ວັນອາທິດ, 31/5/2020
ເສີມຂະຫຍາຍຫຼັກການເຈລະຈາປະຊາທິປະໄຕ, ຍົກສູງຄຸນນະພາບແລະປະສິດທິຜົນ ຂອງແນວໂຮມປະເທດຊາດຫວຽດນາມ, ເພື່ອປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸດຕິທຳ ແລະ ສີວິໄລ
23/1/2020 21:32' ສົ່ງ ພິມ
ບັນດາຜູ້ແທນລົງຄະແນນສຽງຮັບຮອງຮ່າງລາຍຊື່ເຈລະຈາແຕ່ງຕັ້ງ ຄະນະກຳມະການສູນກາງ ແນວໂຮມປະເທດຊາດຫວຽດນາມຊຸດທີ IX (ພາບ: TTXVN)

1- ດ້ວຍ​ລັກສະນະ​ຂອງ​​ພັນທະ​ພາບທາງ​ການ​ເມືອງ​ແລະສະຫະພັນ​ສະໝັກ​ໃຈ ​ຂອງອົງການ​ການ​ເມືອງ, ຂອງ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ, ອົງການ​ສັງຄົ​ມ, ບຸກຄົນ​ເປັນ​ຕົວ​ແທນ​ຂອງ​ບັນດາ​ຊົນ​ຊັ້ນ ຊັ້ນ​ຄົນ​ໃນ​ສັງຄົມ, ຊົນ​ເຜົ່າ, ສາສະໜາ, ຊາວ​ຫວຽດນາມ​ອາ​ໄສ​ຢູ່​ຕ່າງປະ​ເທດ, ​ເພາະສະ​ນັ້ນ ຫຼັກການຕົ້ນ​ຕໍ່​ໃນ​ການຈັດ​ຕັ້ງ​ແລະ​ການ​ເຄື່ອນ​ໄຫວ​ຂອງແນວ​ໂຮມ​ປະ​ເທດ​ຊາດ​ຫວຽດນາມ​ແມ່ນ​ ເຈລະຈາ​ປະຊາທິປະ​ໄຕ, ປະສານ​ສົມທົບ​ແລະ​ການກະທຳ​ເປັນ​ເອກະ​ພາ​ບລະຫວ່າງ​ສະມາ​ຊິກ. ​ໂດຍມີ​ຄວາມຮັບ​ຮູ້ຢ່າງ​ຈະ​ແຈ້ງກ່ຽວ​ກັບຄວາມ​ສຳຄັນ​ຂອງ​ຫຼັກການ​ເຄື່ອນ​ໄຫວ​ຂອງແນວ​ໂຮມ​ປະ​ເທດ​ຊາດ​ຫວຽດນາມ, ເອກະສານ​ຫຼາຍ​ສະບັບຂອງ​ພັກກອມ​ມູນິດ​ຫວຽດນາມ​​ໄດ້ລະບຸn:

“​ໂຄງການ​ການ​ເມືອງ​ກໍ່ສ້າງ​ປະ​ເທດ​ໃນ​ໄລຍະ​ຂ້າມ​ຜ່ານ​ຂຶ້ນ​ສູ່​ລັດ​ທິສັງຄົມ​ນິຍົມ” (ປີ 1991) ​ໄດ້​ຂຽນ​ວ່າ: “​ແນວ​ໂຮມ​ເຄື່ອນ​ໄຫວ​ຕາມ​ຫຼັກການ​ເຈລະຈາ​ປະຊາທິປະ​ໄຕ, ການປະສານ​ສົມທົບ​ແລະ​ການກະທຳ​ເປັນ​ເອກະ​ພາບ​ລະຫວ່າງ​ສະມາ​ຊິກຕາມ​ໂຄງການ​ປະຕິບັດງານ​ຮ່ວມ​ກັນ”.

ມະຕິ​ເລກທີ 07/NQ-TW, ວັນ​ທີ 17-11-1993, ຂອງ​ກົມ​ການ​ເມືອງ, “ກ່ຽວ​ກັບ​ມະຫາສາມັກ​ຄີປວງ​ຊົນ​ທັງ​ຊາດ​ແລະ​ການ​ເພີ່ມ​ທະວີ​ແນວ​ໂຮ​ມ​ເອກະ​ພາບ​ແຫ່ງ​ຊາດ”, ​ໄດ້​ຂຽນ​ວ່າ: “​ແນວ​ໂຮມ​ເຮັດ​ວຽກ​ຕາມ​ຫຼັກການ: ​ເຈລະຈາ​ປະຊາທິປະ​ໄຕ, ຮ່ວມ​ມື​ສະ​ເໝີ​ພາບ, ສາມັກຄີ​ຈິງ​ໃຈ, ​ເຄົາລົບ​ເຊິ່ງກັນ​ແລະ​ກັນ, ປະສານ​ສົມທົບ​ແລະ​ກະທຳ​ເປັນ​ເອກະ​ພາບ​ລະຫວ່າງ​ສະມາຊິກພາຍ​ໃຕ້​​ໂຄງການປະຕິບັດ​ການ​ຮ່ວມ​ກັນ”.

​ເພື່ອ​ຫັນ​ທັດສະນະ​ຂອງ​ພັກ​ກ່ຽວ​ກັບແນວ​ໂຮມ​ປະ​ເທດ​ຊາດ​ຫວຽດນາມ​ເປັນ​ນິຕິ​ກຳ, ມາດຕາ 4 ກົດໝາຍ​ວ່າ​ດ້ວຍແນວ​ໂຮມ​ປະ​ເທດ​ຊາດ​ຫວຽດນາມ ປີ 2015 ​ໄດ້​ກຳນົດ: “2. ການຈັດ​ຕັ້ງ​ແລະ​ການ​ເຄື່ອນ​ໄຫວ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ​ໄດ້​ປະຕິບັດ​ຕາມ​ຫຼັກການສະໝັກ​ໃຈ, ​ເຈລະຈາ​ປະຊາທິປະ​ໄຕ, ປະສານ​ສົມທົບ​ແລະ​ກະທຳ​ເປັນ​ເອກະ​ພາບ​ລະຫວ່າງ​ສະມາຊິກ. 3. ​​​ໃນເມື່ອ​ປະສານ​ສົມທົບ​ແລະ​ກະທຳ​ເປັນ​ເອກະ​ພາບ, ບັນດາ​ອົງການ​ສະມາຊິກ​ຂອງແນວ​ໂຮມ​ປະ​ເທດ​ຊາດ​ຫວຽດນາມ ປະຕິບັດ​ຕາມ​ກົດ​ລະບຽບ​ຂອງແນວ​ໂຮມ​ປະ​ເທດ​ຊາດ​ຫວຽດນາມ, ພ້ອມ​ກັນ​ນັ້ນກໍ່​ຮັກສາ​ຄວາມ​ເປັນ​ເອກະລາດ​ຂອງ​ອົງການ​ຕົນ​ເອງ”.

ກົດ​ລະບຽບ​ຂອງແນວ​ໂຮມ​ປະ​ເທດ​ຊາດ​ຫວຽດນາມ ກໍ່​ໄດ້​ກຳນົດ: ແນວ​ໂຮມ​ປະ​ເທດ​ຊາດ​ຫວຽດນາມ​ແມ່ນ​ພາກສ່ວນ​ໜຶ່ງ​ຂອງ​ລະບົບ​ການ​ເມືອງ​ແຫ່ງ​ປະ​ເທດ​ສາທາລະນະ​ລັດ​ສັງຄົມ​ນິຍົມ​ຫວຽດນາມ ​ໂດຍພັກ​ກອມ​ມູນິດ​ຫວຽດນາມນຳພາ; ​ແມ່ນ​ພື້ນຖານ​ການ​ເມືອງ​ຂອງ​ອຳນາດ​ການ​ປົກຄອງ​ປະຊາຊົນ; ບ່ອນ​ທີ່​ສະ​ແດງ​ເຈດ​ຈຳນົງ​ແລະ​ຄວາມ​ປາຖະໜາ​ຂອງ​ປະຊາຊົນ, ​ເຕົ້າ​ໂຮມ​ກຸ່ມ​ກ້ອນ​ມະຫາ​ສາມັກຄີ​ປວງ​ຊົນ​ທັງ​ຊາດ, ​ເສີມ​ຂະຫຍາຍ​ສິ​ດ​ເປັນ​ເຈົ້າ​ຂອງຂອງ​ປະຊາຊົນ; ບ່ອນ​ເຈລະຈາ, ປະສານສົມທົບ ແລະກະທຳເປັນເອກະພາບ ຂອງສະມາຊິກ.

ຈາກ​ບັນດາ​ເອກະສານ​ຂອງ​ພັກ, ​ລັດ​ແລະແນວ​ໂຮມ​ປະ​ເທດ​ຊາດ​ຫວຽດນາມ, ສາມາດ​​ເຫັນ​ໄດ້​ວ່າ, ການ​ເຈ​ລະ​ຈາ​ປະຊາທິປະ​ໄຕຍາມ​ໃດ​ກໍ່​ໄປ​ຄຽງ​ຄູ່​ກັບ​ການ​ປະສານ​ສົມທົບ​ແລະ​ການກະທຳ​ເປັນ​ເອກະ​ພາບ. ຖ້າ​ແຍກ​ການ​ເຈລະຈາ​ປະຊາທິປະ​ໄຕ​ອອກ​ຈາກ​ການປະສານ​ສົມທົບ​ແລະ​ການກະທຳ​ເປັນ​ເອກະ​ພາບ​ແລ້ວ, ການ​ປະສານ​ສົມທົບ​ແລະ​ການກະທຳ​ເປັນ​ເອກະ​ພາບຈະ​ເປັນ​ພຽງ​ຮູບ​ການ​ເທົ່າ​ນັ້ນ. ​ໃນ​ການ​ຈັດ​ຕັ້ງ​ແລະ​ການ​ເຄື່ອນ​ໄຫວ​ຂອງແນວ​ໂຮມ​ປະ​ເທດ​ຊາດ​ຫວຽດນາມ, ພຽງ​ແຕ່​ເວລາ​ໃດ​ທີ່​ບັນດາ​ບັນຫາ​ຖືກ​ປຶກສາ​ຫາລື​ຢ່າງ​ລະອຽດ​ແລະ​ປະຊາທິປະ​ໄຕ, ຄວາມຄິດ​ເຫັນທີ່​ແຕກ​ຕ່າງ​ກັນ​ໄດ້​ຮັບ​ການ​ເຄົາລົບນັບຖື, ທະ​ແນມ​ແຕ່​ຄວາມ​ເຫັນ​ນັ້ນ​ບໍ່​ຂັດ​ກັບຫຼັກການ​ແລະ​ຈຸດປະສົງ​ການ​ເຄື່ອນ​ໄຫວ​ຂອງແນວ​ໂຮມ​ປະ​ເທດ​ຊາດ​ຫວຽດນາມ, ​ແມ່ນ​ເວລາ​ນັ້ນ, ບັນດາ​ສະມາຊິກ​ຈຶ່ງ​ສະໝັກ​ໃຈ​ປະຕິບັດ ​ແລະ ການ​ປະສານ​ສົມທົບ, ການ​ກະທຳ​ເປັນ​ເອກະ​ພາບ​ ຈຶ່ງດຶງ​ດູດ​ໄດ້​ການ​ເຂົ້າ​ຮ່ວມ​ຢ່າງ​ກວ້າງ​ຂວາງ​ຂອງ​ສະມາຊິກ ​ແລະ ບັນລຸໝາກຜົນ​​ແລະປະສິດທິ​ຜົນ​ຕົວ​ຈິງ.

ຫຼັກການ​ເຈລະຈາ​ປະຊາທິປະ​ໄຕ​ໃນ​ການຈັດ​ຕັ້ງ​ແລະ​ການ​ເຄື່ອນ​ໄຫວ​ຂອງແນວ​ໂຮມ​ປະ​ເທດ​ຊາດ​ຫວຽດນາມຂັ້ນ​ຕ່າງໆ ​ໄດ້​ສະ​ແດງ​ອອກ​ໂດຍ​ຜ່ານ​ບັນດາ​ວຽກ​ງານ​ຕົວ​ຈິງ, ນັ້ນ​ຄື: ​ແນະນຳ​ແລະ​ເຈລະຈາ​ກ່ຽວ​ກັບຜູ້​ສະໝັກ​ເຂົ້າ​ໃນ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມ, ​ເຂົ້າ​ໃນຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມທຸກ​ຂັ້ນ, ​ເຂົ້າ​ໃນ​ຄະນະ​ກຳມະການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດນາມ; ​ແຕ່ງ​ຕັ້ງ​ຕຳ​ແໜ່​ງຕ່າງໆ​ໃນ​ຄະນະ​ປະຈຳ​ຂອງ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມທຸກ​ຂັ້ນ; ກໍ່ສ້າງ​ໂຄງການປະຕິບັດ​ງານ​ໃນ​ສະ​ໄໝ​ຂອງແນວ​ໂຮມ​ປະ​ເທດ​ຊາດ​ຫວຽດນາມ​ແຕ່ລະ​ຂັ້ນ ​ແລະ ​ໂຄງການ​ປະສານ​ສົມທົບ​​ແລະ​ການ​ກະທຳ​​ເປັນ​ເອກະ​ພາບປະຈຳ​ປີ​ ຂອງ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມທຸກ​ຂັ້ນ; ກໍ່ສ້າງ​ແຜນການ​ຕິດຕາມ​ກວດກາ​ແລະ​ວິຈານ​ສັງຄົມປະຈຳ​ປີ; ຕັດສິນຕົກລົງ​ຈັດຕັ້ງ​ການ​ປຸກລະດົມ​ຂົນຂວາຍ​ແລະ​ຂະ​ບວນການ​ແຂ່ງ​ຂັນ​ຮັກ​ຊາດ; ​ເຈລະຈາ​​ເພື່ອ​ຄັດ​ເລືອ​ແລະ​ແນະນຳຜູ້​ສະໝັກ​ເຂົ້າ​ເປັນສະມາຊິກ​ສະພາ​​ແຫ່ງຊາດ, ຜູ້​ແທນ​ສະພາ​ປະຊາຊົນ​ຂັ້ນ​ຕ່າງໆ... ຕົວຢ່າງ, ຕາມກົດ​ລະບຽບ​ຂອງແນວ​ໂຮມ​ປະ​ເທດ​ຊາດ​ຫວຽດນາມ, ຄະນະ​ປະຈຳ​ຂອງ​ຄະນະ​ກຳມະການ​ສູງ​ກາງແນວ​ໂຮມ​ປະ​ເທດ​ຊາດ​ຫວຽດນາມ ກວມ​ດ້ວຍ​ປະທານ, ຮອງ​ປະທານ - ​ເລຂາທິການ​ໃຫຍ່ ​ແລະ ບັນດາຮອງ​ປະທານ​ເຕັມ​ເວລາ. ຄະນະ​ປະຈຳ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມຂັ້ນ​ແຂວງ​ແລະ​ຂັ້ນ​ເມືອງປະກອບ​ມີ​ປະທານ, ບັນດາ​ຮອງ​ປະທານ​ແລະກຳມະການ​ປະຈຳ, ​ແມ່ນ​ນັກ​ເຄື່ອນ​ໄຫວ​ເຕັມ​ເວລາ. ຄະນະ​ປະຈຳ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມຂັ້ນ​ຕາ​ແສງ​ປະກອບ​ມີ​ປະທານ, ຮອງປະທານ ​ແລະ​ກຳມະການ​ປະຈຳ​ບໍ່​ເກີນ​ສອງ​ທ່ານ. ບັນດາ​ຕຳ​ແໜ່​ງທີ່ຄ້າຍຄື​ກັນ​ຢູ່​ໃນ​ອົງການ​ລັດຫຼືອົງການ​ພັກ​ ໄດ້​ປະຕິບັດ​ຕາມ​ຫຼັກການ​ເລືອກ​ຕັ້ງ​ຫຼື​ແຕ່ງ​ຕັ້ງ. ​ແຕ່​ໃນ​ການຈັດ​ຕັ້ງ​ຂອງແນວ​ໂຮມ​ປະ​ເທດ​ຊາດ​ຫວຽດນາມຈະ​ໄດ້​ປະຕິບັດ​ຕາມຂັ້ນ​ຕອນ​ແຍກ​ຕ່າງຫາກ, ນັ້ນ​ແມ່ນ​ຂະ​ບວນການ​ເຈລະຈາ​ປະຊາທິປະ​ໄຕ. ບົນ​ພື້ນຖານ​ການ​ສະໝັກ​ຮັບ​ເລືອກ​ຕັ້ງ​ຂອງ​ສະມາຊິກ​ຄະນະ​ກຳມະການ​ແນວ​ໂຮມ​ປະ​ເທດ​ຊາດ ​ແລະການ​ແນະນຳ​ຂອງ​ອະນຸ​ກຳມະການບຸກຄະລາ​ກອນ​ກອງ​ປະຊຸມ​ໃຫຍ່ ຫຼືຂອງຄະນະ​ກຳມະການ​ປະຈຳ​ປະຈຸ​ບັນ, ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມຈະປຶກສາ​ເຈລະຈາ​ເພື່ອ​ແຕ່ງຕັ້ງບຸກ​ຄະລາ​ກອນ​ເຂົ້າ​ໃນ​ຕຳ​ແໜ່​ງຕ່າງໆ​ໃນ​ຄະນະ​ປະຈຳ ​ໂດຍ​ບໍ່​​ຜ່ານຂັ້ນ​ຕອນ​ການ​ເລືອກ​ຕັ້ງ, ຂັ້ນ​ຕອນ​ການ​ແຕ່ງຕັ້ງ.

ການ​ສ້າງ​ໂຄງການ​ປະຕິບັດ​ງານ​ເຕັມໄລຍະ​ ຂອງແນວ​ໂຮມ​ປະ​ເທດ​ຊາດ​ຫວຽດນາມ​ ໄດ້​ດຳ​ເນີນ​ຢູ່​ໃນ​ກອງ​ປະຊຸມ​ໃຫຍ່ແນວ​ໂຮມ​ປະ​ເທດ​ຊາດ​ຫວຽດນາມ​ແຕ່ລະ​ຂັ້ນ ​ໃນ​ແບບ​ວິທີ​ການ​ເຈ​ລະ​ຈາ​ປະຊາທິປະ​ໄຕ. ບັນດາ​ຜູ້​ແທນທີ່​ເຂົ້າ​ຮ່ວມ​ກອງ​ປະຊຸມ​ໃຫຍ່​ມີ​ຄວາມ​ສະ​ເໝີ​ພາບ​ແລະ​ປະຊາທິປະ​ໄຕ​ໂດຍ​ສົມບູນ ​ໃນ​ການສະ​ເໜີ​ບັນຫາ​ຕ່າງໆ​ທີ່​ເປັນ​ສ່ວນ​ໜຶ່ງ​ຂອງ​ໂຄງການ​ປະຕິບັດ​ງານ 5 ປີ ​ເພື່ອ​ໃຫ້​ກອງ​ປະຊຸມ​ໃຫຍ່​ປຶກສາ​ສົນທະນາ. ພາຍຫຼັງ​ການ​ປຶກສາ​ສົນທະນາ, ກອງ​ປະຊຸມ​ໃຫຍ່​ຈະ​ເຈລະ​ຈາ​ເພື່ອຕົກລົງ​​ໂຄງການ​ປະຕິບັດງານຮ່ວມກັນ​ຂອງ​ແນວໂຮມ​ປະ​ເທດ​ຊາດ​ຫວຽດນາມຂັ້ນ​ດຽວ​ກັນ. ​ໂຄງການ​ປະຕິບັດ​ງານ​ເຕັມ​ໄລຍະ​ແມ່ນ​ການ​ສະ​ແດງ​ເຈດ​ຈຳນົງ​ຮ່ວມ​ກັນ​ຂອງອົງການ​ຈັດ​ຕັ້ງ​ສະມາຊິກ​ທັງ​ໝົດ​ຂອງແນວ​ໂຮມ​ປະ​ເທດ​ຊາດ​ຫວຽດນາມ. ກອງ​ປະຊຸມ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມຈະ​ປະຊຸມ​ເປັນ​ປະຈຳ​ປີ​ລະ​ຄັ້ງ ​ເຊິ່ງມິ​ໜ້າ​ທີ່​ປຶກສາ​ສົນທະນາ​ແລະສ້າງ​ໂຄງການ​ປະສານ​ສົມທົບ​ແລະ​ການກະທຳ​ເປັນ​ເອກະ​ພາບ​ ຂອງແນວ​ໂຮມ​ປະ​ເທດ​ຊາດ​ຫວຽດນາມປະຈຳ​ປີ ບົນ​ພື້ນຖານຄວາມ​ຄາດ​ຄະ​ເນ​ຂອງ​ຄະນະ​ປະຈຳ​ຄະນະ​ກຳມະການ​ແນວ​ໂຮມ​ປະ​ເທດ​ຊາດ​ຂັ້ນ​ດຽວ​ກັນ. ຫົວໜ້າອົງການ​ຈັດ​ຕັ້ງ​ສະມາຊິກ, ບັນດາ​ບຸກຄົນ​ທີ່​ເປັນ​ຕົວ​ແທນ... ຈະ​ປຶກສາ​ຫາລືປະຊາທິປະ​ໄຕ​ ເພື່ອ​ໄປ​ເຖິງ​ຄວາມ​ເປັນ​ເອກະ​ພາບ ​​ໃນ​ໂຄງການ​ປະສານ​ສົມທົບ​ແລະການ​ກະທຳ​ຮ່ວມ​ກັນ.

2- ​ໃນ​ເວລາ​ທີ່​ຜ່ານ​ມາ, ແນວ​ໂຮມ​ປະ​ເທດ​ຊາດ​ຫວຽດນາມ​ໄດ້​ປະຕິບັດ​ເປັນ​ຢ່າງ​ດີ​ ບົດບາດນຳ​ໜ້າ​ໃນ​ການ​ເປີດ​ແລະ​ຈັດ​ຕັ້ງ​ບັນດາ​ການ​ໂຄສະນາ​ຂົນຂວາຍ, ບັນດາ​ຂະ​ບວນການ​ແຂ່ງຂັນຮັກ​ຊາດ, ດຶງ​ດູດ​ການ​ເຂົ້າ​ຮ່ວມ​ຢ່າງ​ກວ້າງຂວາງ​ຂອງ​ປະຊາຊົນ, ​ເສີມ​ຂະຫຍາຍ​ຈິດ​ໃຈ​ແຂ່ງຂັນ​ກັນ​ປະດິດ​ສ້າງ ​ແລະ ບັນດາ​ແຫຼ່ງພະລັງ​ໃນ​ສັງຄົມ ​ເພື່ອ​ປະກອບສ່ວນ​ປະຕິບັດ​ບັນດາ​ເປົ້າ​ໝາຍ ​ແລະ​ໜ້າ​ທີ່​ພັດທະນາ​ເສດຖະກິດ-ສັງຄົມ, ຮັບປະກັນ​ການ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ​ຂອງ​ປະ​ເທດ ​ຢ່າງ​ສຳ​ເລັດ​ມີ​​ໄຊ. ດ້ວຍ​ທິດ​ນຳ “​ເອົາ​ກຳລັງ​ແຮງ​ຂອງ​ປະຊາຊົນ​ເພື່ອ​ເບິ່ງ​ແຍງ​ດູ​ແລ​ຊີວິດ​ການ​ເປັນ​ຢູ່​ຂອງ​ປະຊາຊົນ”, ການ​ຂົນຂວາຍ “ທົ່ວ​ປວງ​ຊົນ​ສາມັກຄີ​ກໍ່ສ້າງ​ຊົນນະ​ບົດ​ໃໝ່, ຕົວເມືອງສີວິໄລ" ​ ໄດ້​ຖືກ​ຄະນະ​ກຳມະການ​ແນວ​ໂຮມ​ປະ​ເທດ​ຊາດ​ຫວຽດນາມຂັ້ນ​ຕ່າງໆ​ເປັນ​ປະທານ​ການ​ປຶກສາ​ຫາລື​, ປະສານ​ສົມທົບ​ກັບ​ບັນດາ​ອົງການ​ສະມາຊິກ ​ເພື່ອ​ຂົນຂວາຍ​ປະຊາຊົນ​ປະກອບ​ແຫຼ່ງພະລັງ, ​ເນື້ອ​ທີ່​ດິນ ​ແລະອຸທິດ​ແ​ຮງງານ​ໃຫ້​ແກ່​ການ​ກໍ່ສ້າງ​ໂຄງ​ສ້າງ​ພື້ນຖານ, ພັດທະນາ​ເສດຖະກິດ, ຫຼຸດຜ່ອນ​ຄວາມທຸກ​ຍາກ, ປົກ​ປັກ​ຮັກສາ​ສະພາບ​ແວດ​ລ້ອມ, ປະຕິບັດ​ກົດໝາຍ, ອະນຸລັກ​ແລະ​ເຊີດ​ຊູ​ຄຸນຄ່າ​ວັດທະນະທຳ​ດັ້ງ​ເດີມ​ຂອງ​ຊາດ, ສ້າງ​​ເຂດ​ຊຸມ​ຊົນ​ທີ່​ມີ​ອາລະຍະ​ທຳ​ແລະມີ​ຄວາມ​ສຸກ. ຂະ​ບວນການໄດ້​ປຸກລະດົມ​ການ​ເຂົ້າ​ຮ່ວມ​ຂອງ​ລະບົບ​ການ​ເມືອງທັງ​ໝົດ, ການ​ຕອບ​ສະໜອງ​ທີ່​ຕັ້ງໜ້າ​ຂອງ​ປະຊາຊົນ​ຈຳນວນ​ຫຼາຍ ​ແລະ ບັນລຸ​ຜົນໄດ້​ຮັບ​ທາງ​ບວກ​ແລະ​ຮອບດ້ານພໍ​ຄວນ. ຮອດ​ທ້າຍ​ເດືອນ​ສິງຫາ 2019, ​ໃນ​ທົ່ວ​ປະ​ເທດ​ມີ 4.475 ຕາ​ແສງ (ບັນລຸ 50,26% ຂອງ​ຈຳນວນ​ຕາ​ແສງ) ຖືກ​ຍອມຮັບ​ວ່າ​ໄດ້​ບັນລຸ​ມາດຕະຖານ​ຊົນນະບົດ​ໃໝ່; ມີ 84 ​ເມືອງ​ຖືກ​ຍອມຮັບ​ວ່າ​ໄດ້​ບັນລຸ​ມາດຕະຖານ/ສຳ​ເລັດ​ວຽກ​ງານ​ກໍ່ສ້າງ​ຊົນນະບົດ​ໃໝ່.

ແນວ​ໂຮມ​ປະ​ເທດ​ຊາດ​ຫວຽດນາມ​ແລະ​ບັນດາ​ອົງການ​ຈັດ​ຕັ້ງ​ສະມາຊິກ​ໄດ້​ປຶກສາ​ເຈລະຈາ​ແລະ​ປະສານ​ງານ​ຢ່າງ​ມີ​ປະສິດທິ​ຜົນ ​ໃນ​ການສ້າງ​ແຜນການ​ຕິດຕາມ​ກວດກາ​ແລະ​ວິຈານ​ສັງຄົມ​ປະຈຳ​ປີ ​ແລະ ​ໄດ້​ຜັນ​ຂະຫຍາຍ​ປະຕິບັດ​ແຜນການ​ເປັນ​ຢ່າງ​ດີອີງ​ຕາມກົດໝາຍວ່າ​ດ້ວຍແນວ​ໂຮມ​ປະ​ເທດ​ຊາດ​ຫວຽດນາມ ປີ 2015 ​ແລະ ມະຕິຮ່ວມ​ເລກທີ 403/2017/NQLT-UBTVQH14-CP-ĐCTUBTWMTTQVN, ວັນ​ທີ 15-6-2017, ຂອງ​ຄະນະ​ກຳມະການ​ປະຈຳ​ສະພາ​ແຫ່ງ​ຊາດ, ລັດຖະບານ ​ແລະ ຄະນະ​ປະທານ​ຄະນະ​ກຳມະການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດນາມ, “ກຳນົດ​ລະອຽດ​ກ່ຽວ​ກັບ​ບັນດາ​ຮູບ​ການ​ຕິດຕາມ​ກວດກາ, ວິຈານ​ສັງຄົມ​ຂອງແນວ​ໂຮມ​ປະ​ເທດ​ຊາດ​ຫວຽດນາມ”, ​ແຜນການ​ຕິດຕາມ​ກວດກາ, ວິຈານ​ສັງຄົມປະຈຳ​ປີ​ ຂອງຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມ ​ໄດ້​ກຳນົດ​ແຈ້ງຈຸດປະສົງ, ລະດັບ​ຄາດໝາຍ, ​ເປົ້າ​ໝາຍ, ​ເນື້ອ​ໃນ, ຮູບ​ການ, ​ເວລາ, ​ເຈົ້າພາບ​ທີ່ດຳ​ເນີນ​ການ​ຕິດຕາມ​ກວດກາ, ວິຈານ​ສັງຄົມ; ກຳນົດ​ບັນດາ​ເນື້ອ​ໃນ​ທີ່ແນວ​ໂຮມ​ປະ​ເທດ​ຊາດ​ຫວຽດນາມ ຫຼື​ອົງການຈັດ​ຕັ້ງ​ການ​ເມືອງ-ສັງຄົມ ​ຮັບຜິດຊອບ. ​​ເມື່ອ​ຈຳ​ເປັນ, ​ເນື້ອ​ໃນ​ແຜນການ​ຕິດຕາມ​ກວດກາ, ວິຈານ​ສັງຄົມ​ຈະ​ໄດ້​ຮັບ​ການ​ດັດ​ແປງ​ ຫຼື​ໄດ້​ເພີ່ມ​ເຕີມ​ຢ່າງ​ທັນ​ການ ດ້ວຍ​ຄວາມ​ເຫັນ​ດີ​ເປັນ​ເອກະ​ພາບ​ຂອງທຸກ​ຝ່າຍ ​ໂດຍ​ແລ້ວ​ແຕ່​ເງື່ອນ​ໄຂ​ຕົວ​ຈິງ​ແລະ​ເວລາ​ຈັດ​ຕັ້ງ​ປະຕິບັດ.

​ໃນ​ໄຕ​ມາດ​ທີ​ສີ່​ຂອງ​ທຸກ​ປີ, ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມປັນຜູ້ນຳ​ໃນ​ການ​ແລກ​ປ່ຽນ​ແລະ​ເປັນ​ເອກະ​ພາບ​ກັບ​ອົງການ​ອຳນາດ​ການ​ປົກຄອງ, ອົງການ​ໂດຍ​ປະຊາຊົນ​ເລືອກ​ຕັ້ງ​ໃນ​ຂັ້ນ​ດຽວ​ກັນ ກ່ຽວ​ກັບ​ການ​ເລືອກ​ເອົາ​ບັນຫາ​ຕ່າງໆ​ທີ່​ຮ້ອນ​ເຄືອງ, ບັນຫາປະຊາຊົນ​ສົນ​ໃຈ ​ເພື່ອ​ສ້າງ​ແຜນການ​ຕິດຕາມ​ກວດກາ, ວິຈານ​ສັງຄົມ​ໃນ​ປີ​ຕໍ່​ໄປ. ​ໃນ​ບາງ​ກໍລະນີສະ​ເພາະ, ການ​ປຶກສາ​ເຈລະຈາ​ໄດ້​ຮັບ​ການ​ປະຕິບັດ​ໃນ​ຮູບ​ແບບ​ກອງ​ປະຊຸມ ຫຼື​ຝາກ​ເອກະສານ​ໃຫ້​ອົງການ​ຈັດ​ຕັ້ງ​ການ​ເມືອງ-ສັງຄົມ ​ແລະ ບັນດາ​ອົງການ​ສະມາຊິກທີ່ກ່ຽວຂ້ອງ ​ເພື່ອ​ເປັນ​ເອກະ​ພາບ​ເນື້ອ​ໃນ​ແລະ​ແຜນການ.

​ເມື່ອ​ແຜນການ​ຕິດຕາມ​ກວດກາ​ແລະ​ວິຈານ​ສັງຄົມ​ຂອງ​ແຕ່​ລະ​ຂັ້ນ​ໄດ້​ຮັບ​ການ​ປະກາດ​ໃຊ້​ໂດຍ​ຜ່ານການ​ປຶກສາ​ເຈລະຈາ​ປະຊາທິປະ​ໄຕ ​ເປັນ​ເອກະພາບລະຫວ່າງ​ສະມາຊິກ​ແລ້ວ​ນັ້ນ ການ​ຜັນ​ຂະຫຍາຍ​ແລະ​ປະຕິບັດຕົວ​ຈິງ ​ຈະຮັບປະກັນ​ການ​ປະສານ​ສົມທົບ​ຢ່າງ​ແໜ້ນ​ແຟ້ນກວ່າ​ອີກ ​ລະຫວ່າງບັນດາ​ອົງການ​ຈັດ​ຕັ້ງ​ສະມາຊິກ​ໃນແນວ​ໂຮມ​ປະ​ເທດ​ຊາດ​ຫວຽດນາມ ກໍ່​ຄື​ລະຫວ່າງ​ບັນດາ​ອົງການ, ການຈັດ​ຕັ້ງ​ຂອງ​ພັກ​ແລະ​ຂອງ​ລັດ​ທີ່​ກ່ຽວຂ້ອງ, ດັ່ງ​ນັ້ນ ຈະ​ແກ້​ໄຂ​​ໄດ້ການ​ທັບຊ້ອນ​ກັນ ​ໃນ​ຂະ​ບວນການ​ປະຕິບັດ​ການ​ຕິດຕາມ​ກວດກາ​ແລະ​ວິຈານ​ສັງຄົມ. ​ແຕ່​ປີ 2018, ຄະນະ​ກຳມະການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດນາມ​ໄດ້​ປຶກສາ​ສົນທະນາ​ການ​ສ້າງ​ແຜນ​ກາງ​ຕິດຕາມ​ກວດກາ, ວິ​ຈານ​ສັງຄົມ​ປະຈຳ​ປີ ​ເພື່ອກຳນົດ​ແຈ້ງກິດຈະກຳ​ໃດ​ທີ່​ຈັດ​ໂດຍແນວ​ໂຮມ​ປະ​ເທດ​ຊາດ​ຫວຽດນາມ, ກິດຈະກຳ​ໃດ​ທີ່​ຈັດ​ໂດຍ 5 ອົງການ​ຈັດ​ຕັ້ງ​ທາງ​ການ​ເມືອງ-ສັງຄົມ.

ວຽກ​ງານ​​ຕິດຕາມ​ກວດກາ​ແລະ​ວິຈານ​ສັງຄົມ​ໃນ​ເວລາທີ່​ຜ່ານ​ມາ​ໄດ້​ກາຍ​ເປັນການ​ເຄື່ອນ​ໄຫວ​ເປັນ​ປົກກະຕິ, ຈຸດ​ສຸມ​ຂອງແນວ​ໂຮມ​ປະ​ເທດ​ຊາດ​ຫວຽດນາມ ​ແລະບັນດາ​ອົງການ​ຈັດ​ຕັ້ງ​​ການ​ເມືອງ-ສັງຄົມ. ແນວ​ໂຮມ​ປະ​ເທດ​ຊາດ​ຫວຽດນາມ​ໄດ້​ນຳພາ ຫຼື​ປະສານສົມທົບກັບ​ບັນດາ​ອົງການ​ສະມາຊິກ, ບັນດາ​ອົງການ, ການຈັດ​ຕັ້ງ​ຂອງ​ພັກ​ແລະ​ຂອງ​ລັດ​ ໃນ​ການ​ຜັນ​ຂະຫຍາຍ 12 ​ໂຄງການ​ຕິດຕາມ​ກວດກາສູນ​ກາງ, ສຸມ​ໃສ່​ບັນດາ​ຂົງ​ເຂດ: ນະ​ໂຍບາຍສຳລັບ​ຜູ້​ທີ່​ມີ​ຄຸນງາມຄວາມດີ​​ເພື່ອການ​ປະຕິວັດ; ປະຕິບັດກົດໝາຍວິທະຍາສາດ​ແລະ​ເຕັກ​ໂນ​ໂລ​ຊີ; ປ່ຽນ​ແປ​ງ​ໃໝ່ການ​ສຶກສາ​ແລະ​ຝຶກ​ອົບຮົມ; ການ​ຄຸ້ມ​ຄອງ, ຜະລິດ, ທຸລະ​ກິດອຸປະກອນ​ການ​ກະ​ເສດ; ​ແກ້​ໄຂ​ຄຳ​ຮ້ອງທຸກ, ຂໍ້​ກ່າວ​ຫາ​ຢູ່​ຂັ້ນ​ຮາກ​ຖານ; ການ​ປະຕິ​ຮູບ​ການ​ບໍລິຫານ; ພາສີ​ອາກອນ​ແລະ​ສຸນ​ລະກາ​ກອນ; ການປົກ​ປ້ອງ​ສະພາບ​ແວດ​ລ້ອມ​ແລະ​ການຮັບມື​ກັບການ​ປ່ຽນ​ແປງ​ສະພາບພູມິ​ອາ​ກາດ; ການ​ປະຕິບັດຕາມ​ກົດໝາຍ​ຂອງສະຖານ​ບໍລິການ​ສຸຂະພາບ; ຮັບປະກັນ​ຄວາມ​ປອດ​ໄພດ້ານ​ສະບຽງ​ອາຫານ; ປະກັນ​ໄພ​ສັງຄົມ, ປະກັນ​ໄພ​ສຸຂະພາບ; ປະ​ເມີນ​ຄວາມ​ເພິ່ງ​ພໍ​ໃຈ​ຂອງ​ປະຊາຊົນ​ແລະ​ອົງການ​ຈັດ​ຕັ້ງ ຕໍ່​ການ​ຮັບ​ໃຊ້​ຂອງ​ອົງການ​ບໍລິຫານ​ລັດ… ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມຢູ່​ແຂວງ​ຕ່າງໆ​ໄດ້​ສະ​ເໜີ​ຕໍ່​ຄະນະ​ພັກ, ປະສານ​ສົມທົບ​ກັບ​ອຳນາດ​ການ​ປົກຄອງ ​ໃນ​ການ​ເລືອກ​ແຜນ​ນະ​ໂຍບາຍທີ່​ສຳຄັນທາງ​ດ້ານ​ເສດຖະກິດ-ສັງຄົມ ​ແລະ ບັນດາ​ບັນຫາ​ທີ່ມີ​ຄວາມ​ເປັນ​ຫ່ວງ​ໃນ​ທ້ອງ​ຖິ່ນ ​ເພື່ອ​ຈັດ​ຕັ້ງ​ການ​ຕິດຕາມ​ກວດກາ. ຫຼາຍ​ຂົງ​ເຂດ​ການ​ຄຸ້ມ​ຄອງ​ທີ່​ສັບສົນ, ຫຍຸ້ງຍາກ​ແລະ​ກະ​ທົບ​ກະ​ເທືອ​ນ​ແຮງ, ​ເຊັ່ນ ການ​ຊົດ​ເຊີຍ​ເພື່ອ​ຕັ້ງ​ຖິ່ນ​ຖານ​ໃໝ່, ການ​ເກນ​ຊື້​ທີ່​ດິນ; ການ​ຄຸ້ມ​ຄອງ​ນຳ​ໃຊ້​ບັນດາ​ແຫຼ່ງພະລັງ​ກໍ່ສ້າງ​ຊົນນະບົດ​ໃໝ່; ການ​ຊົດ​ເຊີຍ​ເຫດການ​ທີ່​ກໍ່​​ໃຫ້​ເກີດມົນ​ລະພິດ​ຕໍ່​ສິ່ງ​ແວດ​ລ້ອມ​ທາງ​ທະ​ເລ... ​ໄດ້​ຮັບ​ການ​ຕິດຕາມ​ກວດກາ​ຢ່າງ​ມີ​ປະສິດທິ​ຜົນ​ໂດຍແນວ​ໂຮມ​ປະ​ເທດຊາດ​ຫວຽດນາມ​ທຸກ​ຂັ້ນ. ບັນດາ​ບົດ​ລາຍ​ງານ​ແລະ​ຂໍ້​ສະ​ເໜີ​ແນະ​ພາຍ​ຫຼັງ​ການຕິດຕາມ​ກວດກາ​ຂອງແນວ​ໂຮມ​ປະ​ເທດ​ຊາດ​ຫວຽດນາມ, ​ໂດຍ​ສະ​ເພາະ​ແມ່ນ​ບັນດາ​ບັນຫາ​ທີ່​ຮ້ອນ​ເຄືອງ​ໃນ​ຫະຊາ​ຊົນ, ​ໄດ້​ຖືກ​ບັນດາ​ກະຊວງ​ແລະຂະ​ແໜງ​ການ​ຢູ່​ສູນ​ກາງ, ຄະນະ​ພັກ​ແລະ​ອຳນາດ​ການ​ປົກຄອງ​ທ້ອງ​ຖິ່ນ ຮັບ​ເອົາ​ແລະ​ຊີ້​ນຳ​ແກ້​ໄຂ​ຢ່າງ​ທັນ​ການ, ​ແລະ​ຜ່ານແນວ​ໂຮມ​ປະ​ເທດ​ຊາດ​ຫວຽດນາມ ​ເພື່ອ​ແຈ້ງ​ໃຫ້​ປະຊາຊົນ​ທຸກ​ຊັ້ນ​ວັນນະ. ​ໃນ​ສະ​ໄໝ 2014-2019, ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມຂັ້ນ​ແຂວງ ​ໄດ້​ນຳພາ​ແລະ​ເຂົ້າ​ຮ່ວມ​ການ​ຕິດຕາມ​ກວດກາຮ່ວມ​ຂະ​ແໜງ 4.093 ຄັ້ງ; ຄະນະ​ກຳມະການແນວ​ໂຮມ​ປະ​ເທດ​ຊາດຫວຽດນາມ​ຂັ້ນ​ເມືອງໄດ້​ຊີ້​ນຳ​ການ​ຕິດຕາມ​ກວດກາ 22.679 ຄັ້ງ; ຄະນະ​ກຳມະການແນວ​ໂຮມ​ປະ​ເທດ​ຊາດຫວຽດນາມ​ຂັ້ນຕາ​ແສງ​ໄດ້​ຊີ້​ນຳການ​ຕິດຕາມ​ກວດກາ 466.012 ຄັ້ງ.

ກົດໝາຍວ່າ​ດ້ວຍແນວ​ໂຮມ​ປະ​ເທດ​ຊາດ​ຫວຽດນາມ ປີ 2015 ​ແລະ ກົດໝາຍ​ການ​ເລືອກ​ຕັ້ງ​ຜູ້​ແທນ​ສະພາ​ແຫ່ງ​ຊາດ ​ແລະ ​ຜູ້​ແທນ​ສະພາ​ປະຊາຊົນ ປີ 2015 ​ໄດ້​ກຳນົດ: ແນວ​ໂຮມ​ປະ​ເທດ​ຊາດ​ຫວຽດນາມມີ​ຄວາມ​ຮັບຜິດຊອບ​ໃນ​ການ​ເຈລະຈາ​ເພື່ອ​ຄັດ​ເລືອ​ກ​ແລະ​ແນະນຳ​ຜູ້​ສະ​ໝັກ​ເຂົ້າ​ເປັນ​ສະມາຊິກ​ສະພາ​ແຫ່ງ​ຊາດ​ແລະ​ຜູ້​ແທນ​ສະພາ​ປະຊາຊົນ​ທຸກ​ຂັ້ນ. ຢູ່​ຂັ້ນ​ທ້ອງ​ຖິ່ນ, ຄວາມ​ຮັບຜິດຊອບ​ໃນ​ການ​ເຈລະຈາ​ເພື່ອ​ແນະນຳ​ຜູ້​ສະໝັກ​ເຂົ້າ​ເປັນ​ຜູ້​ແທນ​ສະພາ​ປະຊາຊົນນັ້ນ ​ໄດ້​ມອບ​ໝາຍໃຫ້​ຄະນະ​ກຳມະການ​ແນວ​ໂຮມ​ປະ​ເທດ​ຊາດ​ໃນ​ແຕ່ລະ​ຂັ້ນ. ຢູ່​ສູນ​ກາງ, ຄະນະ​ປະທານ​ຄະນະ​ກຳມະການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດນາມ ມີ​ຄວາມ​ຮັບຜິດຊອບ​ໃນ​ການ​ເຈລະຈາ​ເພື່ອ​ຄັດ​ເລືອກ​ແລະ​ແນະນຳຜູ້​ສະໝັກ​ເຂົ້າ​ເປັນ​ສະມາຊິກ​ສະພາ​ແຫ່ງ​ຊາດ. ຄະນະ​ປະທານ​ແມ່ນ​ຕົວ​ແທນ​ຂອງ​ຂະ​ແໜງ​ການ, ວົງ​ການ, ຊົນ​ເຜົ່າ, ສາສະໜາ, ຫົວໜ້າ​ອົງການ​ຈັດ​ຕັ້ງ​ສະມາຊິກ​ ໄດ້​ຖືກ​ຄັດ​ເລືອກ​ຈາກບັນດາ​ກຳມະການ ​ຂອງ​ຄະນະ​ກຳມະການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດນາມ. ​ເພາະສະ​ນັ້ນ, ຄະນະປະທານ​ຄະນະ​ກຳມະການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດນາມມີ​ສິດ​ຕາງໜ້າ​ໃຫ້​ຄະນະ​ກຳມະການສູນ​ການແນວ​ໂຮມ​ປະ​ເທດ​ຊາດ​ຫວຽດນາມ ​ໃນ​ການ​ປະຕິບັດໜ້າ​ທີ່​ການ​ເຈລະຈາ​ໃນ​ການ​ເລືອກ​ຕັ້ງ. ພຽງ​ແຕ່​ຜູ້​ທີ່​ມີ​ຄຸນສົມບັດ​ແລະຜ່ານ​ການ​ປຶກສາ​ເຈລະຈາ​ປະຊາ​ທີ​ປະ​ໄຕ​ເທົ່າ​ນັ້ນ ຈຶ່ງ​ຖືກ​ລວມຢູ່​ໃນ​ລາຍ​ຊື່​ຢ່າງ​ເປັນ​ທາງ​ການ​ຂອງຜູ້​ສະໝັກ​ສະມາຊິກສະພາ​ແຫ່ງ​ຊາດ.

3- ຈາກ​ພຶດຕິ​ກຳ​ແຫ່ງ​ການຈັດ​ຕັ້ງ​ແລະ​ເຄື່ອນ​ໄຫວຂອງແນວ​ໂຮມ​ປະ​ເທດ​ຊາດ​ຫວຽດນາມ​ໃຫ້​ເຫັນ​ວ່າ, ຫຼັກການ​ເຈລະຈາ​ປະຊາທິປະ​ໄຕ​ໄດ້​ຮັບ​ການ​ປະຕິບັດ​ຢ່າງ​ມີ​ປະສິດທິ​ຜົນດ້ວຍ​ຄຸນ​ລັກສະນະ​ຂອງ​ມັນ. ການ​ປຶກສາ​ເຈລະຈາ​ປະຊາທິປະ​ໄຕ​ຢູ່​ໃນແນວ​ໂຮມ​ປະ​ເທດ​ຊາດ​ຫວຽດນາມ​ແມ່ນ​ການ​ປະຕິບັດ​ປະຊາທິປະ​ໄຕ, ​ເສີມ​ຂະຫຍາຍ​ສະຕິ​ປັນຍາ, ​ເຊີດ​ຊູ​ຄວາມ​ຮັບຜິດຊອບ​ເປັນຕົວ​ແທນ​ຂອງສະມາຊິກ​ທຸກ​ພາກສ່ວນ, ຊັກ​ຊວນ​ເຊິ່ງກັນ​ແລະ​ກັນ, ມຸ່ງ​ໄປ​ສູ່​ຄວາມ​ເປັນ​ໃຈ​ເຫັນ​ດີ​ເຫັນ​ພ້ອມ, ​ເປັນ​ເອກະ​ພາຍ​ທາງ​ດ້ານ​ເຈດ​ຈຳນົງ​ແລະ​ການ​ກະທຳ​ ເພື່ອ​ຜົນ​ປະ​ໂຫຍ​ດຮ່ວມ​ກັນ... ອີງ​ໃສ່​ລັກສະນະ​ການຈັດ​ຕັ້ງ​ແລະ​ໜ້າ​ທີ່​ການ​ເມືອງ​ຂອງ​ຕົນ, ແນວ​ໂຮມ​ປະ​ເທດ​ຊາດ​ຫວຽດນາມ​ແລະ​ບັນດາ​ອົງການ​ຈັດ​ຕັ້ງ​ສະມາຊິກ ລ້ວນ​ແຕ່​ໄດ້​ເປັນ​ເຈົ້າ​ການ​ໃນ​ການ​ກໍ່ສ້າງ​ແລະ​ຍູ້​ແຮງບັນດາ​ຂະ​ບວນການ​ແຂ່ງຂັນ​ຮັກສາ, ບັນດາ​ຂະ​ບວນການປຸກລະດົມ​ຂົນຂວາຍ ​ແນ​ໃສ່​ເຕົ້າ​ໂຮ​ມ, ດຶງ​ດູດປະຊາຊົນ​ທຸກ​ຊັ້ນ​ຄົນ​, ທຸກ​ວົງ​ການ ​ໃຫ້​ສຸມ​ໃສ່​ການ​ປະຕິບັດ​ໜ້າ​ທີ່​ການ​ເມືອງ, ​ເສດຖະກິດ, ວັດທະ​ນະ​ທຳ, ສັງຄົມ, ການ​ປ້ອງ​ກັນຊາ​ດປ້ອງ​ກັນ​ຄວາມ​ສະຫງົບ, ການ​ຕ່າງປະ​ເທດ, ປັບ​ປຸງ​ແລະ​ເປີດ​ກວ້າງ​ກຸ່ມ​ກ້ອມ​ມະຫາ​ສາມັກຄີ​ປວງ​ຊົນ​ທັງ​ຊາດ.

​ເຖິງ​ວ່າ​ໄດ້​ບັນລຸ​ຜົນງານ​ທີ່​ໜ້າ​ສັນລະ​ເສີນ​ກໍ່ຕາມ, ​ແຕ່​ໃນ​ການຈັດ​ຕັ້ງ​ແລະ​ການ​ເຄື່ອນ​ໄຫວ​ຂອງແນວ​ໂຮມ​ປະ​ເທດ​ຊາດ​ຫວຽດນາມ, ວຽກ​ງານ​ການ​ເຈລະຈາ​ປະຊາທິປະ​ໄຕ​ກໍ່​ຍັງ​ມີ​ຂໍ້​ຈຳກັດ​ບາງ​ຢ່າງ, ​ເຊັ່ນ ການ​ປະສານ​ສົມທົບ​ລະຫວ່າງ​ສະມາຊິກ​ຂອງແນວ​ໂຮມ​ປະ​ເທດ​ຊາດ​ຫວຽດນາມຍັງ​ບໍ່​ທັນ​ແໜ້ນ​ແຟ້ນ; ບົດ​ບາດ​ນຳພາ, ການປະສານ​ງານ​ຂອງຄະນະ​ກຳມະການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດນາມ​ໃນ​ບາງ​ເນື້ອ​ໃນ​ໂຄງການ ຍັງ​ບໍ່​ໄດ້​ສ້າງ​ຄວາມ​ດຶງ​ດູດ​ໃຈ, ບໍ່​​ໄດ້ປຸກ​ຄວາມສົນ​ໃຈ, ຕອບ​ສະໜອງ​ໃນ​ທາງ​ບວກ​ຂອງ​ອົງການ​ຈັດ​ຕັ້ງ​ສະມາຊິກ, ຍ້ອນ​ແນວ​ນັ້ນ​ຈຶ່ງ​ຍັງ​ມີ​ສະພາບ​ການ ບາງຄັ້ງ​ບາງ​ອົງການ​ຈັດ​ຕັ້ງ​ສະມາ​ຊິດບໍ່​ເອົາ​ໃຈ​ໃສ່​ພຽງພໍ​ເຖິງ​ໂຄງການ​ລວມ, ສ່ວນ​ຫຼາຍ​ແມ່ນ​ປະຕິບັດ​ແຍກ​ຕ່າງຫາກ, ດຽວດາຍ. ບາງ​ອົງການ​ຈັດ​ຕັ້ງ​ສະມາຊິກບໍ່​ໄດ້​ເປັນ​ເຈົ້າ​ການ​ໃນ​ການສະ​ເໜີ​ແນະ​ບັນຫາ, ເນື້ອ​ໃນທີ່​ຕ້ອງການ​ມີ​ການ​ປະສານ​ສົມທົບ​ກັບ​ອົງການ​ຈັດ​ຕັ້ງ​ສະມາຊິກ​ອື່ນ. ກຳມະການ​ບາງ​ທ່ານ​ໃນ​ຄະ​ນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມ ​ທີ່​ຕາງໜ້າ​ໃຫ້​ອົງການ​ຈັດ​ຕັ້ງ​ສະມາຊິກ ບໍ່​ໄດ້​ເສີມ​ຂະຫຍາຍ​ຢ່າງ​ເຕັມ​ສ່ວນ ບົດບາດ​ຂອງ​ຜູ້​ຕາງໜ້າ​ໃຫ້ແກ່​ອົງ​ການ, ຊັ້ນ​ຄົນ, ວົງ​ການ​ທີ່​ຕົນ​ເຂົ້າ​ຮ່ວມ​ໃນ​ແນວ​ໂຮມ​ປະ​ເທດ​ຊາດ​ຫວຽດນາມ...

ເພື່ອ​ເສີມ​ຂະຫຍາຍ​​ໃຫ້​ດີກ​ວ່າ​ອີກ ບົດບາດ​ປຶກສາ​ເຈລະຈາ​ປະຊາທິປະ​ໄຕ ​ແນ​ໃສ່​ຍົກ​ສູງ​ຄຸນ​ນະພາ​ບການຈັດ​ຕັ້ງ​ແລະ​ເຄື່ອນ​ໄຫວ​ ຂອງແນວ​ໂຮມ​ປະ​ເທດ​ຊາດ​ຫວຽດນາມຂັ້ນ​ຕ່າງໆ, ​ໃນ​ສະ​ໄໝ 2019-2024, ແນວ​ໂຮມ​ປະ​ເທດ​ຊາດ​ຫວຽດນາມຄວນ​ປະຕິບັດ​ໃຫ້​ດີ ໜ້າ​ທີ່, ວິທີ​ແກ້​ໄຂ​ຕົ້ນຕໍ​ຈຳນວນ​ໜຶ່ງ​ດັ່ງ​ນີ້:

ທີ​ໜຶ່ງ, ປ່ຽນ​ແປງ​ໃໝ່ຂັ້ນ​ຕອນ​ການສ້າງ​ໂຄງການປະສານ​ສົມທົບ​​ແລະການກະທຳ​ເປັນ​ເອກະ​ພາບ, ປຶກສາ​ເຈລະຈາ​ປະຊາທິປະ​ໄຕ...; ຕາມ​ນັ້ນ, ຄວນ​ມີ​ການ​ແລກປ່ຽນ, ປຶກສາ​ຫາລື​ໃນ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງການ​ຈັດ​ຕັ້ງ​ສະມາຊິກລະດັບ​ດຽວ​ກັນ ​ເພື່ອ​ໃຫ້​ໂຄງການ​ທີ່​ສ້າງ​ຂຶ້ນມາ​ນັ້ນ​ມີ​ຄວາມສາມາດ​ປະຕິບັດ, ມີ​ຄວາມ​ລວມສູນ, ​ເສີມ​ຂະຫຍາຍ​ສະຕິ​ປັນຍາ​ຂອງ​ກຸ່ມແນວ​ໂຮມ​ປະ​ເທດ​ຊາດ​ຫວຽດນາມທັງ​ໝົດ. ​ເນື້ອ​ໃນ​ຂອງ​ໂຄງການ​ປະສານ​ງານ​ແລະ​ການກະທຳ​ເປັນ​ເອກະ​ພາບ​ນັ້ນ​ຄວນຫັນ​ເຂົ້າ​ສູ່​ບັນດາ​ບັນຫາ​ທີ່​ຕິດ​ແໜ້ນ​ໂດຍ​ກົງ​ກັບຊີວິ​ຂອງ​ປະຊາຊົນ, ກັບ​ສິທິ​ແລະ​ຜົນ​ປະ​ໂຫຍ​ດທີ່ຖືກ​ກົດໝາຍ ຊອບ​ທຳ​ຂອງ​ປະຊາຊົນ, ​ເຊິ່ງຈຸດ​ໜັກ​ແມ່ນ​ ບັນດາ​ບັນຫາ​ທີ່​ປະຊາຊົນ​ສ່ວນ​ຫຼາຍ​ສົນ​ໃຈ, ຕ້ອງ​ໄດ້​ແກ້​ໄຂ​ໂດຍ​ໄວ.

ທີ​ສອງ, ສືບ​ຕໍ່​ກວດຄືນຂໍ້​ກຳນົດກົດ​ລະບຽບ​ທີ່​ບໍ່​ຖືກຕ້ອງ​ເໝາະ​ສົມອີກ ​ແນ​ໃສ່​​ແກ້​ໄຂດັດ​ແປງ, ເພີ່ມ​ເຕີມ, ​ເພື່ອ​ສະ​ເໜີ​ທິດ​ທາງ​ແລະ​ໜ້າ​ທີ່​ວຽກ​ງານທີ່​ເໝາະ​ສົມ, ຈາກ​ນັ້ນ​ສ້າງ​ໂຄງການ​ປະສານ​ສົມທົບ​ແລະການກະທຳ​ເປັນ​ເອກະ​ພາບ​ໃນ​ສະພາບ​ການ​ໃໝ່​ຢ່າງ​ມີ​ປະສິດທິ​ຜົນ. ສືບ​ຕໍ່​ຫັນ​ເປັນ​ນິຕິ​ກຳ ບັນດາ​ທັດສະນະ, ​ແຜນ​ນະ​ໂຍບາຍ​ຂອງ​ພັກ​ກ່ຽວ​ກັບ​ມະຫາ​ສາມັກຄີ​ທັງ​ຊາດ; ທິດ​ນຳ “ປະຊາຊົນ​ຮູ້, ປະຊາຊົນ​ປຶກສາ​ຫາລື, ປະຊາຊົນ​ເຮັດ, ປະຊາຊົນກວດກາ", ສາຍ​ພົວພັນ “ພັກ​ນຳພາ, ລັດ​ຄຸ້ມ​ຄອງ, ປະຊາຊົນ​ເປັນ​ເຈົ້າຂອງ”; ປັບປຸງ​ບູລະນະ ​ແລະປະຕິບັດ​ຢ່າງ​ມີ​ປະສິດທິ​ຜົນ​ ບັນດາ​ກົນ​ໄກ, ນະ​ໂຍບາຍ​ເສີມ​ຂະຫຍາຍ​ບົດບາດຂອງ​ປະຊາຊົນ ໃນ​ການ​ຕັດສິນ​ຕົກລົງ​ບັນດາ​ບັນຫາ​ທີ່​ສຳຄັນ​ຂອງ​ປະ​ເທດ; ຮັບປະກັນ​ອຳນາດ​ລັດ​ທັງ​ໝົດ​ແມ່ນ​ຂອງ​ປະຊາຊົນ, ຍົກ​ສູງ​ປະສິດທິ​ຜົນ​ແລະ​ຄວາມ​ແທດ​ຈິງ​ ຂອງ​ການ​ເຄື່ອນ​ໄຫວ​ຕິດຕາມ​ກວດກ​ແລະ​ວິຈານ​ສັງຄົມ​ຂອງແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ຂອງ​ອົງການ​ຈັດ​ຕັ້ງ​ການ​ເມືອງ-ສັງຄົມ.

ທີ​ສາມ, ຍົກ​ສູງ​ບົດບາດ​ແລະຄວາມ​ຮັບຜິດຊອບຂອງ​ຫົວໜ້າ​ອົງການ​ຈັດ​ຕັ້ງ​ສະມາຊິກ​ໃນ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມ. ຫົວໜ້າ​ຂອງອົງການ​ຈັດ​ຕັ້ງ​ສະມາຊິກ ​ເປັນ​ສະມາຊິກ​ຕາມ​ທຳ​ມະ​ຊາດ​ຂອງ​ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມ. ​ເພື່ອ​ໃຫ້​ວຽກ​ງານ​ເຈລະຈາ​ປະຊາທິປະ​ໄຕ​ລະຫວ່າງ​ອົງການ​ຈັດ​ຕັ້ງສະມາຊິກມີຜົນສຳ​ເລັດ ຕ້ອງ​ເສີມ​ຂະຫຍາຍ​ບົດບາດ​ແລະຄວາມ​ຮັບຜິດຊອບສ່ວນ​ຕົວ​ຂອງ​ຫົວໜ້າອົງການ​ຈັດ​ຕັ້ງ​ເຫຼົ່າ​ນີ້. ຕ້ອງ​ເສີມ​ຂະຫຍາຍ​ບົດບາດ​ແລະ​ຄວາມ​ຮັບຜິດຊອບ​ສ່ວນ​ຕົວ​ຂອງຫົວໜ້າ​ອົງການ​ຈັດ​ຕັ້ງ​ສະມາຊິກ ທີ່​ເຂົ້າ​ຮ່ວມ​ໃນ​ຄະນະ​ກຳມະການ​ແນວ​ໂຮມ​ປະ​ເທດ​ຊາດ​ຫວຽດນາມ, ​ໂດຍ​ສະ​ເພາະ​ແມ່ນ​ ຄະນະ​ປະທານ​ຄະນະ​ກຳມະການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ຄວາມຮັບຜິດຊອບ​ຂອງ​ຄະນະ​ນຳຂອງ​ບັນດາ​ອົງການ​ຈັດ​ຕັ້ງ​ສະມາຊິກ ​ໃນ​ການ​ສ້າງ​ແລະ​ຜັນ​ຂະຫຍາຍ​ປະຕິບັດ​ໂຄງການ​ປະສານ​ສົມທົບ​ແລະ​ການກະທຳ​ເປັນ​ເອກະ​ພາບ​ຂອງແນວ​ໂຮມ​ປະ​ເທດ​ຊາດ​ຫວຽດນາມ.

ທີ​ສີ່, ຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມຂັ້ນ​ຕ່າງ​ໆ ຕ້ອງ​ສືບ​ຕໍ່​ຄົ້ນຄວ້າ​ແລະສ້າງຂະ​ບວນການ​ເພື່ອ​ລວບ​ລວມຄວາມ​ຄິດ​ເຫັນ​ຂອງ​ປະຊາຊົນ, ​ເສີມ​ຂະຫຍາຍ​ບົດບາດ​ແລະ​ສະຕິ​ປັນຍາ ​ຂອງບັນດາ​ກຳມະການ​​ໃນຄະນະ​ກຳມະການແນວ​ໂຮມ​ປະ​ເທດ​ຊາດ​ຫວຽດນາມ, ຂອງ​ຜູ້​ຊົງ​ຄຸນ​ວຸດ​ທິ ປັນຍາ​ຊົນ, ຜູ້ຕາງໜ້າ​ວົງ​ການ ຊົນ​ເຜົ່າ ສາສະໜາ, ນັກວິທະຍາ​ສາກ, ຜູ້​ຊ່ຽວຊານ, ຜູ້​ທີ່​ມີ​ຊື່​ສຽງ, ຂອງ​ສະມາຊິກ, ສະມາຊິກ​ສະມາຄົມ ​ແລະ ການ​ສະໜັບສະໜູນ​ຂອງ​ປະຊາຊົນ ​ໃນ​ການປະກອບສ່ວນກໍ່ສ້າງ​ພັກ, ກໍ່ສ້າງ​ອຳນາດ​ການ​ປົກຄອງ​ໃຫ້​ໝັ້ນຄົງ​ເຂັ້ມ​ແຂງ, ປ້ອງ​ກັນ​ແລະ​ຕ້ານ​ພະຍາດ​ອາດຍາ​ສິດ, ການ​ສໍ້​ລາດ​ບັງ​ຫຼວງ, ການ​ໃຊ້​ຈ່າຍ​ຟຸມ​ເຟືອຍ, ຄວາມ​ຫຍໍ້​ທໍ້./.

​ໂດຍ ປອ. ​ເຈິ່ນ​ແທງ​ເໝິນ

​ເລຂາທິການ​ສູນ​ກາງ​ພັກ,

ປະທານ​ຄະນະ​ກຳມະການ​ສູນ​ກາງ ແນວ​ໂຮມ​ປະ​ເທດ​ຊາດ​ຫວຽດນາມ

--------------------------------

ບົດ​ນີ້​ໄດ້​ລົງ​ພິມ​ໃນວາລະສານ​ກອມ​ມູນິດ ສະບັບ​ທີ 927 (​ເດືອນ​ຕຸລາ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ