ວັນເສົາ, 15/12/2018
ຕັດສິນໃຈກີດກັ້ນແລະຍູ້ຖອຍການສໍ້ລາດບັງຫຼວງ ເທື່ອລະກ້າວ, ກໍ່ສ້າງການຈັດຕັ້ງກົງຈັກ ແລະຖັນແຖວພະນັກງານ ໃຫ້ສະອາດປອດໃສ, ໝັ້ນຄົງເຂັ້ມແຂງ, ປັບປຸງຄວາມເຊື່ອຖືຮັກແພງ ຂອງປະຊາຊົນ ຕໍ່ກັບພັກແລະລັດ*
8/8/2018 8:46' ສົ່ງ ພິມ
ສະຫາຍເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ (ພາບ: TTXVN)

ຜ່ານ​ການ​ເຮັດ​ວຽກ​ຢ່າງ​ຮີບ​ດ່ວນ, ​ເຂັ້ມ​ງວດ ​ແລະ​ມີ​ຄວາມ​ຮັບຜິດຊອບ​​ໃນວັນ​ໜຶ່ງ, ກອງ​ປະຊຸມ​ທົ່ວ​ປະ​ເທດ​ກ່ຽວ​ກັບ​ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ​ໄດ້​ສຳ​ເລັດ​ເນື້ອ​ໃນ, ​ໂຄງການ​ທີ່​ວາງ​ໄວ້.

ກອງ​ປະຊຸມ​ໄດ້​ຮັບ​ຟັງ​ລາຍ​ງານ​ສະພາບ​ການ, ຜົນສຳ​ເລັດ​ຂອງວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ໃນ​ເວລາ​ທີ່​ຜ່ານ​ມາ, ​ໂດຍ​ສະ​ເພາະ​ຢ່າງ​ຍິ່ງ​ແມ່ນ​ແຕ່​ຕົ້ນ​ສະ​ໄໝ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ມາ​ເຖິງ​ດຽວນີ້, ໜ້າ​ທີ່​ແລະ​ວິທີ​ແກ້​ໄຂ​ທີ່​ສຳຄັນ​ໃນ​ເວລາ​ທີ່​ຈະ​ມາ​ເຖິງ.

ຄວາມ​ເຫັນ​ຂອງ​ບັນດາ​ສະຫາຍ​ເບິ່ງ​ລວມລ້ວນ​ແຕ່​ສະ​ແດງ​ເຖິງ​ຄວາມ​ເປັນ​ເອກະ​ພາບ​ສູງ​ກັບ​ເນື້ອ​ໃນ​ຂອງ​ລາຍ​ງານ, ພ້ອມ​ກັນ​ນັ້ນ​ກໍ່​ເພີ່ມ​ເຕີມ, ທຳ​ຄວາມ​ກະຈ່າງ​ແຈ້ງ​ຕື່ມ​ອີກ ກ່ຽວ​ກັບ​ຫຼາຍ​ບັນຫາ; ຍົກ​ໃຫ້​ເຫັນ​​ຕື່ມ​ອີກ​ບາງ​ບົດຮຽນ, ວິທີ​ເຮັດ​ທີ່​ດີ​ໃນ​ການ​ຊີ້​ນຳ​ນຳພາ​ໃນ​ເວລາ​ທີ່​ຜ່ານ​ມາ ​ແລະ ​ໄດ້ມີຂໍ້​ສະ​ເໜີແນະ, ຄຳ​ແນະນຳ, ການ​ເນັ້ນ​ຢ້ຳວິທີ​ແກ້​ໄຂ​ຈຳນວນ​ໜຶ່ງ ​ເພື່ອ​ແນ​ໃສ່ຍູ້​ແຮ​ງຍິ່ງ​ກວ່າ​ອີກ ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ໃນ​ເວລາ​ທີ່​ຈະ​ມາ​ເຖິງ. ​ເພື່ອ​ສຳ​ເລັດສິ້ນ​ສຸດ​ກອງ​ປະຊຸມ, ຂ້າພະ​ເຈົ້າ​ຂໍ​ອະທິບາຍ​ທຳ​ຄວາມ​ກະຈ່າງ​ແຈ້ງ​ຕື່ມ​ອີກ​ບາງ​ບັນຫາ:

ພາບ​ລວມທົ່ວ​ໄປ​ກ່ຽວກັບວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ນັບ​ແຕ່​ພາຍຫຼັງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ມະ​ເຖິງ​ດຽວ​ນີ້

ພວກ​ເຮົາ​ດີ​ໃຈ​ທີ່​ເຫັນ​ວ່າ, ພາຍຫຼັງ​​ສອງກວ່າ​ປີ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ​ເຖິງ​ວ່າ​ຕ້ອງ​ປະ​ເຊີນ​ໜ້າ​ກັບ​ຄວາມ​ຫຍຸ້​ງຍາກ​ແລະ​ສິ່ງ​ທ້າ​ທາຍ​ຫຼາຍ​ປະການ​ກໍ່ຕາມ, ​ແຕ່​ດ້ວຍ​ຄວາມ​ພະຍາຍາມສູ້​ຊົນ, ຮ່ວມ​ແຮງຮ່ວມ​ໃຈ​ກັນ​ຂອງທົ່ວ​ພັກ, ທົ່ວ​ປວງ​ຊົນ, ປະ​ເທດ​ເຮົາ​ຈຶ່ງ​ສືບ​ຕໍ່​ພັດທະນາ ​ແລະ​ບັນລຸບັນດາ​ໝາກຜົນ​ທີ່​ຮອບດ້ານ​ພໍ​ຄວນ​ໃນ​ເກືອບ​ທຸກໆ​ຂົງ​ເຂດ.

​ເສດຖະກິດ​ມະຫາ​ພາກ​ສືບ​ຕໍ່​ມີຄວາມ​ໝັ້ນຄົງ; ບັນດາ​ການ​ສົມ​ດຸນ​ໃຫຍ່​ໄດ້​ຮັບປະກັນ, ​ໄພ​ເງິນ​ເຟີ້​ຖືກ​ຄວບ​ຄຸມ; ຄວາມ​ປອດ​ໄພ​ທາງ​ສັງຄົມ​ໄດ້​ຮັບ​ການ​ເບິ່ງ​ແຍງ​ດູ​ແລ​​ເປັນ​ຢ່າງດີ; ​ເປັນ​ຄັ້ງ​ທຳ​ອິດ​ໃນ​ຫຼາຍ​ປີ​ທີ່ພວກ​ເຮົາ​ໄດ້​ສຳ​ເລັດ​ແຜນການ​ເສດຖະກິດ-ສັງຄົມຢ່າງຮອບດ້ານ ​ແລະ​ລື່ນ​ລະດັບ​ຄາດໝາຍ, ​ການ​ເຕີບ​ໂຕ ຈີ​ດີ​ພີ ບັນລຸ 6,81% ຊຶ່ງ​ເປັນ​ລະດັບ​ສູງ​ທຽບ​ກັບ​ຫຼາຍ​ປ​ະ​ເທດ​ໃນ​ພາກ​ພື້ນ ​ແລະ​ໃນ​ໂລກ.

ການ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ສະຫງົບ​ໄດ້​ຮັບ​ການ​ເພີ່ມ​ທະວີ, ອະທິປະ​ໄຕ​ແຫ່ງ​ຊາດ​ໄດ້​ຮັບ​ການ​ປົກ​ປ້ອງ​ຢ່າງ​ໝັ້ນຄົງ. ວຽກ​ງານ​ການ​ຕ່າງປະ​ເທດ​ນັບ​ມື້​ນັບ​ໄດ້​ເປີດ​ກວ້າງ ​ເຂົ້າ​ສູ່​ລວງ​ເລິກ, ສະຖານະ​ແລະກຽດ​ສັກ​ສີ​ຂອງ​ຫວຽດນາມ​ໃນ​ເວທີ​ໂລກສືບ​ຕໍ່​ໄດ້​ຮັບ​ການ​ຍົກ​ສູງ​ຂຶ້ນ. ວຽກ​ງານ​ກໍ່ສ້າງ​ປັບປຸງ​ພັກ, ປັບປຸງ​ບູລະນະ​ລະບົບ​ການ​ເມືອງ​ໄດ້​ຮັບ​ການ​ຍູ້​ແຮງຢ່າງ​ຕໍ່​ເມື່ອ​ງ.

ສະ​ເພາະວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ​ໄດ້​ຮັບ​ການຊີ້​ນຳ​ປະຕິບັດ​ຢ່າງຮີບດ່ວນ ຂຸ້ນຂ້ຽວ, ​ໄດ້​ບັນລຸ​ຜົນສຳ​ເລັດ​ທີ່​ຕັ້ງໜ້າ ຈະ​ແຈ້ງຫຼາຍ​ຢ່າງ, ​ສ້າງ​ຄວາມ​ປະ​ທັບ​ໃຈ​ທີ່​ດີ, ​ໄດ້​ຮັບ​ຄວາມ​ຊົມ​ເຊີຍ ​ເຫັນ​ດີ​ເຫັນ​ພ້ອມ ​ແລະ​ສະໜັບສະໜູນທີ່​ສຸດ​ຈາກ​ປະຊາ​ຊົນ; ບັນດາ​ອົງການ​ຈັດ​ຕັ້ງ​ສາກົນ​ໄດ້​ຮັບ​ຮູ້​ແລະ​ປະ​ເມີນ​ຜົນ​ທາງ​ບວກ. ການ​ສໍ້​ລາດ​ບັງ​ຫຼວງ​ຄ່ອຍໆ​ຖືກ​ຈຳກັດ ​ແລະ​ມີ​ທ່າ​ອຽງຜ່ອນຄາຍ, ປະກອບສ່ວນ​ຮັກສາ​ສະຖຽນ​ລະ​ພາບ​ທາງ​ການ​ເມືອງ, ພັດທະນາ​ເສດຖະກິດ-ສັງຄົມ, ປັບປຸງ​ຄວາມ​ເຊື່ອ​ຖື​ຂ​ອງປະຊາຊົນ​ຕໍ່​ພັກ​ແລະ​ລັດ. ສິ່ງທີ່​ພົ້ນ​​ເດັ່ນ​ຄື:

1- ​ໄດ້​ປະກາດ​ໃຊ້​ຂໍ້​ກຳນົດ​ຂອງ​ພັກ​ຫຼາຍ​ຂໍ້, ກົດໝາຍ​ຂອງ​ລັດ​ຫຼາຍ​ສະບັບ​ ແນ​ໃສ່​ເພີ່ມ​ທະວີ​ວຽກ​ງານ​ກໍ່ສ້າງ​ພັກ, ກໍ່​ສ້າງ​ລະບົບ​ການ​ເມືອງ ​ແລະ ປ້ອງ​ກັນ ຕ້ານ​ການ​ສໍ້​ລາດ​ບັງ​ຫຼວງ, ທີ່​ມີ​ຄຸນ​ປະ​ໂຫຍ​ດສຶກສາ​ອົບຮົມ, ບອກ​ເຕື່ອນ, ກີດ​ກັ້ນ, ທັງ​ເປັນ​ພື້ນຖານ​ເພື່ອ​ຄົ້ນ​ເຜີຍ ​ແລະ​ແກ້​ໄຂ​ລົງ​ໂທ​ດຕໍ່​ການ​ກະທຳ​ຜິດພາດ.

ສູນ​ກາງ​ພັກ, ກົມ​ການ​ເມືອ​ງ, ຄະນະ​ເລຂາທິການ, ບັນດາ​ອົງການ​ທີ່​ປຶກສາ​ຂອງ​ພັກ ​ໄດ້​ປະກາດ​ໃຊ້​ຫຼາຍ​ແຜນ​ນະ​ໂຍບາຍ, ມາດ​ຕະການ​ໃໝ່​ທີ່ແຂງ​ແຮງ, ຂຸ້ນຂ້ຽວ​ ກ່ຽວ​ກັບ​ການ​ກໍ່ສ້າງ​ປັບປຸງ​ພັກ ​ແລະຕໍ່ສູ້ປ້ອງ​ກັນ ຕ້ານ​ການ​ສໍ້​ລາດ​ບັງ​ຫຼວງ; ຂໍ້​ກຳນົດ, ມະຕິ​ຫຼາຍ​ສະບັບ​ໄດ້​ຮັບ​ການ​ຊາບ​ຊຶມ ​ແລະ​ປະຕິບັດຢ່າງ​ເຂັ້ມ​ງວດ, ​ເຂົ້າ​ສູ່​ຊີວິດ​ການ​ເປັນ​ຢູ່, ມີ​ຄຸນ​ປະ​ໂຫຍ​ດບອກ​ເຕື່ອນ, ປ້ອງ​ກັນ​ຢ່າງ​ມີ​ປະສິດທິ​ຜົນ. ສະພາ​ແຫ່ງ​ຊາດ, ລັດຖະບານ ​ແລະ​ບັນດາ​ກະຊວງ, ຂະ​ແໜງ​ການ​ພາລະ​ບົດບາດ ​ໄດ້​ເອົາ​ໃຈ​ໃສ່ກວດຄືນ, ​ແກ້​ໄຂ, ​ເພີ່ມ​ເຕີມ, ປະກາດ​ໃຊ້ຂໍ້​ກຳນົດ​ກົດໝາຍ​ໃໝ່​ຫຼາຍ​ສະບັບ ກ່ຽວ​ກັບການ​ຄຸ້ມ​ຄອງ​ເສດຖະກິດ-ສັງຄົມ ​ແລະ ການ​ປ້ອງ​ກັນ​ຕ້ານ​ການ​ສໍ້​ລາດ​ບັງ​ຫຼວງ; ​ແກ້​ໄຂ​ສ່ວນ​ໜຶ່ງຊ່ອງ​ຫວ່າງ, ຄວາມ​ບົກພ່ອງ​ໃນຂໍ້​ກຳນົດ​ກົດໝາຍ​ທີ່​ພາ​ໃຫ້​ເກີດຄວາມ​ຫຍໍ້​ທໍ້, ​ເກີດ​ການ​ສໍ້​ລາດ​ບັງ​ຫຼວງ.

ອາດ​ຈະ​ເວົ້າ​ໄດ້​ວ່າ, ມາ​ເຖິງ​ປະຈຸ​ບັນ ບັນດາ​ແຜນ​ນະ​ໂຍບາຍ​ຂອງ​ພັກ, ບັນດາ​ເອກະສານ​ກົດໝາຍ​ກ່ຽວ​ກັບການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ​ໄດ້​ຮັບ​ການ​ປະກາດ​ໃຊ້​ຢ່າງ​ພຽງພໍ​ພໍ​ຄວນ. ສິ່ງ​ທີ່​ຕ້ອງການ​ທີ່​ສຸດ​ດຽວ​ນີ້​ແມ່ນຄວາມຕື່ນ​ຕົວ, ຄວາມ​ເປັນ​ເອກະ​ພາບ​ສູງ​ທາງ​ດ້ານ​ເຈດ​ຈຳນົງ ​ແລະ​ການ​ກະທຳ, ​ແມ່ນ​ການຈັດ​ຕັ້ງ​ປະຕິບັດ.

2- ວຽກ​ງານ​ກວດກາ, ຕິດຕາມ​ກວດກາ, ກວດ​ສອບ​ໄດ້​ຮັບ​ການ​ຊີ້​ນຳ​ຢ່າງ​ຂຸ້ນຂ້ຽວ ​ແໜ້ນ​ແຟ້ນ, ຄົ້ນ​ເຜີຍ​ຢ່າງທັນ​ການ ​ແລະ​ແກ້​ໄຂ​ຢ່າງ​ເຂັ້ມ​ງວດ ​ຕໍ່ການ​ກະທຳ​ຜິດ, ກະ​ຊັບ​ຮັດ​ແໜ້ນ​ລະບຽບ​ວິ​ໄນ, ປະກອບສ່ວນ​ຢ່າງ​​ໄດ້​ການ​ໄດ້​ງານເຂົ້າ​ໃນ​ການຍົກ​ສູງ​ປະສິດທິ​ຜົນ​ຂອງວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ.

ຄະນະ​ພັກ, ຄະນະ​ກວດກາ​ຂັ້ນ​ຕ່າງໆ​ ໄດ້​ເພີ່ມ​ທະວີ​ການ​ຊີ້​ນຳ, ​ເປັນ​ເຈົ້າ​ການ, ​ເດັດດ່ຽວ, ມີ​ຈຸດ​ໜັກ​ໃຈກາງ; ສຸມ​ໃສ່ຄັດ​ເລືອກ​ເປົ້າ​ໝາຍ, ຂົງ​ເຂດ, ພື້ນ​ທີ່​ທີ່​ສັບສົນ ຫຍຸ້ງ​​ເຫຍີ​ງ, ມັກ​ເກີດ​ການ​ກະທຳ​ຜິດ ການລະ​ເມີດ​ກົດໝາຍ, ມີ​ບັນຫາ​ຮ້ອນ​ເຄື່ອງ ​ທີ່​ພະນັກງານ ສະມາຊິກ​ພັກ ​ແລະ​ປະຊາຊົນສົນ​ໃຈ ​ເພື່ອ​ດຳ​ເນີນ​ການ​ກວດກາ, ຕິດຕາມ​ກວດກາ; ​ໄດ້​ສະຫຼຸບ, ຊີ້​ແຈງ​ການລະ​​ເມີດຈຳນວນ​ຫຼາຍ, ບົນ​ພື້ນຖານ​ນັ້ນ​ໄດ້​ຕົກລົງ​ຫຼື​ສະ​ເໜີປະຕິບັດ​ວິ​ໄນ​ຢ່າງ​ເຂັ້ມງວດ, ຊັດ​ເຈນ, ທັນ​ການ ຕໍ່​ຫຼາຍອົງການ​ແລະ​ບຸກຄົນ​ທີ່​ກະທຳ​ຜິດ.

ພາຍຫຼັງ​ສອງ​ກວ່າ​ປີ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ຄະນະ​ພັກ ​ແລະ​ຄະນະ​ກວດກາ​ຂັ້ນ​ຕ່າງໆ​ໄດ້​ບັງຄັບ​ໃຊ້​ລະບຽບ​ວິ​ໄນຕໍ່ 490 ກວ່າ​ອົງການ​ຈັດ​ຕັ້ງ​ພັກ ​ແລະ​ສະມາຊິກ​ພັກ 35.000 ຄົນ​ທີ່​ໄດ້​ລະ​ເມີດ​ກົດ​ວິ​ໄນ, ​ໃນ​ນັ້ນ​ມີ​ສະມາຊິກ​ພັກ​ເກືອບ 1.300 ຄົນ​ຖືກລົງ​ໂທດ​ຍ້ອນ​ການ​ສໍ້​ລາດ​ບັງ​ຫຼວງ, ຕັ້ງ​ໃຈ​ລະ​ເມີດ​ກົດໝາຍ.

ຄະນະກວດກາ​ສູນ​ກາງພັກ​ໄດ້​ກວດກາ​ແລະ​ຊີ້​ແຈງ​ຫຼາຍ​ກໍລະ​ນີກະທຳ​ຜິດ​ທີ່ຮ້າຍ​ແຮງ, ​ໄດ້​ຕົກລົງ​ບັງຄັບ​ໃຊ້​ລະບຽບ​ວິ​ໄນ ​ແລະສະ​ເໜີ​ໃຫ້​ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລ​ຊາ​ທິການ ປະຕິບັດ​ວິ​ໄນ​ຕໍ່​ຫຼາຍ​ອົງການ​ຈັດ​ຕັ້ງ​ພັກ ​ແລະ​ພະນັກງານຂັ້ນ​ສູງ​ຫຼາຍ​ຄົນ​ທີ່ລະ​ເມີດ​ກົດໝາຍ​ວິ​ໄນ, ​ໃນ​ນັ້ນ​ມີ​ທັງສະຫາຍ​ເປັນ​ກຳມະການ​ສູນ​ກາງ​ພັກ, ກຳມະການ​ກົມ​ການ​ເມື​ອງ; ປະຕິບັດ​ວິ​ໄນ​ຕໍ່​ພະນັກງານ​ປະຈຳການ, ພະນັກງານ​ອອກ​ກິນ​ເບ້ຍ​ບຳນານ ​ແລະນັບ​ທັງຜູ້​ຢູ່​ໃນ​ກຳລັງ​ປະກອບ​ອາວຸດ; ​ເຮັດ​ຢ່າງ​ເຂັ້ມ​ງວດ​ແຕ່​ເທິງ​ລົງ​ລຸ່ມ...

ນີ້​ແມ່ນ​ບາດກ້າວ​ບຸກທະລຸ​ໃນ​ວຽກ​ງານ​ກວດກາ, ປະຕິບັດ​ວິ​ໄນ​ຂອງ​ພັກ, ກະ​ຊັບ​ຮັດ​ແໜ້ນ​ລະບຽບ​ວິ​ໄນ​ຢູ່​ໃນ​ພັກ ​ແລະ​ໃນ​ກົງຈັກ​ແຫ່ງ​ລັດ, ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ, ສະໜັບສະ​ໜູນ, ຕີ​ລາຄາ​ສູງຈາກ​ພະນັກງານ, ສະມາຊິກ​ພັກ ​ແລະ​ປະຊາຊົນ.

ບັນດາ​ອົງການ​ກວດກາ, ກວດ​ສອບ​ໄດ້ສຸມ​ໃສ່​ກວດກາ, ກວດ​ສອບ​ບັນດາ​ຂົງ​ເຂດ​ທີ່​ເຄີຍ​ເກີດຄວາມ​ຫຍໍ້​ທໍ້ ສໍ້​ລາດ​ບັງ​ຫຼວງ, ​ເປັນ​ຕົ້ນ​ແມ່ນ​ບັນດາ​ໂຄງການທີ່​ມີ​ການ​ສູນ​ເສຍ, ຫຼຸບ​ທຶນ​ຈຳນວນ​ຫຼາຍ, ​ແກ່ຍາວ ຊຶ່ງ​ຫາງ​ສຽງ​ສັງຄົມ​ກັງວົນ​ສົນ​ໃຈ.

ຜ່ານ​ການ​ກວດກາ, ກວດ​ສອບ​ໄດ້​ສະ​ເໜີ​ໃຫ້​ເກັບ​ທ້ອນ​ເງິນ​ເກືອບ 170.000 ຕື້​ດົ່ງ ​ແລະ​ທີ່​ດິນ 12 ພັນ​ກວ່າ​ເຮັກຕາ ຄືນ​ມາ​ໃຫ້​ງົບປະມານ​ຂອງ​ລັດ; ​ໄດ້ສະ​ເໜີ​ໃຫ້​ດັດ​ແປງ​ເພີ່ມ​ເຕີມ, ປ່ຽນ​ແທນ, ຍຸບ​ເລີກ​ເອກະສານ​ການ​ຄຸ້ມ​ຄອງບໍລິຫານ​ລັດທີ່​ບໍ່​ສອດຄ່ອງ 300 ກວ່າ​ສະບັບ; ສະ​ເໜີ​​ນຳອົງການທີ່​ມີ​ອຳນາດ​ຕັດ​ສີນ ​ໃຫ້​ດຳ​ເນີນ​ການ​ສຳ​ຫຼວດຄວາມ​ຮັບຜິດຊອບ​ຂອງ​ໝູ່​ຄະນະ ​ແລະ​ບຸກຄົນ​ທີ່​ລະ​ເມີດ​ລະບຽບ​ກົດໝາຍ, ຍົກຍ້າຍ​ເກືອ​ບ 200 ກໍລະນີ​ໄປ​ໃຫ້​ອົງການ​ທີ່​ມີ​ສິດ​ຕັດ​ສີນ ​ເພື່ອ​ສອບສວນ​ແລະ​ຕັດ​ສີນ​ລົງ​ໂທດ​ຕາມ​ກົດໝາຍ.

ຄະນະ​ຊີ້​ນຳ​ສູນ​ກາງ​ກ່ຽວ​ກັບການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ​ໄດ້​ຈັດ​ຕັ້ງ 31 ຄະນະ​ກວດກາ ຕິດຕາມ​ກວດກາ ການ​ກວດກາກໍລະນີ ​ເຫດການ, ການ​ດຳ​ເນີນ​ຄະດີ ສອບ​ສວນ ຟ້ອງ​ຮ້ອງ ພິພາກສາຄະດີ​ສໍ້ລາດ​ບັງ​ຫຼວງ, ຄະດີ​ເສດຖະກິດ​ຢູ່ 63 ​ແຂວງ-ກຳ​ແພງ​ນະຄອນ. ຜ່ານ​ການ​ກວດກາ ຕິດຕາມ​ກວດກາ​ໄດ້​ສະ​ເໜີ​ໃຫ້​ຊີ້​ນຳ​ແກ້​ໄຂ​ຕັດສິນ 452 ກໍລະນີ, ​ເຫດການ, ຄະດີ​ສໍ້​ລາດ​ບັງ​ຫຼວງ​ແລະ​ເສດຖະກິດ.

ສິ່ງ​ທີ່​ໜ້າ​ດີ​ໃຈ​ຄື ຢູ່​ບາງ​ທ້ອງ​ຖິ່ນ, ຄະນະ​ພັກ, ອຳນາດ​ການ​ປົກຄອງ​ ໄດ້​ເອົາ​ໃຈ​ໃສ່​ຊີ້​ນຳ​ນຳພາ, ສ້າງ​ຄວາມ​ຫັນປ່ຽນ​ໃນ​ວຽກ​ງານ​ກວດກາ, ກວດກາ​ນ, ຄົ້ນ​ເຜີຍ, ຈັດການ​ແກ້​ໄຂ​ຢ່າງ​ເຂັ້ມ​ງວດ, ທັນ​ການ ຕໍ່​ພະນັກງານ ສະມາຊິກ​ພັກຫຼາຍ​ຄົນທີ່​ລະ​ເມີດກົດໝາຍ​ຖານ​ສໍ້​ລາດ​ບັງ​ຫຼວງ, ນັບ​ທັງ​ສະຫາຍ​ໃນ​ຄະນະ​ປະຈຳການ, ຜູ້​ປະຈຳການ​ຂອງ​ອົງຄະ​ນະ​ພັກ; ສະພາບ​ການ “ຂັ້ນ​ເທິງ​ຮ້ອນ, ຂ້າງ​ລຸ່ມ​ເຢັນ” ​ໄດ້​ຖືກ​ແກ້​ໄຂ​ຜ່ານ​ຜ່າ​ໃນ​ເບື້ອງ​ຕົ້ນຢູ່​ບາງ​ທ້ອງ​ຖິ່ນ (ຕົວຢ່າງ​ຄື​ຢູ່​ນະຄອນ​ໂຮ່ຈີ​ມິນ, ຮ່າ​ໂນ້ຍ, ດາ​ໜັ້ງ, ​ເຊີນ​ລາ, ດັກ​ລັກ, ​ເກິ່ນ​ເທີ...).

3- ວຽກ​ງານ​ຄົ້ນ​ເຜີ​ຍ ຈັດການ​ແກ້​ໄຂ​ກໍລະນີ ​ເຫດການ, ການ​ສອບ​ສວນ ຟ້ອງ​ຮ້ອງ ພິພາກສາ​ຄະດີ​ສໍ້​ລາດ​ບັງ​ຫຼວງ​ແລະ​ເສດຖະກິດ ​ໄດ້​ຮັບ​ການ​ຍູ້​ແຮງ ​ແລະມີ​ການ​ຫັນປ່ຽນ​ທາງ​ບວກ, ຈະ​ແຈ້ງ, ຖືກ​ຖື​ວ່າ​ເປັນ​ຈຸດ​ສະຫວ່າງ​ໃນ​ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ໃນ​ເວລາ​ທີ່​ຜ່ານ​ມາມໍ່​ນີ້.

ຫຼາຍ​ກໍ​ລະ​ຕີ, ຄະດີ​ສໍ້​ລາດ​ບັງ​ຫຼວງ​ແລະ​ເສດຖະກິດທີ່​ສັບສົນ ຮ້າຍ​ແຮງ, ນັບ​ທັງ​ກໍລະນີທີ່​ຄົງ​ຄ້າງ​ມາ​ແຕ່​ຫຼາຍ​ປີ​ກ່ອນ, ຖືກ​ຄົ້ນ​ເຜີຍ, ຕັດສິນ​ແກ້​ໄຂ​ຢ່າງ​ເຂັ້ມ​ງວດ, ​ເປີດ​ເຜີຍ, ຖືກ​ກົດໝາຍ, ​ເຄັ່ງ​ຄັດ​ທີ່​ສຸດ​ ແຕ່​ກໍ່ມີ​ຈິດ​ໃຈ​ມະນຸ​ກສະ​ທຳ; ມີ​ເຫດ​ມີ​ຜົນ​ແລະ​ມີ​ເຈດຕະນາ​ລົມ, ສະ​ແດງ​ໃຫ້​ເຫັນ​ແຈ້ງ​ທັດສະນະ “​ເວົ້າ​ໄປ​ຄຽງ​ຄູ່​ກັບ​ເຮັດ, ບໍ່​ມີ​ເຂດ​ຫວງ​ຫ້າມ, ບໍ່​ມີ​ຂໍ້​ຍົກ​ເວັ້ນ, ບໍ່​ມີ​ສິດທິ​ພິ​ເສດ”, ປະກອບສ່ວນ​ຍົກ​ສູງ​ກຽດ​ສັກ​ສີ​ແລະ​ກຳລັງ​ແຮງ​ສູ້​ຮົບ ​ຂອງ​ພັກ ​ແລະກໍ່​ເປັນມາດ​ຕະການປຸກ​ສະຕິ ບອກ​ເຕືອນທີ່​ມີ​ປະສິດທິ​ຜົນ (ຄະດີ ​ເຢືອງຈີ​ຢຸ້ງ; ຄະດີ ຫວຸກັວກຫາວ; ຄະດີ ຮວິ່ງ​ທິຮ່ວຽນ​ຍື; ຄະດີ ຟ້າ​ມກົງ​ແຢງ; ຄະດີ ຮ່າ​ວັນ​ຖຳ; ຄະດີ ຢາງ​ກິມດາດ; ຄະດີ ດິງລາ​ທັງ; ຄະດີ ຈິ້ງ​ຊວັນ​ແທງ; ຄະດີ ຟານ​ວັນ​ແອ​ງຫວຸ (ຫວຸຍົມ); ຄະດີ ດິງງ້ອກ​ເຮ້ (ອຸດ​ຈອກ); ຄະດີການ​ພະນັນ​ແລະ​ຈັດ​ຕັ້ງ​ການ​ພະນັນ​ທີ່​ເກີດ​ຂຶ້ນ​ຢູ່​ແຂວງ​ຝູ​ເທາະ ​ແລະ​ຢູ່​ບາງ​ທ້ອງ​ຖິ່ນ...).

ສິ່ງ​ທີ່​ຄວນ​ເອົາ​ໃຈ​ໃສ່​ຄື, ການ​ເກັບ​ໂຮມ​ຊັບ​ສິນຄືນ​ມາ​ຈາກ​ຄະດີ​ສໍ້​ລາດ​ບັງ​ຫຼວງ​ໄດ້​ຮັບ​ຄວາມ​ເອົາ​ໃຈ​ໃສ່​ກວ່າ​​ແຕ່​ກ່ອນ; ການກວດ​ໄລ່, ຢຶດຊັບ​ສິນ​ໃນ​ຄະດີ​ສໍ້​ລາດ​ບັງ​ຫຼວງ ຄະດີ​ເສດຖະກິດ​ຈຳນວນ​ໜຶ່ງ​ ໄດ້​ຮັບ​ຜົນສູງ​ພໍ​ຄວນ (ຄະດີ ຢາງ​ກິມດາດ ຢຶດຊັບ​ສິນ​ໄດ້ 300 ກວ່າ​ຕື້​ດົ່ງ; ຄະດີ ​ເຫືອທິ​ເຝິນ ​ໄດ້ 10.000 ກວ່າຕື້ດົ່ງ; ຄະດີ ທະນາຄານດົງ​ອ໋າ ​ໄດ້​ 2.000 ກວ່າ​ຕື້​ດົ່ງ; ຄະດີ ຟ້າ​ມກົງ​ແຢງ (​ໄລຍະ​ທີ I) ​ໄດ້ 6.000 ກວ່າ​ຕື້​ດົ່ງ; ຄະດີ ດິງລາ​ທັງ ​ໄດ້ 20 ກວ່າ​ຕື້​ດົ່ງ; ຄະດີ ຈິ້ງ​ຊວັນ​ແທງ ​ໄດ້ 45 ກວ່າ​ຕື້​ດົ່ງ; ຄະດີ AVG ​ໄດ້ 8.500 ກວ່າ​ຕື້​ດົ່ງ...).

4- ການ​ກໍ່ສ້າງ ​ແລະ​ປະຕິບັດ​ບັນດາ​ກົນ​ໄກ, ນະ​ໂຍບາຍ​ກ່ຽວ​ກັບ​ການຈັດ​ຕັ້ງພະນັກງານ​ ເພື່ອ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ມີ​ການ​ປ່ຽນ​ແປງ​ທີ່​ຊັດ​ເຈນ​ຫຼາຍ; ການປະຕິ​ຮູບ​ການ​ບໍລິການ, ​ເປີດ​ເຜີຍ, ​ໂປ່ງ​ໃສ, ຄວາມ​ຮັບຜິດຊອບ​ໃນ​ການ​ອະທິບາຍ​ລາຍ​ງານຢູ່​ໃນການ​ເຄື່ອນ​ໄຫວ​ຂອງ​ສຳນັກງານ, ອົງການ, ກົມ​ກອງ ​ໄດ້​ຮັບ​ການ​ຊີ້​ນຳ​ປະຕິບັດ​ຢ່າງ​ລວມສູນ ​ແລະບັນລຸ​ຜົນສຳ​ເລັດ​ທາງ​ບວກ​ທີ່​ດີ.

ສູນ​ກາງ, ກົມ​ການ​ເມືອງ, ຄະນະ​ເລຂາທິການ​ໄດ້​ມີ​ການ​ປ່ຽນ​ແປງ​ໃໝ່​ຫຼາຍ​ຢ່າງທີ່​ສອດຄ່ອງ ຊັດ​ເຈນ, ຊີ້​ນຳ​ແກ້​ໄຂ​ໄດ້​ຫຼາຍ​ບັນຫາ​ທີ່​ຄົງ​ຄ້າງ​ໃນ​ວຽກ​ງານ​ພະນັກງານ; “ບໍ່​ວິ້ງ​ເຕັ້ນ​ຫາ​ຍົດ​ຕຳ​ແໜ່​ງ, ບໍ່​ວິ້ງ​ເຕັ້ນ​ຫາສິດ​ອຳນາດ” ​ໄດ້​ກາຍ​ເປັນຖະ​ແຫຼ​ງການ​ທີ່​​ແຂງ​ແຮງ.

ວຽກ​ງານ​ສັງ​ເກດ​ຕີ​ລາຄາ​ພະນັກງານ​ມີ​ຄວາມ​ຊັດ​ເຈນ​ກວ່າ​ເກົ່າ; ການ​ຜັດປ່ຽນ​ພະນັກງານ​ໄດ້​ຮັບ​ການ​ປະຕິບັດ​ຢ່າງ​ເປັນ​ແບບ​ແຜນ​ກວ່າ​​ແຕ່​ກ່ອນ.

ລັດຖະບານ ​ແລະ​ບັນດາ​ກະຊວງ ຂະ​ແໜງ​ການ ທ້ອງ​ຖິ່ນ​ ໄດ້​ຍູ້​ແຮງ​ການ​ປະຕິ​ຮູບ​ການ​ບໍລິຫານ, ​ເພີ່ມ​ທະວີ​ການ​ເປີດ​ເຜີຍ, ​ໂປ່​ງ​ໃສ, ປັບປຸງ​ສະພາບ​ແວດ​ລ້ອມ​ການ​ລົງທຶນ, ທຸລະ​ກິດ, ຍົກ​ສູງຄວາມ​ສາມາດ​ແຂ່ງຂັນ​ຂອງ​ຊາດ, ປະກອບສ່ວນ​ທີ່​ສຳຄັນ​ເຂົ້າ​ໃນ​ການ​ເຕີບ​ໂຕ​ເສດຖະກິດ ​ແລະປ້ອງ​ກັນ​ກີດ​ກັ້ນ​ຄວາມ​ຫຍໍ້​ທໍ້ ການ​ສໍ້​ລາດ​ບັງ​ຫຼວງ.

ຄະນະ​ພັກ, ອຳນາດ​ການ​ປົກຄອງ, ພະນັກງານ​ການ​ນຳ​ຂັ້ນ​ຕ່າງໆ​ໄດ້ມີ​ຄວາມ​ເອົາ​ໃຈ​ໃສ່​ຫຼາຍ​ກວ່າ​ແຕ່​ກ່ອນ​ເຖິງ​ການ​ຮັບ​ເອົາ​ຄວາມ​ເຫັນ​ສ່ອງ​ແສງ​, ຈັດ​ຕັ້ງ​ການ​ສົນທະນາ, ​ແກ້​ໄຂຄວາມ​ຄິດ​ເຫັນ ຂໍ້​ສະ​ເໜີ​ແນະ ຂໍ້​ຂັດຂ້ອງ ​ແລະບັນຫາ​ເຄັ່ງຮ້ອນ​ ຂອງ​ປະຊາຊົນ, ວິ​ສາ​ຫະກິດ.

5- ວຽກ​ງານ​ໂຄສະນາ ຖະ​ແຫຼ​ງຂ່າວມີ​ການ​ປ່ຽນ​ແປງ​ໃໝ່​ຫຼາຍ​ຢ່າງ, ​ເປັນ​ຕົ້ນ​ແມ່ນ​ການ​ເສີມ​ຂະຫຍາຍ​ບົດບາດ​ຂອງ​ໝັງ​ສື​ພິມ, ສື່​ຂ່າວ​ໃນກ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ.

ການ​ເປີດ​ເຜີຍ​ຜົນ​ຂອງ​ການ​ກວດກາ, ຕິດຕາມ​ກວດກາ, ​ແກ້​ໄຂ​ລົງ​ໂທດ​ຕໍ່​ກໍລະ​ນີ ຄະດີ​ສໍ້​ລາດ​ບັງ​ຫຼວງ ​ເສດຖະກິດ; ​ເປັນ​ເຈົ້າ​ການ​ໃນ​ການ​ສະໜອງ​ຂໍ້​ມູນ​ຂ່າວສານກ່ຽວ​ກັບ​ບັນດາ​ບັນຫາ​ເຄັ່ງຮ້ອນທີ່​ສັງຄົມ​ກັງວົນ​ສົນ​ໃຈ, ຊ່ວຍ​ກຳນົດ​ທິດ​ທີ່​ດີ​ໃຫ້ຫາ​ງສຽງ​ສັງຄົມ ​ແລະ​ກໍ່​ສະ​ແດງ​ໃຫ້​ເຫັນ​​ເຖິງການ​ເປີດ​ເຜີຍ, ​ໂປ່​ງ​ໃສຂອງ​ພັກ​ແລະ​ລັດ​ໃນ​ການກຳຈັດ​ການ​ສໍ້​ລາດ​ບັງ​ຫຼວງ.

ບັນດາ​ອົງການ​ສຳນັກງານ​ຂ່າວສານ, ໜັງສືພິມ​ໄດ້​ຕັ້ງໜ້າ​ເຄື່ອນ​ໄຫວ​ໄປ​ນຳ​ອົງການ​ພາລະ​ບົດບາດ​ໃນການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ; ມີ​ຫຼາຍ​ຂ່າວ, ບົດ​ຄວາມ​ກ່ຽວ​ກັບວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຕໍ່ສູ້​ປະຕິ​ເສດ​ຖ້ອຍ​ທຳນອງ​ບິດ​ເບືອນ ​ເສດ​ສັນ​ປັ້ນ​ແຕ່ງ​ຂອງ​ບັນດາ​ອິດ​ທິກຳລັງ​ສັດຕູກ່ຽວ​ກັບວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງຂອງ​ພັກ ລັດ​ເຮົາ.

6- ​ໄດ້​ເອົາ​ໃຈ​ໃສ່​ເປັນ​ສຳຄັນ​ເຖິງ​ການຈັດ​ຕັ້ງ, ຍົກ​ສູງ​ຄຸນ​ນະພາ​ບ, ປະສິດທິ​ຜົນ​ການ​ເຄື່ອນ​ໄຫວ ​ແລະ​ການ​ປະສານ​ສົມທົບ​ລະຫວ່າງບັນດາ​ສຳນັກງານ ອົງການ​ພາທີ່​ມີລະ​ບົດບາດ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ.

ຄະນະ​ຊີ້​ນຳ​ໄດ້​ມີ​ການ​ປ່ຽນ​ແປງ​ໃໝ່​ຫຼາຍ​ຢ່າງ​ທາງ​ດ້ານ​ເນື້ອ​ໃນ​ກໍ່​ຄື​ແບບ​ວິທີ​ການ​ເຄື່ອນ​ໄຫວ, ​ໄດ້ເອົາ​ໃຈ​ໃສ່​ຍົກ​ສູງ​ປະສິດທິ​ຜົນ​ຂອງ​ວຽກ​ງານຕົວ​ຈິງ, ​ເຮັດ​ວຽກ​ຢ່າງ​ເຂັ້ມ​ງວດ ມີ​ຄວາມ​ຮັບຜິດຊອບ ​ແລະມີ​ແບບ​ແຜນ​ທີ່​ສຸດ, ​ໄດ້​ສຳ​ເລັດ​ເປັນ​ຢ່າງ​ດີ​ບັນດາ​ໜ້າ​ທີ່​ທີ່​ໄດ້​ຮັບ​ມອບ​ໝາຍ, ມີ​ວຽກ​ງານ​ໄດ້​ສຳ​ເລັດ​ລື່ນລະດັບ​ຄາດໝາຍ; ​ເກືອບ​ຄື​ວ່າ ຫຼັງຈາກ​ການ​ປະຊຸມ​ຄະນະ​ຊີ້​ນຳ, ການ​ປະຊຸມ​​ຄະນະ​ປະຈຳຂອງ​ຄະນະ​ຊີ້​ນຳ​ແຕ່​ລະ​ຄັ້ງ ​ແມ່ນ​ສະພາບ​ການ​ຕົວ​ຈິງ​ກໍ່​ມີ​ການຫັນປ່ຽນ​ໃໝ່​ທີ່​ຈະ​ແຈ້ງ.

ບັນດາ​ສະຫາຍ​ກຳມະການ​ຄະນະ​ຊີ້​ນຳ​ໄດ້​ຕັ້ງໜ້າ​ພະຍາຍາມ, ມີ​ຄວາມ​ຮັບຜິດຊອບ, ລົງ​ເລິ​ກໃກ້ຊິດ, ຕັດສິນ​ໃຈ​ຊີ້​ນຳ​ປະຕິບັດ​ບັນດາ​ເນື້ອ​ໃນ​ວຽກ​ງານ​ຕາມ​ໂຄງການ, ​ແຜນ​ງານ​ຂອງ​ຄະນະ​ຊີ້​ນຳ. ຄະນະ​ການ​ເມືອງ​ພາຍ​ໃນ​ສູນ​ກາງ - ອົງການ​ປະຈຳ​ຂອງ​ຄະນະ​ຊີ້​ນຳ ​ໄດ້​ມີ​ຄວາມ​ມານະ​ພະຍາຍາມ, ​ເປັນ​ເຈົ້າ​ການຂະຫຍັນ​ຂັນ​ເຄື່ອນ, ລົງ​ເລິກ​ໃກ້ຊິດ, ​ເດັດດ່ຽວ​ໃນ​ການ​ໃຫ້​ຄຳ​ປຶກສາ, ສະ​ເໜີ​ແນະ, ຊ່ວຍ​ໃຫ້​ຄະນະ​ຊີ້​ນຳ ກໍ່ສ້າງ​ແລະ​ຈັດ​ຕັ້ງ​ປະຕິບັດ​ໂຄງການ, ​ແຜນ​ງານ​ຢ່າງ​ມີ​ປະສິດທິ​ຜົນ.

ບັນດາ​ອົງການ​ກວດກາ​ຂອງ​ພັກ, ອົງການ​ກວດກາ ກວດ​ສອບ, ຕຳຫຼວດ, ອົງການ​ໄອ​ຍະ​ການ, ສານ ​ໄດ້​ລົງມື​ປະຕິບັດ​ໜ້າ​ທີ່​ຢ່າງ​ຕັ້ງໜ້າ​ແລະ​ມີ​ປະສິດທິ​ຜົນ; ບັນດາໜ່ວຍ​ງານ​ສະ​ເພາະ​ກິດ​ຕ້ານ​ການ​ສໍ້​ລາດ​ບັງ​ຫຼວງ ສືບ​ຕໍ່​ໄດ້​ປັບປຸງ​ການຈັດ​ຕັ້ງ ກົງຈັກ, ຍູ້​ແຮງ​ການ​ເຄື່ອນ​ໄຫວດ້ານ​ວິຊາ​ຊີບ​ໃນ​ການ​ຄົ້ນ​ເຜີຍ, ​ຈັດການແກ້​ໄຂກໍລະ​ນີ ຄະ​ດີ​ສໍ້​ລາດ​ບັງ​ຫຼວງ. ການ​ພົວພັນ​ສົມທົບ​ລະຫວ່າງ​ບັນດາ​ອົງການ, ໜ່ວຍ​ງານ​ທີ່​ມີ​ພາລະ​ບົດບາດ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງນັ້ນ ນັບ​ມື້​ນັບ​ແໜ້ນ​ແຟ້ນ, ມີ​ປະສິດທິ​ຜົນ.

ຈາກ​ຜົນທີ່​ໄດ້​ຮັບ​ເທິງ​ນີ້ສະ​ແດງ​ໃຫ້​ເຫັນ​ວ່າ, ການ​ປ່ຽນ​ແປງ​ທາງ​ບວກ​ໃນ​ວຽກງານ​ກໍ່ສ້າງ ປັບປຸງ​ພັກ, ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຕ້ານ​ຄວານ​ຫຍໍ້​ທໍ້, ສ້າງ​ຄວາມ​ເຫັນ​ດີ​ເຫັນ​ພ້ອມ, ​ຄວາມເບີກບານ​ມ່ວນ​ຊື່ນ​ໃນ​ປະຊາຊົນ. ​ແລະ​ນີ້​ແມ່ນ​ແຫຼ່ງກຳລັງ​ໜູນ​ທີ່​ໃຫຍ່​ຫຼວງ​ເພື່ອ​ໃຫ້​ພວກ​ເຮົາສຳ​ເລັດ​ເປັນ​ຢ່າງ​ດີ​ບັນດາ​ໜ້າ​ທີ່​ທີ່​ໄດ້​ວາງ​ອອກ​ມາ, ພາ​ປະ​ເທດ​ຊາດ​ພັດທະນາ​ຢ່າງ​ໄວ​ແລະ​ຍືນ​ຍົງ.

​ໂດຍ​ບໍ່​ຄື​ກັນ​ກັບ​ບາງ​ຄວາມຄິດ​ກັງວົນທີ່​ວ່າ, ຖ້າ​ລວມສູນ​ເກີນ​ໄປ​ເຂົ້າ​ໃນ​ການ​ຕໍ່ສູ້​ຕ້ານ​ການ​ສໍ້​ລາດ​ບັງ​ຫຼວງ, ​ເຂົ້າ​ໃນ​ການ​ກໍ່ສ້າງ​ປັບປຸງ​ພັກ ຈະ​ເຮັດ​ໃຫ້ການ​ຊີ້ນນຳ “ຫົດ​ຫ້ຽນ” ຫຼື​ເຮັດ​ໃຫ້ການ​ພັດທະນາ​ຖືກ​ຊັດ​ຊ້າ​ລົງ, ຫາກ​ກົງ​ຂ້າມ, ​ແມ່ນ​ຍ້ອນ​ອາ​​ໄສວຽກ​ງານ​ທີ່​ດີ​ຂອງ​ການ​ກໍ່ສ້າງ​ພັກ, ການ​ຍູ້​ແຮງ​ການ​ຕໍ່ສູ້ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຈຶ່ງ​ໄດ້​ປະກອບສ່ວນ​ຊຸກຍູ້​ພັດທະນາ​ເສດຖະກິດ-ສັງຄົມ, ​ເພີ່ມ​ທະວີຄວາມ​ໝັ້ນຄົງ​-ການ​ປ້ອງ​ກັນຊາ​ດ, ການ​ຕ່າງປະ​ເທດ.

​ແຕ່​ວ່າ, ຄຽງຂ້າງ​ບັນດາ​ຜົນສຳ​ເລັດ​ທີ່​ບັນລຸ​ໄດ້​ນັ້ນ, ພວກ​ເຮົາ​ກໍ່​ຕ້ອງ​ຍອມຮັບ​​ວ່າ, ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງຍັງ​ມີ​ຂໍ້​ຈຳກັດ, ສິ່ງ​ຄົງ​ຄ້າງຕ່າງໆ ​ຄື​ທີ່​ບົດ​ລາຍ​ງານ​ໄດ້​ຍົກ​ໃຫ້​ເຫັນ.

ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງຢູ່​ບາງ​ທ້ອງ​ຖິ່ນ, ກະຊວງ, ຂະ​ແໜງ​ການ​ບໍ່​ມີ​ການ​ປ່ຽນ​ແປງ​ຈະ​ແຈ້ງ, ຍັງ​ມີ​ສະພາບ​ “ຂັ້ນ​ເທິງ​ຮ້ອນ, ຂັ້ນ​ລຸ່ມ​ເຢັນ”, ຈົ່ງ​ຈຽມ, ຫຼົບຫຼີກ, ຢ້ານ​ຕຳ​ກັນ; ການ​ຄົ້ນ​ເຜີຍ, ​ແກ້​ໄຂ​ລົງ​ໂທດ​ການ​ສໍ້​ລາດ​ບັງ​ຫຼວງ​​ບໍ່​ຕອບ​ສະໜອງ​ຄວາມ​ຕ້ອງການໄດ້; ການ​ກວດກາຕົນ​ເອງ, ການ​ຄົ້ນ​ເຜີຍດ້ວຍ​ຕົນ​ເອງ​ແລະ​ຈັດການແກ້​ໄຂ​ການ​ສໍ້​ລາດ​ບັງ​ຫຼວງຢູ່​ພາຍ​ໃນສຳນັກງານ ອົງການ ກົມ​ກອງ ຍັງ​ຄົງ​ເປັນ​ຂອດ​ອ່ອນ​ແອ.

ສະພາບການ​ລົບ​ກວນ ​ຄວາມ​ຫຍໍ້​ທໍ້​ຫຍຸ້ງ​ເຫ​ຍີ​ງ ​ໃນຂົງ​ເຂດ​ການ​ບໍລິຫານ, ບໍລິການ​ສາທາລະນະ ຍັງ​ກໍ່​ຄວາມ​ຮ້ອນ​ເຄືອງລຳ​ຄານ​ໃຈ​ໃຫ້​ປະຊາຊົນ​ແລະ​ວິ​ສາ​ຫະກິດ.

ສາ​ເຫດຕົ້ນຕໍ​ຂອງ​ຂໍ້​ຈຳກັດ​ເຫຼົ່າ​ນັ້ນ​ແມ່ນ​ຍ້ອນຫຼາຍ​ຄະນະ​ພັກ, ອົງການ​ຈັດ​ຕັ້ງ​ພັກ, ອຳນາດ​ການ​ປົກຄອງ, ຜູ້ນຳ​ໜ້າສຳນັກງານ​ອົງການ ກົມ​ກອງ ຍັງ​ບໍ່​ທັນ​ມີ​ຄວາມ​ຮັບ​ຮູ້​ຢ່າງ​ເລິກ​ເຊິ່ງກ່ຽວກັບຄວາມ​ຮ້າຍ​ແຮງ​ຂອງສະພາບ​ການ​ສໍ້​ລາດ​ບັງ​ຫຼວງ ຢູ່​ທ້ອງ​ຖິ່ນ, ຢູ່​ຂົງ​ເຂດ​ທີ່​ຕົນ​ຄຸ້ມ​ຄອງ; ບໍ່​ເປັນ​ແບບຢ່າງ, ບໍ່​ເດັດດ່ຽວ​ໃນ​ການ​ຊີ້​ນຳ​ນຳພາ, ປະຕິບັດ​ໜ້າ​ທີ່​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ.

ພະນັກງານ ສະມາຊິກ​ພັກ ລັດຖະກອນ ພາກສ່ວນ​ໜຶ່ງ​ທີ່​ບໍ່​ໜ້ອຍ, ​ໃນ​ນັ້ນ​ມີ​ທັງ​ພະນັກງານ​ນຳພາ ຄຸ້ມ​ຄອງ, ຂາດ​ການ​ຝຶກ​ຝົນ​ຫຼໍ່​ຫຼອມ, ມີ​ປະກົດ​ການ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ, ມີ​ການ​ກະທຳ​ກໍ່​ຄວາມ​ຫຍຸ້ງ​ເຫ​ຍີ​ງ​ໃຫ້ປະຊາຊົນ, ທຸ​ຈະລິດ ສໍ້​ລາດ​ບັງ​ຫຼວງ.

ນະ​ໂຍບາຍ, ລະບຽບ​ກົດໝາຍ​ໃນ​ບາງ​ຂົງ​ເຂດ​ບໍ່​ເໝາະ​ສົມ ບໍ່​ໄດ້​ຕາມ​ຄວາມ​ຕ້ອງການ, ຄວາມ​ເປັນ​ໄປ​ໄດ້​ບໍ່​ສູງ; ຍັງ​ບໍ່​ມີ​ກົນ​ໄກ​ທີ່​ແຂງ​ແຮງ​ພຽງພໍ​ເພື່ອ​ຄວບ​ຄຸມ​ອຳນາດ​ຢ່າງ​ແໜ້ນ​ແຟ້ນ; ວຽກ​ງານ​ກວດກາ, ຕິດຕາມ​ກວດກາ​ການ​ປະຕິບັດ​ສິດ​ອຳນາດ​ຂອງ​ຜູ້​ມີ​ຍົດ​ຕຳ​ແໜ່​ງ, ມີ​ສິດ​ອຳນາດ ​ຍັງ​ບໍ່​ໄດ້​ຮັບ​ຄວາມ​ເອົາ​ໃຈ​ໃສ່​ປະຕິບັດ, ດັ່ງ​ນັ້ນ ຈຶ່ງ​​ເຄີຍ​ພາ​ໄປ​ເຖິງ​ການລ່ວງ​ອຳນາດ​ເພື່ອ​​ຜົນ​ປະ​ໂຫຍ​ດສ່ວນ​ຕົວ; ລະບອບ​ຮັບຜິດຊອບ, ລະບອບ​ການ​ງານ​ຍັງ​ບໍ່​ລະອຽດຈະ​ແຈ້ງ.

ການ​ປະຕິບັດ​ກົດໝາຍ​ເບິ່ງ​ລວມຍັງ​ບໍ່​ເຂັ້ມ​ງວດ; ລະບຽບ​ວິ​ໄນ​ຢູ່​ບາງ​ຂະ​ແໜງ​ການ, ຂົງ​ເຂດ​ຍັງ​ຖືກ​ປ່ອຍປະ​ລະ​ເຫຼີງ. ການຈັດ​ຕັ້ງ​ກົງຈັກ, ສິດ​ຂອບ​ເຂດ, ພາຫະນະ, ​ເງື່ອ​ນໄຂ​ເຮັດ​ວຽກຂອງ​ບັນດາ​ສຳນັກງານອົງການ, ໜ່ວຍ​ງານມີພາລະ​ບົດບາດ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຍັງ​ບໍ່​ສົມ​ຄູ່​ກັບ​ພາລະ​ບົດບາດ ໜ້າ​ທີ່​ທີ່​ໄດ້​ຮັບ​ມອບ​ໝາຍ; ຄວາມ​ສາມາດ ລະດັບຄວາມ​ຮູ້​ຂອງ​ພະນັກງານ ລັດຖະກອນ​ພາກສ່ວນ​ໜຶ່ງບໍ່​ໄດ້​ຕາມ​ຄວາມ​ຕ້ອງການ...

ກ່ຽວ​ກັບ​ທິດ​ທາງ, ໜ້າ​ທີ່, ວິທີ​ແກ້​ໄຂ​ໃນ​ເວລາ​ທີ່​ຈະ​ມາ​ເຖິງ

ປະຈຸ​ບັນ, ປະ​ເທດ​ເຮົາ​ພວມ​ຢືນ​ຕໍ່ໜ້າຄວາມ​ຕ້ອງການ, ໜ້າ​ທີ່​ໃໝ່ ພ້ອມ​ດ້ວຍ​ໂອກາດ, ຄວາມ​ສະດວກ ​ແລະ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ໃໝ່​ທີ່​ແຊກ​ຊ້ອນ​ກັນ.

ພາລະກິດ​ການ​ປ່ຽນ​ແປງ​ໃໝ່, ​ເຊື່ອ​ມ​ໂຍງ​ສາກົນ, ພັດທະນາ​ປະ​ເທດຢ່າງ​ໄວ​ແລະ​ຍືນ​ຍົງ ພວມ​ຫັນ​ໄປ​ສູ່​ໄລຍະ​ໃໝ່ ສູງ​ກວ່າ​ເກົ່າ, ນັບ​ມື້​ນັບ​ເຂົ້າ​ສູ່​ລວງ​ເລິກ, ຫຍຸ້ງຍາກ ສັບສົນ​ກວ່າ​ແຕ່​ກ່ອນ. ສະພາບ​ການ​ໃນ​ປະ​ເທດ​ແລະ​ສາກົນ​ໄດ້​ມີ​ການ​ປ່ຽນ​ແປງ​ຫຼາຍ ​ແລະ​ພວມຜັນ​ປ່ຽນ​ຢ່າງ​ໄວວາສັບສົນ, ຄາດ​ຄະ​ເນ​ຍາກ.

ພາຍຫຼັງ​ເຄິ່ງສະ​ໄໝ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ, ວຽກ​ງານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ໄດ້​ບັນລຸ​ໝາກຜົນ​ທີ​ສຳຄັນ​ທີ່​ສຸດ, ໜ້າ​ຊື່ນ​ຊົມ​ທີ່​ສຸດ. ​ແຕ່​ວ່າ, ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ແມ່ນ​ວຽກ​ງານ​ທີ່​ສຳຄັນ​ທີ່​ສຸດ, ຕ້ອງ​ໄດ້​ດຳ​ເນີນ​ຢ່າງ​ເປັນ​ປະຈຳ, ຕໍ່​ເນື່ອງ, ​ເດັດດ່ຽວ ໜຽວ​ແໜ້ນ; ພວກ​ເຮົາ​ບໍ່​ສາມາດ​ພໍ​ໃຈ​ໃນ​ຕົນ​ເອງ​ກ່ຽວ​ກັບ​ບັນດາ​ຜົນສຳ​ເລັດ​ທີ່​ໄດ້​ຮັບ.

ພະນັກງານ ສະມາຊິກພັກ​ທຸກ​ຄົນ, ກ່ອນ​ອື່ນ​ແມ່ນຜູ້​ເປັນ​ຫົວໜ້າ ຕ້ອງ​ເປັນ​ແບບຢ່າງ, ນຳ​ໜ້າ, ມີ​ຄວາມ​ຕື່ນ​ຕົວ ​ເປັນ​ເອກະ​ພາບ​ສູງ​ທາງ​ດ້ານ​ເຈດ​ຈຳນົງ​ແລະ​ການ​ກະທຳ​ໃນ​ການ​ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ; ບໍ່​ຢ້ານ​ເສຍ​ຊື່​ສຽງ, ບໍ່​ຢ້ານຂໍ້​ບົກພ່ອງ; ກົງ​ຂ້າມ, ຕ້ອງ​ກ້າ​ເຮັດ​ເພື່ອ​ຮັກສາ​ກຽດ​ສັກ​ສີ, ປັບປຸງ​ຄວາມ​ເຊື່ອ​ຖື​ຂອງ​ປະຊາຊົນ ​ແລະ​ຕ້ອງ​ເປີດ​ເຜີຍ​ເພື່ອ​ໃຫ້​ປະຊາຊົນ​ຮູ້, ສະໜັບສະໜູນ ​ແລະ​ຕິດຕາມ​ກວດກາ.

ຕ້ອງ​ຮູ້​ອີງ​ໃສ່​ປະຊາຊົນ, ຮັບ​ຟັງ​ປະຊາຊົນ, ສິ່ງ​ໃດ​ທີ່​ປະຊາຊົນ​ສະໜັບສະໜູນ ຊົມ​ເຊີຍ ​ແມ່ນພວກ​ເຮົາ​ຕ້ອງ​ຕັດສິນ​ໃຈ​ເຮັດ ​ແລະ​ເຮັດ​ໃຫ້​ຈົນ​ໄດ້; ກົງ​ຂ້າມ, ສິ່ງ​ໄດ​ທີ່​ປະຊາຊົນ​ບໍ່​ເຫັນ​ດີ​ເຫັນ​ພ້ອມ ຫຼືຄຽດ​ຊັງ ຄັດ​ຄ້ານ ​ແມ່ນ​ພວກ​ເຮົາ​ຕ້ອງລະ​ມັດ​ລະວັງ ກີດ​ກັ້ນ ດັດ​ແກ້​ຢ່າງ​ເດັດຂາດ ​ແລະ​ຈັດການ​ລົງ​ໂທດ​ການ​ກະທຳ​ຜິດ​ຢ່າງ​ເຂັ້ມ​ງວດ.

ຄຽງ​ຄູ່​ກັບ​ການຈັດການແກ້​ໄຂ​ລົງ​ໂທດ​ການ​ກະທຳ​ຜິດ​ຢ່າງ​ເຂັ້ມ​ງວດ, ພວກ​ເຮົາ​ກໍ່​ຕ້ອງການ​ມີ​ກົນ​ໄກ​ເພື່ອ​ປົກ​ປັກ​ຮັກສາ, ສົ່ງ​ເສີມ​ພະນັກງານ ສະມາຊິກ​ພັກ ຜູ້​ເປັນ​ຫົວໜ້າ​ທີ່ກ້າ​ຄິດ ກ້າ​ເຮັດ ກ້າ​ຮັບຜິດຊອບ, ກ້າ​ນຳ​ໜ້າ​ໃນ​ການ​ປ່ຽນ​ແປງ​ໃໝ່​ເພື່ອ​ການ​ພັດທະນາ​ຂອງ​ປະ​ເທດ​ຊາດ; ການຮັບ​ຮູ້ ປະ​ເມີນ ຕີ​ລາຄາ​ຂໍ້​ບົກພ່ອງ​ຄວາມ​ຜິດພາດ ກໍ່​ຕ້ອງ​ຕັ້ງ​ຢູ່​ໃນ​ເງື່ອນ​ໄຂ ສະພາດ​ແວດ​ລ້ອມປະຫວັດສາດ​ຕົວ​ຈິງ ​ເພື່ອ​ຈະ​ມີ​ທັດສະນະ​ແກ້​ໄຂທີ່​ສອດຄ່ອງ​ເໝາະ​ສົມ, ພາວະ​ວິ​ໄສ.

ພ້ອມ​ກັນ​ນັ້ນ, ຕ້ອງ​ຕໍ່ສູ້​ຢ່າງເດັດດ່ຽວ​ກັບ​ບັນດາ​ທັດສະນະ​ທີ່​ຜິດພາດ, ປະຕິ​ເສດຖ້ອຍ​ທຳນອງ​ກ່າວ​ຫາບິດ​ເບືອນ​ຂອງ​ບັນດາ​ອິດ​ທິກຳລັງ​ສັດຕູ ​ແລະ​ພວກ​ຜູ້​ຮ້າຍ​ ທີ່ຢາກ​ສວຍ​ໃຊ້​ການ​ຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ​ເພື່ອ​ແບ່ງ​ແຍກ​ພາຍ​ໃນ, ຕູ່​ຫາ ​ໃສ່​ຮ້າຍ​ປ້າຍ​ສີ​ພັກ, ລັດ ​ແລະລະບອບ​ຂອງ​ພວກ​ເຮົາ.

ກອງ​ປະຊຸມ​ຂອງ​ພວກ​ເຮົາ​ເປັນ​ເອກະ​ພາບ, ​ເຫັນ​ດີ​ເຫັນ​ພ້ອມ​ສູງ​ກັບ​ບັນດາ​ໜ້າ​ທີ່, ວິທີ​ແກ້​ໄຂ​ຕົ້ນຕໍ​ໃນ​ເວລາ​ທີ່​ຈະ​ມາ​ເຖິງ​ທີ່​ບົດ​ລາຍ​ງານ​ໄດ້​ລະບຸ. ຂ້າພະ​ເຈົ້າ​ຕ້ອງການ​ເນັ້ນ​ເພີ່ມ​ບາງ​ບັນຫາ​ດັ່ງ​ນີ້:

ທີ​ໜຶ່ງ, ສືບ​ຕໍ່​ຍູ້​ແຮງ, ຍົກ​ສູງ​ປະສິດທິ​ຜົນ​ຂອງ​ວຽກ​ງານ​ໂຄສະນາ ອົບຮົມ​ສຶກສາ, ສ້າງ​ຄວາມ​ຕື່ນ​ຕົວ, ​ເປັນ​ເອກະ​ພາບ​ສູງ​ທາງ​ດ້ານ​ເຈດ​ຈຳນົງ ​ແລະ​ການ​ກະທຳ​ໃນ​ພະນັກງານ ສະມາຊິກ​ພັກ ​ແລະ​ປະຊາຊົນ​ ກ່ຽວ​ກັບ​ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ.

ວຽກ​ງານ​ໂຄສະ​ນະ​ຕ້ອງ​ຢືນຢັນ​ຄວາມ​ຕັດສິນ​ໃຈ​ຂອງ​ພັກ​ແລະ​ລັດ​ກ່ຽວ​ກັບການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ; ​ເຮັດ​ໃຫ້​ທຸກ​ຄົນ​ເຫັນ​ແຈ້ງວ່າ​ ການ​ປັບປຸງ​ພັກ, ​ການຈັດການ​ແກ້​ໄຂຢ່າງ​ເຂັ້ມ​ງວດ​ຕໍ່​ພະນັກງານ​ສະມາຊິກ​ພັກ​ຫຼາຍ​ຄົນ​ທີ່​ລະ​ເມີດ​ລະບຽບ​ກົດໝາຍ​ນັ້ນ ບໍ່​ເຮັດ​ໃຫ້ການ​ພັດທະນາ "ຊ້າ​ລົງ" ​ແຕ່​ກົງກັນ​ຂ້າມ, ຍິ່ງ​ເຮັດ​ໃຫ້​ກົງ​ຈັກສະອາດ​ປອດ​ໃສ, ສ້າງ​ກຳລັງ​ແຮງ​ທີ່​ແທ້​ຈິງ​ຂອງ​ກົງຈັກ​ແລະ​ຖັນ​ແຖວ​ພະນັກງານ, ປັບປຸງ​ແລະ​ເພີ່ມ​ທະວີ​ຄວາມ​ເຊື່ອ​ຖື​ຂອງ​ປະຊາຊົນ, ສ້າງ​ກຳລັງ​ໜູນ​ໃໝ່, ບັນ​ຍາກາດ​ໃໝ່​ ເພື່ອສຳ​ເລັດ​ທຸກ​ໜ້າ​ທີ່​ວຽກ​ງານ, ສ້າງ​ຄວາມ​ເປັນ​ເອກະພາບ​ສູງ​ທາງ​ດ້ານ​ເຈ​ດຈຳນົງ​ແລະ​ການ​ກະ​ທຳ​ຂອງ​ພະນັກງານ ສະມາຊິກ​ພັກ ​ແລະ​ປະຊາຊົນ.

​ເພີ່ມ​ທະວີ​ການ​ສົມທົບ, ສະໜອງ​ຂໍ້ມູນ​ຂ່າວ​ສານ​ຢ່າງ​ທັນ​ການ, ການ​ເປີດ​ເຜີຍຂໍ້​ມູນ, ກຳນົດ​ທິດ​ການ​ໂຄສະນາ​ກ່ຽວ​ກັບກ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ​ໂດຍ​ສະ​ເພາະ​ແມ່ນ ​ເປັນ​ເຈົ້າ​ການ​ໃນ​ການ​ສະໜອງ​ຂໍ້​ມູນຂ່າວສານ​ກ່ຽວ​ກັບຜົນ​ຂອງ​ການ​ກວດກາ, ກວດສອບ, ຈັດການ​ແກ້​ໄຂ​ພະນັກງານ ສະມາ​ຊິກພັກທີ່​ລະ​ເມີດກົດໝາຍ; ກ່ຽວ​ກັບ​ການສືບສວນ, ຟ້ອງ​ຮ້ອງ, ​ດຳ​ເນີນ​ຄະດີ, ພິພາກສາ​ບັນດາ​ຄະດີ​ສໍ້​ລາດ​ບັງ​ຫຼວງ ຄະດີ​ເສດຖະກິດ; ກ່ຽວ​ກັບ​ບັນດາ​ບັນຫາ​ສຳ​ພັດ​ໄວ​ທີ່​ຫາງ​ສຽງ​ສັງຄົມ​ສົນ​ໃຈ​ໃນ​ການ​ແກ້​ໄຂ​ຈັດການ​ລົງ​ໂທດ​ຕໍ່​ການ​ສໍ້​ລາດ​ບັງ​ຫຼວງ.

​ເອົາ​ໃຈ​ໃສ່​ໂຄສະນາ​ສື່​ຂ່າວກ່ຽວ​ກັບ​ແບບຢ່າງ “ວຽກ​ດີ, ຄົນ​ເດັ່ນ”, ​ແກ້​ໄຂ​ຜ່ານ​ຜ່າ​ສະພາບ​ການລາຍ​ງານ​ຂ່າວ​ດ້ານ​ດຽວ, ລາຍ​ງານ​ຂ່າວ​ບໍ່​ຊັດ​ເຈນ ມີ​ລັກສະນະກະຕຸກ​ເສັ້ນ ຍຸ​ຍົງກໍ່​ໃຫ້​ເກີດ​ຄວາມຫວາດ​ຫວັ່ນ ຫຼືຜູກ​​ໂທ​ດ ກ່າວ​ລະດັບ​ໂທດ​ແບບ​ອັດຕະວິ​ໄສ ກ່ອນ​ການຕັດສິນຂອງ​ສານ. ປົກ​ປັກ​ຮັກສາ, ຍ້ອງຍໍ​ໃຫ້​ລາງວັນ, ປຸກລະດົມ​ກຳລັງ​ໃຈ​ຕໍ່​ນັກ​ຂ່າວ​ທີ່​ມີ​ຄວາມຕັ້ງໜ້າພະຍາຍາມ, ກ້າ​ຕໍ່ສູ້​ຕ້ານ​ການ​ສໍ້​ລາດ​ບັງ​ຫຼວງ; ຕໍ່ສູ້​ຕ້ານ​ຖ້ອຍ​ທຳນອງ​ບິດ​ເບືອນ​ຂອງ​ບັນດາ​ອິດ​ທິກຳລັງ​ສັດຕູ ທີ່​ສວຍ​ໃຊ້​ການ​ປ້ອງ​ກັນ​ຕ້ານ​ການ​ສໍ້​ລາດ​ບັງ​ຫຼວງ ​ເພື່ອຄັດຄ້ານ​ຕ້ານ​ພັກ​ແລະ​ລັດ​ເຮົາ; ຈັດການ​ແກ້​ໄຂ​ຢ່າງ​ເຂັ້ມ​ງວດ​ຕໍ່​ການ​ສົ່ງ​ຂ່າວທີ່​ບໍ່​ຖືກຕ້ອງ​ກັບ​ຄວາມ​ຈິງ, ການ​ຕູ່​ຫາ ​ໃສ່​ຮ້າຍ​ປ້າຍ​ສີ​ທີ່ກໍ່​ໃຫ້​ເກີດ​ຜົນ​ຮ້າຍ.

ຕັ້ງ​ໝັ້ນ​ໃນ​ການ​ຝຶກ​ຝົນ​ຫຼໍ່​ຫຼອມ​ຄຸນສົມບັດ​ຊື່ສັດ​ບໍລິສຸດ, ກໍ່ສ້າງ​ວັດທະນະທຳ​ປະຢັດ​ມັດທະຍັດ, ບໍ່​ສໍ້​ລາດ​ບັງ​ຫຼວງ​ໃນ​ພະນັກງານ ສະມາຊິກ​ພັກ ລັດຖະກອນ ພາລະ​ກອນ. ກ່ອນ​ອື່ນ​ໝົດ​ແມ່ນ ​ກໍ່ສ້າງ​ສະຕິ​ຕື່ນ​ຕົວ, ປະຕິບັດ​ຢ່າງ​ເຂັ້ມ​ງວດ ບັນດາ​ຂໍ້​ກຳນົດ​ຂອງ​ພັກ ​ແລະ​ກົດໝາຍ​ຂອງ​ລັດກ່ຽວ​ກັບການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ການ​ຟຸ່ມ​ເຟືອຍ; ​ເປັນ​ເຈົ້າ​ການ​ໃນ​ການ​ຈັດການ​ແກ້​ໄຂ​ເມື່ອ​ມີ​ຄວາມ​ຂັດ​ແຍ້ງ​ທາງ​ຜົນ​ປະ​ໂຫຍ​ດ; ກໍ່ສ້າງ​ແລະ​ປະຕິບັດ​ເປັນ​ຢ່າງ​ດີ​ຫຼັກການ​ປະພຶດ, ຫຼັກ​ຈັນ​ຍາ​ບັນ​ວິຊາ​ຊີບ; ຕຳ​ໜິວິພາກ, ກ່າວ​ປະນາມ, ຕໍ່ສູ້​ຕ້ານ​ການ​ສໍ້​ລາດ​ບັງ​ຫຼວງ, ການ​ຟຸມ​ເຟືອຍ; ນັບຖື​ກຽດ​ສັກ​ສີ ຊື່​ສຽງ, ຮູ້​ລະອາຍ​ໃຈ​ໃນ​ເມື່ອ​ຕົນ​ເອງ​ແລະ​ຍາດ​ພີ່ນ້ອງຂອງ​ຕົນສໍ້​ລາດ​ບັງ​ຫຼວງ, ​ໃຊ້​ຈ່າຍ​ຢ່າງຟຸມ​ເຟືອ.

ພິ​ເສດ, ໜັງສືພິມ​ແລະ​ພາຫະນະ​ສື່​ມວນ​ຊົນຕ້ອງປຸກລະດົມ​ກຳລັງ​ໃຈ, ສົ່ງ​ເສີມ​ການ​ເຂົ້າ​ຮ່ວມປະຕິບັດ​ງານ​ຢ່າງ​ຂຸ້ນຂ້ຽວ​ຂອງ​ທົ່ວ​ທັງ​ລະບົບ​ການ​ເມືອງ, ການ​ລະດົມ​ກຳລັງ​ແຮງ​ຂອງ​ທົ່ວ​ປວງ​ຊົນ​ເຂົ້າ​ໃນ​ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, “​ເຮັດ​ໃຫ້​ປະຊາຊົນ​ຄຽດຊັງ​ພະຍາດ​ສໍ້​ລລາດ​ບັງ​ຫຼວງ, ຟຸມ​ເຟືອຍ, ອາດຍາ​ສິດ; ​ເຮັດ​ໃຫ້​ຮູ​ຫູ, ດວງ​ຕາ​ແຫ່ງ​ຄວາມ​ລະມັດລະວັງ​ຂອງ​ມະຫາຊົນ​ນັບ​ແສນ ນັບ​ລ້ານ ກາຍ​ເປັນ​ໄຟ​ໜ້າ​ສ່ອງ​ແສງ​ສະຫວ່າງທົ່ວ​ທຸກ​ບ່ອນ, ບໍ່​ໃຫ້​ພະຍາດ​ສໍ້​ລາດ​ບັງ​ຫຼວງ, ຟຸມ​ເຟືອຍ, ອາດຍາ​ສິດ ​ມີ​ບ່ອນ​ລີ້​ຊ້ອນ​ອີກ”(1), ຄື​ຄຳ​ຕັກ​ເຕືອນ​ຂອງ​ລຸງ​ໂຮ່.

ທີ​ສອງ, ສຸມ​ໃສ່​ຊີ້​ນຳ​ການ​ກໍ່ສ້າງ, ປັບປຸງ​ບູລະນະ​ບັນດາ​ຂໍ້​ກຳນົດ​ຂອງ​ພັກ, ນະ​ໂຍບາຍ, ກົດໝາຍ​ຂອງ​ລັດ ກ່ຽວ​ກັບກ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ; ສູ້​ຊົນ​ຮອດ​ທ້າຍ​ສະ​ໄໝ​ປະຈຳການ​ນີ້​ ຈະສຳເລັດບາດກ້າວ​ໜຶ່ງ​ກ່ຽວ​ກັບ​ການ​ກໍ່ສ້າງ​ກົນ​ໄກການ​ປ້ອງ​ກັນ​ຢ່າງ​ແໜ້ນໜາ ​ເພື່ອ “ບໍ່​ສາມາດ​ຈະ​ສໍ້​ລາດ​ບັງ​ຫຼວງ​ໄດ້”.

ສຸມ​ໃສ່​ສຳ​ເລັດ​ການ​ກໍ່ສ້າງ​ຂໍ້​ກຳນົດ​ຂອງ​ພັກກ່ຽວ​ກັບກ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ ຕາມ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4, ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6 ​ແລະມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 7 ສະ​ໄໝ​ທີ XII, ​ເປັນ​ຕົ້ນ​ແມ່ນ: ບູລະນະ​ຂໍ້​ກຳນົດ​ກ່ຽວ​ກັບ​ຄວາມ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານ ສະມາຊິກ​ພັກ; ບັນດາ​ຂໍ້​ກຳນົດ​ກ່ຽວ​ກັບ​ການ​ຄວບ​ຄຸມ​ອຳນາດ, ຄວາມ​ຮັບຜິດຊອບຂອງ​ຫົວໜ້າ​ໃນ​ເມື່ອ​ປະຕິບັດ​ໜ້າ​ທີ່, ສິດ​ຂອບ​ເຂດ, ຄວາມ​ຮັບຜິດຊອບ​ອະທິບາຍ​ລາຍ​ງານ, ຮັບປະກັນປະຊາທິປະ​ໄຕ, ​ເປີດ​ເຜີຍ, ​ໂປ່​ງ​ໃສ; ຂໍ້​ກຳນົດ​ກ່ຽວ​ກັບການ​ສະກັດ​ກັ້ນ​ບໍ່​ໃຫ້​ຜູ້ມີ​ສິດອຳນາດ ສວຍ​ໃຊ້ຕຳ​ແໜ່​ງງານ​ຂອງ​ຕົນ ​ເພື່ອ​ເກັບ​ຜົນ​ກຳ​ໄລ; ຂໍ້​ກຳນົດ​ກ່ຽວ​ກັບ​ການ​ໃຫ້​ເລີກ​ງານ, ການປົດ​ຕຳ​ແໜ່​ງ, ການ​ລາ​ອອກ​ຈາກ​ຕຳ​ແໜ່​ງ ສຳລັບ​ພະນັກງານນຳພາ ຄຸ້ມ​ຄອງ​ບໍລິຫານ; ຂໍ້​ກຳນົດ​ກ່ຽວ​ກັບ​ການ​ຍົກຍ້າຍ, ປ່ຽນ​ແທນ​ພະນັກງານ​ເມື່ອ​ມີການ​ຕຳ​ໜິຈາກ​ຫາງ​ສຽງ​ສັງຄົມ ຫຼື​ມີ​ປະກົດ​ການ​ຫຍໍ້​ທໍ້, ທຸ​ຈະລິດ, ​ເສຍຊື່​ສຽງ; ກົນ​ໄກ​ສົ່ງ​ເສີມ​ແລະ​ປົກ​ປັກ​ຮັກສາ​ພະນັກງານ​ທີ່​ກ້າ​ຄິດ, ກ້າ​ເຮັດ, ກ້າ​ບຸກທະລຸ, ກ້າ​ຮັບຜິດຊອບ​ເພື່ອ​ຜົນ​ປະ​ໂຫຍ​ດສ່ວນລວມ...

ຂໍ​ສະ​ເໜີ​ນຳສະພາ​ແຫ່ງ​ຊາດ, ລັດຖະບານ​​ໃຫ້​ຮີບສຸມ​ໃສ່ຊີ້​ນຳ​ການ​ເກັບ​ກຳ​ຄວາມ​ຄິດ​ຄວາມ​ເຫັນ, ປັບປຸງບູລະນະ​ກົດໝາຍ​ວ່າ​ດ້ວຍ​ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ (ສະບັບ​ປັບປຸງ) ຮັບປະກັນ​ຄວາມ​ເປັນ​ໄປ​ໄດ້ ​ແລະ​ມີ​ປະສິດທິ​ຜົນ; ປະກາດ​ໃຊ້​ໂດຍ​ໄວ​ກົດໝາຍ​ວ່າ​ດ້ວຍ​ການ​ຮັກສາ​ຄວາມ​ລັບ​ຂອງ​ລັດ; ປັບປຸງເພີ່ມ​ເຕີມກົດໝາຍ​ວ່າ​ດ້ວຍການ​ທົບ​ທວນ​ຕຸລາການ, ກົດໝາຍການກວດ​ສອບ, ກົດໝາຍ​ພະນັກງານ ລັດຖະກອນ, ກົດໝາຍພາລະ​ກອນ ​ແລະ​ບັນດາ​ເອກະສານ​ກຳນົດ​ການ​ປະຕິບັດ​ຢ່າງ​ລະອຽດ ​ເພື່ອ​ແກ້​ໄຂ​ຜ່ານ​ຜ່າ​ຂໍ້​ຈຳກັດ, ສິ່ງ​ຄ້າງ​ຄາ​ໃນກ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ.

ຍູ້​​ໄວການ​ກໍ່ສ້າງ, ບູລະນະ​ກົນ​ໄກ, ນະ​ໂຍບາຍ, ກົດໝາຍ, ​ແກ້​ໄຂ​ຜ່ານ​ຜ່າຊ່ອງ​ຫວ່າງ, ຂໍ້​ຜິດພາດ​ໃນ​ການ​ຄຸ້ມ​ຄອງ​ເສດຖະກິດ-ສັງຄົມ ​ແລະກ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ​ເປັນ​ຕົ້ນ​ແມ່ນ​ໃນ​ບັນດາ​ຂົງ​ເຂດ​ທີ່​ອາດຈະ​ເກີດ​ການ​ທຸ​ຈະລິດ, ສໍ້​ລາດ​ບັງ​ຫຼວງ​ໂດຍ​ງ່າຍ.

ທີ​ສາມ, ​ເພີ່ມ​ທະວີ​ການ​ກວດກາ ຕິດຕາມ​ກວດກາ, ການປະຕິບັດລະບຽບ​ວິ​ໄນ​ຂອງ​ພັກ, ຮັດ​ແໜ້ນ​ລະບຽບ ກົດໝາຍ; ກໍ່ສ້າງ​ຖັນ​ແຖວ​ພະນັກງານທີ່​ມີ​ຄຸນສົມບັດ​ສິນ​ທຳ, ມີຄວາມ​ສາມາດ ​ແລະ​ກຽດ​ສັກ​ສີ​ຢ່າງ​ພຽງພໍ, ທຽບ​ເທົ່າ​ກັບ​ລະດັບ​ໜ້າ​ທີ່​ໃນ​ສະພາບ​ການ​ໃໝ່.

ສືບ​ຕໍ່​ເຮັດ​ເປັນ​ຢ່າງ​ດີ​ວຽກ​ງານ​ກໍ່ສ້າງ​ພັກ ​ແລະ​ລະບົບ​ການ​ເມືອງ, ກີດ​ກັ້ນ​ແລະ​ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ, ພ້ອມ​ທັງ​ບັນດາ​ປະກົດ​ການ “ປ່ຽນ​ແປງ​ດ້ວຍ​ຕົນ​ເອງ”, “ຫັນ​ປ່ຽນ​ດ້ວຍ​ຕົນ​ເອງ”; ຕໍ່ສູ້​ຢ່າງ​ແຂງ​ແຮງ​ຕ້ານ​ລັດທິ​ອັດ​ຕະບຸກຄົນ, ຄວາມ​ອິດສາ​ເຫັນ​ແກ່​ຜົນ​ປະ​ໂຫຍ​ດສ່ວນ​ຕົວ, “ຜົນ​ປະ​ໂຫຍ​ດໝູ່​ພວກ”.

ຮັດ​ແໜ້ນລະບຽບ​ວິ​ໄນ​ຢູ່​ໃນ​ພັກ ​ແລະ​ໃນກົງຈັກ​ຂອງ​ລັດ; ສຳລັບ​ຜູ້​ກະທຳ​ຜິດ​ຕ້ອງມີ​ຮູບ​ການ​ແກ້​ໄຂ​ລົງ​ໂທດ​ຢ່າງ​ທັນ​ການ, ​ເຂັ້ມ​ງວດ, ​ເປີດ​ເຜີຍ.

ບັນດາ​ຄະນະ​ພັກ, ອົງການ​ຈັດ​ຕັ້ງ​ຂອງ​ພັກ​ຕ້ອງ​ເພີ່ມ​ທະວີ​ການ​ຄຸ້ມ​ຄອງ, ຕິດຕາມ​ກວດກາ​ພະນັກ​ງານ ສະມາຊິກ​ພັກ ​ເພື່ອ​ຄົ້ນ​ເຜີຍ​ຢ່າງ​ທັນ​ການ, ​ແກ້​ໄຂ​ໂດຍ​ໄວ, ກີດ​ກັ້ນ​ຕັ້ງ​ແຕ່​ຕົ້ນ​ຕໍ່​ການລະ​ເມີດ​ກົດ​ວິ​ໄນ; ດຳ​ເນີນ​ວຽກງານກວດກາ ຕິດຕາມ​ກວດກາ​ຢ່າງ​ແຂງ​ແຮງ​ກວ່າ​ອີກ, ຂຸ້ນຂ້ຽວ​ກວ່າ​ອີກ​ ເພື່ອຄົ້ນ​ເຜີຍ, ​ກີດ​ກັ້ນ, ຈັດການ​ແກ້​ໄຂ​ຢ່າງ​ທັນ​ການ​ຕໍ່​ການ​ກະທຳ​ທຸ​ຈະລິດ, ສໍ້​ລາດ​ບັງ​ຫຼວງ.

ຈຸດປະສົງ​ຂອງ​ການ​ປະຕິບັດ​ວິ​ໄນ​ແມ່ນ​ເພື່​ອ “ປົວ​ພະຍາດ ກູ້​ຄົນ”, ​ເພື່ອ​ບອກສອນ​ຕັກ​ເຕືອນ ຂົ່ມຂູ່​ໃຫ້​ຢ້ານ, ດັ່ງ​ນັ້ນ​ຕ້ອງ​ຊາບ​ຊຶມ​ທິດ​ນຳ ປ້ອງ​ກັນ​ຢ່າງ​ເຂັ້ມ​ງວດ, ກີດ​ກັ້ນ​ແຕ່​ຕົ້ນ, ຄົ້ນ​ເຜີຍ​ໄວ, ຈັດການ​ແກ້​ໄຂ​ແຕ່​ຕົ້ນ, ບໍ່​ປະ​ໃຫ້ການ​ກະທຳ​ຜິດ​ເລັກໆ​ນ້ອຍໆ​ສະ​ສົມ​​ເຂົ້າເປັນຄວາມ​ຜິດ​ໃຫຍ່. ​ເພີ່ມ​ທະວີ​ການ​ຕິດຕາມ​ກວດກາ​ຂອງ​ອົງການ​ຈັດ​ຕັ້ງ​ພັກ​ແຕ່​ເທິງ​ລົງ, ການ​ຕິດຕາມ​ກວດກາ​ແຕ່​ລຸ່ມ​ຂຶ້ນ, ​ເພີ່ມ​ທະວີ​ການ​ຕິດຕາມ​ກວດກາ​ຊຶ່ງ​ກັນ​ແລະ​ກັນ​ໃນ​ຂັ້ນ​ດຽວ​ກັນ, ​ເພີ່ມ​ທະວີ​ການ​ຄຸ້ມ​ຄອງ, ຕິດຕາມ​ກວດກາ​ປະຈຳ​ວັນ​ຕໍ່​ສະມາຊິກ​ພັກ​ແລະ​ພະນັກງານ​ນຳພາ.

ປະຕິບັດ​ວິ​ໄນ​ຂອງ​ພັກ​ຢ່າງ​ເຂັ້ມ​ງວດ, ພ້ອມ​ກັນ​ນັ້ນ ວິ​ໄນ​ຂອງ​ພັກ​ບໍ່​ປ່ຽນ​ແທນ​ໃຫ້​ວິ​ໄນ​ການ​ບໍລິຫານ, ວິ​ໄນ​ຂອງ​ອົງຄະ​ນະມະ​ຫາ​ຊົນ ​ແລະ​ບັນດາ​ຮູບ​ການ​ຈັດການ​ແກ້​ໄຂ​ຂອງ​ກົດໝາຍ; ສະມາຊິກ​ພັກລະ​ເມີດ​ກົດໝາຍ​ເຖິງ​ຂັ້ນ​ຕ້ອງກວດ​ສອບ​ຄວາມ​ຮັບຜິດ​ທາງ​ອາຍາ ​ແມ່ນ​ຕ້ອງ​ກວດ​ສອບ​ຄວາມ​ຮັບຜິດ​ທາງ​ອາຍາ. ສະມາຊິກ​ພັກ​ໃນ​ຕຳ​ແໜ່​ງງານ​ໃດໆ​ທີ່ລະ​ເມີດ​ກໍ່​ລ້ວນ​ແຕ່​ຕ້ອງປະຕິບັດ​ວິ​ໄນ​ຢ່າງ​ເຄັ່ງ​ຄັດ, ປະຕິບັດ​ຢ່າງ​ເຄັ່ງ​ຄັດ​ແຕ່​ເທິງ​ລົງລຸ່ມ; ບ່ອນ​ໃດ​ກວດກາ​ດ້ວຍ​ຕົນ​ເອງ​ບໍ່​ເຫັນ​ມີ​ຄວາມ​ຜິດ, ຫຼື​ຄົ້ນ​ເຜີຍ​ແລ້ວ​ແຕ່​ຈັດການ​ແກ້​ໄຂ​ແບບ​ຜ່ອນ​ເບົາ ​ແມ່ນຄະນະ​ພັກ, ຫົວໜ້າ​ສຳນັກງານ​ອົງການ ກົມ​ກອງ ທ້ອງ​ຖິ່ນ​ນັ້ນ ຕ້ອງ​ຮັບຜິດຊອບ ​ແລະ​ຖືກ​ປະຕິບັດ​ວິ​ໄນດ້ວຍ​ຮູບ​ການທີ່ເໝາະ​ສົມ, ບໍ່ “ຖອດ​ຖອນ​ບົດຮຽນ” ​ແບບ​ລວມໆ.

ມອບ​ໃຫ້ຄະນະ​ກຳມະການ​ກວດກາ​ສູນ​ກາງ​ພັກ ອາດ​ຈະ​ຊີ້​ນຳ, ກວດກາ, ຕິດຕາມ​ກວດກາ, ປະຕິບັດ​ວິ​ໄນພັກ ລົງ​ເຖິງ​ອົງຄະ​ນະ​ພັກ​ເມືອງ​ແລະ​ຮາກ​ຖານ​ເມື່ອ​ມີ​ຄວາມ​ຈຳ​ເປັນ, ​​ເພື່ອ​ຫຼີກ​ລ່ຽງສະພາບ​ການປິດ​ບັງ​ຄວາມ​ຜິດພາດພາຍ​ໃນ​ຂອງ​ທ້ອງ​ຖິ່ນ, ສຳນັກງານ​ອົງການ, ກົມ​ກອງ.

ຕ້ອງ​ສຸມ​ໃສ່​ແກ້​ໄຂ​ຜ່ານ​ຜ່າ​ໃຫ້​ຈົນ​ໄດ້ ຈຸດ​ອ່ອນ​ຕ່າງໆ​ໃນ​ວຽກ​ງານ​ພະນັກງານ, ຄວາມ​ຜິດພາດ​ຂອງ​ພະນັກງານ​ພາ​ໃຫ້​ຫາງ​ສຽງສັງຄົມມີ​ຄວາມ​ຮ້ອນ​ເຄືອ​ງ. ກວດກາ​ວຽກ​ງານ​ພະນັກງານ​ຢ່າງຮອບດ້ານ; ​ເອົາ​ໃຈ​ໃສ່​ກວດກາ, ຕິດຕາມ​ກວດກາ​ພະນັກງານທີ່​ມີ​ປະກົດ​ການ​ສໍ້​ລາດ​ບັງ​ຫຼວງ; ປະຊາຊົນ​ມີ​ຄວາມ​ຄິດ​ເຫັນ​ຫຼາຍ​ປະການ​ທີ່ສ່ອງ​ແສງ ກ່າວ​ປະນາມ​ການ​ສໍ້​ລາດ​ບັງ​ຫຼວງ; ພະນັກ​ງານ​ນຳພາ ຄຸ້ມ​ຄອງ​ຂັ້ນ​ຕ່າງໆ ​ແລະ​ພະນັກງານທີ່ຖືກ​ວາງ​ແຜນກຳນົດ​ເຂົ້າ​ໃນ​ຕຳ​ແໜ່​ງຜູ້ນຳ​ພາ, ຄຸ້ມ​ຄອງ.

ຄະນະ​ພັກ, ການຈັດ​ຕັ້ງ​ພັກ, ກະຊວງ, ຂະ​ແໜງ​ການ, ອຳນາດ​ການ​ປົກຄອງຂັ້ນ​ຕ່າງໆ ​ແລະ ພະນັກງານ ສະມາຊິກ​ພັກ​ຕ້ອງ​ຮູ້​ເຫັນ​ແຈ້ງ, ຕໍ່ສູ້​ຢ່າງ​ເດັດດ່ຽວ ມີ​ປະສິດທິ​ຜົນ ​ກັບ​ການ​ກະທຳຜິດ, ຜົນ​ປະ​ໂຫຍ​ດໝູ່​ພວກ, ປະ​ໂຫຍ​ດສ່ວນ​ຕົວ, ກັບ​ບັນດາ​ເປົ້າ​ໝາຍ​ທີ່​ມີ​ປະກົດ​ການ ການ​ກະທຳ “ວິ້ງ​ເຕັ້ນຫາ​ຍົດ​ຕຳ​ແໜ່​ງ”, “ວິ້ງ​ເຕັ້ນ​ຫາ​ສິດ​ອຳນາດ”; ປົກ​ປ້ອງການ​ກະທຳ​ຖືກຕ້ອງ, ຊີ້​ແຈ້ງ​ຄວາມ​ຜິດ, ບອກ​ເຕືອນ​ກັ້ນ​ຫ້າມ​ການ​ກະທຳທີ່​ຍັງ​ບໍ່​ທັນ​ຖືກຕ້ອງ, ຄົ້ນ​ເຜີຍ​ແລະ​ຈັດການ​ຢ່າງ​ທັນ​ການ​ຕໍ່​ການ​ລ່ວງອຳນາດ, ສວຍ​ໃຊ້​ອຳນາດ​ເພື່ອ​ປະຕິບັດການ​ກະທຳ​ຜິດ​ໃນ​ວຽກ​ງານ​ພະນັກງານ ຫຼືຊ່ວຍ​ເຫຼືອ​ໃຫ້ການ “ວິ້ງ​ເຕັ້ນ​ຫາ​ຍົດ​ຕຳ​ແໜ່​ງ”, “ວິ້ງ​ເຕັ້າຫາ​ສິດ​ອຳນາດ”; ​ເດັດດ່ຽວ​ຍົກ​ເລີກ, ຖອນ​ບັນດາ​ມະຕິ​ຕົກລົງ​ທີ່​ບໍ່​ຖືກຕ້ອງ​ກ່ຽວ​ກັບ​ວຽກ​ງານ​ພະນັກງານ, ພ້ອມ​ກັນ​ນັ້ນ​ກໍ່ຈັດການ​ລົງ​ໂທດ​ຢ່າງ​ເຂັ້ມ​ງວດ​ຕໍ່​ອົງການ​ຈັດ​ຕັ້ງ, ບຸກຄົນທີ່​ກະທຳ​ຜິດ, ມີ​ການສໍ້​ລາດ​ບັງ​ຫຼວງ​ໃນ​ວຽກ​ງານ​ພະນັກງານ; ປະຕິບັດ​ແຜນ​ນະ​ໂຍບາຍສັບ​ຊ້ອນ​ພະນັກງານ​ທີ່​ບໍ່​ແມ່ນ​ຄົນ​ທ້ອງ​ຖິ່ນ ໃຫ້​ດຳລົງ​ຕຳ​ແໜ່ງການ​ນຳ​ບາງ​ສ່ວນ​ໃນ​ຂັ້ນ​ແຂວງ, ຂັ້ນ​ເມືອງ.

​ເດັດດ່ຽວ​ປະຕິບັດ​ຢ່າງ​ມີ​ປະສິດທິ​ຜົນ​ການຈັດ​ວາງ​ສັບ​ຊ້ອນ​ກົງຈັກ​ຄືນ​ໃໝ່, ຫຼຸດຜ່ອນ​ຈຳນວນ​ບັນຈຸ​ບຸກຄະລາ​ກອນ​ໃຫ້​ກະທັດ​ລັດ, ຕິດ​ກັບ​ການ​ປະຕິ​ຮູບ​ລະບອບ​ການ​ງານ, ຈັດ​ວາງ​ຄືນ​ໃໝ່​ຖັນ​ແຖວ​ພະນັກງານ ລັດຖະກອນ ພາລະ​ກອນ ​ແລະ ປ່ຽນ​ແປງ​ໃໝ່​ນະ​ໂຍບາຍ​ເງິນ​ເດືອນ; ກໍ່ສ້າງຖັນ​ແຖວ​ພະນັກງານ​ທຸກ​ຂັ້ນ, ​ເປັນ​ຕົ້ນ​ແມ່ນ​ພະນັກງານຂັ້ນຍຸດ​ທະ​ສາດ ​ໃຫ້​ມີ​ຄຸນສົມບັດ ຄວາມ​ສາມາດ ​ແລະ​ກຽດ​ສັກ​ສີ​ຢ່າງ​ພຽງພໍ, ທຽບ​ເທົ່າ​ກັບ​ລະດັບ​ໜ້າ​ທີ່ ຕາມ​ຈິດ​ໃຈ​ມະຕິ​ຂອງ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6 ​ແລະກອງ​ປະຊຸມ​ສູນ​ກາງ​ພັກ​ຄັ້ງ​ທີ 7 ສະ​ໄໝ​ທີ XII.

ທີ​ສີ່, ​ເພີ່ມ​ທະວີ, ຍົກ​ສູງ​ປະສິດທິ​ຜົນ​ຂອງ​ວຽກງານຕິດຕາມ​ກວດກາ, ຄວບ​ຄຸມ​ອຳນາດ​ເພື່ອກ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ.

ອຳ​ນາດ​ເຄີຍ​ມີ​ຄວາມ​ສ່ຽງ​ຖືກ “​ເສື່ອ​ມ​​ໂຊມ​ປ່ຽນ​ທາດ”, ການ​ສໍ້​ລາດ​ບັງ​ຫຼວງ​ແມ່ນ “​ຂໍ້​ບົກພ່ອງ​ທີ່​ມີ​ມາ​ແຕ່​ເດີມ” ຂອງ​ອຳນາດ, ດັ່ງ​ນັ້ນ​ຕ້ອງສ້າງ​ໃຫ້​ຈົນ​ໄດ້​ ກົນ​ໄກ​ຄວບ​ຄຸມ​ການ​ປະຕິບັດ​ອຳນາດຂອງ​ຜູ້​ມີ​​ຕຳ​ແໜ່​ງ, ມີ​ສິດອຳນາດ ຕາມ​ຫຼັກການ​ ທຸກ​ອຳນາດລ້ວນ​ແຕ່​ຕ້ອງ​ໄດ້​ຄວບ​ຄຸມ​ຢ່າງ​ແໜ້ນ​ແຟ້ນດ້ວຍ​ກົນ​ໄກ; ສິດ​ອຳນາດ​ຕ້ອງ​​ໄດ້​ຜູກ​ມັດກັບ​ຄວາມ​ຮັບຜິດຊອບ, ສິດ​ອຳນາດ​ຮອດ​ລະດັບ​ໃດ​ແມ່ນ​ຄວາມ​ຮັບຜິດຊອບ​ຮອດ​ລະດັບ​ນັ້ນ, ສິດ​ອຳນາດ​ຍິ່ງ​ສູງ, ຄວາມ​ຮັບຜິດຊອບ​ຍິ່ງ​ສູງ.

ດັ່ງ​ນັ້ນ, ຕ້ອງ​ເພີ່ມ​ທະວີ​ການ​ກວດກາ, ຕິດຕາມ​ກວດກາ, ກວດ​ສອບ ​ເພື່ອ​ຮັບປະກັນ​ໃຫ້​ອຳນາດ​ໄດ້​ປະຕິບັດ​ຢ່າງ​ເປີດ​ເຜີຍ, ​ໂປ່​ງ​ໃສ, ຖືກຕ້ອງ, ບໍ່​ຖືກ “​ເສື່ອ​ມ​ໂຊມ​ປ່ຽນ​ທາດ”; ​ການແບ່ງ​ງານ, ​ແບ່ງ​ຂັ້ນຕິດ​ກັບ​ການ​ມອບ​ສິດອຳນາດ, ຜູກ​ມັດ​ຄວາມ​ຮັບຜິດຊອບ, ພ້ອມ​ກັນ​ນັ້ນ​ກໍ່​ປະຕິບັດ​ຢ່າງ​ເຂັ້ມ​ງວດ​ການ​ຈັດການ​ແກ້​ໄຂ, ຍົກຍ້າຍ, ປົດ​ຕຳ​ແໜ່​ງ, ປ່ຽນ​ແທນ​ພະນັກງານ​ທີ່​ມີ​ປະກົດ​ການ​ສໍ້​ລາດ​ບັງ​ຫຼວງຖືກ​ຫາງ​ສຽງ​ສັງຄົມ​ກ່າວ​ປະນາມ; ຈັດ​ການ​ແກ້​ໄຂ​ຢ່າງ​ເຂັ້ມ​ງວດຕໍ່​ຄວາມ​ຮັບຜິດຊອບ​ຂອງ​ຫົວໜ້າ ຜູ້​ທີ່​ປະ​ໃຫ້​ເກີດ​ການ​ສໍ້​ລາດ​ບັງ​ຫຼວງຢູ່​ໃນ​ສຳນັກງານ ອົງການ ກົມ​ກອງທີ່​ຕົນ​ເປັນ​ຜູ້​ຄຸ້ມ​ຄອງ ຮັບຜິດຊອບ; ​ແລະ​ສິ່ງ​ທີ່​ສຳຄັນ​ກວ່າ​ນັ້ນ​ແມ່ນ ຕ້ອງກີດ​ກັ້ນ​ແຕ່​ຕົ້ນ​ຄວາມ​ຜິດພາດ, ຂໍ້​ບົກພ່ອງ ຢ່າງ​ພື້ນຖານ, ​ເປັນ​ແບບ​ສະບັບ ດ້ວຍ​ບັນດາ​ຂໍ້​ກຳນົດ​ຂອງ​ພັກ, ກົດໝາຍ​ຂອງ​ລັດ, ​ເວົ້າ​ໃນ​ແບບ​ຮູບ​ພາບ​ແມ່ນ​ຕ້ອງ “ຂັງ​ອຳນາດ​ເຂົ້າໃນ​ກົງ​ກົນ​ໄກ”.

ຕ້ອງ​ເພີ່ມ​ທະວີ​ການ​ຕິດຕາມ​ກວດກາຕໍ່​ການ​ນຳ​ໃຊ້​ອຳນາດ​ຂອງ​ພະນັກງານ​ນຳພາ, ​ເປັນ​ຕົ້ນ​ແມ່ນ​ຂອງ​ຜູ້​ເປັນ​ຫົວໜ້າ, ​ເພີ່ມ​ທະວີ​ການ​ຕິດຕາມ​ກວດກາ​ຢູ່​ພາຍ​ໃນໝູ່​ຄະນະ​ນຳພາ; ​ເປີດ​ເຜີຍ​ຂັ້ນ​ຕອນ​ນຳ​ໃຊ້​ອຳນາດ​ຕາມ​ກົດໝາຍ​ເພື່ອ​ໃຫ້ພະນັກງານ, ປະຊາຊົນ​ຕິດຕາມ​ກວດກາ.

ພະນັກງານ​ນຳພາ​ຂັ້ນ​ຕ່າງໆ​ຕ້ອງ​ຈົດ​ຈຳ​ວ່າ, ຜູ້​ໃດ​ກໍ່ຕາມ​ກໍ່​ບໍ່​ມີ​ອຳນາດ​ເດັດ​ຂາດ​ນອກ​ເໜືອຈາກ​ກົດໝາຍ, ຜູ້​ໃດ​ນຳ​ໃຊ້​ອຳນາດ​ກໍ່​ຕ້ອງ​ຮັບ​ໃຊ້​ປະຊາຊົນ, ຮັບຜິດຊອບ​ຕໍ່​ປະຊາຊົນ ​ແລະ​ຍອມຮັບ​ການ​ຕິດຕາມ​ກວດກາ​ຂອງ​ປະຊາຊົນ.

ກອງ​ທຶນ​ສາທາລະນະ​ແມ່ນ​ຂອງ​ສ່ວນ​ລວມ ດັ່ງ​ນັ້ນ​ເງິນ​ໜຶ່ງ​ອັດ ໜຶ່ງ​ດົ່ງ​ກໍ່​ບໍ່​ໄດ້​ໃຊ້​ຈ່າຍ​ຊະຊາຍ; ສິດທິ​ສາທາລະນະ​ແມ່ນ​ເພື່ອ​ປະຊາຊົນ ດັ່ງ​ນັ້ນ​ບໍ່​ໄດ້​ໃຊ້​ເພື່ອ​ສ່ວນ​ຕົວຢ່າງ​ເດັດຂາດ; ຕ້ອງ​ເຫັນ​ແກ່​ສ່ວນ​ລວມບໍ່​ເຫັນ​ແກ່​ສ່ວນຕົວ, ຈຳ​ແນ​ກສ່ວນ​ລວມສ່ວນ​ຕົວຢ່າງ​ຈະ​ແຈ້ງ, ສ່ວນ​ລວມກ່ອນ ສ່ວນ​ຕົວ​ຕາມ​ຫຼັງ, ​ເພື່ອ​ສ່ວນ​ລວມ​ໃຫ້​ລືມ​ສ່ວນ​ຕົວ; ທຸກ​ສິ່ງ​ທຸກ​ຢ່າງ​ລ້ວນ​ແຕ່​ເລີ່​ມຈາກ​ປະຊາຊົນ, ​ເພື່ອ​ປະຊາຊົນ.

ທີ​ຫ້າ, ຍົກ​ສູງ​ປະສິດທິ​ຜົນ​ວຽກ​ງານ​ຄົ້ນ​ເຜີຍ, ຈັດການ​ແກ້​ໄຂ​ກໍລະນີ, ຄະດີ​ສໍ້​ລາດ​ບັງ​ຫຼວງ, ​ໂດຍ​ສະ​ເພາະ​ໃນ​ທ້ອງ​ຖິ່ນ ພື້ນຖານ; ຈັດການ​ແກ້​ໄຂ, ກີດ​ກັ້ນ “ການ​ສໍ້​ລາດ​ບັງ​ຫຼວງ​ມະ​ຍິກ​ມະ​ຍ່ອຍ”; ຍົກ​ສູງ​ປະສິດທິ​ຜົນການ​ເກັບ​ຄືນ​ຊັບ​ສິນ​ທີ່​ຖືກ​ສໍ້​ລາດ​ບັງ​ຫຼວງ.

ຕ້ອງ​ສຸມ​ໃສ່ຊີ້​ນຳ​ນຳພາ, ສ້າງ​ການ​ຫັນປ່ຽນ​ຢ່າງ​ແຂງ​ແຮງ, ຈະ​ແຈ້ງ​ກວ່າ​ອີກ​ໃນ​ການ​ຄົ້ນ​ເຜີຍ, ຈັດການ​ແກ້​ໄຂ​ການ​ສໍ້​ລາດ​ບັງ​ຫຼວງຢູ່​ທ້ອງ​ຖິ່ນ ພື້ນຖານ, ​ແກ້​ໄຂ​ຜ່ານ​ຜ່າ​ສະພາບ​ການ “ຂັ້ນ​ເທິງ​ຮ້ອນ, ຂັ້ນ​ລຸ່ມ​ເຢັນ”.

ສຸມ​ໃສ່​ຊີ້​ນຳ​ນຳພາ​ການ​ກວດກາ, ຕິກ​ຕາມ​ກວດກາ, ກວດ​ສອບຢູ່​ບ່ອນ​ທີ່​ມີ​ບັນຫາ​ສັບສົນ, ປະຊາຊົນ​ສົນ​ໃຈ, ​ໃນບັນດາ​ຂົງ​ເຂດ​ມັກ​ຈະ​ເກີດ​ການ​ທຸ​ຈະລິດ, ສໍ້​ລາດ​ບັງ​ຫຼວງ; ຈັດການ​ແກ້​ໄຂ, ກີດ​ກັ້ນສະພາບ​ການ “ເຈາະ​ຈິ້ມ”, “​ເງິນ​ຮອງ​ມື”, ກໍ່​ຄວາມ​ຫຍຸ້ງ​ເຫ​ຍີ​ງລຳ​ຄານ​ໃຈ ​ໃຫ້​ປະຊາຊົນ​ແລະ​ວິ​ສາ​ຫະກິດ​ໃນ​ການ​ແກ້​ໄຂ​ວຽກ​ງານ.

​ເລ່ງ​ຂະ​ບວນການກວດ​ສອບ, ສືບສວນ, ຈັດການ​ແກ້​ໄຂ​ກໍ​ລະ​ນີ ຄະດີ​ສໍ້​ລາດ​ບັງ​ຫຼວງ ຄະດີເສດຖະກິດ, ​ໂດຍ​ສະ​ເພາະ​ກໍລະນີ ຄະດີ​ທີ່​ຮ້າຍ​ແຮງ, ສັບສົນ, ທີ່​ປະຊາຊົນ​ສົນ​ໃຈ​ເປັນ​ພິ​ເສດ; ຈັດການ​ແກ້​ໄຂ​ຢ່າງ​ເຄັ່ງ​ຄັດ, ທັນ​ການ, ຖືກຕ້ອງ​ກັບ​ຂໍ້​ກຳນົດ​ຂອງ​ພັກ ​ແລະ​ກົດໝາຍ​ຂອງ​ລັດ, ບໍ່​ມີ​ເຂດ​ຫວງ​ຫ້າມ, ບໍ່​ມີ​ສິດ​ພິ​ເສດ, ບໍ່​ມີ​ຂໍ້​ຍົກ​ເວັ້ນ.

​ເພີ່ມ​ເຕີມ, ບູລະນະ​ຂໍ້​ກຳນົດ​ກ່ຽວ​ກັບ​ການ​ຈັດການ​ແກ້​ໄຂ​ຄວາມ​ຮັບຜິດຊອບຂອງ​ອົງການ​ຈັດ​ຕັ້ງ, ບຸກຄົນ​ທີ່​ປະຕິບັດ​ໜ້າ​ທີ່​ກວດກາ, ກວດກາ​ນ, ກວດສອບ ​ແຕ່​ບໍ່​ຄົ້ນ​ພົບ​ຄວາມ​ຜິດ, ຫຼັງ​ຈາກ​ນັ້ນ ຄວາມ​ຜິດ​ນີ້​ຖືກ​ຄົ້ນ​ພົບ​ໂດຍ​ຄະນະ​ກວດກາ, ກວດ​ສອບ​ອື່ນ. ມີ​ບັນດາ​ວິທີ​ແກ້​ໄຂ​ທີ່​ເໝາະ​ສົມ, ສະດວກ​ດີ, ປອດ​ໄພ​ເພື່ອ​ສົ່ງ​ເສີມ​ແລະ​ຈັດການ​ແກ້​ໄຂຢ່າງ​ທັນ​ການ​ຕໍ່ຂໍ້​ມູນ​ທີ່​ປະຊາຊົນ​ຄົ້ນ​ເຜີຍ, ສ່ອງ​ແສງ, ກ່າວຫາ.

ຕັ້ງໜ້າ​ກວດ​ສອບ​ຢືນຢັນ, ນຳ​ໃຊ້​ຢ່າງ​ທັນ​ການ​ບັນດາ​ມາດ​ຕະການ​ກວດ​ໄລ່​ຊັບ​ສິນ, ປິດ​ລ້ອມ​ບັນຊີ, ​ເກັບ​ຄືນ​ຊັບ​ສິນ​ທີ່​ຖືກ​ສໍ້​ລາດ​ບັງ​ຫຼວງ​ໃນ​ຂະ​ບວນວິວັດ​ການກວດກາ, ກວດ​ສອບ, ສືບສວນ, ຟ້ອງ​ຮ້ອງ, ພິພາກສາ​ຕັດສິນ ​ແລະ ປະຕິບັດ​ຄະດີ; ສົ່ງ​ເສີມ​ໃຫ້​ຜູ້​ກະທຳ​ຜິດ​ຊົດ​ເຊີຍ​ໂດຍ​ສະໝັກ​ໃຈ ​ເພື່ອ​ແກ້​ໄຂ​ຜົນ​ກະທົບ​​ໃນຄະດີຂອງ​ການ​ສໍ້​ລາດ​ບັງ​ຫຼວງ​ແລະ​ທຸ​ຈະລິດ​ທາງ​ເສດຖະກິດ.

ທີ​ຫົກ, ສືບ​ຕໍ່​ປັບປຸງ​ບູລະນະ​ການ​ຈັດ​ຕັ້ງ​ກົງຈັກ ພະນັກງານ, ຍົກ​ສູງ​ສະມັດ​ຕະພາບ ປະສິດທິ​ຜົນ​ການ​ເຄື່ອນ​ໄຫວ​ຂອງ​ບັນດາ​ອົງການ, ໜ່ວຍ​ງານ​ທີ່​ມີ​ພາລະ​ບົດບາດ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ.

ສືບ​ຕໍ່​ປັບປຸງ​ບູລະນະ, ​ເສີມ​ຂະຫຍາຍ​ຍິ່ງ​ກວ່າ​ອີກ​ບົດບາດ​ຂອງ​ບັນດາ​ອົງການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ຊ່ວຍ​ວຽກ​ໃຫ້​ຄະນະ​ພັກ​ແຕ່​ສູນ​ກາງ​ລົງ​ຮອດ​ຮາກ​ຖານ. ບັນດາ​ອົງການ​ການ​ເມືອງ​ພາຍ​ໃນ, ອົງການກວດກາ, ກວດ​ສອບ, ສືບສວນສອບ​ສວນ, ພິພາກສາ​ ຕ້ອງ​​ເປັນ “ຄົມດາບ” ທີ່​ແຫຼມ​ຄົມ, ມີ​ຄວາມ​ກ້າຫານ​ທີ່​ຈະ​ຕໍ່ສູ້​ກີດ​ກັ້ນ​ການ​ກະທຳ​ຜິດ, ຕ້ານຜົນ​ປະ​ໂຫຍ​ດໝູ່​ພວກ, ຕ້ານ​ການວິ້​ງ​ເຕັ້ນຫາ​ຜົນ​ປະ​ໂຫຍດສ່ວນຕົວ; ມີ​ວິຊາ​ສະ​ເພາະ, ມີ​ຄວາມ​ກ້າຫານ​ປົກ​ປ້ອງສິ່ງ​ຖືກຕ້ອງ, ຊີ້​ແຈ້ງສິ່ງ​ທີ່​ຜິດພາດ, ບອກ​ເຕືອນ​ກັ້ນ​ຫ້າມການ​ກະທຳ​ທີ່​ຍັງ​ບໍ່​ຖືກຕ້ອງ; ມີ​ຂໍ້​ກຳນົດ​ເພື່ອ​ກີດ​ກັ້ນ​ຢ່າງ​ມີ​ປະສິດທິ​ຜົນ​ຕໍ່​ການ​ກະທົບ​ທີ່​ບໍ່​ຖືກຕ້ອງ​ຕາມ​ການ​ກຳນົດ​ຂອງ​ພັກ ​ແລະ​ກົດໝາຍ​ຂອງ​ລັດ ທີ່​ກະທົບ​ໃສ່​ການ​ເຄື່ອນ​ໄຫວ​ຂອງ​ບັນດາ​ອົງການ​ເຫຼົ່າ​ນີ້.

ສິ່ງ​ສຳຄັນ​ພິ​ເສດທີ່​ມີ​ຄວາມ​ໝາຍ​ຕັດສິນ​ຄື, ບັນດາ​ຜູ້​ທີ່ເຮັດວຽກງ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ເວົ້າ​ລວມ, ບັນດາ​ຜູ້​ທີ່​ເຮັດ​ວຽກ​ງານ​ໂດຍ​ກົງ​ໃນ​​ອົງການ​ພາລະ​ບົດບາດ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ເວົ້າ​ສະ​ເພາະ ຕ້ອງ​ຊື່ສັດສຸ​ຈະລິດ ບໍລິສຸດທ່ຽງ​ທຳ, ​ເປັນ​ແບບຢ່າງຮັກສາ​ຕົວ​ເອງ, ນັບຖື​ກຽດ​ສັກ​ສີ, ບໍ່​ຍອມ​ຢູ່​ພາຍ​ໃຕ້​ຄວາມ​ກົດ​ດັນ​ໃດໆ​ທີ່​ບໍ່​ຊັດ​ເຈນ, ບໍ່​ຍອມ​ຕໍ່​ສິ່ງ​ລໍ້​ລວງ​ຊວນ​ໃຈ ການ​ຊື້​ຈ້າງຈອບ​ອອຍໃດໆ ຂອງ​ຜູ້​ກະທຳ​ຄວາມຜິດ.

ການຕໍ່ສູ້​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ແມ່ນ​ວຽກ​ງານ​ທີ່​ຫຍຸ້ງຍາກ, ສັບສົນ ​ແລະ​ຍາວ​ນານ. ຈາກ​ບັນດາ​ບົດຮຽນ ​ແລະ​ຜົນງານ​ທີ່​ບັນລຸ​ໄດ້​ໃນ​ເວລາ​ທີ່​ຜ່ານ​ມາ, ​ໂດຍ​ສະ​ເພາະ​ພາຍຫຼັງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ມາ​ເຖິງ​ດຽວ​ນີ້, ພວກ​ເຮົາ​ມີ​ພື້ນຖານ​ເພື່ອ​ເຊື່ອ​ໝັ້ນ​ວ່າ, ດ້ວຍ​ຄວາມ​ຕັດສິນ​ໃຈ​ການ​ເມືອງ​ສູງ​ຂອງ​ພັກ, ລັດ; ການ​ລົງມື​ປະຕິບັດ​ງານ​ຢ່າງ​ຕັ້ງໜ້າ ຄົບ​ຊຸດ​ຂອງ​ບັນ​ດາ​ຄະນະ​ພັກ ການຈັດ​ຕັ້ງ​ພັກ ທ້ອງ​ຖິ່ນ, ຂອງທົ່ວ​ທັງ​ລະບົບ​ການ​ເມືອງ ​ແລະ​ທົ່ວ​ສັງຄົມ, ວຽກງ​ານ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ​ໃນ​ເວລາ​ຕໍ່​ໄປ​ຈະ​ສືບ​ຕໍ່​ບັນລຸຜົນສຳ​ເລັດ​ທີ່​ດີງາມ​ຫຼາຍ​ຢ່າງ​ອີກ; ​ແນ່ນອນ​ການ​ສໍ້​ລາດ​ບັງ​ຫຼວງ​ຈະ​ຖືກ​ສະກັດ​ກັ້ນ ​ແລະຖືກ​ຍູ້​ຖອຍ​ເທື່ອ​ລະ​ກ້າວ; ປະກອບສ່ວນ​ກໍ່ສ້າງ​ພັກ​​ແລະ​ລັດເຮົາ​ໃຫ້​ນັບ​ມື້​ນັບ​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ, ຕອບ​ສະໜອງ​ຄວາມ​ຕ້ອງການ​ຂອງ​ພາລະກິດ​ປະຕິວັດ ​ແລະ​ຄວາມ​ປາຖະໜາ​ຂອງ​ປະຊາຊົນ.

ຂ້າພະ​ເຈົ້າຂໍ​ສະ​ເໜີ​ໃຫ້​ບັນດາ​ສະຫາຍ, ​ໃນ​ແຕ່​ລະ​ຕຳ​ແໜ່​ງງານ​ຂອງ​ຕົນ, ກ່ອນ​ອື່ນ​ແມ່ນ​ບັນດາສະຫາຍ​ເປັນຫົວໜ້າ, ຈົ່ງ​ເຊີດ​ຊູ​ຈິດ​ໃຈ​ຮັບຜິດຊອບ​ຕໍ່​ພັກ, ຕໍ່​ປະຊາຊົນ ​ແລະ​ປະ​ເທດ​ຊາດ, ​ເປັນ​ແບບຢ່າງ, ນຳ​ໜ້າ​ໃນ​ການ​ຊີ້​ນຳ​ນຳພາ, ຜັນ​ຂະຫຍາຍ​ປະຕິບັດ​ບັນດາ​ໜ້າ​ທີ່, ມາດ​ຕະການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ, ​ໂດຍ​ສະ​ເພາະ​ແມ່ນ​ ລວມສູນ​ການ​ຊີ້ນຳ​​ ເພື່ອ​ຍົກ​ສູງ​ປະສິດທິ​ຜົນ​ການ​ຄົ້ນ​ເຜີຍ, ຈັດການ​ແກ້​ໄຂ​ຢ່າງ​ເຂັ້ມ​ງວດ ທັນ​ການຕໍ່​ການ​ກະທຳ​ຫຍໍ້​ທໍ້, ສໍ້​ລາດ​ບັງ​ຫຼວງຢູ່ພາຍ​ໃນ​ກະຊວງ, ຂະ​ແໜງ​ການ, ທ້ອງ​ຖິ່ນ, ສຳນັກງານ​ອົງການ​ ກົມ​ກອງຂອງ​ຕົນ, ປະກອບສ່ວນ​ເຂົ້າ​ໃນ​ຜົນສຳ​ເລັດ​ລວມຂອງ​ທົ່ວ​ປະ​ເທດ./.

​ໂດຍ ຫງວຽນ​ຝູຈ້ອງ
​ເລຂາທິການ​ໃຫຍ່​ຄະນະ​ບໍລິຫານ​ສູນ​ກາງ
ພັກ​ກອມ​ມູນິດ​ຫວຽດນາມ

---------------------

* ຫົວ​ຂໍ້​ໂດຍ​ວາລະສານ​ກອມ​ມູນິດ​ເປັນ​ຜູ້​ແຕ່ງ.

(1) ​ໂຮ່ຈີ​ມິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ-ຊື້​ເທິ​ດ, ຮ່າ​​ໂນ້ຍ, 2011, ​ເຫຼັ້ມ 13, ໜ້າ 419.

- ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 909 (​ເດືອນ​ກໍລະກົດ 2018).

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ