ວັນຈັນ, 18/11/2019
ການປົກປັກຮັກສາອຳນາດອະທິປະໄຕ ໃນເຂດທະເລໝູ່ເກາະຂອງຫວຽດນາມ ໃນສະພາບການໃໝ່
17/10/2019 5:35' ສົ່ງ ພິມ
ເຮືອນຮ້ານ DK1-21 ຢູ່ໄຫຼ່ທະວີບທາງທິດໃຕ້ຂອງປະເທດຫວຽດນາມ (ແຂວງບ່າເຣ້ຍ-ຫວຸງເຕົ່າ).

ທະ​ເລ​ແລະ​ເກາະຂອງ​ກວຽດນາມ​ແມ່ນ​ພາກສ່ວນ​ທີ່​ສຳຄັນ​ຂອງ​ອຳນາດ​ອະທິປະ​ໄຕ​ແຫ່ງ​ຊາດ, ​ແມ່ນ​ພື້ນ​ທີ່​ແຫ່ງ​ການ​ດຳລົງ​ຄົງ​ຕົວ, ປະຕູ​​ແຫ່ງ​ການ​ແລກປ່ຽນ​ກັບ​ຕ່າງປະ​ເທດ​ໃນ​ໂລກ, ຕິດ​ພັນ​ຢ່າງ​ແໜ້ນ​ແຟ້ນກັບ​ພາລະກິດ​ການ​ສ້າງສາ​ ແລະ​ປົກ​ປັກ​ຮັກສາ​ປະ​ເທດ​ຊາດ. ນີ້​ກໍ່​ແມ່ນ​ພື້ນ​ທີ່​ຍຸດ​ທະ​ສາດ​ທາງ​ດ້ານ​ການ​ປ້ອງ​ກັນ​ປະ​ເທດ​ ແລະ​ຮັກສາ​ຄວາມ​ປອດ​ໄພ, ​ແມ່ນ​ແນວ​ປ້ອງ​ກັນ​ທາງ​ທິດຕາ​ເວັນ​ອອກ​ຂອງປະ​ເທດ, ສ້າງ​ພື້ນ​ທີ່​​ເທສະ​ທີ່​ຈຳ​ເປັນ​ເພື່ອຄວບ​ຄຸມ​ການ​ເຂົ້າ​ເຖິງ​​ແຜ່ນດິນ​​ໃນ​ປະ​ເທດ.

​ໂດຍ​ສືບ​ທອດ​ແລະ​ພັດທະນາ​ຈິດ​ສຳນຶກ​ກ່ຽວ​ກັບ​ອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່ເກາະ ຂອງບັນພະບຸລຸດ​ຂອງ​ພວກເຮົາ ​ໃນ​ປະຫວັດສາດ​ແຫ່ງ​ການ​ສ້າ​ງສາ​ແລະ​ປົກ​ປັກ​ຮັກສາ​ປະ​ເທດ, ກໍ່​ຄື​ຄວາມ​ຮັບ​ຮູ້​ຢ່າງ​ຖືກຕ້ອງ​ກ່ຽວ​ກັບ​ ບົດບາດ​ທີ່​ຕັ້ງ, ຄວາມ​ສຳຄັນ​ພິ​ເສດ​ຂອງ​ທະ​ເລ​ແລະ​ເກາະ​ ໃນ​ພາລະກິດ​ການ​ສ້າງສາ​ແລະ​ປົກ​ປັກ​ຮັກສາ​ປະ​ເທດ​ຊາດ, ພັກ​ກອມ​ມູນິດ​ຫວຽດນາມ ​ແລະ ລັດ​ແຫ່ງ​ສາທາລະນະ​ລັດສັງຄົມ​ນິຍົມຫວຽດນາມ ​ໄດ້​ມີ​ຫຼາຍ​ແຜນ​ນະ​ໂຍບາຍ, ນະ​ໂຍບາຍ​ກ່ຽວ​ກັບ​ທະ​ເລ​ແລະ​ເກາະ. ການຄຸ້ມ​ຄອງ​ແລະ​ຂຸດ​ຄົ້ນທະ​ເລ​ໄປ​ຄຽງ​ຄູ່​ກັບ​ການ​ປົກ​ປັກ​ຮັກສາຢ່າງ​ໝັ້ນຄົງ ອຳນາດ​ອະທິປະ​ໄຕ, ສິດ​ອະທິປະ​ໄຕ ​ແລະ ອຳ​ນາດ​ພິພາກສາ​ຕັດສິນ​ຂອງ​ຊາດ​ໃນ​ເຂດ​ທະ​ເລໝູ່​ເກາະ, ​ເຮັດ​ໃຫ້​ປະ​ເທດ​ຊາດ​ຮັ່ງມີ​ເຂັ້ມ​ແຂງ ​ແມ່ນ​ທັດສະນະສະ​ເໝີ​ຕົ້ນ​ສະ​ເໝີ​ປາຍ​ທີ່​ບໍ່​ປ່ຽນ​ແປງ ​ຂອງພັກ​ກອມ​ມູນິດ​ຫວຽດນາມ ​ແລະ ລັດ​ແຫ່ງສາທາລະນະ​ລັດສັງຄົມ​ນິຍົມຫວຽດນາມ.

​ໃນ​ຊຸມ​ປີ​ທີ່​ຜ່ານ​ມາ, ​ໃນ​ສະພາບ​ໂລກ​ແລະ​ພາກ​ພື້ນມີ​ການ​ຜັນ​ແປ​ຢ່າງ​ສັບສົນ, ​ແຕ່​ພາຍ​ໃຕ້​ການ​ນຳພາ​ຂອງ​ພັກ​ກອມ​ມູນິດ​ຫວຽດນາມ, ການ​ຄຸ້ມ​ຄອງ​ບໍລິຫານ​ຂອງລັດ​ແຫ່ງສາທາລະນະ​ລັດສັງຄົມ​ນິຍົມຫວຽດນາມ, ກອງທັບ​ແລະ​ປະຊາຊົນ​ຫວຽດນາມ​ ໄດ້​ຜັນ​ຂະຫຍາຍ​ຢ່າງ​ຕັ້ງໜ້າ​ ບັນດາ​ການ​ເຄື່ອນ​ໄຫວ​ປົກ​ປັກ​ຮັກສາ​ອຳນາດ​ອະທິປະ​ໄຕ ​ແລະ​ ຜົນ​ປະ​ໂຫຍ​ດຂອງ​ຊາດ​ໃນ​ເຂດ​ທະ​ເລໝູ່​ເກາະ. ຫວຽດນາມ “​ໄດ້​ເປັນ​ເຈົ້າ​ການ, ​ເດັດດ່ຽວ ​ແລະ ຕັ້ງ​ໝັ້ນ​ຕໍ່ສູ້ດ້ວຍ​ບັນດາ​ມາດ​ຕະການ​ທີ່​ເໝາະ​ສົມ, ປົກ​ປັກ​ຮັກສາອຳນາດ​ອະທິປະ​ໄຕ​ໃນ​ເຂດ​ທະ​ເລ, ​ເກາະ ​ແລະ​ ເຂດ​ນ່ານຟ້າ​ໄວ້​ໄດ້ ​ແລະ ຮັກສາສັນຕິພາບ, ສະຖຽນ​ລະ​ພາບ​ເພື່ອ​ພັດທະນາ​ປະ​ເທດ”(1). ພ້ອມ​ກັນ​ນັ້ນ, ຍຸດ​ທະ​ສາດ​ການ​ພັດທະນາ​ເສດຖະກິດ​ທະ​ເລ​ຫວຽດນາມ​ຢ່າງ​ຍືນ​ຍົງ​ຮອດ​ປີ 2030, ວິ​ໄສ​ທັດ​ຮອດ​ປີ 2045 ກໍ່​ໄດ້​ລະ​ບຸ “ຄວາມ​ຮັບ​ຮູ້​ຂອງ​ລະບົບ​ການ​ເມືອງ​ທັງ​ໝົດ, ຂອງປະຊາຊົນ​ ແລະພີ່ນ້ອງ​ຮ່ວມ​ຊາດ​ເຮົາ​ຢູ່​ຕ່າງປະ​ເທດ ກ່ຽວ​ກັບ​ບົດບາດ​ທີ່​ຕັ້ງ​ຂອງ​ທະ​ເລ​ແລະ​ເກາະ​ຕໍ່​ກັບການ​ພັດທະນາ​ເສດຖະກິດ ​ແລະ​ ການປົກ​ປັກ​ຮັກສາ​ອຳນາດ​ອະທິປະ​ໄຕ​​ແຫ່ງຊາດ ​ໄດ້​ຮັບ​ການ​ຍົກ​ສູງ​ຂຶ້ນ​ຢ່າງ​ຈະ​ແຈ້ງ. ອຳນາດ​ອະທິປະ​ໄຕ​ແລະ​ຄວາມ​ໝັ້ນຄົງ​ຂອງ​ຊາດ​ໃນ​ທະ​ເລ ​ໄດ້​ຮັບ​ການ​ຮັກສາ”.

​ໃນ​ປະຈຸ​ບັນ, ກຳລັງ​ແຮງ​ສັງ​ລວມຂອງ​ຊາດ, ທ່າ​ແລະ​ກຳລັງ​ຂອງ​ຫວຽດນາມ​ໃນ​ບັນດາ​ເຂ​ດທະ​ເລ​ແລະ​ເກາະ ​ໄດ້​ເພີ່ມ​ຂຶ້ນ​ຫຼາຍ. ທ່າ​ສະໜາມ​ການ​ປ້ອງ​ກັນຊາ​ດທົ່ວ​ປວງ​ຊົນ, ການ​ຮັກສາຄວາມປອດ​ໄພ​ທົ່ວ​ປວງ​ຊົນ, “ທ່າ​ສະໜາມ​ຮົບ​ປະຊາຊົນ” ​ໃນ​​ເຂດທະ​ເລ​ໝູ່​ເກາະ ​ໄດ້​ຮັບ​ການ​ປັບປຸງ ​ເພີ່ມ​ທະວີ​ຢ່າງ​ບໍ່​ຢຸດ​ຢັ້ງ. ບັນດາ​ກຳລັງ​ຄຸ້ມ​ຄອງ, ປົກ​ປັກ​ຮັກສາ​ທະ​ເລ ​ໄດ້​ຮັບ​ການ​ກໍ່ສ້າງ​ເທື່ອ​ລະ​ກ້າວ ​ແລະ ພັດທະນາ​ເຂັ້ມ​ແຂງ​ຂຶ້ນ​ເລື່ອຍໆ, ​ໃນ​ນັ້ນ​ ກອງທັບ​ເຮືອ​ປະຊາຊົນ​ຫວຽດນາມ​ໄດ້​ຮັບ​ການ​ລົງທຶນ​ເພື່ອ​ກ້າວ​ໂດ​ຍກົງ​ຂຶ້ນ​ສູ່​ທັນ​ສະ​ໄໝ, ມີ​ການຈະ​ເລີ​ນ​​ເຕີບ​ໂຕ​ຢ່າງ​ກ້າວ​ກະ​ໂດດ, ມີ​ກຳລັງ​ແຮງ​ພຽງພໍ​ທີ່​ຈະ​ເປັນ​ຫຼັກ​ແຫຼ່ງ​ໃນ​ການປົກ​ປັກ​ຮັກສາ​ອຳນາດ​ອະທິປະ​ໄຕ​ໃນ​ເຂດ​ທະ​ເລໝູ່ເກາະ​ຂອງ​ປະ​ເທດ. ທະຫານ​ເຮືອ​ແລະ​ບັນດາ​ກຳລັງ​ບັງຄັບ​ໃຊ້​ກົດໝາຍ​ອື່ນໆ​ໃນ​ທະ​ເລ (ຕຳຫຼວດ​ຍາມ​ຊາຍ​ຝັ່ງ, ທະຫານ​ຮັກສາຊາ​ຍ​ແດນ, ກອງ​ກວດກາ​ການ​ປະມົງ…) ບໍ່ຢ້ານ​​ຄວາມ​ຫຍຸ້ງຍາກ, ຄວາມລຳບາກ ​ແລະ​ອັນຕະລາຍ; ​ໄດ້​ຕິດຕາມ​ຢູ່​ໃນ “ບໍລິ​ເວນ​ທີ່​ມີຟອງ​ແຮງລົມ​ຈັດ” ຢ່າງ​​ໃກ້ຊິດກ້າຫານ; ດຳ​ເນີນ​ການ​ລາດຕະ​ເວນ​, ​ກວດກາ​ທັງ​ກາງເວັນ​ແລະກາງ​ຄືນ​ ເພື່ອຢືນຢັນ​ແລະ​ປົກ​ປ້ອງ​ອຳນາ​ອະທິປະ​ໄຕ, ຮັກສາ​ທະ​ເລ​ແລະ​ເກາະ​ໃຫ້​ມີ​ຄວາມ​ສະຫງົບ​ປອດ​ໄພ, ​ເປັນ​ບ່ອນ​ອີງ​ແທ້​ຈິງ​ທີ່​ເຊື່ອ​ຖື​ໄດ້ ​ໃຫ້​ປະຊາຊົນອຸ່ນ​ອຽນ​ໃຈ​ອອກ​ສູ່​ທະ​ເລ​ຫາ​ປາ ​ແລະ ພັດທະນາ​ເສດຖະກິດ. ພິ​ເສດ, ​ແຕ່​ລະ​ຄັ້ງ​ທີ່​ຕ້ອງ​ປະ​ເຊີນ​ໜ້າ​ກັບສະຖານະ​ການ​ທີ່​ສັບສົນ ​ເຄັ່ງ​ຕຶງ, ບັນດາ​ກຳລັງ​ໃນ​ທະ​ເລ​ຍາມ​ໃດ​ກໍ່ຍົກ​ສູງຄວາມ​ຕັດສິນ​ໃຈ “ຄົນ​ຍັງ​ມີ​ຊີວິດ​ຢູ່​ແມ່ນ​ຍັງ​ມີ​ທະ​ເລ​ແລະ​ເກາະ”, “ນິ້ວໜຶ່ງ​ກໍ່​ບໍ່​ຖອຍ, ຄືບ​ໜຶ່ງ​ກໍ່​ບໍ່​ຫ່າງ”; ປະຕິບັດຖືກຕ້ອງ​ຕາມ​ຍຸດ​ໂທ​ບາຍ, ທິດ​ນຳ ​ແລະ ​ແນວ​ຄິດ​ຊີ້​ນຳ; ສະຫຼາດ​ຄ່ອງ​​ແຄ່ວ, ​ເດັດດ່ຽວ, ຕັ້ງ​ໝັ້ນ​ໃນ​ການ​ປົກ​ປັກ​ຮັກສາ​ອຳນາດ​ອະທິປະ​ໄຕ ​ແລະຜົນ​ປະ​ໂຫຍ​ດຂອງ​ຊາດ, ຄວາມ​ປອດ​ໄພ​ແລະ​ຄວາມ​ສະຫງົບຮຽບຮ້ອຍ​ໃນ​ທະ​ເລ; ບໍ່​ປ່ອຍ​ໃຫ້​ຄວາມ​ຂັດ​ແຍ່ງ​ເກີດ​ຂຶ້ນ; ຮັກສາ​ສະພາບ​ແວ​ດລ້ອມ​ສັນຕິພາບ​ແລະ​ສະຖຽນ​ລະ​ພາບ​ ເພື່ອ​ການ​ພັດທະນາ​ປະ​ເທດ​ແລະ​ເປີດ​ກວ້າງ​ການ​ພົວພັນ​ຮ່ວມ​ມື​ກັບ​ບັນດາ​ປະ​ເທດ​ໃນ​ໂລກ.

ນອກ​ຈາກ​ຂໍ້​ສະດວກ​ພື້ນຖານ​ແລ້ວ, ໜ້າ​ທີ່​ປົກ​ປັກ​ຮັກສາ​ອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່ເກາະ​ຂອງ​ປະ​ເທດ​ໃນປະ​ຈຸ​ບັນ​ຍັງ​ມີ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ຕ່າງໆ. ສະພາບ​ການ​ສາກົນ​ແລະ​ພາກ​ພື້ນ​ຜັນ​ປ່ຽນ​ຢ່າງ​ໄວວາ, ສັບສົນ​ແລະ​ບໍ່​ສາມາດຄາດ​ເດົາ​ໄດ້, ບັນດາ​ປັດ​ໄຈທີ່​ຫາ​ກໍ່​ປະກົດ​ຕົວຂຶ້ນ​ໄດ້​ກະທົບ​ໂດຍ​ກົງ​ເຖິງ​ສະພາບ​ການ​ໃນ​ທະ​ເລ​ຕາ​ເວັນ​ອອກ. ການ​ແຂ່ງຂັນ​ຍຸດ​ທະ​ສາດ​ລະຫວ່າງ​ບັນດາ​ປະ​ເທດ​ໃຫຍ່ ​ແລະ ຂໍ້​ພິພາດດ້ານ​ດິນ​ແດນ, ອຳນາດ​ອະທິປະ​ໄຕ​ໃນ​ທະ​ເລ​ໝູ່​ເກາະ ລະຫວ່າງ​ບັນດາ​ປະ​ເທດ​ໃນ​ພາກ​ພື້ນ ນັບ​ມື້​ນັບ​ເຄັ່ງຮ້ອນ ​ເຊິ່ງອາດ​ຈະ​ພາ​ໃຫ້​ເກີດ​ການ​ປະ​ທະ​ກັນ, ທຳລາຍ​ຄວາມ​ສະຫງົບ.

ຢູ່​ໃນ​ປະ​ເທດ, ການ​ປະສານ​ສົມທົບ, ຄວາມ​ເປັນ​ເອກະ​ພາບ​ທາງ​ດ້ານ​ການ​ຮັບ​ຮູ້​​ແລະການ​ກະທຳ​ກ່ຽວ​ກັບອຳນາດ​ອະທິປະ​ໄຕ​ໃນ​ເຂດ​ທະ​ເລດ​ໝູ່ເກາະຂອງ​ປະຊາຊົນ​ພາກສ່ວນ​ໜຶ່ງ​ ແມ່ນ​ຍັງ​ບໍ່​ທັນ​ສູງ. ບັນດາ​ອິດ​ທິກຳລັງ​ສັດຕູ​ໄດ້ອອກ​ແຮງ​ສວຍ​ໃຊ້​ບັນຫາ​ທະ​ເລ​ແລະ​ເກາະ ​ເພື່ອ​ຕ້ານ​ຢັນທຳລາຍພັກ, ລັດ​ແຫ່ງສາທາລະນະ​ລັດສັງຄົມ​ນິຍົມຫວຽດນາມ ​ແລະ ​ລະບອບ​ການ​ປົກຄອງ​ຂອງ​ພວກເຮົາ. ​ໃນ​ເງື່ອນ​ໄຂ​ເສດຖະກິດແລະງົບປະມານ​ຖືກ​ຈຳກັດ, ຫວຽດນາມ​ບໍ່​ສາມາດ​ລົງທຶນ​ທັນທີ​ໃນ​ການ​ກໍ່ສ້າງບັນດາ​ກຳລັງ​ຄຸ້ມ​ຄອງ​ແລະ​ປົກ​ປັກ​ຮັກສາ​ທະ​ເລ​​​ໃຫ້​ເຂັ້ມ​ແຂງ​ໃນ​ມື້ໜຶ່ງ​ຍາມ​ດຽວ​ໄດ້, ດັ່ງ​ນັ້ນ ອຸປະກອນພາຫະ​ນະ​ຂອງ​ກຳລັງ​ເຫຼົ່າ​ນີ້ຍັງຖືກ​ຈຳກັດ, ຍາກ​ທີ່​ຈະ​ຮັກສາ​ການ​ມີໜ້າ ​ເຄື່ອນ​ໄຫວ​ເປັນ​ປະຈຳ​ແລະຕໍ່​ເນື່ອງ ​ໃນ​ທົ່ວ​ເຂດ​ທະ​ເລ​ທີ່​ກວ້າງ​ໃຫຍ່. ກົນ​ໄກ​ປະສານ​ສົມທົບ, ຊີ້​ນຳ, ກຳກັບ​ຂັບ​ເຄື່ອນ​ລວມສູນ, ​ເປັນ​ເອກະ​ພາບ ​ຕໍ່​ບັນດາ​ກຳລັງ​ຄຸ້ມ​ຄອງ, ປະຕິບັດ, ປົກ​ປັກ​ຮັກສາ​ອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ ຍັງ​ມີ​ຂໍ້​ບົກພ່ອງ​ບາງ​ຢ່າງ...

ການ​ປົກ​ປັກ​ຮັກສາ​ອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ ​ແມ່ນ​ການ​ປົກ​ປັກ​ຮັກສາ​ປະ​ເທດ​ທາງ​ທິດ​ທະ​ເລ, ບໍ່​ພຽງ​ແຕ່​ປົກ​ປັກ​ຮັກສາ​ຄວາມ​ຄົບ​ຖ້ວນ, ຄວາມ​ເປັນ​ເອກະ​ພາບ​ຂອງ​ດິນ​ແດນ ພື້ນ​ທີ່​​ທະ​ເລໝູ່​ເກາະ, ຜົນ​ປະ​ໂຫຍ​ດຂອງ​ຊາດ​ຂອງ​ປະ​ເທດ​ເທົ່າ​ນັ້ນ, ​ແຕ່​ຍັງ​ປະກອບສ່ວນປົກ​ປັກ​ຮັກສາ​ພັກ, ລັດ, ປະຊາຊົນ, ລະບອບ​ການ​ປົກຄອງ ​ແລະ ພື້ນຖານ​ວັດທະນະທຳ​ທະ​ເລຂອງ​ຫວຽດນາມ. ນັ້ນ​ແມ່ນ​ຂະ​ບວນວິວັດ​ການ​ຄຸ້ມ​ຄອງ, ປະຕິບັດ, ປົກ​ປັກ​ຮັກສາ ຕາມ​ບັນດາ​ລະບອບ​ກົດໝາຍ​ທີ່​ຕ່າງ​ກັນ, ຖືກ​ກໍ່​ຕັ້ງ​ຂຶ້ນ​ໂດຍ​ສອດຄ່ອງ​​ກັບອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 ​ແລະ ກົດໝາຍ​ທະ​ເລ​ຂອງ​ຫວຽດນາມ.

ຫວຽດນາມ​ເປັນ​ເອກະ​ພາບ​ໃນ​ທິດ​ນຳ​ການ​ກະທຳ “​ກຳ​ແໜ້ນ​ຫຼັກການ, ​ໝູນ​ໃຊ້​ຢ່າງ​ໄຫວ​ພິບ”, “ຕັ້ງ​ໝັ້ນ​ໃນ​ຫຼັກການ​ຍຸດ​ທະ​ສາດ, ຍືດຫຍຸ່ນທາງ​ດ້ານ​ຍຸດ​ໂທ​ບາຍ” ​ໃນ​ການ​ປົກ​ປັກ​ຮັກສາ​ອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ. ອຳນາດ​ອະທິປະ​ໄຕ​ໃນ​ເຂດ​ທະ​ເລໝູ່ເກາະ ​ແລະ ຜືນ​ແຜ່​ນດິນ​ອັນ​ຄົບ​ຖ້ວນ ​ແມ່ນ​ສິ່ງ​ສັກກາລະ​ບູຊາ, ບໍ່​ອາດ​ຈະ​ລ່ວງລ້ຳ, ບໍ່​ສາມາດ​ແລກ​ປ່ຽນ ​ແລະ ບໍ່​ສາມາດ​ປະນີປະນອມ. ບັນດາ​ມາດ​ຕະການ​ປົກ​ປັກ​ຮັກສາອຳນາດ​ອະທິປະ​ໄຕ, ສິດ​ອະທິປະ​ໄຕ, ອຳນາດ​ພິພາກສາ​ຕັດສິນຕໍ່ບັນດາ​ເຂດ​ທະ​ເລ​ໝູ່​ເກາະ ຕ້ອງ​ໄດ້​ຜັນ​ຂະຫຍາຍ​ຢ່າງ​ແຂງ​ແຮງ, ​ເດັດດ່ຽວ ​ເນື່ອງ​ຈາກ​ຫວຽດນາມມີ​ຄວາມ​ເປັນ​ທຳ, ​ແຕ່​ກໍ່​ຕ້ອງ​ສຸດ​ທີ່​ຍືດຫຍຸ່ນ, ອ່ອນ​ໄຫວ, ສອດຄ່ອງ​ກັບ​ເງື່ອນ​ໄຂ, ສະພາບ​ການ ​ແລະ ​ເວລາ​ສະ​​ເພາະ; ຖື​ເອົາ​ການ​ປົກ​ປັກ​ຮັກສາ​ອຳນາດ​ອະທິປະ​ໄຕ, ຜົນ​ປະ​ໂຫຍ​ດຂອງ​ຊາດ ຂອງ​ປະ​ເທດ ​ແລະ ການຮັກສາ​ສັນຕິພາບ ສະຖຽນ​ລະ​ພາບ​ເພື່ອ​ໃຫ້​ປະ​ເທດ​ພັດທະນາ ​ເປັນ​ເປົ້າ​ໝາຍ​ສູງ​ສຸດ. ການປົກ​ປັກ​ຮັກສາອຳນາດ​ອະທິປະ​ໄຕ​ໃນ​ເຂດ​ທະ​ເລໝູ່ເກາະ ແມ່ນ​ຄວາມ​ຮັບຜິດຊອບ​ແລະ​ພັນທະ​ຂອງປະຊາຊົນ​ຫວຽດນາມ​ທຸກ​ຄົນ, ດັ່ງ​ນັ້ນ ຕ້ອງ​ເສີມ​ຂະຫຍາຍ​ກຳລັງ​ແຮງ​ສັງ​ລວມຂອງປວງ​ຊົນ​ທັງ​ຊາດ, ພາຍ​ໃຕ້​ການ​ນຳພາ​ເດັດ​ຂາດ​ຂອງພັກ​ກອມ​ມູນິດ​ຫວຽດນາມ, ການ​ຄຸ້ມ​ຄອງ​ບໍລິຫານ​ເປັນ​ເອກະ​ພາບ​ຂອງ​ລັດ, ມີ​ການ​ແບ່ງ​ງານ, ​ແບ່ງ​ຄວາມ​ຮັບຜິດຊອບ​ຢ່າງ​ຈະ​ແຈ້ງ​ ໃຫ້​ແຕ່​ລະ​ຂັ້ນ, ​ແຕ່​ລະກຳ​ລັງ.

ກຳລັງ​ແຮງ​ປົກ​ປັກ​ຮັກສາອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ ​ແມ່ນ​ກຳລັງ​ແຮງ​ສັງ​ລວມຂອງ​ປະ​ເທດ​ຊາດ, ປະກອບ​ດ້ວຍ​ແລະ​ມີ​ການ​ສົມທົບ​ຢ່າງ​ແໜ້ນ​ແຟ້ນຂອງບັນດາ​ສະໜາມຮົບ, ບັນດາ​ຂົງ​ເຂດ​ການ​ເຄື່ອນ​ໄຫວທັງ​ໝົດ: ການ​ປ້ອງ​ກັນ​ປະ​ເທດ, ການ​ປ້ອງ​ກັນ​ຄວາມ​ສະຫງົບ, ​ເສດຖະກິດ, ການ​ເມືອງ, ການ​ທູດ, ​ກົດໝາຍ... ​ໃນ​ນັ້ນ, ກຳລັງ​ແຮງ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ສະຫງົບ​ມີ​ບົດບາດ​ສຳຄັນ​ພິ​ເສດ. ດັ່ງ​ນັ້ນ, ຕ້ອງ​ກໍ່ສ້າງ​ທ່າ​ສະໜາມຮົບ​ປ້ອງ​ກັນ​ປະ​ເທດ​ທົ່ວ​ປວງ​ຊົນ, ​ປ້ອງ​ກັນ​ຄວາມ​ສະຫງົບ​ປະຊາຊົນ​ໃນ​ທະ​ເລ​ຢ່າງ​ໝັ້ນຄົງ, ການຈັດ​ວາງກຳລັງ​ຍຸດ​ທະ​ສາດທີ່​ມີ​ລວງ​ເລິກ, ຕໍ່​ເນື່ອງລະ​ຫວ່າງ​ຝັ່ງ-ທະ​ເລ-​ເກາະ, ກຽມ​ຄວາມ​ພ້ອມ​ເພື່ອ​ຫັນປ່ຽນ​ເປັນ​ທ່າ​ສະໜາມຮົບ​ສົງຄາມ​ປະຊາຊົນ ​ເມື່ອ​ເກີດ​ການ​ປະ​ທະກັນ. ກໍ່ສ້າງ​ບັນດາ​ກຳລັງ​ຄຸ້ມ​ຄອງ​ແລະປົກ​ປ້ອງ​ທະ​ເລ​ໝູ່​ເກາະ, ກຳລັງ​ສຳຮອງ​ລະດົມ​ພົນ, ທະຫານ​ລາດ, ກອງ​ປ້ອງ​ກັນ​ຕົວ​ເອງ​ເຂດ​ທະ​ເລ​ ໃຫ້​ເຂັ້ມ​ແຂງ, ມີຄຸນນະພາບສັງ​ລວມ​ ແລະ ມີ​ກຳລັງ​ແຮງ​ສູ້​ຮົບ​ສູງ, ​ໃນ​ນັ້ນ ກອງທັບ​ເຮືອ​ເປັນ​ກຳລັງ​ຫຼັກ​ແຫຼ່ງ, ຕ້ອງສືບ​ຕໍ່​ໄດ້​ຮັບ​ບຸລິມະສິດ​ເພື່ອ​ກໍ່ສ້າງ​ເປັນ​ກຳລັງ​ຫຼວງ ທັນ​ສະ​ໄໝ, ທຽບ​ເທົ່າ​ລະດັບ​ໜ້າ​ທີ່. ມີ​ແຕ່​ບົນ​ພື້ນຖານ​ເສີມ​ຂະຫຍາຍ​ສຸດ​ຂີດ​ກຳລັງ​ແຮງ​ສັງ​ລວມ​ແລະ​ລວມສູນຂອງ​ທົ່ວ​ພັກ, ທົ່ວ​ປວງ​ຊົນ, ທົ່ວ​ກອງທັບ, ​ໃນ​ນັ້ນ​ກອງທັບ​ເຮືອ​ເປັນ​​ແກ່ນສານ ຈຶ່ງ​ສາມາດຮັບປະກັນ​ການ​ປົກ​ປັກ​ຮັກສາ​ອຳນາດ​ອະທິປະ​ໄຕ, ຮັກສາ​ສັນຕິພາບ ​ແລະ ສະຖຽນ​ລະ​ພາບ​ຍາວ​ນານ​ໃນ​ທ​ະ​ເລ​ໄດ້.

ປະຊາຊົນ​ຫວຽດນາມ​ໄດ້​ສະຫຼຸບ​ມາ​ແຕ່​ດົນ​ນານ​ແລ້ວ​ວ່າ: “ຂ້າງ​ໃນ​ອຸ່ນ​ອຽນ, ຂ້າງ​ນອກ​ສະຫງົບ”. ນີ້​ບໍ່​ພຽງ​ແຕ່​ແມ່ນ​ບົດຮຽນ​ທີ່​ເລິກ​ເຊິ່ງກ່ຽວ​ກັບການ​ປະພຶດ ​ແລະ ວິທີ​ປະຕິບັດ​ຕົວ​ໃນ​ທຸກໆ​ຄອບຄົວ ​ແຕ່​ລວມທັງຊາດ​ດ້ວຍ. ປະຫວັດສາດ​​ແຫ່ງ​ຊາດ​ຫວຽດນາມ​ໄດ້​ພິສູດ​ຫຼາຍ​ເທື່ອ​ແລ້ວ​ວ່າ, ​ເມື່ອ​ພາຍ​ໃນ​ສາມັກຄີ​, ປະຊາຊົນ​ຖືກຕ້ອງ​ປອງ​ດອງ​ກັນ​ ​​ເຂດ​ແດນຊາຍ​ແດນ​ແຫ່ງ​ຊາດ​ກໍ່​ມີ​ສັນຕິ. ​​ແຕ່​ເມື່ອ​ຂັ້ນ​ເທິງ​ແລະຂັ້ນ​ລຸ່ມ​ບໍ່​ຖືກ​ກັນ, ປະຊາຊົນ​ບໍ່ພໍ​ໃຈ​ຂັດ​ແຍ່ງ​ກັນ, ​ແນ່ນອນ ຕ່າງປະ​ເທດ​ຈະ​ຈ້ອງມອງ, ​​ເຂົ້າ​ມາແຊກ​ແຊງ​ຮຸກ​ຮານ. ຄິດ​ແລ້ວ, ​ໃນ​ການ​ປົກ​ປັກ​ຮັກສາອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ, “ທະ​ເລ​ສະຫງົບ” ຈາກ​ນັ້ນ “ຊາຍ​ຝັ່ງຈະ​ອົບ​ອຸ່ນ”, ປົກ​ປັກ​ຮັກສາ​ຄວາມ​ສະຫງົບ​ຂອງ​ທະ​ເລ​ໝູ່​ເກາະ​ໄດ້ ຈາກ​ນັ້ນປະ​ເທດ​ຈະ​ມີ​ສະຖຽນ​ລະ​ພາບ​ແລະ​ພັດທະນາ. ​ໃນ​ທາງກົງກັນຂ້າມ, “​ຊາຍ​ຝັ່ງ​ມີ​ຄວາມ​ອຸ່ນ​ອຽນ, ​ໃນທະ​ເລ​ຈຶ່ງ​ມີ​ຄວາມ​ສະຫງົບ”, ປະ​ເທດ​ມີ​ສະຖຽນ​ລະ​ພາບ​ແລະ​ພັດທະນາ ຈຶ່ງ​ສ້າງ​ໄດ້​ທ່າ​ແລະ​ກຳລັງ​ ເພື່ອ​ປົກ​ປັກ​ຮັກສາ​ທະ​ເລ​ໝູ່​ເກາະ. ​ເພາະສະ​ນັ້ນ, ຕ້ອງ​ສືບ​ຕໍ່​ເຮັດ​ເປັນ​ຢ່າງ​ດີ​ ວຽກ​ງານ​ໂຄສະນາ​ສຶກສາ​​ເພື່ອຍົກ​ສູງ​ຄວາມ​ຮັບ​ຮູ້, ຈິດ​ສຳ​ນຶກ, ຄວາມ​ຮັບຜິດຊອບ ​ແລະ ພັນທະ​ຂອງ​ພົນລະ​ເມືອງ ກ່ຽວ​ກັບ​ອຳນາດ​ອະທິປະ​ໄຕ, ຄວາມ​ຄົບ​ຖ້ວນທາງ​​ດ້ານ​ດິນ​ແດນ ທະ​ເລ​ໝູ່​ເກາະ. ປັບປຸງຄວາມ​ເຊື່ອ​ໝັ້ນ ​ແລະ ສ້າງ​ຄວາມ​ເຫັນ​ດີ​ເຫັນ​ພ້ອມ, ຄວາມ​ເປັນ​ເອກະສັນ​ສູງ​ໃນ​ລະບົບ​ການ​ເມືອງ​ແລະ​ປະຊາຊົນ ຕໍ່​ບັນດາ​ແຜນ​ນະ​ໂຍບາຍ​ແລະນະ​ໂຍບາຍ​ຂອງ​ພັກ-​ລັດ ທີ່​ກ່ຽວຂ້ອງ​ກັບ​ການ​ພັດທະນາ​ເສດຖະກິດ ​ແລະ ການປົກ​ປັກ​ຮັກສາ​ອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ. ​ເມື່ອ “ເຈຕະນາ​ຂອງ​ພັກ” ​ຖືກ​ກັບ “ຈິ​ດໃຈ​ຂອງ​ປະຊາຊົນ” ​ແລ້ວ​ ຈະ​ສ້າງ​ເປັນ​ກຳລັງ​ແຮງ​ຊະນະ​ເລີດ, ທັບ​ມ້າງ​ທຸກ​ກົນອຸບາຍ​ຂອງບັນດາ​ອິດ​ທິກຳລັງ​ສັດຕູທີ່​ຫວັງສວຍ​ໃຊ້​ບັນຫາ​ທະ​ເລ​ໝູ່​ເກາະ​ເພື່ອຕ້າ​ນຢັນ​ທຳລາຍ​ປະ​ເທດ​ເຮົາ; ພ້ອມ​ກັນ​ນັ້ນກໍ ສ້າງ​ສະຖຽນ​ລະ​ພາບ​ທາງ​ດ້ານ​ການ​ເມືອງພາຍໃນ​ປະ​ເທດ​ ເພື່ອການພັດທະນາ​ເສດຖະກິດ, ສັງຄົມ, ກໍ່ສ້າງ “ທ່າ​ສະໜາມຮົບ​ຈິ​ດໃຈ​ຫະຊາ​ຊົນ” ຢ່າງ​ແໜ້ນໜາ​ຢູ່ໃນ​ຝັ່ງ​ແລະ​ກາງ​ທະ​ເລ. ​ແລະ​ເວດ​ລາ​ນັ້ນ ຈະ​ປຸກ​ຕື່ນສົ່ງ​ເສີມ​ໄດ້ ຄວາມ​ເອກອ້າງ​ທະ​ນົງ​ໃຈ, ຄວາ​ມຖື​ກຽດ​ສັກ​ສີ, ມູນ​ເຊື້ອ, ​ເຈດ​ຈຳນົງໝັ້ນ​ແກ່ນ ບໍ່​ອ່ອນຍອມ ​ຂອງ​ຊາດ; ສ້າງ​ເປັນ​ແນວ​ໂຮມ​ການ​​ເມື​ອງທີ່​ກວ້າງ​ໃຫຍ່​ຂອງ​ປະຊາຊົນ​ທົ່ວ​ປະ​ເທດ ຫັນ​ໄປ​ສູ່​ທະ​ເລ​ໝູ່​ເກາະ​ຂອງ​ປະ​ເທດ​ເຮົາ, ຮ່ວມ​ແຮງ​ຮ່ວມ​ໃຈກັນ​ປົກ​ປັກ​ຮັກສາ​ທະ​ເລ​ໝູ່​ເກາະ​ຂອງ​ປະ​ເທດ​ຊາດ​ຫວຽດນາມ.

​ໃນ​ສະພາບ​ການໂລກາ​ພິວັດ, ຢາກ​ປົກ​ປັກ​ຮັກສາອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ, ຫວຽດນາມ​ຕ້ອງ​ເສີມ​ຂະຫຍາຍ​ຈິ​ດ​ໃຈ​ເພິ່ງ​ຕົນ​ເອງ​ສ້າງ​ຕົນ​ໃຫ້​ເຂັ້ມ​ແຂງ ​ແລະ ຕ້ອງ​ສົມທົບ​ກຳລັງ​ແຮງ​ຂອງ​ຊາດ​ກັບກຳລັງ​ແຮງ​ຂອງ​ຍຸກ​ສະ​ໄໝ, ​ເຊີດ​ຊູ​ຄວາມ​ຊອບ​ທຳ, ຍາດ​ແຍ່ງ​ເອົາ​ຄວາມ​ເຫັນ​ດີ​ເຫັນ​ພ້ອມ​ແລະສະໜັບສະໜູນຂອງ​ສາກົນ, “​ເດັດດ່ຽວ, ຕັ້ງ​ໝັ້ນ​ຕໍ່ສູ້”, ​ເພີ່ມ​ທະວີ​ການ​ຮ່ວມ​ມື​ສາກົນ, “ສ້າງ​ຄວາມ​ແຊກ​ຊ້ອນ​ທາງ​ດ້ານ​ຜົນ​ປະ​ໂຫຍ​ດ”, “ທັງ​ຮ່ວມ​ມື, ທັງ​ຕໍ່ສູ້”. ​ແລະ​ກໍ່​ຕ້ອງຮັບ​ຮູ້​ແຈ້ງວ່າ, ການ​ແກ້​ໄຂ​ຂໍ້​ຂັດ​ແຍ່ງ​ພິພາດ​ໃນ​ທະ​ເລ​ຕາ​ເວັນ​ອອກ ​ແມ່ນ​ບັນຫາ​ຍາວ​ນານ, ບໍ່​ສາມາດ​ຮ້ອນຮົນ​ຟ້າວ​ຟັ່ງ​ໄດ້, ຕ້ອງ​ຕັ້ງ​ໝັ້ນ​ຮ່ວມ​ມື​ຊອກ​ຫາ​ມາດ​ຕະການ​ສັນຕິ​ເພື່ອ​ແກ້​ໄຂຂໍ້​ຂັດ​ແຍ່ງ​ພິພາດ, ບໍ່​ເຮັດ​ໃຫ້​ສະພາບ​ການ​ສັບສົນ​ຕື່ມ​ອີກ, ປົກ​ປັກ​ຮັກສາ​ຜົນ​ປະ​ໂຫຍ​ດອັນ​ຊອບ​ທຳ​ຂອງ​ຫວຽດນາມ, ພ້ອມ​ກັນ​ນັ້ນ​ກໍ່​ເຄົາລົບ​ຜົນ​ປະ​ໂຫຍ​ດອັນ​ຊອບ​ທຳ​ຂອງປະ​ເທດ​ຕ່າງໆ ບົນ​ພື້ນຖານ​ປະຕິບັດ​ຕາມ​ກົດ​ໝານ​ສາກົນ. ​ເພີ່ມ​ທະວີ​ວຽກ​ງານ​ການ​ຕ່າງປະ​ເທດ​ຂອງ​ພັກ, ການ​ທູດ​ປະຊາຊົນ ​ແລະ ​ການພົວພັນ​ຕ່າງປະ​ເທດ​ຂອງກອງທັບ ກັບ​ບັນດາ​ປະ​ເທດ​ໃນ​ພາກ​ພື້ນ, ບັນດາ​ປະ​ເທດ​ທີ່​ມີ​ເຂດ​ທະ​ເລ​ຕິດ​ກັນ​ແລະ​ທັບ​ຊ້ອນ​ກັນ ​ເພື່ອ​ສ້າງ​ຄວາມ​ໄວ້​ວາງ​ໃຈ​ ​ແລະ​ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນ, ຫຼຸດຜ່ອນ​ຄວາມ​ເຄັ່ງ​ຕຶງ, ສົມທົບ​ຢ່າງ​ທັນ​ການ​ເພື່ອ​ແກ້​ໄຂ​ຂໍ້​ຂັດ​ແຍ່ງ​ແລະບັນດາ​ບັນຫາ​ທີ່​ເກີດ​ຂຶ້ນ​ໃນ​ທະ​ເລ. ຜ່ານ​ນັ້ນ, ສ້າງ​ສະພາບ​ແວດ​ລ້ອມ​ທີ່​ອຳນວຍ​ຄວາມ​ສະດວກ​​ ໃຫ້​ແກ່​ການ​ປົກ​ປັກ​ຮັກສາອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ, ບໍ່​ປ່ອຍ​ໃຫ້​ເກີດ​ການ​ປະ​ທະ​ກັນ, ບໍ່​ໃຫ້​ປະ​ເທດ​ຖືກ​ໂດດດ່ຽວ​ໃນ​ບັນຫາ​ທະ​ເລ​ຕາ​ເວັນ​ອອກ, ພ້ອມ​ກັບປະ​ເທດ​ຕ່າງໆ​ກໍ່ສ້າງ​ເຂດ​ທະ​ເລ​ແຫ່ງ​ສັນຕິພາບ, ມິດຕະພາບ, ການ​ຮ່ວມ​ມື, ການ​ພັດທະນາ ​ແລະ ຄວາມ​ໝັ້ນຄົງ​ໃນ​ໄລຍະ​ຍາວ​ນານ.

ການປົກ​ປັກ​ຮັກສາອຳນາດ​ອະທິປະ​ໄຕ​ໃນ​ເຂດ​ທະ​ເລໝູ່​ເກາະ ຕ້ອງການ​ມີ​ລະບົບນະ​ໂຍບາຍ, ກົດໝາຍ​ທີ່​ແໜ້ນ​ແຟ້ນ, ສ​ອດຄ່ອງ​ກັບ​ກົດໝາຍ​ແລະການ​ປະຕິບັດ​ຂອງ​ສາກົນ. ດັ່ງ​ນັ້ນ, ບົນ​ພື້ນຖານ​ບັນດາ​ແຜນ​ນະ​ໂຍບາຍ, ນະ​ໂຍບາຍຂອງພັກ​ແລະ​ລັດ, ​ໂດຍ​ສະ​ເພາະ​ແມ່ນ​ ​ຍຸດ​ທະ​ສາດການປົກ​ປັກ​ຮັກສາ​ປະ​ເທດ​ຊາດ​ໃນ​ສະພາບ​ການ​ໃໝ່, ກົດໝາຍ​ທະ​ເລ​ຫວຽດນາມ, ​​ຍຸດ​ທະ​ສາດການ​ພັດທະນາ​ເ​ສດຖະກິດ​ທະ​ເລ​ແບບ​ຍືນ​ຍົງຮອດ​ປີ 2030, ວິ​ໄສ​ທັດ​ຮອດ​ປີ 2045 ນັ້ນ, ບັນດາ​ກະຊວງ, ຂະ​ແໜງ​ການ, ທ້ອງ​ຖິ່ນ ຕ້ອງສືບ​ຕໍ່ກໍ່ສ້າງ​ແລະ​ປັບປຸງ​ບູລະນະລະບົບ​ນະ​ໂຍບາຍ, ກົດໝາຍ, ສ້າງ​ແລວ​ກົດໝາຍ​ທີ່​ຄົບ​ຊຸດ, ​ເປັນ​ເອກະ​ພາບ​ໃນ​ການ​ຄຸ້ມ​ຄອງ, ປະຕິບັດ ​ແລະ ປົກ​ປັກ​ຮັກສາ​ອຳນາດ​ອະທິປະ​ໄຕ​ໃນ​ເຂດ​ທະ​ເລ​ໝູ່​ເກາະ. ​ໃຫ້​​ເອົາ​ໃຈ​ໃສ່​ເປັນ​ສຳຄັນ ​ເຖິງ​ການ​ຄົ້ນຄວ້າກໍ່ສ້າງ​ບັນດາ​ນະ​ໂຍບາຍ ກ່ຽວ​ກັບ​ການ​ເສີມ​ຂະຫຍາຍ​ຄວາມ​ສາມາດ​ບົ່ມ​ຊ້ອນ ​ແລະ ທ່າ​ແຮງ​ຂອງ​ທະ​ເລ; ກ່ຽວ​ກັບ​ການ​ສົມທົບ​ລະຫວ່າງ​ເສດຖະກິດ​ ກັບການ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ສະຫງົບ, ປ້ອງ​ກັນ​ທະ​ເລ​ໝູ່​ເກາະ. ການ​ປະສານ​ສົມທົບ​ນັ້ນ​ ຕ້ອງ​ສະ​ແດງ​ອອກ​ຢ່າງ​ຈະ​ແຈ້ງ​ໃນ​ແຜນ​ແມ່​ບົດ, ​ແຜນການ, ຍຸດ​ທະ​ສາດ​ການ​ພັດທະນາ ​ຂອງ​ປະ​ເທດ ກໍ່​ຄື​ຂອງ​ແຕ່ລະ​ເຂດ, ​ແຕ່​ລະ​ພື້ນ​ທີ່, ​ແຕ່ລະ​ຂະ​ແໜງ​ການ. ພ້ອມ​ກັນ​ນັ້ນ, ຕ້ອງ​ປັບປຸງ​ບູລະນະ​ກົນ​ໄກ​ຊີ້​ນຳ, ບັນຊາ, ກຳກັບ​ດູ​ແລ, ປະສານ​ສົມທົບລະຫວ່າງ​ບັນດາ​ກຳລັງ, ບັນດາ​ແນວ​ຮົບ​ການຕໍ່ສູ້​ປົກ​ປັກ​ຮັກສາ​ທະ​ເລ​ໝູ່​ເກາະ​ໃນ​ເມື່ອ​ເກີດ​ເຫດ.

ດ້ານ​ອື່ນ​ອີກ, ພວກ​ເຮົາ​ຕ້ອງ​ແກ້​ໄຂ​ເປັນ​ຢ່າງ​ດີ​ ສາຍ​ພົວພັນ​ລະຫວ່າງ​ເສດຖະກິດ​ ​ແລະການ​ປ້ອງ​ກັນ​ປະ​ເທດ​, ​ປ້ອງ​ກັນ​ຄວາມ​ສະຫງົບ; ລະຫວ່າງ​ການ​ຂຸດ​ຄົ້ນ​ແລະ​ການ​ປົກ​ປັກ​ຮັກສາ​ທະ​ເລ; ລະຫວ່າງ​ການ​ກໍ່ສ້າງ​ກຳລັງ​ແຮງ​ຂຸດ​ຄົ້ນ​ທະ​ເລ ​ແລະກຳລັງ​ແຮງ​ປົກ​ປັກ​ຮັກສາ​ທະເລ. ​ເສດຖະກິດ​ທະ​ເລ​ເຂັ້ມ​ແຂງ​ຈະ​ສ້າງ​ພື້ນຖານ​ວັດ​ຖຸ​ ເພື່ອ​ເພີ່ມ​ທະວີ​ກຳລັງ​ແຮງ​ຂອງກ​ອງທັບ​ແລະ​ຕຳຫຼວດ ໃນ​ການ​ປົກ​ປັກ​ຮັກສາ​ທະ​ເລ​ໝູ່​ເກາະ​ຢ່າງ​ໝັ້ນຄົງ​ແລະ​ຄົບ​ຖ້ວນ. ​ໃນ​ທາງກົງກັນຂ້າມ, ກອງທັບ​ແລະ​ຕຳຫຼວດ​​ເຂັ້ມ​ແຂງ​ແຮງ​ກ້າຈຶ່ງ​ປົກ​ປັກ​ຮັກສາ​ທະ​ເລ​ໝູ່​ເກາະ​ໄດ້, ສ້າງ​ໃຫ້​ມີ​ສະພາບ​ແວດ​ລ້ອມ, ພື້ນ​ທີ່​ເທສະ, ​ເງື່ອນ​ໄຂ​ທີ່​ສະດວກ, ປອດ​ໄພ​ໃຫ້​ແກ່​ການ​ພັດທະນາ​ເສດຖະກິດ​ຢ່າງ​ຍືນ​ຍົງ. ທົ່ວ​ພັກ, ທົ່ວ​ປວງ​ຊົນ, ທົ່ວ​ກອງທັບ​ຕ້ອງ​ຊາບ​ຊຶມ, ຜັນ​ຂະຫຍາຍ ​ແລະ ປະຕິບັດ​ຢ່າງ​ມີ​ປະສິດທິ​ຜົນ ຍຸດ​ທະ​ສາດ​ການ​ປ້ອງ​ກັນ​ປະ​ເທດ​ໃນ​ສະພາບ​ການ​ໃໝ່ ​ແລະ ຍຸດ​ທະ​ສາດ​ການ​ພັດທະນາ​ເສດຖະກິດ​ທະ​ເລ​ຂອງ​ຫວຽດນາມຢ່າງ​ຍືນ​ຍົງ​ຮອດ​ປີ 2030, ວິ​ໄສ​ທັດ​ຮອດ​ປີ 2045, ປະຕິບັດ​ຢ່າງ​ສຳ​ເລັດ​ຜົນ​ ເປົ້າ​ໝາຍ​ເຮັດ​ໃຫ້​ຫວຽດນາມ​ກາຍ​ເປັນ​ປະ​ເທດທີ່​ເຂັ້ມ​ແຂງ​ທາງ​ດ້ານ​ທະ​ເລ, ອຸດົມສົມບູນ​ຮັ່ງມີ​ຈາກ​ທະ​ເລ. ຂະ​ບວນການ​ພັດທະນາ​ເສດຖະກິດ​ທະ​ເລ​ຕ້ອງ​ໄດ້​ສົມທົບ​ກັບ​ການ​ເພີ່ມ​ທະວີ​ກຳລັງ​ແຮງ​ປົກ​ປັກ​ຮັກສາ​ອຳນາດ​ອະທິປະ​ໄຕ; ການກໍ່ສ້າງ​ໂຄງ​ສ້າງ​ພື້ນຖານ​ເສດຖະກິດ-ສັງຄົມທະ​ເລ​ໝູ່​ເກາະ ​ແລະ ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ ຕ້ອງ​ໄດ້​ໄປ​ຄຽງ​ຄູ່​ກັບການ​ປັບປຸງອຸປະກອນ, ທ່າ​ທຽບ​ເຮືອ, ​ໂຄງ​ສ້າງ​ການ​ປ້ອງ​ກັນ ​ແລະ ການຈັດ​ວາງ​ສັບ​ຊ້ອນປະຊາກອນ. ບັນດາ​ກອງ​ກຳລັງ​ພິ​ເສດ, ​ໃນ​ນັ້ນ​ມີ​ກອງທັບ​ເຮືອ ຕ້ອງ​ຕັ້ງໜ້າ​ເຂົ້າ​ຮ່ວມ​ການ​ພັດທະນາ​ເສດຖະກິດການ​ປ້ອງ​ກັນ​ປະ​ເທດ​ໃນ​ທະ​ເລໝູ່​ເກາະ ຕາມ​ຂົງ​ເຂດ​ທີ່​ມີ​ທ່າ​ແຮງ, ​ໃຫ້​ບຸລິມະສິດ​​ແກ່​ເຂດ​ທະ​ເລ​ແລະ​ເກາະ​ຢູ່​ໄກ​ຝັ່ງ, ​​ເຂດແນວ​ໜ້າທີ່​ມີ​ຄວາມ​ຫຍຸ້ງຍາກ​ຫຼາຍ, ປະກອບສ່ວນ​ສ້າງ​ທ່າ​ແລະ​ກຳລັງ​ໃຫ້​ປະ​ເທດ ​ໃນ​ຂະບ​ວນການ​ປົກ​ປັກ​ຮັກສາ​ແລະ​ຂຸດ​ຄົ້ນ​ທະ​ເລ.

ຕໍ່ໜ້າ​ການ​ຜັນ​ປ່ຽນ​ຢ່າງ​ໄວວາ, ບໍ່​ສາມາດ​ຄາດ​ເດົາ​ໄດ້​ ຂອງ​ສະພາບ​ການ​ໂລກ, ພາກ​ພື້ນ ​ແລະ​ທະ​ເລ​ຕາ​ເວັນ​ອອກ, ຮຽກຮ້ອງ​ໃຫ້​ທົ່ວ​ພັກ, ທົ່ວ​ປວງ​ຊົນ ​ແລະ ​ທົ່ວ​ກອງທັບ​ເຮົາ ​ຕ້ອງຍົກ​ສູງ​ສະຕິ​ລະວັງ​ຕົວ, ​ເປັນ​ເຈົ້າ​ການ​ໃນ​ການ​ກຳ​ສະພາບ​ການ, ຄາດ​ຄະ​ເນ​ຢ່າງ​ຖືກຕ້ອງ​ທຸກໆ​ການ​ເຄື່ອນ​ໄຫວ​, ກີດ​ກັ້ນ​ຄວາມ​ສ່ຽງ​ຂອງ​ຄວາມ​ຂັດ​ແຍ້ງ​ແຕ່​ຫົວທີ, ​ແຕ່​ໄກ, ຕັດສິນ​ໃຈ​ບໍ່​​ໃຫ້​ສູນ​ເສຍ​ນ້ຳ​ທະ​ເລ​ວາໜຶ່ງ, ບໍ່​​ໃຫ້ສູນ​ເສຍດິນ​ເກາະ​​ຄືບ​ໜຶ່ງ. ບັນດາ​ກຳລັງ​ທີ່​ເຄື່ອນ​ໄຫວ​ກາງ​ທະ​ເລ, ຫຼັກ​ແຫຼ່ງ​ແມ່ນ​ກອງທັບ​ເຮືອ​ ຕ້ອງ​ເອົາ​ໃຈ​ໃສ່ກໍ່ສ້າງ​ບັນດາ​ອົງການ​ຈັດ​ຕັ້ງ​ພັກ ​ແລະ ການຈັດ​ຕັ້ງ​ບັນຊາ, ຖື​ເອົາ​ຄົນ​ເປັນ​ປັດ​ໄຈ​ຕັດສິນ​ຊີ້​ຂາດ, ອາວຸດ​ຍຸດ​​ໂທ​ປະກອນ​ເປັນ​ສຳຄັນ; ພ້ອມ​ທັງ ຮັກສາ​ຄວາມ​ພ້ອມ​ໃນ​ການ​ສູ້​ຮົບ, ກຳ​ແໜ້ນ​ສະພາບ​ການ​ໃນ​ບັນດາ​ເຂດ​ທະ​ເລ, ​ໂດຍ​ສະ​ເພາະ​ແມ່ນ ​ເຂດ​ທະ​ເລ​ຈຸດ​ໜັກສຳຄັນ, ບໍ່​ໃຫ້​ຖືກ​ຕົກ​ໃນ​ທ່າ​ຮັບ ຖືກ​ຕົກສະ​ເງີ້. ​ເພີ່ມ​ທະວີ​ການ​ຝຶກ​ຊ້ອມ​ເພື່ອ​ເປັນ​ເຈົ້າ​ແລະ​ເສີມ​ຂະຫຍາຍ​ປະສິດທິພາບ​ຂອງ​ອາວຸດ​ຍຸດ​ໂທ​ປະກອນ, ຍົກ​ສູງ​ຄວາມ​ສາມາດ​ລາດຕະ​ເວນ ກວດກາ, ປົກ​ປ້ອງ​ອະທິປະ​ໄຕ, ຄວາມ​ສະຫງົບ, ຄວາມ​ເປັນ​ລະບຽບ​ຮຽບຮ້ອຍ ​ແລະ ຄວາມ​ປອດ​ໄພ ​ໃນ​ການ​ເຄື່ອນ​ໄຫວ​ເສດຖະກິດ​ທະ​ເລ​ຕ່າງ​ໆ. ​ເມື່ອມີ​​ເຫ​ດການ ສະຖານະ​ການ​ໃໝ່, ຕ້ອງ​​ໃຫ້​ຄຳ​ແນະ​ນາ​ແລະສະ​ເໜີ​ຕໍ່​ພັກ, ລັດ, ຄະນະ​ພັກ​ສູນ​ກາງ​ທະຫານ, ກະຊວງ​ປ້ອງ​ກັນ​ປະ​ເທດ ກ່ຽວ​ກັບ​ທິດ​ນຳ, ​ແນວ​ນະ​ໂຍບາຍ ​ແລະ​ ມາດ​ຕະການ​ນຳພາ, ຊີ້​ນຳ​ການ​ຈັດການ​​ແກ້​ໄຂ; ​ເສີມ​ຂະຫຍາຍ​ກຳລັງ​ແຮງ​ສັງ​ລວມ; ສົມທົບ​ລະຫວ່າງ​ການ​ຕໍ່ສູ້​ໃນ​ສະໜາມ ກັບ​ການ​ຕໍ່ສູ້​ທາງການ​ເມືອງ ການ​ທູດ ​ແລະ ​ທາງກົດໝາຍ; ຈັດ​ຕັ້ງ, ບັນຊາ, ປະສານ ສົມທົບ​ບັນດາ​ກຳລັງ​ຢ່າງ​ແໜ້ນ​ແຟ້ນ; ​ເດັດດ່ຽວ, ສະຫຼາດ​ຄ່ອງ​ແຄ່​ວ ປົກ​ປັກ​ຮັກສາ​ອຳນາດ​ອະທິປະ​ໄຕ​​ໃນ​ເຂດ​ທະ​ເລ​ໝູ່​ເກາະໄວ້​ຢ່າງ​ໝັ້ນຄົງ ​ແລະ ຮັກສາ​ສະພາບ​ແວດ​ລ້ອມ​ສັນຕິພາບ, ສະຖຽນ​ລະ​ພາບ​ໃນ​ທະ​ເລ.

ກ່ອນ​ໜ້າ​ນີ້​ເກືອບ 500 ປີ, ຈໍ​ຫງວນ ຫງວຽນ​ບິ໋ງຄຽມ ​ໄດ້​ມີ​ການຄາດ​ຄະ​ເນ​ຍຸດ​ທະ​ສາດດັ່ງ​ນີ້: “ທະ​ເລຕາ​ເວັນ​ອອກ​ໝື່ນ​ໄມ​ຕ້ອງວາ​ແຂນ​ອອກ​ປົກ​ປ້ອງ​​. ປະ​ເທດ​ຫວຽດຈະມີ​ສັນຕິ​ຍືນ​ຍົງ​ເປັນໝື່ນ​ປີ”. ​ແລະ​ເມື່ອ​ລຸງ​ໂຮ່ທີ່​ເຄົາລົບ​ຮັກກັບມາ​ຢ້ຽມຢາມ​ກອງທັບ​ເຮືອ​ໃນ​ປີ 1961, ລຸງ​ກໍ່ໄດ້​ຕັກ​ເຕືອນ​ວ່າ: “​​ໃນ​ສະ​ໄໝ​ກ່ອນພວກ​ເຮົາ​ມີ​ແຕ່​ກາງຄືນ​ແລະ​ປ່າ. ມື້​ນີ້​ພວກ​ເຮົາ​ມີ​ວັນ, ມີ​ຟ້າ, ມີ​ທະ​ເລ. ຝັ່ງ​ທະ​ເລ​ປະ​ເທດ​ເຮົາ​ຍາວ, ສວຍ​ງານ, ພວກ​ເຮົາ​ຕ້ອງ​ຮູ້​ຮັກສາ​ມັນ​ໄວ້”. ພວກ​ເຮົາ​ຕ້ອງ​ຈື່​ຈຳຄຳ​ສັ່ງສອນ​ຕັກ​ເຕືອນນັ້ນ​ໄວ້​ຕະຫຼອດ, ​ໃນ​ເມື່ອ​ຍູ້​ແຮງ​ການ​ພັດທະນາ​ເສດຖະກິດ​ທະ​ເລ, ບໍ່​ໄດ້​ປ່ອຍປະ​ລະ​ເຫຼີ​ງພຽງ​ນາທີ​ດຽວ​ຕໍ່ໜ້າ​ທີ່​ປົກ​ປັກ​ຮັກສາ​ອຳນາດ​ອະທິປະ​ໄຕ​ໃນ​ທະ​ເລ​ໝູ່​ເກາະ​ທີ່​ສັກກາລະ​ບູຊາ​ຂອງ​ປະ​ເທດ​ຊາດ./.

-----------------------------------

(1) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງ​ວ່າການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 146.

​ໂດຍ ​ເຈືອງ​ເຕິ​ນຊາງ

ອະດີດ​ກຳມະການ​ກົມ​ການ​ເມືອງ​ສູນ​ກາງ​ພັກ,

ອະດີດ​ປະທານ​ປະ​ເທດ​ແຫ່ງ​ສາທາ​ລະ​ລັດສັງຄົມ​ນິຍົມຫວຽດນາມ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ