ວັນສຸກ, 24/1/2020
ການເສີມຂະຫຍາຍປະຊາທິປະໄຕຢູ່ຫວຽດນາມໃນປະຈຸບັນ: ສະຖານະການແລະວິທີແກ້ໄຂ
6/1/2020 15:47' ສົ່ງ ພິມ
ທ່ານເລຂາທິການໃຫຍ່, ປະທານປະເທດ ຫງວຽນຝູຈ້ອງ ພົບປະກັບຜູ້ມີສິດເລືອກຕັ້ງເມືອງບາດິ່ງ, ຮ່ວານກຽມ ແລະ ໂຮ່ໄຕ, ນະຄອນຫຼວງຮ່າໂນ້ຍ. (ພາບ: TTXVN)

ຜົນ​ຂອງ​ການປະຕິບັດ​ການ​ສົ່ງ​ເສີມ​ປະຊາທິປະ​ໄຕສັງຄົມ​ນິຍົມ 

ກອງ​ປະຊຸມ​ໃຫຍ່​ຄັ້ງ​ທີ VI ຂອງ​ພັກ​ກອມ​ມູນິດ​ຫວຽດນາມ (ປີ 1986) ​ໄດ້​ນຳ​ມະ​ເໜີສີ່​ບົດຮຽນ​ທີ່​ສຳຄັນ, ​ໃນ​ນັ້ນ​ມີ​ບົດຮຽນ: “​ໃນ​ການ​ເຄື່ອນ​ໄຫວ​ທັງ​ໝົດ​ຂອງ​ຕົນ, ພັກ​ຕ້ອງ​ຊາບ​ຊຶມ​ແນວ​ຄິດ “ຖື​ເອົາ​ປະຊາຊົນ​ເປັນ​ກົກ​ຮາກ”, ກໍ່ສ້າງ​ແລະ​ເສີ​ມຂະຫຍາຍ​ສິດ​ເປັນ​ເຈົ້າ​ຂອງຂອງ​ປະຊາຊົນ”(1). ​ເອກະສານ​ຂອງ​ກອງ​ປະຊຸມ​ໃຫຍ່​ໄດ້​ເນັ້ນ​ວ່າ “ລົບ​ລ້າງ​ຄວາມ​ຮັບ​ຮູ້​ຜິດພາດ​ ທີ່​ຖື​ວຽກ​ງານ​ມະຫາຊົນ​ເປັນ​ພຽງ​ມາດ​ຕະການ​ເພື່ອ​ຈັດ​ຕັ້ງ, ປຸກລະດົມ​ປະຊາຊົນ​ ໃນ​ການ​ປະຕິບັດ​ແຜນ​ນະ​ໂຍບາຍ​ແລະນະ​ໂຍບາຍ​. ສຳລັບ​ບັນດາ​ແຜນ​ນະ​ໂຍບາຍທີ່​ກ່ຽວຂ້ອງ​​ໂດຍ​ກົງ​ເຖິງ​ຊີວິດ​ຂອງ​ປະຊາຊົນ​ໃນ​ທົ່ວ​ປະ​ເທດກໍ່​ຄື​ຢູ່​ທ້ອງ​ຖິ່ນ​ຕ່າງໆ ຕ້ອງ​ຂໍ​ຄວາມ​ຄິ​ດ​ເຫັນ​ຂອງ​ປະຊາຊົນກ່ອນ​ທີ່​ຈະ​ຕັດສິນຕົກລົງ”. ​ເນື້ອ​ໃນ​ການ​ເສີມ​ຂະຫຍາຍ​ປະຊາທິປະ​ໄຕສືບ​ຕໍ່​ໄດ້​ຮັບ​ການ​ໄຈ້​ແຍກ​ຢ່າງ​ຈະ​ແຈ້ງ ​ໂດຍ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຂອງ​ພັກ ​ແຕ່​ຄັ້ງ​ທີ VII ​ເຖິງຄັ້ງທີ X.

ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​​ຄັ້ງ​ທີ XI ຂອງ​ພັກ (​ເດືອນ​ມັງກອນ 2011) ​ໄດ້​ຊີ້​ແຈ້ງ: “ສືບ​ຕໍ່​ກໍ່ສ້າງ​ແລະ​ບູລະນະ​ລະບອບ​ປະຊາທິປະ​ໄຕສັງຄົທນິຍົມ, ຮັບປະກັນອຳນາດລັດ​ທັງ​ໝົດ​ເປັນ​ຂອງ​ປະຊາຊົນ; ​ທຸກໆແນວທາງ ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ ​ເພື່ອ​ຜົນ​ປະ​​ໂຫຍ​ດຂອງ​ປະຊາຊົນ; ພະນັກງານລັດຖະກອນ ຕ້ອງ​ປະຕິບັດ​ພາລະ​ບົດບາດໜ້າ​ທີ່​ທີ່​ໄດ້​ຮັບ​ມອບ​ໝາຍ​ເປັນ​ຢ່າງ​ດີ, ​ເຄົາລົບ​ປະຊາຊົນ, ສຸດ​ອົກ​ສຸດ​ໃຈ​ຮັບ​ໃຊ້​ປະຊາຊົນ... ມີ​ກົນ​ໄກ​ລະອຽດ​ເພື່ອ​ໃຫ້​ປະຊາຊົນ​ປະຕິບັດສິດ​ເປັນ​ເຈົ້າ​ຂອງ​ໂດຍ​ກົງ... ​ເສີມ​ຂະຫຍາຍ​ປະຊາທິປະ​ໄຕ, ​ເຊີດ​ຊູ​ຄວາມ​ຮັບຜິດຊອບຂອງ​ພົນລະ​ເມືອງ, ລະບຽບ​ວິ​ໄນ​ສັງຄົມ; ຕຳ​ໜິວິພາກ​ແລະ​ລົງ​ໂທດ​ຢ່າງ​ຮຸນ​ແຮງ​ຕໍ່​ການ​ກະທຳທີ່​ລະ​ເມີດ​ສິດ​ເປັນ​ເຈົ້າ​ຂອງຂອງ​ປະ​ຊາ​ຊົນ...”(2). ​ໃນກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​​ຄັ້ງ​ທີ XII ຂອງ​ພັກ (​ເດືອນ​ມັງກອນ 2016), ບັນຫາ​ເສີມ​ຂະຫຍາຍປະຊາທິປະ​ໄຕ​ໄດ້​ຮັບ​ການ​ຢືນຢັນ​ໃນການ​ປ່ຽນ​ແປງ​ໃໝ່​ແບບ​ວິທີ​ການ​ນຳພາ​ຂອງ​ພັກ: “ສືບ​ຕໍ່​ສະຫຼຸບ​ສັງ​ລວມພຶດຕິກຳ, ຄົ້ນຄວ້າ​ທິດ​ສະ​ດີກ່ຽວ​ກັບ​ພັກ​ກຳ​ອຳນາດ, ກຳນົດ​ແຈ້ງ​ຈຸດປະສົງ​ການ​ກຳ​ອຳນາດ, ​ແບບ​ວິທີ​ການກຳ​ອຳນາດ, ​ເນື້ອ​ໃນ​ການ​ກຳ​ອຳນາດ, ​ເງື່ອນ​ໄຂ​ກຳ​ອຳນາດ; ບັນຫາ​ເສີມ​ຂະຫຍາຍ​ປະຊາທິປະ​ໄຕ​ໃນ​ເງື່ອນ​ໄຂ​ພັກ​ໜຶ່ງ​ດຽວ​ກຳ​ອຳນາດ; ​ໄພ​ຂົ່ມຂູ່​ທີ່​ຈຳ​ເປັນ​ຕ້ອງ​ປ້ອງ​ກັນ​ສຳລັບ​ພັກກຳອຳນາດ”(3).

ກ່ຽວ​ກັບ​ການ​ເສີມ​ຂະຫຍາຍ​ປະຊາ​ທິ​ປະ​ໄຕ​ໃນ​ພັກ, ​ໂຄງການ​ການ​ກໍ່ສ້າງ​ປະ​ເທດ​ຊາດ​ໃນ​ສະ​ໄໝ​ຂ້າມ​ຜ່ານ​ຂຶ້ນ​ສູ່​ສັງຄົມ​ນິຍົມ (ປີ 1991) ​ໄດ້​ລະບຸ: ກໍ່ສ້າງ​ພັກ​ໃຫ້​ສະອາດ​ປອດ​ໃສ​ແລະໝັ້ນຄົງ​ເຂັ້ມ​ແຂງ​ທາງ​ດ້ານ​ການ​ເມືອງ, ​ແນວ​ຄິດ ​ແລະ ການຈັດ​ຕັ້ງ ທຽບ​ເທົ່າ​ກັບ​ໜ້າ​ທີ່, ຮັບປະກັນ​ໃຫ້​ພັກ​ເຮັດ​ຫຼ້ອນ​ໜ້າ​ທີ່ຄວາມ​ຮັບຜິດຊອບ​ນຳພາພາລະກິດ​ການ​ປະຕິວັດສັງຄົມ​ນິຍົມຢູ່​ປະ​ເທດ​ເຮົາ, ພັກ​ຕ້ອງປ່ຽນ​ແປງ​ໃໝ່​ແລະ​ປັບປຸງ​ຕົນ​ເອງຢ່າ​ເປັນ​ປະຈຳ, ອອກ​ແຮງ​ຍົກ​ສູງ​ລະດັບ​ປັນຍາ​ຄວາມ​ຮູ້ ​ແລະ ຄວາມ​ສາມາດ​ນຳພາ. ຮັກສາ​ມູນ​ເຊື້ອ​ສາມັກຄີ​ເປັນ​ເອກະ​ພາບ​ໃນ​ພັກ, ຮັບປະກັນ​ປະຊາທິປະ​ໄຕ​ແລະ​ລະບຽບ​ວິ​ໄນ​ໃນ​ການ​ດຳ​ເນີນ​ຊີວິດ​ຂອງ​ພັກ.

ພັກ​ກອມ​ມູນິດ​ຫວຽດນາມ ​ແລະ ລຸງ​ໂຮ່ ​ໄດ້​ກຳນົດ​ວ່າ ການ​ປະຕິບັດ​ປະຊາທິປະ​ໄຕ​ໃນ​ພັກ​ມີ​ຄວາມ​ໝາຍ​ຕັດສິນ ສຳລັບ​ການ​ພັດທະນາ​ປະຊາທິປະ​ໄຕ​ໃນ​ການຈັດ​ຕັ້ງແລະການ​ເຄື່ອນ​ໄຫວ ຂອງ​ລະບົບ​ການ​ເມືອງ​ທັງ​ໝົດ ຕິດ​ກັບ​ການ​ເປີດ​ປະຊາ​ທິປະ​ໄຕ​ໃນ​ຊີວິດ​ສັງຄົມ​ທັງ​ໝົດ, ມີ​ປະຊາທິປະ​ໄຕ​ຈຶ່ງ​ມີຄວາມ​ເຫັນ​ດີ​ເຫັນ​ພ້ອມ​ໃນ​ສັງຄົມ, ມີ​ຄວາມ​ເຫັນ​ດີ​ເຫັນ​ພ້ອມ​ໃນ​ສັງຄົມ​ຈຶ່ງ​ສ້າງ​ກຳລັງ​ແຮງ​ແຫ່ງ​ມະຫາ​ສາມັກຄີ​ປວງ​ຊົນ​ທັງ​ຊາດ. ​ເນື້ອ​ໃນ​ຂອງ​ການ​ເສີມ​ຂະຫຍາຍ​ປະຊາທິປະ​ໄຕ ຖືກ​ພັກ​ກອມ​ມູນິດ​ຫວຽດນາມກຳນົດ​ຢ່າງ​ຈະ​ແຈ້ງ​ທີ່​ສຸດ, ຮັບປະກັນ​ເສລີພາບ​ຢ່າງ​ແທ້​ຈິງ​ໃນ​ການ​ນຶກ​ຄິດ​ໃນ​ຊີວິດ​ຂອງ​ພັກ, ສົ່ງ​ເສີມ​ແລະ​ເຄົາລົບ​ເສລີພາບ​ໃນ​ການ​ນຶກ​ຄິດ, ການປະດິດ​ສ້າງ, ການ​ສົນທະນາ, ການ​ໂຕ້​ວາທີ​ປະ​ຊາ​ທິປະ​ໄຕ ​ແນ​ໃສ່​ເສີມ​ຂະຫຍາຍປັນຍາຄວາມ​ຮູ້​ຂອງ​ທົ່ວ​ພັກ, ຂອງ​ພະນັກງານ​ສະມາຊິກ​ພັກ​ແຕ່ລະຄົນ ​ໃນ​ການ​ກະກຽມ​ມະຕິ​ຕ່າງໆ ​ແລະການ​ຈັດ​ຕັ້ງປະຕິບັດ​ມະຕິ​ໃຫ້​ປະກົດ​ເປັນ​ຈິງ. ​ໃນ​ກອງ​ປະຊຸມ​ໃຫຍ່​​ ​ແລະ ກອງ​ປະຊຸມຂັ້ນ​ຕ່າງໆ​ຂອງ​ພັກ, ສະມາຊິ​ກພັກ​ແຕ່ລະຄົນ​ມີ​ສິດ​ສົນທະນາ ປຶກສາ​ຫາລື ປະກອບ​ສ່ວນ​​ເຂົ້າ​ໃນ​ວຽກ​ງານ​ຕ່າງໆ​ຂອງ​ພັກ, ຕິ​ຊົມ ຊັກ​ຖາມ​ພະນັກງານ ສະມາຊິກ​ພັກຄົນ​ອື່ນ, ​ໄດ້​ສະ​ເໜີ​ຄວາມ​ເຫັນ​ຂອງ​ຕົນ, ມີ​ສິດສະຫງວນ​ຄວາມ​ເຫັນ ຫຼື​ສະ​ເໜີ​ແນວ​ຄວາມ​ຄິດ​ຕໍ່​ອົງການ​ທີ່​ສູງ​ກວ່າ ຈົນ​ເຖິງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຂອງ​ພັກ. ບັນດາ​ມະຕິ, ຂໍ້​ຕົກລົງ​ຂອງ​ອົງການ​ຈັດ​ຕັ້ງ​ພັກ​ໄດ້​ຮັບ​ການ​ປຶກສາ​ຫາລື​ລວມໝູ່ ​ແລະ ລົງ​ຄະ​ແນນ​ສຽງ​ໂດຍ​ສ່ວນ​ໃຫຍ່. ການ​ເລືອກ​ຕັ້ງ​ຢູ່​ໃນ​ພັກ​ແມ່ນ​ດຳ​ເນີນ​ໄປ​ຢ່າງ​ເປັນ​ປະຊາທິປະ​ໄຕ​ຕາມ​ກົດ​ລະບຽບ​ປ່ອນ​ບັດ​ລັບ, ບໍ່​ກົດ​ດັນ, ບໍ່​ບັງຄັບ... ພິ​ເສດ, ​ໃນ​ໄລຍະ​ທີ່​ຜ່ານ​ມາ​ມໍ່​ນີ້, ການ​ປະຕິບັດ​ປະຊາທິປະ​ໄຕ​ໃນ​ພັກ​ສືບ​ຕໍ່​ໄດ້​ຮັບ​ການ​ເພີ່ມ​ເຕີມ​ດ້ວຍ​ຂໍ້​ກຳນົດ, ກົດ​ລະບຽບ​ທີ່​ເຂັ້ມ​ງວດ​ກວ່າ​ເກົ່າ, ​ເຊັ່ນ​ຂໍ້​ກຳນົດ​ໃຫ້​ກົມ​ການ​ເມືອງ​ລາຍ​ງານ​ວຽກ​ງານ​ແລະ​ການ​ເຄື່ອນ​ໄຫວ​ຂອງ​ຕົນ​ ຕໍ່​ກອງ​ປະຊຸມ​ຄະນະ​ບໍລິຫານ​ງານ​ສູນ​ກາງ, ຄະນະ​ປະຈຳ​ລາຍ​ງານ​ວຽກ​ງານ​ແລະ​ການ​ເຄື່ອນ​ໄຫວ​ຂອງ​ຕົນ​ ຕໍ່​ກອງ​ປະ​ຊຸມ​​ຄະນະພັກ, ຄະນະ​ພັກ​ລາຍ​ງານ​ຕໍ່​ອົງການ​ຈັດ​ຕັ້ງ​ພັກ ຫຼື​ອົງການທີ່​ເລືອ​ຕັ້ງ​ຕົນ; ຂໍ້​ກຳນົດ​ກ່ຽວ​ກັບ​ເວລາ​ດຳ​ເນີນ​ການ​ຕິ​ຊົມ​ຕົນ​ເອງ​ແລະ​ຕິຊົມ, ການຈັດ​ຕັ້ງ​ໃຫ້​ມະຫາຊົນ​ຕິ​ຊົມ​ ແລະລົງ​ຄະ​ແນນ​ສຽງ​ໄວ້​ວາງ​ໃຈຕໍ່​ພະນັກງານ​ສະມາຊິກ​ພັກ ຈາກ​ອົງການ​ສູງ​ສຸດ​ເຖິງ​ອົງການ​ຈັດ​ຕັ້ງ​ຮາກ​ຖານ.

ການ​ເສີ​ມຂະຫຍາຍ​ປະຊາທິປະ​ໄຕ​ໃນ​ບັນດາອົງການ​ຈັດ​ຕັ້ງລັດ ມີ​ການປ່ຽນ​ແປງ​ແລະ​ມີຄວາມ​ກ້າວໜ້າ​ຫຼາຍ​ຢ່າງ. ສະພາ​ແຫ່ງ​ຊາດ​ໄດ້​ມີ​ການ​ປ່ຽນ​ແປງ​ໃໝ່​ທີ່​ສຳຄັນ, ນັບ​ແຕ່​ການ​ເລືອກ​ຕັ້ງຜູ້​ແທນ​ສະ​ພາ​ແຫ່ງ​ຊາດ ​ເຖິງການ​ປັບປຸງ​ບູລະນະ​ໂຄງ​ປະກອບ​ການຈັດ​ຕັ້ງ​ແລະ​ແບບ​ວິທີ​ການ​ເຄື່ອນ​ໄຫວ, ​ເຮັດ​ໜ້າ​ທີ່​ນິຕິບັນຍັດ ວຽກ​ງານ​ຕິດຕາມ​ກວດກາ ​ແລະ ການ​ຕັດສິນ​ຕົກລົງ​ບັນຫາ​ສຳຄັນ​ຂອງ​ປະ​ເທດ ​ໄດ້​ດີກ​ວ່າ​ແຕ່​ກ່ອນ. ການ​ເຄື່ອນ​ໄຫວ​ຂອງສະພາ​ແຫ່ງ​ຊາດນັບ​ມື້​ນັບ​ມີ​ປະຊາທິປະ​ໄຕ​ແລະ​ມີ​ປະສິດທິ​ຜົນ. ​ເພື່ອ​ຍົກ​ສູງ​ຄຸນ​ນະພາ​ບຂອງ​ບັນດາ​ເອກະສານ​ກົດໝາຍ, ສະພາ​ແຫ່ງ​ຊາດ​ໄດ້​ມີ​ຫຼາຍ​ຮູບ​ການ​​ເກັບ​ກຳ​ຄວາມ​ຄິດ​ເຫັນ​ປະກອບສ່ວນ, ​ເຊັ່ນ ຈັດ​ຕັ້ງ​ກອງ​ປະຊຸມ​ ການ​ສຳ​ມະ​ນາ, ​ແຈກ​ຢາຍ​ບັດ​ຂໍ​ຄວາມ​ເຫັນ...

ກ່ອນ​ແລະ​ຫຼັງ​ກອງ​ປະຊຸມ​ສະພາ​ແຫ່ງ​ຊາດ​ແຕ່​ລະ​ຄັ້ງ ​ໄດ້​ຈັດ​ຕັ້ງ​ກອງ​ປະຊຸມ​ພົບ​ປະ​ຜູ້​ມີ​ສິດ​ເລືອກ​ຕັ້ງ ​ເພື່ອ​ເກັບ​ກຳຄວາມ​ຄິດ​ຈິດ​ໃຈ, ຄວາມ​ປາຖະໜາ, ຂໍ້​ສະ​ເໜີ​ແນະ​ຂອງ​ຜູ້​ມີ​ສິດ​ເລືອກ​ຕັ້ງ​ໃນ​ທົ່ວ​ປະ​ເທດ. ຫຼັງຈາກ​ການ​ພົບ​ປະ​ໄດ້​ມີ​ການ​ສະຫຼຸບ​ແລະ​ວິ​ເຄາະຂໍ້​ສະ​ເໜີ​ແນະ​ທີ່​ເໝາະ​ສົມ ​ເພື່ອສະ​ເໜີ​ໃຫ້​ລັດຖະບານ​ຊີ້​ນຳ​ການ​ແກ້​ໄຂ​ຕາມ​ອຳນາດໜ້າ​ທີ່. ​ໃນ​ເວລາ​ຜ່ານ​ມາ, ການ​ເຄື່ອນ​ໄຫວ​ຕັ້ງ​ຄຳ​ຖາມ​ແລະ​ຕອບ​ຄຳ​ຖາມຢູ່​ໃນ​ກອງ​ປະຊຸມ​ຂອງ​ສະພາ​ແຫ່ງ​ຊາດ, ສະພາ​ປະຊາຊົນ​ ມີ​ຄວາມ​ຟົດ​ຟື້ນ​ແລະ​ປະຊາທິປະ​ໄຕ​ຢ່າງ​ແທ້​ຈິງ, ​ເສີມ​ຂະຫຍາຍ​ໄດ້​ຄວາມ​ຮັບຜິດຊອບ​ຂອງ​ຜູ້​ແທນ, ​ໄດ້​ຮັບ​ຄວາມ​ຍອມຮັບ​ຂອງ​ປະຊາຊົນ​ໃນ​ທົ່ວ​ປະ​ເທດ. ​ເປັນ​ໄລຍະ, ສະພາ​ແຫ່ງ​ຊາດ, ສະພາ​ປະຊາຊົນ​​ໄດ້ຈັດ​ຕັ້ງການ​ລົງ​ຄະ​ແນນ​ສຽງ​ໄວ້​ວາງ​ໃຈ​ສຳລັບບັນດາ​ຕຳ​ແໜ່​ງທີ່​ເລືອກ​ໂດຍສະພາ​ແຫ່ງ​ຊາດ, ສະພາ​ປະຊາຊົນ. ການ​ເສີມ​ຂະຫຍາຍ​ປະຊາທິປະ​ໄຕ​ຂອງ​ລັດຖະບານສືບ​ຕໍ່​ມີ​ການ​ປ່ຽນ​ແປງ​ໃໝ່ ​ໃນ​ການວາງ​ນະ​ໂຍບາຍ, ການ​ຄຸ້ມ​ຄອງ​ມະຫາ​ພາກ, ການ​ຊີ້​ນຳ​ແລະ​ກຳກັບ​ຈັດ​ຕັ້ງ​ການ​ປະຕິບັດ. ສະຕິ​​ແລະ​ຄວາມ​ຮັບຜິດຊອບ​ ໃນ​ການ​ຫັນ​ແຜນ​ນະ​ໂຍບາຍ​ແລະມະຕິ​ຂອງ​ພັກ​ເປັນ​ເອກະສານ​ກົດໝາຍ ​ໄດ້​ຮັບ​ການ​ເຊີດ​ຊູ. ພິ​ເສດ, ອຳນາດ​ການປົກຄອງ​ຂັ້ນ​ຕ່າງໆ​ມີ​ຄວາມ​ກ້າວໜ້າ​ຫຼາຍ ​ໃນການຈັດ​ຕັ້ງ​ການ​ຕ້ອນຮັບ​ປະຊາຊົນ, ສົນທະນາ​ກັບພົນ​ລະ​ເມືອງ ​ແລະ ​ແກ້​ໄຂການ​ຮ້ອງທຸກ ຮ້ອງ​ຟ້ອງ​ແລະ​ກ່າວ​ຫາ ​ຂອງ​ພົນລະ​ເມືອງ. ສຳລັບ​ວຽກ​ງານ​ພະນັກງານຕາມ​ການ​​ແບ່ງ​ຂັ້ນ​ຂອງ​ພັກ, ຄະນະ​ກຳມະການ​ພັກ​ໄດ້​ປຶກສາ​ສົນທະນາ​​ແບບ​ປະຊາທິປະ​ໄຕ, ປ່ອນ​ບັດ​ປິດລັບ​ແລະຕົກລົງ​ຕາມ​ສຽງ​ສ່ວນ​ໃຫຍ່. ບັນດາ​ອົງການ​ນິຕິບັນຍັດ, ບໍລິຫານ ​ແລະ ຕຸລາການ ​ໄດ້​ຮັບການ​ອຳນວຍ​ຄວາມ​ສະດວກ​ ແລະການ​ເສີມ​ຂະຫຍາຍ​ພາລະ​ໜ້າ​ທີ່​ໂຄສະນາ, ​ແນະນຳ​ຫາງ​ສຽງ ຈາກ​ພາຫະນະ​ສື່​ມວນ​ຊົນ​ເຊັ່ນ ໜັງສືພິມ, ວິທະຍຸ​ກະຈາຍສຽງ, ​ໂທລະ​ພາຍ, ໜັງສືພິມ​ອອນ​ໄລ...

​ການເສີມ​ຂະຫຍາຍ​ປະຊາທິປະ​ໄຕ​ໃນ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ກໍ່​ມີ​ຄວາມ​ກ້າວໜ້າ​ຫຼາຍ​ຢ່າງ, ລະບຽບ​ການ​ປະຕິບັດ​ສິດ​ປະຊາທິປະ​ໄຕ​ຂອງ​ປະຊາຊົນ ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ແລະ​ເປັນ​ຮູບ​ປະ​ທຳ​ເທື່ອ​ລະ​ກ້າວ. ເອກະສານ​ເປັນ​ພື້ນຖານ​ນິຕິ​ທຳ​ສຳລັບ​ການ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງຂອງປະຊາຊົນ​ ຫຼາຍ​ສະບັບ​ໄດ້​ຖືກ​ສະພາ​ແຫ່ງ​ຊາດ​ຮັບຮອງ​ຜ່ານ, ​ເຊັ່ນ ກົດໝາຍ​ແນວ​ໂຮມ​ປະ​ເທດ​ຊາດ​ຫວຽດນາມ, ກົດໝາຍ​ກຳມະບານ, ກົດໝາຍ​ຊາວ​ໜຸ່ມ, ກົດໝາຍ​ວ່າ​ດ້ວຍ​ການ​ລົງ​ປະຊາ​ມະຕິ... ​ການ​ຮັບປະກັນ​ປະຊາທິປະ​ໄຕ ກ່ຽວ​ກັບ​ສິດທິ​ແລະ​ພັນທະ, ຜົນ​ປະ​ໂຫຍ​ດ, ຄວາມ​ຮັບຜິດຊອບຂອງ​ສະມາຊິກ​ໃນສັງຄົມ​ ໄດ້​ຫັນ​ເປັນກົດ​ໝາຍ​ສະ​ເພາະ ​ແລະ​ ໄດ້​ບັງຄັບ​ໃຊ້​ຢ່າງ​ມີ​ຜົນ​ເທື່ອ​ລະ​ກ້າວ; ​ແຜນ​ນະ​ໂຍບາຍ​ແລະ​ມາດ​ຕະການ​ຫຼາຍ​ຢ່າງ​ ໄດ້​ເສີນ​ຂະຫຍາຍ​ບົດບາດ​ທີ່​ຕັ້ງໜ້າ, ​ຄວາມເປັນ​ເຈົ້າ​ການ​ຂອງ​ປະຊາຊົນ ​ແລະ ຊຸກຍູ້​ຂະ​ບວນການ​ປະຊາທິປະ​ໄຕ​ສັງຄົມ. ຄະນະປະຈຳ​ສະພາ​ແຫ່ງ​ຊາດ ​ໄດ້​ປະກາດ​ໃຊ້​ກົດ​ດຳລັດເລກທີ 34/PT/UBTVQH, ວັນ​ທີ 20-4-2007, “ກ່ຽວ​ກັບ​ການ​ປະຕິບັດລະບອບ​ປະຊາທິປະ​ໄຕ​ຢູ່​ຕາ​ແສງ, ຄຸ້ມ​ຖະໜົມ, ​ເທດສະບານນ້ອຍ”; ລັດຖະດຳລັດ​ເລກທີ 04/NĐ/CP, ວັນ​ທີ 24-1-2013, “ກ່ຽວ​ກັບ​ການ​ປະຕິບັດ​ລະບອບ​ປະຊາທິປະ​ໄຕ​ໃນ​ການ​ເຄື່ອນ​ໄຫວຂອງ​ອົງການ​ບໍລິຫານ​ລັດ ​ແລະ ຫົວໜ່ວຍ​ບໍ​ລິການສາທາລະນະຂອງ​ລັດ”; ລັດຖະດຳລັດ​ເລກທີ 60/NĐ-CP, ວັນ​ທີ 19-6-2013, “ກຳນົດ​ລະອຽດ​ຂໍ້ 3 ມາດຕາ 63 ຂອງປະມວນກົດໝາຍແຮງງານ ກ່ຽວກັບການປະຕິບັດກົດລະບຽບປະຊາທິປະໄຕຢູ່ຮາກຖານ ໃນທີເຮັດວຽກ" ​ໄດ້​ປະກອບສ່ວນ​ອັນ​ສຳຄັນ​ເຂົ້າ​ໃນ​ການ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງຂອງ​ປະຊາຊົນ. ​ໃນ​ປະຈຸ​ບັນ, ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ພວມ​ຕັ້ງໜ້າ​ໃນ​ການ​ປະຕິບັດ​ພາລະໜ້າ​ທີ່​ຕິດຕາມ​ກວດກາ, ວິຈານ​ສັງຄົມ ​ແລະ​ປະກອບ​ຄວາມ​ເຫັນ​ກໍ່ສ້າງ​ພັກ, ກໍ່ສ້າງ​ອຳນາດ​ການ​ປົກຄອງ​ໃຫ້​ສະອາດ​ປອດ​​ໃສ, ໝັ້ນຄົງ​ເຂັ້ມ​ແຂງ. ກ່ອນກອງ​ປະຊຸມ​ສະພາ​ແຫ່ງ​ຊາດ ​ແລະ​ສະພາ​ປະຊາຊົນຂັ້ນ​ຕ່າງໆ, ​ແນວ​ໂຮມ​ປະ​ເທດ​ຊາດ​ຫວຽດນາມ​ໄດ້​ລວບ​ລວມຄຳ​ແນະນຳ ຂໍ້ສະ​ເໜີ​ແນະ​ທີ່​ສົມບູນ​ຈາກ​ອົງການຈັດ​ຕັ້ງ​ສະມາຊິກ ​ແລະ ຄວາມ​ຄິດ​ຄວາມ​ເຫັນ​ຂອງ​ຜູ້​ມີ​ສິດ​ເລືອກ​ຕັ້ງ​ໃນ​ທົ່ວ​ປະ​ເທດ ​ເພື່ອສະທ້ອນ​ເຖິງ​ສະພາ​ແຫ່ງ​ຊາດ; ສະພາ​ປະຊາຊົນ​ຂັ້ນ​ຕ່າງໆ​ໄດ້​ຕິດຕາມ​ຊີ້​ນຳອຳນາດ​ການ​ປົກຄອງ​ຢ່າງ​ເປັນ​ປະຈຳ ​ໃນ​ການຮັບ​ເອົາ​ແລະ​ແກ້​ໄຂຂໍ້​ສະ​ເໜີ​ແນະ​ທີ່​ຖືກຕ້ອງ​ຂອງບັນດາ​ສະມາຊິກ​ສະຫະພັນ, ຂອງສະມາຊິກ​ແລະ​ຜູ້​ມີ​ສິດ​ເລືອກ​ຕັ້ງ.

​ຂໍ້​ຈຳກັດ​ແລະ​ຂໍ້​ບົກພ່ອງຈຳນວນ​ໜຶ່ງ​ທີ່​ຈະ​ຕ້ອງ​ແກ້​ໄຂ

ຄຽງຂ້າງກັນ​​ຂໍ້​ດີຂ້າງ​ເທິງ, ການ​ປະຕິບັດ​ການ​ສົ່ງ​ເສີມປະຊາທິປະ​ໄຕກໍ່​ຍັງມີ​ຂໍ້​ຈຳກັດ​ແລະ​ບົກ​ພ່ອງ. ຄວາມ​ຮັບ​ຮູ້​ກ່ຽວ​ກັບ​ປະຊາທິປະ​ໄຕ​ແລະ​ການ​ກໍ່ສ້າງ​ລະບອບ​ປະຊາທິປະ​ໄຕສັງຄົມ​ນິຍົມຍັງ​ຈຳກັດ, ບໍ່​ພຽງພໍ​ແລະ​ບໍ່​ເປັນ​ລະບົບ; ​ບໍ່​ໄດ້​ອະທິບາຍ​ແລະ​ໃຫ້​ຄວາມ​ກະຈ່າງ​ແຈ້ງ​ກ່ຽວ​ກັບ​ຫຼາຍບັນຫາ​ທີ່​ຄວາມ​ເປັນ​ຈິງ​ວາງ​ອອກ​ມາ; ການ​ແກ້​ໄຂ​ສານ​ພົວພັນ​ລະຫວ່າງ​ປະຊາທິະ​ໄຕ​ແລະ​ລະບຽບ​ວິ​ໄນ ​ບໍ່​ໄດ້​ຮັບ​ຜົນ​ດີ; ບໍ່​ໄດ້​ເອົາ​ໃຈ​ໃສ່​ຢ່າງ​ພຽງພໍເຖິງ​ບັນດາ​​ຮູບ​ການ​ປະຊາທິປະ​ໄຕ​ໂດຍ​ກົງ. ​ໃນ​ປະຈຸ​ບັນ, ພະນັກງານ ສະມາຊິກ​ພັກ ​ແລະ​ປະຊາຊົນ​ພາກສ່ວນ​ໜຶ່ງ ​ຍັງມີ​ຄວາມ​ຮູ້​ແບບ​ງ່າຍດາຍດ້ານ​ດຽວ ​ກ່ຽວ​ກັບ​ປະຊາທິປະ​ໄຕ, ​ໂດຍ​ສະ​ເພາະ​ແມ່ນ​ການ​ປະຕິບັດ​ປະຊາທິປະ​ໄຕ​ໃນ​ພັກ. ບາງ​ຄົນ​ໃຫ້​ທັດສະນະ​ວ່າ ປະ​ຊາ​ທິປະ​ໄຕ​ຢູ່​ໃນ​ພັກ ​ແມ່ນ​ສະມາຊິກ​ພັກມີ​ສິດ​ເສລີ​ໃນ​ການ​ປາກ​ເວົ້າ ​ແລະ ​ມີ​ສິດ​​ເສລີ​ໃນ​ການເຜີຍ​ແຜ່​ທັດສະນະ ຄວາມ​ຄິດ​ເຫັນ​ຂອງ​ຕົນ​ເອງ​ໃນ​ພາຫະນະ​ສື່​ມວນ​ຊົນ. ​ໂດຍ​ສະ​ເພາະ, ບາງ​ຄົນ​ຍັງ​ຢາກ​ຈັດ​ຕັ້ງ​ພັກຄື​ກັນ​ກັບ​ສະ​ໂມ​ສອນ, ​ໄດ້​ສົນທະນາ ​ໂຕ້​ຖຽງ​​ທຸກ​ບັນຫາ, ບໍ່ຕ້ອງເຄົາລົບ​ຫຼັກການ​ລວມສູນ​ປະຊາທິປະ​ໄຕ. ກົງກັນຂ້າມ, ​ພະນັກງານ​ພາກສ່ວນ​ໜຶ່ງຊ້ຳພັດມີ​ຄວາມ​ເຂົ້າ​ໃຈ​ແຂງ​ກະດ້າງ​ກ່ຽວ​ກັບ​ປະຊາທິປະ​ໄຕ, ຖື​ປະຊາທິປະ​ໄຕ​ເປັນ​ພາຫະນະ​ເພື່ອບັນລຸ​ການ​ລວມສູນ, ບໍ່​ຢາກ​ໃຫ້​ສະມາຊິກ​ພັກ​ແລະ​ການຈັດ​ຕັ້ງ​ພັກ​ຂັ້ນ​ລຸ່ມ ມີ​ຄວາມ​ຄິດ​ແລະການ​ຄົ້ນ​ຄິດ​ວິທະຍາສາດ​ທີ່​ເປັນ​ເອກະລາດ, ລວມວິທະຍາ​ສາດ​ແລະ​ການເມືອງ​ເຂົ້າ​ເປັນ​ໜຶ່ງ​ດຽວ, ຖື​ຄວາມ​ເຫັນ​​ຄົ້ນຄວ້າ​ແລກປ່ຽນ​ເປັນ​ເໝືອນ​ກັບ​ແນວທາງ ທັດສະນະ​ຂອງ​ພັກ. ບາ​ງຄົນຖື​ປະຊາທິປະ​ໄຕ​ເປັນ​ກົງກັນຂ້າມ​ກັບ​ການລວນ​ສູນ, ​ແຍກ​ການ​ເສີມ​ຂະຫຍາຍ​ການ​ນຶກ​ຄິດ​ປະດິດ​ສ້າງ​ຂອງ​ສະມາຊິກ​ພັກ ອອກ​ຈາກ​ການ​ປະຕິບັດ​ລະບຽບ​ວິ​ໄນ​ແລະການ​ຮັກສາ​ຄວາມ​ສາມັກຄີ​ເປັນ​ເອກະ​ພາບ​ຢູ່​ໃນ​ພັກ.

​ໃນ​ເງື່ອນ​ໄຂ​ການ​ພັດທະນາ​ເສດຖະກິດ​ຕະຫຼາດ​ກຳນົດ​ທິດສັງຄົມ​ນິຍົມ​ແລະ​ເຊື່ອມ​ໂຍງ​ສາກົນ, ​ເພື່ອ​ສົ່ງ​ເສີມ​ຄວາມ​ຄິດ​ລິ​ເລີ່​ມ​ແລະ​ຈິນຕະນາການ​ເອກະລາດ​ຂອງພະນັກງານສະມາຊິກ​ພັກ ຄວນ​ມີ​ກົດ​ລະບຽບ​ກ່ຽວ​ກັບລະບອບ​ການ​ສະໜອງ​ແລະ​ປັບປຸງ​ຂໍ້​ມູນ​ເປັນ​ປະຈຳ​ ໃຫ້​ພະນັກງານ​ສະມາຊິກ​ພັກ, ຮັບປະກັນ​ສິດຂອງ​ສະ​ມາ​ສິກ​ພັກ​ໃນ​ການ​ຮັບ​ຂໍ້​ມູນ. ​ເປັນ​ພັກ​ໜຶ່ງ​ດຽວ​ທີ່​ກຳ​ອຳນາດ, ພະນັກງານ​ສະມາຊິກ​ພັກ​ຈຳນວນ​ໜຶ່ງບໍ່​ມີ​ຄວາມ​ຮັບ​ຮູ້​ຢ່າງ​ຄົບ​ຖ້ວນ​ກ່ຽວ​ກັບຫຼັກການ​ລວມສູນ​ປະຊາທິປະ​ໄຕ ດັ່ງ​ນັ້ນ​ຈຶ່ງ​ເກີດພະຍາດ​ລ່ວງ​ອຳນາດ, ອຸ້ມ​ວຽກ​ເຮັດ​ຕາງ, ບົງການ​ຊີ້​ຂາດ, ​ເຈົ້າ​ໂຄດ, ​ເປັນ​ຜົນກະທົບ​ເຖິງ​ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ການ​ນຳພາ​ຂອງ​ພັກ. ມີ​ຫຼາຍຮູບ​ການ, ວິທີ​ຈັດ​ຕັ້ງການ​ເກັບ​ກຳ​ຄວາມ​ຄິດ​ເຫັນ​ຂອງ​ປະຊາຊົນ, ​ໂດຍ​ສະ​ເພາະ​ແມ່ນ​ຄວາມ​ເຫັນ​ຂອງ​ຜູ້​ຊ່ຽວຊານ, ນັກວິທະຍາສາດ ​ໃນ​ເມື່ອ​ສ້າງ​ເອກະສານ​ກົດໝາຍ​ແລະ​ໂຄງການ​ທີ່​ສຳຄັນ​ຈຳນວນ​ໜຶ່ງ, ມີ​ບາງ​ໂຄງການ​ຍ້ອນ​ການ​ເກັບ​ກຳ​ຂໍ້​ມູນຄວາມ​ເຫັນບໍ່​ໄດ້​ດີ​ ຈຶ່ງ​ພາ​ໃຫ້​ຄຸນ​ນະພາ​ບຂອງ​ເອກະສານ​ກົດໝາຍ​ບໍ່​ສູງ, ບໍ່​ໄດ້​ຮັບ​ການ​ອະນຸມັດ​ຈາກ​ສະພາ​ແຫ່ງ​ຊາດ, ​ເຊັ່ນ ​ໂຄງການ​ກໍ່ສ້າງ​ທາງ​ລົດ​ໄຟ​ຄວາມ​ໄວ​ສູງ​ເໜືອ-​ໃຕ້, ​ໂຄງການ​ກໍ່ສ້າງ​​ເຂດ​ເສດຖະກິດ​ພິ​ເສດຢູ່​ສາມ​ແຫ່ງ... ບາງ​ເອກະສານ​ກົດໝາຍທີ່​​ສ້າງ​ພື້ນຖານ​ນິຕິ​ທຳ​ໃຫ້​ແກ່​ການ​ເສີມ​ຂະຫຍາຍ​ດີກວ່າ​ອີກ​ ສິດ​ເປັນ​ເຈົ້າ​ຂອງຂອງ​ປະຊາຊົນນັ້ນ ບໍ່​ໄດ້​ຮັບ​ການ​ກໍ່ສ້າງ​ຢ່າງ​ທັນ​ການ, ​ເຊັ່ນ​ ກົດໝາຍ​ວ່າ​ດ້ວຍ​ການ​ຕິດຕາມ​ກວດກາ​ແລະ​ວິຈານ​ສັງຄົມ. ບາງກົດໝາຍ​ທີ່​ຖືກ​ປະກາດ​ໃຊ້​ແລ້ວ, ​ເຊັ່ນ ກົດໝາຍ​ວ່າ​ດ້ວຍ​ການ​ລົງ​ປະຊາ​ມະຕິ ​ແມ່ນ​ເອກະສານ​ກົດໝາຍ​ທີ່​ສຳຄັນ ​ເພື່ອ​ໃຫ້​ປະຊາຊົນ​ສະ​ແດງ​ຄວາມ​ປະສົງ​ຂອງ​ຕົນ​ໂດຍ​ກົງ ​ໃນ​ການ​ຕັດສິນ​ຕົກລົງບັນຫາ​ທີ່​ສຳຄັນ​ຂອງ​ປະ​ເທດ​ຊາດ, ​ເພີ່ມ​ທະວີ​ຄວາມ​ສາມັກຄີ​ແລະ​ຄວາມ​ເຫັນ​ດີ​ເຫັນ​ພ້ອມ​ຂອງ​ສັງຄົມ, ມີ​ຜົນ​ບັງຄັບ​ໃຊ້​ແຕ່​ວັນ​ທີ 1-7-2016, ​ແຕ່​ເຖິງ​ດຽວ​ນີ້ ມັນ​ຍັງ​ບໍ່ທັນ​ໄດ້ຖືກ​ຈັດ​ຕັ້ງ​ປະຕິບັດ​ຢ່າງ​ກວ້າງຂວາງ. ບາງ​ອົງການ​ບໍລິຫານ​ລັດ​ແລະອຳນາດ​ການ​ປົກຄອງທ້ອງ​ຖິ່ນ ມີ​ຄວາມ​ສາມາດ​ທີ່​ອ່ອນ​ແອ​ໃນ​ການຈັດ​ຕັ້ງ​ປະຕິບັດ​ເອກະສານ​ກົດໝາຍ​, ​ເຊັ່ນ​ໃນ​ບັນດາ​ຂົງ​ເຂດ ການວາງ​ແຜນ, ການ​ຄຸ້ມ​ຄອງ​ແຜນການ, ຄຸ້ມ​ຄອງ​ທີ່​ດິນ, ຊັບພະຍາກອນ​ທຳ​ມະ​ຊາດ, ບໍ່​ແຮ່, ການຊົດ​ເຊີຍ​ແລະ​ເກັບ​ກູ້​ພື້ນ​ທີ່, ການຈັດ​ສັນ​ທີ່ຢູ່​ຄົງ​ທີ່…

ການ​ເສີມ​ຂະຫຍາຍ​ປະຊາ​ທິປະ​ໄຕ​​ໃນ​ສັງຄົມຍັງ​ມີ​ຂໍ້​ຈຳກັດ, ປະຊາຊົນ​ພາກສ່ວນ​ໜຶ່ງ​ຍັງ​ອຸກ​ອັ່ງ​ຮ້ອນ​ເຄືອງ, ກ່າວ​ຫາ​ຮ້ອງຟ້ອງສັບສົນ. ຈຳນວນ​ໃບ​ຮ້ອງທຸກ, ຈົດ​ໝາຍກ່າວ​ຫາ, ຮ້ອງ​ຟ້ອງຂອງ​ພົນລະ​ເມືອງ​ທີ່​ຍື່ນ​ຕໍ່ບັນດາ​ອົງການ​ຮັບຜິດຊອບ, ​ເຊັ່ນ ຄະນະ​ກຳມະການປະຊາ​ປາຖະ​ໜາ​ຂອງ​ສະພາ​ແຫ່ງ​ຊາດ, ອົງການ​ກວດກາ​ລັດຖະບານ, ຍັງ​ມີ​​ຫຼາຍ, ​ແຕ່ອັດຕາ​ສ່ວນ​ໃບ​ຮ້ອງ​ຟ້ອງທີ່​ໄດ້​ຮັບ​ການ​ແກ້​ໄຂ​ຍັງ​ຕ່ຳ, ບໍ່​ໄດ້​ຕາມ​ຄາດໝາຍ. ຕາມ​ຂໍ້​ມູນ​ຈາກຄະນະ​ກຳມະການຕຸລາການ​ສະພາ​ແຫ່ງ​ຊາດ, ອັດຕາ​ອົງການ​ອຳນາດ​ການ​ປົກຄອງ​ທີ່​ບໍ່​ໄດ້​ສົນທະນາ​ກັບ​ພົນລະ​ເມືອງ ​ແລະບໍ່​ເຂົ້າ​ຮ່ວມ​ການ​ພິພາກສາ​ຄະດີ ​ໄດ້​ເພີ່ມ​ຂຶ້ນ​ທຸກ​ປີ. ​ແຕ່​ປີ 2015 ​ເຖິງ​ປີ 2017, ນັບ​ແຕ່​​​ເມື່ອ ກົດໝາຍ​ວິທີ​ພິຈາລະນາຄວາມ​ປົກຄອງ​ ມີ​ຜົນ​ບັງຄັບ​ໃຊ້, ທົ່ວ​ປະ​ເທດ​ມີ 11.180 ຂໍ້​ຕັດສິນ​ບໍລິຫານ​ແລະ​ການ​ກະທຳ​ບໍລິຫານ ຖືກ​ສານ​ຍົກ​ເລີກທັງ​ຂໍ້​ ຫຼືຍົກ​ເລີກສ່ວນ​ໜຶ່ງ. ບັນດາ​ກົດດຳລັດ​ແລະ​ລັດຖະດຳລັດ​ກ່ຽວ​ກັບ​ການ​ປະຕິບັດ​ກົດ​ລະບຽບ​ປະຊາທິປະ​ໄຕ​ຢູ່​ຮາກ​ຖານບໍ່​ໄດ້​ຮັບ​ການຈັດ​ຕັ້ງ​ປະຕິບັດເປັນ​ຢ່າງ​ດີ​ຢູ່​ບາງ​ແຫ່ງ. ຂໍ້​ຈຳກັດ ບົກພ່ອງ​ເທິງ​ນີ້​​ແມ່ນ​ຍ້ອນ​ສາ​ເຫດ​ພາວະ​ວິ​ໄສ​ແລະ​ອັດຕະວິ​ໄສ, ​ໃນ​ນັ້ນ​ສາ​ເຫດ​ອັດຕະວິ​ໄສ​ເປັນ​ຕົ້ນຕໍ. ທາງ​ດ້ານ​ພາວະ​ວິ​ໄສ: ການ​ປ່ຽນ​ແປງ​ໃໝ່​ແມ່ນ​ພາລະກິດ​ທີ່​ໃຫຍ່​ໂຕ, ຮອບດ້ານ, ຍາວ​ນານ​ແລະ​ຫຍຸ້ງຍາກ, ສັບສົນ, ບໍ່​​ເຄີຍມີ​ໃນ​ປະຫວັດສາດ. ສະພາບ​ການ​ໂລກ, ພາກ​ພື້ນ ​ແລະ​ການ​ຄັດຄ້ານ​ຕ້ານ​ຢັນ​ຂອງບັນດາ​ອິດ​ທິກຳລັງ​ສັດຕູ ​ໄດ້​ສົ່ງ​ຜົນ​ກະທົບ​ຢ່າງ​ແຮງ​ເຖິງ​ຂະ​ບວນການ​ເສີມ​ຂະຫຍາຍ​ປະຊາທິປະ​ໄຕ​ໃນ​ປະ​ເທດ​ເຮົາ. ທາງ​ດ້ານ​ອັດຕະວິ​ໄສ: ວຽກ​ງານ​ຄົ້ນຄວ້າ​ທິດ​ສະ​ດີ​ແລະ​ສະຫຼຸບ​ສັງ​ລວມພຶດຕິ​ກຳ ກ່ຽວ​ກັບ​ການ​ປະຕິບັດ​ປະຊາທິປະ​ໄຕ​ຢູ່​ໃນ​ພັກ, ​ໃນ​ອົງການ​ລັດ​ແລະ​ໃນ​ສັງຄົມ ບໍ່​ໄດ້​ຮັບ​ຄວາມ​ເອົາ​ໃຈ​ຢ່າງ​ພຽງພໍ, ​ແລະ​ກໍ່​ໄດ້​ຊັກ​ຊ້າ​ໃນ​ການ​ອະທິບາຍ​, ​ຫັນ​ເປັນ​ນີຕິ​ກຳທາງ​ດ້ານ​ລັດ.

ກົນ​ໄກ “ພັກ​ນຳພາ, ລັດຄຸ້ມຄອງ, ປະຊາຊົນເປັນເຈົ້າ” ​ເພື່ອ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງ​ຂອງປະຊາຊົນ​ໃຫ້​ດີກ​ວ່າ​ອີກ. ການ​ຄົ້ນຄວ້າ, ຄາດ​ຄະ​ເນ​ການ​ຜັນ​ປ່ຽນ​ທາງ​ດ້ານ​ປະລິມານ, ຄຸນ​ນະພາ​ບ ​ແລະ​ແນວຄວາມ​ຄິດ​ ຂອງ​ບັນດາ​ຊັ້ນ​ຄົນ​ໃນ​ສັງຄົມ ​ເພື່ອ​ມີ​ແນວທາງ, ​ແຜນ​ນະ​ໂຍບາຍນຳພາ​ການ​ເສີມ​ຂະຫຍາຍ​ປະຊາທິປະ​ໄຕ​ໃຫ້​ແທດ​ເໝາະຖືກຕ້ອງ​ ມີ​ປະສິດທິ​ຜົນກວ່າ​ນັ້ນ ​ແມ່ນ​ຍັງ​ຖືກ​ຈຳກັດ. ຄວາມ​ຮັບ​ຮູ້, ​ແບບ​ວິທີ ​ແລະ​ວິທີ​ການ​ຊີ້​ນຳ​ການຈັດ​ຕັ້ງ​ປະຕິບັດ​ແນວທາງ ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ​ໃນ​ການ​ເສີມ​ຂະຫຍາຍ​ສິດ​ເປັນ​ເຈົ້າ​ທາງ​ດ້ານ​ການ​ເມືອງ, ​ເສດຖະກິດ, ສັງຄົມ, ສິດທິ​ພົນລະ​ເມືອງ​ນັ້ນ ຍັງ​ມີ​ດ້ານ​ຈຳກັດ. ການ​ຄຸ້ມ​ຄອງ, ສຶກສາ​ແລະ​ຝຶກ​ອົບຮົມ​ແນວ​ຄິດ​ການ​ເມືອງ, ຄຸນສົມບັດ, ​ແບບ​ແຜນ​ດຳລົງ​ຊີວິດ ​ໃຫ້​ພະນັກງານ ສະມາຊິກ​ພັກ, ​ໂດຍ​ສະ​ເພາະ​ແມ່ນ​ພະນັກງານ​ນຳພາ ຄຸ້ມ​ຄອງ​ຫຼັກ​ແຫຼ່ງ​ໃນ​ທຸກ​ລະດັບນັ້ນ ​ແມ່ນ​ບໍ່​ໄດ້​ເຮັດ​ຢ່າງຕັ້ງໜ້າ, ​ເປັນ​ປະຈຳ ດັ່ງ​ນັ້ນ​ຈຶ່ງ​ມີພະນັກງານ​ພາກສ່ວນ​ໜຶ່ງ​ລະ​ເມີດ​ກົດ​ລະບຽບ​ປະຊາທິປະ​ໄຕ, ​ບໍ່​ເຄົາລົບ​ສິດ​ເປັນ​ເຈົ້າ​ຂອງຂອງປະຊາຊົນ.

ວິທີ​ແກ້​ໄຂ​ສຳຄັນ​ໃນ​ການ​ເສີມ​ຂະຫຍາຍ​ປະຊາທິປະ​ໄຕ​ສັງຄົມ​ນິຍົມ

ທີ​ໜຶ່ງ, ສືບ​ຕໍ່​ເສີມ​ຂະ​ຫຍາ​ຍປະຊາທິປະ​ໄຕ​ຢ່າງ​ກວ້າງຂວາງ​ຢູ່​ໃນ​ພັກ.

​ເພື່ອ​ເສີມ​ຂະຫຍາຍ​ປະຊາທິປະ​ໄຕ​ຢູ່​ໃນ​ພັກ ຮຽກຮ້ອງ​ໃຫ້​ບັນດາ​ຄະນະ​ພັກ, ພະນັກງານ ສະມາຊິກ​ພັກ​ທຸກຄົນ, ​ໂດຍ​ສະ​ເພາະ​ຜູ້​ເປັນ​ຫົວໜ້າ ຕ້ອງ​​ເຊື່ອມ​ຊຶມ​ຢ່າງ​ເລິກ​ເຊິ່ງ, ຮັບ​ຮູ້​ຢ່າງ​ຄົບ​ຖ້ວນ​ແລະ​ຮອບດ້ານ ​ກ່ຽວ​ກັບທັດສະນະ​ແລະ​ແນວທາງ​ຂອງ​ພັກ​ ໃນ​ການ​ເສີມ​ຂະຫຍາຍ​ປະຊາທິປະ​ໄຕ; ພ້ອມ​ກັນ​ນັ້ນ, ຍູ້​ແຮງ​ວຽກ​ງານ​ສະຫຼຸບ​ສັງ​ລວມພຶດຕິ​ກຳ​ແລະ​ຄົ້ນຄວ້າ​ທິດ​ສະ​ດີ ກ່ຽວ​ກັບ​ການ​ເສີມ​ຂະຫຍາຍ​ປະຊາທິປະ​ໄຕ; ​ແກ້​ໄຂ​ເປັນ​ຢ່າງ​ດີ​ສາຍ​ພົວພັນ​ອິນ​ຊີລະຫວ່າງ “ພັກ​ນຳພາ, ລັດ​ຄຸ້ມ​ຄອງ, ປະຊາຊົນ​ເປັນ​ເຈົ້າ”; ສ້າງ​ເງື່ອນ​ໄຂ​ທີ່​ຈຳ​ເປັນ​ແລະ​ພຽງພໍ​ ເພື່ອ​ໃຫ້​ປະຊາຊົນ​ເປັນ​ເຈົ້າຂອງ​ຢ່າງ​ແທ້​ຈິງ ​ແລະມີ​ປະສິດທິ​ຜົນ. ສືບ​ຕໍ່​ເພີ່ມ​ເຕີມ​ຂໍ້​ກຳນົດ, ກົດ​ລະບຽບ​ກ່ຽວ​ກັບ​ປະຊາທິປະ​​ໄຕ ​ເພື່ອ​ປະຕິບັດ​ເປັນ​ເອກະ​ພາບ​ໃນ​ທົ່ວ​ພັກ. ກ່ອນ​ອື່ນ​ໝົດ, ກຳນົດ​ແຈ້ງ​ກວ່າ​ອີກ ​ກ່ຽວ​ກັບ ພັກ​ຮັບ​ໃຊ້​ປະຊາຊົນ, ຍອມຮັບ​ການ​ຕິດຕາມ​ກວດກາ​ຂອງ​ປະຊາຊົນ, ຮັບຜິດຊອບ​ຕໍ່ປະຊາຊົນກ່ຽວ​ກັບ​ການ​ຕັດສິນ​ຕົກລົງ​ຂອງ​ພັກ. ​ເພີ່ມ​ເຕີມ​ຂໍ້​ກຳນົດ​ກ່ຽວ​ກັບ​ການ​ເສີມ​ຂະ​ຫຍາ​ຍປະຊາທິປະ​ໄຕ​ໃນວຽກງານພະນັກງານ ​ໄປ​ຄຽງ​ຄູ່​ກັບ​ການ​ຄວບ​ຄຸມ​ອຳນາດ​ໃນ​ວຽກ​ງານພະນັກງານ. ພັກ​ນຳພາ​ວຽກ​ງານ​ພະນັກງານ​ແລະ​ການ​ຄຸ້ມ​ຄອງ​ພະນັກງານ​ຢ່າງ​ເປັນ​ເອກະ​ພາບ. ຮັບ​ປະ​ກັນ​ຫຼັກການ​ລວມສູນ​ປະຊາທິປະ​ໄຕ, ການ​ຕັດ​ສິນ​ຕົກລົງ​ທຸກ​ຢ່າງ​ກ່ຽວ​ກັບ​ວຽກ​ງານ​ພະນັກງານ ຕ້ອງ​ໄດ້​ປຶກສາ​ຫາລື​ລວມໝູ່​ ແລະ ​ຕັດສິນຕົກລົງ​ໂດຍ​ສ່ວນ​ໃຫຍ່. ​ເປີດ​ເຜີຍ, ​ໂປ່​ງ​ໃສກ່ຽວ​ກັບຄາດໝາຍ​ແລະ​ແຜນການ​ຮັບ​ສະໝັກ, ການ​ສຶກສາ​​ຝຶກ​ອົບຮົມ​ພະນັກງານ, ການ​ສອບ​ເສ​ງ​ເພື່ອ​ເລື່ອນ​ຊັ້ນ ​ເລື່ອນຕຳ​ແໜ່​ງ, ການ​ພິຈາລະນາ​ເພື່ອ​​ໃຫ້​ກຽດ​ຕຳ​ແໜ່​ງ​ການ​ແຂ່ງຂັນ, ການ​ພິຈາລະນາ​ເພື່ອ​ຍົກ​ລະດັບ; ມາດຕະຖານ, ​ເງື່ອນ​ໄຂ, ຈຳນວນ, ​ໂຄງ​ປະກອບ, ຂະ​ບວນການ​ໝູນວຽນ ຍົກຍ້າຍ ​ແຕ່ງ​ຕັ້ງ​ພະນັກງານ, ​ແນະນຳ​ຜູ້​ສະໝັກ. ປະຕິບັດການ​ປ່ອນ​ບັດ​ລັບ ສຳລັບ​ເນື້ອ​ໃນວຽກ​ງານ​ພະນັກງານ​ທີ່​ຕ້ອງການ​ລົງ​ຄະ​ແນນ​ສຽງ, ມີ​ກົດ​ລະບຽບ​ການ​ແຂ່ງຂັນ​ແບບ​ສົດ​ໃສ​ໃນ​ວຽກ​ງານ​ພະນັກງານ. ​ພະນັກງານທຸກ​ຄົນ​ທີ່​ມີ​ຄົບ​ເງື່ອນ​ໄຂ​ແລະ​ມາດຕະຖານ​ໃນ​ແຜນ​ກຳນົດ ລ້ວນ​ແຕ່​ມີ​ໂອກາດ​ເທົ່າ​ກັນ ​ເພື່ອ​ສະ​ແດງຄຸນ​ສົມບັດ​ແລະຄວາມ​ສາມາດ​ຂອງ​ຕົນ​ໃນ​ການຄັດ​ເລືອກ, ຮັບ​ສະໝັກ​ເຂົ້າ​ໃນ​ຕຳ​ແໜ່​ງຜູ້ນຳ ຜູ້ຄຸ້ມ​ຄອງ​ບໍລິຫານ. ດຳ​ເນີນການ​ເລືອກ​ຕັ້ງ​ດ້ວຍ​ລາຍ​ຊື່​ທີ່ມີ​ຈຳນວນ​ເຫຼືອ, ​ແຕ່ງ​ຕັ້ງ​ພະນັກງານ​ແບບ​ມີ​ການ​ແຂ່ງຂັນ, ​ໂດຍ​ຜ່ານ​ການ​ສອບ​ເສັງ ຫຼື​ຜ່ານ​ການ​ສະ​ເໜີ​ໂຄ​ງການປະຕິບັດ​ງານ. ຄຽງຄູ່​ກັບ​ການ​ເສີມ​ຂະຫຍາຍ​ປະຊາທິປະ​ໄຕ​ໃນ​ວຽກ​ງານ​ພະນັກງານ ຕ້ອງ​ມີ​ຂໍ້​ກຳນົດ​ກ່ຽວ​ກັບ​ການ​ກວດກາ, ຕິດຕາມ​ກວດກາການຕໍ່​ການພົວພັນ​ຜົນ​ປະ​ໂຫຍ​ດ​ໃນ​ວຽກ​ງານ​ພະນັກງານ ​ເພື່ອ​ໃຫ້​ວຽກ​ງານ​ພະນັກງານມີ​ຄວາມ​ເປັນ​ທຳ​ແລະ​ພາວະ​ວິ​ໄສ​ຢ່າງ​ແທ້​ຈິງ. ສືບ​ຕໍ່​ປະຕິບັດ​ເປັນ​ຢ່າງ​ດີ ລະບອບ​ກົມ​ການ​ເມືອງ​ລາຍ​ງານ​ວຽກ​ງານ​ແລະ​ການ​ເຄື່ອນ​ໄຫວ​ຂອງ​ຕົນ ຕໍ່​ກອງ​ປະຊຸມ​ຄະນະ​ບໍລິຫານ​ງານ​ສູນ​ກາງ; ຄະນະ​ປະຈຳ​ລາຍ​ງານ​ວຽກ​ງານ​ແລະ​ການ​ເຄື່ອນ​​ໄຫວ​ຂອງ​ຕົນ ຕໍ່​ກອງ​ປະຊຸມ​ຄະນະ​ພັກ; ຄະນະ​ພັກ​ລາຍ​ງານ​ຕໍ່​ອົງຄະ​ນະ​ພັກ ຫຼື​ອົງການ​ທີ່​ເລືອກ​ຕັ້ງ​ຕົນ. ຍົກ​ສູງ​ຄຸນ​ນະພາ​ບ​ແລະ​ປະສິດທິ​ຜົນ​ຂອງ​ການ​ເຄື່ອນ​ໄຫວຕັ້ງ​ຄຳ​ຖາມ​ແລະ​ຕອບ​ຄຳ​ຖາມ​ໃນຊີວິດ​ພັກ, ​ເຮັດ​ໃຫ້ການ​ເຄື່ອນ​ໄຫວ​ນີ້​ເປັນ​ປົກກະຕິ. ເພື່ອ​ປະຕິບັດ​ປະຊາທິປະ​ໄຕ​ຢູ່​ໃນ​ພັກ ຮຽກຮ້ອງ​ໃຫ້​ສະມາຊິກ​ພັກ​ແຕ່ລະຄົນ​ ຕ້ອງປະຕິບັດ​ຢ່າງ​ເຄັ່ງ​ຄັດ​ຕາມ​ຂໍ້​ກຳ​ນົດ​ເລກທີ 08-Qđi/TW, ວັນ​ທີ 25-10-2018, ຂອງ​ກົມ​ການ​ເມືອງ “ກ່ຽວ​ກັບ​ຄວາມ​ຮັບຜິດຊອບ​ໃນ​ການ​ເປັນ​ແບບຢ່າງ​ຂອງ​ພະນັກງານ ສະມາຊິກພັກ, ກ່ອນອື່ນໝົດແມ່ນ ກຳມະການກົມການເມືອງ, ກຳມະການຄະນະເລຂາທິການ, ກຳມະການຄະນະບໍລິຫານງານສູນກາງພັກ". ​ໃນ​ຫຼາຍ​ເນື້ອ​ໃນກ່ຽວ​ກັບ​ການ​ເປັນ​ແບບຢ່າງ​ນັ້ນ ຕ້ອງ​ເອົາ​ໃຈ​ໃສ່​ເຖິງ​ການ​ເປັນ​ແບບຢ່າງ​ໃນ​ການ​ປະຕິບັດ​ກົດ​ລະບຽບປະຊາທິປະ​ໄຕຢູ່​ຮາກ​ຖານ.

ທີ​ສອງ, ພັກ​ນຳພາ​ລັດ​ໃນ​ການ​ຫັນ​ແນວທາງ ທັດສະນະ​ຂອງ​ພັກ​ກ່ຽວ​ກັບການ​ເສີມ​ຂະຫຍາຍ​ປະຊາທິປະ​ໄຕ ​ເປັນ​ນະ​ໂຍບາຍກົດໝາຍ ​ແລະ ​ເພີ່ມ​ທະວີ​ການ​ກໍ່ສ້າງ ປັບປຸງບູລະນະລັດ​ແຫ່ງ​ອຳນາດ​ກົດໝາຍ​ສັງຄົມ​ນິຍົມ ຂອງ​ປະຊາຊົນ ​ໂດຍ​ປະຊາຊົນ ​ແລະ​ເພື່ອປະຊາຊົນ.

ບົນ​ພື້ນຖານໝູນ​ໃຊ້​ບັນດາ​ຂໍ້​ກຳນົດ​ຂອງ​ລັດຖະທຳ​ມະນູນ​ປີ 2013 ​ແລະ​ ໝູນ​ໃຊ້​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6 ສະ​ໄໝ​ທີ XII “ກ່ຽວ​ກັບ​ການ​ສືບ​ຕໍ່​ການ​ປ່ຽນ​ແປງ​ໃໝ່, ຈັດແຈງໂຄງປະກອບການຈັດຕັ້ງຂອງລະບົບການເມືອງໃຫ້ກະທັດລັດ, ເຄື່ອນໄຫວຢ່າງມີປະສິດທິພາບ ແລະມີປະສິດທິຜົນ" ​ເພື່ອ​ປະຕິບັດ​ການ​ປ່ຽນ​ແປງ​ໃໝ່​ການຈັດ​ຕັ້ງ​ແລະການ​ເຄື່ອນ​ໄຫວ ຂອງ​ສະພາ​ແຫ່ງ​ຊາດ, ລັດຖະບານ. ລະບົບ​ຈັກ​ຕ້ອງ​ໄດ້​ຈັດ​ຕັ້ງ​ໃຫ້​ກະທັດ​ລັດ​ເບົາບາງ, ຈະ​ແຈ້ງ​ທາງ​ດ້ານ​ພາລະ​ໜ້າ​ທີ່, ສິດ​ຂອບ​ເຂດ ​ແລະ ຄວາມ​ຮັບຜິດຊອບ; ການ​ຈັດ​ຕັ້ງ​ແລະການເຄື່ອນ​ໄຫວຂອງ​ກົງຈັກ​ລັດ ​ແຕ່​ສູງ​ການ​ຮອດ​ທ້ອງ​ຖິ່ນ ຕ້ອງ​ສ້າງ​ເງື່ອນ​ໄຂ​ໃຫ້​ປະຊາຊົນ​ເຂົ້າ​ເຖິງ​ໄດ້, ສົມ​ທະ​ນາ​ງ່າຍ, ກວດກາ​ແລະ​ຕິດຕາມ​ກວດກາ​ງ່າຍ; ລະດົມ​ຄວາມ​ສາມາດ, ສະຕິ​ປັນຍາ, ການ​ປະດິດ​ສ້າງ​ຂອງ​ປະຊາຊົນ​ໄດ້ ​ເພື່ອ​ປະ​ກອບ​ເຂົ້າ​ໃນ​ການ​ຄຸ້ມ​ຄອງ​ລັດ​ແລະ​ສັງຄົມ. ລັດ​ຕ້ອງ​ຮັບປະກັນ​ສິດ​ເປັນ​ເຈົ້າ​ແລະ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງ​ປະຊາຊົນ​ຢ່າງ​ແທ້​ຈິງ, ​ໂດຍ​ສະ​ເພາະ​ແມ່ນ ​ສິດທິ​ໃນ​ການ​ເຂົ້າ​ຮ່ວມ​ການ​ກໍ່ສ້າງ​ອຳນາດ​ການ​ປົກຄອງ, ຄັດ​ເລືອກ​ຜູ້​ທີ່​ເປັນ​ຕົວ​ແທນ​ໃຫ້​ແກ່​ຕົນ, ​ແລະ ກຳມະສິດ​ຊັບ​ສິນ​ຕາມ​ກົດໝາຍ. ​ເປີດ​ກວ້າງ​ການ​ສົນທະນາ​ລະຫວ່າງ​ລັດ​ກັບ​ປະຊາຊົນ​ແລະ​ວິ​ສາ​ຫະກິດດ້ວຍ​ຫຼາຍ​ຮູບ​ການ, ​ເພີ່ມ​ທະວີ​ຄວາມ​ຮັບຜິດຊອບ​ອະທິບາຍ​ລາຍ​ງານ ​ແລະຮັບ​ຟັງ​ປະຊາຊົນ. ​ເພີ່ມ​ທະວີ​ປະຊາທິປະ​ໄຕ​ຢູ່​ຮາກ​ຖານ, ​ເປີດ​ກວ້າງ​ບັນດາ​ຮູບ​ການ​ປະຊາທິປະ​ໄຕ​ໂດຍ​ກົງ ​ເພື່ອ​ໃຫ້​ປະຊາຊົນ​ເຂົ້າ​ຮ່ວມ​ວຽກ​ງານ​ຂອງ​ລັດຢ່າງ​ແທດ​ຈິງ, ​ເໝາະ​ສົມ. ບັນດາ​ອົງການ​ບໍລິຫານ​ລັດ, ອຳນາດ​ການ​ປົກຄອງ​ຂັ້ນ​ຕ່າງໆ ສືບ​ຕໍ່​ຍົກ​ສູງ​ປະສິດທິພາບ​ແລະ​ປະສິດທິ​ຜົນ​ຂອງ​ການ​ຄຸ້ມ​ຄອງ​ລັດ, ຮັບປະກັນວ່າ​ ນະ​ໂຍບາຍ​ແລະກົດໝາຍ​ໄດ້​ຮັບ​ການ​ປະຕິບັດຢ່າງ​ມີ​ປະສິດທິ​ຜົນ. ສຸມ​ໃສ່​ຊີ້​ນຳ​ແລະ​ຄຸ້ມ​ຄອງ​ການ​ປະຕິບັດ​ ບັນດາ​ເປົ້າ​ໝາຍ​ພັດທະນາ​ເສດຖະກິດ-ສັງຄົມ, ຍົກ​ສູງ​ຊີວິດ​ການ​ເປັນ​ຢູ່​ດ້ານ​ວັດ​ຖະ​ແລະ​ຈິດ​ໃຈ​ຂອງ​ປະຊາຊົນ​ຢ່າງ​ບໍ່​ຢຸດ​ຢັ້ງ, ປະຕິບັດ​ນະ​ໂຍບາຍຄວາມ​ໝັ້ນຄົງ​ທາງ​ສັງຄົມ​ເປັນຢ່າງ​ດີ. ຍູ້​ແຮ​ງການ​ປະຕິ​ຮູບ​ການ​ບໍລິຫານ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ ເພື່ອ​ໃຫ້​ປະຊາຊົນ​ປະຕິບັດລະບຽບ​ການ​ບໍລິຫານ.

ທີ​ສາມ, ​ແນວ​ໂຮມ​ປະ​ເທດ​ຊາດ​ຫວຽດນາມ​ ແລະ​ ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ເສີມ​ຂະຫຍາຍ​ບົດບາດທີ່​ຕັ້ງ​ຂອງ​ຕົນ ຕາມຂໍ້​ກຳນົດຂອງ​ພັກ​ແລະຕາ​ມ​ເອກະສານ​ກົດໝາຍ ​ເພື່ອ​ປະຕິບັດ​ພາລະ​ໜ້າ​ທີ່​ຕິ​ດຕາມ​ກວດກາ​ແລະ​ວິຈານ​ສົງ​ຄົມ ​ໃຫ້​ໄດ້​ເປັນ​ຢ່າງ​ດີ, ​ໂດຍ​ສະ​ເພາະ​​ແມ່ນ​ ບັນຫາທີ່​ກ່ຽວຂ້ອງ​ເຖິງ​ການ​ເສີມ​ຂະຫຍາຍ​ປະຊາທິປະ​ໄຕ, ​ເຖິງ​ສິດທິ​ແລະ​ຜົນ​ປະ​ໂຫຍ​ດຂອງ​ສະມາຊິກ​ແນວ​ໂຮມ​ແລະ​ສະມາຊິກ​ອື່ນໆ.

ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ​ ປະຕິບັດສິດ​ຕິດຕາມ​ກວດກາ​ແລະ​ວິ​ຈານ​ສັງຄົມ​ຂອງ​ຕົນ​ໃນ​ຫຼາຍ​ຂົງ​ເຂດ, ​ໃນ​ນັ້ນ​ມີ​ການ​ເສີມ​ຂະຫຍາຍ​ປະຊາທິປະ​ໄຕ; ທັງ​ຂົນຂວາຍ, ​ເຕົ້າ​ໂຮມ, ປຸກລະດົມ​ກຳລັງ​ໃຈ​ປະຊາຊົນ​ແລະສະມາຊິກ​ຂອງ​ຕົນ ​ເພື່ອ​ປະຕິບັດ​ໜ້າ​ທີ່​ພັດທະນາ​ເສດຖະກິດ-ສັງຄົມ, ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ​ໃຫ້​ໄດ້​ເປັນ​ຢ່າງ​ດີ, ທັງ​ເຂົ້າ​ຮ່ວມການ​ກໍ່ສ້າງ​ພັກ, ກໍ່ສ້າງ​ອຳນາດ​ການ​ປົກຄອງ​ໃຫ້​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ. ປຸກລະດົມ​ນັກຮຽນ​ຮູ້, ຜູ້​ຊົງ​ຄຸນ​ວຸດ​ທິ, ຜູ້​ຊ່ຽວຊານ​ແລະນັກວິທະຍາສາດ ​ໃຫ້​ເຂົ້າ​ຮ່ວມ​ແລະປະກອບ​ຄວາມ​ຄິດ​​ເຫັນກໍ່ສ້າງ​ເອກະສານທາງ​ກົດໝາຍ, ກໍ່ສ້າງ​ໂຄງການ​ພັດທະນາ​ເສດຖະກິດ-ສັງຄົມ​ທີ່​ສຳຄັນ​ຂອງ​ປະ​ເທດ. ​ເກັບກຳ​ຢ່າງ​ທັນ​ການ ຄຳ​ແນະນຳ, ຂໍ້​ສະ​ເໜີ, ຄວາມ​ປາຖະໜາທີ່​ສົມ​ເຫດ​ສົມ​ຜົນ​ ຂອງສະມາຊິກ, ຂອງ​ປະຊາຊົນ​ແລະ​ຜູ້​ມີ​ສິດ​ເລືອກ​ຕັ້ງ ​ເພື່ອ​ສ່ອງ​ແສງ​ໃຫ້​ພັກ​ແລະ​ລັດ​ພິຈາລະນາ​ແລະ​ຊີ້​ນຳ​ການ​ແກ້​ໄຂ. ​ເຂົ້າ​ຮ່ວມ​ໃນ​ການ​ຄົ້ນ​ເຜີຍ, ຄັດ​ເລືອກ, ​ແນະນຳ​ຜູ້​ທີ່​ມີ​ຄຸນສົມບັດ​ ມີ​ຄວາມ​ສາມາດ, ສົມຄວນ​ທີ່​ຈະ​ໄດ້​ເປັນ​ຕົວ​ແທນ​ຂອງ​ປະຊາຊົນ​ໃນ​ສະພາ​ແຫ່ງ​ຊາດ ​ແລະ ສະພາ​ປະຊາຊົນ​ຂັ້ນ​ຕ່າງໆ. ພາຍ​ໃຕ້​ການ​ນຳພາ​ຂອງ​ຄະນະ​ພັກ, ​ເພີ່ມ​ທະວີ​ພາລະ​ໜ້າ​ທີ່​ຕິດຕາມ​ກວດກາຢ່າງ​ມີ​ຈຸດ​ໜັກ​ໃຈກາງ ​ໃຫ້​ບັນດາ​ອົງການ​ບໍລິຫານ​ລັດ, ອຳນາດ​ການ​ປົກຄອງ​ຂັ້ນຕ່າງໆ ​ແລະ​ຖັນ​ແຖວ​ພະນັກງານ​ສະມາຊິກ​ພັກ, ​ໂດຍ​ສະ​ເພາະ​ແມ່ນ​ຜູ້​ເປັນ​ຫົວໜ້າ. ​ໃນ​ສະພາບ​ການ​ປະຈຸ​ບັນ ຄວນ​ເພີ່ມ​ທະວີ​ການ​ຕິດຕາມ​ກວດກາ​ການ​ນຳພາ​ແລະ​ປະຕິບັດ​ກົດ​ລະບຽບປະຊາທິປະ​ໄຕ​ຢູ່​ຮາກ​ຖານ, ການຈັດ​ຕັ້ງ​ການ​ຕ້ອນຮັບ​ພົນລະ​ເມືອງ, ການ​ສົນທະນາ​ກັບ​ພົນລະ​ເມືອງ​ ແລະ ການ​ແກ້​ໄຂຄຳ​ຮ້ອງທຸກ, ຈົດໝາຍ​ແລະ​ຄຳ​ກ່າວ​ຫາ, ຮ້ອງ​ຟ້ອງ​ຂອງ​ພົນລະ​ເມືອງ​ຕໍ່​ອຳນາດ​ການ​ປົກຄອງ​ທຸກ​ຂັ້ນ. ​ເພີ່ມ​ທະວີ​ວຽກ​ງານ​ການ​ສຶກສາ​ອົບຮົມ, ຍົກ​ສູງ​ຄຸນສົມບັດສິນ​ທຳ ຈັນ​ຍາ​ບັນ​​ໃນ​ການ​ປະຕິບັດ​ໜ້າ​ທີ່ ​ແລະ ຄວາມ​ຮັບຜິດຊອບ​ຂອງພະນັກງານລັດຖະກອນ​ຕໍ່​ກັບ​ປະຊາຊົນ.

ທີ​ສີ່, ​ເສີມ​ຂະຫຍາຍ​ບົດບາດ​ແລະ​ຄວາມ​ຮັບຜິດຊອບ​ ຂອງ​ຫົວໜ້າ​ຄະນະ​ພັກ; ອຳນາດ​ການປົກຄອງ​ຂັ້ນ​ຕ່າງໆ ​ແລະ​ບັນດາ​ອົງການ, ໜ່ວຍ​ງານ​ຂອງ​ລະບົບ​ການ​ເມືອງ​ທັງ​ໝົດ ກ່ຽວ​ກັບ​ການ​ເສີມ​ຂະຫຍາຍ​ປະຊາທິປະ​ໄຕສັງຄົມ​ນິຍົມ.

​ໃນ​ສະພາບ​ການ​ຊຸກຍູ້​ການ​ພັດທະນາ​ເສດຖະກິດຕະຫຼາດ​ກຳ​ນັດ​ທຶດສັງຄົມ​ນີຍົມ ​ແລະ​ການເປັນ​ເຈົ້າ​ການ​ເຊື່ອມ​ໂຍງ​ສາກົນນັ້ນ, ໜຶ່ງ​ໃນ​ບັນດາ​ປັດ​ໄຈ​ຕັດສິນ​ຄຸນ​ນະພາ​ບ​ແລະ​ປະສິດທິ​ຜົນ​ຂອງ​ການ​ເສີມ​ຂະຫຍາຍ​ປະຊາທິປະ​ໄຕ​ແມ່ນ ​ບົດບາດ​ຂອງຫົວໜ້າ​ຄະນະ​ພັກ, ອຳນາດ​ການ​ປົກຄອງ, ສຳນັກງານ ​ອົງການ​ໃນ​ລະບົບ​ການ​ເມືອງ. ຢູ່​ບ່ອນ​ໃດ​ທີ່ຜູ້​ເປັນ​ຫົວໜ້າ​ມີ​ຄວາມ​ຮັບ​ຮູ້​ຢ່າງ​ເລິກ​ເຊິ່ງ​ແລະຄົບ​ຖ້ວນ ​ກ່ຽວ​ກັບສິດ​ເປັນ​ເຈົ້າ​ຂອງ​ປະຊາຊົນ, ກ່ຽວ​ກັບ​ກົດ​ລະບຽບ​ປະຊາທິປະ​ໄຕ​ຢູ່​ຮາກ​ຖານ ​ແລະ ​ເປັນ​ແບບຢ່າງ​ກ່ຽວ​ກັບ​ຄຸນສົມບັດ, ​ແບບ​ແຜນ​ດຳລົງ​ຊີວິດ, ກ່ຽວ​ກັບ​ຄວາມ​ເຄົາລົບ​ກົດໝາຍ ​ແມ່ນ​ຢູ່​ບ່ອນ​ນັ້ນ ປະຊາທິປະ​ໄຕ​ໄດ້ຮັບການປະຕິບັດ​​ເປັນ​ຢ່າງ​ດີ. ​ເລຂາ​ຄະນະ​ພັກ​ແຕ່​ລະສະ​ຫາຍ​ຈາກ​ສູນ​ກາງ​ເຖິງ​ຮາກ​ຖານ, ຜູ້ນຳ​ທີ່​ສຳຄັນ​ຂອງ​ອົງການ​ລັດ, ຂອງອຳນາດ​ການ​ປົກຄອງ​ຂັ້ນ​ຕ່າງ​ໆ, ຂອງສຳນັກງານ ໜ່ວຍ​ງານ ຕ້ອງ​ເສີມ​ຂະຫຍາຍ​ປະຊາທິປະ​ໄຕ​ໃນ​ພັກ​ຢ່າງ​ແທ້​ຈິ​ງ, ຕ້ອງ​ເປີດ​ເຜີຍ ​ໂປ່​ງ​ໃສ​ໃນ​ການບໍລິຫານ​ງານ​ຂອງ​ອຳນາດ​ການ​ປົກຄອງ, ​ເຊີດ​ຊູ​ບົດບາດ, ລັກສະນະ​ນຳ​ໜ້າ, ​ເປັນ​ແບບຢ່າງ​ຂອງ​ພະນັກງານ ສະມາຊິກ​ພັກ, ຕ້ານ​ພະຍາດ​ອາດຍາ​ສິດ, ສວຍ​ໃຊ້​ອຳນາດ, ສໍ້​ລາດ​ບັງ​ຫຼວງ, ​ໃຊ້ຈ່າຍ​ຟຸມ​ເຟືອຍ ​ແລະ ບັນດາ​ການ​ກະທຳ​ທີ່​ລະ​ເມີດ​ສິດ​ເປັນ​ເຈົ້າ​ຂອງ​ຂອງ​ປະຊາຊົນ. ​ໃນ​ຄວາມ​ເປັນ​ຈິງ ການ​ຄັດ​ເລືອກ​ແລະ​ແຕ່ງ​ຕັ້ງ​ຫົວໜ້າທີ່​ມີ​ຄຸນ​ນະ​ທຳ ມີ​ຄວາມ​ສາມາດ, ຮູ້​ໝູນ​ໃຊ້ຜົນສຳ​ເລັດ​ຂອງ​ວິທະຍາສາດ​ແລະ​ເຕັກ​ໂນ​ໂລ​ຊີ​ຢ່າງ​ປະດິດ​ສ້າງ ​ເຂົ້າ​ໃນ​ການ​ນຳພາ ຄຸ້ມ​ຄອງ, ຮູ້​ສ້າງ​ສະພາບ​ແວດ​ລ້ອມ​ປະຊາທິປະ​ໄຕ​ເພື່ອ​ເສີມ​ຂະຫຍາຍ​ສະຕິ​ປັນຍາ, ຄວາມ​ນຶກ​ຄິດ​ປະດິດ​ສ້າງ, ສ່ວນ​ປະກອບ​ຂອງ​ພະນັກງານ ລັດຖະກອນ ​ແມ່ນ​ມີ​ຄວາມ​ສຳຄັນ​ທີ່​ສຸດ ຕິດ​ພັນກັບຜົນສຳ​ເລັດ​ຂອງ​ການ​ປະຕິບັດ​ໜ້າ​ທີ່​ການ​ເມືອງ. ອີງຕາມ​ກົດ​ລະບຽບ​ຂອງ​ພັກ, ຫົວໜ້າ​ທຸກ​ຂັ້ນ ທຸກຂະ​ແໜງ​ການ​ຈະຕ້ອງຕ້ອນຮັບ​ພົນລະ​ເມືອງ, ສົນທະນາ​ກັບ​ພົນລະ​ເມືອງ​ໂດຍ​ກົງ​ເປັນ​ໄລຍະ; ມີ​ແຕ່​ເຮັດ​ຄື​ແນວ​ນັ້ນ​ຈຶ່ງ​ກຳ​ໄດ້​ ແລະ​ຊີ້​ນຳແກ້​ໄຂຄຳ​ສະ​ເໜີ, ຂໍ້​ສະ​ເໜີ​ແນະ​ທີ່​ຖືກ​ຕ້ອງ​ແລະ​ຖືກ​ກົດໝາຍຂອງ​ປະຊາຊົນ​ໄດ້​ຢ່າງ​ທັນ​ການ; ພ້ອມ​ກັນ​ນັ້ນ, ຊີ້​ນຳ​ການ​ແກ້​ໄຂ​ໃບ​ຮ້ອງທຸກ, ຈົດໝາຍ​ກ່າວ​ຫາ ຮ້ອງ​ຟ້ອງ​ຂອງ​ພົນ​ລະ​ເມືອງ, ບໍ່​ປະ​ໃຫ້​ເກີດ “ຈຸດ​ຮ້ອນ” ​ແລະ​ເກີດ​ກໍ​ລະ​ນີຄະດີ​ສັບສົນ ​ແກ່ຍາວ.

ທີ​ຫ້າ, ນຳພາ, ຊີ້​ນຳ​ບັນດາ​ອົງການສື່​ມວນ​ຊົນ​ໃຫ້​ເຮັດ​ວຽກ​ງານ​ໂຄສະນາ​ແລະ​ເຜີຍ​ແຜ່​ແນວທາງ ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ ກ່ຽວ​ກັບ​ການ​ເສີມ​ຂະຫຍາຍ​ປະຊາທິປະ​ໄຕ, ສ້າງ​ການ​ປ່ຽນ​ແປງ​ທາງ​ດ້ານ​ການ​ຮັບ​ຮູ້​​ໃນ​ປະຊາຊົນ​ທຸກ​ຊັ້ນ.

ບັນດາ​ພະ​ຫະນະ​ສື່​ມວນ​ຊົນມີ​ບົດບາດ​ສຳຄັນ​ທີ່​ສຸດ​ໃນ​ການ​​ໂຄສະນາ, ເຜີຍ​ແຜ່​ແນວທາງ ​ແຜນ​ນະ​ໂຍບາຍ ມະຕິ​ຂອງ​ພັກ ​ແລະ ນະ​ໂຍບາຍ ກົດໝາຍ​ຂອງ​ລັດ. ປະຊາຊົນ​ມີ​ຄວາມ​ສົນ​ໃຈ​ທີ່​ສຸດ​ເຖິງ​ການ​ເປີດ​ເຜີນ ​ເຜີຍ​ແຜ່ລະບອບ, ນະ​ໂຍບາຍ​ຕ່າງໆ ທີ່​ກ່ຽວຂ້ອງ​ໂດຍ​ກົງ​ກັບ​ປະຊາຊົນ, ​ເຊັ່ນ ນະ​ໂຍບາຍຄວາມ​ປອດໄພ​ສັງຄົມ (ວຽກ​ເຮັດ​ງານ​ທຳ, ​ແຮງ​ງານ, ​ເງິນ​ເດືອນ, ​ເງິນ​ອຸດ​ໜູນ, ປະກັນ​ໄພ...). ອຳນາດ​ການ​ປົກ​ຄອງຂັ້ນ​ຕ່າງໆ​ ຕ້ອງ​ເປີດ​ເຜີຍ​ເຜີຍ​ແຜ່ຢ່າງ​ກວ້າງຂວາງ​ ໃຫ້​ປະຊາຊົນ​ຮູ້ກ່ຽວ​ກັບ​ບັນດາ​ໂຄງການ​ພັດທະນາ​ເສດຖະກິດ-ສັງຄົມ, ການວາງຜັງ​ເມືອງ, ​ໂຄງ​ສ້າງ​ພື້ນຖານ, ​ແຜນການ​ນຳ​ໃຊ້​ທີ່​ດິນ... ​ເປີດ​ເຜີຍ​ໃຫ້​ປະຊາຊົນ​ຮູ້, ປະຊາຊົນ​ປະກອບ​ຄວາມ​ເຫັນ ​ແລະ ປະຊາຊົນ​ຕິດຕາມ​ກວດກາ​ການຈັດ​ຕັ້ງ​ປະຕິບັດ​ ເມື່ອ​ໄດ້​ຮັບອະນຸມັດ​ຈາກ​ອົງການ​ທີ່​ມີ​ອຳນາດ. ຄະນະ​ພັກ​ແລະ​ອຳນາດ​ການ​ປົກຄອງ​ຂັ້ນ​ຕ່າງໆຈະ​ຕ້ອງ​ເສີມ​ຂະຫຍາຍ​ບົດບາດ​ຂອງ​ໜັງສືພິມ​ແລະ​ພາຫະນະ​ສື່​ມວນ​ຊົນ​ອື່ນ ​ເພື່ອ​ປຸກລະດົມ​ປະຊາຊົນຕໍ່ສູ້​ຢ່າງ​ແຂງ​ແຮງ ​ຕ້ານ​ການ​ສໍ້​ລາດ​ບັງ​ຫຼວງ​ແລະ​ຄວາມ​ຊົ່ວ​ຮ້າຍອື່ນ​ໆ. ​ໃນ​ເງື່ອນ​ໄຂ​ພັກ​ກຳ​ອຳນາດ, ການ​ຕໍ່​ສູ້ກັບ​ປະກົດ​ການ​ທີ່ບໍ່ດີ​ຂອງ​ພະນັກງານ ສະມາຊິກ​ພັກທີ່​ມີ​ຕຳ​ແໜ່​ງມີ​ສິດ​ນັ້ນ ​ແມ່ນ​ຕ້ອງ​​ໃຊ້ອາວຸດ​ສື່​ມວນ​ຊົນ, ຕ້ອງ​ເສີມ​ຂະຫຍາຍ​ບົດບາດ​ເປັນ​ເຈົ້າ​ຂອງ​ຂອງ​ມະຫາຊົນຈຶ່ງ​ມີ​ປະສິດທິພາບ, ປະສິດທິ​ຜົນ. ຈາກ​ນັ້ນ, ຕໍ່ສູ້​ປະຕິບັດ​ປະຊາທິປະ​ໄຕ, ຕຳ​ໜິວິພາກ​ຢ່າງ​ທັນ​ການ​ຕໍ່ປະກົດ​ການ​ສຸດ​ຂົ້ວ, ສວຍ​ໃຊ້​ປະຊາທິປະ​ໄຕ​ເພື່ອ​ເສກ​ສັນ​ປັ້ນ​ແຕ່ງ, ປຸກ​ກະ​ຕຸ້ນ, ​ແກ່ດຶງຊັກ​ຊວນ​ມວນ​ຊົນຮັບ​ໃຊ້​ໃຫ້​ແກ່ “ຜົນ​ປະ​ໂຫຍ​ດໝູ່​ພວກ”, ຜົນປະ​ໂຫຍ​ດສ່ວນ​ຕົວ...; ພ້ອມ​ກັນ​ນັ້ນ, ຕ້ອງ​ກຳຈັດ, ຢຸດຕິການ​ກະທຳ​ທີ່​ມີ​ລັກສະນະ​ປະຊາທິປະ​ໄຕ​ຮູບ​ນອກ​ໃນ​ບັນດາ​ຂົງ​ເຂດ​ຂອງ​ຊີວິດ​ສັງຄົມ./.

​ໂດຍ ຫງວຽນ​ເຖຈຸ​ງ

ກຳມະການ​ສະພາ​ທິດ​ສະ​ດີ​ສູນ​ກາງ

-----------------------------------------

(1) ​ເອກະສານ​ຂອງ​ພັກ: ຄົບ​ຊຸດ, ສພຈ. ຊື້​ເທິ​ດ, ຮ່າ​ໂນ້ຍ, 1987, ​ເຫຼັ້ມ 47, ໜ້າ 362, 363.

(2) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XI, ສພຈ. ການ​ເມືອງ​ແຫ່ງ​ຊາດ - ຊື້​ເທິ​ດ, ຮ່າ​ໂນ້ຍ, 2011, ໜ້າ 238 - 239.

(3) ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງ​ວ່າການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 217.

- ບົດ​ນີ້​ໄດ້​ລົງ​ພິມ​ໃນວາລະສານ​ກອມ​ມູນິດ ສະບັບ​ທີ 925 (​ເດືອນ​ກັນຍາ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ