດາ​ກົດ​ເກນ, ມູນ​ຫຼັກການ​ພັດທະນາ​ທີ່​ສອດຄ່ອງ​ກັບ​ພຶດຕິ​ກຳ​ຂອງ​ຫວຽດນາມ. ສຸມ​ໃສ່​ຊາບ​ຊຶມ​ຢ່າງ​ເລິກ​ເຊິ່ງ ບັນດາ​ທັດສະນະ ​ແນວທາງ​ພື້ນຖານ​ທີ່​ລະບຸ​ໄວ້​ໃນ​ໂຄງການ​ການ​ເມືອງ​ຂອງ​ພັກ ​ແລະ ຜັນ​ຂະຫຍາຍ​ປະຕິບັດ​ຢ່າງ​ສຳ​ເລັດ​ຜົນ ບັນດາ​ໜ້າ​ທີ່​ຈຸດ​ໜັກ​ໃຈກາງ​ທີ່​ບັນດາ​ກອງ​ປະຊຸມ​ໃຫຍ່ຂອງ​ພັກ, ພິ​ເສດ​ແມ່ນ​ກອງ​ປະຊຸມ​ໃຫຍ່​ຄັ້ງ​ທີ XII ທີ່​ຜ່ານ​ມາ​ມໍ່​ນີ້ ​ໄດ້​ວາງ​ອອກ​ມາ​, ນັ້ນຄື: 

- ​ເພີ່ມ​ທະວີ​ການ​ກໍ່ສ້າງ​ພັກ​ໃຫ້​ສະອາດ​ປອດ​ໃສ ໝັ້ນຄົງ​ເຂັ້ມ​ແຂງ, ຍົກ​ສູງ​ຄວາມ​ສາມາດ​ນຳພາ​ແລະ​ກຳລັງ​ແຮງ​ສູ້​ຮົບ​ຂອງ​ພັກ; ກີດ​ກັ້ນ, ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ ຄຸນສົມບັດ​ສິນ​ທຳ ​ແບບ​ແຜນ​ດຳລົງ​ຊີວິດ, ປະກົດ​ການ “ຫັນປ່ຽນ​​ຕົນ​ເອງ”, “ປ່ຽນ​ແປງ​ຕົນ​ເອງ” ຢູ່​ພາຍ​ໃນ. ສຸມ​ໃສ່​ກໍ່ສ້າງ​ຖັນ​ແຖວ​ພະນັກງານ, ​ເປັນ​ຕົ້ນ​ແມ່ນ​ພະນັກງານ​ຂັ້ນ​ຍຸດ​ທະ​ສາດ ​ໃຫ້​ມີ​ຄວາມ​ສາມາດ ມີ​ຄຸນສົມບັດຄົບ​ຖ້ວນ, ​ໄດ້​ຮັບ​ຄວາມ​ເຊື່ອ​ຖື ​ແລະ​ເໝາະ​ສົມ​ກັບ​ໜ້າ​ທີ່. ປ່ຽນ​ແປງ​ໃໝ່​ກົງຈັກ​ຂອງ​ລະບົບ​ການ​ເມືອງ​ທົງ​ໝົດ​ໃຫ້​ກະທັດ​ລັດ, ​ເຄື່ອນ​ໄຫວ​ຢ່າງ​ມີ​ຄວາມ​ສັກສິດ ມີ​ປະສິດທິ​ຜົນ; ຍູ້​ແຮງ​ການ​ຕໍ່ສູ້​ປ້ອງ​ກັນ​​ແລະ​ຕ້ານ​ພະຍາດ​ອາດຍາ​ສິດ, ການ​ສໍ້​ລາດ​ບັງ​ຫຼວງ, ຄວາມ​ຟຸມ​ເຟືອຍ. 

- ສຸມ​ໃສ່​ປະຕິບັດ​ບັນດາ​ວິທີ​ແກ້​ໄຂ ​ເພື່ອ​ຍົກ​ສູງ​ຄຸນ​ນະພາ​ບຂ​ອງການ​ເຕີບ​ໂຕ, ສະມັດ​ຕະພາບ​ຂອງ​ງານ ​ແລະ ກຳລັງ​ແຮງ​ແຂ່ງຂັນ​ຂອງ​ພື້ນຖານ​ເສດຖະກິດ. ສືບ​ຕໍ່​ປະຕິບັດຢ່າງ​ມີ​ປະສິດທິພາບ 3 ການ​ບຸກທະລຸ​ຍຸດ​ທະ​ສາດ (ບູລະນະ​ລະບຽບ​ກົດໝາຍ​​ເສດຖະກິດຕະຫຼາດ​ກຳນົດ​ທິດ​ສັງຄົມ​ນິຍົມ; ປ່ຽນ​ແປງ​ໃໝ່​ການ​ສຶກສາ​ແລະ​ຝຶກ​ອົບຮົມ​ ຢ່າງ​​ພື້ນຖານ​ແລະ​ຮອບດ້ານ, ພັດທະນາ​ຊັບພະຍາກອນ​ມະນຸດ, ​ເປັນ​ຕົ້ນ​ແມ່ນ​ແຫຼ່ງບຸກຄະລາ​ກອນ​ຄຸນ​ນະພາ​ບສູງ; ກໍ່ສ້າງ​ໂຄງ​ສ້າງ​ພື້ນຖານ​ທີ່​ຄົບ​ຊຸດ), ຈັດ​ວາງ​ຄືນ​ໃໝ່​ໂຄງ​ປະກອບ​ເສດຖະກິດ​ໂດຍ​ລວມ​ແລະ​ຄົບ​ຊຸດ ຕິດ​ກັບ​ການ​ປ່ຽນ​ແປງ​ໃໝ່​ຕົວ​ແບບ​ເຕີບ​ໂຕ​ເສດຖະກິດ; ຍູ້​ແຮງ​ການ​ຫັນ​ປະ​ເທດ​ເປັນ​ອຸດສາຫະກຳ ທັນ​ສະ​ໄໝ, ​ເອົາ​ໃຈ​ໃສ່​ເປັນສຳຄັນ​ເຖິງ​ການ​ຫັນ​ກະສິກຳ ຊົນນະບົດ​ເປັນ​ອຸດສາຫະກຳ ທັນ​ສະ​ໄໝ ຕິດ​ກັບ​ການ​ກໍ່ສ້າງ​ຊົນນະ​ບົດ​ໃໝ່. 

- ຕັ້ງ​ໝັ້ນ, ​ເດັດດ່ຽວ​ຕໍ່ສູ້​ປົກ​ປັກ​ຮັກສາ ​ເອກະລາດ ອະທິປະ​ໄຕ ​ເອກະ​ພາບ ​ແລະ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ປະ​ເທດ​ຊາດ ​ຢ່າງ​ໝັ້ນຄົງ; ຜາບ​ແພ້​ທຸກ​ກົນອຸບາຍ “ຜັນ​ປ່ຽນ​ໂດຍ​ສັນຕິ”, ມ້າງ​ເພ​ທຳລາຍ ​ໂຄ່ນ​ລົ້ມ ຂອງ​ບັນດາ​ອິດ​ທິກຳລັງ​ສັດຕູ ປະຕິ​ການ; ຮັກສາ​ສະພາບ​ແວດ​ລ້ອມ​ສັນຕິພາບ ສະຖຽນ​ລະ​ພາບ​ໄວ້​ຢ່າງ​ໝັ້ນຄົງ, ຮັກສາລະ​ບຽບຄວາມ​ສະຫງົບ ຄວາມ​ປອດ​ໄພ​ທາງສັງຄົມ ​ເພື່ອ​ພັດທະນາ​ປະ​ເທດ. ​ເປີດ​ກວ້າງ​ແລະ​ພັດທະນາ​ຕາມ​ລວງ​ເລິກ ​ບັນດາ​ການ​ພົວພັນ​ຕ່າງປະ​ເທດ; ກຽມ​ຄວາມ​ພ້ອມ​ເປັນ​ເພື່ອນ​ມິດ ​ເປັນຄູ່​ຮ່ວມ​ທີ່​ໄວ້​ວາງ​ໃຈ​ໄດ້ ​ແລະ ​ເປັນ​ສະມາຊິກ​ທີ່​ມີ​ຄວາມ​ຮັບຜິດຊອບ​ໃນ​ປະຊາ​ຄົມ​ໂລກ; ສວຍ​ໃຊ້​ໂອກາດ, ຜ່ານ​ຜ່າ​ສິ່ງ​ທ້າ​ທາຍ, ປະຕິບັດ​ການ​ເຊື່ອມ​ໂຍງ​ສາກົນ​ຢ່າງ​ມີ​ປະສິດ​ທິຜົນ​ໃນ​ເງື່ອນ​ໄຂ​ໃໝ່, ສືບ​ຕໍ່​ຍົກ​ສູງ​ບົດບາດ​ຖານະ​ແລະກຽດ​ສັກ​ສີ​ຂອງ​ຫວຽດນາມ​ໃນ​ເວທີ​ໂລກ. 

- ດຶງ​ດູດ, ​ເສີມ​ຂະຫຍາຍ​ຢ່າງ​ແຂງ​ແຮງ ທຸກ​ແຫຼ່ງພະລັງ​ແລະ​ກຳລັງ​ແຮງ​ປະດິດ​ສ້າງ​ຂອງ​ປະຊາຊົນ. ​ເອົາ​ໃຈ​ໃສ່​ຍົກ​ສູງ​ຊີວິດ​ການ​ເປັນ​ຢູ່​ດ້ານ​ວັດຖຸ​ແລະ​ຈິດ​ໃຈ​ຂອງ​ປະຊາຊົນ, ​ແກ້​ໄຂ​ບັນດາ​ບັນຫາສຳຄັນ​ຮີບ​ດ່ວນ​ໃຫ້​ໄດ້​ເປັນ​ຢ່າງ​ດີ; ​ເພີ່ມ​ທະວີ​ການ​ບໍລິຫານ​ການ​ພັດທະນາ​ສັງຄົມ, ຮັບປະກັນ​ສະ​ວັດ​ດີກາ​ນ ຄວາມ​ປອດ​ໄພ​ສັງຄົມ, ຍົກ​ສູງ​ສະ​ວັດ​ດີກາ​ນສັງຄົມ​ ແລະ ຫຼຸດຜ່ອນ​ຄວາມທຸກ​ຍາກ​ແບບ​ຍືນ​ຍົງ. ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງ​ປະຊາຊົນ, ​ເສີມຂະຫຍາຍ​ກຳລັງ​ແຮງ​ແຫ່ງ​ມະຫາ​ສາມັກຄີ​ປວງ​ຊົນ​ທັງຊາດ. 

- ​ເສີມ​ຂະຫຍາຍ​ປັດ​ໃຈ​ມະນຸດ​ໃນ​ທຸ​ກຂົງ​ເຂດ​ຂອງ​ຊີວິດ​ສັງຄົມ; ສຸມ​ໃສ່​ກໍ່ສ້າງ​ຄົນ​ໃໝ່​ທາງ​ດ້ານ​ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ສະຕິ​ປັນຍາ​ແລະ​ຄວາມ​ສາມາດ​ເຮັດ​ວຽກ; ກໍ່​ສ້າງ​ສະພາບ​ແວດ​ລ້ອມ​ວັດທະນະທຳ​ທີ່​ສົດ​ໃສ. 

ສະ​ເຫຼີ​ມສະຫຼອງການ​ປະຕິວັດ​ເດືອນ​ຕຸລາ​ລັດເຊຍຄົບຮອບ 100 ປີ, ຍິ່ງກວ່າ​ເວລາ​ໃດ​ໝົດ, ພວກ​ເຮົາ​ຍິ່ງ​ຕ້ອງ​ຮັບ​ຮູ້​ຢ່າງ​ຈະ​ແຈ້ງກວ່າ​ອີກ ​ກ່ຽວ​ກັບຄຸນຄ່າ ​ແລະ ການ​ປະ​ກອບ​ສ່ວນອັນ​ໃຫຍ່​ຫຼວງ ທີ່​ການ​ປະຕິວັດ​ນີ້​ໄດ້​ນຳ​ມາ​ໃຫ້​ມະນຸດຊາດ, ຍິ່ງ​ຮັບ​ຮູ້​ຢ່າງ​ເລິກ​ເຊິ່ງກວ່າ​ອີກ​ ກ່ຽວ​ກັບບັນດາ​ບົດຮຽນ​ເລືອດ ຈາກ​ການ​ພັງ​ທະລາ​ຍຂອງ​ລັດທິ​ສັງຄົມ​ນິຍົມຕົວ​ຈິງ​ແບບ​ໂຊ​ວຽດ ​ແລະ ຍິ່ງຢຶດໝັ້ນ​ເສັ້ນທາງ​ປ່ຽນ​ແປງ​ໃໝ່ ​ເພື່ອ​ເອກະລາດ​ແຫ່ງ​ຊາດຕິ​ດກັບສັງຄົມ​ນິຍົມ ທີ່​ພັກ ລຸງ​ໂຮ່ ​ແລະ​ປະຊາຊົນ​ເຮົາ​ໄດ້​ເລືອກ​ເອົາ. ພຶດຕິ​ກຳ​ແລະ​ບັນດາ​ຜົນສຳ​ເລັດ​ຂອງການ​ປະຕິວັດ​ຫວຽດນາມ ​ແມ່ນຄວາມ​ເປັນ​ຈິງ​ທີ່​ມີຊີວິດ​ຊີວາ ປະກອບສ່ວນປັດ​ປະຕິ​ເສດບັນດາ​ທ້ອຍທຳນອງ​ຂອງ​ອິດ​ທິກຳລັງ​ສັດຕູ ທີ່ເສກ​ສັນ​ປັ້ນ​ແຕ່ງປະຕິ​ເສດຄຸນຄ່າ​ຂອງການ​ປະຕິວັດ​ເດືອນ​ຕຸລາ​, ປະ​ຕິ​ເສດລັດທິ​ມາກ-​ເລ​ນິນ ​ແລະ ​ເສັ້ນທາງ​ກ້າວ​ຂຶ້ນ​ສູ່​ສັງຄົມ​ນິຍົມຢູ່​ປະ​ເທດ​ເຮົາ. 

ຮຽນ​ບັນດາທ່ານ​ຜູ້​ແທນ​ແລະ​ແຂກ​ທີ່​ມີ​ກຽດ,  

ຮຽນ​ບັນດາ​ສະຫາຍ​ແລະ​ເພື່ອນ​ທັງຫຼາຍ, 

ພວກ​ເຮົາ​ຈັດ​ຕັ້ງ​ການສະ​ເຫຼີ​ມສະຫຼອງການ​ປະຕິວັດ​ເດືອນ​ຕຸລາ​ລັດເຊຍຄົບຮອບ 100 ປີ ​ໃນ​ສະພາບການ​ທີ່​ປະ​ເທດ​ເຮົາ​ກຳລັງ​ຜັນ​ຂະຫຍາຍ​ຢ່າງ​ຟົດ​ຟື້ນ ການ​ປະຕິບັດມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ ​ແລະ ບັນດາ​ມະຕິ, ບົດ​ສະຫຼຸບ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ. ລະບົບ​ການ​ເມືອງ​ທັງ​ໝົດກຳລັງ​ລົງມື​ເຮັດ, ກຳລັງ​ເຄື່ອນ​ໄຫວ​ໄປ​ໃນ​ທາງ​ບວກ: ພັກ​ປະກາດ​ໃຊ້​ແລະ​ຊີ້​ນຳນຳພາການ​ປະຕິບັດມະຕິ​ທີ່​ສຳຄັນ​ຫຼາຍ​ສະບັບ​ຢ່າງ​ມີ​ປະສິດທິ​ຜົນ; ລັດຖະບານ​ພວມ​ດຳ​ເນີນ​ປະຕິບັດ​ບັນດາ​ມະຕິ ​ແຜນ​ນະ​ໂຍບາຍ​ຂອງ​ພັກ​ຢ່າງຂຸ້ນຂ້ຽວ; ສະພາ​ແຫ່ງ​ຊາດ​ພວມ​ມີ​ການ​ປ່ຽນ​ແປງ​ໃໝ່​ຢ່າງ​ແຂງ​ແຮງ, ​ໄດ້​ຮັບ​ການ​ຊົມ​ເຊີຍ​ຈາກ​ຜູ້​ມີ​ສິດ​ເລືອກ​ຕັ້ງ ​ແລະ​ປະຊາຊົນ. ນະ​ໂຍບາຍ​ແລະ​ການ​ປະຕິບັດ​ຫຼາຍ​ຢ່າງ​ທີ່​ຜ່ານ​ມາ​ມໍ່​ນີ້​ຂອງ​ພວກ​ເຮົາ ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ ​ສະໜັບສະໜູນຈາກ​ພະນັກ​ງານ ສະມາຊິກ​ພັກ​ແລະ​ປະຊາຊົນຈຳນວນ​ຫຼວງ​ຫຼາຍ ​ແລະ​ມີ​ຄວາມ​ຕ້ອງການ ຄວາມ​ຫວັງ​ທີ່​ຈະ​ເຮັດ​ດີກ​ວ່າ​ອີກ. ດ້ວຍ​ຈິດ​ໃຈການ​ປະຕິວັດ​ເດືອນ​ຕຸລາ​ລັດເຊຍ, ຈິດ​ໃຈ​ການ​ປະຕິວັດ​ເດືອນ​ສິງຫານ ​ແລະ ​ເຈດ​ຈຳນົງ​ຫວຽດນາມ, ດ້ວຍ​ຄວາມ​ຕັດສິນ​ໃຈ​ໃໝ່ ບັນຍາກາດ​ໃໝ່ ພະລັງ​ຊີວິດ​ໃໝ່, ດ້ວຍ​ສັດທາ​ອັນ​ແຮງ​ກ້າ​ໃນ​ກຳລັງ​ແຮງ ​ເຈດ​ຈຳ​ນົງຂອງ​ທົ່ວ​ພັກ ທົ່ວ​ທັງ​ຊາດ, ຄວາມ​ເຊື່ອ​ໝັ້ນ​ໃນ​ອະນາຄົດ​ທີ່​ສົດ​ໃສ, ພວກ​ເຮົາ​ໝັ້ນ​ໃຈ​ວ່າ ​ແນ່ນອນ​ພວກ​ເຮົາ​ຈະ​ປະຕິບັດ​ແນວທາງ​ປ່ຽນ​ແປງ​ໃໝ່​ຢ່າງ​ສຳ​ເລັດ​ມີ​ໄຊ ​ເພື່ອ​ປະ​ເທດ​ຫວຽດນາມ​ທີ່​ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ ມີ​ປະຊາທິປະຕ ຍຸຕິ​ທຳ ສີວິ​ໄລ, ກ້າວ​ຂຶ້ນ​ສູ່ສັງຄົມ​ນິຍົມຢ່າ​ງໜັກ​ແໜ້ນ. 

​ແນວ​ຄິດ​ທີ່​ຍິ່ງ​ໃຫຍ່​ຂອງການ​ປະຕິວັດ​ເດືອນ​ຕຸລາ​ລັດເຊຍ ກ່ຽວ​ກັບ​ການ​ປົດ​ປ່ອຍ​ຊາດ, ປົດ​ປ່ອຍ​ສັງຄົມ ​ແລະ ປົດປ່ອຍ​ມະນຸດ ສ່ອງ​ແສງສົດ​ໃສຕະຫຼອດ​ການ! 

ລັດທິ ມາກ-​ເລ​ນິນ, ​ແນວ​ຄິດ​ໂຮ່ຈີ​ມິນ ຢູ່​ຕະຫຼອດ​ໄປ! 

ພັກ​ກອມ​ມູນິດ​ຫວຽດນາມທີ່​ສະຫງ່າ​ງາມ ​ໝັ້ນຍືນ! 

ປະ​ເທດ​ສາທາລະນະ​ລັດ ສັງຄົມ​ນິຍົມ ຫວຽດນາມທີ່ສະຫງ່າ​ລາສີ​ ໝັ້ນຍືນ!

ປະທານ​ໂຮ່ຈີ​ມິນ​ທີ່​ຍິ່ງ​ໃຫຍ່ ​ມີ​ຊີວິ​ຢູ່​ຕະຫຼອດ​ໄປ​ໃນ​ພາລະກິດ​ຂອງ​ພວກ​ເຮົາ! 

ຂໍ​ຂອບ​ໃຈ”./.

​ໂດຍ ຫງວຽນ​ຝູຈ້ອງ

​ເລຂາທິການ​ໃຫຍ່ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ​ຫວຽດນາມ

-------------------

(1),(2) ​ເບິ່ງ: ວ.ອີ.​ເລ​ນິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2006, ​ເຫຼັ້ມ 44, ໜ້າ 184, 185.

(3) ​​ໂຮ່ຈີ​ມິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2011, ​ເຫຼັ້ມ 15, ໜ້າ 387.

(4) ​​ໂຮ່ຈີ​ມິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2011, ​ເຫຼັ້ມ 12, ໜ້າ 562.

(5) ​​ໂຮ່ຈີ​ມິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2011, ​ເຫຼັ້ມ 15, ໜ້າ 392-393.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ