ວັນຈັນ, 6/4/2020
ເບິ່ງຄືນຫຼັງ 3 ປີແຫ່ງການປະຕິບັດ ມະຕິກອງປະຊຸມຄັ້ງທີ 4 ຂອງຄະນະບໍລິຫານງານສູນກາງ ພັກກອມມູນິດຫວຽດນາມ ສະໄໝທີ XII
7/2/2020 15:47' ສົ່ງ ພິມ
ກໍ່ສ້າງພັກຂອງພວກເຮົາໃຫ້ສະອາດປອດໄສ, ໝັ້ນຄົນເຂັ້ມແຂງ, ນຳພາປະເທດຍາດເອົາໄຊຊະນະອັນໃຫຍ່ຫຼວງ, ມີຄວາມໝາຍປະຫວັດສາດ (ພາບ: tccs.org.vn)

ຄວາມ​ພະຍາຍາມ​ຢ່າງ​ຕໍ່​ເນື່ອງ​ໃນ​ເວລາ​ທີ່​ຜ່ານ​ມາ

​ໃນ​ເງື່ອນ​ໄຂ​ເຊິ່ງ​ພັກ​ດຽວ​ກຳ​ອຳນາດ, ສະມາຊິກ​ພັກສ່ວນ​ໃຫຍ່​ໄດ້​​ເປັນ​ແບບຢ່າງ ນຳ​ໜ້າ ​ແລະ ​ໄດ້​ຮັບ​ຄວາມ​ໄວ້​ວາງ​ໃຈ​ຈາກ​ປະຊາຊົນ, ​ແຕ່​ກໍ່​ມີ​ສະມາຊິກ​ພັກ​ຈຳນວນ​ໜຶ່ງ​ໄດ້​ລະ​ເມີດລະບຽບ​ວິ​ໄນ​ຂອງ​ພັກ, ຖືກ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ​ ແລະ​ແບບ​ແຜນ​ດຳ​ລົງຊີວິດ, ສົ່ງ​ຜົນກະທົບ​ບໍ່​ດີຕໍ່​ອິດ​ທິພົນ​ຊື່​ສຽງ​ຂອງ​ພັກ ​ແລະ ​ເປັນ​ໜຶ່ງ​ໃນ​ຄວາມ​ສ່ຽງ​ທີ່​ມີ​ຜົນ​ກະທົບໂດຍ​ກົງ ຕໍ່ຖານະກຳ​ອຳນາດ​ຂອງ​ພັກ. ດັ່ງ​ນັ້ນ, ​ໃນ​ໄລຍະ​ເວລາ​ຂອງ​ກອງ​ປະຊຸມ​ໃຫຍ່​ຄັ້ງທີ XI​ ​ແລະ XII ຂອງ​ພັກ, ຄະນະ​ບໍລິຫານ​ງານ​ສູນ​ກາງ​ໄດ້​ປະກາດ​ໃຊ້ສອງ​ມະຕິ​ທີ່​ສຳຄັນກ່ຽວ​ກັບ​ຂົງ​ເຂດ​ນີ້ ​ແລະ ​ເຕົ້າ​ໂຮມຊັບພະຍາກອນ​ ເພື່ອ​ຈັດ​ຕັ້ງ​ປະຕິບັດ​ສອງ​ມະຕິດັ່ງກ່າວ.

ວັນ​ທີ 16-1-2012, ກອງ​ປະຊຸມ​ຄັ້ງ​ທີ 4 ຂອງຄະນະ​ບໍລິຫານ​ງານ​ສູນ​ກາງພັກ​ສະ​ໄໝທີ XI ​ໄດ້ອອກ​ມະຕິ​ເລກທີ 12-NQ/TW ທີ່​ມີ​ຫົວ​ຂໍ້​ວ່າ “ບາງ​ບັນຫາ​ຮີບ​ດ່ວນກ່ຽວ​ກັບ​ການ​ກໍ່ສ້າງ​ພັກ​ໃນ​ປະຈຸ​ບັນ”, ​ໃນນັ້ນ​ກຳນົດໜຶ່ງ​ໃນ​ສາມ​ບັນຫາ​ຮີບ​ດ່ວນທີ່​ຕ້ອງສຸມ​ໃສ່​ແກ້​ໄຂ​ຄື ຕໍ່ສູ້, ກີດ​ກັ້ນ, ຍູ້​ຖອຍ​ສະພາບ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ​ ໃນ​ຖັນ​ແຖວ​ພະນັກງານສະມາຊິກ​ພັກ, ກ່ອນ​ອື່ນ​ໝົດ​ແມ່ນ​ພະນັກງານ​​ນຳພາ ຄຸ້ມ​ຄອງ​ຂັ້ນ​ຕ່າງ​ໆ. ບັນຫາ​ນີ້​ກໍ່​ຖືກ​ກຳນົດ​ວ່າ “​ເປັນ​ບັນຫາ​ໃຈກາງ, ສອດ​ຮ້ອຍ​ຕະຫຼອດ ​ແລະ ຮີບ​ດ່ວນ​ທີ່​ສຸດ".

ພາຍຫຼັງ​ສີ່​ປີ​ແຫ່ງ​ການ​ປະຕິບັດມະຕິ​ເລກທີ 12-NQ/TW, ກອງ​ປະຊຸມ​ໃຫຍ່​ຄົ້ງທີ XII ຂອງ​ພັກ​ໄດ້​ມີ​ບົດ​ລາຍ​ງານ​ສະບັບ​ໜຶ່ງ ​ເພື່ອປະ​ເມີນ​ຜົນ​ຂອງ​ການ​ຈັດ​ຕັ້ງປະຕິບັດມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XI ​ເຊິ່ງ​ໄດ້​ຍົກ​ໃຫ້​ເຫັນ​ຂໍ້​ດີ​ຫຼາຍ​ຢ່າງ, ​ແຕ່ວ່າ​ໂດຍ​ພື້ນຖານ​ແລ້ວ ຍັງ​ບໍ່​ທັນ​ບັນລຸ​ເປົ້າ​ໝາຍ​ແລະ​ຄວາມ​ຮຽກຮ້ອງ​ຕ້ອງການທີ່​ວາງ​ໄວ້. ດັ່ງ​ນັ້ນ, ກອງ​ປະຊຸມ​ໃຫຍ່​ໄດ້​ກຳນົດ​ທິດ​ທາງ​ແລະໜ້າ​ທີ່ກໍ່ສ້າງ​ພັກ​ ໃນ​ຊຸມ​ປີ​ຕໍ່​ໄປ ​ເຊິ່ງ​ໃນ​ນັ້ນ “ຈຸດ​ໜັກ​ແມ່ນ ສືບ​ຕໍ່​ປະຕິບັດ​ມະຕິ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XI ຢ່າງ​ເດັດດ່ຽວ, ໝັ້ນ​ໜຽວ”(1). ໜ້າ​ທີ່​ທຳ​ອິດ​ໃນ 6 ໜ້າ​ທີ່​ຈຸດ​ໜັກ​ໃຈກາງ​ທີ່​ກອງ​ປະຊຸມ​ໃຫຍ່​ວາງ​ອອກ​ມາ​ແມ່ນ: “​ເພີ່ມ​ທະວີ​ການ​ກໍ່ສ້າງ​ແລະ​ປັບປຸງ​ພັກ; ກີ​ດ​ກັ້ນ​ແລະ​ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​​ແນວ​ຄິດການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊິວິດ, ​ປະກົດການ​ຂອງ “ການປ່ຽນ​ແປງ​ດ້ວຍ​ຕົນ​ເອງ”, “ການຫັນປ່ຽນ​ດ້ວຍ​ຕົນ​ເອງ” ຢູ່​ພາຍ​ໃນ”(2).

ດັ່ງ​ນັ້ນ, ຕັ້ງ​ແຕ່​ເລີ່​ມການ​ປະຈຳຕຳ​ແໜ່​ງ, ຄະນະ​ບໍລິຫານ​ງານ​ສູນ​ກາງພັກສະ​ໄໝ​ທີ XII ​ໄດ້​ປະກາດ​ໃຊ້​ມະຕິ​ເລກທີ 04-NQ/TW, ວັນ​ທີ 30-10-2016, “ກ່ຽວ​ກັບ​ການ​ເພີ່ມ​ທະວີ​ການກໍ່ສ້າງ​ແລະ​ປັບປຸງ​ພັກ; ກີດກັ້ນແລະຍູ້ຖອຍ ຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ແບບແຜນດຳລົງຊີວິດ, ປະກົດການຂອງ "ການປ່ຽນແປງດ້ວຍຕົນເອງ", "ການຫັນປ່ຽນດ້ວຍຕົນເອງ" ຢູ່ພາບໃນ". 

​​ໃນເກືອ​ບສາມ​ປີ​ທີ່​ຜ່ານ​ມາ, ທົ່ວ​ພັກ​ໄດ້​ຊາບ​ຊຶມ​ທັດສະນະຕັ້ງ​ໝັ້ນ, ເດັດດ່ຽວ​ປະຕິບັດ ດ້ວຍ​ຄວາມ​ຕັດສິນ​ໃຈ​ການ​ເມືອງ​ສູງ, ຄວາມ​ພະຍາຍາມ​ທີ່​ຍິ່ງ​ໃຫຍ່; ​ເສີມ​ຂະຫຍາຍ​ຄວາມ​ເປັນ​ເຈົ້າ​ການປະດິດ​ສ້າງ ​ແລະ ກຳລັງ​ແຮງ​ສັງ​ລວມ ຂອງລະບົບ​ການ​ເມືອງ​ແລະ​ປະຊາຊົນ, ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ​ໄດ້​ຮັບ​ການ​ປະຕິບັດ​ຢ່າງ​ເຂັ້ມ​ງວດ ​ແລະ ບັນລຸ​ຜົນສຳ​ເລັດ​ບາງ​ຢ່າງ​ດັ່ງ​ລຸ່ມ​ນີ້:

ທີ​ໜຶ່ງ, ຄະນະ​ພັກ​ຂັ້ນ​ຕ່າງ​ໆ, ​ພະນັກງານສະມາຊິກ​ພັກ​ ແລະ​ປະຊາຊົນ ມີຄວາມ​ຮັບ​ຮູ້​ນັບ​ມື້​ນັບ​ຄົບ​ຖ້ວນ, ຮອບດ້ານ​ ແລະ​ເລິກ​ເຊິ່ງ ກ່ຽວ​ກັບ​ຄວາມ​ໝາຍ​ແລະ​ຄວາມ​ສຳຄັນ​ ຂອງ​ວຽກງານກໍ່ສ້າງ​ແລະ​ປັບປຸງ​ພັກ.

ຄະນະ​ພັກ​ຂັ້ນ​ຕ່າງ​ໆ​ໄດ້​ຜັນ​ຂະຫຍາຍບັນດາ​ໂຄງການ, ​ແຜນ​ປະຕິບັດ​ງານ​ສະ​ເພາະ ​ແລະ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ພ້ອມ​ກັບ​ຄຳ​ສັ່ງ​ເລກທີ 05-CT/TW, ວັນ​ທີ 15-5-2016, ຂອງກົມ​ການ​ເມືອງສູນ​ກາງ​ພັກ: “ກ່ຽວ​ກັບ​ການ​ຍູ້​ແຮງ​ການ​ຮ່ຳຮຽນ ​ແລະ ປະຕິບັດ​ຕາມ​ແນວ​ຄິດ, ຄຸນສົມບັດ, ແບບແຜນໂຮ່ຈີມະນ" ຕາມ​ການ​ຊີ້​ນຳ​ແລະ​ແນະນຳ​ຂອງສູນ​ການ​ພັກ. ຄະນະ​ໂຄສະນາ​ອົບຮົມ​ສູນ​ກາງ​ໄດ້​ສ້າງ​ແລະ​ຈັດ​ຕັ້ງປະຕິ​ບັດ​ແຜນການ​ໂຄສະນາ​ປະຈຳ​ປີ ກ່ຽວກັບ​ບັນດາ​ເນື້ອ​​ໃນ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ​ໃນ​ພັກ​ແລະ​ສັງຄົມ. ສະ​ຖາ​ບັນ​ການ​ເມືອງ​ແຫ່ງ​ຊາດ​ໂຮ່ຈີ​ມິນ ​ໄດ້​ເພີ່ມ​ເຕີມ​ບົດ​ບັນຍາຍ​ກ່ຽວ​ກັບ​ການອົບຮົມ​ສຶກສາ​ຄຸນສົມບັດ​ປະຕິວັດ ​ສຳລັບ​ພະນັກງານ​ແລະ​ສະມາຊິກ​ພັກ ​​ໃນຫຼັກສູດ​ທິດ​ສະ​ດີກາ​ນ​ເມືອງ​ລະດັບ​ສູງ ​ແລະ ສື​ບຕໍ່​ຜັນ​ຂະຫຍາຍ​ໃນ​ລະບົບ​ໂຮງຮຽນ​ການ​ເມືອງ​ໃນ​ທົ່ວ​ປະ​ເທດ. ຄະນະກຳມະການ​ຈັດ​ຕັ້ງ​ສູນ​ກາງ ຮ່ວມ​ມື​ກັບ​ໜັງສືພິມ​ປະຊາຊົນ, ວາລະສານ​ກອມ​ມູນິດ, ສະຖານີ​ໂທລະພາບ​ຫວຽດນາມ ​ແລະ ສະ​ມາ​ຄົມ​ນັກ​ຂ່າວ​ຫວຽດນາມ ​​ໃນ​ການ​ຈັດ​ຕັ້ງລາງວັນໜັງສືພິມ​ແຫ່ງ​ຊາດ​ປະຈຳ​ປີ ກ່ຽວ​ກັບ​ການ​ກໍ່ສ້າງ​ພັກ​ ທີ່​ມີ​ຊື່ວ່າ"ລາງວັນຄ້ອນແລະກ່ຽວຄຳ" ​ເຊິ່ງ​ໄດ້ດຶງ​ດູດ​ນັກ​ຂ່າວຈຳນວນ​ຫຼາຍ​ຂອງ​ສື່​ມວນ​ຊົນ​ປະ​ເພດ​ຕ່າງໆ ​​ເຂົ້າຮ່ວມ, ​ຕອບ​ສະໜອງ​​ຢ່າງກະຕືລື​ລົ້ນ ​ແລະ ​ບັນລຸປະສິດທິ​ຜົນ​ດີ​ທີ່​ສຸດ. ບັນດາ​ອົງການ​ສື່ຂ່າວ​ແລະສື່​ມວນ​ຊົນ​ໄດ້​ໃຊ້​ເວລາ​ຫຼາຍສົມຄວນ ພ້ອມ​ດ້ວຍ​ຫຼາຍ​ຮູບ​ການ​ທີ່​ອຸດົມສົມບູນ​ ແລະ​ເນື້ອ​ໃນສະ​ເພາະ​ແທດ​ເໝາະ ​ເພື່ອ​ໂຄສະນາປຸກລະດົມ​ຂົນຂວາຍ​ປະຊາຊົນ ປະກອບສ່ວນ​​ເຂົ້າ​ໃນ​ການກໍ່ສ້າງ​ລະບົບ​ການ​ເມືອງ ​ໃຫ້​ສະອາດ​ປອດ​ໄສ, ໝັ້ນຄົງ​ເຂັ້ມ​ແຂງ. ບົດ​ຄວາມ​ຈຳນວນ​ຫຼາຍ​ມີ​ຄຸນ​ນະພາ​ບດີ ​ໄດ້​ຍົກ​ໃຫ້​ເຫັນ​ແບບຢ່າງ​ທີ່ກ້າວໜ້າດີ​ເດັ່ນ​ຕ່າງໆ ​ຢ່າງ​ທັນ​ການ, ພ້ອມ​ນັ້ນ​ກໍ່​ຄົ້ນ​ເຜີຍ, ຕຳ​ນິວິຈານອົງການ​ຈັດ​ຕັ້ງ, ບຸກຄົນ​ທີ່​ມີ​ປະກົດ​ການ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸ​ນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ; ​ແລະຍັງ​ໄດ້ສ້າງ​ແຮງ​ກົດ​ດັນ​ໃຫ້​ເຈົ້າ​ໜ້າ​ທີ່​ແກ້​ໄຂ​ບັນຫາ​ຮ້ອນ​ເຄືອງ​ຂອງ​ສັງຄົມ​​ໂດຍ​ໄວ, ດ້ວຍ​ເຫດ​ນັ້ນ​ ປະຊາຊົນ​ຈຶ່ງ​ເຫັນ​ດີ​ເປັນ​ເອກະ​ພາບ​ສູງ.

​ຄະນະ​ພັກ, ອົງການ​ຈັດ​ຕັ້ງ​ພັກ​ຫຼາຍ​ແຫ່ງມີ​​ແນວ​ປະຕິບັດ​ທີ່​ດີ​ເຊັ່ນ: ​ແຈກ​ຈ່າຍ​ປຶ້ມ​ບັນທຶກ, ປຶ້ມ​ຄູ່​ມື; ປະ​ກວດ​ຄວາມ​ຮູ້​ກ່ຽວ​ກັບ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ສະ​ໄໝ​ທີ XII ​ແລະ ຄຳ​ສັ່ງ​ເລກທີ 05-CT/TW ຂອງ​ກົມ​ການ​ເມືອງ​ສູນ​ກາງ​ພັກ​ສະ​ໄໝ​ທີ XII; ກໍ່ສ້າງ​ໜ່ວຍ​ພັກ "4 ດີ"; ຊີ້​ແຈງ​ການ​ສະ​ແດງອອກ​ຂອງ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ ​ແລະ​ແບບ​ແຜນ​ດຳ​ງລົງ​ຊີວິດ ​ເພື່ອ​ໃຫ້​ສະມາຊິກ​ພັກ​ຫຼີກ​ລ້ຽງ, ກັນ ​ແລະ ​ຕໍ່ສູ້, ກີດ​ກັ້ນ; ປຶກສາ​ຫາລື, ສ້າງ​ມາດຕະຖານ​ດ້ານ​ຈັນ​ຍາ​ບັນ​ສຳລັບ​ອົງການ​ແລະ​ອາຊີບ, ກຳນົດ​ຢ່າງ​ຈະ​ແຈ້ງ​ກ່ຽວ​ກັບ​ຄວາມ​ຮັບຜິດຊອບ​ໃນ​ການ​ເປັນ​ແບບຢ່າງ ຂອງ​ພະນັກງານສະມາຊິກ​ພັກ, ​ໂດຍ​ສະ​ເພາະ​ແມ່ນ ​ຄວາມ​ຮັບຜິດຊອບ​ເປັນ​ແບບຢ່າງ​ຂອງ​ຫົວໜ້າ; ​ແບ່ງ​ງານ​ໃຫ້​ສະມາຊິກ​ພັກ, ກຳມະການ​ຄະນະ​ພັກ ​ໄປ​ຮ່ວມປະຊຸມ​ລາຍ​ເດືອນ​ກັບ​ໜ່ວຍ​ພັກ​ຢູ່​ເຂດ​ຊຸມ​ຊົນ; ມອບ​ໃຫ້​ສະມາຊິກ​ພັກ​ຮັບຜິດ​ຊອບ, ຊ່ວຍ​ເຫຼືອ, ຂົນຂວາຍ​ຄອບຄົວ​ມະຫາຊົນຈຳນວນ​ໜຶ່ງ ​ໃຫ້ປະຕິບັດ​ຕາມ​ແນວທາງ​ຂອງ​ພັກ, ກົດໝາຍຂອງ​ລັດ ​ແລະຂໍ້​ກຳນົດ​ກົດ​ລະບຽບ​ຂອງ​ທ້ອງ​ຖິ່ນ; ຈັດ​ຕັ້ງ​ການ​ສົນທະນາ​ໂດຍ​ກົງ​ເປັນ​ໄລຍະ​ລະຫວ່າງອຳນນາດ​ການ​ປົກຄອງ​ກັບ​ປະຊາຊົນ​ແລະ​ນັກທຸລະກິດ... ສອດຄ່ອງ​ກັບ​ການ​ປະກາດ​ໃຊ້​ກົດໝາຍຄວາມ​ປອດ​ໄພ​ທາງ​ໄຊ​ເບີຂອງ​ສະພາ​ແຫ່ງ​ຊາດ, ອົງການ​ຂັ້ນ​ຕ່າງໆ​ໄດ້​ຍູ້​ແຮງວຽກ​ງານ​ໂຄສະ​ນະ​ຂ່າວ​ສານ ​ແລະ ຕຳ​ນິວິຈານ​ຢ່າງທັນການ​ຕໍ່ຂໍ້​ມູນ​ທີ່​ບໍ່​ດີ​ແລະ​ເປັນ​ອັນຕະລາຍ, ປະກອບສ່ວນ​ຍົກ​ສູງ​ສະຕິ​ລະວັງ​ຕົວ, ຕໍ່ສູ້​ເພື່ອປະຕິ​ເສດ​ຖ້ອຍ​ຄຳ​ທີ່​ຜິດພາດ, ຕ້ານ​ການ​ໂຄສະນາ​ຊວນ​ເຊື່ອ​ຂອງ​ບັນດາ​ອິດ​ທິກຳລັງ​ສັດຕູທີ່​ຢາກ​ທຳລາຍ​ພັກ​ແລະ​ລັດ​ຂອງ​ພວກ​ເຮົາ.

ຄວາມ​ພະຍາຍ​ມຂອງ​ຄະນະ​ພັກ​ແລະ​ອົງການ​ຈັດ​ຕັ້ງ​ຕ່າງໆ ​ແລະ​ ຂອງ “​ເຫຼົ່າ​ທັບ” ຂໍ້​ມູນ-ຂ່າວສານ ​ໄດ້​ເຮັດ​​ໃຫ້ມີການ​ປ່ຽນ​ແປງ​ຢ່າງ​ແທ້​ຈິງ ​ໃນ​ຄວາມ​ຮັບ​ຮູ້​ແລະ​ການ​ກະທຳ ຂອງ​ທົ່ວ​ພັກ​ແລະ​ທົ່ວ​ປວງ​ຊົນ ກ່ຽວ​ກັບການ​ຕໍ່ສູ້​ປ້ອງ​ກັນ​ແລະ​ຕ້ານ​ຄວາມ​ເສື່ອ​ມ​ໂຊມ​ທາງ​ດ້ານ​​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ ​ແລະ ຕ້ານ “ການ​ປ່ຽນ​ແປງ​ດ້ວຍ​ຕົນ​ເອງ”, “ການ​ຫັນປ່ຽນ​ດ້ວຍ​ຕົນ​ເອງ” ຢູ່​ພາຍ​ໃນ​ພັກ​ແລະ​ໃນ​ສັງຄົມ.

ທີ​ສອງ, ການ​ປະກາດ​ໃຊ້​ເອກະສານ​ຕ່າງໆ​ຂອງ​ພັກ ​ໄດ້​ຮັບ​ຄວາມ​ເອົາ​ໃຈ​ໃສ່​ເປັນ​ພິ​ເສດ, ປະກອບສ່ວນ​ທີ່​ສຳຄັນ​ເຂົ້າ​​ໃນ​ການ​ແກ້​ໄຂ “ຊ່ອງ​ຫວ່າງ” ຕ່າງໆ​ຂອງຂໍ້​ກຳນົດກົດ​ລະບຽບ​ ທີ່​ອາດ​ຈະ​ຖືກ​ສວຍ​ໃຊ້​ເພື່ອ​ກະທຳ​ຜິດ.

​ບັນດາເອກະສານ​ຂອງ​ສູນ​ກາງພັກ​ກ່ຽວ​ກັບ​ວຽກ​ງານ​ກໍ່ສ້າງ​ພັກ​ ​ແມ່ນ​ພື້ນຖານ​ໃຫ້​ຄະນະ​ພັກ​, ອົງການ​ຈັດ​ຕັ້ງ​ພັກທຸກ​ຂັ້ນ ປະຕິບັດ​ໜ້າ​ທີ່​ກໍ່ສ້າງ​ພັກຢ່າງ​ສະດວກ​ແລະ​ຕໍ່​ເນື່ອງ. ບັນດາ​ອົງການ​ທີ່​ປຶກສາ​ຂອງ​ພັກ​ ໄດ້​ໃຫ້​ຄຳ​ແນະນຳ​ແກ່​ພັກ​ ໃນ​ການ​ອອກ​ເອກະສານ​ຫຼາຍ​ສະບັບ ​ເພື່ອ​ຊີ້​ນຳ, ​ແນະນຳທຸກ​ດ້ານ​ຂອງ​ວຽກ​ງານ​ພັກ, ​ໂດຍ​ສະ​ເພາະ​ແມ່ນ​ ວຽກ​ງານ​ກວດກາ​ແລະ​ວຽກ​ງານ​ການຈັດ​ຕັ້ງພະນັກງານ ​ເຊິ່ງ​​ເປັນ​ວຽກ​ງານທີ່​ລະອຽດ​ອ່ອນ​ແລະ​ສັບສົນ​ຫຼາຍ​ໃນ​ປະຈຸ​ບັນ.

ສາມາດ​ເວົ້າ​ໄດ້​ວ່າ, ບໍ່​ມີ​ໄລຍະ​​ເວລາໃດທີ່​ເອກະສານ​ຂອງ​ພັກ​ກ່ຽວ​ກັບວຽງານ​ພະນັກງານ​ໄດ້​ຮັບ​ການ​ສ້າງ, ​ແກ້​ໄຂ​ເພີ່ມ​ເຕີມແລະອອກ​ໃໝ່ ຫຼາຍ​ເທົ່າ​ກັບ​ໃນ​ກວ່າ​ເຄິ່ງໜຶ່ງ​ຂອງ​​ໄລຍະ​ປະຈຳການ​ທີ່​ຜ່ານ​ມາ (ເອກະສານ 45 ສະບັບ)(3).

ສິ່ງດັ່ງກ່າວ​ສະ​ແດງ​ໃຫ້​ເຫັນ​ເຖິງ​ການ​ຊີ້​ນຳ​ຢ່າງ​​ໃກ້ຊິດ​ຂອງສູງ​ການ​ ແລະ ​ຄວາມ​ພະຍາ​ຍາມ, ຄວາມ​ຕັດສິນ​ໃຈ​ການ​ເມືອງ​ສູງ ​ຂອງບັນດາ​ໜ່ວຍ​ງານ​ທີ່​ປຶກສາ​ຂອງ​ພັກ, ປະກອບສ່ວນ​ສ້າງ​ລະບົບ​ເອກະສານ​ທີ່​ຄົບ​ຊຸດ, ສົມບູນ​ພໍ​ຄວນ, ມີ​ບົດບາດ​ສຳຄັນ​ໃນ​ການຈັດ​ຕັ້ງ​ປະຕິບັດ​ວິທີ​ແກ້​ໄຂ​ແມ່ນ​ເຮັດ​​ໃຫ້ພະນັກງານ​ແລະ​ລັດຖະກອນ “ບໍ່​ສາມາດ​ສໍ້​ລາດ​ບັງ​ຫຼວງ”. ຕາມ​ນັ້ນ, ຄະນະ​ພັກຜັນ​ຂະຫຍາຍ​ບັນດາ​ຂໍ້​ກຳນົດ, ລະບຽບ​ການ, ​ໂຄງການ, ​ແຜນການ, ​ແຜນ​ງານ​ສະ​ເພາະ, ສອດຄ່ອງ​ກັບ​ແຕ່ລະ​ທ້ອງ​ຖິ່ນ, ສຳນັກງານ​ອົງການ. ການ​ປະຕິບັດ​ມາດ​ຕະການ​ຕ່າງໆ​ຢ່າງ​ເດັດດ່ຽວຄົບ​ຊຸດ ​ເພື່ອ​ກີດ​ກັ້ນ​ແລະ​ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ ​ແລະ​ ການ​ຕໍ່ສູ້​ຕ້ານ​ “ການ​ປ່ຽນ​ແປງ​ດ້ວຍ​ຕົນ​ເອງ”, “ການ​ຫັນປ່ຽນ​ດ້ວຍ​ຕົນ​ເອງ” ຢ່າງ​ມີ​ປະສິດທິ​ຜົນ, ໂດຍສະເພາະແມ່ນ ການແກ້ໄຂຜ່ານພົ້ນ​ກໍລະນີ​ຕ່າງໆ​ທີ່​ກໍ່​ຄວາມ​ຂັດ​ເຄືອງ​ໃນ​ຄວາມ​ຄິດ​ເຫັນ​ຂອງ​ປະຊາຊົນນັ້ນ, ​ໄດ້​ປະກອບສ່ວນ​ເຂົ້າ​ໃນ​ການ​ປັບປຸງ​ແລະ​ຍົກ​ສູງ​ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ກັບ​ພັກ. 

ທີ​ສາມ, ບົດບາດ​ຂອ​ງອົງການ​ຈັດ​ຕັ້ງ​ພັກ​ແລະ​ຫົວໜ້າ​ສຳນັກງານ​ອົງການ ​ໃນ​ການ​ປ້ອງ​ກັນ​ແລະ​ຕ້ານ​ຄວາມ​ເສື່ອ​ມ​ໂຊມທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ​ ຂອງ​ພະນັກງານ ສະມາຊິກ​ພັກ ​ໄດ້​ຮັບ​ການ​ເສີມ​ຂະຫຍາຍ​ເທື່ອ​ລະ​ກ້າວ.

​ຊາບ​ຊຶ້ງ​ຄຳ​ສອນຕ່າງໆ​ຂອງ​ປະທານ​ໂຮ່ຈີ​ມິນ: “​ແວ່ນ​ແຍງຊີວິດ​ມີຄ່າ​ຫຼາຍ​ກວ່າ​ຮ້ອຍ​ສຸນທອນພົດ​ໂຄສະນາ​ຊວນ​ເຊື່ອ”(4), “ຕົນ​ເອງ​ຕ້ອງ​ຊື່ສັດ ກ່ອນ, ຈຶ່ງ​ຊ່ວຍ​ໃຫ້​ຜູ້​ອື່ນ​ຊື່ສັດ ໄດ້. ຕົນເອງ​ບໍ່ຊື່ສັດ, ​ແຕ່​ຕ້ອງການ​ໃຫ້​ຜູ້​ອື່ນ​ເປັນ​ຄົນຊື່ສັດ ນັ້ນ​ແມ່ນບໍ່ມີ​ເຫດຜົນ,”(5)..., ພັກ​ກອມ​ມູນິດ​ຫວຽດນາມຖື​ການ​ເປັນ​ແບບຢ່າງ​ຂອງ​ພະນັກງານ​ສະມາຊິກ​ພັກ​ແມ່ນ​ໜຶ່ງ​ໃນບັນດາ​ແບບ​ວິທີ​ການ​ນຳພາຕົ້ນ​ຕໍ​ຂ​ອງ​ພັກ.

ຄະນະ​ພັກ, ​ອົງການຈັດ​ຕັ້ງ​ພັກ​ຂັ້ນ​ຕ່າງໆ​ເປັນຜູ້​ນຳພາ, ຊີ້​ນຳ​ການ​ປ້ອງກັນ​ແລະ​ຕ້ານ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ​ໃນ​ພັກ ​ແລະ ​ໃນ​ສັງຄົມ; ພ້ອມ​ກັນ​ນັ້ນ ກໍ່​ເປັນ​ເປົ້າ​ໝາຍ​ທີ່​ຕ້ອງ​ປະຕິບັດ​ການປ້ອງກັນ​ແລະ​ຕ້ານ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ​. ດັ່ງ​ນັ້ນ, ຄະນະ​ພັກ​ແລະ​ອົງການ​ຈັດ​ຕັ້ງ​ພັກ​​ໄດ້​ປະຕິບັດຂໍ້​ກຳນົດ ບົດ​ແນະນຳ​ຕ່າງໆ​ຂອງ​ຂັ້ນ​ເທິງຢ່າງ​ເຂັ້ມ​ງວດ ​ໃນ​ການ​ສຳ​ຫຼວດກວດກາ, ຕິ​ຊົມ​ຕົນ​ເອງ​ແລະ​ຕິ​ຊົມ, ວາງ​ໂຄງການ​ປະຕິບັດ​ງານ, ​ໃຫ້​ຄຳ​ໝັ້ນ​ສັນຍາ​ຈະ​ແກ້​ໄຂ​ຂໍ້​ບົກພ່ອງ​ຂອງ​ຕົນ. ​ສຳນັກງານອົງການ​ຫຼາຍ​ແຫ່ງ ຍັງ​ໄດ້​ກຳນົດ​ການສະ​ແດງ​ທາງ​ລົບ​ສະ​ເພາະ​​ໃກ້​ກັບ​ພາລະ​​ໜ້າ​ທີ່, ວຽກ​ງານແລະສະພາບການ​ຕົວ​ຈິງ; ​ໃຫ້​ຄະ​ແນນ​ແຕ່​ລະ​ມາດຖານ​ການ​ແຂ່ງຂັນ ​ເພື່ອ​ເປັນ​ພື້ນຖານ​ສຳລັບ​ການ​ປະ​ເມີນຄຸນ​ນະພາ​ບ, ການຈັດ​ແບ່ງ​ປະ​ເພດ​ອົງການ​ຈັດ​ຕັ້ງ​ພັກ​ແລະ​ສະມາຊິກ​ພັກ​ປະຈຳ​ປີ. ຄະນະ​ພັກ​ແລະ​ອົງການ​ຈັດ​ຕັ້ງ​ພັກ​ຫຼາຍ​ແຫ່ງ​ ໄດ້​ຈັດ​ຕັ້ງ​ການ​​ເກັບ​ກຳ​ຄວາມ​​ເຫັນ​ແລະຮັບ​ຟັງການ​ປະກອບຄວາ​ມເຫັນ, ຍິ່ງ​ກວ່າ​ນັ້ນຍັງ​ໄດ້​ລວບລວມ​ເອົາ​ຜົນ​ການ​ໃຫ້​ຄະ​ແນນ​ຂອງ​ບັນດາ​ສຳນັກງານ ອົງການທີ່​ກ່ຽວຂ້ອງ ກ່ອນ​ເມື່ອ​ດຳ​ເນີນ​ການ​ສຳ​ຫຼວດກວດກາ, ປະ​ເມີນ​ພະນັກງານ ສະມາຊິກ​ພັກ, ​ເພາະສະ​ນັ້ນ ການ​ປະ​ເມີນ, ການຈັດ​ແບ່ງ​ປະ​ເພດ​ອົງການ​ຈັດ​ຕັ້ງ​ພັກ​ແລະ​ສະມາຊິກ​ພັກ ຈຶ່ງ​ມີ​ຄວາມ​ໝາຍ​ສຳຄັນ​ຍິ່ງ.

ຄະນະ​ພັກ​ຂັ້ນ​ຕ່າງໆ​ໄດ້​ຜັນ​ຂະຫຍາຍ​ປະຕິບັດຂໍ້​ກຳນົດ​ເລກທີ 08-QĐi/TW, ວັນ​ທີ 25-10-2018, ຂອງ​ຄະນະ​ບໍລິຫານ​ງານ​ສູນ​ກາງຢ່າງ​ເຂັ້ມ​ງວດ, ພ້ອມ​ກັນ​ນັ້ນ ​ກໍ່​ປະຕິບັດ​ຂໍ້​ກຳນົດ​ເລດ​ທີ 101-QĐ/TW, ວັນ​ທີ 7-6-2012, ຂອງ​ຄະນະ​ເລຂາທິການ, “ກ່ຽວ​ກັບ​ຄວາມ​ຮັບຜິດຊອບ​ເປັນ​ແບບຢ່າງ​ຂອງ​ພະນັກງານ ສະມາຊິກ​ພັກ, ໂດຍສະເພາະແມ່ນ ພະນັກງານຫຼັກແຫຼ່ງຂັ້ນຕ່າງໆ"; ຂໍ້​ກຳນົດ​ເລດ​ທີ 55-QĐ/TW, ວັນ​ທີ 19-12-2016, ຂອງ​ກົມ​ການ​ເມືອງ, “ກ່ຽວ​ກັບ​ບາງ​ວຽກ​ງານ​ທີ່​ຕ້ອງ​ເຮັດ​ທັນທີ​ ເພື່ອ​ເພີ່ມ​ທະວີ​ບົດບາດ​ເປັນ​ແບບຢ່າງ​ຂອງ​ພະນັກງານ ສະມາຊິກ​ພັກ. ວຽກ​ງານ​ກວດຄືນ, ​ເພີ່ມ​ເຕີມ, ປະກາດ​ໃຊ້​ຂໍ້​ກຳນົດ, ລະບຽບ​ການ, ​ເອກະສານ​ທາງ​ກົດໝາຍ​ ໃຫ້​ສອດຄ່ອງ​ຄົບ​ຖ້ວນ ​ໄດ້​ຮັບ​ຄວາມ​ເອົາ​ໃຈ​ໃສ່ຫຼາຍກວ່າ​ແຕ່​ກ່ອນ. ​ວຽກ​ງານ​ການນຳພາຊີ້​ນຳ​ ໄດ້​ຮັບ​ຄວາມ​ເອົາ​ໃຈ​ໃສ່​ ເພື່ອ​ດັດ​ແປງ​ວີ​ທີ​ແລະ​ແບບ​ແຜນ​ເຮັດ​ວຽກ; ຕັ້ງໜ້າ​ປະຕິ​ຮູບ​ຂັ້ນ​ຕອນ​ການ​ບໍລິຫານ ​ແລະ​ນຳ​ໃຊ້​ວິທະຍາສາດ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ. ສະຕິ​ປະຕິບັດ​ຕາມ​ແນວທາງ​ຂອງ​ພັກ ​ແລະກົດ​ໝານ​ຂອງ​ລັດ, ​ໂດຍ​ສະ​ເພາະ​ແມ່ນ​ຈັນ​ຍາ​ບັນ​ການ​ງານ​ ຂອງ​ພະນັກງານສະມາຊິກ​ພັກ​ ໄດ້​ຮັບ​ການ​ຍົກ​ສູງ​ຂຶ້ນ.

ທີ​ສີ່, ວຽກ​ງານ​ກວດກາ, ຕິດຕາມ​ກວດກາ ​ແລະ ລະບຽບ​ວິ​ໄນ​ຂອງ​ພັກ ​ໄດ້​ຮັບ​ການ​ປະຕິບັດ​ຢ່າງ​ເຂັ້ມ​ງວດ, ​ໂດຍ​ສະ​ເພາະ​​ໃນລະດັບ​ສູນ​ກາງ, ມີ​ຄຸນ​ປະ​ໂຫຍ​ດຢ່າງ​ຈະ​ແຈ້ງ, ​ໄດ້​ຮັບ​ການ​ສະໜັບສະໜູນ​ສູງ​ຈາກສະມາຊິກ​ພັກ​ແລະ​ປະຊາຊົນ.

ຈຸດ​ໃໝ່​ໃນ​ວຽກ​ງານກວດກາ, ຕິດຕາມ​ກວດກາ ​ແລະ ລະບຽບ​ວິ​ໄນ​ຂອງ​ພັກ ​ແມ່ນ​ໄດ້​ເອົາ​ໃຈ​ໃສ່​ການ​ກວດກາ​ແລະ​ປະຕິບັດ​ວິ​ໄນ​ຕໍ່​ພະນັກງານສະມາຊິກ​ພັກທີ່​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ລວມທັງ​ພະນັກງານ​ຂັ້ນ​ສູງ, ພະນັກງງານ​ປະຈຳການ​ຫຼື​ບຳນານ. ມີ​ພະນັກງານຖືກຟ້ອງ​ຄະດີ, ສອບ​ສວນ ​ແລະ​ດຳ​ເນີນການ​ຕາມ​ຂໍ້​ກຳນົດ​ຂອງ​ກົດໝາຍ, ​ເນື່ອງ​ຈາກ​ການ​ສໍ້​ລາດ​ບັງ​ຫຼວງ ຫຼື​ການລະ​ເມີດລະບຽບວິ​ໄນ​ໃນ​ການ​ປາກ​ເວົ້າ... ນີ້​ແມ່ນ​ບາດກ້າວ​ບຸກທະລຸ​ໃຫຍ່​ໃນ​ວຽກງານກວດກາ, ຕິດຕາມ​ກວດກາ​ແລະ​ປະຕິບັດ​ລະບຽບ​ວິ​ໄນ​ຂອງ​ພັກ, ປະກອບສ່ວນ​ເຂົ້າ​ໃນ​ການ​ປ້ອງ​ກັນ​ການລະ​ເມີດວິ​ໄນ​ຂອງ​ພະນັກງານ​ຂັ້ນ​ສູງ ​ແລະ ​ເປັນການ​ປຸກ​ສະຕິ, ​ຄຳ​ເຕືອນທົ່​ວ​ໄປ ຕໍ່​ພະນັກງານສະມາຊິກ​ພັກ​ທຸກ​ຄົນ. ຜົນສຳ​ເລັດ​ດັ່ງກ່າວ​ຍັງ​ປະກອບ​ສ່ວນ​ລົບ​ລ້າງ “​ເຂດ​ຫ້າມ”, “ຂໍ້​ຍົກ​ເວັ້ນ”; ຢັ້ງຢືນ​ວ່າ​ ຈະ​ບໍ່​ມີ​ການ​ປະ​ນິປະນອມ, ບໍ່​ມີ​ຈຸດ​ຢຸດ​ໃນ​ການ​ຕໍ່ສູ້​ເພື່ອ​ເຮັດ​ໃຫ້​ພັກ​ສະອາດ​ປອດ​ໃສ, ກີດ​ກັ້ນ “​ແນວ​ຄິດ​ສັ້ນພຽງ​ໄລຍະ”, “ການ​ອອກ​ກິນ​ເບ້ຍ​ບຳນານ​ຢ່າງ​ປອດ​ໄພ” ສຳລັບ​ພະນັກງານ​ສະມາຊິກ​ພັກ​ທຸກ​ຄົນ. ລະບຽບ​ວິ​ໄນ​ຂອງ​ພັກ​ຈະ​ໄດ້​ຮັດ​ແໜ້ນ​ຕື່ມ​ອີກ. ວຽກ​ງານ​ຊີ້​ນຳ​ນຳພາ​ການຈັດ​ຕັ້ງ​ກົງຈັກ​ໃຫ້​ກະທັດ​ລັດ​ຮັດ​ກຸມ, ມີ​ປະສິດທິ​ພາບ ປະສິດທິ​ຜົນ ​ແລະ ປະຕິບັດ​ຫຼາຍ​ວິທີ​ການ ​ມາດ​ຕະການ ​ກ່ຽວ​ກັບ​ການກໍ່ສ້າງ​ຖັນ​ແຖວ​ພະນັກງານ, ຈັດ​ວາງ​ສັບ​ຊ້ອນ​ພະນັກງານ ລັດຖະກອນ ພາລະ​ກອນ ຕາມຈິດ​ໃຈ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6 ​ແລະ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 7 ສະ​ໄໝ​ທີ XII ​ໄດ້​ບັນລຸ​ຜົນງານທີ່​ຈະ​ແຈ້ງ. ວຽກງານ​ກວດການ, ສອບ​ສວນ, ຟ້ອງ​ຄະດີ, ພິພາກສາ​ ໄດ້​ຮັບ​ຄວາມ​ເອົາ​ໃຈ​ໃສ່ຊີ້​ນຳ​ການ​ປະຕິບັດຢ່າງ​ເຂັ້ມ​ງວດ, ​ໂດຍ​ສະ​ເພາະ ​ສຳລັບ​ກໍລະນີທີ່ກໍ່​ໃຫ້​ເກີດ​ການ​ສູນ​ເສຍ​ຫຼາຍ, ຄະດີ​ສໍ້​ລາດ​ບັງ​ຫຼວງ, ຄະດີ​ເສດຖະກິດຂະໜາດ​ໃຫຍ່​ແລະ​ຮ້າຍ​ແຮງ.

​ໃນ​ໄລ​ຍະ​ກວ່າ​ເຄຶ່ງໜຶ່ງ​ຂອງສະ​ໄໝ​ກອງ​ປະຊຸມ​ໃຫຍ່​ຄັ້ງ​ທີ່ XII ຂອງ​ພັກ, ຄະນະ​ກຳມະການ​ກວດກາ​ສູນ​ກາງ​ໄດ້ປະຕິບັດ​ວິ​ໄນ​ ແລະ ​ສະ​ເໜີ​ໃຫ້​ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອ, ຄະນະ​ເລຂາທິການ ຕັດສິນ​ປະຕິບັດ​ວິ​ໄນຕໍ່ພະນັກງານກວ່າ 70 ຄົນ​ທີ່​ຢູ່​ພາຍ​ໃຕ້​ການ​ຄຸ້ມ​ຄອງ​ຂອງສູນ​ກາງ, ​ໃນ​ນັ້ນ​ມີ:​ ກຳມະການ​ກົມ​ການ​ເມືອ​ງ 1 ທ່ານ; ກຳມະການ​ສູນ​ກາງ​ພັກປະຈຸ​ບັນ 5 ທ່ານ​ເຊິ່ງ​ໃນ​ນັ້ນ 3 ທ່ານ​ໄດ້​ຖືກປົດ​ຈາກ​ຄະນະ​ບໍລິຫານ​ງານ​ສູນ​ກາງ; ອະດີດ​ກຳມະການ​ສູນ​ກາງ​ພັກ 14 ທ່ານ; ຈຳນວນ​ທີ່​ຍັງ​ເຫຼືອ​ລວມມີ ​ເລຂາ​ແລະຮອງ​ເລຂາ​ພັກ​ແຂວງ, ກຳ​ແພງ​ນະຄອນ​ສັງກັດ​ສູນ​ກາງ, ​ເລຂາ ຮອງ​ເລຂາ​ແລະກຳມະການ​ຄະນະ​ພັກ​ກະຊວງ, ຂະ​ແໜງ​ການ, ​ເລຂາ​ແລະຮອງ​ເລຂາ​ຄະນະ​ພັກ, ປະທານ​ສະພາ​ບໍລິຫານ​ກຸ່ມ​ເສດຖະກິດ​ແຫ່ງ​ລັດ, ​ແລະ​ ນາຍ​ພົນ 20 ຄົນ​ໃນ​ກອງທັບ​ແລະ​ຕຳຫຼວດ.

ທີ​ຫ້າ, ​ເສີມ​ຂະຫຍາຍ​ບົດບາດ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ, ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ແລະ ​ປະຊາຊົນ ​ໃນ​ການ​ກໍ່ສ້າງ​ພັກ.

ບັນດາ​ຄະນະ​ພັກ​ໄດ້​ເອົາ​ໃຈ​ໃສ່​ນຳພາ​ການຈັດ​ຕັ້ງ​ປະຕິບັດຂໍ້​ຕົກລົງ​ເລກທີ 217-QĐ/TW, ວັນ​ທີ 12-12-2013, ຂອງ​ກົມ​ການ​ເມືອງ​ສະ​ໄໝ​ທີ XI, ກ່ຽວ​ກັບ “ການ​ປະກາດ​ໃຊ້​ລະບຽບການ​ຕິດຕາມ​ກວດກາ​ແລະ​ວິຈານ​ສັງຄົມ ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ແລະ ​ຂໍ້​ຕົກ​ລັງ​ເລກທີ 218-QĐ/TW, ວັນ​ທີ 12-12-2013, ຂອງ​ກົມ​ການ​ເມືອ​ງ, “ຂໍ້​ກຳນົດ​ກ່ຽວ​ກັບ​ແນວ​ໂຮມ​ປະ​ເທດ​ຊາດ​ຫວຽດນາມ, ບັນດາ​ອົງການ​ຈັດ​ຕັ້ງການເມືອງ-ສັງຄົມ ແລະ ປະຊາຊົນເຂົ້າ ຮ່ວມການປະກອບຄວາມຄິດຄວາມເຫັນ ກໍ່ສ້າງພັກ, ກໍ່ສ້າງອຳນາດການປັກຄອງ",; ​ໃຫ້​ຄວາມ​ສຳຄັນ​ກວ່າ​ອີກ​ເຖິງ​ການ​ຕິດຕາມ​ກວດກາ​ຂອງ​ປະຊາຊົນ ຂອງ​ມະຕິ​ມະຫາຊົນ​ແລະ​ຄວາມ​ຄິດ​ເຫັນ​ຂອງ​ປະຊາຊົນ, ຂອງ​ພະນັກງານ ລັດຖະກອນ​ໃນ​ສຳນັກງານອົງການ ຕໍ່​ຫົວໜ້າ​ແລະ​ພະນັກງານ​ຫຼັກ​ແຫຼ່ງ, ຕໍ່​ການ​ເປີດ​ກວ້າງ​ປະຊາທິປະ​ໄຕ​ໃນ​ອົງການ​ຈັດ​ຕັ້ງ​ພັກ, ອົງການ​ລັດ​ແລະ​ໃນ​ສັງຄົມ.

​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ໄດ້​ມີ​ຄວາມ​ເປັນ​ເຈົ້າ​ການ​ເທື່ອ​ລະ​ກ້າວ​ ໃນ​ການ​ເສີມ​ຂະຫຍາຍ​ບົດບາດ​ຕິດຕາມ​ກວດກາ, ວິຈານ​ສັງຄົມ, ​ເຂົ້າຮ່ວມການ​ກໍ່ສ້າງພັກ, ກໍ່ສ້າງ​ຖັນ​ແຖວ​ພະນັກງານສະມາຊິກ​ພັກ ດ້ວຍ​ຫຼາຍ​ຮູບ​ການ, ມີ​ຄຸນ​ປະ​​ໂຫຍດດັດ​ປັບ​ການ​ປະພຶດ​ຂອງ​ພະນັກງານສະມາ​ຊິດ​ ໃນ​ທາງ​ທີ່​ດີ, ປະກອບສ່ວນ​ເຂົ້າ​ໃນ​ການ​ຕັກ​ເຕືອນ​ແລະ​ປ້ອງກັນບໍ່​ໄຫ້​ເກີດ​ການລະ​ເມີດ​ວິ​ໄນ.

ຂໍ້​ຈຳກັດ​ບາງ​ຢ່າງທີ່​ຕ້ອງ​ໄດ້​ຮັບ​ການ​ແກ້​ໄຂ

ບາງ​ຄະນະ​ພັກ, ອົງການ​ຈັດ​ຕັ້ງ​ພັກ ​ແລະ​ສະມາຊິກ​ພັກ​ບາງ​ຄົນ ບໍ່​​ໄດ້​ເອົາ​ໃຈ​ໃສ່, ມີ​ຄວາມຮັບ​ຮູ້​ບໍ່​ພຽງພໍ​ແລະ​ບໍ່​ເຂັ້ມ​ງາດ ກ່ຽວ​ກັບ​ການ​ເຜີຍ​ແຜ່, ຄົ້ນຄວ້າ, ຊາບ​ຊຶມ​ແລະຮ່ຳຮຽນ ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 4 ຕິດ​ກັບ​ຄຳ​ສັ່ງ​ເລກທີ 05-CT/TW ຂອງ​ກົມ​ການ​ເມືອງ; ການຈັດ​ຕັ້ງ​ປະຕິບັດ​ບັນດາ​ວິທີ​ແກ້​ໄຂ​ທີ່​ກ່າວ​ເຖິງ​ໃນ​ມະຕິ​ດັ່ງກ່າວ​ ແມ່ນ​ບໍ່​ເຂັ້ມ​ງວດ, ບໍ່​ສອດຄ່ອງ​, ບໍ່ເຊື່ອມ​ໂຍງ​ລະຫວ່າງ​ຂັ້ນ ຂະ​ແໜງ​ການ ຂົງ​ເຂດ ​ແລະ​ທ້ອງ​ຖິ່ນ. ການ​ສ້າງ​ໂຄງການ, ​ແຜນການ, ​ແຜນ​ປະຕິບັດ​ງານ ບໍ່​ຕິດ​ແທດກັບສະພາບ​ການ, ຈຸດ​ພິ​ເສດ​ຂອງ​ທ້ອງ​ຖິ່ນ ຂອງ​ສຳນັກງານອົງການ, ຂາດຄວາມ​ເປັນ​ໄປ​ໄດ້, ຍິ່ງກວ່າ​ນັ້ນ ຍັງ​ເກີດ​ຄວາມ​ບໍ່​ພຽງພໍ​ໃໝ່. ຍັງ​ມີ​ສະພາບ​ການ​ພະນັກງານ​ສະມາຊິກ​ພັກ, ຫົວໜ້າ​ຄະນະ​ພັກ, ປະທານ​ອົງການ​ປົກຄອງ, ພະນັກງານ​ຫຼັກ​ແຫຼ່ງຂັ້ນ​ຕ່າງໆ ​ບໍ່​ທັນ​ຍົກ​ສູງ​ຄວາມ​ຮັບຜິດຊອບ​​ໃນ​ການເປັນ​ແບບບຢ່າງ, ຍັງ​ມີ​ປະກົດ​ການ​ຫຼີກ​ລ້ຽງ, ຂາດ​ການ​ເປັນ​ແບບຢ່າງ​ໃນ​ຊີວິດ​ປະຈຳ​ວັນ​ແລະ​​ໃນວຽກ​ງານ, ​ຖືກເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ.

ຄະນະ​ພັກ, ​ອົງການ​ຈັດ​ຕັ້ງ​ພັກ​ຈຳນວນ​ໜຶ່ງ​ ບໍ່​ໄດ້​​ເຂົ້າ​ໃຈ​ສະຖານະ​ການ​​ແລະ​ບໍ່ສຸມ​ໃສ່​ນຳພາ​ແກ້​ໄຂບັນຫາ​ທີ່ຮີບ​ດ່ວນ, ​ໂດດ​ເດັ່ນ ຢ່າງ​ທັນ​ກາ; ຊັກ​ຊ້າ​ໃນ​ການພິຈາລະນາ​ແລະ​ຈັດການ​​ຢ່າງ​ແນ່ນອນ ກັບຄວາມ​ຄິດ​ເຫັນ, ຂໍ້​ສະ​ເໜີ​ແນະ​ ແລະ ​ຄຳ​ຮ້ອງ​ຟ້ອງທີ່​ຖືກຕ້ອງ​ແລະ​ຖືກ​ກົດໝາຍ​ຂອງ​ປະຊາຊົນ. ປະສິດທິ​ຜົນ​ຂອງ​ວຽກ​ງານ​ກວດກາ, ຕິດຕາມ​ກວດກາ ​ແລະລະບຽບ​ວິ​ໄນ​ຂອງ​ພັກຢູ່​ຫຼາຍ​ຄະນະ​ພັກ​ຂັ້ນ​ແຂວງ, ຂັ້ນ​ເມືອງ​ແລະ​ຂັ້ນ​ຮາກ​ຖານ ​ແມ່ນ​ບໍ່​ຈະ​ແຈ້ງ; ຍິ່ງ​ກວ່າ​ນັ້ນ, ຫຼາຍ​ແຫ່ງຍັງ​ມີ​ແນວ​ຄິດ​ອັດຕະວິ​ໄສ, ຖື​ວ່າ​ສະພາບ​ການ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, “ການ​ປ່ຽນ​ແປງ​ດ້ວຍ​ຕົນ​ເອງ”, “ການ​ຫັນປ່ຽນ​ດ້ວຍ​ຕົນ​ເອງ” ມີ​ຢູ່​ໃນ​ສະຖານ​ທີ່​ອື່ນ​ເທົ່າ​ນັ້ນ, ບໍ່​ແມ່ນ​ຢູ່​ໃນ​ອົງການ​ຈັດ​ຕັ້ງ​ພັກ​ຂອງ​ຕົນ​ແລະ​ກັບ​ຕົວ​ຂອງ​ຕົນ​ເອງ.

ວຽກງານ​ການ​ກວດກາ, ຕິດຕາມ​ກວດກາ, ສອບ​ສວນ, ຟ້ອງ​ຮ້ອງ, ພິພາກສາ​ ຍັງ​ມີ​ຂໍ້​ຈຳກັດ, ​ໃນ​ບາງ​ກໍລະນີ ບໍ່​ມີ​ການ​ປະສານ​ສົມທົບ​ກັນ​ຢ່າງ​ແໜ້ນ​ແຟ້ນ​ແລະ​ຄົບ​ຊຸດ; ບາງ​ແຫ່ງ​ບໍ່​ໄດ້​ເອົາ​ໃຈ​ໃສ່​ເຖິງ​ການ​ກວດກາ​ປ້ອງ​ກັນ, ບໍ່​ເປັນ​ເຈົ້າ​ການ​ໃນ​ການ​ຄົ້ນ​ເຜີຍ, ຍັງ​ບໍ່​ທັນ​​ຈັດການ​ຢ່າງເດັດດ່ຽວ​ກັບພະນັກງານ​ສະມາຊິກ​ພັກທີ່ລະ​ເມີດ​ວິ​ໄນ. ມີ​ກໍ​ລະ​ນີ ພະນັກງານສະມາຊິກ​ພັກລະ​ເມີດ​ວິ​ໄນ ​ແຕ່​ບໍ່​ຖືກ​ຈັດການ​ແກ້​ໄຂ​ຢ່າງ​ທັນ​ການ ດັ່ງ​ນັ້ນ​ຈຶ່ງ​ມີ​ກໍ​ລະ​ນີລະ​ເມີດ​ວິ​ໄນຢ່າງຮ້າຍ​ແຮງ, ບາງ​ຄົນ​ຕ້ອງ​ຮັບຜິດຊອບ​ທາງ​ອາຍາ. ການ​ປະຕິບັດ​ຄຳ​ສະ​ເໜີ, ຂໍ້ສະຫຼຸບ​ພາຍຫຼັງ​ການກວດ​ກາ, ຕິດຕາມ​ກວດກາ, ກວດສອບ​​ ເບິ່ງ​ລວມຍັງ​ຊ້າ, ບໍ່​ເຂັ້ມ​ງວດ.

ວຽກ​ງານການຄຸ້ມ​ຄອງ​ກິດຈະກຳ​ຂ່າວ, ພິມ​ຈຳໜ່ສຍ, ອິນ​ເຕີ​ເນັດ, ​ເຄືອ​ຂ່າຍ​ສັງຄົມ​ ຍັງມີ​ຂໍ້​ຈຳກັດ, ບໍ່​ທັນ​ການ, ປະສິດທິ​ຜົນ​ຕ່ຳ. ວຽກ​ງານ​ການ​ໂຄສະນາສື່​ຂ່າວກຳນົດ​ທິດ​ຫາງ​ສຽງ​ສັງຄົມ ບາງ​ຄັ້ງ​ກໍ່​ບໍ່​ທັນ​ເວລາ. ການ​ຕໍ່ສູ້ຂອງ​ກອງ​ກຳລັງ​ທີ່​ເຮັດ​ໜ້າ​ທີ່​ຕໍ່ຕ້ານກັບ “ການ​ຫັນປ່ຽນ​ໂດຍ​ສັນ​ຕິ”, ຕ້ານທັດສະນະ​ທີ່​ຜິດພາດ, ການ​ເສກສັນ​ປັ້ນ​ແຕ່ງ, ການ​ກ່າວ​ຫາ​ທີ່​ບິດ​ເບືອນ, ​ການໃສ່​ຮ້າຍ​ປ້າຍ​ສີຕໍ່ກຽດ​ສັກ​ສີ​ແລະການ​ນຳພາ​ຂອງ​ພັກ​ແລະ​ລັດ ຂອງ​ບັນດາ​ອິດ​ທິກຳລັງ​ສັດຕູ​ແລະ​ພວກ​ສວຍ​ໂອກ​າດທາງ​ການ​ເມືອງ... ບໍ່​ໄດ້​ຮັບ​ການ​ປະຕິບັດ​ຢ່າງຕັ້ງໜ້າ​​ແລະ​ປະສິດທິ​ຜົນ​ກໍ່ຍັງ​ຕ່ຳ.

ຄະນະ​ພັກ, ອົງການ​ຈັດ​ຕັ້ງ​ພັກ​ຊີ້​ນຳ​ນຳພາ​ການຕິ​ຊົມ​ຕົນ​ເອງ​ແລະ​ຕິ​ຊົມ ​ແຕ່​ບໍ່​ລະອຽດ, ບໍ່​ໄດ້​ເຮັດ​ຢ່າງ​ຈິງ​ຈັງ. ການ​ແກ້​ໄຂ​ຜ່ານ​ພົ້ນ​ຂໍ້​ຈຳກັດ, ຂໍ້​ບົກພ່ອງ ຫຼັງ​ຈາກ​ການ​ສຳ​ຫຼວດກວດກາ ​ແມ່ນ​ຍັງ​ບໍ່​ທັນ​​ແຈ້ງ, ບໍ່​ສ້າງ​ໃຫ້​ມີ​ການ​ປ່ຽນ​ແປງ​ຕົວ​ຈິງ. ການ​ປະ​ເມີນ, ຈັດ​ແບ່ງ​ປະ​ເພດ​ຄຸນ​ນະພາ​ບຂອງ​ອົງການ​ຈັດຕັ້ງພັກ, ສະມາຊິກ​ພັກຢູ່​ບາງ​ແຫ່ງ ​ບໍ່​ແທດ​​ເໝາະ​ກັບ​ຄວາມ​ເປັນຈິງ, ຫຼາຍ​ແຫ່ງຍັງຕິດ​ “ພະຍາດນິຍົມຜົນສຳ​ເລັດ”. ຄະນະ​ພັກ​ຂັ້ນ​ລຸ່ມ​ຢູ່ຫຼາຍ​ແຫ່ງ ບໍ່​​ໄດ້ຕັ້ງໜ້າ​ໃນ​ການ​ຜັນ​ຂະຫຍາຍປະຕິບັດ​ມະຕິ​ຕົກລົງ​ທີ່​ສຳຄັນ​ຂອງ​ສູນ​ກາງ ກ່ຽວ​ກັບ​ການ​ປ້ອງ​ກັນ​ແລະ​ຕ້ານ​ການ​ສໍ້​ລາດ​ບັງ​ຫຼວງ. ການ​ປະກາດ​ແຈ້ງ​ຊັບ​ສິນ​ແລະ​ລາຍ​ໄດ້ຂອງ​ພະນັງານ ບໍ່​ມີ​ການ​ປ່ຽນ​ແປງ​ທີ່​ສຳຄັນ​ໃດໆ ​ແລະ ​ໂດຍ​ພື້ນຖານ​ແລ້ວ ​ແມ່ນ​ຍັງ​ຢູ່​ໃນ​ສະພາບ​ທີ່​ເປັນ​ຮູບ​ການ​ແລະ​ການ​ຮັບ​ມື. ຂໍ້​ຕົກລົງ​ເລກ​ທີ່ 217-QĐ/TW ​ແລະ ຂໍ້​ຕົກລົງ​ເລກ​ທີ່ 218-QĐ/TW, ວັນ​ທີ 12-12-2013, ຂອງ​ກົມ​ການ​ເມືອງ​ສູນ​ກາງ​ພັກ​ສະ​ໄໝ​ທີ XI ​ໄດ້​ຮັບ​ການ​ຜັນ​ຂະຫຍາຍ​ຢ່າງ​ຊັກ​ຊ້າ​ແລະ​ປະສິດທິ​ຜົນ​ຕ່ຳ. 

ບົດບາດ​ການ​ວິຈານ​ສັງຄົມ ​ແລະການ​ຕິດຕາມ​ກວດກາ​ ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ແມ່ນ​ຍັງ​ຈຳກັດ, ຍັງ​ບໍ່​ທັນ​ເສີມ​ຂະຫຍາຍ​ຢ່າງ​ແຂງ​ແຮງ ບົດບາດ​ຂອງ​ປະຊາຊົນ​ແລະ​ບົດບາດ​ຂອງ​ສື່ ​ໃນ​ການ​ຕໍ່ສູ້​​ເພື່ອປ້ອງ​ກັນ​ແລະ​ຕ້ານຄວາມ​ເສື່ອ​ມ​ໂຊມ, “ການ​ປ່ຽນ​ແປງ​ດ້ວຍ​ຕົນ​ເອງ”, “ການ​ຫັນປ່ຽນ​ດ້ວຍ​ຕົນ​ເອງ”, ການ​ສໍ້​ລາດ​ບັງ​ຫຼວງ, ການ​ໃຊ້​ຈ່າຍ​ຟຸມ​ເຟືອຍ. ການ​ຮັບ​ຮູ້​ແລະ​ຈັດການ​ແກ້​ໄຂ​ກັບ “ການ​ປ່ຽນ​ແປງ​ດ້ວຍ​ຕົນ​ເອງ”, “ການ​ຫັນປ່ຽນ​ດ້ວຍ​ຕົນ​ເອງ” ຍັງ​ງຸ່ມ​ງ່າມ. ສະພາບ​ການ​ຈົ່ງ​ຈຽມ, ຢ້ານ​ທີ່​ຈະ​ປະ​ທະ​ກັນ, ຍູ້​ຍັດ, ຜີກ​ຫຼີກ, ຢ້ານ​ຄວາມ​ຮັບຜິດຊອບ ຍັງ​ເກີດ​ຂຶ້ນ​ຢູ່​ຫຼາຍ​ແຫ່ງ. ຄະນະ​ພັກຢູ່​ຫຼາຍ​ແຫ່ງຍັງ​ບໍ່​ທັນ​ປະຕິບັດ​ຢ່າງ​ເຂັ້ມ​ງວດ​ຂໍ້​ຕົກລົງ​ເລກທີ 99-QĐ/TW, ວັນ​ທີ 3-10-2017, ຂອງ​ຄະນະ​ເລຂາທິການ​ສູນ​ກາງພັກ, ກ່ຽວກັບ “ການປະກາດ​ໃຊ້ຄູ່​ມືກອບ ເພື່ອ​ໃຫ້​ຄະນະ​ພັກ, ອົງການ​ຈັດ​ຕັ້ງພັກສັງກັດສູນກາງ ສືບຕໍ່ເສີມຂະຫຍາຍບົດບາດຂອງປະຊາຊົນ ໃນການຕໍ່ສູ້ເພື່ອກີດກັ້ນ ແລະຍູ້ຖອຍຄວາມເສື່ອມໂຊມ, "ການປ່ຽນແປງດ້ວຍຕົນເອງ", "ການຫັນປ່ຽນດ້ວຍຕົນເອງ" ຢູ່ພາຍໃນ”. ຍິ່ງ​ໄປ​ກວ່າ​ນັ້ນ, ບາງ​ຄະນະ​ພັກ​ ໃນ​ເມື່ອ​ຜັນ​ຂະຫຍາຍ ຄູ່​ມືກອບ ຍັງ​ໄດ້​ຕັດ​​ຮອນເນື້ອ​ໃນ​ທີ່​ສຳຄັນ​ ແລະ​ “ກະທົບ​ໄວ” ​ເຊັ່ນ: ບັນດາ​ຮູບ​ການປະກາດ​ແຈ້ງຊັບ​ສິນຂອງ​ພະນັກງານ​ການ​ນຳ, ລະບອບ​ການລາຍ​ງານ, ການ​​ອະທິບາຍ... ນັບ​ກະທັ້ງ​ເມື່ອ​ມີ​ການ​ກຳນົດ​ຢ່າງ​ຈະ​ແຈ້ງ​​ແລ້ວ ​ເຊັ່ນ: “ບໍ່​ເລື່ອນ​ຊັ້ນ, ​ແຕ່ງ​ຕັ້ງ​ພະນັກງານທີ່​ເປັນ​ຫົວໜ້າ, ຮອງ​ຫົວໜ້າອົງການ​ຈັດ​ຕັ້ງ-ພະນັກງານ ທີ່​ບໍ່ປະຕິບັດຢ່າງ​ເຂັ້ມ​ງວດ​ແລະ​ມີ​ປະສິດທິ​ຜົນ ມະຕິ​ເລກທີ 39-NQ/TW ຂອງ​ສູນ​ກາງ​ພັກໃນ​ທ້ອງ​ຖິ່ນ, ສຳນັກງານ​ອົງການ​ທີ່​ຕົນ​ຮັບຜິດຊອບ”(6), ​ແຕ່​ຫຼາຍ​ອົງການ​ບໍ່​ໄດ້​ປະກາດເປີດ​ເຜີຍ​ແຜນການ, ລຳດັບ​ການ​ດຳ​ເນີນ​ງານ ​ແລະ ຜົນ​ຂອງ​ການຈັດ​ຕັ້ງ​ຫຼຸດຜ່ອນ​ການ​ບັນຈຸ​, ດັ່ງ​ນັ້ນ​ຈຶ່ງ​ຍາກ​ທີ່​ສຸດ​ທີ່​ຈະ​ເສີມ​ຂະຫຍາຍ​ບົດບາດ​ຂອງ​ປະຊາຊົນ​ໃນ​ວຽກ​ງານ​ທີ່​ສຳຄັນ​ນີ້.

ການ​ຕໍ່ສູ້​ເພື່ອກີດ​ກັ້ນ​ແລະ​ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳ​ເນີນ​ຊີ​ວິກ, “ການ​ປ່ຽນ​ແປງ​ດ້ວຍ​ຕົນ​ເອງ”, “ກາ​ຫັນປ່ຽນ​ດ້ວຍ​ຕົນ​ເອງ” ​ແມ່ນ​ວຽກ​​ຍາກ, ຕ້ອງ​ໄດ້​ດຳ​ເນີນ​​ເປັນ​ປະຈຳ, ຕໍ່​ເນື່ອງ, ​ເດັດດ່ຽວ, ໝັ້ນ​ໜຽວ, ບາງຄັ້ງ​ຈະຕ້ອງ​ໃຊ້ວິທີ​ແກ້​ທີ່​​ເຂັ້ມແຂງ. ສູນ​ກາງ​ພັກ​ກຳລັງ​ຊີ້​ນຳ, ຈັດ​ຕັ້ງ​ການ​ກວດກາ, ສະຫຼຸບ​ສັງ​ລວມການ​ປະຕິບັດ​ມະຕິ​ກອງ​ປະຊຸມ​ສູນ​ກາງ​ຄັ້ງ​ທີ 4 ສະ​ໄໝ​ທີ XII, ​ແນ່ນອນ​ຈະ​ຖອດ​ຖອນ​ບົດຮຽນ​ທີ່​ດີ​ອອກ​ມາ​ໄດ້, ສືບ​ຕໍ່​ປັບ​ປຸງບູລະນະ​ແຜນ​ນະ​ໂຍບາຍ​ແລະ​ວິທີ​ແກ້​ໄຂ ​ເພື່ອ​ໃຫ້​ມະຕິ​ເຂົ້າ​ສູ່​ຊີວິ​ດຈິງ ​ແລະ ຕອບ​ສະໜອງ​ຄວາມ​ຄາດ​ຫວັງ​ຂອງ​ປະຊາຊົນ​./.

ໂດຍ ຮສ. ປອ. ຫງວຽນ​ມິ​ງຕວັນ

ສະ​ຖາ​ບັນ​ການ​ເມືອງ​ແຫ່ງ​ຊາດ​ໂຮ່ຈີ​ມິນ

---------------------

(1), (2) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງ​ການ​ສູນ​ກາງ​ພັກ. ຮ່າ​ໂນ້ຍ, 2016, ໜ້າ 199, 217.

(3) ຂໍ້​ກຳນົດ​ເລກທີ 85-QĐ/TW, ວັນ​ທີ 23-5-2017, ຂອງ​ກົມ​ການ​ເມືອງ, “ກ່ຽວ​ກັບ​ການ​ກວດກາ, ຕິດຕາມກວດກາ, ການປະກາດແຈ້ງຊັບສິນຂອງພະນັກງານພາຍໃຕ້ການຄຸ້ມຄອງຂອງກົມການເມືອງ ແລະຄະນະເລຂາທິການ"; ຄຳ​ສັ່ງ​ເລກທີ 28-CT/TW, ວັນ​ທີ 21-1-2019, ຂອງ​ຄະນະ​ເລ​ຂາ​ທິການ, “ກ່ຽວ​ກັບ​ການ​ຍົກ​ສູງ​ຄຸນ​ນະພາ​ບຂອງ​ການ​ຮັບ​ເອົາ​ສະມາຊິກ​ພັກ​ໃໝ່ ​ແລະ ການກວດຄືນ, ການຄັດເລືອກ, ການເອົາສະມາຊິກພັກທີ່ບໍ່ມີຄຸນສົມບັດພຽງພໍອອກຈາກພັກ"; ຂໍ້​ກຳນົດ​ເລກທີ 179-QĐ/TW, ວັນ​ທີ 25-2-2019, ຂອງ​ກົມ​ການ​ເມືອງ, “ກ່ຽວ​ກັບ​ລະບອບ​ການ​ກວດກາ, ຕິດຕາມ​ກວດກາວຽກ​ງານ​ພະນັກງານ”;  ຂໍ້​ກຳນົດ​ເລກທີ 102-QĐ/TW, ວັນ​ທີ 15-11-2017, ຂອງ​ກົມ​ການ​ເມືອງ, “ການ​ປະຕິ​ບັດ​ວິ​ໄນ​ຕໍ່​ສະມາຊິກ​ພັກ​ທີ່ລະ​ເມີ​ດວິ​ໄນ”; ຂໍ້​ກຳນົດ​ເລກທີ 07-QĐi/TW, ວັນ​ທີ 28-8-2018, ຂອງ​ກົມ​ການ​ເມືອງ, ກ່ຽວ​ກັບ “ການ​ຈັດການ​ກັບ​ອົງການ​ຈັດ​ຕັ້ງ​ພັກ​ທີ່​ລະ​ເມີດ​ວິ​ໄນ”; ຂໍ້​ກຳນົດ​ເລກທີ 11-QĐi/TW, ວັນ​ທີ 18-2-2019, ຂອງ​ກົມ​ການ​ເມືອງ, “ກ່ຽວ​ກັບ​ຄວາມ​ຮັບຜິດ​ຊອບ​ຂອງ​ຫົວໜ້າ​ຄະນະ​ພັກ​ໃນ​ການ​ຕ້ອນຮັບ​ປະຊາຊົນ, ສົນທະນາໂດຍກົງກັບປະຊາຊົນ ແລະ ຈັດການແກ້ໄຂຄຳເຫັນສ່ອງແສງ, ຄຳສະເໜີແນະຂອງປະຊາຊົນ"; ຂໍ້​ກຳນົດ​ເລກທີ 08-QĐi/TW, ວັນ​ທີ 25-10-2018, ຂອງ​ຄະນະ​ບໍລິຫານ​ງານ​ສູນ​ກາງ, ກ່ຽວ​ກັບ “ຄວາມ​ຮັບຜິດ​ຊອບ​ເປັນ​ແບບຢ່າງ​ຂອງ​ພະນັກງານ, ສະມາຊິກ​ພັກ, ກ່ອນອື່ນໝົດແມ່ນ ກຳມະການກົມການເມືອງ, ກຳມະການຄະນະເລຂາທິການ, ກຳມະການສູນກາງພັກ"; ຂໍ້​ກຳນົດ​ເລກທີ 90-QĐ/TW, ວັນ​ທີ 4-8-2017, ຂອງ​ກົມ​ການ​ເມືອງ, ກ່ຽວ​ກັບ “ມາດຕະຖານຕຳແໜ່​ງ, ເກນການປະເມີນພະນັກງານພາຍໃຕ້ການຄຸ້ມຄອງ ຂອງຄະນະບໍລິຫານງານສູນກາງ, ກົມການເມືອງ, ຄະນະເລຂາທິການ"; ຂໍ້​ກຳນົດ​ເລກທີ 89-QĐ/TW, ວັນ​ທີ 4-8-2017, ຂອງ​ກົມ​ການ​ເມືອງ, ກ່ຽວ​ກັບ “ຂອບ​ມາດຕະຖານ​ຕຳ​ແໜ່​ງ, ທິດທາງຂອບເກນການປະເມີນ ພະນັກງານນຳພາ, ຄຸ້ມຄອງຂັ້ນຕ່າງໆ". ພິ​ເສດ, ກອງ​ປະຊຸມ​ສູນ​ກາງ​ພັກ​ຄັ້ງ​ທີ 6 ສະ​ໄໝ​ທີ XII ​ໄດ້​ປະກາດ​ໃຊ້​ມະຕິ​ເລກທີ 18-NQ/TW, ວັນ​ທີ 25-10-2017, “ບາງ​ບັນຫາ​ກ່ຽວ​ກັບ​ການສືບ​ຕໍ່​ປ່ຽນ​ແປງ​ໃໝ່, ສັບຊ້ອນການຈັດຕັ້ງກົງຈັກຂອງລະບົບການເມືອງ ໃຫ້ກະທັດລັດຮັດກຸມ, ເຄື່ອນໄຫວຢ່າງມີປະສິດທິພາບ ແລະປະສິດທິຜົນ", ຈາກ​ນັ້ນ ກອງ​ປະຊຸມ​ສູນ​ກາງ​ພັກ​ຄັ້ງ​ທີ 7 ສະ​ໄໝ​ທີ XII ​ໄດ້​ປະກາດ​ໃຊ້​ມະຕິ​ເລກທີ 26-NQ/TW, ວັນ​ທີ 19-5-2018, “ກ່ຽວ​ກັບ​ການ​ສຸມ​ໃສ່​ການ​ກໍ່ສ້າງ​ຖັນ​ແຖວ​ພະນັກງານ​ຂັ້ນ​ຕ່າງໆ, ໂດຍສະເພາະແມ່ນພະນັກງານຂັ້ນຍຸດທະສາດ, ໃຫ້ມີຄຸນນະພາບ, ມີຄວາມສາມາດຢ່າງຄົບຖ້ວນ ແລະມີກຽດສັກສີ, ທຽບເທົ່າກັບໜ້າທີ່"...

(4) ​ໂຮ່ຈີ​ມິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ, ຮ່າ​ໂນ້ຍ, 2002, ​ເຫຼັ້ມ 1, ໜ້າ 284.

(5) ໂຮ່ຈີ​ມິນ: ນິພົນ​ຄົບ​ຊຸດ, ປຶ້ມ​ທີ່​ໄດ້​ແນະນຳ, ​ເຫຼັ້ມ 6, ໜ້າ 130.

* ບົດ​ນິ້​ໄດ້​ລົງ​ພິມ​ໃນວາລະສານ​ກອມ​ມູນິດ ມະ​ບັບທີ 927 (​ເດືອນ​ຕຸລາ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ