ວັນອັງຄານ, 21/5/2019
ສະຫຼຸບສັງລວມພຶດຕິກຳຮັບໃຊ້ໃຫ້ແກ່ ການຄົ້ນຄວ້າທິດສະດີຂອງພັກ - ສະຖານະການ ແລະ ບັນຫາໃນປະຈຸບັນ
23/2/2019 18:3' ສົ່ງ ພິມ
ພາບປະກອບ (ພາບ: TTXVN)

ການ​ປ່ຽນ​ແປງ​ໃໝ່​ແມ່ນ​ພາລະກິດທີ່​ບໍ່​ມີ​ແບບ​ຢ່າງ ​ແລະ ບໍ່​ເຄີຍ​ມີ​ມາ​ກ່ອນ, ພັກ​ຕ້ອງ​ທັງ​ເຮັດ​ທັງ​ສະຫຼຸບ​ສັງ​ລວມບົດຮຽນ ​ເພື່ອ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ​ຢ່າງ​ບໍ່​ຢຸດ​ຢັ້ງ. ​ເພາະສະ​ນັ້ນ, ການສະຫຼຸບ​ສັງ​ລວມພຶດ​ຕິ​ກຳມີ​ຄວາມ​ສຳຄັນ​ພິ​ເສດ​ໃນ​ການ​ເຄື່ອນ​ໄຫວ​ຄົ້ນຄວ້າ​ທິດ​ສະ​ດີ​ຂອງ​ພັກ. ໜ້າ​ທີ່ສະຫຼຸບ​ສັງ​ລວມພຶດ​ຕິ​ກຳ​​ເລີ່​ມຈາກ​ບົດຮຽນ​ໃຫຍ່​ທີ່​ກອງ​ປະຊຸມ​ໃຫຍ່​ຄັ້ງ​ທີ VI ຂອງ​ພັກ (​ເດືອນ 12-1986) ​ໄດ້​ສະຫຼຸບນັ້ນ​ຄື ພັກ​ຕ້ອງ​ກະທຳ​ຕາມ​ກົດ​ເກນ​ພາວະ​ວິ​ໄສ, ​ເລີ່​ມຈາກ​ພຶດຕິ​ກຳ​ເພື່ອ​ສ້າງ​ແນວທາງ ​ແລະ ພັດທະນາ​ທິດ​ສະ​ດີ. ບັນດາ​ກອງ​ປະຊຸມ​ໃຫຍ່​ຂອງ​ພັກກໍ​ລ້ວນ​ແຕ່​ເນັ້ນ​ໜັກ​ເຖິງ​ຄວາມ​ຕ້ອງການສະຫຼຸບ​ສັງ​ລວມພຶດ​ຕິ​ກຳ​ ເພື່ອ​ເພີ່ມ​ເຕີມ​ແລະ​ພັດທະນາ​ແນວທາງ, ​ແຜນ​ນະ​ໂຍບາຍ, ນະ​ໂຍບາຍ, ພິ​ເສດ​ແມ່ນ​ສະຫຼຸບ​ສັງ​ລວມບັນດາ​ຮູບ​ແບບ​ໃໝ່, ວິທີ​ເຮັດ​ທີ່​ປະດິດ​ສ້າງ​ຂອງ​ທ້ອງ​ຖິ່ນ​ແລະ​ຮາກ​ຖານ ​ເພື່ອຂະຫຍາຍ​ກວ້າງ​ອອກ; ສະຫຼຸບ​ສັງ​ລວມບົດຮຽນ​ຂອງ​ໂລກ​ເພື່ອ​ໃຫ້​ຫວຽດນາມ​ບໍ່​ຕ້ອງ​ຜ່ານ​ຂັ້ນ​ຕອນງົມຫາ​ທາງ​, ປະຕິບັດ​ການ​ພັດທະນາ​ແບບ​ຫຍໍ້​ສັ້ນ. ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ຈັດ​ການ​ເຄື່ອນ​ໄຫ​ວສະຫຼຸບ​ສັງ​ລວມພຶດ​ຕິ​ກຳ​​ເຂົ້າ​ໃນ​ທີ່​ຕັ້ງ​ທຳ​ອິດ​ໃນວົງ​ຈອນ​ຂອງວຽກ​ງານ​ທິດ​ສະ​ດີ - ສະຫຼຸບ​ສັງ​ລວມພຶດ​ຕິ​ກຳ​, ຄົ້ນຄວ້າ​ວິທະຍາສາດ, ພັດທະນາ​ທິດ​ສະ​ດີ​ຂອງ​ພັກ.

ການສະຫຼຸບ​ສັງ​ລວມພຶດ​ຕິ​ກຳ​ແມ່ນ​ໜ້າ​ທີ່​ທີ່​ຫຍຸ້ງຍາກ, ສັບສົນ, ພ້ອມ​ນັ້ນ​ກໍ​ເປັນຄວາມ​ຮັບຜິດຊອບ​ຂອງ​ທຸກ​ອົງການ​ຈັດ​ຕັ້ງ​ພັກ ​ແລະ ສະມາຊິກ​ພັກ​ທຸກ​ຄົນ, ກ່ອນ​ອື່ນ​ແມ່ນ​ຂອງ​ຜູ້​ເຮັກ​ວຽກ​ງານ​ຄົ້ນຄວ້າ​ທິດ​ສະ​ດີ​ຫຼັກ​ແຫຼ່ງ - ມື​ອາຊີບ​ທຸກ​ຄົນ. ການສະຫຼຸບ​ສັງ​ລວມພຶດ​ຕິ​ກຳຂອງ​ທຸກ​ອົງການ​ຈັດ​ຕັ້ງ​ພັກ​ໃນ​ແຕ່ລະ​ຂັ້ນ ຈະ​ຊ່ວຍ​ໃຫ້​ຖອດ​ຖອນ​ເອົາ​ບົດຮຽນ ​ແລະວິທີ​ເຮັດ​ທີ່​ດີ​ຈາກ “ຈຸດ” ​ເພື່ອ​ຄູນ​ຂຶ້ນເປັນ “ດ້ານ”; ຊ່ວຍ​ຊອກ​ຫາຄົ້ນ​ເຜີຍ​ແບບຢ່າງ​ທີ່​ດີ​ເດັ່ນ ​ເພື່ອສຶກສາ​ອົບຮົມ, ຍົກ​ເປັນຕົວຢ່າງ​ໃຫ້ສະມາຊິກ​ພັກ​ແລະ​ມະຫາຊົນ​ເຮັດ​ຕາມ; ພິຈາລະນາ​ບົດຮຽນ ​ແລະວິທີ​ເຮັດ​ທີ່​ດີ​ ຂອງໜ່ວຍງານ​ອົງການ​ອື່ນ ​ເພື່ອ​ໝູນ​ໃຊ້​ໃຫ້​ສອດຄ່ອງ​​ເຂົ້າກັບທ້ອງ​ຖິ່ນ, ກົມ​ກອງ​ຕົນ​ເອງ. ການສະຫຼຸບ​ສັງ​ລວມພຶດ​ຕິ​ກຳ​ຮັບ​ໃຊ້​ໃຫ້​ແກ່​ການ​ຄົ້ນຄວ້າ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ ​ແມ່ນ​ໜ້າ​ທີ່​ຂອງ​ສູນ​ກາງ​ພັກ, ​ໄດ້​ຮັບ​ການ​ປະ​ຕິ​ບັດຢ່າງ​ມື​ອາຊີບ ​ໂດຍ​ຜ່ານ​ບັນດາ​ວິທີການ, ​ເຄື່ອງມື ​ແລະ​ຂະ​ບວນການ​ພິ​ເສດ, ​ເພື່ອ​ສ້າງ​ແລະ​ພັດທະນາ​ແນວທາງ, ​ແຜນ​ນະ​ໂຍບາຍມະຫາ​ພາກ ​ແລະ ປະດິດສ້າງ​ທິດ​ສະ​ດີ​ຢ່າງ​ບໍ່​ຢຸດ​ຢັ້ງ.

ຄວາມ​ຮູ້​ທົ່ວ​ໄປ​ກ່ຽວກັບ​ການສະຫຼຸບ​ສັງ​ລວມພຶດ​ຕິ​ກຳຮັບ​ໃຊ້​ໃຫ້​ແກ່ການ​ຄົ້ນຄວ້າ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ​ກ່ຽວກັບ​ການ​ປ່ຽນ​ແປງ​ໃໝ່​ຂອງ​ພັກ

1- ບົດບາດ​ຂອງການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ​ໃນ​ການ​ຄົ້ນຄວ້າ​ທິດ​ສະ​ດີ

ຄວາມ​ສຳຄັນ​ພິ​ເສດ​ຂອງ​ພຶດຕິ​ກຳ​ໃນ​ວຽກ​ງານ​ທິດ​ສະ​ດີ​ຂອງ​ພັກນັ້ນ ມັນ​ເລີ່​ມຈາກ​ກະ​ໂຕບົດບາດ​ຂອງ​ພຶດຕິ​ກຳທີ່​ເປັນພື້ນຖານ, ແຮງຊຸກດັນ, ຈຸດປະສົງ ແລະ ມາດຕະຖານ ຂອງ​ທິດ​ສະ​ດີ; ຈາກຈຸດ​ພິ​ເສດ​ຂອງ​ກິດຈະການ​ກໍ່ສ້າງ​ສັງຄົມ​ນິຍົມຢູ່​ຫວຽດນາມ, ​ແມ່ນ​ການ​ກໍ່ສ້າງ​ລະບອບ​ສັງຄົມ​ໜຶ່ງ​ທີ່​ໃໝ່​ອ່ຽມ ບໍ່​ເຄີຍ​ມີ​ມາ​ກ່ອນ, ຕ້ອງ​ທັງເຮັດ​ທັງ​​ສະຫຼຸບ​ສັງ​ລວມບົດຮຽນ ​ເພື່ອ​ປະ​ດິິດສ້າງ​ທິດ​ສະ​ດີ.

ພຶດຕິ​ກຳ​​ແມ່ນ​ພື້ນຖານ​ຂອງ​ທິດ​ສະ​ດີ, ​ເພາະວ່າ​ ຄວາມ​ຮູ້​ທັງ​ໝົດທີ່​​ເກີດຂຶ້ນໂດຍ​ກົງຫຼື​ໂດຍ​ທາງ​ອ້ອມນັ້ນ ​ແມ່ນ​ມາ​ຈາກຄວາມ​ເປັນຈິງ​ພຶດຕິ​ກຳ. ພຶດຕິ​ກຳ​ແມ່ນ​ແຮງ​ຊຸກ​ດັນ​ຂອງ​ທິດ​ສະ​ດີ, ​ເພາະວ່າ ການ​ເຄື່ອນ​ໄຫວ​ພຶດຕິ​ກຳ​ເຮັດ​ໃຫ້​ໂລກ​ປ່ຽນ​ແປງ​ໄປ, ​ເຮັດ​ໃຫ້​ຜູ້ຄົນ​ມີ​ການ​ປ່ຽນ​ແປງ​ຕົວ​ເອງ, ​ເຮັດ​ໃຫ້​ຄວາມ​ສາມາດ​ຂອງ​ມະນຸດ​ນັບ​ມື້​ນັບ​ສົມບູນ​ແບບ, ​ໃນ​ນັ້ນ​ມີ​ຄວາມ​ສາມາດ​ຮັບ​ຮູ້. ​ພຶດຕິ​ກຳຍາມ​ໃດ​ກໍ່​ວາງ​ຄວາມ​ຕ້ອງການ, ໜ້າ​ທີ່ ​ແລະ ທິດ​ທາງການພັດທະນາ​ຄວາມ​ຮັບ​ຮູ້, ຮຽກຮ້ອງ​ຕ້ອງມີ​ຄວາມ​ຮູ້​ໃໝ່, ​ໂດຍ​ສະ​ເພາ​ແມ່ນ​ຄວາມ​ຮູ້​ທີ່​ສັງ​ລວມ​ເປັນ​ທິດ​ສະ​ດີ ​ເພື່ອກັບ​ຄືນ​ມາ​ຊີ້​ນຳ​ພຶດຕິ​ກຳ. ພຶດຕິ​ກຳ​ແມ່ນ​ຈຸດປະສົງ​ຂອງ​ທິດ​ສະ​ດີ, ​ເພາະວ່າ ທິດ​ສະ​ດີ​ບໍ່​ພຽງ​ແຕ່​ແນ​ໃສ່​ອະທິບາຍ​ໂລກ, ຕອບ​ສະໜອງ​ຄວາມ​ຕ້ອງການ​ຮັບ​ຮູ້​ຂອງ​ມະນຸດ​ເທົ່າ​ນັ້ນ ຫານ​ພື້ນຖານ​ກວ່າ​ນັ້ນ​ແມ່ນ ​ເພື່ອ​ຊີ້​ນຳ​ພຶດຕິ​ກຳ ​ແລະດັດ​ສ້າງ​ໂລກ. ພຶດຕິ​ກຳ​ແມ່ນ​ຈຸດ​ເລີ່​ມຕົ້ນ​ຂອງ​ທິດ​ສະ​ດີ ​ແລະ​ກໍ​​ແມ່ນຈຸດໝາຍ​ປາຍທາງ​ແຫ່ງ​ການ​ກັບ​ຄືນ​ມາ​ຂອງ​ທິດ​ສະ​ດີ, ເປັນສະຖານທີ່ທີ່ຈະທົດສອບລັກສະນະສັດຈະທຳຂອງທິດສະດີ. ປະທານ​ໂຮ່ຈີ​ມິນ​ອະທິບາຍ​ວ່າ: “ຄວາມ​ເຂົ້າ​ໃຈ​ມາ​ຈາກ​ການ​ປະຕິບັດ. ຄວາມຮູ້​ຜ່ານ​ການ​ປະຕິບັດ​ອີກ​ເທື່ອ​ຈຶ່ງ​ກາຍ​ເປັນ​ທິດ​ສະ​ດີ. ທິດ​ສະ​ດີ​ນັ້ນຈະ​ຕ້ອງ​ໃຊ້​ໃນ​ການ​ປະຕິບັດ”(1). ຈາກ​ນັ້ນ ​ເພິ່ນ​ໄດ້​ສະຫຼຸບ: “ການ​ປະຕິບັດ​ສ້າງ​ຄວາມ​​ເຂົ້າ​ໃຈ. ຄວາມ​ເຂົ້າ​ໃຈ​ກ້າວ​ໄປ​ສູ່​ທິດ​ສະ​ດີ. ທິດ​ສະ​ດີ​ນຳພາ​ການ​ປະຕິບັດ”(2). ພຶດຕິ​ກຳ​ເປັນ​ມາດຕະຖານການ​ປະ​ເມີນ​ຄວາມ​ຖືກ, ຄວາມ​ຜິດ​ຂອງ​ທິດ​ສະ​ດີ. ຄວາມ​ຮູ້​ຂອງ​ມະນຸດ​ເປັນ​ຜົນ​ມາ​ຈາກຂະ​ບວນວິວັດ​ການ​ຮັບ​ຮູ້. ຄວາມ​ຮູ້​ດັ່ງກ່າວ​ອາດ​ຈະ​ສ່ອງ​ແສງຄວາມ​ເປັນ​ຈິງ​ພາວະ​ວິ​ໄສ​ຢ່າງ​ຖືກຕ້ອງ ​ຫຼື​ບໍ່​ຖືກຕ້ອງ. ມີ​ພຽງ​ພຶດຕິ​ກຳ​ເທົ່າ​ນັ້ນ​ຈຶ່ງ​ເປັນ​ມາດຕະຖານ​ພາວະ​ວິ​ໄສ​ໜຶ່ງ​ດຽວ ​ເພື່ອ​ຢືນຢັນ​ສັດຈະທຳ, ປະຕິ​ເສດ​ຄວາມ​ຜິດພາດ. ດັ່ງ​ນັ້ນ, ​ໃນ​ບົດ​ພິນິດ​ກ່ຽວ​ກັບ ຟອຍ​ແບັກ ທ່ານ ກ.ມາກ ​ໄດ້​ຢືນຢັນ: “ບັນຫາ​ຊອກ​ຮູ້​ເບິ່ງ​ວ່າ​ຈິນຕະນາການ​ຂອງ​ມະນຸດ​ຈະ​ສາມາດ​ບັນລຸ​ເຖິງ​ສັດຈະທຳ​ພາວະ​ວິ​ໄສ​ຫຼື​ບໍ່​ນັ້ນ, ມັນ​ບໍ່​ແມ່ນ​ບັນຫາ​ທິດ​ສະ​ດີ​ແຕ່​ຢ່າງ​ໃດ​ເລີຍ ຫາກ​ມັນ​ແມ່ນ​ບັນຫາພຶດຕິ​ກຳ. ​ໃນ​ກະ​ໂຕ​ພຶດຕິ​ກຳ​ນັ້ນ​ເອງ ມະນຸດ​ຕ້ອງພິສູດ​ສັດຈະທຳ, ໝາຍ​ຄວາມ​ວ່າ ພິສູດ​ຄວາມ​ຈິງ​ແລະ​ກຳລັງ​ແຮງ, ​ໂລກີ​ຍະແຫ່ງ​ຈິນຕະນາການ​ຂອງ​ຕົນ. ການ​ໂຕ້​ຖຽງ​ກ່ຽວ​ກັບ​ຄວາມ​ເປັນ​ຈິງ​ຫຼື​ບໍ່​ແມ່ນ​ຄວາມ​ຈິງຂອງ​ຈິນຕະນາການ​ທີ່​ແຍກ​ອອກ​ຈາກ​ພຶດຕິ​ກຳ​ນັ້ນ, ​ແມ່ນ​ບັນຫາທາງ​ວິຊາ​ການ ດຽວ​ລ້ວນ”(3). ​ເພາະສະ​ນັ້ນ, ຄວາມ​ເປັນ​ເອກະ​ພາບ​ລະຫວ່າງ​ທິດ​ສະ​ດີ​ແລະ​ພຶດຕິ​ກຳ​ ແມ່ນ​ຫຼັກການ​​ໜຶ່ງທີ່​ສຳຄັນ​ ໃນ​ທິດ​ສະ​ດີກ່ຽວ​ກັບ​ການ​ຮັບ​ຮູ້​ຂອງ​ລັດທິ ມາກ-​ເລ​ນິນ, ມັນ​ມີ​ຄຸນຄ່າທີ່​ໃຫຍ່​ຫຼວງ​ໃນ​ການ​ຊີ້​ນຳວຽກ​ງານ​ຄົ້ນຄວ້າ​ທິດ​ສະ​ດີ​ ແລະ ສະຫຼຸບ​ສັງ​ລວມພຶດ​ຕິ​ກຳ​. ຫ່າງ​​ເຫີ​ນ​ຈາກ​ຫຼັກການ​ນີ້ ທິດ​ສະ​ດີ​ຈະ​ຕົກ​ໃສ່ລັດທິ​ຄຳ​ພີຕາ​ຍຕົວ, ຂາດ​ພະລັງ​ຊີວິດ, ບໍ່​ມີ​ຄວາມ​ສາມາດ​ພຽງພໍ​ເພື່ອ​ຊີ້​ນຳ​ພຶດຕິ​ກຳ; ການ​ເຄື່ອນ​ໄຫວ​ພຶດຕິ​ກຳ​ກໍ​ຈະຕົກ​​ເຂົ້າ​ໄປ​ໃນ​ບວກ​ຕົມຂອງລັດທິ​​ປະສົບ​ການນິຍົມ ຫຼື ລັດທິ​ຄຳ​ພີທາງ​ປະຕິບັດ. ​ໃນ​ຄວາມ​ໝາຍ​ນັ້ນ, ວ.ອີ.​ເລ​ນິນ ຊີ້​ແຈ້ງ: “​ເພື່ອ​ເຂົ້າ​ໃຈ, ທ່ານ​ຕ້ອງ​ເລີ່​ມຮຽນ​ຮູ້, ຄົ້ນຄວ້າ​ຈາກ​ປະສົບ​ການ, ຈາກ​ປະສົບ​ການ​ໄປ​ສູ່​ອັນ​ທົ່ວ​ໄປ”(4).

ທິດ​ສະ​ດີ​ສ່ອງ​ແສງ​ຄວາມ​ເປັນ​ຈິງ​ພາວະ​ວິ​​ໄສ, ​ແຕ່​ບໍ່​ສ່ອງ​ແສງ​ແບບງ່າຍດາຍ, ​ກົນ​ຈັກ​ຕາຍ​ຕົວ, ຊຶ່ງ​ສ່ອງ​ແສງ​ໃນ​ລະດັບ​ສູງ​ຂອງ​ຄວາມ​ຮັບ​ຮູ້​ໂດຍ​ຜ່ານນາ​ມະ​ທຳ​ພາວະ​ວັດຖຸ. ການ​ສ່ອງ​ແສງ​ຂອງ​ທິດ​ສະ​ດີ​ແມ່ນ​ສ່ອງ​ແສງ​ທາງ​ອ້ອມ, ​ເຈົ້າພາບ​ການ​ຮັບ​ຮູ້​ຕ້ອງ​ຜ່ານບັນດາ​ວິທີ​ວິທະຍາສາດ​ທີ່​ເຂັ້ມ​ງວດ​ຈຶ່ງ​ສາມາດ​ຮັບ​ຮູ້​ເຖິງ​ຄວາມ​ເປັນ​ຈິງ​​ໄດ້ຢ່າງ​ຖືກຕ້ອງ, ຊຶ່ງ​ຢູ່​ນັ້ນ ການ​ສະຫຼຸບ​ສັງ​ລວມພຶດຕິ​ກຳ​ມີ​ທີ່​ຕັ້ງ​ສຳຄັນ​ເປັນ​ພິ​ເສດ. ສະຫຼຸບ​ສັງ​ລວມພຶດ​ຕິ​ກຳ​ແມ່ນ​ວິທີ​ພື້ນຖານ​ໃນ​ການ​ເຄື່ອນ​ໄຫວ​ທິດ​ສະດີ, ແມ່ນວິທີພື້ນຖານເພື່ອເອົາຊະນະລັດທິຄຳພີນິຍົມ ແລະ ລັດທິບົດຮຽນນິຍົມ, ເພື່ອປະຕິບັດຄວາມເປັນເອກະພາບລະຫວ່າງທິດສະດີ ແລະ ພຶດຕິກຳ ເພື່ອສະຫຼຸບ ສັງເຂບ. ເມືອ່ພິຈາລະນະຈົນສຸດ, ທິດສະດີແມ່ນໄດ້ສະຫຼຸບ ສັງເຂບຈາກພຶດຕິກຳ. ບໍ່ມີພຶດຕິກຳ ແລະ ບົດຮຽນປະສົບການກໍຈະບໍ່ມີທິດສະດີ" (5). ການກໍ່ສ້າງ​ສັງຄົມ​ນິຍົມ ​ແມ່ນ​ການ​ກໍ່ສ້າງ​ສັງຄົມໜຶ່ງ​ທີ່​ໃໝ່​ອ່ຽມ, ​ບໍ່​ມີ​ແບບຢ່າງ​ໃນ​ປະຫວັດສາດ​ຂອງ​ຊາດ. ​ເພື່ອ​ບໍ່​ຖືກ​ຕົກ​ໃສ່​ຄວາມ​ອັດຕະວິ​ໄສ​ເຈດ​ຈຳນົງ​ນິຍົມ, ແນວທາງ ​ແຜນ​ນະ​ໂຍບາຍ ນະ​ໂຍບາຍ ຕ້ອງ​ສອດຄ່ອງ​ກັບຄວາມ​ເປັນ​ຈິງ​ຂອງ​ປະ​ເທດ ​ແລະ ທ່າ​ອຽງ​ຂອງ​ຍຸກ​ສະ​ໄໝ, ຕ້ອງ​ໃຫ້​ຄວາມ​ສຳຄັນ​ແກ່​ການສະຫຼຸບ​ສັງ​ລວມພຶດ​ຕິ​ກຳຢູ່​ສະ​ເໝີ ​ເພື່ອ​ປັບປຸງເພີ່ມ​ເຕີມ​ແລະ​ພັດທະນາ​ທິດ​ສະ​ດີ. ດ້ວຍ​ເຫດ​ນັ້ນ, ການ​ຄົ້ນຄວ້າ​ທິດ​ສະ​ດີ​ຕາມ​ຄວາມ​ໝາຍ​ກວ້າງ​ແນ່ນອນຕ້ອງ​ກວມ​ທັງ​ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ​. ນັ້ນ​ແມ່ນ​ໜ້າ​ທີ່​ທີ່​ຫຍຸ້ງຍາກ​ແລະ​ໜັກໜ່ວງ​ທີ່​ສຸດ, ມັນ​ຮຽກຮ້ອງ​ການ​ລົງທຶນ​ຢ່າງ​ເໝາະ​ສົມ​ທາງ​ດ້ານ​ແຫຼ່ງພະລັງ ​ແລະ ​ຜູ້ດຳ​ເນີນ​ງານຕ້ອງ​ມີ​ຄຸນ​ນະພາ​ບ, ຄຸນສົມບັດ ​ແລະ ວິທີ​ການສະ​ເພາະ.

ການ​ຄົ້ນຄວ້າ​ທິດ​ສະ​ດີ​ຕາມ​ຄວາມ​ໝາຍ​ກວ້າງ​ ແມ່ນ​ກວມ​ດ້ວຍ​ການ​ຄົ້ນຄວ້າ​ທິດ​ສະ​ດີ​ພື້ນຖານ, ການ​ຄົ້ນຄວ້າ​ທິດ​ສະ​ດີ​ການ​ເມື​ອງ, ການ​ຄົ້ນຄວ້າ​ທິດ​ສະ​ດີ​ສະ​ເພາ​ຂະ​ແໜງ, ການ​ຄົ້ນຄວ້າ​ວິທະຍາສາດ ​ແລະ ການສະຫຼຸບ​ສັງ​ລວມພຶດ​ຕິ​ກຳ​. ການ​ຄົ້ນຄວ້າ​ທິດ​ສະ​ດີ​ພື້ນຖານ ມີ​ເປົ້າ​ໝາຍສະ​ເພາະຄື ລັດທິ​ມາກ-​ເລ​ນິນ, ​ແນວ​ຄິດ​ໂຮ່ຈີ​ມິນ. ບໍ່​ແມນ​ຄວາມ​ຮູ້, ທັດສະນະ​ທັງ​ໝົດ​ຂອງ ກ.ມາກ, ຟ.ອັງ​ແກນ, ວ.ອີ.​ເລ​ນິນ, ​ໂຮ່ຈີ​ມິນ ລ້ວນ​ແຕ່​ແມ່ນ​ເປົ້າໝາຍ​ຂອງການ​ຄົ້ນຄວ້າ​ທິດ​ສະ​ດີ​ພື້ນຖານ, ​ແຕ່​ມີພຽງພາກສ່ວນ​ທີ່​ສຳຄັນ​ທີ່​ສຸດ, ສັງ​ເຂບທີ່​ສຸດ ພາຍ​ໃຕ້​ຮູບ​ການ​ບັນດາ​ມູນ​ຫຼັກ, ມາດຕະ​ເກນ, ຄວາມ​ສຳນຶກ, ທັດສະນະ, ຂໍ້​ພິນິດ, ຄວາມ​ຮູ້,... ທີ່​ເປັນ​ພື້ນຖານ​ຂອງ​ແນວ​ຄິດ, ​ເຂັມທິດຊີ້​ນຳ​ການ​ເຄື່ອນ​ໄຫວຂອງ​ພັກ​ກອມ​ມູນິດ​ຫວຽດນາມ. ການ​ຄົ້ນຄວ້າ​ທິດ​ສະ​ດີ​ການ​ເມືອງ ​ແມ່ນ​ຄົ້ນຄວ້າ​ກ່ຽວ​ກັບລັດທິສັງຄົມ​ນິຍົມ ​ແລະ ​ເສັ້ນທາງກ້າວ​ຂຶ້ນຢູ່​ຫວຽດນາມ - ໝາກຜົນ​ຂອງ​ການ​ໝູນ​ໃຊ້, ພັດທະນາ​ຢ່າງ​ປະດິດ​ສ້າງ​ລັດທິ ມາກ-​ເລ​ນິນ ​ໃນ​ເງື່ອນ​ໄຂ​ຕົວ​ຈິງ​ຂອງ​ການ​ປະຕິວັດ​ຫວຽດນາມ, ​ແມ່ນ​ຜົນງານ​ແຫ່ງ​ການ​ປະດິດ​ສ້າງ​ທິດ​ສະ​ດີ​ຂອງ​ພັກ ຢູ່​ໃນ​ດິນ​ແດນຕົວ​ຈິງ​ຂອງ​ປະ​ເທດ​ຫວຽດນາມ. ການ​ຄົ້ນຄວ້າ​ວິທະຍາສາດ ມີ​ຂອບ​ເຂດ​ກວ້າງ​ທີ່​ສຸດ, ຂຶ້ນ​ກັບ​ໜ້າ​ທີ່​ຂອງ​ຫຼາຍ​ຂະ​ແໜງວິທະຍາສາດ​ທີ່​ຕ່າງ​ກັນ​ເຊັ່ນ ວິທະຍາສາດ​ທຳ​ມະ​ຊາດ, ວິທະຍາສາດ​ເຕັກ​ໂນ​ໂລ​ຊີ, ວິທະຍາສາດ​ສັງຄົມ ​ແລະ ວິທະຍາສາດມະນຸດ​ສາດ. ​ແຕ່​ລະບາດ​ກ້າວ​ຄືບ​ໜ້າ​ຂອງ​ວິທະຍາສາດມີ​ຄວາມ​ໝາຍ​ໂດຍ​ກົງ​ສຳລັບການ​ພັດທະນາທິດ​ສະ​ດີ​ສະ​ເພາະ​ຂະ​ແໜງ, ມີ​ຄຸນຄ່າ​ຊີ້​ນຳ​ຕໍ່​ແຕ່ລະສາຂາ​ວິຊາ​ສະ​ເພາະ (ເສດຖະສາດ, ການ​ເມືອງ, ວັດທະນະທຳ, ສັງຄົມ, ການ​ປ້ອງ​ກັນຊາ​ດ, ການ​ປ້ອງ​ກັນ​ຄວາມ​ສະຫງົບ, ການ​ຕ່າງປະ​ເທດ, ສິ່ງ​ແວດ​ລ້ອມ...), ສະໜອງ​ຄວາມ​ຮູ້​ທາງ​ອ້ອມ​ໃຫ້​ແກ່​ການ​ເພີ່ມ​ເຕີມ ​ແລະ​ພັດທະນາ​ທິດ​ສະ​ດີ. ວຽກ​ງານ​ທິດ​ສະ​ດີ​ບໍ່​ກວມ​ລວມຜົນງານ​ການ​ຄົ້ນຄວ້າ​ວິທະຍາສາດທັງ​ໝົດ ​ແຕ່​ພຽງ​ແຕ່​ກັ່ນ​ຕອງ, ລວບ​ລວມ, ​ເຊື່ອນ​ຕໍ່​ບັນດາ​ຄວາມ​ຮູ້​ທີ່​ມີ​ຄຸນຄ່າ​ເພີ່ມ​ເຕີມ, ພັດທະນາ​ລັດທິ ​ມາກ-​ເລ​ນິນ, ​ແນວ​ຄິດ​ໂຮ່ຈີ​ມິນ ​ແນ​ໃສ່​ບູລະນະຮູບ​ແບບສັງຄົມ​ນິຍົມ ​ແລະ ​ເສັ້ນທາງ​ຂຶ້ນ​ສູ່ສັງຄົມ​ນິຍົມຢູ່​ຫວຽດນາມ​ໃຫ້​ສົມບູນ, ພິ​ເສດ​ແມ່ນ​ສືບ​ທອດ​ຢ່າງ​ມີ​ການ​ເລືອກ​ເຟັ້ມ ບົດຮຽນ​ປະຫວັດສາດ, ບົດຮຽນ​ຂອງ​ບັນດາ​ພັກ​ກອມ​ມູນິດ​ໃນ​ໂລກ, ບັນດາ​ຄຸນຄ່າ​ທີ່​ກ້າວໜ້າ, ບັນດາທ່າ​ອຽງ​ໂລກ​ທີ່​ສຳຄັນ​ທີ່​ສົ່ງ​ຜົນ​ກະທົບ​ຕໍ່​ຫວຽດນາມ...ການສະຫຼຸບ​ສັງ​ລວມພຶດ​ຕິ​ກຳ​ ​ເປັນ​ພາກສ່ວນ​ໜຶ່ງ​ຂອງ​ວຽກ​ງານ​ທິດ​ສະ​ດີ, ​ເພາະວ່າ ບໍ່​ມີ​ການສະຫຼຸບ​ສັງ​ລວມພຶດ​ຕິ​ກຳ​ ຈະ​ເຮັດ​ໃຫ້ວຽກ​ງານ​ທິດ​ສະ​ດີ​ຖືກ​ຈຳກັດ​ໃນຂອບ​ເຂດ​ການ​ຄົ້ນຄວ້າ​ພື້ນຖານ ​ແລະ ຄົ້ນຄວ້າອະທິບາຍ​ບັນຍາຍ​ໃຫ້​ແກ່​ໂຄງການ​ການ​ເມືອງ, ​ແນວທາງ, ​ແຜນ​ນະ​ໂຍບາຍ, ມະຕິ​ທີ່​ມີ​ຢູ່. ການ​ສະຫຼຸບ​ສັງ​ລວມພຶດຕິ​ກຳ​ໄດ້​ແຍກ​ອອກ​ເປັນ​ເນື້ອ​ໃນ​ສະ​ເພາະ ​ໃນ​ຄວາມ​ສຳພັນ​ກັບການ​ຄົ້ນຄວ້າ​ທິດ​ສະ​ດີ​, ຊ້ຳບໍ່​ໜຳ ກອງ​ປະຊຸມ​ໃຫຍ່​ຄັ້ງ​ທີ XII ຍັງ​ໄດ້ຍົກ​ມັນ​ຂຶ້ນ​ຢູ່​ແຖວ​ໜ້າ ນັ້ນ, ​ເພື່ອ​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ມັນ ຕໍ່ການ​ກໍ່​ຕັ້ງ​ແລະ​ພັດທະນາທິດ​ສະ​ດີ ຕິດ​ກັບ​ເງື່ອນ​ໄຂ​ລະອຽດ​ຂອງ​ກິດຈະການ​ປ່ຽນ​ແປງ​ໃໝ່ ​ໃນ​ເມື່ອ​ຕ້ອງ​ແກ້​ໄຂ​ສະພາບ​ການ​ແຂງ​ກະດ້າງ​ຂອງ​ທິດ​ສະ​ດີ ​ແລະ ກຳນົດ​ບັນດາ​ແບບ​ວິທີ​ການ​ດຳ​ເນີນ​ງານ​ພິ​ເສດ, ລະດົມ​ແຫຼ່ງພະລັງ​ລົງທຶນ​ທີ່​ເໝາະ​ສົມ, ​ແກ້​ໄຂ​ສະພາບ​ການ​ຄົ້ນຄວ້າ​ທີ່​ຈຳກັດ​ໃນ​ປຶ້ມ​ໜັງສື, ຂາດ​ການ​ເຊື່ອມ​ຕິດ​ກັບຄວາມ​ເປັນ​ຈິງ​ພຶດຕິ​ກຳ.

2- ພາວະ​ພາກ, ​ເປົ້າ​ໝາຍ, ​ເນື້ອ​ໃນ ​ແລະ ວິທີ​ການສະຫຼຸບ​ສັງ​ລວມພຶດ​ຕິ​ກຳຮັບ​ໃຊ້​ໃຫ້​ແກ່​ການ​ຄົ້ນຄວ້າ​ເພີ່ມ​ເຕີມ, ພັດທະນາ​ທິກ​ສະ​ດີ.

ພາວະ​ພາກ​ນາມ​ມະ​ທຳ​ຂອງ​ການ​ຄົ້ນຄວ້າ​ທິດ​ສະ​ດີ​ສ່ອງ​ແສງຄວາມ​ເປັນ​ຈິງ​ພາວະ​ວິ​​ໄສ​ໂດຍ​ທາງ​ອ້ອມ, ສະ​ແດງ​ອອກ​ພາຍ​ໃຕ້​ບັນດາ​ມູນ​ຫຼັກ, ມາດຕະ​ເກນ, ກົດ​ເກນ, ຄວາມ​ສຳນຶກ, ທັດສະນະ, ​ແນວທາງ, ​ແຜນ​ນະ​ໂຍບາຍ,... ຊຶ່ງ​ໃນ​ເວລາ​ນັ້ນພາວະ​ພາກ​ຂອງ​ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ ພັດ​ລະອຽດ​ແລະ​ມີ​ຊີວິດ​ຊີວາ​ທີ່​ສຸດ, ສ່ອງ​ແສງ​ໂດຍ​ກົງ ບັນດາລັກສະນະ​ສະ​ເພາະ, ລັກສະນະ​ຂອງ​ເປົ້າ​ໝາຍທີ່​ກະທົບ​ໃສ່ອັດຕະພາບການຮັບ​ຮູ້. ຂອບ​ເຂດ​ຂອງ​ການ​ເຄື່ອນ​ໄຫວພຶດຕິ​ກຳ​ກວມ​ດ້ວຍການ​ເຄື່ອນ​ໄຫວ​ຜະລິດ​ວັດຖຸ, ການເຄື່ອນໄຫວການເມືອງ-ສັງຄົມ ແລະ ການເຄື່ອນໄຫວທົດລອງວິທະຍາສາດ (ກວມ​ທັງ​ການ​ທົດ​ລອງ​ສັງຄົມ); ຈາກ​ພຶດຕິ​ກຳ​ພາຍ​ໃນ​ປະ​ເທດ​ເຖິງ​ພຶດຕິ​ກຳ​ໂລກ; ​ຈາກບັນດາ​ບັນຫາປະຈຸ​ບັນ ​ເຖິງບັນດາ​ສິ່ງ​ຄົງ​ຄ້າງ​ແລະ​ມໍລະດົກ​ປະຫວັດສາດ​ທີ່​ກຳລັງ​ສົ່ງ​ຜົນ​ກະທົບ​ຕໍ່​ປະຈຸ​ບັນ. ​ໃນ​ຂອບ​ເຂດພາວະ​ພາກ​ທີ່​ກວ້າງ​ໃຫຍ່​ນັ້ນ, ວຽກ​ງານສະຫຼຸບ​ສັງ​ລວມພຶດ​ຕິ​ກຳ​ຕ້ອງ​ສຸມ​ໃສ່​ຮັບ​ໃຊ້​ໃຫ້​ແກ່​ຄວາມ​ຕ້ອງການ​ກໍ່ສ້າງ, ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ.

ວຽກ​ງານສະຫຼຸບ​ສັງ​ລວມພຶດ​ຕິ​ກຳ​ຕ້ອງ​ກວມ​ລວມພາວະ​ພາກ​ທີ່​ກວ້າງ​ໃຫຍ່​ຂອງ​ມັນ ນັບ​ແຕ່​ການ​ເຄື່ອນ​ໄຫວ​ຜະລິດ​ວັດຖຸ, ການ​ເຄື່ອນ​ໄຫວ​ການ​ເມືອງ-ສັງຄົມ ຈົນ​ເຖິງ​ການ​ເຄື່ອນ​ໄຫວ​ທົດ​ລອງ​ວິທະຍາສາດ, ສຳຄັນ​ແມ່ນຄົ້ນ​ເຜີຍ​ຂໍ້​ຂັດ​ແຍ່ງ​ພື້ນຖານ, ຂໍ້ຂັດແຍ່ງຕົ້ນຕຊຕ່າງໆ ແລະ ນຳສະເໜີວິທີແກ້ໄຂຂໍ້ຂັດແຍ່ງ, ຊຸກຍູ້ໃຫ້ສິ່ງຕ່າໆພັດທະນາຢ່າງບໍ່ຢຸດຢັ້ງ. ການ​ເຄື່ອນ​ໄຫວ​ພຶດຕິ​ກຳ​ອຸດົມສົມບູນ​ທີ່​ສຸດ, ວຽກ​ງານສະຫຼຸບ​ສັງ​ລວມພຶດ​ຕິ​ກຳ​ບໍ່​​ໄດ້​ກວມ​ເອົາໜ້າ​ທີ່​ທັງ​ໝົດ​ຂອງ​ບັນດາ​ສາຂາ​ວິທະຍາສາດ, ຍິ່ງກວ່ານັ້ນ ບໍ່ໃຫ້ຕົກໃສ່ບັນດາບັນຫາມະຍິກມະຍ່ອຍ, ຫາກ​ພຽງ​ແຕ່​ສຸມ​ໃສ່ບັນດາ​ບັນຫາ​ພື້ນຖານ​ໃໝ່​ອ່ຽມ ​ໂດຍ​ມີ​ເປົ້າ​ໝາຍຊອກ​ຫາ, ກໍ່ສ້າງ, ພັດທະນາຮູບແບບສັງຄົມນິຍົມ ແລະ ເສັ້ມທາງຂຶ້ນສູ່ສັງຄົມນິຍົມ ຢູ່ຫວຽດນາມ. ການສະຫຼຸບ​ສັງ​ລວມພຶດ​ຕິ​ກຳບໍ່​ພຽງ​ແຕ່​ຄົ້ນ​ເຜີຍ​ບັນດາ​ຮູບ​ແບບ, ວິທີ​ເຮັດ​ໃໝ່ ທີ່​ຕ້ອງການ​ຍົກ​ລະດັບຂຶ້ນ​ເປັນ​ບົດຮຽນ​ເທົ່າ​ນັ້ນ, ຫາກ​ຍັງ​ຕ້ອງ​ພິຈາລະນາ​ການ​ເຄື່ອນ​​ເໜັງ​ຂອງ​ທິດ​ສະ​ດີ​ໃນ​ພຶດຕິ​ກຳ, ​ເອົາ​ພຶດຕິ​ກຳ​ເພື່ອທົດ​ສອບ​ທິດ​ສະ​ດີ, ພິ​ເສດ​ແມ່ນ​ບັນດາ​ບັນຫາທີ່​ມີ​ຄວາມ​ຜິດ​ດ່ຽງ, ມີ​ຊ່ອງ​ຫວ່າງລະຫວ່າງ​ທິດ​ສະ​ດີ​ແລະ​ຄວາມ​ເປັນ​ຈິງ. ​ເພາ​ະສະ​ນັ້ນ, ການ​ເຄື່ອນ​ໄຫວ​ຄົ້ນຄວ້າ​ທິດ​ສະ​ດີ ​ແລະ ການສະຫຼຸບ​ສັງ​ລວມພຶດ​ຕິ​ກຳຕ້ອງ​ໄດ້​ປະສົມ​ປະສານ​ຕາມ​ແບບ “ສອງ​ໃນ​ໜຶ່ງ”, ຊຶ່ງ​ຍັງ​ໄດ້​ເອີ້ນ​ວ່າ ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ- ທິດ​ສະ​ດີ ຫຼື ສະຫຼຸບ​ສັງ​ລວມທິດ​ສະ​ດີ - ພຶດຕິ​ກຳ. ຕາມ​ຄວາມ​ໝາຍ​ດັ່ງກ່າວ​ນັ້ນ, ການ​ຄົ້ນຄວ້າ​ທິດ​ສະ​ດີ ​ແລະ ການສະຫຼຸບ​ສັງ​ລວມພຶດ​ຕິ​ກຳຄື​ກັນ​ກັບ “ສອງ​ດ້ານ​ຂອງ​​ເງິນຫຼຽນ”, ບໍ່​ສາມາດ​ແຍກ​ພວກ​ມັນ​ທາງ​ກົນ​ໄກ​ໄດ້, ຍິ່ງ​ກວ່າ​ນັ້ນ ບໍ່​ສາມາດ​ເຮັດ​ໃຫ້​ພວກ​ມັນ​ປໍ​ລະ​ປັກ​ກັນ​ໄດ້.

​ເປົ້າ​ໝາຍ​ຂ​ອງວຽກ​ງານສະຫຼຸບ​ສັງ​ລວມພຶດ​ຕິ​ກຳ ​​ແມ່ນ​ລະບົບຄວາມ​ຮູ້​ປະສົບ​ການ ທີ່​ເກີດ​ມາ​ຈາກ​ການ​ເຄື່ອນ​ໄຫວ​ຜະລິດ​ວັດຖຸ, ການ​ເຄື່ອນ​ໄຫວ​ການ​ເມືອງ-ສັງຄົມ ​ແລະ ການ​ເຄື່ອນ​ໄຫວ​ທົດ​ລອງ​ວິທະຍາສາດ. ພວກ​ມັນ​ແຕກ​ຕ່າງ​ຈາກ​ເປົ້າ​ໝາຍ​ຂອງ​ການ​ຄົ້ນຄວ້າ​ທິດ​ສະ​ດີຄືຄວາມ​ຮູ້​ທິດ​ສະ​ດີ ທີ່​ຕິດ​ກັບ​ຈິນຕະນາການ​ນາມ​ມະ​ທຳ ​ເພື່ອສັງ​ເຂ​ບ​ແລະ​ເຊື່ອມ​ຕໍ່​ຄວາມ​ຮູ້ ​ໃຫ້​ກາຍ​ເປັນ​ແນວ​ຄິດ, ທັດສະນະ, ​ແນວທາງ, ​ແຜນ​ນະ​ໂຍບາຍ, ນະ​ໂຍບາຍ. ຢູ່​ທີ່​ນີ້, ຕ້ອງການ​ຈຳ​ແນ​ກລະຫວ່າງ​ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ​ໃນ​ລະດັບ​ທິດ​ສະ​ດີ ກັບການສະຫຼຸບ​ສັງ​ລວມພຶດ​ຕິ​ກຳ​ທຳ​ມະ​ດາ. ການ​ເຄື່ອນ​ໄຫວ​ສະຫຼຸບ​ສັງ​ລວມຂອງ​ໜ່ວຍ​ງານ, ທ້ອງ​ຖິ່ນ, ຂະ​ແໜງ​ການ​ໜຶ່ງ​ແມ່ນ​ການສະຫຼຸບ​ສັງ​ລວມພຶດ​ຕິ​ກຳ​ທຳ​ມະ​ດາ, ມີ​ຈຸດປະສົງ​ຮັບ​ໃຊ້​ໂດຍ​ກົງ​ໃຫ້​ແກ່​ການ​ນຳພາ, ຄຸ້ມ​ຄອງ, ບໍລິຫານ​ຈັດການ​ຕົວ​ຈິງ. ສ່ວນ​ການສະຫຼຸບ​ສັງ​ລວມພຶດ​ຕິ​ກຳຮັບ​ໃຊ້​ການ​ຄົ້ນຄວ້າ​ທິດ​ສະ​ດີ ຕ້ອງ​ໄດ້​ດຳ​ເນີນ​ຕັ້ງ​ແຕ່ "ຈຸດ" ຮອດ "ດ້ານ, ແຕ່ແຄບຈົນເຖິງກວ້າງ, ປຕ່ການຄົ້ນຄວ້າປະກົດການເຖິງການຖອດຖອນທາດແທ້, ກົດເກນ ຕາມວິທີການອຸປະໄນ, ແລ້ວຄ່ອຍໆຍົກຂຶ້ນ ຈາກຄວາມຮູ້ປະສົບການຂຶ້ນເປັນຄວາມຮູ້ທິດສະດີ.

ຖ້າ​ຫາກ​ແບ່ງ​ຄວາມ​ຮູ້​ປະສົບ​ການ​ຕາມ​ລະດັບ​ການ​ພັດທະນາ​ຂອງ​ຈິນຕະນາການ ກໍ່​ຈະ​ມີ​ຄວາມ​ຮູ້​ປະສົບ​ການ​ທຳ​ມະ​ດາ ​ແລະ ຄວາມຄວາມ​ຮູ້​ປະສົບ​ການ​ວິທະຍາສາດ. ຄວາມ​ຮູ້​ປະສົບ​ການ​ທຳ​ມະ​ດາໄດ້​ເປັນ​ຮູບ​ເປັນ​ຮ່າງ​ໂດຍ​ກົງ​ຈາກຊີວິດ​ປະຈຳ​ວັນ​ແລະ​ການ​ຜະລິດ, ມັນ​ໄດ້​ຮັກສາ​ແລະສົ່ງ​ຜ່ານ​ນ່ວຍຄວາມ​ຈຳ, ການ​ປະຕິບັດ, ສະ​ແດງ​ອອກ​ຢ່າງ​ອຸດົມສົມບູນ​ໃນ​ບຸກຄົນ​ທຸກ​ຄົນ ​ແລະ ​ໃນ​ຊຸມ​ຊົນ​ພົນລະ​ເມືອງ (ຄວາມ​ຮູ້ພື້ນ​ເມືອງ, ຄວາມ​ຮູ້​ຊົນ​ເຜົ່າ, ຄວາມ​ຮູ້​ທ້ອງ​ຖິ່ນ). ຄວາມ​ຮູ້​ປະສົບ​ການ​ວິທະຍາສາດ ​ໄດ້​ຮັບ​ຈາກ​ຜົນ​ການ​ທົດ​ລອງວິທະຍາສາດ, ທົດ​ລອງ​ສັງຄົມ - ພື້ນຖານ​ທີ່​ສຳຄັນ​ສຳລັບ​ຄວາມ​ຮູ້​ທິດ​ສະ​ດີ. ​ໃນ​ວຽກ​ງານສະຫຼຸບ​ສັງ​ລວມພຶດ​ຕິ​ກຳ​ຕ້ອງ​ໃຫ້​ຄວາມ​ສຳຄັນ​ທັງຄວາມ​ຮູ້​ປະສົບ​ການ​ທຳ​ມະ​ດາ (ປະຖົມ​ວິທະຍາສາດ) ​ແລະ ຄວາມຄວາມ​ຮູ້​ປະສົບ​ການ​ວິທະຍາສາດ, ​ໃນ​ນັ້ນ​ໃຫ້​ເອົາ​ໃຈ​ໃສ່​ເປັນ​ພິ​ເສດ​ເຖິງຄວາມຄວາມ​ຮູ້​ປະສົບ​ການ​ວິທະຍາສາດ.

ຖ້າ​ຫາກ​ແບ່ງ​ຄວາມ​ຮູ້​ປະສົບ​ການ​ຕາມ​ວິທີ​ການ​ສ່ອງ​ແສງ ລະຫວ່າງ​ພາວະ​ພາກ ກັບ​ອັດຕະພາບຂອງ​ການ​ຮັບ​ຮູ້ ກໍ່​ຈະ​ມີຄວາມ​ຮູ້​ປະສົບ​ການ​ທາງ​ອ້ອມ ​ແລະ ຄວາມ​ຮູ້​ປະສົບ​ການ​ໂດຍ​ກົງ. ຄວາມ​ຮູ້​ປະສົບ​ການ​ທາງ​ອ້ອມ ​ແມ່ນ​ປະສົບ​ການ​ຕ່າງປະ​ເທດ ​ແລະ​ ປະສົບ​ການ​ທີ່ຕົກ​ຄ້າງ​ຈາກ​ປະຫວັດສາດ. ຄວາມ​ຮູ້​ປະສົບ​ການ​ໂດຍ​ກົງ ​ແມ່ນ​ປະສົບ​ການ​ໃນ​ປະ​ເທດ​ ແລະ ​ປະສົບ​ການທີ່​ອັດຕະພາບ​ຮັບ​ຮູ້​ຖອດ​ຖອນ​ໄດ້ຈາກ​ການ​ປະຕິບັດດ້ວຍ​ຕົນ​ເອງ ຫຼືຜ່ານ​ການ​ຄົ້ນຄວ້າພິ​ເສດສະ​ເພາະ. ການສະຫຼຸບ​ສັງ​ລວມພຶດ​ຕິ​ກຳ​ຕ້ອງ​ຫັນ​ຈຸດ​ສຸມ​ໃສ່​ການ​ສະຫຼຸບ​ສັງ​ລວມປະສົບ​ການ​ໂດຍ​ກົງ, ໝາຍ​ເຖິງ​ຄວາມ​ຮູ້​ຕ່າງ​ໆ​ທີ່​ເກັບ​ກຳ​ໄດ້​ຈາກ​ການ​ປະຕິບັດ ​ແລະ ບົດຮຽນ​ປະສົບ​ການ​ພາຍ​ໃນ​ປະ​ເທດ. ສ່ວນ​ສຳລັບປະສົບ​ການ​ທາງ​ອ້ອມ​ແມ່ນ​ພຽງ​ແຕ່​ຄົ້ນຄວ້າ​ສິ່ງ​ທີ່​ກະທົບ​ເຖິງ​ພາຍ​ໃນ​ປະ​ເທດ (ບົດຮຽນ​ປະສົບ​ການ​ຕ່າງປະ​ເທດ), ຈົນ​ເຖິງ​ປະຈຸ​ບັນ (ບົດຮຽນ​ປະຫວັດສາດ). ທ່ານ​ປະທານ​ໂຮ່ຈີ​ມິນ​ໄດ້​ມີ​ການ​ຊີ້​ແຈງ​ທີ່​ສຳຄັນ​ທີ່​ສຸດ​ກ່ຽວ​ກັບທ່າ​ທີ່​ການ​ປະພຶດ​ຕໍ່​ບົດຮຽນ​ປະສົບ​ການ​ທາງ​ອ້ອມ: “ຖ້າ​ຫາກ​ຄວາມ​ເຂົ້າ​ໃຈ, ບົດຮຽນ​ເຫຼົ່າ​ນັ້ນ​ເໝາະ​ສົມ​ກັບ​ເງື່ອນ​ໄຂ​ພາວະ​ວິ​ໄສ ​ແມ່​ນມັນ​ຖືກຕ້ອງ​ແລະ​ອາດ​ຈະ​ເຊື່ອ​ຖື​ໄດ້. ຖ້າ​ບໍ່, ​ແມ່ນ​ບໍ່​ສາມາດ​​ໄວ້​ໃຈໄດ້”(6). ​ເລື່ອງ​ນີ້​ໃຫ້​ເຫັນ​ວ່າ, ​ໃນ​ວຽກ​ງານສະຫຼຸບ​ສັງ​ລວມພຶດ​ຕິ​ກຳຕ້ອງ​ຖື​ຈຸດ​ສຸມ​ແມ່ນ​ການ​ສະຫຼຸບ​ສັງ​ລວມປະສົບ​ການ​ໂດຍ​ກົງ, ຍ້ອນ​ວ່າ​ມັນ​ແມ່ນບັນດາຄວາມ​ຮູ້ທີ່​ມີ​ລັກສະນະ​ຊາດ, ມີ “ລົມ​ຫາຍ​ໃຈ​ຂອງ​ຊີວິດ”. ​ແຕ່, ບໍ່​ຄວນ​ເບິ່ງ​ເບົາ​ປະສົບ​ການ​ທາງ​ອ້ອ​ມ, ຍ້ອນ​ ບໍ່ວ່າບັນຫາ​ໃດ​ຂອງ​ຊາດ​ກໍ່​ລ້ວນ​ແຕ່​ຕິດ​ແໜ້ນ​ກັບ​ໂລກ, ​ໂດຍ​ສະ​ເພາະ​ແມ່ນ​ໂລກ​ທີ່​ໂລກາ​ພິວັດ; ບໍ່​ມີ​ເຫດການ​ໃດ​ໃນ​ປະຈຸ​ບັນອາດ​ຈະ​ແຍກ​ອອກຈາດ​ອະດີດຕະການ​ໄດ້. ຕ້ອງ​ໄຈ້​ແຍກ​ຢ່າງ​ລະອຽດ​ຖີ່​ຖ້ວນ​ບົດຮຽນ​ປະຫວັດສາດ​ໃນ​ປະ​ເທດ ​ແລະ ບົດຮຽນ​ຕ່າງປະ​ເທດ, ຫຼີກລ້ຽງ​ການ​ໝູນ​ໃຊ້​ແບບ​ກົນ​ຈັກ ​ແລະ ຖືກ​ຕົກ​ໃສ່ການ​ນິຍົມ​ຟື້ນ​ຟູ​ໂບຮານ ຫຼື ຄຳ​ພີ​ພຶດຕິ​ກຳ.

ອັດຕະພາບສະຫຼຸບ​ສັງ​ລວມພຶດ​ຕິ​ກຳ​ແມ່ນ​ຄະນະ​ພັກ​ຂັ້ນ​ຕ່າງໆ, ​ໂດຍ​ແລ້ວ​ແຕ່​ລັກສະນະ, ໜ້າ​ທີ່​ຂອງ​ແຕ່ລະ​ຂັ້ນ ​ເພື່ອ​ວາງ​ຄວາມ​ຕ້ອງການສະ​ເພາະ​ໃຫ້ການສະຫຼຸບ​ສັງ​ລວມພຶດ​ຕິ​ກຳ​. ​ແຕ່, ສະຫຼຸບ​ສັງ​ລວມພຶດ​ຕິ​ກຳ​ໃນ​ລະດັບ​ທິດ​ສະ​ດີ​ແມ່ນ​ຄວາມ​ຮັບຜິດຊອບ​ຂອງທົ່ວ​ພັກ, ກ່ອນ​ອື່ນ​ໝົດ​ແມ່ນ​ຂອງ​ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລຂາທິການ, ​ໃນ​ນັ້ນພາກສ່ວນ​ມີ​ບົດບາດ​ສຳຄັນ ​ແມ່ນອົງການ​ເສນາ​ທິການ​ຍຸດ​ທະ​ສາດ​ຂອງ​ພັກ... ຕ້ອງ​ເນັ້ນ​ໜັກ​ຂໍ້​ນີ້​ແມ່ນ​ຍ້ອນວ່າ ພຽງ​ແຕ່​ຂັ້ນ​ສູນ​ກາງ​ເທົ່າ​ນັ້ນຈຶ່ງ​ມີອຳນາດ​ໃນ​ການວາງ​ແຜນ, ​ແກ້​ໄຂ​ດັດ​ແປງ, ປັບປຸງ​ເພີ່ມ​ເຕີມ, ຂະຫຍາຍ​ແນວທາງ, ​ແຜນ​ນະ​ໂຍບາຍ, ນະ​ໂຍບາຍ, ຕິດ​ກັບ​ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ​. ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ​ຂອງ​ບັນດາ​ຂະ​ແໜງ​ການ, ທ້ອງ​ຖິ່ນ, ກົມ​ກອງມີ​ການ​ປະກອບສ່ວນ​ເຂົ້າ​ໃນ​ການ​ຄົ້ນຄວ້າ​ທິດ​ສະ​ດີ, ​ແຕ່​ເປົ້າ​ໝາຍ​ກ່ອນ​ອື່ນ​ໝົດ​ແມ່ນ​ຮັບ​ໃຊ້​ໃຫ້​ແກ່​ການ​ນຳພາ, ຄຸ້ມ​ຄອງ, ບໍລິຫານ​ຈັດການ​ໂດຍ​ກົງ, ຮັບປະກັນ​ການ​ໝູນ​ໃຊ້​ແນວທາງ, ​ແຜນ​ນະ​ໂຍບາຍ, ນະ​ໂຍບາຍ​ເຂົ້າ​ໃນ​ເງື່ອນ​ໄຂ​ສະ​ເພາະ​ໄດ້​ຢ່າງ​ດີ​ສຸດ. ດ້ານ​ອື່ນ, ການສະຫຼຸບ​ສັງ​ລວມພຶດ​ຕິ​ກຳຂອງ​ທ້ອງ​ຖິ່ນ, ຂະ​ແໜງ​ການ​ຮັບ​ໃຊ້​ໃຫ້​ແກ່​ການວາງ​ແຜນ​ນະ​ໂຍບາຍມີ​ລັກສະນະ​ທ້ອງ​ຖິ່ນ​ແລະຂະ​ແໜງ​ການ, ຖືກ​ກຳນົດ​ໂດຍ​ການ​ແບ່ງ​ຂັ້ນ ​ແບ່ງ​ອຳນາດ, ອາ​ໃສ​ສິ່ງ​ດັ່ງກ່າວ​ຈຶ່ງ​ແກ້​ໄຂ​ໄດ້​ຢ່າງ​ຖືກຕ້ອງ​ສາຍ​ພົວພັນ​ລະຫວ່າງອັນ​ລວມ​ແລະ​ອັນ​ຕ່າງ​ຫາກ, ອັນ​ແຜ່​ຫຼາຍ​ທົ່ວ​ໄປ​ແລະອັນ​ພິ​ເສດສະ​ເພາະ. ຄວາມ​ຮູ້​ທິດ​ສະ​ດີ​ໄດ້​ຫັນ​ເປັນ​ນາ​ມະ​ທຳ ​ແລະ ສັງ​ເຂ​ບສູງ​ທີ່​ສຸດ, ​ແຕ່​ໃນ​ຄວາມ​ເປັນ​ຈິ​ງບໍ່​ມີ​ພາວະ​ພາກ​ນາມ​ມະ​ທຳ​ຄື​ແນວ​ນັ້ນ. ດັ່ງ​ນັ້ນ, ລະຫວ່າງ​ທິດ​ສະ​ດີ​ແລະ​ພຶດຕິ​ກຳ​ຍາມ​ໃດ​ກໍ່​ມີ​ຊ່ອງ​ຫວ່າງ ຊຶ່ງ​ຢາກ​ເຕີມ​ໃຫ້​ມັນ​ເຕັມ ​ແມ່ນ​ຕ້ອງການ​ທີ່​ສຸດ​ເຖິງ​ບົດບາດ​ຂອງ​ຄວາມ​ຮູ້​ປະສົບ​ການທີ່​ເກັບ​ມາ​ໄດ້​ຈາກການສະຫຼຸບ​ສັງ​ລວມພຶດ​ຕິ​ກຳຢູ່​ໃນ​ແຕ່ລະ​ພື້ນ​ທີ່, ​ແຕ່ລະ​ຂັ້ນ, ​ແຕ່ລະ​ຂະ​ແໜງ​ການ. ມັນ​ເຮັດ​ໃຫ້​ທິດ​ສະ​ດີ​ເຂົ້າ​ສູ່​ຊີ​ວິການ​ເປັນ​ຢູ່​ຢ່າງມີ​ຊີວິດ​ຊີວາ, ​ເໝາະ​ສົມ, ສອດຄ່ອງ​ກັບ​ການ​ປ່ຽນ​ແປງ​ຢ່າງ​ໄວວາ​ຂອງ​ພຶດຕິ​ກຳ. ​ເວົ້າ​ຢ່າງ​ອື່ນ, ຄວາມ​ຮູ້​ປະສົບ​ການ​ທີ່​ເກັບ​ກຳມາ​ໄດ້​ຈາດ​ການສະຫຼຸບ​ສັງ​ລວມພຶດ​ຕິ​ກຳ​ຢູ່​ທ້ອງ​ຖິ່ນ, ຂະ​ແໜງ​ການ, ສຳນັກງານ​ອົງການມີ​ບົດບາດ​ລະຫວ່າງ​ກາງ​ ເພື່ອ​ໃຫ້​ທິດ​ສະ​ດີ​ປະຕິບັດ​ບົດບາດ​ກຳນົດ​ທິດ​ແລະ​ຊີ້​ນຳ​ພຶດຕິ​ກຳ​ຢ່າງ​ມີ​ປະສິດທິ​ຜົນ. ດ້ານ​ອື່ນ, ການສະຫຼຸບ​ສັງ​ລວມພຶດ​ຕິ​ກຳຂອງ​ທ້ອງ​ຖິ່ນ, ຂະ​ແໜງ​ການ​ມີ​ບົດບາດ​ຄົ້ນ​ເຜີຍບັນດາ​ຮູບ​ແບບ​ໃໝ່, ວິທີ​ເຮັດ​ມີ່​ດີ ​ເພື່ອ​ເຜີຍ​ແຜ່​ທະວີຄູນ, ​ເພີ່ມ​ເຕີມ, ພັດທະນາ​ທິດ​ສະ​ດີການ​ເມືອງ. ​ເພາະສະ​ນັ້ນ, ການ​ກຳນົດ​ຢ່າງ​ຈະ​ແຈ້ງ​ຄວາມ​ຮັບຜິດຊອບ​ຂອງສູນ​ກາງ​ແລະ​ຂອງ​ທ້ອງ​ຖິ່ນ, ຂອງ​ບັນດາ​ຂະ​ແໜງ​ການ​ແລະ​ຂອງໜ່ວຍ​ງານ​ສະ​ເພາະ,... ​ແມ່ນ​ບັນດາ​ບັນຫາ​ໃຫຍ່​ໃນ​ການຈັດ​ຕັ້ງ​ກຳລັງ ​ແລະ ການຈັດ​ແບ່ງ​ແຫຼ່ງພະລັງ​ທີ່​ຮັບ​ໃຊ້​ໃຫ້​ແກ່​ວຽກ​ງານສະຫຼຸບ​ສັງ​ລວມພຶດ​ຕິ​ກຳ​ ຕິດ​ກັບ​ການ​ຄົ້ນຄວ້າ​ທິດ​ສະ​ດີ.

​ເນື້ອ​ໃນສະຫຼຸບ​ສັງ​ລວມພຶດ​ຕິ​ກຳອຸດົມສົມບູນ, ຫຼາຍ​ຮູບ​ຫຼາຍ​ແບບ​ທີ່​ສຸດ: ນັ້ນ​ແມ່ນ​ການ​ສະຫຼຸບ​ສັງ​ລວມບັນດາ​ຕົວ​ແບບ​ທີ່​ເກີດ​ເອງ​ໃນຄວາມ​ເປັນ​ຈິງ; ​ສະຫຼຸບ​ສັງ​ລວມບັນດາ​ຕົວ​ແບບ​ທົດ​ລອງ; ​ສະຫຼຸບ​ສັງ​ລວມຂະ​ບວນການ​ໜຶ່ງ ຫຼື ການ​ຂົນຂວາຍ​ໜຶ່ງ​ທີ່​ເກີດ​ມາ​ຈາກ​ຄວາມ​ຄິດ​ລິ​ເລີ່​ມຂອງ​ມະຫາຊົນ ຫຼື ​ເລີ່ມຕົ້ນ​ຈາກຄຳ​ສັ່ງ, ມະຕິ, ການ​​ຕົກລົງ​ນຳພາ, ຄຸ້ມ​ຄອງ; ​ສະຫຼຸບ​ສັງ​ລວມບັນດາ​​ແບບຢ່າງ​ດີ​ເດັ່ນ​ກ້າໜ້າ... ຂອບ​ເຂດການ​ສະຫຼຸບ​ສັງ​ລວມອາດ​ຈະ​ແມ່ນ ອົງການ​ຈັດ​ຕັ້ງ​ໜຶ່ງ, ທ້ອງ​ຖິ່ນ​ໜຶ່ງ, ສາຂາ-ຂົງ​ເຂດ​ໜຶ່ງ ​ແລະ ກວ້າງ​ທີ່​ສຸດ​ແມນ​ທົ່ວ​ປະ​ເທດ. ການສະຫຼຸບ​ສັງ​ລວມພຶດ​ຕິ​ກຳຮັບ​ໃຊ້​ການ​ຄົ້ນຄວ້າ​ທິດ​ສະ​ດີ​ຕ້ອງ​ກວມ​ລວມບັນດາ​ເນື້ອ​ໃນ​ດັ່ງກ່າວ ​ແຕ່​ຢູ່​ໃນ​ລະດັບຂອງການ​ສັງ​ລວມທົ່ວ​ໄປ​ແລະສັງ​ເຄາະ ​ໃຫ້​ເກີດ​ເປັນຄວາມ​ສຳນຶກ, ທັດສະນະ, ​ແນວທາງ, ​ແຜນ​ນະ​ໂຍບາຍ, ນະ​ໂຍບາຍ​ຂອງ​ພັກ, ​ເປັນ​ຕົວ​ແບບ​ການ​ພັດທະນາ​ຂອງ​ປະ​ເທດ. ​ເພື່ອ​ມີການ​ສັງ​ລວມທົ່ວ​ໄປ​ແລະສັງ​ເຄາະ ​ໃນ​ການສະຫຼຸບ​ສັງ​ລວມພຶດ​ຕິ​ກຳ​ - ທິດ​ສະ​ດີ ​ແມ່ນ​ຮຽກຮ້ອງ​ຕ້ອງ​ໄປ​ແຕ່​ອັນ​ລະອຽດ​ສະ​ເພາະ​ ເຖິງ​ອັນ​ນາມ​ມະ​ທຳ, ​ຈາກ “ຈຸດ” ຮອດ “ດ້ານ”, ຈາກ​ແຄບ​​ໄປເຖິງກວ້າງ, ຈາກ​ປະກົດ​ການ​ໄປ​ສູ່​ທາດ​ແທ້. ຈຸດປະສົງ​ແມ່ນ​ວາງກຳນົດ​ບັນດາ​ໜ້າ​ທີ່ທິດ​ສະ​ດີ​ທີ່​ມີຄວາມ​ໝາຍ​ພາ​ທາງ, ຊີ້​ນຳ​ພຶດຕິ​ກຳທີ່​ສອດຄ່ອງ​ເໝາະ​ສົມ​ກັບ​ແຕ່ລະ​ໄລ​ຍະທາງປະຕິວັດ ​ແລະ ປັບປຸງຕົວ​ແບບລັດທິສັງຄົມ​ນິຍົມແລະ​ເສັ້ນທາງ​ກ້າວ​ຂຶ້ນ​ສັງຄົມ​ນິຍົມຢູ່​ຫວຽດນາມ​ໃຫ້​ສົມບູນ, ຮັບປະກັນ​ປະຕິ​ບັດ​ສອງ​ໜ້າ​ທີ່​ຍຸດ​ທະ​ສາດ ​ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ​ສັງຄົມ​ນິຍົມ ຢ່າງ​ສຳ​ເລັດ​ມີ​ໄຊ.

​ໂດຍ​ຕ່າງ​ກັນ​ກັບ​ບັນດາວິທີ​ຄົ້ນຄວ້າທິດ​ສະ​ດີ ທີ່​ຕ້ອງ​ໃຊ້​ການ​ຄິດ​ນາມ​ມະ​ທຳ ສັງລວມທົ່ວ​ໄປ, ວິທີ​ສະຫຼຸບ​ສັງ​ລວມພຶດຕິ​ກຳ ຕ້ອງ​ຊອກ​ຮູ້​ໂດຍ​ກົງຄຸນລັກສະນະ, ລັກສະນະ​ປະຈຳ​ຕົວ​ຂອງ​ສິ່ງ​ການ​ແລະ​ປະກົດ​ການ. ຕາ​ມນັ້ນ, ບັນດາ​ວິທີ​ການ​ຕໍ່​ໄປ​ນີ້​ເຄີຍ​ໄດ້​ໃຊ້​​ໃນ​ການສະຫຼຸບ​ສັງ​ລວມພຶດ​ຕິ​ກຳ​: ສັງ​ເກດ, ສືບສວນ, ທົດລອງ, ວິເຄາະໄຈ້ແຍກ ແລະ ສະຫຼຸບບົດຮຽນ, ວິທີການຊ່ຽວຊານ. ສັງ​ເກດ ​ແມ່ນ​ວິທີ​ການຊອກ​ຮູ້​ເປົ້າ​ໝາຍ​ຢ່າງ​​ເປັນ​ລະບົບ ດ້ວຍ​ອິນ​ຊີ​ສຳຜັດ ​ເພື່ອ​ເກັບ​ກຳ​ຂໍ້​ມູນ​ກ່ຽວ​ກັບ​ເປົ້າ​ໝາຍ, ກວມ​ທັງ​ການ​ສັງ​ເກດ​ໂດຍ​ກົງ ​ແລະ ສັງ​ເກດ​ທາງ​ອ້ອມ. ສືບສວນ (ງານ​ພາກ​ສະໜາມ​ຈິງ, ການ​ສຳ​ຫຼວດດ້ວຍ​ຄະ​ແນນ​ສຽງ, ການ​ສຳພາດ...) ​ແມ່ນ​ວິທີ​ສຳ​ຫຼວດ​ເປົ້າ​ໝາຍ​ໃນ​ຂະໜາດ​ໃຫຍ່ ຕາມ​ແບບ​ຟອມທີ່​ລະບຸ, ​ເພື່ອ​ຄົ້ນ​ເຜີຍ​ກົດ​ເກນການ​ແຈກ​ຢາຍ ແລະ ຮັບ​ຮູ້​ຄຸນ​ລັກສະນະ​ຂອງ​ເປົ້າໝ​າຍ. ທົດ​ລອງ ​ແມ່ນ​ວິທີ​ການ​ທີ່​ອັດຕະພາບ​ກະທົບ​ໃສ່​ເປົ້າ​ໝາຍ ​ແລະ ຂະ​ບວນວິວັດ​ການ​ຜັນ​ປ່ຽນ​ຂອງ​ເປົ້າ​ໝາຍ ​ເພື່ອ​ຫັນ​ການ​ພັດທະນາ​ຂອງ​ພວກ​ມັນຕາມຈຸດໝາຍ​ທີ່​ໄດ້​ວາງ​ໄວ້, ຢືນຢັນຫຼືປະຕິ​ເສດສົມ​ມຸດ​ຕິ​ຖານ​ເບື້ອງ​ຕົ້ນ, ຖ້າ​ຫາກ​ສົມ​ເຫດ​ສົມ​ຜົນ​ກໍ່​ຈະນຳ​​ໃຊ້​ຢ່າງ​ກວ້າງຂວາງ, ຖ້າ​ບໍ່​ເໝາະ​ສົມ​ຈະ​ເອົາ​ອອກ. ວິ​ເຄາະໄຈ້ແຍກ ແລະ ສະຫຼຸບບົດຮຽນ ​ແມ່ນ​ວິທີ​ການ​ພິຈາລະນາ​ຄືນ​ໃໝ່ຜົນສຳ​ເລັດ​ຂອງ​ການ​ເຄື່ອນ​ໄຫວ​ພຶດຕິ​ກຳ​ໃນ​ອະດີດ ​ເພື່ອ​ຖອດ​ຖອນ​ຂໍ້ສະຫຼຸບ​ວິທະຍາສາດ - ພຶດຕິ​ກຳ, ​ໄດ້​ດຳ​ເນີນ​ດ້ວຍ​ການ​ເອົາ​ທິດ​ສະ​ດີ​ວິ​ເຄາະໄຈ້​ແຍກ​ຄວາມ​ເປັນ​ຈິງ ​ແລະ ຈາກ​ຄວາມ​ເປັນ​ຈິງ​ຖອດ​ຖອນ​ເອົາ​ທິດ​ສະ​ດີ​ທີ່​ສູງ​ກວ່າ. ວິທີ​ການ​ຊ່ຽວຊານ ​ແມ່ນ​ການ​ນຳ​ໃຊ້​ປັນຍາ​ຊົນສະ​ເພາະ​ວິຊາ​ການ​ແລະສະຫະ​ວິຊາ​ການ ​ເພື່ອ​ວິ​ເຄາະໄຈ້​ແຍກ, ທຳ​ຄວາມ​ກະຈ່າງ​ແຈ້ງ​ກ່ຽວ​ກັບ​ທາດ​ແທ້​ຂອງ​ເປົ້າ​ໝາຍ, ຊອກ​ຫາ​ວິທີ​ແກ້​ທີ່​ດີ​ສຸດ. ​ໃນ​ບັນດາ​ວິທີ​ການ​ເທິງ​ນີ້ ວິທີ​ການວິ​ເຄາະໄຈ້​ແຍກ​ແລະສະຫຼຸບ​ບົດຮຽນ ​ແລະ ວິທີ​ການ​ຊ່ຽວຊານ ​ແມ່ນ​ບາດກ້າວ​ກະ​ກຽມ​ໃຫ້​ແກ່​ການ​ຄົ້ນ​ຄິດ, ສັງ​ລວມ​ເຫດການ, ​ເອກະສານ, ຂໍ້​ມູນ​ໃຫ້​ກາຍ​ເປັນຄວາມ​ຮູ້​ທິດ​ສະ​ດີ. 

ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ ​ຮັບ​ໃຊ້​ການ​ຄົ້ນຄວ້າ​​​ເພີ່ມ​ເຕີມ ​ແລະ ພັດທະນາ​ທິດ​ສະ​ດີ​ປ່ຽນ​ແປງ​ໃໝ່​ຂອງ​ພັກ​ໃນ​ປະຈຸ​ບັນ

1- ຜົນ​ຂອງ​ການ​ປ່ຽນ​ແປງ​ໃໝ່​ວຽກ​ງານສະຫຼຸບ​ສັງ​ລວມພຶດ​ຕິ​ກຳຮັບ​ໃຊ້​ການ​ຄົ້ນຄວ້າ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ​ໃນ​ເວລາ​ທີ່​ຜ່ານ​ມາ

​ໃນ​ຂະ​ບວນວິວັດ​ການ​ນຳພາ​ການ​ປະຕິວັດ​ຫວຽດນາມ, ທ່ານຜູ້ນຳ ​ໂຮ່ຈີ​ມິນ ​ແລະພັກ​ກອມ​ມູນິດ​ຫວຽດນາມ​ໄດ້​ເອົາ​ໃຈ​ໃສ່​ທີ່​ສຸດ​ເຖິງ​ການສະຫຼຸບ​ສັງ​ລວມພຶດ​ຕິ​ກຳ ​​ເພື່ອ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ. ຍ້ອນ​ໄດ້​ດຳເນີນ​ການສະຫຼຸບ​ສັງ​ລວມພຶດ​ຕິ​ກຳ​ຢ່າງ​ເປັນ​ປະຈຳ ດັ່ງ​ນັ້ນ ​ແນວທາງ, ​ແຜນ​ນະ​ໂຍບາຍ, ນະ​ໂຍບາຍ​ຂອງ​ພັກຈຶ່ງ​ສອດຄ່ອງ​ກັບ​ຄວາມ​ເປັນ​ຈິງ, ມີ​ຄວາມ​ສາມາ​ພຽງພໍ​ເພື່ອ​ຊີ້​ນຳ​ພຶດຕິ​ກຳ, ​ແລະ ​ໄດ້​ຮັບ​ການ​ພິສູດ​ດ້ວຍ​ໄຊຊະນະ​ອັນ​ໃຫຍ່​ຫຼວງ​ຂອງ​ການ​ປະຕິວັດ​ຫວຽດນາມ. ບົດຮຽນ​ປະຫວັດສາດ​ກໍ່​ຊີ້​ໃຫ້​ເຫັນ​ວ່າ, ​ເມື່ອ​ຫ່າງ​ເຫີ​ນຈາກຄວາມ​ເປັນ​ຈິງ ຈະ​ບໍ່​ສາມາດກຳ​ກົດ​ເກນ​ພາວະ​ວິ​ໄສໄດ້ ​ແລະ ຖືກ​ຕົກ​ໃສ່​ຄວາມ​ຜິດພາດ, ຂໍ້​ບົກພ່ອງ​ຂອງ​ລັດ​ທະ​ຄຳ​ພີ. ຜົນສຳ​ເລັດ​ອັນ​ໃຫຍ່​ຫຼວງ​ທີ່​ມີ​ຄວາມ​ໝາຍ​ປະຫວັດສາດ​ຂອງ​ພາລະກິດ​ປ່ຽນ​ແປງ​ໃໝ່​ໃນ 30 ກວ່າ​ປີ​ທີ່​ຜ່ານ​ມາ ມີ​ສາ​ເຫດ​ສຳຄັນ​ໜຶ່ງ​ ເລີ່​ມຈາກ​ບ່ອນທີ່​ພັກ​ໄດ້​ຕິດ​ແໜ້ນ​ກັບ​ພຶດຕິ​ກຳ​ຢູ່​ສະ​ເໝີ, ນັບຖື​ກົດ​ເກນ​ພາວະ​ວິ​ໄສ, ​ເອົາ​ໃຈ​​ໃສ່​ເປັນ​ສຳຄັນ​ເຖິງ​ການສະຫຼຸບ​ສັງ​ລວມພຶດ​ຕິ​ກຳ ​ເພື່ອ​ປັບປຸງ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ​ຢ່າງ​ບໍ່​ຢຸດ​ຢັ້ງ, ​ເອົາ​ພຶດຕິ​ກຳ​ເພື່ອ​ທົດສອບ​ທິດ​ສະ​ດີ.

ດັ່ງ​ນັ້ນ, ​ໃນ​ວຽກ​ງານ​ທິດ​ສະ​ດີ, ພັກ​ກອມ​ມູນິດ​ຫວຽດນາມນັບ​ມື້​ນັບ​ເຫັນ​ແຈ້ງ​ແລະ​ເຊີດ​ຊູ​ບົດບາດ ທີ່​ຕັ້ງ​​ຂອງການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ. ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 5 ສະ​ໄໝ​ທີ IX (ເດືອນມີນາ 2002) “ກ່ຽວ​ກັບ​ໜ້າ​ທີ່​ຕົ້ນຕໍ​ຂອງ​ວຽກ​ງານ​ແນວ​ຄິດ, ທິດ​ສະ​ດີ​ໃນ​ສະພາບ​ການ​ໃໝ່” ​ໄດ້​ຢືນຢັນ​ວ່າ “ຕ້ອງ​ໃຫ້​ຄວາມ​ສຳຄັນ​​ແກ່​ການສະຫຼຸບ​ສັງ​ລວມພຶດ​ຕິ​ກຳ​ໃນ​ການ​ຄົ້ນ​ຄວ້າ​ທິດ​ສະ​ດີ ​ແລະ ​ໃນ​ການ​ເຄື່ອນ​ໄຫວ​ຂອງ​ຄະນະ​ພັກຂັ້ນ​ຕ່າງໆ; ຖື​ເອົາ​ການສະຫຼຸບ​ສັງ​ລວມພຶດ​ຕິ​ກຳ​ເປັນ​ໜ້າ​ທີ່​ປະຈຳ​ຂອງທຸກ​ຂັ້ນ, ທຸກ​ຂອ​ແໜງ​ການ; ຕິດ​ແໜ້ນ​ການ​ຄົ້ນຄວ້າ​ພຶດຕິ​ກຳ​ຂອງ​ຫວຽດນາມ ກັບ​ການ​​ເລືອກ​ເອົາຜົນສຳ​ເລັດ​ທາງ​ວິທະຍາສາດ​ຂອງ​ມະນຸດຊາດ”(7). ກອງ​ປະຊຸມ​ໃຫຍ່​ຄັ້ງ​ທີ XII ຂອງ​ພັກ​ໄດ້​ເນັ້ນ​ໜັກ: “ຍົກ​ສູງ​ຄວາມ​ສາມາດ​ໃນ​ການວາງ​ແນວທາງ, ນະ​ໂຍບາຍທີ່​ສອດຄ່ອງ​ກັບ​ກົດ​ເກນ​ພາວະ​ວິ​ໄສ ​ແລະ ຈຸດ​ພິ​ເສດ​ຂອງ​ຫວຽດນາມ, ສ້າງ​ບາດກ້າວ​ບຸກທະລຸ​ເພື່ອ​ການ​ພັດທະນາ”(8) ຕ້ອງ “ຍູ້​ແຮງ​ວຽກ​ງານ​ສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ, ສະໜອງ​ຫຼັກ​ຖານ​ວິທະຍາສາດ, ທິດ​ສະ​ດີ​ໃຫ້​ແກ່​ການວາງ​ແລະ​ພັດທະນາ​ແນວ​ທາງ, ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ​ແລະ​ກົດໝາຍ​ຂອງ​ລັດ”(9). ຈາກທັດສະນະ​ນັ້ນ, ການສະຫຼຸບ​ສັງ​ລວມພຶດຕິ​ກຳຮັບ​ໃຊ້​ໃຫ້​ແກ່​ການ​ຄົ້ນຄວ້າ​ທິດ​ສະ​ດີ ​ໄດ້​ດຳ​ເນີນ​ໄປ​ຢ່າງ​ເປັນ​ພື້ນຖານ​ກວ່າ​ເກົ່າ, ດ້ວຍ​ການ​ເຂົ້າ​ຮ່ວມ​ຂອງ​ຫຼາຍ​ກຳລັງ, ຫຼາຍ​ພາກສ່ວນ, ພິ​ເສດ​ແມ່ນ​ໃນ​ຂະ​ບວນວິວັດ​ການ​ກະກຽມ​ສ້າງ​ເອກະສານຂອງ​ກອງ​ປະຊຸມ​ໃຫຍ່ຜູ້​ແທນ​ທົ່ວ​ປະ​ເທດ​ຂອງ​ພັກ, ມະຕິ​ຂອງ​ກອງ​ປະຊຸມ​ສູນ​ກາງ​ພັກ, ການ​ສະຫຼຸບ​ເບື້ອງຕົ້ນ - ສະຫຼຸບ​ສັງ​ລວມບັນດາ​ມະຕິ, ບົດ​ສະຫຼຸບ​ຂອງຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄຳ​ສັ່ງ​ຂອງ​ຄະນະ​ເລຂາທິການ ຫຼັງ​ຈາກຮອບ​ການ​ດຳ​ເນີນ​ການ​ຮອບ​ໜຶ່ງ (5 ປີ, 10 ປີ). ບັນດາ​ບັ້ນສະຫຼຸບ​ສັງ​ລວມພຶດ​ຕິ​ກຳ - ທິດ​ສະ​ດີ 20 ປີ​ແລະ 30 ປີ​ແຫ່ງ​ການ​ປ່ຽນ​ແປງ​ໃໝ່, ສູນ​ກາງ​ພັກ​ໄດ້​ສ້າງ​ຕັ້ງ​ຄະນະ​ຊີ້​ນຳ, ຈັດ​ຕັ້ງ​ບັນດາ​ຄະນະອະ​ນຸກຳມະການສະ​ເພາະ, ສົ່ງ​ທີ​ມງານ​ສຳ​ຫຼວດຫຼາຍ​ທີ​ມ​ລົງ​ໄປ​ທ້ອງ​ຖິ່ນ, ວິ​ສາ​ຫະກິດ​ຕ່າງໆ, ດຳ​ເນີນ​ການ​ປະຊຸມ​ສຳ​ມະ​ນາ​ລະດັບ​ຊາດ​ຫຼາຍ​ຄັ້ງ... ​ເພື່ອ​ເກັບ​ກຳ​ຂໍ້​ມູນ​ຂ່າວສານ​ກ່ຽວ​ກັບ​ພຶດຕິ​ກຳ, ​ເພີ່ມ​ເຕີມ​ແລະ​ພັດທະນາ​ແນວທາງ, ​ແຜນ​ນະ​ໂຍບາຍ​ຂອງ​ພັກ. ​ໃນ​ໂຄງການ​ດຳ​ເນີນ​ງານ​ທັງ​ສະ​ໄໝ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ຕ່າງໆ, ​ເພື່ອ​ກະກຽມ​ປະກາດ​ໃຊ້​ມະຕິ​ໜຶ່ງ, ບົດ​ສະຫຼຸບ​ໜຶ່ງ, ສູນ​ກາງ​ລ້ວນ​ແຕ່​ໄດ້​ສ້າງ​ຕັ້ງ​ຄະນະ​ຊີ້​ນຳການ​ກໍ່ສ້າງ​ໂຄງ​ຮ່າງ, ດຶງ​ດູດ​ພະນັກງານ​ການ​ນຳ, ພະນັກງານ​ຄຸ້ມ​ຄອງ​ແລະ​ນັກວິທະຍາສາດ​ຫຼາຍ​ຄົນ, ມີໜ້າ​ທີ່ສະຫຼຸບ​ສັງ​ລວມພຶດ​ຕິ​ກຳ​ເພື່ອ​ເພີ່ມ​ເຕີມ, ພັດທະນາ​ແນວທາງ, ​ແຜນ​ນະ​ໂຍບາຍ​ຂອງ​ພັກ. ບັນດາ​ມະຕິ, ຄຳ​ສັ່ງຂອງ​ພັກ ຫຼັງ​ຈາກ​ຮອບ​ການ​ດຳ​ເນີນ​ງານ (5, 10 ປີ) ລ້ວນ​ແຕ່​ໄດ້​ສະຫຼຸບ​ເບື້ອງ​ຕົ້ນ - ສະຫຼຸບ​ສັງ​ລວມ​ ເພື່ອ​ສືບ​ຕໍ່​ດັດສົມ, ​ເພີ່ມ​ເຕີມ​ໃນ​ຮອບ​ການ​ດຳ​ເນີນ​ງານ​ໃໝ່ ຫຼື​ປະກາດ​ໃຊ້​ເອກະສາ​ໃໝ່​ ເພື່ອ​ຍົກ​ສູງຄວາມ​ສາມາດ​ຊີ້​ນຳ​ພຶດຕິ​ກຳ​ຍິ່ງ​ກວ່າ​ອີກ.

​ເນື້ອ​ໃນສະຫຼຸບ​ສັງ​ລວມພຶດຕິ​ກຳ​ໃນ​ຊຸມ​ປີ​ທີ່​ຜ່ານ​ມາ​ແມ່ນ​ອຸດົມສົມບູນ​ ຫຼາຍ​ຮູບ​ຫຼາຍ​ແບບທີ່​ສຸດ ດ້ວຍ​ຫຼາຍ​ລະດັບ​ທີ່​ຕ່າງ​ກັນ, ນັບ​ແຕ່​ບັນດາ “ບັນຫາ​ໃຫຍ່” ຈົນ​ເຖິງ​ບັນດາ​ຕົວ​ແບບ​ທີ່​ລະອຽດ. ຜ່ານ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ​ເບິ່ງ​ລວມ​ແລ້ວ, ທິດ​ສະ​ດີ​ກ່ຽວ​ກັບ​ລັດທິສັງຄົມ​ນິຍົມ ​ແລະ​ເສັ້ນທາງ​ຂຶ້ນ​ສູ່​ສັງຄົມ​ນິຍົມຢູ່​ຫວຽດນາມ ນັບ​ມື້​ນັບ​ຈະ​ແຈ້ງ, ​ໃນ​ນັ້ນ​ມີ​ສ່ວນ​ປະກອບ​ທີ່​ສຳຄັນ​ຂອງ​ການ​ເຄື່ອ​ໄຫວສະຫຼຸບ​ສັງ​ລວມພຶດ​ຕິ​ກຳ, ພິ​ເສດ​ແມ່ນ​ສຳລັບ​ບັນດາ​ບັນຫາ​ໃຫຍ່​ໃນ​ການ​ຮັບ​ຮູ້ກ່ຽວ​ກັບ​ທິດ​ສະ​ດີ​, ​ເຊັ່ນ ການ​ກໍ່ສ້າງ​ພື້ນຖານ​ເສດຖະກິດ​ຕະຫຼາດ​ກຳນົດ​ທິດ​ສັງຄົມ​ນິຍົມ; ການ​ກໍ່ສ້າງ​ລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ ຂອງ​ປະຊາຊົນ, ​ໂດຍ​ປະຊາຊົນ ​ແລະ ​ເພື່ອ​ປະຊາຊົນ; ຮັບປະກັນ​ຜົນ​ປະ​ໂຫຍ​ດສູງ​ສຸດ​ຂອງ​ປະ​ເທດ - ຊາດ ບົນ​ພື້ນຖານ​ບັນດາ​ຫຼັກການ​ຂອງກົດໝາຍ​ສາກົນ ​ໃນ​ສະຖານະ​ການ​ແລະ​ລະບຽບ​ໂລກ​ໃໝ່; ​ແນວທາງ​ການ​ຕ່າງປະ​ເທດ​ທີ່​ເປັນ​ເອກະລາດ, ​ເປັນ​ເຈົ້າ​ຕົນ​ເອງ, ການ​ຫັນ​ການ​ພົວພັນ​ສາກົນ​ເປັນ​ຫຼາຍ​ຮູບ​ຫຼາຍ​ແບບ ຫຼາຍ​ກ້ຳ​ຫຼາຍ​ຝ່າຍ; ບັນຫາ​ທາດ​ແທ້​ແລະ​ລັກສະນະ​ນຳ​ໜ້າ​ຂອງ​ພັກ; ບັນຫາ​ສະມາຊິກ​ພັກ​ເຮັດ​ທຸລະກິດ​ເອກະ​ຊົນ; ສາມ​ການ​ບຸກທະລຸ​ຍຸດ​ທະ​ສາດ​​ເພື່ອ​ການ​ພັດທະນາ​ຂອງ​ປະ​ເທດ​ຊາດ; ​ການຄຸ້ມ​ຄອງ​ການ​ພັດທະນາສັງຄົມ, ການປະຕິບັດ​ຄວາມ​ກ້າວໜ້າ​ແລະ​ຄວາມ​ຍຸຕິ​ທຳ​ທາງ​ສັງຄົມ​ ໃນ​ແຕ່​ລະບາດ​ກ້າວ​ເດີນ​ແລະ​ແຕ່ລະນະ​ໂຍບາຍ​ການພັດທະນາ; ຕັ້ງ​ໝັ້ນ​ແລະ​ເດັດດ່ຽວ​ໃນ​ການ​ປົກ​ປັກ​ຮັກສາ​ເອກະລາດ, ອຳນາດ​ອະທິປະ​ໄຕ, ​ເອກະ​ພາບ ​ແລະ​ຜືນ​ແຜ່​ນດິນ​ອັນ​ຄົບ​ຖ້ວນ​ຂອງ​ປະ​ເທດ ສອດຄ່ອງ​ປັບ​ກົດໝາຍ​ສາກົນ; ຄວບ​ຄຸມ​ອຳນາດ, ປະຕິບັດ​ການ​ຕິດຕາມ​ກວດກາ​ແລະ​ການ​ວິຈາ​ນສັງຄົມ;... ​ໃນ​ແຕ່​ລະ​ລະບົບ​ບັນຫາ, ຜ່ານ​ບັນດາ​ບັ້ນ​ການ​ກະກຽມ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຂອງ​ພັກ, ການ​ສະຫຼຸບ​ສັງ​ລວມ 10 ປີ, 20 ປີ ​ແລະ 30 ປີ​ແຫ່ງ​ການ​ປ່ຽນ​ແປງ​ໃໝ່​, ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳລ້ວນ​ແຕ່​ໄດ້​ດຳ​ເນີນຢ່າງ​ເປັນ​ແບບ​ສະບັບ ຕິດ​ກັບ​ການ​ຄົ້ນຄວ້າ​ທິດ​ສະ​ດີ, ຄົ້ນຄວ້າ​ວິທະຍາສາດ. ​ແຕ່​ລະ​ມະຕິ, ຄຳ​ສັ່ງຂອງ​ສູນ​ກາງ ລ້ວນ​ແຕ່​ໄດ້​ກໍ່ສ້າງ​ບົນ​ພື້ນຖານການສະຫຼຸບ​ສັງ​ລວມພຶດຕິ​ກຳ ​ແລະ ການ​ຄົ້ນຄວ້າ​ທິດ​ສະ​ດີ.

ຄວາມ​ຮັບຜິດຊອບ​ຂອງ​ຄະນະ​ພັກ​ທຸກຂັ້ນ, ທຸກຂະ​ແໜງ​ການ ​ກ່ຽວ​ກັບ​ການສະຫຼຸບ​ສັງ​ລວມພຶດຕິ​ກຳ ນັບ​ມື້​ນັບ​ໄດ້​ກຳນົດ​ຢ່າງ​ຈະ​ແຈ້ງ. ບົນ​ພື້ນຖານ​ສິດ​ອຳນາດ ທີ່​ໄດ້​ຮັບ​ມອບ​ໝາຍ, ຄະນະ​ພັກ​ຂັ້ນ​ຕ່າງໆ​ອອກ​ແຮງ​ປັບປຸງ​ບູລະນະບັນດາ​ອົງການ​ເສນາ​ທິການ​ທີ່​ມີໜ້າ​ທີ່ຫຼັກ​ໃນ​ການສະຫຼຸບ​ສັງ​ລວມພຶດ​ຕິ​ກຳ, ກໍ່ສ້າງ​ແຜນການ​ສະຫຼຸບ​ສັງ​ລວມບັນດາ​ເນື້ອ​ໃນ​ຕາມ​ໂຄງການ​ດຳ​ເນີນ​ງານ​ທົ່ວ​ທັງ​ສະ​ໄໝ. ການສະຫຼຸບ​ສັງ​ລວມພຶດຕິ​ກຳຮັບ​ໃຊ້​ການ​ຄົ້ນ​ຄວາ​ທິດ​ສະ​ດີ ​ເປັນ​ໜ້າ​ທີ່​ຮັບຜິດຊອບ​ຂອງ​ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລຂາທິການ, ​ໃນ​ນັ້ນ​ບັນດາ​ອົງການ​ເສນາ​ທິການ​ຍຸດ​ທະ​ສາດທີ່ມີບົດບາດສະ​ເພາະ​ພິ​ເສດ ຄື ສະພາ​ທິດ​ສະ​ດີ​ສູນ​ກາງ, ບັນດາ​ຄະນະ​ຂອງ​ພັກ (ຄະນະ​ຈັດ​ຕັ້ງ, ​ຄະນະໂຄສະນາ​ອົບຮົມ, ຄະນະເສດຖະກິດ, ຄະນະຂົນຂວາຍ​ປະຊາຊົນ, ຄະນະກວດກາ, ຄະນະກິດຈະການ​ພາຍ​ໃນ), ອົງການ​ຄົ້ນຄວ້າ​ທິດ​ສະ​ດີ​​ແລະກາ​ນ​ເມືອງ​ຂອງ​ພັກ (ສະ​ຖາ​ບັນ​ການ​ເມືອງ​ແຫ່ງ​ຊາດ​ໂຮ່ຈີ​ມິນ, ວາລະສານ​ກອມ​ມູນິດ,  ສະ​ຖາ​ບັນ​ວິທະຍາສາດ​ສັງຄົມ​ຫວຽດນາມ...) ນັບ​ມື້​ນັບ​ໄດ້​ຮັບ​ການ​ເພີ່ມ​ທະວີ​ແຫຼ່ງພະລັງ, ກຳນົດ​ວິທີ​ການ ​ແລະ ດຳ​ເນີນ​ການສະຫຼຸບ​ສັງ​ລວມພຶດຕິ​ກຳຢ່າງ​ເປັນ​ລະບຽບ​ແບບ​ແຜນ. ​ແຕ່​ເດືອນ​ຕຸລາ 1996, ສະພາ​ທິດ​ສະ​ດີ​ສູນ​ກາງ​ໄດ້​ຮັບ​ການ​ສ້າງ​ຕັ້ງ​ຂຶ້ນ, ມີໜ້າ​ທີ່​ເປັນ​ສູນ​ເຕົ້າ​ໂຮມ​ບັນດາກຳລັງ​ຄົ້ນຄວ້າ​ທິດ​ສະ​ດີ, ສະຫຼຸບ​ສັງ​ລວມພຶດ​ຕິ​ກຳ, ​ເປັນ​ທີ່​ປຶກສາ​ໃຫ້​ສູນ​ກາງ​ພັກ​ກ່ຽວ​ກັບ​ບັນດາ​ບັນຫາ​ທິດ​ສະ​ດີກາ​ນ​ເມື​ອງ ​ເພື່ອ​ຮັບ​ໃຊ້​ໃຫ້​ແກ່​ການ​ກໍ່ສ້າງ​ແນວທາງ, ​ແຜນ​ນະ​ໂຍບາຍ ​ແລະ ກຳນົດ​ທິດ​ນະ​ໂຍບາຍ​ທີ່​ສຳຄັນ​ຂອງ​ພັກ. ການ​ເຄື່ອນ​ໄຫວ​ຄົ້ນຄວ້າ​ທິດ​ສະ​ດີ, ວິທະຍາສາດ ຂອງ​ບັນດາ​ສະ​ຖາ​ບັນ, ​ໂຮງຮຽນ ນັບ​ມື້​​ນັບ​ເອົາ​ໃຈ​ໃສ່​ເຖິງ​ການສະຫຼຸບ​ສັງ​ລວມພຶດ​ຕິ​ກຳ. ການ​ປະສານ​ງານ​ລະຫວ່າງ​ສູນ​ກາງ​ກັບ​ບັນດາ​ທ້ອງ​ຖິ່ນ, ອົງການ​ຈັດ​ຕັ້ງ​ເສດຖະກິດ, ໜ່ວຍ​ງານ​ພາລະກິດ​ບໍລິການ, ກົມ​ກອງ​ສູ້​ຮົບ ​ໃນ​ການສະຫຼຸບ​ສັງ​ລວມພຶດ​ຕິ​ກຳ ​ໄດ້​ເກີດ​ຂຶ້ນ​ເປັນ​ປະຈຳ​ແລະ​​ຫຼາກ​ຫຼາຍທາງ​ດ້ານ​ວິທີ​ການ. ວັນ​ທີ 3 ກຸ​ມພາ 2018, ຄະນະ​ບໍລິຫານ​ງານ​ສູນ​ກາງ​ພັກ​ໄດ້​ອອກ​​ໃບ​ແນະນຳ​ສະບັບ​ທີ 02-HD/TW ວ່າ​ດ້ວຍ​ການສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າທິດສະດີ, ​ໃນ​ນັ້ນ​ໄດ້​ທຳ​ຄວາມ​ກະຈ່າງ​ແຈ້ງ​ກ່ຽວ​ກັບຈຸດປະສົງ, ລະດັບ​ຄາດໝາຍ, ​ເປົ້າ​ໝາຍ, ຂອບ​ເຂດ, ​ເນື້ອ​ໃນ, ວິທີ​ການສະຫຼຸບ​ສັງ​ລວມພຶດຕິ​ກຳ, ຄົ້ນຄວ້າ​ທິດ​ສະ​ດີ. ພິ​ເສດ, ​ໃບ​ແນະນຳ​ໄດ້​ອະທິບາຍ​ແຈ້ງ​ກ່ຽວ​ກັບ​ຄວາມ​ຮັບຜິດຊອບ​ຂອງຄະນະ​ພັກ, ຫົວໜ້າ​ຂອງຂັ້ນ​ຕ່າງໆ ​ໃນ​ການສະຫຼຸບ​ສັງ​ລວມພຶດຕິ​ກຳ.

ຖັນ​ແຖວພະນັກງານສະຫຼຸບ​ສັງ​ລວມພຶດຕິ​ກຳນັບ​ມື້​ນັບ​ໄດ້​ຮັບ​ການ​ເພີ່ມ​ທະວີ​ທາງ​ດ້ານ​ຈຳນວນ ​ແລະ ຍົກ​ສູງ​ທາງ​ດ້ານ​ຄຸນ​ນະພາ​ບ. ອາດ​ຈະ​ເຫັນ​ວ່າ, ບັນດາ​ກຳລັງ​ຕໍ່​ໄປ​ນີ້​ໄດ້​ເຂົ້າ​ຮ່ວມ​ການສະຫຼຸບ​ສັງ​ລວມພຶດ​ຕິ​ກຳ: 1- ຫົວໜ້າ ​ແລະ ຄະນະ​ພັກ​ຂັ້ນ​ຕ່າງໆມີ​ໜ້າ​ທີ່​ສະຫຼຸບ​ສັງ​ລວມພຶດຕິ​ກຳ​ການ​ຜັນ​ຂະຫຍາຍປະຕິບັດ​ບັນດາ​ແຜນ​ນະ​ໂຍບາຍ, ​ແນວທາງ​ໃນ​ສຳນັກງານ​ອົງການ, ກົມ​ກອງ, ທ້ອງ​ຖິ່ນ, ຂະ​ແໜງ​ການ​ຂອງ​ຕົນ ​ເພື່ອ​ຮັບ​ໃຊ້​ໃຫ້​ແກ່​ການ​ຍົກ​ສູງ​ປະສິດທິ​ຜົນການຈັດ​ຕັ້ງ​ປະຕິບັດ ​ແລະ ສ່ອງ​ແສງ​ຄືນ​ໃຫ້​ຂັ້ນ​ເທິງ​ທີ່​ມີ​ອຳນາດ​ເພື່ອ​ປັບປຸງ​ນະ​ໂຍບາຍ ຖ້າ​ຫາກ​ມັນ​ຍັງ​ບໍ່​ທັນ​ເໝາະ​ສົມ; 2- ຖັນ​ແຖວ​ນັກ​ຄົ້ນຄວ້າ​ທິດ​ສະ​ດີ, ​ໃນ​ຂະ​ບວນການ​ຄົ້ນຄວ້າ​ທິດ​ສະ​ດີ​ນັ້ນ ຍາມ​ໃດ​ກໍ່​ຖື​ວ່າການສະຫຼຸບ​ສັງ​ລວມພຶດ​ຕິ​ກຳ​ເປັນ​ພາກສ່ວນ​ໜຶ່ງ​ທີ່​ບໍ່​ອາດ​ຈະ​ແຍກ​ອອກ​ໄດ້, ​ເປັນ​ພາກສ່ວນ​ຕົ້ນຕໍ​ຢູ່​​ໃນ​ສະພາ​ທີ່​ປຶກສາ, ສະ​ຖາ​ບັນ, ​ໂຮງຮຽນ, ສະ​ຖາ​ບັນ​ຄົ້ນຄວ້າ; 3- ຖັນ​ແຖວຜູ້​ຊ່ຽວຊານ ​ແລະ​ຜູ້​ຊ່ຽວຊານ​ອາ​ວຸ​ໂສ​ໃນ​ບັນດາ​ຄະນະ​ພັກ​ຢູ່​ສູນ​ກາງ​ແລະ​ທ້ອງ​ຖິ່ນ, ​ໃນ​ຂະບວນວິວັດການ​ກໍ່ສ້າງ​ໂຄງການຮັບ​ໃຊ້​ໃຫ້​ແກ່​ກົມ​ການ​ເມືອງ, ສູນ​ກາງພັກ, ຄະນະ​ພັກ​ແຂວງ ກຳ​ແພງ​ນະຄອນ, ກໍ​ໄດ້​ດຳ​ເນີນ​ການ​ຄົ້ນຄວ້າ​ທິດ​ສະ​ດີ ​ແລະ​ຖື​ວ່າການສະຫຼຸບ​ສັງ​ລວມພຶດ​ຕິ​ກຳ​ແມ່ນ​ໜ້າ​ທີ່​ທີ່​ສຳຄັນ. ​ແຕ່​ລະກຳ​ລັງ​ທີ່​ກ່າວ​ມາ​ເທິງ​ນີ້​ ມີ​ບົດ​ບາດສະ​ເພາະຂອງ​ຕົນ ໃນການສະຫຼຸບ​ສັງ​ລວມພຶດ​ຕິ​ກຳ, ອາດ​ຈະ​ຕິດ​ກັບ​ການ​ນຳພາ ບໍລິຫານ, ຕິດ​ກັບ​ການ​ຝຶກ​ອົບຮົມ​ແລະ​ເຜີຍ​ແຜ່​ທິດ​ສະ​ດີ, ສະໜອງ​ຫຼັກ​ຖານ​ວິທະຍາສາດ, ຕິດ​ກັບຄຳ​ແນະນຳ​ຂອງ​ໂຄງການ​ສະ​ເພາະ. ສິ່ງ​ທີ່​ຄວນ​ເອົາ​ໃຈ​ໃສ່​ຄື ຖັນ​ແຖວ​ພະນັກງານສະຫຼຸບ​ສັງ​ລວມພຶດ​ຕິ​ກຳ ນັບ​ມື້​ນັບ​ໄດ້​ຍົກ​ສູງ​ທາງ​ດ້ານ​ຄຸນ​ນະພາ​ບ, ລະດັບ​ຄວາມ​ຮູ້, ​ໄດ້​ປະກອບ​ວິທີ​ການ​ຮັບ​ໃຊ້​ໃຫ້​ແກ່​ການສະຫຼຸບ​ສັງ​ລວມພຶດ​ຕິ​ກຳ. ພັກ​ແລະ​ລັດ​ໄດ້​ເອົາ​ໃຈ​ໃສ່​ລົງທຶນ​ໃຫ້​ແກ່​ວຽກ​ງານສະຫຼຸບ​ສັງ​ລວມພຶດ​ຕິ​ກຳ, ກວມ​ດ້ວຍ​ການ​ຝຶກ​ອົບຮົມ​ພະນັກງານ ​ແລະ​ເງິນ​ທຶນ​ສຳລັບ​ການ​ດຳ​ເນີນ​ຫົວ​ຂໍ້, ໂຄງການ, ​ແຜນ​ງານ.

​ແບບວິທີ, ວິທີ​ການສະຫຼຸບ​ສັງ​ລວມພຶດຕິ​ກຳນັບ​ມື້​ນັບ​ໄດ້​ເພີ່ມ​ເຕີມ, ບູລະນະ​ໃຫ້​ສົມບູນ. ອາດ​ຈະ​ເຫັນ​ວ່າ, ​ໃນ​ຊຸມ​ປີ​ທີ່​ຜ່ານ​ມາ ບັນດາ​ວິທີ​ການ​ທີ່​ໄດ້​ນຳ​ໃຊ້​ຢ່າງ​ແຜ່​ຫຼາຍ​ເຂົ້າ​ໃນ​ການສະຫຼຸບ​ສັງ​ລວມພຶດຕິ​ກຳ ຄື: 1- ການສະຫຼຸບ​ສັງ​ລວມພຶດ​ຕິ​ກຳ​ໄດ້​ແຊກ​ຊ້ອນ​ເຂົ້າ​ໃນ​ການ​ຄົ້ນຄວ້າ​ທິດ​ສະ​ດີ​ພື້ນຖານ, ​ເອົາ​ທິດ​ສະ​ດີ​ພື້ນຖານ​ເຍືອງ​ສ່ອງ​ໃສ່​ພຶດຕິ​ກຳ, ​ແນ​ໃສ່​ຄົ້ນ​ເຜີຍ​ບັນຫາ​ພຶດຕິ​ກຳ​ໃໝ່​ທີ່​ຫາ​ກໍ່​ເກີດ​ຂຶ້ນ, ບັນດາ​ບັນຫາ​ທີ່​ທິດ​ສະ​ດີມີ​ຄວາມ​ຫຼ້າ​ຊ້າ ຫຼື​ມີຊ່ອງ​ຫວ່າງ​ ທີ່​ຕ້ອງ​ໄດ້​ຮັບ​ການ​ເພີ່ມ​ເຕີມ, ພັດທະນາ; 2- ການສະຫຼຸບ​ສັງ​ລວມພຶດ​ຕິ​ກຳຕິດ​ກັບ​ການ​ຄົ້ນຄວ້າ​ວິທະຍາສາດ, ຕາມ​ທຳ​ມະ​ດາ​ແມ່ນ ນຳ​ໃຊ້​ທິດ​ສະ​ດີ​ໃໝ່​ເພື່ອ​ວິ​ເຄາະ​ແລະ​ປະ​ເມີນ​ຜົນ​ພຶກ​ຕິ​ກຳ ກໍ່​ຄືການ​ສຳ​ຫຼວດສະຖານະ​ການ​ຕົວ​ຈິງ ​ເພື່ອ​ເພີ່ມຄວາມ​ໜ້າ​ເຊື່ອ​ຖື​ຂອງ​ຫຼັກ​ຖານ​ວິທະຍາສາດ; 3- ການສະຫຼຸບ​ສັງ​ລວມພຶດ​ຕິ​ກຳ​ໄດ້ດຳ​ເນີນ​ປະຕິບັດ​ ໂດຍ​ຜ່ານ​ການ​ປະ​ເມີນບັນດາ​ຕົວ​ແບບ​ທົດ​ລອງ​​ໃນ​ພາກຕົວ​ຈິງ, ພິ​ເສດ​ແມ່ນ ບັນດາ​ບັນຫາ​ທີ່​ຍັງ​ມີ​ຄວາມ​ຮັບ​ຮູ້​ແຕກ​ຕ່າງ​ກັນ, ຕ້ອງ​ເລືອກ​ເຮັດ​ທົດ​ລອງ​ເພື່ອ​ຖອດ​ຖອນ​ບົດຮຽນ​ເທື່ອ​ລະ​ກ້າວ, ຈະ​ຜັນ​ຂະຫຍາຍ​ກວ້າງຂວາງ​ຫຼື​ບໍ່, ​ເຊັ່ນ​ບັນຫາ ການລວມຫົວໜ້າ​ຄະນະ​ພັກ​ແລະ​ອຳນາດ​ການ​ປົກຄອງ​ທ້ອງ​ຖິ່ນ​ເຂົ້າ​ເປັນ​ໜຶ່ງ; 4- ການສະຫຼຸບ​ສັງ​ລວມພຶດ​ຕິ​ກຳ​ໄດ້​ປະຕິບັດ​ໃນ​ການ​ກໍ່ສ້າງ​ໂຄງການ​ເພື່ອ​ຍື່ນ​ຕໍ່​ສູນ​ກາງ​ພັກ, ກົມ​ການ​ເມືອງ, ລັດຖະບານ, ສະພາ​ແຫ່ງ​ຊາດ,... ດ້ວຍ​ການ​ເຄື່ອນ​ໄຫວ​ທີ່​ຕ່າງ​ກັນ​ຫຼາຍ​ຢ່າງ ​ແລະ​ ການ​ເຂົ້າ​ຮ່ວມ​ຂອງ​ຫຼາຍ​ພາກສ່ວນ, ​ໂດຍ​ປົກກະຕິ ຄະນະ​ກຳມະການ​ພັກ ​ແລະ ຄະນະ​ຂອງ​ພັກ​ເປັນ​ຜູ້ດຳ​ເນີນ, ຜະລິດ​ຕະພັນ​ສົ້ນ​ອອກ​ແມ່ນ ມະຕິ, ບົດ​ສະຫຼຸບ​ຂອງ​ສູນ​ກາງ; 5- ສະຫຼຸບ​ສັງ​ລວມບັນດາ​ແບບຢ່າງ​ກ້າວໜ້າ, ວິທີ​ເຮັດ​ທີ່​ດີ, ຕົວ​ແບ​ບໃໝ່, ​​ໂດຍ​ນັກວິທະຍາສາດ​ສ່ວນ​ບຸກຄົນ​ເປັນ​ຜູ້​ປະຕິບັດ ຫຼື​ໄດ້​ສ່ອງ​ແສງ​ໃນ​ໜັງສືພິມ, ​ໃນ​ການຈັດ​ຕັ້ງການ​ແຂ່ງຂັນ-ຍ້ອງຍໍ​ຊົ​ມ​ເຊີຍ. ອາດ​ຈະ​ເຫັນ​ວ່າ, ດ້ວຍ​ຫຼາຍ​ວິທີ​​ເທິງ​ນີ້ ການສະຫຼຸບ​ສັງ​ລວມພຶດ​ຕິ​ກຳນັບ​ມື້​ນັບ​ຕິດ​ແໜ້ນ​ກັບການ​ເຄື່ອນ​ໄຫວ​ຄົ້ນຄວ້າ​ທິດ​ສະ​ດີ, ຄົ້ນຄວ້າ​ວິທະຍາສາດ, ກໍ່ສ້າງ​ບັນດາ​ໂຄງການ​ຂອງ​ສູນ​ກາງ ​ແລະ ທ້ອງ​ຖິ່ນ, ກິດຈະການ​ສື່ສານ, ການ​ແຂ່ງຂັນ-ຊົມ​ເຊີຍ​ໃຫ້​ລາງວັນ, ສັນລະ​ເສີນ​ໃຫ້​ກຽດ​ ແກ່ປັດ​ໄຈ​ໃໝ່.

ການ​ສົມທົບ​ລະຫວ່າງ​ອັດຕະພາບ​ແລະ​ຄູ່ຮ່ວມ​ງານ​ໃນ​ການສະຫຼຸບ​ສັງ​ລວມພຶດຕິ​ກຳ ນັບ​ມື້​ນັບ​ແໜ້ນ​ແຟ້ນ. ​ໂດຍ​ສະ​ເພາະ ການ​ປະສານ​ງານ​ລະຫວ່າງບັນດາ​ອົງການ​ຄົ້ນຄວ້າ​ທິດ​ສະ​ດີ, ວິທະຍາສາດສະ​​ເພາະ​ກັບ​ບັນດາ​ອົງການຈັດ​ຕັ້ງ​ການ​ປະຕິບັດ, ລະຫວ່າງ​ບັນດາ​ຄະນະ/ຂະ​​ແໜງ​ການ​ສູນ​ກາງ ​ແລະ ບັນດາ​ຄະນະ​ພັກ​ແຂວງ/ກຳ​ແພງ​ນະຄອນ, ລະຫວ່າງ​ອົງການທີ່​ປຶກສາ ​ແລະ ອົງການກຳນົດ​ນະ​ໂຍບາຍ. ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳຫຼາຍ​ຄັ້ງ ​ຍັງ​ມີ​ການ​ເຂົ້າ​ຮ່ວມ​ຂອງ​ບັນດາ​ຄູ່ຮ່ວມ​ມື​ສາກົນ ​ແລະ ​ອົງການ​ຜູ້​ບໍລິຈາກ​ໃນ​ປະ​ເທດ, ​ເປັນ​ຕົ້ນ​ແມ່ນ ບັນດາ​ບັນຫາ​ໃໝ່ທີ່​ຕ້ອງການ​ຄວາມ​ຊ່ວຍ​ເຫຼືອ​ທາງ​ດ້ານ​ເຕັກ​ໂນ​ໂລ​ຊີ, ວິທີ​ປະ​ເມີນ ​ແລະ ​ຊັບພະຍາກອນ​ການ​ລົງ​ທຶນ. ບັນດາ​ການສະຫຼຸບ​ສັງ​ລວມພຶດຕິ​ກຳ ນັບ​ມື້​ນັບ​ເຊື່ອມ​ຕໍ່​ກັບສື່​ມວນ​ຊົນ ​ເພື່ອ​ໂຄສະນາ, ສ້າງ​ຜົນ​ສະທ້ອນ​ແຜ່​ລາມ​ຂອງ​ບັນດາ​ຕົວ​ແບບ​ໃໝ່, ວິທີ​ເຮັດ​ທີ່​ດີ, ​ແບບຢ່າງທີ່​ດີ​ເດັ່ນ. ບັນດາ​ຮູບ​ການຈັດ​ຕັ້ງ​ເຫດການ ​ເພື່ອ​ໃຫ້​ກຽດ ສັນລະ​ເສີນ​ປັດ​ໄຈ​ໃໝ່, ​ແບບຢ່າງ​ທີ່​ດີ​ເດັ່ນ ​ແລະ ຍ້ອງຍໍ​ໃຫ້​ລາງວັນ​ຢ່າງ​ທັນ​ການ ຍິ່ງ​ເຮັດ​ໃຫ້ການສະຫຼຸບ​ສັງ​ລວມພຶດຕິ​ກຳມີ​ຊີວິດ​ຊີວາ, ຊຶ່ງ​ບໍ່​ພຽງ​ແຕ່​ຢູ່​ໃນ​ເຫດການ, ​ໃນ​ອົງການ​ຈັດ​ຕັ້ງຕ່າງໆ​ເທົ່າ​ນັ້ນ, ຫາກ​ຍັງມີ​ຢູ່​ໃນ​ບຸກຄົນ​ສະ​ເພາະ. ພິຈາລະນາ​ຈົນ​ສຸດ​ແລ້ວ, ຈຸດໝາຍ​ປາຍທາງ​ຂອງ​ຜະລິດ​ຕະພັນ​ການສະຫຼຸບ​ສັງ​ລວມພຶດຕິ​ກຳນັ້ນ​ແມ່ນ ​ແນວທາງ, ​ແຜນ​ນະ​ໂຍບາຍ, ນະ​ໂຍບາຍຂອງ​ພັກ, ດັ່ງ​ນັ້ນ, ກົນ​ໄກ​ຮັບປະກັນ​ໃຫ້​ຜົນ​ຂອງ​ການ​ຄົ້ນຄວ້າ ສະຫຼຸບ​ສັງ​ລວມ ​ໄດ້​ນຳ​ເຂົ້າ​ໃນວາລະ​ການວາງ​ກຳນົດ​ແນວທາງ, ນະ​ໂຍບາຍ​ຂອງ​ພັກ​ແລະ​ລັດ ​ແມ່ນ​ສຳຄັນ​ທີ່​ສຸດ. ບັນດາ​ອົງການ​ນຳພາ​ຂອງ​ພັກ​ແລະ​ລັດ​ໄດ້​ເອົາ​ໃຈ​ໃສ່​ຮັບ​ຟັງ​ລາຍ​ງານຂໍ້​ສະ​ເໜີ​ແນະ​ຈາກ​ພຶດຕິ​ກຳ, ​ເປັນ​ຕົ້ນ​ແມ່ນ​ບັນດາ​ຕົວ​ແບບ​ໃໝ່, ວິທີ​ເຮັດ​ທີ່​ດີ, ​ແບບຢ່າງ​ທີ່​ດີ​ເດັ່ນ​ກ້າວໜ້າ. ການ​ນຳ​ຂັ້ນ​ຕ່າງໆ​ນັບ​ມື້​ເອົາ​ໃຈ​ໃສ່​ເຖິງ​ການ​ນຳ​ໃຊ້​ຜູ້​ຊ່ຽວຊານ ​ເພື່ອ​ໃຫ້​ຄຳ​ປຶກສາ​ກ່ຽວ​ກັບ​ບັນດາ​ບັນຫາ​ທິດ​ສະ​ດີ​ແລະ​ພຶດຕິ​ກຳ ກໍ່​ຄື​ກໍ່ສ້າງ​ກົນ​ໄກການ​ຕິດ​ຕໍ່ ການ​ປຶກສາ​ສົນທະນາ ​ແລະ ການ​ໃຫ້​ຄຳ​ປຶກສາ​ກ່ຽວ​ກັບ​ນະ​ໂຍບາຍທີ່​​ໃກ້ຊິດ​ຕິດ​ແທດ​ກັບ​ຮາກ​ຖານ, ຮັບ​ຟັງ​ຄວາມ​ເຫັນ​ຂອງ​ປະຊາຊົນ, ທົບ​ທວນ​ຂໍ້​ມູນ​ໃນ​ໜັງສືພິມ,... ​ແນ​ໃສ່​ເພີ່ມ​ເຕີມ​ຂໍ້​ມູນ​ຂ່າວສານ​ໃຫ້​ແກ່​ການປະກາດ​ໃຊ້​ແຜນ​ນະ​ໂຍບາຍ, ມະຕິ​ຕົກລົງ​ທີ່​ສຳຄັນ.

ສິ່ງ​ແວດ​ລ້ອມ​ສຳ​ບັລການສະຫຼຸບ​ສັງ​ລວມພຶດຕິ​ກຳ ຕິດ​ກັບ​ການ​ຄົ້ນຄວ້າ​ທິດ​ສະ​ດີ, ຄົ້ນຄວ້າ​ວິທະຍາສາດ ​ໄດ້​ຮັບ​ການ​ປົວ​ແປງ​ທີ່​ແນ່ນອນ. ສຳລັບ​ບັນດາ​ບັນຫາ​ຊຶ່ງ​ກ່ອນ​ໜ້າ​ນີ້​ຖື​ວ່າ​ເປັນ​ຂໍ້​ຫ້າມ, ຍັງ​ມີ​ການ​ຮັບ​ຮູ້​ທີ່​ແຕກ​ຕ່າງ​ກັນນັ້ນ, ດຽວ​ນີ້ ພັກ​​ໄດ້ອະນຸຍາດ​ໃຫ້​ເຮັດ​ທົດ​ລອງ ​ແລ້ວສະຫຼຸບ​ສັງ​ລວມ, ​ເຊັ່ນ ສະມາຊິກ​ພັກ​ເຮັດ​ທຸລະ​ກິດ​ເອກະ​ຊົນ, ການ​ລວມຫົວໜ້າ​ຄະນະ​ພັກ​ແລະ​ອຳນາດ​ການ​ປົກຄອງ​ຮາກ​ຖານ​​ເຂົ້າ​ເປັນ​ໜຶ່ງ, ການ​ພົວພັນ​ຄູ່​ຮ່ວມ​ມື​ພາກ​ລັດ-​ເອກະ​ຊົນ, ການ​ແບ່ງ​ຂັ້ນ​ໃຫ້​ອຳນາດ​ການ​ປົກຄອງ​ທ້ອງ​ຖິ່ນ... ການ​ແປ ​ແລະຮັບ​ເອົາທິດ​ສະ​ດີ​ດ້ານ​ວິຊາ​ການ​ທີ່​ຫຼາກ​ຫຼາຍ ກໍ່​ຊ່ວ​ຍໃຫ້​ຜູ້​ເຮັດ​ວຽກ​ງານສະຫຼຸບ​ສັງ​ລວມພຶດຕິ​ກຳມີ​ວິທີ​ການ​ເບິ່ງ​ໃໝ່, ມີ​​ເຄື່ອງມືທິດ​ສະ​ດີ​ແລະ​ວິທີ​ການ​ ​ເພື່ອ​ຮັບ​ໃຊ້​ໃຫ້​ແກ່​ການສະຫຼຸບ​ສັງ​ລວມພຶດຕິ​ກຳ. ການ​ເປີດ​ປະຊາທິປະ​ໄຕ​ໃນ​ການ​ຄົ້ນຄວ້າ​ວິທະຍາສາດ​ ໄດ້​ຊ່ວຍ​ນຳ​ເອົາ​ຫຼາຍ​ບັນຫາ​ອອກ​ມາ​ ເພື່ອ​ປຶກສາ​ສົນທະນາ, ​ໂຕ້​ຖຽງ​ໃນ​ໜັງສືພິມ ​ແລະ ​ໃນ​ກອງ​ປະຊຸມ​ສຳ​ມະ​ນາ ກ່ອນການ​ສະຫຼຸບ.

2- ຂໍ້​ຈຳກັດ ​ແລະສາ​ເຫດ

ຄຽງ​ຂ້າງ​ກັບ​ຜົນສຳ​ເລັດ​ທີ່​ສຳຄັນ​ເທິງ​ນີ້, ຈຳ​ເປັນ​ຕ້ອງ​ເຫັນ​ວ່າ, ການສະຫຼຸບ​ສັງ​ລວມພຶດ​ຕິ​ກຳຮັບ​ໃຊ້​ໃຫ້​ແກ່​ການຄົ້ນຄວ້າ​ທິດ​ສະ​ດີ​ ຍັງ​ມີ​ຂໍ້​ຈຳກັດ​ບໍ່​ໜ້ອຍ. ​ເບິ່ງ​ລວມ, ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິກຳ ບໍ່ໄດ້​ດຳ​ເນີນການ​ຢ່າງ​ມື​ອາຊີບ, ຂາດຖັນ​ແຖວ​ຜູ້​ຊ່ຽວຊານທາງ​ດ້ານ​ປະລິມານ ​ແລະ ຄຸນ​ນະພາ​ບທີ່​ຈຳ​ເປັນ​ເພື່ອຮັບຜິດຊອບ​ວຽກ​ງານ​ນີ້. ການສະຫຼຸບ​ສັງ​ລວມພຶດ​ຕິ​ກຳ​ແມ່ນ​ການ​ເຄື່ອນ​ໄຫວວິທະຍາສາດ-ພຶດຕິ​ກຳ ພິ​ເສດສະ​ເພາະ ​ແຕ່​ຍັງ​ຂາດວິທີ​ວິທະຍາ ​ແລະ ຂອບ​ທິດ​ສະ​ດີທີ່​ກຳນົດ (ພາວະ​ພາກ, ​ເປົ້າ​ໝາຍ, ຂອບ​ເຂດ, ວິທີ​ການ, ​ເຄື່ອງມື, ພາຫະນະ, ສາຍ​ພົວພັນ​ລະຫວ່າງ​ການສະຫຼຸບ​ສັງ​ລວມພຶດ​ຕິ​ກຳ ກັບ​ການ​ຄົ້ໜຄວ້າ​ທິດ​ສະ​ດີ, ອົບຮົມ​ສຶກສາທິດ​ສະ​ດີ, ຄົ້ນຄວ້າ​ວິທະຍາສາດ, ວາງ​ກຳນົດ​ແນວທາງ...) ​ເປັນ​ພື້ນຖານ​ໃຫ້​ຄະນະ​ພັກ​ຂັ້ນ​ຕ່າງໆ ​ເປັນ​ເຈົ້າ​ການ​ດຳ​ເນີນ​ການ. ຍ້ອນ​ຂາດ​ວິທີ​ວິທະຍາ​ແລະຂອບ​ທິດ​ສະ​ດີ​ທີ່​ເປັນ​ເອກະ​ພາບ, ດັ່ງ​ນັ້ນ​ຜູ້​ເຮັດ​ວຽກ​ງານສະຫຼຸບ​ສັງ​ລວມພຶດ​ຕິ​ກຳ ຈຶ່ງ​ບໍ່​ໄດ້​ສຶກສາ ຝຶກ​ອົບ​ຮົມພິ​ເສດສະ​ເພາະ, ດຳ​ເນີນ​ການສະຫຼຸບ​ສັງ​ລວມພຶດ​ຕິ​ກຳບໍ່​ເປັນ​ມື​ອາຊີບ. ​ເພາະສະ​ນັ້ນ, ​ເມື່ອ​ຕ້ອງການ​ລະດົມ​ກຳລັງ​ເຂົ້າ​​ໃນການປະຕິບັດ​ໜ້າ​ທີ່​ສະຫຼຸບ​ສັງ​ລວມພຶດຕິ​ກຳ​ໃດ​ໜຶ່ງ ກໍ່​ມັກ​ຈະ​ຂາດ​ຜູ້​ຊ່ວຍ​ຊານ​ຫຼັກ​ແຫຼ່ງ, ​ເມື່ອມີ​ຄວາມ​ຮຽກຮ້ອງ​ຕ້ອງການ​ປະຕິບັດ​ໜ້າ​ທີ່ ຫຼາຍ​ບ່ອນ​ໄດ້​ດຳ​ເນີນ​ແບບ​ຮູບ​ການ, ພໍ​ໃຫ້​ແລ້ວ, ບໍ່​ມີ​ຜົນ​ໄດ້​ຮັບ​ທາງ​ບວກ. ສິດ​ຂອບ​ເຂດ, ຄວາມ​ຮັບຜິດຊອບ​ຂອງ​ບັນດາ​ອັດຕະພາບ ​ແລະ ກຳລັງ​ເຂົ້າ​ຮ່ວມ​ການສະຫຼຸບ​ສັງ​ລວມພຶດ​ຕິ​ກຳ ບໍ່​ໄດ້​ກຳນົດ​ຢ່າງ​ຊັດ​ເຈນ. ຕາມ​ທຳ​ມະ​ດາ, ​ເມື່ອ​ຢືນ​ຕໍ່ໜ້າ​ຄວາມ​ຮຽກຮ້ອງ​ຕ້ອງການໜ້າ​ທີ່​ທີ່​ໄດ້​ຮັບ​ມອບ​ໝາຍ, ບັນດາ​ອົງການ​ລ້ວນ​ແຕ່​ໄດ້ສ້າງ​ຕັ້ງ​ຄະນະ​ຊີ້​ນຳທີ່​ມີ​ຄົບ​ທຸກ​ພາກສ່ວນ ​ແຕ່​ຂາດ​ຜູ້​ຊ່ຽວຊານ​ຫຼັກ​ແຫຼ່ງ ທີ່​ເຂົ້າ​ໃຈ​ຢ່າງ​ເລິກ​ເຊິ່ງກ່ຽວ​ກັບ​ທິດ​ສະ​ດີ, ມີ​ຄວາມ​ຮູ້ກ່ຽວ​ກັບ​ພຶດຕິ​ກຳ ​ແລະ ມີ​ຄວາມ​ຊຳນານ​ທາງ​ດ້ານ​ວິທີ​ການ.

​ເປັນອັນ​ຈະ​ແຈ້ງວ່າ, ​ເຖິງ​ວ່າວຽກ​ງານສະຫຼຸບ​ສັງ​ລວມພຶດ​ຕິ​ກຳ​ໄດ້​ຮັບ​ຄວາມ​ເອົາ​ໃຈ​ໃສ່​ເປັນ​ສຳຄັນ ​ແຕ່ຍັງ​ບໍ່​ທັນ​ຕອບ​ສະໜອງ​ໄດ້ກັບ​ຄວາມ​ຕ້ອງການ, ໜ້າ​ທີ່​ຄົ້ນຄວ້າ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ. ມີ​ບັນຫາ​ພຶດຕິ​ກຳ​ຈຳນວນ​ໜຶ່ງ​ທີ່ບໍ່​ໜ້ອຍ ​ໄດ້​ໄຂ​ເສັ້ນທາງ, ຊ້ຳ​ບໍ່​ໜຳ​ ຍັງ​ໄດ້​ດຳ​ເນີນການ​ທົດ​ລອງ​ເປັນ​ເວລາ​ຫຼາຍ​ປີ, ​ແຕ່​ວຽກ​ງານສະຫຼຸບ​ສັງ​ລວມພຶດ​ຕິ​ກຳກໍ່​ຍັງ​ບໍ່​ມີຂໍ້​ສະຫຼຸບ​ທີ່​ຊັດ​ເຈນ (​ເຊັ່ນ ບັນຫາລວມຫົວໜ້າ​ຄະນະ​ພັກ​ແລະ​ອຳນາດ​ການ​ປົກຄອງ​​ເຂົ້າເປັນ​ໜຶ່ງ, ຕົວ​ແບບ​ອຳນາດ​ການ​ປົກຄອງ​ໃນ​ຕົວ​ເມືອງ...). ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳຂ​ອງຄະນະ​ພັກ​ຢູ່​ຫຼາຍ​ທ້ອງ​ຖິ່ນມີ​ລັກສະນະ​ຮູບ​ການ, ດັ່ງ​ນັ້ນ ຜະລິດ​ຕະພັນ​ຂອງ​ການສະຫຼຸບ​ສັງ​ລວມພຶດ​ຕິ​ກຳ ພຽງ​ແຕ່​ຢຸດ​ຢູ່​ທີ່ ບົດລາຍ​ງານ​ການ​ບໍລິຫານທີ່​ແຂງ​ກະດ້າງ, ບໍ່​ມີ​ຄວາມ​ສາມາດຫັນ​ເປັນຄວາມ​ຮູ້ ຫຼື ມີ​ຄວາ​ມຮູ້​ວິທະຍາສາດ​ໜ້ອຍ​ສຸດ ​ເພື່ອ​ກັ່ນ​ຕອງ​ເນື້ອ​ໃນ​ມາ​ຮັບ​ໃຊ້​​ໃຫ້​ແກ່​ການ​ເພີ່ມ​ເຕີມ​ແລະ​ພັດທະນາ​ທິດ​ສະ​ດີ. ສະພາບ​ການ​ຫຼາຍ​ທ້ອງ​ຖິ່ນ “ໝູນ​ໃຊ້” ຕາມ​ລຳພັງ​ໃຈ ​ແນວທາງ​ ແຜນ​ນະ​ໂຍບາຍ​ລວມ ​ເຂົ້າ​ໃນ​ເງື່ອນ​ໄຂຕົວ​ຈິງ​ຂອງ​ທ້ອງ​ຖິ່ນ​ຕົນນັ້ນ ບໍ່​ພຽງ​ແຕ່​​ເນື່ອງຈາກ​ຄວາມ​ອ່ອນ​ແອ​ທາງ​ດ້ານ​ທິດ​ສະ​ດີ​ເທົ່າ​ນັ້ນ, ຫາກ​ຍັງ​ມີ​ທັງ​ສາ​ເຫດຈາກການ​ເບິ່ງ​ເບົາການສະຫຼຸບ​ສັງ​ລວມພຶດ​ຕິ​ກຳ ​ເພື່ອ​ທຳ​ຄວາມ​ກະ​ຈ່າງ​ແຈ້ງ​ກ່ຽວ​ກັບ​ຈຸດ​ພິ​ເສດສະ​ເພາະ​ຂອງ​ທ້ອງ​ຖິ່ນ​ ​ໃນ​ຂະ​ບວນວິວັດ​ການ​ຈັດ​ຕັ້ງ​ປະຕິບັດ. ຫຼື​ສະພາບ​ການຮ່ຳຮຽນບົດຮຽນ​ຂອງ​ທ້ອງ​ຖິ່ນ​ອື່ນ​ແບບ​ກົນ​ຈັກ ທີ່​ນຳ​ໄປ​ສູ່​ຄວາມ​ລົ້ມ​ເຫຼວນັ້ນ ກໍ່​ຍ້ອນ​ຄວາມ​ອ່ອ​ນແອ​ຂອງ​ວຽກ​ງານສະຫຼຸບ​ສັງ​ລວມພຶດ​ຕິ​ກຳ, ບໍ່​ກຳ​ໄດ້​ຈຸດ​ພິ​ເສດ​ຂອງ​ທ້ອງ​ຖິ່ນ​ຕົນ​ເອງ​ເພື່ອ​ໝູນ​ໃຊ້​ໃຫ້​ມັນ​ສອດຄ່ອງ (ເຊັ່ນ ຂະ​ບວນການ​ສ້າງ​ໂຮງງານ​ຊີມັງ​ເຕົາ​ຕັ້ງ, ການກໍ່ສ້າງ​ໂຮງງານນ້ຳຕານ, ການ​ປູກ​ຢາງພາລາ, ການ​ຫັນ​ເປັນ​ຫຸ້ນ​ສ່ວນ​ໄລຍະ​ຕົ້ນ, ການ​ຮ່ວມ​ມື​ພາກ​ລັດ-​ເອກະ​ຊົນ​ ​ໃນ​ຊຸມ​ປີ​ທີ່​ຜ່ານ​ມາ...).

ສາ​ເຫດ​ຂອງ​ຂໍ້​ຈຳກັດ, ຈຸດ​ອ່ອນ​ເທິງ​ນີ້​ແມ່ນ​ມີ​ຫຼາຍ, ​ແຕ່​ສາ​ເຫດ​ຕົ້ນຕໍ​ແມ່ນ: 1- ລັດທິ​ຄຳ​ພີ​ທາງ​ທິດ​ສະ​ດີ ​ທີ່​ຊືມ​ເລິກ​ໃນ​ພະນັກງານ, ສະມາຊິກ​ພັກ​ຈຳນວນ​ໜຶ່ງ​ໃນ​ເວລາ​ຍາວ​ນານ ​ໄດ້​ຈຳກັດ​ຄວາມ​ຕັ້ງໜ້າ, ​ເປັນ​ເຈົ້າ​ການ​ໃນ​ການສະຫຼຸບ​ສັງ​ລວມພຶດ​ຕິ​ກຳ​ເພື່ອ​ເພີ່ມ​ເຕີມ, ພັດທະນາ​ປະດິດ​ສ້າງ​ທິດ​ສະ​ດີ; ຄວາມ​ຄິດ​ຂອງ​ພະນັກງານ​ສ່ວນ​ຫຼາຍ​ແມ່ນ ລໍຖ້າ​ຂັ້ນ​ເທິງ​ເວົ້າ​ຫຍັງ​ແມ່ນ​ຂັ້ນ​ລຸ່ມ​ເຮັດ​​ຖືກຕ້ອງຕາມ ຫຼື “ໝູນ​ໃຊ້” ບົດຮຽນ​ທີ່​ມີ​ພ້ອມ​ຂອງ​ຕົນ​ເອງຕາມ​ລຳພັງ​ໃຈ; 2- ລັດທິ​ບົດຮຽນ​ນິຍົມ​ແມ່ນ​ພະຍາດ​ແຜ່​ຫຼາຍທີ່​ນຳ​ໄປ​ສູ່​ການ​ເບິ່ງ​ເບົາ​ທິດ​ສະ​ດີ, ຂາດ​ສະຕິ​ຍົກ​ສູງ, ພັດທະນາ​ຄວາມ​ຮູ້​ບົດຮຽນ​ໃຫ້​ກາ​ຍ​ເປັນຄວາມ​ຮູ້​ທິດ​ສະ​ດີ ​ໃນ​ຂະ​ບວນການ​ນຳພາ, ຄຸ້ມ​ຄອງ, ບໍລິຫານ​ຈັດການ; 3- ຄະນະ​ພັກ​ຢູ່​ຫຼາຍ​ແຫ່ງ​ບໍ່​ໄດ້​ເອົາ​ໃຈ​ໃສ່ຢ່າງ​ຖືກຕ້ອງ​ເຖິງ​ການ​ລົງທຶນ​ທາງ​ດ້ານ​ກຳລັງ​ຄົນ, ກຳລັງ​ຊັບ​ ແລະ​ເວລາ ​ໃຫ້​ແກ່​ການສະຫຼຸບ​ສັງ​ລວມພຶດ​ຕິ​ກຳ ຮັບ​ໃຊ້​ການ​ຄົ້ນຄວ້າ​ທິດ​ສະ​ດີ ​ແລະ ຮັບ​ໃຊ້​ການ​ຊີ້​ນຳ ບໍລິຫານ​ຈັດການ, ຖ້າ​ຫາກດຳ​ເນີນ​ກໍ່​ເປັນ​ພຽງການ​ເຮັດ​ຕາມ​ຮີດ, ຮູບ​ການ, ບໍ່​ເປັນ​ແບບ​ແຜນ, ຮອບ​ຄອບ, ວິທະຍາສາດ; 4- ຂາດກຳລັງ​ຜູ້​ຊ່ຽວຊານ​ເປັນ​​ແກນຫຼັກ​ໃຫ້​ແກ່​ການສະຫຼຸບ​ສັງ​ລວມພຶດ​ຕິ​ກຳ ​ແລະ ຝຶກ​ອົບຮົມ, ​ແນະນຳ, ຝຶກ​​ແອບ​ວິທີ​ການສະຫຼຸບ​ສັງ​ລວມພຶດ​ຕິ​ກຳ.

ບັນດາ​ບັນຫາ​ທີ່​ວາງ​ອອກ​ມາ ​ແນ​ໃສ່​ຍົກ​ສູງ​ປະສິດທິ​ຜົນ​ຂອງ​ການສະຫຼຸບ​ສັງ​ລວມພຶດ​ຕິ​ກຳຮັບ​ໃຊ້​ການ​ຄົ້ນຄວ້າ​ເພີ່ມ​ເຕີມ, ພັດທະນາ​ທິດ​ສະ​ດີ​ກ່ຽວ​ກັບ​ການ​ປ່ຽນ​ແປງ​ໃໝ່​ຂອງ​ພັກ ​ໃນ​ເວລາ​ຕໍ່ໜ້າ:

1- ສະພາບ​ໃໝ່ ​ແລະ ທິດ​ທາງສະຫຼຸບ​ສັງ​ລວມພຶດ​ຕິ​ກຳ

ພາຍຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່, ຫວຽດນາມ​ພວມ​ກ້າວ​ເຂົ້າ​ສູ່​ເສັ້ນທາງ​ການ​ພັດທະນາ​ໃໝ່ ດ້ວຍ​ຫຼາຍ​ໂອກາດ​ແລະ​ສິ່ງ​ທ້າ​ທາຍ​ທີ່​ແຊກ​ຊ້ອນ​ກັນ. ​ໂອກາດ​ຖືກ​ສ້າງ​ຂຶ້ນ​ມາ​ຈາກ​ຄວາມ​ມສຳ​ເລັດ​ຂອງ​ການ​ປ່ຽນ​ແປງ​ໃໝ່​ໃນ 30 ກວ່າ​ປີ, ຖານະ​ບົດບາດ​ຂອງ​ຫວຽດນາມ​ນັບ​ມື້​ນັບ​ໄດ້​ຍົກ​ສູງ​ໃນ​ເວທີ​ສາກົນ, ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ພາລະກິດ​ການ​ປ່ຽນ​ແປງ​ໃໝ່ ນັບ​ມື້​ນັບ​ໄດ້​ປັບປຸງ. ​ແຮງ​ກົດ​ດັນ​ຮຸນ​ແຮງ​ເມື່ອຊັບພະຍາກອນ​ການຈະ​ເລີ​ນ​ເຕີບ​ໂຕສຳລັບ​ຄວາມ​ກວ້າງ​ຄ່ອຍໆບົກ​ແຫ້ງ​ລົງ ​ແລະ ຂາດ​ແຄນ, ການ​ແຂ່ງຂັນ​ຍຸດ​ທະ​ສາດ​ລະຫວ່າງ​ບັນດາ​ປະ​ເທດ​ໃຫຍ່​ຢູ່​ພາກ​ພື້ນ​ອາຊີ-ປາຊີ​ຟິກນັບ​ມື້​ນັບ​ເຄັ່ງ​ຮ້ອນ, ​ໂຄງ​ສ້າງ​ທາງ​ການ​ເມືອງ​ແລະ​ຄວາມ​ໝັ້ນຄົງ​ໃນ​ພາກ​ພື້ນພວມ​ປ່ຽນ​ແປງ, ພາລະກິດ​ການ​ປົກ​ປັກ​ຮັກສາ​ເອກະລາດ, ອຳນາດ​ອະທິປະ​ໄຕ, ຜືນ​ແຜ່​ນດິນ​ອັນ​ຄົບ​ຖ້ວນ ​ແລະ ການຮັກສາ​ສະພາບ​ແວດ​ລ້ອມ​ສັນຕິພາບ, ສະຖຽນ​ລະ​ພາບ​ເພື່ອການ​ພັດທະນາ ກຳລັງ​ຢືນ​ຕໍ່ໜ້າ​ສິ່ງ​ທ້າ​ທາຍ​ໃໝ່​ຫຼາຍ​ຢ່າງ.

​ໃນ​ເງື່ອນ​ໄຂ​ນັ້ນ, ​ເພື່ອຍາດ​ແຍ່ງ​ເອົາ​ໂອກາດ, ຜ່ານ​ຜ່າ​ສິ່ງ​ທ້າ​ທາຍ, ຍິ່ງ​ກວ່າ​ນັ້ນ​ຕ້ອງ​ເຮັດ​ໃຫ້​ສິ່ງ​ທ້າ​ທາຍ​ກາຍ​ເປັນ​ໂອກາດ, ນັ້ນ​ແມ່ນ​ບັນຫາ​ໃຫຍ່​ສຳລັບ​ການ​ພັດທະນາ. ດັ່ງ​ນັ້ນ, ວຽກ​ງານ​ທິດ​ສະ​ດີ​ຕ້ອງ​ໄປ​ກ່ອນ​ກ້າວ​ໜຶ່ງ, ​ມີ​ຄວາມ​ສາມາດຄາດ​ຄະ​ເນ​ ແລະວາງ​ກຳນົດ​​ແຜນ​ຍຸດ​ທະ​ສາດພັດທະນາ​ປະ​ເທດທີ່​ຖືກຕ້ອງ, ​ໃນ​ນັ້ນ​ການສະຫຼຸບ​ສັງ​ລວມພຶດຕິ​ກຳ​ແມ່ນ​ໜ້າ​ທີ່​ໜຶ່ງ​ທີ່​ສຳຄັນ​ທີ່​ສຸດ. ມີ​ແຕ່​ບົນ​ພື້ນຖານ​ສົມທົບ​ຢ່າງ​ຖືກຕ້ອງລະຫວ່າງ​ການສະຫຼຸບ​ສັງ​ລວມພຶດ​ຕິ​ກຳ ​ແລະ​ການ​ຄົ້ນຄວ້າ​ທິດ​ສະ​ດີ​ເທົ່າ​ນັ້ນ ຈຶ່ງ​ສາມາດ​ຄາດ​ຄະ​ເນ​ສະພາບ​ການ​ຢ່າງ​ຊັດ​ເຈນ, ສະ​ເໜີ​​ວິທີ​ການ​ຮັບ​ມື​ທີ່​ເໝາະ​ສົມ ​ເພື່ອ​ສ້າງ​ກຳລັງ​ແຮງ​ສັງ​ລວມຂອງ​ຊາດ​ທີ່​ມີ​ຄົບ​ທັງ​ທ່າ​​ແລະກຳ​ລັງ​ໃຫ້​ແກ່​ການ​ຮັບປະກັນ​ຄວາມ​ໝັ້ນຄົງ​ແລະ​ການ​ພັດທະນາ.

ຄວາມ​ຮຽກຮ້ອງຕ້ອງການສະຫຼຸບ​ສັງ​ລວມພຶດ​ຕິ​ກຳຮັບ​ໃຊ້ການຄົ້ນຄວ້າ​ທິດ​ສະ​ດີ​​ໃນ​ເວລາ​ຕໍ່​ໄປ​ແມ່ນ​ກວ້າງ​ໃຫຍ່​ທີ່​ສຸດ, ​ແຕ່​ຄວມສຸມ​ໃສ່ບາງ​ທິດ​ທາງ​ລຸ່ມ​ນີ້:

​ໃນ​ຂົງ​ເຂດ​ເສດຖະກິດ: ປ່ຽນ​ແປງ​ໃໝ່ຮູບ​ແບບ​ການ​ເຕີບ​ໂຕ, ​ເສັ້ນທາ​ງແລະ​ວິທີ​ແກ່​ໄຂ​ຊ່ວຍ​ໃຫ້​ຫວຽດນາມ​ຫຼຸດ​ພົ້ນ​ອອກ​ຈາກ “ກັບ​ດັກ​ລາຍ​ໄດ້​ປານ​ກາງ”, ປະຕິ​ບັດ​ການ​ຫັນ​ປະ​ເທດ​ຊາດ​ເປັນ​ອຸດສາຫະກຳ ທັນ​ສະ​ໄໝ. ປ່ຽນ​ແປງ​ໃໝ່, ປັບປຸງ​ບູລະນະ​ແບບ​ວິທີ​ການ​ນຳພາ​ຂອງ​ພັກກ່ຽວ​ກັບ​ເສດຖະກິດ; ​ປົວ​ແປງ​ສະພາບ​ແວດ​ລ້ອມ​ການ​ລົງທຶນ, ທຸລະ​ກິດ, ປະຕິບັດາ​ການ​ລິ​ເລີ່​ມທຸລະ​ກິດ​ແຫ່ງ​ຊາດ, ພັດທະນາ​ເສດຖະກິດ​ເອກະ​ຊົນ, ຍົກ​ສູງ​ປະສິດທິ​ຜົນ​ການ​ດຶງ​ດູດ​ການ​ລົງທຶນ​ຈາກ​ຕ່າງປະ​ເທດ; ປັບ​ໂຄງ​ສ້າງ​ເສດຖະກິດ​ກະສິກຳ​ຄືນ​ໃໝ່ຕິດ​ກັບ​ການ​ກໍ່ສ້າງ​ຊົນນະບົດ​ໃໝ່; ສະ​ສົມ​ແລະ​ລວບ​ລວມ​ດິນ​ນາ. ຂຸດ​ຄົ້ນ​ແລະນຳ​ໃຊ້​ຈົນ​ສຸດ​ຂີດຜົນສຳ​ເລັດ​ຂອງ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່.

​ໃນ​ຂົງ​ເຂດ​ວັດທະນະທຳ, ສັງຄົມ, ສິ່ງ​ແວດ​ລ້ອມ: ກໍ່ສ້າງ​ພື້ນຖານ​ວັດທະນະທຳ​ແລະ​ຜູ້​ຄົນ​ຫວຽດນາມ ຕອບ​ສະໜອງ​ຄວາມ​ຕ້ອງການ​​​ໃນ​ສະພາບ​ການ​ໃໝ່, ພັດທະນາ​ອຸດສາຫະກຳ​ວັດທະນາ; ກໍ່ສ້າງ​ລະບົບ​ຄຸນຄ່າ​ມາດຕະຖານ​ວັດທະນະທຳ​ຂອງຫວຽດນາມ​ໃນ​ຍຸກ​ສະ​ໄໝ​ໃໝ່; ກໍ່ສ້າງ​ສະພາບ​ແວ​ລ້ອມ​ວັດທະນະທຳ​ທີ່​ສົດ​ໃສ, ​ແບບ​ດຳ​ເນີນ​ຊີວິດ​ອາລະຍະ​ທຳ, ພັດ​ທະ​ນາ​ກຳ​ລັງ​ຊ້ອນ​ແຝງ​ທາງ​ວັດທະນະທຳ; ຄຸ້ມ​ຄອງ​ການ​ພັດທະນາ​ສັງ​ຄົມ, ກໍ່ສ້າງ​ລະບົບ​ຄວາມ​ປອດ​ໄພ​ສັງຄົມ​ຫຼາຍ​ຊັ້ນ, ​ໄຫວ​ພິບ, ​ເປີດ​ກວ້າງ​ພື້ນ​ທີ່ການປົກຄຸມ ​ແລະ ຍົກ​ສູງ​ທາງ​ດ້ານ​ຄຸນ​ນະພາ​ບ; ປົກ​ປັກ​ຮັກສາ​ຊັບ​ພະຍາກອນ​, ພັດທະນາ “ເສດຖະກິດສີຂຽວ”, ຮັບ​ມື​ກັບ​ການ​ປ່ຽນ​ແປງ​ສະພາບ​ອາກາດ; ປ່ຽນ​ແປງ​ໃໝ່​ຮູບ​ແບບ​ການ​ສຶກສາອົບຮົມກຳລັງ​ຄົນທີ່​ແທດ​ເໝາະ​ກັບ​ໄລຍະ​ເວລາ​ໃໝ່.

​ໃນ​ຂົງ​ເຂດ​ການ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ, ການ​ຕ່າງປະ​ເທດ: ທ່າ​ຈັດ​ວາງ​ຍຸດ​ທະ​ສາດ​ໃນ​ເງື່ອນ​ໄຂທີ່​ເປົ້າ​ໝາຍ, ຄູ່​ຮ່ວມ​ງານ​ ແລະ​ ວິທີ​ການ​ສົງຄາມ​ໄດ້​​ປ່ຽນ​ແປງ; ກໍ່ສ້າງ​ທ່າ​ສະໜາມ​ຮົບປ້ອງ​ກັນຊາ​ດທົ່ວ​ປວງ​ຊົນ ຕິດ​ກັບ​ທ່າ​ສະໜາມ​ຮົບ​ປ້ອງ​ກັນ​ຄວາມ​ສະຫງົບ​ທົ່ວ​ປວງ​ຊົນ​ ໃນ​ສະພາບ​ການ​ໃໝ່; ປົກ​ປັກ​ຮັກສາ​ອະທິປະ​ໄຕ ​ຄວາມ​ປອດ​ໄພ​ຊາຍ​ແດນ, ອະທິປະ​ໄຕ​ໃນ​ເຂດ​ດິນ​ ທະ​ເລ ​ແລະ​ໝູ່​ເກາະ​ຂອງ​ປະ​ເທດ; ປົກ​ປັກ​ຮັກສາ​ຄວາມ​ໝັ້ນຄົງ​ທາງ​ການ​ເມືອງ, ຄວາມ​ໝັ້ນຄົງທາງ​ວັດທະນະທຳ, ຄວາມ​ໝັ້ນຄົງ​ທາງ​ເຄືອ​ຂ່າຍ, ປ້ອງ​ກັນ​ແລະ​ຕ້ານ​ “ການ​ຫັນປ່ຽນ​ໂດຍ​ສັນຕິ”, ຮັບປະກັນ​ຄວາມ​ປອດ​ໄພ​ທາງ​ສັງຄົມ, ຕໍ່ສູ້​ຕ້ານ​ບັນດາ​ອິດ​ທິກຳລັງ​ສັດຕູ​ແລະ​ພວກ​ສວຍ​ໂອກາດ​ການ​ເມືອງ; ​ເຊື່ອມ​ໂຍງ​ສາກົນ, ສ້າງ​ການ​ພົວພັນ​ມິດຕະພາບ ​ແລະການ​ຮ່ວມ​ມື​ກັບບັນດາ​ປະ​ເທດ, ບັນດາ​ອົງການ​ຈັດ​ຕັ້ງ​ສາກົນ ​ແລະ​ບັນດາ​ທ້ອງ​ຖິ່ນ​ຂອງ​ຕ່າງປະ​ເທດ.

​ໃນ​ຂົງ​ເຂດ​ກໍ່ສ້າງ​ພັກ ​ແລະ ລະບົບ​ກາ​ນ​ເມືອງ: ກໍ່ສ້າງ​ພັກ​ໃຫ້​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ​ທາງ​ດ້ານ​ການ​ເມືອງ, ​ແນວ​ຄິດ, ການຈັດ​ຕັ້ງ​ແລະ​ຄຸນສົມບັດ​ສິນ​ທຳ; ປ່ຽນ​ແປງ​ໃໝ່​ແບບ​ວິທີ​ນຳພາ​ຂອງ​ພັກ, ​ເນື້ອ​ໃນ​ແລະ​ແລະວິທີ​ກຳ​ອຳນາດ​ຂອງ​ພັກ. ຈັດ​ຕັ້ງ​ກົງຈັກ​ໃຫ້​ກະທັດ​ລັດ, ປ່ຽນ​ແປງ​ໃໝ່​ວຽກ​ງານ​ພະນັກງານ ​ແລະ ​ກໍ່ສ້າງ​ຖັນ​ແຖວ​ພະນັກງານ​ໃຫ້ທຽບ​ເທົ່າ​ກັບ​ໜ້າ​ທີ່​ໃນ​ສະ​ໄໝ​ໃໝ່, ພິ​ເສດ​ແມ່ນ​ບັນດາ​ປັດ​ໄຈ​ແບບຢ່າງ​ກ້າວໜ້າ, ວິທີ​ເຮັດ​ທີ່​ດີ, ປັດ​ໄຈ​ໃໝ່. ຄວບ​ຄຸມ​ອຳນາດ, ພິ​ເສດ​ແມ່ນ​ການ​ກວດກາ, ຕິດຕາມ​ກວດກາ​ຂອງ​ພັກ; ​ເສີມ​ຂະຫຍາຍ​ບົດບາດ​ຕິດຕາມ​ກວດກາ ​ແລະ ວິຈານ​ສັງຄົມ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ຂອງ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ; ​ເພີ່ມ​ທະວີ​ການ​ກໍ່ສ້າງ​ຕິດ​ກັບການ​ປັບປຸງ​ພັກ, ປ້ອງ​ກັນ​ແລະ​ຕ້ານ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ, “ການ​ຫັນປ່ຽນ​ດ້ວຍ​ຕົນ​ເອງ”, “ການ​ປ່ຽນ​ແປງ​ດ້ວຍ​ຕົນ​ເອງ” ຢູ່​ພາຍ​ໃນ; ຕ້ານ​ອາດຍາ​ສິດ, ການ​ສໍ້​ລາດ​ບັງ​ຫຼວງ, ການ​ຟຸມ​ເຟືອຍ, ຄວາມ​ຫຍໍ້​ທໍ້, ຜົນ​ປະ​ໂຫຍ​ດໝູ່​ພວກ.

2- ບັນດາ​ບັນຫາ​ທີ່​ຕ້ອງການ​ແກ້​ໄຂ​​ແນ​ໃສ່​ຍົກ​ສູງປະສິດທິ​ຜົນ​ ຂອງການສະຫຼຸບ​ສັງ​ລວມພຶດຕິ​ກຳ ຮັບ​ໃຊ້​ການ​ຄົ້ນຄວ້າ​ເພີ່ມ​ເຕີມ​ ແລະ​ພັດທະນາ​ທິດ​ສະ​ດີ​ກ່ຽວ​ກັບ​ການ​ປ່ຽນ​ແປງ​ໃໝ່​ຂອງ​ພັກ ​ໃນ​ໄລຍະ​ຕໍ່​ໄປ

​ເພື່ອ​ແກ້​ໄຂ​ຜ່ານ​ຜ່າ​ຂໍ້​ຈຳກັດ​​ເທິງ​ນີ້ ​ແລະ​ເພີ່ມ​ທະວີ​ວຽກ​ງານສະຫຼຸບ​ສັງ​ລວມພຶດ​ຕິ​ກຳ ​ໃຫ້​ທຽບ​ເທົ່າ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ໜ້າ​ທີ່​ວຽກ​ງານ​ທິດ​ສະ​ດີ​ໃນ​ສະພາບ​ການ​ໃໝ່ ຕາມ​ຈິດ​ໃຈ​ກອງ​ປະຊຸມ​ໃຫຍ່ຂອງພັກ, ​ໃນ​ເວລາ​ຕໍ່​ໄປ​ຕ້ອງ​ເອົາ​ໃຈ​ໃສ່​ເຖິງ​ບາງ​ບັນຫາ​ລຸ່ມ​ນີ້:

ທີ​ໜຶ່ງ, ຍົກ​ສູງ​ຄວາມ​ຮັບ​ຮູ້​ຂອງ​ຄະນະ​ພັກ​ຂັ້ນ​ຕ່າງໆ​ກ່ຽວ​ກັບ​ວຽກ​ງານສະຫຼຸບ​ສັງ​ລວມພຶດຕິ​ກຳ​ຮັບ​ໃຊ້​ການ​ຄົ້ນຄວ້າ​ທິດ​ສະ​ດີ ​ແລະ ການ​ເຄື່ອນ​ໄຫວ​ຊີ້​ນຳ, ຄຸ້ມ​ຄອງ​ບໍລິຫານ. ຄະນະ​ພັກ​ທຸກ​ຂັ້ນ ​ແລະ ພະນັກງານ​ນຳພາຄຸ້ມ​ຄອງ ​ທຸກ​ຄົນ ຕ້ອງ​ຮັບ​ຮູ້​ແຈ້ງ​ດ້ານ​ດີ​​ແລະ​ດ້ານ​ຈຳ​ກັບ​ຂອງຈິນຕະນາ​ບົດຮຽນ, ຈາກ​ນັ້ນ ຊອກ​ຫາ​ວິທີ​ການ​ເສີມ​ຂະຫຍາຍ​ຈຸດ​ດີ ​ແລະ ​ແກ້​ໄຂ​ຜ່ານ​ຜ່າ​ຂໍ້​ຈຳກັດ. ​ໂດຍ​ກຳ​ເນີ​ດ​ແລະ​ເຕີບ​ໃຫຍ່​ໃນ​ສັງຄົມ​ກະສິກຳ​ນ້ອຍ, ດັ່ງ​ນັ້ນ ​ໃນຈິດ​ໃຕ້​ສຳນຶກ​ຂອງ​ພະນັກງານ ສະມາຊິກ​ພັກ​ຈຳນວນ​ຫຼາຍ ມັກ​ຖືກ​ພະຍາດບົດຮຽນ​ນິຍົມ​ຢ່າງ​ໄວ, ​ແຕ່​ການ​ແກ້​ພະຍາດ​ນີ້​ບໍ່ແມ່ນ​ເລື່ອງ​ງ່າຍ. ຕ້ອງ​ເລີ່​ມຕົ້ນ​ດ້ວຍ​ການ​ຍົກ​ສູງ​ລະດັບ​ທິດ​ສະ​ດີກາ​ນ​ເມືອງ, ສ້າງ​ນິ​ໄສ​ການ​ນຳ​ໃຊ້​ທິດ​ສະ​ດີ​ເພື່ອ​ວິ​ເຄາະ​ໄຈ້​ແຍກ, ປະ​ເມີນ​ຜົນ​ພຶດຕິ​ກຳ, ນຳ​ໃຊ້​ພຶດຕິ​ກຳ​ເພື່ອ​​ພິສູດ​ທິດ​ສະ​ດີ. ຕ້ອງ​ເນັ້ນ​ເລື່ອງນີ້ ​ເພາະ​ວ່າການສະຫຼຸບ​ສັງ​ລວມພຶດ​ຕິ​ກຳບໍ່ສາມາດ​ເປັນ​ໄປ​ໄດ້​ສຳລັບ​ຜູ້​ທີ່​ອ່ອນ​ຄວາມ​ສາມ​າດໃນ​ດ້ານ​ທິດ​ສະ​ດີ, ຖ້າ​ຫາກ​ໄດ້​ກໍ່​ເປັນ​ພຽງ​ການບວກບົດຮຽນ​ປະສົບ​ການຕ່າງໆ​ແບບ​ກົນ​ຈັກ​ເທົ່າ​ນັ້ນ, ຍິ່ງ​ບໍ່​ສາມາ​ດ​ເວົ້າ​ເຖິງ​ການ​ເພີ່ມ​ເຕີມ​ແລະ​ພັດທະ​ນາ​ທິດ​ສະ​ດີຈາກ​ພຶດຕິ​ກຳ​ໄດ້. ດັ່ງນັ້ນ, ການ​ເພີ່ມ​ທະວີ​ຄວາມ​ສາມາດສະຫຼຸບ​ສັງ​ລວມພຶດ​ຕິ​ກຳ​ໃຫ້​ຖັນ​ແຖວ​ພະນັກງານນັ້ນ ບໍ່​ອາດ​ຈະ​ແຍກ​ອອກ​ຈາກ​ການ​ຍົກ​ສູງຈິນຕະນາການ​ທິດ​ສະ​ດີ, ພິ​ເສດ​ແມ່ນ​ທິດ​ສະ​ດີ​ພື້ນຖານ ​ເພື່ອ​ຈະ​ມີ​ວິທີ​ວິທະຍາ ​ແລະ ວິທີ​ການ​ທີ່​ຖືກຕ້ອງ​ ​ໃນ​ເມື່ອນໝູນ​ໃຊ້​ເຂົ້າ​ໃນການສະຫຼຸບ​ສັງ​ລວມພຶດຕິ​ກຳ. ການ​ກໍ່ສ້າງ​ທິດ​ສະ​ດີກາ​ນ​ເມືອງ​ສຳລັບ​ພະນັກງານ​ນຳພາ, ຄຸ້ມ​ຄອງ​ຂັ້ນ​ຕ່າງໆ ​ແມ່ນ​ບໍ່​ພຽງ​ແຕ່​ແນ​ໃສ່​ພັດທະນາ​ຈິນຕະນາການທິດ​ສະ​ດີ​ເທົ່າ​ນັ້ນ ຫາກ​ຍັງ​ກວມ​ທັງ​ການ​ເພີ່ມ​ທະວີ​ທັກ​ສະ​ໃນ​ການສະຫຼຸບ​ສັງ​ລວມພຶດ​ຕິ​ກຳ. ທັກ​ສະ​ດັ່ງກ່າວ​ຕ້ອງ​ກາຍ​ເປັນ​ເຄື່ອງມື​ຖາວອນ​ໃນການຈັດ​ຕັ້ງ​ຊີ້​ນຳ​ພຶດຕິ​ກຳ, ສ້າງນິ​ໄສ​ໃນ​ການ​ຝຶກ​ຝົນ​ສະໝອງ​ສັງ​ເກດ, ສືບສວນ, ວະ​ເຄາະ​ໄຈ້​ແຍກ ​ແລະ ສະຫຼຸບ​ປະສົບ​ການ, ​ເຮັດ​ໃຫ້​ມັນ​ກາຍ​ເປັນຄວາມ​ຮູ້​ວິທະຍາສາດ, ນຳ​ໃຊ້​ທິດ​ສະ​ດີ​ເພື່ອພິຈາລະນາ, ​ໃຊ້​ຄວາມ​ຮູ້​ປະສົບ​ການ​ທີ່​ເໝາະ​ສົມ.

ທີ​ສອງ, ກຳນົດ​ຂອບ​ທິດ​ສະ​ດີ ​ແລະ ວິທີວິທະຍາສາດ ຮັບ​ໃຊ້​ການ​ເຄື່ອນ​ໄຫວສະຫຼຸບ​ສັງ​ລວມພຶດ​ຕິ​ກຳ ບົນ​ພື້ນຖານ​ລັດທິ​ວັດຖຸ​ນິຍົມ​ສັດຈະ​ວິພາກ. ຂອບ​ທິດ​ສະ​ດີ​ສຳລັບ​ການສະຫຼຸບ​ສັງ​ລວມພຶດຕິ​ກຳຕ້ອງ​ໄດ້​ກຳນົດ​ແຈ້ງ ພາວະ​ພາກ, ​ເປົ້າ​ໝາຍ, ອັດຕະພາບ, ​ເນື້ອ​ໃນ, ກຳລັງທີ່​ເຂົ້າຮ່ວມ​ການ​ສະຫຼຸບ​ສັງ​ລວມພຶດຕິ​ກຳ; ສາຍ​ພົວພັນ​ລະຫວ່າງ​ການສະຫຼຸບ​ສັງ​ລວມພຶດ​ຕິ​ກຳ ກັບ​ການ​ຄົ້ນຄວ້າ​ທິດ​ສະ​ດີ, ຄົ້ນຄວ້າ​ວິທະຍາສາດ, ກັບ​ການ​ຊີ້​ນຳ ກຳກັບ​ບໍລິຫານງານ; ບັນດາ​ວິທີ​ການສະຫຼຸບ​ສັງ​ລວມພຶດ​ຕິກຳ,... ຕ້ອງ​ກຳນົດ​ໄດ້​ບັນດາ​ວິທີ​ການ ​ແລະ ທັກ​ສະການສະຫຼຸບ​ສັງ​ລວມພຶດ​ຕິ​ກຳ, ຊ່ວຍ​ໃຫ້​ພະນັກງານ​ກຳ​ໄດ້​ລັກສະນະ​ປະຈຳ​ຕົວ, ທາດ​ແທ້​ຂອງ​ສິ່ງ​ວັດຖຸ​ ແລະ ຂອງ​ປະກົດ​ການ; ວິທີ​ການ​ນຳ​ໃຊ້​ບົດຮຽນ​ປະສົບ​ການ​ເພື່ອ​ຮັບ​ໃຊ້​ໂດຍ​ກົງ​ໃຫ້​ແກ່​ການ​ຊີ້​ນຳ, ກຳກັບ​ບໍລິຫານງານ; ​ເສັ້ນທາ​ງແລະວິທີ​ການ​ຫັນ​ບົດຮຽນ​ເປັນປັນຍາ​ຄວາມ​ຮູ້. ​ເມື່ອ​ຂອບ​ທິດ​ສະ​ດີ​ແລະ​ວິທີ​ວິທະຍາ​ໄດ້​ເປັນ​ຮູບ​ເປັນ​ຮ່າງ​ຂຶ້ນ​ແລ້ວ, ​ແມ່ນ​ຕ້ອງການຫັນ​ມັນ​ເຂົ້າ​ໃນ​ຂະ​ບວນວິວັດ​ການ​ອົບຮົມ​ສຶກສາ ທີ່​ໄດ້​ສັບ​ຊ້ອນ​ໃນ​ຫຼັກສູດ​ທິດ​ສະ​ດີກາ​ນ​ເມືອງ​ຊັ້ນ​ກາງ​ແລະ​ຊັ້ນ​ສູ​ງ ຫຼື ຈັດ​ຕັ້ງການ​ຝຶກ​ອົບຮົມ ​ໃຫ້​ແກ່​ຖັນ​ແຖວ​ພະນັກງານນຳພາ, ຄຸ້ມ​ຄອງ​ຂັ້ນ​ຕ່າງໆ. ການ​ປະກອບ​ຂອບ​ທິດ​ສະ​ດີ​ແລະ​ວິທີ​ການສະຫຼຸບ​ສັງ​ລວມພຶດຕິ​ກຳ ຕ້ອງ​ໄປ​ຄຽງ​ຄູ່​ກັບ​ການ​ປະກອບວິທີ​ການ​ປະ​ເມີນ​ນະ​ໂຍບາຍ, ພິຈາລະນາ​ຂະ​ບວນວິວັດ​ການ​ເຄື່ອນ​ເໜັງ​ຈາກ​ທິດສະ​ດີ ຜ່ານ​ນະ​ໂຍບາຍ​ເພື່ອຊຶມ​ເຂົ້າ​ໄປ​ໃນ​ພາກ​ພຶດຕິ​ກຳ. ນະ​ໂຍບາຍ​ແມ່ນ​ຮູບ​​ແບບ​ຕົວກາງ​ລະຫວ່າງທິດ​ສະ​ດີ ​ແລະ ພາກ​ພຶດຕິ​ກຳ; ມີ​ທັດສະນະ ​ແນວ​ທາງ ​ແຜນ​ນະ​ໂຍບາຍທີ່​ຖືກຕ້ອງ​ບໍ່​ໜ້ອຍ​ຂອງ​ພັກ​ ຍາກ​ທີ່​ຈະ​ເຂົ້າ​ໃນ​ຊີວິດ​ຕົວ​ຈິງ​ໄດ້ ຫຼື​ຖືກ “ໝູນ​ໃຊ້” ຢ່າງ​ຜິດພາດນັ້ນ ບໍ່​ແມ່ນ​ຍ້ອນ​ການ​ຊີ້​ນຳ​ປະຕິບັດ, ຫາກ​ແມ່ນ​ຍ້ອນ​ການ​ຫັນ​ເປັນ​​ນິຕິ​ກຳ ​ເປັນນະ​ໂຍບາຍ​ຂອງ​ລັດ.

ທີ່​ສາມ, ປັບປຸງ​ບູລະນະ​ຂໍ້​ກຳນົດ​ກົດໝາຍ, ກົນ​ໄກ ​ແລະ ສ້າງ​ເງື່ອນ​ໄຂ​ໃຫ້​ແກ່​ການ​ສະຫຼຸບ​ສັງ​ລວມພຶດຕິ​ກຳຮັບ​ໃຊ້​ການ​ຄົ້ນຄວ້າ​ທິດ​ສະ​ດີ. ນັ້ນ​ແມ່ນ​ການປະກາດ​ໃຊ້​ຂໍ້​ກຳນົດ​ກົດໝາຍ​ຕ່າງໆ ທີ່ກຳນົດ​ແຈ້ງ​ຄວາມ​ຮັບຜິດຊອບ, ສິດ​ຂອບ​ເ​ຂດຂອງ​ຄະນະ​ພັກ, ກຳມະການ​ຄະນະ​ພັກ, ຂອງ​ອົງການ​ຮັບຜິດຊອບ​ສະ​ເພາະ​ການສະຫຼຸບ​ສັງ​ລວມພຶດ​ຕິ​ກຳ ຢູ່​ໃນ​ແຕ່ລະ​ຂັ້ນ, ​ແຕ່ລະ​ຂະ​ແໜງ​ການ. ການສະຫຼຸບ​ສັງ​ລວມພຶດ​ຕິ​ກຳຕ້ອງ​ໄດ້​ວາງ​ເປັນ​ລະບອບ​ບັງຄັບສຳລັບ​ພະນັກງານ, ສະມາຊິກ​ພັກ; ຕິດ​ແໜ້ນ​ກັບ​ລະບອບ​ຮ່ຳຮຽນ ຍົກ​ສູງ​ລະດັບ​ທິດ​ສະ​ດີ; ຕິດ​ກັບ​ຄວາມ​ຕ້ອງການ​ສົ່ງ​ພະນັກງານ​ໄປ​ຕິດ​ແທດ​ກັບ​ປະຊາຊົນ, ຕິດ​ແທດ​ກັບ​ພຶດຕິ​ກຳ​ຮາກ​ຖານ. ກວດຄືນ, ທົບ​ທວນ​ ປະ​ເມີນ​ບັນດາ​ກົນ​ໄກສະຫຼຸບ​ສັງ​ລວມພຶດ​ຕິ​ກຳທີ່​ມີ​ຢູ່​ໃນບັນດາ​ອົງການ​ຮັບຜິດຊອບ​ສະ​ເພາະ ​ໂດຍ​ມີ​ການຈຳ​ແນ​ກລະຫວ່າງ​ການ​ເຄື່ອນ​ໄຫວບໍລິຫານ​ວຽກ​ງານ​ພັກ ກັບ ການ​ເຄື່ອນ​ໄຫວວິຊາ​ສະ​ເພາະ ຮັບ​ໃຊ້​ການສະຫຼຸບ​ສັງ​ລວມພຶດ​ຕິ​ກຳຢູ່​ໃນ​ບັນດາ​ຄະນະ​ຂອງ​ພັກ. ບັນດາ​ຄະນະ​ຂອງ​ພັກ​ແມ່ນອົງການ​ເສນາ​ທີ​ການ ​ເປັນທີ່​ປຶກສາ​ຂອງ​ພັກ, ມີ​ບົດ​ບາດ​ຮັບຜິດຊອບ​ສະ​ເພາະ​ການສະຫຼຸບ​ສັງ​ລວມພຶດ​ຕິ​ກຳ, ​ແຕ່​ມາ​ເຖິງ​ປະຈຸ​ບັນ ຍັງ​ບໍ່​ມີ​ການຈຳ​ແນ​ກລະຫວ່າງ​ການ​ເຄື່ອນ​ໄຫວ​ບໍລິຫານ​ວຽກ​ງານ​ພັກ ກັບ​ການ​ເຄື່ອນ​ໄຫວ​ຄົ້ນຄວ້າ, ​ໃຫ້​ຄຳ​ປຶກສາ (ກວມ​ທັງ​ຄົ້ນຄວ້າ​ທິດ​ສະ​ດີ, ສະຫຼຸບ​ສັງ​ລວມພຶດຕິ​ກຳ, ​ໃຫ້​ຄຳ​ປຶກສາ​ກ່ຽວ​ກັບ​ແນວທາງ, ​ແຜນ​ນະ​ໂຍບາຍ) ຊຶ່ງ​ຮຽກຮ້ອງ​ຕ້ອງການ​ມີ​ລະດັບວິຊາ​ສະ​ເພາະ​ຂະ​ແໜງ, ສະຫະ​ຂະ​ແໜງ ​ແລະ ວິທີ​ການ​ທີ່​ເໝາະ​ສົມ. ກົນ​ໄກ​ທີ່​ມີ​ຢູ່​ໃນ​ປະຈຸ​ບັນບໍ່​ສາມາດຊ່ວຍ​ໃຫ້​ພະນັກງານ​ທີ່​ປຶກສາ​ຍົກ​ສູງລະດັບ​ທິດ​ສະ​ດີ, ຍ້ອນ​ມັນ​ບໍ່​ມີ​ເນື້ອ​ໃນຝຶກ​ອົບຮົມ​​ດ້ານ​ວິທີ​ການ​ແລະ​ທັກ​ສະ​ໃນ​ການສະຫຼຸບ​ສັງ​ລວມພຶດ​ຕິ​ກຳ, ດັ່ງ​ນັ້ນ ພະນັກງານ​ຈຶ່ງ​ພົບ​ຄວາມ​ຫຍຸ້ງຍາກ​ໃນ​ການ​ຜັນ​ຂະຫຍາຍ​ຫົວ​ຂໍ້ສະຫຼຸບ​ສັງ​ລວມພຶດ​ຕິ​ກຳໜຶ່ງ. ຈຳ​ເປັນ​ຕ້ອງ​ປັບປຸງ​ບູລະນະບັນດາ​ນະ​ໂຍບາຍ​ທີ່​ກ່ຽວຂ້ອງ, ພິ​ເສດ​ແມ່ນ​ການ​ຮັບປະກັນ​ແຫຼ່ງພະລັງ, ​ເງື່ອນ​ໄຂ ​ແລະສະພາບ​ແວດ​ລ້ອມ​ການ​ເຮັດວຽກ​ ໃຫ້​ສຳນັກງານ​ອົງການ, ພະນັກງານ​ອອກ​ແຮງ​ຝຶກ​ຝົນ​ຫຼໍ່​ຫຼອມ​ຈັນ​ຍາ​ບັນ​ການ​ງານ, ບຳລຸງຄວາມ​ສາມາດ​ທາງ​ດ້ານວິຊາ​ຊີບ, ອາ​ໃສ​ສິ່ງ​ດັ່ງກ່າວ​ນັ້ນ​ເພື່ອ​ເຮັດ​ຫຼ້ອນພາລະ​ບົດບາດຫຼັກ​ໃນ​ການສະຫຼຸບ​ສັງ​ລວມພຶດ​ຕິ​ກຳ.

ທີ​ສີ່, ນຳ​ໃຊ້​ຫຼາຍ​ແບບ​ວິທີ​ການສະຫຼຸບ​ສັງ​ລວມພຶດ​ຕິ​ກຳ, ຕິດ​ການສະຫຼຸບ​ສັງ​ລວມພຶດ​ຕິ​ກຳກັບ​ການ​ຄົ້ນຄວ້າ​ທິດ​ສະ​ດີ, ຄົ້ນຄວ້າ​ວິທະຍາສາດ. ​ເມື່ອ​ການສະຫຼຸບ​ສັງ​ລວມພຶດ​ຕິ​ກຳກາຍ​ເປັນ​ລະບອບ​ບັງຄັບ​ຄື​ກັນ​ກັບ​ການ​ຮ່ຳຮຽນ, ຄົ້ນຄວ້າ​ທິດ​ສະ​ດີ​ແລ້ວ​ນັ້ນ, ​ແມ່ນ​ແບບ​ວິທີ​ການສະຫຼຸບ​ສັງ​ລວມພຶດ​ຕິ​ກຳຕ້ອງ​ໄດ້​ມີ​ຢ່າງ​ຫຼາກ​ຫຼາຍ, ໝາຍ​ຄວາມ​ວ່າ​ ຊ່ວຍ​ໃຫ້​ພະນັກງານ​ຝຶກ​ຝົນ​ຫຼໍ່​ຫຼອມ​ສະໝອງ​ສັງ​ເກດ​ການ, ສືບສວນ, ວິ​ເຄາະ​ໄຈ້​ແຍກ​ສະພາບ​ການ ​ແລະ ​ສະຫຼຸບ​ປະສົບ​ການ,... ​ໃນບໍ່​ວ່າ​ສະພາບ​​​ໃດ, ສະຖານະ​ການ​ໃດ ​ແນ​ໃສ່​ໝຸນ​ໃຊ້​ທິດສະ​ດີ​ໄດ້​ດີ​ສຸດ ກໍ່​ຄື​ຄົ້ນ​ເຜີຍ​ຄວາມ​ຮູ້​ໃໝ່​ ເພື່ອ​ເພີ່ມ​ເຕີມ​ແລະ​ພັດທະນາ​ແນວທາງ, ​ແຜນ​ນະ​ໂຍບາຍ​ຂອງ​ພັກ. ​ແຕ່​ກ່ອນ​ມາ ການສະຫຼຸບ​ສັງ​ລວມພຶດ​ຕິ​ກຳ​ເຄີຍ​ເອົາ​ໃຈ​ໃສ່​​ເປັນ​ສຳຄັນ​ເຖິງ​ແບບ​ວິທີ​ການ​ທາງ​ອ້ອມ ​ໂດຍ​ຜ່ານ​ການ​ສ້າງ​ຕັ້ງ​ຄະນະ​ກຳມະການ​ຊີ້​ນຳ ​ແລະ ຈັດ​ຕັ້ງ​ຕາມ​ລະບົບ​ສາຍ​ຕັ້ງ. ​ແບບ​ວິທີ​ນີ້​ເປັນ​ສິ່ງ​ຈຳ​ເປັນ​ເພື່ອ​ຜັນ​ຂະຫຍາຍ​ໂຄງການ, ໜ້າ​ທີ່ສະຫຼຸບ​ສັງ​ລວມພຶດ​ຕິ​ກຳ - ທິດ​ສະ​ດີສະ​ເພາະ ​ເມື່ອ​ທິດ​ສະ​ດີ​ຍັງ​ມີ​ຄວາມຫຼ້າ​ຊ້າ​ຕໍ່​ຄວາມ​ເປັນ​ຈິງ, ຊຶ່ງ​ຮຽກຮ້ອງ​ຕ້ອງການ​ເພີ່ມ​ເຕີມ​ດ້ວຍ​ຂໍ້​ມູນ​ຈາກ​ຊີວິດ​ການ​ເປັນ​ຢູ່ ຫຼື ຮອບ​ການ​ດຳ​ເນີນ​ງານ​ຂອງ​ມະຕິ​ຕົກລົງ​ໜຶ່ງ ທີ່​ຄົບ​ ຕາມ​ກຳນົດ​ເວລາ (5 ປີ, 10 ປີ) ຊຶ່ງ​ຕ້ອງ​ສະຫຼຸບ​ສັງ​ລວມ, ປະ​ເມີນ​ຜົນ. ນອກຈາກ​ການ​ສະຫຼຸບ​ສັງ​ລວມຕາມ​ແບບ​ວິທີ​ທາງ​ອ້ອມ​ແລ້ວ ຍັງ​ມີການ​ສະຫຼຸບ​ສັງ​ລວມຕາມ​ແບບ​ວິທີການ​ໂດຍ​ກົງ, ໝາຍ​ຄວາມ​ວ່າ ຜູ້ນຳ​ໃຊ້​ເວລາ​ລົງ​ຮາກ​ຖານ​ເພື່ອ​ສັງ​ເກດ​ການ, ສືບສວນ, ສະຫຼຸບບັນດາ​ຕົວ​ແບບ; ຄົ້ນ​ຄວາມ​ບັນດາ​ປັດ​ໄຈ​ໃໝ່, ​ແບບຢ່າງ​ດີ​ເດັ່ນ​ກ້າວໜ້າ (ຫົວໜ່ວຍ​ວິລະ​ຊົນ, ບຸກຄົນ​ວິລະ​ຊົນ, ​ແບບຢ່າງ​ດີ​ເດັ່ນ​ກ້າວໜ້າ); ການສະຫຼຸບ​ສັງ​ລວມພຶດ​ຕິ​ກຳ ​ໂດຍຜ່ານ​ການ​ເຂົ້າ​ຮ່ວມ​ໃນ​ການ​ຝຶກ​ອົບຮົມ​ທິດ​ສະ​ດີກາ​ນ​ເມືອງ. ຍ້ອນ​ການ​ເຂົ້າ​ຮ່ວມ​ໂດຍ​ກົງຈຶ່ງ​ຊ່ວຍ​ໃຫ້ພະນັກງານ​ສະຫຼຸ​ບພຶດຕິ​ກຳ​ໄດ້​ຢ່າງ​ຊື່ສັດ ​ເລິກ​ເຊິ່ງ, ຕາມ​ຄຳ​ແນະນຳ​ຂອງປະທານ ​ໂຮ່ຈີ​ມິນ​ ທີ່​ວ່າ: “ຢາກ​ເຂົ້າ​ໃຈ​ສິ່ງ​ການ​ໜຶ່ງ​ທັງ​ໝົດ, ​ເຂົ້າ​ໃຈ​ທາດແທ້​ແລະ​ກົດ​ເກນ​ພາຍ​ໃນ​ຂອງ​ມັນ, ຈະ​ຕ້ອງພິຈາລະນາ​ຢ່າງຮອບ​ຄອບ, ລວບ​ລວມຄວາມ​ຮູ້ສຶກ​ທີ່​ຫຼາກ​ຫຼາຍ, ​ຈາກ​ນັ້ນເລືອກຂອງ​ຈິງ, ຂອງ​ປອມ, ອັນ​​ໃດຖືກ, ອັນ​ໃດ​ຜິດ, ຈາກ​ພາຍ​ນອກ​ສູ່​ພາຍ​ໃນ, ​ເພື່ອ​ສ້າງ​ເປັນລະບົບ​ຄວາມ​ສຳນຶກ​ທິດ​ສະ​ດີ. ນັ້ນ​ແມ່ນຄວາມ​ເຂົ້າ​ໃຈ​ເນື່ອງ​ຈາກການ​ປະຕິບັດ ​ແລະ ​ໄດ້​ຮັບ​ການ​ປັບປຸງ​ໃນ​ທາງ​ປະຕິບັດ. ຄວາມ​ເຂົ້າ​ໃຈ​ນັ້ນ​ເລິກ​ເຊິ່ງກວ່າ, ຖືກຕ້ອງ​ກວ່າ, ສ່ອງ​ແສງ​ສິ່ງ​ວັດຖຸ​ຮອບດ້ານ​ກວ່າ”(10). ​ເພື່ອ​ໃຫ້​ແບບ​ວິທີ​ສະຫຼຸບ​ໂດຍ​ກົງ​ມີ​ປະສິດທິ​ຜົນນັ້ນ ຕ້ອງ​ກຳນົດ​ລະບອບ​ລົງ​ຮາກ​ຖານ​ຂອງ​ພະນັກງານ​ການ​ນຳ​ຂັ້ນ​ຕ່າງໆ; ສ້າງ​ນິ​ໄສ​ມັກ​ສັງ​ເກດ, ສືບສວນ, ພິຈາລະນາສະຖານະ​ການ​ຈິງ, ພິ​ເສດ​ແມ່ນ ການຄົ້ນ​ເຜີຍຂໍ້​ຂັດ​ແຍ່ງ ​ແລະ ທິດ​ທາງ​ແກ້​ໄຂ​ຂໍ້​ຂັດ​ແຍ່ງ; ກໍ່ສ້າງ​ລະບອບ​ເຂົ້າ​ຮ່ວມ​ການ​ຝຶກ​ອົບຮົມ​ທິດ​ສະ​ດີກາ​ນ​ເມືອງສຳລັບ​ພະນັກງານ​ການ​ນຳ​ຂັ້ນ​ຕ່າງໆ. ລະບອບ​ລົງ​ຮາກ​ຖານຊ່ວຍ​ໃຫ້​ພະນັກງານມີ​ເງື່ອນ​ໄຂ​ເກັບ​ກຳ​ສະພາບ​ການ​ຄວາມ​ເປັນ​ຈິງ, ​ເພີ່ມ​ເຕີມ​ຂໍ້​ມູນ​ພຶດ​ຕິ​ກຳ​ໃຫ້​ຄວາມ​ຮູ້​ທີ່​ຍັງ​ບໍ່​ຊັດ​ເຈນ, ພ້ອມ​ກັນ​ນັ້ນ​ກໍ່​ກວດສອບ​ທິດ​ສະ​ດີ​​ໂດຍ​ການ​ປະຕິບັດ. ບັນດາ​ປັດ​ໄຈ​ໃໝ່, ​ແບບຢ່າງ​ດີ​ເດັ່ນກ້າວໜ້າ ​​ແມ່ນ​ອຸດົມສົມ​ບຸນ​ທີ່​ສຸດ​ໃນ​ຊີວິດ, ກວມ​ທັງ​ແບບຢ່າງ​ລວມໝູ່ ​ແລະ ບຸກຄົນ, ຊຶ່ງ​ຕ້ອງ​ໄດ້​ຮັບ​ການ​ວິ​ເຄາະ​ໄຈ້​ແຍກ​ແລະ​ປະ​ເມີນຢ່າງ​ຖີ່​ຖ້ວນ ​ເພື່ອ​ເຜີຍແຜ່ທະວີ​ຄູນ, ​ເພີ່ມ​ເຕີມ​ໃຫ້​ຄວາມ​ຮູ້​ທິດ​ສະ​ດີ. ​ແບບຢ່າງ​ທີ່​ດີ​ເດັ່ນ​ກ້າວໜ້າ​ປະກອບ​ທັງ​ແນວ​ຄິດ​ກ້າວໜ້າ, ແບບແຜນກ້າວໜ້າ, ວິທີເຮັດທີ່ກ້າວໜ້າ. ການ​ກໍ່ສ້າງ​ທິດ​ສະ​ດີກາ​ນ​ເມືອງ ​ເປັນ​ພື້ນ​ທີ່​ທີ່​ດີ​ສຳລັບການ​ສະຫຼຸບ​ສັງ​ລວມພຶດຕິ​ກຳ​ໃນສະພາບ​ແວດ​ລ້ອມ​ຂອງ​ໂຮງຮຽນ, ພິ​ເສດ​ແມ່ນ​ສຳລັບ​ບັນດາ​ຊຸດ​ຮຽນທີ່​ມີ​ການ​ສອນ​ຂອງ​ຜູ້ນຳ​ລະດັບ​ສູງ. ຈຳ​ເປັນ​ຕ້ອງ​ປ່ຽນ​ແປງ​ໃໝ່ວິທີ​ການສ​ອນ ຈາກ​ການຖ່າຍ​ທອດ​ຄວາມ​ຮູ້​ດ້ານ​ດຽວ ​ໄປ​ເປັນ​ການ​ສົ່ງ​ເສີມການສົນທະນາໂຕ້​ຖຽງ, ການ​ຖາມ​ຕອບ​ຂອງ​ຜູ້​ຮຽນ, ​ເພີ່ມຄວາມ​ປະຕິ​ສຳພັນ​ລະຫວ່າງ​ຜູ້​ຮຽນ, ຍ້ອນ​ແນວ​ນັ້ນ​ຈຶ່ງ​ຈະ​ເກັບ​ກຳ​ໄດ້​ຄວາມ​ຮູ້​ພຶດຕິ​ກຳ​ທີ່​ແນ່ນອນ​ໃນ​ສະພາບ​ແວດ​ລ້ອມ​ຂອງ​ໂຮງຮຽນ. ຄູ​ອາຈານດ້ວຍ​ຄວາມ​ຮູ້​ທິດ​ສະ​ດີ​ຂອງ​ຕົນ ຈະ​ຊ່ວຍ​ໃຫ້​ນັກຮຽນ​ມີ​ທິດ​ທາງ​ທີ່​ຖືກຕ້ອງ​ໃນ​ການ​ໃຊ້​ຄວາ​ມຮູ້ປະສົບ​ການ, ​ແກ້​ໄຂ​ພະຍາດບົນ​ຮຽນ​ນິຍົມ​ໃນ​ເມື່ອ​ໝູນ​ໃຊ້​ທິດ​ສະ​ດີ​ເຂົ້າ​ໃນ​ພຶດຕິ​ກຳ.

ທີ​ຫ້າ, ​ເພີ່ມ​ທະວີ​ຄວາມ​ສາມາດສະຫຼຸບ​ສັງ​ລວມພຶດ​ຕິ​ກຳ​ໃຫ້​ຄະນະ​ພັກ​ຂັ້ນ​ຕ່າງໆ ​ແລະ ກໍ່ສ້າງ​ຖັນ​ແຖວ​ຜູ້​ຊ່ຽວຊານ​ເພື່ອ​ເປັນ​ຫຼັກ​ແຫຼ່ງ​ໃນ​ການສະຫຼຸບ​ສັງ​ລວມພຶດ​ຕິ​ກຳ ຕິດ​ກັບ​ການຄົ້ນຄວ້າ​ທິດ​ສະ​ດີ. ຍ້ອນ​ວ່າ ການສະຫຼຸບ​ສັງ​ລວມພຶດ​ຕິ​ກຳ ກ່ອນ​ອື່ນ​ໝົດ​ແມ່ນ​ຄວາມ​ຮັບ​ຜິດ​ຊອບ​ຂອງ​ຄະນະ​ພັກ​ຂັ້ນ​ຕ່າງໆ, ດັ່ງ​ນັ້ນ ກຳມະການ​ຄະນະ​ພັກ​ທຸກ​ຄົນ​ຕ້ອງ​ໄດ້​ຍົກ​ສູງ​ຄວາມ​ສາມາດສະຫຼຸບ​ສັງ​ລວມພຶດ​ຕິ​ກຳ, ສ້າງ​ສະຕິ​ປະຈຳການ ກ່ຽວ​ກັບ​ໜ້າ​ທີ່ສະຫຼຸບ​ສັງ​ລວມພຶດ​ຕິ​ກຳຕິດ​ກັບ​ການ​ຍົກ​ສູງ​ລະດັບ​ທິດ​ສະ​ດີ. ກຳມະການ​ຄະນະ​ພັກ​ຢາກ​ນຳພາ​ໄດ້​ດີ​ແມ່ນ​ຕ້ອງ​ມີຄວາມ​ສາມາດ​ຈິນຕະນາການ​ທິດ​ສະ​ດີ ​ແລະ ຄວາມ​ສາມາດສະຫຼຸບ​ສັງ​ລວມພຶດ​ຕິ​ກຳ. ສອງ​ດ້ານ​ນີ້​ມີຄວາມ​ພົວພັນ​ສັດຈະ​ວິພາກ​ນຳ​ກັນ. ມີ​ຈິນຕະນາການ​ທິດ​ສະ​ດີ​ຈຶ່ງ​ນຳ​ໃຊ້​ຄວາມ​ຮູ້​ປະສົບ​ການ​ໄດ້​ຢ່າງ​ຖືກຕ້ອງ, ສອດຄ່ອງ, ​ຈຶ່ງ​ແກ້​ໄຂ​ພະຍາດ​ບົດຮຽນ​ນິຍົມ​ໄດ້. ນຳ​ໃຊ້​ຄວາມ​ຮູ້​ປະສົບ​ການ​ຢ່າງ​ສອດຄ່ອງ​ເໝາະ​ສົມແມ່ນວິທີ​ເພື່ອ​ຫຍໍ້​ສັ້ນ​ຊ່ອງ​ຫວ່າງ​ລະຫວ່າງ​ທິດ​ສະ​ດີ​ແລະ​ພຶດຕິ​ກຳ, ​ເພື່ອ​ໝູນ​ໃຊ້​ທິດ​ສະ​ດີ​ຢ່າງ​ສົມ​ເຫດ​ສົມ​ຜົນ, ຍົກ​ເລີກ​ວິທີ​ແກ້​ໄຂ​ທີ່​ບໍ່​ເໝາະ​ສົມ, ສະ​ເໜີ​ແນະ​ເພື່ອ​ດັດ​ແປງ​ກົນ​ໄກ, ນະ​ໂຍບາຍ. ຢ່າງ​ໃດ​ກໍ່ຕາມ, ​ເພື່ອ​ໃຫ້​ວຽກ​ງານສະຫຼຸບ​ສັງ​ລວມພຶດ​ຕິ​ກຳ​ໄດ້​ຮັບ​ການ​ດຳ​ເນີນ​ຢ່າງ​ມື​ອາຊີບ, ຈຳ​ເປັນ​ຕ້ອງ​ສ້າງຖັນ​ແຖວ​ຜູ້​ຊ່ຽວຊານ​ຫຼັກ. ຖັນ​ແຖວ​ດັ່ງກ່າວ​ນັ້ນ​ຢູ່​ໃນ​ໂຄງ​ສ້າງ​ຂອງ​ສະພາ​ທິດ​ສະ​ດີ, ບັນດາ​ຄະນະ​ຂອງ​ພັກ​ແຕ່​ສູນ​ກາງ​ຮອດ​ທ້ອງ​ຖິ່ນ, ຕ້ອງ​ມີ​ລະດັບ​ທິດ​ສະ​ດີ​ທີ່​ເລິກ​ເຊິ່ງ, ຮູ້ແຈ້ງສະພາບຄວາມເປັນຈິງ, ມີຄວາມຊຳນິຊຳນານທາງວິທີການ ແລະ ທັກສະໃນການສະຫຼຸບ​ສັງ​ລວມພຶດ​ຕິ​ກຳ. ຕ້ອງ​ສ້າງ​ເງື່ອນ​ໄຂ​ໃຫ້​ຖັນ​ແຖວ​ຜູ້​ຊ່ຽວຊານ​ຫຼັກ​​ໄດ້ເຂົ້າ​ສູ່​ຄວາມ​ເປັນ​ຈິງ​ຢ່າງ​​ເປັນ​ປະຈຳ, ສະຫຼຸບ​ບັນດາ​ຕົວ​ແບບ, ຂະ​ບວນການ, ​ເຂົ້າ​ຮ່ວມ​ການ​ກໍ່ສ້າງ​ທິດ​ສະ​ດີກາ​ນ​ເມືອງ ​ແລະ ກໍ່​ຕັ້ງສະຕິ​ເປັນ​ເຈົ້າ​ການ, ຕັ້ງໜ້າກ່ຽວ​ກັບການສະຫຼຸບ​ສັງ​ລວມພຶດ​ຕິ​ກຳ ​ໃນ​ຂະ​ບວນວິວັດ​ການ​ນຳພາ, ຊີ້​ນຳ, ດຳ​ເນີນ​ງານ. ມີ​ກົນ​ໄກ, ນະ​ໂຍບາຍຕອບ​ແທນ​ທີ່​ຄຸ້ມ​ຄ່າ​ສຳລັບຖັນ​ແຖວ​ຜູ້​ຊ່ຽວຊານ​ຫຼັກ ​ເພື່ອ​ໃຫ້​ພວກເຂົາອຸ່ນ​ອຽນ​ໃຈ​ເຮັດ​ວຽກ, ບຳລຸງ​ຝຶກ​ຝົນ​ອາຊີບ, ອຸທິດ​ສະຕິ​ປັນຍາ​ໃຫ້​ແກ່​ການຄົ້ນຄວ້າ​ທິດ​ສະ​ດີ ​ແລະ ສະຫຼຸບ​ສັງ​ລວມພຶດ​ຕິ​ກຳ. ກໍ່ສ້າງ​ລະບົບ​ຂໍ້​ມູນ​ແລະ​ປະກອບ​ເຄື່ອງມື, ພາຫະນະ​ທີ່​ຈຳ​ເປັນ ​ເພື່ອ​ໃຫ້​ຖັນ​ແຖວ​ພະນັກງານ​ຊ່ຽວຊານ​ຫຼັກ ​ມີ​ຄວາມ​ສະດວກ​ໃນ​ການສະຫຼຸບ​ສັງ​ລວມພຶດ​ຕິ​ກຳ ຕິດ​ກັບ​ການຄົ້ນຄວ້າ​ທິດ​ສະ​ດີ, ຄົ້ນຄວ້າ​ວິທະຍາສາດ./.

ໂດຍ ຮສ. ປອ. ດວ່າ​ນມິ​ງຫວນ

ກຳມະການ​ສຳຮ​ອງຄະນະ​ບໍລິຫານ​ງານສູນ​ກາງ​ພັກ,

ຫົວໜ້າ​ຄະນະບັນນາທິການວາລະສານ​ກອມ​ມູນິດ

 

---------------------------------------------

- ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 915 (​ເດືອນ​ມັງກອນ 2019)

(1), (2) ​ໂຮ່ຈີ​ມິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ-ຊື້​ເທິ​ດ, ຮ່າ​ໂນ້ຍ, 2011, ​ເຫຼັ້ມ 7, ໜ້າ 127, 120.

(3) ກ.ມາກ ​ແລະ ຟ.ອັງ​ແກນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 1995, ​ເຫຼັ້ມ 3, ໜ້າ 9, 10.

(4) ວ.ອີ.​ເລ​ນິນ: ນິພົນ​ຄົຍ​ຊຸດ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2006, ​ເຫຼັ້ມ 29, ໜ້າ 220.

(5) ​ເບິ່ງ​ບົດ​ຄວາມ​ຂອງ ສຈ. ຫງວຽນ​ດຶກ​ບິ່ງ ລົງ​ພິມ​ໃນໜັງສື​ພິມ​ປະຊາຊົນ ສະບັບ​ອອກ​ວັນ​ທີ 4-6-1992.

(6) ​ໂຮ່ຈີ​ມິນ: ນິພົນ​ຄົບ​ຊຸດ, ປຶ້ມທີ່ໄດ້ແນະນຳ, ​ເຫຼັ້ມ 7, ໜ້າ 124.

(7) ມະຕິ​ກອງ​ປະຊຸມ​ຄັ້ງ​ທີ່ 5 ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ IX, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2002, ໜ້າ 134 – 135.

(8), (9) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງ​ວ່າການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 200, 201.

(10) ໂຮ່ຈີ​ມິນ: ນິພົນ​ຄົບ​ຊຸດ, ປຶ້ມທີ່ໄດ້ແນະນຳ, ​ເຫຼັ້ມ 7, ໜ້າ 127.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ