ວັນພຸດ, 14/11/2018
ເສີມຂະຫຍາຍສຸດຂີດຄວາມຮັບຜິດຊອບ, ສຸມໃສ່ການຄົ້ນຄວ້າ, ປຶກສາສົນທະນາ, ຕັດສິນຕົກລົງບັນດາລາຍງານ, ໂຄງການ, ມະຕິຂອງສູນກາງ*
3/11/2018 10:24' ສົ່ງ ພິມ
ສະຫາຍເລຂາທິການໃຫຍ່ ຫງວຽນຝູຈ້ອງ ກ່າວປາໄສທີ່ກອງປະຊຸມ. (ພາບ: TTXVN)

ເພື່ອ​ປະຕິບັດ​ໂຄງການ​ເຮັດ​ວຽກ​ຂອງຄະນະ​ບໍລິຫານ​ງານ​ສູນ​ກາງ​ພັກທັງ​ສະ​ໄໝ, ມື້ນີ້ສູນ​ກາງ​ຮຽກ​ໂຮມກອງ​ປະຊຸມ​ຄັ້ງ​ທີ 8 ​ເພື່ອ​ປຶກສາ​ສົນທະນາ​ແລະ​ໃຫ້​ຄວາມ​ຄິດ​ເຫັນ​ກ່ຽວ​ກັບ: ສະພາບ​ການ​ເສດຖະກິດ-ສັງຄົມ, ການ​ເງິນ-ງົບປະມານຂອງ​ລັດ ​ປີ 2018, ຄາດໝາຍ​ແຜນການ​ພັດທະນາ​ເສ​ດຖະກິດ-ສັງຄົມ, ການ​ເງິນ-ງົບປະມານ​ ປີ 2019; ສະຫຼຸບ​ສັງ​ລວມ 10 ປີ​ແຫ່ງ​ການ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ X "ກ່ຽວກັບແຜນຍຸດທະສາດທະເລຮອດປີ 2020"; ຂໍ້​ກຳນົດ​ກ່ຽວ​ກັບຄວາມ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານ, ສະມາຊິກ​ພັກ, ກ່ອນ​ອື່ນ​ໝົດ​ແມ່ນ​ກຳມະການ​ກົມ​ການ​ເມືອງ, ກຳມະການ​ຄະນະ​ເລຂາທິການ, ກຳມະການຄະນະ​ບໍລິຫານ​ງານ​ສູນ​ກາງ; ສ້າງ​ຕັ້ງ​ບັນດາຄະນະ​ອະນຸ​ກຳມະການ​ກະກຽມ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ; ພິຈາລະນາ​ບາງ​ບັນຫາ​ກ່ຽວ​ກັບ​ວຽກ​ງານ​ພະນັກງານ ​ແລະບາງ​ບັນຫາ​ອື່ນ​ທີ່​ສຳຄັນ.

ຕາງໜ້າ​ກົມ​ການ​ເມືອງ​ແລະ​ຄະນະ​ເລຂາທິການ, ຂ້າພະ​ເຈົ້າ​ຂໍ​ສະ​ແດງ​ຄວາມ​ຊົມ​ເຊີຍ​ຢ່າງ​ສຸດ​ອົກ​ສຸດ​ໃຈ​ ຕໍ່​ບັນດາ​ສະຫາຍກຳມະການຄະນະ​ບໍລິຫານ​ງານ​ສູນ​ກາງ, ບັນດາ​ຜູ້​ແທນ​ທີ່​ຖືກ​ເຊີນ ທີ່​ໄດ້​ມາ​ຮ່ວມ​ກອງ​ປະຊຸມ​ນີ້ ​ແລະ ຂໍ​ຝາກ​ຄຳ​ອວຍພອນ​ຊົນ​ເຊີຍອັນ​ຈົບງາມ​ທີ່​ສຸດມາ​ຍັງ​ບັນດາ​ສະ​ຫາຍທຸກ​ຄົນ.

ຕາມ​ກົດ​ລະບຽບ​ການ​ເຮັດ​ວຽກ, ຫ້ອງການ​ສູນ​ກາງ​ພັກ​ໄດ້​ຝາກ​ເອກະສານ​ໃຫ້​ບັນດາ​ສະ​ຫາຍຄົ້ນຄວ້າ​ກ່ອນ. ຕໍ່​ໄປ​ນີ້, ຂ້າພະ​ເຈົ້າ​ຂໍ​ປະກອບ​ຄວາມ​ເຫັນ​​ຕື່ມ​ອີກ​ບາງ​ແງ່​ມູມທີ່​ພົວພັນ​ເຖິງ​ເນື້ອ​ໃນ​ ​ແລະ​ໜ້າ​ທີ່ຂອງກອງ​ປະຊຸມ, ມີ​ລັກສະນະ​ເຈາະ​ຈິ້ມ, ຍົກ​ບັນຫາ, ຂໍ​ໃຫ້​ບັນດາ​ສະຫາຍ​ເອົາ​ໃຈ​ໃສ່​ໃນ​ຊະ​ບວນການ​ປຶກສາ​ສົນທະນາ, ພິຈາລະນາ, ຕັດສິນ​ຕົກລົງ.

ກ່ຽວ​ກັບ​ເສດຖະກິດ-ສັງຄົມ, ການ​ເງິນ-ງົບປະມານ​ຂອງ​ລັດ ​ປີ 2018 - 2019

ການ​ທີ່​ສູນ​ກາງ​ພິຈາລະນາ, ​ໃຫ້​ຄວາມ​ເຫັນ​ກ່ຽວ​ກັບ​ບັນຫາເສດຖະກິດ-ສັງຄົມ, ການ​ເງິນ-ງົບປະມານຂອງ​ລັດ​ປີນີ້ ມີ​ຫຼາຍ​​ເນື້ອ​ໃນ​ໃໝ່, ກວ້າງຂວາງ​ເລິກ​ເຊິ່ງ, ກຳນົດ​ເວລາ​ຍາວ​ແລະ​ຮອບດ້ານກວ່າ​ເມື່ອ​ທຽບ​ກັບ​ສອງ​ປີ​ກ່ອນ. ພ້ອມ​ກັບລາຍ​ງານ​ກ່ຽວ​ກັບ​ສະພາບ​ການເສດຖະກິດ-ສັງຄົມ, ການ​ເງິນ-ງົບປະມານຂອງ​ລັດ​ ປີ 2018 ​ແລະ​ຄາດ​ຄະ​ເນ​ແຜນການ​ພັດທະນາເສດຖະກິດ-ສັງຄົມ, ການ​ເງິນ-ງົບປະມານຂອງ​ລັດ​ ປີ 2019, ຄະນະ​ກຳມະການ​ພັກ​ລັດຖະບານ​ ໄດ້​ຊີ້​ນຳ​​ໃຫ້ບັນດາ​ອົງການ​ພາລະ​ບົດບາດກໍ່ສ້າງ​ລາຍ​ງານ​ຈຳນວນໜຶ່ງ ແລະ​ຍື່ນ​ສະ​ເໜີ​ຕໍ່​ສູນ​ກາງ ລາຍ​ງານ​ທີ່​ສຳຄັນ​ເຫຼົ່າ​ນັ້ນ​ກ່ຽວ​ກັບ​ການ​ປະ​ເມີນ​ຜົນ​ກາງ​ສະ​ໄໝ​ໃນ​ການ​ປະຕິບັດ​ແຜນການ​ພັດທະນາເສດຖະກິດ-ສັງຄົມ, ​ແຜນການ​ການ​ເງິນ-ງົບປະມານຂອງ​ລັດ​ ​ແລະ ​ແຜນການ​ລົງທຶນສາທາລະນະ​ໄລຍະ​ກາງ​ ປີ 2016 - 2020.

ສະ​ເໜີ​ໃຫ້ບັນດາ​ສະຫາຍ​ກຳມະການ​ສູນ​ກາງ​ຈົ່ງ​ຄົ້ນຄວ້າ​ເອກະສານ​ເຫຼົ່າ​ນັ້ນ​ຢ່າງ​ລະອຽດ; ອີງ​ຕາມ​ສະຖານະ​ການ​ຕົວ​ຈິງ​ຂອງ​ປະ​ເທດ​ແລະ​ບ່ອນ​ເຮັດ​ວຽກ ​ເພື່ອ​ປຶກສາ​ສົນທະນາ, ຕີ​ລາຄາ​ຢ່າງ​ພາວະ​ວິ​ໄສ ຮອບດ້ານ ​ກ່ຽວ​ກັບ​ສະພາບ​ການເສດຖະກິດ-ສັງຄົມ, ການ​ເງິນ-ງົບປະມານຂອງ​ລັດ ​ໃນ 9​ ເດືອນທີ່​ຜ່ານ​ມາ, ຄາດ​ຄະ​ເນ​ຮອດ​ທ້າຍ​ປີ 2018 ​ແລະ​ ຕີ​ລາຄາ​ກາງ​ສະ​ໄໝ​ກ່ຽວ​ກັບ​ການ​ປະຕິບັດ​ແຜນການ​ພັດທະນາ​ເສດຖະກິດ-ສັງຄົມ, ​ແຜນການການ​ເງິນ-ງົບປະມານຂອງ​ລັດ​ ​ແລະ ແຜນການ​ລົງທຶນສາທາລະນະ​ໄລຍະ​ກາງ​ ປີ 2016 - 2020.

ຊີ້​ໃຫ້​ເຫັນ​ແຈ້ງບັນດາຜົນງານ ຄວາມ​ສຳ​ເລັດ​ທີ່​ບັນລຸ​ໄດ້, ບັນດາ​ຈຸດ​ອ່ອນ ຂໍ້​ຈຳກັດທີ່​ມີ​ຢູ່ ​ແລະ​ສາ​ເຫດ. ​ໃຫ້​ເອົາ​ໃຈ​ໃສ່​ສົມ​ທຽບ​ກັບ​ບັນດາ​ເປົ້າ​ໝາຍ, ໜ້າ​ທີ່ທີ່​ໄດ້​ວາງ​ອອກ​ມາ​ໃນ​ປີ 2018 ​ແລະ​ໃນ​ຕະຫຼອດ​ສະ​ໄໝ​ທີ XII, ​ເປັນ​ຕົ້ນ​ແມ່ນ​ເປົ້າ​ໝາຍ ໜ້າ​ທີ່ ​ເຮັດ​ໃຫ້ເສດຖະກິດ​ມະຫາ​ພາກມີ​ສະຖຽນ​ລະ​ພາບ, ຄວບ​ຄຸມອັດຕາ​ເງິນ​ເຟີ້, ການ​ເຕີບ​ໂຕ​ຢູ່​ໃນ​ລະດັບ 6,5% - 6,7% ປີ 2018 ​ແລະ 6,5% - 7% ສຳລັບ 5 ປີ 2016-2020, ປະຕິບັດ 3 ​​ການ​ບຸກທະລຸ​ຍຸດ​ທະ​ສາດ, ຈັດ​ວາງ​ໂຄງ​ສ້າງ​ເສດຖກິດ​ຄືນ​ໃໝ່ ຕິດ​ກັບ​ການ​ປ່ຽນ​ແປງ​ໃໝ່​ຮູບ​ແບບ​ການ​ເຕີບ​ໂຕ, ຍົກ​ສູງສະ​ມັດ​ຕະພາບ​ຂອງ​ງານ, ຍົກ​ສູງ​ປະສິດທິ​ຜົນ, ກຳລັງ​ແຮງ​ແຂ່ງຂັນ​ຂອງ​ພື້ນຖານ​ເສດຖະກິດ; ພັດທະນາ​ວັດທະນາ​ທຳ-ສັງຄົມ, ​ເບິ່ງ​ແຍງ​ດູ​ແລ​ຊີວິດ​ການ​ເປັນຢູ່ຂອງ​ປະຊາຊົນ, ຮັບປະກັນ​ຄວາມ​ປອດ​ໄພ​ສັງຄົມ; ຮັກສາ​ສະພາບ​ແວດ​ລ້ອມ​ສັນຕິພາບ, ປົກ​ປັກ​ຮັກສາ​ເອກະລາດ ອະທິປະ​ໄຕ​ນອງ​ຊາດ, ຄວາມ​ໝັ້ນຄົງ​ທາງ​ການ​ເມືອງ ​ແລະ ລະບຽບ ຄວາມ​ປອດ​ໄພ​ທາງ​ສັງຄົມ; ​ເປີດ​ກວ້າງ​ແລະ​ຍົກ​ສູງປະສິດທິ​ຜົນ​ການ​ເຄື່ອນ​ໄຫວ​ພົວພັນ​ຕ່າງປະ​ເທດ, ຍົກ​ສູງ​ຖານະ​ບົດບາດ ​ແລະ​ອິດ​ທິພົນ​ຂອງຊາດ...

ພ້ອມ​ກັນ​ນັ້ນ, ວິ​ເຄາະ​ໄຈ້​ແຍກ ຄາດ​ຄະ​ເນ​ເຫດ​ການ​ທີ່​ອາດ​ຈະ​ເກີດ​ຂຶ້ນ​ໃນ​ອະນາຄົດ, ​ເປັນ​ຕົ້ນ​ແມ່ນ​ບັນດາ​ໂອກາດ ຄວາມ​ສະດວກ​ທີ່​ຄວນ​ກຳ​ເອົາ, ບັນດາ​ຄວາມ​ຫຍຸ້ງຍາກສິ່ງ​ທ້າ​ທາຍ​ ທີ່​ຕ້ອງພະຍາຍາມ​ແກ້​ໄຂ​ຜ່ານ​ຜ່າ. ຈາກ​ນັ້ນ, ກຳນົດ​ເປົ້າ​ໝາຍສັງ​ລວມ, ວາງລະດັບຄາດໝາຍ ໜ້າ​ທີ່​ສຳຄັນຕົ້ນຕໍ ​ແລະ ບັນດາ​ນະ​ໂຍບາຍ, ມາດ​ຕະການ​ທີ່​ມີ​ລັກສະນະ​ບຸກທະລຸ ມີ​ຄວາມ​ເປັນ​ໄປ​ໄດ້​ສູງ, ຮັບປະກັນ​ຄວາມ​ສຳ​ເລັດ​ມີ​ໄຊ​ໃນ​ການ​ປະຕິບັດ​ບັນດາ​ເປົ້​າໝາຍ ໜ້າ​ທີ​ຂອງ​ປີ 2019 ​ແລະປີ​ຕໍ່​ໆ​ໄປ ກໍ່​ຄື​ຂອງ​ທົ່ວທັງ​ສະ​ໄໝ​ທີ XII. ພະຍາຍາມ​ຊອກ​ຫາ​ນະ​ໂຍບາຍ, ​ມາດ​ຕະການ​ບຸກທະ​ລູ, ​ເປັນ​ໄປ​ໄດ້, ສອດຄ່ອງ​ກັບ​ການ​​ຜັນ​ປ່ຽນ​ໃໝ່ຂອງ​ສະພາບ​ການ​ໂລກ​ແລະ​ພາກ​ພື້ນ, ​ເປັນ​ຕົ້ນ​ແມ່ນສະພາບ​ຄວາມ​ເຄັ່ງ​ຕຶງ ​ແລະຄວາມ​ຂັດ​ແຍ້​ງທາງ​ການ​ຄ້າ​ລະຫວ່າງ​ບັນດາ​ປະ​ເທດ​ໃຫຍ່, ການ​ຜັນ​ແປ​ຢ່າງ​ສັບສົນ​ຂອງ​ຕະຫຼາດການ​ເງິນ-​ເງິນຕາ ​ແລະ​ລາຄາ​ນ້ຳມັນ​ດິບ​ໃນ​ໂລກ. ​ການ​ແກ້​ໄຂ​ຜ່ານ​ຜ່າ​ຂໍ້​ຈຳກັດຈຸດ​ອ່ອນ​ ທີ່​ບັນດາ​ລາຍ​ງານ​ຂອງ​ຄະນະ​ກຳມະການ​ພັກ​ລັດຖະບານ​ ໄດ້​ຊີ້​ໃຫ້​ເຫັນ​ ຄື ການ​ປະຕິບັດ​ສາມ​ການ​ບຸກທະລຸ​ຍຸດ​ທະ​ສາດ, ຈັດ​ວາງ​ໂຄງ​ສ້າງ​​ເສດຖະກິດ​ຄືນ​ໃໝ່​ ຕິດ​ກັບກາ​ນປ່ຽນ​ແປງ​ໃໝ່​ຮູບ​ແບບ​ການ​ເຕີບ​ໂຕ ຍັງ​ພົບ​ຄວາມ​ຫຍຸ້ງ​ນາກ​ຫຼາຍ; ການ​ລົງທຶນ​ກໍ່ສ້າງ​ບັນດາ​ກິດຈະກຳ​ຈຸດ​ໜັກ​ແຫ່ງ​ຊາດ ​ແລະ​ການ​ເບິ​ກຈ່າຍເງິນ​ລົງທຶນ​ພາກ​ລັດ​ ຍັງ​ຊັກ​ຊ້າ; ການ​ເຕີບ​ໂຕ​ຂອງ​ການ​ສົ່ງ​ອອກ​ແມ່ນ​ຍັງ​ອີງ​ໃສ່​ຂົງ​ເຂດການ​ລົງທຶນ​ຈາກ​ຕ່ງປະ​ເທດ​ເປັນ​ຕົ້ນຕໍ; ຄວາມ​ເປັນ​ເອກະລາດ ​ເປັນ​ເຈົ້າ​ຕົນ​ເອງ​ຂອງ​ພື້ນຖານ​ເສດຖະກິດ​​ ບໍ່​ສູງ, ​ເສດຖະກິດ​ມະຫາ​ພາກ​ຍັງ​ບໍ່​ທັນ​ໝັ້ນຄົງ​ແທ້​ເທື່ອ; ​ແຫຼ່ງພະລັງ​ເພື່ອ​ປະຕິບັດ​ນະ​ໂຍບາຍ​ວັດທະນະທຳ-ສັງຄົມ​ຍັງ​ຖືກ​ຈຳກັດ; ນະ​ໂຍບາຍ​ຈຳນວນ​ໜຶ່ງ​ໄດ້​ຮັບ​ການ​ປະກາດ​ໃຊ້​ຊ້າ ຫຼື​ໄດ້​ຜັນ​ຂະຫຍາຍ​ປະຕິບັດ​ແຕ່​ບໍ່​ໄດ້​ຮັບຜົນ; ຄວາມ​ແຕກ​ໂຕນ​ຮັ່ງມີ-ທຸກ​ຍາກ ​ລະຫວ່າງ​ບັນດາ​ເຂດ​ພາກ ​ແລະ ລະຫວ່າງ​ບັນດາ​ຊັ້ນ​ຄົນ​ປະຊາຊົນ ​ຍັງ​ແຕກ​ຕ່ງກັນ​ຫຼາຍ​ແລະມີ​ທ່າ​ອຽງ​ເພີ່ມ​ຂຶ້ນ; ຫຼາຍ​ບັນຫາ​ສັງຄົມ​ທີ່​ຮ້ອນ​ເຄືອງ​ຍັງ​ເກີດ​ຂຶ້ນ​ແລະ​ເປັນ​ຜົນ​ສະທ້ອນ​ເຖິງ​ລະບຽບ ຄວາມ​ປອດ​ໄພ​ສັງຄົມ, ​ເປັນ​ຕົ້ນ​ແມ່ນ​ໃນ​ຂົງ​ເຂດ​ສາທາລະນະ​ສຸກ, ສຶກສາ ກໍ່ສ້າງ​ຜູ້​ຄົນ​ໃໝ່, ຄຸ້ມ​ຄອງ ປົກ​ປັກ​ຮັກສາ​ຊັບພະຍາກອນ​ທຳ​ມະ​ຊາດ, ສິ່ງ​ແວດ​ລ້ອມ; ສະພາບ​ການ​ຮ້ອງທຸກ ຮ້ອງ​ຟ້ອງ​ກ່ຽວ​ກັບ​ທີ່​ດິນ​ ຍັງ​ສັບສົນ. ຄວາມ​ຊົ່ວ​ຮ້າຍ​ທາງ​ສັງຄົມ, ຢາ​ເສບ​ຕິດ, ການ​ສໍ້​ລາດ​ບັງ​ຫຼວງ, ການລະ​ເມີດ​ກົດໝາຍ, ອຸປະຕິ​ເຫດ​ຈະລາຈອນ, ອຸປະຕິ​ເຫດ​ລະ​ເບີດ​ໄຟ​ໄໝ້ ຍັງ​ເກີດ​ຂຶ້ນ​ຢ່າງ​ສັບສົນ. ວຽກ​ງານ​ປ້ອງ​ກັນ​ແລະ​ຕ້ານ​ອາ​ຊະ​ຍາ​ກຳ, ການ​ຄ້າຂອງ​ເຖື່ອນ, ການ​ສໍ້​ໂກງ​ທາງ​ການ​ຄ້າ ຍັງ​ຖືກ​ຈຳກັດ ຄ້າງ​ຄາ​ຫຼາຍ. ບັນດາ​ອິດ​ທິກຳລັງ​ສັດຕູ, ປະຕິ​ການ, ພວກ​ສວຍ​ໂອກາດ​ທາງ​ການ​ເມືອງ ຍັງ​ສືບ​ຕໍ່ຕໍ່ສູ້​ທຳລາຍ​ດ້ວຍ​ຫຼາຍ​ວິທີ ​ເລ່ກົນ​ໃໝ່...

ກ່ຽວ​ກັລການ​ສະຫຼຸບ​ສັງ​ລວມ 10 ປີ​ແຫ່ງ​ການ​ປະຕິບັດ​ມະຕິ​ເລກທີ 09-NQ/TW “ກ່ຽວ​ກັບ​ແຜນ​ຍຸດ​ທະ​ສາດ​ທະ​ເລ​ຮອດ​ປີ 2020”

ດັ່ງ​ທີ່​ພວກ​ເຮົາ​ທຸກ​ຄົນຮູ້, ສຳລັບ​ປະ​ເທດ​ເຮົາ, ທະ​ເລ ​ເກາະ​ທະ​ເລ​ເປັນ​ພາກສ່ວນ​ໃນ​ອົງ​ປະກອບ​ອະທິປະ​ໄຕ, ສິດ​ອະທິປະ​ໄຕ​ອັນ​ສັກສິດ​ ​ຂອງ​ປະ​ເທດ​ຊາດ ​ແລະ​ມັນ​ຍັງ​ເປັນ​ເທສະ​ພື້ນ​ທີ່​ແຫ່ງ​ການດຳລົງ​ຄົງ​ຕົວ​ແລະຂະຫຍາຍຕົວ​ ຂອງປະຊາຊົນ​ຫວຽດນາມທຸກ​ຮຸ່ນ​ຄົນ; ບັນດາ​ເຂດ​ທະ​ເລ​ປະ​ເທດ​ເຮົາ​ມີ​ທີ່​ຕັ້ງ​ພູມ​ສາດ​ການ​ເມືອງ, ພູມ​ສາດ​ການ​ທະຫານ, ພູມ​ສາດ​ເສດຖະກິດ​ທີ່​ສຳຄັນ ​ໃນ​ພາກ​ພື້ນ​ແລະ​ໃນ​ໂລກ; ສະຕະວັດ​ທີ XXI ຖືກ​ຖື​ວ່າ​ເປັນຍຸກ​ຂອງ​ມະຫາ​ສະໝຸດ, ການ “ອອດ​ໄປ​ໃນ​ທະ​ເລ” ​ໄດ້​ກາຍ​ເປັນ​ທ່າ​ອຽງ​ໃຫຍ່, ທິດ​ທາງ​ທີ່​ສຳຄັນ​ ຂອງ​ບັນດາ​ປະ​ເທດ​ທີ່​ມີ​ທະ​ເລ ​ແລະນັບ​ທັງ​ປະ​ເທດ​ທີ່​ບໍ່​ມິ​ທະ​ເລ. ກຳ​ໄດ້​ທ່າ​ອຽງ​ລວມນັ້ນ​ຂອງ​ໂລກ ຂອງ​ພາກ​ພື້ນ ​ແລະ ​ເລີ່​ມຈາກ​ຄວາມ​ຕ້ອງການຕົວ​ຈິງ​ຂອງການ​ກໍ່ສ້າງ ​ແລະ​ປົກ​ປັກ​ຮັກສາ​ປະ​ເທດ​ຊາດ, ກອງ​ປະຊຸມ​ຄັ້ງ​ທີ 4 ຂອງຄະນະ​ບໍລິຫານ​ງານ​ສູນ​ກາງພັກສະ​ໄໝ​ທີ X ​ໄດ້​ປະກາດ​ໃຊ້​ມະຕິ​ເລກທີ 09/NQ-TW, ວັນ​ທີ 09 ກຸມພາ 2007, “ກ່ຽວ​ກັບ​ແຜນ​ຍຸດ​ທະ​ສາດ​ທະ​ເລ​ຮອດ​ປີ 2020”, ​ໃນ​ນັ້ນ​ກຳນົດ​ແຈ້ງ​ທັດສະນະ​ຊີ້​ນຳ, ​ເປົ້າ​ໝາຍ, ທິດ​ທາງ​ຍຸດ​ທະ​ສາດ ​ແລະ​ໜ້າ​ທີ່, ວິທີ​ແກ້​ໄຂ​ຕົ້ນຕໍ ກ່ຽວ​ກັບ​ການ​ພັດທະນາ​ບັນດາ​ຂະ​ແໜງ​ການ, ຂົງ​ເຂດ​ທີ່​ພົວພັນ​ເຖິງ​ທ​ະ​ເລ, ເກາະທະ​ເລ​ຫວຽດນາມ, ​ແນ​ໃສ່​ພາ​ໃຫ້​ປະ​ເທດ​ເຮົາ​ກາຍ​ເປັນ​ປະ​ເທດ​ທີ່​ເຂັ້ມ​ແຂງ​ໃນ​ທະ​ເລ ​ແລະ ສ້າງ​ຄວາມ​ຮັ່ງມີ​ຈາກ​ທະ​ເລ.

​ໂດຍ​ໄດ້​ຮັບ​ການ​ມອບ​ໝາຍ​ງານ​ຈາກກົມ​ການ​ເມືອງ, ​ຄະນະ​ເລຂາທິການ, ​ໃນ​ເວລາ​ທີ່​ຜ່ານ​ມາ ຄະນະ​ກຳມະການ​ພັກ​ລັດຖະບານ ​ໄດ້ຮີບ​ດ່ວນ, ​ເຂັ້ມ​ງວດ​ໃນ​ການຊີ້​ນຳ​ນຳພາບັນດາ​ກະຊວງ, ຂະ​ແໜງ​ການ, ທ້ອງ​ຖິ່ນ​ທີ່​ກ່ຽວຂ້ອງ ດຳ​ເນີນ​ຢ່າງ​ຕັ້ງໜ້າ​ການ​ສະຫຼຸບ​ສັງ​ລວມ 10 ປີ​ແຫ່ງ​ການ​ປະຕິບັດ​ມະຕິ​ເລກທີ 09-NQ/TW "ກ່ຽວກັບແຜນຍຸດທະສາດທະເລຮອດປີ 2020", ໄຈ້​ແຍກ, ຄາດ​ຄະ​ເນ​ສະພາບ​ການ​ໃໝ່​ຢູ່ໃນ​ປະ​ເທດ, ພາກ​ພື້ນ​ແລະ​ໃນ​ໂລກ​ ໃນ​ເວລາ​ທີ່​ຈະ​ເຖິງ; ​ເພື່ອ​ຈາກ​ນັ້ນ, ສະ​ເໜີ​ໃຫ້​ສູນ​ກາງ​ພິຈາລະນາ, ປະກາດ​ໃຊ້​ມະຕິ​ໃໝ່​ກ່ຽວ​ກັບ ​ແຜນ​ຍຸດ​ທະ​ສາດ​ທະ​ເລ​ຮອດ​ປີ 2030, ວິ​ໄສ​ທັດ​ຮອດ​ປີ 2045.

ນີ້​ແມ່ນບັນຫາ​ສຳຄັນ​ທີ່​ສຸດ, ມັນ​ພົວພັນ​ເຖິງ​ການ​ພັດທະນາ​ເສດຖະກິດ​ທະ​ເລ​ ຕິດ​ກັບ​ການ​ພັດທະນາສັງຄົມ, ປົກ​ປັກ​ຮັກສາ​ຊັບພະຍາກອນ, ສິ່ງ​ແວດ​ລ້ອມ, ຮັບ​ມື​ກັບ​ການ​ປ່ຽນ​ແປງ​ສະພາບອາກາດ, ນ້ຳ​ທະ​ເລ​ຍຶ່ງຂຶ້ນ, ຮັບປະກັນ​ການ​ປ້ອງ​ກັນ​ປະ​ເທດ, ຮັກສາ​ຄວາມ​ປອດ​ໄພ​ແຫ່ງ​ຊາດ, ການ​ຕ່າງປະ​ເທດ, ການ​ຮ່ວມ​ມື​ສາກົນ​ກ່ຽວ​ກັບ​ທະ​ເລ. ການສະ​ເໜີ​ໃຫ້​ສູນ​ກາງ​ພິຈາລະນາ, ປະກາດ​ໃຊ້​ມະຕິ​ໃໝ່​ກ່ຽວ​ກັບ​​ແຜນຍຸດ​ທະ​ສາດ​​ເສດຖະກິດທະ​ເລຫວຽດນາມ​ແມ່ນ​ມີ​ຄວາມ​ສຳຄັນ​ແລະ​ຈຳ​ເປັນ​ທີ່​ສຸດ, ບໍ່​ພຽງ​ແຕ່​ເລີ່​ມຈາກ​ຄວາມ​ຈິງ​ຂອງ​ມະຕິ​ເລກທີ 09-NQ/TW ທີ່ຖືກ​ຈຳກັດ​ເວລາ​ຮອດ​ປີ 2020 ​ເທົ່າ​ນັ້ນ ຫາກ​ຍັງ​ແມ່ນ​ຍ້ອນ​ຫຼາຍ​ເຫດຜົນ​ພາວະ​ວິ​ໄສ ​ແລະ ອັດຕະວິ​ໄສ​ອື່ນ​ອີກ, ​ເຊັ່ນ ສະພາບ​ການ​ໂລກ ​ໃນ​ພາກ​ພື້ນ​ແລະ​ໃນ​ປະ​ເທດ ​ໄດ້​ແລະ​ພວມ​ມີ​ການ​ປ່ຽນ​ແປງຫຼາຍ​ຢ່າງ ຊຶ່ງ​ຮຽກຮ້ອງຕ້ອງ​ມີ​ການ​ເພີ່ມ​ເຕີມ ພັດທະນາ​ກ່ຽວ​ກັບ​ທັດສະນະ ​ແລະ ການ​ດັດສົມ​ກ່ຽວ​ກັບ​ເປົ້າ​ໝາຍ​ທີ່​ລະອຽດ, ກຳນົດ​ທິດ​ທາງ​ການ​ພັດທະນາ​ຂອງ​ບາງ​ຂະ​ແໜງ​ການ, ຂົງ​ເຂດ​ເສດຖະກິດ​ທະ​ເລ. ບັນດາ​ເນື້ອ​ໃນ​ກ່ຽວ​ກັບ​ການ​ພັດທະ​ນາ​ເສດຖະກິດ​ທະ​ເລ ມີ​ຄວາມ​ສຳພັນທາງ​ອິນ​ຊີ, ​​ແໜ້ນ​ແຟ້ນກັບ​​ບັນຫາ​ເສດຖະກິດ​ທັງ​ໝົດ​ຂອງ​ທົ່ວປະ​ເທດ ຊຶ່ງ​ຕ້ອງ​ໄດ້​ເຜີຍ​ແຜ່, ຊາບ​ຊຶມ​ຢ່າງ​ກວ້າງຂວາງ​ເລິກ​ເຊິ່ງ​ໃນ​ທົ່ວ​ລະບົບ​ການ​ເມືອງ ​ແລະ​ໃນ​ທຸກ​ຊັ້ນ​ຄົນ​ປະຊາຊົນ ​ເພື່ອ​ຈາກ​ນັ້ນ​ຍົກ​ສູງ​ຄວາມ​ຮັບ​ຮູ້, ຄວາມ​ຮັບຜິດ​ຊອບ​ຂອງ​ທົ່ວ​ສັງຄົມ ​ໃນ​ການ​ຄຸ້ມ​ຄອງ ຂຸດ​ຄົ້ນ ອະນຸ​ຮັກ ​ເສີມ​ຂະຫຍາຍຢ່າງ​ມີ​ປະສິດທິ​ຜົນ ທຸກ​ຊັບພະຍາກອນ​ແລະ​ທ່າ​ແຮງ​ຂອງ​ທະ​ເລ​ຫວຽດນາມ. ການ​ປະກາດ​ໃຊ້​ມະຕິ​ຈະ​ກຳນົດ​ທິດ​ທາງ​ໃຫ້​ແກ່​ການກໍ່ສ້າງ​ແຜນ​ຍຸດ​ທະ​ສາດ, ​ແຜນ​ແມ່​ບົດ, ​ແຜນການ, ນະ​ໂຍບາຍ, ກົດໝາຍ ​ແລະ ​ບັນດາ​ໂຄງການ, ​ແຜນ​ງານ​ການຈັດ​ຕັ້ງ​ປະຕິບັດຂອງ​ລັດຖະບານ, ຂອງ​ບັນດາທ້ອງ​ຖິ່ນ​ແລະ​ບັນດາ​ອົງການ​ທີ່​ກ່ຽວຂ້ອງ, ພິ​ເສດ​ແມ່ນ​ການ​ລະດົມ​ແຫຼ່ງພະລັງ​ໃນ​ແຜນການ​ລົງທຶນ​ໄລຍະ​ກາງ ​ໃຫ້​ແກ່​ການ​ພັດທະນາ​ເສດ​ຖະກິດ​ທະ​ເລ​ແລະຊາຍ​ຝັ່ງ, ສອດຄ່ອງ​ກັບ​ແຜນ​ຍຸດ​ທະ​ສາດ, ​ແຜນການ​ພັດທະນາ​ເສດຖະກິດ-ສັງ​ຄົມ​ຂອງ​ປະ​ເທດ​ໃນ​ໄລຍະ 2021 - 2030.

ຂໍ​ສະ​ເໜີ​ໃຫ້ບັນດາ​ສະຫາຍ​ຈົ່ງ​ຄົ້ນຄວ້າ, ປຶກສາ​ສົນທະນາ​ບັນດາ​ບັນຫາຢ່າງ​ລະອຽດຮອບດ້ານ ​ເພື່ອ​ເປັນ​ເອກະ​ພາບ​ໃນ​ການ​ສັງ​ເກດ, ປະ​ເມີນກ່ຽວ​ກັບບັນດາ​ຜົນສຳ​ເລັດ​ທີ່​ບັນລຸ​ໄດ້, ບັນດາ​ຈຸ​ດອ່ອນ​ຂໍ້​ຈຳກັດ​ທີ່​ຍັງ​ຄົງ​ຄ້າງ ​ແລະ ສາ​ເຫດ, ບົດຮຽນ​​ທີ່​ຖອດ​ຖອນ​ມາ​ໄດ້​ຈາກພາກ​ຕົວຈິງ 10 ປີ​ແຫ່ງ​ການ​ປະຕິບັດ​ມະຕິ​ເລກທີ 09-NQ/TW; ​ໄຈ້​ແຍກ, ຄາດ​ຄະ​ເນ​ສະພາບ​ການ​ໂລກ​ແລະ​ໃນ​ປະ​ເທດ​ໃນ​ເວລາ​ທີ່​ຈະ​ມາ​ເຖິງ. ຈາກ​ນັ້ນ, ກຳນົດ​ທັດສະນະ, ​ເປົ້າ​ໝາຍ, ທິດ​ທາງ​ຍຸດ​ທະ​ສາດການ​ພັດທະນາ​ເສດຖະກິດ​ທະ​ເລ​ຫວຽດນາມ​ຢ່າງ​ຍືນ​ຍົງ​ຮອດ​ປີ 2030, ວິ​ໄສ​ທັດ​ຮອດ​ປີ 2045 ​ແລະ ບັນດາ​ໜ້າ​ທີ່, ວິທີການມາດ​ຕະການ​ຕົ້ນຕໍ. ​ໃຫ້​ຄວາມ​ສຳຄັນ​ແກ່​ການ​ໄຈ້​ແຍກ​ທຳ​ຄວາມ​ກະຈ່າງ​ແຈ້ງ​ກ່ຽວ​ກັບ​ສາ​ເຫດຂອງ​ຈຸດ​ອ່ອນ, ຂໍ້​ຈຳກັດຕ່າງໆ​ເຊັ່ນ, ບາງ​ເລກ​ຄາດໝາຍ​ການ​ພັດທະນາ​ເສດຖະກິດ​ທະ​ເລ​ແລະ​ຊາຍ​ຝັ່ງ ຍາກ​ທີ່​ຈະ​ບັນລຸ​ໄດ້​ໃນ​ປີ 2020; ບາງ​ຂະ​ແໜງ​ການ ຂົງ​ເຂດ​ເສດຖະກິດ​ທະ​ເລທີ່​ໄດ້​ກຳນົດ​​ເປັນ​ບຸລິມະສິດ​ການ​ລົງທຶນ ​ແຕ່​ພັດ​ຂະຫຍາຍຕົວ​ຊ້າ, ບໍ່​ສົມ​ຄູ່​ກັບ​ຄວາມ​ສາມາດ​ບົ່ມ​ຊ້ອນ, ທ່າ​ແຮງຂອງ​ມັນ; ການ​ລົງທຶນ​ພັດທະນາ​ໂຄງ​ສ້າງ​ພື້ນຖານ​ຊາຍ​ຝັ່ງ, ​ເປັນ​ຕົ້ນ​ແມ່ນ​ລະບົບ​ທ່າ​ກຳ​ປັ່ນ​ທະ​ເລ ​ແລະ​ເຄືອ​ຂ່າຍ​ຄົມມະນາຄົມຊາຍ​ຝັ່ງ ຍັງ​ກະ​ແຈກ​ກະຈ່າຍ, ປະ​ສິດ​ທິຜົນ​ຕ່ຳ, ບໍ່​ຕອບ​ສະໜອງ​ໄດ້​ຕາມ​ຄວາມ​ຕ້ອງການ​ຂອງ​ພຶດຕິ​ກຳ; ​ແຜນ​ແມ່​ບົດ​ບັນດາ​ເຂດ​ຊາຍ​ຝັ່ງ ​ແລະ​ບາງ​ຂະ​ແໜງ​ການ, ຂົງ​ເຂດ​ ບໍ່​ໄດ້​ຕາມຄວາມ​ຕ້ອງການ; ຄວາມ​ສ່ຽງຍ້ອນ​ມົນ​ລະ​ພິດ​ທາງ​ທະ​ເລ, ​ເກາະທະ​ເລ​ຍັງ​ຄົງ​ໜັກໜ່ວງ; ການ​ປ່ຽນ​ແປງ​ສະພາບ​ອາກາດ, ນ້ຳ​ທະ​ເລ​ຍຶ່ງຂຶ້ນກຳລັງຜັນ​ປ່ຽນ​ຢ່າງ​ສັບສົນ ​ແລະ ສົ່ງ​ຜົນ​ກະທົບ​ທາ​ງລົບ​ນັບ​ມື້​ນັບ​ຈະ​ແຈ້ງ; ການ​ລົງທຶນ​ໃຫ້​ແກ່​ການ​ສືບສວນ​ພື້ນຖານ, ຄົ້ນຄວ້າ​ວິທະຍາສາດ-​ເຕັກ​ໂນ​ໂລ​ຊີ ​ແລະ​ພັດທະນາ​ຊັບພະຍາກອນ​ມະນຸດ ບໍ່​ຕອບສະໜອງ​ໄດ້​ຕາມ​ຄວາມ​ຕ້ອງການ; ການ​ຄຸ້ມຄອງ​ລັດ​ກ່ຽວ​ກັບ​ທະ​ເລ, ​ເກາະ​ທະ​ເລ ຍັງ​ງຸ່ມ​ງ່າມ, ປະສິດທິພາບ ປະສິດທິ​ຜົນ​ບໍ່​ສູງ. ​ແມ່ນ​ບໍ່​ວ່າ, ສາ​ເຫດ​ອັດຕະວິ​ໄສ​ແມ່ນ​ຍ້ອນການຈັດ​ຕັ້ງ​ປະຕິບັດ​ມະຕິ​ບໍ່​ດີ; ມີ​ຂໍ້​ບົກພ່ອງ​ໃນ​ການ​ກໍ່ສ້າງ ​ແລະ​ຈົດ​ຕັ້ງ​ປະຕິບັດ​ແຜນ​ແມ່​ບົດ, ​ແຜນການ​ລົງທຶນ​ພັດທະນາບັນດາ​ເຂດ​ເສດຖະກິດ, ທ່ອງ​ທ່ຽວ, ບໍລິການ​ທະ​ເລ ​ແລະ ຂະ​ແໜງ​ເສດຖະກິດ​ທະ​ເລ​ຈຳນວນ​ໜຶ່ງ, ​ເຊັ່ນ​ຕໍ່​ກຳ​ປັ່ນທະ​ເລ, ຂົນ​ສົ່ງ​ທາງ​ທະ​ເລ, ການ​ປະ​ມົງ​ໃນ​ເຂດ​ທະ​ເລ​ໄກ​ຈາກ​ຝັ່ງ...

ກ່ຽວ​ກັບ​ວຽກ​ງານ​ກໍ່ສ້າງ​ພັກ

​ໃນ​ກອງ​ປະຊຸມ​ຄັ້ງ​ນີ້, ກົມ​ການ​ເມືອງ​​ໄດ້​ສະ​ເໜີ​ໃຫ້ຄະນະ​ບໍລິຫານ​ງານ​ສູນ​ກາງພິຈາລະນາ, ຕັດສິນ​ຕົກລົງ​ບາງ​ບັນຫາ​ທີ່​ສຳຄັນດັ່ງ​ນີ້:

ທີ​ໜຶ່ງ, ພິຈາລະນາ, ຕົກລົງ​ການ​ປະກາດ​ໃຊ້ ຂໍ້​ກຳນົດ​ກ່ຽວ​ກັບ​ຄວາມ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານ, ສະມາຊິກ​ພັກ, ກ່ອນອື່ນແມ່ນກຳມະການກົມການເມືອງ, ກຳມະການຄະນະ​ເລຂາທິການ, ກຳ​ມະ​ການຄະນະ​ບໍລິຫານ​ງານ​ສູນ​ກາງພັກ. ດັ່ງ​ທີ່​ບັນດາ​ສະຫາຍຮູ້, ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ​ແລະ​ຄະນະ​ເລຂາທິການ ​ໄດ້​ມີ​ຫຼາຍ​ແຜນ​ນະ​ໂຍບາຍ, ຂໍ້​ກຳນົດ​ກ່ຽວ​ກັບ​ຄວາມ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານ ສະມາຊິກ​ພັກ, ຫຼ້າ​ສຸດ​ແມ່ນ ກົດ​ລະບຽບ​ສະບັບທີ 47-QĐ/TW, ວັນ​ທີ 1 ພະຈິກ 2011, ຂອງຄະນະ​ບໍລິຫານ​ງານ​ສູນ​ກາງພັກ​ສະ​ໄໝ​ທີ XI, “ກ່ຽວ​ກັບສິ່ງ​ທີ່​ສະມາຊິກ​ພັກ​ບໍ່​ໄດ້​ເຮັດ”; ຂໍ້​ກຳນົດ​ເລກທີ 101-QĐ/TW, ວັນ​ທີ 7 ມິຖຸນາ 2012, ຂອງ​ຄະນະ​ເລຂາທິການສະ​ໄໝ​ທີ XI, “ກ່ຽວ​ກັບ​ຄວາມ​ຮັບຜິດ​ຊອບ​ເປັນ​ແບບຢ່າງຂອງ​ພະນັກງານ, ສະມາຊິກ​ພັກ, ​ເປັນ​ຕົ້ນ​ແມ່ນ​ພະນັກງານ​ນຳພາ​ຫຼັກ​ແຫຼ່ງຂັ້ນ​ຕ່າງ​ໆ”; ຂໍ້​ກຳນົດ​ເລກທີ 55-QĐ/TW, ວັນ​ທີ 19 ທັນວາ 2016, ຂອງ​ກົມ​ການ​ເມືອງ​ສະ​ໄໝ​ທີ XII, “ກ່ຽວ​ກັບ​ບາງ​ວຽກ​ງານ​ທີ່​ຕ້ອງ​ເຮັດ​ໃນ​ທັນທີ ​ເພື່ອ​ເພີ່ມ​ທະວີ​ບົດບາດ​ເປັນ​ແບບຢ່າງ​ຂອງ​ພະນັກງານ, ສະມາ​ຊິກ​ພັກ” ​ແລະ​ເນື້ອ​ໃນ​ນີ້​ກໍ່​ໄດ້​ລະບຸ​ໃນ​ຫຼາຍ​ມະຕິ, ຄຳ​ສັ່ງ, ຂໍ້​ກຳນົດ​ອື່ນ​ຂອງ​ພັກ.

ອາ​ໃສ​ບັນດາ​ແຜນ​ນະ​ໂຍບາຍ, ຂໍ້​ກຳນົດ​ທີ່​ຖືກຕ້ອງ​​ແລະ​ທັນ​ການ​ນັ້ນ, ສະຕິ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານ, ສະມາຊິກ​ພັກ​ໄດ້​ຮັບ​ການ​ຍົກ​ສູງ​ຂຶ້ນ​ເທື່ອ​ລະ​ກ້າວ, ສ້າງ​ໃຫ້​ມີ​ການ​ຫັນປ່ຽນ​ຢ່າງ​ຕັ້ງໜ້າ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ​ແບບ​ແຜນ​ເຮັດ​ວຽກ; ສະຕິ​ຮູ້ສຶກ​ກ່ຽວ​ກັບການຈັດ​ຕັ້ງ ລະບຽບ​ວິ​ໄນ ​ແລະ​ຄວາມ​ສາມັກຄີ​ພາຍ​ໃນ. ການ​ປະຕິບັດ​ບັນດາ​ແຜນ​ນະ​ໂຍບາຍ, ຂໍ້​ກຳນົດ​ຂອງ​ພັກ ​ໄດ້​ປະກອບສ່ວນ​​ເພີ່ມ​ທະວີ​ລະບຽບ​ວິ​ໄນ​ຂອງ​ພັກ; ຍົກ​ສູງ​ຄວາມ​ສາມາດ​ນຳພາ ​ແລະ​ກຳລັງ​ແຮງ​ສູ້​ຮົບ​ຂອງອົງການ​ຈັດ​ຕັ້ງ​ພັກ ​ແລະ​ຂອງ​ສະມາຊິກ​ພັກ; ປະກອບສ່ວນ​ກີດ​ກັ້ນ​ແລະ​ຍູ້​ຖອຍ​ຄວາມ​ເສື່ອມ​ໂຊມ​ປ່ຽນ​ທາດ, ການ​ສໍ້​ລາດ​ບັງ​ຫຼວງ​ແລະ​ຄວາມ​ຫຍໍ້​ທໍ້, ປັບປຸງ​ຄວາມ​ເຊື່ອ​ຖື​ຂອງ​ພະນັກງານ, ສະມາຊິກ​ພັກ ​ແລະ​ປະຊາຊົນ​ຕໍ່​ການ​ນຳພາ​ຂອງ​ພັກ.

​ແຕ່​ວ່າ, ຜົນ​ທີ່​ໄດ້​ຮັບ​ຍັງ​ໜ້ອຍ, ບໍ່​ທັນບັນລຸ​ເປົ້າ​ໝາຍ ຄວາມ​ຕ້ອງການ​ທີ່​ວາງ​ໄວ້. ວຽງາ​ນນຳພາ, ຊີ້​ນຳ, ຈັດ​ຕັ້ງ​ການ​ຊາບ​ຊຶມ​ແລະຜັນ​ຂະຫຍາຍ​ປະຕິບັດ​ ຍັງ​ຖືກ​ຈຳກັດ, ປະສິດທິຜົນ​ບໍ່​ສູງ, ບໍ່​ທັນ​​ແຜ່​ລາມ​ກວ້າງຂວາງ. ພະນັກງານ ສະມາຊິກ​ພັກຫຼາຍ​ຄົນ, ​ໃນ​ນັ້ນ​ມີ​ພະນັກງານ​ການ​ນຳ​ຫຼັກ​ແຫຼ່ງ ບໍ່​ທັນ​ຮັບ​ຮູ້​ແຈ້ງຄວາມ​ຮັບຜິດຊອບ ​ແລະບໍ່​ທັນ​ເປັນ​​ແບບຢ່າງ​ໃນ​ການ​ຝຶກ​ຝົນ​ຫຼໍ່​ຫຼອມ, ຮັກສາ​ຄຸນ​ທາດ, ສິນ​ທຳ, ​ແບບ​ແຜນ​ດຳລົງ​ຊີວິດ, ​ແບບ​ແຜນ​ເຮັດ​ວຽກ, ມີ​ປະກົດ​ການ​ຫຍໍ້​ທໍ້​ຕ່າງໆ​ເຊັ່ນ ​ເວົ້າ​ບໍ່​ໄປ​ຄຽງ​ຄູ່​ກັບ​ເຮັດ, ​ເວົ້າ​ຫຼາຍ​ເຮັດ​ໜ້ອຍ, ມີ​ພະນັກງານ​ບາງ​ຄົນ​ພັດ​ສວຍໂອກາດ​ຫາ​ຜົນ​ປະ​ໂຫຍ​ດສ່ວນ​ຕົວ, ສໍ້​ລາດ​ບັງ​ຫຼວງ, ຟຸມ​ເຟືອຍ, ​ໂລບ​ມາກ​ໂລພາ; ມີ​ທັງ​ພະນັກງານ​ການ​ນຳ​ຊັ້ນ​ສູງ, ທີ່ກຳລັງ​ເຮັດ​ວຽກ​ແລະ​ອອກ​ກິນ​ເບ້ຍ​ບຳນານ​ແລ້ວ, ​ໄດ້​ລະ​ເມີດ​ຢ່າງ​ຮຸນ​ແຮງຕໍ່​ວິ​ໄນ​ຂອງ​ພັກ, ກົດໝາຍ​ຂອງ​ລັດ, ກໍ່​ໃຫ້​ເກີດ​ຫາງ​ສຽງ​ທີ່​ບໍ່​ດີ​ໃນ​ໝູ່​ພະນັກງານ, ສະມາຊິກ​ພັກ​ແລະ​ປະຊາຊົນ.

​ເພື່ອ​ແກ້​ໄຂ​ຜ່ານ​ຜ່າ​ສະພາບ​ການ​ດັ່ງກ່າວ​ເທິງ​ນີ້ ​ແລະສືບ​ຕໍ່​ຍູ້​ແຮງ​ການ​ເຊີດ​ຊູ​ຄວາມ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານສະມາຊິກ​ພັກ, ກ່ອນ​ອື່ນ​ແມ່ນ​ຂອງກຳມະການກົມ​ການ​ເມືອງ ກຳມະການຄະນະ​ເລຂາທິການ ​ແລະ ກຳມະການຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ​ໄດ້​ເປັນ​ເອກະ​ພາບ​ຢ່າງ​ສູງສະ​ເໜີ​ໃຫ້ຄະນະ​ບໍລິຫານ​ງານ​ສູນ​ກາງ ພິຈາລະນາ ​ແລະ ປະກາດ​ໃຊ້​ຂໍ້​ກຳນົດ​ໃໝ່​ສະບັບ​ໜຶ່ງ​ກ່ຽວ​ກັບ​ບັນຫາ​ນີ້. ​ເນື້ອ​ໃນ​ຂອງຂໍ້​ກຳນົດ​ຕ້ອງ​ລະ​ອຽດ, ​ເຂົ້າ​ໃຈ​ງ່າຍ, ຈື່​ຂຳ​ງ່າຍ ​ແລະ​ກວດກາ, ຕິດຕາມ​ກວດກາ​ງ່າຍ. ຮ່າງ​ຂໍ້​ກຳນົດ​ໄດ້​ຍົກ 9 ​ເນື້ອ​ໃນ​ທີ່​ຮຽກຮ້ອງ​ໃຫ້ກຳມະການກົມ​ການ​ເມືອງ​, ກຳມະການຄະນະ​ເລຂາທິການ, ກຳມະການ​ຄະນະ​ບໍລິຫານ​ງານ​ສູນ​ກາງ​ແຕ່​ລະສະ​ຫາຍຕ້ອງ​ເປັນ​ແບບຢ່າງ​ນຳ​ໜ້າປະຕິບັດ ​ແລະ 9 ​ເນື້ອ​ໃນ ຕ້ອງ​ເຂັ້ມ​ງວດກັບ​ຕົນເອງ ​ແລະ​ເດັດດ່ຽວ​ຕ້ານ.

ສະ​ເໜີ​ໃຫ້​ບັນດາ​ສະຫາຍ​ກຳມະການ​ສູນ​ກອງ ​ແລະ ບັນດາ​ຜູ້​ແທນ​ທີ່​ມາ​ຮ່ວມ​ກອງ​ປະຊຸມ ຈົ່ງ​ອີງ​ໃສ່​ບົດຮຽນ​ຂອງ​ຕົນ​ແລະພາກພຶກ​ຕິ​ກຳ​ທີ່​ອຸດົມສົມບູນຢູ່​ທ້ອງ​ຖິ່ນ, ສຳນັກງານ​ອົງການ, ກົມ​ກອງ​ທີ່​ຕົນ​ເຮັດ​ວຽກ ​ເພື່ອ​ປະກອບ​ຄວາມ​ຄິດ​ຄວາມ​ເຫັນ​ອັນ​ລະອຽດ ​ແທດ​ຈິງ ສາມາດ​ເປັນ​ໄປ​ໄດ້, ​​ແປງຮ່າງ​ຂໍ້​ກຳນົດໂດຍ​ກົງ​, ສ້າງ​ຄວາມ​ເປັນ​ເອກະ​ພາບ​ສູງ​ໃນ​ສູນ​ກາງ ​ແລະ ປະກາດ​ໃຊ້​ຂໍ້​ກຳນົດ​ໄດ້ ​ເພື່ອ​ຈະ​ຈັດ​ຕັ້ງ​ຜັນ​ຂະຫຍາຍ​ປະຕິບັດ.

ທີ​ສອງ, ຕົກລົງ​ສ້າງ​ຕັ້ງ​ບັນດາ​ຄະນະ​ອະນຸ​ກຳມະການກະກຽມ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ. ຕາມ​ກົດ​ທົ່ວ​ໄປ​ແລະ​ບົດຮຽນ​ໃນ​ການ​ກະກຽມບັນດາ​ກອງ​ປະຊຸມ​ໃຫຍ່ກ່ອນ​ໜ້າ​ນີ້, ​ໃນ​ທີ່​ກອງ​ປະຊຸມ​ນີ້, ກົມ​ການ​ເມືອງ​ສະ​ເໜີ​ຕໍ່​ສູນ​ກາງ​ກ່ຽວ​ກັບ​ຄາດໝາຍ​ສ້າງ​ຕັ້ງ 5 ຄະນະ​ອະນຸ​ກຳມະການ: ອະນຸ​ກຳມະການ​ເອກະສານ; ອະນຸ​ກຳມະການ​ເສດຖະກິດ-ສັງຄົມ; ອະນຸ​ກຳມະການກົດ​ລະບຽບ​ພັກ; ອະນຸ​ກຳມະການບຸກຄະລາ​ກອນ ​ແລະ ອະນຸ​ກຳມະການຈັດ​ຕັ້ງ​ຮັບ​ໃຊ້​ກອງ​ປະຊຸມ. ບັນດາ​ຄະນະອະນຸ​ກຳມະການມີໜ້າ​ທີ່​ກະກຽມລາຍ​ງານ 10 ປີແຫ່ງການປະຕິບັດໂຄງການການເມືອງ ກໍ່ສ້າງປະເທດໃນສະໄໝຂ້າມຜ່ານຂຶ້ນສູ່ບັດທິສັງຄົມນິຍົມ (ສະບັບ​ປັບປຸງ​ເພີ່ມ​ເຕີມ​ປີ 2011) ​ແລະ ລາຍ​ງານ​ການ​ເມືອງ; ລາຍ​ງານ​ສະຫຼຸບ​ສັງ​ລວມການ​ປະຕິບັດ​ຍຸດ​ທະ​ສາດ​ພັດທະນາ​ເສດຖະກິດ-ສັງຄົມ 10 ປີ ​ແລະ ລາຍ​ງານ​ເສດຖະກິດ-ສັງຄົມ 5 ປີ; ລາຍ​ງານ​ກ່ຽວ​ກັບ​ວຽກ​ງານ​ກໍ່ສ້າງ​ພັກ 5 ປີ ​ແລະ ລາຍ​ງານສະຫຼຸບ​ສັງ​ລວມການ​ປະຕິບັດ​ກົດ​ລະບຽບ​ພັກ ​ແລະ​ການປັບປຸງ, ​ເພີ່ມ​ເຕີມ​ກົດ​ລະບຽບ​ພັກ (ຖ້າ​ຫາກ​ມີ) ​ແລະ ລາຍ​ງານ​ວຽກ​ງານ​ບຸກຄະລາ​ກອນ. ຂໍ​ສະ​ເໜີ​ໃຫ້​ສູນ​ກາງ​ພິຈາລະນາ, ​ຕົກລົງການ​ສ້າງ​ຕັ້ງບັນດາ​ຄະນະອະນຸ​ກຳມະການ ທີ່​ມີ​ໂຄງ​ສ້າງ​ແລະ​ບຸກຄະລາ​ກອນ​ຄື​ໄດ້​ສະ​ເໜີ​ໃນ​ໃບ​ລາຍ​ງານ​ຂອງ​ກົມ​ການ​ເມືອງ.

ທີ​ສາມ, ກົມ​ການ​ເມືອ​ງຍື່ນ​ສະ​ເໜີ​ໃຫ້ສູນ​ກາງພິຈາລະນາ, ຕົກລົງ​ການ​ແນະນຳ​ບຸກຄະລາ​ກອນ​ໃຫ້​ສະພາ​ແຫ່ງ​ຊາດ​ເລືອກ​ຕັ້ງ​ປະທານ​ປະ​ເທດ; ​ເລືອກ​ຕັ້ງ​ເພີ່ມ​ເຕີມກຳມະການ​ຄະນະ​ກຳມະການ​ກວດກາ​ສູນ​ກາງ​ສະ​ໄໝ​ທີ XII; ​ແລະ​ພິຈາລະນາ, ຕົກລົງ​ການ​ປະຕິບັດ​ວິ​ໄນ​ຕໍ່​ພະນັກງານ​ຕາມກຳນົດ​ຂອງ​ພັກ.

ກອງ​ປະຊຸມ​ຂອງ​ພວກ​ເຮົາ​ໄດ້​ດຳ​ເນີນ​​​ໃນເວລາຖືກ​ຕາມ​ກາງ​ສະ​ໄໝ​ທີ XII. ປີ 2018 ​ແມ່ນ​ປີ​ບານ​ພັບທີ່​ມີ​ຄວາມ​ໝາຍ​ຕັດສິນ​ຕໍ່​ການປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ຢ່າງ​ສຳ​ເລັດ​ມີ​ໄຊ ​ແລະ​ເປັນ​ປີ​ເລີ່​ມຕົ້ນ​ຂອງ​ການ​ກະ​ກຽມ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ. ​ເນື້ອ​ໃນ​ຂອງ​ກອງ​ປະຊຸມ​ຄັ້ງ​ນີ້ກວມ​ດ້ວຍ​ຫຼາຍ​ບັນຫາ​ທີ່​ສຳຄັນ, ພົວພັນ​ໂດຍ​ກົງ​​ເຖິງການ​ນຳພາ ຊີ້​ນຳປະຕິບັດຢ່າງ​ສຳ​ເລັດ​ຜົນ ​ເປົ້າໝາຍ, ໜ້າ​ທີ່​ພັດທະນາ​​ເສດຖະກິດ-ສັງຄົມ, ການ​ກໍ່ສ້າງ​ພັກ​ໃຫ້​ສະອາດ​ປອດ​ໃສ, ໝັ້ນ​ຄົມ​ເຂັ້ມ​ແຂງ ຕາມ​ທີ່​ກອງ​ປະຊຸມ​ໃຫຍ່​ຄັ້ງ​ທີ XII ​ໄດ້​ວາງ​ອອກ​ມາ ​ແລະ ກະກຽມ​ໃຫ້​ແກ່​ການຈັດ​ຕັ້ງ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ​ຢ່າງ​ສຳ​ເລັດຜົນ.

ຂໍ​ສະ​ເໜີ​ໃຫ້​ສູນ​ກາງ​ເສີມ​ຂະຫຍາຍ​ສຸດ​ຂີດ​ຄວາມ​ຮັບຜິດຊອບ, ສຸມ​ໃສ່​ຄົ້ນຄວ້າ, ປຶກສາ​ສົນທະນາ​ຢ່າງ​ຟົດ​ຟື້ນ, ປະກອບ​ຄວາມ​ເຫັນ​ເພື່ອ​ປັບປຸງ​ບູລະນະ​ບັນດາ​ລາຍ​ງານ, ​ໂຄງການ, ຮ່າງ​ມະຕິ​ ບົດ​ສະຫຼຸບ​ຕ່າງໆ​ຂອງ​ສູນ​ກາງ ​ແລະ ພິຈາລະນາ, ຕົກລົງ​ໃນ​ວາລະ​ທ້າຍ​ກອງ​ປະຊຸມ.

ດ້ວຍ​ຈິດ​ໃຈ​ດັ່ງກ່າວ, ຂ້າພະ​ເຈົ້າ​ຂໍ​ປະກາດ​ເປີດກອງ​ປະຊຸມ​ຄັ້ງ​ທີ 8 ຄະນະ​ບໍລິຫານ​ງານ​ສູນ​ກາງພັກ​ສະ​ໄໝ​ທີ XII./.

-----------------

* ຫົວ​ຂໍ້​ໂດຍ​ວາລະສານ​ກອມ​ມູນິດ​ເປັນ​ຜູ້​ແຕ່ງ.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ